EBREA

EBREA

¹ Okoba, Zamba angakòbò ai bëtara a anyu bëprofèt otëtëg otëtëg kan esë; ² E mëlu ya mvus ma, angakòbò ai bia a anyu mòn woe ya angatele na anë mòn elig asu mam mesë, abë nyè ngò fë angakom si-ndon esë. ³ Ṅnyè anë mfyè ya duma die, atoa fë ndëm nsi woe, abëgë dzom esë ai ngungul ebug woe, avëṅan esob-minsëm, atòbò a mbo-nnomo ati a yob ete, ⁴ akyaè alod benglès a ngul, nala ngò fë angabi e dzoe ya lalod endaban. ⁵ Za ya a benglès Zamba angadzo ya ai nyè na: Wa, onë mòn wama, mamen mëhë bye wa ana? ai na: Mayi bò esya woe, wa obò fë mòn wama? ⁶ Ndò fë eyòṅ azu ai ntol mòn a si-ndon, adzo na: Benglès bë Zamba bëluugu nyè. ⁷ Ndò fë adzo ai benglès na: ṅnyè abò na benglès boe bëvëṅan evundu, e bod basye nyè bëntoa minkabag mi ndoan. ⁸ Adzo ai mòn na: A Zamba, etoa ati dzoe etëlë a bisëb bisëb, ntum sosoo woe onë ntum edzoe woe. ⁹ Ongadiṅ mëkyëbë, ofëmë nkòt; Asu te, a Zamba, Zamba angawòbò wa mbòn ai mbòn mintag, alodo anë awòbò bëmvoe boe. ¹⁰ Adzo fë na: Wa a Nti, a mëtari, wa ongatele tin mëndie ya si-ndon, ndò fë yob onë esye ya mò moe. ¹¹ Bò bayi dzaṅ, wa wayi kanga, bò bësë bayi wu, anë eyie yawu, ¹² abog te wayi bò bag anë mbaaga eyie, anë eyie, abog te hm bayi tsende. Wa onë hm wamen, mimbu mie miayi ki mana. ¹³ Zamba angadzo ya ai englès mbe na: Tòbògò ma a mbo-nnomo, akëlë kui anë matele wa minziziṅ mie etele-mëkol a mëkol a si? ¹⁴ Nga bò bësë bënë e minsisim bëngalom na mibò esye asu e bod bayi bi ngab a akode?

¹ Asu te biayean toan baala e mam bingawog, asu yë na biza kë a elëlëb. ² Amu ngë nkòbò ya benglès bëngakòbò onë ete, ai na e mod osë abò evus ete, adaṅa dzò, mod te abëlë e maan mayean, ³ eyë hm biayi tub ya ngë biayëgan akyaè mod akode di? Nti ṅnyè angatari dò yedan, ndò fë e bod bëngawog bëngabaala bia dò, ⁴ Zamba nyè fë angabòòlò dò ai mëndëm ai biyëṅ bi mam, ai abui mam më ngul, akaba bifaè bi Mfufub Nsisim a ṅyian woe! ⁵ Amu së ki benglès mbò angatele na bëdzoe enyiṅ yazu a biakòbò dzi. ⁶ Badzo hom ziṅ a ngëëṅ na: Za hm anë mod, asu yë na odugan nyè tsog, ngë ki na mòn mod, asu yë na ozu nyè yëbë? ⁷ Ongabò na benglès bëlod nyè man ntye, obòdò nyè ekadi duma ai olugu, ⁸ otele nyè dzom esë a mëkol a si. Eyòṅ angabë atelëge nyè na adzoe byem bisë nala, andzëki lig dzom ziṅ a nsëṅ. Dzam da, biayen ki etoa dzi na adzoe byem bisë. ⁹ E Yesus ya benglès bëngabë bëlodo hë asu man etun abog, ṅnyè biayen abëgë ekadi ai olugu asu mintye mi awu, asu yë na, ai maa Zamba, adëmëlë awu asu bod bësë. ¹⁰ Ṅnyè ya dzom esë enë asu die, ebòòban abë nyè, layean fò na, eyòṅ akë ai abui bòn die a duma, abò hm na, a zen mintye, asu-zoa ya akode daban abò a saaṅ. ¹¹ Amu e mod afubu ai e bod bafububan, bësë batye abë mod mbòg. Asu te awog ki osòn na aloe bò na babënyaṅ, ¹² nyè na: Mayi kad babëdzaṅ dzoe doe, mayi yia olugu woe a zaṅ ekoan, ¹³ nyè fë na: Mayi bëlë afidi abë nyè; Adzo fë na: Yënë, ma nyò, fufulu ai e bòn ya Zamba angavë ma. ¹⁴ Mbol hm bòn bëbëlë ngab a mëki ai a minson, nyè fë angabi ngab ai bò dzam dëda, asu yë na, ai awu, andaman e nyò abëlë ngul awu, nala watyan na andaman Satan, ¹⁵ asoe bò fili, e ba bësë ya bëngabë na a nguma ntye enyiṅ waban, a wòṅ ete, bëngabë na baku a etye olò te. ¹⁶ Amu miayëm na ayag ki ai benglès, ayag ai mvòṅ Abraham. ¹⁷ Mbol hm anë nala, ndò angabë ayean vëṅan anë babënyaṅ a mam mësë, asu yë na abò fada-nen ya abëlë nnëm-ngòl, atoa fë mod afidi a esye Zamba, abò mëtunëṅa asu minsëm mi mvòṅ bod. ¹⁸ Ndò hm, mbol emen angabi mëbobëla, abii mintye, ndò abëlë ngul ya avòli e bod bëbëlë mëbobëla.

