KOLOSI

KOLOSI

¹ Ma Paulus, man apostel Kristus Yesus a ṅyian Zamba, ai Timoteus, madzaṅ, ² biatil mimfufub ai babëdzaṅ bayëbë Kristus a Kolosi; mvoè ai maa bibò ai mina, bisòò abë Zamba esya waan. ³ Biakaṅ Zamba esya Nti waan Yesus Kristus kòm esë, eyòṅ biakogëlan asu dan, ⁴ mbol biawog foe ṅyëbë miayëbë Kristus Yesus, ai ediṅ mibëlë asu mimfufub misë, ⁵ asu afidi bënganyie mina a yob, a mingatari wog a ebug bëbëla mbëmbë foe ⁶ ya angasò abë mina, akyaè ya abugëban a si esë, anaṅa fë anë abë mina, atarigi amos mingawog, miyëmë fë maa Zamba a bëbëla. ⁷ Akyaè ya mingayègè abë Epafras, ndindiṅ mvoe bisye wama; anë mbò esye afidi Kristus a mëyian man, ⁸ ṅnyè angalèè bia ediṅ dzaan a nsisim. ⁹ Asu te hm, bia fë, atarigi amos bingawog dò, biavòd ki bò ngogëlan asu daan, bidzaaga Zamba na midzie ai ṅyëman ṅyian woe a fëg esë ai ntsogan ya nsisim, ¹⁰ na minyiṅ anë mbol wayean ai Nti, midzëṅë na minyëb nyè a nnëm a mam mësë, a e dzam asë anë mbëṅ, ¹¹ avë mina ngul kan esë, anë ngul duma die asu kan fin esë ai afu-nnëm. Ai mintag a nnëm ¹² biakaṅ esya ya abò na bikyëbë ai ngab mimfufub a mfyè. ¹³ Nnyè angakode bia a edzoe dibi, akëlë ai bia a edzoe mòn ediṅ woe, ¹⁴ abë nyè ngò bibëlë akode, ai evaè minsëm. ¹⁵ Anë nsisim e Zamba ya bayen ki, Ntol bikokoma bisë, ¹⁶ Amu abë nyè, byem bisë ya yob ai e bi ya si bingakomban, Ebi bayen ai e bi bayen ki, tò mintomba, ai bati, ai bidzoe, ai mingungul; Byem bisë bingakomban ai nyè asu die. ¹⁷ Emen anë osusua bisë, ndo byem bisë bitii abë nyè. ¹⁸ Anë nlo nyòl, nyòl ya enë nda Zamba. Ṅnyè anë mëtari, ntol ya bëkon, Asu yë na atëbë osu a mam mësë, ¹⁹ Amu angadiṅ na ntud osë otòbò abë nyè, ²⁰ Ai na a nyòl dzie, alad byem bisë abë nyè, Amana kom bitòm bisë ai mëki ya klos dzie, tò a yob tò a si. ²¹ Angalad fë ai mina ya mingabë bëdzin ai minziziṅ okoba asu mintsogan ya bëbë bë mam, ²² etoa dzi, alad ya mina a nyòl minson dzie ai awu na miṅyene mimfufub, tègè ai atòn, tègè ai etòm ziṅ a mis moe, ²³ ngë milaṅan a kpiim a ṅyëbë tègè tigibi, tègè fëṅëlan a afidi mbëmbë foe mingawog, a bëngakad a ekokoma esë ya enë a si, mbëmbë foe te hm ma Paulus masye. ²⁴ Etoa dzi, matag a mindzug misë asu daan, ndò fë madzala a minson miama, e dzom yadzëman a mindzug mi Kristus asu nyòl dzie ya enë nda Zamba. ²⁵ Endzò mavëṅan mod bisye dzie akyaè Zamba abëlan ai dò, avë fë ma na mëdzala ebug Zamba abë mina, ²⁶ e ndimba engabë esòlò atarigi a bisëb bisëb, atarigi fë anë miè bod minë, etoa dzi, yakulan asu mimfufub mie, ²⁷ mmiè Zamba angayi na miyëm akyaè akuma duma ya e ndimba nyi a zaṅ bëhaiden, endzò enë Kristus abë mina, afidi duma. ²⁸ Kristus te ṅnyè bia biayedan, bilëbë mod osë a fëg esë, asu yë na bilëdë mod osë ntud abë Kristus. ²⁹ Asu te mawu esye, mëluman a nkoṅ e ngul dzie yasye ma a nyòl ai fim esë.

