YAKOBUS

YAKOBUS

¹ Ma Yakobus, mbò-esye Zamba ai Nti waan Yesus Kristus, matil mënda më bod awom ai mebè ya mëngamana tsaman. Miavuma a ! ² A babëdzaṅ, yënan dò anë dzam mintag, eyòṅ miatoban ai mëbobëla kan kan, ³ miyëmë na ndëm ṅyëbë waan yazu ai fin. ⁴ Fin dzò esye hm fò ntud, asu yë na mibò ntud, a saaṅ, tègè yaṅan ai dzom ziṅ. ⁵ Ngë mod ziṅ ya abë mina adzëman ai fëg, adzaaga e Zamba avë bod bësë tègè fyal, tègè kòṅan ai mod; bayi nyè dzò vë. ⁶ Asiligi ai ṅyëbë, tègè bò bisoo; amu e mod abò bisoo anë anë nsum mëndim ya maṅ; asë diban ali, anë kë ali. ⁷ Amu mod te ayean ki kë ai ntsogan osu na ayi bi dzom ziṅ abë Zamba; ⁸ anë e mod anë minnëm mibè, tègè ai oyili ziṅ a mëzen moe mësë. ⁹ E madzaṅ anë edzòdi-nyòl, abòò enguṅ mbol atëlë etye ya yob; ¹⁰ Mod akuma abòò enguṅ a edzòdi-nyòl dzie, amu ayi dzòlan anë elòg ya afan. ¹¹ Amu nlo-dzobo atye ai mod ayoṅ woe, amana bò na elòg ekod, sama dzie edzòlan, abëṅ die andaman. Nala ngò fë mod akuma ayi mana a zen enyiṅ dzie. ¹² Mvòm ai e mod ya anë nkanga a mëbobëla, amu e mod akui zingi ayi bi ekada-olugu enyiṅ ya angakag e bod badiṅ nyè. ¹³ Të mod ziṅ ya abëlë mëbobëla adzo na: Zamba abobolo ma. Amu mbë dzam asëki dzam bò na Zamba abi mëbobëla, ndò fë emen abobolo ki mod ziṅ. ¹⁴ Mod osë abëlë mëbobëla ya masò eyòṅ miṅyian mie miasòṅ nyè, mitindigi nyè. ¹⁵ Nala ngò ṅyian waanòṅ abum, obye nsëm, nsëm omana won, obye awu. ¹⁶ Të miakë a ndimi, a mindindiṅ mi babëdzaṅ. ¹⁷ Efaè esë enë mbëṅ, ekaè esë enë ntud, yasò a yob abë esya mfyè ya atsende ki, ndò fë dzom ziṅ yafòlan ki nyè a nyòl. ¹⁸ A ṅyian woe, ndò angabye bia ai ebug bëbëla asu yë na bibò mintol mi kye ya bikokoma bie. ¹⁹ Yëman nala, a mindindiṅ mi babëdzaṅ. Mod osë abòò avol awog, atòṅ a kòbò, atòṅ a wog olun. ²⁰ Olun mod wazu ki ai mëkyëbë më Zamba. ²¹ Asu te, dzogan fulu akoe esë ai abui mbë nnëm a evovoe ete, minòṅ hm ebug yalad minkaṅa bë mina, a ebëlë ngul ya akode minsisim mian. ²² Boan e bod babò e dzam ebug yadzo, së ki hë e ba bawog, mingadug mina bëben. ²³ Amu ngë mod ziṅ awog ebug, tègè dzò bò, e nyòlò te afulan ai e mod afòmbò asu die a eyèt. ²⁴ Amu afòmbò emen, akodo hala, etye etye, avoan e kan ahë bë. ²⁵ Dzam da, e mod atoan bëbë a ntud mvende, mvende fili, alaṅan hala, tègè bò na awogo, avoan fë, dzam da abò dzò mfaṅ, e nyòlò te ayi bi mvòm a mboan woe. ²⁶ Ngë mod ziṅ atsog na alugu Zamba mfaṅ, tègè ban oyëm woe, hë adugu nnëm woe, olugu Zamba woe anë evoe. ²⁷ Olugu Zamba ya anë mfuban, tègè ai atòn a mis më Zamba anë na: akë bëbë ban bë nyui ai minkus a mindzug miaban, atòbò tègè ai akalëga a mam më si-ndon.