¹ Mbol hm anë nala, a mimfufub mi babëdzaṅa mianòṅ ngab a nloe ya yob, toan bindi Yesus, apostel ai fada-nen emëm-ṅyëbë dzaan, ² anë mod afidi asu e mod angatele nyè anë Moses angabë a nguma nda osë. ³ Amu bëngayen na, ṅnyè ayean ai abui duma alodo Moses, akyaè ya e mod aloṅ nda abëlë olugu alodo nda eben. ⁴ Nda esë yaloṅëban hë a mò më mod ziṅ; E mod aloṅ mësë nyè anë Zamba. ⁵ Amu Moses angabë mod afidi a nguma nda anë mbò-esye, asu yë na abòòlò e mam bëyii kòbò a mvus, ⁶ Kristus nyè angabë hm mod afidi a nda dzie a etye mòn. Bia hm binë nda dzie, ngë bibëlë azombo ai enguṅ a fidi daan. ⁷ Asu te, akyaè ya Mfufub Nsisim akòbò: Eyòṅ hm miayi wog kiṅ dzie ana, ⁸ të miabò na minnëm mian mibò alèd, anë abog ya mingatsaa ma bitòm, a amos mëbobëla a nkod-nnam, ⁹ eyòṅ besoa bëngabobolo ma, bësòṅò ma, tò anë bëyënë mimboan miama, ¹⁰ mimbu mimbu mëwom mënyii. Asu te mëngawog olun ai ngongo bod te, ma na: Kòm esë, bënë hë adimi zen a minnëm, bandzëki yëm mëzen mama, ¹¹ akyaè ya mëngakani sòṅ a olun wama ete na: Bânganyian ki a awaè dama tò eyòṅ! ¹² A babëdzaṅ, boan okala na të mod ziṅ ya abë mina abi mbë-nnëm anë tègè ai ṅyëbe, abò na alum Zamba ya avëë mvus, ¹³ dzam da vòligan mina mina amos osë, ntye bëngënë bëdzoo na amos ya ana hi, asu yë na të mëdugan ya nsëm mabò na mod ziṅ amana yes.- ¹⁴ Amu binganòṅ ya ngab abë Kristus ngë biayëm a kpiim ai azombo ya mëtari akëlë kui a mëmana,- ¹⁵ eyòṅ badzo na: Eyòṅ miayi wog kiṅ dzie ana, të miabò na minnëm mian mibò alèd, anë eyòṅ ya mingatsaa ma bitòm. ¹⁶ Bëza hm bëngawog ndò bëngalaṅan mëlò? Nga e bod bësë bëngakui a Egipten, Moses alëdë bò zen? ¹⁷ Bëza bëngatsag nyè bitòm mimbu mimbu mëwom mënyi? Së e bod bëngasëm a, a mimbim miaban mingaku a nkod-nnam a? ¹⁸ Bëza angakani sòṅ na bayi ki nyian a awaè die, së bod mëlò a? ¹⁹ Bingayen hm na, bëngabë ki dzam nyian etòm tègè ai ṅyëbë.

¹ Ndò hm, ntye ya e ngaga dzie enë na bod bayi nyian a awaè die engënë ete, mboan okala na të mod ziṅ ya abë mina akë sòṅ mvumvua. ² Amu bia fë bingabi mbëmbë foe anë e bala bëte. Dzam da ebug mbanda yandzëki bò ai bò mfi, amu bëngabë ki mbaman enyiṅ ai e bod bëngavogolo ai ṅyëbë. ³ Amu e bia ya bingayëbë, bianyian a awaè te, akyaè ya angadzo na: Akyaè ya mëngakani sòṅ a olun wama ete na: Bânganyian ki a awaè dama tò eyòṅ, tò anë mbol esye dzie engamana atarigi a mëtari më yob ai si. ⁴ Amu angakad hom ziṅ asu amos zamgbala na: Ndò Zamba anganòṅ awaè ya esye dzie a amos zamgbala, ⁵ adzo fë etere na: Bânganyian ki a awaè dama tò eyòṅ! ⁶ Mbol hm anë na bod bëvòg banyian ete, ai na e bod bëngatari bi mbëmbë foe bandzëki nyian etòm tègè ai ṅyëbë, ⁷ ndò hm fë atele nguma amos, Amos ya ana, a angakòbò abë David eban ben a mvus hala, akyaè ya mëtari ya dzo na: Eyòṅ miayi wog kiṅ dzie ana, të miabò na minnëm mian mibò alèd. ⁸ Amu ngë Yosua avë bò awaè, ngë Zamba andzëki kòbò adzo amos mfë a mvus hala. ⁹ Ndò hm awaè sabbat angënë asu ayòṅ Zamba. ¹⁰ Amu e mod anyian a awaè die, anòṅ fë awaè a esye dzie anë Zamba anganòṅ awaè a esye dzie. ¹¹ Ndzëṅan hm ai ngul na binyian a awaè te, asu yë na të mod ziṅ adzaṅ anë e bod bali ya bëngabë tègè ai ṅyëbë. ¹² Amu ebug Zamba enë mfaṅ, ndò fë enë ngul, evolo fë alodo e nyamëla okëṅ osë enë minkòṅ mibè, etoa fë dzam sal nnëm ai nsisim a zaṅ, biwonga bi nyòl ai nsòm ya bives, eyëmë mintsogan ai miṅyian ya nnëm, ¹³ ndò fë ekokoma ziṅ esòlò ki a mis moe, dzom esë enë nsò, etoa a ngëëṅ a mis moe; ṅnyè hm biayi dzoan ai nyè. ¹⁴ Mbol hm bibëlë mod fada-nen ya angamana daṅ yob, Yesus, mòn Zamba, ṅyëman a kpiim ai emëm-ṅyëbë. ¹⁵ Amu biabëlë ki e fada-nen ya asëki dzam nòṅ ngab mintye a atëg daan, ṅnyie anë emen angayen mëbobëla anë bia, sësala hë a nsëm. ¹⁶ Nkaṅan hm ai azombo a etoa-ati maa, asu yë na bëyen bia ngòl, ai na biyen maa ya avòli bia abog biayaṅan ai nyè.

¹ E fada-nen osë batòb a zaṅ bod, atëlë na asye mam më Zamba a mëyian më bod, asu yë na avë bifaè ai mëtunëṅa asu minsëm. ² Anë dzam toan bëlan ai e ba bayëm ki ai e ba fë bënë a ndimi, mbol emen anyiṅ a atëg, ³ asu atëg die te ndò anë enòdi na avë mëtunëṅa asu minsëm mie, akyaè abò dò asu nguma ayòṅ. ⁴ Ndò hm mod ziṅan òṅ ki olugu ziṅ ete asu die nyè emen, dzam da Zamba ṅnyè aloe nyè anë angaloe fë Aaron. ⁵ Nala ngò hm fë Kristus andzëki vë emen olugu eyòṅ avëṅan fada-nen, dzam da e nyò angadzo ai nyè na: Wa onë mòn wama, mamen mëhë bye wa amos ya ana. ⁶ Ndò fë adzo hom mfë na: Wa, onë fada a kòm ya kòm, a nkoṅ Melkisedek, ⁷ nyè hm, a mëmos më enyiṅ dzie a si-ndon, angakogëlan ngogëlan bidzaè ai e nyò anë nyè dzam kode a awu, akogëlan ngogëlan evòli, ayono a yob, ai bibëga a mis, ndò fë bëngawog ngogëlan dzie asu fulu ṅyëbe dzie, ⁸ tò anë mbol angabë mòn, ndò angayègè mëwog ai e mintye angabi; ⁹ Ndò hm fë mbol angavëṅan a saaṅ, antoa etam-akode asu e bod bësë babò nyè mëwog, ¹⁰ mbol Zamba angatele nyè na anë fada-nen a nkoṅ Melkisedek. ¹¹ Bibëlë abui nkòbò a biasëki dzam fëlan ai bibug, mbol ben mëlò mëmana ya mina yes. ¹² Amu, afyaṅan bò na, mingayean ya bò bëyëgëlë etoa dzi, hë da mingënë miyaṅan na bëyëgëlë mina ban mam ya a mëkèè bibug bi Zamba, ndò fë miayaṅan ai mënyaṅ, së ki ai mimfaṅ bidi. ¹³ Amu e mod osë anyiṅ ai mënyaṅ, asëki akëṅa ebug mëkyëbë, amu angënë mòngò. ¹⁴ Mimfaṅ bidi minë asu bënyia-bodo, e ba ya fulu emana ya bò yëmëlë, bëngayëm fyal abe ai mbëṅ.

