KORINTI OSU

¹ Ma, Paulus, mëloeban na mëbò apostel Kristus Yesus a ṅyian Zamba, ai madzaṅ Sostene, ² abë nda-Zamba ya enë a Korinti, a bënë mfuban abë Kristus, bëloeban na bëbò mimfufub, abaman ai e bod bësë baloe dzoe Nti waan Yesus Kristus hom osë, ya anë Nti waban atoa fë engoan. ³ Maa abòòg ai mina, ai mvoè ya biasò abë Zamba, esya waan ai esya Nti Yesus Kristus. ⁴ Mavë Zamba wama ngaṅ a bog asë asu daan, asu e maa Zamba bëngavë mina abë Yesus Kristus, ⁵ amu abë nyè ngò miabi kan akuma esë, a nkòbò osë ai a ṅyëman osë, ⁶ amu mbòòlan Kristus ongayëm abë mina, ⁷ akyaè yë na e mina ya miayanga na Nti waan Yesus Kristus ayi kulan, tò efaè akab ziṅ yadzëman ki fë mina. ⁸ Ṅnyè hm ayi mina wone abui a mëmana, mintoa tègè ai akalëga a amos Nti waan Yesus Kristus. ⁹ Zamba anë mod afidi, ṅnyè angaloe mina na mizu baman enyiṅ ai mòn woe Yesus Kristus Nti waan. ¹⁰ Ndò hm makogëlan ai mina a dzoe Nti waan Yesus Kristus, a babëdzaṅ, na mina bësë mibò kiṅ dzidzia, tègè ai ngam ngam abë mina, na milad nnëm mbòg mbòg. ¹¹ A babëdzaṅ, bod ya nda-bod Kloe bëngamana ma kad na mibëlë bitòm a mina mina we. ¹² Makòbò adzo di amu mod osë ya abë mina adzo na: «Ma, mënë a ngam Paulus, ma e nyi Apollos, ma e nyi Kefas, ma e nyi Kristus». ¹³ Yë Kristus anë nkaban ngam ngam nga? Yë Paulus nyè fë angawu asu dan, yë a dzoe Paulus ki ngò mingaduuban nga? ¹⁴ Makaṅ Zamba na mandzëki du tò mbòg ya abë mina, sësala hë Krispus ban Gaius, ¹⁵ na mod aza kë dzo hala na mingaduuban a dzoe dama. ¹⁶ Mëngadu fë nda-bod Stefanas; mayëm ki na mëngadu mod mfë alodo nala. ¹⁷ Amu Kristus andzëki ma lom na mëdu, angalom ma na mëyedan mbëmbë foe, së hm ki ai fëg nkòbò, na klos Kristus eza bò a zëzë. ¹⁸ Amu anë hm na, asu bod ya ndzaṅ, ebug klos enë nkòbò akud, etoa hm ngul Zamba asu bia ya binë nkodan. ¹⁹ Amu anë ntilan na: Mayi dzèè fëg mimfëfëg, mësole akëṅ minkëkëṅ. ²⁰ Mfëfëg onë hm ve? Nsaṅa bëkalara anë ve? Mod mimfèd ya e ndon nyi anë ve? Zamba andzë ya vëṅan feg ya e si nyi akud a? ²¹ Amu, mbol ya si-ndon, ai fëg dzaban, bandzëki yëm Zamba a fëg dzie, ndò Zamba angayen dò mbëṅ na akode e bod bayëbë ai akud foe bayedan di. ²² Mbol Yuden basili mësimba, Grek bëdzëṅë fëg, ²³ bia ha biyedëgan Kristus ya angabomban a klos, nala ontoa dzaṅa-fëgë asu Yuden, akud adzo asu Grek, ²⁴ dzam da, asu e ba bëngaloeban, tò Yuden, tò Grek, Kristus anë ngul Zamba ai fëg Zamba. ²⁵ Amu akud Zamba lalod fëg bod, ntëgan woe olodo ngul bod. ²⁶ A babëdzaṅ, taman hm yen nloe waan, na tègè ai abui mimfëfëg, e kan mod ayen, tègè ai abui mingungul, tègè ai mintomba. ²⁷ Dzam da, ndò Zamba angatòb akud ya si-ndon, asu yë na asama mimfëfëg, atòbò e dzi enë atëg a si-ndon, asu yë na asama mingungul, ²⁸ Zamba atòbò e dzi enë dzëdzaa, ai e dzi babyandi a si mu, e dzi balaṅ ki a taṅ, asu yë na asole e dzi balaṅ a taṅ, ²⁹ asu yë na të mod ziṅ abò enguṅ a mis më Zamba. ³⁰ Ṅnyè abò na mitòbò abë Kristus Yesus ya anë bia e fëg yasò abë Zamba, mëkyëbë ai mfuban, ai akode, ³¹ asu yë na, akyaè anë ntilan na: E mod abò enguṅ, abòò enguṅ a bë Nti.

¹ A babëdzaṅ, eyòṅ mëngasò abë mina, mandzëki mina sòṅ yedan ndimba Zamba ai abui abëṅ bibug ngë fëg. ² Amu mëngayili na mayi ki yëm dzom efë abë mina hë e Yesus Kristus bëngabomolo a klos. ³ Mfag wama, mëngasò abë mina mëtoa ntëgan, mëkònò wòṅ, mënyaman fë abui, ⁴ ndò nkòbò wama ai foe dzama bingabë ki minkòbò bëyëm, bingabë nkobò nsisim ai ngul, ⁵ asu yë na të ṅyebe waan wabò a fëg bod, obò hë ngul Zamba. ⁶ Biakòbò mam më fëg ai e bod bëwolobo ya, së ki fëg ya e si-ndon nyi, ngë ki e nyi e bod bë ndon badzoe e si-ndon nyi. ⁷ Dzam da, biakòbò fëg Zamba ya engabë esòlò a ndimba, e nyi ya Zamba angatele ya okoba asu duma daan, ⁸ e nyi ya tò mod ziṅ mbòg ya bëdzoe bë e si nyi andzëki yëm. Amu, ngë bëyëm, ngë bandzëki bomë Nti a klos. ⁹ Dzam da, hë mbol anë ntilan na: E mam ya dis andzëki yen, alò të wog, e dzi yabë ki lod mod a nlo, e bi ya Zamba angakomëzan e ba badiṅ nyè. ¹⁰ Mina hm Zamba angakuli mò abë Nsisim. Amu Nsisim wasoṅ dzom esë, tò mam më ndimba më Zamba. ¹¹ Za modo ayëm mam më mod, së na nsisim mod onë nyè a nyòl? Nala ngò hm fë mod ayëyëm mam më Zamba, hë Nsisim Zamba ngò wayëm mò. ¹² Mfag waan, biandzëki nòṅ nsisim si-ndon; Nsisim wasò abë Zamba ngò bingabi, asu yë na biyëm e mam ya Zamba avë bia a akab. ¹³ Mam mëte mmò fë biakòbò, së hm ki ai e bibug ya fëg mod yayëgëlë, biakòbò mò hë ai e bibug Nsisim wayëgëlë, bitimiṅi e bod bawoge ai Nsisim mam më Nsisim. ¹⁴ E mod anë mod si, anòṅ ki mam më Nsisim Zamba. Amu mënë mam më akud asu die, ndò fë asëki mò dzam yëm, amu bawog mò hë a Nsisim. ¹⁵ E mod ya Nsisim awog mësë, tegè ai e mod anë nyè dzam tsas. ¹⁶ Amu za angayëm ya ntsogan Nti, na avë nyè mëlëbëga? Mfag waan, bibëlë ntsogan Kristus.

