От Иоанна

Пинилӷӣт Уңипат Иисус Христосымың Аюқылӷӣт Иоанным Игақыхкӣ

Акузин

¹Пӣнлиӷьюхўа̄лъыӷмың Акузин таўантыкақ, Акузин Кияӷныӷмыткақ, Акузин Кияӷныӷулӷӣ. ²Лъңа Кияӷныӷмыткақ пӣнлиӷьюха̄лъыӷмың има. ³Кияӷныӷым лъңакун сяңўа̄ қамахтыңъўа̄ӷлюку улимака̄, талўа сяңўа̄ ата̄сиҳақ улимамаңита̄ Акузитңунани. ⁴Акузитмытуқ уңувалъық, та̄на уңувалъық ниӷугӯқ югнун. ⁵Та̄на ниӷук кӯкхутңӯқ мамлыгми, мамлыгым кая̄лъқумаңита̄.

⁶Та̄ўаңуқ ю̄к Кияӷныӷым каяхтыка̄, а̄тҳа Иоанн. ⁷Иоанным апыӷьяҳтуқа̄ ниӷук қамахлъюки югыт ухпыӷысқылъюки уңипақилъыӷмикун. ⁸Лъңа ниӷугунӷитуқ, иўырңа апыӷьяҳтӯўа̄ ниӷук. ⁹Та̄на ниӷупӣгӯқ тагикақ нунамун, ниӷугулъҳӣ тамаҳа̄нун югнун.

¹⁰Та̄на Акузин нунамыткақ. Қайўа нуна улимака̄яӷңа̄н лъңакун, таўалъӣма нунам югита налъюкыхка̄т. ¹¹Тагика̄ялӷӣ лъми катам югминун, иўырңа тугуклъӣмаңилъкаңат. ¹²Иўырңа қамахлъюки тугуклъиӷилӷӣтлъю, ухпылӷӣтлъю лъминың, авақуталӣсяҳқа̄ҳтыстыкақӣ Кияӷныӷмун. ¹³Авақуталӣсимаңитӣ юхкун алъхыӷақылӷӣстун, талўа югым пиюкылъҳакун налиӷмың накмикылъҳакун. Кияӷныӷым лъминың катам авақуталӣткақӣ.

¹⁴Акузин кымгуҳлъюни акулымнъиткақ. Лъңакун Кияӷнық лӣтыстыңъўа̄қа̄гуқ, лӣтыстыңъўа̄қақа̄лъю пиниқылъыни хўаңкунъун. Ысҳақақаҳпут та̄ўа сыӷлыҳлъягуфтуқ. Сыӷлыҳлъягуфтуқ қаюҳлъяк та̄наңинаҳа̄лӷӣ Иӷныӷа Атам.

¹⁵Иоанным Крестителым а̄пқақа̄, акилӷӯткыхкақа̄ хўатын: «Та̄наңӯқ а̄пқақа лъпысинун хўатын пӣқңама: “Киңумның тагияҳқақ а̄ңыҳлъяхтуқ хўаңамның, қаюҳлъяк кияҳтыңъулӷӣ талўа алъхылъҳилъюңа”».

¹⁶Пиниқиңаҳлъягутминың қуястақӣлъю утыҳпахтӣнақ. ¹⁷Кияӷныӷым тӯныхкақӣ Лӣлиҳтӯсят Моисейкун, иўырңа пиниқылъықлъю, ипалъықлъю лӣтыстыкақа̄к Иисус Христосыкун. ¹⁸Китум алңунак ысҳӣгата̄ Кияӷнық. Та̄наңинаҳа̄м Иӷныӷым қантаӷантылъыҳпига̄м Атамун, лӣтыстыка̄ югнун.

Иоанным Крестителым Уңипа̄

¹⁹Иерусалимымың Иудеит иглыӷутистыңит каяхтикат свящеңигныңлъю, Левитыныңлъю а̄птысқылъюку Иоанн хўатын: «Кинаңузин?» ²⁰А̄псятни кӣмсиӷаҳтыкӣ хўатыҳлъюўа̄қ: «Хўаңа Христосыңунӷитуңа».

²¹Ынка̄м а̄птыка̄т: «Кинаңузинми? Илияңузӣн?» Иоанным кӣмсиқӣ: «Нака̄». А̄плъя̄тақа̄т: «Ӯкналиқистыңузӣн?» Кӣмсиқӣ: «Нака̄». ²²Пика̄т: «Уңипа̄тикут кинаңузин, қаюҳлъяк уңипа̄сяҳтупыста̄ӷнақапут каяхтикат хўаңкунъың. А̄пҳӣ кинаңузин». ²³Иоанным пикӣ: «Ӯкналиқиста Исаия пика̄гуқ:

“Ма акилӷӯгақуқ килга̄ни хўатын:

Таклъяҳтыху тӯмкаҳқа̄ Атанӷым”.

Та̄на ю̄к акилӷӯлӷӣ хўаңаңӯқ».

²⁴Фарисеит та̄кут каяхтыкақыхкаңит Иоаннымун. ²⁵А̄птыка̄т: «Христосыңунӷилъкувык, Илияңунӷилъкувык, ӯкналиқистыңунӷилъкувык, сяңавык крестиӷаӷӣқсин?» ²⁶Иоанным кӣмсиқӣ: «Крестиӷӣқуңа мыҳқун. Акулыхпысинитуқ кина налъюкыхкаҳси. ²⁷Та̄наңӯқ тагияҳқақ киңумның, сыӷлыҳлъягӯқ рыпалъ хўаңа пининӷитуңа итымсяҳқа̄люки сиңӣ».

²⁸Қамахлъютың тама̄кут пика̄гут Вифаниями иңлюңанилңуӷми Кӣўыгни Иорданыгни. Та̄кўани Иоанн крестиӷиңулӷӣ югның.

Пынъӣӷаӷа̄ Кияӷныӷым

²⁹Уна̄миңани Иоанным ысҳаӷлюку Иисус тагилӷӣ лъминун югыт пикӣ: «Ӣи, та̄ната Пынъӣӷаӷа̄ Кияӷныӷым иқитияҳқақ сыӷлыҳқылъҳаның нунам юган. ³⁰Та̄наңӯқ а̄пқақа хўатын: “Ю̄к тагинақңӯқ киңумның, иўырңа а̄ңўа̄ӷӯқ хўаңамның, қаюҳлъяк кияҳтыңъӯқ талўа алъхылъҳилъюңа”. ³¹Хўаңалъю налъюксяӷақа кинаңутаңа, иўырңа крестиӷияҳтӯгуңа мыҳқун лӣтысқылъюку кинаңутаңа Израилыӷмӣнун».

^32-33Та̄хкын Иоанным уңипақыхкақа̄: «Кияӷныӷым каяхтыкақа̄ңа крестиӷисқылъюңа мыҳқун. Паниның налъюкңулюку кинаңутаңа, Кияӷныӷым уңипа̄ткақа̄ңа: “Ысҳаҳлъықахкын Таӷныӷак укилӷӣк югмун. Та̄на ю̄к крестиӷияҳқа̄гуқ Аглыӷналӷӣгныкун Таӷныӷагныкун”. Ынка̄м ысҳаӷахка қилягмың Таӷныӷак укилӷӣк сюңаӷьюкыхталютык Иисусымун, лъңаниткаклъю» ³⁴Та̄хкын Иоанным пикӣ: «Таўатылъюку ысҳақақақа, уңипа̄тамси, та̄на Иӷнықа̄ Кияӷныӷым».

Малихся̄ҳтыксюхўа̄ӷи Иисусым

³⁵Уна̄миңани Иоанн таўанлъя̄тақақ, ма̄лӷуклъю малихся̄ҳтыкык. ³⁶Иоанным ысҳаӷлюку Иисус наӷуҳлъыҳӣ пикақ: «Ысҳа та̄ната Пынъӣӷаӷа̄ Кияӷныӷым!» ³⁷Та̄кук малихся̄ҳтык нагалъюку Иоанн, малихтыка̄к Иисус. ³⁸Иисусым қӣвлюни ысҳаӷлюкык малигулъҳӣк лъңанун а̄птыкакык: «Сяңўа̄ пӣқыстыху?» Кӣмсиқа̄к: «Равви, на̄нтақсин?» («Равви» хўатын писӣгуқ: «Апыҳтуӷиста».) ³⁹Пики: «Малихлъюңа ысҳаӷьяҳтуҳтыху». Ынка̄м малихтыка̄к кияҳфиганун, таўантыкак стаматкылъя̄гмың кынляңа унулъыӷмун.

⁴⁰Югым а̄лъҳа нагаткақ Иоаннымың акузилӷӣмың, малихтикақ Иисусымың Андрейеңуфтуқ, Симон Петырым аңлыгутаңа. ⁴¹Таўаниңинақ Андрей аңлыгутминун Симонымун агляӷлюни пика̄: «На̄лъкума̄ҳпут Мессия». («Мессия» хўатын писӣгуқ: «Христос».) ⁴²Та̄хкын Симон агля̄тка̄ Иисусымун. Иисусым ысҳаӷлюку пика̄: «Лъпык Симоныңӯтын иӷныӷа Иоанным. А̄тҳын Кифаңулъықуқ, хўатын писиқ, Петр».

Иисусым Накмикыхкык Филиппылъю, Нафанаилылъю Малихся̄ҳтыңулюкык

⁴³Уна̄миңани Иисус Галилеянъақумалӷӣ. Налъяӷлюку ю̄к а̄тҳа Филипп, пика̄: «Малихтиңа». ⁴⁴(Филипп Вифсаидаӷмӣңулӷӣ, Андрейенкугытун, Петырытун.) ⁴⁵Та̄хкын Филиппым иваӷьяҳтуӷлюку Нафанаил уңипа̄тка̄: «Налъя̄ма̄ҳпут ю̄к Моисейем игақыхка̄ игӣтхун Лӣлиҳтӯсят, ӯкналиқистытлъю игақыхкақа̄т игамыхтыхун. Иисусыңӯқ Назаретыӷмӣ, иӷныӷа Иосифым». ⁴⁶Нафанаилым а̄птыка̄: «Сяңўа̄ңам пинилӷӣ Назаретымың алъхыҳлъықыфта?» Филиппым кӣмсиқа̄: «Ысҳаӷьяҳтуқаҳуқун».

⁴⁷Иисусым ысҳаӷьямигу Нафанаил тагилӷӣ лъңанун пика̄: «Та̄ната Израилыӷмӣпик, тымңитхўаңилңуқ». ⁴⁸Нафанаилым а̄птыка̄: «Натын лӣсимаксиңа?» Иисусым кӣмсиқа̄: «Ысҳақақамкын асиңанилъютын смоквам уқфиган, талўа сялин Филиппым апылъҳилъюңа лъпынун». ⁴⁹Нафанаилым пика̄: «Апыҳтуӷиста, лъпык Иӷнықа̄тын Кияӷныӷым! Лъпык Умӣлъка̄тын Израилым!» ⁵⁰Иисусым пика̄: «Ухпыҳсӣн қаюҳлъяк уңипа̄скымкын ысҳа̄манилютын асиңани смоквам уқфиган? Сяңўа̄т а̄ңатаӷалӷӣт тама̄куның ысҳаҳлъықатын». ⁵¹Та̄хкын пикӣ: «Ипа уңипа̄тамси, ысҳаҳлъықаҳси қиляк қылъпылӷӣ, Кияӷныӷымлъю яқулги маюлӷӣт, укилӷӣт Иӷныӷакун Югым».

Ныңуӷутылъық Канами

¹Пиңайӣтаңани аӷныӷыт та̄ўаңуқ ныңуҳнақылӷӣк Канами, Галилеямылңуӷми. Иисусым на̄ңа таўанлыңуқ, ²Иисусылъю малихся̄ҳтыкулъҳӣт тахсиқлъиқа̄лӷӣт ныңуҳнақылӷӣгнун. ³Вино қамахсятху, на̄ңан Иисус пика̄: «Виноңӣтут».

⁴Иисусым пика̄: «Аӷнами хўани, сясқыхпынаңа, сялин пилъыҳқақа ка̄сигатуқ».

⁵Та̄хкын Иисусым на̄ңан пикӣ қыпҳаҳтыт: «Сясқыхкаңиси лыган пилӷа̄си».

⁶Та̄ўаңуқ аӷвинлыгуфтут уйӷагмың улима̄ӷыт мылӷутат. Иляңи ма̄лӷук мераңулъӷик, иляңи пиңают мераңулъӷит. (Иудеит атуқақыхкаңит укмаңиҳсямун Моисейем Лӣлиҳтӯся̄н писқылъҳатун.)

⁷Иисусым пикӣ қыпҳаҳтыт: «Имиҳтыки та̄кут мылӷутат мыӷмың». Имиқӣт ыслъымкаӷаҳтаӷлюки.

⁸Та̄хкын пикӣ: «Мыӷмың имӣлъюси агля̄тыху нықынӷаҳқым умӣлга».

Ынка̄м имӣлъютың агля̄тка̄т. ⁹Умӣлгым на̄сӣқа̄ мық виноңуҳтыкақ. Налъюкыхкаңа накын та̄на вино пиңутаңа. (Та̄кут қыпҳаҳтыт лӣсимакыхкаңат қаюҳлъяк имӣлъютың мыӷмың пика̄лӷӣт.) Ынка̄м умӣлгым туқлъюӷлюку нулиҳтуӷнақылӷӣ ¹⁰пика̄: «Тамаҳаӷми кияң пинилӷӣмың виномың атуқақуқ сивуклъюни ынка̄м ақылъқат кыпсю̄нъыӷата тама̄на аҳся̄н аюқылӷӣ вино киңулӣлюку атуӷақа̄т. Иўырңа пинилъҳа вином атуқумаңисимазигу сивуклъюку».

¹¹Канами, Галилеямылңуӷми Иисусым апыӷӣқа̄ алъя̄ҳлъюхўаҳтилъықсюхўа̄ни. Та̄хун алъя̄ҳлъюхўаҳтилъыӷмикун югнун ысҳаҳтыстыка̄ а̄ңылъыҳлъяни. Ынка̄м малихся̄ҳтыңита ухпықыхка̄т ипа Мессияңунилюку.

¹²Та̄м киңуңаның Иисус, на̄ңа, аңлыгутаңи, малихся̄ҳтыңилъю агляқат Капернаумымун, тама̄нтыкат қафсинат аӷныӷыт.

Иисус Храмымун Пилӷӣ

¹³Иудеит нықынӷаҳқысяҳтуңысталӷӣт Пасхамун ынка̄м Иисус агляқақ Иерусалимымун. ¹⁴Храмыми ысҳақӣ югыт акикулӷӣт волының, пынъӣӷның, голубының. Ысҳақӣлъю манимың навыҳқуҳтыт ақумлютың қаюӷвикымыхни. ¹⁵Иисусым кахсягутаңлъяӷлюни тапҳаӷмың, Храмымың а̄нысқуқӣ малигулъюки пынъӣӷнунлъю, волынунлъю. Манилӷутӣт катагӯтақлъюки миңиляткӣ, улъыҳқуқӣлъю қаюӷвигит. ¹⁶Та̄хкын югыт акилъпыгалӷӣт голубының қылъқӣ хўатын: «А̄нутыки хўакын! Атама Мыңтыӷа̄ акилъпыгаӷвигуҳтыхпына̄н». ¹⁷Малихся̄ҳтыңита нықа̄тка̄т Акузитыт Игақыхкат пилъҳат: «Мыгнукиңалъқа Мыңтыӷаҳпынун на̄фқуткынъақңўа̄қа». ¹⁸Та̄хкын Иудеит иглыӷутистыңита а̄птыка̄т Иисус: «Китум қылыҳтатын таўатын писқылъютын? Кияӷныӷым писқумакаңатын, алъя̄ҳлъюхўаҳти ипапиҳқусиҳқамың». ¹⁹Иисусым кӣмсиқӣ: «На̄фқитыху уна храм, пиңаюни аӷныӷни ныкыфлъықақа». ²⁰А̄птыка̄т: «Лъпык ныкыфлъықсигӯ пиңаюни аӷныӷни? Ю̄к ма̄лӷук аӷвинлык сипнықлюкиңӯт аюмиқулъҳыт ныкыфтусиқыхка̄т ӯмун Храмымун». ²¹Иўырңа Иисусым акузиткыңъукаңа лъми югусини храмыңулюку. ²²Уңуваҳтақңан туқулъыӷмың малихся̄ҳтыңита нықа̄тка̄т хўатын пилъҳа: «Уна храм, пиңаюни аӷныӷни ныкыфлъықақа». Ынка̄м ухпықыхкӣт Акузитыт Игақыхкат, Иисусымлъю акузилъҳи.

Иисусым Лӣсимакыхкаңи Қамахлъюки Югыт Натытуляңи

²³Иисус Иерусалимымылъюку Пасхам нықынӷаҳқылъҳани, угляпихлъыҳӣт ысҳапаглюки алъя̄ҳлъюхўаҳтилъҳи ухпықыхкақыхкаңат, ²⁴иўырңа Иисусым ухпықумаңилъкаңи. ²⁵Кинкунун алңунак уңипа̄нъыӷисяӷңа̄тни аюқылӷӣ югның қаюҳлъяк лӣсимакыхкаңи натытуляңи.

Иисусынкук, Никодимынкук

¹Та̄ўаңуқ ю̄к а̄тҳга Никодим, Фарисей Иудеит иглыӷутистыңат. ²Унугьягу Иисусымун агляӷлюни пика̄: «Равви, хўаңкута лӣсимакамкын апыҳтуӷистыңӯтын каяхтыка̄ Кияӷныӷым. Кина алңунак алъя̄ҳлъюхўаҳтина̄нӷитуқ лъпытун таўатын ўыткуқун Кияӷнық лъңанискан». ³Иисусым пика̄: «Ипа уңипа̄тамкын, китум алңунак ысҳаӷна̄нӷита̄ Атаныҳпагулъҳа Кияӷныӷым ўыткуқун алъхынқихтыкуми». ⁴Никодимым а̄птыка̄: «Натынңам аңликақ ю̄к алъхынқихлъықа? Ипапыста̄қ итыӷна̄нӷитуқ на̄ми қантахкынун алъхынқихналюни». ⁵Иисусым кӣмсиқа̄: «Ипа пӣмкын, кина алңунак итыӷна̄нӷитуқ Атаныҳпагулъҳанун Кияӷныӷым ўыткуқун алъхынқихтыкуми мыҳқунлъю, Таӷныӷагныкунлъю. ⁶Тама̄на кымыхкун алъхықақ кымгӯқ, иўырңа тама̄на таӷныӷагныкун алъхықақ таӷныӷа̄қуқ. ⁷Сяӷӣӷаюхпынаң қаюҳлъяк уңипа̄скымкын: “Лъпыси алъхынқихсяҳқапыста̄ӷӯси”. ⁸Ануқа накын алңунак пӣқуқ, нагатақан сюлюхталъҳа, иўырңа налъюкңўа̄ӷан накын пӣқутаңалъю навыклъю пӣқутаңа. Таўатыҳпигақ аюқуқ тамаҳаӷми алъхылӷӣ Таӷныӷагныкун». ⁹Никодимым а̄птыка̄: «Натынңам та̄на пияҳқа̄ўа?» ¹⁰Иисусым кӣмсиқа̄: «Лъпык апыҳтуӷистылгаҳлъютын Израилыӷмӣнун, паниның налъюксигӯ та̄на? ¹¹Ипа пӣмкын, акузиткақаҳпут лӣсимакыхкаҳпут, а̄пҳақаҳпут ысҳақаҳпут, паниның налиҳӣнаҳпыси ухпықигата̄ уңипаҳпут. ¹²А̄пҳақанка лъпысинун нунам пиңи иўырңа ухпықигатаҳпысиңа, натынңам ухпықылъықыстыки а̄пқумки қилягым пиңи? ¹³Кина алңунак майӣгатуқ қилягмун иўырңақун Иӷныӷа Югым укикақ қилягмың».

¹⁴Килга̄ни катам Моисейем напаҳтылъҳатун напақакун медь нымыӷьяқ, таўатыҳпигақ Иӷныӷа Югым напаҳсяҳқа̄лӷӣ. ¹⁵Ынка̄м кина алңунак ухпықилӷӣ лъңаның кынлыңилңуӷмың уңувалъылгулъықуқ. ¹⁶Кияӷныӷым пиниқыпихтутминың нунам юга тӯныхка̄ кызымаҳақ Иӷныни. Иӷныӷа китум алңунак ухпықыхкумигу туқуна̄нӷитуқ, иўырңа алъхыҳлъықа̄ кынлыңилңуқ уңувалъық. ¹⁷Кияӷныӷым каяхсимаңита̄ Иӷныни нунамун аӷью̄ӷисқылъюку нунам юганың, каяхтыкақа̄ югулиӷистыңулюку югнун.

¹⁸Кина алңунак ухпықилӷӣ Иӷныӷмың аӷью̄лъыңна̄нӷитуқ. Кина алңунак ухпықинӷилңуқ нанқихтыңъўа̄қа̄гуқ аӷью̄ӷьяҳқа̄люни, қаюҳлъяк ухпықынӷилъкаңа кызымаҳақ Иӷныӷа Кияӷныӷым. ¹⁹Ысҳа уна апалъя̄ Кияӷныӷым аӷью̄ӷисиҳқа̄ югнун: ниӷук тагика̄яӷңа̄н нунамун, югыт пиниқатаӷақа̄т мамлык ниӷугмың қаюҳлъяк сыӷлытун пӣқылӷӣт. ²⁰Китум алңунак сыӷлытун пикаюгым угумика̄ ниӷук, ынка̄м тагина̄нӷитуқ ниӷугмун сыӷлытун пилъыни ысҳаӷнаюкатки. ²¹Иўырңа кина алңунак ипапиҳқылъюни пикаюк тагияҳқа̄гуқ ниӷугмун, ысҳӣсқылъюку қыпҳақани Кияӷныӷым пиюкылъҳакун аюқылӷӣ.

Иисусынкук Крестиӷысталъю Иоанн

²²Киңуңаның та̄м Иисусылъю малихся̄ҳтыкулъҳӣт агляқат Иудеямун. Малихся̄ҳтыминун малигулъюни тама̄нтуткылъюку крестиӷыкӣ югыт. ²³Иоаннылъю крестиӷиңулӷӣ Еноными, Салимымың қантаӷанлыңуӷми, қаюҳлъяк мыҳлъягулӷӣ тама̄на. Югыт тагиляӷа̄тңулӷӣт лъңанун крестиӷысқылъютың. ²⁴(Иоанн сялин анусимиңлъяӷвигмун канаҳтылъҳилңуқ.)

²⁵Иляңита Иоанным малихся̄ҳтыңита а̄ҳтӣра̄қа̄т ата̄сиқ Иудей укмаңиҳсялъыӷмың Моисейем Лӣлиҳтӯся̄нилңуӷмың. ²⁶Ынка̄м агляӷлютың Иоаннымун уңипа̄тка̄т: «Апыҳтуӷиста, нықамикынӷисигӯ ю̄к лъпыниткақ иңлюңани Иорданым, акузиткыхкан? Хўа̄ ма̄тын крестиӷӣқуқ, ынка̄м қамахлъютың югыт агляҳтӯтңӯт лъңанун». ²⁷Иоанным кӣмсиқӣ: «Кина алңунак алъхыӷунъа̄нӷитуқ сямың ўыткуқун Кияӷныӷым тӯныхкумигу. ²⁸Лъпыси лӣсимакистыкамси хўатын пӣқңама: “Хўаңа Христосыңунӷитуңа иўырңа каяхтыка̄гуңа сивуңани”. ²⁹Угӣӷнақылӷӣ угикаҳқа̄н лъңан пика̄. Нулиҳтуӷнақылӷӣм илякумта̄ӷа, каютаңа утақӣгақуқ нагасюгнимаӷми мыңаның. Илякумта̄ӷан нагақуныӷминигу мыңа қуяҳлъягақуқ. Таўатыҳпигақ хўаңалъю қуялъқа ӣӷўиҳтуқ. ³⁰Лъңа мыгнунаӷатаӷаӷнақңӯқ, хўаңа укаваӷнақңӯңа».

Укикақ Қилягмың

³¹Лъңа та̄на памакаҳтақ а̄ңыҳлъяхтуқ тамаҳаҳлъяганың. Лъңа та̄на нунамың пи, нунам пика̄ ынка̄м акузикаюгӯқ нунам пиңаның. Лъңа та̄на қилягмың пи, қулӣгуқ тамаӷаҳлъяганың. ³²А̄пҳақа̄ ысҳақанилъю нагақуқанилъю иўырңа китум алңунак ухпықигатӣ акузитаңи. ³³Китум алңунак ухпықыхкумики акузитаңи, таўатын пилъыӷмикун ипапиҳқақа̄ Кияӷнық ипаңутаңа. ³⁴Та̄м Кияӷныӷым каяхтыка̄н атуқақӣ Кияӷныӷым акузитаңи, қаюҳлъяк Кияӷныӷым Таӷныӷагни тӯнңукык лъңанун ӣңуналъкиҳлъюкык. ³⁵Атам пиниқыпихта̄ Иӷныни, ынка̄м аҳтуӷьяҳқа̄нӷилъылиткақа̄ сямун тамаҳа̄нун. ³⁶Кина алңунак ухпылӷӣ Иӷныӷакун, кынлыңилңуӷмың уңувалъылгӯқ. Китум алңунак қа̄ткынӷилъкумигу Иӷныӷа уңувалъыңықыҳна̄нӷитуқ, та̄ўаңинақ Кияӷныӷым аӷью̄лъҳанисяҳқа̄гуқ қӯнпың.

