Lododowo

Salomo

ƒe Lododowo

Susu si ta woŋlɔ Salomo ƒe lododowo ɖo kple nyati si dzi wotui ɖo

¹Israel fia Solomo, David ƒe vi ƒe lododowo nye esiawo:

²na nunya kple amehehe,

na nya goglowo gɔmesese,

³hena agbe dzɔdzɔe kple agbe ɖevi nɔnɔ,

be woawɔ nu si dzɔ,

nu si le eteƒe kple nu si nyo,

⁴be ame gblɔewo nadze aɖaŋu eye woana nunya

kple sidzedze sɔhɛwo,

⁵nunyalawo neɖo to,

ne woasrɔ̃ nu akpe ɖe esi wonya xoxo la ŋu

eye ame siwo si sidzedze le xoxo la naxɔ aɖaŋu,

⁶be woase nunyalawo ƒe lododowo

abebubuwo kple adzowo gɔme.

⁷Yehowa vɔvɔ̃e nye nunya ƒe gɔmedzedze,

ke bometsilawo doa vlo nunya kple amehehe.

Dzidede ƒo na amewo be woasrɔ̃ nunya

Nuxɔxlɔ̃ amewo le ha baɖa dede ŋuti

⁸Vinye, ɖo to fofowò ƒe nuxɔxlɔ̃

eye mègagbe nu le dawò ƒe nufiame gbɔ o.

⁹Anye seƒoƒokuku aɖo atsyɔ̃ na wò ta

kple kɔga anɔ kɔwò.

¹⁰Vinye, ne nu vɔ̃ wɔlawo le nuwò blem la,

mègalɔ̃ na wo o.

¹¹Ne wogblɔ na wò be,

“Va kplɔ mí ɖo,

na míade xa ɖe ame aɖe ƒe ʋu ŋuti,

na míanɔ xame na luʋɔ maɖifɔ aɖe,

¹²ne míamii agbagbee abe tsiẽƒe ene,

eye míamii blibo abe ame siwo ge dze ʋe globo me ene

¹³ekema nu xɔasi vovovowo asu mía si

eye míatsɔ afunyinuwo ayɔ míaƒe xɔwo mee

¹⁴eya ta de mía dzi

ale be míana gakotoku ɖeka wò” la,

¹⁵vinye, mègakplɔ wo ɖo o,

mègaka afɔ woƒe toƒewo o

¹⁶elabena woƒe afɔ ɖea abla ɖe nu vɔ̃ ŋu

eye wogona ɖe ʋukɔkɔɖi ŋu.

¹⁷Enye movidzɔdzɔ be woaɖo ɖɔ ɖi na xeviwo

le wo katã ƒe ŋkume!

¹⁸Ame siawo de xa ɖi na woawo ŋutɔ

ƒe ʋu eye wole adeklo dzi ɖe woawo ŋutɔ ɖokuiwo ŋu!

¹⁹Aleae ame siwo tia viɖe ƒoɖi yome la ƒe nuwuwu anɔ,

elabena eɖea ame siwo ƒe asi su edzi la ƒe agbe ɖa.

Nuxɔxlɔ̃ amewo le nunyagbegbe ŋuti

²⁰Nunya le ɣli dom le mɔtata dzi

eye wòkɔ gbe dzi le ƒuƒoƒewo.

²¹Ele ɣli dom le mɔtata siwo dzi zinyenye

le la ƒe dzogoewo dzi eye wòle eƒe nyawo gblɔm

le dua ƒe agbowo me be,

²²“Va se ɖe ɣe ka ɣi mi gegemewo mialɔ̃ bometsinuwɔwɔ?

Va se ɖe ɣe ka yi fewuɖulawo akpɔ dzidzɔ le fewuɖuɖu ŋu,

bometsilawo alé fu sidzedze?

²³Ne ɖe mietrɔ ɖe nye mokaname ŋu la,

anye ne metrɔ nye dzi kɔ ɖe anyi na mi

eye mena mienya nye susuwo.

²⁴Ke esi miegbe tɔtɔ nam esi meyɔ mi,

esi meke nye abɔwo me,

mietsɔ ɖeke le eme o

²⁵eye miedo toku nye aɖaŋuɖoɖowo,

hegbe nye mokaname ta la,

²⁶nye hã mako mi le miaƒe gbegblẽ ta

eye maɖe alɔme le mia ŋu ne dzɔgbevɔ̃e ƒo ɖe mia dzi,

²⁷ɛ̃, ne eƒo ɖe mia dzi abe ahom sesẽ ene,

gbegblẽ hã zɔ to mia dzi abe yali ene,

eye xaxa kple hiã va mia dzi kpoyi!

²⁸“Ekema woayɔm gake nyematɔ o,

woadim gake womakpɔm o.

²⁹Le esi wolé fu sidzedze

eye wometia Yehowavɔvɔ̃ o,

³⁰le esi wogbe nye aɖaŋuɖoɖo

hedo vlo nye mokaname ta.

³¹Azɔ la woaɖu woƒe mɔwo ƒe kutsetse

eye woƒe ɖoɖowo ƒe kutsetse aɖi ƒo na wo

³²elabena gegemewo ƒe afɔɖeɖe baɖawo awu wo

eye bometsilawo ƒe ɖekematsɔleme atsrɔ̃ wo.

³³Ke ame sia ame si ɖoa tom la, anɔ agbe le dedinɔnɔ me

eye aɖe dzi ɖi bɔkɔɔ, mavɔ̃ na dzɔgbevɔ̃e o.”

Agbe nyui nɔnɔ si doa go tso nunya me ƒe viɖe

¹Vinye, ne èxɔ nye nyawo

eye nèdzra nye sededewo ɖo ɖe mewò,

²ne ètrɔ to ɖe nunya ŋu

hetsɔ wò dzi na gɔmesese,

³ne èyɔ sidzedze

eye nèdo ɣli na gɔmesese,

⁴ne èdii abe klosalo

alo kesinɔnu si woɣla ene la,

⁵ekema àse Yehowavɔvɔ̃ gɔme

eye àke ɖe Mawu nyanya ŋu

⁶elabena Yehowae naa nunya,

eye sidzedze kple gɔmesese doa go tso eƒe nu me.

⁷Eɖo dziɖuɖu ɖi na nuteƒewɔlawo

eye wònye akpoxɔnu na ame siwo ƒe zɔzɔme ŋu fɔɖiɖi mele o,

⁸elabena edzɔa ame dzɔdzɔewo ƒe toƒewo ŋu

eye wòkpɔa eƒe nuteƒewɔlawo ƒe mɔwo ta.

⁹Ekema àse nu si nyo,

le dzɔdzɔe eye wòdze la gɔme,

ɛ̃, àse mɔ nyui ɖe sia ɖe gɔme,

¹⁰elabena nunya age ɖe wò dzi me,

eye sidzedze ado dzidzɔ na wò luʋɔ.

¹¹Tamebubu nyui akpɔ tawò,

eye gɔmesese adzɔ ŋuwò.

¹²Nunya aɖe wò tso ame vɔ̃ɖiwo ƒe mɔwo dzi,

tso nya tovo gblɔlawo ƒe asi me,

¹³ame siwo gblea mɔ dzɔdzɔetɔwo ɖi hezɔna

le mɔ doblukɔwo dzi,

¹⁴ame siwo nu gbegblẽ wɔwɔ doa dzidzɔ na,

eye wotsoa aseye le nu tovo ƒe vɔ̃ɖinyenye ŋu,

¹⁵ame siwo ƒe mɔwo glɔ̃

eye wotrana le woƒe mɔwo dzi.

¹⁶Nunya aɖe wò le nyɔnu ahasitɔ hã ƒe asi me

kple srɔ̃nyɔnu si da afɔ la ƒe amenubeble me

¹⁷ame si gblẽ eƒe ɖetugbimesrɔ̃ ɖi

eye mewɔ ɖe nu si wòbla kplii

le Mawu ŋkume la dzi o

¹⁸elabena eƒe aƒe ɖo ta ku me

eye eƒe mɔwo ɖo ta ame siwo le tsiẽƒe la ƒe gbɔgbɔwo gbɔ.

¹⁹Ame siwo katã yia egbɔ la megatrɔna gbɔna loo

alo gena ɖe agbemɔ la dzi o.

²⁰Ale àto ame nyuiwo ƒe mɔwo dzi

eye àlé ame dzɔdzɔewo ƒe mɔwo ɖe asi.

²¹Ame dzɔdzɔewo anɔ anyigba dzi

eye ame maɖifɔwo asusɔ ɖe edzi

²²gake woatsrɔ̃ ame vɔ̃ɖiwo ɖa le anyigba dzi

eye woaho nuteƒemawɔlawo ɖa le edzi.

Nunya ƒe viɖe bubuwo

¹Vinye, mègaŋlɔ nye nufiame be o,

eye nàlé nye sededewo ɖe wò dzi me,

²elabena woadidi wò agbenɔƒewo ɖe edzi

ƒe geɖe, eye woahe dzidzedzekpɔkpɔ vɛ na wò.

³Lɔlɔ̃ kple nuteƒewɔwɔ megate ɖa le gbɔwò gbeɖe o,

tsɔ wo de kɔ eye nàŋlɔ wo ɖe wò dzi ƒe nuŋlɔkpe dzi.

⁴Ekema àkpɔ amenuveve kple ŋkɔ nyui

le Mawu kple amewo ŋkume.

⁵Ɖo ŋu ɖe Yehowa ŋu kple wò dzi blibo,

mègaku ɖe wò ŋutɔ wò nugɔmesese ŋu o;

⁶ɖo ŋu ɖe eŋu le wò mɔwo katã dzi

ekema awɔ wò toƒewo dzɔdzɔe.

⁷Mèganye nunyala le wò ŋutɔ wò ŋkume o,

ke boŋ vɔ̃ Yehowa eye nàtsri vɔ̃.

⁸Esia ahe dɔyɔyɔ vɛ na wò ŋutilã

kple nunyiame vɛ na wò ƒuwo.

⁹De bubu Yehowa ŋu kple wò kesinɔnuwo

kple wò agblemenukuwo ƒe ŋgɔgbetɔwo,

¹⁰ekema wò avawo ayɔ agbagba,

eye wain yeye ayɔ wò ahazewo agbagba.

¹¹Vinye, mègado vlo Yehowa ƒe amehehe o

eye mègagbe eƒe mokaname o

¹²elabena Yehowa ɖɔa ame siwo wòlɔ̃ la ɖo

abe ale si fofo wɔna na vi si ƒe nu dzea eŋu la ene.

¹³Woayra ame si ke ɖe nunya ŋu

kple ame si si gɔmesese su

¹⁴elabena nunya xɔ asi wu klosalo

eye viɖe geɖe le eme wu sika.

¹⁵Asixɔxɔ le eŋu wu adzagba

eye nu siwo katã dim nèle la,

ɖeke mesɔ kplii o.

¹⁶Agbe didi le eƒe ɖusi ƒe asi me,

eye kesinɔnuwo kple bubu le eƒe miasi ƒe asi me.

¹⁷Eƒe mɔwo nye mɔ siwo dzi vivi le

eye ŋutifafa le eƒe toƒewo katã.

¹⁸Enye agbeti na ame siwo xɔ eya amea

eye ame siwo ƒe asi su edzi la woayra wo.

¹⁹Nunyae Yehowa tsɔ ɖo anyigba la ƒe gɔmeɖokpe anyii

eye wòtsɔ gɔmesese ɖo dziƒowo ɖe wo teƒe.

²⁰Etsɔ eƒe nunya ma gogloƒewoe

eye lilikpowo dzaa zãmu.

²¹Vinye, lé afia nyui tsotso kple sidzedze me ɖe asi,

mègana woadzo le ŋkuwòme o.

²²Woanye agbe na wò

kple kɔga aɖo atsyɔ̃ na wò kɔ.

²³Ekema àlé wò mɔ atsɔ le dedinɔnɔ me

eye wò afɔ maɖiɖi o.

²⁴Ne èmlɔ anyi la, màvɔ̃ o,

ne èmlɔ anyi la, àdɔ alɔ̃ vivi.

²⁵Mègavɔ̃ ŋɔdzi si ava kpoyi

alo gbegblẽ si vaa ame vɔ̃ɖiwo dzi o

²⁶elabena Yehowa anye wò dzideƒo

eye mana wò afɔ naɖo mɔ me o.

²⁷Mègagbe nyuiwɔwɔ na ame siwo dze nɛ,

ne ele wò ŋusẽ me be nàwɔe o.

²⁸Mègagblɔ na wò aƒelika be,

“Yi nàtrɔ va, etsɔ matsɔe na wò” esi wòle asiwò fifia o.

²⁹Mègaɖo vɔ̃ ɖe wò aƒelika,

ame si le gbɔwò le anukwareɖiɖi me la ŋu o.

³⁰Mègatsɔ nya ɖe ame aɖeke ŋu dzodzro

esi mewɔ vɔ̃ aɖeke ɖe ŋuwò o.

³¹Mègabiã ŋu ŋutsu nu sesẽ wɔla

alo azɔ le eƒe mɔ aɖeke dzi o,

³²elabena Yehowa nyɔa ŋu ŋutsu nu tovo wɔla

gake elɔ̃a ame siwo wɔa nu dzɔdzɔe.

³³Yehowa ƒe fiƒode le ame vɔ̃ɖiwo

ƒe aƒe dzi, ke eyrana ɖe ame dzɔdzɔewo ƒe aƒe dzi.

³⁴Yehowa ɖua fewu le dadala fewuɖulawo ŋu,

ke evea ame siwo bɔbɔa wo ɖokui la nu.

³⁵Nunyalawo nyia bubu ƒe dome,

ke bometsilawo la, etsɔa wo dea asi na ŋukpe.

Nunya ƒo nuwo katã ta

¹Vinyewo, mise mia fofo ƒe nufiame;

miɖo to ne miaxɔ gɔmesese.

²Nusɔsrɔ̃ deto mele mia nam

eya ta migagbe nye nufiafia o.

³Esi menye ɖevi sue kple vi fɛ̃ le fofonye ƒe aƒe me

kple vi ɖekɛ na danye la,

⁴efia num hegblɔ be,

“Ku ɖe nye nyawo ŋu kple wò dzi katã,

lé nye sededewo me ɖe asi ekema ànɔ agbe.

⁵Dze nunya, di gɔmesese,

mègaŋlɔ nye nyawo be alo aƒo asa na wo o.

⁶Mègagbe nu le nunya gbɔ o ekema adzɔ ŋuwò,

lɔ̃e ekema akpɔ tawò.

⁷Nunya ƒo nuwo katã ta

eya ta dze nunya.

Togbɔ be wò nunɔamesiwo katã nàtsɔ aƒlee hã la,

di gɔmesese.

⁸De asixɔxɔ eŋu ekema ado wò ɖe dzi,

xɔe atuu ekema ade bubu ŋuwò.

⁹Atsɔ amenuveve aɖɔ na wò ta abe seƒoƒotsihe ene

eye wòatsɔ atsyɔ̃fiakuku aɖɔ na wò.”

¹⁰Ɖo to afii, vinye,

ne nàxɔ nye nyawo, ekema wò agbenɔƒewo asɔ gbɔ fũu.

¹¹Mele nunya ƒe mɔ fiam wò

eye mekplɔ wò to toƒe dzɔdzɔewo.

¹²Ne èle zɔzɔm la, naneke maxe mɔ na wò

afɔɖeɖewo o eye ne èsi du la, màkli nu o.

¹³Lé nufiame ɖe asi, mègana wòado le asiwò o;

dzɔ eŋuti nyuie elabena eyae nye agbe na wò.

¹⁴Mègaka afɔ ame vɔ̃ɖiwo ƒe toƒewo

alo nàzɔ ame vɔ̃ɖiwo ƒe mɔ dzi o.

¹⁵Ƒo asa na woƒe mɔwo, mègazɔ wo dzi o,

lé wò mɔ tsɔ nàyi afi si yim nèle

¹⁶elabena ne womewɔ nu vɔ̃ɖi o kpaa,

womedɔa alɔ̃ o eye womedɔa akɔlɔ̃e teti hã o

va se ɖe esime woana ame aɖe nadze anyi.

¹⁷Woɖua vɔ̃ɖinyenye ƒe abolo

eye wonoa nu sesẽ wɔwɔ ƒe wain.

¹⁸Ke ame dzɔdzɔewo ƒe toƒe le abe ŋdi kanya ƒe ɣetotoe ene,

eklẽna, gaklẽna ɖe edzi ne ŋu ɖe le eme nyuie.

¹⁹Ke ame vɔ̃ɖiwo ƒe mɔ le abe viviti tsiɖitsiɖi ene

eye womenya nu si na wole nu klim o.

²⁰Vinye, lé to ɖe nye nyawo ŋu

eye nàƒu to anyi ɖe nya si gblɔm mele la ŋu.

²¹Mègana woadzo le wò ŋkume o,

ke boŋ dzra wo ɖo ɖe wò dzi me,

²²elabena wonye agbe na ame siwo

ke ɖe wo ŋu kple dɔyɔyɔ na ame ƒe ŋutilã blibo la.

²³Dzɔ wò dzi ŋu wu nuwo katã,

elabena eyae nye agbe ƒe vudo.

²⁴Ɖe nya dzodzrowo ɖa le wò nu me,

eye te aʋatsonyawo ɖa xaa tso wò nuyiwo gbɔ.

²⁵Wò ŋkuwo nekpɔ ŋgɔ tẽe

eye wò mo nelé mɔ ɖeka tsɔ le ŋgɔwò.

²⁶Ɖe toƒe sɔsɔewo na wò afɔwo

eye nàlé mɔ siwo dzi sẽ nyuie la ko atsɔ.

²⁷Mègadze ɖe ɖusime alo miame o,

eye ɖe wò afɔ ɖa le vɔ̃ me.

Nuxɔxlɔ̃ amewo le ahasiwɔwɔ ŋuti

¹Vinye, lé to ɖe nye nunya ŋu

eye nàƒu to anyi nyuie ɖe nye sidzedze ƒe nyawo ŋu,

²be nànya nu si nàwɔ

eye wò nuyiwo adzra gɔmesese ɖo

³elabena nyɔnu ahasitɔ ƒe nuyiwo le anyitsi tsyɔm,

eye eƒe numenyawo zrɔ̃ wu ami

⁴gake le nuwuwu la evena wu veve

eye wòɖana wu yi nuevee.

