Еврейенун Посланият
1Кияӷныӷым Акузитаңи Иӷныӷмикун
1Сивунӷани агани угляӷлюкулъю, алъя̄ҳӣна̄люкулъю Кияӷныӷым алыҳқуқақӣ сивуныпут ӯкналиқистытхун. 2Иўырңа укуни киңулиӷни аӷныӷни алыҳқуқақӣлъю Иӷныӷмикун. Лъңакун Кияӷнық нунаңлъяқа̄гуқ, накмикыхкақӣлъю пилӣтысқылъюку сяңўа̄ тамаҳа̄н. 3Иӷныӷым кӯкхутақа̄ Кияӷныӷым ниӷуҳқылъҳа, Кияӷныҳтуңўа̄қлъю аюқуқ. Сяңўа̄т қамахлъюки нагныӷастыңъўӣ таўатылъюки аҳтуӷьяҳқа̄нӷилңӯтхун акузитмикун. Иӷныӷым тӯныхкақа̄ лъми катам уңувалъыни укмаңиӷналюта тамаҳа̄ның сыӷлыҳқылъымнъың. Апыӷӣӷьямигу таўатын пилъыни, қилягми ақумыхка̄гуқ аӷынқигныӷакун Кияӷныӷым, аҳтуӷьяҳқа̄нӷитылъыҳпига̄м.
Иӷнық А̄ңатаӷаҳтуқ Яқулыгның
4Кияӷныӷым қулӣҳтыкақа̄ Иӷнық яқулыгның, атылиткақа̄лъю иңья̄тңалӷӣмың а̄тҳитның. 5Таўатын пикақа̄ қаюҳлъяк Кияӷныӷым пимаңитӣ налиҳӣнӣт яқулгыт хўатын:
«Иӷнықамкын;
аӷныӷми Аталӣтаҳпыңа».
Кияӷныӷымлъю пимаңитӣ налиҳӣнӣт яқулгыт хўатын:
«Атакылъықа̄ңа ынка̄м лъңа Иӷнықылъықақа».
6Кияӷныӷым каяхсяҳқа̄ҳсямигу Иӷнықсюхўа̄ни нунамун, хўатынлъю пика̄гуқ:
«Йықай қамахлъютың Кияӷныӷым яқулгита манигуӷлитху».
7Хўатынлъю пика̄гуқ яқулыгның:
«Кияӷныӷым яқулыни ануқыстун лъӣҳтыстыкақӣ.
Қыпҳаҳтыңи кумаӷулӷӣстун кынӷыстун лъӣҳтыстыкақӣ».
8Иўырңа Кияӷнық Иӷныӷминың хўатын пика̄гуқ:
«Ка̄й Кияӷнық, ақумутахкын кынлыңисяҳқа̄гук қӯнпырухлъяк!
Иглыӷулъықан атаныҳпагулъҳын ылъқуӷутңалъылиӷлюку.
9Пиниқан ылъқуӷутңалъық, угумикан анахутңалъық.
Тама̄кын апалъюқлъюку Кияӷнық,
Кияӷныҳпык накмикума̄тынлъю, қӯлва̄ма̄тынлъю пакихулъюку иляхпының.
Ынка̄ңам қуястиҳлъяхтуқ аңиҳақатынлъю мысӣӷмың».
10Хўатынлъю пика̄гуқ:
«Лъпык, Атанық, пӣнлиӷьюха̄ӷми нунаңлъяқа̄гутын,
ӣхыхпыныңлъю қилягаңлъяқа̄гутын.
11Қамахлъютың авӣӷусяҳқа̄гут,
иўырңа лъпык кияҳсяҳқа̄гутын.
Аӷьюӷьяҳқа̄гут а̄ткастун.
12Имыхтыҳлъықатын қа̄слъистун,
симиҳлъықатынлъю а̄ткастун.
Иўырңа лъпык қӯнпың алмысиқылъықа̄тын,
аӷьюӷьяҳқа̄нӷитутынлъю».
13Кияӷныӷым пимаңитңўа̄ӷӣ налиҳӣнӣт яқулыни хўатын:
«Ақуми хўагун аӷынқигнымкун,
кынляңа аңуяхтын тунымалӣтыстылъымнун итыгаҳпык асиңанун».
14Сяңа̄ўанңам яқулгыт? Қамахлъютың таӷныӷа̄гут қыпҳа̄тилӷӣт Кияӷныӷмың, каяхтақӣлъю каюсӣтысқылъюки тама̄кут югулилъыңьяҳқат.
2Кияӷныӷым Югулиӷилъыҳлъяга
1Тама̄кын апалъюқлъюку сюмыҳтаӷа̄ткыңъўа̄ӷылътыки ипапилъҳыт нагақуқапут лю̄рақ ўа̄кнаниқыстаӷнаюкамтыки. 2Кияӷныӷым апыҳтӯсӣ ипаңӯт; а̄пқақӣ югнун яқулыхтыхун. Кина алңунак қа̄ткунъыӷилңуқ апыҳтӯсянун, Кияӷныӷым аӷью̄ҳлъықа̄ аӷью̄лъыҳқаҳтуталяңатун. 3Ынка̄м иҳсякумакумтыху Кияӷныӷым югулиӷилъыҳлъяга анахпагниңитаҳпут аӷью̄ӷилъыҳқа̄. Атанӷым апыӷьюха̄қақа̄ та̄на югулилъық. Та̄хкын тама̄кут нагақӯткат лъңаның, ипапиҳқа̄т хўаңкунъун. 4Кияӷныӷымлъю ипапиҳқыхкақа̄ хўаңкунъун. Таўатын пика̄гуқ атуқылъыӷмикун алъя̄ҳӣна̄т алъя̄ҳлъюхўаҳтилъҳыт, уйыхтылъыӷмикунлъю тунусӣ Аглыӷналӷӣм Таӷныӷам пиюкылъыӷмитун.
Иисус, Югулилъыңыстикақ Хўаңкунъың
5Кияӷныӷым накмикылъҳитӣ яқулгыт иглыӷутисқылъюки сивумылңуӷмун нунакаҳқамун. (Та̄наңӯқ нуна акузиткыхкыфут.) 6Налиӷныӷитни Акузитни Игақыхкани хўатын игақңа̄қ:
«Кияӷнық, сяңа̄ўа ю̄к умьюгаӷмикақыхкын,
налиӷмың иӷныӷа югым афлъыңакыхкан?
7Улима̄қан укавақа̄нлъюку яқулыгның,
қаҳпалиқақан ниӷуҳқылъыӷмыңлъю, қӯлвалъыӷмыңлъю,
8иглыӷутистыңлъяқақанлъю сямун тамаҳа̄нун».
Таўанилъю Акузитни Игақыхкани игақңа̄қ, Кияӷныӷым улима̄қа̄ ю̄к «иглыӷутистыңулюку сямун тамаҳа̄нун». Та̄на хўатын писӣгуқ сяңўа̄ қамахлъюни илятңа̄қ иглыӷутилъҳанун. Нақамлъю сялин ысҳӣгатаҳпут ю̄к иглыӷутилӷӣ сямун тамаҳа̄нун. 9Иўырңа ысҳаӷаҳпут Иисус! Кияӷныӷым натыңӣҳақ укаваҳтыстыкақсяӷа̄ яқулыгның. Ма̄тын ысҳаӷаҳпут қаҳпалюни ниӷуҳқылъыӷмыңлъю, қӯлвалъыӷмыңлъю қаюҳлъяк икфиқлъюни туқука̄гуқ. Кияӷныӷым пиниқылъҳа апалъюқлъюку, Иисус туқука̄гуқ тамаҳа̄нун. 10Кияӷныӷӯқ улимаӷикақ сямың тамаҳа̄ның лъңанун, нагныӷастыңъўӣлъю таўатылъюки. Итагнапихтыка̄гуқ Кияӷныӷым пиниҳсяӷўа̄қақа̄ Иисус икфиқылъыҳқун пӣнлиҳтыңулюку югулилъҳитнун. Ынка̄м Иисусым тагисяҳқа̄ҳтыкақӣ юлӷутыт ниӷуҳқылъыӷмун.
11Иисусым пылюңиҳсяқақӣ югыт сыӷлыҳқылъҳитның. Ынка̄м лъңалъю тама̄кутлъю пылюңиҳсяқӣ, қамахлъютың Атака̄т Кияӷнық. Тама̄кын апалъюқлъюку Иисусым кайңукигатӣ атиӷьяҳқа̄люки аңлыгутңулюки. 12Иисусым пикақа̄ Кияӷнық:
«Апыҳлъықақа а̄тҳын аңлыгутымнун;
усюқылъықамкын қырңуӷутката».
13Хўатынлъю пика̄гуқ:
«Ныӷьюкылъықақа Кияӷнық».
Пика̄гуқлъю:
«Хўаңалъю, таӷнуҳа̄тлъю Кияӷныӷым тагивақӣ хўаңамнун».
14Та̄кут таӷнуҳа̄т югӯт кымыкшалгутлъю, а̄лгӯтлъю ынка̄м Иисус лъңистун лъӣқа̄гуқ. Таўатын пика̄гуқ туқуналюни на̄фқынъалюку Туӷныӷақ, аҳтуӷьяҳқа̄нӷилъылык туқумун. 15Ынка̄м таўатын пилъыӷмикун итымуткақӣ тама̄кут қыпҳаҳтыля̄ӷыстун аюқылӷӣт уңувалъытың қамахлъюки қаюҳлъяк аликңукаңат туқулъық. 16Хўатыҳлъюга̄ӷӯқ яқулгунӷитут Иисусым каюсиқӣ, иўырңа Авраамым киңунӷи каюсиӷақӣ. 17Тама̄кын апалъюқлъюку Кияӷныӷым Иисус лъӣҳтыстыңъўа̄ӷьяҳқақа̄ хўаңкутыстун. Таўатын қыпҳа̄сяқлъыгўа̄ Кияӷнық Первосвященнигулюни, наңлъыхтаӷлюнилъю, ата̄сӣӷмылъюнилъю. Ынка̄м тӯнияқлъыгуҳтыка̄гуқ аҳтутмың Кияӷныӷмун сыӷывутысқылъюки югыт сыӷлыҳқылъҳит. 18Иисус икфиқыхка̄тминыңлъю, нанӷӣқулъыңыхка̄тминыңлъю, каюсиӷьяқлъыгўӣ тама̄кут нанӷӣқулъыңылӷӣт.
3Иисус А̄ңатаӷаҳтуқ Моисейемың
1Ынка̄ңам ухпықа̄лгутымни, Кияӷныӷым а̄фтыкақӣси лъңанун югулюси, туқлъюқақӣсилъю лъминитысқылъюси қилягми. Сюмыӷмиклъюку Иисус. Кияӷныӷым каяхтыка̄ апостолыңулюкулъю, Первосвященнигаңулюкулъю а̄пҳақыхкыфут ухпықнилюку. 2Иисус ата̄сӣӷмытка̄гуқ Кияӷныӷмун накмикистыминун, катам Моисей ата̄сиӷмыткақ Кияӷныӷмун қыпҳа̄тақңамигу Кияӷнық мыңтыӷа̄ни. 3-4Тамаҳаӷми мыңтыӷақ китумың улимаӷистылгулӷӣ, иўырңа Кияӷныӷым Иисусыкун сяңўа̄ тамаҳа̄н улима̄қа̄. Югыт усюқатаӷаӷьяҳқақа̄т Иисус пакихулъюку Моисейемың, қаюҳлъяк югыт усюқылъықа̄т мыңтыӷаңлъяҳта пакихулъюку мыңтыӷамың. 5Моисей ата̄сӣӷмытка̄гуқ қыпҳаҳта Кияӷныӷым мыңтыӷа̄ни, уңипа̄ткақӣлъю югыт Кияӷнық сямың апыӷьяҳқалгунилюку та̄ганиқа̄ӷақ. 6Иўырңа Христос иӷныӷулюни ата̄сӣӷмытка̄гуқ иглыӷутиста Кияӷныӷым мыңтыӷа̄ни. Хўаңкута мыңтыӷақӣлъю Кияӷныӷым, илютумаңинақумта, ипапиҳқуткумаңинақумтыхулъю сиӷимакыхкаҳпут.
