ROMA

ROMA

¹ Ma, Paulus, olò Yesus Kristus, mëloeban na mëbò man apostel, mëtòbëban asu mbëmbë foe Zamba, ² ya bëprofèt boe bëngakag osusua a mimfufub mintilan, ³ atyan ai mòn woe ya angabyali a nda-bod David mfag ya minson, ⁴ bëtele nyè na anë mòn Zamba ai ngul mfag ya Mfufub Nsisim, atarigi a akui-lë sòṅ bëwu, Yesus Kristus Nti waan; ⁵ Abë nyè ngò binganòṅ ntotomamaa ai esye apostel asu yë na, a dzoe die, biyëgëlë abò mëwog a ṅyëbë a zaṅ bëhaiden bësë. ⁶ A zaṅ bëhaiden bëte, Yesus Kristus nyè angaloe fë mina, ⁷ e mina bësë ya minë a Roma, mindindiṅ mi Zamba, a minë nloean a etye mimfufub, ntotomamaa ai e mvoè ya biasò abë Zamba esya waan, ai abë Nti Yesus Kristus bibòòg ai mina. ⁸ E di osu, mavë Zamba ngaṅ a dzoe Yesus Kristus asu mina bësë, amu bataman ṅyëbë waan a si esë. ⁹ Amu e Zamba ya masye a nsisim wama ai mbëmbë foe anë ma mfaṅ mbòòlò na matsog mina tègè ku sòm, ¹⁰ mësiligi nyè kòm esë a ngogëlan dzama ngë anë të dzam yenan ana na, a ṅyian woe, mësò ki të abë mina! ¹¹ Amu mayi du na mayen mina, asu yë na mëvë mina efaè nsisim asu yë na miwon, ¹² nala watyan na ma mëbi fë awonòṅ abë mina asu ṅyëbë ya mëbëlë fufulu ai mina. ¹³ Mayi ki na miyëgan dò, a babëdzaṅ, na mëngahan hala na mazu abë mina, ndò azaag kui ana, tègè ai zen; asu yë na mëbi fë mfi abë mina anë mayen wò a e bëhaiden bëvòg. ¹⁴ Mëbëlë ekola ai bë Grek, ai bëlòbò-lòbò, ai mimfëfëg, ai mëkut, ¹⁵ asu te, mfag wama, mayag na, tò mina ya Roma fë, mëzu mina kad mbëmbë foe. ¹⁶ Amu mawog ki osòn asu mbëmbë foe, amu anë ngul Zamba asu akode e mod osë ayëbë, atarigi ai man Yuden, a mvus hala, man Grek. ¹⁷ Amu afu-nnëm sosoo Zamba lakulan ete, lëtarigi a ṅyëbë, lëkëlë mana a ṅyëbë, akyaè ya anë ntilan na: Enyiṅ yasò sosoo mod a ṅyëbë. ¹⁸ Amu olun Zamba, osòòg a yob, wakulan ebyandi esë ai abe-nnëm e bod bafèd bëbëla zen ai abe-nnëm a nyòl, ¹⁹ asu te e dzom mod onë yëm abë Zamba yayene abë bò, amu Zamba angalëdë bò dzò. ²⁰ Amu, e byem ya basëki dzam yen abë nyè, atarigi a akomo-lë si-ndon, bënë biè dzam yen a bikokoma, anë ngul kole dzie ai azamba die, antoa hm na, mod abëlë ki bidzuga, ²¹ amu yë na, bëyëmë të Zamba, ndò bandzëki nyè lugu ngë avë nyè ngaṅ anë Zamba; Ndò hm bënganyaban fò a afan ai minlaṅëdan miaban, akut nnëm daban lënada a dibi. ²² Bëtsogo na bënë mimfëfëg, ndë bënë mëkut, ²³ ndò bëngafòlan duma Zamba kole ai bihëgëlë bi mod ndon dzom, ai ebi bi anòn, ai tsit mëkul, ai e nyi yawòṅ a si. ²⁴ Asu te ndò Zamba angadzoge bò ai bëbe miṅyian a minnëm miaban na bëku a enyiṅ mvit, bësama nyòl dzaban ete. ²⁵ Ndò bëngafòlan bëbëla ya abë Zamba ai mëdugan, bëngalugu, bësye fë bikokoma, bëdzoge nkomo. Olugu ai nyè a bisëb bisëb. Amen. ²⁶ Asu te ndò Zamba angadzoge bò na bëku a bëbe miṅyian, amu, bininga baban bëligi bëlan ai fam anë wayean, bëngabò akyaè etam, ²⁷ dzam dëda fë, fam edzoge mbol bayean bëlan ai bininga a enòṅ, eyë bëngadig ai ngoṅ hë na babëlan ai bò bò, fam ai fam, bëngabò mam më osama; bò bëben bëngabi maan ya bivus bite. ²⁸ Mbol bandzëki yi na bayëm Zamba, ndò Zamba nyè angadzoge bò a nsisim ndim waban, bëngabò e mam mayean ki. ²⁹ Bënë ndziean ai abe-nnëm asë, ndòg, mëtom; bënë ndzalan ai mëkomëga, ewoe bod, zuṅa, mëdugan, mvol, minsòs, ³⁰ andondòṅ, bësiṅi Zamba, ebyandi, mëbun, enguṅ, fëg ya abò abe, bòn mëlò, ³¹ tègè ai fëg, tègè ai bëbëla, tègè ai nnëm, ngèt. ³² Bëfyaṅan yëm ntol Zamba na e bod babò e mam ma bakyëbë ai awu, tò hm nala, bò bëben bëbòò mò, bëtaman fë e ba babò mò.

¹ Asu te, a e mod watsig ntol, wasëki ai bidzuga. Amu eyòṅ watsig e mod mbòg ntol, wakpèè wamen a adzo, amu e wamen watsig ntol, wabò fë mam mëte. ² Biayëm na Zamba atsig e bod babò e kan mam nyi ntol a bëbëla. ³ A e mod watsig e bod babò e mam ma ntol, wamen obò fë mò, dze yë watsog na wayi tub ntol Zamba nga? ⁴ Yë mbol ki wabyandi abui abëṅ-nnëm die, ai fin dzie, ai mvam dzie, wa tègè yëm na abën-nnëm Zamba lakë ai wa a avëṅan enyiṅ? ⁵ Etòm alèd-nnëm doe ai mëlò ya nnëm woe endzò wakoman wamen olun a nyòl asu amos olun ai amos ya sosoo ntol Zamba ayi kulan, ⁶ ayi vë mod osë anë mimboan mie minë. ⁷ E ba bandzëki ku sòm, bësye mbëṅ, bëdzëṅë hë duma, ai olugu, ai enyiṅ kole, mbò ayi vë enyiṅ kòm, ⁸ e ba ki badzëṅ hë mfi waban, bëbyandigi bëbëla, bënada a mbë-nnëm, mbò ayi vë olun ai ayòg. ⁹ Mindzug ai mësis binë e mod osë abò abe a nyòl, osusua abë man Yuden, akalan ai man Grek. ¹⁰ Duma, ai olugu, ai mvoè bia bitoa ai e mod osë abò mbëṅ, atarigi ai man Yuden, akalan ai man Grek. ¹¹ Amu Zamba asëki timi. ¹² E ba bësë bëngasëm, të yëm mvende, bò bayi fë dzaṅ të yëm mvende. E ba ki bëngasëm a mvende, bayi bò tsig ntol a mvende. ¹³ Amu yë na, së ki e bod bavogolo mvende mbò bënë sosoo a mis më Zamba, hë e bod banyie mvende mbò bëbëlë mëkyëbë. ¹⁴ Amu yë na, eyòṅ e bëhaiden ya babëlë ki mvende babò mam më mvende hë mbol nnëm walëdë bò, tò anë babëlë ki mvende, bò bëben bënë mvende dzaban. ¹⁵ Bod bëte balëdë bia na e dzom mvende yabende enë bò ntilan a nnëm, amu sosoo waban abòòlò bò, minlaṅëdan miaban a zaṅ bò bò misòman bò ngë ki na mikaman ai bò, ¹⁶ amos ya Zamba ayi tsig ntol e mam më bod ya mësòlò ai mbëmbë foe wama abë Yesus Kristus. ¹⁷ Ngë wadzo hm na onë man Yuden, ofidigi mvende, obò fë enguṅ ai Zamba, ¹⁸ ndò wayëm ṅyian Zamba, oyëmë fë e dzom yadaṅ mbëṅ, mbol bëngayëgëlë wa a mvende, ¹⁹ ngë wayëm mbëṅ mbëṅ na onë nlëdë-zen asu mindindim, otoa mfyè asu e ba bënë a dibi, ²⁰ otoa ṅyëgëlë e ba bënë mëkut, ṅyëgëlë ban bòngò, hë etòm yë na mvende dzoe yavë wa ayëmë-lë fëg ai bëbëla! ²¹ A e mod wayëgëlë e mod mbòg, nga wayëgëlë fë wamen? A e mod wabende na të badzib, dze yë wamen wadzib? ²² A e mod wadzo na të babò bisog, dze yë wamen wabò bisog? A e mod wawog bivëgëlë bëzamba abe, dze yë wasa byem a bëtempel? ²³ A e mod wabò enguṅ a mvende, wabyandi hm Zamba eyòṅ wadaṅ mvende! ²⁴ Amu anë ntilan na: Mina miabò na bëmgbali dzoe Zamba a zaṅ bëhaiden. ²⁵ Amu akële lënë ai mfi ngë wabaala mvende. Dzam da, ngë wadzala ki mvende, akële doe antoa esosòli. ²⁶ Ngë e mod asëki nkëlan abaala mam më mvende, nga nala watele nyè a etye akele? ²⁷ Ndò hm e mod asëki nkëlan a nyòl, hë da abaala të mvende, atsig wa ntol, e wa ya obëlë ntilan mvende ai nkëlan, odaṅa mvende. ²⁸ Amu man Yuden asëki hë e dzom yayene a mis, ndò fë akële lasëki e dzi yayene a nyòl, ²⁹ dzam da man Yuden anë e dzi esòlò, ndò fë nkëlan ya nnëm onë a nsisim, së ki a e mvende enë ntilan; Olugu woe asò ki a bod, asò abë Zamba.

