TITUS
11 Ma Paulus, mbò-esye Zamba, man apostel Yesus Kristus asu ṅyëbë e bod Zamba angatòb, ai asu ṅyëman bëbëla ya olugu Zamba, 2 ai afidi enyiṅ kòm ya e Zamba ayëm ki minnal angakag osusua bisëb bisëb. 3 E mëlu ma, akuli ebug dzie a nkadan mbëmbë foe ya bëngavë ma a abende nkode waan; 4 Matil Titus, mfaṅ mòn wama a ṅyëbë ya onë bia fufulu; maa ai mvoè bibòò ai wa, bisòò abë Zamba esya ai Kristus Yesus nkode waan. 5 Asu te mëngalig wa a Kreta, asu yë na omana kom e mam mësë mëvòg, otele fë bënyia-bodo a tisòn osë, akyaè mëngabende wa, 6 ngë mod ziṅ anë tègè ai ebug balaṅ nyè, abëlë hë mininga mbòg, abëlë e bòn bayëbë, tègè ai na bënë nyè dzam laṅ enyënyam ziṅ, tègè ai nyè mëlò. 7 Amu bisòb ayean bò tègè ai ebug balaṅ nyè, mbol anë etye nkala nda-Zamba, tègè ai nyè mëbun, tègè vol wog olun, tègè diṅ mëyòg, tègè diṅ bitòm, tègè dzëṅ akuma a nkòt, 8 ayean bò afaṅ ai bëyëṅ, adiṅi e dzi enë mbëṅ, mod evovoe, sosoo, mod ngogëlan, ayëmë ban nnëm, 9 ayëmë a kpiim a bëbëla ebug anë dòkten ayi, asu yë na atoan yëm vòli ai ayëgëlë, ai mfuban, atoan hm fë yëm dò e bod badoan ai nyè. 10 Amu abui bod anë mëlò, batalan a anyu, bod mëdugan, adaṅ adaṅ a eba batye a Yuden, 11 bayean bò na bëtòbò bivol; bënë e kan yadzugulu minguma mënda më bod, bëyëgëlë e mam mod ayean ki yëgëlë asu maan bingat ya ete. 12 Mod mbòg ya abë bò, profèt waban, angadzo na: ’Bod ya Kreta bënë kòm esë hë bod minnal, tsit mëtom, atëg, mindondòg.’ 13 Mbòòlan te onë bëbëla. Asu te kòṅan ai bò ngul ben, asu yë na bëbi mfaṅ ṅyëbë, 14 bëzaa kè mëlò a minlaṅ mi mvèt mi Yuden ai a mëbende më bod, bëngalum bëbëla mvus. 15 Dzom esë enë mfuban asu e bod bënë mfuban. Hë da, asu e bod bëbëlë mvit a nyòl ai asu bëhaiden, tò dzom ziṅ esëki mfuban; tò nnëm, tò sosoo waban, bisë binë ndaman. 16 Bamëm na bayëm Zamba hë da bësiege nyè a mimboan; bakyëbë ai ziṅ, bënë mëlò, tègè dzam bò e dzi enë mbëṅ.
