К Ефесянам

Павелым Посланияңи Ухпықанун Ефесымылңуӷнун

¹Укут посланият Павелымың пиңӯт. Христос Иисусым апостолыка̄ңа Кияӷныӷым пиюкылъҳакун.

Письмоңӯңа Кияӷныӷым югитнун Ефесымылңуӷнун, ата̄сӣӷмылңӯт малихся̄ҳтыңи Христос Иисусым.

²Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Кияӷныӷым Накмикыхкақӣлъю Христосыкун

³Усюқылъыңли Кияӷнық, Атаңа Атанымта Иисус Христосым! Христосыкун Кияӷныӷым қуястыңъўӣлъю тамаҳа̄ның тунусямың қиляхтамың. ⁴Нуна улималъҳилъюку Кияӷныӷым накмикыхкақӣлъю Христосыкун пылюңитысқылъюталъю, авутңитысқылъюталъю лъңанун. ⁵Қаюҳлъяк Кияӷныӷым пиниқыхкаңилъю, ныӷиӷлюку алъюҳқинакыхкақӣлъю авақута̄люта Иисус Христосыкун. Таўатын пика̄гуқ қаюҳлъяк пиюкыхкаңа, ыфқуқыхкаңалъю. ⁶Ынка̄м усюқаҳпут Кияӷнық қаюҳлъяк иӷлыхпынани наңлъыкыҳлъягӣлъю пиниқыхкамикун Иӷныӷмикун.

⁷Христосым а̄ўакун, Кияӷныӷым итымуткақӣлъю сыӷлыҳқылъымнъың. Сыӷывутӣ сыӷлыҳқылъыпут апалъюқлъюку наңлъыхталъыҳлъяни ⁸ақыҳқусиқыҳлъякаңа хўаңкунъун. Пыҳқинӷустӣлъю, лӣгикыстӣлъю ⁹успықылъыӷминың сялин алӣҳсигалъкымъиның сивунӷани. Та̄наңӯқ Кияӷныӷым успықыхка̄, пикақа̄ Христосыкун. ¹⁰Кияӷныӷым успықылъыни апыӷӣҳлъықа̄ пилъыҳқаҳлъюгўа̄ӷми. Қамахтыңъўа̄ӷлюки улима̄ни қилягмылңӯтлъю, нунамылңӯтлъю қырңуҳлъықӣ, Христосымун иглыӷутысқылъюки.

¹¹Христосыкун Кияӷныӷым накмикыхкақӣлъю лъңанун югулюта. Аюмирухлъяк пиюкылъыӷмитун ухпықыхкақа̄. Лъңан сяңўа̄ тамаҳа̄н пиюкылъыӷмитун пистақа̄. ¹²Хўаңкута Иудеяни ухпықани сиӷимакиюхўа̄қа̄гукут Христосыкун. Ынка̄м кияҳта̄лъымтыхун усюқыслъықаҳпут Кияӷнық а̄ңылъыҳлъяганун.

¹³Христосыкун лъпысилъю нагақуқақаҳси ипапик уңипақ. Пинилӷӣңӯқ Уңипақ уңипа̄тилӷӣ югулилъыҳпысиның. Ухпықақңафсигу Христос, Кияӷныӷым налъюнӣқақӣси Аглыӷналӷӣгның Таӷныӷагның, акықусяқыхкаминың тӯнылъықнилюкык. ¹⁴Аглыӷналӷӣм Таӷныӷам ипапиҳқыстӣлъю пагитаҳқамнъың кынляңа хўаңкута пилӣтылъыҳқамнун. Ынка̄м усюқылъықаҳпут Кияӷнық а̄ңылъыҳлъяганун!