¹ A babëdzaṅ, mfag wama, mëngabë ki dzam kòbò ai mina anë e bod ya Nsisim, makòbò ai mina anë bod bë si, anë ban bòngò abë Kristus. ² Mënganyuu mina mënyaṅ, së ki e bidi biwon ya. Amu mina mingabë ki mibëlë ngul te. Tò etoa dzi ben, miabëlë ki ngul te, ³ amu mingënë bod bë nyòl. Amu, ntye ya zuṅa ai esuṅu minkoṅ bingënë a zaṅ dzaan, nga mingënë bod bë nyòl, miwulugu fë hë anë bod batsog? ⁴ Amu eyòṅ mod adzo na: Ma mawoge ai Paulus, e nyò mbòg nyè na: ma mënë ai Apollos, miasë hë bod bë nyòl a? ⁵ Apollos ṅnyè anë dze? Paulus ki ṅnyè anë dze? Bënë bëbò-bisye ya bëngavë mina ṅyëbë, anë mod akyaè ya Nti angavë nyè. ⁶ Ma mëngabè, Apollos awòdan mëndim, dzam da Zamba ṅnyè angabò na enaṅ. ⁷ Antoa hm na e mod abè, asëki dzom ziṅ, tò e nyò awòdan, hë e Zamba ya abò na enaṅ ṅnyè anë mfaṅ. ⁸ E mod abè ai e nyò awòdan bënë dzom dzia, dzam da mod osë ya abë bò ayi bi maan moe akyaè angasye. ⁹ Amu biasye fufulu ai Zamba, mina minë afub Zamba ai nda-Zamba. ¹⁰ Ai e maa Zamba bëngavë ma, ndò mëngamana fag bibe, mëtari mëloṅ anë mfëfëg nloṅo-mënda, mod mfë angazu kë ai mëloṅ osu. Mod osë abò okala akyaè abò mëloṅ. ¹¹ Mod asëki dzam tele tin mfim ziṅ fë alodo anë e nyi entëlë ya, ndzò hm enë Yesus Kristus. ¹² Ngë mod ziṅ abò mëloṅ a tin mfim mvòd, ngë silba, ai mëkòg më mòni, ai bile, ai zam, ngë bisie, ¹³ esye mod osë yayi kui a ngëëṅ, amu biayi kuban a ndoan. Amu, e kan esë esye mod enë, ndoan yayi dzò fial. ¹⁴ Ngë esye ziṅ ya mod abò mëloṅ elaṅan etoa, ayi bëlë maan. ¹⁵ Ngë esye mod emana dig, ayi dzèè, dzam da nyè emen akodeban, anë e mod ahë lod a ndoan a zaṅ. ¹⁶ Nga miayëm na minë tempel Zamba ai na Nsisim Zamba otoa abë mina? ¹⁷ Ngë mod ahë ndaman tempel Zamba, Zamba nyè andaman fë nyè. Amu tempel Zamba anë mfufub, mina hm minë nyè. ¹⁸ Të mod ziṅ adug emen. Ngë mod ziṅ atsog na anë fëg abë mina hala e si-ndon nyi, abòò akud, asu yë na azu bò mfëfëg. ¹⁹ Amu fëg ya e si nyi enë akud a mis më Zamba, amu anë ntilan na: Abad mimfëfëg mëkëṅ maban. ²⁰ Ai na: Nti ayëm mintsogan mimfëfëg na minë zëzë. ²¹ Ndò hm, të mod abò enguṅ a bod. Amu dzom esë yawoge ai mina ²² tò Paulus, tò Apollos, tò Kefas, tò si-ndon, tò enyiṅ, tò awu, tò e mam ya etoa dzi, tò e ma mazu. Bisë biawoge ai mina, ²³ mina miawoge ai Kristus, Kristus awoge ai Zamba.

¹ Asu te bod bayean bia nòṅan ë bësye bë Kristus ai bëbaala bë ndimba mam më Zamba. ² Abadan, afëdan fë na, bod bayi na bëzu kòb nkala-byem atoa mod afidi. ³ Mabisi ki tò tsëtsat na miatsas ma, ngë na amos bod batsig ntol onë. Tò mamen masëki dzam tsig mamen ntol. ⁴ Dzom ziṅ yakòbòlò ki ma a nnëm, dzam da nala watyan ki na mëkyëbë ya a nkat, hë da Nti nyè atsig ma ntol. ⁵ Asu te, të miatam tsig ntol ziṅ, ntye Nti abëki sò, ṅnyè ayi fyè e byem bisòlò a dibi, akuli miṅyian ya minnëm a ngëëṅ. Abog te Zamba ayi taman mod osë. ⁶ A babëdzaṅ, mëhë vëg e mam ma a nyòl dzama ai e nyi Apollos asu daan, asu yë na miyègè na: «Obë daṅ e dzi enë ntilan», asu yë na të mod adaṅa kë lëdë emen alodo e nyò mbòg. ⁷ Za akad wa na wasëki anë e bod bëvòg? Dze obëlë, a bandzëki wa ve? Ndò hm, ngë bëngavë wa, dze wabò enguṅ anë bandzëki wa vë? ⁸ Mimana ya dzie, mimana ya bò minkukuma, mivëṅan ya bëdzoe tègè ai bia! Ngë mitoa ki të dzam bò bëdzoe bëte mfaṅ a n a, asu yë na bidzoe ai mina fufulu! ⁹ Amu matsog na Zamba angatele bia Apostel bë mvua, anë e ba bakë a awu, amu bingavëṅan ya ekègè asu si-ndon, ai benglès ai bod. ¹⁰ Bia binë mëkud asu Kristus, mina mitoa mimfëfëg abë Kristus. Bia binë ndëtëg bod, mina biwolo, mina ha mimfaṅ mi bod, bia zëzë bod. ¹¹ Azaag kui etoa dzi, biawog zie, biwogo ekode, bitoa minsò, bëyidi bia, bikëlë ai dulu osu hë nkëan, ¹² ndò biawu esye, bisye ai mò maan. Eyòṅ bakag bia, bia bikubu bò ntotomamaa, bëfëmë bia, bidzibigi, ¹³ bëbugu bia mëdzo, bia bitaman bò. Bingabò ya të anë ngun ya si, binë hë «bile bibugi a mvuan» azaag kui ana. ¹⁴ Së ki asu yë na mëkub mina osama a nlo ngò matil e mam ma, dzam da mabeme mina anë bòn bama ya madiṅ. ¹⁵ Amu, tò anë mibëlë ntèd bëyëgëlë abë Kristus, miabëlë ki abui bë esya. Amu mëngabye mina abë Kristus Yesus ai mbëmbë foe. ¹⁶ Ndò hm makogëlan ai mina: Byean mvulna dzama. ¹⁷ Asu te malom mina Timoteus; anë ndindiṅ mòn afidi wama abë Nti, ṅnyè ayi mina dugan tsog mëzen mama abë Kristus Yesus, akyaè mayëgëlë hom osë a nda-Zamba esë. ¹⁸ Abui bod babede bëben, hë anë mayi ki bada sòṅ a bë mina. ¹⁹ Mayi sò abë mina mbil mbil, ngë Nti adiṅ, ndò mayi yëm ngul e bod bë ebyandi ba, së ki hë a nkòbò. ²⁰ Amu edzoe Zamba esëki a nkòbò, enë a ngul. ²¹ Dze hm miayi? Yë mëzu ai nkas, yë mëzu ai nnëm ediṅ a i evovoe?

¹ Badzo dzo na bisog binë abë mina, e kan bisog esë së ki a zaṅ bëhaiden, na mod ziṅ atoa ai mininga esya. ² Ndò minë hë enguṅ! Nga miayean bò mëyëb asu yë na e mod ahë bò dzam te akodo abë mina? ³ Mfag wama, mënë mò mò a nyòl, mëtoa ai mina a nsisim, ndò mëtsig ya adzo e mod ahë bò dò, hë anë mënë we; ⁴ Boan ekoan a dzoe Nti waan Yesus, ma mënë ai mina a nsisim, ai ngul Nti waan Yesus, ⁵ bikab mod te abë Satan, na nyòl dzie endaman, asu yë na nsisim woe okodeban a amos Nti. ⁶ Enguṅ dzaan esëki mbëṅ. Nga miayëm na man ekòsaṅ tsëtsat ṅnyè abò na ovug omana vus? ⁷ Woan nnomo ekòsaṅ a fyè, asu yë na mibò mkpamaṅ ovug, mbol minë tègè ai ekòsaṅ. Amu ntomba Paska waan, Kristus, otsigëban ya. ⁸ Të biadzëmë hm abog ai nnomo ekòsaṅ, ngë mbë ekòsaṅ, ngë e dzi mëtom, ndzëmëṅan abog ai bëmbaṅëla ya basëki ai ekòsaṅ, a bënë mfuban ai bëbëla. ⁹ Mëngatil ya mina a kalara na të miabaman ai bod bisog, ¹⁰ nala ombë tyan ki na e bëbe bë bod ya si-ndon mu, tò mindondòg, tò e ba bënë akoe, tò e ba balugu bëzëzë bëzamba, nala ontoa hë anë miayean kodo a si-ndon. ¹¹ Mëngatil na të miabaman fufulu ngë mod ziṅ adzo na anë manyòṅ hë da atoa mod bisog, ngë ndòg, aluugu bëzëzë bëzamba, mod bifofodan, ngë nsògò mëyòg, ngë akoe, të miadidi ai akyaè te fufulu. ¹² A dze miayi kë tsig e bod ya nsëṅ ntol? Së bod ya nda ete mbò miatsig ntol a? ¹³ E ba ya nsëṅ, Zamba ayi bò tsig ntol. Tsidan mbë mod a zaṅ dzaan!

