К Галатам

Павелым Посланияңи Ухпықанун Галатиямылңуӷнун

¹Укут посланият Павелымың пиңӯт, апостолымың. Югыт накмикылъҳита̄тңа апостолыңулюңа, талўа каяхтылъҳита̄тңа. Апостолыңӯҳтыка̄гуңа Иисус Христосыкунлъю, Кияӷныҳқунлъю Атакун, уңуваҳтыстикақ лъңаның туқулъыӷмың. ²Письмоӷақамси ухпықани Галатиямылңуӷни. Қамахлъютың ухпықа̄лгутма ма̄нлыңӯт пиниқӣсиңук хўаңамнун малигулъютың.

³Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

⁴Христос лъңаның аҳқуткыхка̄гуқ сыӷлыҳқылъымнъун, итымунъалюта хўакын сыӷлыӷмың кияҳта̄лъыӷмың. Кияӷнымта Атам пиюкылъҳатун пика̄гуқ. ⁵Ынка̄м Кияӷнық усюқылъыңли қӯнпырухлъяк кынлыңуна̄н. Аминь.

Ата̄сӣна̄гуқ Пинилӷӣ Уңипақ

⁶Сяӷӣӷаягутамси а̄ўалъю пыхтаҳтаҳси туқлъюӷистызи наңлъыхталъҳакун Христосым, тугуклъиӷӣси алъяның «пинилӷӣның уңипаның». ⁷Авақшахӣтуқ алъя «пинилӷӣның уңипаның». Иўырңа иляңита югыт тыхылъҳӣҳтыстақӣси алъяңуҳнақуткылъыӷмыхтыхун Пинилӷӣтнъың Уңипаның Христосымың аюқылӷӣт. ⁸Қайўа яқулык қилягмың, налиӷмың налимта хўаңкута уңипақыхкумтыки «пинилӷӣт уңипат» алъяңулюки уңипақыхкамнъың лъпысинун, та̄на Уңипақилӷӣ Кияӷныӷым нанқихлъигу аӷью̄лъыӷмун. ⁹Сивунӷани уңипа̄ткақамси, хўа̄ уңипа̄нъақлъя̄таӷамси, китум алңунак уңипақыхкумики «пинилӷӣт уңипат» алъяңулюки ухпықыхкаҳпысиның, Кияӷныӷым нанқихлъигу аӷью̄лъыӷмун.

¹⁰Таўатын акузилъымкун ыфқуҳнақуткыңъунӷитанка югыт. Нака̄, Кияӷныҳӣна̄гуқ ыфқуҳсюкақа. Паниның югнун ыфқуҳтинақуткыңъукума, Христосымун қыпҳаҳтыңуна̄нӷитуңа.

Натын Павелым Апостолыңуҳтылъҳа

¹¹Ухпықа̄лгутымни, уна лӣсимакысюгақа лъпысинун, Пинилӷӣт Уңипат уңипақақыхкынка югның пиңунӷитут. ¹²Нагақуқақынӷитанка югның, талўа китум алңунак апыҳтӯткумаңитӣ хўаңамнун. Иисус Христосым алӣҳтыкақӣ хўаңамнун.

¹³Нагақуқақаҳси натыся̄тка малихтыңъулюки Иудеит кияҳта̄лъҳит. Ынңа̄талъ наңлъыгьюлъңунаңа амью̄ткыхкақанка ухпықат, та̄куңинаҳа̄гның авӣӷутыснақуткыхкақанка. ¹⁴Иңьяқақанка алъюлъюки аңта̄лгутынка атуқңулюки Иудеит кияҳта̄лъҳит, қаюҳлъяк сягиқныҳлъягуяҳтуңа сивунымта наңаӷныӷитнун.

¹⁵Иўырңа алъхыӷумаңилъюңа Кияӷныӷым накмикыхкақа̄ңа, наңлъыхталъыӷмикун туқлъюқақа̄ңа. ¹⁶Ынка̄м хўаңамнун алӣҳтыкақа̄ кинаңутаңа Иӷныни уңипақысқылъюку язычнигнун. Кинкунун алңунак акузиткысяҳтулъҳитақа та̄на, ¹⁷талўа Иерусалимытылъҳитуңа акузиткынъалюку апостолыңуҳтыканун сивумни. Йыӷлыги Аравиямун пӣңа. Тахталми утыӷниҳтуңа Дамаскымун. ¹⁸Тама̄ни пиңают аюмиқулъҳыт атуӷлюки Иерусалимытуңа алыҳқуӷналюку Кифа (Петр). Лъңанитуңа акимигақ унук. ¹⁹Кина алъя апостол алыҳқунӷитақа иўырңақун Иаков, Атанӷым аңлыгутаңа.

²⁰А̄пқанка укут ипаңӯт, Кияӷныӷым лӣсимака̄ңа иқлъыңиқңунӷитуңа.

²¹Та̄хкын иглыӷа̄ңа Сириямунлъю, Киликиямунлъю. ²²Тама̄ни Иудеями ухпықат Христосыкун сялин налъӣгалъкаңатңа хинасяҳқуӷлюңа. ²³Та̄ўаңинақ лӣсимака̄т нагақулъыҳтың хўатын: «Ю̄к амьюқытиқыстыкыхкаҳпут, на̄фқӣнақуткыхкақлъю ухпықилъымнъың Христосымың ма̄тын хўа̄ уңипақӣқуқ ухпықилъыӷмың Христосыкун!» ²⁴Ынка̄м Кияӷнық усюқақа̄т хўаңа апалъюқлъюңа.

