Откровение

Иисус Христосым Алӣҳтилъҳа

¹Хўани игани игақңа̄т Кияӷныӷым алӣҳтыкӣ Иисус Христосымун. Кияӷныӷым алӣҳтыкақӣ лъңанун лӣгикыстысқылъюки қыпҳаҳтыни сяңўа̄т пияҳтуңыстаӷнилюки. Ынка̄м Христосым каяхтыкақа̄ яқулыни қыпҳаҳтыминун Иоаннымун тама̄кут лӣсимакысқылъюки. ²Та̄хкын Иоанным а̄пқақӣ қамахлъюки ысҳақанилъю, нагатканилъю. Нагаткақӣ акузитаңи Кияӷныӷым, уңипақлъю Иисус Христосымың аюқылӷӣ. ³Қуястыка̄гуқ атиҳтулӷӣ игляхтулюни акузитаңитның ӯкналиқылъҳым. Қуястыка̄гутлъю нагалъютың қа̄ткулъҳӣт қаюҳлъяк қантаӷақун тама̄кут пилъықут.

Иисусым Уңипа̄ Ухпықанун Юӷаӷвигнилңуӷнун

^4-6Укут посланият Иоаннымың пиңӯт ухпықанун қырңгутқаюгнун ма̄ӷраӷвинлыгни юӷаӷвигни Асиями.

Наңлъыхталъықлъю, ныкыхмылъықлъю лъпысинилъик Кияӷныӷмың, ма̄ӷраӷвинлык таӷныӷа̄ның, Иисус Христосымыңлъю. Кияӷныӷӯқ кияҳлъыҳӣ ма̄тын, лъңаңӯқ кияҳлъыҳӣ сивунӷани, лъңаңӯқ тагияҳқақ. (Та̄кут ма̄ӷраӷвинлык таӷныӷат сивуңанитут Кияӷныӷым умӣлгусӣн ақумута̄н.) Иисус Христос ата̄сӣӷмылңӯгуқ лӣсимакиста ипапилъыӷмун. Лъңаңӯқ Кияӷныӷым уңуваҳсюхўа̄қа̄ туқулъыӷмың. Лъңаңӯқ иглыӷутистыңат умӣлгита нунам.

Лъңаңӯқ пиниқилӷӣ хўаңкунъың, а̄ўмикунлъю, итымуткақӣлъю сыӷлыҳқылъымнъың. Атаныҳпагулъыӷминитыстӣлъю, священнигаңуҳтыстӣлъюлъю Кияӷныӷминун Атамун. Иисус Христосым алъхыҳлъикык ниӷуҳқылъықлъю, аҳтуӷьяҳқа̄нӷилъықлъю иглыӷутимун қӯнпырухлъяк кынлыңуна̄н! Аминь.

⁷Ӣи! Иисус тагӣқуқ қилягўа̄хтыхун.

Тамаҳаӷми югым ысҳаҳлъықа̄т,

талўа тама̄кут панасқылъюку пика̄т ысҳаҳлъықа̄т.

Қамахлъютың нунам рамкыңи қия̄ӷӯтыҳлъяхлъықут апалъюқлъюку лъңа.

А̄а, тама̄кут пияҳқа̄гут!

Аминь.

⁸«Хўаңа Альфаңӯңалъю, Омегаңӯңалъю», пӣқ Атанық Кияӷнық, Аҳтуӷьяҳқа̄нӷитыҳлъяк. Лъңаңӯқ кияҳлъыҳӣ ма̄тын, лъңаңӯқ кияҳлъыҳӣ сивунӷани, лъңаңӯқ тагияҳқақ.

Иоанным Ысҳаӷўа̄лъҳа Христосымың

⁹Иоанныңӯңа, ухпықа̄лгуткаҳпысиңа. Икфиқуңа лъпысистун қаюҳлъяк Иисусым Атаныҳпагулъҳан пикӣлъю. Лъңакун икфиқылъыпут нуқытутапут. Агляҳтыстыка̄гуңа қӣҳқамун а̄тқылӷӣ Патмосымың қаюҳлъяк уңипақыхкынка Кияӷныӷым акузитаңи, уңипақлъю Иисусымың аюқылӷӣ. ¹⁰Атанӷым Аӷныӷани Аглыӷналӷӣм Таӷныӷам ӣтҳа̄ңа. Та̄хкын тунутымнилъюку нагақуӷақа ма игляхтуқақ қалӷиҳта̄тытун. ¹¹Хўатын пӣқ: «Игақуҳқи игатхун ысҳақаҳтын. Та̄хкын туюӷнакытын ухпықанун қырңуӷуткаюгнун ма̄ӷраӷвинлыгни юӷаӷвигни: Ефесымылңӯт, Смирнамылңӯт, Пергиямылңӯт, Фиатирамылңӯт, Сардисымылңӯт, Филадельфиямылңӯт, Лаодикиямылңӯтлъю».

¹²Та̄хкын қӣвуңа ысҳаӷналюку ма алыҳқуҳтыка. Қӣвьялӷӣңа ысҳаӷанка ма̄ӷраӷвинлыгуфтут золотат кынылӷутат тунымӣт. ¹³Та̄ўа қукӣтни кина лъяңақа иӷныӷа югым акуҳтуҳлъягыгның аткуя̄қыфтуқ, сякимагмикунлъю тафсиңафтуқ золотамың. ¹⁴На̄сқўалъю нуя̄лъю қатыҳпытук шерстыстун налиӷмың анигустун, ӣскыклъю кынӷым кумаңалъҳатун аюқлъютык. ¹⁵Итыгӣ қылмыҳсяқастун сӣлюстун аюқыфтут пылюңиҳсяқат кыныҳқун. Мыңалъю ыфтуҳлъягатун мыҳлъягым тывуӷалъҳан аюқлъюни. ¹⁶Аӷынқигныӷминың тугумӣқыфтӣ ма̄ӷраӷвинлык иӷалықыта̄ӷыт, қа̄нӷаныңлъю а̄нуқ сявихпак иңлюхтун хинакык ипыхсяқак. Хина̄ ниӷухлъяк аӷныӷым қука̄н сиқинӷӯҳтылъҳатун.

¹⁷Ысҳаӷьямкун итыга̄н мануңакун ӯлъҳаҳтуңа туқукастун. Иўырңа аӷынқигныӷминың ӣхминың ся̄флъюңа пӣңа: «Алиңыхпынаң, хўаңа сивулӣгуңалъю, киңулӣгуңалъю. ¹⁸Уңувалӷӣңӯңа! Туқука̄яҳтуңа, иўырңа ӣи, уңуваңӯңа қӯнпырухлъяк кынлыңуна̄н. Қипыталгӯңа Туқулъыӷмыңлъю, Адымыңлъю.

¹⁹Ся̄қсин игақуҳқи игатхун сяңўа̄т қамахлъюки ысҳақытын ма̄тын, сяңўа̄тлъю киңувақун пияҳқат. ²⁰Ысҳаӷатын ма̄ӷраӷвинлык иӷалықыта̄ӷыт аӷынқигныӷма ӣханилңӯт, ма̄ӷраӷвинлыклъю золотат кынылӷутат тунымӣт, та̄кут сямың писӣтаңи сялин қайвиҳтылъҳитут. Хўатын писӣгут: Ма̄ӷраӷвинлык иӷалықыта̄ӷыт яқулгӯт. Кияӷныӷым уңипаҳтыкӣ ухпықанун қырңуӷуткаюгның ма̄ӷраӷвинлыгни юӷаӷвигни. Ма̄ӷраӷвинлык кынылӷутам тунымӣ та̄куңӯт ма̄ӷраӷвинлык юӷаӷвигыт».

Ухпықанун Ефесымылңуӷнун

¹«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Ефесым.

Хўаңаңӯқ тугумӣлык ма̄ӷраӷвинлык иӷалықыта̄ӷның аӷынқигнымкун, иглыҳтыңъӯңалъю акулңитни ма̄ӷраӷвинлык золотат кынылӷутат тунымӣтни.

²Лӣсимакамси ся̄лъыҳси, уӷлыӷӣлӷӣси, ӣлъқаюнӷитылъыҳсилъю. Лӣсимакамсилъю тугуклъӣгатаси сыӷлыӷыт югыт, иўырңа апостолыңунилӷӣт лӣтақаси ысҳапаглюки тымңиңутаңи. Та̄ўа лӣтаси иқлъыңиқыстыңӯт. ³Мыӷнӣгатуси икфиқылъыҳпысиның хўаңа апалъюқлъюңа, ӣлъқаюгигатусилъю.

⁴Иўырңа пиюкынӷитусиқа лъпысинун унаңӯқ, пиниқнанӣма̄ҳпысиңа, ухпықа̄лгутысилъю сивунӷани пиниқылъыҳпысистун. ⁵Тама̄кын апалъюқлъюку пуйгухпына̄н пиниқыҳлъягьяқыфсиңа, ухпықа̄лгутысилъю. Пиниқнаниӷаҳпысиңа пӣқылъыҳпысистун. Ынка̄м авутыҳқитык. Пиниқынқихтикут пиниқсюххуа̄лъыҳпысистун. Авутыҳқынӷилъкуфси, такулюси иқилъықақа кынылӷутаҳпыси туныма̄ ныңаның. ⁶Иўырңа уна пинитун пилъқаҳси: угумикаси пӣқыхкаңит Николайем малихся̄ҳтыңита, катам хўаңа угумикылъымтун.

⁷Сигутылгукуфси, нагатыкык Таӷныӷак сямың пӣқуткык ухпықанун! Тама̄кут кая̄лъқӣлӷӣт кая̄лъқӣлъыӷмың ныӷысқылъықанка пӣтыстыка̄ның уқфиган уңувалъҳым, таўанлыңуқ Кияӷныӷым Пӣтысиӷаӷвигани».

Посланият Юӷаӷвигитнун Ухпықат Смирнами

⁸«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Смирнам.

Уна уңипақ хўаңамның пиңӯқ: Сивулӣгуңалъю, киңулӣгуңалъю, туқулюңа уңувақа̄гуңа. ⁹Лӣсимаканка сыӷлылӣлъыси, аклъюмаңӯсилъю иўырңа аклъюңитуси! Лӣсимакақа сыӷлыӷыт акузитыт иляңита югыт пӣқыхкаңит лъпысинун. Иудеяңунӣқут, Иудеяпигунӷитыӷңа̄ӷмың. Югӯт қырңуӷуткаюгның Туӷныӷа̄м синагогаңани. ¹⁰Аликыхпынаки тама̄кут икфиқуткынъақыхкыси. Нагатык! Туӷныӷа̄м иляси анусимиңлъяҳтыснақӣ нанӷӣқуналюси. Ынка̄м икфиқылъықуси қуля аӷныӷнун. Иўырңа ата̄сӣӷмытык, қайўа туқуяҳқа̄ӷңа̄ҳпыси. Таўатын пикуфси, акилыҳтӯсялилъықамси кынлыңилңуӷмың уңувалъыӷмың.

¹¹Сигутылгукуфси, нагатыкык Таӷныӷак сямың пӣқуткык ухпықанун!

Тама̄кут кая̄лъқӣлӷӣт кая̄лъқӣлъыӷмың, тӯңлиҳа̄н туқулъҳым ақниҳна̄нӷитӣ».

Посланият Юӷагвигитнун Ухпықат Пергамыми

¹²«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Пергамым.

Уна уңипақ сявихпалыгмың пиңӯқ иңлюхтун хиналык ипыхсяқамың. ¹³Лӣсимакамси на̄нтыстык, таўантуси Туӷныӷа̄м умӣлгутивиган ақумутахкыни. Хўаңамнун ата̄сӣӷмытуси, ухпықнанилъҳитаҳпысиңалъю. Таўатытка̄гуси талўа Антипа, ата̄сӣӷмылңуқ уңипаҳтыка, кияҳтыңъулюку. Таўани Туӷныӷа̄м кияҳфигани туқуткақа̄т.

¹⁴Иўырңа пиюкынӷитусинка лъпысинун укуңӯт: та̄ўа лъпысинитут иляңи қа̄ткулъҳӣт Валаамым апыҳтӯся̄нун. Апыҳтуқақа̄ Валак натын сыӷлыҳқыстысқылъюки Израилыӷмӣт. Ынка̄м Валакым апыҳтуқақӣ ныӷьяӷңӣта писқылъюки нықыт аҳқуткыхкат кияӷныңлъяқанун. Апыҳтуқақӣлъю итагнаӷнилюку алңунак развратылъыӷқақ. ¹⁵Таўатыҳпигақ иляси қа̄ткутут Николайем апыҳтӯся̄нун. ¹⁶Авутыҳқылъюси сыӷлыҳқынъаниҳтык! Пинӷилъкуфси қантаӷақун такулъықамси. Та̄хкын пилъюўаҳлъықанка тама̄кут югыт сявихпагмың қанымнилңуӷмың.

¹⁷Сигутылгукуфси, нагатыкык Таӷныӷак сямың пӣқуткык ухпықанун қырңуӷуткаюгның юӷаӷвигни! Маннамың ӣӷңалӷӣмың, манналилъықақа та̄на кая̄лъқӣлӷӣ Туӷныӷаӷмың. Лъңанунлъю тӯнылъықақа қатылӷӣ уйӷак, атыӷраӷаӷмың игақфикыхкақ. Китум алңунак налъюкыхка̄ атық иўырңақун алъхыҳтикаҳӣна̄м уйӷагмың лӣсимака̄».

Посланият Юӷаӷвигитнун Ухпықат Фиатирами

¹⁸«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Фиатирам.

Уна уңипақ Иӷныӷаның Кияӷныӷым пиңӯқ. Ӣскык кумаӷӯгук кынӷыстун, итыгӣ қылмыҳтутка̄т сӣлюм қылмыҳсялӷатун. ¹⁹Лӣсимакамси ся̄лъыҳси. Лӣсимакақа пиниқылъыҳси, ухпықылъыҳси, қыпҳа̄тилъыҳси, нуқытутилъыҳсилъю. Лӣсимаканка тама̄кут ўата пӣқаси сивунӷани пӣқылъыҳпысиның.

²⁰Иўырңа укуңӯт тыңвимун аюқыхканка лъпысинун: Аӷулӣҳнъыӷитаҳси аӷнақ Иезавель апыҳтуӷилӷӣ ипаңунӷилңуӷның. Ӯкналиқыстыңунӣқуқ Кияӷныӷмун. Иўырңа апыҳтуӷилъыӷмикун пӯҳтақӣ югынка развратысқылъюки, ныӷысқылъюкилъю нықыт аҳқуткыхкат кияӷныңлъяқанун. ²¹Пилъыҳқалиткақсяӷақа авутыҳқысқылъюку, иўырңа та̄қсюнӷитуқ алъянӣныӷмың. ²²Ӣи! Милю̄нъақақа қаваӷвигмун таўани икфиқысқылъюку. Малигулъюки лъңанун милю̄лъықанка тама̄кут гылгаӷнӣлгутаңи ынка̄м икфиқыстыҳлъяхлъықанка. Таўатын пилъықуңа ўыткуқун авутыҳкыхката сыӷлытун пилъҳитның. ²³Туқулъықанкалъю авақутӣ. Ынка̄м қамахлъютың ухпықат юӷаӷвигнилңӯт лӣлъықа̄тңа хўаңаңӯқ лӣсимакилӷӣ югым тамаӷаҳми сюмыҳтаӷалъҳитныңлъю, илюмикыхкӣтныңлъю. Аӷью̄ӷьяҳқақамси тамаӷаҳпыси сыӷлыҳқытулыхпысистун.

²⁴Иўырңа иляхпыси Фиатирами, малихтылъҳитаси Иезавелым сыӷлыӷыт апыҳтуӷилъҳи. Лӣтылъҳитасилъю Туӷныӷа̄м аксяқумта̄ҳлъяги. Тама̄кын апалъюқлъюку қылӷатаӷаӷна̄нӷитамси, ²⁵иўырңақун ухпықумаңинаҳтыху апыҳтулъыси кынляңа утыӷнилъымнун.

²⁶Лъңа та̄на кая̄лъқӣлӷӣ кая̄лъқӣлъыӷмың, атуқилӷӣлъю аныӷныҳқилъымның кынлымун, аҳтуӷьяҳқа̄нӷилъылилъықақа иглыӷутысқылъюки народыт. ²⁷Иглыӷутысқылюки сявикынӷаӷмың жезлылиӷлюки ынка̄м кагимнъакаңит қикумың қулмысӣтыңлъяқастун. ²⁸Тӯнылъықанкалъю уна̄ңум иӷалықыта̄ӷаның. ²⁹Сигутылгукуфси, нагатыкык сямың пӣқуткык Таӷныӷак ухпықанун!»

Уңипақ Ухпықанун Сардисымылңуӷнун

¹«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Сардисым.

Та̄на Кияӷныӷым ма̄ӷраӷвинлык таӷныӷа̄ның пилык ма̄ӷрагвинлыклъю иӷалықыта̄лык, пӣқ: “Лӣсимакамси ся̄қыстык. Югыт пӣқӣси уңуванилюси иўырңа туқуңа̄си. ²Таҳтуӷлюси, икнақуҳсяҳтыху сяңўа̄ сялин лъпыси пизи туқунақылӷӣ. Лӣтанка укавантут сяңўа̄т пӣқыхкыси Кияӷныӷма писқысюлъҳаның лъпысинун. ³Нықамиклъюки апыҳтӯткат лъпысинун, нагақуқасилъю. Қа̄ткитыки, авутыҳқитыклъю сыӷлыҳқылъыҳпысиның. Иўырңа таҳтунӷилъкуфси, такулъықамси тыглыгнӣҳтытун. Налъюкылъықаҳси қакун тагилъыҳқақа лъпысинун.

