1 Jọnu

Ẹkwo-Ozhi Mbụ,

JỌNU

Deru

Okfu, bụ ndzụ, shi l’ẹka Chileke

¹Iwhe-e anyi l’ede l’ẹkwo-ozhi-a anụ unu-a bẹ bụkwa nke onye ono, ẹwha iya bụ Okfu-Chileke bụ iya bụ nke okfu, bụ ndzụ shi l’ẹka Chileke. Okfu ono, l’anụje ndzụ ono bẹ shizhiawho lẹ mbụlembu dụta. Anyi nụkwaru iya lẹ nchị whụa ya l’ẹnya, gbua ya nke, byikwaa ya whọ ẹka. ²Onye ono, bụ ndzụ ono bẹ Chileke meru nke ọwhu e gude ẹnya whụ-dzuru iya, anyi whụwa iya. Ọ bụru iya bẹ anyi l’atụru unu ọnu iya-a. Mbụ l’iwhe ọbu anyi l’ekfuru unu okfu iya; bụ nke ndzụ tututu-mịmimi ono. Ndzụ ono bẹ yẹle Chileke, bụ Nna shihawaa nọduta. Chileke bya egoshi iya anyi, mee: anyi marụ iya. ³Ọo iwhe ono, anyi whụru l’ẹnya, nụa ya lẹ nchị bẹ anyi l’akọkwaruwho unu-a nggẹ anyi l’unu tụgbabe onwanyị. Atụgbabe ono bụ atụgbabe ọwhu anyi lẹ Chileke bụ Nna mẹe Nwa iya Jisọsu Kuráyisutu tụgbaru. ⁴Iwhe meru anyi l’ederu unu iwhe-e bụ nggẹ ẹhu tsọo anyi l’unu ụtso tsọfu iya anyi l’ishi.

Chileke bụ iwhoro ngarụ mba

⁵Ọ kwa ozhi, anyi nụru Kuráyisutu ono l’ọnu bẹ anyi l’akọru unu-a; bụ iya bụ lẹ Chileke bụ iwhoro, ẹkpuroochi ta adụdu iya ilile ilile. ⁶Nteke anyi sụru l’anyi l’iya tụgbaru onwanyị l’ẹka anyi nọdukwadua l’ọchi, bẹ bụkwa ejire bẹ anyi l’adzụ, tẹmenu anyi te eme ire-lanụ. ⁷Ọle nteke anyi bu l’iwhoro lẹge yẹbedua bu l’iwhoro-o; ọo ya bụ l’anyi l’ibe anyi tụgbawaru, mmee Jisọsu, bụ Nwa Chileke l’asafụje anyi iwhe-dụ-ẹji, anyi metagbaberu g’ọ ha.

⁸Nteke bụ l’anyi sụru l’ọ tọ dụdu iwhe-dụ-ẹji, anyi metaru bẹ kwa onwanyị bẹ anyi l’aghọru ụgho; tẹmenu ọkpobe-okfu ono ta adụ anyi l’ẹhu. ⁹Nteke bụ l’anyi bya ekfushiaru iya iwhe-dụ-ẹji, anyi metagbaberu bẹ l’ọo-gụru anyi nvụ l’iwhe-dụ-ẹji ono g’ọ ha, safụkota anyi iwhe bụ-zhia ejo umere, anyi l’eme, eshi-ọwhu ọ bụ onye l’akfụshije ike l’iwhe ọ sụru lẹ ya l’e-me, ọ bụkwaruwho onye dụ chịriri. ¹⁰Nteke bụ l’anyi sụru l’ọ tọ dụdu iwhe-dụ-ẹji anyi metaru, ọ kwa iya bụ l’anyi mewaru iya onye ejire, okfu iya ta adụ anyi l’ẹhu.

Kuráyisutu bụ ọ-kwọo anyi lẹ mkpa

¹Ụnwu mu; iwhe meru mu l’ederu unu iwhe-e l’ẹkwo kwa nggẹ unu te emeje iwhe-dụ-ẹji, ọle nteke bụ l’o nweru onye meru iwhe-dụ-ẹji bẹ anyi nwekwaru-a onye l’ekfuchiru anyi l’iwhu Nna anyi. Onye ọbu bẹ bụ Jisọsu Kuráyisutu, onye dụ chịriri. ²Jisọsu ono bẹ gude onwiya gbaa ẹja ọha; shi nno mee: Chileke gụkotaru anyi nvụ l’iwhe-dụ-ẹji, anyịbedua metagbaberu mẹwaro iwhe-dụ-ẹji, ndu mgboko owhu meru; ọ tọ bụlekwa-a ọwhu anyi metagbaberu nwekiya.