¹ Amu mayi na miyëm e mod ndum mëbëlë asu dan ai asu eba ya Laodisea, e ba bësë bëvòg ya babë ki ma yen ai mis, ² asu yë na bëbi evòli a minnëm miaban, bëlad a ediṅ, ai asu akuma yë na bëtoan yëm mbëṅ, bëyëm ndimba Zamba ya enë Kristus; ³ abë nyè ngò akuma fëg ai ayëmë asë asòlò. ⁴ Madzo nala asu yë na të mod ziṅ azu mina lèè byem bi mam bi mvol. ⁵ Tò hm të mënë mò mò ai nyòl, mënë ai mina a nsisim, mëtala, mëyënë enyiṅ tëtëlë dzaan ai mbol ṅyëbë miayëbë Kristus oyëmë a kpiim. ⁶ Mbol hm minganòṅ Kristus Yesus Nti, nyiṅan fë abë nyè, ⁷ milada minkaṅa bë nyè, mingabedëban anë mimfim abë nyè, miyëmë a ṅyëbë anë bëngayëgëlë mina, mifuguzu a mvëṅan ngaṅ. ⁸ Boan okala na mod aza sòṅ kë ai mina oyab ai dòkten mëdugan, ai ayëgëlë fëg anë bod bazuzu ya babò, a batye hë a si ndon, së ki abë Kristus. ⁹ Amu abë nyè ngò Zamba anë ntud, ¹⁰ ndò fë minë ntud abë nyè, ṅnyè anë nlo edzoe ai ngul esë. ¹¹ Abë nyè ngò fë bëngakele mina akele labòban ki ai mò më mod, mbol mingasòdi ya nyòl minson, nala onë akele Kristus. ¹² Mbol mingadzëban ai nyè a ṅduan, ete ngò fë mingakui ai nyè a sòṅ fufulu, ai ṅyëbë ngul e Zamba angakuli nyè a bëkon. ¹³ Ndò hm e mina ya mingabë ṅwuan a minsëm mian ai mbol tègè ai akele nyòl dzaan, angadugan mina vë enyiṅ ai nyè emen, adzuu mina bivus bisë. ¹⁴ Angamana dim e kalara ekola mingabë mibëlë a mëmvende, angabë ki asu mfi waan, ndò fë angavaè nyè a zaṅ dzaan, abomë nyè a klos. ¹⁵ Angafadi mintomba ai bidzoe bikpëlë biaban, atele bò a ngëëṅ, ai azombo asë, atëgë bò a klos dzie. ¹⁶ Të mod atsig mina ntol ziṅ a mam bidi, ngë mënyu, ngë mam mëbog, ngë a mëtye më ngòn, ngë a sabbat. ¹⁷ Byem bite binë të hë evëgëlë e mam mazu, nyòl Kristus dzò enë ntud. ¹⁸ Të mod azu mina tele a mgbag ai mbol ayag ai edzòdi nyòl, ai olugu benglès, adzëṅë hë e mam angayen, atoa ndzalan ai evoe mëbun ya mintsogan mi nyòl mie, ¹⁹ ndò alad ki ai nlo, ete ngò nyòl esë yatye, ai biwoṅa, ai mëtiṅ, ebëlë mësë, etoa fë nladan, enganaṅ anë Zamba adiṅ. ²⁰ Ngë mingawu ai Kristus a mam më si, asu dze miadzoge na bëbò mina dòkten anë e bod banyiṅ a si ndon? ²¹ «Të waanamba, të wakiègè, të wafogo», ²² byem bite bisë biamana ndaman a babëlan ai biè; Hë mëmvende ai ayëgëlë bod, ²³ mam mayene a mis na mënë mam më fëg eyòṅ akui ya adzo olugu, ngë edzòdi nyòl ngë atug nyòl, masëki ai mfi ziṅ asu enyiṅ nyòl.

