Yesaya

Yesaya

ƒe agbalẽ

¹Esiawoe nye gbedeasi siwo Yesaya, Amoz ƒe vi, xɔ tso Yehowa gbɔ le ŋutega me, tso nu siwo ava dzɔ ɖe Yuda kple Yerusalem dzi la ŋuti. Exɔ gbedeasi siawo le Yuda fiawo, Uzia, Yotam, Ahaz kple Hezekia ŋɔli.

Dukɔ dzeaglã la

²O! Dziƒo kple anyigba,

miɖo to miase nya si gblɔm Yehowa le.

Yehowa be:

“Ɖevi siwo menyi hekplɔ wo

kple beléle la dze aglã ɖe ŋunye.

³Nyitsu nyaa eƒe aƒetɔ,

eye tedzi nyaa eƒe nuɖuƒe,

ke Israel menyam o,

eye nye amewo mese nye nyawo gɔme o.”

⁴O! Dukɔ si wɔ nu vɔ̃,

ame siwo dzi nu vɔ̃ do agba ɖo,

nu vɔ̃ɖi wɔlawo ƒe dzidzimeviwo,

vi siwo nye nu tovo wɔlawo,

wogbe nu le Yehowa gbɔ,

wodo ŋunyɔ Israel ƒe kɔkɔetɔ la,

eye wotrɔ megbe dee.

⁵Nu ka ta miedi be woanɔ mia ƒoƒo dzi?

Nu ka ta miegale aglãdzedze dzi?

Miaƒe ta katã xɔ abi,

eye miaƒe dzi katã hã xɔ abi.

⁶Tso miaƒe afɔƒome va se ɖe miaƒe dzodome la,

teƒe nyui aɖeke meli o, negbe abiwo,

dodrowo, abi mumu siwo womeklɔ

haɖe o alo ɖo amii loo

alo bla o la koe li.

⁷Miaƒe anyigba zu gbegbe,

wotɔ dzo miaƒe duwo le miawo ŋutɔ ƒe ŋkume,

du bubu me tɔwo va ha miaƒe agblemenukuwo,

eye wogblẽ miaƒe anyigba

abe ale si amedzrowo wɔna ene.

⁸Zion nyɔnuvi tsi akogo abe agbadɔ si

le waingble me ene,

abe agblexɔe le dzamatregble me ene,

eye abe du si ŋu futɔwo ɖe to ɖo ene.

⁹Ɖe menye Yehowa, Dziƒoʋakɔwo ƒe Aƒetɔ ye kpɔtɔ ame ʋɛ aɖewo ɖi na mi o la,

anye ne woatsrɔ̃ Yudatɔwo katã,

abe ale si wotsrɔ̃ ame sia ame

le Sodom kple Gomora ene.

¹⁰Mise Yehowa ƒe nya,

mi Sodom dziɖulawo,

milé fɔ ɖe míaƒe Mawu la ƒe se la ŋu,

mi Gomoratɔwo!

¹¹“Miaƒe vɔsa gbogboawo ɖe,

nu ka wonye nam?” Yehowae gblɔe.

“Miaƒe numevɔsa siwo miewɔna

kple agbowo kple lã damiwo ƒe ami la,

wu tsɔtsɔ nam.

Nyitsuwo, alẽwo kple gbɔ̃wo

ƒe ʋu medoa dzidzɔ nam o.

¹²Ne miedo ɖe nye ŋkume la,

ame kae bia esia tso mia si be,

mianɔ afɔɖi ƒom nye xɔxɔnuwo?

¹³Midzudzɔ vɔsa gbɔlo siawo tsɔtsɔ vɛ!

Miaƒe dzudzɔʋeʋĩwo dodo

medoa dzidzɔ nam o.

Nyemate ŋu atsɔ miaƒe takpekpe vɔ̃ɖi

siwo nye dzinu yeyewo,

Dzudzɔgbewo kple gbeƒãɖeɖe takpegbewo o.

¹⁴Melé fu miaƒe dzinu yeye ŋkekenyuiwo

kple ŋkekenyui bubuawo.

Wozu agba nam, eye nu ti kɔ nam le wo tsɔtsɔ me.

¹⁵Ne miele gbe dom ɖa,

keke miaƒe abɔwo me la,

maɣla nye ŋkume ɖe mi,

eye ne mieli kɔ gbedodoɖa gleglegle hã la,

nyemaɖo to mi o,

elabena miaƒe asiwo ƒo ʋu.

¹⁶“Mile tsi ne mia ŋuti nakɔ.

Miɖe miaƒe nu vɔ̃ɖiwo ɖa le nye ŋkume!

Midzudzɔ vɔ̃wɔwɔ,

¹⁷ne miasrɔ̃ nyuiwɔwɔ!

Midi nuteƒewɔwɔ, eye mide dzi ƒo na

ame siwo wote ɖe anyi.

Miʋli tsyɔ̃eviwo ta,

eye miaxɔ nya ɖe ahosiwo nu.

¹⁸“Miva, mina míade ŋugble ɖekae,”

Yehowa gblɔe.

“Togbɔ be miaƒe nu vɔ̃wo biã

abe nyagãdzĩ ene hã la,

woafu abe ɖetifu ene.

Ne wobiã abe ʋu ene hã la,

woafu abe alẽfu ɣi ene.

¹⁹Ne mielɔ̃, eye mieɖo to la,

miaɖu anyigba la ƒe nu nyuitɔwo.

²⁰Ke ne miesẽ to, dze aglã la, yi atsrɔ̃ mi.”

Elabena Yehowa ƒe nue gblɔe.

²¹Tsã la, wokpɔa nuteƒewɔwɔ

kple dzɔdzɔenyenye le eme,

ezu hlɔ̃dolawo ƒe du.

²²Tsã la, klosalo si le keklẽm la wònye,

ke azɔ la, elé ɣebia eye wòzu abe wain nyuitɔ si wotɔ tsii ene.

²³Wò dumegãwo zu aglãdzelawo

kple fiafiwo xɔlɔ̃,

wolɔ̃a zãnuxɔxɔ, eye wotia nunanawo yome.

Womeʋlia tsyɔ̃eviwo ta o,

eye ahosiwo ƒe nya medzɔna le woƒe ʋɔnu o.

²⁴Eya ta ale Aƒetɔ,

Yehowa, Dziƒoʋakɔwo ƒe Aƒetɔ,

Israel ƒe Ŋusẽtɔ la gblɔe nye esi.

“O! Makpɔ gbɔɖeme tso nye ketɔwo ƒe asi me,

eye mabia hlɔ̃ nye futɔwo.

²⁵Matrɔ atsi tsitre ɖe mia ŋu,

atsra mia me, eye maɖe nu kuklui

siwo nye ɖiƒoƒo la ɖa le mia me.

²⁶Emegbe la, maɖo ʋɔnudrɔ̃lawo na mi

abe tsã ene, eye mana aɖaŋudelawo mi

abe ale si wònɔ le gɔmedzedzea me ene.

Emegbe la, woayɔ mi be Dzɔdzɔenyenye

kple Nuteƒewɔwɔ ƒe Du.”

²⁷Woaɖe Zion kple afia nyui tsotso,

eye woaɖe eƒe dzimetrɔlawo kple dzɔdzɔenyenye.

²⁸Ke woagbã aglãdzelawo

kple nu vɔ̃ wɔlawo siaa gudugudu,

eye woatsrɔ̃ ame siwo gbe nu le Yehowa gbɔ.

²⁹“Ŋu akpe mi le logoti siwo ŋu

miekpɔa dzidzɔ le la ŋu;

woade ŋukpe mo na mi le

abɔ siwo mielɔ̃na la ta.

³⁰Miazu abe logoti aɖe si ƒe aŋgbawo yrɔ

kple abɔ si me tsi aɖeke mele o la ene.

³¹Ame sesẽ la azu gbe ƒuƒu,

eƒe dɔwɔwɔ azu dzoxi,

wo ame eve la woabi,

eye ame aɖeke mate ŋu atsii o.”

Yehowa ƒe to la

¹Esiae nye gbedeasi bubu si Yesaya, Amoz ƒe vi la, xɔ tso Yehowa gbɔ, tso Yuda kple Yerusalem ŋuti.

²Le ŋkeke mamlɛawo me la,

woaɖo Yehowa ƒe gbedoxɔ la

gɔme anyi ɖe eƒe to la dzi,

be wòanye to si aƒo towo katã ta,

woakɔe ɖe dzi wòagbɔ togbɛwo katã ta,

eye xexemedukɔwo katã aƒo zi ɖe eŋu.

³Ame geɖewo ava agblɔ be,

“Miva míayi Yehowa ƒe to la dzi,

míage ɖe Yakob ƒe Mawu la ƒe gbedoxɔ la me;

afia eƒe mɔwo mí be míazɔ le eƒe mɔwo dzi.”

Nufiame atso Zion ava,

eye Yehowa ƒe nya atso Yerusalem ava.

⁴Adrɔ̃ ʋɔnu le dukɔwo dome,

eye wòadzra ame geɖewo dome ɖo.

Woatsɔ woƒe aʋawɔyiwo atu kodzoewoe,

eye woatsɔ woƒe akplɔwo atu hɛ̃ gobɛwoe.

Dukɔ magatsɔ yi ɖe dukɔ ŋu

alo axɔ hehe na aʋawɔwɔ o.

⁵O! Yakob ƒe aƒe,

na miazɔ le Yehowa ƒe kekeli me.

Yehowa ƒe ŋkeke

⁶Ègbe nu le wò amewo,

Yakob ƒe aƒe gbɔ, elabena woyɔ fũu

kple ɣedzeƒetɔwo ƒe subɔsubɔwo.

Wokaa afã abe Filistitɔwo ene,

eye wokpea asi ɖe trɔ̃subɔlawo ŋu

le woƒe subɔsubɔwo me.

⁷Woƒe anyigba dzi yɔ fũu kple klosalo kple sika,

eye seɖoƒe meli na woƒe kesinɔnuwo o.

Sɔwo bɔ ɖe woƒe anyigba dzi,

eye seɖoƒe meli na woƒe tasiaɖamwo o.

⁸Woƒe anyigba dzi yɔ fũu kple legbawo,

wodea ta agu na woawo ŋutɔ ƒe asinudɔwɔwɔwo,

eye wodzea klo na nu siwo woƒe asibidɛwo wɔ,

⁹eya ta woaɖiɖi ame ɖe anyi

eye woabɔbɔ amegbetɔƒomea ɖe anyi,

mègatsɔe ke wo o.

¹⁰Miyi ɖe ŋɔdzigadowo me,

mibe ɖe anyigba ƒe tume tso

Yehowa ƒe ŋɔdzi kple eƒe gãnyenye

ƒe ŋutikɔkɔe gbɔ!

¹¹Woaɖiɖi ŋkugãtolawo katã ɖe anyi,

eye woabɔbɔ dadalawo katã ɖe anyi.

Gbe ma gbe la,

Yehowa ɖeka ko woado ɖe dzi.

¹²Yehowa, Dziƒoʋakɔwo ƒe Aƒetɔ la,

ɖo ŋkeke ɖi na dadalawo kple ɖokuiŋudzelawo

kple nu siwo katã wodo ɖe dzi la

(elabena woabɔbɔ wo ɖe anyi).

¹³Woabɔbɔ Lebanon ƒe sedati kɔkɔ tsralawo

kple Basan ƒe logotiwo ɖe anyi.

¹⁴Woabɔbɔ to kɔkɔwo

kple tɔgbɛ kɔkɔwo katã ɖe anyi;

¹⁵woabɔbɔ gbetakpɔxɔ kɔkɔwo

kple gli sesẽwo ɖe anyi,

¹⁶eye woabɔbɔ Tarsis ƒe asitsameliwo

kple tɔdziʋu gãwo katã ɖe anyi.

¹⁷Woabɔbɔ amewo ƒe ɖokuidodoɖedzi

kple dada ɖe anyi.

Yehowa ɖeka ko woado ɖe dzi gbe ma gbe,

¹⁸eye woaɖe legbawo katã ɖa keŋkeŋ.

¹⁹Ne Yehowa tso be yeaʋuʋu anyigba la,

amewo asi age ɖe agadowo me le kpewo tome

kple dowo me le anyigba ƒe tume,

le eƒe ŋɔdzi kple eƒe gãnyenye ƒe atsyɔ̃ ta.

²⁰Le ŋkeke ma dzi la,

amewo atsɔ woƒe klosalolegba

kple sikalegba siwo wosubɔna la

aƒu gbe na alegeliwo kple agutɔwo.

²¹Woasi ayi ɖe agadowo kple kpewo tome

kpakple agakpe kɔkɔwo tame be

woasi le Yehowa ƒe ŋɔdzi

kple eƒe ŋutikɔkɔe ƒe atsyɔ̃nu,

ne etso be yeaʋuʋu anyigba.

²²Amegbetɔ nye nu gblɔe:

ele gblɔe abe eƒe gbɔgbɔ si

le ŋɔtime nɛ ene!

Nu ka ta nàtsɔ wò mɔkpɔkpɔ ada ɖe edzi?

Ʋɔnudɔdrɔ̃ Yerusalem kple Yuda

¹Kpɔ ɖa, Aƒetɔ Yehowa,

Dziƒoʋakɔwo ƒe Aƒetɔ,

aɖo asi Yerusalem kple Yuda ƒe nuɖuɖu

kple tsi ƒe kpɔtsoƒewo kple dzikpɔkpɔ dzi.

Aɖo asi nuɖuɖu kple tsinono

siwo katã wònaa wo la dzi.

²Aɖo asi eƒe kalẽtɔwo kple aʋawɔlawo,

ʋɔnudrɔ̃lawo kple nyagblɔɖilawo,

afakalawo kple dumegãwo,

³ame blaatɔ̃wo: ƒe amegãwo,

amegã bubuwo, aɖaŋudelawo,

aɖaŋudɔwɔlawo kple gbesalawo dzi.

⁴Matsɔ ɖeviwo awɔ woƒe amegãwoe,

eye ɖevi suewo anye wo dzi ɖulawo.

⁵Amewo ate wo nɔewo ɖe to,

ŋutsu atso ɖe ŋutsu ŋu,

aƒelika ɖe aƒelika ŋu,

sɔhɛwo atso ɖe ame tsitsiwo ŋu,

eye yakamewo atso ɖe bubumewo ŋu.

⁶Ŋutsu alé nɔvia ŋutsu le fofoa ƒe aƒe me agblɔ be,

“Wò ya avɔ le ŋuwò,

nye mia kplɔla ne nàkpɔ aƒe gbagbã sia dzi.”

⁷Le ŋkeke ma me la, aɖo eŋu na wo be,

“Ŋutete mele ŋunye o,

nuɖuɖu alo nutata mele nye aƒe me o,

eya ta migawɔm ame siawo kplɔlae o.”

⁸Yerusalem le mumum sɔgɔsɔgɔ,

Yuda le anyi dzem.

Woƒe nyawo kple woƒe nuwɔwɔ tsi tsitre ɖe Yehowa ŋu.

Wogbe eƒe ŋutikɔkɔe ƒe amegbɔnɔnɔ.

⁹Woɖe woƒe nu vɔ̃wo ɖe go abe Sodom ene,

eye womeɣla wo o.

Baba na wo!

Wohe gbegblẽ va wo ɖokuiwo dzi.

¹⁰Gblɔe na dzɔdzɔetɔwo be nuwo adze edzi na wo,

elabena woaɖu woƒe nuwɔnawo ƒe kutsetsewo.

¹¹Baba na ame vɔ̃ɖiwo, gbegblẽ ava wo dzi.

Woaxe nu siwo woƒe asiwo wɔ la ƒe fetu na wo.

¹²Sɔhɛwo te nye amewo ɖe to,

eye nyɔnuwo nye woƒe dziɖulawo.

O! Nye amewo, mia kplɔlawo kplɔ mi trae,

wote mi ɖa le mɔ la dzi.

¹³Yehowa nɔ anyi ɖe enɔƒe le ʋɔnu.

Etso be wòadrɔ̃ ʋɔnu ameawo.

¹⁴Yehowa bu fɔ eƒe amewo,

eƒe dumegãwo kple kplɔlawo be,

“Miawoe tsrɔ̃ nye waingble.

Mieli kɔ nu siwo mieha le

ame dahewo si la ɖe miaƒe aƒewo me.

¹⁵Nu ka gblɔm miele esi miegbã nye amewo,

eye mieto mo na ame dahewo nyanyanya?”

Aƒetɔ, Yehowa, Dziƒoʋakɔwo ƒe Aƒetɔ lae gblɔe.

¹⁶“Zion nyɔnuwo dana,

wolia kɔ ganɛ hafi nɔa zɔzɔm.

Woɖoa ahĩamo, nɔa zɔzɔm,

nɔa ble nyem xatsɛxatsɛ, eye gavi siwo le

woƒe afɔkɔe la nɔa ɖiɖim gliŋgliŋgliŋ.

¹⁷Eya ta Aƒetɔ Yehowa ana be Zion nyɔnuwo ƒe ta nabebe kple abi,

Yehowa ana be ta nakpa na wo.”

¹⁸Le ŋkeke ma dzi la, Aƒetɔ aɖe woƒe atsyɔ̃ɖonuwo ɖa le wo ŋu: aɖe alɔnugɛwo, tablanuwo, kɔga nyuiwo, ¹⁹aɖe togɛwo, alɔnugɛwo kple motsyɔnuwo ɖa. ²⁰Aɖe tablanuwo, klodzonuwo, dɔmeblanuwo, amiʋeʋĩtukpawo, sebewo, ²¹ŋkɔsigɛwo kple ŋɔtigɛwo ɖa. ²²Aɖe awu ʋlaya nyuiwo, kukuwo, vuvɔmewuwo, akplowo; ²³ahuhɔ̃ewo, aklala biɖibiɖi ƒe awuwo, agowuwo kple sedawuwo ɖa.

²⁴Be woanɔ ʋeʋẽm lĩlĩlĩ teƒe la, woaʋẽ kũu;

adagbika axɔ ɖe alidziblanu nyui teƒe,

tabebe axɔ ɖe ɖa ŋɔŋɔe ƒoƒo teƒe,

akpanyatata axɔ ɖe awu ʋlaya, nyui teƒe,

eye ŋutilãléayi axɔ ɖe ŋutilã zɔzrɔ̃e teƒe.

²⁵Wò ŋutsuwo atsi yi nu,

eye wò aʋawɔlawo atsi aʋa.

²⁶Zion ƒe agbowo afa konyi, afa avi,

anɔ anyi ɖe anyigba abe wɔnamanɔŋutɔ ene.

¹Gbe ma gbe la, nyɔnu adre

aku ɖe ŋutsu ɖeka ŋu

ahagblɔ be, “Míaɖu míawo ŋutɔ ƒe nu,

eye míatso avɔ na mía ɖokuiwo.

Na woayɔ wò ŋkɔ ɖe mía ŋu ko,

nàɖe míaƒe ŋukpe ɖa.”

Yehowa ƒe Atilɔ

²Gbe ma gbe la, Yehowa ƒe Atilɔ anya kpɔ, eye ŋutikɔkɔe anɔ eŋu. Anyigba ƒe kutsetse anye dada kple ŋutikɔkɔe na ame siwo susɔ ɖe Israel. ³Ame siwo susɔ ɖe Zion, ame siwo tsi Yerusalem la, woayɔ wo be kɔkɔe, ame siwo katã ƒe ŋkɔ woŋlɔ ɖe agbagbeawo dome le Yerusalem. ⁴Aƒetɔ la aklɔ ɖiƒoƒo ɖa le Zion nyɔnuwo ŋu. Aklɔ ʋu si kɔ ɖe Yerusalem la ɖa kple nuteƒewɔwɔ ƒe gbɔgbɔ kple dzo ƒe gbɔgbɔ. ⁵Ekema Yehowa ana lilikpo nado ɖe Zion to blibo la kple ame siwo katã ƒo ƒu ɖe afi ma kple dzudzɔ la dzi le ŋkeke me, eye le zã me la, anye dzo bibi, eye ŋutikɔkɔe anye agbadɔ. ⁶Woanye vɔvɔli na anyigba le ŋkeke me kple bebeƒe le tsidzadza kple ahomwo me.

Hadzidzi tso Aƒetɔ la ƒe waingble ŋu

¹Azɔ mele ha dzi ge na nye lɔlɔ̃tɔ tso

eƒe waingble ŋuti.

Waingble aɖe le nye lɔlɔ̃tɔ si le togbɛ

si nyoa nuku la dzi.

²Edzobo eme heɖe kpewo le eme,

eye wòdo wainka nyuitɔwo ɖe eme.

Etu gbetakpɔxɔ ɖe agble la titina,

eye wòtu wainfiaƒe hã ɖe afi ma.

Ele mɔ kpɔm na waintsetse nyuiwo,

gake wotse wain vevewo.

³“Azɔ, Yerusalem ŋutsuwo kple Yuda ŋutsuwo,

miese ale si nya la katã va yii,

eya ta midrɔ̃ ʋɔnu le nye

kple nye waingble la dome.

⁴Nu ka wòle be mawɔ na nye waingble la

esi nyemewɔ nɛ o?

Ekema nu ka ta mele mɔ kpɔm na waintsetse nyuiwo,

gake wain vevewo ko wòtse?

⁵Azɔ magblɔ nu si wɔ ge mala

nye waingble la na mi.

Magbã kpɔ ɖa le eŋuti, eye lãwo aɖui.

Magbã gli le eŋu ne amewo nafanyae.

⁶Mawɔe wòazu gbegbe,

womake eƒe alɔwo alo aga eme o,

eye ŋuwo kple aŋɔkawo amie ɖe afi ma.

Made se na lilikpowo be

womagadza tsi ɖe edzi azɔ o.”

⁷Israel ƒe aƒee nye Yehowa,

Dziƒoʋakɔwo ƒe Aƒetɔ la,

ƒe waingble, eye Yuda ŋutsuwoe nye

eƒe dzidzɔ ƒe wainka siwo wòdo.

Ekpɔ mɔ na afia nyui tsotso,

ke ʋukɔkɔɖi wòkpɔ;

ekpɔ mɔ na nu dzɔdzɔe wɔwɔ,

ke konyifavi koe ɖi.

Konyifafa kple ʋɔnudɔdrɔ̃wo

⁸Baba na mi ame siwo le xɔ tsiam ɖe xɔ nu,

eye wole agble tsiam ɖe agble nu be

teƒe aɖeke megasusɔ o,

be woawo ɖeɖe naxɔ anyigba la dzi!

⁹Ale Yehowa, Dziƒoʋakɔwo ƒe Aƒetɔ la,

ka atam mese kple nye towo,

“Ne xɔ gãwo mezu gbegbe,

eye dziƒoxɔ gãwo mezu aƒedowo o fĩi!

¹⁰Woakpɔ wain adzafi ɖeka

kple afã pɛ ko le waingble agbleka ewo sɔŋ me,

eye ne woƒã bli agba ɖeka la, bli kotoku ɖeka pɛ

ko woakpɔ le eme.”

¹¹Baba na mi, ame siwo fɔna fɔŋli henɔa ho ʋlim

le aha muame nono me,

eye mienɔa wain yome va se ɖe zãtiƒe,

eye wòmua mi tsiɖitsiɖi.

¹²Kasaŋkuwo kple saŋkuwo ɖina

le miaƒe kplɔ̃ɖoƒewo, axatsɛwo,

kpẽwo kple wain bɔna ɖe eŋu,

gake wometsɔ ɖeke le eme na Yehowa ƒe

dɔwɔwɔwo alo ade bubu eƒe asinudɔwɔwɔwo ŋu o.

¹³Eya ta nye amewo ayi ɖe aboyome le nugɔmemasemase ta;

dɔwuame awu woƒe ame ŋkutawo,

eye tsikɔ awu ame haho la.

¹⁴Eya ta nuɖuɖu le yɔdo dzrom vevie,

eye wòke eƒe nu ɖi baa,

eya ta Yerusalem ƒe ame ŋkutawo

kple ame hahoawo age dze eme

kple woƒe dzidzɔkpɔkpɔwo

kple aglotutuwo katã.

¹⁵Ale woaɖiɖi ame ɖe anyi,

woabɔbɔ amegbetɔƒomea ɖe anyi,

eye woate dadalawo ƒe ŋku ɖe to.

¹⁶Ke woado Yehowa,

Dziƒoʋakɔwo ƒe Aƒetɔ la

ɖe dzi le eƒe ʋɔnudɔdrɔ̃ me,

eye Mawu Kɔkɔe la aɖe

eƒe kɔkɔenyenye afia to

eƒe dzɔdzɔenyenye me.

¹⁷Ekema alẽwo aɖu gbe abe woawo ŋutɔ

ƒe lãnyiƒee wole ene;

eye alẽviwo aɖu nu le kesinɔtɔwo ƒe aƒedowo me.

¹⁸Baba na ame siwo tsɔ beble

ƒe kawo de dzidada le hehem,

eye wode kekehekawo nu vɔ̃ hele hehem,

¹⁹ame siwo gblɔna be “Mawu newɔ kaba.

Nedo tsɔtsɔe eƒe dɔ be miakpɔe;

Israel ƒe Kɔkɔetɔ la ƒe aɖaŋudede

neva kaba ne mianyae.”

²⁰Baba na ame siwo yɔ vɔ̃ be nyui,

eye woyɔ nyui be vɔ̃,

ame siwo tsɔ viviti ɖɔli kekeli,

eye wotsɔ kekeli ɖɔli viviti.

Ame siwo yɔa veve be vivi,

eye woyɔa vivi be veve.

²¹Baba na ame siwo bua wo ɖokuiwo nunyalawoe,

eye wonye aɖaŋudelawo

le woawo ŋutɔ ɖokuiwo gbɔ.

²²Baba na ame siwo nye kalẽawo le wain gã nono me,

eye wonye dziɖulawo le ahamuamewo tɔtɔ me,

²³ame siwo xɔa zãnu, eye wotsoa afia ŋkunɔ na agɔdzelawo;

ke ame siwo ƒe nya dzɔ la, wodea wo nya me.

²⁴Eya ta abe ale si dzo ƒe aɖe fiaa bee,

eye gbe ƒuƒu bina le dzo me ene la,

nenema kee woƒe kewo anyunyɔ,

eye ya aƒo woƒe seƒoƒowo adzoe abe ʋuʋudedi ene,

elabena wogbe Yehowa, Dziƒoʋakɔwo ƒe Aƒetɔ la

ƒe nufiame, eye woɖe alɔme

le Israel ƒe Kɔkɔetɔ la ƒe nyawo ŋu,

²⁵Eya ta Yehowa ƒe dziku bi ɖe eƒe amewo ŋu.

Ekɔ eƒe alɔ dzi, eye wòƒo wo ƒu anyi.

Towo ʋuʋu kpekpekpe, eye ŋutilã kukuwo le abe

gbeɖuɖɔ le aɖukpo dzi ene.

To esiawo katã gbɔ hã la, eƒe dziku nu mefa o,

eƒe alɔ gale dzi ko.

²⁶Ekɔ aflaga dzi na didiƒe dukɔwo, eye wòlia aku na

ame siwo le anyigba ƒe mlɔenuwo ke.

Kpɔ ɖa, wova kaba kple du!

²⁷Ɖeɖi mete wo dometɔ aɖeke ŋu

alo nu nati kɔ nɛ o.

Ɖeka pɛ hã medɔ akɔlɔ̃e alo dɔ alɔ̃ o.

Alidziblanu metu le ɖeke ƒe ali o,

eye tokota metso le ɖeke ƒe afɔ o.

²⁸Woƒe datiwo le ɖaɖam,

eye woku woƒe dawo me.

Woƒe sɔwo ƒe afɔwo le abe dzosigbewo ene,

eye woƒe tasiaɖamwo ƒe afɔwo le abe yali ene.

²⁹Woƒe gbeɖeɖe le abe dzata tɔ ene,

eye woɖea gbe abe dzataviwo ene.

Wotea gbe heléa nu, eye wotsɔa nu si wolé la dzonae,

ame aɖeke mate ŋu axɔe le wo si o.

³⁰Gbe ma gbe la, woaɖe gbe ɖe edzi abe atsiaƒu ene.

Ne ame aɖe nye kɔ kpɔ anyigba la,

viviti kple hiã ko wòakpɔ,

eye lilikpowo gɔ̃ hã ana kekeli nado viviti.

Woɖo Yesaya nyagblɔɖilae

¹Le ƒe si me Fia Uzia ku la, mekpɔ Aƒetɔ la wònɔ fiazikpui nyui kɔkɔ aɖe dzi, eye eƒe awutoga yɔ gbedoxɔ la katã me. ²Serafi siwo aʋala ade li na la le etame. Wotsɔ aʋala eve tsyɔ ŋkume, eve tsyɔ woƒe afɔwo, eye wotsɔ eve bubu le dzodzomii. ³Wodo ɣli ɖo ɖe wo nɔewo gbɔ be,

“Kɔkɔe, kɔkɔe, kɔkɔe nye Yehowa,

Dziƒoʋakɔwo ƒe Aƒetɔ la;

anyigba blibo la katã yɔ fũu

kple eƒe ŋutikɔkɔe.”

⁴Woƒe gbe ƒe ɖiɖi na be ʋɔtrutiawo kple gbedoxɔ la ƒe agunu ʋuʋu, eye dzudzɔ yɔ gbedoxɔ la me taŋ.

⁵Eye megblɔ be, “Alele! Evɔ nam azɔ, elabena nu vɔ̃ wɔla, nuyi makɔmakɔtɔ menye, eye mele dukɔ si ƒe nuyi mekɔ o, eye wonye vɔ̃wɔlawo la dome; evɔ la, metsɔ nye ŋkuwo kpɔ Fia, Yehowa, Dziƒoʋakɔwo ƒe Aƒetɔ la.”

⁶Kasia Serafiawo dometɔ ɖeka dzo yi ɖe vɔ̃samlekpui la gbɔ, eye wòtsɔ abɛ tsɔ dzoka xɔxɔ le vɔsamlekpui la dzi hedzo va gbɔnye. ⁷Etsɔ dzoka xɔxɔ la tɔ nye nuyi hegblɔ be, “Kpɔ ɖa, woɖe wò vodadawo ɖa, eye wotsɔ wò nu vɔ̃wo ke wò, elabena dzoka sia ka wò nuyi ŋuti.”

⁸Eye mese Aƒetɔ la ƒe gbe wòbia be, “Ame ka madɔ, eye ame ka ayi na mí?”

Meɖo eŋu be, “Aƒetɔ, nyee nye esi, dɔm!”

⁹Egblɔ nam be,

“Yi nàgblɔ na ame siawo be,

‘Miaƒe towo ase nyawo, gake miase egɔme o.

Miaƒe ŋkuwo akpɔ nu,

gake miele si dze gee o.’

¹⁰Na dukɔ sia ƒe dzi naku atri,

tu woƒe towo, eye nàmia woƒe ŋkuwo.

Ne menye nenema o la,

woava kpɔ nu kple woƒe ŋkuwo,

ase nu kple woƒe towo,

ase nu gɔme kple woƒe dziwo,

eye woatrɔ akpɔ dɔyɔyɔ.”

¹¹Eye megblɔ bena “Va se ɖe ɣe ka ɣi, O! Aƒetɔ?”

Eɖo ŋu be,

“Va se ɖe esime duwo katã zu aƒedo,

eye ame aɖeke megale wo me o.

Va se ɖe esime aƒewo katã naɖi gbɔlo,

eye anyigba la katã nazu gbegbe.

¹²Va se ɖe esime Yehowa nya ame sia ame ɖo ɖe aboyome,

eye anyigba la katã nagblẽ keŋkeŋkeŋ.

¹³Togbɔ be ameawo ƒe akpa ewoliawo dometɔ ɖeka

asusɔ ɖe anyigba dzi hã la,

woagana wòazu gbegbe,

gake abe ale si ne wolã logoti

kple gboti, takpoawo susɔna ene la,

nenema ke atiku kɔkɔe la azu

atitakpo ɖe anyigba la dzi.”

Imanuel ƒe dzesi

¹Le Yuda fia, Ahaz, Uzia ƒe vi, Yotam ƒe tɔgbuiyɔvi ŋɔli la, Siria fia Rezin kple Israel fia, Peka, Remalia ƒe vi, woho aʋa va dze Yerusalem dzi, gake womete ŋu xɔ du la o, du la gale te ko.

²Azɔ wogblɔ na David ƒe aƒe la be, Siria wɔ ɖeka kple Efraim, eya ta Ahaz kple dukɔ la katã ƒe dzi ʋuʋu abe ale si ya ʋuʋua avemetiwoe ene.

³Yehowa gblɔ na Yesaya be, “Wò kple viwò ŋutsu, Seya Yasub, mido go ne miakpe Ahaz le dzigbeta si le avɔnyala ƒe mɔdzi la ƒe nuwuƒe. ⁴Gblɔ nɛ be, ‘Kpɔ nyuie, lé dzi ɖe ƒo, eye mègavɔ̃ o. Dzi megaɖe le ƒo wò le dzoti takpo eve siawo, Rezin kple Siria kpakple Remalia ƒe vi ƒe dziku sesẽ la ta o. ⁵Siria, Efraim kple Remalia ƒe vi woɖo nugbe ɖe wò gbegblẽ ŋu be, ⁶“Mina míadze Yuda dzi; mina míavuvui, míamae ɖe mía ɖokuiwo dome, eye míatsɔ Tabel ƒe vi aɖo fiae ɖe enu.” ⁷Gake ale Yehowa Dziƒoʋakɔwo ƒe Aƒetɔ la gblɔe nye esi:

“ ‘Madze edzi o,

mava eme o,

⁸elabena Siria ƒe tae nye Damasko,

eye Damasko ƒe tae nye Rezin.

Le ƒe blaade-vɔ-atɔ̃ la me,

woagbã Efraim gudugudu,

ale womaganɔ te o.

⁹Efraim ƒe tae nye Samaria,

eye Samaria ƒe tae nye Remalia ƒe viŋutsu.

Ne mienɔ te sesĩe le xɔse me o la,

ekema mianɔ te hã o.’ ”

¹⁰Yehowa gaƒo nu na Ahaz be, ¹¹“Bia dzesi Yehowa, wò Mawu la. Eɖanye gogloƒe ke loo alo kɔkɔƒe ke o.”

¹²Ke Ahaz ɖo eŋu nɛ be, “Nyemabia o; nyemado Yehowa akpɔ o.”

¹³Tete Yesaya gblɔ be “Azɔ la, David ƒe aƒe, see. Ɖe mesɔ gbɔ be miado amegbetɔ ƒe dzigbɔɖi akpɔ oa? Ɖe miado nye Mawu hã ƒe dzigbɔɖi akpɔa? ¹⁴Eya ta Aƒetɔ la ŋutɔ ana dzesi mi. Ɖetugbi si menya ŋutsu kpɔ o la afɔ fu, eye wòadzi ŋutsuvi, ana ŋkɔe be Imanuel. ¹⁵Ano nyinotsi babla kple anyitsi va se ɖe esime wòanya ale si wòade vovototo nyui kple vɔ̃ dome, ¹⁶gake hafi ɖevi la nanya ale si wòade vovototo nyui kple vɔ̃ domee la, fia eve siwo mievɔ̃na na vevie la ƒe anyigba azu gbegbe. ¹⁷Yehowa ana be ŋɔdzinu si tɔgbi medzɔ kpɔ tso keke esime Efraim ma ɖa tso Yuda gbɔ o la nadzɔ ɖe wò kple wò amewo kple fofowò ƒe aƒe dzi. Akplɔ Asiria fia aƒu wò.”

¹⁸Gbe ma gbe la, Yehowa alia aku ayɔ nudzodzoewo tso Egipte tɔʋuwo ƒe mlɔewo nu ke kple anyiwo tso Asirianyigba dzi ¹⁹Woava adze ɖe bali globowo kple kpetowo me. Woava dze ɖe ŋuvewo kple tsiʋewo katã me. ²⁰Gbe ma gbe la, Aƒetɔ la atsɔ lãnu si wòɣe le tɔ la godo, Asiria fia, be wòalũ ta na mi, alũ ɖa siwo le miaƒe afɔwo ŋu, eye wòalũ ge hã na mi. ²¹Gbe ma gbe la, nyivi ɖeka kple gbɔ̃ eve pɛ koe atsi ame ɖeka si. ²²Ɖe nyinotsi gbogbo si wonana ta la, ame sia ame akpɔ nyinotsi babla aɖu. Ame siwo katã susɔ ɖe anyigba la dzi la, aɖu nyinotsi kpekẽ la, eye woano anyitsi hã. ²³Gbe ma gbe la, afi sia afi si wainka akpe le, eye wòxɔa klosaloga akpe ɖeka (1,000) la, ŋu kple aŋɔkawo koe amie ɖe teƒe ma. ²⁴Ŋutsuwo ayi afi ma kple da kple dati, elabena ŋu kple aŋɔkawo koe axɔ anyigba la dzi. ²⁵Ke hena togbɛ siwo woŋlɔna kple kodzoe tsã la, miagate ŋu ayi afi mawo o, ɖe vɔvɔ̃ na ŋu kple aŋɔkawo ta, ke woava zu nyiwo kple alẽwo nyiƒe.

Asiria, Yehowa fe dɔwɔnu

¹Yehowa gblɔ nam be, “Tsɔ nuŋlɔkpe gã aɖe, eye nàŋlɔ ɖe edzi bena aboyonu, afɔnetsɔ, nuhaha, va kaba. ²Mayɔ nunɔla Uria kple Zekaria, Yeberekia ƒe vi be woanye ɖasefo wɔnuteƒewo nam.” ³Ale mete ɖe nyɔnu nyagblɔɖila ŋu, eye wòfɔ fu hedzi ŋutsuvi. Yehowa gblɔ nam be, “Mana ŋkɔe be Aboyonu, Afɔnetsɔ, Nuhaha, Va Kaba. ⁴Hafi ɖevi la nate ŋu ayɔ ‘papa’ kple ‘dada’ la, Asiria fia aho aʋa ava dze Damasko kple Samaria dzi, eye wòalɔ woƒe kesinɔnuwo adzoe.”

⁵Yehowa gagblɔ nam be,

⁶“Esi wònye be ame siawo gbe nu le Siloa

tsi si tsana blewu la gbɔ,

eye wokpɔ dzidzɔ ɖe Rezin

kple Remalia ƒe vi ŋu la,

⁷eya ta Aƒetɔ la ana tɔsisi la

ƒe tsi nyanyra sẽŋuwo ava kɔ ɖe wo dzi.

Tɔɖɔɖɔ la anye Asiria fia le eƒe ŋɔdzi katã me.

Tɔ la aɖɔ agbagba, eye wòage ɖe tɔʋuwo katã me;

⁸asi ato Yuda, atsyɔ edzi agbagba,

eye wòaɖɔ́ va se ɖe eƒe ve ke.

Eƒe aʋala akeke atsyɔ miaƒe anyigba ƒe kekeme,

O! Mawu li kpli mi!”

⁹Mi dukɔwo mido aʋaɣli,

eye dzi naɖe le mia ƒo.

Miƒu to anyi,

mi ame siwo le didiƒenyigbawo dzi.

Mibla akpa na aʋawɔwɔ, ke dzi neɖe le mia ƒo;

mibla ali dzi, ke dzi neɖe le mia ƒo.

¹⁰Mide aɖaŋu na aʋawɔwɔ,

gake woagblẽ miaƒe aɖaŋudede,

miwɔ ɖoɖowo, gake womadze edzi o,

elabena Mawu li kpli mi.

Vɔ̃ Mawu

¹¹Ale Yehowa ƒo nu kplim kple kakaɖedzi hede se nam be, magadze ame siawo yome o.

¹²Mègaxɔ nugbeɖoɖo si

ame siawo le wɔwɔm la o,

mègavɔ̃ nu siwo vɔ̃m wole la o,

eye womegado ŋɔdzi na wò o.

¹³Yehowa, Dziƒoʋakɔwo ƒe Aƒetɔ la koe nye ame si miabu kɔkɔe.

Eyae nye ame si ado ŋɔdzi na mi,

¹⁴eye wòazu kɔkɔeƒe, gake anye agakpe kikli

na Yuda kple Israel ƒe aƒe, esi woakli adze anyi.

Gake anye xevimɔ kple adoboli na Yerusalemtɔwo.

¹⁵Ame geɖewo aklii,

adze anyi, eye woaŋe keŋkeŋ.

Woatre mɔ alé wo.

¹⁶Bla ɖaseɖiɖi la, eye nàtre nye nufiafia nu

le nye nusrɔ̃lawo dome.

¹⁷Makpɔ mɔ na Yehowa

ame si le eƒe mo ɣlam ɖe Yakob ƒe aƒe la;

maɖo dzi ɖe eŋu.

¹⁸Kpɔ ɖa, nye kple vinye siwo Yehowa nam lae nye esi. Mienye dzesi kple kpɔɖeŋu le Israel tso Yehowa Dziƒoʋakɔwo ƒe Aƒetɔ la, ame si le Zion to la dzi la gbɔ.

¹⁹Ne amewo gblɔ na mi be, miyi miabia nu le ŋɔliyɔlawo kple afakalawo, ame siwo doa dalĩ kple ŋɔtimegbe gbɔ la, ɖe mele be amewo nabia nu woƒe Mawu boŋ oa? Ɖe woabia nu ame kukuwo na ame gbagbewoa? ²⁰Mitrɔ ɖe nye nufiafia kple ɖaseɖiɖiwo ŋu. Ne nu siwo wogblɔ mesɔ kple nye nyawo o la, ekema kekeli alo nyateƒe aɖeke mele wo tɔwo me o. ²¹Woate wo ɖe anyi, eye dɔ awu wo. Woatsa tsaglãla le anyigba blibo la dzi, eye le dɔwuame ƒe sesẽ ta la woado dziku, aƒo fi ade woƒe fia kple woƒe Mawu. ²²Ekema woade wo to, ke nu si ko woakpɔe nye vevesese kple viviti kple blukɔ dziŋɔ, eye woatsɔ wo aƒu gbe ɖe viviti tsiɖitsiɖi me.

