YOHANNES OSU

¹ E dzi ya engabë atarigi a mëtari, e dzi bingawog, e dzi bingayen ai mis maan, e dzi bingafòmbò, e dzi mò maan mënganamba a ebug enyiṅ ² -ndò enyiṅ engakulëban, ndò bingayen dzò; ndò hm biabòòlò bibendëge fë mina enyiṅ kòm ya engabë abë esya ndò engakulëban bia- ³ e dzi bingayen, biwogo fë, mina biayedan dzò asu yë na mina fë mibi ngab ai bia. Ngab dzaan enë hm ai esya ban mòn woe Yesus Kristus. ⁴ Ndò biatil mina e mam ma, asu yë na mintag mian mibui. ⁵ E ndòṅ bingawog abë nyè, ndzò biabende mina nyi: Zamba anë mfyè, ndò dibi ziṅ lasëki abë nyè. ⁶ Ngë biadzo na bibëlë ngab ai nyè hë da biwulugu a dibi, biakad minnal, biakad ki bëbëla. ⁷ Ngë biawulu a mfyè akyaè ya anë a mfyè, bibëlë ngab bia bia, ndò fë mëki më mòn woe Yesus mavaè bia mvit ya nsëm osë a nyòl. ⁸ Ngë biadzo na bibëlë ki nsëm, biadug bia bëben, ndò fë bëbëla asëki abë bia. ⁹ Ngë biamëm minsëm mian, nyè anë sosoo, atoa fë ayëman, ayi bia vaè minsëm, afubu fë bia a nkòt osë. ¹⁰ Ngë biadzo na biandzëki sëm, biabò na abò mod-minnal, ndò fë ebug dzie yasëki abë bia.

¹ A ban bòn bama, matil mina e mam ma asu yë na të miabad sëm. Ndò ki ngë mod ziṅ asëm, abëlë nkè abë esya; nkè te anë e Yesus Kristus ya anë sosoo. ² Anë mëtunëṅa asu minsëm mian, së hm ki hë asu emian etam, anë fë mëtunëṅa asu minsëm mi si-ndon esë. ³ Na hm ngò biayëm na bingayëm nyè: ngë biabaala mëmvende moe. ⁴ E nyò adzo na: ’mëngayëm nyè’, dzam da të baala mëmvende moe, anë mod-minnal, ndò fë bëbëla asëki abë e nyòlò te. ⁵ E nyò abaala ebug dzie, ediṅ Zamba yadzie abë nyè mfaṅ; nala ngò biayëm na binë abë nyè. ⁶ E nyò adzo na atòbò abë nyè, ayean wulu anë nyè fë angawulu. ⁷ A mindindiṅ miama, matil ki mina mkpamaṅ mvende, matil mina nnomo mvende ya miakad ya sòṅ miabi atarigi a mëtari. Nnomo mvende onë ebug ya mingawog. ⁸ Ndò fë matil mina mkpamaṅ mvende, e dzi enë bëbëla abë nyè ai abë mina, mbol dibi lalod, bëbëla mfyè angafyè ya. ⁹ E nyò adzo na anë a mfyè, dzam da asiṅi manyaṅ, e nyòlò te angënë a dibi. ¹⁰ E nyò adiṅ manyaṅ anë a mfyè, ndò fë asëki dzam bò na mod mfë asëm. ¹¹ E nyò asiṅ manyaṅ anë a dibi, ndò awulu a dibi, ndò fë ayëm ki mfag ake amu dibi lakub ya nyè ndim a mis. ¹² A ban bòngò, matil mina asu yë na minsëm mihaban mina asu dzoe die. ¹³ A bëtara, matil mina mbol mingayëm e nyò anë atarigi a mëtari. A binanga, matil mina mbol mingatègè Mbe. ¹⁴ Maatil mina, a bòngò, mbol mingayëm esya. Maatil mina a bëtara, mbol mingayëm e nyò anë atarigi a mëtari. Maatil mina, a binanga, mbol minë ngul, ndò ebug Zamba enë abë mina, ndò mingatègè Mbe. ¹⁵ Te miadiṅ si-ndon tò e byem binë a si-ndon. Ngë mod adiṅ si-ndon, ediṅ tara yasëki abë nyè. ¹⁶ Amu e mam mësë ya si-ndon, ndòg nyòl, byem bi mò, biasò ki abë tara, biasò a si-ndon. ¹⁷ Ndò hm si-ndon yalod ai ndòg dzie, e nyò ki abò ṅyian Zamba alaṅan kole. ¹⁸ A bòngò, awola mvua di. Akyaè mingawog na Anti-Kristus azu, minziziṅ-mi-Kristus misò ya hm, asu te biayëm