YOANNES

YOANNES

¹ A mëtari, ebugu angabë; ebugu angabë abë Zamba, ebugu atoa man Zamba. ² Angabë abë Zamba a mëtari. ³ Dzom esë engakomban ai nyè, ndò fë, tègè ai nyè, dzom ziṅ yandzëki komban. E dzi engakomban ⁴ engabë enyiṅ abë nyè, ndò enyiṅ engabë mfyè bod. ⁵ Ndò mfyè wafyè a dibi, hë da, dibi tègè wò nòṅ. ⁶ Ndò mod ziṅan gasò, a nloman Zamba, mod te dzoe na Yohannes. ⁷ Angasò asu mbòòlan, na azu bòòlò mfyè, asu yë na bod bësë bëyëbë etòm dzie. ⁸ E nyòlò te angabë ki mfyè; angasò hë asu yë na azu bòòlò mfyè. ⁹ Angabë mfaṅ mfyè ya wafyè mod osë, a ongasò a si ndon. ¹⁰ Angabë a si ndon, ndò fë si ndon engakomban ai nyè, hë da, si ndon yandzëki nyè yëm. ¹¹ Angasò a biwoge bie, hë da, emboe bandzëki soan ai nyè. ¹² Eba bësë ya bëngasoan ai nyè, a bëngayëbë a dzoe die, angavë bò ngul ya avëṅan bòn bë Zamba, ¹³ e ba ya bëngabyali, së a hm ki a mëki ngë ṅyian nyòl ngë ki a ṅyian fam, hë abë Zamba emen. ¹⁴ Ndò ebugu anganòṅ nyòl, aloṅo abëmba die abë bia, ndò biayen duma die, duma anë e di mbaṅ mòn obëlë abë esya; anë ndzian ai maa, ai sosoo. ¹⁵ Yohannes abòòlò nyè, ndò adzo na: E nyò ṅnyè mëdzoo na: E mod azu ma a mvus alod ya ma osu, amu angabë ma osu. ¹⁶ Amu bia bësë bingayen maa abede maa a yob, a ntud enyiṅ woe, ¹⁷ amu a zaṅ Moses ngò mvende engavëëban, maa ki ai sosoo bintoa a zaṅ Yesus Kristus. ¹⁸ Mod ziṅ abë ya ki yen Zamba. Mbaṅ Mòn ya anë Zamba, a anë a nnëm esya, ṅnyè angayaè zen. ¹⁹ Mbòòlan Yohannes a hi, eyòṅ Yuden ya Yerusalem bëngalom nyè bëfada ai bëleviten na bësili nyè na: Wa onë za? ²⁰ Ndò angamëm, andzëki sie, ndò angamëm na: Ma, masëki Kristus. ²¹ Ndò basili nyè na: Dze hm, yë wa onë Elias? nyè na: Kokoa. Yë wa onë profèt? nyè na: Kokoa. ²² Ndò hm badzo ai nyè na: Onë hm za ben tuk? Mbol yë na bivë e ba bëlom bia eyalan. Wadzo adzo doe ya? ²³ Nyè na: Mënë kiṅ e nyò ayëdan a nkod-nnam: limëṅan zen Nti, anë profèt Isaias angakad. ²⁴ E bod ba bëngabë a nloman bëfarisea. ²⁵ Ndò basili nyè, bò na: A dze hm wadu bod, ngë osëki tò Kristus, tò Elias, tò ki profèt? ²⁶ Yohannes nyè ai bò na: Ma madu bod a mëndim. Mod atëlë a zaṅ dzaan, miayëm ki nyè; ²⁷ azu ma a mvus, hë da mayean ki na matii nyè nkòl silfas. ²⁸ E mam ma mëngayenëban a Betania, a Yordan a yat, e hom Yohannes angabë aduu bod. ²⁹ E kidi lende ya hala, ndò ayen Yesus azaag abë nyè, nyè na: Yënë ntomba Zamba ya wavaè minsëm ya si ndon. ³⁰ Ṅnyè mëdzoo ai nyè na: Mod ziṅ azu ma a mvus, a angalod ma osu, amu angabë ma osu. ³¹ Mamen mëmbë yëmë ki nyè, dzam da mëngazu du bod a mëndim asu yë na akulëban a Israel. ³² Ndò Yohannes angabòòlò, nyè na: mëngayen nsisim osusu, osòò a yob anë obëṅ, ndò ongatòbò nyè a nyòl. ³³ Mfa wama, mambë yëmë ki nyè, dzam da e nyò angalom ma na mëdu bod a mëndim ṅnyè angadzo ai ma na: ’E mod oṅyënë nsisim osusu, ozaa tòbò abë nyè, ṅnyè ayi du abë Mfufub Nsisim!’ ³⁴ Mamen mëngayen, ndò fë mazu ya mabòòlò na ṅnyè anë mòn Zamba. ³⁵ E kidi lende ya hala, Yohannes atëlë na, ai bëyègè bëbè ya esamba dzie, ³⁶ ndò afòmbò Yesus, mbol alodo, nyè na: Yënë sik, ntomba Zamba. ³⁷ Ndò e bëyègè bëbè ba bawog nyè akòbògò nala; mbò bakë batoṅ Yesus a zud ba. ³⁸ Ndò Yesus ahëṅan, antala anë bazu batoṅ nyè, nyè ai bò na: Dze miadzëṅ? Bò ai nyè na: Rabbi (nala watyan na: a ṅyëgële), eye otoa he? ³⁹ Nyè ai bò na: Zaan, miayi yen. Ndò bëngakë, bëyënë e hom atoa, ndò bëngatòbò ai nyè amos te. E mam ma, dzam bò awola awomo. ⁴⁰ Mbòg ya e ba bëbè ya bëngawog Yohannes akòbògò, bëtoṅo nyè, angabë Andreas, manyaṅ Simun Petrus. ⁴¹ Ndò atari yen manyaṅ Simun, nyè ai nyè na: Bisòm ya Messias (nala watyan na: Kristus). ⁴² Ndò akë ai nyè abë Yesus. Ndò Yesus afòmbò nyè, nyè na: Wa, onë Simun, man Yohannes; wayi loeban na Kefas, nala watyan na Akògò. ⁴³ Amos otsaag hala, angabë ayii na akë a Galilea, ndò ayen Filipus. Yesus nyè ai nyè na: Zaag wabie ma. ⁴⁴ Filipus angabë mod ya Betsaida, mod ya tisòn Andreas ban Petrus. ⁴⁵ Filipus atoban ai Natanael, nyè ai nyè na: E mod Moses ai bëprofèt bëngatil a kalara mvende, bisòm ya nyè, Yesus, man Yosèf ya Nazarèt. ⁴⁶ Natanaèl nyè ai nyè na: Yë e dzam anë mbëṅ anë dzam sòṅ a Nazaret? Filipus nyè ai nyè na: Zaag yen. ⁴⁷ Ayen Yesus angayen Natanaèl azaag abë nyè, ndò alaṅ nyè ebug dzi na: Yënë a mfaṅ, man Israel nyò anë të ai mvol a nyòl. ⁴⁸ Natanaèl nyè ai nyè na: Eyë wayëm ma he? Yesus nyè ai nyè na: osusua yë na Filipus aloe wa, hala otoa a ele bibuma a si, ma mëyen ya wa. ⁴⁹ Natanaèl nyè ai nyè na: A Rabbi, onë man Zamba, onë ndzoe Israel. ⁵⁰ Yesus nyè ai nyè na: dze yë mbol mëkad wa na mëyen wa a ele a si ndò wayëbë? Wayi yen alodo nala. ⁵¹ Ndò adzo ai nyè na: Amen, amen, makad mina na, miayi yen yob ayoo, benglès bë Zamba bëbëdë, bësusu a man Zamba anë.

¹ A amos lala, alug angabë a Kana ya Galilea, nyia Yesus nyè angabë we. ² Yesus ai bëyègè boe bò fë bëngabë mbandan a alug. ³ Ndò mëyòg mëngaman ha, nyia Yesus nyè ai nyè na: Babëlë ki mëyòg. ⁴ Yesus nyè ai nyè na: Dze enë a zaṅ bia wa? Awola dama andzë ya kui a. ⁵ Nyia nyè ai bod bisye na: E dzi esë ankad mina ana, hë mibòò. ⁶ Bimvaṅ mëkòg bingabë hala bisaman, asu esob-nyòl Yuden, bitoa, anë emvaṅ mëbom mëbè ngë mëlè. ⁷ Yesus nyè ai bò na: Dzalëgan mëndim a bimvaṅ. Ndò bëngadzala biè akui a nkòṅ a yob. ⁸ Nyè ai bò na: Biedan hm, mikë vë ndzoe abog. Mbò bakë ba. ⁹ A ndzoe abog akiègè e mëndim mëngavëṅan wayn ma, të yëm mfag asò, dzam da e bod bisye bëngabied mëndim bëyemë të, ndò ndzoe abog aloe nlug, ¹⁰ nyè ai nyè na: Mod osë atari kad vë e wayn anë mbëṅ; eyòṅ bod bëbili ya wayn, bëngavë e nyò adaṅ ki mbëṅ. Mfag woe, obaala e wayn anë mbëṅ nyò azaag kui etoa dzi. ¹¹ Yesus angabò mëtari më ndëm a Kana ya Galilea, ndò angakuli duma die, bëyègè boe bëyëbë nyè. ¹² A mvus te, ndò angasigi a Kafarnao, ai nyè ai nyia woe, ai babënyaṅ boe, ai bëyègè boe, ndò bëngatòbò we, dzam da tègè tòbò kòm. ¹³ Paska Yuden angasubu ha, ndò Yesus angabed a Yerusalem. ¹⁴ Ndò akòb a tempel na, bëkuan bë nyag ai mintomba ai abëṅ ai e bod batsende mòni, ¹⁵ ndò akom nkas ai minkòl, angatsidan mintomba ai nyag a tempel, akubu mòni e bod batsende mòni a si, avundugu bëtëbëlë a si, ¹⁶ nyè ai bëkuan bë abëṅ na: Vaagan e byem bi ha, mibë vëṅan nda Tara na ebò nda makit. ¹⁷ Ndò bëyègè boe bazu tsog na anë ntilan na: Mvam asu nda dzoe yayi ki ma dzoge a miëëṅ. ¹⁸ Ndò Yuden bayalan, bò ai nyè na: Za ndëm walëdë bia asu yë na obò e kan nyi? ¹⁹ Yesus nyè ai bò na: Bugan e nda-ngogëlan nyi, mëdugan dzò loṅ a taṅ mëlu mëlè. ²⁰ Yuden bò na: E nda-Zamba nyi engaloṅëban a taṅ mimbu mëwom mënyii ai misaman, ndò wayi dzò loṅ hë a taṅ mëlu mëlè nga? ²¹ Ndë nyè angabë akòbògò adzo nda ya nyòl dzie. ²² Eyòṅ hm angakui a sòṅ, ndò bëyègè boe badugan tsog na angakad nala, ndò bëngayëbë ntilan ai ebug Yesus angakòbò. ²³ Mbol angabë a Yerusalem a abog Paska, ndò abui bod angayëbë a dzoe die ai ṅyënan bëyënë e ndëm angabë abòòg. ²⁴ Mfa woe, Yesus andzëki bi afidi ai bò, mbol angabë ayëmë bò, ²⁵ ai mbol angabë ki ayaṅan ai na mod atye nyè ndòṅ mod. Amu emen angabë ayëmë e dzi engabë a nnëm mod.

¹ Mod ziṅ ya bëfarisea, dzoe na Nikodemus, nyia-modo-mvia ya Yuden, ² angasò abë nyè ai alu, ndò adzo ai nyè na: A Rabbi, biayëm na wasò abë Zamba a etye ṅyëgëlë, amu mod ziṅ asëki dzam bò e kan ndëm wabò nyi ngë Zamba asëki ai nyè. ³ Yesus nyè ai nyè na: Amen, amen, makad wa na, e nyò andzëki byali a yob, asëki dzam yen edzoe Zamba. ⁴ Nikodemus nyè ai nyè na: Eyë mod anë dugan byali ya, eyòṅ antoa ya nnom? Yë anë dzam dugan nyian a abum nyia, adugan byali? ⁵ Yesus nyè ai nyè na: Amen, amen, makad wa na: e nyò andzëki dugan byali a mëndim ai nsisim, asëki dzam nyian a ayòṅ Zamba. ⁶ E dzi enë mbyalan a nyòl enë nyòl, e dzi enë mbyalan a nsisim enë nsisim. ⁷ Obë kam na makad wa na, miayean dugan byali a yob. ⁸ Evundu yafëbëlë e hom yayi, ndò wawog eduṅ dzie, hë da otëgë yëm e hom yasò, ngë e hom yakë. Nala ngò hm fë e nyò osë anë mbyalan abë nsisim anë. ⁹ Ndò Nikodemus afèd, nyè ai nyè na: Eyë nala onë dzam yënan ya? ¹⁰ Yesus nyè ai nyè na: Wa onë ṅyëgëlë a Israel, ndò wayëm ki e mam ma nga? ¹¹ Amen, amen, makad wa na: biakòbò e dzi biayëm, bibòòlò fë e dzi bingayen, hë da miayëbë ki mbòòlan waan. ¹² Ngë mam më si mmò mëhë kad mina ana ma, mina të yëbë, eyë miayi ṅyëbë eyòṅ mënkad mina mam më yob ya? ¹³ Ndò fë, mod ziṅ abë ya ki bed a yob sësala hë e nyò angasus, asòò a yob, mòn mod. ¹⁴ Ndò hm fë, akyaè ya Moses angabede nyò a nkod-nnam, nala ngò mòn mod ayean bedëban, ¹⁵ asu yë na e nyò osë abëlë afidi abë nyè, abëlë enyiṅ kòm. ¹⁶ Amu yë na, Zamba angadiṅ si-ndon e kan yë na avëë mbaṅ mòn woe, asu yë na e nyò osë ayebë nyè, abë kë a ndzaṅ, hë da abëlë enyiṅ kòm. ¹⁷ Amu Zamba andzëki lom mòn a si na atsig ntol ya si, dzam da asu yë na si-ndon ekodeban abë nyè. ¹⁸ E nyò ayëbë nyè, atëbë ki a nkat. E nyò ayëbë ki nyè, atëbë ya a nkat, amu andzëki ṅyëbë dzoe mbaṅ mòn Zamba. ¹⁹ Nkat onë na, mfyè ongasò a si-ndon, ndò bod bëngadiṅ dibi alodo mfyè; amu mimboan miaban mingabë abe. ²⁰ Amu, e nyò osë abò abe, afëm mfyè, ndò fë akë ki a mfyè asu yë na mimboan mie miza kulan. ²¹ E nyò abò sosoo azu a mfyè, asu yë na mimboan mie mikulan, amu minë mboan abë Zamba. ²² A mvus te, ndò Yesus ai bëyègè boe bazu a si Yudea, ndò atòbò ai bò hala, angadu bod. ²³ Yohannes nyè angabë aduu a Ainon, babi ai Salim, amu mëndim mëngabë etere abui, bod bëngazu duuban. ²⁴ Amu, hala te Yohannes abë ki woaban a mbog. ²⁵ Ndò minlaṅëdan miakui a zaṅ bëyègè bë Yohannes ai man Yuden, mityan ai esob nyòl. ²⁶ Ndò bakë abë Yohannes, bò ai nyè na: A Rabbi, e mod angabë ai wa a Yordan ayat, a ongabòòlò, ṅnyè nyò angadu ya bod, ndò bod bësë bakë abë nyè. ²⁷ Yohannes nyè na: Mod asëki dzam nòṅ tò dzom ziṅ dzidzia, ngë andzëki dzò vëëban a yob. ²⁸ Mina bëben miabòòlò ma na mëngadzo na: sëki ma mënë Kristus, dzam da mënë nyè nloman a osu. ²⁹ E mod abëlë mininga ṅnyè anë nlugu; mvoe nlugu, a etëlë, ewogo kiṅ dzie, yatag abui asu kiṅ nlugu. Mintag miama mite midzie ya. ³⁰ Nyè ayean bugëban, ma ki mayean dzòdiban. ³¹ E nyò asò a yob, alod bod bësë. E nyò anë mod ya si-ndon, asò a si-ndon, ndò fë akòbò mam ya si. E nyò asò a yob, alod bod bësë. ³² E mod angayen, awogo fë dò, abòòlò, dzam da, tò mod ayëbë ki mbòòlan woe. ³³ E nyò ayëbë mbòòlan woe, amëm na Zamba anë sosoo. ³⁴ E nyò ya Zamba angalom, akòbò mam më Zamba, amu avë ki nsisim a mëlanga. ³⁵ Esya adiṅ mòn, ndò angavë nyè dzom esë a mò. ³⁶ E nyò ayëbë mòn, abëlë enyiṅ kòm. E nyò ki abyandi mòn, ayi ki yen enyiṅ, dzam da, olun Zamba obaa nyè a nyòl.

