От Иакова

Иаковым Посланияңи

¹Укут посланият Иаковымың пиңӯт қыпҳаҳтыңаның Кияӷныӷымлъю, Атанӷымлъю Иисус Христосым. Письмоӷақуңа Иудеит ухпықӣтнун миңитңалӷӣнун тамаңани. Қуякамси.

Ухпылъықлъю, Нуқынъыҳтулъықлъю

²Ухпықа̄лгутымни, қуя̄қитык алъя̄ҳӣнаӷмың сыӷлылӣныҳпысини, ³қаюҳлъяк лӣсимакаси сыӷлылӣлъыҳпыси нанӷӣқуңўа̄т ухпықилъыҳси, нуқынъыҳтуҳсяӷналюси. ⁴Та̄хкын нуқынъыҳтулъыҳси нагныӷнакыси. Ынка̄м таўатын пикуфси аңтанӣлъықуси, ӣӷўиҳлъықуси нӯӷьяҳқа̄хпынаси.

⁵Налиҳси пыҳқинылъыңьюкуми туңсиӷли Кияӷныӷмың. Кияӷнық иӷлыгитыҳлъяхтуқ, қуякусиқинаӷлюку тӯныхкаюўа̄ қамахлъюку ю̄к а̄плъыҳӣ. Кияӷныӷым тӯнылъықӣси туңсиқуфси. ⁶Ынка̄м а̄птык ухпықилъылиӷлюку малӷуклъилъңуна̄н. Малӷуклъиңалӷӣ имаҳлъюгыстун аюқуқ, ануқым тыңқа̄тақыхкаңа. ^7-8Малӷуклъиңалӷӣ ата̄сӣҳсигатуқ сялъыӷмикун тамаҳа̄н. Таўатылңуқ ю̄к талўа сюмыҳтаӷаӷьяҳқа̄нӷитуқ сямың алңунак алъхыӷулъықнилюни Атаныӷмың.

Аклъюмалӷӣлъю, Аклъюңилңуқлъю

⁹Йықай аклъюмалӷӣ ухпықа̄лгун қуяли қӯлваҳтыстыңъалъыӷминың. ¹⁰Йықай аклъюңилңуқ ухпықа̄лгун қуяли қусывыхтыстыңъалъыӷминың, қаюҳлъяк авӣӷусяҳқа̄гуқ пӣтысиӷаӷыстун. ¹¹Сиқинық пӣнъыӷмини ма̄тныҳқўа̄ҳлъягақылӷӣ, пӣтысиӷа̄т палиҳтыслъюки. Та̄хкын пӣтысиӷа̄т ифкақӯтақут, пиниӷнӣӷутақӣ. Таўатыҳпигақ аклъюңилңуқ ю̄к сякыстаӷңа̄ӷми авӣӷулъықуқ.

Нанӷӣқулъық Кияӷныӷмың Пиңунӷитуқ

¹²Қуянаҳалык югым нанӷӣқулъыни нуқытуткаюги. Сюфлъюҳтыкумики алъхыҳсяҳқақа̄ акилыҳтӯсяни кынлыңилңуқ уңувалъық, Кияӷныӷым акықусяқыхка̄ тӯнылъықнилюку пиниқистыминун. ¹³Кина алңунак нанӷӣқулъыңыхкуми хўатын пифқа̄ми: «Кияӷныӷым сыӷлыҳқыснақутка̄ңа». Кияӷнық нанӷӣқулъыңьяҳқаҳа̄нӷитуқ сыӷлыӷмың; тама̄кын апалъюқлъюку кина алңунак сыӷлыҳқыснақуткысяҳқақынӷита̄. ¹⁴Иўырңа ю̄к пиюкылъылюган нанӷӣқулъыңыстақа̄ сыӷлыҳқылъыӷмун. Сивуклъюку пиюкылъылюган сяюгақа̄ сыӷлыҳқылъыӷмун, та̄хкын сыӷлыҳқылъҳым на̄птақа̄. ¹⁵Пиюкылъылюгым алъхыҳтыстақа̄ сыӷлыҳқылъық. Та̄хкын сыӷлыҳқылъық аңлиныӷмини туқулъҳуҳтақуқ.

