К Филиппийцам

Павелым Посланияңи Ухпықанун Филиппымылңуӷнун

¹Укут посланият Павелымыңлъю, Тимофейемыңлъю пиңӯт, қыпҳаҳтыкӣнкуң Христос Иисусым. Письмоӷақамси қамахлъюси Кияӷныӷым югитни, юӷаӷвигым иглыӷутистыңитни, диаконынилъю Филиппымылңуӷни, ухпықилӷӣт Христос Иисусыкун. ²Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Павелым Юӷа̄ткыхкаңи Ухпықат Филиппымылңӯт

³Игамсиқаюгвикақақа Кияӷнықа лъпысиның сюмыҳтаӷа̄ткынъымси. ⁴Юӷа̄ткынъымси қуяпихтақуңа, ⁵қаюҳлъяк нықамикақа уңипақилгусиқақаҳпысиңа Пинилӷӣның Уңипаның. Каюсиқақаҳпысиңа ухпықиюха̄лъыҳпысиның Пинилӷӣның Уңипаның хўавымун кынляңа. ⁶Лӣсимакңўа̄ӷақа Кияӷнық пӣнлиӷикақ пинилӷӣмың қыпҳақамың илюхпысини, лъңан апыӷӣҳлъықа̄ Христос Иисус утыӷниқан. ⁷Итагнапихтуқ хўаңамни сюмыҳтаӷа̄ткынъымси таўатын қаюҳлъяк илюмнитақуси. Уңипақиңулюңалъю, ипапиҳқиңулюңалъю Пинилӷӣт Уңипат ипаңунилюки, ма̄тынлъю анусимиңлъяӷвигмылъюңа, қамахлъюси алъхыҳтыңъўа̄ҳси Кияӷныӷым наңлъыхталъҳа хўаңамнун малигулъюси. ⁸Кияӷнық лӣсимакистыкақа ысҳаӷьюпихтақамси, қаюҳлъяк қамахлъюси пиниқамси Христос Иисусым пиниқылъҳатун лъпыси.

⁹Юӷа̄ткақамси пиниқиҳлъягысқылъюси, лӣсималъыңатаӷӣсқылъюси, лӣгикылъыңатаӷӣсқылъюсилъю. ¹⁰Таўатын лъӣқуфси кияҳтылъыҳпысини сяңўа̄ пинилъыҳпигақ накмикумаңинаӷьягулъықаҳси. Та̄хкын Христос тагинқихтыкан пылюңилъықусилъю, анахутылъҳилъықусилъю. ¹¹Ынка̄м уңувалъыси имиҳлъықут ипапыста̄қ пинӣпихлъыҳӣмың Иисус Христосыңинаҳа̄м пӣтыстыка̄ның. Та̄хкын югыт қӯлваҳлъықа̄тлъю, усюқылъықа̄тлъю Кияӷнық.

Павелым Анусимиңлъялъҳан Уңипақыстӣ Пинилӷӣт Уңипат

¹²Ухпықа̄лгутымни, лъпысинун лӣсимакысюгақа анусимиңлъяӷвигмытылъыӷма ипапыста̄қ углялӷӣ ю̄к нагатыста̄ Пинилӷӣның Уңипаның. ¹³Тама̄кын апалъюқлъюку қамахлъютың умӣлгым мыңтыӷа̄н кылыңакистыңита лӣта̄т анусимиңлъяӷа̄гуңа қаюҳлъяк қыпҳаҳтыкыхкаңаңа Христосым. ¹⁴Анусимиңлъяӷвигмытылъыӷма алъюлъютың ухпықалӷутыт ухпықӣӷатаӷаҳтыстӣ Атаныҳқун. Ынка̄м ўата тытугнаниӷатаӷаҳтут уңипақныӷмыхтыху Христос.