Қа̄ткунъыӷитылъҳат Израилыӷмӣт
7Ынка̄ңам катам таўатын Аглыӷналӷӣк Таӷныӷак пӣк:
«Аӷныӷми хўани нагақуқуфсигу Кияӷныӷым мыңа,
8пиныҳлъиқыхпынаси сивуныҳпысистун.
Тама̄ни аӷныӷни килга̄нилъютың қа̄ткысюгумаңита̄т Кияӷнық,
нанӷӣҳсяӷақақа̄тлъю нуқынъыҳтулъҳа».
9Кияӷнық пӣқ:
«Тама̄ни ю̄к ма̄лӷук аюмиқулъыӷни сивуныҳпыси ысҳақақыӷңа̄ӷмыхтыки апыӷӣқанка, паниның нанӷӣҳсяӷақақа̄тңа.
10Тама̄кын апалъюқлъюку тама̄кут югыт сякшитыстыкақа̄тңа.
Ынка̄м пика̄гуңа:
“Ӣўлың ата̄сӣӷмысигатут хўаңамнун,
лӣгикигатутлъю натылъюку кияҳтысқысюлъымның.
11Сякшитңулюңа акықика̄гуңа алъяңуҳсяҳқа̄нӷилңуӷмың”.
Хўатын пӣңа:
“Итыӷна̄нӷитңўа̄ӷа̄т мыӷна̄ливихкақ ята̄ҳқыхкақа лъңитнун”».
12Ухпықа̄лгутымни кылыңалюси, сыӷлыӷмың сюмыҳтаӷалъыӷныңлъю, ухпынӷитылъыӷныңлъю, иқитутыстыхпынаси уңувалӷӣмың Кияӷныӷмың. 13Иўырңа аҳутаңа тамаҳа̄н кайымутақитык пилъыҳқалгумалюку атилъқылӷӣмың «Аӷныӷми». Таўатын пинӷилъкуфси та̄ўа сыӷлыҳқылъҳым пӯҳлъюси пиныҳлъюңлъяҳлъықӣси. 14Иўырңа ата̄сӣӷмылъкумта уңувалъымта кынлыңанун, ныӷьюклъюку Кияӷнық ухпыӷьюхўа̄лъымтыстун, та̄ўа Христосым пилгуткылъықӣлъю лъми пиминың. 15Акузитни Игақыхкани игақңа̄қ:
«Аӷныӷми нагақуқуфсигу Кияӷныӷым мыңа,
пиныҳлъюгухпынаси сивуныҳпысистун қа̄ткусимаңилңӯт Кияӷныӷмун».
16Кинкуңа̄ўат нагақӯткат Кияӷныӷым мыңаның нақам қа̄ткутыхпынатың? Тама̄куңӯт югыт Моисейем маӷьяҳқуқӣ Египетмың. 17Ю̄к ма̄лӷук аюмиқулъыӷни килъю Кияӷнық сякшитыстатху? Тама̄куңӯт сыӷлыҳқылъютың туқуляӷа̄ткат килга̄ни. 18Кинкунун Кияӷнық акықика̄ўа итыӷна̄нӷитңўа̄ӷнилюки мыӷна̄ливихкамун ята̄ҳқыхкаминун? Акықыхкақӣ қа̄ткусимаңилңӯт лъңанун. 19Та̄ўа лӣгикаҳпут итыҳпагниңитка̄гут таўавык мыӷна̄ливигмун қаюҳлъяк ухпықынӷилъкаңат.
4Кияӷныӷым Акықуся̄ Мыӷна̄лилъық
1Кияӷныӷым акықуся̄ югнун аӷулӣтуқ ӣтҳысқылъюки мыӷна̄ливигминун. Иўырңа алиңылъта лю̄рақ налиҳси нӯҳунъаюкан итыҳпынани мыӷна̄ливиганун. 2Пинилӷӣ уңипақ Кияӷныӷым мыӷна̄ливиганың аюқылӷӣ нагақуқақаҳпут катам тама̄кустун югыстун Моисейем маӷьяҳқуқӣстун Египетмың. Иўырңа пинилӷӣм уңипам каюсӣтылъҳитӣ қаюҳлъяк ухпықумаңита̄т нагақуқаҳтың. 3Хўаңкута ухпылӷӣни итыҳлъықукут Кияӷныӷым мыӷна̄ливиганун. Иўырңа Кияӷныӷым акузиткыхкақӣ ухпықилъҳилңӯт хўатын:
«Сякшитңулюңа акықика̄гуңа алъяңуҳсяҳқа̄нӷилңуӷмың.
Хўатын пӣңа:
“Итыӷна̄нӷитңўа̄ҳтут мыӷна̄ливихкамнун”».
Таўатын акузика̄гуқ қыпҳақани апыӷӣқақыӷңа̄ӷмики има нунаңлъялъыӷминың. 4На̄нтуқ Акузитни Игақыхкани игақлъюни ма̄ӷраӷвинлӣтаңа аӷныӷым хўатын: «Кияӷнық мыӷна̄лика̄гуқ тама̄ҳа̄ның қыпҳақаминың ма̄ӷраӷвинлӣтаңани аӷныӷым». 5Акузитнилъю Игақыхкани Кияӷнық пика̄гуқ:
«Итыӷна̄нӷитңўа̄ҳтут мыӷна̄ливихкамнун».
6Паниның иляңи югыт итыҳлъықут Кияӷныӷым мыӷна̄ливиганун. Иўырңа нагақӯсюхўа̄қат пинилӷӣмың уңипа̄мың, итылъҳитут мыӷна̄ливигмун қаюҳлъяк қа̄ткутылъҳилңӯт Кияӷныӷмун. 7Тама̄кын апалъюқлъюку Кияӷныӷым ныкыхтыкақа̄ иляңа аӷнық, атилъқылӷӣ «Аӷныӷми». Киңурухлъяганың Моисейем, Кияӷныӷым акузиткыхкақа̄ та̄на аӷнық Давидыкун. Утыҳпахтанка Давидым игақыхкӣ Акузитни Игақыхкани хўатын:
«Аӷныӷми хўани нагақуқуфсигу Кияӷныӷым мыңа,
пиныҳлъиқыхпынаси сивуныҳпысистун».
8Иисус Навинам маӷьяҳқулъҳитӣ югыт таўавык мыӷна̄ливигмун. Лӣсимакаҳпут қаюҳлъяк та̄м киңуңаның Кияӷныӷым акузиткыхкақа̄ иляңа аӷныӷа мыӷна̄лилъҳым. 9Тама̄кын апалъюқлъюку та̄ўа Суббота аӷулӣтуқ, мыӷна̄ливик Кияӷныӷым югитнун. 10Кина алңунак ӣтқуми Кияӷныӷым мыӷна̄ливиганун, мыӷна̄лилъықуқ қыпҳақаминың катам таўатын Кияӷныӷым мыӷна̄лилъҳатун. 11Тама̄кын апалъюқлъюку итыӷнақыҳлъягылъта Кияӷныӷым мыӷна̄ливиганун. Қа̄ткынӷитыфқа̄н пилътыху Кияӷнық сивунымта пилъҳистун.
12Акузитаңи Кияӷныӷым уңува̄т қыпҳа̄гут. Ӣпхатаӷаҳтут алңунак иңлюхтун ипыхсяқаның сявихпагның. Ка̄путкаюгӯт қамавырухлъяк уңувасимлъю, таӷныӷамлъю ка̄тутңалъҳыхкынун, нафлъютлъю па̄тҳытлъю ка̄тутңалъҳитнун. Кияӷныӷым акузитаңи нанқихтикаюгӯт югым сюмыҳтаӷалъҳаныңлъю, сянақылъҳаныңлъю. 13Сяңўа̄ қамахтыңъўа̄ӷлюни Кияӷныӷым улима̄ӷа ӣӷңанӷитуқ Кияӷныӷмың. Алӣтут, хўатыҳлъюўа̄ӷӯтлъю ийыхкыни. Лъңанун қайвиҳқысяҳқақапут сялъыпут қамахлъюки.
Иисус Первосвященнигаҳлъякаҳпут
14Тама̄кын апалъюқлъюку Первосвященнигрухлъягӯкут қилягмун маюқамың. Иисусыңӯқ, Иӷныӷа Кияӷныӷым. Ынка̄м ухпықилъыӷмытыкыста̄лъта а̄пқамнъи югнун. 15Первосвященнигамта лӣгикңўа̄қақӣ кая̄лъиқусипут, қаюҳлъяк нунамылъюни нанӷӣқулъыңыхка̄гуқ хўаңкутыстуңўа̄қ. Нақамлъю сыӷлыҳқумаңитуқ. 16Ынка̄м тытулъңуна̄мта агля̄лъта умӣлгусигнун ақумутахкынун Кияӷныӷым, алъхыӷусаҳқа̄люта наңлъыхталъҳанун. Таўани наңлъыкылъықӣлъю, каюсиҳлъықӣлъю аклъюкилъымнъи.
51Тамаҳа̄н первосвященнига Кияӷныӷым накмикыхкақа̄ юлгутаңаның. Кияӷныӷмун агляӷақуқ югыт апалъюқлъюки тӯналюки тунусӣт аҳқыша̄ӷунъалюкилъю сыӷлыҳқылъҳитнун. 2Первосвященнига кая̄лъиқыхкаюгутминың наңлъыхтаӷьяҳқа̄гуқ тама̄кунун налъюкылӷӣнунлъю, ухпықинанилӷӣнунлъю ипапилъыӷмун. 3Қаюҳлъяк кая̄лъиқыхкаюгутминың, первосвященнига аҳқыша̄ӷьяҳқа̄гуқ лъми катам сыӷлыҳқылъыӷминун, сыӷлыҳқылъҳитнунлъю югыт. 4Кина алңунак накмикигатуқ лъңаның первосвященнигуҳналюни қӯлваӷьяҳқа̄люни. Иўырңа ю̄к первосвященнигуҳтақуқ Кияӷныӷым накмикынӷатни, катам таўатын накмикылъҳатун Аарон.
5Таўатынлъю Христос қӯлвалъҳитуқ лъминың накмиклъюни первосвященнигуҳтылъыӷмун, иўырңа Кияӷныӷым накмикыхкақа̄. Пикақа̄:
«Иӷнықамкын; аӷныӷми хўани Аталӣтаҳпыңа».
6Налиӷныӷитни Акузитни Игақыхкани Кияӷныӷым пикақа̄:
«Священнигуъықутын қӯнпырухлъяк,
Мелхиседекым священнигаңулъҳатун».
