Psalmowo

Psalmowo

Agbalẽ gbãtɔ

Psalmowo 1–41

Psalmo 1

¹Woayra ame si

mezɔna ɖe ame vɔ̃ɖiwo ƒe aɖaŋuɖoɖo nu

alo nɔa tsitre ɖe nu vɔ̃ wɔlawo ƒe mɔ dzi loo

alo nɔa anyi ɖe fewuɖulawo dome o,

²ke boŋ ekpɔa dzidzɔ le Yehowa ƒe se la ŋu,

eye wòdea ŋugble le eŋu zã kple keli.

³Eya amea ɖi ati si wodo ɖe tɔʋuwo to,

esi tsea ku le etseɣi,

melũa xe o, eye

nu sia nu si wòwɔna la, edzea edzi nyuie.

⁴Mele alea na ame vɔ̃ɖi ya o!

Wole abe blitsro si ya ƒona dzonae la ene.

⁵Eya ta ame vɔ̃ɖi manɔ te le ʋɔnudrɔ̃gbe,

alo nu vɔ̃ wɔlawo nanɔ ame dzɔdzɔewo ƒe ha me o.

⁶Elabena Yehowa kpɔa ame dzɔdzɔewo ƒe mɔ ta,

ke ame vɔ̃ɖiwo ƒe mɔ atsrɔ̃ gbidii.

Psalmo 2

¹Nu ka ta dukɔwo le nugbe ɖom,

eye amewo le nu dzodzrowo ɖom?

²Anyigbadzifiawo ɖo afɔ anyi sesĩe,

eye dumegãwo ƒo ta kpli ɖe aɖaŋu me ɖe

Yehowa kple eƒe amesiamina la ŋu.

³Wole gbɔgblɔm be,

“Mina míado le Yehowa kple eƒe amesiamina la te,

eye míana ablɔɖe mía ɖokuiwo.”

⁴Ame si woɖo zi dzi le dziƒo la ko nu,

eye Yehowa ɖe alɔme le wo ŋu.

⁵Tete wòka mo na wo le eƒe dɔmedzoe me,

eye wòdo ŋɔdzi na wo le eƒe dziku helĩhelĩ me hegblɔ be,

⁶“Meɖo nye ŋutɔ nye fia ɖe Zion,

nye to kɔkɔe la dzi.”

⁷Maɖe gbeƒã Yehowa ƒe sedede la;

Yehowa gblɔ nam be,

“Wòe nye vinye ŋutsu,

egbea mezu fofowò.

⁸Biam, ne matsɔ dukɔwo awɔ wò domenyinui

kple anyigba ƒe seƒewo ke awɔ tɔwòe.

⁹Àtsɔ gafiatikplɔ aɖu wo dzii, eye àxlã wo ɖi,

woakaka abe ale si ze gbãnae ene.”

¹⁰Eya ta mi fiawo, midze nunya,

eye mi anyigbadzidumegãwo, miɖo to nuxlɔ̃ame.

¹¹Mitsɔ ɖokuibɔbɔ kple bubu subɔ Yehowa le dzidzɔ gã me

kple dzodzo nyanyanya.

¹²Mitsɔ ɖokuibɔbɔ do ɖe fia la ŋkume, ne menye nenema o la,

ado dziku, eye wòatsrɔ̃ mi kpata,

elabena eƒe dɔmedzoe ate ŋu afla ɣe sia ɣi.

Woayra ame siwo katã tsɔe wɔ sitsoƒee.

Psalmo 3

David ƒe ha, esi wòsi le via Absalom nu.

¹O, Yehowa, aleke nye futɔwo sɔ gbɔ ale!

Aleke ame geɖewo tso ɖe ŋunye ale!

²Ame geɖewo le gbɔgblɔm tso ŋutinye be,

“Mawu maɖee akpɔ o.” Sela

³O, Yehowa, ke wò la, ènye akpoxɔnu ƒo xlãm;

ètsɔ ŋutikɔkɔe kɔ ɖe dzinye, eye nèkɔ nye ta dzi.

⁴Yehowae medo ɣli na sesĩe,

eye wòtɔ nam tso eƒe to kɔkɔe la dzi. Sela

⁵Memlɔ anyi hedɔ alɔ̃;

meganyɔ, elabena Yehowae kpɔ tanye.

⁶Nyemavɔ̃ na ame akpe nane siwo ho,

ɖe to ɖem godoo la o.

⁷Tso, O, Yehowa! Ɖem, O, nye Mawu!

Ƒo tome na nye futɔwo katã;

eye nàŋe aɖu na ame vɔ̃ɖiwo.

⁸Yehowa gbɔe ɖeɖe tsona.

Na be wò yayra nanɔ wò amewo dzi. Sela.

Psalmo 4

David ƒe ha na hɛnɔ la. Woadzii ɖe kasaŋku ŋu.

¹Nye Mawu dzɔdzɔetɔ,

tɔ nam ne meyɔ wò.

Na gbɔdzɔem le nye xaxa me;

kpɔ nye nublanui, eye nàse nye gbedodoɖa.

²O! Amegbetɔviwo, va se ɖe ɣe ka ɣie

miaɖi gbɔ̃ nye ŋutikɔkɔe?

Va se ɣe ka ɣie mialɔ̃ beble,

ahadze aʋatsomawuwo yome? Sela

³Minyae be Yehowa tia mawuvɔ̃lawo na eɖokui,

eya ta Yehowa asee, ne meyɔe.

⁴Migawɔ nu vɔ̃ ne dzi ku mi o;

ne miele miaƒe abawo dzi la,

midzro miaƒe dziwo me, eye mizi ɖoɖoe. Sela

⁵Misa vɔ siwo le dzɔdzɔe,

eye miɖo dzi ɖe Yehowa ŋu.

⁶Ame geɖewo le biabiam be, “Ame kae afia nu nyui aɖe mí?”

Na wò mo ƒe kekeli naklẽ ɖe mía dzi, O! Yehowa.

⁷Ètsɔ dzidzɔ gã aɖe yɔ nye dzi me wu ame siwo bli

kple wain yeye do agbogbo na.

⁸Mamlɔ anyi, adɔ alɔ̃ le ŋutifafa me,

elabena wò, Yehowa, koe na mele dedie.

Psalmo 5

David ƒe ha na hɛnɔ la. Woadzii kple kpẽ.

¹O! Yehowa, ɖo to nye nyawo,

eye nàse nye hũɖeɖe.

²Fianye kple Mawunye,

ɖo to nye ɣlidodo,

elabena wòe mele gbe dom ɖa na.

³O! Yehowa, le ŋdi me la, àse nye gbe;

le ŋdi me la, matsɔ nye biabiawo aɖo ŋkuwò me,

eye manɔ lalam kple mɔkpɔkpɔ.

⁴Menye Mawu si kpɔa dzidzɔ le vɔ̃ ŋutie nènye o;

wò la, ame vɔ̃ɖiwo mate ŋu anɔ gbɔwò o.

⁵Ɖokuiŋudzelawo mate ŋu atsi tsitre ɖe ŋkuwò me o;

elabena èlé fu nu vlo wɔlawo katã.

⁶Ètsrɔ̃ aʋatsokalawo;

Yehowa tsri hlɔ̃dolawo kple ameblelawo.

⁷Ke nye ya, mava wò aƒe me to wò nublanuikpɔkpɔ gã la me.

Matsɔ bubu ade ta agu ɖe wò gbedoxɔ kɔkɔe la ŋgɔ.

⁸Kplɔm, O! Yehowa,

le wò dzɔdzɔenyenye nu le nye futɔwo ta,

eye wɔ wò mɔwo dzɔdzɔe le ŋkunye me.

⁹Womate ŋu axɔ nya siwo doa go tso

woƒe nu me la ɖeka pɛ hã dzi ase o,

woƒe dzi yɔ fũu kple gbegblẽ.

Woƒe ve me le abe yɔdo si le ʋuʋu ɖi la ene,

eye wotsɔa woƒe aɖe gblɔa alakpanyawoe.

¹⁰O! Mawu, bu fɔ wo!

Na be woƒe ayemɔwo naƒu wo anyi.

Ɖe wo ɖa le woƒe nu vɔ̃ gbogboawo ta,

elabena wodze aglã ɖe ŋuwò.

¹¹Ke na ame siwo si wò tso la nakpɔ dzidzɔ,

eye na be woadzi ha kple dzidzɔ tegbee.

Keke wò ametakpɔkpɔ ɖe wo dzi,

ale be ame siwo lɔ̃ wò ŋkɔ la natso aseye le mewò.

¹²O! Yehowa, èyraa ame dzɔdzɔewo vavã,

eye nètsɔa wò amenuveve ƒoa xlã wo abe akpoxɔnu ene.

Psalmo 6

David ƒe ha na hɛnɔ la. Woadzii ɖe kasaŋku kple seminit ŋu.

¹O! Yehowa, mègaka mo nam le wò dziku me

alo ahe to nam le wò dɔmedzoe helĩhelĩ me o.

²Yehowa, kpɔ nublanui nam, elabena nu te ŋunye.

O! Yehowa, yɔ dɔm, elabena nye ƒuwo le veve sem.

³Nye luʋɔ le nuxaxa me.

Va se ɖe ɣe ka ɣi, O! Yehowa,

va se ɖe ɣe ka ɣi?

⁴O! Yehowa, trɔ ɖe ŋunye, eye nàɖem;

ɖem, le wò lɔlɔ̃ si meʋãna o la ta.

⁵Ame aɖeke meɖoa ŋku dziwò ne eku o.

Ame kae kafua wò tso eƒe yɔdo me?

⁶Mevɔ le eme keŋkeŋ le ŋeŋe ta;

metsɔ aɖatsi ƒo nye aba, elabena mefa avi zã blibo la,

eye nye aɖatsi wɔe be nye dɔƒe ƒo tsi belebele.

⁷Nuxaxa na ɖeɖi te nye ŋkuwo ŋu;

womegale nu kpɔm tututu o, le nye futɔwo ta.

⁸Mite ɖa le gbɔnye, mi nu vlo wɔlawo,

elabena Yehowa se nye avifafa.

⁹Yehowa se ɣli si medo be wòakpɔ nye nublanui;

Yehowa xɔ nye gbedodoɖa alɔ eve.

¹⁰Nye futɔwo katã ŋu akpe mi, eye miaƒe mo atsi dãa;

woagbugbɔ ɖe megbe enumake kple ŋukpe.

Psalmo 7

David ƒe konyifaha si wòdzi na Yehowa le Benyamintɔ, Kus ƒe nyawo ta.

¹O! Yehowa, nye Mawu, wòe mesi tso,

xɔ nam, eye nàɖem tso ame siwo katã le yonyeme tim la ƒe asi me.

²Ne menye nenema o la,

woavuvum abe ale si dzata vuvua nui ene,

eye woavuvum ʋayaʋaya,

xɔnametɔ aɖeke mava ɖem o.

³O! Yehowa, nye Mawu,

ne mewɔ nu sia, eye vɔ̃ lé ɖe nye asiwo ŋu,

⁴ne mewɔ nu vɔɖi ɖe ame si li kplim le ŋutifafa me ŋuti

alo meda adzo nye futɔ naneke mawɔmawɔtɔe la,

⁵ekema na nye futɔ nati yonyeme, eye eƒe asi nasu dzinye;

na be wòafanyam ɖe anyigba,

eye wòana matsi ke me adɔ. Sela

⁶O! Yehowa, tso, le wò dziku me;

tso ɖe nye futɔwo ƒe nyanyra ŋuti.

Nyɔ, nye Mawu, ne nàɖo ʋɔnu dzɔdzɔe dɔdrɔ̃ anyi.

⁷Na be amehawo naƒo ƒu ɖe ŋuwò.

Ɖu fia ɖe wo dzi tso dziƒo;

⁸na be Yehowa nadrɔ̃ ʋɔnu dukɔ la.

O! Yehowa, tso afia nam le nye dzɔdzɔenyenye ta,

O! Dziƒoʋĩtɔ, tso afia nam le nye nuteƒewɔwɔ ta.

⁹O! Mawu dzɔdzɔetɔ,

ame si dzroa susuwo kple dziwo me,

na ame vɔ̃ɖiwo ƒe nu vɔ̃ɖi wɔwɔ nu natso,

eye nàna dedinɔnɔ ame dzɔdzɔewo.

¹⁰Nye akpoxɔnue nye Mawu Dziƒoʋĩtɔ la,

ame si ɖea ame si dza le eƒe dzi me.

¹¹Mawue nye ʋɔnudrɔ̃la dzɔdzɔe,

Mawu si ɖea eƒe dɔmedzoe fiana gbe sia gbe.

¹²Nu metia kɔ nɛ o, anyre eƒe yi,

eye wòavu eƒe dati me.

¹³Edzra eƒe lãnuwo ɖo da ɖi,

eye eƒe aŋutrɔ bibiawo la etrɔ asi le wo ŋu wosɔ gbe.

¹⁴Ame si fɔ nu vɔ̃ɖi ƒe fu,

eye dzɔgbevɔ̃e zu fu wòfɔ la,

adzi beble ƒe vi.

¹⁵Ame si ɖe ʋe, heku eme wògoglo nyuie la age dze ʋe si

eya ŋutɔ ɖe la me.

¹⁶Dzɔgbevɔ̃e si wòhe vɛ la atrɔ abali ɖe eya ŋutɔ ŋuti,

eye eƒe ŋutasesẽ atrɔ ava eya ŋutɔ ƒe ta dzi.

¹⁷Mada akpe na Yehowa le eƒe dzɔdzɔenyenye ta,

eye madzi kafukafuha na Yehowa Dziƒoʋĩtɔ la ƒe ŋkɔ.

Psalmo 8

David ƒe ha na hɛnɔ la. Woadzii ɖe gitit ƒe gbeɖiɖi nu.

¹O Yehowa, míaƒe Aƒetɔ,

aleke wò ŋkɔ ƒe gãnyenye yɔ anyigba katã dzi ale!

Èɖo wò ŋutikɔkɔe anyi

ɖe dziƒowo tame.

²Èɖo kafukafu anyi ɖe ɖeviwo

kple vi nonowo ƒe nu me le wò futɔwo ta be

nàmia nu na futɔ kple hlɔ̃biala la.

³Ne mekpɔ wò dziƒowo,

siwo nye wò asinudɔwɔwɔwo,

ne mekpɔ ɣleti kple ɣletiviwo,

nu siwo nètsɔ ɖo wo nɔƒee la,

⁴Nu kae nye amegbetɔ be wò ŋkuwo le eŋuti

kple amegbetɔvi be nèléa be nɛ?

⁵Èwɔe wòsɔ kple Mawu kloe,

eye nètsɔ ŋutikɔkɔe kple bubu ɖɔ nɛ.

⁶Èwɔe be wòanye agbo ɖe wò asinudɔwɔwɔ dzi;

eye nètsɔ nu sia nu de eƒe afɔ te.

⁷Alẽhawo, nyihawo,

gbemelãwo,

⁸dziƒoxeviwo, ƒumelãwo

kple nu siwo katã ƒua tsi

le atsiaƒu me la le eƒe kpɔkplɔ te.

⁹O Yehowa, míaƒe Aƒetɔ,

aleke wò ŋkɔ ƒe gãnyenye yɔ anyigba katã dzi ale!

Psalmo 9

David ƒe ha na hɛnɔ la. Woadzii ɖe “ŋutsuvi la ƒe ku” ƒe gbeɖiɖi nu.

¹Makafu wò, O! Yehowa,

kple nye dzi blibo,

maɖe wò nukunuwɔwɔwo katã afia.

²Dzi adzɔm, eye matso aseye le mewò;

O Dziƒoʋĩtɔ, madzi kafukafuhawo na wò ŋkɔ.

³Nye futɔwo trɔ megbe;

wokli nu, eye wo katã wotsrɔ̃ le ŋkuwò me.

⁴Elabena wòe xɔ nye nya,

eye nèɖe nye dzɔdzɔenyenye ɖe go.

Ènɔ wò fiazikpui dzi, eye nèdrɔ̃ ʋɔnu dzɔdzɔe.

⁵Èka mo na dukɔwo, eye nètsrɔ̃ ame vɔ̃ɖiwo hetutu

woƒe ŋkɔwo ɖa tso mavɔ me yi ɖe mavɔ me.

⁶Tsɔtsrɔ̃ mavɔ va futɔ la dzi,

elabena èho woƒe duwo,

eye womagaɖo ŋku wo dzi gɔ̃ hã akpɔ gbeɖe o.

⁷Yehowa aɖu fia tegbetegbe;

eɖo eƒe fiazikpui anyi hena ʋɔnudɔdrɔ̃.

⁸Adrɔ̃ ʋɔnu xexea me le dzɔdzɔenyenye me;

akplɔ dukɔwo katã le nuteƒewɔwɔ me.

⁹Yehowa nye sitsoƒe na ame siwo wote ɖe anyi

kple mɔ sesẽ le xaxaɣiwo.

¹⁰Ame siwo nya wò ŋkɔ la aɖo dzi ɖe ŋuwò,

elabena wò Yehowa,

megble ame siwo dia wò la ɖi kpɔ o.

¹¹Midzi kafukafuhawo na Yehowa,

ame si nɔ fiazikpui dzi gli le Zion,

miɖe gbeƒã nu siwo wòwɔ la le dukɔwo dome.

¹²Elabena eya, ame si biaa hlɔ̃ hlɔ̃dolawo la,

ɖoa ŋku edzi, medoa toku hiãtɔwo ƒe ɣlidodo o.

¹³O Yehowa, kpɔ ale si nye futɔwo le yonyeme tim ɖa!

Kpɔ nye nublanui, eye nàkɔm tso ku ƒe agbowo me,

¹⁴be maɖe wò kafukafu afia le Zion Vinyɔnu ƒe agbowo me,

eye le afi ma matso aseye le ɖeɖe si nènam la ta.

¹⁵Dukɔwo ge dze do si woawo ŋutɔ woɖe la me;

woƒe afɔwo ɖo ɖɔ si woawo ŋutɔ woɖo ɖi le bebeme la me.

¹⁶Yehowa ɖe eɖokui fia to eƒe ʋɔnu dzɔdzɔe dɔdrɔ̃ me;

ame vɔ̃ɖiwo ƒe asinudɔwɔwɔwo atsɔ wo ade mɔ me.

Ŋugbledede. Sela

¹⁷Ame vɔ̃ɖiwo gbugbɔ yi yɔ me,

nenema kee nye dukɔ siwo ŋlɔ Mawu be.

¹⁸Ke womaŋlɔ hiãtɔ be ɖikaa

alo ame si le fu kpem la, mɔkpɔkpɔ nabu ɖee o.

¹⁹Tso, O Yehowa! Mègana amegbetɔ naɖu dzi o,

na woadrɔ̃ ʋɔnu dukɔwo le ŋkuwò me.

²⁰O! Yehowa, ƒo wo ƒu anyi kple ŋɔdzi;

na dukɔwo nanya be amegbetɔwo yewonye. Sela.

Psalmo 10

¹O! Yehowa, nu ka ta nèle adzɔge ʋĩi ɖo?

Nu ka ta nèɣla ɖokuiwò le xaxaɣiwo ɖo?

²Ame vɔ̃ɖi dadala he hiãtɔ ƒu anyi,

ke wògena ɖe mɔ si wòtre da ɖi la me.

³Nu siwo eƒe dzi dina la, egblɔnɛ adegbeƒotɔe;

eyraa ŋuklẽlawo, eye wòɖea alɔme le Yehowa ŋu.

⁴Ame vɔ̃ɖi la media eƒe mɔ o,

le dada viviwo ta,

le eƒe ŋugblededewo katã me la,

meɖoa ŋku Mawu dzi o.

⁵Eƒe mɔwo dzea edzi nɛ nyuie ɣe sia ɣi,

edoa eɖokui ɖe dzi,

wò sewo didi tso egbɔ;

eye wòɖoa hehe ɖe eƒe futɔwo ta.

⁶Egblɔna na eɖokui be, “Naneke maʋuʋum o,

makpɔ dzidzɔ ɣe sia ɣi, eye nyemage ɖe dzɔgbevɔ̃e me akpɔ o.”

⁷Fiƒode, alakpa kple ŋɔdzidodo yɔ eƒe nu me fũu,

eye gbegblẽ kple nu vɔ̃ɖi le eƒe aɖe te.

⁸Edea xa ɖe kɔƒewo xa;

ewu ame maɖifɔwo le xame,

eye wòtsa ŋu na ame si wòalé le bebeme.

⁹Edea xa ɖe ɣaɣlɛƒe abe dzatae be ɖe ave xa ene;

ale be wòalé amemanɔsitɔ;

eléa amemanɔsitɔ, eye wòhea wo ɖe eƒe ɖɔ me dzonae.

¹⁰Etoa ƒu ɖe lãme na ame siwo wòlé,

woƒe mo tsyɔa zi, eye womuna dzea anyi le eƒe ŋusẽ te.

¹¹Egblɔna na eɖokui be,

“Mawu ŋlɔ be; etsɔ nu tsyɔ eƒe mo, eye mele nu kpɔm o.”

¹²Tso, Yehowa! O! Mawu, kɔ wò abɔ dzi.

Mègaŋlɔ hiãtɔ be o.

¹³Nu ka ta ame vɔ̃ɖi la le alɔme ɖem le Mawu ŋuti ɖo?

Nu ka ta wògblɔna na eɖokui be,

“Mayɔm be mana akɔnta o” ɖo?

¹⁴Ke wò, O! Mawu, koe kpɔa dzɔgbevɔ̃e kple vevesese;

èbua eŋuti, eye asiwò me wole.

Ame si le fukpekpe me la,

tsɔa eɖokui dea asi na wò;

elabena wòe nye xɔnametɔ na tsyɔ̃eviwo.

¹⁵Ŋe abɔ na ame vɔ̃ɖi kple nu tovo wɔla;

yɔe ne wòana akɔnta tso nu vɔ̃ɖi siwo wòwɔ

ame aɖeke mekpɔe o la ŋuti.

¹⁶Yehowae nye fia tso mavɔ me yi mavɔ me;

dukɔwo atsrɔ̃ ɖa le eƒe anyigba dzi.

¹⁷O! Yehowa, èse hiãtɔwo ƒe didi;

ède dzi ƒo na wo, eye nèɖo to woƒe ɣlidodo.

¹⁸Èʋli tsyɔ̃eviwo kple ame siwo wote ɖe anyi la ta,

ale be amegbetɔ si nye anyi la magado ŋɔdzi na amewo azɔ o.

Psalmo 11

David ƒe ha na hɛnɔ la.

¹Yehowae mesi tso.

Aleke miele gbɔgblɔm nam be,

“Dzo abe xevi ene nàyi ɖe wò to dzi?

²Elabena kpɔ ɖa, ame vɔ̃ɖiwo he woƒe da me;

wotsɔ woƒe aŋutrɔwo ɖo datikawo ŋuti be

woada ame siwo dza le woƒe dzi me la le blukɔ me.

³Esi wole gɔmeɖokpeawo gbãm la,

nu ka dzɔdzɔetɔ la awɔ?”

⁴Yehowa le eƒe gbedoxɔ kɔkɔe la me;

Yehowa le eƒe fiazikpui dzi le dziƒo.

Elé ŋku ɖe amegbetɔviwo ŋu,

eye wòdo wo kpɔ.

⁵Yehowa doa ame dzɔdzɔe kpɔna,

ke eƒe luʋɔ tsri ame vɔ̃ɖiwo

kple ame siwo lɔ̃a ŋutasesẽ.

⁶Ana dzoka xɔxɔ kple aŋɔ dzodzoe nadza ɖe

ame vɔ̃ɖiwo dzi, eye ya xɔdzo anye wo tɔ gome.

⁷Elabena Yehowae nye dzɔdzɔetɔ, elɔ̃a nuteƒewɔwɔ;

ame siwo dza le woƒe dzi me la akpɔ eƒe ŋkume.

Psalmo 12

David ƒe ha na hɛnɔ la. Woadzii ɖe seminit ŋu.

¹Xɔ nam, Yehowa elabena, mawuvɔ̃lawo megali o,

eye nuteƒewɔlawo bu le amegbetɔwo dome.

²Ame sia ame kaa aʋatso na ehavi,

eye wovivia nu me,

elabena woƒe nuyiwo blea ame.

³Yehowa nelã beblenuyiwo katã

kple aɖe siwo doa wo ɖokui ɖe dzi

⁴hegblɔna be, “Míaɖu dzi kple míaƒe aɖewo,

míaƒe nuyiwo nye mía tɔ,

ame kae aɖu amegã ɖe mía dzi?”

⁵Yehowa be, “Esi wotea ame gblɔewo ɖe to,

eye hiãtɔwo ŋena ta la, matso azɔ.

Maɖe wo tso ame siwo le vlo dom wo la ƒe asi me.”

⁶Kpɔtsɔtsɔ mele Yehowa ƒe nyawo ŋuti o,

wole abe klosalo si wololo le anyikpo me,

eye wòdza zi gbɔ zi adre la ene.

⁷Ame vɔ̃ɖiwo zɔna le ablɔɖe me,

eye wodea bubu yakanuwɔwɔwo ŋu le amegbetɔwo dome.

⁸O! Yehowa, àna míanɔ dedie,

eye àdzɔ mía ŋu tso ame siawo tɔgbi ƒe asi me tegbetegbe.

Psalmo 13

David ƒe ha na hɛnɔ la.

¹O! Yehowa, va se ɖe ɣe ka ɣi?

Ɖe nàŋlɔm be ɖikaɖika?

Va se ɖe ɣe ka ɣi nàɣla wò ŋkume ɖem?

²Va se ɖe ɣe ka ɣi mawɔ avu kple nye tamesusu,

eye gbe sia gbe nuxaxa nayɔ nye dzi me?

Va se ɖe ɣe ka ɣi nye futɔwo aɖu dzinye?

³Kpɔm ɖa, eye nàɖo nya ŋu nam,

O! Yehowa, nye Mawu.

Na kekeli naklẽ ɖe nye ŋkuwo dzi,

ne menye nenema o la,

madɔ alɔ̃ ayi ku me.

⁴Ekema nye futɔwo agblɔ be,

“Meɖu edzi,” eye nye ketɔwo akpɔ dzidzɔ ne medze anyi.

⁵Ke nye ya meɖo dzi ɖe wò lɔlɔ̃ si meʋãna o la ŋu,

nye dzi le aseye tsom le wò xɔname ŋuti.

⁶Madzi ha na Yehowa,

elabena ewɔ nyui nam.

Psalmo 14

David ƒe ha na hɛnɔ la.

¹Bometsila gblɔna le eƒe dzi me be,

“Mawu aɖeke meli o.”

Wonye ame tovowo, eye woƒe nuwɔnawo nye ŋunyɔnu;

ame ɖeka hɔ̃ɔ hã mele wo dome si wɔa nu nyui o.

²Yehowa bi kɔ kpɔ amegbetɔviwo ɖa tso dziƒo,

be wòakpɔe ɖa be nugɔmesela aɖe le wo dome,

eye wòdia Mawu vevie mahã?

³Wo katã wodze ɖe aga,

wo katã tim wogblẽ;

ame aɖeke meli si wɔa nu nyui o,

ɖeka pɛ gɔ̃ hã meli o.

⁴Ɖe nu tovo wɔlawo,

ame siwo ɖua nye amewo abe abolo ene,

eye womeyɔa Yehowa o la manya esia oa?

⁵Ŋɔdzi lé wo ale gbegbe,

elabena Mawu le ame dzɔdzɔewo ƒe hame.

⁶Mi nu tovo wɔlawo,

miegblẽ ame dahewo ƒe ɖoɖowo me,

gake Yehowae nye woƒe sitsoƒe.

⁷O! Xɔname ado tso Zion na Israel.

Ne Yehowa gaɖo eƒe amewo ƒe nunyonamewo te la,

na Yakob natso aseye, eye Israel nakpɔ dzidzɔ!

Psalmo 15

David ƒe ha.

¹Yehowa, ame kae dze anɔ wò kɔkɔeƒe la?

Ame kae anɔ wò togbɛ kɔkɔe la dzi?

²Ame si fɔɖiɖi mele eƒe zɔzɔme ŋu o,

eye wòwɔa nu dzɔdzɔe lae.

Ame si toa nyateƒe tso eƒe dzi me ke

³eye ameŋugbegblẽ mele aɖe dzi nɛ o,

ame si mewɔa vɔ̃ ɖe ehavi ŋu o,

eye meƒoa ɖi nɔvia amegbetɔ o,

⁴ame si ame baɖa ƒe nu menyoa eŋu o,

ke boŋ edea bubu ame siwo vɔ̃a Yehowa la ŋuti,

ame si kaa atam si hea vevesese vanɛ,

gake megbea edziwɔwɔ o,

⁵ame si medoa ga xɔa deme ɖe edzi o,

eye mexɔa zãnu ɖe ame maɖifɔ ŋuti o.

Ame si wɔa nu siawo la,

naneke maʋãe akpɔ gbeɖegbeɖe o.

Psalmo 16

David ƒe ha si wɔa dɔ ɖe ame dzi.

¹O! Mawu, na manɔ dedie,

elabena wò mee mebe ɖo.

²Megblɔ na Yehowa be,

“Wòe nye nye Aƒetɔ;

nu nyui aɖeke mele asinye kpe ɖe ŋuwò o.”

³Ame kɔkɔe siwo le anyigba dzi la woe nye bubume

siwo ƒe nu nyoa ŋunye vevie.

⁴Ame siwo ati mawu tutɔwo yome la, adzi woƒe vevesesewo ɖe edzi.

Nyemasa woƒe ʋuvɔsawo na mawu mawo,

alo ayɔ woƒe ŋkɔwo o.

⁵Yehowa, èɖo tɔnye gome

kple nye kplu da ɖi nam;

èna nye gomekpɔkpɔ le dedie nam.

⁶Liƒo ƒe dzidzeka la dze teƒe nyuiwo nam;

le nyateƒe me la, domenyinu si do dzidzɔ nam la su asinye.

⁷Makafu Yehowa, ame si ɖoa aɖaŋu nam;

le zã me ke hã, nye dzi xlɔ̃a num.

⁸Metsɔ Yehowa ɖo ŋkunye me ɖaa,

elabena ele nye nuɖusime, eya ta nyemavɔ̃ o.

⁹Esia ta nye dzi le dzidzɔ kpɔm,

nye aɖe tso aseye, eye nye ŋutilã hã agbɔ ɖe eme le dedinɔnɔ me,

¹⁰elabena màgblẽm ɖi na yɔdo alo ana wò,

Kɔkɔetɔ la, nàkpɔ gbegblẽ o.

¹¹Èna menya agbemɔ la;

àtsɔ dzidzɔkpɔkpɔ ayɔ menye le ŋkuwò me,

eye matsɔ vivisese si mevɔna o la

anɔ wò nuɖusime tegbee.

Psalmo 17

David ƒe gbedodoɖa.

¹See, O! Yehowa, ɖo to nye ɣlidodo

kple nye dzɔdzɔenyenye ƒe kukuɖeɖe.

Ƒu to anyi ɖe nye gbedodoɖa

si metso alakpanuyiwo me o.

²Afiatsotso nam netso gbɔwò,

eye na wò ŋkuwo nakpɔ nu si le dzɔdzɔe.

³Togbɔ be èdzro nye dzi me

eye nèlé ŋku ɖe ŋunye tsitotsito le zã me;

ne èdom kpɔ hã la,

màkpɔ naneke le menye o.

Meɖoe kplikpaa be nye nu mawɔ nu vɔ̃ o.

⁴Le amegbetɔwo ƒe nuwɔnawo me la,

metsɔ wò numenya kpɔ ɖokuinye dzii be,

nyemage ɖe ame vɔ̃ɖiwo ƒe mɔwo dzi o.

⁵Nye afɔɖeɖewo li ɖe wò toƒewo,

eye nye afɔ meɖiɖi o.

⁶Mele yɔwòm, O! Mawu, elabena àtɔ nam;

ƒu to anyi ɖe ŋunye, eye nàse nye gbedodoɖa.

⁷Ɖe wò lɔlɔ̃ gã la ƒe nukunu fia,

wò ame si tsɔa wò nuɖusi ɖea ame siwo si wò tso,

tso woƒe futɔwo ƒe asi me.

⁸Kpɔ tanye abe wò ŋku ƒe gadaglamakui ene,

eye nàɣlam ɖe wò aʋala ƒe vɔvɔli te,

⁹ɖem tso ame vɔ̃ɖi siwo le funyafunya wɔmem

kple futɔ siwo ɖe to ɖem la ƒe asi me.

¹⁰Wotu woƒe ŋutasẽdziwo,

eye wotsɔa woƒe nuwo gblɔa dadanyawoe.

¹¹Wodo afɔ nam, eye azɔ la, woɖe to ɖem,

woƒe ŋkuwo le te ne woaxlãm ɖe anyigba.

¹²Wole abe dzata dɔwui si le nu dim be yealé,

hele adeklo dzi le avekɔe me ene.

¹³O! Yehowa, tso, kpe akɔ kpli wo,

he wo ƒu anyi, eye tsɔ wò yi nàɖem le ame vɔ̃ɖiwo ƒe asi me.

¹⁴O! Yehowa, tsɔ wò asi ɖem le ame siawo tɔgbi

kple xexemetɔ siawo ƒe asi me,

ame siwo ƒe fetu le agbe sia me.

Ètsia ame siwo nèlɔ̃ vevie la ƒe dɔwuame nu;

wo viŋutsuwo kpɔ nu nyui geɖe,

eye wodzraa kesinɔnuwo ɖo ɖi na wo viwo.

¹⁵Ke nye la, makpɔ wò ŋkume le dzɔdzɔenyenye me,

eye ne menyɔ hekpɔ wò nɔnɔme ko la, maɖi ƒo.

Psalmo 18

David, Yehowa ƒe dɔla, ƒe ha na hɛnɔ la. David dzi ha sia na Yehowa le esime wòɖee tso Saul kple eƒe futɔ bubuawo ƒe asi me. David gblɔ be:

¹O! Yehowa, nye ŋusẽ, melɔ̃ wò.

²Yehowa nye nye agakpe, nye mɔ kple nye xɔnametɔ.

Nye Mawu nye nye agakpe, eyae mesi tso.

Eyae nye nye akpoxɔnu kple ɖeɖe

ƒe ŋusẽ kple nye mɔ sesẽ.

³Meyɔ Yehowa, ame si dze na kafukafu,

eɖem tso nye futɔwo katã ƒe asi me.

⁴Ku ƒe kawo blam,

eye nu siwo gblẽa ame la ƒo ɖe dzinye abe tɔʋu ene.

⁵Tsiẽƒe ƒe kawo

blam, eye ku ƒe mɔtetrewo ɖi kpem.

⁶Meyɔ Yehowa le nye xaxa me;

medo ɣli na nye Mawu be wòaɖem.

Ese nye gbe tso eƒe gbedoxɔ me ke,

eye nye ɣlidodo ɖo egbɔ, ge ɖe eƒe to me.

⁷Tete anyigba dzo nyanyanya, eye wòʋuʋu;

towo ƒe agunuwo ke hã ʋuʋu heyeheye,

eye wodzo kpekpekpe, elabena dzi kui.

⁸Dzudzɔ do tso eƒe ŋɔtime;

dzo ƒe aɖewo do tso eƒe nu me

eye dzoka xɔxɔwo kplɔe ɖo.

⁹Ema dziŋgɔli ɖe eve,

wòto eme ɖi va anyi,

eye lilikpo do blukɔ le eƒe afɔ te.

¹⁰Ede kerubiwo dzi, eye wòdzo dzo.

Eɖo asagba ɖe ya ƒe aʋalawo dzi.

¹¹Viviti nye avɔ si wòtsyɔ, eye lilikpo yibɔ

si dzaa tsi lae nye agbadɔ si ƒo xlãe.

¹²Lilikpo, kpetsi kple dzikedzo do tso

eƒe mo ƒe keklẽ la me.

¹³Yehowa ɖe gbe tso dziƒo,

eye Dziƒoʋĩtɔ la na wose eƒe gbe.

¹⁴Eda eƒe aŋutrɔ, eye wòkaka eƒe futɔwo,

eɖo dzikedzo ɖa, eye wòtɔtɔ wo.

¹⁵Atsiaƒu ƒe balimewo dze gaglã,

eye anyigba ƒe gɔmeɖoɖo tsi ƒuƒlu.

Le Yehowa ƒe nyaheɖeameŋu

kple gbɔgbɔ si do tso eƒe ŋɔtime ta.

¹⁶Edo asi ɖa tso dziƒo lém,

Heɖem tso tɔ goglowo me.

¹⁷Eɖem tso nye futɔ ŋusẽtɔwo ƒe asi me,

tso nye ketɔwo ƒe asi me,

ame siwo sesẽ wum akpa la ƒe asi me.

¹⁸Woƒo ɖe dzinye le nye dzɔgbevɔ̃egbe,

gake Yehowa nye nye kpeɖeŋutɔ.

¹⁹Eɖem tsɔ da ɖe teƒe gbadzaa;

eɖem, elabena nye nu nyo eŋu.

²⁰Yehowa nɔ kplim le nye dzɔdzɔenyenye nu,

eye wòwɔ nyui nam le esi nye asi me dza la ta.

²¹Elabena melé Yehowa ƒe mɔwo me ɖe asi;

nyemewɔ vɔ̃ hetrɔ le nye Mawu yome o.

²²Eƒe sewo katã le ŋkunye me;

eye nyemetrɔ le eƒe ɖoɖowo yome o.

²³Nyemeɖi fɔ le eŋkume o,

eye mete ɖokuinye ɖa tso nu vɔ̃ gbɔ.

²⁴Yehowa wɔ nyui nam le nye dzɔdzɔenyenye

kple esi nye asi me dza le eŋkume la ta.

²⁵Èwɔa nuteƒe na nuteƒewɔla,

eye nèfiaa ɖokuiwò fɔmaɖilae na ame si ŋu fɔɖiɖi mele o.

²⁶Ame si dza le eƒe dzi me la, èɖea ɖokuiwò fianɛ be èdza,

eye nèfiaa ɖokuiwò ayetɔe ɖe ayetɔ la ŋu.

²⁷Èɖea ame siwo bɔbɔa wo ɖokui,

ke ame siwo si dadaŋku le la, èɖiɖia wo ɖe anyi.

²⁸Wò, O! Yehowae na nye akaɖi le bibim,

eye nye Mawu trɔ nye viviti wòzu kekeli.

²⁹Mate ŋu alũ ɖe aʋakɔ dzi to wò kpekpeɖeŋu me,

eye le nye Mawu ta mate ŋu ati kpo aflɔ gli.

³⁰Mawu ya ƒe mɔwo de blibo,

Yehowa ƒe nya nye nyateƒe sɔŋ.

Enye akpoxɔnu na ame siwo tsɔe wɔ sitsoƒee.

³¹Elabena ame kae ganye Mawu kpe ɖe Yehowa ŋu?

Ame kae ganye Agakpe,

ɖe menye míaƒe Mawu la koe oa?

³²Mawue nye nye mɔ sesẽ,

Eyae na nye mɔ zu gbadzaa.

³³Ewɔ nye afɔwo abe zi tɔwo ene,

eye wòna metea ŋu tsia tsitre ɖe teƒe kɔkɔwo.

³⁴Efia aʋawɔwɔ nye asiwo,

eye nye asiwo ate ŋu abɔ dati si wowɔ kple akɔbli.

³⁵Ètsɔ wò dziɖuɖu ƒe akpoxɔnu la nam,

eye wò nuɖusi lém ɖe te.

Èbɔbɔ ɖokuiwò be nàdo kɔkɔm.

³⁶Èkeke mɔ le tenye,

be nye klowo magli le tenye o.

³⁷Meti nye futɔwo yome, eye metu wo.

Nyemetrɔ le wo yome o,

va se ɖe esime wotsrɔ̃.

³⁸Metsrɔ̃ wo be womagate ŋu afɔ gbeɖe o,

ale wodze anyi ɖe nye afɔ nu.

³⁹Wòe na ŋusẽm hena aʋa la wɔwɔ,

Èna mebɔbɔ ame siwo katã

tso ɖe ŋunye la ɖe anyi.

⁴⁰Èna nye futɔwo trɔ megbe dem helé du tsɔ,

eye metsrɔ̃ nye futɔwo.

⁴¹Wodo ɣli be Yehowa naxɔ na yewo,

gake ame aɖeke mexɔ na wo o,

elabena Yehowa metɔ na wo o.

⁴²Metu wo memie abe ʋuʋudedi si ya lɔ ɖe nu la ene,

eye metrɔ wo ɖe mɔtata dzi abe anyi ene.

⁴³Èɖem tso ame siwo va dze dzinye la ƒe asi me,

ètsɔm ɖo dukɔwo nu,

eye ame siwo nyemenya o la dzie meɖu fia ɖo.

⁴⁴Ne wose ŋkɔnye ko la,

woɖoa tom, eye du bubu me tɔwo gɔ̃ hã

dzona nyanyanya le nye ŋkume.

⁴⁵Dzi ɖena le wo katã ƒo, eye wotsɔa dzodzo nyanyanya hedoa goe

le woƒe mɔ sesẽwo me.

⁴⁶Yehowa li tegbee!

Woakafu nye Agakpe la!

Woado Mawu, nye Xɔla la, ɖe dzi bobobo!

⁴⁷Eyae nye Mawu si biaa hlɔ̃ nam,

eye wòbɔbɔa dukɔwo ɖe nye afɔ te,

⁴⁸ame si ɖeam tso nye futɔwo ƒe asi me.

Èkɔm ɖe dzi gbɔ nye futɔwo ta,

eye nèɖem tso ŋutasẽlawo ƒe asi me.

⁴⁹O! Yehowa, makafu wò le dukɔwo dome

le esia ta, eye madzi kafukafuha na wò ŋkɔ.

⁵⁰Ena dziɖuɖu gãwo eƒe fia la;

eɖe amenuveve si nu meyi o la fia David,

eƒe amesiamina la kple eƒe dzidzimeviwo tegbee.

Psalmo 19

David ƒe ha na hɛnɔ la.

¹Dziƒo ɖe Mawu ƒe ŋutikɔkɔe ɖe go,

eye dziŋgɔli le gbeƒã ɖem eƒe asinudɔwo.

²Tso ŋkeke yi ŋkeke, wole Mawu ƒe ŋutikɔkɔe kafum,

eye tso zã yi zã,

wole eƒe gãnyenye ɖem fia.

³Nuƒoƒo alo gbegbɔgblɔ aɖeke meli

si me womese woƒe gbe le o.

⁴Woƒe gbe ɖina le anyigba dzi afi sia afi,

eye woƒe nyawo dea xexea me ƒe mlɔenu ke gɔ̃ hã.

Etu agbadɔ ɖe dziƒowo na ɣe,

⁵eye wòle abe ŋugbetɔsrɔ̃e le go dom tso eƒe agbadɔ me ene.