¹ Ayëm Yesus angayëm na bëfarisea bëyëm ya na Yesus adudu abui bëyègè, aduu fë bod alodo Yohannes ² -hë da Yesus emen angabë ki aduu, bëyègè boe mbò bëngabë bëduu- ³ ndò akodo a Yudea, adugan kë a Galilea. ⁴ Angabë enòdi na akii a Samaria. ⁵ Ndò azu kui a tisòn Samaria dzoe na Sikar, babi ai e si Yakob angavë mòn woe Yosèf. ⁶ Etam Yakob engabë etere. Mbol Yesus angabë ntëgan ai dulu, ndò atòbò a nkom etam. Dzam bò a awola samëna. ⁷ Ndò mininga ziṅ ya Samaria asò hm na azu lè mëndim. Yesus nyè ai nyè na: Vaa ma dzom ya anyu. ⁸ Anë hm ha na, bëyègè boe bëngakë a tisòn na bakë kus dzom ya adi. ⁹ Ndò mininga Samaritan adzo ai nyè na: Dze enë dzam bò na, wa, man Yuden, ongasili ma, ya mënë mininga Samaritan, e dzom ya anyu? (Amu Yuden bakalan ki dzom ziṅ ai bësamaritan). ¹⁰ Yesus nyè ai nyè na: Ngë oyëmë efaè Zamba, ai e mod adzo ai wa na: Vaa ma e dzom ya anyu, ngë wa odzaa nyè ana, avëë fë wa mëndim më enyiṅ. ¹¹ Mininga nyè ai nyè na: A Nti, wabëlë ki tò nlonga, ndò fë etam enë edòg. Eyë wayi sò ai mëndim më enyiṅ ve? ¹² Dze, yë walod tara waan Yakòb ya angavë bia etam, emen anyuu fë mëndim ya ete, ai bòn boe, ai biyëm bie? ¹³ Yesus nyè ai nyè na: E mod osë anyu e mëndim ma, ayi dugan wog ekode. ¹⁴ E mod ki ayi nyu e mëndim ya mamen mayi nyè vë, ayi ki bad wog ekode tò eyòṅ, dzam da, e mëndim mayi nyè vë mayi vëṅan etam e mëndim masoe asu enyiṅ kòm. ¹⁵ Mininga nyè ai nyè na: A Nti, vaa ma mëndim mëte, asu yë na të mabad wog ekode ngë asò lè mëndim. ¹⁶ Nyè ai nyè na: Këlë ma loe nyò nnom, odugan zu va. ¹⁷ Mininga nyè na: masëki ai nnom. Yesus nyè ai nyè na: Okòbò fò mbëṅ, wa na: mabëlë ki nnom. ¹⁸ Amu obi ya fam etan, ndò e nyò obëlë etoa dzi asëki wa nnom. Okòbò fò e dili bëbëla. ¹⁹ Mininga nyè ai nyè na: A Nti, mayen na onë profèt. ²⁰ Bëtara bëkadëga kogëlan a nkol hi, ndò mina miadzo na, e hom bayean kogëlan onë a Yerusalem. ²¹ Yesus nyè ai nyè na: Yëbëgë e dzam makad wa, a mininga, na awola lazu, a miayi ki kogëlan ai Tara tò a nkol hi, tò a Yerusalem. ²² Mina mialugu e dzi miayëm ki. Bia, bialugu e dzi biayëm, amu akode lasò a Yuden. ²³ Amu awola lazu, ndò ben hm di, a e bod balugu mfaṅ mfaṅ bayi kogëlan ai Zamba a nsisim ai a sosoo. Amu, akyaè bod bakogëlan ai nyè nala, mbò Tara adzëṅ. ²⁴ Zamba anë nsisim, ndò e ba bakogëlan ai nyè, bayean kogëlan a nsisim ai a bëbëla. ²⁵ Mininga nyè ai nyè na: Mayëm na Messias azu, a baloe na Kristus. Eyòṅ ayi sò, ayi bia timi mësë. ²⁶ Yesus nyè ai nyè na: E ma makòbò ai wa nyò, ma mënë nyè. ²⁷ Abog te, ndò bëyègè boe bazu, bëngakam dò na angabë alèègè ai mininga. Dzam da, tègè ai e mod adzo na: Dze wadzëṅ, ngë ki na: dze walèè ai nyè? ²⁸ Ndò mininga alig emvaṅ dzie, akëlë a tisòn, nyè ai bod na: ²⁹ Zaan yen mod ya akuli ma e mam mësë mëngabò ya; Yë ṅnyè anë Kristus ana? ³⁰ Ndò bakodo a tisòn, bëngakë abë nyè. ³¹ A zaṅ ha, bëyègè bò ai nyè na: A Rabbi, dzaag. ³² Nyè ai bò na: Ma mëbëlë bidi ya adi, a miayëm ki. ³³ Bëyègè bëngadzo a zaṅ bò a bò na: Yë mod ziṅ asò ai nyè e dzom ya adi ana nga? ³⁴ Yesus nyè ai bò na: Bidi biama binë na, mëbò ṅyian e nyò angalom ma, mëdzala fë esye dzie. ³⁵ Së mina bëben miakad dzo na: Ngòn eligi ya enyii osusua mëkoe a? Bëbëgan, makad mina na: Saman mis a yob, miyen anë mëfub mëngafum ya asu mëkoe. ³⁶ Nkoe-bidi ambëlë ya maan moe, ndò akoan bibuma asu enyiṅ kòm, asu yë na nkoe-bidi ai e mod abè bëtag a enyiṅ kòm. ³⁷ Amu ebug dzi yatoban bëbëla na: E mod amiè mvòṅ anë etam, e nyò akoe atoa etam. ³⁸ Mëngalom mina na mikë koe e dzi miandzëki wu ndzug ai dzò. Bod bëfë bëngawu ndzug, ndò miazu nyian a ndzug waban. ³⁹ Abui bësamaritan ya tisòn te bëngayëbë nyè ai mbol mininga angamëm na: Akad ma e dzi esë mëngabò ya. ⁴⁰ Eyòṅ hm bësamaritan bëngazu abë nyè, ndò bakogëlan ai nyè na atòbò abë bò. Ndò angatòbò hala mëlu mëbè. ⁴¹ Ndò abui bod bëngayëbë asu ebug dzie, ⁴² bò ai mininga na: biayëbë ki fë asu nkòbò woe, bia bëben biwog ya, ndò biayëm na ṅnyè anë nkode si mfaṅ. ⁴³ A mvus e mëlu mëbè ma, ndò akodo hala, akëlë a Galilea. ⁴⁴ Amu Yesus emen angakòbò na: profèt abëlë ki olugu a ayòṅ die. ⁴⁵ Eyòṅ hm angasuan a Galilea, bëngasoan ai nyè, ai ṅyenan bëngayen e mam mësë angabò a Yerusalem a abog, amu bò fë bëngabë a abog te. ⁴⁶ Ndò adugan kë a Kana ya Galilea, e hom angavëṅan mëndim mëntoa wayn. Mòn angabë akònò ndzoe ziṅ ya esamba nkukuma a Kafarnao. ⁴⁷ Eyòṅ angawog na Yesus asò a Yudea na akë a Galilea, ndò akë abë nyè, asili nyè na asigi nyè kë sye mòn, amu angabë awu ai enyiṅ ntye mbòg. ⁴⁸ Yesus nyè ai nyè na: Ngë miandzë yen ndëm ai biyëṅ bi mam, mina tègè yëbë. ⁴⁹ Ndzoe nyò, nyè ai nyè na: A Nti, siigi, osusua yë na mòn awu ma. ⁵⁰ Yesus nyè ai nyè na, këlëg, nyò mòn avëë. E mod nyò ayëbë ebug Yesus angakad nyè, ṅnyè akë nyò. ⁵¹ Hala angënë asiigi, ndò bod bisye boe bazu toban ai nyè a zen, bò ai nyè na: Nyò mòn avëë. ⁵² Ndò asili bò awola angawodan evovoe. Bò ai nyè na: Ongoge, a awola zamgbala, ndò fiba angaman nyè a nyòl. ⁵³ Esya ayëmë fò na a awola te ndò Yesus angadzo ai nyè na: Nyò mòn avëë. Ndò angayëbë, ai nyè, ai nda-bod dzie esë. ⁵⁴ E ndëm bèè nyi Yesus angabò eyòṅ angakë a Galilea, asòòg a Yudea.

¹ A mvus hala, abog Yuden angabë, ndò Yesus abed a Yerusalem. ² A Yerusalem, a mbè mintomba, etam ziṅ enë, baloe dzò a nkòbò ebrea na Betsada; enë ai mimbè mitan. ³ Abui minkokòn, mindindim, mimbombog, mingabë toa etere. [ ⁴ ] ⁵ Mod ziṅan gabë hala, okòn woe otòbò ya mimbu mëwom mëlè ai ebu. ⁶ Eyòṅ Yesus angayen nyè atoa hala, ayëmë fë na atòbò ya nala kòm, nyè ai nyè na: Yë wayi na wabò mvoè? ⁷ Nkokòn wò ai nyè na: mabëlë ki e mod akë ai ma a etòg, eyòṅ mëndim mëngafoṅan ya: eyòṅ esë makë kui, hë mod mfë atari ya sigi we. ⁸ Yesus nyè ai nyè na: Tëbëgë, nòṅò enòṅ dzoe, owulu. ⁹ Etye etye te, e mod nyò abò fò mvoè, ndò anganòṅ enòṅ dzie, angawulu. Amos te ongabë amos sabbat. ¹⁰ Yuden bò ai e mod angabò mvoè nyò na: Ana onë sabbat, ndò wabëlë ki ngul ya abëgë enòṅ dzoe. ¹¹ Nyè ai bò na: E mod abò ma mvoè, ṅnyè akad ma na: Nòṅò enòṅ dzoe, owulu. ¹² Ndò basili nyè na: Mod mbe akad wa na: Bodogo enòṅ, owulu? ¹³ E mod angasyeban angabë ayëmë ki, amu Yesus angasolan ai abui nkunda angabë hom te. ¹⁴ A mvus hala, ndò Yesus atoban ai nyè a tempel, nyè ai nyè na: Wa nyòlò obò ya mvoè, të hm fë wabad sëm, mbë dzam alodo nala aza toban ai wa. ¹⁵ E mod nyò akodo hala, akë lèè Yuden na Yesus ṅnyè angabò nyè mvoè. ¹⁶ Yuden bëkaè hm na basiṅ Yesus mbol angabò e mam ma a amos sabbat. ¹⁷ Yesus angayalan bò na: Tara angënë asye, azaag kui etoa dzi, ndò fë ma, masye. ¹⁸ Bëngadzëṅ dzëṅ abui na bawoe nyè etòm dzi na, ṅnyè asolege sabbat, ṅnyè adzo na Zamba anë esya woe, nala ontoa na, bò Zamba bënë nkoṅ. ¹⁹ Yesus nyè ai bò na: Amen, amen, makad mina na: Mòn asëki dzam bò dzom ziṅ ai emen, ngë andzëki yen esya abò dzò. E mam esya abò, nala ngò fë mòn abò mò. ²⁰ Amu yë na, esya adiṅ mòn, ndò angalëdë nyè e mam abò, ndò fë ayi nyè lëdë mëfë alodo nala, asu yë na mikam. ²¹ Amu, e kan ya esya ahëlë mimbim, avaa enyiṅ, nala ngò fë mòn avë e nyò osë ayi na avë enyiṅ. ²² Amu, tò esya abò ki mod ziṅ nkat, dzam da, angavë mòn woe nkat osë, ²³ asu yë na bod bësë bëkam mòn anë bakam esya. E mod akam ki mòn, akam ki tò esya ya angalom nyè. ²⁴ Amen, amen, makad mina na e mod awog ebug dzama, ayëbë fë e nyò angalom ma, abëlë enyiṅ kòm, ndò fë akë ki a nkat, dzam da, alod ya a enyiṅ, asòò a awu. ²⁵ Amen, amen, makad mina na, awola lazu, ndò ben hm di, a bëwu bayi wog kiṅ mòn Zamba, ndò e ba bayi wog bayi nyiṅ. ²⁶ Amu, e kan esya abëlë enyiṅ abë emen, nala ngò fë angavë mòn nala na abëlë enyiṅ abë emen. ²⁷ Ndò angavë nyè ngul ya abò nkat, amu anë mòn mod. ²⁸ Të miakam dò, amu awola lazu a e bod bësë bënë a mësòṅ bayi wog kiṅ dzie, ²⁹ abog te e ba bëngabò mbëṅ bayi kui, bëkëlë a akui-lë-sòṅ enyiṅ, e ba ki bëngabò abe, a akui-lë-sòṅ nkat. ³⁰ Mabëlë ki ngul ya abò dzam ziṅ ai mamen. E kan mawog, ndzò mabò nkat, ndò nkat wama onë sosoo, amu maadzëṅ ki ṅyian wama, madzëṅ hë ṅyian e nyò angalom ma. ³¹ Ngë mabòòlò mamen, mbòòlan wama osëki mfaṅ. ³² Mod mfë abòòlò ma, ndò mayëm na, mbòòlan abòòlò ma, onë mfaṅ. ³³ Mina bëben mingalom bod abë Yohannes, ndò angabòòlò sosoo. ³⁴ Mfa wama, manòṅ ki mbòòlan wama abë mod, dzam da makad e mam ma asu yë na mikodëban. ³⁵ Angabë alamba layoṅ, afyè fë, ndò mingayi na miatag etun abog a mfyè woe. ³⁶ Mfa wama, mëbëlë mbòòlan walod Yohannes: E mimboan Tara angavë ma na mëdzala miè, mimboan mite ya mabò, miabòòlò ma na Tara angalom ma. ³⁷ Ndò fë, e Tara angalom ma, angabòòlò asu dama. Miabë ya ki wog kiṅ dzie, tò ki ayen asu die, miabë ya ki yen, ³⁸ ndò fë ebug dzie etoa ki abë mina, amu miayëbë kiṅ e nyò angalom. ³⁹ Miasoṅ mfufub Ntilan, amu miatsog na miayi bëlë enyiṅ kòm etere. Ndë ngò wabòòlò ma. ⁴⁰ Ndò fë miayi ki na miazu abë ma asu yë na mibi enyiṅ. ⁴¹ Manòṅ ki olugu a bod, ⁴² dzam da, mazuzu ya mayëm mina na miabelë ki ediṅ Zamba abë mina. ⁴³ Mëngasò a dzoe tara, ndò miasoan ki ai ma. Ngë mod mfë akë sòṅ a dzoe die, misoan ai nyè. ⁴⁴ Eyë minë dzam ṅyëbë ya, eyòṅ mianòṅan duma a mina mina, dzam da të dzëṅ duma mbaṅ mòn Zamba? ⁴⁵ Të miakë tsog na ma mayi mina sòman abë Tara. E mod ayi mina sòman, ṅnyè anë e Moses ya mingafidi. ⁴⁶ Ngë miyëbëgë Moses, ngë miayëbë fë ma. Amu angatil atyan ai ma. ⁴⁷ Ngë miayëbë ki ntilan woe, eyë miayi ṅyëbë bibug biama ya?

