EFESI

EFESI

¹ Ma Paulus, man apostel Kristus Yesus a ṅyian Zamba, matil mimfufub ya minë a Efesi, a bayëbë Kristus Yesus: ² Maa ai mvoè bibòòg ai mina, bisòò abë Zamba esya waan ai Nti Yesus Kristus. ³ Olugu ai Zamba, esya Nti waan Yesus Kristus, ya angafubu bia ai nsalan Nsisim osë a yob abë Kristus, ⁴ akyaè angatòb bia abë nyè osusua akomo-lë yob ai si, na bibò mimfufub, tègè ai atòn a mis moe a ediṅ, ⁵ atari bia tòb na bitëbë a etye bòn abë nyè, etòm Yesus Kristus, mbol angadiṅa ṅyian woe, ⁶ asu olugu duma maa woe ya angafaè bia abë ndindiṅ woe. ⁷ Abë nyè ngò bibëlë akode asu mëki moe, evaè minsëm, anë akuma maa die layi, ⁸ maa te angabulu abë bia, a fëg esë ai mbindan osë, ⁹ abò na biyëm ndimba ṅyian woe, akyaè emen angadiṅ, mbol angatele abë nyè, ¹⁰ na eyòṅ zul mëtiṅ engaboman, abò na Kristus abò nlo byem bisë, tò ebi ya yob, tò ebi ya si, abë nyè. ¹¹ Abë nyè ngò bingavëṅan ngab-elig dzie okoba, akyaè e nyò ya abò mam mësë akyaè ṅyian woe wadiṅ, angatele, ¹² na bibò e ba bë osu ya bafidi Kristus asu olugu duma die. ¹³ Abë nyè ngò fë mina mingawog ebug bëbëla, mbëmbë foe akode waan, abë nyè ngò bëngalig mina ndëm a nyòl mbol mingayëbë asu Mfufub Nsisim ya angakagban, ¹⁴ ṅnyè anë eban ngab-elig dzaan, asu akode ya anë fë na bibëlë ai mò, asu olugu duma die. ¹⁵ Asu te, mbol mëngawog foe ṅyëbë waan ya abë Nti Yesus ai ediṅ ya miadiṅ mimfufub misë, ¹⁶ ndò mënë të kat mvëṅan ngaṅ a su daan, mëtsogo mina a ngogëlan, ¹⁷ asu yë na Zamba Nti waan Yesus Kristus, esya duma, avë mina Nsisim fëg ai Nsisim wakuli ayëmë die, ¹⁸ afyè mis ya nnëm waan, na miyëm afidi ya nloe waan, akuma duma ngab-elig dzie a mimfufub, ¹⁹ ai abim mod anen ngul dzie, asu bia ya biayëbë, akyaè mod ngul woe asye. ²⁰ Ngul te endzò asye ai dzò abë Kristus, ai nkulan angakuli nyè a bëkon, atoa nyè a mbo-nnomo woe a yob, ²¹ alodo edzoe esë, ai ngul esë, ai ntomba osë, ai e dzoe asë ya bënë dzam loe, së ki hm hë enyiṅ dzi, tò fë enyiṅ yazu. ²² Ndò angatele nyè dzom esë a mëkol a si, atele fë nyè na anë nlo nda-Zamba, ²³ endzò enë nyòl dzie, ntud e mod abò mam mësë ntud kan esë.

