К Римлянам

Павелым Посланияңи Ухпықанун Римымылңуӷнун

¹Укут посланият Павелымың пиңӯт; қыпҳаҳтыка̄ңа Иисус Христосым. Кияӷныӷым туқлъюқақа̄ңа апостолыңулюңа, накмикыхкақа̄ңалъю уңипақысқылъюки Пинилӷӣт Уңипани.

²Аюмиқ Кияӷныӷым акықусяқыхкақӣ та̄кут Пинилӷӣт Уңипат ӯкналиқистымикун. Ӯкналиқуткыхкақӣт аглыӷналӷӣтхун Акузитытхун Игақыхкатхун. ³Та̄кут Пинилӷӣт Уңипат Кияӷныӷым Иӷныӷаның аюқут. Югулюни алъхықа̄гуқ Умӣлгым Давидым киңунӷитхун. ⁴Аглыӷналӷӣм Таӷныӷам лӣгикыстӣлъю Атаныҳпут Иисус Христос, Кияӷныӷым аҳтуӷьяҳқа̄нӷилңӯгуқ Иӷныӷа. Таӷныӷам ипапиҳқыхкақа̄ уңуваҳтыслъюку Иисус туқулъыӷмың. ⁵Лъңакун наңлъыкылъыңума̄ңа апостолыңулюңа. Таўатын Кияӷныӷым пикақа̄ңа туқлъӣсқылъюки нунатаҳа̄н юги ухпықысқылъюкулъю, қа̄ткысқылъюкулъю Христос. Ынка̄м Христосым а̄тҳа қӯлвалъыңылъықуқ. ⁶Лъпысилъю Римымылңуӷни, Кияӷныӷым туқлъюқақӣси Иисус Христосымун пикысқылъюси.

⁷Қамахлъюси лъпыси Римымылңуӷни Кияӷныӷым пиниқыхкӣтни, туқлъюқӣтнилъю юкналюси:

Кияӷныӷым Атамта, Атанӷымлъю Иисус Христосым каюсӣлъиси, ныкыхмылъылисилъилъю.

Юӷӣ Игамсиқаюлъҳым

⁸Сивуклъюку тамаҳаҳпысинун игамсиқаюгвикақа Кияӷнықа Иисус Христосыкун, қаюҳлъяк уңипа̄ ухпықилъыҳпыси миңитңӯқ юлӷутнун тамаҳа̄ни. ⁹Пинақылъқа қамахлъюку қыпҳа̄тақақа Кияӷнық, уңипақналюки Пинилӷӣт Уңипат Иӷныӷаның аюқылӷӣт. Кияӷнық лӣсимакистыкақа қӯнпың юӷа̄ткыңъукымси. ¹⁰Юӷаӷақуңалъю Кияӷныӷмун пиюкылъқыхкагу қынўатлъю лъпысинун пияҳқа̄люңа. ¹¹Ысҳаӷьюпихтақамси қуястылъылинъалюси Кияӷныӷым Таӷныӷахкының икнақсю̄хтысқылъюси. ¹²Хўатын пиңўа̄мси: қырңа̄мта кайымутунъалюта, лъпыси ухпықилъымкун, хўаңа ухпықилъыҳпысигун.

¹³Ухпықа̄лгутымни, лӣсимакысюгамси аўын ля̄лиҳфиксюгақамси иўырңа ся̄м қӯнпың пинӷитыстақа̄ңа. Ынка̄м ма̄тын каюсӣсюганка Римыӷмӣт ухпыӷысқылъюки Христосыкун, иляңитнун язычнигнун пилъымтун. ¹⁴Кияӷныӷым накмикыхкақа̄ңа уңипақысқылъюки Пинилӷӣт Уңипат. Ынка̄м уңипақсяҳқақанка тамаҳа̄нун, Грегынкунунлъю, Грегынкуңунӷилңуӷнунлъю, пыҳқиныӷнунлъю, налъю̄қанунлъю. ¹⁵Ынка̄м хўа̄ уңипақиюхлъягӯңа Пинилӷӣның Уңипаның лъпысинунлъю кияҳлъыҳӣни Римыми.

Пинилӷӣт Уңипат Кияӷныӷым Аҳтуӷьяҳқа̄нӷилъқӣ Югулилъыӷмун

¹⁶Кайңукигатанка Пинилӷӣт Уңипат: Кияӷныӷым аҳтуӷьяҳқа̄нӷилъқӣ югулилъыӷмун тамаҳа̄нун ухпықилӷӣнун. Сивуклъютың уңипақыхка̄гут Иудеянун та̄хкын язычнигнун. ¹⁷Та̄кут Пинилӷӣт Уңипат лӣгикыстӣлъю натын Кияӷныӷым налъҳусяӷақутаңи югыт ылъқуӷутңалъыӷмыхнун. Ухпықилъҳинӣтхун Кияӷнық таўатын пӣқуқ. Катам Акузитни Игақыхкани игақңа̄қ: «Налъҳуҳқыхкақ Кияӷныӷым ылъқуӷутңалъҳанун кияҳлъықуқ ныӷьюклъюку лъңа».

Кияӷныӷым Сякшитылъыҳлъяга

¹⁸Қилягмың Кияӷныӷым югыт лӣгикыстӣ сякшитутңунилюки, аӷью̄ҳлъықнилюкилъю сыӷлыҳқылъҳитнун, сыӷлытунлъю пилъҳитнун. Сыӷлытун пилъҳита лӣгикнаниҳтыстӣт Кияӷныӷым ипапилъҳаның. ¹⁹Сяңўа̄ югыт лӣсимакыхка̄т Кияӷныӷмың аюқылӷӣ хўатыҳлъюўа̄ӷӯқ лъңитнун қаюҳлъяк Кияӷныӷым хўатыҳлъюўа̄ӷуҳта̄ лъңитнун. ²⁰Кияӷныӷым улиматаңаның нуна, югыт лӣгикңўа̄ӷақа̄т аҳтуӷьяҳқа̄нӷилъҳа аӷулӣӷигалңуқ, ипалъю Кияӷныӷутаңа. Қайўа югыт ысҳаҳпагниңитыӷңа̄ӷмыхтыкык та̄кук, паниның лӣсимакахкыт Кияӷныӷым улима̄ӷакун. Ынка̄м югыт апалъӣтут хўатын пилъыҳқамың, Налъюкаҳпут Кияӷнылгутаңа. ²¹Лӣсимакыӷңа̄ӷмыхтыху Кияӷнық, қӯлвӣгата̄т Кияӷныӷулюку, игамсиқаюгвикигата̄тлъю. Йыӷлыги сюмыҳтаӷалъҳит Кияӷныӷмың сятңунаниқа̄гут, умьюгӣтлъю лӣгикнаниқа̄гут. ²²Пыҳқинӷунӣқут иўырңа налъю̄ҳтақут. ²³Ынка̄м манигуҳпына̄н Кияӷнық туқуяҳқаҳа̄нӷилңуқ, йыӷлыги манигуӷақӣт кияӷныңлъяқатың юхсюгнилңӯт, қаўа̄хсюгнилңӯт, тыӷикусяҳсюгнилңӯт, налиӷмың нымыӷьяҳсюгнилңӯт.

²⁴Тама̄кын апалъюқлъюку Кияӷныӷым пыхтӣ атуқысқылъюки нукыхналӷӣт похотилъӷыт пиюкыҳлъякӣт. Ынка̄м атуқақӣт югуситың анагңалюки, нечистотамың илямыхнун, ²⁵қаюҳлъяк ипапилъық Кияӷныӷмың аюқылӷӣ на̄вӷусима̄т иқлъыңамун. Ынка̄ңам манигуӷақӣтлъю, қыпҳа̄тақӣтлъю Кияӷныӷым улима̄ӷи, авылӷаӷлюку Улимаӷиста лъңа катам. Лъңаңӯқ усюқсяҳқақ қӯнпырухлъяк кынлыңуна̄н! Аминь.

²⁶Тама̄кын апалъюқлъюку Кияӷныӷым пыхтӣ атуқысқылъюки сыӷлыҳқылъҳыт пиюкыҳлъякӣт. Аӷнат альңунаҳқильӷит югыт, йыӷлыги альңунаҳқысягутут аӷна̄лгутмыхның. ²⁷Таўатыҳпигақ югытлъю альңунаҳқысюгнаниӷит аӷнат, йыӷлыги альңунаҳқыльӷит юлгутмыхның. Таўатын пика̄таңитның Кияӷныӷым аӷью̄ӷӣ югусӣтхун апалъюқлъюки анахутылъыҳлъягит.

²⁸Тама̄кут югыт сюмыӷмыхни сятңунӷинъӣқа̄т лӣсимакылъық Кияӷныӷмың аюқылӷӣ. Ынка̄м Кияӷныӷым пыхтӣ сятңунӷилңуӷнун сюмыҳтаӷалъҳитнун, атуҳқақынӷисяқаңитнунлъю. ²⁹Алъя̄ҳӣнаӷмың сыӷлыӷмың пимаңинаӷақут, сыӷлыҳқақут, пакигныӷӯт, угумикытаҳтутлъю. Ақинакытаҳтут, юхтаӷьюныҳтӯт, пилъюўаӷьюныҳтӯт, пӯҳтиюныҳтӯт, сюмыҳтаӷа̄ткақӣтлъю илятың сыӷлыпигулюки. Йӣлъхӣқут, ³⁰сыӷлытун акузиткақӣт илятың. Угумика̄т Кияӷнық, юкыҳқынӷӯт, қука̄югныӷӯтлъю. Сюмыҳтаӷаӷақут ўата сыӷлытун пиналютың; қа̄ткусигатут аңаюқамыхнун, ³¹налъю̄т, акықусятың атуқигатӣт, наңлъыгьюгигатут, нафуҳтӣтақутлъю илямыхнун. ³²Лӣсимакӣт Кияӷныӷым Лӣлиҳтӯсӣ пилӷӣт таўатылңӯт югыт алъхыҳсяҳқақа̄нңуқ туқулъық. Нагныӷутңинаҳпынаки тама̄кут атуқыхкатың, талўа итагнақақӣт таўатын пилӷӣт.

Кияӷныӷым Нанқихтилъҳа

¹Тама̄кын апалъюқлъюку нанқихтикувык югның анагнӣлъқавигитутын. Нанқихныҳпыки, лъпынун нанқихтақутын аӷью̄ӷьяҳқа̄лютын қаюҳлъяк лъпыклъю лъңистун пӣқылӷӣтын. ²Кияӷнық нанқихтӣқуқ югның сыӷлыпыста̄тун пилӷӣның, лӣсимакаҳпутлъю нанқихтилъҳи ылъқуӷутңа̄т. ³Иўырңа нанқихтақатын анахулъҳӣт, нақамлъю лъпык катам пӣқа̄тын тама̄кут ата̄сит анахутылъҳыт. Ынка̄м сюмыҳпынӣ анагьяҳқа̄нилюку пизигӯ Кияӷныӷым нанқихтилъҳа? ⁴Лӣгикынӷисигӯ наңлъыхтаҳтуляңа Кияӷныӷым? Аӷью̄ӷаҳсигалъкаңатын таўаниңинақ қаюҳлъяк нуқытутақыхкаңатын. Сюмыҳпынӣи та̄кут сятңунӷита̄т? Лӣсимакынӷисигӯ Кияӷныӷым наңлъыкақыхкаңатын қаюҳлъяк авутыҳқысқысюкаңатын? ⁵Иўырңа лъпык алыҳқуныҳлъюгӯтын, пиныҳлъюгӯтын; тама̄кын апалъюқлъюку авутыҳқысюгигатутын. Ынка̄ңам лъпык катам улимаңўа̄н аӷью̄лъыңылъыҳқан сыӷлыӷатаӷа̄люку Нанқихтилъҳым Аӷныӷани. Таўани Аӷныӷми Кияӷныӷым алӣҳлъықа̄к сякша̄лъынилъю, ылъқуӷутңалӷӣлъю нанқихтилъыни. ⁶Нанқихлъықӣ тамаҳӣта югыт апыӷӣӷутылъҳистун. ⁷Иляңи югыт пинитун пимаңинаӷақут қаюҳлъяк Кияӷныӷмың алъхыҳсюкаңит усюқилъық, қӯлвалъық, югусиқлъю туқуяҳқа̄нӷилңуқ. Ынка̄м Кияӷныӷым кынлыңилңуӷмың уңувалъылилъықӣ. ⁸Иўырңа иляңи югыт лъңина̄югныӷӯт. Ухпықсюгигата̄т ипапилъық сыӷлыпыста̄тун пиналютың. Ынка̄м Кияӷныӷым сякшитутыҳлъяглюки, аӷью̄ҳлъяхлъықӣ. ⁹Қамахтыңъўа̄ӷлюни нунамылңуқ ю̄к, Иудея налиӷмың язычник, сыӷлыпыста̄тун пикақ, Кияӷныӷым аӷью̄ҳлъықа̄ сыӷлылӣӷмыңлъю, икфиқылъыӷмыңлъю. ¹⁰Иўырңа қамахтыңъўа̄ӷлюни ю̄к, Иудея налиӷмың язычник, пинитун пикақ, Кияӷныӷым усюқылъықа̄, қӯлваҳлъықа̄, ныкыхмылъилилъықа̄лъю. ¹¹Танӣлъңунаки Кияӷныӷым нанқихлъықӣ қамахтыңъўа̄ӷлюки югыт.

¹²Язычнигыт алъхыҳтылъҳитӣт Лӣлиҳтӯсят Кияӷныӷым тӯныхкӣ Моисейемун. Ынка̄м сыӷлыҳқылӷӣт налъюклъюки Лӣлиҳтӯсят, туқуката Кияӷныӷым нанқихна̄нӷитӣ Лӣлиҳтӯсятхун. Иудеит Лӣлиҳтӯсялгӯт, ынка̄м сыӷлыҳқыхката Кияӷныӷым нанқихлъықӣ Лӣлиҳтӯсятхун. ¹³Тама̄кут нагатаӷысналӷӣт Лӣлиҳтӯсяминун, Кияӷныӷым налъҳусӣгатӣ ылъқуӷутңалъыӷминун. Иўырңа қа̄ткулъҳӣт Лӣлиҳтӯсяминун налъҳуҳқақӣ ылъқуӷутңалъыӷминун. ¹⁴Язычнигыт алъхыҳтылъҳитӣт Кияӷныӷым Лӣлиҳтӯсӣ. Иўырңа қа̄ткынъыӷмыхтыки та̄кут Лӣлиҳтӯсят, қа̄ткутылъҳита Лӣлиҳтӯсялгыстун аюқыстӣт илюмыхтыхун, алъхыҳтыкақынӷитыӷңа̄ӷмыхтыки. ¹⁵Қа̄ткутылъҳита югнун лӣгикыстӣт илюмыхтыхун лӣсимакӣт Лӣлиҳтӯсят қылӷусӣт. Сюмыҳтаӷалъҳиталъю лӣсимакыстӣт Лӣлиҳтӯсят илюңитнитуляңи, қаюҳлъяк сюмыҳтаӷалъҳита иляңакун анахунъӣқӣт налиӷмың иляңакун итагнаӷнӣқӣт. ¹⁶Нанқихтилъҳым Аӷныӷани, Кияӷныӷым нанқихлъықӣ югыт аксяқыхкӣт Христос Иисусыкун. А̄пҳақақа та̄на уңипақнымки Пинилӷӣт Уңипат.