³Nteke anyi l’emeje iwhe Chileke tụru iwu sụ t’e mejee; ọo ya bụ: anyi amarweta l’anyi marụ yẹbe Chileke ono. ⁴Onye sụru lẹ ya marụ iya; onye ọbu te emekwanu iwhe ọ tụru l’iwu t’e mejee; onye ono bụkwa utuwhuruku; ọkpobe-okfu ono ta adụ iya l’ẹhu. ⁵Ọle onye l’eme iwhe Chileke kfuru; o noo onye yeru Chileke obu yefu iyẹ ya l’ishi. O noo iwhe l’e-me t’anyi marweta l’anyi l’iya tụgbaru bụru nnanụ ndono. ⁶Onye sụru lẹ yẹle Chileke tụgbaru bụru nnanụ b’ọ gbakwarụ nke t’onye ọbu nọdu ẹgube ndzụ ono Kuráyisutu shi nọdu.

Iwu ọwhuu

⁷Ndu mu yeru obu; iwu-a, mu l’ederu unu ta abụhekwa iwu ọwhuu; ọ waakwaa akahụ iwu, unu shihawaa eshi mbụlembu nwetaru; akahụ iwu ono bụ ozhi ono, unu nụhawaru. ⁸Ọle a kpọbe iya kfude: mu asụ l’ọ kwaa iwu ọwhuu bẹ mu l’ederu unu. ?Tọ bụhunu iwu ọwhuu bẹ mu l’ederu unu gẹ ọkpobe-okfu iya ono b’e gbee whụwaa l’ẹhu Kuráyisutu mẹe l’ẹhu nke unubẹdua; o noo l’ẹkpuroochi l’agvụwaa agvụ; ọkpobe iwhoro gbee shiwaa unu l’ẹhu abyawaa adụdu.

⁹Onye sụru lẹ ya nọ l’iwhoro ono, nwanna iya dụkwa iya whọ ashị bẹ bụkwa l’ẹkpuroochi bẹ onye ọbu nọdukwadu byeye ntaa. ¹⁰Onye yeru nwanna iya obu nọ l’iwhoro ono; ọ tọ dụdu iwhe-dụ-ẹji, onye ono l’emeje bụkwanu iwhe l’e-me t’onye ọdo daba l’ome iwhe-dụ-ẹji. ¹¹Ọle onye nwanna iya dụ ashị bẹ nọ l’ẹkpuroochi ono; tẹmenu l’ooje daadishi daadishi l’ẹkpuroochi ono; tọ ma ẹka l’ooje eje nkele ẹkpuroochi ono mewaru onye ono: ẹnya bụru iya pyịrikiti.

¹²Mu l’ede ẹkwo-ọ anụ unubẹ ndu bụ ụnwegirima nkele Chileke gudewaa iswi ẹhu Jisọsu gụaru unu nvụ iwhe-dụ-ẹji, unu metagbaberu. ¹³Mu l’ede ẹkwo-ọ anụ unubẹ ndu bụ nna nkele unu marụ onye ono, shizhiawho lẹ mbụlembu dụta ono. Mu l’edekwa iya who anụ unubẹ unwokorọbya whẹ nkele unu lwugbuwaru onye-ejo-ụboku ono, bụ Oshifutuswe l’ọgu.

¹⁴Mu dewaru iya nụ unubẹ ndu bụ ụnwegirima nkele unu marụ Nna ono. Mu dewa iya nụ unubẹ ndu bụ nna nkele unu marụ onye ono, shizhiawho lẹ mbụ dụta ono. Mu dewa iya nụ unubẹ unwokorọbya whẹ nkele unu shihuru ike; okfu Chileke buru unu eburu l’ẹhu, unu lwugbuwaa onye-ejo-ụboku ono, bụ Oshifutuswe.

¹⁵Unu be eyekwa mgboko-o obu, unu te eye iya iwhe dụ iya l’ime. Onye yeru mgboko-o obu; te eyekwa Chileke, bụ Nna obu. ¹⁶O noo l’iwhe lile, dụkota lẹ mgboko-o bụ iya bụ ẹgu ejo iwhe l’anọje agụkaa madzụ mẹe ẹgu o nweru iwhe bụ-zhia iwhe ẹnya whụru mẹwaro oku onwonye iwhe igweli charụ l’iwhe mgboko-o; ta abụkwa l’ẹka Nna b’o shi; ọ kwa lẹ mgboko b’o shi. ¹⁷Mgboko-o mẹe iwhe dụ iya nụ, bụ iwhe tụkoru agụkaa madzụ; tụkokwaru abyawaa ewhushihukota, ọle onye l’eme iwhe dụ Chileke l’uche l’a-nọdu ndzụ jeye lẹ tututu-mịmimi.