Иисусылъю, Аӷнақлъю Самарияӷмӣ

¹Фарисеит нагақӯмакаңат паляҳа̄ҳнилюки югыт тагиляӷа̄лъҳӣт Иоаннымун, нақам нулянилюки тагиляӷа̄лъҳӣт Иисусымун малихся̄ҳтыңуналютыңлъю, крестиӷысқылъютыңлъю. ²(Иўырңа Иисусым лъңан катам крестиӷалянӷилъкаңи, малиҳся̄ҳтыңита крестиӷаляқаңит.) ³Атанӷым лӣгиксямики Фарисеинун та̄на нагақӯманилюку, аӷуляқлъюни Иудеямың Галилеянъықихтыкақ. ⁴Тӯмкаҳқа̄нилңуқ Самария.

⁵Ка̄ткақ Сихарымун, Самариямылңуӷмун уявантыпахлъягунӷилңуқ пӣтысӣӷаӷвигмың Иаковым тӯныхка̄ның иӷныӷминун Иосифымун. ⁶Иаковымлъю мыҳтаӷвига таўанлыңуқ. Иисус иглыҳтыҳлъягым мыӷнулӷӣ ынка̄м ақумыхкақ ся̄ӷўакун мыҳтаӷвигым, аӷныӷым қука̄ни.

^7-8Малихся̄ҳтыңи Сихарымун нықыңьяҳтуқа̄лӷӣт. Та̄хкын Самарияӷмӣ аӷнақ, Сихарымың мыҳтақақ. Иисусым пика̄: «Мыҳсӣҳтиңа». ⁹Аӷнам пика̄: «Иудейеңӯтын, хўаңа Самарияӷмӣңӯңа, сяңавык хўаңамнун мыҳсисқысин?» (Таўатын пикақыхкаңа қаюҳлъяк Иудеит талўа алыҳқуӷьяҳқақынӷилъкаңит Самарияӷмӣт.) ¹⁰Иисусым кӣмсиқа̄: «Гӯк, лӣсимаксяқувгу Кияӷныӷым тӯньяҳқа̄, лӣсимаксяқувгулъю кинаңутаңа мыҳсиңлъялӷӣ лъпынун, мыҳсиңлъяӷвикнаяӷан уңувалъыңыстикаюгмың мыӷмың». ¹¹Аӷнам пика̄: «Югунӣқ, мыҳтаӷвик ӯсқапихтуқ, талўа қалътӣтутын. Накынңам уңувалъыңыстикаюгмың мыңылъықсин? ¹²Сивунымта Иаковым тӯныхкақа̄ уна мыҳтаӷвик хўаңкунъун. Лъңалъю, иӷныӷилъю, тыӷикусӣлъю қамахлъютың мыӷыхка̄гут та̄хкын. А̄ңўа̄ӷунилютын Иаковымың пиңузӣн?» ¹³Иисусым кӣмсиқа̄: «Кина алңунак мыӷылӷӣ хўакын мыӷмың алъя мықсюгьяҳқа̄гуқ. ¹⁴Мық хўаңа тӯньяҳқақа китум алңунак мыӷыхкумигу алъямыңлъю мықсюгна̄нӷитуқ. Мық тӯньяҳқақа лъңанун таўатын лъӣӷьяҳқа̄гуқ сыңъулӷӣстун, тывуӷалӷӣ лъңан илюңаның. Та̄на мық кынлыңилңуӷмың уңувалъыңусиҳқақа̄». ¹⁵Аӷнам пика̄: «Югунӣқ, та̄хкын мыӷмың мыҳсиңа ынка̄м алъя мықсюнӷилъяңа, талўа хўавык мыҳтаӷнаниӷляңа».

¹⁶Иисусым пика̄: «Угин ақфагу ынка̄м тагилӷа̄тын». ¹⁷Аӷнам пика̄: «Угиңитуңа». Иисусым пика̄: «Ипа угиңинъӣтын. ¹⁸Угикыхкақатын талъимат югыт. Ма̄тын та̄на ю̄к кияҳфигын угикынӷитан. Уңипа̄таҳпыңа ипапигмың».

¹⁹Аӷнам пика̄: «Югунӣқ, та̄ўа лӣгикамкын ӯкналиқистыңуфтутын. ²⁰Сивуныӷма манигуқақа̄т Кияӷнық хўани на̄йӷами, иўырңа лъпыси Иудеяни Иерусалимыңунӣқаҳси манӣгӯтфихкақ Кияӷныӷмун». ²¹Иисусым пика̄: «Аӷнами хўани, ухпықиңа, та̄кўаниңани югыт манигуӷнаниҳлъықа̄т Ата хўани на̄йӷами талўа Иерусалимыми. ²²Лъпыси Самарияӷмӣни талўа налъюкаҳси кинаңутаңа манигуқаҳси. Хўаңкута Иудеяни лӣсимакаҳпут кинаңутаңа манигуқаҳпут, қаюҳлъяк Иудеитхун Кияӷныӷым акықусяқыхкақа̄ югулилъық. ²³Иўырңа пилъыҳқақ ука тагиңӯқ, а̄қун ка̄лъюни аюқуқ манигӯтыпикаюгыт манигуҳлъықа̄т Ата Таӷныӷагныкунлъю, ипалъыҳқунлъю. Таўатылңӯт манигӯткаюгыт Атам манигӯтысюгақӣ лъңанун. ²⁴Кияӷнық Таӷныӷа̄гуқ, тама̄кут манигӯлъҳӣт лъңанун манигуӷьяҳқақа̄т Таӷныӷагныкунлъю, ипалъыҳқунлъю».

²⁵Аӷнам пика̄: «Лӣсимакақа Мессия тагилъықуқ, атилъқылӷӣ Христосымың. Тагикуми уңипа̄лъықӣлъю сямың тамаҳа̄ның».

²⁶Иисусым пика̄: «Хўаңа та̄наңӯңа алыҳқуқын».

²⁷Хўа̄лъю Иисусым малихся̄ҳтыңи утыӷниқат. Ысҳаӷлюкык Иисусылъю, аӷна̄млъю алыҳқӯлъҳӣк ынңа̄талъ сяӷӣӷаягуткахкыт. Иўырңа налиҳӣнӣта̄ пимаңилъкаңат аӷнақ: «Сямың пизин?» Налиӷмың Иисус а̄псимаңилъкаңат: «Сяңан аӷнақ алыҳқуҳсигу?»

²⁸Та̄хкын аӷнам мылӷутагни унилъюкык, Сихарымун агляӷлюни югыт пикӣ: ²⁹«Ысҳаӷьяҳтуқаҳтыхуқун мыҳтаӷвигмылңуқ ю̄к. Сялъымның тамаҳа̄ның уңипа̄та̄ңа. Қа̄ Христосыңӯқ?» ³⁰Ынка̄м югыт та̄хкын нымың ысҳаӷьяҳтӯтка̄т Иисус.

³¹Сялин ка̄тылъҳилъюки малихся̄ҳтыңита Иисус пӣӷа̄тақа̄т: «Апыҳтуӷиста, сяңӣҳаӷмың нықа̄». ³²Иўырңа пикӣ: «Хўаңа нықылгӯңа ныӷьяҳқамың лъпыси налъюкңўа̄қаҳпысиның». ³³Малихся̄ҳтыт лъңитның а̄пқуӷа̄ӷуткат: «Қа̄ китум нықмың тагисима̄?»

³⁴Иисусым пикӣ: «Нықыка қа̄ткутылъҳӯқ каяхтикамың хўаңамның, апыӷӣӷысқылъюкулъю қыпҳақақ тагивақани хўаңамнун. ³⁵Нагатақаси югыт пилӷӣт: “Та̄хкын пӣтысиӷалъыӷмың стамат танқит атуӷлюки, унаталъыҳқақ ка̄тақуқ”. Уңипа̄таҳлъямси, ювӷӣӷўа̄қаҳтыкиқун пӣтысӣӷаӷвигыт, тама̄кут пӣткат унатаӷьяҳқа̄ҳтут. ³⁶Ю̄к унаталӷӣ пшеницамың акилыҳтӯсяңьяҳқа̄гуқ қыпҳақаминун, ынка̄м қуяяҳқа̄гуқ малигулъюни пӣтысиӷақамун. Таўатыҳпигақ югым уңипалъыӷмикун кынлыңилңуӷмың уңувалъыңыстыкумики акилыҳтӯсяңьяҳқа̄гуқ. Та̄налъю қуяяҳқа̄гуқ малигулъюни уңипақиюхўа̄қанун хўаңамның. ³⁷Та̄на акузилъық ипаңӯқ: “Ата̄сиқ ю̄к пӣтысӣӷаӷақуқ, иляңа ю̄к унатаӷақуқ”. ³⁸Каяхтыкақамси унатӣсқылъюси пӣтысиӷаӷвигми пӣтысиӷа̄маңилъкыхпысиның. Иляңит пӣтысӣӷақа̄гут, иўырңа лъпыси унатақаюгӯси пӣтыстыкӣтның, ынка̄м лъпысилъю акилыҳтӯсяңылъықуси қыпҳақӣтның».

³⁹Сихарыми, Самарияӷмӣлӷутыт ухпықыхка̄т Иисус қаюҳлъяк аӷнам уңипа̄ткақыхкаңи: «Та̄м югым уңипа̄та̄ңа сялъымның тамаҳа̄ның». ⁴⁰Самарияӷмӣт ка̄лъюку Иисус лъмыхнитысқыхка̄т. Иисус тама̄нтыкақ ма̄лӷук аӷныӷык, ⁴¹ынка̄м ўата ухпыҳтӯткат акузитаңи нагалъюки. ⁴²Та̄на аӷнақ пика̄т: «Нагасюхўа̄ӷақңамкын ухпықыхкақапут акузитытын. Иўырңа ма̄тын хўаңкунъың катам нагалъюку лӣтаҳпут та̄на ю̄к ипа югулиӷистыкыфта̄ нунам юган».

Иисусым На̄лъҳускаңа Умӣлўа̄ӷым Иӷныӷа

⁴³Ма̄лӷук аӷныӷык атуӷлюкык, Иисус Сихарымың аӷуляқыхкақ Галилеямун. ⁴⁴(Иисус лъңаның катам пика̄лӷӣ: «Ӯкналиқиста нуналгутаңан тугуклъӣгата̄т ӯкналиқистыңулюку».) ⁴⁵Ка̄сян Галилеямун, югыт тугуклъиқа̄т қаюҳлъяк ысҳапакақыхкаңат сялъҳа қамахлъюку Иерусалимыми, Пасхамун нықынӷаҳқыңъулютың.

⁴⁶Ынка̄м Иисус аглянқихтыкақ Канамун, Галилеямылңуӷмун, мық виноңуҳтыстыфигминун. Та̄ўаңуқ кавымым умӣлўа̄ӷа, Капернаумыми иӷныӷа қинуюхлъяк. ⁴⁷Нагақуӷьямигу Иисус тагиманилюку Иудеямың, Галилеямун такулюку манӣгӯткат на̄лъҳусяҳтуқӣсқылъюку иӷныни туқуяҳтуңысталӷӣ. ⁴⁸Иисусым пика̄: «Ухпықина̄нӷитуси ўыткуқун ысҳапакуфсики а̄ңылӷӣт алъя̄ҳлъюхўаҳтилъҳыт». ⁴⁹Умӣлўа̄ӷым пика̄: «Югунӣқ, малихтиңа таӷнуҳақа туқувагилган». ⁵⁰Иисусым пика̄: «Агля̄, иӷныӷын уңувалъықуқ». Югым ухпықыхкӣ Иисусым акузитаңи ынка̄м агляқақ. ⁵¹Тумаңани та̄кўани қыпҳаҳтыңита налъяӷлюку уңипа̄тка̄т: «Иӷныӷын пинӣҳсима̄қ». ⁵²А̄птыкӣ наникылъя̄гми пинӣҳсиматаңа. Пика̄т: «Иӷивгақ атасимикылъя̄гми пуқлъыӷаңӣтка̄гуқ». ⁵³Атаңан лӣсимакыхкаңа таўани афлъюми Иисусым пикақыхкаңа: «Иӷныӷын уңувалъықуқ». Ынка̄ңам ныңлъюгуткулъҳӣт ухпыҳтӯткат.

⁵⁴Та̄на тӯңлиқыхкаңа Иисусым алъя̄ҳлъюхўаҳтилъҳан тагилюни Иудеямың Галилеямун.

На̄лъҳутилъық На̄йваӷа̄ӷми

¹Та̄м киңуңаның Иисус, Иерусалимыткақ Иудеит нықынӷаҳқылъҳитнун. ²Та̄ўаңуқ Иерусалимыми, Овечьи Воротам туңаңани на̄йваӷа̄қ талъиматның колоннадалык, Еврейистун атилъҳа Вифезда. ³Угляпихлъыҳӣ қинуюк иңаӷмытулъҳӣ колоннадани, ая̄кат, пиюгигалңӯт, унӣқат. (Пагуӷругуҳныҳсиӷақыхкаңат мық атыӷьюхўа̄ӷналютың. ⁴Иляңани аӷныӷым, яқулга Атанӷым атыныӷмини на̄йваӷа̄ӷмун пагуӷругуҳтыстақыхкаңа мық. Ынка̄м кина атыӷьюхўа̄лӷӣ мыӷмун на̄лъҳутақылӷӣ сямың алңунак ақниӷныӷминың.)

⁵Та̄ўаңуқ ю̄к қинуюгңалӷӣ ю̄к ата̄сиқ қуля сипнықлъю ку пиңаюның иңлюлык аюмиқулъыӷни. ⁶Иисусым ысҳақа̄. Лӣсимакыхка̄ қавңарухлъяк има қинуюкақ ынка̄м а̄птыка̄: «На̄лъҳусюхсӣн?» ⁷Қинуюлӷӣм кӣмсиқа̄: «Югунӣқ, мық пагуӷругуҳныӷани каюткаҳқӣтақуңа. Атыӷнақуткақсяҳтуңа има китум иңьяӷаҳтақа̄ңа». ⁸Иисусым пика̄: «Ныкыви, алъиӷан тугулюку пиюги». ⁹Таўаниңинақ ю̄к на̄лъҳулъюни, алъиӷани тугулюку пиюкақ. Субботаңулӷӣ таўани аӷныӷми.

¹⁰Тама̄кын апалъюқлъюку Иудеит иглыӷутистыңита пика̄т на̄лъҳуткақ ю̄к: «Аӷныӷми Субботаңӯқ, Лӣлиҳтӯсямнъи алъиӷан иглыӷусяҳқақынӷисяӷан Субботами». ¹¹Пикӣ: «Югым на̄лъҳутистыма пӣңа: “Алъиӷан тугулюку пиюги”». ¹²А̄птыка̄т: «Китум на̄лъҳулъютын алъиӷан тугулюку пиюгысқатын?» ¹³Иўырңа югым налъюкыхка̄ на̄лъҳутистыни кинаңутаңа, қаюҳлъяк угля̄пихлъыӷӣ ю̄к таўанлыңуқ, Иисусылъю ысҳаҳтыңъунани иқитка̄лӷӣ.

¹⁴Аӷныӷми та̄кўани Храмыми, Иисусым налъяқа̄ та̄на ю̄к на̄лъҳуткани, пика̄: «Уюқ, на̄лъҳусима̄тын. Сыӷлыҳқынъанӣ лю̄рақ сяңўа̄ сыӷлыӷатаӷалӷӣ икфиқуткынъаюкавгу сыӷлыҳқумаңинақувык». ¹⁵Та̄хкын югым уңипа̄сяҳтуқӣ Иудеит иглыӷутистыңит Иисусыңунилюку на̄лъҳутистыни. ¹⁶Та̄хкын кынляңа Иудеит иглыӷутистыңита сыӷлытун пиягутка̄т Иисус, Субботами на̄лъҳутилъҳаның апалъюқлъюку. ¹⁷Иўырңа Иисусым пикӣ: «Атака̄ қӯнпың қыпҳа̄гуқ, хўаңалъю қыпҳаӷьяҳқа̄гуңа». ¹⁸Ынка̄м Иудеит иглыӷутистыңита ўатақа̄ӷақ туқусюка̄т. Пикат: «Иисусым Субботам Лӣлиҳтӯся̄ на̄фқинаҳпына̄н пика̄гуқлъю Кияӷнық Атакнилюку. Таўатын акузилъыӷмикун Кияӷныҳтуңўа̄қ аюқнилюни пӣқуқ».

Иисусым Аҳтуӷьяҳқа̄нӷилъҳа

¹⁹Иўырңа Иисусым пикӣ: «Ипа пӣмси, Иӷнық лъңинаӷми сяяҳқа̄нӷитуқ, Атаминың ысҳапакаҳӣнани пӣқа̄. Атами пилъҳатун пӣқуқ. ²⁰Атам пиниқа̄ Иӷныни, ынка̄м кылгувикақа̄ сямың тамаҳа̄ның сялъыӷминың. Иўырңа та̄куның а̄ңатаӷалӷӣның кылгувиксяҳқақа̄ сяӷӣӷаюгысқылъюси. ²¹Атам уңуваҳтыслъюки туқукат уңувалъылитақӣ, ынка̄м таўатыҳпигақ Иӷнық уңувалъылитикаюгӯқ пиюкыхкаминун. ²²Ата нанқихтиңигатуқ китумың алңунак. Иўырңа аҳтуӷьяҳқа̄нӷилъылиткақа̄ Иӷныни қамахлъюку нанқихтилъық лъңанун писқылъюку. ²³Кияӷныӷым таўатын пикақа̄ Иӷныни тамаҳа̄нун қӯлвӣсқылъюку катам таўатын қӯлвалъҳистун Ата. Китум та̄м қӯлвӣгалъкумигу Иӷнық қӯлвӣгата̄ Ата каяхтикақ Иӷныӷмың.

²⁴Ипа пӣмси, китум нагаскумики акузитынка, ухпықыхкумигулъю каяхтистыка, кынлыңилңуӷмың уңувалъылгӯқ. Нанқихтылъыңна̄нӷитуқ аӷью̄ӷьяҳқа̄люни қаюҳлъяк туқумың уңувалъыӷмун лъӣқа̄гуқ. ²⁵Ипа пӣмси, пилъыҳқақ ука тагиңӯқ, хўа̄ ка̄сима̄қ, туқукат нагақуҳлъықа̄т мыңа Иӷныӷан Кияӷныӷым. Тама̄кут нагақӯлъҳӣт уңувалъықут, ²⁶қаюҳлъяк Ата уңувалъҳӯқ, ынка̄м уңувалъық лъңаның пиңӯқ. Таўатыҳпигақ Иӷныӷа уңувалъҳӯқ, қаюҳлъяк Атам таўатытыстыкаңа. ²⁷Аҳтуӷьяҳқа̄нӷилъылиткақа̄лъю Иӷныни нанқихтилъыӷмун қаюҳлъяк Иӷнықыхкаңа Югым.

²⁸Сяӷӣӷаягутыхпына̄н уна: пилъыҳқақ тагиңӯқ қамахлъютың туқукат лъивыӷмылңӯт нагақуӷлюку мыңа, ²⁹а̄нлыӷа̄сяҳқа̄гут лъивыӷмыхның. Тама̄кут пинитун пикат уңуваҳтысяҳқа̄гут уңувалъыӷмун. Иўырңа тама̄кут сыӷлытун пикат уңуваҳтысяҳқа̄гут нанқихтылъыӷмун аӷью̄ӷьяҳқа̄лютың».

А̄пҳистыңи Иисусым

³⁰«Нанқихсигатақа кина алңунак сивуклъюку а̄птылъңуна̄н Ата. Ынка̄м нанқихтӣқуңа лъңан писқылъҳинаҳа̄тун. Нанқихтилъқа ылъқуӷутңа̄қ, қаюҳлъяк нанқихтӣқуңа Атам каяхтикам хўаңамның пиюкылъҳатун. Хўаңа пиюкылъымтун пиңигатуңа.

³¹А̄пқума хўаңамның, югыт ухпықна̄нӷитӣт акузитынка, ўыткуқун китум алъя а̄пқаңаңа. ³²Иўырңа китум а̄пҳақа̄ңа таўатын, лӣсимаканка а̄пқӣ ипаңӯт қаюҳлъяк а̄пҳистыка Атакақа. ³³Лъпыси югыт каяхтыкақаси Иоаннымун, апылъҳи хўаңамның ипаңӯт. ³⁴Югыт апынӷисяӷңа̄ӷмыхтыңъа, иўырңа таўатын пӣңа лъпыси югулилъыңысқылъюси. ³⁵Иоанн кынылӷутастун кумаңаяҳтуқлъю, кӯкхутңаяҳтуқлъю. Акузитаңи ниӷугыстун аюқсяҳтут ынка̄м лъпыси натыңӣҳақ акузитаңакун қуястысюка̄гуси. ³⁶Иоанным акузитаңан лӣтыстыкақа̄ңа югнун. Иўырңа ўатақа̄ӷақ Иоанным акузитаңаның қыпҳалъыӷма лӣтыстаӷаӷа̄ңа югнун. Қыпҳаӷанка Атама писқыхкӣ ынка̄м қыпҳалъыӷма лӣтыста̄ югнун Атамнун каяхтыкақнилюңа. ³⁷Каяхтикам хўаңамның, Атам лъминың катам а̄пҳўа̄ ипапиҳқылъық хўаңамның аюқылӷӣ. Нагақӣгатңўа̄ӷаҳси мыңа, ысҳӣгатңўа̄ӷаҳси натытуляңа, ³⁸тугуклъӣгатасилъю акузитаңи, қаюҳлъяк ухпықигатаҳси Атам каяхтыка̄. ³⁹Иваӷивикақаси Акузитыт Игақыхкат, қаюҳлъяк сюмыҳпысини кынлыңилңуӷмың уңувалъыңвикналюки пӣқаси. Та̄куста ата̄сит Акузитыт Игақыхкат а̄пҳилӷӣт хўаңамның. ⁴⁰Нақам хўаңамнун тагиюгигатуси уңувалъылитысқылъюси.

⁴¹Югнун усюқысюнӷитуңа. ⁴²Лӣсимакамси лъпыси, пиниқылъҳитуси илюхпысини Кияӷныӷмун. ⁴³Атама каяхтыкақа̄ңа акузистыңулюңа лъңанун, иўырңа лъпыси тугуклъӣгатаҳпысиңа. Нақам кина тагилюни лъңанун катам акузилӷӣ тугуклъиӷақлъюку. ⁴⁴Натынңам ухпықылъықыстыху тагитка̄қа Кияӷныӷмың усюқысюгукуфси иляхпысинун, нақам та̄наңинаҳа̄м Кияӷныӷым усюқылъыҳқа̄ авылӷаӷлюку? ⁴⁵Сюмыҳтаӷаҳпынаси апыҳлъықнилюку анахутылъыҳси Атамун. Моисейеңӯқ а̄пҳияҳқақ анахутылъыҳпысиның қайўа сиӷимаксяӷңа̄ҳпысигу югулисқылъюси. ⁴⁶Моисей ипа ухпықумакуфсигу ухпықнаяӷаҳпысиңа қаюҳлъяк игақыхкақа̄ңа игатхун. ⁴⁷Ынка̄м Моисейем игақыхкӣ ухпықигалъкуфсики, натынңам ухпықылъықыстыки акузитынка?»

Иисусым Ныӷыстилъҳа 5,000ның Сӣпңалӷӣның Югның

¹Киңуңаның та̄м, Иисусым аӷвиқа̄ На̄йвақ Галилея, а̄тқылӷӣлъю Тивериадамың. ²Угляпихлъыҳӣм малихлъыӷа̄тка̄т қаюҳлъяк На̄лъҳуқӯлӷӣ қинуюгның алъя̄ҳлъюхўаҳтилъыҳқун. ³Ка̄лъютың Иисусылъю малихся̄ҳтыкулъҳӣт маюӷлютың на̄йӷамун ақумӯткат. ⁴Иудеит Пасхамун Нықынӷаҳқылъҳат ка̄сяҳтулӷӣ. ⁵Иисусым сивухлъюни ысҳақӣ юлӷутыҳлъягыт тагиляӷа̄лъҳӣт лъминун. А̄птыка̄ Филипп: «Накын тукфиӷинаяӷыста нықмың юлӷутыҳлъягнун ныӷьяҳқамың?» ⁶Таўатын а̄птыка̄ Филипп натын пилъыҳқа̄ ысҳаӷналюку, лӣсимакыӷңа̄ӷмигу лъми сялъыҳқани. ⁷Филиппым кӣмсиқа̄: «200 динарийелгуӷңа̄мта на̄маяҳқамың нықыңна̄нӷитукут, талўа сясқуҳаӷмың тунқуӷңа̄мтыки».

⁸Иляңалъю малихся̄ҳта таўанлыңуқ, Симон Петырым аңлыгутаңа Андрей. Андрейем пика̄ Иисус: ⁹«Ысҳа уна мыкылӷӣҳақ талъиматның нықыкшаңлъялъхақ, ма̄лӷуклъю иқалъюгык, иўырңа на̄мана̄нӷитут». ¹⁰Иисусым малихся̄ҳтыни пикӣ: «Югыт ақумӯтысқитыки». (Тама̄на выга̄ҳлъягулӷӣ.) Ынка̄м ынтақун 5,000ңӯт югыт ақумӯткат, кысюткыхпынаки аӷнатлъю, таӷнуҳа̄тлъю. ¹¹Та̄хкын Иисусым тугулюки нықыкшагыт, игамсиқаюглюни Кияӷныӷмун, тунқуҳтыстыкӣ ақумӯткаҳлъягнун тама̄вык. Таўатыҳпигақ иқалъюгык пики, қамахлъютың ныӷӯткат кыпсюлъыӷмыхнун. ¹²Қамахлъютың кыпсю̄сята Иисусым малихся̄ҳтыни пикӣ: «Қырңуҳтыху тама̄на ныӷумаңилъкаңат, сякусӣқыхпынаки». ¹³Ынка̄м қырңуҳлъюки имиқӣт қуля ма̄лӷук сӣпнықлъюку корзинат сӣпныӷитның талъимат нықыкшагыт.

