Hiob

Hiob

ƒe agbalẽ

Mawu do Hiob kpɔ

¹Ŋutsu aɖe nɔ Uznyigba dzi si ŋkɔe nye Hiob. Ŋutsu sia nye mokakamanɔŋutɔ kple ame dzɔdzɔe, evɔ̃a Mawu, eye wòtsri nu vɔ̃ɖi. ²Viŋutsu adre kple vinyɔnu etɔ̃ nɔ esi, ³kpe ɖe alẽ akpe adre (7,000), kposɔ akpe etɔ̃ (3,000), nyi siwo wode kɔkuti kɔ na woŋlɔa agblee eveve teƒe alafa atɔ̃ (500) kple tedzi alafa atɔ̃ (500) kple subɔla gbogbo aɖewo ŋu. Eyae nye ŋutsu si de ŋgɔ wu ame sia ame le ɣedzeƒetɔwo katã dome.

⁴Via ŋutsuwo ɖoa nuɖukplɔ̃ na wo xɔlɔ̃wo ɖe woƒe aƒewo me ɖe wo nɔewo yome eye wokpea wo nɔvinyɔnu etɔ̃awo be woaɖu nu ano nu kple yewo. ⁵Ne kplɔ̃ɖoɖo la dze wo dzi kpe ɖo vɔ la, Hiob dɔa ame ɖa woɖakɔa wo ŋuti. Esaa numevɔ ɖe wo dometɔ ɖe sia ɖe nu, le ŋdi kanya elabena esusuna be, “Ɖewohĩ vinyewo wɔ nu vɔ̃ eye wodo ɖiŋu na Mawu le woƒe dziwo me.” Esiae Hiob wɔna ɖaa.

Hiob ƒe dodokpɔ gbãtɔ

⁶Gbe ɖeka la, dziƒodɔlawo va be woatsɔ wo ɖokui afia Yehowa, eye Satana hã nɔ wo dome. ⁷Yehowa bia Satana be, “Afi ka nètso?”

Satana ɖo eŋu na Yehowa be, “Metso tsatsa ge le anyigba dzi, menɔ yiyim nɔ gbɔgbɔm le edzi.”

⁸Tete Yehowa bia Satana be, “Èlé ŋku ɖe nye dɔla Hiob ŋua? Ame aɖeke mele anyigba dzi de enu o; enye mokakamanɔŋutɔ kple ame dzɔdzɔe, ŋutsu si vɔ̃a Mawu eye wòtsri nu vɔ̃ɖi.”

⁹Ke Satana bia Mawu be, “Ɖe Hiob vɔ̃a Mawu dzodzroa? ¹⁰Menye wòe tɔ kpɔ ƒo xlã eya amea, eƒemetɔwo kple nu sia nu si le esi la oa? Èyra eƒe asinudɔwo ale be eƒe alẽhawo kple lãhawo gbagbã ɖe anyigba dzi. ¹¹Ke do wò asi ɖa, ne nàxlã asi ɖe nu siwo katã le esi, ekema le nyateƒe me aƒo fi ade wò le wò ŋutɔ wò ŋkume.”

¹²Yehowa gblɔ na Satana be, “Enyo ta, nu sia nu si le esi la le asiwò me, ke mègaka asibidɛ eya amea ŋutɔ ŋu o.”

Ale Satana dzo le Yehowa ŋkume.

¹³Gbe ɖeka la, esime Hiob ƒe viŋutsuwo kple via nyɔnuwo nɔ nu ɖum, nɔ wain nom le wo nɔvi tsitsitɔ ƒe aƒe me la, ¹⁴dɔla aɖe va Hiob gbɔ gblɔ nɛ be, “Nyiawo nɔ agble ŋlɔm, tedziawo nɔ gbe ɖum le wo gbɔ lɔƒo, ¹⁵kasia Sebeatɔwo va dze wo dzi kplɔ wo dzoe. Wowu dɔlawo kple yi eye nye ɖeka koe te ŋu si be mava gblɔe na wò!”

¹⁶Esi wòganɔ nu ƒom ko la, dɔla bubu va eye wògblɔ be, “Mawu ƒe dzo ge tso dziƒo eye wòfia alẽawo kple dɔlawo, nye ɖeka koe si be mava gblɔe na wò!”

¹⁷Esi mekpɔ ɖe nu le nya la me o la, dɔla bubu va gblɔ be, “Kaldeatɔwo ƒe adzoha etɔ̃ va dze wò kposɔwo dzi eye wolé wo dzoe. Wowu dɔlawo kple yi, nye ɖeka koe te ŋu si be mava gblɔe na wò!”

¹⁸Esi ame sia hã mekpɔ ɖe nu le nya si gblɔm wònɔ me o la, dɔla bubu ge ɖe eme eye wògblɔ be, “Viwò ŋutsuwo kple nyɔnuwo nɔ nu ɖum, nɔ wain nom le wo nɔvi tsitsitɔ ƒe aƒe me. ¹⁹Kasia ya sesẽ aɖe ƒo tso gbegbe va lɔ xɔ la ƒe dzogoe eneawo ɖe me. Tete xɔ la mu dze wo dzi eye woku; nye ɖeka koe te ŋu si be mava gblɔe na wò!”

²⁰Esi Hiob se esia la, etso hedze eƒe awu ʋlaya eye wòlũ eƒe taɖa. Edze klo de ta agu, ²¹hedo gbe ɖa be,

“Amamae menɔ hafi do go tso danye ƒe dɔ me,

eye amamae manɔ hafi atrɔ adzo.

Yehowae na eye Yehowae gaxɔe;

woakafu Yehowa ƒe ŋkɔ!”

²²Le esiawo katã me la, Hiob mewɔ nu vɔ̃ to fɔbubu Mawu me be ewɔ nu gbegblẽ o.

Hiob ƒe dodokpɔ evelia

¹Gbe bubu gbe la, dziƒodɔlawo va do ɖe Yehowa ŋkume eye Satana hã va do kpli wo ɖe Mawu ƒe ŋkume. ²Yehowa bia Satana be, “Afi ka nètso va do?”

Satana ɖo eŋu be, “Metso tsatsa ge le anyigba dzi eye menɔ yiyim, nɔ gbɔgbɔm le edzi.”

³Tete Yehowa bia Satana be, “Èlé ŋku ɖe nye dɔla Hiob ŋua? Ame aɖeke mele anyigba dzi de enu o, enye ame maɖifɔ kple ame dzɔdzɔe, ame si vɔ̃a Yehowa eye wòtsri vɔ̃. Togbɔ be ède adã menye ɖe eŋu be magblẽ edome esi mewɔ naneke o hã la, egalé eƒe blibodede la me ɖe asi ko.”

⁴Satana ɖo eŋu na Yehowa be, “Ŋutilã ɖe ŋutilã teƒe, ekema ame atsɔ nu sia nu si le esi la katã ana ɖe eƒe agbe ta. ⁵Do wò asi ɖa eye nàtu nu kple eƒe ŋutilã kple eƒe ƒuwo, ekema nàkpɔe ɖa be mado ɖiŋu na wò le wò ŋutɔ wò ŋkume o mahã?”

⁶Yehowa gblɔ na Satana be, “Enyo ŋutɔ. Kpɔ ɖa, ele asiwò me, gake mègaka asi eƒe agbe ya ŋu o.”

⁷Ale Satana dzo le Yehowa ŋkume hekplɔ abi vɔ̃ɖi aɖewo ƒu Hiob, tso eƒe afɔgɔme va se ɖe eƒe dzodome. ⁸Tete Hiob tsɔ ze kakɛ nɔ ŋuti kum esi wònɔ anyi ɖe afi me.

⁹Srɔ̃a va egbɔ biae be, “Ɖe nègalé wò blibodede la me ɖe asi koa? Do ɖiŋu na Mawu ne nàku!”

¹⁰Hiob ɖo eŋu nɛ be, “Èle nu ƒom abe nyɔnu bometsila ene. Ɖe míaxɔ nu nyuiwo ko tso Mawu gbɔ eye menye vɔ̃ hã oa?”

Le nu siawo katã me la, Hiob mewɔ nu vɔ̃ le eƒe nuƒoƒo me o.

Hiob xɔlɔ̃ etɔ̃awo

¹¹Esi Hiob xɔlɔ̃ etɔ̃awo, Temanitɔ Elifaz, Suhitɔ, Bildad kple Naamatitɔ, Zofar se dzɔgbevɔ̃e siwo katã dzɔ ɖe Hiob dzi la wodze mɔ tso woƒe aƒewo me le ŋkeke si woɖo ɖi la dzi be woaɖafa nɛ eye woafa akɔ nɛ. ¹²Esi wokpɔe le adzɔge la, womete ŋu dze sii o, ale wowo avi gboo kple ɣli, wodze woƒe awu ʋlayawo eye wolɔ ke kɔ ɖe tame. ¹³Ale wonɔ anyi ɖe egbɔ le anyigba ŋkeke adre kple zã adre sɔŋ. Ame aɖeke mebia nya aɖekee o elabena wokpɔ ale si wònɔ veve semii.

Hiob ƒo nu

¹Le esia megbe la, Hiob ke nu eye wòƒo fi de eƒe dzigbe. ²Egblɔ be,

³“Ŋkeke si dzi wodzim la netsrɔ̃,

nenema ke nye zã si me wogblɔ be,

‘Wodzi viŋutsu na mí!’

⁴Ŋkeke ma nezu viviti,

Mawu si le dziƒo la megatsɔ ɖeke le eme nɛ o,

kekeli aɖeke megaklẽ ɖe edzi o.

⁵Viviti kple blukɔ tsiɖitsiɖi negaxɔe,

lilikpo netsyɔ edzi eye blukɔ nedo ɖe eƒe kekeli dzi.

⁶Viviti tsiɖitsiɖi nexɔ zã ma

eye womegaxlẽe ɖe ƒea ƒe ŋkekewo me

alo woadee ɣleti aɖeke ƒe ŋkekewo me o.

⁷Zã ma netsi ko

eye dzidzɔɣli aɖeke megaɖi le eme o.

⁸Ame siwo ƒoa fi dea ŋkekewo la,

neƒo fi de ŋkeke ma,

ame siwo le klalo be

woade adã ta me na ʋɔ driba la.

⁹Eƒe ŋukeɣletiviwo nedo viviti,

kekeli si lalam wòle la megado nɛ o

eye megakpɔ fɔŋli ƒe ɣetotoe gbãtɔwo o,

¹⁰elabena metu vidzidɔ ƒe ʋɔtruwo ɖe nunye,

be nye ŋkuwo makpɔ dzɔgbevɔ̃e o.

¹¹“Nu ka ŋuti nyemeku le nye dzigbe

eye maku hafi ado tso vidzidɔ me o?

¹²Nu ka ta ata aɖewo le klalo be

woakɔm ɖe akɔ eye no aɖewo li be mano?

¹³Anye ne memlɔ anyi le ŋutifafa me,

le alɔ̃ dɔm, le ɖiɖim ɖe eme.

¹⁴Anye ne mele fiawo kple aɖaŋuɖola siwo le anyigba dzi la gbɔ,

ame siwo tu xɔ gã siwo zu aƒedo azɔ la na wo ɖokuiwo.

¹⁵Anye ne mele dziɖula siwo si sika le

eye woƒe aƒewo me yɔ fũu kple klosalo la gbɔ.

¹⁶Alo nu ka ta womeɖim ɖe tome abe fu gege ene,

abe vidzĩ si mekpɔ ɣe kpɔ o la ene o?

¹⁷Afi ma ame vɔ̃ɖiwo dzudzɔa nyanyra le

eye afi ma ame siwo nu ti kɔ na la le gbɔgbɔm ɖe eme le.

¹⁸Aʋaléleawo hã nɔa ablɔɖe me

eye womegasea dɔdzikpɔlawo ƒe ɣli o.

¹⁹Ame gblɔewo kple amegãwo siaa le afi ma

eye kluvi kpɔa ablɔɖe tso eƒe aƒetɔ ƒe asi me.

²⁰“Nu ka tae kekeli klẽna na ayaɖulawo

eye wònaa agbe luʋɔ si le nu xam?

²¹Nu ka ta wòna agbe ame siwo le ku dim,

evɔ mevana na wo o

kple ame siwo le edim vevie wu kesinɔnu si woɣla

²²kple ame siwo kpɔa dzidzɔ,

tsoa aseye ne woɖo yɔdo me?

²³Nu ka ŋutie wòna agbe ame si ƒe mɔwo le ɣaɣla

kple ame si ŋuti Mawu tɔ kpɔ ɖo?

²⁴Elabena hũɖeɖe xɔ ɖe nuɖuɖu teƒe

eye nye ŋeŋe ƒona ɖi abe tsi ene.

²⁵Nu si mevɔ̃ na la va dzinye

eye nu si dzi ŋɔ nam la dzɔ ɖe dzinye.

²⁶Nyemekpɔ ŋutifafa, tomefafa alo gbɔɖeme aɖeke o,

negbe ʋunyaʋunya ko.”

Elifaz ƒo nu

¹Tete Temanitɔ Elifaz ɖo eŋu na Hiob be,

²“Ne ame aɖe te kpɔ be yeaƒo nu kpli wò la,

ɖe nàgbɔ dzi ɖi aseea?

Ke ame kae ate ŋu azi ɖoɖoe le nu sia ŋuti?

³Bu ale si nèfia nu ame geɖewo

kple ale si nèdo ŋusẽ asi beliwoe ŋuti.

⁴Wò nyawo lé ame siwo yina anyi dze ge la ɖe te

eye nèdo ŋusẽ klo beliwo.

⁵Ke azɔ la, dzɔgbevɔ̃e va dziwò,

eye dzi ɖe le ƒo wò;

eƒo wò ƒu anyi eye nèse veve.

⁶Ɖe wò Mawuvɔvɔ̃ manye wò dzideƒo

eye wò blibodede nanye wò mɔkpɔkpɔ oa?

⁷“Azɔ bu eŋuti kpɔ.

Ame maɖifɔ ka wohe to na kpɔ?

Afi ka wogblẽ ame dzɔdzɔe dome le kpɔ?

⁸Abe ale si mede dzesii ene la,

ame siwo ŋlɔ vɔ̃ɖivɔ̃ɖi ƒe agble

eye woƒã dzɔgbevɔ̃e lae ŋenɛ.

⁹Ne Mawu gbɔ ɖe wo dzi la woyrɔna

eye ne eƒe dziku fla la wotsrɔ̃na.

¹⁰Dzatawo aɖe gbe,

axlɔ̃ sesĩe gake woate ŋu aŋe aɖu na dzataviwo.

¹¹Dzata kuna ne mekpɔ nu lé o

eye dzatanɔwo kakana.

¹²“Wotsɔ nya aɖe vɛ nam le adzame,

nye towo see wotsɔe do dalĩ nam.

¹³Le drɔ̃ewo me le zã me,

esi amewo dɔ alɔ̃ yi eme ʋĩi la,

¹⁴vɔvɔ̃ kple dzodzo nyanyanya lém

eye wona nye ƒuwo katã dzo kpekpekpe.

¹⁵Gbɔgbɔ aɖe ɖo asagba va to nye ŋkume yi

eye ɖadoe ɖo to ɖe ŋunye.

¹⁶Etɔ gake nyemate ŋu agblɔ nu si wònye o.

Nɔnɔme aɖe va tsi tsitre ɖe ŋkunye me

eye mese gbe bɔlɔe aɖe be,

¹⁷‘Ɖe ame kodzogbea anɔ dzɔdzɔe wu Mawua?

Ɖe amegbetɔ anɔ dzadzɛe wu eƒe Wɔlaa?

¹⁸Ne Mawu meka ɖe eƒe dɔlawo dzi o

eye wòbua fɔ eƒe dɔlawo be woda vo,

¹⁹ʋuu keke, ke wòahanye ame siwo le anyixɔwo me,

ame siwo gɔme woɖo anyi ɖe ke me

eye wogbãa wo bɔbɔe abe ŋɔvi ene!

²⁰Wogbãa wo gudugudu le fɔŋli kple zã dome,

ame aɖeke menyana gɔ̃ hã o,

ale wotsrɔ̃na gbidii.

²¹Ɖe womehoa woƒe agbadɔkawo, ale be

woaku numanyamanyae oa?’ ”

¹“Ne àlɔ̃ la, yɔ ame aɖe

gake ame kae atɔ na wò?

Kɔkɔetɔwo dometɔ ka ŋu nàtrɔ ɖo?

²Tosesẽ wua bometsila

eye ŋubiã wua numanyala.

³Nye ŋutɔ mekpɔ bometsila wònɔ ke tom

gake kasia woƒo fi de eƒe aƒe.

⁴Dedinɔnɔ le adzɔge ke na viawo,

wobua fɔe le ʋɔnu

eye ame aɖeke meli aʋli eta o.

⁵Dɔwuitɔwo ɖua nuku si wòxa,

woɖea esiwo tsi ŋuwo me gɔ̃ hã

eye ame siwo wum tsikɔ le la

ƒe ve me ƒuna ɖe eƒe kesinɔnuwo ŋu.

⁶Elabena fukpekpe medoa go tso ke me

alo dzɔgbevɔ̃e medona tso anyigba tume o.

⁷Gake abe ale si dzoxi dzona yia dzii ene la,

nenemae wodzi ame na hiãtuame.

⁸“Ke nenye nyee wònye la,

anye ne maɖe kuku na Mawu

atsɔ nye nya aɖo eƒe ŋkume.

⁹Ewɔa dzesi siwo gɔme womate ŋu ase o

eye wòwɔa nukunu siwo womate ŋu axlẽ o.

¹⁰Enana tsi dzana ɖe anyigba dzi,

eye wòɖoa tsi ɖe gbegbe.

¹¹Edoa ɖokuibɔbɔlawo ɖe dzi

eye wòkɔa ame siwo le nu xam la

dana ɖe dziɖeɖi me.

¹²Egblẽa ayetɔwo ƒe ɖoɖowo me,

ale be woƒe asiwo mekpɔa dzidzedze o.

¹³Eléa nunyalawo le woƒe ayemenuwɔwɔwo me

eye wòkplɔa ame drãwo ƒe nu drã wɔwɔ dzonae.

¹⁴Viviti dona ɖe wo le ŋkeke me

eye wotsaa asi blukɔ me abe zã mee ene.

¹⁵Eɖea hiãtɔwo tso yi si le woƒe nu me la me

eye wòɖea wo le ŋusẽtɔwo ƒe fego me.

¹⁶Ale mɔkpɔkpɔ ɖoa hiãtɔ si

eye nu madzɔmadzɔ miaa eƒe nu.

¹⁷“Woayra ŋutsu si Mawu ɖɔna ɖo

eya ta mègado vlo Ŋusẽkatãtɔ la ƒe amehehe o.

¹⁸Elabena edea abi ame ŋu eye wògablanɛ,

ewɔa nuvevi ame gake eƒe asi yɔa dɔ.

¹⁹Aɖe wò le dzɔgbevɔ̃e ade me

eye le adrelia me la,

vɔ̃ aɖeke mawɔ wò o.

²⁰Aɖe wò le ku ƒe asi me le dɔŋɔli eye le aʋa me la,

aɖe wò le yi ƒe asi me.

²¹Aɖe wò le aɖeɖiƒoame me,

eye màvɔ̃ ne gbegblẽ va o.

²²Wò la àko nu ne gbegblẽ kple dɔwuame le nu gblẽm

eye màvɔ̃ anyigbadzilã wɔadãwo o.

²³Elabena wò kple kpe siwo le agble me la miabla nu

eye lã wɔadãwo anɔ anyi kpli wò le ŋutifafa me.

²⁴Ànyae be wò agbadɔ le dedie

eye ne èxlẽ wò nunɔamesiwo la,

àkpɔe be ɖeke mebu o.

²⁵Ànyae be viwòwo asɔ gbɔ

eye wò dzidzimeviwo asɔ agbɔ abe

gbe mumu le anyigba dzi ene.

²⁶Ànɔ agbe wòade edeƒe,

ayi yɔ me kple dzidzɔ abe lu ye

woxa hebla le nuŋeɣi ene.

²⁷“Míedo esia kpɔ eye wònye nyateƒe.

Eya ta see ne nànɔ agbe ɖe eŋu.”

Hiob ƒe Ŋuɖoɖo

¹Tete Hiob ɖo eŋu nɛ be,

²“Ne ɖe woada nye vevesese

eye woada nye fukpekpewo ɖe nudanu me ɖe!

³Vavã woakpe wu ke si katã le ƒuta,

eya ta mewɔ nuku be nye nyawo mele ame ŋu dzem o.

⁴Ŋusẽkatãtɔ la ƒe aŋutrɔwo le nye lãme,

nye gbɔgbɔ le aɖi si le dodom le wo me la nom.

Woƒo Mawu ƒe ŋɔdzidodowo nu ƒu ɖe ŋunye.

⁵Ɖe gbetedzi xlɔ̃na ne ele gbe mumu gbɔ

alo nyi xlɔ̃na ne wotsɔ gbe ƒuƒu nɛ be wòaɖua?

⁶Ɖe woaɖu nu vɔvɔ dzemademee

alo ɖe koklozi ƒe ɣia vivinaa?

⁷Megbe be nyemaɖui o,

nuɖuɖu mawo tɔgbi ɖe wònana medzea dɔ.

⁸“O, ne ɖe woana nu si mebia lam,

ne Mawu ɖe wòana nu si mele mɔ kpɔm na lam,

⁹ne Mawu ɖe wòalɔ̃ agbãm gudugudu

eye wòaɖe ka eƒe asi ɖe dzinye, ahawum ɖe!