Апостолыт Тугуклъиқаңат Павел

¹Қуля стамат сӣпнықлъюку аюмиқулъық атуӷлюку утыӷниҳтуңа Иерусалимымун; Варнавам малихта̄ңа Титлъю кылъқақа. ²Кияӷныӷым лӣгикыста̄ңа Иерусалимытысқылъюңа. Ка̄сямта ухпықат иглыӷутистыңинӣт қырңуӷутаҳтысқанка. Таўани уңипамсюгутанка натын язычнигнун уңипақилъымның Пинилӷӣның Уңипаның. Таўатын пика̄гуңа лю̄рақ та̄кут иглыӷутистыт апыҳтуӷилъҳынка тымңиңунинаюкатки сивунӷанилъю, ма̄тынлъю. ³Лӣгиканка апыҳтуӷилъҳынка тугуклъиӷӣт қаюҳлъяк малихтистыка Тит, Грегыңуӷңа̄н, обрезаниясқынӷилъкаңат. ⁴Иўырңа иляңи ухпықасиӷўа̄ӷыт аксяқлъюку илятут хўаңкунъун рӣрңиналюку итымңалъыҳпут Христос Иисусыкун. Қыпҳаҳтыля̄ӷуҳнықихтысқылъюта пӣлъю Лӣлиҳтӯся̄мнъун. ⁵Лъңитнун малиҳқутақылъҳитукут талўа натыңӣҳақ алмысиқысқылъюки ипаңулъҳит Пинилӷӣт Уңипат апыҳтӯсяқылъымтыстун лъпысинун.

⁶Та̄кут ухпықат иглыӷутистыңита алъяңуҳсимаңитӣт Пинилӷӣт Уңипат уңипақақыхкынка. (Иглыӷутистыңуяӷңа̄та, хўаңамни алъяңуӷутңитут қаюҳлъяк Кияӷнық танӣлъҳитуқ.) ⁷Иглыӷутистыт лӣгикума̄т Кияӷныӷмун ныӷьюкусиманилюки хўаңамнун Пинилӷӣт Уңипат уңипақысқылъюки язычнигнун, катам таўатын ныӷьюкутылъҳатун Петырымун Пинилӷӣт Уңипат уңипақысқылъюки Иудеянун. ⁸Катам Кияӷнық қыпҳақа̄гуқ Петыркун апостолыкынъалюку Иудеянун, хўаңамкунлъю қыпҳақа̄гуқ апостолыкынъалюңа язычнигнун. ⁹Ынка̄м та̄кут иглыӷутистыт Иаковым, Петырым, Иоанным ныкывӷатилӷӣт ухпықанун, лӣгика̄т Кияӷныӷмун тунусялисиманилюңа таўатын қыпҳӣсқылъюңа язычнигнун. Тама̄кын апалъюқлъюку Варнавалъю ӣхыпут аӷулятӣт тугуклъиӷнилюку қыпҳа̄ңулъыҳпут язычнигнун, лъңит Иудеянун. ¹⁰Та̄наңинақ пуйгуснаниӷа̄т каюсӣтысқылъюки аклъюмалӷӣт, та̄ната нагныӷусюпихтыкыхка.

Павелым Аӷью̄ӷмикаңа Петр Антиохиями

¹¹Тахталми та̄кўани Петр Антиохиямылъюни сямың анахуткақ. Ынка̄м сивуңитни ухпықат аӷью̄ӷмигақа анахутылъҳаның апалъюқлъюку. ¹²Петр ныӷылгусиӷикаюгуялӷӣ язычнигыт ухпықа̄тның кынляңа Иаковым югыт Антиохиятыстылъҳитнун. Иўырңа ка̄сята ныӷылгусиӷнаниӷӣ язычнигыт, а̄фтыкақлъю лъңитның. Таўатын пика̄лӷӣ қаюҳлъяк алиңылӷӣ та̄кут югыт сягиқутңукаңит язычнигыт ухпықа̄т обрезанияҳқа̄нилюки. ¹³Та̄хкын қамахлъютың Антиохияӷмӣт Иудеит ухпықа̄т малигуткат Петырым анахутылъҳанун, талўа Варнавалъю илялъюни. ¹⁴Лӣгиксямки қа̄ткунъыӷитылъҳит апыҳтӯсӣтнун Пинилӷӣт Уңипат, сивуңитни югыт Петр пӣқа: «Лъпык қайўа Иудейеңуӷңа̄ҳпык кияҳтыңңӯтын язычнигыстун, нака̄н Иудеястун. Сяңитаңам язычнигыт Иудеястун кияҳтыснақуткысики?»