Ọ-chị-nta Kuráyisutu

¹⁸Ụnwu mu; l’oge ikpazụ tẹekwaru l’ukfu. Unu nụwaru-a lẹ Ọ-chị-nta Kuráyisutu l’a-bya; ntaa bẹ ndụ-l’achị-nta Kuráyisutu byaakwaru. O noo iwhe meru; anyi marụ lẹ ntaa bụwaa oge ikpazụ ọbu. ¹⁹Ndu ono shiwaa l’echilabọ anyi lụfu; anyi lẹ whẹ shihawaa nọduta, ọle ọ tọ dụdu nteke whẹ bụje anyi. Nggẹ l’ọo iwhe whẹ bụ anyi mẹ anyi lẹ whẹ anọdukwaa, ọle whẹ lụfuru nggẹ a madzukwanuru l’ọ tọ dụdu gẹ whẹ ha m’ọo onye lanụ, bụ anyi.

²⁰Ọle unubẹdua bẹ Kuráyisutu yeru Ume-Dụ-Nsọ iya l’ẹhu. Unu makọtaru iwhe ono bụ ọkpobe-okfu ono. ²¹Sụa, iwhe mu kwoberu ede ẹkwo-ọ ta abụkwa l’unu ta amadụ ọkpobe-okfu ono. Iwhe mekwaru mu l’ederu iya unu bụkwa l’unu marụ iya, unu makwarụwho l’ọ tọ dụdu ejire gẹ ejire ọbu l’adụlee, bụ l’ọkpobe-okfu bẹ l’ooshije.

²²?Ọo onye bụ onye tarụ ishi ejire? Ọo onye ono, l’ete ekweta l’ọo Jisọsu bụ Kuráyisutu ọbu, Chileke kweru ụkwa iya. O noo onye ọbu bụ Ọ-chị-nta Kuráyisutu ndono, mbụ onye jịkaru Nna; jịka Nwa. ²³O noo l’onye ono, jịkaru Nwa; jịkaakwaruwho Nna. Ọle onye kwetaru nke Nwa bẹ wookwaru onwiya tụgbabe l’ẹhu Nna.

²⁴A byabya l’ẹhu nke unubẹdua; mu l’ekfukwa t’ozhi ono, unu nụru eshi mbụlembu ono nọshilekwawho unu ike l’obu t’unu gudeshia ya ike. L’ọ -bụru l’iwhe ono, unu nụru eshi mbụlembu ono dụ unu l’obu dụshia ya unu ike; ọ kwa iya bụ unu lẹ Nwa mẹe Nna atụgba bụru nnanụ, mbụ tụgbawaro jeyewaro. ²⁵Ọ waa bụ iwhe Kuráyisutu kweru anyi ụkwa iya, bụ ndzụ tututu-mịmimi.

²⁶O noo bụkwa nke ndu l’eme tẹ whẹ kwawhua unu ẹnya; duswee unu l’iwhe nke Kuráyisutu bẹ mu deru unu ono. ²⁷Ọle unubẹdua bẹ Chileke yewaru Ume-Dụ-Nsọ nkiya l’ẹhu. Mkpa nke t’onye ọdo bya ezhije unu iwhe ta adụheduwaro unu; eshi Ume Chileke ono l’e-zhikota unu iwhe lile; tẹmenu iwhe l’oozhije bụru ọkpobe-okfu, l’ẹte adụa ẹka ejire dụ iya. Ọo ya bụ t’unu lẹ Kuráyisutu tụgbakwa bụru nnanụ lẹge unu tụgbaru iya ono eje eje. O nokwa iwhe Ume-Dụ-Nsọ ono zhiru unu ndono.

²⁸Ọo ya bụ, ụnwu mu t’unu l’iya tụgbalekwawho bụru nnanụ nke ọwhu bụkwanu nteke o goshileruwho onwiya; obu eshihu anyi ike t’anyi be egude iwhere tsụhu iya egvu nteke l’ọo-bya. ²⁹Nteke ọ -bụ l’unu marụ lẹ Chileke bụ onye dụ chịriri; t’unu makwarụwho l’iwhe bụ onye l’eme iwhe dụ chịriri bẹ bụ nwa Chileke nwụru.

