TESALONIKA BÈÈ

¹ Paulus ai Silvanus ai Timoteus, biatil nda-Zamba ya Tesalonika, ya enë abë Zamba esya waan, ai abë Nti Yesus Kristus; ² maa ai mvoè bibòò ai mina, a biasò abë Zamba esya waan ai Nti Yesus Kristus. ³ A babëdzaṅ, biayean kaṅ Zamba kòm esë asu daan mbol wayean, amu ṅyëbë waan wasam, ediṅ mod osë ya abë mina asu e ba bëvòg enaṅa fë, ⁴ antoa na bia bëben bingabò enguṅ dzaan a mënda më Zamba asu azombo daan ai ṅyëbë waan a efema esë mibëlë ai a mindzug ya miadzibi, ⁵ nala walëdë sosoo ntol Zamba asu yë na ayen na miakyëbë ai edzoe Zamba, ndò fë miabi mintye asu adzo te, ⁶ mbol Zamba ayen na anë mbëṅ na, e bod batibili mina, ayaan ai bò a mindzug, ⁷ avaa e mina ya batibili man evovoe ai bia, eyòṅ Nti ayi kulan a yob ai benglès bë ngul dzie, ⁸ a nkabag ndoan, avaa e bod bayëm ki Zamba endëgëlë, ai e ba fë bandzëki bò mbëmbë foe Nti waan Yesus mëwog, ⁹ mbò bayi yaan endëgëlë anyama kòm, oyab ai mvòm asu Nti, oyab ai duma fim dzie, ¹⁰ eyòṅ ayi sò amos te na abi duma a mimfufub mie ai na bëkam nyè abë e bod bësë bëngayëbë, amu bod bëngayëbë mbòòlan ya biabòòlò mina. ¹¹ Asu te ndò hm biakogëlan kòm esë asu daan asu yë na Zamba abò na mikyëbë ai nloe waan, ai na adzala ṅyian osë ya miayi a abëṅ nnëm, ai esye ṅyëbë a ngul, ¹² asu yë na dzoe Nti waan Yesus abi duma abë mina, mina fë abë nyè, anë maa Zamba waan ai Nti Yesus Kristus ayi.

¹ A babëdzaṅ, biadzaè mina, mfag adzo asò-lë Nti waan Yesus Kristus, ai mbol biayi tòbò ai nyè fufulu, ² biadzaè mina na të miavolo dzèè fëg a abum, ngë ki na nnëm odzugëlan mina, tò asu minkòbò mi nsisim, tò asu ebug ya anyu, tò asu e kalara badzo na bia bingatil, antoa hala na amos Nti osò ya. ³ Të mod adug mina tò kan ziṅ hala. Amu ngë eben ṅyëbë endzëki tari sò, mod nkòt akui fë a ngëëṅ, mòn ndzaṅ, ⁴ ṅnyè aluman, abedëge fë nlo a e dzom esë baloe na zamba ngë a dzom olugu, e kan yë na emen akë tòbò a tempel Zamba, angadzo na emen anë Zamba. ⁵ Nga mingënë mitsogo na mëngakad mina e mam ma hala mëngënë abë mina? ⁶ Ndò hm etoa dzi, miayëm e dzom yakaman ai nyè na abe kulan etoa dzi, akulan hë abog die. ⁷ Amu ndimba tègè ai ṅyëbë engabò ya esye. Hë e mod akaman ai nyè ṅnyè ayi bò nala akëlë kui anë akodo. ⁸ Abog te mod-nkòt ayi kulëban, ṅnyè Nti Yesus ayi woe ai evundu ya anyu die, amana fë ndaman nkuan-ngëëṅ woe osë, ⁹ asò-lë die anë anë esye Satan ai ngul esë, ai mëndëm, ai biyëṅ bi mam mëdugan, ¹⁰ ai bëbe mëdugan asu e ba bakë a ndzaṅ, amu bandzëki ṅyëbë ediṅ bëbëla, asu yë na bëkodeban. ¹¹ Asu te ndò Zamba alom bò ngul mëdugan asu yë na bëyëbë minnal, ¹² ai na e ba bësë bandzëki ṅyëbë bëbëla, bëdiṅi hë nkòt, bod bëte bëtsigëban ntol. ¹³ Bia biayean hm kaṅ Zamba kòm esë asu daan, a babëdzaṅ ya Nti adiṅ, amu Zamba angatòb mina na mibò mintol asu akode a mfuban ya Nsisim ai ṅyëbë bëbëla, ¹⁴ asu te angaloe mina ai mbëmbë foe waan asu yë na mibi duma Nti waan Yesus Kristus. ¹⁵ Antoa hm na, a babëdzaṅ, tëbëgan a kpiim, mibaala fë e mëtum ya mingayègè, tò a nkòbò waan, tò a kalara waan. ¹⁶ Nti waan Yesus Kristus ai Zamba esya waan ya adiṅ mina, avaa fë mina evòli kole ai mbëmbë afidi a maa, ¹⁷ avòligi minnëm mian, awone fë miè a mboan osë ai a mbëmbë nkòbò.