¹⁶Пиниқыхкамни ухпықа̄лгутымни, пӯҳтысиҳпынаси. ¹⁷Қамахлъютың пинилӷӣтлъю, сялъҳўа̄ҳӣлңӯтлъю тунусят қилягмың пиңӯт. Тама̄кут Атамың пиңӯт улимаӷистыңаның қамахлъюни ниӷугым; алъяңуҳсигатуқлъю, мамлыхтыстиңигатуқлъю. ¹⁸Кияӷныӷым лъңан катам Пиюкылъқақа, тӯналюта нутаӷамың уңувалъыӷмың уңипа̄кун ипапиҳқылъҳым. Таўатын пика̄гуқ, хўаңкута мыгнуналъыҳпига̄сқылъюта улима̄ӷьяхаӷминың.

Нагатылъықлъю, Қа̄ткутылъықлъю

¹⁹Пиниқыхкамни ухпықа̄лгутымни, нықамиклъюку уна: тамаҳаӷми нагасюкыстаӷлюни пияҳқа̄гуқ, акузӣӷаҳтафқа̄милъю, сякша̄гаӷаҳтафқа̄милъю, ²⁰қаюҳлъяк сякша̄м каюсӣсигатӣси пинитун кияҳта̄лъыӷмун Кияӷныӷым пиюкыхка̄нун. ²¹Тама̄кын апалъюқлъюку пыхтыху қамахтыңъўа̄ӷлюку алъя̄ҳӣнақ сыӷлық атуқақыхкыси. Қусывыгңаҳпыси тугуклъиҳтыки Кияӷныӷым акузитаңи, пӣтысиӷақӣ илюхпысигун, қаюҳлъяк югулияҳқақӣси уңувасиҳпысиның.

²²Нагатаӷыснаҳпынаки Кияӷныӷым акузитаңи итупилъ атуқитыки. Пӯҳтақуси лъпысиның катам нагатаӷыснаныҳпысики атуқыхпынаки. ²³Ю̄к нагатаӷыснақуми Кияӷныӷым акузитаңаның атуқыхпынаки, таӷныӷаҳқулӷӣстун аюқуқ ²⁴тунускуми таўаниңинақ пуйгулъықа̄ натытулыни. ²⁵Кияӷныӷым ылъқуӷутңалӷӣт Лӣлиҳтӯсӣ итымутыстӣқут югның. Югым лӣнъақумаңинақумики та̄кут Лӣлиҳтӯсят, пуйгухпынаки атуқыхкумики Кияӷныӷым қуясяҳқақа̄ сялъҳакун тамаҳа̄н.

Манигӯтыпилъық Кияӷныӷмун

²⁶Ю̄к сюмыҳтаӷақаюк ухпықаҳлъягунилюни, нақам акузиткысяҳқақынӷилъкымъиның акузикаюк тымңи пӯҳтыңъӯқ лъминың катам. Ухпылъҳа сятңунӷитуқ. ²⁷Кияӷныӷым Атамта пилъҳани ю̄к ухпылъыпӣлгукуми, каюсиӷьяҳқақӣ яйўа̄литлъю, угиңиӷатлъю сыӷлылӣнӷата, нуқысяҳқа̄гуқлъю сыӷлыӷаның нунам.

Пиниқлъюки Юлгутыси

¹Ухпықа̄лгутымни, ухпықиңутыхпысиның Атанымнъың Иисус Христосымың, Атанӷаның ниӷуҳқылъҳым сюмыҳтаӷа̄ткыхпынаки иляңи югым мыгнунаӷатаӷаӷнилюки илямыхның. ²Ма̄лӷук югык итыӷьяқуйык қырңуӷутфихпысинун, а̄лъҳа а̄шаӷлюни, золотамың аляңқуӷӣтиҳтуӷлюни, а̄лъҳа а̄ткалюкаҳлъюни, ³та̄на а̄шаӷңалӷӣ ю̄к пикуфсигу: «Хўагун ақуми пинилъҳакун ақумутам», нақам аклъюмалӷӣ ю̄к пикуфсигу: «Таўани ныкывӷа», налиӷмың: «Ақуми итыгама ся̄ӷўакун», ⁴таўатын пикуфси пакихулъықаси иляңи югыт ынка̄м сыӷлыҳқылъықуси сюмыҳтаӷаткаҳтыкилъю.

