MARKUS

MARKUS

¹ Mëtari më mbëmbë Foe Yesus Kristus, (mòn Zamba), ² anë angatilban abë profet Isaias na: Yënë, malom wa englès wama osu, ayi wa kom zen. ³ Kiṅ e mod abam a nkod-nnam: Koman zen Nti, limëṅan mindzòṅ mie. ⁴ Yohannes Ndu-Bodo angabë a nkod-nnam, ayedëgan ṅduan avëṅan asu evaa minsëm. ⁵ Ndò nnam Yudea osë ai bod bësë ya Yerusalem bëngabë këlëg abë nyè, bëduuban abë nyè a osoe Yordan, bëmëmë minsëm miaban. ⁶ Yohannes angabë abëgë mimvòt mi kamele, ai kanda ekob a angëdëg, adzaa bëmbasana ai woe afan. ⁷ Ndò angabë ayëdëgan, nyè na: Mod azu ma a mvus, anë ngul alodo ma, mëbëlë ki ngul ya alumbu a si na matii nyè minkòl mi ngob. ⁸ Ma madu mina ai mëndim, nyè ayi hm mina du ai Mfufub Nsisim. ⁹ Mëlu mëte, ndò Yesus angasò a Nazaret ya Galilea, ndò angaduban abë Yohannes a Yordan. ¹⁰ Ndò etye etye ya angakodo a mëndim, ndò angayen yob oyaaban, ai nsisim osusu abë nyè anë obëṅ. ¹¹ Ndò kiṅ engasò a yob na: Onë mbòs ediṅ mòn wama, mëngafuu ya wa nnëm. ¹² Etye etye, ndò Nsisim ongatindi nyè a nkod-nnam. ¹³ Ndò angatobò a nkod-nnam mëlu mëwom mënyii, Satan abobolo nyè; angabë atoa ai tsid mëfan, benglès bësye nyè. ¹⁴ A mvus yë na bëkuan ya ai Yohannes, ndò Yesus angakë a Galilea, ayëdegan mbëmbë foe Zamba na: ¹⁵ Abog akpaèn ya, ndò edzoe Zamba esubu ya babi: Tsendëgan, miyëbë mbëmbë foe. ¹⁶ Ndò hm, alodo a ntsag ma më Galilea ha, ndò angayen Simun ai Andreas, manyaṅ Simun, bëwoaga mëvòt a maṅ; amu bëngabë bëlòb bë kòs. ¹⁷ Ndò Yesus adzo ai bò na: Zaan miabie ma, eyòṅ te mayi bò na mibò bëlòb bë bod. ¹⁸ Ndò bëngadzoge mëvòt maban, bëngabie nyè. ¹⁹ Angayi subu man oyab, ndò ayen Yakob, mòn Zebede, ai Yohannes, manyaṅ woe, bò bëkomo mëvòt a efunga, ²⁰ ndò angaloe bò etye te. Ndò bëngalig esya waban Zebede a efunga ai bëlobele, ndò bëngakë babie nyè. ²¹ Ndò bënganyian a Kafarnao; anyian bënganyian a nda-bikoan (sinagoge) a amos sabbat, angayëgëlë. ²² Bod bëngakam ayëgëlë die, amu angabë ayëgëlë bò anë e mod abëlë edzoe, së ki anë bësaṅa bëkalara. ²³ Mod ziṅan gabë a nda-bikoan ha, abëlë mbë nsisim, ndò angabam, ²⁴ nyè na: Dze enë a zaṅ bia wa, a Yesus man Nazaret? Yë wasò na wazu bia mana? Mayëm wa, onë mfufubu ya abë Zamba. ²⁵ Ndò Yesus angakòṅan ai nyè na: Dibi anyu, okui nyè a nyòl! ²⁶ Ndò mbë nsisim ongasuguzu nyè, ndò ongabam a yob ete, okui nyè a nyòl. ²⁷ Bësë bëngakam, bësiligi hm bëben na: Dze dzi? Mkpamaṅ dòkten ai edzoe esë; adzoe tò bëbe minsisim, mia miwogo nyè. ²⁸ Ndò e foe nyi engayaman a nkòṅ nnam Galilea osë. ²⁹ Etye etye, ndò bëngakui a nda-bikoan a nsëṅ, ndò bakë a nda Simun ai Andreas, bò ai Yakob ai Yohannes. ³⁰ Hë da, nkyè mininga Simun angabë adzogo ai fiba, ndò bëngakad nyè dò. ³¹ Ndò angasubu nyè babi, abii nyè a wò, ndò atele nyè. Ndò fiba engakodo nyè a nyòl, angabëlan ai bò. ³² Abog ngoge engabò, abog nlo-dzobo alumbu, ndò bëngabëgë e bod bësë bëngabë wogo mintye ai e ba bëngabë bëlë bëbe minsisim. ³³ Ndò tisòn esë engazu koan a mbè a yob. ³⁴ Ndò angatëbë na alëdë abui bod abëlë akòn kan kan, akuligi bësatan, të dzoge na bësatan bëkòbò, amu bëyëmë nyè. ³⁵ Kikidigi ai ndib, ndò adugan kodo a si, akëlë e hom angabë etam, angakogëlan we. ³⁶ Simun, ai e bod bëngabë ai nyè bëngadzëṅ nyè; ³⁷ Ayen bëngayen nyè, bò na: Bod bësë badzëṅ wa. ³⁸ Nyè ai bò na: Nkodan ha, bikë e mal mëvòg ya ngòdò va, asu yë na ma mëyëdan fë mbëmbë foe we. Amu asu te ndò mëngasò. ³⁹ Ndò angakë ayëdan mbëmbë foe a mënda-bikoan maban a Galilea osë, atsidëgan bëbe minsisim. ⁴⁰ Ndò nzëzam ongazu abë nyè, ongakogëlan ai nyè, (akudu mëbòṅ a si), nyè ai nyè na: Ngë wadiṅ, onë ma dzam fubu. ⁴¹ Ndò Yesus angayen nyè ngòl, asama wò, anamba nyè, nyè ai nyè na: Owe, mayi nala, bò mfuban. ⁴² Etye etye te, ndò zam engakodo nyè a nyòl, ndò e mod nyò angabò mfuban. ⁴³ Ndò asoe nyè, abende nyè ai ngul esë ⁴⁴ na: Bò okala na të wakad tò mod ziṅ tò dzom, hë da okë lëdë nyòl abë fada, okë fë tuni asu mfuban, akyaè Moses angabende, asu yë na bëyen. ⁴⁵ Yë e mod nyò angayi tam kui, atari fò na abëgëlë dò abui, akë atsam e foe nyi, tègè fë yë na Yesus angabë dzam nyian tisòn ziṅ a ngëṅ, angakë a tòbò e hom ongabë të ai bod. Bod ba bëtyege hom osë, bëzaa abë nyè.

¹ Ndò angadugan nyian a Kafarnao a mvus ban mëlu, foe etsaman na anë a nda. ² Abui bod akoan fò, e kan yë na tègè fë ai afola, tò ben mfa ya mbè, angakad hm bò Ebug. ³ Ndò bëngasò bëbëgë mbombog, bod bënyii bëbëgë nyè a yob. ⁴ Mbol bëngabë ki nyè dzam subu babi, ai abui bod angabë hala, ndò bëngakode ndil e hom angabë, alòṅa ligi ete, bësuu ondanga ya mbombog ongabë ete. ⁵ Yesus ayënë ṅyëbë waban, nyè ai mbombog na: A mòn, minsëm mie mivaaban wa. ⁶ Bësaṅa bëkalara bëziṅ bëngabë bëtoa hala, bëngalaṅëdan a minnëm miaban, bò na: ⁷ A dze e mod nyò akòbò e kan nyi? Afodan! Yë mod mfë abëlë ngul ya avaè minsëm alodo anë Zamba etam? ⁸ Yesus alaṅ a fò nnëm waban, e kan bëngabë laṅëdan ete, nyè ai bò na: Dze miakë miafèd a minnëm mian? ⁹ Dze yadaṅ ebugbu, yë adzo ai mbombog na: Minsëm mie mivaaban wa, yë adzo ki na: Tëbëgë, nòṅò ondanga woe, owulu? ¹⁰ Ndò hm, asu yë na mizu yëm na mòn mod abëlë ngul ya avaè minsëm a si, nyè ai mbombog na: ¹¹ Wa madzo ai nyè, tëbëgë a si, bëëgë ondanga woe, okë a nda dzoe. ¹² Ndò angatëbë a si, abëgë fë ondanga woe etye etye, akui, bod bësë bëtala, e kan yë na bësë bëngakam. Bëngalugu Zamba, bò na: Biabë ya ki yen e kan nyi eyòṅ efë! ¹³ Ndò angadugan kë a ntsag maṅ. Nkunda bod osë ongakë abë nyè, nyè angayëgëlë bò. ¹⁴ A akëlë ha, ndò ayen Levi, mòn Alfeus, atoa a nda-toya, nyè ai nyè na: Zaa watoṅ ma. Ndò angakodo a si, angatoṅ nyè. ¹⁵ Ndò hm labò na, atoa na adi a nda dzie, abui bënòṅò bë toya ai bësëm bëntoa ai Yesus ai bëyègè boe ha. Amu bëngabë abui, bëkëlë babie nyè. ¹⁶ Ndò, bësaṅa bëkalara ai bëfarisea bëngayi yen anë adi ai bësëm ai bënòṅò bë toya, ndò badzo ai bëyègè boe na: Asu dze adi ai bësëm, ai bënòṅò bë toya? ¹⁷ Yesus awogo adzo di, nyè ai bò na: E bod bënë mvoè bayaṅan ki ai mbò mëbala, minkokòn mmiè miayaṅan ai nyè! Mandzëki sòṅ na mazu loe bësosoo, bësëm mbò mëngazu loe. ¹⁸ Bëyègè bë Yohannes ai bëfarisea bëngabë baala eki bidi. Ndò bazu nyè sili na: Asu dze bëyègè bë Yohannes ai e ba bëfarisea babaala eki bidi, hë da bëyègè boe të dzò baala? ¹⁹ Ndò Yesus adzo ai bò na: Yë e bod bënë a nsamba alug bënë dzam ki bidi ntye nlugu anë ai bò? Ntye osë nlugu angënë ai bò basëki dzam ki bidi. ²⁰ Dzam da, mëmos mazu, a bayi bò vaa nlug a zaṅ dzaban, eyòṅ te hm bayi ki bidi amos te. ²¹ Bakad ki bede mkpamaṅ abaag a ntu eyie. Bëbò fë nala, abaag layi tonde e hom otëg ya, eyie engafëdan nyabi. ²² Ndò fë bakad ki fudi mimkpamaṅ mëyòg a minnom mëndëg. Bëbò hm fë nala, mëyòg mayi boe e mëndëg ma, mëyòg mëdzaṅa a si, mëndëg fë dzam dëda. Mimkpamaṅ mëyòg makyëbe ai mimkpamaṅ mëndëg. ²³ Ndò fò labò ha na, Yesus akëlë awulu a zaṅ mëfub a amos sabbat, a bëkëlë a zen ha, bëyègè boe bëkèè na bakoe fes. ²⁴ Bëfarisea bò ai nyè na: Wayen anë babò e dzam anë mvende a amos sabbat a? ²⁵ Nyè ai bò na: Miandzë ya laṅ anë David angabò, a bëngabi mëyaṅan, bëwogo zie, ai nyè ai bod boe, ²⁶ mbol anganyian a nda-Zamba, hala Abiatar atoa fada nen, ai mbol angadi bëmbaṅëla mëtunëṅa a bëfada etam bënë dzam di, avëë fë e bod bëngabë esamba ai nyè? ²⁷ Nyè ai bò na: Bëngabò sabbat asu mod-binam, mod andzëki komban asu sabbat. ²⁸ Antoa hm na, mòn mod adzoe sabbat emen.