⁵Eƒe afɔ yina ɖe tsĩeƒe ke

eye eƒe afɔɖeɖewo yina ɖe yɔdo me tẽe

⁶Mebua ta me le ale si wòanɔ agbee ŋu kura o,

eƒe toƒewo glɔ̃ gake menyae o

⁷eya ta azɔ la, vinyewo, miɖo tom,

migaƒo asa na nu si megblɔ na mi o.

⁸Miaƒe toƒewo nete ɖa xaa tso egbɔ,

migagogo eƒe aƒe ƒe agbonu o,

⁹ne menye nenema o la,

miava gblẽ miaƒe ɖekakpuime

ƒe ŋusẽ ɖe ame bubuwo ŋu

kple miaƒe ƒewo ɖe ame vɔ̃ɖi ŋu.

¹⁰Ne menye nenema o la,

amedzrowo anye avuzi le miaƒe kesinɔnuwo dzi

eye nu si nète fifia kpɔ la aɖo atsyɔ̃ na ame bubu ƒe aƒe me.

¹¹Le wò agbe ƒe nuwuwu la, ànɔ ŋeŋem,

ne wò ŋutilã kple wò ameti blibo la vɔ le eme.

¹²Àgblɔ be, “Metsri amehehe kɔkɔkɔ!

Eye nye dzi do vlo ɖɔɖɔɖo!

¹³Nyemaɖo to nye nufialawo

alo aƒu to anyi ɖe nye amegãwo ŋu o.

¹⁴Esusɔ vie donyeme nagblẽ keŋkeŋ

le ameha la katã dome.”

¹⁵No tsi tso wò ŋutɔ wò tsiʋe me

kple tsi dzidzi tso wò ŋutɔ wò vudo me.

¹⁶Ɖe wòle be wò tsitsetsewo nagbagba ɖe mɔtatawo dzi

kple wò tsi sisi ɖe du ƒe ablɔwo mea?

¹⁷Wonenye wò ɖeka ko tɔ,

mègamae kple ame tutɔwo gbeɖe o.

¹⁸Woayra wò vudo eye nàkpɔ dzidzɔ

ɖe wò ɖekakpuimesrɔ̃ ŋu.

¹⁹Eyae nye zinɔ lɔlɔ̃a kple sãde dzeani la,

eƒe nowo neɖi kɔ na wò ɣe sia ɣi,

eye eƒe lɔlɔ̃ nede dzo mewò ɖaa.

²⁰Vinye, nu ka ŋuti nàƒo kpakpakpa ɖe nyɔnu ahasitɔ ŋu?

Nu ka ŋuti nàlé alime na ame bubu srɔ̃?

²¹Elabena ame sia ame ƒe mɔ le ƒuƒlu le Yehowa ŋkume

eye wòdoa woƒe mɔwo katã kpɔ.

²²Ame vɔ̃ɖi ƒe nu vɔ̃ɖi siwo wòwɔna la zua mɔ ɖenɛ,

eye eƒe nu vɔ̃ zua ka blanɛ sesĩe.

²³Aku le ɖokuidzimaɖumaɖu ta

eye eƒe bometsitsi gã la akplɔe atrae.

Nuxɔxlɔ̃ amewo le bometsitsi ŋuti

¹Vinye, ne ède megbe na wò aƒelika,

eye nèsi akpe tsɔ do ŋugbee na ame tutɔ,

²ne ŋugbe si nèdo zu mɔ me nèɖo

eye wò numenyawo bla wò la,

³ekema vinye, wɔ esia ne nàtsɔ aɖe ɖokuiwòe,

esi nège ɖe hawòvi ƒe asi me ta.

Yi nàbɔbɔ ɖokuiwò,

ɖe kuku na hawòvi la amenubletɔe!

⁴Wò ŋkuwo megadɔ alɔ̃ o

eye wò aɖaba megadɔ akɔlɔ̃e o.

⁵Ɖe ɖokuiwò le eƒe asi me abe ale si sãde sina le adela ƒe asi me ene

alo abe ale si xevi dona le xevimɔtrela ƒe kamɔ mee ene.

⁶Wò, kuviatɔ, yi anyidi gbɔ;

kpɔ eƒe mɔwo ɖa, eye nàdze nunya!

⁷Gbeɖela loo dzikpɔla

alo dziɖula aɖeke mele esi o,

⁸gake le dzomeŋɔli la eƒoa eƒe nuhiahiãwo nu ƒu

eye wòƒoa eƒe nuɖuɖu nu ƒu le nuŋeɣi.

⁹Wò, kuviatɔ va se ɖe ɣe ka ɣi nàmlɔ afi ma?

Ɣe ka ɣi nànyɔ tso alɔ̃ me?

¹⁰Dɔ alɔ̃ vie, dɔ akɔlɔ̃e sẽe,

ŋlɔ wò abɔwo nàdzudzɔ vie,

¹¹tete ahedada aƒo ɖe dziwò abe adzodala ene

eye hiã abe aʋakalẽtɔ si bla akpa ene.

¹²Yakame kple ame baɖa

si le yiyim kple alakpadada,

¹³le ŋku tem, tsɔ afɔ le dzesi fiam

eye wòtsɔ eƒe asi le nya gblɔmii,

¹⁴ame si ɖoa nu vɔ̃ɖi, beble le eƒe dzi me,

eye ɣe sia ɣi wòdea dzre aƒe la

¹⁵eya ta gbegblẽ aƒo ɖe edzi kpoyi

eye woatsrɔ̃ eya amea zi ɖeka, naneke maɖee le eme o.

¹⁶Nu adree Yehowa tsri,

eye nu adree nye nu siwo wònyɔa ŋui:

¹⁷dadaŋkuwo, alakpaɖe,

asi siwo kɔa ʋu maɖifɔ ɖi,

¹⁸dzi si ɖoa nu vɔ̃ɖiwo,

afɔ siwo ɖea abla ɖe vɔ̃wɔwɔ ŋuti

¹⁹aʋatsoɖaseɖila si kɔa alakpa ɖi,

kple ŋutsu si dea dzre nɔviwo dome.

Nuxɔxlɔ̃ amewo le ahasiwɔwɔ ŋuti

²⁰Vinye, lé fofowò ƒe sededewo me ɖe asi

eye mègagblẽ dawò ƒe nufiame ɖi o.

²¹Bla wo ɖe wò dzi ŋuti tegbee

eye nàsae ɖe wò kɔ ŋuti.

²²Ne èle zɔzɔm la, woafia mɔ wò, ne èle alɔ̃ dɔm la,

woadzɔ ŋuwò eye ne ènyɔ la, woaƒo nu na wò

²³elabena sedede siawo nye akaɖi,

nufiafia sia nye kekeli eye ɖɔɖɔɖo

si amehehe hena vɛ la nye agbe ƒe mɔ,

²⁴esi aɖe wò tso nyɔnu ahasitɔ ƒe asi me

kple srɔ̃nyɔnu dzego la ƒe aɖe ŋanɛ ƒe asi me.

²⁵Eƒe tugbedzedze megana eƒe nu nadzro wò

le wò dzi me alo nàna eƒe ŋku mawo nalé wò o,

²⁶elabena gbolo aɖi gbɔ̃ wò,

nànɔ abe abolo ko ene eye nyɔnu ahasitɔ aɖe agbe le mewò.

²⁷Ɖe ŋutsu aɖe aɖe dzo ɖe atata

eye eƒe awuwo nagbe fiafia?

²⁸Ɖe ŋutsu aɖe azɔ le dzoka xɔxɔ dzi

eye eƒe afɔwo nagbe fiafia?

²⁹Nenemae wòanɔ na ŋutsu si dɔna kple ŋutsu bubu srɔ̃,

womagbe tohehe na ame si ka asi eŋuti o.

³⁰Womedoa vlo fiafitɔ ne efi fi be wòatsɔ atsi eƒe dɔwuame nu,

ne dɔ la ewum o

³¹gake ne wolée la, ele nɛ be wòaɖo nua teƒe zi adre,

esia ana eƒe kesinɔnu siwo katã le esi le eƒe aƒe me la navɔ le esi.

³²Ke ame si wɔ ahasi kple srɔ̃tɔ la mebua ta me o

eye ame si wɔnɛ la gblẽa eɖokui dome.

³³Ƒoƒo kple kɔ kple vlododo nye etɔ gome

eye womaɖe eƒe ŋukpe ɖa akpɔ gbeɖe o

³⁴elabena ŋuʋaʋã ana srɔ̃ŋutsu ƒe dɔmedzoe nafla

eye ne ele hlɔ̃ biam la, makpɔ nublanui o.

³⁵Maxɔ avulénu aɖeke o,

eye maxɔ zãnu aɖeke hã o, aleke gbegbee wòloloe hã.

Kpɔ nyuie le nyɔnu ahasitɔ ŋuti

¹Vinye, lé nye nyawo me ɖe asi

eye nàdzra nye sededewo ɖo ɖe mewò.

²Lé nye sededewo me ɖe asi ekema ànɔ agbe

eye dzɔ nye nufiamewo ŋuti abe wò gadaglamakui ene.

³Bla wo ɖe wò asibidɛwo ŋu

eye nàŋlɔ wo ɖe wò dzi ƒe nuŋlɔkpe dzi.

⁴Gblɔ na nunya be,

“Nɔvinye nyɔnu nènye.”

Eye nàyɔ ƒometɔ na gɔmesese,

⁵woana nyɔnu ahasitɔ la nanɔ adzɔge na wò,

eye woaɖe wò le srɔ̃nyɔnu dzego la ƒe amenublenyawo ƒe asi me.

⁶Mele nye xɔ ƒe fesrẽ nu,

hekpɔ nu to fesrẽnuvɔ la me.

⁷Mekpɔ ame aɖe le bebewuwo dome,

mekpɔ ɖekakpui si tsi bome la le sɔhɛwo dome.

⁸Ele zɔzɔm le kpɔdome,

ɖo ta dzogoe si me nyɔnu la le la me;

ezɔ ɖo ta afi si nyɔnu la ƒe aƒe le,

⁹le fiẽ me, esime anyigba nɔ tsyɔtsyɔm,

eye zã do blukɔ.

¹⁰Tete nyɔnu aɖe do go va kpee,

edo awu abe gbolo ene eye ayedzedze le mo nɛ.

¹¹Eƒe gbe le dzi dem,

metsɔ ɖeke le eme na ame aɖeke o

eye eƒe afɔwo gbe tɔtɔ ɖe aƒe me,

¹²ele kpɔdome fifia, kasia egado ɖe ablɔme xoxo

eye wòdea xa ɖe dzogoe ɖe sia ɖe dzi.

¹³Elé ɖekakpui la hegbugbɔ nu nɛ ŋɔnɔe

eye wòɖo mo kplalaa gblɔ nɛ be,

¹⁴“Ŋutifafavɔsa le aƒenye me,

egbe mexe nye adzɔgbeɖefewo o,

¹⁵eya ta medo be mava do go wò,

medi wò eye meke ɖe ŋuwò!

¹⁶Meɖo aklala biɖibiɖi ƒe abadzivɔ si wode amadede vovovowoe,

esi wowɔ le Egipte la ɖe nye aba dzi.

¹⁷Mewu lifi,

anowɔtre kple ami ʋeʋĩ vovovowo ɖe nye aba dzi,

¹⁸eya ta va, míano lɔlɔ̃ wòasu mí va se ɖe ŋdi,

na míatsɔ lɔlɔ̃ ado vivi ɖe mía ɖokuiwo ŋu!

¹⁹Nye aƒetɔ mele aƒe o,

ezɔ mɔ didi aɖe.

²⁰Etsɔ eƒe gakotoku si ga yɔ fũu la dzoe

eye ne dzinu sɔ tegblẽ hafi wòagbɔ.”

²¹Etsɔ amenublenya siawo blee

eye wòtsɔ eƒe aɖe ŋanɛ la kplɔe trae.

²²Etso zia enumake hekplɔe ɖo abe nyitsu

wokplɔ yina wuwu ge

alo abe zi si ɖo afɔ mɔ me ene.

²³Va se ɖe esime aŋutrɔ naƒo ɖe eƒe aklã,

abe xevie dzo ɖe kamɔ dzi

eye menyae be yeƒe ku le afi ma o la ene

²⁴eya ta azɔ la, vinyewo,

miɖo tom eye miƒu to anyi ɖe nu si megblɔ la ŋu.

²⁵Migana miaƒe dzi natrɔ ɖe eƒe mɔwo ŋu loo,

alo miatra age ɖe eƒe toƒewo o.

²⁶Elabena ame siwo tsi esi me la sɔ gbɔ,

eye ame siwo wòwu la de ha.

²⁷Eƒe aƒe nye tsiẽƒe ƒe mɔ gbadza

siwo ɖo ta ku ƒe xɔgãwo me.

Nunya ƒe ameyɔyɔ

¹Ɖe nunya mele ɣli dom le ame yɔm oa?

Ɖe gɔmesese mekɔ eƒe gbe dzi oa?

²Etsi tsitre ɖe kɔkɔƒe siwo le mɔto la tame,

afi si afɔmɔwo do go le.

³Ele tsitre ɖe dua ƒe agbowo ƒe mɔ xa

kple agbo la me le ɣli dom sesĩe be,

⁴“O ŋutsuwo, miawoe mele ɣli dom na

eye mekɔ nye gbe dzi na amegbetɔƒomea katã.

⁵Mi bebewuwo, midze nunya;

mi bometsilawo gɔmesese nesu mia si.

⁶Miɖo to elabena nya xɔasiwo le asinye be magblɔ;

meke nye nu be magblɔ nu si le dzɔdzɔe.

⁷Nye nu gblɔa nu si le eteƒe,

elabena nye nuyi tsri vɔ̃ɖivɔ̃ɖi.

⁸Nye numenyawo katã le dzɔdzɔe;

ɖeke meglɔ̃ alo nye ayemenya o.

⁹Wo katã le dzɔdzɔe na ame si si sidzedze le;

fɔɖiɖi mele wo ŋu na ame siwo si gɔmesese le o.

¹⁰Tia nye amehehe ɖe klosalo teƒe

kple nye gɔmesese ɖe sika nyuitɔ teƒe

¹¹elabena nunya xɔ asi wu adzagba

eye nu siwo dim wò dzi le la ƒe ɖeke mesɔ kplii o.

¹²“Nye, nunya kple ŋuɖɔɖoe nɔa teƒe ɖeka;

gɔmesese kple sidzedze le asinye.

¹³Yehowa vɔvɔ̃e nye be nàlé fu vɔ̃,

eya ta metsri dada kple ɖokuidodoɖedzi,

agbe baɖa nɔnɔ kple nya dzodzrowo gbɔgblɔ.

¹⁴Tɔnyee nye aɖaŋudede kple afia nyui tsotso,

gɔmesese kple ŋusẽ le asinye.

¹⁵Dzinyee fiawo tona ɖua fia

eye dziɖulawo dea se siwo le dzɔdzɔe.

¹⁶Dzinyee dumegãwo tona kplɔa du

eye nenema kee nye bubume

siwo le dzi ɖum le anyigba dzi.

¹⁷Melɔ̃a ame siwo lɔ̃am

eye ame siwo diam la kpɔam.

¹⁸Hotsui kple bubu bɔ ɖe asinye,

nenema kee nye kesinɔnu

siwo megblẽna o kple dzidzedze.

¹⁹Nye kutsetse nyo wu sika nyuitɔ,

eye nu si dona tso menye la ƒo klosalo nyuitɔ ta sãa.

²⁰Mezɔna le dzɔdzɔenyenye ƒe mɔ dzi

kple nuteƒewɔwɔ ƒe toƒewo,

²¹eye mekɔa kesinɔnu ɖe ame siwo lɔ̃am la dzi,

henana woƒe nudzraɖoƒewo gbagbana.

²²“Yehowa dzim abe eƒe nuwɔwɔwo ƒe ŋgɔgbetɔ ene,

hafi wòava wɔ nuwo le blema.

²³Etɔ asi dzinye tso mavɔ me ke,

tso gɔmedzedzea me,

hafi xexea me nava dzɔ.

²⁴Wodzim esime atsiaƒuwo menɔ anyi o,

eye vudo siwo dzia tsi fũu la hã menɔ anyi o.

²⁵Hafi woatsɔ towo ada ɖe woƒe nɔƒewo, eye togbɛwo nadzɔ la,

nye la, wodzim xoxo.

²⁶Hafi wòava wɔ anyigba alo gbegbe

alo anyigbadziʋuʋudediwo gɔ̃ hã la, wodzim xoxo.

²⁷Menɔ afi ma hafi wòtsɔ dziƒowo ɖo wo nɔƒe

eye wòdzidze dzite da ɖe gogloƒewo tame.

²⁸Esi wòɖo lilikpowo ɖe dziƒo,

eye wòli ke tɔ goglowo ƒe dzɔtsoƒe,

²⁹esi wòɖo liƒo na atsiaƒu be

eƒe tsiwo magbɔ teƒe si wòde se be woase la dzi o

eye wòɖo anyigba gɔme la, medzɔ xoxo.

³⁰Ale menye aɖaŋudɔwɔla nɔ eƒe axadzi,

dzidzɔ yɔ menye gbe sia gbe

eye metsoa aseye le eŋkume ɣe sia ɣi.

³¹Medzɔ dzi le eƒe xexe blibo la me

eye amegbetɔwo ƒe nu do dzidzɔ nam.

³²“Eya ta, azɔ la, mi vinyewo, miɖo tom;

woayra ame siwo lé nye mɔwo me ɖe asi.

³³Ɖo to nye sededewo eye nàdze nunya,

mègado tokue o.

³⁴Woayra ame si ɖoa tom,

nɔa ŋudzɔ le nye ʋɔtru nu gbe sia gbe

eye wòlalana le nye kpui nu

³⁵elabena ame si ke ɖe ŋutinye la,

ke ɖe agbe ŋu eye wòxɔa amenuveve tso Yehowa gbɔ.

³⁶Ke ame si mete ŋu ke ɖe ŋutinye o la,

wɔa nu vevi eɖokui eye ame siwo katã léa fum la lɔ̃a ku.”

Nunya kple bometsitsi ƒe amekpekpe

¹Nunya tu eƒe xɔ

eye wòɖo eƒe sɔti adreawo te.

²Etrɔ asi le eƒe lã si wòwu ŋu,

tɔtɔ eƒe wain, eye wòɖo eƒe kplɔ̃ hã.

³Edɔ eƒe dɔlanyɔnuwo

eye wòtsi tsitre ɖe dua ƒe kɔkɔƒe ke hedo ɣli be,

⁴“Mi bebewuwo katã mige ɖe eme le afii!”

Egblɔ na numanyalawo be,

⁵“Miva, miɖu nye nu

eye mino nye wain si metɔtɔ.