¹ Dze yë na mod ziṅ abëlë bò na, abëlë adzo ai e nyò mbòg, angakë dò kòbò a mis bëhaiden, aligi dò kòbò a mis mimfufub nga? ² Nga miayëm na mimfufub miayi tsig ntol si-ndon? Ndò hm ngë mina miayi tsig ntol si-ndon, mina tègè ai e ngul miatsig ban mëdzo nga? ³ Nga miayëm na miayi tsig benglès ntol, makë dzo e ban mam ba? ⁴ Eyòṅ mibëlë akyaè ban mëdzo di, yë miatele e bod bënë tègè ai ndòṅ a nda-Zamba na mbò bëtsig ntol te? ⁵ Makòbò adzo di na miwog osòn. Yë nala onë na mfëfëg ziṅ osëki abë mina a onë dzam tsig adzo a zaṅ mod ban manyaṅ? ⁶ Ndò hm di, manyaṅ ban manyaṅ bëngatsigëban mëdzo a mis bëhaiden nga? ⁷ Kë anë dzam osòn ben na mibëlë dzam mësòman a zaṅ dzaan a! Nga minë dzoge na bëbò mina abe? Nga minë dzoge na bëfadi mina byem? ⁸ Nga mina bëben miabò fë babënyòṅa be, mifadigi bò byem? ⁹ Yë na miayëgan na bod bë abe bayi ki bi ngab-elig edzoe Zamba? Të miatòbò a ndimi hala: tò bod bisog, tò bëlugu bëzëzë bëzamba, tò bod bë ngòbinda, tò e fam yaboman bò bò, tò e bininga baboman bò bò, ¹⁰ tò miṅwuwub, tò mindondòg, tò bësòg mëyòg, tò bod bifofodan, tò minkokoe, bayi ki bi ngab edzoe Zamba. ¹¹ Nala ngò bëvòg ya abë mina bëngabë. Ndò mingawòbòban ya, mintoa mimfufub, mikyëbë a nkat a dzoe Nti Yesus Kristus ai abë Nsisim Zamba waan. ¹² «Mënë dzam bò mam mësë», dzam da mësë masëki ai ma mfi. Mënë dzam bò mësë, ndò dzom ziṅ yadzoe ki ma. ¹³ Bidi biawoge ai osaṅ, osaṅ otoa asu abum. Ndò Zamba ayi ndaman e dzi, andaman fë e dzi evòg. Nyòl yawoge ki ai bisog, yawoge ai Nti, Nti atoa asu nyòl. ¹⁴ Zamba angavëlë Nti a sòṅ, ndò fë ayi bia kuli nala ai ngul dzie. ¹⁵ Nga miayëm na nyòl dzaan enë bidzo bi Kristus? Ndò hm yë mënòṅ bidzo bi Kristus, mëbò na bibò bidzo bi mininga ebamba? Tègè ai dzom! ¹⁶ Nga miayëm na e mod akë bie mininga ebamba anë ai nyè nyòl dzia? Adzo hm na: Bò bëbè bayi bò nyòl dzia. ¹⁷ E mod alad ai Nti anë ai nyè nyòl dzia. ¹⁸ Tuban bisog. Nsëm osë mfë mod abò, abò ki wò a nyòl dzie. E mod abò bisog, asëm a nyòl dzie eben. ¹⁹ Nga miayëm na nyòl dzaan enë tempel Mfufub Nsisim ya atoa abë mina, a Zamba angavë mina, ndò miawoge ki ai mina bëben? ²⁰ Bëngakus mina abui mòni. Vaan hm Zamba duma a nyòl dzan.

¹ Asu e mam hm mingatil ma: Anë mbëṅ na fam etòbò, të namba mininga. ² Etòm adzo bisog te, ndò mod osë ayean bi e mininga woe, mininga osë abëlëgë e fam dzie. ³ Fam edzalëga mininga mvende alug, dzam dëda fë mininga adzalëga nnom mvende alug. ⁴ Mininga abëlë ki fë edzoe a nyòl dzie emen, hë fam fò, dzam dëda fë, fam ebëlë ki fë edzoe a nyòl dzie, hë mininga fò. ⁵ Ndò hm të miabënan a enòṅ, ngë asëki na mihë kui dò kiṅa su ban mëlu, asu yë na mibi abog asu ngogëlan, midugan hm tòbò fufulu, na Satan azaa bobolo mina etòm ya na miayëm ki ban nnëm. ⁶ Madzo adzo di na mavë mina ngul, së ki mvende. ⁷ Amu matam na bod bësë bëbò anë ma. Dzam da mod osë abëlë efaè akab Zamba avë nyè, e nyò e kan nyi, e nyò e kan fòg. ⁸ Madzo ai minkoe, ai minkus na, anë mbëṅ abui na bëtòbò anë ma. ⁹ Ngë basëki dzam ban nnëm, bëlugu, amu anë mbëṅ abui na olug, alodo anë wadig ai ngoṅ. ¹⁰ Mabende e ba ya bëngalug ya, së ki hm ma, Nti ṅnyè abende, të mininga atsaman ai nnom, ¹¹ ngë ahë kë tsaman, atòbògò nkoe, ngë ki na adugan lad ai nnom; ndò fë të nnom atsidan ngal. ¹² E bod bëvòg, ma makòbò ai bò, së ki Nti: Ngë madzaṅ ziṅ abëlë mininga, ngòn haiden, mininga te ayëbë na atòbò ai nyè fufulu, të asoe nyè. ¹³ Ndò fë ngë mininga ziṅ abëlë nnom anë haiden, nyè fë ayëbë na atòbò ai nyè fufulu, të asoe nnom te. ¹⁴ Amu nnom anë haiden nyò amana fubu emen abë ngal, e mininga haiden amana fubu emen abë madzaṅ. Ngë atoa tègè ai nala, bòn baan bëntoa tègè ai bò mfuban, ndò hm bò bënë mfuban. ¹⁵ Ngë man haiden ayi na atsam alug, akëlëg! Madzaṅ ngë kal dzaan ziṅ atii ki a mvende eyòṅ te. Zamba angaloe mina a mvoè. ¹⁶ A mininga, wayëm a dze ngë wayi kode nyò nnom? A fam, wayëm a dze ngë wayi kode nyò ngal? ¹⁷ Ndò mod osë awulugu e kan Zamba angavë nyè ngab ai e kan Zamba angaloe nyè. Nala ngò fë mabende a mënda më Zamba mësë. ¹⁸ Ngë mod ziṅan galoeban hala antoa ya nkëban, të asole akele te. Ngë mod ziṅan galoeban abë ki keleban, të akelëban. ¹⁹ Adzo yë na mod anë nkëban, ndò asëki nkëban, asëki dzam! Hë mbaalan mëmvende më Zamba ngò onë ai mfi. ²⁰ Mod osë atobògò a nloe ya angaloeban. ²¹ Ngë ongaloeban otoa olò, të nala waandëgëlë wa. Hë da, ngë obëlë ngul ya abò fili, obò dò. ²² Amu e man olò bëngaloe abë Nti, anë fili mod Nti, dzam dëda e fili mod bëngaloe enë olò Kristus. ²³ Bëngakus mina taṅ a yob abui. Të miabò olò bod. ²⁴ Mod osë atòbògò a mis më Zamba e hom angabë eyòṅ bëngaloe nyè, a babëdzaṅ. ²⁵ Asu mintud mi bininga, mabëlë ki nguma mvende Nti ziṅ, dzam da makad mina akyaè ya matsog, anë e mod afidi ya Zamba, ayënë ngòl. ²⁶ Matsog na, a etye ngèt bitëlë dzi, anë mbëṅ na mod atòbò nala. ²⁷ Ngë ongalad ai mininga të wadzëṅ na otsam adzo te. Ngë onë ntsaman ai mininga, të wadzëṅ mininga. ²⁸ Ngë walug, wasëm ki. Ngë ntud ngòn mininga olug, wasëm ki. E bala bëte bëbëlë hë mindzug ya nyòl, ndò madzëṅ na misaala miè. ²⁹ A babëdzaṅ, madzo na, abog antoa ya etun. Ndò hm, atarigi ana, e bod bëbëlë bininga bëbòòg anë babëlë ki, ³⁰ e ba bayon, hë anë bayon ki, e ba batag hë anë batag ki, e ba bakus, hë anë babëlë ki, ³¹ e ba babëlan ai si-ndon, hë anë babëlan ki ai dzò; Amu e si-ndon nyi yamana lod. ³² Mayi na mibò tègè saṅan; nkoe wasaṅan ai mam më Nti, akyaè ya anë dzam nyëb Nti a nnëm. ³³ Nlugu asaṅan ai mam më si, akyaè anë dzam nyëb ngal a nnëm, ³⁴ antoa hm nkaban a zaṅ. Ndò fë nkoe mininga ai ntud ngòn mininga wasaṅan ai mam më Nti, asu yë na abò mfufub a nyòl ai a nsisim. E mininga anë nlugan asaṅan ai mam më si, akyaè ya anë dzam nyëb nnom a nnëm. ³⁵ Makòbò adzo di asu mfi waan, së ki na mëkòl mina olam, hë asu yë na, asu Nti, mibò dzin, bod bë afidi, tègè bëbë a mgbag. ³⁶ Ngë mod ziṅ ayen na abò ntud ngòn mininga woe abe, ngë adzo te lalod nyè nkoṅ ai na layean bòban, abòòg akyaè adiṅ; asëm ki; bëluugan. ³⁷ E mod ki aban nnëm woe, tègè ai mëyaṅan, abana ṅyian woe, ayënë fë a nnëm woe na abò mbëṅ na abaala ntud ngòn mininga nala, abò mbëṅ. ³⁸ Antoa hm na, e mod alug ntud ngòn mininga abò mbëṅ, e nyò alug ki nyè abulu bò mbëṅ. ³⁹ Mininga anë nlugan ntye nnom atala. Ngë nnom awu, anë fili na alug e mod adiṅ, dzam da, a dzoe Nti! ⁴⁰ Dzam da anë mvòm abui ngë akanga nala, nala ngò mayen. Matsog hm të fë na mëbëlë Nsisim Zamba.