¹ Ndò angadugan nyian a nda-bikoan. Mod ziṅan gabë hala, atoa nkat wò. ² Bëngafòmbò nyè, kamëna ayi nyè sye a amos sabbat, bësòman nyè. ³ Ndò angadzo ai e mod angabë nkat wò na: Zaa tëbë a zaṅ ha. ⁴ Nyè ai bò na: Mod anë ngul abò dze a amos sabbat, yë abe, yë mbëṅ, yë anyii, yë awoe? Bëntoa bivol. ⁵ Ndò angatum bò mis ai olun osë, nnëm ovus nyè asu alëd-nnëm daban, nyè ai mod na: Sama wò. Ndò mod angasam wò, odugan bò mvoè. ⁶ Bëfarisea bëkui fò ai bod ya ngam Herodes a nsëṅ, bëngabui esòg etyan ai nyè, e kan bëngabë nyè dzam dzèè a ekoa. ⁷ Ndò Yesus angakë a fëfël, mfa ya maṅ, ai bëyègè boe, mod ntumba bod asòò a Galilea ai a Yudea, ai ⁸ a Yerusalem, ai Idumea ai a Yordan ayat, ai a nnam Tir ai Sidon, mod nkunda e bod bëwogo e mam abòòg bëngazu abë nyè. ⁹ Ndò adzo ai bëyègè boe na bëkomëzan nyè man efunga asu yë na të abui bod di lakubu nyè a nyòl. ¹⁰ Amu angabë abò abui bod ya ete mvoè, bëngakuban nyè a nyòl asu yë na e ba bësë bëbëlë man okòn bënamba të nyè. ¹¹ Mfa bëbe minsisim, eyòṅ miyënë nyè, bëngalaban nyè a si osu, bëbama, bò na: Onë mòn Zamba. ¹² Angabam ai bò abui na të bakulan nyè a ngëëṅ. ¹³ Ndò abed a minkol, angaloe e ba angabë adiṅi na aloe, bëmana sòṅ a bë nyè. ¹⁴ Ndò angatòb awom ai bëbè (ayole bò na apostel), asu yë na bëtòbò ai nyè ai na alom bò bëkë bayëdan mbëmbë foe, ¹⁵ bëbëlë fë ngul ya atsidan bëbe minsisim. ¹⁶ Ndò angatòb awom ai bëbè, avëë Simun dzoe na Petrus, ¹⁷ ai Yakob man Zebede, ai Yohannes manyaṅ Yakob, ayole bò na Boarneges, nala watyan na «Bòn bë zayaṅ», ¹⁸ ai Andreas, ai Filip, ai Bartolomeus ai Matias, ai Tomas, ai Yakob man Alfeus, ai Tadeus, ai Simun man Kananea, ¹⁹ ai Yudas Iskariot ya angakuan ai nyè. ²⁰ Ndò azu a nda. Ntumba bod odugan sò, e kan yë na bëngabë tègè ai adii-lë etun mbaṅëla. ²¹ Ndò bod ya nda-bod dzie, awogo bëngawog nala, bëkëë na bakë nyè bi, amu bëdzoo na asòg. ²² Bësaṅa bëkalara ya bëngasò a Yerusalem bëngadzo na abëlë evu Belzebul, ai na atsidan bëbe minsisim a dzoe ndzoe bëbe minsisim. ²³ Ndò angaloe bò, akada bò a bikug na: Eyë Satan anë dzam tsidan Satan ya? ²⁴ Ngë edzoe nkukuma ziṅ ebò fë ngam ngam ai eben, edzoe te esëki dzam tòbò kòm. ²⁵ Ndò fë, ngë nda-bod ziṅ ebò ngam ngam a nnëm ete, nda-bod te yayi ki tòbò kòm. ²⁶ Ndò hm, ngë Satan angaluman ya ai emen, atoa ngam ngam, ayi ki tòbò kòm, amana die asò ya. ²⁷ Mod ziṅ asëki dzam nyian a nda zingi, amana nyè sa akuma, ngë andzëki tari faṅ zingi ngadag, abog te azu nyè sa nda. ²⁸ Makad mina bëbëla na, dzam asë angâdzuban bòn bë bod, ai minsëm miaban, ai ekokòbò esë bakòbò. ²⁹ Hë da, e mod akpëlë Mfufub Nsisim, ayi ki bi bidzuga tò eyòṅ, amu abò nsëm onë kole. ³⁰ Amu bëngabë dzo na mbë nsisim anë nyè a nyòl. ³¹ Ndò nyia ai babënyaṅ bëngasò, bëntelë a nsëṅ, bëlomo nyè loe. ³² Ndò e bod bëngabë bëtoa nyè edinga a nyòl badzo ai nyè na: Nyoa ai babënyòṅ (ai bënyòkal) bayi wa a nsëṅ a li. ³³ Ndò ayalan bò na: Za anë nna, ngë madzaṅ? ³⁴ Ndò abëbë e bod bëngabë bëtoa nyè edinga a nyòl, nyè na: Nna nyò, babëdzaṅ ba. ³⁵ Amu e nyò abò ṅyian Zamba, e nyòlò te anë madzaṅ, atoa ma kal, atoa nna.

¹ Ndò adugan kèè na ayëgëlë a ntsag maṅ. Mod nkunda bod asò fò abë nyè, ndò abed bed a efunga, antoa a maṅ a yob, e bod bësë ba bëtoa a kindig maṅ. ² Angayëgëlë bò abui mam a minkana, akada bò na: ³ vogëlan na: Ndò mmias mvòṅ angakui na akë amias mvòṅ. ⁴ Eyòṅ amias mvòṅ ha, abim ziṅ a kuu a mgbag zen, anòn asòò, amana di. ⁵ Abim afë akuu a si ngòg, tègè ai abui si ete, efaè fò etye etye amu tègè ai abui si. ⁶ Ndò nlo-dzobo atole, e mvòṅ nyi emana dig, amu tègè ai minkaṅ, emana kod. ⁷ E mvòṅ fòg ekuu a biyò, biyò binganaṅ, bimana dzò fid, etë wum bibuma. ⁸ Mvòṅ fë ekuu a mbëmbë si, efaè, ewumu bibuma, ewumu biyòṅ mëwom mëlè, e nyili mëwom mësaman, e nyili ntèd. ⁹ Nyè ai bò na, e mod abële mëlò y’awog, awogo! ¹⁰ Eyòṅ bëngaligi etam, e bod bëngabë esamba ai nyè ai b’awom bëbè bëngasili nyè na atimi minkana. ¹¹ Nyè ai bò na: Mina bëngakuli ndimba y’edzoe Zamba. E ba ki ya nsëṅ, mam mësë mënë bò hë bikug, ¹² asu yë na: bëbëbë hë mbëban, tègè yen, bëvogolo hë mvogëlan, tègè wog, asu yë na bëza vëṅan, bëdzu bò dò. ¹³ Nyè ai bò na, ngë miawog ki nkana vi, eyë miayi yëm minkana misë ya? ¹⁴ Mmias mvòṅ amias ebug. ¹⁵ E ba bënë a mgbag zen mbò bënë na, a bamias ebug, ṅnyie anë bawog dzò, Satan asòò vaè ebug babè bò a nnëm. ¹⁶ E ba ki mbò bënë e ba ya babè a si bikok, ṅnyie anë bawog ebug, bëyëbë dzò ai abui mintag, ¹⁷ hë da, babëlë ki minkaṅa nnëm ete; bënë ekes. Ngë mindzug, ngë mintye mikë sòṅ a su ebug, mbò baku mbëg ba. ¹⁸ E ba bëvòg mbò bënë e ba babè a biyò. Mbò bawog ebug Zamba, ¹⁹ bëngasaṅan ai mam më si, ndòg akuma ai mëyaṅan mësë mëvòg bidzie bò a nnëm, ebug të wum bibuma. ²⁰ E ba ki mbò bënë e ba ya bamias a mbëmbë si; mbò bawog ebug, bënyie dzò, bëngawum bibuma, e nyòlò mëwom mëla, e nyò ki mëwom mësaman, e nyò mbòg ntèd biyòṅ. ²¹ Nyè ai bò na: Yë bakoe alamba na bafudi dò a etug a si ngë a enòṅ asi? Nga asu yë na babede a etëlëga alamba a yob? ²² Dzom ziṅ yasòli ki a engakui ki a mfyè, ndò fë dzom ziṅ esòlò ki a yangabò të kui a engëngëṅ. ²³ Ngë mod ziṅ abëlë mëlò ya awog, awogo! ²⁴ Nyè ai bò na: Boan okala ai e mam miawog. E kan miavëg, nala ngò fë bayi mina vëg, bëngabag bag fë a yob. ²⁵ Bayi vë e mod abëlë; e nyò abëlë ki, tò e man abim abëlë, bëvaa nyè nyè. ²⁶ Nyè ai bò na: Edzoe Zamba enë anë e mod awoa fes a si, ²⁷ ndò tò akë oyò, tò atala, tò ai alu, tò ai amos, mvòṅ efaègi, enaṅa fë, emen tègè yëm mbol nala wakui. ²⁸ Si eben yatari wum bibuma, nsò otari kui, a mvus te, mis. ²⁹ Eyòṅ evie ya, alomo bod mëkoe ai mëkòṅ asu yë na bëkoe. ³⁰ Nyè na: Binë dzam vëg edzoe Zamba ai dze, akyaè nkana afe binë dzò vëg ai dzò? ³¹ Enë anë fes ndoṅ; endzò enë na, eyòṅ wamias dzò a si, etoa abòd alodo e fes esë enë a si, ³² eyòṅ bëbè ya dzò nala, enganaṅ, entoa anen alodo bibëbëga bisë, embëlë bod mintëm, e ndie yë na, anòn ya yob antoa dzam loṅ mumba a evovoe dzie. ³³ Ndò, hë e kan minkana nyi ndzò angabë akada bò ebug, e kan bëngabë dzam wog. ³⁴ Angabë ki akòbògò ai bò, së na a minkana, abog antoa ya ai bëyègè boe, angatimi bò mësë. ³⁵ Amos te oben, ai mëvindi më ngoge, ndò adzo ai bò na: Ndaṅan a kindig ayat. ³⁶ Ndò bëngalig nkunda bod vi, bënòṅò nyè a efunga mbol angabë, bifunga bifë bitoa ai nyè esamba. ³⁷ Ndò mod evundu nkulu angavuṅ, minsum mëndim mingakuban a efunga, efunga engadzie ai mëndim. ³⁸ Nyè atoa të a mvus efunga, nlo obëdë nyè a fila, akëlë a oyò. Ndò bavëlë nyè, bò ai nyè na: Wabisi ki anë biamana wu na nga? ³⁹ Ndò angavëbë a oyò, angabam ai evundu, nyè ai maṅ na: A miëëṅ! Evol! Ndò evundu engasus, mod endindim antoa. ⁴⁰ Nyè ai bò na: Za akyaè wòṅ minë di? A dze miabëlë ki ṅyëbë? ⁴¹ Bëngambara eyëgan, bëngakòbò a zaṅ bò a bò ha na: Za mod adi na tò evundu, tò maṅ biabò nyè mëwog?

¹ Ndò bakui a kindig maṅ a yat, a nnam Geraza. ² Ndò asus a efunga a si, ndò mod ziṅ abëlë mbë nsisim, asòò a mësòṅ, azu toban ai nyè. ³ Mod te angaloṅ mvog a mësòṅ, tò mod ziṅan gabë ki fë nyè dzam tindi ngadag, tò mësuṅ, ⁴ amu bëkadëga nyè faṅ ngadag, dzam da akadëga tie ngadag ai mësuṅ, tègè ai e mod abëlë ngul ya atëgë nyè. ⁵ Antoa hm na, abog asë, tò ai alu tò ai amos, akëlë abam a mësòṅ ai a minkol, akëlë abali emen ai ngòg. ⁶ Ayen angayen Yesus, angënë man ntye nali, ndò atye mbil, asò laban Yesus osu, ⁷ angabam a yob ete na: Dze enë a zaṅ bia wa, a Yesus, mòn Zamba ya yob ete? Mavuu wa sòṅ a dzoe Zamba, të wa fogo ma! ⁸ Amu Yesus angabë adzoo ai nyè na: A mbë nsisim, kui e mod nyò a nyòl. ⁹ Ndò asili nyè na: Onë dzoe ya? Nyè ai nyè na: Dzoe dama anë na Nkunda, amu binë etitib. ¹⁰ Ndò angayëgëlë të ai nyè abui na të atsidan bò oyab ai dzal te. ¹¹ Mod nkunda ngoe angabë a mëdiiga a nkol te. ¹² Ndò bakogëlan ai nyè bò na: Lomo të bia a e ngoe nyi, bikë nyian ete. ¹³ Ndò angavë bò ngul nala. Bëbë minsisim bëkuig, bëkë nyian a ngoe, nkunda obumi a mbimbiṅ, okë suman a maṅ ete, dzam bò bakuda bëbè, bëmana yimbi a maṅ. ¹⁴ Bënòni baban bëtubu, bëkë kad e foe nyi a dzal ai a mëfub. Ndò bod basò na bazu yen e dzam angalod. ¹⁵ Ndò bazu abë Yesus, bëntala e mod ambë bëlë mbë nsisim atoa, abëgë biyie; e mod ambë bëlë etitib minsisim nyò atoa a miëëṅ, wòṅ oku bò a nyòl. ¹⁶ E bod bëngayen bëngalèè bò e dzam ya angayënan ai e mod ambë bëlë mbë nsisim ai e di ngoe. ¹⁷ Ndò bakèè na bakogëlan ai nyè na akodo bò a mal maban. ¹⁸ Ndò abed a efunga, e mod ambë bëlë mbë nsisim angakogëlan ai nyè na akë ai nyè. ¹⁹ Nyè tègè yëbë, nyè ai nyè na: Këlë a bod boe, a nda dzoe, olèè bò e mam Nti abò wa, ai mbol ayen wa ngòl. ²⁰ Ndò angakë, angayëdan a nkòṅ nnam Bëtisòn Awom (Dekapolis) e mam mësë Yesus angabò nyè, bësë bëngakam. ²¹ Adaṅa Yesus angadugan daṅ a kindig ayat a efunga, mod nkunda bod akoan nyè a nyòl, antoa a ntsag maṅ. ²² Ndò ndzoe nda-bikoan ziṅ dzoe na Yairus azu; ayen angayen Yesus, aku nyè a mëkol a si, ²³ angakogëlan ai nyè abui nyè na: Ngò dzam enë fò, bëkon bëlindigi, bëyëmë bëlindigi; zaa të nyè kë bede mò, akodëban, anyiṅ. ²⁴ Ndò akë ai nyè. Mod nkunda bod angatoṅ nyè ha, bëngafid fid nyè. ²⁵ Mininga ziṅ ya mëki mëkui abum mimbu mimbu awom ai mibè, ²⁶ hala amana ya bëdòbodò bësë, mòni amana nyè a mò, tègè ai evòli, okòn ongafëdan ben, ²⁷ angayi wog na Yesus anë hala, angazu a bod ete ha, ndò anamba ewòman dzie a mvus, ²⁸ amu angabë adzoo na: «Mënamba ki të hë ewòman dzie, ngë mënyiiban ana». ²⁹ Etye etye te, e mëki mëkui nyè a abum mëtsigi, ayëmë fë a nyòl dzie na mintye mie milèd ya. ³⁰ Yesus awodan a nnëm ete na ngul engakui nyè a nyòl, ndò akilan a bod ete ha, nyè na: Za anamba ma biwòman? ³¹ Bëyègè boe bò ai nyè na: Wayen abim abui bod lafid wa di, ongasili na za anamba ma? ³² Angakë abëbë na ayen e mininga angabò dò. ³³ Mininga angambara, anyamëṅan, mbol ayëmë e dzam angayenan ai nyè, ndò akë nyè ku a si osu, amana nyè kad bëbëla osë. ³⁴ Nyè ai nyè na: A ngò dzam, ṅyëbë woe onyii wa. Këlë tòbò mvoè, okòn woe oman ya. ³⁵ Angënë akòbògò ha, ndò bod basò a nda ndzoe nda-bikoan bò na: Ngò dzoe ewu ya. Dze wabad ndëgele ṅyëgëlë? ³⁶ Ndò Yesus abò anë andzëki wog, nyè ai ndzoe nda-bikoan na: Obë mbara, bëlëgë hë ṅyëbë. ³⁷ Ndò andzëki dzoge na mod akë ai nyè, sësala hë Petrus, ai Yakob, ai Yohannes, manyaṅ Yakob. ³⁸ Ndò bakui a nda ndzoe nda-bikoan, ndò ayen enyënyam ai bininga bëyono ai e ba balòṅ bikiga abui, ³⁹ ndò anyian, nyè ai bò na: Dze miabò enyënyam, miyono? Mòngò andzëki wu, akë a oyò. ⁴⁰ Bëngabò nyè emgbaṅ. Ndò angakuli bësë a nsëṅ, anòṅò esya mòn ai nyia, ai e ba bëngabë ai nyè esamba, ndò banyian mfa mòngò angabë. ⁴¹ Ndò abi mòngò a wò, nyè ai nyè na: Talita kum; nala watyan na, a man mininga, (wa madzo ai nyè), tëbëgë. ⁴² Ndò mòngò angakodo a si etye etye, angawulu, amu hala atoa mimbu awom ai mibè. Mod wòṅ a susu bò a nyòl. ⁴³ Ndò abende bò abui na, të mod ayëm adzo te, nyè ai bò na bëvë nyè dzom ya adi.