¹ Asu te, ntaman dzoge e mam ya mëtari a mabëbë Kristus, bikë a e mam mëwon ya, tègè fë ai na biadugan tele tin mfim asu ntsendan enyiṅ, a mimboan ya minë ṅwuan, ai asu ṅyëbë biayëbë Zamba, ² ai asu dòkten, asu mëwòbò, mbëdan mò, akui-lë sòṅ bëwu ai nkat mvua. ³ Biayi hm dò bò ngë Zamba ayëbë. ⁴ Amu lasëki dzam bòban na e bod ya mfyè ongafyè ya eyòṅ dzia, bëyëmë fë efaè ya yob, bëbii fë ngab abë Mfufub Nsisim, ⁵ a bëngayëm ya abë ebug Zamba ai ngul ya enyiṅ yazu, ⁶ ngë bod bëte bëhë sie ṅyëbë, na bëdugan bò na bod bëte bëkèè ai ntsendan enyiṅ, amu nala onë na badugan bomë mòn Zamba a klos asu daban, bëngakub nyè osòn a nlo. ⁷ Amu e si yanyu mëndim më mvëṅ ya makad ku ete, engabye e bibëbëga binë ai e bod babè biè mfi, si te ebëlë ngab a nsalan Zamba. ⁸ Ngë ebò hm na biyò ai sas binaṅ, yasëki ai mfi, ndò fë bayi dzò yòg; mëmana moe mënë hë ndoan. ⁹ A babëdzaṅ, mfag ya abë mina, biayëm mbëṅ mbëṅ e mam mënë mbëṅ asu akode, tò anë biakòbò akyaè di. ¹⁰ Amu Zamba asëki abim nkòt te na akë voan esye dzaan, ai ediṅ mingalëdë asu die, mbol mingasye mimfufub ndò fë mingënë misye bò. ¹¹ Amu biayi du na mod osë ya abë mina alëdë osësa ya abi afidi daan akui a mëmana, ¹² asu yë na të miabò ndzëm, dzam da, na mibie mvulna e bod banòṅ ngab-elig a ngaga asu ṅyëbë waban ai afu-nnëm. ¹³ Amu Zamba angakag Abraham, ndò hm mbol angabë bëlë ki e mod alodo nyè na akani sòṅ a bë nyè, ndò angakani sòṅ a bë nyè emen ¹⁴ nyè na: Bëbëla emen, mayi fò wa kub nsalan, mëbò fë na obye abui bod. ¹⁵ Nala ngò hm angabò fin, ndò angabëlë ngaga. ¹⁶ Amu bod bakani sòṅ a dzoe e mod alod bò, ndò eyòṅ esë badoan, nkanan sòṅ ngò wabòòlò mësë. ¹⁷ Ndò hm, mbol Zamba angabë ayii na alëdë bòn bë elig na ngaga yayi ki tsende, ndò hm angakani sòṅ ete, ¹⁸ asu yë na, asu mam mëbè ya matsende ki, a Zamba asëki dzam kad evus ete, na e bia ya bingabë sòbò abë nyè, bibi mfaṅ a wonòṅ ya ayëm a kpiim ai afidi ya adzogo bia osu di. ¹⁹ Bibëlë afidi te anë mfaṅ ekye mal; enë ngul asu nnëm, afidi ya lanyian a etun-nda Zamba ya a nnëm ete, a mvus tende, ²⁰ mfag ya Yesus angakë bia mbil osu, anyian, abò fada-nen a kòm ya kòm a nkoṅ Melkisedek.

¹ E Melkisedek nyò, nkukuma Salem, fada Zamba ya yob ete, angatoban ai Abraham, Abraham asòò woe minkukuma, ndò angafubu nyè; ² ndò Abraham angavë nyè efas awomo ya dzom esë; ndò hm, e di osu, biatimi na anë nkukuma mëkyebë, a mvus hala nkukuma Salem, nala watyan na nkukuma mvoè, ³ nyè ha tègè ai esya, tègè ai nyia, tègè ai nlaṅ ya mëbonde moe, abëlë ki e hom mëlu moe matari tò ki e hom enyiṅ dzie yaman, afulan ai mòn Zamba ndò alaṅan fada a kòm ya kòm. ⁴ Yëman hm abim mfaṅ mod anë, a Abraham esya ayòṅ angavë nyè e ngab awomo ya e byem angasa a bita. ⁵ Ndò hm bòn bë Levi, a bënë bëfada, bëbëlë mvende na nnam oyaan ai bò ntòlò anë mvende yadzo, nala watyan na babënyaṅ baban mbò bayaan, tò anë bò bësë bëngabyali a abum Abraham. ⁶ E nyò ya andzëki byali ai bò abum da, angabò na Abraham ayaan ai nyè ntòlò, ndò fë angafubu e mod angabë ai ngaga! ⁷ Kë biayëm mbëṅ mbëṅ na nyia-modo ṅnyè avaè mòngò mëtè a! ⁸ Ndò hm, e bod bë ndon, bayi wu, mbò banòṅ ntòlò; mfag mbòg, e nyò fë babòòlò na atala, nyè fë anòṅò. ⁹ Kë binë fë dzam dzo na e Levi ya anòṅò ntòlò angayaan nyè a nyòl Abraham, ¹⁰ amu hala te angënë a abum esya eyòṅ Melkisedek angatoban ai nyè. ¹¹ Ndò hm, ngë anë na etye fada bëleviten engakui a sug (amu nnam ongabi mvende, mbò bëtoa bëfada), mfi