⁶Miɖe asi le bometsitsi ŋu,

ekema mianɔ agbe eye miazɔ le gɔmesese me.

⁷“Ame si le nya gbem na fewuɖula la le eƒe dzu dɔm

eye ame si ka mo na ame vɔ̃ɖi la xɔa dzudzu.

⁸Mègaka mo na fewuɖula o, ne menye nenema o la,

alé fu wò; ke boŋ ka mo na nunyala eye alɔ̃ wò nya.

⁹Fia nu nunyala, aganya nu ɖe edzi wu,

fia nu ame dzɔdzɔe eye agasrɔ̃ nu akpe ɖe esi wònya xoxo la ŋuti.

¹⁰“Yehowa vɔvɔ̃e nye nunya ƒe gɔmedzedze

eye sidzedze Kɔkɔetɔ la nye gɔmesese

¹¹elabena to dzinye wò ŋkekewo adzi ɖe edzi fũu

eye woatsɔ ƒewo akpe wò agbenɔƒewo.

¹²Ne èdze nunya la, wò nunya ahe viɖe vɛ na wò;

ke ne ènye fewuɖula la, wò ɖeka koe akpe fu.”

¹³Nyɔnu bometsila la le ɣli dom,

womekplae o eye menya nu hã o.

¹⁴Enɔ anyi ɖe eƒe aƒe ƒe ʋɔtru nu,

enɔ anyi ɖe zikpui dzi le du la ƒe kɔkɔƒe kekeake

¹⁵le ame siwo va le eme tsom la yɔm,

ame siwo lé woƒe mɔ tsɔ tẽe be,

¹⁶“Mí ame siwo katã nye bebewuwo la,

mige ɖe eme le afii!”

Egblɔna na ame siwo menya nu o la be,

¹⁷“Tsi si wofi la vivina,

eye nu si woɖu le vivime la vivina!”

¹⁸Ke womenya gɔ̃ hã be ame kukuwo le afi ma o

eye eƒe ame kpekpewo le yɔdo ƒe gogloƒe ke o.

Salomo ƒe lododowo

¹Solomo ƒe lododowo:

Ɖevi si nya nu la nana fofoa kpɔa dzidzɔ,

ke ɖevi si tsi bome la hea nuxaxa vɛ na dadaa.

²Kesinɔnu si wokpɔ to mɔ fitifitiwo dzi la menye viɖe aɖeke o,

gake dzɔdzɔnyenye ɖea ame tso ku me.

³Yehowa menaa dɔ wua ame dzɔdzɔewo o,

ke egblẽa ame vɔ̃ɖiwo ƒe didiwo me.

⁴Asi si wɔa kuvia la nana ame ɖoa ko

gake asi si doa vevi nu la hea kesinɔnu vɛ.

⁵Ame si ƒoa nukuwo nu ƒu le dzomeŋɔli la nye vi nyanu,

ke ame si dɔa alɔ̃ le nuŋeɣi la, vi ŋukpenuwɔlae.

⁶Yayra anye fiakuku anɔ ame dzɔdzɔe ƒe ta

ke ŋutasesẽ yɔa ame vɔ̃ ƒe nu me.

⁷Ŋkuɖoɖo ame dzɔdzɔe dzi anye yayra,

ke ame vɔ̃ɖiwo ƒe ŋkɔ aƒaƒã.

⁸Ame si nunya le dzi me na la xɔa sededewo,

ke bometsila, nukpoloeƒola, atsrɔ̃.

⁹Ame si ŋu fɔɖiɖi mele o la zɔna le dedinɔnɔ me,

ke asi atu ame si toa mɔ gɔglɔ̃wo dzi.

¹⁰Ame si tea ŋku ɖe ame kple dziku la

hea nuxaxa vɛ, eye bometsila, nukpoloeƒola, atsrɔ̃.

¹¹Ame dzɔdzɔe ƒe nu nye agbevudo,

ke ŋutasesẽ yɔa ame vɔ̃ɖi ƒe nu me.

¹²Fuléle hea mama vɛ,

gake lɔlɔ̃ tsyɔa dzidadawo katã dzi.

¹³Nunya le nugɔmeselawo ƒe nuyi dzi,

ke ameƒoti adze dzime na numanyalawo.

¹⁴Nunyalawo dzraa gɔmesese ɖo,

ke bometsila ƒe nu hea gbegblẽ vɛ.

¹⁵Kesinɔtɔwo ƒe kesinɔnuwo nye du si ŋu wotɔ glikpɔ sesẽ ɖo,

ke hiãtɔwo ƒe ahedada nye woƒe gbegblẽ.

¹⁶Ame dzɔdzɔe ƒe dɔwɔfetu hea agbe vɛ nɛ,

gake ame vɔ̃ɖi ƒe viɖe hea tohehe vɛ nɛ.

¹⁷Ame si ɖo to amehehe la le agbemɔ fiam

gake ame si gbea ɖɔɖɔɖo la kplɔa ame bubuwo tranae.

¹⁸Ame si ɣla fuléle ɖe eƒe dzi me la, alakpanuyi le esi

eye ame si nɔa ame ŋu gblẽm la, bometsilae.

¹⁹Afi si nya geɖe le la, nu vɔ̃ megbea afi ma nɔnɔ o,

ke ame si lé eƒe aɖe la, nunyalae.

²⁰Ame dzɔdzɔe ƒe aɖe le abe klosalo nyuitɔ ene,

ke viɖe mele ame vɔ̃ɖi ƒe dzi ŋu o.

²¹Ame dzɔdzɔe ƒe nuyi hea nunyiame vɛ na ame geɖewo,

gake bometsilawo kuna le simadzemadze ta.

²²Yehowa ƒe yayra hea kesinɔnu vɛ,

eye metsɔa fukpekpe aɖeke kpena ɖe eŋu o.

²³Bometsila kpɔa dzidzɔ le nu tovo wɔwɔ ŋu,

ke ame si sea nu gɔme la,

nunyae nye eƒe dzidzɔ.

²⁴Nu si vɔ̃m ame vɔ̃ɖi le lae ava tui,

ke nu si dim dzɔdzɔetɔ le la, eyae woanae.

²⁵Ne ahomya ƒo va yi la,

ame vɔ̃ɖi la maganɔ anyi o,

ke ame dzɔdzɔe ya anɔ te sesĩe ɖaa.

²⁶Abe ale si aha tsitsi nɔna na aɖu

eye dzudzɔ nɔna na ŋku ene la,

nenema kuviatɔ le na ame siwo dɔ dɔe.

²⁷Yehowavɔvɔ̃ nana agbe didina.

Ke ame vɔ̃ɖi ƒe agbenɔƒewo le kpuie.

²⁸Ame dzɔdzɔe ƒe viɖee nye dzidzɔ

gake ame vɔ̃ɖiwo ƒe mɔkpɔkpɔ zua dzodzro.

²⁹Yehowa ƒe mɔ nye sitsoƒe na ame dzɔdzɔe,

ke enye gbegblẽ na nu tovo wɔlawo.

³⁰Womaho ame dzɔdzɔe la akpɔ gbeɖe o

gake ame vɔ̃ɖi ya manɔ anyigba la dzi o.

³¹Nunya dona tso dzɔdzɔetɔ la ƒe nu me,

gake woalã alakpaɖe la ɖa.

³²Ame dzɔdzɔe ƒe nuyiwo nya nya dzeto gbɔgblɔ,

gake ame vɔ̃ɖi ƒe nu gblɔa nya tovowo.

¹Yehowa tsri nudanu amebatɔ,

ke nudakpe si de blibo la nye eƒe dzidzɔ.

²Dada doa ŋgɔ na ŋukpeɖuɖu,

ke ɖokuibɔbɔ hea nunya vɛ.

³Ame dzɔdzɔewo ƒe ta me nyui ɖoɖo kplɔa wo,

ke nuteƒemawɔlawo la,

woƒe dzi me eve susu tsrɔ̃a wo.

⁴Kesinɔnu nye nu dzodzro le dzikudogbe,

ke dzɔdzɔenyenye ɖea ame tso ku me.

⁵Ame maɖifɔwo ƒe dzɔdzɔenyenye taa mɔ dzɔdzɔe ɖe wo ŋgɔ,

ke ame vɔ̃ɖiwo ƒe vɔ̃wɔwɔ hea wo ƒua anyi.

⁶Ame dzɔdzɔewo ƒe nu dzɔdzɔe wɔwɔ ɖea wo,

ke didi vlowo zua mɔ ɖea nuteƒemawɔlawo.

⁷Ne ame vɔ̃ɖi ku la,

eƒe mɔkpɔkpɔ tsrɔ̃na,

nu siwo katã wòle mɔ kpɔm na tso

eƒe ŋusẽ me la zua tofloko.

⁸Woɖea ame dzɔdzɔe tso fu me

eye wòvaa ame vɔ̃ɖi la dzi boŋ.

⁹Mawumavɔ̃la tsɔa eƒe nu gblẽa ehavi domee,

ke woɖea ame dzɔdzɔe la to sidzedze me.

¹⁰Ne nu dze edzi na ame dzɔdzɔe la,

du blibo kpɔa dzidzɔ,

ke ne ame vɔ̃ɖi tsrɔ̃ la,

wodoa dzidzɔɣli.

¹¹To dzɔdzɔetɔ ƒe yayra dzi wodoa du ɖe dzi,

ke wotsrɔ̃nɛ to ame vɔ̃ɖi ƒe nu dzi.

¹²Ame manyanu doa vlo ehavi,

ke ŋutsu nugɔmesela léa eƒe aɖe.

¹³Amenyagblɔla ʋua go nya ɣaɣla,

ke ame ɖɔʋu ɣlaa nya.

¹⁴Dukɔ aɖe dzea anyi, ne mɔfiala meli o,

ke dziɖuɖu vana to aɖaŋuɖola geɖewo dzi.

¹⁵Ame si de megbe na ame bubu la akpe fu,

ke ame si gbe akpesisi abe ŋugbedodo ƒe dzesi ene la anɔ dedie.

¹⁶Wodea bubu nyɔnu dɔmenyotɔ ŋu,

ke ŋutsu ŋutasẽlawo ƒe asi sua kesinɔnu ko dzi.

¹⁷Ŋuistu dɔmenyotɔ wɔa nyui na eɖokui,

gake ŋutsu ŋutasẽla hea hiã vaa eɖokui dzii.

¹⁸Woxea fetu si me beble le la na ame vɔ̃ɖi,

ke ame si ƒã dzɔdzɔenyenye ƒe ku la axa nu geɖe.

¹⁹Ame si nye dzɔdzɔetɔ vavã la, akpɔ agbe,

ke ame si ti nu vɔ̃ɖi yome la yia eƒe ku me.

²⁰Yehowa tsri ame siwo ƒe dzi daa alakpa,

ke ame siwo fɔɖiɖi mele woƒe mɔwo ŋu o la ƒe nu nyoa eŋu.

²¹Maka ɖe esia dzi na mi be,

womagbe tohehe na ame vɔ̃ɖi la o,

ke woana ablɔɖe ame dzɔdzɔewo.

²²Abe ale si sikaŋɔtigɛ nɔa ha ƒe ŋɔtimee ene la,

nenema kee nye nyɔnu dzetugbe si meɖoa ŋu ɖo o.

²³Ame dzɔdzɔewo ƒe didiwo vaa eme na wo nyuie,

ke ame vɔ̃ɖiwo ƒe mɔkpɔkpɔ wua nu le dziku me.

²⁴Ame ɖeka naa nu faa

gake egakpɔa geɖe ɖe edzi,

ame bubu vea nu le nu si wòle be wòana la ŋu

gake ahe ko wòdana.

²⁵Nu adze dzi na ame si na nu faa,

ame si na amewo ƒe dzi dze eme la,

woana eya ŋutɔ hã ƒe dzi nadze eme.

²⁶Ame si tsɔ bli ɣla la amewo aƒo fi adee

gake yayra ava ame si lɔ̃ be yeadzra etɔ la dzi.

²⁷Ame si ti nyui yome la, amewo adi nyui nɛ

gake vɔ̃ vana na ame si le vɔ̃ dim.

²⁸Ame si tsɔ eƒe mɔkpɔkpɔ da ɖe eƒe kesinɔnuwo dzi la

adze anyi gake ame dzɔdzɔe awɔ mlɔmlɔmlɔ abe gbe dama ene.

²⁹Ame si he dzɔgbevɔ̃e va eƒe ƒome dzi la,

ya anye eƒe domenyinu

eye bometsila anye subɔla na nunyala.

³⁰Ame dzɔdzɔe ƒe kutsetse nye agbeti,

eye ame si ɖea luʋɔwo la, nunyalae.

³¹Ne ame dzɔdzɔewo xɔ wo tɔ gome le anyigba dzi la,

ekema aleke wòahanɔ na mawumavɔ̃lawo kple nu vɔ̃ wɔlawo!

¹Ame si lɔ̃ amehehe la lɔ̃a sidzedze,

ke ame si lé fu mokaname la, bometsilae.

²Yehowa vea ame nyui la nu,

ke ebua fɔ ayemenuwɔla ya.

³Womatsɔ vɔ̃ɖivɔ̃ɖi aɖo ame gɔme anyii o

gake womate ŋu aho ame dzɔdzɔe ya o.

⁴Srɔ̃nyɔnu zazɛ̃ nye fiakuku na srɔ̃ŋutsua,

ke srɔ̃nyɔnu ŋukpenanuwɔla nye ŋuɖui le ƒu tome na srɔ̃a.

⁵Ame dzɔdzɔe ƒe ɖoɖowo toa mɔ ɖeka,

ke ame vɔ̃ɖi ƒe aɖaŋuɖoɖo nye beble.

⁶Ame vɔ̃ɖiwo ƒe nyawo le lalam na ʋu

gake dzɔdzɔetɔwo ƒe nuƒoƒo ɖea wo.

⁷Wotutua ame vɔ̃ɖiwo ƒua anyi eye womeganɔa anyi o,

ke ame dzɔdzɔe ƒe aƒe lia ke ɖaa.

⁸Wokafua ame le nunya si le esi la ta,

ke wodoa vlo ŋutsu tagbɔ kuku tɔwo.

⁹Enyo be nànye ame tsɛ aɖe ko eye subɔla nanɔ asiwò,

wu be nàwɔ ɖokuiwò amegãe eye nuɖuɖu manɔ asiwò o.

¹⁰Ame dzɔdzɔe léa be na eƒe lãwo

ke dɔmenyo siwo ame vɔ̃ɖiwo ya wɔna la nye ŋutasesẽ.

¹¹Ame si ŋlɔ eƒe agble la akpɔ nuɖuɖu geɖe,

ke ame si kplɔa blezibledi ɖo la, numanyalae.

¹²Ame vɔ̃ɖiwo ƒe nu siwo woha la le ŋutasẽlawo dzrom,

ke ame dzɔdzɔewo ƒe ke ƒona ɖe to sesĩe.

¹³Ame vɔ̃ɖi ƒe nu vlo ƒoƒo zua mɔ ɖenɛ,

ke ame dzɔdzɔe dona le fu me.

¹⁴Ame ƒe nu ƒe kutsetse hea nu nyuiwo vɛ nɛ taŋtaŋtaŋ,

eye enye nyateƒe be dɔ si ame tsɔ eƒe asi wɔ lae hea viɖe vɛ nɛ.

¹⁵Bometsila ƒe mɔ dzɔna le eya ŋutɔ ƒe ŋkume,

ke ame dzɔdzɔe xɔa aɖaŋuɖoɖo.

¹⁶Bometsila ɖea eƒe dziku fiana zi ɖeka,

ke nunyala doa toku dzudzu.

¹⁷Ɖasefo nyateƒetɔ gblɔa nya si le eteƒe le ʋɔnu,

ke aʋatsoɖasefo daa alakpa le ʋɔnu.

¹⁸Nya vlowo ƒona ɖe ame abe yi ene,

ke ame dzɔdzɔe ƒe aɖe hea dɔyɔyɔ vɛ.

¹⁹Nyateƒenuyiwo nɔa anyi ɖikaa,

ke alakpaɖe nu mesena yina o.

²⁰Beble le ame siwo ɖoa nu vɔ̃ɖi la ƒe dzi me,

ke dzidzɔ nɔa ame siwo hea ŋutifafa vɛ la ƒe dzi me.

²¹Dzɔgbevɔ̃e medzɔna ɖe ame dzɔdzɔe dzi o,

ke ame vɔ̃ɖiwo la, xaxa yɔa wo me fũu.

²²Yehowa lé fu alakpanuyiwo,

ke ekpɔa dzidzɔ ɖe ame siwo toa nyateƒe la ŋu.

²³Nunyala mekɔa nu le sidzedze si su esi la dzi o,

ke bometsilawo ƒe dzi ɖea gbeƒã woƒe bometsitsi.

²⁴Asi si doa vevi nu la aɖu fia,

ke kuviawɔwɔ kplɔa ame ɖona ɖe dɔ sesẽ me.

²⁵Nuxaxa le dzi me tea ame ɖe anyi,

ke amenuvenya dea dzi ƒo na ame.

²⁶Ame dzɔdzɔe ɖoa ŋu ɖo le xɔlɔ̃wɔwɔ me,

ke ame vɔ̃ɖiwo ƒe mɔ kplɔa wo tranae.

²⁷Kuviatɔ memea eƒe adelã o,

ke nunyala léa be na eƒe nunɔamesiwo.

²⁸Agbe le dzɔdzɔenyenye ƒe mɔ me,

makumaku le mɔ ma dzi.

¹Vi nyanu ɖoa to fofoa ƒe amehehe,

ke fewuɖula metsɔa ɖeke le mokaname me o.

²Ame ƒe nu ƒe kutsetsee wòtsɔna ɖua nu nyuiwoe,

ke nuteƒemawɔlawo ƒe dzi tsi dzi ɖe nu vlo wɔwɔ ŋuti.

³Ame si dzɔa eƒe nuyiwo ŋuti la dzɔa eƒe agbe ŋuti,

ke ame si kea nu kabakaba la atsrɔ̃.

⁴Nu dzroa kuviatɔ vevie gake mekpɔa naneke o,

ke vevidonula ƒe didiwo vaa eme nɛ.

⁵Ame dzɔdzɔe léa fu alakpanya,

ke ame vɔ̃ɖiwo ya hea ŋukpe kple vlododo vɛ.

⁶Dzɔdzɔenyenye dzɔa ŋutsu fɔmaɖila ƒe agbe ŋuti,

ke vɔ̃ɖivɔ̃ɖi léa nu vɔ̃ wɔla ƒua anyi.