7Кияӷнық аҳтуӷьяҳқа̄нӷилъылгӯқ югулияҳқа̄люку Иисус туқулъыӷмың. Ынка̄м Иисус нунамытңулюни, игляхтулюни қунитӯмаӷми юӷақа̄лӷӣлъю, туңсиқа̄лӷӣлъю Кияӷныӷмун югулисқылъюни туқулъыӷмың. Кияӷныӷым нагаткақӣ юӷалъҳи, қаюҳлъяк қусывыхлъюни қа̄ткыхка̄ Кияӷныӷым пиюкылъҳа. 8Қайўа Иисус Кияӷныӷым Иӷнықыӷңа̄тни, паниның лӣтка̄гуқ қа̄ткусималъыӷмың икфиқылъыӷмикун. 9Апыӷӣӷьягу қамахлъюку Кияӷныӷым писқылъҳа, Иисусыңуҳтуқ кынлыңилңуӷмың югулилъыңыстияҳқақ тамаҳа̄нун қа̄ткулъҳӣнун лъңанун. 10Ынка̄м Кияӷныӷым накмикыхкақа̄ первосвященнигаңулюку, Мелхиседекым первосвященнигаңулъҳатун.
Таӷнуҳаҳа̄тлъю, Аңтанӣткатлъю Ухпықат
11Апыӷьяҳқаҳлъягӯкут тама̄куның. Иўырңа апыҳтуныҳлъюпихтуси тама̄куның қаюҳлъяк лӣгикаӷаҳсигалңӯси. 12Ныӷипихлъюси ухпықа̄лӷӣси ынка̄м апыҳтуӷияҳқа̄ҳтыка̄гуси иляхпысинун. Йыӷлыги паниның аклъя̄қуси китумун апыҳтунқихтысқылъюси ухпынҳат лӣсюхўа̄ӷьяҳқӣтның Кияӷныӷым акузитаңаның. Катам таӷнуҳаҳаӷыстун мамаҳтуӷьюгақуси, нықыпигьюхпынаси. 13Кина алңунак мамаҳтуқаюк паниның таӷнуҳаҳа̄гуқ. Сялин налъюка̄ ылъқуӷутңалъықлъю, анахутңалъықлъю. 14Иўырңа нықыпик аңтанӣтканун пиңӯқ. Пыҳқихсяқа̄гут лӣгиксяҳқа̄люкык пинилӷӣлъю, сыӷлылӷилъю.
61Ынка̄м лӣтылътыки апыҳтӯсят аңтанӣтканун ухпықанун аюқылӷӣт. Лӣтңўа̄қақаси апыҳтӯсюхўа̄қат Христосымың аюқылӷӣт ынка̄ңам лӣнъықихсяҳқақынӷитаси. Лӣтңўа̄ӷума̄си атуқсяҳқа̄фқӣта пиналюки тама̄кут туқумун аюқылӷӣт. Лӣнъықихсяҳқақынӷитаҳсилъю ухпықилъыӷмың аюқылӷӣ Кияӷныҳқун, 2крестиӷылъыӷның, ӣхтилъыӷның, уңуваҳтилъыӷның туқуканың, Кияӷныӷымлъю нанқихтилъыҳқа̄ның югның аӷью̄ӷьяҳқа̄люки кынлыңуна̄н. 3Кияӷныӷым пистыкаңилъю, апыҳтуҳлъықамси аңтанӣтысқылъюси ухпықат.
4-6Тама̄ иляңаның юлгӯқ алъхыӷутка̄ялӷӣның Кияӷныӷым ниӷуганың, на̄сӣқақа̄тлъю қилягым тунуся̄. Алъхыӷутка̄гутлъю Аглыӷналӷӣгның Таӷныӷагның. Нанӷӣқақӣт пиниҳтуляңи Кияӷныӷым акузитаңи, нанӷӣқақа̄тлъю Кияӷныӷым аҳтуӷьяҳқа̄нӷилъҳа нунакаҳқамылңуқ. Та̄хкын ухпықнаниқумыхтыху Христос, авутыҳқынқихтыпагниңӣлъықут қаюҳлъяк қақӯранқихтыкаңат Кияӷныӷым Иӷныӷа, кайңуся̄кыхкаңатлъю юхтуқами.
7Нуна мыӷақуқ ыслъялъюгуҳнъыӷани, пӣтыстӣқуқлъю нунивахсыӷамың атуҳқамың тама̄кунун пыксиҳқиканун нунамың. Ынка̄м Кияӷныӷым пиниҳқыстақа̄ нуна. 8Иўырңа нуна пӣтыстимакуми сикуҳлъюгныңлъю, плевелыныңлъю сятңунӷитуқ. Якуӷна̄нитуқ Кияӷныӷым сыӷлыӷунилъыҳқа̄ның, ынка̄м паныҳсяҳқа̄гуқ.
9Пиниқыхкамни, қайўа лъпысинун письмоткыӷңа̄мтыки тама̄кут, сюмыҳтаӷа̄ткигатамси таўатылъюси. Лӣсимакаҳпут пиниӷатаӷалӷӣмың қуястылъылгӯси югулилъыҳпысигун. 10Кияӷнық ылъқуӷутңа̄н нанқихтӣқуқ, ынка̄м пуйгуна̄нӷита̄ қыпҳалъыҳсилъю, пиниқилъыҳсилъю лъңанун каюсӣтылъыҳпысигун юги. Нықамикылъықа̄лъю паниның каюсӣтңукыси. 11Нагныҳтысюгамси сягиқлъюси қыпҳа̄тысқылъюку Кияӷнық уңувалъыҳпыси тахталңатун. Ынка̄м алъхыҳтыпыста̄ҳлъықаҳси сиӷимакыхкаҳси. 12Иҳсяниталӷӣңуҳтысюнӷитамси. Йыӷлыги тама̄кустун аюқыстысюгамси ухпықилъыӷмыхтыхун, нуқытутилъыӷмыхтыхунлъю алъхыӷусяҳқат Кияӷныӷым акықусяқыхка̄ның.
Кияӷныӷым Акықуся̄ Айыпсюгитуқ
13Кияӷныӷым акықақңамигу Авраам, акықыхкақа̄ пияҳқапыста̄ӷунилюку. Аваңитутаңаның а̄ңатаӷалӷӣмың лъңаның, атуқлъюку лъми катам атыни акықика̄гуқ. 14Авраам пикақа̄: «Қуястыпыста̄ӷлютын, угля̄пихлъюку киңунылилъықамкын». 15Авраам қыляныҳпынани утақӣка̄гуқ, ынка̄м алъхыҳтыкақа̄ Кияӷныӷым акықуся̄. 16Китум ныклъыхсюныӷминигу а̄ҳтӣра̄ӷутылъық, акықӣқуқ сямың пилъыни ипаңунилюку атуқлъюку китум а̄тҳа лъңаның а̄ңатаӷалӷӣм. 17Алъхыӷусяҳқат акықусяминың, Кияӷныӷым лӣгикыстысюгўӣ алъя̄ңуҳсяҳқақынӷитңўа̄ӷнилюки агӷилъыни. Ынка̄м акықика̄гуқ атуқлъюку атыни. 18Кияӷныӷым таўатын кайымилъю. Кияӷнық иқлъыңиқигатуқ акықиныӷмини, иқлъыңиқна̄нӷитуқлъю акықикуми атуқлъюку атыни ипапиҳқынъалюку пияҳқақутни. Та̄кук алъяңуҳтықаҳна̄нӷитук. Хўаңкута анагнӣқани Кияӷныӷмун пақнӣнъалюта, кайымылъыңыҳлъяхтукут сиӷимакналюку Кияӷныӷым акықуся̄. 19Та̄на сиӷималъық уйӷӣтңӯқ уңувасимнъун, пақнанӣӷутыстӣлъюлъю, айыпсюгитыстӣлъюлъю. Та̄на сиӷималъық итыҳтуқ аглыӷналъыҳпигаӷмун нымун сяфка̄ӷутым аўатаңанилңуӷмун. 20Таўавык Иисус ӣтқа̄гуқ сивумнъи хўаңкута апалъюқлъюта. Первосвященнигуңуҳтыка̄гуқ қӯнпырухлъягмун, Мелхиседекым священнигаңумалъҳатун.
7Священнига Мелхиседек
1Та̄на Мелхиседек умӣлъкысяӷа̄ Салимым, священнигака̄лъю Қулиҳпига̄м Кияӷныӷым. Авраам утыӷнӣмалюку пилъюўамың кая̄лъқуӷлюки умӣлгыт, Мелхиседекым налъяӷлюку қуястыкақа̄. 2Та̄хкын Авраамым тӯныхка̄ қуляҳқылъҳаның сямың тамаҳа̄ның тугукаминың пилъюўами. Мелхиседекым а̄тҳа ма̄лӷугыгның сямың писилгӯқ, сивулиқ хўатын писӣгуқ: «Умӣлга Ылъқуӷутңалъҳым». Умӣлъкыхка̄таңаның Салимым, а̄тҳан а̄лъҳа хўатын писӣгуқ: «Умӣлга Ныкыхмылъҳым». 3Игӣтуқ игақфикыхкамың Мелхиседекым атаңаныңлъю, на̄ңаныңлъю налиӷмың сивунӷаның, талўа алъхылъҳаныңлъю, туқулъҳаныңлъю. Кияӷныӷым Иӷныӷатун аӷулӣтуқ священнигуңулюни қӯнпырухлъяк.
4Та̄ўа лӣгикаҳси Мелхиседекым а̄ңумалъыҳлъяга. Талўа сивунықсюхўа̄мта Авраамым тӯныхка̄ Мелхиседек қуляҳқылъҳаның тугуляқаминың пилъюўами. 5Священникат киңунқӣ Левийем. Лӣлиҳтӯсяни, Кияӷныӷым қылъқақӣ священнигыт қырңуҳтисқылъюки юлгутаңитның қуляҳқылъыӷмың алъхыҳтыкӣтның. Священникат таўатын пӣқут, священнигатлъю, югытлъю Авраамым киңунқыӷңӣстың. 6Мелхиседек киңунқынӷита̄ Левийем, иўырңа тугуклъиқақа̄ қуляҳқылъық Авраамым тӯньягу. Қуястыкақа̄лъю Авраам, алъхыӷутка̄лӷӣ Кияӷныӷым акықуся̄ның. 7Налъюнықнӣтуқ та̄на қуястилӷӣ а̄ңатаӷаҳтуқ та̄хкын қуястыкамың. 8Священнигыт югӯт туқукаюгыт нақамлъю алъхыӷутка̄гут қуляҳқылъыӷмың. Мелхиседеклъю алъхыӷутка̄гуқ қуляҳқылъыӷмың, иўырңа кияҳтыңъӯқ, Акузитыт Игақыхкат апылъҳистун. 9Левий алъхыӷутка̄гуқ югның қуляҳқылъыӷмың. Пинаялӷӣкут талўа лъңалъю лъивикика̄гуқ қуляҳқылъыӷмың Мелхиседекымун, Авраамыкун. 10Қайўа Левий алъхылъҳитыӷңа̄ӷми, сивуныӷми Авраамым югусӣнитка̄гуқ Мелхиседекым налъяӷақңагу Авраам.
Иисус Мелхиседекытун Аюқуқ
11Лӣлиҳтӯсяни игақңа̄қ священнигыт киңунқысяҳқақӣ Левийем. Лъңита Лӣлиҳтӯсят апыҳтӯткақӣт югнун, иўырңа қыпҳақа̄т Кияӷныӷмун нӯҳутка̄гуқ. Тама̄кын апалъюқлъюку югыт аклъюка̄гут священнигымың Мелхиседекытун аюқылӷӣмың, Ааронытун аюқынӷилңуқ. 12Левит священнигыт симиныӷмыхтыки алъяның священниганың, та̄ўа Лӣлиҳтӯсятлъю алъяңуҳсяҳқа̄гут. 13Священникат қӯнпың Левийем рамкыңаның пиңӯт, иўырңа Атаныҳпут рамкыңаның пиңунӷитуқ. Кина алңунак Атанымта рамкыңаның пи қыпҳӣгатңўа̄ҳтуқ священнигаңулюни аҳқыфигыгни. 14Тамаҳаӷми лӣсимака̄т Атаныҳпут алъхықа̄гуқ рамкыңанун Иудам. Моисейем пимаңитӣ киңунӷи Иудам священнигуңуяҳқа̄нилюки.