mbe ongabë hm fë na fada mfë atëbë a nkoṅ Melkisedek, bò tègè nyè tele a nkoṅ Aaron? ¹² Amu eyòṅ etye fada yatsende, kë mvende dzò yatsende fë obili a! ¹³ Amu e mod emen anë ai e mam ma atye ben a nda-bod fë, a mod ziṅ ya ete angabë ki asye a alatar. ¹⁴ Biayen mbëṅ mbëṅ na Nti waan angatye a nda-bod Yuda. Moses andzëki kòbò adzo bëfada tò eyòṅ dzia, abëbëgë nda-bod te. ¹⁵ Ndò fë biatoan yen nala eyòṅ fada mfë atëbë afulan ai Melkisedek; ¹⁶ Angabò fada, së ki a mvende abyali, dzam da a ngul enyiṅ ya yandaman ki. ¹⁷ Amu babòòlò nyè na: Onë fada a kòm ya kòm a nkoṅ Melkisedek. ¹⁸ Ndò hm anë na, mfag hi, nnomo mvende awoaban ya a mgbag mbol anë ntëgan, tègè ai mfi, - ¹⁹ amu mvende endzëki bò dzom ziṅ ntud, a saaṅ,- mfag mbòg, bëngazu ai bia eyëgan mbëmbë afidi ya asulu bia babi abë Zamba. ²⁰ Ndò andzëki bòban tègè ai nkanan sòṅ. E bali bëngabòban bëfada tègè ai nkanan sòṅ, ²¹ e nyò ki angabi nkanan sòṅ hi na: Nti angakani dò sòṅ, ndò aangasie ki dò: Wa, onë fada a kòm ya kòm. ²² Nala ngò hm Yesus anë eban amvoe ya lanyëb abui. ²³ Ndò hm fë e bëfada bali bëngabë abui ben, amu bëngabë ki dzam bò kole asu bò fë bawu. ²⁴ Ndò hm mbol akanga a kòm ya kòm, ndò abëlë etye fada dzie ai mò. ²⁵ Antoa hm na anë dzam kode e bod bakë abë Zamba bëlodo abë nyè nguma nguma, amu anyiṅ kòm esë na akogëlan asu daban. ²⁶ Amu e kan fada-nen nyi endzò fò bingabë kyëbëgë ai dzò: mod ngogëlan tègè ai mëdugan, tègè ai mvit a nyòl, tègè kalan dzom ai bësëm, amana lod yob asë. ²⁷ Nyè ayaṅan ki na, amos osë, anë bëfada bënen, atari tuni mëtunëṅa asu minsëm mie, a mvus te azu tuni asu minsëm mi nnam. Amu angabò dò hë eyòṅ dzidzia, eyòṅ angatuni emen. ²⁸ Amu mvende engatele bod ya bëbëlë bivus na bëbò bëfada; ebug nkanan sòṅ ya engasò a mvus mvende, yatele mòn ya anë ntud, a saaṅ a kòm ya kòm.

¹ Ntol ebug ya e mam bihë dzo onë na: Bibëlë e kan fada-nen nyi, a angatòbò a mbo-nnomo etoa-ati duma a yob, ² asye a nda-Zamba, asye fë bëbëla tende ya emen Nti angatele, së ki mod. ³ Amu fada-nen osë anë hala na atuni bifaè ai mëtunëṅa. Nala ontoa hm na fada-nen ṅnyè fë ayean bi e dzom atuni. ⁴ Ngë atoa a si-ndon, ngë asëki fada, amu e ba batuni akyaè mvende Moses yadzo bënë hala. ⁵ Basye evëgëlë ai nsisim nda-Zamba ya yob, akyaè ya Zamba angakad Moses eyòṅ angabë na aloṅ tende, nyè na: Otoan bò mësë anë e paran bëlëdë wa a nkol a yob. ⁶ Ndò hm bëvë ya nyè esye ya yadaṅ mbëṅ, mbol anë ntëbë-zaṅa mvoe anë mbëṅ abui, mbol yatye a ngaga yabulu nyëb. ⁷ Amu ngë amvoe osu abò a saaṅ, tègè fë ai afola asu e di bèè. ⁸ Amu ayen na bavus eyòṅ adzo na: Yënë, mëlu mazu, Nti ṅnyè akòbò nala, a mayi lad mkpamaṅ amvoe ai nda Israel, ai nda Yuda, ⁹ së ki anë amvoe mëngalad ai besya baan a amos mëngabi bò a wò, mëkuli bò a nnam Egipten, amu bandzëki laṅan a amvoe dama, ndò ma fë mëngavoan bò, Nti ṅnyè akòbò nala. ¹⁰ Amu amvoe di ndò mayi lad ai nda Israel a mvus mënda mëte, Nti ṅnyè akòbò nala. Mayi bò fudi mëmvende mama a nnëm, mëtil mò a minnëm miaban, abog te mayi bò Zamba waban, bò bëbò fë ayòṅ dama. ¹¹ Abog te layi ki bad bò na anë mod angayëgëlë mvoe, anë mod angayëgëlë manyaṅ, nyè na: Yëmë Nti. Amu bod bësë bayi ma yëm, atarigi a bòngò, akëlë kui a bënyia-bodo ya abë bò. ¹² Mayi bò yen ngòl asu bivus biaban, mayi ki dugan tsog minsëm miaban. ¹³ Eyòṅ adzo na mkpamaṅ, kë nala onë na e di osu abò ya nnomo! Ndò hm e dzi yayombo, evëṅan nnomo-dzom, entoa ya babi adzaṅ.

