PETRUS BÈÈ

¹ Ma Simun Petrus, mbò-esye ai man apostel Yesus Kristus, matil e bod bëngabi ṅyëbë ya onë fë anë engoan a mëkyebe më Zamba waan ai nkode waan Yesus Kristus; ² Mvoè ai maa bibòò abë mina etitib na miyëm Zamba ai Yesus Nti waan. ³ Akyaè ya ngul Zamba dzie engavë bia e mam mësë ya manèè enyiṅ ai olugu Zamba asu ṅyëman e nyò angaloe bia ai duma die aben, ai ṅlëdan ngul dzie, ⁴ etere ngò mimfaṅ mi ngaga ya minë mfi abui mingavëëban bia, asu yë na, etere, mibi ngab a azamba, mitub eboe enë a si-ndon etòm bëbe miṅyian. ⁵ Asu te ben, dzëṅan ai ngul esë na mibag mbëmbë fulu a ṅyëbë waan a yob, mibag ṅyëman a mbëmbë fulu a yob, ⁶ mibag mbanan nnëm a ṅyëman, mibag fin a mbanan nnëm, olugu Zamba a fin, ⁷ ediṅ babënyaṅ a olugu Zamba, ediṅ a ediṅ babënyaṅ. ⁸ Amu ngë mibëlë e mam ma, mëtoa fë abui, mabò na të miabò tègè ai mfi ngë ki na tègè ai bibuma asu ṅyëman Nti waan Yesus Kristus. ⁹ E mod abëlë ki e byem bili anë ndim ndò fë ayen ki oyab, avoan esob minsëm dzie ya okoba. ¹⁰ Asu te a babëdzaṅ, daṅan mvaman na mibò na nloe waan ai ntòban waan bibò a kpiim. Eyòṅ miabò nala, miangaku ki mbëg. ¹¹ Amu nala ngò bayi mina toan kom mbol mianyian a edzoe kole Nti waan ai nkode waan Yesus Kristus. ¹² Asu te mayi kòm esë na madugan mina tsog e mam ma, afyaṅan bò na miayëm mò ai na miyëmë a kpiim a e bëbëla mibële. ¹³ Mayen na anë sosoo na, ntye ya mëngënë a e nyòl nyi, mëvëlë mina a oyò ai ntsogan matsog mina mam, ¹⁴ mbol mayëm na mëngayi ya sòdi e nyòl nyi anë Nti waan Yesus Kristus angalëdë ma. ¹⁵ Ndò fë mayi dzëṅ ai ngul esë na mikad tsog e mam ma kòm esë hala te mëkë ya. ¹⁶ Amu biandzëki lèè minlaṅ mi mvèt minë ntaan ntaan mbëṅ, eyòṅ bibòò na miyëm ngul ai asò-lë Nti waan Yesus Kristus; dzam da, bia bëben bingayen ati-ati die ai mis. ¹⁷ Amu eyòṅ angabi olugu ai duma abë Zamba esya, eyòṅ ki lëngasò nyè a yob anë ati-ati duma na: Ndindiṅ mòn wama hi, ṅnyè mëngafuu nnëm, ¹⁸ ndò bia bëben bingawog e kiṅ nyili esòò a yob, bitoa ai nyè a mfufub nkol. ¹⁹ Ndò fë bibëlë ebug nkòbò profèt a yadaṅdaṅ fò ete. Miayi bò mbëṅ ngë mivogolo dzò anë alamba ya lafyè a e hom onë dibi, akëlë kui anë kidi yalende, otitie kidi otye mina a minnëm; ²⁰ E di osu, miyëmë hm na nkòbò profèt osë ya ntilan wasëki adzo yë na mod emen atimi; ²¹ Amu së ki a ṅyian mod ngò nkòbò profèt ongasò okoba, dzam da, bod bëkòbògò, lësòò abë Zamba, akyaè Mfufub Nsisim atindigi bò.

