К Титу

Павелым Посланияңи Титымун

¹Укут посланият Павелымың пиңӯт қыпҳаҳтыңаның Кияӷныӷым, апостолыңаныңлъю Иисус Христосым. Каяхтыка̄гуңа каюсӣтысқылъюки Кияӷныӷым накмикыхкӣ югыт ухпылъыҳтуҳтаӷӣсқылъюки, лӣтысқылъюкулъю ипапилъық. Та̄м ипапилъҳым каюсиҳлъықӣ югыт кияҳтылъыҳқӣт Кияӷныӷым пиюкылъҳатун. ²Та̄хкын ата̄симың ипапилъыӷмың сиӷималъылгӯкут кынлыңилңуӷмың уңувалъыӷмың. Иқлъыңиқигатңўа̄ӷым Кияӷныӷым акықусяқыхкақа̄ та̄на уңувалъық има аюмирухлъяха̄ның. ³Ынка̄м пилъыҳқаҳлъюўа̄ӷмини Кияӷныӷым лӣтыстыкақа̄ та̄на кынлыңилңуқ уңувалъық уңипамикун. Хўаңамнун ныӷьюкуткақа̄ уңипани ынка̄м уңипақақақа қылӷутылъҳатун Кияӷныӷым Югулиӷистымта.

⁴Укут посланият Титымун пиңӯт, иӷныпикамкын ухпықилъымтыгныгун. Кияӷныӷым Атам, Христос Иисусымлъю Югулиӷистымта қуяслъитынлъю, ныкыхмылъылгуслъитынлъю.

Титым Қыпҳақа̄ Критыми

⁵Униткақамкын Критыми, апыӷӣӷысқылъюку қыпҳақаҳпут апыӷӣлъҳилңуқ. Накмӣҳтӣсқысюгамкын Пресвитерыкаҳқамың юӷаӷвигнун тамаҳӣтни нунаҳаӷми. Нықамиклъюки қылӷутканка: ⁶Пресвитерыкаҳқақ авутңисяҳқа̄гуқ; ата̄симың нулӣлгуяҳқа̄гуқ, авақутӣлъю ухпықа̄яҳқа̄гут; нылъиқныӷуяҳқа̄нӷитут, қа̄ткусигасяҳқа̄нӷитутлъю. ⁷Иглыӷутистыңутминың Кияӷныӷым қыпҳақа̄нун, Епископа авутңисяҳқа̄гуқ. Юкыҳқынӷуяҳқа̄нӷитуқ, налиӷмың ка̄тқаҳта̄маңуяҳқа̄нӷитуқ, налиӷмың сю̄мыстыңуяҳқа̄нӷитуқ, налиӷмың сю̄хлъюгуяҳқа̄нӷитуқ, налиӷмың пакигныӷуяҳқа̄нӷитуқ аклъюңиӷиналюни. ⁸Итупилъ упуӷанӷуяҳқа̄гуқ, пиниқистыкаҳқақа̄ пинилъҳым. Нуқынъыҳтуяҳқа̄гуқ, ылъқуӷутңаяҳқа̄гуқ, таӷныӷагмикун пылюңисяҳқа̄гуқ, нуқытутияҳқа̄гуқ алңунак сыӷлыӷмың. ⁹Лъңа ата̄сиӷмысяҳқа̄гуқ ипапигнун апыҳтӯсянун апыҳтуӷалъыңылъыӷмитун. Атуқлъюки ипапигыт апыҳтӯсят кайымылъықӣ югыт, лӣгикыслъықӣлъю апыҳтуӷистысиӷўа̄ӷыт анахутңанилюки.

¹⁰Угля̄пихтут қа̄ткусюгигалңӯт, тымңи акузилӷӣт пӯҳтилӷӣт илямыхның, кияң тама̄куңӯт апыҳтуӷилӷӣт язычнигыт ухпықӣт обрезанияҳқа̄нилюки. ¹¹Та̄қыстики таўатын апыҳтуӷилъҳитның. Тымңимың апыҳтуӷилъыӷмыхтыхун алңунасыӷаҳқақӣт ӣңунӣта ныңлъюгутыт. Апыҳтуӷӣқут апыҳтӯсяҳқақынӷилъкымыхның; таўатын пӣқут аклъюңиӷипигыснаӷналютың. ¹²Ата̄сим Критыӷмӣм ӯкналиқистым пикақӣ: «Критыӷмӣт қӯнпың иқлъыңаҳтут, угиҳсялӷӣстун тыӷикусястун аюқут, иҳсяниталӷӣңӯтлъю ныӷыҳлъягыт». ¹³Таўатын пилъҳа ипаңӯқ. Та̄на апалъюқлъюку қывӯлъюки аӷью̄ҳқи Критыӷмӣт ухпықӣт ухпықысқылъюки ипапигыт апыҳтӯсят. ¹⁴Уңипа̄тики наганъаниӷлиткиңуқ Иудеит тымңи уңипаӷа̄таңит. Қа̄ткынъаниӷлиткиңуқ югыт қылӷусяңлъяқӣт. Та̄куңӯт иҳсякикат ипапигның апыҳтӯсяның. ¹⁵Сяңўа̄ қамахлъюни пылюңитуқ тама̄кунун пылюңилңуӷнун. Иўырңа сяңўа̄ қамахлъюни пылюңинъыӷитуқ тама̄кунун пылюңинъыӷилңуӷнун. Кияҳтыңъӯт сыӷлыҳқылъыӷми, ухпықигата̄тлъю Христос. Умьюгӣтлъю, сюмыӷныӷитлъю нукыхнаҳтыка̄гут, ынка̄м лӣгиксяҳқа̄нанӣма̄т пинилъықлъю, сыӷлылъықлъю. ¹⁶Лӣсимакнӣқа̄т Кияӷнық иўырңа кияҳта̄лъҳита ипапиҳқақа̄т налъюкутаңа: угумикнипихтут, қа̄ткусигатут, сясӣнӷитутлъю сяңўа̄ алңунак пинитун пина̄нӷита̄т.