Иудеитлъю, Лӣлиҳтӯсятлъю

¹⁷Ма̄тынңам письмоюганка Иудеит. Иудейяңукувык, ныӷьюкатын Лӣлиҳтӯсят Кияӷныӷым тӯныхкақӣ юхпынун. Қука̄юхтутынлъю Кияӷныӷмун пикнилютын. ¹⁸Лӣлиҳтӯсятхун лӣсимакан сяңўа̄ Кияӷныӷым сясқысюлъҳа лъпынун, натынлъю накмиксяҳқа̄таңа сяңўа̄ ылъқуӷутңалӷӣ. ¹⁹Ынка̄м сюмыҳпыни маӷьяҳқуҳтыңунӣқутын ая̄канун, ниӷугунӣқутынлъю мамлыгмылңуӷнун. ²⁰Сюмыҳпыни налъҳусяҳтыңунӣқутын налъю̄қанун, апыҳтуӷистыңунӣқутыңлъю таӷнуҳаӷнун. Лӣлиҳтӯсялгутыхпының, сюмыҳпыни лӣсимакнилюку сяңўа̄ тамаҳа̄н пӣқан, қамахлъюкилъю ипапилъық. ²¹Апыҳтуӷақатын илятың, сяңан лъпынун апыҳтӣгасин? Уңипақӣқутын: «Тыглыхпынаң», лъпыык, тыглыгӣгасӣн? ²²Пӣқутын: «Гылгаӷнӣҳпынаң», лъпык, гылгаӷнӣӷӣгасӣн? Угумикыпихтатын кияӷныңлъяқат, лъпык, тугунъӣқӣгасӣн храмыңитның? ²³Қука̄юхтақутын қаюҳлъяк Кияӷныӷым Лӣлиҳтӯсяни тӯныхкақӣ юхпынун. Иўырңа қа̄ткынӷинъыҳпыки Лӣлиҳтӯсят қӯлвӣгатан Кияӷнық. ²⁴Акузитни Игақыхкани игақңа̄қ: «Апалъюқлъюси лъпыси Иудеяни, язычнигыт сяңӯҳтақа̄т Кияӷныӷым а̄тҳа».

²⁵Қа̄ткыңъукуфки Кияӷныӷым Лӣлиҳтӯсӣ обрезаниялъҳын пиниҳтуқ. Иўырңа қа̄ткынӷилъкуфки Лӣлиҳтӯсят обрезаниялъҳилңуӷыстун аюқутын. Ынка̄м қуястылъыңна̄нӷитутын Кияӷныӷым акықуся̄ның. ²⁶Язычник обрезаниялъҳилңуқ қа̄ткулъҳӣ қылӷусӣтнун Лӣлиҳтӯсят, Кияӷныӷым тугуклъиҳлъықа̄ никимқун обрезанияка̄люку. ²⁷Лъпыси Иудеяни Лӣлиҳтӯсялгӯси игақңалӷӣның, обрезанияка̄гусилъю, та̄ўаңинақ қа̄ткигатаси Лӣлиҳтӯсят. Иўырңа язычнигыт обрезаниялъҳилңӯт, қа̄ткақӣт Лӣлиҳтӯсят. Ынка̄м қа̄ткутылъҳитхун Кияӷныӷым нанқихлъықӣси аӷью̄ӷьяҳқа̄люси. ²⁸Обрезанияңинаӷлюку югым югусӣ Иудеяпигуҳтысна̄нӷита̄. Обрезаниялъыпӣк пиңигатуқ югусим қа̄йңина̄кун. ²⁹Итупилъ, ю̄к Иудеяпӣгӯқ Иудейяңукуми илюмикун. Иҳсяқҳўа обрезанияка̄гуқ Аглыӷналӷӣгныкун Таӷныӷагныкун, нака̄н игақыхкатхун Лӣлиҳтӯсятхун. Ынка̄м Кияӷныӷмың усюқылъыңылъықуқ, нака̄н югның.

¹Сяңўа̄ аныӷныҳқусӣгўа ю̄к алъхықуми Иудейеңулюни? Сяңўа̄ аныӷныҳқусӣгўа обрезаниялъыӷмун? ²Угля̄пихтут аныӷныҳқусит! Сивулиҳпигақ Кияӷныӷым ныӷьюкуткақӣ Иудеянун Акузитыт Игақыхкат. ³Иляңи ата̄сӣӷмынъыӷилъката Кияӷныӷмун, Кияӷнық ата̄сӣӷмынъыӷитыслъықатхӯ? ⁴Йыӷлыгилъю! Тамаҳаӷми ю̄к иқлъыңиқыстыңуӷңа̄н, Кияӷнық ипаңӯқ. Акузитни Игақыхкани Кияӷныӷмың аюқылӷӣ игақңа̄қ хўатын:

«Акузиныҳпыни, тамаҳаӷми лӣсимакылъықа̄тын ылъқуӷутңанилютын.

Югыт нанқихтыкаңатын, ипапиҳқылъықатын анахутңанилюки».

⁵Анахунъымта, анахутылъымта югыт лӣгикыстыңъўа̄ӷақӣт Кияӷнық ылъқуӷутңанилюку. Ынка̄м пилъықыста̄ Кияӷнық анахунъилюку аӷью̄қаңилъю анахутылъымнъун? (Акузиңӯңа югыстун.) ⁶Таўатынъыӷитуқ! Кияӷнық ылъқуӷутңанӷилъкан, натынми Кияӷныӷым нанқихлъықаки нунам юги?

⁷Иўырңа ю̄к пинаялӷӣ: «Иқлъыңиқылъыӷма югыт усюқистақӣт Кияӷныӷмун қаюҳлъяк иқлъыңиқылъыӷма алӣҳтақа̄ Кияӷныӷым ипаңулъҳа. Ынка̄м сяңанңам Кияӷныӷым нанқихтаңа аӷью̄ӷьяҳқа̄люңа сыӷлыҳқыстытун?» ⁸Ю̄к пинаялӷӣлъю: «Сыӷлытун пилъта сяңўа̄ пинилӷӣ апыӷӣӷысқылъюку сыӷлытун пилъымнъың». Иляңи югыт тымңимың пӣқут хўаңкута апыҳтуӷӣқнилюта таўатын. Нанқихтылъыңьяҳқа̄гут аӷью̄ӷьяҳқа̄лютың, аӷью̄лъыҳқамыгыстун.

Кина Алңунак Ылъқуӷутңанӷитуқ

⁹Ынка̄м хўаңкута Иудеянӣ, пиниӷатаӷаӷыста̄ язычнигның? Нака̄, йыӷлыгилъю! А̄пҳўа̄қақанка Иудеитлъю, язычнигытлъю таўатыҳпигақ сыӷлыҳқылъҳым а̄ҳқутақлъюки аюқӣ. ¹⁰Акузитни Игақыхкани игақңа̄қ:

«Та̄ўа кина алңунак ылъқуӷутңанӷитуқ, талўа ата̄сиҳақ.

¹¹Кина алңунак лӣгикигатуқ,

китум алңунак ивӣгата̄ Кияӷнық.

¹²Қамахлъюни ю̄к тунутка̄гуқ Кияӷныӷмың;

қамахлъютың анахутка̄гут;

кина алңунак пинитун пиңигатуқ, талўа ата̄сиҳақ.

¹³Иҳсялъқӣт қылъпалңуӷыстун лъӣвӷыстун аюқут;

улютың атуқңўӣт пӯҳтимун,

қызимыхтыхун ядылгӯт нымыӷьястун;

¹⁴қа̄нӷит имиӷңа̄т злословиялъыӷныңлъю, угумикытиқылъыӷмыңлъю.

¹⁵Юхтаӷиракыхтут;

¹⁶навык алңунак пиныӷмыхни на̄фқӣстыңўа̄қут, сыӷлылӣҳқистыңўа̄қутлъю.

¹⁷Налъюка̄т ныкыхмылъюни кияҳтылъыҳқақ,

¹⁸талўа аликигата̄т Кияӷнық».

¹⁹Лӣсимакапут Иудеит Лӣлиҳтӯсялгит қа̄ткысяҳқақӣт қылӷусӣт. Ынка̄м та̄кут Лӣлиҳтӯсят ныпӣҳқылъықӣт югыт хўатын пилъыҳқӣтның: «Налъюкапут сяңутаңи сыӷлыҳқылъҳыт». Лӣлиҳтӯсятлъю лӣгикыслъықӣт Кияӷныӷмун нанқихлъықнилюки қамахлъюки нунам юги. ²⁰Нанқихтыкумики югыт налъҳусяӷна̄нӷитӣ ылъқуӷутңалъыӷминун қа̄ткутылъҳитхун Лӣлиҳтӯсянун. Итупилъ Лӣлиҳтӯсят лӣтыстӣ югыт сыӷлыҳқыстыңунилюки.

Ылъқуӷутңалъық Ухпықилъыҳқун

²¹Иўырңа Кияӷныӷым югыт лӣгикыстӣ налъҳусяҳлъықнилюки ылъқуӷутңалъыӷминун, нака̄н қа̄ткутылъҳитхун Лӣлиҳтӯсянун. Кияӷныӷым а̄пқақа̄ та̄на Лӣлиҳтӯсятхунлъю, ӯкналиқистытхунлъю. ²²Кияӷныӷым югыт налъҳусяқақӣ ылъқуӷутңалъыӷминун ухпықилъҳитхун Иисус Христосыкун. Та̄на ипаңӯқ тамаҳа̄нун ухпылӷӣнун Христосыкун қаюҳлъяк алъякунъыӷитут ²³қамахлъютың сыӷлыҳқыхка̄тмыхның. Ынка̄м нӯҳутка̄гут Кияӷныӷым а̄ңылъыҳлъяганун. ²⁴Иўырңа Кияӷныӷым акиңилңуҳқун тунусямикун налъҳусяқақӣ ылъқуӷутңалъыӷминун итымутистыңитхун, Христос Иисусыкун. ²⁵Кияӷныӷым тӯныхкақа̄ Иисус аҳқутңулюку сыӷлыҳқылъыӷнун. Ынка̄м Иисусым а̄ўакун сыӷывутақӣ югыт сыӷлыҳқылъҳит ухпықиңалӷӣт лъңакун. Таўатын лӣгикыстыкақа̄ ылъқуӷутңанилюни. Сивунӷани агани Кияӷныӷым нуқытуткақӣ югыт ынка̄м ныпӣӷуткақӣ сыӷлыҳқылъҳит. ²⁶Иўырңа ӯми пилъыӷми ипапиҳқа̄ ылъқуӷутңанилюни налъҳусялъыӷмикун алңунак ю̄к ылъқуӷутңалъыӷминун апалъюқлъюки ухпықилъҳит Иисусыкун.

²⁷Ынка̄м сяңа̄ўа қука̄югуткысяҳқаҳгуа? Қука̄югуткаҳқӣтукут! Қука̄юхна̄нӷитыста̄ қаюҳлъяк қа̄ткынъақуткыхкыпут Лӣлиҳтӯсят? Нака̄, қаюҳлъяк Кияӷныӷым налъҳусяқаңи югыт ылъқуӷутңалъыӷминун ухпықилъҳитхун Иисусыкун, нака̄н қа̄ткутылъҳитхун Лӣлиҳтӯсянун. ²⁸Ынка̄м лӣгикаҳпут ю̄к налъҳусяқа̄гуқ Кияӷныӷым ылъқуӷутңалъҳанун ухпықилъыҳқун, нака̄н қа̄ткутылъыҳқун Лӣлиҳтӯсянун. ²⁹Кияӷнық Иудеяңинаҳа̄т Кияӷнықатхӯ? Язычнигытлъю Кияӷнықынӷитатхӯ? А̄а, язычнигытлъю Кияӷнықа̄т, ³⁰ата̄сиҳа̄таңаның Кияӷнық. Ынка̄м налъҳусяҳлъықӣ Иудеит ылъқуӷутңалъыӷминун ухпықилъҳитхун, язычнигытлъю ухпықилъҳитхун. ³¹Лӣлиҳтӯся̄т сятңунаниҳқыстыкӣ ухпықилъымтыхун? Нака̄! Йыӷлыгилъю! Ухпықилъымта қа̄ткысюхтыстақӣ Лӣлиҳтӯсят қылӷуткӣт.

Успута̄лъҳа Авраамым

¹Сямыңʼңам пилъықыста Авраамымың, сивунымнъың хўаңкута Иудеяни? Сямың лӣтка̄ўа? ²Кияӷныӷым налъҳусяқақңукагу ылъқуӷутңалъыӷминун сялъҳакун, сямың қука̄югусиҳқалгунаяҳтуқ. Иўырңа Кияӷныӷмун қука̄югуткыпагниңитӣ сялъыни. ³Акузитни Игақыхкани игақңа̄қ хўатын: «Авраамым ухпықыхкақа̄ Кияӷнық ынка̄м ухпықилъҳа апалъюқлъюку Кияӷныӷым тугуклъиқақа̄ ылъқуӷутңалӷӣңулюку».

⁴Ю̄к қыпҳалъыӷминың акилыҳтӯсяңыхкаюгӯқ. Акилыҳтӯся̄ тунуся̄нӷитуқ қаюҳлъяк лъңан алъхыҳтыкақа̄ қыпҳа̄лъюку. ⁵Кияӷныӷым налъҳусяӷна̄нӷита̄ ю̄к ылъқуӷутңалъыӷминун қыпҳа̄тилъҳакун лъңанун. Итупилъ югым ныӷьюксяҳқақа̄ Кияӷнық налъҳусяӷикаюк сыӷлыҳқыстының ылъқуӷутңалъыӷминун ухпықилъҳитхун. ⁶Умӣлгым Давидым игақыхкақа̄ та̄на ата̄сиқ. Пика̄гуқ югыт қуястыпика̄нилюки Кияӷныӷым налъҳусяӷақңаки ылъқуӷутңалъыӷминун авылӷаӷлюки қыпҳа̄тилъҳит Кияӷныӷмун.

⁷«Қуястыка̄гут тама̄кут сыӷлыҳқылъҳит Кияӷныӷым сыӷывуткӣ, анахутылъҳит ся̄пыхкӣ!

⁸Қуястыка̄гуқ ю̄к сыӷлыҳқылъҳи Атанӷым сюмыӷмикнаниқаңи».

⁹Та̄на қуястылъық Давидым акузиткыхка̄, обрезаниякаҳӣнаӷнун пиңўа̄? Нака̄! Обрезаниялъҳилңуӷнунлъю пиңӯқ. Акузитни Игақыхкани игақңа̄қ: «Авраамым ухпықыхкақа̄ Кияӷнық, ынка̄м ухпықилъҳа апалъюқлъюку Кияӷныӷым тугуклъиқақа̄ ылъқуӷутңалюку». ¹⁰Қавңақ Кияӷныӷым тугуклъиқақагу? Сивуңани обрезаниялъҳа̄н налиӷмың киңуңаның? Сивуңани обрезаниялъҳан, нака̄н киңуңаның. ¹¹Тахталми та̄кўани Авраам обрезанияка̄гуқ. Обрезаниялъҳа налъюнӣлъкута̄гуқ ипапиҳқусӣлюни Кияӷныӷым налъҳусяқақыхкаңа ылъқуӷутңалъыӷминун ухпықилъҳакун. Сялин обрезаниялъҳилъюку Кияӷныӷым тугуклъиқақа̄ ылъқуӷутңалюку. Тама̄кын апалъюқлъюку Авраам атаңӯқ тамаҳа̄нун ухпықилӷӣнун обрезаниялъҳитыӷңа̄та, ынка̄м Кияӷныӷым тугуклъӣмӣ ылъқуӷутңалюки. ¹²Авраамылъю атака̄т обрезаниякат. Та̄на ипаңӯқ та̄ўаңинаҳақ ухпықилъылгукуйың Аврааматун, сялин обрезаниялъҳилъюку.

Кияӷныӷым Акықуся̄ Тамаҳа̄нун Аюқуқ Ухпықилъылыгнун

¹³Кияӷныӷым акықыхкақӣ Авраамылъю киңунқулъҳӣт ӣңунаҳа̄н нуна лъңитнун пагилъықнилюку. Акықусяқылъҳита̄ та̄на Авраамымун қаюҳлъяк қа̄ткыхкаңи Лӣлиҳтӯсят. Итупилъ Кияӷныӷым акықыхкақа̄ қаюҳлъяк ухпықыхкаңа ынка̄м Кияӷныӷым тугуклъиқақа̄ ылъқуӷутңалюку. ¹⁴Кияӷныӷым акықуся̄ тӯньяҳқа̄яқан қа̄ткулъҳӣнун Лӣлиҳтӯсянун, та̄ўа ухпықилъық сятңунӷитуқ. Кияӷныӷымлъю акықуся̄ сятңунӷитуқ. ¹⁵Кияӷнық сякшитақуқ югыт қа̄ткунъыӷинъыӷата Лӣлиҳтӯсянун тӯныхка̄нун Моисейемун. Иўырңа Лӣлиҳтӯсӣсяқан та̄ўа югыт қа̄ткунъыӷитусӣнъаяҳтут.