¹⁰Ekema esia aganye akɔfafa nam ko

kple nye dzidzɔ le vevesese si nu mele tsotsom o la me be,

nyemagbe nu le Kɔkɔetɔ la ƒe nyawo gbɔ o.

¹¹“Ŋusẽ kae gale asinye

be maganɔ mɔ kpɔm?

Mɔnukpɔkpɔ kawoe gali ta magbɔ dzi ɖi?

¹²Kpe ƒe ŋusẽe le asinyea?

Akɔblie nye nye ŋutilãa?

¹³Ɖe ŋusẽ aɖe le asinye be makpe ɖe ɖokuinye ŋu,

esi azɔ la wonya dzidzedzekpɔkpɔ ɖa le ŋunyea?

¹⁴“Ele na xɔlɔ̃wo be woakpe ɖe

ame si ƒo dzi ɖe le la ŋu

togbɔ be egbe nu le Ŋusẽkatãtɔ vɔvɔ̃ gbɔ hã.

¹⁵Ke womate ŋu aɖo dzi ɖe nɔvinye ŋutsuwo ŋu o

elabena wole abe tɔʋu si miena le kuɖiɣi ene

alo abe tɔʋu si ɖɔna gbagbana,

¹⁶ne tsikpe si le ete doe ɖe dzi,

ne sno si dza ɖe edzi la lolo

hena wòsɔ gbɔ ɖe edzi

¹⁷gake eƒe sisi nu tsona ne kuɖiɣi ɖo

eye dzoxɔxɔ nana wòmiena la ene.

¹⁸Asihawo ɖea asi le woƒe mɔwo ŋu hedzea gbe toa tagba

eye wokuna ɖe mɔ dzi.

¹⁹Asiha siwo tso Tema la le tsi dim,

asigbedela siwo tso Seba la le mɔ kpɔm.

²⁰Ke woƒe dzi tsi dzi elabena kakaɖedzi nɔ wo si hafi

gake esi wova ɖo afi ma la, ŋukpe ko woɖu.

²¹Azɔ miawo hã mieɖee fia be, mienye ŋudɔwɔnu aɖeke o,

miekpɔ nu si ŋu ŋɔdzi le eye mievɔ̃.

²²Ɖe megblɔ kpɔ be,

‘Mina nane ɖe nunye,

mixe fe ɖe tanye tso miaƒe kesinɔnuwo me,

²³miɖem le ketɔ la ƒe asi me

alo mixɔm le ŋutasẽla ƒe fegomea?’

²⁴“Mifia num eye mazi ɖoɖoe;

mifia afi si meda ƒu le lam.

²⁵Aleke nyateƒenyawo mehe venae o!

Ke nu ka miaƒe nyahehewo ɖe fia?

²⁶Ɖe miedi be yewoaɖɔ nya si megblɔ la ɖo

eye miawɔ ame si ƒo dzi ɖe le la

ƒe nyawo abe yaƒoƒo enea?

²⁷Miadzidze nu gɔ̃ hã ɖe tsyɔ̃eviwo dzi

eye miatsɔ mia xɔlɔ̃wo gɔ̃ hã aɖɔli nue.

²⁸“Azɔ la, minyo dɔ me miatrɔ mo ɖe gbɔnye,

ɖe mate ŋu ada alakpa le mia ŋkumea?

²⁹Miɖe asi, migawɔ nu madzɔmadzɔ o

migbugbɔ bu eŋuti

elabena nye nuteƒewɔwɔ ɖo xaxa me.

³⁰Ɖe vɔ̃ɖivɔ̃ɖi aɖe le nye nuyiwo dzia?

Ɖe nye nu made dzesi beble oa?”

¹“Ɖe menye dɔ sesẽ mee amegbetɔ le

le anyigba dzi oa?

Ɖe eƒe ŋkekewo mele

abe agbatetsɔla tɔ ene oa?

²Abe ale si kluvi dina be zã nedo kaba

alo agbatetsɔla kpɔa mɔ na eƒe fetu vevie ene la,

³nenemae wotsɔ ɣleti siwo me fukpekpe le

kple zã siwo me hiãtuame le la nam.

⁴Ne memlɔ anyi la, nye susu gblɔna be,

‘Ɣe ka ɣi gɔ̃e mele fɔfɔ ge?’

Zã didina eye meƒoa togotogoe

le aba dzi va se ɖe fɔŋli.

⁵Nye ŋutilã dze abi kple nyẽ helé dzɔbu

eye nye ŋutigbalẽ wó gblogblogblo hele tsi ƒaƒã tsyɔm.

⁶“Nye ŋkekewo le du ɖim wu avɔlɔ̃ʋu

eye wowua enu mɔkpɔkpɔmanɔmee.

⁷O Mawu, ɖo ŋku edzi be,

nye agbe la, ƒuƒu ko wònye,

nye ŋkuwo magakpɔ dzidzɔŋkekewo akpɔ o.

⁸Ŋku si le kpɔyem fifia la magakpɔm akpɔ o,

miadim eye nyemanɔ anyi o.

⁹Abe ale si lilikpo buna eye enu va yinae ene la,

nenemae ame si yi tsiẽƒe la megagbɔna o.

¹⁰Magatrɔ ava eƒe aƒe me akpɔ o,

eye eƒe nɔƒe hã magadze sii o.

¹¹“Eya ta nyemazi ɖoɖoe o,

maƒo nu tso nye gbɔgbɔ ƒe vevesese me,

eye mafa konyi le nye luʋɔ ƒe nuxaxa me.

¹²Nyee nye atsiaƒu alo lã dziŋɔ si le atsiaƒu ƒe gogloƒe be,

nèɖe dzɔlawo ɖo ŋunyea?

¹³Ne mebu be nye aba afa akɔ nam

eye suɖi aɖe nye konyifafa dzi akpɔtɔ la,

¹⁴ekema ètsɔa drɔ̃ewo doa vɔvɔ̃ nam

eye nètsɔa ŋutegawo doa ŋɔdzi nam.

¹⁵Ale be melɔ̃ kudɔƒoƒo

kple ku wu nye ŋutilã sia.

¹⁶Menyɔ ŋu nye agbe,

nyemanɔ agbe ɖaa o.

Ɖe asi le ŋunye,

viɖe mele nye ŋkekewo ŋu o.

¹⁷“Nu kae nye amegbetɔ be nèdo kɔkɔe alea,

be nètsɔ ɖe le eme nɛ nenema gbegbe,

¹⁸be nèléa ŋku ɖe eŋu ŋdi sia ŋdi

eye nèdonɛ kpɔ aɖabaƒoƒo ɖe sia ɖe?

¹⁹Ɖe màgaɖe ŋku ɖa le ŋunye

alo ana gbɔdzɔem aɖabaƒoƒo ɖeka hɔ̃ɔ gɔ̃ hã oa?

²⁰Ne mewɔ nu vɔ̃ ɖe, O amegbetɔwo ŋu dzɔla,

nu ka mehewɔ ɖe ŋutiwò?

Nu ka ŋuti nède dzesim heɖe ŋku tɔm ale?

Ɖe mezu agba ɖe dziwòa?

²¹Nu ka ta mèɖe ŋku ɖa le nye dzidadawo ŋu

eye mètsɔ nye nu vɔ̃wo kem o?

Elabena esusɔ vie mamlɔ ke me,

àdim gake nyemaganɔ anyii o.”

Bildad ƒo nu

¹Tete Suhitɔ, Bildad ɖo nya ŋu na Hiob be,

²“Va se ɖe ɣe ka ɣie nànɔ nya siawo gblɔm?

Wò nyawo nye yaƒoƒo sesẽ ɖeɖe ko.

³Ɖe Mawu atso afia ŋkunɔa?

Ɖe Ŋusẽkatãtɔ la atrɔ nya dzɔdzɔe abua?

⁴Esi viwòwo wɔ nu vɔ̃ ɖe eŋu la,

etsɔ wo de asi na tohehe si woƒe nu vɔ̃ dze na.

⁵Gake ne àkpɔ Mawu dzi ɖa,

aƒo koko na Ŋusẽkatãtɔ la,

⁶ekema ne èle dzadzɛe,

le dzɔdzɔe, fifia gɔ̃ hã la,

atso le tawò eye wòagaɖo wò te,

ada wò ɖe teƒe si wòle be nànɔ.

⁷Wò gɔmedzedze anɔ sue

gake emegbe àdzi asɔ gbɔ ɖe edzi.

⁸“Bia dzidzime siwo do ŋgɔ,

eye nàkpɔe ɖa be nu ka wo fofowo srɔ̃ mahã,

⁹elabena míawo la, etsɔviwo míenye, míenya naneke o

eye míaƒe ŋkekewo le anyigba dzi le abe vɔvɔli ko ene.

¹⁰Ɖe womafia nu wò, agblɔe na wò oa?

Ɖe womagblɔ nya na wò tso woƒe gɔmesese me oa?

¹¹Ɖe keti miena, tsina ƒlaluu ɖe teƒe si sii mele oa?

Ɖe aƒla awɔ nyuie ne mekpɔ tsi oa?

¹²Esi wogale mumu ko eye womeɖo sisi me haɖe o

la, woyrɔna kaba wu gbe si le gbedzi.

¹³Aleae wòvaa emee na ame siwo katã ŋlɔ Mawu be

eye nenemae Mawumavɔ̃lawo ƒe mɔkpɔkpɔ tsrɔ̃nae.

¹⁴Nu si ŋu wòɖo dzi ɖo la meɖo ŋusẽ o

eye nu si wòde mee la nye yiyiɖɔ.

¹⁵Ede me eƒe ɖɔ eye wòlã, eku ɖe eŋu,

gake etso ɖe eƒe asi me.

¹⁶Ɖeko wòle abe ati si wode tsii nyuie le ŋdɔgbe ene

ekekea eƒe alɔwo ɖe abɔa me,

¹⁷eƒe kewo blana ɖe agakpe geɖewo ŋu

eye wodia teƒe le kpewo dome.

¹⁸Gake ne wohoe le enɔƒe la,

teƒe la gbea nu le egbɔ eye wògblɔna be,

‘Nyemekpɔ wò kpɔ o.’

¹⁹Vavã eƒe agbe yrɔna

eye atiku bubuwo miena ɖe eteƒe.

²⁰“Enye nyateƒe be Mawu megbea ame si ŋu fɔɖiɖi mele o

alo doa ŋusẽ nu vɔ̃ɖi wɔlawo ƒe asi o.

²¹Ke hã la, agana nukoko nayɔ wò nu me fũu,

eye wòatsɔ dzidzɔɣli ayɔ wò nuyiwo nu.

²²Ŋukpe alé wò futɔwo eye ame vɔ̃ɖiwo

ƒe agbadɔwo maganɔ anyi o.”

Tete Hiob ƒo nu

¹Hiob ɖo eŋu nɛ gblɔ be,

²“Vavã menya be esia nye nyateƒe,

gake aleke amegbetɔ kodzogbea

anɔ dzɔdzɔe le Mawu ŋkumee?

³Togbɔ be anye ame ƒe didi be

yeahe nya kplii hã la,

mate ŋu aɖo nya ɖeka pɛ hã ŋu

nɛ le nya akpe dome o.

⁴Eƒe nunya de to, eƒe ŋusẽ keke ta,

ame kae tso ɖe eŋu kpɔ gbe abixɔxɔ?

⁵Emli towo ɖa gake womenya o

eye wòtrɔ wo bu anyi le eƒe dziku me.

⁶Eʋuʋu anyigba le enɔƒe eye wòna

eƒe sɔtiwo ʋuʋu kpekpekpe.

⁷Eƒoa nu na ɣe eye meklẽna o,

etsɔa nu xea ɣletiviwo ŋkume

ale be womeklẽna o.

⁸Eya ɖekae keke dziƒowo me

eye wòzɔa ƒutsotsoewo dzi.

⁹Eyae wɔ ɣletivi siwo woyɔna be,

Avutɔ, Koklovinɔ kple Atifieŋu

kple dzieheɣletiviwo.

¹⁰Ewɔ nu dzɔtsu siwo me dzodzro meli o

eye wòwɔ nukunu siwo mele xexlẽme o.

¹¹Ne eva to ŋunye yi la, nyemate ŋu akpɔe o,

ne etso eme va yi la, nyemate ŋu adze sii o.

¹²Ne exɔ nu le ame si sesẽtɔe la,

ame kae ate ŋu aɖo asi edzi?

Ame kae ate ŋu agblɔ nɛ be,

‘Nu kae nye ema wɔm nèle?’

¹³Mawu meɖoa asi eƒe dziku dzi o,

Rahab ƒe aʋakɔwo gɔ̃ hã bɔbɔ ɖe eƒe afɔ te.

¹⁴“Eya ta aleke nye ya mate ŋu aɖe ɖeklemie?

Afi ka makpɔ nyawo le atsɔ ahe nya kplii?

¹⁵Togbɔ be nyemedze agɔ o hã la,

nyemate ŋu aɖo nya ŋu nɛ o.

Kuku ko mate ŋu aɖe na nye Ʋɔnudrɔ̃la be

wòakpɔ nublanui nam.

¹⁶Ne meyɔe eye wòtɔ nam gɔ̃ hã la,

nyemebu be aɖo tom o.

¹⁷Atsɔ ahomya agbãm gudugudu

eye wòadzi nye abiwo ɖe edzi dzodzro.

¹⁸Maɖe mɔ nam be magakpɔ gbɔdzɔe o,

ke boŋ ana vevesese nakpɔ ŋusẽ ɖe dzinye.

¹⁹Ne ŋusẽ ƒe nya wònye la, kpɔ ɖa,

ŋusẽtɔe wònye!

Ke ne enye ʋɔnudɔdrɔ̃ ƒe nya la,

ame kae akplɔe ayi ʋɔnui?

²⁰Ne nyemeɖi fɔ o gɔ̃ hã la, nye nu abu fɔm,

eye ne nyemedze agɔ o hã la, abu fɔm.

²¹“Togbɔ be nyemeɖi fɔ o hã la,

nyemetsɔ ɖeke le eme na ɖokuinye o

eye medo vlo nye ŋutɔ nye agbe.

²²Wo katã le ɖeka eya ta megblɔ be,

‘Etsrɔ̃a ame maɖifɔ kple ame vɔ̃ɖi la siaa.’

²³Ne ameƒoti he ku vɛ kpata la,

eɖea alɔme le ame maɖifɔ ƒe mɔkpɔkpɔ bubu ŋuti.

²⁴Ne anyigba aɖe ge ɖe ame vɔ̃ɖi ƒe asi me la,

ekema etsyɔa nu mo na eƒe ʋɔnudrɔ̃lawo.

Ne menye eyae o ɖe, ekema ame kae?

²⁵“Nye ŋkekewo le du ɖim wu duƒula,

wodzo dzo kabakaba dzidzɔ aɖeke manɔmee.

²⁶Wozɔ mii va yi abe aƒlaʋuwo ene

eye abe hɔ̃woe de agba anyi be

yewoaƒo nu le anyigba ene.

²⁷Ne megblɔ be, ‘Maŋlɔ nye konyifafa be

eye madzudzɔ adãɖoɖo, aɖo nukomo la,’

²⁸ekema nye fukpekpewo katã doa ŋɔdzi nam

elabena menyae be màbum fɔmaɖilae o.

²⁹Esi wobum fɔɖilae xoxo ɖe,

nu ka tae maganɔ ʋiʋlim dzodzro?

³⁰Ne mele tsi kple tsiledzalẽ

eye metsɔ nunyadzalẽ klɔ asi gɔ̃ hã la,

³¹aganyrɔm ɖe anyiʋe me,

ale be manyɔ ŋu na nye awuwo gɔ̃ hã.

³²“Menye amee wònye abe nye ene ne maɖo nya ŋu nɛ,

be makplɔe ayi ʋɔnui ahe nya kplii o.

³³Ne ame aɖe ɖe wòli aƒo nu le mía dome,

ada asi ɖe mí ame evea dzi

³⁴ame si aɖe Mawu ƒe ameƒoti ɖa le ŋutinye,

ale be eƒe ŋɔdzi magado vɔvɔ̃ nam o la, ne anyo.

³⁵Ekema maƒo nu na eya amea mavɔmavɔ̃e,

gake abe ale si wòle nam fifia ene la, nyemate ŋui o.”

¹“Nye agbe le ŋu nyɔm na nye ŋutɔ,

eya ta maɖe asi le nye konyifafa ŋu wòado bababa

eye maƒo nu le nye luʋɔ ƒe vevesese me.

²Magblɔ na Mawu be, ‘Mègabu fɔm o

gake gblɔ nu siwo nye nya nètsɔ ɖe ŋutinye la nam.

³Ɖe wòle nuwò vivim be yele teyem ɖe to,

be nètsɔ wò asinudɔwɔwɔ ƒu gbe

eye nèle alɔgbɔnu kom na ame vɔ̃ɖiwo ƒe ɖoɖowoa?

⁴Ŋutilãmeŋkue le tawòa?

Ɖe nèkpɔa nu abe ale si amegbetɔ

kodzogbea kpɔa nu enea?

⁵Ɖe wò ŋkekewo le abe kodzogbeawo tɔ ene

alo wò ƒewo le abe amegbetɔ tɔ ene,

⁶be nàtsa adi nye vodadawo,

aku nye nu vɔ̃wo gɔme,

⁷evɔ nènya be nyemedze agɔ o

eye ame aɖeke mate ŋu axɔm le wò asi me oa?

⁸“ ‘Wò asiwoe wɔm eye womem.

Ɖe nàtrɔ azɔ atsrɔ̃ma?

⁹Ɖo ŋku edzi be anyie nètsɔ mem.

Ɖe nàgatrɔm azɔ mazu anyia?

¹⁰Ɖe mètrɔm kɔ ɖe anyi abe notsi ene

eye nèna mebla abe notsi babla ene oa?

¹¹Ɖe mèfa ayi kple lãkusi ɖe ŋunye

eye nètem ƒo ƒu ɖe nye ƒuwo

kple lãmekawo ŋuti oa?

¹²Èna agbem henyo dɔ me nam

eye le wò ametakpɔkpɔ la ta nèdzɔ nye gbɔgbɔ ŋuti.

¹³“ ‘Ke esiae nèɣla ɖe wò dzi me

eye menya be esia le wò susu me be,

¹⁴Ne mewɔ nu vɔ̃ la,

wò ŋkuwo anɔ ŋutinye

eye màgbe tohehe nam

le nye vodada ta o.

¹⁵Ne meɖi fɔ la, baba nam!

Ne nyemeɖi fɔ o gɔ̃ hã la,

nyemate ŋu afɔ mo dzi o

elabena ŋukpe yɔ menye fũu

eye menyrɔ ɖe nye vevesese me.

¹⁶Ne mefɔ mo dzi la,

ekema èɖeam ɖe nu abe dzata ene

eye nèɖea wò ŋusẽ dziŋɔ la

fiana ɖe ŋutinye.

¹⁷Èɖoa ɖasefo bubuwo ŋunye

eye nèdoa dziku ɖe ŋutinye ɖe edzi,

ale wò aʋakɔwo tsona ɖe ŋunye ɖe

wo nɔewo yome abe ƒutsotsoewo ene.

¹⁸“ ‘Ke nu ka ŋuti nèna medo tso danye ƒe dɔ me?

Ɖe meku ɖe danye ƒe dɔ me la,

adzɔ dzi nam ŋutɔ,

anye ne ŋku aɖeke mekpɔm o.

¹⁹Ɖe nyemedzɔ o alo wokɔm tso danye

ƒe dɔ me yi yɔdo mee la, ne enyo ta!

²⁰Ɖe nye ŋkeke ʋɛawo mewu nu kloe vɔ oa?

Ɖe mo ɖa le ŋunye ale be nye hã makpɔ dzidzɔ vi aɖe,

²¹hafi ayi demagbɔnugbe,

ne mayi ɖe viviti kple blukɔ ƒe anyigba dzi,

²²anyigba si dzi zã do blukɔ kpekpekpe le,

teƒe si nye blukɔ tsiɖitsiɖi kple tɔtɔ teƒe,

afi si kekeli le ko abe viviti ene.’ ”

Zofar ƒo nu

¹Naamatitɔ, Zofar ɖo eŋu na Hiob be,

²“Ɖe woagbe nya siawo ŋu ɖoɖo na wòa?

Ɖe woabe nyawɔla sia tɔ dzɔa?

³Ɖe wò nya dzodzro siawo ade ga nu na amewoa?

Ɖe ame aɖeke meli aka mo na wò ne èle fewu ɖum oa?

⁴Ègblɔ na Mawu be

‘Kpɔtsɔtsɔ mele nu siwo dzi mexɔ se la ŋu o

eye medza le ŋkuwòme.’

⁵O, aleke medi be Mawu naƒo nu,

ne wòake eƒe nuyiwo ɖe ŋutiwò,

⁶ne wòaɖe nunya ƒe nu ɣaɣlawo afia wò

elabena mo evee li na nunya.

Vavã, nya esia be:

Mawu ŋlɔ wò nu vɔ̃wo dometɔ aɖewo be gɔ̃ hã.

⁷“Àte ŋu ase Mawu ƒe nya goglowo gɔmea?

Àte ŋu adzro Ŋusẽkatãtɔ la ƒe mlɔenuwo ke mea?

⁸Wokɔkɔ wu dziƒowo, nu ka nàte ŋu awɔ?

Wogoglo wu tsiẽƒe ƒe gogloƒewo, nu ka nènya?

⁹Wodidi wu anyigba eye wokeke wu atsiaƒu.

¹⁰Ke ne eva do, hede wò gaxɔ me eye wòdrɔ̃ ʋɔnu wò la,

ame ka ate ŋu atsi tsitre ɖe eŋu?