¹ Amvoe osu angabë hm abëlë mëmvende ya e kan bayean lugu, ai nda-olugu a si-ndon. ² Amu bëngakom nguma ebëm, e dzi ya nsëṅ, etëlë-alamba ai tëbëlë ai e hom bayen bëmbaṅëla, bingabë ete. Hom te ngò baloe na: Mfufub Homo. ³ A mvus e tende bèè, ebëm engabë hala, bëloege na Mfufubu Mimfufubu, ⁴ abëlë alatar otu mvòt mvòt, atoa ṅwòban ṅwòban mvòt; man nlonga mvòt angabë etere, abëlë manna ai ntum Aaron ya kye efaègi ete, ai mëbam më amvoe; ⁵ A yob hala, bëkerubim bë duma ya bëngabë bëluu a etoa-ngòl a yob. Biasëki dzam mana tag mam mete etoa dzi. ⁶ Eyòṅ hm bëmana ya komëzan e mam ma, bëfada bëngakë hm mban a ebëm ya nsëṅ, bëbòò esye dzaban; ⁷ A ebëm bèè, hë fada-nen etam ṅnyè anyian ete eyòṅ dzia a nguma mbu; anyian ki we së na anòṅ mëki ya atuni asu die nyè emen ai asu minsëm mi nnam. ⁸ Nala ngò Mfufub Nsisim alëdë na zen ya nda olugu yabë ki kui a ngëëṅ, ntye ya ebëm osu engënë etëlë, ⁹ (endzò enë mvulna abog bitoa di); Amu batuni bifaè ai mëtunëṅa ya masëki dzam toan kom nnëm e mod alugu a saaṅ, ¹⁰ babò hë mam bidi ai mënyu, ai mëwòbò kan kan, mbol bayean bëlan ai nyòl, mam mëte mësë mëngabë na matòbò nala hë azaag kui a abog ya batsende mò. ¹¹ Eyòṅ hm Kristus angasò a etye fada-nen ya abëṅ mam mëngasò ya, alodo hm ebëm yadaṅ anen etoa fë a saaṅ, a yasëki nkoman ai mò më bod, (nala onë na yasëki dzom ya e si-ndon nyi), ¹² ndò hm anganyian hë eyòṅ dzidzia a Mfufub Homo, abëlë hm e mëki moe emen, së ki e ma më kabad ngë bòn bë nyag, nala ngò angatele akode kole etëtele. ¹³ Amu, ngë mëki më kabad ai nyag ai asub ngal nyag a bamiam bod bë eboe a nyòl mafubu bò asu yë na nyòl ebò bò mfuban, ¹⁴ ngamëna hm ai mëki më Kristus; ṅnyè angatuni Zamba emen tègè ai atòn abë nsisim kole; mëki mëte mmò mayi bia mana fubu minnëm a mimboan minë ṅwuan asu yë na bisye e Zamba avëë. ¹⁵ Asu te anë ntëbë-zaṅa mkpamaṅ amvoe, asu yë na mbol awu angasò ya na lakode bò a minsëm ya bëngabò a amvoe osu, e bod ya bënë nloan bëbi ngaga ngab-elig kole. ¹⁶ Amu e hom ṅyian mvua onë, bayean toan yëm na e mod anë ai wa awu ya. ¹⁷ Amu ṅyian mvua onë mfaṅ hë eyòṅ bod bëwu ya, amu ntye ya e mod akad ṅyian mvua angënë atala, ṅyian te wasëki dzam bòban. ¹⁸ Nala onë na, tò amvoe osu andzëki bòban tègè ai mëki. ¹⁹ Amu eyòṅ Moses angamana kad nnam tëbëga osë ya mvende, ndò anganòṅ mëki më nyag ai e ma më kabad, ai mëndim, ai e sud yavie, ai abui ele isop, angamiam mò bod a nyòl ai a kalara, ²⁰ nyè na: Mëki më amvoe ma, amvoe ya Zamba abende mina. ²¹ Ndò angamiam mëki a ebëm ai a bisoa ai a byem bi olugu bisë dzam dëda. ²² Amu a etye mvende, dzam bò na dzom esë yavëṅan mfuban hë ai mëki, ndò fë ngë tègè ai na bësoe mëki, tègè ai bidzuga. ²³ Angabë hm fò ayean bò nala na bëfubu bivëgëlë bi byem ya yob ai mëtum mala, dzam da e byem ya yob biafuban ai mëtunëṅa mënyëbë alodo e mala. ²⁴ Amu Kristus andzëki nyian a mfufub etòbògò ya onë nkoman ai mò më bod, a wafulan ai e hi onë mfaṅ; anganyian a yob ben, asu yë na akui Zamba a mis etoa dzi asu daan. ²⁵ Lëngabë ki asu yë na atuni emen abui biyòṅ, akyaè ya fada-nen anyian a mfufub hom mbu osë ai mëki më mod mfë. ²⁶ Ngë nala, ngë angabë ayean dzugi mintye abui biyòṅ, atarigi a mëtari më yob ai si. Ndò hm etoa dzi, akui a ngëëṅ eyòṅ dzidzia a zuli metin na avaè minsëm ai mëtunëṅa moe. ²⁷ Ndò fë akyaè ya anë na bod bayean wu eyòṅ dzia, a mvus hala nkat obòban, ²⁸ nala ngò fë Kristus ya bëngatuni eyòṅ dzidzia ayi sò eyòṅ bèè, asu yë na avaè minsëm mi abui bod, së ki asu adzo minsëm; azu asu yë na akode e ba ya bayanga nyè mfaṅ.

¹ Mbol hm mvende ebëlë hë evëgëlë mimbëmbë mi mam ya miazu, ebëlë ki byem bite mfaṅ, yasëki dzam bò na e bod basubu babi bëbò mintud, a saaṅ, tò e mëtunëṅa ya batuni kòm esë anë mbu. ² Ngë tègè ai nala, nga ngë bëtele ya mò, ngë e bod batuni bayëm ki fë adzo nsëm, mbol bëfuban ya eyòṅ dzia? ³ Dzam da, a mëtunëṅa mëte, batsog minsëm mbu osë. ⁴ Mëki më nyag ai kabad masëki dzam vaè minsëm. ⁵ Asu te, eyòṅ anyian a si-ndon, nyè na: Wandzëki diṅ mëtunëṅa ai bifaè, dzam da, okomëzan ma nguma nyòl. ⁶ E mëtunëṅa ya badigi ai e ma ya asu minsëm mandzëki wa nyëb a nnëm; ⁷ Ndò hm mëngadzo na: Yënë, mësò ya, bëngatil adzo dama a kalara ekob, mazu bò ṅyian woe, a Zamba. ⁸ Eyòṅ adzo a yob hali na: Mëtunëṅa ai bifaè, ai na e mëtunëṅa badigi ai e ma ya asu minsëm, waandzëki mò diṅ, ndò fë mandzëki wa nyëb a nnëm, (batuni mò anë mvende yadzo), ⁹ ndò angadzo na: Yënë, mësò ya na mazu bò ṅyian woe. Angavaè ṅyian osu asu yë na e hi bèè otòbò. ¹⁰ Biamana fuban a ṅyian te asu mëtunëṅa më nyòl Yesus Kristus hë eyòṅ dzidzia. ¹¹ Fada osë atëlë, abò esye dzie amos osë, atuniṅi fë mëtunëṅa ma abui biyòṅ, dzam da masëki dzam vaè minsëm; ¹² nyè angatuni efaè dzidzia, atòbò a mbo-nnomo Zamba a kòm ya kòm, ¹³ a hala ngò ayanga na minziziṅ mie mitëbë nyè anë etelëga mëkol a mëkol a si. ¹⁴ Amu angabò na e bod bënë mfuban bëbò a saaṅ a kòm ya kòm ai efaè dzidzia. ¹⁵ Tò Mfufub Nsisim emen abòòlò bia dò. Amu a mvus yë na akad ya na: ¹⁶ Amvoe ya mayi lad ai bò di, a mvus mëlu mëte, Nti ṅnyè akòbò nala. Mëfudigi bò mëmvende mama a minnëm, mëmana mò til a nnëm waban ¹⁷ ndò abag na: Mayi ki dugan tsog minsëm miaban ngë bivus biaban. ¹⁸ E hom evaè minsëm enë, batuni ki fë bifaè asu minsëm. ¹⁹ A babëdzaṅ, mbol hm bibëlë azombo ya anyian a nda olugu a mëki më Yesus ²⁰ akyaè ya angakom bia zen ya enë mkpamaṅ, evëë fë, a zaṅ tende, nala watyan na a nyòl dzie, ²¹ ai ngul fada ya asye a nda-Zamba, ²² nkaṅan hm osu ai mfaṅ nnëm, ai mfaṅ ṅyëbë, bimana vaè mbë sosoo a minnëm, bimana fë sob nyòl a mimfuban mëndim. ²³ Ṅyëman a kpiim ai mfaṅ emëm-afidi, amu e mod angavë ngaga anë mod afidi, ²⁴ ṅyëgan ngul ya ediṅ a i mimbëmbë mi mam, anë mod asu e nyò mbòg, ²⁵ tègè dzoge fulu ya atoban fufulu, akyaè antoa ya fulu, dzam da, bivòligan, adaṅ adaṅ a eyòṅ miayen dzi na Amos ongasubu ya babi. ²⁶ Amu yë na, ngë biavaṅ sëm a mvus yë na biyëm ya bëbëla, mëtunëṅa asu minsëm masëki fë, ²⁷ hë na biayanga nkat ai mësis, ndò fë ngul ndoan yayi digi e bod ya ngam ya ayat. ²⁸ Ngë bëwusnèt bëbè ngë ki na bëlè bënë, e mod osë adaṅ mvende Moses awu tègè ai ngòl ziṅ. ²⁹ Za akyaè abe endëgëlë miatsog na e mod nyò ayean ai dò, a abisi ki mòn Zamba, akubu fë eboe a mëki më amvoe ya bëngafubu nyè ete, abèan fë Nsisim maa? ³⁰ Amu biayëm e mod angadzo na: Ma mënë ai bivudëga, mayi yaan ai mod osë. Ndò fë adzo na: Nti ayi bò ayòṅ die nkat. ³¹ Anë hm mësis na mod aku a mò më e Zamba ya avëë. ³² Tsogan hm mëlu ya okoba; a mvus yë na mibi ya mfyè, ndò mingazombo abui mintye, ³³ biyòṅ biziṅ bili bëtelege mina a bod ete ai mëtè ai mintye, biyòṅ bivòg, binòṅò ngab ai e bod bëwaa etibili te. ³⁴ Amu minganòṅ ngab a mintye mi ban mimbog, ndò minganòṅ të fë ṅsèan akuma daan ai mintag, mbol miyëmë na mibëlë akuma ladaṅ mbëṅ, lëkanga fë. ³⁵ Të miadzèè hm azombo daan, amu anë mimfaṅ mi maan. ³⁶ Miayaṅan ai fin asu yë na eyòṅ miabò ṅyian Zamba, mibi hm ngaga. ³⁷ Amu yë na abog aligi ya man etun, abog te, e mod ayi sò, ayi ki tigibi. ³⁸ Sosoo mod wama ayi nyiṅ ai ṅyëbë, ndò fë ngë ahë dugan ai mvus, nnëm wama wayi ki nyè wog mbëṅ. ³⁹ Bia biasëki hm e bod badugan ai mvus asu amala, binë hë bod bë ṅyëbë asu yë na bibëlë enyiṅ.

¹ Ṅyëbë onë eban e mam biafidi, ndëm e byem ya biayen ki. ² Amu etere ngò bod ya okoba bëngayen maa. ³ A ṅyëbë ngò biayëm na si-ndon engakomban ai ebug Zamba, ai na e byem biayen ai e byem biayen ki bingakomban. ⁴ A ṅyëbë ngò Abel angatuni Zamba mëtunëṅa ya malod e ma më Kain, etere ngò bëngayen na anë sosoo; Zamba angabòòlò nyè ai ṅnòṅan anganòṅ mëtunëṅa moe; angawu, dzam da angënë akobògò hë asu ṅyëbë woe. ⁵ A ṅyëbë ngò Enok anganòṅëban a yob asu yë na të ayen awu, ndò bandzëki nyè yen, amu Zamba anganòṅ nyè. Ndò hm, osusua yë na Zamba anòṅ nyè, bëngayen na anyëb Zamba a nnëm. ⁶ Ngë tègè ai ṅyëbë, abëlë ki ngul ya anyëb mod a nnëm; Amu e mod osë ayi na asubu Zamba babi ayean ṅyëbë na Zamba anë, ndò fë ayaan ai e bod badzëṅ nyè. ⁷ A ṅyëbë, mbol bëngabeme Noe asu e mam ya mëngabë na babë ki mò yen, ndò angawog, aloṅo arka asu akode nda dzie, etere ngò abò si-ndon nkat, ndò fë angabi ngab-elig a mëkyëbë ya ṅyëbë. ⁸ A ṅyëbë, ndò Abraham angatye, na bëloe ya nyè, akëlë e hom angabë na anòṅ ngab-elig, ndò angatye tègè yëm mfag akë. ⁹ A ṅyëbë ngò angazu tòbò a nnam ngaga anë eza nnam, atoa a bibëm ai Isaak ai Yakob, bò fë bòn bë elig ya e ngaga nyi. ¹⁰ Amu angabë ayanga e tisòn ebëlë tin mimfim; Zamba ṅnyè angabë ayean bò nloṅo ai nkomo tisòn te. ¹¹ A ṅyëbë fë ngò e Sara angabë nkokom angabi ngul ya anòṅ abum, tò anë hala alod ya okala, hë mbol angayëbë na e mod angakag nyè dò anë mod afidi. ¹² Nala ngò hm ongabò na, abë mod mbòg, antoa ya ben fë eyë, ndo bòn bëngabyali, taṅ hë anë atitie ya yob, tègè bò dzam laṅ, hë anë nsëlëg onë a ntsag maṅ. ¹³ A ṅyëbë ngò hm fë bò bësë bëngawu, tègè