na awola mvua di. ¹⁹ Bëngatye abë bia, dzam da bëngabë ki bëwoge ai bia. Amu ngë bëwoge ai bia, ngë bëngatòbò ai bia fufulu. Ndò hm bëngakodo abë bia asu yë na akulan na tò mbòg awoge ki ai bia. ²⁰ Mfag waan, mine ṅwòban mbòn abë Mfufubu, ndò miayëm nala mina bësë. ²¹ Mandzëki mina til etòm yë na miayëm ki bëbëla, dzam da mbol miayëm nyè ai mbol yë na minnal miziṅ miatye ki a bëbëla. ²² Za anë mod-minnal, se e nyò asie na Yesus asëki Kristus a? E nyòlò te anë Anti-Kristus, e nyò asie esya ai mòn. ²³ E nyò asie mòn abëlë ki tò esya. E nyò amëm mòn abëlë fë esya. ²⁴ Mfa wan, e dzi mingawog atarigi a mëtari etòbògò abë mina. Ngë e dzi mingawog atarigi a mëtari etòbò abë mina, mina fë miayi tòbò abë mòn ai abë esya. ²⁵ Ekaa angakag bia dzi: Enyiṅ kòm. ²⁶ Maatil mina e mam ma mëtyan ai e bod bayi na badzèè mina, Bon bë Zamba. ²⁷ Ndò mfuban mbòn mingabi abë nyè watòbò abë mina, ndò miayaṅan ki ai na mod ziṅ ayëgële mina. E kan mfuban mbòn woe wayëgëlë mina mësë, wa onë hm bëbëla, wasëki mfugu, ndò e kan ongayëgëlë mina, tòbëgan ete. ²⁸ Etoa dzi hm a bòngò, laṅan abë nyè asu yë na, eyòṅ ayi kulëban, bibëlë azombo, bibò te bi osama a asò-lë die. ²⁹ Ngë miayëm na anë sosoo, miayëm fë na e nyò osë abò sosoo anë mbyalan abë nyè.

¹ Yënan e kan ediṅ tara angavë bia, na bëloe bia na bòn bë Zamba, ndò fë binë bòn bë Zamba nala bëbëla. Asu te si-ndon yayëm ki bia, amu yandzëki nyè yëm. ² A mindindiṅ miama, etoa dzi, binë bòn bë Zamba, hë da e dzom biayi bò yabë ki kulan. Biayëm na eyòn yayi kulëban, biayi bò anë nyè, amu biayi nyè yen akyaè anë. ³ Ndò e mod ose abëlë afidi abë nyè afubu emen, akyaè emen anë mfuban. ⁴ E mod ose abò nsëm abò fë evus, amu nsëm onë evus. ⁵ Ndò miayëm na e nyòlò te angakulëban asu yë na avaè minsëm, ndò nsëm osëki abë nyè. ⁶ E nyò osë atoa abë nyè asëm ki. E mod osë asëm andzëki nyè yen, ndò fë andzëki nyè yëm. ⁷ A bòngò, mod ziṅ abë mina dug. E nyò abò sosoo anë sosoo amu e nyòli anë sosoo. ⁸ E nyò abò nsëm asò abë Satan, amu Satan azuzu ya asëm atarigi a mëtari. Asu te mòn Zamba angakulëban, na asole mimboan mi Satan. ⁹ E nyò osë angabyali abë Zamba abò ki nsëm, amu mvòṅ dzie etoa abë nyè, ndò asëki dzam sëm, amu angabyali abë Zamba. ¹⁰ Bòn bë Zamba ai bòn bë Satan basëlan e dzam di na: E mod osë abò ki sosoo asò ki abë Zamba, tò fë e nyò adiṅ ki manyaṅ. ¹¹ Abende ya mingawog atarigi a mëtari di, na bidiṅan bia bia, ¹² së ki anë Kain angabë asòò abë Mbe, ndò angawoe manyaṅ. Ndò hm ki, asu dze angawoe nyè? Mbol mimboan mie mingabë abe, e mi mi manyaṅ mitoa sosoo. ¹³ Te miakam, a babëdzaṅ, ngë si-ndon yasiṅ mina. ¹⁴ Biayëm na bingasò a awu, ndò bialod a enyiṅ, amu biadiṅ babëdzaṅ. E nyò adiṅ ki alaṅan a awu. ¹⁵ E mod osë adiṅ ki manyaṅ anë ṅwoe bod, ndò fë miayëm na ṅwoe bod ziṅ abëlë ki enyiṅ kòm abë nyè. ¹⁶ Eyë hm bingayëm ediṅ na: Angavë enyiṅ dzie asu daan. Ndò bia biayean vë enyiṅ dzaan asu babëdzan. ¹⁷ E nyò abëlë byem bi mò abëbëgë