¹¹Vavã enyaa alakpatɔwo eye ne ekpɔ nu vɔ̃ɖi la,

ɖe medzea sii oa?

¹²Gake abe ale si gbetedzi mate ŋu

adzi vi wòanye amegbetɔ o ene la,

nenema kee womate ŋu

awɔ bometsila hã wòazu nunyala o.

¹³“Ke hã la, ne ètsɔ wò dzi nɛ blibo,

ne èwu wò asiwo dzi do ɖe egbɔ,

¹⁴ne èɖe nu vɔ̃ siwo le wò asi me la ɖa

eye ne mèɖe mɔ na nu vɔ̃ɖi aɖeke be

wòanɔ wò agbadɔ me o la,

¹⁵ekema àkɔ wò mo dzi ŋukpemanɔmee,

ànɔ te sesĩe eye mavɔ̃ o.

¹⁶Le nyateƒe me la, àŋlɔ wò hiãkame be

eye àɖo ŋku edzi ko abe tsi sisi si nu va yi la ene.

¹⁷Wò agbe me akɔ wu ŋdɔkutsu dzati

eye viviti anɔ na wò abe ŋdikekeli ene.

¹⁸Ànɔ dedie elabena mɔkpɔkpɔ li,

àtsa ŋku godoo eye àmlɔ anyi bɔkɔɔ le dedinɔnɔ me.

¹⁹Àmlɔ anyi eye ame aɖeke mava do ŋɔdzi na wò o;

ale ame geɖewo ava bia amenuveve tso gbɔwò.

²⁰Ke ɖeɖi ate ame vɔ̃ɖiwo ƒe ŋkuwo ŋu,

bebeƒe abu ɖe wo

eye woƒe mɔkpɔkpɔ azu kudɔƒoƒo.”

Hiob ƒo nu

¹Tete Hiob ɖo eŋu nɛ be,

²“Mewɔ nuku be miawo koe nye amewo

eye ne mieku la nunya aku kpli mi o!

³Gake susu le asinye abe miawo ke ene.

Mienyo wum o.

Ame ka menya nu siawo katã o?

⁴“Togbɔ be meyɔ Mawu eye wòtɔ nam hã la,

mezu nu ɖikokoe na xɔ̃nyewo.

Togbɔ be mele dzɔdzɔe eye fɔɖiɖi mele ŋunye o hã la,

mezu alɔmeɖenu na wo!

⁵Ŋutsu siwo li le dziɖeɖi me la do vlo dzɔgbevɔ̃etɔ

eye nenema ke woawɔ na ame siwo ƒe afɔ ɖiɖi.

⁶Adzohawo ƒe agbadɔwo li le ŋutifafa me

eye ame siwo do dziku na Mawu la li le dedinɔnɔ me.

Nenema kee nye ame siwo tsɔa woƒe mawu

ɖe woƒe asi me.

⁷“Ke bia gbemelãwo, ne woafia nu wò alo dziƒoxeviwo,

ne woagblɔe na wò.

⁸Alo ƒo nu na anyigba,

ne wòafia nu wò alo na atsiaƒumelã ne wòaka eta na wò.

⁹Nu siawo katã dometɔ kae menyae be,

Yehowa ƒe asie wɔ esiawo katã o?

¹⁰Nuwɔwɔ ɖe sia ɖe ƒe agbe le eƒe asi me

eye amegbetɔwo katã ƒe gbɔgbɔ hã le eƒe asi me.

¹¹Ɖe to medoa nyawo kpɔ

abe ale si aɖe ɖɔa nuɖuɖu kpɔe ene oa?

¹²Ɖe menye amegãɖeɖiwo gbɔe nunya tso aƒe ɖo oa?

Ɖe agbe didi mehea gɔmesese vɛ oa?

¹³“Mawu tɔe nye nunya kple ŋusẽ;

aɖaŋudede kple gɔmesese hã nye etɔ.

¹⁴Nu si wògbã kɔ ɖi la,

womagate ŋu agbugbɔ atui o.

Ame si wòde gaxɔ me la,

womate ŋu aɖe asi le eŋu o.

¹⁵Ne eɖo asi tsidzadza dzi la, ku ɖina,

ne egaɖe asi le eŋu fũu hã la, eɖea anyigba

¹⁶Etɔe nye ŋusẽ kple dziɖuɖu,

ame si woble kple ameblela katã wonye etɔ.

¹⁷Ekplɔa dumegãwo dzonae amama

eye wònana Ʋɔnudrɔ̃lawo zua bometsilawo.

¹⁸Eɖea atsyɔ̃ɖonu siwo fiawo dona la ɖa

eye wòtsɔa avɔ kakɛ sana ɖe ali na wo.

¹⁹Ekplɔa nunɔlawo dzonae amama

eye ame siwo li ke tso gbe aɖe gbe

ke la emua wo ƒua anyi.

²⁰Edea ga nu na aɖaŋuɖola siwo ŋu woɖoa dzi ɖo

eye wòɖea dumegãwo ƒe sidzedze ɖa.

²¹Edoa ŋunyɔ bubumewo

eye wòxɔa lãnu le kalẽtɔwo si.

²²Eɖea nu goglo siwo le viviti me la ɖe go

eye wòhea blukɔ tsiɖitsiɖi vaa kekeli me.

²³Eyae naa dukɔwo xɔa ŋkɔ

eye eya kee tsrɔ̃a wo.

Eyae dzia dukɔwo ɖe edzi

eye eya kee kakaa wo.

²⁴Exɔa susu le anyigbadzifiawo si

eye wònana wonɔa tsaglalã tsam le gbegbe.

²⁵Wotsaa asi blukɔ me afi si akaɖi mele o

eye wònana wonɔa ya mum abe ame siwo mu aha ene.”

¹“Nye ŋkuwo kpɔ nu siawo katã,

nye towo se wo eye wose wo gɔme.

²Nu si nènya la, nye hã menyae,

mède ŋgɔ wum o.

³Gake medi vevie be maƒo nu kple Ŋusẽkatãtɔ la

eye mahe nya kple Mawu.

⁴Ke miawo la, miele ŋunye gblẽm kple aʋatsonyawo,

mi katã mienye gbedala siwo ŋu viɖe aɖeke mele o!

⁵Ne mi katã miahaɖo to ɖe!

Le mia gbɔ la, esia anye nunya.

⁶Mise ɖokuinyenuɖeɖe azɔ,

mise nye nuyiwo ƒe kokoƒoƒo.

⁷Ɖe miaƒo nu baɖa ɖe Mawu nua?

Ɖe miaƒo nu bebletɔe ɖe enua?

⁸Ɖe miebe yewoade edzia?

Ɖe miebe yewoaxɔ nya ɖe Mawu nua?

⁹Anyo na mi ne edo mi kpɔa?

Miate ŋu ablee abe ale si miable amewo enea?

¹⁰Le nyateƒe me, aka mo na mi,

ne miede edzi le adzame.

¹¹Ɖe eƒe ŋutikɔkɔe mado ŋɔdzi na mi oa?

Ɖe eƒe ŋɔdzi malé mi oa?

¹²Miaƒe nya tsitsiwo nye lododo gbɔlowo

eye dedinɔnɔ ƒe gli siwo mieɖo la nye anyigliwo ko.

¹³“Mizi ɖoɖoe ne miana mɔm maƒo nu,

ekema nu si be yeadzɔ ɖe dzinye la nedzɔ.

¹⁴Nu ka ŋuti metsɔ ɖokuinye de xaxa me

eye metsɔ nye agbe ɖo nye asiƒome?

¹⁵Togbɔ be ele wu ye ge hã la,

matsɔ nye mɔkpɔkpɔ ada ɖe eya amea dzi ko.

Le nyateƒe me maʋu go

nye mɔwo ɖe ŋkume nɛ.

¹⁶Vavã esia ava zu ɖeɖe nam

elabena mawumavɔ̃la aɖeke mate kpɔ be yeado ɖe eŋkume o!

¹⁷Miɖo to miase nye nyawo nyuie,

miƒu to anyi miase nu si gblɔ ge mele.

¹⁸Azɔ meɖo nye nyawo ɖe ɖoɖo nu vɔ,

menya be tɔnye adzɔ godoo.

¹⁹Ɖe ame aɖe ate ŋu atsɔ nya ɖe ŋunyea?

Ne ame aɖe ate ŋui la, ekema mazi ɖoɖoe aku.

²⁰“O Mawu, nu eve siawo ko medi be nàwɔ nam,

eye nyemaɣla ɖokuinye ɖe wò o.

²¹Te wò asi ɖa xaa tso gbɔnye eye nàdzudzɔ vɔvɔ̃dodo nam

kple wò ŋɔdzinuwo.

²²Ekema yɔm eye matɔ alo maƒo nu

eye nàɖo eŋu.

²³Nu vɔ̃ kple nu gbegblẽ nenie mewɔ?

Ɖe nye vodada kple nu vɔ̃ fiam.

²⁴Nu ka tae nèɣla wò mo

eye nèbum wò futɔe?

²⁵Ɖe nàwɔ funyafunya aŋgba si ya lɔ ɖe nua?

Ɖe nàti atsa yomea?

²⁶Elabena èŋlɔ nu vɔ̃ɖiwo ɖi ɖe ŋunye

eye nèna nye ɖekakpuimenu vɔ̃wo va dzinye.

²⁷Ède gakɔsɔkɔsɔ nye afɔwo,

wò ŋkuwo le nye toƒewo katã ŋu

eye nède dzesi nye afɔƒome.

²⁸“Ale mevɔ le eme abe nu si ƒaƒã

alo avɔ si gbagblaʋui ɖu la ene.”

¹“Amegbetɔ si nyɔnu dzi ƒe agbemeŋkekewo le kpuie

eye woyɔ fũu kple fukpekpe.

²Ekena abe seƒoƒo ene eye wòyrɔna,

ele abe vɔvɔli si dzona kaba eye metɔna ɖi o la ene.

³Ɖe nàke ŋku ɖe esia tɔgbi ŋua?

Ɖe nàkplɔe va ʋɔnui le ŋkuwòmea?

⁴Ame ka ate ŋu aɖe nu dzadzɛ tso nu si medza o la me?

Ɖeka pɛ teti hã o!

⁵Èɖo ame ƒe ŋkekewo ɖi xoxo;

èɖo eƒe ɣletiwo da ɖi eye nèɖo liƒo

siwo dzi mate ŋu agbɔ o la ɖi nɛ.

⁶Eya ta ɖe ŋku ɖa le eŋu

eye nàɖe asi le eŋu va se ɖe esime

eƒe ɣeyiɣi de abe agbatedɔwɔla ene.

⁷“Mɔkpɔkpɔ li na ati gɔ̃ hã, ne wolãe la,

egadzena yeyee eye eƒe alɔ yeyeawo nu matsi o.

⁸Eƒe kewo anya do xoxo ɖe tome

eye eƒe takpo aku ɖe tome,

⁹ke hã la, ne tsi nya ʋẽ ɖee ko la, egadzena

eye wòtoa alɔwo abe ati si wodo ene.

¹⁰Gake ne amegbetɔ ya ku la,

wotsɔnɛ mlɔa anyie kpoo nenema;

egbɔa eƒe gbɔgbɔ mamlɛa eye meganɔa agbe o.

¹¹Abe ale si atsiaƒu ɖia ke alo tsi miena

le tɔsisi me wòƒuna kplakplakpla ene la,

¹²nenemae amegbetɔ mlɔa anyie eye megafɔna o

va se ɖe esime dziƒo nu ava yi.

Amegbetɔwo magafɔ alo anyɔ tso woƒe alɔ̃dɔdɔ me o.

¹³“O, ne ɖe nàɣlam ɖe yɔdo me,

atsyɔ nu dzinye va se ɖe

esime wò dziku nu va yi ɖe!

Alo nàɖo ɣeyiɣi nam

eye emegbe nàɖo ŋku dzinye ɖe!

¹⁴Ne ame ku la, ɖe wòaganɔ agbea?

Le nye ɣeyiɣi sesẽwo me hã,

manɔ nye yeyewɔwɔ ƒe ŋkeke la lalam.

¹⁵Àyɔm eye matɔ, wò dzi alé dzo ɖe nu

si wò asiwo wɔ la ŋu.

¹⁶Ekema àxlẽ nye afɔɖeɖewo,

ke menye be wò ŋku nanɔ nye nu vɔ̃wo ŋu o.

¹⁷Woatre nye dzidadawo nu ɖe akplo me

eye àtsyɔ nu nye nu vɔ̃wo dzi.

¹⁸“Gake abe ale si ke ɖena le to te wòŋena dzea eme

eye agakpe ʋãna le eteƒe ene la,

¹⁹abe ale si tsi nyia kpewoe

eye tsidzadza kplɔa ke si le anyigba dzonae ene la,

nenemae nègblẽa ame ƒe mɔkpɔkpɔ mee.

²⁰Èdzea edzi kple ŋusẽ zi ɖeka

eye ɖe wòvɔnae nye ekema;

ètrɔa eƒe dzedzeme henyanɛ dzonae.

²¹Ne wode bubu via ŋutsuwo ŋu hã la, menyanɛ o,

ne woɖi gbɔ̃ wo hã la, mekpɔnɛ o.

²²Negbe eya ŋutɔ ƒe veve si sem wòle le ŋutilã me koe

eye eya ŋutɔ fana na eɖokui.”

Elifaz ƒo nu

¹Temanitɔ, Elifaz ɖo Hiob ƒe nyawo ŋu be,

²“Ɖe nunyala aɖo nya ŋu kple susu gbɔlo

alo ana ɣedzeƒeya xɔdzo nayɔ eƒe dɔ mea?

³Ɖe wòatsɔ nya manyatalenuwo ahe nya

alo atsɔ nuƒoƒo si nye nya dzodzro ahe nyaea?

⁴Kura gɔ̃ hã la, èɖi gbɔ̃ mawuvɔvɔ̃

eye nèhe mawusubɔsubɔ adodoea ɖe megbe.

⁵Wò nu vɔ̃e ƒoe

ɖe nuwò ale nètia ayetɔwo ƒe aɖe.

⁶Wò ŋutɔ wò nue bu fɔ wò, menye tɔnyee o,

eye wò ŋutɔ wò nuyiwoe ɖu ɖasefo ɖe ŋuwò.

⁷“Wòe nye ame gbãtɔ si wodzi kpɔa?

Ɖe wodzi wò hafi togbɛwo va dzɔa?

⁸Èse Mawu ƒe aɖaŋudede kple toa?

Gbɔwò ko nunya tso aƒe ɖoa?

⁹Nu ka nènya si míawo ya míenya o?

Nu ka gɔmee nèse esi gɔme míawo míese o?

¹⁰Ta ƒowɔ tɔwo kple amegãɖeɖiwo le mía dzi,

ame siwo tsi wu fofowò gɔ̃ hã.

¹¹Ɖe Mawu ƒe akɔfanamenya siwo wògblɔ bɔlɔɔ la,

mesɔ agbɔ na wò oa?

¹²Nu ka ŋuti wò dzi kplɔ wò dzoe,

wò ŋkuwo le dzo dam,

¹³ale be nènyɔ wò dziku ɖe Mawu ŋu

eye nètrɔ nya siawo kɔ ɖi tso wò nu me?

¹⁴“Nu kae nye amegbetɔ be,

wòadza alo ame si nyɔnu dzi la be wòanɔ dzɔdzɔe?

¹⁵Ne Mawu meka ɖe eƒe kɔkɔetɔwo dzi o

eye dziƒowo gɔ̃ hã medza le eƒe ŋkume o,

¹⁶aleke wòahanye amegbetɔ si nye aɖi,

esi dovo eye wòno nu vɔ̃ɖi abe tsi ene!

¹⁷“Ɖo tom ne maɖe nu me na wò;

na magblɔ nu si teƒe mekpɔ la na wò,

¹⁸nu si nunyalawo ɖe gbeƒãe

eye womeɣla naneke si woxɔ tso wo fofowo gbɔ o,

¹⁹ame siwo ko wotsɔ anyigba la na,

esi amedzro aɖeke meto wo dome o.

²⁰Ame vɔ̃ɖi kpea fuwo ƒe fu le

eƒe agbemeŋkekewo katã me,

nenema ke ŋutasẽla hã kpea fu le ƒe

siwo katã woɖo ɖi nɛ la me.

²¹Gbeɖiɖi siwo ŋu ŋɔdzi le la yɔ eƒe tome fũu

eye ne wòdze abe nuwo ɖe wole afɔ tsɔm ene la,

adzohawo va dzea edzi.

²²Dzi ɖe le eƒo be mate ŋu asi le viviti la nu o

elabena wotsɔe de asi na yi.

²³Ele tsaglalã tsam le nuɖuɖu dim abe akaga ene

elabena enya be vivitidogbe la tu aƒe kpokploe.

²⁴Xaxa kple vevesese na ŋɔdzi lé eya amea ŋutɔ

eye wova dze edzi abe fia si le klalo na aʋakpekpe ene.

²⁵Elabena eŋlɔ kɔ do ɖe mo na Mawu

eye wòdze aglã ɖe Ŋusẽkatãtɔ la ŋu,

²⁶helũ ɖe edzi ɖekematsɔlemetɔe

kple akpoxɔnu titri sesẽ aɖe.

²⁷“Togbɔ be eda ami ɖe mo gbɔ

eye wòlolo ɖe ali gbɔ hã la,

²⁸anɔ du gbagbãwo kple xɔ siwo me ame aɖeke mele o la me,

xɔ siwo gbã zu glikpo.

²⁹Magakpɔ hotsui o eye eƒe kesinɔnuwo maganɔ anyi

alo eƒe nunɔamesiwo nagbagba ɖe anyigba dzi o.

³⁰Masi le viviti la nu o, dzo ƒe aɖe ana eƒe alɔwo nayrɔ

eye Mawu ƒe numegbɔgbɔ akplɔe adzoe.

³¹Megable eɖokui, atsɔ eƒe dzi aɖo nu si nye tofloko la ŋu o

elabena ɖeke maɖe vi nɛ o.

³²Hafi eƒe ɣeyiɣi nade la, woaɖo eteƒe nɛ

abe ale si dze ene eye eƒe alɔdzewo matsi ɖe edzi o.

³³Anɔ abe wainka si ŋu wogbe waintsetse gbogbowo katã le la ene

alo abe amiti si dudu eƒe seƒoƒowo ene.

³⁴Elabena mawumavɔ̃lawo ƒe ha madzi ɖe edzi o

eye dzo afia ame siwo lɔ̃a zãnuxɔxɔ ƒe agbadɔwo.

³⁵Wofɔa fukpekpe ƒe fu, hedzia nu vɔ̃ɖi

eye beble ɖoa atsyɔ̃ ɖe woƒe vidzidɔwo me.”

Hiob ƒe nyaŋuɖoɖo

¹Hiob ɖo eŋu nɛ be,

²“Mese nya siawo tɔgbi wòsɔ gbɔ,

akɔfala gbɔlowo ko mi katã mienye!

³Miaƒe nuƒo legbe, gɔdɔ̃gɔdɔ̃awo mawu nu akpɔ oa?

Nu kae le mia vem be miegale nyahehe dzi kokoko?

⁴Nenye miawoe le tenyeƒe la,

nye hã maƒo nu abe miawo ke ene,

agblɔ nyatinyatiwo ɖe mia ŋu

eye maʋuʋu ta ɖe mia ŋu.

⁵Maƒo nu ade dzi ƒo na mi

eye akɔfanya siwo ado tso nunye la ana miaƒe dzi adze eme.

⁶“Gake ne meƒo nu la,

nye vevesesewo dzi maka ɖe kpɔtɔ o

eye ne medzudzɔ hã la,

veveseseawo medzona o.

⁷O Mawu, vavãe èna mevɔ le eme keŋkeŋ

eye nètsrɔ̃ nye aƒekɔ la katã.

⁸Èna meɖi ku, vɔ keŋ eye wòzu ɖaseɖiɖi,

nye kuɖiɖi tsi tsitre hezu ɖasefo ɖe ŋunye.

⁹Yehowa ƒom, hevuvum le eƒe dziku me

eye wòɖu aɖukli ɖe ŋunye,

nye ketɔ fɔ ŋku ɖaɖɛwo ɖe dzinye.

¹⁰Amewo ke woƒe nuwo baa hedo ɣli ɖe tanye.

Woƒo tome nam fewuɖutɔe

eye wowɔ ɖeka ɖe ŋunye.

¹¹Mawu dem asi na ame vɔ̃ɖiwo

eye wòkɔm ƒu gbe ɖe ŋutasẽlawo ƒe fego me.

¹²Nuwo nɔ edzi dzem nam nyuie gake ekakam.

Elé kɔʋume nam hegbãm gudugudugudu.

Etsɔm wɔ ade si minyam wòle,

¹³eƒe aŋutrɔdalawo ɖe to ɖem.

Eŋɔ nye ayikuwo nublanuimakpɔmakpɔtɔe

eye wòna nye vevego gbã hekɔ ɖe anyigba.

¹⁴Eva ƒo ɖe dzinye enuenu

eye wòlũ ɖe dzinye abe kalẽtɔ ene.

¹⁵“Metɔ akpanya hetsyɔ na nye ŋutilã

eye metsɔ nye mo de ke me.

¹⁶Avifafa na nye mo biã dzẽe,

vɔvɔli ƒo xlã nye ŋkuwo,

¹⁷evɔ nye asiwo mewɔ nu tovo aɖeke o

eye nye gbedodoɖa hã dza hafi.

¹⁸“O, anyigba, mègatsyɔ nye ʋu dzi o

eye ɖoɖoe megazi le nye ɣlidodo nu o!