¹ A mvus hala, ndò Yesus adaṅ a maṅ më Galilea, Tiberiad. ² Mod nkunda angabë abyege nyè, amu bëngayen e ndëm angabò a nyòl minkokòn. ³ Ndò Yesus abed a nkol, antoa hala ai bëyègè boe. ⁴ Paska, abog Yuden, angabë babi. ⁵ Abede Yesus angabede mis, ayënë na mod nkunda bod azu abë nyè, nyè ai Filipus na: Eyë biayi kus bëmbaṅëla ve na e bod ba bëdi? ⁶ Ndë angabë akòbògò nala, abobolo nyè. Amu emen angabë të ayëmë e dzam ayi bò. ⁷ Ndò Filipus ayalan nyè na: Tò bëmbaṅëla a taṅ minsaṅ mi mòni mintèd mibè bayi ki bò yean na mod osë anòṅ man etun. ⁸ Ndò mbòg ya bëyègè boe, Andreas, manyaṅ Simun Petrus, adzo ai nyè na: ⁹ Man mòngò anë ha, abëlë bëmbaṅëla bë ovug bëtan, ai mimbuman mi kòs mibè. Ndò hm ki, nala ngò onë dze asu abui bod di? ¹⁰ Yesus nyè na: Toegan bod a si. Bilòg bingabë abui hom te. Ndò e bod ba bamana tòbò a si, bëtoa, dzam bò tòzin etan. ¹¹ Ndò Yesus anòṅ bëmbaṅëla, avëë ngaṅ, angakab e bod bëmbë toa a si, dzam dëda fë ai kòs, e taṅ bëyiig. ¹² Eyòṅ bëngadzie, ndò adzo ai bëyègè boe na: Koegan e bitun bimana ligi, asu yë na të dzom ziṅ yandaman. ¹³ Ndò bëngakoan, bëdzala biad bitan ai bitun bëmbaṅëla bi ovug bitan bingaligi e bod bëdzaag. ¹⁴ Ayen bod bëngayen e ndëm angabò nyi, bò na: E mod nyò ṅnyè fò anë e profèt ayean sòṅ a si-ndon bëbëla. ¹⁵ Mbol Yesus ayëmë na bayi na bazu nyè bi asu yë na bëtele nyè nkukuma, ndò angakë a nkol a yob, nyè etam. ¹⁶ Eyòṅ ngoge engasus, ndò bëyègè boe basus mfa ya maṅ, ¹⁷ ndò babed a efunga, bëngakë a maṅ a yat, a Kafarnao. Ndò dibi lëngasus ha, hala Yesus abëki bò sòṅ bye. ¹⁸ Maṅ mëngayobo fò ai mod nkulu evundu. ¹⁹ Hala bësubu ya ai mal dzam bò kilomera etan, bëntala Yesus awulugu a maṅ, asubugu a mal mëngabë, bëngakòn wòṅ. ²⁰ Nyè ai bò na: Mamen, të miambara. ²¹ Bëngayi na banòṅ nyè a efunga, ndò fò efunga yakui e hom bëngabë këlëg. ²² E kidi lende ya hala, nkunda ongabë otëlë a maṅ oyab nali; bëngayen na efunga efë engabë ki ete, hë dzia, ai na Yesus andzëki kë ai bëyègè boe a efunga, hë da bëyègè mbò bëngakë etam. ²³ Bifunga bifë bingasò a Tiberiad babi ai e hom bëngadi bëmbaṅëla eyòṅ Nti angavë ngaṅ. ²⁴ Eyòṅ hm nkunda bod ongayen na Yesus asëki ete, tò bëyègè boe të ai bò, ndò babed a bifunga, mbò bakë a Kafarnao ba, bakë badzëṅ Yesus. ²⁵ Ndò batoban ai nyè a maṅ a yat bò ai nyè na: A Rabbi, osò kui mu abog afe? ²⁶ Yesus nyè ai bò na: Amen, amen, makad mina na: Miadzëṅ ma, së ki asu miyen ndëm, dzam da, mbol midi bëmbaṅëla, midzie fë. ²⁷ Syean e mbaṅëla andaman kig, hë atòbògò fò akui a enyiṅ kòm, a mòn mod ayi mina vë. Amu yë na, ṅnyè esya angakomodo. ²⁸ Bò ai nyè na: eyë binë dzam sye mimboan mi Zamba ya? ²⁹ Yesus nyè ai bò na: Esye Zamba enë na, miyëbë e nyò emen angalom. ³⁰ Bò ai nyè na: Ndëm fe wabò, asu yë na biyen, biyëbë fë wa? Wabò dze ben tug? ³¹ Bëtara bò bëngadi hm manna a nkod-nnam, e kan enë ntilan na: Angavë bò mbaṅëla ya yob na bëdi. ³² Yesus nyè ai bò na: Amen, amen, makad mina na: së ki Moses ṅnyè angavë mina mbaṅëla ya yob, dzam da esya wama ṅnyè avë mina mfaṅ mbaṅëla ya yob. ³³ Amu yë na, mbaṅëla Zamba anë e mod asò a yob, avaa fë si-ndon enyiṅ. ³⁴ Bò ai nyè na: A Nti, nga wavë bia mbaṅëla te kòm esë! ³⁵ Yesus nyè ai bò na: Ma mënë mbaṅëla enyiṅ: e mod azu abë ma, ayi ki wog zie, ndò fë e nyò ayëbë ma ayi ki wog ekode tò eyòṅ. ³⁶ Dzam da, mbol mëkad ya mina, tò miafaṅan ma yen, miayëbë ki. ³⁷ E dzi esë Tara avë ma yayi sò abë ma, ndò fë mayi ki tsidan e nyò azu abë ma a nsëṅ, ³⁸ amu mëngasò a yob, së ki asu yë na mabò ṅyian wama, hë ṅyian e nyò angalom ma. ³⁹ Ṅyian e nyò angalom ma onë hm na, e dzi esë angavë ma, të madzèè dzò, dzam da, mëkuli dzò a sòṅ a amos mvua. ⁴⁰ Amu ṅyian Tara onë na: e nyò osë ayen mòn, ayëbë fë nyè, abëlë enyiṅ kòm, ma mëkuli fë nyè a sòṅ a amos mvua. ⁴¹ Yuden bëngasog ai nyè mbol angadzo na: Ma mënë mbaṅëla ya asò a yob, ⁴² bëngadzo na: Së Yesus, man Yosèf nyò a? Biayëm esya ai nyia a? Eyë angazu ya dzo ya na: Mëngasò a yob? ⁴³ Yesus nyè ai bò na: Mibë kë miasòg a zaṅ mina mina. ⁴⁴ Mod ziṅ asëki dzam sòṅ a bë ma, ngë e Tara angalom ma andzëki nyè dudu; ma mayi nyè kuli a sòṅ a amos mvua. ⁴⁵ Anë ntilan abë profèt na: Zamba ayi bò yëgëlë bò bësë. E mod osë awog e dzam lasò abë Tara, ayègè fë, azu abë ma. ⁴⁶ Asëki hala na mod ziṅan gayen ya Tara, ngë së ki e nyò asò abë Zamba, e nyòlò te angayen ya Tara. ⁴⁷ Amen, amen, makad mina na: e nyò ayëbë, abëlë enyiṅ kòm. ⁴⁸ Ma mënë mbaṅëla enyiṅ. ⁴⁹ Besoa bëngadi manna a nkod-nnam, bëwuu fë. ⁵⁰ E nyò anë mbaṅëla ya asò a yob, asu yë na e mod osë adi nyè abë wu. ⁵¹ Ma mënë mbaṅëla avëë ya asò a yob. Ngë mod adi mbaṅëla te, ayi nyiṅ kole, ndò fë mbaṅëla mayi vë anë nyòl dzama asu enyiṅ si-ndon. ⁵² Yuden bëngasog bò bò ha, bò na: Eyë e nyò anë bia dzam vë nyòl dzie ya na bidi? ⁵³ Yesus nyè ai bò na: Amen, amen, makad mina na: Ngë miandzëki di nyòl mòn mod, minyuu fë mëki moe, miabëlë ki enyiṅ abë mina. ⁵⁴ E mod adi nyòl dzama, anyuu fë mëki mama, abëlë enyiṅ kòm, ndò fë mayi nyè kuli a sòṅ, a amos mvua. ⁵⁵ Amu nyòl dzama enë mimfaṅ bidi, mëki mama mëtoa mimfaṅ mënyu. ⁵⁶ E nyò adi nyòl dzama, anyaag fë mëki mama, atoa abë ma, ma fë abë nyè. ⁵⁷ E kan e Tara ya avëë angalom ma, ma mënyiṅi fë hë etòm Tara, e mod adi ma, ṅnyè ayi nyiṅ etòm dzama. ⁵⁸ E nyò ṅnyè anë mbaṅëla ya angasò a yob, së ki e kan bëtara bëngadi, bëwuu. E nyò adi mbaṅëla nyò, ayi nyiṅ a kòm ya kòm. ⁵⁹ Angakòbò e mam ma, ayëgëlë a sinagoge a Kafarnao. ⁶⁰ Mbol abui dzam ya bëyègè boe bëngawog, bò na: nkòbò hi onë alèd. Za anë wa dzam wog? ⁶¹ Mbol Yesus angayëm na bëyègè boe balaṅëdan asu te, nyè ai bò na: Dze yë nala waandṅgele mina nga? ⁶² Ngamëna ki eyòṅ miayi yen mòn mod abëdë mfa angabë osusua? ⁶³ Nsisim ngò wavë enyiṅ; nyòl esëki ai mfi. E bibug mëkad mina binë nsisim, bitoa fë enyiṅ. ⁶⁴ Dzam da, bod bëvòg ya abë mina bayëbë ki. Amu Yesus angabë ayëmë, atarigi fò a mëtari, e bod bayëbë ki, ai e mod angabë na akuan ai nyè. ⁶⁵ Nyè na: Asu te ndò mëkad mina na, mod ziṅ asëki dzam sòṅ a bë ma ngë Tara andzëki nyè vë ngul te. ⁶⁶ Asu te abui bëyègè bëngakodo nyè a esamba, tègè fë bad wulu ai nyè. ⁶⁷ Yesus nyè ai awom ai bëbè na: Dze, yë mina miayi fë kë? ⁶⁸ Simun Petrus nyè ai nyè na: A Nti, biayi kë abë za? Obëlë bibug bi enyiṅ, ⁶⁹ ndò bingayëbë ya, biayëm fë na wa onë Mfufubu Zamba. ⁷⁰ Yesus nyè ai bò na: Së ma mëngatòb mina awom ai bëbè a? Tò a hm nala, mbòg ya abë mina anë mbë nsisim. ⁷¹ Angabë adzoo ai Yudas, mòn Simun Iskariot. Amu ṅnyè angabë ayi kuan ai nyè, nyè fë atoa mbòg ya bë awom ai bëbè.

¹ A mvus hala, Yesus angakë awulu a Galilea. Angabë ayii ki na akë awulu a Yudea, mbol Yuden bëmbë dzëṅë na bawoe nyè. ² Abog Bibëm Yuden angabë babi. ³ Ndò babënyaṅ badzo ai nyè na: Kodogo ha, okë a Yudea, asu yë na bëyègè boe bëyen e mimboan wabò. ⁴ Amu mod ziṅ abò ki dzom a asoe, eyòṅ ayi na bëyem nyè. Ngë wabò e mam ma, bò na si-ndon eyëm wa. ⁵ Amu babënyaṅ bëngabë ki bëyëbëgë nyè. ⁶ Yesus nyè ai bò na: Abog dama abë ki kui, hë abog daan ndò lakui abog asë. ⁷ Si-ndon esëki mina dzam fëm, dzam da, yafëm ma asu mabòòlò dzò na mimboan mie minë abe. ⁸ Mina, kaṅan a abog. Mayi ki bed a abog dili, amu abog dama abë ki dzie. ⁹ Ai nkòban akòbògò nala, ndò angaligi a Galilea. ¹⁰ Eyòṅ babënyaṅ bëngabed a abog, ndò fë nyè abed, hë da, së ki a ngëëṅ, (angabed) hë anë asoe. ¹¹ Yuden bëngabë dzëṅë nyè a abog, bëdzoo na: Eyë anë ve? ¹² Enyënyam entoa a minkunda hë etòm dzie. Bëvòg bëdzoo na: anë mbëmbë mod, bëfë bëdzoo na: Kokoa, adug bod. ¹³ Tò hm nala, tègè ai e mod akòbò adzo die a yob, ai e wòṅ bëmbarëga Yuden. ¹⁴ Abog angayi kui anë a zaṅ hali, ndò Yesus angabed a tempel, angayëgëlë. ¹⁵ Yuden bëngakam, bò na: Eyë e nyò ayëm kalara he, tègè ai na angayègè? ¹⁶ Yesus nyè na: ṅyëgëlan wama wawoge ki ai ma; onë e hi e nyò angalom ma. ¹⁷ Ngë mod ayi na abò ṅyian woe, ayi yëm ngë ṅyëgëlan wasò abë Zamba, ngë ki na makòbò ai ngul dzama mamen. ¹⁸ E mod akòbò ai ngul dzie, adzëṅ duma die. E nyò adzëṅ duma e mod angalom nyè, e nyòlò te anë sosoo, ndò fë ebom-kama esëki abë nyè. ¹⁹ Së Moses ṅnyè angavë mina mvende a? Hë da, tò mbòg ya abë mina abaala ki mvende. A dze miadzëṅ na miawoe ma? ²⁰ Ndò nkunda ongayalan na: Onë ai mbë nsisim. Za adzëṅ na awoe wa? ²¹ Yesus nyè ai bò na: Maabò hë mboan mbòg, ndò mina bësë miakam. ²² Asu te Moses angavë mina akele, -së ki na lasò abë Moses, lasò a bëtara- ndò miakele bod a sabbat. ²³ Ngë bakele bod a amos sabbat asu yë na të mvende Moses yasole, ma miawog ai nyè olun, mbol mëbò nguma mod mvoè a sabbat nga? ²⁴ Të miabëbë bod a asu eyòṅ miatsig ntol; mitsigi ntol sosoo. ²⁵ Bod bëziṅ ya Yerusalem bëngadzo na: Së e mod nyò ṅnyè badzëṅ na bawoe a? ²⁶ Bëbëgë, akòbò a ngëëṅ, bò tègè nyè fèd. Dze, yë bëdzoe bëyëm ya ana na anë Kristus nga? ²⁷ Dzam da, biayëm mfag asò. Eyòṅ Kristus ansòò, mod ayi ki yëm mfag asò. ²⁸ Ndò Yesus angabam eyòṅ ayegëlë a tempel, nyè na: Miayëm fò ma, miyëmë fë mfag masò. Hë da, mandzëki sòṅ ai mamen; e nyò angalom ma anë sosoo, ṅnyè miayëm ki. ²⁹ Ma mayëm nyè, amu masò abë nyè, ndò fë, ṅnyè angalom ma. ³⁰ Bëngadzëṅ hm na babi nyè, hë tègè ai e mod afudi nyè wò a nyòl, amu hala awola die abë ki sò. ³¹ Abui dzam ya nkunda ha bëngayëbë nyè bëngadzo na: Yë Kristus ayi fò bò mam alodo e mod nyò eyòṅ ayi sò nga? ³² Eyòṅ bëfarisea bëngawog nkunda olaṅëdan ai e mam ma asu die, ndò bëfada bënen ai bëfarisea bëngalom bod bisye na bëbi nyè. ³³ Yesus nyè na: Mëngënë ai mina etun abog, abog te mëdugan abë e nyò angalom ma. ³⁴ Miayi ma dzëṅ, tègè ma yen, ndò fë, mfag mayi tòbò, miasëki dzam sò. ³⁵ Yuden bëngadzo bò a bò na: E nyò ayi na akë ve, e kan ya biasëki nyè dzam sòm? Dze yë ayi na akë a mbole bë Grek, akë yëgëlë bëgrek? ³⁶ Ebug ahë dzo dzi na: Miayi ma dzëṅ, hë tègè ma yen, ndò fë, mfag mayi tòbò, miasëki dzam kë we, nala watyan ya? ³⁷ Amos mvua ya abog, ndò Yesus angakom etye, angakòbò a yob ete na: ngë mod awog ekode, azaag abë ma, anyu. ³⁸ E mod ayëbë ma, anë Mfufub Ntilan ongadzo, “Asoe layi nyè so a abum, lësoege e mëndim mëvëë”. ³⁹ Angabë adzoo ai nsisim ya e bod bëngayëbë nyè bëyiigi bi. Amu hala nsisim wabë ki sò, tègè ai na Yesus abëlë ya duma. ⁴⁰ Bod bëziṅ ya nkunda bëngayi wog e bibug bi, bò na: E mod nyò anë profet mfaṅ. ⁴¹ Bod bëfë bò na: E nyò anë Kristus; bëfë bò na: Dze, yë Kristus ayi sò a Galilea? ⁴² Nga Mfufub Ntilan wadzo na a mvòṅ David, ai a Betleem a dzal David, ngò Kristus ayi sò? ⁴³ Nkunda bod ontoa hm kiṅ mëndzaṅ etòm dzie. ⁴⁴ Bëvòg bëziṅ ya ete bëngayi na bëbi nyè, dzam da mod tègè nyè fudi mò a nyòl. ⁴⁵ Ndò bod bisye bakë a bëfada bënen ai bëfarisea, bò ai bò na: Asu dze mibò të sòṅ ai nyè? ⁴⁶ Bod bisye bò na: Mod ziṅ abë ya ki kòbò e kan nyi. ⁴⁷ Bëfarisea bò na: Dze, yë mia mikë ya a ndzaṅ? ⁴⁸ Za ya a bëdzoe ngë ki bëfarisea atam ya nyè ṅyëbë hala? ⁴⁹ Nkunda bod ya wayëgan mvende hi onë ṅyoan. ⁵⁰ Nikodemus nyè ai bò na: (Ṅnyè angatari nyè sò yen osusua; angabë mbòg ya abë bò) ⁵¹ Yë mvende dzaan yakpèè mod ngë bandzëki tari wog nkat woe, bëyëmë fë e dzam abò? ⁵² Bò ai nyè na: Dze, yë wa onë fë mod ya Galilea? Këlë tsas, wayi yen na profet ziṅ atye ki a Galilea. ⁵³ Ndò bëngadugan, anë mod a nda dzie.

