PETRUS OSU

¹ Petrus, man apostel Yesus Kristus, matil bëlodo bë zen ya bënë ntòban, a bënë a Efulu Mëyòṅ a Pontus a Kapadosia, a Azia ai a Bitinia; ² Bënë ntòban a etilga Zamba esya abë Mfufub Nsisim asu mëwog ai asu mmiaman mëki me Yesus Kristus. Maa ai mvoè ebòò abë mina etitib. ³ Ngaṅ ai Zamba esya Nti waan Yesus Kristus ya angabò na, a ṅyian abui ngòl die, midugan byali a vëvëë afidi ai akui-lë sòṅ Yesus Kristus a bëkon, ⁴ asu ngab-elig yandaman ki, etoa fë tègè ai atòn, tègè bubi, a banyie a yob asu daan, ⁵ mina ya babaala a ngul Zamba ai ṅyëbë asu akode ya anë a ngomëzan na lakulëban a abog mvua. ⁶ Ndò hm miatag a e dzam di, afyaṅan bò na miayean bi mëlunga etoa dzi hë man etun abog a mindzug kan kan, ⁷ asu yë na ndëm ṅyëbë waan ebò asu mëngëmë ai duma ai olugu eyòṅ Yesus Kristus ayi kulëban. Ṅyëbë waan te onë ai mfi abui alodo e mvòt ya enë dzam ndaman, dzam da bëngakiègè të wò a ndoan. ⁸ Yesus Kristus te ṅnyè miadiṅ, tò anë miandzëki nyè yen; tò anë mbol miayen ki etoa dzi, miayëbë, ndò fë miasan ai abui mintag ya mod asëki dzam lèè. ⁹ Ndò hm miabi akode minsisim mian, ndò anë mfi ya ṅyëbë waan. ¹⁰ E bëprofèt bëngakòbò adzo maa waan, bëngadzëṅ, bëbindi fë dzam ya akode te. ¹¹ Bëngabë bësiligi za modo, za abogo nsisim Kristus ya ongabë abë bò ongatari kad mintye mi Kristus ai e duma ya mvus hala. ¹² Ndò hm bëngakulan bò na bëngabë ki bësye e mam ma asu bò bëben, asu daan ngò bëngabë bësye mò, mam mëte mmò e bod bëngakad mina mbëmbë foe bëndëm mina kad abë Mfufub Nsisim ya angalomban a yob, mam mëte mmò benglès bayi na bayen. ¹³ Asu te, tindëgan kanda a angëdëg nnëm waan, miban nnëm mbëṅ, mifudi afidi daan a maa ya bazu ai mina nyè a asò-lë Yesus Kristus. ¹⁴ Mbol minë bòn mëwog, te mianyiṅ anë miṅyian mian ya okoba, eyòṅ mingabë mingënë të yëm, ¹⁵ dzam da, akyaè ya e nyò angaloe mina anë mfufub, mina fë boan mimfufub nala a enyiṅ dzaan, ¹⁶ asu te anë ntilan na: Miayi bò mimfufub, amu ma fë mënë mfufub. ¹⁷ Ndò hm ngë mialoe e nyò atsig ntol hë a mboan mod osë, tègè ai ebom-kama, na tara, nyiṅan ai wòṅ ntye ya minë a mëkaban. ¹⁸ Miayëm na miandzëki kodeban a e zëzë enyiṅ mingabyali ai dzò, ai e byem biandaman, silba ai mvòt: ¹⁹ mingakodeban ai mimfaṅ mëki me Kristus anë e ma më ntomba onë tègè ai atòn, tègè ai mvit. ²⁰ Bëngatele nyè nala osusua akomo-lë yob ai si, dzam da angakulan a abog mvua asu daan. ²¹ Asu die ngò mibële afidi abë Zamba ya angavëlë nyè a bëkon, avëë nyè duma, antoa hm na ṅyëbë waan ai afidi daan binë abë Zamba. ²² Mbol mingamana ya sob minsisim mian mfuban mfuban a mëwog me bëbëla asu ediṅ babëdzaṅ yasëki mëdugan, diṅan hm mina mina mfaṅ ben, asòò mina a abum a si; ²³ Mingadugan byali, së ki a e fes yandaman, mingadugan byali a e fes yandaman ki, a ebug Zamba ya avëë, elaṅan fë. ²⁴ Asu te mod ose anë anë elòg, duma die asë anë sama elòg. Elòg emana kot, sama ekuu a si. ²⁵ Ebug Nti dzò yalaṅan a kòm ya kòm. Ebug bëngayedan mina dzili.