¹⁹Azɔ gɔ̃ hã la, nye ɖasefo le dziƒo

eye nye nyaxɔɖeakɔla le afi ma.

²⁰Tanyeʋlila nye xɔ̃nye,

esi nye ŋkuwo le aɖatsi ɖuɖum na Mawu.

²¹Eɖea kuku na Mawu ɖe ame ta

abe ale si ame ɖea kuku ɖe xɔlɔ̃a tae ene.

²²“Ƒe ʋɛ aɖewo koe ava yi

hafi madze mɔ ayi demagbɔnugbe.

¹Nu te nye gbɔgbɔ ŋu belibelibeli,

nye ŋkekewo hã le kpuie

eye yɔdo le lalayem.

²Vavãe, fewuɖulawo ƒo xlãm,

ele be nye ŋkuwo nanɔ woƒe amenuɖiaɖia ŋu.

³“O Mawu, tsɔ ŋugbedodo si dim nèle la nam.

Ame kae gali si ade megbe nam?

⁴Ètu woƒe susu ɖe gɔmesese ŋu

eya ta màna woƒe alɔ nade dzi o.

⁵Ne ame aɖe gbe exɔlɔ̃wo ɖe nu si woanae ta la,

viawo ƒe ŋkuwo atsi.

⁶“Mawu tsɔm wɔ lodonue na ame sia ame,

ame si ƒe ŋkume amewo ɖea ta ɖo gɔ̃ hã.

⁷Nuxaxa na be nye ŋkuwo dzi tsyɔ

eye nye ameti blibo la mele abe vɔvɔli ene.

⁸Ame dzɔdzɔewo ƒe mo wɔ yaa le esia ta;

dɔ me ve ame maɖifɔwo ɖe mawumavɔ̃lawo ŋuti.

⁹Ke hã la, ame dzɔdzɔewo alé woƒe mɔwo me ɖe asi

eye asi dzadzɛtɔwo akpɔ ŋusẽ ɖe edzi.

¹⁰“Mi katã mitrɔ va ko, migadze agbagba kpɔ!

Gake nyemakpɔ nunyala aɖeke le mia dome o.

¹¹Nye ŋkekewo va yi, nye ɖoɖowo me gblẽ

eye nenema kee nye nye dzi ƒe didiwo hã.

¹²Ame siawo trɔ zã wòzu ŋkeke,

ke esi viviti do ɖe wo la, wogblɔ be,

‘Kekeli tsɔ ɖe mía gbɔ’

¹³Ne aƒe si ko mele mɔ kpɔm na la nye yɔdo,

ne meɖo aba ɖe viviti me,

¹⁴ne megblɔ na zãnuxɔxɔ be, ‘Wòe nye fofonye,’

eye megblɔ na ŋɔvi be, ‘Wòe nye danye’

alo ‘Wòe nye nɔvinye nyɔnu’ la,

¹⁵ekema afi ka nye mɔkpɔkpɔ la le?

¹⁶Ɖe wòayi ɖe ku ƒe agbowo mea?

Ɖe nye kplii míayi tome ɖekaea?”

Bildad ƒe nuƒo

¹Tete Suhitɔ, Bildad ɖo eŋu na Hiob be,

²Ɣe ka ɣi miadzudzɔ nya siawo gbɔgblɔ?

Midze nunya ekema míate ŋu aƒo nu.

³Nu ka ŋuti wobu mí movitɔwoe

eye wobu mí bometsilawoe le wò ŋkume?

⁴Wò ame si vuvu ɖokuiwò kɔ ɖi le wò dziku me,

ɖe wòle be woagblẽ anyigba ɖi ɖe tawò

alo woaɖe agakpewo ɖa le wò teƒea?

⁵“Wotsia ame vɔ̃ɖi ƒe akaɖi

eye eƒe dzo megabina o.

⁶Kekeli si le eƒe agbadɔ me la doa viviti

eye akaɖi si le eƒe axadzi la hã tsina.

⁷Megatea ŋu ɖea abla o

eye eya ŋutɔ ƒe nuɖoɖowo ƒunɛ anyi.

⁸Eƒe afɔ ɖoa ɖɔ me

eye wòƒoa dablibɛ le ɖɔkawo me.

⁹Mɔ léa afɔkpodzi nɛ

eye mɔ̃ka blanɛ sesĩe.

¹⁰Wolɔa ke kɔna ɖe mɔka dzi nɛ le anyigba

eye wotrea mɔ ɖe eƒe mɔ me.

¹¹Ŋɔdzidodowo doa vodzi nɛ le akpa sia akpa

eye wokplɔa eƒe afɔɖeɖe ɖe sia ɖe ɖo.

¹²Dzɔgbevɔ̃e tsi dzi vevie be yeadzɔ ɖe edzi

eye gbegblẽ le klalo be yeava edzi ne edze anyi.

¹³Eɖu eƒe ŋutilã ƒe akpa aɖewo

eye ku ƒe ŋgɔgbevi vuvu eƒe ŋutinuwo

¹⁴Woɖee ɖa le eƒe agbadɔ si nye eƒe sitsoƒe la me

eye wokplɔe yina na ŋɔdziwo ƒe fia.

¹⁵Dzo bibi xɔ aƒe ɖe eƒe agbadɔ me

eye aŋɔka bibi kaka ɖe eƒe nɔƒe.

¹⁶Eƒe kewo yrɔna le ete ke

eye eƒe aŋgbawo yrɔna le eƒe tame.

¹⁷Woŋlɔnɛ be le anyigba dzi

eye eƒe ŋkɔ buna le amewo dome.

¹⁸Wonyanɛ tso kekeli nu yina ɖe viviti me

eye woɖenɛ ɖa le xexea me.

¹⁹Vi alo dzidzimevi menɔa esi le eƒe amewo dome o

eye ame aɖeke metsia agbe le teƒe si wònɔ va yi o.

²⁰Ɣetoɖoƒetɔwo ƒe nu ku le nu si dzɔ ɖe edzi ta

eye vɔvɔ̃ ɖo ɣedzeƒetɔwo.

²¹Vavãe, aleae ame vɔ̃ɖi ƒe nɔƒe nɔna,

aleae ame si menya Mawu o la ƒe nɔƒe nɔna.”

Hiob ƒe nuƒo

¹Hiob ɖo eŋu be,

²“Va se ɖe ɣe ka ɣie miawɔ funyafunyam

eye miatsɔ miaƒe nyawo agbãm?

³Zi ewo sɔŋue nye esi miedo vlom

eye mieti kpo dze dzinye ŋumakpemakpetɔe.

⁴Nenye nyateƒee be metra mɔ la,

vodada sia nye nye ɖeka ko ƒe nya.

⁵Nenye vavãe miebe yewoakɔ mia ɖokuiwo ɖe dzi agbɔ tanye,

ahazã vlo si wodom la aɖia nunyee la,

⁶ekema minyae be Mawu dze agɔ le dzinye

eye wòtsɔ eƒe ɖɔ ƒo xlãm.

⁷“Togbɔ be mefa avi sesĩe be,

‘Wodze agɔ le dzinye!’ hã la,

ame aɖeke metɔ nam o

eye togbɔ be medo ɣli be woaxɔ nam hã la,

wometso nam o.

⁸Exe nye mɔ be nyemate ŋu ato edzi ayi o,

etsɔ viviti tsyɔ nye toƒewo.

⁹Eklo bubu le ŋunye

eye wòɖe fiakuku le tanye.

¹⁰Evuvum kɔ ɖi le akpa sia akpa va se ɖe esime medzo,

ale wòho nye mɔkpɔkpɔ abe ati ene.

¹¹Eƒe dziku bi ɖe ŋunye

eye wòbum ɖe eƒe ketɔwo dome.

¹²Eƒe aʋakɔwo lũ ɖe eme kple ŋusẽ,

woƒu kpo ɖe ŋunye eye woƒu asaɖa anyi ɖe

nye agbadɔ ŋu godoo va kpe.

¹³“Eɖe nɔvinye ŋutsuwo ɖa le ŋunye

eye wòklã nye kple xɔ̃nyewo dome keŋkeŋkeŋ.

¹⁴Nye ƒometɔwo dzo le gbɔnye

eye nye ame nyanyɛwo ŋlɔm be.

¹⁵Ame siwo va dze gbɔnye

kple nye nyɔnudɔlawo bum amedzroe

eye mezu du bubu me tɔ le wo ŋkume.

¹⁶Meyɔ nye dɔla gake metɔ o

togbɔ be metsɔ nye nu ɖe kuku nɛ hafi.

¹⁷Nye nu me le ʋeʋẽm ɖe nye ŋutɔ srɔ̃nye

eye mele ŋu nyɔm na nye ŋutɔ nɔvinye ŋutsuwo.

¹⁸Ŋutsuvi suewo gɔ̃ hã koam eye ne meva do la,

woɖua fewu le ŋunye.

¹⁹Mele ŋu nyɔm na xɔ̃nye veviwo katã eye ame siwo melɔ̃ la,

tso ɖe ŋutinye.

²⁰Mezu ŋutilã kple ƒu ɖeɖe,

eye meɖo kudo nu.

²¹“Mikpɔ nye nublanui, xɔ̃nyewo,

mikpɔ nublanui nam elabena Mawu ƒe asi ƒom.

²²Nu ka ta mieti yonyeme

abe ale si Mawu ti yonyemee ene?

Nye ŋutilã si mieɖu la mesɔ gbɔ na mi oa?

²³“O nenye ɖe woaŋlɔ nye nyawo ɖi,

nenye ɖe woaŋlɔe ɖe agbalẽ me eye

²⁴nenye ɖe woatsɔ gayibɔnuŋlɔnu aɖee ɖe akɔblikpe dzi

alo woaɖee ɖe agakpe dzi tegbee hã la, anyo ŋutɔ.

²⁵Menya be nye Xɔnametɔ le agbe,

eye mlɔeba la, atsi tsitre ɖe anyigba dzi.

²⁶Eye ne nye ŋutigbalẽ vuvu keŋkeŋkeŋ hã la,

makpɔ Mawu le nye ŋutilã me,

²⁷Nye ŋutɔ makpɔe, makpɔe kple nye ŋkuwo,

menye ame bubu aɖeke tɔ o.

Aleke nye dzi mehetsi dzi ɖe eŋui o!

²⁸“Ne miegblɔ be,

‘Aleke míadi vɔ̃ nɛ?

Eya ŋutɔ gbɔ kuxiawo tso’ la,

²⁹ekema yi nedo vɔvɔ̃ na miawo ŋutɔ

elabena dziku atsɔ yi ahe toe

eye mianya be ʋɔnudɔdrɔ̃ li.”

Zofar ƒe nuƒo

¹Tete Naamatitɔ, Zofar ɖo eŋu nɛ be,

²“Nu siwo le fu ɖem na nye susue dɔm be maɖo eŋu na wò

elabena metsi dzi le ɖokuinye me ŋutɔ.

³Mese mokaname aɖe si ɖe bubu le ŋunye,

eye nye gɔmesese de dzi ƒo nam be maɖo nyawo ŋu.

⁴“Meka ɖe edzi be ènya ale si wònɔ tso blema,

tso ɣeyiɣi si ke wowɔ amegbetɔ da ɖe anyigba dzi be

⁵ame vɔ̃ɖiwo ƒe nukoko nu mesena yina o,

eye Mawumavɔ̃lawo ƒe aseyetsotso nɔa anyi ɣeyiɣi kpui aɖe ko.

⁶Togbɔ be eƒe dada yi ɖatɔ dziƒo,

eƒe ta yi ɖatɔ lilikpowo ke hã la,

⁷atsrɔ̃ gbidii abe eya ŋutɔ ƒe afɔdzi ene

eye ame siwo kpɔe la agblɔ be,

‘Afi ka wòle?’

⁸Edzona dzona abe drɔ̃e ene,

womagakpɔe o eye wòabu

abe ŋutega si wokpɔ le zã me ene.

⁹Ŋku si kpɔe la magakpɔe akpɔ o,

eye eƒe nɔƒe hã magakpɔe akpɔ o.

¹⁰Ele be viawo nawɔ ɖɔɖɔɖo anyo dɔ me na ame dahewo,

eya ŋutɔ ƒe asiwo aɖe asi le eƒe kesinɔnuwo ŋu.

¹¹Ɖekakpuimeŋusẽ dzodzoe si yɔ

eƒe ƒuwo me la aku kplii ayi ke me.

¹²“Togbɔ be nu vɔ̃ɖi vivi le eƒe nu me,

eye wòɣlae ɖe eƒe aɖe te,

¹³togbɔ be mate ŋu aɖe asi le eŋu o

eye wòbe ɖe nu me nɛ hã la,

¹⁴eƒe nuɖuɖu ave le eƒe dɔ me,

eye wòazu da ƒe aɖi le eƒe dɔgbowo me.

¹⁵Atu kesinɔnu siwo wòmi la aƒu gbe.

Mawu ana eƒe dɔgbowo nadzɔ wo katã aƒo ɖi.

¹⁶Eno da ƒe aɖi

eye ƒli ƒe aɖi awui.

¹⁷Makpɔ gome le tɔʋu kple tɔsisi

siwo me anyitsi kple notsi babla le sisim le la me o.

¹⁸Maɖu nu siwo ŋu wòdze agbagba le o,

ke boŋ atsɔ wo ana eye maɖu viɖe

si do tso eƒe asitsatsa hã me o

¹⁹elabena ete ame dahewo ɖe to wozu hiãtɔwo

eye wòxɔ aƒe siwo metu o.

²⁰“Vavã makpɔ gbɔdzɔe le eƒe nudzodzrowo me o

eye maɖe eɖokui to eƒe nunɔamesiwo dzi o.

²¹Naneke masusɔ nɛ esi wòavuvu o

eƒe kesinɔnuwo matɔ ɖi o.

²²Le eƒe nukpɔkpɔ gbogboawo dome la,

xaxa ava edzi eye hiãtuame

ƒe ŋusẽ katã ava edzi.

²³Ne eƒe ƒodo yɔ nyuie la Mawu atrɔ

eƒe dziku bibi akɔ ɖe edzi

eye wòana eƒe dɔmedzoe nadza ɖe edzi.

²⁴Togbɔ be esi le gayibɔlãnu nu hã la,

akɔbliŋutrɔ ƒo ɖee.

²⁵Eɖee do goe tso eƒe lãme

eye wòho eƒe tsutsyɔeƒe le eƒe aklã me.

Ŋɔdzi alée,

²⁶eye viviti tsiɖitsiɖi le eƒe kesinɔnuwo lalam.

Dzo si womeƒlɔ ɖo o la afiae

eye wòabi nu si susɔ ɖe eƒe agbadɔ me la keŋkeŋkeŋ.

²⁷Dziƒo aɖe eƒe vodada ɖe go

eye anyigba atso ɖe eŋu.

²⁸Tsiɖɔɖɔ akplɔ eƒe aƒe adzoe eye le Mawu ƒe dɔmedzoeŋkeke la dzi la,

tsi sisiwo akplɔe adzoe.

²⁹Esia nye gomekpɔkpɔ si Mawu ɖo ɖi na ame vɔ̃ɖiwo,

eye wònye domenyinu tso Mawu gbɔ na wo.”

Hiob ƒe nuƒo

¹Hiob ɖo nya ŋu nɛ be,

²“Ɖo to nyuie nàse nye nyawo,

esia nenye akɔfafa si nànam.

³Migbɔ dzi ɖi nam, ne maƒo nu eye ne meƒo nu vɔ la,

miate ŋu ayi miaƒe alɔmeɖeɖe dzi.

⁴“Amegbetɔe mele konyi fam na?

Nu ka ta nyemagbe dzigbɔɖeanyi o?

⁵Mikpɔm ɖa, ne miaƒe mo

nawɔ yaa eye miaƒu asi nu.

⁶Ne mebu nu sia ŋuti la ŋɔ dziam

eye nye ameti blibo la medzona nyanyanya.

⁷Nu ka ta ame vɔ̃ɖiwo nɔa agbe, tsina,

kua amegã, eye woƒe ŋusẽ dzina ɖe edzi ɖo?

⁸Wonɔa agbe, kpɔa wo viwo lia ke heƒoa xlã wo

eye woƒe dzidzimeviwo tsina le wo ŋkume.

⁹Woƒe aƒewo me le dedie,

wovo tso vɔvɔ̃ ƒe asi me eye Mawu ƒe

ameƒoti mevaa wo dzi o.

¹⁰Woƒe nyitsuwo megbea asiyɔyɔ o,

woƒe nyinɔwo dzia vi eye fu megena le wo ƒo o.

¹¹Woɖea wo viwo doa goe abe lãha ene

eye wo vi suewo nɔa fefem henɔa ɣe ɖum.

¹²Wodzia ha ɖe asiʋuiwo kple kasaŋkuwo ŋu

eye wotua aglo ɖe kpẽ ƒe ɖiɖi ŋu.

¹³Woɖua woƒe ƒewo le dzidzedzekpɔkpɔ me

eye woyia yɔ me le ŋutifafa me

¹⁴gake wogblɔna na Mawu be,

‘Ɖe asi le mía ŋu!

Medzro mí be míanya wò mɔwo o.

¹⁵Ame kae nye Ŋusẽkatãtɔ be míasubɔe?

Viɖe ka míakpɔ ne míedo gbe ɖa nɛ?’

¹⁶Evɔa woƒe dzidzedzekpɔkpɔ mele woawo ŋutɔ ƒe asi me o,

eya ta menɔ adzɔge na ame vɔ̃ɖiwo ƒe aɖaŋudede.

¹⁷“Ke hã la, zi nenie ame vɔ̃ɖiwo ƒe akaɖi tsina?

Zi nenie dzɔgbevɔ̃e dzɔna ɖe wo dzi,

esi nye nu si Mawu ɖo ɖi na wo le eƒe dziku me?

¹⁸Zi nenie wole abe gbe ƒuƒu si ya lɔ ɖe nu

alo atsa si ahom lɔ ɖe nu ene?

¹⁹Wogblɔ be, ‘Mawu ɖo amegbetɔ ƒe tohehe ɖi na via ŋutsuwo.’

Anyo be wòahe to na amea ŋutɔ,

ne wòanya nu si wònye!

²⁰Eya ŋutɔ ƒe ŋkuwo nekpɔ eƒe gbegblẽ,

eye wòano Ŋusẽkatãtɔ la ƒe dɔmedzoekplu

²¹elabena ɖe wòtsɔ ɖe le eme na ƒometɔ

siwo wògblẽ ɖe megbe esi ɣleti

siwo woɖo ɖi nɛ la wu nua?

²²“Ɖe ame aɖe ate ŋu afia gɔmesese Mawu,

esi wònye eyae drɔ̃a ʋɔnu ame kɔkɔtɔ gɔ̃ hã?

²³Ame aɖe ku esi eƒe agbe ɖo vivime,

wòle dedinɔnɔ me eye wòɖe dzi ɖi bɔkɔɔ,

²⁴eƒe ŋutilã kpɔ nunyiame nyuitɔ

eye ƒutomemi yɔ eƒe ƒuwo me fũu.

²⁵Ame bubu ku le eƒe luʋɔ ƒe nuxaxa me

eye mese vivi na nu vivi aɖeke kpɔ o.

²⁶Ke wo ame evea mlɔ kasanu le ke me,

eye ŋɔviwo ɖi ba ɖe wo kple evea dzi.

²⁷“Menya nu siwo susum miele la nyuie

kple nu vɔ̃ɖi siwo ɖom miele be miadze agɔ le dzinye.

²⁸Miegblɔ be, ‘Afi ka ame xɔŋkɔ la ƒe aƒe le

eye agbadɔ si me ame vɔ̃ɖiwo nɔ la ɖe?’

²⁹Miebia gbe mɔzɔlawo kpɔ oa?

Mietsɔ ɖeke le woƒe nuteƒekpɔkpɔ

si wogblɔ fia mi la me be

³⁰woɖea ame vɔ̃ɖi le dzɔgbevɔ̃egbe,

eye woɖenɛ le dzikugbe oa?

³¹Ame kae ɖe eƒe agbe vlo si nɔm wòle la ɖe mo nɛ kpɔ?

Ame kae ɖoa nu tovo si wòwɔ la teƒe nɛ?

³²Wokɔnɛ yia yɔdo gbɔe

eye wodzɔa eƒe yɔdokpe ŋu.

³³Ke siwo le balime la vivi enu, amewo katã dze eyome

eye ameha gã aɖe si womate ŋu axlẽ o la dze ŋgɔ nɛ.

³⁴“Eya ta aleke miate ŋu awɔ atsɔ

miaƒe bometsinyawo afa akɔ nam mahã?

Naneke mele miaƒe nyaŋuɖoɖowo me wu alakpa o!”

Elifaz ƒe nuƒo

¹Temanitɔ, Elifaz ɖo eŋu be,

²“Ɖe ame anye viɖenu na Mawua?

Ɖe nunyala gɔ̃ hã anye viɖenu nɛa?

³Dzidzɔ ka wòanye na Ŋusẽkatãtɔ la ne ènye ame dzɔdzɔe?

Eye viɖe ka wòakpɔ ne fɔɖiɖi mele wò mɔwo ŋu o?

⁴“Wò Mawuvɔvɔ̃ tae wòka mo na wò

hetsɔ nya ɖe ŋuwòa?

⁵Ɖe wò nu vɔ̃ɖi wɔwɔ mekpe ŋutɔ oa?

Ɖe nuwuwu li na wò nu vɔ̃woa?

⁶Èbia megbedanu tso nɔviwò ŋutsuwo si susumanɔmetɔe

eye nèɖe avɔ le amewo ŋu wotsi amama.