¹ Eyë hm Zamba Yuden adaṅ lod e bod bëvòg ve? Ndò ki akële anë mfi dze? ² Alodo hm fò bò abui mimfag misë. Amu, e di osu, mbò Zamba angavë bibug bie. ³ Ndò hm ki, dze, yë ngë bod bëziṅ bandzëki bò mëwog, yë mëlò maban masole mgba Zamba? ⁴ Tègè ai dzom ziṅ nala! Zamba nyè anë bëbëla, mod osë atoa mvol, akyaè anë ntilan na: Asu yë na bëmëm na onë sosoo a bibug bie, okyëbë fë eyòṅ batsig wa ntol. ⁵ Ngë abe-nnëm daan lalëdë afu-nnëm Zamba a ngëëṅ, bidzo hm ya? Yë Zamba anë mbë-nnëm eyòṅ olun woe wadzimbi bia? (Makòbò hm fò a nkoṅ mod). ⁶ Tègè ai dzom! Ngë tègè ai nala, eyë Zamba anë dzam tsig si-ndon ntol ya? ⁷ Ndò hm ki, ngë bëbëla Zamba awum a mfugu wama a yob, antoa duma die, asu dze hm badugan ma tsig ntol anë nsemë minsëm? ⁸ Ndò hm, yë e kan bod bëziṅ bamgbali bia enë ete, bò na biadzo na: ’Mboan abe, asu yë na mbëṅ ozu?’ E bala bëte bëmbëlë ya sosoo endëgëlë. ⁹ Dze hm? Yë bia biadaṅ mimfaṅ? Tègè hm fò a! Amu mëtsig ya na tò Yuden, tò Grek, bësë bënë a edzoe nsëm, ¹⁰ e kan enë ntilan na: Tò mod ziṅ asëki sosoo, ¹¹ mod ziṅ awog ki Zamba, tò mod ziṅ adzëṅ ki Zamba. ¹² Bësë bënë ndiman zen, bësë bëtoa ewuwu-ntug, tègè ai e mod abò mbëṅ, tègè ai tò mbòg. ¹³ Engòṅ dzaban enë e sòṅ eyoo, badug bod ai oyëm waban, nsu akpë onë bò a biyè bi anyu. ¹⁴ Anyu daban anë a tuud ai bikag, ai ngëb, ¹⁵ mëkol mëvolo bò na bakë soe mëki; ¹⁶ a mëzen maban, hë bikudi ai zoe, ¹⁷ ndò bayëm ki zen mvoè. ¹⁸ A mis maban, tègè ai wòṅ Zamba. ¹⁹ Biayëm na, e mam ya mvende yadzo mabëbë e bod bënë a edzoe mvende, asu yë na anyu asë afëdëban, si-ndon esë engayalan nkat abë Zamba. ²⁰ Asu te mod ziṅ akyëbë ki ai afu-nnëm a mis më Zamba ai mimboan ya mvende, amu yë na biayëm nsëm hë a zaṅ mvende. ²¹ Dzam da, afu-nnëm sosoo Zamba angakulan tègè ai mvende; mvende eben ai bëprofèt bamëm nala; ²² Afu-nnëm sosoo Zamba layenëban asu bëyëbë ai ṅyëbë bayëbë Yesus Kristus. Amu dzom ziṅ yatsende ki hala, ²³ bod bësë bëngasëm, ndò badzëman ai duma Zamba, ²⁴ ndò hm bakyëbë a nkat a zëzë ai maa woe ya ayenëban a akode lëngasò abë Yesus Kristus. ²⁵ Zamba angatele nyè na anë mëtunëṅa ai ṅyëbë ya mëki moe asu yë na abò mbòòlan afu-nnëm sosoo die, mbol adzu minsëm ya okoba, ²⁶ ai odzibi Zamba. Asu mbòòlan afu-nnëm sosoo die abog binë di, na anë sosoo ndò fë abò na e mod ayëbë Yesus akyëbë a nkat. ²⁷ Enguṅ yasò hm fë ve? Yayean ki bò! Asu mvende fe hm ki? Yë asu mimboan? Tègè hm fò! Hë asu mvende ṅyëbë! ²⁸ Amu matsog na mod akyëbë a nkat ai ṅyëbë, tègè yaṅan ai mimboan mi mvende. ²⁹ Ndò hm, yë Zamba anë hë Zamba Yuden nga? Asë fë Zamba bëhaiden a? Owe, anë fë Zamba bëhaiden, ³⁰ amu Zamba anë mbòg. Ṅnyè ayi bò na Yuden bëkyëbë a nkat etòm ṅyëbë waban, abò fë na bëhaiden bëkyëbë a nkat hë ai ṅyëbë. ³¹ Yë biasole hm mvende ai ṅyëbë? Tègè ai dzom! Biawone wone mvende.

¹ Biazu hm dzo na tara waan Abraham, a etye nyòl, angabi dze? ² Amu, ngë Abraham angakyëbë a nkat hë a zaṅ mimboan mie, abëlë e dzom abò enguṅ ete, dzam da së ki a mis më Zamba. ³ Amu ntilan wadzo ya? Abraham angayëbë Zamba, ndò bëngalaṅ nyè dò na akyëbë a nkat. ⁴ Bayaan ki ai mbò-esye maan asu abëṅ-nnëm, maan mënë ekola. ⁵ Asu e mod andzëki sye, ayëbëgë e mod abò na mbë mod akyëbë a nkat, ṅyëbë woe walaṅëban nyè na akyëbë a nkat. ⁶ Akyaè ya David akam e mod ya Zamba angabò na akyëbë a nkat tègè yaṅan ai mimboan, na mod te anë mvòm na: ⁷ Bënë mvòm, e ba ya minsëm miaban miadzuban, ai e ba ya minsëm miaban miabudiban; ⁸ Sombòg mvòm, e mod Nti alaṅ ki nsëm woe a taṅ. ⁹ Yë ebug mvòm dzi yatyan ai Yuden, yë yatyan ai bëhaiden? Amu biadzo na: Bëngalaṅ Abraham na ṅyëbë woe wakyëbë nyè a nkat. ¹⁰ Eyë angalaṅëban ya? Yë hala akëlëban ya, yë hala abë ki këlëban? Së hm ki a akële, dzam da a esosòli. ¹¹ Ndò hm anganòṅ ndëm akële anë tiga mëkyëbë ai ṅyëbë osusua akële, asu yë na nyè abò esya e ba bësë bayëbë, bëtoa tegè ai nkëlan, asu yë na nala olaṅëban fë bò na bakyëbë, ¹² abò hë esya akële asu e ba bafidi ki hë akële daban, dzam da a bawulu a zen ṅyëbë ya esya waan Abraham angawulu hala abë ki kelëban. ¹³ Amu Abraham ngë ki mvòṅ dzie bandzëki bi ngaga ai mvende, na si-ndon yayi nyè bò ngab-elig, ngaga te engasò a mëkyëbë ya mvende. ¹⁴ Amu ngë e bod badzala mvende mbò bënë ai elig, ṅyëbë ontoa zëzë, ngaga esole. ¹⁵ Mvende dzò yazu hm ai olun. Ngë mvende ebò mò mò hom ziṅ, mod ziṅ tègè dzò daṅ. ¹⁶ Asu te hm elig yasò a ṅyëbë, asu yë na ezu a maa, asu yë na ngaga ewoge ai mvòṅ dzie esë, së hm ki hë ai e ba ya mvende; dzam da ewoge fò fë ai e ba ya ṅyëbë Abraham, ya anë esya waan bia bësë, ¹⁷ akyaè anë ntilan na: Mëngatele wa esya abui mëyòṅ, a mis më e Zamba angayëbë, a avë bëwu enyiṅ, abò na e dzom yasëki ebò. ¹⁸ Nyè angayëbë, abëlë afidi tò e hom wayean ki fë fidi, na ayi bò esya abui mëyòṅ, mbol bëngadzo na: Na ngò mvòṅ dzoe yayi bò. ¹⁹ Andzëki tigibi a ṅyëbë, ayëmë të fë na hala nyòl dzie emana ya wu, atoa dzam bò bisëb ntèd, ayëmë fë na esog Sara emana ya wu. ²⁰ Ayënë të ngaga Zamba, ndò andzëki bò bisoo, dzam da, angamana won a ṅyëbë, avaa Zamba duma, ²¹ ayëmë mbëṅ mbëṅ na anë fë dzam bò e dzi angakag. ²² Asu te hm bëngalaṅ nyè dò na akyëbë a nkat. ²³ Adzo te landzëki tilban hë asu die etam na bëngalaṅ nyè dò, ²⁴ dzam da asu daan fë amu bayi fë bia laṅ nala, e bia ya biayëbë e nyò angakuli Yesus, Nti waan, a bëkon, ²⁵ Yesus te angakabëban asu minsëm mian, ahëlëban asu mëkyëbë man.

