BISYE BI APOSTEL
11 A Teofil, e kalara osu, mëngatil e mam mësë ya Yesus angabò, ayëgëlë, atarigi a mëtari, 2 azaag kui amos angatëbëlë apostel ya angatòb, ai Mfufub Nsisim, ndò anganòṅëban a yob. 3 Mbò angalëdë emen, atala, a mvus yë na abi ya mintye akyaè asë, mëlu mëlu mëwom mënyii, akòbògò mam më edzoe Zamba. 4 Ndò hm, adzaag ai bò bidi ha, ndò abende bò na të bakodo a Yerusalem, bëyanga hë mëtiṅ më esya, akyaè ya mingawog mëdzoo na, 5 Yohannes angadu a mëndim, mfa waan, miayi duuban abë Mfufub Nsisim e mëlu mazu ma. 6 Ndò hm bëngamana koan, bësili nyè na: «A Nti, yë abog wazu dugan tele edzoe Israel di akui ya nga?» 7 Nyè ai bò na: «Së ki mina miayean yëm mëbog ai bënyie ya tara angatele a ngul dzie, 8 dzam da, miayi bi ngul eyòṅ Mfufub Nsisim ayi mina sòṅ a nyòl, abog te miayi ma bò bëbòòlò a Yerusalem ai a Yudea asë, ai Samaria, akëlë kui a mëbug më si». 9 Akòbògò nala, bëngayen nyè anë anòṅëban a yob, ndò nkut ongamana nyè bò dimëzan a mis. 10 Ndò mbol bëngabë bëbëbëgë a yob anë akë, ondzi na, fam ebè entëlë bò a mgbag, ebëgë mimfum biyie, 11 bò na: «A Bod ya Galilea, dze mitëlë, mibëbëgë a yob? E Yesus ya avaaban mina a yob nyò, nala ngò ayi sò, e kan mihë yen akëlë a yob». 12 Ndò hm apostel bëngadugan a Yerusalem, bësòò a nkol bile-bi-mbòn; hom te ongabë babi ai Yerusalem, ntye dulu ya amos sabbat. 13 Asuan bëngasuan a tisòn, ndò babed a nda-yob, e hom bëkarëga yanga; bënë ha na: Petrus ai Yohannes, ai Yakob, ai Andreas, Filip ai Tomas, Bartolomeus ai Matias, Yakob man Alfeus ai Simun man Zelot, ai Yudas man Yakob. 14 Bò bësë bëngabë nnëm mbòg mbòg, mban a ngogëlan ai bininga, ai Maria, nyia Yesus, ai babënyaṅ. 15 Mëlu mëte, ndò Petrus angatëbë a si a zaṅ babënyaṅ, (Nkunda bod ongabë nkoan hom mbòg ha dzam bò ntèd ai mëwom mëbè) nyè na: 16 A babëdzaṅ, ntilan ongabë oyean toban, akyaè Mfufub Nsisim ongatari kòbò a anyu David, atyan ai Yudas ya angavëṅan nlëdë-zënë asu e bod bëzaa bi Yesus, 17 na angabë a ngab dzan, ndò abi fë ngab ya esye dzi. 18 Ndò mod te angakus aboda si ai mòni dzongo, ndò alaban ai asu a si, atole a zaṅ, miyè midabëra a si. 19 Ndò e bod bësë bëtoa a Yerusalem bayëm nala, antoa hm na, bëngaloe afub te a nkòbò waban na: Akeldamak, nala watyan na: Afub mëki. 20 Amu anë ntilan a kalara bësalmen na: Dzal die lëbòò elig, ndò fë të mod atòbò ete, ai na Mod mfë anòṅò afola edzoe dzie. 21 Bod bëziṅ bazuzu ya batòbò ai bia ha abog asë, eyòṅ Nti Yesus angabë awulugu ai bia, asë ali, anë ali, 22 atarigi a ṅduan Yohannes, azaag kui amos ya bënganòṅ nyè a yob a zaṅ dzaan; Layean na mbòg ya ete abò mbòòlò akui-lë sòṅ fufulu ai bia. 23 Ndò bëbè bëngatëbë, Yosef ya bëloege na Barsabbas, atoa mëbëdan na Yustus, ai Matias. 24 Ndò bëngakogëlan, bò na: «A Nti, wa wayëm minnëm mi bod bësë; lëdëgë e nyò watòb a e bod bëbè ba, 25 na anòṅ etoa esye apostel ya Yudas angadzoge a si nyè akëlë e hom woe.» 26 Ndò bëngaboe ngam, ebii Matias, ndò fò anyian a taṅ a postel awom ai mbòg.
21 Ndò hm, eyòṅ lëngabò na amos Pentekoste ongazu ya mana, bò bësë bëntoa hom mbòg. 2 Etye etye na, ndò eduṅ engasò a yob, hë anë mod nkulu, ndò engadzie nguma nda osë bëngabë bëtoa ete, 3 bëngayen ayëm lakë lakaban anë ndoan, angatòbò anë mod osë ya abë bò a nlo a yob, 4 ndò bò bësë bëngadzie ai Mfufub Nsisim, bëtari hm na bakòbò a minkòbò mifë, e kan nsisim ongabë obò na bëfala nkòbò. 5 Yuden bëngabë bëtoa a Yerusalem, bëtoa bod bë ṅyëbë, bësòò a mëyòṅ mësë ya si. 6 E mod eduṅ nyò angayi bò, mod nkunda bod abugi fò ha, bëmana koan, bëngakam, amu anë mod awogo bò anë bakòbò nkòbò woe. 7 Fëg engadzaṅ fò bò, bëngakam, bò na: «Nga e bod bësë bakòbò ba bënë bod ya Galilea? 8 Ndò eyë anë ya na biawog bò, anë mod a nkòbò waan ya bingabyali ai wa? 9 Bia ha bod ya Partia ai Medina, bod ya Elam, ai e ba bëtoa a Mezopotamia, a Yudea ai a Kapadokia, a Pontus ai a Azia, 10 Frizia ai Pamfilia, Egipten, bod ya basò a mfag Libia ya Sirena, ai e bëyëṅ basò a Roma, 11 Yuden ai e ba bëngavëṅan a ṅyëbë Yuden, Kreta ai Arabia, biawog bò bëkòbògò minkòbò mian, bëlèègè biyëṅ bi mam bi Zamba». 12 Fëg edzaṅa fò bò, bënzëmë, bëngadzo, anë mod ai e nyò mbòg na: «Na ngò watyan ya ana?» 13 Bëvòg bëngamgbali fò bò, bò na: «Bënë mbilan wayn». 14 Ndò Petrus angatëbë a si ai bë awom ai mbògò, ndò avë kiṅ, nyè ai bò na: «Mina e Yuden ai e bod bësë mitoa a Yerusalem, yëman e dzam di, mivogolo fë bibug biama. 15 Amu së ki anë mbol miatsog na e bod ba basòg mëyòg, (amu bingënë bibëlë hë awola lala ya amos), 16 hë da, dzam te ndò profèt Yoel angakòbò na: 17 Layi bò na, a mëmos më mvua, Zamba ṅnyè akòbò nala, mayi soe Mfufub Nsisim wama abë mod osë, abog te bëndoman baan ai bëngòn baan bayi kèè na bakòbò anë bëprofet, binanga bian biayi yen mam a nlo, minnom mingayen biyëyëm a nlo; 18 abog te ma mayi soe nsisim wama a nyòl bësye bama, fam ai bininga, mëmos mëte, bëngakòbò anë bëprofet. 19 Mayi bò biyëṅ bi mam a yob ete, ai mëndëm a si, mëki ai ndoan ai nkut otsida. 20 Nlo-dzobo ayi vëṅan dibi, ngòn evëṅan mëki, osusua yë na amos duma ai amos nen Nti wazu. 21 Ndò layi bò na, e mod osë ayi loe Nti ayi kodeban. 22 A bod ya Israel, vogolan e bibug bi; E Yesus man Nazaret ya Zamba angatele mina a zaṅ ai mimboan mi ngul, ai biyëṅ bi mam, ai e mëndëm Zamba angabò a mò moe a zaṅ dzaan, akyaè ya mina bëben miayëm, 23 Yesus te ṅnyè mingawoe, mibomë nyè a klos a mò më e bod bayëm ki mvende, abog ya angatilban, Zamba ayëmë fë nala, ndò angavë mina nyè, 24 ṅnyè hm Zamba angakuli a sòṅ, atii angatii mësuṅ më awu, mbol awu angabë ki nyè dzam bi nkom. 25 Amu David adzo asu die na: Mayen Nti atëlë ma osu abog asë, amu atëlë ma a mbo-nnomo na mëzaa nyaman. 26 Asu te nnëm wama wafon, oyëm wama otaga, alodo anë nyòl dzama yanyiṅ ai afidi, 27 amu wayi ki ma voan nsisim a bëkon, tò ki na odzoge na mfufubu woe aboe a si. 28 Ongalëdë ma mëzen më enyiṅ, wayi ma dzala ai mintag a mis moe. 29 A babëdzaṅ, dzogan ma mëtoan mina kad adzo tara David bëbëla na, Angawu, adzëban, ndò fë sòṅ dzie enë abë bia azaag kui amos hi. 30 Mbol angabë profèt, ndò angayëm na Zamba angakani nyè sòṅ na mod ya abum die ayi tòbò a etoa-edzoe dzie. 31 Mbol angayen dò osusua, ndò akòbò adzo akui-lë sòṅ Kristus na: Ayi ki laṅan a tolendoṅ, ndò fë nyòl dzie yayi ki boe a si. 32 Yesus te ṅnyè Zamba avëlë a bëkon, ṅnyè bia bësë binë bëbòòlò boe. 33 Mbol mbo-nnomo Zamba angabede nyè, ndò anganòṅ ekaa Mfufub Nsisim abë esya, asoe nyè, akyaè ya miayen, miwogo fë di. 34 Amu, tò anë David andzëki bed a yob, adzo na: Nti angadzo ai Nti wama na: Tòbògò ma a mbo-nnomo 35 akëlë kui anë mabò minziziṅ mie etele mëkol dzoe. 36 Ndò hm, nda-bod esë ya Israel eyëmë na e Yesus ya mina mingabomë a klos, ṅnyè Zamba atele Nti ai Kristus». 37 Awogo bëngawog nala, nnëm ongakod bò a abum ha, bò ai Petrus ai apostel bëvòg na: «Bibò hm ya, a babëdzaṅ?» 38 Petrus nyè ai bò na: «Tsendëgan, mod osë ya abë mina aduuban a dzoe Yesus Kristus asu evaè minsëm dzaan, abog te miayi bëlë efaè Mfufub Nsisim. 39 Amu, mina, ai bòn ban, ai e bod bësë bënë oyab, ai e taṅ bod esë Nti Zamba waan angaloe, mina minë ai ngaga». 40 Angabë hm fë alëbë bò, akòbògò ai bò nala ai abui bibug afë, nyè na: «Mikodeban ya a zaṅ e mvòṅ bod dzongo nyi». 41 E bod ba bëyëbë fò ebug dzie, bëduuban, ndò bod bëngabagëban bò a yob amos te dzam bò bakuda bëlè. 42 Bëngabë mban a ayëgëlë apostel, bëtoa ai bò fufulu, tò a mbëgan mbaṅëla, tò a ngogëlan. 43 Mod osë angabë hë wòṅ, abui biyëṅ bi mam ai mëndëm bibòòban a mò bë apostel. 44 E bod bësë bëyëbëgë bëngabë hom mbòg, bëbëlë dzom esë fufulu, 45 bëngabë manëṅa kuan ai akuma, ai byem bi mò biaban, bëngakab biè a zaṅ bò a bò ha, anë mod, abim ayaṅan ai dò. 46 Amos osë, bò bësë, nnëm mbòg mbòg, bëkëlë a tempel, bëbëgë mbaṅëla a mënda maban, bëkaban bidi ai mintag, ai dzin a nnëm, 47 bëluugu Zamba, bod bësë bëkama bò. Nti abaag bò e bod bëkodeban a yob amos osë.
31 Petrus ban Yohannes bëngabë bëdë a tempel asu ngogëlan mëwola ebul. 2 Bod bëngazu bëbëgë mod ya angabyali mbombog; bëkarëga nyè toe amos osë a mbè tempel ya baloe na «Abëṅ mbè», asu yë na adzaè e bod banyian a tempel man mòni. 3 Ayen angayen Petrus ban Yohannes bëyiigi nyian a tempel, ndò angadzaè bò mòni. 4 Ndò Petrus afòmbò nyè, fufulu ai Yohannes, nyè na: «Bëbëgë bia». 5 E mod nyò angafòmbò bò, afidigi na ayi bi dzom abë bò. 6 Petrus nyè na: «Tò mòni, tò mvòt, mabëlë ki, dzam da, e dzi mëbëlë ndzò mavë wa. A dzoe Yesus Kristus man Nazaret, tëbëgë a si, owulu». 7 Ndò abi nyè a wò mbo-nnomo, atele nyè a si. Etye etye te, mëkol ai mvòṅëlò bimana nyè won, 8 amëṅë a yob, antëlë, angakë awulu; ndò anyian ai bò a tempel awulugu, ayëlëgë, alugu Zamba. 9 Bod bësë bëyënë nyè anë awulu, alugu Zamba. 10 Bëdugan nyè yëm na ṅnyè akarëga tòbò a mbè ya tempel asu mòni, ndò bëngadzie ai minkamaṅ ai ndzaṅan fëg asu e dzam angabò mod te. 11 Ndò angalad Petrus ai Yohannes a nyòl ha, bod bësë bëngazu mimbil mfag bëngabë a minkum baloe na minkum mi Salomon, bò bësë hë akam. 12 Petrus angayi yen nala, nyè ai bod na: «A bod ya Israel, dze miakam e dzam di, ndò ki dze miabëbë bia hë anë bia bibò na e mod nyò awulu a ngul dzaan a yob, ngë ki na mbol biadaṅ kam Zamba? 13 Zamba Abraham ai Zamba Isaak ai Zamba Yakob, Zamba bëtara, avë mòn woe Yesus duma, e nyò ya mina mingakuan ai nyè, misie fë nyè a mis më Pilatus, eyòṅ nyè angatsig na asoe nyè. 14 Mina mingasie mfufubu ai sosoo, misili na bësoe mina ṅwoe bod, 15 mingawoe mbonde enyiṅ; ṅnyè Zamba akuli a bëkon, ndò bia bënë bëbòòlò boe. 16 Ndò hm, a ṅyëbë ya dzoe die, e mod mitala nyò, a miayëm fë nyè, dzoe die awono nyè, ndò ṅyëbë ya dzoe die ovë nyè e mvoè mina bësë miayen nyi. 17 Ndò etoa dzi, a babëdzaṅ, mayëm na mingabò nala mbol tègè yëm angabë bëlë mina, akyaè fë bëdzoe ban bëngabò. 18 Ndò hm Zamba, e mam angatari kad a anyu bëprofèt bësë na Kristus woe ayi bëlë mintye, adzala ya dò totoe. 19 Vëṅan hm, midugan mfag minsëm miavaaban mina, 20 asu yë na abog evovoe azu abë Nti, alom mina e nyò angatele, Kristus Yesus, 21 ṅnyè yob layean soan ai nyè, akui abog e mam mësë Zamba angakòbò a kòm ya kòm a anyu mimfufub bëprofet boe matoban. 22 Moses nyè angadzo na: Nti Zamba ayi mina tele profet hë anë ma a zaṅ babënyòṅ. Mivogolo e mam mësë ayi mina kad. 23 Layi bò na, e mod osë ayi ki vogolo profet te, ayi mana ai si a ekoa bod. 24 Anë fò na, bëprofèt bësë, atarigi abë Samuel akëlë osu, bësë bëngakòbò, ndò bëngabende e mëmos ma. 25 Mina minë bòn bëprofèt ai bòn bë elad-amvoe ya Zamba angalad ai bëtara, nyè ai Abraham na: Mënda më bod mësë ya si mayi luguban a mvòṅ dzoe. 26 Asu daan ngò Zamba angatele mbò-esye woe, alomo nyè, angafubu mina asu yë na mod osë ya abë mina alum bëbe bë mam boe mvus.
41 Mbol hm bëlèègè ai bod, ndò bëfada ai ndzoe bëzimbi ya tempel ai bësadukea bëngazu bò tëbë a mgbag, 2 bëwogo adzo di abe na bayëgëlë bod, bëyedëgan akui-lë sòṅ bëwu abë Yesus. 3 Ndò babi bò, bëfudi bò a mimbog akui kindi lende ya hala, amu hala ngoge entoa ya. 4 Abui bod ya bëvogolo ebug bëngayëbë, ndò bod bëngakui dzam bò tò bakuda bëtan. 5 Ndò hm lazu bò na, e kidi lende ya hala, ndò bëdzoe baban, ai bënyia-bodo-mvia, ai bësaṅa bëkalara baban bëngakoan a Yerusalem, 6 fufulu ai Annas, fada nen, ai Kaifas, ai Yohannes, ai Alesander ai e ba bësë bëngabë a mvòṅ bëfada bënen, 7 ndò batele bò a ezëzaṅ, bëngasili bò minsili, bò na: «Ai ngul fe, ngë ki na a dzoe za mihë bò e dzam di?» 8 Petrus atoa ndzalan ai Mfufub Nsisim ha, ndò abodo nkòbò, nyè ai bò na: «A bëdzoe bë nnam ai bënyia-bodo-mvia, 9 ngë badzëṅ bia a si amos ya ana, etòm ya na bibò nkokòn mod mbëmbë dzam, ai na a dzoe za akodeban, 10 mina bësë hm, ai ayòṅ Israel asë, yëman na a dzoe Yesus Kristus man Nazaret ya mina mingabomë a klos, ndò Zamba angavëlë nyè a bëkon, a dzoe die ngò e mod nyò atëlë mina mvoè osu. 11 Ṅnyè anë akòg ya bia bëloṅ bë nda binga woa a fyè, ndò avëṅan ya nnomo akògò. 12 Ndò fë akode asëki abë mod mfë, amu dzoe afë asëki a si a zaṅ bod, a biayean kodeban ete». 13 Mbol bëngayen azombo Petrus ban Yohannes, bëyëmë fë na bayëm ki kalara, bò ha tègè ai ayègè, bëngakam, mbol bëyëmë na bod bëte bëngabë ai Yesus, 14 ndò babëbë e mod angabò mvoè nyò, atëlë ai bò, tègè ai ebug bafèd. 15 Ndò bakad bò na bëyanga a nsëṅ nda-mëdzo, asu yë na bëbui fëg bò a bò, 16 bò na: «Bibò ya ai e bod ba? Amu adzo ndëm te ayëmban ya a ngëëṅ a zaṅ e bod bësë bëtoa a Yerusalem, ndò biasë ki dò dzam sie. 17 Dzam da, asu yë na të dzam te layaman abui abui, ntëlan bò mvende të dugan kòbò ai mod ziṅ a edzoe di». 18 Ndò bëngaloe bò, bëtele bò mvende na tègè tègè bada fala ebug, ngë ki na ayëgëlë a dzoe Yesus. 19 Ndò Petrus ban Yohannes bafèd, bò ai bò na: «Mina bëben yënan adzo di: Yë anë sosoo a mis më Zamba na bidaṅ mina vogolo alodo Zamba? 20 Amu bia biasëki dzam bò të kòbò e mam bingayen, biwogo fë». 21 Ndò badugan bò beme, bësoe bò, tègè yen e dzam bavë bò endëgëlë ete, hë etòm bod bë nnam, amu bësë bëngabë bëvaa Zamba duma asu e dzam angabò. 22 E mod hm asimba mboan mvoè di angabòban a nyòl, angabë bisëb mëwom mënyii ai fus. 23 Eyòṅ bëngasoe bò, ndò bëngakë a bod baban, ndò balèè bò e mam mësë bëfada bënen ai bënyia-bodo-mvia bëngakad. 24 Amana bëngamana wog, ndò bò bësë bëngavë kiṅ fufulu abë Zamba, bò na: A Nti, wa ongakom yob ai si, ai maṅ, ai e byem bisë ya ete, 25 wa ongakòbò ai Mfufub Nsisim a anyu tara waan, mbò-esye woe David na: Asu dze mëyòṅ mënë ebyandi, minnam mibindigi zëzë mam? 26 Minkukuma ya si-ndon mitëlë, bëdzoe bëkoan fufulu, na baluman ai Nti, ai Kristus woe. 27 Amu Herodes ai Ponsius Pilatus ai bëhaiden, ai bòn bë Israel bëngakoan a tisòn te mfaṅ na baluman ai mfufub mbò-esye woe Yesus ya ongawòbò mbòn, 28 na babò e mam mësë ya wò woe ai ṅyian woe bingatele na biayi bòban. 29 Ndò hm etoa dzi, a Nti, yënë mëlam maban, ovë hm bituga bie na bëkòbò ebug dzoe ai azombo asë, 30 osam wò woe na obò bod mvoè, ai na mëndëm ai biyëṅ bi mam bibòban a dzoe mfufub mbò-esye woe Yesus. 31 Bëkogëlan ha, ndò e hom bëngabë nkoan ongatigëdan, bò bësë bëdzie ai Mfufub Nsisim, bëngakòbò ebug Zamba ai azombo. 32 Nkunda e bod bënganyian a ṅyëbë ongabë hë nnëm mbòg mbòg, ai nsisim mbòg mbòg, tò mod të dzo na dzom dzie yawoge ai nyè, byem biaban bingabë bò hë fufulu. 33 Ndò apostel bëngabë bòòlò akui-lë sòṅ Nti Yesus ai abui fim, abui maa atoa ai bò bësë. 34 Mod ziṅan gabë ki a mëyaṅan a zaṅ dzaban; amu e ba bësë bëngabë bëbëlë mënda ai mal bëkuan ai mò, bëzaag ai mòni nkuan, 35 bëdzoge apostel a mëkol a si, bëngavë mod osë e taṅ a yaṅan ai dzò. 36 E Yosef ya baloe na Barnabas, mbòg ya ngab apostel, (dzoe die latyan na mòn evòli), angabë man Leviten, bëbyali ya Siprus, 37 angabë abëlë afub, ndò angakuan ai dò, asòò ai mòni, adzoge nyè apostel a mëkol a si.