⁷Mèna tsi ame siwo nu ti kɔ na la wono o

eye nète nuɖuɖu dɔwuitɔwo,

⁸evɔ nèhenye ŋusẽtɔ,

anyigba le asiwò eye nèle anyigba dzi,

bubu le ŋuwò.

⁹Èɖo ahosiwo ɖa asi ƒuƒlu

eye nèɖe tsyɔ̃eviwo ƒe ŋusẽ ɖa.

¹⁰Eya ta mɔkawo ɖe to ɖe wò ɖo

eya ta dzɔgbevɔ̃e ƒo ɖe dziwò kpoyi hedo ŋɔdzi na wò

¹¹eya ta viviti do ale gbegbe be màgate ŋu akpɔ nu o

eye eya tae tɔɖɔɖɔ va tsyɔ dziwò ɖo.

¹²“Ɖe Mawu mele dziƒo kɔkɔtɔ oa? Ɖe mekpɔ ale si ɣletivi kɔkɔtɔwo kɔkɔe oa?

¹³Gake ègblɔ be, ‘Nu ka Mawu nya?

Ɖe wòdrɔ̃a ʋɔnu to viviti ma tɔgbi mea?

¹⁴Lilikpo dodowo xe eŋkume

eya ta mekpɔa mí ne ele tsatsam

le dziƒo ƒe agbo sesẽwo me o.’

¹⁵Ɖe nàgalé mɔ xoxo si dzi

ame vɔ̃ɖiwo zɔ va yi la me ɖe asia?

¹⁶Wokplɔ wo dzoe hafi woƒe ɣeyiɣi de

eye tsiɖɔɖɔ kplɔ woƒe gɔmeɖokpewo dzoe.

¹⁷Wogblɔ na Mawu be, ‘Ɖe asi le mía ŋu!

Nu kae Ŋusẽkatãtɔ la awɔ mí?’

¹⁸Evɔ wònye eyae tsɔ nu nyuiwo yɔ xɔ na wo fũu,

eya ta menɔ adzɔge na ame vɔ̃ɖiwo ƒe aɖaŋudede.

¹⁹Ame dzɔdzɔewo kpɔ woƒe gbegblẽ eye dzi dzɔ wo,

ame maɖifɔwo gblɔ ɖe wo ŋu fewuɖutɔe be,

²⁰‘Wotsrɔ̃ míaƒe futɔwo vavã

eye dzo va fia woƒe kesinɔnuwo.’

²¹“Tsɔ ɖokuiwò na Mawu

eye nànɔ ŋutifafa me kplii,

to esia me la, dzɔgbenyui ava wò mɔ dzi.

²²Xɔ nufiame tso eƒe nu me, eye nàtsɔ

eƒe nyawo adzra ɖo ɖe wò dzi me

²³Ne ètrɔ va Ŋusẽkatãtɔ la gbɔ la, agaɖo wò te.

Ne èɖe nu vɔ̃ɖi wɔwɔ ɖa xaa tso wò agbadɔ gbɔ,

²⁴eye nètsɔ wò dzonu veviwo kɔ ɖe ke me,

tsɔ wò sika adodoe si tso Ofir ƒu gbe ɖe agakpewo tome la,

²⁵ekema Ŋusẽkatãtɔ la anye wò sika

kple klosalo nyuitɔ.

²⁶Ekema le nyateƒe me la,

Ŋusẽkatãtɔ ƒe nu ado dzidzɔ na wò

eye àwu wò mo dzi ɖe Mawu ŋu.

²⁷Àdo gbe ɖa nɛ, wòaɖo to wò

eye àxe wò adzɔgbeɖefewo nɛ.

²⁸Nu si nèɖo la, ava eme na wò

eye kekeli aklẽ ɖe wò mɔwo dzi.

²⁹Ne woɖiɖi amewo ɖe anyi,

eye nègblɔ be, ‘Fɔ wo ɖe dzi!’

la, ekema woafɔ ame siwo wote

ɖe anyi la ɖe dzi.

³⁰Aɖe ame si ŋu fɔɖiɖi le gɔ̃ hã,

ame si woaɖe to wò asi ƒe kɔkɔenɔnɔ me.”

Hiob ƒe nuƒo

¹Tete Hiob ɖo eŋu be,

²“Egbe gɔ̃ hã nye konyifafa do gã ɖe edzi,

eƒe asi sẽ ɖe dzinye,

evɔ mele hũu ɖem hafi.

³Nenye ɖe manya afi si makpɔe le,

nenye ɖe mayi enɔƒe la, anyo ŋutɔ!

⁴Matsɔ nye nya aɖo eŋkume eye nye nu me ayɔ fũu

kple nya siwo matsɔ aɖe ɖokuinye nu

⁵Ne makpɔ ale si wòaɖo eŋu nam

eye mabu nya si wòagblɔ la ŋuti.

⁶Ɖe wòatsi tsitre ɖe ŋunye kple ŋusẽ gã aɖea?

Ao, ke boŋ aɖo tom

⁷Afi ma ame dzɔdzɔe ate ŋu atsɔ eƒe nyawo aɖo eŋkume le

eye woaɖem tegbee tso nye ʋɔnudrɔ̃la ƒe asi me.

⁸“Gake ne meyi ɣedzeƒe la, mele afi ma o,

ne meyi ɣetoɖoƒe la, nyemekpɔe le afi ma hã o.

⁹Ne ele dɔ wɔm le anyiehe la, nyemekpɔnɛ o,

ne etrɔ ɖe dziehe hã la, nye ŋku melɔnɛ o.

¹⁰Gake enya mɔ si dzi mele, ne edom kpɔ la,

mato eme abe sika ene.

¹¹Nye afɔwo le eƒe afɔtoƒewo yome kplikplikpli,

melé eƒe mɔ tsɔ eye nyemedze ɖe aga o.

¹²Nyemete ɖe aga tso eƒe nuyiwo ƒe sededewo gbɔ o,

mede asixɔxɔ eƒe nyawo ŋu

wu nye gbe sia gbe ƒe nuɖuɖu.

¹³“Ke eya ɖekae li, ame ka ate ŋu axe mɔ nɛ?

Nu sia nu si dze eŋu lae wòwɔna.

¹⁴Ena se siwo wòde ɖi la va eme ɖe ŋutinye

eye ɖoɖo siawo tɔgbi gale esi ɖe ŋunye.

¹⁵Esia ta ŋɔ dzim le eŋkume

eye ne mebu esiawo katã ŋuti la, mevɔ̃na nɛ.

¹⁶Mawu na dzi ɖe le ƒonye,

Ŋusẽkatãtɔ la do ŋɔdzi nam.

¹⁷Ke hã la, viviti la alo blukɔ tsiɖitsiɖi

si tsyɔ mo nam la mena ɖoɖoe zi le nunye o.

¹“Nu ka ŋuti Ŋusẽkatãtɔ la

meɖo ɣeyiɣiwo ɖi hena ʋɔnudɔdrɔ̃ o?

Nu ka ta ame siwo nyae la nanɔ mɔ kpɔm

na ŋkeke siawo dzodzro?

²Amewo ɖea liƒokpewo ɖa,

wokplɔa lãha siwo wofi la yia gbeɖuƒee.

³Wokplɔa tsyɔ̃eviwo ƒe tedziwo dzonae

eye woxɔa ahosi ƒe nyi abe awɔbanu ene.

⁴Wotutua asi hiãtɔwo ɖa le mɔƒome

eye wozia ame dahe siwo katã

le anyigba dzi la dzi be woasi abe.

⁵Ame dahewo ɖoa gbe nɔa nuɖuɖu dim

abe gbetedziwo le gbegbe ene

eye kuɖiɖinyigbawo dia nuɖuɖu na wo viwo.

⁶Woŋe gbe le agblewo dzi na lãwo

eye wofɔa nuku siwo ge la le

ame vɔ̃ɖiwo ƒe waingblewo me.

⁷Esi avɔ mele wo si o ta la womlɔ anyi ƒuƒlu le zã me

eye naneke meli woatsyɔ le vuvɔ me o.

⁸Tsi ƒoa wo tea wo ŋu nyuie le towo dzi,

wokuna ɖe agakpewo ŋu elabena bebeƒe meli o.

⁹Woɖea tsyɔ̃evi le no nu

eye woxɔa ame dahe ƒe vi ɖe fe si wònyi la nu.

¹⁰Esi wònye avɔ mele wo si o ta la,

wole yiyim amama,

wolé lu bablawo ɖe ta,

evɔ dɔ le wo wum.

¹¹Wole amiti ƒe ku tum le te dzi,

wofiaa wain le wainfiaƒewo gake tsikɔ le wo wum.

¹²Ame siwo le kudɔ ƒom ƒe ŋeŋe de dzi le dua me kɔtɔɔ

eye ame siwo xɔ abi la ƒe luʋɔwo le ɣli

dom be woaxɔ na yewo,

gake Mawu mebu fɔ ame aɖeke be edze agɔ o.

¹³“Ame aɖewo li siwo tsi tsitre ɖe kekeli la ŋu,

ame siwo menya eƒe mɔwo alo zɔ eƒe toƒewo o.

¹⁴Ne viviti do la, hlɔ̃dola la tsona hewua ame dahewo kple hiãtɔwo,

le zã me la, enɔa zɔzɔm abe fiafitɔ ene

¹⁵Ahasitɔ ƒe ŋku nɔa viviti lalam,

egblɔna le eƒe susu me be, ‘Ŋku aɖeke makpɔm o,’

eye wòɣlaa eƒe mo.

¹⁶Le viviti me la, amewo gbãa ʋɔ,

gena ɖe aƒewo me

gake ne ŋu ke la, wonɔa xɔ me tua ʋɔ ɖe wo ɖokuiwo nu

elabena womedi kekeli ƒe nya aɖeke o.

¹⁷Ke wo katã la, viviti tsiɖitsiɖie le na wo abe ŋdikekeli ene

eye wodzea xɔ̃ viviti ƒe ŋɔdzinuwo.

¹⁸“Evɔ la, futukpɔ ko wonye le tsi ŋgɔ,

woƒoa fi dea anyigba ƒe akpa si nye woƒe gome

ale be ame aɖeke mayi ɖe waingblewo me le afi ma o.

¹⁹Abe ale si dzoxɔxɔ kple kuɖiɖi kplɔa tsikpe

si lolõ la dzonae ene la,

nenemae yɔdo kplɔa ame siwo wɔa

nu vɔ̃ la hã dzonae.

²⁰Vidzidɔ ŋlɔa wo be, wozua nuɖuɖu na ŋɔviwo,

womegaɖoa ŋku ame vɔ̃ɖiwo dzi o,

ke boŋ woŋena abe atilɔ ene.

²¹Wohaa konɔwo kple vimanɔsitɔwo

eye womekpɔa nublanui na ahosiwo o.

²²Gake Mawu kplɔa kalẽtɔwo dzonae kple eƒe ŋusẽ.

Togbɔ be woli ke hã la,

kakaɖedzi mele wo si be woanɔ agbe o.

²³Ɖewohĩ ana woaɖe dzi ɖi abu be yewole dedie

gake eƒe ŋkuwo le woƒe mɔwo ŋu.

²⁴Wodoa wo ɖe dzi ɣeyiɣi kpui aɖe,

tete wo nu va yina,

woɖiɖia wo ɖe anyi eye wokuna

abe bubuawo katã ko ene ale woŋea wo

abe ale si woŋea bli le bliti ŋu ene.

²⁵“Ne mele alea o la,

ame kae aɖe aʋatso nam

eye wòana nye nyawo nazu tofloko?”

Bildad ƒe nuƒo

¹Bildad, Suhitɔ ɖo eŋu nɛ be,

²“Dziɖuɖu kple ŋɔdzi nye Mawu tɔ,

eyae ɖo ɖoɖo anyi ɖe dziƒo ƒe kɔkɔƒewo.

³Ɖe woate ŋu axlẽ eƒe aʋakɔwoa?

Ame ka tame eƒe kekeli meklẽ ɖo o?

⁴Ekema aleke amegbetɔ anye dzɔdzɔetɔ le Mawu ŋkume?

Aleke amegbetɔ, nyɔnu tɔ dzidzia, anɔ dzadzɛe?

⁵Ne ɣleti ƒe keklẽ menye naneke nɛ o

eye ɣletiviwo hã medza le eŋkume o la,

⁶aleke amegbetɔ si nye ŋɔvi

kple ame vi si nye ŋɔ la ayi nane nye ge le eŋkume!”

Hiob ƒe nuƒo

¹Hiob ɖo eŋu nɛ be,

²“Miekpe ɖe ame beli la ŋu ŋutɔ!

Miekpe ɖe ame gblɔe la ƒe abɔ ŋu ŋutɔ!

³Aɖaŋu kae nye esi nèna ame si si nunya mele o!

Eye sidzedze kae nye gã si nèɖe fia!

⁴Ame kae kpe ɖe ŋuwò be nègblɔ nya siawo?

Eye ame ka ƒe gbɔgbɔe ƒo nu to dziwò?

⁵“Ame kukuwo le vevesese gã aɖe me,

nenema kee nye ame siwo le tɔ gɔme

kple ame siwo le tɔ me.

⁶Ku le ƒuƒlu le Mawu ŋkume,

eye wometsyɔ nu gbegblẽ dzi o.

⁷Ekeke dzigbeme ƒe lilikpowo ɖe teƒe siwo naneke mele o

eye wòna anyigba le yame, naneke melée ɖe asi o.

⁸Eŋlɔ tsiwo ɖe lilikpowo me,

gake woƒe kpekpe mena lilikpoawo gbã o.

⁹Etsɔ nu tsyɔ ɣleti si sɔ tegblẽe la ƒe ŋkume

eye wòkeke eƒe lilikpowo ɖe edzi.

¹⁰Eɖe liƒo na dzite ɖe tsiwo dzi

eye wòde mama kekeli kple viviti dome.

¹¹Ne ele mo kam na nuwɔwɔwo la,

dziƒosɔtiwo ʋuʋuna eye wodzona nyanyanya.

¹²Ena atsiaƒu dze agbo to eƒe ŋusẽ dzi

eye wòfli Rahab kakɛkakɛ to eƒe nya dzi.

¹³Ena dziŋgɔli me kɔ to eƒe ŋɔtimegbɔgbɔ dzi

eye eƒe asi ŋɔ da vɔ̃ɖi si ɖiɖi va yina.

¹⁴Esiawoe nye eƒe dɔwɔwɔwo ƒe sue aɖe ko

eye aleke dalĩ si wodo le eŋuti miese la le bɔlɔe ale!

Eya ta ame kae ate ŋu ase

eƒe ŋusẽ ƒe gbeɖeɖe gɔme?”

¹Tete Hiob yi eƒe nuƒoa dzi be,

²“Meta Mawu si gbe afiatsotso nam la ƒe agbe kple Ŋusẽkatãtɔ,

ame si do vevesese na nye luʋɔ be,

³zi ale si agbe le menye,

Mawu ƒe gbɔgbɔ le nye ŋɔti me la,

⁴nye nuyi magblɔ nya vɔ̃ɖi o

eye nye aɖe magblɔ beblenya aɖeke o.

⁵Nyemalɔ̃ gbeɖe be tɔwò dzɔ o

va se ɖe esi maku la,

nyemasẽ nu le nye blibodede ŋu o.

⁶Malé nye dzɔdzɔenyenye me ɖe asi ɖaa

eye nyemaɖe asi le eŋu akpɔ o.

Zi ale si mele agbe la,

nye dzitsinya mado vlom o.

⁷“Nye futɔwo nenɔ abe ame vɔ̃ɖiwo ene

eye nye ketɔwo abe ame madzɔmadzɔwo ene!

⁸Elabena mɔkpɔkpɔ kae le ame vlo si ne wolãe ɖa

eye Mawu ɖe eƒe agbe ɖa?

⁹Ɖe Mawu ase eƒe ɣlidodo,

ne eɖo xaxa mea?

¹⁰Ɖe eƒe nu anyo Ŋusẽkatãtɔ la ŋua?

Ɖe wòayɔ Mawu ɣe sia ɣia?

¹¹“Mafia nu mi tso Mawu ƒe ŋusẽ ŋuti

eye nyemaɣla Ŋusẽkatãtɔ la ƒe mɔwo ɖe mi o.

¹²Miawo ŋutɔ miekpɔ esiawo katã.

Ekema nu kae nye nuƒo manyatalenu gbogbo siawo?

¹³“Esia nye gome si Mawu ɖo ɖi na ame vɔ̃ɖiwo

kple domenyinyi si ŋutasẽla xɔna tso Ŋusẽkatãtɔ la gbɔ.

¹⁴Aleke ke viawo sɔ gbɔe hã la,

woɖo wo ɖi na yi eye eƒe dzidzimeviwo

makpɔ nu aɖu aɖi ƒo akpɔ gbeɖe o.

¹⁵Dɔvɔ̃ awu ame siwo susɔ nɛ

eye woƒe ahosiwo mafa na wo o.

¹⁶Togbɔ be eli kɔ klosalo abe ke ene,

wòdo agba avɔ wòkɔ abe to ene hã la,

¹⁷ame dzɔdzɔewo ado nu siwo wòli kɔe

eye ame maɖifɔwo ama eƒe klosalo.

¹⁸Xɔ si wòtu la anɔ abe gbagblaʋui

ƒe azi si wòƒo teti ko la ene

eye wòanɔ abe zãɖialawo

ƒe agbadɔ si wòwɔ la ene.

¹⁹Emlɔ anyi abe hotsuitɔ ene

gake esusɔ vie maganɔ nɛ nenema o

elabena esi wòʋu eƒe ŋkuwo la,

naneke megali o.

²⁰Ŋɔdzi ƒona ɖe edzi abe tɔɖɔɖɔ ene

eye ahom kplɔnɛ dzonae le zã me.

²¹Ɣedzeƒeya kɔe dzoe eye wòdzo,

ale wòkplɔe ɖa le enɔƒe.

²²Etsɔ eɖokui xlã ɖe edzi nublanuimakpɔmakpɔtɔe,

esi wòsi le eƒe ŋusẽ nu afɔtsɔtsɔe.

²³Esi akpe ɖe eta fewuɖutɔe

eye wònyae ɖa le enɔƒe.”

¹“Klosalokuƒe li

eye teƒe li si wololõa sika le.

²Wokua gayibɔ le tome

eye wokpɔa akɔbli ne wololõ akɔblikpe.

³Amegbetɔ ɖo seƒe na viviti,

etsana le didiƒewo kple viviti tsiɖitsiɖitɔ

kekeake me hena tomenuwo.

⁴Eɖe do wògoglo yi eme ʋĩi hedidi tso amenɔƒe gbɔ,

teƒe si amewo ƒe afɔ mede kpɔ o;

teƒe goglo sia, si didi tso amewo gbɔ lae

wonɔa ka me henɔa nyenyem le yame le.

⁵Anyigba si me wokpɔa nuɖuɖu tsonae lae wotrɔ

le tome abe dzo me wòto ene.

⁶Woɖea safirkpe tso eƒe kpe siwo wogbã la me

eye woɖea sika tso eƒe kewɔ me.

⁷Xe ƒonuwo menya toƒe ɣaɣla ma o

eye aʋako aɖeke ƒe ŋku mekpɔe kpɔ o

⁸Gbemelã siwo dana la meka afɔ afi ma kpɔ o,

eye dzata aɖeke hã mezɔ afi ma kpɔ o.

⁹Ame ƒe asi gbã kpe sesẽawo

eye wòna towo te dze go.

¹⁰Eɖea mɔ ɖe kpeawo tome

eye eƒe ŋkuwo kpɔa

eƒe nu xɔasi vovovowo katã.

¹¹Etsana le tsidzɔƒewo

eye wòhea nu ɣaɣlawo vaa kekeli nu.

¹²“Ke afi ka woakpɔ nunya le?

Afi ka gɔmesese nɔna?

¹³Amegbetɔ mese eƒe nuvãnyenye gɔme o,

womate ŋu akpɔe le agbagbeawo ƒe anyigba dzi o.

¹⁴Gogloƒe gblɔ be,

‘Menye tɔnyee o,’

Atsiaƒu gblɔ be,

‘Mele gbɔnye o,’

¹⁵Womate ŋu aƒlee kple sika nyuitɔ

alo woada klosalo ɖe eƒe home nu o.

¹⁶Màte ŋu aƒlee kple sika adodoe si tso Ofir alo kple kpe xɔasiwo,

oniks kple safir o.

¹⁷Sika alo kristalkpe masɔ kplii o

eye womatsɔ sikanuwo gɔ̃ hã aɖɔlii o.

¹⁸Womayɔ sui kple adzagba ƒe ŋkɔwo gɔ̃ hã ɖe eŋu o

elabena nunya ƒe asixɔxɔ kɔ wu gbloti tɔ sãsãsã.

¹⁹Womatsɔ Kuskpe xɔasi, topaz, asɔ kplii o

eye sika nyuitɔ mate ŋu aƒlee o.

²⁰“Ekema afi ka nunya tso?

Afi ka nye gɔmesese ƒe nɔƒe?

²¹Eɣla ɖe nu gbagbe ɖe sia ɖe ƒe ŋkukpɔƒe

eye woɣlae ɖe dziƒoxeviwo gɔ̃ hã.

²²Tsiẽƒe kple ku gblɔ be,

‘Nyasegblɔ tso eŋuti koe ɖo míaƒe towo me.’

²³Mawue nya egbɔmɔ

eye eya koe nya afi si wòle.

²⁴Elabena eyae tea ŋu kpɔa anyigba ƒe mlɔenu

ke, eye wòkpɔa nu sia nu si le ɣea te.