Anyi bụ ụnwu, Chileke nwụru

¹Unu whụwaru-a gẹ Chileke, bụ Nna yetaberu anyi obu nke t’o ku anyi ụnwu iya, mbụ ọ bụkwaru ụnwu iya ọbu bẹ anyi bụ. Iwhe meru ndiwhe ta ama anyi bụ lẹ whẹ ta amadụ iya. ²Ndu mu yeru obu; lẹ ntaa bẹ anyi bụakwa ụnwu Chileke. Iwhe anyi l’e-be bụru tẹke afụtakwaa iwhoro, ọle iwhe ọwhu anyi maberu bụ lẹ nteke Kuráyisutu l’a-bya bẹ anyi l’a-dụ-zhiawho g’ọ dụ; o noo l’ọolewho g’ọ dụ bụ gẹ l’ọo-dụ anyi awhụ iya. ³Ọo ya bụ l’onye nọ Jisọsu l’ẹka ele ẹnya abyabya iya ono; t’onye ono bụkwaru onye l’anọje eme tẹ mmerwu ba adụ iya l’ẹhu; lẹ Jisọsu ọbu l’onwiya ta adụkwa mmerwu dụ iya l’ẹhu.

⁴Iwhe bụ onye l’eme iwhe-dụ-ẹji bẹ ikpe nmaakwarụ l’onye ono bụ onye l’emebyi iwu Chileke; o noo l’ome iwhe-dụ-ẹji, bụhukwawho omebyi iwu Chileke. ⁵Unu marụ-a l’ọo Kuráyisutu ọbu bẹ byarụ tẹ ya bya asafụ madzụ iwhe-dụ-ẹji, dụ madzụ l’ẹhu; tẹmenu Kuráyisutu ono l’onwiya ta adụkwa iwhe-dụ-ẹji, dụ iya l’ẹhu. ⁶O to nwekwa onye yẹle Kuráyisutu tụgbaru bụru nnanụ l’emejekwadu iwhe-dụ-ẹji; tọ dụhunu onye l’eme iwhe-dụ-ẹji whụjeru iya nụ; ọwhu ọ bụroo onye l’ekfu nke l’ọ marụ iya.

⁷Ụnwu mu; t’unu be ekwekwa t’o nweru onye l’a-kwawhu unu ẹnya; duwhua unu l’iwhe nke Kuráyisutu. Onye l’eme iwhe dụ chịriri bẹ bụkwa onye dụ chịriri lẹge Kuráyisutu bụkwawho onye dụ chịriri. ⁸Onye l’eme iwhe-dụ-ẹji bụkwa nke Oshifutuswe; o noo lẹ Oshifutuswe l’anọje emeswe Chileke eshi mbụlembu. Iwhe Nwa Chileke byaturu bụkwa tẹ ya mebyishia iwhe Oshifutuswe l’emeje.

⁹Onye bụ onye Chileke nwụru te emejehedu iwhe-dụ-ẹji; o noo lẹ Ume Chileke l’emewaa ire l’ẹhu onye ono. Onye ono ta afụhedu mee iwhe-dụ-ẹji ọdo; eshi-ọwhu ọ bụwaa Chileke nwụru iya. ¹⁰Ọ waa gẹ l’ee-gude marụ ndu bụ whẹ bụ ụnwu Chileke mẹe ndu ọwhu bụ ụnwu nke Oshifutuswe. Onye l’ete eme iwhe l’ụzo, dụ chịriri te eshikwa lẹ Chileke. Onye l’ete eyee nwanna iya obu te eshikwawho lẹ Chileke.

Oye ibe onye obu

¹¹Unu makwarụ-a l’ozhi-ọma ono, e shi eshi mbụlembu ono zhita unu bụ t’anyi ye ibe anyi obu. ¹²T’anyi ba adụkwa g’ọo Kenu. Lẹ Kenu bẹ nọkwa l’ẹka onye ejo-ụboku-ono, bụ Oshifutuswe gbua nwune iya. Sụa, ?ọo gụnu kpatarụ o gbua nwune iya ono? Iwhe kparụ iya nụ bụ lẹ Kenu ọbu l’onwiya bẹ umere iya dụ ẹji; umere nke nwune iya dụ chịriri.