15Ынка̄м тама̄кут лӣгикатаӷаӷапут хўатыҳлъюўа̄қ қаюҳлъяк иляңа священнигым Мелхиседекытун аюқылӷӣ тагима̄қ. 16Лӣлиҳтӯсят қылӷуткақа̄т священник киңунқысяҳқақнилюку Левийемун. Атаныҳпут священнигуңуҳтыка̄нӷитуқ Лӣлиҳтӯсят писқылъҳитхун, иўырңа священнигаңуҳтыка̄гуқ аҳтуӷьяҳқа̄нӷилңуҳқун уңувалъыӷмикун кынлытҳӯсяҳқа̄нӷилңуҳқун. 17Акузитыт Игақыхкат пика̄лӷӣт:
«Священнигуңӯтын қӯнпырухлъяк,
Мелхиседекым священнигуңулъҳатун».
18Тама̄кын апалъюқлъюку Кияӷныӷым симиқақа̄ Лӣлиҳтӯсяқ священнигның аюқылӷӣ қаюҳлъяк кая̄лңуқлъю, атӯнӷилңуқлъю. 19Лӣлиҳтӯсят кина алңунак пистысимаңита̄ Кияӷныӷым пиюкылъҳатун. Ынка̄м Кияӷныӷым тӯнумилъю пиниӷатаӷалӷӣмың сиӷималъыӷмың. Та̄хун сиӷималъыҳқун агляӷьяҳқа̄ҳтукут Кияӷныӷмун.
20Та̄м сиӷималъҳым ся̄ӷўакун Кияӷнық алъяңуҳна̄нӷилңуӷмың акықима̄қ. 21Иўырңа таўатылңуӷмың акықилъҳитуқ Левийем киңунӷи священнигаңуҳтақңата. Иисусыңинаӷмун хўатын пика̄гуқ:
«Атанық акықима̄қ, алъяңуҳна̄нӷита̄клъю умьюгагни;
“Лъпык священнигуңӯтын қӯнпырухлъяк”».
22Тама̄кын апалъюқлъюку Иисусыңӯқ ипапиҳқылъық Кияӷныӷым акықусяни пипыста̄ҳлъықа̄. Та̄на акықусяқ пиниӷатаӷаҳтуқ акықусяқыхкаминың Моисейкун.
23Сивунӷани священнигытуяҳтуқ. Туқунӷата иляңита священнигыт нагныӷутақа̄т қыпҳақа̄т. 24Иўырңа Иисус священнигуңӯқ қӯнпырухлъяк қаюҳлъяк уңувалъықуқ қӯнпың. 25Тама̄кын апалъюқлъюку Иисусым ӣўлың югулияқлъыгўӣ Кияӷныӷмун аглялӷӣт лъмикун, қаюҳлъяк қӯнпың уңуваңӯқ манигӯтунъалюки тама̄кут Кияӷныӷмун.
26Иисус Первосвященнигуңӯқ тӯникаюк сямың аклъюкыхкамнъың. Аглыӷнаҳтуқ, авутңитуқ, пылюңитуқ, а̄фтыңъа̄қ сыӷлыҳқыстының, Кияӷныӷым қӯлвақақа̄ қулиҳпигаӷмун қилягмун. 27Иисус иляңистун первосвященнигыстун аюқынӷитуқ. Аҳутаңа тамаҳа̄н первосвященнига аҳқыша̄ӷьяҳқа̄гуқ, сивуклъюни лъми сыӷлыҳқылъыӷминун, та̄хкын югыт сыӷлыҳқылъҳитнун. Иисус тӯнақңами лъми катам, аҳқуткыхка̄гуқ сыӷлыҳқылъҳитнун югыт, ата̄сиҳаӷмың. 28Лӣлиҳтӯсяни игақңа̄қ югыт накмӣӷьяҳқа̄нилюки первосвященнигакаҳқамың сыӷлыҳқыхкаюгуӷңа̄н алңунак югыстун. Киңуңаның Кияӷныӷым апылъҳан Лӣлиҳтӯсят Моисейемун, тахталми та̄кўани алъяңуҳсяҳқа̄нӷилңуӷмың акықика̄гуқ. Та̄хун акықилъыҳқун Кияӷныӷым Иӷныни Первосвященнигуңуҳтыстыкақа̄, афкуяңуна̄н, қӯнпырухлъяк.
8Иисус, Первосвященникаҳпут
1А̄пқаҳпут лъпысинун, хўатын писӣгуқ: таўатылңуӷмың первосвященнилгӯкут ақумгалӷӣмын аӷынқигныӷани ся̄ӷўакун Аҳтуӷьяҳқа̄нӷитылъыҳпига̄м қилягми. 2Қыпҳа̄тиңӯқ первосвященнигуңулюни святилищами. Та̄на скинияпигӯқ Атанӷым ныкыфтыкақа̄, югым ныкыфтыкақынӷита̄.
3Тамаҳаӷми первосвященнига накмикыхка̄гуқ тӯнисқылъюку тунусяның, тыӷикусяныңлъю аҳқыша̄ӷысқылъюку Кияӷныӷмун. Ынка̄м Первосвященнигывутлъю сямың тӯньяҳқалгуяҳқа̄гуқ Кияӷныӷмун. 4Иисус нунамысяқуми священнигуңунаянӷитуқ, қаюҳлъяк священнигыт нунами тӯникаюгут тунусяның Кияӷныӷмун Лӣлиҳтӯсят писқылъҳистун. 5Священнигыт қыпҳақа̄гут святилищами, қилягмылңуҳтун аюқысюгнилңуӷми. Сялин Моисейем скиния ныкыфтылъҳилъюку, Кияӷныӷым апақуткақа̄: «Ўатаҳлъяк сяңўа̄ қамахлъюку улиманакын таўатыңўа̄қ успықылъымтун кылгуткамтун лъпынун на̄йӷами». 6Кияӷныӷым Иисус қыпҳақалиткақа̄ священнигаңулюку. Қыпҳақа̄ мыгнунаӷатаӷаҳтуқ Левитат священнигыт қыпҳалъҳитның. Таўатыҳпигақ акықусяӷраӷақ пиниӷатаӷалӷӣңӯқ акықусялюгмың қаюҳлъяк та̄хун Иисусым илялӣӷутыстыкақӣ Кияӷнықлъю, югытлъю. Пиниӷатаӷаҳтуқ қаюҳлъяк тунымӣтңа̄қ акықусятхун пиниӷатаӷалӷӣтхун.
7Сивулиқ акықусяқ афкуйӣсяқан, та̄ўа тӯңлӣнъаяҳтуқ. 8Иўырңа Кияӷныӷым афкуялгуникақӣ юни хўатын пӣқңами:
«Аӷныӷыт ка̄лъықут, пӣқ Атанық,
акықусяӷраӷақ пилъықақа Израилыӷмӣнунлъю, Иудаӷмӣнунлъю.
9Акықусяӷраӷақа таўатынъа̄нӷитуқ акықусяқыхкамтун сивунӷитнун таслъюқлъюки аӷуляқутақңамки Египетмың.
Қа̄ткусимаңитут акықусяма писқылъҳатун.
Ынка̄м авылӷақӣнақақанка, пӣқ Атанық.
10Аӷныӷыт та̄кут киңуңитның уна акықусяӷраӷақ пилъықақа Израилыӷмӣнун, пӣқ Атанық:
Лӣлиҳтӯсянка умьюгӣтнун канаҳлъықанка,
игақылъықанкалъю қамагун илюңитхун.
Кияӷнықылъықа̄тңа, лъңит юкылъықанка.
11Налиҳӣнӣта̄ апыҳтуӷьяҳқақынӷита̄ нуналгутни,
налиӷмың ныңлъюгутни лӣтысқылъюку Атанық,
қаюҳлъяк қамахлъютың лӣсимакылъықа̄тңа,
укалиҳпигаҳаӷның пиңўа̄ҳлъягнун.
12Сыӷывулъықанка анахутылъҳит,
алъямыңлъю нықамикна̄нӷитанка сыӷлыҳқылъҳит».
13Кияӷныӷым акузиткақңамигу акықусяӷраӷақ, сивулиқ акықусяқ атӯнаниҳтыстыкақа̄. Ынка̄м сяңўа̄ алңунак атӯнаниӷлюни аӷьюӷлюни мулюхпынани авӣӷулъықуқ.
9Манигӯтылъық Нунамылңуӷми Скиниями
1Акықусяқсюхўа̄ӷмини Кияӷныӷым игақыхкақӣ қылӷусят натын манигӯтылъыҳқамың лъңанун, натынлъю ныкыфтылъыҳқа̄ святилище нунами. 2Та̄на святилище югыт улимака̄т палаткаңуфтуқ ма̄лӷугыгның нылык. Сивулӣм ным а̄тқыфта̄ Аглыӷналӷӣ На. Илюңанитыфтут кынылӷуталӷутак, қаюӷвикык нықыкшаңлъялгык тӯныхкамың Кияӷныӷмун. 3Аўалиӷныӷани тӯңлиҳа̄н сяфка̄ӷутым иляңа ным атилъқылӷӣ Аглыӷналъыҳпигақ На. 4Илюңани та̄ўа золото аҳқыфигык паныӷрыӷа̄сик фимиамымун. Та̄ўалъю сялңагык қаспыӷиқак золотамың, атҳык ковчегык, нықаңӯсиҳқак Кияӷныӷым акықуся̄нун. Ковчегым имақыфтӣ золото ақимлыӷутак маннамың ималгык, Аароным аявӣӷа пӣтқуӷвикыхкақ, ма̄лӷуклъю лъӣвнықыхтак уйӷагык игақуӷвикңалӷӣк Кияӷныӷым қылӷуся̄ның. 5Қӯлңани ковчегым та̄ўа золото херувимык, яқҳўик таӷныӷаңулъҳӣк искупленият ныкаҳқақит. Иўырңа ӯми пилъыӷми акузиткыпагниңитапут тама̄кут.
6Сяңўа̄ тамаҳа̄н палатканилңуқ апыӷӣӷлюку, та̄хкын аҳутаңа тамаҳа̄н священнигыт ӣтҳақут сивулиӷмун нымун қыпҳаӷналютың. 7Иўырңа первосвященнигаңинаҳақ итыӷьяҳқа̄гуқ тӯңлиҳа̄нун ныңанун палаткам. Таўатын пӣқуқ ата̄сиҳаӷмың аюмиқулъыӷми. Итыныӷмини таўавык нымун ӣўлың кылъқысяҳқа̄гуқ а̄ўаның аҳқуткыхкам тыӷикусям. Тӯнӣқуқ а̄ўмың Кияӷныӷмун лъми сыӷлыҳқылъыӷминун, югытлъю сыӷлыҳқылъҳитнун. Та̄на а̄ўк сыӷлыҳқылъҳитнун пиңӯқ налъюклъютың пикӣтнун. 8Тама̄кутхун Аглыӷналӷӣм Таӷныӷам лӣгикыстӣлъю итыӷвик Аглыӷналъыҳпигаӷмун Нымун сялин қылъпыҳсигалңуқ скиния атуқңулюку. 9Та̄кут успута̄гут ма̄тымун. Лӣгикыстӣлъю тунусятлъю, аҳтуткыхкатлъю тыӷикусят налъҳусяҳпагниңита̄т манигӯтистым сюмыӷныӷа. 10Тама̄кут тунусятлъю, аҳтутытлъю атуқыхка̄гут қа̄ткысяҳқа̄люки қылӷусят нықныңлъю, мыӷьяҳқаныңлъю, пылюңиҳсялъыҳқаныңлъю югусӣтның аюқылӷӣт. Тама̄кут қылӷусят югусиҳӣнаӷмун аюқут. Қа̄ткысяҳқа̄гут кынляңа Кияӷныӷым акықусяӷраӷа̄ атӯҳтылъҳанун.