²⁵Esi wòɖo ya ƒe ŋusẽ anyi,

hedzidze tsiwo vɔ,

²⁶esi wòwɔ se na tsidzadza,

heta mɔ na dziɖegbe kple ahom vɔ la,

²⁷enye kɔ kpɔ nunya, dzro eme kpɔ

eye wòda asi ɖe edzi, hedoe kpɔ.

²⁸Tete wògblɔ na amegbetɔ be,

‘Kpɔ ɖa, Aƒetɔ la vɔvɔ̃e

nye nunya eye nugbegbe

le vɔ̃ gbɔe nye gɔmesese.’ ”

¹Hiob yi eƒe nuƒoƒo dzi be,

²“O, ale si medi vevie be wòanɔ nam abe

ale si wònɔ le ɣleti siwo va yi me la ene,

le ŋkeke siwo me Mawu kpɔ tanye,

³esi eƒe akaɖi klẽ ɖe nye ta dzi

eye eƒe kekeli na mezɔ to blukɔ tsiɖitsiɖi me!

⁴O, nenye ɖe wòanɔ nam abe nye lãmesẽŋkekewo me ene,

esi kadodo kple Mawu kplikplikpli na wòyra nye aƒe,

⁵esi Ŋusẽkatãtɔ la ganɔ kplim ko

eye vinyewo ƒo xlãm,

⁶esi nye toƒe nye notsi kpeke ɖeɖe

eye amitimi ɖuɖu bababa tso agakpe me nam.

⁷“Ne meyi dua ƒe agbo nu,

henɔ anyi ɖe zikpui dzi gli,

le dua ƒe ablɔme la,

⁸ɖekakpuiawo kpɔam,

heƒoa asa nam eye ame tsitsiwo tsona ɖe tsitrenu,

⁹dumegãwo tɔna ne wole nu ƒom

hetsɔa asi ɖoa nu.

¹⁰Gbɔgblɔ buna ɖe ame ŋkutawo

eye woƒe aɖe léna ɖe woƒe nu me.

¹¹Ame sia ame si ɖo tom la kafuam

eye ame siwo kpɔm la ƒoa nu nyui tso ŋutinye

¹²elabena mexɔna na hiãtɔ siwo le ɣli dom be

woakpe ɖe yewo ŋu kple tsyɔ̃evi si si kpeɖeŋutɔ mele o.

¹³Ame si le kukum la ƒe yayra vaa dzinye

eye menana ahosi ƒe dzi kpɔa dzidzɔ.

¹⁴Metsɔ dzɔdzɔenyenye do abe awu ene

eye nuteƒewɔwɔ nye nye awu ʋlaya kple tablanu.

¹⁵Menye ŋku na ŋkuagbãtɔ

kple afɔ na tekunɔ.

¹⁶Menye tɔ na hiãtɔwo

eye mexɔa nya ɖe amedzrowo nu.

¹⁷Meŋea tsyo na ame vɔ̃ɖiwo

eye meɖea nu si woda adzoe la le woƒe aɖutame.

¹⁸“Mebu be, ‘Maku ɖe nye ŋutɔ nye aƒe me,

nye ŋkekewo asɔ gbɔ abe ke ene.

¹⁹Nye kewo aƒo ɖe to, ade tsi gbɔ

eye zãmu adza ɖe nye alɔwo dzi zã blibo la.

²⁰Nye ŋutikɔkɔe anɔ yeye zum ɣe sia ɣi le ŋunye

eye dati anɔ yeye ɖaa le asinyeme.’

²¹“Amewo ɖoa tom henɔa nye asinu kpɔm,

nɔa lalam na nye aɖaŋuɖoɖo le ɖoɖoezizi me.

²²Ne meƒo nu la, womegaƒoa nu o

eye nye nyawo gena ɖe woƒe towo me bɔlɔɔ.

²³Wonɔa lalayem abe ale si wolalana na tsidzadza ene

eye woxɔa nye nyawo dea wo ɖokui me

abe ale si wonoa kelemetsi ene.

²⁴Womexɔnɛ sena ne meko nu na wo o,

nye mo ƒe kekeli nye nu xɔasi na wo.

²⁵Metiaa mɔ si woato la na wo,

menɔa wo dome abe woƒe tatɔ ene

eye menɔa wo dome abe woƒe fia le

eƒe aʋakɔwo dome ene.

Menɔna abe ame si faa akɔ na konyifalawo ene.

¹“Ke azɔ la, ame siwo menye xoxo na,

ame siwo fofowo manyɔ ŋui be womade ha

kple nye lãkplɔvuwo gɔ̃ hã o la ɖua fewu le ŋutinye.

²Nu ka woƒe alɔkpa sesẽ la wɔ nam,

esi ŋusẽ vɔ le wo ŋu?

³Hiã kple dɔwuame na wowɔ ɖeƒomevie hele tsatsam

le dzogbe kple kuɖiɖinyigbawo dzi le zã me.

⁴Le gbe me woda amagbewo

eye woƒe nuɖuɖue nye dɔli ƒe ke.

⁵Woɖe wo ɖa le wo nɔvi amegbetɔwo ƒe ha me

eye wodo ɣli ɖe wo ta abe fiafitɔwo wonye ene.

⁶Wozi wo dzi be woanɔ tɔʋu siwo mie la me,

agakpewo tome kple do siwo woɖe ɖe anyigba la me.

⁷Wole xɔxlɔ̃m le gbe me

eye woƒo ta kpli ɖe avekawo te.

⁸Wonya wo le anyigba la dzi abe ame ɖigbɔ̃wo

kple yakamewo ƒe dzidzimeviwo ene.

⁹“Ke azɔ la, wo viŋutsuwo kpa ha dem,

heɖu fewu le ŋunye le ha la me

eye mezu lodonu le wo dome.

¹⁰Wonyɔa ŋum, henɔa adzɔge nam

eye woɖea ta ɖe mo nam faa.

¹¹Esi azɔ Mawu lã nye datika, hewɔ fum la,

wowɔa nu si dze wo ŋu la le ŋkunye me.

¹²Wo detɔwo tso ɖe ŋutinye le nye ɖusime,

woɖo mɔwo ɖi na nye afɔ

eye woƒu woƒe aʋakpowo ɖe ŋunye.

¹³Wogbã nye mɔ, edze edzi na wo be

wogblẽ donyeme eye ame aɖeke mekpe ɖe wo ŋu gɔ̃ hã o.

¹⁴Wolũ ɖe dzinye abe gli gbagbã mee woto ene

eye wozɔ to gbagbãƒewo va ƒo ɖe dzinye.

¹⁵Ŋɔdzidodowo nye tsyɔ dzinye,

wonya nye bubu ɖe nu abe ale si ya lɔa nu ɖe nue ene

eye nye dedinɔnɔ bu abe lilikpo ene.

¹⁶“Azɔ nye agbe nu va le yiyim

eye hiãŋkekewo lém.

¹⁷Zã ŋɔa nye ƒuwo

eye nye vevesese manyagblɔ nu metsona o.

¹⁸Mawu tsyɔ eƒe ŋusẽ triakɔ la

dzinye abe avɔ ene, eye

wòle awu ɖe ve nam.

¹⁹Ekɔm ƒu gbe ɖe ba me

eye mezu ke kple dzofi.

²⁰“O Mawu, mefa avi yɔ wò gake mètɔ nam o,

metsi tsitre gake ɖeko nèkpɔm dũu.

²¹Ètrɔ dze dzinye nublanuimakpɔmakpɔtɔe

eye nètsɔ wò alɔkpa sesẽ ɖu dzinyee.

²²Èƒom tsa, hena ya lɔm ɖe nu

eye nènyamam le ahom la me.

²³Menya be àhem ayi ku me,

teƒe si woɖo ɖi na kodzogbeawo katã.

²⁴“Vavãe, ame aɖeke medoa asi ɖa léa

ame si gbã gudugudu ne ele ɣli dom be

woaxɔ na ye le eƒe xaxa me o.

²⁵Ɖe nyemefa avi ɖe ame siwo ɖo xaxa me la ŋu oa?

Ɖe nye luʋɔ mexa nu ɖe ame dahewo ŋuti oa?

²⁶Gake esi mekpɔ mɔ na nyui la, vɔ̃ tum,

esi mekpɔ mɔ na kekeli la, viviti koe va nam.

²⁷Dzoxɔxɔ si le edzi yim le menye la metɔna o,

fukpekpeŋkekewo kpe akɔ kplim.

²⁸Nye amea menyɔ tsiɖitsiɖitsiɖi le yiyim

gake menye ɣee ɖum o,

metsi tsitre ɖe ameha

la titina hedo ɣli bia kpekpeɖeŋu.

²⁹Meva zu nɔviŋutsu na amegãxiwo

kple hati na golowo.

³⁰Nye ŋutigbalẽ nyɔ tsiɖitsiɖitsiɖi hele fofom le ŋutinye

eye asrã dze dzinye kple dzoxɔxɔ gã aɖe.

³¹Nye kasaŋku do konyifagbe

eye nye dze le avigbe dom.

¹“Mebla nu kple nye ŋku be

megakpɔ ɖetugbi aɖeke ahiãdzetɔe o.

²Elabena nu kae nye amegbetɔ tɔ gome tso

Mawu si le dziƒo la gbɔ

kple eƒe domenyinu tso

Ŋusẽkatãtɔ si le dziƒo ʋĩi la gbɔ?

³Ɖe menye gbegblẽ wònye na ame vɔ̃ɖiwo

kple dzɔgbevɔ̃e na nu tovo wɔlawo oa?

⁴Ɖe mekpɔ nye mɔwo

eye wòxlẽ nye afɔɖeɖe ɖe sia ɖe oa?

⁵“Nenye be mezɔ le aʋatsokaka me

alo nye afɔ ɖe abla ɖe amebeble ŋuti la,

⁶ekema Mawu nedam le nudanu nyuitɔ dzi

eye wòanya be nyemeɖi fɔ o.

⁷Nenye be nye afɔ tra le mɔ la dzi,

nenye be nye dzi kplɔ nu si nye ŋkuwo kpɔ la ɖo

alo nye asiwo ƒo ɖi la,

⁸ekema ame bubuwo neɖu nu siwo meƒã

eye woneho nye nukuwo le bo dzi.

⁹“Ne nyɔnu aɖe flu nye dzi

alo mede xa ɖe nye aƒelika ƒe ʋɔtru nu la,

¹⁰ekema srɔ̃nye netu bli na ŋutsu bubu

eye ŋutsu bubuwo nedɔ kplii.

¹¹Elabena esia anye ŋukpenanu

kple nu vɔ̃ si dze na ʋɔnudɔdrɔ̃.

¹²Enye dzo si bina hena gbegblẽ,

eye wòaho nye nukuwo akɔ ɖi.

¹³“Ne nyemetso afia nyui na nye dɔlaŋutsuwo

kple dɔlanyɔnuwo ne wotsɔ nya ɖe ŋunye o la,

¹⁴nu ka mawɔ ne Mawu bia gbem?

Ŋuɖoɖo ka mana ne eyɔm be mana akɔnta?

¹⁵Ɖe menye ame si wɔm ɖe vidzidɔ me lae wɔ woawo hã oa?

Ɖe menye eya koe wɔ mí ame evea katã

ɖe mía dadawo ƒe dɔ me oa?

¹⁶“Nenye be mete hiãtɔwo woƒe didiwo

alo mena nu te ahosiwo ƒe ŋkuwo ŋu,

¹⁷nenye be nye ɖeɖe meɖu nye abolo heku ŋɔ tsyɔ̃evi la,

eya ko woagblɔ nya aɖe,

¹⁸evɔ la tso nye ɖekakpuime ke,

menyi tyɔẽviwo abe fofo ene

eye tso nye ɖevime ke,

mefia mɔ ahosiwo.

¹⁹Ne mekpɔ ame aɖe wòle tsɔtsrɔ̃m le avɔmanɔamesi ta

alo hiãtɔ si mekpɔ awu ne wòado o

²⁰eye eƒe dzi meyram be metsɔ avɔ si wowɔ

kple nye alẽwo ƒe fu nɛ be wòade dzo lãme nɛ o,

²¹ne mekɔ nye asi dzi ɖe tsyɔ̃evi ŋu, evɔa menya be

woxɔa nye nya le ʋɔnu la,

²²ekema na be nye abɔ nage le abɔgba ŋu

eye wòaŋe le ekpeƒe.

²³Elabena gbegblẽ si tso Mawu gbɔ la le ŋɔ dzim nam,

eye vɔvɔ̃ na eƒe atsyɔ̃ mana mawɔ nu mawo o.

²⁴“Nenye ɖe meɖo dzi ɖe sika ŋu

alo megblɔ na sika nyuitɔ be,

‘Wòe nye nye sitsoƒe,’

²⁵nenye ɖe mekpɔ dzidzɔ le nye kesinɔnu gbogboawo ta,

nu siwo nye alɔ wɔ dɔ kpɔ,

²⁶nenye ɖe mede bubu ɣe ŋuti le ale si wòle keklẽm

alo ɣleti le ale si wòle yiyim kple atsyɔ̃,

²⁷ale be woflu nye dzi le adzame

eye metsɔ nye asi wɔ dzesi na wo be melɔ̃ wo,

de bubu wo ŋu la,

²⁸ekema esiawo hã anye nu vɔ̃

siwo wòle be woahe ayi ʋɔnu,

elabena adze ċa be

nyemeto nyateƒe na Mawu le dziƒo o.

²⁹“Nenye ɖe mekpɔ dzidzɔ le

nye futɔ ƒe dzɔgbevɔ̃e me dzedze ŋu

alo dzɔ dzi le hiã siwo tui ta la,

eya ko magblɔ nya aɖe.

³⁰Gake nyemeɖe mɔ na nye nu be

wòawɔ nu vɔ̃ to ɖiŋudodo na eƒe agbe me o.

³¹Nenye ɖe ame siwo le aƒenye me la se megblɔ kpɔ be,

‘Ame kae meɖu Hiob ƒe abolo ɖi ƒo kpɔ o?’ la,

anye ne enye nya bubu

³²elabena mele na amedzro aɖeke be

wòatsi mɔto adɔ o

elabena nye ʋɔtru le ʋuʋu ɖi

ɣe sia ɣi na mɔzɔlawo.

³³Nenye ɖe meɣla nye nu vɔ̃

abe ale si amewo wɔna ene,

be meɣla nye dzidada ɖe nye dzi me,

³⁴elabena mevɔ̃ na ameha la ŋutɔ

eye mevɔ̃ na dukɔ la ƒe vlododo ale gbegbe be,

mezi ɖoɖoe hegbe gododo ɖe gota la,

anye ne enye nya bubu kura.

³⁵“O, ɖe ame aɖe le asinye aɖo tom ɖe!

Kpɔ ɖa mede asi ɖokuinyetaʋlinyawo te,

azɔ la, Ŋusẽkatãtɔ la neɖo eŋu nam,

ame si le nunye tsom la hã neŋlɔ

nunyetsonyawo ɖe agbalẽ dzi.

³⁶Vavã malée ɖe nye abɔta

eye maɖɔe ɖe ta abe fiakuku ene.

³⁷Mana nutsotsoe tso nye afɔɖeɖe ɖe sia ɖe ŋuti

eye mate ɖe eŋu abe fiavi ene.

³⁸“Nenye ɖe nye anyigba fa avi ɖe ŋutinye

eye eƒe boliƒowo yɔ kple aɖatsi,

³⁹nenye be meɖu eƒe kutsetsewo femaxee

alo mena dɔwɔla siwo le agblea dzi la

ƒe gbɔgbɔ gbã gudugudugudu la,

⁴⁰ekema aŋɔkawo nemie nam ɖe lu teƒe

eye gbe wuwluiwo nemie ɖe ƒo teƒe.”

Esiae nye Hiob ƒe nyawo ƒe nuwuwu.

Elihu ƒe nuƒo

¹Ale ŋutsu etɔ̃ siawo dzudzɔ nyaŋuɖoɖo na Hiob, elabena enye ame dzɔdzɔe le eya ŋutɔ ŋkume. ²Tete dzi ku Buzitɔ, Elihu, ame si nye Barakel ƒe vi, tso Ram ƒe ƒomea me vevie ɖe Hiob ŋu le esi wòbu eɖokui dzɔdzɔetɔe wu Mawu la ta. ³Edo dziku ɖe exɔlɔ̃ etɔ̃awo hã ŋu elabena mɔ aɖeke meli si dzi woato abu fɔ Hiob o, gake wobu fɔe. ⁴Azɔ la, Elihu lala be yeaƒo nu na Hiob elabena wotsi wui. ⁵Gake esi wòkpɔ be nya aɖeke megale ame etɔ̃awo si o la, Elihu gado dziku ɖe edzi.

⁶Ale Buzitɔ, Barakel ƒe vi Elihu gblɔ be,

“Nyemetsi o, mienye xoxo nam

eya ta mevɔ̃ eye nyemete ŋu

do dzi gblɔ nu si menya la na mi o.

⁷Mebu be, ‘Tsitsi neƒo nu

eye ƒe geɖe nefia nunya.’

⁸Gake gbɔgbɔ si le ame me,

Ŋusẽkatãtɔ la ƒe gbɔgbɔe naa gɔmesesee.

⁹Menye tsitsiawo koe nye nunyalawo o

eye menye amegãxoxowo koe se nu si le dzɔdzɔe la gɔme o.

¹⁰“Eya ta megblɔ be, Miɖo tom,

nye hã magblɔ nu si menya la na mi.

¹¹Menɔ lalam esi mienɔ nu ƒom,

meɖo to se miaƒe nyameɖeɖewo

kple ale si nya vɔ le mia si

eye mienɔ nya si miagblɔ la dim.

¹²Meɖo to mi nyuie

gake mia dometɔ aɖeke mete ŋu

ɖee fia be Hiob dze agɔ o

eye mia dometɔ aɖeke mete ŋu

ɖo eƒe nyahehewo ŋu o.

¹³Migagblɔ be, ‘Míeke ɖe nunya ŋuti o,

Mawu neɖe vodada nɛ, menye amegbetɔ o.’

¹⁴Gake Hiob metsɔ nya ɖe ŋunye o

eye nyematsɔ miaƒe nyahehewo aɖo nya ŋu nɛ o.

¹⁵“Woƒe mo wɔ yaa,

nya aɖeke megale wo si woagblɔ o

eye gbɔgblɔ bu ɖe wo.

¹⁶Ɖe magalala, esi wozi ɖoɖoe

eye azɔ wotsi tsitre ɖe afi ma kpaɖii

nya aɖeke ŋu maɖomaɖoea?

¹⁷Nye hã magblɔ tɔnye sinua;

nye hã magblɔ nu si menya

¹⁸elabena nya le asinye fũu,

eye nye gbɔgbɔ le dzinye zim.

¹⁹Elabena le menye la,

mele abe wain si le goe me wotu nu ɖe enu ene

eye abe wainlãgbalẽgolo si

le klalo na gbagbã ene.

²⁰Ele nam be maƒo nu ne makpɔ gbɔdzɔe,

ele nam be make nye nu eye maɖo nya ŋu.

²¹Nyemade ame aɖeke dzi

alo aflu ame aɖeke o

²²elabena ne mebi le amefuflu me la,

nye Wɔla akplɔm dzoe kpuie.

¹“Ke azɔ la, Hiob, ɖo to nye nyawo,

eye ƒu to anyi ɖe nu sia nu si magblɔ la ŋu.

²Kpɔ ɖa, mele nye nu ke ge

eye nye nyawo le nye aɖe nu.

³Nye nyawo tso dzi vavã me

eye nye nu agblɔ nu si menya le anukware me.

⁴Mawu ƒe gbɔgbɔe wɔm,

Ŋusẽkatãtɔ la ƒe gbɔgbɔe de agbe menye,

⁵eya ta ɖo nya ŋu nam, ne àte ŋui,

dzra ɖokuiwò ɖo ne nàhe nya kplim.

⁶Ɖeko mele abe wò ene le Mawu ŋkume,

nye hã anyi mee woɖem tsoe.

⁷Vɔvɔ̃ nam megado dzikatsoƒo na wò

alo nye asi nakpe le dziwò o.

⁸“Gake ègblɔ wòge ɖe nye to me

eye mese nya siwo tututu nègblɔ la be,

⁹‘Medza eye nu vɔ̃ mele ŋutinye o,

ŋutinye kɔ eye mevo tso vodada me.

¹⁰Ke hã la, Mawu kpɔ vodada le ŋunye,

eye wòbum eƒe futɔe.

¹¹Etsɔ nye afɔ de kunyowu me

eye eƒe ŋkuwo le nye mɔwo katã ŋu kplikplikpli.’

¹²“Gake magblɔe na wo be,

le esia me ya, tɔwò medzɔ o,

elabena Mawu lolo wu amegbetɔ.

¹³Nu ka ŋutie nèle nya hem kplii be,

meɖo amegbetɔ ƒe nya aɖeke ŋuti nɛ o?

¹⁴Elabena Mawu ƒoa nu to mɔ sia alo ekemɛ dzi

togbɔ be amegbetɔ mekpɔe dze sii o hã.

¹⁵Le drɔ̃e me, le zã me ƒe ŋutega me,

ne amewo dɔ alɔ̃ yi eme ʋĩi

alo wole akɔlɔ̃e dɔm le woƒe abawo dzi la,

¹⁶ava ƒo nu ɖe to me na wo,

atsɔ kpɔdzidzewo ado ŋɔdzii na wo,

¹⁷be wòana amegbetɔ natrɔ tso vɔ̃wɔwɔ me

eye wòaɖee tso dada me,

¹⁸ne wòadzra eƒe luʋɔ ɖo tso yɔdo ƒe asi me

eye eƒe agbe magatsrɔ̃ ɖe yi nu o.