⁴Паниның қафсиңга̄гут югыт Сардисыми а̄ткатың нукыхнаҳқылъҳилъкаңит. Иглыҳтылгусиҳлъықа̄тңа а̄лъютың қатылӷӣмың а̄ткамың қаюҳлъяк итагналӷӣңӯт. ⁵Кая̄лъқӣлӷӣ, лъңистун а̄лъықуқ қатылӷӣмың а̄ткамың. А̄тҳалъю ӷывысна̄нӷитақа Кынлыңилңӯм Уңувалъҳым Ига̄ның. Атамалъю яқулганлъю сивуңитни хўаңамнун пикнилъықақа. ⁶Сигутылгукуфси, нагатыкык сямың пӣқуткык Таӷныӷак ухпықанун!”»

Уңипақ Ухпықанун Филадельфиямылңуӷнун

⁷«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Филадельфиям.

Уна уңипақ Аглыӷналӷӣмың, Ипапигмың пиңӯқ. Лъңанитуқ Давидыми қипытақ. Қылъпыҳтыкумигу амик, китум алңунак умыгна̄нӷита̄. Ӯмкумигулъю амик, китум алңунак қылъпыҳна̄нӷита̄. ⁸Лӣсимакамси ся̄қыстық, лӣсимакамсилъю кая̄туси. Нақамлъю қа̄ткаси апыҳтӯсянка, мысиӷӣгатусилъю хўаңамнун малихся̄ҳтыкнилюси. Ӣи, қылъпыӷусима̄мси амигмың; китум алңунак умыгьяҳқақынӷилъкаңаның. ⁹Ӣи! Тама̄кут қырңуӷулъҳӣт Туӷныӷа̄м синагогаңани, Иудеяңунӣқут. Иўырңа иқлъыңиқыстыңӯт; Иудеяңунӷитут. Лъпысинун пислъюки қуңуҳтыснақанка сивухпысигун. Та̄хкын лӣлъықа̄т пиниқыхкымси. ¹⁰Қылъқақамси нуқытысқылъюси. Қа̄ткыхкақутыхпысиның қылӷилъқа пақнӣҳсяҳлъықамси сыӷлылӣлъыӷның ка̄нъақылӷӣның нунатаҳаӷының тамаҳа̄ның. Тама̄кут сыӷлылӣлъҳыт нанӷӣқулъықӣт қамахлъюки югыт кияҳлъыҳӣт нунами.

¹¹Тагияҳтуҳтуңа. Айыпсюгилъюси ухпықумаңинаҳтыңъа китумун алңунак ўаянӷитысқылъюки қаҳпаси. ¹²Кая̄лъқӣлӷӣ аӷвыӷақыта̄ҳтыслъықақа Кияӷныӷма Храмыңани, алъямыңлъю а̄на̄нӷитуқ. Ынка̄м лъңакун игақылъықақа а̄тҳа Кияӷныӷма, а̄тҳалъю Кияӷныӷма ныҳлъяган, Иерусалимыӷраӷақ, укилӷӣ қилягмың Кияӷнымның. Лъңакунлъю игақылъықақа атыӷраӷақа. ¹³Сигутылгукуфси нагатыкык сямың пӣқуткык Таӷныӷак ухпықанун!»

Уңипақ Ухпықанун Лаодикиямылңуӷнун

¹⁴«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Лаодикиям.

Уна уңипақ Аминымың пиңӯқ. Ата̄сӣӷмылңӯгуқ, ипапиҳқыңъалӷӣңӯқ лӣсимакиста. Лъңакун Кияӷныӷым улимакақа̄ сяңўа̄ қамахлъюку. ¹⁵Лӣсимакамси ся̄қыстық: исыкинанӷитуси, налиӷмың угуқнанӷитуси. Исыкиналӷӣситуқ налиӷмың угуқналӷӣситуқ! ¹⁶Ынка̄м мақаӷра̄ха̄тыхпысиның, исыкинанӷилңӯси налиӷмың угуқнанӷилңӯси, қысӣнъақамси қанымның! ¹⁷Пӣқуси аклъюңинъилюси, алъхыӷутыҳлъягақнилюси, аклъюңиганъилюсилъю. Иўырңа налъюкуси сыӷлыӷўа̄ӷӯси, наңлъыгнаҳтуси, аклъюма̄си, ая̄ңа̄си, амсикаӷмытусилъю. ¹⁸Тама̄кын апалъюқлъюку уңипа̄тамси аклъюңиӷисқылъюси тукфиҳтыху золото қигыҳтыңъўа̄қақ кыныҳқун, тыңьяҳтуҳтык хўаңамнун. Тукфиӷитыклъю хўаңамның қатылӷӣның а̄тканың ся̄пысқылъюки кайңуналӷӣт амсикаӷмытылъыси. Тукфиӷитыклъю хўаңамның аӷакаҳқамың ийыхпысинун ысҳа̄сягутысқылъюси.

¹⁹Тама̄кут пиниқыхканка налъҳусяӷақанка, аӷью̄ӷақанкалъю. Ынка̄м сягиқныӷуҳтык, авутыҳқылъюси сыӷлыҳқынъаниҳтык. ²⁰Ӣи! Ныкывлюңа амигми тыңлюхтуҳтуңа. Китум алңунак нагақуқумигу мыка, амигмың қылъпыӷусимакаңаңа итыҳлъықуңа лъңанун. Ынка̄м ныӷылгусиҳлъықақа, лъңанлъю ныӷылгусиҳлъықа̄ңа.

²¹Кая̄лъқӣлюңа ынка̄м ақумга̄ңа ся̄ӷўани Атама умӣлгусӣкун ақумутахкынкун. Таўатыҳпигақ кая̄лъқӣлӷӣ ақумыслъықақа ся̄мкун умӣлгусигныкун ақумутамкун. ²²Сигутылгукуфси, нагатыкык Таӷныӷак сямың пӣқуткык ухпықанун!»

Манигӯтылъық Қилягми

¹Та̄хкын тама̄кут киңуңитның та̄ўа ысҳаӷақа қилягми амик қылъпалңуқ!

Ма нагаткақа қалӷиҳта̄тытун аюқылӷӣ, хўатын пӣқ: «Мая̄ хўавык. Лъпынун ысҳаҳтыснақанка сяңўа̄т пияҳқат». ²Таўаниңинақ Таӷныӷагнитуңа. Та̄ўа қилягми ысхаӷахка умӣлгусик ақумутак, кина ақумгафтуқ. ³Ақумгалӷӣ умӣлгусигни ысҳақа̄люни иқаҳтахкытун ясписылъю сардисылъю аюқуқ. Увитаңани умӣлгусим та̄ўа аглюк иқыҳтакык смарагдытун аюқлъютык. ⁴Увитаңани умӣлгусим ақумутаҳлъягым та̄ўа югинақ стамат сӣпнықлъюки умӣлгусит ақумуталӷутыт. Та̄кутхун ақумгатңафтут югинақ стамат сӣпнықлъюки утфат қатылӷӣмың аткуя̄ӷулъютың, золотамыңлъю қаҳпалютың. ⁵Умӣлгусим ақумутаҳлъягыхкының калъюгым ниӷўа̄хпахтӣ, лывыклъюхтӣ, тыңъа̄хтӣлъю пӣт. Сивухкыни умӣлгусим ақумутаҳлъягым та̄ўа ма̄ӷраӷвинлык нанит кумаңалӷӣт, та̄кут ма̄ӷраӷвинлыгуфтут таӷныӷӣ Кияӷныӷым. ⁶Умӣлгусим ақумутаҳлъягым сивухкыни та̄ўа кылъӣсюгнилңуқ қыргыся, мыӷра̄кыхтақ кристаллыстун.

Умӣлгусим ақумутаҳлъягым увитаңани, тамаҳӣтни сянихкыни, та̄ўа стамат Уңувалӷӣт, ийыҳлъягуфтут ся̄ймыхтыхунлъю, ақсягымыхтыхунлъю. ⁷Сивулиқ Уңувалӷӣ левысюгнитыфтуқ, тӯңлиҳа̄ Уңувалӷӣ волсюгнитыфтуқ, пиңая̄т сяңўа̄ Уңувалӷӣ хиналгуфтуқ югым хина̄ның, ынка̄м стамӣтаңат Уңувалӷӣ тыңа̄каюхтун қаўа̄хпахтун аюқыфтуқ. ⁸Ынка̄м стамат Уңувалӷӣт тамаҳаӷмың аӷвинлыгның яқулгутутыфтут, ынңа̄талъ югусӣт ийыҳлъягуфтут талўа қамавык яқҳўита асиңитнун. Аӷныҳтӯма̄н унухтӯма̄н та̄қигалңӯт иляганыӷмың:

«Аглыӷналӷӣ, аглыӷналӷӣ, аглыӷналӷӣ,

Атанӷӯқ Кияӷнық, Аҳтуӷьяҳқаҳа̄нӷитыҳлъяк,

лъңаңӯқ ма̄тын, лъңаңӯқ сивунӷани,

лъңаңӯқ тагияҳқақ!»

⁹Та̄кут стамат Уңувалӷӣт илягаҳтут иляга̄тңитның усюқилъҳым, қӯлваӷилъҳым, игамсиқаюлъҳым ақумгалӷӣмун умӣлгусигни ақумутаҳлъягыгни, кияҳлъыҳӣмун қӯнпырухлъяк кынлыңуна̄н. Таўатын пинӷата ¹⁰югинақ стамат сӣпнықлъюки утфат нӣнӷутақут сивуңакун ақумгалӷӣм умӣлгусим ақумутаҳлъягыхкынун, манигуӷақа̄т кияҳлъыҳӣ қӯнпырухлъяк кынлыңуна̄н. Та̄кут пресвитерыт қаҳпатың матаҳлъюки лъӣқӣт сивуңакун умӣлгусим ақумутаҳлъягыхкынка, ынка̄м илягаӷақут:

¹¹«Хўаңкута Атаныҳпут Кияӷныҳпут!

Лъпык тугупыста̄ӷьяҳқақатын усюқылъыҳлъягыт, қӯлвалъыҳлъягыт,

игамсиқаюлъыҳлъягыт аҳтуӷьяҳқа̄нӷилъыҳпынун.

Улимакақутыхпының сяңўа̄ қамахтыңъўа̄ӷлюку,

пиюкылъыҳпытун кияҳлъықут ынка̄м алъхыӷулъықутлъю уңувалъыӷмың».

Ӣмгат Игат, Пынъӣӷаҳақлъю

¹Та̄хкын ысҳаӷанка ӣмгат игат аӷынқигныӷан ӣханилъюки ақумгалӷӣм умӣлгусим ақумутахкыни. Та̄кут ӣмгат игат игаӷвикыхка̄фтут иңлюхтун, умыглютың ма̄ӷраӷвинлык печатының. ²Та̄хкын ысҳаӷақа аҳтуӷьяҳқа̄нӷилңуқ яқулык. Игляхтулюни а̄птилӷӣ: «Кина итагнаӷьяҳқа̄ўа икуӷьяҳқа̄люки ма̄ӷраӷвинлык печатылъҳыт қылъпыҳсяҳқа̄люки ӣмгат игат?» ³Та̄ўа аваңитуқ китумың алңунак қилягми, налиӷмың нунами, налиӷмың нунам асиңани итагналӷӣ қылъпыҳсяҳқа̄люки ӣмгат игат, ысҳаӷьяҳқа̄люкилъю илюңит. ⁴Ынка̄м қия̄ӷўаҳлъяхтуңа қаюҳлъяк на̄лъкынӷилъкаңат кина алңунак итагналӷӣ қылъпыҳсяҳқа̄люки ӣмгат игат, ысҳаӷьяҳқа̄люкилъю илюңит. ⁵Та̄хкын ата̄сим утфам пӣңа: «Қияхпынаң! Ӣи, лев. Иудам рамкыңаның пиңӯқ, Давидымлъю киңунқа̄. Кая̄лъқӣстыңӯқ ынка̄м лъңа итагнаҳтуқ икуӷьяҳқа̄люки ма̄ӷраӷвинлык печатылъҳыт қылъпыҳсяҳқа̄люки ӣмгат игат».

⁶Та̄хкын ысҳаӷақа Пынъӣӷаҳақ ныкывӷалӷӣ ся̄ӷўани умӣлгусим ақумутам. Қукӣтнитыфтуқ стамат уңувалӷӣт, утфатлъю. Пынъӣӷаҳақ ысҳақа̄люни никимқун туқуткақ. Ма̄ӷраӷвинлыгның сиӷунылгуфтуқ, ма̄ӷраӷвинлыгныңлъю ийылгуфтуқ. Та̄кут ийыт ма̄ӷраӷвинлык таӷныӷақӣ Кияӷныӷым, каяхтыкӣ тамаҳа̄нун нунам. ⁷Пынъӣӷаҳа̄м такулюку умӣлъхусигни ақумутагни ақумгалӷӣ, аӷынқигныӷан ӣханың туўӣ ӣмгат игат. ⁸Тугуяки ӣмгат игат, та̄кут стамат уңувалӷӣт, югинақлъю стамат сӣпнықлъюку пресвитерыт сыкықӯтут нунамун сивуңакун Пынъӣӷаҳа̄м. Тамаҳаӷмың тугумӣқлъютың гуслимың, золотамыңлъю сягныҳаӷның ыслъықңалӷӣт фимиамымың. Фимиамыт юӷақӣт Кияӷныӷым югита. ⁹Илягаҳтут нутаӷамың иляга̄тмың хўатын:

«Итагнаҳтутын тугуяҳқа̄люки ӣмгат игат,

икуӷьяҳқа̄люкилъю печатыңит.

Туқутка̄лӷӣтын, а̄ўапыныңлъю тукфиқақатын югыт Кияӷныӷмун.

Лъңит тамаҳӣтның пиңӯт рамкының,

улюның, югның, нуната̄ныңлъю.

¹⁰Ынка̄м Атаныҳпагулъҳанитыстатын,

священнигаңуҳтыстатынлъю Кияӷнымнун,

умӣлгыстунлъю иглыӷутилъықут нунами».

¹¹Ысҳапагумалюңа нагақуӷанка мыңит яқулылӷутыҳлъягыт. Угля̄пихлъыӷӣт кыстыпагниңилңӯт. Ныкывӷатңуфтут увитаңани умӣлгусим ақумутам, стаматлъю уңувалӷӣт, утфатлъю. ¹²Игляхтулютың пӣқут:

«Пынъӣӷаҳақ туқуткақ,

итагнаҳтуқ алъхыҳсяҳқа̄люку аҳтуӷьяҳқа̄нӷилъық,

аклъюңи, пыҳқинылъық, икнақылъық, қӯлвалъық,

ниӷуҳқылъық, усюқылъықлъю!»

¹³Та̄хкын нагақуӷанка тамаҳаӷмың улима̄ӷыт, қилягмылңӯт, нунамылңӯт, нунам асиңанилңӯт, кылъӣнилңӯтлъю. Қамахлъютың пилӷӣт ақумгалӷӣмунлъю умӣлгусигни ақумутагни, Пынъӣӷаҳаӷмунлъю:

«Усюқилъыңитык, қӯлвалъыңитык, ниӷуҳқылъыңитык, аҳтуӷьяҳқа̄нӷилъылгутыклъю қӯнпырухлъяк кынлыңуна̄н!»

¹⁴Та̄хкын стамат уңувалӷӣт пӣт: «Аминь», утфатлъю сыкықӯлъютың нунамнун, манигуӷахкыт Кияӷнықлъю, Пынъӣӷаҳа̄млъю.

Пынъӣӷаҳа̄м Қылъпыҳқуқаңи Печатылъҳыт

¹Та̄хкын ысҳапагақа Пынъӣӷаҳа̄м қылъпыҳтыкаңа сивулиқ печатылъық та̄куның ма̄ӷраӷвинлыгның печатылъыӷның. Таўантыфтут стамат Уңувалӷӣт, нагақуӷақа ата̄сиқ пилӷӣ: «Таги!» Мыңа калъюгыстун тыңъа̄лӷӣ. ²Та̄хкын ысҳаӷақа қатылӷӣ кӯни. Иглыӷутистыңа уӷлювылгуфтуқ, қаҳпалита̄тлъю. Лъңаңӯқ кая̄лъқӣкақ аңуягминың, ынка̄м а̄нуқ кая̄лъқӣмаңинаӷналюни.

³Пынъӣӷаҳа̄м қылъпыҳсяқминигу тӯңлиҳа̄ печатылъҳым, нагақуӷақа тӯңлиҳа̄ Уңувалӷӣ пилӷӣ: «Таги!» ⁴Иляңа кӯним а̄нуқ, кавилңӯфтуқ. Иглыӷутистыңа пилъыҳқалита̄т югыт ныкыхмытунъанӣтысқылъюки туқуқӯтысқылъюки. Тӯныхка̄тлъю сявихпагрухлъягмың.

⁵Та̄хкын Пынъӣӷаҳа̄м қылъпыҳсяқминигу пиңайӣтаңа печатылъҳым, нагақуӷақа пиңайӣтаңат Уңувалӷӣ пилӷӣ: «Таги!» Ысҳаӷақа тагнылӷӣ кӯни. Иглыӷутистыңа а̄пқа̄силгуфтуқ ӣхмини. ⁶Нагақуӷақа мыстун аюқысюгнилңуқ акулңитни стамат Уңувалӷӣт пилӷӣ: «Мерам има пшеница акика̄ ата̄сим динарийем. Пиңают мерам имӣ ячменыт акикӣ ата̄сим динарийем. Иўырңа на̄фқыхпынакык маслинам мысӣӷа, винолъю».

