FILIPI

FILIPI

¹ Paulus ai Timoteus, bësye bë Kristus Yesus, biatil mimfufub misë minë abë Kristus a Filipi, ai bëtëbë bë osu ai bëbò bë esye, ² maa ai mvoè a biasò abë Zamba esya ai Nti Yesus Kristus bibòò ai mina. ³ Makaṅ Zamba wama eyòṅ matsog mina, ⁴ e ngogëlan makogëlan asu daan kòm esë, mëbòò dò ai mintag, ⁵ a enyiṅ fufulu dzaan asu mbëmbë foe, atarigi amos osu, azaag kui etoa dzi, ⁶ mëyëmë fò mbëṅ na e mod angatari abëṅ esye di abë mina ayi dzò dzala akui a amos Kristus Yesus. ⁷ Mbol anë sosoo asu dama na mëtsog e mam ma asu mina bësë, mbol mëbëlë mina a nnëm wama, a mimbog miama ai a makaman, mëyini fë mbëmbë foe mina bësë ya miakaban ai ma maa. ⁸ Amu Zamba anë ma wusnèt akyaè mayi mina bësë du a nnëm Kristus Yesus. ⁹ Ndò makogëlan na ediṅ dzaan ebui hë mbuan, na miyëm, miyen fë, ¹⁰ mibindi e dzi yadaṅ mbëṅ, asu yë na mibò mfuban, tègè ai bidzo a amos Kristus Yesus. ¹¹ Mitoa hë ndzalan ai bibuma mëkyëbë a nyòl Kristus Yesus asu duma ai olugu Zamba. ¹² Mayi na miyëm, a babëdzaṅ, na e dzam angabò ma ndò angakë ai mbëmbë foe osu ¹³ e kan yë na mësuṅ mama mëngayene a ngëëṅ a bë Kristus a bëdzoe bësë ai e bod bësë bëvòg, ¹⁴ ai na abui babëdzaṅ bëbi azombo asu mimbog miama abë Nti, bëngabulu fë kad ebug tègè ai wòṅ. ¹⁵ Bëvòg ya ete bayedan Kristus asu zuṅa ai ziṅ, e ba bëvòg asu mbëmbë ṅyian. ¹⁶ E ba babò dò ai ediṅ, bayëm na mënë hala na makaman ai mbëmbë foe, ¹⁷ e ba babò asu zuṅa, bayedan Kristus ai minnëm mibè, bëtsogo na babag ma ndzug a mimbog miama. ¹⁸ Dze enë ete? Ṅnyie anë anë na, tò ya tò ya, tò a mfugu, tò a bëbëla, bayedan Kristus, ndò matag etere. Hë da mayi yi fë tag, ¹⁹ amu mayëm na adzo te layi sò ai ma akode, asu ngogëlan dzaan ai nkëan Nsisim Kristus wakè ma, ²⁰ mbol mayanga abui, mëfidigi fë na mayi ki sama a dzom ziṅ, dzam da, na, ai fim esë, anë abog asë ai etoa dzi, Kristus ayi bi olugu a nyòl dzama, tò mëwu, tò ki mënyiṅ. ²¹ Amu asu dama, enyiṅ enë hë Kristus, awu atoa na madò. ²² Hë da, ngë enyiṅ ya nyòl enë ma bibuma bi esye, mayëm ki e dzi mayi tòb. ²³ Mëyëmë a zaṅ byem bite bibè, mëbëlë ṅyian na mëkë, mëtòbò ai Kristus amu ndò fò ladaṅ mbëṅ abui. ²⁴ Alaṅan a nyòl wa onë ai mina mfi abui. ²⁵ Mbol matoan yëm nala mbëṅ, mayëm na mayi tòbò, mëtoa mina bësë a mgbag asu yë na mikë osu ai mintag a zen ṅyëbë, ²⁶ asu yë na enguṅ dzan efuguzan abë Kristus Yesus abë ma eyòṅ mayi dugan sòṅ a bë mina. ²⁷ Nyiṅan hë mbol wayean ai mbëmbë foe Kristus asu yë na tò mësò, mëyënë mina, tò masëki we, mëwodan minlaṅ mian, na mitëlë a kpiim ai nsisim mbòg, nnëm mbòg, mikëan a ṅyëbë mbëmbë foe, ²⁸ mina të mbara tò nziziṅ waan a dzam ziṅ, nala wayi bò lëdë amala daban, olëdë mina akode daan. Dzom te yatye abë Zamba. ²⁹ Amu bëngavë mina na, asu Kristus, mibi ngul ya ayëbë nyè, së hm ki hë nala, ngul yë na mibi mintye asu die, ³⁰ miluman e bita mingayen na binë bita biama, mbiè fë miawog minlaṅ abë ma bili.