¹⁹“Alo eƒoa ame le dɔbadzi

kple ƒutomevevesese si nɔa edzi ɖaa,

²⁰ale be eya ameti bliboa nyɔa ŋu nuɖuɖu

eye eƒe luʋɔ doa vlo nuɖuɖu vivitɔ gɔ̃ hã.

²¹Eƒe ŋutilã vɔ le eme eye eƒe ƒu siwo ŋu

lã nɔ tehetehe la dze go azɔ.

²²Eƒe luʋɔ te ɖe yɔdo ŋu kpokploe,

eye eƒe agbe ɖo ku ƒe dɔlawo ƒe asi me.

²³Ke hã la, ne Mawudɔla le eƒe axadzi abe nyaxɔɖeakɔla ene,

ɖeka le akpe dome,

be wòagblɔ nu si nyo na ame la nɛ,

²⁴heve enu, gblɔ nɛ be,

‘Ɖe eƒe agbe be magayi yɔdo me o

elabena mekpɔ avulénu nɛ’ la,

²⁵tete eƒe ŋutilã zua yeye abe ɖevi tɔ ene

eye wògaɖoa eƒe nɔnɔme me abe

eƒe ɖekakpuimeŋkekewo me ene.

²⁶Edoa gbe ɖa na Mawu

eye wòkpɔa amenuveve tso egbɔ,

ekpɔa Mawu ƒe ŋkume eye wòdoa dzidzɔɣli,

ale Mawu gaɖonɛ te,

be wòanɔ dzɔdzɔenyenye si me wònɔ tsã.

²⁷Tete wòvaa amewo gbɔ, gblɔna be,

‘Mewɔ nu vɔ̃ hedo vlo nu si le dzɔdzɔe

gake nyemexɔ tohehe si medze na la o.

²⁸Eɖe nye agbe tso yɔdomeyiyi me,

eye manɔ agbe adzɔ dzi le eƒe kekeli me.’

²⁹“Mawu wɔa nu siawo katã na ame,

zi eve alo etɔ̃ gɔ̃ hã,

³⁰be wòaɖe eƒe luʋɔ tso tsiẽƒe,

be agbe ƒe kekeli naklẽ ɖe edzi.

³¹“Ƒu to anyi, Hiob, ne nàɖo tom,

zi ɖoɖoe, ne maƒo nu.

³²Ne nya aɖe le asiwò la, ɖo nya ŋu nam,

elabena medi be wòatso na wò.

³³Gake ne mele eme o la, ekema nàɖo tom,

zi ɖoɖoe ne mafia nunya wò.”

¹Tete Elihu gblɔ be,

²“Mise nye nyawo, mi nunyalawo,

miɖo tom, mi nugɔmeselawo,

³elabena to doa nyawo kpɔ

abe ale si aɖe ɖɔa nuɖuɖu kpɔe ene.

⁴Mina míadze si nu si le dzɔdzɔe la na mía ɖokui

eye mina míasrɔ̃ nu si nyo la ɖekae.

⁵“Hiob gblɔ be, ‘Nyemeɖi fɔ o

gake Mawu gbe afiatsotso nam

⁶Togbɔ be tɔnye dzɔ hã la, wobum alakpatɔe,

togbɔ be nyemeɖi fɔ o hã la,

eƒe aŋutrɔ de abi makumaku ŋutinye’

⁷Ame kae le abe Hiob,

ame si no fewuɖuɖu abe tsi ene?

⁸Edea ha kple nu vɔ̃ɖi wɔlawo

eye wòbɔa ha kple ame vɔ̃ɖiwo.

⁹Elabena egblɔ be,

‘Viɖe aɖeke mele eme ne èdze agbagba be

yeadze Mawu ŋu o.’

¹⁰“Eya ta miɖo tom, mi ŋutsu nugɔmeselawo.

Nete ɖa xaa tso Mawu gbɔ, be wòawɔ nu vɔ̃ɖi

kple Ŋusẽkatãtɔ la, be wòawɔ nu gbegblẽ.

¹¹Ewɔna na ame ɖe nu si wòwɔ la nu

eye wòhea nu si eƒe nuwɔnawo dze na la vaa edzii.

¹²Mele be wòava ame ƒe ta me gɔ̃ hã be

Mawu awɔ nu gbegblẽ

alo be Ŋusẽkatãtɔ la atso afia ŋkunɔ o.

¹³Ame kae tsɔe ɖo anyigbadzikpɔlae?

Ame kae tsɔe ɖo xexea me katã nu?

¹⁴Ne enye eƒe tameɖoɖo

eye wòɖo asi eƒe gbɔgbɔ

kple agbegbɔgbɔ dzi la,

¹⁵amegbetɔwo katã atsrɔ̃

eye ame atrɔ azu anyi.

¹⁶“Ne gɔmesese le asiwò la, se nya sia,

lé to ɖe nu si gblɔ ge mele la ŋuti.

¹⁷Ɖe ame si tsri afia nyui tsotso la ate ŋu akplɔ dua?

Ɖe nàbu fɔ dzɔdzɔetɔ kple Ŋusẽtɔ la?

¹⁸Ɖe menye Eyae nye ame si gblɔ na fiawo be,

‘Mienyo na naneke o’

eye na bubumewo be,

‘Ame vɔ̃ɖiwo mienye’ oa,

¹⁹ame si medea amegãwo dzi o

eye mewɔa nyui na kesinɔtɔwo,

gblẽa ame dahewo ɖi o,

elabena wo katã nye eƒe asinudɔwɔwɔwo oa?

²⁰Wokuna kpata le zãtitina,

ameawo ʋuʋuna eye wo nu va yina

ale woɖea kalẽtɔwo ɖa amegbetɔ ƒe asi manɔmee.

²¹“Eƒe ŋkuwo le amegbetɔwo ƒe mɔwo ŋu,

ekpɔa woƒe afɔɖeɖe ɖe sia ɖe.

²²Teƒe doblukɔ alo teƒe doviviti tsiɖitsiɖitsiɖi aɖeke meli

si nu tovo wɔlawo asi abe ɖo o.

²³Mehiã be Mawu nado amegbetɔwo kpɔ ayi ŋgɔ

alo woava eŋkume wòadrɔ̃ ʋɔnu wo o.

²⁴Mekua nya gɔme hafi kakaa ŋusẽtɔwo,

eye wòtsɔa ame bubuwo ɖoa wo teƒe o.

²⁵Elabena eƒe ŋku le woƒe nuwɔnawo ŋu

eya ta etua asi wo ƒua anyi le zã me,

eye wogbãna gudugudugudu.

²⁶Ehea to na wo ɖe woƒe vɔ̃ɖivɔ̃ɖi ta,

le afi si ame sia ame ate ŋu akpɔ wo le

²⁷elabena wotrɔ le eyome

eye womegatsɔ ɖeke le eme na eƒe mɔ aɖeke o.

²⁸Wona ame dahewo ƒe konyifafa va eŋkume,

ale be wòse hiãtɔwo ƒe ɣlidodo

²⁹Ke ne ezi ɖoɖoe kpoo la, ame ka abu fɔe?

Ne eɣla eƒe mo la, ame ka ate ŋu akpɔe?

Ke hã la, ele amewo kple dukɔwo tame sɔsɔe,

³⁰be maɖe mɔ na Mawumavɔ̃la wòaɖu fia o

eye be maɖe mɔ nɛ wòaɖo mɔ na ameawo o.

³¹“Tsɔe be ame aɖe gblɔ na Mawu be,

‘Medze agɔ gake nyemagawɔe azɔ o.

³²Fia nu si nyemate ŋu akpɔ o lam,

ne mewɔ nu gbegblẽ la, nyemagawɔe azɔ o.’

³³Ɖe Mawu aɖo eteƒe na wò le wò didi nu,

esi nègbe be yematrɔ dzi me oa?

Wòe wòle be nàɖo eŋu, menye nyee o

eya ta gblɔ nu si nènya la nam.

³⁴“Nugɔmeselawo gblɔe eye nunyala

siwo se nye nyawo la gblɔ nam be,

³⁵‘Hiob ƒoa nu nugɔmemasemasetɔe

eye susu mele eƒe nyawo me o.’

³⁶O, ɖe woado Hiob akpɔ va se ɖe nuwuwu,

be wòɖo nya ŋu abe ame vɔ̃ɖi ene la, ne anyo ŋutɔ!

³⁷Etsɔ aglãdzedze kpe ɖe eƒe nu vɔ̃ ŋuti,

esia akpe fewuɖutɔe le mía dome

eye wòle nyawo gblɔm fũu ɖe Mawu ŋu.”

¹Tete Elihu yi eƒe nuƒoa dzi be,

²“Èsusu be esia le dzɔdzɔea?

Ègblɔ be, ‘Mawu atso afia nam’

³gake nèhele ebiam be,

‘Viɖe ka wònye nam eye nu ka makpɔ

le eme ne nyemewɔ nu vɔ̃ o?’

⁴“Medi be maɖo eŋu na wò

kple xɔ̃wò siwo le gbɔwò.

⁵Wu mo dzi nàkpɔ dziƒo ɖa,

le ŋku ɖe lilikpo siwo le dziƒo boo le tawòme

⁶Ne èwɔ nu vɔ̃ la, nu ka wòawɔ le eŋu?

Ne wò nu vɔ̃wo sɔ gbɔ fũu la,

nu ka wòagblẽ le eŋu?

⁷Ne ènye dzɔdzɔetɔ la, nu kae nètsɔ nɛ,

alo nu kae wòxɔ tso asiwò me?

⁸Ame abe wò ene ko dzie wò vɔ̃ɖivɔ̃ɖi awɔ dɔ ɖo

eye amegbetɔviwo ko dzie wò

dzɔdzɔenyenye awɔ dɔ ɖo.

⁹“Amewo le ɣli dom le teteɖeanyi

ƒe agba kpekpewo te,

wole kuku ɖem be woana gbɔdzɔe yewo tso

Ŋusẽtɔ la ƒe alɔ sesẽ te

¹⁰gake ɖeke mebia be, ‘Afi ka Mawu,

nye Wɔla, ame si nana kafuhawo ɖina le zã me,

¹¹ame si fiaa nu geɖewo mí,

wu gbemelã siwo le anyigba dzi

eye wòwɔ mí nunyalawoe wu dziƒoxeviwo la le?’

¹²Ne amewo le ɣli dom nɛ la, metɔna o,

le ame vɔ̃ɖiwo ƒe ɖokuiŋudzedze ta.

¹³Vavã, Mawu meɖo to woƒe kokoƒoƒo gbɔlo la o

eye Ŋusẽkatãtɔ la do toku wo.

¹⁴Ne meɖo to emawo o la,

aleke wòaɖo to esia ya boŋ esi nègblɔ be,

mele ekpɔm o, wò nya la le eƒe asi me,

eye ele be nàlalae.

¹⁵Gawu la, egblɔ be eƒe dziku mehea to na ame gbeɖe o

eye menyea kɔ kpɔa vɔ̃ɖivɔ̃ɖi gɔ̃ hã o.

¹⁶Ale Hiob ke eƒe nu hegblɔ nya dzodzrowo

eye wòlɔ nya siwo me gɔmesese aɖeke mele o

la kɔ ɖi gleglegle.”

¹Elihu yi edzi be,

²“Kpɔ nye asinu vie eye maɖee afia wò

be nya geɖewo li magblɔ ɖe Mawu nu.

³Mexɔa nye gɔmesese tso afi aɖeke ɖaa,

eya ta matso na nye Wɔla.

⁴Kakaɖedzi nenɔ asiwò be,

nye nyawo menye aʋatso o

eya ta ame si si gɔmesese deto le lae le gbɔwò.

⁵“Mawu nye Ŋusẽtɔ,

etri akɔ eye meʋãna le eƒe taɖodzinu me o

gake medoa vlo amewo o.

⁶Menana ame vɔ̃ɖiwo nɔa agbe o,

ke boŋ ekpɔa hiãtɔwo ƒe hiahiãwo gbɔ na wo.

⁷Meɖea eƒe ŋku ɖa le ame dzɔdzɔewo ŋu o,

eɖoa wo zi dzi ɖe fiawo xa

eye wòdoa wo ɖe dzi tegbetegbe.

⁸Ke ne wode ga amewo,

hebla wo sesĩe kple hiã ƒe kawo la,

⁹egblɔa nu si wowɔ la na wo,

esi nye be wowɔ nu vɔ̃ dadatɔe.

¹⁰Enana woɖoa to ɖɔɖɔɖo eye wòɖea gbe na wo be

woatrɔ le woƒe nu vɔ̃ɖi la me.

¹¹Ne woɖo to eye wosubɔe la,

woanɔ woƒe agbemeŋkeke mamlɛawo le nukpɔkpɔ me

eye woƒe ƒewo ayɔ fũu kple dzidzeme.

¹²Ke ne womeɖo to o la,

yi atsrɔ̃ wo eye woaku numanyamanyae.

¹³“Fuléle le dzi me na Mawumavɔ̃lawo,

ne ede kunyowu woƒe afɔwo hã la,

womedoa ɣli be woaxɔ na yewo o.

¹⁴Wokuna le woƒe ɖekakpui dzodzoe me,

ɖe ŋutsu gbolowɔla siwo nɔa trɔ̃xɔwo me la dome.

¹⁵Ke eɖea ame siwo le fu kpem la

le woƒe fukpekpewo me

eye wòƒoa nu na wo le woƒe xaxa me.

¹⁶“Ele nuwò blem be nàdo go tso xaxa ƒe glã me,

ava teƒe keke, ahavo tso dzizizi me

eye nànɔ wò kplɔ̃ si dzi nuɖuɖu damiwo

le fũu la ŋu le dziɖeɖi me.

¹⁷Ke azɔ la, wotsɔ ʋɔnudɔdrɔ̃ si dze na

ame vɔ̃ɖiwo la do agbae na wò,

ale nège ɖe afiatsotso

kple tohehe ƒe asi me.

¹⁸Kpɔ nyuie be ame aɖeke metsɔ kesinɔnuwo ble nuwòe o

eye zãnu si le kpekpem segee la nana nàdze ɖe aga o.

¹⁹Ɖe wò kesinɔnuwo alo wò kutrikuku veviwo katã

alé wò ɖe asi be màɖo xaxa me oa?

²⁰Wò dzi megatsi dzi ɖe zã ƒe dodo ŋu ne nàhe

amewo ado goe le woƒe aƒewo me o.

²¹Kpɔ nyuie be mètrɔ ɖe nu vɔ̃ɖi,

si nèdi wu hiã la ŋu o.

²²“Kpɔ ɖa, wodo Mawu ɖe dzi bobobo le eƒe ŋusẽ me.

Ame kae nye nufiala abe eya ene?

²³Ame kae tia mɔ siwo wòato la nɛ alo gblɔ nɛ be,

‘Èwɔ nu gbegblẽ?’

²⁴Ɖo ŋku edzi, nàdo eƒe dɔwɔwɔwo ɖe dzi,

siwo amewo kafuna le woƒe hadzidziwo me.

²⁵Amegbetɔwo katã kpɔe

eye agbagbeawo ɖea ŋku ɖee tso adzɔge.

²⁶Mawu lolo loo, ekɔ gbɔ míaƒe gɔmesese ta!

Eƒe ƒewo ƒe gɔmedidi gbɔ míaƒe nudidi ƒe ŋutete ta.

²⁷“Ehea tsi si le gegem toŋtoŋtoŋ la ƒoa ƒu,

si dzana abe tsi ene ɖe tɔʋuwo me,

²⁸lilikpowo hã lolõa tsi si le wo me,

eye tsi dzana bababa ɖe amegbetɔwo dzi.

²⁹Ame kae ase ale si wòkeke lilikpowo,

kple ale si wòɖea gbe tso eƒe agbadɔ me la gɔme?

³⁰Kpɔ ale si wòkaka eƒe dzikedzo ƒo xlã eɖokui

eye wòblu atsiaƒu ƒe gogloƒewo ke hã ɖa.

³¹Aleae wòkplɔa dukɔwoe eye wònaa nuɖuɖu

wo le agbɔsɔsɔ me.

³²Etsɔa dzikedzo yɔa eƒe asiwo mee

eye wòdɔnɛ be wòake dzo ɖe nu si wòɖoe na la dzi.

³³Eƒe dziɖegbe ɖea gbeƒã ahom si gbɔna,

nyiwo gɔ̃ hã ɖea gbeƒã, ne egbɔna.

¹“Esia na nye dzi lã kpo eye wòti kpo le enɔƒe.

²O ɖo to! Ɖo to eƒe gbe ƒe gbeɖeɖe

kple bublu si le dodom tso eƒe nu me.

³Eɖe asi le eƒe dzokeke ŋu ɖe yame katã

eye wòɖoe ɖe anyigba ƒe mlɔenu ke hã

⁴Eƒe gbeɖeɖe kplɔa esia ɖo,

ebluna kple eƒe ŋutikɔkɔe ƒe gbe.

Ne eƒe gbe ɖi la, meléa naneke ɖi o.

⁵Mawu ƒe gbe bluna le nukumɔwo dzi,

ewɔa nu dzɔtsu siwo kɔ wu míaƒe gɔmesese.

⁶Egblɔna na tsikpe be,

‘Dza ɖe anyigba dzi’

eye na tsi be,

‘Nye tsi gã aɖe nàdza.’

⁷Ale be amegbetɔ siwo katã wòwɔ la nanya eƒe dɔwɔwɔ,

eye wòɖoa asi ame sia ame ƒe dɔ dzi.

⁸Gbemelãwo sina bena

eye wonɔa woƒe dowo me.

⁹Ahom tsoa eƒe xɔa me vana

eye ya sesẽwo hea vuvɔ vɛ.

¹⁰Mawu ƒe gbɔgbɔ hea fafa gã aɖe vɛ

eye tsi gbanawo dzi zua tsikpe.

¹¹Enyɔa tsi ɖe lilikpowo me,

ekakaa eƒe dzikedzo to wo me.

¹²Le eƒe mɔfiafia nu wotrɔa trɔgodoe le anyigba la katã ŋkume,

be woawɔ nu sia nu si ƒe se wòde na wo.

¹³Ehea lilikpowo vɛ be woahe to na amewo

alo be woade tsi anyigba,

ne wòaɖe eƒe lɔlɔ̃ afia ameawo.

¹⁴“Hiob, ɖo to nàse nu sia,

zi ɖoɖoe eye nàbu Mawu ƒe nukunuwo ŋu.

¹⁵Ènya ale si Mawu léa lilikpowo ɖe asii,

eye wònana dzi kea dzoa?

¹⁶Ènya ale si lilikpowo wɔ hafi le yamea,

ènya nukunu siwo nye ame si de blibo

le gɔmesese me la tɔa?

¹⁷Wò ame si le fifia tem le wò awuwo me,

ne dzieheya xɔdzo nya ƒo to anyigba dzi ko,

¹⁸àte ŋu akpe ɖe eŋu le dziŋgɔli ƒe keke ɖe yame me,

nu si sesẽ abe ahuhɔ̃e si wowɔ kple akɔbli enea?

¹⁹“Gblɔ nu si míagblɔ nɛ la na mí,

míate ŋu ahe míaƒe nya ayi egbɔe o

elabena míawo míele viviti me.

²⁰Wonegblɔ nɛ be medi be maƒo nua?

Ɖe ame aɖe abia be wonemi ye agbagbea?

²¹Azɔ la, ame aɖeke mate ŋu akpɔ ɣe o

elabena ele keklẽm le dziƒo ŋutɔ,

esi yaƒoƒo na eƒe mo kɔ nyuie.

²²Edo tso anyiehe kple sikatsyɔ̃ɖoɖo.

Mawu ɖiɖi va le ŋɔdzi ƒe ŋutikɔkɔe me.

²³Ame aɖeke matu Ŋusẽkatãtɔ la o

elabena togbɔ be eƒe ŋusẽ de dzi bobobo,

le eƒe afiatsotso kple dzɔdzɔenyenye gã la me hã la,

metea ame aɖeke ɖe anyi o.

²⁴Eya ta amewo dea bubu eŋu

elabena ɖe medea bubu ame siwo katã

ƒe dzi me nunya le la ŋu oa?”

Yehowa ƒo nu

¹Tete Yehowa ɖo nyawo ŋu na Hiob to ahom me be,

²“Ame ka nye esi tsɔ viviti tsyɔ nye aɖaŋudede dzi

kple nya siwo gɔmesese meli na la o?

³Tso nàbla ali dzi abe ŋutsu ene,

mabia nya wò, nàɖo eŋu nam.

⁴“Afi ka nènɔ esi meɖo anyigba ƒe gɔmeɖokpewo anyi?

Gblɔe nam, ne èse egɔme.

⁵Ame kae dzidze eƒe kekeme kple didime?

Ànyae godoo! Ame kae tsɔ dzidzeka ɖo eŋu?

⁶Nu ka dzi woɖo egɔme anyi ɖo?

Alo ame kae ɖo eƒe dzogoedzikpe

⁷esi ŋukeɣletiviwo le ha dzim ɖekae

eye Mawudɔlawo katã do dzidzɔɣli?

⁸“Ame kae do ʋɔ ɖe atsiaƒu nu

esi wòdo go kpoyi tso dadaa ƒe dɔ me

⁹esi metsɔ lilikpo wɔ eƒe awudodoe heblae ɖe

viviti tsiɖitsiɖitsiɖi me,

¹⁰esi meɖo seɖoƒe nɛ,

hede ʋɔtru kple gametiwo enu,

¹¹esi megblɔ be, ‘Afii ko nàse,

mèkpɔ mɔ ato liƒo sia dzi o,

afi sia ko wò dada kple ɖokuidodoɖedzi ase?’