Wodzi ŋutsuvi na mí

¹Ke hã la, blukɔdodo ƒe ɣeyiɣi kple dziɖeleameƒo ƒe ɣeyiɣi manɔ anyi ɖikaa o. Tsã la, èbɔbɔ Zebulonyigba kple Naftalinyigba ɖe anyi. Ke le ɣeyiɣi siwo gbɔna me la, ade bubu dukɔ siwo le Ƒutamɔ dzi kple esiwo le Yɔdan godo la ŋu.

²Dukɔ si le viviti me zɔm la kpɔ kekeli gã aɖe,

ame siwo le blukɔ tsiɖitsiɖi ƒe anyigba dzi la, kekeli klẽ na wo.

³Èdzi dukɔ la ɖe edzi, eye nèdzi woƒe dzidzɔkpɔkpɔ hã ɖe edzi.

Wokpɔ dzidzɔ le ŋkuwòme abe ale si

amewo kpɔa dzidzɔ le nuŋeɣi

kple abe ale si amewo kpɔa dzidzɔ ne

wole aboyonu mam la ene.

⁴Ale si wònɔ le Midiatɔwo ŋɔli ene la,

ègbã kɔkuti si nye agba la na wo,

èɖe kɔsɔkɔsɔ si le kɔ na wo

kple ame siwo te wo ɖe anyi la ƒe ameƒoti ɖa.

⁵Woatɔ dzo aʋawɔlawo ƒe afɔkpawo kple awu si bliba

ʋu le aʋa me la, eye dzo afia wo,

⁶elabena wodzi vi na mí, wona ŋutsuvi mí.

Dziɖuɖu le eƒe abɔta,

eye woda fianyenye ƒe bubuŋkɔwo ɖe edzi be,

“Nukunu, Aɖaŋudela, Mawu Kalẽtɔ,

Fofo Mavɔ kple Ŋutifafafia.”

⁷Eƒe dziɖuɖu akeke ta, eye seɖoƒe manɔ eƒe fiaɖuƒe ŋu o.

Aɖu fia le fofoa David ƒe fiazikpui dzi

kple eƒe fiaɖuƒe la me,

ne woafɔe ɖe te, eye wòatsɔ ʋɔnudɔdrɔ̃ dzɔdzɔe ali kee

tso ɣe ma ɣi yi ɖe mavɔ me.

Nu sia ava eme, elabena Yehowa,

Dziƒoʋakɔwo ƒe Aƒetɔ la

ƒe didi vevie awɔe ade goe.

Yehowa do dɔmedzoe ɖe Israel ŋu

⁸Aƒetɔ la ɖo du ɖe Yakob,

eye wòava ƒo ɖe Israel dzi

⁹ne amewo katã nadze sii hekpe ɖe Efraim kple Samariatɔwo,

ame siwo nɔa gbɔgblɔm le dada kple adegbe ƒuƒlu me be,

¹⁰“Anyikpewo mu dze anyi,

gake míagbugbɔ wo atu kple kpe tɔxɛwo;

wotso gbotiwo ƒu anyi,

ke míado sedatiwo ɖe wo teƒe”,

¹¹gake Yehowa do Rezin ƒe futɔwo ɖe dzi ɖe wo ŋu,

eye wòde ƒu lãme na eƒe futɔwo.

¹²Aram tso ɣedzeƒe, eye Filistitɔwo tso ɣetoɖoƒe

vuvu Israel kple nu siwo ke ɖi baa la.

Togbɔ be esiawo katã dzɔ hã la,

Yehowa ƒe dɔmedzoe nu mefa o,

eye eƒe alɔ gale dzi ɖe wo ŋu ko.

¹³Gake ame siawo metrɔ ɖe ame si ƒo wo la ŋu o,

wogbe be yewomadi Yehowa Ŋusẽkatãtɔ la yomemɔ o.

¹⁴Ale Yehowa tsrɔ̃ ta kple asike,

deʋaya kple keti siaa ɖa tso Israel le ŋkeke ɖeka dzi.

¹⁵Ame tsitsiwo kple ame ŋkutawoe nye ta la,

eye nyagblɔɖila siwo fiaa alakpadada lae nye asike la.

¹⁶Ame siawo kplɔlawo nye ameblelawo,

eye ame siwo blem wole la bu.

¹⁷Eya ta Aƒetɔ la makpɔ dzidzɔ le ɖekakpuiwo ŋu

alo ave tsyɔ̃eviwo kple ahosiwo nu o,

elabena wo katã wonye mawumavɔ̃lawo kple ame vɔ̃ɖiwo

eye wo katã wogblɔa nya vlowo.

Ke le esiawo katã megbe hã la, eƒe dɔmedzoe nu mefa o,

eye eƒe alɔ gale dzi ko.

¹⁸Vavã ŋutasesẽ le bibim abe dzo ene.

Efia ŋuwo kple aŋɔkawo,

eye wòtɔ dzo avekɔewo kple avedodowo,

ale be dzudzɔ de dzi kɔtɔɔ.

¹⁹Yehowa, Dziƒoʋakɔwo ƒe Aƒetɔ la

ƒe dɔmedzoe na dzo ƒo anyigba,

eye dukɔ la anye dzodonu,

ame aɖeke makpɔ nɔvia ta o.

²⁰Woavuvu nu le ɖusime, gake dɔ aganɔ wo wum,

woaɖu nu le miame, gake womaɖi ƒo o.

Ame sia ame aɖu eya ŋutɔ ƒe dɔmevi ƒe lã.

²¹Manase aɖu Efraim, eye Efraim aɖu Manase,

wo kple eve la siaa woatso ɖe Yuda ŋu.

Le esiawo katã megbe hã la, Yehowa ƒe dɔmedzoe nu metsi o,

eye eƒe alɔ gale dzi ko.

¹Baba na ame siwo wɔa se madzɔmadzɔwo,

ame siwo dea se siwo tea ame ɖe anyi,

²be woaxɔ nu si nye ame dahe tɔ la le esi,

woada adzo dzɔdzɔenyenye le

ame teɖeanyiwo si,

woaɖe aboyo ahosiwo kple tsyɔ̃eviwo.

³Nu ka miawɔ le akɔntanagbe la

esi gbegblẽ atso adzɔge ava?

Ame ka gbɔ miasi ayi wòana kpekpeɖeŋu mi?

Afi ka miagble miaƒe kesinɔnuwo ɖo?

⁴Naneke masusɔ o, ke boŋ gamemewo

kple ame siwo tsi aʋa ko,

ke to esiawo katã megbe hã la,

Yehowa ƒe dɔmedzoe nu mefa o,

eye eƒe alɔ gale dzi ko.

Mawu ƒe ʋɔnudɔdrɔ̃ Asiria

⁵“Baba na Asiria, nye dɔmedzoe ƒe ameƒoti;

ame si ƒe asi me metsɔ nye dɔmedzoe ƒe asi dee.

⁶Medɔe ɖe dukɔ mavɔ̃mawu ŋu,

meɖe gbe nɛ ɖe dukɔ si doa dɔmedzoe nam la ŋu,

ne wòaɖe aboyo eƒe amewo,

aha wo, eye wòafanya wo,

anya wo abe anyi ene le woƒe ablɔwo dzi.

⁷Ke menye esiae nye eƒe susu o,

menye esia bum wòle o,

eƒe taɖodzinue nye be yeagblẽ nu,

eye yeahe dukɔ geɖewo ƒe nuwuwu vɛ.

⁸Egblɔ be, ‘Ɖe nye aʋakplɔlawo katã menye fiawo oa?’

⁹‘Ɖe Kalno medze anyi abe Karkemis ene, Hamat abe Arpad ene,

eye Samaria abe Damasko ene oa?

¹⁰Ale si nye asi su fiaɖuƒe siawo

kple woƒe legba siwo de ŋgɔ

wu Yerusalem kple Samariatɔwo dzi la,

¹¹ɖe nyemawɔ Yerusalem kple eƒe legbawo

abe ale si mewɔ Samaria

kple eƒe legbawoe ene oa?’ ”

¹²Ne Yehowa wu nu siwo katã wòɖo be yeawɔ kple Zion to la kple Yerusalem nu vɔ la, ekema agblɔ be, “Mahe to na Asiria fia le eƒe dada kple ɖokuikpɔkpɔ gãe ta. ¹³Elabena egblɔ be,

“ ‘Nye ŋutɔe tsɔ nye asi wɔ nu siawoe.

Meɖe dukɔwo ƒe liƒowo ɖa,

ha woƒe kesinɔnuwo, eye abe ŋusẽtɔ ene la,

mebɔbɔ woƒe fiawo ɖe anyi.

¹⁴Abe ale si woƒoa asi ɖe xevitɔ me ene la,

nenemae nye asi ɖo dukɔwo ƒe kesinɔnuwo gbɔe;

abe ale si amewo lɔa xevizi siwo wogble ɖe xevitɔwo me ene la,

nenema melɔ xexeme dukɔwoe:

ame aɖeke meli, ƒo aʋala alo ke eƒe dɔ xlɔ̃ o.’ ”

¹⁵Ɖe fia aƒo adegbe wu ame si tsɔe le nu lãma?

Alo ɖe laxalaxa atɔ asi akɔ wu ame si le eŋuti dɔ wɔma.

Ɖe ameƒoti ate ŋu aƒo ame si lée ɖe asi alo ɖe

atizɔti ate ŋu akɔ eɖokui ɖe dzi mahã?

¹⁶Eya ta Yehowa, Dziƒoʋakɔwo ƒe Aƒetɔ la,

adɔ dɔléle vɔ̃ɖi aɖe ɖa wòava atsrɔ̃ wò aʋakɔwo katã,

eye dzo abi le eƒe amegãwo dome

abe ale si dzo binae ene.

¹⁷Israel ƒe Kekeli azu dzo,

eƒe Kɔkɔetɔ la anɔ abe dzo bibi ene,

eye le ŋkeke ɖeka dzi la,

abi afia ŋuwo kple aŋɔkawo.

¹⁸Abe ale si dɔléle vɔ̃ɖi dzea ŋutsu dzi hewunɛ ene la,

nenema ke Yehowa atsrɔ̃ Asiria ƒe ave dodowo

kple woƒe agblenyigba nyuiwo gbidigbidi.

¹⁹Avemetiawo abi ale gbegbe be, ɖevi sue ɖeka pɛ gɔ̃ hã ate ŋu

axlẽ esiwo susɔ aŋlɔ da ɖi.

Israel ƒe ame mamlɛawo

²⁰Ava eme le ɣe ma ɣi me be

Israel ƒe ame mamlɛawo kple Yakob ƒe aƒe,

ame siwo tsi agbe la,

magaɖo dzi ɖe ame si ƒo wo la ŋu o,

ke boŋ aɖo dzi ɖe Yehowa,

Israel ƒe kɔkɔetɔ la ŋu le nyateƒe me.

²¹Ame mamlɛawo atrɔ gbɔ,

Yakob ƒe ame mamlɛawo

atrɔ ɖe Mawu Ŋusẽkatãtɔ la ŋu.

²²Togbɔ be wò dukɔ, O! Israel,

le abe ƒutake ene hã la,

ame mamlɛawo koe atrɔ gbɔ.

Woɖo kpe gbegblẽ dzi, eye dzɔdzɔenyenye gbagbã ɖi.

²³Aƒetɔ Yehowa, Dziƒoʋakɔwo ƒe Aƒetɔ la

ahe tsɔtsrɔ̃ si wòɖo ɖi kplikpaa la ava anyigba blibo la dzi.

²⁴Eya ta ale Yehowa, Dziƒoʋakɔwo ƒe Aƒetɔ la, gblɔe nye esi:

“O! Mi ame siwo le Zion, migavɔ̃ Asiria,

ame si ƒo mi kple ameƒoti,

eye wòɖe kpo ɖe mia dzi abe ale si Egipte wɔ ɖe mia ŋu la ene o.

²⁵Madidi o la, nye dziku ɖe mia ŋu nu ava ayi,

eye matrɔ nye dɔmedzoe ɖe wo tsɔtsrɔ̃ ŋuti.”

²⁶Yehowa, Dziƒoʋakɔwo ƒe Aƒetɔ la,

aɖe atam ɖe wo dzi abe ale si wòƒo Midian le Oreb ƒe agakpe la gbɔ ene,

eye ado eƒe atikplɔ ɖe tsiawo dzi

abe ale si wòdze le Egipte la ene.

²⁷Le ŋkeke ma dzi la,

woaɖe woƒe agbawo le wò abɔta,

aŋe woƒe kɔkuti le wò kɔ,

eye woƒe kɔkuti aŋe le miaƒe amidada ta.

²⁸Woge ɖe Ayat,

woto Migron, eye wova gble

woƒe nuzazãwo ɖe Mikmas.

²⁹Wodo to domemɔ, eye wogblɔ be,

“Miatsi Geba adɔ.”

Rama dzo nyanyanya,

Saul ƒe Gibea de afɔ du me.

³⁰Do boboe, Galim nyɔnuvi;

Laisa, ƒu to anyi, nublanuie nye Anatɔt.

³¹Maglimae si,

Gabimtɔwo ɣla wo ɖokui.

³²Egbea ke, woatɔ ɖe Nɔb ŋu.

Woanye woƒe kɔwo le yame ɖe Zion nyɔnuvi ƒe to

kple Yerusalem ƒe togbɛ la ŋu.

³³Kpɔ ɖa, Aƒetɔ Yehowa, Dziƒoʋakɔwo ƒe Aƒetɔ la,

atsɔ ŋusẽ gã aɖe alã atilɔwo tso ati

siwo kɔ de dzi bobobo,

eye wòabɔbɔ ketɔwo ɖe anyi.

³⁴Woatsɔ fia adza ave dodowo,

eye Ŋusẽtɔ la amu Lebanon ƒe sedatiwo

aƒu anyi le avewo me.

Atilɔ si tso Yese ƒe ke me

¹Atilɔ aɖe adze tso Yese ƒe ke me;

tso eƒe ke me la,

atilɔ aɖe atse ku.

²Yehowa ƒe Gbɔgbɔ anɔ eya amea dzi,

nunya kple gɔmesese ƒe gbɔgbɔ;

aɖaŋudede kple ŋusẽ ƒe gbɔgbɔ kple sidzedze

kple Yehowavɔvɔ̃ ƒe gbɔgbɔ,

³eye Yehowavɔvɔ̃ ƒe nu anyo eŋu.

Madrɔ̃ ʋɔnu ɖe nu si eƒe ŋku le kpɔkpɔm la nu,

alo atso nya me ɖe nu si eƒe to se la nu o,

⁴gake adrɔ̃ ʋɔnu na ame dahewo le dzɔdzɔnyenye me,

eye wòatso afia na anyigbadzihiãtɔwo ɖe eteƒe.

Atsɔ eƒe numetikplɔ aƒo anyigba la,

eye wòatsɔ eƒe numegbɔgbɔ atsrɔ̃ ŋutasẽlawoe.

⁵Dzɔdzɔenyenye anye eƒe alidziblaka,

eye nyateƒe anye alidziblanu le eƒe aklito.

⁶Amegaxi anɔ alẽvi gbɔ,

lãklẽ atsyɔ akɔ anyi ɖe gbɔ̃vi gbɔ bɔkɔɔ, nyivi,

dzata kple nyi dami woanɔ wo nɔewo gbɔ le ŋutifafa me,

eye ɖevi sue aɖe akplɔ wo.

⁷Nyinɔ aɖu gbe le sisiblisiwo dome,

wo viwo atsyɔ akɔ anyi ɖe teƒe ɖeka,

eye dzata gɔ̃ hã aɖu gbe abe nyitsu ene.

⁸Vi nonowo ata le ƒli ƒe do nu,

eye ɖevi suewo aƒo asi ɖe dakpui ƒe do me.

⁹Naneke mahe vɔ̃ alo gbegblẽ va

nye to kɔkɔe blibo la dzi o,

elabena sidzedze Yehowa axɔ anyigba la dzi

abe ale si tsi yɔa atsiaƒu mee ene.

Israel kple Yuda ƒe ame mamlɛawo ƒe tɔtrɔ gbɔ

¹⁰Gbe ma gbe la, Yese ƒe ke la anye aflaga na anyigbadzitɔwo katã. Dukɔwo katã ava ƒo zi ɖe eŋu, elabena eƒe nɔƒe anye ŋutikɔkɔeteƒe. ¹¹Gbe ma gbe la, Yehowa ado eƒe asi ɖa akplɔ aboyomewo tso Asiria, Dzigbe Egipte, Anyigbe Egipte, Kus, Elam, Babilonia, Hamat siwo susɔ la agbɔe zi evelia.

¹²Atu aflaga na dukɔwo,

eye wòaƒo Israelvi

siwo woɖe aboyoe la nu ƒu.

Aƒo Yuda ƒe vi siwo ka hlẽ ɖe xexea me

ƒe dzogoe eneawo dzi la nu ƒu.

¹³Efraim ƒe ŋuʋaʋã nu atso,

eye Yehowa atsrɔ̃ Yuda ƒe futɔwo.

Efraim magaʋã ŋu Yuda o,

alo Yuda nagaxaxa Israel ɖo o.

¹⁴Mlɔeba la, wo kple eve la woaɖi aga adze Filistitɔwo dzi le ɣetoɖoƒe,

eye woaha dukɔ siwo le ɣedzeƒe la.

Woƒe asi asu Edom kple Moab dzi,

eye Amon ƒe vi azu wo tenɔlawo.

¹⁵Yehowa ana Egipte ƒu la namie,

eye wòanye eƒe asi le Frat tɔsisi dzi

kple ya xɔdzo sesẽ.

Amae ɖe tɔʋu adre me ale be

woate ŋu atsoe kple atokota gɔ̃ hã.

¹⁶Ale wòanye mɔtata na eƒe ame mamlɛ

siwo susɔ tso Asiria abe ale si wònɔ

na Israel esi wòkplɔ wo do

goe tso Egipte ene.

Kafukafuhawo

¹Le ɣe ma ɣi la, àgblɔ be,

“Makafu wò, O! Yehowa,

togbɔ be èdo dɔmedzoe ɖe ŋunye tsã hã la,

wò dɔmedzoe nu yi,

eye nèfa akɔ nam.

²Nyateƒe, Mawu nye nye xɔname.

Maɖo dzi ɖe eŋu, eye nyemavɔ̃ o.

Ɛ̃, Yehowae nye nye ŋusẽ kple nye hadzidzi,

eye eyae zu nye xɔname

³Miadu tsi le xɔname ƒe vudowo me kple dzidzɔ.”

⁴Le ŋkeke ma dzi la, àgblɔ be,

“Mida akpe na Yehowa!

Miyɔ eƒe ŋkɔ,

miɖe gbeƒã eƒe ŋkɔ le xexemedukɔwo dome.

⁵Miɖe gbeƒã Yehowa, elabena ewɔ nu dzɔatsuwo,

miɖe gbeƒã eƒe kafukafu le xexea me katã.

⁶Mido ɣli, eye mitso aseye,

mi ame siwo le Zion,

elabena gãe nye Israel ƒe Kɔkɔetɔ si le mia dome.”

Nyagblɔɖi ɖe Babilonia ŋu

¹Esia nye ŋutega si Mawu ɖe fia Yesaya, Amoz ƒe vi la, tso Babilonia ƒe gbegblẽ ŋuti.

²Mitu aflaga ɖe togbɛ ƒuƒlu tame.

Mido ɣli yɔ nye aʋawɔlawo.

Mimia asi wo,

be woage ɖe bubumewo

ƒe agbowo me.

³Meɖe gbe na nye aʋawɔla, meyɔ nye kalẽtɔwo

be woaɖe nye dɔmedzoe afia, ame siwo tsoa aseye

ɖe nye dziɖuɖu ŋu.

⁴Miƒu to anyi,

ɣli le ɖiɖim le towo dzi abe ameha gã

aɖewoe le afi ma ene.

Miƒu to anyi,

zi tɔ le fiaɖuƒewo me abe dukɔ geɖewoe

le ƒu ƒom ene.

Yehowa, Dziƒoʋakɔwo ƒe Aƒetɔ lae

le amewo nu ƒom ƒu hena aʋawɔwɔ.

⁵Wotso anyigba didiwo dzi va,

tso keke dziƒowo ƒe mlɔewo nu ke.

Wova kple Yehowa kple eƒe dɔmedzoe

ƒe aʋawɔnuwo be woagbã dukɔ la katã.

⁶Mido ɣli, elabena Yehowa ƒe ŋkeke la tu aƒe.

Ava abe gbegblẽ ene tso Ŋusẽkatãtɔ la gbɔ.

⁷Le esia ta la, asiwo katã aku yigbaa ɖe amewo ŋu,

eye amegbetɔwo katã ƒe dzi alolo ɖe dɔ me na wo.

⁸Vevesese kple nuxaxa alé wo,

eye woaŋe abe nyɔnu si le ku lém la ene.

Woƒe mo anɔ vevem hẽe,

eye woafɔ ŋku ɖe wo nɔewo dzi gaa.

⁹Kpɔ ɖa, Yehowa ƒe ŋkeke dziŋɔ la gbɔna.

Egbɔna kple dziku kple dɔmedzoe helĩhelĩ be

woana anyigba la nazu gbegbe,

eye wòatsrɔ̃ mi vɔ̃wɔla siwo le edzi.

¹⁰Ɣletivi hamehame siwo le dziŋgɔli ŋu la magaklẽ o,

ne ɣe dze la, ado viviti, eye dzinu magaɖi o.

¹¹Mahe to na xexea me le eƒe nu tovowo wɔwɔ ta,

eye maxe fe na ame vɔ̃ɖiwo le woƒe nu vɔ̃wo ta.

Matsi dadalawo ƒe dada nu,

eye mate ŋutasẽlawo ƒe ɖokuidodoɖedzi ɖe to.

¹²Mana amegbetɔwo nave wu sika nyuitɔ,

eye amegbetɔ kodzogbeawo hã ave wu sika si tso Ofir.

¹³Eya ta mana dziƒowo naʋuʋu kpekpekpe,

eye anyigba naʋuʋu le eƒe agunu ke

le Yehowa Ŋusẽkatãtɔ la ƒe dɔmedzoe ta

le eƒe dziku helĩhelĩ ƒe ŋkeke la dzi.

¹⁴Abe sãde aɖe si wonya ɖe nu ene

alo alẽha si ŋu kplɔla mele o ene la,

ame sia ame agatrɔ ayi ɖe eƒe amewo gbɔ,

eye ame sia ame asi ayi wo denyigba dzi.

¹⁵Woaƒo lãnu ɖe ame sia ame si wolé,

eye ame si dzi asi su la atsi yi nu.

¹⁶Woatsɔ woƒe vidzĩwo axlã ɖe anyi le wo ŋkume.

Woaha woƒe aƒewo, eye woadɔ kple wo srɔ̃wo sesẽtɔe.

¹⁷Kpɔ ɖa, made adã ta me na Mediatɔwo ɖe wo ŋu;

ame siwo mebua klosalo ɖe naneke me o,

eye sika gɔ̃ hã medoa dzidzɔ na wo o.

¹⁸Woƒe aŋutrɔwo tea ɖekakpuiwo ƒua anyi.

Womekpɔa nublanui na funɔdɔmee o,

alo ɖeviwo ƒe nu mewɔa nublanui na wo o.

¹⁹Babilonia, fiaɖuƒewo ƒe nu xɔasi,

Mawu amu Babiloniatɔwo ƒe dada aƒu anyi

abe Sodom kple Gomora ene.

²⁰Amewo magatso aƒe ɖe afi ma akpɔ gbeɖe o,

eye wòazu aƒedo tso dzidzime yi dzidzime.

Arabiatɔ aɖeke matu eƒe agbadɔ ɖe afi ma o,

alẽkplɔla aɖeke mana eƒe lãwo

natsyɔ akɔ anyi ɖe afi ma o.

²¹Ke gbemelãwo koe atsyɔ

akɔ anyi ɖe afi ma.

Favieʋuto ayɔ woƒe xɔwo me,

golowo atso aƒe ɖe afi ma

eye azizãwo aɖi adrɔ le afi ma.

²²Gbevuwo hã anɔ afi ma,

Amegaxiwo axɔ woƒe dziƒoxɔ sesẽwo awɔ wo nɔƒewo.

Eƒe ɣeyiɣi tu aƒe,

eye eƒe ŋkekewo mahe ɖe megbe o.

¹Yehowa akpɔ nublanui na Yakob,

aʋu ʋɔ atia Israel, eye wòatsɔ wo aɖo

woawo ŋutɔ ƒe anyigba dzi.

Dukɔ bubu me tɔwo akpe ɖe wo ŋuti,

eye woawɔ ɖeka kple Yakob ƒe aƒe la.

²Dukɔwo akplɔ wo va woawo ŋutɔ nɔƒee.

Dukɔwo kple dɔlanyɔnuwo le Yehowa ƒe aƒe la dzi.

Ale woalé ame siwo ɖe aboyo wo la,

eye woaɖu gã ɖe ame siwo te wo ɖe to la dzi.

³Gbe si gbe Yehowa ana mi gbɔdzɔe tso miaƒe fukpekpewo, hiãkamewo kple dɔ sesẽ siwo miewɔ le aboyo me la, ⁴ado hamelo sia na Babilonia fia be,

Ale funyafunyawɔame la wu nue nye esi!

Ale eƒe ŋutasesẽ hã wu nue nye esi!

⁵Yehowa ŋe ame vɔ̃ɖi ƒe ameƒoti,

eye wòŋe fiawo ƒe tsiamiti

⁶siwo wotsɔ ƒo dukɔwo atraɖii,

eye le woƒe dɔmedzoe me,

wobɔbɔ dukɔwo ɖe anyi heti

wo yome kutɔkutɔe.

⁷Anyigbawo katã gbɔ ɖe eme le ŋutifafa me,

eye wode asi hadzidzi kple dzidzɔkpɔkpɔ me.

⁸Logotiwo kple Lebanon ƒe sedatiwo

le dzidzɔ kpɔm ɖe ŋu wò, eye wogblɔ be,

“Azɔ esi wolã wo ƒu anyi la,

atidzela aɖeke magava lã mi aƒu anyi o.”

⁹Tsĩeƒe le dzadzraɖo wɔm be

woado go wò ne èva.

Ènyɔ ame kukuwo ƒe gbɔgbɔwo be woado go wò,

ame siwo nye dziɖulawo le xexe sia me kpɔ.

Èna ame siwo ɖu fia ɖe xexemedukɔwo dzi kpɔla tso

le woƒe fiazikpuiwo dzi.

¹⁰Wo katã woaɖo eŋu na wò kple gbe ɖeka be,

“Wò hã èzu ame beli abe míawo ke ene;

èle abe mia dometɔ ɖeka ene azɔ.”

¹¹Wotsɔ wò atsyɔ̃ɖoɖo katã ɖi ɖe yɔ me kpe ɖe

wò kasaŋkuwo ƒe ɖiɖi ŋuti.

Nyẽwo le dodom le tewò,

eye ŋɔviwo le tatam le dziwò.

¹²Aleke nèhege tso dziƒoe, o ŋukeɣletivi!

Wokɔ wò ƒu gbe ɖe anyigba dzi;

wò ame si te dukɔwo ɖe anyi kpɔ!

¹³Ègblɔ le wò dzi me be,

“Malia nu ayi ɖe dziƒo.

Mali nye fiazikpui ɖe Mawu ƒe ɣletiviwo tame.

Manɔ nye fiazikpui dzi le takpekpeto la dzi,

le to kɔkɔe la tame ʋĩi ke.

¹⁴Malia ayi ɖe lilikpowo tame ke,

eye mawɔ ɖokuinye be masɔ ta kple Dziƒoʋĩtɔ la.”

¹⁵Ke wohe wò ƒu gbe ɖe yɔ me,

ɖe tsiẽƒe ƒe gogloƒe ke.

¹⁶Ame siwo kpɔ wò la, woafɔ ŋku ɖe dziwò,

eye woabu nu si dzɔ ɖe dziwò la ŋuti ahabia be,

“Ɖe menye ame siae nye ame si ʋuʋu anyigba la,

eye wòna fiaɖuƒewo dzo nyanyanya,

¹⁷ame si na xexea me zu gbegbe,

ame si gbã du gãwo, eye wòɖe aboyo emenɔlawo oa?”

¹⁸Dukɔwo katã ƒe fiawo mlɔ anyi ɖe

woƒe yɔdowo me le bubu me.

¹⁹Ke wo ya la, wokɔ wò ƒu gbe ɖe wò yɔdo me

abe atilɔ si gbɔ wogbe nu le la ene.

Wolɔ ame siwo wowu kple ame siwo tsi yi nu la li kɔe ɖe dziwò,

ame siwo woɖi ɖe agakpetowo ƒe gogloƒe ke,

eye wole abe ŋutilã kuku siwo wofanya kple afɔ la ene.

²⁰Womaɖi wò abe woawo ene o,

elabena ègblẽ wò anyigba, eye nèwu wò amewo.

Womagayɔ ame vɔ̃ɖiwo ƒe dzidzimeviwo ƒe ŋkɔ azɔ o.

²¹Dzra teƒe ɖo ne nàwu ŋutsuwo

le afi ma, ɖe wo fofowo ƒe nu vɔ̃wo ta.

Womatsi tsitre be woanyi anyigba la ƒe dome,

eye woatso du gãwo, wòaxɔ anyigba la dzi o.

²²Yehowa, Dziƒoʋakɔwo ƒe Aƒetɔ la gblɔ be,

“Matso ɖe wo ŋuti.

Maɖe Babilonia ƒe ŋkɔ, ame siwo tsi agbe,

viawo kple eƒe dzidzimeviwo ɖa”

Yehowae gblɔe.

²³“Mana wòazu hlɔ̃madɛwo nɔƒe,

eye matsɔ gbegblẽ ƒe xa akplɔ woe.”

Yehowa, Dziƒoʋakɔwo ƒe Aƒetɔ lae gblɔe.

²⁴Nyagblɔɖi la ɖi Asiria ŋu. Yehowa, Dziƒoʋakɔwo ƒe Aƒetɔ la, ka atam be,

“Le nyateƒe me, ale si meɖoe la, nenemae wòanɔ,

eye ale si meɖo ɖe ta me la, nenema wòava emee.

²⁵Magbã Asiriatɔwo le nye anyigba dzi,

eye mafanya wo le nye towo tame.

Maɖe kɔkuti ɖa le nye amewo ƒe kɔ,

eye maɖe eƒe agba kpekpe ɖa le woƒe abɔta.”

²⁶Esia nye ɖoɖo si mewɔ ɖe xexea me katã ŋu,

nye asi si mekɔ ɖe dukɔwo katã dzi,

²⁷elabena esiae Yehowa,

Dziƒoʋakɔwo katã ƒe Aƒetɔ la ɖo.

Ame kae ate ŋu agblẽ eme?

Ekɔ eƒe asiwo dzi,

ame kae ate ŋu aɖiɖii?

Nyagblɔɖi ɖe Filisitɔwo ŋu

²⁸Mexɔ nyagblɔɖi sia le ƒe si me fia Ahaz ku.

²⁹Mi Filistitɔwo, migakpɔ dzidzɔ be ameƒoti si wotsɔ ƒo mi la ŋe o,

elabena da vɔ̃ɖi ado tso da ma ke me,

eye eƒe metsonu nye da vɔ̃ɖi si noa aɖi,

eƒe kutsetse anye da to aʋala si yɔ fũu kple aɖi.

³⁰Ame dahewo ƒe ame dahe akpɔ nyuiƒe,

eye hiãtɔwo atsyɔ akɔ anyi le dedinɔnɔ me.

Ke matsɔ dɔtoto atsrɔ̃ wò ame siwo tsi agbe la.

³¹Fa avi, o agbo! Do ɣli, o du! Mi

Filistitɔwo katã milolõ.

Dzudzɔ babla tso anyiehe,

eye ame beli aɖeke mele woƒe aʋakɔwo dome o.

³²Ŋuɖoɖo kae woana dukɔ ma ƒe ame dɔdɔawo?

“Yehowa gaɖo Zion te, eye le afi ma hiãtɔ akpɔ sitsoƒe.”

Nyagblɔɖi ɖe Moab ŋu

¹Esiae nye nyagblɔɖi ɖe Moab ŋu:

woatsrɔ̃ Ar le Moab,

woagbãe le zã!

Woatsrɔ̃ Kir le Moab,

woagbã wo le zã!

²Wò ame siwo le Dibon la lũ ta kolikoli,

eye wolũ woƒe ge hã

hele konyi fam vevie, eye woyi ɖe

woƒe mawu Nebo kple Medeba

ƒe gbedoxɔwo me ne woafa na wo.

³Wo katã wota akpanya hele zɔzɔm le mɔtatawo dzi;

wo katã wole ɣli dom le xɔwo tame kple ablɔwo me

eye wotsɔ mo tsyɔ anyi hele avi fam.

⁴Ame siwo le Hesbon kple Eleale

le avi fam sesĩe ale gbegbe be,

woƒe ɣlidodo ɖo keke Yahaz.

Esia na be Moab ƒe aʋawɔlawo

wo avi gboo, eye dzi ɖe le wo ƒo.

⁵Nye dzi le nu xam le Moab ŋu.

Eƒe aʋasilawo si yi keke Zoar,

eye wode Eglat Selisia ke.

Woyi Luhit to dzi kple avifafa,

eye le Horonaim mɔ dzi la,

wonɔ konyi fam tso woƒe gbegblẽ ŋuti.

⁶Nimrim tɔsisi la hã amie, ahaƒu kplakplakpla, eye gbewo katã ayrɔ;

nu miemiewo katã aku, eye gbe mumu aɖeke maganɔ anyi o.

⁷Ale woƒe kesinɔnu siwo wokpɔ heli kɔe ɖi la,

woatsɔe atso Amutitɔʋu lae.

⁸Woƒe konyifaɣli le ɖiɖim le Moab ƒe liƒowo dzi;

woƒe avifafa ɖo keke Eglaim,

eye woƒe konyifafa ɖo Beer Elim.

⁹Dimon tɔsisiwo yɔ fũu kple ʋu,

gake mahe nu vɔ̃ɖi wu esia ava Dimon dzi.

Dzata aɖo Moab ƒe aʋasilawo

kple ame siwo susɔ ɖe anyigba dzi la dome.

¹Miɖo alẽviwo ɖe anyigbadziɖula la abe

miaƒe adzɔnunana ene tso Sela to gbegbe la

ahayi ɖe Zion ƒe vinyɔnu ƒe to la dzi.

²Abe ale si wonyaa xe dzodzoewo le

woƒe atɔwo me ene la,

nenema ke wòanɔ na Moab nyɔnuwo

le Arnon ƒe tɔtsoƒewo.

³“Ɖo aɖaŋu na mí, eye nàtso nya me na mí.

Na wò vɔvɔli nazu abe zã ene le ŋudɔkutsu.

Ɣla aʋasilawo, eye mègafia wo yomemɔ o.

⁴Na be Moab ƒe aʋasilawo nanɔ gbɔwò,

eye nànye woƒe sitsoƒe tso nugblẽla ƒe asi me.”

Ŋutasẽla ƒe ɣeyiɣi ava yi, eye gbegblẽ hã nu atso.

Ameyometila hã abu ɖa keŋ le anyigba dzi.

⁵Woaɖo fiazikpui anyi le lɔlɔ̃ me.

Ŋutsu aɖe si atso David ƒe aƒe me la,

anɔ edzi le nuteƒewɔwɔ me.

Ame sia adrɔ̃ ʋɔnu dzɔdzɔe,

eye wòado dzɔdzɔenyenye ɖe ŋgɔ.

⁶Míese nu tso Moab ƒe dada,

eƒe asitɔtɔ akɔ kple ɖokuidodoɖedzi,

eƒe dada kple eƒe amemabumabu ŋu,

gake eƒe adegbeƒoƒowo katã nye dzodzro,

⁷eya ta Moabtɔwo afa avi,

woafa avi ɖe Moab ŋu.

Mixa nu, miafa konyi ɖe waintsetsebolo ta na Kir Hareset,

⁸elabena Hesbon ƒe agblewo yrɔ,

nenema kee nye Sibma ƒe wainkawo hã.

Dukɔwo ƒe amegãwo gblẽ waintsetse nyuitɔ

siwo ƒe kawo de Yazer heɖo keke gbegbe,

eye eƒe alɔwo keke va ɖo ƒuta.

⁹Eya ta mafa avi abe Yazer

ɖe Sibma ƒe wainkawo ŋu ene.

O! Hesbon, O! Eleale. Mefa mi vevie!

Elabena dzidzɔɣli si ɖina le miaƒe kutsetsegbeɣi

kple nuŋeŋe me la zi ɖoɖoe.

¹⁰Dzidzɔ kple vivisese nu tso le abɔwo me,

ame aɖeke mele ha dzim

alo le dzidzɔɣli dom le waingblewo me o,

ame aɖeke megafiaa wain le wainfiaƒe o,

elabena metsi dzidzɔɣliwo nu.

¹¹Nye dzi le konyi fam le menye ɖe Moab ŋu

abe ale si woƒoa kasaŋku ene,

eye vevesese tso Kir Hareset ŋu.

¹²Ne eva eme be Moab do ɖe eƒe nuxeƒe la,

dagbadagba ƒuƒlu koe.

Ne eyi eƒe gbedoɖaƒe

be yeado gbe ɖa la, mate ŋui o.

¹³Esia nye nya si Yehowa gblɔ ɖi xoxo tso Moab ŋu. ¹⁴Yehowa be, “Le ƒe etɔ̃ me tututu abe ale si agbatedɔwɔla xlẽa eƒe ƒee ene la, maɖi gbɔ̃ Moab ƒe atsyɔ̃ kple ame gbogboawo, ame siwo asusɔ la, woanɔ ʋɛe, eye womanɔ nemi me hã o.”

Nyagblɔɖi ɖe Damasko ŋu

¹Esiae nye nyagblɔɖi ɖe Damasko ŋu:

“Kpɔ ɖa, Damasko maganye du abe tsã ene o,

ke boŋ atrɔ azu aƒedo!

²Woagblẽ Aroa ƒe duwo ɖi woatsi ƒuƒlu,

eye wòazu nɔƒe na alẽha siwo atsyɔ akɔ anyi ɖe afi ma,

eye ame aɖeke mado ŋɔdzi na wo o.

³Efraim ƒe mɔ sesẽwo nu ayi

kple Damasko ƒe fiaɖuƒe hã,

eye Aram ƒe ame mamlɛawo

ƒe ŋusẽ anɔ abe Israeltɔ ene.”

Yehowa, Dziƒoʋakɔwo ƒe Aƒetɔ lae gblɔe.

⁴“Eva eme le ɣe ma ɣi be,

Yakob ƒe ŋusẽ aɖiɖi, eye eƒe lãmemi avɔ keŋ.

⁵Azu abe bligble si me woŋe bli

le hegblẽ hɔ̃litiawo ɖe tsitrenu ene,

eye abe ale si agbledela fɔa bli dzɔdzɔe

le Refaim me ene.

⁶Kutsetse ʋɛ aɖewo asusɔ abe ale si ne wogbe amiti vɔ,

eye kutsetse eve alo etɔ̃ aɖewo susɔna ɖe eƒe adzame ene.

Wo ame ene alo atɔ̃ nɔa atiawo ƒe alɔwo dzi la ene.”

Yehowa Israel ƒe Mawu lae gblɔe.

⁷Ɣe ma ɣi la, amegbetɔ atrɔ ɖe eƒe Wɔla ŋu,

eye eƒe ŋkuwo anɔ Israel ƒe Kɔkɔetɔ la dzi.

⁸Womagatrɔ ɖe woƒe vɔsamlekpui

siwo woawo ŋutɔ wowɔ kple woƒe asiwo la ŋu o,

eye womagabu aƒeli kple ɣelégba

siwo woawo ŋutɔ wowɔ kple woƒe asiwo la o.

⁹Le ŋkeke ma dzi la, woƒe du sesẽ siwo wogblẽ ɖi na Israelviwo hesi dzo la anɔ abe gbegbe ene, eye woazu aƒedo.

¹⁰Elabena èŋlɔ Mawu, wò xɔnametɔ la be,

eye mèɖo ŋku agakpe si nye wò mɔ sesẽ la dzi o.

Eya ta togbɔ be nèƒã nuku nyuiwo,

eye nèdo du bubu me tɔwo ƒe wainkawo;

¹¹togbɔ be gbe si gbe nèdoe la,

ètɔ kpɔ ɖe eŋu, eye esi ŋu ke la,

èna wò nukuawo ƒo se hã la,

le nuŋegbe la, màŋe naneke wu fukpekpe kple vevesese o.

¹²O! Dukɔ geɖewo ƒe agbodzedze.

Wodze agbo abe tɔ dzeagbo ene!

O! Woƒe amewo ƒe hoowɔwɔ.

Wole hoo wɔm abe tɔ dzeagbowo

ƒe hoowɔwɔ ene.

¹³Togbɔ be ameawo le hoo wɔm

abe tsi sesẽwo ƒe hoowɔwɔ ene hã la,

ne èblu ɖe wo ta la,

wosina yia megbe ke.

Èɖe wo ɖe ŋu abe gbe ƒuƒuwo le towo dzi

kple yali le ahom nu ene.

¹⁴Ŋɔdzi nɔa anyi le fiẽ me, gake wobuna ne ŋu ke.

Esia nye ame siwo daa adzo mí la ƒe gome

kple mía halawo ƒe dzidzenu.

Nyagblɔɖi ɖe Kus ŋu

¹Baba na anyigba si le Kus ƒe tɔsisiwo

ƒe go kemɛ dzi, afi si tɔdziʋu siwo doa abala la zɔna,

²dukɔ si dɔa amewo ɖona ɖe atsiaƒu

kple tɔsisiwo dzi kple aƒlatɔdziʋu siwo ɖia du sesĩe.

Midɔ ame dɔdɔ ɖeablawo ɖe dukɔ dzɔatsu si ƒe amewo kɔ,

eye wo ŋu zrɔ̃ la gbɔ,

dukɔ si amewo vɔ̃na le gbeta,

du didiwo ke hã me,

dukɔ nyanyra si fiana dzea amewo dzi hetsrɔ̃a wo;

dukɔ si ƒe anyigba me tɔsisi geɖewo si to.

³Mi xexea me nɔlawo katã kple anyigbadzitɔwo,

ne wotu aflaga ɖe towo dzi la, miakpɔe.