¹ Ndò angakodo hala, akëlëg a dzal die, bëyègè boe bëngatoṅ nyè. ² A amos sabbat, ndò akèè na ayëgëlë a nda-bikoan, ndò abui ya e ba bëvogolo nyè bëngakam, bò na: Eyë asò ai e mam ma ve? Za akyaè fëg abëlë di, akyaè biyëṅ bi mam layënan a mò moe di! ³ E mod nyò asë kabinda, mòn Maria ai manyaṅ Yakob ai Yoset ai Yudas ai Simun a? Bëkal bësë abë bia mu a? Bëngadzèè fëg, bëdzèègè nlo asu die. ⁴ Yesus angakad bò na: Babyandi profet hë a dzal abyali die ai a bivuvuman bie ai a nda dzie. ⁵ Tègè fë ai ngoṅ ya abò asimba ete tò dëda. Hë ban mintèt miziṅ të mmiè abedëge mò, mibò mvoè. ⁶ Angakam ndzëman ṅyëbë waban. Ndò akë ayëgëlë a mal ya ngòdò hala. ⁷ Ndò aloe b’awom ai bëbè, akèè na alom bò bëbè bëbè, avaa bò ngul asu bëbe minsisim, ⁸ ndò atëbëlë bò na bëbë nòṅ nguma dzom ziṅ a zen, tò ntum, tò bidi, tò mfëg, tò nsaṅ mòni, ⁹ nyè ai bò na, hë da, mibòdò bësilfas, të mianòṅ biwòman bibè. ¹⁰ Nyè ai bò na: E hom osë minyian a nda ziṅ, tòbëgan ete akëlë kui anë miakodo ete. ¹¹ Ngë dzal ziṅ aben bëlan ai mina, aben ki mina vogolo, eyòṅ miakodo ete, misasa mbulug ya onë mina a mëkol a si asu yë na misòman bò. ¹² Ndò bëngatye, bëngabende na bod bëvëṅan, ¹³ bëtsidan abui bëbe minsisim, bëwòbògò abui minkokòn mbòn, bëbò mvoè. ¹⁴ Ndò nkukuma Herodes angawog, amu dzoe die awumu abui, nyè na Yohannes Ndu-bodo adugan vëbë a sòṅ bëwu, asu te biyëṅ bi mam bi biabòban a mò moe. ¹⁵ Bëvòg bëdzoo na Elias nyòlò. Bëvòg ki na anë mbòg ziṅ ya bëprofet. ¹⁶ Awogo Herodes angawog nala, nyè na: E Yohannes mëngatsig nlo, ṅnyè anë nkuan a sòṅ nyòlò. ¹⁷ Amu Herodes te angalom na bëbi Yohannes, ndò bëngafaṅ nyè a mbog etòm Erodiada, mininga manyaṅ woe Filip, amu angalug nyè. ¹⁸ Amu Yohannes akadëga dzo ai Herodes na: Wabëlë ki ngul yë na otòbògò ai mininga manyòṅ. ¹⁹ Erodiada angafëm nyè, angayi na awoe nyè, dzam da tègè ai zen. ²⁰ Amu Herodes angabë ambarëga Yohannes, amu ayëmë na anë sosoo mod, atoa fë mfufub, angakaman ai nyè, ndò fë, afyaṅan bò na bibug bi Yohannes bibii nyè a nnëm, hë adiṅi avogolo nyè. ²¹ Ndò latoban mbëṅ amos ziṅ na Herodes angabanda mvindi bod a abog atoban mimbu mi abyali die, ai bëdzoe minkunda bëzimbi, ai mvindi bod ya Galilea, ²² ndò ngòn Erodiada engasò ha, engadzëm, enyëbë fò Herodes a mis ha ai e bod bëngabë dzaa ai nyè. Ndò nkukuma adzo ai man mininga na: Siligi ma e dzom esë wayi, mayi wa dzò vë. ²³ Ndò akani nyè sòṅ na: E dzi esë wayi ma sili, mayi wa vë, tò ben etun nnam edzoe dzama. ²⁴ Ndò akui, nyè ai nyia na: Mësili dze? Nyè ai nyè na: Nlo Yohannes Ndu-bodo. ²⁵ Ndò anganyian avol, akëlëg abë nkukuma, ndò akad nyè na: Mayi na, etoa bitoa dzi, ovë ma nlo Yohannes Ndu-bodo a esoa. ²⁶ Mintye midzie nkukuma a nnëm, ai mbol angakani sòṅ, bëyëṅ bëtoa fë, hë da tègè dzam soo ebug dzie. ²⁷ Ndò hm fò nkukuma alom mod na abende na bëzu ai nyè nlo woe. Ndò angakë nyè tsig nlo a nda-mimbog. ²⁸ Ndò angasò ai nlo woe a esoa, avëë wò man mininga, man mininga avëë wò nyia woe. ²⁹ Awog bëyègè boe bëngawog nala, ndò bëngakë nòṅ mbim woe, bëkë dzëb a sòṅ. ³⁰ Ndò apostel bëngakoan abë Yesus, bëngatye nyè e mam mësë bëngabò ai mbol bëngayëgëlë. ³¹ Nyè ai bò na: Zaan a fëfël, e hom binë etam, mitam fë waè man tsëtsat na. Amu abui bod bëkëlë, bëzaa fë, tègè ai adii ya mod wadi man dzom. ³² Ndò bakë a efunga, e hom ongabë a miëëṅ. ³³ Ndò bod bëngayen bò bëkëlë nala, abui bëyëmë fò bò, bëngabugi a mal mal, bëngakë bò kui osu ai mëkol. ³⁴ Ndò akui ha, ayënë e mod ntumba bod nyò, angawog bò ngòl, amu bëngabë anë mintomba minë tègè ai nnòni, ndò akèè na ayëgëlë bò abui mam. ³⁵ Eyòṅ ngoge engabò anë yasubu, ndò bëyègè bazu nyè kad na: Aha onë ntye, ndò fë ngoge engasubu ya. ³⁶ Soege bò, bëkë kus e dzom badi a mal ai mëfub a ngòdòg va. ³⁷ Ndò ayalan bò na: Mina bëben, vaan bò dzom ya adi. Bò ai nyè na: Yë na bikë kus bidi a taṅ mintèt mibè, bivë bò na bëdi? ³⁸ Nyè ai bò na: Mibëlë bëmbaṅëla bam? Kaṅan yen. Ayëm bëngayëm, bò na: Bëmbaṅëla bëtan, ai kòs ebè. ³⁹ Ndò angabende bò na bëtoe bò mëngoe mëngoe a bilòg. ⁴⁰ Ndò bëngatòbò ban mëngoe nala, bëvòg bala ntèt, e ba bëvòg, mëwom mëtan. ⁴¹ Ndò anganòṅ e bëmbaṅëla bëtan ba ai kòs ebè, abede mis a yob, avëë ngaṅ, abëgë bëmbaṅëla, avëë bëyègè boe na bëkë bavë bò, akaba fë bò kòs. ⁴² Ndò bësë bëngadi, bëdzie. ⁴³ Bëngabodo e bitun bingaligi, biat awom ai bibè mintud ai bitun bëmbaṅëla ai kòs. ⁴⁴ E bod bëngadi ba bëngabë bakuda bë bod bëtan. ⁴⁵ Ndò abò na bëyègè boe bëbed a efunga, bëkë nyè osu a nnam Betsaida, ntye asoege bod. ⁴⁶ Eyòṅ angamana yaan ai bò, ndò akë a nkol na akë kogëlan. ⁴⁷ Eyòṅ ngoge engavin, efunga entoa ya a maṅ a zaṅ, atoa nyè etam a nkod si. ⁴⁸ Ndò ayen bò bëbadan ai mfogan bingab, amu evundu esòò bò osu; Dzam bò ai ndib kidi, ndò akë atoṅ bò, awulugu a maṅ a yob, angayi bò kë lod. ⁴⁹ Eyòṅ bëngayen nyè awulugu a maṅ a yob nala, bëngadzo na kon, bëngabam a yob. ⁵⁰ Amu bësë bëyënë nyè, bëmbarëga fë. Ndò akalan bò nkòbò etye etye, nyè na: suugan minnëm a si, mamen! Të miambara. ⁵¹ Ndò angabed a bëngabë a efunga, evundu esusu, bëngakam fò eyëgan a minnëm miaban. ⁵² Amu, tò asimba bëmbaṅëla, tègè wog, nnëm ongadig bò ha. ⁵³ Ndò bëngadaṅ a kindig ayat, bënyian a Genezaret, bëkui a kindig. ⁵⁴ Bëngënë bësusu a efunga nala, bod bëyëmë fò nyè ha, ⁵⁵ bëngatye mimbil ai nkòṅ nnam te osë, bëkèè na bazu ai nyè minkokòn mibëbëdan a binòṅ biaban, bëbëgë bò e hom osë bawog na anë. ⁵⁶ Eyòṅ esë anyiigi a dzal ngë tisòn, ngë a mvus nnam, bëtoege minkokòn a minsëṅ mi angara, bëkogëlan ai nyè na bënamba të hë alò ewòman dzie. E bod bësë bënambëga dò, bëbò fë mvoè.