¹ A babëdzaṅ, mëngakë luu nkòbò na, kogëlan asu daan, asu yë na ebug Nti ewulu avol, ebi fë olugu anë abë mina, ² ai na bikodeban a mò më bëbe bë bod mëtom. Amu së ki bod bësë mbò bëbëlë ṅyëbë. ³ Nti anë mod afidi, ṅnyè ayi mina wone, akala fë mina a mò më Mbe. ⁴ Bibëlë afidi abë Nti asu daan, amu miabò e mam bingabende, ndò fë miayi kë ai nala osu. ⁵ Nti akëlë ai minnëm mian a zen ediṅ Zamba ai a fin Kristus. ⁶ A babëdzaṅ, biabende mina a dzoe Nti waan Yesus Kristus na misaala e madzaṅ osë awulu ki tëtëlë, tègè bie e tum bingavë bò. ⁷ Amu mina bëben miayëm na miayean bia vu, amu biandzëki nyiṅ ezëzam ai mina, ⁸ tò ki na bingadi mbaṅëla a zëzë abë mod ziṅ; Dzam da, a mindzug, ai a mëtug ete, ai alu, ai amos, bisye fò asu yë na të biandëgëlë mod ziṅ ya abë mina. ⁹ Së ki mbol biabëlë ki ngul te, dzam da hë asu yë na bia bëben bivë mina mvulna, mivu bia. ¹⁰ Amu eyòṅ bingabë abë mina, dzam te ndò bingabende mina, na ngë mod ziṅ ayi ki na asye, të adi. ¹¹ Amu biawog na bod bëziṅ banyiṅ a bë mina we ezëzam, tègè sye tò dzom, hë akë afudi anyu hom osë. ¹² Kan bod te endzò biabende, bilëbë fë bò abë Nti Yesus Kristus na bësye a miëëṅ, bëdi mbaṅëla ya bò bëben basye. ¹³ Mfag waan, a babëdzaṅ, të miaku sòm abò e dzi enë tëtëlë. ¹⁴ Ngë mod ziṅ abò ki ebug dzaan ya kalara mu mëwog, toan nyè big, të miakalan ai nyè dzom ziṅ, asu yë na awog osòn. ¹⁵ Dzam da, të miayen nyè anë nziziṅ waan, lëban nyè anë manyaṅ waan. ¹⁶ Nti mvoè emen avaa mina mvoè kòm esë ai hom osë. Nti abòò ai mina bësë. ¹⁷ Mësugan mënë ntilan ai wò wama, ma Paulus. Ndëm ya e kalara osë matil nyi. Na ngò matil. ¹⁸ Maa Nti waan Yesus Kristus abòò ai mina bësë.