KORINTI BÈÈ

¹ Ma Paulus, man apostel Kristus Yesus a ṅyian Zamba, ai madzaṅ Timoteus, abë nda-Zamba ya enë a Korinti, ai e mimfufub misë minë a Akaia asë, ² maa ai mvoè bibòò ai mina, bisòò abë esya waan ai Nti Yesus Kristus. ³ Olugu ai Zamba, esya Nti waan Yesus Kristus, esya ngòl esë ai esya awone, ⁴ ṅnyè awone bia a ndzug osë ai awone ya Zamba angawone bia, ⁵ na akyaè ya mintye mi Kristus miafuguzu abë bia, awone dan afuguzu asu Kristus. ⁶ Ngë bibëlë mindzug, hë asu yë na biwone mina, ai asu akode dan. Ngë bibëlë awonòṅ, hë asu awonòṅ daan ya lasò e fin ya bibëlë a mindzug ya bia fë biadzugi. ⁷ Afidi daan ayëmë a kpiim asu daan, mbol biayëm na akyaè ya mianòṅ ngab a mindzug, nala ngò fë mianòṅ ngab a awone. ⁸ Amu, a babëdzaṅ, mayi ki na miyëgan ndzug bingabi a Azia, amu ndzug te ongalod bia ton, bingayi dzèè afidi ya enyiṅ. ⁹ A nnëm etere, bitsogo na biazu wu, bintoa hm të bada fidi bia bëben, bifidigi hë Zamba ya avëlë mimbim. ¹⁰ Ṅnyè angakode bia a awu, ṅnyè fë ayi kode, ṅnyè bingafidi, ndò fë ayi kode, ¹¹ mbol miasye asu daan ai ngogëlan, asu yë na abui bod avë ngaṅ a su daan, bikë bi efaè-akab bavë bia asu ngogëlan abui bod. ¹² Amu etòm enguṅ dzaan enë na: a mbòòlan sosoo waan, ai nnëm mòngò, a saaṅ Zamba, së ki ai fëg bod, ai maa woe ngò fò bingawulu a si-ndon, adaṅ adaṅ a fë abë mina. ¹³ Amu biatil ki mina mam mëfë së na e mam mialaṅ, a miayëm fë. Mafidi na miayi yëm mbëṅ mbëṅ, ¹⁴ anë mingayëm bia hë etun, na binë dzom enguṅ dzaan, anë mina fë asu daan a amos Nti waan Yesus. ¹⁵ Mbol mëyëmë nala, ndò mëngayi tari sòṅ a bë mina, asu yë na mibi mintag eyòṅ bèè, ¹⁶ mëlod abë mina, mëkë a Masedonia, mëdugan tye a Masedonia mëzu abë mina, miyaan ai ma, mëkë a Yudea. ¹⁷ Eyòṅ mëtsogo nala, dze, yë mëngabë mëbò dò ai evëves nnëm? Yë na matsog mintsogan mi bod, e kan ya na mëdzoo na Owe-Kokoa a dzam dëda? ¹⁸ Sòṅ, anë Zamba anë bëbëla, e dzam biakad mina asëki owe-kokoa. ¹⁹ Amu Yesus Kristus mòn Zamba ya bingayedan mina, ai ma, ai Silvanus ai Timoteus, andzëki bò owe ai kokoa, hë owe ṅnyè angabë abë nyè. ²⁰ Amu ngaga Zamba esë enë ’Owe’ abë nyè. Asu te biadzo ai Zamba na ’Amen’ asu olugu Zamba a dzoe die. ²¹ Zamba te ṅnyè avë bia ngul ai mina abë Kristus, ṅnyè fë awòbò bia mfufub mbòn, ²² ṅnyè abò bia tiga, avëë bia eban Nsisim a minnëm. ²³ Mfag wama, matele Zamba wusnèt a enyiṅ dzama, na asu yë na makaman ai mina ngò mandzëki sòṅ a Korinti, ²⁴ së ki asu yë na bidzoe ṅyebe waan, hë mbol biasye fufulu asu mintag mian. Miyëmë a kpiim a ṅyëbë.

¹ Amu mënòṅ oyili na mayi ki sòṅ a bë mina ai endëgëlë. ² Amu, ngë mandëgëlë mina, za ayi ma vë mintag së na e mod mavë endëgëlë te? ³ Mëngatil mina e dzam di, asu yë na, eyòṅ makë sò, të mawog olun ai e bod bayean ma vë mintag, mëbëlë afidi ai mina bësë na mintag miama minë mintag mi mina bësë. ⁴ Amu mëngatil mina a zaṅ mindzug ai nyënya a nnëm, ai abui bibëga, së ki asu yë na miwog olun, da asu yë na miyëm abui ediṅ mëbëlë asu daan. ⁵ Ngë mod ziṅan gabò na bëwog olun, së ki ma angabò dò, dzam da, asu yë na të madaṅ dò yin abui, ndzoan na mina bësë angabò dò. ⁶ Asu kan mod te, endëgëlë ya e bod bësë bëvòg bavë nyè yayean: ⁷ kë miayëyean dzu, mivòligi, asu yë na olun oza lod mod te nkoṅ a . ⁸ Ndò makogëlan ai mina na milëdë nyè ndëm ediṅ. ⁹ Amu asu te fë mëhë til, asu yë na mëyëm mfaṅ fulu waan, ngë minë mëwog a mam mësë. ¹⁰ E mod osë miadzu, ma fë madzu nyè. Amu, e dzam madzu, ngë mëhë bëlë e dzam madzu, madzu asu daan a mis më Kristus, ¹¹ asu yë na të Satan ayen bia si-etëgë-bikòn. Amu biayëgan ki mintsogan mie. ¹² Mbol hm mëngakui a Troas na mayedan mbëmbë foe Kristus, mbè oyaaban fë ma we abë Nti, ¹³ mëngabë mësaṅan a nnëm abui, mbol mandzëki yen madzaṅ Titus, ndò mëngayaan ai bò, mëkëlë a Masedonia. ¹⁴ Ngaṅ ai Zamba, mbol avë bia olugu kòm esë abë Kristus, akuligi fë mënyum më ṅyëman woe ai wò esye waan hom osë. ¹⁵ Amu binë mbëmbë enyum Kristus asu Zamba tò a e bod bakodeban, tò e ba bakë a ndzaṅ, ¹⁶ asu e ba, binë enyum yasò a awu ekëlë a awu, asu bevòg, enyum yasò a enyiṅ, ekëlë a enyiṅ. Za akyëbë ai e mam ma? ¹⁷ Amu biasëki anë abui bod bakuan ai ebug Zamba, bia biasye a tëtëlë, biakòbò a nloman Zamba, a mis më Zamba, abë Kristus.