¹⁶Тама̄кын апалъюқлъюку ухпықилъыӷмыхтыхун югыт алъхыҳта̄т Кияӷныӷым акықуся̄ акиңилңӯлюку тунусяқ. Ынка̄м қамахлъютың Авраамым киңунӷита алъхыҳтыпыста̄ҳлъықа̄т Кияӷныӷым акықуся̄. Та̄на акықусяқ Иудеяңинаҳаӷнун аюқынӷитуқ Лӣлиҳтӯсялыгнун. Иўырңа ухпықилӷӣнунлъю аюқуқ Авраамым ухпықилъҳатун. Ынка̄м Авраам қамахлъюта атакаҳпут ухпықилӷӣни. ¹⁷Акузитни Игақыхкани игақңа̄қ: «Атаңуҳтыстамкын угляпихлъыҳӣнун нунат югитнун». Кияӷныӷым таўатын акықыхкақа̄ Авраам қаюҳлъяк ухпықыхкаңа Кияӷнық. Кияӷныӷӯқ туқуканың уңуваҳтикаюк, қылӷилъыӷмикунлъю улиматкаюк сямың сяңилңуӷмың.

¹⁸Авраамым авақутилъыҳқа̄ сиӷиманӣтка̄гуқ. Иўырңа ухпықыхкақа̄ Кияӷнық, сиӷимакумаңинақақа̄лъю. Ынка̄м атаңуҳтыка̄гуқ угля̄пихлъыҳӣнун нунат югитнун. Хўатын Кияӷныӷым пикақа̄: «Киңуныҳтын кыстыпагниңисяҳқа̄гут». ¹⁹Авраамым нулиҳа, Сарра, қумиңыпагниңитка̄лӷӣ. Лъңа Авраам ю̄к талъимат аюмиқулъыҳтуткалиӷьяҳтуӷлюни, туқумун туӷа̄ӷулӷӣ. Иўырңа тама̄кут сю̄мқыӷңа̄ӷмики, ухпықилъҳа Кияӷныӷмун укава̄маңилңуқ. ²⁰Ухпықинанӣмаңитуқ талўа айгуӷикумаңита̄ Кияӷныӷым акықуся̄. Иўырңа ухпықӣӷатаӷақақ, усюқыхка̄лъю Кияӷнық. ²¹Авраамым ипапиҳқуткыңъўа̄қақа̄ Кияӷныӷмун пияҳқақнилюку акықусяқыхкани. ²²Акузитни Игақыхкани игақңа̄қ: «Кияӷныӷым тугуклъиқақа̄ ылъқуӷутңалюку», апалъюқлъюку ухпықилъҳа. ²³Та̄кут акузитыт: «Кияӷныӷым тугуклъиқақа̄ ылъқуӷутңалюку», игақыхка̄гут нака̄н Авраамыңинаӷмун, ²⁴иўырңа игақыхка̄гут хўаңкунъунлъю. Кияӷныӷым тугуклъиҳлъықӣлъю ылъқуӷутңалюта қаюҳлъяк ухпықыхкыфут лъңа. Лъңаңӯқ Иисусымың Атанымнъың уңуваҳтыстикақ. ²⁵Кияӷныӷым тӯныхкақа̄ Иисус туқуматкысқылъюки сыӷлыҳқылъыпут, уңуваҳтыкақа̄лъю налъҳусяӷналюта ылъқуӷутңалъыӷминун.

Ылъқуӷутңалъық Кияӷныӷми

¹Тама̄кын апалъюқлъюку налъҳусяқа̄тымнъың Кияӷныӷым ылъқуӷутңалъҳанун ухпықилъымтыхун, ныкыхмылъылгӯкут Кияӷныӷми Атанымтыхун Иисус Христосыкун. ²Апалъюқлъюку ухпықилъыҳпут Иисусым кияҳтыстӣлъю Кияӷныӷым пиниқылъҳани. Ынка̄м қуяҳлъягӯкут қаюҳлъяк лӣсимакңўа̄ӷаҳпут Кияӷныӷым ныңиҳтыслъықӣлъю ниӷуҳқылъыӷминың. ³Та̄м ся̄ӷўакун қуя̄қукут сыӷлылӣлъымнъи қаюҳлъяк лӣсимакаҳпут сыӷлылӣлъҳым нуқынъыҳтулъыңыстақӣлъю. ⁴Нуқынъыҳтулъымтыхун Кияӷныӷым итагнақақӣлъю. Итагнақилъҳан сиӷималъыңыстақӣлъю. ⁵Та̄м сиӷималъҳым ӣлъқамиқна̄нӷитӣлъю қаюҳлъяк Кияӷныӷым кӯвыхкақа̄ пиниқылъыни қамавык илюмнъун Аглыӷналӷӣгныкун Таӷныӷагныкун, Кияӷныӷым тӯныхкамикун хўаңкунъун.

⁶Югулипагниңилъюта Христосым туқуматкыхкақӣ сыӷлыҳқыстыт, таўани пилъыҳқаҳлъюўа̄ӷми Кияӷныӷым накмикыхка̄ни. ⁷Ынтақун қафсинкӯраҳӣна̄т туқуматкиюгнаяҳтут ылъқуӷутңалӷӣмун югмун. Налиӷмың ынтақун кина туқуматкиюгнаяҳтуқ пинилӷӣмун югмун. ⁸Иўырңа Кияӷныӷым кылгуткақа̄ пиниқылъыни хўаңкунъун, паниның сыӷлыҳқыстыңулюта Христосым туқуматкыхкақӣлъю! ⁹Налъюнықнӣӷаҳпут Кияӷныӷым налъҳуся̄милъю ылъқуӷутңалъыӷминун Христосым а̄ўакун. Налъюнықнӣӷатаӷаӷаҳпут югулилъыңылъықукут Христосыкун Кияӷныӷым сякша̄лъҳаның. ¹⁰Хўаңкута Кияӷныӷым аңуяксяӷӣнкутлъю, иўырңа илялӣқақӣнкутлъю туқулъҳакун Иӷныӷми. Ма̄тын Кияӷныӷым илякумта̄қӣлъю, ынка̄м налъюнықнӣӷатаӷаӷаҳпут югулилъыңылъықукут Христосым уңувалъҳакун! ¹¹Та̄м ся̄ӷўакун, қуяҳлъягӯкут Кияӷныӷми Атанымтыхун Иисус Христосыкун. Лъңаңӯқ хўаңкунъун илялӣӷутыстилӷӣ Кияӷныӷмун.

Адамылъю, Христосылъю

¹²Юксюхўа̄қ, Адам, сыӷлыҳқақңан, сыӷлыҳқылъҳан туқулъық итыҳтыстыкақа̄ нунамун. Ынка̄м қамахлъюни ю̄к туқуяҳқа̄гуқ қаюҳлъяк қамахлъюни сыӷлыҳқыхка̄гуқ. ¹³Сыӷлыҳқылъылгука̄гуқ нунами сялин Кияӷныӷым тӯнылъҳилъюки Лӣлиҳтӯсят Моисейемун. Иўырңа Кияӷныӷым нанқихтылъҳитӣ югыт аӷью̄ӷьяҳқа̄люки сыӷлыҳқылъҳитнун қаюҳлъяк Лӣлиҳтусӣлңуқ. ¹⁴Паниның югыт кияҳтыка̄гут има Адамымың Моисейемун, қамахлъютың туқуяҳқа̄гут, малигулъютың тама̄кут сыӷлыҳқылъҳит Адамым сыӷлыҳқылъҳатун аюқынӷилңӯт.

Адам Христосытун аюқуқ, тагияҳқатун. ¹⁵Иўырңа Кияӷныӷым тунуся̄ Адамым сыӷлыҳқылъҳатун аюқынӷитуқ. Ипаңӯқ угляпихлъыҳӣт югыт туқука̄гут апалъюқлъюку ата̄сим югым сыӷлыҳқылъҳа. Иўырңа Кияӷныӷым пиниқылъҳа сыӷлыҳлъягӯқ. Ынка̄м угля̄пихлъыӷӣт югыт алъхыҳтыкақа̄т Кияӷныӷым ақыҳқыңъалӷӣ акиңилңуқ тунуся̄, пиниқылъҳакун ата̄сим югым Иисус Христосым. ¹⁶Алъякутыҳлъяхтук, Адамым сыӷлыҳқылъҳалъю, тунуся̄лъю Кияӷныӷым. Киңуңаның Адам сыӷлыҳқақңан Кияӷныӷым нанқихтыкақа̄ аӷью̄ӷьяҳқа̄люку. Иўырңа киңуңитның юлӷутыҳлъягыт сыӷлыҳқақңата, Кияӷныӷым акиңилңуҳқун тунусямикун налъҳусяҳтыстыкақӣ ылъқуӷутңалъыӷминун. ¹⁷Ата̄сиқ ю̄к сыӷлыҳқыхка̄гуқ ынка̄м лъңа апалъюқлъюку, туқулъҳым иглыӷутӣ қамахлъюки югыт. Иўырңа сяңўа̄ Кияӷныӷым апыӷӣқа̄ ата̄сикун юхкун, Иисус Христосыкун, а̄ңатаӷаҳтуқ сыӷлыҳқылъҳаның ата̄сим югым. Ынка̄м алъхыӷулъҳӣт Кияӷныӷым кымнапихлъыҳӣмың пиниқылъҳаның, тунуся̄ныңлъю ылъқуӷутңалъҳаның, қамахлъютың иглыӷутилъықут кияҳтылъыӷми ата̄сикун юхкун Иисус Христосыкун.

¹⁸Апалъюқлъюку Адамым ата̄сиқ сыӷлыҳқылъҳа, Кияӷныӷым нанқихтыкақӣ қамахлъюки югыт аӷью̄ӷьяҳқа̄люки. Таўатыҳпигақ апалъюқлъюку Христосым ата̄сиқ ылъқуӷутңалӷӣ пилъҳа Кияӷныӷым налъҳусяӷӣ қамахлъюки югыт ылъқуӷутңалъыӷминун, тӯнӣлъю уңувалъыӷмың. ¹⁹Қа̄ткунъыӷитылъҳакун ата̄сим югым, угля̄пихлъыӷӣт югыт сыӷлыҳқыстыңуҳтыка̄гут. Таўатыҳпигақ, қа̄ткутылъҳакун ата̄сим югым, угля̄пихлъыӷӣт югыт налъҳусяӷьяҳқа̄гут Кияӷныӷым ылъқуӷутңалъҳанун.

²⁰Лӣлиҳтӯсят Кияӷныӷым тӯныхкӣ Моисейемун югыт лӣся̄ӷаҳтыстӣт сыӷлыҳқылъыӷмың. Иўырңа югыт сыӷлыҳқатаӷаӷьята Кияӷныӷым наңлъыхталъҳа нуляңинақақ. ²¹Сыӷлыҳқылъҳым иглыӷуткақӣ югыт туқулъыҳқун. Иўырңа Кияӷныӷым пиниқылъҳан иглыӷутңўӣ югыт налъҳусялъыӷмикун лъми ылъқуӷутңалъыӷминун. Ынка̄м алъхыҳта̄т кынлыңилңуқ уңувалъық Иисус Христосыкун Атанымтыхун.

Туқулъық Сыӷлыҳқылъыҳқун Иўырңа Уңувалъық Христосыкун

¹Сямыңʼңам пилъықыста? Сыӷлыҳқумаңина̄лъта̄а Кияӷныӷым наңлъыхталъҳа нулясқылъюку? ²Нака̄! Қаюҳлъяк туқукастун аюқукут, ынка̄м туқука̄кумта натын сыӷлыҳқумаңинаӷнақыста? ³Лӣсимакаҳси, қамахлъюта крестиӷақңамта илятка̄гукут Христос Иисусымун. Илятка̄гуткутлъю туқулъҳанун крестиӷақңамта. ⁴Крестиӷылъымтыхун туқука̄гукутлъю, қуңука̄гукутлъю Христосыми. Аҳтуӷьяҳқа̄нӷилъыҳлъягмикун Атам уңуваҳтыкақа̄ Христос туқулъыӷмың. Ынка̄м кияҳсяҳқа̄ҳлъықукут кияҳта̄лъылиӷраӷаӷлюта.

⁵Кияӷныӷым илясимакаңилъю Христосымун туқулъҳакун, та̄хкын илятыстыпыста̄ҳлъықӣлъюлъю лъңанун уңуваҳтыслъюта лъңатун. ⁶Лӣсимакаҳпут хўаңкутылъюгуялӷӣт қақӯра̄тка̄гут Христосыкун иглықатақнанӣсқылъюта сыӷлыҳқылъҳым аҳтуӷьяҳқа̄нӷилъҳанун, қыпҳаҳтыля̄ӷунаниӷналюталъю сыӷлыҳқылъыӷмун. ⁷Ю̄к туқуныӷмини итымақуқ аҳтуӷьяҳқа̄нӷилъҳаның сыӷлыҳқылъҳым. ⁸Туқумакумта Христосыми, ухпықаҳпут кияҳтылгусиӷьяҳқақаҳпутлъю лъңа. ⁹Лӣсимакаҳпут Христос уңуваҳтыстыка̄гуқ туқулъыӷмың ынка̄м алъямыңлъю туқуяҳқа̄нӷитуқ қаюҳлъяк туқулъық аҳтуӷьяҳқа̄нӷилъҳӣтка̄гуқ лъңанун. ¹⁰Ата̄сиҳаӷмың туқука̄гуқ кая̄лъқынъалюку сыӷлыҳқылъық. Иўырңа уңуватминың, кияҳтыңъӯқ Кияӷныӷмун. ¹¹Таўатыҳпигақ сюмыҳтаӷаҳтык туқука̄люси сыӷлыҳқылъҳым аҳтуӷьяҳқа̄нӷилъҳанун, сюмыҳтаӷаҳтыклъю уңуваңулюси Кияӷныӷмун Христос Иисусыкун.

¹²Тама̄кын апалъюқлъюку сыӷлыҳқылъыӷмун иглықатақыстыхпынаки югусиси туқукаюгыт. Сыӷлыҳқылъҳым иглықатақыхкаки югусиси, қа̄ткысюхлъықаси югусиҳпыси сыӷлыҳқыңъалӷӣт пиюкылъҳи. ¹³Алңунак налиӷныӷи югусиҳпыси тӯныхпынаки сыӷлыҳқусӣлюки, қаюҳлъяк таўатын пикуфси тӯнылъықаси сыӷлыӷмун. Итупилъ тӯнитык Кияӷныӷмун. Туқукастун аюқсяҳтуси, иўырңа Кияӷныӷым уңуваҳтыкақӣси. Ынка̄м тӯнитыки ӣңунӣта югусиси Кияӷныӷмун лъңанун атуқысқылъюки ылъқуӷутңалъыӷмун. ¹⁴Сыӷлыҳқылъҳым иглықатақна̄нӷитӣси қаюҳлъяк иглықатақңўӣси Кияӷныӷым пиниқылъҳан; иглықатақңунӷитӣси Лӣлиҳтӯсят.

Қыпҳаҳтыля̄ӷи Ылъқуӷутңалъҳым

¹⁵Ынка̄м сянақыстаңам? Итагнаҳта̄а сыӷлыҳқылъыҳқаҳпут қаюҳлъяк Кияӷныӷым пиниқылъҳан иглықатақңукаңилъю нака̄н Лӣлиҳтӯсят? Нака̄, итагнанӷитуқ! ¹⁶Лӣсимакыстыки тӯныхкуфси китумун қа̄ткысяҳқа̄люку, та̄ўа лъңан қыпҳаҳтыля̄қа̄ҳлъықӣси. Қа̄ткыхкуфсигу сыӷлыҳқылъық, туқуслъықӣси. Иўырңа қа̄ткыхкуфсигу Кияӷнық, налъҳусяҳлъықӣси ылъқуӷутңалъыӷминун. ¹⁷Қыпҳаҳтыля̄ӷуяҳтуси сыӷлыҳқылъыӷмун. Иўырңа игамсиқаюгвикақа Кияӷнық қаюҳлъяк ма̄тын қамакырухлъяк қа̄ткыхкыси апыҳтӯсяӷраӷа̄т апыҳтӯсяқыхкат лъпысинун. ¹⁸Итымутка̄гуси сыӷлыҳқылъыӷмың ынка̄м қыпҳаҳтыля̄ӷуҳтыка̄гуси ылъқуӷутңалъыӷмун. ¹⁹Тама̄кут лӣгикныҳлъюгутаңитның лъпысинун, успутақңўа̄нка қыпҳаҳтыля̄ӷытлъю пилӣтыстыңитлъю. Сивунӷани тӯныхкаюгуяӷаси югусиси қыпҳаҳтыля̄ӷулюки нукыхналӷӣнунлъю, нулямаңиналӷӣнунлъю сыӷлытун пилъыӷнун. Ма̄тын тӯнитыки югусиси қыпҳаҳтыля̄ӷулюки ылъқуӷутңалъыӷмун кияҳтысқылъюси пылюңилъюси.