bi e dzom bëngakag bò, dzam da bëyënë te dzò bëtëlë oyab nali, bësugu dzò, bëmëmë fë na bënë bëyëṅ ai bëdzin a si-ndon. ¹⁴ Amu e bod bakòbò nala batoan lëdë na badzëṅ dzal daban. ¹⁵ Ndò hm ngë bëtsog e dzal bëngatye ete, ngë bëngabi abog ya adugan ete. ¹⁶ Ndò hm të badzëṅ dzal afë a lënë mbëṅ alodo nala, dzal te anë dzal ya yob. Asu te Zamba awog ki osòn na bëloe nyè na Zamba, amu angakomëzan bò tisòn. ¹⁷ A ṅyëbë, ndò Abraham angayi tuni Isaak eyòṅ bëngabobolo nyè, ndò angatuni mbaṅ mòn, nyè ya angabë ngaga, ¹⁸ ṅnyè bëngadzo ai nyè na: Abë Isaak ngò wayi bi bòn; ¹⁹ Angayen na Zamba anë dzam hëlë bod tò a bëkon, nala ngò angadugan bëlë mòn woe, nala obòò ndëm. ²⁰ A ṅyëbë ngò fë Isaak angafubu Yakob ban Esau asu e mam mazu. ²¹ Hala antëlë ya na awu, a ṅyëbë ngò Yakob angafubu bòn bë Yosef mbombòg mbombòg, ndò angalumbu a ntum woe a yob. ²² A ṅyëbë, hala angayi ya wu, ngò Yosef angakòbò adzo mbole bòn bë Israel, ndò fë angamana bende mam ya edzëb-mbim dzie. ²³ A ṅyëbë, eyòṅ angabyali, ngò bëbonde bë Moses bëngasòli nyè ngòn elè, amu bëngayen na mòn te angabë anyëbe, bò tègè mbara abende nkukuma. ²⁴ A ṅyëbë ngò Moses angaben na bëloe nyè na mòn ngòn Farao eyòṅ angaku mod, ²⁵ ndò ben angatòb na abi mintye fufulu ai ayòṅ Zamba alodo na abi mbëmbë enyiṅ ndon minsëm; ²⁶ Angayen na osòn Messias onë mod akuma alodo akuma ya Egipten, amu angabë ayënë maan ya ete. ²⁷ A ṅyëbë ngò angakodo a Egipten, tègè mbara ayòg nkukuma. Amu angabò fin hë anë ayen e nyò asëki ai ayene. ²⁸ A ṅyëbë ndò angadzëmë Paska ai mmiaman mëki, asu yë na të mod-endaman anamba mintol mi bòn ya zaṅ dzaban. ²⁹ A ṅyëbë ngò bëngadaṅ e maṅ mavie hë anë nkot si; eyòṅ hm bòn bë Egipten bò bëngayi dò bò, ndò bamana yimbi. ³⁰ A ṅyëbë ngò mimfim ya Yeriko mingaku a si, a mvus yë na bëloṅ ya miè edinga a nyòl mëlu zamgbal. ³¹ A ṅyëbë ngò Rahab, mininga ebamba, andzëki wu ai bod mëlò, amu angasoan ai mvoè ai e bod bëzaag fëb si. ³² Mëbad hm fë dzo ya? Abog layi ma dzëman ngë malèè minlaṅ mi Gideon ai Barak ai Samson ai Yefte ai David ai Samuel ai e mi bëprofet; ³³ mbò bëngahaman bidzoe ai ṅyëbë, bëlëdë mëkyëbë, bëbii ngaga, bëfëdë mënyu bimgbëm, ³⁴ bëdimi minsum mi ndoan, bëtubu minkòṅ mi fa, bënòṅò ngul a atëg daban, bëbòò ngul a bita, bëtuli minkan bita a fyè. ³⁵ Bininga bëngabi bëwu baban a bëkui a sòṅ. Bëngatibili bëvòg, bëtëbë na bësoe bò hë asu yë na bëbi akui-lë sòṅ ya ladaṅ nyëb. ³⁶ Bëfë bëngadzugi ai ekpëlë, ai ebom, tò ben mësuṅ ai mimbog. ³⁷ Bëngalum bò ngòg, bësigi bò ai zig, bëwoe bò ai nyamëla okëṅ ya bëwoe bë bod bëbëlë, bakë bawulu nala bëbëgë bikob bi kabad ai bikob bikëla; bënë bod bë osòn, ai mindzug a nyòl atuud, bëtibili bò, ³⁸ -e si-ndon engabë ki ekyëbëgë ai bò,- bakë bandëṅa nkod-nnam, ai a minkol, a mimbog ai a fëan mëkòg a si. ³⁹ Ndò hm, e bod bësë ba, tò anë ṅyëbë wabòòlò bò mbëṅ, bandzëki bi e dzom bëngakag bò, ⁴⁰ amu Zamba angatele dzom ziṅ ya yadaṅ mbëṅ asu daan, na ngë tègè ai bia, bò tègè kui a ntud, a saaṅ.

¹ Nala ontoa hm na, bia fë bibëlë mod nkunda bëwusnèt a bënë bia a nyòl edinga; ntaman hm dzoge mbëgë osë, ai nsëm walad a nyòl ai fin, bikë mbil e ndum enë bia osu nyi, ² bibëbë abë Yesus, ṅnyè angatye ṅyëbë hi, abò fë wa a saaṅ, ṅnyè angadzibi mintye ya klos asu e mintag mingabë nyè osu, abyandi osòn, ndò angatòbò a mbo-nnomo etoa-ati Zamba. ³ Yënan e mod angadzibi akyaè ziṅ bësëm nyi a nyòl dzie, asu yë na të miaku sòm ngë ki na nnëm otëg mina. ⁴ E ndum mialuman ai nsëm, miabë ki kanga akui e hom miasoe mëki. ⁵ Ndò mivoan ya e mëlëbëga maloe mina na bòn: A mòn wama, të wabyandi ayëgëlë Nti; të waku sòm eyòṅ akòṅan ai wa. ⁶ Amu Nti andëgëlë e mod adiṅ, ayid e mòn osë ayëbë na anë engoe. ⁷ Tòbògan a ayëgëlë die, amu Zamba abëlan ai mina anë abëlan ai bòn. Mòn mbe esya anë të yëgëlë? ⁸ Ngë mibëlë hm ki ayëgëlë ya mina bësë minganòṅ ngab ete, minë hm bòn bë ngòbinda, miasëki bòn. ⁹ Ndò fë bingabi ya besya osusua, bëyëgëlë bia, ndò fë bikama bò. Nga biayean hm bulu dzòdiban abë esya minsisim mian asu yë na binyiṅ? ¹⁰ Amu bò bëngayen na asu man etun abog, anë mbëṅ na bëyëgëlë bia; mfag woe, nyè angayen na nala ongabë ai mfi asu daan asu yë na binòṅ ngab a enyiṅ mfuban dzie. ¹¹ Ayëgëlë asë layene ki na anë adzo mintag etye etye, hë adzo olun; a mvus hala, angavë bibuma bi mvoè ya mëkyëbë asu e bod bëngabi ayëgëlë te. ¹² Asu te hm, bedëgan e mò maan mëmana ya mina tëg mala ai e