¹ Yë bitari hm fë na biataman bia bëben? Ndò ki yë binë anë bod bëziṅ, na biayaṅan ai kalara ovangul a biazu abë mina, ngë eyòṅ miazu abë bia? ² Mina bëben minë kalara ovangul, anë bia ntilan a minnëm, bod bësë bayëm nyè, bëlaṅa fë nyè, ³ amu mialëdë na minë kalara Kristus a bingatil, asëki ntilan ai tinte, anë ntilan ai Nsisim Zamba ya avëë, së hm ki a mëbam mëkòg, anë ntilan a mëbam më nnëm nyòl. ⁴ Biayëm nala mbëṅ ai Kristus asu Zamba. ⁵ Së ki na biadaṅ yëm abui, na bikë dzo na dzom ziṅ yatye abe bia; Zamba emen ṅnyè avë bia ngul te, ⁶ ṅnyè angatele bia na bibò bësye bë mkpamaṅ elad, së ki elad enë ntilan, edzi Nsisim. Amu ekanga ekanga ya kalara yawoe, Nsisim wavë enyiṅ. ⁷ Ngë esye awu engabë ntilan a kalara mëkòg engavëṅan adzo duma, e kan ya na bòn bë Israel bëngabë ki dzam bëbë Moses a asu etòm mfyè duma ongabë nyè a mvòm asu, a ongabë fë na wamana, ⁸ biyòṅ taṅ ya esye Nsisim yayi bò a duma ete? ⁹ Ngë duma anë asu esye ya nkat, biyòṅ taṅ ya esye afu-nnëm sosoo yayi fuguzu ai duma! ¹⁰ E dzam biakòbò di, e dzom engabë ebëlë duma, ebëlë ki fë duma te, etòm yë na duma te lalod bisë. ¹¹ Amu ngë dzom ndon ebëlë abim duma di, biyòṅ taṅ ya e dzi enë kole yayi tòbò a duma! ¹² Mbol hm bibëlë kan afidi te, ndò bianyiṅ ai abui azombo, ¹³ ndò fë, së ki anë Moses ya angabë abudigi eyie a mvòm asu, asu yë na bòn bë Israel bëza yen mëmana më ndon. ¹⁴ Fëg dzaban engabò ya ndim. Amu, azaag kui amos ya ana, eyie te enë eyòṅ balaṅ nnomo elad, tègè bò kuli na emana ya sole abë Kristus. ¹⁵ Ndò azaag kui amos ya ana, eyòṅ esë balaṅ Moses eyie eyala bò a nnëm. ¹⁶ Eyòṅ esë mod avëṅan abë Nti, eyie yavaaban. ¹⁷ Nti te anë Nsisim. Fili enë e hom Nsisim Nti onë. ¹⁸ Bia bësë, tègè ai eyie a mësu, biayen duma Nti, bitsende, bintoa evëgëlë dzie, bisòò a duma bikëlë a duma, amu Nti ya anë Nsisim ṅnyè abò dò.