Ne woku kpẽ la, miasee.

Ale si Yehowa gblɔ nam lae nye esi:

⁴“Manɔ anyi kpoo anɔ nu kpɔm tso nɔnyeƒe

abe ale si yame kɔnae ne ŋdɔ le ʋuʋum sesĩe la ene,

abe ale si lilikpo dzaa ahũ le nuŋeɣi

le dzomeŋɔli ene.”

⁵Elabena hafi nuŋeɣi nava yi ne seƒoƒowo hã nava yi,

eye seƒoƒowo nazu wain ɖiɖi la,

matsɔ hɛ̃ gobɛ la alã alɔawoe aƒu gbe.

⁶Woagblẽ wo katã ɖi na to dzi xe ƒonuwo

kple anyigbadzilãwo;

xe ƒonuwo anɔ wo dzi le dzomeŋɔli,

eye anyigbadzilãwo katã anɔ wo dzi le vuvɔŋɔli.

⁷Ɣe ma ɣi la, dukɔ si dzɔ atsu ƒlalu, eye eŋu zrɔ̃ dredredre,

dukɔ si wovɔ̃na le didiƒe ke,

dukɔ si kli tsu, eye wònyaa avuzi le ame dzi,

dukɔ si ƒe anyigba me tɔsisiwo to yi la,

ahe nunanawo vɛ na Yehowa le Zion to la gbɔ, afi si wosubɔnɛ le.

Nyagblɔɖi ɖe Egipte ŋu

¹Esiae nye nyagblɔɖi ɖe Egipte ŋu.

Kpɔ ɖa, Yehowa ɖi tso dziƒo gbɔna va Egipte

kple du le lilikpowo dzi.

Egipte legbawo dzo nyanyanya le eŋkume,

eye vɔvɔ̃ na be, Egiptetɔwo ƒe dzi lolo ɖe dɔ me na wo.

²“Mana be Egiptetɔwo nawɔ avu kple wo nɔewo,

nɔvi kple nɔvi nawɔ avu, zɔhɛ natso ɖe zɔhɛ ŋu,

du natso ɖe du ŋu,

eye fiaɖuƒe natso ɖe fiaɖuƒe ŋuti.

³Dzi aɖe le Egiptetɔwo ƒo, eye matɔtɔ woƒe ɖoɖowo.

Woayi aɖabia nu le legbawo, ŋɔligbɔgbɔwo,

ŋɔliyɔlawo kple afakalawo gbɔ.

⁴Matsɔ Egiptetɔwo ade ŋutasẽla aɖe ƒe ŋusẽ te,

eye fia vɔ̃ɖi aɖe aɖu wo dzi.”

Aƒetɔ, Yehowa, Dziƒoʋakɔwo ƒe Aƒetɔ lae gblɔe.

⁵Nil tɔsisi la amie,

eye eme aƒu kplakplakpla.

⁶Tɔʋumetsiwo aƒaƒã, anɔ ʋeʋẽm.

Egipte tɔʋuwo hã amie, eye wo me aƒu.

Aƒla kple aɖa siwo le tɔsisi la me la ayrɔ.

⁷Nenema ke gbe siwo mie ɖe Nil tɔsisi la to

kple esiwo mie ɖe tɔsisi la kple ƒu la

ƒe godoƒe la hã ayrɔ.

Nuku siwo le bo dzi le Nil tɔsisi la to la afia,

eye ya aƒo wo adzoe.

⁸Tɔƒodelawo kple ame siwo doa ƒu ɖe tɔsisi la me la aɖe hũu, afa konyi,

eye nenema ke ame siwo daa asabu ɖe tɔa me la hã axa nu.

⁹Ɖetitrelawo abu mɔkpɔkpɔ,

nenema kee nye aklalavɔ biɖibiɖiwo lɔ̃lawo hã.

¹⁰Ketelɔlawo ƒe mo atsi daa

eye agbatedɔwɔlawo katã ƒe dzi axa nu.

¹¹Zoan ƒe dumegãwo azu bometsilawo.

Farao ƒe aɖaŋuɖola nyanuwo ɖo aɖaŋu manyatalenuwo.

Aleke nàte ŋu agblɔ na Farao be,

“Menye nunyalawo dometɔ ɖeka,

menye blemafiawo ƒe nusrɔ̃la?”

¹²Afi ka miaƒe nunyalawo le azɔ.

Wonegblɔ nu siwo Yehowa, Dziƒoʋakɔwo ƒe Aƒetɔ la,

ɖo ɖe Egipte ŋu la na mí.

¹³Zoan ƒe dumegãwo zu bometsilawo.

Woble Memfis ƒe dukplɔlawo,

eye ame siwo nye eƒe dzogoedzikpewo la kplɔ Egipte trae.

¹⁴Yehowa tsɔ ŋuzitsɔame ƒe gbɔgbɔ de wo me.

Ale wòna Egipte mu sɔgɔsɔgɔ le nu siwo katã

wòwɔna la me abe ale si ahanomunɔtɔ mlina le xe si

eya ŋutɔ ɖe la me ene.

¹⁵Naneke meli Egipte nawɔ o, ta alo asike,

deʋaya alo keti mate ŋu awɔ naneke na Egipte o.

¹⁶Ɣe ma ɣi la, Egiptetɔwo azu abe nyɔnuwo ene. Ŋɔ adzi wo woadzo nyanyanya le Yehowa, Dziƒoʋakɔwo ƒe Aƒetɔ la ƒe asi si wòkɔ dzi ɖe wo ŋuti la ta. ¹⁷Ne woyɔ Yuda ŋkɔ teti hã la, ŋɔ adzi Egiptetɔwo, eye woƒe dzi age ɖe dɔ me na wo ɖe gbegblẽ si Yehowa, Dziƒoʋakɔwo ƒe Aƒetɔ la, wɔ ɖe wo ŋu la ta.

¹⁸Le ɣe ma ɣi la, du gã atɔ̃ le Egiptenyigba dzi atrɔ adze Yehowa, Dziƒoʋakɔwo ƒe Aƒetɔ la yome, eye woasrɔ̃ Hebrigbe agblɔ. Woayɔ du siawo dometɔ ɖeka be Heliopolis, Ɣekeklẽdu.

¹⁹Le ŋkeke mawo me la, woaɖi vɔsamlekpui gã aɖe ɖe Egiptenyigba la titina na Yehowa, eye woaɖi ŋkuɖodzikpe ɖe woƒe liƒo dzi na Yehowa. ²⁰Esiae nye dzesi kple ŋkuɖodzi na Yehowa, Dziƒoʋakɔwo ƒe Aƒetɔ la, le Egiptenyigba dzi. Ne wodo ɣli na Yehowa le woƒe futɔwo ta la, aɖo ɖela kple ametaʋlila ɖe wo be wòaɖe wo le woƒe futɔwo ƒe asi me. ²¹Le ŋkeke ma me la, Yehowa aɖe eɖokui afia Egiptetɔwo, woadze si Yehowa, eye woatsɔ woƒe vɔsawo kple nunanawo asubɔe. Woaɖe adzɔgbe na Yehowa, eye woawɔ edzi. ²²Yehowa akplɔ dɔvɔ̃ aƒu Egiptetɔwo; aƒo wo, eye wòagayɔ dɔ wo. Woatrɔ ɖe Yehowa ŋu, eye wòase woƒe kukuɖeɖe ahayɔ dɔ wo.

²³Le ŋkeke ma me la, woado mɔ gã aɖe ɖe Egipte kple Asiria dome, Asiriatɔwo azɔ edzi ayi Egipte, Egiptetɔwo hã azɔ edzi ayi Asiria, eye wo kple eve la woasubɔ ɖekae. ²⁴Ɣe ma ɣi la, Israel, nye etɔ̃lia akpe ɖe Egipte kple Asiria ŋu, esiae nye yayra le anyigba dzi. ²⁵Ale Yehowa, Dziƒoʋakɔwo ƒe Aƒetɔ la ayra wo agblɔ be, “Woayra wò, Egipte, nye dukɔ, Asiria, nye asinudɔwɔwɔ kple wò, Israel, nye domenyinu.”

Nyagblɔɖi ɖe Egipte kple Kus ŋu

¹Le ƒe si me Asiria fia Sargon dɔ eƒe aʋafiagã ɖe Filistitɔwo ƒe du, Asdod me, eye wòwɔ aʋa kplii hexɔe la, ²ɣe ma ɣi Yehowa gblɔ na Amoz ƒe vi, Yesaya, be, “Ɖe wò akpanya si nèta la da ɖi, eye nàɖe afɔkpawo le wò afɔ.” Ale Yesaya wɔ nenema; eɖe amama, eye wònɔ afɔ ƒuƒlu zɔm nɔ yiyim.

³Yehowa gblɔ be, “Abe ale si nye dɔla Yesaya si le afɔ ƒuƒlu zɔm ƒe etɔ̃ sɔŋ ene, nu si nye dzesi kple kpɔɖeŋu na Egipte kple Kus la, ⁴nenema ke Asiria fia aɖe aboyo Egipte kple Kus, aɖe amewo, ɖeviwo kple tsitsiawo siaa be woatsɔ ado ŋukpe Egipte, ⁵Ame siwo ɖo ŋu ɖe Kus ŋu, eye wotsɔa Egipte ƒoa adegbee la, woavɔ, eye ŋu akpe wo. ⁶Le ɣe ma ɣi la, ame siwo le ƒuta afi sia la agblɔ be, mikpɔ nu si va dzɔ ɖe ame siwo miesina tsona be woaxɔ na mi le Asiria ƒe asi me la dzi ɖa. Ke azɔ la, aleke miawɔ asi?”

Nyagblɔɖi ɖe Babilonia ŋu

¹Esiae nye nyagblɔɖi ɖe gbegbe si le ƒuta la ŋu.

Amedzidzela aɖe ava dze mia dzi tso gbegbe,

anyigba dziŋɔ aɖe dzi abe ale si ahom

tuna toa anyigbemenyigba dzi ene.

²Woɖe ŋutega dziŋɔ aɖe fiam;

ametatrɔla trɔ ame ta,

nuhala kpɔ nuhaha.

Elam dze edzi! Media ƒu kpo ɖe eŋu!

Mana hũɖeɖe siwo katã wòhe vɛ la nawu nu.

³Eya ta vevesese na nye ameti blibo la meʋuʋu.

Vevesese ƒo ɖem abe nyɔnu si le ku lém la tɔ ene.

Nu siwo mese la na memu sɔgɔsɔgɔ,

eye dzidzi ƒom le nu siwo mekpɔ la ta.

⁴Nye dzi tso, vɔvɔ̃ na medzo nyanyanya.

Ale fiẽ fafɛ si mele mɔ kpɔm

na la zu ŋɔdzi gã aɖe nam.

⁵Woɖo kplɔ̃wo. Nuwo katã sɔgbe,

woɖu nu, wono nu!

Kasia ɣli ɖi be, mitso,

mi amegãwo ne miasi ami

na miaƒe akpoxɔnuwo.

⁶Ale Yehowa gblɔ nam nye esi,

“Yi nàɖo gbetakpɔla,

eye na wòaɖe gbeƒã nu

siwo katã wòkpɔ.

⁷Ne ekpɔ tasiaɖamwo kple sɔdolawo ƒe hã,

tedzidolawo kple kposɔdolawo la,

ekema neɖo to, wòagaɖo to nyuie.”

⁸Gbetakpɔla ɖe gbe abe dzata ene be,

“Nye Aƒetɔ, metsi tsitre ɖe nye dzɔƒe

la gbe sia gbe kple zãwo katã me.

⁹Kpɔ ɖa, ŋutsu aɖe le tasiaɖam me

kple sɔdolawo ƒe ha gbɔna,

eye wòna ŋuɖoɖo siam be,

‘Babilonia mu, gamu.

Wogbã eƒe legbawo katã ƒu anyi.’ ”

¹⁰O! Nye dukɔ si wogbã gudugudu le lugbɔƒe abe lu ene,

megblɔ nu siwo katã Yehowa,

Dziƒoʋakɔwo ƒe Aƒetɔ, Israel ƒe Mawu la

de asi nam be magblɔ la na mi.

Nyagblɔɖi ɖe Edom ŋu

¹¹Esiae nye Mawu ƒe nyagblɔɖi ɖe Duma ŋu.

Ame aɖe yɔm tso Seir be,

“Gbetakplɔla, zã gbɔ tsɔa?

Gbetakpɔla zã gbɔ tsɔa?”

¹²Gbetakpɔla ɖo eŋu be,

“Esusɔ vie ŋu nake, gake zã agado ake.

Nya si nèdi be yeabia la, biae, gake gatrɔ gbɔ.”

Nyagblɔɖi ɖe Arabia ŋu

¹³Esiae nye nyagblɔɖi ɖe Arabia ŋu.

Mi asiha siwo tso Dedam,

ame siwo ƒu asaɖa anyi ɖe Arabia ƒe avekɔewo me,

¹⁴mi ame siwo le Tema,

miku tsi vɛ na ame siwo tsikɔ le wuwum.

Mitsɔ nuɖuɖu vɛ na aʋasilawo,

¹⁵elabena wosi le yi si woɖe le aku me la

kple da si me wovu kpakple aʋa si dzi ŋɔ la nu.

¹⁶Ale Aƒetɔ la gblɔ nam nye esi, “Le ƒe ɖeka me tututu abe ale si awɔbamenɔla xlẽa eƒe ƒee ene la, Kedar ƒe atsyɔ̃ katã nu ayi. ¹⁷Aŋutrɔdala mamlɛawo kple aʋawɔla siwo susɔ le Kedar la anye ame ʋɛ aɖewo ko.” Yehowa Israel ƒe Mawu lae gblɔe.

Nyagblɔɖi ɖe Yerusalem ŋu

¹Esiae nye nyagblɔɖi ɖe ŋutega balime la ŋu.

Nu kae ɖe mi ɖe nu

hafi mi katã miede xɔwo tame?

²O! Hoowɔwɔ ƒe du,

ʋunyaʋunya kple aglotutu ƒe du,

nu kae le wɔwòm?

Wò ame kukuwo la, menye yi nu wotsi o,

eye menye aʋa hãe wotsi o.

³Wò dumegãwo katã si dzo;

wotsɔ wo ɖokuiwo na futɔwo,

eye womeʋli wo ɖokui ta o.

Togbɔ be wosi dzo esi futɔ la megogo wo kura o

hã la, wolé wò amewo katã,

eye wozu aboyomewo.

⁴Eya ta megblɔ be, “Miɖe kɔ ɖa le ŋunye,

eye mina mɔm mafa avi vevie.

Migafa akɔ nam ɖe nye ameawo ƒe tsɔtsrɔ̃ ta o”,

⁵elabena Aƒetɔ Yehowa,

Dziƒoʋakɔwo ƒe Aƒetɔ la ɖo ŋkeke ɖi na ʋunyaʋunya,

nuwo fanyafanya kple ŋɔdzi le ŋutega balime la,

ŋkeke si dzi woamu gliwo aƒu anyi,

eye ɣli aɖi le towo tame.

⁶Elam kpla daku, eƒe tasiaɖam

kple sɔdolawo kpe ɖe eŋuti,

eye Kir ɖe nu le eƒe akpoxɔnu ŋu.

⁷Ale tasiaɖamwo yɔ wò balime nyuitɔ,

eye woɖe sɔdolawo ɖe wò agbowo nu.

⁸Ale Aƒetɔ la ɖe Yuda ƒe akpoxɔnuwo katã ɖa,

eye Yuda di xɔ si wotu ɖe ave me, si me aʋawɔnuwo nɔ la

vevie gbe ma gbe.

⁹Miekpɔ be gbagbãƒe geɖewo

le David ƒe du la ŋu,

eya ta mielɔ tsi ɖe anyigbeta la me.

¹⁰Miexlẽ xɔ siwo le Yerusalem,

hegbã woƒe gliwo be miagbugbɔ wo aglã.

¹¹Mieɖe tsiʋe gã aɖe ɖe gli eveawo dome,

helɔ tsi le ta xoxo la me kɔ ɖe eme,

gake miebia ame si wɔe la ta se o,

alo miede bubu ame si wɔ ɖoɖo ɖe eŋu

tso blema ke la ŋu o.

¹²Aƒetɔ Yehowa, Dziƒoʋakɔwo ƒe Aƒetɔ la,

di tso mia si le ŋkeke ma dzi be,

miafa avi, afa konyi, alũ ta kolikoli.

¹³Ke mikpɔ ɖa, miele dzidzɔ kpɔm, le aglo tum.

Miewu nyiwo, tso alẽwo;

mieɖu lã, mieno wain, eye miegblɔ be,

“Mina miaɖu nu,

ano nu, elabena etsɔ miele kuku ge!”

¹⁴Yehowa, Dziƒoʋakɔwo ƒe Aƒetɔ la, gblɔ nam be, “Womatsɔ nu vɔ̃ sia ake mi o va se ɖe miaƒe kugbe.” Aƒetɔ Yehowa, Dziƒoʋakɔwo ƒe Aƒetɔ lae gblɔe.

¹⁵Ale Aƒetɔ Yehowa, Dziƒoʋakɔwo ƒe Aƒetɔ la, gblɔ nye esi,

“Tso nàyi Sebna,

nuwo dzikpɔla, ame si le aƒea nu

la gbɔ, nàgblɔ nɛ be,

¹⁶‘Nu ka wɔm nèle le afi sia,

eye ame kae ɖe mɔ na wò be

naɖe yɔdo na ɖokuiwò ɖe afi sia hafi nèle yɔdo ɖem

ɖe kɔkɔƒe, eye nèle kpe gbãm be nàwɔ wò

dzudzɔƒe ɖe agakpewo tome?’

¹⁷“Kpɔ nyuie, elabena esusɔ vie Yehowa ƒe asi nasu dziwò,

eye wòatsɔ wò aƒu gbe. O! Ŋutsu kalẽtɔ.

¹⁸Aŋlɔ wò nogoe abe abo ene,

eye wòatsɔ wò aƒu gbe

ɖe anyigba gã aɖe dzi.

Afi ma nàku ɖo, eye afi ma

wò tasiaɖam ɖablawo atsi.

Wò ame si nye ŋukpe

na wò aƒetɔ ƒe aƒe.

¹⁹Maɖe wò ɖa le wò zi dzi,

eye woaxɔ wò nɔƒe kɔkɔ la le asi wò.

²⁰“Gbe ma gbe la, mayɔ nye dɔla Eliakim, Hilkia ƒe vi. ²¹Matsɔ wò awu ʋlaya ado nɛ; atsɔ wò alidziblanu abla ali dzi nɛ, eye maxɔ wò nɔƒe atsɔ nɛ. Anye fofo na Yerusalemtɔwo kple Yuda ƒe aƒe la. ²²Matsɔ David ƒe aƒe ƒe safui la aɖo abɔta nɛ. Nu sia nu si wòʋu la, ame aɖeke mate ŋu atui o, eye nu sia nu si wòtu la, ame aɖeke mate ŋu aʋui o. ²³Maƒoe ɖe to abe tsyoti ene le teƒe sesẽ aɖe. Anye fiazikpui si ŋu bubu le na fofoa ƒe aƒe. ²⁴Eƒe ƒome la katã ƒe ŋutikɔkɔe anɔ eya amea dzi, ɖe viawo kple eƒe dzidzimeviwo dzi. Anɔ nu siwo katã ŋu dɔ wowɔna le aƒe me la dzi; tso agbawo dzi va se ɖe tsinokpluwo dzi.”

²⁵Yehowa, Dziƒoʋakɔwo ƒe Aƒetɔ la gblɔ be, “Le ŋkeke ma dzi la, tsyoti si woƒo ɖe teƒe sesẽ la aho. Woalãe, wòamu adze anyi, eye agba si wotsɔ ku ɖe eŋu la hã akaka.” Yehowae gblɔe.

Nyagblɔɖi ɖe Tiro ŋu

¹Esiae nye nyagblɔɖi ɖe Tiro ŋu.

Mifa konyi, o meli siwo tsa asi le Tarsis,

elabena wogbã Tiro,

eye aƒe alo melidzeƒe megali na mi o.

Wose nya sia esi wole Kipro ke.

²Mizi ɖoɖoe, mi ame siwo le ƒukpo la dzi

kple mi asitsala siwo tso Sidon.

Mi ame siwo ƒudzidɔwɔlawo wɔ kesinɔtɔwoe,

³Wotsɔ bli tso Sidon,

nuŋeŋe si tso Nil Nutowo me

to tɔ gãwo dzi va Tiro

abe adzɔnuwo ene,

ale Tiro zu asiɖiƒe na dukɔwo.

⁴Ŋu nekpe wò, O! Sidon,

wò mɔ sesẽ si le ƒuta,

elabena atsiaƒu gblɔ na wò be,

“Nyemelé ku kpɔ alo dzi vi kpɔ o.

Nyemenyi ŋutsuviwo alo nyɔnuviwo kpɔ o.”

⁵Ne gbe va ɖo Egipte la, woaxa nu vevie

tso nu si wose tso Tiro ŋuti.

⁶Mitso ƒu va Tarsis;

mifa konyi, mi ame siwo le ƒukpo la dzi.

⁷Alea wò blemadu si yɔ fũu kple dzidzɔkpɔkpɔ,

wo ame si zɔ mɔ yi didiƒenyigbawo dzi la va zue nye esia?

⁸Ame kae ɖo nugbe sia ɖe Tiro ŋu,

ame si ɖɔa fiakuku na amewo,

eƒe adzɔdolawo nye amegãwo,

eye eƒe asitsalawo nye ame xɔŋkɔwo

le anyigba dzii?

⁹Yehowa, Dziƒoʋakɔwo ƒe Aƒetɔ lae

ɖo esia be yeaɖi gbɔ̃ atsyɔ̃ɖoɖowo katã ƒe dada,

eye yeabɔbɔ ame xɔŋkɔwo katã

ɖe anyi le anyigba dzi.

¹⁰O! Tarsis ƒe vinyɔnu,

de agble ɖe Nil tɔsisi la to,

elabena melidzeƒe megali na wò o.

¹¹Yehowa kɔ eƒe asi dzi ɖe atsiaƒu la dzi,

eye wòna eƒe fiaɖuƒewo dzo nyanyanya.

Eɖe gbe be woagbã

Foenisia ƒe mɔ sesẽwo.

¹²Yehowa gblɔ be,

“O! Sidon ƒe vinyɔnu si menya ŋutsu o,

wò dzidzɔkpɔkpɔ nu tso!

“Tsi tsitre, tso ƒu la, eye nàyi Kipro, afi ma gɔ̃ hã la,

màkpɔ dzudzɔƒe o.”

¹³Kpɔ Babiloniatɔwo ƒe anyigba la ɖa;

tsã la, bubu menɔ wo ŋu o

va se ɖe esime Asiriatɔwo fɔe hetsɔe wɔ nɔƒee

na ame siwo nɔ gbegbe.

Wotu dziƒoxɔ kɔkɔwo kple fiasãwo ɖe afi ma;

ke ena wòzu aƒedo.

¹⁴Mi Tarsis melikulawo mifa avi,

elabena wogbã miaƒe mɔ sesẽ la!

¹⁵Le ɣe ma ɣi me la, woaŋlɔ Tiro be ƒe blaadre sɔŋ; siwo nye fia ƒe agbenɔƒe. Le ƒe blaadre siawo ƒe nuwuwu la, ava eme na Tiro abe ale si woŋlɔe ɖe gboloha ƒe hagbewo me nɛ ene be,

¹⁶“Tsɔ kasaŋku. Ɖi tsa le dua me.

O! Gbolo si wogbe,

ƒo kasaŋku la nyuie, eye nàdzi ha geɖewo,

ale be woaɖo ŋku dziwò.”

¹⁷Le ƒe blaadre ƒe nuwuwu la, Yehowa ahe to na Tiro. Agatrɔ ayi ɖe eƒe gbolowɔwɔ dzi, eye wòatsa asi sia kple fiaɖuƒe siwo katã le anyigba dzi; ¹⁸Ke hã la, woatsɔ viɖe siwo wòkpɔ la na Yehowa. Womadzrae ɖo ɖe nudzraɖoƒe alo aɣlae o. Woatsɔ eƒe viɖe siwo wòkpɔ la na ame siwo nɔ agbe le Yehowa ŋkume be, woatsɔ aƒle nuɖuɖu geɖe kple nudodo nyuiwoe.

Yehowa atsrɔ̃ anyigba la

¹Kpɔ ɖa, Yehowa le anyigba la tsrɔ̃ ge,

eye wòawɔe wòazu gbegbe.

Ele anyigba la ƒe ŋkume gblẽ ge,

eye woakaka edzinɔlawo.

²Anɔ alea na nunɔlawo kple amehawo,

na aƒetɔ kple dɔlaŋutsu,

na aƒenɔ kple dɔlanyɔnu,

nudzrala kple nuƒlela,

na ame si doa nugbana kple nugbanadola,

na fetɔ kple fenyila.

³Woaɖi gbɔlo anyigba la ƒiaƒiaƒia,

eye woahae keŋkeŋ.

Yehowae gblɔ nya sia.

⁴Anyigba la aƒu, eye edzinuwo ayrɔ.

Nu ati kɔ na xexea me katã,

eye nu gbagbewo ayrɔ ɖe tsitrenu.

Ame siwo doa wo ɖokuiwo ɖe dzi

le anyigba dzi la hã axa nu.

⁵Anyigbadzinɔlawo do gu anyigba la,

woda le sewo kple ɖoɖowo dzi,

eye wotu nubabla mavɔ la,

⁶eya ta fiƒode anye atsyɔ anyigba la dzi,

eye edzinɔlawo ƒe vodadawo ava woƒe ta dzi.

Esia ta anyigbadzinɔlawo fia,

eye ame ʋɛ aɖewo koe susɔ.

⁷Wain yeyewo vɔ ƒiaƒiaƒia,

wainkawo yrɔ, eye dzidzɔkpɔlawo katã le tse ɖum.

⁸Axatsɛ siwo ƒe gbe me kɔ la hã zi ɖoɖoe,

Màgase dzidzɔkpɔlawo ƒe hoowɔwɔ o.

Kasaŋku siwo ɖina

kple dzidzɔ la hã zi ɖoɖoe.

⁹Womegatsɔa hadzidzi noa wain o,

eye aha sesẽ hã ve le nu me na enolawo

¹⁰Du gbagbã la zu aƒedo,

eye wotu aƒe ɖe sia ɖe ƒe agbo.

¹¹Wole ɣli dom le wain dim

le mɔtatawo dzi kple ŋkubiã.

Dzidzɔkpɔkpɔwo katã trɔ zu blanuiléle,

eye vivisesewo katã bu le anyigba la dzi.

¹²Du la zu aƒedo,

eye wokaka eƒe agbowo.

¹³Alea wòanɔ le anyigba la dzi

kple dukɔwo dome.

Anɔ abe amiti si dzi wogbe kutsetsewo katã vɔ le

alo abe wainka si dzi wogbe wain tsetsewo

le hegble kutsetse wuwlui aɖewo ko ɖo la ene.

¹⁴Ame ʋɛ siwo susɔ la kɔ gbe dzi hedo dzidzɔɣli;

tso ɣetoɖoƒe woɖe gbeƒã Yehowa ƒe gãnyenye,

¹⁵eya ta mi, ɣedzeƒetɔwo,

mitsɔ ŋutikɔkɔe na Yehowa;

mido Yehowa, Israel ƒe Mawu la ƒe ŋkɔ

ɖe dzi le ƒukpowo dzi.

¹⁶Tso anyigba ƒe mlɔea nu ke,

miese ha ƒe ɖiɖi be,

“Ŋutikɔkɔe woana Dzɔdzɔetɔ la.”

Ke megblɔ be, “Evɔ nam, evɔ nam, baba nam.

Wodem asi!

Ametatrɔlawo dem asi!”

¹⁷O! Mi anyigbadzitɔwo, ŋɔdzi,

ʋe globo kple kamɔ le mia lalam.

¹⁸Ame si le ŋɔdzi

nu la age adze ʋe globo la me;

ame si dze agbagba do le ʋe globo

la me la, kamɔ aɖee,

elabena dziƒo ƒe fesrẽwo ʋu,

eye anyigba ƒe agunu ʋuʋu.

¹⁹Anyigba wó, anyigba fe kpla,

anyigba ʋuʋu sesĩe.

²⁰Anyigba le mumum sɔgɔsɔgɔ abe ahanomunɔtɔ ene,

ele ʋuʋum abe agbadɔ si me ya ɖo ene,

elabena anyigbadzinɔlawo ƒe aglãdzedze ƒe nu vɔ̃wo le

ekpem ale gbegbe be adze anyi,

eye magafɔ gbeɖe o.

²¹Le ŋkeke ma dzi la,

Yehowa ahe to na ŋusẽ siwo le dziƒonutowo me

kple fia siwo le anyigba dzi.

²²Woaƒo wo nu ƒu abe gamenɔla

siwo le gaxɔ globo me ene.

Woanɔ gaxɔ me, eye woahe to na wo

le ŋkeke geɖe megbe.

²³Ŋu akpe ɣe, eye ɣleti ƒe mo awɔ yaa,

elabena Yehowa, Dziƒoʋakɔwo ƒe Aƒetɔ la,

aɖu fia le ŋutikɔkɔe me le Zion to la dzi

kple Yerusalem le eƒe dumegãwo ŋkume.

Kafu Yehowa

¹O! Yehowa, wòe nye nye Mawu.

Mado wò ŋkɔ ɖe dzi, eye makafu wò,

elabena wò nuteƒewɔwɔ de blibo.

Èwɔ nu dzɔtsuwo,

nu siwo nèɖo ɖi tso blema ke.

²Èna du gãwo trɔ zu aƒedo,

eye mɔ sesẽwo zu glikpo.

Amedzrowo ƒe du sesẽwo maganye du anɔ anyi o.

Womagbugbɔ wo atu akpɔ o,

³eya ta dukɔ siwo wɔa kalẽ la ade bubu ŋuwò,

eye dukɔ nyanyrawo avɔ̃ wò,

⁴elabena Yehowa,

wòe nye sitsoƒe na ame dahewo,

xɔnametɔ na hiãtɔwo le xaxa me,

bebeƒe le ahom me kple vɔvɔli

le ŋdɔkutsu helĩhelĩ nu.

Ŋutasẽlawo lɔ gbɔgbɔtsixe ɖe ƒo

abe yatsi si le ƒoƒom ɖe gli ŋu la ene,

⁵eye abe dzoxɔxɔ sesẽ tso gbegbe ene;

èna amedzrowo ƒe hoowɔwɔ nu tso

abe ale si ne lilikpo xe ɣe ŋkume la,

eƒe dzoxɔxɔ ɖiɖinae ene.

Aleae nètsi ame nyanyrawo ƒe hadzidzi nue.

⁶Le to sia dzi,

Yehowa, Dziƒoʋakɔwo ƒe Aƒetɔ la,

atsɔ nuɖuɖu damiwo aɖo kplɔ̃e na dukɔwo katã.

Wain tsitsitɔ anɔ afi ma.

Lã damitɔ akpe ɖe eŋu,

eye wain nyuitɔ abɔ ɖe eŋu.

⁷Le to sia dzi, aɖe ameɖivɔ si me

wobla amewo katã ɖo

kple avɔ si wotsɔ tsyɔ dukɔwo katã dzi la ɖa.

⁸Ami ku tso mavɔ me yi ɖe mavɔ me.

Aƒetɔ Yehowa atutu aɖatsi sia aɖatsi ɖa

le amewo ƒe ŋkume.

Aɖe eƒe dukɔ la ƒe ŋukpe ɖa

le anyigba blibo la dzi.

Yehowae gblɔe.

⁹Gbe ma gbe la, woagblɔ be,

“Esiae nye míaƒe Mawu vavã la.

Míeɖo ŋu ɖe eŋu, eye wòɖe mí.

Eyae nye Yehowa si ŋu míeɖo ŋu ɖo.

Mina míatso aseye, akpɔ dzidzɔ le eƒe ɖeɖe la ta.”

¹⁰Yehowa ƒe asi anɔ to sia dzi,

ke afanya Moab ɖe eƒe afɔ te

abe ale si wofanyaa gbe ƒuƒu ɖe aɖu me ene.

¹¹Akeke eƒe abɔwo ɖe dukɔ la dzi

abe ale si tsiƒula kekea eƒe abɔwo

ne ele tsi ƒum ene.

Mawu aɖiɖi wo ɖe anyi le woƒe dada ta togbɔ be

wotsɔ woƒe asiwo wɔ kalẽnu geɖewoe hã.

¹²Amu woƒe gli sesẽwo aƒu anyi,

eye woakaka ɖe anyigba,

agbã gudugudu, eye woazu kewɔ.

Kafukafuha

¹Gbe ma gbe la, woadzi ha sia le Yudanyigba dzi be:

Du sesẽ aɖe le mía si;

Mawu tsɔ ɖeɖe ɖo gli sesẽ aɖe ƒo xlãe.

²Miʋu agboawo be dukɔ dzɔdzɔe la nage ɖe eme;

dukɔ si lé xɔse me ɖe asi.

³Àna be ame si ƒe susu ku ɖe ŋuwò la

nanɔ ŋutifafa gã aɖe me,

elabena eɖo ŋu ɖe ŋuwò.

⁴Ɖo ŋu ɖe Yehowa ŋu ɖaa, elabena

Yehowae nye Agakpe mavɔ la.

⁵Ebɔbɔa ame siwo le kɔkɔƒe la ɖe anyi,

ebɔbɔa du si do eɖokui ɖe dzi la ɖe anyi.

Egbãnɛ va se ɖe anyigba ke,

eye wòtutunɛ dea ke me.

⁶Wotua afɔe ƒua anyi.

Ame dahewo kple ame siwo wote ɖe to lae tua afɔe.

⁷Ame dzɔdzɔe ƒe mɔ dzi le zɔzrɔ̃e;

O! Azɔ, wòe wɔ ame dzɔdzɔe ƒe mɔ wòzrɔ̃.

⁸Ɛ̃, Yehowa, míele zɔzɔm le wò se la nu hele lalawòm;

wò ŋkɔ kple wò gãnyenye nye míaƒe dziwo ƒe didi.

⁹Nye luʋɔ le diwòm vevie le zã me,

le ŋdi la, nye gbɔgbɔ tsia dzi ɖe ŋuwò vevie.

Ne wò ʋɔnudɔdrɔ̃ ɖiɖi ɖe anyigba dzi la,

xexemetɔwo srɔ̃a wò dzɔdzɔenyenye.

¹⁰Togbɔ be wovea ame vɔ̃ɖiwo nu hã la,

womesrɔ̃a dzɔdzɔenyenye o;

le dzɔdzɔenyenye ƒe anyigba dzi gɔ̃ hã la,

wogale nu tovowo wɔwɔ dzi ko,

eye womekpɔ Yehowa ƒe gãnyenye o.

¹¹O! Yehowa, wò abɔ de dzi bobobo,

gake womekpɔe o.

Na woakpɔ ale si nètsɔ dzo ɖe wò

amewo ŋuti ne ŋu nakpe wo;

na be dzo si nèdzra ɖo ɖi

na wò futɔwo la nava fia wo.

¹²Yehowa, wòe ɖo ŋutifafa ɖi na mí;

nu siwo katã míete ŋu wɔ la wòe wɔ wo na mí.

¹³O! Yehowa, míaƒe Mawu,

aƒetɔ bubuwo ɖu mía dzi kpe ɖe ŋuwò,

ke wò ɖeka ko ƒe ŋkɔ ŋutie míede bubue.

¹⁴Azɔ la woku, womegale agbe o;

ame siwo ku ƒe gbɔgbɔ matsi tsitre o;

èhe to na wo, èna gbegblẽ va wo dzi,

eye nèɖe woƒe ŋkɔwo ɖa be

womagaɖo ŋku wo dzi o.

¹⁵Èkeke dukɔ la ɖe edzi, O! Yehowa;

èna dukɔ la keke ta ɖe edzi.

Èxɔ ŋutikɔkɔe na ɖokuiwò,

eye nèkeke anyigba la ƒe liƒowo ɖe edzi.

¹⁶Esi nèhe to na wo, eye womagate ŋu

akɔ gbe dzi ado gbe ɖa o la,

Yehowa, wova gbɔwò le woƒe xaxa la me.

¹⁷Abe ale si nyɔnu si le ku lém la

ŋena hedoa ɣli le vevesese ta ene la,

nenema kee míele le ŋkuwò me, O! Yehowa.

¹⁸Fu le mía ɖum;

míele ku lém, gake ya ko míedzi.

Míetsɔ ɖeɖe va anyigba dzi o;

míedzi ame siwo le xexea me o.

¹⁹Ke ame siwo ku le mewò la anɔ agbe;

woƒe ŋutilãwo atsi tsitre.

Mi ame siwo mlɔ ke me,

minyɔ, eye miado dzidzɔɣli.

Miaƒe ahũ le abe esi dzana le ŋdi la ene.

Anyigba aɖe eƒe ame siwo ku la ɖe go.

²⁰Miheyi, nye amewo.

Mige ɖe miaƒe xɔwo me, eye miatu ʋɔawo.

Miɣla mia ɖokuiwo va se ɖe esime

eƒe dɔmedzoe helĩhelĩ la nu nava yi.

²¹Kpɔ ɖa, Yehowa tso le enɔƒe be yeava ahe to

na anyigbadzinɔlawo le woƒe nu vɔ̃wo ta.

Anyigba aɖe ʋu siwo wokɔ ɖe edzi la afia,

eye magate ŋu aɣla eƒe ame kukuwo o.

Israel ƒe ɖeɖekpɔkpɔ

¹Le ŋkeke ma dzi la,

Yehowa atsɔ eƒe yi dziŋɔ, gã,

sẽŋu la ahe to na Leviatan,

da si nɔa eɖokui xatsam la;

awu ʋɔ driba si le atsiaƒu me la hã.

²Le ŋkeke ma dzi la,

“Miadzi ha tso waingble si tse fũu la ŋu.

³Nye Yehowae kpɔa edzi.

Medea tsii ɣe sia ɣi.

Medzɔa eŋu zã kple keli be

ame aɖeke magagblẽe o.

⁴Nyemedo dziku o.

Ɖe wònye ŋu kple aŋɔkawoe mie nam la,

anye ne meho aʋa ɖe wo ŋuti, atɔ dzo wo katã.

⁵Ema manɔmee la, woneva di sitsoƒe le gbɔnye;

woneva míawɔ ŋutifafa,

ɛ̃, woneva wɔ ŋutifafa kplim.”

⁶Ŋkekewo li gbɔna esi Yakob ato ke;

Israel aƒo se, eye eƒe kutsetse ayɔ xexea me katã.

⁷Ɖe Yehowa ƒoe ƒu anyi abe ale si Yehowa ƒo

ame siwo ƒoe ƒu anyi la enea?

Ɖe wòwui abe ale si wowu

ame siwo wui la enea?

⁸To aʋawɔwɔ kple aboyomeyiyi me, ètu nu kplii,

etsɔ eƒe gbeɖeɖe dziŋɔ la nyae do goe

abe gbe si gbe ɣedzeƒeya ƒo la ene.

⁹To esia me ko woalé avu Yakob ƒe vodadawo,

eye esia anye kutsetse si ado tso

eƒe nu vɔ̃wo ɖeɖe ɖa me.

Eyae nye be wòagbã vɔsamlekpuiwo;

woatu wɔ abe ɣe ene eye aƒeliwo

ƒe dzudzɔʋeʋĩdoƒewo maganɔ anyi o.

¹⁰Du si woglã la zu aƒedo,

amenɔƒe si amewo megale o.

Wogblẽe ɖi wòzu gbegbe, afi si nyiviwo ɖua gbe le;

afi mae wotsyɔa akɔ ɖo, eye woɖua wainti ƒe alɔwo

¹¹Wainka la kuna, ŋena dzea anyi,

eye nyɔnuwo fɔnɛ doa dzoe,

elabena wonye ame masenugɔmewo.

Eya ta woƒe Wɔla metrɔ dɔ me ɖe wo ŋu o,

eye woƒe Wɔla meve wo nu o.

¹²Le ŋkeke ma dzi la, O! Mi Israelviwo, Yehowa aƒo mi abe lu ene tso Frat tɔsisi la to va se ɖe Egipte tɔʋuwo to, eye wòagayɔ mi aƒo ƒui ɖeka ɖeka. ¹³Le ŋkeke ma dzi la, kpẽ sesẽ aɖi. Ame siwo le tsɔtsrɔ̃m le Asiria kple ame siwo si yi Egipte la, woatrɔ agbɔ ava subɔ Yehowa le to kɔkɔe si le Yerusalem la dzi.

Baba na Efraim

¹Baba na seƒoƒofiakuku ma si nye dada na

Efraim ƒe ahanomunɔtɔwo.

Baba na seƒoƒo yɔyrɔ la ƒe gãnyenye

si wotsɔ ɖo atsyɔ̃ na balime si nyoa nuku.

Baba na du ma si nye dada na

ame siwo wain flu tagbɔ na!

²Kpɔ ɖa, ame si sesẽ,

nye kalẽtɔ la le Aƒetɔ la si.

Ava abe tsikpe ƒe dzadza

kple ya si gblẽa nu la ene.

Ava abe kelemetsi kple tsiɖɔɖɔ ene,

be wòatsɔe aƒu gbe ɖe anyigba ŋusẽtɔe.

³Seƒoƒotsihe ma si nye Efraim ƒe

ahanomunɔtɔwo ƒe dada la,

woafanyae ɖe afɔ te.

⁴Seƒoƒo yɔyrɔ ma si nye

eƒe gãnyenye ƒe atsyɔ̃ si wòɖɔ

na balime nyonuku la anɔ

abe gbotsetse si ɖi do ŋgɔ

na mamlɛawo la ene;

esi ame aɖe kpɔe la,

egbee kaba heɖu.

⁵Gbe ma gbe la,

Yehowa, Dziƒoʋakɔwo ƒe Aƒetɔ la,

anye gãnyenye ƒe fiakuku

kple seƒoƒotsihe si dzeani

na eƒe ame mamlɛawo.