⁵Пиниқыхкамни ухпықа̄лгутымни, нагатаҳтыкқун. Кияӷныӷым накмикыхкақӣ аклъюма̄лӷӣт нунами хўани ухпықилъыҳтусқылъюки. Накмикыхкақӣ тугуклъиҳтыңулюки Атаныҳпагулъыӷминың, акықусяқыхкаминың югминун, пиниқиңалӷӣнун лъңаның. ⁶Иўырңа лъпыси аклъюма̄лӷӣт югыт укалӣстақаси. Лӣсимакаси аклъюңилңӯт пияқлъӣҳқақӣси, агля̄тақлъюси нанқихтивигмун. ⁷Лъңаңут сыӷлытун акузиткилӷӣт қӯлваӷңалӷӣмың а̄тҳаның Иисусым, атық тӯныхкақ лъпысинун қаюҳлъяк лъңан пикыхкаңиси.

⁸Кияӷныӷым Атаныҳпагулъҳан Лӣлиҳтӯся̄ уна̄ңуқ: «Пиниқлъюку юлгутын пиниқылъыҳпытун лъпынун катам». Қа̄тқыхкуфсигу та̄на Лӣлиҳтӯсяқ, та̄ўа пинитун пӣси. ⁹Иўырңа пакихускуфсики иляңи югыт сыӷлыҳқылъықуси, қа̄ткынъа̄нӷитаҳсилъю та̄на Лӣлиҳтӯсяқ. ¹⁰Китум қа̄ткысяӷңа̄ӷмики қамахлъюки Кияӷныӷым Лӣлиҳтӯсӣ, ата̄сиқ қа̄ткынӷилъкумигу, қамахлъюки қа̄ткыңъунӷитӣ. ¹¹Кияӷнық пика̄гуқ: «Гылгаӷнӣҳпынаң». Хўатынлъю пика̄гуқ: «Юхтаҳпынаң». Гылгаӷнӣнӷисяӷңа̄ҳпык юхтақувык та̄ўа қа̄ткыңъунӷитатын Кияӷныӷым Лӣлиҳтӯсӣ. ¹²Акузилъыҳпысигун, сялъыҳпысигун пира̄мсилюси қаюҳлъяк лъпысиңӯси нанқихсяҳқат мыгнуналъыҳпигаҳқун Лӣлиҳтӯсякун. Та̄м Лӣлиҳтӯсям итымуткақӣси атуқысқылъюку Кияӷныӷым пиюкылъҳа лъпысинун. ¹³Кияӷныӷым нанқихтыкумиси наңлъыгьягунъа̄нӷитӣси, наңлъыгьягунъыӷилъкуфсики юлгутыси. Иўырңа наңлъыкыхкуфсики юлгутыси Кияӷныӷым наңлъыгьягулъықӣси.

Ухпықилъықлъю, Аныӷныҳқылъықлъю

¹⁴Ухпықа̄лгутымни, кина хўатын пиӷңа̄ӷми: «Ухпықилъылгӯңа», иўырңа та̄м ухпықилъҳан югулина̄нӷита̄ атуқынӷилъкумигу ухпықилъыни аныӷныҳқилъыӷмикун. Сясӣлъықаңам ухпықилъҳа аныӷныҳқилъңунани? ¹⁵Сянаяӷыстык ухпықа̄лгутыси а̄ткӣсяқанлъю, нықаңисяқанлъю? ¹⁶Тӯныхпына̄н аклъюкыхка̄ның тымңи хўатын пикуфсигу: «Кияӷныӷым қуясна̄ӷа̄тын; сюнаңуқ ныӷьяҳқаңилъю, а̄ткаңилъю мақалӷӣмың», сясӣлъықанңам акузитыси аныӷныҳқилъңунатың? ¹⁷Ухпықилъықлъю таўатытуқ, аныӷныҳқилъыҳқун атуқынӷилъкуми сясӣнӷитуқ.