¹⁴Та̄на алъя̄ҳлъюхўаҳтилъық югыт ысҳапаглюку пикат: «Ипапыста̄қ уна ӯкналиқистыңӯқ тагияҳқа̄ника̄т нунамун». ¹⁵Иисусым лӣсимакыхкаңа югыт ақфалюку умӣлыңлъяӷнақуткынъақңукаңат, ынка̄м на̄йӷамун агляқақ лъңинаҳа̄налюни.

Иисус Пиюлӷӣ Мыҳқун

¹⁶Таўани иӷивгаӷми, Иисусым малихся̄ҳтыңи укикат На̄йвамун Галилеямун. ¹⁷Мамлыхтыкаңа, Иисусылъю паниның авӣлңуқ, ынка̄м малихся̄ҳтыңи аңьямун ӯҳқӯлъютың агляқат Капернаумымун иңлюңанилңуӷмун на̄йвам. ¹⁸Та̄хкын на̄йвақ имаҳлъюгуҳтыкақ қаюҳлъяк ануқлъиҳлъякаңа. ¹⁹Ӣўынлъю аңўа̄ӷмың на̄йвам қука̄нун лъӣӷақут, ысҳақа̄т Иисус мыҳқун пиюгмың тагилӷӣ аңьямун ынка̄м алиңрӯӷуткат. ²⁰Иўырңа Иисусым пикӣ: «Алиңыхпынаси, Хўаңаңӯңа». ²¹Ынка̄м ӯхтысюка̄т аңьямун. Та̄хкын таўаниңинақ қӯтмун ка̄ткат такукамыхнун.

Югыт Ивақаңат Иисус

²²Юлӷутыҳлъягыт уныхтыкат иңлюңани на̄йвам, уна̄миңани пиялӷӣмың Иисус авӣтуқ. Лӣсимакыхкаңат ата̄сӣна̄лӷӣ аңьяқ ыснами. Иисус малигусимаңилңуқ малихся̄ҳтыминун аңьякун, лъңинаӷмың пика̄лӷӣт унилъюку. ²³Та̄хкын иляңи аңьят ка̄тқӯткат Тивериадамың. Тамлякат туңаңакун юлӷутыҳлъягыт ныӷӯтфигитхун иӷивгақ. Ныӷыхка̄лӷӣт нықыкшаңлъямың, киңуңаның Иисусым игамсиқаюлъҳан. ²⁴Юлӷутыҳлъягыт пиялӷӣмың Иисусылъю малихся̄ҳтыкулъҳӣт авӣтут, ынка̄м аңьянун ӯхлъыӷа̄лъютың Капернаумымун иваӷьяҳтуқа̄т Иисус.

Иисус Нықыкшаңлъя̄гуқ Уңувалъылитикаюк

²⁵На̄лъкысямыхтыху Иисус а̄птыка̄т: «Апыҳтуӷиста, қавңақ ма̄вык ка̄син?» ²⁶Иисусым кӣмсиқӣ: «Ипа уңипа̄тамси, иваӷаҳпысиңа қаюҳлъяк ныӷылӷӣси нықыкшаңлъямың кыпсюӷа̄ӷлюси. Иванӷитаҳпысиңа алъя̄ҳлъюхўаҳтилъҳынка апалъюқлъюки. ²⁷Қыпҳа̄тыхпына̄н нықа мулюңигалңуқ. Йыӷлыги қыпҳа̄тақитыху нықа на̄вьяҳқа̄нӷилңуқ, кынлыңуна̄н уңувалъыңыстикаюк. Таўатылңуқ нықа Иӷныӷан Югым тӯньяҳқақа лъпысинун, қаюҳлъяк Кияӷныӷым Атам итагнақыхкақа̄ лъңа».

²⁸Югыт а̄птыка̄т Иисус: «Сяңа̄ўат қыпҳақат Кияӷныӷым писқысюкӣ хўаңкунъун?» ²⁹Иисусым кӣмсиқӣ: «Лъпысинун қыпҳақақ Кияӷныӷым писқысюка̄ ысҳа уна: ухпықысқылъюку та̄на ата̄сиқ Кияӷныӷым каяхтыка̄». ³⁰Ынка̄м югыт а̄птыка̄т: «Сяңўа̄ алъя̄ҳлъюхўаҳтилъық пинаяҳсигу? Ысҳапагьяқумтыху ынңа̄талъ ухпықнаяӷамкын. Сянаяҳсин? ³¹Сивуныпут ныӷыхка̄гут маннамың килга̄ни. Акузитни Игақыхкани игақыхка̄гуқ хўатын: “Қилягмың памакын тӯныхкақӣ нықыкшаңлъямың ныӷысқылъюки”». ³²Иисусым пикӣ: «Ипа уңипа̄тамси, қилягмың памакын Моисейеңунӷитуқ тӯникақ нықыкшаңлъямың. Қилягмың памакын Атакақа тӯникаюк нықыкшаңлъяпигмың лъпысинун. ³³Кияӷныӷым нықыкшаңлъя̄ ысҳа та̄на ата̄сиқ укикақ қилягмың, тӯнилӷӣ уңувалъыӷмың нунам юганун». ³⁴Югыт пика̄т: «Югунӣқ, ӣўлың тӯникут таўатылңуӷмың нықыкшаңлъямың».

³⁵Иисусым пикӣ: «Хўаңаңӯқ нықыкшаңлъяқ уңувалъылитикаюк. Кина та̄на тагилӷӣ хўаңамнун алъямыңлъю игатаӷна̄нӷитуқ. Китум та̄м ухпықыхкумиңа алъямыңлъю мықсюгна̄нӷитуқ. ³⁶Иўырңа сивунӷани уңипа̄тылъымтун пӣмси, ысҳақақаҳпысиңа иўырңа сялин ухпықигатаҳпысиңа. ³⁷Кина алңунак Атам тагивақа̄ тагияҳқа̄гуқ хўаңамнун. Иҳсяксяҳқақынӷитақа кина алңунак тагилӷӣ хўаңамнун, ³⁸қаюҳлъяк укика̄гуңа қилягмың атуқналюку пиюкылъҳа Каяхтистыма. Хўаңа пиюкылъқа пияҳтӯнӷитақа. ³⁹Каяхтистыма ифлъӣсюнӷита̄ңа та̄куның тагивақаминың, талўа ата̄сиҳақ. Итупилъ хўаңамнун уңуваҳтысқысюўӣ киңулиӷми аӷныӷми. ⁴⁰Уна Атама Пиюкылъқақа: китум алңунак ысҳаӷлюку Иӷнықа ухпықыхкумигу кынлыңилңуӷмың уңувалъыңылъықуқ. Ынка̄м уңуваҳлъықақа киңулиӷми аӷныӷми».

⁴¹Иудеит уңьюпҳутка̄т Иисусым хўатын пилъҳа: «Хўаңа нықыкшаңлъя̄гуңа укикақ қилягмың». ⁴²Пикат: «Иисусыңӯқ, Иосифым иӷнықа̄, лӣсимакаҳпут атаңалъю, на̄ңалъю. Сяңами хўатын пӣ: “Укика̄гуңа қилягмың?”» ⁴³Иўырңа Иисусым пикӣ: «Уңьюпыҳтыхпынаси. ⁴⁴Атаңӯқ каяхтикақ хўаңамның. Кина алңунак тагина̄нӷитуқ хўаңамнун ўыткуқун Атам тагистыкумигу хўаңамнун. Ынка̄м уңуваҳлъықақа киңулиӷми аӷныӷми. ⁴⁵Ӯкналиқистыт игақыхкақа̄т уна: “Кияӷныӷым апыҳтуӷьяҳқақӣ қамахлъюки югыт”. Тамаҳаӷми нагалъҳӣ, лӣлъҳӣ Атамың тагикаюгӯқ хўаңамнун. ⁴⁶Сюмыҳтаӷаҳпынаси китумун алңунак ысҳа̄манилюку Ата. Кияӷныӷмың тагикам лъңинаҳаӷми ысҳақақа̄ Ата.

⁴⁷Ипа уңипа̄тамси, лъңа та̄на ухпықилӷӣ кынлыңилңуӷмың уңувалъылгӯқ. ⁴⁸Хўаңа нықыкшаңлъя̄гуңа тӯникаюк кынлыңилңуӷмың уңувалъыӷмың. ⁴⁹Сивуныси ныӷыхка̄гут маннамың килга̄ни, иўырңа паниның туқуляӷа̄тка̄гут. ⁵⁰Иўырңа уна нықыкшаңлъяқ укикақ қилягмың, китум алңунак ныӷыхкумигу туқуна̄нӷитңўа̄ҳтуқ. ⁵¹Хўаңа уңувалъылитикаюгӯңа, нықыкшаңлъяқ укикақ қилягмың. Китум алңунак ныӷыхкумигу та̄на нықыкшаңлъяқ, кияҳсяҳқа̄гуқ қӯнпырухлъяк. Та̄на нықыкшаңлъяқ кымыкшакақа, тӯнақыхкыхка нунам юги уңувалъыңысқылъюки».

⁵²Та̄хкын Иудеит а̄ҳтӣра̄ӷусягуткат лъмыхның. Пикат: «Натын ӯм югым кымыкшани тӯнақагу ныӷысқылъюку?» ⁵³Иисусым пикӣ: «Ипа уңипа̄тамси, Иӷныӷан Югым кымыкшага ныӷьяҳқақаҳси, а̄ўалъю мыӷьяҳқақаҳси. Таўатын пинӷилъкуфси, уңувалъыпигитуси илюхпысини. ⁵⁴Китум алңунак ныӷыхкумигу кымыкшака, мыӷыхкумигу а̄кўа, кынлыңилңуӷмың уңувалъылгӯқ, уңуваҳлъықақалъю киңулиӷми аӷныӷми. ⁵⁵Кымыкшака нықыҳпига̄гуқ, а̄кўалъю мыӷьяҳқапӣгӯқ. ⁵⁶Китум алңунак ныӷыхкумигу кымыкшака, мыӷыхкумигу а̄кўа, кияҳтыңъӯқ хўаңамни, хўаңа Кияҳтыңӯт лъңан илюңани. ⁵⁷Атам уңувастикаюгым каяхтыкақа̄ңа, хўаңалъю уңувастақа̄ңа. Ынка̄м китум алңунак ныӷыхкумиңа уңувалъықуқ хўаңа апалъюқлъюңа. ⁵⁸Сивунымта ныӷыхкӣстун нықыкшаңлъястун аюқынӷитуңа. Ныӷыхка̄гут нықыкшаңлъямың иўырңа паниның туқуляӷа̄тка̄гут. Нықыкшаңлъя̄гуңа укикақ қилягмың. Кина алңунак ныӷыхкуми та̄хкын нықыкшаңлъямың кияҳсяҳқа̄гуқ қӯнпырухлъяк». ⁵⁹Иисусым тама̄на қамахлъюку а̄пқа̄ апыҳтуӷиңулюни синагогаңани Капернаумыми.

Апыҳтӯся̄ Кынлыңилңӯм Уңувалъҳым

⁶⁰Иисусым малихся̄ҳтыңита нагалъюку алъюлъютың пикат: «Уна апыҳтӯсяқ пияқнапихтуқ, китумңам тугуклъиҳлъықагу?» ⁶¹Уңипа̄тыстыңъунани Иисусым лӣсимакыхкаңи малихся̄ҳтыни уңьюпҳулъҳӣт таўатын, ынка̄м пикӣ: «Та̄м апыҳтулъҳым ӣлъқаюхтыстисӣ? ⁶²Сямыңʼңам пинаяӷыстык ысҳаӷьяқуфсигу Иӷныӷа Югым маюлӷӣ ныксяқыминун сивунӷани? ⁶³Таӷныӷак уңувалъылитикаюгӯк, иўырңа ю̄к уңувалъылитина̄нӷитуқ. Акузитынка лъпысинун таӷныӷа̄гутлъю уңувалъҳӯтлъю. ⁶⁴Иўырңа иляхпыси ухпықигатӣт акузитынка». (Иисусым лӣсимакыхкаңи килъю ухпықинӷилңӯт. Лӣсимакыхкаңи има пӣнлиӷьюхўа̄лъыӷмың. Талўа лӣсимакыхкаңа кинаңутаңа увыҳпагутияҳқақ лъминың.) ⁶⁵Иисусым пикӣ: «Иляхпыси ухпықинӷитылъҳа апалъюқлъюку хўатын пика̄гуңа: “Атам тагисныӷилъкумигу ю̄к хўаңамнун, тагина̄нӷитңўа̄ҳтуқ”».

⁶⁶Киңуңаның Иисусым таўатын пилъҳан угляпихлъыҳӣм малихся̄ҳтыңан унитка̄ малихся̄ӷнаниқа̄т. ⁶⁷Иисусым а̄птыкӣ қуля ма̄лӷук сӣпнықлъюку малихся̄ҳтыт: «Лъпысилъю аӷуляқсюгыстык?» ⁶⁸Симон Петырым кӣмсиқа̄: «Атанық, китумунңам пилъықыста? Лъпык акузитыхпык а̄пҳақа̄ натын алъхыӷутылъыҳқақ кынлыңилңуӷмың уңувалъыӷмың. ⁶⁹Хўаңкута ухпықамкын, лӣткақамкын лъпык Аглыӷналӷӣка̄тын Кияӷныӷым».

⁷⁰Та̄хкын Иисусым пикӣ: «Накмикыхкақақа қуля ма̄лӷук сӣпнықлъюку малихся̄ҳтыкаҳқақ, лъпысиңӯт. Иўырңа налиҳси ата̄сиқ туӷныӷа̄гуқ». ⁷¹Иисусым акузиткыңъукаңа Иуда, иӷныӷа Симон Искариотым қаюҳлъяк та̄кўаниңани увыҳпагусяҳқақыхкаңа. Иуда илякыхкаңат та̄кут қуля ма̄лӷук сӣпңалӷӣт малихся̄ҳтыт.

Иисусым Аңлыгутаңита Ухпықынӷилъкаңат

¹Киңуңаның та̄м Иисус иглыӷакақ Галилеями. Иглыӷаюгумаңилңуқ Иудеями, қаюҳлъяк Иудеит иглыӷутистыңит тама̄нлыңӯт туқусюгукаңат. ²Иудеит нықынӷаҳқылъыҳқа̄т а̄тқылӷӣ шалашымың ка̄сяҳтуңысталӷӣ. ³Иисусым аңлыгутаңита пика̄т: «Аӷуляқи ма̄кын, агля̄ Иудеямун малихся̄ҳтытын ысҳапагысқылъюки алъя̄ҳлъюхўаҳтилъыҳпының. ⁴Китум алңунак апыҳсыӷӯюлӷӣм аксяқигата̄ сялъыни. Ынка̄м таўатын пинақңукувык тамаҳаӷми югым ысҳапаглитын!» ⁵(Талўа аңлыгутаңита Иисус ухпықынӷилъкаңат.)

⁶Иисусым аңлыгутни пикӣ: «Иудеитылъыҳқақа сялин ка̄сигатуқ, иўырңа лъпыси алңунак аӷныӷни пияҳқа̄гуси. ⁷Нунам юган угумикна̄нӷитӣси, хўаңа угумика̄тңа қаюҳлъяк а̄пҳақыхкыхка сыӷлық атуқақыхкаңат. ⁸Ынка̄м лъпыси нықынӷаҳқылӷӣнун пикатык; хўаңа пинақынӷитуңа қаюҳлъяк аӷнықа сялин ка̄сигатуқ». ⁹Иисусым таўатын пилюки лъңа Галилеямыткақ.

Иисус Нықынӷаҳқымъун Пилӷӣ

¹⁰Иисусым аңлыгутаңи нықынӷаҳқымъун пикат. Та̄хкын киңуңитның югнун ысҳаҳтысюкаҳпынани лъңалъю пикақ. ¹¹Нықынӷаҳқымъи Иудеит иглыӷутистыңита ивақа̄т Иисус, пимаӷмың: «На̄гу та̄на ю̄к?» ¹²Угляпихлъыҳӣт югыт таўанлыңӯт сигутқӯткыхка̄т Иисус. Иляңита пика̄т: «Иисус пинӣпихтуқ ю̄к». Иляңита пика̄т: «Нака̄, пӯҳтақӣ югыт». ¹³Иўырңа китум алңунак қа̄йңакун акузиткумаңилъкаңа Иисус, алиңлюни Иудеит иглыӷутистыңитның.

Иисус Апыҳтуӷилӷӣ Нықынӷаҳқылӷӣни

¹⁴Нықынӷаҳқылъҳа неделям қукаӷитақуқлъю, Иисус Храмымун агляӷлюни апыҳтуӷикақ. ¹⁵Иудеит иглыӷутистыңита сяӷӣӷаягулъюку пикат: «Натын уна ю̄к лӣтыҳлъяхта игаӷья̄маңилңуқ?» ¹⁶Иисусым кӣмсиқӣ: «Апыҳтӯсянка хўаңамның пиңунӷитут, Каяхтистымның пиңӯт. ¹⁷Китум алңунак Кияӷныӷым пиюкылъҳа атуқсюгукумигу лӣсимаксяҳқақа̄, апыҳтуӷилъқа Кияӷныӷмың пиңутаңа, налиӷмың хўаңамның катам пиңутаңа. ¹⁸Кина алңунак апыҳтуӷилӷӣ лъми катам сюмыҳтаӷалъыӷминың қӯлвалъыңнақуткыңъӯқ. Иўырңа кина алңунак қӯлвалъыңыстинақуткылӷӣ каяхтикамун, акузиңӯқ ипапигмың, иқлъыңиқигатуқ. ¹⁹Қамахлъюси лӣсимакаҳси Моисейем Лӣлиҳтӯсялиткақӣси, иўырңа налиҳӣнаҳпыси қа̄ткигатаси. Сяңамаңам туқунъақуткыстыңъа?» ²⁰Югыт кӣмсиқа̄т: «Туӷныӷа̄м ӣтҳума̄тын. Китум туқунъақуткатын?» ²¹Иисусым пикӣ: «Ата̄симың алъя̄ҳлъюхўаҳтияма Субботами қамахлъюси сяӷӣӷаюхтуси. ²²Моисейем қылъқақӣси обрезаниясқылъюки иӷныси (қайўа сивуныси обрезанияка̄ӷңа̄та Моисейем обрезаниясқылъҳан сивуңани). Нақам лъпыси обрезанияҳқа̄нӷата иӷныси Субботами пӣқаси. ²³На̄фқыңъунӷилъкуфсигу Моисейем Лӣлиҳтӯся̄ обрезанияӷилъыҳпысигун Субботами, сяңама угумиягутыстыңъа ю̄к на̄лъҳутңўа̄лъымның Субботами? ²⁴Нанқихтихпынаси югыт ся̄қутаңи лӣгикңўа̄ҳпынаки, нанқихтӣқитык ылъқуӷулъюси».

Иисус, Христосыңўа̄, Кияӷныӷым Каяхтыка̄?

²⁵Та̄хкын иляңи Иерусалимыӷмӣт пикат: «Та̄ната ю̄к туқусюкаңат. ²⁶Нақам ысҳа апыҳтуӷилӷӣ югнун, нақамлъю иглыӷутистымта сянақигата̄т. Қа̄ хўа̄ лӣгика̄т Христосыңутаңа, Кияӷныӷым каяхтыка̄? ²⁷Иўырңа хўаңкута лӣсимакаҳпут та̄на ю̄к накын пиңутаңа. Христосыпик тагикан, китум алңунак налъюксяҳқақа̄ накын пиңутаңа».

²⁸Иисус паниның апыҳтуӷиңулюни Храмыми, игляхтулюни пикақ: «Қайўа лӣсимакңўа̄ӷыстыхӯ кинаңутка, накынлъю пиңутка? Хўаңамның тагимаңитуңа. Каяхтистыка ипапигӯқ, иўырңа лъпыси налъюкаҳси. ²⁹Хўаңа лӣсимакақа қаюҳлъяк лъңаның тагика̄гуңа, лъңан каяхтыкақа̄ңа». ³⁰Иисус таўатын пиян иляңита югыт тугунақуткыхка̄т. Иўырңа китум алңунак ахтуқа̄маңилъкаңа қаюҳлъяк аӷныӷа сялин ка̄сигалңуқ. ³¹Иўырңа угляпихлъыҳӣт югыт ухпықыхкаңат Иисус. Ынка̄м пикат: «Лӣсимакаҳпут уна ю̄к Христосыңӯқ, қаюҳлъяк угля̄пихлъюку алъя̄ҳлъюхўаҳтӣқ Христосым пияҳқа̄ның».

Иудеит Лӣгикынӷилъкаңит Иисусым Акузитаңи

³²Иляңита Фарисеит нагақуқӣт югыт таўатын акузимлыӷа̄лъҳӣт Иисусымың, ынка̄м лъңиталъю, первосвященнигытлъю каяхтыкӣт кылыңакистыт тугусқылъюку. ³³Та̄хкын Иисус пикақ: «Натыңӣҳақ лъпысинилъюңа агляҳлъықуңа Каяхтистымнун. ³⁴Иваҳлъықаҳпысиңа иўырңа на̄лъкынъа̄нӷитаҳпысиңа. Такукамнун агляҳпагниңитуси». ³⁵Иудеит иглыӷутистыңита илятың пикӣт: «Навык уна ю̄к пинақа на̄лъкысяҳқа̄фқа̄ми? Грегыт акуляңитнилңӯт юпут такуляӷнақакӣ? Қа̄ апыҳтуӷилъықуқ Грегынун? ³⁶Сямыңтуқ Иисус пӣ хўатын пӣқңами: “Иваҳлъықаҳпысиңа иўырңа на̄лъкынъа̄нӷитаҳпысиңа; такукамнун агляӷна̄нӷитуси”?»

Иисусым Акузитки Аглыӷналӷӣк Таӷныӷак

³⁷Киңулиқ аӷныӷа нықынӷаҳқылъҳым мыгнуналъыҳпига̄лӷӣ. Таўани аӷныӷми, Иисус ныкывлюни игляхтулюни пикӣ: «Кина алңунак мықсюкуми тагилюни хўаңамнун мыӷли. ³⁸Китум алңунак ухпықыхкумиңа, илюңаның қамакын кӣўыт ма̄қсяҳқа̄гут уңувалъыңыстикаюгыт мыӷыт». Акузитыт Игақыхкат таўатын пика̄гут. ³⁹Иисусым акузиткыңъукык Аглыӷналӷӣк Таӷныӷак. Кияӷныӷым Таӷныӷагни сялин тӯнигата̄к қаюҳлъяк сялин кывгигалъкаңа Иисус қӯлвалъылитыҳлъягналюку. Иўырңа та̄кўаниңани тама̄кут ухпықилӷӣт Иисусымың, алъхыӷусяҳқа̄гут Таӷныӷагның.

А̄ҳтӣра̄ӷуткыхкаңат Иисус

⁴⁰Нагасямыхтыху Иисус таўатын акузилӷӣ иляңи югыт пикат: «Уна ю̄к ипапыста̄қ ӯкналиқистыңӯқ ныӷьюкыхкаҳпут». ⁴¹Иляңита пика̄т: «Христосыңӯқ». Иўырңа иляңита пика̄т: «Христос тагияҳқа̄ўа̄ Галилеямың? ⁴²Акузитыт Игақыхкат пика̄гут Христос тагилъықнилюку Давидым ныңлъюгутаңаның, алъхыҳлъықнилюкулъю Вифлеемыми, Давидым кияҳфиганың». ⁴³Иляңита югыт ипапиҳқуткумаңилъкаңат Иисус, ⁴⁴ынка̄м тугуюка̄т иўырңа китум алңунак ахтуқа̄маңилъкаңа.

Иудеит Иглыӷутистыңит Ухпықинӷилңӯт

⁴⁵Кылыңакистыт каяхтыка̄ялӷӣт тугусқылъюку Иисус, ка̄сята первосвященнигытлъю, Фарисеитлъю а̄птыкӣт: «Сяңан тагинъаниӷыстыху Иисус?» ⁴⁶Кӣмсиқӣт: «Кина алңунак та̄тун юхтун акузиңигатуқ». ⁴⁷Фарисеит а̄птыкӣт: «Лъпысилъю Иисусым пӯҳтисӣ? ⁴⁸Хўаңкута иглыӷутистынилъю, Фарисеинилъю лӣсимакапут Моисейем Лӣлиҳтӯсӣ. Налимта̄а ухпықатху Иисус? Нака̄! ⁴⁹Тама̄кут юлӷутыт налъюкӣт Моисейем Лӣлиҳтӯсӣ, ынка̄м Кияӷныӷым на̄фқылъықӣ». ⁵⁰(Ата̄сиқ Иудеит иглыӷутистыңат Никодимыңуфтуқ, сивунӷани Иисусымун пикақ.) Никодимым пикӣ: ⁵¹«Лӣлиҳтӯсямнъи нанқихсяҳқақынӷитаҳпут ю̄к, ўытқукун нагалъюку лӣгикыхкумтыху сяматаңа». ⁵²Пика̄т: «Лъпыклъю Галилеямың пиңузин? Лӣнъақики Акузитыт Игақыхкат. Лӣлъықан ӯкналиқистыңитуқ тагикамың Галилеямың». ⁵³Қамахлъюни тама̄на аӷуляқӯткақ, нымыхнун агляҳтӯткақ.