⁷Ame aɖe wɔna abe kesinɔtɔe wònye ene, evɔ naneke mele esi o,

ame bubu wɔa eɖokui ame dahee, evɔ kesinɔnu geɖe le esi.

⁸Ame ƒe kesinɔnuwo ate ŋu aƒle eƒe agbe ta

gake ame dahe mesea ŋɔdzidoname aɖeke o.

⁹Ame dzɔdzɔe ƒe kekeli klẽna nyuie,

ke wotsia ame vɔ̃ɖi ƒe akaɖi.

¹⁰Dzre sɔŋ ko dada hena vɛ,

ke nunya tsoa aƒe ɖe ame siwo sea aɖaŋu la gbɔ.

¹¹Ga si wokpɔ to mɔ fitifiti dzi la nu va yina,

ke ame si dia ga vivivi la wɔnɛ be wòdzina ɖe edzi.

¹²Mɔkpɔkpɔ si woɖe ɖa la nana dzi léa dɔ,

ke didi si va eme la nye agbeti.

¹³Ame si doa vlo amehehe la xɔa eŋufetu,

ke ame si ɖoa to sedede la xɔa eteƒeɖoɖo.

¹⁴Nunyala ƒe nufiafia nye agbevudo,

eye wòɖea ame tso ku ƒe mɔkawo me.

¹⁵Gɔmesese nyui hea amenuveve vanɛ,

ke nuteƒemawɔlawo ƒe mɔ dzi sesẽna.

¹⁶Nunyala ɖe sia ɖe wɔa nu kple gɔmesese,

ke bometsila ɖea eƒe bometsitsi fiana.

¹⁷Dɔtsɔla vɔ̃ɖi gena ɖe dzɔgbevɔ̃e me,

ke dɔtsɔla si wɔa nuteƒe la hea dɔyɔyɔ vanɛ.

¹⁸Ame si do toku amehehe la,

ahedada kple ŋukpe vaa edzi,

ke wodea bubu ame si lɔ̃a mokaname ŋuti.

¹⁹Didi si vaa eme la vivina na luʋɔ,

ke vɔ̃tsitsri nye ŋunyɔ na bometsilawo.

²⁰Ame si zɔna kple nunyala la, dzea nunya,

ke ame si dzea xɔ̃ bometsilawo la

gena ɖe fuwɔame me.

²¹Dzɔgbevɔ̃e tia vɔ̃wɔla yome

gake dzɔgbenyui nye ame dzɔdzɔe ƒe fetu.

²²Ame nyui gblẽa domenyinu ɖi na via ƒe viwo,

ke woɖoa ame vɔ̃ɖi ƒe kesinɔnuwo ɖi na ame dzɔdzɔewo.

²³Ame dahe ƒe agble wɔa nuku geɖe,

ke amebaba kplɔnɛ dzonae.

²⁴Ame si vea nu le ameƒoti gbɔ la léa fu via,

ke ame si lɔ̃a via la kpɔa egbɔ be yehee nyuie.

²⁵Ame dzɔdzɔe ɖua nu ɖia ƒo,

ke dɔ wua ame vɔ̃ɖi ya.

¹Nyɔnu nyanu tua eya ŋutɔ ƒe xɔ,

ke nyɔnu bometsila ya tsɔa eya ŋutɔ

ƒe asi vuvua xɔ si wòtu la kɔna ɖe anyi.

²Ame si ƒe zɔzɔme ŋu fɔɖiɖi mele o la vɔ̃a Yehowa,

ke ame siwo ƒe mɔ le gɔdɔ̃gɔdɔ̃ la doa vloe.

³Bometsila ƒe nuƒo nana ameƒoti dzea eƒe dzimegbe,

ke nunyala ƒe nuyi kpɔa eta.

⁴Ne nyiwo meli o la, nyikpo me ɖia gbɔlo,

ke woxaa nuku geɖe to nyitsu ƒe ŋusẽ me.

⁵Ɖasefo nyateƒetɔ meblea ame o,

ke aʋatsoɖasefo ya trɔa alakpa kɔna ɖi glẽglẽglẽ.

⁶Fewuɖula dia nunya gake mekpɔa ɖeke o,

ke gɔmesese vana na ame si si sidzedze le la bɔbɔe.

⁷Te ɖa le bometsila gbɔ

elabena màkpɔ gɔmesese le eƒe nu me o.

⁸Ayedzelawo ƒe nunyae nye be woabu ta me le woƒe mɔwo ŋu,

ke bometsilawo ƒe bometsitsie nye alakpa.

⁹Bometsilawo le alɔme ɖem le nuvɔ̃ŋutivɔsa ŋuti,

ke ŋudzedzekpɔkpɔ le dzɔdzɔetɔwo dome.

¹⁰Dzi ɖe sia ɖe nya eya ŋutɔ ƒe vevesese

eye ame aɖeke hã mate ŋu ama eƒe dzidzɔ kplii o.

¹¹Woatsrɔ̃ ame vɔ̃ɖiwo ƒe aƒe,

ke ame dzɔdzɔewo ƒe agbadɔ anɔ anyi ɖaa.

¹²Mɔ aɖe li, si le dzɔdzɔe le ame ƒe ŋkume,

ke le nuwuwua la, ekplɔa ame yia ku mee.

¹³Le nukoko gɔ̃ hã me la,

dzi ase veve eye dzidzɔkpɔkpɔ awu nu le nuxaxa me.

¹⁴Woaxe fe na tosẽlawo le woƒe mɔwo ta

eye nenema ke ame nyui hã axɔ eƒe fetu.

¹⁵Susu wodzoetɔ xɔa nya sia nya dzi sena,

ke nunyala dea ŋugble le eƒe afɔɖeɖewo ŋuti.

¹⁶Nunyala léa fu vɔ̃ eye wòvɔa Yehowa,

ke bometsila doa dziku kabakaba eye wòwɔa nu dzimagbɔɖitɔe.

¹⁷Ame si doa dɔmedzoe kabakaba la wɔa bometsinuwo

eye wòléa fu ayedzela.

¹⁸Susu wodzoetɔwo ƒe domenyinue nye bometsitsi,

ke wotsɔa sidzedze ɖɔna na nunyalawo.

¹⁹Ame vɔ̃ɖiwo adze klo ɖe ame nyuiwo ŋkume

eye nenema ke nu tovo wɔlawo awɔ le ame dzɔdzɔewo ƒe agbonu.

²⁰Ame dahewo ƒe aƒelikawo ke hã ƒoa asa na wo,

ke xɔlɔ̃ geɖe nɔa kesinɔtɔwo si.

²¹Ame si do vlo ehavi la wɔ nu vɔ̃,

ke woayra ame si nyo dɔ me na hiãtɔ.

²²Ame siwo ɖoa nu vɔ̃ɖi la traa mɔ

ke ame siwo wɔa ɖoɖo ɖe nu nyui wɔwɔ ŋu la xɔa lɔlɔ̃

kple nuteƒewɔwɔ ƒe teƒeɖoɖo.

²³Kutrikuku ɖe dɔwɔna ŋu hea viɖe vɛ,

ke nukpoloeƒoƒo ɖeɖe hea ame yia ahedada mee.

²⁴Nunyalawo ƒe kesinɔnue nye woƒe fiakuku,

gake bometsilawo ƒe bometsinuwɔwɔ hea bometsitsi vanɛ.

²⁵Ɖasefo nyateƒetɔ ɖea ame geɖewo ƒe agbe,

ke aʋatsoɖasefo nye ameblela.

²⁶Ame si vɔ̃a Yehowa la,

mɔ sesẽ aɖe le esi eye wòanye bebeƒe na viawo.

²⁷Yehowa vɔvɔ̃e nye agbe ƒe vudo

eye wòɖea ame tso ku ƒe mɔkawo me.

²⁸Ame xexlẽme gbogbo nye fia ƒe ŋutikɔkɔe,

ke ne amewo mele du aɖe me o la,

gbegblẽ vaa dumegã dzi.

²⁹Sidzedze gã aɖe sua ŋutsu dzigbɔɖitɔ si,

ke ŋutsu si doa dziku kabakaba la,

ɖea eƒe bometsitsi fiana.

³⁰Dzi si me ŋutifafa le la nana agbe ŋutilã

gake ŋubiã nana ƒuwo ƒaƒãna.

³¹Ame si tea ame dahewo ɖe anyi la doa vlo wo Wɔla,

ke ame si nyoa dɔ me na hiãtɔ la dea bubu Mawu ŋuti.

³²Ne dzɔgbevɔ̃e dzɔ la, ame vɔ̃ɖiwo yia to,

ke le ku me ke hã la, ame dzɔdzɔewo kpɔa sitsoƒe.

³³Ame si si sidzedze su la, nunya tsoa aƒe ɖe eƒe dzi me,

eye le bometsilawo dome gɔ̃ hã la, enana wodzea si ame si ƒomevi wònye.

³⁴Dzɔdzɔenyenye doa dukɔ ɖe dzi,

ke nu vɔ̃ nye ŋukpe na dukɔmeviwo.

³⁵Dɔla nyanu ƒe nu nyoa fia ŋu,

ke eƒe dɔmedzoe vaa dɔla ŋukpenanuwɔla dzi.

¹Nyaŋuɖoɖo kple gbe bɔbɔe tsia dziku nu,

ke nyagbɔgblɔ kple gbedaɖeame nana dɔmedzoe flana.

²Nunyalawo ƒe aɖe ɖea gɔmesese fiana,

gake bometsinyawo dona tso bometsila nu glẽglẽglẽ.

³Yehowa ƒe ŋkuwo le afi sia afi

eye eƒe ŋkuwo le ame vɔ̃ɖiwo

kple ame nyuiwo siaa ŋu.

⁴Aɖe si hea dɔyɔyɔ vɛ la nye agbeti,

ke alakpaɖe gbãa gbɔgbɔ gudugudugudu.

⁵Bometsila doa vlo fofoa ƒe amehehe,

ke ame si xɔa ɖɔɖɔɖo la, nunyalae.

⁶Kesinɔnu gã aɖe nɔa aƒe me na nunyala,

ke ame vɔ̃ɖiwo ƒe hokpɔkpɔ hea dzɔgbevɔ̃e vɛ na wo.

⁷Nunyalawo ƒe nuyiwo kakaa sidzedze,

ke mele alea le bometsilawo ƒe dzi me o.

⁸Yehowa léa fu ame vɔ̃ɖiwo ƒe vɔsa,

ke dzɔdzɔetɔwo ƒe gbedodoɖa dzea eŋu.

⁹Yehowa léa fu ame vɔ̃ɖiwo ƒe mɔ,

ke elɔ̃a ame siwo tia dzɔdzɔenyenye yome la ƒe mɔ.

¹⁰Tohehe sesẽ le ame si tra le mɔ dzi la lalam

eye ame si lé fu ɖɔɖɔɖo la aku.

¹¹Ku kple tsiẽƒe le nuvo le Yehowa ŋkume,

kaka wòahanye amegbetɔwo ƒe dzi!

¹²Fewuɖula tsri nyagbename

eya ta mabia aɖaŋu le nunyalawo gbɔ o.

¹³Dzi si me dzidzɔ le la nana mo klẽna,

gake dzi si le veve sem la gbãa gbɔgbɔ gudugudugudu.

¹⁴Dzi si si sidzedze su la dia gɔmesese

gake bometsitsi zua nuɖuɖu na bometsila ƒe nu.

¹⁵Ame siwo wole fu wɔmii la ƒe ŋkekewo katã nye vɔ̃

gake dzi si me dzidzɔ le la tua aglo atraɖii.

¹⁶Nu sue si ŋu Yehowavɔvɔ̃ kpe ɖo la nyo wu

kesinɔnu geɖe si ŋu dzimaɖeɖi le.

¹⁷Amagbenuɖuɖu si ŋu lɔlɔ̃ kpe ɖo la nyo wu

nyivi dami ɖuɖu si ŋu fuléle kpe ɖo.

¹⁸Dɔmedzoetɔ hea mama vɛ,

ke dzigbɔɖitɔ tsia dzre nu.

¹⁹Ŋuwo le kuviatɔ ƒe mɔ dzi,

ke dzɔdzɔetɔ ƒe mɔ nye mɔtata.

²⁰Viŋutsu nunyala hea dzidzɔ vɛ na fofoa,

ke bometsila doa vlo dadaa.

²¹Bometsinuwɔwɔ doa dzidzɔ na ame manyanu,

ke nugɔmesela léa mɔ ɖeka tsɔna.

²²Ɖoɖowo me gblẽna ne aɖaŋudede meli o,

ke ne aɖaŋuɖolawo li fũu la, wokpɔa dzidzedze.

²³Nyaŋuɖoɖo ɖe nunya me doa dzidzɔ na ame

eye aleke nya si wogblɔ le egblɔɣi la mehenyoe o?

²⁴Nunyalawo ƒe agbemɔ ɖo ta dzi,

be wòakpe ɖe eŋu magaɖiɖi ayi ɖe tsiẽƒe o.

²⁵Yehowa gbãa dadalawo ƒe aƒe ƒua anyi,

ke enana ahosiwo ƒe liƒo nɔa anyi pɛpɛpɛ.

²⁶Yehowa léa fu ame vɔ̃ɖiwo ƒe tameɖoɖo,

ke ame siwo dza la tɔ ya doa dzidzɔ nɛ.

²⁷Ŋuklẽla hea fukpekpe vaa eƒe aƒe dzi,

ke ame si lé fu zãnuxɔxɔ la anɔ agbe.

²⁸Ame dzɔdzɔe ƒe dzi daa eƒe nyaŋuɖoɖowo kpɔ,

ke nu vɔ̃ɖi doa go tso ame vɔ̃ɖiwo ƒe nu me bababa.

²⁹Yehowa le adzɔge na ame vɔ̃ɖiwo,

ke esea ame dzɔdzɔewo ƒe gbedodoɖa.

³⁰Mo si kɔ la doa dzidzɔ na dzi,

eye nya nyui dea agbe ƒuwo me.

³¹Ame si ɖoa to mokaname si hea agbe vɛ la,

ƒe dzi adze eme le nunyalawo dome.

³²Ame si doa toku amehehe la, doa vlo eɖokui,

ke ame si xɔa mokaname la gɔmesese sua esi.

³³Yehowavɔvɔ̃ fiaa nunya ame

eye ɖokuibɔbɔ doa ŋgɔ na bubu.

¹Amegbetɔ tɔe nye dzi ƒe nuɖoɖowo,

ke nyaŋuɖoɖo na aɖe tsoa Yehowa gbɔ.

²Fɔɖiɖi menɔa ame ŋutɔ ƒe mɔwo ŋu le eya ŋutɔ ƒe ŋkume o,

ke Yehowa daa susuwo kpɔ.

³Tsɔ nu sia nu si nèwɔna la de Yehowa ƒe asi me,

ekema wò ɖoɖowo adze edzi na wò.

⁴Yehowa wɔ nu sia nu le eƒe ŋudɔwɔnu ta,

eɖo ame vɔ̃ɖi la gɔ̃ hã ɖi hena dzɔgbevɔ̃eŋkeke la.

⁵Dadalawo katã nye ŋunyɔnu na Yehowa.

Maka ɖe edzi na wò be,

womagbe tohehe na wo o.

⁶Woɖea nu vɔ̃ ɖa to lɔlɔ̃ kple nuteƒewɔwɔ me

eye ame ƒoa asa na nu vɔ̃ɖi to Yehowavɔvɔ̃ me.

⁷Ne ame aɖe ƒe mɔwo nyo Yehowa ŋu la,

enana eƒe futɔwo gɔ̃ hã nɔa anyi kplii le ŋutifafa me.

⁸Nu sue si ŋu dzɔdzɔenyenye kpe ɖo la nyo wu

nu geɖe si ŋu madzɔmadzɔ kpe ɖo.

⁹Ame wɔa ɖoɖo ɖe ale si wòazɔe ŋu le eƒe dzi me,

gake Yehowae fiaa ale si wòaɖe afɔe.

¹⁰Fia ƒe nuyiwo ƒoa nu abe nya gblɔm wòle ɖi ene

eya ta eƒe nu megatso afia gbegblẽ o.

¹¹Nudakpe kple nudanu vavãwo tso Yehowa gbɔ

eye nenema ke nudakpe siwo katã

le akplo me hã nye eƒe nuwɔwɔ.

¹²Nu tovo wɔwɔ nye ŋunyɔnu na fiawo

elabena woɖoa fiazikpui anyi ɖe dzɔdzɔenyenye dzi.

¹³Nuyi siwo dzi alakpa mele o la,

doa dzidzɔ na fiawo,

wodea asixɔxɔ ame si toa nyateƒe la ŋu.

¹⁴Fia ƒe dziku nye ku ƒe dɔla,

ke nunyala alé avui.

¹⁵Ne fia ɖo mo kɔkɔe la,

egɔmee nye agbe

eye eƒe amenuveve le abe tsiɖoɖo le adame ene.

¹⁶Aleke nunyaxɔxɔ mehenyo wu sikae o,

eye gɔmesesetiatia mehenyo wu klosaloe o!

¹⁷Ame dzɔdzɔewo ƒe mɔtata ƒoa asa na nu vɔ̃ɖi

eye ame si dzɔa eƒe mɔ ŋu la dzɔa eƒe agbe ŋuti.

¹⁸Dada doa ŋgɔ na gbegblẽ

eye ɖokuidodoɖedzi doa ŋgɔ na anyidzedze.

¹⁹Enyo be woabɔbɔ ame ɖokui ɖe anyi

le hiãtɔwo dome wu be woama afunyinuwo kple dadalawo.

²⁰Nu dzea edzi na ame si ɖoa to nufiame

eye woayra ame si tsɔ eƒe mɔkpɔkpɔ da ɖe Yehowa dzi.

²¹Woyɔa ame siwo nunya le woƒe dzi me la be sidzelawo,

eye nya vivi doa nufiame ɖe ŋgɔ.

²²Gɔmesese nye agbetsidzidzi na ame siwo ke ɖe eŋuti,

ke bometsitsi hea tohehe vɛ na bometsilawo.

²³Nunyala ƒe dzi dzɔa eƒe nu ŋuti

eye eƒe nuyiwo doa nufiame ɖe ŋgɔ.

²⁴Nya nyuiwo nye anyitsito,

enana luʋɔ sea vivi, eye wòhea dɔyɔyɔ vɛ na ƒuwo.

²⁵Mɔ aɖe li si le dzɔdzɔe le ame ƒe ŋkume,

ke le nuwuwua la, ekplɔa ame yia ku mee.

