TIMOTEUS BÈÈ

¹ Ma Paulus, man apostel Kristus Yesus a ṅyian Zamba ai asu ngaga enyiṅ enë abë Kristus Yesus, ² matil ndindiṅ mòn wama Timoteus: maa, ngòl ai mvoè a biasò abë Zamba esya ai Kristus Yesus Nti waan bibòò ai wa. ³ Makaṅ Zamba ya malugu anë bëtara ai nnëm mfuban, eyòṅ matsog wa kòm esë a mëngogëlan mama, ai alu, ai amos, ⁴ mëyii du na mayen wa, mëtsogo bibëga bie, asu yë na mëdzie ai mintag; ⁵ matsog ṅyëbë woe ya onë tëtëlë, a nyò-mvama Lois ai nyoa Enike bëngabë bëbëlë; mayëbë na wa fë obëlë wò. ⁶ Asu te madugan wa tsog na odugan yoṅolo efaè akab Zamba ya enë abë wa ai mbedan mò wama. ⁷ Amu Zamba andzëki bia vë Nsisim wòṅ, angavë bia Nsisim ngul, ai ediṅ a i otëtëg. ⁸ Të hm wawog osòn ai mbòòlan Nti waan ngë ki ai ma, man mimbog woe, dzam da nòṅò ngab mintye dzoe a mbëmbë foe ai ngul Zamba ⁹ ya angakode bia, aloe fë bia mfufub nloe, së ki hm asu mimboan mian, dzam da mbol emen angadiṅa i asu e maa ya bëngavë bia abë Kristus Yesus osusua bisëb bisëb; ¹⁰ Maa te akulan etoa dzi ai asò-lë nkode waan Kristus Yesus ya angasole awu, asòò ai enyiṅ a enyiṅ kole a mfyè ai mbëmbë foe. ¹¹ Mbëmbë foe te ṅnyè bëngatele ma na mëyedan nyè, mëtoa fë man apostel ai ṅyëgëlë, ¹² etòm te endzò madzugi e mam ma. Dzam da mawog ki osòn, amu mayëm e mod mëngafudi afidi dama abë nyè, ndò fë mayëm mbëṅ mbëṅ na abëlë ngul ya akala e dzi ya angavë ma asu amos te. ¹³ Nòṅò mvulna a mimbëmbë minkòbò ongawog abë ma a ṅyëbë ai ediṅ ya enë abë Kristus Yesus. ¹⁴ Obaala mbëmbë dòkten asu Mfufub Nsisim ya atoa abë bia. ¹⁵ Wayëm e di na, e bod bësë ya Azia bëngalum ya ma mvus, bëvòg ya ete bënë na: Figelos ai Ermogenes. ¹⁶ Zamba ayënë nda-bod Onesiforus ngòl amu angavòli ma abui biyòṅ, ndò fë andzëki wog mësuṅ mama osòn, ¹⁷ dzam da, eyòṅ angasò a Roma, angadzëṅ ma mbil mbil, ndò fë angayen ma. ¹⁸ Zamba avaa nyè na ayen ngòl abë Nti amos te. Ndò fë wayëm mbëṅ alodo ma abim bisye angavòli bò a Efesi.