²⁰Қыпҳаҳтыля̄ӷўа̄қңафси сыӷлыҳқылъыӷмун, ылъқуӷутңалъҳым иглықатақылъҳитӣси. ²¹Сивунӷани сыӷлытун пика̄гуси, иўырңа ма̄тын кайңука̄ҳси тама̄кут сыӷлытун пикаси. Сяңа̄ўа алъхыҳтыкаҳси тама̄кут пилюки? Алъхыҳтыкақаҳси туқулъҳинаҳақ. ²²Иўырңа ма̄тын итымулъюси сыӷлыҳқылъыӷмың қыпҳаҳтыля̄ӷуҳтыка̄гуси Кияӷныӷмун. Ынка̄м Кияӷныӷым пылюңӣҳтысимӣси, алъхыӷутысимӣсилъю кынлыңилңуӷмың уңувалъыӷмың. ²³Акилыҳтӯся̄ сыӷлыҳқылъҳым туқулъҳӯқ; иўырңа Кияӷныӷым акиңилңуқ тунуся̄ кынлыңилңӯгуқ уңувалъық Христос Иисусыкун Атанымтыхун.

Ухпықатлъю, Лӣлиҳтӯсятлъю

¹Ухпықа̄лгутымни, письмомамси лӣсимакилӷӣни Лӣлиҳтӯсяның. Ынка̄м лӣгикаси Лӣлиҳтӯсят қылӷақӣт югыт кияҳтыңъулюки. ²Угӣқақ аӷнақ успута̄гуқ. Лӣлиҳтӯсям қылылъҳани аӷнақ угиминисяҳқа̄гуқ тахталңатун угими кияҳтылъҳан. Иўырңа туқукан угини, та̄ўа итымылъықуқ Лӣлиҳтӯся̄ның ныңуҳтылъҳым. ³Иўырңа, угини уңувалюку алъями югми кияҳтыкуми гылгаӷнӣҳтыңулюни атиӷьяҳқа̄гуқ. Иўырңа угиңа туқумакан, итымылъықуқ та̄хкын Лӣлиҳтӯсямың. Гылгаӷнӣӷунӷитуқ угӣнқихтыкуми. ⁴Ухпықа̄лгутымни, лъпысилъю итымума̄си Лӣлиҳтӯсяның қаюҳлъяк туқука̄гуси Христосыми. Тама̄кын апалъюқлъюку Христосым пикӣси. Лъңаңӯқ Кияӷныӷым уңуваҳтыка̄ туқулъыӷмың, хўаңкунъун қыпҳа̄тысқылъюку Кияӷнық. ⁵Сивунӷани қа̄ткақапут сыӷлыҳқыңъалӷӣт пиюкылъҳи югусимта. Лӣлиҳтӯсят атуқистысюгақӣлъю тама̄куның. Ынка̄м атуқыхкумтыки туқуслъықӣлъю. ⁶Сивунӷани анусимиңлъяӷастун аюқсяҳтукут Лӣлиҳтӯсянун. Туқука̄тымнъың Христосыми, итымутка̄гукут қа̄ткусяҳқа̄лъымнъың Лӣлиҳтӯсянун. Ынка̄м қыпҳа̄тңўа̄ҳпут Кияӷнық уңувалъыӷраӷамтыхун Таӷныӷагныкун, нака̄н уңувалъылюмтыхун Лӣлиҳтӯсятхун.

⁷Сямыңʼңам пилъықыста? Лӣлиҳтӯся̄т сыӷлыҳқылъҳўа̄т? Йыӷлыгилъю! Та̄кут Лӣлиҳтӯсят лӣтыстыкақӣ хўаңамнун сыӷлыҳқылъҳыт сяңутаңи. Лӣнъаянӷитақа қилӣқытиқылъық сяңутаңа Лӣлиҳтӯсяқ хўатын қылӷимаңисяқан: «Қилӣқытиқыхпынаң». ⁸Иўырңа атуқлъюку та̄на қылӷусяқ, сыӷлыҳқылъҳым алъя̄ҳӣнаӷның қилӣқытаңлъяқақа̄ңа. Лӣлиҳтӯсяңунатың сыӷлыҳқылъҳыт туқуңа̄т. ⁹Сивунӷани кияҳтыңъуяҳтуңа Лӣлиҳтӯсяңуна̄н; иўырңа лӣсяқыхка та̄на қылӷусяқ, сыӷлыҳқылъық уңуваӷлюни ынка̄м туқӯңа. ¹⁰Қылӷусяқ уңувастияҳқа̄ялӷӣ хўаңамнун, йыӷлыги туқуста̄ңа. ¹¹Та̄хун қылӷусякун, сыӷлыҳқылъҳым пӯҳсяқлъыгуҳта̄ңа. Ынка̄м атуқлъюку қылӷусяқ сыӷлыҳқылъҳым туқута̄ңа.

¹²Иўырңа Лӣлиҳтӯсят аглыӷналӷӣңӯт, қылӷусяқлъю аглыӷналӷӣңӯқ, ылъқуӷутңа̄лӷилъю, пиниҳтуқлъю. ¹³Та̄м қылӷусям пинилӷӣм, туқустаңа̄? Йыӷлыгилъю! Сыӷлыҳқылъҳым туқута̄ңа атуқлъюку сяңўа̄ пинилӷӣ. Ынка̄м лӣтаҳпут қылӷусякун сыӷлыҳқылъық ынңа̄талъ сыӷлыпигӯқ.

Пиңигатақа Пиюкылъқа

¹⁴Лӣсимакапут Лӣлиҳтӯсят Кияӷныӷым Таӷныӷа̄ның пиңӯт, иўырңа маӷьяҳқӯнӷита̄ңа Таӷныӷам. Маӷьяҳқӯңўа̄ңа югусима пиюкылъҳан, ынка̄м қыпҳаҳтыля̄ӷӯңа сыӷлыҳқылъыӷмун. ¹⁵Лӣгикигатақа ся̄қутка қаюҳлъяк атуқигатақа сяңўа̄ атуқсюкақа. Итупилъ атуқақақа сяңўа̄ угумикыхкақа. ¹⁶Иўырңа атуқыхкумки угумикыхканка атуқсюнӷитыӷңа̄мки, та̄ўа итагнақақанка Лӣлиҳтӯсят пинӣтаңи. ¹⁷Ынка̄м хўаңаңунӷитуқ таўатын пӣқылӷӣ, итупилъ сыӷлыҳқылъық илюмнилңуқ таўатын пӣқуқ. ¹⁸Лӣсимакақа аваңитуңа пинилӷӣмың илюмни, югусимни. Пинитун пиюгақсяӷңа̄ӷма, пипагниңитақа. ¹⁹Пиңигатақа пинилӷӣ пиюкыхкақа, йыӷлыги сыӷлық пӣқақа пиюкынӷиткақа. ²⁰Ынка̄м пиюкынӷиткақа пинымкун, та̄ўа хўаңаңунӷитуқ таўатын пилӷӣ. Итупилъ сыӷлыҳқылъҳўа̄қуқ илюмнилңуқ таўатын пӣқылӷӣ.

²¹Ынка̄м лӣтақа та̄на: пинитун пинақыӷңаӷма, паниның сыӷлық таўантақуқ. ²²Қа̄мкырухлъяк пиниӷью̄гусиқанка Кияӷныӷым Лӣлиҳтӯсӣ. ²³Иўырңа лӣтақа та̄ўа иляңа лӣлиҳтӯсяқ югусимнитуқ. Пилъюўақаңи Кияӷныӷым Лӣлиҳтӯсӣ умьюгама итагнақыхкӣ. Лӣлиҳтӯсям югусимнилңӯм сыӷлыҳқыстақа̄ңа, ынка̄м анусимиңлъяӷастун аюқуңа та̄мун лӣлиҳтӯсямун. ²⁴Сыӷлыӷўа̄ӷӯңа! Китумңам итымулъықаңа хўакын югусимың туқустияҳқамың хўаңамның? ²⁵Игамсиқанаҳалык Кияӷныӷмун итымускаңаңа Иисус Христосыкун Атанымтыхун!

Ынка̄ңам қа̄тканка Кияӷныӷым Лӣлиҳтӯсӣ умьюгамкун, иўырңа югусимкун қа̄ткақа лӣлиҳтӯсяқ сыӷлыҳқыстилӷӣ хўаңамның.

Кияҳтылъық Таӷныӷагныкун

¹Ынка̄ңам киналъю алңунак Христос Иисусымун илятка̄ката Кияӷныӷым нанқихна̄нӷитӣ аӷью̄ӷьяҳқа̄люки. ²Қаюҳлъяк Лӣлиҳтӯся̄н Таӷныӷам уңувалъылитилӷӣм Христос Иисусыкун итымуткақа̄ңа лӣлиҳтӯся̄ның сыӷлыҳқылъҳымлъю туқулъҳымлъю. ³Моисейем Лӣлиҳтӯсӣ таўатын пипагниңитут қаюҳлъяк югусимта пиюкылъҳита кая̄лыҳқыхкақӣ Лӣлиҳтӯсят. Иўырңа Кияӷныӷым пикақа̄ Лӣлиҳтӯсят пипагниңитка̄т. Каяхтыкақа̄ лъми катам Иӷныни нунамун сыӷлыҳқумалӷӣтун юхтун аюқлъюку. Тӯныхкақа̄ Иӷныни аҳқутңулюку сыӷлыҳқылъымнъун. Таўатын нанқихтыкақа̄ сыӷлыҳқылъық югусимылъюку, ⁴хўаңкунъун қа̄ткысяқлъыгуҳтысқылъюки Лӣлиҳтӯсят ылъқуӷутңалӷӣт қылӷусӣ. Хўаңкуңӯт кияҳлъыҳӣт малиҳқутақлъюта Таӷныӷам пиюкылъҳанун, нака̄н югусимта пиюкылъҳитнун. ⁵Тама̄кут кияҳлъыҳӣт малиҳқутақлъютың югусимың пиюкылъҳитнун, сюмыҳтаӷа̄ткыңъинаӷақӣт пиюкылъытың. Иўырңа тама̄кут кияҳлъыҳӣт малиҳқутақлъютың Таӷныӷагнун, сюмыҳтаӷа̄ткыңъинаӷақӣт Таӷныӷам пиюкылъҳи. ⁶Умьюгапут малиҳқутақыхката югусимта пиюкылъҳанун, туқулъықукут. Иўырңа умьюгапут малиҳқутақыхката Таӷныӷагнун, Кияӷныӷым уңувалъылилъықӣлъю, ныкыхмылъылилъықӣлъю. ⁷Умьюгапут малиҳқутақынӷата югусимта пиюкылъҳанун, аңуягўа̄қукут Кияӷныӷмун қаюҳлъяк қа̄ткигалъкыпут Лӣлиҳтӯсӣ. Ипа қа̄ткыпагниңитапут Кияӷныӷым Лӣлиҳтӯсӣ. ⁸Тама̄кут малиҳқутақңалӷӣт югусимың пиюкылъҳанун ыфқуҳтыпагниңита̄т Кияӷнық.

⁹Иўырңа лъпыси иглықатақңунӷитӣси югусиҳпыси пиюкылъҳан. Иглықатақңўӣси Кияӷныӷым Таӷныӷахкынка, қаюҳлъяк ипа кияҳтыңъулӷӣ илюхпысини. Христосым Таӷныӷакык кияҳтыңъунӷилъкайык илюңани югым, пикынӷита̄ Христосым. ¹⁰Югусиси туқунақңӯт апалъюқлъюки сыӷлыҳқылъыси. Иўырңа Христос кияҳтыңукан илюхпысини, та̄ўа Таӷныӷам уңувалъылилъықӣси, қаюҳлъяк Христосым налъҳусяҳтыстыкақӣси Кияӷныӷым ылъқуӷутңалъҳанун. ¹¹Кияӷныӷым Таӷныӷакык уңуваҳтикак Иисусымың, кияҳтыңӯқ илюхпысини. Катам Кияӷныӷым уңуваҳтыстылъҳатун Христос Иисус, уңуваҳтыслъықӣ югусиси Таӷныӷагмикун кияҳлъыҳӣгныкун илюхпысини.

¹²Ынка̄ңам ухпықа̄лгутымни, кияҳсяҳқа̄гукут Кияӷныӷым Таӷныӷахкынка кияҳтысқысюлъҳатун, нака̄н югусимта кияҳтысқысюлъҳатун. ¹³Кияҳтыңъукуфси малиҳқутақлъюси югусиҳпыси пиюкылъҳанун, туқулъықуси. Иўырңа Таӷныӷагныкун туқускуфсики югусиҳпыси сыӷлыҳқыңʼңалӷӣт пӣқыхкаңит, та̄ўа кияҳлъықуси. ¹⁴Қаюҳлъяк тама̄кут маӷьяҳқуқӣ Кияӷныӷым Таӷныӷахкынка Кияӷныӷым авақутақӣ. ¹⁵Таӷныӷам алъхыҳтыкаҳпыси Кияӷныӷмың қыпҳаҳтыля̄ӷуҳтыснықихна̄нӷитӣси алиңылъыӷмун. Йыӷлыги Таӷныӷам Кияӷныӷмун авақутақыстӣси. Ынка̄м лъңакун туқлъюӷаӷаҳпут Кияӷнық: «Авва! Ата̄й!» ¹⁶Кияӷныӷым Таӷныӷакык лъмыгның илятка̄гук таӷныӷамнъун уңипа̄нъалюта Кияӷныӷмун авақутақнилюта. ¹⁷Кияӷныӷым авақутақутаңаның, Кияӷныӷым пагитистыкӣлъю, Христосымлъю пагитистылгуткӣлъю. Ниӷуҳқылъыңылъықукут Христосытун икфиқыхкумта Христосым икфиқылъҳатун.

Кияӷныӷым Таӷныӷахкынка Каюсиӷӣлъю

¹⁸Сюмымни икфиқылъыпут уңувалъымнъи иңлютыпагниңитут ниӷуҳқылъыӷмун Кияӷныӷым алӣҳсяҳқа̄нун хўаңкунъун. ¹⁹Улима̄қ қамахлъюни утақӣңӯқ қылянылъылиӷлюни Кияӷныӷмун алӣҳтысқылъюки кинкуңутаңи авақутӣ. ²⁰Кияӷныӷым нанқихтыкақа̄ улима̄қ аӷью̄ӷьяҳқа̄люку ынка̄м атӯнаниҳтыста̄. Улима̄қ нанқихтысюнӷитка̄гуқ, иўырңа Кияӷныӷым таўатын пиюкыхкақа̄. Нақамлъю паниның сиӷималъылгӯқ ²¹қаюҳлъяк ата̄сими аӷныӷми Кияӷныӷым итымулъықа̄ улима̄қ аӷулъыӷмың. Та̄хкын улима̄қ илялъықуқ итымңалъыҳлъягитнун Кияӷныӷым авақутӣтнун. ²²Лӣсимакаҳпут хўавымун кынляңа ӣңунаӷми улима̄қ ңилъыхтыңъӯқ ақниҳқылъҳатун иӷниюлӷӣм. ²³Иўырңа улима̄ҳӣна̄нӷитуқ ңилъыхлъыҳӣ, хўаңкуталъю ңилъыхтыңъӯкут. Хўаңкуңӯкут Аглыӷналӷӣгның Таӷныӷагның пилыгни Кияӷныӷым тунусяқсюххуа̄ӷа хўаңкунъун. Ңилъыхтыңъӯкутлъю илюмтыхун утақӣмалюта Кияӷныӷмун алъюҳқисқылъюта авақута̄люта лъңанун, итымутысқылъюкилъю югусипут сыӷлыҳқылъыӷмың. ²⁴Та̄хун сиӷималъыҳқун югулика̄гукут. Иўырңа алъхыҳсимакумтыху сиӷимакыхкаҳпут, та̄ўа сиӷималъҳунӷитуқ. Югыт сиӷимаңигатут сямың алъхыҳтыңъўа̄қамыхның. ²⁵Иўырңа сиӷимамакумта сямың алъхыҳтыкақынӷилъкымнъың, утақалъықаҳпут қыляныҳпына̄мта.