51 Mod ziṅ ha, dzoe na Ananias, ban ngal Safira, bëngakuan ai si, 2 ndò angasòli etun mòni, ngal ayëmë nala, ndò angasò ai etun, adzoge apostel a mëkol a si. 3 Petrus nyè na: «A Ananias, dze fò Satan adzie wa a nnëm ha, ongazu dug Mfufub Nsisim, osòli etun mòni ya nkuan si? 4 Nga si dzoe? Ndò hm ki, eyòṅ abò na okuan ya ai dzò, nga mòni ahë woge ai wa? Dze ehë bò na ohëg e kan dzam nyi? Wandzë ki dug bod, Zamba ṅnyè ohë dug.» 5 Ananias angayi wog e bibug bi, ndò alaban a si, awuu; wòṅ okuu e bod bësë bëvogolo ha a nyòl. 6 Ndò binanga bingakodo a si, bëwogo nyè a biyie, bëkë nyè dzëb. 7 Mëwola mëngayi lod hala anë mëlè, ndò mininga woe azu nyian, nyè tègè yëm e dzam lëbò ha. 8 Petrus nyè ai nyè na: Kada ma, yë abim mòni di ndò mikuan ai dò si ete? Nyè na: Owe, abim te dili. 9 Petrus nyè ai nyè na: Dze yabò na mikui kiṅa bobolo nsisim Nti? Yënë, mëkol më e bod basò dzëb nyò nnom ma mëtëlë a mbè; bò fë bazu kë ai wa. 10 Ndò fë nyè angaku nyè a mëkol a si etye etye, awuu. Ndò bëndoman bë bod bëngasò, bëkòbò nyè atoa mbim, ndò bëngabëgë nyè, bëdzëbë nyè babi ai nnom, 11 ndò mod wòṅan gaku nda-Zamba esë a nyòl ai e bod bësë bëwogo e mam ma. 12 Abui mëndëm ai biyëṅ bi mam bingabòban a mò bë apostel a zaṅ bod. Ndò bò bësë bëkarëga toban, nnëm mbòg mbòg a minkum mi Salomon, 13 tò mod mbòg ya e ba bëvòg të zombo lad ai bò, dzam da hë nnam otaman bò. 14 Bëyëbë bëngabuli bagëban abë Nti, minkunda mi fam ai bininga, 15 e kan yë na bëngazu ai minkokòn, bëboege bò a bëmatela ai binòṅ a ndzòṅ a yob, asu yë na, eyòṅ Petrus ayi sò, tò të hë nsisim woe onamba mbòg ya ete. 16 Minkunda mingakë miasò a ngòdòg bëtisòn ya Yerusalem, bëbëgë minkokòn ai e bod bëbe minsisim bëndëgëlë, bò bësë bëmana syeban. 17 Ndò fada nen angatëbë, ai nyè ai e bod bëngabë ai nyè ha, ekoan bësadukea, bëmana ya dzie ai aban ha, 18 ndò babi apostel, bëfudi bò a mimbog mi nnam. 19 Ai alu ha, ndò englès Nti angayaè mimbè ya mbog, akuli bò a nsëṅ, nyè na: 20 «Kaṅan tëbë a tempel, mikad nnam e bibug bi enyiṅ bisë bi.» 21 Ndò bëngawog, ndò banyian a tempel ai ndib kidi, bëngayëgëlë. Ndò hm fada nen nyè angasuan mfag woe ai bod boe, bëtogan ekoan-nnam ai basugu ati bë bòn bë Israel, ndò balom bò nòṅ a nda-mimbog. 22 Ndò bëbò-bisye bëngasuan a nda-mimbog, tègè bò kòb we. Bëdugan ai mvus, ndò baboe foe na: 23 «Bikë kòb nda-mimbog efëdë mbëṅ mbëṅ, bënòni bëtëtëlan a mimbè, ndò biyaè, dzam da të kòb tò mod mbòg a nnëm ete». 24 Awogo ndzoe bëzimbi ya tempel ai bëfada bënen bëngawog e foe nyi, fëg edzaṅa bò, të yëm mbol nala wayi kë osu. 25 Ndò mod ziṅ aham hala, angalèè bò na: «Yënan, e bod mingafudi a mimbog, bëtëlë a tempel, bëyëgëlë nnam». 26 Ndò ndzoe bëzimbi bë tempel angakë ai bod bisye boe, abii bò otëtëg otëtëg, amu bëmbarëga na nnam oza lum bò ngòg. 27 Ndò bëngasò ai bò, bëtele bò a ekoan-nnam a zaṅ. Ndò fada nen asili bò na: 28 «Biandzë mina kad na të miayëgëlë e dzoe di a? Etoa dzi, Yerusalem amana ya dzie ai ayëgëlë dan, ndò miayi na miazu ai bia mëki më mod te a nyòl nga?» 29 Petrus ai apostel bò na: «Biayean bò Zamba mëwog alodo anë bod. 30 Zamba bëtara akuli Yesus a sòṅ, e Yesus mingawoe ai nkëlan mingakele nyè a ele. 31 Zamba abede nyè a wò mbo-nnomo woe na abò etòṅ-ntomba ai nkode, ai na avë Israel ntsendan enyiṅ ai evaè minsëm. 32 Ndò hm bia binë bëbòòlò bë mam mëte, bia ai nsisim ya Zamba angavë e bod babò nyè mëwog». 33 Bëngayi wog nala, bëmana hm fam, bëngayi na bawoe bò. 34 Ndò man Farisea ziṅ ya ekoan-nnam, dzoe na Gamaliel, atoa mbëmbë ṅyëgëlë mvende, bod bëdiṅi fë nyè, ndò angabende na bëtam kui ai e bod ba a nsëṅ man etun, 35 nyè ai bò na: «A bòn bë Israel, mikalëga e dzam miayi bò e bod ba. 36 Amu, e mëlu mëndëm lod ma, Teudas angatëbë, nyè na anë mod, ndò bod, dzam bò mëwom mënyii, bëngalad ai nyè; Awoe bëngawoe nyè, ndò e bod bësë bëngabë bëtoṅo nyè bëngatsaman, bëdzaṅa a sòòd, tègè ai ndòṅ. 37 A mvus hala, ndò Yudas man Galilea angatëbë a si e mëlu ya bëbòò elaṅ, bod bëngatoṅ nyè a zud. Ndò fë nyè angadzaṅ a ekoa, e bod bësë bëngabë bëbiege nyè bëmana tsaman. 38 Ndò hm makad mina etoa dzi na: Të miakalan ai e bod bala dzam, dzogan bò. Ngë e mam balam, ai e ma babò, masò a bod, mayi mana ai mëben; 39 Dzam da, ngë masò abë Zamba, miasëki mò dzam mana, miza tëmë, mingaluman ai Zamba». Ndò bëngakui kiṅa i nyè, 40 bëloe apostel, bëyidi bò, ndò babende bò na të bakòbò a dzoe Yesus, bësoe bò. 41 Ndò të apostel bakodo a ekoan-nnam ha, bakë batag, mbol bëngayen na bakyëbë ai ebyandi etòm dzoe, 42 bëntoa hm na, amos osë, hë a tempel ai a mënda mënda, të ku sòm a ayëgëlë, bëyedëgan Yesus Kristus.
61 Mëlu mëte, ndò taṅ bëyègè engabed fò abui; E bod ya nnam Grek bëngasòg Ebrea, amu Ebrea bëkarëga voan minkus mi Grek a ekab-bidi ya amos osë. 2 Ndò bë awom ai bëbè bëngaloe nkunda bëyègè, bò na: «Asëki mbëṅ na bikë dzoge ebug Zamba a si, na biasye bod a tëbëlë. 3 A babëdzaṅ, tòban bod ya bënë ai olugu a zaṅ dzaan zamgbal, bëtoa ndzalan ai nsisim, ai fëg; mbò biayi tele a esye dzi; 4 mfag waan, biayi mvaman ai ngogëlan, ai esye ebug.» 5 Ndò adzo di anganyëb bod bësë a nnëm, ndò batòb Stefanus, mod ya angabë ndzalan ai ṅyëbë, ai Mfufub Nsisim; bëtòbò fë Filip, Prokoro, Nikanor, Timon, Parmenas, Nikola, mod ya anganòṅ ṅyëbë a Antiokia, 6 ndò batele bò apostel osu, ndò bakogëlan, bëbede bò mò. 7 Ebug Zamba enganaṅ, taṅ bëyègè engabui a Yerusalem eyëgan, abui dzam ya bëfada bëngayebë fë. 8 Stefanus antoa ndzalan ai maa, ai ngul, angabò biyëṅ bi mam ai bod mëndëm a zaṅ bod ha. 9 Ndò bod bëziṅ ya nda-bikoan ya bëloege na ’nda-bikoan fili bod’, ai bod ya Sirena, ai Alesandria, ai bod ya Silisia ai Azia, bëngalaṅëdan ai Stefanus, 10 dzam da tègè dzam kui a nkoṅ fëg ai nsisim angabë akòbògò etere. 11 Ndò batindi bod na bëkad na: Bingawog nyè akòbògò mam më ebyandi mëtyan ai Moses, ai Zamba. 12 Ndò bëngamana yoṅolo bod minnëm, ai bëfada, ai bësaṅa bëkalara, ndò bazu nyè dilan, bëbii nyè, bëkëlë ai nyè a nda-mëdzo, 13 ndò bëtsigi bë mbë mvaa bëngatëbë, bò na: E mod nyò anë hë akòbò abe ai mfufub etòbògò hi ai mvende. 14 Amu biawog nyè adzo na Yesus man Nazaret ṅnyè ayi bug etòbògò dzi, atsende fë e mëtum Moses angalig bia ai mò. 15 Ndò e bod bësë bëngabë bëtoa a nda-mëdzo ha bëngabëbë nyè, bëntala asu die hë anë asu englès.
71 Ndò fada nen asili na: «Yë anë badzo na?» 2 Nyè na: «A bëtara ai babëdzaṅ, vogëlan na: Zamba duma angayene tara waan Abraham, hala atoa a Mezopotamia, osusua yë na atòbò a Haran. 3 Ndò angadzo ai nyè na: Kodogo a si dzoe, ai a bod boe, okë a e si mayi wa lëdë. 4 Ndò angakodo a si Kaldea, atòbò a Haran. A mvus yë na esya awu ya, ndò angakodo hala, asò loṅ mvog a e si nyi, e hom mitoa etoa dzi, 5 andzëki nyè vë ngab-elig ete, tò ki etëlë-mëkol, dzam da, ndò angakag nyè na ayi nyè vë na ewoge ai nyè, ewoge fë ai mvòṅ dzie a mvus dzie; nyè ha tëgë ai mòn. 6 Zamba angadzo fò hm na: mvòṅ dzoe yayi tòbò bëdzin a ezaa nnam, bayi bò na bësye anë bëlò, bëtibili fë bò mimbu mintèd minyii. 7 Mayi dzòs ayòṅ layi bò na bësye anë bëlò, Zamba ṅnyè adzo nala, a mvus e mam mala, bayi kodo hom te, bëzu ma lugu e hom hi. 8 Ndò angavë nyè elada akele. Nala ngò angabye Isaak, akele nyè a amos mwomo, Isaak akele Yakòb, Yakòb akele bëtara awom ai bëbè. 9 Ndò bëtara bëngasiṅ Yosef, bëkuan ai nyè a Egipten. Zamba angabë ai nyè, 10 ndò angakode nyè a mindzug mie misë, avë nyè maa ai fëg a mis më Farao, nkukuma ya Egipten, ndò angatele nyè na adzoe Egipten ai nda dzie esë. 11 Ndò zie engabò a Egipten esë, ai a Kanaan, mod ndzug abui, bëtara baan tègè yen bidi. 12 Mbol Yakob angawog na bidi binë a Egipten, ndò angatari lom bëtara baan. 13 Eyòṅ bèè, ndò Yosef angabò na babënyaṅ bëyëm nyè, ndò Farao azu yëm nda-bod Yosef. 14 Ndò Yosef angalom na bëzu ai nyè esya woe Yakob, ai ayom bod die asë, minkug mëwom zamgbal ai mitan. 15 Ndò Yakob angasigi a Egipten, awuu, bëtara baan bëwuu fë, 16 ndò bëngavaè bò hala, bësòò ai bò a Sikem, bëdzëbë bò a e sòṅ Abraham angakus a taṅ mòni a mò më bòn bë Emmor a Sikem. 17 Eyòṅ hm abog e ngaga ya Zamba angakag Abraham angakui, ndò bod bëngafui, bëntoa abui a Egipten, 18 azaa kui anë nkukuma ziṅ mfë anganòṅ edzoe a Egipten, nyè tègè yëm Yosef. 19 Nkukuma nyò angabad ayòṅ daan, atibili bò, abò na bëlëdë bòn baban a ngëëṅ, asu yë na të banyiṅ. 20 Mëlu mëte, ndò Moses angabyali, anyëbë Zamba a mis. Angatòbò ngòn elè a nda esya; 21 mbol hm bëngalëdë nyè a ngëëṅ, ndò ngòn Farao enganòṅ nyè, angatòṅ nyè anë mòn woe emen. 22 Bëngayëgëlë Moses fëg esë ya Egipten, amu angabë ngul a nkòbò ai a mimboan. 23 «Hala te angakui ya bisëb mëwom mënyii, ndò angabindi a nnëm woe na akë yen babënyaṅ, bòn bë Israel. 24 Ndò ayen anë batibili mod, ndò akaman ai nyè, ndò fò akun e mod bëtibili nyò, awoe man Egipten. 25 Angabë adzo na babënyaṅ bayi wog etere na Zamba avë bò nkode a mò moe; Bò ha të wog. 26 Amos otsaag hala, ndò azu bò kòb bëyidëgan, ndò angadzëṅ na ahaṅ bò, nyè na: ’A bod, kë minë anyaṅa ! Dze miawoean?’ 27 E nyò angabë atibili manyaṅ asogolo fò nyè, nyè na: Za atele wa na onë ndzoe ngë ki na ntsigi-ntol waan? 28 Dze yë wa ongayi ya ma woe akyaè ya ongawoe man Egipten angoge? 29 Awogo Moses angawog ebug dzi, ndò atub, akë tòbò a nnam Madian, ndò angabye bòn bëbè we. 30 «A mvus mimbu mëwom menyii, ndò englès angayene nyè a ntud-ndoan, a Sinai, a nkod-nnam, ai a minkol. 31 Ndò Moses angayen, angakam e dzam ayënë di, ndò asubu a osu na atoan yen e dzam angabë abòòg, ndò kiṅ Nti engasò we na: 32 Ma mënë Zamba bë esoa, Zamba Abraham ai Isaak ai Yakob. Moses akèè na anyaman, tègè fë zombo na abëbë we. 33 Nti nyè ai nyè na: tiigi e ngob enë wa a mëkol, amu e hom otëlë hili onë mfufub hom. 34 Mëtoan ya fò yen ndzug ayòṅ dama a Egipten, ndò fë mëwog bò ntad, ndò hm mayi sigi, mëkë bò kode. Ndò hm, etoa dzi, malom wa a Egipten. 35 E Moses nyò ya bëngasie, bò na: Za atele wa na onë ndzoe ngë ki na ntsigi-ntol? ṅnyè Zamba angalom na abò ndzoe ai nkode ai wò englès ya angayene nyè a ntud ele. 36 Angakuli bò, abò biyëṅ bi mam ai mëndëm a nnam Egipten, ai a e maṅ mavie, ai a nkod-nnam a taṅ bisëb mëwom mënyii. 37 Moses te ṅnyè angakòbò ai bòn bë Israel na: Zamba ayi mina tele profet hë anë ma, a zaṅ babënyòṅ. 38 Ṅnyè angabë atëlë a etogan bod a zaṅa nkod-nnam, ai englès akòbògò ai nyè a nkol Sinai, ai bëtara baan; ṅnyè angabi bibug bi enyiṅ, avë bia, 39 ṅnyè bandzëki yi na babò mëwog, ndò batimi nyè, minnëm miaban mimana të kilan hë a Egipten, 40 bò ai Aaron na: Komo bia bëzamba, bëwulu bia a osu. Amu, e Moses ya akuli bia a nnam Egipten nyò, biayëm ki e dzam ayenan ya ai nyè. 41 Mëlu mëte, ndò bëngakom mòn nyag, bëngazu nyè vë mëtunëṅa, bëngafon ai bisye ya mò maban. 42 Ndò Zamba angalum bò mvus, adzoge bò na bëlugu atitie, akyaè anë ntilan a kalara bëprofèt na: A ayòṅ Israel, a bisëb bisëb mëwom mënyii a nkod-nnam, yë mingatam ma sòṅ vë mëtunëṅa, ngë biyëm? 43 Mingabëgë tende Molok, ai otitie zamba waan Raifan, bihëgëlë ya mingakom na mialugu biè, ndò mayi mina vë a mëkaban omana lod Babilon. 44 Tende eboe ngam engabë bëtara a nkod-nnam, e kan e mod angakòbò ai Moses angabende nyè a akom; 45 Bëtara bëngakë ai nyè, anë mod a abog die, ai Yosua, eyòṅ bëngaboe mëyòṅ ya Zamba angatsidan bëtara a osu, akui a abog David, 46 ṅnyè angayen maa a mis më Zamba, ndò angadzaè na ayen etòbògò asu nda Yakob. 47 Salomon ṅnyè hm angaloṅ nyè nda. 48 Dzam da, Mëdaṅa-yobo atoa ki a e nda baloṅ ai mò, anë profèt adzo na: 49 Yob onë etoa ntomba dzama, si etoa ma etele-mëkol. Za akyaè nda miayi ma loṅ, Nti ṅnyè akòbò nala, ngë ki na za homo ayi bò awaè dama? 50 Së wò wama ngò ongakom e mam mësë ma a? 51 «A e bod minë nlo alèd ba, ai minnëm ai mëlò tègè ai nkëlan, mina fë miayi kanga Mfufub Nsisim kòm esë anë bë esoa. 52 Profèt mfe bë esoa bandzëki fëm? Bëngawoe e bod bëkada bò asòò-lë sosoo modo, sosoo mod te ṅnyè mingakuan ai nyè, miwoe fë nyè; 53 Mina minganòṅ mvende e kan benglès bëngabende mina, ndò miandzëki dzò baala.» 54 Awog bëngawog nala, ndò bëngafam, bëngaladan mëkëg asu die. 55 Atoa hm ndzalan ai Mfufub Nsisim ha, ndò abëbë a yob, ayënë duma Zamba, Yesus atëlë a mbo-nnomo Zamba, 56 nyè na: Mayen anë yob oyoo, mòn mod atëlë a mbo-nnomo Zamba. 57 Ndò babam a yob ete, bëmana budi mëlò maban, ndò bò bësë bakuban nyè a nyòl, 58 bësogolo nyè a ṅnyie tisòn a nsëṅ, bëngalum nyè ngòg. Bëwusnèt bëngadzoge biyie biaban a mëkol më man ndoman a si, dzoe na Saulus; 59 A bëwoe Stefanus ai ngòg ha, nyè avëë kiṅ, nyè na: A Nti Yesus, nòṅò nsisim wama. 60 Ndò aku ai mëbòṅ a si, angakòbò a yob ete na: A Nti, të walaṅ bò nsëm hi. Akòbògò nala, ndò akë a oyò.