¹²“Èɖe gbe na ŋdi kpɔ tso

esi wò ŋkekewo dze egɔme

alo na fɔŋli nya eƒe nɔƒe,

¹³be wòalé anyigba ƒe toga,

ahaʋuʋu ame vɔ̃ɖiwo ɖa le edzia?

¹⁴Anyigba trɔ eƒe nɔnɔme abe anyi le nutrenu te ene,

eye eƒe nɔnɔme le abe avɔ tɔ ene.

¹⁵Woxɔ ame vɔ̃ɖiwo ƒe kekeli le wo si

eye woŋe woƒe abɔ si wodo ɖe dzi.

¹⁶“Èzɔ mɔ yi ɖe atsiaƒu ƒe vudo me

alo zɔ le gogloƒe ƒe nudiƒewo kpɔa?

¹⁷Wofia ku ƒe agbowo wò kpɔa?

Èkpɔ ku ƒe vɔvɔli ƒe agbowo kpɔa?

¹⁸Èse anyigba ƒe kekeme gɔmea?

Gblɔe nam, ne ènya esiawo katã.

¹⁹“Afi ka mɔ si yi kekeli ƒe nɔƒe la to?

Eye afi kae nye viviti nɔƒe?

²⁰Àte ŋu akplɔ wo ayi wo nɔƒewoea?

Ènya toƒe si yi ɖe wo nɔƒea?

²¹Meka ɖe edzi be ènyae

elabena wodzi wò ye ma ɣi xoxo!

Ƒe geɖewoe nye esia esi nèle agbe!

²²“Ège ɖe sno ƒe nudzraɖoƒe

alo kpɔ kpetsi ƒe nudzraɖoƒe,

²³esi meɖo ɖi na xaxaɣi,

aʋaŋkekewo kple aʋakpegbe la kpɔa?

²⁴Afi ka mɔ si wotona yia teƒe

si dzikedzo kakana le

alo teƒe si wokakaa ɣedzeƒeya le ɖe

anyigba blibo la dzi la to?

²⁵Ame kae ɖo toƒe na tsi gã siwo dzana

kple mɔ na ahom sesẽwo,

²⁶be woade tsi anyigba si dzi ame mele o

kple gbegbe si ame menɔ o,

²⁷be wòaɖi kɔ na kuɖiɖinyigba gbɔlo

eye wòamie gbe fɛ̃wo?

²⁸Fofo le tsidzadza sia?

Ame kae nye tɔ na ahũdzadza?

²⁹Ame ka ƒe dɔ mee tsikpe do tso?

Ame kae dzi zãmu si dzana tso dziƒo,

³⁰esi tsiwo do kpe abe ahlihã ene

eye gogloƒewo tame zu tsikpe?

³¹“Àte ŋu abla Atifieŋu siwo le keklẽma?

Àte ŋu atu Avutɔ ƒe kawoa?

³²Àte ŋu akplɔ ŋukeɣletiviwo ado goe ne woƒe dodoɣi ɖo

alo akplɔ koklonɔ kple viawoa?

³³Ènya dziƒo ƒe sewoa?

Àte ŋu aɖo Mawu ƒe fiaɖuɖu anyi ɖe anyigba dzia?

³⁴“Àte ŋu akɔ gbe dzi ado ɣli na lilikpowo,

eye nàtsɔ tsiɖɔɖɔ atsyɔ ɖokuiwò dzia?

³⁵Wòe ɖo dzikedzo ɖe eƒe mɔ dzia?

Ɖe wova gblɔna na wò be,

‘Míawoe nye esi’ mahã?

³⁶Ame kae tsɔ nunya na dzi

alo gɔmesese na susu?

³⁷Ame ka sie nunya le be wòaxlẽ lilikpowo?

Ame kae ate ŋu aviã tsizɔ siwo le dziƒo,

³⁸ne anyigba do kpe eye anyikɔ

siwo le anyigba la lé ɖe wo nɔewo ŋu?

³⁹“Wòe daa ade na dzatanɔ

eye nèdia nuɖuɖu na dzatawo, ne dɔ le wo wum

⁴⁰eye womlɔ woƒe dowo me

alo le adeklo dzi le ave mea?

⁴¹Ame kae dia nuɖuɖu na akpaviãwo,

ne viawo le xɔxlɔ̃m na Mawu

eye wole tsatsam le nuɖuɖu makpɔmakpɔ ta?

¹“Ènya ɣeyiɣi si todzigbɔ̃wo dzia via?

Ènɔa eteƒe hafi zinɔ fɔa fua?

²Èxlẽa ɣletiwo va se ɖe woƒe vidziɣia?

Ènya ɣeyiɣi si wodzia via?

³Wodzea klo hedzia vi

eye woƒe kuléle wua nu.

⁴Wo viwo tsina eye ŋusẽ ɖoa wo ŋu le gbe me,

ale wodzona eye womegagbɔna vaa wo dadaa gbɔ o.

⁵“Ame kae na ablɔɖe gbetedzi?

Ame kae tu kae?

⁶Metsɔ gbegbe nɛ be wòanye eƒe aƒe

kple dzeƒi gbadza la nɛ be wòanye enɔƒe.

⁷Hoowɔwɔ si le edzi yim le dua me la

le kokoe ɖim nɛ eye mele tasiaɖamkula ƒe ɣlidodo sem o.

⁸Etsana le togbɛwo dzi dia gbeɖuƒe

eye wòtsaa ŋu na gbe mumu ɖe sia ɖe.

⁹“Ɖe to si le gbe me la alɔ̃ asubɔ wòa?

Atɔ ɖe wò gbeɖuƒe le zã mea?

¹⁰Àte ŋu ade kae ɖe agbleŋlɔnu ŋua?

Alɔ̃ anɔ yowòme aŋlɔ balimea?

¹¹Ɖe nàɖo ŋu ɖe eŋu le eƒe ŋusẽ gã la ta?

Àtsɔ wò dɔ kpekpewo agble ɖe eƒe asi mea?

¹²Àte ŋu aɖo dzi ɖe eŋu be atsɔ wò lu agbɔe na wò dedie

eye wòaƒoe ƒu ɖe wò lugbɔƒea?

¹³“Golo ƒoa eƒe aʋala kpakpakpa dzidzɔtɔe

gake womate ŋu atsɔe asɔ

kple damixe ƒe fu kple aʋalã o.

¹⁴Eɖaa eƒe azi ɖe anyigba,

enana ke xɔdzo dea dzo eme

¹⁵eye metsɔ ɖeke le eme be,

ame aɖe ate ŋu aɖo afɔ edzi, agbãe loo,

alo lã wɔadã aɖe agbãe o.

¹⁶Esẽa ŋuta le viawo ŋu abe menye eyae dzi wo o

ene eye metsɔa ɖeke le eme ne

eƒe agbagbadzedze zu dɔ vlo o.

¹⁷Elabena Mawu mena nunyae

alo na susu nyuie o.

¹⁸Ke hã la, ne ekeke aʋala me, hedze duƒuƒu gɔme la,

sɔ kple sɔdola ƒe nu ɖia kokoe nɛ.

¹⁹“Wòe na ŋusẽ sɔ

alo wòe tsɔ kɔdza de kɔ nɛa?

²⁰Wòe na wòtia kpo abe ʋetsuvi ene

eye wòdoa ŋɔdzi kple eƒe ŋɔtimegbɔgbɔa?

²¹Etsɔa eƒe afɔkli kaa nu ŋɔdzitɔe,

ekpɔa dzidzɔ ɖe eƒe ŋusẽ ŋu

eye wòlũna ɖe aʋakɔ dzi.

²²Vɔvɔ̃ doa nukokoe nɛ eye mevɔ̃a naneke o,

yi gɔ̃ hã medoa ŋɔdzi nɛ o.

²³Aŋutrɔwo le wo nɔewo lɔm le eƒe axadzi,

nenema kee nye akplɔ siwo le dzo dam kple yi.

²⁴Ele anyigba ɖum esi wògli kple dzidzɔ manyagblɔ,

mate ŋu anɔ te va se ɖe esime kpẽ naɖi o.

²⁵Edo ɣli be, ‘Aha!’ ne kpẽa ɖi.

Esea aʋa ƒe ʋeʋẽ le adzɔge ke

kple aʋakplɔlawo ƒe gbeɖeɖe kple aʋaɣli.

²⁶“Ɖe aʋako dzona yia dzi ʋĩi le wò nunya nu

eye wòkekea eƒe aʋalã heɖoa ta dziehea?

²⁷Ɖe hɔ̃ dzona yia dzi ʋĩi le wò gbeɖeɖe nu

eye wòwɔa eƒe atɔ ɖe kɔkɔƒea?

²⁸Enɔa togbɛ kɔkɔ dzi eye wòtsia afi ma le zã me,

agakpe tsakli tomee nye eƒe bebeƒe.

²⁹Afi ma wòdia eƒe nuɖuɖu tsonae

eye eƒe ŋku kpɔnɛ le adzɔge ke.

³⁰Ʋu nye nuɖuɖu na viawo

eye afi si aʋatsilawo le la,

afi ma wònɔna.”

¹Yehowa gblɔ na Hiob be,

²“Ɖe ame si le nya hem kple Ŋusẽkatãtɔ la aɖɔe ɖoa?

Ame si tsɔ nya ɖe Mawu ŋu la neɖo eŋu nɛ!”

³Tete Hiob ɖo eŋu na Yehowa be,

⁴“Aleke nye ame si medze o

la maɖo nya ŋu na wòe?

Metsɔ nye asi ɖo nye nu.

⁵Meƒo nu zi ɖeka

gake nyemekpɔ ŋuɖoɖo o;

meƒo nu zi evelia

eya ta nyemagaƒo nu o.”

⁶Tete Yehowa ƒo nu na Hiob tso ahom me be,

⁷“Bla ali dzi abe ŋutsu ene,

mabia nya wò eye nàɖo eŋu nam.

⁸“Ɖe nàdo vlo nye afiatsotsoa?

Ɖe nàbu fɔm, atso na ɖokuiwòa?

⁹Ɖe wò abɔ le abe Mawu tɔ ene

eye wò gbe ate ŋu ablu abe etɔ enea?

¹⁰Ekema tsɔ ŋutikɔkɔe kple atsyɔ̃ ɖɔ na ɖokuiwò

eye nàtsɔ bubu kple gãnyenye ado na ɖokuiwò.

¹¹Trɔ wò dɔmedzoe ƒe nuwɔwɔ kɔ ɖi bababa,

nye kɔ kpɔ dadala ɖe sia ɖe eye nàhee aƒu anyi.

¹²Nye kɔ kpɔ dadala ɖe sia ɖe ne nàbɔbɔe ɖe anyi

eye nàgbã ame vɔ̃ɖiwo ɖe afi si wole.

¹³Ɖi wo katã ɖe ke me

eye nàɣla woƒe mo ɖe yɔdo me.

¹⁴Ekema nye ŋutɔ maʋu eme na wò be,

wò ŋutɔ wò ɖusibɔ axɔ na wò.

¹⁵“Kpɔ atiglinyi si mewɔ kpe ɖe ŋutiwò la ɖa,

eɖua gbe abe nyi ene.

¹⁶Eƒe ŋusẽ le alime nɛ eye ŋusẽ kae nya gã si le

eƒe ƒodo ƒe lãmekawo me!

¹⁷Eƒe asike le nyenyem abe sedati ene,

eƒe atagbomekawo ge ɖe wo nɔewo me.

¹⁸Eƒe ƒuwo le abe akɔbliga si me do le la ene

eye eƒe afɔtiwo le abe gakpo ene.

¹⁹Eyae nye gbãtɔ le Mawu ƒe nuwɔwɔwo dome

gake Ewɔla ate ŋu azɔ ɖe edzi kple yi.

²⁰Togbɛwo tsɔa woƒe kutsetsewo vɛ nɛ

eye gbemelãwo katã fena le egbɔ.

²¹Emlɔa anyi ɖe ati dama te

eye wòɣlaa eɖokui ɖe aƒla siwo le sime la me.

²²Atiawo doa vɔvɔli ɖe edzi heɣlanɛ

eye keti siwo le tɔʋuwo to la ƒoa xlãe.

²³Ne tɔwo dze agbo la, dzika metsoa eƒo o

eye togbɔ be Yɔdan tɔsisi le ƒoƒom ɖe eƒe nu dzi hã la,

eɖea dzi ɖi bɔkɔɔ.

²⁴Ɖe ame aɖe ate ŋu alée

kple eƒe ŋku alo aɖo mɔ nɛ,

ahaŋɔ eƒe ŋɔtia?

¹“Àte ŋu atsɔ ƒu aɖe lo le tɔ me

alo atsɔ ka abla eƒe aɖe ɖe nu me nɛa?

²Àte ŋu ade ka ŋɔti me nɛ alo atsɔ ƒu aŋɔ eƒe glã?

³Anɔ kukuɖeɖe na wò dzi ɖaa be nàkpɔ nublanui nɛa?

Aƒo nu na wò kple gbe blewua?

⁴Awɔ ɖoɖo kpli wò be nàkplɔe wòanye

wò kluvi le eƒe agbe me katã?

⁵Àte ŋu amlae abe xevi ene alo atsɔe ada ɖe

avɔ dzi na viwò nyɔnuviwoa?

⁶Ɖe asitsalawo atsɔ woƒe adzɔnuwo aɖɔliia?

Ɖe woamae ɖe asitsalawo domea?

⁷Àte ŋu atsɔ gaƒliwo aŋɔ eƒe ŋutigbalẽ

alo atsɔ akplɔ atɔ eƒe ta?

⁸Ne èka asi eŋuti la, àɖo ŋku avuwɔwɔ si yi edzi la dzi

eye madzro wò be nàgawɔe o!

⁹Mɔkpɔkpɔ be yeate ŋu aɖu edzi nye beble

elabena ne èkpɔe teti gɔ̃ hã la, ŋɔ adzi wò.

¹⁰Ame aɖeke medzi ŋɔ de enu ne wòanyɔe o.

Ekema ame kae ate ŋu anɔ te ɖe nunye?

¹¹Ame kae tre nu nanam bena maɖo eteƒe nɛ mahã?

Nu sia nu si le ɣea te la nye tɔnye.

¹²“Nyemagbe nuƒoƒo le eƒe ata, abɔ,

eƒe ŋusẽ kple eƒe nɔnɔme dzeani la ŋu o.

¹³Ame ka ate ŋu aɖe awu si wòdo ɖe edzi la le eŋu?

Ame ka ate ŋu ado ɖe egbɔ kple gaƒli?

¹⁴Ame ka ate ŋu ake eƒe nu,

nu si me aɖuwo katã kpe ɖe wo nɔewo nu le kple vɔvɔ̃?

¹⁵Akpoxɔnuwo ɖo ɖe eƒe dzimegbe

eye woɖo ɖe wo nɔewo nu,

¹⁶ɖe sia ɖe lé ɖe nɔvia ŋu ale gbegbe be,

ya gɔ̃ hã mate ŋu ato wo dome o.

¹⁷Wolé ɖe wo nɔewo ŋu sesĩe,

woku ɖe wo nɔewo ŋu ale gbegbe be,

womate ŋu ama wo dome o.

¹⁸Eƒe nyenye kea dzo miamiamia

eye eƒe ŋkuwo le abe ŋdi ƒe kekeli ene.

¹⁹Dzoxiwo dona tso eƒe nu me,

eye nenema kee nye dzo ƒe aɖewo hã.

²⁰Dzudzɔ dona le eƒe ŋɔtime abe ale si tsize si

woɖo aƒladzo dzi la fiena tua dzudzɔe ene.

²¹Eƒe gbɔgbɔ dea dzo aka me

eye dzo bibi dona tso eƒe nu me.

²²Ŋusẽ le eƒe kɔ me eye dɔmedzoe le eŋgɔ.

²³Eƒe ayi mlɔ wo nɔewo dzi

eye wolé ɖe wo nɔewo ŋu sesĩe,

ale be womate ŋu afoe ɖa o.

²⁴Eƒe akɔta do akpa abe kpe ene

eye wòsẽ abe te si dzi wotua nu le la ene.

²⁵Ne etso la, ŋɔ dzia ŋusẽtɔwo gɔ̃ hã

eye wogbugbɔna ɖe megbe ne

wose eƒe afɔzi wògbɔna.

²⁶Yi si kaa eŋu la mewɔa nanekee o,

nenema kee nye akplɔ,

aŋutrɔ kple akplɔ nuɖekɛ.

²⁷Gayibɔ le nɛ abe gbe ƒuƒu ene

eye akɔbli le abe ati si nyunyɔ la ene.

²⁸Mesina le aŋutrɔwo nu o

eye akafokpewo le nɛ abe blitsro ene.

²⁹Kpo le nɛ abe gbe ƒuƒu ene

eye ne yi le gbe dom la, eɖia kokoe nɛ.

³⁰Eƒe dɔme le abe ze gbagbã dzaglidzagliwo ene

eye woɖea fli ɖe ba me abe luƒomɔ ene.

³¹Enana gogloƒewo fiena wlɔwlɔwlɔ abe aŋɔɖaze ene

eye wòblua atsiaƒu me abe

amiɖaze me blum wole ene.

³²Egblẽa mɔ si le dzo dzam la ɖe emegbe

eye wòtrɔa atsiaƒu wòzua futukpɔ ɣi,

ale nàbu be atsiaƒua ɖe wòƒo wɔ ene.

³³Naneke mele anyigba dzi sɔ kplii o,

enye nuwɔwɔ si mevɔ̃a naneke o.

³⁴Eklẽa ŋku ɖe nu siwo katã doa wo ɖokui ɖe dzi

eye wònye fia ɖe nu siwo katã dana la dzi.”

Hiob ƒe nuƒo

¹Tete Hiob ɖo eŋu na Yehowa be:

²“Azɔ menya be àte ŋu awɔ nu sia nu,

ame aɖeke mate ŋu agblẽ wò ɖoɖowo me o.

³Èbia be, ‘Ame kae nye

esi tsyɔ nu nye aɖaŋudede dzi numanyamanyatɔe?’

Nyateƒee, meƒo nu le nu siwo nyemenya o la ŋuti,

nu siwo goglo akpa na nye nyanya.

⁴“Ègblɔ be, ‘Ɖo to azɔ, ne maƒo nu,

ne mabia gbe wò, ne nàɖo eŋu nam.’

⁵Nye towo se nya le ŋuwò,

ke azɔ la, nye ŋkuwo kpɔ wò

⁶eya ta nu siwo katã megblɔ la kpe ŋu nam

eye megbe wo le ke kple afi me.”

Nuwunyawo

⁷Esi Yehowa gblɔ nya siawo na Hiob vɔ la, egblɔ na Temanitɔ, Elifaz be, “Medo dɔmedzoe ɖe mia kple xɔ̃wò eveawo ŋu elabena miegblɔ nu si le eteƒe la tso ŋutinye abe nye dɔla Hiob ene o ⁸eya ta azɔ mitsɔ nyitsu adre kple agbo adre, ne miayi ɖe nye dɔla Hiob gbɔ eye miasa numevɔ na mia ɖokuiwo. Nye dɔla Hiob ado gbe ɖa ɖe mia ta, mase eƒe gbedodoɖa eye nyemaɖo miaƒe bometsinuwo teƒe na mi o elabena mieƒo nu nyui tso ŋutinye abe nye dɔla Hiob ene o.” ⁹Ale Temanitɔ, Elifaz, Suhitɔ, Bildad kple Naamatitɔ, Zofar wɔ abe ale si Yehowa de see na wo ene eye Yehowa xɔ Hiob ƒe gbe si wòdo ɖa ɖe wo ta.

¹⁰Esi Hiob do gbe ɖa ɖe exɔlɔ̃awo ta vɔ la, Yehowa gawɔe kesinɔtɔe abe tsã ene eye wòdzi eƒe kesinɔnuwo ɖe edzi nɛ zi eve wu tsã. ¹¹Nɔviŋutsuwo kple nɔvia nyɔnuwo katã kple eƒe ame nyanyɛwo katã va egbɔ eye woɖu nu kplii le eƒe aƒe me. Wofa akɔ nɛ, hede dzi ƒo nɛ ɖe dzɔgbevɔ̃e siwo Yehowa he va edzii la ta eye wo dometɔ ɖe sia ɖe na klosaloga kple sikasigɛe.

¹²Yehowa yra Hiob fifia wu tsã. Alẽ akpe wuiene (14,000), kposɔ akpe ade (6,000), agbleŋlɔnyi eve, eve teƒe akpe ɖeka (1,000) kple tedzi akpe ɖeka (1,000) nɔ esi. ¹³Viŋutsu adre kple vinyɔnu etɔ̃ hã nɔ esi. ¹⁴Ena ŋkɔ nyɔnuvi gbãtɔ be, Yemima, evelia be, Kezia eye etɔ̃lia be Keren Hapuk. ¹⁵Womegakpɔ nyɔnu aɖeke le anyigba blibo la dzi wòdze tugbe de Hiob ƒe vinyɔnuwo nu o. Wo fofo na domenyinu wo ɖe wo nɔviŋutsuwo xa.

¹⁶Le esia megbe la, Hiob nɔ agbe ƒe alafa ɖeka kple blaene (140) eye wòkpɔ viawo kple woƒe viwo ƒe dzidzime ene sɔŋ. ¹⁷Ale Hiob tsi, nɔ agbe wòde edeƒe hafi ku.