Ele abe duƒula si le dzidzɔ kpɔm be wòalé eƒe mɔ atsɔ ene.

⁶Ɣe dzena tso dziƒo ƒe go ɖeka dzi,

eye wòzɔna yia go kemɛ dzi,

naneke meɣla ɖe eƒe dzoxɔxɔ o.

⁷Yehowa ƒe se la de blibo,

enaa agbegbɔgbɔ luʋɔ!

Yehowa ƒe ɖoɖowo le eteƒe,

eye wonana bometsilawo dzea nunya.

⁸Yehowa ƒe mɔwo dzɔ,

wonana dzi kpɔa dzidzɔ.

Yehowa ƒe sewo me kɔ,

wonana ame dzea nunya.

⁹Yehowa ƒe sewo me kɔ;

wonɔa anyi ɖaa.

Yehowa ƒe sewo li ke sesĩe,

eye ɖikeke aɖeke mele woƒe dzɔdzɔenyenye ŋu o.

¹⁰Woxɔ asi wu sika kple sika nyuitɔ;

wovivina wu anyitsi

kple anyitsi si woɖe le anyito me.

¹¹Wò sewo wotsɔ xlɔ̃ nu wò dɔlae,

elabena viɖe gã geɖe le wo dzi wɔwɔ me.

¹²Ame kae ate ŋu ade dzesi nu gbegblẽ si wòwɔ?

Tsɔ nye vodada siwo metsɔ ɣla la kem.

¹³Ɖe wò dɔla tso lɔlɔ̃nuwɔwɔ ƒe nu vɔ̃wo hã me;

womaɖu dzinye akpɔ o.

Ekema mazu fɔɖiɖi manɔŋutɔ,

eye ŋutinye akɔ tso vodada gã me.

¹⁴Na be nye numenyawo

kple nye dzi ƒe ŋugbledede nadze ŋuwò,

O! Yehowa, nye Agakpe kple nye Xɔnametɔ.

Psalmo 20

David ƒe ha na hɛnɔ la.

¹Yehowa netɔ na wò ne èɖo xaxa me;

Yakob ƒe Mawu la ƒe ŋkɔ nanye ŋuwòdzɔla.

²Neɖo kpekpeɖeŋu ɖe wò tso kɔkɔeƒe la,

eye wòaɖo xɔname ɖe wò tso Zion.

³Neɖo ŋku wò vɔsawo katã dzi,

eye wòaxɔ wò numevɔsawo. Sela

⁴Nena nu si wò dzi di la wò,

eye wòana wò ɖoɖowo katã nadze edzi na wò.

⁵Míado dzidzɔɣli ne èɖu dzi, eye míakɔ míaƒe aflagawo dzi

le míaƒe Mawu la ƒe ŋkɔ me.

Yehowa awɔ nu siwo katã nèbiae la na wò.

⁶Azɔ menya be Yehowa ɖe eƒe amesiamina,

etɔ nɛ tso eƒe nɔƒe kɔkɔe la

kple eƒe nuɖusi ƒe ŋusẽ, si wòtsɔna ɖea amee.

⁷Ame aɖewo ɖoa ŋu ɖe tasiaɖamwo ŋu,

eye ame aɖewo ɖoa dzi ɖe sɔwo ŋu,

ke míawo ya míeɖo dzi ɖe Yehowa,

míaƒe Mawu la ƒe ŋkɔ ŋu.

⁸Ame mawo la, wodzea klo, eye wodzea anyi,

ke míawo ya, míenɔa tsitre, eye míedzɔna kã.

⁹O! Yehowa, xɔ na fia la!

Tɔ na mí ne míeyɔ wò!

Psalmo 21

David ƒe ha na hɛnɔ la.

¹O! Yehowa, fia la le dzidzɔ kpɔm le wò ŋusẽ me.

Ale gbegbe wòle aseye tsom le dziɖuɖu gã siwo nènae la ta!

²Ètsɔ nu si eƒe dzi di la nɛ, eye nèwɔ nu

siwo wòtsɔ eƒe nu bia la dzi nɛ. Sela

³Ètsɔ yayra xɔasi geɖewo do dza nɛ,

eye nètsɔ fiakuku si wowɔ kple sika nyuitɔ la ɖɔ nɛ.

⁴Ebia agbe wò, eye nènae hedidi

eƒe ŋkekewo tso mavɔ me yi mavɔ me.

⁵Eƒe ŋkɔxɔxɔ de du to dziɖuɖu siwo nènae la me.

Ètsɔ atsyɔ̃ kple bubu kɔ ɖe eya amea dzi.

⁶Vavã ènae yayra si nu meyina o,

eye nèna dzidzɔkpɔkpɔ kple aseyetsotsoe le ŋkuwò me.

⁷Elabena fia la ɖo dzi ɖe Yehowa ŋu,

eye le Dziƒoʋĩtɔ la ƒe lɔlɔ̃ si meʋãna o ta la,

mavɔ̃ akpɔ gbeɖe o.

⁸Wò asi alé wò futɔwo katã,

eye wò nuɖusi atu wò ketɔwo.

⁹Ne wò vavaɣi ɖo la,

àwɔ wo abe kpodzo bibi ene.

Yehowa ami wo le eƒe dɔmedzoe me,

eye eƒe dzo afia wo katã.

¹⁰Àtsrɔ̃ woƒe dzidzimeviwo ɖa le anyigba dzi,

eye àtsrɔ̃ woƒe nunɔamesiwo ɖa le amegbetɔwo dome.

¹¹Togbɔ be wole vɔ̃ ɖom ɖe ŋuwò,

eye wowɔ ɖoɖowo be woasẽ ŋuta le ŋuwò hã la,

madze edzi na wo o,

¹²elabena ne èdidi wò aŋutrɔ ɖe wo dzi la,

woatrɔ ʋu me ade wò adzo.

¹³Ède ŋgɔ, O! Yehowa, le wò ŋusẽ me;

eya ta míadzi ha, eye míakafu wò ŋusẽ.

Psalmo 22

David ƒe ha na hɛnɔ la, ne woadzi ɖe “Zinɔ le ŋdi kanyaa” ƒe gbeɖiɖi nu.

¹Nye Mawu, nye Mawu, nu ka ŋuti nègblẽm ɖi?

Nu ka ta nèle adzɔge ʋĩi na xɔxɔ nam,

eye nète ɖa xaa tso nye hũɖeɖe gbɔ?

²O! Nye Mawu, medo ɣli na wò le ŋkeke

kple zã me; megale edzi ko,

gake mètɔ nam o.

³Ke wò la, èle kɔkɔe, eye Israel ƒe kafukafuhawo zu

fiazikpui nènɔ anyi ɖe edzi gli.

⁴Mewòe mía fofowo tsɔ woƒe xɔse dee,

woka ɖe dziwò, eye nèɖe wo.

⁵Wodo ɣli na wò, eye nèɖe wo,

dziwòe woka ɖo, eye ŋu mekpe wo o.

⁶Ke nye la, ŋɔ menye, menye amegbetɔ o,

elabena amewo ɖu fewu le ŋunye, eye wodo vlom.

⁷Ame siwo katã kpɔm la ɖe alɔme le ŋunye;

woflɔa dzu ɖe dzinye, eye woʋuʋua ta ɖe ŋunye gblɔna be:

⁸“Eka ɖe Yehowa dzi,

Yehowa neɖee míakpɔ.

Yehowa neɖee, elabena eƒe nu nyo eŋu.”

⁹Ke wòe hem tso vidzidɔ me,

eye le danye ƒe no nu ke, èna meka ɖe dziwò.

¹⁰Wòe nye nye Mawu tso danye ƒe dɔ me

ke, eye tso ɖevime wotsɔm de asi na wò.

¹¹Mèganɔ adzɔge tso gbɔnye o,

elabena xaxa tum,

eye ame aɖeke meli axɔ nam o.

¹²Nyitsu geɖewo ɖe to ɖem;

Basan nyitsu sesẽwo ƒo xlãm.

¹³Woke woƒe nuwo ɖe ŋunye baa

abe dzata si le gbe tem hele nu si wòlé la vuvum ene.

¹⁴Woƒom ɖe anyi abe tsi ene,

eye nye ƒuwo katã gli le woƒe kpeƒewo.

Nye dzi lolõ ɖe dɔ me nam gbanaa hesi to menye.

¹⁵Ŋusẽ vɔ le ŋunye abe ze gbagbã ene,

eye nye aɖe lé ɖe nye nu me,

elabena ètsɔm mlɔ ku ƒe ʋuʋudedi me.

¹⁶Avuwo ƒo xlãm,

ame vɔ̃ɖiwo ƒe ha ɖe to ɖem,

eye wotsɔ nu ŋɔ nye asiwo kple afɔwo.

¹⁷Mate ŋu axlẽ nye ƒuwo,

amewo fɔ ŋku ɖe dzinye,

eye wokpɔ dzidzɔ le nye anyidzedze ŋuti.

¹⁸Woma nye awuwo na wo nɔewo,

eye woda akɔ ɖe nye awu ʋlaya dzi.

¹⁹Ke wò, O! Yehowa, mèganɔ adzɔge o;

O! Nye ŋusẽ, va kaba nàɖem.

²⁰Ɖe nye agbe tso yi ƒe asi me,

eye ɖe nye agbe xɔasi la tso avuwo ƒe ŋusẽ me.

²¹Ɖem le dzatawo ƒe nu me,

eye nàɖem le towo ƒe dzowo nu.

²²Maɖe gbeƒã wò ŋkɔ na nɔvinyewo,

eye le amehawo dome, makafu wò.

²³Mi ame siwo vɔ̃a Yehowa, mikafui!

Mi, Yakob ƒe dzidzimeviwo, mide bubu eŋuti!

Misroe ɖa, mi Israel ƒe dzidzimeviwo!

²⁴Elabena menyɔ ŋu alo do vlo

ame siwo le fu kpem la ƒe hiãtuame o;

meɣla eƒe mo ɖee o,

ke boŋ eɖo to eƒe ɣlidodo na kpekpeɖeŋu.

²⁵Gbɔwòe nye kafukafuha si medzina

le ameha gãwo dome la ƒe tanya tsona.

Maxe nye adzɔgbeɖefewo

le ame siwo vɔ̃a wò la ŋkume.

²⁶Hiãtɔwo aɖu nu aɖi ƒo;

ame siwo dia Yehowa la akafui.

Miaƒe dziwo nenɔ agbe tegbee!

²⁷Anyigba ƒe mlɔenu katã hã aɖo ŋku edzi,

atrɔ ɖe Yehowa ŋu,

eye anyigbadzidukɔwo ƒe ƒomeawo katã

ava de ta agu ɖe eŋkume.

²⁸Elabena fiaɖuɖu la nye Yehowa tɔ,

eye wòɖu fia ɖe dukɔwo dzi.

²⁹Kesinɔtɔ siwo katã le anyigba dzi la

aɖu nu, eye woasubɔe;

ame siwo katã mate ŋu anɔ agbe o,

eye woyi ɖe ke ƒe tume la adze klo ɖe eŋkume.

³⁰Dzidzimewo asubɔe, eye dzidzime siwo ava dzɔ la,

woagblɔ nya na wo tso Aƒetɔ la ŋuti.

³¹Woaɖe gbeƒã eƒe dzɔdzɔenyenye na

ame siwo meva dzɔ haɖe o,

elabena eyae wɔe.

Psalmo 23

David ƒe ha.

¹Yehowae nye kplɔnyela,

eya ta naneke mahiãm o.

²Lãnyiƒe damawo dzi wòna metsyɔ akɔ ɖo,

eye wòkplɔm yi tɔʋu fafɛwo gbɔe,

³hena nye luʋɔ gbɔ agbe.

Ekplɔm to dzɔdzɔenyenye ƒe

mɔwo dzi le eƒe ŋkɔ la ta.

⁴Ne mezɔ to ku ƒe balime si do viviti tsiɖitsiɖi hã la,

nyemavɔ̃ dzɔgbevɔ̃e aɖeke o,

elabena wòe le gbɔnye, eye wò lãkplɔti

kple atikplɔ faa akɔ nam.

⁵Èɖo kplɔ̃ ɖe akɔnyeme le nye ketɔwo ƒe ŋkume.

Èsi ami ɖe ta nam, nye kplu yɔ gbagba.

⁶Vavãe, dzɔgbenyui kple amenuveve adze yonyeme

le nye agbemeŋkekewo katã me,

eye manɔ Yehowa ƒe aƒe me ɖaa.

Psalmo 24

David ƒe ha.

¹Anyigba kple nu siwo katã yɔ edzi,

xexea me kple emenɔlawo katã nye Yehowa tɔ.

²Elabena eɖoe anyi ɖe atsiaƒu dzi,

eye wòɖo egɔme anyi ɖe tɔsisiwo dzi gli.

³Ame kae alia Yehowa ƒe togbɛ?

Ame kae atsi tsitre ɖe eƒe kɔkɔeƒe la?

⁴Ame si ƒe asi me dza, eye eƒe dzi me le dzadzɛe,

ame si metsɔ eƒe luʋɔ na legba o,

eye mekaa aʋatso heta nu dzodzro o.

⁵Eya axɔ yayra tso Yehowa gbɔ, eye Mawu,

eƒe Ɖela la, atso afia nɛ.

⁶O! Yakob ƒe Mawu,

aleae dzidzime si dia wò,

eye wòdia ŋkuwòme la le. Sela

⁷O! Mi agbowo, miʋu;

mi blemaʋɔtruwo, miʋu,

ne Ŋutikɔkɔefia la nage ɖe eme.

⁸Ame kae nye Ŋutikɔkɔefia la?

Yehowa ŋusẽtɔ kple kalẽtɔ lae,

Yehowa si wɔa kalẽ le aʋagbedzi lae.

⁹O! Mi agbowo, miʋu;

mi blemaʋɔtruwo, miʋu,

ne Ŋutikɔkɔefia la nage ɖe eme.

¹⁰Ame kae nye Ŋutikɔkɔefia sia?

Yehowa Ŋusẽkatãtɔ lae nye Ŋutikɔkɔefia la. Sela.

Psalmo 25

David ƒe ha.

¹O! Yehowa,

wòe mekɔ nye luʋɔ ɖe dzi na.

²O! Nye Mawu, ŋuwòe meɖo dzi ɖo.

Mègana ŋu nakpem,

alo nàɖe mɔ nye futɔwo naɖu dzinye o.

³Ame si tsɔ eƒe mɔkpɔkpɔ da ɖe dziwò la,

ŋu makpee akpɔ gbeɖe o;

gake ŋu akpe ame siwo nye vivimenuwɔlawo.

⁴O! Yehowa, fia wò mɔwo

kple wò toƒewom,

⁵kplɔm le wò nyateƒe la me, eye nàfia num,

elabena wòe nye nye Mawu kple nye Ɖela,

eye nye mɔkpɔkpɔ le mewò ŋkeke blibo la katã.

⁶O! Yehowa, ɖo ŋku wò lɔlɔ̃

kple wò nublanuikpɔkpɔ sɔgbɔ la dzi,

elabena woli tso blema ke.

⁷O! Yehowa, mègaɖo ŋku nye ɖekakpuimenu vɔ̃wo

kple nye aglãdzemɔwo dzi o;

ke boŋ ɖo ŋku dzinye le wò lɔlɔ̃ la ta,

elabena nyuiwɔwɔ le mewò.

⁸Yehowa nyo, eye wòwɔa nu dzɔdzɔe,

eya ta efiaa eƒe mɔ nu vɔ̃ wɔlawo.

⁹Ekplɔa ɖokuibɔbɔlawo to nu dzɔdzɔe wɔwɔ me,

eye wòfiaa eƒe mɔ wo.

¹⁰Yehowa ƒe mɔwo katã nye lɔlɔ̃ kple nuteƒewɔwɔ na

ame siwo léa eƒe nubablamenyawo ɖe asi.

¹¹O! Yehowa, togbɔ be nye dzidada sɔ gbɔ ale gbegbe hã la,

tsɔ wo kem le wò ŋkɔ la ta.

¹²Ekema ame kawoe nye ŋutsu ma siwo vɔ̃a Yehowa?

Afia nu wo le mɔ si woato la dzi.

¹³Woakpɔ dzidzedze le woƒe agbemeŋkekewo me,

eye woƒe dzidzimeviwo anyi anyigba la ƒe dome.

¹⁴Yehowa gblɔa nya ɣaɣlawo na ame siwo vɔ̃nɛ,

eye wòɖea eƒe nubabla fiaa wo.

¹⁵Nye ŋkuwo le Yehowa ŋu ɖaa,

elabena eya koe aɖe nye afɔ le mɔ me.

¹⁶Trɔ ɖe ŋunye ne nàve nunye,

elabena metsi akogo, eye hiã tum.

¹⁷Nye dzi ƒe nuxaxawo do gã ɖe edzi,

na vovom tso nye vevesesewo me.

¹⁸Nye kɔ nàkpɔ nye nuxaxa kple nye vevesese ɖa,

eye nàɖe nye nu vɔ̃wo katã ɖa.

¹⁹Kpɔ ale si nye futɔwo dzi ɖe edzii ɖa,

eye nàkpɔ ale si wolé fum ɖikaɖikae ɖa!

²⁰Kpɔ nye agbe ta, eye nàɖem;

megana ŋu nakpem o, elabena mewòe mebe ɖo.

²¹Nuteƒewɔwɔ kple dzɔdzɔenyenye nedzɔ ŋunye,

elabena nye mɔkpɔkpɔ le mewò.

²²O! Mawu,

ɖe Israel tso woƒe xaxawo katã me.

Psalmo 26

David ƒa ha.

¹O! Yehowa, tso afia nam,

elabena menɔ agbe si ŋu fɔɖiɖi mele o.

Meɖo dzi ɖe Yehowa ŋu,

nyemeʋã kpɔ gbeɖe o.

²O! Yehowa, lolom, dom kpɔ;

eye nàdzro nye dzi kple tamesusu hã me,

³elabena wò lɔlɔ̃ le ŋkunye me ɖaa,

eye mezɔna le wò nyateƒe la me ɣe sia ɣi.

⁴Nyemanɔ anyi ɖe ameblelawo dome,

alo ade ha kple alakpanuwɔlawo o.

⁵Metsri ame tovowo ƒe habɔbɔ,

eye megbe be nyemanɔ ame vɔ̃ɖiwo dome o.

⁶Meklɔ nye asiwo le fɔmaɖimaɖi me,

eye meƒo xlã wò vɔsamlekpui, O! Yehowa,

⁷hele wò kafukafuha dzim

kple ɣli le nukudɔ siwo katã nèwɔ la xlẽm fia.

⁸O! Yehowa, melɔ̃ aƒe si me nèle,

afi si wò ŋutikɔkɔe le.

⁹Mègatsɔ nye luʋɔ kpe ɖe nu vɔ̃ wɔlawo ŋuti

kple nye agbe kpe ɖe hlɔ̃dolawo ŋuti,

¹⁰ame siwo ƒe asi me ɖoɖo vɔ̃ɖiwo le,

eye woƒe nuɖusime yɔ fũu kple zãnuxɔxɔ o.

¹¹Ke nye la, menɔ agbe si ŋu fɔɖiɖi mele o,

eya ta ɖem, eye nàkpɔ nublanui nam.

¹²Nye afɔ le sɔsɔeƒe.

Makafu Yehowa le takpekpe gã la me.

Psalmo 27

David ƒe ha.

¹Yehowae nye nye kekeli kple nye ɖeɖe.

Ame ka mavɔ̃?

Yehowae nye mɔ sesẽ na nye agbe,

ame ka adzi ŋɔ nam?

²Ne ame vɔ̃ɖiwo lũ ɖe dzinye be woavuvum,

ne nye futɔwo kple nye ketɔwo lũ ɖe dzinye la,

woakli nu adze anyi.

³Togbɔ be aʋakɔ gã aɖe ɖe to ɖem hã la,

nye dzi mavɔ̃ o,

togbɔ be wodze aʋa ɖe ŋunye hã la,

azɔ koŋ dzi aɖo ƒonye.

⁴Nu ɖeka mebia Yehowa,

esiae nye be manɔ Yehowa ƒe aƒe me

le nye agbemeŋkekewo katã me,

ne malé ŋku ɖe Yehowa ƒe nyonyo ŋu,

eye madii le eƒe gbedoxɔ me.

⁵Elabena le xaxaɣiwo la,

atsyɔ nu dzinye le eƒe nɔƒe la me;

aɣlam ɖe eƒe agbadɔ ƒe bebeƒe,

eye wòakɔm aɖo agakpe kɔkɔ aɖe dzi.

⁶Ekema nye ta akɔ dzi agbɔ nye futɔ

siwo ƒo xlãm godoo la ta;

matsɔ dzidzɔɣli asa vɔ nɛ le eƒe agbadɔ kɔkɔe la me.

Madzi ha, eye maƒo saŋku na Yehowa.

⁷O! Yehowa, se nye gbe, ne meyɔ wò;

kpɔ nublanui nam, eye nàtɔ nam.

⁸Nye dzi le gbɔgblɔm le ŋuwò be,

“Di eƒe ŋkume!”

Yehowa, wò ŋkumee madi.

⁹Mègaɣla wò ŋkume ɖem o,

mègatrɔ wò dɔla ɖo ɖa le dɔmedzoe me o,

elabena wòe nye nye xɔnametɔ.

O! Mawu, nye Ɖela,

mègagbe nu le gbɔnye alo agblem ɖi o.

¹⁰Togbɔ be tɔnye kple nɔnye gblem ɖi hã la,

Yehowa axɔm.

¹¹O! Yehowa, fia wò mɔwom;

kplɔm to mɔ dzɔdzɔe dzi,

le ame siwo tem ɖe to la ta.

¹²Mègatsɔm de asi na nye futɔwo ƒe didi o,

elabena alakpaɖasefowo tso ɖe ŋutinye kpe ɖe

ame siwo lɔ ŋutasesẽ ƒe gbɔgbɔtsixɛ ɖe ƒo la ŋuti.

¹³Esia nye nu si dzi meka ɖo la be:

Makpɔ Yehowa ƒe nu nyuiwo

le agbagbeawo ƒe anyigba dzi.

¹⁴Kpɔ mɔ na Yehowa;

sẽ ŋu, eye nàlé dzi ɖe ƒo.

Kpɔ mɔ na Yehowa.

Psalmo 28

David ƒe ha.

¹O! Yehowa, nye Agakpe,

wò yɔm mele, mègado tokum o.

Elabena ne èzi ɖoɖoe la,

manɔ abe ame siwo yi aʋlime la ene.

²Esi mekɔ nye asiwo dzi ɖo ɖe wò Kɔkɔeƒewo ƒe Kɔkɔƒe la gbɔ la,

se nye ɣlidodo na nublanuikpɔkpɔ,

ne meyɔ wò be nàxɔ nam.

³Mègakplɔm kpe ɖe ame vɔ̃ɖiwo ŋu o,

ame siwo ƒoa nu kple aƒelikawo fafɛ,

gake vɔ̃ɖivɔ̃ɖi le woƒe dzi me.

⁴Ɖo eteƒe na wo le woƒe nuwɔnawo

kple woƒe dɔwɔwɔ vɔ̃wo ta.

Xe fe na wo ɖe nu si woƒe asiwo wɔ la nu,

eye nàgbugbɔ tohehe si wodze na la ahe va wo dzii.

⁵Esi womede bubu Yehowa ƒe nuwɔnawo

kple eƒe asinudɔwo ŋuti o ta la,

àgbã wo aƒu anyi,

eye màgbugbɔ wo atu akpɔ gbeɖe o.

⁶Woakafu Yehowa, elabena ese ɣli si dom mele

le nublanuikpɔkpɔ biam.

⁷Yehowae nye nye ŋusẽ kple akpoxɔnu;

nye dzi ka ɖe eya amea dzi, eye wòɖem.

Nye dzi ti kpo le dzidzɔkpɔkpɔ ta,

eye mada akpe nɛ to hadzidzi me.

⁸Yehowae nye eƒe dukɔ ƒe ŋusẽ;

ɖeɖe ƒe mɔ sesẽ wònye na eƒe amesiamina.

⁹Ɖe wò dukɔ, eye nàyra wò domenyinu;

nànye woƒe kplɔla, eye nàkɔ wo ɖe akɔnu tegbetegbe.

Psalmo 29

David ƒe ha.

¹Mitsɔ bubu na Yehowa, O! Mi ŋusẽtɔwo,

mitsɔ ŋutikɔkɔe kple ŋusẽ na Yehowa.

²Mitsɔ ŋutikɔkɔe si dze Yehowa ƒe ŋkɔ nɛ;

misubɔ Yehowa le eƒe kɔkɔenyenye ƒe atsyɔ̃ me.

³Yehowa ƒe gbe ɖi le tsiwo dzi;

Ŋutikɔkɔe ƒe Mawu la ɖe gbe,

eye Yehowa ɖe gbe le tsi gãwo dzi.

⁴Ŋusẽ le Yehowa ƒe gbe ŋu,

eye ŋutikɔkɔe nye Yehowa ƒe gbe.

⁵Yehowa ƒe gbe ŋe Lebanon ƒe sedatiwo.

⁶Ena Lebanon ti kpo abe nyivi ene,

eye Sirion hã abe tovi ene.

⁷Yehowa ƒe gbe ke dzo mia abe dzikedzo ene.

⁸Yehowa ƒe gbe ʋuʋu dzogbenyigba,

eye Yehowa ʋuʋu Kades Dzogbenyigba.

⁹Yehowa na gboti sesẽwo ʋuʋu heyeheye,

eye wòna avewo lũ xɛ.

Le eƒe gbedoxɔ me la, ame sia ame do ɣli be,

“Ŋutikɔkɔe!”

¹⁰Yehowa nɔ eƒe fiazikpui dzi gli le tsiɖɔɖɔ dzi.

Woɖo Yehowa fia tso mavɔ me yi mavɔ me.

¹¹Yehowa naa ŋusẽ eƒe dukɔ;

eye wòyraa eƒe amewo kple ŋutifafa.

Psalmo 30

David ƒe ha na gbedoxɔ la ŋutikɔkɔ.

¹O! Yehowa, mado wò ɖe dzi,

elabena wòe hem do goe tso ʋe globo me,

eye mèna mezu nu ɖikokoe na nye futɔwo o.

²O! Yehowa, nye Mawu,

mebia kpekpeɖeŋu tso gbɔwò, eye nèyɔ dɔm.

³O! Yehowa, wòe ɖem tso tsiẽƒe,

eye mèna meyi aʋlime o.

⁴Midzi ha na Yehowa,

mi eƒe ame kɔkɔewo,

eye mikafu eƒe ŋkɔ kɔkɔe la.

⁵Elabena medoa dɔmedzoe eteƒe didina o,

ke eƒe amenuveve ya nɔa anyi agbenɔɣi katã.

Avifafa anɔ anyi le zã me,

gake aseyetsotso ava le ŋdi me.

⁶Esi mekpɔ be meli ke la, megblɔ be,

“Nye la, nyemaʋuʋu kpɔ gbeɖe o.”

⁷O! Yehowa, esi nève nunye la,

èna nye to li ke zã,

gake esi nèɣla wò ŋkume ɖem la,

nye mo tsi dãa.

⁸Yehowa, wòe meyɔ,

Yehowae medo ɣli na be wòakpɔ nublanui nam.

⁹“Viɖe kae le eme ne donyeme

gblẽ alo ne meyi ɖe aʋlime?

Ɖe ʋuʋudedi akafu wòa?

Ɖe wòaɖe gbeƒã wò nuteƒewɔwɔa?

¹⁰See, O! Yehowa, eye nàkpɔ nye nublanui;

O! Yehowa, kpe ɖe ŋunye.”

¹¹Èna nye avifafa zu ɣeɖuɖu;

èɖe akpanya le ŋutinye hetsɔ dzidzɔkpɔkpɔ do nam,

¹²ale be nye dzi nadzi ha na wò, eye mazi ɖoɖoe o.

O! Yehowa, nye Mawu,

mada akpe na wò tegbetegbe.

Psalmo 31

David ƒe ha na hɛnɔ la.

¹O! Yehowa, mewòe mebe ɖo;

mègana ŋu nakpem akpɔ gbeɖe o;

ɖem le wò dzɔdzɔenyenye la ta.

²Ƒu to anyi ɖe ŋunye, va kaba nàɖem,

nànye nye xɔxɔ ƒe agakpe

kple mɔ sesẽ ne nàɖem.

³Le wò ŋkɔ la ta, kplɔm, eye nàfia mɔm,

elabena wòe nye nye agakpe kple mɔ sesẽ.

⁴Ɖem le mɔ si woɖo ɖi nam la me,

elabena wòe nye nye mɔ sesẽ.

⁵Asiwò me metsɔ nye gbɔgbɔ de, eya ta Yehowa,

nyateƒe ƒe Mawu, va nàɖem.

⁶Metsri ame siwo ku ɖe legba maɖinuwo ŋu;

ke nye la meku ɖe Yehowa ŋu.

⁷Makpɔ dzidzɔ, eye matso aseye le wò lɔlɔ̃ la me,

elabena èkpɔ nye hiã henya nye luʋɔ ƒe nuxaxa.

⁸Mètsɔm de asi na nye futɔ o,

ke boŋ èɖo nye afɔ gbadzaƒe.

⁹O! Yehowa, kpɔ nublanui nam,

elabena nye dzi ʋu dzo,

nuxaxa na nye ŋkuwo dzi wɔ dɔ̃ɔ,

eye konyifafa na nye luʋɔ kple ŋutilã gbɔdzɔ.

¹⁰Vevesese sɔŋ yɔ nye agbe me,

eye ŋeŋe xɔ nye agbenɔƒewo me.

Ŋusẽ vɔ le ŋunye le nye fukpekpewo ta,

eye nye ƒuwo hã nyunyɔ ɖe lãme nam.

¹¹Le nye futɔwo ƒe nuwɔnawo ta mezu alɔmeɖenu na nye

aƒelikawo vevie ŋutɔ.

Mezu ŋɔdzinu na xɔ̃nyewo,

eye ame siwo do gom le mɔtata dzi la sina le nunye.

¹²Woŋlɔm be abe ɖe meku xoxo ene,

ale mezu ze gbagbã.

¹³Mese ame geɖewo ƒe ameŋugblẽnyawo;

ŋɔdzi ɖe to ɖem, wode adaŋu tso ŋunye,

eye woɖo nugbe be yewoaɖe nye agbe ɖa.

¹⁴Ke wò, Yehowa, dzie meka ɖo;

megblɔ be, “Wòe nye nye Mawu.”

¹⁵Nye ɣeyiɣiwo le asiwò me;

ɖem tso nye futɔwo kple ame siwo

le yonyeme tim la ƒe asi me.

¹⁶Na wò mo naklẽ ɖe wò dɔla dzi,

ɖem le wò lɔlɔ̃ si meʋãna o la ta.

¹⁷O! Yehowa, mègana ŋu nakpem o,

elabena wòe medo ɣli na;

ke na ŋu nakpe ame vɔ̃ɖiwo,

eye ɖoɖoe nazi le wo nu le yɔme.

¹⁸De ga nu na woƒe alakpanuyiwo,

elabena wotsɔa dada

kple ɖekematsɔleme gblɔa nya vlo ɖe ame dzɔdzɔe ŋu.

¹⁹Wò nu nyui siwo nèdzra ɖo ɖi na

ame siwo vɔ̃a wò la lolo ŋutɔ.

Nu nyui siwo nèkɔ ɖe ame siwo

si wò tso dzi le amewo ƒe ŋkume la lolo.

²⁰Èɣla wo ɖe ɣaɣlaƒe si le gbɔwò,

tso amewo ƒe ayemenuwo gbɔ.

Èɣla wo ɖe nɔwòƒe be

woanɔ dedie tso aɖeɖiƒoame gbɔ.

²¹Woakafu Yehowa,

elabena eɖe eƒe nukulɔlɔ̃ la fiam

le esime mele du si ŋu woƒu kpo ɖo la me.

²²Megblɔ le nye dzikatsoƒo me be:

“Woɖem ɖa le wò ŋkume azɔ!”

Ke hã la, èse nye nublanuiɣlidodo

esi meyɔ wò be nàxɔ nam.

²³Milɔ̃ Yehowa, mi eƒe ame kɔkɔewo!

Yehowa kpɔa nuteƒewɔlawo ta,

ke eɖoa eteƒe na dadalawo wòsɔa gbɔ dea

woƒe nuwɔnawo nu.

²⁴Misẽ ŋu, eye milé dzi ɖe ƒo, mi ame siwo katã tsɔ

miaƒe mɔkpɔkpɔ de Yehowa me.

Psalmo 32

David ƒe nufiameha.

¹Woayra ame si wotsɔ eƒe dzidadawo kee,

eye wotsyɔ nu eƒe nu vɔ̃wo dzi.

²Woayra ŋutsu si Aƒetɔ la meɖe vodada na o,

eye alakpa mele eƒe gbɔgbɔ me o.

³Esi mezi ɖoɖoe la,

nye ŋeŋe atraɖii ŋkeke blibo la katã na nye ƒuwo nyunyɔ.

⁴Elabena wò asi sẽ ɖe dzinye zã

kple keli katã, eye ŋusẽ vɔ le ŋunye

abe dzomeŋɔli ƒe dzoxɔxɔ mee mele ene. Sela

⁵Tete meɖe nye nu vɔ̃wo fia wò,

eye nyemetsyɔ nu nye dzidadawo dzi o.

Megblɔ be, “Maʋu nye dzidadawo me na Yehowa”,

eye nètsɔ nye nu vɔ̃wo ƒe yomedzenuwo kem. Sela

⁶Mawumemewo katã nedo gbe ɖa na wò zi ale si nèli kpli wo,

elabena enye nyateƒe be ne tɔsisi gãwo ɖɔ la, womade wo gbɔ o.

⁷Wòe nye nye bebeƒe,

àɖem tso xaxa me, eye àtsɔ ɖeɖe

ƒe aseyetsohawo aƒo xlãm. Sela

⁸Mafia nu wò, eye mafia mɔ si nàto la wò.

Maxlɔ̃ nu wò, eye makpɔ tawò.

⁹Mèganɔ abe sɔ alo tedzisɔ

siwo nunya mele tagbɔ na o la ene o,

elabena ele be woade ka

kple numega nu me na wo hafi amla wo,

ne menye nenema o la,

womate ŋu ate ɖe ŋuwò o.

¹⁰Ame vɔ̃ɖiwo kpea fu geɖe,

ke Yehowa ƒe lɔlɔ̃ si meʋãna o la ƒoa xlã

ame siwo ɖoa dzi ɖe eŋu la.

¹¹Mikpɔ dzidzɔ, eye mitso aseye ɖe Yehowa ŋu,

mi ame dzɔdzɔewo;

midzi ha, mi ame siwo katã ƒe dzi le dzɔdzɔe!

Psalmo 33

¹Midzi ha kple dzidzɔ na Yehowa,

mi ame dzɔdzɔewo;

edze mi ame siwo ƒe dzi to

mɔ ɖeka la be woakafui.

²Mikafu Yehowa kple kasaŋkuwo,

eye miƒo ha nɛ le ka ewo ƒe kasaŋku dzi.

³Midzi ha yeye nɛ;

miƒo ha nɛ kple ŋusẽ, eye míado dzidzɔɣli.

⁴Elabena Yehowa ƒe nya nye nyateƒe, eye wòto mɔ ɖeka;

etoa nyateƒe le nu siwo katã wòwɔna la me.

⁵Yehowa lɔ̃a dzɔdzɔenyenye kple nuteƒewɔwɔ;

anyigba yɔ fũu kple eƒe lɔlɔ̃ si meʋãna o.

⁶Yehowa ƒe nya wotsɔ wɔ dziƒowoe,

eye eƒe numegbɔgbɔ wotsɔ wɔ wo ŋuti nuwoe.

⁷Eƒo atsiaƒumetsiwo nu ƒu ɖe kpluwo me,

eye wòdzra tɔ goglowo ɖo ɖe nudzraɖoƒewo.

⁸Anyigba katã nevɔ̃ Yehowa,

eye xexemetɔwo katã nede bubu eŋu.

⁹Elabena eƒo nu, eye wòva dzɔ;

eɖe gbe, eye wòli ke goŋgoŋgoŋ.

¹⁰Yehowa gblẽ dukɔwo ƒe adaŋudedewo me,

eye wòtɔtɔ anyigbadzitɔwo ƒe ɖoɖowo.

¹¹Ke Yehowa ya ƒe ɖoɖowo nɔa anyi maʋamaʋãe ɖikaa,

eye eƒe dzimesusuwo li tso dzidzime yi dzidzime.

¹²Woayra dukɔ si ƒe Mawue nye Yehowa,

ame siwo wòtia be woanyi yeƒe dome.

¹³Yehowa bi kɔ tso dziƒo ke,

eye wòkpɔ amegbetɔviwo katã.

¹⁴Ele eƒe nɔƒe ke hekpɔ

ame siwo katã le anyigba dzi,

¹⁵eya ame si wɔ ame sia ame ƒe dzi,

eye wòléa ŋku ɖe nu sia nu si wowɔna la ŋu.

¹⁶Aʋakɔ gbogbo si le fia aɖe si la mate ŋu aɖee o,

eye ŋusẽ triakɔ hã meɖea kalẽtɔ o.

¹⁷Ne eɖo ɖeɖe dzi la,

sɔ maɖe ame si tsɔ eƒe mɔkpɔkpɔ da ɖe edzi o,

togbɔ be ŋusẽ triakɔ le esi hã la,

mate ŋu aɖee o.

¹⁸Ke Yehowa ƒe ŋku le ame siwo vɔ̃nɛ la ŋu,

ame siwo tsɔa woƒe mɔkpɔkpɔ dana ɖe

eƒe lɔlɔ̃ si meʋãna o la dzi,

¹⁹be wòaɖe wo tso ku ƒe asi me,

eye wòana woatsi agbe le dɔŋɔli.

²⁰Míele lalam le mɔ kpɔm na Yehowa,

eyae nye míaƒe xɔname kple akpoxɔnu.

²¹Míaƒe dziwo le dzidzɔ kpɔm le eya amea me,

elabena mieka ɖe eƒe ŋkɔ kɔkɔe la dzi.

²²O! Yehowa, na wò lɔlɔ̃ si meʋãna o la,

nanɔ mía dzi abe ale si míetsɔ míaƒe

mɔkpɔkpɔ da ɖe dziwò ene.

Psalmo 34

David ƒe ha. Ekpa ha sia esime wòdo aɖaʋatɔ eɖokui le Abimelek ŋkume, eye wònyae wòdzo.

¹Mado Yehowa ɖe dzi ɣe sia ɣi;

eye eƒe kafukafu anɔ nye nu me ɖaa.

²Nye luʋɔ aƒo adegbe le Yehowa me,

ame siwo le veve sem la nesee ne woakpɔ dzidzɔ.

³Mido kɔkɔ Yehowa kplim;

mina míawɔ ɖeka ado eƒe ŋkɔ ɖe dzi.

⁴Meyɔ Yehowa, eye wòtɔ nam heɖem tso nye vɔvɔ̃wo katã me.

⁵Ame siwo tsɔ woƒe ŋku da ɖe edzi la aklẽ,

ŋukpe matsyɔ mo na wo o.

⁶Hiãtɔ sia yɔe, eye Yehowa ɖo toe,

heɖee le eƒe xaxawo katã me.

⁷Yehowa ƒe dɔlawo ƒua asaɖa anyi ƒoa xlã

ame siwo vɔ̃nɛ, eye wòɖea wo.

⁸Miɖɔe kpɔ, ne miakpɔe be Yehowa ƒe dɔ me nyo;

woayra ŋutsu si be ɖe eya amea me.

⁹Mivɔ̃ Yehowa, mi eƒe ame kɔkɔewo,

elabena naneke mehiãa ame siwo vɔ̃nɛ la o.

¹⁰Dɔ awu dzatawo, eye woagbɔdzɔ,

gake ame siwo dia Yehowa ya la, kesinɔnu aɖeke mahiã wo o.

¹¹Miva, vinyewo, miɖo tom,

ne mafia Yehowavɔvɔ̃ mi.

¹²Mia dometɔ siwo lɔ̃ agbe,

eye miedi be miakpɔ ŋkekenyui geɖewo la,

¹³mikpɔ miaƒe aɖewo dzi nyuie tso vɔ̃ ŋuti,

eye miaƒe nuyiwo tso aʋatsokaka ŋuti.

¹⁴Mite ɖa le vɔ̃ gbɔ, eye miawɔ nu nyui,

midi ŋutifafa, eye miati eyome.

¹⁵Yehowa ƒe ŋku le ame dzɔdzɔewo ŋu,

eye eƒe towo le woƒe ɣlidodo ŋu;

¹⁶ke Yehowa klẽa ŋku ɖe nu vɔ̃ɖi wɔlawo be wòaɖe wo ɖa

le anyigba dzi, eye womagaɖo ŋku wo dzi akpɔ o.

¹⁷Ame dzɔdzɔewo do ɣli,

Yehowa see, eye wòɖe wo le woƒe xaxawo katã me.

¹⁸Yehowa tsɔ ɖe ame siwo ƒe dzi gbã gudugudu la gbɔ,

eye wòɖea ame siwo ƒe gbɔgbɔ wogbã ƒu anyi.

¹⁹Ame dzɔdzɔe ƒe fukpekpewo sɔ gbɔ ŋutɔ,

gake Yehowa ɖenɛ le wo katã me;

²⁰ekpɔa eƒe ƒuwo katã ta,

eye womaŋe wo dometɔ aɖeke o.

²¹Dzɔgbevɔ̃e awu ame vɔ̃ɖi,

eye woabu fɔ ame dzɔdzɔewo ƒe futɔwo.

²²Yehowa ɖea eƒe dɔlawo,

eye womabu fɔ ame siwo katã sinɛ tsona la o.

Psalmo 35

David ƒe ha.

¹O! Yehowa, wɔ avu kple ame siwo le avu wɔm kplim;

wɔ aʋa kple ame siwo le aʋa wɔm kplim.

²Tso, tsɔ akpoxɔnu kple wò akɔtatsyɔnu, eye nàxɔ nam.

³Tsɔ akplɔ nueveetɔ kple nuɖekɛtɔ ɖe yonyemetilawo ŋuti.

Gblɔ na nye luʋɔ be,

“Nyee nye wò xɔname.”

⁴Ame siwo le nye agbe yome tim la,

ŋukpe kple vlododo nelé wo,

eye ame siwo le nugbe ɖom ɖe nye gbegblẽ ŋu la,

gbegblẽ netrɔ va woawo ŋutɔ dzi.

⁵Wonenɔ abe bli ƒe atsa si ya lɔ ɖe nu ene,

eye Yehowa ƒe dɔla nenya wo ɖe du nu;

⁶woƒe mɔ dzi nedo viviti, ahanɔ ɖiɖim,

eye Yehowa ƒe dɔla neti wo yome.