81 Saulus angabë ai bò kiṅ na bëwoe nyè. Mëlu mëte, ndò mod efëma angakui nda-Zamba ya Yerusalem a nyòl; Bod bësë bëmana tsaman a nnam Yudea, ai Samaria, sësala hë apostel. 2 Bod bë ngogëlan bëziṅ bëngadzëb Stefanus, ndò fë bëngayëb nyè abui. 3 Saulus angavu ha, akë atsam nda-Zamba a mënda mënda ya anyian ete, adudugu fam ai bininga, afudigi bò a mbog. 4 E bod bësë bëngamana tsaman bëngakë hm bayëdan mbëmbë foe. 5 Filip angasigi a tisòn Samaria, angayëdan bò Kristus. 6 Minkunda mitoan fò vogolo e mam Filip akada bò, bëtoa nnëm mbòg mbòg eyòṅ bëwogo, bëyënë fë e mëndëm angabë abòòg. 7 Amu mvid minsisim mingakui abui bod a nyòl, miakë miabam a yob ete, abui mintèd ai mimbombog mingasyeban. 8 Ndò mintag mingadzie a tisòn te a tuud. 9 Mod ziṅ hala, dzoe na Simun, hala atari ya bò mëngaṅ a tisòn te ha, bod ya Samaria bëngakam, mod te nyè na anë mfaṅ mod, 10 bod bësë bëtoan nyè vogolo, atarigi a bòngò, akui a bënyia-bodo, bò na: E mod nyò anë e ngul Zamba ya baloe na ’Mod-ngulu’. 11 Bëngatoan nyè vogolo ha ban mëlu, hë etòm e mëngaṅ mëbòò na bëkam. 12 Eyòṅ hm bëngayëbë na Filip ayëdan mbëmbë foe edzoe Zamba ai dzoe Yesus Kristus, ndò fam ai bininga bëngaduuban. 13 Ndò fë tò Simun nyè angayëbë, ndò angaduuban, angalad hm fò Filip a nyòl ha, akama eyòṅ ayënë mëndëm ai mam më ngul mënen mëbòòban. 14 Eyòṅ apostel ya Yerusalem bëngawog na Samaria ayëbë ebug Zamba, ndò balom Petrus ban Yohannes we, 15 ndò bëngasigi, bëngakogëlan asu daban, na bëbi Mfufub Nsisim. 16 Amu hala te abë ki ku tò mod mbòg a nyòl; bëngaduuban hë ṅduan a dzoe Nti Yesus. 17 Ndò hm bakë babede bò mò, bëbii Mfufub Nsisim. 18 Simun angayi yen na nsisim wavëëban ai mbëdan mò apostel, ndò azu ai bò mòni, 19 nyè na: Mina fë vaan ma e ngul nyi, na e mod osë mayi bede mò, abi Mfufub Nsisim. 20 Petrus nyè ai nyè na: Ai wamen ai mòni woe, mimana ki ana, mbol wadzo na wakus efaè Zamba ai mòni! 21 Wabëlë ki dzom ziṅ ngë ngab e dzam di, amu nnëm woe wasëki tëtëlë a mis më Zamba. 22 Dzoge hm abe doe te a si, okogëlan ai Nti, eyòṅ te ayi wa dzu olam ya nnëm woe te, 23 amu mayen na onë a etòg nsëm, otii a mësuṅ më mbë nnëm. 24 Simun nyè ai nyè na: Mina, kogëlan ai Nti asu dama, asu yë na të mbë dzam ya mihë dzo ayënan ai ma. 25 Ndò hm bëngamëm fò, bëkada ebug Nti, ndò bëngadugan a Yerusalem, bëkëlë bayëdan mbëmbë foe a abui mal bësamaritan. 26 Ndò englès Nti adzo ai Filip na: ’Kodogo a si, okë a nnam a nkyè, e zen yatye a Yerusalem, esiigi a Gaza, zen te enë a nkod-nnam.’ 27 Ndò angakodo a si, ayëmë zen. Ondzi na, mod ya Etiopia, e mod nyò atoa miag, atoa nkala-byem bi Kandaki, nkukuma ya Etiopia, angasò na azu kogëlan a Yerusalem; 28 Hala angadugan ya ha, antoa hm a ekalig dzie a yob, angalaṅ profèt Isaias. 29 Ndò nsisim wadzo ai Filip na: ’Këlë wabie ebigidi dzi.’ 30 Ndò Filip akë mbil osu, awogo e mod nyò alaṅa profèt Isaias, nyè ai nyè na: ’Yë wawog fò e dzam walaṅ dili?’ 31 Mod te nyè na: ’Eyë mënë dzam wog ya, ngë mod ziṅ atimi ki ma?’ Ndò angakogëlan ai Filip. Filip abëdë a ebigidi, atòbò ai nyè. 32 Aboda ntilan angabë alaṅa angabë na: Bëngakë ai nyè hë anë ntomba ya bakë tsig; anë evol anë e man ntomba atëlë e mod atsig nyè mimvòd osu; nala, nyè të yaè anyu die. Amu enyiṅ dzie evaaban ya a si. 33 Asu edzòdi-nyòl dzie, ndò bandzëki tsig ntol woe, Za angalèè nlaṅ ya ngongo dzie? Amu enyiṅ dzie evaaban ya a si. 34 Ndò e miag mod hi wadzo ai Filip na: ’Masili wa na, za profèt akòbò ai nyè e dzam di? Yë nyè emen, yë mod mfë?’ 35 Ndò Filip abodo nkòbò, atari a aboda ntilan te, angakad nyè mbëmbë foe Yesus. 36 Bëkëlë a zen ha, ndò bakui a osoe, e miag mod hi wò na: ’Mëndim ma, dze yakaman na mëbë duuban?’ [ 37 ] 38 Ndò abende na bëtele ebigidi, bò bësë bëbè bësusu a mëndim, ai Filip ai e miag mod hi, ndò angadu nyè. 39 Eyòṅ bëngadugan bed a kindig, ndò nsisim Nti waanòṅ Filip, e miag mod hi tègè fë nyè bada yen, nyè angakë të fë dzam die ai mintag. 40 Bëngadugan wodan Filip a Azot. Angakë akë a mal mal, akë abende mbëmbë foe a bëtisòn bësë, akëlë kui anë azu kui a Sezarea.
91 Saulus antoa hë na andëgëlë bëyègè bë Nti, awoe fë bò. Ndò akë abë fada nen, 2 adzaè nyè bëkalara asu mënda bikoan ya Damaskus na, ngë ahë kòb bod bëziṅ bëbòò adzo zen, tò fam tò bininga, atindi bò ngadag, asò ai bò a Yerusalem. 3 Abog akëlë ha, hala akui ya babi a Damaskus, etye etye na, ndò mfyè ongasò a yob, okuban nyè a nyòl hë anë zeyaṅ, 4 ndò angaku a si, angawog kiṅ edzoo ai nyè na: A Saulus, a Saulus, a dze waluman ai ma? 5 Nyè na: Wa za, a Nti? E nyò mbòg nyè na: Ma mënë e Yesus waluman ai nyè. 6 Ndò hm, kodogo a si, onyian a tisòn; bayi wa kad e dzam wayean bò. 7 E bod bëngabë ai nyè a zen ha bëngalaṅan mënyu mëyoo, bëwogo hë kiṅ, të yen tò mod. 8 Ndò Saulus angatëbë a si; eyòṅ mis mëngayaaban nyè, të fë yen dzom. Bëngakë ai nyè, bëbëlë nyè a wò, ndò banyian ai nyè a Damaskus. 9 Ndò angatòbò nala, mëlu mëlè, të yen, të di, të nyu. 10 Ṅyègè ziṅan gabë a Damaskus, dzoe na Ananias; ndò Nti angadzo ai nyè a nlo na: A Ananias! Nyè na: Ma nyò, a Nti. 11 Nti ai nyè na: Tëbëgë, okë a ndzòṅ baloe na tëtëlë ndzòṅ, odzëṅ mod dzoe na Saulus ya Tarsis, a nda Yudas. Amu akogëlan, 12 ndò ayen mod a nlo dzoe na Ananias, mod te anganyian, abedëge nyè mò asu yë na adugan yen. 13 Ananias nyè na: A Nti, mëwog ya abui bod bëkòbògò adzo e mod nyòlò, e bëbe bë mam bësë abò mimfufub mie a Yerusalem. 14 Ndò fë bëfada bënen bavë nyè ngul ya abi e bod bësë baloe dzoe doe mu. 15 Nti ai nyè na: Këlëg, amu mod te anë ntòban na abëgë dzoe dama a bëhaiden, ai minkukuma, ai bòn bë Israel. 16 Amu mayi nyè lëdë e mam mësë ayi dzugi asu dzoe dama. 17 Ndò Ananias angatye, anyian a nda, ndò abede nyè mò, nyè na: A Saulus, a madzaṅ, Nti alom ma, e Yesus ayene wa a e zen ozaag, asu yë na odugan yen, odzie fë ai Mfufub Nsisim. 18 Etye etye na, byem bingasòdan nyè a mis anë bibas, angadugan yen. Ndò angakodo a si, aduuban. 19 Ndò angadi bidi, anòṅò ngul. Angatòbò ai bëyègè ya Damaskus hala ban mëlu; 20 Etye etye na, angayedan Yesus a mënda-bikoan na ṅnyè anë mòn Zamba. 21 E bod bësë bëwogo nala bëngakam, bò na: Së e mod nyò ṅnyè angabë amanëṅa e bod baloe e dzoe di ai si a Yerusalem a? Së asu te ndò asò ha na azu bò faṅ ngadag, akë ai bò a bëfada bënen a? 22 Ngul engafëdan naṅ Saulus a nyòl, angatoe Yuden ya Damaskus biboṅ, alëdëgë bò na Yesus ṅnyè anë Kristus mfaṅ. 23 A mvus ban mëlu hala, ndò Yuden bëngawoe oyili na bawoe nyè. 24 Ndò Saulus angayëm oyili waban. Bëfòmbògò mimbè mi dzal ai alu, ai amos, asu yë na bëwoe nyè. 25 Ndò bëyègè boe bënganòṅ nyè ai alu asë, ndò basuu nyè ai mfim osë a nkoe etere. 26 Eyòṅ angakui a Yerusalem, ndò angadzëṅ na anyian bëyègè a nyòl; hë da bò bësë bëmbarëga nyè, bò të ṅyëbë na anë ṅyègè. 27 Ndò Barnabas anganòṅ nyè, akëlë ai nyè abë apostel, ndò angamana bò lèè akyaè angayen Nti a zen a yob ai mbol angakad nyè, ai mbol angakòbò ai fim esë a dzoe Yesus. 28 Ndò angakaè na akë ai bò fufulu, asë ali, anë ali, a Yerusalem ha, akòbògò ai fim esë a ngul dzoe Nti, 29 angalèè, alaṅëdan ai Yuden bë Grek, bëngadzëṅ na bawoe nyè. 30 Ayëm babënyaṅ bëngayëm nala, ndò basigi ai nyè a Sezarea, bëlomo nyè a Tarsis. 31 Ekoan nda-Zamba engabë a saaṅ a Yudea asë, ai a Galilea ai a Samaria, eloṅëban, ewulugu, ekama Nti, ebuguban ai nkëan Mfufub Nsisim. 32 Ndò hm labò ha na, Petrus akëlë awulu ha, ndò angasigi mfag e mimfufub ya mingabë a Lidas. 33 Ndò angakòb mod ziṅ we, dzoe na Aineas, e mod nyò amana ya bò ntèd ha, abombo ya a enòṅ ha bisëb mwom. 34 Ndò Petrus adzo ai nyè na: A Aineas, Yesus Kristus abò wa mvoè. Kodogo a si, wamen okom enòṅ dzoe. Etye etye te, ndò angatëbë. 35 Ndò bod bësë ya Lidas bëngayen nyè, tò e ba ya Saron, ndò bëngavëṅan, bëngayëbë Nti. 36 Mininga ziṅan gabë a Yopa, dzoe na Tabita, nala watyan na: Ngòn nkògò. Angabë abòò abui mimbëmbë mi mam, atoa fë akab abui. 37 Mëlu mëte, ndò angakòn abui, awuu. Ndò hm bëngamana nyè wòbò, bëboe nyè a nda-yob. 38 Mbol ya Lidas anë babi ai Yopa, awogo bëyègè bëngawog na Petrus anë we, ndò balom nyè bod bëbè, bëngakogëlan ai nyè na: Zaag të a binë, të tigibi. 39 Ndò Petrus angakodo a si, akëlë ai bò. Eyòṅ angakui a ete, ndò bakë ai nyè a nda-yob; minkus misë mitëtëlan nyè babi, miyono, bëngalëdë nyè biwòman ai biyie bisë ya Dorkas angatiṅ eyòṅ angabë ai bò; 40 Ndò Petrus angakuli bësë a nsëṅ, ndò akud mëbòṅ, angakogëlan, ndò akilan mfag mbim ongabë, nyè na: A Tabita, tëbëgë. Ndò Tabita ayaè mis, ayënë Petrus, akomo etoa. 41 Ndò asam nyè wò, atëlë nyè a si. Ndò azu loe mimfufub ai minkus, atëlë nyè bò a zaṅ, atala. 42 Ndò adzo di angayëmëban a Yopa asë, abui bod bëyëbë Nti. 43 Ndò angabombo ban mëlu a Yopa abë Simun, nkomo bikop.
101 Mod ziṅan gabë a Sezarea, dzoe na Kornelius, atoa ndzoe ntèd bëzimbi, nkunda bëzimbi woe otoa dzoe na Italien, 2 e mod nyò atoa mod ngogëlan, akama fë Zamba, ai nyè ai nda-bod dzie esë, abò akab abui ai nnam, akogëlan ai Zamba kòm esë. 3 Ndò atoan yen a nlo anë englès Zamba anyian abë nyè dzam bò a awola ebulu, nyè ai nyè na: A Kornelius! 4 Ndò abëbë nyè a kumaa, wòṅ osusu nyè a nyòl, nyè na: Dze dzili, a Nti? Nyè ai nyè na: Ngogëlan dzoe ai akab doe biabed Zamba a mis anë mëtunëṅa. 5 Ndò hm, etoa dzi, lomo bod a Yopa, bëkë wa loe Simun ziṅ ya anë mëbadan na Petrus. 6 Anë a mëyëṅ abë Simun ziṅ, nkomo bikop, mod te abëlë nda a ntsag-man. 7 Ṅnyie anë englès alèègè ai nyè nyò angakë, ndò aloe bod bisye boe bëbè, ai man bëzimbi angabë nyè mëwog, akama fë Zamba, 8 ndò amana bò timi mam mësë, alomo bò a Yopa. 9 E kidi lende ya hala, e bod ba bëkëlë a zen ha, bëngasubu ya fë babi a tisòn, ndò Petrus abed a ndil a yob, na akogëlan a awola samëna. 10 Zie engakòn nyè, angayi e dzom adi. Bëkomëzan bidi ha, ṅnyè atari na anyaman kam nyò, 11 angayen yob oyoo, dzom engasus a si anë mod ndòmbò, esusu a si ai mëbug mënyii; 12 kan tsid mëkul esë ai e tsid yawòṅ a i abum a si, ai anòn ya yob etoa ete. 13 Ndò kiṅ yadzo ai nyè na: Tëbëgë a si a Petrus; woe, odi fë. 14 Petrus nyè na: Tègè ai dzom ziṅ nala, a Nti, amu mabë ya ki di e dzom enë mvit ngë eboe. 15 Ndò kiṅ yadzo ai nyè eyòṅ bèè na: E byem ya Zamba afubu ya, obë dzo na binë mvit. 16 E dzam di angabò nala biyòṅ bilè; etye etye, ndò ndòmbò eyie yadugan nòṅëban a yob. 17 Ntye ya Petrus akëlë atsog a nnëm woe mbol e dzam ahë yen di latyan, ondzi na, e bod ya Kornelius angalom ba bëngadzëṅ nda Simun, bëtëlë a mbè, 18 ndò baloe, bësili ngë e Simun anë mëbadan na Petrus anë a mëyëṅ hala. 19 Hala Petrus angënë abindigi e dzam angayen di, ndò nsisim wadzo ai nyè na: Bod bëlè badzëṅ wa; 20 Kodogo hm a si, osigi, okë ai bò. Të wasoo, amu ma mëlom bò. 21 Ndò Petrus asus mfag e bod ba bëngabë, nyè ai bò na: Ma nyò, ma miadzëṅ. Dze esò ai mina? 22 Bò na: Kornelius, ndzoe ntèd bëzimbi, sosoo mod, akama Zamba, ayòṅ Yuden asë lakam nyè. Mfufub englès okad na alom wa sòṅ loe okë a nda dzie, owog bibug bie. 23 Ndò anyili bò a nda ete, angabëlan ai bò. E kidi lende ya hala, ndò akodo a si, ayëmë zen ai bò. Babënyaṅ bëziṅ ya Yopa bëngabë ai nyè esamba ha. 24 A amos otsaag, ndò anyian a Sezarea. Kornelius angabë ayanga bò, ndò angamana togan bivuvuman bie ai mimfaṅ bëmvoe boe. 25 Eyòṅ hm Petrus anganyian, ndò azu toban ai nyè, alaban nyè a mëkol a si, angakogëlan. 26 Ndò Petrus angatele nyè a si nyè na: Tëbëgë a si; ma fë mënë hë mod. 27 Alèègè ai nyè ha, ndò anyian, akòbò abui bod bësë bëngamana sò, 28 nyè ai bò na: Mina bëben miayëm akyaè anë man Yuden mvende të tòbò fufulu ai ndzin, ngë akë a bimò abë nyè. Ndò hm të Zamba alëdë ma na mayean ki dzo ai tò mod ziṅ na anë mvit, ngë ki na mod anë eboe. 29 Asu te, eyòṅ bëlom ma loe, ndò mësò, të fèd tò ebug. Ndò hm masili etòm bëlom ma loe ai dzò. 30 Kornelius nyè na: Mëlu mënyii ana, akyaè awola di, mëngabë mëkogëlan a awola ebulu a nda dzama ; atëm na, mod antëlë ma osu, abëgë biyie bifyègè, 31 nyè na : A Kornelius, Zamba awog ngogëlan dzoe, ndò fë abaala akab doe ; 32 lomo hm bod a Yopa, obò na, e Simun anë mëbadan na Petrus azu ; anë a mëyëṅ a nda Simun nkomo bikobo, a ntsag maṅ. 33 Etye etye te, ndò mëngalom wa loe, ndò fë wa obò mbëṅ, mbol osò. Ndò hm bia bësë ba bitoa Zamba a mis na biavogolo e mam mësë Nti abende wa. 34 Ndò Petrus abodo nkòbò, nyè na: Mëyëm ya hm fò bëbëla na Zamba asëki timi, 35 dzam da, a ayòṅ asë, e mod akam nyè, abò fë sosoo, Zamba ayëbë nyè. 36 Angalom bòn bë Israel ebug, ayedëgan mbëmbë foe mvoè a anyu Yesus Kristus, ṅnyè anë Nti bësë; 37 Mina bëben miayëm e mam mëngalod a Yudea asë, atarigi a Galilea, a mvus ṅduan ya Yohannes angabende, 38 akyaè ya Zamba angawòbò Yesus ya Nazaret mbòn ai Mfufub Nsisim, ai ngul; Yesus te ṅnyè akëlë abò mbëṅ, asye e bod bësë ya Satan angatëgë, mbol Zamba angabë ai nyè. 39 Ndò hm bia bëben binë bëbòòlò bë e mam mësë angabò a nnam Yuden ai a Yerusalem. Ṅnyè bëngawoe, bëbomë nyè a klos; 40 Zamba angakuli nyè a sòṅ a amos lala, ndò fë angabò na ayene, 41 së hm ki na ayene bod bësë, hë da na ayene e bëbòòlò ya Zamba angatari tòb, bia, e bia ya bingadi ai nyè fufulu, binyuu fë ai nyè, a mvus yë na asò ya a bëkon. 42 Ndò angabende bia na biyedan nnam, bimëm fë na ṅnyè Zamba angatele ntsigi-ntol bënyiṅi ai bëwu. 43 Ṅnyè bëprofèt bësë babòòlò na e mod osë ayëbë nyè, ayi bëlë evaa-minsëm a dzoe die. 44 Petrus angënë akòbògò e mam ma, ndò Mfufub Nsisim angaku e bod bësë bëvogolo ebug a nyòl. 45 E bëyègè ya bëngasò ai Petrus ha, a bëngabë nkëlan, bëngakam na efaè Mfufub Nsisim yasoeban bëhaiden a nyòl. 46 Amu bëngabë bëwogo bò bëkòbògò minkòbò minkòbò, bëtaman fë Zamba. Ndò hm Petrus azu sili na: 47 Yë mod ziṅan gënë dzam kaman ai e bod ba mëndim na bëduuban nga, abim anë bò fë bëbi ya Mfufub Nsisim anë bia? 48 Ndò hm abende na bëduuban a dzoe Yesus Kristus. A mvus te, bëngakogëlan ai nyè na atòbò hala ban mëlu.