Ипапигыт Апыҳтӯсят Ухпықанун

¹Иўырңа лъпык апыҳтӯсяқики ухпықанун ипапигыт апыҳтӯсят. ²Апыҳтуҳқи нуйыклъӣт югыт нуқынъыҳтусқылъюки, сӣвакналӷӣңулюки, сюмыҳтаӷаюсқылъюки, айыпсюгитысқылъюки ухпықилъыҳқун, пиниқылъыҳқун, нуқынъыҳтулъыҳқун. ³Таўатыҳпигақ апыҳтуҳқи нуйыклъӣт аӷнат кияҳтысқылъюки тӯнңалюки Кияӷныӷмун. Сыӷлытун акузиткысяҳқақынӷитӣт илятың, налиӷмың мыӷыҳлъяфқӣта виномың. Апыҳтуӷияҳқа̄гут пинитун кияҳта̄лъыҳқамың, ⁴ынка̄м пыҳқиҳлъықӣт уюқлъӣт аӷнат пиниқысқылъюки угиңитлъю, авақутӣтлъю. ⁵Сюмыҳтаӷақыхсяҳқа̄гут, пылюңисяҳқа̄гут кияҳта̄лъыӷмыхни, қыпҳақыхсяҳқа̄гут нымыхни, наңлъыхтаӷьяҳқа̄гут, қа̄ткусяҳқа̄гут угимыхнун. Ынка̄м китум алңунак сыӷлықӯӷна̄нӷитӣ Кияӷныӷым апыҳтӯсӣ.

⁶Таўатыҳпигақ қылыҳқи нукалъпигат нуқынъыҳтусқылъюки. ⁷Лъпык сялъыҳпыгун тамаҳа̄кун, успута̄ўи лъңитнун аныӷныҳқилъыҳпыгун. Апыҳтуӷӣқи ипапиҳқылъютын, пира̄мсилютын. ⁸Ўатаҳлъяк апыҳтӯсяқыхкан ылъқуӷутңали ынка̄м китум алңунак сыӷлықӯнӷилъилъю. Таўатын пикувык кипулъхина̄ҳтыт сыӷлытун акузиткынъа̄нӷитӣлъю, кипулъхина̄лъҳиталъю кайңуюхтыслъықӣ. ⁹Апыҳтуҳқи қыпҳаҳтыля̄ӷыт қа̄ткысқылъюки пилӣтыстыңит, ыфқуҳтыңъўа̄ӷысқылъюкилъю. Выӷуснаӷьяҳқақынӷитӣт, ¹⁰налиӷмың тыглыгвиксяҳқақынӷитӣт. Йыӷлыги қӯнпың пинитун, ата̄сӣӷмылъютың пияҳқақӣт. Ынка̄м сялъыӷмыхтыхун тамаҳа̄кун пиюкнаңлъяҳлъықӣт апыҳтӯсӣ Кияӷныӷым Югулиӷистымта.

¹¹Таўатын кияҳсяҳқа̄гукут қаюҳлъяк Кияӷныӷым алӣҳтыкақа̄ пиниқылъыни югулилъыңысқылъюку ю̄к тамаҳа̄н. ¹²Та̄м пиниқылъҳым апыҳтуӷӣлъю пыхтысқылъюку кияҳта̄лъық Кияӷныӷмун аюқынӷилңуқ, иҳсякысқылъюки нунам юган пиюкылъҳи сыӷлыҳқыңъалӷӣт. Апыҳтуӷӣлъюлъю нуқынъыҳтусқылъюта, ылъқуӷутңалюта, кияҳтысқылъюта Кияӷныӷым пиюкылъҳатун нунами хўани. ¹³Таўатын кияҳтылъта утақӣмалюта қуяналӷӣмың сиӷималъыӷмың. Сиӷималъқаҳпут ниӷуҳқыңъалӷӣ алӣлъыҳқа̄ Иисус Христосым Кияӷныҳлъямта, Югулиӷистымта. ¹⁴Лъминың тӯныхка̄гуқ югулиналюта тамаҳа̄ның сыӷлыҳқылъыӷмың. Таўатын пика̄гуқ қаюҳлъяк пылюңиҳсяӷьюкаңилъю лъңанун югулюта, сягиқлъюта аныӷныҳқисқылъюта югнун.

