TIMOTEUS OSU

¹ Ma Paulus, man apostel Kristus Yesus a abende Zamba nkode waan, ai Kristus Yesus afidi daan, ² matil Timoteus, mfaṅ mòn wama a ṅyëbë; maa, ngòl, ai mvoè bibòò ai wa, bisòò abë Zamba esya ai abë Kristus Yesus Nti waan. ³ Akyaè ya mëkogëlan ai wa eyòṅ mëkëlë a Masedonia na oligi a Efesi, asu yë na obende bod bëziṅ na të bayëgëlë dòkten mfë, ⁴ tò ki na bëdzèè abog daban ai minaṅ mi mvèt, ai alaṅ mëbyali tègè ai sug, byem bite biafòṅòlò hë bivoe mintsogan a bod, alodo e kan enyiṅ Zamba ayi a ṅyëbë. ⁵ Oyak abende onë ediṅ yasò a nnëm mfuban ai a mbëmbë nnëm sosoo, ai a ṅyëbë ya onë tègè ai mëdugan; ⁶ Mbol bod bëziṅ bandzëki nyiṅ nala, bënyaban fò a zen ekokòbò, ⁷ bëyii na babò bëyëgëlë bë mvende, bò ha të wog tò e dzam badzo, tò e mam bakòbò. ⁸ Biayëm na mvende enë abëṅ dzam ngë mod abëlan ai dzò anë mvende yayi; ⁹ Mbol biayëm mbëṅ na mvende esëki hala asu sosoo mod, enë asu bod bë nkòt, bod mëlò, eba balugu ki Zamba, ai bësëm, eba bayëm ki adzo Zamba ngë edi latyan ai nyè, a bawoe besya baban ai bënyia baban, bëwoe bë bod, ¹⁰ bod bisog, e fam yaboman bò bò, bëdzibi bod, bod minnal, bëkanëṅi sòṅ a mëdugan, bëbòò e mam mëfë maluman ai mfaṅ a yëgëlë, ¹¹ ya onë anë mbëmbë foe mvomvòm Zamba ayi, ṅnyè bëngakalan ma. ¹² Makaṅ Kristus Yesus Nti waan ya angavë ma ngul, mbol ayen na mënë mod afidi ai ntelan atelëge ma a esye dzi, ¹³ a ma mëngabë hm mod bikag, mëluman ai nyè, tègè nyè kam, dzam da ndò angayen ma ngòl, amu mëngabò dò ma tègè yëm, tègè ai ṅyëbë. ¹⁴ Maa Nti waan angafuguzu ai ṅyëbë, ai ediṅ ya abë Kristus Yesus. ¹⁵ Ebug enë bëbëla, ndò fë yakyëbë ai na biyëbë dzò, na Kristus angasò a si-ndon na akode bësëm; ma mënë mod osu ya ete. ¹⁶ Ndò hm angayen ma ngòl asu te, asu yë na, abë ma ngò Kristus Yesus atari lëdë fin dzie esë na ebò mvulna asu e bod bëyean nyè ṅyëbë asu enyiṅ kòm. ¹⁷ Olugu ai duma bibòò ai Zamba ya anë mbòg, a bayen ki, a atsende ki, nkukuma yob ai si a bisëb bisëb, amen. ¹⁸ Abende di ndò mavë wa, a mòn wama Timoteus, latoban ai bibug bëprofèt asu doe, asu yë na bibò wa bikpële ya waluman ai biè mbëmbë ndum, ¹⁹ mbol obëlë ṅyëbë, ai abëṅ nnëm sosoo; bod bëvòg bëngawoa mò a fyè, ndò bëngadzèè ṅyëbë, ²⁰ bëvòg ya ete bënë na: Imene ai Aleksander, mbò mëngakalan a mò më Satan asu yë na bëyègè na bayean ki kag.