111 Ndò hm apostel ai babënyaṅ ya bëngabë a Yudea bawog na tò bëhaiden bëyëbë ya ebug Zamba. 2 Eyòṅ hm Petrus angabed a Yerusalem, e bod bëngabë nkëlan bëngasog ai nyè, 3 bò na: ’Onganyian abë e bod basëki nkëlan, ndò fë wadi ai bò fufulu!’ 4 Petrus atari hm na atimi bò mbëṅ mbëṅ, nyè na: 5 Mëngabë a tisòn Yopa, mëkogëlan, ndò mayen a nlo ha, dzom engasus a si anë mod ndòmbò, esusu, esòò a yob ai mëbug mënyii, ndò yazu kui abë ma. 6 Ndò mabëbë ete, mëtoan fòmbò, ndò mayen tsit ya si-ndon, tsit afan, ai e tsit yawòṅ a si, ai anòn ya yob. 7 Ndò mawog kiṅ edzoo ai ma na: ’Kodogo a si, a Petrus, owoe, odi fë.’ 8 Ma na: Tègè fò a Nti, amu e dzom ziṅ enë mvit ngë eboe yabë ya ki ma nyian a anyu. 9 Ndò kiṅ yasò a yob eyòṅ bèè na: Ebi ya Zamba afubu, të wadzo na binë mvit. 10 Angabòban nala biyòṅ bilè, ndò e byem bisë bi biadugan bed a yob. 11 Etye etye te, bod bëlè bëntëlë a nsëṅ e nda mëngabë; bëngalom bò abë ma, bësòò a Sezarea. 12 Ndò nsisim wadzo ai ma na mëkë ai bò, të malaṅëdan. Ndò bakë ai ma, ai e babëdzaṅ bësaman ba, ndò biakë nyian a nda mod te. 13 Ndò alèè bia mbol ya ayen englès a nda dzie, atëlë, akòbògò na: ’Lomo bod a Yopa, bëkë wa loe Simun ya anë mëbadan na Petrus, 14 ṅnyè ayi wa kad e mam wayi kodeban ete, ai wa, ai nda-bod dzoe esë.’ 15 Akaè mëngakaè na makòbò, ndò Mfufub Nsisim angasus bò a nyòl, e kan fë angasus bia a nyòl a mëtari. 16 Ndò hm mazu tsog ebug ya Nti angakòbò na Yohannes nyè angadu ai mëndim, mina miayi duuban ai Mfufub Nsisim. 17 Ndò hm, ngë Zamba emen avë bò efaè dzam dëda anë angavë bia eyòṅ bingayëbë Yesus Kristus, ma mënë za na mëzu kaman ai Zamba na abë dò bò? 18 Awog bëngawog nala, ndò bëngaku bivol, bëngalugu Zamba, bò na: Ndë Zamba avë ya tò bëhaiden na bëvëṅan a enyiṅ a ! 19 Antoa hm na, e ba ya bëngamana tsaman asu mindzug mingabò a etòm Stefanus bëkëlë kui a Fenisia, ai Siprus, ai Antiokia, bò të kad tò mod ziṅ ebug sësala hë Yuden. 20 Bod bëziṅ ya abë bò bëngabë ban bë Siprus ai ban bë Sirenea, mbò bëngasò a Antiokia, bëngalèè tò ai bë Grek, bëkada bò mbëmbë foe Yesus Kristus. 21 Wò Nti ongabë ai bò; abui dzam bëngayëbë, bëvëṅan abë Nti. 22 Ndò e foe adzo daban te nyi engakë kui a nda-Zamba ya enë a Yerusalem, ndò balom Barnabas na akë a Antiokia. 23 Ṅnyie anë angakui, ayënë ntotomamaa Zamba, ndò angatag, angayin fë bò bësë na bëyëm minnëm, bëlad ai Nti, 24 amu angabë mbëmbë mod atoa fë ndzalan ai Mfufub Nsisim, ai ṅyëbë. Ndò mod nkunda angabagban abë Nti. 25 Ndò hm akë a Tarsis na akë adzëṅ Saulus, 26 ayënë nyè, akëlë ai nyè a Antiokia. Ndò hm bazu tòbò ai nda-Zamba hala nguma mbu, bëyëgëlë abui bod; Eyë bëngayègè loe bëyègè a Antiokia eyòṅ osu na Bëkristen. 27 Mëlu mëte, ndò bëprofèt bëngatye a Yerusalem, bësòò a Antiokia. 28 Ndò mbòg ya abë bò, dzoe na Agabus, angatëbë a si, angakòbò ai ngul nsisim na mod zie azu bò a si esë; ndò fë zie engabò a abog Klaudius. 29 Mfa ya bëyègè, bëtsigi na mod osë ya abë bò alom e babënyaṅ ya Yudea man dzom, anë mod a nkoṅ ngul woe. 30 Ndò hm bëngabò nala, bëlomo fë bënyia-bod-mvia atom te a mò më Barnabas ai Saulus.
121 Dzam bò abog te, ndò nkukuma Herodes angafod bod ya nda-Zamba mò a nyòl na andëgëlë bò. 2 Ndò angawoe Yakob, manyaṅ Yohannes, ai nyamëla okëṅ. 3 Mbol angayen na nala waanyëb Yuden a nnëm, ndò hm angakë ai nala osu, abò na bëbi Petrus (Engabë a mëlu më mbaṅëla saṅ); 4 Abi angabi nyè, ndò afudi nyè a mbog, avëë nyè bikoa bëzimbi binyii na bëkala nyè, amu ayii na avë nyè nnam a mvus Paska. 5 Ndò hm bëngabaala Petrus a mbog ha. Nda-Zamba engakogëlan hm fò ai Zamba asu die ha abui. 6 Abog angakui na Herodes angayi ya na alëde nyè a nsëṅ, alu te aben, Petrus akëlë oyò a zaṅ bëzimbi bëbè, atoa mfaṅ a n a mësuṅ mëbè, bënòni bëkalëga a mbè a yob. 7 Ndò englès Nti angasò, mfyè ongafyè a nda ha. Ndò akud Petrus a avël, ahëlë nyè, nyè na: Kodogo a si avol; Ndò mësuṅ mëngasòdan nyè a mò. 8 Englès nyè ai nyè na: Tindigi kanda a angëdëg, obòd fë ngob dzoe. Ndò abò nala. Nyè ai nyè na: Bòdò ewòman dzoe, obie ma a zut. 9 Ndò angakui, angabie nyè, të yëm na e mam mayënan ma ai englès mënë bëbëla. Angabë atsogo na ayen a nlo. 10 Ndò azu lod abë nkala osu, ai e nyò bèè, bëngakë a mbè bikye wakë a tisòn, ndò ongayaaban ai oben, bëkui, bëngakë a ndzòṅ ziṅ; etye etye na, englès aligi nyè. 11 Petrus atomo nyòl, nyè na: Mëyëm ya bëbëla na Nti alom englès woe, ndò akode ma a mò më Herodes, ai a e dzam nnam Yuden ohë lam. 12 Eyòṅ angatoan yëm nala, ndò akë a nda Maria, nyia Yohannes ya baloe na Markus, mfag abui bod bëngamana koan, bëkogëlan. 13 Ndò angakud a mbè ya nsëṅ, ndò man mininga bisye dzoe na Roda angazu a mbè ; 14 Ayëm angayëm kiṅ Petrus, ndò andzëki yaè mbè ai e mintag mimbë bëlë nyè, adugan dugan mbil a nda, ndò akad bò na Petrus atëlë a mbè a nsëṅ. 15 Ndò badzo ai nyè na : Wakòn a nlo ! Nyè të hë ayin na adzo te anë ete. Bò na : Englès woe nyòlò. 16 Petrus nyè anë hë akud a mbè. Ndò bayaè, bëyënë nyè, bëngakam. 17 Ndò avë bò ndëm ai wò na bëku bivol, angalèè bò mbol Nti angakuli nyè a mbog, nyè na : Kaṅan kad Yakob ai babëdzaṅ e mam ma. Ndò angakui, akëlë hom mfë. 18 Ai mëlende më kidi, ndò mod enyënyam angabò a zaṅ bëzimbi ha, bësiligi e dzam ayenan ai Petrus. 19 Herodes nyè na bëkë badzëṅ nyè. Mbol hm bëngabò tègè nyè yen, ndò akaè na asili bëzimbi minsili ; avëë abende na bëwoe bò. Ndò akodo a Yudea, akëlë a Sezarea, antoa we. 20 Angabë awogo mbë olun ai bod ya Tir, ai e ba ya Sidon. Ndò bò bësë bakui kiṅ dzia ha, bësò nyè yen, hala te bëmana ya kom ai Blastus, e mod asye a etun-nda nkukuma, ndò basili na bakom etòm a evovoe, mbol eyë bidi bisòò a nda nkukuma asu dzal daban. 21 Amos ya bëngayili, ndò Herodes angabòd biyie bi nkukuma, ndò atòbò a etoa edzoe, angakòbò ai bò, 22 bod bëngabam, bò na: Kiṅ Zamba, së ki enyi mod! 23 Etye etye te ndò englès Nti angabimi nyè, etòm ya na andzëki vë Zamba duma; Bitum bingadi nyè, ndò angasuu ṅhëbë. 24 Ebug Zamba enganaṅ, ebulban. 25 Ndò Barnabas ban Saulus bëngadugan a Yerusalem, adzala bëngamana dzala esye dzaban, bësòò ai Yohannes ya bëloege na Markus.
131 Bëprofèt bëngabë a nda-Zamba a Antiokia na: Barnabas, Simeon ya bëloege fë na Niger, Lukius man Sirenea, Manas ya anganaṅ ai Herodes, adzoege efas nnam, ai Saulus. 2 Bëluugu Nti, bëkii fë bidi, ndò nsisim wadzo na: Telegan ma Barnabas ai Saulus a mgbag asu esye ya mëngaloe ya bò na bëbò. 3 Ndò bamana ki bidi, bëkogëlan, ndò babede bò mò, bësoe bò. 4 Mbol Mfufub Nsisim angalom bò nala, ndò bakë a Silisia, bëtye hala, bëngakë mfag ya Siprus. 5 Ndò basuan a Salamina, bëngabende ebug Zamba a mënda-bikoan më Yuden. Yohannes anë bò nkè-esye ha. 6 Ndò bëngawulu ai elon esë, akëlë kui a Pafos, ndò bakòb mod-mëbiaṅ ziṅ, profèt dzongo, man Yuden, dzoe na Bar-Yesus; 7 Angabë fufulu ai mëyian më edzoe nen Sergius Paulus, mfëfëg mod. E mod edzoe nyò abanda Barnabas ban Saulus, angayi na awog ebug Zamba. 8 Elimas, mod mëbiaṅ, nala ngò dzoe die latyan, angabò bò nkanga ha, angadzëṅ fë na avaè mëyian më edzoe nnëm a ṅyëbë. 9 Saulus ha, ṅnyè fë anë Paulus, atoa ndzalan ai Mfufub Nsisim, angabëbë nyè a toaṅ, 10 nyè na: A wa ya onë ndzalan ai mfugu osë, ai mvol esë, wa mòn Satan, wa nziziṅ sosoo, wayiyi ki tele adzo di na waandaman bëtëtëlë mëzen më Nti nga? 11 Wazu hm yen etoa dzi na wò Nti wayi wa ku a nyòl; wayi ku ndim, të yen nlo-dzobo man eban. Etye etye te, ndò nkud ai dibi biaku nyè a nyòl, angawulu anë ndòngò, adzëṅë e mod abi nyè a wò. 12 Ayen mëyian më ndzoe angayen e dzam angalod di, ndò angakaè na ayëbë, mbol ayëgëlë Nti angabi nyè a nnëm abui. 13 Ndò Paulus ai bëmvoe boe bëngatye a Pafos, bëkëlë a Perga ya Pamfilia. Ndò Yohannes akaèn ai bò ha, adugan a Yerusalem. 14 Bëkë bawulu hala, a bëtyege a Perga, ndò bazu kui a Antiokia ya Pisidia, ndò banyian a nda-bikoan, a amos sabbat, bëtòbò a si. 15 Amana bëngamana laṅ mvende ai bëprofèt, ndò bëdzoe bë nda-bikoan balom bò kad na: A babëdzaṅ, ngë mibëlë ebug ya miawone nnam ete, nòṅan nkòbò. 16 Ndò Paulus atëbë, avë ndëm ai wò, nyè na: A bod ya Israel, ai e bod miambara Zamba, vogolan. 17 Zamba ayòṅ Israel di angatòb bëtara, ndò fë angabede nnam eyòṅ bëngabë toa a Egipten, ndò angakuli bò we ai wò osama nyè; 18 Dzam bò mimbu mëwom mënyii, azombo bò a nkod-nnam 19 ndò angatsam mëyòṅ zamgbal a si Kanaan, avëë bò bilig biaban, 20 a taṅ mimbu dzam bò mintèd minyii ai mëwom mëtan. A mvus te, ndò avë bò bëtsigi-mintol, akui abë profèt Samuel. 21 A hala ngò bëngayag na hë bëbii nkukuma, ndò fë Zamba angavë bò Saul, mòn Kis, mod ya nda-bod Benyamin, a taṅ mimbu mëwom mënyii, 22 ndò angavaè nyè, atele bò David nkukuma, ndò angadzo ai nyè abòòlò na: Mëyen David, ṅnyè ayi bò ṅyian wama osë. 23 A mëki moe ngò Zamba angavë Israel nkode Yesus, anë angakag; 24 osusua yë na azu, Yohannes angatari bende nnam Israel osë ṅduan avëṅan. 25 Eyòṅ hm Yohannes angambara abim mbil die, nyè na: Miavëg na menë za? Së ki ma mënë nyè. Dzam da, mod azu ma a mvus, a makyëbë ki na mësòdi nyè ngob a mëkol. 26 A babëdzaṅ, bòn ya ayòṅ Abraham ai e mina ya miambara Zamba, mina minë ai ebug akode dzi. 27 Amu e bod bëtoa a Yerusalem ai bëdzoe baban bandzëki nyè yëm, ndò, a bëdzòsò nyè, bëngadzala bibug bëprofèt ya balaṅ a sabbat osë, 28 bò të yen etòm ziṅ a yayean ai awu a nyòl dzie, ndò basili Pilatus na awoe nyè. 29 Ndò bamana dzala e mam mësë mëngatilban a nyòl dzie, bësuu nyè a klos, bëfudi nyè a sòṅ. 30 Ndò Zamba angavëlë nyè a bëkon, 31 mëlu mëlu ayenëṅe e bod bëngatye ai nyè a Galilea, bëbëdë a Yerusalem, bod bëte mbò bënë bëbòòlò boe a nnam etoa dzi. 32 Ndò hm bia biabende mina e dzam bëngakag bëtara, 33 na Zamba akpaèn dò abë bia, bòn baban, akuli Yesus a sòṅ, e kan enë ntilan a salmen bèè na: Wa onë mòn wama, ana ngò mëbye wa. 34 Mbol ahëlë ya nyè a bëkon, ayi ki fë dugan boe, amu angadzo na: Mayi mina vë mfufub maa David. 35 Asu te fë adzo a salmen mfë na: Wayi ki dzoge na Mfufubu woe aboe a sòṅ. 36 Mfa David, a mvus ya na amana ya dzala ṅyian Zamba a abog die, ndò awu, ndò bëngaboe nyè ai bë esya, ayënë eboe ya sòṅ. 37 Hë da, e nyò ya Zamba angavëlë, andzëki yen eboe ya sòṅ. 38 A babëdzaṅ, yëman hm na, asu die ngò bëngabende mina evaè minsëm, (ai e mam mësë ya mvende Moses), mbol ya mingabë ki dzam kyëbë a adzo a mam mëte ai mvende Moses, 39 e mod osë ayëbë nyè, abi mëkyëbë. 40 Mibò okala na të e mam mëngadzoban a bëprofèt mayenan ai mina: 41 Yenan, mina bod bë ebyandi, kaman dò, midimëzan fë, amu e dzam mayi bò a mëlu maan, dzam ya miasëki dzam ṅyëbë ngë bëhë lèè mina dò. 42 Ndò bakui a nsëṅ, bod bëngakogëlan ai bò na bëdugan bò kad mam mëte e sabbat mbòg atsaag. 43 Amana ekoan ngogëlan engaman, abui bë Yuden ai bëyëṅ bënganòṅ ṅyëbë, bëtoa bod bë ngogëlan, bëngabie Paulus ai Barnabas, bò bëngalèè ai bò, bëyini bò na bëbò mban a maa Zamba. 44 Eyòṅ sabbat angakui, tisòn esë ekoan na yawog ebug Nti. 45 Ayen Yuden bëngayen minkunda mi bod, bëmana dzie ai ziṅ, bëngatòli e mam Paulus angabë adzoo. 46 Paulus ai Barnabas bëngakòbò ha ai azombo asë, bò na: Mina bihë yean tari kad ebug Zamba. Ndò hm mbol miatëb dzò, miyënë fë na miakyëbë ki ai enyiṅ kòm, ndò hm biakë a bëhaiden bënë. 47 Amu nala ngò Nti angabende bia, nyè na: Matele wa na onë mfyè asu bëhaiden, asu yë na obò akode akëlë kui a mëbug më si. 48 Bëhaiden bëngayi wog nala, bëngatag, bëluugu Nti, bëyëbëgë, e ba bësë ya bëngatele asu enyiṅ kòm. 49 Ndò ebug Nti engatsaman a mal mësë. 50 Yuden bëngasogolo e mimfaṅ mi bininga midiṅi ngogëlan, ai bëdzoe bë tisòn, ndò bëngatsag efëma ha a nyòl Paulus ai Barnabas, ndò batsidan bò a si dzaban. 51 Ndò të bëngakud mbulug ya mëkol maban, bëkëlë a Ikonium, 52 bëyègè bëngadzie ai mintag, ai Mfufub Nsisim.
141 Ndò fë labò a Ikonium anë angabë bò fulu, bënyian a nda-bikoan Yuden, bëngakòbò e kan yë na mod nkunda Yuden ai bë Grek angayëbë. 2 E Yuden bandzëki ṅyëbë ba bëngafòṅòlò, bëfugu ezëṅ a minnëm bëhaiden asu babënyaṅ. 3 Bëngatòbò hala ban mëlu, bëkada ebug ai fim ai azombo, bëfidigi Nti ya abòòlò bò a ebug ntotomamaa woe, abò na mëndëm ai biyëṅ bi mam biyenan a mò maban. 4 Nkunda bod ya tisòn hi okaban hm fò ngam ngam, bëvòg bëtoa ai Yuden, bëvòg ai apostel. 5 Mbol hm bëhaiden ai Yuden, ai bëdzoe baban bëngazu vëgëlë bò tsag, bëlumu fë bò ngòg, 6 bò bëyëmë nala, ndò batub a bëtisòn ya Lukania a bënë na: Listra, ai Derba, ai nnam ngòdò hala, 7 awe ngò bëngabë bëkada mbëmbë foe. 8 Mod ziṅan gabë a Listra, atoa ebog, atòbògò a mëkol a yob, angabyali nyia a abum ebog, hala abë ya ki wulu tò eyòṅ. 9 Ndò e mod nyò awog Paulus akòbògò. Paulus abëbë nyè, ayënë na abëlë ṅyëbë ya akodeban, 10 ndò adzo a yob etere na: ’Tëbëgë tëtëlë ai mëkol moe.’ Ndò e mod nyò angabumi a si, angawulu. 11 Minkunda mingayi yen e dzam Paulus angabò di, bëvëë kiṅa nkòbò Lukania, bò na: Bëzamba bësò a binë mu ai nyòl mod; 12 Bëngaloe Barnabas na Yupiter, Paulus ṅnyè bëloege na Hermès, mbol ṅnyè akalëgi nkòbò. 13 Tempel Zes angabë a tisòn ha; fada woe angakë ai nyag, ai bikada mëbui a mbè dzal, anë hm ai abui bod ha, na bavë mëtunëṅa. 14 Awogo apostel Barnabas ban Paulus bëngawog e dzam di, ndò bamana nyab biyie biaban, bënyaban a bod ete ha, bëngayedan a yob, 15 bò na: A bod, dze miabò na? Bia fë binë bod anë mina, biakad mina mbëmbë foe na midzoge e bivovol bi mam bi, mivëṅan abë Zamba ya avëë, ṅnyè angakom yob ai si, ai maṅ, ai e byem bisë binë ete. 16 Okoba, angadzoge mëyòṅ mësë na mëwulu a mëzen maban. 17 Tò nala, andzëki dzoge emen nala tègè ai wusnèt, amu angabë abòò mbëṅ, alomo mina mvëṅ a yob ai e mëbog mawum bidi, ndò angadzala mina minnëm ai bidi, ai mintag. 18 Tò nala, nkòbò hi të bò na bod bëwudan, na të bavë bò mëtunëṅa. 19 Ndò Yuden bëngatye a Antiokia ai a Ikonium, bëmana bòlan bod, ndò balum Paulus ngòg, bëkë badudu nyè a si, bëkuli nyè a tisòn a nsëṅ, bëtsogo na bëwoe ya nyè. 20 Ndò bëyègè bëngaloṅ nyè edinga a nyòl, atëbë, anyian a tisòn. Amos otsaag hala, ndò ban Barnabas bëngakë a Derba. 21 Ndò bamana yedan mbëmbë foe a tisòn te, abui bod bëvëṅan fë bëyègè, ndò badugan a Listra, ai Ikonium, ai a Antiokia, 22 bëwonëṅe minnëm bëyègè, bëlëbë fë bò na bëbò mban a ṅyëbë ai na biayean bi abui mindzug, abog te bizu kë nyian a edzoe Zamba. 23 Ndò bëngatòb bënyia-bod-mvia, anë e nda-Zamba nyili, bëngakogëlan, bëkii bidi, ndò bayome bò abë Nti ya bëngayëbë. 24 Ndò bakë bakë a Pisidia hala, bëkui a Pamfilia, 25 ndò bakad ebug a Perga, bësigi a Atalia, 26 bëkodo hala, bëyëmë zen a Antiokia, ahala ngò hm, a ntotomamaa Zamba a yob, bëngavëëban esye ya bëngabë bëdzalëga dzi. 27 Akui bëngakui, ndò bamana koan nda-Zamba, bëngalèè e mam mësë ya Zamba angabò ai bò, ai na angayaè bëhaiden mbè ya ṅyëbë. 28 Ndò hm bëngatòbò ai babënyaṅ ban mëlu.