¹ Mfag e tsit bëhë tsig bëzëzë bëzamba: Biayëm na bia bësë bibëlë ṅyëman; ṅyëman wadug bia, ediṅ ndzò yawone bia bia. ² Ngë mod ziṅ atsog na ayëm dzom ziṅ, nala watyan na abë ki yëm akyaè ayean yëm. ³ Ngë mod ziṅ adiṅ Zamba, Zamba ayëm mod te. ⁴ Adzo yë na mod adi e tsit bëtsig bëzamba, biayëm na bëzamba basëki a si-ndon, ai na Zamba anë hë mbòg mbòg. ⁵ Afyaṅan bò na baloe bëzamba tò a yob tò a si, mbol bëzamba bënë abui, bëti fë abui, ⁶ asu daan, Zamba anë hë mbòg, esya ya dzom esë yatye abë nye, bia bitoa fë asu die, Nti Yesus Kristus anë mbòg. Byem bisë binë a dzoe die, bia fë hë a dzoe die. ⁷ Ndò mod osë abëlë ki ṅyëman hi. Bëvòg bala, bëngamana yëman ai bëzamba, bëngadi hë anë batuni bëzamba bëte, ndò mbol sosoo waban anë ntëgan, bëngazu ai bò eboe. ⁸ Së ki bidi mbiè biakë ai bia abë Zamba; tò ki na: bibò të di, biayi dzèè, ngë bihë di, biayi bi mfi. ⁹ Boan hm okala na të ngul dzaan yabò ekòli-obag asu e ba bëngënë ntëgan. ¹⁰ Amu, ngë bëhë yen e wa obëlë ṅyëman odzaag a nda bëzëzë bëzamba, nga sosoo e mod anë ntëgan ayi nyè vë ngul a nyòl na adi tsit bëzëzë bëzamba? ¹¹ Amu otala hm na ndëtëg mod ayi dzèèban asu ṅyëman woe; anë hm e manyòṅ ya Kristus angawu asu die! ¹² Eyòṅ hm miasëm a babënyòṅ nala, mituligi sosoo waban ya angënë ntëgan, kë miasëm abë Kristus a! ¹³ Asu te hm, ngë bidi biasogolo madzaṅ a nsëm, mayi ki bad di tsit tò eyòṅ, asu yë na mëza sogolo madzaṅ a nsëm.

¹ Nga mënë fili? Nga mënë man apostel? Nga mëngayen Yesus, Nti waan? Nga minë wò-esye wama abë Nti? ² Tò masëki man apostel asu e bod bëvòg, mënë man apostel asu daan. Amu minë tiga esye apostel dzama abë Nti. ³ Nkaman makaman ai mamen abë e bod batsag hm ma hi: ⁴ Nga bibëlë ngul ya adi ai anyu? ⁵ Nga bibëlë ngul ya anòṅ mininga kristen a esamba dzaan anë apostel bëvòg ai babënyaṅ bë Nti ai Kefas babò? ⁶ Yë hë ma etam ai Barnabas bibëlë ki ngul na të biasye asu enyiṅ dzaan? ⁷ Za angatam ya bò esye man bëzimbi ai mòni woe? Za angawòdan ya afub wayn, abò të di bibuma ya ete? Za ki anganòni ya nkunda biyëm, abò të di e bidi biasò ete? ⁸ Yë makòbò e mam ma a nkoṅ mod? Nga mvende yakòbò mam mëte? ⁹ Amu anë ntilan a mvende Moses na: Të waandëgëlë e nyag yabò esye ntòsan bibuma. Yë Zamba adaṅ yag ai nyag nga? ¹⁰ Së asu daan ndò akòbò a? Amu asu daan ndò bëngatil na e mod abè ayean bè ai afidi a nnëm, e nyò atòs bibuma, abëlë afidi na ayi bi ngab ete. ¹¹ Ngë bingamias mam më Nsisim abë mina, yë eyëṅ dzam anë ete na bifumi mam më nyòl abë mina? ¹² Ngë bod bëfë bëbëlë ngul ya akaban byem bian, ngamëna ai bia! Dzam da, biandzëki bëlan ai ngul te, ndò bingadzibi mësë asu yë na të biatëgëlan mbëmbë foe Kristus. ¹³ Nga miayëm na e bod basye a tempel badian ai tempel, e ba bëtoa babi ai alatar bëbëlë ngab a alatar te? ¹⁴ Nala ngò hm fë Nti angabende na e bod bayedan mbëmbë foe bëdian ai mbëmbë foe. ¹⁵ Mfag wama, mandzëki bëlan ai e mam mësë mala. Mandzëki til e mam ma asu yë na mam mëte mëyënan ai ma. Mazombo wu alodo na enguṅ dzama ebò zezë. ¹⁶ Amu ngë mayedan mbëmbë foe, enguṅ esëki ma ete, amu anë ma enòdi. Amala ai ma, ngë mayedan ki mbëmbë foe. ¹⁷ Amu, ngë mëbò esye te a ṅyian wama, mëmbëlë ya maan. Ngë mabò hm dzò a enòdi, bëngavë ma esye te na mëbò. ¹⁸ Maan mama mënë hm dze? Mënë na eyòṅ makad mbëmbë foe, mëkad mbëmbë foe te, tègè sili maan, asu yë na të mabëlan ai ngul dzama a mbëmbë foe. ¹⁹ Amu mënë fili ai bod bësë, ndò mamen masye bod bësë asu yë na mëdudu abui bod. ²⁰ Mënganyiṅ ai Yuden anë man Yuden, asu yë na mëdudu Yuden. Mënyiṅi ai e ba ya edzoe mvende anë ma mënë fë a edzoe mvende, tò anë mamen mëngabë ki a edzoe mvende, asu yë na mëdudu e ba ya edzoe mvende. ²¹ E ba ya babëlë ki mvende, mënyiṅi ai bò anë mabelë ki mvende, ma mëbëlë të mvende Zamba, mbol mënë a mvende Kristus, asu yë na mëdudu e ba babëlë ki mvende. ²² Mëngabò ntëgan ai e ba bënë ntëgan, asu yë na mëdudu e ba bënë ntëgan. Mëngavëṅan dzom esë asu bod bësë, asu yë na mëkode bod bëziṅ, tò dze ebò. ²³ Mabò mam mësë asu mbëmbë foe, asu yë na ma fë mënòṅ ngab ete. ²⁴ Nga miayëm na a bambara mimbil a nsëṅ bivoe, bò bësë bambara mbil, hë mod mbòg mbòg ṅnyè akëlë bëlë kòb duma ete? Nala ngò hm mina fë mimbarëga mbil, asu yë na mibëlë maan. ²⁵ E mod akë mbil nala, abaala abui biki na atom nyòl; bò babò nala asu maan më ndon, bia ki asu maan më kole. ²⁶ Etoa dzi hm, makë ki mbil a zëzë, ndò fë malum ki bikuda biama a afan. ²⁷ Dzam da, matug nyòl dzam mfaṅ, mëtibili dzò, na mëza bò na, mëmana yëdan e bod bëvòg mbëmbë foe, mamen mëngaku a nkat.