⁶Anye afia nyui tsotso ƒe gbɔgbɔ anɔ

ame si le ʋɔnu drɔ̃m la me.

Anye ŋusẽ na agbonudzɔlawo le aʋaŋɔli.

⁷Wain na ame siwo hã le mumum sɔgɔsɔgɔ,

eye aha sesẽ na ame siwo le ya mum.

Aha sesẽ na nunɔlawo kple nyagblɔɖilawo siwo le zɔzɔm sɔgɔsɔgɔ

eye wain na wole movinu wɔm.

Aha sesẽ na ame siwo le ya mum.

Vodada le woƒe ŋutegakpɔkpɔ me,

eye kpɔtsɔtsɔ le woƒe nyametsotso ŋu.

⁸Woɖe xe ɖe kplɔ̃wo katã dzi kpe ɖo,

eye teƒe aɖeke meli si womeɖe xe ɖo o.

⁹“Ame ka wòle didim be yeafia nue?

Ame ka wòle eƒe gbedeasi la me ɖem na?

Ɖevi siwo si woxɔ no le la loo

alo vidzĩ siwo woɖe le no nua?

¹⁰Ele ale; se ɖe se dzi, se ɖe se dzi.

Ɖoɖo ɖe ɖoɖo dzi, ɖoɖo ɖe ɖoɖo dzi;

afii ʋɛe, afi mɛ hã ʋɛe.”

¹¹Ɖe sia ɖe nyo, Mawu aƒo nu kple dukɔ sia to nuyi

kple aɖe tutɔwo dzi,

¹²ame si Mawu gblɔ na be,

“Teƒe siae nye dzudzɔƒe eya ta na

ame siwo ŋu ɖeɖi te la nadzudzɔ,” eye

“Teƒe siae nye gbɔɖemeƒe”,

gake womeɖo toe o.

¹³Eya ta Yehowa ƒe nya na woe nye be

se ɖe se dzi, se ɖe se dzi.

Ɖoɖo ɖe ɖoɖo dzi, ɖoɖo ɖe ɖoɖo dzi, ale be woayi,

eye woagbugbɔ ɖe megbe, adze anyi.

Mixɔ abi, kamɔ neɖe mi,

eye wonelé mi,

¹⁴eya ta mise Yehowa ƒe nya,

mi fewuɖula siwo le ame siawo dzi ɖum le Yerusalem.

¹⁵Miegblɔna dadatɔe be, “Míeɖo nubabla me kple ku,

eye míeɖo gbe ɖi kple yɔdo.

Nenye be dɔvɔ̃ zɔ va yi la,

maka asi mía ŋu o,

elabena míetsɔ alakpa wɔ míaƒe sitsoƒee,

eye míetsɔ beble wɔ míaƒe bebeƒee.”

¹⁶Ke ale Aƒetɔ Mawu gblɔe nye esi,

“Kpɔ ɖa, mele gɔmeɖokpe aɖe ɖom ɖe Zion,

kpe si wodo kpɔ.

Dzogoedzikpe xɔasi si nye gɔmeɖokpe si maʋã o.

Ame si ɖo ŋu ɖe eŋu la mavɔ̃ o.

¹⁷Matsɔ afia nyui tsotso awɔ eƒe dzidzekae,

eye dzɔdzɔenyenye anye eƒe nudanu,

tsikpe akplɔ miaƒe sitsoƒe si nye alakpa la adzoe,

eye tsi aɖɔ axɔ miaƒe bebeƒe.

¹⁸Woate fli ɖe nu si miebla kple ku la me,

eye gbe si mieɖo ɖi kple yɔdo la madze edzi o.

Ne dɔvɔ̃ zɔ va yi la,

adze mi katã dzi, eye miaɖo baba.

¹⁹Zi ale si nu wòva la, zi nenema ke wòakplɔ mi adzoe.

Tso ŋdi yi ŋdi, le ŋkeke me kple zã me, ava ato mia dzi ayi.”

Gbedeasi sia gɔmesese

ɖeɖe ahe ŋɔdzi vɛ.

²⁰Aba la le kpuie akpã,

màte ŋu adra ɖe edzi o.

Abadzivɔ la mekeke

woaxatsa ame ɖokui ɖe eme o.

²¹Yehowa atso abe ale si wòwɔ le Perazim toa dzi ene.

Aʋuʋu eɖokui abe ale si wòwɔ

le Gibeon Balime la ene be

wòawɔ eƒe dɔ wɔnuku la,

eye wòawɔ eƒe dɔdeasi si mienya o.

²²Azɔ midzudzɔ miaƒe fewuɖuɖu

ne menye nenem o la,

miaƒe bablawo agamia mi ɖe edzi.

Aƒetɔ Yehowa, Dziƒoʋakɔwo ƒe Aƒetɔ la,

gblɔ gbegblẽ si wòɖo ɖi kplikpaa ɖe

anyigba blibo la ŋu nam.

²³Mise nu si gblɔm mele na mi,

eye miɖo to nya si tom mele na mi.

²⁴Ne agbledela ŋlɔ nu be yeaƒã nu la,

ɖe wòganɔa nuŋɔŋlɔ dzia?

Ɖe wògadzoboa anyigba,

ganɔa edzadzraɖo dzia?

²⁵Ne edzra anyigba ɖo vɔ la, ɖe meƒãa sikɔni kple adrike,

lu kple ƒo ɖe agbakawo me,

eye woƒãa bli ɖe agbleliƒowo dzi oa?

²⁶Eƒe Mawu fiaa nue,

eye wògblɔa nu nyuitɔ si wòawɔ la nɛ.

²⁷Wometsɔa luƒomɔ ƒoa sikɔnie alo tsɔa keke zɔa adrike dzi

hafi woklẽna o, ke boŋ wotsɔa kpo ƒoa sikɔnie,

eye wotsɔa ati ƒoa adrikee.

²⁸Wotua bli hafi tsɔna ƒoa aboloe,

eya ta ame aɖeke manɔ bli nyɔnyɔ dzi ɖaa o.

Togbɔ be wotsɔa keke ƒe afɔtiwo nyɔa blie hã la,

menye sɔ siwo woti ɖe kekea ŋuti la ƒe afɔwoe tua blia o.

²⁹Esiawo katã tso Yehowa, Dziƒoʋakɔwo ƒe Aƒetɔ la gbɔ;

ame si ƒe aɖaŋudede wɔ nuku, eye eƒe nya me goglo.

Baba na David ƒe du la

¹Baba na wò, Ariel, Ariel du gã,

si me David nɔ.

Tsɔ ƒe kpe ɖe ƒe ŋu, eye na wò azãɖuɖuwo

nanɔ edzi yim ɖaa.

²Maƒu kpo ɖe Ariel ŋu, afa konyi, axa nu,

ekema anɔ nam abe vɔsamlekpui si ƒo ʋu la ene.

³Maƒu asaɖa anyi aƒo xlã wò godoo.

Matu gbetakpɔxɔ sesẽwo aƒo xlã wòe,

eye maɖe ʋe ɖe ŋuwò.

⁴Woaɖiɖi wò ɖe anyi, eye àƒo nu tso anyigba ƒe tume.

Wò nuƒoƒo aɖi hɔlɔhɔlɔ le ke me.

Wò gbe aɖi tso anyigba ƒe tume abe ŋɔli tɔ ene,

eye tso ke me, wò nuƒoƒo aɖi abe dalĩ dom wole ene.

⁵Wò futɔ gbogboawo anɔ abe kewɔ memi ene,

eye ŋutasẽlawo ƒe ha anɔ abe tsro si ya lɔ ɖe nu la ene;

kasia zi ɖeka kpoyi,

⁶Yehowa, Dziƒoʋakɔwo ƒe Aƒetɔ la,

ava kple dziɖegbe,

anyigbaʋuʋu kple gbeɖiɖi gã aɖe.

Yaƒoƒo sesẽ, ahom kple dzo ƒe aɖe

siwo biaa nu akpe ɖe eŋuti.

⁷Dukɔwo ƒe ameha siwo ho aʋa ɖe Ariel ŋu

va dze eya ŋutɔ kple eƒe mɔ sesẽwo dzi,

eye wòƒu kpo ɖe eŋu la, anɔ abe drɔ̃e

alo ŋutega le zã me ene.

⁸Abe ale si dɔwuitɔ kua drɔ̃e be

yele nu ɖum ene, ke ne enyɔ la, dɔwuame ganɔa anyi,

eye abe ale si ame si wum tsikɔ le la kua drɔ̃e be

yele tsi nom, ke ne enyɔ la, tsikɔ ganɔa ewum vevie ene la,

nenema ke wòanɔ na dukɔwo ƒe

ameha siwo ho aʋa ɖe Zion to la ŋuti.

⁹Miɖo asi nu, eye newɔ nuku na mi.

Mitre ŋku, eye mizu ŋkugbagbãtɔwo.

Mimu aha, ke menye wain o,

minɔ ya mum, ke menye aha sesẽe o.

¹⁰Yehowa na alɔ̃ sesẽ aɖe dze mia dzi.

Eyae tre mi nyagblɔɖilawo ƒe ŋkuwo,

eye wòtsyɔ nu ta na mi nukpɔlawo.

¹¹Ke hena miawo ya la, ŋutega sia katã menye naneke o; negbe nya siwo woŋlɔ ɖe lãgbalẽ dzi hetre enu la koe wònye. Ne mietsɔ lãgbalẽ si dzi woŋlɔ nua ɖo la na ame si ate ŋu axlẽ nu hegblɔ nɛ be, “Meɖe kuku, xlẽ nu sia nam la,” aɖo eŋu be, “Nyemate ŋui o, elabena wotre enu.” ¹²Alo ne mietsɔ agbalẽ la na ame si mate ŋu axlẽ nu o hegblɔ nɛ be, “Meɖe kuku xlẽ nu sia nam” la, aɖo eŋu be, “Nyemenya agbalẽxexlẽ o.”

¹³Ale Aƒetɔ la gblɔ nye esi,

“Ame siawo te va gbɔnye kple woƒe nu,

eye wotsɔ woƒe nyawo de bubu ŋunye,

ke woƒe dziwo te ɖa xaa tso gbɔnye.

Subɔsubɔ si wotsɔna nam la nye amegbetɔwo

ƒe nuɖoɖo siwo wofia wo,

¹⁴eya ta magana ame siawo ƒe mo nagawɔ yaa

kple nukunuwo ƒe nukunu.

Nunyalawo ƒe nunya nu ava ayi,

eye gɔmesese abu ɖe nugɔmeselawo.”

¹⁵Baba na ame siwo wɔa nu si woate ŋui be

woaɣla woƒe aɖaŋudedewo ɖe Yehowa;

ame siwo wɔa woƒe dɔwo le viviti me hegblɔna be,

“Ame kae kpɔ mi? Ame kae anya?”

¹⁶Mietrɔ gbo nu sia nu, eye miebu zemela

abe anyi si wòtsɔ le ze mem la ene!

Ɖe ze agblɔ na zemela be.

“Mènya naneke oa?”

¹⁷Le ɣeyiɣi kpui aɖe me la,

ɖe Lebanon mazu anyigba si nyoa nuku,

eye anyigba si nyoa nuku la natrɔ azu ave oa?

¹⁸Gbe ma gbe la,

tokunɔwo anɔ abe agbalẽa me nyawo ene,

eye tso blukɔ kple viviti me,

ŋkugbagbãtɔwo akpɔ nu.

¹⁹Agava eme be hiãtɔwo akpɔ dzidzɔ ɖe Yehowa ŋu,

eye ame dahewo akpɔ dzidzɔ ɖe Israel ƒe kɔkɔetɔ la ŋu.

²⁰Ŋutasẽlawo nu ava yi,

fewuɖulawo maganɔ anyi o,

eye woatsrɔ̃ ame siwo katã kpɔa dzidzɔ

le nu vɔ̃ɖi wɔwɔ ŋu,

²¹ame siwo tsɔa nya dea ame nya me wòzua agɔdzela,

ame si trea mɔ na ametaʋlila le ʋɔnu,

eye wòtsɔa aʋatsoɖaseɖiɖi dea

ame dzɔdzɔe nya mee.

²²Eya ta ale Yehowa, ame si ɖe Abraham, gblɔ na Yakob ƒe aƒe lae nye esi,

“Ŋu magakpe Yakob azɔ o.

Woƒe mo magatsi dãa o.

²³Ne wokpɔ wo viwo le wo dome;

nye asinudɔwɔwɔwo la,

woalé nye ŋkɔ kɔkɔe la me ɖe asi.

Woade dzesi Yakob ƒe kɔkɔetɔ la ƒe kɔkɔenyenye,

eye woavɔ̃ Israel ƒe Mawu la.

²⁴Ame siwo dze aglã le gbɔgbɔ me la,

gɔmesese asu wo si, eye tosẽlawo axɔ nufiafia.”

Baba na dukɔ kɔlialiatɔ la

¹Yehowa be,

“Baba na vi sẽto siwo dea aɖaŋu hewɔa nu

siwo nyemeɖo na wo o.

Woblaa nu nye Gbɔgbɔ manɔmee

eye wolia kɔ nu vɔ̃ ɖe nu vɔ̃ dzi!

²Ame siwo mebia gbem hafi yi Egipte o,

eye wosi Farao tso hebia tso esi be

wòanye woƒe akpoxɔnu ne

woabe ɖe Egipte ƒe vɔvɔ̃li te.

³Ke Farao ƒe akpoxɔnunyenye

na mi atrɔ zu ŋukpe, eye Egipte ƒe

vɔvɔlitenɔnɔ ahe vlododo vɛ na mi.

⁴Togbɔ be woƒe amegãwo le keke Zoan,

eye woƒe ame dɔdɔwo ɖo Hanes ke hã la,

⁵ŋu akpe ame sia ame,

elabena ame si wosi tso la mate ŋu aɖewo o.

Womaxɔ na wo alo ana kpekpeɖeŋu wo o,

negbe ŋukpe kple vlododo ko woakpɔ.”

⁶Gbedeasi tso gbemelã siwo le gbegbe la ŋuti.

Le anyigba si dzi fukpekpe kple xaxa le,

afi si dzatatsu kple dzatanɔ,

fli kple da toaʋalawo le la,

afi mae ame dɔdɔwo tsɔa woƒe nu

xɔasiwo ɖoa tedziwo dzi

kple woƒe kesinɔnuwo ɖoa kposɔwo dzi yina

na dukɔ si mele ɖeke me o,

⁷na Egipte dukɔ si ŋu ŋutete aɖeke mele o.

Eya ta meyɔe be Rahab, Wɔnavɔleŋutɔ.

⁸Azɔ la, yi nàŋlɔe ɖe nuŋlɔkpe dzi na wo,

ŋlɔe ɖe agbalẽ me be wòanye ɖaseɖiɖi tegbee

hena ŋkeke siwo gbɔna.

⁹Ame siawo nye aglãdzelawo, vi alakpatɔwo,

vi siwo mele klalo be yewoaɖo

to Yehowa ƒe nufiamewo o.

¹⁰Wogblɔ na nukpɔlawo be,

“Migakpɔ ŋutega azɔ o!”

eye na nyagblɔɖilawo be,

“Migagblɔ gbedeasi si le eteƒe la na mí o.

Migblɔ nya viviwo na mí.

Migblɔ alakpanyawo ɖi.

¹¹Mite ɖa le mɔ sia dzi.

Midzo le teƒe sia, eye midzudzɔ ŋɔdzidodo na mí

kple Israel ƒe Kɔkɔetɔ la!”

¹²Eya ta ale, Israel ƒe Kɔkɔetɔ la gblɔe nye esi,

“Esi miegbe gbedeasi sia heɖo ŋu ɖe ŋutasesẽ ŋu,

eye mieku ɖe beble ŋuti ta la,

¹³miaƒe nu vɔ̃ sia azu abe gli kɔkɔ si fe hele mumum,

eye kasia wòmu zi ɖeka gbloo la ene.

¹⁴Afli kakɛkakɛ abe ze si ge hegbã gudugudu la ene.

Afli ale gbegbe be, womakpɔ kakɛ aɖeke si alolo

woatsɔ aɖe dzo le mlekpui me

alo aku tsii le zɔ me o.”

¹⁵Ale Aƒetɔ Yehowa, Israel ƒe Kɔkɔetɔ la gblɔe nye esi,

“Dzimetɔtrɔ kple anyinɔnɔ kpoo mee miaƒe ɖeɖe le,

eye ɖoɖoezizi kple ŋuɖoɖo ɖe eŋu mee miaƒe ŋusẽ le.

Ke miegbe wo katã.

¹⁶Miegblɔ be, ‘Kpao, míado sɔwo asi’,

eya ta miasi!

‘Miegblɔ be miado sɔ ɖeablawo asi adzo.’

Eya ta mia yometilawo hã ado sɔ ɖiduwo akplɔ mi ɖo.

¹⁷Ne woƒe ame ɖeka pɛ blu la miaƒe ame akpe ɖeka asi le enu,

eye ne woƒe ame atɔ̃ blu la, mi katã miasi

va se ɖe esime miasusɔ abe aflagati le to tame

kple aflaga le togbɛ dzi ene.”

¹⁸Ke hã la, Yehowa le lalam vevie be yeave mia nu;

etso be yeakpɔ nublanui na mi,

elabena Yehowa nye Mawu si drɔ̃a ʋɔnu dzɔdzɔe.

Woayra ame siwo katã kpɔa eƒe asinu.

¹⁹O! Mi Zion nɔlawo, ame siwo le Yerusalem, miagafa avi azɔ o. Ave mia nu ne miefa avi be wòakpe ɖe mia ŋu. Ne enya see ko la, aɖo to mi. ²⁰Togbɔ be Aƒetɔ la tsɔ abolo na mi le hiã me, kple tsi na mi le xaxa me hã la, miaƒe nufialawo magabe azɔ o, ke boŋ miakpɔ wo kple miaƒe ŋkuwo. ²¹Mietrɔ ɖe ɖusime o, mietrɔ ɖe miame o, miase nya siawo le miaƒe megbe be, “Esiae nye mɔ la, mizɔ edzi.” ²²Ekema miado gu miaƒe legba siwo ŋu wofa klosalo ɖo kple miaƒe aklamakpakpɛ siwo ŋu wofa sika ɖo. Miatsɔ wo aƒu gbe abe gbelégodoe ene ahagblɔ ɖe wo ŋu be, “Mite yi xaa.”

²³Adɔ tsidzadza ɖa be wòade tsi nuku siwo mieƒã ɖe agble me. Nuɖuɖu si ado tso miaƒe agble me la anyo, eye wòasɔ gbɔ fũu. Le ŋkeke ma dzi la, wò nyihawo aɖu gbe le lãnyiƒe kekewo. ²⁴Nyitsu kple tedzi siwo nètsɔna ŋlɔa agblee la, aɖu gbe siwo wotsɔ nu tɔxɛwo tsakae, eye wotsɔ sofi kple gaflo dzoboe. ²⁵Le ŋkeke si dzi woawu ame geɖewo la, gbetakpɔxɔ kɔkɔwo amu; tɔʋumetsi asi tso to kɔkɔ ɖe sia ɖe kple togbɛ kɔkɔ ɖe sia ɖe dzi. ²⁶Ɣleti aklẽ abe ɣe ene; Ɣe ƒe keklẽ adzi ɖe edzi zi adre, eye wòanɔ abe ŋkeke adre ƒe kekeli ene, ne Yehowa bla abi na eƒe dukɔ la, eye wòwu abi si wòde wo ŋu la na wo.

²⁷Kpɔ ɖa, Yehowa ƒe ŋkɔ tso adzɔge gbɔna ɖa,

eƒe dziku le bibim, eye lilikpo dodo ƒo xlãe.

Elé ŋɔdzi ɖe nu, eye eƒe aɖe nye dzobinu.

²⁸Eƒe ŋɔtimegbɔgbɔ le sisim

abe tɔʋu si ɖɔ va se ɖe ve ke ene.

Etsraa dukɔwo le gbegblẽ ƒe tsranui me,

eye wòtsɔ numega de nu me

na dukɔwo hekplɔa wo tranae.

²⁹Ekema miadzi ha le zã me

abe ŋkekenyui aɖe ɖum miele ene.

Miaƒe dziwo akpɔ dzidzɔ abe ale si wònɔna ne

wole dze kum yina ɖe Yehowa ƒe to la dzi

kple Israel ƒe Agakpe la gbɔ ene.

³⁰Yehowa ana be amewo nase eƒe gãnyenye ƒe gbe,

eye wòana woakpɔ eƒe alɔ wòaɖiɖi ɖe anyi

kple dɔmedzoe helĩhelĩ, dzo si biaa nu, ahomya,

tsidzadza sesẽ kple tsikpe.

³¹Yehowa ƒe gbe akaka Asiria ʋayaʋaya.

Atsɔ eƒe fiatikplɔ axlã ɖe wo, woamu adze anyi.

³²Zi ale si Yehowa tsɔ eƒe toheti le Asiria ƒomii la,

zi nenema kee axatsɛwo kple kasaŋkuwo anɔ ɖiɖim

ne etsɔ eƒe alɔ sesẽ la le aʋa wɔm kplii le aʋagbedzi.

³³Wodzra afi si woatɔ dzo Tofet le la da ɖi xoxo.

Wodzrae ɖo ɖi na fia la hã.

Wowɔ eƒe dzoʋe la wògoglo hekeke.

Dzo kple nake bɔ ɖe eme.

Yehowa ƒe Gbɔgbɔ si le sisim

abe aŋɔtɔʋu ene lae atɔ dzoe.

Baba na ame siwo ɖoa ŋu ɖe Egipte ŋu

¹Baba na ame siwo ƒu du yi ɖe Egipte be woaxɔ na yewo;

ame siwo ɖo dzi ɖe sɔwo ŋu,

eye woɖo ŋu ɖe woƒe tasiaɖam gbogboawo ŋu,

hetsɔ woƒe mɔkpɔkpɔ de sɔdolawo

ƒe ŋusẽ triakɔ la me.

Ke womeɖo ŋu ɖe Israel ƒe Kɔkɔetɔ la ŋu loo

alo be yewoabia Yehowa ƒe kpekpeɖeŋu o.

²Ke nunyala vavã eya hã nye,

eye wòate ŋu ahe gbegblẽ vɛ.

Magbe nya si wògblɔ la dzi wɔwɔ o.

Atso ɖe ame vɔ̃ɖiwo ƒe aƒe ŋuti

kple ame siwo kpena ɖe nu tovo

wɔlawo ŋuti la ŋu.

³Ke Egiptetɔwo la, amegbetɔwo ko wonye,

menye Mawu wonye o.

Woƒe sɔwo nye ŋutilã, ke menye gbɔgbɔ o.

Ne Yehowa do eƒe asi ɖa la,

ke aɖe le ame si na kpekpeɖeŋu la te;

ame si ŋu wòkpe ɖo la hã amu adze anyi,

eye wo kple eve la katã atsrɔ̃.

⁴Ale Yehowa gblɔ nam nye esi,

“Abe ale si dzata alo dzatavi tea gbee ne elé nu,

eye togbɔ be woyɔa alẽkplɔlawo ƒe ha katã ɖe eŋu,

gake woƒe ɣlidodo medoa ŋɔdzi nɛ o,

woƒe hoowɔwɔ hã meɖia naneke nɛ o ene la,

nenema kee Yehowa, Dziƒoʋakɔwo ƒe Aƒetɔ la,

aɖi va anyi ne wòawɔ aʋa le Zion to la

kple eƒe to kɔkɔwo dzi.

⁵Abe ale si xeviwo saa agbae le yame ene la,

nenema kee Yehowa, Dziƒoʋakɔwo ƒe Aƒetɔ la,

atsyɔ nu Yerusalem dzie ahaxɔ nɛ.

Ato etame ayi eye wòaɖee.”

⁶O! Israelviwo, mitrɔ va ame si ŋu miedze aglã ɖo vevie la gbɔ, ⁷elabena gbe ma gbe la, mia dometɔ ɖe sia ɖe agbe nu le klosalogba kple sikalegba siwo miaƒe asiwo wɔ hena nu vɔ̃ wɔwɔ la gbɔ.

⁸“Asiria atsi yi si menye amegbetɔ tɔ o la nu;

yi si menye kodzogbeawo tɔ o lae atsrɔ̃ wo.

Woasi le yi nu, ke woalé woƒe ɖekakpuiwo

woawɔ dɔ dzizizitɔe.

⁹Ŋɔdzi ana woƒe mɔ sesẽwo namu;

ne wokpɔ aʋaflaga la ko la,

dzidzi aƒo woƒe aʋakplɔlawo.”

Yehowa, ame si ƒe dzo le bibim le Zion,

eye eƒe kpodzo le Yerusalem lae gblɔe.

Dzɔdzɔenyenye ƒe fiaɖuƒe

¹Kpɔ ɖa, fia aɖe aɖu fia le dzɔdzɔenyenye me,

eye eƒe dumegãwo aɖu dzi le nuteƒewɔwɔ me.

²Ame ɖe sia ɖe anɔ abe bebeƒe le yaƒoƒo nu

kple sitsoƒe le ahom me ene.

Anɔ abe tɔsisiwo le gbegbe

kple agakpe ƒe vɔvɔli

le kuɖiɖinyigba dzi ene.

³Ekema ame siwo kpɔa nu la ƒe ŋkuwo maganye tre o,

eye ame siwo ƒe to sea nu la ƒe towo anɔ ʋuʋu.

⁴Ame mabutamewo ƒe susu anya nu,

ase nu gɔme, eye ame siwo kukɔna la ƒe

aɖe aƒo nu tẽe eme nakɔ.

⁵Womagayɔ bometsilawo be bubumewo,

eye womagayɔ yakamewo be ame ŋkutawo o,

⁶elabena bometsila gblɔa bometsinya,

eye eƒe susu yɔ fũu kple nu vɔ̃ɖi.

Enɔa agbe le Mawu mavɔmavɔ me,

eye wògblɔa nya tatrawo ɖe Yehowa ŋu,

menaa nuɖuɖu dɔwuitɔwo o,

eye wotea tsi tsikɔwuitɔwo.

⁷Yakamewo ƒe wɔnawo vɔ̃ɖi.

Woɖoa nu vɔ̃ɖiwo be woatsrɔ̃ hiãtɔwo kple alakpa,

ne hiãtɔwo ƒe nya dzɔ hã.

⁸Ke bubume wɔa ɖoɖo siwo ŋu bubu le la,

eye bubunuwɔnawo nana wònɔa te.

⁹Mi nyɔnu siwo ɖe dzi ɖi bɔkɔɔ,

mitso ne miaɖo tom.

Mi vinyɔnuvi siwo le dziɖeɖi me.

Miɖo to nya si magblɔ!

¹⁰Le ƒe ɖeka kple edzivɔ siwo gbɔna me la,

mi ame siwo ɖe dzi ɖi bɔkɔɔ la miaʋuʋu.

Miaƒe wainkawo agbe tsetse,

eye atikutsetse bubuwo hã matse na mi o.

¹¹Miʋuʋu, mi nyɔnu siwo ɖe dzi ɖi bɔkɔɔ;

mixa nu, mi vinyɔnuvi siwo ɖe dzi ɖi!

Miɖe miaƒe avɔwo da ɖi,

eye miasa akpanya ɖe ali.

¹²Mifa konyi na miaƒe agble wɔnukuwo,

na miaƒe wainkpo siwo tsena nyuie,

¹³eye na nye amewo ƒe anyigba,

anyigba si dzi ŋu kple aŋɔkawo mie ɖo.

Ɛ̃, mifa na aƒe siwo katã me dzidzɔkpɔkpɔ yia edzi le kple du sia,

si me wotua aglo le

¹⁴Mɔ sesẽwo aɖi gbɔlo.

Du si me hoowɔwɔ nɔ la, azu aƒedo.

Xɔ tsralawo kple gbetakpɔxɔwo azu abe agado ene

tegbetegbe anye dzidzɔ na tedziwo

kple gbeɖuƒe na lãhawo

¹⁵va se ɖe esime woakɔ Gbɔgbɔ la ɖe mia dzi tso dziƒo,

gbegbewo nagazu agbledeƒewo,

eye agbledeƒewo nadze abe ave ene.

¹⁶Nuteƒewɔwɔ anɔ gbegbe,

eye dzɔdzɔenyenye anɔ agbledenyigba dzi.

¹⁷Dzɔdzɔenyenye ƒe ku anye ŋutifafa,

eye dzɔdzɔenyenye ƒe metsonu anye tomefafa

kple dzideƒo tegbetegbe.

¹⁸Nye amewo anɔ teƒe siwo ŋutifafa le

kple aƒe siwo me dedinɔnɔ le

kple teƒe siwo tomefafa

kple dziɖeɖi le.

¹⁹Togbɔ be kpetsiwo tsrɔ̃ avewo,

eye wogbã du la gudugudu hã la,

²⁰woayra mi ne mieƒã nu ɖe tɔʋu ɖe sia ɖe to,

eye miena miaƒe nyiwo kple tedziwo ɖu gbe le ablɔɖe me.

Xaxa kple ɖeɖekpɔkpɔ

¹Baba na wò, o nugblẽla!

Wò ame si womegblẽ o.

Baba na wò, o ametatrɔla!

Wò ame si womede asi o.

Ne èdzudzɔ nugbegblẽ la, woagblẽ wò hã

ne èdzudzɔ ametatɔtrɔ la, woatrɔ wò hã tawò.

²O! Yehowa, ve mía nu;

míele diwòm vevie.

Nye míaƒe ŋusẽ ŋdi sia ŋdi.

Nye mía ɖela le xaxaɣeyiɣiwo me.

³Ne èɖe gbe la, amewo sina,

ne ètso la, dukɔwo kakana hlẽna.

⁴O! Dukɔwo, woaƒo miaƒe nuhahawo nu ƒu

abe ale si woƒoa ŋɔviwo nu ƒue ene,

eye amewo adze wo dzi abe ale si ʋetsuviwo

ƒe ha gã aɖe dzea nu dzi ene.

⁵Wodo Yehowa ɖe dzi,

elabena etsɔ dziƒo wɔ nɔƒee.

Atsɔ nu dzɔdzɔe wɔwɔ

kple dzɔdzɔenyenye ayɔ Zion.

⁶Anye gɔmeɖokpe sesẽ na míaƒe ɣeyiɣiwo.

Anye nudzraɖoƒe gã na ɖeɖekpɔkpɔ,

dziƒonunya kple sidzedze, eye Yehowavɔvɔ̃

anye safui na kesinɔnu sia.

⁷Kpɔ ɖa woƒe kalẽtɔwo le avi fam sesĩe le mɔtatawo dzi.

Ŋutifafa ƒe ame dɔdɔwo fa avi vevie.

⁸Gbedzimɔwo ɖi gbɔlo, eye mɔzɔla aɖeke mele mɔtatawo dzi o.

Nubabla la me gblẽ.

Wodo ŋunyɔ eƒe ɖasefowo,

eye womede bubu ame aɖeke ŋuti o.

⁹Anyigba la ƒu kplakplakpla,

eye naneke megale edzi o.

Ŋu kpe Lebanon, eye wòyrɔ sũu.

Saron le abe Araba gbegbe ene.

Basan kple Karmel lũ xɛ abe ati ene.

¹⁰Yehowa be, “Matso azɔ, woadom ɖe dzi,

eye woakɔ nye alɔ ɖe dzi azɔ.

¹¹Atsakiti nye fu nèfɔ, eye nèdzi gbe ƒuƒu.

Wò gbɔgbɔ nye dzo si fia wò.

¹²Woafiã abe akalo ene,

eye woatɔ dzo wo abe ŋuve si wolã kɔ ɖi ene.”

¹³Mi ame siwo le adzɔge, mise nu si mewɔ.

Mi ame siwo tso kpuiƒe, mide dzesi nye ŋusẽ!

¹⁴Ŋɔdzi lé nu vɔ̃ wɔla siwo le Zion,

eye vɔvɔ̃ dze Mawumavɔ̃lawo dzi, wobia be,

“Mía dometɔ kae anɔ te ɖe dzobinu la nu?

Mía dometɔ kae anɔ anyi ɖe dzo mavɔ̃ sia me.”

¹⁵Ame si zɔna le dzɔdzɔenyenye me,

eye wògblɔa nu si le eteƒe,

ame si tsri viɖe si wokpɔ to amebaba me, eye mexɔa zãnu o,

ame si xe eƒe towo be magase hlɔ̃donyawo o,

ame si mia eƒe ŋkuwo

be makpɔ nu gbegblẽ wɔwɔ o.

¹⁶Esiae nye ame si anɔ kɔkɔƒe,

eye eƒe bebeƒe anye mɔ sesẽ si le towo tame.

Akpɔ abolo aɖu ɖaa,

eye tsinono mahiãe o.

¹⁷Wò ŋkuwo akpɔ fia la le eƒe atsyɔ̃ɖoɖo gã me,

eye àkpɔ anyigba keke la le adzɔge.

¹⁸Àbu ŋɔdzinu siwo nèwɔ va yi le wò susu me be,

“Afi ka amegã ma le?

Afi ka ame si dzɔa adzɔga la le?

Afi ka amegã si kpɔa gbetakpɔxɔwo dzi la le?”

¹⁹Màgakpɔ ɖokuiŋudzela mawo azɔ o,

ame siwo fiana, eye woƒe nuƒo gɔme menyasena o.

²⁰Wò ŋku nenɔ Zion dzi.

Du si me mieɖua miaƒe ŋkekenyuiwo le;

wò ŋkuwo akpɔ Yerusalem,

ŋutifafaƒe kple agbadɔ si womaɖe ɖa akpɔ o.

Womaho eƒe tsyotiwo le tome

alo alã ka siwo wohe ɖe wo ŋuti o.

²¹Afi mae Yehowa, le eƒe ŋutikɔkɔe me,

anye míaƒe Ŋusẽtɔ le.

Anɔ abe teƒe si tɔ gbadzawo kple tɔʋuwo le la ene.

Tɔdziʋu siwo wokuna kple tablu la,

made afi ma o

eye meli gã aɖeke hã mato edzi ayi o,

²²elabena Yehowae nye míaƒe ʋɔnudrɔ̃la.

Yehowae nye ame si wɔ sewo na mí,

eye Yehowae nye míaƒe fia.

Eyae nye ame si aɖe mí.

²³Wò abaladokawo me gbɔdzɔ;

womebla wò abaladotiawo sesĩe o;

ale wò abalawo me meke o,

eya ta woama afunyinu gbogboawo,

eye tekunɔwo gɔ̃ hã atsɔ nuhahawo adzoe.

²⁴Ame siwo le Zion la dometɔ aɖeke magblɔ be,

“Mele dɔ lém” o,

eye woatsɔ ame siwo le afi ma la ƒe nu

vɔ̃wo ake wo.

Ʋɔnudɔdrɔ̃ dukɔwo

¹Mite va, mi dukɔwo;

miɖo to afii, miƒu to anyi, mi amewo!

Mina be anyigba kple edzinuwo katã nasee,

eye xexea me kple emenuwo katã hã nasee!

²Yehowa do dziku ɖe dukɔwo katã ŋu,

eye eƒe dɔmedzoe bi ɖe woƒe asrafowo ŋu.

Atsrɔ̃ wo gbidigbidi

ahatsɔ wo ade asi be woawu.

³Woatsɔ woƒe Ame tsiaʋawo aƒu gbe.

Woƒe ŋutilã kukuawo aƒaƒã anɔ ʋeʋẽm

eye towo aƒo woƒe ʋu bekee.

⁴Ɣletivi siwo katã le dziŋgɔli ŋu la alolo,

eye woaŋlɔ dziŋgɔli abe lãgbalẽ ene.

Dziƒoŋunuwo katã age adze anyi

abe ale si aŋgbawo dudunae le wainka ŋu

alo abe ale si aŋgba yrɔna hegena le gboti dzi ene.

⁵Nye yi no nu ɖi kɔ le dziƒo.

Kpɔ ɖa eɖiɖi kple ʋɔnudɔdrɔ̃ ɖe Edom dzi;

ame siwo metsrɔ̃ gbidigbidi.

⁶Yehowa ƒe yi ƒo ʋu bekee, eye ami bla ɖe eŋu.

Alẽviwo kple gbɔ̃wo ƒe ʋu le eŋu,

hekpe ɖe ami si bla ɖe agbowo ƒe ayiku ŋu,

elabena Yehowa ɖu vɔsaŋkekenyui le Bozra,

eye wòwu lã geɖewo le Edom.

⁷To wɔadãwo atsrɔ̃ akpe ɖe wo ŋu,

nenema kee nye nyitsu viwo kple nyitsu gãwo hã.

Ʋu asi to woƒe anyigba dzi bababa,

eye lãwo ƒe ami aƒo anyigba bekee,

⁸elabena hlɔ̃biagbe le Yehowa si,

ƒe si me wòaxe nu vɔ̃ ŋu fe,

eye wòatso afia na Zion.

⁹Edom ƒe tɔsisiwo me aƒu kplakplakpla.

Ke si le anyigba la abi abe aŋɔe lé dzo ene,

eye eƒe anyigba katã abi abe gbe ƒuƒu ene.

¹⁰Dzo la matsi o, zã kple keli, eye eƒe dzudzɔ ade dzi boo.

Abi gbegbe tso dzidzime yi dzidzime,

eye ame aɖeke magato afi ma ayi akpɔ gbeɖe o.

¹¹Azu nɔƒe na adzexewo.

Afi ma akpaviã kple xe bubuwo awɔ atɔ ɖo.

Mawu atsɔ eƒe dzidzeka aɖo Edom ŋuti,

eye wòada wo le gbegblẽ masɔmasɔ ƒe nudanu me.

¹²Naneke maganɔ anyi na woƒe bubumewo,

woayɔ be fiaɖuƒe o.

Woƒe dumegãwo hã nu ava ayi.

¹³Ŋu avu atsyɔ woƒe fiasã kɔkɔwo dzi,

gbe fieŋuiwo kple aŋɔkawo amie ɖe woƒe mɔ sesẽwo me,

eye anyigba la azu nɔƒe na asilãwo kple aƒe na golowo.

¹⁴Gbemelã vovovowo ado go kple amegaxiwo,

eye gbedzigbɔ̃wo axlɔ̃ na wo nɔewo le afi ma.

Anye nɔƒe na xe siwo nɔa zã me

eye woakpɔ gbɔɖeme na wo ɖokuiwo le afi ma.

¹⁵Adzexe awɔ atɔ, aɖa azi ɖe eme le afi ma, aƒo vi,

akpɔ viawo dzi, eye wòatsɔ eƒe aʋalawo atsyɔ wo dzi.

Afi siae akagawo aƒo ƒu ɖo,

atsu kple asi.

¹⁶Mikpɔ Yehowa ƒe agbalẽ me, eye mixlẽ nu sia.

Nu siawo dometɔ aɖeke mabu o,

ɖeke manɔ anyi, atsu alo asi o,

elabena eƒe nue de se sia,

eye eƒe Gbɔgbɔ aƒo wo nu ƒu.

¹⁷Edzidze woƒe gomekpɔkpɔwo na wo.

Eƒe asie wòtsɔ ma nu si wòdzidze la na wo.

Azu wo tɔ tegbee,

eye woanɔ afi ma tso dzidzime yi dzidzime.

Ame siwo woɖe la ƒe dzidzɔkpɔkpɔ

¹Gbegbe kple anyigba si ƒu kplakplakpla la akpɔ dzidzɔ.

Gbedadaƒo atso aseye ahaƒo se abe dzogbenya ene, ²aƒo se, atso aseye, eye wòado dzidzɔɣli.

Woagbugbɔ Lebanon ƒe ŋutikɔkɔe nɛ,

Karmel ƒe lãnyiƒe kple Saron ƒe gbe dama

ƒe atsyɔ̃ agatrɔ ava na wo,

eye woakpɔ Yehowa ƒe ŋutikɔkɔe

kple míaƒe Mawu la ƒe atsyɔ̃.

³Do ŋusẽ asi beliwo, eye nàli ke klo siwo le ƒoƒom la;

⁴migblɔ na ame siwo ƒe dzi le vɔvɔ̃m be,

“Misẽ ŋu, migavɔ̃ o.

Miaƒe Mawu la gbɔna.

Ava kple hlɔ̃biabia kple teƒeɖoɖo,

eye wòaɖe mi.”

⁵Ekema ŋkugbagbãtɔwo ƒe ŋkuwo aʋu,

eye tokunɔwo ƒe towo aʋu.

⁶Tekunɔ ati kpo abe zi ene,

eye aɖetututɔ ado dzidzɔɣli,

Tɔsisi aŋɔ ɖe gbegbe,

eye tɔʋuwo asi tso gbedadaƒo.

⁷Blezibleziteƒewo atrɔ azu tsita

eye anyigba si ƒu kplakplakpla la agbɔ agbe kple tometsi.

Teƒe siwo nye amegaxiwo nɔƒe tsã la atrɔ azu lãnyiƒe azɔ,

eye aƒlawo kple ati si ƒe aŋgbawo dzi

woŋlɔa nu ɖo tsã la amie ɖe afi ma.

⁸Mɔtata gbadza aɖe anɔ afi ma.

Woayɔe be kɔkɔenyenye ƒe mɔ.

Ame makɔmakɔwo mazɔ mɔ sia dzi o.

Anye toƒe na ame siwo zɔna le mɔ ma dzi.

Gegemewo gɔ̃ hã matra le edzi o.

⁹Dzata alo lã wɔadã aɖeke mazɔ afi ma o.

Womakpɔ wo dometɔ aɖeke le afi ma o.

Ke ame siwo woɖe la koe azɔ afi ma.

¹⁰Ame siwo Yehowa xɔ ƒle la koe atrɔ gbɔ.

Woatsɔ hadzidzi age ɖe Zion;

woatsɔ dzidzɔ mavɔ aɖo atsyɔ̃ na woƒe tawo.

Dzidzɔ kple aseyetsotso adze wo ŋgɔ,

eye nuxaxa kple hũɖeɖe maganɔ anyi o.