¹ A babëdzaṅ, të miabò ebom-kama ziṅ, mina ya mibëlë ṅyëbë Yesus Kristus, Nti duma waan. ² Amu ngë mod ziṅan yian a nda-bikoan dzaan abëgë okene mvòt, ai biyie bi mòni, mbubua ziṅ onyian obëgë mvit biyie, ³ abog te miabëbë e mod abëgë biyie bi mòni nyò, mina ai nyè na: ’Wa, zaag tòbò a mbëmbë etoa ha’, mina ai mbubua na: ’Wa, tëbëgë we’, ngë ki na ’Tòbògò ma a mëkol ha’, ⁴ nga nala onë na mihë fyal bod a mësu abë mina ndò fë mitsig ntol ai bëbe mintsogan? ⁵ Vogolan, a mindindiṅ mi babëdzaṅ. Së Zamba ṅnyè angatòb mimbubua ya si na mibò minkukuma a ṅyëbë a, ai na bëbi elig a edzoe angakag eba badiṅ nyè a? ⁶ Mina miabyandi mbubua. Së bod bë akuma mbò batibili mina a, bëkëlë ai mina a mënda mëdzo a? ⁷ Së mbò bamgbali abëṅ dzoe ya bëngavë mina a? ⁸ Ngë miabaala hm nkukuma mvende, anë ntilan wadzo na: Odiṅi manyòṅ anë wadiṅ wamen, miabò mbëṅ. ⁹ Ngë miabò ebom-kama, miabò nsëm, mvende etsigi mina ntol na miadaṅ mvende. ¹⁰ Amu e mod osë abaala mvende esë, adaṅa hë dzam dëda ya ete, asëm ya ete, asëm ya a mvende esë. ¹¹ E mod angadzo na: Të waandaman alug, angadzo fë na: të wawoe. Ngë waandaman ki alug, hë da owoe, odaṅ ya mvende. ¹² Kòbògan hm, mibòò fë anë e bod bayi tëbë a nkat mvende fili. ¹³ Amu mvende esëki ngòl asu e mod asëki nnëm ngol. Ngòl yabad nkat. ¹⁴ A babëdzaṅ, mfi dze onë ete, ngë mod ziṅ adzo na abëlë ṅyëbë, hë da tègè bëlë mimboan? Yë ṅyëbë onë nyè dzam kode? ¹⁵ Ngë manyaṅ ngë kal bënë minsò, tègè ai e dzom badi amos te, ¹⁶ abog te mod mbòg ya abë mina adzo ai bò na: Kaṅan mvoè, wòbògan ndoan, dziean bidi; hë da mina tègè bò vë e dzom nyòl yayaṅan ai dzò, mfi dze onë ete? ¹⁷ Nala ngò fë ṅyëbë onë; ngë obëlë ki mimboan, onë fò ṅwuan a nnëm ete. ¹⁸ Mod ziṅ ayi kë dzo na: Wa, obëlë ṅyëbë, ma, mëbëlë mimboan; Lëdëgë ma ṅyëbë woe tègè ai mimboan, ma, mayi wa lëdë ṅyëbë wama ya wasò a mimboan. ¹⁹ Wayëbë na Zamba anë mbòg, wabò fò mbëṅ. Nga bësatan bayëbë, bënyaman fë! ²⁰ A akud mod, wayi na wayëm na ṅyëbë onë tègè ai mimboan osëki ai mfi nga? ²¹ Nga tara waan Abraham angabi mëkyëbë a mimboan, eyòṅ angatuni mòn woe Isaak a alatar? ²² Wayen na ṅyëbë ṅyëbë ongabë osye ai mimboan mie, ndò ṅyëbë woe ongabò a tuud etòm mimboan, ²³ ndò ntilan ongatoban mbol ongadzo na: Abraham angayëbë Zamba, ndò bëngalaṅ nyè dò na akyëbë, ndò angaloeban na: Mvoe Zamba. ²⁴ Kë miayen hm na mod abi mëkyëbë a mimboan, së ki hë a ṅyëbë etam. ²⁵ Dzam dëda fë, nga Rahab, mininga ebamba, angabi mëkyëbë a mimboan, eyòṅ angabëlan ai bëbëgë bë foe, alëdë bò zen fë? ²⁶ Akyaè ya nyòl enë mbim ngë tègè ai nsisim, nala ngò fë ṅyëbë onë mbim ngë tègè ai mimboan.