11Христос тагӣқңами Первосвященнигуңулюни, тагиткақӣ қамахлъюки пинилӷӣт қуястилъҳыт хўа̄ ма̄тын хўа̄нлыңӯт. Ӣтқақа̄ скиния қилягмылңуқ, мыгнунаӷатаӷалӷӣлъю пиниӷатаӷалӷӣлъю нунамылңуӷмың скиниямың. Қилягмылңуқ скиния югыт улима̄қынӷита̄т ынка̄м нунам пикынӷита̄. 12Та̄хкын Христос ӣтқа̄гуқ ата̄симың қӯнпырухлъяк Аглыӷналъыҳпигаӷмун Нымун сыӷлыҳқылъымнъың итымунъалюта кынлыңуна̄н. Таўатын пика̄гуқ тӯнылъыӷмикун лъми катам а̄ўни, атуҳпынаки а̄ўит козёлытлъю, каумӷа̄тлъю. 13Лӣҳтӯсят қылъқақӣт священнигнун сивилъяхтӣсқылъюки югыт а̄ўитның козёлыт, каўым юхтанӷит, панылъҳаныңлъю каумӷа̄м. Таўатын пӣқут пылюңиҳсяӷналюки югыт югусӣт тугуклъиӷьюгнаҳтысқылъюки Кияӷныӷмун. 14Тама̄кут пылюңиӷияқлъыгуката югыт югусӣтның, та̄ўа Христосым а̄ўан ўата пилъықӣ. Пылюңиҳлъықӣ умьюгаси сятңунӷилңуӷның ухпықилъыӷның лъпысинун қыпҳа̄тысқылъюку уңувалӷӣ Кияӷнық. Кынлыңилңӯгныкун Таӷныӷагныкун, Христос сыӷлыҳқылъҳилңуқ, тӯныхка̄гуқ лъңаның катам Кияӷныӷмун аҳқутңулюни.
15Ынка̄м Христосым тагиткақа̄ Кияӷныӷым акықусяӷраӷа̄ югнун туқлъюқа̄нун. Христос таўатын пика̄гуқ лъңитнун алъхыҳтысқылъюку кынлыңилңуқ пагитақ Кияӷныӷым акықусяқыхка̄ лъңитнун. Алъхыҳлъықӣт пагитат қаюҳлъяк Христосым туқуматкыхкақыхкаңи. Ынка̄м югыт кияҳтыкат акықусяқсюхўа̄ӷми, итымума̄т сыӷлыҳқылъыӷмыхның.
16Игакун югым игақуҳлъықӣ сяӷьяни китумун пагисяҳқа̄нилюки туқукуми. Пагитияҳқам алъхыҳна̄нӷитӣ пагисяҳқани ўытку китум ипапиҳқыхкагу ю̄к туқуматаңа. 17Та̄м югым игақуқӣ пикатңуна̄нӷитут сялин кияҳтыңъулюку. Игақуқӣ пикатңуҳлъықут киңуңаның туқукан. 18Тама̄кын апалъюқлъюку талўа акықусяқсюхўа̄қ пикатңумаңитуқ а̄ўңунани. 19Моисейем а̄пқақӣ югнун қамахлъюки қылӷусят Лӣҳтӯсянилңӯт. Та̄хкын каумӷа̄тлъю, козёлытлъю а̄ўитның тугулъюни мыӷмың акумыхка̄. Тугулъюни кавилңуӷмың шерстымың, авая̄ныңлъю иссопым ныптыкӣ а̄ўмун. Та̄хкын сивилъяхтақӣ игат Лӣлиҳтӯсялӷутат, қамахлъюкилъю югыт. 20Пикӣ: «Унаңӯқ а̄ўк апыӷӣӷилӷӣ Кияӷныӷым акықуся̄ның қылӷускаңа лъпысинун қа̄ткысқылъюку». 21Таўатыҳпигақ Моисейем сивилъяхтақақӣ а̄ўмың скиния, қамахлъюкилъю сяӷьят атуқыхкат манигӯтылъыӷмун. 22Ипапыста̄қ Лӣлиҳтӯсят пилъҳитни, қамахтывзиглюни сяңўа̄ тамаҳаӷми пылюңиқа̄гуқ а̄ўкун. Кияӷныӷым сыӷывунъа̄нӷитӣ югыт сыӷлыҳқылъҳит ўыткуқун а̄ўк ма̄қыхкан.
Христосым Аҳтуткылъҳан Сыӷлыҳқылъҳыт Иқиткақӣ
23Нунамылңуқ скиния, илюңанилңӯтлъю сяӷьят қилягмылңуӷыстун аюқут. Тама̄кут нунамылңӯт сяӷьят пылюңиӷьяҳқа̄гут а̄ўитхун тыӷикусят. Иўырңа қилягмылңӯт сяӷьяпигыт пылюңиӷьяҳқа̄гут аҳтутытхун пиниӷатаӷалӷӣт нунами аҳқуткыхканың. 24Христос ӣтҳумаңитуқ Аглыӷналъыҳпигаӷмун Нымун югыт улима̄ӷитнун. Та̄на ипапихтун қилягмылңуҳтун аюқуқ. Йыӷлыги қилягмун ӣтқа̄гуқ ынка̄м ма̄тын Кияӷныӷмытуқ Первосвященнигаңулюни хўаңкунъун. 25Христос нунам первосвященнигыстун аюқынӷитуқ. Ата̄сиҳаӷмың аюмиқунӷани первосвященник ӣтҳақуқ Аглыӷналъыҳпигаӷмун Нымун кылъқылъюни а̄ўмың лъми пикынӷилъкыминың. Иўырңа Христос аҳқуткумаңитуқ лъңаның утыҳпахтӣнақ, 26қаюҳлъяк икфиқнаяҳтуқ углӣнаӷлюку има улималъҳаның нунам. Иўырңа укуни киңулиӷни аӷныӷни тагика̄гуқ ата̄симың қӯнпырухлъяк иқинъалюки сыӷлыҳқылъҳыт аҳтуткылъыӷмикун лъминың. 27Тамаҳаӷми туқуяҳқа̄лӷӣ ата̄сиҳаӷмың, ынка̄м та̄м киңуңаның Кияӷныӷым нанқихлъықӣ. 28Таўатыҳпигақ ата̄сиҳаӷмың Христос аҳтуткыхка̄гуқ лъмитның иқинъалюки сыӷлыҳқылъҳит юлӷутыт. Иўырңа алъя тагикуми, аҳтуткысяҳтӯнӷитуқ лъминың сыӷлыҳқылъыӷмун. Йыӷлыги югулияҳтуҳлъықӣ қылянқилӷӣт лъңаның.
101Лӣлиҳтӯсят таӷныӷаңулъҳӣстун аюқут пинилӷӣнун ка̄сяҳқанун, иўырңа Лӣлиҳтӯсят та̄куҳпига̄нӷитут. Лӣлиҳтӯсят қылылъҳистун Иудеит аҳқыша̄ӷумаңинаӷақут аюмӣтаңа тамаҳа̄н. Иўырңа тама̄кут аҳқыша̄лъҳыт укмаңиӷўа̄ҳпагниңитӣт сыӷлыҳқылъҳитның манигуӷьяҳтуныӷмыхтыху Кияӷнық. 2Югыт манигӯтыстыңи Кияӷныӷым укмаңипӣгумакумың сыӷлыҳқылъыӷмыхның, сыӷлыҳқинаниӷнаяҳтут. Ынка̄м аҳтуткинаниӷнаяҳтут. 3Иўырңа аюмӣтаңа тамаҳа̄н, тама̄кут аҳқыша̄лъҳыт нықаңуҳтыстақӣт югыт сыӷлыҳқылъҳитның, 4қаюҳлъяк а̄ўита каўым юхтанӷитлъю, козёлытлъю сыӷлыҳқылъҳиҳпагниңитӣт. 5Тама̄кут апалъюқлъюки Христос тагӣқңами нунамун пикақа̄ Кияӷнық:
«Аҳтутыюгумаңитутынлъю, тунусяӷьюгумаңитутынлъю,
иўырңа ята̄ҳқыхкақан югусиқ хўаңамнун.
6Ыфқуқумаңитатын тыӷикусят ӣңунӣта паныҳтыкат аҳқыфигыгни налиӷмың аҳтутыт сыӷлыҳқылъыӷнун.
7Та̄хкын хўаңа пӣқа:
“Ӣи Кияӷнық, тагӣңа пиюкылъыҳпытун пиналюңа,
катам таўатын игақуқақыхкаңатңа Акузитни Игақыхкани”».
8Христос пика̄лӷӣ: «Аҳтуӷъюгумаңитутынлъю, тунусяӷьюгумаңитутынлъю. Аҳтуӷъюгумаңитутын тыӷикусяның ӣңунаӷмың паныҳтыканың аҳқыфигыгни налиӷмың аҳтутның сыӷлыҳқылъыӷнун. Тама̄кут ыфқуҳсимаңита̄тын». Христос таўатын пика̄гуқ Лӣлиҳтӯсят қылӷуткақыӷңа̄тки тама̄кут аҳтутыт писқылъюки. 9Та̄хкын пика̄гуқ: «Ӣи, тагӣңа пиюкылъыҳпытун пиналюңа». Ынка̄м Кияӷныӷым қамахлъюки иқиқуӷлюки аҳтутылъюгыт ныңитхун ныкыхтыкақа̄ Христос аҳқутңулюку. 10Иисус Христосым қа̄ткысяқминигу Кияӷныӷым пиюкылъҳа, пылюңиқақӣлъю сыӷлыҳқылъымнъың тӯнылъыӷмикун югусини ата̄сиҳаӷмың қӯнпырухлъяк.
11Аҳутаңа тамаҳа̄н, тамаҳаӷмың священнигыт ныкывӷаӷмың қыпҳақатың пӣқӣт. Утыҳпахтӣнақ тӯнӣқут таўатылъкулъҳӣның аҳтутның. Таўалъӣма тама̄кут аҳтутыт сыӷлыҳқылъҳиӷияҳқаҳа̄нӷитут. 12Иўырңа Христосым тӯныхкақа̄ ата̄сиқ аҳқун сыӷлыҳқылъыӷнун қӯнпырухлъягмун. Та̄хкын ақумыхкақ аӷынқигныӷакун Кияӷныӷым. 13Таўани Христос утақӣгақуқ кынляңа Кияӷныӷым ныкыхтылъыҳқа̄нун аңуяги итыга̄н асиңанун. 14Та̄хун ата̄сикун аҳтуткылъыҳқун, Христосым қӯнпырухлъяк на̄михтыстыкақӣ пылюңиҳсяқат сыӷлыҳқылъыӷмыхның.
15Аглыӷналӷӣмлъю Таӷныӷам уңипа̄тӣлъю тама̄куның. Сивуклъюни хўатын пика̄гуқ:
16«Унаңӯқ акықусяқа юмнун,
киңуңитның тама̄кут аӷныӷыт, пӣқ Атанық,
Лӣлиҳтӯсянка канаҳлъықанка илюңитнун,
игақылъықанкалъю умьюўӣтхун».