Senakerib do ŋɔdzi na Yerusalem

¹Le Fia Hezekia ƒe fiaɖuɖu ƒe ƒe wuienelia me la, Asiria fia, Senakerib ɖe to ɖe Yuda du siwo katã woglã la, eye wòɖu wo dzi. ²Emegbe la, Asiria fia dɔ eƒe aʋafia kple aʋakɔ gã aɖe tso Lakis ɖo ɖe Fia Hezekia le Yerusalem. Esi aʋafia la kple eŋumewo va tɔ ɖe Dzigbeta la ƒe tɔʋu to, le mɔ si ɖo ta avɔnyala ƒe nunyaƒe la, ³Hilkia ƒe vi, Eliakim, ame si nye fiasã la ƒe dɔdzikpɔla, Sebna, agbalẽŋlɔla kple Asaf ƒe vi, Yoa, si nye nuŋlɔla la do go yi ɖakpee.

⁴Aʋafia la gblɔ na wo be, “Gblɔ na Hezekia be:

“ ‘Ale Asiria fia, fiagã la gblɔe nye esi: Nu ka dzi nètu wò dzideƒo sia ɖo? ⁵Ègblɔ be, aʋawɔmɔnu tɔxɛwo kple aʋawɔwɔ ƒe ŋusẽ le asiwò, ke nya ƒuƒluwo ko gblɔm nèle. Ame ka ŋu nèle ŋu ɖom ɖo hafi dze aglã ɖe ŋunye? ⁶Kpɔ ɖa, èle ŋu ɖom ɖe Egipte, aƒla ŋeŋe, atizɔti ma ŋu. Esi ne ame aɖe ziɔ ɖe eŋu la, aŋɔ asi nɛ ahade abi eŋu. Nenemae nye Egipte fia, Farao, na ame sia ame si aɖo ŋu ɖe eŋu. ⁷Ke ne ègblɔ nam be, “Yehowa, miaƒe Mawu la ŋue miele ŋu ɖom ɖo la,” ɖe menye eya ƒe nuxeƒewo kple vɔsamlekpuiwoe Hezekia gbã hegblɔ na Yuda kple Yerusalem be, “Ele na mi be miasubɔ le vɔsamlekpui sia ŋgɔ oa?”

⁸“ ‘Va azɔ nàtso gbe kple nye amegã, Asiria fia. Matsɔ sɔ akpe eve na wò, ne ànya kpɔ edolawo ko. ⁹Ekema aleke nàte ŋu anya nye amegã ƒe dɔla si nye suetɔ, togbɔ be nèle ŋu ɖom ɖe Egipte ŋu be woakpe ɖe ŋuwò kple tasiaɖam kple sɔwo? ¹⁰Gawu la, ɖe meva be madze anyigba sia dzi, ahatsrɔ̃e Yehowa manɔmea? Yehowa ŋutɔe gblɔ nam be maho aʋa ɖe dukɔ sia ŋuti ne matsrɔ̃e.’ ”

¹¹Tete Eliakim, Sebna kple Yoa gblɔ na aʋafia la be, “Míeɖe kuku, ƒo nu na wò dɔlawo le Aramgbe me, elabena míese Aramgbe. Mègaƒo nu na mi le Hebrigbe me o. Ne menye nenema o la, ame siwo nɔ anyi ɖe glia dzi la ase wò nyawo gɔme.”

¹²Aʋafiagã Rabsaki ɖo eŋu na wo be, “Ɖe wobe miaƒe amegã kple miawo gbɔ ko nye amegã ɖom ɖo be magblɔ nya siawo na, eye ame siwo le glia dzi la mele eme oa? Woawo kple miawo siaa, miaɖu miawo ŋutɔ ƒe afɔdzi, eye miano miawo ŋutɔ ƒe aɖuɖɔ.”

¹³Tete aʋafiagã la te va hedo ɣli gblɔ le Hebrigbe me be, “Mise Asiria fia, fiagã la ƒe nyawo! ¹⁴Ale fia la gblɔe nye esi, migana Hezekia nable mi o. Mate ŋu aɖe mi o! ¹⁵Migana Hezekia nable mia nu be, miɖo dzi ɖe Yehowa ŋu o, esime wògblɔ be, ‘Yehowa aɖe mi godoo; womatsɔ du sia ade asi na Asiria fia o.’

¹⁶“Migaɖo to Hezekia o. Ale Asiria fia gblɔe nye esi: ‘Mido va gbɔnye, miawɔ ŋutifafa kplim.’ Ekema ame sia ame aɖu eƒe waintsetse kple gbotsetse, eye wòano eya ŋutɔ ƒe vudometsi ¹⁷va se ɖe esime mava akplɔ mi ayi anyigba si ɖi mia tɔ la dzi, anyigba si dzi bli kple wain yeye, abolo kple waingblewo bɔ ɖo.

¹⁸“Migana Hezekia nable mi esi wògblɔ be, ‘Yehowa aɖe mi’ o. Ɖe dukɔ aɖe ƒe Mawu te ŋu ɖe eƒe anyigba tso Asiria fia ƒe asi me kpɔa? ¹⁹Afi ka Hamat kple Arpad ƒe mawuwo le? Afi ka Sefarvaim ƒe mawuwo le? Ɖe wote ŋu xɔ Samaria le asinyea? ²⁰Ke mawuwo dometɔ kawoe le dukɔ siawo katã me si te ŋu ɖe eƒe anyigbawo tso nye asi me kpɔ hafi Yehowa ya ate ŋu aɖe Yerusalem tso nye asimea?”

²¹Ke ameawo katã zi ɖoɖoe, eye womeɖo nya aɖeke ŋu nɛ o, elabena fia la de se na wo be, “Migaɖo eŋu nɛ o.”

²²Tete Hilkia ƒe vi, Eliakim, fiasã la dɔdzikpɔla, agbalẽŋlɔla Sebna kple Asaf ƒe vi, Yoa, si nye nuŋlɔla la dze awu le wo ɖokuiwo ŋu heyi Fia Hezekia gbɔ, eye wogblɔ nu siwo katã aʋafiagã la gblɔ la nɛ.

Nyagblɔɖi tso Yerusalem ƒe ɖeɖekpɔkpɔ ŋuti

¹Esi fia Hezekia se nya siawo la, edze eƒe awuwo, eye wòta akpanya heyi Yehowa ƒe gbedoxɔ me. ²Emegbe la, edɔ eƒe dɔnunɔla, Eliakim kple eƒe agbalẽŋlɔla Sebna kple nunɔla tsitsiwo dometɔ aɖewo, ame siwo katã hã ta akpanya, eye woyi ɖe Nyagblɔɖila Yesaya, Amoz ƒe vi la gbɔ. ³Wogblɔ nɛ be, Ale fia Hezekia gblɔe nye esi: “Egbee nye xaxa, mokaka kple vlodogbe. Enye ɣeyiɣi sesẽ abe nyɔnu si vi ɖo atame na be wòadzi, gake ŋusẽ mele eŋu be woasii adzi o la ene. ⁴Ɖewohĩ Yehowa, wò Mawu la ase nya siwo aʋafia, si eƒe aƒetɔ Asiria fia dɔ la gblɔ. Ame si wòdɔ be woaɖe alɔme le Mawu gbagbe la ŋu, eye wòaka mo nɛ ɖe nya siwo Yehowa, wò Mawu la se ta. Eya ta do gbe ɖa ɖe ame mamlɛ siwo tsi agbe la ta.”

⁵Esi fia Hezekia ƒe ame dɔdɔwo va Yesaya gbɔ la, ⁶Yesaya gblɔ na wo be, “Migblɔ na miaƒe aƒetɔ be, ‘Nu si Yehowa gblɔe nye esi: migavɔ̃ nu si miese, busunya siwo Asiria fia teviwo gblɔ ɖe ŋutinye la o. ⁷Ɖo to afii: mele gbɔgbɔ aɖe de ge eme, ale be ne nutsotso aɖewo va ɖo egbɔ la, atrɔ ayi ɖe eya ŋutɔ ƒe anyigba dzi, eye le afi ma, mana wòatsi yi nu.’ ”

⁸Esi aʋafia la se be Asiria fia dzo le Lakis la, eya hã ho dzo, eye wòke ɖe fia la ŋu wònɔ aʋa wɔm kple Libna.

⁹Azɔ gbe va na Senakerib be, Tirhaka, Kus fia, si le Egipte ƒe dzigbeme lɔƒo la ho aʋa gbɔna edzi dze ge. Esi wòse nya sia la, edɔ amewo ɖo ɖe fia Hezekia gbɔ be woagblɔ nɛ be, ¹⁰“Migblɔ na Hezekia, Yuda fia be, ‘Mègana mawu si ŋu nèle ŋu ɖom ɖo la nable wò o,’ esi wògblɔ be, ‘Womatsɔ Yerusalem ade asi na Asiria fia o.’ ¹¹Meka ɖe edzi be, èse nu siwo Asiria fiawo tu kple dukɔwo katã, eye wotsrɔ̃ wo gbidigbidi. Ke woaɖe wò ya? ¹²Ɖe dukɔ siwo mía fofowo tsrɔ̃ va yi la ƒe mawuwo te ŋu ɖe woa? Ɖe Gozan, Haran, Rezef kple Edentɔ siwo le Tel Asar la ƒe mawuwo ɖe woa? ¹³Afi ka Hamat fia le, afi ka Arpad fia le, afi ka Sefarvaim dua ƒe fia le, eye afi ka Hena kple Iva ƒe fiawo le?”

Hezekia ƒe gbedodoɖa

¹⁴Hezekia xɔ agbalẽ la le ame dɔdɔawo si hexlẽe. Etso heyi ɖe Yehowa ƒe gbedoxɔ me, eye wòkeke agbalẽ la ɖe Yehowa ŋkume. ¹⁵Emegbe la, edo gbe ɖa na Yehowa be: ¹⁶“O! Yehowa, Dziƒoʋakɔwo ƒe Aƒetɔ, Israel ƒe Mawu, ame si nɔ kerubiwo dome, wò koe nye Mawu ɖe anyigbadzifiaɖuƒewo katã dzi. Wòe wɔ dziƒo kple anyigba. ¹⁷O! Yehowa, ƒu to anyi, eye nàse nu. Ʋu wò ŋkuwo, eye nàkpɔ nu. Se nya siwo katã Senakerib tsɔ do vlo Mawu gbagbe lae ɖa.

¹⁸“O! Yehowa, enye nyateƒe be Asiria fiawo na be ame siawo kple woƒe anyigbawo zu gbegbe. ¹⁹Wotsɔ woƒe mawuwo ƒu gbe ɖe dzo me hetsrɔ̃ wo, elabena menye mawuwo wonye o, ke boŋ ati kple kpe wonye, amegbetɔ ƒe asinudɔwɔwɔwoe. ²⁰Ke azɔ, O! Yehowa, mía Mawu, ɖe mí tso eƒe asi me be fiaɖuƒe siwo katã le anyigba dzi la nanya be wò koe nye Yehowa.”

Senakerib ƒe anyidzedze

²¹Yesaya, Amoz ƒe vi, ɖo gbedeasi sia ɖe Hezekia be, “Ale Yehowa, Israel ƒe Mawu la gblɔe nye esi, ‘Esi nèdo gbe ɖa nam tso Senakerib, Asiria fia ŋuti ta la, ²²esia nye nya si Yehowa gblɔ ɖe eŋuti.’

“Zion vinyɔnu si menya ŋutsu o

la gbe nu le gbɔwò, eye wòɖu fewu le ŋuwò.

Yerusalem vinyɔnu

ɖo hehe ɖe tawò esi nèlé du tsɔ.

²³Ame ka nèdzu hegblɔ busunyawo ɖe eŋuti?

Ame ka ta nèle ɣli dom ɖo,

eye ame ka nètre ŋku kpɔe dadatɔe?

Israel ƒe Kɔkɔetɔ la ŋutie!

²⁴To wò ame dɔdɔwo dzi nèɖe alɔme

le Aƒetɔ la ŋu hegblɔ be,

‘Metsɔ nye tasiaɖamwo,

lia yi towo tame ke,

yi keke Lebanon tame ke.

Melã eƒe sedati kɔkɔwo kple

eƒe avemeti nyuitɔwo,

meyi eƒe teƒe kɔkɔtɔ kekeake afi si

eƒe ave dodowo le.

²⁵Meɖe vudo ɖe dzronyigbawo dzi,

eye meno wo me tsi le afi ma.

Mena Egipte tɔʋuwo mie

le nye afɔ te.’

²⁶“Mèsee do ŋgɔ oa?

Megblɔ nu sia da ɖi tso blema ke.

Mewɔ ɖoɖo ɖe eŋu tso gbe aɖe gbe ʋĩi;

ke azɔ la, mena wòva eme be, du siwo ŋu

woɖo gli sesẽwo

ɖo la zu anyiglago.

²⁷Èxɔ ŋusẽ le dua me nɔlawo si.

Woƒe mo wɔ yaa, eye ŋu kpe wo.

Wole abe nukuwo le agble dzi ene,

nu miemie fɛ̃wo le bo dzi

kple gbe siwo mie ɖe xɔ tame la ene.

Ŋdɔ sesẽ ɖu wo,

eye woyrɔ le esime wometsi o.

²⁸“Ke menya afi si nèle.

Menya ɣeyiɣi si nèdona gagbɔna,

eye menya ale si nèdo dɔmedzoe ɖe ŋunye.

²⁹Esi nèdo dɔmedzoe ɖe ŋutinye,

eye wò amemabumabu va ɖo nye to me ta la,

matsɔ nye lãɖeƒu ade ŋɔti me na wò,

made numega nu me na wò,

eye mana mɔ si nèto va

la nàgato eya ke dzi adzo.

³⁰“O! Hezekia, esia anye dzesi na wò:

“Ƒe sia me la, àɖu nuku

si mie le eya ŋutɔ ɖokui si,

eye le ƒe evelia me la,

àɖu nu si mie tso gbãtɔ me.

Ke le ƒe etɔ̃lia me la, àƒã nu, eye àxa nu.

Àde waingble eye àɖu eƒe tsetsea

³¹Ava eme be ame siwo susɔ na Yuda ƒe

aƒe la woato ke, eye woatse ku,

³²elabena ame aɖewo asusɔ tso Yerusalem nɔlawo dome,

eye ame siwo tsi agbe la ado tso Zion to la dzi,

Yehowa Ŋusẽkatãtɔ ƒe didi vevie

ana esia nava eme.

³³“Eya ta ale Yehowa gblɔ ɖe Asiria fia ŋue nye esi,

“Mage ɖe du sia me alo ada aŋutrɔ ɖeka pɛ le afi sia o.

Mava afi sia kple akpoxɔnu

alo aƒu kpo ɖe du sia ŋuti o.

³⁴Mɔ si wòto va la, eya ke dzie wòato adzo.

Mage ɖe du sia me akpɔ gbeɖe o.”

Yehowae gblɔe.

³⁵“Maʋli du sia ta aɖee le nye ŋutɔ kple David,

nye dɔla ta!”

³⁶Emegbe la, Yehowa ƒe dɔla yi ɖe Asiriatɔwo ƒe aʋasaɖa la me hewu ame akpe alafa ɖeka kple blaenyi-vɔ-atɔ̃. Esi amewo fɔ ŋdi la, kpɔ ɖa, ame kukuwo sɔŋ ko wokpɔ. ³⁷Ale Asiria fia, Senakerib kaka asaɖa la, eye wòho dzo. Etrɔ yi Ninive, eye wònɔ afi ma.

³⁸Gbe ɖeka esi wònɔ gbe dom ɖa le eƒe mawu, Nisrɔk ƒe gbedoxɔ me la, via ŋutsu eve, Adramelek kple Sarezer, wowui kple yi hesi yi Ararat eye via Esarhadon ɖu fia ɖe eteƒe.

Hezekia ƒe dɔléle

¹Le ŋkeke mawo me la, Hezekia dze dɔ, eye wòɖo kudo nu. Nyagblɔɖila Yesaya, Amoz ƒe vi, yi egbɔ, eye wògblɔ nɛ be, “Ale Yehowa gblɔe nye esi, ‘Ɖɔ wò aƒe ɖo, elabena èle kuku ge, eye màhaya o.’ ”

²Hezekia trɔ mo ɖo ɖe gli ŋu, eye wòdo gbe ɖa, ɖe kuku na Yehowa be, ³“O! Yehowa, ɖo ŋku ale si metsɔ dzi blibo kple nyateƒe zɔ le ŋkuwò mee, eye mewɔ nu si nyo le ŋkuwòme la dzi.” Eye Hezekia fa avi kple ɣli.

⁴Tete Yehowa ƒe gbe va na Yesaya be: ⁵“Yi nàgblɔ na Hezekia be, ‘Ale Yehowa, fofowò David ƒe Mawu la gblɔe nye esi, “Mese wò gbedodoɖa, eye mekpɔ wò aɖatsiwo. Matsɔ ƒe wuiatɔ̃ akpe ɖe wò agbenɔƒewo ŋu.” ⁶Maɖe wò kple du sia tso Asiria fia ƒe asi me. Maʋli du sia ta.

⁷“ ‘Esiae nye Yehowa ƒe dzesi na wò, be Yehowa awɔ nu si ŋugbe wòdo. ⁸Mana be vɔvɔli nagbugbɔ ɖe megbe ɖoƒe ewo tso Ahaz ƒe ɣetrɔti gbɔ.’ ” Ale ɣe ƒe vɔvɔli he ɖe megbe ɖoƒe ewo.

⁹Esiae nye Yuda fia, Hezekia, ƒe nyaŋlɔɖiwo, esi wòhaya tso eƒe dɔléle la me vɔ megbe:

¹⁰Megblɔ be, “Le nye agbe ƒe kekeli me,

ɖe mato ku ƒe agbowo me,

eye woaxɔ nye agbemeŋkeke mamlɛawo le asinyea?”

¹¹Megblɔ be, “Nyemagakpɔ Yehowa o.

Nyemagakpɔ Yehowa le agbagbeawo ƒe anyigba dzi o;

nyemagakpɔ amegbetɔwo alo anɔ anyi

kple ame siwo le xexe sia me o.

¹²Womu nye agbadɔ hexɔe le asinye

abe ale si wowɔa alẽkplɔla ƒe agbadɔe ene.

Abe ale si avɔlɔ̃la ŋlɔa eƒe avɔe heɖenɛ tso agbati me ene la,

nenemae meŋlɔ nye agbee, eye nèna nye agbe wu enu zã kple keli.

¹³Melala dzigbɔɖitɔe va se ɖe fɔŋli,

gake èŋe nye ƒuwo abe dzata ene,

eye zã kple keli nèna nye agbe wu enu.

¹⁴Medo ɣli abe sagbadre alo tsalĩ ene,

eye mele xɔxlɔ̃m abe ahɔnɛ si tsi akogo ene.

Nye ŋkuwo dzi wɔ dɔ̃ɔ esi mewu mo dzi le dziƒo kpɔm.

O! Aƒetɔ, mele nu xam, va nàkpe ɖe ŋutinye.”

¹⁵Nu ka gblɔ ge mala? Egblɔ nya nam,

eye eya ŋutɔ wɔ ɖe edzi.

Eya ta mazɔ ɖokuibɔbɔtɔe.

Le nye agbemeŋkekewo katã me,

le nye luʋɔ ƒe vevesese ta.

¹⁶O! Aƒetɔ, nu siawo ŋue amewo nɔa agbe ɖo,

eye nye hã nye gbɔgbɔ kpɔ agbe le wo me.

Èna mehaya, eye nègana mele agbe.

¹⁷Le nyateƒe me la, nye nyonyo tae

nèna meto vevesese mawo me.

Wò lɔlɔ̃ na be nèɖem tso gbegblẽ ƒe do globo me,

eye nètsɔ nye nu vɔ̃wo ƒu gbe ɖe megbe wò.

¹⁸Elabena yɔdo mate ŋu akafu wò o,

ku mate ŋu adzi kafukafuhawo na wò o,

eye ame siwo yi aʋlime la mate ŋu

akpɔ mɔ na wò nuteƒewɔwɔ o.

¹⁹Ame gbagbewo koe akafu wò

abe ale si mele wɔwɔm egbe ene,

eye fofowo agblɔ wò nuteƒewɔwɔ na wo viwo.

²⁰Yehowa aɖem, eye míadzi ha

kple kasaŋkuwo le míaƒe agbemeŋkekewo katã me,

le Yehowa ƒe gbedoxɔ me.

²¹Azɔ Yesaya gblɔ be, “Mitsɔ gbotsetse miaɖu, atikee. Mitsɔe ɖo ƒoƒoea dzi nɛ ekema ahaya.”

²²Hezekia bia be, “Nu kae anye dzesi be magayi Yehowa ƒe gbedoxɔ me?”

Ame dɔdɔwo tso Babilonia

¹Le ɣe ma ɣi la, Marduk Baladan, si nye Babilonia fia Baladan ƒe vi la dɔ amewo ɖa be woatsɔ agbalẽ kple nunana ayi na Hezekia elabena ese eƒe dɔdzedze kple hayahaya. ²Hezekia xɔ ame dɔdɔawo kple dzidzɔ, eye wòtsɔ nu siwo katã le eƒe nudzraɖoƒe la fia wo; esiwo nye klosalo, sika, atike ʋeʋĩwo, ami tɔxɛwo, aʋawɔnu siwo katã le esi kple nu sia nu si le eƒe kesinɔnuwo dzraɖoƒe. Naneke mele fiasã alo fiaɖuƒe blibo la me si Hezekia mefia wo o.

³Emegbe la, Nyagblɔɖila Yesaya yi ɖe Fia Hezekia gbɔ ɖabiae be, “Nya ka ame siawo gblɔ, eye afi ka wotso?”

Hezekia ɖo eŋu be, “Wotso anyigba didi aɖe dzi, tso keke Babilonia.”

⁴Nyagblɔɖila la biae be, “Nu ka wokpɔ le wò fiasã me?”

Hezekia ɖo eŋu be, “Wokpɔ nu sia nu si le nye fiasã la me. Naneke mele nye kesinɔnuwo dome si nyemefia wo o.”

⁵Tete Yesaya gblɔ na Hezekia be, “Ɖo to nya si Yehowa, Dziƒoʋakɔwo ƒe Aƒetɔ la gblɔ. ⁶Ŋkekewo li gbɔna, esiwo me nu sia nu si le wò fiasã me, kpe ɖe nu siwo katã fofowòwo dzra ɖo ŋu la, woalɔ wo katã ayi ɖe Babilonia. Naneke masusɔ o. Yehowae gblɔe. ⁷Wò dzidzimevi aɖewo kple vi siwo wodzi na wò ŋutɔ hã, woakplɔ wo adzoe, eye woazu ŋutsu tata siwo anye aƒedzikpɔlawo le Babilonia fia ƒe fiasã me.”

⁸Hezekia ɖo eŋu be, “Yehowa ƒe nya siwo nègblɔ la nyo,” elabena esusu be, “Ŋutifafa kple dedinɔnɔ anɔ yeƒe agbemeŋkekewo me.”

Akɔfafa na Mawu ƒe amewo

¹Mifa akɔ, mifa akɔ na nye amewo,

miaƒe Mawu lae gblɔe.

²De dzi ƒo na Yerusalem, eye nàgblɔ nɛ be,

eƒe dɔ sesẽ wɔwɔ wu enu.

Woxe fe ɖe eƒe nu vɔ̃wo ta be ekpɔ teƒeɖoɖo eve

tso Yehowa gbɔ ɖe eƒe nu vɔ̃wo ta.

³Ame si le ɣli dom le gbea dzi ƒe gbe enye esi:

“Midzra Yehowa ƒe mɔ ɖo le gbegbe.

Mita mɔ dzɔdzɔe ɖe gbedadaƒo na miaƒe Mawu la.

⁴Balimewo katã akɔ kpo, eye woabɔbɔ to

kple togbɛ ɖe sia ɖe ɖe anyi;

anyigba tsakliwo katã azu zɔzrɔ̃e,

eye teƒe siwo katã kɔ kpo la azu sɔsɔe.

⁵Woaɖe Yehowa ƒe ŋutikɔkɔe ɖe go,

eye amegbetɔƒomea katã akpɔe,

elabena Yehowa ƒe nue gblɔe.”

⁶Gbe aɖe ɖi be, “Ɖe gbeƒã!”

eye mebia be, “Nu ka ƒe gbeƒã maɖe?”

“Amegbetɔwo katã le abe gbe ene,

eye woƒe atsyɔ̃ le abe seƒoƒo le gbe me ene.

⁷Gbe ƒuna, eye seƒoƒo yrɔna,

elabena Yehowa ƒe gbɔgbɔ gbɔ ɖe wo dzi.

Vavãe amewo katã le abe gbe ene.

⁸Gbe ƒuna, eye seƒoƒo yrɔna,

ke miaƒe Mawu ƒe nya nɔa anyi tegbee.”

⁹Wò ame si tsɔ du nyui vɛ na Zion,

lia to kɔkɔ aɖe.

Wò ame si tsɔ du nyui vɛ na Yerusalem, kɔ wò gbe dzi nàdo ɣli,

kɔ gbe dzi, mègavɔ̃ o;

gblɔ na Yuda ƒe duwo be,

“Miaƒe Mawue nye esi!”

¹⁰Kpɔ ɖa, Aƒetɔ Mawu gbɔna kple ŋusẽ,

eye eƒe abɔ le dzi be yeaɖu fia.

Kpɔ ɖa, eƒe fetu kpe ɖe eŋuti,

eye eƒe teƒeɖoɖo hã kpe ɖe eŋuti.

¹¹Anyi eƒe alẽhawo abe alẽkplɔla ene;

alé alẽviawo ɖe abɔdome,

alé wo ɖe eƒe akɔnu,

eye wòakplɔ alẽnɔwo kple beléle.

¹²Ame kae dzidze tsi ɖe eƒe asiʋlome

alo tsɔ eƒe asi ƒe kekeme dzidze dziƒoe?

Ame kae lɔ ke si le anyigba la ɖe nudonu me

alo da towo le nudanu me

kple togbɛwo le nudanu dzi?

¹³Ame kae ase Yehowa ƒe susu gɔme

alo anye eƒe aɖaŋudela aɖo aɖaŋu nɛ?

¹⁴Ame ka gbɔ Yehowa yi be wòaɖe nugɔme nɛ

alo wòafia mɔ dzɔdzɔetɔe?

Ame kae fia nunya alo gɔmesese ƒe mɔe?

¹⁵Vavãe dukɔwo le abe tsi si ge toŋtoŋ tso tɔkpo me ene,

wobu wo abe ʋuʋudedi le nudanu dzi ene,

eye wòda ƒukpowo le nudanu dzi

abe ʋuʋudedi ko wonye ene.

¹⁶Lebanon ƒe avemetiwo mesɔ gbɔ

woatsɔ awɔ nakee ado dzoe le vɔsamlekpui dzi o,

eye eƒe lãhawo hã mesɔ

gbɔ ade numevɔsawo nu o.

¹⁷Dukɔwo katã menye naneke le eƒe ŋkume o.

Ebua wo abe nu maɖinuwo ko ene, eye wonye tofloko.

¹⁸Ekema ame ka míatsɔ asɔ kple Mawu,

eye nɔnɔme ka míatsɔ asɔ kplii?

¹⁹Legba nye aɖaŋuwɔla ƒe nuwɔwɔ.

Sikanutulae tsɔ sika fa ɖe eŋu,

eye wòtsɔ klosalo wɔ kɔsɔkɔsɔ de nɛ.

²⁰Ame dahe si, si nu siawo mele o la

wɔa ati si megblẽna o la ŋu dɔ.

Edia atikpala si aɖaŋu le mo na be

wòakpa aklamakpakpɛ,

eye wòalii be mamu adze anyi o.

²¹Ɖe mienya oa? Ɖe miesee oa?

Ɖe womegblɔe na mi tso gɔmedzedzea me ke oa?

Ɖe miese egɔme tso anyigba

ƒe gɔmeɖoanyiɣi ke oa?

²²Eyae nye ame si nɔ fiazi dzi le xexea me godoo tame,

eye anyigbadzinɔlawo le abe abɔwo ene le ete.

Ekeke dziƒowo abe avɔ ene,

eye wòwɔe abe avɔgbadɔ si me wonɔna la ene.

²³Eɖea bubu le amegãwo dzi,

eye wòwɔa xexe sia me dziɖulawo

wozua nu maɖinuwo.

²⁴Womekpɔ do wo o, womekpɔ ƒã wo o,

womekpɔ to ke ɖe anyigba me o,

kasia egbɔ ɖe wo dzi,

woyrɔ, eye ya va kplɔ wo dzoe abe atsa ene.

²⁵Kɔkɔetɔ la be, “Ame ka miatsɔm asɔ kplii

alo ame kae sɔ kplim?”

²⁶Miwu mo dzi ne miakpɔ dziƒo.

Ame ka wɔ nu siawo katã?

Ame si ɖe dziƒoŋunuwo ɖe go ɖekaɖeka,

eye wòna ŋkɔ ɖe sia ɖe lae.

Le eƒe ŋusẽ triakɔ kple eƒe alɔ sesẽ la ta,

mena ɖeke bu le wo dome o.

²⁷O! Yakob, nu ka ta nègblɔ ale, eye O! Israel,

nu ka ta nègblɔ be,

“Nye mo ɣla ɖe Yehowa, eye nye Mawu

metsɔ ɖeke le nye nyawo me o?”

²⁸Ɖe mènyae oa? Ɖe mèsee oa?

Yehowae nye Mawu mavɔtɔ la.

Eyae nye anyigba ƒe seƒe ke Wɔla.

Ɖeɖi metea eŋu alo nu tia kɔ nɛ o.

Eƒe nugɔmesese goglo.

Ame aɖeke mate ŋu adzro eme akpɔ o.

²⁹Ena ŋusẽ ame siwo ŋu ɖeɖi te,

eye wòdoa ŋusẽ ame siwo gbɔdzɔ.

³⁰Nu tia kɔ na sɔhɛwo gɔ̃ hã, eye wogbɔdzɔna.

Nenema ke ŋusẽ vɔna le ɖekakpuiwo ŋu,

eye wodzea anyi,

³¹gake ame siwo kpɔa mɔ na Yehowa la

ƒe ŋusẽ gaɖoa yeye me.

Woadzo ayi dzi abe hɔ̃wo ene.

Woaƒu du, gake ɖeɖi mate wo ŋu o.

Woazɔ azɔli, gake nu mati kɔ na wo o.

Israel ƒe kpeɖeŋutɔ

¹“Mi ƒukpowo, mizi ɖoɖoe le ŋkunye me!

Ŋusẽ yeye neɖo dukɔwo ŋu!

Mina woava ŋgɔ hafi woaƒo nu.

Mina miado go le ʋɔnudrɔ̃ƒe.

²“Ame kae de dzo lãme na ame si tso ɣedzeƒe,

heyɔe le dzɔdzɔenyenye me be wòatsɔ dɔ nɛ?

Etsɔ dukɔwo de asi nɛ, eye wòfanya fiawo le eŋkume.

Etsɔ eƒe yi wɔ wo wozu kewɔ,

eye wòtsɔ eƒe aŋutrɔ wɔ wo wozu abe atsa si ya ƒo ene.

³Eti wo yome, eye wòƒu du to teƒe siwo meto kpɔ o,

gake naneke mewɔe o.

⁴Ame kae wɔ esia hekpɔ egbɔ be ede go,

eye wòyɔ dzidzimewo tso gɔmedzedzea me ke?

Nye, Yehowa, si nɔ kple gbãtɔwo,

eye nenema ke mele kple mamlɛawo hã, Nyee.”

⁵Ƒukpowo kpɔe, eye wovɔ̃.

Anyigba ƒe mlɔenuwo dzo kpekpekpe,

woƒo ƒu, eye wozɔ ɖe ŋgɔgbe;

⁶ɖe sia ɖe kpe ɖe nɔvia ŋu,

eye wogblɔ na wo nɔewo be, “Lé dzi ɖe ƒo.”

⁷Aɖaŋudɔwɔla de dzi ƒo na sikanutula,

ganutrela de dzi ƒo na zudala.

Egblɔ tso nu si wotre la ŋu be, “Wotree nyuie.”

Tete wòƒo gatagbadzɛ ɖe aklamakpakpɛ la be magaʋã o.

⁸“Ke wò, Israel, nye dɔla, Yakob, ame si metia.

Mi, xɔ̃nye, Abraham ƒe dzidzimeviwo.

⁹Wò, ame si mekplɔ tso anyigba ƒe mlɔenuwo,

meyɔ wò tso eƒe dzogoewo dzi ke.

Megblɔ be, ‘Nye dɔlae nènye.’

Metia wò, eye nyemegbe wò o,

¹⁰eya ta mègavɔ̃ o, elabena meli kpli wò.

Ŋɔ megadzi wò o, elabena nyee nye wò Mawu.

Mali ke wò, eye makpe ɖe ŋuwò;

matsɔ nye dzɔdzɔenyenye ƒe nuɖusibɔ alé wò ɖe te.

¹¹“Kpɔɖa, ŋukpe kple vlododo ava

ame siwo katã do dɔmedzoe ɖe ŋuwò la dzi,

ame siwo tsi tsitre ɖe ŋuwò la atsrɔ̃,

eye wo nu ava ayi.

¹²Àdi wò ketɔwo, gake màkpɔ wo o.

Ame siwo ho aʋa ɖe ŋuwò la azu tofloko ƒe tofloko,

¹³elabena nyee.

Nye Yehowa, wò Mawu,

ame si lé wò nuɖusibɔ ɖe asi hele gbɔgblɔm na wò be

‘Mègavɔ̃ o, makpe ɖe ŋuwò.’

¹⁴Mègavɔ̃ o. O! Ŋusẽmanɔsitɔ, Yakob,

O! Israel beli, elabena nye ŋutɔ makpe ɖe ŋuwò.”

Yehowa, wò Ɖela, Israel ƒe Kɔkɔetɔ lae gblɔe.

¹⁵“Kpɔ ɖa, matsɔ wò awɔ luƒomɔ yeye ɖaɖɛ si

ƒe aɖuwo sɔ gbɔ fũu.

Àfanya towo, agbã wo gudugudu,

eye àwɔ togbɛwo woazu fufu.

¹⁶Àgbɔ wo, ya aƒo wo adzoe,

eye ahomuya alɔ wo ɖe nu,

ke wò ya, àdzɔ dzi ɖe Yehowa ŋu,

eye àtso aseye ɖe Israel ƒe Kɔkɔetɔ la ŋu.

¹⁷“Ame dahewo kple hiãtɔwo le tsatsam le tsi dim,

ke womekpɔ ɖeke o.

Woƒe aɖewo dzi ƒu kplakplakpla le tsikɔwuame ta.

Ke nye Yehowa, matɔ na wo;

nye Israel ƒe Mawu la nyemagble wo ɖi o.

¹⁸Mana tɔsisiwo nasi ato to ƒuƒluwo tame,

eye tometsiwo nasi to balimewo.

Mana gbegbewo nazu tɔʋuwo,

eye kuɖiɖinyigba nazu tsidzɔƒewo.

¹⁹Mana sedati, logoti,

gboti kple amiti namie ɖe gbegbe,

eye mana xeti, fɔfɔli,

kple sesewu namie ɖe dzogbe.

²⁰Ale be amewo nakpɔe, anyae,

abu eŋu, eye woase egɔme be,

Yehowa ƒe asie wɔ esia, eye Israel ƒe

Kɔkɔetɔ lae na wòva eme.”

²¹Yehowa be, “Ɖe wò nyawo to.

Ƒo nu le nya siwo nètsɔ vɛ la ŋu.” Yakob ƒe fia lae gblɔe.

²²“Mitsɔ miaƒe legbawo vɛ ne

woava agblɔ nu si ava dzɔ la na mí.

Migblɔ nu siwo nɔ anyi tsã la na mí be

míabu wo ŋuti, eye míanya woƒe metsonu

alo migblɔ nu siwo ava dzɔ la na mí.

²³Nya kae le etsɔ si na mí ne

mianya be mawuwoe mienye.

Wɔ nane, eɖanye nyui alo vɔ̃,

ale be míaƒe mo nawɔ yaa, eye vɔvɔ̃ naɖo mí.

²⁴Ke miele naneke hã me o,

eye miaƒe dɔwɔwɔwo mele ɖeke me kura o.

Ame si tia mi la zu ŋunyɔnu.

²⁵“Menyɔ ame aɖe tso anyiehe

eye wòle mɔ dzi gbɔna.

Ame si tso afi si ɣe dzena tsoe,

eye wòyɔa nye ŋkɔ.

Ame si fanya dziɖulawo abe anyi ene,

efanya wo abe zemelae le anyi nyam ene.

²⁶Ame kae ƒo nu tso ame sia ŋuti tso gɔmedzedzea,

ne mienyae do ŋgɔ,

ne miate ŋu agblɔ be, ‘Eƒe nya dzɔ?’

Ame aɖeke megblɔ esia o.

Ame aɖeke megblɔe da ɖi o;

ame aɖeke mese nya aɖeke tso gbɔwò o.

²⁷Nyee nye ame gbãtɔ si gblɔe na Zion be,

‘Kpɔ ɖa, wole afii!’

Meɖo nyanyuigblɔla ɖe Yerusalem.

²⁸Metsa ŋku, ke ame aɖeke meli o,

ame aɖeke mele wo dome aɖo aɖaŋu o.

Ame aɖeke mele wo dome aɖo nya

si mebia wo la ŋu nam o.

²⁹Kpɔ ɖa, wo katã wonye tofloko!

Woƒe dɔwɔwɔwo mele ɖeke me o.

Woƒe legbawo hã nye ya

kple tofloko ko.

Yehowa ƒe dɔla

¹“Kpɔ ɖa esiae nye nye dɔla si melé ɖe te,

nye ame tiatia si ŋu mekpɔa ŋudzedze le;

matsɔ nye gbɔgbɔ kɔ ɖe eya amea dzi

ne wòadrɔ̃ ʋɔnu dzɔdzɔe na dukɔwo.

²Mafa avi alo ado ɣli

alo woase eƒe ŋkɔ le mɔtata dzi o.

³Maɖe aƒla ŋeŋe la ɖa o,

eye matsi akaɖimeɖovu si

le bibim ɖɔɖɔɖɔ la o.

Adrɔ̃ ʋɔnu le nyateƒe me.

⁴Maʋuʋu alo dzi naɖe le eƒo o

va se ɖe esime wòɖo dzɔdzɔenyenye

ƒe ʋɔnudrɔ̃ƒe anyi ɖe anyigba dzi,

eye ƒukpowo ada woƒe mɔkpɔkpɔwo ɖe eƒe se la dzi.”

⁵Ale Yehowa, Mawu, ame si wɔ dziƒo, eye wòhe eme,

ame si keke anyigba kple nu siwo katã doa go tso eme,

ame si na agbegbɔgbɔ edzinɔlawo, eye wòna agbe

ame siwo zɔna le edzi la gblɔe nye esi.

⁶“Nye, Yehowa, meyɔ wò le dzɔdzɔenyenye me.

Malé wò alɔnu.

Makpɔ tawò, ana nànye nubabla na amewo

kple kekeli na dukɔwo,

⁷be nàʋu ŋku na ŋkugbagbãtɔwo,

be nàɖe ga gamenɔlawo,

eye nàɖe ame siwo nɔ do globo me la tso viviti me.

⁸“Nyee nye Yehowa, ŋkɔnyee ma!

Nyematsɔ nye ŋutikɔkɔe

alo kafukafu ana legbawo o.

⁹Kpɔ ɖa, blemanyawo va eme,

eye megale yeyewo gblɔm.

Hafi woava dzɔ la,

meɖe gbeƒã tso wo ŋuti na mi xoxo.”

Kafukafuha na Yehowa

¹⁰Mi ame siwo toa atsiaƒu dzi,

mi nu siwo le atsiaƒu me,

mi ƒukpowo kple ame siwo le wo dzi,

midzi ha yeye na Yehowa.

Midzi eƒe kafukafuha

le anyigba ƒe mlɔenuwo ke.

¹¹Gbegbe kple du siwo le afi ma nekɔ woƒe gbe dzi.

Kedar ƒe kɔƒewo me nɔlawo netso aseye.

Ame siwo le Sela la nedzi ha kple dzidzɔ.

Wonedo ɣli tso towo tame.

¹²Wonetsɔ ŋutikɔkɔe na Yehowa,

eye woaɖe gbeƒã eƒe kafukafu le ƒukpowo dzi.

¹³Yehowa ado abe kalẽtɔ ene.

Ade dzo eɖokui me abe aʋawɔla ene.

Atsɔ eƒe gbe ado aʋaɣli,

eye wòaɖu eƒe futɔwo dzi.

¹⁴“Mezi kpi eteƒe didi,

mezi ɖoɖoe, eye melé ɖokuinye kpoo,

ke azɔ la, abe nyɔnu si le ku lém ene la,

mado ɣli, alɔ gbɔgbɔtsixe ɖe ƒo,

eye manɔ gbɔgbɔm fuxefuxe.

¹⁵Makaka towo kple togbɛwo,

mana gbe damawo katã naƒu,

mana tɔsisiwo nazu tɔdomekpowo,

eye mana tɔʋuwo namie keŋkeŋ.

¹⁶Makplɔ ŋkugbagbãtɔwo ato mɔ si womenya tsã o la dzi,

eye makplɔ wo to mɔ manyamanya dzi.

Mana viviti nazu kekeli le wo ŋgɔ,

eye mana toƒe tsakliwo nazu zɔzrɔ̃e na wo.

Esiawoe nye nu siwo mawɔ,

nyemagble wo ɖi o.

¹⁷Ke ame siwo ɖoa dzi ɖe aklamakpakpɛwo ŋu,

ame siwo gblɔna na legbawo be,

‘Míaƒe mawuwoe mienye’ la,

woagbugbɔ ɖe megbe kple ŋukpe gã.

Israel, ŋkugbagbãtɔ kple tokunɔ

¹⁸“Mi tokunɔwo, mise nu,

mi ŋkugbagbãtɔwo,

mifɔ mo dzi, miakpɔ nu!

¹⁹Ame kae tsi ŋku, eye wòku to

abe nye dɔla si medɔ la ene,

ɖe menye nye dɔlae oa?

Ame kae nye ŋkunɔ abe xɔ̃nye ene,

eye wòtsi ŋku abe Yehowa ƒe dɔla ene?

²⁰Èkpɔ nu geɖe, gake mètsɔ wo de ta me o,

wò towo le ʋuʋu ɖi, gake mèse naneke o.”