21 Mfag woe, kòbògò e mam mayean ai mfaṅ dòkten. 2 Okad minnom mi bod na të banyu mëyòg, bëbòò e bod bakam, evovoe, bëbëlë mfaṅ ṅyëbë, mfaṅ ediṅ, mfaṅ fin. 3 Minnom mi bininga fë dzam dëda, bëbòò ai dzin a fulu dzaban, të babò bësatan, ngë abò olò adzo mëyòg, bëyëgëlë hë e mam mënë mbëṅ, 4 asu yë na bëyëgëlë ban bininga na bëdiṅ bëyom, bëdiṅ bòn baban, 5 bëbòò evovoe, mfuban, bëbaala nda mbëṅ, abëṅ nnëm, bëbòò bëyom mëwog, asu yë na të bod bamgbali ebug Zamba. 6 Dzam dëda, lëbë fë binanga na bëyëm ban nnëm 7 a mam mësë, lëdëgë na wamen onë mvulna a mimbëmbë mi mam mësë, olëdëgë na onë a saaṅ a dòkten woe, ai dzin, 8 nkòbò woe obò tègè ai alaṅa-lë ebug, asu yë na e mod adoan ai wa asama, tègè ai mbë dzam anë bia dzam laṅ. 9 Kada bëlò na bëbò bëti baban mëwog a mam mësë, na bënyëb bò a nnëm, tègè doan ai bò, 10 tègè ai fulu wub, hë da bëlëdë mbëmbë ṅyëbë waban osë, asu yë na bëvë dòkten Zamba nkode waan olugu a mam mësë. 11 Amu maa Zamba nkode akulan a bod bësë, 12 ayëgëlë bia, asu yë na bitam dzoge tëb Zamba etòm miṅyian mi si, bizu hm nyiṅ evovoe, ai sosoo, ai fulu ngogëlan e si nyi, 13 biyanga mvomvòm afidi ai asò-lë duma Zamba nen ai nkode waan Yesus Kristus 14 ya angakaban asu daan, asu yë na akode bia a nkòt osë, ai na afubu nyè emen akyaè ayòṅ etam, a lamvaman ai mimbëmbë mi mam. 15 Kòbògò e mam ma, olëb, okòṅan fë ai bò ai ngul dzoe ese. Të mod abyandi wa hala!
31 Dugan bò tsog na bëbò mintomba ai bidzoe mëwog, bëwog bò, bëtòbò a ngomëzan asu abëṅ dzam asë, 2 të bamgbali mod ziṅ, të badzëṅ bitòm, bëbò evovoe, bëlëdëgë bod bësë afu-nnëm daban; 3 Amu bia bëben fë bingabë mëkud, mëlò, bitoa a ndimi, bisye miṅyian mian ai kan ngoṅ esë, binyiṅi a abe, a mëkomëṅa, bibòò mam më ziṅ, bisiṅan fë bia bia. 4 Eyòṅ hm bingayen abëṅ-nnëm ai ediṅ Zamba nkode waan adiṅ bod, 5 së ki asu mimboan ya mëkyëbë ya bingabò, dzam da hë asu ngòl dzie, ndò angakode bia ai mëwòbò më abyali bèè, ai ntsendan ya abë Mfufub Nsisim 6 ya angasoe bia a nyòl abui abui abë Yesus Kristus nkode waan, 7 asu yë na bibëlë mëkyëbë a maa woe, bibò fë bòn bë elig asu afidi enyiṅ kòm. 8 Ebug enë bëbëla; Mayi na matoan wa baala e mam ma, na e bod bëngafudi afidi daban abë Zamba bëdzëṅ na bëmvaman ai mimbëmbë mi mam. Mam mëte mënë mbëṅ, mëtoa fë ai mfi asu bod. 9 Saala ntsogan akud, ai minlaṅ mëbonde mënda më bod, zuṅa ai bitòm asu mam më mvende; Amu masëki ai mfi ndò fë mënë dzëdzaa. 10 Osaala e mod atye ṅyëbë mfë, ngë obeme ya nyè eyòṅ dzia ngë bibè, 11 oyëmë na kan mod te enë ndaman, mod minsëm, ndò fë avë emen mëku. 12 Eyòṅ mayi lom Artemis ngë Tikikus abë wa, ovol ma sòṅ kòb a Nikopolis, amu awe ngò mëyili na mayi tòbò a abog oyon. 13 Otoan yaan ai Zenas ya anë man loya, ai Apollos, asu yë na të badzëman ai dzom ziṅ. 14 Bod baan bëtoan yègè mvaman ai mimbëmbë mi mam, asu mimfaṅ mëyaṅan, asu yë na të batòbò nala të bò esye. 15 E bod bësë bënë ai ma ha basug wa. Sugu e bod bësë badiṅ bia a ṅyëbë. Maa abò ai mina bësë.