¹³Ụnwunna mu; t’ọ bọ dụjekwa unu biribiri l’unu dụ ndiwhe ashị. ¹⁴Iwhe ka anyi odo ẹnya bụ l’anyi shi nwụhu anwụhu, ọle anyi shiwaa l’anwụhu ono fụtawaa bahụwaa lẹ ndzụ. Iwhe mekwanuru anyi marụ l’o noo g’ọ dụ bụru l’anyi yeru ụnwunna anyi obu. Onye l’ete eyee madzụ ibe iya obu bẹ nwụhukwaduru-a anwụhu g’ọ nwụhuru. ¹⁵Iwhe bụ onye nwanna iya dụ ashị bụakwa ọchi bẹ onye ono gbụru, unu manụru-a l’onye gburu ọchi bẹ ndzụ tututu-mịmimi l’ẹte adụdua l’ẹhu. ¹⁶Sụa, ọ wakwa g’anyi gude marụ iwhe ọbu bụ oye obu ndọwa; lẹ Kuráyisutu harụ t’e gbua ya l’iswi ẹhu anyi. Ọo ya bụ l’anyịbedua b’ọ gbakwarụwho nke t’anyi haa t’e gbua anyi l’iswi ẹhu onye anyi l’iya tụkoru nọdu Chileke l’ẹka. ¹⁷Ọle nteke bụ l’ọ dụ onye ẹku nke mgboko-o byarụ; mkpa byarụ onye yẹle iya tụkoru nọdu Chileke l’ẹka; o be nke t’o yetaru iya ẹka; o rwuchiaru nwanna iya ono obu; ?ọo gụnu bẹ ẹgube onye ono l’agbabẹhunu ọkpa sụ lẹ ya yeru Chileke obu? ¹⁸Ụnwu mu; t’anyi be eyejeshi obu l’eli ọnu yẹle ire mẹchemeche; t’anyi gudeje umere anyi goshi l’ọo-whọ ezhi-okfu l’anyi yeru-a madzụ obu.

Onweru obu l’iwhu Chileke

¹⁹Ọo ya bụ, anyi l’emewaa nno anyi amarụ l’anyi shia lẹ Chileke ono bụ iya bụ ọkpobe-okfu l’onwiya. Ya abụwaru iya rọo bẹ anyi l’e-gude mee t’obu kabaa anyi oshihu ike l’iwhu Chileke ọbu; ²⁰m’ọ -bụru l’o nwezhiaru nteke obu l’anma anyi ikpe; o noo lẹ Chileke ka obu anyi shii; tẹmenu ọ makọtaru iwhe lile. ²¹Ụnwunna mu; ọ bụru l’obu ta anmajẹdu anyi ikpe; ọ kwa iya bụ l’anyi ta atsụhedu egvu l’iwhu Chileke. ²²Anyi l’anatajẹ l’ẹka iya iwhe bụ iwhe anyi sụru t’ọ nụ anyi; o noo l’anyi l’anọje eme iwhe ọ tụru l’iwu t’anyi meje; tẹmenu anyi l’eme iwhe dụ iya ree. ²³Iwhe ọbu bụ iya bụ iwu ọbu, Chileke tụru sụ t’anyi meje; bụkwa t’anyi woru onwanyị ye Nwa iya l’ẹka, bụ Jisọsu Kuráyisutu mẹe t’anyi ye ibe anyi obu bụ iya bụlewho iwhe ọ tụru anyi l’iwu sụ t’anyi mejee. ²⁴Onye l’emeje iwhe iwu Chileke kfuru bẹ bukwa ebu l’ime Chileke; Chileke bukwaruwho ebu l’ime iya. Iwhe anyi l’egudeje marụ lẹ Chileke bu l’ime anyi bụ Ume iya ono, ọ nụru anyi.

Ume Chileke yẹle ume Oshifutuswe

¹Ndu mu yeru obu; t’ọ bọ bụ-zhiakwawho ndu sụru lẹ Ume Chileke bu whẹ l’ẹhu; bụ whẹ kfujee okfu, unu ekweta l’ọo ezhi-okfu. Unu dalejeekwa iya adale t’unu marụ: ?Ume ọbu bụdu nụ Ume Chileke? L’o nwekwaru ndu wụfutaru dzuru mgboko ntaa. Iwhe ndu ono l’anọje ekfu l’abụkotaje ejire bẹ whẹ l’anọje adzụshi; whẹ asụ lẹ whẹ l’ekfuchiru Chileke. ²Sụa, unu lekwa g’unu l’e-shije marụ Ume ọwhu shi l’ẹka Chileke ndọwa: Iwhe bụ onye kfuzhiwaru l’edzudzu-ọha sụ l’ọ bụa ezhi-okfu lẹ Jisọsu Kuráyisutu byarụ-a lẹ mgboko-o bya abụru madzụ, unu amarụ lẹ Ume, bu onye ono l’ẹhu bẹ bụa Ume, shi l’ẹka Chileke. ³Iwhe bụ onye l’ete ekweje ekfu lẹ Jisọsu Kuráyisutu byarụ-a; bya abụru madzụ l’ezhi lẹ mgboko-o, unu amalẹruwho lẹ Ume, bu onye ono l’ẹhu te eshidu l’ẹka Chileke. Ume, bu ẹgube onye ono l’ẹhu bụ Ume nke onye ono, bụ ọ-chi-nta Kuráyisutu. ?Mbẹ unu nụwaru-a lẹ ọ-chi-nta ono l’e-be bya? Ọ byaakwaru. Ọ nọokwa anọ lẹ mgboko-o.