¹ Ngë bëngakuli hm mina a sòṅ ai Kristus, dzëṅan mam ya yob, mfag ya Kristus atoa a mbo nnomo Zamba. ² Tsogan mam ya yob, së ki e ma ya si. ³ Amu mingawu ndò enyiṅ dzaan esòlò ai Kristus abë Zamba. ⁴ Eyòṅ Kristus ayi kui a ngëëṅ, ṅnyè anë enyiṅ dzaan, abog te mina fë miayi kui a ngëëṅ ai nyè a duma. ⁵ Woean hm bidzo ya si, bisog, enyiṅ mvit, bëbe mintsogan, bëbe miṅyian, ndòg akuma, nala onë olugu bëzamba, ⁶ byem bite mbiè biazu ai bòn olun Zamba a nyòl. ⁷ Mbiè mingabë miwulugu a zut okoba, hala mingënë minyiṅi a ete. ⁸ Etoa dzi, midzoge ya hm fò mam mëte mësë, olun, ayòg, abe nnëm, bikag, mëfodan, a masò mina a anyu. ⁹ Të mialèan minnal mina mina, sòdan nnomo modo ai mimboan mie misë, ¹⁰ mibòd mkpamaṅ modo, ya odugan ya bò mkpamaṅ na ayëmë akyaè e nyò angakom nyè ¹¹ e hom tò man Grek, tò man Yuden, tò akele, tò e nyò asëki nkëlan, tò man bëlòbò-lòbò, tò man Sitia, tò olò, tò fili mod, byem bite biasëki we, hë Kristus ṅnyè anë bisë, atoa fë a bësë. ¹² Bòan hm nnëm ngòl, abëṅ nnëm, edzòdi nyòl, afu-nnëm, fin, hë anë mimfufub ai mindindiṅ ya Zamba angatòb, ¹³ midzibigi mina mina, midzuan fë mina mina ngë mod abëlë adzo ai e nyò mbòg. Akyaè ya Kristus angadzu mina, mina fë boan nala. ¹⁴ A e mam mësë mala a yob, bëlëgan ediṅ, nala watyan na tin abëṅ asë. ¹⁵ Mvoè Kristus edzoege a minnëm mian, ndzò bëngaloe mina ete a nyòl dzia. Vaan ngaṅ. ¹⁶ Ebug Kristus etòbògò abë mina abui, miyëgëlë, milëban fë mina mina ai fëg esë, a minnëm mian ai gratsia, miyiègè Zamba bia bi ongëmë, bia bi olugu, bia ya nsisim. ¹⁷ E dzam asë miabò tò a nkòbò, tò a mboan, boan mësë a dzoe Nti Yesus, mikaṅa Zamba esya abë nyè. ¹⁸ Mina bininga, boan fam mëwog anë layean abë Nti. ¹⁹ Mina fam, diṅan bëyal baan, të miakòṅan ai bò. ²⁰ Mina bòngò, boan bëbonde baan mëwog a dzam asë, amu nala ngò waanyëb abë Kristus. ²¹ Mina besya: të miabò na bòn baan bënyòdi mina, bëza ku sòm. ²² Mina bëlò, boan e bod badzoe mina a nyòl mëwog kan esë, të miabò dò hë na bëyen mina, boan dò ai nnëm mòngò, mimbarëga Nti. ²³ Eyòṅ miabò dò, misye ai nnëm waan osë hë anë miasye Nti, së ki bod, ²⁴ miyëmë na miayi bi maan më ngab elig abë Nti. Syean Kristus Nti. ²⁵ E mod abò nkòt ayi bi maan më nkòt te, amu efyal mësu yasëki we.

¹ Mina bëdzoe, lëdëgan bëlò baan sosoo ai tëtëlë, miyëmë na mina fë mibëlë Nti a yob. ² Boan mban a ngogëlan, tòbògan evie ete ai mvëṅan ngaṅ, ³ mikogëlan fufulu asu daan asu yë na Zamba ayaè bia mbè yë na bikad ebug, ndimba Kristus, a mëtii ai dzò a mësuṅ, ⁴ asu yë na mëkuli dzò a ngëëṅ a kyaè ya mayean kòbò. ⁵ Wulugan a fëg asu bëhaiden, mitoan bëlan ai abog. ⁶ Nkòbò waan obò kòm esë hë nkòbò mgba, e hi bëfudi nku, na miyëm akyaè miayean yalan mod osë. ⁷ Tukikos, ndindiṅ madzaṅ, ai mbò esye afidi ai mvoe esye dzama abë Nti ayi mina mana lèè minlaṅ miama, ⁸ ṅnyè malom mina asu adzo di na miyëm e mam mabëbë bia, avòli mina minnëm, ⁹ fufulu ai Onezimus mod afidi, ai ndindiṅ madzaṅ, ya anë mod ya abë mina. Bayi mina lèè e mam mësë ya mu. ¹⁰ Bod basug mina na: Aristarkus ya anë ai ma a mbog, Markus, manyaṅ Barnabas, (mëngatil ya mina adzo die, ngë asò abë mina, bëlan ai nyè mbëṅ), ¹¹ ai Yesus ya baloe na Yustus, bod bëte basò a akele. Hë bò etam mbò masye ai bò asu edzoe Zamba, ndò fë bëngavòli ma abui. ¹² Epafras, mod ya abë mina, asug mina; anë mbò esye Kristus Yesus, aluman fò asu dan kòm esë a ngogëlan asu yë na mitëbë a kpiim, mitòbò fë tègè ai bisoo a ṅyian Zamba osë. ¹³ Mënë nyè wusnèt na asye abui asu daan ai asu bod ya Laodisea ai e ba ya Yerapolis. ¹⁴ Lukas, ndindiṅ mod bëbëla ai Demas basug mina. ¹⁵ Sugan e babëdzaṅ ya Laodisea, ai Nimfas, ai e nda Zamba yakoan a nda dzie. ¹⁶ Eyòṅ miayi mana laṅ e kalara nyò, boan na bëlaṅ fë nyè a nda Zamba ya Laodisea, ai na mina fë minaṅ e kalara ya bëngatil nda Zamba ya Laodisea. ¹⁷ Kadan Arkipus na: Odzëṅ na odzala esye ya ongabi abë Nti. ¹⁸ Mësugan mënë ntilan ai wò wama, ma Paulus. Tsogan mësuṅ mama. Maa abòòg ai mina.