¹ Asu te, mbol bibëlë esye dzi na bëngawog bia ngòl, ndò biaku ki sòm, ² bingadzoge fò hë e mam basòli asu osòn, bia të wulu ai mëkëṅ, tò ki a tsende ebug Zamba, dzam da, mbol biakad bëbëla a ngëëṅ ngò wayi bò na bod bëse bëyëbë bia a mis më Zamba. ³ Ngë eyie ebudu mbëmbë foe waan a asu, ebudu nala asu e bod bakë a ndzaṅ. ⁴ Asu daban, Zamba e si-ndon nyi angakpè mintsogan bëhaiden ndim a mis, asu yë na të bayen mfyè mbëmbë foe duma Kristus ya anë evëgëlë Zamba. ⁵ Amu biayedan ki bia bëben, biayedan Yesus Kristus Nti, bia binë bëlò ban asu ediṅ Yesus. ⁶ Amu e Zamba angadzo na: Mfyè ofyèg a dibi, ṅnyè angafyè a minnëm mian asu mfyè ṅyëman duma Zamba a mvòm asu Yesus Kristus. ⁷ Bibëgë hm mod akuma te a mëmvie më si, asu yë na abui ngul Zamba lëwoge ai Zamba, lasò ki abë bia. ⁸ Bibëlë mindzug a dzam asë, dzam da tègè fidi, fëg edzaṅa bia, bia tègè dzò dzèè esë, ⁹ baluman ai bia, bia tègè tigibi, bëwudu bia bikuda, bia tègè dzaṅ a ekoa, ¹⁰ bibëgë awu Yesus kòm esë a nyòl dzaan. ¹¹ Amu e bia ya bivëë, bingavëëban ya a awu a nyòl Yesus, asu yë na enyiṅ Yesus dzò eyene a ewuwu nyòl dzan. ¹² Antoa hm na, awu lasye abë bia, enyiṅ esye abë mina. ¹³ Mbol bibëlë Nsisim ṅyëbë Zamba dzam da, akyaè anë ntilan na: Mëngayëbë, asu te mëngakòbò, ndò bia fë bingayëbë, asu te bingakòbò, ¹⁴ biyëmë na e nyò angahëlë Nti Yesus ayi bia hëlë ai Yesus, atogan fë bia ai mina fufulu. ¹⁵ Amu byem bisë binë asu daan, asu yë na maa afuguzu etòm abui bod, abuli ngaṅ a su duma Zamba. ¹⁶ Asu te biaku ki sòm, afyaṅan bò na ekob nyòl dzaan yandaman, nnëm ete wawome amos ya amos osë. ¹⁷ Amu e man zëzë ndzug ya etoa dzi akomëzan bia mod olugu kole, ¹⁸ biabëbë ki e byem bayen, biabëbë e bi bayen ki. E byem bayen binë ndon, e bi bayen ki binë kole.

¹ Biayëm na ngë ebëm si dzaan yandaman ana, bibëlë nda ya Zamba avë bia, nda kole ya mò më bod mandzëki loṅ a yob. ² Ndò hm bibëlë mintye, biyii du na biabëlan ai etòbògò dzaan yasò a yob, ³ antoa hm na, ngë bihë sòdi e dzi bibëgë dzi, të bialaṅan minsò. ⁴ Amu e bia ya binë a ebëm, bibëlë sug ya abui mintye, mbol biayi ki na biasòdi e dzom bibëgë, biayi hë na biabòd e dzi evòg, asu yë na enyiṅ emana dim mbim nyòl. ⁵ E nyò angakomëzan bia asu dzam te anë Zamba, ṅnyè avë bia eban Nsisim. ⁶ Ndò hm ngul enë bia a nyòl kòm esë, biyemë na ntye bitoa a nyòl, binë oyab ai Nti. ⁷ Amu biawulu ai ṅyëbe, biawulu ki ai ṅyenan biayen. ⁸ Ngul enë bia a nyòl, bingayiyi hë na ngë biakodo a nyòl, bitòbò abë Nti. ⁹ Asu te biadzëṅ na, tò binë abë nyè, tò binë nyè oyab, binyëb nyè a nnëm. ¹⁰ Amu bia bësë biayi yean kë tëbë a etoa nkat Kristus osu, asu yë na mod osë abëlë maan ya e mam angabò a nyòl, tò mbëṅ, tò abe. ¹¹ Mbol biambara Nti, ndò biadudu bod, Zamba nyè angadudu bia. Mafidi na mëtëlë a ngëëṅ a ṅyënan waan. ¹² Biadugan ki lëdë bia bëben abë mina, biavë mina hë afola yë na mibò enguṅ ai bia, asu yë na mibò enguṅ te abë e bod babò enguṅ hë a miṅyene, tègè dzò bò a nnëm. ¹³ Ngë biavu abui, hë asu Zamba. Ngë binë evovoe, hë asu daan. ¹⁴ Amu ediṅ Kristus yayadan bia, mbol biayëm na mod mbòg angawu asu bod bësë, asu te bod bësë bawu. ¹⁵ Ndò angawu asu bod bësë asu yë na të bënyiṅ badugan nyiṅ asu daban, bënyiṅ asu e nyò angawu asu daban, akulëban fë a sòṅ. ¹⁶ Antoa hm na, atarigi etoa dzi, bia biayëm ki mod ziṅ mfag ya nyòl. Tò bingayëm Kristus mfag ya nyòl, etoa dzi, biayëm ki fë nyè nala. ¹⁷ Ngë mod anë abë Kristus, anë mkpamaṅ ekokoma. Minnomo mimana ya, yënë sik, mimkpamaṅ mintoa ya. ¹⁸ Byem bisë biasò abë Zamba ya angalad bia ai emen ai Kristus, avëë fë bia esye elad, ¹⁹ akyaè ya Zamba angabë alada si-ndon ai emen abë Kristus, tègè bò laṅ minsem miaban, ndò fë angavë bia ebug elad. ²⁰ Ndò hm binë bëbëgë bë foe asu Kristus, Zamba akòbògò a anyu daan. Biakogëlan ai mina a dzoe Kristus: ladan ai Zamba. ²¹ E nyò angabë ayëmë ki nsëm, angabòban nsëm asu daan, asu yë na bia bivëṅan mëkyëbë më Zamba abë nyè.