¹ Ndò hm awonòṅ anë abë Kristus, evòli ediṅ, enyiṅ fufulu nsisim, ediṅ a i ngòl, ² dzalan mintag miama ai mbol miatsog dzam dëda, mibëlë ediṅ dzam dëda, nnëm mbòg mbòg, ntsogan mbòg mbòg, ³ mod tègè dzëṅ mfi woe emen, tègè dzëṅ engëlzëg, dzam da, ai edzòdi-nyòl, telegan e bod bëvòg osu, bëlodo mina; ⁴ të mod adzëṅ mfi woe, hë da adzëṅë fë mfi mod osë. ⁵ Bëlëgan e mintsogan Kristus angabë abëlë abë nyè emen, ⁶ ṅnyè atoa nyòl Zamba, andzëki yen na nala te wakyëbë ai nyè na ban Zamba bëbò nkoṅ, ⁷ ndò angadzòdi emen, anòṅò nyòl olò, angafulan ai mod; bëngayen nyè a mis anë mod, ⁸ adzòdi emen, ndò angabò mëwog akëlë kui a awu, awu ya klos ben! ⁹ Asu te ndò Zamba nyè angabede nyè, avëë nyè e dzoe lalod dzoe asë, ¹⁰ asu yë na a dzoe Yesus, abòṅ asë akudëban a si, tò a yob, tò a si, tò a tolendoṅ, ¹¹ ai na anyu asë amëm na Yesus Kristus anë Nti, asu duma Zamba esya. ¹² A mindidiṅ miama, antoa hm na, akyaè ya miakad ya sòṅ miabò mëwog, -së ki hë eyòṅ mënë ai mina, tò fë etoa dzi a masëki hala,- syean ai ngul asu akode daan ai wòṅ, ai mësis. ¹³ Amu Zamba ṅnyè asye abë mina, ndò fë ayi sye asu mbëmbë ṅyian. ¹⁴ Boan mam mësë tègè ai minaṅëdan ngë mimfèt, ¹⁵ asu yë na mibò tègè ai atòn, ai evovoe nnëm, bòn bë Zamba a saaṅ a zaṅ e bod bë mvol bënë ndaman ba, a zaṅ dzaban ngò miafyè anë atitie a si-ndon, ¹⁶ milëdëgë ebug enyiṅ, asu enguṅ dzama a amos Kristus, amu mandzëki mbara mbil a zëzë, ndò fë mandzëki wu esye a zëzë. ¹⁷ Dzam da, ngë mëki mama mayean soeban anë efaè mëtunëṅa asu ṅyëbë waan, mawog dò mintag, mëtaga fë ai mina bësë. ¹⁸ Mina fë taan, mitag fë ai ma dzam dëda nala. ¹⁹ Mafidi abë Nti Yesus na mëngayi ya mina lom Timoteus, asu yë na nnëm obò ma ovëves eyòṅ mayi wog mëfoe maan. ²⁰ Mabëlë ki mod mfë anë nyè, ya anë dzam mvaman ai mina mfaṅ. ²¹ Amu bod bësë badzëṅ hë mfi waban, së ki e hi Yesus Kristus. ²² Miayëm wò-esye woe, amu angasye ai ma fufulu asu mbëmbë foe anë mòn asye ai esya. ²³ Ṅnyè hm mafidi na mayi lom ṅnyie anë mayi yëm etye mëtëlë. ²⁴ Mëbëlë afidi abë Nti na mamen mayi fë vol sòṅ we. ²⁵ Mëyen fë na anë ai mfi na mëlom mina Epafroditus, madzaṅ a bia nyè bibòòg esye fufulu, bitoa fë a nkan bita fufulu, nyè angasò a nloman waan, avòli fë ma a mëyaṅan mama, ²⁶ mbol angabë ayi mina bësë du, nnëm otoa nyè a mëlunga, mbol mingawog na angabë akònò. ²⁷ Amu angakòn fò, awu ai enyiṅ ntye mbòg; Dzam da ndò Zamba angayen nyè ngòl, së ki hë nyè, tò fë mamen, asu yë na të mintye miabag ma a nyòl hë mbagan. ²⁸ Asu te hm malom mina nyè ai abui mvam asë, asu yë na mitag eyòṅ miadugan nyè yen, ma fë mëbi evovoe. ²⁹ Soan hm ai nyè abë Nti ai mintag misë, mikama fë e bod bënë anë nyè, ³⁰ amu angafam wu asu esye Kristus, ayii lig enyiṅ dzie, asu yë na adzala esye miyean bò.