¹ Dzogan hm abe asë ai mëdugan mësë, ai fulu minnal, ai mëkomëṅa, ai nsògan bod; ² Anë minkëṅëlë mi bòn, dzëṅan fò mënyaṅ më nsisim ya masëki dzam ndaman, asu yë na minaṅ ete asu akode. ³ Amu miyëm ya na Nti anë dzam mbëṅ. ⁴ Zaan abë nyè, nnom akòg ya bod bëngawoa a fyè, Zamba nyè atòb nyè na anë ai mfi abui, ⁵ mina bëben, mbol minë bëvëvë mëkòg, boan na bëloṅ mina anë nda ya nsisim, asu yë na mivëṅan mfufub ayòṅ bëfada, mituni Zamba mëtunëṅa më nsisim ya ayëbë asu Yesus Kristus. ⁶ Asu te ntilan wadzo na: Yënë, mafudi akòg a Sion, akòg ya abug nda; Anë ntòban, atoa abui mfi; Ndò e mod ayi dò ṅyëbë aangasama ki. ⁷ Asu e mina ya miayëbë, anë duma, dzam da asu eba ya bayëbë ki akòg ya bëloṅo bë nda bëngawoa a fyè, akòg te avëṅan ya nnom akòg. ⁸ Ndò fë anë akòg ya baku mimbëg ete, nkom ya baku a nsëm. E bod baku mimbëg babò ki ebug mëwog, akyaè ya bëngabë etilga. ⁹ Mfag waan, minë ntòban ayòṅ, ayòṅ mintomba bëfada, mfufub ayòṅ, bod ya bawoge ai nyè, asu yë na miyedan biyëṅ bi mam bi e mod angaloe mina a dibi, asòò ai mina a eyëṅ mfyè woe. ¹⁰ E bod bëngabë ki ayòṅ okoba, bëntoa ya ayòṅ Zamba etoa dzi; e bod bëngabë ki bëyënë ngòl bëbi ya ngòl etoa dzi. ¹¹ A mindindiṅ miama, makogëlan ai mina anë bëdzin ai batòbò nnam na, misaala miṅyian mi nyòl a mialuman ai nsisim waan. ¹² Nyiṅan mbëṅ a zaṅ bëhaiden asu yë na, ngë bakë mina laṅ ebug anë bëbò bë abe, bëyen mimbëmbë mimboan mian, bëvë fë Zamba duma amos ayi bia sòṅ yen. ¹³ Boan edzoe esë ya si mëwog asu Nti: Boan Kaiser emen mëwog amu adzoe bësë. ¹⁴ Tò bëngòmëna ya alom na bëndëgëlë e bod babò abe, bëtaman e ba babò mbëṅ. ¹⁵ Amu nala ngò ṅyian Zamba onë na, eyòṅ miabò e dzi enë mbëṅ, midib mëkud më bod mënyu mbol bayëm ki. ¹⁶ Nyiṅan anë e bod bënë fili, dzam da të fili avë mina ngul ya abò abe. Nyiṅan anë bësye bë Zamba. ¹⁷ Kaman bod bësë; diṅan anyaṅ; mbarëgan Zamba; kaman Kaiser. ¹⁸ Bëlò bëbòò bëti baban mëwog ai wòṅ osë, së ki hë e ba bënë dzam mbëṅ ai evovoe, tò ben e ba bënë dzam abe. ¹⁹ Amu nala onë maa, ngë mod atsog Zamba, angazombo olun, adzuugi a nkòt. ²⁰ Amu olugu mbe anë ete ngë miabò abe, mingakë bò azombo eyòṅ bandëgëlë mina asu te? Dzam da, ngë miabò mbëṅ, mitoa azombo eyòṅ miadzugi hala, nala onë maa ya asò abë Zamba. ²¹ Amu ndò bëngaloe mina ai dò, amu Kristus angadzugi mintye asu daan, aligi mina mvulna asu yë na mibie nyè e hom atele mëkol, ²² nyè andzëki bò nsëm, ndò fë bandzëki sòm mëdugan a anyu die, ²³ eyòṅ bëtèè nyè, tègè dugan mëtè, adzuugi mintye, nyè tègè yalan, angabë avaa bisë a mò më ntsigi ntol ya anë sosoo. ²⁴ Emen ṅnyè angabëgë minsëm mian a nyòl dzie a ele, asu yë na biwu a minsëm, binyiṅ a mëkyëbë; A mëvëṅ moe ngò mingabò mvoè. ²⁵ Amu mingabë anë mintomba ya minë a ndimi, ndò hm etoa dzi, midugan ya sòṅ a bë nnòni ai nkala minsisim mian.