Павелым Юӷӣ

¹⁵Нагақӯма̄қа ухпықилъыҳси Атаныҳқун Иисусыкун, пиниқылъыҳсилъю тамаҳӣтнун Кияӷныӷым югитнун. Тама̄кын апалъюқлъюку, ¹⁶нықамикақамси юӷанымни, игамсиқаягунъыӷмың та̄қигатамси Кияӷныӷмун. ¹⁷Атаҳлъяка̄ Атанымта Иисус Христосым. Лъңанун туңсӣтақамси пыҳқинӷусқылъюси Таӷныӷахкынкун, лӣгикатаӷӣсқылъюси Кияӷныӷмың. ¹⁸Юӷа̄ткақа ниӷук кӯкхутысқылъюку илюхпысинун, лӣгикысқылъюку сиӷималъық Кияӷныӷым лъпысинун пикыстыка̄ қаюҳлъяк накмикыхкақӣси. Юӷа̄ткамсилъю лӣгикысқылъюки кымнаҳлъягыт қуястылъыҳлъягыт Кияӷныӷым акықусяқыхкӣ югминун. ^19-20Юӷаҳтуңалъю лӣгикысқылъюку сыӷлыҳлъягӯқ Кияӷныӷым аҳтуӷьяҳқа̄нӷилъыҳлъяга қыпҳалӷӣ хўаңкунъи ухпықилӷӣни. Та̄на аҳтуӷьяҳқа̄нӷитылъыҳлъяк ата̄сӣгуқ Кияӷныӷым уңуваҳтисиқыхка̄ Христосымун туқулъыӷмың. Та̄хкын қилягми Кияӷныӷым ақумысима̄ аӷынқигныӷмикун. ²¹Кияӷныӷым қулиҳпига̄ҳтыстыкақа̄ Христос тамаҳӣтның иглыӷутистының, қылӷикаюгның, аҳтуӷьяҳқа̄нӷилъылыгның, умӣлыгныңлъю. А̄тҳа иңья̄тңаҳлъяхтуқ атыӷьяхаӷның нунами хўани, нунаӷраӷаҳқамилъю. ²²Кияӷныӷым лъикақа̄ сяңўа̄ қамахтыңъўа̄ӷлюку Христосым итыга̄н асиңанун, на̄сқӯтистыңлъяқақа̄лъю сямун тамаҳа̄нун апалъюқлъюки ухпықат. ²³Қамахлъютың ухпықат югусиқӣ Христосым, ынка̄м лъңа ӣӷўиҳтуқ. Христосым ӣӷўиҳта̄ сяңўа̄ қамахлъюку нани алңунак.

Туқулъыӷмың Уңувалъыӷмун

¹Сивунӷани таӷныӷаси туқуңаяҳтут қаюҳлъяк қа̄ткумаңилъкыси Кияӷнық, сыӷлыҳқыстыңуяҳтусилъю. ²Таўатысяҳтуси кияҳтыңъулюси нунам сыӷлыӷмун иглыӷныӷанун. Қа̄ткыңъуяӷаҳсилъю иглыӷутистыңат туӷныӷа̄т қилягамылңӯт. Лъңаңӯқ а̄ңылъыҳпигақ туӷныӷақ иглыӷутилӷӣ югның қа̄ткусигалңуӷның Кияӷныӷмун. ³Қамахлъюта кияҳтыка̄гукут тама̄кустун югыстун. Атуқыхкақапут сыӷлыҳқыңъалӷӣт пиюкылъҳи югусимталъю, умьюгамталъю. Ынка̄м қамахлъюта алъхықа̄тымнъың сыӷлыҳқыстыңулюта, аӷью̄лъыңнақңуяҳтукут Кияӷныӷым сякша̄лъҳакун.

⁴Иўырңа Кияӷнық наңлъыхтаҳлъяхтуқ, пиниқыпихтӣлъхуқлъю. ⁵Қайўа таӷныӷапут туқуңаяӷңӣта апалъюқлъюки сыӷлыҳқылъыпут, Кияӷныӷым уңуваҳтӣлъю малигулъюта Христосымун. (Югулика̄гуси Кияӷныӷым наңлъыкылъҳакун.) ⁶Кияӷныӷым уңуваҳтӣлъю малигулъюта Христос Иисусымун, хўаңкунъунлъю ақумылгусиҳтыста̄ қилягми. ⁷Кияӷнық таўатын пика̄гуқ киңулӣӷаӷнун лӣтысқылъюку пиниқылъыӷрукута̄ҳлъяни хўаңкунъун Христос Иисусыкун. ⁸Кияӷныӷым наңлъыхталъҳакун югулика̄гуси ухпықилъыҳпысигун. Югулилъыҳси лъпысиның пилъқынӷитаҳси, Кияӷныӷым тунусяқа̄ лъпысинун. ⁹Югулилъҳитӣси апалъюқлъюку сялъыҳси, ынка̄м қука̄югуткысяҳқақынӷитаҳси. ¹⁰Кияӷныӷым улима̄қӣлъю таўатылъюта. Христос Иисусыкун улима̄қӣлъю қыпҳӣсқылъюки пинилӷӣт қыпҳақат. Сивунӷани та̄кут пинилӷӣт қыпҳақат ята̄ҳқыңъўа̄қақӣ хўаңкунъун қыпҳӣсқылъюки кияҳтылъымнъи.