17Та̄хкын пӣқ:
«Алъямыңлъю нықамикна̄нӷитанка сыӷлыҳқылъҳит, сыӷлытунлъю пилъҳит».
18Ынка̄м Кияӷныӷым сыӷывускаки сыӷлыҳқылъҳит, аҳтутыт атуқсяҳқа̄наниҳлъықут сыӷлыҳқылъыӷнун.
Туӷа̄ӷылъта Кияӷныӷмун
19Тама̄кын апалъюқлъюку, ухпықа̄лгутымни, алиңылъңуна̄мта итылъыҳқаңукут Аглыӷналъыҳпигаӷмун а̄ўакун Иисусым. 20Қылъпыӷусимисилъю тумыӷраӷаӷмың уңувалъыӷмун сяфка̄ӷуткун; та̄на сяфка̄ӷун югусиқа̄. 21Священнигалыхлъя̄гӯкутлъю иглыӷутилӷӣмың Кияӷныӷым мыңтыӷа̄ның. 22Тама̄кут апалъюқлъюки тугӯлътыху Кияӷнық ипапиҳқылъюта, ныӷьюкңўа̄ӷлюку. Таўатын пилъыҳқаңукут қаюҳлъяк умьюгалъюпут сивилъяхтақа̄гут Христосым а̄ўаның укмаңӣҳтысқылъюки, югусипутлъю уӷвуҳқыхка̄гут пылюңилңуҳқун мыҳқун. 23Йықай ата̄сӣӷмылъюта сиӷималъыӷмытыкыста̄лъта хўаңкунъун пикникамнъун, қаюҳлъяк ухпықаҳпут Кияӷнық ата̄сӣӷмытуқ ынка̄м пияҳқақӣ акықусяни. 24Йықай сюмыҳтаӷа̄лъта натын қӣлңумиӷусяҳқа̄люта пиниқсяҳқа̄люки илят, пинитунлъю пияҳқа̄люта. 25Йықай та̄қыфқа̄мта қырңуӷунъыӷмың пилъта манигуӷналюку Кияӷнық, иляңита пӣқылъҳистун. Йыӷлыги қырңуӷусимаңина̄лъта кайымутунъалюта. Ўата кайымусимаңина̄лъта қаюҳлъяк Атанӷым Аӷныӷа туӷа̄лӷӣ.
26Сыӷлыҳқысюга̄тақумта киңуңаның лӣлъюку ипапилъық, та̄ўа аҳтуткаҳқӣтуқ иқитусиҳқамың тама̄вык сыӷлыҳқылъыӷнун. 27Тама̄кут таўатын пилӷӣт алиңрӯӷмың утақӣлъықут Кияӷныӷым нанқихтилъҳаның. Атуқылъықа̄к угуқнаҳлъягык кынӷык на̄фқынъалюки тама̄кут кипулъхина̄лӷӣт лъңаның. 28Ма̄лӷук налиӷмың пиңают лӣсимакистыт а̄пқатху ю̄к қа̄ткусимаңинъилюку Моисейем Лӣлиҳтӯся̄мнъун, нанқихтистым наңлъыкыхпына̄н туқутыслъықа̄. 29Сюмыҳтаӷа̄ткаҳтыху натынми аңкаслъюган Кияӷныӷым аӷью̄ҳлъықагу ю̄к тутма̄сҳақӣқылӷӣ Иӷныӷаның Кияӷныӷым, пӣқылӷӣ сятңунӷинъилюку а̄ўк апыӷӣӷуткақ акықусяӷраӷаӷмың (қайўа Кияӷныӷым укмаңӣсиқыхкақыӷңа̄гу сыӷлыҳқылъҳанун), сыӷлықӯӷӣқылӷӣлъю наңлъыхталӷӣгнун Таӷныӷагнун. 30Лӣсимакаҳпут Кияӷнық; лъңаңулӷӣ хўатын пикақ: «Хўаңаңӯқ аӷью̄ӷияҳқақ, акисяҳқақанка сыӷлытун пилъҳит». Хўатынлъю пика̄гуқ: «Атанӷым нанқихсяҳқақӣ лъми юни». 31Татама̄таӷнапихтуқ кина алңунак ӣханисяҳқақ уңувалӷӣм Кияӷныӷым Нанқихтилъҳым Аӷныӷани!
32Нықамикыхкыси тама̄кут аӷныӷыт сивунӷани лӣсюхўа̄ӷақңафсигу ипапилъық Христосымың аюқылӷӣ. Аӷулӣтка̄гуси ата̄сӣӷмылъюси қайўа икфиқыҳлъяӷңа̄ҳпыси. 33Иляңакун юхтуқами югыт сыӷлытун акузиткақӣсилъю, амьюқыта̄ткақӣсилъю. Иляңани ныкывӷалгусиӷақаси тама̄кут амьюқыта̄ткысилӷӣт. 34Наңлъыкақаси анусимиңлъяӷвигмылңӯт. Талўа қуяңа̄қуси югыт тугулянӷатки сяӷьяси қаюҳлъяк лӣсимакаҳси паниның сялгӯси пиниӷатаӷалӷӣмың қӯнпыкаҳқамың. 35Ынка̄ңам ӣлъқаюхпынаси қаюҳлъяк илютумаңинақуфси алъхыӷулъықуси акилыҳтӯсяҳлъягмың. 36Аклъюкңўа̄ҳси нуқынъыҳтулъық атуқсяҳқа̄люку Кияӷныӷым пиюкылъҳа. Та̄хкын алъхыҳлъықаси акықусяқыхкӣ. 37Катам игақңалӷӣ Акузитни Игақыхкани хўатын:
«Қантаӷақун та̄на тагияҳқақ ка̄лъықуқ; кима̄ўина̄нӷитуқ.
38Ылъқуӷутңалӷӣт югынка кияҳлъықут ухпықилъыҳқун.
Иўырңа китум алңунак пыхтыкумигу ухпықилъыни, уңувасигма ыфқуқна̄нӷита».
39Иўырңа хўаңкута пыхтикастун ухпықилъыӷмыхның аюқынӷитукут, на̄фқылъыңьяҳқастун. Иўырңа ухпықилъылгӯкут ынка̄м уңувасипут югулика̄гут.
11Ухпықилъық
1Ухпықилъҳым лӣсимакыстыңъўа̄ӷӣлъю алъхыҳсяҳқақнилюку сиӷмакыхкаҳпут, ипапиҳқусигуқ ысҳаӷьяҳқақынӷилъкымнъун. 2Ухпықилъыӷмыхтыхун аюмӣм юги итагнақылъыңыхка̄гут Кияӷныӷмың.
3Ухпықилъыҳқун лӣгикыхкақаҳпут Кияӷныӷым улима̄ка̄ нуна акузитмикун. Тама̄кут алӣлңӯт улима̄ӷӯт ысҳаӷьяҳқа̄нӷилңуӷмың.
4Ухпықилъыҳқун Авель тӯника̄гуқ Кияӷныӷмун тугуклъиӷьюгнаӷатаӷалӷӣмың аҳтутмың Каиным аҳтуткыхка̄ның. Кияӷнық пика̄гуқ Авель ылъқуӷутңалӷӣңунилюку ю̄гым ухпықилъҳа апалъюқлъюку. Кияӷныӷым ипапиҳқыхкақа̄ Авель ылъқуӷутңанилюку тугуклъилъыӷмикун тунусӣ. Ухпықилъыӷмикун Авель паниның акузиңӯқ, туқука̄яӷңа̄ӷми. 5Ухпықилъыҳқун Енох маю̄тыстыка̄гуқ қилягмун ынка̄м нанӷӣлъҳита̄ туқулъық. Китум алңунак на̄лъкылъҳита̄ қаюҳлъяк Кияӷныӷым тугукақыхкаңа. Маюлъҳилъюни қилягмун, игақңака̄гуқ Енохым ыфқуҳтыкақа̄ Кияӷнық. 6Ухпықилъңунани китум алңунак ыфқуҳтыпагниңита̄ Кияӷнық. Кина алңунак тагиюкуми Кияӷныӷмун ухпықыпыста̄ӷьяҳқақа̄ Кияӷнылгунилюку, акилыҳтуӷьяҳқақӣлъю иваӷипӣлӷӣт лъңаның.
7Ухпықилъыҳқун Нойем нагаткақӣ Кияӷныӷым кылыңася̄ӷуткӣ тама̄кут сялин пиңигалъюки. Ынка̄м қа̄ткылъюку Кияӷнық аңьяҳпаңлъяқа̄гуқ ныңлъюгутни югулиналюки улывылъыӷмың. Таўатын пилъыӷмикун Нойем нунам юги нанқихтыстыкақӣ Кияӷныӷмун аӷью̄ӷысқылъюки. Ухпықилъыни апалъюқлъюку Нойем алъхыҳтыкақа̄ ылъқуӷутңалъық Кияӷныӷмың.
8Ухпықилъыҳқун Авраамым қа̄ткыхкақа̄ Кияӷнық туқлъюӷақңатни аӷуляқысқылъюку иляңанун нунам. Кияӷныӷым акықусяқа̄ та̄на нуна лъңанун тӯнылъықнилюку. Ынка̄м униткақа̄ лъми нунани налъюклъюку навык пинақутни. 9Ухпықилъыҳқун кияҳтыка̄гуқ нуната̄люни нунами Кияӷныӷым акықусяқыхка̄ни. Палатканитка̄гуқ катам Исаакылъю, Иаковым пилъҳыхкытун. Ылъкыхкынкалъю алъхыҳтыкақа̄к Кияӷныӷым акықусяқыхка̄ та̄на нуна. 10Авраам таўатын пика̄гуқ қаюҳлъяк утақӣңулӷӣ кияҳналюни ныҳлъягми тунымаҳтуқами. Кияӷныӷӯқ успықистыңалъю, улимаӷистыңалъю ныҳлъягым.
11Авраам нанывгаҳлъягңа̄ӷми, Сарралъю қумиңьяҳқа̄нӷитыӷңа̄ӷми, паниның ухпықилъыҳқун Сарра қумиңыхка̄гуқ, қаюҳлъяк ныӷьюкыхкақа̄ Кияӷныӷмын пилъықнилюку акықусяқыхкани. 12Тама̄кын апалъюқлъюку Авраам туқуяҳтуңыстақа̄ӷңа̄ӷми, паниның киңуныҳтуҳқа̄ҳлъяка̄гуқ. Лъңита угляҳталңит иӷалықыта̄ӷыстун қилягамылңуӷыстун аюқут, кыстыка̄нӷилңуӷыстунлъю қына̄взыӷа̄тун ыснам.
13Қамахлъютың тама̄кут югыт паниның кияҳтыка̄гут ухпықилъыҳқун туқулъыӷмыхнун кынляңа. Туқуляӷа̄тка̄лӷӣт алъхыҳтыхпынаки Кияӷныӷым акықусяқыхкӣ лъмыхнун. Иўырңа ухпықилъыҳқун ысҳақақӣт Кияӷныӷым акықусяқыхкӣ уяванлъюки сивумыхнилъюки қуякыхкақӣтлъю. Ынка̄ңам уңипа̄ткақӣт югыт нуната̄нилютың хўани нунами, нунамун пикынӷинъилютың. 14Тама̄кут таўатын акузилӷӣт, хўатыҳлъюўа̄қ а̄пҳўа̄т нунакаҳқаӷьюгнилютың лъмыхнун пикаҳқамың. 15Сю̄мқыхкақсяқумыхтыху та̄на нуна униткаҳтың, утыҳтылъыҳқалгунаяҳтут. 16Йыӷлыги пиюкатаӷақақа̄т пиниӷатаӷалӷӣ нуна, қилягмылңуқ. Ынка̄м Кияӷнық кайңуюгигатуқ Кияӷнықнинӷатни. Талўа ята̄ҳқуткақӣ ныҳлъягмың.