¹ Ndò fë avëlë mina ya mingabë ṅwuan a bivus ai minsëm mian, ² a mingabë nyiṅi etere okoba, akyaè ya enyiṅ ya e si nyi, akyaè ndzoe ngul ya evundu, nsisim ya ongënë bò esye dzie a bod mëlò etoa dzi. ³ A zaṅ dzaban, bia bësë fë binganyiṅ okoba ai miṅyian mi nyòl mian, bibò ṅyian nyòl ai nsisim, bia fë bingabë hë bòn bë olun anë e ba bëvòg a enyiṅ dzaan. ⁴ Ndò hm Zamba ya abëlë akuma nnëm ngòl, ai abui ediṅ die angadiṅ bia, ⁵ ai mbol fë bingabë ṅwuan a bivus, ndò angadugan bia vë enyiṅ ai Kristus, -minë nkodan a akab a yob- ⁶ ndò angavëlë bia, atoa fë bia a yob fufulu ai Kristus Yesus, ⁷ asu yë na, e bisëb biazu, mod etòg akuma bifaè woe ayene a afu-nnëm alëdë bia abë Kristus Yesus. ⁸ Amu minë nkodan a akab a yob ai a ṅyëbë. Dzam te latye ki abë mina, anë efaè Zamba. ⁹ Lasò ki a mimboan, mod azaa bò enguṅ hala. ¹⁰ Amu binë ekokoma dzie, bingakomban abë Kristus Yesus asu mimbëmbë mimboan ya Zamba angatari komëzan asu yë na biwulu ete. ¹¹ Asu te, mitsog hm na okoba mingabë bëhaiden a nyòl, e mina ya e Yuden ya bakëban ai mò a nyòl baloe na bëhaiden, ¹² mitsogo na abog te mingabë miwoge ki ai Kristus, mitoa bëdzin a ayòṅ Israel, bëyëṅ a mëtiṅ më ngaga, tègè ai afidi, mitoa tègè ai Zamba a si-ndon. ¹³ Etoa dzi, abë Kristus, e mina ya mingabë oyab ai Kristus okoba, mintoa ya babi a mëki më Kristus. ¹⁴ Amu ṅnyè anë mvoè dzaan, ṅnyè abò na bia bësë bëbè bibò dzom dzia, atie ongola angabë asala bia a zaṅ, amana ziṅ a nyòl dzie, ¹⁵ asole mvende mëbende asu yë na akom bësë bëbè abë nyè na bëbò mkpamaṅ mod a wabò mvoè, ¹⁶ alada fë bësë bëbè a nyòl dzia ai Zamba a klos, mbol angawoe ziṅ abë nyè. ¹⁷ Ndò eyòṅ angasò, angayedan mvoè asu e mina ya mingabë oyab, ayedan fë mvoè asu e ba bëngabë babi. ¹⁸ Abë nyè ngò bia bësë bëbè bianyian ai nsisim mbòg abë esya. ¹⁹ Ndò hm miasëki fë bëyëṅ ngë bëdzin, minë bòn bë nnam fufulu ai mimfufub, mitoa fë bod bë nda-bod Zamba, ²⁰ amu e nda minë, engaloṅëban a apostel ai bëprofèt a yob, Yesus Kristus ṅnyè anë nnom andie ya mëloṅ mëte, ²¹ abë nyè ngò mimfaṅ mëloṅ mësë mianaṅ, mëbò mfufub tempel abë Nti, ²² abë nyè ngò fë mina mingaloṅëban ai bia na mibò etòbògò Zamba a nsisim.

¹ Asu te, ma Paulus, man mimbog Kristus Yesus asu mina bëhaiden, ² miayean ya wog akyaè mabëlan ai e maa Zamba bëngavë ma asu daan, ³ na bëngakuli ma a nlo na mëyëm ndimba, akyaè ya mëndëmë mina kad, ⁴ ai maa te, eyòṅ mialaṅ, minë dzam wog ntsogan wama a ndimba Kristus; ⁵ Ndimba ya bandzëki bò na e ngongo bod fòg, bòn bë bod, bëyëm dzò, akyaè engakulëban mimfufub mi apostel mie ai bëprofèt a Nsisim, ⁶ na bëhaiden bëbi ngab-elig fufulu, bëbò nyòl dzia, bëkaban ngaga abë Kristus Yesus asu mbëmbë foe; ⁷ Mbëmbë foe te ṅnyè mëngasye, akyaè ya efaè maa Zamba bëngavë ma yasye a ngul dzie. ⁸ E ma ya madaṅ obòbòd a zaṅ mimfufub misë, ma bëngavë e maa nyò, na mëyedan bëhaiden mbëmbë foe akuma Kristus ya anë tègè ai alèè, ⁹ na mëfyè bod bësë e kan babëlan ai e ndimba ya engabë esolò atarigi a bisëb bisëb abë Zamba ya angakom bisë, ¹⁰ asu yë na abò na, bidzoe ai mingungul biyëm fëg Zamba ya enë kan kan, a yob ai a nda-Zamba. ¹¹ Akyaè ya angawoe ya oyili woe kole abë Kristus Yesus Nti waan, ¹² abë nyè ngò bibëlë azombo, bimbëlë fë afidi asu ṅyëbë biayëbë nyè. ¹³ Asu te makogëlan na të maku sòm a mindzug ya mëbëlë asu daan, mbol minë etam duma dzan. ¹⁴ Asu te makud mëbòṅ a mis më tara, ¹⁵ abë nyè ngò nda-bod esë yabi dzoe tò a yob, tò a si, ¹⁶ asu yë na avë mina akuma die ai ngul ya abò nkanga ai nsisim woe asu enyiṅ ya nnëm ete, ¹⁷ na, asu ṅyëbë, Kristus atòbò a minnëm mian, milada minkaṅ, miyëmë fë a ediṅ, ¹⁸ asu yë na mibi ngul ya awog ai mimfufub misë e dzom enë ndam ai ayab, ai ntye a yob, ai edòg, ¹⁹ na miyëm mod ediṅ ṅyëman Kristus, asu yë na midzie akyaè ntud Zamba onë. ²⁰ Abë e nyò abëlë ngul ya abò abui ai e ngul yasye abë bia alodo anë biasili ngë atsog, ²¹ duma ai nyè a nda-Zamba, ai abë Kristus Yesus a ngongo bod esë a bisëb bisëb. Amen.