¹ Mbol biasye fufulu ai nyè, ndò biakogëlan ai mina na të mianòṅ maa Zamba a zëzë. ² Amu adzo na: A mbëmbë abog, mëngawog wa, A amos akode, mëngavòli wa. Yënë hm, mbëmbë abog hm nyò, amos akode hi. ³ Biayè ki mod ziṅ dzom a zen, asu yë na bëza yen evus ya esye dzaan, ⁴ dzam da bialëdë bia bëben anë bësye bë Zamba, ai abui fin, a mindzug, a mëyaṅan, a wòṅ, ⁵ a zaṅ bibom, a mimbog, a mëndum, a ngul bisye, a bivie, a biaki bidi. ⁶ A fulu mfuban ai ṅyëman, a fin, a abëṅ nnëm, a Mfufub Nsisim, a mfaṅ ediṅ, ⁷ a ebug bëbëla, a ngul Zamba. Ai bikpëlë bi mëkyëbë ya mbo-nnomo ai ebi ya mbo-ngala, ⁸ ai duma, ai osòn, ai bikag, ai mëtaman; tò banòṅ bia anë bod bë mvol ai bod bë bëbëla, ⁹ na bayëm ki bia ndë bayëm bia, bëdzoo na biwu ya ndë bitala, bëtibili bia hë da tègè bia woe, ¹⁰ bëbòò na biwog olun ndë biatag, bò na binë mëbua ndë biabò na abui bod bëbi akuma, hë anë bibëlë ki dzom, ndë bibëlë byem bisë. ¹¹ A bod ya Korinti, anyu daan ayoo asu daan. Nnëm waan ondama. ¹² Nguma etòm ziṅ wasëki abë bia, eyë etòm enë a minnëm mian we. ¹³ Makòbò ai bòn bama, mina fë bëlan ai bia kan te anë biabëlan ai mina. ¹⁴ Të miawulu esamba ai bëhaiden. Afu-nnëm ai nkòt biakuan dze? Mfyè ai dibi biakalan dze? ¹⁵ Kiṅ fe Kristus ban Belial bënë? E mod ayëbë ban man haiden bakalan dze? ¹⁶ Oyili mfe onë a zaṅ tempel Zamba ai tempel bëzëzë bëzamba? Bia bëben binë tempel Zamba ya avëë, akyaè ya Zamba adzo na: Mayi tòbò abë bò, mëwulugu bò a zaṅ, Mayi bò Zamba waban, Bò bëbò ayòṅ dama. ¹⁷ Asu te, kodogan a zaṅ dzaban, mitsaman ai bò, Nti ṅnyè akòbò nala, të mianamba dzom eboe, abog te mamen mayi bëlan ai mina, ¹⁸ abog te mayi mina bò esya, mina fë mibò bëndoman ai bëngòn bama, Nti ngul mësë ṅnyè akòbò nala.

¹ A mindindiṅ miama, mbol bibëlë e ngaga esë nyi, mfubugan bia bëben ai mvit ya nyòl ai a nsisim, bibò na mfuban waan obò ntud a wòṅ Zamba. ² Yaagan bia minnëm mian. Biandzëki bëlan ai mod ziṅ abe, biandzëki ndaman mod ziṅ, biandzëki dian ai mod ziṅ. ³ Masòman ki mod ziṅ. Asu te matari ya dzo na minë bia a minnëm, na biwu fufulu, binyiṅ fë fufulu. ⁴ Mëbëlë abui afidi ai mina, mëbòò fë enguṅ ai mina. Mëngadzie ya ai evòli, mëfuguzu ai mintag a ndzug waan osë. ⁵ Amu eyòṅ bingasò a Masedonia, nyòl dzaan engasaṅan abui, mindzug hom osë. A nsëṅ, bita, a nnëm ete, wòṅ. ⁶ Ndò e Zamba avòli e bod bënë edzòdi nyòl angavòli bia ai asò-lë Titus, ⁷ së ki hë asò-lë die, dzam da fë a evòli mingavòli nyè, amu angalèè bia miṅyian mian ai ṅyon waan ai mvam dzaan asu dama, mëngafëdan wog mintag. ⁸ Ngë mabò a kalara na miliṅan, masingi ki dò. Ngë mëngasingi dò, mayen na kalara te angabò na miliṅan etun abog; ⁹ etoa dzi, mawog mintag, së ki mbol mingaliṅan, dzam da mbol mingaliṅan, mitsende enyiṅ. Amu mingaliṅan anë Zamba ayi, e kan yë na miandzëki dzèè tò mod ziṅ etòm dzaan. ¹⁰ Amu mëliṅan a ndi Zamba mabye ntsendan enyiṅ; asu akode ladugan ki ai mvus. Mëliṅan më si-ndon mabye awu. ¹¹ E mëliṅan ma, anë Zamba ayi, masò ai mina akyaè osësa te, së hm ki hë nala, masò fë ai mina mbol miakaman ai mina bëben ai sosoo olun, ai wòṅ, ṅyian du, mvam, bivudëga. A dzam asë, lëdëgan na minë a saaṅ e dzam di. ¹² Ndò, tò anë mëngatil mina, së ki asu e mod angabò abe, ngë asu e nyò bëngabò abe, angabë asu yë na osësa ya abë mina asu daan oyene mina a ngëëṅ a mis më Zamba. ¹³ Asu te biayen evòli. Bingadaṅ fë wog mintag hala a evòli dzaan a yob, etòm mintag mi Titus, mbol miasuu nyè nnëm a si. ¹⁴ Amu, ngë mëngataman mina a mis moe, mandzëki sama amu e kan bingakòbò ai mina wakui bëbëla, nala ngò fë enguṅ bingabò Titus a mis yakui bëbëla. ¹⁵ Ndò nnëm woe onë fò hë abë mina eyëgan, abog atsog mëwog maan, akyaè mingabëlan ai nyè ai wòṅ, ai olugu. ¹⁶ Mawog mintag na mëbëlë ngul afidi ai mina.