¹ Ndò bëfarisea ai bësaṅa bëkalara bëziṅ ya Yerusalem bëngakoan nyè a nyòl. ² Ndò bëngayen bëyègè boe bëvòg bëdzaa ai eboe a mò, nala watyan na bò tègè sob mò ³ (amu anë hm na, bëfarisea ai Yuden bësë bënë tègè di së na bëtoan sob mò akui a bikud-bòṅ asu yë na babaala tum besya, ⁴ bënë fë eki të di ngë bandzë tam du mò a mëndim eyòṅ basò a nsëṅ angara, ai abui mam mëfë a babaala a mëngasò kidi, nsoban kòb, ai bimvaṅ, ai bisoa, -ai binòṅ-). ⁵ Ndò bëfarisea ai bësaṅa bekalara basili nyè na: Asu dze bëyègè boe bawulu ki a tum bëtara ya okoba, hë bëdzaa ai eboe a mò? ⁶ Nyè ai bò na: Profet Isaias angatoan fò mina laṅ ebug dzi, mina bod bë mvol, anë anë ntilan na: E mvòṅ bod nyi yalugu ma hë ai biya bi anyu, nnëm waban otoa oyab ai ma. ⁷ Olugu ya balugu ma anë evoe, bayëgëlë të hë mëmvende më bod. ⁸ Miadzoge mvende Zamba a mgbag, mingabaala mëtum më bod. ⁹ Nyè ai bò na: Miabyandi mvende Zamba asu yë na miabaala mëtum maan. ¹⁰ Amu Moses angadzo na: Olugu esoa ban nyoa ai na e mod akòbò ai esya ngë nyia abe, ayean ai awu. ¹¹ Mina miadzo na: Ngë mod ahë dzo ai esya ngë nyia na «Korban», nala watyan na: E dzi mëhë yean wa vë enë efaè, ¹² miadzo na mod te abëlë ki fë adzo ai ntòṅan esya ngë nyia; ¹³ miandaman fë nkòbò Zamba ai mëtum maan mëngasò mina koba. Miabò fë e kan mam nyili abui. ¹⁴ Ndò angadugan loe nkunda bod nyè ai bò na: Mina bësë, vogëlan ma, miwog. ¹⁵ Dzom ziṅ yasëki dzam vë mod eboe a yatye nyè a nsëṅ enyiigi nyè a nyòl, dzam da, e dzi yakui mod a nyòl endzò yavë mod eboe. ¹⁷ Ndò eyòṅ angalig bod, anyian a nda, ndò bëyègè boe basili nyè na afëlan bò nkana. ¹⁸ Nyè ai bò na: Ndë mia minë fë tègè wog a! Miawog ki na e dzi esë yasò a nsëṅ enyiigi mod a nyòl esëki nyè dzam vë eboe, ¹⁹ amu yanyian ki nyè a nnëm, yakë nyè a abum, engakë mana a edug (nala ngò hm afubugu bidi bisë). ²⁰ Nyè na, e dzom yakui mod a nyòl, endzò yakë vë mod eboe. ²¹ Eyë bëbë mintsogan basò a nnëm mod ete: bisog, wub, ewoe bod, ²² endaman mëlug, ndòg akuma, abe-nnëm, mëdugan, nkòbò-mvit, aban, mëfodan, mëbun, mfufulan. ²³ Bëbë bë mam bësë bala basò a nnëm ete, bëngavë mod eboe. ²⁴ Ndò angakodo hala, akëlëg a nkòṅ nnam Tir, anyian a nda ziṅ, të yi na mod ayëm, dzam da, tègè ai asòbò. ²⁵ Ndò mininga ziṅ a wodan nyè, (ngò dzie embë bëlë mbë nsisim), ndò azu laban Yesus a mëkol a si. ²⁶ Mininga te angabë ngòn grek, ayòṅ Sirofenika. Ndò akogëlan ai nyè na atsidan mbë nsisim a nyòl ngòn dzie. ²⁷ Yesus nyè ai nyè na: Tarigi dzoge na bòn (bë dzal) bëdzie, amu asëki mbëṅ na bënòṅ bidi bi bòn, bëngawoa a mvu enë. ²⁸ Ndò ayalan nyè na: A Nti, nga mvu yakad di e mënyuṅ maku bòn a tëbëlë a si? ²⁹ Yesus nyè ai nyè na: Asu ebug dzoe dzili, këlëg, mbë nsisim akodo ya wa ngòn a nyòl. ³⁰ Ndò adugan a nda dzie, akë kòb mòngò aboo a enòṅ, mbë nsisim akë ya. ³¹ Ndò adugan kodo a nkòṅ nnam Tir, adaṅ a Sidon, akëlëg a maṅ më Galilea, a zaṅ mal ya Bëtisòn-awom. ³² Ndò bazu ai nyè mod atoa ndòg, të toan kòbò, ndò bakogëlan ai nyè na abede nyè mò. ³³ Ndò akë ai nyè a mgbag, oyab ai nkunda bod, bò etam, afudi nyè minyu a mëlò, atui mëtè, anamba nyè oyëm, ³⁴ abede mis a yob, asuu ṅhebë, nyè ai nyè na: Effata, nala watyan na: Yaaban. ³⁵ Etye etye te, mëlò moe mëyaaban, oyëm otiiban fë nyè, angakòbò fë mbëṅ. ³⁶ Ndò abende bò na bëbë kad tò mod. Anë abende, anë bafëdan kë babëgëlë dò. ³⁷ Bësë bëngakam adzo di eyëgan, bò na: Abò dzam asë hë mbëṅ, abò na mindondòg miwog, ai na mimvumvug mikòbò.

¹ Mëmos mëte, lëdugan bò na, etitib bod etoa tègè ai e dzom badi, ndò aloe bëyègè boe, nyè ai bò na: ² Mawog e bod ba ngòl, amu bëtòbò ya ai ma esamba mëlu mëlè, etoa dzi, babëlë ki e dzom badi. ³ Ngë ma mësoe bò ai zie esë a abum na bëdugan a mal maban, bayi ku sòm a zen, amu bëvòg ya abë bò basò zen oyab. ⁴ Ndò bëyègè boe bayalan nyè na: Eyë mod anë dzam vë e bod ba bidi, bëdzie a nkod-nnam mu ya? ⁵ Ndò asili bò na: Mibëlë bëmbaṅëla bam? Bò na: zamgbal. ⁶ Ndò abende nkunda bod vi na bëtòbò a si. Ndò anòṅ e bëmbaṅëla zamgbal ba, avëë ngaṅ, abëgë, avëë bëyègè boe na bëkab, bëngakab bod. ⁷ Bëmbë bëlë fë ban kòs. Ndò angafubu bò, nyè na bëkab fë bò. ⁸ Ndò bëngadi, bëdzie, bëwolo biad zamgbal ya bitun bingaligi. ⁹ Bëngabë, dzam bò bakuda bënyii. Ndò asoe bò. ¹⁰ Etye etye, abëdë a efunga ai bëyègè boe, akëlëg a nnam Dalmanuta. ¹¹ Ndò bëfarisea bazu, bëkèè na badoan ai nyè, bësiligi nyè na avë bò ndëm esòò a yob, bëbobolo nyè. ¹² Ndò asuu ṅhëbë ai edudu, nyè na: A dze e ngongo bod nyi yasili ndëm? Makad mina bëbëla na, e ngongo bod nyi yangavëëban ki ndëm. ¹³ Ndò alig bò, adugan bed a efunga, akëë man ntye. ¹⁴ Ndë bëngavoan nòṅ bëmbaṅëla, bò bëbëlë hë mbaṅëla mbòg a efunga ha. ¹⁵ Ndò Yesus avë bò tëbëga na: Mibò okala asaala ekòsaṅ bëfarisea ai e dzi Herodes. ¹⁶ Bëngasilan a zaṅ bò bò na yë mbol babëlë ki bëmbaṅëla. ¹⁷ Mbol angayen nala, nyè ai bò na: Dze miakë mianyiṅ na miabëlë ki bëmbaṅëla? Ndë miabë ki wog, misoṅo a? Yë minnëm minë mina alèd nga? ¹⁸ Minë ai mis, të yen, mitoa ai melò, tègè wog. Nga miatsog ¹⁹ anë mëngabëg bëmbaṅëla bëtan asu bod bakuda bëtan; mingawolo biad bitun bi mbaṅëla atud biam? Bò na: Awom ai bibè. ²⁰ Eyòṅ ki mëngabëg bëmbaṅëla zamgbal asu bakuda bë bod bënyii, mingakoan biad biam bitoa mintud ai bitun bëmbaṅëla? Bò na: zamgbal. ²¹ Nyè ai bò na: Dze yë miabë ki wog? ²² Ndò bazu kui a Betsaida. Bësòò ai nyè ndindim, bëngakogëlan ai nyè na anamba nyè. ²³ Ndò anòṅ ndindim a wò, akëë ai nyè a fëfël, atui nyè mëtè a mis, abëdë nyè mò, ndò asili nyè na: Yë wayen dzom ziṅ? ²⁴ Ndò angakui mis, nyè na: Mayen bod, bënë anë bile ya biawulu. ²⁵ Ndò adugan nyè bede mò a mis, angatoan yen, antoa mvoè, angatoan fò yen dzom esë. ²⁶ Ndò alom nyè a nda dzie, nyè na: Të waanyian a dzal! ²⁷ Ndò Yesus akui ai bëyègè boe a nkòṅ nnam Sezarea ya Filipi. Bëtoa a zen, ndò asili bëyègè boe na: Bod badzo na mënë za ben tug? ²⁸ Bò ai nyè na: Yohannes Ndu-bodo, bëvòg badzo na onë Elias, bëvòg bò ki na, profet ziṅ mbòg. ²⁹ Ndò asili bò na: Mina ki, miadzo na mënë za? Ndò Petrus ayalan nyè na: Wa onë Kristus. ³⁰ Ndò abende bò na të balèè mod adzo die te. ³¹ Ndò hm akèè na ayëgëlë bò na, mòn mod ayean bi abui mintye, ai na mvindi ai bëfada bënen ai bësaṅa bëkalara bayi nyè sie, ayi woeban, adugan kui a sòṅ a mvus mëlu mëlè. ³² Akòbògò adzo di a ngëëṅ. Ndò Petrus adudu nyè a mgbag, akèè na akòṅan ai nyè. ³³ Ndò akilan, abëbë bëyègè boe, angakòṅan ai Petrus, nyè na: Kodogo ma a zen, a Satan, amu mintsogan mie miasëki e mi mi Zamba, watsog hë mam më bod. ³⁴ Ndò aloe bëyègè boe ai nkunda bod, nyè ai bò na: Ngë mod ayi na azu abye ma, asyege emen, anòṅò klos dzie, azu atoṅ ma. ³⁵ Amu, e mod ayi na anyii enyiṅ dzie, ayi dzò dzèè. E nyò ki ayi dzèè enyiṅ dzie asu dama ai asu Mbëmbë Foe, ayi dzò nyii. ³⁶ Amu, mfi dze onë na mod ahaman si esë, ngë adzèè enyiṅ dzie? ³⁷ Dze ki mod anë vë eban asu enyiṅ dzie? ³⁸ Amu, e mod awog osòn asu dama ai asu bibug biama a e ngongo bod b’ebamba ai minsëm ba, mòn mod nyè ayi fë wog osòn asu die abog ansò a duma esya ai mimfufub benglès.