²⁶Таўатыҳпигақ Таӷныӷам каюсиӷақӣлъю кая̄тылъымнъи, қаюҳлъяк налъюкылӷӣкут натын юӷалъыҳқақсяқымтыстун. Иўырңа Таӷныӷам лъңаның катам юӷа̄тақӣлъю Кияӷныӷмун ңилъыхтылъыҳлъяхкун акузитңуна̄н. ²⁷Кияӷныӷым лӣсимакӣ югыт сюмыҳтаӷалъҳит. Лӣсимакӣлъю сюмыҳтаӷалъҳи Таӷныӷам, қаюҳлъяк Таӷныӷам юӷа̄ткақӣ юги Кияӷныӷым пиюкылъҳатун аюқлъюки.

²⁸Лӣсимакаҳпут Кияӷныӷым сяңўа̄т қамахлъюки қыпҳаҳтыстақӣ қырңӣта пиниҳқылъыҳқӣтнун пиниқистыми. Лъңаңут туқлъюқӣ ухпықылъыӷмитун. ²⁹Тама̄куңӯт Кияӷныӷым накмикыкыстақӣ. А̄фтыкақӣлъю Иӷныӷмитун лъӣӷысқылъюки. Таўатын пика̄гуқ Иӷныни алъхыӷьюхўа̄ӷумасқылъюку аңлыгутылӷутаңаның. ³⁰Ынка̄м Кияӷныӷым а̄фтыкани туқлъюқақӣ. Тама̄кутлъю туқлъюқани налъҳусяқақӣ ылъқуӷутңалъыӷминун. Тама̄кутлъю налъҳусяқани ылъқуӷутңалъыӷминун қӯлвақақӣ.

Кияӷныӷым Пиниқылъҳа Христос Иисусыкун

³¹Сямыңʼңам пинақыстыху уна? Кияӷнық хўаңкунъун аюқңукан, китумңам тыңвимун пилъықӣлъю? ³²Иӷлыкумаңита̄ лъми катам Иӷныни; итупилъ тӯныхкақа̄ аҳқутңулюку тамаҳамнъун! Кияӷныӷым тӯнумакаңилъю Иӷныӷминың, та̄ўа лъңакун иӷлыхпынани тӯнылъықӣлъю сямың тамаҳа̄ның. ³³Китумңам анахунъилъықаки Кияӷныӷым накмикыхкӣ югыт? Кияӷныӷым лъңаның катам анахутылъҳинъикақӣ! ³⁴Кинаңам пилъықа̄ Кияӷныӷым юги нанқихсяҳқа̄нилюки аӷью̄ӷьяҳқа̄лютың? Христос Иисусым пилъықагӯ? Нака̄, қаюҳлъяк лъңаңӯқ туқуматкикақ хўаңкунъун, уңуваҳтыка̄гуқлъю туқулъыӷмың. Ма̄тын юӷа̄ткақӣлъю ақумлюни аӷынқигныӷани Кияӷныӷым. ³⁵Ся̄мңам иқитыслъықинкут пиниқылъҳаның Христосым? Сыӷлылӣлъҳым, пияқлъӣлъҳым, амьюқыта̄ткылъҳым, паныӷниқылъҳым, аклъюмалъҳым, якуӷна̄м, налиӷмың туқутылъҳым? ³⁶Игақңа̄қ Акузитни Игақыхкани хўатын:

«Лъпык апалъюқлъютын аҳутаңа тамаҳа̄н югыт туқусюгақӣлъю.

Сюмыҳтаӷалъыӷмыхни пынъӣӷыстун аюқнӣқӣлъю туқусяҳқат».

³⁷Иўырңа тама̄кут қамахлъюки кая̄лъқыңъўа̄қақапут Христосыкун пиниқистымтыхун. ³⁸Лӣсимакңўа̄ӷақа ся̄м алңунак иқитысна̄нӷитӣлъю Кияӷныӷым пиниқылъҳаның: талўа туқулъҳым, уңувалъҳым, яқулгыт, налиӷмың туӷныӷа̄т. Талўа сяңўа̄ сяӷңа̄н аӷныӷми налиӷмың сивуми агани, налиӷмың аҳтуӷьяҳқа̄нӷилъҳыт. ³⁹Талўа сяңўа̄т қулымнъи налиӷмың асимнъи. Улима̄ӷми иқитыстияҳқақшахӣтуқ хўаңкунъың Кияӷныӷым пиниқылъҳаның Христос Иисусыкун Атанымтыхун.

Кияӷныӷым Накмикыхкӣ Югыт

¹Апыӷьюкақа лъпысинун ипаңӯқ. Иқлъыңиқңунӷитуңа қаюҳлъяк Христосым пика̄ңа, Аглыӷналӷӣм Таӷныӷамлъю иглыӷутңўа̄к умьюгахка. ²Уңипа̄сюгамси хўатын: қивӷуҳлъягӯңа қаюҳлъяк қа̄мхурухлъяк илюмкун на̄ңигалңуӷмың ақниҳқуткыҳлъягўа̄нка ³юлгутынка, Иудеит. Пияқлъыгуяқан, лъңит апалъюқлъюки Кияӷныӷымтуқ нанқихтыкаңаңа аӷью̄ӷналюңа, иқитыстыкаңаңалъю Христосымың. ⁴Юлгутынка Израилым киңунқӣ, Кияӷныӷым алъюҳқикақӣ лъңанун авақута̄люки. Алӣҳтыкақа̄ ниӷуҳқылъыни лъңитнун. Акықӯқақӣ сялъыҳқаминың лъңитнун. Тӯныхкақӣ Лӣлиҳтӯсяминың. Апыҳтуқақӣ лъңанун манигӯтылъыҳқамың ылъқуӷулъюки. Акықӯқақӣлъю қуяслъықнилюки қа̄ткыхкаңатни. ⁵Киңунқӣт сивунықсюхўа̄мта, та̄кутхун киңуныҳтыхун Христос алъхықа̄гуқ югулюни. Лъңа Кияӷныӷӯқ иглыӷутилӷӣ сямың тамаҳа̄ның. Усюқылъыңи қӯнпырухлъяк кынлыңуна̄н! Аминь.

⁶Кияӷныӷа̄м акықусяни пимаңитагӯ Израилыӷмӣнун? Нака̄! Акықусяни пикақа̄ лъңитнун, иўырңа иляңинаҳӣ киңунӷи Израилым Израилыӷмӣпигӯт. ⁷Иляңинаҳӣлъю Авраамым киңунӷи лъңан авақутапӣкӣ. Кияӷныӷым пикақа̄ Авраам хўатын: «Киңунӷыт лъпынун акықусянка Исаакакун аюқсяҳқа̄гут». ⁸Та̄на хўатын писӣгуқ, иляңи авақутат алъхықат Авраамымын авақутақынӷитӣ Кияӷныӷым. Иўырңа алъхықаҳӣна̄т Кияӷныӷым акықуся̄кун Авраамымун киңуныпӣкӣ Авраамым. ⁹Кияӷныӷым акықуся̄ Авраамымун хўатытуқ: «Аюмиқун утыӷниқума хўатын лъӣқан Сарра иӷныңылъықуқ».

¹⁰Та̄на Саррам иӷныӷа Исаакыңӯқ, сивуныҳпут. Нулиҳтуӷлюни Ревеккамың, атака̄к малӷик иӷныӷыхкынка Ревеккам. ^11-12Талўа сялин алъхылъҳилъюкык, сялинлъю пиңигалъюкык пинилӷӣмың налиӷмың сыӷлыӷмың, Кияӷныӷым пикақа̄ Ревекка: «Нуйыклъӣм қыпҳа̄лъықа̄ уюқлъиқ». Атанық таўатын пика̄гуқ лӣгикысқылъюку лъңинаӷми накмӣҳтыңунилюни сялъыҳқаминың. Кияӷныӷым накмикыхкақа̄ та̄на иӷнық қаюҳлъяк лъңаңӯқ Кияӷныӷым туқлъюӷьюка̄. Накмикыхкақынӷита̄ қаюҳлъяк та̄м иӷныӷым сяңўа̄ пикақутаңаның. ¹³Акузитни Игақыхкани игақыхка̄лӷӣ: «Пиниқыхкақақа Иаков, нақам угумикыхкақақа Исав».

¹⁴Сямыңʼңам пинақыстыху та̄на? Кияӷнық анахута̄? Йыӷлыгилъю! ¹⁵Қаюҳлъяк Моисей хўатын пикақа̄:

«Наңлъыхтаҳлъықуңа китумун алңунак наңлъықсяҳқамнун;

нафуҳтаҳлъықуңа китумун алңунак нафуқсяҳқамнун».

¹⁶Ынка̄ңам югыт алъхыҳтыпагниңита̄т Кияӷныӷым наңлъыхталъҳа пиюклъюку налиӷмың сялъыӷмыхтыхун. Кияӷныҳӣна̄гуқ накмӣӷьяҳқақ наңлъыксяҳқаминун. ¹⁷Акузитни Игақыхкани игақңа̄қ Кияӷныӷым пикақа̄ Фараон хўатын: «Умӣлгуҳтыстыкақамкын кылгунъалюку аҳтуӷьяҳқа̄нӷилъқа лъпыгун. Ынка̄м югыт нунатаҳа̄ни тамаҳа̄ни уңипақылъықа̄т а̄тқа». ¹⁸Ынка̄м Кияӷныӷым наңлъыгьягуткаюга̄ кина алңунак пиюкыхкани, пиныҳлъю̄хтыстақа̄лъю кина алңунак пиюкыхкани.

Кияӷныӷым Угумиюлъҳалъю, Наңлъыхталъҳалъю

¹⁹Ынка̄м а̄плъықаҳпыңа хўатын: «Кияӷнық таўатытңукан, сяңанңам нанқихлъықаки килъю алңунак аӷью̄ӷьяҳқа̄люки? Китум алңунак айгӣнаӷьяҳқақынӷита̄ Кияӷныӷым пиюкылъҳа». ²⁰Иўырңа кинаңузин, югми, выӷусна̄скын Кияӷнық? Қикумың улима̄ӷым сягныӷым а̄псигата̄ улимастыни хўатын: «Сяңама хўатылъюңа улимазиңа?» ²¹Югым қикумың сягныңлъяҳтым пиюкылъыӷмитун атуқсяҳқақа̄ қику. Улимаюкумикык ма̄лӷук ата̄симың қикумың пияҳқақа̄к, а̄лъҳа мыгнуналӷӣмун атӯлюку, иляңа сямун алңунак атӯлюку.

²²Кияӷныӷым кылгусюкақа̄ угумиюлъыҳлъяни, лӣсимакысюга̄лъю аҳтуӷьяҳқа̄нӷилъыни. Иўырңа нуқытунъыҳпакақӣ нанқихтыкани на̄фқынъалюки. ²³Таўатын пика̄гуқ лӣсимакысқылъюку ниӷуҳқылъыҳлъяни наңлъыкыхкаминун. Ята̄ҳқыкыстақақӣ лъңитнун алъхыҳтысқылъюку ниӷуҳқылъыни. ²⁴Талўа хўаңкуталъю туқлъюқақӣнкут, нака̄н Иудейяңинаӷның иўырңа язычнигныңлъю. ²⁵Осиям ӯкналиқылъҳани Кияӷнық пика̄гуқ хўатын язычнигның:

«Тама̄кут юкынӷилъкынка, атиҳлъықанка: “Югынка”.

Тама̄кут югыт пиниқынӷилъкынка, атиҳлъықанка: “Пиниқыхканка”.

²⁶Таўани Кияӷныӷым уңипа̄тфигитни: “Юкынӷитамси”,

таўанилъю атиҳлъықӣт:

“Авақутӣ уңувалӷӣм Кияӷныӷым”».

²⁷Исаиям акилӷӯткыхкақа̄ Израиль хўатын:

«Қайўа Израилыӷмӣт ысным қына̄взыӷа̄тун угляҳтаткалиӷңа̄та,

таўалъӣма қафсинкӯраҳа̄т югулилъыңьяҳқа̄гут,

²⁸қаюҳлъяк Атанӷым кима̄ўилъңунани нанқихтыңъўа̄ҳлъықӣ нунам юги».

²⁹Сивунӷани Исаиям пинақнилъҳатун аюқуқ:

«Атанӷым аҳтуӷьяҳқаҳа̄нӷилңӯм сӣпусимаңисяқаңилъю киңуныӷмың,

қамахтыңъўа̄ӷлюта на̄фқылъыңнаяҳтукут Содомылъю, Гоморрамлъю ныҳлъягыхкытун».

Израилыӷмӣт Ухпынӷитылъҳат

³⁰Сямыңʼңам пилъықыста? Язычнигыт, лъңитның налъҳусяӷнақуткумаңитут Кияӷныӷмун, иўырңа Кияӷныӷым налъҳусяқақӣ ылъқуӷутңалъыӷминун апалъюқлъюку ухпықилъҳат. ³¹Израилыӷмӣт малиҳқутақнақуткыхка̄гут Лӣлиҳтӯсянун ылъқуӷутңаналютың Кияӷныӷмун, иўырңа пиля̄тақумаңитут. ³²Сяңамың пиля̄тақунӷитат? Қаюҳлъяк налъҳусяӷнақуткылӷӣт лъңитның Кияӷныӷмун сялъыӷмыхтыхун, ныӷьюкыхпына̄н Кияӷныӷмун налъҳусӣсқылъютың ылъқуӷутңалъҳанун. Ынка̄м на̄хтақут «на̄хтусикун уйӷахкун». ³³Игақыхка̄лӷӣ Акузитни Игақыхкани хўатын:

«Ӣи, Сиоными ныкыхтақа уйӷак югыт на̄хтысқылъюки,

та̄м уйӷагым иқуслъықӣ.

Иўырңа кина алңунак ухпықуми лъңакун кайңуюгна̄нӷитуқ».

¹Ухпықа̄лгутымни, қамагун илюмкун пиюкыпихтақанка хўаңа катам югынка Иудеит югулилъыңысқылъюки! Ынңа̄талъ Кияӷныӷмун юӷа̄ткақанка! ²Хўатын пӣҳнақанка югынка: Қыпҳа̄сюпихтақа̄т Кияӷнық иўырңа лӣгикигата̄т натын Кияӷнық қыпҳа̄тысюҳқақ лъңитнун. ³Лӣгикылъҳита̄т натын Кияӷныӷым налъҳусяӷақутаңи югыт ылъқуӷутңалъыӷминун. Ынка̄м ылъқуӷутңаңлъяӷнақуткақут қа̄ткылъюки Лӣлиҳтӯсӣ. Таўатын пилъыӷмыхтыхун тугуклъӣгата̄т Кияӷныӷым ылъқуӷутңалъҳа. ⁴Христос кынлыка̄т Лӣлиҳтӯсят. Ынка̄м тамаҳаӷми ухпықилъылык Кияӷныӷым налъҳусяҳлъықа̄ ылъқуӷутңалъыӷминун.