¹⁸Кина пилъықуқ: «Лъпык ухпықилъылгӯтын, хўаңа аныӷныҳқылъылгӯңа». Кылгувикиңа ухпықилъыҳпының аныӷныҳқилъҳилңуӷмың, кылгувикылъықамкын ухпықилъымның аныӷныҳқилъымкун. ¹⁹Ухпықан ата̄сиҳа̄таңа Кияӷнық. Та̄на пиниҳтуқ! Туӷныӷа̄тлъю ухпықақа̄т та̄на ынка̄ңам алиңрӯӷақут, уңылыхтақут қаюҳлъяк лӣсимакыхкаңат Кияӷныӷым нанқихсяҳқақыхкаңи. ²⁰Уюқ налъю̄қақ ю̄к, паниның лӣгикигасигӯ ухпықилъық аныӷныҳқилъңунани сясӣнӷитуляңа? ²¹Сяңан Кияӷныӷым тугуклъиқақагу сивуныҳпут Авраам сыӷлыҳқумаңилңуӷыстун? Тугуклъиқақа̄ Авраам қаюҳлъяк ухпықилъыни атуқыхкақа̄ аныӷныҳқылъыӷмикун аҳқуткақңамигу иӷныни Исаак аҳқыфигыгныкун. ²²Лӣгиксигӯ? Ухпықилъықлъю, аныӷныҳқилъықлъю қырңа̄гмык қыпҳақаюгӯк. Тама̄кын апалъюқлъюку Авраамым ухпықилъҳа ӣӷўиҳтыкақа̄ аныӷныҳқылъыҳқун. ²³Ынка̄м Акузитыт Игақыхкат хўатын пилъҳит Авраамымың апыӷӣқа̄гут: «Авраамым ухпықыхкақыхкаңа Кияӷнық. Тама̄кын апалъюқлъюку Кияӷныӷым тугуклъиқақыхкаңа Авраам сыӷлыҳқумаңилңуӷыстун». Ынка̄м Кияӷныӷым Авраам илякумта̄қнилюку пикақа̄. ²⁴Кияӷныӷым тугуклъиӷақа̄ ю̄к аныӷныҳқилъҳакунлъю, ухпықилъҳакунлъю; тугуклъӣгата̄ ухпықилъыра̄ӷина̄кун.

²⁵Раавылъю успута̄гуқ. Акикикаюгуялӷӣ югусиминың. Иўырңа Кияӷныӷым тугуклъиқақыхкаңа сыӷлыҳқумаңилңуӷыстун апалъюқлъюку каюсиӷилъҳа. Иисус Навинам каяхтыкақыхкык ма̄лӷук югык аксяқлъюку нунаңат ювӷӣӷысқылъюку. Югыт иваӷьяткык, Раавым алъякун тӯмкун анахтыстыкакык.

²⁶Ынка̄ңам югусиқ таӷныӷаңунани туқуңа̄қ, ухпықилъықлъю аныӷныҳқилъңунани туқуңа̄қ.