¹ E di osu hm, mayi na bëbò ngogëlan zaag ai ngogëlan miṅyian ai ngaṅ a su bod bësë, ² asu minkukuma ai asu eba bësë bëbëlë edzoe, asu yë na bënyiṅ evovoe, tègè ai endugëlan, ai olugu Zamba asë ai dzin. ³ Nala ngò onë mbëṅ, onyëbë fë Zamba nkode waan a mis, ⁴ ṅnyè ayi na bod bësë bëkodeban, ai na bëzu yëm bëbëla. ⁵ Amu Zamba anë mbòg, ntëbë-zaṅa zaṅ Zamba ai bod anë mbòg: e mod anë Kristus Yesus, ⁶ ṅnyè angavë emen eban asu abui bod, mbòòlan te okui a zuli metiṅ. ⁷ Bëngatele ma na mëyedan mbòòlan te, mëbò fë man apostel mbòòlan te, -makòbò bëbëla, madug ki,- mënë ṅyëgëlë bëhaiden a ṅyëbë ai bëbëla. ⁸ Ndò mayi na fam ekogëlan hom osë, bëbedëge mimfufub mi mò a yob, tègè ai olun ngë moman. ⁹ Ndò fë mayi dzam dëda na bininga bëbi mbòd ya waanyëb, bëdzaman bò bëben ai dzin, tègè ai miṅyene, tègè kòg esil, tègè ai mvòt ngë minsanga, ngë biyie bi mòni, ¹⁰ bëdzaman ai mimbëmbë mimboan, akyaè layean ai e bininga bamëm olugu Zamba. ¹¹ Mininga ayean yègè a miëëṅ, ai mëwog. ¹² Mayëbë ki na mininga ayëgëlë, ngë ki na adzoe fam; ayean tòbò a miëëṅ. ¹³ Amu Adam angatari komban, a mvus hala ndò bëngakom Eva. ¹⁴ Ndò fë së ki Adam ṅnyè bëngadug, mininga ṅnyè angaku a nsëm eyòṅ bëdug ya nyè. ¹⁵ Dzam da ayi kodeban ai mbyean bòn, ngë alaṅan atoa a ṅyëbë, ai ediṅ, ai mfuban, ai dzin.

¹ Ebug enë bëbëla Ngë mod ayi na abed bisòb, atoṅ fò mbëmbë dzam. ² Bisòb ayean hm bò e mod anë të ai akalëga, abëlëgë hë mininga mbòg mbòg, tègè nyu mëyòg, abindigi mam, atoa akomëdo, afaṅ, akëṅa yëgëlë bod, ³ tègè diṅ wayn, tègè diṅ bitòm, dzam da atòbògò evovoe, mod mvoè, ⁴ atoan tele nda dzie mbëṅ, abòò na bòn boe bëbò mëwog, abòò dzin abui; ⁵ -ngë mod ziṅ ayëm ki dzoe nda dzie, eyë ayi nòni nda-Zamba ya?- ⁶ Të abò mod ya andëmë nyian a ṅyëbë, aza kud ongon, akuu a ntol Satan. ⁷ Bod ya nsëṅ bayean tsig na akyëbë ai dò, azaa ku a bidzo biaban, nala onë na, a mëlam më Satan. ⁸ Dzam dëda fë, bëdiakon bëbòò bod bë olugu, tègè ai mësu mëbè, tègè diṅ wayn abui, tègè bò bingat a mam më akuma, ⁹ bëbëlëgë ndimba ṅyëbë a mfuban sosoo nnëm. ¹⁰ Bëtarigi bò lom a mëbobëla, a mvus hala, bëzu bò esye diakon bëtoa të ai atòn. ¹¹ Dzam dëda fë, bininga bëbòò bod bë olugu, tègè ai bò mfòb, tègè diṅ mëyòg, bëbòò bod bë afidi a mam mësë. ¹² Bëdiakon bëbòò fam ya ebëlë hë mininga mbòg, bëtoan dzoe bòn baban ai mënda maban. ¹³ Amu e bod basye esye diakon mbëṅ banòṅ bëben mbëmbë etoa ai abui azombo ya anë a ṅyëbë abë Kristus Yesus. ¹⁴ Matil wa e mam ma, mëfidigi na mayi vol sòṅ a bë wa. ¹⁵ Ngë mëtëgëlan, oyëm hm mbol wayean bò a nda-Zamba, endzò enë nda e Zamba avëë, nnom andie ai tin bëbëla. ¹⁶ Ndimba olugu Zamba enë hm fò anen bëbëla: Akulan a ngëëṅ a minson, abii mëkyëbë a nsisim, ayene benglès, bëyedan nyè a bëhaiden, bëyëbë nyè a si-ndon, akëlë a yob a duma ete.