⁷Та̄хкын Пынъӣӷаҳа̄м қылъпыҳсяқминигу ыстамӣтаңа печатылъҳым, нагақуӷақа стамӣтаңат Уңувалӷӣт пилӷӣ: «Таги!» ⁸Ысҳаӷақа аҳся̄лъя̄к кӯни. Иглыӷутистыңан а̄тқыфта̄ Туқулъық, Адым малихта̄. Пилъыҳқалитка̄фтук туқуқӣсқылъюки ыстамаҳқылъҳан нунам юги сявихпахкун, паныӷа̄тылъыҳқун, ақниӷныҳқун, угўиҳсялӷӣтхунлъю тыӷикусӣтхун нунам. ⁹Та̄хкын Пынъӣӷаҳа̄м қылъпыҳсяқминигу талъимӣтаңа печатылъҳым, ысҳаӷанка асиңанилъюки аҳқыфигым уңувасӣт туқуқуқат. Туқуткақыхкаңит қаюҳлъяк ухпықыхкақыхкаңит Кияӷныӷым акузитаңи, уңипақумаңинақӣтлъю. ¹⁰Акилӷӯҳлъяхтут: «Ка̄й Аҳтуӷьяҳқаҳа̄нӷитыҳлъяк Атанық, аглыӷнаҳтутынлъю, ипапигӯтынлъю! Тама̄кут нунам юги туқуқуқат хўаңкунъың, натын тахка̄н утақӣнъақсики нанқихсяҳқа̄люкилъю, аӷью̄ӷьяҳқа̄люкилъю?» ¹¹Та̄хкын ата̄сикаҳтӣта уңувасӣт туқутка̄т қатылӷӣмың аткуя̄литкӣт, мыӷна̄лӣстысқыхкӣтлъю. Таўатын пияҳқа̄гут қаюҳлъяк иляңи ухпықа̄лгутңит, Христосымлъю қыпҳаҳтыңи туқусяҳқа̄гут лъңита туқутылъҳистун. Ынка̄м мыӷна̄линақут кынляңа угляҳталңит на̄мастыката тама̄кут туқусяҳқат.

¹²Ысҳапагақа Пынъӣӷаҳа̄м қылъпыҳсяқминигу аӷвинлӣтаңа печатылъҳым нуна уфсюгутыҳлъяхтуқ. Сиқинық тагныҳта̄ сювиналӷӣтун қӣпаӷаҳтун улимакатун козёлым мылъқўаның. Танқиқлълъю ыслъықңалӷӣ а̄ўыстун лъӣҳтуқ. ¹³Иӷалықыта̄ӷыт қилягамың ифкақӯтут нунамун катам таўатын қигумаңилңӯт смокват ифкақӯлъҳӣт уқфигмың ануқыҳлъягым уфсюгутылъҳатун. ¹⁴Қиляга авӣӷутуқ ӣмгат игат имылъҳистун, қамахлъютың на̄йӷатлъю қӣҳқатлъю нӯҳқӯтут нымыхның. ¹⁵Та̄хкын нунам умӣлги, иглыӷутистыңи, пилъюўаҳтыт умӣлгыт, аклъюңилңӯт, қӣлңумиҳтикаюгыт, тамаҳаӷмың қыпҳаҳтыля̄ӷыт, қыпҳаҳтыля̄ӷунӷилңӯтлъю ӣҳтӯтут қайыни, акулңитнилъю уйӷагыт на̄йӷани. ¹⁶На̄йӷанунлъю, уйӷагнунлъю акилӷӯгут: «Улъыӷвикикут ӣӷысқылъюта хина̄ның ақумгалӷӣм ақумутахкыни умӣлгусим, сякша̄лъыҳлъяганыңлъю Пынъӣӷаҳа̄м! ¹⁷Ка̄туқ Аӷныӷа аӷью̄ӷилъыҳқаҳлъяга хўаңкунъун ынка̄м китумңам анахлъықагу!»

144,000 Израилыӷмӣт

¹Тама̄кут киңуңитның ысҳаӷанка стамат яқулгыт ныкывӷалъҳӣт ыстамани каңиӷӣтни нунам. Яқулгыт нуқнықыфтӣт стамат ануқыт ануқлъинӷитысқылъюку нунами налиӷмың кылъӣни налиӷмың алңунак уқфигни. ²Та̄хкын ысҳаӷақа иляңа яқулык маюлӷӣ асиваӷмың тугумӣлык налъюнӣӷутаңаның уңувалӷӣм Кияӷныӷым. Яқулгым акилӷӯгӣ стамат яқулгыт Кияӷныӷым тӯныхкӣ аҳтуӷьяҳқа̄нӷилъыӷмың на̄фқысқылъюку нуна, кылъӣлъю. ³Яқулгым пӣ: «На̄фқыхпына̄н нуна налиӷмың кылъӣ налиӷмың уқфигыт! Утақӣтык кынляңа печатылъымнъун қаўӣтхун қыпҳаҳтыңи Кияӷнымта». ⁴Та̄хкын нагақуӷанка қафснгутаңи югыт печаталяҳтуқӣт қаўӣтхун. Югыт угляҳталяңит 144,000ңуфтут тамаҳӣтның рамкыңаның Израилым.

⁵Иудам рамкыни 12,000ңуфтут,

Рувимым рамкыни 12,000ңуфтут,

Гадым рамкыни 12,000ңуфтут,

⁶Асирым рамкыни 12,000ңуфтут,

Неффалимым рамкыни 12,000ңуфтут,

Манассиям рамкыни 12,000ңуфтут,

⁷Симеоным рамкыни, 12,000ңуфтут,

Левийем рамкыни, 12,000ңуфтут,

Иссахарым рамкыни, 12,000ңуфтут,

⁸Завулоным рамкыни, 12,000ңуфтут,

Иосифым рамкыни, 12,000ңуфтут,

Вениаминым рамкыни, 12,000ңуфтут.

Юлгуӷутыҳлъягыт Манигуқаңат Кияӷнық

⁹Та̄м киңуңаның ысҳаӷанка угляпыста̄ҳлъягыт юлӷутыҳлъягыт китум алңунак кыстыпагниңилъкаңи! Тамаҳӣтның пиңуфтут нуната̄ның, рамкының, югның, улюныңлъю. Ныкывӷатңуфтут умӣлгусим ақумутам, Пынъӣӷаҳа̄млъю сивухкынкун. Қӣпаӷа̄лъютың қатылӷӣның, тугумӣӷлютыңлъю пальмам уқфиган авайӣтның. ¹⁰Акилӷӯтыҳлъяхтут:

«Югулилъық Кияӷнымта пика̄ умӣлгусигни ақумутагни ақумгалӷӣ, Пынъӣӷаҳа̄млъю!»

¹¹Қамахлъютың яқулгыт ныкывӯтут увитаңитни умӣлгусим ақумутам, утфатлъю, стаматлъю уңувалӷӣт. Та̄хкын сыкықӯтут нунамун сивуңакун умӣлгусим ақумутам, манигуӷа̄т Кияӷнық. ¹²Пӣт:

«Аминь! Кияӷныҳпут тамаҳаӷми усюқлъигу,

ниӷуҳқылъигу, игамсиқаюгвиклъигу,

қӯлваӷлигу қаюҳлъяк лъңаңӯқ пыҳқинылъылык,

аҳтуӷьяҳқа̄нӷилъылык, икнақылъылыклъю.

Лъңа таўатытуқ қӯнпырухлъяк кынлыңуна̄н!

Аминь!»

¹³Та̄хкын ата̄сим утфитның а̄пта̄ңа: «Кинкуңа̄ўат қатылӷӣмың қӣпаӷаӷңалӷӣт, накынлъю пиңўа̄т?»

¹⁴Кӣмсиӷақа: «Югунӣқ, лъпык лӣсимакатын». Утфам пӣңа: «Та̄куңӯт сюфлъюӷуткат сыӷлылӣӷрукута̄ҳлъягмың. Пынъӣӷаҳа̄м а̄ўакун аӷвиглюки қӣпаӷатың, қатыҳтыстыкақӣт.

¹⁵Тама̄кын апалъюқлъюку ныкывӷатңӯт сивухкыни Кияӷныӷым умӣлгусӣн ақумутахкыни.

Манигуӷақа̄т аӷныҳтӯма̄н унухтӯма̄н Храмыңани.

Ақумгалӷӣм умӣлгусигни ақумутагни азигутиҳлъықӣ наю̄тңалъыӷминың.

¹⁶Игатиқнаниҳлъықут,

налиӷмың мықсюгьюгнаниҳлъықут.

Сиқинӷым налиӷмың алңунак угуқнаҳлъялӷӣм угунъа̄нӷитӣ.

¹⁷Пынъӣӷаҳақ умӣлгусим ақумутам ся̄ӷўанилңуқ пынъӣӷнӣҳтыкылъықа̄т.

Маӷьяҳқуҳлъықӣ сыңъулӷӣнун мыӷнун уңувалъылитикаюгнун, Кияӷныӷымлъю қуниңиҳтуҳлъықӣ».

Ма̄ӷраӷвинлӣтаңи Печатылъҳым

¹Пынъӣӷаҳа̄м қылъпыҳтақңамигу ма̄ӷраӷвинлӣтаңа печатылъҳым, қилягми қалъыгнаниӷўа̄ӷутут ынтақун афлъюм авылъҳатун тахка̄н. ²Та̄хкын ысҳаӷанка та̄кут ма̄ӷраӷвинлык яқулгыт ныкывӷалӷӣт Кияӷныӷым сивуңакун. Тамаҳаӷмың қалӷиҳта̄тыңӯтут. ³Та̄хкын иляңа яқулык, тугумӣлык золотамың сягныӷмың, тагилюни ныкывуқ аҳқыфигыгни. Тӯныхка̄т фимиамылӷутмың илятысқылъюки қамахлъюки юӷӣтнун Кияӷныӷым юган. Яқулгым лъӣ золотагнун аҳқыфигыгнун сивуңанилңӯк умӣлгусим ақумутам. ⁴Фимиамым агыпся̄ маюҳтуқ малигулъюни юӷалъҳитхун Кияӷныӷым югита. Маюҳтут Кияӷныӷмун сягныӷмың яқулгым тугумӣӷаның. ⁵Та̄хкын яқулгым, тугулюку сягнық, имиӷа̄ кынӷаның аҳқыфигым. Сягныӷым имӣ милю̄тӣ нунамун. Ынка̄м калъюгуҳтыҳлъяхтуқ, кавлыхтаҳлъяхтуқ, ниӷўа̄ҳпахтаҳлъяхтуқ, нуналъю уфсюгутыҳлъяхтуқ.

Қалӷиҳта̄тыт

⁶Та̄хкын ма̄ӷраӷвинлык яқулгыт, қалӷиҳта̄тылгыт ята̄ҳқут қалӷиҳтиналютың.

⁷Сивулӣм яқулгым қалӷиҳта̄тни қалӷиҳта̄. Та̄хкын кафтыкшаклъю, кынықлъю акумлютык а̄ўмың нунамун милю̄тахкыт. Ынка̄м пиңаюҳқылъҳа нунам паныҳтуқ, пиңаюҳқылъҳитлъю уқфигыт паныҳтут, қамахлъютыңлъю сюңаӷьюлӷӣт выга̄ӷыт паныҳтут.

⁸Тӯңлиҳа̄н яқулгым қалӷиҳта̄тни қалӷиҳта̄. Та̄хкын сяңўа̄ на̄йӷаҳлъяхсюгнилңуқ кумаӷугңалӷӣ, милю̄та̄т кылъӣнун. Ынка̄м пиңаюҳқылъҳа кылъӣм а̄ўгуҳтуқ. ⁹Пиңаюҳқылъҳит кылъӣнилңӯт уңувалӷӣт туқӯт, пиңаюҳқылъҳитлъю аңьяҳпагыт на̄фқыңъўа̄ӷӣ.

¹⁰Пиңайӣтаңита яқулгым қалӷиҳта̄тни қалӷиҳта̄. Та̄хкын иӷалықыта̄ҳлъяк, кумаӷуӷңалӷӣ нанистун, қилягамың ифкаҳтуқ пиңаюҳқылъҳитхун кӣўытлъю, сыңъулӷӣтлъю мыӷыт. ¹¹А̄тҳа иӷалықыта̄ӷым «Сюңаӷни». Пиңаюҳқылъҳа мыӷым сюңаӷниҳтыкақ ынка̄м юлӷутыҳлъягыт мыӷлютың туқукат қаюҳлъяк мық сюңаӷниҳтыка̄лӷӣ.

¹²Стамӣтаңита яқулгым қалӷиҳта̄тни қалӷиҳта̄. Та̄хкын ся̄м тынпӣ сиқинық, танқиқ, иӷалықата̄ӷытлъю, ынка̄м пиңаюҳқылъҳи мамлыхтӣ. Пиңаюҳқылъҳа аӷныӷым мамлыхта̄, пиңаюҳқылъҳалъю унугым.

¹³Ысҳаӷақалъю, нагақуӷақалъю қаўа̄хпак тыңа̄лӷӣ қӯлвани, игляхтулюни пилӷӣ: «Сыӷлыӷўа̄ӷунақңӯқ! Сыӷлыӷўа̄ӷунақңӯқ! Сыӷлыӷўа̄ӷунақңӯқ! Киңулӣт пиңают яқулгыт қалӷиҳнақыхкумыхтыки қалӷиҳта̄тытың, та̄хкын ынңа̄талъ сыӷлыпыста̄ӷунақңӯқ югнун нунами кияҳлъыҳӣт тама̄ни пилъыӷни!»

¹Та̄хкын талъимӣтаңита яқулгым қалӷиҳта̄тни қалӷиҳта̄. Ысҳаӷақа иӷалықыта̄қ ифкақақ қилягамың нунамун, қипыталитка̄фтуқлъю қылъпыҳтысқылъюку асилиӷныӷилңуқ ля̄ўа̄қ. ²Иӷалықыта̄ӷым қылъпыҳта̄ асилиӷныӷилңуқ ля̄ўа̄қ. Тысямакын агыпсюқ а̄нуқ катам агыпся̄тун ыхлъюҳлъягым рыпалъ сиқинықлъю, қилягалъю мамлыхта̄ агыпсюм. ³Та̄хкын агыпсюмың а̄нлыӷа̄тут саранчалӷутыт, нунамунлъю укихтӯтут. Ка̄пуӷьяҳқат югның, катам скорпионыт ка̄пылъҳистун. ⁴Уңипа̄тка̄лӷӣт саранчат на̄фқыфқӣта выга̄ӷыт писқылъюки налиӷмың сюңаӷьюгыт нунивахсыӷат налиӷмың алңунак уқфигыт. Ақниҳтысқыхкӣлъю тама̄куңина̄т югыт Кияӷныӷым налъюнӣлъҳилъкаңи қаўӣтхун. ⁵Саранчанун туқуқуҳтыснаниқӣ тама̄кут югыт, та̄ўаңинақ икфиқыстыҳлъягыстысқыхкӣ талъиматнун танқинун. Скорпионыт ка̄пылъҳистун югыт икфиқыҳлъякат. ⁶Та̄куни талъимани танқини тама̄кут югыт туқуюпихлъықут, иўырңа туқупагниңилъықут. Югыт туқунақыҳлъяхлъықут, иўырңа туқуна̄нӷитут.

⁷Саранчат ысҳақа̄лютың кӯнистун аюқут пилъюўамун ята̄ҳқыхкат. На̄сқўитнитыфтут лъяңақа золотат қаҳпат, хинӣтлъю югыт хинӣстун аюқлъютың. ⁸Нуйӣт аӷнат нуйӣстун аюқлъютың, хӯтңитлъю левыт хӯтңистун аюқлъютың. ⁹Югусимыхтыхун қалътылгуфтут ысҳақа̄лютың сявикынӷа̄ӷыт сякимагӣтат. Яқўӷиталъю сюлюхталъҳит лъяңақа колесницат кӯнитуқат сюкыралӷӣт пилъюўамун. ¹⁰Папылгуфтут скорпионыстун ка̄пикаюгмың. Ынка̄м талъиматнун танқинун югыт икфиқыстыҳлъягӣт папыгмыхның капуӷлюки. ¹¹Умӣлылгуфтут иглыӷутилӷӣ лъңитның, яқулгуфтуқ ысҳа̄макистыңа асилиӷныӷилңӯм ля̄ўа̄ӷым. Еврейистун а̄тҳа Аваддон, Грегыстун Аполлион, (хўатын писиқ: «На̄фқӣста»).

¹²Сивулиқ сыӷлыпыста̄ҳлъяк алъпахтуқ, та̄м киңуңаның паниның ма̄лӷук сыӷлыпыста̄ҳлъягык пияҳқа̄гук.