Гылгаӷнӣқақ Аӷнақ

¹Иисус агляқақ Елеоным найӷаҳанун. ²Уна̄ңулюку аглянқихтыкақ Храмымун. Юлӷун тагиляӷа̄сян Иисусым ақумлюни апыҳтуқӣ. ³Лӣлиҳтӯсяның апыҳтуӷикаюгытлъю, Фарисеитлъю тагитка̄т аӷнақ аңуксякақ гылгаӷнӣӷумалюку. Ныкывыслъюку сивуңитхун югыт, ⁴Иисус пика̄т: «Апыҳтуӷиста, уна аӷнақ аңуксяка̄гуқ гылгаӷнӣӷумалюку. ⁵Лӣлиҳтӯся̄н Моисейем қылӷусяқа̄, аӷнат таўатын пиката туқутысқылъюки милюҳпага̄таҳӣнақ. Лъпык сямың пинаяҳсигу?» ⁶Иисус а̄птыка̄т таўатын Лӣлиҳтӯсят кипулъыгмун сямың писқылъюки, қаюҳлъяк анахутысюгукаңат. Иисус пыӷлыҳлъюни иӷныӷўа̄ӷминың игақақ нунакун. ⁷А̄пта̄таӷьятни Иисусым ныкывлюни пикӣ: «Налиҳпыси сыӷлыҳқылъықшахӣлңӯм милюӷьюхўа̄ӷлигу уйӷагмың». ⁸Алъя пыӷлыҳлъюни иӷныӷўа̄ӷминың игақақ нунакун. ⁹Нагасямыхтыху Иисус, аӷуляқӯтыкыстақат. Нуйыклъӣт сивуклъютың, та̄хкын тама̄кут иляңит аӷуляқӯткат. Иисус лъңинаҳа̄ҳтыкақ, иўырңақун та̄на аӷнақ паниның ныкывӷалӷӣ сивуңани. ¹⁰Иисусым ныкывынқихлъюни а̄птыка̄: «Аӷнами, на̄ки анахунъистытын? Налиҳӣнӣта̄ аӷью̄ӷьяҳқа̄нилютын пинӷитатын?» ¹¹Кӣмсиқа̄: «Югунӣқ, налиҳӣнӣта̄ пинӷита̄тңа». Ынка̄м Иисусым пика̄: «Хўаңалъю аӷью̄ӷьяҳқа̄нилютын пинақынӷитамкын. Аӷуляқи, алъя сыӷлыҳқыхпынаң».

Иисус Ниӷугӯқ Нунам Юганун

¹²Та̄кўаниңани Иисусым алыҳқуӷля̄тақӣ югыт. Пикӣ: «Хўаңа ниӷугӯңа нунам юганун. Китум малихтыкумиңа мамлыгми кияҳна̄нӷитуқ, кынылгулъықуқ уңувалъылитикаюгмың». ¹³Фарисеит пика̄т Иисус: «Та̄ўа апыӷля̄таҳтутын лъпынун, иўырңа акузитытын ипапиҳқусиҳқӣтут». ¹⁴Иисусым пикӣ: «Акузиткыӷңа̄ӷма хўаңамның катам, акузитынка ипаңӯт қаюҳлъяк лӣсимакақа накын тагитка̄нка, лӣсимакақалъю такуяҳқақа. Лъпыси налъюкаҳси накын пиматка, талўа налъюкаҳси такуяҳқақа. ¹⁵Нанқихтӣқуси нунам югатун, хўаңа нанқихсигатақа кина алңунак. ¹⁶Нанқихтинақсяқума нанқихтилъқа ылъқуӷутңанаяҳтуқ қаюҳлъяк лъңина̄нӷитуңа: Ата Каяхтистыка хўаңамнитуқ. ¹⁷Лӣлиҳтӯсяҳпысини игақңа̄қ ма̄лӷук югык сяңўа̄ а̄пқумыхтыху таўатыңўа̄қ, акузилъҳик ухпықылъықӣт ипаңунилюки. ¹⁸Ынка̄м хўаңамның а̄пҳақуңа, Атамлъю Каяхтистыма а̄пҳақа̄ңа». ¹⁹А̄птыка̄т: «На̄гу Атан?» Иисусым кӣмсиқӣ: «Налъюкаҳпысикут Атакулъҳӣгни. Иўырңа хўаңа лӣсимаксяқуфсиңа, Атакалъю лӣсимакнаяӷаҳси». ²⁰Иисус апыҳтуӷиңулӷӣ таўатын Храмыми манимың афлъыңакивиган туңаңани. Иўырңа китум алңунак тугумаңитка̄, қаюҳлъяк пилъыҳқа̄ сялин ка̄сигалңуқ.

Иудеялӷутыт Ухпықыхкаңат Иисус

²¹Алъямың Иисусым пикӣ югыт: «Унилъықамси, иваҳлъықаҳпысиңа, иўырңа туқулъықуси сыӷлыҳқылъыҳтӯмаҳпыси. Такукамнун агляӷна̄нӷитуси». ²²Та̄хкын Иудеит иглыӷутистыңит пикат: «Иисус хўатын пӣқ: “Такукамнун агляӷна̄нӷитуси”. Қа̄ лъминың туқунъақуқ?» ²³Иўырңа Иисусым пикӣ: «Лъпыси ма̄кын нунамың пиңӯси, хўаңа памакын пиңӯңа. Лъпыси нунам пикӣси, хўаңа нунам пикынӷита̄ңа. ²⁴Ынка̄м уңипа̄тамси туқулъықнилюси сыӷлыҳқылъыҳтӯмаҳпыси. А̄а туқулъықуси сыӷлыҳқылъыҳтӯмаҳпыси ухпықынӷилъкуфсиңа хўаңа хўаңаңутка». ²⁵А̄птыка̄т: «Кинаңузинми?» Иисусым кӣмсиқӣ: «Хўаңаңӯңа а̄пҳақылъымтун пӣнлиӷьюхўа̄лъыӷмың има. ²⁶Акузиткысяҳқаҳлъягӯңа лъпысиның, нанқихтусиҳқаҳтӯңалъю лъпысинун. Иўырңа Каяхтикақ хўаңамның ипаңӯқ, ынка̄м нунам юганун а̄пҳақанка нагатканка лъңаның».

²⁷Югыт лӣгикумаңилъкаңат Иисусымун акузиткыңъутаңа Ата. ²⁸Ынка̄м Иисусым пикӣ: «Кыфкуфсигу Иӷныӷа Югым лӣлъықаҳси хўаңа хўаңаңутка. Лӣлъықаҳси сяңўа̄ ма̄на пӣқыхкыхка хўаңамның пиңигатулъка. Лӣлъықаҳси акузиткыхкаюгутка Атам апыҳтӯсяқыхкаҳӣна̄ хўаңамнун. ²⁹Каяхтикақ хўаңамның хўаңамнитуқ. Ӣўлың атуқыхкаюўа̄қа ыфқуҳтиналӷӣ лъңанун ынка̄м унисигата̄ңа». ³⁰Иисус таўатын акузималюку, угляпихлъыҳӣм ухпықыхка̄.

Итымутылъық Сыӷлыҳқылъыӷмың

³¹Иисусым пикӣ Иудеит ухпықилӷӣт лъңаның: «Нагнықуфси қа̄ткулъюси апыҳтулъымнун, ипапыста̄қ малихся̄ҳтыкамси. ³²Ипапиҳқылъық лӣлъықаҳси ынка̄м ипапиҳқылъҳым итымулъықӣси». ³³Пика̄т: «Авраамым киңунқӣлъю, қыпҳаҳтыля̄ӷунӷитукут. Сяңамта пизикут итымусяҳқа̄нилюта?» ³⁴Иисусым кӣмсиқӣ: «Ипа уңипа̄тамси, кина алңунак сыӷлыҳқыңъалӷӣ, сыӷлыҳқылъыӷмун қыпҳаҳтыля̄ӷыстун аюқуқ. ³⁵Қыпҳаҳтыля̄қ ныңлъюгутынисяҳқа̄нӷитуқ қӯнпырухлъяк. Иўырңа ныңлъюгутыт иӷныӷат лъңитнисяҳқа̄гуқ қӯнпырухлъяк. ³⁶Ынка̄м Иӷныӷым итымыстыкаңиси, ипапыста̄қ итымьяҳқа̄гуси. ³⁷Лӣсимакамси Авраамым киңунқӣси. Иўырңа туқусюўақаҳпысиңа қаюҳлъяк тугуклъӣгалъкыси апыҳтӯсянка. ³⁸Уңипа̄тамси Атама кылгутка̄ның хўаңамнун, иўырңа лъпыси атахпыси қылӷутка̄ пӣқаҳси».

³⁹Кӣмсиқа̄т: «Хўаңкута атакаҳпут Авраам». Иисусым пикӣ: «Ипа Авраамым авақутақсяқаңиси, атуқақнаяӷаҳси Авраамым пика̄. ⁴⁰Иўырңа хўа̄ лъпыси туқунъақуткақаҳпысиңа, хўаңа ипапигмың уңипа̄тикаюк нагақуқамның Кияӷныӷмың. Авраам таўатын пинаянӷитуқ. ⁴¹Атуқңўа̄ҳси атахпыси пика̄». Иудеит пика̄т: «Кияӷныҳӣна̄гуқ Атавут, ынка̄м хўаңкута лъңан иӷныпикӣлъю». ⁴²Иисусым пикӣ: «Кияӷнық ипа Атаксяқуфсигу пиниқнаяӷаҳпысиңа, қаюҳлъяк тагика̄гуңа Кияӷныӷмың, ынка̄м хўа̄ хўа̄нтуңа. Хўаңамның тагимаңитуңа, Кияӷныӷым каяхтыкақа̄ңа. ⁴³Лӣгикигатаҳси сямың пилъқа қаюҳлъяк тугуклъиӷьяҳқақынӷилъкыси апыҳтуӷилъҳынка. ⁴⁴Авақутақӣси атахпыси туӷныӷа̄м, ынка̄м атуқсюўақаҳси атахпыси пиюкылъҳа. Пӣнлиӷьюхўа̄лъыӷмың има юхтаҳтыңӯқ. Ипапиҳқылъық атуқаҳсигата̄ қаюҳлъяк ипапиҳқылъҳилңуқ. Иқлъыңиқныӷмини та̄ўаңинаҳақ айӷӣткани пӣқыхкаңа қаюҳлъяк иқлъыңиқыстыңулӷӣ, атакыхкаңа иқлъыңам. ⁴⁵Иўырңа хўаңа акузӣқуңа ипапигмың, ынка̄м тама̄кын апалъюқлъюку ухпықигатаҳпысиңа. ⁴⁶Налиҳпыси ипапиҳқуткынъаяҳтаңа сыӷлыҳқыстыңутка? Қайўа акузиӷңа̄ӷма ипапигмың, сяңамаңам ухпықигастыңъа? ⁴⁷Китум алңунак Кияӷныӷым пиңан тугуклъиӷақӣ Кияӷныӷым акузитаңи. Иўырңа лъпыси тугуклъӣгатаси Кияӷныӷым акузитаңи, қаюҳлъяк Кияӷныӷым пикынӷилъкаңиси».

Иисус А̄ңатаӷаҳтуқ Авраамымың

⁴⁸Иудеит пика̄т: «Пӣмкын, Самарияӷмӣңӯтын, туӷныӷа̄млъю ӣтҳума̄тын. Ипа пизика̄н?» ⁴⁹Иисусым кӣмсиқӣ: «Туӷныӷа̄м итылъҳита̄ңа. Қӯлваӷақақа Атака̄ иўырңа лъпыси қӯлвӣгатаҳпысиңа. ⁵⁰Қӯлвалъыңнақуткыңъунӷитуңа хўаңамның. Иўырңа Ата̄сӣгуқ қӯлваӷиюлӷӣ хўаңамның, лъңаңӯқ нанқихтияҳқақ ылъқуӷулъюни. ⁵¹Ипа уңипа̄тамси, китум алңунак қа̄ткыхкумики апыҳтуӷилъҳынка, туқуна̄нӷитңўа̄ҳтуқ». ⁵²Иудеит пика̄т Иисус: «Та̄ўа лӣтамкын туӷныӷалгуфтутын илюхпыни. Талўа Авраамылъю, ӯкналиқистытлъю туқуляӷа̄тка̄гут. Иўырңа лъпык пӣтын: “Китум алңунак қа̄ткыхкумики апыҳтуӷилъҳынка, туқуна̄нӷитңўа̄ҳтуқ”. ⁵³Сюмыҳпынӣ а̄ңатаӷаҳсӣн атамнъың Авраамымың? Авраам туқука̄гуқ, ӯкналиқистытлъю туқуляӷа̄тка̄гут. Кинаңунилютын пӣқсин?» ⁵⁴Иисусым кӣмсиқӣ: «Хўаңамның қӯлвақума та̄на қӯлвалъық сясӣна̄нӷитуқ. Қӯлваӷикаюк хўаңамның Атакақа. Лъпыси Кияӷнықнӣқлъюку ⁵⁵налъюкаҳси. Хўаңа лӣсимакақа. Налъюкникумкун иқлъыңиқыстыңулъықуңа лъпысистун. Иўырңа хўаңа лӣсимакақа, қа̄ткақанкалъю сямың пилъҳи. ⁵⁶Атази Авраам қуяҳлъяка̄гуқ ысҳаҳлъықнилюку тагилъқа. Ысҳақақа̄, ынка̄м қуяка̄гуқ». ⁵⁷Иудеит пика̄т: «Ай? Сямың пизин? Ысҳа̄маңитңўа̄ӷан Авраам. Талўа сялин ю̄к ма̄лӷук қуля сӣпнықлъюку аюмиқиңуҳсигатутын». ⁵⁸Иисусым пикӣ: «Ипа уңипа̄тамси, талўа сивуңани Авраамым Хўаңаңӯңа». ⁵⁹Иисус таўатын пиян, югыт уйӷагмың тугуля̄ткат милюҳпага̄таӷналюку. Иўырңа Иисус ӣӷлюни а̄ныхкақ Храмымың.

Иисусым На̄лъҳускаңа Ая̄кақ Ю̄к

¹Иисусым иглыӷуткылъюку ысҳақа̄ ю̄к ая̄ңаӷми алъхықақ. ²Малихся̄ҳтыңан а̄птыка̄: «Апыҳтуӷиста, китум сыӷлыҳқылъҳан уна ю̄к ая̄ңаӷми алъхыҳтыстагу, лъңан сыӷлыҳқылъҳа̄ налиӷмың аңаюқахкынка?» ³Иисусым кӣмсиқӣ: «Ӯм югым налиӷмың аңаюқахкынка сыӷлыҳқылъҳита ая̄ңасныӷита̄. Уна ю̄к ая̄ңаӷми алъхықа̄гуқ ысҳӣсқылъюку Кияӷныӷым аҳтуӷьяҳқа̄нӷилъҳа лъңакун. ⁴Нагныӷутыпыста̄ӷьяҳқақапут қыпҳақӣ Каяхтистыма паниның аӷныӷулюку. Унугьяҳтуӷа̄, кина алңунак қыпҳаӷна̄нӷитуқ унугми. ⁵Паниның нунамылъюңа ниӷука̄ңа нунам юган». ⁶Таўатын пикаткылъюку нунакун қысиӷлюни сюнамың акумлюку аңиҳыхкакык югым ӣскык. ⁷Та̄хкын ю̄к пика̄: «На̄йваӷаӷмун Силоамымун аӷмигьяҳта̄». (Силоам хўатын писӣлӷӣ: «Туюқақ».) Ынка̄м ю̄к аӷмигьяҳтуӷлюни тагиялӷӣми ысҳа̄сягулъюни.

⁸Увилиӷныӷиталъю, иляңиталъю аўын ысҳаӷақыхкаңат та̄на ю̄к туңсиӷралӷӣ ынка̄м а̄пқуӷа̄ӷуткат: «Унаңунӷита̄ ю̄к ақумлюни туңсиӷраӷақсялӷӣ?» ⁹Иляңи пикат: «А̄а та̄наңӯқ». Иўырңа иляңи пикат: «Нака̄, алъяңӯқ, кинаңӯқ лъңасюгнилңуқ». Ынка̄м ая̄ңаялӷӣм пикӣ: «Та̄наңӯңа». ¹⁰А̄птыка̄т: «Натын ысҳа̄сягусин?» ¹¹Кӣмсиқӣ: «Югым а̄тқылӷӣм Иисусымың қысиӷлюни сюнамың акумлюку аңиҳлъюкык ийыхка аӷмигьяҳтӣсқа̄ңа Силоамымун. Ынка̄м аӷмиглюңа ысҳа̄сягутуңа». ¹²А̄птыка̄т: «На̄гу та̄на ю̄к?» Югым кӣмсиқӣ: «Ся̄, налъюкақа̄!»

Фарисеит А̄пқуӷа̄қаңат Ая̄ңаялӷӣ

¹³Та̄хкын ая̄ңаялӷӣ югыт агля̄тка̄т Фарисеинун. ¹⁴(Таўани аӷныӷми Субботаңулӷӣ Иисусым қысиӷлюни сюнамың акумлюку ысҳа̄сягутыстақңамигу ю̄к.) ¹⁵Фарисеит а̄птыка̄т ю̄к: «Натын ысҳаӷьягусин?» Кӣмсиқӣ: «Югым аңиҳлъюкык сюнамың ийыхка, аӷмигьялӷӣңа ысҳаҳтуңа». ¹⁶Иляңи Фарисеит пикат: «Уна ю̄к Кияӷныӷмың пиңунӷитуқ, қаюҳлъяк қа̄ткигатӣ Лӣлиҳтӯсят Субботамың аюқылӷӣт». Иўырңа иляңи пикат: «Ю̄к сыӷлыҳқыста, алъя̄ҳлъюхўаҳтиляӷна̄нӷитуқ таўатылңуӷмың». А̄ҳтӣра̄ӷуткат.

¹⁷Алъя а̄птыка̄т ю̄к: «Лъңан ысҳаҳтыста̄тын. Сямың пинаяҳсигу?» Югым кӣмсиқӣ: «Ӯкналиқистыңӯқ». ¹⁸Иудеит иглыӷутистыңита ухпықумаңилъкаңат ая̄ңая̄таңалъю, ысҳаӷьягутылъҳалъю, ынка̄м ақфастыкахкыт аңаюқакык. ¹⁹А̄птыкахкыт: «Уна иӷнықыстыху? Ая̄ңаӷми алъхыӷуманикыси, натын ысҳаӷьягута?» ²⁰Аңаюқахкынка кӣмсиқӣ: «Лӣсимакаҳпут иӷнықаҳпут. Лӣсимакаҳпут ая̄ңаӷми алъхықа̄гуқ, ²¹иўырңа налъюкаҳпут натын ысҳаӷьягусиматаңа. Талўа налъюкаҳпут китум ысҳаӷьягутыстылъҳа. А̄птыху югуҳтыка̄гуқ, кӣмсиӷна̄ӷӣси лъминың». ²²Аңаюқакык таўатын пикак алиңлютык Иудеит иглыӷутистыңитның. Иглыӷутистыт ата̄сӣҳтыңъўа̄қат китум алңунак ухпықникагу Иисус, Христосыңунилюку иқитысяҳқа̄люку синагогамың. ²³Та̄на апалъюқлъюку аңаюқакык хўатын пикак: «Югуҳтыка̄гуқ, а̄птыху».

²⁴Ынка̄м Иудеит иглыӷутистыңита туқлъюнқихлъюку ая̄ңаялӷӣ ю̄к, пика̄т: «Усюқигу Кияӷнық. Лӣсимакаҳпут та̄на ю̄к, Иисус, сыӷлыҳқыстыңӯқ». ²⁵Пикӣ: «Налъюкақа̄ сыӷлыҳқыстыңутаңа, иўырңа лӣсимакңўа̄ӷақа ая̄ңаялӷӣңа хўа̄ ысҳаӷьягутуңа». ²⁶Иудеит иглыӷутистыңита а̄птыка̄т: «Ся̄тын? Натын ысҳаӷьягутыстатын?» ²⁷Кӣмсиқӣ: «Уңипа̄тңўа̄ӷамси, иўырңа нагасюгигатаҳпысиңа. Сяңан алъя нагасюгыстыху? Лъпысилъю малихся̄ҳтыңуҳсюгыстык лъңанун?» ²⁸Та̄хкын угумиягулъюку пика̄т: «Лъпык малихся̄ҳтыка̄тын. Хўаңкута Моисейем малихся̄ҳтыкӣлъю. ²⁹Лӣсимакаҳпут Кияӷныӷым алыҳқуқақа̄ Моисей. Иўырңа та̄на ю̄к, Иисус, налъюкаҳпут накын пиңутаңа». ³⁰Югым пикӣ: «Кӣ! Лъпыси иглыӷутистыни налъюкумастыху накын тагика̄таңа, нақамлъю лъңан ысҳаӷьягутыста̄ңа. ³¹Қамахлъюта лӣсимакңўа̄ӷаҳпут Кияӷныӷым нагасигатӣ сыӷлыҳқыстыт. Иўырңа Кияӷныӷым нагаткаюўа̄ кина алңунак манигӯлъҳӣ, қа̄ткулъҳӣ лъминун. ³²Има нуна пӣнлиӷьюхўа̄лъҳаның китум алңунак нагақӣгата̄ кина алңунак ысҳаҳтыстинилюку ая̄ңаӷми алъхықамың. ³³Та̄на ю̄к Кияӷныӷмың пиңунӷисяқуми сянаянӷитуқ». ³⁴Пика̄т: «Сыӷлыҳқыстыңӯтын има алъхынӷаҳа̄тыхпының, сяңанңам хўаңкута апыҳтуӷнақуткысикут?» Та̄хкын а̄ныстыстыка̄т синагогамың.

Иисусым Акузиткыхкаңа Ая̄ңалъық

³⁵Иисусым нагақуқа̄ ая̄ңаялӷӣ ю̄к а̄нысиманилюку синагогамың. Ынка̄м иваӷлюку на̄лъкысямигу пика̄: «Ухпықсигу Иӷныӷа Югым?» ³⁶Югым а̄птыка̄: «Югунӣқ, кинаңа̄ўа Иӷныӷа Югым? Уңипа̄тиңа ынка̄м ухпықлъякун». ³⁷Иисусым пика̄: «Ысҳама̄н, алыҳқуӷақа̄тын». ³⁸Югым пика̄: «А̄а, Атанық, ухпыҳтуңа». Та̄хкын сыгысқуҳлъюни манигуқа̄ Иисус.

³⁹Иисус пикақ: «Тагиңӯңа нунамун а̄фқуӷналюки югыт, тама̄кут ысҳӣгасялӷӣт ысҳӣсқылъюки, тама̄кут ысҳақаюгыт ая̄сналюки». ⁴⁰Иляңита Фарисеит туңаңанилңӯт Иисус нагалъюку а̄птыка̄т: «Сямың пизин? Хўаңкуталъю ая̄ңанизикӯт?» ⁴¹Иисусым кӣмсиқӣ: «Ая̄ңаяқуфси Кияӷныӷым пинаянӷитӣси сыӷлыҳқыстыңунилюси. Иўырңа хўатын пика̄тыхпысиның: “Ысҳақаюгӯкут” тама̄кын апалъюқлъюку Кияӷныӷым пӣқӣси сыӷлыҳқыстыңунилюси».

Пынъӣӷнӣҳталъю, Пынъӣӷилъю

¹Иисусым пикӣ: «Ипа уңипа̄тамси, ю̄к нагун алңунак маюӷлюни пынъӣлӷутамун ӣтқуми амигунӷилңуҳқун, тыглыгнӣҳтыңӯқлъю, ўаяҳтыңӯқлъю. ²Ю̄к итылӷӣ амихкун пынъӣӷнӣҳтыңӯқ, ынка̄м ³кылыңакистым амигмылңӯм қылъпыӷутақа̄. Пынъӣӷыт нагақуныӷмыхтыху мыңа такўа̄қа̄т. Та̄м пынъӣӷнӣҳтым лъми катам пынъӣни а̄тҳитхун туқлъюҳтыӷлюки а̄нутақӣ. ⁴Лъңан катам пынъӣӷи қамахлъютың а̄нлыӷа̄нъыӷата, пынъӣӷнӣҳта сивуңитни иглыҳтақуқ ынка̄м пынъӣӷыт малихлъыӷа̄тақа̄т, қаюҳлъяк мыңа лӣсимакыхкаңат. ⁵Малихна̄нӷита̄т кина налъюкыхкаҳтың йыӷлыги қимагӯсяҳқа̄гут, қаюҳлъяк налъюкыхкаңат мыңа». ⁶Та̄хун уңипаӷа̄ткун Иисусым уңипа̄ткӣ та̄кут Фарисеит, иўырңа лӣгикумаңилъкаңат сямың писӣтаңа.

Пинилӷӣ Пынъӣӷнӣҳта

⁷Ынка̄м Иисусым пиля̄тақӣ: «Ипа уңипа̄тамси, хўаңа амигӯңа пынъӣӷнун. ⁸Қамахлъютың югыт сивумни тагикат тыглыгнӣҳтыңӯтлъю ўаяҳтыңӯтлъю ынка̄м пынъӣӷыт нагасимаңитӣт та̄кут. ⁹Хўаңа амигӯңа, кина алңунак ӣтқуми хўаңамкун югулилъыңьяҳқа̄гуқ. Ынка̄м ӣтҳақлъюни, а̄нақлъюни, на̄лъкутақлъюнилъю ныӷьяҳқамың пилъықуқ. ¹⁰Тыглыгнӣҳта та̄ўаңинақ тыглыгьяқаюгӯқ, юхтаӷьяқаюгӯқ, на̄фқӣяқаюгӯқ, иўырңа хўаңа тагика̄гуңа югыт уңувалъыңысқылъюки уңувалъыпигмың.