¹⁵Ипаңӯқ иляңи уңипақиңӯт Христосымың қаюҳлъяк ақинакңукаңатңалъю, а̄ҳтӣра̄ӷукаңатңалъю. Иўырңа иляңи уңипақиңӯт Христосымың ылъқуӷулъютың. ¹⁶Уңипақиңӯт қаюҳлъяк пиниқыхкаңатңа. Лӣсимакыхкаңат Кияӷныӷым тагистыкақа̄ңа хўавык ныкывӷатысқылъюки Пинилӷӣт Уңипат аңуямнъың. ¹⁷Иўырңа иляңит уңипақиңӯт Христосымың лъңина̄юхтым, ипапиҳқыхпынатың. Сюмыӷмыхни таўатын пилъыӷмыхтыхун сыӷлылӣҳқатаӷаӷнилюңа пӣтңа анусимиңлъяӷвигмысималюңа. ¹⁸Итагнаҳтуқ, уңипақилъҳат ылъқуӷутңаяӷңа̄н налиӷмың сямың алъяның апалъюлгуяӷңа̄н, уңипақилъҳита қуястақа̄ңа, қаюҳлъяк уңипақиңӯт Христосымың угляпихлъыҳӣнун.

¹⁹А̄а қуяңалъықуңа, қаюҳлъяк лӣсимакақа а̄ньяҳқа̄гуңа анусимиңлъяӷвигмың юӷа̄ткылъыҳпысигун, каюсилъҳакунлъю Иисус Христосым Таӷныӷа̄н. ²⁰Пиюкылъыҳлъякалъю, сиӷимакылъыҳлъякалъю ысҳа та̄на, кайңусяӷа̄тыфқа̄ма пиналюңа Христосымун. Итупилъ кияҳсюгақуңа илютулюңа ўатақа̄ӷақ ма̄тын анусимиңлъяӷвигмытылъымни. Ынка̄м Христос қӯлвалъыңылъықуқ уңуваӷңа̄ӷма, налиӷмың туқуяӷңа̄ӷма. ²¹Хўаңамни уңувалъық Христосыңӯқ, ынка̄м туқулъық алъхыӷутаӷалъҳӯқ. ²²Иўырңа уңуванақңукума қыпҳаӷатаӷаҳлъықуңа Христосымун. Наликык накмикылъыҳқақа налъюкақа̄, уңувалъық налиӷмың туқулъық. ²³Кукшиқңӯңа налихкының накмӣлъыҳқамның. Аӷуляқсюпихтақсяҳтуңа Христосымынъалюңа, қаюҳлъяк пиниӷатаӷаӷьяҳқа̄гуқ та̄на. ²⁴Иўырңа мыгнунаӷатаӷаҳтуқ лъпыси апалъюқлъюси уңуваңӯңа. ²⁵Ипапиҳқуткума̄қа та̄на, лӣсимакақа ўӣн уңуванақңӯңа. Лъпысининъақңӯңа каюсӣнъалюси нагусқылъюси, қуямалъыңысқылъюси ухпылъыҳпысигун. ²⁶Лъпысинун пикума, усюқатаӷаҳлъықаҳси Христос Иисус хўаңа апалъюқлъюңа.

²⁷Сяяӷңа̄тңа нагныӷутыки кияҳта̄лъыси Христосым апыҳтулъҳатун Пинилӷӣтхун Уңипатхун. Ынка̄м ысҳаӷьяҳтуқумси, налиӷмың авӣтыӷңа̄ӷма нагақуқумси, лӣгикылъықақа ата̄систун пилъыҳси. Лӣгикылъықақалъю қырңаҳпыси ныкывӷанъақуткылъыси Пинилӷӣт Уңипат аңуяхпысиның. ²⁸Аликыхпынаки аңуяси, қӯнпың илютулъюси. Ынка̄м таўатын пилъыҳпыси ипапиҳқылъықа̄т лъңит кая̄лъқӣна̄нӷитут. Лъпыси кая̄лъқӣлъықуси қаюҳлъяк Кияӷныӷӯқ кая̄лъқӣстилӷӣ лъпысиның. ²⁹Лъпысинун қыпҳа̄сяқлъыгуҳтыстыкақа̄ Христос, ухпықңинаҳпына̄н, икфиқылгусиқысилъю. ³⁰Пилъюўалгусиҳтыңъа. Сивунӷани ысҳапакақаҳпысиңа пияқлъӣлӷӣңа, нагақуқақасилъю пияқлъӣлъҳынка ма̄тын. Лъпысилъю тама̄кут ата̄сит пияқлъӣӷуткынъақңўа̄си.