mëbòṅ madzëm mina mala a yob, ¹³ milimi fë mindzòṅ asu mëkol maan, asu yë na të edzo enë eyëm yakòli, dzam da esyeban. ¹⁴ Dzëṅan na mitòbò mvoè ai bod bësë, midzëṅ fë enyiṅ mimfufub; ngë tègè ai dzò, mod ziṅ ayi ki yen Nti. ¹⁵ Boan okala na të mod ziṅ asub maa Zamba, na të nkaṅ onë ayol waanaṅ, ongazu ai bitòm; abui bod bëngabi ya eboe abë nyè. ¹⁶ Të mod ziṅ abò bisog, ngë abò të mbara Zamba anë Esau ya angakuan ai ntol woe hë asu esoa bidi. ¹⁷ Miayëm na a mvus hala, angayi na abi ngab-elig a nsalan, ndò bëngaben nyè dzò vë, amu andzëki yen mbol atsende enyiṅ, afyaṅan bò na, angadzëṅ dzò ai bibëga a mis. ¹⁸ Amu miandzëki sòṅ a bë e dzom bënë dzam namba anë nkabag ndoan ngë bidi, ngë ki na man dibi, ngë mod evundu, ¹⁹ hë anë kiṅ tòṅ ngë ki nkòbò, a e bod bëngawog bëngadzaè na të badugan bag ebug ziṅ ete, ²⁰ amu bëngabë ki dzam zombo abende di na: Tò tsit afan endzò enamba nkol, bëlumu dzò ngòg. ²¹ Amu dzam te angabë Moses abim mësis te, ndò angadzo na: Makòn wòṅ sug, ndò fë manyaman. ²² Mingasò a nkol Sion, a tisòn Zamba evëë, Yerusalem ya yob, ai a minkunda benglès bënë a ekoan, ²³ a ekoan mintol mi bòn a bënë ntilan a kalara a yob, abë Zamba ya atsig bësë ntol, ai a minsisim bësosoo bë bod bënë a saaṅ, ²⁴ ai abë Yesus ntëbë-zaṅ mkpamaṅ amvoe, ai a mëki bamiam; mëki mëte makòbò mbëṅ alodo e ma më Abel. ²⁵ Boan okala na të miatëb e mod akòbò nyò. Amu ngë bëngabë ki dzam tub eyòṅ bëngatëb e mod akuligi bò ngam a si, ngamëna ai bia ya bialum e nyò akuli bia ngam a yob mvus! ²⁶ Kiṅ dzie endzò ebòò okoba na si etigëdan, ndò hm akag bia na: Mayi dugan bò na si etigëdan eyòṅ efë, së hm ki hë si etam, tò fë yob wayi tigëdan. ²⁷ Ebug dzi yalëdë eyòṅ efë na e dzom engatigëdan ekodo ya, enë anë e dzom engakomban, asu yë na e dzi yatigëdan ki eligi. ²⁸ Asu te mvaan ngaṅ mbol bingabi edzoe yatigëdan ki, endzò biasye Zamba ete mbëṅ, ai olugu, ai wòṅ. ²⁹ Amu Zamba waan anë ayoṅ ndoan.

¹ Ediṅ anyaṅ ekanga abë mina. ² Të miavoan abëlan ai bëyëṅ ai afaṅ, amu bod bëziṅ bëngabëlan ya ai benglès nala tègè yëm. ³ Tsogan mimbog hë anë minë ai bò a mimbog; mitsogo e ba ya bod batibili, mbol mina bëben minë a nyòl. ⁴ Alug abòò adzo olugu a bod bësë, enòṅ alug etòbò tègè ai atòn, amu Zamba abò bod bë ebamba ai e bod bandaman mëlug nkat. ⁵ Të enyiṅ dzaan yabò e dzi ndiṅan mòni, tòbògan mintag ai abim mibëlë. Amu emen angadzo na: Mayi ki wa dzëman a enyiṅ, tò ki na mëvoan wa, ⁶ asu te binë hm fò dzam dzo na: Nti anë mvòli wama, mangâmbara ki tò eyòṅ. Dze ben mod anë ma dzam bò? ⁷ Tsogan bëtëbë bë osu baan; mbò bëngakad mina ebug Zamba. Yënan anë enyiṅ dzaban engakë mana, minòṅ mvulna a ṅyëbë waban. ⁸ Yesus Kristus anë hë dzam dëda tò ongoge, tò a na, tò a kòm ya kòm. ⁹ Të miakë a ndimi ai byem bi dòkten ya biasò mfag mfë; anë mbëṅ na nnëm obi ngul ai maa, së ki ai bidi. Bidi bite biandzëki bò ai e bod bëbiege biè ai mfi. ¹⁰ Bibëlë alatar ya e bod basye a ebëm babëlë ki ngul ya adi ete. ¹¹ Amu e tsit ya fada-nen azu ai mëki maban asu minsëm a mfufub etòbògò, badigi tsit te a elunga a nsëṅ. ¹² Asu te hm ndò Yesus angadzugi mintye mie a mbè a nsëṅ asu yë na afubu ayòṅ ai mëki moe. ¹³ Nkaṅan hm abë nyè a elunga a nsëṅ, bibëgë osòn a nlo asu die. ¹⁴ Amu biabëlë ki e tisòn yalaṅan ha, biadzëṅ dzëṅ a e nyi yazu. ¹⁵ Ntunëṅan Zamba mëtunëṅa më olugu kòm esë asu die, mëtunëṅa mëte mënë bibuma ya biyaè bi anyu ya biamëm dzoe die. ¹⁶ Të miavoan na mibò mbëṅ, mikab fë e byem mibëlë, amu kan mëtunëṅa te endzò yanyëb Zamba a nnëm. ¹⁷ Boan bëtëbë bë osu baan mëwog, midzòdiban fë abe bò; amu bakala minnëm mian anë e bod bayi tëbë ai dò a nkat, asu yë na bëbò dò ai mintag, tègè wog abe. Amu nala wasëki ai mina mfi ziṅ. ¹⁸ Kogëlan asu daan, amu biayëm na sosoo waan anë a saaṅ, mbol biayi na bianyiṅ mbëṅ a mam mësë. ¹⁹ Madaṅ kogëlan na mibò dò asu yë na mëvol mina dugan sòṅ kòb. ²⁰ Zamba mvoè ya azu ai Nti waan Yesus Kristus, mod nnòni mintomba, a bëkon a mëki më amvoe kole, ²¹ avaag mina e dzom esë enë mbëṅ asu yë na mibò ṅyian woe, asye abë bia e dzi yanyëb a mis moe abë Yesus Kristus; ṅnyè duma abòò ai nyè a bisëb bisëb. Amen. ²² A babëdzaṅ, makogëlan ai mina, dzibigan ebug mëlëbëga dzi, amu mëtil mina hë etun. ²³ Yëman na bësoe ya manyaṅ waan Timoteus a mbog. Ngë avol sò, mayi sò ai nyè we, mëzu mina yen. ²⁴ Sugan bëtëbë bë osu baan bësë ai mimfufub misë. Bod ya Italien basug mina. ²⁵ Maa abòò ai mina bësë.