Иудеитлъю, Язычнигытлъю Ухпықилъыҳқун Югулилъыңылъҳат

¹⁵Иудеяңулюта алъхықа̄гукут, нака̄н язычнигыт сыӷлыҳқыстыт. ¹⁶Нақамлъю лӣсимакаҳпут Кияӷныӷым ылъқуӷутңалъыӷминун налъҳусяӷна̄нӷита̄ ю̄к қа̄ткутылъҳакун Лӣлиҳтӯсянун, таўатыңинақ налъҳусяҳлъықа̄ ухпықилъҳакун Иисус Христосымың. Талўа хўаңкута Иудеяни ухпықыхкақаҳпут Христос Иисус, Кияӷныӷым ылъқуӷутңалъҳанун налъҳусӣсқылъюта ухпықылъымтыхун Христос, нака̄н қа̄ткутылъымтыхун Лӣлиҳтӯсянун. Кина алңунак қа̄ткутылъҳакун Лӣлиҳтӯсянун Кияӷныӷым ылъқуӷутңалъыӷминун налъҳусяӷьяҳқақынӷита̄. ¹⁷Иудеяни хўаңкута налъҳусяҳтысюгукумта Христосыкун, нака̄н Лӣлиҳтӯсятхун, иляңита Иудеит сыӷлыҳқыстыңунилъықӣнкут язычнигыстун. Ынка̄м Христосыңуфта̄ сыӷлыҳқыстыңуҳтыстилӷӣ? Йыӷлыгилъю! ¹⁸Лӣлиҳтӯсят пыхтыкақанка, атуқынқихсягускумки та̄ўа Лӣлиҳтӯсянун анахулъықуңа. ¹⁹Лӣлиҳтӯсятхун туқука̄гуңа Лӣлиҳтӯсянун кияҳсяҳқа̄люңа Кияӷныӷмун. ²⁰Қақӯра̄тка̄гуңа Христосымун малигулъюңа, ынка̄м хўаңаңунанӣма̄қ кияҳлъыҳӣ; Христосыңуҳсима̄қ кияҳлъыҳӣ илюмни. Кияҳтыңуӷңа̄ӷма югусимни, Кияҳтыңӯт ухпықилъымкун Иӷныӷаның Кияӷныӷым. Пиниқыхкаңаңа, тӯныхка̄лӷӣлъю хўаңамнун. ²¹Ынка̄м пакигигатақа Кияӷныӷым тунуся̄. Ю̄к қа̄ткутылъыӷмикун Лӣлиҳтӯсянун налъҳусяӷьяҳқа̄яқан Кияӷныӷым ылъқуӷутңалъҳанун, та̄ўа Христосым туқулъҳа тымңиңунаяҳтуқ.

Апалъӣ Лӣлиҳтӯсят

¹Налъюҳаӷмың лъпыси Галатияӷмӣни! Китум пӯҳтиси? Пуйгустыхӯ а̄пҳўа̄қақсяқыхка Иисус Христосым туқулъҳа қақӯракун? ²А̄птаҳлъямси: натын алъхыҳтыкақыстыкык Аглыӷналӷӣк Таӷныӷак, қа̄ткутылъыҳпысигун Лӣлиҳтӯсянун налиӷмың ухпықылъыҳпысигун нагаткаҳпысигун? ³Налъю̄пигыстык? Аглыӷналӷӣгныкун Таӷныӷагныкун пӣнлиӷлюку нутаӷақ уңувалъыҳси, апыӷӣӷнақыстыхӯу лъпысиның катам? ⁴Икфиқылъыҳси тымңиңуфта̄? Ухпықыпыста̄ӷақа тымңиңунӷитуқ. ⁵Кияӷныӷым тӯныхкақисӣи Таӷныӷагминың, алъя̄ҳлъюхўаҳтика̄ўалъю̄ акулыхпысини қаюҳлъяк қа̄ткыхкыси Лӣлиҳтӯсят, налиӷмың ухпықыхкыси нагақуқаҳси?

⁶Акузитыт Игақыхкат а̄пқақа̄т Авраамым ухпықыхкақа̄ Кияӷнық, ынка̄м Кияӷныӷым налъҳусяқақа̄ ылъқуӷутңалъыӷминун. ⁷Ынка̄м лъпыси лӣсимакылъықаси тама̄кут ухпықилъылгыт Кияӷныҳқун Авраамым киңуныҳпигақӣ. ⁸Акузитыт Игақыхкат а̄пқыстақақа̄т Кияӷныӷмун налъҳусяӷнақнилюки язычнигыт ылъқуӷутңалъыӷминун ухпықилъҳитхун. Ныӷиӷлюку Кияӷныӷым а̄пқақа̄ та̄на Пинилӷӣ Уңипақ Авраамымун, хўатын пӣқңами: «Қамахтыңъўа̄ӷлютың нунам рамкыңи қуястылъыңнақңӯт лъпыгун». ⁹Авраамым ухпықыхкақа̄ ынка̄м қуястылъыңыхкақ. Таўатыҳпигақ тамаҳаӷми ухпықилӷӣ қуястылъыңьяҳқа̄гуқ лъңатун.