Улю

¹Ухпықа̄лгутымни, алъюлъюси апыҳтуӷистыңуҳтыфқа̄фси Кияӷныӷым Акузитаңаның, қаюҳлъяк лӣсимакаҳси хўаңкута апыҳтуӷистыни нанқихтыңъўа̄ӷатаӷаӷьяҳқа̄гукут. ²Қамахлъюта анахутаӷаныҳтуҳлъяхтукут. Кина алңунак ю̄к акузилъыӷмикун анахусигалңуқ ылъқуӷутңапыста̄ӷӯқ. Югым ылъқуӷутңалӷӣм талўа югусинилъю агӷиткылъюку аюқсяҳқақа. ³Сявикынӷа̄ҳа̄т сянитмун аюқлъюки кӯнит қа̄нӷитнун канаҳтақапут қа̄ткысқылъюта ынка̄м хўаңкута иглыӷутақапут. ⁴Сюмыҳтаӷа̄ткаҳтыкиқунлъю аңьяҳпахлъягыт; ақӯтасқувыгаҳа̄м қӣфтақӣ аңьялгым пиюкылъҳанун талўа ануқатыҳлъягьяӷңа̄н. ⁵Улюлъю мыкыста̄ҳа̄гуқ иўырңа а̄ңа̄югныҳлъягӯқ.

Кынҳа̄м уқфилӷутыҳлъягыт кумаҳсяҳқақӣ! ⁶Улюлъю кынӷыстун аюқуқ. Ыслъықңа̄қ сыӷлыҳқылъыӷмың ынка̄м сыӷлыҳқумалъҳа миңиткаюгӯқ югусимун. Ынка̄м на̄фқӣкаюгӯқ кияҳта̄лъымнъың қаюҳлъяк геенам кынӷан кумаҳтақа̄.

⁷Алъя̄ҳӣна̄т тыӷикусят, қаўа̄гыт, нымыӷьят, мыӷым тыӷикусӣ қимухтыкаюгӯт, а̄қун югым қимухтақӣ ⁸иўырңа китум алңунак қимухна̄нӷита̄ улю. Ныклъыгигалңӯгуқ, сыӷлыӷӯқ, ыслъықңа̄қ туқуналӷӣмың ядымың. ⁹Улю усюқусиқақаҳпут Атанымнъун Атамун. Нақам сыӷлыӷмың ныӷьюхтаӷа̄сиқақаҳпут юлгутымнъун, Кияӷныӷым улима̄ӷитнун лъмисюгнилъюки. ¹⁰Усюқилъықлъю, сыӷлыӷмыңлъю ныӷьюхтаӷалъық а̄ныхкаюгӯк ата̄симың қаныӷмың. Ухпықа̄лгутымни, таўатысяҳқа̄нӷисяҳтуқ. ¹¹Пинилӷӣлъю, сыӷлықлъю мық ма̄қыхкаюўа̄к ата̄симың сыңъумың? ¹²Ухпықа̄лгутымни, смоквам уқфига пӣтыстина̄нӷитуқ маслинымың. Таўатыҳпигақ виноградым лозаңа пӣтыстина̄нӷитуқ смоквамың. Талўа мыҳтаӷвик таӷьюӷнилңуӷмың мықылӷӣ пинилӷӣмың мыӷитуқ.

Пыҳқинылъық

¹³Кина акулыхпысинита пыҳқинылӷӣ, лӣгикималӷӣлъю? Таўатытылъыни кылгулъигу пинитун кияҳта̄лъыӷмикун, аныӷныҳқилъыӷмикунлъю қусывыгңаӷми. ¹⁴Иўырңа илюхпысигун ақинаңакуфсилъю, лъңӣна̄югныӷукуфсилъю иқлъыңиқуткыхпына̄н ипапиҳқылъық, қаӷьялъыҳпысигун лӣсиманилюси. ¹⁵Таўатылңуқ пыҳқинылъық қиляхта̄нӷитуқ, нунамың пиңӯқ. Кияӷныӷым Таӷныӷахкының пиңунӷитуқ, туӷныӷаӷмың пиңӯқ. ¹⁶Нани алңунак ақиналъылгунӷанилъю, лъңина̄юхлъылгунӷанилъю та̄ўа кипулъхина̄лъылўа̄қуқ, сяңўа̄тлъю алъя̄ҳӣна̄т сыӷлыӷыт таўантақут. ¹⁷Иўырңа пыҳқинылъық қиляхтақ кияң пылюңитуқ. Амалъықа ныкыхмытуқ, кавьюгитуқ, малиҳқутақиңа̄қ, наңлъыхтаҳтуқ, пинистаҳӣнатун пикаюгӯқ, танӣлъҳитуқ, юпӣнӷӯқ. ¹⁸Ныкыхмылъық пӣтутыстун аюқуқ. Тама̄кут ныкыхмылъыӷмун қыпҳақаюгыт пӣтысиӷаӷақӣт, ынка̄м сяӷна̄қут ылъқуӷңалӷӣмыңлъю, пинилӷӣмыңлъю кияҳта̄лъыӷмыхни.