¹ Makogëlan hm ai mina, ma, man mimbog, abë Nti, na minyiṅ ai dzin nloe bëngaloe mina, ² ai edzòdi-nyòl esë, ai afu-nnëm asë, ai fin; midzibigi mina mina ai ediṅ, ³ mibò osësa akala etye dzom dzidzia ya nsisim ai ati mvoè. ⁴ Nyòl dzia, Nsisim mbòg, akyaè ya mingaloeban a mbaṅ afidi ya nloe waan. ⁵ Nti mbòg, ṅyëbë mbòg, ṅduan mbòg, ⁶ Zamba mbòg ai esya bësë, ṅnyè anë bësë a yob, a zaṅ bësë, abë bësë. ⁷ Mod osë ya abë bia angavëëban maa anë efaè Kristus enë mvëgan. ⁸ Asu te adzo na: Angabed a yob, akëlë a minkom, avëë bod bifaè. ⁹ Mbedan watyan ya, së na angasus a bifas ya si etere a? ¹⁰ E mod angasus ṅnyè fë angabed a yob ete, asu yë na adzala mësë. ¹¹ Ndò fë angatele apostel, bëprofèt, bëkad bë mbëmbë foe, bëvòg bënòni, ai bëyëgëlë, ¹² asu yë na akomëzan mimfufub asu nsol esye, asu nloṅan nyòl Kristus, ¹³ akëlë kui anë bia bësë biakui a ṅyëbë mbòg ai ṅyëman mòn Zamba mbòg, a okala nyia-modo, akëlë kui a etye biabi Kristus ntud, ¹⁴ asu yë na të biadugan bò bòngò, bisë osu, binë a mvus anë evundu bëdòkten a mëdugan më bod, ai mëkëṅ asu mfi mëdugan, ¹⁵ bikòbògò bëbëla a ediṅ, binaṅa bë nyè kan esë, ṅnyè anë nlo, Kristus. ¹⁶ Nguma nyòl osë olada, otoa ndzònan fufulu abë nyè, onë nladan ai ngul nkòl esye, eyòṅ esë yasye mbëṅ, nala wabò na nyòl enaṅ, engaloṅëban fë a ediṅ. ¹⁷ Makad mina dò ndò fë makogëlan ai mina abë Nti: të miadugan nyiṅ anë bëhaiden banyiṅ a mvol nnëm waban, ¹⁸ mbol mintsogan miaban minë a dibi, bënë bëdzin a enyiṅ Zamba etòm asug anë bò a nyòl, etòm alèd ya minnëm miaban, ¹⁹ mbol bëngakanga a nnëm alèd waban, bëtëbë hm na babò ebamba, bëbòòg kan mam enë mvit esë a nnëmëna. ²⁰ Mfag waan, së ki nala ngò mingayègè Kristus, ²¹ së ki nala ngò mingawog nyè, bëyëgëlë fë mina abë nyè mbol anë bëbëla abë Yesus, ²² na mivaè nnomo modo ya enyiṅ dzaan ya okoba, nnomo modo ya anë ṅwuan a mintsogan mi nsëm, ²³ na mibò mimkpamaṅ a nnëm waan ete, ²⁴ mibòd hm mkpamaṅ mod akyaè Zamba adiṅ, a ongakomban mëkyëbë ai mfaṅ bëbëla. ²⁵ Asu te, dzogan minnal; Mod osë akòbògò bëbëla ai manyaṅ, amu binë bidzo, anë mod e dzi e nyò mbòg. ²⁶ Wogan olun, hë da, të miasëm. Të nlo-dzobo ayimbi, miwogo olun, ²⁷ ndò fë të mianèd Satan zen. ²⁸ Të ṅwuwub wabad dzib, anòṅò nòṅò ndzug ya asye ai mò moe, abò mbëṅ, asu yë na eyòṅ ambëlë ya ai mò, avë e mod anë a mëyaṅan. ²⁹ Të mbë nkòbò akui mina a anyu, hë ebug yavòli e hom onë ai mfi, asu yë na evë e bod bawog dzò maa. ³⁰ Ndò fë të miabò na Mfufub Nsisim Zamba owog olun, abë nyè ngò bëngalig mina ndëm a nyòl asu amos akode. ³¹ Nkòbò nyag osë, ai ayòg, ai olun, ai mvam, ai bikag bikodogo a zaṅ dzan. ³² Boan dzam mbëṅ a zaṅ mina mina, ai nnëm ngòl, midzuan mina mina anë Zamba angadzu mina abë Kristus.