¹⁰Иўырңа Кияӷныӷым аӷью̄ӷьяҳқақӣ тама̄кут сиӷималӷӣт қа̄ткутылъыӷмыхтыхун Лӣлиҳтӯсянун налъҳусяҳлъықнилютың ылъқуӷутңалъҳанун. Қаюҳлъяк игақңа̄қ Акузитни Игақыхкани хўатын: «Китум алңунак қа̄ткынӷилъкаки тамаҳӣта игақңалӷӣт игӣтхун Лӣлиҳтӯсят нанқихтылъыңылъықуқ аӷью̄ӷьяҳқа̄люни». ¹¹Хўатыҳлъюўа̄қ лӣгикнаҳтуқ, кина алңунак налъҳусяӷьяҳқа̄нӷитуқ Кияӷныӷым ылъқуӷутңалъҳанун қа̄ткутылъыӷмикун Лӣлиҳтӯсянун. Қаюҳлъяк Акузитыт Игақыхкат пика̄гут: «Та̄на Кияӷныӷым налъҳусяқа̄ ылъқуӷутңалъыӷминун кияҳлъықуқ ухпылъыӷмикун». ¹²Иўырңа қа̄ткулъҳӣ Лӣлиҳтӯсянун сиӷимаңунӷитуқ ухпылъыҳқун, қаюҳлъяк Акузитыт Игақыхкат пика̄гут: «Сиӷималӷӣ Лӣлиҳтӯсятхун кияҳлъықуқ қа̄ткылъюки».

¹³Ынка̄м Кияӷныӷым нанқихтыкақӣлъю аӷью̄ӷналюта апалъюқлъюки Лӣлиҳтӯсят, иўырңа Христосым навыҳқылъикақӣлъю нанқихлъыҳқамнъың тугулъыӷмикун аӷью̄лъыҳқаҳпут. Қаюҳлъяк Акузитыт Игақыхкат пика̄гут: «Нанқихтыка̄гуқ аӷью̄ӷьяҳқа̄люни тамаҳаӷми агаҳтыкақ уқфихкун». ¹⁴Христос Иисусым навыҳқылъикақӣлъю ынка̄м лъңакун Кияӷныӷым қуястыкақӣ язычнигыт та̄хкын ата̄симың қуястылъыӷмың акықусяқыхкаминун Авраамымун. Ынка̄м ухпылъыҳқун алъхыҳтахпут Таӷныӷак Кияӷныӷым акықусяқыхкакык.

Лӣлиҳтӯсятлъю, Акықусяқлъю

¹⁵Ухпықа̄лгутымни, уңипа̄таҳлъямси успутаҳқамың аҳутаңа тамаҳа̄н пӣқылӷӣның: югык акықускумык сямың, игақлъюку игакун, атытыңлъю игақлъюкык, китум алңунак аӷулӣҳсяҳқақынӷита̄ акықутутылъҳак налиӷмың иляяҳқақынӷита̄. ¹⁶Кияӷнық акықусяңлъяҳтықа̄гуқ Авраамымунлъю, киңунӷанунлъю. Кияӷныӷым акықусяңлъя̄маңитӣ: «Киңунӷи», Акықусяңлъяҳтықа̄гуқ ата̄сӣнаӷмун киңуныӷмун, та̄на Христосыңӯқ. ¹⁷Та̄на лӣгикысюгақсяӷақа: Кияӷнық акықусяңлъяқа̄гуқ Авраамымун ынка̄м акықусяни пинақникақа̄. 430 аюмиқулъҳыт киңуңитның акықилъыӷми, Кияӷныӷым тӯныхкӣ Лӣлиҳтӯсят. Та̄кут Лӣлиҳтӯсят та̄на акықусяқ сятңунаниҳқынъа̄нӷита̄ налиӷмың на̄фқынъа̄нӷита̄. ¹⁸Лӣлиҳтӯсятхун алъхыҳнақңукумтыху Кияӷныӷым тунуся̄, та̄ўа акықуся̄кун алъхыҳна̄нӷитаҳпут. Иўырңа акықилъыӷмикун Кияӷныӷым тунусяни тӯныхкақа̄ Авраамымун.

¹⁹Сяңамың Лӣлиҳтӯсят тӯныхка̄ўат? Тӯныхка̄гут югнун лӣгикысқылъюки анахутылъҳит сыӷлыҳқылъҳунилюки. Та̄кут Лӣлиҳтӯсят таўатытка̄гут кынляңа киңунық тагилъҳанун. Лъңаңӯқ Кияӷныӷым акықусяңлъяқа̄. Та̄кут Лӣлиҳтӯсят Кияӷныӷым яқулыхтыхун тӯныхкақӣ Моисейемун. Та̄хкын Моисейем уйгукутистым тӯныхкақӣ югнун. ²⁰Иўырңа уйгукутистысюӷнӣтуқ ата̄сиқ акықикуми. Кияӷнық ата̄сиҳа̄тминың уйгукутистысюӷнӣтуқ.

Апалъӣ Лӣлиҳтӯсят

²¹Лӣлиҳтӯся̄т тыңвимун аюқаткӣ Кияӷныӷым акықусӣ? Нака̄, йыӷлыгилъю! Лӣлиҳтӯсям уңувалъыңысяҳқақсяқумикут, та̄ўа Кияӷныӷым налъҳусяӷнаяӷӣлъю ылъқуӷутңалъыӷминун та̄хун Лӣлиҳтӯсякун. ²²Иўырңа Акузитыт Игақыхкат пика̄гут қамахлъюки нунам юги сыӷлыҳқылъҳым анусимиңлъяӷақӣ. Ынка̄ңам Кияӷныӷым акықусяқыхкани тӯнылъықа̄ ухпықикаҳӣнаӷнун Иисус Христосымың.