¹ Ngë biakyëbë a nkat etòm ṅyëbë, bibëlë mvoè ai Zamba a zaṅ Nti waan Yesus Kristus; ² A zaṅ dzie ngò fë binë dzam nyian a e maa binada ete nyi, bingabò enguṅ a afidi duma Zamba. ³ Së hm ki hë nala: Biabò fë enguṅ a mindzug, biyëmë na mindzug miabye fin, ⁴ fin ebye azombo, azombo abye afidi. ⁵ Afidi dò lakub ki mod osama, amu ediṅ Zamba enë bia nkuban a minnëm ai Mfufub Nsisim bëngavë bia. ⁶ Amu, hala te bia bingënë ntëgan, eyòṅ abog angakui, ndò Kristus angawu asu bëbe. ⁷ Amu anë hm man aye na mod awu asu sosoo mod. Mod anë hm të dzam ṅyëbë na awu asu mbëmbë mod. ⁸ Ndò hm Zamba angalëdë ediṅ a diṅ bia na, bia bitoa bësëm minsëm, ndò Kristus angawu asu daan. ⁹ Abadan afëdan na, bikyëbë a nkat ai mëki moe, ayi bia kode a olun woe. ¹⁰ Ngë eyòṅ bingabë minziziṅ mie, bingalad ai Zamba a awu mòn woe, ngamëna ai eyòṅ bilad ya dzi. Biayi kodeban a enyiṅ dzie. ¹¹ Së hm ki hë nala, dzam da, biayi bò enguṅ a bë Zamba ai Nti waan Yesus Kristus a angavë bia elad. ¹² Asu te, akyaè ya nsëm onganyian a si-ndon a zaṅ mod mbòg, awu dò anyian ai nsëm, nala ngò hm fë awu angayaman a bod bësë nala, mbol bësë bëngasëm. ¹³ Amu hala mvende yabë ki sò, nsëm ontoa ya a si-ndon, dzam da nsëm walaṅëban ki ngë mvende esëki, ¹⁴ ndò awu angadzoe atarigi abë Adam, azaag kui abë Moses; angadzoe tò e ba bandzëki sëm akyaè ya Adam angasëm. Ṅnyè hm anë ndëm e nyò angabë na azu. ¹⁵ Dzam da, së ki mbol nsëm, ngò fë efaè-akab. Amu, ngë abui bod bëngawu etòm nsëm mod mbòg, kë maa Zamba ai efaè ya maa mod mbòg, Yesus Kristus, bingabui abë abui bod! ¹⁶ Efaè yasëki anë nsëm mod mbòg. Amu ntol batsig a nsëm mod mbòg onë mëku, efaè-akab yabò na mod okyëbë a nkat tò ai abui minsëm. ¹⁷ Amu, ngë awu angadzoe etòm nsëm mod mbòg, e ba banòṅ ndzalan maa ai efaè afu-nnëm sosoo bayi dzoe a enyiṅ a zaṅ mod mbòg, Yesus Kristus fog fe? ¹⁸ Ndò hm, mbol ya etòm nsëm mod mbòg engasò ai mëku asu bod bësë, nala ngò fë etòm mëkyëbë më mod mbòg engasò ai mëkyëbë ya enyiṅ asu bod bësë. ¹⁹ Amu yë na, akyaè ya abui bod bëngavëṅan bësëm etòm mëlò më mod mbòg, nala ngò fë abui bod bayi bi mëkyëbë etòm mëwog më mod mbòg. ²⁰ Mvende engasò asu yë na nsëm obui. E hom ki nsëm obui, maa nyè fë angafuguzan, ²¹ asu yë na, e kan ya nsëm ongadzoe a awu, nala ngò fë maa adzoe ai mëkyëbë asu enyiṅ kòm a zaṅ Yesus Kristus Nti waan.

¹ Bidzo hm ya? Ye bikanga a nsëm asu yë na maa abui? ² Tègè ai dzom! E bia ya bingawu ya a nsëm, eyë binë dzam nyiṅ ete ya? ³ Yë miayëgan na, e bia ya bingaduuban abë Kristus Yesus, a awu die ngò bingaduuban? ⁴ Bingadzëban abë nyè ai ṅduan asu awu, asu yë na, akyaè ya duma esya angakuli Kristus a bëkon, nala ngò fë bia biwulu a mkpamaṅ enyiṅ. ⁵ Amu, ngë bimana ya lad ai akyaè awu die, kë biayi fë kaban akui-lë sòṅ die a! ⁶ Biayëm fò na nnomo modo waan ongabomban a klos ai nyè, asu yë na asole nyòl nsëm, na të biadugan bò olò nsëm. ⁷ Amu e nyò awu, akodeban a nsëm. ⁸ Ngë bingawu hm ai Kristus, biayëbë na biayi fë nyiṅ ai nyè, ⁹ mbol biayëm na Kristus akulëban a bëkon, ndò ayi ki dugan wu, awu ladzoe ki fë nyè. ¹⁰ Amu angawu, ndò angawu a nsëm hë eyòṅ dzidzia. Mbol hm anyiṅ, anyiṅ a bë Zamba. ¹¹ Mina fë yëman hm na minë ṅwuan a nsëm, minyiṅi ai Zamba abë Kristus Yesus. ¹² Të hm fë nsëm wabada dzoe a nyòl awu dzaan, na mivogolo miṅyian mie, ¹³ ndò fë të miabara vë bidzo bian na bibò bikpëlë bi mbë-nnëm; Vaan Zamba mina bëben anë e bënyiṅ basò a awu, mivë Zamba bidzo bian na bibò bikpëlë bi mëkyëbë. ¹⁴ Amu nsëm wayi ki fë mina dzoe. Amu miawoge ki fë ai mvende, miawoge ai maa. ¹⁵ Dze hm fë? Yë bikë biasëm, hë etòm yë na biawoge ki ai mvende, biawoge hë ai maa nga? Tègè ai dzom! ¹⁶ Nga miayëm na, eyòṅ miavëṅan mod ziṅ olò na miawog nyè, mintoa fë olò e mod miawog, ngë olò nsëm, mikëlë a awu, ngë olò mëwog, mikëlë a mëkyëbë? ¹⁷ Maa abò ai Zamba na, afyaṅan bò na mingabë olò nsëm, ndò të mingabò mëwog ai nnëm osë e kan ayègè bëngavë mina, ¹⁸ mikodeban a nsëm, mingabò olò mëkyëbë. ¹⁹ Makòbò nkòbò mod mbol nyòl dzaan enë ntëgan. Amu e kan ya mingavë bidzo bian na bibò mvit ai mbë enyiṅ esye olò akë ai mod oyab, nala ngò hm fë vaan bidzo bian etoa dzi na bibò mëkyëbë esye olò asu enyiṅ mfuban. ²⁰ Amu eyòṅ mingabë bëlò bë nsëm, mina tègè ai mëkyëbë. ²¹ Maan mëfe mingabi a e byem ya mingawog ya osòn ete bi? Amu amana daban anë hë nsëm. ²² Etoa dzi hm, mbol mingakodeban a nsëm, mibòò Zamba bëlò, mibëlë maan asu mfuban, amana daban anë enyiṅ kòm. ²³ Amu maan më nsëm mënë nsëm, efaè-akab Zamba etoa enyiṅ kòm abë Yesus Kristus Nti waan.