¹ Vuan Zamba anë mindindiṅ mi bòn, ² nyian a ediṅ anë Kristus angadiṅ mina, ndò fë angakab emen anë mëtunëṅa ya manyum mbëṅ abë Zamba. ³ Të batud adzo bisog ngë mam më mvit ngë nnëmëna ziṅ abë mina, akyaè layean bò a zaṅ mimfufub. ⁴ Dzam dëda ai etye mvit ya nsisim, ai mëfodan, ai nkòbò mvit, e byem biayean ki bò; Dzam da, bulugan vë ngaṅ. ⁵ Amu miayean yëm na mod bisog osë, ngë e nyò mvit, ngë e nyò abò mam nnëmëna, nala onë na e nyò alugu bëzamba, abëlë ki ngab-elig a edzoe Kristus ai e dzi Zamba. ⁶ Të mod adug mina ai nkòbò mvol. Asu ai akyaè mam te ngò olun Zamba wazu bòn mëlò a nyòl. ⁷ Të miakalan ai bò dzom ziṅ. ⁸ Amu mingabë dibi osusua, etoa dzi, minë mfyè abë Nti. Nyiṅan anë bòn bë mfyè, ⁹ amu bibuma bi mfyè binë a abëṅ-nnëm asë, ai mëkyëbë, ai bëbëla. ¹⁰ Yenan e dzom yanyëb Nti a nnëm, ¹¹ të mianòṅ ngab a zëzë mam më dibi, kulan ben mò a ngëëṅ. ¹² Amu anë ben osòn akòbò e mam e bod bala babò a mësoe, ¹³ amu e byem bisë mfyè wakuli a ngëëṅ, biayene; ¹⁴ amu e dzi esë yayene enë mfyè. Asu te adzo na: Tëbëgë, a e mod wakë oyò, tëbëgë a bëkon, abog te Kristus ayi wa fyè. ¹⁵ Toan yen akyaè mianyiṅ; të mianyiṅ anë mëkud, nyiṅan anë mimfëfëg, ¹⁶ toan bëlan ai abog, amu mëmos mënë abe. ¹⁷ Asu te, të miabò mëkud, wogan hë ṅyian Nti. ¹⁸ Të miasòg mëyòg, eyë tègè bindi asò ete; dzam da boan ntud ai Nsisim, ¹⁹ miyiagan mina mina bia bi oyëṅ, ai bia bi olugu, ai e bia biasò a Nsisim, mibomo mvèt, miyiaga Nti bia, a minnëm mian, ²⁰ mivaa Zamba ya anë esya ngaṅ kòm esë asu bod bësë a dzoe Nti waan Yesus Kristus. ²¹ Boan mina mina mëwog ai wòṅ Kristus: ²² Bininga bëbòòg bëyom mëwog anë babò Nti mëwog, ²³ amu fam enë nlo mininga anë Kristus anë nlo nda-Zamba, ṅnyè anë nkode nyòl. ²⁴ Ndò hm, akyaè ya nda-Zamba enë a edzoe Kristus, nala ngò fë bininga bëbòòg ai bëyom a dzam asë. ²⁵ Mina fam, diṅan bëyal ban anë Kristus angadiṅ nda-Zamba, akaba fë emen asu nda-Zamba te, ²⁶ asu yë na afubu dzò, amana dzò bò mfuban a ṅwòban mëndim a nkòbò, ²⁷ asu yë na atele emen nda-Zamba te osu efyèg, tègè ai atòn ngë mbòd, ngë dzom ziṅ ki nala, asu yë na etòbò mfufub, hë a saaṅ. ²⁸ Nala ngò fë bëfam bayean diṅ bëyal baban anë nyòl dzaban. E mod adiṅ mininga woe adiṅ emen. ²⁹ Amu mod ziṅ abë ya ki fëm nyòl dzie, dzam da atòṅ dzò, anòṅ ai dzò okala, anë Kristus anë ai nda-Zamba. ³⁰ Amu binë bidzo ya nyòl dzie. ³¹ Asu te fam yayi lig esya ai nyia, alada ai ngal, abog te bò bëbè bayi bò nyòl dzia. ³² E ndimba nyi enë anen abui. Ma makòbò adzo Kristus ai adzo nda-Zamba. ³³ Ndò hm mod osë ya abë mina adiṅi ngal anë adiṅ emen, ngal nyè fë ambarëga nnom.