Югулилъық Тамаҳа̄нун Пиңӯқ

⁵Моисей игақа̄гуқ Кияӷныӷмың налъҳусяӷилӷӣмың югның ылъқуӷутңалъыӷминун қа̄ткутылъҳитхун Лӣлиҳтӯсянун. Хўатын игақыхкақа̄: «Югым қа̄ткумакаки Лӣлиҳтӯсят, та̄кутхун кияҳлъықуқ». ⁶Иўырңа налъҳусяқақ Кияӷныӷым ылъқуӷутңалъҳанун ухпықилъыҳқун, қылъқа̄гуқ: «А̄птыхпынаң: “Кина маюҳлъықа қилягмун?”» (укихналюку Христос нунамун). ⁷Налиӷмың а̄птыхпынаң: «Кина укихлъықа Кынлыңилңуӷмун?» (маю̄нъалюку Христос туқумың.) ⁸Акузитни Игақыхкани хўатын игақңа̄қ: «Кияӷныӷым уңипа̄ қантаӷантуқ лъпынун. Акузиткылъықан қаныҳпыгун, ухпықылъықанлъю илюхпыгун». (Кияӷныӷым уңипа̄ ухпықилъыӷмың аюқылӷӣ, та̄наңӯқ уңипақыхкыфут.) ⁹А̄пқувгу қаныҳпының: «Иисус Атанӷунилюку», илюхпыныңлъю ухпықыхкувгу Кияӷныӷмун уңуваҳтысиманилюку туқулъыӷмың, югулилъыңылъықутын. ¹⁰Ю̄к ухпыҳтуқ илюмикун, ынка̄м Кияӷныӷым налъҳусяӷа̄ ылъқуӷутңалъыӷминун. А̄пҳа̄лъю қаныӷмикун ухпықыхкани, ынка̄м югулилъыңуқ. ¹¹Акузитни Игақыхкани игақңа̄қ: «Китум алңунак ухпықыхкумигу лъңа кайңуюгна̄нӷитуқ». ¹²Алъяңуӷутңитут Иудеитлъю, Грегытлъю қаюҳлъяк ата̄сӣгуқ Атанық, Атанқа̄ тамаҳа̄н. Қуястыҳлъягақа̄ тамаҳа̄н туқлъюӷилӷӣ лъңаның. ¹³Катам Акузитни Игақыхкани игақңалӷӣ: «Тамаҳаӷми туқлъюӷилӷӣ а̄тҳакун Атанӷым югулилъыңьяҳқа̄гуқ».

¹⁴Иўырңа натын югыт туқлъюҳлъықатху ухпынӷилъкумың? Натын ухпыҳлъықат, нагақӯнъыӷилъкумың? Натынлъю нагақуҳлъықа̄т уңипақистыңунатың? ¹⁵Натын югыт уңипақилъықат лъңаның ўытку каяхтылъыңыхкуйың? Катам Акузитни Игақыхкани игақңалӷӣ: «Пиниӷнаҳаӷмың итыгӣт тама̄кут уңипақилӷӣт Пинилӷӣның Уңипаның!»

¹⁶Иўырңа иляңинӣта қа̄ткыхкақӣт Пинилӷӣт Уңипат. Исаия а̄птыка̄гуқ: «Атанық, китум ухпықыхкақагу уңипаҳпут?» ¹⁷Кина алңунак ухпықилъылгуна̄нӷитуқ нагатыхпынани уңипа̄мың Христосымың аюқылӷӣмың.

¹⁸Иўырңа пӣқсиңа̄ Израилыӷмӣт нагақӯнъыӷинъилюки уңипа̄мың? А̄а, нагақупыста̄қа̄гут. Акузитни Игақыхкани игақңалӷӣ:

«Мыңит аӷуляқума̄т тамаҳа̄нун нунам;

акузитаңитлъю кынлыңитнун нунам».

¹⁹Алъя а̄пқуӷа̄лъылгӯңа: Израилыӷмӣт лӣгикынӷитаткӣи Израилыӷмӣңунӷилңӯт лъңитлъю Кияӷныӷым юкаткӣ? А̄а, лӣгикумӣт. Сивуклъюку Кияӷныӷым Моисей хўатын писта̄:

«Лъпысинун ақинакыснақанка Израилыӷмӣңунӷилңӯт.

Израилыӷмӣңунӷилңуҳтыхун лӣгикигалңуҳтыхун угумиюхтыснақамси».

²⁰Та̄хкын Исаия тытухпынани а̄пҳика̄гуқ хўатын Кияӷныӷым пилъҳаның:

«Тама̄кут иваӷимаңилңӯт хўаңамның, на̄лъкыхкақа̄тңа.

Тама̄кунун а̄птинӷилңуӷнун хўаңамның, лӣтыстыка̄гуңа».

²¹Иўырңа Израилымың Кияӷнық хўатынлъю пика̄гуқ:

«Аӷнылъқусиҳлъяк ныңугутанка ӣхынка қа̄ткусигалңуӷнунлъю,

кипулъхина̄лӷӣнунлъю хўаңамның».

Кияӷныӷым Наңлъыгьягускаңи Израилыӷмӣт

¹Ынка̄м а̄птамси: Кияӷныӷым Израилыӷмӣт юксюгнаниҳтакӣ? Йыӷлыгилъю! Хўаңа катам Израилыӷмӣңӯңа, Авраамым киңунӷа, Вениаминым рамкыңан пиңӯңа. ²Кияӷныӷым юксюгнанилъҳитӣ юни қаюҳлъяк накмикыхкақӣ сялин нунаңлъялъҳилъюни. Лӣсимакынӷистыхӯ Акузитни Игақыхкани Илиям қикыҳқуткыхкақыхкаңи Кияӷныӷмун Израилыӷмӣт? Хўатын пика̄лӷӣ: ³«Атанық, туқуқуқақӣт ӯкналиқистытын, улъыҳқуқақӣт аҳқыфихтын; хўаңаңинаҳа̄гуңа сӣпнық, туқунъақуткақа̄тңалъю». ⁴Иўырңа Кияӷныӷым пикақа̄:

«Паниның 7,000мың юлгӯңа манигӯсигалңӯт кияӷныңлъяқамун Ваалымун».

⁵Ма̄тынлъю таўатытут. Сӣпнылгӯқ Кияӷныӷым накмикыхка̄ның наңлъыхталъыӷмикун. ⁶Кияӷнық накмӣӷумакуми наңлъыгьюлъыӷмикун, та̄ўа накмикылъҳитӣ пинитун пилъҳитхун. Таўатын накмикумакумики, та̄ўа накмикылъҳитӣ наңлъыгьюлъыӷмикун.

⁷Хўатын пӣқуңа: Израилыӷмӣт на̄лъкылъҳита̄т ивақаҳтың, Кияӷныӷым накмикыхкаҳӣнӣта на̄лъкыхкақа̄т. Иляңи тама̄кут Кияӷныӷым пиныҳлъю̄хтыстыкақӣ. ⁸Катам Акузитни Игақыхкани игақыхка̄лӷӣ:

«Кияӷныӷым умьюгӣт лӣгиксяҳқа̄наниҳқыхкақӣ.

Хўавымун кынляңа аӷныӷмун ӣйңит ысҳаӷьяҳқа̄наниҳқыхкақӣ,

сигутңитлъю нагақӯсяҳқа̄наниҳқыхкақӣ».

⁹Давидылъю пика̄гуқ:

«Нықынӷаҳқылъҳит ныгаӷа̄ҳлъит,

на̄птылъҳуҳлъит, на̄хтусӣҳлъит, аӷью̄ӷисӣҳлъит лъңитнун.

¹⁰Ӣйңит ая̄лъыңлит ысҳаӷнанӣсқылъюки,

қукӣтлъю пакыгныңлит уқигитның сыӷлылӣлъҳита қӯнпырухлъяк».

¹¹Ынка̄м а̄птамси, Израилыӷмӣт на̄хтақңамың, алъя ныкывыпагниңитақа̄т? Йыӷлыгилъю! Иўырңа Израилыӷмӣт сыӷлыҳқылъҳит апалъюқлъюки, язычнигыт югулилъыңут. Ынка̄м югулилъыңылъҳита Израилыӷмӣт ақинастӣт. ¹²Кияӷныӷым атуқыхкақӣ сыӷлыҳқылъҳит Израилыӷмӣт тагинъалюку қуястылъыҳлъяк нунам юганун. Израилыӷмӣт ифлъӣлъҳита тагита̄т қуястылъыҳлъяк язычнигнун. Та̄хкын қамахлъютың накмикыхка̄т Израилыӷмӣт, иляскумың югуликанун, қуястылъҳыт натынми угляҳтаткалъықат!

Югулилъҳат Язычнигыт

¹³Ма̄тын алыҳқуӷьюгамси лъпыси язычнигни. Кияӷныӷым накмикыхкақа̄ңа апостолыңулюңа язычнигның. Ынка̄м пира̄мсипихлъюңа пӣқақа уна мыгнуналӷӣ қыпҳақақ Кияӷныӷым қылӷутка̄ хўаңамнун. ¹⁴Апыҳтуӷилъымкун лъпысинун ақинасналюки пӣнка Иудеялгутынка, иляңи югулилъыңысқылъюки. ¹⁵Кияӷныӷым иҳсякақңаки Иудеит, нунам юги Иудейеңунӷилңӯт илялӣҳтыстыкақӣ лъңанун. Ынка̄м Иудеит тугуклъинқихтыкумики, уңуваҳлъыҳӣстун туқукат аюқсяҳқа̄гут.

¹⁶Нықыкшаңлъям икылъықсюхўа̄ӷа тӯныхкақ Кияӷныӷмун, аглыӷна̄ңукан, та̄ўа ӣңунаӷми нықыкшаңлъяқ аглыӷнаҳтуқ. Аккўи уқфигым аглыӷнақата, авайӣлъю аглыӷнаҳтут.

¹⁷Иудеит пӣтысиӷақастун маслинам уқфигатун аюқут иляңи авая̄н айымтыкат. Лъпыси язычнигни аваястун аюқуси айымтыкат пӣтысиӷалъҳилңуӷмың маслинам уқфиганың. Та̄мың уқфигмың, китум тугулюку аваяқ ныкыхтыкумигу пӣтысиӷақамун маслинам уқфиганун, алъхыӷусяҳқа̄гуқ акум мыся̄ның пӣнъапихлъыҳӣмың. ¹⁸Сюмыҳтаӷаҳпынаси пиниӷатаӷаӷнилюси аваяның айымтыканың. Қука̄юхтыхпынаси, қаюҳлъяк аваяра̄ӷина̄гуси. Акут икнақуҳтысигатаси, акӯгут икнақуҳсяӷилӷӣт лъпысиның.

¹⁹Иўырңа пилъықуси: «А̄а, аваят айымтыка̄гут ныкыхналюта уқфигмун». ²⁰Та̄на ипаңӯқ. Кияӷныӷым айымтақӣ аваят қаюҳлъяк ухпықынӷилъкаңат лъңа. Иўырңа лъпыси ныкыхтыстыкақӣси уқфигмун қаюҳлъяк ухпықыхкыси лъңа. Ынка̄м қука̄юхтыхпынаси, йыӷлыги алиңитык. ²¹Иудеит аваяҳпига̄гут. Кияӷныӷым айымтыкақутаңаның аваяҳпига̄т, та̄ўа лъпысилъю айымлъықӣси уқфигмың нагныӷунъыӷилъкуфсигу ухпылъыҳси. ²²Ынка̄м лӣгикаҳси Кияӷнық наңлъыхтаҳтуқ, аӷью̄тапихтуқлъю. Аӷью̄ӷақӣ сыӷлыҳқыхкат, иўырңа наңлъыкақӣси ныӷьюкумаңинаныҳпысигу наңлъыхталъҳа. Иўырңа ныӷьюкнанӣмакуфсигу лъпысилъю кыпулъықӣси. ²³Иудеит ухпықынқихтыкумыхтыху Кияӷнық, ныкыхнықихлъықӣ уқфигмун. Кияӷнық аҳтуӷьяҳқа̄нӷилъылгӯқ ныкыхнықихсяҳқа̄люки ныксяқаңитхун. ²⁴Лъпыси язычнигни аваяпикынӷитӣси пӣтысиӷақам маслинам уқфиган. Кияӷныӷым кыпыхкақӣси пӣтысиӷалъҳилңуӷмың маслинам уқфиганың. Та̄хкын ныкыхтыкақӣси пӣтысиӷақамун маслинам уқфиганун, қайўа югыт ныкыхтиңигасяӷңа̄та уқфигмун таўатылңуӷмың аваямың. Иудеит пӣтысиӷақамың маслинам уқфиганың пиңутмыхның, Кияӷныӷми пияқнӣтут ныкыхнықихсяҳқа̄люки лъңита катам уқфигитнун.

Кияӷнық Наңлъыхтаҳтуқ Тамаңанун

²⁵Ухпықа̄лгутымни, лӣгикысюгамси сямың қайвиҳсимаңилңуӷмың сивунӷани. Апыӷью̄гусиқа лъпысинун унаңӯқ: пыҳқинӷуюгныӷуфқа̄фси писқылъюси сюмыҳтаӷаткаҳтыкилъю. Иляңита Израилыӷмӣт ухпықсюгумаңита̄т Кияӷнық. Таўатылъықут кынляңа Кияӷныӷым накмикыхкӣ язычнигыт қамахлъютың тагиляӷа̄тылъҳитнун лъңанун. ²⁶Та̄хкын қамахлъютың Израилыӷмӣт югулилъыңылъықут. Акузитни Игақыхкани игақңалӷӣ:

«Югулиӷиста тагилъықуқ Сионымың; иқилъықӣ қамахлъюки сыӷлыӷыт киңунӷаның Иаковым.

²⁷Та̄на акықусяқақа лъңитнун

иқискумки сыӷлыҳқылъҳит».

²⁸Иудеит иҳсякыхкақӣт Пинилӷӣт Уңипат ынка̄м Кияӷныӷым аңуякӣ. Лъпыси апалъюқлъюси язычнигни Кияӷныӷым атуқыхкақа̄ иҳсякилъҳат қуясналюси. Иўырңа Иудеит паниның Кияӷныӷым накмикыхкақӣ югыт. Пиниқумаңина̄ўӣ апалъюқлъюку акықусяни сивунӷитнун. ²⁹Кияӷныӷым умьюгагни алъяңуҳтықаҳна̄нӷита̄к. Выҳна̄нӷитӣ тунусяни, пыхна̄нӷитӣлъю накмикыхкани лъңанун югулюки. ³⁰Сивунӷани лъпыси язычнигни қа̄ткылъҳитаҳси Кияӷнық. Иўырңа ма̄тын алъхыҳтаҳси Кияӷныӷым наңлъыхталъҳа қаюҳлъяк Иудеит қа̄ткунъыӷилңӯт. ³¹Ма̄тын Иудеит қа̄ткусигатут Кияӷныӷмун, ынка̄м наңлъыкақӣси язычнигни. Иўырңа иляңани аӷныӷым лъңиталъю алъхыҳлъықа̄т Кияӷныӷым наңлъыхталъҳа. ³²Қамахтыңъўа̄ӷлютың югыт қа̄ткигата̄т Кияӷнық. Қа̄ткунъыӷитылъҳат анусимиңлъяӷвихтун аюқуқ, Кияӷныӷым таўавык канаҳтақыхкаңи. Таўатын пӣқуқ наңлъыкналюки қамахлъюки.

Усюқилъық Кияӷныӷмун

³³Ка̄й, сыӷлыҳлъягӯт Кияӷныӷым аклъюңиңи, пыҳқинылъҳа, лӣсималъҳалъю!

Китумңам лӣгикңўа̄ҳлъықаки нанқихтилъҳи?

Китумңам лӣгикңўа̄ҳлъықаки иглыӷныӷи?

³⁴Катам Акузитни Игақыхкани игақңалӷӣ:

«Китум лӣсимакакык умьюгакык Атанӷым?

Китумңам алыҳқуҳлъықагу апақунъалюку?

³⁵Китум алңунак сялисигатагӯу Атанық,

Атаныӷмун лъивикысқылъюку утыӷмун?»

³⁶Сяңўа̄ қамахлъюни лъңаның пиңӯқ, лъңакун пиңӯқ, лъңанунлъю пиңӯқ.

Лъңа усюқылъыңли қӯнпырухлъяк! Аминь.

Уңувалӷӣт Аҳқутыт

¹Ухпықа̄лгутымни, Кияӷнық наңлъыхтапихтутаңаның, ынңа̄талъ кайымамси тӯнысқылъюки югусиси Кияӷныӷмун уңувалӷӣңулюки аҳтутыт. Пылюңилъит, тугуклъиӷьюгнаӷлитлъю Кияӷныӷмун. Та̄наңӯқ манигӯтылъыпихси. ²Ӯм нунам югатун кияҳтыхпынаси. Йыӷлыги Кияӷныӷмун алъяңуҳтыстык нутаҳтыслъюки умьюгаси. Та̄хкын лӣгикылъықаҳси пиюкылъҳа Кияӷныӷым пинилӷӣ, тугуклъиӷьюгналӷӣ, қамахтӣңўа̄ӷңалӷӣлъю.