⁴Ọle-a, ụnwu mu, unubẹdua shikwa lẹ Chileke. Ndu ono, l’adzụshi ejire ono lẹ whẹ l’ekfuchiru Chileke bẹ unu lwugbuakwaru. O noo lẹ Ume nke Chileke ono, bu unu l’ẹhu bẹ kakwa ume nke ọ-chị-nta Kuráyisutu ono, bụ iya l’achị mgboko-o ọkpehu. ⁵Sụa, ndu ono, l’anọje adzụshi ejire ono lẹ whẹ bụ ndu nkfuchiru Chileke bẹ shikwa lẹ mgboko-o. Ọo ya bụ l’iwhe whẹ l’anọje ekfu bẹ shi l’ọriri ndu nke mgboko-o. Ọ bụru iwhe ono meru ndiwhe l’anọje azụru whẹ mgbede l’ọo nke whẹ bụ iya. ⁶Anyịbedua bụ nke Chileke. Ọ bụru ndu marụ Chileke bẹ l’ekweje lẹ nke anyi bụ iya. Ndu l’ẹte abụa nke Chileke te ekwejekwa l’ọ dụ iwhe nke anyi bụ. O nokwa g’anyi l’egudeje marweta ume, bụ l’ẹhu onye l’ekfu ọkpobe-okfu mẹe ume ọwhu bu l’ẹhu onye l’adzụ ejire.

Chileke bụ oye obu

⁷Ndu mu yeru obu, unu t’anyi tụko ye ibe anyi obu; l’oye obu bẹ shikwa l’ẹka Chileke, mbụ l’onye yeru ibe iya obu bẹ bụkwa onye Chileke nwụru; ọ bụkwaruwho onye marụ Chileke. ⁸Onye l’ete eyee ibe iya obu ta amakwa Chileke; o noo lẹ Chileke l’onwiya bụ oye obu. ⁹Gẹ Chileke gude goshibe lẹ ya yenukaru anyi obu bụ l’o zhiru Nwa lanụ, ọ nwụru kpụ t’ọ bya lẹ mgboko-o nggẹ anyi shi iya l’ẹka nọdu ndzụ. ¹⁰Ẹka oye obu ọwa gude swịa iche bụ l’ọ tọ bụdu l’ọo anyịbedua yeru Chileke obu; ọo Chileke goshichiaru l’ọo yẹbedua yeru anyi obu. G’o gude goshi iya bụ l’o yeru Nwa iya t’ọ bya egude onwiya gbaa ẹja ọha gude gbafụ iwhe-dụ-ẹji, anyi metagbaberu.

¹¹Ndu mu yeru obu; eshi-ọwhu Chileke yeberu anyi obu nno, b’ọ gbarụ nke t’onyenọnu yekwawho ibe iya obu lẹge anyi ha. ¹²Ọ tọ dụkwa onye whụjebuwaru Chileke, ọle-a; anyi -yewaa ibe anyi obu; ọo ya bụ Chileke ebukwanuru anyi eburu l’ẹhu; tẹmenu oye obu Chileke edzukwaawho oke l’ẹhu anyi.

¹³Lẹ Chileke nụkwaru anyi Ume nkiya gẹdegede; ọ kwa Ume ono, ọ nụru anyi ono bẹ meru g’o gude anyi marụ lẹ yẹbe Chileke bu ebu l’ime anyi; anyịbedua bukwaruwho l’ime Chileke. ¹⁴Anyi whụakwaruwho l’ẹnya; anyi kfuakwaru iya madzụ lile sụ lẹ Nna yeru Nwa iya t’ọ bya abụru Onye Ndzọta l’adzọje ndiwhe. ¹⁵Ọo ya bụ l’onye duzhiwaa ike kfụru l’edzudzu-ọha; kfua lẹ Jisọsu bụ Nwa Chileke b’a malẹruwho lẹ Chileke buwa iya ebu l’ẹhu; onye ọbu bukwaru Chileke l’ẹhu. ¹⁶Sụa, anyi makwarụ-a lẹ Chileke yeru anyi obu; anyi wowaru onwanyị ye iya l’ẹka nkele anyi kwetaru l’ọo ezhi-okfu l’o yeru anyi obu.