¹ Bë profèt minnal bënë a nnam, anë bëyëgëlë minnal bayi fë bò abë mina; mbò bayi sò ai mam më ngam ngam a mandaman bod, bëngasie Nti ya angakus bò. Bazu ai bò bëben amala lavol bòban. ² Abui bod bayi bò toṅ a ebamba, mbò bayi mgbali zen bëbëla, ³ a ndòg a yob, bayi dian ai mina ai e mam batye a nlo. Nkat waban wazuzu ya wabò esye, ndò fë amala daban lakë ki oyò. ⁴ Amu ngë Zamba andzëki kaman ai benglès eyòṅ bëngasëm, dzam da ndò angawoa bò a ndoan kòm, avëë bò na bëbi bò a ebe ndoan akëlë kui a nkat, ⁵ të kaman ai nnomo si-ndon, dzam da ndò angakaman ai Noe ai bod bëfë zamgbal na ayedan mëkyëbe, eyòṅ angasò ai mvëṅ endëgëlë a si-ndon a nyòl e bod balugu ki Zamba, ⁶ abò na bëtisòn bë Sodoma ai Gomorra bëvëṅan hë asub asub, bëbò hë bilig, abòò na bëbò mvulna e bod bëngabë na bayi ki lugu Zamba. ⁷ Ndò angakode Lodo, sosoo mod ya angabë mëlunga a nnëm etòm mbë enyiṅ ebamba waban ya angabë tègè ai mvende ziṅ. ⁸ Amu sosoo mod te ya angabë anyiṅi a zaṅ dzaban, asu e mam ayënë, awogo fë, amos ya amos osë sosoo nnëm woe angabë abëlë ndzug ai bëbe mimboan. ⁹ Nti ayëm mbol akode e mod alugu nyè a mëbobëla, ndò fë ayëm baala bod bë nkòt a endëgëlë asu amos nkat, ¹⁰ adaṅ adaṅ a eba babie nyòl a bëbe miṅyian, bëbyandigi ati. E bod mëbun bakam ki dzom, bambara ki mgbali mimbëmbë benglès, ¹¹ tò anë benglès ya bënë anen abui a ngul ai a fim basòman ki bò mbë sòman abë Nti. ¹² Hë da eba, hë anë e tsit ebëlë ki nlo, bikokoma bi nyòl ya bingabyali hë na babiban, bëwoe bò, bëmgbaligi e mam bayëm ki, bayi mana anë bò fë bamana. ¹³ Bayi bi maan më nkòt asu nkòt waban. Bayen na anë bivoe na babò ezëzam ai amos; Bënë adzo mvit osama, eyòṅ babò mëbog ai mina, bëbòò ezëzam a basòṅ mina. ¹⁴ Mis maban mënë atuud ai ṅyian ndaman mëlug, tègè vòd nsëm. Basòṅ minnëm miyëmë ki a kpiim; Bëbëlë minnëm ya mimana ya yëmëlë ai ndòg. Bòn bë eyòg! ¹⁵ Bëdzoge tëtëlë zen, ndò bëngadimi; bëtoṅo zen Balaam, mòn Bozor, nyè adiṅi maan asu abe abòòg, ¹⁶ ndò hm bëngakòṅan ai nyè asu mboan abe woe. Mvuvug ozele ongakòbò ai kiṅ mod, ndò ongatsig akud mboan profèt te zen. ¹⁷ Eba bënë bitam binë tègè ai mëndim, mboan ya wasò ai evundu; Nkut ndoan ya dibi wayanga bò. ¹⁸ Amu, eyòṅ bakòbò bivoe bi mam bi akud, ai miṅyian mi ebamba miaban ya nyòl fë, basòṅ bod ya bëndëm fò tub eba banyiṅ a ndimi. ¹⁹ Bakag bò fili, bò bëben bëtoa bëlò bë eboe. E dzom esë yabad mod, mod avëṅan olò dzom te. ²⁰ Amu ngë batub mvit ya si-ndon mbol bayëm Nti waan ai nkode, Yesus Kristus, bëngënë bëyëmë ete, biabad bò; e mvit mvua elod ya e nyi osu a abe asu daban. ²¹ Angabë mbëṅ abui asu daban na të bayëm zen mëkyëbë alodo anë bëyëmë dzò, abog te bëdzoge mfufub abende bavë bò a si. ²² E dzam badzo a nkana latoban fò ai bò na: Mvu yadugan a bëndolo boe, ai na bawòbò ngoe hë asu yë na ekë duman a mbòdòg.