Аӷвинлӣтаңа Қалӷиҳталъҳым

¹³Та̄хкын аӷвинлӣтаңита яқулгым қалӷиҳта̄тни қалӷиҳта̄. Нагақуӷақа ма золотагның аҳқыфигыгның стаманың сиӷунылгыгның тыкышқамыгныкун Кияӷныӷым сивуңанилңӯк. ¹⁴Та̄м мым алыҳқуӷа̄ аӷвинлӣтаңат яқулгыт қалӷиҳта̄тылык. Пика̄: «Итымутики стамат яқулгыт асиҳқыңъалӷӣт кӣгўлъягыгни Евфратыгни!» ¹⁵Ынка̄м стамат яқулгыт итымуткӣ. Ята̄ҳқыхка̄фтут та̄мун афлъюмун, аӷныӷмун, танқимун, аюмиқулъыӷмунлъю туқуқӣсқылъюки пиңаюҳқылъҳи югыт. ¹⁶Уңипа̄та̄ңа угляҳталяңитның кӯнитхун иглыҳлъыҳӣт пилъюўаҳтыт, ю̄к қуля миллионыңуфтут. ¹⁷Ысҳаӷўа̄лъымкун ысҳаӷанка кӯнит, иглыӷутистыңитлъю. Сякимагӣтӣт кынӷыстун кавитыфтут, сапфирыстун сюңаӷьюкыхтыфтут, уқумьягыстун, тықуҳсюгнилңуфтут. Кӯнит на̄сқўит левыт на̄сқўистун аюқыфтут, қа̄нӷитның а̄нут кынық, агыпсюқ, уқумьяк. ¹⁸Та̄кутхун пиңаютхун на̄фқӣлъыҳлъяхтыхун туқуқуӷӣт пиңаюҳқылъҳи югыт. Кӯнит қа̄нӷитның а̄нлыӷа̄тут кынық, агыпысюқ, уқумьяк. ¹⁹Кӯнит аҳтуӷьяҳқа̄нӷилъылгӯт қа̄нӷитнилъю, па̄пхитнилъю. Па̄пхит нымыӷьястун аюқылӷӣт на̄сқулгыт кӣтиқусӣт югнун.

²⁰Иляңи тама̄кут югыт туқутылъҳилъкаңит тама̄кут на̄фқӣлъыҳлъягыт, авутыҳқумаңилңӯт пыхсюгумаңилъкаңит кияӷныңлъяқатың. Манигуӷнанӣмаңитӣт туӷныӷа̄т, кияӷныңлъяқатлъю улима̄ӷыт золотамың, серебромың, сӣлюмың, уйӷагмың, унаҳсимыңлъю. Тама̄кут ысҳа̄сяҳқа̄нӷилңӯт, нагақӯсяҳқа̄нӷилңӯт, налиӷмың пиюгьяҳқа̄нӷилңӯт. ²¹Талўа авутыҳқуткумаңилъкаңит юхталъытың, алигнаҳта̄лъытың, ныңуҳтыхпынатың атуқутылъыҳтың, налиӷмың тыглыгнӣлъытың.

Яқулыклъю, Ӣмгатлъю Игаҳа̄т

¹Та̄хкын ысҳаӷақа иляңа аҳтӣгатыҳлъяк яқулык укилӷӣ қилягмың. Пилюгугңафтуқ қилягўа̄ӷмың, на̄сқўан қуляңани аглюк, хина̄ сиқиныҳтун кӯкхулъюни, иӷукыклъю кумаӷулӷӣстун столпыстун аюқлъютык. ²Тугумӣқыфтӣ ӣмгат игаҳа̄т қылъпалңӯт. Аӷынқигныӷық итыгани тӯтыстӣ кылъӣм мыӷан қа̄йңакун, сяӷумигнықлъю итыгани тӯтыстӣ қӯткун. ³Игляхтупихлъюни акилӷӯгуқ левым уўиҳнӣлъҳастун. Акилӷӯҳлъягьян ма̄раӷвинлыгьягыт калъюгыт тыңъа̄хтаҳтут. ⁴Ма̄ӷраӷвинлыгьягыт калъюгыт тыңъа̄хтаӷьята игақнақсяӷанка сямың пилъҳит. Иўырңа нагақуӷақа ма қилягмың пилӷӣ: «Аксяқики ма̄ӷраӷвинлыгьягыт калъюгыт сямың пилъҳит, игақыхпынаки!»

⁵Та̄хкын ысҳаӷақа яқулык ныкывӷалӷӣ кылъӣкунлъю, қӯткунлъю. Қилягмун ныңугутӣ аӷынқигныӷық ӣхыни, ⁶акықӣқ Кияӷныӷым а̄тҳакун кияҳлъыҳӣ қӯнпырухлъяк кынлыңуна̄н. Лъңаңулӷӣ улимаӷикақ қилягамың, нунамың, кылъӣның, сямыңлъю тамаҳа̄ның та̄кунилңуӷның. Яқулык пӣқ: «Пилъыҳқақ ка̄туқ. ⁷Иўырңа ма̄ӷраӷвинлӣтаңита яқулгым қалӷиҳнақыхкумигу қалӷиҳта̄тни, та̄ўа Кияӷныӷым апыӷӣҳлъықа̄ ухпықилъыни қайвиҳсимаңилъкынъи сивунӷани. Ухпықилъҳа ата̄сӣгуқ а̄пқа̄ қыпҳаҳтыминун ӯкналиқистынун».

⁸Та̄хкын нагақуқама мым қилягмың алыҳқуӷля̄таӷа̄ңа: «Агляӷлютын тугуки қылъпалңӯт ӣмгат игат ӣханилңӯт яқулгым ныкывӷалӷӣм кылъӣкунлъю, қӯткунлъю».

⁹Яқулыгмун агляӷлюңа туңсиӷанка имыгңалӷӣт игаҳа̄т. Пӣңа: «Тугулюки ныӷики; ақсяқуҳпыни қуга̄хлъықут иўырңа қаныҳпыни мӯгалъықут мёдыстун».

¹⁰Яқулгым ӣханың тугулюки ӣмгат игаҳа̄т ныӷанка, имани қанымни мӯгатут мёдыстун. Иўырңа тӯфсяқынка ақсяқуқа қуўа̄хта̄.

¹¹Та̄хкын пӣтңа: «Алъямың ӯкналиқуткыпыста̄ӷьяҳқақатын юлӷутыт, нунаталӷутыт, алъя̄ҳӣна̄т улюлӷутыт, умӣлылӷутытлъю».

Ма̄лӷук Уңипаҳтык

¹Та̄хкын китум аявӣлита̄ңа успута̄сиқысқылъюку. Ынка̄м каяхта̄ңа: «Успутаӷьяҳтуҳу Кияӷныӷым Храмыңа, аҳқыфигыклъю, кыснакытынлъю югыт манигӯлъҳӣт таўани. ²Иўырңа успутаҳпына̄н Кияӷныӷым Храмыңан уқҳа ыслъята̄нилңуқ, қаюҳлъяк тӯныхка̄гуқ язычнигнун. Тутма̄сҳақнақңўа̄т Аглыӷналӷӣ Ныҳлъяк югыгмалӷу ма̄лӷук сӣпнықлъюку танқини. ³Уңипаҳтыхка пилюгугңалӷӣк вретищемың, аҳтуӷьяҳқа̄нӷилъылылъықахка ӯкналиқысқылъюкык 1,260 аӷныӷнун».

⁴Ма̄лӷук уңипаҳтык ма̄лӷугӯк маслинам уқфигык, ма̄лӷугӯклъю кынылӷутам тунымакык ныкывӷалӷӣк сивуңани Атанӷан нунам. ⁵Ынка̄м китум алңунак ақниҳнақуткыхкумикык, қа̄нӷыхкының кынӷым а̄нлюни туқуқуҳлъықӣ аңуягит. Китумлъю алңунак ақниҳнақуткыхкумикык та̄ўа туқусяҳқа̄ҳлъықуқ. ⁶Аҳтуӷьяҳқа̄нӷилъылгӯк қиляга ыслъялъюгуӷнанӣсқылъюку ӯкналиқылъҳыхкыгни. Аҳтуӷьяҳқа̄нӷилъылгӯк мыӷыт а̄ўуҳтысқылъюки. Аҳтуӷьяҳқа̄нӷилъылгӯклъю алъя̄ҳӣнаӷның икфиқналӷӣның сыӷлылӣҳлъягның, аўын таўатын пӣқылъықук пиюкылъыӷмыгыстун.

⁷Апыӷӣқуйык уңипаныӷмың, асилиӷныӷилңуӷмың ля̄ўа̄ӷмың а̄нылъықуқ тыӷикусялъю̄к. Пилъюўаҳлъықа̄к ынка̄м кая̄лъқыхкумикык туқулъықа̄к. ⁸Кымыхкўа̄ӷик тама̄нлъықук тӯмңани ныҳлъягым, Атанӷита қақӯраӷвигани. Та̄на ныҳлъяк а̄тқыфтуқ Содомымыңлъю, Египетмыңлъю қаюҳлъяк юги Содомыӷмӣстунлъю, Египетыӷмӣстунлъю аюқылӷӣт. ⁹Югыт нунатаҳа̄ның, рамкының, алъя̄ҳӣнаӷның улюның, нунатаныңлъю тагилъықут ысҳаӷналюкык кымыхкўа̄ӷик. Таўатын пилъықут пиңаюнун аӷныӷнун авылъылиӷлюку, китумунлъю алңунак қуңуҳтыснаниҳлъықахкыт. ¹⁰Та̄кук ӯкналиқистык икфиқыстиҳлъяка̄лӷӣк нунам югитнун. Ынка̄м югыт қуяҳлъяхлъықут, тунқӯлъықутлъю тунусямың илямыхнун, апалъюқлъюку туқулъҳыхкынун. ¹¹Иўырңа киңуңитның пиңают аӷныӷыт авылъылиӷлюку Кияӷныӷым аныӷныни итыҳтыстыка̄ ӯкналиқистыгнун. Ынка̄м ныкывьямык, қамахлъютың тама̄кут ысҳаӷлюкык алиңрӯӷутыҳлъякат. ¹²Та̄хкын ӯкналиқистык нагақуӷа̄к игляхтупихлъыҳӣ ма қилягмың пилӷӣ: «Маюҳтык хўавык!» Аңуягит ысҳапагумалюки маюҳтук қилягмун қиляўа̄ҳқун. ¹³Таўани пилъыӷми қывӯтыпихлъюни нуна уфсюгутыҳлъяхтуқ; қуляҳқылъҳа ныҳлъягым на̄вуқ. Ынка̄м 7,000 ю̄к туқуқуӷа̄ нунам уфсюгутылъыҳлъяган. Тама̄кут югыт яйўа̄сыкат какава̄та̄тыҳлъяглютың усюқӯҳта̄т Кияӷныӷа қилягым.

¹⁴Тӯңлиҳа̄ сыӷлыпыста̄ҳлъягым сыӷлылӣлъҳым алъпахтуқ, иўырңа ысҳаҳтыху пиңая̄ сыӷлыпыста̄ҳлъягым сыӷлылӣлъҳым ка̄сяҳтуңыстаҳтуқ.

Ма̄ӷраӷвинлӣтаңа Қалӷиҳта̄тым

¹⁵Та̄хкын ма̄ӷраӷвинлӣтаңита яқулгым қалӷиҳта̄тни қалӷиҳта̄. Игляхтупихлъютың мыт қилягми пӣт: «Атаныҳпагулъҳа нунам атаныҳпагулъқа̄ҳта̄к Атанымталъю, Христосыңанлъю, ынка̄м Лъңа иглыӷутилъықуқ қӯнпырухлъяк кынлыңуна̄н!» ¹⁶Та̄хкын югинақ стамат сӣпнықлъюку сӣванлъыӷыт ақумгалӷӣт умӣлгуситхун ақумутамыхтыхун Кияӷныӷым сивуңани, хинатың сыкылъюки манигуӷа̄т Кияӷнық. ¹⁷Пика̄т:

«Игамсиқаюгвикамкын,

Атанық Кияӷнық Аҳтуӷьяҳқаҳа̄нӷилңуқ,

кияҳлъыҳӣ ма̄тын, ӣўлыңлъю кияҳлъыҳӣ! Тугума̄н аҳтуӷьяҳқа̄нӷитылъыҳлъягын ынка̄м пӣнлиҳтутын иглыӷутимун.

¹⁸Нунам юги сякшитыҳлъяхтут,

иўырңа ма̄тын сякша̄лъыҳқан ка̄туқ.

Туқукат нанқихсяҳқа̄ҳтут.

Акилыҳтуӷьяҳқа̄ҳтатын қыпҳаҳтытын ӯкналиқистыт,

аглыӷналӷӣт юхтын,

қамахлъюкилъю сӣвакилӷӣт лъпынун,

укаванлыңӯтлъю, апыҳсыӷутлъю.

Туқуқулъыҳқан ка̄туқ тама̄кунун туқуқуқаның югның нунами».

¹⁹Та̄хкын Кияӷныӷым Храмыңа қилягмылңуқ қылъпатыфтуқ. Таўани Храмыңани ысҳаӷахка Ковчегык Кияӷныӷым Заветылӷутакык. Та̄хкын ниӷўа̄хпахтаҳтук, ыфтуҳтаҳтук, тыңъа̄хтаҳтуклъю калъюгык; нуна уфсюгутыҳлъяхтуқ, кафтыкшагуҳтыҳлъяга̄лъю!

Аӷна̄қлъю, Драконылъю

¹Та̄хкын қилягами сяңўа̄ сяӷӣӷанапихлъыҳӣ алӣҳтуқ лӣгикусиҳқаҳпут пияҳқамун: Аӷнақ пилюгуглюни сиқиныӷмың, итыгӣ танқикун ныкыхлъютың, на̄сқумикун қаҳпалюни қуля ма̄лӷук сӣпнықлъюку иӷалықыта̄ӷның. ²Қумилгуфтуқ, иӷниюгым ақниҳқылъюку лъӣӷа̄, а̄нақылъҳан таӷнуҳа̄м араҳқа̄.

³Та̄хкын қилягами сяңўа̄ иляңа сяӷӣӷанапихлъыҳӣ алӣҳтуқ лӣгикусиҳқаҳпут апыӷӣӷнақылӷӣмун: Та̄ўа кавилңуқ драконыҳлъяк, ма̄ӷраӷвинлык на̄сқулык, қуля сиӷунылык, ынка̄м қамахлъютың на̄сқўа қаҳпалгутутыфтут. ⁴Папыгминың сяқипхутӣ нунамун пиңаюҳқылъҳи қилягам иӷалықыта̄ӷи. Та̄хкын дракон ныкывыхкақ мануңакун аӷнам ныӷналюку таӷнуҳа̄ иӷнӣӷыснақагу. ⁵Аӷнақ иӷныңуқ, иглыӷусяҳқӣ қамахтыңъўа̄ӷлюки нунам юги сявикынӷаӷмың анагуталиӷлюни. Иўырңа аӷнам таӷнуҳа̄ акуқаӷлюку агля̄та̄т Кияӷныӷмун, умӣлгусихкынунлъю ақумутагнун. ⁶Аӷнақ қимахтуқ килга̄нун. Тама̄ни Кияӷныӷым ята̄ҳқуткақыхкаңа ныкаҳқамың, афлъыңаксяҳқақыхкаңат 1,260 аӷныӷыт.

⁷Та̄хкын қилягми пилъюгутут. Михаилымлъю яқулъкулъҳӣт пилъюўаӷа̄т дракон. Драконымлъю яқулъкулъҳӣт пилъюўаӷӣт Михаилылъю яқулъкулъҳӣт, ⁸иўырңа Михаилым кая̄лъқа̄ дракон. Ынка̄м дракон яқулъкулъҳӣт қилягмысяҳқа̄наниҳтут. ⁹Қилягмың милю̄та̄т драконыҳлъяк. (Ныӷиҳталюк нымыӷьяқ а̄тҳа Туӷныӷақ, налиӷмың Туӷныӷақ, пӯҳқуҳтыңа нунам юган.) Милю̄та̄т нунамун яқулыхтӯма̄н.

¹⁰Та̄хкын нагақуӷақа ма игляхтулюни қилягмың пилӷӣ:

«Хўа̄ ка̄сима̄т Кияӷныӷым югулиӷилъҳа,

аҳтуӷьяҳқа̄нӷилъҳа, атаныҳпагулъҳалъю,

Христосыңанлъю аҳтуӷьяҳқа̄нӷилъҳа.

Сялин Туӷныӷақ милю̄тылъҳилъюку қилягмың,

аӷныҳтӯма̄н унухтӯма̄н анахутңанӣқӣ ухпықа̄лгутыпут Кияӷныӷмун.

¹¹Ухпықа̄лгутымта кая̄лъқума̄т а̄ўакун Пынъӣӷаҳа̄м,

уңипақылъыӷмыхтыхунлъю Кияӷныӷым ипапиҳқылъҳа.

Талўа туқуяӷңа̄ӷмың аюқут Христос апалъюқлъюку.

¹²Ынка̄м қамахлъюси кияҳлъыҳӣни қилягми, қуятыҳлъяхтык!

Иўырңа сыӷлыӷўа̄ӷунақңӯси нунамылңуӷнилъю, кылъӣнилңуӷнилъю!

Туӷныӷа̄м укигвикумӣси,

сякшитыҳлъягӯқ қаюҳлъяк лӣсимака̄ пилъыҳқӣӷусяҳтуҳтуқ».