¹ Mfag woe, a mòn wama, bò nkanga a maa ya anë abë Kristus Yesus. ² Ndò fë, e mam ya ongawog abë ma a mis më abui bëwusnèt, vaa mò bod bë afidi, mbò bayi bò nkoṅ ya ayëgëlë e bod bëvòg. ³ Nòṅò ngab a mintye anë mbëmbë man bëzimbi Kristus Yesus. ⁴ Mod ziṅ asëki dzam bò esye bëzimbi, angasaṅan fë ai mam më si, asu yë na abò esye dzie anë ntëbë-osu woe ayi. ⁵ Ngë mod ziṅ anë a bivoe ya bod bavëgan a mbil, asëki dzam dò ngë abò të voe anë mëmvende mayi. ⁶ Layean na e mod awòbò ndzug a asye afub, atari bi ngab a mëkoe ya ete. ⁷ Otoan wog e dzam madzo di. Amu Nti ayi wa vë fëg ya awog a dzam asë. ⁸ Otsogo Yesus Kristus ya anë nkuan a bëkon, mod ya mvòṅ David, akyaè mbëmbë foe wama adzo, ⁹ asu te madzugi mintye, mëbëgë ben mësuṅ anë ezilngan dzam da, ebug Zamba etii ki a mësuṅ. ¹⁰ Asu te madzibi mësë asu e bod bënë ntòban, asu yë na bò fë bëbi akode ya anë abë Kristus Yesus ai mintag mi kòm. ¹¹ Ebug enë bebela. Amu ngë bingawu fufulu, biayi fë nyiṅ fufulu. ¹² Ngë biadzibi, biayi fë bëlë edzoe minkukuma ai nyè. Ngë bisie nyè, nyè fë ayi bia sie. ¹³ Ngë biasëki bod bë afidi, nyè alaṅan të mod afidi, amu asëki dzam sie emen. ¹⁴ Otsogo bò e mam ma, otoan bò kad a ngëëṅ a mis më Zamba na të bawoman, nala wasëki ai mfi, nala wabò hë na e bod bawog mam mëte bëdzèè fëg. ¹⁵ Luman fò ai ngul na obò zingi a mis më Zamba, mbò-esye ya abëlë akalëga osòn, akada ebug bëbëla a kpaam. ¹⁶ Saala e bod bayëm ki Zamba, a bakòbò evoe nkòbò. Amu bayi kë ai ebyandi Zamba dzaban osu, ¹⁷ ayëgëlë daban layi diiban anë fol yadi mod nyòl. Imeneus ai Filetus bënë bod ya ete, ¹⁸ mbò bënë a ndimi mfag ya bëbëla, badzo na akui-lë-sòṅ a bòban ya, ndò fë badzugulu ṅyëbë bod bëziṅ. ¹⁹ Tò të nala, ngul ya tin mfim Zamba etëlë, ebëlë e ndëm nyi na: Nti ayëm e bod boe, ai na e mod osë aloe dzoe Nti asaala nkòt. ²⁰ A mod nda, së ki hë byem bi mvòt ai silba mbiè binë ete, byem bi ele ai ekòn binë fë we, bivòg bitoa asu olugu, e bi bivòg asu zëzë mam. ²¹ Ngë mod ziṅ amana hm wòbò mfuban a e mam ma, ayi bò dzam olugu, mfuban, atoa ai esya nda mfi, atoa nkomëzan asu abëṅ dzam asë. ²² Otubu e kan miṅyian binanga bibëlë, odzëṅë hë mëkyëbë, ṅyëbë, ediṅ, mvoè ai e bod baloe Nti ai nnëm mfuban. ²³ Osaala mintsogan mëkud, a miayëm ki dzom, oyëmë na kan mintsogan te yabye bitòm. ²⁴ Mbò-esye Nti ayean ki bò bitòm, ayean bò evovoe ai bësë, ayëmëṅë yëgëlë, adzibigi, ²⁵ ayëgëlë e bod badoan ai nyè ai evovoe nnëm, kamëna Zamba avëṅan bò nnëm, bëyëm bëbëla, ²⁶ bëngadugan kë sòṅ a mëlam më Satan a mvus yë na angabi ya bò na bëbò ṅyian woe.

¹ Yëmë e di na, a mëmos më mvua, ndzug wayi bò babi. ² Amu bod bayi bò akoe, bëdiṅi mòni, enguṅ, bëmgbaligi ai mëbun, bëbòò bëbonde mëlò, tègè yëm Zamba, bod bë ngèt, ³ tègè ai nnëm, tègè yen mod ngòl, bësatan, nnëm ayoṅ, hë anë bod ya afan, tègè yëm e dzi enë mbëṅ, ⁴ bëkuan ai bod, enyënyam, mëbun, bëdiṅi mintag mi si mëyian yë na badiṅ Zamba. ⁵ Bayene anë balugu Zamba hë da bësiege ngul ya olugu Zamba. Saala bod bëte. ⁶ Amu e bod bakë banyian a mënda bënë bod ya ete; babi e bininga bënë ntëgan, ai minsëm a nyòl a tuud, a miṅyian kan kan mialëdë zen, ⁷ bëyèègè kòm esë, dzam da tègè ai ngul ya asò kui na bëyëm bëbëla. ⁸ Akyaè ya Yanes ban Yambrès bëngabèan Moses, nala ngò fë bò babèan bëbëla; bod ya fëg engamana ya sole, bëkuu a ṅyëbë. ⁹ Dzam da bayi ki bugeban nala osu, amu bod bësë bayi fò yen akud daban akyaè e di e bod bali angabë. ¹⁰ Mfag woe, mbol ongatoan bie ayëgëlë dama, a fulu, a e dzi biatoṅ, a fin, a ediṅ, a azombo, ¹¹ a bindëgëlë, a mintye ya mëngabi a Antiokia, a Ikoniom, a Listra, mëngadzibi bindëgëlë bite bisë, ndò fë Nti angakode ma a mam mëte mësë. ¹² E bod bësë ya bayi na banyiṅ enyiṅ Zamba abë Kristus Yesus bayi bi mindzug. ¹³ Bëbe bë bod ai bod mëdugan bayi kë ai abe daban osu, bëdugu bod, bëdugu fë bò bëben. ¹⁴ Mfag woe, laṅan a e mam ongayègè, a wayëm na mënë ete, oyëmë e bod ongayègè mò abë bò, ¹⁵ ai na wayëm mfufub ntilan atarigi otoa mòngò, nala ngò onë dzam bò na obò fëg asu akode ai ṅyëbë onë abë Kristus Yesus. ¹⁶ Ntilan osë watye abë Zamba, ndò fë onë ai mfi na bëyëgëlë wò, asu yë na badoan, asu yë na waanyoe e dzi enë nkòt, asu ayègè anë a mëkyëbë, ¹⁷ asu yë na mod Zamba abò a ngomëzan, abëlë fë ekpëlë a abò e dzam asë anë mbëṅ.