¹ A babëdzaṅ, -makòbò hm ai e bod ya bayëm mvende- yë miayëgan na mvende yabi mod hë ntye angënë atala? ² Amu nlugan mininga otii ai nnom hë eyòṅ nnom atala. Ngë nnom ahë wu, antoa fili ai mvende nnom. ³ Nala onë na, ntye nnom atala, nge ahë lug fam fë, abò ngòbinda. Ngë nnom ahë wu, anë fili ai mvende; abò ki ngòbinda ngë ahë lug fam fë. ⁴ A babëdzaṅ, antoa hm na mina fë mingawu a mvende a nyòl Kristus, asu yë na miwoge ai mod mfë, e nyò angakulëban a bëkon, asu yë na biwum Zamba bibuma. ⁵ Amu eyòṅ bingabë nyiṅi enyiṅ nyòl, bëbe miṅyian bë nsëm bëngabò esye a bidzo bian a zaṅ mvende, asu yë na biwum bibuma asu awu. ⁶ Etoa dzi hm, bikodeban ya a mvende, ai awu bingawu abë e nyò angabë atègè bia, bintoa hm dzam sye a mkpamaṅ nsisim, së ki a nnomo ekaṅa kaba. ⁷ Bidzo hm ya? Yë mvende enë nsëm? Tègè ai dzom! Hë da, ngë tègè ai mvende, ma tègè yëm nsëm. Amu mëngabë ki dzam yëm mbë-ṅyian, ngë mvende ebò tègè dzo na: Të wayi ezaa dzom. ⁸ Nsëm ongayen zen a mvende, omana ma dzala ai miṅyian misë mingakë. Ngë tègè ai mvende, nsëm onë ṅwuan. ⁹ Okoba, mëngabë të hm mënyiṅi tègè wodan mvende. Ṅnyie anë mvende engasò, ndò nsëm ongatari na waanyiṅ, ¹⁰ ma, mëwuu, ndò e mvende engabë na yakë ai ma a enyiṅ engakë ai ma a awu. ¹¹ Amu nsëm ongayen zen a mvende, odugu ma, mëngawu ete. ¹² Dzam da mvende eben enë mfufub, abende atoa mfufub ai sosoo, ai mbëṅ. ¹³ Yë e dzom enë mbëṅ engasò ai ma awu? Tègè ai dzom! Nsëm, asu yë na nsëm ongakui a ngëëṅ, ongasò ai ma awu a zaṅa bende. ¹⁴ Amu biayëm na mvende enë dzam ya nsisim, ma mënë hm mod minson ya mëngakaban a ewoge nsëm. ¹⁵ Amu mayëm yëm ki e dzam mabò. Amu së ki e dzom mahan ndzò mabò; hë da, e dzi mafëm, ndzò mabò. ¹⁶ Ngë e dzom mayi ki, endzò mabò, mënë hm kiṅa i mvende na enë mbëṅ. ¹⁷ Antoa hm na, së ki fë ma mabò dò; nsëm otoa ma a nyòl ngò wabò dò. ¹⁸ Amu mayëm na e dzom enë mbëṅ yatoa ki abë ma, nala watyan na, a nyòl dzama. Amu ṅyian ngò onë ebugbu, mboan mbëṅ tègè ai wò nala. ¹⁹ Amu mabò ki mbëṅ mayi, abe mayi ki, ndò mabò. ²⁰ Ndò hm, ngë mabò e dzi mayi ki, së hm ki fë ma mabò dò; nsëm otoa abë ma ngò wabò dò. ²¹ Mëngasòm hm e mvende nyi na: Eyòṅ mayi na mabò mbëṅ, abe antoa ma babi. ²² Amu mawog mintag ai mvende Zamba asu nnëm wama. ²³ Dzam da ndò mayen mvende fë a bidzo biama, mvende te yaluman ai e mvende ya nnëm wama ete, ndò fë yabi ma nkom a e mvende nsëm ya enë ma a bidzo biama. ²⁴ Ngò ma e! Za hm angâkode ma a e nyòl awu nyi? ²⁵ Maa ai Zamba a dzoe Yesus Kristus Nti waan. Antoa hm na, hë ma ma, masye mvende Zamba a nsisim, ma fë mësye mvende nsëm a nyòl.

¹ Antoa hm na, ntol mëku ziṅ wasëki asu e bod bënë abë Kristus Yesus. ² Amu mvende nsisim enyiṅ abë Kristus Yesus engakode wa a mvende nsëm ai awu. ³ E dzam mvende engabë ki dzam bò mbol engamana tëg etòm nyòl, Zamba abò dò: Angalom mòn woe, anòṅò nyòl nsëm, na avaè nsëm, ndò angatègè nsëm a nyòl, ⁴ asu yë na abende nsëm adzalëban abë bia ya biawulu ki anë nyòl yayi, biwulugu anë nsisim wayi. ⁵ Amu e bod bënë a edzoe nyòl, batsog fë hë mam më nyòl; e ba ki bënë a edzoe nsisim, batsog mam më nsisim. ⁶ Amu nyòl yakë ai mod a awu, nsisim okëlë ai nyè a enyiṅ ai mvoè. ⁷ Asu te, e dzam nyòl yadaṅ yag ai dzò, laluman ai Zamba, amu layëbë ki mvende Zamba, dzam te labëlë ki ngul ya ayëbë dzò. ⁸ E bod banyiṅ enyiṅ nyòl basëki dzam nyëb Zamba a nnëm. ⁹ Mina, miasëki bod bë nyòl, minë bod ya nsisim ngë nsisim Zamba otoa abë mina. Ngë mod ziṅ abëlë ki nsisim Kristus, e nyòlò te awoge ki ai nyè. ¹⁰ Ngë Kristus anë abë mina, nyòl enë ṅwuan asu nsëm, nsisim otoa enyiṅ asu mëkyëbë. ¹¹ Ngë nsisim e mod angakuli Yesus a bëkon otoa abë mina, e mod angahëlë Kristus a bëkon nyè fë ayi vë biwuwu bi nyòl bian enyiṅ mbol nsisim woe otoa abë bia. ¹² A babëdzaṅ, antoa hm na, biabëlë ki nyòl ekola ziṅ, na bikë të nyiṅ anë nyòl yayi, ¹³ amu ngë mianyiṅ anë nyòl yayi, miayi wu. Ngë miwoe hm mimboan mi nyòl a nsisim, miayi nyiṅ. ¹⁴ Amu e ba ya nsisim Zamba walëdë zen, e bala bëte bënë bòn bë Zamba; ¹⁵ Amu miandzëki dugan nòṅ nsisim wòṅ, dzam da minganòṅ nsisim ya etye bòn; abë nsisim te ngò biayedan na: Abba, a tara! ¹⁶ Nsisim te oben ngò wabòòlò a nnëm waan na binë bòn bë Zamba. ¹⁷ Ngë binë hm bòn, binë fë bëkaban bë elig. Mbol binë bëkaban bë elig Zamba, biakaban dzò ai Kristus, ngë bibi mintye ai nyè, asu yë na binòṅ ngab a duma die. ¹⁸ Mayen na mintye ya abog binë di miavëgan ki ai e duma layi kulan a ngëëṅ a bë bia. ¹⁹ Amu bikokoma bisë biayanga abui na biayen anë bòn bë Zamba bayene a ngëëṅ. ²⁰ Amu bikokoma bingatòbò a edzoe bivovolan bi mam, së hm ki na bidaṅ adiṅ nala, hë asu e nyò adzoege biè, bibëlë të afidi na ²¹ bikokoma bite biayi kodeban a esye olò ya ndon, bikë a fili duma bòn bë Zamba. ²² Biayëm na si-ndon esë yatad, ebëlë mintye mi nkogolo akui ana. ²³ Së hm ki hë nala, dzam da, bia bëben bibëlë bifaè bi osu ya abë Mfufub Nsisim, bia bëben biatad a minnëm etere biyanga na bibò bòn bë Zamba, ai akode nyòl dzaan. ²⁴ Amu bingakodeban a afidi. Afidi ya bayen asëki afidi. Amu, za afidi e dzom ya ayen? ²⁵ Ngë biafidi hm e dzi ya biayen ki, bingayanga hm, bibana nnëm. ²⁶ Dzam dëda fë, nsisim wakad vòli atëg daan. Amu biayëm ki kogëlan mbol wayean, dzam da nsisim wakogëlan asu daan ai e kan biyëga ya mod asëki dzam fala. ²⁷ E mod asoṅ minnëm ayëm akyaè ṅyian onë a nsisim, amu akogëlan asu daan e kan Zamba adiṅ. ²⁸ Biayëm na, asu e bod badiṅ Zamba, dzom esë yakë mana mbëṅ, amu angaloe bò a ṅyian woe. ²⁹ Amu e ba angatari yëm osusua, atele fë bò na bëfulan ai mòn woe, asu yë na abò ntol mòn a zaṅa bui babënyaṅ. ³⁰ E ba ya angatòb nala, mbò fë angaloe. E ba ya angaloe, mbò angatele a etye sosoo, mbò angavë duma. ³¹ Bidzo hm adzo di ya? Ngë Zamba anë ai bia ngam, za ayi luman ai bia? ³² Emen nyè andzëki kaman ai mòn woe emen, ndò angakab kab nyè asu bia bësë. Eyë ayi bia bò të vë byem bisë abë nyè ya? ³³ Za ayi sòman e ba ya Zamba angatòb? Zamba ṅnyè hm atele a etye sosoo. ³⁴ Za ayi kpèè a adzo? Kristus Yesus angawu, abadan afëdan, akui a sòṅ, ṅnyè anë a mbo-nnomo esya, akogëlan asu daan. ³⁵ Za ayi bia kandan ai ediṅ Kristus? Yë mindzug, yë nsaṅan, yë etibili, yë zie, yë nsò, yë abe ziṅ, yë nyamëla okëṅ? ³⁶ Akyaè anë ntilan na: Etòm dzoe endzò biawu nguma ntye amos, bëngatele bia etye mintomba ya bakë tsig. ³⁷ Tègè hm fò, amu a e mam mësë ma, biadò a dzoe e nyò angadiṅ bia. ³⁸ Mayëm mbëṅ mbëṅ na, tò awu, tò enyiṅ, tò benglès, tò bidzoe, tò e bi bingalod, tò e bi biazu, tò mingungul, ³⁹ tò yob, tò ndon, tò ekokoma efë yasëki bia dzam kandan ai ediṅ Zamba ya enë abë Kristus Yesus Nti waan.