¹³Драконым лӣгиксямигу нунамун милю̄тылъыни, малиҳқаӷа̄ аӷнақ иӷныңыхкақ. ¹⁴Иўырңа аӷнақ тӯныхка̄т қаўа̄хпагрухлъягым яқухкының тыңа̄сқылъюку килга̄нун. Тама̄ни пақнӣлъықуқ нымыӷьямың, афлъыңакылъықа̄тлъю пиңают аюмиқулъҳыт, аӷвинлык танқит илялъюки. ¹⁵Та̄хкын нымыӷьям уӷью̄та̄ мық кӣўыстун аюқылӷӣ аӷнақ ма̄қутысқылъюку. ¹⁶Иўырңа нунам каюсӣта̄ аӷнақ. Нунам агитаӷулъюку тӯфта̄ мыҳлъяк драконым уӷью̄тка̄. ¹⁷Та̄хкын драконым угумиягутыҳлъяглюку аӷнақ, ынка̄м пилъюўаӷьяҳтуӷӣ қамахлъюки иляңи киңунӷи. Тама̄куңӯт қа̄ткутңалӷӣт Кияӷныӷым қылӷусӣтнун, ата̄сӣӷмылңӯтлъю ипалъыӷмун апыҳтӯсяқыхка̄нун Иисусым. ¹⁸Та̄хкын дракон ныкывуқ кылъӣм ысна̄кун.

Ма̄лӷук Тыӷикусялъю̄гык

¹Та̄хкын ысҳаӷақа тыӷикусялъю̄к а̄нылӷӣ кылъӣмың. Қуляңуфтут сиӷунӷи, ма̄ӷраӷвинлык на̄сқулык. Қамахлъютың сиӷунӷи қаҳпалгутутыфтут, тамаҳаӷмың на̄сқут игақуӷвикңафтут атыӷмың сыӷлықӯлӷӣмың Кияӷныӷмун. ²Та̄на тыӷикусялъю̄к барсысюгнитуқ, итыгӣ кайңым итыга̄тун аюқылӷӣт, қа̄нӷа левым қа̄нӷатун аюқылӷӣ. Драконым тӯна̄ тыӷикусялъю̄к аҳтуӷьяҳқа̄нӷилъыӷминың, умӣлгусигминың ақумутагның, иглыӷутияҳқа̄ҳтыста̄лъю атыни атуқлъюку. ³Ата̄сиқ на̄сқўа тыӷикусялъю̄гым туқутысюгниткақ кӣтиӷлюни, иўырңа та̄на кӣялъҳа ма̄мыхка̄фтуқ. Ӣңунаҳаӷмың нунам югита сяӷӣӷаягулъюку малихта̄т тыӷикусялъю̄к. ⁴Қамахлъютың югыт манигуӷа̄т дракон қаюҳлъяк тыӷикусялъю̄гмун тӯныхкаңа аҳтуӷьяҳқа̄нӷилъыни. Манигуӷа̄тлъю тыӷикусялъю̄к, пӣт: «Кинаңам тыӷикусялъю̄хтун аюқа̄? Китумңам пилъюўаҳлъықагу?»

⁵Та̄хкын тыӷикусялъю̄к акузияҳқа̄ҳтуқ. А̄ңа̄юхтыҳлъяхтуқ, сыӷлыпыста̄тунлъю акузитка̄ Кияӷнық. Аҳтуӷьяҳқа̄нӷилъыңуқ иглыӷутияҳқа̄люни югымалӷу ма̄лӷук сипнықлъюкугнун танқинун. ⁶Пӣнлиӷа̄ сыӷлыпыста̄тун акузиткилъыни Кияӷныӷмун, а̄тҳаның, кияҳфигануң, тама̄куныңлъю кияҳлъыҳӣнун қилягми. ⁷Аҳтуӷьяҳқа̄нӷилъылита̄ пилъюўӣсқылъюки Кияӷныӷым юги, кая̄лъқысқылъюкилъю. Иглыӷусяҳқа̄ҳтыстӣ қамахлъюки рамкыт, югыт, улют, нуната̄нилңӯтлъю югыт. ⁸Қамахлъюни нунами кияҳлъыҳӣм манигуҳлъықа̄т тыӷикусялъю̄к. Иўырңа тама̄кут а̄тҳит игақңалӷӣт Игӣтхун Уңувалъҳым манигуӷна̄нӷита̄т. Кияӷныӷым игақыхкақӣ а̄тҳит нунаңлъялъҳилъюни. Та̄кут игат пикӣ Пынъӣӷаҳа̄м, югыт туқуткӣта.

⁹Нагатык, сигутылгукуфси:

¹⁰«Кина алңунак тугуяҳқа̄куми, тугулъықа̄т.

Кина алңунак туқусяҳқа̄куми сявихпахкун, туқулъықа̄т сявихпахкун.

Та̄кук хўатын писӣгуқ: Кияӷныӷым юги нуқынъыҳтуяҳқа̄гутлъю, ухпықилъылгуяҳқа̄гутлъю».

¹¹Та̄хкын ысҳаӷақа иляңа тыӷикусялъю̄к нунамың а̄нылӷӣ. Ма̄лӷугыгның сиӷунылгуфтуқ Пынъӣӷаҳа̄м сиӷунӷатун, акузӣқлъю драконытун. ¹²Сивулиқ тыӷикусялъю̄к таўанлъюку тӯңлиҳа̄н тыӷикусялъю̄гым атуқа̄ қамахлъюку аҳтуӷьяҳқа̄нӷилъҳа. Та̄хун аҳтуӷьяҳқа̄нӷилъыҳқун манигӯтыстӣ қамахлъюки нунам юги сивулиӷмун тыӷикусялъю̄гмун. (Кӣңан туқутысюгнитка̄, иўырңа кӣялъҳа ма̄мыхкақ.) ¹³Тӯңлиҳа̄ тыӷикусялъю̄к алъя̄ҳлъюхўаҳтиҳлъяга̄таҳтуқ, талўа қилягмың нунамун кынық укихтыста̄ югыт ысҳапагит. ¹⁴Тӯңлиҳа̄ тыӷикусялъю̄к аҳтуӷьяҳқа̄нӷилъыңуқ алъя̄ҳлъюўаҳтияҳқа̄люни таўантылъҳани сивулӣм тыӷикусялъю̄гым. Тама̄гун алъя̄ҳлъюхўаҳтилъыҳтыхун пӯҳтӣ қамахлъюки югыт кияҳлъыҳӣт нунами. Қылӷӣ югыт наңаӷныңлъӣсқылъюки қӯлвӣсқылъюку сивулиқ тыӷикусялъю̄к. (Та̄на туқутка̄ялӷӣ сявихпахкун иўырңа уңувақақ.) ¹⁵Тӯңлиҳа̄ тыӷикусялъю̄к аҳтуӷьяҳқа̄нӷилъыңуқ аныӷныңыстияҳқа̄люни уңувалъыӷмың наңаӷныӷанун тыӷикусялъю̄гым. Ынка̄м наңаӷнық акузияқлъыгуҳтуқ. Та̄хкын наңаӷныӷым қылӷӣ югыт туқуқӣсқылъюки тама̄кут манигӯсюнӷилңӯт лъңанун. ¹⁶Тӯңлиҳа̄н тыӷикусялъю̄гым налъюнӣҳтӣсқӣ числомың қамахлъюки югыт аӷынқигныӷитхун ӣхитхун налиӷмың қаўӣтхун. Таўатын қылӷӣ а̄ңўа̄ӷуӷңа̄та, укавансяӷңа̄та, аклъюңитыӷңа̄та, аклъюмаӷңа̄та, қыпҳаҳтыля̄ӷунӷитыӷңа̄та, қыпҳаҳтыля̄ӷуӷңа̄та. ¹⁷Кина алңунак тукфиӷияҳқа̄нӷитуқ налиӷмың акикияҳқа̄нӷитуқ ўыткуқун налъюнӣлъылгукуми. Та̄на налъюнӣлъкутақ тыӷикусялъю̄гым а̄тқа̄ налиӷмың а̄тҳан числока̄.

¹⁸Пыҳқинылъылгым лӣгикна̄ӷа̄ уна. Сюмыҳтаӷалъыӷмикун лӣгикылъықа̄ сямың писӣтаңа тыӷикусялъю̄гым числоңа. Та̄на число югмун а̄тҳӯқ, 666ңӯқ.

Пынъӣӷаҳақлъю, 144,000ытлъю Югыт

¹Та̄хкын ысҳаӷақа та̄ўа Пынъӣӷаҳақ ныкывӷалӷӣ На̄йӷами Сионым. Лъңанитутыфтут 144,000 югыт, қагумыхтыхун игақфикыхкат а̄тҳаның, Атаңанлъю а̄тҳаның. ²Нагақуӷақалъю ма қилягмың. Нагатка̄люни лъяңақа қалъяңатун мыҳлъягыт, тыңъа̄гатунлъю калъюгым. Нагаткақа ма лъяңақа гуслистыт айңанаңалъҳӣстун гуслитхун аюқылӷӣ. ³144,000 югыт ныкывӷатңуфтут сивуңани умӣлгусим ақумутам, стаматлъю уңувалӷӣт, утфатлъю. Та̄кут югыт илягаӷақыфтут иляга̄тыӷраӷаӷмың. Китум алңунак та̄на иляга̄н лӣсяҳқақынӷилъкаңа иўырңақун 144,000 югыт. Лъңаңут Кияӷныӷым югуликӣ қуңаңитның нунам юганың. ⁴Та̄кут югыт нукыхнаҳқумаңилңӯгут аӷнамың атуқилъыҳқун. Малихтақа̄т Пынъӣӷаҳақ навык алңунак пинӷани. Кияӷныӷым югуликақӣ акулңитның нунам юган, тунусяқсюхўа̄ӷӯт Кияӷныӷмунлъю, Пынъӣӷаҳаӷмунлъю. ⁵Иқлъыңиқигатңўа̄ҳтут. Апалъӣтут.

Пиңают Яқулгыт

⁶Та̄хкын ысҳаӷақа иляңа яқулык тыңа̄лӷӣ қӯлваҳпани. А̄пҳӣ кынлыңилңӯт Пинилӷӣт Уңипат нунами кияҳлъыҳӣнун, тамаҳӣтнун нуната̄нилңуӷнун югнун, рамкынун, улюнун, югнунлъю. ⁷Игляхтупихлъюни пӣқ: «Аликитыху Кияӷнық, усюқитыху а̄ңылъыҳлъяга! Югның нанқихтилъыҳқа̄ ка̄тӯқ. Манигуҳтыху улимаӷикақ қилягамың, нунамың, кылъӣның, сыңъулӷӣныңлъю мыӷның!»

⁸Тӯңлиҳа̄н яқулгым малихта̄ сивулиқ, хўатын пимаӷми: «На̄вума̄қ! Вавилоныҳлъяк на̄вума̄қ! Вавилоным атуқилъҳа блудамың винотун аюқуқ. Виноминың мыӷысқуӷӣ қамахлъюки нунам юги, ынка̄м лъңиталъю блуд атуқсягута̄т. Ынка̄м таўатын пилъыӷмыхтыхун Кияӷныӷмун аӷью̄ҳтыслъықут».

⁹Пиңая̄к яқулгым малигутуқ сивулӣгнун. Игляхтупихлъюни пӣқ: «Китум алңунак манигуқумигу тыӷикусялъю̄к, наңаӷныӷалъю, алъхыҳсимакумигулъю налъюнӣлъық қагумикун налиӷмың ӣхмикун ¹⁰мыӷьяҳқақа̄ виноңа Кияӷныӷым сякша̄лъҳан. Та̄на вино мылӣмаңилңуқ кӯвыхкақ қаю̄симун Кияӷныӷым сякша̄лъқа̄! Кина алңунак манигӯткақ та̄кугнун икфиқыҳлъягьяҳқа̄гуқ кыныӷмилъю, уқумьягмилъю, сивуңитни аглыӷналӷӣтни яқулгыт, Пынъӣӷаҳа̄млъю. ¹¹Кынӷым икфиқыстыҳлъяхлъықӣ, агыпся̄ маюҳлъықуқ қӯнпырухлъяк кынлыңуна̄н. Икфиқнаниӷна̄нӷитут аӷныҳтӯма̄н унухтӯма̄н, манигӯтка̄тмыхның тыӷикусялъю̄гмун, наңаӷныӷанун, налъюнӣқа̄тмыхныңлъю а̄тҳаның».

¹²Тама̄кут қамахлъютың хўатын писӣгут, Кияӷныӷым юги нуқынъыҳтупыста̄ӷьяҳқа̄гут. Тама̄куңӯт қа̄ткутңалӷӣт Кияӷныӷым қылӷуся̄нун, ата̄сӣӷмылъютыңлъю Иисусымун.

¹³Та̄хкын нагақуӷақа қилягмың ма пилӷӣ: «Игақигу уна: Хўакын кынлыклъюку қуясяҳқа̄гут туқуяҳқат қыпҳа̄сималюку Атанық!»

Таӷныӷак пӣк: «Қуянапыста̄ҳтут! Мыӷна̄лилъықут уӷлыӷӣлъыӷмыхның, югыт нықамикылъықӣт аныӷныҳқилъҳит».

Нунамың Унаталъық

¹⁴Та̄хкын ысҳаӷақа та̄ўа қатылӷӣ қиляўа̄қ, қиляўаҳқун ақумгафтуқ лъяңақа иӷныӷа югым. На̄сқумикун золотамың қаҳпалгуфтуқ, тугумӣқыфта̄лъю ипылӷӣ пакшыгмылңуқ сявик. ¹⁵Та̄хкын иляңа яқулык а̄нуқ Храмымың. Акилӷӯҳлъяга̄ ақумгалӷӣ қилягўа̄ӷми: «Пакшыгмылңуқ сявигын атуқлъюку уната̄, қаюҳлъяк унаталъыҳқақ ка̄туқ, нунам пӣтыстыка̄ унатаӷьяҳқа̄ҳтыңъӯқ!» ¹⁶Ынка̄м қиляўа̄ӷми ақумгалӷӣм пакшыгмылңуқ сявини уната̄сиқа̄ нунамун.

¹⁷Та̄хкын иляңа яқулык а̄нуқ Храмымың қилягми, лъңалъю ипылӷӣмың пакшыгмылңуӷмың сявилгуфтуқ.

¹⁸Та̄хкын иляңа яқулык а̄нуқ аҳқыфигыгның афлъыңакистыңа кынӷан аҳқыфигым. Акилӷӯҳлъяга̄ яқулык ипылӷӣмың пакшыгмылңуӷмың сявилык: «Сявихпының кыпуҳқи виноградыт нунам лозаңаның, қаюҳлъяк виноградыт қигума̄т!» ¹⁹Ынка̄м ягулгым пакшыгмылңуқ сявини сяқипхута̄ нунамун, кыпуӷӣ виноградыт нунам лозаңаның. Та̄хкын милюқутақӣ виноградым қагыҳқӯсиҳлъяганун. Та̄наңӯқ Кияӷныӷым сякшитфихлъяга. ²⁰Виноградымун қагыҳқӯсик ыслъята̄нилңӯк ныҳлъягым. Виноградыт қагыҳқуӷьялӷӣмың а̄ўк ма̄қуқ қагыҳқӯсиның 300 километр тахталъкылъюку, 1,5 метра ӯсқаҳтулъкылъюку.

Моисейемлъю, Пынъӣӷаҳа̄млъю Иляга̄тңат

¹Та̄хкын қилягами алӣҳтуқ сяңўа̄ сяӷӣӷанапихлъыҳӣ лӣсимакусиҳқаҳпут пияҳқамун. Та̄ўа ма̄ӷраӷвинлык яқулгыт, тагитилӷӣт ма̄ӷраӷвинлыгның сыӷлылӣлъыҳлъягның. Та̄кут сыӷлылӣлъыҳлъягыт та̄қнӣткыфтӣ Кияӷныӷым сякша̄лъыҳлъяган.

²Та̄хкын ысҳаӷақа кылъӣсюгнилңуқ мыӷра̄кыхтақ сиқинўа̄ӷыстун, акумңалӷӣ кыныӷмың. Ысҳаӷанкалъю кая̄лъқӣкат тыӷикусялъю̄гмың, наңаӷныӷаның, а̄тҳанлъю числоңаның. Ныкывӷатңуфтут ся̄ӷўаӷни кылъӣм, гуслилиҳтӯлъютың Кияӷныӷым тӯныхкӣтның лъңитнун. ³Илягаӷақыфтут иляга̄таңаның Моисейем, (Кияӷныӷым қыпҳаҳтыңа), иляга̄таңаныңлъю Пынъӣӷаҳа̄м:

«Ка̄й, Атанық Кияӷнық Аҳтуӷьяҳқаҳа̄нӷитыҳлъяк,

қыпҳалъыҳтын сыӷлыҳлъягӯт, алъя̄ҳлъюхўаҳлъягӯт!

Ка̄й, умӣлгат нунам югита,

лъпык сялъыҳтын ылъқуӷутңа̄тлъю, ипаңӯтлъю!

⁴Атанық, қамахтыңъўа̄ӷлютың югыт аликылъықа̄тын,

қӯлваҳлъықа̄тлъю а̄тҳын!

Лъңина̄гутын аглыӷналӷӣ!

Қамахтыңъўа̄ӷлютың нунатат манигуӷьяҳтуҳлъықа̄тын,

қаюҳлъяк лӣсимакыхкаңат нанқихтилъыҳтын ылъқуӷутңалӷӣт!»