Христосым Қусывыгңалъҳалъю, А̄ңылъҳалъю

¹Кияҳта̄лъыҳпыси Христосыкун икнақуҳтисӣ? Пиниқылъҳан илютуҳтисӣ? Қуя̄стык ата̄систун лъӣлӷӣси ухпықа̄лгуткулъҳӣни Аглыӷналӷӣгныкун Таӷныӷагныкун? Пинитун пӣқыстыкӣ, наңлъыкақыстыкӣ иляси? ²Таўатытңукуфси, қуямастыҳлъяхтыңъа пиниқутылъыҳпысигун, ата̄систун сюмыҳтаӷаткаҳтыкилъю, ата̄систун пилъыҳпысигун. ³Лъңина̄югныӷухпынаси, а̄ңа̄югныӷухпынаси. Йыӷлыги қусывгутулъюси, иляхпысиның пиниӷатаӷаӷнилюси сюмыҳтаӷаҳпынаси. ⁴Сю̄мқыхпынаки пиюкылъҳӣнаси, йыӷлыги пиюкылъыси пакикаӷлюки каюсӣтақлъюки иляси. ⁵Сюмыӷныси Христос Иисусым сюмыӷныӷатун аюқлъит.

⁶Иисус Кияӷныҳтун аюқсяӷңа̄ӷми сюмыҳтаӷа̄маңитуқ Кияӷнық иңлюксяҳқа̄люку.

⁷Йыӷлыги Кияӷныӷулъыни пакиглюку,

қыпҳаҳтыстун лъӣқа̄гуқ.

Югыстун лъӣқа̄гуқ, алъхықа̄гуқлъю югыстун.

⁸Югуҳсями қусывыхтыка̄гуқ ынка̄м қа̄ткутка̄гуқ туқулъыӷмун,

талўа туқука̄гуқ қақӯракун.

⁹Тама̄кын апалъюқлъюку Кияӷныӷым ныкыхтыкақа̄ Иисус а̄ңылъыҳпига̄люку,

атиқақа̄лъю Атаныӷмың а̄ңылъыҳпигаӷмың атыӷьяхаӷның.

^10-11Ынка̄ңам қамахтыңъўа̄ӷлюни қилягмылңӯм,

нунамылңӯм, нунам асиңанилңӯм қӯлваҳлъықа̄т Иисус қуңуҳқӯтылъыӷмыхтыхунлъю, апылъыӷмыхтыхунлъю:

«Иисус Христос Атанӷӯқ».

Таўатын пилъыӷмыхтыхун қӯлваҳлъықа̄т Кияӷнық Ата.

Кӯкхутылъық Ниӷугыстун Нунами

¹²Ынка̄ңам пиниқыхкамни, лъпысинилъюңа қа̄ткумаңинақақаҳпысиңа, ма̄тын авӣлъымни қа̄ткатаӷаҳтыңъа. Ӣӷўиҳтысқылъюку югулилъыҳси қыпҳа̄маңинаҳтык алиңылъылиӷлюсилъю, уңылыхтылъылиӷлюсилъю; ¹³қаюҳлъяк Кияӷнық қӯнпың қыпҳа̄гуқ лъпысини атуқсягутысқылъюку пиюкылъыни, қа̄ткусягутысқылъюсилъю пиюкылъыӷминун.

¹⁴Сяңўа̄ тамаҳа̄н пӣқитыху акузилгафқа̄фси, налиӷмың а̄ҳтӣра̄ӷутыфқа̄фси. ¹⁵Ынка̄м авутңилъықусилъю, пылюңилъықусилъю. Кияӷныӷым авақутӣ авутңисяҳқа̄гут кияҳтыңъулютың акулңитни пӯҳтинӷытлъю, сыӷлыҳқыстытлъю. Кӯкхутыпыста̄ӷьяҳқа̄гуси иӷалықыта̄ӷыстун нунами, ¹⁶уңипақиңулюси лъңитнун Христосымың уңувалъыңыстикаюгмың. Ынка̄м тагинқихтыкан қуяслъықаҳпысиңа ынңа̄талъ, қаюҳлъяк кияҳта̄лъыҳпыси кылгусяҳқақа̄ қыпҳалъқа тымңиңунӷилңуқ.