¹ Matëbëlë wa, a mis më Zamba ai a mis më Kristus Yesus ya ayi bò nkat bënyiṅ ai bëwu a asò-lë die ai edzoe dzie. ² Yedëgan ebug, tòbògò hala tò abog layean tò abog layean ki, lëbë, kòṅan, vòligi ai afu-nnëm asë, ai ayëgëlë asë. ³ Amu abog lazu, a bayi ki fë ṅyëbë mbëmbë ayëgëlë, dzam da mëlò mëyaaban bò, bayi wolo bëyëgëlë akyaè ya miṅyian miaban minë. ⁴ Abog te bayi vaè mëlò a bëbëla, bëngakè mò a minaṅ mi mvèt. ⁵ Mfag woe, osaala mam mësë, obëlëgë mintye, obò esye nkada mbëmbë foe, odzala esye dzoe. ⁶ Amu bëngayi ya ma tuni, ndò abog nkëan dama asò ya. ⁷ Mëngaluman abëṅ ndum ndò fë mëngambara mbil, mëbaala ṅyëbë. ⁸ Atarigi etoa dzi, bënyie ya ma ekat duma mëkyëbë, a Nti ya anë sosoo ntsigi ntol ayi ma vë amos te; së ki hë ma etam ayi dzò vë, ayi fë dzò vë e bod bësë bëngadiṅ asò-lë die. ⁹ Dzëṅë ai ngul esë na ovol sòṅ a mënë mu. ¹⁰ Amu Demas alig ya ma, adiṅi e si-ndon nyi, ndò akë a Tesalonika, Kreskes akëlë a Galasia, Titus a Dalmasia. ¹¹ Lukas etam ṅnyè anë ai ma ha. Nòṅò Markus, ozu ai nyè eyòṅ wayi sò, amu anë ai ma mfi a esye abò. ¹² Mëngalom Tukikos a Efesi. ¹³ Eyòṅ wayi sò, ozaag ai ma ewòman mëngalig a Troas abë Karpos; ozaag fë ai bëkalara, adaṅ adaṅ a bikob. ¹⁴ Alesander nlui-bikye angabò ma abe abui. Nti ayi nyè dugan akyaè mimboan mie. ¹⁵ Saala tò nyè, amu angadoan ai bibug bian abui. ¹⁶ Eyòṅ osu ya mëngakaman ai mamen, mod ziṅan gabë ki hala, bësë bëngamana fò ma lig etam. Të balaṅ bò dò. ¹⁷ Nti angakè ma, avëë ma ngul, asu yë na, a anyu dama, nkadan mbëmbë foe odzalëban, ai na bëhaiden bësë bëwog; Ndò mëngakodeban a anyu emgbëm; ¹⁸ Nti ayi ma kode a mbë dzam osë, akode fë ma, akë ai ma a edzoe dzie ya ayob; Duma ai nyè a bisëb bisëb. Amen. ¹⁹ Sugu ma Priska ai Akila ai nda-bod Onesiforus. ²⁰ Erastus angaligi a Korinti, Trofus ṅnyè malig akònò a Miletus. ²¹ Dzëṅë na ovol zu osusua abog oyon. Ebulus ai Pudas ai Linus ai Klaudia ai babëdzaṅ bësë basug wa. ²² Nti abòò ai nsisim woe. Maa abò ai mina.