Киңулӣт Ма̄ӷраӷвинлык Сыӷлылӣлъыҳлъягыт

⁵Та̄м киңуңаның ысҳаӷақа қилягми қылъпыҳтыкаңат Храм. (Аглыӷналъыҳпига̄гуқ На, лъңан югита лӣсимакусиқа̄т Кияӷнық таўанъилюку.) ⁶Та̄хкын ма̄ӷраӷвинлык яқулгыт а̄нлыӷа̄тут Храмымың кылъқылъютың ма̄ӷраӷвинлыгның сыӷлылӣлъыҳлъягның. Тамаҳаӷмың аткуя̄ӷулъютың қатыӷракыхтамың ниӷулӷӣмың, сякимагмыхтыхун золотамың тафсилютың. ⁷Та̄хкын ата̄сим уңувалӷӣм стаманың та̄куның, золотамың сягнылиқуӷӣ ма̄ӷраӷвинлык яқулгыт. Та̄кут сягныӷыт имиӷңа̄т сякша̄лъыҳлъя̄ганың Кияӷныӷым, кияҳлъыҳӣ қӯнпырухлъяк кынлыңуна̄н. ⁸Храмым илюңа агыпсюҳқа̄га̄ Кияӷныӷым ниӷуҳқылъҳаныңлъю, аҳтуӷьяҳқа̄нӷилъҳаныңлъю. Кина алңунак итыӷна̄нӷитуқ Храмымун кынляңа ма̄ӷраӷвинлык сыӷлылӣлъыҳлъягыт кынлытҳӯтылъҳитнун, тагиткӣт ма̄ӷраӷвинлык яқулгыт.

Сягныӷыт Имақылӷӣт Кияӷныӷым Сякшитылъыҳлъяганың

¹Та̄хкын Храмымың нагақуӷақа игляхтулӷӣ ма, уңипа̄скаңи ма̄ӷраӷвинлык яқулгыт: «Кӯвьяҳтуҳтыки нунамун ма̄ӷраӷвинлык сягныӷыт Кияӷныӷым сякша̄лъыҳлъяги!»

²Ынка̄м сивулӣм яқулгым сягныни кӯвьяҳтуӷа̄ нунамун. Та̄хкын сыӷлыпыста̄ҳлъягыт ақниӷнапихлъыҳӣт пупигыт пӣтқӯтут налъюнӣлъыңыхканун тыӷикусялъю̄гмың. Тама̄куңӯт манигӯткат наңаӷныӷанун.

³Тӯңлиҳа̄н яқулгым сягныни кӯва̄ кылъӣнун. Та̄хкын кылъӣ а̄ўатун туқукам югым лъӣӷлюни, ынка̄м қамахлъютың уңувалӷӣт кылъӣни туқуляӷа̄тут.

⁴Пиңайӣтаңита яқулгым сягныни кӯва̄ кӣгўнунлъю, сыңъунунлъю мыӷнун ынка̄м а̄ўуҳқӯтут. ⁵Нагақуӷақа иглыӷутилӷӣ мыӷның яқулык пилӷӣ:

«Ка̄й, Аглыӷналӷӣ Кияӷнық,

лъпыңӯқ ма̄тын кияҳлъыҳӣ,

лъпыңӯқ қӯнпың кияҳлъыҳӣ!

Нанқихтилъыҳтынлъю, аӷью̄ӷилъыҳтынлъю ылъқуӷутңа̄т.

⁶Югыт туқуқуқақӣт юхтын, ӯкналиқистытынлъю,

ынка̄м мыӷьяҳқалитатын а̄ўмың.

Таўатын аӷью̄ӷьяҳқа̄лютың лъмыхның алъхыҳтыкақа̄т!»

⁷Та̄хкын нагақуӷақа аҳқыфигыгның ма пилӷӣ:

«А̄а Атанық, Кияӷнық Аҳтуӷьяҳқа̄нӷилңуқ!

Ипаңӯтлъю, ылъқуӷутңа̄тлъю нанқихтилъыҳқаҳтын!»

⁸Ыстамӣтаңита яқулгым сяӷныни кӯва̄ сиқиныҳқун ынка̄м Кияӷныӷым сиқинӷым кынӷанун паныҳтыстӣ югыт. ⁹Сиқинӷым угуқнаҳлъяган паныҳтыстӣ югыт. Ынка̄м сяңӯҳтыҳлъяга̄т а̄тҳа Кияӷныӷым, иглыӷутистыңутаңаның тама̄вык сыӷлылӣлъыҳлъягнун. Авутыҳқынӷитутлъю, усюқынӷита̄тлъю Кияӷныӷым а̄ңылъыҳлъяга.

¹⁰Талъимӣтаңита яқулгым сягныни кӯва̄ тыӷикусялъю̄гым умӣлгусӣн ақумутахкынкун, ынка̄м атаныҳпагулъҳа мамлыҳқўа̄га̄. Югыт икфиқым улютың амқыҳқуӷӣт. ¹¹Сяңӯҳтыҳлъяга̄т Кияӷныӷа қилягым апалъюқлъюку ақниҳқылъыӷмыхныңлъю, пупихта̄лъыӷмыхныңлъю. Авутыҳқынӷитутлъю сыӷлытун пилъыӷмыхның.

¹²Аӷвинлӣтаңита яқулгым сягныни кӯва̄ кӣўлъягыгнун Евфратыгнун. Кӣўык патыҳтук ята̄ҳқунъалюки тӯмкаҳқамың умӣлгыт тагилӷӣт асиваӷмың. ¹³Та̄хкын ысҳаӷанка пиңают нукыхналӷӣт туӷныӷа̄т ўамынгусюгнилңӯт. А̄нут қа̄нӷитның драконым, тыӷикусялъю̄гым, ӯкналиқистысиӷўа̄ӷымлъю. ¹⁴Та̄кут туӷныӷа̄т алъя̄ҳлъюхўаҳтикаюгуфтут. Аӷуляқут умӣлгитнун нунатаҳа̄н тамаҳа̄н қырңуҳналюки пилъюўамун аӷныҳлъягани Кияӷныӷым Аҳтуӷьяҳқаҳа̄нӷилңӯм.

¹⁵Атанық пӣқ: «Нагатаҳтык! Тагиңӯңа тыглыгнӣҳтытун! Қуянаҳтуқ тыҳумалӷӣ, а̄ткани пӣфтыңъўа̄ӷлюки аюқыхкаңи. Ынка̄м иглыҳна̄нӷитуқ амсикаӷми, кайңусяӷа̄нъа̄нӷитуқлъю тысқагани югыт ысҳақумыхтыху!»

¹⁶Та̄хкын туӷныӷа̄т қырңуҳтӣт умӣлгыт Армагеддонымун. Таўатын Еврейлъимистун атилъҳа аюқуқ.

¹⁷Та̄хкын ма̄ӷраӷвинлӣтаңита яқулгым сягныни кӯва̄ ыслъямун. Храмыми умӣлгусигның ақумутаҳлъягыгның игляхтупихлъюни ма пӣқ: «Апыӷӣҳтуқ!» ¹⁸Та̄ўа ниӷўа̄хпахтаҳтуқ, тыңъа̄хтаҳтуқ, калъитуқ, нуналъю уфсюгутыҳлъяхтуқ. Та̄на нунам уфсюгутылъыҳлъяга сыӷлылъыҳпига̄гуқ Кияӷныӷым юңлъяӷьюхалъҳаның. ¹⁹Ныҳлъяк пылъыҳтуқ пиңаюҳқылъюни. Нунатлъю ныҳлъягит қамахтыңъўа̄ӷлютың на̄вӯтут. Кияӷныӷым нықамикӣ Вавилоныҳлъягым сыӷлыҳқылъҳи. Ынка̄м мыӷыста̄ вино қаю̄симылңуқ сякшитылъыҳлъягминың имақылӷӣ. ²⁰Қамахлъютың қӣҳқат авӣӷуқӯтут, қамахлъютыңлъю на̄йӷат ка̄вӯтут. ²¹Кафтыкшагрухлъягыт ю̄к талъимат уқихтуткавзилӷӣт қилягамың ифкақӯтут югнун. Ынка̄м тама̄кут югыт сяңӯҳтыҳлъяга̄т Кияӷнық апалъюқлъюки кафтыкшагрухлъягыт. Та̄на сыӷлылӣлъыҳлъяк сыӷлыпигулӷӣ.

Аӷнақлъю, Тыӷикусялъю̄клъю

¹Та̄хкын яқулгыт ма̄ӷраӷвинлыгның сягнылгыт, та̄куның ата̄сим такулюңа пӣңа: «Таги, кылгувикнақамкын аӷью̄лъыҳқа̄ның апыҳсыӷӯм аӷнам югусиминың акикикаюгым, ақумгалӷӣ мыҳлъяхтыхун. ²Нунам умӣлги сыӷлыҳқақут атуқақлъюку аӷнақ. Сыӷлыӷыт атуқистилъҳи винотун аюқут, ынка̄м нунам юги сю̄мақут мыныӷмыхтыху виноңа».

³Та̄хкын яқулгым Таӷныӷагныкун агля̄та̄ңа килга̄нун. Таўани ысҳаӷақа аӷнақ ақумгалӷӣ кавишакыхтакун тыӷикусялъю̄хкун. Тыӷикусялъю̄к игақуӷвикңафтуқ узимун сяңӯҳтусиның атыӷның Кияӷныӷмун. Ма̄ӷраӷвинлык на̄сқулгуфтуқ, қӯлңуфтутлъю сиӷунӷи. ⁴Аӷнақ пилюгугңафтуқ ысныя̄ӷмыңлъю, кавишакыхтамыңлъю, ынка̄м улъңақлъюни золотамың, акитуҳлъягмың уйӷагмың, жемчугымыңлъю. Тугумӣқыфта̄ золото қаю̄сиқ ыслъықңалӷӣ сыӷлыӷналӷӣның кияҳта̄лъыӷның, нукыхналӷӣныңлъю блудылъӷаның. ⁵Қаўа̄ни игақңафтуқ атық қайвиҳсимаңилңуқ хўатын писиқ:

Апыҳсыӷуқ Вавилон,

на̄ка̄т югусимыхның акикикаюгыт аӷнат,

сыӷлыӷналъҳаныңлъю нунам.

⁶Ысҳаӷақа аӷнақ сю̄мылӷӣ а̄ўитның Кияӷныӷым югита, а̄ўитныңлъю туқуқуқат қаюҳлъяк ата̄сӣӷмылңӯт Иисусымун.

Ысҳаӷлюку аӷнақ сяӷӣӷаюхлъяхтуңа. ⁷Иўырңа яқулгым пӣңа: «Сяңавык сяӷӣӷаюхсин? Уңипа̄нъақамкын қайвиҳсимаңилңуӷмың сямың писӣткык аӷна̄млъю, тыӷикусялъю̄гылъю. Та̄на тыӷикусялъю̄к иглыӷутилӷӣ аӷнамың, на̄сқулгӯқ ма̄ӷраӷвинлык, сиӷунылгӯқлъю қуля. ⁸Тыӷикусялъю̄к ысҳақан уңуваялӷӣңӯқ, Иўырңа туқука̄гуқ. Маюҳлъықуқ Ся̄мнаңилңуӷмың Ля̄гўа̄ӷмың на̄фқылъыңналюни. Юлгӯқ нунами а̄тҳит игақылъҳилңӯт Игӣтхун Уңувалъҳым нуна пӣнлилъҳилъюку. Тама̄кут югыт ысҳақумыхтыху тыӷикусялъю̄к сяӷӣӷаюхлъықут қаюҳлъяк уңуваялӷӣ, туқукақ иўырңа тагияҳқақ.

⁹Сюмыҳтаӷаюқам лӣгикылъықа̄ уна: Ма̄ӷраӷвинлык на̄сқут ма̄ӷраӷвинлыгӯт қымит аӷнам ақумгавиги. ¹⁰Та̄кут на̄сқут ма̄ӷраӷвинлыгӯтлъю умӣлгыт. Талъимат туқука̄гут, ата̄сиқ иглыӷутиңӯқ, ынка̄м ата̄сиқ сялин тагиңигатуқ. Тагикуми иглыӷутияҳқа̄гуқ натыңӣҳақ. ¹¹Тыӷикусялъю̄к уңуваялӷӣ иўырңа туқукақ, пиңаюның иңлюлӣтңӯқ умӣлык. Та̄на пиңаюның иңлюлӣта умӣлык иляка̄т сивулӣт ма̄ӷраӷвинлык умӣлгыт, на̄фқылъыңьяҳтӯгуқ.

¹²Ысҳақаҳтын қуля сиӷунӷыт, қуляңӯт умӣлгыт сялин иглыӷутиңигатут. Иўырңа аҳтуӷьяҳқа̄нӷилъыңылъықут иглыӷутияҳқа̄лютың ата̄сиқ афлъю малигулъютың тыӷикусялъю̄гмун. ¹³Та̄кут ата̄сиқ умьюгақлъюку тӯнылъықӣт тыӷикусялъю̄гмун аҳтуӷьяҳқа̄нӷилъытыңлъю, пилъыҳқатыңлъю. ¹⁴Ынка̄м пилъюўаҳлъықа̄т Пынъӣӷаҳақ. Иўырңа Пынъӣӷаҳа̄м кая̄лъқылъықӣ қаюҳлъяк Атанқыхкаңат атанӷыт, Умӣлъкыхкаңатлъю умӣлгыт. Пынъӣӷаӷаӷмылңӯт туқлъюқа̄гут, накмикыхка̄гут, ата̄сӣӷмылңӯгутлъю».

¹⁵Та̄хкын яқулгым пӣңа: «Ысҳаӷатын мыӷыт аӷнам югусиминың акикикаюгым ақумгавиги. Та̄кут мыӷыт юлӷутыҳлъягӯт нунатаҳа̄ның тамаҳа̄ның пиңӯт, улюкылӷӣт алъя̄ҳӣнаӷмың. ¹⁶Ысҳақаҳпык қуля сиӷунӷыт, тыӷикусялъю̄гымлъю, угумӣлъықа̄т аӷнақ югусиминың акикикаюк. Сяқшахӣӷулъюку, амсиқаҳқылъюку, кымга ныӷлюку, та̄хкын сӣпныӷа кумаҳлъықа̄т. ¹⁷Та̄кут қуля сиӷунӷыт таўатын пика̄гут қаюҳлъяк Кияӷныӷым лъңитнун атуқыстыкақа̄ пиюкылъыни. Аңыҳқуматка̄гутлъю тӯналюки атаныҳпагулъытың тыӷикусялъю̄гмун. Таўатын пика̄гут кынляңа Кияӷныӷым пиюкылъҳа апыӷӣлъҳанун. ¹⁸Та̄на аӷнақ ысҳақан ныҳлъягӯқ иглыӷутилӷӣ умӣлгитның нунат».

Вавилоным На̄фқылъҳа

¹Та̄м киңуңаның ысҳаӷақа иляңа яқулык қилягмың укилӷӣ. Аҳтуӷьяҳқа̄нӷилъылыхлъягуфтуқ, ниӷуҳқылъыӷминың ӣңунаҳа̄н нуна ниӷухта̄. ²Акилӷӯҳлъяхтуқ:

«На̄вума̄қ! На̄вума̄қ Вавилоныҳлъяк!

Ныка̄ҳсима̄т туӷныӷа̄т,

нукыхналӷӣт туӷныӷа̄т,

укмаңинъыӷилңӯт кусхыналӷӣт қаўа̄гыт.

³Вавилоным атуқилъҳа блудамың винотун аюқуқ,

нунатаҳа̄н тамаҳа̄н мыӷа̄.

Нунам умӣлгита атуқақа̄т,

нунамлъю акилъпыгаҳтыңита аклъюңиӷисиқңўа̄т нуқытусяҳқа̄нӷилңуҳқун блудам атуқиюлъҳакун».

⁴Та̄хкын нагақуӷақа иляңа ма қилягмың пилӷӣ:

«Юмни, а̄нлыӷа̄тык Вавилонымың!

Илятыхпынаси сыӷлыҳқылъҳанун аӷью̄лъыңнаюкафси лъңанун малигулъюси.

⁵Сыӷлыҳқылъҳи маюҳтыҳлъягңа̄т ӯсқаҳтуткаӷмың қиляхтун,

Кияӷныӷым нықамикӣ сыӷлыҳқылъҳи.

⁶Сыӷлытун пикатыху Вавилон катам лъңан сыӷлытун пилъҳатун.

Малӷуҳқылъюку сыӷлытун пилъҳа пикатыху.

Қаю̄сӣкун кӯвитыху вино икнақытулңа малӷуҳқыңъа̄н лъңан атуқақылъҳастун.

⁷Лъминың усюқыҳлъягақуқ,

аклъюңиҳлъянилъю атуқақа̄ сямун алңунак пиюкыхкаминун.

Ынка̄м икфиқыстыҳлъяхтыхулъю, қивӷустыҳлъяхтыхулъю атуныкӣтыслъюку қаӷьялъыҳлъяганун.

Лъминың пӣқуқ:

“Царицаңӯңа ақумгалӷӣ умӣлгусимкун.

Угиңиӷа̄нӷитуңа ынка̄м қивӷуна̄нӷитңўа̄ҳтуңа!”

⁸Тама̄кын апалъюқлъюку аӷныҳӣнаӷми ка̄лъықа̄ туқулъҳым,

қивӷулъҳым, нықаңисяхлъягым.

Та̄хкын кынӷым паныҳлъықа̄ қаюҳлъяк аӷью̄ӷистыңа,

Атанық Кияӷнық, аҳтуӷьяҳқа̄нӷитыҳлъяхтуқ».

⁹Нунам умӣлги иляткат атуқилъҳанунлъю, қилӣӷьюлъҳанунлъю, ысҳақумыхтыху агыпся̄ панылъҳан қиякылъықа̄т, игляхтупихлъютыңлъю қиякыҳлъяхлъықа̄т. ¹⁰Уяванлъютың ныкывылъықут қаюҳлъяк алиңылӷӣт лъмыңлъю илянъаюкамың икфиқылъҳанун. Пилъықут:

«Сыӷлыҳаӷмың! Сыӷлыҳаӷмың лъпык а̄ңыҳлъяк аҳтӣгалңуқ ныҳлъяк, Вавилон!