¹¹Хўаңа пинилӷӣңӯңа пынъӣӷнӣҳта. Пинилӷӣм пынъӣӷнӣҳтым туқуматкысяҳқақӣ пынъӣни. ¹²Акилыҳтуқаюк пынъӣӷнӣҳтыңунӷитуқ ынка̄м пынъӣӷыт лъңан пикынӷитӣ. Та̄м қыпҳаҳтым ысҳақумигу ама̄ тагилӷӣ, қимагьяҳқа̄гуқ пынъӣӷыт унилъюки. Та̄на ама̄ пынъӣҳтыкан қамахлъютың пынъӣӷыт миңилъықут. ¹³Ю̄к акилыҳтуқаюк қимагьяҳқа̄гуқ, қаюҳлъяк тымңи қыпҳаҳтыңулӷӣ ынка̄м лыган ўа̄кна̄нӷитӣ пынъӣӷыт. ^14-15Хўаңа пинилӷӣңӯңа пынъӣӷнӣҳта. Атам лӣсимакылъҳатун хўаңа, хўаңалъю лӣсимакылъымтун Ата, таўатыҳпигақ лӣсимаканка пынъӣӷынка, пынъӣӷма лӣсимака̄тңа. Туқуматкылъықанка пынъӣӷынка. ¹⁶Пынъӣҳтӯңа пынъӣлӷутамынъыӷилңуӷмың. Лъңитлъю тагисяҳқапыста̄қанка, нагалъықа̄т мыка ынка̄м пынъӣӷынка ата̄систун лъӣҳлъықут, ата̄сиқ пынъӣӷнӣҳтыклъюку.

¹⁷Атам пиниқа̄ңа қаюҳлъяк уңувалъқа тӯньюкыстаӷлюку аюқақа выҳнықихналюку. ¹⁸Китум алңунак иқинъа̄нӷита̄ уңувалъқа, қаюҳлъяк хўаңамның катам тӯньюглюку аюқақа. Тӯнилъыҳқалгӯңа уңувалъымның, выҳтилъыҳқалгӯңа уңувалъымның. Таўатын Атама қылъқақа̄ңа».

¹⁹Алъямың Иудеит а̄ҳтӣра̄ӷуткат, Иисусым акузитаңи апалъюқлъюки. ²⁰Угляпихлъыҳӣт пикат: «Та̄на ю̄к туӷныӷа̄м итыӷлюку налъюңуҳтыстыкақа̄, сяңанңам нагатақыстыху?» ²¹Иўырңа иляңи пикат: «Ю̄к туӷныӷа̄м налъюңуҳтыстыка̄ таўатын акузина̄нӷитуқ. Туӷныӷа̄м ысҳаҳтысягулъықагӯ ая̄кақ?»

Иудеит Иҳсякыхкаңат Иисус

²²Уксю̄лӷӣ, Иерусалимыми Иудеит нықынӷаҳқылӷӣт нықамикналюку Посвящатлъҳа Храмым. ²³Иисус иглыҳтыңъулӷӣ Соломоным притворыңан, туңаңани Храмым. ²⁴Иудеит увитаңиӷлюку пика̄т: «Натын тахка̄н кукшиқуткыснақсин хўаңкунъун? Христосыңукувык уңипа̄тңўа̄ҳқут».

²⁵Иисусым кӣмсиқӣ: «Уңипа̄тңўа̄қақамси иўырңа ухпықигатаҳпысиңа. Алъя̄ҳлъюхўаҳтӣқуңа Атама А̄тҳакун лӣгикысқылъюңа кинаңутка. ²⁶Иўырңа лъпыси ухпыӷигатуси қаюҳлъяк пынъӣқынӷилъкымси. ²⁷Лӣсимаканка пынъӣӷынка, нагалъюку мыка малихтақа̄тңа. ²⁸Тӯнанка кынлыңилңуӷмың уңувалъыӷмың, ынка̄м туқуна̄нӷитңўа̄ҳтут. Китум алңунак акуқаӷна̄нӷитӣ ӣхымның. ²⁹Атама тагивақақӣ пынъӣӷынка. А̄ңыҳлъяхтуқ китумың алңунак, ынка̄м китум алңунак акуқаӷна̄нӷитӣ Атама ӣханың. ³⁰Атакулъҳӣгни ата̄систун аюқукуң».

³¹Та̄хкын Иудеит тугуля̄лъя̄тақат уйӷагмың туқунъалюку Иисус. ³²Иўырңа Иисусым пикӣ: «Ысҳапагаҳпысиңа угляпихлъыҳӣ аныӷныҳқилъық апыӷӣӷақа Атама аҳтуӷьяҳқа̄нӷилъҳакун. Налӣтнун та̄кут аныӷныҳқилъыӷма милюҳпага̄таӷьюгыстыңъа?» ³³Иудеит кӣмсиқа̄т: «Туқунъақынӷитамкын аныӷныҳқилъҳын апалъюқлъюку, та̄ўаңинақ акузилъҳын апалъюқаҳпут. Тымңи югӯтын. Кияӷныӷмун сыӷлыҳқыҳлъяка̄гутын Кияӷныҳтун аюқнилютын пӣқңавык!» ³⁴Иисусым пикӣ: «Лӣлиҳтӯсяҳпысини игақңа̄қ Кияӷныӷым пилъҳа хўатын: “Лъпыси кияӷныӷӯси”. ³⁵Лӣсимакапут Акузитыт Игақыхкат алъяңуҳсяҳқа̄нӷитут. Акузитни Игақыхкани Кияӷныӷым кияӷныӷунимакаки ³⁶сяңамаңам сыӷлыҳқыҳлъягуманистыңъа Кияӷныӷмун? Апалъюқыстыхӯ Кияӷныӷмун Иӷнықнилъқа? Атам накмикыхкақа̄ңа, каяхтыкақа̄ңа нунамун. ³⁷Атуқынӷилъкумкун Атама пӣқыхкаңа, ынңа̄талъ ухпықынӷинъакыфсиңа, ³⁸иўырңа атуқақақа Атама пӣқыхкаңа. Ухпықынӷитыӷңа̄ҳпысиңа хўаңа, ухпықитыки қыпҳақанка ынка̄м лӣлъықаҳси, лӣгикылъықаҳси Ата хўаңамнитутаңа, хўаңа лъңани». ³⁹Та̄хкын Иудеит тугунақлъя̄таӷьяӷа̄т, иўырңа Иисус анакақ лъңитның.

⁴⁰Та̄хкын Иисусым аӷвиӷлюкык Кӣўык Иорданымың а̄тқылӷӣк аглянқихтыкақ Иоанным крестиӷивиксюхўа̄лъҳанун, ынка̄м тама̄нтыкақ. ⁴¹Угляпихлъыҳӣ ю̄к тагиляӷа̄ткақ лъңанун, пикат: «Иоанн алъя̄ҳлъюхўаҳтимаңитуқ, иўырңа Иоанным апылъҳа ӯмың югмың қамахлъюни ипаңӯқ». ⁴²Таўани угляпихлъыҳӣм ухпықыхка̄ Иисус.

Туқулъҳа Лазарым

¹Та̄ўаңуқ ю̄к, а̄тқылӷӣ Лазарымың қинуюкақ. Вифаниями кияҳтыңъулӷӣ наягыгмини Мариями, Марфами. ²(Та̄м Мариям та̄кўаниңани Атанӷым итыгӣ кӯвиклъюки тыпыңлъя̄симың нуяминың сяңихсяҳқақӣ. Мариям кӯхқыхкаңа Лазарь қинуюлӷӣ.) ³Мариямлъю, Марфамлъю уңипа̄сяҳтуқат Иисус: «Атанық, пиниқыхкан қинуюгӯқ». ⁴Иисус уңипа̄сятни пикақ: «Қинуюлъҳан апалъя̄ туқулъҳунӷитуқ иўырңа усюқисӣлюни Кияӷныӷмун пиңӯқ, ысҳӣсқылъюкулъю аҳтуӷьяҳқа̄нӷилъыҳлъяга Иӷныӷан Кияӷныӷым».

⁵Иисусым пиниқыхкык Марфамлъю аңлыгуткулъҳӣк, Лазарьлъю. ⁶Иўырңа нагақуӷңа̄ӷмигу Лазарым қинуюлъҳа, паниның ма̄лӷук аӷныӷык тама̄нтыкақ. ⁷Та̄хкын Иисусым малихся̄ҳтыни пикӣ: «Иудеянъақылъта». ⁸Малихся̄ҳтыңита пика̄т: «Апыҳтуӷиста, лыган қантаӷақун Иудеит туқунъақыхкақа̄тын милюҳпага̄тамың. Хўа̄ алъя аглянқихсюхсӣн?» ⁹Иисусым кӣмсиқӣ: «Аӷныӷым ата̄сим авылъҳа ниӷугӯқ. Кина алңунак иглыҳтыкуми аӷныӷми на̄хна̄нӷитуқ, қаюҳлъяк ысҳаӷақа̄ тумыни нунам ниӷугакун. ¹⁰Иўырңа кина алңунак иглыҳтыкуми унугми на̄хсяҳқа̄гуқ қаюҳлъяк ниӷугилңуқ илюмини». ¹¹Иисус таўатын пилюни пикӣлъю: «Илякумта̄ҳпут Лазарь қава̄гуқ, таҳтуҳсяҳтуӷнақақа». ¹²Малихся̄ҳтыңита пика̄т: «Атанық, қава̄куми пинӣҳлъықа̄». ¹³Иисусым пиңуяқаңи Лазарь туқуманилюку, иўырңа малихся̄ҳтыңита сюмыҳтаӷа̄ткыхка̄т Лазарь қава̄нилюку. ¹⁴Ынка̄м Иисусым уңипа̄тңўа̄қӣ: «Лазарь туқума̄қ. ¹⁵Қуя̄ңа лъңанинъыӷитка̄лӷӣңа туқа̄қңан. Апалъюқақа лъпысинун ухпықатаҳӣсқылъюңа. Тагитык, такулътыху». ¹⁶Та̄хкын Фомам (Малӷимыңлъю а̄тқылӷӣм) пикӣ малихся̄ҳтылгутни: «Хўаңкуталъю туқулгусиӷьяҳтӯлътыху».

Иисус Туқулъыӷмың Уңуваҳтылъхӯқлъю, Уңувалъҳӯқлъю

¹⁷Иисусым ка̄лъюни Вифаниямун нагақуқа̄ Лазарь туқуманилюку, ынмис ыстамагуҳтақыфтӣ аӷныӷыт лъивылъыӷминың. ¹⁸Вифания қантаӷанлыңуқ Иерусалимымың, ¹⁹ынка̄м угляпихлъыҳӣт Иудеит тагиляӷа̄ткат илютуҳсяӷналюкык Марфалъю, Мариялъю, кӯгӷыхкынка туқулъҳаның.

²⁰Марфам нагақуӷьямигу Иисус тагинилюку па̄сқа̄, Мария нымыткақ. ²¹Марфам пика̄ Иисус: «Атанық, ма̄нтыка̄яқувык кӯхқа туқунаянӷитуқ. ²²Иўырңа лӣсимакақа, талўа ма̄тын Кияӷныӷым тӯньяҳқақа̄тын сямың алңунак а̄птыкувык». ²³Иисусым пика̄: «Кӯгӷын уңуваҳлъықуқ уңувалъыӷмун». ²⁴Марфам пика̄: «Лӣсимакақа уңуваҳлъықуқ туқукат уңуваҳтӯската киңулиӷми аӷныӷми». ²⁵Иисусым пика̄: «Хўаңа туқулъыӷмың уңуваҳтылъҳӯңалъю, уңувалъҳӯңалъю. Китум алңунак ухпықыхкумиңа туқуяӷңа̄ӷми, уңувалъылгуяҳқа̄гуқ. ²⁶Ынка̄м кина алңунак кияҳтыкуми хўаңамни, ухпықыхкумиңалъю, туқуна̄нӷитңўа̄ҳтуқ. Марфа, ухпықсигӯ та̄на?» ²⁷Марфам кӣмсиқа̄: «А̄а Атанық, ухпықамкын Христосыңӯтын, Иӷныӷа Кияӷныӷым. Лъпыңӯқ тагияҳқа̄ника̄т нунамун».

Иисус Қиякақ

²⁸Марфам таўатын пилюку агляқақ. Туқлъюӷлюку аңлыгутни Мария, лъңина̄ҳалюку пика̄: «Апыҳтуӷиста ка̄сима̄қ, а̄птақа̄тын». ²⁹Уңипа̄сятни, Мария ныкыфқаҳтыкақ Иисусымун пиналюни. ³⁰(Иисус паниның ныҳпигаӷмун аглӣгалңуқ, сялин Марфам налъяӷвиганилңуқ.) ³¹Иудеит Мариянкунилңӯт илютуҳсяӷилӷӣт Мариямың ысҳапаглюку ныкыфқаҳлъюни а̄ньян малихтыка̄т. Сюмыӷмыхни лъивыӷмун қияяҳтуӷнақнилюку пика̄т.

³²Иўырңа Мария агляқақ Иисусымун. Ысҳаӷьямигу сикмӯлъюни мануңакун пика̄: «Атанық, ма̄нтыка̄яқувык кӯхқа туқунаянӷитуқ». ³³Иисусым ысҳаӷлюку Мария қиялӷӣ, тама̄кутлъю Иудеит малигуткат қия̄ӷӯлъҳӣт ынңа̄талъ сыӷлылӣҳлъякақ. ³⁴А̄птыкӣ: «Нагун лъӣвӷумастыху?» Пика̄т: «Атанық, таги, ысҳаӷьяҳтуҳу». ³⁵Иисус қиякақ. ³⁶Ынка̄м Иудеит пикат: «Ысҳаҳу таўатыҳлъяк пиниқума̄гу Лазарь». ³⁷Иўырңа иляңи пикат: «Иисусым на̄лъҳусимакумигу ая̄кақ, сяңан Лазарь туқунӷитыснаниҳтагу?»

Иисусым Уңуваҳтыкаңа Лазарь

³⁸Иисус лъивыӷмун агля̄ткылъюку алъя сыӷлылӣнқихтыҳлъякақ. Лазарым лъӣвӷа сюфлъю̄лӷӣ, уйӷагрухлъягмың па̄йңа ся̄плъюни. ³⁹Иисус пикақ: «Иқитыху уйӷак». Марфам пика̄: «Атанық, ыстамагуҳтӣ аӷныӷыт туқутминың ынка̄м тыпыңыҳлъяхтуқ». (Марфа наякыхкаңа туқукам югым.) ⁴⁰Иисусым пика̄: «Уңипа̄ткақамкын ухпыӷьяқувык ысҳаҳлъықан Кияӷныӷым аҳтуӷьяҳқа̄нӷилъҳа». ⁴¹Та̄хкын иқитка̄т уйӷак па̄йңаның лъӣвӷым. Иисус қӯлмун ысҳаӷлюни пикақ: «Ата̄й, игамсиқаюгвикамкын нагатақыхкывңа. ⁴²Лӣсимакақа қӯнпың нагақуӷақаҳпыңа. Иўырңа таўатын пӣңа югыт увитымнилңӯт апалъюқлъюки, ухпықысқылъюку лъпынун каяхтыка̄тка». ⁴³Иисус таўатын пилюни, игляхтупихлъюни пикақ: «Лазарь, а̄ни». ⁴⁴Ю̄к туқука̄ялӷӣ а̄ныхкақ. Ӣхилъю, итыгӣлъю ӣмгувикңалӷӣт қӣпаӷаӷмың, хина̄лъю қантаӷлюни алъяның қӣпаӷаӷмың. Иисусым пикӣ: «Қӣпаӷа̄т ӣкитыки ынка̄м иглыҳлъи».

Иглыӷутистыт Агӷиткат Туқунъалюку Иисус

⁴⁵Та̄кут Иудеит малигуткат Мариямун ысҳапака̄т Иисус уңуваҳтилӷӣ, ынка̄м угляпихлъыҳӣм ухпықыхка̄т Иисус. ⁴⁶Иўырңа иляңи Иудеит Фарисеинун пикат, уңипа̄ткӣт Иисусым уңуваҳтилъҳаның. ⁴⁷Та̄хкын первосвященнигытлъю, Фарисеитлъю қырңуҳлъюки агӷистыт а̄птыкӣт: «Сянақыстаңам? Та̄на ю̄к алъя̄ҳлъюхўаҳтиҳлъягӯқ. ⁴⁸Нагныҳтыстыкумтыху таўатын, тамаҳаӷми ухпықылъықа̄т. Ынка̄м Римыӷмӣт тагилютың на̄фқылъықа̄т Храмлъю юпутлъю».

⁴⁹Каиафалъю таўанлыңуқ, первосвященнигулӷӣ таўани аюмиқулъыӷми. Каиафам пикӣ: «Лъпыси налъюкңўа̄ҳтуси! ⁵⁰Итагнаӷатаӷаӷнаяҳтуқ ата̄сим югым туқуматкысяқумики югыт, қамахлъютың юмта на̄фқылъыҳқӣтның. Иўырңа лъпыси лӣгикигатаҳси та̄на». ⁵¹Каиафа лъминың таўатын акузимаңилңуқ, Кияӷныӷым акузистыкақа̄ қаюҳлъяк первосвященнигулӷӣ таўани аюмиқулъыӷми. Таўатын пилъыӷмикун ӯкналиқуткыхка̄ Иисусымун туқуткылъықнилюки Иудеит. ⁵²Иудеяңина̄т туқуткыхпынаки иўырңа қамахлъюки Кияӷныӷым авақутӣ миңитңалӷӣт тамаңани туқуткысяҳқақӣ ата̄сӣҳтысқылъюки ныңлъюгуткулъҳӣт. ⁵³Та̄хкын аӷныӷмың кынляңа Иудеит иглыӷутистыңита агӷиткыхка̄т натын туқутылъыҳқамың Иисус. ⁵⁴Ынка̄м Иисус алӣлъюни алңунак иглыҳнаниқақ Иудеит акулңитни. Иўырңа тама̄кын аӷуляқыхкақ килга̄н туңаңанун, нымун атилъқылӷӣ Эфраим. Малихся̄ҳтыкулъҳӣт тама̄нтыкат.

⁵⁵Иудеит Нықынӷаҳқылъҳат Пасхамун ка̄сяҳтулӷӣ, ынка̄м накын алңунак угляпихлъыҳӣ ю̄к агляҳтӯткақ Иерусалимымун. Таўани ята̄ҳқыхкат нықынӷаҳқылъыӷмун укмаңиҳсялъыӷмыхтыхун Лӣлиҳтӯсят писқылъҳистун. ⁵⁶Югыт ивақа̄т Иисус ынка̄м қырңуӷусямың Храмыми а̄птыкӣт илятың: «Иисусылъю тагинақақа̄ Нықынӷаҳқымъун? Сюмыҳпысини сянақа?» ⁵⁷Первосвященнигытлъю, Фарисеитлъю тугуналюку Иисус лӣлиҳтӯткақыхкаңат югнун: «Налиҳпыси лӣсимакыхкумигу Иисусым на̄нтуляңа ўатаҳлъяк уңипа̄нъакыфсикут».

Иисус Илякумта̄ӷминилңуқ Вифаниями

¹Аӷвинлыгуҳтақуқлъю аӷнық Нықынӷаҳқылъҳанун Пасхам, Иисус Вифанияткақ, Лазарым кияҳфиганун. (Та̄на Лазарь Иисусым уңуваҳтыкақа̄ туқулъыӷмың). ²Таўани Иисус ята̄ҳқутка̄т нықынӷаҳқунъалюку ынка̄м Марфам кытфаҳтӯткӣ ақылъқат. Лазарлъю таўанлыңуқ малигулъюни Иисусымун. ³Та̄хкын Мариям тагиткакык акитупихлъыҳӣк тыпыңлъя̄сик нардопигмың улима̄ӷык. Иисусым итыгӣ кӯвиклъюки сяңихтыкӣ нуяминың. Ынка̄м мыңтыӷам илюңа тыпыңлъя̄сиҳпагниҳқўа̄кақ. ⁴Иуда Искариотлъю таўанлыңуқ, Иисусым малихся̄ҳтыңа. (Та̄кўаниңани увыҳпагусяҳқақңукаңа Иисус). Иуда пикақ: ⁵«Та̄кук тыпыңлъя̄сик 300 динарийем акика̄к. Акиксяқлъыгыстун, акиңа та̄на аклъюмалӷӣнун тунқуӷнаяҳтуқ». ⁶Таўатын пика̄лӷӣ мыгнукылӷӣстун аклъюмалӷӣт иўырңа мыгнукыпихтыкаңа мани. Афлъыңакистыңулӷӣ малихся̄ҳтыт манилӷутӣтның ынка̄м тугуткаюгулӷӣ лъңанун катам атуҳқамың тыглыгнӣҳтыңутминың.

⁷Иисусым пика̄: «Авылӷаҳу, афлъыңакума̄к тыпыңлъя̄сик аӷныӷмун хўавык ята̄ҳқынъалюку лъивылъыҳқақа. ⁸Аклъюмалӷӣт қӯнпың тама̄нтут. Хўаңа қӯнпың лъпысининъа̄нӷитуңа».

Иудеит Агӷиткат Лазарь Туқунъалюку

⁹Угляпихлъыҳӣт Иудеит нагақуӷлюку Иисус Вифаниямынъилюку ысҳаӷьяҳтӯтка̄т, таўавыклъю Лазарь ысҳаӷналюку Иисусым уңуваҳтыка̄. ^10-11Лазарь апалъюқлъюку угляпихлъыҳӣт Иудеит унилъюки иглыӷутистытың ухпықыхка̄т Иисус. Ынка̄м та̄кут первосвященнигыт агӷитңўа̄қат туқунъалюку Иисус, ынраӷңам хўа̄ агӷиткыхка̄т Лазарылъю туқунъалюку.

Югыт Усюқыхкаңат Иисус Иерусалимылъҳӣ

¹²Уна̄миңани юлӷутыҳлъягыт Нықынӷаҳқылъҳанун Пасхам тагиляӷа̄ткат, нагақуқа̄т Иисус тагӣқнилюку Иерусалимымун. ¹³Ынка̄м кыпӯлъютың пальмат уқфигыт авайӣтның па̄сқа̄т Иисус акилӷӯмаӷмың:

«Усюқнаҳалык Кияӷнық!

Кияӷныӷым қуяслъигу Умӣлга Израилым тагилӷӣ А̄тҳакун Атанӷым!»

¹⁴Иисусым навӷаӷлюку осёлаӷақ қа̄йңакун ақумыхкақ таўатыңўа̄қ Акузитыт Игақыхкат пинақнилъҳистун. Та̄кут Акузитыт хўатын пика̄гут:

¹⁵«Алиңыхпынаси, югани Иерусалимым!

Ысҳаҳтыху, умӣлыхси тагӣқуқ ақумлюни осёлыӷа̄м қа̄йңакун».

¹⁶Таўани пилъыӷми Иисусым малихся̄ҳтыңита лӣгикумаңилъкаңат та̄на ӯкналиқылъық. Ўытку киңуңаның Иисусым уңувалӷанлъю, маюлъҳанлъю қилягмун нықа̄тка̄т та̄на ӯкналиқылъық, нықа̄ткӣтлъю апыӷӣқӣт лъңанун.

¹⁷Юлӷутыт уңипақңукаңат ысҳапалъыҳтың Иисусым уңуваҳтилъҳа Лазарымың, а̄нысқылъҳалъю лъивыӷмың. ¹⁸Ынка̄м угляпихлъыҳӣм югым па̄сқа̄т Иисус, қаюҳлъяк нагақуқақыхкаңат та̄на алъя̄ҳлъюхўаҳтилъық. ¹⁹Та̄хкын Фарисеит илятың пикӣт: «Сяңўа̄ тамаҳаӷми анахутңӯқ хўаңкунъун. Ысҳақаҳтыхуқун, ӣңунаҳаӷми югым малихтыңъўа̄ Иисус».

Иисусым Акузиткыхкаңа Туқулъыҳқани

²⁰Иляңилъю Грегыт Иерусалимытка̄лӷӣт манигӯнъалютың Нықынӷаҳқылъҳани Пасхам. ²¹Агляӷлютың Филиппымун, пика̄т: «Югунӣқ, ысҳаӷьюўақаҳпут Иисус». (Филипп Вифсаидамың пиңулӷӣ, Галилеямылңуӷмың.) ²²Ынка̄м Филиппым уңипа̄лъюку Андрей, уңипа̄сяҳтуқа̄к Иисус. ²³Иисусым пики: «Афлъю ка̄сима̄қ Иӷныӷан Югым қӯлвалъыңыҳлъялъыҳқа̄. ²⁴Ипа уңипа̄тамси, ўыткуқун пӣтун ифкаҳлъюни нунамун итыӷлюни туқукуми пӣтысқуҳлъягьяҳқа̄гуқ, а̄мта̄м туқунӷилъкуми та̄ўа ата̄сиҳа̄лъықуқ пӣтун. ²⁵Китум алңунак пиниқыхкумигу уңувалъыни ифлъяяҳқақа̄. Иўырңа китум алңунак угумикыхкумигу уңувалъыни хўани нунами кынлыңилңуӷмың уңувалъыңьяҳқа̄гуқ. ²⁶Китум алңунак қыпҳа̄сюкумиңа малихсяҳқақа̄ңа. Ынка̄м қыпҳаҳтыка хўаңамнисяҳқа̄гуқ на̄нсяӷңа̄ӷма. Атама қӯлваӷьяҳқақа̄ кина алңунак қыпҳа̄тилӷӣ хўаңамның.