⁷Esi nyemewɔ naneke wo o,

gake woɖo ɖɔ ɖi nam, eye woɖe ʋe ɖi nam ta la,

⁸gbegblẽ neƒo ɖe wo dzi kpoyi,

ɖɔ si woɖo nam la neɖe woawo ŋutɔ,

eye woage dze ʋe si woɖe ɖi nam la me aƒaƒã ɖe afi ma.

⁹Ekema nye luʋɔ atso aseye le Yehowa me,

eye wòadzɔ dzi le eƒe xɔname ŋuti.

¹⁰Nye ameti blibo la katã mado ɣli be,

“O! Yehowa, ame kae sɔ kpli wò?

Wò ame si ɖe ame beliwo tso

ame siwo sesẽ wu wo la ƒe asi me,

eye nèɖe hiãtɔwo kple ame dahewo tso

ame siwo ha wo la ƒe asi me.”

¹¹Ɖasefo ŋutasẽlawo zɔ va ŋgɔgbe,

eye wobia biabiam tso nu

siwo ŋuti nyemenya naneke le o.

¹²Wotsɔ vɔ̃ ɖo nyui teƒe nam,

eye wogble nye luʋɔ ɖe nuxaxa me.

¹³Gake ne wodze dɔ la,

metaa akpanya, eye metsɔa nutsitsidɔ bɔbɔa ɖokuinyee.

Ne womeɖo nye gbedodoɖa ŋuti nam o la,

¹⁴menɔa yiyim kpokpokpo le nuxaxa me abe xɔ̃nye

alo nɔviŋutsu fam mele ene.

Medea mo to abe danye ƒe ku fam mele ene.

¹⁵Gake ne mekli nu la,

woƒoa ƒu koa nu hahaha,

eye ne mele vo me la, futɔwo va ɖea to ɖem.

Woɖea alɔme le ŋunye madzudzɔmadzudzɔe.

¹⁶Woɖua fewu le ŋunye vevesesetɔe,

eye woɖua aɖukli ɖe ŋunye abe mawumavɔ̃lawo ene.

¹⁷O! Aƒetɔ, va se ɖe ɣe ka ɣi nànɔ te akpɔ wo ase ɖo?

Ɖe nye agbe tso woƒe nu gbegblẽwo me,

ɖe nye agbe xɔasi tso dzata siawo ƒe asi me.

¹⁸Ekema mada akpe na wò le ameha gã la dome,

eye makafu wò le ame gbogbowo dome.

¹⁹Mègana ame siwo nye nye futɔwo la nakpɔ dziɖuɖu

ƒe dzidzɔ ɖe ŋunye yakatɔe o,

eye mègana ame siwo lé fum susumanɔmetɔe la

nate ŋku ɖem kple vevesese o.

²⁰Womeƒoa nu ŋutifafatɔe o,

ke boŋ woɖoa alakpa ƒe amenutsonyawo ɖi ɖe

ame siwo le anyigba dzi kpoo la ŋuti.

²¹Wokea woƒe nu baa ɖe ŋutinye hegblɔna be,

“Ɛhɛ̃! Ɛhɛ̃! Míawo ŋutɔ míekpɔe kple míaƒe ŋkuwo.”

²²O! Yehowa, èkpɔ esia, eya ta mègazi ɖoɖoe o.

O! Aƒetɔ, mèganɔ adzɔge nam o.

²³Nyɔ, tso nàʋli tanye!

Wɔ avu ɖe nunye,

nye Mawu kple nye Aƒetɔ.

²⁴Tso afia nam le wò dzɔdzɔenyenye la ta,

O! Yehowa, nye Mawu,

mègana woakpɔ dziɖuɖu ƒe dzidzɔ ɖe ŋutinye o.

²⁵Mègana woabu be,

“Ɛhɛ̃, esia tututu dim míele” o.

Alo agblɔ be, “Míemii agbagbee” o.

²⁶Ame siwo katã le dzidzɔ kpɔm tso nye xaxa ŋuti la,

ŋukpe nelé wo, eye woatɔtɔ;

na be ame siwo kɔ wo ɖokuiwo dzi ɖe ŋutinye la

nata ŋukpe kple vlododo abe avɔ ene.

²⁷Ke ame siwo dzɔ dzi be nètso afia nam la

nedo dzidzɔɣli kple aseyetsoɣli.

Wonenɔ gbɔgblɔm ɖaa be,

“Woado Yehowa, ame si dzɔa dzi le eƒe dɔla

ƒe dedinɔnɔ ŋu la ɖe dzi.”

²⁸Nye aɖe aƒo nu le wò dzɔdzɔenyenye ŋuti,

eye wòadzi wò kafukafuha ɖaa.

Psalmo 36

David, Yehowa ƒe dɔla, ƒe ha na hɛnɔ la.

¹Yehowa ƒe gbedeasi aɖe le nye dzi me tso

ame vɔ̃ɖi ƒe nu vɔ̃ wɔwɔ ŋuti.

Mawuvɔvɔ̃ aɖeke mele woƒe ŋkuwo me o.

²Elabena le eya ŋutɔ ŋkume,

wòvivi nu me na eɖokui ale gbegbe be

mete ŋu kpɔ eƒe nu vɔ̃ dze sii

alo wòagbe nu le egbɔ o.

³Eƒe numenyawo vɔ̃ɖi,

henye beble sɔŋ, eye wòdzudzɔ nuwɔwɔ ɖe nunya me

kple nu nyui wɔwɔ.

⁴Eɖoa nu vɔ̃ɖi le eƒe aba dzi,

etsɔa eɖokui dea asi na nu si nye vɔ̃,

eye megbea nu si nye nu gbegblẽ o.

⁵O! Yehowa, wò lɔlɔ̃ kɔ ɖatɔ dziƒowo ke,

eye wò nuteƒewɔwɔ tɔ dziŋgɔli ke.

⁶Wò dzɔdzɔenyenye le abe to gãwo ene,

eye wò afiatsotso le abe tɔ goglo ene.

O! Yehowa, èkpɔa amegbetɔwo kple lãwo siaa ta.

⁷Wò lɔlɔ̃ si meʋãna o la xɔ asi loo!

Ame siwo ŋuti bubu le

kple ame siwo ŋuti mele o,

le amegbetɔviwo dome siaa kpɔa sitsoƒe

le wò aʋala ƒe vɔvɔli te.

⁸Wò aƒemenu gbogboawo nye nuɖuɖu na wo,

eye nènaa tsi wo wonona tso wò dzidzɔtɔsisi la me.

⁹Elabena gbɔwòe agbe ƒe tsitsetse la le,

eye wò kekeli mee míekpɔa kekeli le.

¹⁰Yi edzi nàɖe wò lɔlɔ̃ afia ame siwo nya wò,

eye nàɖe wò dzɔdzɔenyenye afia

ame siwo ƒe dzi to mɔ ɖeka.

¹¹Dadalawo megaɖo afɔ dzinye,

alo ame vɔ̃ɖiwo ƒe asi nanyam o.

¹²Kpɔ ale si nu vɔ̃ɖi wɔlawo dze anyi ɖe anyigbae ɖa;

wotutu wo ƒu anyi, eye womete ŋu fɔ o!

Psalmo 37

David ƒe ha.

¹Mègadzo nyanyanya le ame vɔ̃ɖiwo ta,

alo aʋã ŋu nu tovo wɔlawo o

²elabena esusɔ vie woayrɔ abe gbe ene,

eye abe gbe mumu ene la, woaku wo atsɔ aƒu gbe.

³Ɖo dzi ɖe Yehowa ŋu, eye nàwɔ nyui;

nɔ anyigba la dzi, eye nàɖu eƒe nu nyuiwo le dziɖeɖi me.

⁴Yehowa ƒe nu nenyo ŋuwò ekema ana nu

siwo wò dzi di la wò.

⁵Tsɔ wò mɔwo gblẽ ɖe Yehowa ƒe asi me;

ɖo dzi ɖe eŋu, eye awɔ esia na wò.

⁶Ana wò dzɔdzɔenyenye nàdze abe ŋdikekeli ene,

eye wò dzɔdzɔenyenye ƒe mɔ abe ŋdɔkutsuɣe ene.

⁷Zi kpoo le Yehowa ŋkume,

eye nànɔ eƒe asinu kpɔm le dzigbɔɖi me.

Ne amewo ƒe mɔwo dze edzi na wo,

eye wote ŋu wɔ nu vɔ̃ɖi siwo woɖo la,

mègavɔ̃ nàdzo nyanyanya o.

⁸Ɖe asi le dziku ŋu, eye nàtrɔ megbe de wò dɔmedzoe,

ŋɔ megadzi wò o,

elabena nu vɔ̃ɖi me ko wòakplɔ wò ayii.

⁹Woatsrɔ̃ ame vlowo

gake ame siwo tsɔ woƒe mɔkpɔkpɔ de

Yehowa me la, anyi anyigba la ƒe dome.

¹⁰Esusɔ vie ko ame vɔ̃ɖi la maganɔ anyi o,

togbɔ be àdi wo hã la, màkpɔ wo o.

¹¹Ke ame fafawo anyi anyigba la ƒe dome,

eye dzi adzɔ wo le ŋutifafa gbogbo la ta.

¹²Ame vɔ̃ɖiwo ɖo nugbe ɖe

ame dzɔdzɔewo ŋu heɖu aɖukli ɖe wo ŋuti.

¹³Ke Aƒetɔ la le ame vɔ̃ɖiwo kom,

elabena enya be woƒe ŋkeke la gbɔna.

¹⁴Ame vɔ̃ɖiwo ɖe woƒe yi,

eye wohe woƒe dati me be woada hiãtɔ

kple ame dahe aƒu anyi,

eye woawu ame siwo ƒe zɔzɔme to mɔ ɖeka.

¹⁵Gake woƒe yiwo aŋɔ woawo ŋutɔ ƒe dziwo,

eye woƒe datiwo aŋe.

¹⁶Nu ʋɛ si le ame dzɔdzɔewo si la nyo wu

kesinɔnu gbogbo siwo le ame vɔ̃ɖiwo si,

¹⁷elabena woaŋe ame vɔ̃ɖiwo ƒe ŋusẽ,

ke Yehowa alé ame dzɔdzɔewo ɖe te.

¹⁸Ame siwo ŋuti fɔɖiɖi mele o la

ƒe ŋkekewo le nyanya na Yehowa,

eye woƒe domenyinu anɔ anyi tegbetegbe.

¹⁹Le ŋkeke vɔ̃wo dzi la, womalũ xɛ o;

le dɔŋɔli la, nuɖuɖu ado agbogbo na woawo ya.

²⁰Ke ame vɔ̃ɖi ya atsrɔ̃.

Yehowa ƒe futɔwo anɔ abe gbe ƒe seƒoƒo ene,

woanya kpɔ nyuie, gake wo nu ava yi,

woabu abe dzudzɔ ene.

²¹Ame vɔ̃ɖi doa nugbana, eye mexea fea o,

ke ame dzɔdzɔe ya naa nu faa.

²²Ame siwo Yehowa yra la anyi anyigba la ƒe dome,

ke ame siwo wòƒo fi de la, woaɖe wo ɖa.

²³Ŋutsu si ƒe mɔwo dze Yehowa ŋu la,

elia ke eƒe afɔɖeɖewo;

²⁴ne ekli nu hã la, madze anyi o

elabena Yehowa tsɔ eƒe asi lée ɖe te.

²⁵Tsã la, menye ɖevi, ke azɔ la metsi,

gake womegble ame dzɔdzɔe aɖeke ɖi mekpɔ kpɔ loo,

alo wo viwo nabia abolo hafi aɖu o.

²⁶Woawo boŋ vea ame nu ɣe sia ɣi,

eye wodoa nugbana na amewo faa;

eya ta wo viwo axɔ yayra.

²⁷Tsri nu vɔ̃ɖi, eye nàwɔ nyui

ekema ànɔ anyigba dzi tegbetegbe.

²⁸Elabena Yehowa lɔ̃a nu dzɔdzɔe wɔlawo,

eye magblẽ eƒe nuteƒewɔlawo ɖi o.

Akpɔ wo ta tegbee,

ke ame vɔ̃ɖi ƒe dzidzimeviwo ya woatsrɔ̃ wo.

²⁹Ame dzɔdzɔe anyi anyigba la ƒe dome,

eye wòanɔ edzi tegbee.

³⁰Nunyanya doa go tso ame dzɔdzɔe ƒe nu me,

eye eƒe aɖe gblɔa nu si le eteƒe.

³¹Eƒe Mawu ƒe se le eƒe dzi me,

eya ta eƒe afɔ meɖiɖina o.

³²Ame vɔ̃ɖiwo de xa ɖi na ame dzɔdzɔewo,

eye wole woƒe ku dim;

³³gake Yehowa matsɔ wo agblẽ ɖe woƒe ŋusẽ te,

alo wòaɖe mɔ be, woabu fɔ wo ne wokplɔ wo va ʋɔnui o.

³⁴Lala nàkpɔ Yehowa ƒe asinu,

eye nàlé eƒe mɔ ɖe asi.

Ado wò ɖe dzi be nànyi anyigba la ƒe dome.

Ne woatsrɔ̃ ame vɔ̃ɖiwo la, àkpɔ eteƒe.

³⁵Mekpɔ ame vɔ̃ɖi,

ŋutasẽla aɖe wòda ama nyuie

abe ati dama si dzɔ kple anyigba la ene.

³⁶Gake eteƒe medidi o ko, enu va yi, eye megali o;

togbɔ be medii hã la, nyemeke ɖe eŋuti o.

³⁷Bu ame maɖifɔ la ŋu,

eye nàlé ŋku ɖe ame dzɔdzɔewo ŋu,

elabena ŋgɔgbe li na ŋutifafamewo katã.

³⁸Ke woatsrɔ̃ nu vɔ̃ wɔlawo katã,

eye woaɖe ame vɔ̃ɖi la ɖa.

³⁹Ame dzɔdzɔewo ƒe xɔxɔ atso Yehowa gbɔ,

eye eyae nye woƒe mɔ sesẽ le xaxaɣeyiɣiwo me.

⁴⁰Ke Yehowa kpena ɖe wo ŋu, eye wòɖea wo tso dzɔgbevɔ̃e me;

eɖea wo tso ame vɔ̃ɖiwo ƒe asi me,

eye wòkpena ɖe wo ŋu,

elabena eyae wosi tso.

Psalmo 38

David ƒe ha. Kukuɖeɖe.

¹O! Yehowa, mègaka mo nam le wò dziku me,

alo ahe to nam le wò dɔmedzoe helĩhelĩ me o,

²elabena wò aŋutrɔwo ƒo ɖem,

eye wò asi sẽ ɖe dzinye.

³Wò dziku helĩhelĩ la wɔe be ŋusẽ aɖeke megale menye o;

nye ƒuwo tugu le nye nu vɔ̃ ta.

⁴Nye dzidada kɔ gbɔ tanye abe agba kpekpe si

nyemate ŋu atsɔ o la ene.

⁵Nye abiwo ƒaƒã hele ʋeʋẽm

le nye bometsitsi ƒe nu vɔ̃ ta.

⁶Wobɔbɔm ɖe anyi, eye woɖi gbɔ̃m,

eye ŋkeke blibo la, mele yiyim le nuxaxa me.

⁷Vevesese manyagblɔ aɖe xɔ nye ame blibo la me,

eye ŋusẽ aɖeke megale nye ameti blibo la ŋu o.

⁸Megbɔdzɔ, hegba gudugudu,

eye mele ŋeŋem le nye dzi ƒe vevesese ta.

⁹O! Aƒetɔ, nye dzimedidiwo katã le ŋkuwò me,

eye nye hũɖeɖewo meɣla ɖe wò o.

¹⁰Nye dzi le tsotsom kpokpokpo,

ŋusẽ vɔ le ŋunye, eye nyemegate ŋu le nu kpɔm o.

¹¹Le nye abiawo ta,

xɔ̃nyewo kple nye zɔhɛwo ƒo asa nam,

eye nye aƒelikawo hã le adzɔge nam.

¹²Ame siwo le nye agbe yome tim la tre mɔ nam,

ame siwo di be yewoawɔ nuvevim la

le nu ƒom tso nye gbegblẽ ŋuti;

ŋkeke blibo la wole ɖoɖo wɔm ɖe alakpadada ŋu.

¹³Mele abe tokunɔ si mate ŋu ase nu o la ene,

eye mele abe aɖetututɔ si mate ŋu aƒo nu o la ene.

¹⁴Mele abe ame si mesea nu o la ene

kple ame si mate ŋu atsɔ eƒe nu aɖo nya aɖeke ŋu o la ene.

¹⁵O! Yehowa, mele asiwò nu kpɔm,

O! Aƒetɔ, nye Mawu, atɔ nam godoo.

¹⁶Elabena megblɔ be, “Mègana be woakpɔ dziɖuɖu ƒe dzidzɔ ɖe ŋutinye,

alo woado wo ɖokui ɖe dzi ɖe ŋutinye ne nye afɔ ɖiɖi o.”

¹⁷Esusɔ vie ko madze anyi,

eye nye vevesese la le edzi ɖaa.

¹⁸Meʋu nye dzidada me,

eye nye nu vɔ̃ ɖe fu nam.

¹⁹Ame geɖewoe nye nye futɔ gãwo,

eye ame siwo lé fum susumanɔmetɔe la sɔ gbɔ ŋutɔ.

²⁰Ame siwo tsɔ vɔ̃ ɖo nyui siwo mewɔ teƒe la

ƒo ɖi nye ŋkɔ,

esi meti nu si nyo la yome.

²¹O! Yehowa, mègagblẽm ɖi o,

O! Nye Mawu, mèganɔ adzɔge nam o.

²²Va kaba, nàɖem,

O! Aƒetɔ, nye Ɖela.

Psalmo 39

David ƒe ha na hɛnɔ Yedutun.

¹Megblɔ be, “Malé ŋku ɖe nye mɔwo ŋu,

akpɔ nye aɖe dzi be mawɔ nu vɔ̃ o,

eye zi ale si ame vɔ̃ɖi la gale ŋkunye me la,

made ga nye nu.”

²Gake esi mezi ɖoɖoe li kpoo,

eye nyemele nya nyui aɖeke gblɔm o hã la,

nye vevesese do ga ɖe edzi.

³Nye dzi xɔ dzo ɖe dɔ me nam;

esi mele ŋugble dem la, exɔ dzo ɖe edzi;

tete meƒo nu kple nye aɖe.

⁴“O! Yehowa, fia nye agbe ƒe nuwuwu

kple ŋkeke ale si manɔ agbee lam;

eye na manya ale si nye agbe le du dzii.

⁵Èwɔ nye ŋkekewo wole abe asi ƒe kekeme ko ene,

eye nye agbenɔɣi menye naneke le ŋkuwò me o.

Amegbetɔ ɖe sia ɖe ƒe agbe le abe ƒuƒu ko ene. Sela

⁶“Amegbetɔ le yiyim, le gbɔgbɔm,

ke vɔvɔli ko wònye.

Ele agbagba dzem, gake wo katã nye nu dzodzro

Eli kɔ kesinɔnuwo gleglegle,

gake menya ame si ƒe asi me woayi ɖo o.

⁷“Aƒetɔ, ke azɔ la, nu ka makpɔ mɔ na?

Nye mɔkpɔkpɔ le mewò.

⁸Ɖem tso nye vodadawo katã me,

eye mègawɔm mazu alɔmeɖenu na yakamewo o.

⁹Mezi ɖoɖoe, nyemake nu o,

elabena wòe wɔ esia.

¹⁰Ɖe wò tohehe si le dzinye la ɖa;

wò asi va dzinye kple ŋusẽ ale metsi anyigba.

¹¹Èkaa mo, eye nèhea to na amewo ɖe woƒe nu vɔ̃wo ta;

ègblẽa woƒe kesinɔnuwo dome abe agbagblaʋui ene,

ale amegbetɔ ɖe sia ɖe le abe ƒuƒu ko ene. Sela.

¹²“O! Yehowa, se nye gbedodoɖa,

nye ɣlidodo hena kpekpeɖeŋu nede to me na wò;

mègado toku nye avifafa o.

Amedzro kple mɔzɔla menye le gbɔwò

abe ale si fofonyewo katã nɔ ene.

¹³Ɖe ŋku ɖa le ŋunye, ale be magakpɔ dzidzɔ hafi mayi,

eye nyemaganɔ anyi o.”

Psalmo 40

David ƒe ha na hɛnɔ la.

¹Mele mɔ kpɔm na Yehowa le dzigbɔɖi blibo me;

etrɔ ɖe ŋutinye, eye wòse nye ɣlidodo.

²Ehem do goe tso ʋe dziŋɔ me,

eye wòɖem tso ba finyafinya me,

hetsɔ nye afɔ ɖo agakpe dzi,

eye wòna meli ke ɖe afi si metɔ ɖo.

³Etsɔ ha yeye de nunye si nye kafukafuha na míaƒe Mawu la.

Ame geɖewo akpɔe,

woavɔ̃e, eye woaɖo dzi ɖe Yehowa ŋu.

⁴Woayra ame si ɖoa dzi ɖe Yehowa ŋu,

ame si mekpɔa dadalawo ƒe asinu,

alo kplɔa ame siwo dze alakpalegbawo yome o.

⁵O! Yehowa, nye Mawu,

wò nukunu siwo nèwɔ la sɔ gbɔ loo!

Ɖoɖo geɖe siwo nèwɔ ɖe mía ŋu la,

ame aɖeke mate ŋu axlẽ wo afia wò o.

Ne ɖe wòanye be maƒo nu le wo ŋu,

eye maxlẽ wo afia la, nyemate ŋui o,

elabena wosɔ gbɔ akpa.

⁶Mèdi vɔsa kple nunana,

alo bia numevɔsa kple akpedavɔsa o,

ke boŋ èʋu nye towo be mase wò gbe,

⁷eya ta meɖo ŋu be,

“Nyee nye si meva;

agbalẽ mee woŋlɔe ɖo tso ŋutinye.

⁸Medi be mawɔ wò lɔlɔ̃nu,

O! Nye Mawu, woŋlɔ wò se la ɖe nye dzi me.”

⁹O! Yehowa, meɖe gbeƒã wò dzɔdzɔenyenye le ameha gã la dome,

eye abe ale si nènya ene la, nyememia nye nu o.

¹⁰Nyemeɣla wò dzɔdzɔenyenye ɖe nye dzi me o,

ke boŋ meƒo nu le wò nuteƒewɔwɔ kple ɖeɖe ŋuti.

Nyemeɣla wò lɔlɔ̃

kple wò nyateƒe la ɖe ameha gã la o.

¹¹O! Yehowa, mègate wo nublanuikpɔkpɔ o,

ke boŋ na be wò lɔlɔ̃ kple wò nyateƒe nakpɔ tanye ɖaa,

¹²elabena fukpekpe siwo mele xexlẽ o la ɖe to ɖem,

nye nu vɔ̃wo wu tsɔtsɔ nam

eye nyemegate ŋu le nu kpɔm o.

Wosɔ gbɔ wu nye taɖa,

eye dzi ɖe le ƒonye.

¹³O! Yehowa, nedze ŋuwò be nàɖem;

O! Yehowa, va kaba nàɖem.

¹⁴Ŋu nekpe ame siwo katã le nye agbe dim ne woaɖe ɖa la;

woƒe mo netsi dãa,

eye ame siwo katã le nye gbegblẽ dim la

negbugbɔ ɖe megbe kple ŋukpe.

¹⁵Ame siwo le gbɔgblɔm ɖe ŋunye be,

“Ehɛ̃! Ehɛ̃!” la ƒe ŋukpe newɔ moya na wo.

¹⁶Ke ame siwo katã dia wò la akpɔ dzidzɔ,

eye woatso aseye akpɔ dzidzɔ le mewò.

Ame siwo lɔ̃a wò ɖeɖe la negblɔ ɖaa be,

“Mido Yehowa ɖe dzi!”

¹⁷Ke nye la, meda ahe, eye hiã le tu yem,

O! Aƒetɔ, ɖo ŋku dzinye. O! Nye Mawu,

wòe nye nye kpeɖeŋutɔ kple nye xɔname,

mègahe ɖe megbe o.

Psalmo 41

David ƒe ha na hɛnɔ la.

¹Woayra ame si tsɔ ɖe le eme na ame dahewo,

Yehowa aɖee le xaxaɣi.

²Yehowa adzɔ eŋu, eye wòakpɔ eƒe agbe ta.

Yehowa ayrae le anyigba dzi,

eye matsɔe ade asi na eƒe futɔwo ƒe didi o.

³Yehowa anɔ kplii le dɔba dzi, eye wòana lãmesesẽe,

afɔe tso dɔba dzi.

⁴Megblɔ be, “O! Yehowa,

kpɔ nublanui nam, yɔ dɔm,

elabena mewɔ nu vɔ̃ ɖe ŋuwò.”

⁵Nye futɔwo le gbɔgblɔm tso ŋunye fewuɖutɔe be,

“Ɣe ka ɣi gɔ̃e wòle kuku ge ne eƒe ŋkɔ natsrɔ̃?”

⁶Ne ame aɖe ɖi tsa va be yeakpɔm ɖa la,

edaa alakpa, eƒe dzi ƒoa ameŋugblẽnyawo nu ƒu,

eye wòdoa go yina kakanɛ.

⁷Nye futɔwo katã le dalĩ dom le ŋutinye,

eye wole nu vɔ̃ɖiwo susum tso ŋutinye le gbɔgblɔm be,

⁸“Dɔléle vɔ̃ɖi aɖe dze edzi,

magatso le afi si wòmlɔ la akpɔ gbeɖe o.”

⁹Xɔ̃nye si tsi metoa nye kplii dome o,

ame si dzi meka ɖo,

eye wòɖua nu kplim la kɔ eƒe afɔkpodzi dzi ɖe ŋutinye.

¹⁰O! Yehowa, ke wò ya kpɔ nye nublanui,

kɔm ɖe dzi be maɖo teƒe na wo.

¹¹Menya be èkpɔ ŋudzedze le ŋutinye,

elabena nye ketɔ meɖu dzinye o.

¹²Le nye nuteƒewɔwɔ ta la, èlém ɖe asi,

eye nètsɔm ɖo wò ŋkume tegbetegbe.

¹³Woakafu Yehowa, Israel ƒe Mawu la

tso mavɔ me yi mavɔ me.

Neva eme, ɛ̃, neva eme.

Agbalẽ evelia

Psalmowo 42–72

Psalmo 42

Korah ƒe viwo ƒe ha na hɛnɔ la.

¹Ale si zinɔ ƒe ve me ƒunae ɖe tɔʋuwo ŋu la,

O! Mawu, nenemae nye luʋɔ le diwòm.

²Tsikɔ le nye luʋɔ wum ɖe Mawu ŋu,

ɖe Mawu gbagbe la ŋu.

Ɣe ka ɣi mayi aɖado go Mawu?

³Nye aɖatsiwo zu nuɖuɖu nam zã kple keli,

evɔ amewo le gbɔgblɔm nam ŋkeke blibo la be,

“Afi ka wò Mawu la le?”

⁴Nu siawo dzi meɖo ŋkue esi meyi ɖokuinye me.

Tsã la, nyee kplɔa amehawo;

menɔa ŋgɔ kplɔa wo yina ɖe gbedoxɔ me,

eye dzidzɔɣli kple kafukafuhawo dea dzi

le ŋkekenyuiɖulawo dome kɔtɔɔ.

⁵O! Nye luʋɔ, nu ka ŋuti nèle nu xam?

Nu ka ta nètsi dzodzodzoe le menye ɖo?

Tsɔ wò mɔkpɔkpɔ da ɖe Mawu dzi,

elabena magakafui,

eya ame si nye nye Ɖela

kple nye Mawu.

⁶Nye luʋɔ le nu xam le menye,

eya ta maɖo ŋku dziwò le Yɔdanyigba dzi,

le Hermon tame ke kple Mizar to dzi.

⁷Tɔ goglo yɔa tɔ goglo le wò tsitsetsewo ƒe howɔwɔ me;

wò tsitsotsoewo kple tsi kpakawo ŋe tsyiɔ dzinye.

⁸Le ŋkeke me la, Yehowa ɖoa eƒe lɔlɔ̃ ɖem,

le zã me la eƒe ha nɔa nunyeme,

eye wònyea gbedodoɖa na nye agbe ƒe Mawu la.

⁹Megblɔ na Mawu, nye Agakpe la be,

“Nu ka ta nèŋlɔm be ɖo?

Nu ka ta manɔ yiyim, anɔ nu xam

le nye futɔwo ƒe teteɖeanyi ta ɖo?”

¹⁰Nye ƒuwo le veve sem, eye nye ketɔwo

le alɔme ɖem le ŋunye,

le gbɔgblɔm nam ŋkeke blibo la be,

“Afi ka wò Mawu la le?”

¹¹O! Nye luʋɔ, nu ka ta nèle nu xam ɖo?

Nu ka ta nètsi dzodzodzoe le menye ɖo?

Tsɔ wò mɔkpɔkpɔ da ɖe Mawu dzi,

elabena magakafui,

eya ame si nye nye Ɖela kple nye Mawu.

Psalmo 43

¹O! Mawu, tso afia nam,

eye nàʋli tanye le mawumavɔ̃lawo dome,

ɖem tso ame vɔ̃ɖiwo kple ameblelawo ƒe asi me.

²Wòe nye Mawu, nye mɔ sesẽ.

Nu ka ta nègbem ɖo?

Nu ka ta manɔ yiyim, anɔ nu xam

le nye futɔwo ƒe teteɖeanyi ta ɖo?

³Ɖo wò kekeli kple nyateƒe ɖa, ne woakplɔm;

na woakplɔm ayi ɖe wò to kɔkɔe la dzi, afi si nènɔna.

⁴Ekema mayi ɖe Mawu ƒe vɔsamlekpui ŋgɔ,

Mawu si nye nye aseyetsotso kple nye dzidzɔ.

O! Mawu, nye Mawu, makafu wò kple kasaŋku.

⁵O! Nye luʋɔ, nu ka ta nèle nu xam ɖo?

Nu ka ta nètsi dzodzodzoe le menye ɖo?

Tsɔ wò mɔkpɔkpɔ da ɖe Mawu dzi,

elabena magakafui,

eya ame si nye nye Ɖela kple nye Mawu.

Psalmo 44

Korah ƒe viwo ƒe nufiameha na hɛnɔ la.

¹O! Mawu, míawo ŋutɔ míesee

kple míaƒe towo, nu siwo mía fofowo gblɔ na

mí tso nu siwo nèwɔ na wo le woƒe ɣeyiɣiwo me le blema.

²Ètsɔ wò asi nya dukɔwo,

eye nètsɔ mía fofowo ɖo wo teƒe.

Ègbã dukɔwo gudugudu,

ke èna mía fofowo ya dzi ɖe edzi.

³Anyigba mesu wo si to

woawo ŋutɔ ƒe yi dzi loo,

alo woawo ŋutɔ ƒe alɔe ɖu dzi na wo o,

ke boŋ wò nuɖusi,

wò alɔ kple wò mo ƒe kekelie xɔ na wo,

elabena èlɔ̃ wo.

⁴Wòe nye nye Fia kple nye Mawu,

wòe he dziɖuɖuwo vɛ na Yakob.

⁵To dziwò míetutu míaƒe futɔwo do ɖe megbe,

eye to wò ŋkɔ me míenya avuzi le míaƒe futɔwo dzi.

⁶Nyemeɖo ŋu ɖe nye aŋutrɔ ŋu o,

eye nye yi mehe dziɖuɖu vɛ nam o,

⁷ke boŋ èna míeɖu míaƒe ketɔwo dzi,

eye nèna ŋukpe lé míaƒe adikatɔwo.

⁸Míetsɔ Mawu ƒo adegbe ŋkeke blibo la,

eye míakafu wò ŋkɔ tegbetegbe. Sela

⁹Ke azɔ la, ègbe mí, eye nèbɔbɔ mí ɖe anyi;

azɔ la, mègadona kple míaƒe aʋakɔwo o.

¹⁰Èna míegbugbɔ ɖe megbe le míaƒe futɔwo ŋgɔ,

eye míaƒe ketɔwo ha mí.

¹¹Ètsɔ mí na be woavuvu mí abe alẽwo ene,

eye nèkaka mí ɖe dukɔwo dome.

¹²Ètsɔ wò dukɔ la dzra ho kpɔtsɔe

eye mèkpɔ naneke le wo dzadzra me o.

¹³Ètsɔ mí wɔ vlodonu na míaƒe aƒelikawo,

eye míezu alɔmeɖenu kple nu ɖikokoe na ame siwo ƒo xlã mí.

¹⁴Ètsɔ mí wɔ lodonu le dukɔwo dome,

eye amewo ʋuʋua ta ɖe mía ŋu ne wokpɔ mí.

¹⁵Nye vlododo le ŋkunye me ŋkeke blibo la,

eye ŋukpe tsyɔa mo nam,

¹⁶ne vlodolawo, fewuɖulawo le nunye ɖiam,

elabena futɔ la ɖoe kplikpaa be yeabia hlɔ̃m.

¹⁷Togbɔ be míeŋlɔ wò be,

alo da alakpa le wò nubabla la me o hã

la, èna nu siawo katã va mía dzi.

¹⁸Míaƒe dziwo metrɔ le yowòme o,

eye míaƒe afɔwo hã metra le wò mɔ dzi o.

¹⁹Gake ègbã mí gudugudu hegble mí ɖe amegaxiwo dome,

eye nètsɔ viviti tsiɖitsiɖi tsyɔ mía dzi.

²⁰Nenye ɖe míeŋlɔ míaƒe Mawu ŋkɔ be,

alo ke míaƒe abɔwo na dzromawu aɖe la,

²¹ɖe Mawu manya esi wònya

dzimenu ɣaɣlawo katã oa?

²²Gake le tawò la, míekpɔa ku ŋkeke blibo la,

eye wobua mí abe alẽ siwo wokplɔ yina wuwu ge la ene.

²³Nyɔ, O Aƒetɔ! Nu ka ta nèle alɔ̃ dɔm ɖo?

Fɔ! Mègagbe mí ɖikaa o.

²⁴Nu ka ta nèɣla wò mo,

eye nèŋlɔ míaƒe hiãkame kple teteɖeanyi be ɖo?

²⁵Wohe mí ƒu ke me,

eye míaƒe ŋutilã lé ɖe anyigba.

²⁶Tso, nàxɔ na mí,

ɖe mí le wò lɔlɔ̃ si meʋãna o la ta.

Psalmo 45

Korah ƒe viwo ƒe nufiameha si nye srɔ̃ɖeha na hɛnɔ la, ne woadzi ɖe dzogbenya ƒe gbeɖiɖi nu.

¹Nya nyuiwo le fiefiem le nye dzi me

esi mele ha sia kpam na fia la,

eye nye aɖee nye nuŋlɔla adodoea ƒe nuŋlɔti.

²Èdze ɖeka wu ŋutsuwo katã,

wotsɔ amenuveve si ami na wò nuyi,

elabena Mawu yra wò tegbee.

³O! Kalẽtɔ, tsɔ wò yi ta ɖe ali,

eye nàtsɔ wò atsyɔ̃ kple gãnyenye ata.

⁴Do sɔ dziɖuɖutɔe le wò fianyenye me.

Le nyateƒe, ɖokuibɔbɔ kple dzɔdzɔenyenye me,

na wò nuɖusi naɖe wò nuwɔwɔ dziŋɔwo afia.

⁵Na wò aŋutrɔ ɖaɖɛwo naŋɔ fia la ƒe futɔwo ƒe dzi,

eye na dukɔwo nadze anyi ɖe wò afɔ nu.

⁶O! Mawu, wò fiazikpui ali ke tso mavɔ me yi ɖe mavɔ me,

wò fiaɖuƒe la ƒe tsiamiti anye nuteƒewɔwɔ ƒe atikplɔ.

⁷Èlɔ̃ dzɔdzɔenyenye, eye nètsri nu vɔ̃ɖi wɔwɔ;

eya ta Mawu, wò Mawu la

ɖo wò nèkɔ gbɔ fia bubuwo ta to dzidzɔkpɔkpɔ

ƒe amisisi na wò me.

⁸Kotoklobo, lifi kple atike ʋeʋĩ le ya ɖem le wò awuwo me.

Kasaŋkuwo na nèle aseye tsom le wò nyiɖufiasawo me.

⁹Fiavinyɔnuwo le wò nyɔnu bubumewo dome,

eye fiasrɔ̃ si do Ofir Sikanuwo la nɔ wò nuɖusime.

¹⁰O! Vinyɔnu, ɖo to, nàbu eŋu, eye nàƒu to anyi.

Ŋlɔ wò dukɔ kple fofowò ƒe aƒe la be.

¹¹Wò tugbedzedze wɔ dɔ ɖe fia la dzi ŋutɔ,

eya ta de bubu eŋu, elabena eyae nye wò aƒetɔ.

¹²Tiro vinyɔnu atsɔ nunana vɛ,

eye ŋutsu kesinɔtɔwo ava bia amenuveve tso gbɔwò.

¹³Fiavinyɔnu la nye keklẽ sɔŋ le eƒe xɔ me;

eye wotsɔ sika lé ɖe eƒe awu legbe ƒe teƒeteƒewo keŋ.

¹⁴Edo awu legbe si wolɔ̃ kple ka,

eye wokplɔe va fia la gbɔe;

eƒe dɔlanyɔnu siwo menya ŋutsu o la kplɔe ɖo,

eye wokplɔ wo vɛ na wò.

¹⁵Wokplɔ wo ge ɖe eme le dzidzɔkpɔkpɔ kple aseyetsotso me,

ale woge ɖe fiasã la me.

¹⁶Mía viŋutsuwo axɔ ɖe mía fofowo teƒe,

eye míawɔ wo fiaviwo le anyigba la katã dzi.

¹⁷Mana woaɖo ŋku dziwò le dzidzimewo katã me,

eya ta dukɔwo akafu wò tso mavɔ me yi ɖe mavɔ me.

Psalmo 46

Korah ƒe viwo ƒe ha na hɛnɔ la, ne woadzi ɖe alamot ƒe gbeɖiɖi nu.

¹Mawue nye míaƒe sitsoƒe kple ŋusẽ,

xɔnametɔ si li ɖaa kpli mí le xaxawo me.

²Eya ta ne anyigba gli le zi dzi hã la, míavɔ̃ o,

ne towo ho ɖadze atsiaƒu me,

³eye atsiaƒutsi ɖe gbe lɔ futukpɔ ɖe nu,

ale be towo dzo kpekpekpe

le eƒe howɔwɔ ta hã la, míavɔ̃ o. Sela

⁴Tɔsisi aɖe li,

esi ƒe tsiwo doa dzidzɔ na Mawu ƒe du,

teƒe kɔkɔe, afi si Dziƒoʋĩtɔ la nɔna.

⁵Mawu le afi ma, eya ta mamu adze anyi o.

Mawu akpe ɖe eŋu ne ŋu ke teti.

⁶Hoowɔwɔ ɖo dukɔwo me, fiaɖuƒewo mu;

ekɔ eƒe gbe dzi, tete anyigba lolo.

⁷Yehowa, Dziƒoʋakɔwo ƒe Aƒetɔ la li kpli mí,

Yakob ƒe Mawu la nye míaƒe mɔ sesẽ. Sela

⁸Miva kpɔ Yehowa ƒe dɔwɔwɔwo ɖa,

miva kpɔ gbegblẽ si wòhe va anyigba dzi la ɖa.

⁹Ena aʋawɔwɔ nu tso va se ɖe keke anyigba ƒe mlɔenu ke;

eŋe da, eye wòfli akplɔ,

hetɔ dzo akpoxɔnuwo.

¹⁰“Ɖe dzi ɖi, eye nànya be nyee nye Mawu.

Woadom ɖe dzi le dukɔwo dome,

eye woadom ɖe dzi le anyigba dzi.”

¹¹Yehowa Dziƒoʋakɔwo ƒe Aƒetɔ la li kpli mí,

Yakob ƒe Mawu la nye míaƒe mɔ sesẽ. Sela.

Psalmo 47

Korah ƒe viwo ƒe ha na hɛnɔ la.

¹Miƒo asikpe, mi dukɔwo katã.

Mitso aseye ɖe Mawu ŋu kple ɣli.

²Ŋɔdzi le Yehowa Dziƒoʋĩtɔ la ŋu ale gbegbe,

eyae nye Fiagã ɖe anyigba la katã dzi!

³Ebɔbɔ dukɔwo ɖe mía te,

eye wòtsɔ anyigbadzitɔwo de míaƒe afɔ te.

⁴Etia míaƒe domenyinu na mí si nye dada na Yakob,

ame si wòlɔ̃. Sela

⁵Mawu yi dzi kple aseyetsotso,

Yehowa yi dzi kple kpẽ ƒe ɖiɖi.

⁶Midzi kafukafuhawo na Mawu,

midzi kafukafuhawo;

midzi kafukafuhawo na míaƒe Fia la,

midzi kafukafuhawo,

⁷elabena Mawue nye Fia ɖe anyigba blibo la dzi,

midzi kafukafuha nɛ.

⁸Mawu ɖu fia ɖe dukɔwo dzi.

Mawu nɔ anyi ɖe eƒe fiazikpui kɔkɔe la dzi.

⁹Dukɔwo ƒe bubumewo ɖi anyi

abe Abraham ƒe Mawu la ƒe amewo ene,

elabena anyigbadzifiawo nye Mawu tɔ,

elabena wodo eya amea ɖe dzi bobobo.

Psalmo 48

Korah ƒe viwo ƒe ha.

¹Yehowa lolo, eye eya koe dze kafukafu

le míaƒe Mawu la ƒe du me, le eƒe to kɔkɔe la dzi.

²Zion to la kɔkɔ henya kpɔ ale gbegbe,

eye wònye dzudzɔdonu na anyigba blibo la.

Fia gã la ƒe du, si le abe Zafon to kɔkɔe la ene.

³Mawu le eƒe fiasãwo me,

eye wòɖe eɖokui fia abe eƒe mɔ sesẽ ene.

⁴Fiawo ƒo woƒe aʋakɔwo nu ƒu,

hezɔ ɖe edzi ɖekae,

⁵ke esi wokpɔe la, woƒe nu ku,

ŋɔdzi lé wo eye wosi dzo.

⁶Dzidzi ƒo wo, eye wose veve

abe nyɔnu si le ku lém la ene.

⁷Egbã wo gudugudu

abe ale si ɣedzeƒeya gbã Tarsis tɔdziʋuwo ene.

⁸Abe ale si míese ene la,

nenemae míekpɔe le Yehowa,

Dziƒoʋakɔwo ƒe Aƒetɔ la

kple míaƒe Mawu la ƒe du mee.