Аӷью̄лъыңутын ата̄сиҳаӷми афлъюми!»

¹¹Нунам акилъпыгаҳтыңита қия̄ӷўа̄тка̄т қивӷуҳлъягумаӷмың, қаюҳлъяк китум алңунак тукфиӷнаниқаңит сяӷьяңит. ¹²Вавилоными акилъпыгаҳтыт акикақсяқаңит золотат, сереброят, акитуҳлъягыт уйӷагыт, жемчугытлъю; акикақсяқаңитлъю қӣпаӷаҳқат улима̄ӷыт виссонымың, шелкымың, қӣпаӷаҳқатлъю иқыҳтақылӷӣт ысныгья̄ӷыт, кавишакыхтатлъю. Акикақсяқаңитлъю тыпкыхтыпихлъыҳӣт унаҳсит, улима̄ӷыт на̄ңқуның, акитуҳлъягның унаҳсиның, сӣлюның, сявикынӷа̄гның, мраморыныңлъю. ¹³Акикақсяқаңитлъю корицат, благовоният, фимиамыт, смирнат, ладанат; винот, маслинам мысӣӷи; авляўат, пшеницат; скотыт, пынъӣӷыт, кӯнит, колесницат; талўа югыт акикақсяқаңит қыпҳаҳтыля̄ӷулюки. ¹⁴Акилъпыгаҳтыт Вавилон пилъықа̄т:

«Қамахлъютың пинилӷӣт алъхыҳсюкыҳлъякаҳтын авӣӷутут.

Қамахлъютыңлъю аклъюңиҳлъяхтын қылмыҳлъягыт авӣӷутут,

алъямыңлъю алъхыҳсяҳқа̄наниӷатын!»

¹⁵Акилъпыгаҳтыт аклъюңиӷикат акикилютың Вавилоными, ныкывӷалъықут уяванлъютың қаюҳлъяк алиңылӷӣт илянъаюкамың икфиқылъҳанун. Қиялъықут қивӷуҳлъягумаӷмың, ¹⁶хўатынлъю пилъықут:

«“Сыӷлыӷўа̄ӷӯқ! Сыӷлыӷўа̄ӷӯқ ныҳлъяк!

А̄ткаюгуяҳтуқ виссонымың, ысныя̄ӷмың,

кавишакыхтамыңлъю, улъңақыхкаюгуяҳтуқлъю золотамың,

акитуҳлъягмың уйӷагмың, жемчугымыңлъю!

¹⁷Ата̄сими афлъюми аклъюңиҳлъягӣта̄!”

Қамахлъютың аңьялгыт, югит, иглыӷат, акилъпыгаҳтытлъю иглыӷакаюгыт аңьяҳпахтыхун алъхыӷунъалютың кияӷусиҳқамыхның, аңьяҳпагит аӷулӣқат уяванлъютың Вавилонымың кумаӷақңан. ¹⁸Ысҳаӷлюку агыпся̄ кумалъҳан, акилӷӯгут: “Алъя ныҳлъягитуқ хўатылңуӷмың!” ¹⁹На̄сқутың пагулялиҳтуӷӣт қияткылъюку, қивӷуткылъюку акилӷӯгут:

“Сыӷлыӷўа̄ӷӯқ! Сыӷлыӷўа̄ӷӯқ ныҳлъяк!

Аклъюңиҳлъяганың қамахлъютың аңьяҳпалгыт аклъюңиӷикаюгуяҳтут!

Иўырңа ата̄сими афлъюми аклъюңиҳлъягӣта̄!”»

²⁰Та̄хкын қилягмың кина пӣқ:

«Ка̄й қилягмылңуӷни, қуякитыху қаюҳлъяк Кияӷныӷым на̄фқа̄ Вавилон!

Қуятык Кияӷныӷым югитни,

апостолыни, ӯкналиқистынилъю!

Кияӷныӷым аӷью̄ӷа̄ қаюҳлъяк сыӷлытун пикақыхкаңиси!»

²¹Та̄хкын икнақыҳлъялӷӣм яқулгым кывга̄ уйӷагрухлъяк, зерномун кагимтисистун аюқылӷӣ. Милю̄та̄ кылъӣмун, хўатын пимаӷми:

«Таўатыҳпигақ ныҳлъяк Вавилон,

Кияӷныӷым милю̄тыҳлъяхлъықа̄ аситмун ынка̄м алъямыңлъю ысҳаӷна̄нӷита̄т.

²²Китум алңунак нагақуӷна̄нӷитӣ гуслистытын,

пилъхуӷикат айңанаңастытын,

свирелыстытын, қалӷиҳтаҳтытынлъю!

Қамахлъютың пилъхуӷикат қыпҳаҳтытын авӣӷусяҳқа̄гут,

зерномың кагимтыстытын алъялъю нагақуӷна̄нӷитӣт!

²³Кынылӷутам ниӷуга кӯкхунъа̄ниӷнақуқ лъпыни.

Мыңик нулиҳтуӷнақылӷӣмлъю угӣӷнақылӷӣмлъю нагақуӷнаниӷнақук лъпыни.

Акилъпыгаҳтытын аҳтӣгатңўа̄ӷьяҳтут нунатаҳа̄ни тамаҳа̄ни.

Алигнаҳта̄лъыҳпыгун пӯҳқуқақатын қамахтыңъўа̄ӷлюки нунам юги!

²⁴Вавилоными та̄ўа а̄ўит ӯкналиқистыт,

Кияӷныӷым юги, қамахлъютыңлъю туқутка̄т нунами».

¹Киңуңаның икнақыҳлъялӷӣм яқулгым акузилъҳан, қилягми нагақуӷанка юлӷутыҳлъягыт акилӷӯлӷӣт:

«Аллилуия!

Югулилъық, қӯлвалъық, аҳтуӷьяҳқа̄нӷилъықлъю Кияӷнымта пикӣ!

²Лъңан нанқихтилъҳи ипаңӯт, ылъқуӷутңа̄т!

Лъңан аӷью̄қақа̄ апыҳсыӷуқ аӷнақ югусиминың акикикаюк қаюҳлъяк нунам юги пистыкаңи блудакун атуқыстақлъюни.

Кияӷныӷым акиткақа̄ қаюҳлъяк қыпҳаҳтыңи туқуқуҳтыстыкаңи».

³Юлӷутыҳлъягыт акилӷӯля̄таҳтут:

«Аллилуия!

Ныҳлъягым кумалӷӣм агыпся̄ маю̄гуқ қӯнпырухлъяк кынлыңуна̄н!»

⁴Та̄хкын югинақ стамат сӣпнықлъюки утфат, стаматлъю уңувалӷӣт нӣнӷуқӯлъютың манигуӷа̄т Кияӷнық, ақумгалӷӣ умӣлгусигмикун. Пика̄т:

«Аминь! Аллилуия!»

Пынъӣӷаҳа̄м Ныңуҳтылъҳан Нықынӷаҳқылъҳа

⁵Та̄хкын умӣлгусигның ақумутаҳлъягыгның ма хўатын пӣқ:

«Усюқитыху Кияӷныҳпут,

қамахлъюси қыпҳаҳтыңани аликилӷӣни лъңаның,

укаванлыңуӷнилъю, а̄ңўа̄ӷнилъю!»

⁶Та̄хкын нагақуӷанка лъяңақа мыңит юлӷутыҳлъягыт. Нагатка̄лютың сюксюгистун тывлюҳтыҳлъялӷӣт мыӷыт, калъюгымлъю тыңъа̄хталъҳатун аюқлъютың. Акилӷӯгут:

«Аллилуия!

Атанық Кияӷныҳпут, Аҳтуӷьяҳқаҳа̄нӷилңуқ иглыӷутӣқ!

⁷Қуятылъта, ынңа̄талъ қуяҳлъягылъталъю, усюқылътыхулъю!

Пынъӣӷаҳа̄м ныңуҳтылъыҳқа̄ ка̄туқ,

нулӣҳқа̄лъю ята̄ҳқума̄қ.

⁸Кияӷныӷым а̄сиҳтӯма̄ угӣӷнақылӷӣ пиниӷракыхтамың қатылӷӣмың виссонымың».

(«Виссон» хўатын писӣгуқ, ылъқуӷутңалӷӣт аныӷныҳқилъҳыт Кияӷныӷым югита пӣқыхкаңит.)

⁹Та̄хкын яқулгым пӣңа: «Уна игақигу: Пынъӣӷаҳа̄м ныңуҳтылъҳан нықынӷаҳқылъҳанун ныӷьяҳтӣсқыхкат қуястыка̄гут». Хўатынлъю пӣңа: «Укут ипаңӯт акузитаңи Кияӷныӷым».

¹⁰Та̄хкын нӣнӷутуңа яқулгым итыга̄кун манигуӷналюку, иўырңа пӣңа: «Таўатын пихпынаң! Манигуҳу Кияӷнық! Қыпҳа̄тақақа Кияӷнық лъпытун, ухпықа̄лгутыфпытунлъю. Лъңаңут ата̄сӣӷмылңӯт ипалъыӷмун Иисусым апыҳтӯсяқыхка̄нун. Ипалъық Иисусым апыҳтӯсяқыхка̄ та̄наңӯқ ипалъық Кияӷныӷым Таӷныӷахкынка ӯкналиқистынун уңипақыстыка̄».

Иглыӷастыңа Қатылӷӣм Кӯним

¹¹Та̄хкын ысҳаӷақа қиляк қылъпылӷӣ, та̄ўа қатылӷӣ кӯни! Кӯникун иглыҳлъыҳӣм а̄тҳа «Ата̄сӣӷмылңуқ, Ипапик». Ылъқуӷутңа̄т нанқихтилъҳи, пилъюўақаңилъю аңуяни. ¹²Ӣскык кумаӷулъҳатун кынӷым аюқлъютык, на̄сқумикун қаҳпалӷутылгуфтуқ. А̄тҳа лъңакун игақңафтуқ китум алңунак налъюкыхкаңа иўырңақун лъңина̄н. ¹³Аткуя̄ӷык атукык ныптыка̄фтук а̄ўкун. А̄тқыфта̄: «Кияӷныӷым Акузитаңа». ¹⁴Қилягмың пилъюўаҳтыңита малихся̄ӷа̄т ӯхлъютың қатылӷӣтхун кӯнитхун, аткуя̄ӷлютың иқаңилңуӷмың қатылӷӣмың виссонымың. ¹⁵Қа̄нӷаның а̄нуқ ипылӷӣ сявихпак, та̄хун қамахтыңъўа̄ӷлюки накумӣт кая̄лъқуҳлъықӣ. Иглыӷулъықӣ сявикынӷаӷмың анагуталиӷлюни. Та̄хкын тутмаҳлъықӣ аңуяни катам югыт тутмаӷақылъҳистун виноградыт қагыҳқӯсигнилңӯт. Та̄на тутмалъық сякша̄лъыҳлъяка̄ Кияӷныӷым Аҳтуӷьяҳқаҳа̄нӷилңӯм. ¹⁶Аткуя̄ӷакунлъю, қухтуқа̄кунлъю игақңафтуқ атық хўатын: «УМӢЛГА УМӢЛГЫТ, АТАНӶА АТАНӶЫТ».

¹⁷Та̄хкын ысҳаӷақа яқулык ныкывӷалӷӣ сиқиныҳқун. Қамахлъюки қаўа̄лӷутыт қӯлвани тыңа̄лӷӣт игляхтупихлъюни пӣ: «Тагиляӷа̄лъюси қырңуӷутык Кияӷныӷым нықынӷаҳқылъыҳлъяганун! ¹⁸Тагитык, ныӷьяҳтуҳтыки кымыхкўа̄ӷит умӣлгыт, пилъюўаҳтыт умӣлгыт, пилъюўаҳтытлъю. Ныӷьяҳтуҳтыки кымыхкўа̄ӷит кӯнит, кӯникун иглыҳтыстыт, қамахлъюкилъю югыт, қыпҳаҳтыля̄ӷыт, қыпҳаҳтыля̄ӷунӷилңӯт, укаванлыңӯт, а̄ңўа̄ӷытлъю».

¹⁹Та̄хкын ысҳаӷанка тыӷикусялъю̄клъю, нунамлъю умӣлги, пилъюўаҳтыкулъҳӣт қырңуӷутут пилъюўаӷналюку иглыҳлъыҳӣ кӯникун, пилъюўаҳтыңилъю. ²⁰Тугўа̄хкыт тыӷикусялъю̄гылъю, ӯкналиқистысиӷўа̄ӷылъю алъя̄ҳлъюўаҳтӣӷа̄тақақ таўанлъюку тыӷикусялъю̄к. (Алъя̄ҳлъюўаҳтӣқылъыӷмикун пӯҳқуқӣ налъюнӣлъыңыхкат тыӷикусялъю̄гмың, манигуқа̄тлъю наңаӷныӷа.) Тыӷикусялъю̄клъю, ӯкналиқистысиӷўа̄ӷылъю уңува̄хкынка милю̄та̄к на̄йвам кынӷанун кумаӷулӷӣмун уқумьягмун. ²¹Пилъюўаҳтым кӯникун иглыҳлъыҳӣм туқуқуӷӣ сявихпахкун қаныӷминың а̄ныхкакун. Та̄хкын қамахлъютың қаўа̄гыт ныӷӣт кымыхкўа̄ӷит кыпсюқӣналъыӷмыхнун.

Тысяча Аюмиқулъҳыт

¹Та̄хкын ысҳаӷақа яқулык қилягмың укилӷӣ тугумӣқлъюни қипытаыңаның Ся̄маңилңӯм Ля̄ўа̄ӷым, қӣпшаӷутыҳлъягныңлъю. ²Кая̄лъқылъюку дракон туўа̄. (Дракон та̄наңӯқ аюмиҳтақ нымыӷьяқ, а̄тҳа Туӷныӷақ, Туӷныӷақ.) Та̄хкын яқулгым асиҳқа̄ қӣпшаӷутның тысяча аюмиқулъыӷнун. ³Милю̄лъюку Ля̄ўа̄ӷмун, та̄хкын амигмың ӯмгулъюку маҳқатутка̄ печатлюку. Ынка̄м Драконым пӯҳсяҳқа̄наниӷӣ югыт кынляңа тысяча аюмиқулъҳыт алъпалъҳитнун. Алъпаката итымутаҳлъықа̄т.

⁴Та̄хкын ысҳаӷанка умӣлгусит ақумутат, ақумгалӷӣтлъю та̄кутхун. Кияӷныӷым нанқихтияҳқа̄ҳтыстыкӣ югның. Ысгаӷанкалъю уңувасӣт тама̄кут на̄сқўиҳтуқӣт апалъюқлъюку Иисус. Уңипақыхкақыхкаңат ипалъық Иисусым қайвиҳқыхка̄, акузитаңилъю Кияӷныӷым. Та̄кут манигӯсимаңитут тыӷикусялъю̄гмун, налиӷмың наңаӷныӷанун. Талўа қагумыхтыхун, налиӷмың ӣхмыхтыхун алъхыҳтылъҳита̄т налъюнӣлъкута̄ тыӷикусялъю̄гым. Уңуваҳтӯлъютың иглыӷутилгусиӷа̄т Христос тысяча аюмиқулъыӷнун. ⁵Та̄на сивулӣгуқ уңуваҳқулъық. (Иляңи тама̄кут туқукат уңуваҳтӯнъа̄нӷитут кынляңа тысяча аюмиқулъҳыт алъпалъҳитнун.) ⁶Тама̄кут Кияӷныӷым уңуваҳтыкӣ уңуваҳтӯсюхўа̄лъыӷми қуястыка̄гутлъю, аглыӷнаҳтутлъю. Туқуна̄нӷитут тӯңлиҳа̄ни туқулъҳым. Иўырңа священнигаңунақңӯт Кияӷныӷмунлъю, Христосымунлъю. Иглыӷутилгусиҳлъықа̄тлъю Христос тысяча аюмиқулъыӷни.

Кияӷныӷым Кая̄лъқыхкаңа Туӷныӷақ

⁷Тысяча аюмиқулъҳыт алъпаката, Туӷныӷақ анусимиңлъяӷвиганың итымусяҳқа̄гуқ. ⁸Ынка̄м а̄нлюни пӯҳқуҳлъықӣ нунатат миңитңалӷӣт нунатаҳа̄ни тамаҳа̄ни. Тама̄кут нунатат а̄тқӣт Гогылъю, Магогылъю. Югит угляҳлъяхтут қына̄взыӷа̄тун ысным. Та̄хкын Туӷныӷа̄м қырңуҳлъықӣ пилъюўамун. ⁹Туӷныӷа̄м пилъюўаҳтыңи иқылмун миңилъютың иглыҳлъықут нунакун. Ка̄лъютың каңлъюлъықахкыт нуна̄қлъю Кияӷныӷым югита ная̄т, ныҳлъяклъю Кияӷныӷым пиниқыхка̄. Та̄хкын қилягмың Кияӷныӷым кынық укихтыслъюку паныҳтыкӣ пилъюўаҳтыт. ¹⁰Та̄хкын Туӷныӷақ пӯҳтикақ нунатаның, Кияӷныӷым яқулгита милю̄лъықа̄т на̄йвамун кумаӷулӷӣ уқумьягмың. Таўавык милю̄ткақыхкыхкыт тыӷикусялъю̄гылъю, ӯкналиқистысиӷўа̄қлъю. Таўани икфиқыҳлъяхлъықут аӷныҳтӯма̄н унухтӯма̄н қӯнпырухлъяк кынлыңуна̄н.

