TESALONIKA OSU

¹ Ma Paulus, ai Silvanus ai Timoteus, biatil nda-Zamba ya Tesalonika ya enë abë Zamba esya, ai Nti Yesus Kristus: mvoè ai maa bibòò ai mina. ² Biakaṅ Zamba kòm esë asu mina bësë, bitsogo mina a ngogëlan dzaan, ³ bitsogo esye ṅyëbë dzaan kòm esë, ai tuṅ, ediṅ a i mban afidi miafidi Nti waan Yesus Kristus a mis më Zamba ai tara waan, ⁴ a e babëdzaṅ Zamba adiṅ, mbol biayëm ntòban ya bëngatòb mina, ⁵ amu mbëmbë foe waan andzëki laṅan hë nkòbò nkòbò abë mina, angayene fò ai ngul, a Mfufub Nsisim ai mfaṅ ṅyëman, akyaè miayëm akyaè bod bingabë abë mina, asu daan. ⁶ Ndò fë mina mingavu bia, mivuu fë Nti, mbol minganòṅ ebug a abui mindzug ete, minòṅò dzò ai mintag mi Mfufub Nsisim, ⁷ e kan yë na mintoa ya mvulna asu bëyëbe bësë a Masedonia ai a Akaia. ⁸ Amu, atyege abë mina, ebug Nti yawogan mindum, së ki hë a Masedonia ai a Akaia, dzam da, hom osë, ṅyëbë ya miayëbë Zamba onë ṅyaman, e kan yë na biayaṅan ki fë na bikad mina dzom ziṅ. ⁹ Amu bò bëben balèè akyaè ya mingabëlan ai bia, ai mbol mingalum bëzamba mvus, misòò abë Zamba na miasye e Zamba avëë, atoa fë bëbëla, ¹⁰ ai na miyanga mòn woe, a asò a yob, e nyò angavëlë a bëkon, Yesus ya akode bia a olun ya wazu.

¹ A babëdzaṅ, mina bëben miayëm hm na nsoan bingasò abë mina waandzëki bò a zëzë, ² dzam da bitari bi mintye, bëtè bia anë miayëm, bibii azombo a Filipi abë Zamba waan na biakad mina mbëmbë foe Zamba a bitòm a yob. ³ Amu evòli dzaan yasò ki a mëdugan ngë a mam më mvit, ngë a mëkëṅ, ⁴ dzam da akyaè ya Zamba angafëb bia, asò hm bia vë mbëmbë foe, kan te endzò biakòbò, së ki të hë anë biayi na bianyëb bod a nnëm, Zamba ṅnyè biayi na bianyëb a nnëm, ṅnyè fë angafëb bia minnëm. ⁵ Asu te biabë ya ki kòbò nkòbò mëmëṅële, anë miayëm, tò ki alam mfi waan, Zamba anë bia wusnèt, ⁶ tò ki adzëṅ e duma lasò a bod, tò abë mina, tò a bod bëfë, ⁷ tò anë mbol bibëlë ngul ya alëdë ngul dzaan na binë apostel bë Kristus, dzam da ndò bingavëṅan ban bòngò a zaṅ dzaan, anë eyòṅ nyia-ntòṅ afolo bòn boe, ⁸ nala ngò biyii mina du; biyili hm na biayi mina vë, së ki hë mbëmbë foe Zamba, dzam da tò enyiṅ dzaan ben, mbol angabë na bingadiṅ ya mina eyëgan. ⁹ Amu, a babëdzaṅ, tsogan tuṅ dzaan ai abui esye daan. Bisye ai alu, ai amos, asu yë na biza woe ai mod ziṅ ya abë mina ai ndzug, bingayedan hm mina mbëmbë foe Zamba. ¹⁰ Mina bëben minë bëwusnèt, tò fë Zamba emen, akyaè bingabë ai e mina ya mingayëbë, bitoa ai evag, ai sosoo, tègè ai alaṅa-lë ebug, ¹¹ akyaè ya miayëm anë bingabë ai mod osë ya abë mina, anë esya anë ai bòn boe, ¹² bilëbë, bifologo, bikogëlan ai mina na miwulu anë Zamba adiṅ, e Zamba aloe mina a edzoe dzie ai a duma die. ¹³ Ndò hm asu te biakaṅ Zamba abog asë, amu eyòṅ minganòṅ ebug mëwog Zamba abë bia, minganòṅ dzò, së ki anë ebug bod, minganòṅ dzò anë enë mfaṅ, anë ebug Zamba, endzò yasye abë mina bëyëbë. ¹⁴ Amu, a babëdzaṅ, mingamana ya vu mënda më Zamba ya mënë a Yudea abë Kristus Yesus, amu mina fë mingabi mindzug a mò më bod ya ayòṅ daan anë Yuden bëngandëgëlë fë bò, ¹⁵ Yuden bëte mbò bëngawoe Nti Yesus ai bëprofèt, bëluman ai bia, bò tègè nyëb Zamba a nnëm, bëluman ai bod bësë, ¹⁶ bëkaman ai bia na bilèè ai bëhaiden asu yë na bëkodeban, asu te badzala taṅ minsëm dzaban kòm esë. Olun osò ya bò a nyòl ntud ntud. ¹⁷ Mfag waan, a babëdzaṅ, binë ban bë nyui etoa dzi asu daan, a mis, së ki a nnëm; ndò bidzëṅ ya ai ngul esë na biyen mina. ¹⁸ Asu te bingabë biyii na biazu abë mina; anë mfag wama ma Paulus, abui biyòṅ fò, ndò Satan angatsig bia zen. ¹⁹ Za hm anë afidi daan, ai mintag mian ai ekada enguṅ dzaan, -së mina a?- a mis më Nti waan Yesus abog ayi sò? ²⁰ Amu mina minë duma daan ai mintag mian.