Mawu na wòanɔ dedie

tegbetegbe. Sela

⁹O! Mawu, míedea ŋugble le wò lɔlɔ̃ si meʋãna o la ŋu

le wò gbedoxɔ me.

¹⁰O! Mawu, wò kafukafu de keke anyigba la ƒe mlɔenu

ke abe wò ŋkɔ ene.

Wò nuɖusi ɖua fia le dzɔdzɔenyenye me.

¹¹Zion to kpɔ dzidzɔ,

eye Yuda ƒe kɔƒewo

le aseye tsom le wò afiatsotso ta.

¹²Mizɔ Zion to la ŋu godoo,

mizɔ ƒo xlãe, eye mixlẽ eƒe xɔ tsralawo,

¹³ne miakpɔ kpo si woƒo ɖe eƒe gliwo ŋu.

Mikpɔ eƒe fiasãwo nyuie ne míatsɔe atu xoe

na dzidzime si gbɔna,

¹⁴elabena Mawu siae nye míaƒe Mawu

tso mavɔ me yi ɖe mavɔ me;

eyae anye mía kplɔla yi ɖase ɖe nuwuwu.

Psalmo 49

Korah ƒe viwo ƒe ha na hɛnɔ la.

¹Mi anyigbadzitɔwo katã, mise esia;

mi xexemetɔwo katã miƒu to anyi,

²mi ame dzodzrowo kple amegãwo,

ame dahewo kple kesinɔtɔwo siaa.

³Nye nu agblɔ nunya ƒe nyawo,

eye nya siwo ado tso nye dzi me la ahe gɔmesese vɛ.

⁴Maƒu to anyi ɖe lododo ŋu,

eye mato adzo kple nye kasaŋku.

⁵Nu ka ta mavɔ̃ ne ŋkeke vɔ̃wo va,

ne ame vɔ̃ɖi, ameblelawo ƒo xlãm,

⁶ame siwo ɖoa dzi ɖe woƒe kesinɔnuwo ŋu,

eye wotsɔa woƒe nukpɔkpɔ gbogboawo nɔa adegbe ƒom ɖo?

⁷Ame aɖeke mate ŋu aɖe nɔvia ƒe agbe

alo atsɔ ga aƒle etae le Mawu gbɔ o.

⁸Agbeƒlega menye ga sue o,

eye ga home aɖeke made enu be

⁹amea nanɔ agbe tegbee,

eye makpɔ ku o.

¹⁰Ame sia ame kpɔe be nunyala kuna;

bometsilawo kple abunɛtɔwo siaa tsrɔ̃na,

eye wogblea woƒe kesinɔnuwo ɖi na ame bubuwo.

¹¹Togbɔ be anyigbawo le wo

si woŋlɔ woƒe ŋkɔwo ɖe wo dzi hã la,

woƒe yɔdowo anye woƒe aƒe tegbee,

eye woanye woƒe nɔƒe tso dzidzime yi dzidzime.

¹²Togbɔ be kesinɔnu geɖewo

le amegbetɔ si hã la, manɔ agbe tegbee o,

ɖeko wòle abe gbemelã siwo tsrɔ̃na ene.

¹³Esia nye nu si dzɔna ɖe

ame siwo ɖo ŋu ɖe wo ɖokuiwo ŋu la dzi.

Aleae wòanɔ na wo yomedzela

siwo dea woƒe nyagbɔgblɔwo dzi. Sela

¹⁴Woayi tsiẽƒe abe alẽwo ene,

eye woanye nuɖuɖu na ku.

Ame dzɔdzɔe aɖu wo dzi le ŋdi,

woƒe ŋutilãwo aƒaƒã ɖe yɔdo me,

eye woate ɖa xaa tso woƒe xɔ gã dranyiwo gbɔ.

¹⁵Ke Mawu aɖe nye agbe tso ku me,

eye wòaxɔm ɖe eɖokui gbɔ. Sela

¹⁶Ne ame aɖe zu kesinɔtɔ la,

megawɔ moya na wò o,

ne eƒe aƒe ƒe atsyɔ̃ dzi ɖe edzi la, megawɔ nuku na wò o,

¹⁷elabena ne eku la, matsɔ naneke ɖe asi o,

eƒe atsyɔ̃ gɔ̃ hã mayi yɔ me kplii o.

¹⁸Togbɔ be ebu eɖokui ame si woyra,

eye amewo kafui esi nu le edzi dzem nɛ hã la,

¹⁹ayi aɖawɔ ɖeka kple fofoa ƒe dzidzime

si magakpɔ agbe ƒe kekeli akpɔ o.

²⁰Ame si si kesinɔnuwo le, evɔ gɔmesese mele esi o la

le abe gbemelã si tsrɔ̃ la ene.

Psalmo 50

Asaf ƒe ha.

¹Mawu ŋusẽtɔ, Yehowa ƒo nu heyɔ takpekpe na

anyigba la tso agudzedze va se ɖe esime ɣe ɖo to.

²Mawu klẽ tso Zion

le eƒe anidzedze blibo la me.

³Míaƒe Mawu la gbɔna,

ahom le tutum le eŋgɔ,

dzo le nu bim le eŋgɔ, eye mazi ɖoɖoe o.

⁴Eɖi ʋɔnu, eye wòyɔ dziƒo

kple anyigba ne wòadrɔ̃ ʋɔnu eƒe dukɔ,

⁵“Miƒo nye ame kɔkɔewo nu ƒu nam,

ame siwo bla nu kplim kple akpedavɔsa.”

⁶Dziƒo ɖe gbeƒã eƒe dzɔdzɔenyenye,

elabena Mawu ŋutɔe nye ʋɔnudrɔ̃la. Sela

⁷“See, o nye dukɔ, mele nu ƒo ge,

O! Israel, maɖu ɖasefo ɖe ŋuwò,

elabena nyee nye Mawu, wò Mawu la.

⁸Nyemeka mo na wò ɖe wò akpedavɔsa

alo numevɔsa siwo le ŋkunye me ɖaa la ta o.

⁹Nyemehiã nyitsu tso wò nyikpo me,

alo gbɔ̃wo tso wò gbɔ̃kpo me o,

¹⁰elabena avemelãwo katã tɔnye wonye,

kple nyi siwo le togbɛ akpewo dzi.

¹¹Menya xevi ɖe sia ɖe si le towo dzi,

eye nuwɔwɔ ɖe sia ɖe si le gbe me la tɔnyee wonye.

¹²Ne dɔe le wuyem la, nyemagblɔe na wò o,

elabena xexea me kple nu siwo katã le eme la nye tɔnye.

¹³Ɖe meɖua nyilã

alo noa gbɔ̃wo ƒe ʋua?

¹⁴“Mitsɔ akpedavɔsawo na Mawu,

eye mixe miaƒe adzɔgbeɖefewo na Dziƒoʋĩtɔ la.

¹⁵Miyɔm le xaxagbe,

maɖe mi, eye miade bubu ŋutinye.”

¹⁶Ke Mawu le gbɔgblɔm na ame vɔ̃ɖi la be:

“Mɔ ka nèkpɔ be nàxlẽ nye sewo afia,

alo alé nye nubabla la ɖe nu?

¹⁷Wò la èlé fu nye nufiame,

eye nètsɔ nye nyawo ƒu gbe ɖe megbe.

¹⁸Ne èkpɔ fiafitɔ la, èwɔa ɖeka kplii,

eye nèdea ha kple ahasitɔwo.

¹⁹Nya vlowo doa go le nuwò,

eye wò aɖe blea ame.

²⁰Ègblɔa nya tsia tsitre ɖe nɔviwò ŋu,

eye nèƒoa ɖi dawòvi ŋutsu.

²¹Nu siawoe nye nu siwo nèwɔ hafi mezi ɖoɖoe,

eye nèsusu be ɖeko mele abe ye ene,

gake maka mo na wò,

eye mado asi ɖe mo na wò.

²²“Bu esia ŋuti, wò ame si ŋlɔ Mawu be,

ne menye nenema o la, mavuvu wò kakɛkakɛ,

eye ame aɖeke maxɔ wò le asinye o.

²³Ame si na akpedavɔsa la,

de bubu ŋunye, eye wòta mɔ be

mafia Mawu ƒe ɖeɖee.”

Psalmo 51

David ƒe ha na hɛnɔ la. Ekpa ha sia esime wòwɔ ahasi kple Batseba, eye Nyagblɔɖila Natan va egbɔ.

¹O! Mawu, kpɔ nye nublanui le wò lɔlɔ̃ si meʋãna o la ta.

Le wò dɔmenyo sɔgbɔ la nu, tutu nye dzidadawo ɖa.

²Klɔ nye vodadawo katã ɖa, eye nàle tsi nam

ŋunye nakɔ tso nye nu vɔ̃wo me.

³Elabena menya nye dzidadawo,

eye nye nu vɔ̃wo le nye ŋkume ɖaa.

⁴Ŋuwò, wò ko ŋu mewɔ nu vɔ̃ ɖo,

eye nu si nye vɔ̃ le wò ŋkume la mewɔ,

eya ta ne èle nu ƒom la, woaɖee afia be tɔwò dzɔ,

eye ne ètso afia la, woagblɔ be ele eteƒe.

⁵Vavã, wodzim ɖe nu vɔ̃ me,

eye nu vɔ̃ me danye fɔ nye fu ɖo.

⁶Vavã, nyateƒe si tso dzi me ke la nèdina;

èfia nunyam le ememe ke.

⁷Klɔ ŋutinye kple kakle, eye ŋunye aɖi;

le tsi nam, eye mafu tititi wu aklala.

⁸Na mase dzidzɔkpɔkpɔ kple aseyetsotso,

ne nye ƒu siwo nèŋe la nakpɔ dzidzɔ.

⁹Ɣla wò mo ɖe nye nu vɔ̃wo,

eye nàtutu nye vodadawo katã ɖa.

¹⁰O! Mawu, wɔ dzi dzadzɛ aɖe nam,

eye nàgbugbɔ gbɔgbɔ si li ke la de menye.

¹¹Mègatsɔm ƒu gbe le wò ŋkume,

alo nàxɔ wò Gbɔgbɔ Kɔkɔe la le asinye o.

¹²Gbugbɔ ɖeɖekpɔkpɔ ƒe dzidzɔ de menye,

eye nàna gbɔgbɔ si le klalo la be wòalém ɖe asi.

¹³Ekema mafia wò mɔwo dzidalawo,

eye nu vɔ̃ wɔlawo atrɔ ava gbɔwò.

¹⁴O! Mawu, ɖem tso ʋukɔkɔɖi ƒe nu vɔ̃ me,

wò Mawu si ɖem, eye nye aɖe adzi ha

le wò dzɔdzɔenyenye ŋu.

¹⁵O! Aƒetɔ, ke nye nuyiwo,

eye nye nu aɖe gbeƒã wò kafukafu.

¹⁶Mèdia vɔsa o, anye ne metsɔe na wò;

numevɔsa hã medoa dzidzɔ na wò o.

¹⁷Vɔsa siwo nye Mawu tɔe nye gbɔgbɔ si wogbã.

O! Mawu, màdo vlo dzi si gbã hetugu la o.

¹⁸Na nu nadze edzi na Zion le wò didi nyui la nu,

eye nàɖo Yerusalem ƒe gliwo te.

¹⁹Ekema dzɔdzɔenyenyevɔsawo

kple numevɔsa blibowo ava gbɔwò,

ado dzidzɔ na wò, eye woatsɔ nyitsuwo asa vɔe

le wò vɔsamlekpui dzi.

Psalmo 52

David ƒe nufiameha na hɛnɔ la. Ekpa ha sia esi Edomtɔ, Doeg yi ɖagblɔ na Saul be, “David yi ɖe Ahimelek ƒe aƒe me.”

¹Nu ka ta nètsɔ nu vɔ̃ɖi le adegbe ƒom, wò kalẽtɔ?

Nu ka wɔ nèle adegbe ƒom ŋkeke blibo la,

wò ame si nye ŋunyɔnu le Mawu ƒe ŋkume?

²Wò aɖe le gbegblẽ ɖom;

èle abe hɛ ɖaɖɛ ene, wò alakpatɔ.

³Èlɔ̃ vɔ̃ wu nyui,

èlɔ̃ alakpa wu nyateƒetoto. Sela

⁴O! Wò alakpaɖe,

èlɔ̃ nya gbegblẽwo sɔŋ ko!

⁵Vavã, Mawu hã aƒu wò anyi ɖe gbegblẽ mavɔ me.

Mawu ahe wò ado goe tso wò agbadɔ me,

aho wò kple ke tso agbagbeawo ƒe anyigba dzi. Sela

⁶Ame dzɔdzɔewo akpɔe, eye woavɔ̃;

woakoe ahagblɔ be,

⁷“Kpɔ ɖa, ŋutsu si metsɔ Mawu wɔ eƒe mɔ sesẽ o,

ke boŋ wòtsɔ eƒe dzi ɖo eƒe kesinɔnu gbogboawo ŋu,

eye wòkpɔ ŋusẽ hegblẽ ame bubuwo dome lae nye esi!”

⁸Ke nye la, mele abe amiti si le tsetsem le Mawu ƒe aƒe me la ene.

Meɖo dzi ɖe Mawu ƒe lɔlɔ̃ si meʋãna o

la ŋu tso mavɔ me yi ɖe mavɔ me.

⁹Makafu wò tegbee le nu si nèwɔ la ta;

matsɔ nye mɔkpɔkpɔ ade wò ŋkɔ me,

elabena wò ŋkɔ nyo.

Makafu wò le wò ame kɔkɔewo ŋkume.

Psalmo 53

David ƒe ha na hɛnɔ la. Woadzii ɖe nublanuigbe me.

¹Bometsila gblɔ le eƒe dzi me be,

“Mawu aɖeke meli o.”

Wonye ame baɖawo, woƒe mɔwo hã nye nu tovowo,

ame aɖeke meli si wɔa nu nyui o.

²Mawu lé ŋku ɖe amegbetɔviwo ŋu tso dziƒo,

ne wòakpɔe ɖa be ame aɖe se nu gɔme alo di Mawu hã.

³Ke ame sia ame trɔ megbe dee,

wo katã tim wɔ nu tovo;

ame ɖeka hɔ̃ɔ hã meli si wɔa nu nyui o,

ɖeka pɛ hã meli o.

⁴Ɖe ame vɔ̃ɖiwo,

ame siwo vuvu nye dukɔ abe ale si woɖua aboloe ene,

eye womeyɔa Mawu o la

ava srɔ̃ nu gbe aɖe gbea?

⁵Woawoe ma ŋɔdzi lé, evɔ ŋɔdzinu aɖeke meli hafi o.

Mawu gbã ƒu ɖe lãme na ame siwo tso ɖe mia ŋu la;

ena ŋukpe lé wo, elabena Mawu gbe wo.

⁶O! Xɔname neva tso Zion na Israel!

Ne Mawu gaɖo eƒe dukɔ ƒe nunyonamewo te la,

Yakob netso aseye, eye Israel nekpɔ dzidzɔ!

Psalmo 54

David ƒe ha na hɛnɔ la. Woadzii ɖe kasaŋku ŋu. David kpa ha sia esi Zifitɔwo yi Saul gbɔ gblɔ nɛ be, “Ɖe David meva ɣla ɖe mía dome oa?”

¹Ɖem, O! Mawu, ɖem kple wò ŋkɔ,

tsɔ wò ŋusẽ tso afia nam.

²O! Mawu, se nye gbedodoɖa,

eye nàƒu to anyi ɖe nye numenyawo ŋu.

³Amedzrowo tso ɖe ŋunye,

ŋutasẽlawo ti nye agbe yome,

ame siwo mebua Mawu ɖe naneke me o. Sela

⁴Mawu nye nye xɔnametɔ vavã,

Aƒetɔ lae nye ame si lém ɖe asi.

⁵Vɔ̃ negbugbɔ va ame siwo le ŋunye gblẽm la dzi,

tsrɔ̃ wo le wò nuteƒewɔwɔ ta.

⁶Masa lɔlɔ̃nuvɔsa na wò,

O! Yehowa, makafu wò ŋkɔ, elabena enyo.

⁷Eɖem tso nye xaxawo katã me,

eye nye ŋkuwo kpɔ ale si woɖu nye futɔwo dzii.

Psalmo 55

David ƒe nufiameha na hɛnɔ la. Woadzii ɖe kasaŋku ŋu.

¹O! Mawu, ɖo to nye gbedodoɖa,

mègado toku nye kokoƒoƒo o.

²Ɖo tom, eye nàtɔ nam.

Nye tamesusuwo ɖea fu nam, eye metɔtɔna,

³ne mese futɔ la ƒe gbe,

alo ne ame vɔ̃ɖi la tro ŋku ɖem.

Elabena wohe fukpekpe va dzinye,

eye wogblɔa nya vɔ̃wo ɖe ŋunye le woƒe dɔmedzoe me.

⁴Nye dzi le nu xam vevie le menye;

ku ƒe ŋɔdzi ɖe to ɖem.

⁵Vɔvɔ̃ kple dzodzo nyanyanya lém,

eye ŋɔdzi gbagba blam.

⁶Megblɔ be,

“O! Ɖe wònye aʋala le asinye abe ahɔnɛ ene la,

anye ne madzo aɖadzudzɔ le teƒe aɖe.

⁷Madzo ayi keke gbegbe,

aɖanɔ afi ma. Sela

⁸Maɖe abla ayi ɖe nye bebeƒe,

ate ɖe aga tso ya sesẽwo kple ahom gbɔ.”

⁹O! Aƒetɔ, tɔtɔ ame vɔ̃ɖiwo,

tɔtɔ woƒe nyagbɔgblɔwo, elabena mekpɔ ŋutasesẽ

kple ʋunyaʋunya le dua me.

¹⁰Zã kple keli wole tatam le eƒe gliwo dzi,

eye nugbeɖoɖo kple hiãkame le eme.

¹¹Ŋusẽ siwo gblẽa nu la le dɔ wɔm le dua me;

ŋutasesẽ kple alakpadada medzona le eƒe ablɔ dzi o.

¹²Ne futɔe le dzu yem la, mate ŋu atsɔe;

ne ketɔe kɔ eɖokui ɖe dzi ɖe ŋunye la, mate ŋu aɣla ɖee,

¹³gake wò, ŋutsu abe nye ene,

xɔ̃nye vevi kple nye kpeɖeŋutɔ,

¹⁴nye kple ame si dome habɔbɔ vivi aɖe nɔ,

eye míezɔna aduadu le amehawo dome le gbedoxɔ me lae.

¹⁵Ku neƒo ɖe nye ketɔwo dzi kpoyi;

woneyi yɔdo me agbagbe,

elabena nu vɔ̃ɖi wɔwɔ xɔ aƒe ɖe wo dome.

¹⁶Ke meyɔ Mawu,

eye wòtɔ nam, heɖem.

¹⁷Fiẽ, ŋdi kple ŋdɔ

medo ɣli le xaxame, eye wòse nye gbe.

¹⁸Eɖem tso aʋa si le edzi yim kplim la me le dedinɔnɔ me,

togbɔ be ame geɖewo tso ɖe ŋutinye hã.

¹⁹Mawu, ame si le fiazikpui dzi tegbee la asee,

eye wòabɔbɔ wo ɖe anyi, Sela

ame siwo gbe tɔtrɔ le woƒe mɔwo dzi,

eye womevɔ̃a Mawu o lae.

²⁰Nye zɔhɛ wɔ avu

kple exɔlɔ̃wo hegblẽ kɔ ɖo na eƒe nubabla.

²¹Eƒe nuƒo zrɔ̃ dredredre abe notsi kpekpe ene,

evɔ aʋawɔwɔ le eƒe dzi me;

eƒe numenyawo zrɔ̃ wu ami,

gake wonye yi siwo woɖe le aku me lé ɖe asi.

²²Tsɔ wò dzimaɖiwo da ɖe Yehowa dzi, eye akpɔ tawò,

elabena mana ame dzɔdzɔe la nadze anyi akpɔ gbeɖe o.

²³O! Mawu, ke wò la,

àhe ame vɔ̃ɖiwo ayi yɔdo me.

Ŋutsu hlɔ̃dolawo kple ameblelawo manɔ agbe

wòade agbemeŋkeke siwo nèna wo la ƒe afã hã o.

Ke nye la, wò ko dzi meka ɖo.

Psalmo 56

David ƒe nufiameha na hɛnɔ la. Woadzii ɖe “Ahɔnɛ si dzo ɖe logoti dzi le didiƒe ke” la ƒe gbeɖiɖi nu. Ekpa ha sia esi Filistitɔwo lée le Gat.

¹Kpɔ nye nublanui, O! Mawu,

elabena amegbetɔwo ti yonyeme kple ŋkubiã;

ŋkeke blibo la wole yonyeme kutɔkutɔe.

²Ame siwo le ŋunye gblẽm la ti yonyeme ŋkeke blibo la,

eye wo dometɔ geɖewo tso ɖe ŋunye kple dada.

³Maka ɖe dziwò ne vɔvɔ̃ ɖom.

⁴Wò Mawu si ƒe nya mekafu,

Mawu si dzi meka ɖo; nyemavɔ̃ akpɔ o.

Nu ka amegbetɔ, ŋutilã kple ʋu, awɔm ma?

⁵Ŋkeke blibo la wotrɔa gbo nye nyawo,

ɣe sia ɣi wole nugbe ɖom be woawɔ nuvevim.

⁶Woɖo babla, wole ŋu tsam,

hele ŋku lém ɖe nye afɔɖeɖewo ŋu,

eye wotsi dzi ɖe nye agbetsɔtsrɔ̃ ŋuti.

⁷Ɖe woƒe vɔ̃ɖinyenye ta la, megana mɔ woasi o;

O! Mawu, he dukɔwo ƒu anyi le wò dɔmedzoe me.

⁸Ŋlɔ nye konyifafa da ɖi;

lé nye aɖatsiwo ɖe agbalẽ dzi;

ɖe womele wò nyaŋlɔɖiwo me xoxo oa?

⁹Ekema nye futɔwo atrɔ adzo, ne meyɔ wò be nàxɔ nam.

To esia me la, manya be Mawu nye tɔnye.

¹⁰Mawu, ame si ƒe nya mekafu,

Yehowa ame si ƒe nya mekafu.

¹¹Mawu, ame si dzi meka ɖo; nyemavɔ̃ o.

Nu ka amegbetɔ ate ŋu awɔm?

¹²O! Mawu, meɖe adzɔgbe na wò,

eya ta maxe adzɔgbeɖefe na wò.

¹³Elabena èɖem tso ku me,

eye nèna be nye afɔwo hã magaɖiɖi o,

ne mate ŋu azɔ le Mawu ŋkume

le agbagbeawo ƒe anyigba dzi.

Psalmo 57

David ƒe ha na hɛnɔ la. Woadzii ɖe “Mègagblẽ nu o” ƒe gbeɖiɖi nu. Ekpa ha sia esi wòsi le Saul nu yi ɖabe ɖe agado aɖe me.

¹Kpɔ nye nublanui, O! Mawu, kpɔ nye nublanui,

elabena wò mee nye luʋɔ kpɔ sitsoƒe le.

Wò aʋala ƒe vɔvɔli te mabe ɖo va se ɖe

esime gbegblẽ la nu nava yi.

²Mawu, Dziƒoʋĩtɔ lae medo ɣli na,

Mawu si wɔa ɖoɖo si wòwɔ ɖe ŋunye la dzi.

³Edɔ xɔnametɔ tso dziƒo, eye wòxɔ nam heka mo na

ame siwo le yonyeme tim kutɔkutɔe. Sela

Mawu dɔ eƒe lɔlɔ̃ kple eƒe nuteƒewɔwɔ ɖa.

⁴Mele dzatawo dome,

memlɔ lã lénuwo dome,

amegbetɔ siwo ƒe aɖuwo nye akplɔwo kple aŋutrɔwo,

eye woƒe aɖewo nye yi ɖaɖɛwo.

⁵Medo wò ɖe dzi, O Mawu, gbɔ dziƒowo ŋu,

na wò ŋutikɔkɔe naklẽ ɖe anyigba blibo la dzi.

⁶Woɖo ɖɔ ɖi na nye afɔ,

ena mete ɖe anyi kple nuxaxa.

Woɖe ʋe ɖe mɔ dzi nam,

gake woawo ŋutɔ ge dze eme. Sela

⁷Nye dzi li ke sesĩe, O Mawu,

nye dzi li ke sesĩe,

eya ta madzi ha aƒo saŋku.

⁸Nyɔ, nye luʋɔ!

Nyɔ, kasaŋku kple gasaŋku!

Mana fɔŋli nanyɔ!

⁹O! Aƒetɔ, makafu wò le dukɔwo dome,

eye madzi ha na wò le dukɔwo dome,

¹⁰elabena wò lɔlɔ̃ keke ta,

yi ɖatɔ dziƒo ke, eye wò nuteƒewɔwɔ yi ɖatɔ dziŋgɔli.

¹¹Medo wò ɖe dzi, O Mawu, gbɔ dziƒowo ŋu,

na wò ŋutikɔkɔe naklẽ ɖe anyigba blibo la dzi.

Psalmo 58

David ƒe nufiameha na hɛnɔ la. Woadzii ɖe “Mègagblẽ nu o” ƒe gbeɖiɖi nu.

¹Ɖe mi dziɖulawo mietoa nyateƒea?

Ɖe mietsoa afia dzɔdzɔe na amewoa?

²Ao, nu madzɔmadzɔ wɔwɔ boŋ míeɖo ɖe miaƒe dziwo me,

eye míaƒe asiwo wɔa ŋutasẽnu le anyigba dzi.

³Ame vɔ̃ɖiwo tra mɔ tso keke woƒe vidzĩ me ke,

eye tso wo dadawo ƒe dɔ me ke,

wodze aglã, hedaa alakpa.

⁴Woƒe aɖi le abe da ƒe aɖi ene.

Egale abe ƒli si xe nu eƒe to me ene,

⁵eye ne gbesala ɖe gbe nɛ la, mewɔa edzi o;

aleke gbegbee dzotɔ la bi ɖe gbesasa mee hã la, mesenɛ o.

⁶O, Mawu, ŋe aɖu ɖe nu me na wo,

O, Yehowa, tu tsyo na dzata la!

⁷Wo nu neyi abe tsi si si va yi la ene.

Ne wovu woƒe dawo me la,

woƒe aŋutrɔwo nu netsi.

⁸Wole abe abɔbɔ si va yi, eye etoƒe bu la ene.

Wonenɔ abe fu gege ene, be womakpɔ ɣe o.

⁹Hafi miaƒe zewo nase ŋutidzo si wodo ɖe wo te ŋkɔ,

eɖanye mumua, alo ƒuƒua o,

woakplɔ ame vɔ̃ɖi la adzoe.

¹⁰Ame dzɔdzɔewo akpɔ dzidzɔ,

ne wole hlɔ̃ biam ɖe wo nu,

eye wole woƒe afɔwo klɔm ɖe

ame vɔ̃ɖiwo ƒe ʋu me.

¹¹Ekema amewo agblɔ be,

“Vavã, wogale eteƒe ɖom na ame dzɔdzɔe,

eye Mawu aɖe li si drɔ̃a ʋɔnu anyigba vavã.”

Psalmo 59

David ƒe nufiameha na hɛnɔ la. Woadzii ɖe “Mègagblẽ nu o” ƒe gbeɖiɖi nu. Ekpa ha sia esi Saul dɔ amewo be woadzɔ eƒe aƒe ŋu, eye ne edo go la, woawui.

¹O! Mawu, ɖem tso nye futɔwo ƒe asi me;

kpɔ tanye le ame siwo tso ɖe ŋutinye la ta.

²Ɖem tso nu vlo wɔlawo ƒe asi me

eye nàxɔm tso hlɔ̃dolawo ƒe asi me.

³Kpɔ ale si wode xa ɖi nam lae ɖa!

Ame nyanyrawo ɖo nugbe ɖe ŋunye,

evɔ la, O Yehowa, nyemedze agɔ,

alo wɔ nu vɔ̃ aɖeke o.

⁴Nyemeda vo aɖeke o,

evɔ wole klalo be woadze dzinye.

Tso, nàxɔ nam; kpɔ xaxa si me mele la ɖa!

⁵O! Yehowa, Mawu Ŋusẽkatãtɔ,

Israel ƒe Mawu, nyɔ nàhe to na dukɔwo,

mègakpɔ nublanui na ametatrɔla vɔ̃ɖi siawo o. Sela

⁶Wotrɔ gbɔ le fiẽ me le gbe tem abe avuwo ene,

eye wole tsaglãla tsam le dua me.

⁷Kpɔ nu si wotu tso woƒe nu me la ɖa,

wotu nyawo tso woƒe nuyiwo me le gbɔgblɔm be,

“Ame ka ate ŋu aɖo to mí?”

⁸O! Yehowa, wò koe le wo kom,

èɖe alɔme le dukɔ mawo katã ŋu.

⁹O! Nye ŋusẽ, mele nuwò kpɔm.

O! Mawu, wòe nye nye mɔ sesẽ,

¹⁰nye Mawu lɔlɔ̃tɔ.

Mawu adze ŋgɔ nam, eye ana makpɔ dziɖuɖu ƒe dzidzɔ

ɖe nye ketɔwo dzi.

¹¹Gake mègawu wo o,

O! Aƒetɔ, míaƒe akpoxɔnu,

ne menye nenema o la, nye amewo aŋlɔ be.

Le wò ŋusẽ me, na woatsa tsaglãla,

eye nàhe wo aƒu anyi.

¹²Nya sia nya si doa le wo nu la nye nu vɔ̃,

woƒe dada nazu abe mɔ ene aɖe wo,

Le fiƒodenya kple alakpanya siwo wogblɔ ta la,

¹³fia wo kple dziku,

fia wo va se ɖe esime womaganɔ anyi o.

Ekema woanya va se ɖe anyigba la ƒe mlɔenu ke, be

Mawue nye fia ɖe Yakob dzi. Sela

¹⁴Wotrɔ gbɔ le fiẽ me, le gbe tem abe avuwo ene,

eye wole tsaglãla tsam le dua me.

¹⁵Wole tsatsam le nuɖuɖu dim,

eye ne womeɖi ƒo o la, wonɔa wòwóm.

¹⁶Ke nye la, madzi wò ŋusẽ ƒe ha,

eye le ŋdi me la, madzi ha le wò lɔlɔ̃ ŋuti,

elabena wòe nye nye mɔ sesẽ,

kple nye sitsoƒe le xaxaɣiwo.

¹⁷O! Nye ŋusẽ, mele kafukafuha dzim na wò.

O! Mawu, wòe nye nye mɔ sesẽ kple nye Mawu si dzi meka ɖo.

Psalmo 60

David ƒe ha na hɛnɔ la. Woadzii ɖe “Nubabla ƒe Dzogbenya” ƒe gbeɖiɖi nu. David kpa nufiameha sia esi wòwɔ aʋa kple Aram Naharaim kple Aram Zobah, kpe ɖe esi Yoab trɔ gbɔ tso aʋa le Dze Balime, afi si wòwu Edomtɔ akpe wuieve (12,000) le la ŋu.

¹O! Mawu, ègbe mí, èti kpo dze mía dzi,

eye nèdo dɔmedzoe ɖe mía ŋu,

eya ta gbugbɔ mí ɖo te!

²Èʋuʋu anyigba la, eye nèfee wòle nuvo,

eya ta gatre eƒe gbagbãƒeawo, elabena ele ʋuʋum.

³Èna ɣeyiɣi sesẽwo tu wò dukɔ la,

eye nèna wain mí míeno mu hele yiyim sɔgɔsɔgɔsɔgɔ.

⁴Ke hena ame siwo vɔ̃a wò la,

èkɔ aflaga dzi be wòanye akpoxɔnu ɖe

woƒe aŋutrɔ ŋu. Sela

⁵Xɔ na mí, eye nàɖe mí kple wò nuɖusi,

be ame siwo nèlɔ̃ la nakpɔ xɔxɔ.

⁶Mawu ƒo nu tso eƒe kɔkɔeƒe la be;

“Le dziɖuɖu me, mama Sekem,

eye madzidze Sukɔt Balime hã.

⁷Gilead nye tɔnye, Manase hã tɔnyee.

Nye gakukue nye Efraim,

eye Yuda nye nye fiatikplɔ.

⁸Moab nye nye asiklɔgba,

meɖe nye tokota ƒu gbe ɖe Edom dzi,

eye medo dziɖuɖuɣli ɖe Filistia ta.”

⁹Ame ka akplɔm ayi du si ŋu

woɖo gli sesẽ ƒo xlãe la me?

Ame ka akplɔm ayi Edom?

¹⁰O! Mawu, ɖe menye wòe o la,

wò ame si gbe mí, eye mègadona

kple míaƒe aʋakɔwo lae oa?

¹¹Kpe ɖe mía ŋu, ɖe míaƒe futɔwo ŋuti,

elabena amegbetɔ ƒe kpekpeɖeŋu mele ɖeke me o.

¹²To Mawu dzi, míaɖu dzi,

eye míafanya míaƒe futɔwo ɖe anyigba.

Psalmo 61

David ƒe ha na hɛnɔ la. Woadzii ɖe kasaŋku ŋu.

¹Se nye ɣlidodo, O Mawu,

eye nàlé to ɖe nye gbedodoɖa ŋu.

²Meyɔ wò tso anyigba ƒe mlɔenu,

meyɔ wò, esi nu te nye dzi ŋu belibelibeli;

azɔ kplɔm yi ɖe agakpe si kɔ wum la dzi,

³elabena wòe nye nye sitsoƒe

kple mɔ sesẽ, le futɔ la ta.

⁴Medi vevie be manɔ wò agbadɔ me tegbee,

eye mabe ɖe wò aʋala ƒe fafaƒe. Sela

⁵O! Mawu, èse nye adzɔgbeɖeɖewo,

eye nètsɔ ame siwo vɔ̃a wò ŋkɔ la ƒe domenyinu nam.

⁶Dzi fia la ƒe agbemeŋkekewo ɖe edzi nɛ,

eƒe ƒewo nasɔ gbɔ be wòakpɔ dzidzime geɖewo.

⁷Neɖu fia le Mawu ŋkume tegbee,

eye na wò lɔlɔ̃ kple nuteƒewɔwɔ nakpɔ eta.

⁸Ekema madzi kafukafuha na wò ŋkɔ tegbee,

eye maxe nye adzɔgbeɖefewo gbe sia gbe.

Psalmo 62

David ƒe ha na Hɛnɔ Yedutun.

¹Mawu me ko nye luʋɔ kpɔ gbɔɖeme le,

eye eya ko gbɔ nye xɔxɔ tsona.

²Eya koe nye nye agakpe,

nye xɔxɔ kple nye mɔ sesẽ, eya ta nyemaʋã akpɔ gbeɖe o.

³Va se ɖe ɣe ka ɣi nànɔ ame ɖeka ƒoƒo dzi?

Ɖe mi katã mialé ame si le abe gli gbagbã

kple kpɔ si le mumum ene la aƒu anyia?

⁴Woɖoe vavã be yewoatutui tso

eƒe nɔƒe kɔkɔ la, elabena wolɔ̃a alakpadada.

Wotsɔa woƒe nuwo gblɔa yayranyawoe,

ke fiƒode le woƒe dzi me. Sela

⁵O! Nye luʋɔ, gbɔ ɖe eme le Mawu ɖeka ko me,

elabena eya gbɔ nye mɔkpɔkpɔ tso.

⁶Eya hɔ̃ɔ koe nye nye agakpe,

nye xɔxɔ kple nye mɔ sesẽ,

eya ta nyemaʋuʋu o.

⁷Nye xɔxɔ kple bubu ku ɖe Mawu ŋu,

eyae nye nye agakpe sesẽ kple nye sitsoƒe.

⁸O! Mi dukɔwo, miɖo dzi ɖe eŋu ɣe sia ɣi;

mitsɔ miaƒe hiahiãwo kɔ ɖe edzi,

elabena Mawue nye míaƒe sitsoƒe. Sela

⁹Vavã, ƒuƒu ko ame gbɔlowo nye,

eye alakpa nye ame siwo nye ame ŋkutawo,

elabena ne woda wo le nudanu dzi la,

tofloko ko wonye,

eye wo katã ƒuƒu ko wonye.

¹⁰Migaɖo ŋu ɖe amebaba ŋu,

alo akpɔ dzidzɔ ɖe nu siwo wofi la ŋuti o.

Togbɔ be wò kesinɔnuwo dzi ɖe edzi hã la,

mègatsɔ wò dzi da ɖe wo dzi o.

¹¹Mawu gblɔ nya ɖeka,

eye mese nu eve le eme be,

“Wò, O Mawu, ɖeka koe sesẽ,

¹²eye O Aƒetɔ, wò la lɔlɔ̃ bɔ ɖe asiwò.

Vavã, àɖo eteƒe na ame

sia ame ɖe nu si wòwɔ la nu.”

Psalmo 63

David ƒe ha. Ekpae esi wòle Yuda gbegbe.

¹O! Mawu, wòe nye nye Mawu,

mele diwòm vevie;

tsikɔ le nye luʋɔ wum ɖe ŋuwò,

nye ameti blibo la mele diwòm,

le kuɖiɖinyigba si ƒu kplakplakpla,

eye tsi aɖeke meli o la dzi.

²Mekpɔ wò le kɔkɔeƒe la,

eye mekpɔ wò ŋusẽ kple wò ŋutikɔkɔe.

³Esi wò lɔlɔ̃ nyo wu agbe ta la,

nye nuyiwo ado wò ɖe dzi.

⁴Makafu wò, zi ale si mele agbe,

eye mado nye asiwo ɖe dzi le wò ŋkɔ me.

⁵Nye luʋɔ aɖi ƒo abe nuɖuɖu nyuitɔ kekeakee wòɖu ene;

hadzidzi anɔ nu nam, eye nye nu adzi kafukafuhawo na wò.

⁶Le nye aba dzi, meɖoa ŋku dziwò,

mebua ŋutiwò le nye ŋunɔɣi le zã me.

⁷Esi nènye nye xɔnametɔ ta la,

madzi ha le wò aʋala ƒe vɔvɔli te.

⁸Nye luʋɔ ku ɖe ŋuwò goŋgoŋgoŋ,

eye wò ɖusibɔ lém ɖe te.

⁹Woatsrɔ̃ ame siwo le nye agbe yome tim,

woayi ɖe keke anyigba la ƒe tume ke.

¹⁰Woatsɔ wo ade asi na yi,

eye woazu nuɖuɖu na amegaxiwo.

¹¹Ke fia la akpɔ dzidzɔ le Mawu me;

ame siwo katã kaa atam le Mawu ƒe ŋkɔ me la akafui,

ke woamia nu na alakpatɔwo.

Psalmo 64

David ƒe ha na hɛnɔ la.

¹O! Mawu, ɖo tom, esi meɖe nye kuxiwo na wò;

kpɔ nye agbe ta tso futɔ siwo le ŋɔdzi dom nam la ƒe asi me.

²Ɣlam tso ame vɔ̃ɖiwo ƒe nugbeɖoɖo

kple ame vlo mawo ƒe howɔwɔ me.

³Wonyrea woƒe aɖewo abe yi ene,

eye wodzidzea woƒe nyawo ɖe ame dzi

abe aŋutrɔ siwo nu aɖi le la ene.

⁴Wodea xa hedaa aŋutrɔ ame maɖifɔ la,

eye wodanɛ zi ɖeka vɔvɔ̃manɔŋutɔe.

⁵Wodea dzi ƒo na wo nɔewo

le woƒe nu vɔ̃ɖi ɖoɖowo me,

woƒoa nu tso ale si woatre mɔ ɖe vivime

la ŋuti gblɔna be, “Ame kae le ekpɔ ge?”

⁶Woɖoa nu vɔ̃ɖi hegblɔna le eŋuti be,

“Míewɔ ɖoɖo deŋgɔ la vɔ!”

Vavãe, ame ƒe susu kple dzi me nye ayenuwɔƒe,

⁷gake Mawu ada aŋutrɔ wo

eye wòalɔ wo zi ɖeka kpoyi woamu adze anyi.

⁸Ana woawo ŋutɔ ƒe aɖe nade wo nya me

eye wòahe wo ade tsɔtsrɔ̃ me.

Ame siwo katã akpɔ wo la aʋuʋu ta ɖe wo ŋu fewuɖutɔe.

⁹Tete vɔvɔ̃ aɖo amegbetɔƒomea katã;

woado Mawu ƒe dɔwɔwɔwo ɖe dzi,

eye woade ŋugble le nu si wòwɔ la ŋuti.

¹⁰Ame dzɔdzɔe akpɔ dzidzɔ le Yehowa me, eye wòasii atso.

Ame siwo katã dza le woƒe dzi me la akafui!

Psalmo 65

David ƒe ha na hɛnɔ la.

¹O! Mawu, kafukafu le lalawòm le Zion;

wòe míaxe míaƒe adzɔgbeɖefewo na.

²O! Wò ame si sea gbedodoɖa,

gbɔwòe amewo katã ava.

³Esi nu vɔ̃ do agba ɖe mía dzi la,

ètsɔ míaƒe dzidadawo ke mí.

⁴Woayra ame siwo nètia,

eye nèkplɔ wo vɛ be woanɔ wò xɔxɔnuwo!

Ètsɔ wò aƒe me,

wò gbedoxɔ kɔkɔe la me nu nyuiwo ɖi ƒoe na mí.

⁵Èna ŋuɖoɖo mí to dzɔdzɔenyenye ƒe ŋɔdzidɔwo me,

O, Mawu míaƒe xɔnametɔ,

anyigba ƒe mlɔenu ke,

kple atsiaƒu siwo le didiƒe ke la katã ƒe mɔkpɔkpɔ.

⁶Wò ame si na towo va dzɔ to wò ŋusẽ me,

eye nètsɔ ŋusẽ bla ali dzii,

⁷wò ame si tsi atsiaƒu ƒe hoowɔwɔ

kple ƒutsotsoe dzeagbowo

kpakple dukɔwo ƒe ʋunyaʋunyawo nu.

⁸Ame siwo le didiƒe la vɔ̃ wò nukunuwo;

èna dzidzɔhawo ɖi tso afi si ɣe dzena tsona

kple afi si wòɖoa to ɖo.

⁹Èlé be na anyigba,

de aɖui wòsui nyuie, eye nède tsii fũu.

Tsi yɔ Mawu ƒe tɔʋuwo banaa,

ne wòana bli eƒe dukɔ,

elabena nenema nèɖoe.

¹⁰Ède tsi eƒe boliƒowo,

eye nègbã kpoteƒewo wozu sɔsɔe.

Ètsɔ agbafie bɔbɔ anyigba lae,

eye nèyra eƒe nukuwo.

¹¹Ètsɔ wò kesinɔnu gbogboawo ɖo atsyɔ̃e na ƒe la,

eye wò agblekekewo yɔ gbagba.

¹²Lãnyiƒe siwo le gbegbe la yɔ gbagba,

eye wotsɔ aseyetsotso ta na togbɛwo.