¹ A babëdzaṅ, mayi ki na miyëgan na, bëtara baan bësë bëngabë a nkut a si, ai na bëngadaṅ maṅ, ² ndò fë bësë bëngaduuban a mò më Moses a nkut ai a maṅ, ³ ndò fë bò bësë bëngadi bidi bi Nsisim bite, ⁴ ndò fë bò bësë bënganyu mënyu më Nsisim mëte. Amu bënganyu mëndim ya akòg atoṅo bò, akòg te angabë Kristus. ⁵ Dzam da, Zamba andzëki daṅ a diṅ a bui ya abë bò, amu bëngamana dzëban a nkod-nnam. ⁶ E mam ma mënë bia mvulna, asu yë na të biayi bëbe bë mam, anë bò bëngayi mò a minnëm. ⁷ Të hm mialugu bëzëzë bëzamba anë bëvòg ya ete, akyaè anë ntilan na: Bod bëngatòbò a si, bëngadi, bënyaa fë, ndò fë bëngatëbë a si, bëntoa hë bivoe. ⁸ Të biabò bisog, amu bëvòg ya abë bò bëngabò bisog, ndò bëngawu a amos mbòg mbòg bod bakuda mëwom mëbè ai bëlè. ⁹ Të biabobolo Kristus, akyaè ya bëvòg ya ete bëngabobolo, ndò nyò engamana bò woe. ¹⁰ Të miabò mimfèt, akyaè ya bëvòg ya ete bëngabò mimfèt ndò mod endaman angamana bò. ¹¹ E mam ma mëngayenan ai bò anë mvulna, bëngatil mò na babeme bia, mbol mëmana më si mayi bia kòb. ¹² Ndò hm, e mod atsog na atëlë, abòòg okala na abë ku. ¹³ E mëbobëla mëngabi mina mënë hë e ma më bod. Zamba anë mod afidi, ndò ayi ki dzoge na bëbobolo mina alodo ngul dzaan, dzam da ayi bò na, a mëbobëla, mibëlë e zen miatub mò. ¹⁴ A mindindiṅ miama, asu te hm, tuban olugu bëzëzë bëzamba. ¹⁵ Makòbò ai e bod batsog. Mina bëben, tsasan e dzam madzo. ¹⁶ E kòb maa biafubu, nga enë e ngab bianòṅ a mëki më Kristus? Mbaṅëla biabëg asë e ngab bianòṅ a nyòl Kristus a? ¹⁷ Abui bod binë di, binë nyòl dzia, amu mbaṅëla anë mbòg, amu bia bësë bianòṅ ngab a mbaṅëla mbòg. ¹⁸ Fòmbëgan Israel ya nyòl. Nga e bod badi mëtunëṅa banòṅ ngab a alatar? ¹⁹ Mayi na madzo ya? Yë na e bidi biatuni bëzëzë bëzamba binë dze, bëzëzë bëzamba bëtoa ki dze ben? ²⁰ Ma na, e byem batuni, batuni ki biè Zamba, batuni biè bësatan. Ndò hm mayi ki na mikalan dzom ziṅ ai bësatan. ²¹ Miasëki dzam bò na minyaa kòb Nti, minyaa fë kòb bësatan; miasëki dzam nòṅ ngab a tëbëlë Nti ai a tëbëlë bësatan. ²² Yë bitsaa Nti nga? Yë bialod nyè a ngul nga? ²³ Binë dzam bò mam mësë, dzam da mësë masëki ai mfi. Binë dzam bò mësë, dzam da, së ki mësë mmò mawone bia a mbëmbë enyiṅ. ²⁴ Të mod adzëṅ mfi woe, adzëṅë hë mfi e mod mbòg. ²⁵ Dzaag e tsit esë miakus a makit, tègè hm sili minsili asu sosoo nnëm. ²⁶ Amu si ai e byem bisë ya ete biawoge ai Nti. ²⁷ Ngë man haiden ziṅ abanda mina, ndò mibëlë ngoṅ na miakë we, dzaan e dzi esë bavë mina, tègè sili minsili, etòm sosoo nnëm. ²⁸ Ngë mod ahë dzo ai mina na: e tsit nyi enë tsit mëtunëṅa, të miadi, asu e mod ahë kad mina ai asu sosoo nnëm. ²⁹ Makòbò ki adzo sosoo nnëm waan mina bëben, dzam da asu e nyò e mod mbòg. Asu dze hm sosoo mod mfë azu tsig ntol ya fili dzama? ³⁰ Ngë manòṅ ngab a maa, eyë badzo ma ya asu e dzam makaṅ Zamba ete? ³¹ Tò hm miadi, tò mianyu, tò miabò za dzomo, boan mësë asu duma Zamba. ³² Të miabò mod ziṅ nnëm mintye, tò Yuden, tò Grek, tò nda-Zamba, ³³ akyaè ya mamen madzëṅ na mënyëb bod bësë a nnëm a mam mësë, ma tègè dzëṅ e dzi enë ai ma mfi, mëdzëṅë hë mfi abui bod, asu yë na bëkodeban.

¹ Toṅan mvulna dzama anë mabie e nyi Kristus. ² Mataman mina mbol ya miatsog ma a mam mësë ndò fë miabaala e mëtum ya mëngakalan mina. ³ Mayi na miyëm na Kristus anë nlo fam esë, fam etoa nlo mininga, Zamba atoa nlo Kristus. ⁴ E fam esë yakogëlan ngë ki na yakòbò nkòbò profèt, ebëgë dzom a nlo (anë ntom), yabyandi nlo woe. ⁵ E mininga osë akogëlan ngë ki na abò esye profèt ai nsò nlo, abyandi nlo woe. Anë fò fë dzam dëda anë e mininga bësode ntui. ⁶ Amu ngë mininga abòd ki ntom, atsigi esil! Ngë anë hm osòn asu mininga na atsig esil, ngë ki na asode nlo, abòdò ntom! ⁷ Amu fam yayean ki bòd ntom a nlo, mbol anë evëgëlë ai duma Zamba. Mininga nyè anë hm duma fam. ⁸ Amu fam yatye ki abë mininga, mininga ṅnyè atye abë fam. ⁹ Ndò fë fam yandzëki komban asu mininga, mininga ṅnyè angakomban hm asu fam. ¹⁰ Asu te mininga ayean bi dzin a nlo woe asu benglès. ¹¹ Tò hm nala, abë Nti, mininga asëki dzam nyiṅ tègè ai fam, fam tègè dzam nyiṅ tègè ai mininga. ¹² Amu akyaè ya mininga atye abë fam, nala ngò fë fam yabyali abë mininga. Byem bisë biatye abë Zamba. ¹³ Mina bëben yenan adzo di: Yë anë mbëṅ na mininga akogëlan ai Zamba nsò nlo nga? ¹⁴ Nga nkoman ben bod bëne wayëgëlë mina na anë fam adzo osòn na adili esil, ¹⁵ eyòṅ ki mininga adili dzò, nala otoa nyè adzo duma? Amu esil enë nyè anë e dzom abudi nyòl ete. ¹⁶ Ngë mod ziṅ atsog na anë dzam laṅëdan adzo di, ma makad mina na tò bia, tò mënda më Zamba mabëlë ki fulu te. ¹⁷ E di mazu hm mina lëb di, mataman ki mina asu miakoan ki asu mbëṅ, miakoan asu abe. ¹⁸ Amu, e di osu, eyòṅ miakoan a nda-Zamba, mawog na minë ngam ngam. Ndò mayëbë të adzo te nala. ¹⁹ Amu mimfèt miayean bò a zaṅ dzaan, asu yë na e bod bëbëlë mfaṅ ṅyëbë a zaṅ dzaan bëkui a ngëëṅ. ²⁰ Eyòṅ miakoan hom mbòg, adzo ndian bidi bi Nti asëki ete. ²¹ Amu a miadi ha, hë mod osë atari fò mana di bidi bie, antoa hm na, e mod nyò awogo zie, e nyò mbòg asògò mëyòg. ²² Nga mibëlë mënda asu yë na midi, minyu fë we? Yë na miabyandi nda-Zamba, ndò miasama mimbubua? Mëkad mina ya? Yë mëtaman mina? Mataman ki mina e dili! ²³ Amu mamen mëngayègè e mam mëngakalan mina abë Nti na: Nti Yesus, alu ya bëngakuan ai nyè, ndò anganòṅ mbaṅëla, ²⁴ avëë ngaṅ, abëgë, nyè na: Nyòl dzama nyi a yabudan ai mina. Boan dò na mitsog ma. ²⁵ Dzam dëda, a mvus bidi, ndò anòṅ kòb, nyè na: E kòb nyi enë mkpamaṅ elad a mëki mama. Eyòṅ esë miayi dzò nyu, boan dò na mitsog ma. ²⁶ Amu eyòṅ esë miadi mbaṅëla nyò, minyaa fë kòb, miayedan awu Nti akëlë kui anë azu. ²⁷ Antoa hm na, e mod osë adi mbaṅëla, anyuu fë kòb Nti akyaè layean ki, ayi bëlë nkat a nyòl ai mëki më Nti. ²⁸ Mod atarigi hm bindi emen, azu hm di mbaṅëla, anyu fë kòb. ²⁹ Amu e mod adi, anyaag fë, adi, anyaag fë ntol woe ngë ayen ki na nyòl esëki zëzë mbaṅëla. ³⁰ Asu te abui ya abë mina bakòn, bëtoa mintèt, bëwaag. ³¹ Ngë biatoan bindi bia bëben, bayi ki bia tsig mbë ntol. ³² Eyòṅ Nti avë bia endëgëlë, ayëgëlë bia akomodo, asu yë na biza ku a nkat ai si-ndon. ³³ A babëdzaṅ, eyòṅ hm miakoan na miadi, yangan e bod bëvòg. ³⁴ Ngë mod awog zie, adzaag a nda, asu yë na miza koan asu nkat. Asu e mam mëvòg, mayi mina sòṅ lëb eyòṅ mayi sò.