¹ Dzam dëda fë, mina bininga, boan bëyom baan mëwog, asu yë na, tò bëvòg ya ete babò mëlò, bëbò të kë a ndzaṅ asu enyiṅ bëyal baban, tègè fala tò ebug, ² eyòṅ bayen anë enyiṅ dzaan enë olugu ai mfuban. ³ Të enyiṅ dzaan yabò hë e nyanga yayene a nsëṅ: afen esil, abòd minsanga mi mvòt ai abòd biyie; ⁴ Nyanga dzaan ebòò e dzom esòlò a nnëm, abëṅ-nnëm ya landaman ki, evovoe nsisim; e mod anë ai mfi abui a mis më Zamba. ⁵ Nala ngò mimfufub mi bininga ya mifidigi Zamba mikarëga bò nyanga okoba, bëbòò bëyom mëwog, ⁶ anë Sara angabò Abraham mëwog, aloege nyè na ’Nti’; minë bòn boe ngë miabò mbëṅ tègè mbara na dzom ziṅ yasii mina. ⁷ Fam fë dzam dëda; nyiṅan a nda alug evovoe, mivaa mininga olugu anë e nyòl enë ntëgan abui, amu mina bësë mibëlë ngab-elig, na maa enyiṅ ngogëlan dzan eza kanga a zen. ⁸ Mëngaluu nkòbò na, boan nnëm mbòg mbòg, miwogan mintye, midiṅan anë babënyaṅ, mibëlëgë nnëm edzòdi-nyòl, ⁹ tègè dugan mod ziṅ abe asu abe angabò mina, tò ki atè asu atè, dzam da mifubugu bò, amu asu te ndò bëngaloe mina asu yë na mibi ngab-elig a maa. ¹⁰ Amu, e mod ayi na adiṅ enyiṅ, ai na ayen mimbëmbë mëmos, abii oyëm na obë kòbò e dzam anë abe, abii fë biyè bi anyu na bibë kòbò mëdugan, ¹¹ alumu bò mvus, abòò hë mbëṅ, adzëṅë mvoè, atoṅo dzò a zut. ¹² Amu mis më Nti mëbëdë bësosoo a nyòl, mëlò moe mavogolo ngogëlan dzaban, dzam da mvòm asu Nti yaluman ai e bod babò abe. ¹³ Ndò hm za ayi mina bò abe ngë miamvaman ai mbëṅ? ¹⁴ Tò ki midzugi mintye asu mëkyëbë, mvòm ai mina. Të miambara akyaè ya bënë wòṅ; të nnëm wakòn mina a abum; ¹⁵ boan na Kristus Nti abò mfuban a minnëm mian, mitòbò kòm esë a ngomëzan na miatoan timi e mod asili mina nsili asu afidi daan; ¹⁶ mibò dò ai abëṅ nnëm, ai wòṅ, mibëlëgë nnëm sosoo asu yë na, eyòṅ balaṅ mina bibug, e bod ya balaṅ mina bibug a mbëmbë enyiṅ waan ya abë Kristus bësama. ¹⁷ Amu anë mbëṅ abui na midzugi mintye eyòṅ miabò mbëṅ alodo anë eyòṅ miabò abe, ngë eyë ṅyian Zamba onë nala. ¹⁸ Amu Kristus emen angabi mintye asu minsëm hë eyòṅ dzia, sosoo mod asu bod bë nkòt, asu yë na akë ai bia abë Zamba; bëngawoe nyè a nyòl, adugan bëlë enyiṅ a nsisim. ¹⁹ Abë nsisim te ngò angakë yedan e minsisim minë a mimbog mbëmbë foe. ²⁰ Minsisim mite mingabò mëlò okoba eyòṅ fin Zamba engayanga a mëlu më Noe, eyòṅ bëngakom arka, bod bënyian etere abòd abòd, bëngabë bod mwom, ndò bëngakodeban ai mëndim. ²¹ Ṅduan ya onganòṅ mvulna ete ngò hm wakode mina etoa dzi, së ki na wavaè mina mvit a nyòl, dzam da onë ndzaan ya biadzaè Zamba nnëm sosoo onë a saaṅ, asu akui-lë sòṅ Yesus Kristus ²² ya angakë a yob, anë a mbo-nnomo Zamba. Benglès ai mintomba babò nyè mëwog.