¹ Bëbëla ṅnyè makad mina abë Kristus nyò; madug ki. Sosoo ya nnëm wama abòòlò ma a nnëm ² na nnëm onë ma ndzugulan abui, ndò fë mintye minë ma a nnëm kòm esë. ³ Amu mënë dzam kogëlan na mamen mëbëgë eyòg yatsam ma ai Kristus, hë asu e babëdzaṅ mëvuman ai bò a mëki, ⁴ mbò bënë bòn bë Israel, mbò bawoge ai etye bòn bë Zamba, ai duma, ai ngaga, ⁵ mbò bawoge ai bëtara; abë bò ngò Kristus atye mfag ya nyòl, ṅnyè alod byem bisë; Zamba ya aluguban a bisëb bisëb, amen. ⁶ Nala watyan ki na ebug Zamba engaku a fud. Amu së ki e bod bësë babyali abë Israel mbò bënë Israel. ⁷ Ndò fë së ki mbol bënë mëki më Abraham ndò bò bësë bënë bòn, hë da abë Isaak ngò wayi bi mvòṅ dzoe. ⁸ Nala watyan na, së ki bòn ya nyòl mbò bënë bòn bë Zamba, dzam da bòn bë ngaga mbò bayi loe na mvòṅ. ⁹ Ebug ngaga hm dzi: Akyaè abog di, a mayi sò, Sara ambëlë ya mòn. ¹⁰ Së ki hë nala, dzam da, Rebekka anganòṅ abum ai fam dzia, Isaak, esya waan. ¹¹ Amu, hala te babë ki byali tò ki abò e dzi enë abe ngë mbëṅ, asu yë na ṅyian Zamba otòbò anë angayi, ¹² së ki asu mimboan, hë asu yë na Zamba angaloe, ndò bëngakad nyè na: Ntol wayi sye mëligi-mvua, ¹³ akyaè anë ntilan na: Mëngadiṅ Yakob, mëfëmë Esau. ¹⁴ Bidzo hm ya? Yë ebom-kama enë abë Zamba? Tègè ai dzom! ¹⁵ Amu adzo ai Moses na: E mod mëdzo na mayen ngòl, ṅnyè mayen ngòl, e nyò madzo na mawog mintye, ṅnyè mawog mintye. ¹⁶ Antoa hm na, së ki na mod wayi daṅ yag, ngë ambara mbil, anë hë na Zamba ayen ngòl. ¹⁷ Amu ntilan wadzo ai Farao na: Asu te matele wa, asu yë na mëtoan kuli ngul dzama a ngëëṅ a bë wa, ai na bëyëdan dzoe dama a si esë. ¹⁸ Antoa hm na, e nyò adiṅ na ayen ngòl, ayënë nyè ngòl, e nyò ki adiṅ, avëë nnëm alèd. ¹⁹ Wayi hm dzo ai ma na: Dze hm fë adzëṅ bia bidzo? Za anë kanga a ṅyian woe? ²⁰ A mod binam, a bëbëla fò, wa onë za na wafëdan ai Zamba? Yë ekokoma yadzo ai nkomo na, a dze ongakom ma e kan nyi? ²¹ Yë na mmè mëmvie abëlë ki ngul ya amam ekòn dzie mbol adiṅ; eyòṅ dzia akomo sug ya abëṅ mvie, eyòṅ evòg dzili akomo zëzë mvie? ²² Ndò dze ben ki ngë Zamba ayi na akuli olun woe, alëdë fë ngul dzie, ndò të angadzibi e mëmvie më olun mëngabë nkoman na mandaman ai abui fin, ²³ ai asu yë na alëdë akuma duma die asu mëmvie më ngòl ya angatari komëzan asu duma? ²⁴ Bia hm angaloe kan te, së ki hë a zaṅ Yuden, tò fë a zaṅ bëhaiden, ²⁵ akyaè adzo a kalara Osea na: Mayi loe e nyò angabë ki ayòṅ dama na ayòṅ dama. E nyò bëdiṅi ki, mëloe na ndindiṅ wama. ²⁶ Ndò hm layi bò na, e hom bëngakad bò na: Miasëki ayòṅ dama, Etere ngò bayi bò loe na: Bòn bë e Zamba ya avëë. ²⁷ Isaias ayedan fë asu Israel na: Tò taṅ bòn bë Israel ebò anë nsëlëg ya maṅ, hë man abim ṅnyè ayi kodeban. ²⁸ Amu Nti ayi bò na ebug dzie eyenëban, atsig adzo abog etun. ²⁹ Ndò fë akyaè ya Isaias angabende osusua na: Ngë Nti bëzimbi abò të bia lig mvòṅ, ngë bintoa ya anë Sodoma, bingafulan fë ai Gomorra. ³⁰ Bidzo hm ya? Biadzo na: bëhaiden ya bëdzëṅë ki mëkyëbë bëngabi mëkyëbë mëte, mëkyëbë ya masò a ṅyëbë, ³¹ Israel nyè atoṅo mvende mëkyëbë, ndò andzëki bi mvende. ³² Etòm dze? Amu bandzëki dò bò a ṅyëbë, bëbò hë anë lasò a mimboan. Bëngatobe a ngòg baku mimbëg, ³³ akyaè anë ntilan na: Yënë sik, matele ekòli obag ai akòg lasòṅ bod a nsëm a Sion; e mod ayi dò yëbë, angasama ki.

¹ A babëdzaṅ, e dzam nnëm watam ma ai e ngogëlan makogëlan ai Zamba asu daban bisë binë asu akode daban. ² Mabòòlò fò asu daban na bënë evag asu mam më Zamba, dzam da evag te etoa ndimi. ³ Amu bayëgan sosoo Zamba, hë da badzëṅ na balaṅan a sosoo waban, bò të dzoge na edzoe sosoo Zamba edzoe bò. ⁴ Amu Kristus anë mëmana më mvende, mëkyëbë asu e mod osë ayëbë. ⁵ Amu Moses atil adzo mëkyëbë ya mvende na: E mod abò mò, ayi nyiṅ asu mam mëte. ⁶ E mëkyëbë masò a ṅyëbë madzo na: Obë dzo a nnëm woe na, za ayi bed a yob? nala watyan na akë bò na Yesus asus a si. ⁷ Ngë ki na: Za ayi sus a mbimbiṅ asi? Nala watyan na, akë sòṅ ai Kristus a bëkon. ⁸ Ndò hm wadzo ya? Ebug enë wa babi, a anyu doe ai a nnëm woe, nala watyan na ebug ṅyëbë ya biabende. ⁹ Amu ngë wamëm ai anyu doe na Yesus anë Nti, oyëbëgë fë a nnëm woe na Zamba angavëlë nyè a bëkon, wayi kodeban. ¹⁰ Amu mod ayëbë ai nnëm asu mëkyëbe, amëmë ai anyu asu akode. ¹¹ Amu ntilan wadzo na: E mod osë ayëbë nyè, angâsama ki. ¹² Amu dzom yasëlan ki a zaṅ man Yuden ai man Grek, amu nyè anë Nti bësë, anë mvam asu e ba bësë baloe nyè. ¹³ Amu e mod osë ayi loe dzoe Nti ayi kodeban. ¹⁴ Eyë hm bayi loe e nyò bandzëki ṅyëbë ya? Eyë bayi ṅyëbë ya ngë bandzëki wog? Eyë bayi wog ya, tègè ai e mod ayedan bò dò? ¹⁵ Eyë bayi yedan ya ngë bandzëki bò lom? Akyaè ya anë ntilan na: Mënyëbëg a dze, mëkol më e bod bayedan mimbëmbë mi mam! ¹⁶ Ndò hm, së ki bësë mbò babye mbëmbë foe. Amu Isaias adzo na: A Nti, za angayëbë e dzam bingayedan? ¹⁷ Antoa hm na ṅyëbë wasò e foe wawog, foe te etoa e mam matyan ai Kristus. ¹⁸ Mëngasili hm na: Yë mbol yë na bandzëki wog? Bëngawog fò: Kiṅ dzaban engayaman a si esë, bibug biaban biyaman a mëbug më si mësë. ¹⁹ Mëngasili fë na: Dze yë Israel andzëki yëm nga? Moses nyè angatari dzo na: Mayi mina bò na mikombo man zëzë nnam, mayi bò na nnëm odig mina asu man nnam anë tègè ai fëg. ²⁰ Isaias nyè akë kë osu, nyè na: E bod bambë dzëṅë ki ma bëyen ya ma, E ba basiligi ki ma, mëkuli bò mamen a ngëëṅ. ²¹ Adzo ai Israel na: Nguma amos hë mësama ayòṅ mëlò ai nnëm alèd di mò.