¹ Nyè ai bò na: Makad mina bëbëla, bod bëziṅ bëtëtëlan va, a bëngayen ki awu akui anë bayen edzoe nkukuma Zamba esòò ai ngul esë. ² A mvus mëlu mësaman, ndò Yesus anòṅ Petrus ai Yakob, ai Yohannes, abëdë ai bò a mod nkol a yob, bò we etam. Ndò angatsende bò a mis, ³ biwòman bie bingafum akyaè yë na tò ten ya si esëki dzam bò na bifum nala. ⁴ Bëntala Elias ban Moses bëlègè ai Yesus. ⁵ Ndò Petrus adzo ai Yesus na: A ṅyëgëlë, anë hm fò mbëṅ na bitòbò va, nloṅan bibëm bilè, wa dzia, Moses dzia, Elias fë dzia. ⁶ Amu angabë yemë ki e dzam anë dzo, bësë bëtoa ai wòṅ a minnëm. ⁷ Ndò nkut ongasus bò a yob, kiṅ engasò a nkut vi na: Ndindiṅ mòn wama hili, mivogolo nyè. ⁸ Etye etye na, ndò badugan bëbë, tègè fë yen tò mod, hë Yesus etam ṅnyè atoa ai bò. ⁹ Eyòṅ bësusu a nkol a si, ndò abende bò na të balèè tò mod e mam bëngayen, akëlë kui anë mòn mod atëbë a sòṅ bëwu. ¹⁰ Ndò bëngabaala adzo di, hë bësiligi bò a bò e dzom yatyan na atëbë a sòṅ bëwu. ¹¹ Ndò basili nyè na: Asu dze bësaṅa bëkalara badzo na Elias ayean tari zu? ¹² Nyè ai bò na: Elias ayean tari zu na amana kom mësë. Ndò ki, asu dze anë ntilan abëbëgë mòn mod na ayean bi abui mintye, bëbyandigi fë nyè? ¹³ Ndò hm fò makad mina na Elias angasò ya, ndò bëngabò ai nyè anë bëyii, e kan bëngatil asu die. ¹⁴ Ndò azu mfa bëmbë, ayënë mod nkunda atoa ai bò, ai bësaṅa bëkalara bëdoan ai bò. ¹⁵ Ayen nkunda osë hi ongayen nyè, bësigan fò, bëngatye mimbil, bëkëlë nyè sug. ¹⁶ Ndò asili bò na: Dze mialaṅëdan ai bò? ¹⁷ Ndò mod ziṅ ya nkunda ete ayalan nyè na: A ṅyëgëlë, mësò ai mòn wama abë wa, abëlë mvumvug mbë nsisim. ¹⁸ Akad bò na, e hom osë abi nyè, adibi nyè a si, avul angakui nyè a anyu, angaladan mësoṅ, amana kat. Ndò mësili bëyègè boe na bëtsidan nyè, bò tègè ai ngul. ¹⁹ Ndò ayalan bò na: A e ngongo bod minë tègè ai ṅyëbë ba, mayi tòbò ai mina akui oden? Mayi mina dzibi akui oden? Zaan ai nyè abë ma! ²⁰ Ndò bëngasò ai nyè abë nyè. Mbë nsisim angayi nyè yen, angasugzu mòngò, akuu a si, angakë abigidi, avul akui a anyu. ²¹ Ndò asili esya na: Lakad ya nyè bò nala atarigi abog afe? Nyè na, atarigi atoa man mòngò. ²² Biyòṅ bivòg biben, akad nyè woa a ndoan, ngë ki na a mëndim na awoe nyè. Ngë anë ebugbu, yënë të bia ngòl, ovòli bia. ²³ Yesus nyè ai nyè na: Ngë anë ebugbu ṅnyè atyan ya? Ngë obëlë ṅyëbë, dzom esë enë ebugbu. ²⁴ Esya e mòngò nyò angayëdan fò na: Mayëbë. Vòligi të obobòd ṅyëbë wama. ²⁵ Ndò Yesus angayen nkunda bod ozaa mbil, ndò abam ai mbë nsisim na: A mvumvug ai ndondòg nsisim, ma mabende wa: kodogo e mòngò nyòlò a nyòl, të nyè bad nyian a nyòl. ²⁶ Ndò angakui, abama, asugzu nyè abui. Mòngò andzogo anë mbim, abui bod angadzo na awu ya. ²⁷ Hë da, ndò Yesus angabi nyè a wò, atëlë nyè mëkol a si, atëbë. ²⁸ Anyian anganyian a nda, ndò bëyègè boe basili nyè a omomoa na: Asu dze biandzëki bi ngul ya atsidan nyè? ²⁹ Nyè ai bò na: E kan nyili esëki dzam kodo ngë së na ai ngogëlan. ³⁰ Ndò bëngakodo hala, bëngakë ai nnam Galilea osë, nyè tègè yi na tò mod ayëm. ³¹ Amu angabë ayëgëlë bëyègè boe, akada bò na: Mòn mod ayi kuan a mò më bod, bayi nyè woe, a mvus mëlu mëlè yë na ngë awu, ayi tëbë a sòṅ. ³² Bò tègè wog adzo di, dzam da, bëmbarëga nyè sili. ³³ Ndò bazu a Kafarnao. Bëtoa a nda, ndò asili na: Dze mihë fëdan ai zen esë? ³⁴ Bò hë bivol. Amu bëzaa bafëdan bò bò ai zen esë e mod adaṅ mfaṅ. ³⁵ Ndò angatòbò a si, aloe b’awom ai bëbè, nyè ai bò na: Ngë mod ayi na abò mod osu, abò mod mvua ai olò bësë. ³⁶ Ndò anòṅ man mòngò, atëlë nyè a zaṅ dzaban, anòṅò nyè a mò moe, nyè ai bò na: ³⁷ E mod ayi soan ai mbòg ya e ban bòngò ba a dzoe dama, ma asoan ai nyè. E mod ki asoan ai ma, sëki ma asoan ai nyè, asoan ai e nyò angalom ma. ³⁸ Yohannes nyè ai nyè na: A ṅyëgëlë, biayen mod atsama bëbe minsisim a dzoe doe, ndò biayi nyè dò tele mvende, amu asëki ai bia esamba. ³⁹ Ndò Yesus adzo na: Të miakaman ai nyè. Amu mod ziṅ asëki dzam bò eyëṅ dzam a dzoe dama, angadugan vol kòbò ai ma abe. ⁴⁰ E mod asëki ai bia e ngam y’ayat, anë ai bia ngam dzia. ⁴¹ E mod angânyuu mina elè mëndim hë asu miasye a dzoe Kristus, makad mina bëbëla na, angâdzèè ki efaè dzie. ⁴² E mod angâbò na mbòg ya e ban abobod bayëbë ma ba aku mbëg, mbëṅ onë abui asu die na bëkëlë nyè akòg a kiṅ, bëwoa nyè a yòm. ⁴³ Ngë wò woe wakpè wa mbëg, tsigi wò. Anë mbëṅ na onyian ai wò mbòg a enyiṅ alodo na okë ai mò mëbè a tolendoṅ, a e ndoan enë të dim. [ ⁴⁴ ] ⁴⁵ Ngë akol doe lakpè wa mbëg, tsigi dò. Anë mbëṅ na onyian a enyiṅ ai akol da, alodo na bëwoa wa a tolendoṅ ai mëkol mëbè. ⁴⁶ Ngë dis doe lakpè wa mbëg, tui dò. Anë mbëṅ na onyian a edzoe Zamba ai dis dëda, alodo na bëwoa wa a tolendoṅ ai mis mëbè, [ ⁴⁷ ] ⁴⁸ mfa nsòṅ waban onë të wu, ndoan të dim. ⁴⁹ Amu mod osë ayi kidiban a nku ai ndoan. ⁵⁰ Nku onë mbëṅ. Ngë nku odzèè zam dzie, bayi wò bad kidi ai dze? Baalan nku abë mina, minyiṅ hm fë mvoè a zaṅ mina mina.

¹ Ndò angakodo hala, asòò a nkòṅ nnam Yudea, a Yordan ayat, minkunda mi bod mingadugan nyè zu a nyòl, angadugan bò yëgëlë mbol ongabë nyè fulu. ² Ndò bëfarisea bëngasubu nyè babi, bëngasili (bëbobolo nyè) ngë fam ebëlë ngul ya asoe ngal. ³ Ndò angayalan bò na: Moses angabende mina ya? ⁴ Bò na, Moses angavë ngul yë na bëtil kalara maan, bësoe nyè. ⁵ Yesus nyè ai bò na: Kë asu alèd nnëm daan ngò angatil mina mvende te a! ⁶ Atarigi a abonde yob ai si, angakom bò fam ai mininga. ⁷ Asu te ndò fam yakad lig esya ai nyia, akë lad ai ngal, ⁸ bò bëbè bëntoa nyòl dzia. Antoa hm na, basëki fë bëbè, hë nyòl dzia. ⁹ Ndò hm, të mod akandi e dzi Zamba angalad. ¹⁰ Eyòṅ bëngadugan a nda, ndò bëyègè basili nyè adzo te. ¹¹ Nyè ai bò na: Ngë mod asoe ngal, alugu mfë, andaman alug osu. ¹² Ngë mininga nyè ki asoe nnom, alugu mfë, anyiṅ a bisog. ¹³ Ndò bëngasò ai nyè ban bòngò na anamba bò. Bëyègè bëngakòṅan ai bò. ¹⁴ Ayen Yesus angayen nala, aliṅan, nyè ai bò na: Dzogan ban bòngò bëzu abë ma, mibë kaman ai bò, amu edzoe Zamba yawoge ai e bod bënë anë bò. ¹⁵ Makad mina bëbëla na: E mod ayi ki soan ai ayòṅ Zamba anë man mòngò, angânyian ki ete. ¹⁶ Angabëgë bò a mò, afubugu bò, abedëge bò mò. ¹⁷ Akui angakui a ndzòṅ, ndò mod ziṅan gazu toban ai nyè mbil, akudu nyè mëbòṅ osu, asili nyè na: A mbëmbë ṅyëgëlë, mëbò ya na mëbëlë enyiṅ kòm? ¹⁸ Yesus nyè ai nyè na: A dze waloe ma na mbëṅë? Mod mfë asëki mbëṅ, hë Zamba etam. ¹⁹ Kë wayëm mëmvende! Të wawoe, të waandaman alug, të wadzib, të watsig mbë ntol, të waanòṅ edzi esëki endzoe, olugu esoa ban nyoa. ²⁰ Nyè ai nyè na: A ṅyëgëlë, mazuzu ya mabaala e mam mësë mala, atarigi mòngò. ²¹ Yesus angafòmbò nyè, adiṅi nyè a mis, nyè ai nyè na: Dzom dzidzia eligi ya wa; Këlëg, okë kuan ai e dzi esë obëlë, ovë mimbubua, (eyòṅ te wayi bi etòg-akuma a yob) ozu hm fë watoṅ ma. ²² E mod nyò atindi fò asu ai nkòbò vi, akëlëg ai mëlunga a nnëm, amu angabë abëlë abui byem bi mò. ²³ Ndò Yesus angakilan abëbë na, abëbë na, nyè ai bëyègè boe na: Layi hm bò aye na e mod abëlë akuma anyian a edzoe Zamba! ²⁴ Bëyègè bëngakam nkòbò woe vi. Yesus adugan bò kad na: A bòngò, anë hm të fò aye na mod waanyian a edzoe Zamba. ²⁵ Anë ebugbu abui na kamele alod a alòṅ ondondò, alodo ai na nkukuma mod onyian a edzoe Zamba. ²⁶ Bëngafëdan kam, bëdzoo bò bò na: Za hm anë dzam kodeban? ²⁷ Yesus angafòmbò bò, nyè na: Adzo te lakad bod, lakad ki Zamba. Amu Zamba anë ngul-bò-mësë. ²⁸ Ndò Petrus angakèè na akad nyè na: Tam bëbë na, bingalig dzom esë na biazu biatoṅ wa. ²⁹ Yesus nyè na: Makad mina bëbëla na, mod ziṅ asëki dzam lig nda, ngë babënyaṅ, ngë bëkal, ngë nyia, ngë esya, ngë bòn, ngë mëfub asu dama ai asu mbëmbë foe, ³⁰ së na abi mënda, ai babënyaṅ, ai bëkal ai bënyia, ai bòn ai mëfub, ai mintye biyòṅ ntèd a si mu, akë fë bi enyiṅ kòm a enyiṅ yazu. ³¹ Abui bod bëtëlë osu, bayi bò bod bë mvua, bod bë mvua bëntoa bod bë osu. ³² Bëtoa a zen, bëbëdë a Yerusalem, ndò Yesus angakë bò osu, bëngakam, e ba ki bëtoṅo nyè bëngambara. Ndò Yesus adugan nòṅ b’awom ai bëbè, akèè na akad bò e mam mazu yënan ai nyè, ³³ nyè na: Mbëdan biabed a Yerusalem vi, mòn mod ayi kuan a mò bëfada bënen, ai bësaṅa bëkalara; bayi tsig na akyëbë ai awu, bëkaba nyè a mò bëhaiden, ³⁴ bayi nyè kpëgëlë, bëtuigi nyè mëndèn a nyòl, bëyidi nyè, bëwoe fë nyè, hë da, ayi kui a sòṅ a mvus mëlu mëlè. ³⁵ Ndò Yakob ai Yohannes, bòn bë Zebede, basubu nyè babi, bò ai nyè na: A ṅyëgëlë, biayi të na obò bia anë biayi wa sili. ³⁶ Nyè ai bò na: Dze endzò miayi na mebò mina? ³⁷ Bò ai nyè na: bò të na bitòbò wa, e nyò a mbo-nnomo, e nyò mbòg a mbo-ngala a duma doe. ³⁸ Yesus nyè ai bò na: Miayëm ki e dzom miasili dzili. Yë mibëlë azombo ya anyu e kòb mayi nyu, ngë aduban ṅduan mayi duban? ³⁹ Bò na: Bibëlë azombo te. Yesus nyè ai bò na: Miayi a hm fò nyu e kòb mayi nyu, miduuban fë ṅduan mayi duban, ⁴⁰ hë da mfa ya ntòban a mbo-nnomo wama ai a mbo-ngala wama, mabëlë ki ngul ya abò dò. Mam mëte mënë ai e bod ya Zamba angatòb. ⁴¹ Awog b’awom bëvòg bëngawog adzo di, bëngaliṅan ai Yakob ban Yohannes. ⁴² Ndò Yesus aloe bò, nyè ai bò na: miayëm na e bod badzoe mëyòṅ badzoe mò ai ngul esë; E bod bënë mimfaṅ batoan bad e ba bëvòg. ⁴³ Nala wayean ki ai mina. Dzam da, e mod ayi na abò mod nen a zaṅ dzan abò ṅsye bod bësë. ⁴⁴ E nyò ayi na abò mod osu abë mina, abò olò bësë. ⁴⁵ Amu tò mòn mod andzëki sòṅ na bësye nyè, angasò na asye, avë fë enyiṅ dzie a eban asu abui bod. ⁴⁶ Ndò basuan a Yeriko. Abog akodogo a Yeriko ai bëyègè boe, ai mod nkunda bod, ndò Bartimeo, mòn Timeo, atoa ndim, adzaaga mòni, angabë atoa a ndzòṅ. ⁴⁷ Angayi wog na Yesus man Nazaret nyòlò, akèè fò na akòbò a yob ete na: A man David, a Yesus, kudu ma ngòl. ⁴⁸ Abui bod bëngasog ai nyè ha, bò na atòbò evol. Hë avaa kiṅa yob, nyè na: A man David, yënë ma ngòl. ⁴⁹ Ndò Yesus akom etoa, nyè na: loegan nyè. Ndò baloe ndindim, bò ai nyè na: Tòbògò ai ndi, kodogo a si; aloe wa. ⁵⁰ Ndò asamza eyie dzie, ayoge, angakë abë Yesus. ⁵¹ Ndò Yesus adzo ai nyè na: Dze wayi na mëbò wa? Ndindim wò ai nyè na: Rabbuni, bò na mëyen. ⁵² Yesus nyè ai nyè na: Këlëg, ṅyëbë woe onyii wa. Etye etye te, angadugan yen mbëṅ, ṅnyè akë atoṅ Yesus a zen nyò.