¹ A babëdzaṅ, biayi na miyëm e maa Zamba bëngavë mënda më Zamba ya Masedonia, ² na a bod mindzug baban, hë mintag miaban ai mëbua maban binganaṅ, bintoa akuma ya nnëm mòngò waban. ³ Mabòòlò dò na, bëvaa abim ngul dzaban, alodo fë bò ton, ai mbëmbë ṅyian waban, ⁴ bëkogelan ai bia eyëgan abui na bëbi maa ya esye fufulu asu mimfufub, ⁵ së ki hm anë bingatsog, dzam da bëngatari mana vëëban Nti ai bia a ṅyian Zamba, ⁶ asu te bingakogëlan ai Titus na, akyaè ya angatari dò, azu mana kom esye akab te abë mina. ⁷ Ndò mbol ya miafuguzu a dzom esë, a ṅyebë, a nkòbò, a ṅyëman ai a osësa osë, ai a ediṅ bibëlë asu daan, fuguzan fë a esye akab dzi. ⁸ Matele ki mvende, mayi hë na mëyëm ngë osësa waan ai ediṅ binë ete. ⁹ Amu miayëm maa Nti waan Yesus Kristus, mbol angavëṅan mëbua, atoa nkukuma, asu yë na mina fë mibi akuma mëbua te. ¹⁰ Makad mina ntsogan wama a adzo te. Amu anë ai mfi asu daan, mbol ya, mbu ongaman, mingabò dò, ndò fë mingalëdë na miayi kë ai nala osu. ¹¹ Ndò hm, etoa dzi, manëṅan dò bò, asu yë na, akyaè ya minë osësa a miayi na miabò dò, nala ngò fë mibò dò ai abim mibëlë. ¹² Amu eyòṅ osësa onë hala, wayene mbëṅ ai abim ya mod abëlë, së ki abim abëlë ki. ¹³ Së ki na bëvòg bëbi evovoe, mina mibi mindzug, dzam da, abò dzam dëda. ¹⁴ Etoa dzi, e dzi mibëlë a fus a yob, ekëlë a mëyaṅan mënë, asu yë na e dzi bëbëlë a fus a yob ezu a mëyaṅan ya mibëlë, nala obò dzam dëda, ¹⁵ e kan enë ntilan na: E nyò anganòṅ abui andzëki bi abui, E nyò ki anganòṅ abòd të yaṅan. ¹⁶ Ngaṅ ai Zamba ya avë Titus osësa asu daan a nnëm, ¹⁷ mbol angayëbë ngogëlan dzaan, abulu bò osësa, ndò fë ayëbë na azu abë mina. ¹⁸ Bialom mina madzaṅ mfë fufulu ai nyè, a bayëm asu esye mbëmbë foe dzie a mënda më Zamba mësë, ¹⁹ së ki hë nala, mënda më Zamba mëngatele nyè na akë ai bia a dulu, avòli fë bia esye maa biabò dzi, asu duma Nti ai asu osësa waan, ²⁰ biabò okala na, mod azaa yen evus a e mod esye mòni ya biabò nyò. ²¹ Biabò okala na bibò mbëṅ, së ki hë a mis më Nti, tò ben a mis më bod fë. ²² Bialom mina madzaṅ ya biayen ya na anë osësa a abui mam, etoa dzi ben anë osësa abui mbol abëlë abui afidi abë mina. ²³ Mfag Titus, anë eyòṅ dzama, bia nyè biasye fë fufulu asu daan. Mfag babëdzaṅ bënë apostel mënda më Zamba, bënë duma Kristus. ²⁴ A mis mënda më Zamba, milëdëgë hm ndëm ediṅ dzaan ai enguṅ bingabò mina a mis maban.

¹ Mayaṅan ki ai na mëtil mina asu afaṅ ya biabò mimfufub. ² Amu mayëm osësa waan, a mëngabò ai wa enguṅ a mis më bod ya Masedonia, mbol Akaia amana ya komëzan mbu ongaman, ndò evag dzaan engavëlë abui dzam ya abë bò oyò. ³ Ndò malom mina babëdzaṅ, asu yë na të enguṅ mëbòòg asu daan yavëṅan zëzë e dzam di, na akyaè ya mëngadzo, mitòbò a ngomëzan, ⁴ lëza bò na, ngë bod ya Masedonia bëhë zu ai ma we, bëyënë na miasëki a ngomëzan, bingawu osòn, makë tsog mina bëben, asu abui afidi bibëlë di. ⁵ Asu te mëngayen na mayean bò na babëdzaṅ bëtari bia kë osu abë mina, bëmana sòṅ komëzan efaè afaṅ dzaan mingakag, etòbò babi, asu yë na ebò fò afaṅ, së ki hë anë biafadi. ⁶ Anë hm na, e mod amias bidi abòd, ayi fë koe hë abòd. E nyò amias abui, ayi fë koe abui. ⁷ Mod osë avaag anë atsig a nnëm woe, të avë ai olun a nnëm ngë ki na obila. Amu Zamba adiṅ e mod avë ai mintag. ⁸ Zamba abëlë ngul ya abulu maa osë abë mina, asu yë na mibëlë e dzom esë miayaṅan ai dzò, a dzam asë ai kòm esë, mibulu hm bò e dzom enë mbëṅ, ⁹ akyaè anë ntilan na: Angabò akab, avëë e bod bënë a mëyaṅan, Mëkyëbë moe mënë a bisëb bisëb. ¹⁰ E nyò avë mbè mvòṅ mvòṅ ya abè, avaa mbaṅëla na bod bëdi, ayi vë, abaag mvòṅ dzaan, abò na bibuma bi akab daan binaṅ. ¹¹ Miayi bi akuma asu akab daan asë e kan yë na bingavë Zamba ngaṅ. ¹² Amu esye biabò bod dzi esëki hë na biavòli mimfufub mbol bënë a mëyaṅan, enë fë na yafuguzu ai nkaṅan biakaṅ Zamba. ¹³ Akyaè bayi yen esye dzi, bayi lugu Zamba asu mëwog mialëdë a miayëbë mbëmbë foe Kristus ai akab miavòli bò, mivòligi fë bod bësë, ¹⁴ ndò bakogëlan asu daan, bëyii na bayen mina asu abui maa Zamba anë abë mina. ¹⁵ Ngaṅ ai Zamba asu efaè dzie ya enë tègè ai alèè.