151 Ndò hm fò bod bëziṅ bëngatye a Yudea, bëngayëgëlë babënyaṅ na: ’Ngë bandzëki mina kele akyaè ya mvende Moses, miasëki dzam kodeban.’ 2 Abui moman ai minkòbò bibolan a zaṅ Paulus ban Barnabas ai bò, ndò bayili na Paulus ai Barnabas ai bod bëfë ya abë bò bëbed a apostel ai bënyia-bod-mvia a Yerusalem asu adzo te. 3 Ndò nda-Zamba engayaan ai bò ha, bëdaṅa a Fenisia ai Samaria, bëngalèè mbol ya bëhaiden bavëṅan, bëngabò na babënyaṅ bësë bëwog mintag. 4 Akui bëngakui a Yerusalem, ndò nda-Zamba yasoan ai bò, tò fë apostel ai bënyia-bod-mvia, bëngalèè e mam mësë Zamba abò ai bò. 5 Ndò bod bëziṅ ya ekòg bëfarisea, a bëngasò a ṅyëbë, batëbë a si, bò na: ’E bod bëvòg bali bayean kelëban, bibende fë bò na bëbaala mvende Moses.’ 6 Apostel ai bënyia-bod-mvia bëkoan hm na batoan yen adzo te. 7 Mbol nkòbò ongayi bò abui, ndò Petrus atëbë a si, nyè ai bò na: A babëdzaṅ, miayëm mbëṅ mbëṅ na, ban mëlu ana, e hom hi, ndò Zamba angatòb na, a anyu dama, bëhaiden bëwog mbëmbë foe, bëyëbë. 8 Ndò hm, Zamba ya ayëm minnëm, angabòòlò dò, avë bò Mfufub Nsisim anë angavë bia, 9 ndò hm dzom ziṅ yasëlan ki fë bia ai bò, a ṅyëbë, ṅnyie anë amana ya bò fubu minnëm. 10 Ndò hm, dze mingazu ya bobolo Zamba ha, na abede bò adid mbëgë a bitul, mbëgë ya tò bëtara, tò bia bëben biangabë ki dzam bëgë? 11 Ndò hm biayëbë ai ntotomamaa Nti Yesus na biayi kodeban anë bò fë. 12 Ndò nda esë engaku evol, bëngavogolo Barnabas ban Paulus bëlèègè bò e mëndëm mësë ai biyëṅ bi mam bisë Zamba angabò bëhaiden a mò maban. 13 Amana bëngamana lèè, bëtòbò bivol, ndò Yakob adzo na: A babëdzaṅ, vogolan ma. 14 Simun amana ya lèè e kan ya Zamba angatari ṅyëbë na anòṅ ayòṅ a zaṅ bëhaiden asu dzoe die. 15 Bibug bëprofèt biatoban ai nala, akyaè anë ntilan na: 16 A mvus hala, mayi dugan sò, mëdugan loṅ ebëm David ya engaku a si, mëdugan loṅ bilig bie, mëmana biè kom mbëṅ. 17 Lëntoa hm na, e bod bësë bëvòg bayi dzëṅ Nti ai e mëyòṅ mësë bayi kali dzoe dama a nyòl dzaban; Nti emen abò mam ṅnyè akòbò nala, 18 e mam bazuzu ya bayëm koba. 19 Asu te mayen na biayean ki bada ndëgëlë e bod ya basò a bëhaiden, a bëngavëṅan abë Zamba, 20 bëtil bò hë ntilan na bësaala bëzëzë bëzamba, ai bisog, ai e tsit bëbòòlò kiṅ, të dzò tsig, ai mëki. 21 Amu yë na, asòò kidi, Moses abëlë e bod bayedan nyè a tisòn esë, a mënda-bikoan eyòṅ balaṅ nyè a sabbat osë. 22 Ndò apostel, ai bënyia-bod-mvia, ai nda-Zamba esë bëngayili na bëtòb bod a zaṅ dzaban, bëlom bò a Antiokia fufulu ai Paulus ban Barnabas; bëngabë na: Yudas, a bëloege na Barsabbas, ai Silas, bod ya bëngabë bëtëbë bë osu a babënyaṅ, 23 ndò batil, bëvë bò kalara te a mò na: Apostel ai bënyia-bod-mvia, babënyaṅ, biatil babëdzaṅ ya bëhaiden ete a Antiokia, ai Siria, ai Silisia: Miavuma! 24 Mbol biawog na bod bëziṅ ya abë bia basò mina ndëgëlë ai mam mëziṅ ya mëngadzugulu mina minnëm, mam mëte, biandzëki mò bende, 25 ndò bitogan fufulu, ndò biyen na bialom mina bod bëziṅ esamba ai mindindiṅ mian Barnabas ban Paulus, 26 bod ya bëngavë ya enyiṅ dzaban asu dzoe Nti waan Yesus Kristus. 27 Ndò hm bilom Yudas ban Silas na bëkad fë mina e mam ma a anyu. 28 Amu tò bia, tò Mfufub Nsisim, biayen na biayean ki mina dugan bag mbëgë mfë olodo abim layean, na: 29 asaala biyëm batuni bëzëzë bëzamba, ai mëki, ai e tsit bandzëki tsik kiṅ, ai bisog; ngë misaala mò, miabò mbëṅ. Mitòbògò mvoe. 30 Ayaan bëngayaan ai bò, ndò bakë a Antiokia, bëkoan abui bod, bëvëë bò kalara. 31 Bëngayi laṅ, bëngatag fò asu awone te. 32 Mbol angabë na Yudas ai Silas bò bëngabë fë bëprofet, bëngawone babënyaṅ, bëvaa bò fim a nyòl ai abui bibug, 33 ndò bëngatòbò hala ban mëlu, bëligi babënyaṅ ai mvoè, bëdugan abë e bod bëngalom bò. 35 Paulus ai Barnabas bëntoa a Antiokia, ai abui bod bëfë, bëyëgëlë, bëkada mbëmbë foe ebug Nti. 36 A mvus mëlu hala, ndò Paulus adzo ai Barnabas na: Ndugan doe ai mvus, bikë yen babëdzaṅ e tisòn esë ya bingayedan ebug Nti ete, biyen mbol bënë. 37 Barnabas angabë ayi na bëkë ai Yohannes ya baloe na Markus. 38 Paulus angayen na, mbol Yohannes angakaèn ai bò a Pamfilia, të kë ai bò a esye, nyè na të bakë ai nyè. 39 Ndò mod nkòbò angabò bò ha, ndò batsaman, Barnabas anòṅò Markus, akëlë ai nyè a Siprus, 40 Paulus atòbò Silas, babënyaṅ bëtama bò maa Nti, ndò akë. 41 Ndò angadaṅ a Siria, ai Silisia, akë awone mënda më Zamba.
161 Ndò azu kui a Derba ai a Listra. Ṅyègè ziṅan gabë we, dzoe na Timoteus, mòn ngòn Yuden engabë ebëlë ṅyëbë, esya atoa man Grek, 2 babënyaṅ ya Listra ai Ikonium bëkama nyè abui. 3 Paulus angabë ayi na akë ai nyè, ndò anganòṅ nyè, akëlë nyè, etòm e Yuden bëngabë mimfag mite. Amu bësë bëngabë bëyëmë na esya anë man Grek. 4 A bëkëlë bakë a bëtisòn ha, bëbendëge bò na bëkala oyili ya apostel ai bënyia-bod-mvia bëngayili a Yerusalem. 5 Mënda më Zamba mëngawon a ṅyëbë, taṅ dzaban engabui amos osë. 6 Ndò balod a Frizia ai nnam Galatika; Mfufub Nsisim angatele bò mvende na të kòbò ebug a Azia. 7 Ndò bazu a Muzias, bëdzëṅë na bakë a Bitinia, nsisim Yesus të bò vë ngul. 8 Ndò hm basaala Muzias, bësigi a Troas. 9 Ai alu, ndò Paulus ayen a nlo ha na, mod ziṅ ya Masedonia atëlë, akogëlan ai nyè na: Daṅa a Masedonia mu, ozu bia vòli. 10 Ayen angayen nala a nlo, bingadzëṅ na bikë a Masedonia, mbol bingayen na Zamba aloe bia na bikad bò mbëmbë foe. 11 Ndò bingatye a Troas, bikëlë tëtëlë hala a Samotraka; amos otsaag hala, bikëlë a Neapolis, 12 bikodo hala, bikëë a Filipi, edzëdzala ya Masedonia, si edzoe Roma. Bingatòbò hala ban mëlu. 13 A amos sabbat, ndò bingakui a mbè tisòn a nsëṅ, babi ai osoe, bitsogo na nda-ngogëlan enë ete, ndò bingatòbò a si, bingalèè ai e bininga bëngamana sòṅ hala. 14 Ndò mininga ziṅ, dzoe na Lidia, (abòò makit ai eyie abui mòni yavie), asòò a Tiatira, ambarëga Zamba, angavogolo ha; Nti angayaè nyè nnëm na avogolo e mam ya Paulus angabë akòbògò. 15 Eyòṅ angaduuban ha ai nda-bod dzie esë, ndò akogëlan ai bia, nyè na: Ngë mina miyen na mayëbë Nti, zaan a nda dzama, mitòbò ete. Angayag fò bia a kiṅa i dzam te. 16 Angabò hm na, eyòṅ bingakë a ngogëlan ha, ndò man mininga bisye atoban ai bia, abëlë nsisim mvigi; man mininga te angasye bati boe abui mòni ai mvigi te. 17 Ndò angazu abie Paulus ai bia bësë, abama a yob, nyè na: E bod ba bënë bësye bë Zamba ya minkut ete, mbò bayedan mina zen akode. 18 Angabò e dzam di ha mëlu mëlu. Mbol Paulus angatëg ai adzo te, ndò akilan, akòbò ai ngul nsisim na: Madzo ai wa a dzoe Yesus Kristus na okodo nyè a nyòl. Ndò fë akodo awola te aben. 19 Bati boe bëngayi yen na afidi mëbugëban daban adzaṅ ya, ndò babi Paulus ban Silas, bëkë badudu bò a nsëṅ angara a bëtëbë bë osu, 20 ndò bakë ai bò a bëtsigi bë ntol bënen, bò na: E bod ba bamana bia dzugulu nnam, bënë Yuden, 21 ndò bayedan mëtum ya biayëm ki baala ngë abò mò, mbol bia binë ban bë Roma. 22 Nnam osë ongawog bò abe, bëtsigi bë ntol bëmana nyab biwòman biaban, ndò babende na bëyit bò; 23 Ndò bëngayit bò abui, bëwoa bò a mbog, ndò babende nnòni mimbog na atoan bò kala. 24 Angayi wog abende di, ndò nnòni mimbog nyò anganòṅ bò, afudi bò a mbog ya a nnëm etere, amana bò faṅ mëkol a mbog. 25 Dzam bò ai zaṅa lu ha, Paulus ban Silas bëngakogëlan, bëyiaga Zamba bia, e mimbog mivòg mingavogolo bò. 26 Etye etye na, ndò si engatigëdan eyëgan e kan yë na mimfim ya nda-mimbog mingafoṅan. Ndò fë mimbè misë mingayaaban, mësuṅ mësòdan. 27 Ndò nnòni mimbog ahëbë, antala anë mimbè mimbog miyoo, ndò adudu nyamëla okëṅ dzie, antëlë na awoe emen, amu atsogo na mimbog mimana tub. 28 Ndò Paulus azu dzo a yob ete na: Obë bò wamen abe ziṅ, amu bia bësë binë ha. 29 Ndò abò na bëzu ai ngoe, avolo nyian ha, anganyaman, ndò aku Paulus ban Silas osu, 30 akui ai bò a nsëṅ, nyè ai bò na: A e bod ba, mayean bò dze na mëkodeban? 31 Bò na: Yëbëgë Nti Yesus, abog te wayi kodeban, ai wa, ai nda-bod dzoe esë. 32 Ndò bëngakad nyè ebug Nti, ai nyè ai e bod bësë bëngabë a nda dzie. 33 Ndò anòṅ bò ai alu te asë, amana bò sob mëki më ebom, ndò angaduuban, ai nyè ai emboe bësë etye etye te; 34 Ndò akë ai bò a nda, abòò bò bidi, angatag ai nda-bod dzie esë mbol angayëbë Zamba. 35 Kidi engayi lëndë, ndò bëtsigi bë ntol balom bod baban, bò na: Kaṅan soe e bod bala. 36 Ndò nnòni azu lèè Paulus e dzam di nyè na: «bëtsigi bë ntol bëlom mina soe. Ndò hm, etoa dzi, kuan, mikëlë mvoè.» 37 Paulus nyè ai bò na: ṅnyie anë mimana ya bia yit a bod ete, tègè ai na bisie etòm ziṅ, bia binë hm bòn bë Roma, mifudi bia a mbog, ndò etoa dzi mingayi ya bia soe a omomoa nga? Tègè ai dzom ziṅ nala! Bò bëben bëzaag bia kuli a nsëṅ! 38 Ndò e bod ba bakë kad bëtsigi bë ntol nkòbò hi. Awogo bëngawog na bënë bòn bë Roma, bëngakòn wòṅ, 39 ndò bazu kogëlan ai bò, bëkuli bò a nsëṅ, ndò basili bò na bëkodo të bò a dzal. 40 Akui bëngakui a mimbog, ndò bakë abë Lidia, ndò bayen babënyaṅ, bëmana bò wone, ndò batye, bëkëlëg.
171 Ndò balod a Amfipolis ai a Apolonia, bëkëlë a Tesalonika mfag nda-bikoan Yuden engabë. 2 Ndò Paulus angakë nyian abë bò, mbol fulu dzie engabë, bësabbat bëlè, alaṅëdan ai bò bibug ya mfufub ntilan, 3 afëlëgan, alëdëgë na Kristus angabë ayean dzugi mintye, akui a bëkon, ai na: ’Kristus te ṅnyè mabende mina.’ 4 Bëvòg ya abë bò bëyëbë fò, bëbaman fë ai Paulus ban Silas, mod nkunda bë Grek, bod bë ngogëlan, ai abui mimfaṅ mi bininga. 5 Yuden bëngabò mbë nnëm ha, ndò bamana koan bëbe bëzëzë bë bod ya nsëṅ angara, bëngabò engëngam a tisòn, ndò bazu a nda Yason, bëngadzëṅ bò, na bëzu ai bò a bod ete. 6 Mbol bandzëki bò yen ete, ndò bakë ai Yason, ai babënyaṅ bëfë hala abë bëdzoe bë tisòn, bëngabam, bò na: E bod bakë badzugulu si esë bësò ya kui abë bia, 7 mbò Yason asoan ai bò. Bò bësë badaṅ mëmvende më Kaizer mbol batele nkukuma mfë bò na ṅnyè anë Yesus. 8 Nnam ai bëdzoe bë tisòn bëngayi wog e mam ma, fëg engadzaṅ bò. 9 Ndò Yason ai e bod bëvòg bëngayaan eban, ndò basoe bò. 10 Etye etye te, ai alu ha, ndò babënyaṅ bëngalom Paulus ban Silas a Beroa. Akui bëngakui we, ndò bakë a nda-bikoan Yuden. 11 E Yuden ba bëngabë evovoe abui, alodo e ba ya Tesalonika, ndò bëngayëbë ebug ai evag, anë amos, bëbindigi ntilan, na bëyen kamëna eyë mam mëte mënë nala. 12 Abui ya abë bò bëngayëbë, ai abui mimfaṅ mi bininga bë Grek, ai fam. 13 Yuden ya Tesalonika bëngayi yëm na Paulus ayedan ebug Zamba a Beroa, ndò bakë we, bëngafòṅòlò bod, bëdzèègè bò fëg. 14 Etye te, ndò babënyaṅ bëngalom Paulus na akë, akëlë kui a maṅ, ndò Silas ban Timoteus bëngaligi hala. 15 Ndò hm bënganòṅ Paulus, bëkëlë ai nyè a Atena, ndò badugan ai mbanda hi asu Silas ban Timoteus na bëtye avol avol, bëkë nyè kòb we. 16 Ntye Paulus ayanga bò ha, ndò nnëm wamana nyè dig ai olun a abum, mbol tisòn engabë atuud ai bëzëzë bëzamba. 17 Angakad hm laṅëdan a nda-bikoan ai Yuden, ai bod bë ngogëlan, ai e bod ya atoban ai bò amos osë a angara. 18 Mimfëfëg miziṅ ya ngam Epikurea ai a ngam Stoa bëngafëdan ai nyè, bëvòg bëngadzo na: Ayiyi na adzo dze ai nlòban alòb hi? Bëvòg bò na: Ayene anë anë mbëgë foe bëzamba bëfë; mbol angabë ayedëgan Yesus ai akui-lë sòṅ. 19 Ndò banòṅ nyè, bëkëlë ai nyè a Areopagus, bò na: Yë binë fò dzam yëm akyaè mkpamaṅ ayëgëlë wayëgële hi onë? 20 Amu wazu ai bia biyëṅ bi mam a mëlò. Biayi na biayëm mbol mam mëte matyan. 21 Bod bësë ya Atena ai bëyëṅ ya ete bëngabë hë minlaṅ, bëyii na bayëm ngë mkpamaṅ ziṅ onë a nnam. 22 Ndò Paulus angatëbë a zaṅ Areopagus, nyè na: ’A bod ya Atena, mayen na mialugu Zamba a dzam asë. 23 Amu, a mëhë kë mawulu, makë mayen byem bi olugu bian, ndò mëyen alatar ai ntilan vi na: Asu «e zamba ya biayëm ki». E dzi ya miazu ya mialugu, të dzò yem, ndzò hm mabende mina. 24 E Zamba angakom si esë ai e byem bisë binë ete, ṅnyè anë Nti yob ai si; atoa ki a bëtempel bëngaloṅ ai mò, 25 basye ki nyè ai mò më bod, -antoa hë anë ayaṅan të ai dzom ziṅ,- ṅnyè avë bisë enyiṅ, ai ṅhëbë, ai byem bisë. 26 Atyege abë mod mbòg mbòg, ndò angakom ayòṅ bod asë ya atoa a si-ndon, ṅnyè atele mëbog më mbu, atele fë bitòbògò biaban, 27 na bëdzëṅ Zamba, kama të na bënë nyè dzam wodan, bëyënë fë nyè, ndò fë asëki ai mod osë ya abë bia oyab. 28 Amu bianyiṅ a bë nyè, bifoṅan, bitoa abë nyè, akyaè ya bëyia bë mvèt baan bëngadzo na: Kë amu binë mvòṅ bod dzie! 29 Mbol hm binë mvòṅ bod Zamba, biayean ki tsog na Zamba afulan ai mvòd, ngë silba, ngë ngòg, ngë dzom ya akëṅ ngë fëg mod engabonde. 30 Mbol ya Zamba angabudi mis a mëbog më ndimi mëte, abende hm bod etoa dzi na bëvëṅan hom osë, 31 amu angatele amos ya ayi tsig si-ndon ntol a sosoo, abë e mod angatele, avëë nyè ndi a bod bësë, mbol angakuli nyè a bëkon. 32 Bëngayi wog etudi akui-lë sòṅ ya bëwu, bëvòg bëngawoe, bëvòg bò na: Bimvogolo fë wa e dili amos mfë. 33 Na, ndò Paulus angakodo abë bò hala. 34 Bod bëziṅ bëngalad të nyè a nyòl ha, bëngayëbë, bëvòg ya ete moe na: Dionisius ya Areopagus, ai mininga dzoe na Damaris, ai bod bëfë fë esamba ai bò hala.