¹ A babëdzaṅ, të abui ya abë mina babò esye bëyëgëlë, amu miayëm na e bia ya biabò esye te biayi bi nkat onë alèd abui. ² Amu biaku abui biyòṅ. Ngë mod ziṅ aku ki mbëg a nkòbò, e nyòlò te anë ntud mod a saaṅ, anë fë dzam ban nguma nyòl osë. ³ Nga biakad fudi bikabëli mësuṅ a anyu, asu yë na bibò bia mëwog, bingawulu hm ai nyòl dzaban mbol biayi! ⁴ Bëbëgë bëtitima, abim anen bënë, ngul evundu endzò yatindi bò, hë man ekye ṅnyè awulu ai bò e hom ṅyian ndudu titima wayi; ⁵ Ndò hm oyëm onë man edzo tsëtsat, dzam da wabò enguṅ ai mimfaṅ mi mam. Bëbëgan akyaè man ndoan ladigi abim mod afan! ⁶ Oyëm onë hm ndoan. Oyëm onë enyiṅ nkòt ya enë bia a bidzo, wamana ndaman nyòl esë, ofudi ndoan a enyiṅ bikokoma, gehena amana wò fudi ndoan a nyòl. ⁷ Mod binama anë dzam komodo kan tsit afan esë, ai kan anòn esë, ai e kan tsit esë yawòṅ a bum a si, ai e tsit esë ya maṅ, ndò fë kan tsit te esë emana ya komëdan a mò më mod binam. ⁸ Ndò tò mod mbòg asëki dzam komodo oyëm; oyëm onë dzom abe ya enë të ku sòm, ndzalan ai nsul awu. ⁹ Eyë bialugu Nti ai tara waan ete, ete ngò fë biakag bod a bëngakomban a evëgëlë Zamba; ¹⁰ A anyu dëda ngò bikag ai nsalan biakui. A babëdzaṅ, e mam ma mayean ki bòban. ¹¹ Yë etam dzidzia yavë e mëndim banyu, evaa fë biyëyëg? ¹² A babëdzaṅ, yë ele faige enë dzam wum ebuma mbòn, ngë ki na ele wayn engawum faige? Mëndim më nku masëki wa dzam vë e mëndim ya anyu. ¹³ Za anë mfëfëg, za abëlë fëg enyiṅ abë mina? Alëdëgë hm mimboan mie ai evovoe fëg a mbëmbë enyiṅ woe. ¹⁴ Dzam da, ngë anë na, a minnëm mian, mibëlë mbë aban, midzëṅë fë hë mfi waan, të miabò enguṅ ngë mëdugan ai bëbëla. ¹⁵ Fëg te yasò ki a yob, enë fëg ya si, e nyi ya nyòl, fëg Satan. ¹⁶ Amu e hom anë, ai ndzëṅan mfi, ete ngò ezezam ai bëbe bë mam binë. ¹⁷ Fëg yasò a yob; e di osu, enë mfuban mfuban; a mvus hala, enë mvoè, evovoe, enë mëwog, enë ndzalan ai nnëm ngòl, ai mimbëmbë bibuma, tègè ai dzò ebom-kama, tègè ai dzò mëdugan. ¹⁸ E bod banyiṅ a mvoè babè bibuma ya mëkyebe a mvoè ete.

¹ Mëndum ai bitòm biakuli ve a zaṅ dzaan? Së mam më ngoṅ maan mmò maluman a bidzo bian a? ² Ngë miandzëki bi e dzom miayi, mingawoe bod. Mibëlë ngoṅ asu dzom ziṅ, mbol miasëki dzò dzam bi, mingayidan, milumëṅan. Miabi hm ki mbol miadzaè ki. ³ Miadzaè hë da miabi ki, mbol miadzaè abe, asu yë na mimana ndaman e dzom miadzaè a mam më ngoṅ maan. ⁴ A e bod miasëki bod bë afidi ba, nga miayëm na amvoe ai si-ndon latyan na wasiṅ Zamba? ⁵ Yë miatsog hm ki na ntilan wakòbò a zëzë na: Abò aban ai nsisim angatoe bia a nyòl, ⁶ hë da avë bia maa alodo nala? Asu te adzo na: Zamba aluman ai e bod bënë mëbun, avaag e bod bënë edzòdi-nyòl maa. ⁷ Boan hm Zamba mëwog, boan Satan nkanga, abog te ayi mina tub; ⁸ Suban Zamba babi, abog te ayi mina subu babi. A bod minsëm, soban mò, mimana fubu minnëm mian, a e bod minë minnëm mibè. ⁹ Boan engongòl, mitòbò a mëyëb, miyon. Loe daan avëṅan mëyëb, mintag mian mivëṅan mëlunga. ¹⁰ Dzòdan mina bëben a mis më Nti, abog te ayi mina bede. ¹¹ A babëdzaṅ, të mialaṅan bibug. E mod alaṅ manyaṅ ebug ngë ki na atsig ntol manyaṅ, alaṅ mvende ebug ndò fë atsig mvende ntol. Ngë watsig hm mvende ntol, wasëki mbaala mvende, ontoa ya ntsigi-ntol. ¹² Mod mbòg mbòg ṅnyè avë mvende, ṅnyè fë abëlë ngul ya akode, ngë adzèè bod. Mfag woe, wa onë za na watsig manyòṅ ntol? ¹³ E mina hm miadzo na: Ana, ngë okidi, biayi kë e tisòn nyili, biayi bombo we nguma mbu, bibòò makit, bidi mòni. ¹⁴ E mina ya minë akyaè te, miayëm ki e dzam lëmbòban okidi, akyaè enyiṅ dzaan yayi bò! Amu minë hë e fëb yakui man etun abog, a mvus hala emana dzaṅ. ¹⁵ Mëyian yë na miadzo na: Ngë Nti adiṅ, biayi nyiṅ, bibòò anë osi, anë oka. ¹⁶ Ndò hm të miabò enguṅ ai miṅyene mian. Kan enguṅ te esë enë abe. ¹⁷ Asu e mod ayëm e dzi enë mbëṅ ai e dzi enë abe, nala onë nsëm asu die.