¹⁷Ухпықилъыҳсилъю, қыпҳалъыҳсилъю Кияӷныӷмун аҳқутыстун аюқут. Туқускаңатңа хўани анусимиңлъяӷвигми қуялъықуңа, қаюҳлъяк туқулъқа аҳқутыстун аюқсяҳқа̄гуқ тӯнылӷӣ лъпыси аҳқутыхпысинун ӣӷўӣсӣлюни. Та̄м қамахлъюта қуяслъықӣнкутлъю. ¹⁸Таўатыҳпигақ лъпысилъю қуяяҳқа̄гуси, қуялгусиҳлъягьяҳқақаҳпысиңа.

Тимофейлъю, Епафродитлъю

¹⁹Атанӷым пиюкылъқыхкагу, Тимофей каяхсяҳтуңыстаӷақа лъпысинун. Ынка̄м қуялъықуңа уңипаңыхкума лъпысиның. ²⁰Тимофейеңинаҳа̄м сюмыҳтаӷа̄ткақӣси сюмыҳтаӷа̄ткылъымтун. ²¹Тама̄кут иляңи кияң лъңитның катам сюмыҳтаӷа̄ткақут Иисус Христосым қыпҳақа̄ авылӷаӷлюку. ²²Иўырңа Тимофей лӣсимакңўа̄ӷаҳси натытуляңа. Иӷныӷыстун каю̄сӣткақа̄ңа уңипақиңулюңа Пинилӷӣның Уңипаның. ²³Лӣгикаӷыснақумкун а̄нысяҳқа̄тка анусимиңлъяӷвигмың каяхлъықақа лъпысинун. ²⁴Ныӷьюкақа Атанық хўаңалъю лъпысинун пияҳтуңыстаҳтуңа.

²⁵Сюмыҳтаӷа̄ткақақа ухпықа̄лгутфут Епафродит лъпысинун утыӷниҳтысналюку. Каюткаҳқаӷьюгумалюңа тагистыкақыхкыси каюсӣтысқылъюңа. Қырңа̄мтуң қыпҳақа̄гукуңлъю, уңипақика̄гукуңлъю Пинилӷӣның Уңипаның. Ныкывӷаткақапуңлъю Пинилӷӣт Уңипат кипулъхина̄лӷӣның. ²⁶Агляҳтыснақақа лъпысинун қаюҳлъяк аӷьюқңӯқ. Пыңгақӣси қаюҳлъяк нагақуқақыхкыси қинуюлъҳаның. ²⁷Ипаңӯқ қинуюхлъяка̄гуқ рыпалъ туқувзиқа̄гуқ. Иўырңа Кияӷныӷым наңлъыгьягуткақа̄, хўаңалъю наңлъыгьягуткақа̄ңа. Туқумаяқан ўатақа̄ӷақ қивӷулъыңатаӷаӷнаяҳтуңа. ²⁸Тама̄кын апалъюқлъюку ўатақа̄ӷақ агляҳтысюгақа лъпысинун. Ка̄скан ысҳақуфсигу қуялъықуси, ынка̄ңам итагнаӷилъықуңа хўаңалъю. ^29-30Епафродит туқуяӷңа̄ӷми қыпҳақа̄гуқ Христосымун, а̄қун туқувзиқа̄гуқ. Каюсӣткақа̄ңа қаюҳлъяк лъпыси каюсӣтыпагниңиткақаҳпысиңа, авӣлңӯси. Қуякусиқлъюку упуӷанъакыси қаюҳлъяк аңлыгуткаҳси Атаныҳқун. Ынка̄м қӯлваӷлюки қамахлъюки югыт Епафродитытун аюқылӷӣт.

Югулисиҳпигақ

¹Ухпықа̄лгутымни, на̄ңнӣткун уңипа̄сюўамси: «Қуяма̄қитык Атаныҳқун!»