181 A mvus hala, ndò angakaèn ai bod ya Atena, akëlë a Korinti. 2 Ndò atoban ai man Yuden dzoe na Akila, byalibyali ya Pontus, hala andëm sòṅ a Italien, ai ngal Priskila, mbol Klaudius angavë abende na Yuden bësë bëkodo a Roma; ndò akë abë bò; 3 mbol hm bò bësë bëngabë bëyëmë asu esye da, ndò angatòbò abë bò, angasye. Bëngabë bëloṅo bëtende. 4 Akarëga kë laṅëdan a nda-bikoan a sabbat osë, adzëṅë na atoe Yuden ai Grek biboṅ. 5 Asòò Silas ban Timoteus bëngasò a Masedonia, Paulus antoa evag eyëgan a akad ebug, ayini Yuden na Yesus anë Kristus. 6 Mbol bëfëdan ai adzo te abui, bëmgbaligi fë nyè, ndò asamëza biyie bie, nyè ai bò na: Mëki maan mësoeban mina a nlo. Atarigi etoa dzi, zen enë ma fili na mazu kë a bëhaiden. 7 Akodo hala, akëlë a nda mod ziṅ dzoe na Titus Yustus, mod te alugu Zamba; nda dzie engabë babi ai nda-bikoan. 8 Krispus, ndzoe nda-bikoan, ayëbë Nti, ai nyè ai nda-bod dzie esë, ndò fë abui bod ya Korinti bëngawog, bëyëbë, bëngaduuban. 9 Ndò Nti adzo ai Paulus a nlo ai alu na: Obë mbara. Kòbògò hë nkòban, të waku evol, 10 amu mënë ai wa, ndò fë mod ayi ki wa tsag etòm na abò wa abe, amu yë na abui bod bënë ma e tisòn nyi. 11 Ndò angabombo hala nguma mbu ai ngòn esaman, ayëgëlë bò ebug Zamba. 12 Galius atoa eyian edzoe a Akaia, ndò Yuden bësë bëngawoe oyili, bëbii Paulus, bëkë ai nyè a nsëṅ mëdzo, 13 bò na: E mod nyò asòṅ bod na bëlugu Zamba të baala mvende. 14 Paulus adzo na ayaè anyu, Galius nyè ai Yuden na: Ngë atoa asu etòm ziṅ, a Yuden, ngë matoan vogolo sòman dzaan, 15 ngë etòm enë asu ayëgëlë ai moe, ai mvende dzaan, mina bëben yenan. Mayi ki bò ntsigi ntol e mam mala. 16 Ndò angakuli bò a nda-mëdzo a nsëṅ. 17 Ndò bò bësë bëngabi Sosten, ndzoe nda-bikoan, bëngayit nyè hala, a nsëṅ nda-mëdzo. Galius të bisi tò dzam ete. 18 Paulus angadugan tòbò hala ban mëlu ai babënyaṅ, ndò ayaan ai bò, ayëmë zen a Siria, Priskila ai Akila bënë ai nyè eyòṅ ha; angasode nlo a Kenkrea, amu angalig mëtiṅ nala. 19 Ndò bakui a Efesi, aligi bò hala, nyè akëlë a nda-bikoan, angalaṅëdan ai Yuden. 20 Ndò bakogëlan ai nyè na atòbò hala man eban, nyè të yëbë, 21 dzam da, ndò ayaan ai bò, nyè na: Mayi dugan sòṅ a bë mina, ngë Zamba adiṅ. Ndò atye a Efesi, 22 asusu a Sezarea, abëdë, akë sug nda-Zamba, ndò atye, akëlë a Antiokia. 23 Ndò angabombo hala eban, angakë akë a minnam ya Galatika ai Frizia, akë awone bëyègè bësë. 24 Man Yuden ziṅ, dzoe na Apolos, byalibyali ya Alesandria, ayëmë nkòbò ha, angasuan a Efesi, ayëmë mfufub ntilan mbëṅ. 25 Bëngayëgëlë nyè zen Nti, angavu ha, akë alèè, ayëgëlë mam më Yesus mbëṅ mbëṅ, afyaṅan bò na ayëmë hë ṅduan Yohannes. 26 Ndò hm akaè na akòbò ai fim a nda-bikoan. Priskila ban Akila bëwogo nyè ha, ndò baloe nyè a fëfël, bëngatoan nyè timi zen Zamba. 27 Mbol ayi na adaṅ a Akaia, babënyaṅ bëwogo fò nala mbëṅ, ndò batil bëyègè na bëbëlan ai nyè; Angayi kui we, angavòli bëyëbë abui ai maa. 28 Amu atoege Yuden biboṅ mbëṅ, a bod ete, alëdëgë bò ai mfufub ntilan na Yesus anë Kristus.
191 Ndò hm labò ha na, Apolos angabë a Korinti, ndò Paulus akalan a mvus nnam ha, asuan a Efesi, atoban ai bëyègè bëziṅ, 2 nyè ai bò na: Yë mingabi Mfufub Nsisim eyòṅ mingasò a ṅyëbë? Bò ai nyè na: Biabëbë ya ki wog na Mfufub Nsisim anë. 3 Ndò afèd, nyè na: Mingaduuban a dze? Bò na: Bingaduuban ṅduan Yohannes. 4 Paulus nyè na: Yohannes angadu ṅduan avëṅan, akada bod na bëyëbë e mod azu nyè a mvus, na bëyëbë Yesus. 5 Bëngayi wog nala, ndò bëngaduuban a dzoe Nti Yesus, 6 ndò Paulus abede bò mò, Mfufub Nsisim asòò bò a nyòl, bëngakòbò minkòbò, bëkada mam bëprofèt. 7 Bod bëte bësë bëngabë dzam bò awom ai bëbè. 8 Ndò anyian a nda-bikoan, angakad kòbò hala ngòn ngòn elè, alaṅëdan, ayini mam më edzoe Zamba. 9 Mbol bëvòg bëbòò aled-minnëm, bëbòò fë mëlò, ndò alig bò, anòṅò bëyègè, angayëgëlë bò amos osë a sikulu Tiranus. 10 Nala ongaboban mimbu mimbu mibè, e ndie yë na, e bod bësë bëtoa a Azia bëngawog ebug Nti, tò Yuden, tò Grek. 11 Zamba angabò mimfaṅ biyëṅ bi mam a mò më Paulus, 12 e kan yë na bënòṅò bënapken ai biyie ya bihë namba nyè, bëkëlë biè bede minkokòn, akòn daban angamana lèd, bëbe minsisim bëtubu. 13 Mingëngaṅ mi Yuden miziṅ ya bëkëlë bawulu nala mingadzëṅ na mialoe dzoe Yesus na basye e bod bëmbë bëlë bëbe minsisim, bò na: ’Mavu wa sòṅ a dzoe e Yesus ya Paulus ayedan.’ 14 Bòn bë fada nen Yuden ziṅ dzoe na Skeva, bò zamgbal, mbò bëbòò e dzam di. 15 Ndò mbë nsisim adzo ai bò na: Mayëm Yesus, mëyëmë fë Paulus, mina minë bëza? 16 Ndò e mod mbë nsisim angabë a nyòl nyò ayëlë bò a nyòl, ayëmë ai bò, abada bò. Bëngabë bëtubu a nda te hë minsò ai mëvëṅ a nyòl. 17 E Yuden bësë ai Grek bënyiṅi a Efesi bëngayëm e dzam di, ndò wòṅ ongaku bò bësë a nyòl, bëngalugu dzoe Nti Yesus. 18 Abui bod ya bëngayëbë bëngazu, bëmëmë, bëkulan mëkëṅ maban. 19 Abui bod ya bëbòò mëbiaṅ bëngamana sòṅ ai bëkalara, bëmana digi a mis më bod bësë, ndò balaṅ taṅ, bëyënë na minsaṅ mi silba tòzin mëwom mëtan. 20 Na, ai ngul Nti, ebug engabë enaṅa, ewonëban. 21 A mvus e mam ma, ndò Paulus anòṅ oyili na azu daṅ a Masedonia ai Akaia, akëlë a Yerusalem. Nyè na: A mvus yë hala, mayean kë yen Roma. 22 Ndò alom bëkè boe bëbè, Timoteus ban Erastus a Masedonia. Emen aligi ban mëlu a Azia. 23 Mëlu mëte, mod etòm abole asu zen. 24 Amu mod ziṅ dzoe na Demetrius, nlui byem bi mvòd, akarëga kom byem bi olugu Artemis ai silba, bod bisye boe bëdzaa mòni etere abui, 25 ndò aloe bò ai e ba bësë bësye kan te, nyè na: A bod, kë miayëm na eyë biayen enyiṅ a esye dzi a! 26 Ndò miayen miwogo fë na, së ki hë a Efesi ha, dzam bò a nnam Azia osë, e Paulus nyò akë amana sòṅ bod abui, adzo na e byem ya bakom ai mò biasë ki bëzamba. 27 Ndò hm, së ki hë makit maan mmò mazu ku a si etam, tò ben tempel zamba mininga Artemis nënë azu wu ntug, bayi nyè vaè olugu woe, abim anë nnam Azia osë ai si esë bialugu nyè! 28 Mbol bod bëngawog nala, bëmana wog olun, bëngabam, bò na: Artemis ya Efesi anë dzom nen! 29 Ndò tisòn engadzie ai engongom, bò bësë bëkuban a nsëṅ bivoe, bakë badudu Gaius ai Aristarkus ya Masedonia, biyòṅ bi Paulus. 30 Paulus angayi ha na anyian a bod ete, ndò bëyègè bandzëki nyè dzoge. 31 Bod bëziṅ ya edzoe ya Azia, bëmvoe boe, bëlomo nyè kad na të akë a nsëṅ bivoe. 32 Bëvòg bëbama na, e ba bëvòg bëbama mbol mfë. Amu fëg engadzaṅ ekoan bod dzi, abui bod të toan yëm asu dze ben bëngakoan ete. 33 Ndò Yuden bazu tele Alesander osu. Alesander nyè ai bod na bëku bivol, ayi na atimi bod e dzom yalod. 34 Ṅnyie anë bëngayëm na anë man Yuden, ndò bësë babede kiṅa yob, dzam bò mëwola mëwola mëbè, bò na: Artemis ya Efesi anë dzom nen! 35 Ndò nsaṅa bëkalara angasuu nnam minnëm a si, nyè na: A bod ya Efesi, mod mfe ayëm ki na tisòn ya Efesi endzò yakala nda Artemis nen ai ehëgëlë yasò a yob? 36 Mbol hm asëki dzam bisoo, miayean vòli minnëm, të miabò nduduman. 37 Amu misò ai e bod ba, bò ha basëki endaman, ndò fë bandzëki mgbali zamba waan. 38 Ngë Demetrius ai bod boe bëbëlë hm etòm ai mod, mëmos mëdzo mënë, eyian edzoe etoa fë, bëkëlë dzòs mëdzo maban. 39 Ngë miadzëṅ hm dzam afë, layi komëban a ekoan nnam. 40 Amu bënë bia dzam sòman na biadzugulu nnam ana, bia tègè ai mbol binë dzam timi abui enyënyam asë di. Ndò angakòbò nala, asoe ekoan nnam.
201 Eyòṅ engongom engaman, ndò Paulus alom loe bëyègè, angawone bò, asugu bò, ndò angatye, akëlë a Masedonia. 2 Ndò akë adaṅ minnam mite, akë awone bò ai abui bibug, asò kui a nnam Grek, 3 abombo hala ngòn elè. Atëlë na akë a Siria, Yuden bëngalam nyè, ndò ayili na adugan, akë lod a nnam Masedonia. 4 Sopatros, mòn Pirrus ya Beroa, Aristarkus ai Sekundus ya Tesalonika, Gaius ya Derba ai Timoteus, Tikikos ai Trofim ya Azia bënë ai nyè eyòṅ ha. 5 Ndò bakë osu, bëkë bia yanga a Troas; 6 mfa waan, a mvus mëmos bivovoe bi mbaṅëla, ndò bingayëm dulu, bitye a Filipi, bisò bò kòb a Troas a mvus mëlu mëtan, ndò bingabombo hala mëlu zamgbal. 7 A amos osu ya sòndò, bimana ya koan ha na biabëg mbaṅëla, Paulus angalèè ai bia ha, mbol ayean kë a dulu e kidi lende ya hala, ndò angandama nkòbò akui a zaṅ-alu. 8 Abui mëlamba mëngabë a nda-yob, mfa bingabë nkoan. 9 Ndò ndoman mod ziṅ, dzoe na Etukos, angatòbò a wundi, oyò ongandëṅ nyè a mis ha abui, amu Paulus angabë hë akëlë ai nkòbò osu, ndò oyò ongalod nyè nkoṅ, ndò asòdan a nda lala a yob, akuu a si, bëngabodo nyè hë mbim. 10 Ndò Paulus asus, adiban nyè a nyòl, awuban ai nyè, nyè na: Të miabò enyënyam, amu enyiṅ enë nyè a nyòl. 11 Ndò abed, abëgë mbaṅëla, angadi, ndò adugan bodo nkòbò kòm, akui a kidi yalende, na, ndò azu tye. 12 Ndò banòṅ e mòngò nyò atala, bëmbëlë ngul a nyòl ha abui. 13 Bia bingakë osu, a mal, bisuan a Asos, etere ngò biyean nòṅ Paulus, amu emen angamana kom nala, ayi na awulu a nkot si. 14 Eyòṅ angatoban ai bia a Asos, ndò bianòṅ nyè, bikëlë a Mitilene, 15 ndò bingadugan tye hala amos otsaag, bisò kui a Kios ayat, amos mbòg, bikui a Samos, amos otsaag bisò kui a Miletus. 16 Paulus angayen na biayean saala Efesi, asu yë na të adugan bombo a Azia. Amu ayi du na, ngë anë ebugbu, atòbò a Yerusalem a amos Pentekoste. 17 Atoa a Miletus, ndò angalom loe bënyia-bod-mvia ya nda-Zamba a Efesi. 18 Asuan bëngasuan abë nyè, nyè ai bò na: Mina bëben miayëm akyaè mënganyiṅ ai mina, atarigi amos osu ya mëngatele akol a Azia, 19 mësye Nti ai edzòdi nyòl esë, ai bibëga a mis, ai e mëbobëla ya Yuden bëngalam ma, 20 miayëm na mandzëki mina sòli man dzam ziṅ atoa ai mfi, mëbò të mina nyè kad, mëyëgëlë mina a mënda mënda ai a bod etere, 21 mëbende Yuden ai Grek avëṅan abë Zamba ai ṅyëbë bayëbë Nti waan Yesus a kpaam. 22 Ndò hm etoa dzi, Nsisim wabi ma, mëbëlë na mëkëlë a Yerusalem, ma tègè yëm e dzam layanga ma we, 23 hë na, Mfufub Nsisim wabòòlò ma a tisòn esë na mësuṅ ai mindzug biayanga ma. 24 Dzam da, madaṅ ki yen na enyiṅ enë ai ma mfi, hë na mëmana mbara mbil wama, mëmana fë esye ya Nti Yesus angavë ma, na mëbòòlò mbëmbë foe ntotomamaa Zamba. 25 Etoa dzi hm, mayëm na e mina bësë ba a mëkëlë mayedan edzoe a zaṅ dzaan, miayi ki fë ma dugan yen asu. 26 Asu te makad mina amos di na mënë a saaṅ asu mëki maan mina bësë. 27 Amu mandzëki mina dimi akad ṅyian Zamba osë. 28 Kalëgan mina bëben, ai nkunda osë ya Mfufub Nsisim ongatele mina bë asu zoa na mikala nda-Zamba ya angakus a mëki moe. 29 Mamen mayëm fë na, ṅnyie anë mayi tye, ayòg zë layi sò abë mina, tègè ai nyindi, 30 ndò ben fë bod bëziṅ ya zaṅ dzaan bayi tëbë, bëngakòbò të dòkten mvol asu yë na bëdudu bëyègè a batoṅ bò. 31 Asu te hm, mikalëga, mitsogo na, mimbu mimbu milè, mandzëki mina vòd lëb, ai bibëga a mis, mbombòg mbombòg. 32 Etoa dzi hm, malig mina a mò më Zamba, ai a ebug ntotomamaa woe, ṅnyè anë dzam loṅ, avaa fë ngab elig a zaṅ e ba bësë bënë mimfufub. 33 Mandzëki yi silba mod ziṅ, tò ki mvòd ngë ewòman. 34 Mina bëben miayëm na e mò mama ma mëngasye asu mëyaṅan mama ai e ma më e bod bëngabë ai ma fufulu. 35 Mëngalëdë mina mvulna a dzom esë na eyòṅ mod wasye nala, wavòli mintèd, bitsogo hm fë bibug ya Nti Yesus angakòbò na: Anë maa abui, eyòṅ wavë alodo anë eyòṅ waanòṅ. 36 Akòbògò nala, ndò akud mëbòṅ ai bò bësë, angakogëlan. 37 Bëngayon fò abui, bëngawuban ai Paulus a kiṅ, 38 bëbëlë abui mëlunga ha ai ebug angadzo na bayi ki dugan yen asu die. Ndò bakë nyè lëdë a mal.