²¹Edze Yehowa ŋu le eƒe dzɔdzɔenyenye ta be,

wòade gãnyenye kple bubu eƒe se ŋu.

²²Ke esia nye ame siwo woda adzoe, eye woha wo;

mɔ ɖe wo katã le dowo me,

eye wobe ɖe gaxɔwo me.

Wozu nuhaha, eye ame aɖeke meli axɔ na wo o.

Wozu nu siwo woda adzoe,

eye ame aɖeke meli agblɔ be,

“Mitrɔ wo yii o.”

²³Mia dometɔ kae aɖo to nu sia

alo alé to ɖe nu siwo gbɔna dzɔdzɔ ge la ŋu tsitotsito?

²⁴Ame kae de Yakob asi be wòazu nuhaha,

eye wòde Israel asi na adzodalawo?

Ɖe menye Yehowa, ame si ŋu miewɔ nu vɔ̃ ɖo lae oa?

Elabena wogbe eƒe mɔwo dzi toto,

eye womewɔ ɖe eƒe sewo dzi o.

²⁵Eya ta wòtrɔ eƒe dɔmedzoe helĩhelĩ la

kple aʋawɔwɔ ƒe nu vlowo kɔ ɖe wo dzi.

Ena dzo bi ƒo xlã wo, gake womese egɔme o.

Dzo la fia wo, gake mede dzi gbɔ na wo o.

Israel ƒe Ɖela ɖeka hɔ̃ɔ la

¹Ke azɔ la, ale Yehowa,

ame si wɔ wò, O! Yakob,

eye wòme wò, O! Israel,

la gblɔe nye esi,

“Mègavɔ̃ o, elabena meɖe wò.

Metsɔ wò ŋkɔ yɔ wò be tɔnye nènye.

²Ne èto tɔ me, mato eme kpli wò,

ne èto tɔsisiwo me, mato wo me kpli wò

be tɔsisi la malé wò o.

Ne èto dzo me mame wò o,

eye dzo ƒe aɖewo hã mafia wò o,

³elabena nye Yehowa, wò Mawu,

Israel ƒe Kɔkɔetɔ lae nye wò ɖela.

Metsɔ Egipte ƒle tawò,

eye Kus kple Seba axɔ ɖe tewòƒe.

⁴Esi asixɔxɔ kple bubu le ŋutiwò

le ŋkunye me, eye melɔ̃ wò ta la,

matsɔ ŋutsuwo ana ɖe tewòƒe.

Matsɔ amegbetɔwo ana ɖe wò agbe teƒe.

⁵Mègavɔ̃ o, elabena meli kpli wò,

makplɔ viwòwo tso ɣedzeƒe,

eye maƒo mia nu ƒu tso ɣetoɖoƒe.

⁶Magblɔ na anyiehe be,

‘Ɖe asi le wo ŋu.’

Na dziehe be, ‘Megasika wo o.’

Mikplɔ vinye ŋutsuwo tso didiƒe

kple vinyenyɔnuwo tso anyigba

ƒe mlɔenuwo ke vɛ,

⁷ame sia ame si ko ŋu woyɔ nye ŋkɔ ɖo,

ame siwo mewɔ hena nye ŋutikɔkɔe,

ame siwo meme, eye mewɔ.”

⁸Mikplɔ ame siwo ŋku li na,

gake womele nu kpɔm o la

kple ame siwo to li na,

gake womesea nu o la do goe.

⁹Dukɔwo katã kpe ta, eye amewo ƒo takpli.

Wo dometɔ kae gblɔ esia da ɖi,

eye wòɖe gbeƒã nu siwo dzɔ va yi la na mi?

Womekplɔ woƒe ɖasefowo vɛ,

ne woaɖee fia be woƒe nya dzɔ,

ale be ame bubuwo asee agblɔ be, “Nyateƒee” o.

¹⁰Yehowa be, “Miawoe nye nye ɖasefowo

kple nye dɔla si metia be mianya,

eye miaxɔ dzinye ase,

ase egɔme be nyee.

Mawu aɖeke medo ŋgɔ nam o,

eye ɖeke hã mado ŋgɔ nam o.

¹¹Nyee, ɛ̃, nyee.

Nyee nye Yehowa.

Ɖela aɖeke meli kpe ɖe ŋunye o.

¹²Nye la, meɖee fia. Meɖe eme,

eye meɖe gbeƒã be nyee,

ke menye dzromawu siwo le mia dome lae o.

Miawoe nye nye ɖasefowo.”

¹³Yehowae gblɔe.

“Mianyae be nyee nye Mawu.

Ɛ̃, nye koe tso blema ke.

Ame aɖeke mate ŋu axɔ ame le asinye o.

Ne mewɔ nu la, ame kae ate ŋu atrɔe?”

Mawu ƒe amenuveve kple Israel ƒe anukwaremaɖimaɖi

¹⁴Ale Yehowa, wò Ɖela,

Israel ƒe Kɔkɔetɔ la gblɔe nye esi,

“Le tawò madɔ ame ɖo ɖe Babilonia

woaɖakplɔ Babiloniatɔwo vɛ abe aʋasilawo ene,

eye woalɔ wo ɖe woƒe tɔdziʋu

siwo dzi wodana ɖo la me.

¹⁵Nyee nye Yehowa,

miaƒe Kɔkɔetɔ la, Israel Wɔla kple miaƒe Fia.”

¹⁶Ale Yehowa, ame si ɖe mɔ to atsiaƒu me,

ame si ɖe mɔ to tɔsisi gãwo me,

¹⁷ame si na tasiaɖamwo, sɔwo, aʋakɔwo,

kple kalẽtɔwo ho aʋa,

va tsi afi si womagafɔ le gbeɖe o.

Ame si na wotsrɔ̃, eye wotsi abe akaɖimeɖovu ene la gblɔe nye esi:

¹⁸“Miŋlɔ blemanuwo be.

Migaɖo ŋu ɖe gbe aɖe gbe nuwo ŋu o.

¹⁹Kpɔ ɖa, mele nu yeye wɔm!

Edo mo ɖa xoxo, mèle ekpɔm oa?

Mele mɔ tam ɖe gbedzi, eye mana tɔsisiwo

nado ɖe kuɖiɖinyigba dzi.

²⁰Gbemelãwo, amegaxiwo

kple golowo ade bubu ŋunye,

elabena mena tsi do tso gbegbe,

eye tɔsisiwo do ɖe kuɖiɖinyigba dzi be

mana tsi nye amewo, nye ame tiatiawo,

²¹ame siwo mewɔ na ɖokuinye be

woaɖe gbeƒã nye kafukafu.

²²“Ke wò, Yakob, mèyɔm o.

O! Israel, mèkpe fu ɖe tanye o.

²³Mètsɔa wò alẽwo saa numevɔ nam loo

alo tsɔa wò akpedavɔsa dea bubu ŋunye o.

Nyemetsɔ nuɖuvɔsawo do agbae na wò o

alo ɖe fu na wo be nàtsɔ dzudzɔʋeʋĩdonu vɛ nam o.

²⁴Mètsɔ atikeʋeʋĩ aɖeke vɛ nam

alo tsɔa wò lãwo ƒe ami sãa vɔ̃e nam agbadree o,

ke boŋ ètsɔ wò nu vɔ̃wo do agbae nam,

eye nèɖe fu nam kple wo vodadawo.

²⁵“Nyee, ɛ̃, nyee atutu wò dzidadawo ɖa le

nye ŋutɔ ɖokuinye ta, eye nyemagaɖo ŋku wò nu vɔ̃wo dzi o.

²⁶Ɖo ŋku tsãnuwo dzi nam.

Na míahe nya sia kple mía nɔewo.

Gblɔ ale si wò nya dzɔe.

²⁷Fofowò gbãtɔ wɔ nu vɔ̃.

Wò nyanuɖelawo dze aglã ɖe ŋutinye,

²⁸eya ta mado ŋunyɔ ame ŋkuta

siwo le wò gbedoxɔ me.

Matsɔ Yakob ade asi na gbegblẽ,

eye Israel na fewuɖuɖu.”

Israel dukɔ tiatia la

¹“Ke azɔ la, ɖo to, o nye dɔla Yakob,

Israel, ame si metia.

²Ale Yehowa ame si wɔ wò,

ame si me wò ɖe vidzidɔ me,

ame si akpe ɖe ŋuwò la gblɔe nye esi,

Mègavɔ̃ o, O! Yakob, nye dɔla.

Yerusalem, ame si metia,

³elabena makɔ tsi ɖe kuɖiɖinyigba dzi

kple tɔʋuwo ɖe anyigba ƒuƒu dzi.

Makɔ nye gbɔgbɔ ɖe viwòwo dzi

kple nye yayra ɖe wò dzidzimeviwo dzi.

⁴Woamie abe gbe si le gbedzi ene,

eye woanɔ abe amutiwo le tɔʋuwo to ene.

⁵Ɖeka agblɔ be, ‘Yehowa tɔ menye.’

Bubu atsɔ Yakob ƒe ŋkɔ na eɖokui,

eye ame bubu hã aŋlɔ ɖe eƒe asi ŋuti be,

‘Yehowa tɔ,’ eye wòatsɔ ŋkɔ be Israel.

Yehowa menye legbawo o

⁶“Ale Yehowa, Israel ƒe Fia kple Ɖela,

Yehowa, Dziƒoʋakɔwo ƒe Aƒetɔ la gblɔe nye esi:

Nyee nye gbãtɔ kple mlɔetɔ.

Mawu bubu aɖeke mekpe ɖe ŋunye o.

⁷Ekema ame kae sɔ kplim?

Neɖe gbeƒãe.

Neva gblɔe, eye wòaɖee afia le ŋkunye me,

nu siwo dzɔ tso esime meɖo nye blemamewo gɔme anyi

kple nu si gbɔna eme va ge.

Ɛ̃, negblɔ nu si ava dzɔ.

⁸Migadzo nyanyanya o.

Migavɔ̃ o.

Ɖe nyemeɖe gbeƒã esia,

eye megblɔe da ɖi gbe aɖe gbe ke oa?

Miawoe nye nye ɖasefowo.

Ɖe Mawu bubu aɖe gali kpe ɖe ŋunyea?

Ao, Agakpe aɖeke megali o.”

⁹Ame siwo katã ha legbawo la,

mele ɖeke me o, eye nu siwo ŋu

wode asixɔxɔe la nye tofloko.

Ame siwo ƒoa nu ɖe wo nu la nye ŋkugbagbãtɔwo,

numanyala siwo menya ŋukpe o.

¹⁰Ame kae kpa aklamakpakpɛ mawo,

eye wòli legba si mahe viɖe aɖeke vɛ nɛ o?

¹¹Woado ŋukpe aklamakpakpɛwɔla

kple aklamakpakpɛ la siaa,

elabena aɖaŋudɔwɔlawo hã,

amegbetɔwo ko wonye.

Wo katã neƒo ƒu ne woaɖo kpe nu dzi,

ke hã la, woaƒo wo aƒu anyi

kple ŋɔdzi kple dɔléle.

¹²Gbede tsɔ eƒe dɔwɔnu de gayibɔdzo me.

Etsɔ eƒe zu wɔ dɔ le gayibɔ la ŋu kple eƒe abɔ sesẽ,

eye wòwɔe wòzu legba.

Dɔ wui, eye wògbɔdzɔ.

Meno tsi o, ale nu ti kɔ nɛ vevie.

¹³Atikpala tsɔ nudzidzenu,

eye wòtsɔ ɣe te fli ɖe teƒe siwo wòdzidze.

Etsɔ nukpafi zrɔ̃ teƒeteƒewoe,

eye wòtsɔ nudzidzega dzidzee.

Ekpae ɖe ame ƒe nɔnɔme me,

le ame ƒe dzedze nyuitɔ me be

wòate ŋu atsɔe ada ɖe trɔ̃xɔ me.

¹⁴Atikpala la lã sedati,

papawu alo logoti.

Ena wòtsi le avemetiwo dome.

Ɖewohĩ edo gboti hã,

eye tsidzadza na wòtsi.

¹⁵Ame la tsɔe wɔ nakee.

Etsɔ ɖe do dzoe le ƒuƒum.

Etsɔ ɖe do dzoe, me abolo.

Etsɔ ɖe wɔ mawue.

Ke etsɔ ɖe wɔ mawue hesubɔna,

eye wòtsɔ ɖe wɔ aklamakpakpɛ hedea ta agu nɛ.

¹⁶Etsɔ ati la ƒe afã do dzoe heɖa nu le edzi.

Eme lã le edzi, eye wòɖu nu ɖi ƒo.

Azɔ eƒu dzo la hegblɔ be:

“Aa! Mekpɔ dzo le ƒuƒum, eye nye lãme xɔ dzo.”

¹⁷Etsɔ ati la ƒe mamlɛa wɔ aklamakpakpɛ,

mawu si wòdea ta agu na hesubɔna.

Edo gbe ɖa nɛ be,

“Ɖem, wòe nye nye mawu.”

¹⁸Ame siawo menya naneke o.

Womese naneke gɔme o.

Nu tsyɔ woƒe ŋkuwo dzi be womegakpɔ nu o,

eye woƒe susuwo me xe be womagase naneke gɔme o.

¹⁹Nunya mele wo dometɔ aɖeke si wòagblɔ be,

“Metsɔ afã wɔ nakee.

Meme abolo gɔ̃ hã le eƒe dzokawo dzi,

eye meme lã hã le edzi heɖu o.

Ɖe matsɔ mamlɛa awɔ ŋunyɔnuea?

Ɖe madze klo na atikpoa.”

²⁰Etsɔ eƒe susu da ɖe dzofi dzi,

eye dzi si woble la kplɔe trae,

ale mate ŋu aɖe eɖokui alo agblɔ be,

“Ɖe nu si melé ɖe nye nuɖusime la menye aʋatso oa?”

²¹“Ɖo ŋku nu siawo dzi, O! Yakob,

elabena wòe nye nye dɔla, O! Israel.

Nyee me wò, eye nye dɔlae nènye.

O! Israel, nyemaŋlɔ wò be akpɔ o.

²²Mekplɔ wò vodadawo dzoe abe lilikpo ene,

eye mena wò nu vɔ̃wo nu va yi

abe ahũ si dza le fɔŋli ene.

Trɔ̃ va gbɔnye,

elabena meɖe wò.”

²³O! Dziƒowo, midzi ha kple dzidzɔ,

elabena Yehowae wɔ esia.

O! Anyigba do ɣli sesĩe.

Mido ha ɖa, mi towo, avewo kple avemetiwo,

elabena Yehowa ɖe Yakob.

Eɖe eƒe Ŋutikɔkɔefia le Israel.

²⁴“Ale Yehowa,

wò Ɖela, ame si me wò

ɖe dɔ me la gblɔe nye esi:

“Nyee nye Yehowa

si wɔ nuwo katã.

Ame si he dziƒowo me,

eye nye ŋutɔe keke anyigbawo me.

²⁵Nyee gblẽa alakpanyagblɔɖilawo ƒe dzesiwo me,

eye medoa abunɛ bokɔwo ƒe nukakawo,

ame si ɖea nunyalawo le zi dzi,

eye wòtrɔa woƒe nunya wòzua bometsitsi.

²⁶Ame si wɔna ɖe eƒe dɔlawo ƒe biabiawo dzi,

eye wònaa eƒe dɔlawo ƒe nyagblɔɖiwo vaa eme.

“Ame si gblɔ le Yerusalem ŋu be, ‘Amewo aganɔ me wò,’

na Yuda ƒe duwo be, ‘Woagbugbɔ mi atso,’

eye na aƒedowo be, ‘Magbugbɔ mi aɖo te.’

²⁷Ame si gblɔ na tɔ goglowo be,

‘Mimie, mana mia me tsiwo namie.’

²⁸Ame si gblɔ le fia Sirus ŋu be, ‘Eyae nye nye alẽkplɔla,

eye awɔ nu siwo katã dze ŋunye.

Agblɔ le Yerusalem ŋu be, “Woagbugbɔe atu,”

eye le gbedoxɔ la ŋu be, “Mina woaɖo eƒe gɔmeɖokpewo anyi.” ’

Yehowa tia Sirus

¹“Ale Yehowa gblɔ na Sirus, eƒe amesiamina,

ame si ƒe nuɖusibɔ melé be matsɔ abɔbɔ dukɔwo ɖe anyi

le eŋkume be maxɔ aʋawɔnuwo le fiawo si,

ne maʋu mɔwo le eŋgɔ be agbowo matu le eŋgɔ o.

²Madze ŋgɔ na wò, agbã towo le ŋgɔwò.

Magbã akɔbligbowo, eye maŋe gayibɔ ƒe gametiwo.

³Matsɔ kesinɔnu siwo le blukɔ me

kple nu xɔasi siwo wodzra ɖo ɖe ɣaɣlaƒe la na wò,

ne nànya be nyee nye Yehowa, Israel ƒe Mawu la,

ame si tsɔ wò ŋkɔ yɔ wòe.

⁴Le Yakob, nye dɔla kple Israel,

nye ame tiatia ta la,

metsɔ wò ŋkɔ yɔ wòe heda bubuŋkɔ ɖe dziwò,

togbɔ be mèdze sim o hã.

⁵Nyee nye Yehowa.

Bubu aɖeke megali o.

Mawu bubu aɖeke megali kpe ɖe ŋunye o.

Mado ŋusẽ wò togbɔ be mèdze sim o hã.

⁶Ale be tso afi si ɣe dzena tsona va se ɖe afi si wòɖoa to ɖo la,

amewo nanya be Mawu bubu aɖeke mesɔ kplim o.

Nyee nye Yehowa.

Bubu aɖeke megali o.

⁷Nyee na kekeli dona.

Nyee wɔ viviti.

Nyee he dzidzedzekpɔkpɔ vɛ,

eye nye kee he gbegblẽ hã vɛ.

Nye Yehowae wɔ esiawo katã.

⁸“Mi dziŋgɔlĩwo, midza dzɔdzɔenyenye abe tsi ene.

Lilikpowo nena wòadza.

Na anyigba nake nu baa.

Na ɖeɖe nado tso eme,

eye na dzɔdzɔenyenye natsi kplii.

Nye Yehowae wɔe.

⁹“Baba na ame si le dzre wɔm kple eƒe Wɔla.

Ame si lé nɛ ko abe ze le ze bubuwo dome le anyigba ene.

Ɖe anyi abia zemela be,

‘Nu ka mem nèle mahã?’

Ɖe wò dɔ si wɔm nèle la,

abia be, ‘Asi mele asiwò oa?’

¹⁰Baba na ame si gblɔna na fofoa be,

‘Nu ka ta nèdzim ɖo?’ alo na dadaa be,

‘Nu ka ta nèlé ku ɖo?’

¹¹“Ale Yehowa, Israel ƒe Kɔkɔetɔ kple ekplɔla gblɔe nye esi:

Ɖe nàbia gbem tso vinyewo ŋu

alo aɖe gbe nam tso nye asinudɔwɔwɔwo ŋutia?

¹²Nyee wɔ anyigba kple ame siwo le edzi.

Nye ŋutɔ nye asiwoe keke dziƒowo me.

Nyee wɔ dziƒoŋunuwo katã.

¹³Le nye dzɔdzɔenyenye me, mado ŋusẽ Sirus.

Mana eƒe mɔwo nanɔ dzɔdzɔe.

Agbugbɔ nye du atso, eye wòaɖe asi

le nye aboyomewo ŋuti nam.

Ke maxɔ teƒeɖoɖo aɖeke o,

Yehowa, Dziƒoʋakɔwo ƒe Aƒetɔ lae gblɔe.”

¹⁴Ale Yehowa gblɔe nye esi,

“Nu siwo wowɔ le Egipte,

Kus ƒe adzɔdonuwo kple Sabeatɔ tsrala

mawo katã woava gbɔwò azu tɔwò.

Woaɖo fli ɖe megbewò,

eye woanɔ hame ava gbɔwò.

Woade ta agu na wò, aɖe kuku agblɔ be

‘Vavãe, Mawu li kpli wò, eye bubu aɖeke megali o.

Mawu bubu aɖeke megali o.’ ”

¹⁵Vavãe, ènye Mawu si ɣlaa eɖokui.

O! Mawu kple Israel ƒe Ɖela.

¹⁶Aklamakpakpɛwɔlawo katã aɖu ŋukpe,

eye woakpɔ vlododo.

Wo katã woaɖu ŋukpe.

¹⁷Ke Yehowa aɖe Israel kple ɖeɖe mavɔ.

Màɖu ŋukpe alo akpɔ vlododo yi ɖe mavɔ me o,

¹⁸elabena ale Yehowa,

ame si wɔ dziƒo, eye wònye Mawu,

ame si wɔ anyigba, eye wòna wòva dzɔ,

meyɔe be wòatsi gbɔlo o,

ke boŋ ewɔe be nuwo nanɔ edzi.

Eyae gblɔ be, “Nyee nye Yehowa,

bubu aɖeke megali o.

¹⁹Nyemeƒo nu le ɣaɣlaƒe le anyigba aɖe si do blukɔ la dzi o.

Nyemegblɔ na Yakob ƒe dzidzimeviwo be,

‘Midim dzodzro’ o.

Nye Yehowa, nyateƒe ko megblɔna,

eye nu si le eteƒe la ko meɖea gbeƒãe.

²⁰“Miƒo ƒu ne miava.

Miƒo takpli, mi aboyome siwo tso dukɔwo me.

Abunɛtɔwoe nye ame siwo lé aklamakpakpɛwo ɖe ta,

eye wodoa gbe ɖa na mawu siwo mate ŋu aɖe ame o.

²¹Miɖe gbeƒã nu si ava dzɔ.

Migblɔe ne woase.

Mina woaƒo ƒu ade aɖaŋu.

Ame kae gblɔ nya sia ɖi le blema,

eye wòɖe gbeƒãe gbe aɖe gbe ʋĩi va yi?

Ɖe menye nye Yehowae oa?

Mawu bubu aɖeke meli kpe ɖe ŋunye o.

Nye la, Mawu dzɔdzɔetɔ kple Ɖelae menye.

Ɖeke megali o, negbe nye koe.

²²“Mitrɔ ɖe ŋunye ne miakpɔ ɖeɖe,

mi anyigba ƒe mlɔenuwo ke,

elabena nyee nye Mawu, eye ɖeke megali o.

²³Nye ŋutɔ meka atam.

Nye nu gblɔ nya si mede megbe na,

nya si womatrɔ gbeɖe o.

Klo sia klo adze nam,

eye aɖe sia aɖe ayɔm aka atamue.

²⁴Woagblɔ le ŋunye be,

‘Yehowa ɖeka hɔ̃ɔ me ko dzɔdzɔenyenye kple ŋusẽ le.’ ”

Ame siwo katã do dɔmedzoe ɖe eŋuti la,

atrɔ ava egbɔ kple ŋukpe.

²⁵Ke Yehowa mee Israel ƒe dzidzimeviwo katã

akpɔ dzɔdzɔenyenye kple dodoɖedzi le.

Babilonia ƒe mawuwo

¹Bel de ta agu, Nebo do dɔgɔ̃e.

Wotsɔ woƒe legbawo do agbae na agbatsɔlãwo.

Numeme siawo zu agba wotsɔna nɔa yiyim,

eye wozu agba na agbatsɔla siwo gbɔdzɔ.

²Wo katã wobɔbɔna hedea ta agu ɖekae,

ke womete ŋu ɖe agba la ɖa o,

eye woyi aboyome.

³“O! Yakob ƒe aƒe, miɖo tom.

Mi ame siwo katã susɔ na Israel ƒe aƒe la,

mi ame siwo melé ɖe asi tso gbe si gbe wofɔ miaƒe fu,

eye metsɔ mi tso gbe si gbe wodzi mi

⁴va se ɖe miaƒe tsitsime

esime miaƒe taɖa ƒo wɔ ke hã la,

nye koe, nye ɖeka koe ate ŋu alé mi ɖe te.

Nyee wɔ mi, eye matsɔ mi ada ɖe ɖokuinye dzi.

⁵“Ame ka miebe yewoatsɔm asɔ kplii

alo agblɔ be esɔ kplim?

Ame ka miagblɔ be mele

abe eya ene, ne woatsɔe asɔ kplim?

⁶Wo dometɔ aɖewo dudua sika

le woƒe kotokuwo me ɖe anyigba,

eye wodaa klosalo le nudanu me.

Woyɔa sikanutula be wòatsɔe awɔ mawue na wo,

eye wodea ta agu hesubɔnɛ.

⁷Wotsɔnɛ ɖoa abɔta henɔa yiyim kplii.

Wotsɔnɛ ɖoa enɔƒe, eye afi ma ko wònɔa tsitre ɖo.

Metea ŋu ɖea zɔ yia teƒe bubu o.

Togbɔ be wodoa ɣli nɛ hã la,

meɖoa nya ŋu na wo o,

eye metea ŋu ɖea wo le woƒe xaxawo me hã o.

⁸“Mi aglãdzelawo, miɖo ŋku edzi,

milée ɖe susu me, eye wòanɔ dzi me na mi.

⁹Miɖo ŋku blemanuwo dzi,

nu siwo dzɔ gbe aɖe gbe ʋĩi va yi.

Nyee nye Mawu.

Ɖeke megali o.

Nyee nye Mawu, mawu bubu aɖeke megali o;

Nyee nye Mawu, mawu bubu aɖeke mesɔ kplim o.

¹⁰Mena mienya nuwuwua tso gɔmedzedzea,

eye tso blema ke, mienya nu si ava dzɔ.

Megblɔ be, ‘Nye nuɖoɖiwo anɔ anyi tegbee,

eye mawɔ nu siwo katã dze ŋunye,’

¹¹meyɔ xeƒonu tso ɣedzeƒe,

eye tso anyigba didi aɖe dzi.

Meyɔ ame aɖe be wòana nye tameɖoɖowo nava eme.

Nu si megblɔ la, eyae mana wòava eme.

Nu si meɖo la, eya ke mawɔ.

¹²Miɖo tom, mi dzimesẽlawo kple mi,

ame siwo le adzɔge na dzɔdzɔenyenye.

¹³Metsɔ nye dzɔdzɔenyenye gbɔnae

be wòate ɖe mia ŋu.

Manɔ adzɔge tso mia gbɔ o,

eye nye ɖeɖe mahe ɖe megbe o.

Mana ɖeɖe nado na Zion,

eye nye atsyɔ̃ anɔ Israel ŋu.”

Babilonia ƒe anyidzedze

¹“Ɖi ɖe anyi nànɔ ke me,

wò Babilonia ƒe vinyɔnu si menya ŋutsu o.

Wò Babiloniatɔwo ƒe vinyɔnu,

nɔ anyi ɖe anyigba,

menye ɖe fiazikpui dzi o.

Womagayɔ wò be lɔlɔ̃vi

alo ame si woalé be na o.

²Yi te dzi nàtu wɔ.

Ɖe wò motsyɔvɔ da ɖi.

Klo wò avɔ ɖe dzi.

Na wò afɔwo nadze, eye nàtso tɔwo.

³Woaɖe amama wò, eye woaklo nu

le wò ŋukpeƒe dzi.

Mabia hlɔ̃,

eye nyemaɖe ame aɖeke le eme o.”

⁴Miaƒe Ɖelae nye Israel ƒe Kɔkɔetɔ la.

Yehowa, Dziƒoʋakɔwo ƒe Aƒetɔe nye eŋkɔ.

⁵“Babiloniatɔwo ƒe vinyɔnu nɔ anyi le ɖoɖoezizi me.

Yi ɖe blukɔ me.

Womagayɔ wò be,

Fiaɖuƒewo ƒe fianyɔnu o.

⁶Medo dziku ɖe nye amewo ŋuti,

eye medo gu nye domenyinu.

Metsɔ wo de asi na wò,

eye mekpɔ nublanui na wo o.

Ètsɔ kɔkuti kpekpe da ɖe

ametsitsi belibeliwo gɔ̃ hã dzi.

⁷Ègblɔ be, ‘Nye la, mayi edzi tegbee.

Manye fianyɔnu yi ɖe mavɔ me!’

Ke mèbu nu siawo ŋu

alo de ŋugble le nu si ava dzɔ la ŋu o.

⁸“Ke azɔ la, ɖo to afii.

Wò nugblẽla vloe si ɖe dzi ɖi blewu

le wò dedinɔnɔ me, eye nègblɔ na ɖokuiwò be,

‘Nye koe, mawu aɖeke megali kpe ɖe ŋunye o.

Nyemanye ahosi alo ana vinyewo natsrɔ̃ o.’

⁹Esiawo kple evea katã ava dziwò

le aɖabaƒoƒo ɖeka me le ŋkeke ɖeka dzi.

Viwòwo atsrɔ̃, eye nàzu ahosi.

Wo katã woava dziwò pɛpɛpɛ togbɔ be afakalawo

kple gbesa sesẽ geɖewo le asiwò hã.

¹⁰Èka ɖe wò vɔ̃ɖivɔ̃ɖitɔnyenye dzi hegblɔ be,

‘Ame aɖeke mekpɔam o.’

Wò nunya kple gɔmesese ble wò

nègblɔ na ɖokuiwò be,

‘Nye koe, mawu aɖeke megali kpe ɖe ŋunye o.’

¹¹Gbegblẽ aƒo ɖe dziwò,

eye mànya ale si nàwɔ asa gbe adee wòadzo o.

Dzɔgbevɔ̃e adzɔ ɖe dziwò,

esi màte ŋu aɖe ɖa kple awɔbanu o.

Tsɔtsrɔ̃ si mèle mɔ kpɔm na o la,

aƒo ɖe dziwò kpoyi.

¹²“Eya ta yi wò amlimagbesawo,

wò nukakawo dzi,

esiwo me nèƒo ɖokuiwò ɖo tso wò ɖevime ke.

Ɖewohĩ akpɔ dzidzedze,

ɖewohĩ ahe ŋɔdzi vɛ.

¹³Aɖaŋudede gbogbo siwo katã nèxɔ la,

ɖeko wona nègbɔdzɔ!

Na wò ɣletivimenunyalawo nava.

Ame siwo léa ŋku ɖe ɣletiviwo ŋu

hegblɔa nya ɖi dzinu sia dzinu la, na ne woaɖe wò

tso nu siwo gbɔna dzɔdzɔ ge ɖe dziwò la me.

¹⁴Vavãe wole abe atitakpo ƒuƒu ene.

Dzo afia wo katã.

Womate ŋu aɖe wo ɖokui gɔ̃ hã

tso dzo ƒe aɖewo me o.

Afi sia dzoka xɔxɔwo meli ame aɖeke naƒu o.

Afi sia womedo dzo ɖi,

ame aɖeke naƒu o.

¹⁵Ame siwo nèwɔ dɔ sesẽwo kpli,

eye nèzɔ mɔ geɖewo kpli wo tso wò ɖevime ke la,

esia koe nye nu si woate ŋu awɔ na wò.

Ɖe sia ɖe lé eƒe mɔ tsɔ le vodada me,

eye ɖeka hɔ̃ɔ hã meli si aɖe wò o.”

Israel, dukɔ tosesẽtɔ la

¹“O! Yakob ƒe aƒe, miɖo to nya sia.

Mi ame siwo ŋu woyɔ Israel ɖo,

eye mietso Yuda ƒe dzidzime me.

Mi ame siwo ka atam kple Yehowa ƒe ŋkɔ,

eye mieyɔa Israel ƒe Mawu la ƒe ŋkɔ,

gake menye le nyateƒe alo dzɔdzɔenyenye me o.

²Mi ame siwo yɔa mia ɖokuiwo be du kɔkɔe la me tɔwo,

eye mieɖo ŋu ɖe Israel ƒe Mawu la ŋu,

ame si ŋkɔe nye Yehowa,

Dziƒoʋakɔwo ƒe Aƒetɔ.

³Megblɔ nu siwo dzɔ va yi la da ɖi xoxo.

Metsɔ nye nu ɖe gbeƒã wo,

eye mena mienya wo.

Meɖe zɔ, kasia wo katã wova eme,

⁴elabena menya ale si miaƒe dzi me sẽe.

Miaƒe kɔwo lia abe gakpo ene,

eye miaƒe tagbɔ sẽ abe akɔbli ene,

⁵eya ta megblɔ nu siawo

na mi gbe aɖe gbe ʋĩi va yi.

Hafi woava adzɔ la,

meɖe gbeƒã na mi be miagagblɔ be,

‘Nye legbawoe wɔ wo.

Nye aklamakpakpɛwo

kple akɔblimawue ɖo wo da ɖi,’ o.

⁶Miese esiawo katã.

Mikpɔ wo katã ɖa.

Ɖe mialɔ̃ be wole eme oa?

“Tso azɔ dzi la,

maƒo nu tso nu yeyewo ŋu na mi,

tso nu siwo le ɣaɣla, eye mienya wo o

la ŋuti na mi.

⁷Fifia ko wowɔ wo.

Wo wɔɣi medidi o.

Miese woƒe ŋkɔ kpɔ abe egbea ene o,

eya ta miate ŋu agblɔ be,

‘Ɛ̃ mienya wo’ o.

⁸Miesee kpɔ loo alo se egɔme o.

Tso blema ke, miaƒe towo meʋu o.

Menya ale si miebaɖae la nyuie.

Woyɔa mi tso ɖevime ke be, aglãdzelawo.

⁹Le nye ŋutɔ nye ŋkɔ ta la,

mehe nye dɔmedzoe ɖe megbe.

Le nye kafukafu ta la, nyemena wòva mia dzi o,

be nyematsrɔ̃ mi o.

¹⁰Kpɔ ɖa, melolõ mi, gake menye abe klosalo ene o.

Medo mi kpɔ le fuwɔame ƒe kpodzo me.

¹¹Le nye ŋutɔ ta, mewɔ esia ɖo.

Aleke maɖe mɔ be woaɖi gbɔ̃m?

Nyematsɔ nye ŋutikɔkɔe

na ame bubu o.”

Israel kpɔ ɖeɖe

¹²“O! Yakob, ɖo tom, Israel, ame si meyɔ.

Nyee nye gbãtɔ, eye nyee nye mlɔetɔ hã.

¹³Nye ŋutɔe tsɔ nye asiwo ɖo anyigba gɔme anyi,

eye nye nuɖusibɔe metsɔ keke dziwo mee.

Ne meyɔ wo la,

wo katã wotsona ɖekae.

¹⁴“Mi katã miva ƒo ƒu ne miaɖo to afii.

Legbawo dometɔ kae gblɔ nu siawo da ɖi?

Ame si Yehowa tia la ana Yehowa ƒe

tameɖoɖo ɖe Babilonia ŋu nava eme, eye wòakɔ

eƒe abɔ dzi ɖe Babiloniatɔwo ŋu.

¹⁵Nye, nye koe ƒo nu. Ɛ̃, nyee yɔe.

Makplɔe vɛ, eye wòakpɔ dzidzedze le eƒe dɔdeasi la me.

¹⁶“Mite ɖe ŋunye kpokploe ne miaɖo to nya sia,

nyemeƒo nu le bebeme o.”

Esi wòva eme la, menɔ afi ma?

Azɔ Yehowa, Dziƒoʋakɔwo ƒe Aƒetɔ la dɔm kple eƒe Gbɔgbɔ.

¹⁷Ale Yehowa, wò Ɖela,

Israel ƒe Kɔkɔetɔ la gblɔe nye esi,

“Nyee nye Yehowa, wò Mawu,

si fiaa nu si nyo na wò la wò,

ame si fiaa mɔ si nàto la wò.

¹⁸Nenye ɖe nèɖo to nye sededewo la,

anye ne wò ŋutifafa anɔ sisim abe tɔsisi ene,

eye wò dzɔdzɔenyenye anɔ abe ƒutsotsoe ene.

¹⁹Wò dzidzimeviwo ɖe woasɔ gbɔ abe ke ene,

eye viwòwo abe ƒutake si womate ŋu axlẽ o la ene.

Womaɖe woƒe ŋkɔwo ɖa loo

alo woatsrɔ̃ le ŋkunye me o.”

²⁰Midzo le Babilonia, misi le Babiloniatɔwo gbɔ!

Mitsɔ dzidzɔɣli ɖe gbeƒã esia, eye mido bobloe.

Miɖo du ɖe anyigba ƒe mlɔenuwo ke be,

“Yehowa ɖe eƒe dɔla Yakob”

²¹Tsikɔ mewu wo esi wòkplɔ wo to gbedzi o.

Ena tsi do tso agakpe me na wo.

Egbã agakpe la,

eye tsi do bababa.

²²Yehowa be,

“Ŋutifafa meli na ame vɔ̃ɖiwo o.”

Yehowa ƒe dɔla

¹Miɖo tom, mi ƒukpowo,

mise nya sia, mi didiƒe dukɔwo:

Hafi woava dzim la, Yehowa yɔm.

Tso nye vidzĩ me wòyɔ nye ŋkɔ.

²Ewɔ nye nu abe yi ɖaɖɛ ene.

Etsɔm ɣla ɖe eƒe asi ƒe vɔvɔli te.

Etsɔm wɔ aŋutrɔ ɖaɖɛ,

eye wòɣlam ɖe eƒe daku me.

³Egblɔ nam be, “Wòe nye nye dɔla, Israel,

si me maɖe nye atsyɔ̃ afia le.”

⁴Ke megblɔ be, “Nye agbagbadzedzewo nye dzodzro.

Megblẽ nye ŋusẽ ɖe yame,

eye nyemeɖe vi aɖeke o.

Ke hã la, nu si nye tɔnye gome la,

le Yehowa ƒe asi me, eye nye fetu le nye Mawu gbɔ.”

⁵Azɔ la, ale Yehowa,

ame si mem ɖe dɔ me be manye yeƒe dɔla la,

be makplɔ Yakob gbɔe ne maƒo ƒu Israel ɖe egbɔ,

elabena wode bubu ŋunye le Yehowa ŋkume,

eye nye Mawu nye nye ŋusẽ la gblɔe nye esi:

⁶“Nu tsɛ ko wònye le ŋkuwò me be,

nènye nye dɔla, be nàgaɖo Israel ƒe towo te,

eye nàkplɔ Israel ƒe ame siwo mesusɔ ɖi la gbɔe.

Gawu la, mawɔ wò nànye kekeli na ame siwo menye Yudatɔwo o la,

be nàhe nye ɖeɖe vɛ na anyigba ƒe mlɔenuwo ke.”

⁷Ale Yehowa, Ɖela kple Israel ƒe Kɔkɔetɔ la gblɔ

na dziɖulawo ƒe dɔla be,

“Fiawo akpɔ wò, eye woatso anɔ tsitre.

Fiaviwo akpɔ wò, eye woade ta agu

na Yehowa nuteƒewɔla,

Israel ƒe Kɔkɔetɔ la,

ame si tia wò la ta.”

Mawu gbugbɔ Israel ɖo te

⁸Ale Yehowa gblɔe nye esi,

“Le nye dɔmenyo ƒe ɣeyiɣiwo me la, matɔ na wò,

eye le xɔxɔgbe makpe ɖe ŋu wò.

Malé wò ɖe asi, eye mawɔ wò nànye nubabla na amewo,

be nàgbugbɔ anyigba aɖo te,

eye nagbugbɔ eƒe domenyinu

siwo tsi yame la ama,

⁹ekema nàgblɔ na aboyomenɔlawo be, ‘Mido va’,

eye na ame siwo le blukɔ me la be, ‘Miva kekeli nu!’

“Woaɖu nu le mɔwo to, eye woakpɔ gbeɖuƒe

le togbɛ ƒuƒluwo tame.

¹⁰Dɔ kple tsikɔ magawu wo azɔ o.

Dzogbe xɔdzo alo ŋdɔkutsu magaɖu wo azɔ o.

Ame si kpɔa nublanui na wo la anye woƒe mɔfiala,

eye wòakplɔ wo ayi tɔʋuwo to.

¹¹Matrɔ nye towo katã woazu mɔtatawo,

eye woakɔ nye mɔ dodowo ɖe dzi.

¹²Kpɔ ɖa, woatso teƒe didiwo ava.

Ɖewo atso anyiehe,

ɖewo atso ɣetoɖoƒe, eye ɖewo hã

atso Aswan nutowo me.”

¹³Mido dzidzɔɣli, o mi dziƒowo!

O! Anyigba netso aseye.

Mido ha ɖa kple dzidzɔ.

O, mi towo!

Elabena Yehowa fa akɔ na eƒe dukɔ,

eye wòakpɔ nublanui na

ame siwo ŋu wode abie.

¹⁴Ke Zion gblɔ be, “Yehowa gblem ɖi,

Aƒetɔ la ŋlɔm be.”

¹⁵“Ɖe nyɔnu aŋlɔ vi si le no nu la be,

eye makpɔ nublanui na vi si eya ŋutɔ dzi oa?

Togbɔ be ate ŋu aŋlɔe be hã la,

nye ya nyemaŋlɔ wò be o!

¹⁶Kpɔ ɖa, meŋlɔ wò ŋkɔ ɖe nye asiƒowo me,

eye wò gliwo le ŋkunye me ɖaa.

¹⁷Viwò ŋutsuwo ɖe abla trɔ gbɔ,

eye ame siwo ha mi la dzo le mia gbɔ.

¹⁸Mifɔ mo dzi, eye miatsa ŋku godoo.

Mia viŋutsuwo katã aƒo ƒu ava mia gbɔ,

zi ale si mele agbe.” Yehowae gblɔe.

“Miado wo abe ale si wodoa atsyɔ̃ɖonuwoe ene,

eye miatsɔ wo ado abe ale si ŋugbetɔ doa nu ene.

¹⁹“Togbɔ be wogbã mi,

miezu aƒedo, eye miaƒe anyigba zu gbegbe hã la,

azɔ la, anɔ sue akpa na wò amewo,

eye ame siwo vuvu mi la,

anɔ adzɔge na mi.

²⁰Vi siwo wodzi na mi le miaƒe konyifaɣiwo me la,

agblɔ ɖe to me na mi be,

‘Teƒe sia le sue akpa na mí.

Mina teƒe keke mí míanɔ.’

²¹Ekema àgblɔ le wò dzi me be,

‘Ame kae dzi ame siawo katã nam?

Kunyawo dzɔ ɖe dzinye, eye metsi ko.