Қинуягусигатуңа уңипа̄нъықихнымси посланиятхун игақыхкамның сивунӷани, ынка̄м илялъықуқ пақнӣтылъыҳпысинун. ²Кылыңалюси сыӷлытун пикаюгның, тама̄куның қикминың, югӯт сягиқутилӷӣт кыпфикысқылъюки югусӣт. ³Хўаңкутаңӯкут ухпықани обрезанияпӣўа̄қани қаюҳлъяк манигуӷақаҳпут Кияӷнық Таӷныӷахкынкун, усюқақаҳпутлъю Христос Иисус. Ныӷьюңигатукутлъю Кияӷныӷмун пилӣтысқылъюта хўаңкута катам сялъымтыхун. ⁴Кина алңунак Кияӷныӷым пилӣсяҳқақсяқагу лъңан катам сялъҳакун, хўаңа пияҳқа̄яҳтуңа. Югыт таўатын пияҳқа̄яқата хўаңа ўатақа̄ӷақ пинаяҳтуңа укут апалъюқлъюки: ⁵Обрезаниякақа̄тңа пиңаюның иңлюлык аӷнық атуӷьямкун киңуңаның алъхылъыӷма. Израилыӷмӣның пиңӯңа, рамкыңаның Вениаминым. Еврейпӣгӯңа, аңаюқахкалъю Еврейеңӯк. Малиҳқутақңаҳлъяхтуңа Иудеит Лӣлиҳтӯсӣтнун, тама̄кын апалъюқлъюку Фарисейеңуҳтуңа. ⁶Сягиқыпихлъюңа амьюқыта̄ткыхкақанка ухпықат. Қа̄ткыңъўа̄қақанка Иудеит Лӣлиҳтӯсӣт рыпалъ анахутылъыӷмун авутңитка̄гуңа. ⁷Иўырңа тама̄кут алъхыҳтыкақникақсяқынка ифлъяма̄нка апалъюқлъюку Христос. ⁸Ипа сяңўа̄т қамахлъюки ифлъяма̄нка апалъюқлъюку мыгнунаҳтулңа лӣтңўа̄лъымның Христос Иисусым, Атанқа. Лъңа апалъюқлъюку сяңўа̄т қамахлъюки ыхсима̄нка. Ысҳаӷанка малъястун аюқлъюки алъхыҳтыпигналюку Христос, ⁹илятңўа̄ҳтуңалъю лъңанун. Ухпықнанӣма̄қа хўаңамның пиниӷнақылъық қа̄ткутылъымкун Кияӷныӷым Лӣлиҳтӯся̄мнъун. Йыӷлыги лӣсимакақа Кияӷныӷым пиниҳтыстақа̄ңа қаюҳлъяк ухпықыхкыхка Христос. Уна пинилъық Кияӷныӷмың аюқуқ, югыт алъхыҳтақа̄т ухпықилъыӷмыхтыхун Христосымың. ¹⁰Пиюкылъыҳлъякақа, лӣнъалюку Христос, нанӷӣӷналюкулъю аҳтуӷьяҳқа̄нӷилъҳа уңуваҳтылъҳан; илянъалюңалъю икфиқылъҳанун, лъңатунлъю лъӣӷьяҳқа̄люңа туқулъҳани. ¹¹Таўатын пикума, Кияӷнық сиӷимакақа хўаңалъю уңуваҳтысқылъюңа туқулъыӷмың.

Кытанқустыстун Аюқуңа Кынлымун Ка̄сюхўа̄ӷьюхлъяк

¹²Хўатын пиңунӷитуңа: «Христосытун лъӣӷума̄ңа налиӷмың Христосытун кияҳтақуңа қӯнпың». Иўырңа пинақылъҳақа қамахлъюку атуқңўа̄қа Христосым пиюкылъҳатун лъӣӷналюңа атуқналюкулъю писқысюлъҳа хўаңамнун. ¹³Ухпықа̄лгутымни, сюмыҳтаӷӣгатуңа кая̄лъқылӷахтӯманилюку. Иўырңа ата̄сиқ пӣқақа, пуйгулюку сяңўа̄ тунутымнилңуқ сивутмӣӷнақуткақуңа ка̄нъалюку сяңўа̄ сивумнилңуқ. ¹⁴Ынка̄м таклъяӷрукытун килга̄қуңӯңа кая̄лъқӣсиқналюку акилыҳтӯсяқ, Кияӷныӷым туқлъю̄тка̄нун памавык Христос Иисусыкун. ¹⁵Таўатын сюмыҳтаӷанӷилъкуфси, Кияӷныӷым лӣгикысна̄ӷӣ сюмыҳтаӷалъыси анахутңалӷӣт. ¹⁶Уна мыгнунапихтуқ, нагныӷутылътыки кияҳта̄лъыпут малихлъюку ипапиҳқылъық лӣткаҳпут.