¹ A mindindiṅ miama, e kalara bèè matil mina nyò. A bëkalara bëte bësë bëbè, mavëlë nnëm sosoo waan, mëtsogo mina mam, ² asu yë na mitsog e mam mimfufub bëprofèt bëngatari kad ai mvende Nti, ai nkode waan a anyu apostel ban. ³ E di osu, yëman na a mëmos më mvua, bod bë fyanga bayi sò ai fyanga, bënyiṅi të hë ai miṅyian miaban, ⁴ bò na: Eyë e ngaga asò-lë die enë ve? Amu anë bëtara bëngawu, mam mësë mënë fò hë anë akèègè a mëtari më akomo-lë yob ai si. ⁵ Amu bavaṅ fò yëgan e di na, okoba, yob ai si bingabë; a ebug Zamba a yob, ndò bingatye a mëndim ndò fë bingabë hë asu mëndim; ⁶ mbiè bingabò na si-ndon ya okoba edzaṅa mendim më mvëṅ endëgëlë. ⁷ E yob ai si ya etoa dzi, a ebug te a yob, binë nkomëzan asu ndoan, banyie biè akëlë kui a amos nkat ai ndzaṅ e bod balugu ki Zamba. ⁸ A mindindiṅ miama, të hm miayëgan e dzam di na, amos mbòg a mis më Nti onë anë akuda mimbu, akuda mimbu anë amos mbòg. ⁹ Zamba asëki atòṅ a vë ngaga, anë bod bëziṅ badzo na nala onë atòṅ; anë hë fin ai mina, ayi ki na bëvòg bëkë a ndzaṅ, ayi na bësë bëkë kui a ntsendan enyiṅ. ¹⁰ Amos Nti wayi sò anë ṅwuwub, abog te yob wayi dzaṅ ai mod eduṅ, byem biayi nyami a ndoan, abog te si ai mimboan ya ete biayi mana dig. ¹¹ Mbol hm e byem bisë bi biayi mana tiiban, za akyaè bod miayean bò a mfufub enyiṅ ai olugu Zamba; ¹² miyanga, mifëbë mëlu më asò-lë amos Zamba; asu amos te ngò yob wayi kab ndoan, omana nyami, byem binganyami ai ndoan. ¹³ Dzam da, biayanga mkpamaṅ yob ai mkpamaṅ si a mëkyëbë mëtoa ete, anë angakag. ¹⁴ Asu te, a mindindiṅ miama, mbol miayanga e mam ma, dzëṅan ai ngul esë na akòb mina ai mvoè, tègè ai atòn, tègè ai mvit; ¹⁵ Yënan fë na fin Nti waan enë akode, akyaè ndindiṅ madzaṅ Paulus angatil mina ai e fëg bëngavë nyè, ¹⁶ akyaè akòbò e mam ma a bëkalara boe. Ete, mam mëziṅ mënë aye awog, ndò e bod bayëm ki ai e ba bëyëmë ki a kpiim batsende anë batsende mintilan mivòg, hë asu amala daban. ¹⁷ Mfag waan, a mindindiṅ miama, mbol mitari ya yëm e dzam di osusua, boan okala, ndim e bod bënë tègè ai mvende ezaa kë ai mina, mingadzèè ndi dzaan. ¹⁸ Naṅan a maa ai a ṅyëman Nti waan ai nkode waan Yesus Kristus. Duma abòò ai nyè ana ai a amos kole. Amen.