Woɖe aboyom hegbe nu le gbɔnye.

Ame kae nyi ame siawo wotsi?

Nye ɖeka ko wogblẽ ɖi,

ke ame siawo ɖe afi ka wotso?’ ”

²²Ale Aƒetɔ, Yehowa gblɔe nye esi,

“Kpɔ ɖa, mamia asi Trɔ̃subɔlawo,

makɔ nye aflaga dzi na amewo.

Woalé mia viŋutsuwo ɖe woƒe abɔwo dome atsɔ vɛ,

eye woakɔ mia vinyɔnuwo ɖe abɔta vɛ.

²³Fiawo aɖu fofo na mia viwo,

fia nyɔnuwo ana no mia viwo.

Woade ta agu, atsyɔ mo anyi na mi le ŋkuwò me,

eye woaɖuɖɔ ke le afɔŋu na wò.

Ekema ànyae be nyee nye Yehowa,

ame siwo tsɔa woƒe mɔkpɔkpɔwo dana ɖe dzinye la,

nyemenana ŋu kpea wo o.”

²⁴Ɖe woate ŋu axɔ nu siwo kalẽtɔwo ha la

le wo si alo axɔ aboyomewo le ŋutasẽlawo sia?

²⁵Ke ale Yehowa gblɔ nye esi,

“Ɛ̃, woate ŋu axɔ nuhahawo le kalẽtɔwo si,

eye woaɖe aboyomewo le ŋutasẽlawo ƒe fego me.

Mawɔ avu kple ame siwo awɔ

avu kpli wò, eye maɖe viwòwo.

²⁶Mana ame siwo te wò ɖe enyi la

naɖu woawo ŋutɔ ƒe ŋutilã,

eye woano woawo ŋutɔ ƒe ʋu wòamu wo abe wain ene,

ekema amegbetɔƒomea anyae be,

nye Yehowae nye wò Ɖela,

eye Yakob ƒe Ŋusẽtɔ lae nye wò Xɔnametɔ.”

Israel ƒe nu vɔ̃ kple dɔla la ƒe toɖoɖo

¹Ale Yehowa gblɔe nye esi,

“Afi ka mia dada ƒe srɔ̃gbegbalẽ si metsɔ gbee la le?

Alo ame siwo ŋu menyi fe le

la dometɔ kae metsɔ mi dzra na?

Miaƒe nu vɔ̃wo tae wotsɔ mi dzra ɖo.

Miaƒe dzidadawo tae wonya mia dada ɖo.

²Nu ka ta esi meva la, ame aɖeke meli o?

Nu ka ta esi meyɔ mi la, ame aɖeke metɔ o?

Ɖe nye abɔ to ɖe me be mate ŋu aɖe mi oa?

Ɖe ŋusẽ mele ŋunye be maxɔ na mi oa?

Gbe ko meɖe, tete atsiaƒu mie.

Mena tɔsisiwo zu gbegbe, eye lã siwo le wo me la ƒaƒã,

elabena tsi mie le wo ŋu,

eye tsikɔ wu wo woku.

³Metsɔ viviti tsyɔ lilikpo ŋgɔ,

eye mena akpanya zu edzitsyɔnu.”

⁴Aƒetɔ Yehowa tsɔ nufiala ƒe aɖe nam

be manya nya si matsɔ ado ŋusẽ

ame si gbɔdzɔ lae.

Enyɔam ŋdi sia ŋdi.

Eʋua nye to be mase nu

abe ame si wole nu fiam la ene.

⁵Aƒetɔ Yehowa, ʋu nye towo, eye nyemadze aglã o,

nyemegbugbɔ yi megbe hã o.

⁶Metrɔ nye dzime na ame siwo ƒom,

metrɔ nye tome na ame siwo nyɔa ge nam la.

Nyemeɣla nye mo ɖe fewuɖulawo

kple ame siwo nyɔa ta ɖe mo nam o.

⁷Esi Aƒetɔ Yehowa, kpena ɖe ŋunye ta la,

ŋu makpem o,

eya ta mewɔ nye mo wòse abe hlihakpe ene,

eye menya be ŋu makpem o.

⁸Ame si ɖeam le nya me la tsɔ ɖe gbɔnye,

eya ta ame kae ate ŋu atsɔ nya ɖe ŋunye?

Nena míado go ŋkume kple ŋkume!

Ame kae nye nunyetsola?

Nekpe avu kplim!

⁹Aƒetɔ Yehowae kpe ɖe ŋunye.

Ame ka ate ŋu abu fɔm?

Wo katã woanyunyɔ abe avɔ ene

eye agbagblaʋui aɖu wo.

¹⁰Ame kae le mia dome si vɔ̃a Yehowa,

eye wòwɔa eƒe dɔla ƒe nya dzi?

Na ame si le viviti me zɔm,

akaɖi mele esi o la naka ɖe Yehowa ƒe ŋkɔ dzi,

eye wòaɖo ŋu ɖe eƒe Mawu la ŋuti.

¹¹Ke azɔ mi ame siwo katã do dzo,

eye miewɔ akakatiwo na mia ɖokuiwo la, miyi,

eye miazɔ le miaƒe dzo siwo miedo

kple akakati siwo miesi la ƒe keklẽ nu.

Esiae nye nu si miaxɔ tso asinyeme:

Miamlɔ anyi ɖe fuwɔame me.

Ɖeɖe mavɔ na Zion

¹“Miɖo tom, mi ame siwo tia dzɔdzɔenyenye yome,

eye miedia Yehowa.

Mikpɔ agakpe si me woɖe mi tsoe

kple fukpekpe si me woɖe mi le la dzi.

²Mikpɔ mia fofo Abraham kple Sara,

ame siwo dzi mi la dzi.

Esi meyɔe la, eya ɖeka koe,

gake meyrae, eye mewɔe wòzu ame geɖe.

³Yehowa afa akɔ na Zion godoo, eye anye kɔ akpɔ

eƒe gli gbagbãwo kple dɔmetɔtrɔ.

Atrɔ eƒe gbegbe wòazu Edenbɔ,

eƒe kuɖinyigbawo abe Yehowa ƒe abɔ ene.

Dzidzɔ kple vivisese anɔ afi ma

eye akpedada kple hadzidzi hã anɔ afi ma.

⁴“Nye amehawo, miɖo tom,

nye dukɔ, miaƒe to nenɔ ŋunye:

Nufiame atso gbɔnye,

eye nye ʋɔnu dzɔdzɔe dɔdrɔ̃

anye kekeli na dukɔwo.

⁵Nye dzɔdzɔenyenye gbɔna kple du,

nye ɖeɖe le mɔ dzi gbɔna,

eye nye abɔ ahe afia nyui

tsotso vɛ na dukɔwo.

Ƒukpowo akpɔ mɔ nam, eye woalala

kple mɔkpɔkpɔ anɔ nye alɔ sinu kpɔm.

⁶Mifɔ mo dzi ne miakpɔ dziƒo,

mide mo to ne miakpɔ anyigba.

Dziƒowo nu ava yi abe dzudzɔ ene.

Anyigba anyunyɔ abe avɔ ene,

eye edzinɔlawo aku abe tagbatsutsu ene,

ke nye xɔname anɔ anyi ɖikaa,

eye nye dzɔdzɔenyenye nu matsi gbeɖe o.

⁷“Miɖo tom, mi ame siwo nya nu si le dzɔdzɔe.

Mi ame siwo ƒe dziwo me nye se la le,

migavɔ̃ amewo ƒe mokaname o,

eye woƒe dzu megado ŋɔdzi na mi o,

⁸elabena gbagblaʋui aɖu wo abe avɔ ene,

eye ŋɔ aɖu wo abe ɖetifu ene.

Ke nye dzɔdzɔenyenye la anɔ anyi tegbee,

eye nye xɔname anɔ anyi tso dzidzime yi dzidzime.”

⁹Nyɔ, nyɔ! O! Yehowa ƒe alɔ, ne nàtsɔ ŋusẽ ado.

Nyɔ abe le tsã ƒe ɣeyiɣiwo kple blemaŋɔliwo ene.

Ɖe menye wòe fli Rahab kakɛkakɛ,

eye nètsɔ nu ƒo ɖe lã dziŋɔ la oa?

¹⁰Ɖe menye wòe na atsiaƒu,

tɔ goglo la me tsiwo mie,

eye nèta mɔ ɖe atsiaƒu me be

ame siwo woɖe la nato edzi ayi oa?

¹¹Yehowa ƒe ame siwo woɖe la atrɔ agbɔ.

Woage ɖe Zion kple aseyetsotso,

eye dzidzɔkpɔkpɔ anye fiakuku anɔ woƒe tawo dzi.

Vivisese kple dzidzɔkpɔkpɔ asu wo si,

eye nuxaxa kple hũɖeɖe abu ɖe wo.

¹²“Nye, nye koe faa akɔ na mi.

Ame kae nènye be nèle vɔvɔ̃m na amegbetɔ

siwo le abe gbe ko ene?

¹³Nu ka ta nèŋlɔ Yehowa,

wò Wɔla, si keke dziƒowo me,

eye wòɖo anyigba ƒe agunu anyi la be?

Nu ka ta ŋɔdzi léa wò gbe sia gbe

le ameteɖeanyila ƒe dɔmedzoe ta,

ame si ɖoe kplikpaa be yeagblẽ nu?

Afi ka ameteɖeanyila ƒe dɔmedzoe la le azɔ?

¹⁴Woaɖe ga gamenɔla siwo le vɔvɔ̃m la kpuie.

Womaku ɖe gaxɔ me loo

alo abolo nahiã wo o,

¹⁵elabena nyee nye Yehowa, wò Mawu,

ame si de adã atsiaƒu me be ƒutsotsoewo dze agbo.

Yehowa, Dziƒoʋakɔwo ƒe Aƒetɔe nye eŋkɔ.

¹⁶Metsɔ nye nyawo de nuwò,

eye meɣla wò ɖe nye asi ƒe vɔvɔli te.

Nye ame si tsɔ dziƒowo ɖo

wo teƒe heɖo anyigba gɔme anyi,

eye megblɔ na Zion be, ‘Nye dukɔ nènye.’ ”

Yehowa ƒe dɔmedzoekplu

¹⁷Nyɔ, nyɔ! O! Yerusalem, fɔ,

wò ame si ƒe dɔmedzoekplu le Yehowa ƒe asi me.

Wò ame si no nu muame la wòvɔ ƒioƒioƒio,

kplu si nana amewo zɔna sɔgɔsɔgɔ.

¹⁸Viŋutsu siwo katã wòdzi la ɖeke meli afia mɔe o.

Viŋutsu siwo katã wònyi la, ɖeke meli alé eƒe alɔnu o.

¹⁹Dzɔgbevɔ̃e evee dzɔ ɖe dziwò,

ame kae ate ŋu afa akɔ na wò?

Gbegblẽ kple tsɔtsrɔ̃,

dɔwuame kple yi ƒo go wò,

ame ka ate ŋu afa akɔ na wò.

²⁰Nu te viwò ŋutsuwo ŋu.

Womlɔ mɔtata ɖe sia ɖe ƒe dzogoewo dzi

abe avugbɔ̃e si ɖo mɔ me la ene.

Yehowa ƒe dɔmedzoe kple wò Mawu la

ƒe mokaname ɖi ƒo na wo,

²¹eya ta ɖo to afii,

wò ame si kpe hiã, eye nèmu aha,

evɔ mèno wain hã o.

²²Ale wò Aƒetɔ, Yehowa gblɔe nye esi,

wò Mawu si ʋli eƒe dukɔ ta la be,

“Kpɔ ɖa, mexɔ kplu si na nèle mumum sɔgɔsɔgɔ la le asiwò.

Màgano nye dɔmedzoe ƒe nu muame la

le kplu sia me azɔ gbeɖe o.

²³Matsɔe ade asi na wò fuwɔamela

siwo gblɔna na wò be,

‘Mlɔ anyi ne míazɔ dziwò ayi’,

eye nèwɔ wò dzime abe anyigba

kple mɔdodo ene be woato edzi ayi.”

¹Nyɔ! O! Zion, nyɔ ne nàta ŋusẽ.

Tsɔ wò atsyɔ̃vɔ nàta.

O! Yerusalem, du kɔkɔe.

Aʋamatsolawo kple ame makɔmakɔwo

magage ɖe mewò azɔ o.

²Ʋuʋu ke le ŋutiwò.

Tsi tsitre! Yerusalem, ne nànɔ fiazi dzi.

O! Zion nyɔnuvi si woɖe aboyoe,

ɖe ga si wode kɔ na wò la ɖa.

³Elabena ale Yehowa gblɔe nye esi,

“Wotsɔ mi dzra naneke maxɔmaxɔe,

eya ta woagbugbɔ mi axɔ,

gake menye kple ga o.”

⁴Ale Aƒetɔ Yehowa gblɔe nye esi:

“Tsã la, nye dukɔ yi Egipte be wòanɔ afi ma.

Emegbe la, Asiriatɔwo tee ɖe to vevie.

⁵“Ke azɔ la, nu kae le asinye le afi sia?” Yehowae gblɔe.

“Esi me wokplɔ nye dukɔ dzoe yakatsyɔ,

eye wo dziɖulawo ɖua fewu le wo ŋu.”

Yehowae gblɔe.

“Gbe sia gbe

wole gbɔ̃ ɖim nye ŋkɔ,

⁶eya ta nye dukɔ anya nye ŋkɔ,

eye le ŋkeke ma dzi la,

woanya be nyee gblɔe da ɖi.

Ɛ̃, be nyee.”

⁷Du nyui tsɔlawo ƒe afɔwo nyo le towo dzi loo!

Ame siwo ɖea gbeƒã ŋutifafa,

ame siwo hea gbedeasi nyuiwo vɛ.

Ame siwo ɖe gbeƒã ɖeɖekpɔkpɔ,

eye wogblɔna na Zion be,

“Wò Mawu nye fia ɖaa!”

⁸Ɖo to afii, wò gbetakpɔlawo kɔ

woƒe gbewo dzi hedo dzidzɔɣli ɖekae.

Ne Yehowa trɔ gbɔ va Zion la,

woakpɔe kple woƒe ŋkuwo.

⁹Midzi dzidzɔhawo,

mi Yerusalem ƒe gli kpowo,

elabena Yehowa fa akɔ na eƒe dukɔ,

eye wòɖe Yerusalem.

¹⁰Yehowa aklo nu le eƒe abɔ kɔkɔe la ŋu

le dukɔwo ƒe ŋkume,

eye anyigba ƒe mlɔenuwo ke hã

akpɔ mia Mawu la ƒe ɖeɖe.

¹¹Midzo, midzo, mido go le afi ma!

Migaka asi nu makɔmakɔ aɖeke ŋu o!

Mido go le eme, Migade asi woƒe nu siwo ŋuti mekɔ o.

Mi ame siwo lé Yehowa ƒe kpluwo ɖe asi.

¹²Ke miadzo kplakplakpla alo asi adzo o,

elabena Yehowa adze ŋgɔ na mi,

eye Israel ƒe Mawu la axe megbe na mi.

Dɔla la ƒe fukpekpe kple ŋutikɔkɔe

¹³Kpɔɖa, nye dɔla awɔ nu ɖe nunya me.

Woadoe ɖe dzi.

Axɔ ŋkɔ, eye woade bubu gã aɖe eŋu.

¹⁴Abe ale si ame geɖewo ƒe nu ku le eŋuti,

eƒe dzedzeme tro kpaɖikpaɖi wu

ame sia ame tɔ, eye eƒe nɔnɔme gblẽ ale gbegbe be,

megaɖi amegbetɔ o ene la,

¹⁵nenema kee wòahlẽ nu ɖe dukɔ geɖewo dzi,

eye fiawo amia nu le eya amea ta,

elabena woakpɔ nu si womegblɔ na wo o,

eye woase nu si womese kpɔ o la gɔme.

¹Ame kae xɔ miaƒe gbedeasi la dzi se,

eye ame ka ŋue woɖe Aƒetɔ la ƒe alɔ fia ɖo?

²Edze abe atilɔ fɛ̃ ene le eŋkume,

eye wòle abe ke si woɖe

le anyigba ƒuƒu me la ene.

Nyonyo alo fianyenye mele eŋu ne

eƒe nu nanyo mia ŋu o.

Naneke mele eƒe dzedzeme ŋu

si awɔe be wòadzro mí o.

³Amewo do vloe, eye wogbee.

Ŋutsu si dzi vevesese kple fukpekpe le la wònye.

Ele abe ame si ta amewo tsɔ nu tsyɔ ŋkume ɖo la ene.

Wodo vloe, eye míebui ɖe naneke me o.

⁴Ke le nyateƒe me la, eyae tsɔ míaƒe dɔlélewo,

eye wòde ta míaƒe vevesesewo te,

gake míebui abe ame si Mawu ƒo,

eye wòtsɔ fukpekpewo da ɖe edzi la ene.

⁵Ke woƒo nu ɖee le míaƒe dzidadawo ta.

Wogbãe gudugudu ɖe míaƒe nu vɔ̃wo ta.

Tohehe si he ŋutifafa vɛ na mí la le eya amea dzi,

eye eƒe abi siwo wòxɔ la yɔ dɔ mí.

⁶Mí katã míetra mɔ abe alẽwo ene.

Mía dometɔ ɖe sia ɖe lé eƒe mɔ tsɔ;

ke Yehowa tsɔ mí katã ƒe nu vɔ̃wo da

ɖe eya amea dzi.

⁷Wotee ɖe to, eye wòkpe fu, gake meke nu o.

Wokplɔe abe alẽ ene yina wuwu ge.

Ezi ɖoɖoe kpoo abe alẽ si le

eƒe fukolawo ŋkume la ene, eye meke nu o.

⁸Wolée, hedrɔ̃ ʋɔnui, eye wokplɔe dzoe.

Ame ka ate ŋu aƒo nu le eƒe dzidzimeviwo ŋuti?

Woɖee ɖa le agbagbeawo ƒe anyigba dzi.

Le nye amewo ƒe dzidadawo ta woƒoe ɖo.

⁹Woɖe yɔdo nɛ ɖe ame vɔ̃ɖiwo dome,

eye le eƒe ku me, wòmlɔ kesinɔtɔwo dome;

evɔ mewɔ vɔ̃ aɖeke loo alo beble nɔ eƒe nu me o.

¹⁰Ke enye Yehowa ƒe lɔlɔ̃nu be wòagbãe gudugudu,

ana wòakpe fu togbɔ be Yehowa tsɔ

eƒe agbe wɔ fɔɖivɔsae hã la,

akpɔ eƒe dzidzimeviwo.

Adidi eƒe ŋkekewo ɖe edzi,

eye Yehowa ƒe lɔlɔ̃nu ava eme to eƒe asi dzi.

¹¹Ne eƒe luʋɔ kpe fu vɔ la,

akpɔ agbe ƒe kekeli, eye eƒe dzi adze eme;

to enyanya me, nye dɔla dzɔdzɔe atso afia

na ame geɖewo, eye wòade ta woƒe nu vɔ̃wo te,

¹²eya ta mana gomekpɔkpɔe

le ame ŋkutawo dome.

Ama afunyinuwo kple kalẽtɔwo,

elabena etsɔ eƒe agbe de ku me ke,

eye wowui ɖe nu vɔ̃ wɔlawo dome ene;

evɔ eyae tsɔ ame geɖewo ƒe nu vɔ̃,

eye wòxɔ nya ɖe vodalawo nu.

Ŋutikɔkɔe si ava Zion dzi

¹“Tso aseye, o konɔ,

wò ame si medzi vi kpɔ o.

Wò ame si melé ku kpɔ o.

Dzi ha nàdo dzidzɔɣli,

elabena nyɔnu si tsi akogo la

ƒe viwo sɔ gbɔ wu nyɔnu si si srɔ̃ le la.”

Yehowae gblɔe.

²Keke wò agbadɔ ƒe nɔƒe ɖe edzi,

he wò agbadɔvɔ la me ɖe edzi;

he wò agbadɔvɔ la me ɖe edzi,

mègatoe ɖe eme o.

Didi wò agbadɔkawo ɖe enu,

eye nàƒo wò tsyotiwo ɖe to sesĩe,

³elabena akeke ta ayi ɖusime kple miame.

Wò dzidzimeviwo axɔ dukɔwo

ƒe anyigbawo le wo si, eye woatso aƒewo ɖe

woƒe du gbagbãwo me, anɔ wo me.

⁴“Mègavɔ̃ o, elabena wò mo matsi dãa o.

Mègavɔ̃ na ŋukpeɖuɖu o,

elabena womado vlo wò o.

Àŋlɔ wò ɖetugbimeŋukpewo be,

eye màgaɖo ŋku wò ahosinyenye

ƒe vlododowo dzi o,

⁵elabena wò wɔlae nye srɔ̃wò.

Eƒe ŋkɔe nye Yehowa, Dziƒoʋakɔwo ƒe Aƒetɔ.

Israel ƒe Kɔkɔetɔ lae nye wò Ɖela.

Woyɔnɛ be anyigba blibo la ƒe Mawu.

⁶Yehowa agbugbɔ ayɔ wò vɛ,

abe nyɔnu si gbɔ srɔ̃a gbe nu le,

eye eƒe gbɔgbɔ le nu xam la ene.

Abe ame si ɖe srɔ̃ le ɖetugbime,

eye srɔ̃a gblee ɖi la ene”

Wò Mawu lae gblɔe.

⁷“Megble wò ɖi ɣeyiɣi kpui aɖe ko,

gake matsɔ dɔmetɔtrɔ si goglo la akplɔ wò agbɔe.

⁸Le nye dziku sesẽ la me meɣla

nye mo ɖe wò ɣeyiɣi kpui aɖe,

gake matsɔ dɔmenyo si nɔa anyi

tegbee la ave nuwòe.”

Yehowa, wò Ɖelae gblɔe.

⁹“Ele nam ko abe Noa ƒe ɣeyiɣiwo me ene,

esi meka atam be ale si tsi ɖe anyigbae le Noa ŋɔli la,

magadzɔ nenema akpɔ gbeɖe o.

Nenema kee meka atam azɔ be

nyemagado dziku ɖe mia ŋuti o

eye nyemagaka mo na mi akpɔ o.

¹⁰Togbɔ be towo aʋa, eye togbɛwo aɖe ɖa hã la,

nye lɔlɔ̃ mavɔ si metsɔ lɔ̃ mi la maʋã o,

eye nye ŋutifafanubabla mate ɖa o.”

Yehowa, wò nublanuikpɔlae gblɔe.

¹¹“O! Wò du si kpe hiã,

ahom lɔ wò ɖe nu, eye womefa akɔ na wò o.

Matsɔ kpe ŋɔŋɔewo atu wòe,

eye matsɔ adzagba aɖo gɔwòme anyi.

¹²Matsɔ gbloti asrã wò xɔtamee,

wò agbowo anye lekewɔnu siwo le keklẽm,

eye wò gliwo anye kpe xɔasiwo.

¹³Yehowa afia nu viwò ŋutsuwo katã,

eye viwòwo ƒe ŋutifafa asɔ gbɔ fũu.

¹⁴Woaɖo gɔwòme anyi le dzɔdzɔenyenye me.

Ŋutasesẽ anɔ adzɔge na wò.

Màvɔ̃ na naneke o.

Ŋɔdzi ate ɖa xaa tso gbɔwò,

eye mate ɖe ŋuwò o.

¹⁵Ne ame aɖe wɔ avu kpli wò la, menye nyee dɔe o.

Ame si awɔ avu kpli wò la, ana ta.

¹⁶“Kpɔ ɖa, nyee wɔ gbede

si yɔa ʋu ɖe dzo te wòléna,

eye wòtua lãnu si hiã na eƒe dɔ.

Nyee wɔ nugblẽla be wòagblẽ nu;

¹⁷lãnu sia lãnu si wotu ɖe ŋutiwò la,

madze edzi o,

eye àɖu aɖe sia aɖe si atso ɖe

ŋutiwò le ʋɔnu la dzi.

Esiae nye Yehowa ƒe dɔlawo ƒe domenyinu,

eye wòganye afiatsotso na wò tso gbɔnye,”

Yehowae gblɔe.

Tsikɔwuawo kpekpe

¹“Miva, mi ame siwo katã tsikɔ le wuwum.

Miva tsi gbɔ, eye mi ame siwo si ga mele o,

miva ƒle nu ne miaɖu!

Miva dze wain kple nyinotsi,

menye kple ga o,

ke boŋ femaxee.

²Nu ka ta miagblẽ ga ɖe nu si menye abolo o la ŋuti,

eye miagblẽ miaƒe ɣeyiɣi ɖe nu

si meɖia ƒodo o la ŋuti?

Miɖo to, miɖo tom ne miaɖu nu si nyo,

eye miaƒe luʋɔ akpɔ dzidzɔ ɖe

nuɖuɖu nyuitɔ kekeake ŋuti.

³Miɖo to ne miava gbɔnye.

Miɖo tom be miaƒe luʋɔ nanɔ agbe.

Mabla nu mavɔ kpli mi,

elabena metsɔ nye lɔlɔ̃ si meʋãna o

la do ŋugbee na David.

⁴Kpɔ ɖa, metsɔe wɔ ɖasefoe na dukɔwo be

wòanye kplɔla kple aʋafia na dukɔwo.

⁵Le nyateƒe me,

miayɔ dukɔ siwo mienya o la aƒo ƒu,

eye dukɔ siwo mienya o

la aɖe abla ava mia gbɔ le Yehowa,

miaƒe Mawu, Israel ƒe Kɔkɔetɔ la,

ta, elabena eyae ɖo atsyɔ̃ na mi!”

⁶Midi Yehowa zi ale si miate ŋu ake ɖe eŋu.

Miyɔe zi ale si wòtsɔ ɖe mia gbɔ.

⁷Ame vɔ̃ɖi neɖe asi le eƒe mɔ vɔ̃ ŋu,

eye ŋutasẽla neɖe asi le eƒe susu vɔ̃wo ŋu,

netrɔ ɖe Yehowa ŋu be wòakpɔ nublanui nɛ

kple miaƒe Mawu la ŋu,

elabena atsɔ wo akee faa.

⁸“Elabena nye susuwo menye miaƒe susuwo o

eye miaƒe mɔwo hã menye nye mɔwo o,”

Yehowae gblɔe.

⁹“Abe ale si dziƒowo kɔ boo tso anyigba gbɔe ene la,

nenema kee nye mɔwo kɔ wu miaƒe mɔwo,

eye nye susuwo kɔ wu miaƒe susuwo.

¹⁰Abe ale si tsi kple tsikpe dzana tso dziƒoe,

eye megatrɔna yia dziƒo o,

negbe ɖe wode tsi anyigba

kple nuku siwo le edzi

be woatse ku nyuiwo na agbledela,

eye woanye abolo na ame si aɖui ene la,

¹¹nenema kee nye,

nye nya si do le nye nu me,

matrɔ agbɔ va gbɔnye ƒuƒlu o;

negbe ɖe wòwɔ nu si medi

kple nu si ta medɔe ɖo la hafi.

¹²Míado go kple dzidzɔkpɔkpɔ,

eye woakplɔ mí le ŋutifafa me.

Towo kple togbɛwo agli

kple dzidzɔkpɔkpɔ le mia ŋgɔ

eye ati kple gbe siwo

le gbedzi la aƒo asikpe.

¹³Le ŋuve teƒe la logotiwo amie na mi,

eye le aŋɔkawo teƒe la gbotiwo amie na mi.

Esia tso Yehowa gbɔ be,

wòanye dzesi mavɔ si womagblẽ akpɔ gbeɖe o.”

Ɖeɖe na ame bubuwo

¹Ale Yehowa gblɔe nye esi,

“Minɔ ʋɔnu dzɔdzɔe dɔdrɔ̃ dzi,

eye miwɔ nu si le dzɔdzɔe,

elabena nye ɖeɖe tsɔ ɖe mia gbɔ,

eye esusɔ vie woaɖe

nye dzɔdzɔenyenye ɖe go.

²Woayra ame si wɔna alea heléa eme ɖe asi sesĩe,

ame si megblẽa kɔ ɖo na Dzudzɔgbe la o,

ke boŋ wòléa eme ɖe asi,

eye menana eƒe asi wɔa nu vɔ̃ɖi o.”

³Amedzro si tsɔ eɖokui na Yehowa la megagblɔ be,

“Yehowa le ɖe nye ge ɖa le eƒe dukɔ la dome” o.

Ŋutsu si wota hã megafa konyi agblɔ be,

“Ati ƒuƒu ko menye” o.

⁴Elabena ale Yehowa gblɔe nye esi,

“Ne ŋutsu siwo wota, lé nye Dzudzɔgbe me ɖe asi,

hetia nu si dzea ŋunye,

eye wolé nye nubabla me ɖe asi goŋgoŋ la,

⁵mana ŋkuɖodzikpe kple ŋkɔ wo ɖe

nye gbedoxɔ kple eƒe gliwo me,

esi nyo wu viŋutsuwo kple vinyɔnuwo.

Matsɔ ŋkɔ mavɔ si womate ŋu

aɖe ɖa akpɔ gbeɖe o la na wo.

⁶Ke hena amedzro siwo ku ɖe Yehowa ŋu

be woanye dɔlawo nɛ,

woalɔ̃ Yehowa ƒe ŋkɔ, eye woasubɔe.

Wo ame siwo katã lé nye Dzudzɔgbe me ɖe asi,

womegblẽ kɔ ɖo nɛ o,

eye woku ɖe nye nubabla ŋu vevie la,

⁷woawoe makplɔ ava nye to kɔkɔe la dzi,

eye mado dzidzɔ na wo le nye gbedoxɔ me.

Maxɔ woƒe numevɔsa kple akpedavɔsa

siwo wotsɔ va nye vɔsamlekpui dzi,

elabena woayɔ nye aƒe

la be dukɔwo katã ƒe gbedoxɔ.”

⁸Aƒetɔ Yehowa, ame si ƒo Israel ƒe amewo nu ƒu la be,

“Magaƒo ame bubuwo nu ƒu,

akpe ɖe ame siwo ƒo ƒu xoxo la ŋu.”

Mawu tsɔ nya ɖe ame vɔ̃ɖiwo ŋu

⁹Miva, mi lã wɔadãwo katã.

Miva ne miavuvu nu,

mi avemelã wɔadãwo katã!

¹⁰Israel ƒe gbetakpɔlawo katã nye ŋkugbagbãtɔwo.

Nunya metso aƒe ɖe wo gbɔ o.

Avu si ƒe aɖe tu lae wonye.

Womate ŋu awo o.

Womlɔa anyi hekua drɔ̃e,

eye alɔ̃ vivia wo nu.

¹¹Wonye avu siwo ɖua nutsu;

nu meɖia ƒo na wo o.

Wonye alẽkplɔla siwo mesea nugɔme o.

Wo katã wolé woƒe mɔ tsɔ,

ɖe sia ɖe le eya ŋutɔ ƒe viɖe dim.

¹²Ɖe sia ɖe doa ɣli be,

“Miva, mina ne maku wain vɛ!

Miva ne miano aha muame wòasu mi!

Etsɔ hã nanɔ abe egbe ene

alo nanyo sãa wu gɔ̃ hã.”

¹Ame dzɔdzɔe tsrɔ̃na, eye ame aɖeke

mebua eŋu le eƒe dzi me o.

Woɖea Mawumemewo ɖa,

gake ame aɖeke mesea egɔme be

ɖe woɖea ame dzɔdzɔewo ɖa be

womagadze nu vɔ̃ɖi me o.

²Ame siwo zɔna le dzɔdzɔenyenye me

la yina ɖe ŋutifafa me,

le ku me ke hã, wodzudzɔna.

³“Ke mite va afii, mi nyɔnunukala ƒe viwo.

Mi ahasitɔwo kple gbolowo ƒe dzidzimeviwo!

⁴Ame ka ŋue miele fewu ɖum le?

Ame ka ŋu mieke nu bãa ɖo hedo

aɖe ɖe gota biɖaa na?

Ɖe menye aglãdzelawo kple alakpatɔwo

ƒe dzidzimeviwoe mienye oa?

⁵Fieŋufieŋu le lãme na mi ɖe legbawo ŋu,

le logotiwo kple ati dama ɖe sia ɖe te.

Mietsɔa mia viwo sãa vɔe

le balimewo kple agakpetowo te.

⁶Legba siwo le balime kple kpe zɔsrɔ̃ewo dome lae

nye wò gomekpɔkpɔ.

Woawoe nye tɔwò.

Woawoe nèƒoa aha ɖi na,

eye nètsɔa nuɖuvɔsa hã naa wo.

Le nu siawo katã ta la, ɖe mazi kpia?

⁷Èɖo aba ɖe togbɛ si kɔ bobobo la dzi.

Afi mae nèyi hewɔ vɔsawo le.

⁸Ètsɔ wò trɔ̃subɔnuwo da ɖe

wò ʋɔtruwo kple ʋɔtrutiwo megbe.

Ègbe nu le gbɔnye.

Èklo nu le wò aba dzi hede edzi,

eye nèkekee ɖe edzi hebla enu

kple ame siwo ƒe abawo nèlɔ̃,

eye nèkpɔ woƒe amame.

⁹Èyi ɖe Molek gbɔ kple ami,

eye nètsɔ ami ʋeʋĩwo kpe ɖe eŋu fũu.

Èɖo wò ame dɔdɔwo ɖe didiƒe ke,

eye wò ŋutɔ nèyi tsiẽƒe!

¹⁰Wò mɔwo na ɖeɖi te ŋuwò,

gake mèdi be yeagblɔ be,

‘Wo katã nye tofloko’ o.

Èkpɔ be wò ŋusẽ gaɖo yeye me,

eya tae nu mete ŋuwò o.

¹¹“Ame kae dzi ŋɔ na mi nenema,

eye ame kae mievɔ̃ na

nenema gbegbe be mieto nyateƒe nam o,

eye mieɖo ŋku dzinye alo bu nu sia ŋuti

le miaƒe dzi me o?

Ɖe menye esi mezi kpi eteƒe didi

tae mievɔ̃na nam oa?

¹²Maɖe miaƒe dzɔdzɔenyenye

kple miaƒe dɔwɔwɔwo ɖe go afia,

ke womaɖe vi aɖeke na mi o.

¹³Ne miedo ɣli be woakpe ɖe mia ŋu la,

ekema mina miaƒe legba gbogboawo naxɔ na mi!

Ya akplɔ wo katã adzoe,

ne woɖo ƒuƒu teti ɖe wo la,

wo katã woaƒo ya adzo;

ke ame si tsɔm wɔ eƒe sitsoƒee la,

anyi anyigba la ƒe dome,

eye wòaxɔ nye to kɔkɔe la wòanye etɔ.”

Akɔfafa na dzimetrɔlawo

¹⁴Woagblɔ be,

“Mido mɔ, mido mɔ.

Midzra mɔtata la dzi ɖo!

Miɖe mɔxenuwo ɖa le mɔ me na nye dukɔ”,

¹⁵elabena ale ame si nye gã,

eye wòkɔ wu nuwo katã,

ame si li tegbee, eye eƒe ŋkɔe

nye Kɔkɔe la gblɔe nye esi,

“Mele teƒe kɔkɔ si le kɔkɔe,

gake meli kple ame si ƒe nu vɔ̃wo vee,

eye wòbɔbɔ eɖokui ɖe anyi le gbɔgbɔ me be

magbɔ agbe ame si bɔbɔ eɖokui ɖe anyi la

ƒe gbɔgbɔ, eye magbɔ agbe

ame si ƒe nu vɔ̃wo vee la ƒe dzi.

¹⁶Nyemanɔ fɔ bum ɖaa

alo ado dɔmedzoe ɣe sia ɣi o,

ne menye nenema o la,

nu ati kɔ na ame ƒe gbɔgbɔ le ŋkunye me,

eye nu ate luʋɔ siwo mewɔ la ŋu.

¹⁷Nye dɔmedzoe fla le eƒe ŋubiabiã ƒe nu vɔ̃ ta.

Mehe to nɛ, eye meɣla nye ŋkume ɖee le dziku me,

ke hã la, egayi eƒe lɔlɔ̃nuwɔwɔ dzi.

¹⁸Mekpɔ eƒe mɔwo, gake mada gbe le eŋu.

Mafia mɔe, eye magbugbɔ afa akɔ nɛ.

¹⁹Matsɔ kafukafuha ade nu

na Israel ƒe konyifalawo, eye

ŋutifafa, ŋutifafa na ame siwo le kpuiƒe kple didiƒe siaa.

Nye la, mayɔ dɔ wo katã.”

Yehowae gblɔe.

²⁰“Ke ame vɔ̃ɖiwo le abe atsiaƒu dzeagbo

si mate ŋu anɔ anyi kpoo o la ene;

esi ƒe ƒutsotsoewo le gbeɖuɖɔ

kple ba ɖem ɖe go.”

²¹Nye Mawu be,

“Ŋutifafa meli na ame vɔ̃ɖi la o.”

Nutsitsidɔ vavãtɔ

¹“Gblɔe kple ɣli, mègadzudzɔ o.

Kɔ wò gbe dzi abe kpẽ ene.

Gblɔ nye dukɔ ƒe aglãdzedze nɛ

kple Yakob ƒe aƒe la ƒe nu vɔ̃wo nɛ.

²Wole diyem gbe sia gbe.

Edze abe ɖe wotsi dzi be woanya nye mɔwo

abe ɖe wonye dukɔ si wɔa nu dzɔdzɔe,

eye womeŋlɔ woƒe Mawu ƒe sewo be o la ene.

Wole afiatsotso dzɔdzɔe dim tso gbɔnye,

eye wòdze abe ɖe wotsi dzi

be Mawu nate ɖe wo ŋu kpokploe ene.

³Wobiana be, ‘Nu ka ŋuti míetsi nu dɔ,

gake mède nu eme na mí o,

eye míebɔbɔ mia ɖokuiwo,

gake mède dze sii o?’

“Evɔ gbe si gbe mietsi nu dɔ la,

miewɔ nu si dze mia ŋu,

eye mieba miaƒe dɔwɔlawo katã.

⁴Miaƒe nutsitsidɔ la wua enu kple dzrewɔwɔ,

kple avuwɔwɔ, gawu la,

mietu kɔ mia nɔewo tamesesẽtɔe

kple miaƒe asi vɔ̃ɖiwo.

Migakpɔ mɔ be ne mietsi nu dɔ nenema la,

woase miaƒe gbe le dziƒo o.

⁵Ɖe esia nye nutsitsidɔ si tɔgbi melɔ̃na be

ame nabɔbɔ eɖokui le ŋkeke ɖeka ko mea?

Tadede agu abe keti ene,

akpanyadzimɔmlɔ kple dzofimemɔmlɔ

koe nye nutsitsidɔa?

Eya yɔm nèle be nutsitsidɔ

kple ŋkeke si dzea Yehowa ŋua?

⁶“Ɖe menye esiae nye nutsitsidɔ si metia oa,

be woaɖe nu madzɔmadzɔwo ƒe gakɔsɔkɔsɔwo ɖa,

woatu kɔkuti ƒe kɔsasawo,

ne woana ablɔɖe ame siwo wote ɖe to,

eye woaŋe kɔkuti ɖe sia ɖe oa?

⁷Ɖe menye eyae nye be nàna nuɖuɖu dɔwuitɔwo,

ana nɔƒe ame dahe si le tsaglãla tsam,

ne èkpɔ ame aɖe wòle amama la, nàta avɔ nɛ,

eye màtrɔ megbe ade wò ŋutɔ

wò ŋutilã kple ʋu oa?

⁸Ekema wò kekeli adze abe agudzedze ene,

eye wò dɔyɔyɔ ado kaba.

Ekema wò dzɔdzɔenyenye adze ŋgɔ na wò,

eye Yehowa ƒe ŋutikɔkɔe axe megbe na wò.

⁹Ekema àyɔ Yehowa, eye wòatɔ na wò.

Àdo ɣli be wòaxɔ na wò, eye wòagblɔ be,

‘Nyee nye esi.’

“Ne èɖe teteɖeanyi ƒe kɔkuti ɖa,

asifiafia ame kple ameŋugblẽnyawo gbɔgblɔ,

¹⁰ne ètsi nu dɔ hetsɔ wò nuɖuɖu na dɔwuitɔ,

eye nèkpɔ ame siwo wote ɖe anyi la

ƒe hiahiãwo gbɔ la,

ekema wò kekeli adze le viviti me,

eye wò zã anɔ abe ŋdɔkutsu ene.

¹¹Yehowa akplɔ wò ɖaa.

Akpɔ wò hiahiãwo gbɔ le kuɖiɖinyigba dzi,

eye wòado ŋusẽ wò ameti blibo la.

Ànɔ abe abɔ si wode tsii nyuie

kple vudo si memiena o ene.

¹²Wò amewo agbugbɔ blemaƒedowo atu,

eye woaɖo gli ɖe gbe aɖe gbe tɔwo

ƒe gɔmeɖokpe xoxowo dzi.

Woayɔ wò be ‘Gli gbagbãwo ɖɔɖola

kple mɔtata siwo to duwo me la dzraɖola.’

¹³“Ne èhe ɖe megbe tso Dzudzɔgbe ŋkeke la gbegblẽ gbɔ,

ne mèwɔ nu si dze ŋuwò le ŋkeke kɔkɔe la dzi o,

ke boŋ nèkpɔ dzidzɔ le Dzudzɔgbe ŋkeke la ŋu,

eye nède bubu Yehowa ƒe ŋkeke kɔkɔe la ŋu,

ne ède bubu eŋu, mèlé wò mɔ tsɔ o,

ne mèwɔ nu si dze ŋuwò,

alo gblɔ nya dzodzrowo o la,

¹⁴ekema àkpɔ dzidzɔ le Yehowa me,

eye mana be nàɖi tsa ade anyigba

ƒe kɔkɔƒewo ahaɖu fofowò,

Yakob ƒe domenyinu.”

Yehowa ƒe nue gblɔe.

Nu vɔ̃ me ʋuʋu kple ɖeɖekpɔkpɔ

¹Kpɔ ɖa, Yehowa ƒe alɔ mele kpuie akpa be mate ŋu aɖe ame,

alo eƒe to mexe be mate ŋu ase nu o;

²ke boŋ miaƒe nu vɔ̃woe ma mi

kple miaƒe Mawu dome.