²³Сялин ухпылъҳилъюку анусимиңлъяӷа̄яҳтукут Лӣлиҳтӯсянун. Лӣлиҳтӯсят а̄ҳқутақңуяӷӣлъю кынляңа Кияӷныӷым хўаңкунъун лӣтыстылъҳанун ухпылъық. ²⁴Лӣлиҳтӯсят апақутистыксяӷапут кынляңа Христосым тагилъҳанун. Ынка̄м ма̄тын ухпықилъымтыхун Христосыкун, Кияӷныӷым налъҳусяӷьяҳқа̄ҳтӣлъю ылъқуӷутңалъыӷминун. ²⁵Ухпылъық тагитаңаның Христосыкун Лӣлиҳтӯсят апақутистыкнаниӷапут.

²⁶Ухпықилъыҳпысигун Христос Иисусыкун, қамахлъюси Кияӷныӷым авақутақӣси. ²⁷Крестиӷақңафси Христосымун, а̄лъҳӣстун Христос пикақаҳси таўатын пиюлюгугақылъыҳпысистун. ²⁸Алъяңуӷутңитут Иудеитлъю, язычнигытлъю; алъяңуӷутңитут қыпҳаҳтыля̄ӷытлъю, қыпҳаҳтыля̄ӷунӷилңӯтлъю; алъяңуӷутңитут югытлъю, аӷнатлъю, қаюҳлъяк қамахлъюси атуным аюқуси Христос Иисусыкун. ²⁹Христосым пикңукаңиси та̄ўа Авраамым киңунқӣси. Ынка̄м лъпысилъю пилӣлъықаҳси Кияӷныӷым акықуся̄ Авраамымун.

¹Нагныӷутаҳлъякун хўатын, иӷнық пилӣтияҳқақ атами сяӷьяңаның қыпҳаҳтыля̄ӷыстун кияӷуткаюгӯқ мыкыста̄ҳа̄люни, қайўа лъңан пиксяӷңа̄гу сяңўа̄ тамаҳа̄н атами пӣңа. ²Мыкыста̄ҳа̄люку югыт афлъыңакыхкақа̄т, сяңўа̄тлъю тама̄кут лъңан пикаҳқӣ кынляңа атаңан пияҳқа̄ҳнилъҳанун. ³Хўаңкуталъю таўатысяҳтукут. Таӷнуҳа̄люта қыпҳаҳтыля̄ӷуяҳтукут нунам иглыӷутистыңитнун туӷныӷаӷнун. ⁴Иўырңа Кияӷныӷым накмикыхка̄ аӷнық ка̄сян каяхтыка̄ Иӷныни, алъхықақ аӷнакун. Лъңан қа̄ткыхкақӣ Лӣлиҳтӯсят ⁵итымунъалюта Лӣлиҳтӯсяның, авақуталӣтысқылъюталъю Кияӷныӷмун. ⁶Лъпыси авақутақутминың Кияӷныӷым, Иӷныӷми Таӷныӷакык каяхтыкақа̄к илюмнъун, қывулъютык пикак: «Авва, Ата!» ⁷Ынка̄м Кияӷныҳқун қыпҳаҳтыля̄ӷунаниҳтутын, авақутақа̄тын. Авақутақа̄ҳтутминың лъми пини лъпынун пилӣтыслъықӣ.

Павелым Сюмыӷьялиткыхкаңи Галатияӷмӣт

⁸Сивунӷани налъюксяӷаҳси Кияӷнық, ынка̄м қыпҳаҳтыля̄ӷуяҳтуси кияӷныӷунӷилңуӷнун. ⁹Иўырңа ма̄тын лӣсимакаҳси Кияӷнық, налиӷмың ипапыста̄қ Кияӷныӷӯқ лӣсимакистызи. Сяңафсиңам утыҳсюгыстык кая̄лңуӷнун сясӣнӷилңуӷнун иглыӷутилӷӣнун туӷныӷаӷнун? Сяңан тама̄кунун қыпҳаҳтыля̄ӷуҳнықихсюгыстык? ¹⁰Паниның қа̄ткақаси апыҳтуӷалъҳит аӷныӷнун, танқинун, аюмиқулъыӷнун аӷныӷнунлъю сялъқумсивикақыхкаңитнун. ¹¹Алиңуткақамси, қамахлъюни қыпҳа̄тилъқа лъпысинун сясӣнӷинъаюкан.

^12-13Ухпықа̄лгутымни, туңсиӷвикамси, хўаңамтун лъӣӷысқылъюси қаюҳлъяк хўаңалъю лъпысистун лъӣқа̄гуңа язычнигыстун.

Сивунӷани уңипақитақңамси Пинилӷӣның Уңипаның сыӷлытун пимаңитаҳпысиңа. Нықамикаҳси таўани такукақамси қаюҳлъяк қинуюгулӷӣңа. ¹⁴Қайўа қинуюлъыӷма сыӷлылӣҳтысяӷңа̄ӷмиси укаваҳсимаңитаҳпысиңа налиӷмың иҳсякумаңитаҳпысиңа. Йыӷлыги, упуӷатаҳпысиңа никимқун Кияӷныӷым яқулгатун, налиӷмың Христос Иисусытун. ¹⁵На̄гу қуяңалъыҳси? Лӣсимакамси пияқлъыгуяқата ийыси нусюглюки тагиваӷнаяӷаси. ¹⁶Ынка̄м аңуйӣӷыстыңъа̄ қаюҳлъяк уңипа̄скымси ипапигмың?