¹³Gbe damawo dzi yɔ fũu kple lãhawo,

eye balimewo ƒe afi sia afi yɔ kple bli;

wo katã do dzidzɔɣli, eye wodzi ha.

Psalmo 66

Ha na hɛnɔ la.

¹Mi anyigbawo katã mido ɣli,

mitso aseye ɖe Mawu ŋu!

²Midzi eƒe ŋkɔ ƒe ŋutikɔkɔe ƒe ha;

mikafu Mawu ƒe gãnyenye!

³Migblɔ na Mawu be,

“Wò dɔwɔwɔwo dziŋɔ loo!

Wò ŋusẽ tri akɔ ale gbegbe be,

wò futɔwo de ta agu na wò.

⁴Anyigba la katã de ta agu na wò,

wole kafukafuha dzim na wò,

wole kafukafuha dzim na wò ŋkɔ.” Sela

⁵Va, nàkpɔ nu si Mawu wɔ,

ale si le amegbetɔwo ta wòwɔ ŋɔdzidɔ geɖewo!

⁶Etrɔ atsiaƒu wòzu anyigba ƒuƒui,

wozɔ afɔ to tsi la titina;

miva míatso aseye le eya amea me.

⁷Ele fia ɖum kple eƒe ŋusẽ tegbee,

eƒe ŋku le dukɔwo ta kpɔm,

aglãdzela aɖeke megatso ɖe eŋuti o. Sela

⁸O! Mi dukɔwo, mikafu míaƒe Mawu la;

mina eƒe kafukafu nade dzi woase.

⁹Eyae kpɔ míaƒe agbe ta,

eye mena míaƒe afɔ ɖiɖi o.

¹⁰Elabena O Mawu, wòe do mí kpɔ,

wòe lolõ mí abe klosalo ene.

¹¹Wòe de mí gaxɔ me,

eye nèdo agba ɖe megbe na mí.

¹²Èna amewo zɔ míaƒe ta dzi,

eye míeto dzo me kple tɔ me,

gake èkplɔ mí va anyigba

si dzi nuwo do agbogbo ɖo fũu.

¹³Mava wò gbedoxɔ me kple numevɔsa,

eye maxe nye adzɔgbeɖefewo na wò,

¹⁴adzɔgbe siwo nye nuyi ɖe,

eye nye nu ɖe gbeƒã wo, esi meɖo xaxa me.

¹⁵Matsɔ lã damiwo kple agbowo asa numevɔe na wò,

hekpe ɖe nyitsuwo kple gbɔ̃wo ŋuti. Sela

¹⁶Miva se, mí ame siwo katã vɔ̃a Mawu;

mina magblɔ nu siwo wòwɔ nam la na mi.

¹⁷Metsɔ nye nu do ɣli nɛ,

eƒe kafukafu le nye aɖe dzi.

¹⁸Ɖe mena nɔƒe nu vɔ̃ le nye dzi me la,

ne Aƒetɔ la meɖo tom o,

¹⁹gake Mawu ɖo tom vavã,

eye wòse nye gbe le gbedodoɖa me.

²⁰Woakafu Mawu, ame si medo toku nye gbedodoɖa,

alo te eƒe lɔlɔ̃ ɖa le gbɔnye o!

Psalmo 67

Ha na hɛnɔ la. Woadzii ɖe kasaŋku ŋu.

¹Mawu, ve mía nu, eye nàyra mí,

na wò mo naklẽ ɖe mía dzi, Sela

²Ale be woanya wò mɔwo le anyigba dzi

kple wò xɔxɔ le dukɔwo dome.

³O! Mawu, dukɔwo akafu wò,

anyigbadzidukɔwo katã akafu wò.

⁴Dukɔwo akpɔ dzidzɔ, adzi ha, atso aseye,

elabena èɖu dukɔwo dzi le dzɔdzɔenyenye me,

eye nèkplɔ anyigbadzidukɔwo. Sela

⁵Mawu, dukɔwo katã akafu wò;

wòe dukɔwo katã akafu.

⁶Ekema anyigba ana woaxa eƒe nukuwo fũu, eye Mawu,

míaƒe Mawu la ayra mí.

⁷Mawu ayra mí, eye anyigba

ƒe mlɔenutɔwo katã avɔ̃e.

Psalmo 68

David ƒe ha na hɛnɔ la.

¹Mawu tso, na wò futɔwo naka hlẽ,

na wò ketɔwo nasi le nuwò.

²Gbɔ wo ɖa abe ale si ya gbɔa dzudzɔ dzonae ene.

Abe ale si yɔkumi lolõna le dzo nu ene la,

nenema ame vɔ̃ɖiwo atsrɔ̃e le Mawu ŋkume.

³Ke ame dzɔdzɔewo ya akpɔ dzidzɔ,

atso aseye le Mawu ŋkume;

na woakpɔ dzidzɔ, eye woatu aglo.

⁴Midzi ha na Mawu,

midzi kafukafuha na eƒe ŋkɔ,

mido ame si le lilikpowo dzi gbɔna la ɖe dzi,

eŋkɔe nye Yehowa, eye mitso aseye le eŋgɔ;

⁵eya ame si nye tɔ na tɔmanɔsitɔwo,

ahosiwo ta ʋlila, eye wònye Mawu si le enɔƒe kɔkɔe la.

⁶Mawu kplɔa ame siwo tsi akogo la dea ƒomewo me,

enana ablɔɖe gamenɔlawo, eye wodzia dzidzɔhawo.

Ke ame dzeaglãwo la, egblẽa wo ɖe kuɖiɖinyigba dzi.

⁷O! Mawu, ne èdo dze wò dukɔ la ŋgɔ,

hezɔ to gbegbe la, Sela

⁸anyigba ʋuʋu, dziƒowo dza tsi bɔbɔbɔ le Mawu,

si nɔ Sinai la ŋkume, le Mawu,

Israel ƒe Mawu la ŋkume.

⁹O! Mawu, èna tsi dza fũu,

eye nèna wò domenyinu si nu ti kɔ na

belibelibeli la gakpɔ ŋusẽ.

¹⁰Mawu, wò amewo yi ɖanɔ edzi,

eye tso wò nu gbogboawo me, èna nu ame dahewo.

¹¹Aƒetɔ ɖe gbeƒã nya la,

eye ameha gã aɖe do ɣli kplii be,

¹²“Fiawo kple aʋakɔwo, misi kaba,

elabena amewo le afunyinuwo ham le asaɖawo me.

¹³Esi miele alɔ̃ dɔm le lãkpowo dome la,

wotsɔ klosalo fa ɖe nye ahɔnɛ ƒe aʋala ŋu,

eye wotsɔ sika si le keklẽm la fa ɖe eƒe fuwo ŋuti.”

¹⁴Esi Ŋusẽkatãtɔ la kaka anyigbadzifiawo hlẽ la,

enɔ abe tsikpee dza ɖe Zalmɔn dzi ene.

¹⁵Basan towo ƒe dzedzeme

kple kɔkɔme nya kpɔ ŋutɔ;

to tsaklitsakliwo Basan toawo nye.

¹⁶O! To tsaklitsakliwo,

nu ka ta mietsɔ ŋuʋaʋã ƒe ŋku

le to si Mawu tia be wòanye yeƒe fiazikpui ƒe nɔƒe

kple Yehowa ŋutɔ ƒe nɔƒe tegbee la kpɔmii?

¹⁷Mawu ƒe tasiaɖamwo nye akpe nanewo

kple akpe teƒe akpewo;

Aƒetɔ la tso Sinai va ɖo eƒe teƒe kɔkɔe la.

¹⁸Esi nèlia yi dzi la, ètɔ ka aboyomewo hekplɔ dzoe,

èxɔ nunana tso amewo gbɔ,

tso aglãdzelawo gɔ̃ hã gbɔ, be wò,

O! Yehowa Mawu, àte ŋu anɔ afi ma.

¹⁹Kafukafu woana Aƒetɔ, Mawu míaƒe Ɖela,

ame si tsɔa míaƒe agbawo gbe sia gbe. Sela

²⁰Míaƒe Mawu nye Mawu si xɔna na ame;

ɖeɖe tso ku me vana to Aƒetɔ Yehowa ko dzi.

²¹Vavã, Mawu agbã ta na eƒe futɔwo

kple dzodome na ame siwo gale woƒe nu vɔ̃wo dzi yim.

²²Aƒetɔ la gblɔ be,

“Makplɔ wo vɛ tso Basan;

makplɔ wo ado goe tso atsiaƒu ƒe gogloƒe ke,

²³be nàklɔ afɔ ɖe wò futɔwo ƒe ʋu me,

eye wò avuwo ƒe aɖewo hã nakpɔ wo tɔ gome.”

²⁴O! Mawu, wole míaƒe azɔlime kpɔm,

wole ale si nye Mawu

kple fianye zɔ ge ɖe kɔkɔeƒe lae la kpɔm.

²⁵Woɖo ɖe fli me, hadzilawo le ŋgɔgbe,

hafialawo ɖo, eye ɖetugbi siwo

le axatsɛ ƒom la tsɔ wo ɖe dome.

²⁶Mikafu Mawu le ameha gã la dome.

Mikafu Yehowa le Israelviwo ƒe takpekpe me.

²⁷Kpɔ ɖa, Benyamin ƒe to si nye suetɔ lae le ŋgɔ na wo,

Yuda ƒe dumegã gbogboawo le afi ma,

eye Zebulon kple Naftali ƒe amegãwo hã le afi ma.

²⁸O! Mawu, yɔ wò ŋusẽ vɛ;

O! Mawu, ɖe wò ŋusẽ fia mí abe tsã ene.

²⁹Le wò Yerusalem gbedoxɔ ta la,

fiawo atsɔ nunanawo vɛ na wò.

³⁰Blu ɖe lã wɔadã siwo le aƒlawo me

kple nyitsuwo ƒe ha siwo le dukɔwo ƒe nyiviwo dome la ta.

Netsɔ klosalokɔ gãwo vɛ le ɖokuibɔbɔ me.

Kaka dukɔ siwo aʋawɔwɔ doa dzidzɔ na.

³¹Ame dɔdɔwo atso Egipte ava,

eye Kus abɔbɔ eɖokui ɖe Mawu te.

³²O! Mi anyigbadzifiaɖuƒewo,

midzi ha na Mawu,

midzi kafukafuha na Aƒetɔ la, Sela

³³Eya ame si nɔ blemalilikpowo dzi,

eye wòɖe gbe kple gbe sesẽ aɖe.

³⁴Miɖe gbeƒã Mawu ƒe ŋusẽ,

ame si ƒe atsyɔ̃ le Israel dzi,

eye eƒe ŋusẽ le dziŋgɔli ŋu.

³⁵O! Mawu, ŋɔdzi le ŋuwò le wò kɔkɔeƒe la;

Israel ƒe Mawu la na ŋusẽ

kple ŋutete eƒe dukɔ la.

Woakafu Mawu!

Psalmo 69

David ƒe ha na hɛnɔ la. Woadzii ɖe “Dzogbenya” ƒe gbeɖiɖi nu.

¹Mawu, ɖem,

elabena tsi ɖɔ ɖe ŋunye va se ɖe nye kɔgbɔ ke.

²Meɖo ba yi ɖe tome ke,

afi si afɔɖoƒe mele o.

Meɖo tɔ goglowo me;

tsi ɖɔ to tanye.

³Medo ɣli be woaxɔ nam,

ale nu ti kɔ nam, eye nye ve me hã ƒu kplakplakpla.

Mekpɔ mɔ na Mawu ʋuu,

eye ɖeɖi te nye ŋkuwo ŋu.

⁴Ame siwo lé fum ɖe nanekemawɔmawɔ ta la

sɔ gbɔ wu nye taɖa.

Amewo lé fum yakatsyɔ,

eye woti yonyeme be woatsrɔ̃m.

Ale meɖo nu si nyemefi o la eteƒe dzizizitɔe.

⁵O! Mawu, ènya nye bometsitsi,

eye nye fɔɖiɖi mele ɣaɣla ɖe wò o.

⁶O! Aƒetɔ, Yehowa Ŋusẽkatãtɔ,

mègana ame siwo ƒe mɔkpɔkpɔ

le mewò la naɖu ŋukpe le tanye o.

O! Israel ƒe Mawu, ame siwo le diwòm la,

mègana ŋu nakpe wo le tanye o.

⁷Tawòe wodo vlom ɖo,

eye ŋukpe tsyɔ mo nam.

⁸Menye amedzro na nye ŋutɔ nɔvinye ŋutsuwo

kple ame manyamanya na danyevi ŋutsuwo.

⁹Elabena lɔlɔ̃ na wò aƒe zu dzo ge ɖe menye,

eye ame siwo dzu wò la ƒe dzudzu va dzinye.

¹⁰Esi mefa avi, tsi nu dɔ la,

vlododo boŋ wozu nam;

¹¹esi meta akpanya la,

mezu nu ɖikokoe na amewo.

¹²Ame siwo nɔ anyi ɖe agbo nu la ɖe alɔme le ŋunye,

eye ahamulawo kekeake hã kpa ha dem.

¹³O! Yehowa, medo gbe ɖa na wò le wò amenuveɣi;

O! Mawu, le wò lɔlɔ̃ gã la ta,

tɔ nam kple wò xɔname si medana le edzi o.

¹⁴Ɖem tso agbi me,

mègana mayi to o,

ɖem le ame siwo lé fum la ƒe asi me,

tso tɔ goglowo me.

¹⁵Mègana tsi naɖɔ to tanye,

alo gogloƒe namim, eye ʋe globo natu eƒe nu ɖe dzinye o.

¹⁶O! Yehowa, tɔ nam, le wò lɔlɔ̃ deto la ta,

eye trɔ ɖe ŋutinye le wò nublanuikpɔkpɔ gã la ta.

¹⁷Mègaɣla wò mo ɖe wò dɔla o;

ke boŋ tɔ nam kaba, elabena meɖo xaxa me.

¹⁸Te ɖe ŋunye, eye nàxɔ nam,

ɖem le nye ketɔwo ta.

¹⁹Ènya ale si wodo vlom,

ɖi gbɔ̃m, eye wodo ŋu kpem;

nye futɔwo katã le ŋkuwò me.

²⁰Vlododo na nye dzi gbã,

eye mezu xɔnamemanɔsitɔ;

mekpɔ mɔ na babadoname,

gake ɖeke meli o.

Mekpɔ mɔ na akɔfalawo,

gake nyemekpɔ ɖeke o.

²¹Wotsɔ veve de nye nuɖuɖu me,

eye esi tsikɔ wum la, wotsɔ aha tsitsi nam be mano.

²²Woƒe kplɔ̃ si woɖo na wo la nezu mɔ na wo;

nezu teƒeɖoɖo kple mɔ na wo.

²³Woƒe ŋkuwo dzi nedo viviti be,

womagate ŋu akpɔ nu o,

eye na woƒe dzi me naɖo kpo tegbee.

²⁴Trɔ wò dziku kɔ ɖe wo dzi,

eye nàna wò dɔmedzoe helĩhelĩ nalé wo.

²⁵Woƒe nɔƒe neɖi gbɔlo;

mègana be ame aɖeke neganɔ woƒe agbadɔwo me o.

²⁶Elabena woti ame siwo ŋu nède abii la yome,

eye wole nu ƒom le ame siwo nèwɔ nuvevii la ƒe vevesese ŋu.

²⁷Bu fɔ wo, eye nàgabu fɔ wo ɖe edzi;

mègana woakpɔ gome le wò xɔname me o.

²⁸Tutu woƒe ŋkɔwo ɖa le agbegbalẽ la me,

eye mègana woaŋlɔ woƒe ŋkɔ ɖe

ame dzɔdzɔewo dome o.

²⁹Mele vevesese kple nuxaxa me;

O! Mawu, na wò xɔname natɔ kpɔ ƒo xlãm.

³⁰Matsɔ hadzidzi akafu Mawu ƒe ŋkɔ,

eye madoe ɖe dzi kple akpedada.

³¹Esia adze Yehowa ŋu wu nyi,

eye wòado dzidzɔ nɛ wu nyitsu

kple eƒe dzowo kpakple eƒe afɔkliwo.

³²Hiãtɔwo akpɔe ahatso aseye,

eye mi ame siwo dia Mawu la,

míaƒe dziwo nenɔ agbe ɖaa!

³³Yehowa ɖoa to hiãtɔwo,

eye medoa vlo eƒe ame siwo le aboyome o.

³⁴Dziƒo kple anyigba nekafui,

atsiaƒuwo kple nu siwo katã ʋãna le wo me,

³⁵elabena Mawu aɖe Zion,

eye wòagbugbɔ Yuda ƒe duwo atso.

Ekema amewo aɖanɔ afi ma, axɔe wòazu wo tɔ;

³⁶eƒe dɔlawo ƒe viwo atsɔe anyi domee,

eye ame siwo lɔ̃ eƒe ŋkɔ la anɔ afi ma.

Psalmo 70

David ƒe ha na hɛnɔ la. Kukuɖeɖe.

¹O! Mawu, netsɔ nàɖem;

O! Yehowa, va kaba nàxɔ nam.

²Ŋukpe kple tɔtɔ neva ame siwo

le nye agbe yome tim la dzi.

Ame siwo le nye gbegblẽ dim la

negbugbɔ ɖe megbe kple ŋukpe.

³Na be ame siwo le gbɔgblɔm be,

“Ɛhɛ̃! Ɛhɛ̃!” la

natrɔ megbe adzo kple ŋukpe.

⁴Ke ame siwo dia wò la netso aseye;

woakpɔ dzidzɔ le mewò,

eye ame siwo lɔ̃a wò xɔname la negblɔ ɖaa be,

“Woado Mawu ɖe dzi ɖaa!”

⁵Ke nye la, O Mawu, meda ahe, eye hiã tum,

eya ta va gbɔnye kaba.

O! Yehowa, mègahe ɖe megbe o,

elabena wòe nye nye xɔnametɔ kple nye Ɖela.

Psalmo 71

¹O! Yehowa, mewòe mebe ɖo,

mègana ŋu nakpem akpɔ gbeɖe o.

²Xɔ nam, eye nàɖem le wò dzɔdzɔenyenye la ta;

trɔ wò to ɖe gbɔnye, eye nàxɔ nam.

³Nye sitsoƒe ƒe agakpe,

afi si mate ŋu abe ɖo ɣe sia ɣi.

Ɖe gbe be woaxɔ nam,

elabena wòe nye nye agakpe kple mɔ sesẽ.

⁴O! Nye Mawu, ɖem tso ame vɔ̃ɖiwo ƒe asi me,

eye nàɖem tso nu tovo wɔlawo

kple ŋutasẽlawo ƒe fego me.

⁵Elabena tso ɣe aɖe ɣi ke, wòe nye nye mɔkpɔkpɔ

kple nye dzideƒo tso nye ɖekakpuime ke,

O! Aƒetɔ Yehowa.

⁶Tso nye dzigbe ke,

wò ko ŋu meku ɖo,

elabena wòe ɖem tso danye ƒe dɔ me,

eya ta makafu wò ɖaa.

⁷Mezu nu maɖinu na ame geɖewo,

gake wòe nye nye mɔ sesẽ.

⁸Wò kafukafu yɔ nye nu me,

eye meɖea gbeƒã wò atsyɔ̃ŋkeke blibo la.

⁹Mègatsɔm ƒu gbe, ne meku amegã o,

eye mègagblẽm ɖi ne ŋusẽ vɔ le ŋunye o.

¹⁰Elabena nye futɔwo ƒo nu tsi tsitre ɖe ŋunye,

eye ame siwo le lalam be yewoawum la,

wɔ ɖeka ɖo nugbe ɖe ŋunye.

¹¹Wogblɔ be, “Mawu gblẽe ɖi, míti eyome,

míalée, elabena ame aɖeke mava axɔ nɛ o.”

¹²O! Mawu, mèganɔ adzɔge tso gbɔnye o,

O! Nye Mawu, va kaba nàxɔ nam.

¹³Na be nunyetsolawo natsrɔ̃ kple ŋukpe,

eye nàna be vlododo kple ŋukpe natsyɔ

ame siwo di be yewoawɔ nuvevim la dzi.

¹⁴Ke nye ya la, mɔkpɔkpɔ anɔ asinye ɖaa,

eye makafu wò, agakafu wò ɖe edzi.

¹⁵Nye nu aɖe gbeƒã wò dzɔdzɔenyenye

kple wò xɔname ŋkeke blibo la,

togbɔ be nyemenya eƒe kpekpeme o hã.

¹⁶Mava aɖe gbeƒã wò nu dzɔatsuwo,

O Aƒetɔ Yehowa.

Maɖe gbeƒã wò dzɔdzɔenyenye,

wò ɖeka tɔ ko.

¹⁷O! Mawu; tso nye ɖekakpuime ke,

nèfia num, eye va se ɖe egbe la,

mele gbeƒã ɖem wò nu dzɔatsuwo.

¹⁸O! Mawu, ne metsi,

ƒo wɔ hã la, mègagblẽm ɖi o,

va se ɖe esime maɖe gbeƒã wò ŋusẽ

na dzidzime si ava dzɔ

kple wò ŋusẽ na ame siwo woava dzi.

¹⁹O! Mawu, wò dzɔdzɔenyenye yi ɖatɔ dziŋgɔli ke,

wò ame si wɔ nu dzɔatsu geɖewo.

O! Mawu, ame kae le abe wò ene?

²⁰Togbɔ be èna mekpɔ xaxa geɖe kple vevesese hã la,

àgaɖo nye agbe te, eye àva kplɔm

ado goe tso anyigba ƒe tume ke.

²¹Àdzi nye bubu ɖe edzi,

eye àgafa akɔ nam.

²²O! Nye Mawu, makafu wò kple kasaŋku

le wò nuteƒewɔwɔ ta;

madzi kafukafuha na wò kple gasaŋku,

O! Israel ƒe Kɔkɔetɔ.

²³Nye nuyiwo ado dzidzɔɣli,

ne mele kafukafuhawo dzim na wò,

nye ame si nèɖe.

²⁴Nye aɖe agblɔ wò dzɔdzɔenyenye

ƒe dɔwo ŋkeke blibo la,

elabena ŋukpe kple tɔtɔ va

ame siwo di be yewoawɔ nuvevim la dzi.

Psalmo 72

Ha na Solomo.

¹O! Mawu, tsɔ wò afia nyui tsotso do na fia la,

kple wò dzɔdzɔenyenye na fiavi la.

²Adrɔ̃ ʋɔnu na wò dukɔ la le dzɔdzɔenyenye me,

eye wòatso afia nyui na ame siwo ƒe dzi gbã la.

³Towo atsɔ kesinɔnuwo vɛ na wò dukɔ,

eye togbɛwo atsɔ dzɔdzɔenyenye ƒe kutsetse vɛ na wo.

⁴Aʋli ame siwo ƒe dzi gbã la ta,

axɔ na hiãtɔwo ƒe viwo,

eye wòagbã ameteɖetola la nyanyanya.

⁵Zi ale si ɣe kple ɣleti li la,

anɔ te le dzidzimewo katã me.

⁶Anɔ abe tsidzadza ɖe anyigba si dzi woƒo gbe le

kple agbafie si dza ɖe anyigba hede tsii ene.

⁷Ame dzɔdzɔewo ayi ŋgɔ le eƒe ɣeyiɣiwo me,

eye kesinɔnuwo ado agbogbo va se ɖe esime ɣleti magaɖi o.

⁸Aɖu fia tso atsiaƒu ƒe go sia dzi ayi go kemɛ dzi,

tso tɔsisi to ase ɖe anyigba la ƒe mlɔenuwo ke.

⁹Dukɔ siwo le gbegbe la ade ta agu nɛ,

eye eƒe futɔwo aɖuɖɔ ʋuʋudedi.

¹⁰Tarsis fia kple didiƒe ƒutatɔwo ahe adzɔ vɛ nɛ,

eye Sieba kple Seba fiawo atsɔ nunanawo vɛ nɛ.

¹¹Fiawo katã ade ta agu nɛ,

eye dukɔwo katã asubɔe,

¹²elabena aɖe hiãtɔ si le avi fam

kple wɔmenɔ si xɔnametɔ aɖeke meli na o.

¹³Akpɔ nublanui na ame gblɔewo kple hiãtɔwo,

eye wòaɖe ame dahewo tso ku me.

¹⁴Aɖe wo le teteɖeanyi kple ŋutasesẽ me,

elabena woƒe ʋu xɔ asi le eŋkume.

¹⁵Fia la nenɔ agbe tegbee!

Wonetsɔ Seba sika nɛ.

Amewo nedo gbe ɖa ɖe eta ɖaa,

eye wòayra ŋkeke blibo la.

¹⁶Bli nedo agbogbo ɖe anyigba la katã dzi;

eye neʋã ɖe togbɛwo katã dzi.

Blitiawo netri abe Lebanontɔwo ene,

eye woanɔ abe gbe le gbedzi ene.

¹⁷Eƒe ŋkɔ nenɔ anyi ɖaa,

eye nenɔ anyi zi ale si ɣe le keklẽm.

Woayra dukɔwo katã to eya amea dzi,

eye woayɔe be yayratɔ.

¹⁸Woakafu Yehowa Mawu,

Israel ƒe Mawu la,

eya ame si ko wɔa nu dzɔatsuwo.

¹⁹Woakafu eƒe ŋkɔ si ŋu ŋutikɔkɔe

le la tso mavɔ me yi ɖe mavɔ me;

eƒe ŋutikɔkɔe neyɔ anyigba blibo la dzi.

Amen, ɛ̃, Amen.

²⁰Esiawo wu Yese ƒe vi, David ƒe gbedodoɖawo nu.

Agbalẽ etɔ̃lia

Psalmowo 73–89

Psalmo 73

Asaf ƒe ha.

¹Vavã, Mawu wɔ nyui na Israel

kple ame siwo dza le woƒe dzi me.

²Ke nye la, nye afɔ ɖiɖi kloe,

eye esusɔ vie ko medze anyi.

³Elabena mebiã ŋu ɖokuiŋudzela esi mekpɔ

ale si nu le edzi dzem na ame vɔ̃ɖiwoe.

⁴Hiãkame aɖeke mele wo dzi o,

eye wole lãmesẽ kple dedinɔnɔ me.

⁵Wovo tso agba siwo tena ɖe amewo dzi la me,

eye amegbetɔwo ƒe hiãtuame aɖeke mele wo dzi o.

⁶Eya ta dada nye woƒe kɔga,

eye wodo nu vɔ̃ɖi wɔwɔ abe awu ene.

⁷Dzidada dona tso woƒe dzi si ku atri la me,

eye seɖoƒe meli na woƒe susu ƒe nu vɔ̃ɖiwo ɖoɖo o.

⁸Woɖua fewu, ƒoa nu vlodoametɔe,

eye le woƒe dada me la, woklẽa ŋku ɖe amewo be woabɔbɔ na wo.

⁹Woƒe nuwo xɔ dziƒo wɔ wo tɔe,

eye woƒe aɖewo xɔ anyigba wòzu wo tɔ.

¹⁰Eya ta woƒe amewo trɔ ɖe wo gbɔ,

eye wono tsi fũu.

¹¹Wogblɔ be, “Aleke Mawu awɔ anya?

Ɖe nunya le Dziƒoʋĩtɔ la sia?”

¹²Aleae ame vɔ̃ɖiwo le,

wole ablɔɖe me ɣe sia ɣi, eye wodzia woƒe kesinɔnuwo ɖe edzi.

¹³Nyateƒee, dzodzro ko wònye be mewɔ nye dzi dzadzɛ,

eye dzodzroe meklɔ nye asi ɖe fɔmaɖimaɖi me.

¹⁴Mekpea fu ŋkeke blibo la,

eye ŋdi sia ŋdi wohea to nam.

¹⁵Ɖe megblɔ be,

“Ale maƒo nui nye si” la,

anye ne mede viwòwo asi.

¹⁶Enye teteɖeanyi gã aɖe te menɔ

esi medze agbagba be mase nu siawo gɔme,

¹⁷va se ɖe esime mege ɖe Mawu ƒe Kɔkɔeƒe la,

tete mese afi si woawu nu ɖo la gɔme.

¹⁸Vavã, ètsɔ wo ɖo didiƒe,

eye nètsɔ wo xlã ɖe anyi wogblẽ keŋkeŋ.

¹⁹Aleke wohetsrɔ̃ kpata ale,

ŋɔdzi kplɔ wo dzoe kaba ŋutɔ!

²⁰O! Aƒetɔ, abe ale si drɔ̃e nɔna ne

ame nyɔ tso alɔ̃ me ene la,

do vlo wo abe drɔ̃e manyatalenu ene.

²¹Esi nye dzi bi ɖe dɔ me nam,

eye nye gbɔgbɔ se veve la,

²²mezu bometsila kple numanyala,

eye mele abe lã tagbɔkukutɔ ene le ŋkuwò me.

²³Ke mele gbɔwò ɣe sia ɣi,

eye nèlé nye ɖusibɔ ɖe asi.

²⁴Èkplɔm le wò aɖaŋudede nu,

eye àkplɔm emegbe ayi wò ŋutikɔkɔe mee.

²⁵Ame kae le dziƒo nam, negbe wò ko?

Naneke mele anyigba si medi kpe ɖe ŋuwò o.

²⁶Nye ŋutilã kple nye dzi nu ava yi,

gake Mawue nye nye dzi ƒe ŋusẽ

kple nye gomekpɔkpɔ tegbetegbe.

²⁷Ame siwo le adzɔge tso gbɔwò la atsrɔ̃,

elabena ètsrɔ̃ ame siwo katã meto nyateƒe na wo o.

²⁸Ke nye ya la, enyo be mate ɖe Mawu ŋu.

Aƒetɔ Yehowae mewɔ nye sitsoƒee,

maxlẽ wò nuwɔwɔwo katã afia.

Psalmo 74

Asaf ƒe nufiameha.

¹O! Mawu, nu ka ŋuti nègble mí ɖi ɖikaa?

Nu ka ta wò dɔmedzoe bi ɖe wò alẽ siwo le wò lãnyiƒe ŋuti?

²Ɖo ŋku ame siwo nèƒle le blema,

dukɔ si nye wò domenyinu,

ame siwo nèɖe kple Zion, to afi si nènɔ la dzi.

³Trɔ ɖe gli siwo gbã ɖikaɖika la ŋu,

gbegblẽ siawoe futɔ la he va wò teƒe kɔkɔe lae.

⁴Wò futɔwo le gbe ɖem le afi si nèdo go mí le;

wova tsi woƒe aflaga ɖe teƒe la be wòanye dzesi anɔ afi ma.

⁵Wole nu wɔm abe ŋutsu siwo lé fia ɖe asi

le ave dodowo me be woalã atiwo ene.

⁶Wotsɔ woƒe fiawo kple yiwo dza aɖaŋu

siwo wowɔ ɖe gliawo ŋu.

⁷Wotɔ dzo wò kɔkɔeƒe la wòbi va anyigba,

eye wodo gu teƒe si wò Ŋkɔ nɔna.

⁸Wogblɔ le woƒe dzi me be,

“Míagbã wo gudugudu!”

Wotɔ dzo teƒe sia teƒe si wosubɔa Mawu le,

le anyigba dzi.

⁹Womegawɔa nukunu aɖeke na mí o;

womegblẽ nyagblɔɖila aɖeke ɖi o

eye mía dometɔ aɖeke menya ɣeyiɣi si nu sia nu ava yi o.

¹⁰O! Mawu, ɣe ka ɣi futɔ la aɖu fewu

le ŋuwò ase ɖo?

Ɖe ketɔ la ado vlo wò ŋkɔ tegbeea?

¹¹Nu ka ta nèhe wò asi, wò nuɖusi ɖe megbe ɖo?

Ɖe wò asi doe le wò awu te, eye nàtsrɔ̃ wo!

¹²Ke wò la, O Mawu, wòe nye fianye tso blema ke;

wòe tsɔ ɖeɖe va anyigba la dzi.

¹³Wòe tsɔ wò ŋusẽ ma atsiaƒu,

eye nègbã tɔmelã dziŋɔwo ƒe ta le tsiwo me.

¹⁴Wòe gbã Leviatan ƒe ta,

eye nètsɔe wɔ nuɖuɖui na gbemelãwo.

¹⁵Wòe ʋu nu le tsitsetsewo

kple tɔʋuwo nu wosi bababa,

eye wòe na tɔ siwo sina ɖaa la mie.

¹⁶Ŋkeke nye tɔwò, eye zã hã tɔwòe;

wòe wɔ ɣe kple ɣleti.

¹⁷Wòe ɖo liƒo na anyigba,

eye wòe wɔ vuvɔŋɔli kple dzomeŋɔli.

¹⁸O! Yehowa, ɖo ŋku ale si futɔ la do vlo wò

kple ale si bometsilawo ɖe alɔme le wò ŋkɔ ŋuti la dzi.

¹⁹Mègatsɔ wò akpakpa ƒe agbe de asi na lãwɔadãwo o,

eye mègaŋlɔ wò hiãtɔwo ƒe gbe be ɖikaa o.

²⁰Tsɔ ɖe le wò nubabla la me,

elabena ŋutasesẽ ƒe wɔnawo yɔ anyigba la ƒe ɣaɣlɛƒewo fũu.

²¹Mègana ame siwo wote ɖe anyi la

nate gbugbɔɖemegbe kple ŋukpe o;

ke boŋ ame dahewo kple hiãtɔwo nekafu wò ŋkɔ.

²²O! Mawu, tso eye nàʋli wò bubu ta;

ɖo ŋku ale si bometsilawo le alɔme ɖem

le ŋuwò ŋkeke blibo lae dzi.

²³Mègado toku wò futɔwo ƒe ʋunyaʋunyawɔwɔ,

kple wò ketɔwo ƒe howɔwɔ si le dzi dem ɖaa la o.

Psalmo 75

Asaf ƒe ha na hɛnɔ la, ne woadzii ɖe “Mègagblẽ nu o” ƒe gbeɖiɖi nu.

¹O! Mawu, míeda akpe na wò,

míeda akpe na wò, elabena wò ŋkɔ tsɔ ɖe mía gbɔ,

eye amewo le wò nukunuwo xlẽm fia.

²Ègblɔ be, “Meɖo ɣeyiɣi da ɖi,

elabena nyee adrɔ̃ ʋɔnu le dzɔdzɔenyenye me.

³Ne anyigba kple edzinɔlawo ʋuʋu kpekpekpe la,

nyee léa eƒe sɔtiwo ɖe asi sesĩe. Sela

⁴Megblɔ na ɖokuiŋudzelawo be,

‘Midzudzɔ dada,’

eye na ame vɔ̃ɖi be,

‘Mègakɔ wò dzo ɖe dzi o.

⁵Mègakɔ wò dzowo ɖe dzi ɖe dziƒo ŋu o,

eye mègahe ve hafi nànɔ nu ƒom o.’ ”

⁶Dodoɖedzi metsoa ɣedzeƒe,

ɣetoɖoƒe alo gbegbe vana na ame o,

⁷ke boŋ Mawue nye afiatsola,

eɖea ame sia le zi dzi,

eye wòdoa ame kemɛ ɖe dzi.

⁸Kplu aɖe le Yehowa ƒe asi me,

wain si lɔ fu ɖe nu, eye wotsɔ nu ʋeʋĩ tɔtɔe la le eme;

ekui na ame vɔ̃ɖi siwo le anyigba dzi,

wonoe, no ahaƒã si le egɔme la hã ƒiaƒiaƒia.

⁹Ke nye la, manɔ esia gblɔm ɖaa be;

madzi kafukafuha na Yakob ƒe Mawu la;

¹⁰maŋe ame vɔ̃ɖiwo ƒe dzowo,

ke woado ame dzɔdzɔewo ƒe dzowo ɖe dzi.

Psalmo 76

Asaf ƒe ha na hɛnɔ la. Woadzii ɖe kasaŋku ŋu.

¹Wonya Mawu le Yuda,

eye eƒe ŋkɔ lolo le Israel.

²Eƒe agbadɔ le Salem,

eye eƒe nɔƒe le Zion.

³Afi ma wòŋe aŋutrɔ bibiwo,

akpoxɔnuwo kple yiwo le, nu siwo nye aʋawɔnuwo. Sela

⁴Keklẽ geɖe ƒo xlã wò,

eye nènya kpɔ sãsãsã wu to siwo me adelã le fũu la.

⁵Woha kalẽtɔwo, wodɔ woƒe alɔ̃ mamlɛtɔ;

aʋawɔla siawo dometɔ ɖeka pɛ

hã magate ŋu akɔ eƒe asiwo dzi o.

⁶O! Yakob ƒe Mawu, esi nèblu ko la,

sɔ kple tasiaɖam siaa tɔ ɖe teƒe ɖeka.

⁷Wò ko wòle be woavɔ̃.

Ame ka ate ŋu anɔ te ɖe nuwò ne èdo dɔmedzoe?

⁸Èɖe gbeƒã wò afiatsotso tso dziƒo,

anyigba vɔ̃, eye wòzi ɖoɖoe.

⁹O! Mawu, esi nètso be yeatso afia,

aɖe anyigba la ƒe hiãtɔwo la,

nu sia nu zi ɖoɖoe. Sela

¹⁰Vavã, wò dziku helĩhelĩ ɖe amewo ŋu,

he kafukafu vɛ na wò, eye ame siwo tsi agbe

le wò dziku la megbe la dze akɔ anyi.

¹¹Miɖe adzɔgbe na Yehowa, miaƒe Mawu la,

eye mixe adzɔgbeɖefeawo;

anyigba siwo katã ƒo xlã mi la

netsɔ nunanawo vɛ na Ame si wòle be woavɔ̃ la.

¹²Etsi dziɖulawo ƒe gbɔgbɔ nu;

anyigbadzifiawo katã vɔ̃nɛ.

Psalmo 77

Asaf ƒe ha na Hɛnɔ Yedutun.

¹Medo ɣli na Mawu be wòaxɔ nam;

medo ɣli na Mawu be wòaɖo tom.

²Esi meɖo xaxa me la, medi Aƒetɔ la;

le zã me la, meke nye abɔwo me, gake ɖeɖi mete wo ŋu o,

eye nye luʋɔ gbe akɔfafaxɔxɔ.

³O! Mawu, meɖo ŋku dziwò, eye meɖe hũu.

Mele ŋeŋem, eye nu te nye gbɔgbɔ ŋu. Sela

⁴Èna nye ŋkuwo gbe miamia;

fuɖeɖewo sɔ gbɔ ale gbegbe be

nyemate ŋu aƒo nu o.

⁵Mebu gbe aɖe gbe ŋkekewo

kple blemaƒewo ŋu.

⁶Tete meɖo ŋku ha siwo medzina le zã me la dzi.

Nye dzi gbã, eye nye gbɔgbɔ bia be:

⁷“Ɖe Aƒetɔ la agbe ame tegbetegbea?

Ɖe magave ame nu akpɔ oa?

⁸Ɖe eƒe lɔlɔ̃ si meʋãna o la vɔ tegbetegbea?

Ɖe eƒe ŋugbedodo vɔ hena ɣeyiɣiawo katã?

⁹Ɖe Mawu ŋlɔ nublanuikpɔkpɔ bea?

Ɖe wòɖo asi eƒe dɔmenyonyo dzi le dɔmedzoe ta?” Sela

¹⁰Tete megblɔ be,

“Dziƒoʋĩtɔ la ƒe nuɖusi ƒe ƒewo ko maƒo koko na.”

¹¹Maɖo ŋku Yehowa ƒe nuwɔwɔwo dzi,

ɛ̃, maɖo ŋku nukunu siwo nèwɔ le blema la dzi.

¹²Made ŋugble le wò dɔwɔwɔwo katã ŋu,

eye mabu ta me le wò nuwɔwɔ dzɔatsuwo ŋu.

¹³O! Mawu, wò mɔwo le kɔkɔe

mawu kae lolo abe míaƒe Mawu la ene?

¹⁴Wòe nye Mawu si wɔ nukunuwo,

eye nèɖe wò ŋusẽ fia le dukɔwo dome.

¹⁵Ètsɔ wò abɔ sesẽ la ɖe wò dukɔ la,

ame siwo nye Yakob kple Yosef ƒe dzidzimeviwo. Sela

¹⁶O! Mawu, tsiwo kpɔ wò,

tsiwo kpɔ wò, eye woŋe,

gogloƒewo ke hã dzo nyanyanya.

¹⁷Lilikpo ɖuɖu tsi bababa,

dziŋgɔli ɖe gbe, eye wò aŋutrɔwo klẽ dzo bibibi, yi gagbɔ.

¹⁸Wose wò gbeɖeɖe le yali me,

wò dzikedzo klẽ ɖe xexea me,

eye anyigba ʋuʋu hedzo nyanyanya.

¹⁹Wò mɔ to atsiaƒu me, eye wò toƒe

le tɔ gãwo me, gake womekpɔa wò afɔteƒe o.

²⁰Èkplɔ wò dukɔ abe alẽha ene,

to Mose kple Aron ƒe asiwo dzi.

Psalmo 78

Asaf ƒe nufiameha.

¹O! Nye dukɔ, mise nye nufiame,

eye miɖo to nye numenyawo.

²Make nye nu, aƒo nu le lododowo me.

Magblɔ nu siwo le ɣaɣla,

nu siwo li tso blema ke.

³Nu siwo míese, eye míenya,

nu siwo mía fofowo tsɔ tu xoe na mí.

⁴Míawo míaɣlae ɖe mía viwo o,

ke boŋ míagblɔ Yehowa ƒe dɔwɔwɔ

siwo dze na kafukafu,

eƒe ŋusẽ kple nukudɔ

siwo wòwɔ la na megbeviwo.

⁵Ewɔ ɖoɖowo na Yakob,

eye wòɖo se anyi ɖe Israel,

se siwo ŋu wòde se na

mía fofowo be woafia wo viwo,

⁶ale be dzidzime megbetɔwo hã nanya wo,

eye vi siwo womedzi haɖe o hã nanya wo,

ne woawo hã nafia wo viwo.

⁷Ekema woatsɔ woƒe mɔkpɔkpɔ ada ɖe Mawu dzi,

eye womaŋlɔ eƒe nuwɔwɔwo be o,

ke boŋ woalé eƒe sewo me ɖe asi.

⁸Ke womanɔ abe wo fofo kɔlialiatɔwo,

dzidzime dzeaglã,

ame siwo ƒe dzi meku ɖe Mawu ŋu o,

eye woƒe gbɔgbɔ meto nyateƒe nɛ o la ene o.

⁹Togbɔ be aŋutrɔwo le Efraimtɔwo si hã la,

wotrɔ megbe si dzo le aʋakpegbe.

¹⁰Womelé Mawu ƒe nubabla me ɖe asi o,

eye wogbe be yewomanɔ agbe ɖe eƒe se la nu o.