Miaƒe nu vɔ̃woe na wòɣla eƒe ŋkume

ɖe mi be maɖo to mi o,

³elabena miaƒe asiwo ƒo ʋu,

eye vodada le asibidɛ ŋu na mi.

Miaƒe nuyiwo da alakpa,

eye miaƒe aɖewo gblɔ nya tovowo.

⁴Ame aɖeke meli si gblɔna be

wometso afia dzɔdzɔe o.

Ame aɖeke meʋlia eɖokui ta to mɔ dzɔdzɔe dzi o,

ke boŋ woɖoa ŋu ɖe nyahehe dzodzrowo ŋu.

Wodaa alakpa.

Wofɔa fuɖename ƒe fu hedzia nu vɔ̃ɖi.

⁵Woƒoa da ƒe aziwo, eye wolɔ̃a yiyiɖɔ.

Ame si ɖu woƒe aziwo la,

aku, eye ne ɖe gbã la,

ƒli ado tso eme.

⁶Woƒe yiyiɖɔ menyo na avɔ o.

Womate ŋu atsyɔ nu si wowɔ la o.

Woƒe dɔwɔwɔwo nye dɔwɔwɔ vɔ̃ɖiwo,

eye nu baɖa wɔwɔ le woƒe asiwo me.

⁷Woƒe afɔwo ƒua du gena ɖe nu vɔ̃ me,

eye woɖea abla le ʋu maɖifɔ kɔkɔ ɖi me.

Woƒe susuwo nye susu vɔ̃ɖiwo.

Gbegblẽ kple tsɔtsrɔ̃ bɔ ɖe woƒe mɔwo dzi.

⁸Womenya ŋutifafa ƒe mɔ o.

Nu dzɔdzɔe wɔwɔ mele woƒe mɔwo dzi o.

Wotrɔ woƒe mɔwo wozu mɔ gɔglɔ̃wo,

eye ame siwo azɔ wo dzi ayi la,

manya ŋutifafa o,

⁹eya ta nuteƒewɔwɔ le adzɔge na mi,

eye dzɔdzɔenyenye metsɔ ɖe mia gbɔ o.

Miekpɔ mɔ na kekeli, ke viviti sɔŋ ƒo xlã mi.

Míekpɔ mɔ na xexea me ƒe kɔkɔ,

ke blukɔ me boŋ ko zɔm miele.

¹⁰Miele asi tsam le gli ŋu abe ŋkugbagbãtɔwo ene,

eye miele mɔ dim kple asi abe

ame siwo mele nu kpɔm o la ene.

Miele nu klim le ŋdɔkutsu dzatsi abe zã me ene,

eye míele lãmesesẽtɔwo dome abe ame kukuwo ene.

¹¹Mi katã miele gbe tem abe sisiblisiwo ene,

eye miele xɔxlɔ̃m nublanuitɔe abe ahɔnɛwo ene.

Miele mɔ kpɔm na ʋɔnudɔdrɔ̃ dzɔdzɔe,

gake miekpɔ ɖeke o.

Miele mɔ kpɔm na ɖeɖe,

gake metsɔ ɖe mia gbɔ o,

¹²elabena míaƒe dzidadawo sɔ gbɔ le ŋkuwò me

eye míaƒe nu vɔ̃wo le mía nu tsom.

Míenya míaƒe dzidadawo,

eye míedze si miaƒe nu vɔ̃,

¹³siwo nye aglãdzedze,

nugbeɖoɖo ɖe Yehowa ŋu,

megbetɔtrɔ̃ de míaƒe Mawu la, ameteteɖeto,

tsitretsitsi ɖe ame ŋu kple alakpanya

siwo míeɣla ɖe míaƒe dzi me la gbɔgblɔ.

¹⁴Ale wonya ʋɔnu dzɔdzɔe dɔdrɔ̃ do ɖe megbe,

eye nu dzɔdzɔe wɔwɔ tsi tsitre ɖe adzɔge.

Nyateƒe le nu klim le kpɔdomewo,

eye nuteƒewɔwɔ mate ŋu age ɖe ame o.

¹⁵Ale nyateƒe mele afi aɖeke woakpɔ o,

eye ame si gbe nu le nu vɔ̃ɖi gbɔ la zu nuhaha.

Yehowa ɖo ŋku anyi hekpɔ nu,

ke mekpɔ nu dzɔdzɔe wɔwɔ le afi aɖeke o,

eye medzɔ dzi nɛ o.

¹⁶Yehowa kpɔ be ame aɖeke meli o.

Ewɔ moya nɛ be ame aɖeke meli si alé avu o,

ale wòtsɔ eya ŋutɔ ƒe alɔ xɔ na eɖokui,

eye eya ŋutɔ ƒe dzɔdzɔenyenye lée ɖe te.

¹⁷Edo dzɔdzɔenyenye abe eƒe akɔtakpoxɔnu ene,

eye xɔxɔ ƒe gakuku le ta nɛ.

Etsɔ hlɔ̃biabia ƒe awuwo do,

eye wòtsɔ ŋuʋaʋã xatsa ɖe eɖokui ŋu

abe doɖedzi ene.

¹⁸Axe fe na wo ɖe nu siwo wowɔ la nu.

Atsɔ dɔmedzoe axe fee na eƒe futɔwo,

eye wòatsɔ teƒeɖoɖo axe fee na eƒe ketɔwo.

Atsɔ nu si dze la axe fee na ƒukpowo.

¹⁹Ɣetoɖoƒetɔwo avɔ̃ Yehowa ƒe ŋkɔ,

eye ɣedzeƒetɔwo

ade bubu eƒe ŋutikɔkɔe ŋu,

elabena ele vava ge abe tsiɖɔɖɔ

si le sisim kple ŋusẽ,

eye Yehowa ƒe gbɔgbɔ nyae

ɖe du nu la ene.

²⁰Yehowa be, “Ɖela ava Zion na Yakob ƒe

ame siwo trɔ tso woƒe nu vɔ̃wo me.”

²¹Yehowa be, “Nye la, esiae nye nye nubabla kpli wo. Nye Gbɔgbɔ si le dziwò, nye nya siwo metsɔ de nuwò la madzo le nuwò alo le viwòwo ƒe nu alo le wò dzidzimeviwo ƒe nu tso azɔ dzi yi ɖe mavɔ me o,” Yehowae gblɔe.

Zion ƒe ŋutikɔkɔe

¹“Tso nàklẽ, elabena wò kekeli do,

eye Yehowa ƒe ŋutikɔkɔe dze ɖe dziwò,

²elabena kpɔ ɖa, viviti ado ɖe anyigba katã dzi,

eye blukɔ tsiɖitsiɖi atsyɔ eƒe amewo dzi,

gake Yehowa adze ɖe dziwò,

eye eƒe ŋutikɔkɔe anɔ dzedzem le dziwò.

³Dukɔwo ava wò kekeli la gbɔ,

eye fiawo ava wò agudzedze ƒe keklẽ la gbɔ.

⁴“Fɔ mo dzi, eye nàkpɔ nu siwo ƒo xlã wò.

Wo katã woƒo ƒu heva gbɔwò,

viwò ŋutsuwo tso didiƒe ke va,

eye wolé viwò nyɔnuwo ɖe abɔdome vɛ.

⁵Ekema àkpɔe, ahako alɔgbɔnu.

Wò dzi ati kpo, avu gblotoo kple dzidzɔkpɔkpɔ.

Woatsɔ nu xɔasi siwo le atsiaƒu dzi la vɛ na wò,

eye dukɔwo ƒe kesinɔnuwo ava gbɔwò.

⁶Kposɔwo ƒe ha axɔ wò anyigba dzi

hekpe ɖe Midian kple Efa ƒe kposɔviwo ŋuti.

Nenema ke Sebatɔwo katã hã ava

ana sika kple dzudzɔʋeʋĩdonuwo,

eye woadzi ha akafu Yehowa.

⁷Woakplɔ Kedar ƒe lãhawo aƒo ƒu vɛ na wò,

eye Nebayɔt ƒe agbowo asubɔ wò.

Woaxɔ wo abe vɔsa ene le nye vɔsamlekpui dzi,

eye maɖo atsyɔ̃ na nye gbedoxɔ kɔkɔe la.

⁸“Ame kawoe nye ema le dzodzom

le yame abe lilikpowo ene,

alo abe ahɔnɛwo yina ɖe woƒe atɔwo me ene?

⁹Vavãe ƒukpowo le mɔ kpɔm nam.

Tarsis ƒe meliwo le ŋgɔ na wo,

lɔ viwò ŋutsuwo tso didiƒewo gbɔnae

kple woƒe klosalo kple sika be

woatsɔ ade bubu Yehowa,

wò Mawu kple Israel ƒe Kɔkɔetɔ la ŋu,

elabena eyae ɖo atsyɔ̃ na wò.

¹⁰“Amedzroviwo agbugbɔ wò gliwo aɖo,

eye woƒe fiawo asubɔ wò.

Togbɔ be meƒo mi le nye dziku me hã la,

le nye dɔmenyo me la, makpɔ nublanui na mi.

¹¹Wò agbowo anɔ ʋuʋu ɖi ɖaa.

Womatu wo akpɔ gbeɖe le ŋkeke me alo zã me o.

Ale be amewo nate ŋu atsɔ dukɔwo

ƒe kesinɔnuwo vɛ na mi.

Woƒe fiawo anɔ ŋgɔ le dziɖuɖu

ƒe asaɖabɔbɔ la me,

¹²eya ta dukɔ alo fiaɖuƒe si agbe be yemasubɔ mi o la,

atsrɔ̃, eye woagbãe gudugudu.

¹³“Lebanon ƒe ŋutikɔkɔe ava dziwò.

Woƒe sesewu, fɔfɔli kple papawu ava na wò

be woaɖo atsyɔ̃ na nye kɔkɔeƒe la,

eye matsɔ ŋutikɔkɔe ada ɖe nye afɔɖoƒe.

¹⁴Ame siwo te wò ɖe to la,

ƒe ŋutsuviwo ado dɔgɔ̃e ava gbɔwò.

Ame siwo katã ɖe alɔme le ŋuwò la,

ade ta agu ɖe wò afɔ nu,

eye woayɔ wò be Yehowa ƒe Du,

Israel ƒe Kɔkɔetɔ la ƒe Zion.

¹⁵“Togbɔ be wogble wò ɖi helé fu wò,

eye ame aɖeke meto mewò yi o hã la,

matsɔ wò awɔ atsyɔ̃ mavɔ

kple dzidzɔe na dzidzimewo katã.

¹⁶Àno dukɔwo ƒe notsi, eye àno fiawo ƒe no,

ekema ànyae be, nye Yehowae nye wò Ɖela,

eye Yakob ƒe Ŋusẽtɔ lae nye wò xɔnametɔ.

¹⁷Matsɔ sika ana wò ɖe akɔbli teƒe,

eye klosalo ɖe gayibɔ teƒe.

Le ati teƒe la, matsɔ akɔbli na wò,

eye mana gayibɔ wò ɖe kpe teƒe.

Mawɔ ŋutifafa wòanye tatɔ na wò,

eye dzɔdzɔenyenye nanye dziɖula na wò.

¹⁸Womagase ŋutasesẽ ŋkɔ le wò anyigba dzi,

tsɔtsrɔ̃ loo alo gbegblẽ hã manɔ wò liƒowo dzi o.

Ke boŋ àyɔ wò gliwo be Ɖeɖekpɔkpɔ,

eye wò agbowo be Kafukafu.

¹⁹Ɣe maganye wò akaɖi le ŋkeke me loo

alo ɣleti naklẽ ɖe dziwò o,

elabena Yehowa anye wò kekeli tegbee

ye wò Mawu anye wò ŋutikɔkɔe.

²⁰Wò ɣe magaɖo to azɔ o,

eye wò ɣleti hã magaɖo xɔ azɔ o.

Yehowa anye wò kekeli mavɔ,

eye wò konyifaŋkekewo nu ava ayi.

²¹Ekema wò amewo katã anye dzɔdzɔetɔwo,

eye anyigba anye wo tɔ tegbee.

Wonye ati fɛ̃ si medo,

kple nye asinudɔwɔwɔwo be

woaɖe nye ŋutikɔkɔe afia.

²²Ame ʋɛ siwo le mia dome la azu akpe,

eye ame siwo mesɔ gbɔ o la

azu dukɔ gã dranyi aɖe.

Nyee nye Yehowa,

le ewɔɣi la, mawɔ esia wòatsɔ kaba.”

Yehowa ƒe dɔmenyo ƒe ƒe

¹Aƒetɔ Yehowa ƒe Gbɔgbɔ le dzinye,

elabena Yehowa si ami nam,

be magblɔ nyanyui la na ame dahewo.

Edɔm ɖa be mayɔ dɔ ame siwo ƒe dzi gbã.

Maɖe gbeƒã ablɔɖe na aboyomewo,

eye woaɖe ga gamenɔlawo tso viviti me;

²ne maɖe gbeƒã.

Yehowa ƒe dɔmenyo ƒe ƒe la

kple míaƒe Mawu la ƒe hlɔ̃biaŋkeke,

eye mafa akɔ na konyifalawo.

³Edɔm be mana nu Zion ƒe nuxalawo,

ne maɖɔ atsyɔ̃fiakuku na wo ɖe dzofi teƒe,

dzidzɔkpɔkpɔ ƒe ami ɖe nuxaxa teƒe,

kafukafu ƒe awu ɖe gbɔgbɔ

si bu mɔkpɔkpɔ teƒe.

Woayɔ wo be dzɔdzɔenyenye ƒe logotiwo,

ati siwo Yehowa ŋutɔ do,

be yeatsɔ aɖe yeƒe bubu afiae.

⁴Woagbugbɔ blema ƒe aƒedowo atso,

eye teƒe siwo zu glikpowo

hena ɣeyiɣi didi aɖe la afɔ ɖe te.

Woagbugbɔ du gbagbã siwo zu gbegbe

hena dzidzime geɖewo la atso.

⁵Amedzroviwo anye miaƒe agbleŋlɔlawo

kple waingble dzikpɔlawo.

⁶Woayɔ mi be Yehowa ƒe nunɔlawo,

eye woatsɔ ŋkɔ na mi be,

miaƒe Mawu la ƒe hadɔwɔlawo.

Miaɖu dukɔwo ƒe kesinɔnuwo,

eye miaƒo adegbe le woƒe nunɔamesi

siwo zu mia tɔ la ta.

⁷Le woƒe ŋukpe teƒe la, nye dukɔ la

axɔ gomekpɔkpɔ teƒe eve.

Le vlododo teƒe la,

woakpɔ dzidzɔ ɖe woƒe domenyinyi ŋuti;

ale woaxɔ domenyinyi ƒe teƒe eve

le woƒe anyigba dzi,

eye dzidzɔkpɔkpɔ mavɔ anye wo tɔ.

⁸“Elabena nye Yehowa,

melɔ̃ nuteƒewɔwɔ.

Metsri adzodada kple nu vɔ̃.

Maɖo eteƒe na wo le nye nuteƒewɔwɔ me,

eye mabla nu mavɔ kpli wo.

⁹Woadze si wo viwo le dukɔwo dome

kple woƒe dzidzimeviwo le xexemetɔwo dome.

Ame siwo akpɔ wo la ade dzesii be

woawoe nye ame siwo Yehowa yra.”

¹⁰Yehowa ƒe nu nyoa ŋunye ŋutɔ,

eye nye luʋɔ le dzidzɔ kpɔm le nye Mawu me,

elabena etsɔ ɖeɖe ƒe avɔwo ta nam,

eye wòtsɔ dzɔdzɔenyenye ƒe awu ʋlaya do nam,

abe ale si ŋugbetɔsrɔ̃ ɖoa atsyɔ̃ na eƒe ta,

abe nunɔla ene kple abe ale si ŋugbetɔ ɖoa

atsyɔ̃e kple lekewɔnuwo ene.

¹¹Elabena abe ale si nuku mienae ene

kple agble si dzi woƒã nu ɖo

nana nuku la tsinae ene la,

nenemae Aƒetɔ Yehowa ana be dzɔdzɔenyenye

kple kafukafu namie le dukɔwo katã ŋkume.

Zion ƒe ŋkɔ yeye la

¹Le Zion ta la, nyemazi ɖoɖoe o,

le Yerusalem ta la, nyemazi kpi o,

va se ɖe esime eƒe dzɔdzɔenyenye

naklẽ abe kekeli ene, eye eƒe ɖeɖe

nabi abe akakati ene.

²Dukɔwo akpɔ wò dzɔdzɔenyenye,

eye fiawo akpɔ wò ŋutikɔkɔe.

Woayɔ ŋkɔ yeye si Yehowa ƒe

nu atsɔ na wò la na wò.

³Ànye atsyɔ̃kuku le Yehowa ƒe asi me

kple fiakuku le wò Mawu ƒe asi me.

⁴Womagayɔ wò azɔ be

Wogbe nu le egbɔ,

alo ayɔ wò anyigba be Gbegbe o.

Ke boŋ woayɔ wò be,

Hefziba si gɔmee nye

Eƒe nu nyo ŋunye, eye woayɔ wò anyigba be Biula,

si gɔmee nye eɖe srɔ̃,

elabena wò nu anyo Yehowa ŋu,

eye wòaɖe wò anyigba abe srɔ̃ ene.

⁵Abe ale si ɖekakpui ɖea ɖetugbii ene la,

nenema ke viwò ŋutsuwo aɖe wòe,

eye abe ale si ŋugbetɔsrɔ̃ kpɔa dzidzɔe ɖe

eƒe ŋugbetɔ ŋu ene la,

nenemae wò Mawu akpɔ dzidzɔ ɖe ŋuwòe.

⁶O! Yerusalem,

meɖo gbetakpɔlawo wò gliwo dzi.

Womazi ɖoɖoe le ŋkeke me alo zã me o.

Mi ame siwo yɔa Yehowa,

migagbɔ ɖe eme o,

⁷eye migana gbɔdzɔe o,

va se ɖe esime wòaɖo Yerusalem te,

awɔe wòanye kafukafunu le anyigba dzi.

⁸Yehowa ta eƒe ɖusibɔ kple eƒe alɔ sesẽ la be,

“Nyemagatsɔ wò bli ana wò futɔwo

wòanye nuɖuɖu na wo gbeɖe o,

eye wain yeye si ŋuti nèku kutri ɖo la,

nyemagana amedzrowo naxɔe ano o.

⁹Ke ame siwo xa nukuawo la,

woaɖu wo, akafu Yehowa,

eye ame siwo gbe waintsetseawo la,

ano wo me ha le nye xɔxɔnu kɔkɔewo.”

¹⁰Mito eme yi, mito agboawo me yi!

Midzra mɔ ɖo na dukɔ la.

Mido mɔ, mido mɔtatawo.

Miɖe kpewo ɖa le mɔa dzi.

Mikɔ aflaga dzi na dukɔwo.

¹¹Yehowa na woɖe gbeƒãe

le anyigba ƒe mlɔenuwo ke be,

“Migblɔ na Zion vinyɔnu la be,

‘Kpɔ ɖa, wò Ɖela gbɔna!

Kpɔ ɖa, eƒe fetu

kple eƒe teƒeɖoɖo kpe ɖe eŋuti.’ ”

¹²Woayɔ wo be, “Ame kɔkɔewo.

Yehowa ƒe Ame siwo wòɖe.”

Ke wò la, woayɔ wò be,

“Ame si dim wole vevie,”

eye woayɔ wò be,

“Du si gbɔ womagagbe nu le o.”

Mawu ƒe hlɔ̃biabia kple ɖeɖe ƒe ŋkeke

¹Ame kae nye esi gbɔna tso Bozra le Edom,

eye aŋɔ dzĩ ƒo eƒe awuwo?

Ame kae nye esi ɖo atsyɔ̃,

eye wòle zɔzɔm le eƒe ŋusẽ triakɔ me?

“Nyee le nu ƒom le dzɔdzɔenyenye me.

Ŋusẽ le asinye be maɖe ame.”

²Nu ka ta wò awuwo biã abe

ame si le wain fiam la tɔwo ene?

³“Nye ɖekae fia wain le wainfiaƒe,

ame aɖeke metso dukɔwo

dome va kpe ɖe ŋunye o.

Mefanya wo le nye dziku me,

eye menya avuzi le wo dzi

le nye dɔmedzoe helĩhelĩ la me.

Woƒe ʋue hlẽ ɖe nye awuwo me,

eye woƒe ʋu ƒo nu siwo medo,

⁴elabena hlɔ̃biaŋkeke le nye dzi me,

eye nye ɖeɖe ƒe ƒe la va ɖo.

⁵Metsa ŋku, ke ame aɖeke meli

ana kpekpeɖeŋu o.

Nye mo wɔ yaa be ame aɖeke meva

na kpekpeɖeŋu o.

Tete nye ŋutɔ nye abɔ xɔ nam,

eye nye dɔmedzoe lém ɖe te.

⁶Mefanya dukɔwo le nye dziku me.

Le nye dɔmedzoe helĩhelĩ la me, mena womu aha,

eye metrɔ woƒe ʋu kɔ ɖe anyigba.”

Kafukufu kple gbedodoɖa

⁷Maɖe gbeƒã Yehowa ƒe dɔmenyo,

Yehowa ƒe nu siwo wòwɔ na mí,

esiwo ta wòle be woakafui ɖo.

Ɛ̃, kpe ɖe nu nyui siwo katã wòwɔ

na Israel ƒe aƒe la ŋu,

le eƒe nublanuikpɔkpɔ

kple dɔmenyo gbogboawo ta la,

⁸egblɔ be, “Vavã nye amewoe wonye.

Viŋutsu siwo mada alakpa nam o”,

eya ta wòzu woƒe Ɖela.

⁹Eya hã xaxa le woƒe xaxawo katã me,

eye mawudɔla si dzi wòwɔa dɔ tonae la ɖe wo.

Eɖe wo le eƒe lɔlɔ̃ kple nublanuikpɔkpɔ ta.

Efɔ wo ɖe dzi,

eye wòtsɔ wo le blemaŋkekeawo katã me,

¹⁰gake wodze aglã hedo dziku na eƒe Gbɔgbɔ Kɔkɔe la,

eya ta wòtrɔ ɖe wo ŋu hezu futɔ na wo,

eye eya ŋutɔ wɔ aʋa kpli wo.

¹¹Tete eƒe dukɔ la ɖo ŋku blemaŋkekeawo dzi,

Mose kple eƒe amewo ƒe ŋkekewo hebia

be afi ka ame si nye eƒe alẽhawo ƒe kplɔla,

si kplɔ wo to atsiaƒu me la le?

Afi ka ame si dɔ

eƒe Gbɔgbɔ Kɔkɔe la ɖe wo dome,

¹²ame si dɔ eƒe ŋutikɔkɔe ƒe alɔ ƒe ŋusẽ

be wòanɔ Mose ƒe nuɖusime la le?

Afi ka ame si ma tsiwo le wo ŋgɔ

be eƒe ŋkɔ nanyɔ tegbee,

¹³eye wòkplɔ wo to gogloƒe la le?

Abe sɔ si le gbadzaƒe ene la, womekli nu o.

¹⁴Abe nyi si wokplɔ yina ɖe gbeɖuƒe ene la,

Yehowa ƒe Gbɔgbɔ na wogbɔ ɖe eme.

Aleae nèkplɔ wò dukɔ lae

be nàde bubuŋkɔ ɖokuiwò ŋu.

¹⁵Bi kɔ tso dziƒo, eye nàkpɔ nu tso wò

ŋutikɔkɔefiazikpui kɔkɔ la dzi.

Afi ka wò ŋuʋaʋã kple ŋusẽ la le?

Woɣla wò bɔbɔenyenye

kple wò dɔmetɔtrɔ ɖe mí,

¹⁶gake wòe nye mia Fofo,

togbɔ be Abraham menya mí

alo Israel nayi si dze ge mi o hã la,

wò, o, Yehowae nye mia Fofo,

mía Ɖela tso gbe aɖe gbe kee nye wò ŋkɔ.

¹⁷O! Yehowa, nu ka ta nèna míetra tso wò

mɔwo dzi hesẽ míaƒe dziwo me,

be míede bubu ŋu wò o?

Gatrɔ va le wò dɔla siwo nye to

siwo nye wò domenyinuwo la ta.

¹⁸Ɣeyiɣi kpui aɖe koe wò teƒe,

kɔkɔe la nɔ wò amewo ƒe asi me.

Ke azɔ la, míaƒe futɔwo nya avuzi

le wò kɔkɔeƒe la dzi.

¹⁹Tɔwòwoe míenye tso blema ke, gake woawo la,

mèɖu fia ɖe wo dzi kpɔ o,

eye womeyɔ wò ŋkɔ hã

ɖe wo ŋu kpɔ o.

Gbedodoɖa hena ɖeɖekpɔkpɔ dzi yiyi

¹O, esi nàhadze dziƒowo me aɖi ava anyi,

be towo nadzo kpekpekpe le ŋkuwò me!

²Abe ale si nake léa dzoe,

eye wònaa tsi fiena wlɔwlɔwlɔ ene la,

nenema ke nàɖi va, ana wò ketɔwo nanya wò ŋkɔ,

eye dukɔwo nadzo nyanyanya le ŋkuwò me,

³elabena esime nèwɔ nu dziŋɔ

siwo míekpɔ mɔ na o la,

èɖiɖi va anyi,

eye towo dzo kpekpekpe le ŋkuwò me.

⁴Tso blema ke, ame aɖeke mesee o,

to aɖeke mesee o,

ŋku aɖeke mekpɔ Mawu bubu aɖeke kpe ɖe ŋuwò,

esi kpena ɖe ame siwo le mɔ kpɔm nɛ la ŋu o.

⁵Èkpena ɖe ame siwo wɔa nu dzɔdzɔe dzidzɔtɔe,

eye wòɖoa ŋku wò mɔwo dzi la ŋuti,

ke esi míegale nu vɔ̃ wɔwɔ dzi ɖe ŋuwò la,

èkpɔ dziku, eya ta aleke míawɔ akpɔ ɖeɖe?

⁶Mí katã míele abe ame makɔmakɔwo ene,

eye míaƒe nu dzɔdzɔe wɔwɔwo katã

le abe ɖovu ƒoɖi ene.

Mí katã míeyrɔ abe aŋgba ene,

eye míaƒe nu vɔ̃wo lɔ mi ɖe nu hoo abe ya ene.

⁷Ame aɖeke meyɔa wò ŋkɔ

alo dzea agbagba be wòaku ɖe ŋuwò o,

elabena èɣla wò mo ɖe mí, eye le míaƒe nu vɔ̃wo ta la,

èna míevɔ le eme keŋkeŋ,

⁸gake hã la, o Yehowa,

wòe nye mía Fofo.

Míawo la, anyie mienye

eye wòe nye zemela.

Mí katã mienye wò asinudɔwɔwɔwo.

⁹O! Yehowa, mègado dziku wòatso eme o.

Mègaɖo ŋku míaƒe nu vɔ̃wo dzi ɖaa o.

O, nye kɔ nàkpɔ mi ɖa, mieɖe kuku,

elabena mí katã míenye wò amewo.

¹⁰Wò du kɔkɔewo zu gbegbe,

Zion gɔ̃ hã zu gbegbe, eye Yerusalem zu aƒedo.

¹¹Wotɔ dzo míaƒe gbedoxɔ kɔkɔe dzeani

si me mia fofowo kafu wò le,

eye nu siwo katã ŋuti

míede asixɔxɔe la gblẽ.

¹²O, Yehowa, le nu siawo katã megbe la,

ɖe nàgade megbe tso mía ŋua?

Ɖe nàzi kpi ahe to na mí wu ale si hiã?

Ʋɔnudɔdrɔ̃ kple ɖeɖekpɔkpɔ

¹“Meɖe ɖokuinye fia ame siwo mebia tanye se o,

eye ame siwo medim o la ke ɖe ŋunye.

Dukɔ si meyɔ nye ŋkɔ o la, megblɔ nɛ be,

‘Nyee nye esi, nyee nye esi.’

²Ŋkeke blibo la katã mekeke

nye abɔwo me na dukɔ sẽto,

ame siwo zɔna le mɔ manyomanyowo dzi

hedzea wo ŋutɔ ƒe susuwo yome la.

³Ame siwo le dɔmedzoe dom nam

ɣe sia ɣi ɖekematsɔlemetɔe.

Wosa vɔ le abɔwo me, eye wodoa dzudzɔʋeʋĩwo

le anyikpe ƒe vɔsamlekpuiwo dzi,

⁴ame siwo nɔa ameɖibɔwo me hedɔa ŋu

le teƒe ɣaɣlɛwo, eye woɖua halã,

woƒe detsizewo yɔna fũu

kple lã makɔmakɔ ƒe detsiwo.

⁵Ame siwo gblɔna be,

‘Nɔ adzɔge, mègate ɖe ŋu nye o,

elabena mele kɔkɔe akpa na wò!’

Ame siawo tɔgbi la,

dzudzɔe wonye le nye ŋɔtime.

Dzo si le bibim ŋkeke

blibo la katãe wonye.

⁶“Kpɔ ɖa, woŋlɔe ɖi ɖe nye ŋkume ɖaa.

Nyemazi ɖoɖoe o.

Maɖo eteƒe na wo, wòasu wo nyuie.

Maɖo eteƒe atsɔ axe fe na wo,

⁷miaƒe nu vɔ̃wo kple mia fofowo tɔwo siaa,

elabena wosa vɔ le towo tame,

eye wodo tokum le togbɛwo dzi.

Madzidze woƒe tohehe wòayɔ banaa,

maɖo akɔ na wo ɖe woƒe tsã nu vɔ̃wo ta.”

Yehowae gblɔe.

⁸Ale Yehowa gblɔe nye esi,

“Abe ale si wofiaa wain le wain tsetsewo me vɔ,

eye amewo gblɔna be,

‘Migatsɔe ƒu gbe o, elabena ɖe gale eme’ ene la,

nenemae mawɔ ɖe nye dɔlawo ŋu,

nyematsrɔ̃ wo katã o.

⁹Mana dzidzimewo nado tso Yakob me,

eye ame siwo axɔ nye towo woanye

woƒe domenyinu la ado tso Yuda me.

Nye ame tiatiawo anyi nu siawo ƒe dome,

eye afi mae nye dɔlawo anɔ.

¹⁰Saron azu lãnyiƒe na alẽhawo,

eye Akor ƒe balime azu nyiwo ƒe gbɔɖemeƒe

na nye ame siwo dia nye mɔ.

¹¹“Ke mi ame siwo gblẽ Yehowa ɖi,

eye mieŋlɔ nye to kɔkɔe la be,

mi ame siwo ɖo kplɔ̃ na Aklama,

eye mieku wain si wotɔtɔ la,

kplu banaa na Dzɔgbese la,

¹²maɖo mi ɖi na yi, eye mi katã

miado dɔgɔ̃e hena wuwu,

elabena meyɔ mi gake mietɔ o.

Meƒo nu gake mieɖo to o.

Miewɔ nu tovo le nye ŋkume,

eye mietia nu si metsri.”

¹³Eya ta ale Aƒetɔ Yehowa gblɔe nye esi:

“Nye dɔlawo aɖu nu,

ke miawo la dɔ awu mi.

Nye dɔlawo ano nu;

miawo la, tsikɔ awu mi.

Nye dɔlawo akpɔ dzidzɔ,

ke miawo la woado ŋukpe mi.

¹⁴Nye dɔlawo adzi ha le woƒe dziwo

ƒe dzidzɔkpɔkpɔ ta, ke miawo la,

miafa avi le dzi ƒe vevesese ta,

eye miado ɣli le gbɔgbɔ ƒe teteɖeanyi ta.

¹⁵Miagblẽ miaƒe ŋkɔwo ɖi na nye ame tiatiawo

woawɔ wo ŋu dɔ abe fiƒodenuwo ene.

Aƒetɔ Yehowa awu mi,

ke eƒe dɔlawo ya la, atsɔ ŋkɔ bubu na wo.

¹⁶Ame si ayra eɖokui le anyigba dzi la awɔe

le nyateƒe ƒe Mawu la ƒe ŋkɔ me,

eye ame si aka atam le anyigba dzi la,

akae le nyateƒe Mawu la ƒe ŋkɔ me,

elabena woaŋlɔ fuɖename tsãtɔwo be,

eye woaɣla ɖe nye ŋkuwo.

Dziƒo yeye kple anyigba yeye

¹⁷“Kpɔ ɖa, mawɔ dziƒo yeye kple anyigba yeye.

Womagaɖo ŋku tsãnuwo dzi

alo woava ame ƒe susu me o,

¹⁸gake mikpɔ dzidzɔ,

eye mitso aseye tegbee ɖe nu si mawɔ la ŋu,

elabena mawɔ Yerusalem be wòanye dzudzɔdonu,

eye eƒe amewo anye dzidzɔkpɔlawo.

¹⁹Matso aseye ɖe Yerusalem ŋu,

eye nye amewo ƒe nu ado dzidzɔ nam.

Womagase avifafa

kple konyifaɣli le eme azɔ o.

²⁰“Ɖevi si xɔ ŋkeke ʋɛ aɖewo ko,

alo amegãɖeɖi si ƒe ƒewo mede o la

maganɔ afi ma o.

Woabu ame si xɔ ƒe alafa ɖeka

hafi ku la abe ɖekakpui ene,

eye nu vɔ̃ wɔla si mexɔ ƒe alafa ɖeka hafi ku o

la, woabui nɛ abe fiƒode ene.

²¹Woatu xɔwo anɔ wo me.

Woade waingble, eye woaɖu eme kutsetse.

²²Womagatu xɔ, eye ame bubuwo nanɔ wo me,

alo woade agble ame bubu naɖu o,

elabena abe ale si ati tsinae ene la,

nenema nye amewo ƒe agbemeŋkekewo hã anɔ.

Nye ame tiatiawo aɖu woawo ŋutɔ

ƒe asinudɔwɔwɔwo hena ɣeyiɣi didi aɖe.

²³Womadze agbagba dzodzro,

alo adzi vi siwo woɖo dzɔgbevɔ̃e ɖi na la o,

elabena woanye ame siwo Yehowa yra,

woawo ŋutɔ kple woƒe dzidzimeviwo siaa.

²⁴Matɔ hafi woayɔm.

Ne wogale nuƒoƒo dzi la, masee.

²⁵Amegaxi kple alẽvi aɖu gbe le teƒe ɖeka.

Dzata aɖu gbe abe nyi ene,

ke ʋuʋudedi anye da ya ƒe nuɖuɖu.

Womawɔ nu vevi ame alo agblẽ nu

le nye to kɔkɔewo katã dzi o.”

Yehowae gblɔe.

Ʋɔnudɔdrɔ̃ kple mɔkpɔkpɔ

¹Ale Yehowa gblɔe nye esi,

“Dziƒoe nye nye fiazikpui,

eye anyigbae nye nye afɔɖodzinu.

Afi ka xɔ si miatu nam la le?

Afi ka nye gbɔɖemeƒe anɔ.

²Menye nye asie wɔ esiawo katã,

eye wova dzɔ oa?”

Yehowae gblɔe.

“Esiae nye ame si mebuna;

ame si bɔbɔ eɖokui,

da ahe le gbɔgbɔ me,

eye ne ese nye nya la,

wòdzona nyanyanya.

³Ke ame si tsɔ nyitsu sa vɔe la,

sɔ kple ame si wu ame,

eye ame si tsɔ alẽvi sa vɔe la,

sɔ kple ame si ŋe kɔ na avu.

Ame si sa nuɖuvɔ la,

sɔ kple ame si tsɔ ha ƒe ʋu sa vɔe,

eye ame si do ŋkuɖodzi ƒe dzudzɔ ʋeʋĩ la,

sɔ kple ame si subɔ legba.

Wotia woawo ŋutɔ ƒe mɔwo,

eye woƒe luʋɔ dzɔa dzi

le woƒe ŋunyɔnuawo ŋu,

⁴eya ta nye hã masẽ ŋuta le wo ŋu,

eye mana nu si le ŋɔ dzim na wo la nava wo dzi,

elabena esi meyɔ wo la,

ame aɖeke metɔ o, eye esi meƒo nu la,

ame aɖeke meɖo to o.

Wowɔ nu vɔ̃ɖi le nye ŋkume,

eye wotia nu si medoa dzidzɔ nam o.”

⁵Mi ame siwo vɔ̃a Yehowa ƒe nya la,

mise Yehowa ƒe nya.

“Mia nɔviŋutsu siwo lé fu mi,

eye woɖe mi ɖe aga le nye ŋkɔ ta la, gblɔ be,

‘Wonetsɔ ŋutikɔkɔe na Yehowa

be miakpɔ miaƒe dzidzɔ’,

gake ŋukpe alé wo.

⁶Se hoowɔwɔ ma si tso dua me

kple ɣli si le ɖiɖim tso gbedoxɔ me la ɖa.

Gbeɖiɖi la nye Yehowa ƒe gbe.

Ele fetu si dze na eƒe futɔwo la xem na wo.

⁷“Edzi vi hafi lé ku.

Edzi ŋutsuvi hafi fu ɖui.

⁸Ame kae se esia tɔgbi kpɔ?

Ame kae kpɔ esiawo kpɔ?

Ɖe woate ŋu adzi dukɔ aɖe le ŋkeke ɖeka me,

alo woadzi anyigba aɖe zi ɖeka kpoyia?

Ke Zion ya léa ku hedzia

viawo zi ɖeka kpoyi.

⁹Ɖe mana be vidziɣi naɖo, gake magbe vixexea?” Yehowae gblɔe.

“Ɖe nye ame si ɖe mɔ be woadzi vi la, natu vidzidɔa?”

Wò Mawu lae gblɔe.

¹⁰“Mitso aseye ɖe Yerusalem ŋu,

eye mikpɔ dzidzɔ kplii,

mi ame siwo katã lɔ̃e.

Mitso dzidzɔ ƒe aseye kplii,

mi ame siwo katã fa konyi ɖe eta,

¹¹elabena miano eƒe akɔfafa ƒe no, eye miaɖi kɔ.

Mianoe fũu, eye ale si notsi la le dodom bababa la,

ana miaƒe dziwo nadze eme.”

¹²Elabena ale Yehowa gblɔe nye esi,

“Matsɔ ŋutifafa nɛ wòasi abe tɔsisi ene,

eye dukɔwo ƒe kesinɔnuwo ava nɛ

abe tɔʋu si ɖɔ gbã go la ene.

Àno eƒe no, akɔ wò ɖe eƒe abɔwo me,

eye àfe le eƒe atata.

¹³Abe ale si vi dada faa akɔe na via ene la,

nenema mafa akɔ na mi,

eye woafa akɔ na mi le Yerusalem ta.”

¹⁴Ne miekpɔ esia la, miaƒe dziwo akpɔ dzidzɔ,

eye miatsi abe gbe ene.

Woaɖe Yehowa ƒe asi ɖe go afia eƒe dɔlawo.

Ke woaɖe eƒe dɔmedzoe helĩhelĩ la, afia eƒe futɔwo.

¹⁵Kpɔ ɖa, Yehowa gbɔna kple dzo bibi,

eye eƒe tasiaɖamwo le abe ahomya ene.

Aɖe eƒe dziku ɖe go le dɔmedzoe helĩhelĩ me,

eye wòaɖe eƒe mokaname afia le dzo ƒe aɖewo me,

¹⁶elabena Yehowa atsɔ dzo

kple eƒe yi ahe ʋɔnudɔdrɔ̃ ava amewo katã dzi.

Ame geɖewoe nye ame siwo Yehowa awu.

¹⁷Yehowa be, “Ame siwo wɔ wo ɖokuiwo kɔkɔe hekɔ wo ɖokuiwo ŋu nyuie be woayi ɖe abɔwo me, eye wokplɔ ame si le titina na halã, alegeli kple ŋunyɔnu bubuwo ɖulawo ɖo la, wo katã woatsrɔ̃ ɖekae.

¹⁸“Ke nye la, le woƒe nuwɔnawo kple tameɖoɖo ta la, esusɔ vie mava ƒo dukɔwo kple gbegbɔgblɔwo katã nu ƒu be woakpɔ nye ŋutikɔkɔe.

¹⁹“Maɖo dzesi anyi ɖe wo dome, eye maɖo ame siwo tsi agbe la ƒe ɖewo ɖe dukɔwo dome, ɖe Tarsis, Libia kple Lidiatɔwo dome, ame siwo xɔ ŋkɔ le aŋutrɔdada me. Maɖo ɖewo ɖe Tubal, Griknyigba dzi kple didiƒeƒukpowo dzi, afi si womese nye gãnyenye alo kpɔ nye ŋutikɔkɔe le kpɔ o. Woaɖe gbeƒã nye ŋutikɔkɔe le dukɔwo dome. ²⁰Woakplɔ nɔviwò ŋutsuwo katã ɖe asi vɛ, woanɔ sɔwo dzi, woanɔ tasiaɖamwo me, woanɔ kekewo, tedzisɔwo kple kposɔwo dzi, tso dukɔwo katã dome ava nye to kɔkɔe, Yerusalem dzi abe vɔsa ene na Yehowa. Woatsɔ wo vɛ abe ale si Israelviwo tsɔa nuɖuvɔsa vaa Yehowa ƒe gbedoxɔ me ɖe agba gbadzɛwo me ene, ²¹eye matia wo dometɔ aɖewo be woanye nunɔlawo kple Leviviwo.” Yehowae gblɔe.

²²Yehowa be, “Abe ale si dziƒo kple anyigba yeye siwo mewɔ la anɔ anyi tegbee le nye ŋkume ene la, nenema ke wò ŋkɔ kple wò dzidzimeviwo anɔ anyi tegbee. ²³Tso Dzinu Yeye yi Dzinu Yeye, tso Dzudzɔgbe ɖeka yi Dzudzɔgbe bubu, amegbetɔwo katã ava ade ta agu ɖe nye ŋkume. ²⁴Woado go aɖakpɔ ame siwo dze aglã ɖe ŋunye la ƒe kukuawo, elabena woƒe nyewo maku o, woƒe dzowo matsi o, eye woanye ŋunyɔ na amegbetɔƒomea katã.”