¹ Eyòṅ bëngakui babi ai Yerusalem, a Betfage ai Betania, a nkol bile bi mbòn, ndò alom bëyègè boe bëbè, ² nyè ai bò na: Kaṅan e dzal anë mina osu dili; eyòṅ miayi kui ete, miayi yen ozele atii, mod ziṅ abë ya ki nyè bed a yob. Tian nyè, mizu ai nyè. ³ Ngë bësili mina na: Dze miabò dzili? Yalan na: Nti woe ayaṅan ai nyè, ndò fë ayi nyè dugan lom mu. ⁴ Ndò bëngakë, bëkòbò ozele atii babi ai mbè a nsëṅ, a mgbag ndzòṅ, ndò batii nyè. ⁵ Ndò bod bëziṅ bëmbë tëlë hala badzo ai bò na: A ya miatii ozele? ⁶ Ndò bayalan bò anë Yesus angadzo, bëdzoge bò. ⁷ Ndò bakë ai ozele abë Yesus, bëmana nyè bede biwòman biaban a nyòl, Yesus atòbò nyè a yob. ⁸ Abui bod bëngatè biwòman biaban a ndzòṅ, bëvòg bëbugu mëbui bile ya mëfub. ⁹ E bod bëkëlë nyè osu ai e ba bëzaa nyè a mvus bëngabede kiṅ na: Osanna. Maa ai e nyò azu a dzoe Nti . ¹⁰ Olugu ai edzoe tara waan David yazu bia a zen. Osanna a yob ete. ¹¹ Ndò anyian a Yerusalem, anyian a tempel, angakë a fëb dzom esë; ngoge engayi vin, ndò akë a Betania, ai b’awom ai bëbè. ¹² E kidi lende ya hala, bëkodogo a Betania, ndò zie yakòn nyè. ¹³ Ndò ayen ele bibuma ebëlë abui kye etëlë man ntye, angakë, adzo na ayi të kòb ebuma ete. Ndò akë, tègè kòb tò dzom, hë kye. Abog te dò lëngabë ki abog bibuma. ¹⁴ Ndò adzo ai ele na: Mod angâbad ki di ebuma dzoe tò eyòṅ. Bëyègè boe bëwogo. ¹⁵ Ndò bazu a Yerusalem. Ndò anyian a tempel, akèè na atsam e bod bëkuan ai e ba bëkusu byem a tempel, akubu bëtëbëlë b’e bod bëtsendëge mòni ai e ba b’e bod bëkuan ai abëṅ asi, ¹⁶ të dzoge na tò mod abëgë dzom a mò a tempel. ¹⁷ Angayëgëlë bò, nyè na: Asë ntilan na: Bayi loe nda dzama na nda ngogëlan asu mëyòṅ mësë a? Mina mibò ya dzò etòbògò bizilngan! ¹⁸ Ndò bëfada bënen ai bësaṅa bëkalara bëngawog, bëngadzëṅ mbol bënë nyè dzam dzèè. Amu bëmbarëga nyè, asu bod bësë bëkama ayëgëlë die. ¹⁹ Abog ngoge engavin, ndò bëngakodo a tisòn. ²⁰ A bëkëlë bawulu ai ndib kidi, bëntala ele bibuma emana ya kod, akègè a minkaṅ. ²¹ Ndò Petrus adugan tsog, nyè ai nyè na: Rabbi, yënë, ele ya wayòg emana ya kod. ²² Yesus nyè ai bò na: Bëlëgan ṅyëbë abë Zamba. ²³ Makad mina bëbëla na, e mod andzo ai nkol vi na: Famëṅi, okë diban a maṅ, tègè soan a nnëm woe, hë ayëbëgë na e dzam akòbò layi bòban, nala wayi yenan ai nyè. ²⁴ Asu te makad mina na: E dzi esë miayi dzaè a ngogëlan, yëbëgan na mibi ya dzò; miayi dzò bëlë. ²⁵ Eyòṅ miakogëlan, dzuan e mod mibëlë ai nyè olun, asu yë na esya waan ya yob adzu mina minsëm mian. ²⁷ Ndò badugan zu a Yerusalem. Akëlë awulu a tempel ha, ndò bëfada bënen ai bësaṅa bëkalara ai mvindi bod ya nnam bazu toban ai nyè, ²⁸ bò ai nyè na: e ngul wabò e mam ma yasò wa ve? Za ki angavë wa e ngul nyi na obò e mvòṅ mam nyi? ²⁹ Yesus nyè ai bò na: Mayi mina sili ebug dzia; ngë miyalan ma, ma mëkada mina e ngul mabò e mam ma ai dzò. ³⁰ Ṅduan Yohannes ongabë osò ve, yë a yob, yë a bod? Yalan ma! ³¹ Bëngalaṅëdan bò bò, bò na, ngë biadzo na: Ombë sòṅ a yob, ayi bia sili na: Asu dze miandzëki nyè yëbë? ³² Yë bikë a hm ki dzo na ombë sòṅ a bod? Bëngambara nkunda bod, amu abui bëngabë bëdzoo na Yohannes anë mfaṅ profet. ³³ Ndò bayalan Yesus na: Biayëm ki. Ndò hm Yesus nyè adzo ai bò na: Ma makad hm ki mina e ngul mabò e mam ma ete!

¹ Ndò akèè na akòbò ai bò a minkana, nyè na: Mod ziṅan gabè afub wayn, amana loṅ ongola, amana kom ofèd, aloṅo nkum, avëë bod bisye mëfub, akëlë a dulu. ² A abog mëkoe, ndò alom olò woe mbòg a bod bisye na akë nòṅ mëkoe ya afub wayn. ³ Bod bisye bëbii nyè, bëmana yit, bësoe nyè mò mò. ⁴ Ndò adugan bò lom olò mfë. E nyòlò te, bëbaa mëvëṅ a nlo, bëmana nyè kub osama a nyòl. ⁵ Adugan lom mfë. Bëwoe e nyòlò te, ai abui bëfë; bëyidi bëvòg, bëwoe bëvòg. ⁶ Hala aligi ya va hë ai mbòg, hë mbaṅ mòn woe. Ndò akëan nyè bò lom, adzoo na: Bayi kòn mòn wama wòṅ. ⁷ Ndò bod bisye bëngadzo a zaṅ bò bò na: Mòn elig nyòlò! Ṅwoan nyè, elig ewoge ai bia. ⁸ Ndò bëngabi nyè, bëwoe, bëwoa nyè a ongola afub a nsëṅ. ⁹ Mod afub ayi hm fò bò ya? Ayi sò, adzèè bod bisye a ekoa, avëë bod bëfë afub wayn. ¹⁰ Miandzë ya laṅ ebug ntilan dzi na: Akòg ya bëloṅo bë nda bëngawoa a fyè, ndò avëṅan ya nnom-akògò. ¹¹ Nti ṅnyè abò adzo te, anë eyëṅ dzam a mis man. ¹² Bëngadzëṅ na babi nyè, hë da bëmbarëga bod, amu bëngabii mbëṅ na nkana te otyan ai bò. Ndò bëngalig nyè, bëkodo hala. ¹³ Ndò balom nyè bod bëziṅ ya esamba bëfarisea ai e ba ya ngam Herodes asu yë na bëlam nyè a nkòbò. ¹⁴ Ndò bazu nyè kad na: A ṅyëgëlë, biayëm na onë sosoo ai na wabisi ki tò mod; amu onë ha të fial bod a mësu, hë oyëgëlë zen Zamba a bëbëla. Yë biayean yaan Kaiser toya, yë biayean ki yaan? Yë bivë, yë bibò të vë? ¹⁵ Mbol ayëmë mëdugan maban, nyè ai bò na: Dze miabobolo ma? Zaan ai ma nsaṅ mòni, mëyen. ¹⁶ Ndò bazu ai nyè wò. Nyè ai bò na: Evëgëlë za dzi, za ki anë ai nsanan? Bò ai nyè na: Kaiser. ¹⁷ Yesus nyè ai bò na: Vaan Kaiser e dzi yawoge ai Kaiser, mivaa hm fë Zamba e dzi yawoge ai Zamba. Bëngakam adzo te abui. ¹⁸ Ndò bësadukea bazu abë nyè ha (ba badzo na akui-lë-sòṅ a sëki), ndò basili nyè na: ¹⁹ A ṅyëgëlë, Moses angatil bia na: Ngë manyaṅ mod ziṅ awu, aligi mininga, të lig mòn, manyaṅ anòṅò ngal, abonde manyaṅ elig ai nyè ²⁰ Antoa hm na: Bod bëngabë babënyaṅ zamgbal. Ndò e nyò osu angalug mininga, awuu, të lig mvòṅ. ²¹ E nyò bèè alugu nyè, awuu të lig mvòṅ. E nyò lala hë dzam dëda. ²² Bò bësë zamgbal, tègè lig mvòṅ. ²³ Abog akui-lë sòṅ (ngë bayi kui a sòṅ), ayi bò mininga za? Amu bò zamgbal bëngalug nyè! ²⁴ Yesus nyè ai bò na: Miasë a ndimi abui a, të yëm mintilan, të yëm ngul Zamba? ²⁵ Amu eyòṅ bayi kui a sòṅ, fam yayi ki lug, bininga të lugëban; bënë anë benglès ya yob. ²⁶ Mfa mimbim, na miakui a sòṅ, miandzë laṅ a kalara Moses, e hom balèè adzo ele edigi, anë Zamba adzo ai nyè na: Mënë Zamba Abraham, Zamba Isaak ai Zamba Yakob? ²⁷ Asëki Zamba bëwu, anë Zamba bënyiṅ. Minë a ndimi eyëgan. ²⁸ Ndò nsaṅa bëkalara mbòg angasubu babi, mbol angawog bò bëdoan: ayen angayen na angayalan bò mbëṅ, ndò asili nyè na: Mvende fe yalod e nyi esë fòg? ²⁹ Ndò Yesus ayalan nyè na, e mvende osu enë na: Vogolo, a Israel, Nti Zamba waan anë hë Nti mbòg, ³⁰ ndò odiṅi Nti Zamba woe ai nnëm woe osë, ai nsisim woe osë, ai fëg dzoe esë, ai ngul dzoe esë. ³¹ E nyi bèè nyi: Odiṅi e mod mbòg anë wamen. Mvende fë yalod ki e nyili. ³² Ndò nsaṅa bëkalara adzo ai nyè na: Anë ete, a ṅyëgëlë, okòbò bëbëla na anë mbòg, ndò fë mfë asëki, hë nyè etam, ³³ ai na adiṅ nyè ai nnëm osë, ai nsisim osë, ai ngul esë ai adiṅ e mod mbòg anë mod wadiṅ wamen, nala onë abui alodo bifaè ai mëtunëṅa mësë. ³⁴ Mbol Yesus angayen na angayalan ai fëg, nyè ai nyè na: Wasëki oyab ai edzoe Zamba. Tègè fë ai e mod azombo nyè sili nsili. ³⁵ Yesus angayëgëlë a tempel, nyè na: Eyë bësaṅa bëkalara badzo ya na Kristus anë mòn David? ³⁶ David emen angadzo ai ngul Mfufub Nsisim na: Nti adzo ai Nti wama na: tòbògò ma a mbo-nnomo, akëlë kui anë mafudi wa minziziṅ mie a mëkol a si. ³⁷ David emen aloe nyè na Nti, ndò eyë anë nyè mòn ve? Abui bod avogolo nyè a miëëṅ. ³⁸ Eyòṅ ayëgëlë va, ndò adzo na: Mikalëga bësaṅa bëkalara a badiṅ bakë bawulu ai mindzòmbò biyie, bëdiṅi na bod bësug bò a minsëṅ mi angara. ³⁹ Badiṅ bitoa ya osu a mënda-bikoan ai bitoa ya osu a mëbog bidi, ⁴⁰ bamana sa mënda minkus, bëkogëlan kòm hë asu miṅyene. Bayi bëlë mbë nkad. ⁴¹ Ndò akë tòbò babi ai nkòb almosen, angafòmbò anë bod bëfudigi mòni a nkòb. Abui minkukuma bëfudigi abui mòni. ⁴² Ndò nkus mininga ziṅ, otoa mbubua, wakë sòṅ hala, ofudi sifen ebè, nala onë anë dòlò etan. ⁴³ Ndò aloe bëyègè boe, nyè ai bò na: Makad mina bëbëla, e man mbubua nkus nyò afudi a nkòb alodo e bod bësë bëhë fudi mòni ete. ⁴⁴ Amu bod bësë bëvë hë abui akuma anë bò mvug, hë da mfa woe, avë e dzom esë ahë bëlë a mëbua moe ete, avë enyiṅ dzie esë.