²⁷Ма̄тын уңувасихка сыӷлылӣӷӯк. Сямың пиляңа? Хўатын пиляңа̄: “Ата̄й, югулиңа икфиқылъыҳқамның”? Нака̄, таўатын пина̄нӷитуңа қаюҳлъяк тагика̄гуңа икфиқналюңа. ²⁸Ата̄й, а̄ңылъыҳлъяга атыҳпык алӣҳтигу». Та̄хкын ма қилягмың пикақ: «А̄ңылъыҳлъяга атыӷма алӣҳсима̄қа, алъя алӣҳлъықақа».

²⁹Юлӷутым ныкывӷалъҳӣм таўани нагалъюку та̄на ма пикат: «Калъюгуҳта̄». Иўырңа иляңи пикат: «Яқулгым алыҳқуӷўа̄ Иисус». ³⁰Иисусым пикӣ: «Ма та̄на лъпысинун аюқуқ, хўаңамнун пиңунӷитуқ. ³¹Хўа̄ ма̄тын Кияӷныӷым нанқихнақа̄ нунам юга, хўа̄ ма̄тын Кияӷныӷым ыхнақңўа̄ иглыӷутистыңа ӯм нунам. ³²Хўаңа кывылъыңыхкума нунамың, та̄хун тагиляӷа̄тыслъықақа қамахлъюку ю̄к хўаңамнун». ³³Иисус таўатын пикақ апыӷналюку натын туқулъыҳқани. ³⁴Юлӷутыҳлъягыт пика̄т: «Нагақуқақаҳпут Лӣлиҳтӯся̄ның Моисейем, Христосыңӯқ кияҳсяҳқа̄гуқ қӯнпырухлъяк. Ынка̄м сяңавык пизин: “Иӷныӷа Югым кывылъыңьяҳқа̄гуқ”? Кинаңа̄ўа та̄на: “Иӷныӷа Югым”?» ³⁵Та̄хкын Иисусым пикӣ: «Ниӷук лъпысининъақңӯқ натыңӣҳақ. Ынка̄м иглыҳтык ниӷугаӷлюку, мамлыхфагилган. Кина алңунак иглыҳлъыҳӣ мамлыгми налъюкуқ натмун пӣқутни. ³⁶Ынка̄м ниӷук паниның лъпысинилъюку ухпықитыху, авақуталӣтысқылъюси ниӷугмун». Иисус таўатын пилюни кахтаҳтыкақ лъңитның.

Иудеит Ухпықынӷилъкаңат Иисус

³⁷Югыт ысҳапагьяӷңа̄ӷмыхтыху Иисус угля̄пихлъюку алъя̄ҳлъюхўаҳтилӷӣ паниның ухпықумаңилъкаңат. ³⁸Ухпықумаңитылъҳита апыӷӣҳтыстыка̄ Исаиям ӯкналиқистым хўатын пилъҳа:

«Атанық, китум ухпықаки сяңўа̄т а̄пқапут?

Атанӷым аҳтуӷьяҳқа̄нӷилъыни китумун ысҳаҳтыстагу?»

³⁹Тама̄кын апалъюқлъюку ухпыҳпагниңитка̄гут. Исаия хўатынлъю ӯкналиқыхка̄гуқ, Кияӷнық пика̄гуқ:

⁴⁰«Ӣйңит ая̄стыкақанка ысҳа̄нъаюката.

Умьюгӣтлъю лӣгиксяҳқа̄наниҳқыхкақанка лю̄рақ қӣвнаюката хўаңамнун на̄лъҳутысқылъютың».

⁴¹Исаия таўатын пика̄гуқ ысҳақақутминың Иисусым ниӷуҳқылъыҳқа̄ ынка̄м акузиткыхкақыхкаңа.

⁴²Қайўа угляпихлъыҳӣт Иудеит ухпықынӷисяӷңа̄тху Иисус, нақамынрақ угляпихлъыҳӣт иглыӷутистыңита ухпықыхка̄т Иисус, Христосыңутаңа. Иўырңа а̄пҳумаңилъкаңат алиңлютың Фарисеит а̄ныснаюкаңистың синагогамың, ⁴³қаюҳлъяк та̄кут иглыӷутистыт усюқылъыңьюгақут югның пакихулъюку Кияӷныӷым усюқылъыҳқа̄ның.

⁴⁴Иисус акилӷӯкақ: «Китум алңунак ухпықыхкумиңа, хўаңаңинаӷма ухпықыхпынаңа, ухпықңўа̄ Каяхтистыка. ⁴⁵Китум алңунак ысҳақумиңа, ысҳа̄ңўа̄ Каяхтистыка. ⁴⁶Тагика̄гуңа нунамун ниӷугулюңа, китум алңунак ухпықыхкаңаңа мамлыгмынъаниҳлъықуқ. ⁴⁷Китум алңунак нагалъюки акузитынка қа̄ткынӷилъкаки, нанқихна̄нӷитақа аӷьюӷьяҳқа̄нилюку, қаюҳлъяк нанқихсяҳтӯнӷитанка нунам юги, йыӷлыги югулияҳтӯўанка. ⁴⁸Китум алңунак иҳсякыхкаңаңалъю, тугуклъинӷилъкакилъю акузитынка нанқихтистыкаҳқалгӯқ. Акузитыт акузиткыхканка нанқихлъықа̄т киңулиӷми аӷныӷми, ⁴⁹қаюҳлъяк акузитынка хўаңа пикынӷитанка. Атам Каяхтистыма қылӷутка̄ның акузӣқуңа. ⁵⁰Лӣсимаканка қылӷусӣ кынлыңилңуӷмың уңувалъыңыстикаюгӯт. Ынка̄м акузиткақыхкынка Атам қылӷусяқӣ хўаңамнун акузиткысқылъюки».

Иисусым Уӷвуҳтуқаңи Малихся̄ҳтыми Итыгӣт

¹Ата̄сӣҳтыкақ аӷнық Пасхам Нықынӷаҳқылъыҳқа̄нун. Иисусым лӣсимакыхкаңа қантаӷақун Атамун аглялъыҳқани унилъюку уна нуна. Қӯнпың пиниқыхкақӣ тама̄кут лъми пини нунамылңӯт, пиниқыхкақӣ кынлымун.

²Таўани иӷивгаӷми Иисусылъю малихся̄ҳтыкулъҳӣт қырңуӷуткат ныӷналютың. Туӷныӷа̄м апыӷӣқа̄ сюмыҳтаӷа̄ткысқылъық Иуда Искариотымун увыҳпагутысқылъюку Иисус. (Иуда иӷнықыхкаңа Симоным.) ³Иисусым лӣсимакыхкаңа Атам тӯныхкақыхкаңа аҳтуӷьяҳқа̄нӷилъыӷмың сямун тамаҳа̄нун. Лӣсимакыхкаңалъю Кияӷныӷмың пиңутни, аглялъыҳқанилъю Кияӷныӷмун. ⁴Ныӷӯтңулютың таўани Иисус ныкывлюни, қа̄слъӣт а̄ткани матаҳқуӷлюки, выхлъюк қукамикун қилъҳутка̄. ⁵Та̄хкын аӷмигусик мыӷмың имиӷлюкык малихся̄ҳтыми итыгӣт уӷвуҳтуқӣ, қукаминилңуӷмың выхлъюгмың сяңихтақлъюки. ⁶Иисусым ка̄тка̄ Симон Петр, Петырым а̄птыка̄: «Атанық, итыганка уӷвуӷнақсикӣ?» ⁷Иисусым кӣмсиқа̄: «Лӣгикна̄нӷитан ся̄қутка ма̄тын иўырңа та̄кўаниңани лӣгикылъықутын». ⁸Петырым пика̄: «Итыганка уӷвуӷна̄нӷитңўа̄ӷатын». Иисусым пика̄: «Уӷвунӷилъкумки итыгаҳтын, малихся̄ҳтыкнаниҳлъықамкын». ⁹Симон Петырым пика̄: «Атанық, нақам итыганка уӷвуныӷмың та̄қыхкуфки ӣхынкалъю, на̄сқуқалъю пинакытын». ¹⁰Иисусым пика̄: «Ю̄к уӷвуҳқынъыӷмини иқаңӣтақа̄, итыгаҳӣнӣ уӷвуӷьяҳқа̄ўақут қагани иглыҳлъюни итыныӷмини. Қамахлъюси иқаңитуси, иўырңақун кина ата̄сиқ». ¹¹Иисусым лӣсимакыхкаңа кинаңутаңа увыҳпагутияҳқақ лъңаның. Тама̄кын апалъюқлъюку хўатын пика̄лӷӣ: «Қамахлъюси иқаңитуси, иўырңақун кина ата̄сиқ».

¹²Та̄қсямики итыгӣт уӷвуҳтуныӷмың қа̄слъӣт а̄ткани а̄лъюки ақумынқихлъюни а̄птыкӣ: «Лӣгикынӷистыхӯ та̄на уӷвуҳтуӷилъқа итыгаҳпысиның? ¹³Туқлъюӷақаҳпысиңа Апыҳтуӷистымыңлъю, Атаныӷмыңлъю, ылъқуӷаҳтақаҳпысиңа, қаюҳлъяк таўатытуңа. ¹⁴Хўаңа, Атаныҳпысини, Апыҳтуӷистыхпысини уӷвӯӷақумки итыгаси лъпысилъю уӷвуӷьяҳқақаси иляхпыси итыгӣт. ¹⁵Таўатын пӣңа успутақысқылъюку лъпысинун. Ынка̄м лъпысилъю пӣқитык хўаңа пилъымтун лъпысинун. ¹⁶Ипа уңипа̄тамси, қыпҳаҳта а̄ңатаӷанӷитуқ умӣлыгминың, уңипаҳталъю а̄ңатаӷанӷитуқ каяхтистыминың. ¹⁷Лӣсимакыхкуфсики тама̄кут қуялъықуси таўатын пикуфси».

Иисусым А̄пқаңа Увыҳпагутылъыҳқани

¹⁸«Акузиткыңъунӷитамси қамахлъюси. Лӣсимаканка натытуляңи накмикыхканка. Иўырңа апыӷӣӷьяҳқа̄гуқ Акузитнилңуқ Игақыхкани хўатын пилъық: “Югым ныӷылгусиӷикам хўаңамның увыҳпагуткақа̄ңа”. ¹⁹Уңипа̄тамси та̄на сивутҳулъюку, ынка̄м апыӷӣқан ухпықылъықаҳпысиңа хўаңа лъңаңӯңа. ²⁰Ипа уңипа̄тамси, китум алңунак тугуклъиқумигу каяхтыкақа̄, хўаңалъю тугуклъиҳлъықа̄ңа. Ынка̄м китум алңунак тугуклъиқумиңа, тугуклъиҳлъықа̄ Каяхтикақ хўаңамның».

²¹Иисусым апыӷлюку увыҳпагутылъыҳқани ынңа̄талъ қа̄мхурухлъяк қивӷуҳлъякақ, пикӣ: «Ипа уңипа̄тамси, налиҳпыси увыҳпагунъақңўа̄ңа». ²²Малихся̄ҳтыт ысҳақақуткат лъмыхның қаюҳлъяк налъюнықсюкыхка̄т кина пикатаңа. ²³Ата̄сиқ малихся̄ҳта пиниқыхка̄ Иисусым ақумгалӷӣ ся̄ӷўани. ²⁴Симон Петырым апақулюку та̄на малихся̄ҳта а̄птысқыхка̄ кина пӣқутаңа. ²⁵Та̄м малихся̄ҳтым малъыглюни Иисусымун а̄птыка̄: «Атанық, кинаңа̄ўа увыҳпагутинақылӷӣ лъпынун?» ²⁶Иисусым кӣмсиқа̄: «Ныплъюку нықыкшаңлъяқ қаю̄симун тӯнылъықақа увыҳпагутияҳқамун хўаңамның». Ынка̄м Иисусым тугулюку нықыкшаңлъяқ, ныплъюку, тӯныхка̄ Иуда Искариотымун, иӷныӷанун Симоным. ²⁷Лыган Иудам туўа̄ нықыкшаңлъяқ, Туӷныӷа̄м ӣтқа̄ Иуда. Иисусым пика̄ Иуда: «Та̄на пияҳқан пӣӷаҳтигу». ²⁸Налиҳӣнӣта̄ таўанлыңӯт лӣгикумаңилъкаңат сямың Иисусым Иуда пикатаңа. ²⁹Иудам афлъыңакңукык манилӷутак, ынка̄м сюмыҳтаӷа̄ткыхка̄т сямың тукфиӷияҳтӣсқынъилюку аклъюкыхкамың нықынӷаҳқымъун, налиӷмың аклъюмалӷӣнун тӯнияҳтӣсқынъилюку. ³⁰Ынка̄м Иудам ныӷлюку нықыкшаңлъяқ а̄ныхкақ. Унугулӷӣ таўани.

³¹Иуда а̄ньян Иисус пикақ: «Хўа̄ ма̄тын югыт ысҳаӷа̄т натын Иӷныӷа Югым қӯлвалъыңылъҳа, ынка̄м лъңакун Кияӷнық қӯлвалъыңуқ. ³²Кияӷнық қӯлвалъыңыңукан Иӷныӷакун Югым, Кияӷныӷым қӯлваӷьяҳқақа̄ лъмикун қантаӷаҳақун.

³³Таӷнуҳаҳамни, унисяҳтуңыстаӷамси. Қайўа иваӷьяӷңа̄ҳпысиңа, такукамнун пина̄нӷитуси. Иудеит иглыӷутистыңитлъю уңипа̄ткақанка таўатын. ³⁴Уңипа̄нъақамси нутаӷамың қылӷусямың: Пиниқутулъюси. Пиниқутусяҳқа̄гуси катам хўаңа пиниқылъымтун лъпыси. ³⁵Пиниқускуфси тамаҳаӷми югым лӣсимакылъықӣси хўаңамнун малихся̄ҳтыңунилюси».

Иисус Петырымун Налъюнқынъақнилӷӣ

³⁶Симон Петырым а̄птыка̄ Иисус: «Атанық, навык пинақсин?» Иисусым кӣмсиқа̄: «Такуяҳқамнун малихна̄нӷитаҳпыңа ма̄тын иўырңа та̄кўаниңани малигулъықутын». ³⁷Петырым а̄птыка̄: «Атанық, сяңан малихнақынӷисикын ма̄тын? Туқуткысяқлъыгўа̄мкын хўа̄». ³⁸Иисусым кӣмсиқа̄: «Ипа туқуткылъықсиңа̄? Ипа уңипа̄тамкын, пиңаюның налъюнқылъықаҳпыңа петух қалӷиҳтыстыхпына̄н».

Иисус Тӯмңӯқ Атамун

¹Иисус пиля̄тақақ: «Қа̄мнаси сыӷлылӣҳтыстыхпынаки, сиӷимакитыху Кияӷнық, сиӷимакитыңъа хўаңалъю. ²Угля̄пихтуқ ныкаҳқақ Атама мыңтыӷа̄ни ынка̄м ята̄ҳқусяҳтуӷнақамси ныкаҳқамың. Таўатынъыӷисяқан уңипа̄нъаянӷитамси. ³Ята̄ҳқунъыӷмың апыӷӣқумси тагинқихлъюңа тугуклъиҳлъықамси, хўаңамнитысқылъюси кияҳфимни. ⁴Лӣсимакаҳси тума такунақыхкыхка». ⁵Фомам пика̄ Иисус: «Атанық, налъюкаҳпут навык пинақутын ынка̄м натынңам лӣсимакылъықыстыху тума?» ⁶Иисусым кӣмсиқа̄: «Хўаңа тӯмңӯңа, ипапилъҳӯңа, уңувалъҳӯңа. Кина алңунак Атамун агляӷна̄нӷитуқ ўытқукун хўаңамкун. ⁷Лӣсимакңўа̄ӷьяқуфсиңа, лӣсимакнаяӷаҳси Атакалъю. Иўырңа хўакын кынляңа лӣтаҳсилъю, ысҳаӷаҳсилъю».

⁸Филиппым пика̄: «Атанық, кылгутигу Ата хўаңкунъун ынка̄м итагнаӷилъта». ⁹Иисусым пика̄: «Филипп, лъпысинитуңа қавңарухлъяха̄ның, та̄ўа налъюкақсиңа̄? Китум ысҳа̄макумиңа, ысҳақақа̄лъю Ата. Ынка̄м сяңавык пизин: “Кылгутигу Ата хўаңкунъун”? ¹⁰Ухпықынӷистыңъа̄ Атам илюңанилңӯңа, Ата хўаңа илюмни? Акузитынка хўаңа катам акузиткынӷитанка. Ата илюмнилңуқ қыпҳаӷақуқ хўаңамкун. ¹¹Ухпықитыңъа Атам илюңанинъилюңа пилӷӣңа, Аталъю илюмнинъикыхка. Налиӷмың ухпықитыңъа алъя̄ҳлъюхўаҳтилъҳынка апалъюқлъюки. ¹²Ипа уңипа̄тамси, китум ухпықыхкумиңа, та̄кут ата̄сит қыпҳақанка пилъықӣ. Талўа а̄ңатаӷалӷӣт тама̄куның пилъықӣ қаюҳлъяк агляӷнақуңа Атамун. ¹³А̄птыкуфси сямың алңунак Атымкун лыган пилъықақа, Атам а̄ңылъыҳлъяга кылгутысқылъюку Иӷныӷакун. ¹⁴Сямың алңунак а̄птыкуфсиңа Атымкун пилъықақа».

Акықусяқыхкак Аглыӷналӷӣк Таӷныӷак

¹⁵«Пиниқыхкуфсиңа қа̄ткылъықаси қылӷусянка. ¹⁶А̄плъықақа Ата тӯнысқылъюси алъяның Каюткаҳқамың, ынка̄м тӯнылъықӣси Каюткаҳқамың лъпысинисяҳқамың қӯнпырухлъяк. ¹⁷Та̄кук Каютык Таӷныӷа̄гук апыҳтуҳлъықӣси Кияӷныӷым ипапилъҳаның. Нунам юган тугуклъиӷна̄нӷита̄ қаюҳлъяк ысҳӣгалъкаңа талўа налъюкыхкаңа. Иўырңа лъпыси лӣсимакаҳси қаюҳлъяк лъпысинитуқ, илюхпысинисяҳқа̄гуқлъю.

¹⁸Унинъа̄нӷитамси лъңинаҳаҳпыси яйўа̄листун. Тагинқихлъықуңа лъпысинун. ¹⁹Ма̄тықўа̄қун нунам юган ысҳаӷнаниӷнақа̄тңа, иўырңа лъпыси ысҳаҳлъықаҳпысиңа, қаюҳлъяк уңувалӷӣңа, лъпысилъю уңувалъықуси. ²⁰Ынка̄м таўани аӷныӷми уңуваҳтылъымни лӣлъықаҳси Атама илюңанитулъка, лъпысилъю илюмнитылъыҳси, хўаңалъю илюхпысинитулъка.

²¹Китум тугуклъиқумики қылӷусянка, қа̄ткыхкумикилъю, пиниқистыкақа, Атамалъю пиниқылъықа̄. Хўаңалъю пиниқылъықақа, лӣтыслъықуңалъю лъңанун». ²²Та̄хкын Иудам пика̄, (Иуда Искариотыңунӷилңӯм) «Атанық, сяңавык лӣтыснақсин хўаңкунъун, нақам нунам юганун лӣтыстыхпынаң?» ²³Иисусым кӣмсиқа̄: «Китум пиниқыхкумиңа қа̄ткылъықӣ апыҳтӯсянка. Атама пиниқылъықа̄ ынка̄м Атакулъҳӣгни такулюку кияҳфикылъықаҳпут. ²⁴Китум пиниқынӷилъкумиңа қа̄ткынъа̄нӷитӣ апыҳтӯсянка. Апыҳтӯсят нагаткыси хўаңамның пиңунӷитут, Атамың пиңӯт Каяхтистымның.

²⁵Уңипа̄тамси тама̄кын лъпысинилъюңа. ²⁶Каютым апыҳтуҳлъықӣси сямың тамаҳа̄ның. Нықаҳтыслъықӣ қамахлъюки тама̄кут а̄пқанка лъпысинун. Та̄кук Каютык Аглыӷналӷӣңӯк Таӷныӷак, Атам каяхсяҳқакык Атымкун.

²⁷Унивикамси ныкыхмылъыӷмың. Ныкыхмылъқа тӯнақа лъпысинун. Нунам тӯнылъҳатун тӯныӷитамси. Ынка̄м илюси сыӷлылӣҳтыстыхпынаки талўа алиңыхпынаси. ²⁸Нагаткақаҳпысиңа хўатын пилӷӣңа: “Аӷуляқнақуңа иўырңа тагинқихлъықуңа лъпысинун”. Пиниқыхкақсяқуфсиңа қуянаяҳтуси уңипа̄тақңамси Атамун агляӷнақнилюңа, қаюҳлъяк а̄ңыҳлъяхтуқ хўаңамның. ²⁹Хўа̄ уңипа̄тамси та̄хкын сивутҳулъюку пилъыҳқа̄ ынка̄м апыӷӣқан ухпыҳлъықуси. ³⁰Алыҳқуӷнаниӷьяҳтуңыстаӷамси, қаюҳлъяк иглыӷутистыңа нунам ӯм тагиңӯқ. Аҳтуӷьяҳқа̄нӷилъҳитуқ хўаңамнун, ³¹иўырңа Атам қылӷуткӣ писқылъҳўа̄ӷатун атуқақанка нунам юганун лӣтысқылъюку пиниқилъқа Атамун. Ныкывитык, аӷуляқылъта».

Иисус Лозапик

¹«Хўаңа лозапигӯңа, Атака̄ пӣтысиӷаҳтыңӯқ. ²Қамахлъюки аваянка пӣтыстиңигалңӯт икуӷақӣ. Қамахлъюки аваят пӣтыстикаюгыт кыпуӷвикақӣ пӣтыстиӷатаӷӣсқылъюки. ³Лъпыси укмаңиӷўа̄ӷлюси аюқуси акузитытхун акузиткыхкамкун лъпысинун. ⁴Хўаңамнитыкыстаҳтык хўаңа лъпысинитылъымтун. Аваяра̄ӷинақ пӣтыстина̄нӷитуқ ўыткуқун лозамыскуми. Таўатытуси лъңинаҳпыси пӣтыстина̄нӷитуси ўыткуқун хўаңамнитыкыстақуфси.

⁵Хўаңа лозаңӯңа, лъпыси авая̄гуси. Кина алңунак пӣтысқуҳлъягьяҳқа̄гуқ хўаңамнитыкыстақуми, хўаңа лъңани. Иўырңа хўаңаңунаси сяна̄нӷитуси. ⁶Кина алңунак хўаңамнинъыӷилъкуми аваястун аюқуқ ыхлъюни палиқақ. Таўатылңӯт аваят қырңуҳлъюки паныҳтақӣт. ⁷Хўаңамнитыкыстақуфси, акузитынка лъпысинитыстыкуфсики а̄плъыҳа̄си сямың алңунак пиюкыхкаҳпысиның ынка̄м алъхыӷулъықуси. ⁸Атака̄ усюқылъыңылъықуқ пӣтысқуҳлъякуфси, лӣгикыслъықусилъю хўаңамнун малихся̄ҳсяҳтыкнъилюси. ⁹Пиниқамси катам Атам пиниқылъҳатун хўаңа. Пиниқылъымнитыкыстаҳтык. ¹⁰Қа̄ткыхкуфсики қылӷусянка пиниқылъымнитыкыстаҳлъықуси таўатыҳпигақ Атама пиниқылъҳанитылъымтун қа̄ткутылъымкун қылӷуся̄нун.

¹¹Уңипа̄тамси тама̄кын қуямалъқа лъпысинитысқылъюку, қуямалъыҳси ӣӷўӣсқылъюку. ¹²Унаңӯқ қылӷусяқа̄ лъпысинун: пиниқутулъюси хўаңа пиниқылъымтун лъпыси. ¹³Югым туқуматкыхкумики илякумта̄ни пиниқылъҳа а̄ңыпихтуқ. Кина алъя пиниқылъҳитуқ та̄мың а̄ңатаӷалӷӣмың. ¹⁴Илякумта̄қаҳпысиңа, қылӷутканка қа̄ткыхкуфсики. ¹⁵Хўакын кынлыклъюку қыпҳаҳтыңулюси атиӷна̄нӷитамси, қаюҳлъяк қыпҳаҳтым налъюка̄ умӣлыни ся̄қутаңа. Иўырңа ма̄тын атиӷамси илякумта̄ӷмың, қаюҳлъяк лӣтыстыкыхка лъпысинун қамахлъюку нагаткақа Атамның. ¹⁶Лъпыси накмикумаңитаҳпысиңа, хўаңа накмикыхкақамси, қыпҳақалитамсилъю. Ынка̄м аӷуляқлъюси пӣтысқуҳтык, пӣтысқулъыҳси нагныӷасқысюўақа. Таўатын пикуфси Атам тӯнылъықӣси сямың алңунак а̄птыкуфси Атымкун. ¹⁷Уна қылӷусяқақа, пиниқутулъюси».