Ата̄сӣҳтылъық Христосыкун

¹¹Нықамиклъюку язычнигыңулюси алъхықа̄гуси. Иудеит атиӷақӣси «обрезаниялъҳилңӯт», лъңит атиқаюгӯт «обрезаниякат». (Обрезаниялъҳат югусиҳӣнӣтнитуқ.) ¹²Нықамиклъюку тама̄ни пилъыӷни налъюксяӷаҳси Христос кинаңутаңа. Нуната̄яҳтуси Израилыӷмӣнун ынка̄м илятылъҳисяҳтуси Кияӷныӷым акықусяқыхка̄нун лъңитнун. Нунами хўани кияҳтыңъуяҳтуси сиӷималъңунасилъю, Кияӷныңунасилъю. ¹³Иўырңа ма̄тын пилъыӷми Христос Иисусымун илясима̄си. Сивунӷани аўавансяҳтуси Кияӷныӷмың, иўырңа ма̄тын пилъыӷми туӷа̄ӷусима̄си лъңанун Христосым а̄ўакун. ¹⁴Христос лъңа катам ныкыхмылъқаҳпут. Лъңаңӯқ ата̄сӣҳтыстилӷӣ Иудеяныңлъю, язычнигыныңлъю. На̄фқыхкақа̄ миңлъюта а̄фтилӷӣ хўаңкунъың, ынка̄м аңуякунъаниҳқыхкақӣлъю. ¹⁵Христосым туқулъыӷмикун атӯнаниҳқыхкақӣ Иудеит Лӣлиҳтӯсӣтлъю қылӷусӣтлъю. Таўатын пика̄гуқ Иудеитлъю, язычнигытлъю ата̄сӣҳтысқылъюки лъмикун. Ынка̄м ныкыхмылъыңыстыкақӣ. ¹⁶Туқулъыӷмикун қақӯракун, Христосым угумикунъаниҳқӣ Иудеитлъю, язычнигытлъю. Та̄хкын ата̄сӣҳтыстӣ, илялӣӷутыстӣлъю Кияӷныӷмун. ¹⁷Христос тагилюни уңипақика̄гуқ ныкыхмылъыӷмың лъпысинун язычнигнун, аўавантыңъуялӷӣси Кияӷныӷмун. Уңипақика̄гуқлъю ныкыхмылъыӷмың Иудеянун, қантаӷантыңъулӷӣт Кияӷныӷмун. ¹⁸Ынка̄м Христосыкун Иудеянилъю, язычнигнилъю тагияқлъыгуҳтукут Атамун ата̄сикун Таӷныӷакун.

¹⁹Ынка̄ңам лъпыси язычнигни нуната̄наниҳтуси. Итупилъ нуналгутка̄ҳтӣси Кияӷныӷым югита, илятусилъю ныңлъюгутаңанун Кияӷныӷым. ²⁰Мыңтыӷа̄тун аюқуси ныкыфтыкат тумыңлъяқӣтхун апостолынилъю, ӯкналиқистытлъю. Христос Иисус лъңа катам каңиӷам уйӷака̄. ²¹Қамахлъютың мыңтыӷам налиӷныӷи ныкыҳқӯтңа̄т қырңаӷмың Христосыкун. Та̄кут налиӷныӷыт нуляялӷӣмың храмыңуҳтыңъӯт Атаныӷмун. Та̄на храм аглыӷнаҳтуқ. ²²Илятңалъыҳпысигун Христосымун, малигулъюси иляңитнун ухпықанун ныкыфтыңъӯси мыңтыӷамун Кияӷныӷым кияҳфиганун Таӷныӷагмикун.