211 Eyòṅ hm bingatye ai dulu, na bimana ya yaan ai bò, ndò biawulu tëtëlë, bikui a Kos, amos samëna bikui a Rodos, bikodo hala bikui a Patara, 2 ndò biayen titimi edaṅa a Fenisia, bibëdë ete, ndò biakë. 3 Bingayi yen Sipra nali, ndò bialig nyè a mbo-ngala, bikëlë a Siria, bisusu a si a Tir. Amu etere ngò bësuugu mimbëgë ya titimi. 4 Ndò biatoban ai bëyègè hala, bibombo hala mëlu zamgbal; ndò bakad Paulus ai ngul nsisim na të abed a Yerusalem. 5 Eyòṅ mëlu maan mëngatoban, ndò bingatye, bikëlë. Bësë bëngazu yaan ai bia, ai bininga ai bòngò, azaag kui a ṅnyie tisòn, ndò biakud mëbòṅ a si a ntsag-maṅ, bingakogëlan, 6 ndò biamana yaan ha, bibëdë a mal, bò bëdugan a mal maban. 7 E dulu bisòò a Tir angayi mana, ndò biakui a Ptolemais, bisugu babëdzaṅ, bitòbò ai bò amos mbòg. 8 Amos otsaag, ndò biatye, bikëlë a Sezarea, ndò bianyian a nda Filip, nkada foe, mbòg ya bod zamgbal, ndò biatòbò abë nyè. 9 Angabë abëlë mintud mi ngòn milè, bëkòbògò anë bëprofèt. 10 Ndò biatòbò hala ban mëlu, ndò profèt ziṅ dzoe na Agabus angasò a Yudea, 11 ndò azu abë bia, anòṅò kanda Paulus, atindi emen a mëkol ai a mò, nyè na: Mfufub Nsisim adzo na: E mod anë ai e kanda nyò, na ngò Yuden bayi nyè faṅ ngadag a Yerusalem, bëkalan nyè a mò bëhaiden. 12 Ṅnyie anë bingawog nala, ai bia, ai bod bë dzal, bingakogëlan ai nyè na të abed a Yerusalem. 13 Paulus nyè na: Dze ndzò miabò a miayon na, midzugulu ma nnëm ha? Amu, hë ma ma, mënë a ngomëzan së ki hë na bëfaṅ ma ngadag, mënë fë a ngomëzan na mëwu a Yerusalem asu dzoe Nti Yesus. 14 Mbol bingabë ki nyè dzam tëgë, ndò biatòbò bivol, bia na: ṅyian Nti obòban. 15 A mvus mëlu mëte, ndò biamana komëzan, bibëdë a Yerusalem. 16 Bëyègè bëziṅ ya Sezarea bëngasò ai bia hala, ndò bakë ai bia abë Mnazon man Sipra, nnomo ṅyëgëlë, bitòbò abë nyè. 17 Bingayi kui a Yerusalem, babëdzaṅ bësoan fò ai bia ha ai mintag. 18 Amos otsaag hala, ndò Paulus akë ai bia abë Yakob, bënyia-bod-mvia bësë bëtoa ha. 19 Ndò asug bò, angalèè bò mbombòg mbombòg e mam ya Zamba angabë abòòg a bëhaiden ai wò esye woe. 20 Ndò bawog, bëngalugu Zamba, bò ai nyè na: A madzaṅ, wayen na bakuda bakuda ya Yuden bëyëbë ya, hë da bò bësë bëngënë bëlada a mvende. 21 Ndò bawog adzo doe na wayëgëlë e Yuden banyiṅ a zaṅ bëhaiden na bëvoan Moses, wa ai bò na të bakele bòn baban, tò ki na bëbaala mëtum maan. 22 Bibò hm ya? Bëyean ya wog na onë nsoan mu. 23 Ndò hm, obò e dzam biayi wa kad di. Bibëlë bod bënyii ha a bëngalig mëtiṅ a nyòl dzaban. 24 Nòṅò hm bod bëte, okë fububan ai bò fufulu, oyaan fë asu daban, asu yë na bësode bò ntui, abog te bod bësë bayi yëm na e mam balèè a nyòl dzoe masëki ete, dzam da na wawulu tëtëlë, obaala fë mvende. 25 Asu e bëhaiden bëngavëṅan, bia bëben bingatil bò, biyënë na bayean saala e tsid bëngatuni bëzëzë bëzamba, bësaala mëki, ai mintui biyëm, ai bisog. 26 Ndò Paulus anòṅ e bod ba amos otsaag hala, afububan ai bò, anyian a tempel na akad bò amos ya mëmos më efubu-nyòl mayi toban, ndò angatòbò we akui amos ya mod osë azaag vë mëtunëṅa. 27 Hala te e mëlu zamgbal ma mëngayi ya toban, ndò Yuden ya Azia bëngayen nyè a tempel, ndò bamana fòṅòlò nnam, bëfudi nyè mò a nyòl, 28 bò na: A bod bë Israel, këan bia. E mod nyò ṅnyè aluman ai nnam, ai mvende, ai e hom hi, ayëgëlë bod nala hom osë, ndò ben anyili bë Grek a tempel, amana sòṅ ai eboe a mfufub hom te. 29 Anë hm ha na, bëngatari yen Trofim man Efesi esamba ai nyè a tisòn, bëngatsog hm na Paulus anganyian ai nyè a tempel. 30 Tisòn esë eyoge, abui bod akoan, ndò banòṅ Paulus, bëdudu nyè a tempel a nsëṅ, ndò mimbè mingafèdëban etye etye. 31 Mbol bëdzëṅë na bawoe nyè, ndò e foe nyi yakë kui abë ndzoe bakuda bëzimbi na Yerusalem osë anë engëngam. 32 Ndò anòṅ bëzimbi etye etye, ai bëdzoe mintèd bëzimbi, ndò asigi mbil mfag bëngabë. Ayen bëngayen ndzoe bëzimbi ai bëzimbi bëben, bò tègè bada yit Paulus. 33 Ndò ndzoe bakuda bëzimbi asubu babi, anòṅò nyè, ndò abende na bëfaṅ nyè ai mësuṅ mëbè, angasili na anë za ben ai e esye ya abò a enyiṅ dzie. 34 Nkunda bod ontoa kiṅ mëndzaṅ. Mbol angabë ki dzama toan yëm etòm ben mbol engëngam engabë, ndò abende na bëkë ai nyè a yat bëzimbi. 35 Eyòṅ angakui a zitèb, lëntoa na bëzimbi bëmbëgë nyè a yob etòm efida bod, 36 amu nkunda bod ongabë obiege nyè, bò na: Këlëg ai nyè! 37 Bëtëlë ha na banyian ai Paulus a yat bezimbi, ndò adzo ai ndzoe bakuda bëzimbi na: Yë mënë wa dzam kad man ebug? E mod nyò nyè na: Dze yë wayëm nkòbò Grek? 38 Së wa onë e man Egipten andëmë sie etòm ha, ndò angakë ai bod bakuda bënyii a baluman bita a nkod-nnam a? 39 Paulus nyè na: Ma, mënë man Yuden, byalibyali ya Tarsis a Silisia, byalibyali ya e tisòn mod ayëgan ki. Ndò makogëlan ai wa na odzoge ma mëkòbò ai nnam. 40 Ndò avë nyè ngul te. Paulus atëbë hm a zitèb, ndò asili nnam na oku evol. Bëkuu hm a miëëṅ. Angakòbò ai bò a nkòbò ebrea na:
221 A bëtara ai babëdzaṅ, vogolan anë makaman ai mamen abë mina. 2 Bëngayi wog anë akòbò ebrea, bëngafëdan ku bivol. Nyè na: 3 Mënë man Yuden, mëngabyali a Tarsis, a Silisia, mënganaṅ e tisòn nyi, mëyègè sikulu a mëkol më Gamaliel, akyaè mvende bëtara enë aye, mëmvamëṅan ai Zamba anë mina bësë miabò dò ana hi. 4 Mëngaluman ai e zen nyi bita bi awu, mëfaṅa fam ai bininga ngadag, mëfudigi bò a mbog, 5 akyaè ya fada nen ai bënyia-bod-mvia bësë bënë ma dzam bòòlò, amu mbò bëngavë ma e bëkalara makë lëdë babëdzaṅa Damaskus, na mëzu ai e bod bënë we a mësuṅ a Yerusalem, asu yë na bëndëgëlë bò. 6 Ndò hm layenan ai ma a mëkëlë a zen ha, mëngasubu ya babi a Damaskus, ai zaṅa mos, etye etye, ndò mod mfyè angakubi ma a nyòl, 7 mëkuu a si, mëngawog kiṅ edzoo ai ma na: A Saulus, a Saulus, a dze waluman ai ma? 8 Ndò mayalan na: Wa za a Nti? Nyè ai ma na: Ma mënë e Yesus man Nazaret ya waluman ai nyè. 9 E bod bëngabë ai ma esamba bëyënë mfyè, dzam da të wog e kiṅ ekòbògò ai ma. 10 Ndò mazu dzo na: Mëbò ya, a Nti? Nti ai ma na: Kodogo a si, okë a Damaskus, awe ngò bayi wa kad e mam mësë wayean bò. 11 Mbol duma mfyè hi ongadim ma mis, e bod bëngabë ai ma esamba bëngalëdë ma zen, bëbëlë ma a wò, ndò bakui a Damaskus. 12 Ananias ziṅ, mod ya abaala mvende mbëṅ, e Yuden bësë ya bëmbë toa we bëkama fë nyè, 13 asòò abë ma, ndò azu ma tëbë babi, nyè ai ma na: A madzaṅ Saulus, mis mëyënë wa! Awola te aben, mëngayen nyè. 14 Nyè na: Zamba bëtara atòb wa na oyëm ṅyian woe, oyen sosoo, owog fë kiṅ ya anyu die, 15 amu wayi nyè bò mbòòlò a zaṅ bod bësë asu e mam ongayen, owogo fë. 16 Ndò hm, etoa dzi, asu dze wayanga? Kodogo a si, oduuban, minsëm mie mivaaban eyòṅ waloe dzoe die. 17 Ndò layenan ai ma na, eyòṅ mëdugan ya a Yerusalem, mëkogëlan a tempel, mëntoa anë a biyëyëm, 18 ndò mayen nyè adzoo ai ma na: Vologo tye a Yerusalem mbil, amu bayi ki ṅyëbë mbòòlan wabòòlò ma. 19 Ma na: A Nti, bayëm na ma mëngabë lomo bò a mbog, mëyidi e bod bayëbë wa a mënda-bikoan mësë, 20 ndò fë eyòṅ mëki më mbòòlò woe Stefanus mëngasoe a si, ma mëngabë fë mëtëlë hala, mëtoa ai bò kiṅ, mëkalëga biyie bi e bod bëwoe nyè. 21 Nyè ai ma na: Këlëg, amu malom wa a mëyòṅ oyab. 22 Bëngavogolo nyè akui a ebug dzili, ndò babede kiṅ bò na: Vagan e mod nyòlò a si bëkon, amu akyëbë ki na anyiṅ. 23 Bëngabam fò, bësamza biwòman, bëwoaga mbulug a yob, 24 ndò ndzoe bakuda bëzimbi abende na bëkë ai nyè a yat bëzimbi, bëyit nyè ai nkas, asu yë na bëyëm etòm bëhë fam nyè a nyòl ai dzò. 25 Amana bëngamana nyè faṅ ngadag, Paulus nyè ai ndzoe ntèd bëzimbi angabë atëlë hala na: Yë mibëlë ngul ya ayit mòn nnam Roma ya bandzëki tsig adzo die nga? 26 Awog angawog nala, ndò ndzoe ntèd bëzimbi akë kad ndzoe bakuda bëzimbi na: Dze ohë yi bò dzi? Kë e mod nyò anë mòn nnam Roma a! 27 Ndò ndzoe bakuda bëzimbi azu, nyè ai nyè na: Tam ma kad na: Onë mòn nnam Roma nga? Nyè na: Owe. 28 Ndzoe bakuda bëzimbi nyè na: Mëngakus etye te ai abui mòni. Paulus nyè na: Mfa wama, mëngabyali ai nkoṅ te. 29 Etye etye te, e bod bëngabë yi nyè yit bëmana subu a mvus, ndzoe bakuda bëzimbi angambara, ayëm angayëm na Paulus anë mòn nnam Roma ai na angabò na bëfaṅ nyè ngadag. 30 E kidi lende ya hala, mbol ayi na atoan yëm asu dze Yuden bëngasòman nyè, ndò asuu nyè, abende na bëfada bënen ai nda-mëdzo esë bikoan, ndò bazu ai Paulus, atele nyè bò osu.
231 Paulus angafòmbò bëtsigi mintol, nyè na: A babëdzaṅ, mazuzu ya manyiṅ Zamba a mis anë mbëmbë mòn nnam, azaag kui amos ya ana. 2 Ananias, fada nen, avëë fò e bod bëmbë tëlë hala ngul na bëbimi nyè a anyu. 3 Paulus nyè ai nyè na: A mfim wafum, kë Zamba ayi wa bimi a! Ndò otoa ha otsigi ntol wama anë mvende yayi, odaṅa daṅ a fë mvende, a wabende na bëbimi ma nga? 4 E bod bëmbë tëlë hala bò na: Fada nen ṅnyè watè nga? 5 Paulus nyè na: A babëdzaṅ, mandzëki yëm na anë fada nen. Amu anë ntilan na: Wayean ki kòbò abe ai ndzoe nnam woe. 6 Paulus angayi yëm na ngam dzia enë bësadukea, e ngam fòg etoa bëfarisea, ndò avë kiṅa nda-mëdzo ete ha na: A babëdzaṅ, mënë man farisea, mòn bëfarisea, ndò badzòs ma di hë etòm afidi ai etòm akui-lë sòṅ bëwu. 7 Ṅnyie anë angakòbò nala, moman mëtari a zaṅ bësadukea ai bëfarisea, bëkaban ngam ngam. 8 Amu bësadukea badzo na akui-lë sòṅ a sëki, tò benglès, tò nsisim; bëfarisea bò bayëbë bisë. 9 Mod etotog antoa, ndò bësaṅa bëkalara ya ngam bëfarisea bëngatëbë a si, bëngalaṅëdan ai e ba bëvòg ba, bò na: Biayen ki mbë dzam abë e mod nyò. Dze hm ki, ngë nsisim, ngë ki na englès alèè ai nyè? 10 Mbol moman mëngabë hë abed, ndzoe bakuda bëzimbi angambara na bëza saṅa Paulus, ndò abende bëzimbi na bësigi, bëkë nyè vaè a zaṅ dzaban, bëkë ai nyè a yat bëzimbi. 11 Alu angabë atsaag, ndò Nti azu nyè tëbë babi, nyè na: Bò fam. Amu akyaè ya ohë bòòlò ma a Yerusalem, nala ngò fë wayean ma bòòlò a Roma. 12 Kidi engayi lende, ndò Yuden bëngatogan ekoan, ndò bakani sòṅ na bayi ki di tò anyu ntye babë ki woe Paulus. 13 E bod bëngawoe oyili te bëngabë bëlodo taṅ mëwom mënyii, 14 ndò bakë a bëfada bënen ai bënyia-bod-mvia, bò na: Bikani sòṅ mfaṅ na biayi ki dëmëlë dzom ziṅ së na bitari woe Paulus. 15 Ndò hm, etoa dzi, mina kadan ndzoe bakuda bëzimbi ai ekoan bëtsigi mintol na azu ai bia nyè ha, bibò hë anë biayi na biatoan yëm etòm dzie. Mfa waan, bitëlë a ngomëzan na biawoe nyè eyòṅ ayi subu babi. 16 Mòn kal Paulus angayi wog olam te, ndò asò, anyian a yat bëzimbi, amana dò lèè Paulus. 17 Ndò Paulus aloe ndzoe ntèd bëzimbi mbòg, nyè na: Këlëg ai e mòngò nyò abë ndzoe bakuda bëzimbi, amu abëlë e dzam akad nyè. 18 Ndò anganòṅ nyè, akëlë ai nyè abë ndzoe bakuda bëzimbi, nyè na: Paulus, man mimbog, aloe ma, ndò asili ma na mëzu ai e mòngò nyò abë wa, abëlë e dzam akad wa. 19 Ndò ndzoe bakuda bëzimbi abi nyè a wò, akëlë ai nyè a fëfëlë, hë bò bëbè, ndò asili na: Dze wayi na wakad ma? 20 Mòngò nyè na: Yuden bëyili na bayi wa sili na osigi ai Paulus okidi a nda-mëdzo na bëtoan yëm etòm dzie. 21 Ndò hm, të wayëbë bò. Amu bod ya ete, alodo bod mëwom mënyii, balam nyè, bëkani sòṅ na bayi ki di tò anyu së na bëwoe nyè; etoa dzi, bëtëlë, bëyanga mbol wayi dzo. 22 Ndò ndzoe bakuda bëzimbi asoe mòngò, abende nyè na: Të wakulan tò mod ziṅ na osò ma kad mam mëte. 23 Ndò aloe bëdzoe bë ntèd bëzimbi bëbè, nyè na: Komëzan bëzimbi mintèd mibè na bëkë a Sezarea, ai bëbëdë bikabëli mëwom zamgbal, ai bënòni mintèd mibè, atarigi a awola lala ya alu, 24 eyëm ya babed etòbògò babi, asu yë na mibede Paulus ete, mikë ai nyè abë ngòmëna Felis; 25 Ndò angatil e kalara nyò na: 26 Ma, Klaudius Lisias, abë mbòs ediṅ ngòmëna wam, Felis, wavuma! 27 Yuden bëngabi e mod nyò; bëtëlë na bawoe nyè, ndò mazu bò dilan ai bëzimbi, mëvaè nyè, mëwogo na anë mòn nnam Roma. 28 Mbol mëhë yi na mayëm etòm basòman nyè ete, ndò makë ai nyè a nda-mëdzo dzaban, 29 mëyënë na bakòbò të hë mam ya mvende dzaban, tègè ai etòm ziṅ yayean ai awu, ngë sòman yayean ai mimbog. 30 Mbol hm bësò ma lèè na balam mod te, ndò mëlom wa nyè etye etye, ndò fë mëkad bësòman na bëzu toṅ e sòman basòman nyè abë wa. 31 Ndò bëzimbi bënganòṅ Paulus ha ai alu asë, akyaè bëngabende bò, bëkëlëg ai nyè abë Antipater 32 e kidi lende ya hala, bëbò na bëbëdë bikabëli bëkë ai nyè, bò bëdugan a yat bëzimbi. 33 Ndò banyian a Sezarea, bëkalan ngòmëna kalara, bëlëdë fë nyè Paulus. 34 Ndò angalaṅ, asili nyè nnam awoge ai wò; angayi wog na asò a Silisia, 35 nyè na: ’Mayi wog ndòṅ etòm dzoe hë eyòṅ bësòman bayi sò.’ Ndò abende na bënòni nyè a dzal Herodes.
241 A mvus mëlu mëtan, ndò Ananias, fada nen, angasigi we ai bënyia-bod-mvia bëziṅ, ai loya Tertulus; mbò bëzaa sòman Paulus abë ngòmëna. 2 Bëngayi nyè loe, ndò fò Tertulus atari na asòman Paulus, nyè na: Bianyiṅ a mfaṅ mvoè hë asu e mam ongatsende a nnam hi ai asu fëg dzoe, 3 a Nti Felis; bayëbë wa kan esë ai hom osë ai abui ngaṅ. 4 Asu yë na të mabad wa ndëngëlë madzaè wa na ovogolo bia tsëtsat ai abëṅ nnëm doe. 5 Amu biyen na e mod nyò anë nsu, akë atsag bitòm a zaṅ Yuden a si esë, anë asu-zoa ya ayëgëlë mvol ya bod bë man Nazaret. 6 Angadzëṅ na azu ai eboe a tempel, ndò biabi nyè, [ 7 Bingayi na biatsig ntol woe ai mvende dzaan, ndò Lisias, ndzoe bëzimbi, afadi nyè a mò maan, nyè na bësòman boe bëzu abë wa.] 8 asu yë na wamen otoan nyè sili, oyëm e mam mësë ma ya biasòman nyè. 9 Ndò fò Yuden bëngabaman kiṅ, bò na e mam mësë ma mënë ete. 10 Ndò Paulus angabodo nkòbò, mbol ngòmëna angavë nyè ndëm nala, nyè na: Abui mimbu ana, hë otoa ntsigi ntol ya ayòṅ di, ndò mazu kaman ai mamen ai nnëm a saaṅ. 11 Obëlë ngul ya ayëm na, hë mëlu awom ai mëbè ana, ngò mëngabed a Yerusalem na makë kogëlan. 12 Ndò bandzëki ma yen mëfëdan ai mod ziṅ a tempel, ngë ki na mëtogan bod, tò a mënda-bikoan tò a tisòn; 13 Basëki ben dzam bòòlò e mam basòman ai ma mò mala. 14 Mamëm a mis moe na etòm e zen baloe na evovolan ayëgëlë, e kan masye Zamba bëtara, mëyëbëgë e mam mënë ntilan a bëprofèt ai e dzi yasò a mvende, 15 mëbëlë afidi abë Zamba, afidi ya e bod bëben ba bëbëlë fë, na akui-lë sòṅ bësosoo ai bëbe layi bòban. 16 Asu te madzëṅ ai ngul esë na mëbi nnëm sosoo kòm esë a mis më Zamba ai a mis më bod. 17 A mvus abui mimbu, ndò masò na mazu vë ayòṅ dama almosen, 18 a hala ngò bëngazu ma kòb a tempel, mëfububan, tègè ai bod, tègè ai engongom, 19 Yuden bëziṅ ya Azia, mbò bëhë yean wa tëbë osu ha, bësòman ma ngë bëbëlë sòman ai ma. 20 Bò bëben bëkada etòm bëngayen a mëmbë tëlë a mis bëtsigi mintol, 21 eyòṅ ziṅ na e dzam mëngakòbò a yob ete a mëngabë mëtëlë ai bò na: Etòm akui-lë sòṅ bëwu endzò mëtëlë mina ai dzò osu a nda-mëdzo ana. 22 Mbol Felis angabë ayëmë adzo zen di mbëṅ, ndò asoe bò, nyè na: Eyòṅ Lisias, ndzoe bakuda bëzimbi ayi sigi mu, mayi kòbò adzo daan. 23 Ndò abende ndzoe ntèd bëzimbi na bënòni nyè, hë da atoa fili, të kaman ai bod boe na bësye nyè. 24 A mvus mëlu ha, Felis atoa ai ngal woe Drusila, ngòn Yuden, ndò alom loe Paulus, bëngavogolo mam më ṅyëbë Kristus Yesus. 25 Ndò afëlan nyè mam më fulu sosoo, ai ebana-nnëm, ai nkat wazu; Felis angambara, nyè na: Abim te layean. Tama kë; eyòṅ mayi yen afola, mëloe wa. 26 Atoa fë na, afidigi na Paulus ayi nyè vë mòni. Asu te angabë alomo nyè loe mban, angalèè ai nyè. 27 Mbol mimbu mi esye mibè mie mingaman, ndò Porsius Festus angazu fòl Felis; mbol Felis ayi na abò Yuden mbëṅ, ndò angalig Paulus afëdë.