Иисусым Кылыңася̄қаңи Малихся̄ҳтыни

¹⁸«Нунам юган угумикыхкаңиси, нықамиклъюку хўаңа сивуклъюңа угумикыхкақа̄тңа. ¹⁹Нунам пиксяқумиси, юган пиниқнаяӷӣси пиниқутутылъыӷмыгыстун. Иўырңа хўаңа накмикыхкақамси хўакын нунамың ынка̄м нунам пикынӷитӣси. Тама̄кын апалъюқлъюку нунам юган угумикӣси. ²⁰Нықамиклъюку а̄пқақа лъпысинун: Қыпҳаҳта а̄ңатаӷанӷитуқ умӣлыгминың. Амью̄ткумакумыхтыңъа лъпысилъю амью̄ткылъықӣси. Қа̄ткумакумыхтыки апыҳтӯсянка, лъпысилъю апыҳтӯсяси қа̄ткылъықӣт. ²¹Таўатын пилъықӣси хўаңа апалъюқлъюңа қаюҳлъяк налъюка̄т Каяхтистыка. ²²Тагилюңа алыҳқӯмаңисяқумки лӣнъаянӷитут сыӷлыҳқылъиҳтың. Иўырңа хўа̄ анагнӣлъқавигӣтӣ сыӷлыҳқылъыӷмыхның. ²³Китум угумикыхкумиңа, угумика̄лъю Атака̄. ²⁴Акулңитни алъя̄ҳлъюхўаҳтӣӷа̄тақа̄гуңа китум алңунак пиңигалъкаңаның. Ысҳапакақыӷңа̄ӷмыхтыки алъя̄ҳлъюхўаҳтилъҳынка паниның ухпықылъҳита̄тңа, угумикӣнкуң Атакулъҳӣгни ынка̄м сыӷлыҳқыстыңӯт нанқихтылъыңьяҳқат. ²⁵Таўатын пилъыӷмыхтыхун апыӷӣқақа̄т Акузитыт Игақыхкат хўатын пилъҳат: “Угумика̄тңа апалъюңуна̄н”.

²⁶Каютык каяхлъықахка лъпысинун, Атамың пиңӯк. Таӷныӷа̄гук апыҳтуӷияҳқак Кияӷныӷым ипапилъҳаның. Тагикуми уңипақылъықа̄ңа. ²⁷Лъпысилъю уңипақылъықаҳпысиңа югнун, қаюҳлъяк хўаңамнитка̄лӷӣси қыпҳаӷьюхўа̄лъҳаның има».

¹«Уңипа̄тамси тама̄кын ӣлъқаюфқа̄фси писқылъюси амью̄ткыхкаңиси. ²Югыт иқитыслъықӣси синагогамыхның. А̄а, пилъыҳқақ тагиңӯқ, китум алңунак туқускумиси сюмыҳтаӷаӷьяҳқа̄гуқ қыпҳа̄тңунилюку Кияӷнық. ³Таўатын пияҳқақӣси қаюҳлъяк лӣсимаңилъкаңинкуң Атакулъҳӣгни. ⁴Уңипа̄тамси тама̄кын ма̄тын пилъыҳқақ ка̄скан нықамикысқылъюки а̄пқанка. Уңипа̄симаңитамси тама̄кын пӣнлиӷьюхўа̄лъыӷми малихся̄ҳтыңуҳтақңафси қаюҳлъяк лъпысинилңӯңа».

Қыпҳалъҳа Аглыӷналӷӣм Таӷныӷам

⁵«Ма̄тын утыӷниӷнақңӯңа Каяхтистымнун; иўырңа налиҳпыси а̄пныӷитаҳпысиңа хўатын: “Навык пинақсин?” ⁶Қивӷуҳлъягӯси қаюҳлъяк уңипа̄скымси тама̄кын. ⁷Иўырңа уңипа̄нъақамси ипапигмың: пиниӷатаӷаӷьяҳқа̄гуси аӷуляқыхкума, қаюҳлъяк каяхфикылъықамси Каюткаҳқагның. Аӷуляқынӷилъкума Каюткаҳқак тагина̄нӷитук лъпысинун. ⁸Каютык тагикумык лӣгилъӣҳқылъықӣ нунам юги сыӷлыҳқылъыӷмың, ылъқуӷутңалъыӷмың, нанқихтилъыӷмың. ⁹Лӣгикыслъықӣ сыӷлыҳқыстыңутаңи, қаюҳлъяк хўаңа ухпықигалъкаңатңа. ¹⁰Лӣгикыслъықа̄ ылъқуӷутңалъық, қаюҳлъяк агляӷнақылӷӣңа Атамун ынка̄м ысҳаӷнаниҳлъықаҳпысиңа. ¹¹Лӣгикыслъықа̄ нанқихтылъық, қаюҳлъяк иглыӷутистыңа нунам ӯм нанқихтылъыңўа̄ӷлюни аюқуқ аӷью̄ӷьяҳқа̄люни.

¹²Паниның апыӷьяҳқаҳлъягӯңа лъпысинун иўырңа сялин лӣгикыпагниңитаси. ¹³Иўырңа Таӷныӷак апыҳтуӷилӷӣк Кияӷныӷым ипапилъҳаның, тагикуми маӷьяҳқуҳлъықӣси ипапилъыпырыгўа̄ӷмун. Акузиткынъа̄нӷитӣ лъми катам акузитни, иўырңа акузилъықуқ нагақуқаҳӣнаӷминың. Ынка̄м уңипа̄лъықӣси сяңўа̄ сяяҳқа̄таңа та̄кўаниңани. ¹⁴Қӯлваҳлъықа̄ңа қаюҳлъяк тугуклъиӷлюки хўаңа акузитынка апыҳлъықӣ лъпысинун. ¹⁵Қамахтыңъўа̄ӷлюку Атам пӣңа хўаңа пикақа̄. Тама̄кын апалъюқлъюку пӣңа, Таӷныӷам тугуклъиӷлюки тӯныхканка апыҳлъықӣ лъпысинун».

Қивӷулъық Қуялъҳуҳсяҳқақ

¹⁶«Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа». ¹⁷Иляңита малихся̄ҳтыт илятың а̄птыкӣт: «Сямың пӣлъю Иисусым хўатын пилъыӷмикун: “Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа”? Та̄налъю сяңа̄ўа хўатын пилъҳа: “Қаюҳлъяк агляӷнақуңа Атамун”?» ¹⁸Пикат: «Сямың пӣ таўатын пилъыӷмикун: “Қантаӷақун”? Налъюкаҳпут сямың писӣтаңа». ¹⁹Иисусым лӣсимакыхкаңи а̄псюкаңат ынка̄м пикӣ: «Лъпысиның а̄пқуӷўа̄ӷусиқыстыхӯ сямың пикатка хўатын пилъымкун: “Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа?” ²⁰Ипа уңипа̄тамси, қияяҳқа̄гусилъю қивӷуяҳқа̄гусилъю иўырңа нунам юги қуяяҳқа̄гут. Лъпыси қивӷуяҳқа̄гуси иўырңа қивӷулъыси қуялъҳуҳсяҳқа̄гут. ²¹Аӷнақ иӷниюныӷмини икфиқақуқ, қаюҳлъяк иӷнилъыҳқа̄ ка̄лъҳӣ. Иўырңа иӷниями пуйга̄ икфиқылъыни, қаюҳлъяк қуякыхкаңа таӷнуҳақ алъхылӷӣ нунамун. ²²Қивӷуңӯси ма̄тын иўырңа ысҳаҳлъықамси алъямың ынка̄м қуялъықуси. Китум алңунак иқинъа̄нӷита̄ қуялъыҳси.

²³Таўани аӷныӷми а̄пна̄нӷитаҳпысиңа сямың алңунак. Ипа уңипа̄тамси, Атама тӯнылъықӣси сямың алңунак а̄птыкуфси Атымкун. ²⁴Хўавымун кынляңа а̄псигатуси сямың алңунак Атымкун. А̄птык алъхыӷулъықуси ынка̄м қуялъыҳси ӣӷўиҳлъықуқ».

Кая̄лъқӣлъық

²⁵«Уңипа̄ткақамси тама̄куның уңипаӷа̄тытхун. Иўырңа уңипаӷа̄тның атуқнанилъыҳқақа ка̄лъықуқ ынка̄м хўатыҳлъюўа̄қ апыӷьягулъықақа Ата лъпысинун. ²⁶Та̄на пилъыҳқақ ка̄скан лъпысиның катам а̄плъыҳа̄си Атымкун. Ынка̄м уңипа̄тамси хўаңа а̄птунъаниҳлъықамси Атамун, ²⁷қаюҳлъяк Атам лъңаның катам пиниқӣси. Пиниқӣси қаюҳлъяк пиниқыхкыфсиңа, ухпықыхкысилъю Атамың тагика̄тка. ²⁸Атамың тагика̄гуңа нунамун. Ма̄тын унилъюку нуна агляӷнақуңа Атамун».

²⁹Малихся̄ҳтыңита пика̄т Иисус: «Та̄ўа алыҳқуӷаҳпыкут хўатыҳлъюўа̄қ атуқыхпынаки уңипаӷа̄тыт! ³⁰Хўа̄ лӣтамкын сяңўа̄ тамаҳа̄н лӣсимакыфтан. Лӣсимакақатын югым а̄псяҳқӣ талўа а̄птыстыхпынаки ынка̄ңам китум алңунак а̄пныӷитыӷңа̄ӷмитын сямың алңунак аюқутын. Тама̄кын апалъюқлъюку ухпықамкын Кияӷныӷмың тагика̄тын». ³¹Иисусым пикӣ: «Қынўатлъю ухпыӷыстык? ³²Миңитылъыҳқаҳси ка̄сяҳтуҳтуқ, талўа хўа̄ ка̄лъюни аюқуқ. Қамахлъюси ныхпысинун агляҳтӯлъықуси, унилъықаҳпысиңа лъңинаҳаӷма. Иўырңа паниның лъңинаҳа̄на̄нӷитуңа қаюҳлъяк Ата хўаңамнилңуқ. ³³Уңипа̄тамси тама̄кын ныкыхмылъылгусқылъюси хўаңамкун. Нунами хўани сыӷлылӣҳлъықуси иўырңа илютулюси қаюҳлъяк кая̄лъқыхкақақа нуна».

Иисусым Юӷа̄ткыхкаңи Малихся̄ҳтыни

¹Иисус та̄қсями акузиныӷмың сивухлъюни қилягмун юӷақақ: «Ата̄й, аӷнық ка̄туқ. Қӯлваҳу Иӷныӷын, қӯлвӣсқылъютын Иӷныҳпынун. ²Иӷнық Атаныңлъяқақан тамаҳа̄нун югнун. Ынка̄м кынлыңилңуқ уңувалъық тӯнңўа̄ тамаҳӣтнун тӯныхкаҳпынун лъңанун. ³Югыт кынлыңилңуӷмың уңувалъыңақут лӣтылъыӷмыхтыхун лъпык, та̄наңинаҳақ Кияӷныҳпигақ, лӣтылъыӷмыхтыхунлъю Иисус Христос лъпык каяхтыкан. ⁴Қӯлва̄ма̄мкын нунами хўани апыӷӣлъымкун қыпҳақақ қылӷуткан хўаңамнун писқылъюку. ⁵Ынка̄ңам Ата̄й, манухпынисималюңа қӯлваӷңа қӯлвалъыӷмың хўаңа пиксяқымның лъпынилъюңа, сивуңани нунам улималъҳан.

⁶Лӣтыстыкақақа натытулын югнун тагивақаҳпынун нунамың хўакын. Лъпык пиксяқытын тагивақаҳтын хўаңамнун. Қа̄ткыхкақӣт акузитытын. ⁷Қынўатлъю лӣтӣт сяңўа̄т қамахлъюки тагивақаҳтын лъпынун пиңутаңи, ⁸қаюҳлъяк апыҳтӯсяқыхкаҳтын хўаңамнун апыҳтӯсяқыхкақанка лъңитнун. Тугуклъӣмӣт ынка̄м лӣта̄т ипапыста̄қ тагика̄тка лъпынун. Ухпықа̄тлъю лъпынун каяхтыка̄тка.

⁹Юӷа̄ткыңъўа̄нка лъңит. Юӷа̄ткыңъунӷитанка югыт нунам пиңи. Юӷа̄ткыңъўа̄нка тама̄кут тагивақаҳтын қаюҳлъяк лъпык пикыхкытын. ¹⁰Қамахлъюки хўаңа пинка лъпык пикатын; қамахлъюки лъпык пикатын хўаңа пиканка. Лъңитхун а̄ңылъыҳлъяка кылгулъюни аюқуқ. ¹¹Агляӷьяҳтуңыстаҳтуңа лъпынун, нунамынъаниӷьяҳтуңыстаҳтуңа, иўырңа лъңит нунамылъықут. Аглыӷналӷӣ Ата, афлъыңакики аҳтуӷьяҳқа̄нӷилъҳакун атыҳпык, тагивақаҳтын хўаңамнун, ата̄сӣсқылъюки ата̄сӣлъымтыхун. ¹²Лъңитнилъюңа афлъыңакыхкақанка аҳтуӷьяҳқа̄нӷилъҳакун атыҳпык, тагивақаҳтын хўаңамнун. Кылыңакыхкақанка, ынка̄м талўа ата̄сиқ ифлъялъҳитуқ, иўырңақун ата̄сиқ ю̄к ифлъяяҳқақ, Акузитыт Игақыхкат апыӷӣӷысқылъюки. ¹³Хўа̄ ма̄тын лъпынун агляӷнақуңа. Иўырңа таўатын юӷаҳтуңа паниның нунамылъюңа, қуялъқа илюңитнитысқылъюку хўаңа пима. ¹⁴А̄пқақанка Акузитытын лъңитнун, ынка̄м нунам юган угумикӣ қаюҳлъяк нунам пикынӷилъкаңи хўаңамтун. ¹⁵Юӷа̄ткыңъунӷитанка лъпынун иқитысқылъюки нунамың. Иўырңа юӷа̄ткыңъўа̄нка лъпынун афлъыңакаҳтысқылъюки Туӷныӷаӷмың. ¹⁶Нунам пикынӷитӣ катам хўаңа пикынӷитылъҳатун. ¹⁷А̄фтики лъпынун ипапилъыҳқун; акузитын ипапилъҳӯқ. ¹⁸Каяхтыкақанка нунамун, каяхтылъыҳпытун хўаңа. ¹⁹Лъңит апалъюқлъюки хўаңамның а̄фтыка̄гуңа лъпынун, лъңитлъю а̄фтысқылъюки акузитыхпыгун ипапилъыҳқун.

²⁰Юӷа̄ткыңъўа̄нка та̄кут югыт, юӷа̄ткыңъўа̄нка тама̄кутлъю югыт ухпықияҳқат хўаңамның уңипақилъҳитхун малихся̄ҳтыма. ²¹Юӷаҳтуңа қамахлъюки ата̄сӣсқылъюки. Ата̄й, йықай илюмтыгнитыстики катам таўатын лъпык илюмнитылъыҳпытун, хўаңа лъпык илюхпынитылъымтун. Илюмтыгнитыстики нунам юганун ухпықысқылъюку лъпынун каяхсиматка. ²²Қӯлвақақанка катам таўатын қӯлвалъыҳпытун хўаңа, лъңит ата̄сӣсқылъюки катам таўатын хўаңкутуң ата̄сӣлъымтыхун. ²³Хўаңа илюңитнитуңа, лъпык илюмнитутын лъңит ата̄сӣҳтыңъўа̄ӷысқылъюки. Ынка̄м нунам юган лӣлъықа̄т лъпынун каяхсиматка. Лӣлъықа̄тлъю пиниқылъҳын тама̄кунун ухпықилӷӣнун хўаңамның, хўаңамнун пиниқылъыҳпытун аюқылӷӣ.

²⁴Ата̄й, укут югыт тагивақаҳтын хўаңамнитысюўақанка, лъңитнун ысҳӣсқылъюку ниӷуҳқылъқа. Пиниқутыхпының та̄на ниӷуҳқылъық тагивақақан сивуңани нунаңлъялъҳым. ²⁵Ка̄й ылъқуӷутңалӷӣ Ата, нунам юган налъюка̄тын; хўаңа лӣсимакамкын. Та̄кутлъю тагивақаҳпык лӣсимака̄т лъпынун каяхсиматка. ²⁶Лӣтыстыкақанка натытулыхпының. Лӣтысимаңинаӷнақамкын пиниқылъҳын хўаңамнун илюңитнитысқылъюку, хўаңалъю илюңитнинъалюңа».

Иисус Тугукаңат

¹Иисус юӷаныӷмың та̄қлъюни, малихся̄ҳтыкулъҳӣт аӷвиқат сюқлъюнӷыгныкун а̄тқылӷӣк Кедронымың. Та̄ўаңуқ иңлюхкыни маслиныт уқфигыт; таўавык агляқат. ²Иисусым увыҳпагутистыңан, Иудам лӣсимакыхкаңа та̄на такука̄т, қаюҳлъяк Иисусылъю малихся̄ҳтыкулъҳӣт таўавык пикатуқат. ³Ынка̄м Иуда первосвященнигынунлъю, Фарисеинунлъю ақфаткақ кылыңакистыныңлъю, иляңитныңлъю Римым пилъюўаҳтыңитның. Та̄хкын маӷьяҳқуқӣ уқфихтуқамун. Та̄кут кылъқыхкат гӯтутмың, иляңи унаҳсимың кумаңалӷӣмың, иляңи кынылӷутамың. ⁴Иисусым лӣсимакыхкаңа қамахлъюку сялъыҳқани, ынка̄м такулюки а̄птыкӣ: «Кина иваӷақыстыху?» ⁵Кӣмсиқа̄т: «Иисус Назаретыӷмӣ». Иисусым пикӣ: «Хўаңа Иисусыңӯңа». (Иудалъю увыҳпагутиста ныкывӷалӷӣ пилъюўаҳтыни.) ⁶Иисусым таўатын пийистың: «Хўаңа Иисусыңӯңа», та̄кут югыт утыӷмӣқаӷлютың улъыӷа̄ткат. ⁷Иисусым а̄плъя̄тақӣ: «Кина иваӷақыстыху?» Кӣмсиқа̄т: «Иисус Назаретыӷмӣ».

⁸Иисусым пикӣ: «Уңипа̄тамси, хўаңа Иисусыңӯңа. Хўаңаңукан ивақаҳси укут югыт аӷуляқыстыки». ⁹Иисус таўатын пика̄лӷӣ апыӷӣӷысқылъюку хўатын пилъыни: «Ата̄й, тагивақаҳпының талўа ата̄сиқ ю̄к ифлъямаңитақа».

¹⁰Та̄хкын Симон Петырым сявихпани нусюгаҳлъюку илыфкаӷаҳтыка̄ Малхым аӷынқигнық сигутңа. (Малха, первосвященнигым қыпҳаҳтыля̄қыхкаңа.) ¹¹Иисусым пика̄ Петр: «Сявихпагын канаҳтигу. Қаю̄сиқ мыӷынӷилъякӯн Атам тагивақа̄?»

Иисус Агля̄скаңат Аннамун

¹²Та̄хкын пилъюўаҳтыт, умӣлгатлъю, кылыңакистытлъю Иудеит такулюку Иисус, тугулюку асиҳқыхка̄т. ¹³Ынка̄м сивуклъюку агля̄тка̄т Аннамун, сякиңанун Каиафам. (Таўани аюмиқулъыӷми Каиафа первосвященнигукалӷӣ.) ¹⁴Каиафам пикақыхкаңи Иудеит иглыӷутистыт, пиниӷатаӷаҳлъықнилюку ата̄сиқ ю̄к туқумаяқан югнун.

Петырым Налъюнқыхкаңа Иисус

¹⁵Симон Петырымлъю, иляңанлъю малихся̄ҳтым киңуңаның малихтыка̄к Иисус. Первосвященнигым лӣсимакыхкаңа а̄лъҳа малихся̄ҳта. Ынка̄м лыган та̄м малихся̄ҳтым малихтыка̄ Иисус, первосвященнигым мыңтыӷа̄н увитаңанун. ¹⁶Петр ныкывӷамалюку амигым туңаңани, а̄лъҳан малихся̄ҳтым, первосвященнигым лӣсимакыхка̄н, а̄нлюни алыҳқуӷлюку аӷнаӷақ амигнӣҳта итыҳтыстыка̄ Петр. ¹⁷Аӷнаӷа̄м амигнӣҳтым а̄птыка̄ Петр: «Лъпыклъю̄ та̄м югым малихся̄ҳтыкатын?» Петырым кӣмсиқа̄: «Нака̄! Малихся̄ҳтыкынӷита̄ңа!»

¹⁸Қыпҳаҳтытлъю, кылыңакистытлъю кулымың кумаҳтика̄лӷӣт уӷухсиӷналютың қаюҳлъяк ақлъяӷалңуқ. Петырлъю таўани уӷухсиқақ.

Первосвященнигым А̄пқуӷўа̄қаңа Иисус

¹⁹Қама илюңани первосвященнигым а̄пқуӷўа̄қа̄ Иисус, малихся̄ҳтыңаныңлъю, апыҳтуӷилъҳаныңлъю. ²⁰Иисусым кӣмсиқа̄: «Юхтуқами акузӣқуңа. Қӯнпың апыҳтуӷӣқуңа қамахлъютың Иудеит қырңуӷутфигитни, синагогани, Храмымилъю. Сяңўа̄ алңунак аксяқлъюку акузиткигатақа. ²¹Ынка̄м сяңама а̄пқуӷўа̄ҳсиңа? А̄птики югыт нагатка̄т апыҳтуӷилъымның. Лӣсимака̄т сямың пиматка». ²²Иисус таўатын пиян кылыңакистым туңаңанилңӯм қасяҳлъюку а̄птыка̄: «Сяңан таўатын кӣмсиҳсигу первосвященнига?» ²³Иисусым кӣмсиқа̄: «Сямың сыӷлытун акузимакума, а̄пҳу сыӷлытун акузилъқа. Иўырңа ылъқуӷусимакума сяңама қасяҳсиңа?»

²⁴Та̄хкын Аннам, агля̄тыстыка̄ Иисус асиҳқыңъа̄н Каиафамун, первосвященнигмун.

Петырым Налъюнқылъя̄тақа̄ Иисус

²⁵Симон Петр ныкывӷаӷми уӷухсӣмалюку а̄птыка̄т: «Лъпыклъю̄ малихся̄ҳтыкатын та̄м югым?» Петр мысиӷақақ: «Нака̄! Малихся̄ҳтыкынӷита̄ңа!» ²⁶Ата̄сиқ қыпҳаҳтыңа первосвященнигым таўанлыңуқ, илякўа̄ӷа югым, Петырым сигутңиӷаҳтыка̄н. Қыпҳаҳтым а̄птыка̄: «Ысҳаҳсюгнисикын лъңанилъютын маслинытми уқфихтуқами?» ²⁷Алъямың Петр мысиӷаӷля̄тақақ. Ага таўаниңинақ петух қалӷиқақ.

Иисус Агля̄скаңат Пилатымун

²⁸Та̄хкын уна̄ңупихлъюку Иудеит иглыӷутистыңита агля̄тка̄т Иисус Каиафам мыңтыӷа̄ның, Римым умӣлыхпаган нанқихтивикыңанун. Та̄кут иглыӷутистыт ӣтҳумаңилңӯт нанқихтивигмун, қаюҳлъяк укмаңиҳсяӷўа̄қа̄лӷӣт Моисейем Лӣлиҳтӯся̄н писқылъҳатун ныӷналютың Пасхами. ²⁹Ынка̄м Пилатым а̄нвиклъюки а̄птыкӣ: «Сямың анахусимафта уна ю̄к?» ³⁰Кӣмсиқа̄т: «Уна ю̄к тагинъаянӷитаҳпут лъпынун анахусимаңисяқан». ³¹Пилатым пикӣ: «Агля̄лъюку лъпысиның нанқихтыху Лӣлиҳтӯсяҳпыси писқылъҳатун».

Пика̄т: «Римым лӣлиҳтӯсӣтни хўаңкута Иудеяни аӷью̄ӷисиқсяҳқақынӷитаҳпут туқутилъық». ³²(Таўатын акузилъҳита апыӷӣқа̄т Иисусым апылъҳа натын туқулъыҳқаминың.) ³³Та̄хкын Пилат итынқихлъюни нанқихтивигмун, тагитыслъюку Иисус а̄птыка̄: «Лъпа̄к умӣлъкатын Иудеит?» ³⁴Иисусым кӣмсиқа̄: «Лъпының а̄псиңа таўатын? Налиӷмың китум уңипа̄ткақа̄тын хўаңамның?» ³⁵Пилатым кӣмсиқа̄: «Сюмыҳпыни Иудейеңузиңа̄? Лъпык катам юхпык, первосвященнигытлъю тагиткақа̄тын хўаңамнун. Сямың анахусимазин?» ³⁶Иисусым пика̄: «Атаныҳпагулъқа ӯм нунам пикынӷита̄. Атаныҳпагулъқа нунамың пиңуяқан, қыпҳаҳтыма пилъюўа̄нъаяӷа̄тңа Иудеянун тӯныфқа̄ма писқылъюңа. Иўырңа Атаныҳпагулъқа нунамың пиңунӷитуқ». ³⁷Пилатым пика̄: «Та̄ўа умӣлгуфтутын!» Иисусым пика̄: «Лъпык умӣлгунӣҳпыңа. Тагика̄гуңа нунамун уна апалъюқлъюку: апыӷналюку ипапиҳқылъық югнун; та̄на апалъюқлъюку алъхықа̄гуңа. Қамахлъюни пиниқиңалӷӣ ипапилъыӷмың нагаткаюгӯқ хўаңамнун». ³⁸Пилатым а̄птыка̄: «Сяңа̄ўа ипапиҳқылъық?»

Таўатын пилюни Иудеит а̄нвиклъя̄тақӣ. Пикӣ: «Уна ю̄к на̄лъкыфикынӷитақа сямың анахусиматаңа аӷью̄ӷусиҳқамың. ³⁹Иўырңа лъпыси наңаӷнықыхкыси, Пасхами хўаңамнун а̄ныстысюгақыхкыси ата̄сиқ анусимиңлъяӷақ. Итымутысюгыстыхӯ уна умӣлга Иудеит?» ⁴⁰Акилӷӯкат: «Нака̄, лъңа пифқа̄н, Варавва а̄ныстигу!» (Варавва ўаяӷнӣҳтыңулӷӣ.)