¹ Asu te, mbol tègè fò ai abana-lë nnëm, ndò biazu yili na bialigi a Atene etam, ² ndò bingalom Timoteus, manyaṅ waan, asye fë ai Zamba fufulu a mbëmbë foe Kristus asu yë na awone mina, avòli fë mina a ṅyëbë waan, ³ asu yë na të mod aku sòm a e mindzug mi. Amu miayëm na asu te binë hala. ⁴ Amu eyòṅ bingabë abë mina, bingatari mina kad na biayi bi mindzug, akyaè fë angatoban, ndò fë miayëm nala. ⁵ Asu te, mbol tègè fë ai abana-lë nnëm, ndò mëngalom na bëzu yëm mbol ṅyëbë waan onë, ma na yë mod mëbobëla abobolo ya mina ana o, ai na esye ndzug dzaan ezaa bò a zëzë. ⁶ Etoa dzi hm a Timoteus adugan abë bia, asòòg mfag minë, mbol akad bia abëṅ foe ṅyëbë waan ai ediṅ dzaan, ai na miatsog bia mbëṅ kòm esë na miyii fë du na miayen bia, anë biayi na biayen mina, ⁷ ndò biyen evòli ete, a babëdzaṅ, asu daan a mësis ai mindzug mian, etòm ṅyëbë mibëlë, ⁸ amu etoa dzi, binganyiṅ ya ngë mitelë a kpiim abë Nti. ⁹ Za ngaṅ binë vë Zamba asu e mintag misë biatag etòm dzaan a mis më Zamba waan, ¹⁰ ai alu, ai amos, biadzaè fò nyè eyëgan na: biyen mësu maan ai na bidzala e mam madzëman a ṅyëbë waan? ¹¹ Zamba te emen, esya waan, ban Nti waan Yesus, bëkomo bia zen na bizu abë mina. ¹² Mfag waan, Nti adzalëga mina, abò na mifuguzu ai ediṅ a mina mina ai asu bod bësë anë badiṅ mina, ¹³ asu yë na ayëm mina minnëm a kpiim, mibò të ai atòn a enyiṅ mimfufub a mis më Zamba, esya waan, eyòṅ Nti waan Yesus ayi sò ai mimfufub mie misë. Amen.

¹ Mfag mbòg hm a babëdzaṅ, biadzaè mina, bikogëlan fë ai mina abë Nti Yesus na akyaè ya bingalëdë mina mbol miayean wulu abë Zamba, minyëbë fë nyè a nnëm, nala ngò fë miwulu, asu yë na midaṅa bò nala mbëṅ. ² Amu miayëm mëbende bingavë mina a dzoe Nti Yesus. ³ Amu ṅyian Zamba, efubu nyòl dzaan, ngò onë na, misaala bisog, ⁴ mod osë ayëm baala nyòl dzie a mfuban ai olugu, ⁵ së ki a mintsogan mi ngoṅ anë bëhaiden ya bayëm ki Zamba, ⁶ të bò evus ngë adug manyòṅ a mam më enyiṅ, amu Zamba akun e mam mësë mala, akyaè ya bingatari mina kad ndò fë biabòòlò dò a ngëëṅ. ⁷ Amu Zamba andzëki bia loe asu mam më mvit, angaloe bia asu mam më mfuban. ⁸ Asu te, e mod abyandi dò, së ki mod ṅnyè abyandi, abyandi e Zamba ya avë bia Mfufub Nsisim woe. ⁹ Mfag ediṅ babëdzaṅ, miayaṅan ki na bëtil mina, amu mina bëben miayègè dò abë Zamba na midiṅan mina mina, ¹⁰ ndò fë miabò dò asu babëdzaṅ bësë ya bënë a Masedonia osë. Makogëlan ai mina a babëdzaṅ, Kaṅan ai nala osu! ¹¹ Midzëṅë na minyiṅ evovoe, mibò e mam mabëbë mina, misye fë ai mò maan, anë bingabende mina, ¹² asu yë na miwulu tëtëlë a mis më bod ya nsëṅ, tègè yaṅan ai mod. ¹³ A babëdzaṅ, biayi ki na miyëgan adzo e bod bëngakë ya oyò, asu yë na të miatòbò a mëlunga anë e bod bëvòg ya bëbëlë ki afidi. ¹⁴ Amu ngë biayëbë na Yesus angawu, ndò fë angakui a sòṅ, nala ngò fë Zamba ayi kë ai e ba bëngakë oyò abë Kristus ai nyè emen. ¹⁵ Amu biakad mina dò a ebug Nti na e bia ya bivëë, a binë bëligi akëlë kui a asò-lë die, biayi ki lod e bod bënë oyò osu. ¹⁶ Amu Nti emen, eyòṅ bayi vë abende, a kiṅ ertsenglès, ai a tòṅ Zamba, ayi sus asòò a yob, abog te e bod bëngawu abë Kristus bayi tari tëbë a si, ¹⁷ a mvus hala e bia ya bitala, a bingaligi, fufulu ai bò, bayi kë ai bia a minkut na bikë toban ai Nti a evundu. Nala ngò biayi tòbò ai Nti kòm esë; ¹⁸ na, vaan mina mina awonòṅ ai e bibug bi.