¹⁵Апыҳтӯсяқики тама̄кут ухпықанун. Кияӷныӷым қылӷусӣ атуқлъюки кайымики, аӷулӣҳтикилъю сыӷлытун пиңуката. Йықай китумун алңунак укаваҳтыстыхпынаң.

Ухпықат Кияҳта̄лъыҳқа̄т

¹Нықаңуҳтики ухпықат малиҳқутақысқылъюки кавымым иглыӷутистыңитнун, умӣлўа̄ӷнунлъю. Қа̄ткутңаяҳқа̄гут, апыӷӣӷңаяҳқа̄гут тамаҳа̄нун аныӷныҳқилъыӷнун. ²Уңипа̄тики кина алңунак сыӷлытун акузиткыфқа̄н, а̄ҳтӣра̄фқа̄н писқылъюку. Итупилъ ныкыхмытулъюки, қусывыгңатулъюки писқылъюки тамаңанун. ³Хўаңкуталъю сивунӷани налъюяҳтукут, қа̄ткусигасяҳтукут, пӯҳтыңъаяҳтукутлъю. Югусимта пиюкылъҳа айӷӣлъюку, итагнаҳқусиқлъюку аюқсяӷаҳпут. Уңувалъыпут кияӷусиқсяӷапут сыӷлыпыста̄ӷмун, ақиналъыӷмунлъю. Югыт угумиксяӷӣлъю, угумикусяҳтукутлъю. ⁴Иўырңа Кияӷныӷым Югулиӷистымта лӣсимакыстыкақӣлъю наңлъыхталъыӷминың, пиниқылъыӷминыңлъю. ⁵Югуликақӣлъю апалъюқлъюку наңлъыхталъыни, нака̄н аныӷныҳқилъымтыхун. Аглыӷналӷӣгныкун Таӷныӷагныкун уӷвуқақӣ сыӷлыҳқылъыпут, нутаӷамыңлъю, уңувалъылиткақӣлъю. ⁶Кияӷныӷым кӯвыхкақа̄к Аглыӷналӷӣк Таӷныӷак кымнапихлъюкык хўаңкунъун Иисус Христосыкун, Югулиӷистымтыхун. ⁷Кияӷнық таўатын пика̄гуқ пиниқилъыӷмикун налъҳусяӷналюта ылъқуӷутңалъыӷминун. Ынка̄м сиӷималъылгӯкут хўаңкута пилӣнъалюку кынлыңилңуқ уңувалъық. ⁸Тама̄кут пилъҳыт ипаңӯт. Тама̄кут апыҳтӯсят лъпынун сягиқутысқысюганка югнун қа̄ткысқылъюки. Та̄хкын ухпылъылгыт Кияӷныҳқун аныӷныҳқипыста̄ҳлъықут. Тама̄кут аныӷныҳқилъҳыт пинилӷӣңӯтлъю, каютңӯтлъю тамаңанун.

⁹Иўырңа лъпык иқитңалютын тама̄куның тымңи қаниқулъҳӣның, а̄ҳтӣра̄ӷулъҳӣның сивуныӷмың а̄тҳитның, Лӣлиҳтӯсяныңлъю. Тама̄на сясӣнӷитуқ, каютңуна̄нӷитуқ китумун алңунак. ¹⁰Кина алңунак а̄фқӯтыстилӷӣ кылыңася̄ӷнакын ата̄симың налиӷмың алӷиӷлюку. Наганъыӷилъкан пыхнакын. ¹¹Лӣсимакан таўатылңӯм югым иҳсякыхкақа̄ ипапилъық, сыӷлыҳқыстыңӯқлъю. Ынка̄м лъңан катам сыӷлыҳқылъҳан нанқихсяҳқа̄ҳтыслъықа̄ аӷью̄ӷьяҳқа̄люку.

Та̄қнӣтыт Апыҳтуӷалъҳыт

¹²Агляҳтыстыкумкун Артема налиӷмың Тихик лъпынун, Никополынъақыҳлъяха̄тын, қаюҳлъяк уксюҳсюгақуңа тама̄ни. ¹³Каюсиӷнақыҳлъягнакыхкын законник Зина, Аполлослъю иглыӷалъыҳқахкынун. Ўатаҳлъяк ята̄ҳқунъакыхкын кылъқысяҳқамың сямың аклъюкыхкахкының. ¹⁴Ухпықа̄лгутымта пыҳқихся̄ткылъитху аныӷныҳқуткаҳқақ ынка̄м каюсиӷьяқлъыгуҳнакаңит аклъюкыхкапилгыт. Тымңи кияҳта̄фқа̄мың пилит. ¹⁵Қамахлъютың хўаңамнилңӯт пиниқӣсиңуқ. Пиниқылъыҳпут а̄пқаӷнакын ухпықа̄лгутымнъун пиниқистымнъун. Кияӷныӷым қуяслъиси қамахлъюси.