²⁶Agbatedɔwɔla ƒe nudzodzro wɔa dɔ nɛ,

dɔwuame doa ŋusẽe be wòayi edzi.

²⁷Yakame le nu vɔ̃ɖi ɖom

eye eƒe nuƒoƒo le abe dzo si le bibim sesĩe la ene.

²⁸Ame vɔ̃ɖi dea dzre aƒe

eye amenyagblɔla maa xɔlɔ̃ veviwo dome.

²⁹Ame dzeaglã blea eƒe aƒelika nu,

eye wòkplɔnɛ toa mɔ gɔglɔ̃ dzi.

³⁰Ame si le ŋku trom la le nu vɔ̃ɖi aɖe ɖom,

eye ame si mia eƒe nu ɖe nu dzi la awɔ vɔ̃ godoo.

³¹Ta si ƒo wɔ la nye atsyɔ̃fiakuku,

agbe dzɔdzɔe nɔnɔe henɛ vɛ.

³²Enyo be nànye ŋutsu dzigbɔɖitɔ wu kalẽtɔ,

ame si ɖu eƒe dziku dzi la nyo wu ame si xɔ du.

³³Wolɔa hotsui ɖe akɔ hetsɔna kaa nui,

ke nyametsotso ɖe sia ɖe tso Yehowa gbɔ.

¹Abolo ƒuƒlu sue ɖuɖu si ŋu ŋutifafa kple dziɖeɖi kpe ɖo la nyo wu

aƒe si me yɔ fũu kple agbeɖuɖu

eye dzre kpe ɖe eŋu.

²Dɔla nyanu aɖu aƒetɔ ɖe viŋutsu ŋukpenanuwɔla dzi

eye ama domenyinu la kpli wo abe wo nɔviŋutsu wònye ene.

³Sonu li na klosalo eye dzokpo li na sika,

ke Yehowae doa dziwo katã kpɔ.

⁴Ame vɔ̃ɖi ɖoa to nuyi vɔ̃ɖiwo

eye aʋatsotɔ ƒua to anyi ɖe aɖe si gblẽa ame ŋu la ŋu.

⁵Ame si ɖea alɔme le ame dahe ŋuti la doa vlo woƒe Wɔla

eye ame si kpɔa dzidzɔ be dzɔgbevɔ̃e dzɔ la,

womagbe tohehe nɛ o.

⁶Ame si ku amegã la ƒe fiakukue nye viawo ƒe viwo

eye dzilawo nye atsyɔ̃ na wo viwo.

⁷Nuyi siwo doa wo ɖokuiwo ɖe dzi la medzena bometsila

kaka alakpanuyiwo nahayi dziɖula dze ge o!

⁸Zãnu nye kpe xɔasi na ame si nae,

afi sia afi si wòayi la, edzea dzi nɛ.

⁹Ame si tsɔ nu tsyɔ vodada dzi la doa lɔlɔ̃ ɖe ŋgɔ

eye ame si gawɔ nu si wòwɔ va yi la maa xɔlɔ̃ veviwo dome.

¹⁰Mokaname dea ta me na ame si si sidzedze le

wu nu si ƒoƒo alafa ɖeka nye na bometsila.

¹¹Ame vɔ̃ɖi la ɖoe kplikpaa be yeadze aglã

eya ta woadɔ dumegã sẽŋuta ɖe eŋu.

¹²Enyo be nàdo go sisiblisi si ŋu woɖe viwo le wu

esi nàdo go bometsila le eƒe bometsitsi me.

¹³Ne ŋutsu tsɔ vɔ̃ ɖo nyui teƒe la,

vɔ̃ madzo ɖa le eƒe aƒe me kpɔ gbeɖe o.

¹⁴Dzregɔmetoto le abe ale si woŋɔa tɔʋu ene;

eya ta ɖe asi le nya ŋu hafi wòava zu dzre.

¹⁵Afiatsotso na agɔdzela,

kple fɔbubu agɔmadzela siaa nye nu si Yehowa tsri.

¹⁶Ŋudɔwɔnu ka ga nye le bometsila ƒe asi me,

esi didi aɖeke mele eme ɖe nunyadidi ŋuti o?

¹⁷Xɔlɔ̃ lɔ̃a ame ɣeawo katã ɣi,

ke wodzi nɔviŋutsu hena hiãgbe.

¹⁸Ame manyanu ƒua asi akɔ

eye wòdoa ŋugbe tsɔa eɖokui daa megbee na ehavi si nyi fe.

¹⁹Ame si lɔ̃ dzrewɔwɔ la lɔ̃a nu vɔ̃

eye ame si de agbo kɔkɔ eƒe aƒe nu la le gbegblẽ dim.

²⁰Ame si si dzi dovo le la nu medzea edzi nɛ o

eye ame si si alakpaɖe le la gena ɖe fukpekpe me.

²¹Viŋutsu si tsi bome la hea veve vɛ,

eye fofo si, si vi tsibome le la makpɔ dzidzɔ o.

²²Dzi si kpɔa dzidzɔ la nye atike nyui,

ke gbɔgbɔ si wote ɖe to la nana ƒu tome ƒuna kplakplakpla.

²³Ame vɔ̃ɖi xɔa zãnu le bebeme be

wòatrɔ nya dzɔdzɔe atsyɔ anyi.

²⁴Ame si si sidzedze le la ƒe ŋku nɔa nunya ŋu,

ke bometsila ƒe ŋkuwo tsana,

dona ɖe anyigba ƒe mlɔenu ke.

²⁵Viŋutsu tsibome hea nuxaxa vɛ na fofoa

kple veve vɛ na ame si dzii.

²⁶Menyo be woahe to na fɔmaɖila

alo aƒo dɔnunɔla ɖe eƒe nuteƒewɔwɔ ta o.

²⁷Ame si si sidzedze su la nya vlowo medona le enu o

eye ame si si gɔmesese le la ɖɔa ŋu ɖo,

medoa dziku dzodzro o.

²⁸Wobua bometsila gɔ̃ hã nunyalae nenye be ezi ɖoɖoe,

eye wobunɛ sidzelae ne ekpɔ eƒe aɖe dzi nyuie.

¹Ɖokuitɔdila dia eɖokui ko tɔ

eye meɖoa to nunyanya siwo gblɔm wole la o.

²Bometsila medoa vivi ɖe gɔmesese ŋu o,

ke boŋ ekpɔa dzidzɔ le eya ŋutɔ ƒe susuɖegblɔ ŋu.

³Ne vɔ̃ɖivɔ̃ɖi va la, vlododo kplɔnɛ ɖo

eye ne alɔmeɖeɖe va la, ŋukpe dzea eyome.

⁴Ame ƒe numenyawo nye tɔ goglo,

ke nunya ƒe vudo nye ta si le dzidzim.

⁵Menyo be woade ame vɔ̃ɖi dzi

alo atrɔ ame maɖifɔ ƒe nya dzɔdzɔe atsyɔ anyi o.

⁶Bometsila ƒe nuyiwo denɛ dzre me

eye eƒe nu hea ƒoƒo vaa edzii.

⁷Nu si bometsila ƒe nu gblɔ la,

metso eya ŋutɔ gbɔ o, eye eƒe nuyi nye mɔka na eƒe luʋɔ.

⁸Amenyagblɔla ƒe nyawo vivina

abe nuɖuɖu vivi si woka de nu me la ene;

woyina ɖe ame ƒe dɔgbowo me ke.

⁹Ame si wɔa alɔgblɔdɔ le eƒe dɔ

ŋuti la nye nugblẽla nɔvi.

¹⁰Yehowa ƒe ŋkɔ nye mɔ sesẽ,

ame dzɔdzɔewo sina yia eme eye wonɔa dedie.

¹¹Kesinɔtɔwo ƒe kesinɔnuwo nye woƒe du sesẽ

eye wobuna be wonye gli kɔkɔ si ame aɖeke mate ŋu aflɔ o.

¹²Hafi ame aɖe nadze anyi la,

dada nɔa eƒe dzi me,

ke ɖokuibɔbɔ doa ŋgɔ na bubu.

¹³Enye bometsitsi kple ŋukpe na ame,

be wòaɖo nya ŋu hafi ase nu si gblɔm wole.

¹⁴Ame ƒe gbɔgbɔ lénɛ ɖe te le dɔléle me,

ke ame ka ate ŋu atsɔ gbɔgbɔ si gbã gudugudu?

¹⁵Sidzela ƒe dzi kpɔa gɔmesese

eye nunyala ƒe to dia gɔmesese.

¹⁶Nunana ʋua mɔ na nunala

eye wòkplɔnɛ gena ɖe amegã la ƒe ŋkumee.

¹⁷Ame gbãtɔ si to eƒe nya la dzena dzɔdzɔetɔe

va se ɖe esime ame aɖe va bia gbee.

¹⁸Nudzidze tsia dzre nu

eye wòtsoa nya me na ame sesẽ siwo le dzre wɔm.

¹⁹Nɔviŋutsu si dzi wodze agɔ le la sẽ wu du si ŋu woɖo gli sesẽ ɖo

eye dzrewɔwɔ le abe fiasã si ƒe agbowo ŋu wode gameti sesẽwoe ene.

²⁰Ame ƒe numekutsetse ɖia ƒo nɛ

eye nuŋeŋe si doa go tso eƒe nuyiwo me la ana eƒe dzi nadze eme.

²¹Ku kple agbe ƒe ŋusẽ le aɖe si,

eye ame siwo lɔ̃e la aɖu eƒe kutsetse.

²²Ame si si srɔ̃nyɔnu su la ke ɖe nu nyui ŋu

eye wòxɔa amenuveve tso Yehowa gbɔ.

²³Ame dahe ɖea kuku biaa nublanuikpɔkpɔ,

ke kesinɔtɔ ya ɖoa nya ŋu adãtɔe.

²⁴Ame si si xɔlɔ̃ geɖe le la ate ŋu awu nu le gbegblẽ me,

gake xɔlɔ̃ aɖe li si kuna ɖe ame ŋu wu dadavi gɔ̃ hã.

¹Anyo be nànye ame dahe si ƒe zɔzɔme ŋu fɔɖiɖi mele o,

wu bometsila si ƒe nuyiwo gblɔa nya tovo.

²Menyo be dzo nanɔ mewò ɖe nuwo wɔwɔ ŋu gɔmesesemanɔmee

alo atsi dzi ahabu mɔ o.

³Ame ŋutɔ ƒe bometsitsie gblẽa eƒe agbe dome,

evɔ eƒe dzi bina ɖe Yehowa ŋu.

⁴Kesinɔnunɔamesi dzea xɔlɔ̃ geɖe na ame,

gake ame dahe ƒe xɔlɔ̃wo kakana le eŋu.

⁵Womagbe tohehe na aʋatsoɖasefo o

eye ame si trɔa alakpa kɔna ɖi bababa la,

madzo le ablɔɖe me o.

⁶Ame geɖewo wɔa nu be woadze fia ŋu,

eye ame si naa nu ame faa la, ame sia ame dzea xɔ̃e.

⁷Ame dahe ƒe ƒometɔwo katã ɖea kɔ ɖa le eŋu,

aleke exɔlɔ̃wo magbee geɖe wu o!

Togbɔ be etia wo yome nɔa kuku ɖem na wo hã la,

womedea nu eme nɛ o.

⁸Ame si, si nunya su la lɔ̃a eya ŋutɔ ƒe luʋɔ

eye ame si melɔ̃a nu le gɔmesese gbɔ o la,

nu dzea edzi nɛ.

⁹Womagbe tohehe na aʋatsoɖasefo o

eye ame si trɔa alakpa kɔna ɖi bababa la atsrɔ̃.

¹⁰Agbe vivi nɔnɔ medze bometsila ʋuu keke

wòahanye be kluvi ɖu aƒetɔ ɖe dumegãwo dzi o.

¹¹Ame ƒe nunya nana wògbɔa dzi ɖi

eye ŋutikɔkɔe wònye nɛ ne eŋe aɖaba ƒu dzidada dzi.

¹²Fia ƒe dziku le abe dzata ƒe gbetete ene,

ke eƒe amenuveve le abe zãmu le gbedzi ene.

¹³Viŋutsu tsibome nye fofoa ƒe gbegblẽ

eye srɔ̃nyɔnu dzrewɔla le abe tsitrɔnu si le ɖuɖum ɖaa ene.

¹⁴Aƒewo kple kesinɔnuwo nye domenyinu tso dzilawo gbɔ,

ke srɔ̃nyɔnu nyanu ya,

Yehowa gbɔe wòtsona.

¹⁵Kuvia nana ame dɔa alɔ̃ yia eme ʋĩi

eye dɔ wua ƒomewɔla.

¹⁶Ame si wɔna ɖe sedede dzi la dzɔa eƒe agbe ŋu,

ke ame si metsɔ ɖeke le eƒe mɔwo ŋu o la aku.

¹⁷Ame si nyo dɔ me na hiãtɔ la,

do nugbana na Yehowa, aɖo nu si wòwɔ la teƒe nɛ.

¹⁸He to na viwò ŋutsuvi elabena eya mee mɔkpɔkpɔ le;

ke mègakpe ɖe ame siwo le eƒe ku dim la ŋuti o.

¹⁹Ame si dzi kuna helĩhelĩ la,

axe eŋutife; ne èɖee le eme la, agawɔe ake.

²⁰Ɖo to aɖaŋuɖoɖo,

nàxɔ amehehe eye le nuwuwua la, àdze nunya.

²¹Nu geɖewo ame ɖo ɖe eƒe dzi me,

gake Yehowa ƒe ɖoɖo koe vaa eme.

²²Nu si ame dina lae nye lɔlɔ̃ si meʋãna o;

enyo be nànye ame dahe wu alakpatɔ.

²³Yehowavɔvɔ̃ kplɔa ame yia agbe gbɔe.

Ekema ànɔ anyi aɖe dzi ɖi

eye kuxi aɖeke maƒo go wò o.

²⁴Ne kuviatɔ de asi nuɖugba me la,

maɖee ɖa atsɔ yi nu gbɔe teti gɔ̃ hã o!

²⁵Ƒo fewuɖula kple ati,

ekema gegemewo adze nunya;

ka mo na ame si si sidzedze le, ekema gɔmesese asu esi.

²⁶Ame si daa adzo fofoa,

nyaa dada doa goe lae nye viŋutsu si hea ŋukpe

kple vlododo vɛ.

²⁷Vinye, ne èdzudzɔ amehenyawo sese la,

ekema àtra tso gɔmesese ƒe nyawo gbɔ.

²⁸Aʋatsoɖasefo ɖua fewu le afia nyui tsotso ŋu

eye ame vɔ̃ɖi ƒe nu miaa nu vɔ̃ɖi.

²⁹Woɖo tohehe ɖi na fewuɖulawo

eye woɖo ƒoƒo ɖi na bometsilawo ƒe dzime.

¹Wain nye fewuɖula eye aha muame nye avuwɔla,

ame si wokplɔ trae la menya nu o.

²Fia ƒe dziku doa vɔvɔ̃ abe dzata ƒe gbetete ene

ame si do dziku nɛ la bua eƒe agbe.

³Bubu wònye na ŋutsu ne eƒo asa na dzre

gake bometsila ɖe sia ɖe wɔa dzre kabakaba.

⁴Kuviatɔ meŋlɔa agble le agbledeɣi o,

eya ta edia nu le nuŋeɣi doa kpoe.

⁵Ŋutsu ƒe tameɖoɖowo nye tɔ goglo,

gake ame si si nugɔmesese su la akui wòavɔ.

⁶Ŋutsu geɖewo gblɔna be lɔlɔ̃ matrɔ le yewo si

gake ame ka ate ŋu akpɔ ŋutsu nuteƒewɔla?

⁷Ame dzɔdzɔe nɔa agbe si ŋu kpɔtsɔtsɔ mele o;

yayra anɔ viawo dzi emegbe gɔ̃ hã.

⁸Ne fia nɔ anyi ɖe eƒe fiazikpui dzi be yeadrɔ̃ ʋɔnu la,

eɖe vɔ̃wo katã ɖa kple eƒe ŋkuwo.

⁹Ame ka ate ŋu agblɔ bena,

“Mewɔ nye dzi dzadzɛe,

ŋutinye kɔ eye vɔ̃ mele ŋutinye o?”

¹⁰Yehowa lé fu nudakpe vovovo eve

kple nudzidzenu vovovo eve siaa.

¹¹Wonyaa ɖevi gɔ̃ hã to eƒe nuwɔna me,

ne ele agbe dzadzɛ eye eƒe nuwɔnawo le eteƒe.

¹²Yehowa wɔ to si sea nu

kple ŋku si kpɔa nu la siaa.

¹³Mègalɔ̃ alɔ̃ tsu dɔdɔ o, ne menye nenema o la,

àva zu hiãtɔ, nɔ ŋu ekema àɖu nu wòasusɔ.

¹⁴Nuƒlela gblɔna be,

“Menyo o, menyo o,”

emegbe la, eyina ɖanɔa adegbe ƒom be yeƒle nu ɖiɖi.

¹⁵Sika li, adzagba hã li fũu

gake nuyi siwo gblɔa nunyanya la, kpe xɔasi veviwo wonye.

¹⁶Xɔ avɔ le ame si da megbe na amedzro la si,

tsɔe ɖo awɔbae ne eda megbe na nyɔnu gbolowɔla.

¹⁷Nuɖuɖu si wokpɔ to amefuflu me la vivina na ŋutsu,

gake le nuwuwu la, eƒe nu me yɔna kple kpekui sɔŋ.

¹⁸Wɔ ɖoɖo to aɖaŋuxɔxɔ me,

ne èle aʋa wɔm la, bia mɔfiame.

¹⁹Amenyagblɔla ʋua go nya ɣaɣla

eya ta ƒo asa na ŋutsu nukpoloeƒola.

²⁰Ne ŋutsu do ɖiŋu na fofoa alo dadaa la,

woatsi eƒe akaɖi ne ele viviti tsiɖitsiɖi me.

²¹Domenyinu si wokpɔ to mɔ kpui dzi le gɔmedzedzea me la,

yayra manɔ edzi le nuwuwua o.

²²Mègagblɔ be,

“Maɖo vɔ̃ si nèwɔ ɖe ŋunye la teƒe na wò” o!

Kpɔ Yehowa ƒe asinu ekema aɖe wò.

²³Yehowa lé fu nudakpe ƒomevi vovovowo

eye nudanu amebatɔ hã menyoa Yehowa ŋu o.

²⁴Yehowa fiaa afɔɖeɖe ame,

ke aleke ame aɖe awɔ ase eya ŋutɔ ƒe mɔwo gɔme?