¹ Mamen, Paulus, makogëlan ai mina ai evovoe, ai abëṅ nnëm Kristus, e ma ya mënë edzòdi-nyòl eyòṅ mënë abë mina, mëntoa ayòg eyòn mënë mina oyab. ² Makogëlan ai mina na eyòṅ mayi sò, të mabò ayòg akyaè mayi bò ai bod bëziṅ ya badzo na bianyiṅ të hë enyiṅ si. ³ Tò anë bianyiṅ a nyòl, bialuman ki bita bi nyòl. ⁴ Amu bikpëlë bi ndum dzaan biasëki e bi bi nyòl; binë ngul asu Zamba na biabug mimfim, biasole mëlam më fëg; ⁵ Biasole e mëbun mësë mabede nyòl ai fëg Zamba, biabi fëg esë nkom asu yë na ewog Kristus, ⁶ ndò binë a ngomëzan na biandëgëlë mod mëlò osë, eyòṅ mëwog maan mayi bò ntud. ⁷ Bëbëgan e dzi etële mina osu. Ngë mod ziṅ ayëm na awoge ai Kristus, atoan hm bindi na, akyaè ya awoge ai Kristus, nala ngò fë bia biawoge ai Kristus. ⁸ Tò ben ki mabò enguṅ a bui ai ngul dzaan ya Nti angavë bia na bikomdo mina, së ki asu yë na bidzèè mina, mayi ki sama. ⁹ Mayi ki na mayene anë masii mina ai bëkalara. ¹⁰ Amu bod bëziṅ badzo na: ’Bëkalara boe bënë ai fim, ai ngul, eyòṅ emen atëlë bia a mis, hë ntëgan ntëgan, nkòbò woe tègè ai ndòṅ.’ ¹¹ Mod te atoan bindi na, akyaè ya binë e bëkalara biatil, eyòṅ binë mò mò, nala ngò fë binë a mimboan eyòṅ binë hala. ¹² Amu biayi ki na biavëgan kan ziṅ ai e ba balëdë bò bëben, dzam da, eyòṅ bavëgan bò bò, balëdë ki na bënë fëg. ¹³ Mfag waan, biayi bò enguṅ a bui, biayi laṅan hë abim ṅnyie Zamba angavë bia, bizu fë kui abë mina. ¹⁴ Amu biahèd ki ntye, hë anë biandzëki kui a minë, amu bia bingatari kui abë mina ai mbëmbë foe Kristus. ¹⁵ Biabò ki enguṅ nnëmëna ai eza esye, dzam da afidi daan anë na, anë ṅyëbë waan waanaṅa bë mina, esye dzaan enaṅ fë nala abui. ¹⁶ Bibëlë afidi ya ayedan mbëmbë foe a minnam a ngòdò dzaan, hë da të bò enguṅ a su eza esye ya e hom bëkad ya mbëmbë foe. ¹⁷ E mod abò enguṅ, abòò dzò abë Nti. ¹⁸ Amu së ki e mod ataman emen ṅnyè bakam, hë e mod fò Nti ataman.