Киңулиқ Нанқихтилъық

¹¹Та̄хкын ысҳаӷақа Кияӷнық ақумгалӷӣ қатылӷӣгныкун умӣлгусигныкун ақумутаҳлъягыгныкун. Нуналъю, қилягалъю қима̄гӯтук Кияӷныӷым таўантылъҳаның, алъялъю ысҳаӷьяҳқа̄хпынатык. ¹²Ысҳаӷанкалъю туқуляӷа̄ткат, укалӣўақлъютыңлъю, а̄ңўа̄ӷўа̄қлъютыңлъю аюқылӷӣт. Ныкывӷатңуфтут сивуңани умӣлгусим ақумутаҳлъягым. Та̄хкын игат қылъпыҳтӣт, Игӣ Уңувалъҳым, игақуӷвикыхкат а̄тҳитның тама̄кут уңуваяҳқат қӯнпырухлъяк. Иляңилъю игалӷутыт қылъпыҳтӣт игақуӷвикыхкат туқукат кияҳта̄лъҳитның аюқылӷӣт. Кияӷныӷым нанқихтӣ атуқлъюки игақуқат игатхун. ¹³Та̄хкын кылъӣм туқумастӣни пыхтӣ. Туқулъҳымлъю, Адымлъю туқумаститың пыхтӣт. Қамахтыңъўа̄ӷлюки Кияӷныӷым нанқихтӣ кияҳта̄лъҳистун. ¹⁴Та̄хкын Туқулъықлъю, Адылъю милю̄тахкыт на̄йвам кынӷанун. На̄йвам кынӷа тӯңлиқа̄ туқулъҳым. ¹⁵Китум алңунак а̄тҳа игақумаңилңуқ Ига̄ни Уңувалъҳым, милю̄сима̄т на̄йвам кынӷанун.

Қиляграӷақлъю, Нунаӷраӷақлъю

¹Та̄хкын ысҳаӷахка қиляграӷақлъю, нунаӷраӷақлъю. Қиляксюхўа̄ӷӣсима̄қ, нунаксюхўа̄ӷӣсима̄қ, кылъӣңӣтка̄гуқлъю. ²Ысҳаӷақалъю Аглыӷналӷӣ Ныҳлъяк, Иерусалимыӷраӷақ, укилӷӣ Кияӷныӷмың қилягмылңуӷмың. Ныҳлъяк ята̄ҳқылъюни угӣӷнақылӷӣм улъңақылъҳатун угиминун. ³Нагақуӷақа ма игляхтупихлъыҳӣ умӣлгусигның ақумутагның пилӷӣ: «Ысҳақаҳуқун, Кияӷныӷым кияҳфига югнитуқ! Кияҳфикылъықӣ ынка̄м лъңит юкылъықӣ. Кияӷнық лъңа катам лъңитнилъықуқ ынка̄м лъңа Кияӷнықылъықа̄т. ⁴Қуниңиҳлъықӣ қамахлъюки. Туқуңӣлъықа̄, қивӷуңӣлъықа̄, қияңӣлъықа̄, талўа ақниҳқыңъӣлъықа̄ қаюҳлъяк тама̄кут атуқсяқаңит атуқнаниҳлъықӣт».

⁵Та̄хкын умӣлгусигнилңуқ ақумутагни пӣқ: «Ысҳақаҳқиқун, улима̄қанка сяңўа̄т қамахтыңъўа̄ӷлюки нутаӷа̄люки!» Хўатынлъю пӣқ: «Игақики тама̄кут а̄пқанка лъпынун қаюҳлъяк тама̄кут акузитыт ипаңӯт, ухпықсяҳқа̄гутлъю». ⁶Пӣңалъю: «Апыӷӣҳтуқ! Хўаңа Альфаңӯңа, Омегаңӯңа, хўаңа пӣнлыӷӯңа, кынлыңӯңа. Кина алңунак мықсюлӷӣ, акиңуна̄н мыҳсилъықақа сыңъулӷӣмың уңувалъыңыстикаюгмың мыӷмың. ⁷Китум алңунак кая̄лъқӣлӷӣм алъхыҳлъықӣ тама̄кут хўаңамның. Кияӷнықылъықа̄тңа ынка̄м лъңит авақутақылъықанка. ⁸Иўырңа тама̄кут қуюҳталӷӣт, ухпықилъҳилңӯт, сыӷлылъыҳпигаӷның сыӷлыҳқылӷӣт, юхтаҳтыт, ныңуҳтыхпынатың атуқулъҳӣт, алигналӷӣт, манигӯткаюгыт кияӷныңлъяқанун, қамахлъютыңлъю иқлъыңалӷӣт, ныкаҳқа̄т на̄йва̄гуқ кумаӷулӷӣ кыныӷмыңлъю, уқумьякмыңлъю. Та̄наңӯқ тӯңлӣ туқулъҳым».

Иерусалимыӷраӷақ

⁹Та̄хкын яқулгыт ма̄ӷраӷвинлыгның сягнылгыт ыслъықңалӷӣның киңулиӷның сыӷлылӣлъыҳлъягның, ата̄сим та̄куның такўа̄ңа. Пӣңа: «Таги, кылгувикнақамкын Угӣӷнақылӷӣмың, нулӣҳқа̄ Пынъӣӷаҳа̄м». ¹⁰Кияӷныӷым Таӷныӷахкынкун яқулгым тугулюңа агля̄та̄ңа ӯсқалъыҳпига̄нун на̄йӷам. Таўани кылгута̄ Иерусалим, Аглыӷналӷӣ Ныҳлъяк укилӷӣ Кияӷныӷмың қилягмылңуӷмың. ¹¹Кӯкхутңаӷми Кияӷныӷым ниӷуҳқылъҳаның. Ныҳлъяк кӯкхутуқ акитуҳлъялӷӣтун уйӷахтун, ясписытун, мыӷра̄кыхтуткаӷми кристаллытун. ¹²Ӯсқаҳлъягмың миңлъютылык, қуля ма̄лӷук сӣпнықлъюку амихлъялга̄тақ. Қуля ма̄лӷук сӣпнықлъюку яқулгыт амихлъягнитыфтут. Ата̄сикаҳтаӷмың амихлъягыт игақфикңафтут атыӷмың қуля ма̄лӷук сӣпнықлъюку рамкыни Израилым. ¹³Миңлъютаңа ныҳлъягым қуля ма̄лӷук сӣпнықлъюку амихлъялык, пиңают асиваӷми, пиңают айўа̄ни, пиңают икываӷми, пиңают пакфалъями. ¹⁴Ныҳлъягым миңлъютаңа тунымиқа̄фтуқ қуля ма̄лӷук сӣпнықлъюку уйӷагның. Ата̄сикаҳтаӷмың уйӷагыт игақфикңафтут атыӷмың қуля ма̄лӷук сӣпнықлъюку апостолаңаның Пынъӣӷаҳа̄м.

¹⁵Яқулык алыҳқуҳтыка золотамың успуталгуфтуқ успутаӷналюку ныҳлъяк, амихлъягилъю, миңлъютаңалъю. ¹⁶Ныҳлъяк улъювӣӷракыхтыфтуқ тахталңа, патыҳтулңатун аюқыфтуқ. Яқулгым ныҳлъяк успутаӷьяқминигу: 2,400 километра тахталъкыфта̄, патыҳтулъкыфта̄, ӯсқаҳтулъкыфта̄лъю. ¹⁷Миңлъютаңалъю успутаӷьяқминигу, 65 метраңуфтуқ ӯсқаҳтулңа. Яқулгым успуталъҳатун аюқыфтуқ югым успуталъҳа. ¹⁸Миңлъютаңа улима̄ӷуфтуқ ясписымың. Ныҳлъяк улима̄ӷуфтуқ золотапырыгўа̄ӷмың. Маникаҳқақ мыӷра̄кыхтыпихлъыҳӣ сиқинӷўа̄ҳтун. ¹⁹Ныҳлъягым миңлъютаңан тунымӣ пиниӷна̄қусиӷлютың алъя̄ҳӣнаӷның акитуҳлъягның уйӷагның. Сивулиқ ясписыңуфтуқ, тӯңлиҳа̄ сапфирыңуфтуқ, пиңая агатыңуфтуқ, стама̄ смарагдыңуфтуқ, ²⁰талъима ониксыңуфтуқ, аӷвинлыга сардисыңуфтуқ, ма̄ӷраӷвинлыга хризолитыңуфтуқ, пиңаюның иңлюлга вириллыңуфтуқ, стаманың иңлюлга топазыңуфтуқ, қӯлңуӷутаңа хризопрасыңуфтуқ, қуля ата̄сим сӣпнӣӷа гиацинтыңуфтуқ, қуля ма̄лӷугым сӣпныӷан аметистыңуфтуқ. ²¹Қуля ма̄лӷук сӣпнықлъюку амихлъягыт жемчугыңуфтут, тамаҳаӷмың амихлъягыт ата̄симың жемчугмың улима̄ӷуфтут. Ныҳлъягым тӯмңи золотапырыгўа̄ӷуфтут; золото мыӷра̄кыхтыпихлъыҳӣ сиқинӷўа̄ҳтун.

²²Ныҳлъягми ысҳа̄нъыӷитуңа Храмымың, қаюҳлъяк Храмыңа Атанӷӯқ Кияӷнық Аҳтуӷьяҳқаҳа̄нӷилңуқ, Пынъӣӷаӷа̄гуқлъю. ²³Ныҳлъяк сиқиныҳсюӷнӣтуқ, налиӷмың танқиҳсюӷнӣтуқ ниӷухкамың, қаюҳлъяк ниӷуҳқылъҳа Кияӷныӷым ниӷукыхкаңа, Пынъӣӷаҳақлъю кынылӷутақыхкаңа. ²⁴Қамахтыңъўа̄ӷлютың нунам юги кияҳлъықут ниӷугакун кӯкхутңалӷӣкун. Нунамлъю умӣлгита аклъюңитың тагиқӯтӣт ныҳлъягмун. ²⁵Ныҳлъягым амихлъяги умыгна̄нӷитут аӷныӷым на̄ңныӷани қаюҳлъяк унугна̄нӷилңуқ тама̄ни. ²⁶Нунам югита ныҳлъягмун тагиқӯлъықӣт пиниӷнаҳлъягыт аклъюңитың. ²⁷Иўырңа ныҳлъягмун итыӷьяҳқа̄нӷитуқ сяңўа̄ сыӷлық, талўа кина алңунак сыӷлыӷнатун писта, налиӷмың иқлъыңиқыста. Иўырңа ныҳлъягмун итыӷьяҳқа̄гут тама̄куңинаҳа̄т а̄тҳит игақңалӷӣт Ига̄кун Уңувалъҳым. Та̄кут Игат Пынъӣӷаҳа̄м пикӣ.

¹Та̄хкын яқулгым кылгувика̄ңа кӣўыгның ма̄қылӷӣгның Кияӷныӷымлъю, Пынъӣӷаҳа̄млъю умӣлгусихкынка ақумутахкының. Уңувалъылитикаюгмың мылгык, мыӷра̄кыхтуткалӷӣк кристаллытун. ²Ма̄қңалӷӣк қука̄кун тумаңан ныҳлъягым. Кӣўык иңлюхтун уқфихтуқак уңувалъылитикаюгның. Тамаҳаӷми уқфик пӣтыстикаюгӯқ плодының танқӣнаҳқун, аюмиқулъыӷми, қуқуңӣтлъю на̄лъҳутусӣфтут нуната̄нун. ³Сяңўа̄ алңунак Кияӷныӷым нанқихтыка̄ аӷью̄ӷьяҳқа̄люку, ныҳлъягмынъа̄нӷитуқ. Кияӷныӷымлъю, Пынъӣӷаҳа̄млъю умӣлгусик ақумутахкыт ныҳлъягмысяҳқа̄гук, Кияӷныӷымлъю қыпҳаҳтыңита манигуҳлъықа̄т. ⁴Хина̄ ысҳаҳлъықа̄т, а̄тҳалъю қаўӣтхун игақңалъықуқ. ⁵Тама̄ни унугнаниҳлъықа̄, кынылӷутаҳсюӷнӣӷулъықӣ, налиӷмың сиқиныҳсюӷнӣӷулъықӣ, қаюҳлъяк Атанық Кияӷнық ниӷукылъықа̄т. Иглыӷутилъықутлъю умӣлгулютың қӯнпырухлъяк кынлыңуна̄н.

Тагилъыҳқа̄ Иисусым

⁶Та̄хкын яқулгым пӣңа: «Укут акузитыт ухпықсяҳқа̄гут, ипаңӯтлъю. Атанӷым, Кияӷныӷым иглыӷутилӷӣм таӷныӷӣтның ӯкналиқистыми, каяхтыкақа̄ яқулыни кылгувикысқылъюки қыпҳаҳтыни сяңўа̄т пияҳтуңыстаӷнилюки».

⁷Иисус пӣқ: «Нагатык! Тагияҳтуҳтуңа! Қуястыка̄гут қа̄ткулъҳӣт ӯкналиқылъыӷнун игақңалӷӣнун укутхун игатхун».

⁸Хўаңа, Иоанн, нагаткақанкалъю, ысҳақақанкалъю тама̄кут. Нагақуӷақңамкилъю, ысҳаӷақңамкилъю тама̄кут, нӣнӷутуңа яқулгым итыга̄ни манигуӷналюку, кылгувикистыка тама̄кын. ⁹Иўырңа пӣңа: «Таўатын пихпынаң! Хўаңалъю қыпҳаҳтыңӯңа лъпытун, ухпықа̄лгутыхпытунлъю ӯкналиқистыстун, қа̄ткулъҳӣстунлъю акузитаңитнун укут игат. Манигуҳу Кияӷнық!» ¹⁰Пӣңалъю: «Аксяқыхпынаки ӯкналиқылъҳыт укут игат а̄пқӣт, қаюҳлъяк тама̄кут пилъыҳқӣт ка̄сяҳтӯма̄т. ¹¹Кина алңунак сыӷлытун пилӷӣ нагныӷли сыӷлытун, ынка̄м кина алңунак нукыхнамың сю̄мқылӷӣ нагныӷли нукыхнамың сю̄мқылъюни. Кина алңунак ылъқуӷутңалӷӣ нагныӷли ылъқуӷутңалюни, киналъю алңунак пылюңилңуқ нагныӷли пылюңилъюни».

¹²Иисус пӣқ: «Нагатык! Тагияҳтуҳтуңа! Акилыҳтӯсяҳқанка кылъқылъықанка налъяңиҳтуӷналюки югыт кияҳта̄лъҳистун. ¹³Хўаңа Альфаңӯңа, Омегаңӯңа, хўаңа сивулӣгуңа, киңулӣгуңа, хўаңа пӣнлыӷӯңа, кынлыңӯңалъю».

¹⁴Қуястыка̄гут тама̄кут аткуя̄тың аӷвикӣт иқаңӣтыслъюки. Тама̄кын апалъюқлъюку ныӷьяҳқа̄ҳтыка̄гут пӣтыстыка̄ның уңувалъылитикаюгым уқфигым. Итыӷьяҳқа̄ҳтыка̄гутлъю ныҳлъягым амихлъягитхун. ¹⁵Иўырңа ныҳлъягым ыслъята̄нилңӯт қикмӣгут, алигналӷӣңӯт, ныңуҳтыхпынатың атуқистыңӯт, юхтаҳтыңӯт, кияӷныңлъяқанун манигӯтыстыңӯт, иқлъыңиқсюныҳтӯт, иқлъыңиқумаңинаӷақутлъю.

¹⁶«Хўаңа, Иисус, каяхтыкақақа яқулъка лъпысинун ухпықанун юӷаӷвигнилңуӷнун. Апыҳлъықа̄к укук лъпысинун: “Хўаңа Давидым киңунқа̄ңа, хўаңа ниӷугракыхта̄гуңа уна̄ңум иӷалықыта̄ӷа”».

¹⁷Таӷныӷаклъю, Угӣӷнақылӷӣлъю пӣк: «Таги!» Тамаҳаӷмилъю нагалъҳӣ пили: «Таги!» Кина алңунак мықсюлӷӣ тагили; тугуклъиӷлигу акиңилңуқ мық уңувалъылитикаюк.

На̄ңнӣтыт

¹⁸Хўаңа, Иоанн, кылыңася̄ӷьюганка нагалъҳӣт ӯкналиқылъыӷнун игақыхкатхун укутхун игатхун. Китум алңунак иляра̄қаки ӯкналиқуткыхкат укуни игани, Кияӷныӷым аӷью̄ҳлъықа̄. Лъңанун илялъықӣ тама̄кут сыӷлылӣлъыҳлъягыт игақңалӷӣт укутхун игатхун. ¹⁹Китум алңунак икувикыхкаки ӯкналиқуткыхкат укуни игани, Кияӷныӷым иқилъықӣ ныңиҳқӣ пӣтыстыкат уқфиганың уңувалъылитикаюгым. Кияҳтысна̄нӷита̄лъю аглыӷналӷӣми ныҳлъягми. Та̄кук апыӷңа̄к укуни игани.

²⁰Иисусыңӯқ а̄пҳилӷӣ тама̄кын қамахлъютың ипаңунилюки. Пӣқлъю: «Ипапыста̄қ тагияҳтуҳтуңа!»

Аминь. Таги, Атанық Иисус!

²¹Наңлъыхталъҳа Атанымта Иисусым тамаҳаҳпысинилъи. Аминь.