¹ Mëngakë luu nkòbò na, a babëdzaṅ, taan abë Nti. Nala waandëgëlë ki na mëbaala mina e mam ma, nala onë ai mina mfi. ² Mibòòg okala ai mvu! Mibòòg okala ai bëbe bëbò bisye, ai e bod babaè avëṅ a nyòl. ³ Bia binë bod ya akele, e bia ya bialugu a Nsisim Zamba, bibòòg enguṅ a bë Kristus Yesus tègè fudi afidi daan a nyòl, ⁴ afyaṅan bò na mënë dzam bò enguṅ tò a nyòl. Ngë mod ziṅ ayen hala na akyëbë ai afidi nyòl dzie, kë malod nyè a! ⁵ Bëngakele ma amos mwomo; mënë mod ya ayòṅ Israel, a nda-bod Benyamin, man Ebrea, mòn Ebrea, mfag mvende, mënë man Farisea, ⁶ mëngaluman ai nda-Zamba ai abui evag, asu mëkyëbë ya mvende, mëngabë të ai atòn; ⁷ E dzi esë ya engabë ma ai mfi, mëngayen na, asu Kristus, engabë ma edzèè abog. ⁸ Ndò mëngayen yen na mam mësë mënë ma edzèè abog etòm ayëmë-lë Kristus Yesus Nti wama, ya anë mbëṅ ya walod bisë, asu die ngò dzom esë yavëṅan zëzë, mëyënë na enë hë akun, asu yë na mëdò ai Kristus, ⁹ mëtòbò abë nyè, ma tègè ai mëkyëbë mama ya masò a mvende, hë e ma masò a ṅyëbë ya mayëbë Kristus, e mëkyëbë masò abë Zamba asu ṅyëbë, ¹⁰ na mëyëm nyè, mëyëm fë ngul akui-lë sòṅ die ai anòṅ ngab a mintye mie, na mëfulan fë ai nyè a awu die, ¹¹ na mëkë kui a akui-lë sòṅ bëwu. ¹² Së ki na mëkui ya etye te, ngë ki na mëntoa ya ntud nala, makë ai ndzëṅan osu, mëfidigi na mayi bi, akyaè ya Kristus angabi ma. ¹³ A babëdzaṅ, mamen matsog ki na mayi dò bi; Mabò hë dzom dzia: Mavoan e mam ya mvus, mëtoṅo hë e ma ya osu, ¹⁴ matoṅ fò a mëmana, e maan ya mënë na Zamba angaloe ma a yob abë Yesus Kristus. ¹⁵ E bia ya biwon ya, eyë ntsogan nala. Ndò fë ngë miatsog mbol mfë, Zamba ayi fë mina dò kulan. ¹⁶ E hom osë bikë ya kui, nkaṅan ai nala osu. ¹⁷ Vuan ma, a babëdzaṅ, mifòmbògò fë e ba ya banyiṅ anë mingayen mvulna abë bia. ¹⁸ Amu abui bod banyiṅ hala -mazuzu ya makad mina adzo daban, etoa dzi makad mina dò mëyono- bënë minziziṅ mi klos Kristus, ¹⁹ a mëmana, bayi dzaṅ, Zamba waban anë abum daban, bëbëlë duma a osama waban, mbò batsog hë mam më si. ²⁰ Amu dzal daan anë a yob, awe ngò fë biayanga nkode, Nti Yesus Kristus, ²¹ ṅnyè ayi tsende obobòd nyòl vi na ofulan ai nyòl duma dzie, ai e ngul abëlë na atëgë byem bisë.