¹ Ndò angakodo a tempel, mbòg ya bëyègè boe nyè ai nyè na: A ṅyëgëlë, yënë akyaè abëṅ mëkòg ai abëṅ mëloṅ! ² Yesus nyè ai nyè na: Wayen e bod mëloṅ bala a? Tò akòg da layi ki ligi lëbëdë e di avòg a yob, së na lëmana bugi. ³ Ndò angakë tòbò a nkol bile bi mbòn, abëbëgë tempel nali, ndò Petrus ai Yakob ai Yohannes basili nyè a omomoa na: ⁴ Kada bia, e mam mala mayi yënëban abog afe, ndëm fe ki yayi lëdë na mam mëte mëngazu ya yenan? ⁵ Ndò Yesus angatari na akad bò na: Mibò okala na mod aza dug mina. ⁶ Abui dzam layi sò a dzoe dama, bëdzo na: Ma mënë nyè, bëngadug abui bod. ⁷ Eyòṅ miayi wodan bita ai mëfoe bita, të miadzèè fëg. Nala wayean yënëban, dzam da mëmana mabëki kui. ⁸ Ayòṅ layi luman ai ayòṅ avòg, edzoe nkukuma eluman ai e dzi evòg, si yayi kë yatigëdan mëboda mëziṅ, zie entoa: mëtari mintye mi nkogolo mili. ⁹ Mibò okala. Bayi kuan ai mina a mënda mëdzo, bëyidi mina a mënda-bikoan, abog te miayi bò bëbòòlò bama a mis bëdzoe ai minkukuma. ¹⁰ Amu mbëmbë foe ayean tari yëdan a mëyòṅ mësë. ¹¹ Eyòṅ ki bayi kuan ai mina nala, të miasaṅan na miayi kòbò ya? Hë mbol osë Zamba ayi bò na mikòbò, eyë kòbògan nala. Amu, sëki mina miayi kòbò, Mfufub Nsisim ṅnyè ayi kòbò. ¹² Mod ayi kuan ai manyaṅ a awu, esya akuan ai mòn, bòn bëngaluman ai bëbonde, bëwoe bò. ¹³ Miayi bi efëma a bod bësë asu dzoe dama. E mod ayi bò azombo akui a mëmana, ṅnyè ayi kodeban. ¹⁴ Eyòṅ miayi yen bidim bili ai amala biyenëban e hom wayean ki, a e mod walaṅ, wogo! E bod bënë a Yudea abog te, bëtubu a minkol a yob, ¹⁵ e nyò anë a ndil abë sus ngë akë nòṅ dzom ziṅ a nda dzie; ¹⁶ e mod anë a afub, abë dugan ai mvus na akë nòṅ ewòman. ¹⁷ Ngòl ai e ba bënë mëbum ai mindzindzie ya mëmos mëte. ¹⁸ Kogëlan na të layenan a abog oyon. ¹⁹ Amu, mëmos mëte, amala layi bò e kan yabë ya ki bò atarigi anë Zamba angakom si, azaa kui ana, ai akyaè langâbad ki bò. ²⁰ Ngë Nti abò të tsig mëlu mëte etun, tò mod mbòg ayi ki nyiiban, dzam da, ayi tsig mëlu asu e ba ya angatòb. ²¹ Eyòṅ te, ngë mod akad mina na: Kristus nyò anë ha, ṅnyè nyòli anë ali, të miayëbë. ²² Amu abui bëkristus ai bëprofet mëdugan bayi tëbë a nnam, bëbò mësimba ai biyëṅ bi mam asu yë na badug e ba bënë ntòban, ngë anë ebugbu. ²³ Mfa waan, mibò okala. Mamana mina bende mësë osusua. ²⁴ Mëlu mëte, a mvus e bidim bili, nlo-dzobo ayi yimbi a nkut, ngòn të bad fyè mial, ²⁵ Atitie lëngadabëda a yob, minkan ya yob minga tigëdan, ²⁶ eyòṅ te bayi yen mòn mod azaa a minkut ai abui fim ai duma. ²⁷ Abog te ayi lom benglès, angakoan e ba bënë ntòban a mëbug më si mënyii, atarigi a abug si, akëlë kui a abug yob. ²⁸ Nòṅan ayègè ai mvulna ele tòli. Ṅnyie anë ntëm wasòman kye, kye ekui, mingayëm na esëb entoa ya babi. ²⁹ Dzam dëda, mfa waan, eyòṅ miayi yen e mam mala mëyenëṅan, miyëmë na (Mòn mod) antëlë ya a mbè. ³⁰ Makad mina bëbëla na, e ngongo bod nyi yayi ki wu së na e mam mala mëyenëban. ³¹ Yob ai si biayi lod, bibug biama biangalod ki. ³² Mfa awola te ai amos te, mod ayëyëm dò, tò benglès ya yob, tò mòn; hë Tara etam ṅnyè ayëm. ³³ Boan okala, tòbëgan evie, amu miayëm ki abog. ³⁴ Anë anë mod ya angakë a dulu, aligi nda dzie ai bod bisye boe, avë bò ngul, anë mod esye dzie, abende nnòni na abò evie. ³⁵ Tòbëgan hm evie; amu miayëm ki abog nti dzal ayi sò, tò ngongogële, tò ai zaṅ, tò ai ndib, tò ai mëlende më kidi, ³⁶ amu, eyòṅ ayi sò mbumlëna, ayean ki mina kòb oyò. ³⁷ Ndò fë e dzam madzo di anë asu mod osë: tòbëgan a ngomzëna.

¹ Hala Paska ai abog mbaṅëla të ai saṅ bitoa mëlu mëbè. Ndò bëfada bënen ai bësaṅa bëkalara bëngadzëṅ mbol bënë dzam bi Yesus a mëkëṅ, bëwoe nyè. ² Amu bëdzoo na: Së hm ki a abog ete mu, enyënyam eza bò a zaṅ bod. ³ Ndò hm, atoa a Betania, a nda Simun man nzëzam, atoa na adi, ndò mininga ziṅan gasò, abëlë ndëg mbòn alabinda, otoa mfaṅ ai dia, ndò aboe e ndëg nyi, angasoe nyè wò a nlo. ⁴ Bod bëziṅ bëngalaṅëdan a minnëm ha na: A dze hm fò abim endaman alabinda di? ⁵ Amu bëhë bë dzam kuan ai mbòn hi alodo minsaṅ mi mòni mintèd milè, bëvëë mimbubua. Bëngasòg nyè. ⁶ Ndò Yesus adzo na: Dzogan nyè. Dze miayi ai nyè abe? Abò ma mbëmbë esye. ⁷ Amu mimbubua minë ai mina kòm esë, ndò minë bò dzam bò mbëṅ abog asë, mfa wama, masëki ai mina kòm esë. ⁸ Abò abim ahë bëlë ngul. Atari ma waba mbòn a nyòl asu edzëb-mbim dzama. ⁹ Makad mina bëbëla na, e hom osë bëngâbende mbëmbë foe a si esë, e dzam e mininga nyò abò layi lèèban, bëtsogo nyè. ¹⁰ Ndò Yudas Iskariot, mbòg ya b’awom ai bëbè, angakë a bëfada bënen asu yë na akuan ai bò nyè. ¹¹ A bëngawog nala, bëngasan ai mintag, ndò bakag nyè na bayi nyè vë mòni. ¹² Ndò, amos osu ya abog mbaṅëla të ai saṅ, abog bakad tuni Paska, ndò bëyègè boe badzo ai nyè na: Wayi na bikë wa komëzan e hom wadi Paska ve? ¹³ Ndò alom bëyègè boe bëbè, nyè ai bò na: Kaṅan a tisòn, miayi toban ai fam ebëgë emvaṅ mëndim: Biegan nyè, ¹⁴ e hom ayi nyian, mikad mod nda ya ete na: ṅyëgëlë asili na: Eyë etun-nda bëyëṅ dzama mayi di Paska ai bëyègè bama enë ve? ¹⁵ Abog te ayi mina lëdë mod etun-nda a nda-yob atoa nkoman. Eyë komëzan bia abog ete. ¹⁶ Ndò bëyègè bëngakë, bënyian a tisòn, bëkòbò anë angakad bò, bëkomëzan Paska. ¹⁷ Eyòṅ ngoge engavin, ndò azu ai b’awom ai bëbè. ¹⁸ Ndò bayëm bitoa, bëngadi, ndò Yesus adzo na: Makad mina bëbëla na mod mbòg ya abë mina ya adi ai ma, ayi kuan ai ma. ¹⁹ Bëntoa mëlunga, bëngakë basilan bò bò ha na: Yë ma ana nga? ²⁰ Ndò akad bò na: Mbòg ya b’awom bëbè, a ayi du ai ma wò a esoa eyòṅ. ²¹ Amu mòn mod akë fò anë bëngatil asu die, hë dzam da, amala ai e mod mòn mod akuan a mò moe! Lëntoa mbëṅ asu die ngë mod te abò të byali. ²² A bëdzaa ha, ndò anòṅ mbaṅëla, avëë ngaṅ, abëgë, akalan bò, nyè na: Nòṅan, e dzi enë nyòl dzama. ²³ Ndò fë anòṅ kòb, avëë ngaṅ, akalan bò, ndò bësë bënganyu ete. ²⁴ Ndò adzo ai bò na: E dzi enë mëki mama ya mkpamaṅ elad, mayi soeban asu abui bod. ²⁵ Makad mina bëbëla na mayi ki bad nyu ebuma ya ndig wayn akëlë kui amos ya mayi nyu mkpamaṅ wayn a ayòṅ Zamba. ²⁶ Ndò bëngayia bia bi oyëṅ, bëkui, bëkëlë a nkol bile bi mbòn. ²⁷ Ndò Yesus adzo ai bò na: Bod bësë bayi ma wog osòn, amu anë ntilan na: Mayi bimi nnòni, mintomba misë mimana tsaman. ²⁸ Dzam da, a mvus yë na mëkui ya sòṅ, mayi mina kë osu a Galilea. ²⁹ Ndò Petrus adzo ai nyè na: Tò fò bod bësë bëwog wa osòn, mfa wama, tègè ai nala. ³⁰ Ndò Yesus adzo ai nyè na: Makad wa bëbëla na, e wamen nyò, alu ben di, osusua yë na nnom kub alòṅ biyòṅ bibè, wayi ma sie biyòṅ bilè. ³¹ Hë nyè afëdan dzo na: Tò mayean wu ai wa, mangasie ki wa. Bò bësë bëngakòbò hë dzam dëda. ³² Ndò bakë a mod afub atoa dzoe na Getsemani, ndò adzo ai bëyègè boe na: Tòbëgan ha, ntye makë kogëlan. ³³ Ndò anòṅ Petrus ai Yakob ai Yohannes, akèè na asaṅan eyëgan, ai mëlunga abui, ³⁴ ndò adzo ai bò na: Nnëm wama onë a mëlunga akui a awu. Tòbëgan ha, bibò evie. ³⁵ Ndò akë osu man ntye, akuu a si, angakogëlan na, ngë anë ebugbu awola te asaala nyè, ³⁶ angadzo na: Abba, a Tara, onë bò mesë. Vaagi ma e kòb nyi, dzam da sëki anë mbol mayi, abòò anë mbol wayi. ³⁷ Ndò azu bò koe bëkëlë oyò, nyè ai Petrus na: A Simun, dze yë wakë oyò? Wandzëki bi ngul ya atòbò evie tò hë awola da nga? ³⁸ Tòbëgan evie, mikogëlan, asu yë na të miaku a mëbobëla; amu nsisim onë ngul, nyòl etoa ntëgan. ³⁹ Ndò adugan kë, angakogëlan hë dzam dëda. ⁴⁰ Ndò adugan bò sòṅ koe bëkëlë oyò, amu mis mëngabë bò adid, bò ha të yëm e dzam bakad nyè. ⁴¹ Ndò akë eyòṅ lala, nyè ai bò na: Kaṅan oyò eyòṅ dzili, miwaè: Nala wayean. Awola asò ya, yënan sik, mòn mod azu kuan a mò bësëm. ⁴² Tëbëgan, nkaṅan. E mod akuan ai ma nyòlò azu. ⁴³ Angënë akòbògò nala, ndò Yudas (mbòg ya b’awom ai bëbè) asò, anë ha ai nkunda bod ya bëfada bënen ai bësaṅa bëkalara ai bënyia-bod-mvia bëngalom, bëbëlë bënyamëla, ai këg. ⁴⁴ E mod akuan ai nyè angakui ai bò kiṅ na: E mod mayi wuban ai nyè, ṅnyè nyòlò, bian nyè, mitoan kë ai nyè. ⁴⁵ Ndò asubu nyè babi, nyè ai nyè na: Rabbi, awuban ai nyè. ⁴⁶ Ndò e bod ba bafudi nyè mò a nyòl, bëbii nyè. ⁴⁷ Mod mbòg ya e ba bëngabë bëtëlë hala atye fò nyamëla, abaa man olò fada nen, atsigi nyè alò. ⁴⁸ Ndò Yesus adzo ai bò na: Dze yë misò ma bi anë ezilgan, ai akëṅ, ai këg nga? ⁴⁹ Mëngabë ai mina amos osë a tempel, mëyëgëlë, mina tègè ma bi. Abòban nala, asu yë na ntilan odzalëban. ⁵⁰ Ndò bëngalig nyè, bò bësë bëmana tub. ⁵¹ Man ndoman ziṅ azaa atoṅ nyè hala, abëgë sanda a angëdëg, ndò babi nyè. ⁵² Ndò angalig sanda atubu nsò. ⁵³ Ndò bakë ai Yesus abë fada nen, ndò bëfada bënen bësë ai bënyia-bod-mvia ai bësaṅa bëkalara bakoan. ⁵⁴ Petrus azu abye nyè ha man ntye, akui a nsëṅ abaa fada nen, ndò atòbò a si ha ai bod bisye, angawòbò ndoan. ⁵⁵ Bëfada bënen ai ekoan nnam bëngadzëṅ akalëga abë Yesus asu yë na bëwoe nyè, hë da, të yen. ⁵⁶ Amu abui bëzaa nyè tsig mbë mvaa, dzam da mbòlan waban të toban kiṅ. ⁵⁷ Ndò bod bëziṅ bëngatëbë hala, bëngatsig nyè mbë mvaa, bò na: ⁵⁸ Bingawog e mod nyò adzo na: Mënë dzam bug e tempel anë nloṅan ai mò më bod nyò, mëdugan loṅ mfë, së a ki ai mò më bod, a mvus mëlu mëlè, ⁵⁹ dzam da tò mbòòlan waban te të toban. ⁶⁰ Ndò fada nen angatëbë a ezezaṅ, ndò asili Yesus na: Wafèd ki e mësòman ma nga? ⁶¹ Nyè hë evol, të yalan tò dzom. Ndò fada nen adugan nyè sili na: Yë wa onë Kristus, mòn e nyò anë ai olugu. ⁶² Yesus nyè na: Owe, ndò fë miayi yen mòn mod atoa a mbo-nnomo ngul, azaa fë a minkut a yob. ⁶³ Ndò fada nen angatonde biwòman bie nyè na: Dze fë bingëne yaṅan ai bësòman? ⁶⁴ Miwog ebyandi! Miayen dò ya? Bò bësë bëngatsig na ayean ai awu. ⁶⁵ Ndò bëvòg bëziṅ batari na batui nyè mëtè bëbudigi nyè asu, bëbimiṅi nyè, bò na: Bò mvigi; Tò bod bisye bëbimiṅi nyè a mëmaṅ. ⁶⁶ Petrus atoa osinkiè abaa ha, ndò man mininga ziṅ, mbò bisye fada nen asò ⁶⁷ ndò ayen Petrus awòbògò ndoan, ndò atoan nyè bëbë, nyè na: Wa wazu ya fë watòbò ai Yesus man Nazaret. ⁶⁸ Ndò asie na: Mayëm ki, ndò fë mawog wog ki e dzam wadzo. Ndò akë osu efas ya nsëṅ, ndò nnom kub alòṅ. ⁶⁹ Ndò man mininga ayen nyè, adugan kèè na akad e bod bëmbë tëlë hala na: E mod nyò anë mbòg ya abë bò. ⁷⁰ Hë nyè asiege. Eban të kog, ndò e bod bëmbë tëlë hala badzo ai Petrus na: Onë fò mbòg ya abë bò totoe, amu onë man Galilea. ⁷¹ Ndò akèè na akag, akanëṅi sòṅ nyè na: Mayëm ki e mod miadzo nyòlò. ⁷² Etye etye te, ndò nnom kub alòṅ eyòṅ bèè. Petrus adugan tsog ebug ya Yesus angadzo ai nyè na: Osusua yë na nnom kub alòṅ biyòṅ bibè, wayi ma sie biyòṅ bilè. Atsogo angatsog dò, aboe yon.