251 Ngë Festus anòṅ edzoe anë mëlu mëlè, ndò atye a Sezarea, abëdë a Yerusalem, 2 ndò bëfada bënen ai mvindi bod ya Yuden bazu nyè kad adzo Paulus, bëngakogëlan ai nyè, 3 bësiligi nyè na abò bò mvam, alom nyè a Yerusalem; Hala te bëkòl ya olam na bayi nyè woe a zen. 4 Ndò Festus ayalan na Paulus afëdë a Sezarea, ndò fë emen atëlë na akë we. 5 Nyè na: E bod ya abë mina, a bëbëlë ngul, bësiigi ai ma, ngë dzom ziṅ esëki tëtëlë abë mod te, bësòman nyè. 6 Andzëki bombo kòm abë bò, dzam bò hë mëlu mwom ngë awom, ndò asigi a Sezarea; Amos otsaag hala, ndò atòbò a etoa mëdzo, abende na bëzu ai Paulus. 7 Asò angasò, ndò e Yuden bëngamana sòṅ a Yerusalem baloṅ nyè edinga a nyòl, bëngalaṅ abui bëbe bë mam a bëngabë ki dzam bòòlò, 8 Paulus angakaman ai emen, nyè na: Mandzëki sëm tò a mvende Yuden, tò a tempel, tò abë Kaizer. 9 Mbol Festus ayi na abò Yuden mvam, nyè ai Paulus na: Yë wayi na wabed a Yerusalem, bëkòbò adzo di a mis mama we? 10 Paulus nyè na: Mëtëlë nsëṅ mëdzo Kaizer a mis ha, ete ngò bayean kòbò adzo dama. Mandzëki bò Yuden ebyandi ziṅ, wamen wayëm fë mbëṅ mbëṅ nala. 11 Ngë mëbò evus ziṅ ngë ki etòm yakyëbë ai awu, madzaè ki na të bawoe ma. Hë da, ngë e mam e bod ba basòman ma mësëki ete, mod ziṅ asëki bò dzam bò mvam te na akuan ai ma. Makë ai adzo abë Kaizer. 12 Festus amana lèè ai bod boe, nyè na: Odzo na wakë ai adzo abë Kaizer; Wazu hm kë abë Kaizer. 13 A mvus ban mëlu hala, nkukuma Agripa ban Berenis bësuan a Sezarea, bësòò sug Festus. 14 Mbol bëngatòbò hala eban, ndò Festus amana lèè nkukuma adzo Paulus, nyè na: Mod ziṅ anë ha, a Felis angalig a mbog; 15 Eyòṅ mëngabë a Yerusalem, ndò bëfada bënen ai mvindi Yuden bëngasili na bëtsig na aku a adzo. 16 Ndò mëngayalan bò na fulu esëki a Roma na bakuan ai mod ziṅ së na e mod basòman atëbë e bod basòman nyè a mis, adzòsò fë ai bò. 17 Ndò bëngakoan ha avol avol amos otsaag hala, ndò matòbò a etoa mëdzo, mëbende na bëzu ai mod te. 18 Ndò bësòman bëngaloṅ nyè edinga a nyòl; e bëbe bë mam mëtsogo, bësòman boe tègè nyè laṅ dzom ziṅ ya ete, 19 nguma etòm hë mam më ṅyëbë waban ai etòm Yesus ziṅ ya angawu, Paulus nyè ayini na avëë. 20 Mbol fëg engadzaṅ ma ai adzo te, ndò masili nyè na yë ayi na akë a Yerusalem, bëdzòs nyè we asu etòm te. 21 Ndò Paulus asili na bëfèd nyè, biyanga ntsigan Kaizer; ndò mabende na bëfèd nyè akui anë mayi nyè lom abë Kaizer. 22 Agripa nyè ai Festus na: Ma mayi fë na mavogolo mod te. Nyè ai nyè na: Wayi nyè vogolo okidi. 23 E kidi lende ya hala, ndò Agripa ban Berenis bëngasò hë anë bakë a ngul abog, ndò banyian a nda-bikoan bi nnam, bënë ha ai bëdzoe bakuda bëzimbi, ai mimfaṅ mi bod ya tisòn; ndò Festus abende na bëzu ai Paulus. 24 Festus nyè na: A nkukuma Agripa, ai e bod bësë minë ai bia ha, bëbëgan e mod ya nkunda Yuden bëngazu ma yen asu die a Yerusalem, bëngabam fë a yob ete ha na ayean ki fë dugan nyiṅ. 25 Mfag wama, mandzëki yen na abò dzom ziṅ a yayean ai awu; mbol emen akë ai adzo abë Kaizer, ndò mëyili na malom nyè we. 26 Mabëlë ki nguma dzom ziṅ ya mayi til Kaizer a nyòl dzie, asu te madugan sòṅ ai nyè a mis man, adaṅ adaṅ a a mis moe, a nkukuma Agripa, asu yë na mëyëm e dzom matil eyòṅ bëmmana nyè sili minsili ana. 27 Amu mayen na nala osëki sosoo abui na bëlom man mimbog nala, tègè kad nguma etòm basòman nyè ete.
261 Ndò Agripa adzo ai Paulus na: Onë dzam kaman ai wamen etoa dzi. Ndò Paulus avë ndëm ai wa, angakaman ai emen, 2 nyè na: A nkukuma Agripa, e mam mësë ya Yuden basòman ma ma, mayen na mëbëlë mvòm na a mis moe ngò mazu kaman ai mamen, 3 adaṅ adaṅ a mbol wayëm mëtum më Yuden mësë, ai mëdzo maban, ndò makogëlan ai wa na oban nnëm, ovogolo ma. 4 Yuden bësë bayëm enyiṅ dzama, atarigi mëtoa mòngò, mbol mënganyiṅ a tarigi a mëtari a ayòṅ dama a Yerusalem, 5 bazuzu ya bayëm ma, ngë badiṅ bòòlò na mënganyiṅ anë man Farisea, akyaè ya e ngam yadaṅ alèd a ṅyëbë waan enë. 6 Ndò etoa dzi, etòm afidi e ngaga Zamba angakag bëtara endzò mëtëlë ai dzò a dzòs dzi, 7 e ngaga ya mënda më bod awom ai mëbè man masye Zamba ai evag esë, ai alu ai amos, mëfidigi na mayi dzò bi, asu afidi te ndò Yuden basòman ma, a nkukuma. 8 Asu dze miayen aye na Zamba avëlë mimbim? 9 Mfag wama mamen, mëngabë mëyënë na mayean luman ai dzoe Yesus man Nazaret, 10 ndò fë mëngabò nala a Yerusalem, mëngafudi abui mimfufub a mbog ai e ngul bëfada bënen bëngavë ma. Mëbaa kiṅ dzama, ngë bëngabë na bawoe bò. 11 A mënda-bikoan mësë, mëndëgëlë bò, mëbii bò a ngul na bëmgbali Zamba abui, mëngavini bò nnëm abui, makë matsidan bò akui eza bëtisòn. 12 A mëbò esye te, ndò makë a Damaskus ai ngul, ai kalara bëfada bënen. 13 Ai zaṅa mos na, a nkukuma, a zen a yob, mëngayen mfyè nlo-dzobo osòòg a yob, ndò wakuban ma a nyòl, tò fë e bod bëngabë ai ma esamba. 14 Ndò bia bësë bingaku a si, mëngawog kiṅ engakad ma a nkòbò ebrea na: A Saulus, a Saulus, a dze waluman ai ma? Anë wa aye na obimi ntum. 15 Ndò madzo na: Wa za, a Nti? Nti nyè na: Mamen mënë e Yesus waluman ai nyè. 16 Ndò hm, tëbëgë, oyëm mëkol a si. Mayene wa etòm ya na matòb wa, na obò etuga ai mbòòlò e mam wayen ai e ma mayi wa lëdë, 17 mayi wa kode a mò më nnam ai a mò e bëhaiden ya malom wa abë bò, 18 na mëyaè bò mis, na bëkodo a dibi, bëdugan a mfyè, bëkodo a ngul Satan, bëdugan abë Zamba, na bëbi evaa-minsëm ai ngab elig ai e bod bëfububan ai ṅyëbë bayëbë ma. 19 Nala hm, a nkukuma Agripa, mandzëki bò e dzam mëngayen a yob di mëlò, 20 dzam da, ndò mëngatari bende e ba ya Damaskus ai e ba ya Yerusalem, nkòṅ nnam osë ya Yuda ai bëhaiden, mëbende bò na bëvëṅan, bëdugan abë Zamba, na bëbò e mam makyëbë ai avëṅan. 21 Asu te ndò Yuden bëngabi ma mëtoa a tempel, bëngadzëṅ na bawoe ma. 22 Maabi nkèan ya abë Zamba akui amos ya ana, mëngakòbò tò ai bòngò, tò bënyia-bodo, mëtëbë, të kòbò dzom efë së na e dzi bëprofèt ai Moses bëngadzo na yayi bòban, 23 na Kristus ayean bëlë mintye, abò fë e mod osu akui a sòṅ bëkon, ayedan nnam ai bëhaiden mfyè. 24 Eyòṅ angamana kaman ai emen a e mam ma, ndò Festus adzo a yob ete na: Ongasòg ya, a Paulus! Abui ṅyëman kalara doe labò na osòg. 25 Paulus nyè na: Masòg ki, a ndindiṅ Festus, makad hë bibug bi bëbëla ya binë ete. 26 Nkukuma emen malèè e mam ma a fili ete ayëm. Makaṅ ki na dzom ziṅ ya e mam mëkad nyè enë nyè nkënga, amu andzëki bòban a asoe. 27 A nkukuma Agripa, yë wayëbë bëprofet? Mayëm na wayëbë. 28 Agripa nyè ai Paulus na: Dze yë ongayi ya ki ma bò Kristen hë abim etun abog di? 29 Paulus nyè na: Mënë fë dzam kogëlan ai Zamba na, tò a kòm tò a etun abog, së ki hë wa, dzam da e bod bësë bavogolo ma ana bëbò fò fë anë mënë, sësala hë e mësuṅ ma. 30 Ndò nkukuma angatëbë ai ngòmëna ai Berenis ai e bod bësë bëngabë bëtoa ai bò, 31 ndò bakë a esòg, bëngafëdan bò bò na: E mod nyò andzëki bò e dzom yayean ai awu ngë mimbog. 32 Agripa nyè ai Festus na: Ohë bë dzam suu e mod nyò ngë abò të kë ai adzo abë Kaizer.
271 Mbol bëngatsig na biayean kë a Italien a mal, ndò bavë Paulus ai mimbog mifë hala a mò më ndzoe ntèd bëzimbi, dzoe na Yulius, mod ya nkan bëzimbi Agustus. 2 Ndò bingabed a mal ya Adramita, etëlë na yakë a nkòṅ nnam Azia. Bingatye ha, Aristarkus, man Masedonia ya Tesalonika atoa ai bia esamba. 3 Amos otsaag hala, ndò biakui a Sidon. Mbol Yulius abëlan ai Paulus mbëṅ, ndò avë nyè ngul na akë a bëmvoe boe, bëbëlan ai nyè mbëṅ. 4 Ndò biakodo hala, bikëlë a Siprus, mbol evundu engabë ezaag bia osu; 5 Adaṅa bingadaṅ e maṅ mënë a zaṅ Silisia ai Pamfilia, ndò biazu kui a Mira ya Lisias. 6 Mbol ndzoe ntèd bëzimbi angayen mal më Alesandria ete mëkëlë a Italien, ndò abede bia ete. 7 Mëlu mëlu, biwulugu otëtëg, ndò biakui a Kinidus ai abui mindzug ete; ndò mbol evundu esòò bia osu, të bia dzoge na bikë ai dulu osu, ndò biayëm zen a Kreta, mfag ya Salmon, 8 bisò lod babi ete ai abui mindzug, ndò biakë hom ziṅ abaloe na Abëṅ aboṅ, babi ai dzal Lazaias. 9 Mbol abog angamana lod abui, hala dulu maṅan toa ya fë mësis abui, hala fë abog amos mëlunga alod ya, ndò Paulus alëb 10 bò na: A bod, mayen na e dulu maṅ di layi sò ai bia ndzug, layi fë bia dzèè, së ki hë asu mimbëgë ai mal, dzam da tò ben asu enyiṅ dzaan. 11 Ndò ndzoe ntèd bëzimbi angadaṅ vogolo e dzam ndzoe mal ai e mod angabë ai mal bëkada nyè, alodo anë e mam Paulus adzoo. 12 Mbol aboṅ te angabë ki mbëṅ a abog oyon, ndò abui bod angadzo na bëtye ai mal hom te, bëdzëṅ na bëkui a Fenis, aboṅ ya Kreta, lëtyege a nnam nkyè akui a nnam akoe, bëbombo ete a abog oyon. 13 Abò man evundu angabò, bëngadzo na bëyen ya mvòm, ndò batsag titima, bëngakë babi a Kreta, 14 eban të kog, mod evundu ya baloe na «Mod ya akoe» asò hm tye. 15 Ndò mal mëngavom ai evundu; mbol hm bingabë ki dzam kë ai dulu akyaè ya biyii, ndò fò biadzoge na bivom. 16 Ndò biazu lod babi a man elon ya bëloege na Kauda, biyënë ndzug na biatele mal. 17 Ndò të bëngatele mal nala, bëngadzëṅ na batindi mò. Mbol hm bëmbarëga na bëzaa vom a Sirta, ndò basuu tan a si, bëngavom. 18 E kidi lende ya hala, mbol evundu edudugu bia eyëgan, bëngawoa mimbëgë a maṅ. 19 Amos lala, bëngawoa byem bi mal a maṅ ai mò maban mëben. 20 Mëlu mëlu, tò vian, tò atitie tègè fyè, hë mod nkulu ṅnyè avuṅu, e man afidi ya na biayi kodeban angadzaṅ. 21 Mod zie ambëlë bia, ndò Paulus atëbë bò a zaṅ, nyè na: A bod, mihë yean ma vogolo na të miatye a Kreta, ngë bisaala të ndzug hi ai ndzèan hi. 22 Ndò hm, etoa dzi, malëb mina na mibò azombo, amu tò mod ziṅ ayi ki dzèè enyiṅ dzie, hë mal mmò mayi ndaman. 23 Amu englès Zamba ya masye ayene ma alu ya ana di 24 nyè na: Të wambara, a Paulus, wayean tëbë Kaizer osu. Yënë sik, Zamba avë wa e bod bësë bënë a dulu ai wa. 25 Asu te hm, boan azombo, a bod. Amu mayëbë Zamba na layi bòban e kan bëhë kad ma. 26 Biayean kë kui a elon ziṅ. 27 Mbol alu awom ai nyiina angakui, bivomo a Adria, ai zaṅa lu, bëdudu bë mal bëngawodan na bikui ya a nkot si. 28 Ndò bavëg, bëyënë ṅnyie edòg dzam bò mera ebè. 29 Mbol hm bëmbarëga na bëzaa wundi akòg, ndò basuu wun enyii a mëndim, bëngakogëlan na kidi elëndë. 30 Mbol bëdudu bë mal bëdzëṅë na batub, ndò bamana woa ban mal a mëndim a si, bò na aya batoan woa wun a maṅ, 31 ndò Paulus adzo ai ndzoe ntèd bëzimbi na: Ngë e bod ba bandzëki tòbò a mal, miasëki dzam kodeban. 32 Ndò bëzimbi bëngatsig minkòl ya mal, bëbò na mal mësigi. 33 A kidi ekëlë lëndë ha, ndò Paulus angabò na bod bësë bëdi, nyè na: Amos awom ai nyiina hi mitoa, miyanga, të di tò dzom. 34 Ndò makogëlan ai mina na midi bidi. Amu nala onë asu enyiṅ dzan. Amu esil mod mbòg ziṅ ya abë mina yayi ki nyè dzaṅ a nlo. 35 Ndò akòbò nala, anòṅò mbaṅëla, avëë Zamba ngaṅ a mis më bod bësë, abëgë, akaè na adi. 36 Bò bësë bëmbëlë ngul, bò fë bëngadi bidi. 37 Bingabë a mal ha, bod bësë mintèd mibè ai mëwom zamgbal ai bësaman. 38 Eyòṅ bëngadzie bidi, ndò babò na mal mëbò oveves, bëngawoa oles a man. 39 A kidi engalëndë, të yëm nnam bëngabë, ndò të bayen kindig ebëlë nsëlëg e hom bod bawòbò, bëngabui fëg na bakë sëlë mal ete. 40 Ndò bëngasuli wun a kindig maṅ, bëtii minkòl, ndò otan waandami; ndò evundu engatindi bò a nselëg. 41 Mbol mal mëzaa diban a kindig ai maṅ mimfag mibè, ndò nlo mal wafòòbò a si, mfag ya mvus omana sëgëlan ai minkumdu mi maṅ. 42 Bëzimbi bëmana yili na bawoe mimbog, asu yë na mod aza tubu ai mëdzòg. 43 Mbol ndzoe ntèd bëzimbi ayii na akë kui ai Paulus mvoè, ndò akaman ai bò adzo te, ndò abende e ba bëyëmë dzòg na mbò bëtari suman a mëndim, bëkë kui a kindig, 44 e ba bëvòg ki, e ba a bitun mëbam, e ba ki a byem biziṅ ya mal. Nala ngò bësë bëngakë të ai nsël a nyòl a kindig.
281 Eyòṅ bikodeban ya nala, ndò biazu yëm na elon te enë dzoe na Malta. 2 Bëlòbò-lòbò bënòṅò fò bia eyëgan mbëṅ, amu bëngakoman ndoan, bësoan fë ai bia bësë mbol mvëṅ engatye a yob, ai asu ahëb. 3 Ndò Paulus angakë awolo bitun bi ndzaag a si, angafudi a ndoan; ndò akpë laham ete etòm ndugudu, atimbi nyè a wò. 4 Mbol e bëlòbò-lòbò ba bëngayen na akpë landëṅ nyè a wò, bëngakòbò a bò bò ha na: E mod nyò ayean bò ṅwoe-bod. Akodeban ya a maṅ a li, zamba sosoo të dzoge na anyiṅ. 5 Ndò të nyè angasamëza akpë a ndoan, të dzugi dzom ziṅ, 6 bò bëngayanga na ayi mana vus hala, adiban a si etye etye, hë mbim. Mbol bëyanga nala kòm, bò tègè yen anë dzom yafòlan nyè a nyòl, bëngatsog mbol mfë, bò na anë zamba. 7 Babi ya hala, ntomba osu ya elon, dzoe na Puplius, angabë abëlë mod dzal. Ndò angasoan ai bia mëlu mëlè, abëlan ai bia anë bëmvoe boe. 8 Ndò hm labò ha na, fiba ai ntui bimbëlë esya Puplius ha, amboo a si, ndò Paulus akë abë nyè, ndò akogëlan, abede nyè mò, ndò abò nyè mvoè. 9 E dzam di angayi bò nala, e bod bëvòg ya elon a bëkònò bëngazu, bësyeban, 10 bëngabëlan ai bia ai abui olugu; a bityege ha, bëvëë bia e byem biyaṅan ai biè. 11 A mvus ngòn elè, ndò biabed a mal ya Alesandria; mal mëte mëngabë mëyanga a elon hala na oyon olod, obëgë otil na Dioskuri. 12 Ndò bingakui a Sirakuza, bibombo hala mëlu mëlè, 13 bitye hala, bikui a Redzio; A mvus alu da, ndò evundu-nkyè yavundu hala, amos bèè, bikëlë a Pozuoli; 14 ndò biayen babëdzaṅ hala, bëbanda bia na bitòbò ai bò mëlu zamgbal. Na, ndò bingakui a Roma. 15 Babëdzaṅ ya we bëngayi wog adzo daan, ndò bazu toban ai bia a angara Appius ai a mënda bëyëṅ mëlè. Paulus angayi bò yen, ndò akaṅ Zamba, amana tome nyòl. 16 Eyòṅ binganyian a Roma, ndò bëngavë Paulus ngul na atòbò nyè etam ai e man bëzimbi anòniṅi nyè. 17 A mvus mëlu zamgbal, ndò angatogan bëtëbë bë osu bë Yuden. Eyòṅ bëngamana sò, nyè ai bò na: A babëdzan, mandzëki bò dzom ziṅ a yabèan mvende ngë mëtum bëtara, tò anë bëngakalan ma mëtoa mfaṅ a n ngadag a mò bë Roma a Yerusalem. 18 Bò bëkë basili ma minsili, bëngayi ma suu mbol nguma etòm wayean ai awu ongabë ki ma a nyòl. 19 Mbol hm Yuden bëngafèd adzo te, mëntoa a enyòdi na makë ai adzo abë Kaizer; nala watyan ki na mëbëlë e dzam masòman ayòṅ dama ete. 20 Asu etòm te ndò masili na mayen mina, mëlèè fë mina adzo te, amu etòm afidi Israel endzò mëbëgë e mësuṅ ma. 21 Bò ai nyè na: Mfag waan, tò kalara ziṅ a bëbëgë wa, biandzëki bi, asòò a Yudea; Tò mbòg ziṅ ya a babëdzaṅan dzëki bia sòṅ lèè ngë akad abe dzom ziṅ atyan ai wa. 22 Ndò hm biayi na biwog mfag woe mbol watsog, amu biayëm na bod bafëdan ai mkpamaṅ ekoan hi hom osë. 23 Ndò bëngayili nguma amos, bësòò abui a nda dzie, angatimi bò, abòòlò edzoe Zamba, ayini bò mam më Yesus, atarigi a mvende Moses ai bëprofèt, akèè lë kidi, akëlë kui ngongogële. 24 Bëvòg bëyëbë fò e mam adzoo ma, e ba bëvòg të yëbë. 25 Bëngatsaman hm nala kiṅ kiṅ, ndò Paulus akòbò ebug dzia, na, Mfufub Nsisim akòbò fò mbëṅ ai bëtara a anyu profèt Isaias na: 26 Këlëg abë e bod ba, okòbò na: Miayi fò wog ai mëlò, dzam da të toan wog, Miyënë ai mis, dzam da të yen. 27 Amu nnëm ayòṅ di omana ya bò alèd, ndò fë batoan ki fë wog ai mëlò, bëmana fë budi mis. Asu yë na të bayen ai mis, të bawog ai mëlò, bò të soṅ ai nnëm na bëvëṅan, mësye bò. 28 Yëman hm na akode Zamba di alomëban ya bëhaiden. Bò bayi wog. 29 Akòbò angakòbò nala, ndò Yuden bëngatye ai dulu na badugan, bëlaṅëdan bò a bò. 30 Angatòbò nala minguma mimbu mibè, asye mòni woe, asoan ai e bod bësë bëkëlë nyè yen, 31 ayedan edzoe Zamba, ayëgëlë mam më Nti Yesus Kristus ai fim esë, tègè ai e mod akaman ai nyè na abë dò bò.