¹¹Woŋlɔ nu si wòwɔ la be,

esiwo nye nukunu siwo wòɖe fia wo.

¹²Ewɔ nukunu le wo fofowo ŋkume

le Egiptenyigba dzi,

le Zoan nuto me.

¹³Ema atsiaƒu, hekplɔ wo to emee,

eye wòna tsi la tɔ dzɔ kã abe glikpɔ ene.

¹⁴Etsɔ lilikpo kplɔ woe le ŋkeke me,

eye wòtsɔ dzo keklẽ kplɔ woe le zã me.

¹⁵Efe agakpe me le gbegbe,

eye wòna tsi wo wòsɔ gbɔ

abe atsiaƒumetsiwo ene.

¹⁶Ena tsi do tso agakpe me

eye tsi la si bababa abe tɔsisiwo ene.

¹⁷Ke woyi edzi gawɔ nu vɔ̃ ɖe eŋu,

eye wodze aglã ɖe Dziƒoʋĩtɔ la ŋu le gbedzi.

¹⁸Wotsɔ woƒe lɔlɔ̃nu te Mawu kpɔ,

esi wobia nuɖuɖu si le wo dzrom vevie.

¹⁹Woƒo nu tsi tsitre ɖe Mawu ŋu be,

“Ɖe Mawu ate ŋu aɖo kplɔ̃ na mí le gbedzia?

²⁰Esi wòtsɔ nu ƒo agakpe la, tsi do bababa,

eye tɔʋuwo si kplakplakpla.

Gake ɖe wòate ŋu ana nuɖuɖu mía?

Ate ŋu ana lã eƒe dukɔa?”

²¹Esi Yehowa se wo ŋkɔ la, dzi kui vevie;

eƒe dzo bi ɖe Yakob ŋu,

eye eƒe dɔmedzoe de dzi ɖe Israel ŋu,

²²elabena womexɔ Mawu dzi se,

alo ka ɖe eƒe xɔname dzi o.

²³Ke hã la, eɖe gbe na lilikpowo le dzi,

eye wòʋu dziƒo ƒe ʋɔtruwo,

²⁴ena mana dza tso dziƒo na dukɔ la be woaɖu,

eye wòna bli wo tso dziƒo.

²⁵Amegbetɔ ɖu mawudɔlawo ƒe nuɖuɖu,

eye wòɖo nuɖuɖu si sinu wohiã la ɖe wo.

²⁶Etu ka ɣedzeƒeya tso dziƒo,

eye wòkplɔ dzigbeya kple eƒe ŋusẽ.

²⁷Ena lã dza ɖe wo dzi abe ʋuʋudedi ene,

eye xe dzodzoewo abe ƒutake ene.

²⁸Ena woge dze woƒe asaɖa me,

eye woƒo xlã woƒe agbadɔwo.

²⁹Ale woɖui ʋuu heɖi ƒo taŋ,

elabena ewɔ nu si dzrom wole la dzi na wo.

³⁰Ke hafi nuɖuɖu si wodzro la navɔ,

eye esi wògale nu me na wo ko la,

³¹Mawu ƒe dɔmedzoe bi ɖe wo ŋu;

ewu ame sesẽwo le wo dome,

eye wòlã Israel ɖekakpuiwo ƒu anyi.

³²To nu siawo katã gbɔ hã la,

wogayi nu vɔ̃ wɔwɔ dzi,

eye togbɔ be ewɔ nukunuwo hã la,

womexɔe se o.

³³Ale wòna woƒe ŋkekewo wu nu nanekemakpɔkpɔe,

eye woƒe ƒewo wu nu le ŋɔdzi me.

³⁴Ɣe sia ɣi si ke Mawu wu wo ko la,

wodinɛ, eye wogatrɔna ɖe eŋu kple vevidodo.

³⁵Woɖoa ŋku edzi be Mawue nye woƒe Agakpe,

eye Mawu Dziƒoʋĩtɔ lae nye woƒe Ɖela.

³⁶Ke emegbe la, wotsɔa woƒe nu flunɛ,

eye wotsɔa woƒe aɖe daa alakpa nɛ.

³⁷Woƒe dziwo meku ɖe eŋu vavã o,

eye womewɔ eƒe nubabla dzi le nyateƒe me o.

³⁸Gake ekpɔ nublanui na wo;

etsɔ woƒe vodadawo ke wo, eye metsrɔ̃ wo o.

Zi geɖe la, eɖoa asi eƒe dziku dzi,

eye menaa eƒe dɔmedzoe katã bina o.

³⁹Eɖo ŋku edzi be ŋutilã ko wonye,

eye wonye ya si ƒona yina gake megatrɔna gbɔna o.

⁴⁰Zi nenie womedze aglã ɖe eŋu le gbedzi,

eye womedo vevesese nɛ le kuɖiɖinyigba dzi o!

⁴¹Enuenu wotea Mawu kpɔna,

eye wodoa dziku na Israel ƒe Kɔkɔetɔ la.

⁴²Womeɖo ŋku eƒe ŋusẽ dzi,

gbe si gbe wòɖe wo tso ŋutasẽla ƒe asi me,

⁴³gbe si gbe wòɖe eƒe nukudzesiwo fia

le Egipte kple eƒe nukudɔwo fia le Zoan nuto me o.

⁴⁴Etrɔ woƒe tɔsisiwo wozu ʋu,

eye womete ŋu no woƒe tɔʋumetsi o.

⁴⁵Eɖo togbato ƒe ha gã aɖe ɖe wo dome,

woɖu wo kple akpɔkplɔwo wogblẽ woƒe nuwo.

⁴⁶Etsɔ woƒe nukuwo na ʋetrawo

kple woƒe kutsetsewo na ʋetsuviwo.

⁴⁷Egblẽ woƒe waingblewo kple kpetsi,

eye woƒe gbotiwo kple tsidzadza sesẽ.

⁴⁸Etsɔ woƒe nyihawo na kpetsi,

eye wòtsɔ woƒe lãhawo na dzikedzo.

⁴⁹Eɖo eƒe dɔmedzoe nyanyra,

dziku helĩhelĩ, xaxa kple fuwɔame,

siwo nye mawudɔla siwo gblẽa nu la ɖe wo.

⁵⁰Eɖe mɔ ɖi na eƒe dɔmedzoe;

meɖe woƒe agbe tso ku me o,

ke boŋ etsɔ wo de asi na dɔvɔ̃.

⁵¹Ewu Egiptetɔwo ƒe ŋgɔgbevi

siwo nye woƒe ŋutsunyenye

ƒe kutsetse gbãtɔwo le Ham gbadɔwo te.

⁵²Gake ekplɔ eƒe dukɔ la abe lãhawo ene,

eye wòkplɔ wo abe alẽwo ene to gbedzi.

⁵³Ekplɔ wo le dedinɔnɔ me, ale be womevɔ̃ o,

gake ƒu la tsyɔ woƒe futɔwo dzi.

⁵⁴Ale wòkplɔ wo va eƒe anyigba kɔkɔe la ƒe liƒo dzi,

va tonyigba si eƒe nuɖusi xɔ la gbɔ.

⁵⁵Enya dukɔwo le wo ŋgɔ,

eye wòma woƒe anyigba na wo be

wòanye woƒe domenyinu,

eye wòna Israel ƒe toawo nɔ woƒe aƒewo me.

⁵⁶Ke wote Mawu kpɔ,

wodze aglã ɖe Dziƒoʋĩtɔ la ŋu,

eye womelé eƒe sewo me ɖe asi o.

⁵⁷Abe wo fofowo ene la,

womeɖo to o, wowɔ nu dzimaxɔsetɔe,

eye wole abe dati doagblɔ ene,

elabena womate ŋu aka ɖe wo dzi o.

⁵⁸Wotsɔ woƒe nuxeƒewo do dɔmedzoe nɛ,

eye woƒe legbawo na ŋuʋaʋã tso le eya amea me.

⁵⁹Esi Mawu se wo ŋkɔ la, dzi kui vevie ŋutɔ,

eye wògbe Israel keŋkeŋ.

⁶⁰Ale wògblẽ agbadɔ si le Silo la ɖi,

agbadɔ si wòtu ɖe amegbetɔwo dome.

⁶¹Eɖo nubablaɖaka si nye eƒe ŋusẽ la ɖe aboyome,

eye wòtsɔ eƒe atsyɔ̃nu de asi na futɔ la.

⁶²Etsɔ eƒe dukɔ de asi na yi,

eye wòdo dɔmedzoe vevie ɖe

eƒe domenyinu la ŋu.

⁶³Ena dzo fia eƒe ɖekakpuiwo,

eye womedzi srɔ̃ɖeha na eƒe ɖetugbiwo o.

⁶⁴Wotsɔ woƒe nunɔlawo de asi na yi,

eye avi bu ɖe woƒe ahosiwo.

⁶⁵Tete Aƒetɔ la nyɔ tso alɔ̃ me abe ale si aha kɔna

le mo na ame si no wain mu la ene.

⁶⁶Enya eƒe futɔwo do ɖe megbe,

eye wòdo ŋukpe mavɔ wo.

⁶⁷Emegbe la, wògbe nu le Yosef ƒe agbadɔwo gbɔ,

eye metia Efraim ƒe to la o.

⁶⁸Ke boŋ etia Yuda ƒe to la,

esi nye Zion to si wòlɔ̃na vevie.

⁶⁹Etu eƒe kɔkɔeƒe la abe kɔkɔƒe ene,

eye abe anyigba si wòli kee tegbetegbe ene.

⁷⁰Etia David dɔla,

eye wòɖee le alẽkpo me;

⁷¹tso alẽkplɔdɔ me, eye wòkplɔe vɛ be wòakplɔ eƒe dukɔ,

Yakob kple eƒe domenyinu, Israel.

⁷²David kpɔ wo dzi le dzi dzɔdzɔe me,

eye wòkplɔ wo le aɖaŋu me.

Psalmo 79

Asaf ƒe ha.

¹O! Mawu, dukɔwo nye zi ɖe wò domenyinu la dzi,

wodo gu wò gbedoxɔ kɔkɔe la,

eye wogbã Yerusalem wòzu anyiglagoe.

²Wotsɔ wò dɔlawo ƒe kukuawo

na dziƒoxewo abe nuɖuɖu ene,

eye wotsɔ wò ame kɔkɔeawo ƒe ŋutilã

na anyigbadzilã wɔadãwo.

³Wokɔ woƒe ʋu ɖi abe tsi ene ƒo xlã Yerusalem,

eye ame aɖeke meli aɖi ame kukuawo o.

⁴Míezu fewuɖunu na míaƒe aƒelikawo,

eye míezu alɔmeɖenu kple vlodonu na ame siwo ƒo xlã mí.

⁵O! Yehowa, va se ɖe ɣe ka ɣi?

Ɖe nàdo dɔmedzoe tegbeea?

Va se ɖe ɣe ka ɣi wò ŋuʋaʋã abi abe dzo ene?

⁶Trɔ wò dziku helĩhelĩ la kɔ ɖe dukɔ

siwo menya wò o la dzi

kple fiaɖuƒe siwo meyɔa wò ŋkɔ o la dzi.

⁷Elabena wovuvu Yakob,

eye wogbã eƒe denyigba.

⁸Mègawɔ na mí ɖe mía fofowo ƒe nu vɔ̃ nu o;

na wò nublanuikpɔkpɔ nava do go mí kaba,

elabena míeɖo xaxa gã aɖe me.

⁹O! Mawu, mía Ɖela,

kpe ɖe mía ŋu le wò ŋkɔ ƒe bubu ta.

Ɖe mí, eye nàtsɔ míaƒe nu vɔ̃wo

ake mí le wò ŋkɔ la ta.

¹⁰Nu ka ŋuti dukɔwo agblɔ be,

“Afi ka woƒe Mawu la le?”

Le míawo ŋutɔ ƒe ŋkume, na dukɔwo nanya be,

èbia hlɔ̃ na wò dɔla siwo ƒe ʋu wokɔ ɖi.

¹¹Aʋaléleawo ƒe ŋeŋe neɖo gbɔwò,

tsɔ wò asi ƒe ŋusẽ ɖe

ame siwo wotso kufia na.

¹²O! Aƒetɔ, ɖo vlo, si míaƒe aƒelikawo

do wò la teƒe na wo zi adre.

¹³Ekema mí wò dukɔ,

wò lãnyiƒe ƒe alẽwo akafu wò tegbee,

eye tso dzidzime yi dzidzime

míaɖe wò kafukafu afia.

Psalmo 80

Asaf ƒe ha na hɛnɔ la. Woadzii ɖe “Nubabla ƒe Dzogbenya” ƒe gbeɖiɖi nu.

¹O, Israel ƒe Kplɔla, ɖo to mí,

wò ame si kplɔ Yosef ƒe dzidzimeviwo abe lãha ene;

wò ame si nɔ anyi ɖe kerubiwo titina gli,

klẽ ²le Efraim, Benyamin kple Manase ŋgɔ.

Nyɔ wò ŋusẽ,

va nàxɔ na mí.

³O! Mawu, gaɖo mí te;

na wò mo naklẽ ɖe mía dzi,

be míakpɔ xɔxɔ.

⁴O! Yehowa, Mawu Ŋusẽkatãtɔ,

va se ɖe ɣe ka ɣi wò dɔmedzoe abi ɖe

wò dukɔ ƒe gbedodoɖa ŋu?

⁵Èna aɖatsibolo wo woɖu,

eye nèna aɖatsi wo wono taŋtaŋ.

⁶Ètsɔ mí wɔ dzrewɔnui na míaƒe aƒelikawo,

eye míaƒe futɔwo ɖe alɔme le mía ŋu.

⁷O! Mawu, Ŋusẽkatãtɔ, gaɖo mí te;

na wò mo naklẽ ɖe mía dzi,

be míakpɔ xɔxɔ.

⁸Ètsɔ wainka tso Egipte,

ènya dukɔwo, eye nèdoe.

⁹Èdzra eŋuti ɖo nyuie,

eye wòto ke hevu tsyɔ anyigba.

¹⁰Edo vɔvɔli ɖe towo tame

eye wòɖe alɔ de sedati kɔkɔwo tame.

¹¹Eɖe alɔ yi ɖe keke ƒuta ke,

eye eƒe kewo yi ɖe keke Frat tɔsisi la nu ke.

¹²Nu ka ŋuti nègbã kpɔ le eŋu,

ale be ame siwo to afi ma yi la fɔ wain tsetsewo?

¹³Gbehawo nya avuzi le edzi,

eye gbemelãwo ɖui.

¹⁴Trɔ va mía gbɔ, O Mawu, Ŋusẽkatãtɔ!

Do kɔ ɖa tso dziƒo, eye nàkpɔ nu!

Kpɔ wainka sia ta,

¹⁵ke si wò nuɖusi do,

viŋutsu si wò ŋutɔ nèhe wòtsi.

¹⁶Wolã wò wainka,

wotɔ dzoe, eye wò mokaname na wò amewo tsrɔ̃.

¹⁷Wò asi nenɔ ŋutsu si le wò nuɖusime,

amegbetɔvi si nènyi na ɖokuiwò la dzi.

¹⁸Ekema míatrɔ le yowòme o;

gbɔ agbe mí, eye míayɔ wò ŋkɔ.

¹⁹O! Yehowa, Mawu Ŋusẽkatãtɔ, gaɖo mí te;

na wò mo nàklẽ ɖe mía dzi be míakpɔ xɔxɔ.

Psalmo 81

Asaf ƒe ha na hɛnɔ la. Woadzii ɖe gitit ƒe gbeɖiɖi nu.

¹Midzi ha, mikpɔ dzidzɔ ɖe Mawu, míaƒe ŋusẽ la ŋu,

eye mitso aseye kple ɣli ɖe Yakob ƒe Mawu la ŋu!

²Mido ha ɖa, xatsɛwo neɖi,

miƒo kasaŋku kple gakasaŋku siwo ƒe gbe me kɔ.

³Miku lãdzokpẽwo le Dzinu Yeye dzi

kple ne dzinu sɔ tegblẽe le míaƒe ŋkekenyuiɖugbe.

⁴Esia nye se na Israel kple ɖoɖo na Yakob ƒe Mawu la.

⁵Esi Mawu tso ɖe Egiptetɔwo ŋu la,

eɖoe anyi be wòanye se na Yosef,

afi si míese gbegbɔgblɔ si gɔme míese o la le:

⁶Egblɔ be, “Meɖe agba la ɖa le woƒe abɔta,

eye woɖe woƒe asiwo ɖa le kusi la ŋuti.

⁷Mieyɔm le miaƒe xaxa me, eye mexɔ na mi.

Metɔ na mi le dziɖegbelilikpo la me.

Medo mi kpɔ le Meriba tsi la gbɔ. Sela

⁸Mísee, o nye dukɔ, maxlɔ̃ nu mi.

O! Israel, nenye ɖe nàɖo tom ɖe!

⁹Dzromawu aɖeke maganɔ dowòme o;

màgade ta agu na mawu tutɔ aɖeke o.

¹⁰Nyee nye Yehowa, wò Mawu,

ame si kplɔ wò do goe tso Egipte.

Ke wò nu baa, eye mana wòayɔ.

¹¹“Ke nye dukɔ meɖo to nye gbe o;

Israel gbe, mebɔbɔ eɖokui nam o,

¹²eya ta meɖe asi le wo ŋu na

woƒe dzi sesẽwo, ne woadze nu

siwo woawo ŋutɔ ɖo la yome.

¹³“Ɖe wònye nye dukɔ aɖo tom,

eye Israel nazɔ nye mɔwo dzi la,

¹⁴aleke nyemahabɔbɔ woƒe futɔwo ɖe anyii kaba,

eye nyemahakɔ nye asiwo dzi ɖe woƒe ketɔwo ŋui o!

¹⁵Ame siwo lé fu Yehowa la ada alakpa le eŋkume,

eye woƒe tohehe anɔ anyi tegbee.

¹⁶Ke míaɖu bliwɔ nyuitɔ,

eye matsɔ kpetomenyitsi aɖi ƒoe na mi.”

Psalmo 82

Asaf ƒe ha.

¹Mawu nɔ zi me na takpekpe gã la,

eye wòdrɔ̃ ʋɔnu le “mawuwo” dome.

²“Va se ɖe ɣe ka ɣi miaʋli ame baɖa la ta,

eye miatso afia ade ame vɔ̃ɖi la dzi?” Sela

³“Miʋli ame gblɔewo kple tsyɔ̃eviwo ta,

eye miwɔ dɔmenyo na hiãtɔwo kple ame siwo wote ɖe to.

⁴Mixɔ na ame gblɔewo kple hiãtɔwo,

eye miɖe wo tso ame vɔ̃ɖiwo ƒe asi me.

⁵“Womenya naneke o, womese naneke gɔme o.

Wole zɔzɔm le blukɔ me,

eye anyigba ƒe agunuwo katã ʋuʋu.

⁶“Megblɔ be, ‘Mawuwoe mienye;

mi katã mienye Dziƒoʋĩtɔ la ƒe viŋutsuwo’,

⁷gake miaku abe amegbetɔwo ko ene

eye miatsi aʋa abe fia ɖe sia ɖe ko ene.”

⁸O! Mawu, tso, eye nàdrɔ̃ ʋɔnu anyigba la

elabena dukɔwo katã nye wò domenyinu.

Psalmo 83

Asaf ƒe ha.

¹O! Mawu, mègazi kpi o,

O! Mawu, mègazi ɖoɖoe o,

mèganɔ anyi kpoo o.

²Kpɔ ale si wò futɔwo le nyanyram ɖa,

kpɔ ale si wò ketɔwo kɔ ta dzii ɖa.

³Wole nu baɖa ɖom ɖe wò dukɔ ŋu le ayeme,

eye woɖo nugbe ɖe ame siwo nèlɔ̃na la ŋu.

⁴Wogblɔ be, “Miva, míatsrɔ̃ wo, be womaganye dukɔ o,

eye womagaɖo ŋku Israel ƒe ŋkɔ dzi akpɔ gbeɖe o.”

⁵Wotsɔ tameɖoɖo ɖeka de adaŋu,

eye wobla ɖe ŋuwò,

⁶ame siwo le Edom ƒe agbadɔwo me,

Ismaelitɔwo, Moabtɔwo, Hagritɔwo,

⁷Gebalitɔwo, Amonviwo, Amalekitɔwo,

Filistitɔwo kple ame siwo tso Tiro.

⁸Asiria gɔ̃ hã kpe ɖe wo ŋu,

be wòado alɔ Lot ƒe dzidzimeviwo. Sela

⁹Wɔ wo abe ale si nèwɔ Midian,

Sisera kple Yabin le Kison tɔsisi la to ene,

¹⁰ame siwo tsrɔ̃ le Endor,

eye wole abe gbeɖuɖɔ ene le anyigba.

¹¹Wɔ woƒe bubumewo abe Oreb kple Zeb ene,

eye woƒe dumegãwo abe Zeba kple Zalmuna ene,

¹²ame siwo gblɔ be,

“Mina míaxɔ Mawu ƒe lãnyiƒewo.”

¹³O! Nye Mawu, wɔ wo abe betsyo

kple blitsa si ya lɔ ɖe nu ene.

¹⁴Abe ale si dzo biaa ave,

alo dzo ƒe aɖe tɔa dzo towo ene la,

¹⁵nenemae nàti wo yomee kple wò ya sesẽ,

eye nàdo ŋɔdzi na wo kple wò ahom.

¹⁶Tsɔ ŋukpe tsyɔ mo na wo,

ale be amewo nadi wò ŋkɔ, O Yehowa.

¹⁷Na ŋukpe nalé wo,

woƒe mo natsi dãa, eye wonetsrɔ̃ le ŋukpe me.

¹⁸Na woanya be wò, ame si ŋkɔe nye Yehowa la,

wò koe nye Dziƒoʋĩtɔ la ɖe anyigba blibo la dzi.

Psalmo 84

Korah ƒe viwo ƒe ha na hɛnɔ la. Woadzii ɖe gitit ƒe gbeɖiɖi nu.

¹O! Yehowa, Dziƒoʋakɔwo ƒe Aƒetɔ,

wò nɔƒe dzeani loo!

²Yehowa, wò xɔxɔnuwo

le nye luʋɔ dzrom kutɔkutɔe.

Nye dzi kple ŋutilã

le vivi dom ɖe Mawu gbagbe la ŋu.

³O! Yehowa, Dziƒoʋakɔwo ƒe Aƒetɔ,

Fianye kple Mawunye,

sagbadre gɔ̃ hã kpɔ nɔƒe,

eye atsutsrɔe wɔ atɔ na eɖokui,

afi si wòatsɔ viawo ada ɖo,

be wòate ɖe wò vɔsamlekpui la ŋu.

⁴Woayra ame siwo nɔa wò aƒe me la,

elabena wole kafuwòm ɖaa. Sela

⁵Woayra ame siwo ƒe ŋusẽ le mewò,

ame siwo ƒe dzi ku ɖe xɔsemɔzɔzɔ ŋuti.

⁶Ne woto Baka Balime la,

wowɔnɛ wòzua tsidzɔƒewo,

eye kelemetsi tsyɔa edzi kple yayra.

⁷Wole azɔli dzi tso ŋusẽ me yi ŋusẽ me va se ɖe

esime wo dometɔ ɖe sia ɖe nado ɖe Mawu ŋkume le Zion.

⁸Yehowa, Mawu Ŋusẽkatãtɔ;

O! Yakob ƒe Mawu,

ɖo to nye gbedodoɖa. Sela

⁹O! Mawu, nye kɔ nàkpɔ míaƒe akpoxɔnu,

eye nakpɔ wò amesiamina la kple amenuveve.

¹⁰Ŋkeke ɖeka le wò xɔxɔnu nyo wu akpe le afi aɖe;

enyo be manye agbonudzɔla

le Mawu ƒe aƒe me wu be manɔ

ame vɔ̃ɖi ƒe agbadɔ me,

¹¹elabena Yehowa Mawue nye ɣe kple akpoxɔnu.

Yehowae naa amenuveve kple bubu,

eye metea nu nyui ame siwo fɔɖiɖi

mele woƒe zɔzɔme ŋu o.

¹²O! Yehowa, Dziƒoʋakɔwo ƒe Aƒetɔ,

woayra ŋutsu si ɖoa dzi ɖe ŋuwò la.

Psalmo 85

Korah ƒe viwo ƒe ha na hɛnɔ la.

¹O! Yehowa, èɖe amenuveve fia wò anyigba;

ègaɖo Yakob ƒe nunyonamewo te.

²Ètsɔ wò dukɔ la ƒe vodada kee,

eye nètsyɔ nu woƒe nu vɔ̃wo katã dzi. Sela

³Èɖe asi le wò dzikudodo helĩhelĩ ŋuti

eye nèdzudzɔ dɔmedzoe kaɖikaɖi dodo.

⁴O! Mawu, míaƒe Ɖela, gaɖo mí te,

míaƒe nu meganɔ dzi kum na wò o.

⁵Ɖe nàdo dɔmedzoe ɖe mía ŋu ɖikaa?

Ɖe nàdidi wò dɔmedzoe la

wòazɔ ato dzidzimewo katã mea?

⁶Màgagbɔ agbe mí,

be wò dukɔ nàkpɔ dzidzɔ ɖe ŋuwò oa?

⁷O! Yehowa, ɖe wò lɔlɔ̃ si meʋãna o la fia mí,

eye nàna wò xɔname mí.

⁸Maɖo to ase nya si Yehowa Mawu agblɔ;

edo ŋutifafa ƒe ŋugbe na eƒe dukɔ,

eƒe ame kɔkɔewo, gake ɖeko mègana

woatrɔ ayi bometsitsi gbɔ o.

⁹Vavã eƒe ɖeɖe tsɔ ɖe ame siwo vɔ̃nɛ la gbɔ,

ale be eƒe ŋutikɔkɔe nanɔ míaƒe anyigba dzi.

¹⁰Lɔlɔ̃ kple nuteƒewɔwɔ do go wo nɔewo,

eye dzɔdzɔenyenye kple ŋutifafa gbugbɔ nu na wo nɔewo.

¹¹Nuteƒewɔwɔ mie tso anyigba me,

eye dzɔdzɔenyenye do mo ɖa kpɔ anyigba tso dziƒo.

¹²Yehowa ana nu si nyo la mí vavã,

eye míaƒe anyigba atse eƒe ku.

¹³Dzɔdzɔenyenye le eŋgɔ,

eye wòle mɔ tam na eƒe afɔtoƒewo.

Psalmo 86

David ƒe gbedodoɖa.

¹Ɖo tom, O Yehowa, eye nàtɔ nam,

elabena meda ahe, eye hiã tum.

²Kpɔ nye agbe ta,

elabena metsɔ ɖokuinye na wò.

Wòe nye nye Mawu,

eya ta ɖe wò dɔla si ɖo dzi ɖe ŋuwò.

³O! Aƒetɔ, kpɔ nye nublanui,

elabena mele yɔwòm ŋkeke blibo la.

⁴O! Aƒetɔ, tsɔ dzidzɔ vɛ na wò dɔla,

elabena wòe medo nye luʋɔ ɖe dzi na.

⁵O! Aƒetɔ, ènyo, eye nètsɔna kena,

lɔlɔ̃ bɔ ɖe asiwò na ame siwo katã yɔa wò.

⁶O! Yehowa, se nye gbedodoɖa,

eye nàlé to ɖe nye nublanuiɣli ŋu.

⁷Le nye xaxagbe, mayɔ wò elabena àtɔ nam.

⁸O! Aƒetɔ aɖeke megale mawuawo dome abe wò ene o;

nuwɔna aɖeke mesɔ kple tɔwò o.

⁹O! Aƒetɔ, dukɔ siwo katã nèwɔ la ava asubɔ

le ŋkuwò me, eye woatsɔ ŋutikɔkɔe ana wò ŋkɔ.

¹⁰Elabena èlolo, eye nèwɔ nu dzɔatsuwo;

wò koe nye Mawu.

¹¹O! Yehowa, fia wò mɔm,

eye mazɔ le wò nyateƒe la me;

tsɔ dzi si to mɔ ɖeka la nam,

ale be mavɔ̃ wò ŋkɔ.

¹²Makafu wò, O Aƒetɔ, nye Mawu,

kple nye dzi blibo.

Mado wò ŋkɔ ɖe dzi tegbee,

¹³elabena wò lɔlɔ̃ nam lolo ŋutɔ,

eye nèɖem tso keke tsiẽƒe ʋĩi ke.

¹⁴O! Mawu, dadalawo tso ɖe ŋunye,

ŋutasẽlawo ƒe ha ti nye agbe yome,

eye wonye ŋutsu siwo mebu wò ɖe naneke me o.

¹⁵O! Aƒetɔ, ke wò la,

Mawu si kpɔa nublanui,

eye wòvea ame nu lae nènye,

mèdoa dɔmedzoe kabakaba o,

lɔlɔ̃ bɔ ɖe asiwò, eye nèwɔa nuteƒe.

¹⁶Trɔ ɖe ŋutinye, eye nàkpɔ nublanui nam;

na wò ŋusẽ wò dɔla, eye nàɖe viwò ŋutsu nuteƒewɔla.

¹⁷Ɖe wò nyuiwɔwɔ ƒe dzesi fiam,

be nye futɔwo nakpɔe, eye ŋu nakpe wo,

elabena o Yehowa, wòe kpe ɖe ŋunye, eye nèfa akɔ nam.

Psalmo 87

Korah ƒe viwo ƒe ha.

¹Eɖo eƒe agunu anyi ɖe to Kɔkɔe la dzi.

²Yehowa lɔ̃ Zion ƒe agbowo

wu Yakob ƒe nɔƒewo katã.

³O! Mawu ƒe du,

wogblɔ nu nyui geɖewo tso ŋuwò. Sela

⁴“Maŋlɔ Rahab kple Babilon ƒe ŋkɔ ɖe

ame siwo nyam la dome,

nenema kee nye Filistia kple Tiro hekpe ɖe Kus ŋuti,

magblɔ be, ‘Wodzi esia le Zion.’ ”

⁵Vavã, woagblɔ le Zion ŋu be,

“Wodzi esia kple ekemɛ le afi ma,

eye Dziƒoʋĩtɔ la ŋutɔ aɖo egɔme anyi.”

⁶Yehowa aŋlɔ ɖe dukɔwo ƒe agbalẽ me be,

“Wodzi esia le Zion.” Sela

⁷Ne wole ha dzim la, woadzi ha be,

“Nye agunuwo katã le mewò.”

Psalmo 88

Korah ƒe viwo ƒe ha na hɛnɔ la. Enye nufiameha si Ezrahitɔ Heman kpa; woadzii ɖe Mahalat Leanot ƒe gbeɖiɖi nu.

¹O! Yehowa, Mawu si ɖem,

mele ɣli dom le ŋkuwò me zã kple keli.

²Nye gbedodoɖa nede gbɔwò,

ƒu to anyi ɖe nye kokoƒoƒo ŋu,

³elabena nye luʋɔ yɔ fũu kple xaxawo,

eye nye agbe ɖo kudo nu.

⁴Wobum ɖe ame siwo yi aʋlime la dome;

mele abe ŋutsu si si ŋusẽ mele o la ene.

⁵Woɖem ɖe aga da ɖe ame kukuwo dome,

eye mele abe ame siwo wowu wole yɔdo me la ene,

ame siwo dzi miagaɖo ŋkui o,

eye woɖe wo ɖa le wò dzikpɔkpɔ te.

⁶Ètsɔm de ʋe goglotɔ me,

yi ɖe keke viviti tsiɖitsiɖi me.

⁷Wò dziku helĩhelĩ le dzinye vevie,

eye nètsɔ wò ƒutsotsoewo tsyɔ dzinye. Sela

⁸Èxɔ xɔ̃nye veviwo le asinye,

eye nètsɔm wɔ ŋunyɔnu na wo.

Ètsɔm da ɖe xaxɛƒe, nyemate ŋu asi o,

⁹eye nuxaxa wɔe be nye ŋkuwo dzi tsyɔ.

O! Yehowa, mele yɔwòm gbe sia gbe,

eye meke nye abɔwo me na wò.

¹⁰Ɖe nàte ŋu aɖe wò nukunuwo afia ame kukua?

Ɖe ame siwo ku la ate ŋu atsi tsitre akafu wòa? Sela

¹¹Ɖe woaɖe gbeƒã wò lɔlɔ̃ le yɔdo me

kple wò nuteƒewɔwɔ le tsiẽƒea?

¹²Ɖe woanya nu le wò nukunuwo ŋu le viviti me,

alo le wò dzɔdzɔenyenyedɔwo ŋu le anyigba manyamanya dzia?

¹³Ke wò, o Yehowae,

mele ɣli dom na be nàxɔ nam,

eye le ŋdi me la, nye gbedodoɖa neva gbɔwò.

¹⁴O! Yehowa, nu ka ta nègbem,

eye nèɣla wò mo ɖem ɖo?

¹⁵Tso nye ɖekakpuime ke, mekpe hiã,

eye meɖo kudo nu,

mekpe fu le wò ŋɔdzidodowo ta,

eye dzi ɖe le ƒonye.

¹⁶Wò dziku helĩhelĩ tsyɔ dzinye,

eye wò ŋɔdzi gblẽ donyeme.

¹⁷Woƒo xlãm ŋkeke blibo la abe tsiɖɔɖɔ ene,

eye wonye tsyɔ dzinye.

¹⁸Èɖe nye zɔhɛwo kple xɔ̃nyewo ɖa le ŋunye,

eye vivitie nye xɔ̃nye si tsɔ ɖe gbɔnye.

Psalmo 89

Ezrahitɔ Etan ƒe nufiameha.

¹Madzi ha le Mawu ƒe lɔlɔ̃ gã la ŋu ɖaa,

matsɔ nye nu aɖe gbeƒã wò

nuteƒewɔwɔ tso dzidzime yi dzidzime.

²Maɖe gbeƒã be wò lɔlɔ̃ li ke tegbee,

eye nèɖo wò nuteƒewɔwɔ anyi ɖe dziƒo ŋutɔŋutɔ.

³Ègblɔ be, “Mebla nu kple nye ame tiatia,

meka atam na David, nye dɔla be,

⁴‘Maɖo wò ƒome anyi tegbee,

eye mana wò fiazikpui nali ke na dzidzimewo katã.’ ” Sela

⁵O! Yehowa, dziƒowo le wò nukunuwo kafum,

kple wò nuteƒewɔwɔ hã

le ame kɔkɔewo ƒe hame.

⁶Elabena ame kae le dziŋgɔli me

si woatsɔ asɔ kple Yehowa?

Le nu gbagbe siwo le dziƒo dome la,

kae le abe Yehowa ene?

⁷Le ame kɔkɔewo ƒe adaŋudeha me la ŋɔdzi le Mawu ŋu ŋutɔ,

ŋɔdzi le eŋu wu ame siwo katã ƒo xlãe.

⁸O! Yehowa, Dziƒoʋakɔwo ƒe Mawu, ame kae ɖi wò?

O! Yehowa, wò la, ŋusẽtɔe nènye, eye wò nuteƒewɔwɔ ƒo xlã wò.

⁹Wòe ɖu atsiaƒu ƒe agbodzedze dzi,

ne ƒutsotsoewo le dzi dem la, ènana wodzea akɔ anyi.

¹⁰Ègbã Rahab gudugudu abe

ame siwo wowu la dometɔ ɖeka ene,

eye nètsɔ wò abɔ sesẽ kaka wò futɔwo.

¹¹Dziƒowo nye tɔwò, anyigba hã tɔwòe;

wòe wɔ xexea me kple emenuwo katã.

¹²Wòe wɔ anyiehe kple dziehe;

ne Tabɔr kple Hermon se wò ŋkɔ ko la,

wodzia ha, tsoa aseye.

¹³Wotsɔ ŋusẽ de wò abɔ me,

eye wò asi sesẽ, wò nuɖusi de dzi.

¹⁴Woli wò fiazikpui anyi ɖe dzɔdzɔenyenye kple ʋɔnudɔdrɔ̃ dzi,

eye lɔlɔ̃ kple nuteƒewɔwɔ le zɔzɔm le ŋgɔwò.

¹⁵Woayra ame siwo srɔ̃ ale si woakafu wòe,

eye wozɔna le wò mo ƒe kekeli me, O Yehowa.

¹⁶Wotsoa aseye le wò ŋkɔ me ŋkeke blibo la,

eye wokpɔa dodoɖedzi le wò dzɔdzɔenyenye me.

¹⁷Elabena wòe nye woƒe ŋutikɔkɔe kple ŋusẽ,

eye to wò amenuveve me, nèkɔ míaƒe dzo ɖe dzi.

¹⁸Vavã, míaƒe akpoxɔnu nye Yehowa tɔ,

miaƒe fia nye Israel ƒe Kɔkɔetɔ la.

¹⁹Ɣe aɖe ɣi la, èƒo nu na wò

ame kɔkɔewo le ŋutega me be,

“Metrɔ ŋusẽ kɔ ɖe kalẽtɔ aɖe dzi;

medo ɖekakpui aɖe ɖe dzi le nye amewo dome.

²⁰Meke ɖe David, nye dɔla

ŋu, eye mesi ami nɛ kple nye ami kɔkɔe.

²¹Nye asi alée ɖe asi,

le nyateƒe me, nye alɔ ado ŋusẽe.

²²Futɔ aɖeke mazi edzi wòadzɔ ga nɛ o,

eye ame vɔ̃ɖi aɖeke matee ɖe to o.

²³Mafanya eƒe futɔwo le eŋgɔ,

eye maƒo ame siwo tso ɖe eŋu la aƒu anyi.

²⁴Nye lɔlɔ̃ si meʋãna o la anɔ anyi kplii,

eye woakɔ eƒe dzo ɖe dzi to nye ŋkɔ dzi.

²⁵Makɔ eƒe asi dzi ɖe atsiaƒu dzi,

eye eƒe nuɖusi ɖe tɔsisiwo dzi.

²⁶Ayɔm be, ‘Wòe nye Fofonye, nye Mawu,

nye Agakpe kple Ɖela.’

²⁷Matsɔe awɔ nye ŋgɔgbevi

kple fia si wodo ɖe dzi wu

le anyigbadzifiawo katã dome.

²⁸Malé nye lɔlɔ̃ nɛ me ɖe asi ɖaa,

eye nye nubabla kplii mada

le edzi akpɔ gbeɖe o.

²⁹Maɖo eƒe ƒome anyi tegbee,

eye zi ale si dziƒo li la,

nenema ke eƒe fiazikpui hã anɔ anyii.

³⁰“Ne viawo gblẽ nye sewo ɖi,

eye womewɔ nye ɖoɖowo dzi o,

³¹ne woda le nye sedede dzi,

eye wogbe nye gbeɖeɖewo dzi wɔwɔ la,

³²ekema matsɔ ati ahe to na woe ɖe

woƒe nu vɔ̃wo ta, eye matsɔ ƒoƒo ahe to

na wo ɖe woƒe vodadawo ta,

³³gake nyemaxɔ nye lɔlɔ̃ le esi,

alo ada le nye nuteƒewɔwɔ dzi o.

³⁴Nyemagbe nye nubabla la dzi wɔwɔ o,

eye nyematrɔ nu si nye nu gblɔ la o.

³⁵Meta nye kɔkɔenyenye zi ɖeka

hena ɣeyiɣiwo katã be,

nyemada alakpa na David o.

³⁶Ke boŋ eƒe ƒome anɔ anyi tegbee,

eye eƒe fiazikpui ali ke

le nye ŋkume abe ɣe ene.

³⁷Woaɖoe anyi ɖaa abe ɣleti,

ɖasefo nuteƒewɔla si le dziŋgɔli ŋu ene.” Sela

³⁸Gake ègbe, èdo vlo, eye nèdo dɔmedzoe ɖe wò

amesiamina ŋu vevie.

³⁹Ète fli ɖe nu si nèbla kple wò dɔla me,

eye nèdo gu eƒe fiakuku, tsɔe ƒu gbe ɖe ke me.

⁴⁰Ègbã eƒe gliwo,

eye nèwɔ eƒe mɔ sesẽwo wozu aƒedo.

⁴¹Ame siwo katã to afi ma la hae,

eye wòzu alɔmeɖenu na eƒe aƒelikawo.

⁴²Èdo eƒe futɔwo ƒe nuɖusi ɖe dzi,

eye nèna eƒe ketɔwo katã tso aseye.

⁴³Èna eƒe yi nu tsi, eye mèkpe ɖe eŋu

le aʋawɔwɔ me o.

⁴⁴Èna eƒe ŋutikɔkɔe wu enu,

eye nètsɔ eƒe fiazikpui ƒu gbe ɖe anyigba.

⁴⁵Èɖe eƒe ɖekakpuimeŋkekewo dzi kpɔtɔ,

eye nètsɔ ŋukpe tsyɔ nɛ abe avɔ ene. Sela

⁴⁶O! Yehowa va se ɖe ɣe ka ɣie?

Ɖe nàɣla ɖokuiwò tegbea?

Ɣe ka ɣi wò dziku abi abe dzo ene ase ɖo?

⁴⁷Ɖo ŋku ale si nye agbe le du dzii la dzi.

Tofloko kae nye si, nèwɔ amegbetɔviwo na!

⁴⁸Amegbetɔ kae anɔ agbe, eye maku o,

alo aɖe eɖokui tso tsiẽƒe ƒe ŋusẽ me? Sela

⁴⁹O! Aƒetɔ, afi ka wò lɔlɔ̃ gã tsãtɔ le,

wò lɔlɔ̃ si nye atam nèka na David

le wò nuteƒewɔwɔ me la le?

⁵⁰Aƒetɔ, ɖo ŋku ale si woɖu fewu le wò dɔla ŋuti

kple ale si nye dzi tsɔ dukɔwo ƒe vlodoame la dzi.

⁵¹O! Yehowa, ɖo ŋku vlodoame si wò futɔwo tsɔ

le alɔme ɖem le wò amesiamina ƒe

afɔɖeɖe ɖe sia ɖe ŋuti la dzi.

⁵²Woakafu Yehowa tegbetegbee!

Amen, ɛ̃, Amen.

Agbalẽ enelia

Psalmowo 90–106

Psalmo 90

Mose, Mawu ƒe ame ƒe gbedodoɖa.

¹Yehowa, wòe nye míaƒe sitsoƒe

le dzidzimewo katã me.

²Hafi towo nava dzɔ,

alo hafi nàwɔ anyigba kple xexea me,

tso mavɔ me yi ɖe mavɔ me, wò koe nye Mawu.

³Ènana amegbetɔwo gatrɔna zua kewɔ, eye nègblɔna be,

“O! Amegbetɔviwo, mitrɔ zu kewɔ.”

⁴Elabena ƒe akpewo le ŋkuwò me

le abe etsɔ ŋkeke si va yi la ene,

alo abe ŋudzɔɣi le zã me ene.

⁵Èkplɔa amewo dzonae to ku me;

wole abe gbe mumu le ŋdi me ene.

