Nahum

Nahum

ƒe agbalẽ

¹Esiae nye nyagblɔɖi si Mawu ɖe fia Nyagblɔɖila Nahum, Elkositɔ, le ŋutega me tso nu si ava dzɔ ɖe Ninive dzi la ŋu, eye wòŋlɔe ɖe agbalẽ sia me.

Yehowa do dɔmedzoe ɖe Ninive ŋu

²Yehowa nye Mawu ʋãŋu kple hlɔ̃biala.

Ebiaa hlɔ̃, eye wòyɔ fũu kple dɔmedzoe.

Yehowa biaa hlɔ̃ eƒe ketɔwo,

eye wòléa dziku ɖi na eƒe futɔwo.

³Yehowa medoa dziku kaɖikaɖi o,

ŋusẽ triakɔ le esi, eye magbe tohehe na agɔdzela o.

Eƒe mɔwo to ahom kple ya sẽsewo me,

eye lilikpowoe nye eƒe afɔ ƒe ʋuʋudedi.

⁴Eblu ɖe atsiaƒu ta wòmie,

eye wòna tɔsisiwo me ƒu kplakplakpla.

Basan kple Karmel ƒe lãnyiƒe damawo zu gbegbe,

eye Lebanon ƒe ave damawo zu dzogbe.

⁵Towo ʋuʋu kpekpekpe,

eye togbɛwo lolõ gbanaa le eŋkume,

anyigba kple edzinɔlawo katã ʋuʋu le eŋkume.

⁶Ame ka ate ŋu anɔ te ɖe eƒe dziku nu?

Ame ka ate ŋu anɔ te ɖe eƒe

dɔmedzoe helĩhelĩ la nu?

Ekɔ eƒe dɔmedzoe ɖe anyi abe dzo ene,

eye agakpewo kaka le eŋkume.

⁷Yehowa nyo, elabena enye sitsoƒe le xaxa me!

Eléa be na ame si xɔa edzi sena.

⁸Ke atsrɔ̃ Ninive kple tɔɖɔɖɔ,

eye wòanya eƒe futɔwo aɖo ɖe viviti me.

⁹Nugbe ɖe sia ɖe si woɖo ɖe Yehowa ŋu la,

mana wòadze edzi o,

ke boŋ gbegblẽ mava na wo zi evelia o.

¹⁰Woabla wo ɖe ŋuve me,

woano woawo ŋutɔ ƒe wain amu,

eye woabi abe gbe ƒuƒu ene.

¹¹O Ninive, mewòe ame si ɖo nugbe ɖe Yehowa ŋu,

eye wòɖo aɖaŋu vlo na amewo la do tso.

¹²Ale Yehowa gblɔe nye esi:

“Togbɔ be wosɔ gbɔ,

eye kpeɖeŋutɔwo le wo si hã la,

wo katã woatsrɔ̃, eye wo nu ava ayi.

O Yuda, togbɔ be mede abi ŋuwò hã la,

nyemagade abi ŋuwò azɔ o.

¹³Azɔ la, maŋe kɔkuti le wò kɔ,

eye matu ka wò tso bablawo me.”

¹⁴Yehowa de se tso wò Ninive ŋuti be:

“Womayɔ wò ŋkɔ ɖe dzidzime aɖeke ŋuti o.

Mafli miaƒe aklamakpakpɛwo,

eye magbã legba siwo mieli ɖe miaƒe

mawuwo ƒe gbedoxɔ me.

Maɖe yɔdo na mi,

elabena mieganyo na naneke o.”

¹⁵Kpɔ ɖa, dɔlawo tso towo dzi gbɔna

kple nya nyui,

eye wole gbeƒã ɖem ŋutifafa!

O Yuda, ɖu wò ŋkekenyuiwo,

eye nàxe wò adzɔgbeɖefewo.

Ame vɔ̃ɖiwo magava aha wò azɔ o,

elabena woatsrɔ̃ wo keŋkeŋ.

Wogbã Ninive

¹Ninive, futɔwo ƒe asrafowo ƒo ɖe dziwò vɔ.

Kpɔ wò mɔ sẽsewo ta.

Wò ŋkuwo nenɔ mɔ la ŋu.