Тӯнитык Лъпысиның Катам Кияӷныӷмун

¹Ся̄м а̄ҳтӣра̄ӷутыстақисилъю, пилъюгутыстақӣсилъю? Апалъюқақаҳси, сыӷлыӷым пиюкылъыҳпыси пилъюўаӷақӣ пинилӷӣт пиюкылъыси. ²Қилӣӷақуси аваңинъыҳпысини ынка̄м юхтаӷьяҳқаҳтақуси алъхыҳналюки қилӣқыхкаси. Қилӣҳлъягақуси та̄ўаңинақ алъхыҳтыпагниңитақаҳси ынка̄м а̄ҳтӣра̄ӷутақуси, пилъюгутақуси. Алъхыӷусигатуси Кияӷнық а̄псигатутыхпысиның. ³Талўа а̄птыӷңа̄ҳпысигу Кияӷнық алъхыҳсигатаҳси қаюҳлъяк сыӷлыӷмун атуҳқа̄люки а̄птақылӷӣси. Пиюкыхкаҳси лъпыси катам пиюкыхкаҳӣнаҳпысинун аюқақылӷӣ. ⁴Укуҳси ата̄сӣӷныӷилңуӷни! Лӣсимакынӷистыхӯ пиниқыхкуфсигу нунам сыӷлыӷа, угумикаҳси Кияӷнық? Китум алңунак пиниқыхкумигу нунам сыӷлыӷа аңуягӯқ Кияӷныӷмун. ⁵Сюмыҳтаӷаҳпынаси Акузитыт Игақыхкат тымңиңунилюку хўатын пилъҳат, таӷныӷак кияҳлъыҳӣк илюмнъи ақинанақныҳтӯк. ⁶Тама̄кын апалъюқлъюку Кияӷныӷым каюсӣтаӷаӷақӣлъю нуқытутысқылъюки пиюкылъылюпут. Иўырңа Акузитыт Игақыхкат пӣт:

«Кияӷныӷым каюсиӷақӣ қусывыгңалӷӣт пӯру кипулъыгмун пӣқӣ қука̄югныӷыт».

⁷Тӯнлюси лъпысиның катам Кияӷныӷмун. Аяклъиҳтыху туӷныӷақ, анагнӣҳлъықуқ лъпысиның. ⁸Қантаӷалъӣӷаҳтык Кияӷныӷмун, Кияӷнық қантаӷалъӣӷаҳлъықуқ лъпысинун. Сыӷлыҳқыстыни, ӯҳтуҳтык! Лъпыси ата̄сӣҳтылъҳилңуӷни, укмаңиҳтыки илюси қа̄мкут. ⁹Қуянӷитык, асымыҳқитык, қиятык! Ныңляҳқылъҳыси қиялъҳуҳтыки, қуялъыси қуянӷилңӯҳтыстыки. ¹⁰Қусывыхтык Атаныӷмун, қӯлваҳлъықӣси.

Нанқихтутыхпынаси

¹¹Ухпықа̄лгутымни, сыӷлықӯӷутыхпынаси. Китум алңунак сыӷлықӯқумигу ухпықа̄лгутыни, сыӷлықӯҳлъықӣ Лӣлиҳтӯсят. Нанқихтыкумигулъю ухпықа̄лгутыни нанқихтыңъўӣ Лӣлиҳтӯсят. Нанқихтыкуфки Лӣлиҳтӯсят қа̄ткыңъунӷитатын. Йыӷлыги Лӣлиҳтӯсят нанқихтистыка̄тын. ¹²Кияӷныҳӣна̄гуқ Лӣлиҳтӯсяңлъяҳта, нанқихтисӣлюки атуқақӣ, ынка̄м сяңанңам нанқихсигу юлгутын? Кияӷныҳӣна̄гуқ югулиӷияҳқақ, на̄фқияҳқақ.