¹ Kikidigi ai ndib, ndò bëfada bënen ai bënyia-bod-mvia ai bësaṅa bëkalara ai ekoan nnam esë babò ekoan, bëfaṅa Yesus ngadag, bëkë nyè vë Pilatus. ² Ndò Pilatus asili nyè na: Yë onë nkukuma Yuden? Ndò ayalan nyè na: Ndò wadzo dili. ³ Bëfada bënen bëngasòman nyè abui. ⁴ Ndò Pilatus adugan nyè sili: Wayalan ki tò dzom nga? Vogolo abim basòman wa. ⁵ Yesus atoa të yalan tò dzam, e kan yë na Pilatus angakam. ⁶ A abog Paska asë, akarëga bò suu e man mimbog bëdzaa nyè. ⁷ Mod ziṅ hala angabë dzoe na Barabbas, atoa a mimbog ai bod bëkarkara ya bëngawoe mod a endudugëlan ziṅ. ⁸ Ndò bod bëngabed, bëtari na basili nyè na abò bò anë fulu engabë nyè. ⁹ Ndò Pilatus ayalan bò na: Yë miayi na mësoe mina nkukuma Yuden? ¹⁰ Ayëmë të na bëfada bënen bëngakuan ai nyè a mbë nnëm. ¹¹ Bëfada bënen bëngabòlan bod na Barabbas ṅnyè asuu bò. ¹² Ndò Pilatus adugan bò yalan, nyè na: Dze hm miayi na mëbò ai e nyò mialoe na nkukuma Yuden? ¹³ Ndò bafëdan yëdan a yob ete na: Bomo nyè a klos. ¹⁴ Pilatus nyè ai bò na: Dze adaṅ abò a enë abe? Bò ha hë bëyedëgan a yob na: Bomo nyè a klos. ¹⁵ Mbol Pilatus angabë ayi na bod bëtòbò mintag, ndò asuu bò Barabbas, avë na bëyid Yesus, bëbomo nyè a klos. ¹⁶ Ndò bëzimbi bëngakui ai nyè a nsëṅ abaa, a nda ngòmëna, bëloe esamba bëzimbi esë, ¹⁷ ndò babòdò nyè eyie eviege, bëtiṅi ekada biyò, bëbede nyè dzò a nlo. ¹⁸ Bëkèè hm na basug nyè: Ovuma, a nkukuma Yuden. ¹⁹ Bëngabimi nyè a nlo ai engëṅ, bëtuigi nyè mëtè, bëkudu nyè mëbòṅ osu na balugu nyè. ²⁰ Eyòṅ bëngamana nyè kpëlë, bësòdi nyè evëlë eyie, bëdugan nyè bòdi biyie bie. Mbò bakë ai nyè ba na bakë nyè bomo a klos. ²¹ Ndò banòdi Simun man Sirena, ya angabë lodo hala, asòò a afub, esya Alesander ai Rufus, na abëgë nyè klos. ²² Ndò bakë ai nyè a Golgota, nala watyan na, Hom Ekogolo nlo. ²³ Ndò bavë nyè mëyòg më saṅ. Abënë nyu. ²⁴ Ndò babomo nyè a klos, bëkaban biwòman bie, bëdoa abia. ²⁵ Engabë awola lala, eyòṅ bëbomo nyè a klos. ²⁶ Etòm awu die engabë ntilan na: Nkukuma Yuden. ²⁷ Bëngabome fë bizilngan bibè ai nyè ha, mbòg a mbo-nnomo, e nyò mbòg a mbo-ngala. ²⁹ E bod bëlodo hala bëngakpëlë nyè, bëluugu minlo bëdzo na: Bòs, a e mod wabug tempel, odugan nyè loṅ a mvus mëlu mëlè, ³⁰ susu a klos, onyii wamen. ³¹ Dzam dëda fë, bëfada bënen ai bësaṅa bëkalara bëngakpëlë nyè a zaṅ bò a bò ha, bò na: Angakode bod bëfë, asëki dzam kode hë emen! ³² Kristus, nkukuma Israel atam hm sus a klos na, biyen, biyëbë fë. E bod bëmbë mboman a klos ai nyè ha bëngakpëlë nyè. ³³ Eyòṅ awola samëna angakui, ndò dibi angabò akui a awola ebulu. ³⁴ A awola ebulu, ndò Yesus angakòbò a yob ete na: Eloi, Eloi, lema sabaktani? nala watyan na: A Zamba wama, a Zamba wama, a dze wadzoge ma? ³⁵ Bod bëziṅ ya bëngabë tëlë hala bëngayi wog, bò na: Yënë, aloe Elias! ³⁶ Mod ziṅ hala atye mbil, akë du anya a saṅ wayn, akëlë a akòṅ, anyuu nyè, nyè na: Dzogan, biyen ngë Elias ayi nyè suu a si. ³⁷ Yesus adugan vë kiṅa yob ete, ndò asuu ṅhëbë. ³⁸ Ndò mod eye ndòmbò ya tempel angatondëban a zaṅ, atarigi a yob, akui a si. ³⁹ Ndzoe ntèd bëzimbi angabë tëlë nyè osu; e kan Yesus angasuu ṅhëbë, mod te nyè na: Bëbëla, e mod nyò ahë bë mòn Zamba. ⁴⁰ Bininga bëngabë bëtëlë hala oyab, bëbëbëgë, bëtoa na: Maria Magdalena ai Maria nyia Yakob mòngò ai Yoset, ai Saloma, ⁴¹ mbò bëzaa batoṅ nyè eyòṅ angabë a Galilea, bësye nyè, ai abui bininga afë a bëngabed ai nyè a Yerusalem. ⁴² Abog ngoge ekëlë vin hali, mbol angabë okuli abog, nala onë na osusua sabbat, ⁴³ ndò Yosef ya Arimatea, mfaṅ mod ya ekoan nnam, nyè fë angabë ayanga ayòṅ Zamba, ndò angabi azombo, akëlë abë Pilatus, adzaè nyè mbim Yesus. ⁴⁴ Pilatus angakam na Yesus awu ya ki, ndò aloe ndzoe ntèd bëzimbi, asili nyè ngë hala awu ya eban. ⁴⁵ Eyòṅ angayëm ai e kan ndzoe bëzimbi angakad nyè, ndò avë Yosef mbim. ⁴⁶ Akusu ndòmbò eye, asuu nyè a si, awogo nyè a ndòmbò te, aboe nyè a sòṅ ya bëngabog a akòg, bëfudi ngòg a mbè sòṅ. ⁴⁷ Maria Magdalena ai Maria nyia Yoset bëyënë të e hom bëngafudi nyè.

¹ Sabbat angayi lod, Maria Magdalena ai Maria nyia Yakob ai Saloma bëkusu mimbòn na bakë nyè miè wòbò. ² Ndò hm ai ndib kidi, ngë sabbat alod anë angoge, ndò bakë a sòṅ, hala nlo-dzobo akui ya. ³ Bëzaa basilan bò a bò na: Za amvaa bia ngòg a mbè sòṅ an a? ⁴ A batye mis na babëbë, bëntala na ngòg engavaaban; dzò engabë hm eyëgan anen. ⁵ Ndò banyian a sòṅ, bëyënë ndoman mod etoa efas ya mbo-nnomo, abëgë mfum ewòman, bëngakòn wòṅ a bui. ⁶ Ndò adzo ai bò na: Mibë mbara: Yesus man Nazaret ya angabomban a klos ṅnyè miadzëṅ, së nala a? Atëbë a sòṅ, asëki ha. E hom bëngaboe nyè hi. ⁷ Mfa waan, kaṅan kad bëyègè boe ai Petrus na akë mina osu a Galilea. Awe ngò miayi nyè yen, e kan angakad mina. ⁸ Yë bëngayi kui a nsëṅ, ndò batub mimbil a sòṅ, amu bëngabë nyaman kam ai wòṅ osë. Ndò bandzëki kad mod tò dzom ai e wòṅ bëmbarëga. Na ngò Mbëmbë Foe atili Markus angamana ya eyòṅ dzi. ⁹ Ntëban angatëbë a sòṅ ai ndib kidi a amos osu ngë sabbat alod anë angoge, ndò angayene Maria Magdalena ya angakuli bëbe minsisim zamgbal a nyòl. ¹⁰ E Maria nyò akë kad e ba bëngabë bëmvoe boe, bò ha hë mëlunga, hë miṅyon. ¹¹ Ṅnyie anë bëngayi wog na atala, ai na Maria angayen nyè, bëngasoo. ¹² A mvus ya hala, ndò ayene bëbè ya abë bò bëkëlë bawulu, atoa nyòl kan fë, awulugu a mvus nnam. ¹³ Ndò bakë kad e ba bëvòg. Tò nala bò të bò yëbë. ¹⁴ Ndò hm ladugan bò na, bëtoa na badi, ndò ayene b’awom ai mbòg, akòṅan ai bò asu bisoo biaban ai alèd-nnëm daban, amu bandzëki ṅyëbë e bod bëngayen nyè hala atëbë ya a sòṅ. ¹⁵ Nyè ai bò na, kaṅan a si esë, miyedan ekokoma esë mbëmbë foe. ¹⁶ E mod ayi yëbë, aduban fë, ayi kodeban; e nyò ayi ki yëbë, ayi ku a nkad. ¹⁷ E ba bayi ṅyëbë bayi bò e mësimba ma: Bayi tsidan bëbë minsisim a dzoe dama, bayi kòbò minkòbò mifë, ¹⁸ bayi bi nyò ai mò, ndò fë tò bënyu ngul nsul, wayi ki bò bò tò dzom, bayi bede minkokòn mò, mingabò mvoè. ¹⁹ Eyòṅ hm Nti Yesus angamana lèè ai bò nala, ndò anganòṅëban a yob, atòbò a mbo-nnomo Zamba. ²⁰ Bò bëtye hm na bakë bayedan mbëmbë foe hom osë, Nti asye ai bò, ebug dzò elada minkaṅa i mësimba mëbòban ete. Amen.