¹Ынка̄м Пилатым қылӷутка̄ иқитулъюку Иисус кахсягмигысқылъюку. ²Пилъюўаҳтыт қаҳпаңлъяқа̄т сикуҳлъюхтуқамың аваямың. А̄тыслъюку қаҳпа Иисусым на̄сқўакун, ысныгрукыхтагныңлъю аткуя̄қа̄т. ³Та̄хкын Иисус такулюку лыгасӣӷўа̄ткыхка̄т: «Қуяҳляги, Қӯлваӷамкын, Умӣлгат Иудеит!» қасяҳта̄тақа̄тлъю.

⁴Пилатым а̄нықихлъюни пикӣ Иудеит: «Ысҳаҳтыху, а̄нутыснақақа Иисус лъпысинун, лӣгикысқылъюси на̄лъкыфикынӷитақа анахутылъыӷмың». ⁵Та̄хкын Иисус а̄нусяқмыхтыху қаҳпалюни сикуҳлъюгмың, аткуя̄ӷлюнилъю ысныгрукыхтагның аюқыфтуқ. Пилатым пикӣ Иудеит: «Та̄ната ю̄к! Ысҳақаҳтыхуқун!»

⁶Первосвященнигытлъю, кылыңакистытлъю Иудеит ысҳаӷлюку Иисус акилӷӯткат: «Қақӯраҳтыстигу! Қақӯраҳтыстигу!»

Иўырңа Пилатым пикӣ: «Лъпысиның аӷуляқулъюку қақӯрахтыху, қаюҳлъяк хўаңа на̄лъкыфикынӷитақа сямың анахутылъыӷмың».

⁷Иудеит пика̄т: «Лӣлиҳтӯсямнъи туқусяҳқа̄гуқ, қаюҳлъяк Иӷнықнилюни Кияӷныӷмун пика̄гуқ».

⁸Пилатым нагалъюки таўатын пилӷӣт ўатақа̄ӷақ алиңыхкақ. ⁹Итынқихлъюни нанқихтивигмун а̄птыка̄ Иисус: «Накын пиңузин?» Иўырңа Иисусым кӣмсӣмаңитка̄. ¹⁰Пилатым а̄птыка̄: «Алыҳқуӷьюнӷисиңа̄? Лӣсимакынӷисигӯ итымутысқынъаяқымкын, налиӷмың қақӯрӣсқынъаяқымкын?»

¹¹Иисусым кӣмсиқа̄: «Қылыӷна̄нӷитатын пилъюўаҳтыт қақӯрӣсқылъюңа ўыткуқун Кияӷныӷым пиюкылъқыхкагу. Ынка̄м ю̄к тагитистыка сыӷлыҳқылъыҳта̄ӷатуқ лъпынун».

¹²Киңуңаның та̄м Пилатым итымунъақуткыхкақсяқаңа Иисус, иўырңа Иудеит акилӷӯкат: «Кина алңунак лъминың умӣлыңлъялӷӣ, аңуягӯқ Кесарымун. Итымускувгу та̄на ю̄к илякумта̄қынӷита̄тын Кесарым».

¹³Пилатым нагалъюки та̄кут акузитыт, а̄нутыстыка̄ Иисус, Каменный Помостымун. (Еврейистун та̄на атық Гаввафаңулӷӣ.) Та̄хкын Пилат ақумыхкақ нанқихтивигым ақумута̄кун. ¹⁴(Аӷныӷым қукаӷнақыхкаңа Ята̄ҳқилъҳым Аӷныӷани Пасхамун.) Пилатым пикӣ Иудеит: «Та̄ўа Умӣлыхси!»

¹⁵Иудеит акилӷӯткат: «Сяңулюку, сяңулюку, қақӯраҳтыстигу!»

Пилатым а̄птыкӣ: «Хўаңамнун қақӯраҳтыстысюгыстыхӯ умӣлыхси?»

Первосвященнигыт кӣмсиқа̄т: «Кесарыңинаҳа̄гуқ умӣлыхпут».

¹⁶Ынка̄м Пилатым пыхтыка̄ Иисус лъңитнун қақӯрӣсқылъюку.

Қақӯрақаңат Иисус

¹⁷Та̄хкын пилъюўаҳтыт а̄нутка̄т Иисус уямихтыслъюку қақӯра̄. Агля̄тка̄т таўавык атилъқылӷӣмун: «Югым На̄сқўан Ныңа». (Та̄на Еврейистун, Голгофаңулӷӣ.) ¹⁸Таўани қақӯрақа̄т, ма̄лӷуклъю югык малигулъюкык қақӯрақахкыт. А̄лъҳа аӷынқигныӷанилъюку, иляңа сяӷумигныӷанилъюку, Иисус қука̄нилъюку. ¹⁹Пилатым игақыстыкақыхкаңа: «ИИСУС НАЗАРЕТЫӶМӢ, УМӢЛГАТ ИУДЕИТ». Та̄хкын ныкыхтыстыка̄ қақӯра̄кун Иисусым. ²⁰Та̄на игақыхка̄лӷӣ Еврейскыт, Ромамыт, Грегыт улюңистун. Углялӷӣт Иудеит атиҳтуқа̄т, қаюҳлъяк қақӯраӷвига Иисусым қантаӷанлыңуқ Иерусалимымың. ²¹Иудеит первосвященнигита такулюку Пилат пика̄т: «Таўатын игақсяҳқа̄нӷисяҳтуқ: “Умӣлгат Иудеит”. Хўатын игақсяҳқа̄яҳтуқ: “Уна ю̄к пика̄гуқ, Хўаңа Умӣлъка̄тңа Иудеит”».

²²Пилатым пикӣ: «Игақыстыкақа таўатынъақңӯқ».

²³Пилъюўаҳтыт туқӯқа̄сямыхтыху Иисус қақӯрамун тугулюки а̄ткӣ, ыстамаҳқыхкӣт, ата̄сикаҳта̄н тугуля̄ткат. Ата̄сик аткуя̄ҳӷык кылюңунатык улима̄ӷык тӯймыгның кынимыгнун.

²⁴Пилъюўаҳтыт пикат: «Та̄кук ӣӷўӣхкынка атыҳтӣра̄ӷусиқылътыкык». Таўатын пилъыӷмыхтыхун Акузитыт Игақыхкат апыӷӣҳтыстыкӣт хўатын пилъҳит:

«А̄тканка ныңӣткақӣт,

ынка̄м та̄кук аткуя̄ӷыхка атыҳтӣра̄ӷусиқыхкақахкыт».

²⁵Пилъюўаҳтыт таўатын пималюки, та̄ўаңуқ стамат аӷнат ныкывӷалъҳӣт қақурам туңаңани: Иисусым на̄ңа, на̄ңанлъю аңлыгутаңа, Мариялъю Клеопам нулиҳа, Мариялъю Магдалаӷмӣ. ²⁶Иисусым ысҳақакык на̄нилъю, пиниқыхканилъю малихся̄ҳтыни ныкывӷалӷӣк таўани. На̄ни пика̄: «Аӷнами хўани, та̄на иӷнылӣтан».

²⁷Та̄хкын малихся̄ҳтыни пика̄: «Та̄на на̄лӣтан». Та̄хкын кынляңа малихся̄ҳтыңан агля̄тка̄ лъмыхнун.

Иисусым Туқулъҳа

²⁸Та̄м киңуңаның Иисусым лӣсимакыхка̄ сяңўа̄ тамаҳаӷми хўа̄ апыӷӣлӷӣ. Ынка̄м Акузитыт Игақыхкат апыӷӣӷысқылъюки хўатын пикақ: «Мықсюхтуңа».

²⁹Та̄ўаңуқ сягныӷўа̄қ қуўа̄лӷӣмың виномың ималык. Пилъюўаҳтыт ныкыхлъюку ныпсягусиқ иссопым унаҳсӣӷўа̄ӷакун, ныплъюку виномун Иисусым қа̄нӷанун ныңугутка̄т. ³⁰Иисусым на̄сӣӷлюку вино, пикақ: «Та̄ўа апыӷӣҳтуқ». Гӯҳтуткылъюку таӷныӷагни пыхтыкакык.

³¹Ята̄ҳқивигутаңаның Аӷнық, Иудеит иглыӷутистыңита та̄кут югусӣт қақӯрамытысюнӷилъкаңит, қаюҳлъяк уна̄миңани Субботаңулӷӣ, Пасхамлъю аӷнықыхкаңа. Ынка̄м Пилатымун қылӷутысқыхкӣт пилъюўаҳтынун айымқӣсқылъюки иӷуңит туқурахкӣӷысқылъюки, иқинъалюки қақӯрӣтның. ³²Та̄хкын пилъюўаҳтыт такулюку сивулиқ ю̄к, айымқуқахкыт иӷукык, а̄лъҳанлъю иӷукык айымқуқахкыт. Та̄кук қақӯрақақыхкыхкыт малигулъюкык Иисусымун. ³³Иисусым иӷукык айымсимаңилъкыхкыт қаюҳлъяк такуяқмыхтыху туқуңўа̄ӷлюни аюқыфтуқ. ³⁴Иўырңа ата̄сим пилъюўаҳтым панаминың кынуқақа̄ Иисус сяниңакун. Таўаниңинақ а̄кўлю, мықлъю ма̄қыхкак. ³⁵(Ысҳапакам тама̄кын а̄пҳӣ тама̄кут. Акузиткыхкӣ ипаңӯт, лӣсимакуқлъю уңипақңўа̄ ипапилъық. А̄пҳӣ тама̄кут лъпысилъю ухпыӷысқылъюси.) ³⁶Тама̄кут апыӷӣқа̄гут Акузитыт Игақыхкат апыӷӣӷысқылъюки:

«Талўа ата̄сиқ ныҳқўа̄ӷа айымьяҳқа̄нӷитуқ».

³⁷Хўатынлъю Акузитыт Игақыхкат пика̄гут:

«Ысҳапахлъықа̄т панакаҳтың».

Иисус Лъӣфқаңат

³⁸Та̄м киңуңаның югым Аримафеяӷмӣм, а̄тқылӷӣм Иосифымың, Иисусым югусӣ аӷуляқутка̄ Пилатым аңыӷьягу. (Иосиф малихся̄ҳтыкыхкаңа Иисусым, иўырңа аксяқлъюку пика̄лӷӣ алиңлюни Иудеит иглыӷутистыңитның.) ³⁹Никодимым малихтыка̄ Иосиф, кылъқылъюни тыпыңлъя̄симың ю̄к талъимат литра, смирнанкугның, алоэнкугның акумутңалӷӣгның. (Та̄на Никодим сивунӷани Иисусымун пика̄лӷӣ унугми.) ⁴⁰Та̄кук югык аӷуляқулъюку Иисусым югусӣ тыпыңлъяҳқума̄н ӣмгутка̄к қӣпаӷаҳқун. (Таўатын Иудеит лъӣвӷақыхкаңит югыт туқукат.) ⁴¹Иисусым қақӯраӷвиган туңаңани та̄ўаңуқ сад уқфихтуқақ. Таўантыфтуқ нутаӷаҳлъюк лъивық, сялин лъивыӷвикылъҳилңуқ. ⁴²Та̄юҳқыңъулӷӣк қаюҳлъяк Иудеит Ята̄ҳқыфикыхкаңат Аӷнық та̄на, ынка̄м та̄хун қантаӷанлыңуҳқун лъӣфқа̄қ.

Имӣлңуқ Лъивық

¹Сивулиӷми аӷныӷани неделям, Мария Магдалаӷмӣ лъивыҳтыкақ сялин мамлыглюку. Ысҳақа̄ уйӷагрухлъяк иқилъюни лъӣвӷым па̄йңаның. ²Ынка̄м кытанқуснақ агляқақ Симон Петырымунлъю, иляңанунлъю малихся̄ҳтымун, Иисусым пиниқыхка̄нун. Мариям пики: «Нӯхсима̄т Атанық лъӣвӷаның. Налъюкаҳпут навык лъиматаңа».

³Ынка̄м Петырлъю, а̄лъҳалъю малихся̄ҳта лъивыҳтыкак ⁴кытанқуснақ. А̄лъҳа Петырымың сюкалңуқ, ынка̄м сивуклъюни ка̄ткақ. ⁵Гӯҳлъюни қиныҳсялӷӣми ысҳақӣ қӣпаӷа̄т, иўырңа ӣтҳумаңилңуқ. ⁶Киңуңӣҳа̄ның Симон Петр ка̄лъюни ӣтқақ лъивыӷмун, ысҳақӣ қӣпаӷа̄т таўани. ⁷Ысҳақа̄лъю алъякаӷми қӣпаӷақ Иисусым на̄сқўакун ӣмгутңаялӷӣ. ⁸Та̄хкын а̄лъҳа малихся̄ҳта ка̄сюхўа̄қақ лъивыӷмун ӣтқақ. Ысҳаӷьямигу ухпықыхка̄ Иисус. ⁹Сялин ысҳалъҳилъюки лӣгикумаңиткаңак Акузитнилңуқ Игақыхкақ уңувапыста̄ӷьяҳқа̄нилюку туқулъыӷмың. ¹⁰Та̄хкын малихся̄ҳтык агляқак нымыгнун.

Иисусым Алӣӷвикыхкаңа Мария Магдалаӷмӣ

¹¹Иўырңа лъивыӷми Мария қийиқыхкақ. Қиянқусӣн гӯҳлъюни илютмун қиныҳсялӷӣми, ¹²ысҳақакык ма̄лӷук яқулгык аткуя̄лгык қатылӷӣмың. Ақумгафтуқ Иисусым югусӣн лъивиксяқаңакун, а̄лъҳа на̄сқўан ныңакун, иляңа итыга̄н ныңакун. ¹³А̄птыка̄т: «Аӷнақ, сяңавык қия̄қсин?»

Кӣмсиқакык: «Нӯхсима̄т Атанқа. Налъюкақа̄ навык лъиматаңат». ¹⁴Мария таўатын пилюни қӣвуткылъюку ысҳақа̄ Иисус ныкывӷалӷӣ, иўырңа налъюкыхка̄ Иисусыңутаңа.

¹⁵Иисусым а̄птыка̄: «Аӷнақ, сяңавык қия̄қсин? Кина иваӷақсигу?»

Мариям пӣтысиӷаҳтыңунилюку пикақсяқаңа, ынка̄м пика̄: «Югунӣқ, нусюгумакувгу уңипа̄тиңа навык лъиматын, ынка̄м ақфалъықақа».

¹⁶Иисусым пика̄: «Мария».

Мариям қӣвлюку пика̄ Еврейистун: «Раввуни». (Хўатын писиқ: «Апыҳтуӷиста».)

¹⁷Иисусым пика̄: «Ся̄фтыхпынаңа, сялин майӣгатуңа Атамун. Иўырңа агляӷлютын аңлыгутымнун уңипа̄нъакытын: “Маюӷнақуңа Атамнун, лъпысилъю Атахпысинун, Кияӷнымнун, лъпысилъю Кияӷныҳпысинун”».

¹⁸Мария Магдалаӷмӣ агляӷлюни малихся̄ҳтынун пикӣ: «Ысҳа̄ма̄қа Атанық». Ынка̄м уңипа̄ткӣлъю Иисусым уңипа̄тысқылъҳаның.

Иисус Алӣлӷӣ Малихся̄ҳтыминун

¹⁹Сивулӣлӷӣ аӷныӷа неделям. Иӷивга̄ни таўани малихся̄ҳтыт қырңуӷуткат. Алиңлютың Иудеит иглыӷутистыңитның, амигыт маҳқатңастыкӣт. Иисус тагилюни акуляңитхун ныкывлюни пикӣ: «Ныкыхмылъық лъпысинилъи». ²⁰Таўатын пилюни, кылгуткӣ ӣхынилъю сянинилъю, ынка̄м малихся̄ҳтыт қуяҳлъякат ысҳаӷлюку Атанық. ²¹Та̄хкын Иисусым пиля̄тақӣ: «Ныкыхмылъық лъпысинилъи. Катам таўатын Атам каяхтылъҳатун хўаңа, таўатыҳпигақ каяхтамси». ²²Таўатын пилюни, аныӷзӣглюки пикӣ: «Тугуклъиҳтыкык Аглыӷналӷӣк Таӷныӷак. ²³Сыӷывускуфсики килъю алңунак сыӷлыҳқылъҳитның, Кияӷныӷым сыӷывулъықӣ. Сыӷывунъыӷилъкуфсики, Кияӷныӷым сыӷывунъа̄нӷитӣ».

Иисусым Алӣӷвикыхкаңа Фома

²⁴Фома, (а̄тҳан а̄лъҳа Малӷи) малихся̄ҳтынисимаңилңуқ Иисусым такўа̄қңаки. Фома қуля ма̄лӷук сӣпнықыхкаңат малихся̄ҳтыт. ²⁵Иляңита малихся̄ҳтыт уңипа̄тка̄т Фома: «Ысҳа̄ма̄ҳпут Атанық!»

Иўырңа Фомам пикӣ: «Ухпықна̄нӷитақа ўыткуқун ысҳақумки туқӯқалъҳи ӣханилңӯт. Ухпықна̄нӷитақалъю ўыткуқун ся̄фтыкумки туқӯқалъҳытлъю, сяниңанилңуқлъю паналъық».

²⁶Неделық ата̄сиқ атуӷлюку малихся̄ҳтыт таўанлъя̄тақат мыңтыӷами, Фомалъю таўанлыңуқ. Амигыт маҳқатңаӷңа̄та Иисусым итыӷвиклъюки ныкывыхкақ акуляңитхун. Пикӣ: «Ныкыхмылъық лъпысинилъи». ²⁷Та̄хкын Фома пика̄: «Ысҳаӷлюки ӣхынка ся̄фтики, ся̄фтигулъю сяника. Айгуӷитиқыфқа̄выгңам, ухпыӷи». ²⁸Фомам пика̄: «Атанымни, Кияӷнымни!» ²⁹Та̄хкын Иисусым пика̄: «Ухпықӣтын қаюҳлъяк ысҳақывңа. Қуянаҳалык тама̄кут ухпылӷӣт ысҳаҳпынаңа».

Иоанным Игаңлъялъҳан Апалъя̄

³⁰Иисус угляӷңа̄н алъя̄ҳлъюхўаҳтӣӷа̄тақа̄гуқ ысҳа̄манӷитни малихся̄ҳтыми, игақумаңилңӯгут укуни игани. ³¹Иўырңа укут игақңалӷӣт игақыхка̄гут лъпысинун ухпықысқылъюку Иисус, Христосыңутаңа, Иӷныӷа Кияӷныӷым. Ухпықылъыҳпысигун уңувалъыңылъықуси А̄тҳакун.

Иисус Ысҳаҳтыслъя̄тақақ Иляңитнун Малихся̄ҳтыминун

¹Та̄кўаниңани Иисус ысҳаҳтыслъя̄тақақ малихся̄ҳтыминун На̄йвами Тивериадами. Хўатын ысҳаҳтыстыка̄гуқ. ²Иляңиңуқ малихся̄ҳтым қырңаӷмыткат на̄йвами. Симон Петырлъю, Фомалъю (а̄тҳан а̄лъҳа Малӷи), Нафанаилылъю, Канамың пи Галилеямылңуӷмың, Зеведейемлъю иӷныӷык, алъя ма̄лӷук малихся̄ҳтык. ³Симон Петырым пикӣ: «Иқалъинӣӷьяӷнақуңа». Пика̄т: «Малихнақамкын». Ынка̄м аңьякун кылъютың унулъқусиқ иқалъюхнақуткыхка̄ялӷӣт, иўырңа пикыңумаңиткат.

⁴Аҳтаӷаӷақа̄лъю малихся̄ҳтыт ысҳақа̄т Иисус ныкывӷалӷӣ ысными, иўырңа кинаңутаңа налъюкыхкаңат. ⁵Иисусым пикӣ: «Илякумта̄мни, иқалъюхныӷистык?» Кӣмсиқа̄т: «Нака̄». ⁶Пикӣ: «Атыҳтыху ныгаҳпахси аңьяҳпыси аӷынқигныӷакун, ынка̄м пикыңылъықуси». Писқылъҳатун пикат. На̄пқаӷиҳлъякат рыпалъ ныгаҳпак қа̄кныӷмың аҳтуқа̄т аңьямун.

⁷Малихся̄ҳтым Иисусым пиниқыхка̄н пика̄ Петр: «Атанӷӯқ!» Симон Петырым нагақуӷьямигу пилюгуглюни қытхықақ мыӷмун. (Петр амсикаҳтыка̄ялӷӣ қыпҳаӷналюни.) ⁸Малихся̄ҳтыт аңьямылңӯт ыснамун қамуқа̄т на̄пқаӷӣӷңалӷӣ ныгаҳпак. Аўавантыпанӷилңӯт қӯтмың, ынтақун ю̄к талъимат метра уятуткалӷӣт.

⁹Малихся̄ҳтыт ӯхлъыӷа̄сялӷӣмың қӯтмун ысҳақахкыт анӣӷўтыкак кынӷык, иқалъюгмың ухкылгык. Та̄ўалъю нықыкшаңлъялгуфтуқ. ¹⁰Иисусым пикӣ: «Тагитык иқалъюхтаҳпысиның».

¹¹Ынка̄м Симон Петр аңьямун ӯхлъюни сяюка̄ ныгаҳпак қӯтмун. Та̄ўаңуқ 153ңуфтут иқалъюхпаҳқуҳлъягыт на̄птыкат, нақамлъю ныгаҳпак пӣгумаңилңуқ. ¹²Иисусым пикӣ: «Ныӷьяҳтуҳтык». Налиҳӣнӣта̄ малихся̄ҳтыт а̄пныӷмың тытука̄т кинаңутаңа, лӣсимаклъюку Атанӷутаңа. ¹³Иисусым тугулюку нықыкшаңлъяқ тунқуқа̄ лъңитнун, иқалъюгытлъю таўатын пикӣ.

¹⁴Та̄на пиңайӣткыхкаңа Иисусым ысҳаҳтыстылъҳа малихся̄ҳтыминун, уңуваҳтыстылъыӷми киңуңаның.

Иисус Петырымун Апыҳтӯткысқылӷӣ Ухпықанун

¹⁵Та̄қсямың ныныӷмың Иисусым а̄птыка̄ Симон Петр: «Симон, иӷныӷа Иоанным, пиниқатаӷаҳсиңа̄ укуның?»

Кӣмсиқа̄: «А̄а Атанық, лӣсимакаҳпыңа пиниқыхкымкын».

Иисусым пика̄: «Ныҳқики пынъӣӷаӷа̄нка». ¹⁶Алъя Иисусым а̄птыка̄: «Симон, иӷныӷа Иоанным, пиниқсиңа̄?»

Кӣмсиқа̄: «А̄а Атанық, лӣсимакаҳпыңа пиниқыхкымкын».

Иисусым пика̄: «Афлъыңакики пынъӣӷынка». ¹⁷Пиңайӣткун а̄птыка̄: «Симон, иӷныӷа Иоанным, пиниқсиңа̄?»

Петр сыӷлыӷьюкақ, қаюҳлъяк Иисусым пиңаюның а̄птыкаңа: «Пиниқсиңа̄?» Петырым кӣмсиқа̄: «Атанық, лӣсимакан сяңўа̄ қамахлъюку. Лӣсимакаҳпыңа пиниқыхкымкын».

Иисусым пика̄: «Ныҳқики пынъӣӷынка. ¹⁸Ипа уңипа̄тамкын, нукалъпига̄лютын лъпынун тафсилютын навык пиюкылъыҳпынун пӣқсин. Иўырңа нанывгақувык, ӣхытын кывыглюки, китум тафсилютын агля̄лъықа̄тын такуюкыхкақынӷилъкыхпынун». ¹⁹Таўатын пилъыӷмикун Иисусым уңипа̄тңуфта̄ Петр натын туқуяҳқа̄таңа, ынка̄м туқулъыӷмикун қӯлваӷьяҳқа̄ Кияӷнық. Та̄хкын Иисусым пика̄ Петр: «Малихтиңа».

Иисусылъю, Иляңалъю Малихся̄ҳта

²⁰Петырым қӣвлюни ысҳақа̄ малихся̄ҳта Иисусым пиниқыхка̄ малигулъҳӣ. (Та̄наңӯқ малихся̄ҳта аяқиҳтыкақ Иисусыкун ныӷӯтңулютың а̄птикақ: «Атанық, китум увыҳпагунъақатын?») ²¹Петырым ысҳаӷлюку та̄на малихся̄ҳта, а̄птыка̄ Иисус: «Атанық, лъңаңам сялъықа?»

²²Иисусым кӣмсиқа̄: «Кияҳтысюкумкун кынляңа тагилъымнун, агӷиткысяҳқақынӷитан лъпык. Малихтыңъинаӷңа».

²³Ынка̄м ухпықани уңипақ миңиткақ, та̄на малихся̄ҳта туқуна̄нӷинъилюку. Иўырңа Иисусым пимаңита̄ туқуна̄нӷинъилюку. Хўатын пика̄гуқ: «Кияҳтысюкумкун кынляңа тагилъымнун, агӷиткысяҳқақынӷитан лъпык». ²⁴Лъңаңӯқ малихся̄ҳта а̄пҳӣқылӷӣ тама̄кын пилъыӷның, игақуқақӣлъю тама̄кут. Лӣсимакапут а̄пқӣ ипаңӯт.

²⁵Угля̄пихтут игақулъҳилңӯт Иисусым пикӣ. Игақуқа̄яқумың қамахлъютың сюмымни ынтақун ӣңунаӷми нуна лъивигӣнъаяӷа̄ игалӷутыҳлъягнун.