¹ Yesus nyè akëlë a nkol bile bi mbòn. ² Eyòṅ kidi engadugan lende, akëlë a tempel, bod bësë bëngazu abë nyè, ndò atòbò a si, angayëgëlë bò. ³ Ndò bësaṅa bëkalara ai bëfarisea bazu ai mininga ya bëngadilan aboo ai fam, ndò batele nyè a zaṅ, ⁴ bò ai nyè na: A ṅyëgëlë, e mininga nyò adiliban aboo ai fam a si. ⁵ A mvende dzaan, Moses angabende na bëwoe kan mininga te ai ngòg. Mfag woe, wadzo ya? ⁶ Bëngabë hm të bëdzoo e mam ma na babobolo nyè, asu yë na bëbi akalëga ya asòman nyè. Ndò të Yesus alumbu a si, angatil a mëtsò ai onyu. ⁷ Mbol hm bëngabë bëyaag ai minsili, ndò anyoan, nyè ai bò na: E mod anë të ai nsëm abë mina, ṅnyè atarigi nyè lum ngòg. ⁸ Ndò adugan lumbu, angatil a mëtsò. ⁹ Eyòṅ e bod ba bëngawog nala, bëngasolan mbòm mbòg, atarigi ai minnom, ndò angaligi nyè etam ai e mininga nyò atëlë a zaṅ. ¹⁰ Ndò Yesus anyoan, nyè ai nyè na: A mininga, bënë ve? Dze, yë mod andzëki wa kpè a nkat? ¹¹ Nyè na: Kokoa, a Nti. Yesus nyè ai nyè na: Tò ma, makpè ki wa a nkat. Këlëg, ndò hm, atarigi ana, të fë wabad sëm. ¹² Ndò Yesus adugan dzo ai bò na: Ma mënë mfyè si. E mod abye ma, ayi ki wulu a dibi. ¹³ Bëfarisea bò ai nyè na: Mbòòlan woe osëki sosoo, ṅnyie anë wamen obòòlò wamen. ¹⁴ Yesus nyè ai bò na: Tò a ki mabòòlò mamen, mbòòlan wama onë ete, amu mayëm mfag masò ai mfag makë. ¹⁵ Mina miadzòs ai ntsogan nyòl, ma madzòs ki tò mod. ¹⁶ Ndò hm ki, ngë matsig ntol, ntol wama onë ete mfaṅ, amu masëki etam; mënë ai e nyò angalom ma, Tara. ¹⁷ A mvende dzaan, anë ntilan na: mbòòlan bod bëbè onë bëbëla. ¹⁸ Mabòòlò mamen, e Tara angalom ma abòòlò fë asu dama. ¹⁹ Ndò bakad nyè na: Esoa anë ve? Yesus nyè na: Tò ma, tò Tara, miayëm ki. Ngë miyëmë ma, ngë miayëm fë Tara. ²⁰ Angakòbò e mam ma a etun-nda ya banyie akuma, ayëgëlë a tempel. Mod ziṅan dzëki nyè bi, amu hala awola die abë ki kui. ²¹ Ndò adugan bò kad na: Ma, makë, ndò miayi ma dzëṅ; miayi fë wu a nsëm waan. Mfag makë, miasëki dzam sò. ²² Yuden bëngadzo na: Dze, yë ayi woe emen, eyòṅ adzo di na « mfag makë, miasëki dzam sòṅ »? ²³ Nyè ai bò na: Mina, minë bod ya si, ma, mod ya yob. Mina, minë bod ya e si-ndon nyi, ma, masëki mod ya e si-ndon nyi. ²⁴ Mëkad mina na miayi wu a minsëm mian. Amu, ngë miayëbë ki na ma mënë, miayi wu a minsëm mian. ²⁵ Bò ai nyè na: Wa onë za? Yesus nyè ai bò na: Dze ben mawuwu ndzug akòbò ai mina? ²⁶ Mëbëlë abui mam ya mayean kòbò asu daan, mëtsigi ntol, dzam da, e mod angalom ma anë bëbëla, ndò e mam mëngawog abë nyè, mmò makad si-ndon. ²⁷ Bò tègè yëm na akòbò ai bò adzo esya. ²⁸ Yesus nyè ai bò na: Eyòṅ miayi yen mòn mod, eyòṅ te miayi yëm na ma mënë, ndò fë mabò ki dzom ziṅ ai ngul dzama, dzam da makòbò e kan ya Tara angayëgëlë ma. ²⁹ Ndò fë, e mod angalom ma anë ai ma; andzëki ma lig etam, amu mabò e dzi yanyëb nyè a nnëm kòm esë. ³⁰ Abui bod angayëbë nyè ai nkòban akobògò e mam ma. ³¹ Ndò Yesus adzo ai e Yuden bëngayëbë nyè na: Ngë mialaṅan ai ebug dzama, minë bëyègè bama mfaṅ. ³² Miayi yëm bëbëla, bëbëla abò fë mina fili. ³³ Bò ai nyè na: Binë mvòṅ Abraham, ndò biabë ya ki bò mod ziṅ olò, tò eyòṅ. Eyë onë dzam dzo ya na: « Miayi bò fili »? ³⁴ Yesus nyè ai bò na: Amen, amen, makad mina na: E mod osë asëm, anë olò nsëm. ³⁵ Olò watòbò ki kole a nda, mòn ṅnyè atòbò ete kole. ³⁶ Ngë mòn ayi mina bò fili, miayi bò fili mfaṅ. ³⁷ Mayëm na minë mvòṅ Abraham. Dzam da, miadzëṅ na miawoe ma, amu ebug dzama yanyian ki abë mina. ³⁸ Makòbò e mam mëngayen abë tara. Mina fë, boan e mam mingawog abë tara. ³⁹ Bò ai nyè na: Esya waan ṅnyè anë Abraham. Yesus nyè ai bò na: ngë mitoa bòn bë Abraham, ngë miabò mimboan mie. ⁴⁰ Etoa dzi, miadzëṅ na miawoe ma, e ma ya mëkad mina e bëbëla mëngawog abë Zamba. Abraham andzëki bò nala. ⁴¹ Mina, miabò mimboan mi esya waan. Bò ai nyè na: Biandzëki byali a ngòbinda. Bibëlë esya mbòg, Zamba. ⁴² Yesus nyè ai bò na: Ngë Zamba atoa esya waan, ngë miadiṅ ma, amu mëngasò abë Zamba, ndò fë madugan we. Amu, mandzëki sòṅ ai mamen, ṅnyè angalom ma. ⁴³ Asu dze miawog ki ayëgëlë dama? Kë amu miasëki dzam vogolo ebug dzama. ⁴⁴ Mina, miasò abë esya waan, Satan, ndò miadiṅ na miabò ṅyian waan. Ṅnyè anë hm ṅwoe bod atarigi a mëtari, ndò atëlë ki a bëbëla, amu bëbëla asëki abë nyè. Eyòṅ akòbò minnal, akòbò mam moe, amu anë mod minnal, atoa fë esya minnal. ⁴⁵ Mfag ya abë ma, miayëbë ki ma mbol makòbò bëbëla. ⁴⁶ Za ya abë mina ayi ma tam sama etòm nsëm? Ngë makòbò bëbëla, asu dze miayëbë ki ma? ⁴⁷ E mod asò abë Zamba avogolo bibug bi Zamba. Asu te miavogolo ki, amu miasëki bod bë Zamba. ⁴⁸ Yuden bò ai nyè na: Biandzë toan dzo na: Onë man Samaritan ai na obëlë fë mbë nsisim a? ⁴⁹ Yesus nyè na: Mabëlë ki mbë nsisim, dzam da, makam Tara. Mina miabyandi ma. ⁵⁰ Ma madzëṅ ki duma dama. E mod adzëṅ, atsigi ntol, anë. ⁵¹ Amen, amen, makad mina, ngë mod abaala ebug dzama, ayi ki yen awu tò eyòṅ. ⁵² Yuden bò ai nyè na: Bingayëm ya fò na obëlë mbë nsisim. Abraham angawu, bëprofet bëwuu fë, wa na: Ngë mod abaala ebug dzama, ayi ki wodan awu tò eyòṅ. ⁵³ Dze, yë walod e Tara waan Abraham ya angawu? Bëprofèt bëngawu fë. Wavëg na onë za ben? ⁵⁴ Yesus nyè na: Ngë mavë mamen duma, duma dama lasëki dzom. Esya wama ṅnyè avë ma duma, ṅnyè miadzo na anë Zamba waan, ⁵⁵ dzam da, miayëm ki nyè. Ngë madzo ana na, mayëm ki nyè, mëntoa mod minnal anë mina. Ndò hm, mayëm nyè, ndò fë mabaala ebug dzie. ⁵⁶ Esya waan Abraham angabë ataag na ayen amos wama, ndò angayen, afono fë. ⁵⁷ Yuden bò ai nyè na: Wasëki tò mimbu mëwom mëtan, ndò ongayen ya Abraham nga? ⁵⁸ Yesus nyè ai bò na: Amen, amen, makad mina na: Osusua yë na Abraham abyali, ma mënë. ⁵⁹ Ndò babodo ngòg na balum nyè. Ndò Yesus asòbò, akuig a tempel.

¹ A alodo na, antala mod ya angabyali ndim. ² Ndò bëyègè boe basili nyè na: A Rabbi, za angasëm, yë nyè, yë bëbonde boe na azu byali ndim? ³ Yesus nyè na: tò nyè, tò bëbonde boe, mod andzëki sëm; anë fò hë asu yë na mimboan mi Zamba mikulan a ngëëṅ a bë nyè. ⁴ Biayean bò esye enyò angalom ma ntye amos ongënë. Alu angazu ya, tègè ai e mod anë dzam bò esye ete. ⁵ Ntye mënë a si, mënë mfyè si-ndon. ⁶ Akòbògò nala, ndò atui a si, abòò mbòdòg ai e mëtè angatui, angasii nyè mis ai wò, ⁷ nyè ai nyè na: Këlë wòbò a etam Siloam (nala watyan na enyò anë nloman). Ndò hm angakë, awòbò, asòò, angayen. ⁸ Bëbonde boe ai e bod bëyenë nyè osusua a angabë nzëzaa, bò na: Së enyò ṅnyè akadëga tobò, adzaègi a? ⁹ Bëvòg bëdzoo na: Ṅnyè, bëvòg bò na: Tègè, afulan fò ai nyè. Emen nyè na: Mamen. ¹⁰ Ndò hm bakad nyè na: Eyë hm mis mëyaaban wa ya? ¹¹ Nyè na: E mod baloe na Yesus abò mbòdòg, ndò asii ma a mis, nyè ai ma na: Këlëg wòbò a Siloam. Ndò mëkë, mëwòbò, mëngayen. ¹² Ndò badzo ai nyè na: Eyë anë ve? Nyè na: Mayëm ki. ¹³ Ndò bakë ai e mod angabë ndim osusua nyò a bëfarisea. ¹⁴ Amos ya Yesus angabò mbòdòg hi, ayaè e mod nyò mis ongabë amos sabbat. ¹⁵ Ndò bëfarisea bò badugan nyè sili akyaè angayaaban mis. Nyè ai bò na: Awòbò ma mbòdòg a mis, ndò mëwòbò, ndò mayen di. ¹⁶ Bod bëziṅ ya bëfarisea bëngadzo na: E mod nyòlò asò ki abë Zamba, amu abaala ki sabbat. Bëvòg ki bò na: Eyë nsëmë minsëm anë dzam bò e kan ndëm nyi ya? Bëntoa kiṅ mëndzaṅ. ¹⁷ Ndò badugan dzo ai ndindim na: Wa wayen ya atyan ai nyè, mbol ayaè wa mis? Nyè na: anë profèt. ¹⁸ Yuden bò të ṅyëbë na angabë ndim, ndò angayen ya; akëlë kui anë bëngalom loe bëbonde bë e mod angabë angayen ya nyò, ¹⁹ ndò basili bò na: Yë e mod nyò ṅnyè anë e mòn waan miadzo na angabyali ndim? Eyë anë ya na angayen ya etoa dzi? ²⁰ Ndò bëbonde boe bayalan na: Biayëm na mòn waan nyò, ai na angabyali ndim. ²¹ Eyë angayen ya ya etoa dzi? Biayem ki, tò ki e mod ayaè nyè mis, biayëm ki. Siligan nyè, nga antoa ya nyia-modo! Emen ayi kòbò asu die emen. ²² Bëbonde boe bëngakòbò nala mbol bëmbarëga Yuden. Amu hala Yuden bëvë ya abende na ngë mod ziṅ amëm Kristus, bëkuligi nyè a nda-bikoan a nsëṅ. ²³ Asu te bëbonde boe bëdzoo na: Antoa ya nyia-modo, siligan nyè emen. ²⁴ Ndò hm badugan loe e mod angabë ndim nyò eyòṅ bèè, bò ai nyè na: Vaa Zamba olugu. Bia, biayëm na e mod nyòlò anë nsëmë minsëm. ²⁵ Ndò hm e mod nyò akad bò na: Tò anë nsëmë minsëm o, mayëm ki. Mayëm hë dzom dzia, na mëngabë ndim, ndò mëngayen ya. ²⁶ Bò ai nyè na: Dze abò wa? Eyë ayaè wa mis ya? ²⁷ Nyè ai bò na: Mëkad ya mina, mina të wog. Dze mingënë yi na miwog? Dze, yë mina fë miayi na miabò bëyègè boe? ²⁸ Bëngasog ai nyè, bò na: Wa, onë ṅyègè woe, bia, binë bëyègè bë Moses. ²⁹ Biayëm na Zamba angalèè ai Moses; enyò, biayëmyem ki mfag asò. ³⁰ Ndò e mod nyò ayalan, nyè ai bò na: Eyë eyëṅ esë enë ete na, miayëm ki mfag asò, dzam da ayaè ma mis. ³¹ Biayëm na Zamba awog ki bësëm, dzam da, ngë mod ziṅ ambara Zamba, abòò fë ṅyian woe, Zamba awog nyè. ³² Akèègè koba, babë ya ki wog na mod ziṅan gayaè mis më e mod angabyali ndim. ³³ Ngë mod te tègè sòṅ a bë Zamba, ngë asëki dzam bò tò dzom. ³⁴ Bò ai nyè na: Hë wa, wa, obyali a nsëm ete, ndò ongazu ya bia yëgëlë nga? Ndò bëngakuli nyè a nsëṅ. ³⁵ Ndò Yesus angawog na bëkuli nyè a nsëṅ; atoban angatoban ai nyè, nyè ai nyè na: Yë wayëbë mòn mod? ³⁶ E mod nyò nyè na: A Nti, ṅnyè anë za; mayi nyè yëbë. ³⁷ Yesus nyè ai nyè na: Oyenyen ya nyè, ndò enyò akòbò ai wa, ṅnyè nyòlò. ³⁸ Nyè na: Mayëbë, a Nti. Angalugu nyè. ³⁹ Yesus nyè na: Mëngasò a e si-ndon nyi asu nkat, asu yë na e ba bayen ki bëyen, e ba bayen bëbò ndim. ⁴⁰ Bëfarisea bëziṅ ya bëngabë ai nyè ha bò ai nyè na: Dze, yë bia binë ndim nga? ⁴¹ Yesus nyè ai bò na: Ngë mitoa ndim, ngë miabëlë ki nsëm ziṅ. Ndò hm miadzo na: Biayen. Nsëm waan wakanga.