²⁵Mɔ wònye na ame ne ekɔ nane ŋu tamemabumabutɔe

eye emegbe hafi wòva bu adzɔgbe si wòɖe la ŋuti.

²⁶Fia nyanu gbɔa ame vɔ̃ɖiwo

eye wòzɔa wo dzi kple luƒotasiaɖam.

²⁷Yehowa ƒe akaɖi kpɔa ame ƒe gbɔgbɔ me

eye wòdzroa eƒe ememe ke kpɔ.

²⁸Lɔlɔ̃ kple nuteƒewɔwɔ nana fia nɔa dedinɔnɔ me

eye to lɔlɔ̃ me eƒe fiazikpui lia ke.

²⁹Ɖekakpuiwo ƒe ŋusẽe nye woƒe ŋutikɔkɔe

eye ta ƒowɔ nye ame tsitsiwo ƒe atsyɔ̃.

³⁰Kɔ kple abixɔxɔ ɖea vɔ̃ ɖa

eye ƒoƒo klɔa ame ƒe ememe ke.

¹Fia la ƒe dzi le Yehowa ƒe asi me;

efiaa mɔe wòtoa afi sia afi si wòlɔ̃ la

abe ale si woɖea toƒe na tsi si si tso tsidzɔtsoƒe ene.

²Ŋutsu ƒe mɔwo katã dzea eŋu

gake Yehowae daa dziwo kpɔ.

³Nu dzɔdzɔe kple nu si

le eteƒe wɔwɔ doa dzidzɔ na Yehowa wu vɔsa.

⁴Ŋku gã kple dzi si me dada

le lae nye ame vɔ̃ɖiwo ƒe akaɖi,

evɔ wòhenye nu vɔ̃.

⁵Vevidonula ƒe ɖoɖoɖowo hea viɖe vɛ

nenema kee dzitsitsi hea ahedada vɛ.

⁶Kesinɔnu si wotsɔ alakpaɖe kpɔe la nu va yina kaba

abe ƒuƒu ene eye wònye mɔ si ŋu aɖi vɔ̃ɖi le.

⁷Ame vɔ̃ɖiwo ƒe ŋutasẽnuwɔwɔ ahe wo adzoe

elabena wogbe be yewomawɔ nu nyui o.

⁸Fɔɖila ƒe mɔ le gɔdɔ̃gɔdɔ̃

gake fɔmaɖila ƒe nuwɔwɔ le dzɔdzɔe.

⁹Enyo be woanɔ dzogoe dzi le xɔta wu be woanɔ xɔ ɖeka me

kple srɔ̃nyɔnu dzrewɔla.

¹⁰Nu vɔ̃ɖi wɔwɔ dzroa ame vɔ̃ɖi vevie,

mekpɔa nublanui na ehavi o.

¹¹Ne wohe to na fewuɖula la,

bometsilawo dzea nunya;

ne wofia nu nunyala la, sidzedze sua esi.

¹²Dzɔdzɔetɔ la ɖea ŋku ɖe ame vɔ̃ɖi ƒe aƒe ŋu,

eye wòhea gbegblẽ vaa ame vɔ̃ɖi la dzi.

¹³Ne ame aɖe do toku ame dahe ƒe ɣlidodo la,

ne eya hã do ɣli la,

ame aɖeke masee nɛ o.

¹⁴Nunana si wona le adzame la faa dziku nu

eye zãnu si woɣla ɖe awu ʋlaya te hafi tsɔ vɛ la

léa avu dziku helĩhelĩ.

¹⁵Afia nyui tsotso hea dzidzɔ vɛ na ame dzɔdzɔe,

ke ehea ŋɔdzi vɛ na vɔ̃ wɔlawo.

¹⁶Ŋutsu si tra tso gɔmesese ƒe mɔ dzi la

va dzudzɔna le ame kukuwo ƒe ha me.

¹⁷Ame si lɔ̃a agbeɖuɖu la azu hiãtɔ

eye ame si lɔ̃a wain kple ami la makpɔ hotsui o.

¹⁸Ame vɔ̃ɖi zua avulénu ɖe ame dzɔdzɔe teƒe

eye nenema ke nuteƒemawɔla ɖea nuteƒewɔla nu.

¹⁹Enyo be nànɔ dzogbe wu be nànɔ anyi

kple srɔ̃nyɔnu dzrewɔla kple dɔmedzoedola.

²⁰Nuɖuɖu vivi kple ami bɔ ɖe nunyala ƒe aƒe me fũu,

gake bometsila ɖua nu sia nu si le esi.

²¹Ame si tia dzɔdzɔenyenye kple lɔlɔ̃ la,

tia agbe, dzidzedze kple bubu.

²²Nunyala dze kalẽtɔ ƒe du dzi

eye wòmu mɔ sesẽ si ŋu wole dzi ɖom ɖo la ƒu anyi.

²³Ame si kpɔa eƒe nu kple eƒe aɖe dzi la,

ɖea eɖokui tso dzɔgbevɔ̃e me.

²⁴Ŋutsu dadala, ɖokuiŋudzela,

si wɔa nu tovo kple dada la, eyae woyɔna be, “Fewuɖula.”

²⁵Kuviatɔ ƒe nudzodzro ahe ku vɛ nɛ,

elabena eƒe asiwo gbe be yewomawɔ dɔ o.

²⁶Ele nu dzrom ŋkeke blibo la,

ke ame dzɔdzɔe la nana faa, eye metea ame o.

²⁷Ame vɔ̃ɖi ƒe vɔsa nye ŋunyɔnu,

kaka wòahanye be etsɔe vɛ kple susu vɔ̃ɖi.

²⁸Aʋatsoɖasefo atsrɔ̃ eye ame si ɖoa toe la atsrɔ̃ gbidigbidi.

²⁹Ame vɔ̃ɖi ɖoa mo kplala ɖi,

ke dzɔdzɔetɔ léa ŋku ɖe eƒe mɔwo ŋu.

³⁰Nunya, gɔmesese kple ɖoɖo aɖeke meli si adze edzi o,

ne etsi tsitre ɖe Yehowa ŋu.

³¹Woblaa akpa na sɔ ɖe aʋakpegbe ŋu,

gake Yehowa ƒe asimee dziɖuɖu ya le.

¹Ŋkɔ nyui didi nyo wu kesinɔnuwo

eye ŋudzedzekpɔkpɔ nyo wu klosalo kple sika.

²Nu ɖeka siae nàkpɔ le kesinɔtɔ kple ame dahe ŋu:

Yehowae nye wo katã Wɔla.

³Nunyala kpɔ dzɔgbevɔ̃e gbɔna eye wòɣla eɖokui

gake bometsila ya yiyim ko wòle eye wòkpea fu ɖe enu.

⁴Ɖokuibɔbɔ kple Yehowavɔvɔ̃ hea kesinɔnu,

bubu kple agbe vɛ.

⁵Ŋu kple mɔkawo le ame vɔ̃ɖi la ƒe mɔ dzi,

ke ame si dzɔ eƒe luʋɔ ŋuti la, ate ɖa xaa tso wo gbɔ.

⁶He ɖevi ɖe mɔ si wòato la dzi eye ne etsi la,

mate ɖa le edzi o.

⁷Kesinɔtɔwo ɖua gã ɖe ame dahewo dzi

eye nugbanadola zua dɔla na ame si do nugbana la nɛ.

⁸Ame si ƒã vɔ̃ɖivɔ̃ɖi la axa dzɔgbevɔ̃e,

eye woatsrɔ eƒe dɔmedzoe ƒe ameƒoti.

⁹Woayra ame si nyoa dɔ me na amewo

elabena emaa eƒe nuɖuɖu kple ame dahewo.

¹⁰Nya fewuɖula la do goe eye dzre hã ado go,

nenema ke nyahehe kple dzudzu hã awu nu.

¹¹Ame si lɔ̃ dzi dzadzɛ kple nuƒoƒo si me nya dzetowo le la,

eyae fia la adze xɔ̃e.

¹²Yehowa ƒe ŋkuwo le nugɔmesese ŋu,

ke etrɔa gbo nuteƒemawɔlawo ƒe nyawo.

¹³Kuviatɔ gblɔna be,

“Dzata le gota!” alo “Woava wum le ablɔ dzi!”

¹⁴Nyɔnu ahasitɔ ƒe nu la, ʋe globo wònye

eye ame si dzi Yehowa ƒe dziku le la eyae age adze eme.

¹⁵Wobla bometsitsi ɖe ɖevi ƒe dzi ŋu,

ke ɖɔɖɔɖo ƒe ameƒoti ana wòate ɖa xaa tso egbɔ.

¹⁶Ame si tea ame dahewo ɖe anyi be

yeadzi yeƒe kesinɔnuwo ɖe edzi

kple ame si naa nu kesinɔtɔ la siaa age ɖe hiã me.

Nunyala ƒe nya blaetɔ̃awo

Nya gbãtɔ

¹⁷Ƒu to anyi eye nàse nunyalawo ƒe nyawo,

na wò dzi naku ɖe nu si fiam mele ŋuti,

¹⁸elabena edoa dzidzɔ na ame ne èɣla wo ɖe wò dzi me,

eye wo katã nanɔ klalo le wò nuyiwo dzi.

¹⁹Ale be nàɖo dzi ɖe Yehowa ŋu,

esia ta mele nu fiam wò ɖo egbea,

ɛ̃, wòe mele nu fiam.

²⁰Ɖe nyemeŋlɔ nufiamenya blaetɔ̃ na wò,

aɖaŋuɖonyawo kple nugɔmesenyawo

²¹be woafia nyateƒe kple kakaɖedzinyawo

wò be nàtsɔ nunyanyawo aɖo nya ŋu

na ame si dɔ wò la oa?

Nya evelia

²²Mègaba ame dahewo le esi woda ahe ta o

eye mègate hiãtɔ ɖe to le ʋɔnu o,

²³elabena Yehowa axɔ nya ɖe wo nu

eye wòaha ame si ha wo.

Nya etɔ̃lia

²⁴Mègadze xɔ̃ ŋutsu dɔmedzoetɔ o

eye mègade ha kple ame si doa dziku kabakaba o,

²⁵ne menye nenema o la, àva srɔ̃ eƒe mɔwo

eye nàtsɔ ɖokuiwò ade mɔ me.

Nya enelia

²⁶Mèganye ame si ƒua asi akɔ ɖe fenyila nu

alo dea megbe na ame si do nugbana la o;

²⁷eye ne mèkpɔ ga axe fea o la,

woaɖe aba si dzi nèmlɔna la gɔ̃ hã le tewò.

Nya atɔ̃lia

²⁸Mègaɖe blemaliƒokpe

si fofowòwo ɖi la ɖa o.

Nya adelia

²⁹Èkpɔ ame si bi ɖe eƒe dɔ me la le dɔ wɔma?

Asubɔ le fiawo ŋgɔ

eye menye le ame tsɛwo ŋgɔ o.

Nya adrelia

¹Ne ènɔ kplɔ̃ ŋu be yeaɖu nu kple fia la,

lé ŋku ɖe nu si wotsɔ ɖo akɔwò me la ŋu nyuie

²eye tsɔ hɛ ɖo wò ve dzi

ne ènye nutsuɖula.

³Mègadzro eƒe nuɖuɖu kpeɖiwo o

elabena nuɖuɖu ma nye beble.

Nya enyilia

⁴Mègaku kutri vivivo,

agbɔdzɔ ɖokuiwò be yeakpɔ hotsui o,

dze nunya nàlé avu ɖokuiwò.

⁵Kasia wò ŋku nabe yeato kesinɔnuwo dzi la,

wo nu va yi xoxo

elabena woato aʋala godoo

eye woadzo adzo ayi ɖe dziƒo ʋĩi abe hɔ̃ ene.

Nya asiekelia

⁶Mègaɖu ŋutsu nuvela ƒe nuɖuɖu o,

eye eƒe nuɖuɖu kpeɖiwo megadzro wò o,

⁷elabena enye ame si le ga si wòagblẽ ɖe nua ɖaɖa ŋuti la ŋu bum.

Egblɔ na wò be,

“Ɖu nu, nàno nu”

gake megblɔe tso eƒe dzi me o.

⁸Àdzɔ nu sue si nèɖu la hã

eye àtsɔ wò kafukafunya siwo nègblɔ la hã ada ahee.

Nya ewolia

⁹Mègaƒo nu ɖe bometsila ƒe to me o,

elabena ado vlo wò nunyanyawo.

Nya wuiɖekɛlia

¹⁰Mègaɖe blemaliƒokpewo ɖa

alo age ɖe tsyɔ̃eviwo ƒe agble me o

¹¹elabena ŋusẽtɔe nye wo ta ʋlila;

eye awɔ avu kpli wò ɖe wo nu.

Nya wuievelia

¹²Tsɔ wò dzi ku ɖe nufiame ŋu

eye wò towo natrɔ ɖe gɔmesese ŋu.

Nya wuietɔ̃lia

¹³Mègagbe tohehe na ɖevi o,

ne èƒoe kple ati la, mele kuku ge o.

¹⁴Tsɔ ameƒoti he to nɛ

eye àɖe eƒe luʋɔ tso ku me.

Nya wuienelia

¹⁵Vinye, ne wò dzi dze nunya la,

ekema nye hã nye dzi akpɔ dzidzɔ

¹⁶eye nye ememe ke atso aseye ne wò

nuyiwo gblɔ nu si le dzɔdzɔe.

Nya wuiatɔ̃lia

¹⁷Mègana wò dzi naʋã ŋu nu vɔ̃ wɔlawo o,

ke boŋ tsɔ dzo ɖe Yehowavɔvɔ̃ ŋu.

¹⁸Vavã, mɔkpɔkpɔ le asiwò hena etsɔ si gbɔna

eye wò mɔkpɔkpɔ mazu dzodzro o.

Nya wuiadelia

¹⁹Vinye, ɖo tom ne nàdze nunya

eye na wò dzi nanɔ mɔ dzɔdzɔetɔ dzi.

²⁰Mègade ha kple ame siwo nye waintsunolawo

alo lã geɖe ɖulawo o.

²¹Elabena ahatsunolawo kple nutsuɖulawo la,

ahee wodana eye alɔ̃ tsu dɔdɔ nana wonɔa awu vuvuwo me.

Nya wuiadrelia

²²Ɖo to fofowò, ame si dzi wò

eye mègado vlo dawò ne eku nyagã o.

²³Ƒle nyateƒe la eye mègadzrae o;

ƒle nunya, amehehe kple gɔmesese.

²⁴Ame dzɔdzɔe fofo atso aseye geɖe

eye ame si si vi nyanu le la akpɔ dzidzɔ le eŋu.

²⁵Dawò kple fofowò nekpɔ dzidzɔ

eye nyɔnu si dzi wò la netso aseye!

Nya wuienyilia

²⁶Vinye, tsɔ wò dzi nam

eye wò ŋkuwo nenɔ nye mɔwo ŋu

²⁷elabena gbolo la, ʋe globoe wònye

eye srɔ̃nyɔnu ahasitɔ la,

vudo xaxɛ wònye.

²⁸Ede xa ɖi abe adzodala ene

eye wòdzia ŋutsu ahasitɔwo ƒe xexlẽme ɖe edzi.

Nya wuiasiekelia

²⁹Ame kae le hũu ɖem?

Ame kae le veve sem?

Ame kae le nu xam?

Ame kae le eƒe nuteɖeamedziwo gblɔm?

Ame kae xɔ abi yakatsyɔ?

Ame ka ƒe ŋkue biã abe ʋu ene?

³⁰Ame siwo tsia wainze te la tɔe,

ame siwo yina ɖaɖɔa wain si wotɔtɔ kpɔ la tɔe.

³¹Mègaɖɔ wain kpɔ ne ebiã dzẽe,

ne ele fu tsɔm le kplu me,

ne eto vetome heɖiɖi ɖe dɔ me o!

³²Le nuwuwu la,

eɖua ame abe da ene

eye wònyɔa aɖi abe ƒli ene.

³³Wò ŋkuwo akpɔ nu tutɔ manyatalenuwo

eye wò susu anɔ nu baɖabaɖawo susum.

³⁴Ànɔ abe ame si mlɔ atsiaƒu gbana dzi

alo ame si mlɔ abala dzi ene.

³⁵Àgblɔ be,

“Woxlã nu ɖem gake nyemexɔ abi o!

Woƒom gake mevem o!

Ɣe ka ɣi gɔ̃ manyɔ ne magadi ahayomemɔ?”

Nya blaevelia

¹Mègabiã ŋu ame vɔ̃ɖiwo o,

mègadi woƒe hamenɔnɔ o

²elabena woƒe dzi ɖoa nu tovo

eye woƒe nuyiwo ƒoa nu tso nu gbegblẽ wɔwɔ ŋuti.

Nya blaeve-vɔ-ɖekɛlia

³Nunya wotsɔna tua xɔe

eye gɔmesese wotsɔna ɖoa egɔme anyie,

⁴to sidzedze me wotsɔa nu nyui tɔxɛ siwo mebɔ o

kple kesinɔnu nyuiwo yɔa woƒe xɔwo mee.

Nya blaeve-vɔ-evelia

⁵Ŋusẽ gã aɖe le nunyala si

eye ame si si gɔmesese le la dzia eƒe ŋusẽ ɖe edzi.

⁶Èhiã nufiame hafi adze aʋa eye hafi dziɖuɖu nava la,

èhiã aɖaŋuɖola geɖewo.

Nya blaeve-vɔ-etɔ̃lia

⁷Nunya kɔ boo na bometsila akpa;

le amehawo dome, le agbo nu la, nya aɖeke mele esi wòagblɔ o.

Nya blaeve-vɔ-enelia

⁸Ame si ɖo vɔ̃ be yeawɔ

lae woyɔna be ame vɔ̃ɖi.

⁹Bometsinuwo ɖoɖo nye nu vɔ̃ eye amewo tsria fewuɖula.

Nya blaeve-vɔ-atɔ̃lia

¹⁰Ne èʋuʋu le xaxaɣi la,

aleke wò ŋusẽ mehele sue o?

¹¹Ɖe ame siwo wokplɔ yina wuwu ge

eye xɔ na ame siwo le yiyim sɔgɔsɔgɔ yina ɖe ku me.

¹²Ne ègblɔ be,

“Míenya naneke tso nu sia ŋuti o” la,

ɖe ame si daa dziwo kpɔ la menyae oa?

Ɖe wòle nyanya na ame si kpɔa wò agbe ta?

Ɖe maɖo eteƒe na ame sia ame ɖe nu si wòwɔ la nu oa?