¹⁷Ухпықа̄лгутымни, успутақлъюңа малихтыңъа. Ысҳапаглюки иляңилъю кияҳлъыҳӣт хўаңамтун. ¹⁸Сивунӷани угляӷңа̄н уңипа̄та̄тақақамси, ма̄тын уңипа̄нъақлъя̄таӷамси қунитӯмаӷма. Угля̄пихтут кияҳлъыҳӣт аңуягулютың Христосым туқулъҳаның қақӯракун. ¹⁹Сю̄мқақӣт югусимың пиюкылъҳит кияң, Кияӷнық авылӷаӷлюку. Кайңуюгусиҳқақсяқытың а̄ңа̄югусиқақӣт. Сюмыҳтаӷа̄ткақа̄т нунамылңуҳӣнақ кияҳта̄лъыҳтың ынка̄м на̄фқылъыңьяҳқа̄гут геенами. ²⁰Иўырңа ухпықани хўаңкута қилягмӣңӯкут. Ынка̄м утақаңўа̄ҳпут югулиӷиста, Атанық Иисус Христос, укигьяҳқақ хўаңкунъун қилягмың памакын. ²¹Тагикуми алъяңуҳсяҳқақӣ кая̄лңӯт, туқумун аюқылӷӣт югусипут. Уңуваҳтыкатун югусимитун лъӣҳсяҳқақӣ аҳтуӷьяҳқа̄нӷилъыӷмикун. Та̄хун ата̄сикун аҳтуӷьяҳқа̄нӷилъыҳқун иглыӷусяҳқа̄ҳлъықа̄ сяңўа̄ қамахтыңъўа̄ӷлюку.

Павелым Сялъыҳқамың Уңипа̄скаңи Ухпықат

¹Ынка̄ңам пиниқыхкамни ухпықа̄лгутымни, ысҳаӷьюпихтамси, қуямасиқамси, акилыҳтӯсяқамсилъю қыпҳалъымнун. Таўатын аӷулӣтыкыстаҳтык Атаныҳқун. ²Еводия, Синтихия, қывӯлъюңа қылыӷнақамтык, та̄қитык аӷиванъыӷмың. Ата̄систун лъӣҳтык, қаюҳлъяк ухпықа̄лгуткутутык Атаныҳқун. ³Қыпҳалгутымни Сизыгус, лъпыклъю каю̄сӣтаҳтикык аӷнак та̄кук та̄қысқылъюкык аӷиванъыӷмың. Ылъкыхкынка қывӯлъютык қыпҳалгусиқақӣлъю Клименталъю, иляңилъю қыпҳалгутынка, қамахлъюта уңипақиңулюта Пинилӷӣның Уңипаның юлӷутыҳлъягнун. Қыпҳалгутма қамахлъютың а̄тҳит игақңа̄т Ига̄кун Уңувалъҳым. Таўантут игани а̄тҳит қамахлъютың кынлыңилңуӷмың уңувалъыңыхкат.

⁴Ӣўлың қуяма̄қитык Атаныҳқун. Пинақлъя̄таӷамси, Қуяма̄қитык! ⁵Нуқынъыҳтулъыҳси югым қамахлъюни лӣлъигу. Атанық тагияҳтуңыстаҳтуқ. ⁶Сюмыӷьялиткыхпына̄н сяңўа̄ алңунак. Йыӷлыги, сямың аклъюкуфси юӷаныҳпысини туңсиӷақитык Кияӷныӷмун тӯнысқылъюси. Ӣўлың туңсиӷақитык игамсиқаюлъылиӷлюси. ⁷Ынка̄м Кияӷныӷым илюсилъю, умьюгасилъю ныкыхмытысна̄ӷӣ Христос Иисусыкун. Кияӷныӷым ныкыхмылъҳа а̄ңыҳлъяхтуқ, китум алңунак лӣгикңўа̄ӷна̄нӷита̄.