¹ A babëdzaṅ, mayi ki na mitòbò a ndimi asu dzam bifaè bi Mfufub Nsisim. ² Miayëm na, hala mingënë bëhaiden, mingabë fò hë atoṅ mimvumvug bëzëzë bëzamba. ³ Ndò hm makad mina na, mod ziṅ asë dzam bò na, akòbò ai ngul Nsisim Zamba nyè na: Amala ai Yesus! Ndò fë mod ziṅ asëki dzam dzo na: Yesus anë Nti, ngë tègè ai ngul Mfufub Nsisim. ⁴ Bifaè bi akab binë mëkyaè mëkyaè, Nsisim hë mbòg mbòg. ⁵ Bisye binë fë kan kan, hë Nti mbòg mbòg. ⁶ Minsol bisye minë mëkyaè mëkyaè, hë Zamba mbòg, ṅnyè abò mam mësë a bod bësë. ⁷ Nsisim wavë mod osë na ayen e dzom enë ai mfi. ⁸ Amu, e mod nyòlò, Nsisim ovë nyè nkòbò fëg, e nyò mbòg, hë Nsisim te ovëë nkòbò ṅyëman; ⁹ mod, hë ai ngul Nsisim te, abi ṅyëbë, mod mfë fë nyòlò, abii efaè abò bod mvoè hë a Nsisim mbòg mbòg te, ¹⁰ mod mfë ayi bi ngul ya abò mësimba, e nyò mbòg abii nkòbò bëprofèt, mfë nyòlò na afas minsisim, e nyòlò na akòbò minkòbò kan kan, e nyò mbòg na atimi minkòbò. ¹¹ E mam mësë ma, hë Nsisim mbòg mbòg ngò wabò mò, ngò fë wakab, ovaa anë mod e kan wadiṅ. ¹² Akyaè ya nyòl enë dzidzia, ebëlë abui bidzo, bidzo bisë ya nyòl bitoa abui, nyòl etoa dzidzia, nala ngò fë Kristus anë. ¹³ Amu bia bësë bingaduuban abë Nsisim mbòg na binë nyòl dzia, tò Yuden, tò Grek, tò bëlò, tò fili bod, ndò fë bia bisë binganyu Nsisim mbòg. ¹⁴ Ndò hm nyòl esëki edzo dzia, enë abui bidzo. ¹⁵ Ngë akol ladzo ana na: Mbol masëki wò, mawoge ki ai nyòl, yë asu te ayi bò të woge ai nyòl? ¹⁶ Ngë alò ladzo na, mbol masëki dis, mawoge ki ai nyòl, yë asu te layi bò të woge ai nyòl nga? ¹⁷ Ngë nguma nyòl osë otoa dis, bëngawog ai dze? Ngë otoa hë ṅwogan, bënganyumulu ai dze? ¹⁸ Ndò hm, Zamba angakom bidzo, edzo esë ya ete a nyòl anë angadiṅ. ¹⁹ Ngë bisë bitoa edzo dzia, nyòl entoa ve? ²⁰ Bidzo binë abui, nyòl etoa dzia. ²¹ Dis lasëki dzam dzo ai wò na: Mayaṅan ki ai wa, ngë ki na nlo ongadzo ai mëkol na: mayaṅan ki ai mina. ²² Antoa antoa na, e bidzo biayene ntëgan abui mbiè biadaṅ mfi, ²³ ndò fë e bi biatsog na binë bidzo bi osòn a nyòl mod, mbiè biadaṅ vë olugu, e bi ya biasëki ai dzin, mbiè biadaṅ mvaman ai biè, ²⁴ e bi binë dzin biayaṅan ki ai mvam dzaan. Ndò hm Zamba angakom nyòl e kan yë na avëë e bi biadzëman ai olugu mod olugu nen, ²⁵ asu yë na të ngam ngam yabò a nyòl, hë da na bidzo bimvaman biè biè a zaṅ dzaban. ²⁶ Ndò hm ngë edzo dzia ebëlë mintye, bidzo bisë bivòg biawog mintye. Ngë edzo dzia ebëlë olugu, bidzo bisë biawog ai dzò mintag. ²⁷ Mina minë nyòl Kristus, mina fë, anë mod, minë bidzo. ²⁸ Ndò hm Zamba angatele bod bëvòg a nda-Zamba, atari na apostel, akalan na bëprofèt, e di lala bëyëgëlë, a mvus hala mësimba, a mvus hala bifaè bi akab ya alëdë akòn, avòli bod, alëb bod, akòbò abui minkòbò. ²⁹ Yë bod bësë bënë apostel? Yë bësë bënë bëprofèt? Yë bësë bënë bëyëgëlë? Yë bësë babò mësimba? ³⁰ Yë bësë bëbëlë bifaè ya alëdë minkokòn? Yë bësë bakòbò minkòbò abui? Yë bësë batimi minkòbò mite? ³¹ Dzëṅan hm e bifaè ya bialod e bi. Ndò hm mazu mina lëdë e zen yadaṅ nyëb.

¹ Ngë makòbò minkòbò mi bod ana ai e mi benglès, ma tègè ai ediṅ, kë mëntoa ya e ngòm etubi, mëbò hë eduṅ anë etug angonga. ² Ngë mëbëlë ngul ya abò profèt, mëyëmë mam më ndimba mësë, ai ṅyëman osë, ngë mëbëlë ṅyëbë osë na mabodo minkol a si, ma ha tègè ai ediṅ, masëki dzom ziṅ. ³ Tò mëmana kab akuma dama asë, mëvëë fë nyòl dzama na bedigi dzò a ndoan, ma ha tègè ai ediṅ, masëki ai mfi ziṅ. ⁴ Ediṅ enë fin, ediṅ enë afu-nnëm, esëki mëkomëṅa, esëki miṅyene, esëki enguṅ, ⁵ yabò ki nkòt, yadzëṅ ki mfi woe, yasëki nnëm mëliṅëna, yanyie ki dzam a nnëm, ⁶ yatag ki ai nkòt, yatag ai bëbëla. ⁷ Yadzibi mësë, yayëbë mësë, yafidi mësë, yazombo mësë. ⁸ Ediṅ enë mvende të dzëman. Mfa esye profèt, yayi sole! Minkòbò ki, miayi man! Ṅyëman fë wayi sole! ⁹ Biayëm hë abim ziṅ, ndò fë biakòbò anë bëprofèt hë etun. ¹⁰ Eyòṅ e dzi enë ntud a saaṅ yayi sò, e mam bitun bitun mala mayi mana. ¹¹ Eyòṅ mëngabë mòngò, mëkobògò anë mòngò, mëtsogo anë mòngò, mëbindigi anë mòngò. Eyòṅ mëngakui mod, ndò mëngadzoge mam më mòngò mëte. ¹² Etoa dzi, mayëm hë etun; a mvus mayi toan yëm akyaè ya Zamba ayëm ma. ¹³ Etoa dzi hm byem bialigi na ṅyëbë, afidi, ediṅ, mbiè bilè bili. Ediṅ ndzò hm yalod bisë.