¹ Amen, amen, madzo ai mina na: E mod osë anyian ki a mbè efòg mintomba, dzam da, akë bed zen fë, e nyòlò te anë ṅwuwub ai ezilgan. ² E nyò ki anyian a mbè, anë ṅnòni mintomba. ³ Mbaala mbè ayaè nyè, mintomba miawog kiṅ dzie, ndò aloe mintomba mie a dzoe, angalëdë miè zen a nsëṅ. ⁴ Eyòṅ amana ya kuli mintomba mie misë a nsëṅ, angawulu miè a osu, mintomba mingabie nyè, amu miayëm kiṅ dzie. ⁵ Miasëki dzam bie ndzin, miatubtub nyè amu miayëm ki kiṅ bëdzin. ⁶ Yesus angavë bò e mvulna nyi, bò të yëm e mam angabë akada bò. ⁷ Yesus angadugan bò kad na: Amen, amen, madzo ai mina na: Ma, mënë mbè mintomba. ⁸ E ba bësë bëngasò ma osu, bënë miṅwuwub ai bizilngan, dzam da, mintomba miandzëki bò wog. ⁹ Ma, mënë mbè. Ngë mod anyian abë ma, ayi kodëban, ndò fë ayi nyii, akuig, ayënë fë mëdiiga. ¹⁰ Ṅwuwub wazu hë asu yë na wadzib, owoe, ondaman fë. Ma mëngasò asu yë na bëbi enyiṅ, bëbi dzò ntud ntud. ¹¹ Ma mënë mbëmbë nnòni. Mbëmbë ṅnòni akab enyiṅ dzie asu mintomba. ¹² E mod asye hë asu maan, a asëki ṅnòni, a mintomba miawoge ki ai nyè, ayenë fë mvu afan ezaag, adzoge fò mintomba, atubu, mvu afan ebii miè, emana tsam, ¹³ mbol asye hë mòni, ndò abisi ki e di layenan ai mintomba. ¹⁴ Ma mënë mbëmbë ṅnòni, ndò mayëm emiama, miè miyëmë fë ma, ¹⁵ anë tara ayëm ma, ma mëyëmë fë Tara, ndò makab enyiṅ dzama asu mintomba. ¹⁶ Ndò fë mëbëlë mintomba mifë ya miasëki a efòg dzi. Mayean wulu ai e mili mite, miayi wog kiṅ dzama, ndò miayi bò esamba dzia, ṅnòni mbòg. ¹⁷ Asu te Tara adiṅ ma, mbol makab enyiṅ dzama, asu yë na mëdugan dzò nòṅ. ¹⁸ Mod afadi ki ma dzò, dzam da, mamen makab dzò, mëbëlë fë ngul ya adugan dzò nòṅ. Mënganòṅ e mvende nyili abë Tara. ¹⁹ Yuden bëdugan kaban ngam ngam etòm e bibug bi. ²⁰ Abui ya ete bëdzoo na: Anë ai mbë nsisim, ndò fë asòg. Dze miavogolo nyè? ²¹ Bëfë bò na: e bibug bi biasëki ebi bi e mod abële mbë nsisim. Yë mbë nsisim onë dzam yaè ndindim mis? ²² Ndò abog afubu-lë-tempel angabò a Yerusalem, a abog oyon, ²³ Yesus angakë awulu a tempel, mfag ya minkum mi Salomon. ²⁴ Yuden bëloṅo nyè edinga a nyòl, bò ai nyè na: Wayi bia këlë minnëm a yob akëlë kui ve? Ngë wa onë Kristus, kada bia a kpaam. ²⁵ Yesus nyè ai bò na: Mëkad ya mina, mina të yëbë. E mimboan mabò a dzoe Tara mmiè miabòòlò ma. ²⁶ Ndò mina miayëbë ki, amu miasëki a ekòg mintomba miama. ²⁷ Mintomba miama miawog kiṅ dzama; mayëm miè, ndò fë miabie ma, ²⁸ ndò fë mavë miè enyiṅ kòm; miayi ki dzaṅ a ekòg tò eyòṅ, ndò fë mod ziṅan gâfadi ki ma miè a mò. ²⁹ E Tara angavë ma, alod bësë, ndò mod ziṅ asëki dzam fadi a mò më Tara. ³⁰ Bia Tara binë dzom dzia. ³¹ Ndò Yuden badugan nòṅ ngòg na balum nyè. ³² Yesus nyè ai bò na: Maalëdë mina abui mimbëmbë mimboan ya abë Tara. Mialum ma ngòg asu mboan mbe ya ete? ³³ Yuden bò ai nyè na: Së ki asu mbëmbë mboan ngò bialum wa ngòg, dzam da, asu ebyandi, mbol ya na, wa ha, otoa të mod, ongadzo na onë Zamba. ³⁴ Yesus nyè ai bò na: Asë ntilan a mvende dzaan na: Mëngadzo na: Minë bëzamba a? ³⁵ Ngë Zamba adzo ai e bod angakad ebug dzie na bënë bëzamba -Mfufub Ntilan wa wasole hm ki- ³⁶ e nyò ya Tara angafubu, alomo a si, mina miadzo na: «Onë ebyandi», mbol mëdzo na: «Mënë mòn Zamba» nga? ³⁷ Ngë mabò ki mimboan mi Tara, mibë ma yëbë. ³⁸ Ngë mabò hm miè, tò mibò ma të yëbë, yëbëgan mimboan, asu yë na miyen, miyëm fë na Tara anë abë ma, ma fë abë Tara. ³⁹ Bëngadugan dzëṅ na babi nyè, ndò angasòdan bò a mò. ⁴⁰ Ndò adugan kui a Yordan ayat, e hom Yohannes angabë aduu bod osusua, atòbò hala. ⁴¹ Abui bod asòò abë nyè, bò na: Yohannes andzëki bò tò ndëm dzia, dzam da e mam mësë Yohannes angadzo mëtyan ai nyè mënë ete. ⁴² Ndò abui bod bëngayëbë nyè ete.

¹ Mod ziṅan gabë akònò, dzoe na Lazarus, mod ya Betania, a dzal Maria ai manyaṅ Marta. ² Maria te ṅnyè angawòbò Nti mbòn, amana nyè fimi mëkol ai esil dzie, ṅnyè ndom dzie Lazarus engabë ekònò. ³ Ndò bëkal bëngalom nyè kad na: A Nti, yënë sik, e mod wadiṅ akòn hm. ⁴ Ndò Yesus angawog, nyè na: Okòn hili osëki asu awu, onë asu duma Zamba, asu yë na mòn Zamba abi duma ete. ⁵ Dzam da, Yesus angabë adiṅi Marta, ai manyaṅ, ai Lazarus. ⁶ Awogo hm na akòn, ndò të fë atòbò e hom angabë mëlu mëbè, ⁷ a mvus hm hala, nyè ai bëyègè na: Ndugan a Betania. ⁸ Bëyègè bò ai nyè na: A Rabbi, angoge angoge, Yuden bëdzëṅë na balum wa ngòg, ndò ongadugan ya kë we? ⁹ Yesus nyè na: Amos osë mëwola awom ai mëbè a? Ngë mod awulu ai amos, afèè ki mbëg, amu ayen mfyè e si nyi. ¹⁰ Ngë mod ziṅ awulu hm ai alu, aku mbëg, amu mfyè osëki abë nyè. ¹¹ Akòbò nala, a mvus hala, nyè ai bò na: Mvoe dzaan Lazarus anë nkëan a oyò. Dzam da, makë nyè vëlë a oyò te. ¹² Bëyègè boe bò ai nyè na: A Nti, ngë akë oyò, ayi kodeban. ¹³ Ndë Yesus nyè akòbògò adzo awu die, bò bëtsogo na akòbò adzo nkëan oyò. ¹⁴ Ndò hm Yesus adzo ai bò a kpaam na: Lazarus anë ṅwuan, ¹⁵ dzam da mawog mintag asu daan, asu yë na miyëbë, mbol mabë ki we. Ndò hm, nkaṅan abë nyè. ¹⁶ Ndò Tomas -anë mëbëdan na Didimos- adzo ai bëyègè bëvòg na: Bia nkaṅan, bikë wu ai nyè. ¹⁷ Yesus asuan hm, akòbò na antoa ya mëlu mënyii a sòṅ. ¹⁸ Betania angabë babi ai Yerusalem, dzam bò mintie awom ai mitan. ¹⁹ Abui dzam ya abë Yuden bëngasò abë Marta ai Maria na bazu yëb Lazarus ai bò. ²⁰ Eyòṅ hm Marta angawog na Yesus azu, ndò angakë toban ai nyè. Maria nyè angabë atoa a nda ete. ²¹ Marta nyè ai Yesus na: A Nti, ngë otòbò ha, ngë ndom dzam yandzëki wu. ²² Dzam da, mayëm etoa dzi na, e dzi esë wayi sili Zamba, ayi wa dzò vë. ²³ Yesus nyè ai nyè na: Nyò ndom ayi kui a sòṅ. ²⁴ Marta nyè ai nyè na: Mayëm na ayi womo a akui-lë-sòṅ a mos mvua. ²⁵ Yesus nyè ai nyè na: Ma mënë akui-lë-sòṅ ai enyiṅ. E nyò ayëbë ma, tò afyaṅan wu, ayi nyiṅ. ²⁶ Ndò fë, e nyò anyiṅ, ayëbëgë fë ma, ayi ki wu tò eyòṅ. Yë wayëbë nala? ²⁷ Nyè ai nyè na: Owe, a Nti, mazuzu ya mayëbë na wa onë Kristus, mòn Zamba ya azu a si-ndon. ²⁸ Akòbò angakòbò nala, ndò akë loe manyaṅ Maria avol avol, nyè na: ṅyëgëlë anë ha, aloe wa. ²⁹ Awog angawog nala, akodo a si mbil, akëlë abë nyè. ³⁰ Hala te Yesus abë ki sòṅ a dzal ete, angënë atëlë e hom Marta angatoban ai nyè. ³¹ E Yuden bëngabë ai nyè a nda, bëyëbë ai nyè, bëngayi yen anë Maria akodo mbil a si, akui a nsëṅ, bëngatoṅ nyè, bëtsogo na akë yon a sòṅ. ³² Eyòṅ hm Maria angakui e hom Yesus angabë, ayënë nyè, ndò alaban nyè a mëkol a si, nyè ai nyè na: A Nti, ngë otòbò ha, ngë ndom yandzëki ma wu. ³³ Ayen Yesus angayen anë ayon, ayënë fë na, e Yuden bëngasò ai nyè bayon, asigan fò a nnëm etere ai abui mintye, ³⁴ nyè na: Eyë miafudi nyè ve? Bò ai nyè na: a Nti, zaa yen. ³⁵ Yesus angayon. ³⁶ Yuden bò na: Yënë anë angabë adiṅi nyè. ³⁷ Bëvòg ya ete bò na: Andzë yaè ndindim mis a? Nga ambë fë bò na të e nyò awu? ³⁸ Yesus adugan sigan a nnëm, asòò a sòṅ. Engabë a mbog akòg, ndò bëngayè akòg ete. ³⁹ Yesus nyè na: Vaagan akòg. Marta, kal e mod angawu, nyè ai nyè na: a Nti, anganyum ya, amu amos nyiina hi. ⁴⁰ Yesus nyè ai nyè na: Mandzë wa kad na ngë wayëbë, wayi yen duma Zamba a? ⁴¹ Ndò bavaè ngòg. Ndò Yesus abede mis a yob, nyè na: A Tara, makaṅ wa, mbol wawog ma. ⁴² Mayëm fò na wawog ma kòm esë, dzam da asu nkunda otëlë hi ngò makòbò, asu yë na bëyëbë na ongalom ma. ⁴³ Adzo angadzo nala, ndò aloe a yob etere na: A Lazarus, zaag a nsëṅ mu. ⁴⁴ Ndò mbim wakui, otoa ntindan a mëkol ai a mò ai biyie, asu afaṅa a eyie mbim. Yesus nyè ai bò na: Tian nyè, midzoge nyè, akë. ⁴⁵ Abui dzam ya e Yuden bëngasò abë Maria, bëyënë e mam angabò, bëyëbë nyè. ⁴⁶ Bëvòg ya abë bò, bëkëlë a bëfarisea, bëmana bò tie e mam Yesus angabò. ⁴⁷ Ndò bëfarisea ai bëfada bënen bakoan esòg, bò na: Ndò biazu bò ya, akyaè e mod nyò abò biyëṅ bi mam di? ⁴⁸ Ngë biadzoge nyè nala, bod bësë bayi nyè yëbë, edzoe ya Roma esòò, bëmana bia ai si, ai e hom hi ai ayòṅ asë. ⁴⁹ Mbòg ya abë bò, Kaifas, angabë fada-nen a mbu te, nyè ai bò na: Miayëm ki tò dzom; ⁵⁰ Nga miayen na layean na mod mbòg awu asu ayòṅ, alodo na nguma ayòṅ odzaṅ? ⁵¹ Andzëki kòbò nala ai nyè emen, dzam da, mbol angabë fada-nen mbu te, ndò angabende na Yesus ayi wu asu mëyòṅ, ⁵² së hm ki hë asu mëyòṅ; asu fë yë na, e bòn bë Zamba bënë ntsaman, akoan bò dzom dzia. ⁵³ Atarigi amos te, bëngadzëṅ na bawoe nyè. ⁵⁴ Yesus të fë bad wulu a ngëëṅ a Yuden ete, dzam da ndò angakodo hala, akëlë a nkòṅ nnam ya nkod-nnam, a tisòn dzoe na Efraim, antoa we ai bëyègè boe. ⁵⁵ Paska Yuden angabë babi, ndò abui bod bëngabed a Yerusalem, bësòò a mal, osusua Paska, asu yë na bëfubëban. ⁵⁶ Bëngadzëṅ hm Yesus, bò a bò ha, bëtëlë a tempel bò na: Miayen dò ya? Yë ayi bò të sòṅ a abog nga? ⁵⁷ Ndò bëfada bënen ai bëfarisea bëngavë mvende na ngë mod ayëm e hom anë, akuli nyè, asu yë na bëbi nyè.

¹ Mëlu mësaman osusua Paska, ndò Yesus angasò a Betania, e hom Lazarus angabë; Lazarus te ṅnyè Yesus angahëlë a bëkon. ² Ndò bëngabò nyè dina hala, Marta asye a tëbëlë bidi, Lazarus atoa mbòg ya e bod bëdzaag ai nyè. ³ Ndò Maria anòṅ etun kila mbòn mësan otoa abui mòni, angawòbò wò Yesus a mëkol, afimiṅi nyè mëkol ai esil dzie. Nda edzie fò ai enyum mbòn. ⁴ Yudas Iskariot, mbòg ya bëyègè boe, -ṅnyè angabë na ayi kuan ai nyè- nyè na: ⁵ A dze bandzëki kuan ai mbòn vi minsaṅ mintèd milè, bëvëë mimbubua? ⁶ Angabë adzoo nala, së ki mbol adaṅa mvaman ai mimbubua, dzam da, mbol angabë ṅwuwub, ṅnyè fë abëlë nkòb, ndò akadëgë dzib e dzi bafudi ete. ⁷ Yesus nyè na: Dzoge nyè, abòò dò asu amos edzëb-mbim dzama. ⁸ Amu mibëlë mimbubua kòm esë abë mina, dzam da, miabëlë ki ma kòm esë. ⁹ Abui nkunda ya Yuden bëngayëm na anë hala, ndò bëngasò, së hm ki hë asu Yesus etam, dzam da asu yë na ba bëyen e Lazarus ya angahëlë a bëkon. ¹⁰ Ndò bëfada bënen bëngabui esòg na bëwoe fë tò Lazarus, ¹¹ amu abui dzam bëngabë kodogo a Yuden, bëngayëbë Yesus hë etòm dzie. ¹² Amos otsaag hala, nkunda osë ongasò a abog, bëngayi wog na Yesus azu a Yerusalem, ¹³ bënòṅò mëbui mëlen, bëngakë toban ai nyè, bëbama na: Osanna, aluguban, e nyò azu a dzoe Nti, nkukuma Israel. ¹⁴ Yesus ayënë man ozele, atòbò nyè a yob, akyaè anë ntilan na: ¹⁵ Të wakòn wòṅ, a ngòn Sion, Yënë sik, nkukuma woe azu, atoa ngal ozele a yob. ¹⁶ Bëyègè boe bandzëki wog dzam te etye etye, dzam da, eyòṅ Yesus angabëlë duma, ndò bazu tsog na dzam te angabë ntilan atyan ai nyè, ai na bëngabò nyè dò. ¹⁷ Nkunda ya ongabë ai nyè eyòṅ angaloe Lazarus a sòṅ a nsëṅ, ahëlë nyè a bëkon, ongabòòlò fò. ¹⁸ Asu te nkunda ozaag toban ai nyè, amu bëwogo e ndëm angabò nyi. ¹⁹ Bëfarisea bëngadzo a zaṅ bò bò na: Nga miayen na miasëki ai mfi? Bod bësë batoṅ nyè! ²⁰ Bëgrek bëziṅ bëngabë ai e bod bëngabed na bazu a abog. ²¹ Ndò bakë abë Filipus ya Betsaida ya Galilea, ndò badzo ai nyè na: A moe, biayi na biayen Yesus. ²² Ndò Filipus akë kad Andreas, Andreas ai Filipus bësòò kad Yesus. ²³ Yesus nyè ai bò na: Awola asò ya na mòn mod abëlë olugu. ²⁴ Bëbëla emen, makad mina na: ngë e fes mvòṅ yaku a si ebò të wu, yatòbò etam. Ngë ewu, yayi vë abui bibuma. ²⁵ E nyò adiṅ enyiṅ dzie, adzèè dzò, ndò e nyò afëm enyiṅ dzie a e si nyi, ayi dzò baala a enyiṅ kòm. ²⁶ Ngë mod ziṅ asye ma, ayi ma toṅ, ndò fë, e hom osë mayi tòbò, nsye wama nyè ayi fë tòbò ete. Ngë mod ziṅ asye ma, Tara ayi nyè vë olugu. ²⁷ Etoa dzi, nnëm wakòn ma; ndò mëkë dzo ya? Yë na: A Tara, kodëge ma a awola di? Ma mëngasò asu awola di! ²⁸ A Tara, vaa dzoe doe olugu. Ndò kiṅ engasò a yob na: Mëvë ya olugu, ndò fë mayi dugan vë. ²⁹ Nkunda ongabë otëlë, owogo, bò na: zeyan nyili! Bëvòg bò na: Englès ahë kòbò ai nyè. ³⁰ Yesus nyè na: E kiṅ nyili endzëki bòban asu dama, ebòban asu daan. ³¹ Eyòṅ dzi, ntol e si nyi wazu tsigëban; etoa dzi, ndzoe ya e si nyi azu woaban a nsëṅ. ³² Mfag wama, eyòṅ mayi bedëban a si, mayi dudu bësë abë ma. ³³ Angakòbò nala atyan ai akyaè awu ayigi wu. ³⁴ Nkunda ai nyè na: Bia, bingawog a mvende na Kristus alaṅan a kòm, ndò eyë wadzo ya na mòn mod ayean bedëban a yob? Mòn mod te anë za ben? ³⁵ Yesus nyè ai bò na: Mfyè ongënë ai mina man eban. Wulugan ntye mibëlë mfyè, asu yë na të dibi ladilan mina. Ndò, e nyò awulu a dibi, ayëm ki mfag akë. ³⁶ Ntye mibëlë mfyè, yëbëgan mfyè, asu yë na mibò bòn bë mfyè. Yesus angayi mana kòbò nala, ndò akë, asòbò bò. ³⁷ Afyaṅan bò na angabò eyëgan abui biyëṅ bi mam a zaṅ dzaban, bò tègè nyè yëbë, ³⁸ asu yë na ebug profèt Isaias dzi etoban na: A Nti, za angayëbë nkòbò wama? Za ki mbo-nnomo Nti angakulëban? ³⁹ Asu te bëngabë ki dzam yëbë, amu Isaias adzo fë na: ⁴⁰ Angakub bò ndim a mis, Amana bò yëm minnëm, asu yë na të bayen ai mis, bò të wog ai nnëm, asu yë na bëzaa vëṅan, mësye bò. ⁴¹ Isaias angadzo nala amu angayen duma die, ndò angakòbò atyan ai nyè. ⁴² Tò hm të nala, abui bëvòg ya bëdzoe bëngayëbë nyè, dzam da, asu bëfarisea, bò të nyè mëm asu yë na bëzaa kuli bò a nda-bikoan a nsëṅ. ⁴³ Amu bëngabë diṅi olugu ya asò a bod alodo olugu Zamba. ⁴⁴ Ndò Yesus akòbò a yob ete, nyè na: E nyò ayëbë ma, së ki ma ayëbë, ayëbë e nyò angalom ma, ⁴⁵ ndò fë e nyò ayen ma, ayen e nyò angalom ma. ⁴⁶ Ma mëngasò anë mfyè a si, asu yë na e nyò osë ayëbë ma abë tòbò a dibi. ⁴⁷ Ndò ngë mod ziṅ awog bibug biama, dzam da, të biè baala, së ki ma matsig ntol woe. Amu mandzëki sòṅ na madzòs si, dzam da asu yë na makode si. ⁴⁸ E mod abyandi ma, të nòṅ bibug biama, abëlë e mod adzòs nyè. Ebug mëngakòbò, yayi nyè dzòs a amos mvua. ⁴⁹ Amu makòbò ki ai mamen, dzam da, e Tara angalom ma ṅnyè angavë ma mvende e dzom makòbò ai e dzi mayi dzo. ⁵⁰ Ndò mayëm na mvende dzie enë enyiṅ kòm. E mam makòbò, akyaè ya Tara angakad ma, nala ngò makòbò.