Chileke bụ oye obu l’onwiya. Ọo ya bụ l’onye gude oye obu buru, bẹ buwaa ebu l’ime Chileke; Chileke bukwaruwho l’ime onye ọbu. ¹⁷Iwhe l’e-goshi l’oye obu dzuru oke l’ẹhu anyi bụ l’obu l’e-shihu anyi ike mbọku ikpe ono. O noo l’ọo gẹ ndzụ Kuráyisutu dụ bụ gẹ ndzụ anyi dụkwawho lẹ mgboko-o. ¹⁸Onye yeru onye ọdo obu ta adụhekwa iwhe l’ọotsu onye ono egvu iya. Oye obu ọwhu bụ ọkpobe iya l’egbejekwaa chiwhua iwhe bụ-zhia ntsụ-megvu g’ọ ha. O noo l’ọ -bụru lẹ madzụ l’eme iwhe ọtsu-egvu ọtsu-egvu; ọ kwa iya bụ l’ọ marụ l’aa-nụ iya awhụ. Ọ kwa iya bụ l’onye ono bẹ oye obu ọwhu o yeru te edzudu oke.

¹⁹Anyi yeru Chileke obu nkele o vu ụzo ye anyi obu. ²⁰Nteke ọ -bụ lẹ madzụ bẹ nwanna iya dụ ashị; onye ono sụkwanu lẹ ya yeru Chileke obu; ọ kwa ejire bẹ onye ono l’adzụ. ?Ndẹnu g’ọ bụ onye yẹle iya bụ nwanna, bụ onye l’oole l’ẹnya bẹ l’ooto yedua obu; ya abụ-chiaru Chileke, l’ọoto whụa l’ẹnya bẹ l’oogbechia je eye obu. ²¹Jisọsu l’onwiya tụkwaru iwu-a sụ t’onye yeru Chileke obu; yekwawho nwanna iya obu. O noo bụru iwu ọwhu ọ tụru anyi l’onwiya.

Okoo, anyi l’atụ ekpu iwhe nke mgboko

¹Sụa, iwhe bụ-zhia onye kwetaru l’ọo Jisọsu bụ Onye Ndzọta ọbu, Chileke kweru ụkwa lẹ ya l’e-zhi t’ọ bya ọbu; onye ono bụakwa nwa Chileke. Iwhe ọdo bụru l’onye ono -yezhiwaru onye nwụru nwa obu; l’atụkojekwa onye ọbu yẹle nwa iya ọbu yekota obu. ²Anyi -yezhiwaa Chileke obu eme iwu, ọ tụru anyi: ọ kwa iya bụ anyi amarụ l’anyi yeru ụnwu Chileke obu. ³Lẹ g’anyi l’e-shije goshi l’anyi yeru Chileke obu bụkwa anọ emeje iwhe Chileke tụru l’iwu sụ t’e mejee. Mbụ iwhe ọbu, ọ tụru l’iwu iya ọbu ta abụkwa l’ọotsu l’ẹhu ememe. ⁴Iwhe bụ onye Chileke nwụru bẹ l’alwugbuje iwhe mgboko-o; ka iya ike. Ọ kwa l’ọo l’anyi wowaru onwanyị ye l’ẹka Chileke meru g’o gude anyi lwugbuwaa iwhe nke mgboko-o; tụru okoo kpua iya. ⁵Sụa, ?ọo onye dụ ọ-du-agha bẹ l’atụjeru okoo kpua iwhe nke mgboko-o? Ọo onye ono, kwetaru l’ọo Jisọsu bụ Nwa Chileke.

Ọnoru Jisọsu l’ekebe

⁶Ọ kwa Jisọsu Kuráyisutu bẹ bụ onye ono, byarụ nụ. Nteke ono, ọ byarụ bẹ bụ mini b’o gude bya; gudekwawho mmee. Ọ tọ bụlekwaa mini nwẹkiya b’o gude bya; o gude mini ono; gudekwawho mmee bya. Onye l’egoshi l’iwhe ono bụ ezhi-okfu bụ Ume Chileke nkele ọo Ume Chileke l’onwiya bụ ọkpobe-okfu ono. ⁷Ọo ya bụ lẹ whẹ dụ ẹto agbarụ Jisọsu ẹka-ebe; ⁸bụ iya bụ Ume Chileke mẹe mini mẹe mmee. Ẹka-ebe ẹto ono wụkotalewho ọnu nnanụ. ⁹O noo gẹ Chileke shi egoshi lẹ Jisọsu bụ Nwa iya. Anyi l’ekwetaje l’ekebe madzụ l’agba. Ẹka-ebe ọwhu Chileke l’agba gbẹkwa kabaanụ oshihu ike. ¹⁰Ọo ya bụ l’onye kwetazhiwaru nke Nwa Chileke ono bẹ ẹka-ebe ono dụwaa l’obu iya. Onye l’ete ekwetaa nke Chileke bẹ meekwaru Chileke onye ejire nkele onye ono te ekwetadu l’iwhe Chileke l’ekfu l’okfu ẹhu Nwa iya bụ ọkpobe-okfu. ¹¹Ẹka-ebe ọbu bụ lẹ Chileke nụru anyi ndzụ tututu-mịmimi mẹe lẹ ndzụ ono bụ l’ẹhu Nwa iya b’o shi. ¹²Onye yẹle Nwa Chileke ono tụgbaru bụru nnanụ bẹ nweekwaru ndzụ ono, ọle onye yẹle Nwa ono l’ẹte atụgbaa bụru nnanụ te enwekwa ndzụ ono.