¹ Mëngasili hm na: Dze, yë Zamba angaben ayòṅ die? Tègè ai dzom! Amu mamen mënë man Israel, a mëki më Abraham, a nda-bod Benyamin. ² Zamba andzëki ben ayòṅ die ya angatari yëm. Ndò ki, dze yë miayëgan e dzam ntilan wadzo abë Elias, eyòṅ angasòman Israel abë Zamba? ³ A Nti, bëprofèt boe, bëwoe; bë alatar boe, bëmana ndaman; mfag wama, mëligi ya ma etam, ndò fë bëngadzëṅ ya ma ai awu. ⁴ Dze ebug Zamba yayalan nyè ete? Mëtòb asu dama mamen, bod bakuda zamgbal, mbò bandzëki kud Baal mëbòṅ a si. ⁵ Nala ngò hm fë etoa bitoa dzi, man abim ya anë ntòban a afu-nnëm anë hala. ⁶ Ngë anë ntòban a afu-nnëm, së ki hm fë ai ngul mimboan, amu ngë tègè ai nala, afu-nnëm asëki fë afu-nnëm. ⁷ Antoa hm ya? E dzi ya Israel adzëṅ, andzëki dzò bi. E bod bënë ntòban bëbi dzò. E ba bëvòg bënë alèd-nnëm, ⁸ akyaè anë ntilan na: Zamba angavë bò nsisim oyò, avëë bò mis asu yë na të bayen, mëlò asu yë na të bawog, azaag kui a mos di. ⁹ Ndò David adzo na: Tëbëlë bidi waban avëṅan olam ai avòd, ai e hom baku mimbëg ai bivudëga asu daban, ¹⁰ mis maban mëbòò a nkut ete na të bayen, bëbugu mvus tègè vòd. ¹¹ Mëngasili hm na: Yë bëngafè mbëg asu yë na bëku? Tègè ai dzom! Dzam da, e zaṅ bëngaku, ndzò akode angasò bëhaiden asu yë na bëwu bò kombo. ¹² Ngë nsëm waban onë akuma si-ndon, evus dzaban etoa akuma bëhaiden, biyòṅ taṅ ya ngë bò bësë bayëbë ana! ¹³ Mina bëhaiden madzo ai bò. Mbol anë na ma mënë apostel bëhaiden, malugu esye dzama, ¹⁴ mëfidigi na kamëna ayòṅ dama layi kombo nala, ma mëkode fë bëvòg ya ete. ¹⁵ Amu ngë eyòṅ baben bò, nala wabò na bëlad ai si-ndon, nga eyòṅ bayëbë bò nala watyan na enyiṅ yasò bod a bëkon? ¹⁶ Ngë bibuma bi osu binë mimfufub, ekò fë dzam dëda. Ngë minkaṅ minë mimfufub, mintëm fë dzam dëda. ¹⁷ Ngë mintëm miziṅ mingabugi, a wa ya onë ele efë, a bëhë bëm wa a mintëm mite, ontoa onyaag e mëndim masò a minkaṅa si ele, ¹⁸ wayean ki bò enguṅ a nyòl mintëm. Eyòṅ hm wakë bò enguṅ, së ki wa obëgë minkaṅ, minkaṅ mmiè mibëgë wa! ¹⁹ Wayi kë dzo na ’mintëm mingabugi asu yë na mëbëmban’. ²⁰ Nala onë fò mbëṅ! Bëngatsigiban asu tègè ai ṅyëbë, wa oyëmë etoa te asu ṅyëbë. Obë daṅ tsog e mam malod wa, bò hë wòṅ. ²¹ Amu, ngë Zamba andzëki kaman ai mintëm miawoge ai ele, tò wa, ayi ki kaman ai wa. ²² Yënë anë Zamba anë afu-nnëm, atoa fë ayòg. Anë ayòg ai e ba bëngaku. Afu-nnëm Zamba anë wa a nyòl, ngë obò mban a afu-nnëm; ngë tègè ai nala, wayi tsigiban. ²³ E bali hm, ngë bandzëki laṅan a enyiṅ dzaban enë tègè ai ṅyëbë, bayi dugan bëmban a ele. Amu Zamba abëlë ngul ya adugan bò bëm. ²⁴ Amu, ngë e wa ya onë na bëngatsig wa a ele afan, bësòò wa bëm nala a mbëmbë ele, ngamëna ai e bò ya bawoge ai nala, bayi bò dugan bëm a ele dzaban! ²⁵ A babëdzaṅ, mayi ki fò na miyëgan e ndimba nyi, asu yë na mibindi ai fëg, na alèd-nnëm anë a ngab ziṅ a Israel, akëlë kui anë bëhaiden bësë bamana nyian, ²⁶ abog te hm Israel osë ayi kodeban, akyaè anë ntilan na: Nkode ayi tye a Sion, amana vaè ebyandi ya abë Yakob. ²⁷ Amvoe ya malad ai bod di, eyòṅ mayi vaè minsëm miaban. ²⁸ Asu mbëmbë foe, bënë minziziṅ a mfi waan, asu ntòban, bënë mindindiṅ etòm bëtara. ²⁹ Amu bifaè bi akab Zamba ai ntòban woe biasëki odali. ³⁰ Amu akyaè ya mingabò Zamba mëlò okoba, Zamba ayënë mina ngòl etoa dzi asu mëlò maban, ³¹ ndò hm bò fë bënë mëlò etoa dzi asu yë na bëyen bò ngòl asu ngòl dzan. ³² Amu Zamba angafèd bod bësë a mëlò ete asu yë na adugan fë yen bësë ngòl. ³³ Abim edòg te! Edòg akuma, ai fëg, ai ṅyëman Zamba! Mintsogan mie mibui ndimba adze! ³⁴ Amu, za angayëm ntsogan Nti? Za ki angavë nyè mëlëbëga? ³⁵ Za angatam nyè vë, angayanga na bëyaan nyè ekola te? ³⁶ Amu byem bisë biatye abë nyè, bitoa ai ngul dzie, ndò fë biakë abë nyè. Duma ai nyè a bisëb bisëb, amen.