¹ Osusua abog Paska, mbol Yesus ayëmë na awola die asò ya na akodo e si nyi, adugan abë esya, mbol angadiṅ emboe ya bëngabë a si-ndon, ndò angadiṅ fò bò akui a mëmana. ² Abog bidi bi ngoge, hala Satan anyian ya Yudas man Simun Iskariot a nnëm na akuan ai nyè, ³ mbol ayëmë na esya angavë nyè dzom esë a mò, ai na angasò abë Zamba, ndò fë adugan abë Zamba, ⁴ a bëdzaa ha, ndò atëbë, asòdi biwòman, anòṅò etun eyie, atindi a angëdëg. ⁵ Ndò asoe mëndim a basin, akaè na asob bëyègè mëkol, angafimi mò ai etun eyie engabë etii nyè a angëdëg. ⁶ Ndò azu abë Simun Petrus. Petrus nyè ai nyè na: A Nti, dze yë wayi ma sob mëkol? ⁷ Yesus nyè ai nyè na: E dzam mabò di, wawog ki dò etoa dzi, wayiyi yëm a mvus hala. ⁸ Petrus nyè ai nyè na: waangâsob ki ma mëkol tò eyòṅ. Yesus nyè ai nyè na: Ngë mandzëki wa sob mëkol, wabëlë ki ngab ai ma. ⁹ Simun Petrus nyè ai nyè na: A Nti, së a hm ki hë mëkol etam, sobo fë tò mò ai nlo. ¹⁰ Yesus nyè ai nyè na: E mod awòbò ya ayaṅan ki ai mëwòbò, ayaṅan hë ai nsoban mëkol, amu anë mfuban mfuban. Ndò fë mina minë mfuban; së hm ki mina bësë. ¹¹ Amu angabë ayëmë e mod ayii kuan ai nyè. Asu te angakad na së ki mina bësë minë mfuban. ¹² Eyòṅ hm angamana bò sob mëkol, ndò adugan bòd biyie bie, adugan kom etoa, nyè ai bò na: Yë miayëm e dzam mëbò mina di? ¹³ Mialoe ma na: ṅyëgele ai Nti; miabò fò mbëṅ, amu anë nala. ¹⁴ Ndò hm, ngë e ma ya mënë ṅyëgele ai Nti, mëhë sob mina mëkol, mina fë miayean soban mina mina mëkol. ¹⁵ Amu mëvë mina mvulna asu yë na, e kan mëhë bò, mina fë mibò nala. ¹⁶ Makad mina bëbëla na: Olò walod ki nti woe, ndò fë mod minloman alod ki e nyò alom nyè. ¹⁷ Ngë miayëm e mam ma, minë mvòm ngë miabò mò. ¹⁸ Makòbò ki ai mina bësë. Mayëm e ba mëngatòb; Dzam da, asu yë na Ntilan odzalëban na: E mod adi bidi biama, abede ma etindi dzie a nyòl. ¹⁹ Etoa dzi, makad mina osusua yë na labòban, asu yë na, eyòṅ layi bòban, miyëm na mënë. ²⁰ Makad mina bëbëla na, e mod abëlan ai e nyò malom, ma abëlan ai nyè; e nyò hm abëlan ai ma, abëlan ai e nyò angalom ma. ²¹ Akòbò Yesus angakòbò nala, ndò nnëm wasigan nyè a abum ete, nyè na: Bëbëla emen, makad mina na, mbòg ya abë mina ayi kuan ai ma. ²² Bëyègè bëngabëban bò bò, bò të yëm e mod adzo ai nyè. ²³ Mbòg ya bëyègè angabë ayëgë Yesus a toe, ṅnyè Yesus adiṅi. ²⁴ Simun Petrus abòò nyè ndëm ai nlo, na asili nyè e mod adzo ai nyè. ²⁵ Ndò atoan yëm etoa a toe Yesus, nyè ai nyè na: A Nti, za? ²⁶ Yesus nyè na: E nyò mayi vë etun mbaṅëla ya mayi du a bidi. Ndò adu etun mbaṅëla a bidi, anòṅò, avëë Yudas, man Simun Iskariot. ²⁷ A mvus etun mbaṅëla dzi, ndò Satan anyian nyè a nyòl. Yesus nyè ai nyè na: Vologo bò e dzam wayean bò. ²⁸ E bod bëngabë ai nyè a bidi ha, tò mbòg të yëm e dzam adzoo ai nyè. ²⁹ Bëvòg bëdzoo na, mbol Yudas angabë abëlë nkòb mòni, ndò Yesus adzo ai nyè na: Kusu e byem biayaṅan ai biè asu abog, ngë ki na: Vaa mimbubua dzom ziṅ. ³⁰ Anòṅan ganòṅ etun mbaṅëla, ndò akë a nsëṅ. Së alu lëvini ha. ³¹ Eyòṅ angakui, Yesus nyè na: Eyòṅ dzi, mòn mod avëëban ya olugu, ndò fë Zamba avëëban ya olugu abë nyè. ³² Ngë Zamba avëëban ya olugu abë nyè, Zamba ayi nyè vë olugu abë nyè emen, avë fë nyè olugu etye etye. ³³ A bòngò, mëngëne ai mina etun abog. Miayi ma dzëṅ, ndò e kan mëngadzo ai Yuden na: E hom makë, miasëki dzam kë, nala ngò madzo ai mina etoa dzi. ³⁴ Mavë mina mkpamaṅ mvende, na midiṅan mina mina, akyaè ya mëngadiṅ mina, asu yë na mina midiṅan fë mina mina. ³⁵ Eyë bësë bayi yëm na minë bëyègè bama ete, ngë mibëlë ediṅ asu mina mina. ³⁶ Simun Petrus nyè ai nyè na: A Nti, eyë wakë ve? Yesus nyè ai nyè na: Wasëki ma dzam bie e hom makë etoa dzi. Wayi ma bie a mvus. ³⁷ Petrus nyè ai nyè na: Asu dze masëki wa dzam bie etoa dzi? Mayi vë enyiṅ dzama asu doe! ³⁸ Yesus nyè na: Wadzo na wayi vë enyiṅ dzoe asu dama a? Ndò makad wa di na: Nnom kub ayi ki lòṅan a, së na osie ma biyòṅ bilè.

¹ Të nnëm wakòbò mina a abum abui. Yëbëgan Zamba, yëbëgan fë ma. ² Mëdzogëbo mënë abui a nda tara. Ngë tègè ai nala, yë ngë makad mina na makë mina komëzan etoa? ³ Layi bò na: eyòṅ mëkë ya nala, mëkomëzan mina etoa, mayi dugan sò, mënòṅò mina abë ma, asu yë na, e hom ya mënë, mina mitobò fë ete. ⁴ Ndò fë, e hom makë, miayëm zen ya ete. ⁵ Tomas nyè ai nyè na: A Nti, biayëm ki mfag wakë. Eyë binë dzam yëm zen ya? ⁶ Yesus nyè ai nyè na: Ma mënë zen, mëtoa bëbëla, mëtoa enyiṅ. Mod ziṅ azu ki abë Tara së na alod abë ma. ⁷ Ngë miayëm ma, miayëm hm fë Tara. Akèègè etoa dzi, miayëm nyè, ndò fë mingayen ya nyè. ⁸ Filip nyè ai nyè na: A Nti, lëdëgë bia esoa, nala wayean ai bia. ⁹ Yesus nyè ai nyè na: Dze yë mëtòbò ya ai mina abog asë di, wa tègè ma yëm nga, a Filip? E nyò ayen ya ma, ayen ya fë Tara; Asu dze wadzo na, lëdëgë bia esoa? ¹⁰ Dze yë wayëbë ki na mënë abë Tara, Tara atoa abë ma? E bibug makad mina, makòbò ki biè ai mamen; e Tara atoa abë ma abò esye dzie. ¹¹ Yëbëgan ma na mënë abë Tara, Tara atoa abë ma. Ngë miayëbë ki nala, yëbëgan hm të hë asu e mimboan mi. ¹² Bëbëla emen, makad mina: e mod ayëbë ma, ayi bò e mimboan mabò mi, abò fë alodo nala, amu makë abë Tara. ¹³ Ndò e dzi miayi dzaè a dzoe dama, mayi dò bò, asu yë na Tara avëëban olugu abë mòn. ¹⁴ Ngë midzaè ma dzom ziṅ a dzoe dama, mayi dzò bò. ¹⁵ Ngë miadiṅ ma, miayi baala mëmvende mama. ¹⁶ Mayi hm dzaè Tara, alomo mina nkè mfë, asu yë na atòbò ai mina kole, ¹⁷ nsisim bëbëla, a si-ndon yasëki dzam nòṅ, amu yayen ki nyè, të nyè yëm. Mina miayëm nyè, amu alaṅan abë mina, ndò fë ayi tòbò ai mina. ¹⁸ Malig ki mina nyui, mazu abë mina. ¹⁹ Hë man eban, si-ndon tègè ma bad yen; mfag waan, miayi ma yen, amu manyiṅ, ndò fë miayi nyiṅ. ²⁰ Amos te, miayi yëm na mënë abë Tara, mina abë ma, ma fë abë mina. ²¹ E nyò abëlë mëmvende mama, abaala fë mò, e nyòlò te ṅnyè adiṅ ma. E nyò hm adiṅ ma, Tara ayi nyè diṅ, ma mayi fë nyè diṅ, ndò fë mayi nyè kulan mamen. ²² Yudas, -së ki man Iskariot- nyè na: A Nti, dze etam bò a wayi na wakulan wamen hë abë bia, të kulan a si-ndon? ²³ Yesus nyè ai nyè na: Ngë mod ziṅ adiṅ ma, ayi baala ebug dzama, ndò Tara ayi nyè diṅ, ndò biayi sò abë nyè, bikomo etoa abë nyè. ²⁴ E nyò adiṅ ki ma, abaala ki bibug biama. Ndò hm fë, ebug miawog esëki endzama, enë ebug e Tara angalom ma. ²⁵ Mëngakad mina e mam ma mëtoa abë mina. ²⁶ Mfag nkè, Mfufub Nsisim, e nyò Tara ayi lom a dzoe dama, ayi mina yëgëlë bisë, adugan mina baala e ma mësë mëngakad mina. ²⁷ Malig ai mina mvoè, mavë mina mvoè dzama; mavë ki mina akyaè ya si-ndon yavë. Nnëm obë mina sigan a abum, mibë kòn wòṅ. ²⁸ Miawog anë makad mina na: Makë, ndò fë mazu abë mina. Ngë midiṅi ma, ngë miafon na makë abë tara, amu Tara alod ma. ²⁹ Ndò hm, etoa dzi, makad mina osusua yë na nala wayënan, asu yë na, eyòṅ layi bòban, miyëbë. ³⁰ Mayi ki mina bad kad abui mam, amu ndzoe si-ndon azu. Abëlë ki ngul a nyòl dzama. ³¹ Dzam da, asu yë na si-ndon eyëm na madiṅ Tara, ai na mabò e dzi Tara angabende ma: Tëbëgan, nkodan va.

¹ Ma mënë bëbëla ele wayn, Tara nyè anë nkoe. ² Ntëm osë ya abë ma, a wawum ki ebuma, atsig wò, ndò fë ntëm osë wawum ebuma, atone wò asu yë na obuli wum bibuma. ³ Mintoa ya mfuban, etòm ebug mëngakad mina. ⁴ Laṅan abë ma, ma fë abë mina. Akyaè ya ntëm wasëki dzam wum ebuma ai oben ngë walaṅan ki ai ele wayn, nala fë ai mina, ngë miandzëki tòbò abë ma. ⁵ Ma mënë ele wayn, mina ki mintëm. E nyò alaṅan abë ma, ma fë abë nyè, awum abui bibuma, amu tègè ai ma, miasëki dzam bò dzom. ⁶ Ngë mod ziṅ nyòlò atòbò ki abë ma, awoaban a nsëṅ anë ntëm, amana kod, bëngakoan miè, bëwoa a ndoan, engadig. ⁷ Ngë mitòbò abë ma, bibug biama bitòbò abë mina, dzagan e dzi miayaṅan ai dzò, eyòṅ te yayi yenan ai mina. ⁸ Tara avëëban olugu asu yë na miwum abui bibuma, mibò fë bëyègë bama. ⁹ Akyaè ya Tara angadiṅ ma, nala ngò fë mëngadiṅ mina. Laṅan a ediṅ dzama. ¹⁰ Ngë mibaala mëmvende mama, miayi laṅan a ediṅ dzama, anë mëngabaala mëmvende më Tara, ndò mëtoa a ediṅ dzie. ¹¹ Makad mina e mam ma asu yë na mintag miama mitòbò abë mina, ai na mintag mian mibò ntud. ¹² Mvende dzama enë na midiṅan mina mina anë mëngadiṅ mina. ¹³ Mod ziṅ abëlë ki ediṅ a lodo e dzi na mod avë enyiṅ dzie asu bëmvoe boe. ¹⁴ Mina minë bëmvoe bama ngë miabò e mam mabende mina. ¹⁵ Maloe ki fë mina na bëlò, amu olò wayëgan e dzi nti woe abò. Maloe mina na bëmvoe amu mabò na miyëm e dzi esë ya mëngawog abë tara. ¹⁶ Së ki mina mingatòb ma, ma mëngatòb mina, ndò mëngatele mina na mikë, miwum bibuma, bibuma bian bilaṅan, asu yë na e dzi esë miadzaè Tara a dzoe dama, avë mina. ¹⁷ Mabende mina na midiṅan mina mina. ¹⁸ Ngë si-ndon yafëm mina, yëman na engatari ya ma fëm. ¹⁹ Ngë miwoge ai si-ndon, ngë si-ndon yadiṅ endzie. Mbol hm miawoge ki ai si-ndon, ndò mëngatòb mina, asu te si-ndon yafëm mina. ²⁰ Tsogan ebug mëngakad mina: olò walod ki nti woe. Ngë bëngasiṅ ma, ba bayi mina siṅ. Ngë bëbaala ebug dzama bayi baala endzaan. ²¹ Ndò bayi mina bò e mam mësë mala etòm dzoe dama, amu bayëm ki e nyò angalom ma. ²² Ngë mëbò të sò, mëkòbò ai bò, ngë babëlë ki nsëm. Ndò hm, babëlë ki edzuga ziṅ asu minsëm miaban. ²³ E nyò asiṅ ma, asiṅ fë Tara. ²⁴ Ngë mëbò të bò mimboan ya mod mfë abë ya ki bò, ngë babëlë ki nsëm. Ndò hm, bò bëngayen, bësiṅi ai mamen, ai Tara. ²⁵ Dzam da, asu yë na ebug ya mvende dzaban edzalëban na: Bëngasiṅ ma a zëzë. ²⁶ Eyòṅ nkè ya mayi mina lom abë tara ayi sò, nsisim bëbëla ya wayi sò abë tara, e nyòlò te ayi ma bòòlò. ²⁷ Ndò fë mina miayi bòòlò, amu mingabë ai ma atarigi a mëtari.