⁸Ынка̄ңам ухпықа̄лгутымни, на̄ңнӣтаңакун посланияма уңипа̄сюўамси сюмыҳтаӷа̄ткумаңинӣсқылъюки пинилӷӣтлъю, усюқсяҳқатлъю хўатылңӯт: тама̄кут ипапигыт, қӯлваӷьяҳқат, ылъқуӷутңалӷӣт, пылюңилңӯт, пиниқсяҳқат, тама̄кутлъю пинитун акузиткысяҳқат. ⁹Сяңўа̄ қамахлъюку нагныӷутыху лӣткаҳси хўаңамның апыҳтуӷилъымкунлъю, кияҳта̄лъымкунлъю. Ынка̄м Кияӷнық ныкыхмылъылитикаюк лъпысинилъықуқ.

Павелым Иқамсиқаюгвикыхкаңи Филиппыйыӷмӣт Ухпықат Тунусӣтның

¹⁰Ынңа̄талъ қуяпихтуңа Атаныҳқун қаюҳлъяк қавңарухлъяха̄ның хўа̄ алъямың каюсӣлъя̄тақыфсиңа! Лӣсимакақа каюсӣсюкақаҳпысиңа, иўырңа пипагниңитка̄гуси. ¹¹Аклъюңунилюңа пиңунӷитуңа қаюҳлъяк натысяӷңа̄ӷма итагнаӷақуңа. ¹²Иляңани нӯӷңаӷма кияҳтақуңа, иляңани сӣптӣлюңа кияҳтақуңа. Итагнаӷьягусима̄ңа нани алңунак сятулымтун кияҳнымни. Итагнаӷақуңа кыпсюӷңаӷма кияҳнымни, игатаӷңа̄ӷмалъю кияҳнымни, талўа аклъюмаӷңа̄ӷмалъю, аклъюнӷитыӷңа̄ӷмалъю. ¹³Сяңўа̄ алңунак пияҳқақақа Христосыкун икнақуҳсяҳтымкун. ¹⁴Паниның лъпыси пинитуңўа̄қ каюсӣтақаҳпысиңа сыӷлылӣнымни.

¹⁵Лъпыси Филиппыйыӷмӣни, лӣсимакңўа̄ӷаҳси аӷуляқақңама Македониямың, уңипақиюхўа̄ӷақңама Пинилӷӣның Уңипаның, лъңина̄гуси ухпықани каюсиӷикат хўаңамның. Лъңина̄гуси илятңалӷӣт алъхыӷутылъымнунлъю, ифлъӣлъымнунлъю. ¹⁶Ата̄сиҳа̄хпына̄н аклъюпигнымни манимың Фессалоникамылъюңа, туюӷақаҳпысиңа. ¹⁷Иўырңа лӣгикысюгамси тунусяси манит мыгнуналъыҳпига̄нӷитут хўаңамни. Мыгнуналъыҳпигақ ысҳа уна: акилыҳтӯсяҳқақ алъхыҳсяҳқаҳси Кияӷныӷмың пинитун пилъыси апалъюқлъюки.

¹⁸Хўа̄ ма̄тын на̄ма̄ңа, а̄а, талўа сӣптӣлюңа аюқуңа. Тую̄сяси Епафродиткун қамахлъютың ка̄сима̄т, ынка̄м хўа̄ аклъюңигатуңа. Тунусяси хўаңамнун аҳқуткыхкастун аюқут Кияӷныӷми ыфқуҳтинапихлъыҳӣт. ¹⁹Ынка̄ңам Кияӷныӷма ята̄ҳқунъа̄ӷӣси сямың тамаҳа̄ның аклъюкыхкаҳпысиның аклъюңитылъыҳлъягмикун Христос Иисусыкун. ²⁰Кияӷнымнун, Атамун усюқилъта, қӯнпырухлъяк кынлыңуна̄н. Аминь.

Киңулӣт Сю̄мқилъҳыт

²¹Уңипа̄таҳнакыси қамахлъюки ухпықат Христос Иисусыкун сю̄мқақанкаңуқ. Ухпықа̄лгутыт хўаңамнилңӯт сю̄мқақӣсиңуқ. ²²Қамахлъютың Кияӷныӷым юган сю̄мқақӣсиңуқ, кияң та̄кут Кесарым мыңтыӷаӷмӣңита.

²³Наңлъыхталъҳа Иисус Христосым таӷныӷаҳпысинилъи.