¹ A babëdzaṅ, makogëlan ai mina, a ngòl Zamba, na mituni Zamba nyòl dzaan anë abëṅ mëtunëṅa mëvëë; olugu waan ya nsisim nyòlò. ² Ndò të miabie e si-ndon nyi, dzam da, tsendëgan, ai ntsendan ya nnëm, asu yë na mitoan yëm akyaè ṅyian Zamba onë, e dzi enë mbëṅ, ai e dzi yanyëb a nnëm ai e dzi enë të ai atòn. ³ Amu makòbò ai mod osë ya abë mina a ngul e maa ya bëngavë ma, na të miadaṅ kam mina bëben alodo anë mod onë dzam tsog, dzam da tsogan abim layean ai nnëm, akyaè ya Zamba angavëg mèra ṅyëbë asu mod osë. ⁴ Amu akyaè ya bibëlë abui bidzo a nyòl dzia, bidzo bisë tègè ai asu-esye dzam dëda, ⁵ nala ngò fë bia abui binë nyòl dzia abë Kristus, anë mod atoa edzo asu e ba bëvòg. ⁶ Bibëlë bifaè bi akab mëkyaè mëkyaè asu e maa bëngavë bia, ngë efaè nkòbò profèt, asu nkoṅ ṅyëbë, ⁷ ngë ki na efaè esye asu esye te; ngë efaè na mod anë ṅyëgëlë, angayëgëlë, ⁸ ngë na avòli bod, angavòli bò. E mod abò akab, abò dò ai nnëm mòngò, e nyò anë ntëbë-osu, abò dò ai evag, e nyò ayen ngòl abò ai mintag. ⁹ Të ediṅ dzaan yabò e dzi mëdugan. Mitubu abe, milad ai mbëṅ, ¹⁰ boan evag a ediṅ miadiṅan mina mina, mikama e mod mbòg abui a mina mina, ¹¹ të bò ndzëm a evag, miyoṅo a nnëm ete, misye Nti, ¹² mifono ai afidi, mibò fin a mindzug, mibò mban a ngogëlan, ¹³ mivòligi dzala miṅyian mimfufub, midzëṅë afaṅ. ¹⁴ Fubugan e bod batibili mina, fubugan bò, të miakag bò. ¹⁵ Mitaga ai e ba batag, miyono ai e ba bayon. ¹⁶ Boan kiṅa zaṅ mina mina, të daṅ yag ai e mam mënë a yob abui, midzëṅë e mam mënë edzòdi-nyòl. Të miadaṅ kë kud ongon. ¹⁷ Të miadugan mod ziṅ abe asu abe, mikam e mam mënë mbëṅ a mis më bod bësë. ¹⁸ Ngë adzo te anë mina ebugbu, nyiṅan mvoè ai bod bësë. ¹⁹ A mindindiṅ miama, të miakun mina bëben, dzam da, dzogan olun Zamba obò esye dzie, amu anë ntilan na: Ma mënë ai mëkunëṅa, ma fë mayi vë maan, Nti ṅnyè akòbò nala. ²⁰ Dzam da, ngë nziziṅ woe wawog zie, vaa nyè bidi, ngë awog ekode, vaa nyè e dzom anyu; amu eyòṅ wabò nala, wakoman nyè maag më ndoan a nlo a yob. ²¹ Obë dzoge na abe atègè wa, dzam da tèègè abe ai mbëṅ.

¹ Mod osë abòò edzoe nen mëwog. Amu edzoe yasò hë abë Zamba, ndò Zamba ṅnyè atele bidzoe bisë. ² Asu te, e mod abò ki edzoe mëwog, aluman ai tëbëga Zamba; e bod bësë babò mëlò nala bayi ku a nkat. ³ Amu e mod asye mbëṅ a mbara ki bëdzoe. E nyò asye abe ṅnyè ambara bëdzoe. Ngë wayi ki na ombara edzoe, bòò mbëṅ, wayi bi mëtamëna ete. ⁴ Amu bëdzoe basye Zamba asu mbëṅ woe. Ngë obò hm e dzam anë abe, mbarëga. Amu abëgë ki nyamëla a zëzë. Amu anë mbò-esye Zamba, abaala ntol woe, olun ontoa asu e mod abò abe. ⁵ Wayean bò mëwog, së ki hë asu olun, dzam da asu sosoo ya nnëm fë. ⁶ Asu te, yaan toya. Amu e bod babò esye nnòṅan toya bënë bësye bë Zamba a ete. ⁷ Yaan ai mod osë ekola dzie, miyaan toya ai e mod anë ai nyè, miyaan ntòlò abë e mod awoge ai nyè; e mod miayean kam, mingakam, e mod miayean lugu, mingalugu. ⁸ Të miabi mod ziṅ ekola ziṅ, së na ekola na miadiṅan mina mina. Amu e mod adiṅ e nyò mbòg adzala ya mvende. ⁹ Amu e mëmvende ma: Të wabò bisog, të wawoe, të wadzib, të wayi ezaa dzom, ai e memvende mëvòg, mënë hë a ebug dzia dzi: Odiṅi e mod mbòg anë wamen. ¹⁰ Ediṅ wadiṅ e mod mbòg yabò ki abe. Ediṅ enë nguma mvende osë. ¹¹ Kë miatoan hm yëm abog di na awola akui ya bia na bihëbë a oyò, amu akode antoa ya bia babi abui alodo eyòṅ bingasò a ṅyëbë. ¹² Alu angakë ya, amos ongasubu ya. Ndzogan bisye bi dibi, bibòd bikpëlë bi mfyè. ¹³ Wulugan tëtëlë anë biawulu ai amos, tègè ai abui ndian ngë mënyu, tègè ai adzo bibòn ngë ebamba, tègè ai zuṅa ngë mëkomga, ¹⁴ bòdan fò Nti Yesus Kristus; të miandëṅa i ntsogan mam më nyòl ya madzugulu mina miṅyian.

¹ Nòṅan e mod ṅyëbë woe onë ntëgan ai osësa, tègè daṅ a kë mialaṅëdan. ² Mod ziṅ nyòlò ayen na anë dzam di kan bidi esë, e nyò anë ntëgan adi hë bitutuga. ³ Të e nyò adi bisë abyandi e nyò adi ki; të e nyò adi ki adzòs e nyò adi; Amu Zamba anganòṅ nyè ai osësa. ⁴ Wa onë za na wazu dzòs ezaa mbò-esye? Tò atëlë, tò aku, adzo Nti woe. Ayi hm tëbë, amu Nti abëlë ngul ya atele nyè. ⁵ Mod ziṅ nyòlò afyal mëmos, e nyò mbòg nyè ayen na mënë dzam dëda. Mod osë ya ete akanga a ediṅ ya ayëbë a nnëm. ⁶ E mod afyal mëlu, abò dò asu olugu Nti. E nyò adi, adi asu olugu Nti, amu akaṅ Zamba. ⁷ Amu mod mbòg ziṅ ya abë bia anyiṅ ki asu die emen, ndò fë mod ziṅ awu ki asu die. ⁸ Eyòṅ hm bianyiṅ, ṅnyiṅan asu Nti, eyòṅ biawu, ṅwaan asu Nti. Tò bianyiṅ, tò biawu, biawoge ai Nti. ⁹ Amu asu te ndò Kristus angawu ndò fë anganyiṅ, asu yë na abò Nti bëwu ai bënyiṅ. ¹⁰ A wa, dze ben watsig manyòṅ ntol? Dze ben ki wabyandi manyòṅ? Amu bia bësë biayi tëbë a etoa ntsigi ntol Zamba osu, ¹¹ amu anë ntilan na: Sòṅ hë anë mënë na, Nti ṅnyè akòbò nala, mëbòṅ mësë mayi ma kudëban a si, ndòṅ fë oyëm osë wayi ma kaṅ. ¹² Ndò hm mod osë ya abë bia ayi tye ndò dzie emen. ¹³ Të biabad hm tsigan ntol bia bia, dzam da ṅyilan na mod ayi ki bò na manyaṅ aku, ngë asogolo nyè a nsëm. ¹⁴ Matoan yëm mbëṅ mbëṅ abë Nti Yesus na dzom ziṅ esëki eboe ai eben. Asu e mod atsog na dzom te enë eboe, enë hm fò eboe asu die. ¹⁵ Amu ngë manyòṅ awog e dzom wadi abe, wa wawulu ki fë a zen ediṅ. Dzoge kë ai e nyò ya Kristus angabudan ai nyè a elëlëb hë asu bidi. ¹⁶ Të miabò na adzo daan ya anë mbëṅ a zu ai mina emgbaṅ a nyòl. ¹⁷ Amu edzoe Zamba esëki bidi ai mënyu, enë mëkyëbë, ai mvoè, ai mintag abë Mfufub Nsisim. ¹⁸ Amu e mod asye Kristus hala, anyëb Zamba a nnëm, bod bëkama fë nyè. ¹⁹ Ndzëṅan hm mam më mvoè ai mam më eka a zaṅ dzaan. ²⁰ Të wakë ndaman esye Zamba asu bidi. Bidi bisë binë fò mfuban, dzam da bitoa abe asu e mod adi, asogolo manyaṅ a nsëm. ²¹ Anë mbëṅ na të wadi tsit, ngë ki anyu mëyòg, ngë abò ki e dzom manyòṅ aku mbëg ete. ²² Mfa woe, ṅyëbë woe obò a zaṅ mina Zamba. Mvòm ai e mod nnëm wakòṅan ki ai nyè e mam atsog. ²³ E mod anë na, asë osu anë a mvus, ngë adi fë, aku a nkat, amu abò ki dzam te a ṅyëbë. E dzom esë yatye ki a ṅyëbë enë nsëm.