¹ A babëdzaṅ ya madiṅ, mëyii fë mina du, mintag miama ai ekad-olugu dzama, antoa hm na, boan minkanga nala abë Nti. ² Malëb Eodia, mëlëbë fë Sintikè, na bëlad abë Nti. ³ Owe, a mfaṅ mvoe mintye dzama, madzaè wa na ovòli e bininga ba, amu bëngaluman fufulu ai ma asu mbembë foe, fufulu ai Klemens ai e bod bëvòg basye ai ma fufulu, a moe maban mënë a kalara enyiṅ. ⁴ Taan abë Nti kòm esë. Madugan baala, taan! ⁵ Bod bësë bayean yëm fin dzaan. Nti antoa ya babi. ⁶ Të miasaṅan; Boan na Zamba ayëm mëyaṅan maan a ngogëlan esë ai a ṅyëdan ai mvëṅan ngaṅ. ⁷ E mvoè Zamba yalod fëg esë yayi kala minnëm mian ai mintsogan mian abë Kristus Yesus. ⁸ A babëdzaṅ, mëngakë luu nkòbò na, e dzi esë enë bëbëla, e dzi esë enë sosoo, e dzi esë enë a saaṅ, e dzi esë yayean ai ediṅ, e dzi esë enë ntomba, e dzi enë mbëmbë fulu, ai dzam olugu, mam mëte mmò mitsogo. ⁹ E mam ya mingayègè, a bëngavë fë mina, a mingawog, miyënë abë ma, mmò boan. Zamba mvoè nyè fë ayi bò ai mina. ¹⁰ Matag abui abë Nti na midugan ya nèè mbëmbë ntsogan mibëlë asu dama; mayëm na mingabë fò mimvaman asu dama, hë da tègè ai afola. ¹¹ Së ki na mënë a mëyaṅan, ndò makòbò nala, amu mëngayègè na tò mëtëlë a etye efe, hë mëtoa mintag. ¹² Mayëm nyiṅ a mëbua, mëyëmë fë nyiṅ a ntam. Akyaè etye esë, mënë nkomëdan: tò na madzie, tò mawog zie, tò mëbëlë abui, tò mënë a mëyaṅan. ¹³ Mënë dzam bò mësë abë e nyò avë ma ngul. ¹⁴ Dzam da mingabò mbëṅ mbol minganòṅ ngab a mindzug miama. ¹⁵ A bod ya Filipi, mina fë miayëm na a mëtari më mbëmbë foe, eyòṅ mëngatye a Masedonia, nda-Zamba ziṅ fë yandzëki sye ai ma fufulu na biavòlan bia bia, hë mina fò etam, ¹⁶ amu mingalom ma ekè abui biyòṅ a Tesalonika. ¹⁷ Së ki na madzëṅ bifaè, madzëṅ hë e bibuma bianaṅ asu mfi waan. ¹⁸ Bëyaan ya ai ma alodo ben nala. Mënë ndzalan, mbol mëngabi atom ya mingalom ai Epafroditus, mëtunëṅa ya manyum mbëṅ, mëtunëṅa bayëbë, a manyëb Zamba a nnëm. ¹⁹ Zamba wama ayi mina dzala ṅyian waan osë mbol abëlë abui akuma abë Kristus Yesus. ²⁰ Duma ai Zamba ya anë fë esya waan a bisëb bisëb. Amen. ²¹ Sugan e mod osë anë mfufub abë Kristus Yesus. E babëdzaṅ bënë ai ma basug mina. ²² Mimfufub misë miasug mina, adaṅ adaṅ a e ba ya nda Kaiser. ²³ Maa Nti Yesus Kristus abò ai nsisim waan.