¹ Byean ediṅ a zut, dzëṅan fë bifaè bi akab ya Nsisim, adaṅ adaṅ a na mikòbò anë bëprofèt. ² Amu e mod akòbò nkòbò te akòbò ki ai bod, akòbò ai Zamba. Amu tò mod ziṅ awog ki nyè, akòbò të hë mam më ndimba a Nsisim. ³ E mod akòbò anë profèt, akòbò ai bod asu yë na awone bò, afolo bò, avaa fë bò ngul a nyòl. ⁴ E mod akòbò minkòbò awone emen. E nyò akòbò anë profèt awone nda-Zamba. ⁵ Mayi na mina bësë mikòbò minkòbò, dzam da na midaṅa kòbò anë bëprofèt. Nkòbò bëprofèt walod nkòbò mod wakòbò minkòbò ngë asëki na mod atimi minkòbò mite asu yë na nda-Zamba ebi awone. ⁶ Ndò hm etoa dzi, a babëdzaṅ, ngë mazu abë mina mëkòbògò minkòbò, mëbòò ai mina mfi dze, ngë mandzëki kòbò ai mina na makuli mam, ngë a ṅyëman, ngë a nkòbò profèt, ngë a ayëgëlë? ⁷ Nga tò e byem bi obobomo binë tègè ai enyiṅ, tò ololòṅ, tò mvèt, ngë batoan ki bom na bëyëmë kiṅ, eyë bayi yëm e dzia babom ya? ⁸ Dzam dëda, ngë balòṅ tòṅ ana tègè yëm kiṅ te, za ayi komëzan bita? ⁹ Dzam dëda fë asu daan a adzo minkòbò, ngë miakòbò ki a saaṅ, eyë bayi yëm e dzam miadzo ya? Miayi kòbò a evundu. ¹⁰ Minkòbò minë hm fò a si-ndon sug ya abui, ndò bawog misë. ¹¹ Ngë mayëm ki mbol e dzam badzo latyan, mënë man bëlòbò-lòbò asu e mod akòbò, nyè fë man bëlòbò-lòbò asu dama. ¹² Dzam dëda hm asu daan, ngë miayag ai bifaè bi Nsisim, dzëṅan biè abui asu yë na nda-Zamba ewonëban. ¹³ Asu te, e mod akòbò minkòbò, akogëlan fë na atimi miè. ¹⁴ Ngë makogëlan a minkòbò, nsisim wama wakogëlan, nsisim wama tègè ai mfi ya ete. ¹⁵ Antoa hm ya? Mayi kogëlan a nsisim, ndò fë mayi kogëlan a nnëm. Mayi yia bia bi olugu a nsisim, mëyiaga fë a nnëm. ¹⁶ Ngë walugu Zamba a nsisim, eyë e mod asò a nsëṅ ayi yalan «Amen» ya a wakaṅ Zamba? Amu ayëm ki e dzom wadzo! ¹⁷ Amu, mfa woe, wa wavë ngaṅ mbëṅ, dzam da e mod mbòg ayen ki mfi ya ete. ¹⁸ Mavë Zamba ngaṅ; makòbò minkòbò abui alodo mina bësë. ¹⁹ Mayi na a ekoan biakoan, mëkòbò bibug bitan ai nnëm, asu yë na mayëgëlë e bod bëvòg, alodo anë ntèd bibug a minkòbò. ²⁰ A babëdzaṅ, të miabò bòngò a fëg, boan bòngò a abe, boan mintud a fëg. ²¹ Anë ntilan a mvende na: Mayi kòbò ai e bod ba a minkòbò mifë ai a minkòbò bëlòbò-lòbò, ndò tò nala, bayi ki ma bò mëwog. ²² Asu te, së ki asu bëyëbë ngò minkòbò minë ndëm, minë asu bëhaiden, nkòbò bëprofèt osëki asu bëhaiden, onë asu bëyëbë. ²³ Ngë nda-Zamba esë ekoan hom mbòg, bod bësë bëngakòbò minkòbò, e bod bayëm ki dò, ngë ki na bëhaiden bësò nyian, nga bayi dzo na miasòg? ²⁴ Ngë bësë bakòbò anë bëprofèt, man haiden ngë e mod ayègè sòṅ an yian, bod bësë bayi nyè kpè a adzo, antoa a mëku. ²⁵ E ma mesë mësòlò nyè a nnëm mayi kui a ngëëṅ, abog te ayi laban ai asu a si, angakogëlan ai Zamba, nyè na: Zamba anë abë mina bëbëla. ²⁶ Antoa hm ya a babëdzaṅ? Eyòṅ miakoan, mod osë abëlëgë dzia olugu, abëlëgë ayëgëlë, ngë ekuli-mam, ngë nkòbò, ngë mbol atimi nkòbò te. Mam mësë mëbò asu awone. ²⁷ Ngë mod akòbò minkòbò, hë bëbè, ngë bëdaṅ bëlè, anë mod eyòṅ dzie, mod mbòg atimiṅi fë. ²⁸ Ngë e mod atimi asëki, atòbò evol a ekoan, akòbò asu die emen, ai asu Zamba. ²⁹ Bëprofèt bëkòbògò bëbè ngë bëlè, e bod bëvòg bëngafyal. ³⁰ Ngë bakuli mod mfë mam, e mod osu akuu evol. ³¹ Amu mina bësë minë dzam kòbò anë profèt, mod mbombòg, asu yë na bod bësë bëyègè, bëbi fë awone ete. ³² Minsisim bëprofèt miwogo edzoe bëprofèt, ³³ amu Zamba asëki Zamba ndugëlan, anë Zamba mvoè. Akyaè anë a mënda më Zamba mimfufub misë, ³⁴ bininga bëtòbògò bivol a bikoan. Amu babëlë ki ngul ya akòbò, hë na bëbò mëwog, akyaè mvende yadzo. ³⁵ Ngë bayi na bayègè dzom ziṅ bësiligi bëyom baban a mënda maban. Amu anë adzo osòn na mininga akòbò a nda-Zamba. ³⁶ Yë mina mingakad ebug Zamba, yë engasò ki abë mina etam? ³⁷ Ngë mod atsog na anë profet, ngë ki na abëlë bifaè bi Nsisim, alaṅa e mam matil mina, amu mënë mvende Nti. ³⁸ Ngë ayëbë ki mò, Zamba ayëm ki nyè. ³⁹ A babëdzaṅ, antoa hm na, dzëṅan ai ngul na mikòbò anë bëprofet, ndò fë të miakaman ai na bod bëkòbò minkòbò. ⁴⁰ Dzam asë abòban mbëṅ mbëṅ, mbol wayean.