¹ Nsisim watoan ma kad na, a mëbog më mvua, bod bëvòg bayi ku a ṅyëbë, bëngabie minsisim mëdugan ai ayëgëlë bësatan, ² ai nkòbò mfugu bod minnal; sosoo waban amana ya dig, ³ bëkiligi mëlug, bëbendëge bod na bëki bidi ya Zamba angakom na bëdi, bëvaa ngaṅ a su bëyëbe ai asu e bod bayëm bëbëla. ⁴ Amu ekokoma Zamba esë enë abëṅ dzom, ndò dzom ziṅ yasëki dzam woaban a fyè, ngë banòṅ dzò ai nnëm ngaṅ, ⁵ amu yavëṅan mfufub ai ebug Zamba, ai ngogëlan. ⁶ Ngë oyëgëlë babëdzaṅ e mam ma, wayi bò mbëmbë mbò-esye Kristus Yesus a bënganèè ai bibug bi ṅyëbë, ai mbëmbë ayëgëlë ya ongënë obiege a zut ana. ⁷ Tubu e bod bayëm ki Zamba, otub fë minaṅ minnom mi bininga; Bò na oyëmëlë a esye olugu Zamba. ⁸ Amu abò na nyòl emana yëmëlë, nala wadaṅ ki ai mfi; olugu Zamba anë ai mfi asu mam mësë, mbol abëlë ngaga enyiṅ bianyiṅ dzi ai enyiṅ yazu. ⁹ Ebug enë bëbëla, ekyëbëgë fë ai na bëyëbë dzò; ¹⁰ Amu asu te biawu esye, bilumëṅan, amu bingafidi Zamba ya avëë, ṅnyè anë nkode bod bësë, adaṅ adaṅ a nkode bëyëbë. ¹¹ Bendëge mam mëte, oyëgëlë mò. ¹² Të mod abyandi wa mbol ongënë mòngò; Obòò mvulna asu bëyëbë a nkòbò, a fulu, a ediṅ, a ṅyëbë, a fulu mfuban. ¹³ Ntye mazu kui we, kële ai nlaṅan osu, ai evòli, ai ayëgëlë. ¹⁴ Mvende të voan efaè akab enë wa a nyòl, a bëngavë wa a nkòbò bëprofèt ai mbedan mò a ekoan bënyia-bodo. ¹⁵ Otoan bò e mam mala, onyiṅi hë ete, asu yë na bod bësë bëyen anë wakë ai enyiṅ dzoe osu. ¹⁶ Otoan kala wamen ai ayëgëlë doe, oyëm ete a kpiim. Amu eyòṅ wabò nala, wayi kode wamen ai e bod bavogolo wa.