³Кияӷныӷым тӯныхкақутаңаның тунусямың апостолыңулюңа, тамаҳаҳпысинун пӣңа: Сюмыҳтаӷа̄ткыхпынаси лъпысиның пиниӷатаӷаӷнилюси аюқылъыҳпысиның. Йыӷлыги ипапиҳқылъюси сюмыҳтаӷа̄ткақитык ухпықилъыҳтулыхпысигун Кияӷныӷым тӯныхка̄кун лъпысинун. ⁴Югусипут налиӷныҳтупихтут, тамаҳаӷми налиӷнық алъятун сяяҳқа̄гуқ. ⁵Угляӷьяӷңа̄мта, ата̄сигукут Христосым югусӣн. Ынка̄м хўаңкута налиӷныӷни хўаңкунъың пикутукут. ⁶Қамахлъюта алъякулъҳӣның тунусялгӯкут Кияӷныӷым тӯныхка̄ның наңлъыхталъыӷмикун. Тунусяҳпут уңипақиңукан Кияӷныӷым уңипа̄мың, уңипақилъта ухпықилъыҳтуталымтыстун. ⁷Тунусяҳпут қыпҳа̄тиңукан, қыпҳа̄тилъта, апыҳтуӷиңукан, апыҳтуӷилъта; ⁸кайымиңукан илямың, кайымилъта; тӯниңукан, иӷлыхпына̄мта тӯнилъта; иглыӷутиңукан, сягиқлъюта иглыӷутилъта; наңлъыкиңукан, қуякусиқлъюку наңлъыкилъта.

⁹Пиниқитык ипапиҳқылъюси. Угумиклъюку сыӷлық, пиюкумаңинаҳтыху сяңўа̄ пинилӷӣ. ¹⁰Пиниқутутык аңлыгуткулъҳӣстун. Қӯлва̄тутақитык пакихулъюку қӯлвӣсқысюлъыҳпысиның. ¹¹Та̄куңинаҳа̄гның қыпҳаҳтык, иҳсянифқа̄фси. Сягиқулъюку қыпҳа̄тақитыху Атанық қамакын илюхпысиның. ¹²Қуяңатык қаюҳлъяк сиӷималъылгӯси, нуқытақитык ныкыхмылъюси сыӷлылӣныҳпысини, юӷаӷақитыклъю ӣўлың. ¹³Ухпықа̄лгутыхпысинун аклъюлӷӣнун тӯнӣқитык, упуӷатӣқитык кинкуның алңунак.

¹⁴Юӷа̄ткақитыки амьюқыта̄ткистыси Кияӷныӷмун қуястысқылъюки, нака̄н ақниҳтысқылъюки. ¹⁵Қуялгусиӷақитыки тама̄кут қуялӷӣт, қиялгусиӷақитыки тама̄кут қиялӷӣт. ¹⁶Кияҳтык ныкыхмытулъюси. Қука̄юхтыхпынаси йыӷлыги илякитыки укаванталӷӣт. Сюмыҳтаӷа̄ткыхпынаси пыҳқинӷунилюси иляхпысиның.

¹⁷Китум сыӷлытун пикаңиси, акитыхпынаки сыӷлытун. Пӣқитыки пинилӷӣт тугуклъиӷьюгналӷӣт тамаҳа̄нун. ¹⁸Пияҳқа̄кан, пӣқитыху сяңўа̄ пияҳқаҳси кияҳтысқылъюси ныкыхмылъюси тамаҳа̄нун. ¹⁹Пиниқыхкамни, акинӣӷнақыхпынаки сыӷлытун пистыси, итупилъ пыхтыки Кияӷныӷым сякша̄лъҳанун. Акузитни Игақыхкани игақңалӷӣ хўатын:

«Хўаңаңӯқ аӷью̄ӷияҳқақ,

хўаңаңӯқ акинӣӷьяҳқақ, пӣқ Атанық».

²⁰Игақңа̄қлъю Акузитни Игақыхкани:

«Аңуягын игата̄ңукан ныӷыснакын,

мықсюгукан мыҳсинакын.

Таўатын пикувгу на̄сқўакун маюҳфикылъықан кумаңалӷӣмың кӯлямың».

²¹Кая̄лъқыстыхпынаси сыӷлыӷмун, итупилъ кая̄лъқитыху сыӷлық пинитун пилъыҳқун.

Қа̄ткылъюки А̄ңўа̄ӷыт Иглыӷутилӷӣт

¹Тамаҳаӷми қа̄ткусяҳқа̄гуқ а̄ңўа̄ӷуҳтыканун иглыӷутистынун. Кина алңунак иглыӷутистыңуна̄нӷитуқ ўыткуқун Кияӷныӷым иглыӷутистыңуҳтыстыкумигу. Иглыӷутистыңӯт қаюҳлъяк Кияӷныӷым ныкыхтыкақӣ иглыӷутисқылъюки. ²Китум алңунак қа̄ткынӷилъкумики иглыӷутистыт, қа̄ткигатӣ Кияӷныӷым накмикыхкӣ. Ынка̄м аӷью̄ҳтыслъықуқ. ³Пинитун пикаюгыт аликигатӣт иглыӷутистыт, иўырңа сыӷлытун пикаюгыт аликсяҳқақӣт. Аликсюнӷилъкуфсики иглыӷутистыт, пинитун пикатык, ынка̄м усюқылъықӣси. ⁴Иглыӷутистыт Кияӷныӷым қыпҳаҳтыкӣ аныӷныҳқылъыҳқаҳпысинун. Иўырңа сыӷлытун пикуфси, аликнакыси, қаюҳлъяк Кияӷныӷым қылӷумӣ аӷью̄ӷысқылъюки сыӷлытун пикат. Кияӷныӷым қыпҳаҳтыкӣ, аӷью̄ӷистыкӣлъю сыӷлытун пилӷӣнун. ⁵Тама̄кын апалъюқлъюку қа̄ткитыки иглыӷутистыт. Қа̄ткитыки қаюҳлъяк Кияӷныӷмун аӷью̄ҳтысюнӷилңӯси. Иўырңа та̄наңинақ апалъю̄нӷитуқ. Қа̄ткитыки қаюҳлъяк лӣсимакаҳси қа̄ткутылъық ылъқуӷутңа̄қ.

⁶Та̄куклъю апалъюқлъюкык лъивикақаси налогыси, қаюҳлъяк иглыӷутистыт қыпҳа̄гут Кияӷныӷмун қыпҳақатын пиныӷмыхтыки. ⁷Ынка̄ңам налогыт асыңыси қамахлъюки лъивикитыки иглыӷутыстыхпысинун. Сӣвакитыкилъю, қӯлваҳтыкилъю қамахлъюки.

Пиниқлъюки Иляси

⁸Асыңыхпына̄ң китумың алңунак, иўырңақун пиниқылъыҳси асыңыкңинаҳтыху иляхпысинун. Китум алңунак пиниқыхкумики юлгутни қа̄ткыңъўӣ ӣңунӣта Лӣлиҳтӯсят. ⁹Игақңа̄т Лӣлиҳтӯсяни хўатын:

«Гылгаӷнӣҳпынаң, Юхтаҳпынаң, Тыглыхпынаң, Қилӣқытиқыхпынаң».

Қа̄ткылъықатын та̄кут қылӷусят, алңунаклъю қылӷусят, қа̄ткыхкувгу уна қылӷусяқ:

«Пиниқлъюку юлгутын пиниқылъыҳпытун лъпынун».

¹⁰Кина алңунак пиниқикуми юлгутминың, сыӷлытун пина̄нӷитӣ. Пиниқилъыӷмикун қа̄ткутңӯқ ӣңунӣтнун Лӣлиҳтӯсят.

¹¹Тама̄кут пикатыки қаюҳлъяк лӣсимакаҳси пилъыҳқақ ка̄сима̄қ. Қавалӷӣстун аюқуси иўырңа ма̄тын таҳтуӷьяҳқа̄ҳтуси. Югулилъыҳпут туӷа̄ҳтуқ ухпыӷьюха̄лъымнъың. ¹²Унук алъпагьяҳтуҳтуқ, хўа̄ аҳсяҳтуңыстаӷа̄. Та̄қылътыкиңам атуқныӷмың сыӷлыӷыт югыт пӣқыхкаңит мамлыгми. Ынка̄м тугулътыки пилъюўа̄сиҳқат ниӷугми. ¹³Пинитун кияҳтылъта катам югыстун кияҳлъыҳӣт ниӷугани аӷныӷым. Сыӷлытун тыӷигниқыфқа̄мта, сю̄мыфқа̄мта, алңунак алңунасыӷафқамта, пилъюўатыфқа̄мта, ақинатыфқа̄мта. ¹⁴Итупилъ акулӷа̄ӷыстун а̄тыху Атанық Иисус Христос, сюмыҳтаӷа̄ткыфқӣталъю атуқналюки югусиҳпыси пиюкылъҳит.

Нанқихтыхпына̄н Ухпықа̄лгутын

¹Упуӷатыху ю̄к ухпықилъыҳқыста̄ҳақ акулыхпысинилңуқ. А̄ҳтӣра̄ӷусиқыхпына̄н сяңўа̄ ухпықыхка̄ ылъқуӷутңатаңа налиӷмың анахутңатаңа. ²Ата̄сим югым ухпықа̄ ныӷьяҳқа̄нилюни алңунак нықмың. Иўырңа ю̄к ухпылъыҳқыста̄ҳақ ныӷақуқ нунивахсыӷаҳӣнаӷмың. ³Югым ныӷыхкаюгым алңунак нықмың, сӣваклъигу ю̄к нықаюк нунивахсыӷаҳӣнаӷмың. Югым ныӷыхкаюгым нунивахсыӷаҳӣнаӷмың, нанқихныӷилъигу ю̄к нықаюк алңунак нықмың, қаюҳлъяк Кияӷныӷым тугуклъӣма̄. ⁴Кинаңунилютын пӣқсин нанқихтилӷӣ китум қыпҳаҳтыңаның? Қыпҳаҳтым пилӣтистыңина̄н нанқихлъықа̄ пинитун пиматаңа налиӷмың сыӷлытун пиматаңа. Атанӷым қыпҳаҳтыңа пинитун пилъықуқ қаюҳлъяк Атанӷым каюсиӷьяқлъыгукаңа пинитун писқылъюку.

⁵Югым ухпықа̄ ата̄сиқ аӷнық мыгнунаӷатаӷаӷнилюку иляңитның аӷныӷның. Иляңан югым ухпықӣ қамахлъютың аӷныӷыт таўатылъкунъилюки. Тамаҳаӷми югым умьюгагни ата̄сӣҳтыңъўа̄ӷликык. ⁶Китум алңунак ухпықыхкумигу мыгнунаӷлюку аӷнық таўатын пӣқуқ қӯлваӷналюку Атанық. Китум алңунак ныӷыхкумигу алңунак нықа таўатын пӣқуқ қӯлваӷналюку Атанық, қаюҳлъяк игамсиқаюгвикақыхкаңа Кияӷнық нықмың. Китум алңунак ныӷьюнӷилъкумики иляңи нықыт таўатын пӣқуқ қӯлваӷналюку Атанық, игамсиқаюгвикақыхкаңалъю Кияӷнық. ⁷Уңуваңигатукут хўаңкунъун, туқуңигатукутлъю хўаңкунъун. ⁸Уңувакумта, Атаныӷмун уңуваңӯкут. Туқумакумта, Атаныӷмун туқулъықукут. Ынка̄м уңуваяӷңа̄мта налиӷмың туқуяӷңа̄мта Атанӷым пикӣлъю. ⁹Христос туқулюни, уңуваҳтыка̄гуқ Атанӷуналюни уңувалӷӣнунлъю, туқуканунлъю. ¹⁰Лъпыси, сяңан нанқихтақыстыки ухпықа̄лгутыси? Сяңанлъю сӣвакигастыки ухпықа̄лгутыси? Нықамиклъюку, қамахлъюта ныкывьяҳқа̄гукут сивуңакун Кияӷныӷым, лъңанун нанқихтысқылъюта. ¹¹Акузитни Игақыхкани игақңа̄қ:

«Атанық пӣқ, қаюҳлъяк хўаңа уңувалӷӣңа Кияӷнық,

тамаҳаӷми ю̄к сыгысқуҳқӯлъықуқ хўаңамнун,

тамаҳаӷмилъю югым усюқылъықа̄ Кияӷнық».

¹²Ынка̄м қамахлъюта Кияӷныӷмун апыӷьяҳқақаҳпут сялъыҳпут, сяңанлъю таўатын пиматфут.

Ухпықа̄лгутын Сыӷлыҳқыстыхпына̄н

¹³Ынка̄ңам та̄қылъта нанқихтунъыӷмың. Йыӷлыги, умьюгапут ата̄сӣҳтылътыки ухпықа̄лгутфут на̄хтыстыфқа̄н налиӷмың сыӷлыҳқыстыхпына̄н пилътыху. ¹⁴Атаныҳқун Иисусыкун лӣсимакңўа̄ӷақа аваңитуқ ӣнӷуткамың нықмың. Иўырңа югым ухпықыхкумигу сяңўа̄ ӣнӷутка̄люку, та̄ўа лъңани ӣнӷутка̄гуқ. ¹⁵Ухпықа̄лгутын унӣӷмиқумакан сямың ныӷыхкаҳпының, та̄ўа пиниқнанӣма̄н. Ныӷыхкаҳпынун на̄фқыстыхпына̄н ухпықилъҳа Христосым туқуматкыхка̄. ¹⁶Ухпықыхкан пиниҳтуқ; акузиткыстыхпына̄н сыӷлыӷулюку. ¹⁷Қаюҳлъяк Кияӷныӷым Атаныҳпагулъҳани сяңўа̄т ныӷыхкапутлъю, мыӷыхкапутлъю мыгнунанӷитут. Укут мыгнунаҳтут: ылъқуӷутңалъық, ныкыхмылъық, қуялъықлъю; та̄кут Аглыӷналӷӣгның Таӷныӷагның пиңӯт. ¹⁸Та̄кут атуқлъюки қыпҳа̄тилӷӣм Христосымун, ыфқуҳлъықа̄ Кияӷнық, итагнақылъықа̄тлъю югыт.

¹⁹Ынка̄м атӯлътыху ныкыхмылъыңыстияҳқақ, кайымутутылъталъю ухпылъыҳтуҳтаӷаӷналюта. ²⁰На̄фқыхпына̄н Кияӷныӷым қыпҳалъҳа апалъюқлъюку нықа. Қамахлъюни нықа ныӷьяҳқа̄гуқ, иўырңа анахутңа̄қ ныӷылъыҳқақ алңунак нықмың сыӷлыҳқыстияҳқақ китумың. ²¹Итагнаӷьяҳқа̄гуқ кымыкшахтунӷитылъық, винотунӷитылъық, сяңўа̄лъю алңунак на̄хтыстияҳқақ ухпықа̄лгутыхпысинун. ²²Кияӷныҳӣнақлъю лӣсимаксяҳқақаҳси тама̄кут ухпықыхкаҳтын. Қуяқуқ ю̄к атуқныӷминики ухпықыхкани ылъқуӷутңанилюки сыӷлыӷниткыхпынаки. ²³Иўырңа югым ныӷыхкани, ухпықыхкумигу анахутңанилюку, Кияӷныӷым нанқихлъықа̄ қаюҳлъяк пинӷилъкаңа сяңўа̄ ухпықыхкани. Сяңўа̄ алңунак ухпықыхкани анахутңанилюку атуқумакумигу сыӷлыҳқылъықуқ.