¹⁷Тама̄кут югыт қа̄ткутысюкаңиси Иудеит Лӣлиҳтӯсӣтнун, пиюкыпихтӣси лъмыхнун малиҳқутақысқылъюси, иўырңа апалъя̄т пининӷитуқ. Лъңита а̄фтысюгӣси хўаңамның, лъңинаӷмың малихтысқылъютың. ¹⁸Пиниҳтуқ югыт сю̄мқыхкумыхтыки юлгутытың, та̄ўаңинаҳақ апалъӣт пиниқата. Қӯнпың та̄на ипаңӯқ, авӣсяӷңа̄ӷма. ¹⁹Таӷнуҳаҳамни, катам аӷнам ақниҳқылъҳатун иӷниюлъыӷмини хўаңалъю таўатын ақниҳқуткынъықихтыңъўа̄мси кынляңа Христосытун лъӣлъыҳқаҳпысинун. ²⁰Хўа̄туқ ма̄тын лъпысинилъҳиңа ынка̄м лӣсимакнаялӷӣңа натын алыҳқуӷьяҳқа̄люси. Сюмыӷьялиткыҳлъяўа̄мси.

Успутаҳқак Агарылъю, Сарралъю

²¹Лъпыси атуқиюлӷӣни Иудеит Лӣлиҳтӯсӣтның, талўа лӣгикигатаси Лӣлиҳтӯсят сямың писӣтаңи. ²²Игақңа̄қ Акузитни Игақыхкани Авраамыңуқ ма̄лӷугыгның иӷнылгӯқ, а̄лъҳа қыпҳаҳтыля̄ҳқун аӷнакун, иляңа қыпҳатыля̄ӷунӷилңуҳқун аӷнакун. ²³Иӷныӷа қыпҳаҳтыля̄ҳқун алъхықа̄гуқ югыстун китутун алңунак. Иўырңа иляңа иӷныӷан қыпҳаҳтыля̄ӷунӷилңуҳқун алъхықа̄гуқ қаюҳлъяк Кияӷныӷым акықусяқыхкаңа. ²⁴Та̄кук аӷнак успута̄гук ма̄лӷугыгнун акықусяхкынун Кияӷныӷым. Қыпҳаҳтыля̄қ Агарь акықуся̄тун Кияӷныӷым аюқуқ Синайым найӷаҳани ынка̄м алъхықа̄гут қыпҳаҳтыля̄ҳқа̄лютың. ²⁵Агарь Синайым найӷаҳақңулюни аюқуқ, Аравиямылңуқ. Аӷныӷмимлъю Иерусалимыңатун аюқуқ, қаюҳлъяк авақутақулъҳӣт қыпҳаҳтыля̄ӷӯт Лӣлиҳтӯсянун. ²⁶Иўырңа па̄мна Иерусалим қыпҳаҳтыля̄ӷитуқ, лъңа на̄каҳпут. ²⁷Акузитыт Игақыхкат пика̄гут:

«Қуяҳлъяги, лъпык қумиңигалңӯтын,

ақниҳқигалңӯтын иӷниюлъыӷмың.

Угихпык унитыӷңа̄тын,

ара̄ қуяҳлъягым аңталяңаның қаюҳлъяк таӷнуҳаҳта̄ӷасяҳқа̄гутын аӷнамың угилыгмың».

²⁸Ухпықа̄лгутымни, Исаакытун аюқуси қаюҳлъяк авақутақӣси Кияӷныӷым апалъюқлъюку акықусяни Авраамымун. ²⁹Тама̄ни аӷныӷни та̄на иӷнық алъхықақ югыстун китутун алңунак амьюқыта̄ткыхкақа̄ иӷнық алъхықақ Таӷныӷам пилъҳакун. Паниның ма̄тын таўатытуқ. ³⁰Иўырңа Акузитыт Игақыхкат сямың пӣтху? «Қыпҳаҳтыля̄қ аӷнақ, иӷныӷалъю аӷуляқыстыкык. Қаюҳлъяк қыпҳаҳтыля̄ӷым аӷнам иӷныӷа ныңиӷна̄нӷитуқ атами сяӷьяңаның малигулъюни иӷныӷанун қыпҳаҳтыля̄ӷунӷилңӯм аӷнам». ³¹Ухпықа̄лгутымни, хўаңкута авақутақынӷитӣнкут қыпҳаҳтыля̄ӷым аӷнам, иўырңа авақутақӣнкут қыпҳаҳтыля̄ӷунӷилңӯм аӷнам.

Итымңалъық Христосыкун

¹Христосым хўаңкута итымуткақутаңаның, итымыпӣгума̄кут. Ынка̄ңам ныкывӷатык аӷулӣлъка̄люси, қыпҳаҳтыля̄ӷуҳнықихтыхпынаси Лӣлиҳтӯсянун.