Nya blaeve-vɔ-adelia

¹³Vinye, no anyitsi elabena enyo;

anyitsi tso anyito me avivi le wò nu me.

¹⁴Nyae hã be, nunya avivi wò luʋɔ nu;

ne èke ɖe eŋu la,

mɔkpɔkpɔ li na wò hena etsɔ si gbɔna

eye wò mɔkpɔkpɔ mazu dzodzro o.

Nya blaeve-vɔ-adrelia

¹⁵Mègade xa ɖe ame dzɔdzɔe ƒe aƒe ŋu o,

mègava ha enɔƒe o

¹⁶elabena togbɔ be ame dzɔdzɔe adze anyi zi adre hã la,

agafɔ gake ame vɔ̃ɖiwo ya la,

dzɔgbevɔ̃e ahe wo aƒu anyi.

Nya blaeve-vɔ-enyilia

¹⁷Mègakpɔ dziɖuɖu ƒe dzidzɔ ne wò futɔ dze anyi o,

eye ne ekli nu la,

dzi megadzɔ wò o,

¹⁸elabena Yehowa akpɔe, eye madze eŋu o,

eye wòaɖe eƒe dziku ɖa le edzi.

Nya blaeve-vɔ-asiekelia

¹⁹Mègadzo nyanyanya le ame vɔ̃ɖiwo ta

alo aʋã ŋu ŋutasẽla o,

²⁰elabena mɔkpɔkpɔ aɖeke meli na ame vɔ̃ɖi ɖe etsɔ si gbɔna ŋuti o

eye woatsi ŋutasẽlawo ƒe akaɖi.

Nya blaetɔ̃lia

²¹Vinye, vɔ̃ Yehowa kple fia la

eye mègade aglãdzelawo dzi o

²²elabena ame eve mawo ana gbegblẽ naƒo ɖe wo dzi kpoyi

eye ame kae nya dzɔgbevɔ̃e si woate ŋu ahe vɛ?

Nunyalawo ƒe nyagbɔgblɔ bubuwo

²³Esiawo hã nye nunyalawo ƒe nyagbɔgblɔwo:

Akpa ɖeka dzi dede le ʋɔnudɔdrɔ̃ me menyo o.

²⁴Ame si agblɔ na fɔɖila be,

“Mèdze agɔ o” la, amewo ado ɖiŋu nɛ

eye dukɔwo anyɔ ŋui.

²⁵Ke eme anyo na ame siwo abu fɔ agɔdzela

eye yayra gãwo ava wo ameawo dzi.

²⁶Nyaŋuɖoɖo ɖe ɖoɖo nu le

abe nugbugbɔ ene.

²⁷Wu wò gotadɔwo nu

eye nàdzra wò agble me ɖo,

ema megbe la, tu wò xɔ.

²⁸Mègaɖu ɖasefo ɖe hawòvi ŋu dzodzro

alo atsɔ wò nuyiwo aka aʋatsoe o.

²⁹Mègagblɔ be,

“Mele ewɔ ge nɛ abe ale si wòwɔe ɖe ŋutinye ene,

mele eteƒe ɖo ge na ŋutsu sia ɖe nu si wòwɔ la ta” o.

³⁰Meto kuviatɔ kple ame manyanu

ƒe waingble ŋu yi;

³¹ŋu vu tsyɔ afi sia afi,

gbe to ɖe eme katã eye kpekpɔ la kaka le eŋu.

³²Metsɔ nye dzi ɖo nu si mekpɔ la ŋu

eye mesrɔ̃ nu tso nu si mekpɔ la me.

³³Dɔ alɔ̃ vie, dɔ akɔlɔ̃e sẽe,

ŋlɔ wò abɔwo nàdzudzɔ vie,

³⁴tete ahedada aƒo ɖe dziwò abe adzodala ene,

eye hiã abe aʋakalẽtɔ si bla akpa ene.

Salomo ƒe lododo bubuwo

¹Esiawoe nye Solomo ƒe lododo bubu siwo Yuda fia Hezekia ƒe dɔdzikpɔlawo ŋlɔ da ɖi.

²Enye Mawu ƒe ŋutikɔkɔe be wòaɣla nya;

eye fiawo ƒe bubue nye be woaku nya me.

³Abe ale si dziƒo kɔe eye anyigba gogloe ene la,

nenemae womate ŋu adzro fiawo ƒe dzi me o.

⁴Ɖe ɖi ɖa le klosalo ŋu,

ekema klosalonutula kpɔ dɔwɔnu.

⁵Ɖe ame vɔ̃ɖi ɖa le fia la ŋkume

ekema eƒe fiazikpui ali ke to dzɔdzɔenyenye me.

⁶Mègado ɖokuiwò ɖe dzi le fia la ŋkume o

eye mègaʋli nɔƒe le amegãwo dome o.

⁷Enyo be wòagblɔ na wò be,

“Va dzime le afii” wu be wòaɖiɖi wò le bubumewo ŋkume.

Nu si nèkpɔ kple wò ŋkuwo la,

⁸mègatsɔ dzitsitsi ahee va ʋɔnui o

elabena nu ka nàwɔ le nuwuwua

ne hawòvi la do ŋukpe wò?

⁹Ne èle nya hem kple hawòvi la,

mègaʋu go ame bubu ƒe nya ɣaɣla o,

¹⁰ne menye nenema o la,

ame si see la ado ŋukpe wò

eye ŋkɔ baɖa si le ŋuwò la maɖe ɖa akpɔ gbeɖe o.

¹¹Nya si wogblɔ dedie la,

le abe “sikaplu” le klosalogba me ene.

¹²Ŋutsu nunyala ƒe mokaname le na to si le esem la

abe sikatogɛ alo sikatsyɔ̃ɖonu aɖe ene.

¹³Dɔla nuteƒewɔla le na ame siwo dɔe la

abe ale si sno fanae le nuŋeɣi ene;

enana eƒe aƒetɔwo ƒe gbɔgbɔ gbɔna ɖe eme.

¹⁴Ŋutsu si ƒoa adegbe le nunana siwo mena o ŋu la

le abe lilikpododo kple ya si medzaa tsi o la ene.

¹⁵Dzigbɔɖie wotsɔna blea fia nue

eye aɖe bɔbɔe ate ŋu agbã ƒu.

¹⁶Ne èke ɖe anyitsi ŋu la, no esi sinu nàte ŋui ko,

ne ènoe fũu akpa la, àdzɔe.

¹⁷Mègaƒo afɔɖi hawòvi ƒe aƒe me o,

ne èle egbɔ dem kabakaba la, ava tsri wò.

¹⁸Ŋutsu si ɖi aʋatsoɖase ɖe ehavi ŋu la le abe kpo,

yi alo aŋutrɔ ɖaɖɛ ene.

¹⁹Dziɖoɖo ɖe nuteƒemawɔla ŋu le xaxaɣiwo le abe aɖu vovo

alo afɔ tutu ene.

²⁰Ame si dzi ha na dzi kpekpe tɔ la le

abe ame si ɖe awu kpekpe ɖi le vuvɔwɔgbe

alo “vinigae” wokɔ ɖe “soɖa” dzi ene.

²¹Ne dɔ le wò ketɔ wum la, na nui wòaɖu,

ne tsikɔ le ewum la, na tsii wòano.

²²Ne èwɔ esia la,

àƒo dzoka xɔxɔwo nu ƒu ɖe eƒe ta dzi,

eye Yehowa ŋutɔ aɖo eteƒe na wò.

²³Abe ale si anyieheya hea tsidzadza vɛ ene la,

nenema amenyagblɔɖe dea adã mo na amee.

²⁴Enyo be woanɔ dzogoe dzi le xɔta wu be

woanɔ aƒe ɖeka me kple srɔ̃nyɔnu dzrewɔla.

²⁵Abe ale si tsi fafɛ faa akɔ na luʋɔ gbɔdzɔe ene la,

nenema kee nya nyui tso duta hã nɔna.

²⁶Ame dzɔdzɔe si na mɔ ame vɔ̃ɖi la

le abe tsitsetse si me blu

alo vudo si me wolɔ gbe kɔ ɖo la ene.

²⁷Menyo be woano anyitsi fũu

alo wònye nu dzeame be ame nadi eya ŋutɔ ƒe bubu o.

²⁸Ame si meɖua eɖokui dzi o la

le abe du si ŋu wogbã gli le la ene.

¹Abe ale si sno dzanae le dzomeŋɔli

alo tsi dzanae le nuŋeɣi ene la,

nenemae bubu medze bometsila o.

²Abe ale si atsutsrɔe dzonae

alo sagbadrɛ saa agbae ene la,

nenemae ɖiŋu si wodo na

ame ɖe madzɔmadzɔ dzi la tsia yamee.

³Sɔƒoka li na sɔ, numega li na tedzi

nenemae ameƒoti li na bometsila ƒe dzimegbe!

⁴Mègaɖo nya ŋu na bometsila le eƒe bometsitsi nu o,

ne menye nenema o la, wò ŋutɔ hã ànɔ abe eya amea ene.

⁵Ɖo nya ŋu na bometsila le eƒe bometsitsi nu,

ne menye nenema o la ava bu eɖokui nunyalae le eɖokui gbɔ.

⁶Dudede asi na bometsila le

abe ame ŋutɔ ƒe afɔ lalã alo dzɔgbevɔ̃e nono ene.

⁷Abe ale si atatututɔ ƒe afɔ nɔa yamee ene la,

nenemae lododo le le bometsila ƒe nu mee.

⁸Abe ale si wotsɔa kpe dea akafomee ene la,

nenemae bubudede bometsila ŋu le.

⁹Abe ale si ŋuti nɔna le ahamula ƒe asimee ene la,

nenemae lododo nɔna le bometsila ƒe nu mee.

¹⁰Ame si daa aŋutrɔ bometsila dzodzro la le

abe ame si dɔa dɔ ame si le eme tsom la ene.

¹¹Abe ale si avu trɔna gayia nu si wòdzɔ gbɔe ene la,

nenemae bometsila gawɔa bometsinu si wòwɔ va yi.

¹²Èkpɔ ame aɖe si nye nunyala le eya ŋutɔ ŋkume kpɔa?

Mɔkpɔkpɔ geɖe li na bometsila wu eya amea.

¹³Kuviatɔ gblɔna be,

“Dzata le mɔa dzi, dzata si le gbe tem ŋɔdzitɔe la

le tsatsam le ablɔwo me!”

¹⁴Abe ale si ʋɔtru trona le eƒe megbega mee ene la,

nenemae kuviatɔ nɔa tɔtrɔm le eƒe aba dzii.

¹⁵Kuviatɔ tsɔ eƒe asi de nuɖugba me

gake kuvia ɖoe ale gbegbe be,

edede nu me zu dɔ nɛ.

¹⁶Kuviatɔ nye nunyala le eya ŋutɔ ƒe ŋkume,

wu ame adre siwo ɖoa nya ŋu nunyatɔe.

¹⁷Ame si le eme tsom gake de nu dzrenya si metsɔ egbɔ o

me la le abe ame si lé towo kple eve na avu ene.

¹⁸Abe ale si aɖaʋatɔ daa akakati bibi

alo aŋutrɔ si ŋu aɖi le la ene la,

¹⁹nenemae nye ame si ble ehavi

eye emegbe wògblɔ nɛ be,

“Fefem ko mele!”

²⁰Ne nake meli o la,

dzo tsina; ne sakplitɔ meli o la, dzre kena.

²¹Abe ale si aka léa dzo eye nake doa dzo ene la,

nenema ŋutsu dzretɔ ƒlɔa dzre ɖoe.

²²Amenyagblɔla ƒe nyawo vivina

abe nuɖuɖu vivi si woka de nu me la ene;

eyina ɖe ame ƒe dɔgbowo me ke.

²³Abe ale si wofaa sikatsi ɖe anyikplu ŋu ene la,

nenema nuyi xɔdzo si ŋu dzi vɔ̃ɖi kpe ɖo la le.

²⁴Ame baɖa tsɔa eƒe nuyi trɔa eɖokui bubue,

gake eɣlaa beble ɖe eƒe dzi me.

²⁵Togbɔ be eƒe nyawo nya le sesem hã la, mègaxɔ edzi se o

elabena ŋunyɔnu adre le eƒe dzi me.

²⁶Eƒe susu baɖa aɣla ɖe beble megbe,

gake woaʋu go eƒe vɔ̃ɖivɔ̃ɖi le amehawo dome.

²⁷Ne ame aɖe ɖe ʋe la, eya ŋutɔ age adze eme

eye ame si amli kpe la,

kpe si wòmli la age adze eya ŋutɔ dzi.

²⁸Alakpaɖe léa fu ame siwo ŋuti wòle abi demii,

eye nu si blea ame la hea gbegblẽ vɛ.

¹Mègaƒo adegbe le etsɔ si gbɔna ŋu o

elabena mènya nu si ŋkeke la ahe vɛ o.

²Na ame bubu nakafu wò,

ke menye wò ŋutɔ wò nu o,

ame bubu newɔe, menye wò ŋutɔ wò nuyiwo o.

³Kpe nye nu kpekpe eye ke nye agba kpekpe

gake bometsila ƒe dzikudoname kpena wu wo ame evea.

⁴Dziku la ŋutasẽlae eye dɔmedzoe la agbodzelae,

ke ame ka ate ŋu anɔ te ɖe ŋuʋaʋã nu?

⁵Mokaname le ame dome nyo

wu lɔlɔ̃ si woɣla.

⁶Àte ŋu aka ɖe xɔlɔ̃ ƒe abideameŋu dzi

gake ketɔ ƒe nugbugbɔ dzina ɖe edzi.

⁷Ƒoɖila doa vlo anyitsi,

ke hena dɔwuitɔ la, nu veve gɔ̃ hã vivina nɛ.

⁸Ame si tra tso eƒe aƒe me la

le abe xevi si bu eƒe atɔmemɔ ene.

⁹Ami ʋeʋĩ kple dzudzɔdonu ʋeʋĩ doa dzidzɔ na dzi,

xɔlɔ̃ ƒe nunyoamenu tsoa eƒe aɖaŋuɖoɖo vavãwo me.

¹⁰Mègagblẽ xɔ̃wò alo fofowò xɔlɔ̃ ɖi o,

eye mègayi nɔviwò ƒe aƒe me ne dzɔgbevɔ̃e ƒo go wò o,

anyo na wò be nàyi hawòvi si tsɔ ɖe gbɔwò la gbɔ wu

nɔviwò si le adzɔge.

¹¹Vinye, dze nunya eye nàhe dzidzɔ vɛ na nye dzi;

ekema mate ŋu aɖo nya ŋu na ame si ado vlom.

¹²Nunyala kpɔ dzɔgbevɔ̃e gbɔna eye wòɣla eɖokui

gake bometsila le yiyim eye wòkpe fu ɖe eta.

¹³Xɔ avɔ le ame si da megbe na amedzro la si,

tsɔe de awɔba me, ne eda megbe na nyɔnu ahasitɔ.

¹⁴Ne ŋutsu aɖe le eƒe aƒelika yram kple ɣli le ŋdi kanya la,

woatsɔe abe ɖiŋudodo ene.

¹⁵Srɔ̃nyɔnu dzrewɔla le abe tsitrɔnu si

le ɖuɖum madzudzɔmadzudzɔe le tsidzagbe ene.

¹⁶Asiɖoɖo edzi le abe asiɖoɖo ya dzi ene

alo asitsɔtsɔ ku ami ene.

¹⁷Abe ale si ga nyrea ga ene la,

nenema kee ame nyrea amee.

¹⁸Ame si lé be na eƒe gboti nyuie la aɖu eƒe tsetsea

eye woade bubu ame si kpɔ eƒe aƒetɔ dzi la ŋu.

¹⁹Abe ale si ame ƒe mo dzena le tsi dzii ene la,

nenema ame ƒe dzi ɖea eƒe nɔnɔme fianae.

²⁰Ku kple tsiẽƒe meɖia ƒo gbeɖe o

nenema kee nye ame ƒe ŋku.

²¹Sonu li na klosalo, eye dzokpo li na sika,

gake wodoa ame kpɔ to kafukafu si wotsɔ nɛ la dzi.

²²Togbɔ be èto bometsila le to me,

ètoe kple tati abe bli ene hã la,

màte ŋu aɖe eƒe bometsitsi ɖa le eŋu o.

²³Ka ɖe edzi be wò alẽhawo ƒe nɔnɔme le nyanya na wò

eye wò ŋku le wò lãhawo ŋu ɖaa;

²⁴elabena kesinɔnuwo menɔa anyi ɖikaa o

eye fiakuku hã menɔa anyi hena dzidzimewo katã o.

²⁵Ne woƒo gbe eye gbe mumu mie ɖe eteƒe,

ne wolã gbe siwo le togbɛwo dzi ƒo ƒui la,

²⁶ekema alẽviawo ana avɔ wò

eye gbɔ̃wo anye ga si nàtsɔ aƒle agblee.

²⁷Gbɔ̃notsi anɔ asiwò fũu

be wò kple wò aƒemetɔwo miano

eye wòanye nunyiame na wò dɔlanyɔnuwo.

¹Ame vɔ̃ɖi la léa du tsɔna,

evɔ ame aɖeke menyae ɖe du nu o,

ke dzi le ame dzɔdzɔe ƒo abe dzata ene.

²Dziɖulawo sɔ gbɔ ɖe dukɔ si me aglãdzedze le,

ke ŋutsu si si gɔmesese kple sidzedze le la hea ɖoɖodziwɔwɔ vɛ.

³Dziɖula si tea hiãtɔwo ɖe anyi la le abe tsidzadza si ɖe anyigba

eye megblẽ nuɖuɖu aɖeke ɖi o la ene.

⁴Ame siwo gbe nu le sea gbɔ la kafua ame vɔ̃ɖiwo

ke sedziwɔlawo tsia tsitre ɖe wo ŋu.

⁵Ame vɔ̃ɖiwo mesea afiatsotso nyui gɔme o

gake ame siwo dia Yehowa ya sea egɔme nyuie.

⁶Enyo be nànye hiãtɔ si ƒe zɔzɔme ŋu fɔɖiɖi mele o,

wu nànye kesinɔtɔ si ƒe mɔwo to vo.

⁷Ame si léa sea me ɖe asi la nye vi nyanu

gake ame si dea ha kple nutsuɖulawo la doa ŋukpe fofoa.

⁸Ame si dzi eƒe kesinɔnuwo ɖe edzi to demegaxɔxɔ me la,

le kɔ lim nuwo na ame bubu si anyo dɔ me na ame dahewo.