Mibla ali dzi sesĩe

eye miƒo aʋawɔlawo nu ƒu.

²Yehowa agbugbɔ Yakob ƒe atsyɔ̃ nɛ,

eye wòanɔ abe Israel tɔ ene.

Togbɔ be futɔwo gblẽ wò,

Yakob ƒe anyigba,

eye woha wò waingblewo hã.

³Futɔwo ƒe asrafowo ƒe akpoxɔnu biã dzẽe,

eye wodo awu dzĩ.

Tasiaɖamŋugawo le dzo dam gbe si gbe

wobla akpa na aʋawɔwɔ,

eye kalẽtɔwo le woƒe akplɔwo nyem le yame.

⁴Tasiaɖamwo le zi nyem le mɔtatawo dzi,

eye wole du ƒum le ablɔwo me le yiyim le gbɔgbɔm.

Woƒe dzedzeme le abe akakatiwo ene,

eye wole dzo kem abe dzikedzo ene.

⁵Fia la ado ɣli ayɔ eƒe aʋafiawo;

woanɔ du dzi anɔ anyi dzem,

anɔ fɔfɔm be yewoayi aɖaɖo gli sesẽwo,

ale be futɔwo mate ŋu akpɔ mɔ ava o.

⁶Agbo si le tɔsisi la nu la aʋu siaa,

eye fiasã la ƒe gliwo anye kpo, amu adze anyi.

⁷Woɖe gbe be woaɖe aboyo dua me tɔwo.

Eƒe kosiviwo anɔ xɔxlɔ̃m abe ahɔnɛ ene,

eye woanɔ akɔta ƒom.

⁸Ninive le abe ta si ƒe tsi le sisim ene.

Ne woado ɣli be:

“Mitɔ, mitɔ,”

la, ame aɖeke manye kɔ akpɔ megbe o.

⁹Miha klosalowo!

Mìha sika!

Kesinɔnuwo sɔ gbɔ fũu,

xexlẽme meli na nu xɔasi siawo o.

¹⁰Woɖi gbɔlo dua keŋkeŋ,

wohae eye woɖe amae.

Amewo ƒe dzi gbã, klowo le ƒoƒom kpakpakpa,

ameti blibo la le dzodzom nyanyanya,

eye ŋkume sia ŋkume afu tititi.

¹¹Afi ka dzatawo ƒe do la le azɔ?

Afi si wonyia dzataviwo le,

afi si dzatatsu kple dzatanɔ

kple dzatavi ɖia tsa le vɔvɔ̃manɔmee ɖe?

¹²Dzatatsu léa nu si ade viawo kple dzatanɔ nu;

etsɔa nuléleawo yɔa eƒe mlɔƒe kple eƒe dowo me fũu.

¹³Yehowa, Dziƒoʋakɔwo ƒe Aƒetɔ la gblɔ be:

“Metso ɖe ŋuwò;

matɔ dzo wò tasiaɖamwo,

eye wò dzataviwo atsi yi nu.

Nyemagblẽ ame aɖeke ɖe anyigba dzi nàgada adzoe o,

eye womagase wò ame dɔdɔwo ƒe gbe le teƒe aɖeke azɔ o.”

Baba na Ninive

¹Baba na du si yɔ fũu kple ʋukɔkɔɖi,

alakpadada kple nuhaha,

eye wògbe asiɖeɖe le nu siwo wòha la ŋu.

²Ƒu to anyi nàse ale si sɔƒokawo le gbe dom,

eye tasiaɖamwo ƒe afɔtiwo,

kple sɔwo ƒe afɔkpawo le hoo wɔm esime tasiaɖamwo

le du sim glaŋglaŋglaŋ le mɔtatawo dzi!

³Sɔdolawo dze agbo, yiwo le dzo dam,

eye akplɔwo le dzo sim le woƒe asi me!

Ame tsiaʋawo teƒe mekɔ o,

ame kukuwo sɔ gbɔ taŋtaŋtaŋ,

eye ɖewo tsi wo nɔewo dzi.

Amewo le wo dzi zɔm le anyi dzem,

le fɔfɔm; gale anyi dzem.

⁴Esiawo katã va eme ɖe gbolo ɖeka ƒe gbolowɔwɔ vivivo ta.