¹ E bia ya binë ngul, biayean bëgë atëg e ba bënë ntëgan, tègè dzëṅ mintag mian. ² Mod osë adzëṅë na anyëb manyaṅ a nnëm, asu mbëṅ, biwonan bia bia. ³ Amu Kristus andzëki dzëṅ hë mintag mie, hë mbol anë ntilan na: Mëtè më e bod bëtèè wa mëngakubi ma a nyòl. ⁴ E mam mësë mëngatilban okoba, mëngatilban asu ayëgëlë daan, asu yë na bibi afidi ai azombo ai evòli yasò a ntilan. ⁵ Zamba azombo ai evòli avaa mina na mitsog a zaṅ dzaan anë Kristus Yesus, ⁶ asu yë na, mina bësë nnëm mbòg mbòg, milugu Zamba ai esya Nti waan Yesus Kristus. ⁷ Asu te bëlan mina mina ai osësa, akyaè fë Kristus angabëlan ai mina asu duma Zamba. ⁸ Amu madzo na Kristus angavëṅan olò Yuden asu bëbëla Zamba, asu yë na ayin e ngaga bëtara bëngabi, ⁹ na bëhaiden bëvë Zamba olugu asu ngòl, akyaè anë ntilan na: Asu te mayi wa taman a zaṅ bëhaiden, mëyiègè fë bia asu olugu dzoe doe. ¹⁰ Ndò fë adzo na: A mëyòṅ, fonan ai ayòṅ di. ¹¹ Adzo fë na: A mëyòṅ mësë, taman Nti, mëyòṅ mësë mëtaman nyè. ¹² Ndò fë Isaias adzo na: Nkaṅ ya nda Yese wayi faè, ngò wayi dzoe mëyòṅ, mëyòṅ mësë mayi nyè fidi. ¹³ Zamba afidi adzalëga mina ai mintag misë, ai mvoè a ṅyëbë, asu yë na mifuguzu a afidi, ai ngul Mfufub Nsisim. ¹⁴ A babëdzaṅ, mamen mayëm fò mbëṅ mbëṅ na, mfa waan, midzie ya ai abëṅ nnëm a tuud, mintoa ntud ai ṅyëman osë, ndò fë mibëlë ngul ya avean mëlëbëga. ¹⁵ Dzam da, mëtil mina ai kiṅ mvam a mëboda mëziṅ na mëdugan mina dò tsog, ai e maa Zamba angavë ma ¹⁶ asu yë na mëbò mbò-esye Yesus Kristus asu bëhaiden, mëbò esye mbëmbë foe Zamba asu yë na mëtunëṅa bëhaiden mëbò akyaè layean, mëfuban fë abë Mfufub Nsisim. ¹⁷ Mëbëlë e dzom mabò enguṅ ete abë Yesus Kristus: esye masye Zamba. ¹⁸ Amu mabëlë ki e dzom mënë dzam laṅ, a Kristus andzëki bò a mò mama, asu yë na bëhaiden bëbò mëwog, tò a nkòbò, tò a mboan, ¹⁹ ai ngul mësimba ai biyëṅ bi mam, ai ngul Nsisim Zamba. Nala ngò mamana bò esye mbëmbë foe Kristus, atarigi a Yerusalem, mëkilan a ngòdò esë akëlë kui a Iliria, ²⁰ ndò mëngayag na mëyedan mbëmbë foe e hom ongabë na babë ya ki yëm dzoe Kristus, asu yë na mëzaa kë loṅ e hom mod mfë angatari mëloṅ, ²¹ akyaè anë ntilan na: E bod ya bambë ya ki kad adzo doe, bayi yen; E ba ya bandzëki tam wog, bayi wog. ²² Asu te ndò mabë ya ki bi abog na mazu abë mina. ²³ Dzam da, mbol mabëlë ki fë e hom masye e minnam mi, ndò fë mbol atarigi abui mimbu ana, mazu ya mayi du na mazu abë mina, ²⁴ eyòṅ makë a Kpanya. Amu mafidi na mayi lod hala, mëyenë mina, abog te mëtye abë mina hala ai bikaè eyòṅ mëmana ya tòbò ai mina man eban. ²⁵ Etoa dzi, makë a Yerusalem ai atom asu mimfufub. ²⁶ Amu Masedonia ai Akaia bëngayen na bayean lëdë eka dzaban e mimbubua minë a mimfufub ya Yerusalem. ²⁷ Bëngayili nala, ndò fë bëngabë bëbëlë ekola. Amu mbol bëhaiden bëngabi ngab a bifaè biaban ya nsisim, bò fë bëbëlë na bësye bò a mam më mò. ²⁸ Eyòṅ mayi mana bò adzo te, mëkalan fë bò eka dzi, mëtye ai e dulu makë a Kpanya, mëlod abë mina. ²⁹ Amu mayaṅan na eyòṅ mazu abë mina, mazu ai nsalan Kristus ntud. ³⁰ A babëdzaṅ, makogëlan ai mina a dzoe Nti waan Yesus Kristus ai ediṅ Nsisim na mibaman ai ma a ngogëlan asu dama abë Zamba, ³¹ asu yë na mëkodeban a mò më e bod bayëbë ki a Yuden, ai na efaè dzama enyëb mimfufub ya Yerusalem a nnëm, ³² asu yë na mëzu abë mina ai mintag asu ṅyian Zamba, mëtam fë waè ai mina. ³³ Zamba mvoè abòò ai mina bësë. Amen.

¹ Kal dzan Foibè nyili malom mina. Anë mbò-esye a nda-Zamba ya Kenkrea. ² Soan ai nyè mbëṅ abë Nti, e mësoan makyëbë ai mimfufub, mikè fë nyè e dzam asë ayaṅan ai dò. Amu angabëlan ai abui bod mbëṅ, abëlan fë ai e mamen nyò mbëṅ. ³ Sugan ma Priska ban Akila. Mëngasye ai bò fufulu abë Yesus Kristus. ⁴ Bëngayi lig enyiṅ dzaban asu enyiṅ dzama, ndò së ki ma etam makaṅ bò, mënda më Zamba bëhaiden mësë makaṅ bò. ⁵ Sugan fë e nda-Zamba enë bò a nda ete. Sugan ndindiṅ wama Epanetus, ṅnyè anë ntol kye ya Azia asu Kristus. ⁶ Sugan Maria, ya angasye abui asu daan. ⁷ Sugan bivuvuman biama Andronikus ai Yunia; bò fë bëngabë ai ma a mimbog; bënë mimfaṅ mi apostel ya bëbò ya esye dzi a mis më Kristus osusua ma. ⁸ Sugan Ampliatus ya madiṅ abë Nti. ⁹ Sugan Urbanus, ya angabò esye ai bia abë Kristus, ai ndindiṅ wama Stakus. ¹⁰ Sugan Apelès, ya angabi mindzug abë Kristus. Sugan bod ya nda-bod Aristobolus. ¹¹ Sugan Erodiona, evuvuman dzama, ai bod ya nda-bod Narkisus a bënë abë Nti. ¹² Sugan Trifana ai Trifosas ya bëngasye abui abë Nti. Sugan ndindiṅ wama Persis ya angasye abui abë Nti. ¹³ Sugan Rufus ya angatòbëban abë Nti ai nyia woe ya anë fë ma nyia. ¹⁴ Sugan ma Asinkritus, Flegon, Ermès, Patrobas, Ermas, ai babëdzaṅ bënë fufulu ai bò. ¹⁵ Sugan Filologus ai Yulia, Nereas ai kal dzie, Olimpas, ai e mimfufub misë minë ai bò. ¹⁶ Sugan ma mina mina ai mimfufub mësugan. Mënda më Zamba më Kristus mësë masug mina. ¹⁷ A babëdzaṅ, makogëlan ai mina na mibò okala e bod batsam mina, bësogolo bod a nsëm, bëdzoge ayègè ya mina mingayègè; saalan bò. ¹⁸ Amu bò basye ki Nti waan Kristus, basye hë mëbun maban, bëngadug ban abobod ai mbëmbë nkòbò mvol. ¹⁹ Amu foe mëwog dzaan ekui ya abë mod osë mu. Mënë mintag ai mina, mayi na mibò fëg asu mbëṅ, të kalan dzom ai abe. ²⁰ Zamba mvoè ayi fid Satan a mëkol man a si avol. Maa Nti waan Yesus abòòg ai mina. ²¹ E Timoteus bi nyè biasye, ai Lusius, ai Yazon, ai Sosipater, bivuvuman biama, bëmana mina sug. ²² Ma, Tersius ya mëhë til e kalara nyò abë Nti, masug mina. ²³ Gaius, nnëṅ wama, ai nnëṅ nda-Zamba esë ya mu asug mina. ²⁴ Erastus, mbaala nkòb-mòni ya tisòn asug mina, tò fë madzaṅ Kuartus. ²⁵ Olugu abòò ai nyè ya abëlë ngul ya awone mina asu mbëmbë foe ai ṅyedan Yesus Kristus, asu nkulan ndimba engabë esòlò bisëb bisëb, ²⁶ ndò ekulan etoa dzi ai mintilan bëprofèt, ai abende Zamba kole ya abò na bëyëm nyè, asu mëwog më ṅyëbë ya bëhaiden bësë, ²⁷ olugu ai Zamba fëg etam, a dzoe Yesus Kristus a bisëb bisëb. Amen.