²Нагатык! Хўаңа, Павел, уңипа̄тамси: обрезаниястыкуфси Лӣлиҳтӯсям писқылъҳатун, та̄ўа Христосым апыӷӣқа̄ каюткынъа̄нӷитаҳси. ³Алъя кылыңася̄ӷақа тамаҳа̄н ю̄к, обрезаниястыкуми та̄ўа қа̄ткыңъўа̄ӷьяҳқақӣ қамахлъюки Лӣлиҳтӯсят. ⁴Лӣлиҳтӯсятхун налъҳусяҳтыснақуткыхкуфси Кияӷныӷым ылъқуӷутңалъҳанун, а̄флъықуси лъпысиның Христосымың, унилъықаҳсилъю Кияӷныӷым наңлъыхталъҳа. ⁵Аглыӷналӷӣгныкун Таӷныӷагныкун утақаңўа̄ҳпут сиӷималъыҳпут апыӷӣӷысқылъюку. Сиӷималъыҳпут та̄наңӯқ: Кияӷныӷмун налъҳусӣсқылъюта ылъқуӷутңалъҳанун ухпықылъымтыхун Христосыкун. ⁶Христос Иисусым пикңукаңисилъю, ю̄к мыгнунанӷитуқ обрезанияка̄куми налиӷмың обрезаниялъҳилъкуми. Уна ысҳа мыгнуналӷӣ, ухпықилъық Христосыкун пиниқистилӷӣ юлгутымнъың.

⁷Сивунӷани пинитуңўа̄қ пиңуяҳтуси. Китум қа̄ткунъаниҳтыстиси ипапиҳқылъыӷмун? ⁸Кияӷныӷым туқлъюӷистыхпыси пилъқынӷита̄. ⁹Нықамиклъюку: «Закваскаңӣҳа̄м ҳӯҳтыстыҳлъягақа̄ акӯтақ». ¹⁰Лъпысилъю, хўаңалъю пикутаңаның Атанӷым, налъюнықсюкынӷитанка ухпықнанифқӣта апыҳтӯсянка лъпысинун писқылъюки. Лӣсимакақалъю Кияӷныӷым аӷью̄ҳлъықа̄ сыӷлылӣҳқилӷӣ лъпысиның, кинаңуяӷңа̄н.

¹¹Ухпықа̄лгутымни, уңипақиңигатуңа югыт обрезаниясқылъюки. Таўатын уңипақиңуяқума Иудеит амьюқыта̄ткынъаниӷнаяӷа̄тңа ынка̄м қақӯра̄ Христосым сюгагнӣӷуткынъаянӷита̄т. ¹²Тама̄кут сыӷлылӣҳқилӷӣт лъпысиның обрезаниялъыӷмың, лъңитңут обрезаниястыңъулютың евнухыңлялъҳӣт лъңитның.

¹³Ухпықа̄лгутымни, Кияӷныӷым тахсиқақӣси итымңалъыӷмун Христосыкун. Та̄ўаңинақ атуқыхпына̄н итымңалъыҳси атуӷьяҳқа̄люки сыӷлыҳқыңъалӷӣт пиюкылъҳи югусим. Итупилъ қыпҳа̄тыки иляси пиниқылъыҳпысигун. ¹⁴Қаюҳлъяк қа̄ткылъықаси қамахлъюки Лӣлиҳтӯсят қа̄ткыхкуфсигу уна Лӣлиҳтӯсяқ: «Пиниқлъюку юлгутын пиниқылъыҳпытун лъпынун катам». ¹⁵Иўырңа лъпысиның қаниқунъақңукуфсилъю пилъюгунъақңукуфсилъю угиҳсялӷӣстун тыӷикусястун, кылыңатык, қаюҳлъяк на̄фқутунъақуси.

Кияҳтык Аглыӷналӷӣгныкун Таӷныӷагныкун

¹⁶Хўатын пӣмси, кияҳтык қа̄ткылъюкык Аглыӷналӷӣк Таӷныӷак. Таўатын пикуфси атуқна̄нӷитаси сыӷлыҳқыңъалӷӣт пиюкылъҳи югусим. ¹⁷Қаюҳлъяк сыӷлыҳқыңъалӷӣт пиюкылъҳи югусим кипулъыгңа̄т Таӷныӷагнун, пиюкылъҳи Таӷныӷам кипулъыгңа̄т пиюкылъҳанун югусим. Та̄кук аңуякутук ынка̄м атуқна̄нӷитаси пиюкылъыси. ¹⁸Таӷныӷам маӷьяҳқӯңукаңиси та̄ўа Лӣлиҳтӯсят атуқсяҳқа̄наниӷаси.

¹⁹Югусим сыӷлыҳқылъыҳтуқам пиюкылъҳи налъюнӣтут. Укуңӯт: алңунасыӷақ, сыӷлытун атуқутылъық, нуқысигалңӯт алңунак атуқимун, ²⁰манӣгӯтылъық кияӷныңлъяқанун, уйвӣниқылъық, аңуйиқылъық, пилъюгутылъық, қуңьяқилъық, сякшитылъық, лъңина̄юхтылъық, а̄фқымыра̄лъық, қырңуҳпахта̄тылъық, ²¹ақиналъық, сю̄мылъық, қырңуӷулъютың аҳсяҳпа̄хтақут сыӷлытун пилъыӷмун, иляңаныңлъю сыӷлыҳқылъыӷның. Кылыңася̄ӷнақлъя̄таӷамси сивунӷани пилъымтун, тама̄кут таўатын кияҳлъыҳӣт илятңана̄нӷитут қуяслъыӷаның Кияӷныӷым Атаныҳпагулъҳан.