¹ Mëngakad mina e mam ma asu yë na të miakam. ² Bayi mina tsidan a mënda-bikoan. Ndò fë awola lazu, a e mod osë awoe mina ayi tsog na avë Zamba mëtunëṅa. ³ Ndò bayi bò mam mëtë amu bandzëki yëm tò Tara, tò ma. ⁴ Ndò hm mëngakad mina e mam ma asu yë na eyòṅ awola daban layi zu, midugan tsog na mëngakad mina. Mandzëki mina kad mam mëte atarigi a mëtari, amu mëngabë ai mina. ⁵ Etoa dzi, mazu kë abë e nyò angalom ma, ndò tò mod mbòg ya abë mina asilisili ki ma na: Eyë wakë ve? ⁶ Dzam da, mbol mëkad mina mam mëte, ndò mëlunga mëdzie mina a minnëm. ⁷ Ma makad mina bëbëla; anë mbëṅ asu daan na mëkë. Amu, ngë mëbò të kë, nkè ayi ki sòṅ a bë mina. Eyòṅ hm ki mayi kë, mayi mina nyè lom. ⁸ Eyòṅ e nyòlò te ayi sò, ayi bòòlò si-ndon asu nsëm, ai asu sosoo, ai asu nkat. ⁹ Asu nsëm, amu bandzëki ma yëbë. ¹⁰ Asu sosoo, mbol makë abë Tara, ndò miayi ki ma bad yen. ¹¹ Asu nkat, mbol ndzoe e si-ndon nyi atsigëban ya ntol. ¹² Mëngëlë bëlë abui mam ya akad mina, dzam da miasëki mò dzam wog etoa dzi. ¹³ Eyòṅ hm e nyòli ayi sò, nsisim bëbëla, ayi mina lëdë zen a bëbëla osë. Amu ayi ki kòbò ai emen, dzam da, e ma mësë ayi wog, ayi mò kòbò, ndò fë ayi mina bende e mam mayi sò. ¹⁴ E nyòlò te ayi ma vë olugu, amu ayi nòṅ a endzama, abende mina; ¹⁵ E dzi esë Tara abëlë, enë endzama. Asu te madzo na, ayi nòṅ a endzama, abende mina. ¹⁶ Man eban ayi kog, mina tègè ma bad yen, man eban mfë, midugan ma yen. ¹⁷ Bëvòg ya bëyègè boe bëngadzo bò a bò na: Dze ben tug akad bia na: Man eban ayi kog, mina tègè ma bad yen, man eban mfë, midugan ma yen, amu makë abë Tara? ¹⁸ Bëngadzo hm na: E man eban nyò ṅnyè anë dze? Biayëm ki e dzam adzo. ¹⁹ Yesus angabë ayëmë na bayi nyè sili, nyè ai bò na: Dze yë miakë miasili a mina mina mbol mëdzo na: Man eban ayi kog, mina tègè ma bad yen, man eban mfë, midugan ma yen? ²⁰ Bëbëla emen, makad mina na miayi yon, mitada, si-ndon dzò efono. Miayi tòbò a mëlunga, dzam da mëlunga maan mayi vëṅan mëfon. ²¹ Eyòṅ mininga abye, abëlë mintye amu awola die asò ya. Eyòṅ abye ya man mòn, adugan ki tsog mintye, asu e mintag yë na mod abyali a si-ndon. ²² Ndò hm mina, minë a mëlunga etoa dzi. Mayi mina dugan yen, eyòṅ te minnëm miayi mina fon, ndò fë tò mod ayi ki mina fadi mëfon maan. ²³ A amos te, miayi ki ma sili tò dzom. Makad mina bëbëla na, ngë mindzaa Tara dzom ziṅ adzoe dama, amvëë mina dzò. ²⁴ Akui etoa dzi, miabë ki dzaè dzom ziṅ adzoe dama. Dzagan, miayi bëlë, asu yë na mëfon maan mëbò ntud. ²⁵ Mëngakad mina e mam ma a minkana. Awola lazu, a mayi ki bad kòbò ai mina a minkana, dzam da, mayi mina kad mam më Tara a kpaam. ²⁶ Amos te, miayi sili a dzoe dama, ndò makad ki mina na mayi dzaè Tara asu daan. ²⁷ Amu Tara emen adiṅ mina, amu mingadiṅ ma ndò fë mingayëbë na mëngasò abë Tara. ²⁸ Mëngasò abë tara, ndò mëngazu a si-ndon. Ndò madugan kodo a si-ndon, mëkëlë abë Tara. ²⁹ Bëyègè boe bò na: Watala na ongakòbò ya a kpaam, të kòbò a minkana a? ³⁰ Eyòṅ dzi, biayëm na wayëm mësë ai na wayaṅan ki ai na mod asili wa. Asu te biayëbë na ongasò abë Zamba. ³¹ Yesus nyè ai bò na: Etoa dzi, miayëbë. ³² Awola lazu, lësòsò ya, a miayi tsaman, anë mod a biwoge bie, miligi ma etam. Dzam da, masëki etam, amu Tara anë ai ma. ³³ Mëngakad mina e mam ma asu yë na mibi mvoè abë ma. Mibëlë mintye a si-ndon. Dzam da, vaan koa, mëngatègè ya si-ndon.

¹ Amana angamana kòbò e mam ma, ndò Yesus angabede mis a yob, nyè na: A Tara, awola asò ya. Vaa nyò mòn duma, asu yë na nyò mòn avë wa duma, ² akyaè ya ongavë nyè ngul a ekokoma esë, asu yë na, e dzi esë ongavë nyè, avë dzò enyiṅ kòm. ³ Enyiṅ kòm dzò enë na bëyëm wa, Zamba mbòg ai bëbëla, ai e nyò ongalom, Yesus Kristus. ⁴ Mëngavë wa duma a si, ai mkpaèn mëngakpaèn esye ongavë ma na mëbò. ⁵ Ndò hm, etoa dzi, wamen, a Tara, vaa ma duma, e kan mëngabë mëbëlë a mgbag dzoe osusua yë na si yazu bò. ⁶ E bod ongavë ma a si-ndon, mëngakulan bò dzoe doe. Bëngabë emboe, ndò ongavë ma bò, ndò bëngabaala ebug dzoe. ⁷ Etoa dzi, bayëm na, e bi bisë ongavë ma, biasò abë wa. ⁸ Amu e mëbende ongavë ma, mëngavë bò, ndò bò bëngayëbë, bëyëmë fë bëbëla na, bingasò abë wa, bëyëbë fë na wa ongalom ma. ⁹ Ma, makogëlan asu daban, së ki asu si-ndon ngò makogëlan, hë da asu eba ongavë ma, amu bënë emboe, ¹⁰ ndò ebi bisë biawoge ai ma biawoge ai wa, embie bitoa embiama, ndò mëngavëëban olugu abë bò. ¹¹ Ndò hm, masëki fë a si-ndon; mfa waban, bënë a si-ndon; ma, mazu abë wa. A Tara ya onë mfufub, baala bò a dzoe doe ya ongavë ma, asu yë na bëbò dzom dzidzia anë bia. ¹² Eyòṅ mëngabë ai bò, mëbaala bò a dzoe doe ya ongavë ma, mëkalëga fë bò, ndò mod ziṅ ya abë bò andzëki dzaṅ, sësala hë mòn ndzaṅ-kòm, asu yë na Ntilan odzalëban. ¹³ Eyòṅ hm dzi, mazu abë wa, ndò makòbò e mam ma a si-ndon mu, asu yë na mintag miama midzie abë bò. ¹⁴ Ma mëngavë bò ebug dzoe, ndò emò minlaṅ yafëm bò, amu basëki bod ya si-ndon, akyaè fë masëki mod ya si-ndon. ¹⁵ Makogëlan ki na ovaè bò a si-ndon, dzam da, asu yë na okaman ai bò abë Mbe. ¹⁶ Basëki bod ya si-ndon e kan ma masëki mod ya si-ndon. ¹⁷ Fubugu bò a bëbëla: Ebug dzoe enë bëbëla. ¹⁸ E kan ongalom ma a si-ndon, ma mëngalom bò a si-ndon, ¹⁹ ndò mafubu mamen, asu yë na bò bëbò mfuban a bëbëla. ²⁰ Së hm ki asu daban etam ngò makogëlan, makogëlan fë asu e ba bayëbë ma a ebug dzaban a yob, ²¹ asu yë na bësë bëbò dzom dzia, anë wa, a Tara, onë abë ma, ma abë wa; asu yë na bëtòbò abë bia, si-ndon eyëbë na wa ongalom ma. ²² Mfag wama, e duma ongavë ma, mëngavë bò dò, asu yë na bëbò dzom dzia anë binë dzom dzia: ²³ ma abë bò, wa ki abë ma, asu yë na bëtoan fò bò dzom dzia, si-ndon ezu hm yëm na wa ongalom ma, ai na ongadiṅ bò anë ongadiṅ ma. ²⁴ A Tara, e dzi ongavë ma, mayi na, e hom mënë, bò fë bëtòbò ai ma, asu yë na bëyen e duma dama ya ongavë ma, amu ongadiṅ ma osusua akomo-lë-yob ai si. ²⁵ A Tara ya onë sosoo, si-ndon endzëki wa yëm, hë da ma mëngayëm wa, ndò bëngayëm na wa ongalom ma. ²⁶ Mëngabò na bëyëm dzoe doe ndò fë mayi kë ai nala osu, asu yë na ediṅ ya ongadiṅ ma ebò abë ma, ma fë abë bò.

¹ Akòbògò nala, Yesus ayëmë zen ai bëyègè boe, ndò bëngakë a ndoṅ Kedron ayat. Afub angabë hom te, ndò anyian a afub ai bëyègè boe. ² E Yudas angakuan ai nyè angabë ayëmë hom te, mbol Yesus angabë akadëga koan ete ai bëyègè boe. ³ Ndò hm Yudas anganòṅ nkunda bëzimbi ya a bëfada bënen, ai bëbò bisye bëfarisea, asò ete ai ngoe, ai mëlamba, ai mëkòṅ. ⁴ Mbol Yesus ayëmë e mam mësë mëyigi yënan ai nyè, ndò akui a nsëṅ, nyè ai bò na: Za miadzëṅ? ⁵ Bò ai nyè na: Yesus, man Nazaret. Nyè ai bò na: Ma nyò. E Yudas akuan ai nyè nyè fë angabë atëlë ai bò. ⁶ Eyòṅ angakad bò na, ma nyò, ndò bëngadugan ai mvus, bëkuu a si. ⁷ Ndò adugan bò sili na: Za miadzëṅ? Bò na: Yesus, man Nazaret. ⁸ Yesus nyè na: Mëdzo ya ai mina na ma mënë. Ngë ma hm miadzëṅ, dzogan e ba bëkë. ⁹ Asu yë na ebug angakòbò edzalëban na: E ba ya ongavë ma, mandzëki dzèè tò mbòg ya ete. ¹⁰ Simun Petrus angabë abëlë fa, ndò atie dzò, abaa dzò man olò fada-nen, ndò atsig nyè alò mbo-nnomo. Dzoe man olò angabë na Malkus. ¹¹ Yesus nyè ai Petrus na : Fudigi fa a abam. Dze yë mëbò të nyu e kòb Tara angavë ma ? ¹² Nkunda bëzimbi ai ndzoe waban ai bëlò bëfarisea bënòṅò Yesus, ndò bafaṅ nyè ngadag. ¹³ Ndò batari kë ai nyè abë Annas. Ṅnyè angabë nkiè e Kaifas angabë fada-nen a mbu te. ¹⁴ Kaifas te ṅnyè angavë Yuden mvulna na: layean na mod mbòg awu asu nkunda. ¹⁵ Simun Petrus ai ṅyègè mfë bëngabë toṅo Yesus ha. Ṅyègè nyò angabë ayëman ai fada-nen, ndò anganyian ai Yesus a abaa fada-nen. ¹⁶ Petrus nyè aligi atëlë a mbè, a nsëṅ. Ṅyègè mbòg angabë ayëman ai fada-nen nyò akuig a nsëṅ, ndò akòbò ai e mininga ya mbè, ndò anyili Petrus a nda. ¹⁷ E mininga ya mbè nyò nyè ai Petrus na: Wasë mbòg ya bëyègè bë e mod nyò a? Nyè na: Kokoa. ¹⁸ Bëlò ai bëbò bisye bëngabë tëlë hala, a akoman ndoan, mbol ahëb angabë, bëngawòbò ndoan. Petrus nyè fë angabë atëlë ai bò, awòbògò ndoan. ¹⁹ Fada-nen angasili Yesus mam bëyègè boe ai ayëgëlë die. ²⁰ Yesus nyè ai nyè na: Mëngakòbò ai bod a ngëëṅ, mëkarëga yëgëlë a nda-bikoan, mandzëki kòbò dzom ziṅ a asoe. ²¹ Dze wasili ma? Siligi e bod bëngabë vogolo ma e dzam mëkada bò. Bayëm e mam mëngakad bò. ²² Akòbò angakòbò nala, mbò bisye mbòg angabë atëlë babi hala, ndò abimi Yesus a amaṅ, nyè na: Eyë wayalan ai fada-nen na nga? ²³ Yesus nyè ai nyè na: Ngë mëkòbò abe, bòòlò dò. Ngë mëkòbò hm mbëṅ, a dze wayit ma? ²⁴ Ndò Annas alom nyè abë Kaifas, fada-nen, atoa mfaṅ a n ngadag. ²⁵ Simun angabë awòbògò ndoan. Bò ai nyè na: Wasë mbòg ya bëyègè boe a? Ndò asie, nyè na: Kokoa. ²⁶ Nsye fada-nen mbòg, angabë avuman ai e nyò Petrus angatsig alò, nyè na: Mandzë wa yen ai nyè a afub a? ²⁷ Petrus adugan sie; etye te, nnom-kub alòṅò. ²⁸ Ndò bakodo ai Yesus abë Kaifas, bëkëlë ai nyè a nda-mëdzo ai ndib kidi. Dzam da, bò tègè nyian a nda-mëdzo, asu yë na eboe eza kë bò a nyòl, mbol bëyiigi di Paska. ²⁹ Ndò Pilatus angakui a nsëṅ a bëngabë, nyè ai bò na: Za sòman miasòman e mod nyò? ³⁰ Ndò bayalan na: Ngë e mod nyò atoa të ai nyè mbë mod, ngë biandzëki sòṅ ai nyè abë wa. ³¹ Pilatus nyè ai bò na: Nòṅan nyè, midzòs nyè a mvende dzaan. Yuden bò ai nyè na: Biabëlë ki ngul ya awoe mod ziṅ. ³² Asu yë na ebug Yesus angakad akyaè awu ya ayean wu etoban. ³³ Pilatus adugan a nda-mëdzo ete, ndò aloe Yesus, nyè ai nyè na: Yë wa onë nkukuma Yuden? ³⁴ Yesus ayalan na: Yë wadzo dò ai wamen, yë bod bëfë mbò ki bëkad wa dò atyan ai ma? ³⁵ Pilatus nyè na: Yë ma mënë man Yuden? Ayòṅ doe ai bëfada bënen bësò ai wa abë ma; Wasie za etòmò? ³⁶ Yesus nyè na: Edzoe dzama yasëki e si-ndon nyi; ngë edzoe dzama esòò a si-ndon, ngë bëlò bama bëṅyidan ana asu yë na të maku a mò më Yuden. Ndò hm, edzoe dzama yasò ki a si. ³⁷ Pilatus nyè ai nyè na: Ndë onë hm nkukuma a? Yesus nyè na: Ndò wadzo dili na mënë nkukuma. Mëngabyali etòm te, ndò fë mëngasò a si asu yë na mabòòlò bëbëla. Enyò osë asò a bëbëla awog kiṅ dzama. ³⁸ Pilatus nyè ai nyè na: Dze enë bëbëla? Asili angasili nala, ndò adugan kui a nsëṅ a Yuden bëngabë, nyè ai bò na: Ma mayen ki nguma etòm abë nyè. ³⁹ Mbol hm anë mina tum na mëkuli mina mbog a Paska, yë miayi na mëkuli mina nkukuma Yuden? ⁴⁰ Bëngadugan bam, bò na: Të wakuli nyè, kuligi Barabbas. E Barabbas nyò angabë ezilgan.