Налъюкаҳпут Уна̄ми Сялъыҳқаҳпут

¹³Иляси хўатын пӣқут: «Аӷныӷми налиӷмың уна̄ми таўавык нунамун аӷуляқылъықуңа. Тама̄нлъықуңа ата̄сиқ аюмиқулъық, маниңлъяҳлъықуңа». ¹⁴Иўырңа налъюкаҳси уна̄ми сялъыҳқаҳси! Талўа налъюкаҳси уңувалъыҳпыси тахталъкаҳқа̄. Уңувалъыҳси такысқуҳа̄гуқ, агыпсюӷрухаӷыстун аюқуқ, мулюхпынани авӣӷуткаюк. ¹⁵Итупилъ хўатын пӣқитык: «Атанӷым пиюкылъқыхкагу уңувакыстаҳлъықукут ынка̄м апыӷӣӷутақылъықукут сямың алңунак». ¹⁶Таўатын пинӷилъкуфси а̄ңа̄юхлъықусилъю, қанаңулъықусилъю. Тама̄кут а̄ңа̄юхтылъҳыт сыӷлыӷӯт.

¹⁷Ынка̄м китум алңунак лӣсимакыӷңа̄ӷмигу пинитун пилъық атуқынӷилъкумигу, сыӷлыҳқыңъӯқ.

Кылыңася̄лъық Аклъюңилңуӷнун

¹Нагатык аклъюңилңуӷни! Қиякыстаҳтык, ӣлъқыкыстаҳтык қаюҳлъяк сыӷлылӣӷнақңӯси. ²Аклъюңиси аӷума̄т, а̄ткаси молым ныӷумӣ. ³Золотасилъю, серебросилъю анаҳта̄ма̄т. Анаҳта̄лъҳита ипапиҳқынъақңўа̄ лъңина̄югныӷулъыҳсилъю, пакигныӷулъыҳсилъю нанқихтылъыңыхкуфси. Та̄хкын анаҳта̄лъҳым югусиси на̄фқылъықӣ катам кынӷыстун. Қайўа киңулиӷнун аӷныӷнун лъӣӷңа̄ҳпыси, қырңуҳтимаңина̄гуси ўата аклъюңиӷиналюси. ⁴Талўа акилыҳтулъҳитаси қыпҳаҳтыси унатақат пӣтусиӷаӷвихпысини. Нагатыки акузилгалъҳит. Атанӷым аҳтуӷьяҳқа̄нӷитыҳлъягым нагақӯмӣ акилӷӯлъҳит. ⁵Кияҳта̄лъыҳпысини хўани нунами, аклъюңитутыхпысиның сяңўа̄ алңунак пиюкыхкаҳси алъхыҳтақаҳси ыфқуҳналюси лъпысиның катам. Таўатын пилъыҳпысигун пынъӣӷыстун аюқуси. Пынъӣӷыт қугилисиӷат налъюка̄т қантаӷақун туқутылъыҳқаҳтың. Налъюкыстыхӯ қантаӷақун Атанӷым нанқихтилъыҳқа̄? ⁶Лъпысиңӯт нанқихтистикатлъю, туқутистикатлъю анахусимаңилңуӷның югның, лъңита аяклъӣмаңитӣси.

Қыляныныҳлъяклъю, Юӷалъықлъю

⁷Ухпықа̄лгутымни, қыляныҳпынаси кынляңа Атанӷым тагинқихтылъыҳқа̄нун. Пӣтысиӷаҳта успутақитыху. Нунами пӣтысиӷаӷлюни қыляныӷьюкаҳпынани утақӣгақуқ укся̄ӷымлъю, упынӷа̄млъю ыслъялъюўаның нагустикаюгмың пӣсяҳқаның. ⁸Лъпысилъю қыляныныҳлъюгутык ныӷьюмаңинаӷлюси қаюҳлъяк Атанық тагияҳтуҳтуқ.