¹ Të wakòṅan ai nyia-modo-mvia; vòligi nyè anë esoa, obëlan ai bëndoman anë babënyòṅ, ² obëlan ai bënyia bininga anë bënyoa, bëngòn anë bënyò bëkal a mfuban osë. ³ Oluugu mimfaṅ minkus. ⁴ Ngë nkus ziṅ obëlë mòn ngë ndie, mbò bëtarigi yègè bò esye ya nda dzaban, ai na bëdugan bëbonde bifaè biaban. Amu nala ngò waanyëb a mis më Zamba. ⁵ E mininga anë nkus mfaṅ, anyiṅi fë etam, a angafudi afidi die abë Zamba, ndò fë akë ai nala osu ai biyega, ai ngogëlan tò ai alu tò ai amos. ⁶ E nyò ki adiṅ enyiṅ, angawu ya koba. ⁷ Bendëge fë e mam ma, asu yë na bëbò tègè ai akalëga. ⁸ Ngë mod ziṅ atòṅ ki bivuvuman bie, abadan afëdan na, mod ya nda-bod dzie emen, aben ya ṅyëbë ndò fë anë mbë haiden. ⁹ Mininga ayi tilban a taṅ minkus hë alod ya bisëb mëwom mësaman, ai na angabi hë nnom mbòg, ¹⁰ awumu ai mimbëmbë mimboan: ngë anganèè bòn, ngë angabëlan ai bëyëṅ mbëṅ, ngë angasob mimfufub mëkol, ngë angavòli e bod bëbëlë mindzug, ngë angamvaman ai abëṅ dzam asë. ¹¹ Të wayëbë e minkus mingënë bëngòn; Amu eyòṅ nnëm ngòn watsog ki fë Kristus, bëngayi na balug. ¹² Bayi bëlë nkat amu bavoan e mëtiṅ më osu. ¹³ Abadan afëdan, bayègè enyiṅ atëg, bakë a mënda mënda, së ki hë na tègè ai esye babò; bënë hë minsòs, mfugu, bëngakòbò e mam bayean ki kòbò. ¹⁴ Mayi na eba bëngënë bëngòn, bëbye bòn, bëbi nda mbëṅ, të vë minziziṅ miaban akalëga yë na bëlaṅ bò ebug. ¹⁵ Amu bëvòg bëyëm ya zen a mvus Satan. ¹⁶ Ngë mininga ziṅ ya ayëbë Zamba abëlë bivuvuman bitoa minkus, ayean bò vòli, nda-Zamba yayean ki bëgë mbëgë te, asu yë na evòli eba ya bënë mimfaṅ minkus. ¹⁷ E bënyia-bodo ya babò esye dzaban mbëṅ bayean ai maan biyòṅ bibè, adaṅ adaṅ a e ba bawu esye ai ebug, ai ayëgëlë. ¹⁸ Amu ntilan wadzo na: Wayean ki tindi e nyag yatsag bibuma anyu, ai na: mbò-esye akyëbë ai maan moe. ¹⁹ Të wayëbë e mësòman basòman bënyia-bodo, së na bësòman bënë bëbè ngë bëlè. ²⁰ Kòṅan ai bësëm a mis më bod bësë, asu yë na e bod bëvòg bëmbara. ²¹ A mis më Zamba ai Kristus Yesus ai mintòban benglès, mabende wa a ngëëṅ na obaala e mam ma tègè fyal, të wabò mò ai ewu-dis. ²² Të wavolo bede mod ziṅ mò a nlo, të waanòṅ ngab a minsëm mi e mod mbòg; Otòbògò mfuban. ²³ Të wakë ai ṅnyuan mëndim osu, nyaag man wayn asu osaṅ woe ai mbol wafëm kad kòn. ²⁴ Minsëm mi bod bëziṅ miayene a ngëëṅ, mikëlë ai bò a nkat; minsëm mi bod bëfë miakui a ngëëṅ hë a mvus. ²⁵ Nala ngò fë mimbëmbë mi mam miakui a ngëëṅ, tò e mi minë abe tò e mi miasëki dzam sòbò.