¹ Mfag mëbog ai mëwola, a babëdzaṅ, miayaṅan ki na bëtil mina, ² amu mina bëben miatoan yëm na amos Nti wayi sò anë ṅwuwub wazu ai alu. ³ Ngë badzo na: Mvoè ai evovoe bi! Abog te hm anyama te layi bò ku a nyòl etye etye, anë mintye mi nkogolo miazu mbubum mininga a nyòl etye etye, tègè fë ai atubu. ⁴ Mfag waan, a babëdzaṅ, miasëki a dibi, asu yë na amos odilan mina anë ṅwuwub. ⁵ Amu mina bësë minë bòn bë mfyè ai bòn bë amos. Biawoge ki ai alu ngë ai dibi. ⁶ Ndò hm të miakë oyò anë e bod bëvòg, dzam da ntòbògan evie, tègè nyu. ⁷ Amu e bod bakë oyò, bakë oyò ai alu, e bod ki basòg mëyòg, basòg mò ai alu. ⁸ Bia biawoge ai amos, të bianyu mëyòg, bibòd eben ṅyëbë ai ediṅ, ekongo dzaan etoa afidi akode. ⁹ Amu Zamba andzëki bia komëzan asu olun, angakomëzan bia asu yë na bibi akode asu Nti waan Yesus Kristus, ¹⁰ ya angawu asu daan, asu yë na, tò binë evie, tò biakë oyò, binyiṅ fufulu ai nyè. ¹¹ Asu te, vòligan mina mina, mivëṅan fë awonòṅ, anë mingabò ya. ¹² A babëdzaṅ, biadzaè mina na mikam e bod bëngawu esye abë mina, e bod bënë mina bëtëbë bë osu abë Nti ai eba bavë mina mëlëbëga, ¹³ mikam bò eyëgan a ediṅ asu esye dzaban. Nyiṅan mvoè abë bò. ¹⁴ A babëdzaṅ, biakogëlan ai mina, lëban e bod bënë ndunduman, miwonòṅo eba bënë wòṅ, mivòligi eba bënë ntëgan, mibòò afu-nnëm ai bod bësë. ¹⁵ Boan okala na të mod abò bivudëga asu e dzam bëbò nyè, dzam da, dzëṅan hë mbëṅ kòm esë asu mina mina ai asu bod bësë. ¹⁶ Taan abog asë, ¹⁷ kogëlan mban, ¹⁸ vaan ngaṅ a dzam asë. Amu nala ngò onë ṅyian Zamba abë Kristus Yesus asu daan. ¹⁹ Të miatëgëlan Nsisim, ²⁰ të miabyandi nkòbò bëprofet, ²¹ bindigan mam mësë, milad ai e dzi enë mbëṅ, ²² mitubu kan abe asë. ²³ Zamba mvoè emen afubugu mina ntud ntud; Akalëga fë mina nsisim ai nnëm ai nyòl na bibò a saaṅ a asò-lë Nti waan Yesus Kristus. ²⁴ E mod aloe bia anë mod-afidi, ṅnyè fë ayi dò bò. ²⁵ A babëdzaṅ, kogëlan fë asu daan. ²⁶ Sugan babëdzaṅ bësë ai mimfufub mëwuban. ²⁷ Ndò mavuu mina sòṅ a bë Nti di: Hë bëlaṅa babëdzaṅ bësë e kalara nyò! ²⁸ Maa Nti waan Yesus Kristus abòò ai mina.