⁹Ne ame aɖe doa toku sea la,

eƒe gbedodoɖawo gɔ̃ hã zua ŋunyɔnu.

¹⁰Ame si kplɔ nu dzɔdzɔe wɔla to mɔ vɔ̃ dzi la,

age ɖe eya ŋutɔ ƒe mɔ me.

Ke ame siwo ŋu fɔɖiɖi mele o la,

axɔ domenyinu nyui.

¹¹Kesinɔtɔ nye nunyala le eya ŋutɔ gbɔ

gake hiãtɔ si si sidzedze le la kpɔa egɔme.

¹²Ne ame dzɔdzɔe ɖu dzi la,

dzidzɔkpɔkpɔ teƒe mekɔna o,

ke ne ame vɔ̃ɖi zu fia la,

amewo sina bena.

¹³Nu medzea edzi na ame si ɣla eƒe nu vɔ̃ o,

ke wokpɔa nublanui na ame si ʋu eƒe nu vɔ̃wo me

eye wògbe nu le wo gbɔ.

¹⁴Woayra ŋutsu si vɔ̃a Yehowa ɣe sia ɣi,

ke ame si sẽa eƒe dzi me la gena ɖe xaxa me.

¹⁵Ŋutasẽla si le ame dahewo dzi ɖum la

le abe dzata si le gbe tem alo sisiblisi si le ade tam ene.

¹⁶Dziɖula tamesesẽtɔ menyaa nu o,

ke ame si lé fu kesinɔnu ƒoɖi la anɔ agbe didi, ase vivi.

¹⁷Hlɔ̃dola si hlɔ̃dodo la zu agba na la anye tsatsala va se ɖe eƒe kugbe;

ame aɖeke megakpe ɖe eŋu o.

¹⁸Ame si fɔɖiɖi mele eƒe zɔzɔme ŋu o la anɔ dedie,

ke ame si ƒe mɔwo to vo la adze anyi kpata.

¹⁹Ame si ŋlɔ eƒe agble la akpɔ nuɖuɖu geɖe,

ke ame si ƒe susu le nu manyatalenuwo

yome la, ahedada axɔ aƒe nɛ.

²⁰Woayra ŋutsu nuteƒewɔla fũu,

ke womagbe tohehe na ame si tsi dzi ɖe

kesinɔnuwo kpɔkpɔ ŋuti o.

²¹Amedzidede menyo o

gake ame ayi aɖawɔ vɔ̃ ɖe abolo kakɛ ta.

²²Ŋutsu nuvela tsi dzi ɖe hotsuikpɔkpɔ ŋu,

evɔ mehenya be ahedada le ye lalam o.

²³Ame si ka mo na ŋutsu la,

axɔ amenuveve ɖe amenuveve dzi wu

ame si alakpaɖe le nume na.

²⁴Ame si da adzo fofoa alo dadaa hegblɔ be,

“Medze vɔ̃ o” la, nye kpeɖeŋutɔ na nugblẽla.

²⁵Ŋutsu ŋubiala hea mama vɛ

ke ame si ɖoa dzi ɖe Yehowa ŋu la, nu adze edzi nɛ.

²⁶Ame si ɖoa dzi ɖe eɖokui ŋu la, bometsilae,

ke ame si zɔna le nunya me la anɔ dedie.

²⁷Ame si naa nu hiãtɔ la,

naneke mahiãe o,

ke ame si miaa ŋku ɖe woƒe hiahiãwo dzi la,

axɔ fiƒode geɖe.

²⁸Ne tamesesẽtɔ zu dziɖula la,

amewo sina bena, ke ne ame vɔ̃ɖiwo tsrɔ̃ la,

ame dzɔdzɔewo tsina.

¹Ame si woka mo na zi gede gake wògbe lia kɔ la,

atsrɔ̃ zi ɖeka kpata xɔnamemanɔŋutɔe.

²Ne ame dzɔdzɔewo le dzi ɖum la, amewo dzɔa dzi;

ke ne dziɖuɖu ge ɖe ame vɔ̃ɖiwo ƒe asi me la, amewo ŋena.

³Ame si lɔ̃a nunya la hea dzidzɔ vɛ na fofoa,

ke ame si dze xɔ̃ gbolowo la gblẽa eƒe ga dome.

⁴To afia nyui tsotso me fia hea dedinɔnɔ vɛ na dukɔ,

ke fia si klẽa ŋu ɖe zãnuxɔxɔ ŋu la gbãa du.

⁵Ame si do fuflugba na ehavi la le ɖɔ ɖom na eya ŋutɔ ƒe afɔ.

⁶Ame vɔ̃ɖi ƒe nu vɔ̃ denɛ mɔ me,

ke ame dzɔdzɔe adzi ha atso aseye.

⁷Ame dzɔdzɔewo tsɔa ɖe le afiatsotso na hiãtɔwo me

gake ame vɔ̃ɖiwo ya metsɔa ɖeke le eme o.

⁸Fewuɖulawo dea ʋunyaʋunya du me,

ke nunyalawo tsia dziku nu.

⁹Nunyala yi ʋɔnudrɔ̃ƒe kple bometsila,

bometsila le adã fiam, le fewu ɖum eye ŋutifafa meli o.

¹⁰Hlɔ̃dolawo lé fu ŋutsu nuteƒewɔla

eye wodina be yewoawu dzi dzadzɛ tɔ.

¹¹Bometsila ɖea eƒe dziku katã fiana,

ke nunyala ɖua eɖokui dzi.

¹²Ne dziɖula ɖo to beblenyawo la,

eƒe dɔnunɔlawo katã zua ŋutasẽlawo.

¹³Nu ɖeka sia le hiãtɔ kple ameteɖetola siaa si,

Yehowae wɔ ŋku na wo ame evea.

¹⁴Ne fia drɔ̃ ʋɔnu na hiãtɔ ɖe dzɔdzɔenyenye dzi la,

eƒe fiazikpui anɔ dedie ɣe sia ɣi.

¹⁵Ameƒoti si wotsɔna ɖɔa ame ɖoe la fiaa nunya ame,

gake ɖevi si womehe o la dea ŋukpe mo na dadaa.

¹⁶Ne ame vɔ̃ɖiwo le dzi ɖum la,

nu vɔ̃ hã dea dzi, ke ame dzɔdzɔewo akpɔ woƒe anyidzedze.

¹⁷Ne èhe viwò ŋutsuvi la, ekema àkpɔ ŋutifafa

eye wòahe dzidzɔ vɛ na wò luʋɔ.

¹⁸Afi si ɖeɖefia mele o la,

amewo wɔa woƒe lɔlɔ̃nu;

ke woayra ame si léa sea me ɖe asi.

¹⁹Numenya ɖeɖe mate ŋu aɖɔ dɔla ɖo o,

togbɔ be ese egɔme hã la, mawɔ ɖe edzi o.

²⁰Èkpɔ ame si ƒoa nu blablablaa?

Mɔkpɔkpɔ geɖe li na bometsila wu eya amea gɔ̃ hã.

²¹Ne ŋutsu aɖe wɔ vi na eƒe subɔviŋutsu tso eƒe ɖevime la,

ahe nuxaxa vɛ le nuwuwua.

²²Ŋutsu dɔmedzoetɔ dea dzre amewo dome

eye ame si doa dziku kabakaba la wɔa nu vɔ̃ geɖe.

²³Ŋutsu si dana la ɖua ŋukpe,

ke wobua ŋutsu si bɔbɔa eɖokui ɖe anyi le gbɔgbɔ me.

²⁴Ame si wɔ ɖeka kple fiafitɔ la nye eya ŋutɔ ƒe futɔ;

wonana wòkaa atam

eye mekpɔ mɔ akɔ nu le edzi o.

²⁵Vɔvɔ̃ si le ame aɖe me lae nyea mɔ nɛ,

ke ame si ka ɖe Yehowa dzi la nɔa dedie.

²⁶Ame geɖewo dina be yewoado ɖe dziɖula ŋkume,

aƒo nu kplii gake Yehowa gbɔ ame ƒe afiatsotso tsona.

²⁷Nu gbegblẽ wɔla nye ŋunyɔ na ame dzɔdzɔe

eye nu dzɔdzɔe wɔla nye ŋunyɔ na ame vɔ̃ɖi.

Agur ƒe nyawo

¹Yake vi Agur ƒe nyagblɔɖi.

Ŋutsu sia gblɔ na Itiel, kple Ukal be:

²“Nyee tsi bome wu le amewo dome;

ame ƒe nugɔmesese mele asinye o.

³Nyemesrɔ̃ nunya

alo nya naneke le Kɔkɔetɔ la ŋu o.

⁴Ame kae lia yi dziƒo gagbɔ kpɔ?

Ame kae lɔ ya ɖe eƒe asiƒome?

Ame kae bla tsiwo katã ɖe eƒe awu ʋlaya me?

Ame kae ɖo anyigba ƒe mlɔenu ke anyi?

Eŋkɔ ɖe, via ŋkɔ ɖe?

Gblɔe nam, ne ènyae!

⁵“Kpɔtsɔtsɔ mele Mawu ƒe nya aɖeke ŋu o;

enye akpoxɔnu na ame siwo sii tso.

⁶Mègatsɔ nya kpe eƒe nyawo o,

ne menye nenema o la, aka mo na wò

eye woakpɔe be ènye alakpatɔ.

⁷“O Yehowa, nu evee mebia wò;

mègatem hafi maku o.

⁸Te aʋatsokaka kple alakpa ɖa xaa tso gbɔnye,

mègatsɔ ahedada alo hotsuikpɔkpɔ nam o,

ke boŋ na nye gbe sia gbe ƒe abolo kom.

⁹Ne menye nenema o la, mava ɖi ƒo akpa,

agbe nu le gbɔwò ahabia be,

‘Ame kae nye Yehowa?’

Alo mada ahe akpa, afi fi.

¹⁰“Mègagblẽ dɔla ŋu na eƒe aƒetɔ o,

ne menye nenema o la, ado ɖiŋu na wò

eye nàkpe fu ɖe eta.

¹¹“Ame aɖewo li,

siwo doa ɖiŋu na wo fofowo

eye womeyraa wo dadawo hã o;

¹²ame siwo dza le woawo ŋutɔ ƒe ŋkume, evɔ womeklɔ ɖi si

woƒo la ɖa le wo ŋuti o;

¹³ame siwo si ŋku gã le ɣe sia ɣi,

eye wokpɔa ame ɖeƒomevie;

¹⁴ame siwo ƒe aɖu le abe yi ene

eye woƒe glãwo le abe hɛ ɖaɖɛwo ene,

ne woavuvu ame dahewo le anyigba dzi

eye woaɖe hiãtɔwo ɖa le amegbetɔwo dome.

¹⁵“Vinyɔnu eve le axɔ̃ si,

wole avi fam be, ‘Nam! Nam!’

“Nu etɔ̃ li siwo nu meɖia ƒo na gbeɖe o,

eye enelia megblɔna be, ‘Enyo gbɔ!’ o:

¹⁶woawoe nye, yɔdo,

vidzidɔ si tsi ko,

anyigba si tsi meɖia kɔ na o,

kple dzo si megblɔna gbeɖe be, ‘Enyo gbɔ!’ o.

¹⁷“Ŋku si ɖua fewu le fofoa ŋu,

eye wòdoa vlo bubudede dadaa ŋu la,

balime ƒe akpaviãwo ahoe le etome,

eye akagawo aɖui.

¹⁸“Nu etɔ̃ li siwo wɔ nuku nam akpa,

eye nyemese enelia gɔme o:

¹⁹hɔ̃ ƒe mɔ le yame,

da ƒe mɔ le agakpe dzi,

tɔdziʋu ƒe mɔ le atsiaƒuwo dzi

kple ŋutsu ƒe mɔ le ɖetugbi gbɔ.

²⁰“Esiae nye nyɔnu ahasitɔ ƒe mɔ.

Eɖua nu hetutua nuto gblɔna be,

‘Nyemewɔ nu gbegblẽ aɖeke o.’

²¹“Nu etɔ̃ tee anyigba ʋuʋuna le kpekpekpe,

eye le enelia te ya la, mate ŋu atsɔe o:

²²woawoe nye, dɔla si va zu fia,

bometsila si si nuɖuɖu bɔ ɖo fũu,

²³ne nyɔnu si ame aɖeke melɔ̃ eƒe nya o,

la ɖe srɔ̃ kple ne dɔlanyɔnu xɔ ɖe eƒe aƒenɔ teƒe.

²⁴“Nu ene le anyigba dzi le sue,

gake woƒe nunya gbɔ metsɔ o:

²⁵anyidiwo nye nuwɔwɔ si ŋu ŋusẽ sue aɖe ko le,

gake woƒoa woƒe nuɖuɖu nu ƒu le dzomeŋɔli;

²⁶kpetomefiwo nye lã siwo ŋu ŋusẽ sue aɖe ko le,

gake wowɔa woƒe nɔƒe ɖe agakpewo tome;

²⁷Fia mele ʋetsuviwo si o,

gake woƒe ha blibo la yia teƒewo le ɖoɖo me;

²⁸woate ŋu alé adoglo kple asi,

gake fiawo ƒe aƒewo mee wokpɔa wo le.

²⁹“Nu etɔ̃e zɔa agozɔli

eye nu enee zɔna abe fia ene:

³⁰dzata si nye gã le lã wɔadãwo dome eye medoa megbefɔ le naneke gbɔ o;

³¹koklotsu,

gbɔ̃tsu,

kple fia si eƒe aʋakɔwo ƒo xlãe.

³²“Ne ètsi bome hedo ɖokuiwò ɖe dzi

alo ɖo nu vɔ̃ɖi aɖe la,

tsɔ wò asi tsyɔ wò nu!

³³Elabena abe ale si ne woƒo nyinotsi wòzua bɔta

eye ne wofia ŋɔti ʋu dona ene la,

nenema kee ne wode dzo dziku me la, dzre dzɔna.”

Fia Lemuel ƒe nyawo

¹Fia Lemuel ƒe nyawo, nyagblɔɖi si dadaa fiae lae nye esi:

²“Oo vinye,

O nye dɔmevi, O nye adzɔgbeɖevi,

³Mègagblẽ wò ŋusẽ ɖe nyɔnuwo ŋu

kple wò lãmeka ɖe ame siwo gblẽa fiawo dome la ŋu o.

⁴“O Lemuel, esia menye fiawo tɔ o,

menye fiawo tɔ be woano wain o

eye menye dziɖulawo tɔ be woadzro aha sesẽ o.

⁵Ne menye nenema o la,

woamu aha aŋlɔ nu si sea gblɔ la be

eye woaxɔ ablɔɖe le ame siwo wote ɖe anyi la si.

⁶Tsɔ aha muame na ame siwo le tsɔtsrɔ̃m

kple wain na ane siwo le nuxaxa me,

⁷na woanoe aŋlɔ woƒe ahedada be

eye womagaɖo ŋku woƒe hiãtuame dzi akpɔ o.

⁸“Ƒo nu ɖe ame siwo mate ŋu aƒo nu ɖe

wo ɖokui nu o la nu eye nàʋli amemanɔsitɔwo ƒe ablɔɖe ta.

⁹Ƒo nu eye nàdrɔ̃ ʋɔnu dzɔdzɔe,

ʋli ame dahewo kple hiãtɔwo ƒe ablɔɖe ta.”

Nuwunyawo: Srɔ̃nyɔnu bubume ƒe nɔnɔme

¹⁰Ame ka akpɔ srɔ̃nyɔnu si ƒe agbe dze ame ŋu?

Exɔ asi wu adzagba.

¹¹Srɔ̃a kana ɖe edzi blibo

eye nu sia nu si ŋu asixɔxɔ le la mevena le egbɔ o.

¹²Le nyɔnu sia ƒe agbemeŋkekewo katã me la,

ehea nyui ko vɛ, ke menye vɔ̃ o.

¹³Edia ɖetifu kple avemeka

eye wòwɔa dɔ kple eƒe asiwo faa.

¹⁴Ele abe asiʋu ene

eye wòhea nuɖuɖu tso didiƒe vaa aƒee.

¹⁵Efɔna ne ŋu mekpɔ ke o,

edia nuɖuɖu na eƒe ƒometɔwo eye wòmaa dɔ na eƒe dɔlanyɔnuwo.

¹⁶Ebua ta me le agble ŋu eye wòƒlenɛ,

eɖena tso eƒe nukpɔkpɔwo me tsɔna dea waingblee.

¹⁷Ewɔa dɔ kple ŋkubiã

eye eƒe alɔwo sẽna ɖe eƒe dɔwo ŋu.

¹⁸Ekpɔa egbɔ be yeƒe asitsatsa ɖe vi geɖe

eye yeƒe akaɖi metsina le zã me o.

¹⁹Ɖetifutreti le eƒe asi me

eye wòtsɔa eƒe asibidɛwo léa ɖetitrekekee.

²⁰Eʋua asi na ame dahewo

eye wòdoa asi ɖe hiãtɔwo gbɔ.

²¹Ne snodzaɣi ɖo la,

mevɔ̃na ɖe eƒe aƒekɔ nu o

elabena wo katã tsyɔ kuntru dzĩ.

²²Elɔ̃a abadzivɔ na eƒe aba

eye wòdoa aklala biɖibiɖi ƒe awu kple awu blɔ.

²³Wodea bubu srɔ̃a ŋu le dua ƒe agbonu

ne enɔ anyigba la dzi dumegãwo dome.

²⁴Etɔa aklala biɖibiɖi ƒe awuwo dzrana

eye wòdzraa alidziblanu na asitsalawo.

²⁵Edo ŋusẽ kple bubu abe awu ene

eye ate ŋu ako ŋkeke siwo gbɔna.

²⁶Eƒoa nu kple nunya

eye nufiame anukwaretɔ le eƒe aɖe dzi.

²⁷Ekpɔa eƒe aƒekɔ ƒe nyawo gbɔ nyuie

eye meɖua kuviabolo o.

²⁸Viawo tsona yɔnɛ be yayratɔ,

nenemae srɔ̃a hã yɔnɛ, hekafunɛ be,

²⁹“ ‘Nyɔnu siwo wɔa nu ɖɔʋuwo la li fũu,

gake wò la, èƒo wo katã ta.’

³⁰Nyonyo la, beblee,

eye tugbedzedze nu hã va yina kaba;

gake woakafu nyɔnu si vɔ̃a Yehowa.

³¹Mitsɔ fetu si wòdze na la nɛ,

eye eƒe dɔwɔwɔwo ahe kafukafu vɛ nɛ

le dua ƒe agbowo nu.”