Ndzụ tututu-mịmimi

¹³Sụa, iwhe-e mu l’ede bẹ bụkwa unubẹdua unu lẹ Nwa Chileke tụgbaru bụru nnanụ bẹ mu l’ederu iya nggẹ unu makwanụru l’unu nwewaa ndzụ tututu-mịmimi ono. ¹⁴Obu l’eshihuje anyi ike l’iwhu Chileke; o noo l’ọonuje olu anyi m’ọ -bụru-a l’iwhe anyi sụru t’ọ nụ anyi bẹ anyi kfuru-a g’ọ dụ iya mma l’obu. ¹⁵Ọ kwa iya bụ; eshi-ọwhu anyi marụ l’ọonuje olu anyi l’iwhe bụ-zhia iwhe anyi sụru t’ọ nụ anyi bẹ anyi maanarụ-a l’anyi natawaru iwhe ọbu anyi sụru t’ọ nụ anyi ọbu.

¹⁶O -nweru onye whụru nwanna iya l’ẹka l’oome iwhe-dụ-ẹji, mbụ ẹgube iwhe-dụ-ẹji ọwhu l’ẹte abụa: e -mee ya; ya egbua onye ọbu meru iya nụ; t’onye ono kfukwaru nụ Chileke l’okfu ẹhu nwanna iya ono; tẹ Chileke wota ndzụ nụ nwanna iya ono, meru iwhe-dụ-ẹji ono. Ọ kwa iya bụ Chileke anụ ndu l’eme ẹgube ejo iwhe dụ nno ndzụ. O nwekwaru iwhe-dụ-ẹji ọwhu bụ: e -mee ya; ya egbua onye ọbu meru iya nụ. Mu ta asụkwa t’e kfuru nụ Chileke l’ẹgube iwhe-dụ-ẹji onona. ¹⁷Iwhe bụ-zhia iwhe e meru l’ụzo l’ẹte akfụaru nhamụnha, bẹ bụakwa iwhe-dụ-ẹji, ọle o nwekwaruwho iwhe-dụ-ẹji ọwhu bu: e -mee ya; ya eje egbu onye meru iya.

¹⁸Anyi mawarụ l’iwhe bụ onye Chileke nwụru te emejedu iwhe-dụ-ẹji. Iwhe l’emejenu bụ lẹ Jisọsu, bụ Nwa Chileke l’anọje eleta onye ono ẹnya ọkpobe eleta. Ọonoje eleta iya ree t’ẹka onye-ejo-ụboku ono, bụ Oshifutuswe be erwu iya l’ẹhu.

¹⁹Anyi maakwarụ l’anyi bụ nke Chileke; lẹ ndiwhe gẹ whẹ ha bẹ onye-ejo-ụboku ono, bụ Oshifutuswe tụru gburumu swechita.

²⁰Iwhe ọwhu anyi makwanụru bụ lẹ Nwa Chileke byarụ; anyi makwarụwho l’o meru t’ẹnya kosahu anyi nke ọwhu anyi byabya amarụ onye ono bụ iya bụ ọkpobe Chileke. Ọo onye ono, bụ ọkpobe Chileke ono, bẹ anyi l’iya tụgbaru bụru nnanụ. Onye o shikwanu l’ẹka bụru Nwa iya ono bụ Jisọsu Kuráyisutu. Yẹbedua, bụ Jisọsu bụ iya bụ ọkpobe Chileke ọbu; bụkwaru iya whọ bụ ndzụ tututu-mịmimi l’onwiya. ²¹Ụnwu mu; t’unu be ekwejekwa t’o nweru iwhe unu l’e-yeru nhafụ-ẹka t’ọ bya anochia ẹnya Chileke l’ime obu unu.