17-18Кияӷныӷым акықыхкақыхкаңа Авраам: «Исаакыкун киңуныҳлъягулъықутын». Ухпықилъыҳқун Авраамым ныӷьюкыхкақа̄ Кияӷнық нанӷӣқўа̄қңатни. Ынка̄м аҳқуткысяҳқа̄ҳтыка̄ кызымаҳақ иӷныни, Исаак. 19Авраамым ухпықыхкақа̄ Кияӷнық уңуваҳтияқлъыгунилюку туқуканың. Ынка̄м Кияӷныӷым туқутыснаниӷақңагу Исаак, Авраамым выҳтыкалъҳӯқақа̄ Исаак туқулъыӷмың.
20Ухпықилъыҳқун Исаакым қуястыкақа̄к Иаковымлъю, Исавылъю, туңсӣткақа̄к Кияӷныӷмун қуястысқылъюкык а̄ӷакаҳқӣк.
21Ухпықилъыҳқун Иаковым, туқунақңулюни қуястыкақа̄к алъякақаҳта̄хкынка иӷныӷык Иосифым. Та̄хкын қуңуҳлъюни аявӣӷмикун манигуқақа̄ Кияӷнық.
22Ухпықилъыҳқун Иосифым, кынлытҳӯнъақылъҳани уңувалъыӷми, акузиткыхкақа̄ аӷуляқылъыҳқа̄т Израилыӷмӣт Египетмың. Апыҳтӯткақӣлъю ныҳқўа̄ни натын сялъыҳқӣ.
23Ухпықилъыҳқун Моисейем аңаюқахкынка ӣӷаҳтуқақа̄к пиңают танқит алъхылъҳан киңуңаның. Ысҳақаңат ю̄кыхтыпихлъыҳӣ, алиңумаңилңӯклъю қа̄ткунъыӷисяҳқа̄лютык умӣлгым қылӷутылъҳанун.
24Ухпықилъыҳқун Моисей, югуҳсями иҳсяка̄гуқ иӷнықысныӷмың Фараоным паниганун. 25Йыӷлыги накмӣқа̄гуқ икфиқылгусиӷналюки Кияӷныӷым юги, авылӷаӷлюку ыфқуӷьюгналъҳа сыӷлыҳқылъҳым мулюяҳқа̄нӷилңуқ. 26Итупилъ сюмыҳтаӷа̄ткыхкақа̄ икфиқылъыҳқани Христосымун итагнаӷатаӷаӷнилюку аклъюңилӷутаңаның Египетым. Сюмыҳтаӷа̄ткыңъўӣ акилыҳтӯсяҳқат ага сивумылңӯт.
27Ухпықилъыҳқун Моисейем униткақа̄ Египет алиңылъңунани умӣлгым сякша̄лъҳаның. Ӣлъқаюгумаңитуқ қаюҳлъяк ысҳалӷӣстун пикақыхкаңа алӣнъыӷилңуқ Кияӷнық. 28Ухпықилъыҳқун Моисейем қылъқақӣ югыт Пасхасқылъюки, қылӷуткақа̄лъю а̄кў сивилъяхта̄тысқылъюку амихтыхун. Ынка̄м Яқулган Туқулъҳым туқутылъҳитӣ иӷнықсюхўа̄ӷит Израилыӷмӣт.
29Ухпықилъыҳқун Израилыӷмӣт аӷвиқақа̄т Чермное Море никимқун қутыстун. Иўырңа Египетыӷмӣт, аӷвиӷнақуткыңъулютың пыкақутка̄гут.
30Ухпықилъыҳқун Израилыӷмӣт ма̄ӷраӷвинлыгни аӷныӷни узивгақақа̄т Иерихоным миңлъютаңа. Та̄хкын миңлъюта улъыӷа̄тка̄гуқ. 31Ухпықилъыҳқун Раавым, югусиминың акикикаюгым, упуӷаткақа̄к Израилыӷмӣт рӣрңистыхкыт. Тама̄кын апалъюқлъюку туқулъҳитуқ малигулъюни қа̄ткусигалңуӷнун Кияӷныӷмун.
32Ўатақа̄ӷақ уңипамсюгулъямсӣ югның ухпықиканың Кияӷныӷмың? Та̄кыҳлъягьяҳқа̄гут акузиткысяҳқа̄люки Гедеонылъю, Варакылъю, Самсонылъю, Иеффайелъю, Давидылъю, Самуилылъю, ӯкналиқистытлъю. 33Ухпықилъыҳқун иляңи югыт хўатын пика̄гут: кая̄лъқыхкақӣт атаныҳпагулъҳыт, ылъқуӷутңалютың иглыӷутика̄гут. Ынка̄м Кияӷныӷым акықусӣ тугукақӣт. Иляңита левыт қа̄нӷит мықытыстақӣт. 34Кумаӷуҳлъягыт кынӷыт қа̄мтақӣт, анагақлъюкилъю туқутистыкаҳқатың сявихпахкун. Кая̄тақут иўырңа ухпықилъҳита икнақуҳтақӣт. Ухпықилъыҳқун пилъюўаҳтыңит икнақуҳтыҳлъягақут ынка̄м кая̄лъқақӣт иляңита нунат пилъюўаҳтыңит. 35Ухпықилъыҳқун аӷнат туқумастӣтың выҳтақӣт туқулъыӷмың Кияӷныӷым уңуваҳныӷаки.
Иляңи ынңа̄талъ икфиқыстыҳлъягақӣт пыхтысқылъюку ухпықилъҳат. Иўырңа туқуналютың пӣқут Кияӷныӷмун уңуваҳтысқылъютың пиниӷатаӷалӷимун уңувалъыӷмун. 36Иляңи лыгасӣӷўа̄ткақлъюки, иляңи кахсягмигақлъюки, иляңи қӣпшаӷусиӷлюки анусимиңлъяӷақӣт. 37Иляңи милюҳпага̄тамың туқутақӣт, иляңи югусӣт пиляхтуӷлюки малӷуҳқақӣт, иляңи туқутақӣт сявихпахкун. Иляңи тымги тама̄ни иглыҳтақут а̄лъютың пынъӣӷымлъю, козёлымлъю амӣның. Иляңи аклъюмапихлъыҳӣт, югыт амьюқыта̄ткыхкӣт, сыӷлытунлъю кияӷуткӣт. 38Нунам юги пинипагунӷитут кияҳтылгусиӷьяҳқа̄люки тама̄кут ылъқуӷутңалӷӣт югыт! Иляңи ылъқуӷутңалӷӣт тымңи тама̄ни иглыӷака̄лӷӣт па̄ҳқилъҳани, на̄йӷани, кияҳтақлъютың қайыни, ля̄ўа̄ӷнилъю.
39Қамахлъюки тама̄кут Кияӷныӷым итагнақыхкақӣ ухпықилъҳит апалъюқлъюки! Нақамлъю алъхыҳсимаңита̄т Кияӷныӷым акықусяқыхка̄, 40қаюҳлъяк Кияӷныӷым успықыхка̄ хўаңкунъун пиниӷатаӷалӷӣңӯқ. Ухпықилъҳа хўатытуқ: акықусяни пина̄нӷитӣ лъңитнун хўаңкуңунаки. Қырңа̄мта қамахлъюта ӣӷўиҳлъықӣнкут.
12Кияӷнық Хўаңкута Атавут
1Қамахлъютың тама̄кут югыт лӣгикыстӣлъю ухпықилъыӷмыхның натын кияҳтылъыӷмыхтыхун. Ма̄тын увитаңиӷлюта ысҳапагақӣлъю. Ынка̄м килга̄қустыстун иқитылътыки қамахлъюки уқихкутат, сыӷлыҳқылъҳытлъю иглягулъҳӣт хўаңкунъун. Сягиқлъютаңам килга̄қулъта сивумнъилңуӷмун, 2ысҳа̄маклъюку Иисус, пӣнлиӷистыңалъю, апыӷӣӷистыңалъю ухпықилъымта. Кайңунаҳтуқ туқулъыҳқақ қақӯракун, иўырңа Иисусым пикаткумаңита̄ кайңусяӷа̄тылъық. Йыӷлыги накмӣқа̄гуқ икфиқналюни қақӯракун апалъюқлъюку қуялъық алъхыҳсяҳқани. Ынка̄м ма̄тын ақумга̄қ аӷынқигныӷани Кияӷныӷым.
3Сюмыҳтаӷа̄ткаҳтыхуқун Иисус. Ӣлъқаюгумаңитуқ қайўа сыӷлыҳқыстыт угумикыра̄ҳлъяӷңа̄тни. Таўатын лъпысилъю илютулъҳӣнъа̄нӷитусилъю, ӣлъқаюгна̄нӷитусилъю. 4Сыӷлыҳқынӷинъақуткылъыҳпыси сялин югнун туқутысигатӣси. 5Пуйгустыкӣ илютуҳся̄сит акузитыт уңипа̄тилӷӣт Кияӷныӷмун иӷнықнилюси? Акузитни Игақыхкани игақңа̄қ:
«Иӷнымни, авылӷақӣнаҳпына̄н Атанӷым налъҳусянӷатын,
ӣлъқаюхпынаңлъю аӷью̄нӷатын.
6Қаюҳлъяк қамахлъюки пиниқыхкани Атанӷым апыҳтуӷақӣ қа̄ткысқылъюни,
аӷью̄ӷақӣлъю тугуклъиқани авақута̄люки».
7Тугуклъиӷақитыху Кияӷныӷым аӷью̄ӷилъҳа қаюҳлъяк иӷнықылӷӣстун пӣқӣси. Қамахлъюки авақутатың атаңита аӷью̄ӷақӣт налъҳуҳқынъалюки. 8Қамахлъютың авақутат аӷью̄лъыңақут. Аӷью̄лъыңынӷилъкувык та̄ўа атаңилңӯгутын ынка̄м авақутапикынӷита̄тын. 9Та̄м ся̄ӷўакун, атамта нунамылңӯт аӷью̄ӷақӣлъю апыҳтуӷналюта қа̄ткысқылъютың, иўырңа паниның қӯлваӷақапут. Ынка̄м Атавут қилягмылңуқ қа̄ткатаӷаӷьяҳқақаҳпут уңуваналюта. 10Атамта нунамылңӯт аӷью̄ӷақӣлъю натыңӣҳақ, сюмыӷмыхни ылъқуҳлъюку аӷью̄ӷиңунилютың. Иўырңа Кияӷныӷым аӷью̄ӷақӣлъю пиниҳқылъыҳқамнъун пылюңӣҳтысқылъюта лъмитун. 11Қуянӣтуқ аӷью̄лъыңнымта қаюҳлъяк ақниҳтақыхкаңилъю. Иўырңа тахталми, лӣтфикнымтыху, ныкыхмылъыңақукут қаюҳлъяк кияҳсягутақукут ылъқуӷулъюта.
Апыҳтуӷалъҳытлъю, Кылыңася̄лъҳытлъю
12Кывыхтыки ӣхыси қуӷаӷңалӷӣт, та̄хкын икнақуҳсяҳтыки кая̄лңӯт сыгысқуси! 13Таклъяҳтики тӯмңи тутмалъыҳпык, та̄хкын кая̄лңуқ иӷун а̄нқаӷна̄нӷитуқ нафлъюминың, иўырңа на̄лъҳулъықуқ.