²²Нақамынрақ Аглыӷналӷӣм Таӷныӷам пӣтыстыкӣ укуңӯт: пиниқылъық, қуямалъық, ныкыхмылъық, нуқынъыҳтулъық, наңлъыхталъық, пинилъық, ата̄сӣӷмытылъық, ²³якумаңиңитылъық, нуқытылъықлъю. Та̄кут ӣнӷутылъҳитут алңунак лӣлиҳтӯсяни. ²⁴Христос Иисусым пиңита қақӯра̄ткақӣт сыӷлыҳқыңъалӷӣт пиюкылъҳит югусимың. ²⁵Кияҳтыңъукумта Таӷныӷагныкун, қа̄ткылътыкык Таӷныӷак. ²⁶Қука̄югныӷуфқа̄мта, қинуюхтифқа̄мта, ақинакутыфқа̄мта.

Каюсӣтулъюси

¹Ухпықа̄лгутымни, кина сыӷлыҳқылъҳым ка̄тфалъюхтыкагу, лъпыси кияҳлъыҳӣни Таӷныӷагныкун, пинитуңўа̄қ якуқлъюку каюсӣтыху малигунъықихтысқылъюку Атаныӷмун. Лъпысилъю, кылыңаңўа̄ӷлюси лю̄рақ нанӷӣқулъыңнаюкафси. ²Каюткутулъюси сыӷлылӣлъыҳпысини; таўатын қа̄ткылъықаҳси Лӣлиҳтӯсяқ Христосым қылӷутка̄. ³Кина сюмыҳтаӷақуми сяңунилюни, сяңунӷитыӷңа̄ӷми, лъңаның пӯҳтыңъӯқ. ⁴Йықай тамаҳаӷми югым ювӷӣӷўа̄ӷлигу кияҳта̄лъыни. Ынка̄м пиниқан қуякнакаңа лъми катам апыӷӣқани успутақылъңуна̄н китум апыӷӣқа̄нун. ⁵Тамаҳаӷми югым иглыӷусяҳқақӣ лъми пияҳқани.

⁶Кина алңунак апыҳтуқақ Кияӷныӷым апыҳтӯся̄мның, пинилӷӣмың тӯнили апыҳтуӷистыминун.

⁷Сюмыҳтаӷақувык пӯҳлъықнилюку Кияӷнық лъпынун пӯҳтыңъӯтын. Югым сяңўа̄ пӣтысӣӷақани унатаӷьяҳқақа̄. ⁸Пӣтысиӷақувык ыфқуҳналюку сыӷлыҳқыңъалӷӣ пиюкылъҳын, та̄хкын унатаҳлъықан туқулъық. Иўырңа пӣтысиӷақувык ыфқуҳналюкык Таӷныӷак, та̄хкын Таӷныӷагның унатаҳлъықан кынлыңилңуқ уңувалъық. ⁹Ынка̄м қинуягутыхпына̄н пинитун пилъық пилътыху, қаюҳлъяк ӣлъқаюнӷилъкумта пилъыҳқақ ка̄скан акилыҳтӯсяңылъықукут. ¹⁰Ынка̄м пилъыҳқалгунымта ӣўлың пинитун пӣқылътыки қамахтыңъўа̄ӷлюки югыт, кияң тама̄кут аңлыгутылӣткапут Христосыкун.

Павелым Киңулиқ Кылыңася̄лъҳа

¹¹Ысҳақаҳтыкиқун я̄хтуҳлъягыт игалъҳынка букват!

¹²Югыт ысҳаҳсяқсюныҳтуқатлъю қанаткиюныҳтуқатлъю пинитун қыпҳалъыӷмыхның, лъңиңӯт обрезаниясқӯӷўа̄ӷилӷӣт лъпысиның. Таўатын пӣқут қаюҳлъяк алиңақылӷӣт амьюқыта̄ткылъыңнаюкамың уңипақыхкумыхтыху қақӯраҳӣна̄ Христосым, авылӷаӷлюку обрезаниялъық. ¹³Қайўа обрезанияка̄яӷңа̄ӷмың, лъңит катам қа̄ткусигатут Лӣлиҳтӯсянун. Обрезаниясқысюгақӣси қанаткыпигыснаӷналюси лъмыхнун обрезаниястыкақнилюси. ¹⁴Иўырңа хўаңа қанана̄нӷитуңа сямың алңунак иўырңақун қақӯра̄ның Атанымта Иисус Христосым. Туқулъҳакун қақӯрами нуна қақӯра̄ма̄қ хўаңамнун, ынка̄м хўаңа қақӯра̄ма̄ңа нунамун. ¹⁵Мыгнунанӷитуқ ю̄к обрезанияка̄куми, налиӷмың обрезаниялъҳилъкуми. Уна мыгнуналӷӣңӯқ: Кияӷныӷым улимакақӣлъю нутаӷа̄люта югни. ¹⁶Тамаҳӣтнун қа̄ткулъҳӣнун апыҳтӯсямнун, йықай Кияӷныӷым ныкыхмылъҳалъю, наңлъыхталъҳалъю лъңитнилъи, Израилыңанилъю Кияӷныӷым.

¹⁷Хўакын кынлыклъюку китум алңунак алъя сыӷлылӣҳтыстыфқа̄ма пилиңа қаюҳлъяк югусимнилңӯт ма̄мылъҳыт кылгутңўа̄т қыпгаҳтыля̄ӷулъқа Иисусымун.

¹⁸Ухпықа̄лгутымни, йықай пиниқиңалӷӣ каюсилъҳа Атанымта Иисус Христосым тамаҳаҳпысинилъи. Аминь.