⁶Togbɔ be emie le ŋdi yeyee hã la,

le fiẽ me la, eƒu, eye wòku.

⁷Wò dɔmedzoe la tsrɔ̃ mí

eye wò dɔmedzoe do ŋɔdzi na mí.

⁸Ètsɔ míaƒe vodadawo ɖo wò ŋkume

kple míaƒe nu vɔ̃ siwo míewɔ

le ɣaɣlaƒe la ɖo wò mo ƒe kekeli nu.

⁹Míaƒe ŋkekewo katã nu va yi le wò dziku ta,

eye míewu míaƒe ƒewo nu kple ŋeŋe.

¹⁰Míaƒe agbemeŋkekewo le ƒe blaadre,

alo blaenyi, gake ne ŋusẽ gale mía ŋutie nye ema,

elabena woƒe didi nye fuɖename kple aɖukliɖuɖu;

wo nu va yi kaba, eye míedzo.

¹¹Ame kae nya wò dɔmedzoe ƒe ŋusẽ?

Elabena wò dziku nu sẽ abe ale si woavɔ̃ wòe ene.

¹²Fia ale si míaxlẽ míaƒe ŋkekewo dedie la mí,

ale be dzi si me dziƒonunya le la nasu mía si.

¹³O! Yehowa, bɔbɔ wò asi! Va se ɖe ɣe ka ɣi?

Kpɔ nublanui na wò dɔlawo.

¹⁴Tsɔ wò lɔlɔ̃ si meʋãna o la ɖi ƒoe na

mí le ŋdi me, be míadzi ha kple dzidzɔ,

eye míatso aseye le míaƒe ŋkekewo katã me.

¹⁵Na míatso aseye, ɖe ŋkeke siwo katã nètu nu kpli mí

kple ƒe siwo katã me nèhe fukpekpe va mía dzi la ta.

¹⁶Na woaɖe wò dɔwɔwɔwo afia wò dɔlawo

kple wò atsyɔ̃ afia wo viwo.

¹⁷Aƒetɔ, míaƒe Mawu, na wò amenuveve nanɔ mía dzi,

eye nàli ke míaƒe asinudɔwo na mí, ɛ̃,

míaƒe asinudɔwo, nàna woali ke nyuie.

Psalmo 91

¹Ame si nɔ Dziƒoʋĩtɔ la ƒe bebeƒe la

agbɔ ɖe eme le Ŋusẽkatãtɔ la ƒe vɔvɔli te.

²Magblɔ na Yehowa be, “Eyae nye nye sitsoƒe kple nye mɔ sesẽ,

nye Mawu si ŋu meku ɖo.”

³Vavã, aɖe wò le xevimɔtrela ƒe mɔ

kple dɔvɔ̃ dziŋɔ me.

⁴Atsɔ eƒe fuwo atsyɔ dziwò,

àkpɔ sitsoƒe le eƒe aʋala te,

eye eƒe nuteƒewɔwɔ anye wò akpoxɔnu

kple mɔxenu aƒo xlã wò.

⁵Màvɔ̃ zãmeŋɔdzi alo aŋutrɔ si le ʋɔ lũm le ŋkeke me,

⁶dɔvɔ̃ si le tsatsam le viviti me,

alo dɔxɔleameŋu si le nu gblẽm le ŋdɔ la o.

⁷Akpe adze anyi ɖe axawò,

eye akpe ewo ɖe wò nuɖusime,

ke wò la, mate ɖe ŋuwò o.

⁸Ɖeko nàkpɔe kple wò ŋkuwo,

eye àkpɔ ale si woahe to na ame vɔ̃ɖiwoe.

⁹Ne ètsɔ Dziƒoʋĩtɔ la, Yehowa,

ame si nye nye sitsoƒe wɔ nɔwòƒee la,

¹⁰ekema dzɔgbevɔ̃e maɖi kpe wò o,

eye gbegblẽ mate ɖe wò agbadɔ ŋu o,

¹¹elabena ade se na eƒe dɔlawo tso ŋutiwò,

be woakpɔ tawò le wò mɔwo katã dzi.

¹²Woakɔ wò ɖe woƒe asiwo me,

be màtsɔ wò afɔ axlã ɖe kpe aɖeke o.

¹³Àɖo afɔ dzata kple ƒli dzi, eye ànya avuzi

le dzata dziŋɔ kple da vɔ̃ɖi dzi.

¹⁴Yehowa be, “Maɖee, elabena elɔ̃m,

madzɔ eŋu, elabena enya nye ŋkɔ.

¹⁵Ayɔm, eye matɔ nɛ;

manɔ anyi kplii le xaxa me,

maɖee, eye made bubu eŋuti.

¹⁶Matsɔ agbe didi aɖi ƒo nɛ,

eye maɖe nye xɔxɔ afiae.”

Psalmo 92

Ha si wokpa. Hadzidzi. Na Dzudzɔgbe ŋkeke la.

¹Enyo be woakafu Yehowa,

eye woadzi ha na wò ŋkɔ, o Dziƒoʋĩtɔ,

²ne woaɖe gbeƒã wò lɔlɔ̃ le ŋdi me

kple wò nuteƒewɔwɔ le fiẽ me,

³ɖe ka ewo gakasaŋku

kple kasaŋku ƒe gbe vivi nu.

⁴O! Yehowa, èna mekpɔ dzidzɔ le wò nuwɔnawo ta.

Medzi ha tso aseye le wò asinudɔwo ta.

⁵O! Yehowa, wò dɔwɔwɔwo lolo loo,

aleke wò susuwo me goglo ale?

⁶Numanyala menya esia o,

eye bometsilawo mese egɔme o,

⁷be togbɔ be ame vɔ̃ɖi tsi mlɔmlɔmlɔ abe gbe ene,

eye nu tovo wɔlawo ƒo se hã la,

woatsrɔ̃ wo gbidigbidi.

⁸Ke wò, o Yehowa, woado wò ɖe dzi tegbetegbe.

⁹Vavã, wò futɔwo, o Yehowa,

atsrɔ̃ le nyateƒe me,

eye nu vlo wɔlawo katã aka ahlẽ gbẽe.

¹⁰Èkɔ nye dzo ɖe dzi abe to tɔ ene,

eye nèkɔ ami nyuitɔwo ɖe dzinye.

¹¹Nye ŋkuwo kpɔ ale si woɖu nye ketɔwo dzii,

eye nye towo se ale si wonya avuzi

le nye futɔ vɔ̃ɖiwo dzii.

¹²Ame dzɔdzɔewo atsi abe ale si deti tsinae ene,

woatsi akɔ abe Lebanon ƒe sedati ene;

¹³ati siwo wodo ɖe Yehowa ƒe aƒe me,

woatsi nyuie le míaƒe Mawu la ƒe xɔxɔnu.

¹⁴Aleke gbegbe wotsii hã la,

woaganɔ tsetsem, eye woƒe aŋgbawo ada ama, eye womalũ xɛ o.

¹⁵Woaɖe gbeƒã be, “Yehowae nye dzɔdzɔetɔ;

eyae nye nye Agakpe, eye vɔ̃ɖinyenye aɖeke mele eme o.”

Psalmo 93

¹Yehowa le fia ɖum, eta gãnyenye,

Yehowa ta gãnyenye, eye ŋusẽ le esi.

Eli ke xexea me, maʋã o.

²Woɖo wò fiazikpui anyi tso blema ke,

eye nèli tso mavɔ me ke.

³Atsiaƒuwo dze agbo, o Yehowa,

atsiaƒuwo le ɣli dom,

atsiaƒuwo dze agbo,

eye woƒe tsotsoewo le ŋeŋem.

⁴Ke ètri akɔ wu tɔsisi gãwo ƒe gbeɖeɖe,

ètri akɔ wu atsiaƒu ƒe agbodzedze, ɛ̃,

Yehowa le dziƒo tri akɔ.

⁵Wò sewo le te goŋgoŋgoŋ;

O! Yehowa, kɔkɔenyenye ɖo atsyɔ̃

na wò aƒe ɣeawo katã ɣi.

Psalmo 94

¹O! Yehowa, Mawu si biaa hlɔ̃,

O! Mawu si biaa hlɔ̃, klẽ.

²Tso, o xexea me ƒe Ʋɔnudrɔ̃la,

ɖo nu si dadalawo wɔ la teƒe na wo.

³O! Yehowa, va se ɖe ɣe ka ɣi

ame vɔ̃ɖi la atso aseye?

⁴Wole nya tovowo gblɔm,

eye dada yɔ ame vɔ̃ɖiwo katã me fũu.

⁵O! Yehowa, wogbã wò dukɔ la nyanyanya,

wote wò domenyinu la ɖe to.

⁶Wowu ahosiwo kple amedzrowo,

eye wowu tsyɔ̃eviwo hã.

⁷Wogblɔ be, “Yehowa mele ekpɔm o,

Yakob ƒe Mawu la metsɔ ɖeke le eme o.”

⁸Mikpɔ nyuie, mi gegeme siwo le dukɔ la me,

mi bometsilawo, ɣe ka ɣi miadze nunya?

⁹Ɖe eya ame si wɔ to la mase nu oa?

Ɖe eya ame si wɔ ŋku la makpɔ nu oa?

¹⁰Ɖe eya ame si hea to na dukɔwo la mahe to oa?

Ɖe eya ame si fiaa nu ame la, ahiã na nunya?

¹¹Yehowa nya amegbetɔ ƒe susu,

eye wònya be tofloko ko wònye.

¹²O, Yehowa, woayra ame si nèhe to na,

ame si nèfia nui tso wò se la me,

¹³eye nèna gbɔdzɔe tso dzɔgbevɔ̃eŋkekewo me,

va se ɖe esime wòɖe ʋe na ame vɔ̃ɖiwo.

¹⁴Elabena Yehowa magbe eƒe dukɔ la o,

eye magblẽ eƒe domenyinu ɖi o.

¹⁵Woagaɖo ʋɔnudɔdrɔ̃ anyi ɖe dzɔdzɔenyenye dzi,

eye ame siwo katã ƒe dzi to mɔ ɖeka la adze eyome.

¹⁶Ame ka atso ɖe ame vɔ̃ɖiwo ŋu nam?

Ame ka atsi tsitre ɖe nu tovo wɔlawo ŋu ɖe nunye?

¹⁷Ɖe menye Yehowae kpe ɖe ŋunye o la,

anye ne eteƒe madidi o la, manɔ ɖoɖoezizi me le tsiẽƒe.

¹⁸Esi medo ɣli be,

“Nye afɔ le ɖiɖim” la, wò lɔlɔ̃,

O! Yehowa, de megbe nam.

¹⁹Esi dzitsitsi yɔ menye la,

wò akɔfaname he dzidzɔ vɛ na nye luʋɔ.

²⁰Ɖe fiazikpui madzɔmadzɔ

si hea hiãkame vɛ to

eƒe sededewo me la ate ŋu ade ha kpli wòa?

²¹Wowɔa ɖeka ɖe ame dzɔdzɔewo ŋu,

eye wotsoa kufia na ame maɖifɔ.

²²Gake Yehowae nye nye mɔ sesẽ,

nye Mawu kple agakpe si nye nye sitsoƒe.

²³Aɖo woƒe nu vɔ̃wo teƒe na wo,

eye wòatsrɔ̃ wo le woƒe vɔ̃ɖinyenye ta, ɛ̃,

Yehowa, míaƒe Mawu la atsrɔ̃ wo.

Psalmo 95

¹Miva, mina míatso aseye ɖe Yehowa ŋu,

eye míado dzidzɔɣli ɖe míaƒe xɔxɔ ƒe Agakpe la ŋu.

²Mina míado ɖe eŋkume kple akpedada,

eye míadoe ɖe dzi to saŋku kple hadzidzi me.

³Elabena Yehowae nye Mawu gã la,

eye wònye fiagã si ƒo mawuwo katã ta.

⁴Anyigba ƒe gogloƒewo le eƒe asi me,

eye towo ƒe tsutsueƒe ke hã nye etɔ.

⁵Atsiaƒu hã nye etɔ,

elabena eyae wɔe, eye eƒe asie wɔ anyigba ƒuƒui hã.

⁶Miva, mina míabɔbɔ ade ta agu nɛ,

eye mina míadze klo ɖe

Yehowa, mía Wɔla la ƒe ŋkume.

⁷Elabena eyae nye míaƒe Mawu,

eye míenye amewo le eƒe lãnyiƒe,

kple lãha le eƒe dzikpɔkpɔ te.

Egbe, ne miese eƒe gbe la,

⁸migasẽ miaƒe dzi me abe ale si miewɔ le Meriba

kple ale si miewɔ gbe ma gbe le Masa le gbea dzi ene o.

⁹Afi mae mia fofowo,

togbɔ be wokpɔ nu si mewɔ hã la,

wodom kpɔ, eye wotem kpɔ le.

¹⁰Medo dɔmedzoe ɖe dzidzime ma ŋu ƒe blaene sɔŋ,

megblɔ be, “Wonye ame siwo ƒe dzi tra mɔ,

eye womenya nye mɔwo o.”

¹¹Ale le nye dɔmedzoe me, meka atam be,

“Womayi ɖe nye dzudzɔ la me gbeɖe o.”

Psalmo 96

¹Midzi ha yeye na Yehowa;

Mi anyigbawo katã, midzi ha na Yehowa.

²Midzi ha na Yehowa, mikafu eƒe ŋkɔ;

miɖe gbeƒã eƒe xɔxɔ gbe sia gbe.

³Miɖe eƒe Ŋutikɔkɔefia le dukɔwo dome

kple eƒe nukudɔwo fia le anyigbadzitɔwo katã dome.

⁴Elabena Yehowa lolo,

eye wòdze kafukafu ŋutɔ;

ele be woavɔ̃e wu mawuwo katã.

⁵Dukɔwo ƒe mawuwo nye legbawo,

ke Yehowae wɔ dziƒowo.

⁶Atsyɔ̃ kple gãnyenye le eŋgɔ,

eye ŋusẽ kple ŋutikɔkɔe le eƒe kɔkɔeƒe la me.

⁷O! Mi dukɔwo ƒe ƒomewo,

mitsɔ ŋutikɔkɔe kple ŋusẽ na Yehowa.

⁸Mitsɔ ŋutikɔkɔe si dze eƒe ŋkɔ la nɛ,

eye mitsɔ vɔsanuwo va eƒe xɔxɔnuwoe.

⁹Misubɔ Yehowa le eƒe kɔkɔenyenye ƒe atsyɔ̃ me,

eye anyigba katã nedzo nyanyanya le eŋkume.

¹⁰Migblɔ le dukɔwo dome be, “Yehowae le fia ɖum.”

Eɖo xexea me gɔme anyi goŋgoŋgoŋ, mate ŋu aʋã o;

eye adrɔ̃ ʋɔnu amewo ameŋkumemakpɔmakpɔtɔe.

¹¹Mina dziƒowo natso aseye, anyigba nekpɔ dzidzɔ,

atsiaƒu kple emenuwo katã neɖe gbe,

¹²eye gbegbe kple emenuwo katã netso aseye.

Ekema avemetiwo adzi ha atso aseye;

¹³woadzi ha le Yehowa ŋgɔ, elabena egbɔna,

eye wògbɔna ʋɔnu drɔ̃ ge.

Adrɔ̃ ʋɔnu xexea me le dzɔdzɔenyenye me

kple dukɔwo le nyateƒe me.

Psalmo 97

¹Yehowa le fia ɖum, anyigba nekpɔ dzidzɔ,

eye ƒutadu siwo le didiƒe ke la netso aseye.

²Lilikpowo kple blukɔ tsiɖitsiɖi ƒo xlãe,

eye dzɔdzɔenyenye kple afia nyui tsotso nye

eƒe fiazikpui ƒe gɔmeɖokpe.

³Dzo le bibim le eŋgɔ,

eye wòle eƒe futɔwo fiam le akpa sia akpa.

⁴Eƒe dzikedzo si akaɖi ɖe xexea me,

eye anyigba kpɔe heʋuʋu heyeheye.

⁵Towo lolo abe yɔkumi ene le Yehowa ŋgɔ, ɛ̃,

le anyigba ƒe Aƒetɔ la ŋkume.

⁶Dziƒowo le gbeƒã ɖem eƒe dzɔdzɔenyenye,

eye dukɔwo katã kpɔ eƒe ŋutikɔkɔe.

⁷Ŋukpe lé aklamakpakpɛsubɔlawo katã,

ame siwo tsɔa legbawo ƒoa adegbee,

ke misubɔe, mi mawuwo katã!

⁸Zion see, dzi dzɔe, eye Yuda ƒe kɔƒewo hã tso aseye

le wò afia nyui tsotsowo ta, o Yehowa.

⁹O! Yehowa, wò koe nye Dziƒoʋĩtɔ ɖe anyigba la katã dzi,

eye wodo wò ɖe dzi gbɔ mawuwo katã ta sãsãsã.

¹⁰Mi ame siwo lɔ̃a Yehowa la, mitsri vɔ̃,

elabena edzɔa etɔ siwo wɔa nuteƒe la ƒe agbe ŋuti,

eye wòɖea woƒe agbe tso ame vɔ̃ɖiwo ƒe asi me.

¹¹Kekeli klẽna ɖe ame dzɔdzɔewo dzi, eye dzidzɔkpɔkpɔ yɔa

ame siwo ƒe dzi to mɔ ɖeka la ƒe dziwo me.

¹²Mi ame dzɔdzɔewo, mitso aseye le Yehowa me,

eye mikafu eƒe ŋkɔ kɔkɔe la.

Psalmo 98

Hadzidzi.

¹Midzi ha yeye na Yehowa, elabena ewɔ nu dzɔatsuwo;

eƒe nuɖusi kple eƒe abɔ kɔkɔe la wɔ ɖeɖedɔ nɛ.

²Yehowa na wonya eƒe ɖeɖe, eye wòklo nu

le eƒe dzɔdzɔenyenye dzi na dukɔwo.

³Eɖo ŋku eƒe lɔlɔ̃

kple nuteƒewɔwɔ dzi na Israel ƒe aƒe la,

eye anyigba ƒe mlɔenu ke hã

kpɔ míaƒe Mawu la ƒe ɖeɖe.

⁴Mi anyigbawo katã,

mido dzidzɔɣli na Yehowa,

migli kple hadzidzi kple saŋkuƒoƒo.

⁵Midzi ha na Yehowa kple kasaŋku,

mitsɔ kasaŋku, hadzidzi,

⁶kpẽkuku kple lãdzokuku

kpakple dzidzɔɣli do ɖe Yehowa, fia la ŋkume.

⁷Mina atsiaƒu kple nu siwo katã le eme la nado ɣli,

anyigba kple edzinɔlawo katã hã.

⁸Mina tɔsisiwo naƒo asikpe,

eye towo katã nadzi ha ɖekae le dzidzɔkpɔkpɔ ta.

⁹Wonedzi ha le Yehowa ŋkume,

elabena eva ʋɔnu drɔ̃ ge anyigba la.

Adrɔ̃ ʋɔnu anyigba la le dzɔdzɔenyenye me

kple dukɔwo ameŋkumemakpɔmakpɔtɔe.

Psalmo 99

¹Yehowa le fia ɖum, dukɔwo nedzo nyanyanya,

enɔ eƒe fiazikpui dzi gli le kerubiwo dome,

anyigba neʋuʋu.

²Yehowa nye gã le Zion,

ekɔ gbɔ dukɔwo katã ta.

³Wonekafu wò ŋkɔ gã,

dziŋɔ la, eya amea le kɔkɔe.

⁴Fia la nye ŋusẽtɔ,

elɔ̃a afia nyui tsotso,

wò la, èɖo dzɔdzɔenyenye anyi,

eye nèwɔ nu si le dzɔdzɔe le Yakob me.

⁵Mido Yehowa, míaƒe Mawu la

ɖe dzi, eye mide ta agu ɖe eƒe afɔ nu,

elabena eya amea le kɔkɔe.

⁶Mose kple Aron le eƒe nunɔlawo dome;

Samuel le ame siwo yɔ eƒe ŋkɔ la dome;

woyɔ Yehowa ŋkɔ, eye wòtɔ na wo.

⁷Eƒo nu na wo tso lilikpo dodo me,

eye wolé se kple ɖoɖo siwo wòtsɔ na wo la me ɖe asi.

⁸O! Yehowa, míaƒe Mawu, wòe tɔ na wo;

togbɔ be èhe to na wo

le woƒe nu tovowo ta hã la,

ènye tsɔtsɔke ƒe Mawu na Israel.

⁹Mido Yehowa, miaƒe Mawu la ɖe dzi,

eye misubɔe le eƒe to kɔkɔe la dzi,

elabena Yehowa, míaƒe Mawu la le kɔkɔe.

Psalmo 100

Hadzidzi Akpedaha.

¹Mi anyigbawo katã,

mido dzidzɔɣli ɖe Yehowa ŋu.

²Misubɔ Yehowa kple dzidzɔ,

eye mitsɔ aseyetsohawo do ɖe eŋkume.

³Minyae be Yehowae nye Mawu.

Eyae wɔ mí, eye míenye etɔ,

eƒe amewo kple alẽwo le eƒe lãnyiƒe míenye.

⁴Mige ɖe eƒe agbowo me kple akpedada,

eƒe xɔxɔnuwo kple kafukafu;

mida akpe nɛ, eye mikafu eƒe eŋkɔ.

⁵Elabena Yehowa nyo, eye eƒe lɔlɔ̃ li ɖaa;

nenema kee eƒe nuteƒewɔwɔ hã nɔa anyi

tso dzidzime yi dzidzime.

Psalmo 101

David ƒe ha.

¹O! Yehowa, madzi ha le wò lɔlɔ̃

kple afia nyui tsotso ŋuti,

eye madzi kafukafuha na wò.

²Makpɔ nyuie be menɔ agbe si ŋu mokaka mele o,

eya ta gbe ka gbe nàva asrãm kpɔ?

Mazɔ le aƒenye me

kple dzi si ŋuti mokaka mele o.

³Nyematsɔ nu si me vɔ̃ le la aɖo nye ŋkume o.

Metsri xɔsemanɔsitɔwo ƒe nuwɔnawo,

womalé ɖe ŋunye o.

⁴Ame siwo ƒe dzi to vo la, ate ɖa xaa tso gbɔnye,

kadodo aɖeke mele nye kple nu vɔ̃ɖi dome o.

⁵Made ga nu na ame si ƒo ɖi ehavi ƒe ŋkɔ le bebeme,

eye ame si ŋku gã le esi

eye wòdana le dzi me la,

eya nyematɔ ɖe egbɔ o.

⁶Nye ŋku anɔ nuteƒewɔlawo ŋu

le anyigba dzi, be woanɔ anyi kplim.

Ame si fɔɖiɖi mele eƒe zɔzɔme ŋu o la,

anye nye nunɔla.

⁷Ame si nye ameblela la, manɔ aƒenye me o,

eye ame si daa alakpa la matsi tsitre ɖe ŋkunye me o.

⁸Ŋdi sia ŋdi la, mana ame vɔ̃ɖi siwo

le anyigba dzi la nazi ɖoɖoe.

Maɖe nu tovo wɔla ɖe sia ɖe ɖa

le Yehowa ƒe du la me.

Psalmo 102

Hiãtɔ aɖe ƒe gbedodoɖa, esi nu te eŋu, eye wòfa konyi le Yehowa ŋkume.

¹O! Yehowa, se nye gbedodoɖa,

eye nye kokoƒoƒo hena kpekpeɖeŋu neɖo gbɔwò.

²Mègaɣla wò ŋkume ɖem,

ne mele xaxa me o.

Trɔ wò to ɖe gbɔnye,

eye ne meyɔ wò la, nàtɔ nam kaba.

³Elabena nye ŋkekewo nu va yi abe dzudzɔ ene,

eye nye ƒuwo xɔ dzo hẽe abe dzokpo ene.

⁴Nye dzi xɔ abi, eye wòyrɔ abe gbe ene.

Meŋlɔ nye nuɖuɖu gɔ̃ hã be.

⁵Le nye ŋeŋe sesĩe ta la,

meɖi ku zu ƒu ɖeɖe.

⁶Mele abe ʋlukuku si le gbegbe ene,

alo abe ʋlukuku si le gli gbagbãwo tome ene.

⁷Mele ŋu le aba dzi,

eye mele abe xevi si tsi akogo le xɔ tame ene.

⁸Nye futɔwo le alɔme ɖem

le ŋunye ŋkeke blibo la,

eye ame siwo tso ɖe ŋunye

la tsɔ nye ŋkɔ wɔ ɖiŋudonui.

⁹Elabena meɖu dzowɔ abe nuɖuɖu ene,

eye metsɔ aɖatsi tɔtɔ nye nunonoe,

¹⁰le wò dziku helĩhelĩ la ta

elabena èdom ɖe dzi,

eye nètsɔm ƒu gbe ɖe adzɔge.

¹¹Nye ŋkekewo le abe fiẽ ƒe vɔvɔli ene,

eye meyrɔ abe gbe ene.

¹²O! Yehowa, wò la èle fia ɖum tegbetegbe,

eye wò ŋkɔxɔxɔ li tso dzidzime yi dzidzime.

¹³Ke wò la àtso,

akpɔ nublanui na Zion,

elabena ɣeyiɣi de be nàve enu, ɛ̃,

ɣeyiɣi ɖoɖi la de.

¹⁴Elabena eƒe kpewo xɔ asi le wò dɔlawo gbɔ,

eye eƒe ʋuʋudedi gɔ̃ hã ʋãa

nublanuikpɔkpɔ le wo me.

¹⁵Dukɔwo avɔ̃ Yehowa ƒe ŋkɔ,

eye anyigbadzifiawo katã ade bubu wò ŋutikɔkɔe ŋu.

¹⁶Elabena Yehowa agbugbɔ Zion atso,

eye wòado le eƒe ŋutikɔkɔe me.

¹⁷Aɖo hiãtɔwo ƒe gbedodoɖa ŋu,

eye mado vlo woƒe kokoƒoƒo o.

¹⁸Miŋlɔ esia ɖi hena dzidzime siwo ava dzɔ,

ale be ame siwo womedzi haɖe o

la nakafu Yehowa be:

¹⁹“Yehowa kpɔ nu tso eƒe kɔkɔeƒe la,

eye wòkpɔ anyigba tso dziƒo,

²⁰be wòase gamenɔlawo ƒe ŋeŋe,

eye wòaɖe ga ame siwo wotso kufia na.”

²¹Ale woaɖe gbeƒã Yehowa ƒe ŋkɔ le Zion

kple eƒe kafukafu le Yerusalem,

²²ne dukɔwo kple fiaɖuƒewo

ƒo ƒu be woasubɔ Yehowa.

²³Eŋe nye ŋusẽ le nye agbemɔ dzi,

eye wòɖe nye ŋkekewo dzi kpɔtɔ,

²⁴eya ta megblɔ be, “O! Nye Mawu,

mègakplɔm dzoe le nye ŋkekewo ƒe titina o,

wò ame si ƒe ƒewo li tso dzidzime yi dzidzime.

²⁵Le gɔmedzedzea me la, èɖo anyigba ƒe agunu anyi,

eye dziƒowo nye wò asinudɔwɔwɔ.

²⁶Woatsrɔ̃, ke wò ya ànɔ anyi ɖaa;

woanyunyɔ abe avɔ ene,

eye àɖɔli wo abe avɔ ene

ahatsɔ wo aƒu gbe.

²⁷Ke wò la, ègale ale si nènɔ,

eye wò ƒewo mawu enu akpɔ o.

²⁸Wò dɔlawo ƒe viwo anɔ ŋkuwò me,

eye woaɖo woƒe dzidzimeviwo anyi le ŋkuwò me.”

Psalmo 103

David ƒe ha.

¹O! Nye luʋɔ, kafu Yehowa;

nu siwo katã le menye la,

mikafu eƒe ŋkɔ kɔkɔe la.

²O! Nye luʋɔ, kafu Yehowa,

eye mègaŋlɔ nu nyui siwo katã

wòwɔ na wò la be o.

³Ame si tsɔ wò vodadawo katã kea wò,

eye wòdaa gbe le wò dɔlélewo katã ŋu.

⁴Ame si ɖea wò agbe tso ʋe me,

eye wòtsɔa lɔlɔ̃ kple nublanuikpɔkpɔ ɖɔna na wò.

⁵Ame si tsɔa nu nyuiwo ɖia ƒo na wò didiwo,

ale be wò ɖekakpuinyenye gaɖoa yeye me abe hɔ̃ tɔ ene.

⁶Yehowa lɔ̃a nu dzɔdzɔe wɔwɔ,

eye wòtsoa afia na ame siwo katã wote ɖe anyi.

⁷Ena Mose nya eƒe mɔwo,

eye wòna Israelviwo nya eƒe nuwɔwɔwo.

⁸Yehowa kpɔa nublanui, eye wòvea ame nu,

medoa dɔmedzoe kabakaba o, eye lɔlɔ̃ bɔ ɖe esi.

⁹Metsɔa nya ɖe ame ŋu ɣe sia ɣi,

alo léa dɔmedzoe ɖi ɖikaa o.

¹⁰Mewɔna na mí ɖe míaƒe nu vɔ̃wo nu,

alo ɖoa eteƒe na mí ɖe míaƒe vodadawo nu o.

¹¹Elabena abe ale si dziƒo kɔ tso anyigba gbɔe ene la,

nenemae eƒe lɔlɔ̃ loloe na ame siwo vɔ̃nɛ.

¹²Abe ale si ɣedzeƒe didii tso ɣetoɖoƒe gbɔ ene la,

nenemae wòte míaƒe dzidadawo ɖa tso mía gbɔe.

¹³Abe ale si fofo ƒe dɔ me trɔna ɖe viawo ŋuti ene la,

nenemae Yehowa kpɔa nublanui na ame siwo vɔ̃nɛ,

¹⁴elabena enya ale si wowɔ mí,

eye eɖo ŋku edzi be ʋuʋudedi ko míenye.

¹⁵Amegbetɔ ƒe ŋkekewo le abe gbe ene,

edzena abe seƒoƒo le gbedzi ene;

¹⁶ya ƒona toa edzi, eye meganɔa anyi o,

womegaɖoa ŋku eteƒe gɔ̃ hã dzi o.

¹⁷Gake tso mavɔ me yi ɖe mavɔ me, Yehowa ƒe lɔlɔ̃ li

kple ame siwo vɔ̃nɛ, eye eƒe dzɔdzɔenyenye nɔa anyi

kple wo viwo ƒe viwo

¹⁸kpakple ame siwo léa eƒe nubabla me ɖe asi,

eye woɖoa ŋku edzi wɔna ɖe eƒe sewo dzi.

¹⁹Yehowa ɖo eƒe fiazikpui anyi ɖe dziƒo,

eye eƒe fiaɖuƒe le wo katã dzi ɖum.

²⁰Mi eƒe dɔlawo, mikafu Yehowa,

mi ŋusẽtɔ siwo wɔa eƒe lɔlɔ̃nu,

eye miewɔa eƒe nya dzi.

²¹Mikafu Yehowa,

mi eƒe dziƒoʋakɔwo katã,

mi eƒe dɔla siwo wɔa eƒe lɔlɔ̃nu.

²²Mikafu Yehowa,

mi eƒe dɔwɔwɔwo katã,

le afi sia afi, le eƒe dziɖuɖu te.

O! Nye luʋɔ, kafu Yehowa.

Psalmo 104

¹O! Luʋɔnye, kafu Yehowa.

O! Yehowa, nye Mawu, èlolo loo;

èɖo atsyɔ̃, eye nèta gãnyenye.

²Etsyɔ kekeli abe avɔ ene,

ehe dziƒo me abe avɔgbadɔ ene,

³eye wòɖo eƒe dziƒoxɔwo ƒe sɔtiwo

ƒe agunu anyi ɖe woƒe tsiwo dzi.

Etsɔ lilikpowo wɔ eƒe tasiaɖam,

eye wònɔ ya ƒe aʋalawo dzi.

⁴Yae nye eƒe dɔtsɔlawo,

eye dzo ƒe aɖewo nye eƒe dɔlawo.

⁵Eɖo anyigba anyi ɖe eƒe gɔmeɖokpe dzi,

eya ta maʋã akpɔ gbeɖe o.

⁶Ètsɔ gogloƒewo tsyɔ nɛ abe avɔ ene,

eye tsiawo tɔ ɖe toawo tame.

⁷Ke esi nèblu la, tsiawo si,

eye esi nèɖe gbe la, wolé du tsɔ.

⁸Wosi to towo tame,

heva to balimewo, va ɖo teƒe si nètia na wo la.

⁹Èɖo liƒo si dzi womate ŋu adze to o la na wo,

eye womagakaka axɔ anyigba dzi akpɔ gbeɖe o.

¹⁰Ena tsitsetsewo kɔ ɖe agawo me,

eye wosi to towo dome.

¹¹Wonaa tsi gbemelãwo,

eye wotsia gbetedziwo ƒe tsikɔwuame nu.

¹²Dziƒoxeviwo wɔa atɔ ɖe tsisisiawo to,

eye wodzia ha le atilɔwo dzi.

¹³Edea tsi towo tso eƒe xɔ dzigbemetɔ me;

eƒe dɔ ƒe kutsetse ɖia ƒo na anyigba.

¹⁴Ena gbe mie na nyihawo,

eye wòƒãa nuku na amegbetɔ be wòaxa,

ale wòna nuɖuɖu do tso anyigba la me na wo;

¹⁵wain si doa dzidzɔ na ame ƒe dzi,

ami si ana be eƒe mo nanɔ keklẽm

kple abolo si alé eƒe dzi ɖe te.

¹⁶Wode tsi Yehowa ƒe atiawo nyuie,

Lebanon ƒe sedati siwo wòdo.

¹⁷Afi mae xeviwo wɔ woƒe atɔwo ɖo,

eye aŋɔɣi wɔ eƒe nɔƒe ɖe gbotiwo me.

¹⁸To kɔkɔwo nye gbemegbɔ̃wo tɔ,

eye agakpewo tome zu bebeƒe na hlɔ̃madɛwo.

¹⁹Ɣleti dea vovototo ɣeyiɣiwo dome,

eye ɣe nya ɣeyiɣi si wòaɖo to.

²⁰Ètsɔ viviti vɛ, eye wòzu zã, ale lã siwo katã

le ave me la doa go.

²¹Dzatawo ɖea gbe na nuléle,

eye wodia woƒe nuɖuɖu tso Mawu gbɔ.

²²Ɣe dzena, eye wotrɔna dzona ɖamlɔa woƒe dowo me.

²³Tete ame do go yi dɔ me,

yi ɖe eƒe dɔ gbɔ va se ɖe fiẽ.

²⁴O! Yehowa, wò dɔwɔwɔwo sɔ gbɔ loo!

Èwɔ wo katã le nunya deto me,

anyigba dzi yɔ fũu kple wò nuwɔwɔwo.

²⁵Atsiaƒue nye ekem, elolo hekeke,

lã siwo mele xexlẽme o la yɔe,

nenema kee nye nu gbagbe bubuwo hã,

suewo kple gãwo siaa.

²⁶Meliwo zɔa edzi yina,

gagbɔna, eye afii mae boso si nèwɔ la hã le.

²⁷Esiawo katã le asiwò nu kpɔm be

nàna nuɖuɖu yewo le wo naɣi.

²⁸Ne èna wo la, woƒonɛ ƒu;

eye ne èʋu wò asi la, ètsɔa nu nyui ɖia ƒo na wo.

²⁹Ke ne èɣla wò mo la,

ŋɔdzi léa wo, eye ne èxɔ woƒe gbɔgbɔ le wo si la,

wokuna, trɔna zua kewɔ.

³⁰Ne èdɔ wò Gbɔgbɔ ɖa la,

wodzɔna, eye nèwɔa anyigba ƒe ŋkume yeyee.

³¹Yehowa ƒe ŋutikɔkɔe nenɔ anyi tegbee.

Yehowa nekpɔ dzidzɔ le eƒe dɔwɔwɔwo ŋu,

³²eya ame si do mo ɖe anyigba dzi, eye anyigba dzo nyanyanya;

eya ame si ka asi towo ŋu, eye wotu dzudzɔ.

³³Madzi ha na Yehowa le nye agbemeŋkekewo katã me,

eye zi ale si mele agbe la,

madzi kafukafuha na nye Mawu la.

³⁴Nye ŋugbledede nedze eŋu,

esi mele dzidzɔ kpɔm le Yehowa me.

³⁵Ke nu vɔ̃ wɔlawo netsrɔ̃ ɖa le anyigba dzi,

eye ame vɔ̃ɖiwo maganɔ anyi o.

O! Luʋɔnye, kafu Yehowa.

Mikafu Yehowa.

Psalmo 105

¹Mida akpe na Yehowa,

miyɔ eƒe ŋkɔ, eye miɖe gbeƒã nu

siwo wòwɔ la le dukɔwo dome.

²Midzi ha nɛ, midzi kafukafuha nɛ,

miɖe gbeƒã eƒe nukunuwɔwɔwo.

³Miƒo adegbe le eƒe ŋkɔ kɔkɔe la ŋu,

mina ame siwo dia Yehowa la ƒe dzi natso aseye.

⁴Midi Yehowa, mibia eƒe ŋusẽ,

midi eƒe ŋkume ɖaa.

⁵Miɖo ŋku nukunu siwo wòwɔ,

eƒe dzesiwo kple eƒe ʋɔnudɔdrɔ̃wo dzi.

⁶O! Eƒe dɔla Abraham ƒe dzidzimeviwo.

O! Yakob ƒe viwo, ame siwo wòtia.

⁷Eyae nye Yehowa, míaƒe Mawu la,

eƒe ʋɔnudɔdrɔ̃ xɔ anyigba la katã dzi la me.

⁸Eɖoa ŋku eƒe nubabla

kple se siwo wòde

na dzidzime akpewo la dzi ɖaa,

⁹eyae nye nu si wòbla kple Abraham

kple atam si wòka na Isak.

¹⁰Eɖo kpe edzi na Yakob abe sedede ene,

eye na Israel abe nubabla mavɔ ene be,

¹¹“Wòe matsɔ Kanaanyigba la na,

abe wò domenyinu ene.”

¹²Ke esi wonye ame ʋɛ aɖewo ko,

womesɔ gbɔ o,

eye wonye amedzrowo le anyigba dzi la,

¹³wotsa tso dukɔ me yi dukɔ me,

tso fiaɖuƒe ɖeka me yi bubu me.

¹⁴Meɖe mɔ be ame aɖeke nate wo ɖe anyi o,

le wo ta, wòka mo na fiawo be,

¹⁵“Migaka asi nye amesiaminawo ŋu o,

eye migawɔ nu vevi nye nyagblɔɖilawo o.”

¹⁶Ena dɔ to ɖe anyigba la dzi,

eye wògblẽ woƒe nuɖuɖukpɔtsoƒewo katã,

¹⁷ke edɔ ŋutsu aɖe si woyɔna be Yosef,

ame si wodzra abe kluvi ene la ɖe wo ŋgɔ.

¹⁸Wode kunyowu afɔ nɛ,

wode abi eŋu, eye wotsɔ gakɔsɔkɔsɔ de kɔ nɛ,

¹⁹va se ɖe esime nya si wògblɔ ɖi la va eme,

eye va se ɖe esime Yehowa ƒe nya

naɖo kpe edzi, be nya si wògblɔ la nye nyateƒe.

²⁰Fia la dɔ ame woyi ɖaɖee le game,

eye dukɔ la dziɖula na ablɔɖee.

²¹Etsɔe ɖo amegãe ɖe eƒe aƒe nu,

eye wònye eƒe nunɔamesiwo katã dzikpɔla,

²²be wòade dɔ asi na eƒe dɔnunɔlawo ale si dze eŋu,

eye wòafia nunya eƒe dumegãwo.

²³Ale Israel ge ɖe Egiptenyigba dzi,

eye Yakob nɔ Hamnyigba dzi abe amedzro ene.

²⁴Yehowa na eƒe dukɔ la dzi ɖe edzi,

eye wòna wosɔ gbɔ fũu akpa na woƒe futɔwo,

²⁵ame siwo ƒe dzi wòtrɔ be woalé fu eƒe dukɔ la,

eye woaɖo nugbe ɖe eƒe dɔlawo ŋu.

²⁶Edɔ Mose, eƒe dɔla kple Aron, eƒe ame tiatia ɖa.

²⁷Wowɔ eƒe dzesi gãwo le wo dome

kple eƒe nukunuwo le Hamnyigba dzi.

²⁸Eɖo viviti ɖa, eye anyigba la dzi do blukɔ

elabena ɖe wometsi tsitre ɖe eƒe nyawo ŋu oa?

²⁹Ena woƒe tsiwo trɔ zu ʋu,

eye to esia me woƒe tɔmelãwo ku.

³⁰Ena woƒe anyigba la dzi yɔ fũu kple akpɔkplɔwo,

esiwo ge ɖe woƒe dumegãwo ƒe xɔgãwo me ke.

³¹Eƒo nu, eye tagbatsutsu kple togbato ƒe ha gã aɖe va xɔ

woƒe dukɔ la katã me.

³²Etrɔ woƒe tsidzadza wòzu kpetsi,

eye dzikedzo kpe ɖe eŋuti

le woƒe anyigba blibo la dzi.

³³Eƒo woƒe wainkawo kple gbotiwo ƒu anyi,

eye wòmu ati siwo le woƒe dukɔ me la ƒu anyi.

³⁴Eƒo nu, eye ʋetsuviwo va ƒo ɖi,

nenema kee nye abɔ gbogbo aɖewo hã;

³⁵woɖu numiemie mumu ɖe sia ɖe le woƒe anyigba la dzi,

eye woɖu nuku ɖe sia ɖe si le bo dzi hã.

³⁶Emegbe la, eƒo ŋgɔgbevi siwo katã

le woƒe anyigba dzi la ƒu anyi,

esiwo nye woƒe ŋutsunyenye ƒe kutsetse gbãtɔwo.

³⁷Ke ekplɔ Israel do goe, wodo agba kple klosalo kple sika,

eye ame beli aɖeke menɔ woƒe toawo dome o.

³⁸Egipte kpɔ dzidzɔ esi wodo go dzo,

elabena Israel ƒe ŋɔdzi lé wo.

³⁹Ekeke lilikpo ɖe wo dzi abe avɔ ene,

eye wòna dzo wo be wòanye akaɖi na wo le zã me.

⁴⁰Wobiae, eye wòna tegliwo woɖu,

eye wòtsɔ dziƒobolo ɖi ƒo na woe.

⁴¹Eʋu agakpe la, tsi do na wo bababa,

eye wòsi to gbegbe la abe tɔsisi ene.

⁴²Elabena eɖo ŋku eƒe ŋugbe kɔkɔe si wòdo na

eƒe dɔla Abraham la dzi.

⁴³Ekplɔ eƒe dukɔ la do goe kple aseyetsotso,

eƒe ame tiatiawo kple dzidzɔɣli.