e manyaṅ anë a mëyaṅan, afëdë nyè nnëm woe, eyë ediṅ Zamba enë dzam laṅan abë nyè ya? ¹⁸ A bòngò, te biadiṅ hë ai anyu, tò ki ai oyëm, ndiṅan ai mimboan, ai bëbëla. ¹⁹ Nala ngò biayi yëm na biasò a bëbëla, abog te biayi bò na minnëm mian miyëm, e hom anë na, ²⁰ tò minnëm mian mifyaṅan bia kpèè a nkat, Zamba alod minnëm mian ndò fë ayëm mësë. ²¹ A mindindiṅ miama, ngë minnëm mian miandzëki bia kpèè a nkat, bibëlë afidi abë Zamba, ²² ndò e dzi biayi dzaè, biayi dzò hëlë abë nyè, amu biabaala mëmvende moe, ndò biabò e mam manyëb nyè a nnëm. ²³ Mvende dzie hm nyi: na biyëbë dzoe mòn woe Yesus Kristus, bidiṅan fë bia bia anë angavë bia mvende. ²⁴ E nyò anyie mëmvende moe alaṅan abë nyè, nyè fë abë mod te. Nala ngò biayëm na alaṅan abë bia, atye abë nsisim angavë bia.

¹ A mindidiṅ miama, te miayëbë nsisim osë, dzam da tsasan minsisim, miyëm ngë miasò abë Zamba; abui bëprofèt mëdugan bëngasò ya a si-ndon; ² Na ngò miayëm Nsisim Zamba: Nsisim osë wamëm na Yesus Kristus angasò a minson wasò abë Zamba, ³ ndò fë nsisim wamëm ki Yesus wasò ki abë Zamba. E hili te onë Anti-Kristus a mingawog na azu, ndò antoa ya a si-ndon ⁴ Mina miasò abë Zamba, a bòngò, ndò mingatègè bò amu e nyò anë abë mina alod e nyò anë a si-ndon. ⁵ E bala basò a si-ndon, asu te bakòbò mam më si, ndò fë si-ndon yawog bò. ⁶ Bia biawoge ai Zamba; e nyò ayëm Zamba awog bia. E nyò awoge ki ai Zamba awog ki bia. Nala ngò biayëm Nsisim bëbëla ai nsisim mëdugan. ⁷ A mindindiṅ miama, ṅdiṅan bia bia, amu ediṅ yasò abë Zamba, ndò e mod osë adiṅ anë mbyalan abë Zamba ndò fë adiṅ Zamba. ⁸ E nyò adiṅ ki andzëki yëm Zamba, amu Zamba anë ediṅ. ⁹ Ediṅ Zamba engakulan abë bia na Zamba angalom mbaṅ mòn woe a si-ndon na bibi enyiṅ abë nyè. ¹⁰ Ediṅ yasëki na bingadiṅ Zamba. Dzam da na ṅnyè angadiṅ bia, ndò angalom mòn woe na abò metunëṅa asu minsëm mian. ¹¹ A mindindiṅ miama, ngë Zamba angadiṅ bia e kan nyi, bia fë biayean diṅan bia bia. ¹² Mod ziṅ abë ya ki yen Zamba. Ngë biadiṅan bia bia, Zamba alaṅan abë bia, ndò fë ediṅ dzie enë fò abë bia mfaṅ. ¹³ Nala ngò biayëm na bialaṅan abë nyè, nyè fë abë bia, amu angavë bia Nsisim woe. ¹⁴ Bingayen, ndò biabòòlò na esya angalom mòn na akode si-ndon. ¹⁵ E nyò amëm na Yesus anë mon Zamba, Zamba atoa abë mod te, nyè fë abë Zamba. ¹⁶ Bia bingayëm dò, ndò fë bingayebe ediṅ ya Zamba abëlë asu daan. Zamba anë ediṅ, ndò e nyò atoa a ediṅ, atoa abë Zamba ndò fë Zamba atoa abë nyè. ¹⁷ Na ngò ediṅ engabò mfaṅ mfaṅ a bë bia, asu yë na bibi afidi a amos nkat, amu e kan anë, nala ngò fë bia binë e si-ndon nyi. Wòṅ osëki a ediṅ, ¹⁸ amu mfaṅ ediṅ wawoa wòṅ a nsëṅ ; wòṅ obëlë endegëlë, hë da e mod ambara asëki a ediṅ mfaṅ. ¹⁹ Bia biadiṅ a mu angatari bia diṅ. ²⁰ Ngë mod ziṅ adzo na «Madiṅ Zamba», dzam da asiṅi manyaṅ, mod te anë mod-minnal. Amu e nyòb adiṅ ki e manyaṅ woe ya ayen asëki dzam diṅ e Zamba ya andzëki yen. ²¹ Bibëlë e mvende nyi abë nyè na e nyò adiṅ Zamba, adiṅi fë manyaṅ.