¹ Mbol hm Kristus angabi mintye a nyòl, nòṅan hm mintsogan mie na mibò mina bikpële, amu e mod angadzugi mintye a nyòl avòd ya adzo nsem ² e kan yë na angakë ai enyiṅ osu a nyòl, abim abog aligi ya, së ki fë ai miṅyian mi bod, dzam da a ṅyian Zamba. ³ Abog angalod ya layëan asu e mam bëhaiden babò, a enyiṅ ebamba, bëmvomëgan, bësògò mëyòg; enyiṅ bidi ai mënyu, mëyòg ai olugu bëzamba anë eki. ⁴ Bakam dò na miatoṅ ki bò a mboan abui ezëzam te, bëngakag mina; ⁵ bayi tëbë a nkat abë e nyò atoan tsig ntol bënyiṅ ai bëwu. ⁶ Asu te bëngayedan tò bëwu mbëmbë foe asu yë na, tò anë bënë ntsigan ntol a nyòl anë bod, bënyiṅ a nsisim anë Zamba. ⁷ Mëmana më dzom esë mëntoa ya babi. Nnëm waan obòòg a saaṅ, miyëme fë ban nnëm na mikogëlan; ⁸ A mam mësë, daṅan baala ediṅ dzaan a zaṅ mina mina a kpiim, amu ediṅ yabudi abui minsëm. ⁹ Boan afaṅ mina mina, tègè ai olun; ¹⁰ akyaè ya mod osë angabi efaè akab dzie, bëlan ai dzò a zaṅ mina mina anë mimbëmbë bënòni bë maa Zamba. ¹¹ Ngë mod asye babënyaṅ, lëbòò hë anë e ngul ya Zamba avë, asu yë na Zamba abi olugu a mam mësë asu Yesus Kristus; duma ai ngul bibòò ai nyè a bisëb bisëb. Amen. ¹² A mindindiṅ miama, të miakam e ndoan yasò mina a nyòl na yabobolo mina, hë anë eyëṅ dzam yayenan ai mina, ¹³ dzam da wogan mintag mbol mianòṅ ngab a mintye mi Kristus, asu yë na mitag, mifon fë eyòṅ duma die layi kulan a ngëëṅ. ¹⁴ Ngë batè mina etòm dzoe Yesus Kristus, minë mvòm, amu nsisim duma ai nsisim Zamba otoa abë mina. ¹⁵ Të mod mbòg ya abë mina akë dzugi mintye hala etòm yë na anë ṅwoe bod, ngë ṅwuwub, ngë ezilngan, ngë e mod afadi ezaa. ¹⁶ Ngë abëlë hm mintye mbol anë kristen, të awog osòn, aluugu Zamba a dzoe te. ¹⁷ Amu abog bakèè nkat ya nda-bod Zamba asò ya. Ngë batari ai bia, e bod babò ki mbëmbë foe Zamba bayi kë mana ya? ¹⁸ Ngë sosoo mod atotoan ben ki bëlë akode, eyë mod minsëm ya ayëm ki Zamba ayi tëbë a ngëëṅ ve? ¹⁹ E bod hm badzugi mintye a ṅyian Zamba bëvaa hm minnëm miaban ai mboan mbëṅ abë nkomo ya anë mod-afidi.

¹ E ma fë mënë nyia-modo-mvia ai mbòòlò mintye mi Kristus, mëbëlë fë ngab a e duma layi kuli a ngëëṅ, makogëlan ai bënyia-bodo-mvia. ² Kalëgan nkunda Zamba mibëlë, së ki a obila, boan dò a ṅyian waan anë Zamba adiṅ, të miabò dò ai ndòg mòni, boan dò ai nnëm evag, ³ të miabò dò hë anë miadzoe e bod bawoge ai mina, boan anë e bod miavë nkunda mvulna. ⁴ Eyòṅ ṅnòni nen ayi sò a ngëëṅ, miayi bi ekada e duma lamana ki. ⁵ Dzam dëda, a bëndoman, boan bënyia-bodo mëwog. Mina bësë, bòdan edzòdi-nyòl a zaṅ mina mina, amu Zamba akad e bod bënë mëbun a nnëm, avaa e bod bënë edzòdi-nyòl maa. ⁶ Dzòdigan hm mina bëben a ngul wòṅ Zamba a si, asu yë na abede mina a zuli mëtiṅ, ⁷ fudëgan miṅyian mian misë a mò moe, amu anòṅ ndzug ai mina. ⁸ Banan nnëm, mitòbò evie. Nziziṅ waan, Satan, avuṅ hë anë ayòg emgbëm, adzëṅë e mod amana nyab. ⁹ Yëman nyè mëkol a si, mibò nkanga a ṅyëbë, miyëmë na babënyaṅ baan bëbëlë fë kan mintye te a si esë. ¹⁰ Zamba maa asë ya angaloe mina a duma kole die abë Yesus Kristus ayi mina dugan tone eyòṅ midzugi ya mintye man etun abog, awone mina, avëë mina ngul, atele mina a kpiim. ¹¹ Ngul ebòò ai nyè a bisëb bisëb, amen. ¹² Mëtil mina man etun ai Silvanus ya mayen na anë madzaṅ a fidi, mëlëbe mina, mëbòòlò fë na mfaṅ maa Zamba hi; eyë mitobògò hë ete. ¹³ Ntòban mininga ya Babilonia wasug mina. Tò fë mòn wama Markus asug mina. ¹⁴ Sugan mina mina ai mëwuban më ediṅ. Mvoè ebòòg ai mina bësë ya minë abë Kristus.