¹ A babëdzaṅ, madugan mina tsog mbëmbë foe mëngayedan mina, a minganòṅ, a mitëlë ete, ² ṅnyè akode mina ngë mitoan nyie e bibug mëngayedan mina nyè ete, ngë anë na miandzëki ṅyëbë ṅyëbë Angòg. ³ Mëngavë mina, e di osu, hë e dzi fë bëngavë ma na Kristus angawu asu minsëm mian anë ntilan wadzo, ⁴ ndò angadzëban, akui a sòṅ a mos lala, anë ntilan wadzo ⁵ ai na Kefas angayen nyè, bë awom ai bëbè fë. ⁶ Ndò fë angadugan yene babëdzaṅ mintèd mitan eyòṅ dzia, abui ya ete bëngënë tala ana, bëvòg bëngawu ya. ⁷ Ndò fë angayene Yakob, ayene fë apostel bësë. ⁸ A mvus bësë, ayene fë ma ya mënë anë enyungi dzom. ⁹ Amu ma mënë mëligi-mvua ya apostel, a makyëbë ki na bëloe ma na man apostel, mbol mëngaluman ai nda-Zamba. ¹⁰ Mënë e dzom mënë ai maa Zamba ndò e maa woe angavë ma andzëki kanga evoe, hë da, mëngawu esye alodo bò bësë, së hm ki ma, e maa Zamba anë ai ma. ¹¹ Ndò hm, tò ma, tò bò, e kan bingayedan mbëmbë foe, nala ngò fë mingayëbë. ¹² Ngë biabende na Kristus angakui a sòṅ bëwu, eyë bod bëvòg ya abë mina badzo ya na akui-lë sòṅ bëwu lasëki? ¹³ Ngë akui-lë sòṅ bëwu lasëki, Kristus nyè fë andzëki kui a sòṅ. ¹⁴ Ngë Kristus andzëki hm kui a sòṅ, mbendan biabende foe onë evoe, ṅyëbë waan fë hë evoe. ¹⁵ Bayi hm fë yen na binë bëprofèt minnal bë Zamba, amu biabòòlò na Zamba angakuli Kristus a sòṅ ndë nyè andzëki nyè kuli, ngë anë na bëwu bakui ki a sòṅ. ¹⁶ Ngë bëwu bakui ki a sòṅ, tò Kristus nyè andzëki kui a sòṅ. ¹⁷ Ngë Kristus andzëki kui a sòṅ, ṅyëbë waan onë zëzë, ndò mingëlë minada a minsëm mian, ¹⁸ nala ontoa na e bod bëngawu abë Kristus bënë ndzaṅan. ¹⁹ Ngë bingafidi Kristus hë enyiṅ dzi, bia fò biadaṅ engòngòl a bod bësë. ²⁰ Ndò hm anë na, Kristus angakui a sòṅ bëwu, ntol bëwu bësë. ²¹ Amu awu lëngasò etòm mod mbòg, ndò fë akui-lë sòṅ lazu hë etòm mod mbòg. ²² Akyaè ya bod bësë bawu abë Adam, nala ngò fë bod bësë babi enyiṅ abë Kristus. ²³ Mod osë hm a etye dzie: Kristus anë ntol, a mvus hala, e bod bayi tòbò ai Kristus eyòṅ adugan sò, ²⁴ a mvus hala, mëmana, eyòṅ ayi vë esya edzoe Zamba, eyòṅ ayi tëgë edzoe esë, ai ngul esë; ²⁵ Amu ayean dzoe akëlë kui anë asili minziziṅ mie a mëkol a si. ²⁶ Nziziṅ mvua ayi tëgë onë awu. ²⁷ Amu angatele nyè byem bisë a mëkol a si. Eyòṅ ayi dzo na, mëtègè ya byem bisë, nala watyan na, sësala hë e nyò angavë nyè edzoe. ²⁸ Eyòṅ hm byem bisë biayi nyè tègè osu, mòn emen ayi tòbò a edzoe e mod angamana nyè tëgë byem bisë, asu yë na Zamba abò byem bisë a bod bëse. ²⁹ Amu yë na, e bod baduuban asu bëwu bayi hm bò ya? Ngë anë hm fò na bëwu bakui ki a sòṅ, asu dze bod baduuban asu daban? ³⁰ A dze bingënë waa ndzug? ³¹ Mandëṅ ai awu amos osë; sòṅ hë enguṅ dzaan, e dzi ya mëbëlë abë Kristus Nti waan. ³² Hë a etye mod, mfi dze ongabë ma na mëluman ai tsit a Efesi? Ngë bëwu bakui ki a sòṅ, ndzaan, binyaag, amu biayi wu okidi. ³³ Të miakë a ndimi. Mbë eyòṅ andaman mbëmbë fulu. ³⁴ Zaan a tëtëlë zen, të miabada sëm. Amu bod bëvòg bayëm ki Zamba; makòbò na mëkub mina osòn a nlo. ³⁵ Mod ziṅ nyòlò ayi dzo na: Eyë bëwu bakui a sòṅ ya? Bazu ai kan nyòl fe? ³⁶ A akud dzom, e mvòṅ wamias a si, yabëlë ki enyiṅ, së na etari wu. ³⁷ Ndò e mvòṅ wamias, së ki e nyòl wayi fumi ndzò wamias, wamias nsò fes, ngë oles, ngë fes fë ki. ³⁸ Zamba avë nyè e nyòl adiṅ, ndò mvòṅ esë ebëlë nyòl dzie. ³⁹ Ndò nyòl esë esëki dzam da, hë da, mod abëlë endzie, nyòl tsit etoa etam, nyòl anòn etam, nyòl kòs etam. ⁴⁰ Nyòl ya yob enë, nyòl ya si etoa fë. Ndò duma nyòl ya yob anë etam, duma nyòl ya si etam. ⁴¹ Duma nlo-dzobo anë etam, duma ngòn atoa etam, duma atitie fë etam. Amu atitie lasëlan a duma. ⁴² Nala ngò fë akui-lë sòṅ bëwu anë. Babè a si, eboege, engakui a sòṅ tègè ai eboe. ⁴³ Eyòṅ yadzëban, adzo osòn, engakui a sòṅ ai duma. Yadzëban obobòd, engakui a sòṅ a ngul ete. ⁴⁴ Badzëb nyòl minson, nyòl nsisim engakui a sòṅ. Ngë nyòl minson enë, nyòl nsisim dzò enë fë. ⁴⁵ Akyaè ya anë ntilan na: Adam, e mod osu, ambëlë enyiṅ, e Adam mvua nyè abò ya hm nsisim wavë enyiṅ. ⁴⁶ Dzam da, së ki nyòl nsisim ndzò etëlë osu, nyòl minson fò ndzò etëlë osu, a mvus hala, nyòl nsisim. ⁴⁷ E mod osu atye a mbòdòg ya si, e mod bèè asò a yob. ⁴⁸ E kan mod mbòdòg anë, nala ngò fë bod bë mbòdòg bënë. E kan e mod ya yob anë, nala ngò fë bod ya yob bënë. ⁴⁹ E kan ya bingabëgë evëgëlë mbòdòg, nala ngò fë biayi bëge evëgëlë ya yob. ⁵⁰ A babëdzaṅ, madzo e dzam di na minson ai mëki biasëki dzam bi elig edzoe Zamba; e dzi yaboe esëki dzam bi elig e dzi enë të boe. ⁵¹ Yënan sik, ndimba ndzò makad mina nyi. Bia bësë biayi ki wu, dzam da bia bësë biayi tsende, ⁵² a ekabëla dis, etye etye, a e tòṅ mvua. Amu bayi lòṅ tòṅ, bëwu bëngakui a sòṅ tègè dzam dugan ndaman, bia bingatsende. ⁵³ Amu eboe dzi yayean bòd të-ai-eboe, nyòl awu ebòdò nyòl kole. ⁵⁴ Eyòṅ eboe dzi yayi bòd të ai eboe, e nyòl awu nyi ebòdò nyòl kole, abog te ebug engatilban yayi yenan na: Awu atëgëban ya, ⁵⁵ a awu, eyë wadò ve? A awu, eyë ngal bita dzoe enë ve? ⁵⁶ Ngal bita awu enë nsëm, ngul nsëm ndzò enë mvende; ⁵⁷ Ngaṅ ai Zamba mbol abò na bidò abë Nti waan Yesus Kristus. ⁵⁸ A mindindiṅ mi babedzaṅ, antoa hm na, boan nkanga, të tëg, mibulugu bò esye Nti kòm esë, miyëmë na ndzug waan osëki zëzë abë Nti.

¹ Ndò hm, asu ntogan mòni asu mimfufub: Akyaè ya mëngabende mënda më Zamba ya Galati, nala ngò fë mibòòg. ² Amos osu ya sabbat osë, mod osë ya abë mina anyiege man dzom a nda, abim asë abëlë ngul, asu yë na të etogan mòni yabò eyòṅ mayi sò. ³ Eyòṅ mayi sò, e bod miayi tòb, mayi bò lom ai kalara a mò na bëkë ai efaè dzaan a Yerusalem. ⁴ Ngë anë ai mfi na mëkë, bayi kë ai ma eyòṅ. ⁵ Mayi sò abë mina eyòṅ mayi lod a Masedonia. Amu mayi lod a Masedonia, ⁶ mënë dzam tòbò abë mina, eyòṅ ziṅ ben na mayi tòbò hala abog oyon asë, asu yë na miyaan ai ma e hom osë mënë tye na makë. ⁷ Amu mayi ki na mayen mina etoa dzi a ntulan, mbol mafidi na mayi tòbò abë mina man eban, ngë Nti ayëbë. ⁸ Mayi tòbò a Efesi akui a Pentekoste. ⁹ Amu mod mbè ayoo ma we, ayene mbëṅ oyab; abui minziziṅ minë we. ¹⁰ Ngë Timoteus asò, dzëṅan na të adugan kòn wòṅ. Amu nyè fë abò esye Nti anë ma. ¹¹ Të mod ziṅ afëm nyè. Miyaan ai nyè mvoè, asu yë na azu abë ma. Amu mayanga nyè ai babëdzaṅ. ¹² Mfag madzaṅ Apollos, mëkogëlan ya ai nyè abui na azu abë mina ai babëdzaṅ. Ndò hm ṅyian woe ohë bë ki na azu etoa dzi. Ayi sòṅ eyòṅ ayi bi afola. ¹³ Vëbëgan, boan nkanga a ṅyëbë, boan fam, toman nyòl. ¹⁴ E dzam asë miabò abòò hë ediṅ. ¹⁵ Makogëlan ai mina, a babëdzaṅ. Miayëm nda-bod Stefanas. Endzò enë ntol bëyëbë ya Akaia, ndò bënganyian a esye mimfufub. ¹⁶ Boan kan bod te mëwog, ai e mod osë asye ai bò, awaa fë ndzug. ¹⁷ Mawog mintag na Stefanas ai Fortunatus ai Akaikus bësò, amu bënë a mëyian ya mbol miadzëman ma a mis. ¹⁸ Bëngavòli ma nnëm, ai minnëm mian fë. Mikama akyaè bod te. ¹⁹ Mënda më Zamba ya Azia masug mina. Akila ai Priska, ai e nda-Zamba yakoan a nda dzaban bëmana mina sug abui abui. ²⁰ Babëdzaṅ bësë basug mina. Sugan mina mina, miwuban mimfufub mëwuban. ²¹ Mamen Paulus matil mësugan ai wò wama. ²² Ngë mod ziṅ adiṅ ki Nti, amala ai nyè. Maranatha (Zaag a Nti). ²³ Maa Nti Yesus abò ai mina. ²⁴ Ediṅ dzama ebòò ai mina bësë abë Kristus Yesus.