14Кияҳнақитык ныкыхмытулъюси тамаҳа̄нун югнун, кияҳнақитыклъю сыӷлыҳқылъңунаси. Килъю алңунак пылюңинъыӷилңӯт ысҳаӷна̄нӷита̄т Атанық. 15Ысҳа̄макулъюси килъю алңунак лю̄рақ алъхыҳныӷися̄ӷа̄т Кияӷныӷым наңлъыхталъҳа. Нагусяқуна̄нлъю сюңаӷнилңуқ акуқ сыӷлылӣҳқӣлюни на̄фқӣяҳқақ юлӷутмың. 16Ысҳа̄макулъюси килъю алңунак блудникысаҳтут, налиӷмың килъю алңунак қӯлваӷинӷися̄ҳтут Кияӷныӷмың Исавытун. Акикыхкақыхкаңа пагитаҳқани ата̄сиҳаӷмун ныӷьяҳқамун. 17Лӣсимакаҳси та̄м киңуңаның, алъхыҳсюгақңамигу атами қуястылъҳа, атаңан иҳсякыхкақа̄. Исавым алъяңуҳтыпагниңиткақа̄ апыӷӣқани, қайўа қунитӯмаӷми туңсиӷңа̄ӷмигу атами қуястилъҳа.
18Сивуныҳпысистун аюқынӷитуси Синайым найӷаҳанун пикастун. Ысҳаӷьяҳқа̄т, ся̄фсяҳқа̄тлъю. Таўани мамлыхлъягукақ, на̄фтыҳлъягукақ, на̄йӷақлъю кумаӷуҳлъягулӷӣ. 19Нагақуқа̄т қалӷиҳта̄н қалӷиҳлъыҳӣ, нагақуқа̄тлъю Кияӷныӷым мыңа. Иўырңа ныпӣқӣсқыхка̄т, 20қаюҳлъяк тугуклъиӷьюнӷилъкаңат қылӷилъҳа хўатылңуқ: «Та̄на на̄йӷақ, югым налиӷмың тыӷикусям ся̄фтыкумигу, туқусяҳқапыста̄ӷӯқ милюҳпага̄тамың». 21Моисейем ысҳақа̄ какава̄таӷнапихлъыҳӣ рыпалъ хўатын пика̄лӷӣ: «Лъңа̄талъ уңылыхтуңа алиңрӯӷым».
22Иўырңа катам лъпыси тагика̄гуси Сионым найӷаҳанун, қилягым Иерусалимыңанун, ныҳлъяганун уңувалӷӣм Кияӷныӷым. Тагика̄гуси кыстыка̄нӷилңуӷнун яқулыгнун қырңуӷутканун қуялъылиҳлъяглюси. 23Тагика̄гуси қырңуӷутылъҳитнун қамахтыңъўа̄ӷлютың ухпықат иӷнықсюхўа̄ӷыстун аюқылӷӣт. Қилягми а̄тҳит игақңа̄т игатхун. Тагика̄гуси Кияӷныӷмун нанқихтистыңитнун қамахтыңъўа̄ӷлютың югыт, таӷныӷӣтнунлъю ылъқуӷутңалӷӣт югыт ӣӷўиҳтыстыканун. 24Тагика̄гуси Иисусымун, лъңакун Кияӷнық акықусяӷраӷаңлъяқа̄гуқ. Тагика̄гусилъю сивилъяхта̄ткамун а̄ўанун Иисусым. Пиниӷатаӷаҳтуқ Авелым а̄ўаның, қаюҳлъяк Кияӷныӷым сыӷывутӣ сыӷлыҳқылъҳыт Иисусым а̄ўакун.
25Ынка̄м кылыңатык, нагасюнӷитыхпына̄н Кияӷнық акузилӷӣ. Сивунымта нагасюнӷиткақа̄т кылыңася̄ӷилъҳа нунами хўани, ынка̄м анагумаңита̄т аӷью̄ӷилъҳа. Хўаңкута аӷью̄ӷатаӷаҳлъықӣнкутлъю нагасюнӷилъкумтыху кылыңася̄лъҳа қилягмың. 26Кияӷнық акузӣқңами Синайым найӷаҳаның, мыңан уфсюгуткақа̄ нуна. Иўырңа ма̄тын акықима̄қ хўатын: «Ата̄сиҳаӷмың уфсюгунъықихлъықақа нуна, иўырңа қиляклъю уфсюгулъықақа». 27Таўатын акузилъҳан: «Ата̄сиҳаӷмың уфсюгунъықихлъықақа нуна», лӣгикыстыңъўа̄ӷӣлъю хўатын, сяңўа̄т қамахлъюки улима̄ни, Кияӷныӷым иқилъықӣ уфсюгусяҳқат. Тама̄куңинаҳа̄т уфсюгутыпагниңилңӯт тама̄нлъықут қӯнпырухлъяк.
28Тама̄кын апалъюқлъюку игамсиқаюгвикылътыху Кияӷнық қаюҳлъяк тӯныхкаңилъю атаныҳпагулъыӷмың уфсюгусяҳқа̄нӷилңуӷмың. Ынка̄ңам манигӯлътыху Кияӷнық ыфқуӷналъкыхка̄тун алиңылъылиӷлюталъю, қӯлваӷилъылиӷлюталъю, 29қаюҳлъяк Кияӷныҳпут на̄фқӣлӷӣңӯқ кынық.
13Ухпықат Кияҳта̄лъыҳқа̄т
1Пиниқыкыстаҳтыки ухпықа̄лгутыси. 2Упуӷамаңинаҳтык ақӣягнун қаюҳлъяк иляңита упуӷатақӣт налъюклъюки яқулгутаңи. 3Нықамиклъюки анусимиңлъяӷвигмылңӯт, никимқун лъпысилъю анусимиңлъяӷвигмылңуси. Нықамиклъюки икфиқңалӷӣт, никимқун лъпысилъю икфиқылӷӣси.
4Тамаҳаҳпыси сӣвакитыху ныңуӷутылъық ынка̄м угитлъю, нулиҳытлъю ата̄сӣӷмытулъит. Кияӷныӷым нанқихсяҳқақӣ гылгаӷнӣлӷӣт, тама̄кутлъю иляңаның блудникылъӷит.
5Кияҳтык пакигныӷухпынаси манимун, итагнаӷақитыклъю сятуталыхпысистун. Кияӷнық пика̄гуқ:
«Унинъа̄нӷитңўа̄ӷамси;
пыхна̄нӷитңўа̄ӷамси».
6Ынка̄м тытулъңуна̄мта хўатын пилъта:
«Атанық каюткақа!
Алиңна̄нӷитуңа югыт сялъыҳқӣтның».
7Нықамиклъюки иглыӷутистыси уңипақикат лъпысинун Кияӷныӷым акузитаңаның. Нықамиклъюки натын кияҳтыка̄таңи ынка̄м ухпылъылгунақитык лъңистун. 8Иисус Христос алмысиқақа̄ иӷивгақ, аӷныӷми, қӯнпырухлъяклъю. 9Иқитутыстыхпынаси ипапилъыӷмың алъя̄ҳӣнаӷнунлъю, алъяка̄ягнунлъю апыҳтӯсянун. Наңлъыхталъҳакун Кияӷныӷым айыпсюгиҳсяҳтыки илюси, нака̄н қа̄ткылъюки Лӣлиҳтӯсят нықның аюқылӷӣт. Та̄кут нықыт Лӣлиҳтӯсӣт қа̄ткыхкуфсики айыпсюгиҳсяӷна̄нӷитӣт илюси.
10Священнигыт қыпҳалӷӣт скиниями иныҳтыка̄гут ныӷылъыҳқӣтның аҳтуткыхкамың аҳқыфимтыхун. 11Первосвященнигым тагитақӣ а̄ўит тыӷикусят Аглыӷналъыҳпигаӷмун аҳтуткынъалюки сыӷлыҳқылъыӷнун. Иўырңа кымыхкўа̄ӷит тыӷикусят ныҳлъягмың иқитулъюки паныҳтақӣт. 12Тама̄кын апалъюқлъюку Иисусылъю иқитутка̄гуқ ныҳлъягмың. Таўани туқука̄гуқ, пылюңиҳсяӷналюки югыт сыӷлыҳқылъҳитның лъми катам а̄ўминың. 13Ынка̄ңам ныҳлъягмың хўаңкуталъю агля̄лъта Иисусымун, сыӷлытун акузиткысқылъюта катам лъңа сыӷлытун акузиткылъҳистун. 14Нунами хўани қӯнпыкаҳқамың ныҳлъягитукут, иўырңа утақаңўа̄ҳпут ныҳлъяк тагияҳқақ.
15Иисусыкун ӣўлың аҳтуткилъта Кияӷныӷмун. Аҳтутыпут усюқилъқапут апынымтыху Иисус Атанӷунилюку. 16Пуйгухпына̄н пинитун пилъық, тӯнутақитыклъю қаюҳлъяк тама̄кут аҳқутңӯт ыфқуӷналӷӣт Кияӷныӷмун.
17Қа̄ткитыки иглыӷутистыси атуқлъюки қылӷусӣт. Кылыңакиңӯт уңувасиҳпысиның лӣсимаклъюку Кияӷныӷмун нанқихсяҳқа̄си. Қуянӷитыстыхпынаки иглыӷутистыси, итупилъ қа̄ткылъыҳпысигун қыпҳақатың пилъықӣт қуякусиқлъюки. Қа̄ткынӷилъкуфсики каюсӣтыпагниңитӣси.
18Юӷа̄ткитыкут. Лӣсимакапут умьюгамта анахутылъҳинъӣлъю, қаюҳлъяк ӣўлың пиюкылъқаҳпут ылъқуӷутңалӷӣ пияҳқа̄люку. 19Та̄куңинаҳа̄гның каяхтамси юӷа̄ткысқылъюңа қантаӷақун лъпысинун утыӷниӷналюңа.
Та̄қнӣта Юӷақ
20Кияӷныӷым ныкыхмылъылитистым Атаныҳпут Иисус уңуваҳтыстыкақа̄ туқулъыӷмың. Ынка̄м а̄ўмикун Пынъӣӷнӣҳтыҳлъягуҳтыка̄гуқ пынъӣӷнун. А̄ўан атӯяҳқа̄ҳтыстыкақа̄ Кияӷныӷым қӯнпыкаҳқақ акықуся̄. 21Юӷаҳтуңа Кияӷныӷмун тӯнысқылъюси сямың тамаҳа̄ның пинилӷӣмың лъпысинун пиюкылъҳа писқылъюку. Иисус Христосыкунлъю илюхпысинун Кияӷныӷым пилигу ыфқуӷналӷӣ лъңанун. Христос усюқылъыңли қӯнпырухлъяк кынлыңуна̄н. Аминь.
На̄ңнӣтыт
22Ухпықа̄лгутымни, нагатңўа̄қаҳтыки посланиянка қаюҳлъяк кайымьюгақамси. Тама̄кын апалъюқлъюку такыста̄ҳа̄люку письмоӷамси. 23Лӣсимакысюгамси ухпықа̄лгутымнъың, Тимофейемың, а̄нысима̄қ анусимиңлъяӷвигмың. Ка̄тылӷаҳтуӷьяқан қырңа̄мтуң ысҳаӷьяҳтуҳлъықамси.
24Қуякаҳнакыси қамахлъюки иглыӷутистыси, қамахлъюкилъю Кияӷныӷым юги. Ухпықа̄лгутытлъю Италиямың пикат қуякаҳнакысиңуқ.
25Кияӷныӷым пиниқиңалӷӣ каюсилъҳа тамаҳаҳпысинилъи! Аминь.