¹ Mina bod bë akuma, mingaboe ya sëmë asu e bëbe bë mam bayenan ai mina. ² Akuma daan amana ya bubi; biyie bian bimana di bibibian, ³ mvòt dzaan ai silba waan bimana ya bò miëṅgele, ndò nsul waban wayi mina bòòlò, omana fë mina di a nyòl anë ndoan. Mimana ya koan akuma a mëlu ya mvus ma. ⁴ Yënë sik, maan ya miandzëki yaan ai bod bisye bëngasye mina mëfub mabam a yob ete, ndò fë bikiga bi e bod bëngafumi bidi bikui ya a mëlò më Nti Sabaot. ⁵ Minganyiṅ a akuma ete a si, midiṅi bivoe bi si, mingatòṅ minnëm mian asu amos bayi mina woe, ⁶ mingakpè sosoo mod a adzo, miwoe nyè, andzëki mina yëm mëkol a si. ⁷ Tòbògan hm fin akëlë kui a asò-lë Nti. Tama yen anë mbè mëfub ayanga bibuma ya si, a biabi nyè a nnëm, ai fin esë, akëlë kui anë abi biè abog oyon ngë ki na a mëtye më mbu. ⁸ Mina fë boan hm fin, mibò nkanga a minnëm, amu asò-lë Nti antoa ya babi. ⁹ A babëdzaṅ, të miakòṅan mina mina, asu yë na mizaa bi nkat. Ntsigi-ntol antëlë ya a mbè a si. ¹⁰ A babëdzaṅ, nòṅan mvulna a nyòl bëprofèt ya bëkòbògò a dzoe Nti ai azombo, ai fin. ¹¹ Owe, biataman e bod bënë azombo na bënë mvòm. Mingawog azombo Yobo, ndò fë mingayen mbol Nti angabëlan ai nyè a mëmana, na Nti anë ndam-nnëm atoa fë nnëm-ngòl. ¹² A babëdzaṅ, madaṅ yag na të miakani sòṅ, tò ai yob, tò ai si, tò ki zëzë nkanan sòṅ. Owe waan abò hë owe, kokoa waan abò hë kokoa, mizaa ku a nkat. ¹³ Ngë mod ziṅ ya abë mina abëlë mindzug, akogëlan. Ngë mod ziṅ anë mintag abui, ayiègè bia bi olugu. ¹⁴ Ngë mod ziṅ akòn abë mina, alomo loe bënyia-bodo-mvia ya nda-Zamba, bò bëkogëlan asu die, bëwòbò nyè mbòn a dzoe Nti. ¹⁵ Ngogëlan ṅyëbë yayi kode nkokòn, Zamba atele nyè tëtëlë. Ngë angabò minsëm miziṅ, mivaaban nyè. ¹⁶ Mëman minsëm mina mina, mikogëlan anë mod asu e nyò mbòg, asu yë na mibò mvoè. Ngogëlan sosoo mod enë ngul abui. ¹⁷ Elias angabë mod anë bia, ndò angakogëlan ai ngul na të mvëṅ yanòṅ, ndò mvëṅ engakanga tègè nòṅ mimbu milè ai ngòn esaman. ¹⁸ Ndò fë angadugan kogëlan, yob onganòṅ mvëṅ, ndò si engafaè bibuma. ¹⁹ A babëdzaṅ, ngë mod ya abë mina ahë dzèè zen bëbëla, mod mfë adugan sòṅ ai nyè a zen, ²⁰ e mod ahë kë sòṅ ai nsëme minsëm a mbë zen woe, ayëmë na akode nyè nnëm a awu, ai na abudi abui minsëm.