Ame si ble afakalawo ƒe amegã nu,

eye wòdo kluvi dukɔwo kple eƒe gbolowɔwɔ hebla amewo

kple eƒe adzewɔwɔ.

⁵Yehowa, Dziƒoʋakɔwo ƒe Aƒetɔ la gblɔ be:

“Le esia ta, metsi tsitre ɖe ŋuwò,

azɔ maɖe motsyɔvɔ le mo na wò,

mana dukɔwo nakpɔ wò amame,

eye fiaɖuƒewo nakpɔ wò ŋukpe.

⁶Malɔ gbeɖuɖɔ akɔ ɖe dziwò,

ado ŋunyɔ wò, eye nàzu nukpɔkpɔ na dukɔwo.

⁷Ame siwo katã akpɔ wò la, dzidzi aƒo wo,

eye woagbugbɔ ɖe megbe agblɔ be,

‘Ninive gbã gudugudu, ame ka afa nɛ?’

Afi ka makpɔ ame aɖe le wòafa akɔ na wò?”

⁸Wòe nyo wu Tebes, si le Nil tɔsisi to,

eye tɔ la ƒo xlãe godoa?

⁹Kus kple Egipte nye eƒe ŋusẽ triakɔ la.

Nenema ke Putitɔwo kple Libiatɔwo

nye eƒe kpeɖeŋutɔwo le aʋa me,

¹⁰gake Tebes dze anyi,

woɖe aboyo emenɔlawo, eye wotsɔ wo viwo

ƒe ta xlã ɖe kpe le mɔtatawo dzi.

Wodzidze nu ɖe eƒe bubumewo dzi,

eye wode kɔsɔkɔsɔ eƒe amegãwo katã.

¹¹Wò hã àmu aha, asi abe,

eye àdi sitsoƒe le futɔwo ta.

¹²Wò mɔ sesẽwo katã anɔ abe gboti si dzi

kutsetse ɖiɖiwo le la ene.

Ne woʋuʋu atia la,

kutsetsewo gena ɖe eɖula ƒe nu me.

¹³Kpɔ wò asrafowo ɖa,

wo katã wole abe nyɔnuwo ene.

Wò anyigba ƒe agbo anɔ ʋuʋu ɖi siaa

na wò futɔwo, eye dzo afia wò gametiwo.

¹⁴Du tsi kɔ ɖi na ɖokuiwò ɖe aʋadzegbe ŋu.

Dzra wò mɔ sesẽwo ƒe gliwo ɖo.

Ge ɖe anyiʋewo me, eye nànya anyi atsɔ tre gli gbagbãwoe.

¹⁵Esi nèle nu siawo wɔm la dzo ava fia wò;

yi alã wò aƒu anyi, eye woaɖu wò

abe ale si ʋetsuvi ɖua nui ene.

Midzi ɖe edzi abe ʋetsuviwo ene,

misɔ gbɔ ɖe edzi abe ʋetsuviwo ene.

¹⁶Èdzi wò asitsalawo ɖe edzi va se ɖe

esime wosɔ gbɔ wu ɣletiviwo,

gake ʋetsuviwo aɖu wo,

aɖi gbɔlo anyigba la, eye woadzo adzo.

¹⁷Ŋuwòdzɔlawo asɔ gbɔ abe ʋetsuviwo

ƒe ha gã aɖe ene, eye wò amegãwo asɔ gbɔ

abe ʋetra siwo dze ɖe gli ŋu

le ŋdi me, ke ne ɣe dze ko la,

woadzo adzo, eye teƒe si wonɔ la magadze o ene.

¹⁸O Asiria fia, wò kplɔlawo le akɔlɔ̃e dɔm;

wò bubumewo mlɔ anyi le dzudzɔm.

Woakaka wò amewo ɖe towo dzi,

eye ame aɖeke maƒo wo nu ƒu o.

¹⁹Naneke mate ŋu awu abi si nèxɔ la o,

elabena edzi ŋɔ ŋutɔ.

Ame sia ame si ase wò anyidzedze la,

aƒo asikpe ɖe tawò,

elabena ame kae mekpɔ gome le wò

ŋutasesẽ gbogboawo me o?