¹ Ngë mitoa të dzam dzibi fulu akud dzama tsëtsat! Kë miayean ma dzibi a! ² Amu mamvaman ai mina mvam Zamba, amu mëngasili mina alug, na mëvë mina a alug, anë ntud ngòn mininga, abë fam dzidzia, Kristus. ³ Mambara na, anë nyò engadug Eva ai mëkëṅ moe, mintsogan mian miza ndaman tègè fë ai miè mfuban ngë ki na anë e mi mi mòngò, abë Kristus. ⁴ Amu ngë mod asò mina yedan Yesus mfë alodo anë enyò bingayedan, ngë ki na bëvë mina nsisim mfë ya miandzëki bi, ngë ki na mbëmbë foe mfë ya miandzëki yëbë, mingayëbë dò mbëṅ. ⁵ Amu matsog ki na e mimfaṅ mi apostel mili mialod ma. ⁶ Tò madaṅ ki yëm nkòbò, masëki nala a ṅyëman ben, ndò fë bilëdë ya mina dò kan esë. ⁷ Yë mëngabò nsëm na mabò edzòdi-nyòl asu yë na mëbedëban, mbol bingayedan mina mbëmbë foe Zamba a zëzë? ⁸ Mëngadzib e mënda më Zamba mëvòg, mënòṅò maan asu yë na masye mina, ⁹ ndò fë ntye mëngabë ai mina, tò mëngaku a mëyaṅan, mandzëki ndëgëlë mod ziṅ. Amu e babëdzaṅ bësòò a Masedonia bëngadzala miṅyian miama, ndò mandzëki bò mod ziṅ adid mbëgë tò kan ziṅ, a maangabò ki tò eyòṅ. ¹⁰ Makad mina bëbëla na enguṅ dzi yayi ki ma mana a minnam mi Akaia. ¹¹ Asu dze? Yë na madiṅ ki mina? Zamba ayëm! ¹² E di mabò, mayi fë dò bò, asu yë na mëtsig e bod bayi zen te, na bëyen na bënë ai bia nkoṅ e dzam babò enguṅ ete. ¹³ Amu bod bëte bënë apostel bë mvol, bod bisye bë mfugu, bayi na bayene anë apostel bë Kristus. ¹⁴ Dze biakam ete? Amu Satan emen angayi na ayene anë englès mfyè. ¹⁵ Nkënga osëki ete na bësye boe bëyene anë bësye mëkyëbë. Amana daban layi fë bò anë mimboan miaban. ¹⁶ Mabaala na, të mod atsog na menë akud. Ngë tègè ai nala, yëban ma anë akud, asu yë na ma fë mëbò man enguṅ. ¹⁷ E dzam madzo di, makòbò ki dò anë Nti ayi, makòbò dò anë masòg, asu yë na mazombo enguṅ te. ¹⁸ Mbol abui bod babò enguṅ a kyaè ya nyòl, ma fë mayi bò enguṅ. ¹⁹ Amu miadzibi mëkud, mina bëben mitoa mimfëfëg. ²⁰ Amu miadzibi ngë mod atibili mina, ngë mod adian ai mina, ngë mod afadi mina dzom, ngë mod adzib mina dzom a mëkëṅ, ngë mod abimi mina a amaṅ. ²¹ Madzo dò mëwogo osòn, amu bia bingabò atëg. Ngë mod anë dzam lëdë nyòl, matam fò kòbò anë akud, ma fë mabò dò enguṅ. ²² Yë bënë Ebrea? Ma fë. Yë bënë ban bë Israel? Ma fë dzam dëda! Yë bënë mëki më Abraham? Ma fë! ²³ Yë bënë bësye bë Kristus? -Mëngakobò ya anë akud- Malod bò! Malod bò a bisye, malod bò a mimbog, malod bò a bibom, abui biyòṅ dili, awu angasubu ma babi! ²⁴ Biyòṅ bitan, Yuden bëngayit ma bingëṅ mëwom mënyii ovaè dzia, ²⁵ bëyidi ma ai nkas biyòṅ bilè, eyòṅ dzia, bëlumu ma ngòg, mal mëkubu ai ma biyòṅ bilè, mëbombo a maṅ nala nguma amos ai nguma alu. ²⁶ Abui biyòṅ nala a dulu, mësis ya osoe, wòṅ miṅwuwub, wòṅ ya mambara babëdzaṅ, wòṅ ya mambara bëhaiden, mësis a tisòn, wòṅ a nkod-nnam, wòṅ a maṅ, wòṅ a su babëdzaṅ bë mvol, ²⁷ esye, tuṅ, abui biyòṅ hë evie, a zie ai ekode, abui biyòṅ a eki-bidi, a avëb, a nsò. ²⁸ E mala ki fas. Amos osë nnëm okëlë ma a yob, etòm mvam asu mënda më Zamba mësë. ²⁹ Za akòn, mëtoa të kòn ai nyè? Za aku a nsëm, ma tègè dò wog abe? ³⁰ Ngë mayean bò enguṅ, mayean bò enguṅ ai eyòṅ mëngabë ntëgan. ³¹ Zamba, esya Nti Yesus ayëm na madug ki, olugu ai nyè a bisëb bisëb. ³² A Damaskus, ngòmëna ya edzoe nkukuma Aretas angabë anoniṅi tisòn bod bë Damaskus na abi ma, ³³ ndò bëngasuu ma a nkun a wundi ya mfim, mëtubu nyè a mò.