⁴⁴Etsɔ dukɔwo ƒe anyigbawo na wo,

eye nu si ame bubuwo ku kutri kpɔ la

va zu domenyinu na wo.

⁴⁵Ale be woalé eƒe ɖoɖowo me ɖe asi,

eye woawɔ eƒe sewo dzi.

Mikafu Yehowa.

Psalmo 106

¹Mikafu Yehowa.

Mida akpe na Yehowa,

elabena eƒe dɔ me nyo, eye eƒe lɔlɔ̃ li ɖaa.

²Ame kae ate ŋu aɖe gbeƒã Yehowa ƒe nu dzɔatsu

siwo wòwɔ alo akafui wòade go?

³Woayra ame siwo léa dzɔdzɔenyenye me ɖe asi,

ame siwo wɔa nu si nyo la ɣe sia ɣi.

⁴O! Yehowa, ɖo ŋku dzinye ne èle wò dukɔ la nu vem,

va kpe ɖe ŋunye ne èle wo ɖem,

⁵be nye hã makpɔ gome le wò ame tiatiawo ƒe dzidzedzekpɔkpɔ me,

be makpɔ dzidzɔ kple wò dukɔ la,

eye mawɔ ɖeka kple wò domenyinu la, akafu wò.

⁶Míewɔ nu vɔ̃ abe mía fofowo ke ene;

míewɔ nu tovo, eye míewɔ nu vɔ̃ɖi.

⁷Esi mía fofowo nɔ Egipte la,

womebu wò nukunuwo ŋu o;

womeɖo ŋku wò dɔmenyo gbogboawo dzi o,

ke boŋ wodze aglã le ƒu la to,

le Ƒu Dzĩ la to,

⁸gake eɖe wo le eƒe ŋkɔ la ta,

be wòana woanya eƒe ŋusẽ triakɔ la.

⁹Eblu ɖe Ƒu Dzĩ la ta, eye wòmie;

ale wòkplɔ wo to ƒugɔme abe tagba ƒuƒui ene.

¹⁰Eɖe wo tso futɔ la ƒe asi me,

eye ketɔ la ƒe asimee wòxɔ wo le.

¹¹Tsi la ŋe tsyɔ wo yometilawo dzi,

eye ɖeka pɛ gɔ̃ hã metsi agbe o.

¹²Tete woxɔ eƒe ŋugbedodowo dzi se,

eye wodzi ha kafui.

¹³Kasia woŋlɔ nu si wòwɔ la be xoxo,

eye womelala xɔ aɖaŋu tso egbɔ o.

¹⁴Le gbea dzi la, wodzro nu vevie,

eye le gbegbe la, wote Mawu kpɔ.

¹⁵Ale wòtsɔ nu si biam wole la na wo,

gake eɖo dɔvɔ̃ ɖe wo dome.

¹⁶Woʋã ŋu Mose kple Aron le asaɖa la me,

ame si ŋuti wokɔ na Yehowa.

¹⁷Anyigba ke nu mi Datan,

eye wòɖi Abiram kple eyomedzelawo agbagbe.

¹⁸Dzo va fia wo yomedzelawo,

eye dzo ƒe aɖewo fia ame vɔ̃ɖiawo.

¹⁹Wowɔ nyivi le Horeb to la gbɔ,

eye wosubɔ legba si wowɔ kple ga.

²⁰Wotsɔ woƒe Ŋutikɔkɔe ɖɔli nyitsu si ɖua gbe.

²¹Woŋlɔ Mawu si ɖe wo la be,

Mawu si wɔ nu gãwo na wo le Egipte

²²kple dzesiwo le Hamnyigba dzi

kple ŋɔdzinuwo le Ƒu Dzĩ la to.

²³Eya ta wògblɔ be, yele wo tsrɔ̃ ge.

Ɖe Mose, eƒe ame tiatia la

metsi tsitre ɖe gbagbãƒe la hexe mɔ na

eƒe dziku helĩhelĩ la o la, anye ne etsrɔ̃ wo.

²⁴Wodo vlo anyigba dzeani la,

eye womexɔ eƒe ŋugbedodo dzi se o.

²⁵Wolĩ liʋĩliʋĩ le woƒe agbadɔwo me,

eye womeɖo to Yehowa o.

²⁶Eya ta wòdo eƒe asiwo ɖe dzi ka atam na wo

be yele nana ge wo katã natsrɔ̃ ɖe gbea dzi,

²⁷woƒe dzidzimeviwo atsi dukɔwo dome,

eye yeakaka wo ɖe anyigbawo dzi.

²⁸Wotsɔ Baal Peor ƒe kɔkuti ku kɔ na wo ɖokuiwo,

eye woɖu nu siwo wotsɔ sa vɔ̃e na mawu siwo me agbe mele o.

²⁹Wotsɔ woƒe nu vɔ̃ɖiawo do dɔmedzoe na Yehowa,

eye dɔvɔ̃ gbã gboo ɖe wo dome.

³⁰Gake Finehas tsi tsitre hetso nya me,

tete dɔvɔ̃ la nu tso.

³¹Wobu esia dzɔdzɔenyenye nɛ

hena dzidzime mavɔ siwo ava dzɔ.

³²Le Meriba tsiawo gbɔ,

wodo dɔmedzoe na Yehowa,

eye Mose kpɔ nya le woawo ta.

³³Elabena wodze aglã ɖe Mawu ƒe Gbɔgbɔ ŋuti,

eye nya vlowo ge le Mose nu.

³⁴Wometsrɔ̃ ameawo abe ale si Yehowa de se na wo ene o,

³⁵ke boŋ wotsaka kple dukɔwo,

eye wosrɔ̃ woƒe kɔnyinyiwo.

³⁶Wosubɔ woƒe legbawo,

esi zu mɔ me woge ɖo.

³⁷Wotsɔ woƒe ŋutsuviwo

kple woƒe nyɔnuviwo sa vɔe na gbɔgbɔ vɔ̃wo.

³⁸Wokɔ ʋu maɖifɔ ɖi,

wo viŋutsuwo kple wo vinyɔnuwo ƒe ʋu,

ame siwo wotsɔ sa vɔe na Kanaan legbawo,

eye wotsɔ woƒe ʋu gblẽ kɔ ɖo na anyigba la.

³⁹Woƒo ɖi wo ɖokuiwo to nu si wowɔ la me,

eye to woƒe nuwɔnawo me,

wotsɔ wo ɖokuiwo wɔ gbolowoe,

⁴⁰eya ta Yehowa do dɔmedzoe ɖe eƒe dukɔ ŋuti,

eye wònyɔ ŋu eƒe domenyinu.

⁴¹Etsɔ wo de asi na dukɔwo,

eye woƒe futɔwo ɖu fia ɖe wo dzi.

⁴²Woƒe futɔwo te wo ɖe to,

eye wotsɔ wo de woƒe ŋusẽ te.

⁴³Eɖe wo zi geɖe,

gake woɖoe kplikpaa be yewoadze aglã,

eye wovɔ le eme keŋkeŋ

le woƒe nu vɔ̃ me.

⁴⁴Ke ekpɔ woƒe hiã la ɖa,

esi wòse woƒe ɣlidodo;

⁴⁵le wo ta, eɖo ŋku eƒe nubabla la dzi,

eye wòɖe asi le eƒe tameɖoɖo ŋu le eƒe lɔlɔ̃ gã la ta.

⁴⁶Ena ame siwo katã ɖe aboyo wo

la kpɔ nublanui na wo.

⁴⁷O! Yehowa, míaƒe Mawu,

ɖe mí, eye nàƒo mía nu ƒu tso dukɔwo dome,

be míada akpe na wò ŋkɔ kɔkɔe la,

eye míaƒo adegbe le wò kafukafu ŋu.

⁴⁸Woakafu Yehowa, Israel ƒe Mawu la,

tso mavɔ me yi mavɔ me.

Dukɔ blibo la nàgblɔ be, “Amen!”

Mikafu Yehowa.

Agbalẽ atɔ̃lia

Psalmowo 107–150

Psalmo 107

¹Mida akpe na Yehowa,

elabena enyo, eye eƒe lɔlɔ̃ li ɖaa.

²Ame siwo Yehowa ɖe la negblɔ esia;

ame siwo wòɖe tso futɔ la ƒe asi me,

³ame siwo nu wòƒo ƒui tso anyigbawo dzi,

tso ɣedzeƒe kple ɣetoɖoƒe, anyiehe kple dziehe.

⁴Ame aɖewo tsa tsaglãla le gbedzi kple gbedadaƒo,

eye womekpɔ mɔ si woato ayi du aɖe si me woanɔ la o.

⁵Dɔ kple tsikɔ wu wo,

eye nu te woƒe luʋɔ ŋu le wo me.

⁶Tete wodo ɣli yɔ Yehowa le woƒe xaxa la me,

eye wòɖe wo le woƒe hiã la me.

⁷Ekplɔ wo tẽe yi

ɖe du aɖe si me woanɔ.

⁸Woneda akpe na Yehowa le eƒe lɔlɔ̃ si meʋãna o

la ta kple eƒe nukudɔ siwo wòwɔna na amewo la ta.

⁹Elabena etsɔa nu nyuiwo ɖia ƒoe na

ame siwo dɔ kple tsikɔ le wuwum.

¹⁰Ame aɖewo nɔ viviti kple blukɔ tsiɖitsiɖi me,

gamenɔla siwo le fu kpem le gakɔsɔkɔsɔwo me,

¹¹elabena wodze aglã ɖe Mawu ƒe nyawo ŋuti,

eye wodo vlo Dziƒoʋĩtɔ la ƒe aɖaŋudede.

¹²Eya ta wòtsɔ wo de asi na dɔ sesẽ wɔwɔ,

womu sɔgɔsɔgɔsɔgɔ, eye ame aɖeke meli akpe ɖe wo ŋu o.

¹³Tete wodo ɣli na Yehowa le woƒe xaxa la me,

eye wòɖe wo le woƒe hiã la me.

¹⁴Eɖe wo le viviti kple blukɔ tsiɖitsiɖitsiɖi la me,

eye wòtso woƒe gakɔsɔkɔsɔwo.

¹⁵Woneda akpe na Yehowa le eƒe lɔlɔ̃ si meʋãna o

la ta kple eƒe nukudɔ siwo wòwɔna na amewo la ta,

¹⁶elabena eŋe akɔbligbowo,

eye wòlã gayibɔ ƒe gametiwo me.

¹⁷Wo dometɔ aɖewo zu bometsilawo to

woƒe aglãdzenuwo wɔwɔ me,

eye wokpe fu le woƒe dzidadawo ta.

¹⁸Wonyɔ ŋu nuɖuɖu ɖe sia ɖe,

eye woɖo ku ƒe agbowo nu.

¹⁹Wodo ɣli na Yehowa le woƒe xaxa la me,

eye wòɖe wo le woƒe hiã la me.

²⁰Edɔ eƒe nya ɖa, eye wòyɔ dɔ wo,

heɖe wo tso tsiẽƒe.

²¹Woneda akpe na Yehowa le eƒe lɔlɔ̃ si meʋãna o

la ta kple eƒe nukudɔ siwo wòwɔna na amewo la ta.

²²Wonesa akpedavɔ nɛ,

eye woaɖe eƒe dɔwɔwɔwo afia to aseyetsohawo me.

²³Ame aɖewo le meli me zɔ atsiaƒu dzi,

wonye asitsalawo le tɔ gãwo dzi.

²⁴Wokpɔ Yehowa ƒe dɔwɔwɔwo,

wokpɔ eƒe nukudɔwo le atsiaƒu gɔme,

²⁵elabena eƒo nu, elɔ ahom kɔ ɖe ƒu la dzi,

eye eƒe tsotsoewo dze agbo.

²⁶Woyi dziƒo boo, eye wogadze eme

le gogloƒe ke, ale le woƒe agbe ƒe xaxa me,

woƒe dzideƒo lolo gbana.

²⁷Wole mumum sɔgɔsɔgɔsɔgɔ,

le nu klim abe ame siwo mu aha ene,

eye womegale naneke gɔme sem o.

²⁸Tete wodo ɣli na Yehowa le woƒe xaxa la me,

eye wòɖe wo le woƒe hiã la me.

²⁹Etsi ahom la nu wòzi ɖoɖoe abe dalĩ dom wole ene,

eye ƒutsotsoeawo hã ɖo to kpoo.

³⁰Wokpɔ dzidzɔ esi wòdze kɔ anyi,

eye wòkplɔ wo va se ɖe

esime wova ɖo afi si wodi be yewoanɔ.

³¹Woneda akpe na Yehowa le eƒe lɔlɔ̃ si meʋãna o la ta

kple eƒe nukudɔ siwo wòwɔna na amewo la ta.

³²Wonedoe ɖe dzi le dukɔ la ƒe ƒuƒoƒo me,

eye woakafui le dumegãwo ƒe takpekpe me.

³³Etrɔ tɔsisiwo wozu gbegbe

kple tsidzɔƒewo wozu kuɖiɖinyigba,

³⁴eye agbledeƒe zu dzeƒi le ame siwo

le teƒe ma ƒe nu vɔ̃ɖi wɔwɔ ta.

³⁵Etrɔ gbegbe wòzu tɔʋu,

eye kuɖiɖinyigba zu tsidzɔƒe;

³⁶afi mae wòkplɔ dɔwuitɔwo be woava nɔ,

eye wotso du si me woanɔ.

³⁷Woƒã nukuwo ɖe agble me,

wode waingblewo, eye wotse ku geɖe hena xaxa.

³⁸Eyra wo, eye woƒe xexlẽme dzi ɖe edzi ŋutɔ.

Nenema ke mena woƒe lãhawo dzi ɖe kpɔtɔ o.

³⁹Tete wozu ʋɛ, wobɔbɔ wo ɖe anyi le teteɖeanyi,

dzɔgbevɔ̃e kple nuxaxa me;

⁴⁰eye eya ame si trɔa vlododo kɔna ɖe ame ŋkutawo dzi la,

wɔe be wole tsaglãla tsam le gbegbe afi si mɔtoƒe aɖeke mele o.

⁴¹Ke ekɔ hiãtɔwo ɖe dzi tso woƒe hiã me,

eye wòna woƒe ƒome dzi ɖe edzi abe lãhawo ene.

⁴²Ame dzɔdzɔe kpɔe,

eye wòkpɔ dzidzɔ, gake ame vɔ̃ɖiwo katã mia woƒe nu.

⁴³Ame si nye nunyala la,

neɖo to nu siawo, eye wòabu Yehowa ƒe lɔlɔ̃ deto la ŋuti.

Psalmo 108

Hadzidzi. David ƒe ha.

¹O! Mawu, nye dzi le te goŋgoŋgoŋ.

Madzi ha, aƒo saŋku kple nye luʋɔ blibo.

²Saŋku kple kasaŋku,

minyɔ! Manyɔ fɔŋli.

³O! Yehowa, makafu wò le dukɔwo dome,

eye madzi ha le ŋuwò le anyigbadzitɔwo dome,

⁴elabena wò lɔlɔ̃ de blibo,

hekɔ wu dziƒowo, eye wò nuteƒewɔwɔ yi ɖatɔ lilikpowo.

⁵O! Mawu, woado wò ɖe dzi agbɔ dziƒowo ŋu,

eye na wò ŋutikɔkɔe naxɔ anyigba blibo la dzi.

⁶Ɖe mí, eye nàkpe ɖe mía ŋu kple wò nuɖusibɔ,

be ame siwo nèlɔ̃ vevie la nakpɔ ɖeɖe.

⁷Mawu ƒo nu tso eƒe kɔkɔeƒe la be,

“Mama Sekem le dziɖuɖu me,

eye madzidze Sukɔt Balime.

⁸Gilead nye tɔnye, Manase hã tɔnyee;

nye gakukue nye Efraim,

eye Yuda nye nye fiatikplɔ.

⁹Moab nye nye tsiletɔkpo,

matsɔ nye atokota aƒu gbe ɖe Edom dzi,

eye mado dziɖuɖuɣli ɖe Filistia ŋu.”

¹⁰Ame ka akplɔm ayi du sesẽ la mee?

Ame ka akplɔm ayi Edom?

¹¹O! Mawu, ɖe menye wòe oa?

Nu ka wɔ nègbe mí,

eye mègadona kple míaƒe aʋakɔwo o?

¹²Kpe ɖe mía ŋu ɖe míaƒe futɔwo ŋuti,

elabena èna amegbetɔ ƒe kpekpeɖeŋu mele nemi hã me o.

¹³Ne Mawu le mía dzi la, míaɖu dzi,

eye wòafanya míaƒe futɔwo ɖe eƒe afɔ te.

Psalmo 109

David ƒe ha na hɛnɔ la.

¹O! Mawu, wò ame si mekafu,

mègazi ɖoɖoe o,

²elabena ame vɔ̃ɖiwo kple alakpatɔwo,

ke woƒe nuwo ɖe ŋutinye,

eye wogblɔ nya ɖe ŋunye kple alakpaɖewo.

³Wotsɔ fulényawo ƒo xlãm;

wotso ɖe ŋunye nanekemawɔmawɔe.

⁴Wotsɔ fɔbubu nam ɖe nye lɔlɔ̃ teƒe,

ke nye la, ame si doa gbe ɖa vevie lae menye.

⁵Wotsɔ vɔ̃ ɖo nyui teƒe nam,

eye wotsɔ fuléle ɖo nye lɔlɔ̃ teƒe.

⁶Tia ame vɔ̃ɖi aɖe wòatso ɖe eŋu;

eye na amenutsola natsi tsitre ɖe eƒe nuɖusime.

⁷Ne wodrɔ̃ ʋɔnui la,

woneɖe agɔdzedze nɛ,

eye eƒe gbedodoɖawo nebu fɔe.

⁸Eƒe ŋkekewo nenɔ ʋɛ

eye ame bubu naxɔ eƒe amekplɔdɔ awɔ.

⁹Viawo nezu tsyɔ̃eviwo,

eye srɔ̃a nezu ahosi.

¹⁰Viawo nenɔ tsaglãla tsam, anɔ nu biam;

wonenya wo do goe le woƒe aƒe gbagbãwo me.

¹¹Fetɔ aɖe nexɔ eƒe nunɔmesiwo katã,

eye amedzrowo neha nu siwo wòwɔ dɔ kpɔ.

¹²Ame aɖeke megave enu loo,

alo akpɔ nublanui na eƒe tsyɔ̃eviwo o.

¹³Eƒe dzidzimeviwo netsrɔ̃,

eye woaɖe woƒe ŋkɔwo ɖa le dzidzime si gbɔna la me.

¹⁴Woneɖo ŋku fofoawo ƒe vodadawo dzi

le Yehowa ŋkume, eye womegatutu dadaa

ƒe nu vɔ̃ ɖa akpɔ gbeɖe o.

¹⁵Woƒe nu vɔ̃wo nenɔ Yehowa ŋkume ɖaa,

ale be wòaɖe woƒe ŋkɔ ɖa le anyigba dzi,

¹⁶elabena mebu dɔmenyowɔwɔ ŋuti kpɔ o,

ke boŋ eƒo hiãtɔ,

ame dahe kple ame si ƒe dzi gbã la ƒu anyi woku.

¹⁷Elɔ̃a ɖiŋudodo, eya ta ɖiŋudodo neva eya ŋutɔ ƒe ta dzi;

amewo yayra medoa dzidzɔ nɛ o,

eya ta yayra nete ɖa xaa tso eya ŋutɔ gbɔ.

¹⁸Etsɔ ɖiŋudodo do abe awu ene,

wòge ɖe eƒe lãme abe tsi ene,

eye wòɖo eƒe ƒuwo me abe ami ene,

¹⁹eya ta netae abe avɔ ene,

eye nebla ali dzi nɛ abe alidziblaka ene tegbetegbe.

²⁰Esia nenye fe si Yehowa axe na nunyetsolawo

kple ame siwo gblɔa nya vɔ̃ ɖe ŋutinye.

²¹Ke wò la, o Aƒetɔ Yehowa,

wɔ nyui nam le wò ŋkɔ la ta,

ɖem le wò lɔlɔ̃ si wɔa nyui la ta,

²²elabena hiãtɔ kple ame dahe menye,

eye nye dzi xɔ abi le menye.

²³Nunye yi abe vɔvɔli le fiẽ me ene

eye woʋuʋum abe ʋetsuvi ene.

²⁴Le nutsitsidɔ ta la,

nye klowo zu belie,

eye meɖi ku glaglaglã.

²⁵Mezu alɔmeɖenu na nunyetsolawo,

eye woʋuʋua ta ne wokpɔm.

²⁶O! Yehowa, nye Mawu,

kpe ɖe ŋunye, ɖem le wò lɔlɔ̃ la ta.

²⁷O! Yehowa, wonenya be to wò asi dzie nèwɔ esia.

²⁸Woaƒo fi ade ame, ke wò la àyra ame,

ne wotso ɖe ŋunye la, ŋu akpe wo,

ke wò dɔla ya atso aseye.

²⁹Nunyetsolawo ado vlododo abe awu ene,

eye wòata ŋukpe abe avɔ ene.

³⁰Matsɔ nye nu ado Yehowa ɖe dzi,

eye le ameha gã la dome, makafui,

³¹elabena etsi tsitre ɖe hiãtɔ la ƒe nuɖusime,

be yeaɖe eƒe agbe tso ame siwo bu fɔ̃e la ƒe asi me.

Psalmo 110

David ƒe ha.

¹Yehowa gblɔ na nye Aƒetɔ la be,

“Nɔ anyi ɖe nye nuɖusime,

va se ɖe esime matsɔ wò futɔwo

awɔ wò afɔɖodzinui.”

²Yehowa adidi wò ŋusẽ ƒe fiatikplɔ ɖe edzi tso Zion,

eye àɖu fia le wò futɔwo dome.

³Wò aʋakɔwo alɔ̃ faa ade megbe na wò le wò aʋakpegbe.

Ànɔ atsyɔ̃ɖoɖo kɔkɔe,

si do go tso fɔŋli ƒe dɔ me ke la me,

axɔ wò ɖekakpuimezãmu.

⁴Yehowa ka atam,

eye matrɔ eƒe susu akpɔ o, be

“Wòe nye nunɔla tegbee,

le Melkizedek ƒe ɖoɖo la nu.”

⁵Aƒetɔ la le wò nuɖusime,

agbã fiawo nyanyanya le eƒe dɔmedzoeŋkeke la dzi.

⁶Adrɔ̃ ʋɔnu dukɔwo, eye wòali kɔ woƒe kukuawo,

nenema ke wòagbã dziɖulawo le anyigba blibo la dzi.

⁷Ano tsi le tɔʋu si le mɔto la me,

eya ta afɔ eƒe ta dzi.

Psalmo 111

¹Mikafu Yehowa.

Mado Yehowa ɖe dzi kple nye dzi blibo

le ame dzɔdzɔewo ƒe adaŋudeha me kple amehawo dome.

²Yehowa ƒe dɔwɔwɔwo lolo kpem;

ame siwo wodoa dzidzɔ na la bua wo ŋuti.

³Ŋutikɔkɔe kple atsyɔ̃ nye eƒe nuwɔwɔwo,

eye eƒe dzɔdzɔenye li tegbee.

⁴Ena woɖo ŋku eƒe nukudɔwo dzi;

Yehowa nye amenuvela kple nublanuikpɔla.

⁵Enaa nuɖuɖu ame siwo vɔ̃nɛ,

eye wòɖoa ŋku eƒe nubabla dzi tegbetegbe.

⁶Eɖe eƒe dɔwɔwɔwo ƒe ŋusẽ fia eƒe dukɔ la

eye wòtsɔ dukɔ bubuwo ƒe anyigba na wo.

⁷Eƒe asinudɔwɔwɔwo le eteƒe, eye wodzɔ;

nenema ke woate ŋu aka ɖe eƒe sewo hã dzii,

⁸elabena wole te tso mavɔ me yi ɖe mavɔ me,

eye wòde sewo le nuteƒewɔwɔ kple dzɔdzɔenyenye me.

⁹Eɖo ɖeɖe ɖi na eƒe dukɔ,

eɖo eƒe nubabla anyi tegbee,

eye eƒe ŋkɔ le kɔkɔe; ŋɔdzi hã le eŋu.

¹⁰Yehowa vɔvɔ̃e nye nunya ƒe gɔmedzedze,

eye ame siwo katã léa eƒe sewo me ɖe asi

la, gɔmesese nyui sua wo si.

Eya tɔe nye kafukafu tegbee.

Psalmo 112

¹Mikafu Yehowa.

Woayra ŋutsu si vɔ̃a Yehowa,

eye wòkpɔa dzidzɔ vevie le eƒe sewo ŋu.

²Viawo anye ŋusẽtɔwo le anyigba la dzi,

eye woayra dzi dzɔdzɔetɔwo ƒe dzidzime.

³Kesinɔnu kple nu nyuiwo le eƒe aƒe me,

eye eƒe dzɔdzɔenyenye nɔa anyi ɖikaa.

⁴Le viviti me gɔ̃ hã la,

kekeli klẽna na ame dzɔdzɔewo,

nenema ke wònɔna na ame si vea ame nu,

kpɔa nublanui, eye wòwɔa nu dzɔdzɔe.

⁵Nyui ava na ame si nyoa dɔ me, doa nugbana faa,

eye wòwɔa eƒe nuwo to mɔ dzɔdzɔe dzi.

⁶Vavã, maʋã akpɔ o;

woaɖo ŋku ame dzɔdzɔe dzi tegbee.

⁷Mavɔ̃ na nya vɔ̃ sese o,

eƒe dzi li ke, eye wòkana ɖe Yehowa dzi.

⁸Mavɔ̃ naneke o, elabena dzi le eƒo;

eye mlɔeba la, akpɔ eƒe futɔwo ta ɖa le dziɖuɖu me.

⁹Ema eƒe kesinɔnuwo na ame dahewo fũu,

eƒe dzɔdzɔenyenye li tegbee,

eye woakɔ eƒe dzo ɖe dzi bobobo le bubu me.

¹⁰Ame vɔ̃ɖi akpɔe, eye dzi akui,

aɖu aɖukli, avɔ le eme keŋkeŋkeŋ.

Ame vɔ̃ɖiwo ƒe dzimedidiwo azu tofloko.

Psalmo 113

¹Mikafu Yehowa.

O! Mi Yehowa ƒe dɔlawo,

mikafui, mikafu Yehowa ƒe ŋkɔ.

²Woakafu Yehowa ƒe ŋkɔ

tso fifia yi ɖe mavɔ me ke.

³Woakafu Yehowa ƒe ŋkɔ

tso ɣeyiɣi si ɣe adze va se ɖe esi wòaɖo to ɖe afi si wòɖoa to ɖo.

⁴Yehowa nye gã ɖe dukɔwo katã dzi,

eye eƒe ŋutikɔkɔe gbɔ dziƒowo ta.

⁵Ame kae le abe Yehowa,

míaƒe Mawu la ene, ame si nɔ anyi ɖe fiazikpui dzi le dziƒo,

⁶eye wòbɔbɔ be yeakpɔ dziƒowo kple anyigba ɖa?

⁷Efɔ ame dahe ɖe tsitre tso ke me,

eye wòfɔ hiãtɔ ɖe dzi tso dzowɔ me;

⁸hetsɔ wo ɖo dumegãwo xa,

ɛ̃, woƒe dumegãwo xa.

⁹Ame si na konɔ nɔa eƒe aƒe me,

hekpɔa dzidzɔ abe viwo dada ene.

Mikafu Yehowa.

Psalmo 114

¹Esi Israel do go tso Egipte,

esi Yakob ƒe aƒe la do go

tso gbe bubu gblɔlawo dome la,

²Yuda zu Mawu ƒe kɔkɔeƒe,

eye Israel zu eƒe fiaɖuƒe.

³Atsiaƒu kpɔe, eye wòsi dzo,

Yɔdan tɔsisi hã te yi megbe.

⁴Towo ti kpo abe agbowo ene,

eye togbɛwo abe alẽviwo ene.

⁵O! Atsiaƒu, nu ka ta nèsi ɖo,

O! Yɔdan tɔsisi, nu ka ta nète yi megbe ɖo?

⁶Mi towo, nu ka ta mieti kpo abe agbowo ene,

eye mi togbɛwo abe alẽviwo ene ɖo?

⁷O! Anyigba, dzo nyanyanya le Aƒetɔ la ŋkume,

le Yakob ƒe Mawu la ŋkume,

⁸eya ame si trɔ agakpe wòzu tɔʋu

kple agakpe sesẽ wòzu tsidzɔƒe.

Psalmo 115

¹Menye míawoe o, o Yehowa, menye míawoe o,

ke boŋ ŋutikɔkɔe la nye wò ŋkɔ tɔ,

le wò lɔlɔ̃ kple nuteƒewɔwɔ ta.

²Nu ka ta dukɔwo le gbɔgblɔm be,

“Afi ka woƒe Mawu la le?”

³Míaƒe Mawu la le dziƒo,

eye nu sia nu si dze eŋu lae wòwɔna,

⁴gake woawo ya ƒe legbawo nye klosalo kple sika,

eye amegbetɔ ƒe asiwoe wɔ wo,

⁵eya ta nu li na wo,

gake womate ŋu aƒo nu o, ŋku li na wo,

gake womate ŋu akpɔ nu o;

⁶to li na wo,

gake womesea nu o, ŋɔti li na wo,

gake womeʋẽa nu sena o;

⁷asi li na wo,

gake wometea nu kpɔna o, afɔ li na wo,

gake womate ŋu azɔ loo, alo aƒo nu to ve me o.

⁸Ame siwo wɔ wo la, anɔ abe woawo ke ene,

eye nenema kee nye ame siwo tsɔ woƒe mɔkpɔkpɔ da ɖe wo dzi.

⁹O! Israel ƒe aƒe, ɖo dzi ɖe Yehowa ŋu,

eyae nye wò kpeɖeŋutɔ kple akpoxɔnu.

¹⁰O! Aron ƒe aƒe,

ɖo dzi ɖe Yehowa ŋu,

eyae nye wò kpeɖeŋutɔ kple akpoxɔnu.

¹¹Mi ame siwo vɔ̃nɛ, miɖo dzi ɖe Yehowa ŋu,

eyae nye miaƒe kpeɖeŋutɔ kple akpoxɔnu.

¹²Yehowa ɖo ŋku mía dzi,

eya ta ayra mí.

Ayra Israel ƒe aƒe la,

ayra Aron ƒe aƒe la,

¹³ayra ame siwo vɔ̃a Yehowa,

suewo kple gãwo siaa.

¹⁴Yehowa nana miadzi ɖe edzi,

miawo ŋutɔwo kple mia viwo.

¹⁵Yehowa neyra mi,

eya dziƒo kple anyigba Wɔla.

¹⁶Dziƒo kɔkɔtɔ nye Yehowa,

Wɔla la tɔ, ke etsɔ anyigba na amegbetɔ.

¹⁷Menye ame kukuwoe kafua Yehowa o,

menye ame siwo zi ɖoɖoe le aʋlimee o;

¹⁸ke boŋ mí ame siwo doa Yehowa

ɖe dzi fifia kple ɖaasi lae.

Mikafu Yehowa.

Psalmo 116

¹Melɔ̃ Yehowa, elabena ese nye gbe;

ese nye avifafa be wonekpɔ nublanui nam.

²Esi wòtrɔ to ɖe gbɔnye ta la,

mayɔe zi ale si mele agbe.

³Ku ƒe kawo blam, eye tsiẽƒe ƒe vevesese va dzinye.

Hiã tum, eye nuxaxa va dzinye.

⁴Tete meyɔ Yehowa ƒe ŋkɔ be,

“O! Yehowa, ɖem!”

⁵Yehowa nye amenuvetɔ kple dzɔdzɔetɔ;

míaƒe Mawu la yɔ fũu kple nublanuikpɔkpɔ.

⁶Yehowa kpɔa ame siwo fa tu le dzi me la ta;

esi menɔ hiahiã gã aɖe me la, eɖem le eme.

⁷O! Luʋɔnye, gagbɔ ɖe eme,

elabena Yehowa nyo dɔ me na wò.

⁸O! Yehowa, wòe ɖe nye luʋɔ tso ku me,

nye ŋkuwo tso aɖatsi si me,

nye afɔwo tso anyidzedze me;

⁹be mate ŋu azɔ le Yehowa ŋkume

le agbagbeawo ƒe anyigba dzi.

¹⁰Mexɔe se, eya ta megblɔ be,

“Wokaa hiãm ŋutɔ.”

¹¹Eye le nye moya me, megblɔ be,

“Amegbetɔwo katã nye aʋatsokalawo.”

¹²Aleke mawɔ aɖo dɔmenyo

siwo katã Yehowa wɔ nam la teƒe nɛ?

¹³Makɔ xɔxɔ ƒe kplu la ɖe dzi,

eye mayɔ Yehowa ƒe ŋkɔ.

¹⁴Maxe nye adzɔgbeɖefe na Yehowa

le eƒe dukɔ blibo la ŋkume.

¹⁵Eƒe ame kɔkɔewo ƒe ku nye nu xɔasi

le Yehowa ŋkume.

¹⁶O! Yehowa, menye wò dɔla vavã,

wò dɔlae menye,

wò subɔla ƒe viŋutsue menye,

eye nèɖem tso nye gakɔsɔkɔsɔ siwo blam la me.

¹⁷Masa akpedavɔ na wò,

eye mayɔ Yehowa ƒe ŋkɔ.

¹⁸Maxe nye adzɔgbeɖefe na Yehowa,

le eƒe dukɔ blibo la ŋkume,

¹⁹le Yehowa ƒe aƒe ƒe xɔxɔnuwo,

le mia dome, o Yerusalem.

Mikafu Yehowa.

Psalmo 117

¹Mi dukɔwo katã, mikafu Yehowa;

midoe ɖe dzi, mi ame siwo katã le anyigba dzi.

²Elabena eƒe lɔlɔ̃ na mí sɔ gbɔ ŋutɔ,

eye Yehowa ƒe nuteƒewɔwɔ li tegbee.

Mikafu Yehowa.

Psalmo 118

¹Mida akpe ne Yehowa,

elabena eƒe dɔ me nyo, eye eƒe lɔlɔ̃ li ɖaa.

²Israel negblɔ be;

“Eƒe lɔlɔ̃ li ɖaa.”

³Aron ƒe aƒe la negblɔ be;

“Eƒe lɔlɔ̃ li ɖaa.”

⁴Ame siwo vɔ̃a Yehowa la negblɔ be,

“Eƒe lɔlɔ̃ li ɖaa.”

⁵Le nye vevesese me, medo ɣli yɔ Yehowa,

etɔ nam, eye wòɖe gam.

⁶Yehowa li kplim, eya ta nyemavɔ̃ o.

Nu ka amegbetɔ awɔm?

⁷Yehowa li kplim, eyae nye nye xɔnametɔ.

Makpɔ nye futɔwo ta ɖa le dziɖuɖu me.

⁸Enyo be woatsɔ Yehowa awɔ sitsoƒee

wu, be woaɖo ŋu ɖe amegbetɔ ŋu.

⁹Enyo be woatsɔ Yehowa awɔ sitsoƒee wu, be

woaɖo ŋu ɖe dumegãwo ŋu.

¹⁰Dukɔwo katã ɖe to ɖem,

gake le Yehowa ƒe ŋkɔ me,

metsrɔ̃ wo katã.

¹¹Woɖe to ɖem,

gake le Yehowa ƒe ŋkɔ me,

metsrɔ̃ wo katã.

¹²Woƒo kɔ ɖe ŋunye abe anyiwo ene,

gake wo nu va yi kaba abe ŋuvedzo ene;

ɛ̃, Yehowa ƒe ŋkɔ mee metsrɔ̃ wo le.

¹³Wotu asim do ɖe megbe,

eye medze anyi kloe,

gake Yehowa xɔ nam.

¹⁴Yehowae nye nye ŋusẽ kple nye ha,

eye wòzu nye xɔname.

¹⁵Aseyetsotso kple dziɖuɣli le ɖiɖim

le ame dzɔdzɔewo ƒe agbadɔ me be,

“Yehowa ƒe nuɖusi wɔ nu dzɔatsuwo!

¹⁶Yehowa ƒe nuɖusi le dzi bobobo!

Yehowa ƒe nuɖusi wɔ nu dzɔatsuwo!”

¹⁷Nyemaku o,

ke boŋ manɔ agbe,

eye maɖe gbeƒã nu siwo Yehowa wɔ.

¹⁸Yehowa he to nam vevie,

gake metsɔm de asi na ku o.

¹⁹Miʋu dzɔdzɔenyenye ƒe agbowo nam,

mage ɖe eme, eye mada akpe na Yehowa.

²⁰Esiae nye Yehowa ƒe agbo,

afi si dzɔdzɔetɔwo ato age ɖe eme.

²¹Mada akpe na wò,

elabena èɖo tom, eye nèzu nye xɔname.

²²Kpe si xɔtulawo gbe la,

eyae va zu dzogoedzikpe.

²³Yehowae wɔ esia,

eye wònye nukunu le míaƒe ŋkume.

²⁴Esia nye ŋkeke si Yehowa wɔ,

mina míakpɔ dzidzɔ, atso aseye le eme.

²⁵O! Yehowa, ɖe mí, o Yehowa,

na wòadze edzi na mí dzro.

²⁶Woayra ame si gbɔna le Yehowa ƒe ŋkɔ me.

Míeyra wò tso Yehowa ƒe aƒe me.

²⁷Yehowae nye Mawu,

eye wòna eƒe kekeli klẽ ɖe mía dzi.

Mitsɔ miaƒe atilɔwo ɖe asi ne

miage ɖe ŋkekenyuiɖulawo ƒe

hame ayi ɖe keke vɔsamlekpui la ƒe dzowo gbɔ.

²⁸Wòe nye nye Mawu, eya ta mada akpe na wò;

wòe nye nye Mawu, eya ta mado wò ɖe dzi.

²⁹Mida akpe na Yehowa, elabena eƒe dɔ me nyo,

eye eƒe lɔlɔ̃ li tegbetegbe.

Psalmo 119

א Aleph

¹Woayra ame siwo kpɔtsɔtsɔ mele woƒe mɔwo ŋu o,

ame siwo zɔna ɖe Yehowa ƒe se la nu.

²Woayra ame siwo léa eƒe ɖoɖowo me ɖe asi,

eye wodinɛ kple woƒe dzi blibo.

³Womewɔa vɔ̃ aɖeke o;

ke boŋ wozɔna le eƒe mɔwo dzi.

⁴Èwɔ se siwo dzi wòle be

woawɔ ɖo blibo la da ɖi.

⁵O! Ɖe nye mɔwo li ke sesĩe

le wò sewo dzi wɔwɔ me la, anyo ŋutɔ.

⁶Ekema ŋu makpem ne mebu wò sewo katã ŋu o.

⁷Makafu wò le dzi dzɔdzɔe me,

ne mele wò se dzɔdzɔeawo srɔ̃m.

⁸Mawɔ ɖe wò sededewo dzi,

eya ta mègagblẽm ɖi keŋkeŋ o.

ב Beth

⁹Aleke ɖekakpui awɔ,

be eƒe mɔ dzi nanɔ dzadzɛe ɣe sia ɣi?

To agbenɔnɔ ɖe wò nya la nu mee.

¹⁰Madi wò kple nye dzi blibo,

eya ta mègana matra tso wò sewo gbɔ o.

¹¹Meɣla wò nya ɖe nye dzi me,

be nyemawɔ nu vɔ̃ ɖe ŋuwò o.

¹²O! Yehowa, woakafu wò ɖaa;

fia wò sededewom.

¹³Matsɔ nye nu axlẽ se siwo katã

do tso wò nu me la afia.

¹⁴Melé wò ɖoɖowo me ɖe asi dzidzɔtɔe,

abe ale si ame kpɔa dzidzɔ ɖe

kesinɔnu gbogbowo ŋu ene.

¹⁵Mede ŋugble le wò ɖoɖowo ŋu,

eye melé ŋku ɖe wò mɔwo ŋu.

¹⁶Wò sededewo doa dzidzɔ nam,

nyemaŋlɔ wò nya la be o.

ג Gimel

¹⁷Wɔ nyui na wò dɔla, be manɔ agbe.

Mawɔ wò nya la dzi.

¹⁸Ʋu nye ŋkuwo be makpɔ

nukunuwo le wò se la me.

¹⁹Amedzroe menye le anyigba dzi,

eya ta mègaɣla wò sededewo ɖem o.

²⁰Nu te nye luʋɔ ŋu,

le wò sewo yometiti ɣe sia ɣi ta.

²¹Èka mo na dadalawo,

ame siwo woƒo fi de,

eye wotra tso wò sewo gbɔ.

²²Ɖe ŋukpe kple vlododo ɖa le ŋunye,

elabena melé wò sewo me ɖe asi.

²³Togbɔ be dziɖulawo nɔ anyi ɖe teƒe ɖeka,

eye wole ŋunye gblẽm hã la,

wò dɔla ade ŋugble le wò sededewo ŋu.

²⁴Wò ɖoɖowo dzɔa dzi nam;

wonye nye aɖaŋuɖolawo.

ד Daleth

²⁵Wotsɔm mlɔ anyigba le ke me,

kpɔ nye agbe ta le wò nya la nu.

²⁶Mexlẽ nye mɔwo fia, eye nèɖo tom.

Fia wò sededewom.

²⁷Na mase wò sewo ƒe nufiafia gɔme;

ekema made ŋugble le wò nukunuwo ŋu.

²⁸Nuxaxa na nye luʋɔ gbɔdzɔ;

do ŋusẽm le wò nya la nu.

²⁹Ɖem le alakpamɔwo dzi,

eye nàve nunye to wò se la dzi.

³⁰Metia nyateƒe ƒe mɔ,

eye nye dzi ku ɖe wò sewo ŋu.

³¹Meku ɖe wò sewo ŋu vevie,

o Yehowa, eya ta mègana ŋu nakpem o.

³²Mele du dzi le wò sewo ƒe mɔ dzi,

elabena èna nye dzi gbɔ ɖe me.

ה He

³³O, Yehowa, fia ale si madze wò sededewo yomee lam,

ekema malé wo me ɖe asi va se ɖe nuwuwu.

³⁴Na gɔmesesem, ekema malé wò se la me ɖe asi,

eye mawɔ edzi kple nye dzi blibo.

³⁵Dam ɖe wò sededewo ƒe mɔ dzi,

elabena afi ma mekpɔa dzidzɔ le.

³⁶Trɔ nye dzi ɖe wò sewo ŋu,

ke menye ɖe ɖokuitɔdidi ƒe viɖe ŋu o.

³⁷Ɖe nye ŋku ɖa le nu maɖinuwo ŋu,

eye nàɖe nye agbe le wò nya la nu.

³⁸Wɔ wò ŋugbedodo la dzi na wò dɔla,

ale be woavɔ̃ wò.