¹ Eba bësë ya bënë a etye bëlò, bëkama bëti baban akyaè layean ai olugu asë, asu yë na të bamgbali dzoe Zamba ngë ayëgëlë. ² Eba ya bëti baban bënë bëyëbë, të babyandi bò, amu bënë babënyaṅ; bëtoan bò sye, amu e bod bayen mfi ya esye dzaban bënë mindindiṅ bëyëbë. Yëgëlë e mam ma, obendëge fë mò. ³ Ngë mod ziṅ ayëgëlë mbol mfë tègè toṅ mimfaṅ bibug bi Nti waan Yesus Kristus ai ayëgëlë olugu Zamba a nten, ⁴ mod te anë akud, ayëm ki dzom, adzëṅ hë minsili ai moman, ete ngò e mam ma masò na: mëkomëṅa, zuṅa, bikag, bëbe mintsogan ai e mod mbòg, ⁵ minkòbò a zaṅ bod ya bëbelë ki sosoo a nnëm, tègè ai bëbëla, amu batsog na olugu Zamba azu ai mòni. ⁶ Olugu Zamba anë fò ai abui mfi, mod antoa afidigi hë emen. ⁷ Amu biandzëki sòṅ ai dzom ziṅ a si-ndon; antoa hm na biabëlë ki ngul ya akë ai dzom ziṅ. ⁸ Ngë bibëlë e dzom biadi ai e dzom biabòd, nala wayean ai bia. ⁹ E bod bayi na bakag akuma, baku a mëbobëla ai mëlam, bëntoa tègè fë ai nnëm a abum, bënë bëbò bë abe etòm abui miṅyian daban; mam mëte matindi bod a ndzaṅ ai a amala. ¹⁰ Tin abe asë enë ediṅ mòni, bod bëvòg ya bënë ete bëngalum ya ṅyëbë mvus, bëmana fë babi mëvëṅ eyëgan. ¹¹ Mfag woe, a mod Zamba, tubu e mam ma. Biege mëkyëbë a zut, ai olugu Zamba, ai ṅyëbë, azombo, afu-nnëm. ¹² Luman abëṅ bita bi ṅyëbë, nòṅò enyiṅ kòm, asu te ndò bëngaloe wa eyòṅ ongamëm ṅyëbë mbëṅ a mis bëwusnèt. ¹³ Mabende wa a mis më Zamba ya abò na dzom esë enyiṅ, ai a mis më Kristus ya angamëm ṅyëbë woe mbëṅ a mis më Pilatus, ¹⁴ na onyie mvende, etòbò të ai atòn, tègè ai akalëga akëlë kui anë Nti waan Yesus Kristus ayene; ¹⁵ A zuli mëtiṅ, mvòmvòmò, e nyò anë ngul etam, nkukuma minkukuma, Nti bëti, ṅnyè ayi lëdë asò-lë te, ¹⁶ nyè etam ṅnyè anë tègè wu, atoa a mfyè onë tègè ai asubu-lë babi, a tò mod ziṅ ayëm ki, ndò fë mod ziṅ asëki nyè dzam yen. Olugu ai ngul kole bibòò ai nyè. Amen. ¹⁷ Bendëge e bod bënë minkukuma e si-ndon nyi na të babò mëbun, ngë ki na bëfudi afidi daban a akuma ndon, bëfudigi dò abë Zamba ya avë bia bisë abui abui na bitag ai biè. ¹⁸ Bod bëte bëbòò mbëṅ, bëbulu bò mimbëmbë mi mam, bëbòò akab, bëbii fulu akab; ¹⁹ Bëkomëzan bò bëben akuma, abëṅ mëtin më nda asu enyiṅ yazu, asu yë na bëbi mfaṅ enyiṅ. ²⁰ A Timoteus, obaala e dzom bëngavë wa, osaala e bod bayëm ki Zamba, a bënë dzëdzaa nkòbò ai bisoo bi ṅyëman mvol; ²¹ Bod bëziṅ bëngayëbë mam mëte, ndò bëngaku a ṅyëbë. Maa abò ai mina.