¹ Ngë mayean bò enguṅ, nala ben wasëki ai mfi; mazu lèè mbol Nti ayene, akulëgan. ² Mayëm mod ziṅ abë Kristus, mimbu awom ai minyii ana; tò na a nyòl dzie o, tò na së ki a nyòl dzie, mayëm ki, Zamba ayëm. Mod te anganòṅëban a e yob lala. ³ Ndò mayëm na, mod te, tò na a nyòl dzie, tò na së ki a nyòl dzie, mayëm ki, Zamba ayëm, ⁴ na anganòṅëban a paradis, angawog e bibug bafala ki, a mod asëki dzam kòbò. ⁵ Mabò enguṅ a su mod te, mabò ki enguṅ a su mamen, ngë së ki a bivus biama. ⁶ Amu ngë mayi na mabò enguṅ, masëki dzam bò akud, amu mayi kòbò bëbëla. Dzam da mabò ki dò, asu yë na mod azaa kam ma alodo e dzom ayen ngë edzi awog abë ma, ⁷ etòm abui bikuli-mam. Asu te, asu yë na të madaṅ bò mëbun, ndò bëngalum ma eyò a nyòl, englès Satan, asu yë na ayit ma, na mëzaa bò mëbun. ⁸ Mëkogëlan ya ai Nti biyòṅ bilè adzo te, na ekodo ma a nyòl. ⁹ Ndò angadzo ai ma na: Maa wama ayean ai wa, amu ngul enë ntud a atëg. Mayi hm bulu bò enguṅ ai mintag a atëg dama, asu yë na ngul Kristus etòbò abë ma. ¹⁰ Asu te mawog mintag a atëg, a mam më ebyandi, a mëyaṅan, a baluman ai ma, a mindzug, asu Kristus. Amu, eyòṅ mënë ntëgan, abog te mënë ngul. ¹¹ Mëngabò akud, mina miabò ma nala. Amu mina mingabë yean ma taman. Amu mimfaṅ mi apostel mialod ki ma hom, tò anë masëki dzom ziṅ. ¹² Mëndëm më man apostel mëngalëdëban a zaṅ dzan, ai fin, mëndëm, ai biyëṅ bi mam, ai mam më ngul. ¹³ Dze hm fò e mënda më Zamba mëvòg malod mina ete, alodo na mandzëki mina sili dzom? Dzuan ma nkòt te. ¹⁴ Eyòṅ lala dzi mëmana ya komëzan na mazu abë mina, ndò mayi ki sili mod dzom. Amu madzëṅ ki e dzom yawoge ai mina, mina bëben madzëṅ. Bòn bayean ki nyie mòni asu bëbonde, bëbonde mbò bayean dò bò asu bòn. ¹⁵ Mayi na mayaan asu daan, bëkuan fë ai ma asu daan. Ngë mabulu mina diṅ a bui, yë mayean ki ai ediṅ nga? ¹⁶ Abò hm nala; mandzëki mina ndëgëlë, ndò mëngadian ai mina a mëkëṅ! ¹⁷ Yë na mëngadian ai mina ai e bod mëngalom mina? ¹⁸ Mëngakogëlan ai Titus, ndò mëngalom nyè ai madzaṅ. Yë Titus angadian ai mina? Nga binganyiṅ ai nsisim mbòg? Nga bingawulu zen dzia? ¹⁹ Azaag kui etoa dzi, miatsog na biakaman ai bia bëben a mis maan. Makòbò a mis më Zamba abë Kristus. A babëdzaṅ, mam mësë mëngabë hë asu awone dan. ²⁰ Amu mambara na mëzu mina kòb anë mayi ki, ngë ki na mizu ma kòb anë miadiṅ ki. Të mabad wog adzo zuṅa, aban, olun, mintsogan mi akoe, bikag, minsòs, mëbun, bitòm. ²¹ Mambara na eyòṅ mayi dugan sò, Zamba wama adzòdi ma a mis maan, ai na mëbò a mëlunga asu abui bod ya bakë ai minsëm miaban osu, bò të tsende mbë enyiṅ, ai bisog, ai ebamba bëngabë bëbòòg.

¹ Eyòṅ lala dzi mazu abë mina: Adzo asë layi tsigëban a anyu bëwusnèt bëbè ngë bëlè. ² Mëngatari ya kad eyòṅ mëngabë we eyòṅ bèè, ndò fë matari kad etoa mënë mu dzi, madzo ai e bod bakë ai minsëm miaban osu ai e ba bësë bëvòg na, ngë mësò eyòṅ efë, mayi ki fë dzu. ³ Mbol miadzëṅ ndëm ya na Kristus akòbò abë ma, mbol asëki ntëgan ai mina, anë ngul abë mina. ⁴ Amu angaboman a klos etòm ntëgan nyòl, dzam da anyiṅ ai ngul Zamba. Amu bia binë ntëgan abë nyè, dzam da bianyiṅ ai nyè, ai e ngul Zamba yazu abë bia. ⁵ Fòmbëgan mina bëben, ngë minë a ṅyëbë, bindigan. Yë miandzeki yëm na Yesus Kristus anë abë mina? Kamëna miasëki a nkoṅ te. ⁶ Mafidi na miayi toan yëm na binë a nkoṅ te. ⁷ Biakogëlan ai Zamba na të miabò evus ziṅ, së ki asu yë na bia biyene mimkpangos, dzam da, asu yë na mibò mbëṅ, bia bibò anë biasëki nkoṅ te. ⁸ Amu biasëki dzam luman ai bëbëla, binë dzam sye asu bëbëla. ⁹ Amu biatag eyòṅ binë ntëgan, mina mitoa ngul. Asu te biakogëlan: Asu yë na minyiṅ ntud. ¹⁰ Asu te matil e mam ma mëtoa mò mò, asu yë na, eyòṅ mayi tòbò we, të mabò ayòg abui ai e ngul Nti angavë ma asu yë na maloṅ, së ki asu yë na masili nda a si. ¹¹ A babëdzaṅ, a mëmana, tòbògan mintag, tsendëgan mëfulu, bian awonòṅ, boan kiṅ, nyiṅan mvoè, abog te Zamba mvoè ayi bò ai mina. ¹² Sugan mina mina ai mimfufub mëwuban. Mimfufub misë miasug mina. ¹³ Maa Nti Yesus Kristus ai ediṅ Zamba, ai enyiṅ fufulu Mfufub Nsisim bibòòg ai mina bësë.