¹ A bòngò, boan bëbonde ban mëwog abë Nti. Nala ngò onë sosoo. ² Olugu esoa ban nyoa, e mvende ya ebëlë fë ngaga nyili, ³ asu yë na obò mvoè, onyiṅ fë kòm a si. ⁴ Mina, besya, të miatibili bòn ban, dzam da mikomodo bò, miyëgëlë bò ai ayëgëlë Nti. ⁵ Mina bëlò, boan bëdzoe ban ya si mu mëwog, ai wòṅ, ai mësis, ai nnëm mòngò, anë miabò ai Kristus mëwog; ⁶ të miabò nala hë eyòṅ bayen mina, hë anë e bod badzëṅ miṅyene, boan anë bësye bë Kristus, a babò ṅyian Zamba ai nnëm osë, ⁷ misye bò ai mbëmbe ṅyian anë miasye Nti, së ki bod, ⁸ miyëmë na eyòṅ mod osë abò e dzam anë mbëṅ, Nti ayi nyè vë maan ya ete tò anë olò, tò anë fili mod. ⁹ Mina bëti, boan bò dzam dëda, dzogan adzo mvam, miyëmë na Nti waban ai Nti waan anë a yob, ai na afyal ki bod a mësu. ¹⁰ Mëngakë luu nkòbò na, boan ngul abë Nti ai awonòṅ ya ngul dzie. ¹¹ Bòdan bikpëlë bi Zamba asu yë na mibi ngul ya abò nkanga a mëlam më Satan. ¹² Amu esëki ndum awu, enë ndum ya mialuman ai bidzoe, ai mingungul, ai bëdzoe bë e si dibi nyi, ai bëbe minsisim ya yob. ¹³ Asu te, nòṅan bikpëlë bi Zamba asu yë na mibi ngul ya alaṅan a mbë amos, abog te, eyòṅ miayi mana bò e mam mësë ma, mitëbe bëtëtëlë. ¹⁴ Tëbëgan hm tëtëlë, mibòd bëbëla a angëdëg, mëkyëbë mëtoa mina eben, ¹⁵ mibòd bësilfas, mitoa a ngomëzan na miakad mbëmbë foe mvoè, ¹⁶ minòṅ eben ya ṅyëbë a mam mësë, ete ngò miayi dim ndoan ya mëkòṅ më Mbë Modo ya mayoṅ ai ndoan. ¹⁷ Bòdan fë ekongo akode, ai nyamëla nsisim, nala watyan na ebug Zamba. ¹⁸ Kogëlan, midzaaga abog asë a nsisim, asu te boan okala a mban ngogëlan asu mimfufub misë, ¹⁹ ai asu dama, asu yë na eyòṅ mayaè anyu, bëvë ma ebug makòbò ai fim esë na mëkad ndimba mbëmbë foe, ²⁰ mbëmbë foe te ṅnyè mëtii ai nyè a mësuṅ nyò, mëtoa nloman, asu yë na mëkòbò fò nyè ai fim anë mayean kòbò. ²¹ Asu yë na miyëm mbol mënë ai esye mabò, ndindiṅ madzaṅ Tukikos ya anë fë mbò-esye afidi abë Nti ayi mina mana kad, ²² ṅnyè malom abë mina asu te, asu yë na mibi mëfoe maan, avòli fë minnëm mian. ²³ Mvoè ai ediṅ a i ṅyëbë ya biasò abë Zamba esya ai Nti Yesus Kristus bibòòg ai babëdzaṅ. ²⁴ Maa abòòg ai e bod bësë badiṅ Nti waan Yesus Kristus a enyiṅ kòm.