¹ Ndò Pilatus anòṅ Yesus, abòò na bëyit nyè. ² Bëzimbi bëmana tiṅ ekadi biyò, bëbede nyè dzò a nlo, bëwòman fë nyè ndzòmbò ewòman oviege, ³ bëngalod nyè osu, bò na: Ovuma, a nkukuma Yuden; bëngabimi nyè a mëmaṅ. ⁴ Ndò Pilatus adugan kui a nsëṅ, nyè ai bò na: Yënan, mazu ai mina nyè a nsëṅ, asu yë na miyëm na mayen ki etòm ziṅ abë nyè. ⁵ Ndò Yesus akui a nsëṅ, abëgë ekadi biyò ai ewòman eviege. Nyè ai bò na: Yënan, mod te hm nyò. ⁶ Ayen bëfada bënen ai bëbò bisye bëngayen nyè, bëngabam, bò na: A klos, a klos! Pilatus nyè ai bò na: Mina bëben, nòṅan nyè, mibomë nyè a klos. Amu ma mayen ki etòm abë nyè. ⁷ Yuden bò ai nyè na: Bibëlë mvende, ndò, a mvende te, ayean wu, amu atele emen a etye mòn Zamba. ⁸ Awogo Pilatus angawog e dzam di, angafëdan kòn wòṅ. ⁹ Ndò adugan nyian a nda-mëdzo, nyè ai Yesus na: Wasòsò he? Yesus tègè nyè vë eyalan. ¹⁰ Ndò hm Pilatus adzo ai nyè na: Wakalan ki ai ma nkòbò nga? Wayëm fò na mëbëlë ngul ya asoe wa ai ngul ya abomë wa a klos? ¹¹ Yesus nyè na: Ngë ngul te ebò të wa vëëban a yob, ngë wabëlë ki ngul ziṅ a nyòl dzama. Asu te, e mod akuan ai ma abë wa abëlë mod nsëm abui. ¹² Atarigi hala, Pilatus angadzëṅ na asoe nyè. Yuden bëngabam, bò na: Ngë ohë soe nyè, oyëmë na wasëki mvoe Kaiser. E mod osë abò emen nkukuma aluman ai Kaiser. ¹³ Awogo Pilatus angawog e mam ma, ndò akui ai Yesus a nsëṅ, atoa nyè a etoa ntsigi ntol, e hom baloe na Lithostrotos, a nkòbò hebrea na Gabata. ¹⁴ Angabë amos mëfaṅ më Paska, dzam bò a awola samëna. Nyè ai Yuden na: Nkukuma waan hm vi! ¹⁵ Bëngabam, bò na: Kodogo ai nyè hala, bomo nyè a klos. Pilatus nyè ai bò na: Mëbom nkukuma waan a klos nga? Bëfada bënen bò na: Biabëlë ki nkukuma mfë hë Kaiser. ¹⁶ Ndò hm Pilatus avë bò nyè na aboman a klos. Ndò hm banòṅ Yesus. ¹⁷ Ndò emen abëgë klos dzie, akui e hom baloe na hom ekogëlo nlo, a nkòbò ebrea na Golgota; ¹⁸ ete ngò bëngabomë nyè a klos, ndò fë babomë bod bëfë bëbè ai nyè ha, enyò mfag hi, enyò mbòg mfag mbòg, Yesus a zaṅ. ¹⁹ Pilatus angatil abam, abòò na bëbaè dò a klos. Angabë ntilan na: Yesus man Nazora, nkukuma Yuden. ²⁰ Abui dzam ya Yuden bëngalaṅ abam te, amu e hom bëngabomë Yesus a klos ongabë babi ai tisòn, ndò fë abam angabë ntilan a nkòbò ebrea, ai alatan, ai grek. ²¹ Ndò bëfada bënen bë Yuden badzo ai Pilatus na: Obë til na: Nkukuma Yuden; Tili na: angadzo na: Mënë nkukuma Yuden. ²² Pilatus nyè na: E dzi mëtil ya, mëtil ya. ²³ Eyòṅ bëzimbi bëngabomë Yesus a klos, ndò banòṅ biwòman bie, bëbòò ngab enyii, anë man bëzimbi ngab dzia, ai edud. Edud dzi engabë nguma, tègè ai ekudëga; ²⁴ Ndò badzo na: Të bianyab dzò; ṅdoan abia, biyen e mod akyëbë ai dzò. Asu yë na ntilan otoban na: Bëngakaban ma biyie a bò bò, bëdòò abia ai edud dzama. Bëzimbi mbò bëngabò nala. ²⁵ Nyia woe, ai manyaṅ nyia, Maria nga Klopas ai Maria ya Magdala bëngabë bëtëlë babi ai klos Yesus. ²⁶ Ayen Yesus angayen nyia ai ṅyègè adiṅi atëlë babi, nyè ai nyia na: A mininga, nyò mòn nyòlò. ²⁷ Asò hm dzo ai ṅyègè na: Nyoa nyòlò. Atarigi awola te, ndò ṅyègè anganòṅ nyè a biwoge bie. ²⁸ A mvus hala, mbol Yesus ayëmë na mësë mëman ya, asu yë na ntilan odzalëban, nyè na: Mawog ekode. ²⁹ Ndëg engabë etëlë hala ai saṅ wayn a tuud. Ndò badu anya ete, bëfana a engëṅ, bëkèè nyè na anyu. ³⁰ Eyòṅ Yesus anganòṅ saṅ wayn, nyè na: aman ya. Ndò angalui nlo, asuu ṅhëbë. ³¹ Mbol hm engabë mëfaṅ më Paska, asu yë na të mimbim miakanga a klos a sabbat, amos sabbat te wa ongabë anen, ndò Yuden basili Pilatus na bëbug bò mëkol, bëvaè bò. ³² Bëzimbi bësòò, bëbugu e mod osu mëkol, ai e nyò mbòg a bëngabë bëbomo ai nyè a klos. ³³ Eyòṅ bëngakui abë Yesus, bëntala na awu ya, ndò bandzëki nyè bug mëkol, ³⁴ dzam da, ndò man bëzimbi mbòg angadzii nyè akòṅ a mviè; etye etye, mëki ai mëndim bingakui. ³⁵ E mod angayen angabòòlò, ndò fë mbòòlan woe onë bëbëla, ndò ayëm na akòbò bëbëla, asu yë na mina fë miyëbë. ³⁶ Amu, angayënan nala asu yë na ntilan otoban na: Eves yangâbugi ki nyè. ³⁷ Ndò fë ntilan mfë wadzo na: Bayi fòmbò e nyò ya bëngatubulu. ³⁸ A mvus hala, ndò Yosef ya Arimatea, ya angabë ṅyègè Yesus a asoe, ai e wòṅ a mbarëga Yuden, akë dzaè Pilatus na afami mbim Yesus a klos. Ndò azu kë vaè mbim woe. ³⁹ Nikodemus ya angasò abë Yesus ai alu, nyè fë asò ai mira, ai mëkëmëdë më zëg dzam bò kila mëwom mëtan. ⁴⁰ Ndò banòṅ mbim Yesus, bëmana wa wòbò ai e byem bianyum mbëṅ, akyaè tum Yuden enë a badzëb bod. ⁴¹ E hom bëngabomë nyè a klos, afub angabë ete, sòṅ etoa ete, hala babë ki dzëb mod ziṅ ete. ⁴² Ete ngò bëngadzëb Yesus, mbol sòṅ engabë babi, mëfaṅ më abog Yuden mëtoa fë.

¹ Amos osu ya sòndò, Maria ya Magdala akëlë a sòṅ ai ndib kidi, ndò ayen na akòg anë mvaan a sòṅ. ² Ndò azu mbil abë Simun Petrus ai abë ṅyègè mbòg ya Yesus adiṅi, nyè ai bò na: Bëvaa Nti a sòṅ, ndò biayëm ki e hom bëfudi nyè. ³ Petrus ai ṅyègè mbòg bëkui a nsëṅ, bësòò a sòṅ. ⁴ Bò bëbè bëwulugu mbil eyòṅ: Ndò ṅyègè mbòg angambara mbil avol alodo Petrus, ndò atari sòṅ kui a sòṅ, ⁵ ndò alumbu, ayënë biyie bi mbim bidzogo, dzam da, të nyian. ⁶ Simun Petrus fë asòò atoṅo nyè, ndò anyian a sòṅ, ayënë biyie bi mbim bidzogo, ⁷ ai ndòmbò, dzò etoa e hom nlo ongabë; engabë ki ai biyie bi mbim bivòg, dzam da etoa mbaan e hom woe. ⁸ Ṅyègè mbòg ya angatari sòṅ kui a sòṅ a sò hm nyian, ayënë, ayëbë fë. ⁹ Amu hala te babë ki wog Ntilan na ayean hëbë a bëkon. ¹⁰ Ndò bëyègè bëngasob. ¹¹ Maria angabë atëlë a sòṅ osu, ayono. A ayono ha, ndò alumbu a sòṅ ete, ¹² ndò ayen benglès bëbè bëbëgë mimfum biyie, bëtoa enyò e hom nlo, enyò mbòg e hom mëkol, e hom mbim Yesus ongadzogobo. ¹³ Ndò badzo ai nyè na: A mininga, dze wayon? Nyè ai bò na: Bëvaè Nti wama, ndò mayëm ki e hom bëfudi nyè. ¹⁴ Akòbògò nala, ndò avëṅan a mvus, antala Yesus atëlë, hë da të yëm na Yesus. ¹⁵ Yesus nyè ai nyè na: A mininga, dze wayon? Za wadzëṅ? Mbol atsogo na e mod nyò ṅnyè asye afub te, nyè ai nyè na: A nti, ngë wa obëgë nyè, kada ma mfag ofudi nyè, ma mayi nyè kë nòṅ. ¹⁶ Yesus nyè ai nyè na: A Mariam! Ndò avëṅan, nyè ai nyè a nkòbò ebrea na: Rabbuni (nala watyan na: A ṅyëgëlë). ¹⁷ Yesus nyè ai nyè na: Obë ma namba, amu mabë ki bed abë tara. Këlëg a babëdzaṅ bënë, okad bò na: Mabed abë Tara ai esya waan, abë Zamba wam ai Zamba waan. ¹⁸ Maria Magdalena asò hm kad bëyègè na: Mëyen Nti; e mam ma mmò akad ma. ¹⁹ A ngongogële ya amos te, amos osu ya sòndò, mimbè mifëdë e hom bëyègè bëngabë asu e wòṅ bëmbarëga Yuden, Yesus asòò, atëbë a zaṅ, nyè ai bò na: Mvoè ai mina. ²⁰ Akòbò nala, ndò alëdë bò mò moe ai mviè dzie. Bëyègè bëngatag ai ṅyënan bëngayen Nti. ²¹ Yesus adugan dzo ai bò na: Mvoè ai mina. E kan tara angalom ma, nala ngò hm fë malom mina. ²² Adzoo nala, ndò avundu bò, nyè na: Nòṅan mfufub ṅhëbë. ²³ E ba ya mingâvaè minsëm, mingâvaaban. E ba mingâbò të vaè, miayi laṅan. ²⁴ Tomas, dzoe na Didimos, mbòg ya bë awom ai bëbè, angabë ki ai bò eyòṅ Yesus angasò. ²⁵ Bëyègè bëvòg bò ai nyè na: Biyen Nti. Nyè ai bò na: Së na mëyen biboga bi sen a mò moe, mëfudi fë onyu wama ete, mëfudi fë wò wama a mviè dzie, ma të yëbë. ²⁶ Ndò hm a mvus mëlu mwom, bëyègè boe bëtoa fë a nda ete, Tomas atoa ai bò, ndò Yesus azu, mimbè mifëdë, ndò atëbë bò a zaṅ, nyè na: Mvoè ai mina. ²⁷ Ndò azu dzo ai Tomas na: Zaag ai onyu woe ha, oyen mò mama, ozu fë ai wò woe, ofudi wò a mviè dzama, ozu hm bò ṅyëbë, të wabò bisoo. ²⁸ Tomas nyè ai nyè na: A Nti wama ai Zamba wama. ²⁹ Yesus nyè ai nyè na: Dze yë mbol oyen ma ndò wazu yëbë? Bënë mvòm, eba bayen ki, dzam da bëyëbëgë. ³⁰ Yesus angabò fë abui mëndëm a mis bëyègè boe, a masëki ntilan a e kalara nyò. ³¹ E ma mëngatilban asu yë na miyëbë na Yesus anë Kristus, mòn Zamba; miyëbë, mibëlë enyiṅ a dzoe die.

¹ A mvus hala, ndò Yesus angadugan yene bëyègè a ntsag maṅ më Tiberiad. Na ngò angayene. ² Simun Petrus ai Tomas ya anë mëbëdan na Didimos ai Natanael ya Kana ya Galilea ai bòn bë Zebede, ai bëyègè bëfë bëbè bëngabë fufulu. ³ Simun Petrus nyè ai bò na: Makë a nlòb. Bò ai nyè na: Bia fë biazu ai wa. Ndò bakui, bëbëdë a efunga, ndò bandzëki bi dzom alu te. ⁴ Ai kikidigi ai ndib, Yesus antëlë a kindig, dzam da bëyègè bëngabë ki bëyëmë na Yesus. ⁵ Ndò hm Yesus adzo ai bò na: A bòngò, yë mibëlë man mbuman kòs? Bò ai nyè na: Kokoa. ⁶ Nyè ai bò na: Woagan mvunda mfag wò mbo-nnomo ya efunga, miayi bi. Ndò bawoa, tègè fë ai ngul ya alindi dzò asu abui kòs. ⁷ Ṅyègè ya Yesus adiṅi nyè ai Petrus na: Nti! Simun Petrus angayi wog na Nti, ndò afaṅ sanda, amu angabë nsò, asuman a maṅ, ⁸ e bëyègè bëvòg bësòò ai efunga amu bëngabë ki oyab ai nkot si, dzam bò yat ntèd, bazu balindi mvunda kòs. ⁹ Eyòṅ bëngasus a si, bëntala ndoan maag ai mbuman kòs ete ai mbaṅëla. ¹⁰ Yesus nyè ai bò na: Zaan ai e kòs mindëm bi etoa dzi. ¹¹ Petrus abëdë, alindi mvunda a si, etoa ndzalan ai bod bë kòs ntèd ai mëwom mëtan ai elè. Afyaṅan bò na engabë abim abui te, mvunda të nyabi. ¹² Yesus nyè ai bò na: Zaan tsam akag. Tò mbòg ya a bëyègè boe të nyè zombo sili na: Wa onë za? Bëyëmë na Nti. ¹³ Yesus asòòg, ndò anòṅ mbaṅëla, avëë bò, ai mbuman kòs dzam dëda. ¹⁴ Nala ongabë eyòṅ lala Yesus ayenëṅe bëyègè boe ngë atëbë a bëkon. ¹⁵ Eyòṅ bëtsama akag ha, Yesus nyè ai Simun Petrus na: A Simun man Yohannes, yë wadiṅ ma alodo eba? Nyè ai nyè na: Owe a Nti, wayëm na madiṅ wa. Nyè ai nye na: Nònëṅi mintomba miama. ¹⁶ Ndò adugan nyè kad eyòṅ bèè na: A Simun man Yohannes yë wadiṅ ma? Nyè ai nyè na: Owe, a Nti, wayëm na madiṅ wa. Nyè ai nyè na: Nònëṅi bënyia mintomba bama. ¹⁷ Ndò akad nyè eyòṅ lala na: A Simun man Yohannes, yë wadiṅ ma? Petrus antoa fò a mëlunga na asili nyè eyòṅ lala na: Yë wadiṅ ma? Nyè ai nyè na: A Nti, wayëm mësë, wayëm na madiṅ wa. Yesus nyè ai nyè na: Nònëṅi bënyia mintomba bama. ¹⁸ Amen, amen makad wa, eyòṅ ongabë ntëgan, ofaṅa wamen eyie, okëlë mfag wadiṅ. Eyòṅ wayi yombo, wayi sam mò moe, mod mfë abòdògò wa, akëlë ai wa mfag wayi ki. ¹⁹ Akòbògò nala, avaa mvulna akyaè awu ya ayiigi vë Zamba olugu ete. Ṅnyie anë angadzo nala, nyè na: Biege ma. ²⁰ Petrus avëṅan ai mvus, ndò ayen ṅyègè Yesus adiṅi, atoṅo bò -ṅnyè angabombo nyè a toe a bidi bi ngoge, nyè ai nyè na: A Nti, za ayi kuan ai wa?- ²¹ Ayen hm Petrus angayen nyè, nyè ai Yesus na: A Nti, mfag enyò ki ya? ²² Yesus nyè ai nyè na: Ngë mayi na alaṅan akëlë kui anë madugan zu, dze yabëbë wa ete? Mfag woe, biege ma. ²³ Foe eyaman hm fò a zaṅ babënyaṅ na ṅyègè te ayi ki wu. Yesus nyè andzëki dzo na ayi ki wu, angadzo hë na: Ngë mayi na alaṅan akëlë kui anë mazu, dze yabëbë wa ete? ²⁴ Enyò ṅnyè anë ṅyègè ya abòòlò mam mete, ndò fë angatil mò, ndò biayëm na mbòòlan woe onë bëbëla. ²⁵ Mam mëfë mënë abui a Yesus angabò. Ngë bëhë til mò mësë, matsog na tò si esë tègè ai afola asu bëkalara bëte.