¹ E mod ose ayëbë na Yesus anë Kristus anë mbyalan abë Zamba, ndò fë e mod osë adiṅ mbonde adiṅ fë e nyò angabyali abë nyè. ² Na ngò biayëm na biadiṅ bòn bë Zamba, bibòò fë mëmvende moe: ³ Ediṅ Zamba dzi, na bibaala mëmvende moe, ndò hm mëmvende moe mësëki adid. ⁴ E dzi esë enë mbyalan abë Zamba yatègè si-ndon. Ntegan watègè si-ndon onë ṅyëbë waan. ⁵ Za hm atègè si-ndon ngë se ki e nyò ayëbë na Yesus anë mòn Zamba? ⁶ Anë e nyò azu a mëndim ai mëki, Yesus Kristus; azu hm ki hë a mëndim etam, azu a mëndim ai a mëki. Ndò Nsisim wabòòlò, amu Nsisim onë bëbëla. ⁷ Bëbòòlò bënë bëlè: ⁸ Nsisim, ai mëndim, ai mëki, ndò bò bëlè bëte babò dzom dzia. ⁹ Ngë bianòṅ mbòòlan bod, mbòòlan Zamba walod nala. Amu mbòòlan Zamba onë na angabòòlò mòn woe. ¹⁰ E mod ayëbë mòn Zamba abëlë mbòòlan abë nyè ; e mod ayëbë ki Zamba abò na Zamba abò mod minnal, amu andzëki ṅyëbë mbòòlan ya Zamba angabòòlò mon woe. ¹¹ Ndò mbòòlan onë na Zamba angavë bia enyiṅ kòm, ndò enyiṅ te enë abë mòn woe. ¹² E nyò abëlë mòn, abëlë fë enyiṅ. E nyò abëlë ki mòn Zamba, abëlë ki enyiṅ. ¹³ Matil mina e mam ma asu yë na miyëm na mibëlë enyiṅ kòm, mina ya miayëbë dzoe mòn Zamba. ¹⁴ Afidi bibëlë abë nyè anë na, ngë bidzaè dzom ziṅ a ṅyian woe, awog bia. ¹⁵ Ndò ngë biayëm na awog bia, tò biadzaè dze, biayëm na bibëlë mëyaṅan a biadzaè nyè. ¹⁶ Ngë mod ziṅ ayen manyaṅ asëmë nsëm tòg, ayi dzaè Zamba, avëë nyè enyiṅ, asu e ba basëm minsëm mintòg. Nsëm ewoagan onë. Ndò madzo ki na bëkogëlan asu e hili te. ¹⁷ Abë asë anë nsëm, ndò fë nsëm tòg onë. ¹⁸ Biayëm na e mod osë angabyali abë Zamba asëm ki; e nyò angabyali bë Zamba nala, abaala nyè, ndò fë Mbe anamba ki nyè. ¹⁹ Biayëm na biasò abë Zamba, ndò si-ndon esë enara a nsëm. ²⁰ Ndò fë biayëm na mòn Zamba angasò, avëë bia fëg yë na biyëm bëbëla, ndò binë a bëbëla, abë mòn woe Yesus Kristus. Ṅnyè anë bëbëla Zamba ai enyiṅ kòm. ²¹ A bòngò, kaman ai mina bëben a bëzëzë bëzamba.