⁹Ухпықа̄лгутымни, сыӷлықӯҳпынаки иляси ынка̄м Атанӷым нанқихныӷилъиси. Лъңаңӯқ Нанқихтиста ка̄сяҳтуңысталӷӣ. ¹⁰Ухпықа̄лгутымни, нықамиклъюки ӯкналиқистыт акузикат а̄тҳакун Атанӷым. Успутақитыки қыляныҳпынатың нуқынъыҳтулютың икфиқылъыӷми пикат. ¹¹Қуяңанӣқапут ӯкналиқистыт қаюҳлъяк икфиқңуӷңа̄ӷмың паниның ныӷьюкумаңинақақа̄т Атанық. Нагақуқақаҳси Иовым нуқынъыҳтулъҳа, қуястылъҳалъю Атаныӷмың икфиқылъҳа алъпагьян. Ынка̄м Иовыкун Атанӷым лӣтыстӣси нафуҳталъыӷминыңлъю, наңлъыхталъыӷминыңлъю.

¹²Ухпықа̄лгутымни, апыӷнақыхкыхка уна мыгнунапихтуқ. Акықиныҳпысини, акықихпынаси қиляхкун, налиӷмың нунакун, налиӷмың сякун алңунак. Пияҳқа̄куфси лыган а̄ңггга̄си, пияҳқа̄нӷилъкуфси лыган нака̄ҳа̄си. Ынка̄м атуқақитыки акықусяси, таўатын пикуфси Атанӷым нанқихна̄нӷитӣси аӷью̄ӷьяҳқа̄люси.

¹³Кина акулыхпысини икфиқңўа̄? Юӷаӷли. Кина қуяңа̄? Илягаӷли усюқилъыӷмың. ¹⁴Кина қинуюўа̄? Туқлъюӷлики Пресвитерыт ынка̄м юӷа̄ткылъитху мысӣҳқылъюку А̄тҳакун Атанӷым. ¹⁵Юӷалъҳым ухпықилъыҳқун на̄лъҳусяҳқақа̄ қинуюлӷӣ ю̄к. Ынка̄м Атанӷым югунқўӯҳтыснықихлъықа̄, сыӷлыҳқылъҳилъю сыӷывулъықӣ. ¹⁶Тама̄кын апалъюқлъюку а̄пҳақлъюки сыӷлыҳқылъыси иляхпысинун, юӷа̄ткутутақлъюси на̄лъҳутылъыңысқылъюси. Ылъқуӷутңалӷӣм югым юӷалъҳи икнақыҳлъяхтут, алъхыӷуткаюгӯт. ¹⁷Илия югӯқ хўаңкутыстун аюқылӷӣ. Та̄куңинаҳа̄гның юӷақақ ыслъялъюгуҳтыфқа̄н писқылъюку. Ынка̄м ыслъялъюгуҳсимаңилңуқ пиңают аюмиқулъҳыт алъя аӷвинлык танқиқ илялъюку. ¹⁸Та̄хкын алъя юӷақақ ыслъялъюгуҳтысқылъюку. Ынка̄м ыслъялъюгуҳсялӷӣми нуна пӣтыстикақ ныӷьяҳқамың.

^19-20Ухпықа̄лгутымни, уна киңулӣгуқ апыӷьюкыхка лъпысинун. Налиҳси ухпықинаниқан апыҳтӯсяпигның, китум каюсиӷлигу ухпықинқихтылъыӷмун. Таўатын пикумигу югулислъықа̄к сыӷлыҳқыстым уңувасикык туқулъыӷмың. Кияӷныӷымлъю сыӷувулъықӣ та̄м сыӷлыҳқыстым сыӷлыҳқылъылӷутыҳлъяги.