Ыфқуҳтыки Иляси, Ыфқуҳтыфқа̄фси Лъпысиның

¹Хўаңкута ухпықилъыҳтуқани каюсӣсяҳқақапут ухпықилъыҳқыста̄ҳа̄т сыӷлылӣнӷата. Ыфқуҳсяҳқа̄нӷитукут хўаңкунъың. ²Итупилъ, тамаҳа̄мта ыфқуҳнақылътыху ухпықа̄лгутфут лъңан катам пиниҳқылъыҳқа̄нун, ухпықилъыҳтуҳтысқылъюку. ³Талўа Христос ыфқуҳсимаңитуқ лъңаның катам. Йыӷлыги игақыхка̄гуқ Акузитни Игақыхкани: «Югыт сыӷлықӯлӷӣт лъпынун, сыӷлықӯлъҳит тыкитақут хўаңамкун». ⁴Сивунӷани Акузитыт Игақыхкат игақыхка̄гут апыҳтуӷналюта. Нуқынъыҳтустӣлъю, кайымилъюлъю сиӷималъыңнаюкамта. ⁵Нуқынъыҳтулъҳылъю, кайымылъҳылъю Кияӷныҳта̄гук. Лъңан кияҳтыслъиси итагнақулъюси катам Христос Иисусым пилъҳатун. ⁶Та̄хкын қамахлъюси қырңаҳпыси ата̄систун усюқылъықаҳси Кияӷнық, Атаңа Атанымта Иисус Христосым.

Пинилӷӣт Уңипат Иудеянунлъю, Язычнигнунлъю Пиңӯт

⁷Тама̄кын апалъюқлъюку тугуклъӣтулъюси катам Христосым тугуклъиқаюгукаңиси лъпыси. Таўатын пикуфси югыт усюқылъықа̄т Кияӷнық. ⁸Амынқун Христос қыпҳаҳтыңуҳтыка̄лӷӣ Иудеянун лӣгикысқылъюки Кияӷнық ӣўлың ипапӣқуқ. Тама̄кын апалъюқлъюку Иудеит лӣсимакңўа̄ӷа̄т Кияӷныӷым пияҳқақӣ акықусяқыхкани сивунӷитнун. ⁹Христос тагика̄лӷӣлъю язычнигнун усюқысқылъюку Кияӷнық наңлъыхталъҳанун. Игақңа̄қ Акузитни Игақыхкани:

«Ынка̄ңам усюқылъықамкын акулңитни язычнигыт,

илягаҳлъықуңалъю усюқилъыӷмың атыҳпынун».

¹⁰Акузитни Игақыхкани игақңа̄қлъю хўатын:

«Язычнигни, қуятык малигулъюси Кияӷныӷым югитнун!»

¹¹Алъя Акузитни Игақыхкани игақңа̄қ:

«Усюқитыху Атанық, қамахлъюси язычнигни;

усюқитыху, қамахлъюси югни!»

¹²Исаия пика̄гуқ:

«Киңунӷа Иессейем тагилъықуқ иглыӷунъалюки язычнигыт,

ынка̄м лъңакун сиӷималъықут».

¹³Кияӷныӷӯқ сиӷимастилӷӣ. Имиӷлиси қуялъыҳлъягмыңлъю, ныкыхмылъыӷмыңлъю ухпықылъыҳпысигун лъңанын. Та̄хкын сиӷималъыңатаӷаҳлъықуси аҳтуӷьяҳқа̄нӷилъҳакун Аглыӷналӷӣм Таӷныӷам.

Павелым Письмоткыхкаңа Қыпҳақани

¹⁴Ухпықа̄лгутымни, лӣсимакңўа̄ӷамси пинӣпихтуси югни. Лӣсимакақалъю лӣгикңўа̄ӷлюки аюқаси апыҳтӯсят Кияӷныӷмың аюқылӷӣт, ынка̄м апыҳтӯсяқлъыгўа̄си иляңитнун. ¹⁵Иўырңа тытулъңунаңа письмокақамси сямың иляңитның нықамикысқылъюси тама̄кын. Таўатын письмомаңа қаюҳлъяк Кияӷныӷым тунусиҳтуӷа̄ңа ¹⁶қыпҳаҳтыңулюңа Христос Иисусымун язычнигнун. Священнигыстун аюқақуңа уңипақинымни Пинилӷӣның Уңипа̄мың Кияӷныӷым язычнигнун. Таўатын уңипақӣқуңа лъңит тунусятун аюқысқылъюки тугуклъиӷьюгналӷӣ Кияӷныӷмун. Аглыӷналӷӣм Таӷныӷам аглыӷнаҳтыста̄ тунусяқ.

¹⁷Ынка̄м қука̄юхтақуңа қыпҳақамның Кияӷныӷмун Христос Иисусыкун. ¹⁸Акузиткысяҳқақанка Христосым апыӷӣқаҳӣнӣ хўаңамкун. Лъңаңӯқ язычнигның қа̄ткутыстилӷӣ Кияӷныӷмун уңипақилъымкунлъю, қыпҳақамкунлъю. ¹⁹Таўатын пика̄гуқ аҳтуӷьяҳқа̄нӷилъҳакун алъя̄ҳлъюхўаҳтилъҳыт, аҳтуӷьяҳқа̄нӷилъҳакунлъю Аглыӷналӷӣм Таӷныӷам. Уңипақңўа̄қақанка Пинилӷӣт Уңипат Христосымың аюқылӷӣт тамаҳа̄ни Иерусалимымың та̄гавырухлъяк Иллирикымун. ²⁰Ӣўлың пиюкылъқысяӷақа уңипақналюки Пинилӷӣт Уңипат нунани нагақӯсигалңуӷни Христосымың. Таўатын пика̄гуңа қаюҳлъяк ныкыфтиюгунӷилңӯңа тумаңакун иляңан югым пӣнлиқа̄кун. ²¹Катам Акузитни Игақыхкани игақңалӷӣ хўатын:

«Тама̄кут сялин уңипа̄сигалңӯт лъңаның, ысҳаҳлъықа̄т, сялинлъю нагақӯсигалңӯт лъңаның, лӣгикылъықа̄т».

Павелым Ля̄лиҳнақылъҳа Римымун

²²Тама̄кын апалъюқлъюку угляӷңа̄н лъпысинун пипагниңитақуңа қаюҳлъяк иляңитни нунани уңипақӣқылӷӣңа. ²³Иўырңа ма̄тын апыӷӣӷақа қыпҳақақа ма̄ни. Углялӷӣни аюмиқулъыӷни лъпысинун пиюпихтақсяҳтуңа, ²⁴ынка̄м сюнаңуқ ма̄тын ля̄лиҳфиклъямси Испаниямун пикаткылъюку. Ля̄лиӷутаҳтылъымта киңуңаның сюнаңуқ каюсиҳтыңъа аӷуляқнақыхкума Испаниямун. ²⁵Иўырңа лъпысинун пивагилгама, Иерусалимымынъақақуңа каюсӣнъалюки Кияӷныӷым юги тама̄нлыңӯт. ²⁶Ухпықат Македониямылңӯтлъю, Ахаиямылңӯтлъю қуякусиқлъюку тӯника̄гут манимың каюсӣнъалюки аклъюмалӷӣт акулңитнилңӯт Кияӷныӷым юган Иерусалимыми. ²⁷Қуякусиқлъюку таўатын пика̄гут. Та̄кут язычнигыт асыңымӣт Иудеит қаюҳлъяк алъхыӷутка̄лӷӣт Кияӷныӷым қуястилъҳаның лъңитхун. Ынка̄м язычнигыт каюсиӷьяҳқақӣт Иудеит ухпықӣт Иерусалимымылңӯт туюӷлюки манимың. ²⁸Хўа̄ кылъқынъақақа язычнигыт маниңат Иудеянун. Апыӷӣқумкун уна қыпҳақақ тӯнлюку мани лъңитнун, ля̄лиҳфиксяҳтуҳлъықамси, та̄хкын Испаниялъықуңа. ²⁹Лӣсимакақа ка̄скума лъпысинун, пилгулъықуңа Христосым ӣңуна̄н қуястылъҳаның.

³⁰Ухпықа̄лгутымни, Атанымтыхун Иисус Христосыкун, пиниқылъҳакунлъю Таӷныӷам, малигулъюси хўаңамнун юӷа̄ткыҳлъякаҳтыңъа Кияӷныӷмун каюсӣтысқылъюңа. ³¹Юӷаҳтык Кияӷныӷмун пақнӣҳсӣсқылъюңа ухпықа̄нӷилңуӷның Иудеями. Юӷа̄ткитыхулъю қыпҳақақа Иерусалимыми тугуклъиӷьюгнӣсқылъюку Кияӷныӷым югитнун. ³²Та̄хкын Кияӷныӷым пиюкылъқыхкагу, лъпысинун пилъықуңа қуялъылиҳлъяглюңа, ынка̄м пиниӷью̄хнықихлъықуңа ля̄лиҳфикумалюси. ³³Кияӷнық ныкыхмылъылитилӷӣ тамаҳаҳпысинилъи. Аминь.

Павелым Сю̄мқыхкаңи Ухпықа̄лгутыни

¹Уңипа̄сюгамси ухпықа̄лгутымнъың, Фивамың. Пинилӷӣңӯқ диаконисса ухпықанун қырңуӷуткаюгнун юӷаӷвигани Кенхреям. ²Упуӷанъакыси Кияӷныӷым югита пӣқылъҳистун қаюҳлъяк Атанӷым пика̄. Каюткысюнӷиси каюсиӷақлъюку қаюҳлъяк каютыҳлъягӯқ углялӷӣнун югнун, хўаңамнунлъю талўа.

³Уңипа̄таҳнакыхси Прискиллалъю, Акилалъю сю̄мқақахкаңуқ. Қыпҳалгуткахка Христос Иисусымун. ⁴Талўа туқутылъыҳқаҳтынь пикаткыхпына̄н пақнӣҳсяҳқақа̄гныңа. Тама̄кын апалъюқлъюку игамсиқаюхлъягӯңа лъкыхкының. Қамахлъютыңлъю ухпықат язычнигыт юӷаӷвигитнилңӯт игамсиқаюгӯт. ⁵Уңипа̄таҳнакыси ухпықат қырңуӷуткаюгның мыңтыӷахкыни сю̄мқақанкаңуқ.

Уңипа̄таҳнакыси пиниқыхкақа Епенет сю̄мқақақаңуқ. Асиями лъңа ухпыӷьюха̄қа̄гуқ Христосыкун. ⁶Уңипа̄таҳнакыси Мария сю̄мқақақаңуқ; қывӯлъюни қыпҳа̄ткақӣси. ⁷Уңипа̄таҳнакыхси Андроникалъю, Юниюлъю Иудейялгутыхка, анусимиңлъяӷалгуткыхкақахкалъю, сю̄мқақахкаңуқ. Апостолыңӯк югыт лӣсимакңўа̄қыхкыт; сивумни ухпықа̄ҳтыка̄гук.

⁸Уңипа̄таҳнакыси Амплий, пиниқыхкақа Атаныҳқун, сю̄мқақақаңуқ. ⁹Уңипа̄таҳнакыси Урбан, қыпҳалгутфут Христосымун, пиниқыхкақалъю Стахия, сю̄мқақахкаңуқ. ¹⁰Уңипа̄таҳнакыси Апеллесалъю сю̄мқақақаңуқ. Нанӷӣҳсяӷалъыңақңами ипапиҳқыхкақа̄ ата̄сиӷмитылъыни Христосымун. Уңипа̄таҳнакыси ныңлъюгутаңи Аристовулым сю̄мқақанкаңуқ. ¹¹Уңипа̄таҳнакыси Иродион, Иудейялгутка, сю̄мқақақаңуқ. Уңипа̄таҳнакысилъю ухпықат ныңлъюгутаңанилңӯт Наркиссым сю̄мқақанкаңуқ.

¹²Уңипа̄таҳнакыхси Трифеналъю, Трифосалъю сю̄мқақахкаңуқ. Та̄кук аӷнак қыпҳаҳтыңӯк Атаныӷмун. Уңипа̄таҳнакысилъю пиниқыхкақа Персида, сю̄мқақақаңуқ; қывулъюни қыпҳақа̄гуқ Атаныӷмун. ¹³Уңипа̄таҳнакыхси Руфылъю на̄кулъҳӣк, сю̄мқақахкаңуқ. Руф Атанӷым накмикыхкақа̄, на̄ңанлъю иӷнықылӷӣстун пӣқа̄ңа. ¹⁴Уңипа̄таҳнакыси Асинкритылъю, Флегонтылъю, Ермийелъю, Патробалъю, Ермылъю, қамахлъюкилъю ухпықа̄лгутыт лъңитнилңӯт, сю̄мқақанкаңуқ. ¹⁵Уңипа̄таҳнакыхси Филологылъю, Юлиюлъю, Нирейямлъю наякулъҳӣк, Олимпанлъю, қамахлъюкилъю Кияӷныӷым юги лъңитнилңӯт, сю̄мқақанкаңуқ.

¹⁶Қуякутақитык на̄ӷутмың Кияӷныӷым пиниқылъҳакун. Қамахлъютың ухпықат Христосым юӷаӷвиганилңӯт, лӣсимакысюгӣси сю̄мқақӣсиңуқ.

Павелым Киңулӣт Апыҳтӯсӣ

¹⁷Ухпықа̄лгутымни, қылӷамси кылыңасқылъюси тама̄куның а̄фқӯтыстикаюгның, тунутыстилӷӣның югыт ухпықилъҳитның, кипулъхина̄лӷӣның апыҳтӯсяның лӣткаҳпысиның. Иқитңатык тама̄куның. ¹⁸Югыт таўатын пикаюгыт қыпҳа̄тңунӷита̄т Христос Атаныҳпут. Та̄ўаңинаҳақ лъмың катам ыфқуқыхкаҳӣнатың пӣқӣт. Апыҳтуӷиныӷмыхни акузитыҳлъюхўа̄т атуқақӣт, усюқӯҳтақӣтлъю югыт пӯҳналюки пӯҳсюгумалӷӣт.

¹⁹Қамахлъютың югыт нагақӯма̄т қа̄ткутңалъыҳси Атаныӷмун, ынка̄м тама̄кын апалъюқлъюку қуякыҳлъяўа̄мси. Пыҳқинӷусюгамси сямун пинилӷӣмун, иўырңа анахутылъңунаси сыӷлыӷмун.

²⁰Кияӷныӷым ныкыхмылъылитилӷӣм қантаӷақун кагимлъықа̄ Туӷныӷақ итыгаҳпыси асиңани.

Атаныҳпут Иисус Христос наңлъыхтаӷли лъпысинун.

²¹Қыпҳалгутма Тимофейем, Иудейялгутмалъю Луцийямлъю, Иасонымлъю, Сосипатрымлъю сю̄мқақӣсиңуқ.

²²Тертийяңӯңа, ига̄тақақа Павел посланияңаның. Хўаңалъю сю̄мқақамси Атаныҳқун.

^23-24Хўаңа Павел, Гаийемытақуңа. Мыңтыӷа̄ни қамахлъютың ухпықат қырңуӷуткаюгӯт. Лъңанлъю, ухпықатлъю сю̄мқақӣсиңуқ.

Ныҳлъямта манимың афлъыңакистыңан, Ерастым, ухпықа̄лгутымталъю Квартым сю̄мқақӣсиңуқ.

Усюқилъық Юӷалъыҳқун

²⁵Усюқылътыху Кияӷнық! Лъңан айыпсюгиҳсяӷьяқлъыгўӣ ухпықилъыси Пинилӷӣтхун Уңипатхун Иисус Христосымың аюқылӷӣмың уңипақумаңинаӷақыхкымнун югнун. Та̄наңӯқ аксяқыхкақ уңипақ Кияӷныӷым қайвиҳсимаңитка̄ има пӣнлиӷьюха̄лъҳаның нунам. ²⁶Иўырңа ма̄тын, пӣнлыӷилңӯм Кияӷныӷым қайвиҳсимӣ Пинилӷӣт Уңипат игақулъҳитхун ӯкналиқистыт. Қылӷусимӣ Пинилӷӣт Уңипат лӣтысқылъюки югнун нунатаҳа̄ни тамаҳа̄ни. Таўатын пика̄гуқ лъңитнун ухпықысқылъюнилъю, қа̄ткысқылъюнилъю.

²⁷Лъңина̄гуқ Кияӷнық, пыҳқинылӷӣ сямун тамаҳа̄нун. Югыт усюқлъитху қӯнпырухлъяк Иисус Христосыкун! Аминь.