Павелым Қыпҳа̄тилъҳа Язычнигнун

¹Тама̄кын апалъюқлъюку, хўаңа, Павел, анусимиңлъяӷвигмытуңа қаюҳлъяк қыпҳа̄скыхка Христос Иисус лъпыси апалъюқлъюси язычнигни. ²Ынтақун нагақӯма̄ҳси Кияӷныӷым наңлъыхталъыӷмикун қыпҳақалиткақа̄ңа лъпысинун. ³Кияӷныӷым лӣтыста̄ хўаңамнун қайвиҳтылъҳилңуқ успықылъыни. Қавңанҳақ письмоткаҳтыкақақа та̄на. ⁴Атиҳтуқуфсигу письмоткыхкақа лӣлъықаҳси лӣгикылъқа қайвиҳтылъҳилңуқ успықылъық Христосымың аюқылӷӣ. ⁵Сивунӷани Кияӷныӷым уңипа̄тылъҳитӣ югыт қайвиҳтылъҳилңуӷмың успықылъыӷминың. Иўырңа укуни аӷныӷни Аглыӷналӷӣгныкун Таӷныӷагныкун қайвиҳта̄ успықылъыни аглыӷналӷӣнун апостолыминунлъю, ӯкналиқистыминунлъю. ⁶Хўатытуқ успықылъҳа: язычнигыт ухпықилъыӷмыхтыхун Пинилӷӣның Уңипаның илясима̄т Иудеянун Кияӷныӷым қуястылъҳанун. Налиӷнықа̄ҳсимӣ ата̄сим югусим, ынка̄м илятут Кияӷныӷым акықуся̄нун Христос Иисусыкун.

⁷Кияӷныӷым наңлъыхталъыӷмикун, аҳтуӷьяҳқа̄нӷилъыӷмикунлъю тунусялита̄ңа қыпҳаҳтыңулюңа уңипақысқылъюки Пинилӷӣт Уңипат. ⁸Укалиҳпига̄гуңа тамаҳӣтның Кияӷныӷым юганың. Таўалъӣма Кияӷныӷым наңлъыхталъыӷмикун тунусялита̄ңа хўатын: накмика̄ңа язычнигнун уңипақысқылъюки Пинилӷӣт Уңипат Христосым аклъюңиңаның аюқылӷӣт. Аклъюңиңи иңья̄тңа̄т югыт лӣгикылъҳитның. ⁹Кияӷныӷым накмикыхкақа̄ңалъю лӣгикыстысқылъюки қамахлъюки югыт қайвиҳсимаңилңуӷмың успықылъыӷминың. Кияӷныӷым, улимаӷикам сямың тамаҳа̄ның, қайвиҳтылъҳита̄ успықылъыни пӣнлиӷьюха̄лъыӷмың ма̄тымун. ¹⁰Та̄хкын қилягнилңӯт: иглыӷутилӷӣтлъю, аҳтуӷьяҳқа̄нӷилъылгытлъю, Кияӷныӷым лӣтыслъықӣ алъя̄ҳӣнаӷмың пыҳқинылъыӷминың. Таўатын пилъықуқ югмикун юӷаӷвигнилңуҳтыхун. ¹¹Тама̄куңӯт Кияӷныӷым успықыхкӣ сялин нунаңлъялӷилъюни. Апыӷӣӷумӣ Христос Иисусыкун Атанымтыхун. ¹²Ухпықилъымтыхун Христосыкун агляӷьяҳқа̄ҳсима̄кут Кияӷныӷмун тытулъңуна̄мталъю, алиңылъңуна̄мталъю. ¹³Ынка̄ңам ӣлъқаягутыхпына̄н ухпықилъыҳси апалъюқлъюку икфиқуткыңъукымси. Икфиқылъыӷма қӯлваҳтыслъықӣси.

Пиниқылъҳа Христосым

¹⁴Ынка̄м та̄на апалъюқлъюку сыгысқуҳтуңа сивуңани Атам. ¹⁵Лъңаңӯқ атиӷилӷӣ тамаҳӣтның ныңлъюгутның қилягмылңуӷныңлъю, нунамылңуӷныңлъю. ¹⁶Юӷаҳтуңа Кияӷныӷмун аклъюңиҳлъяганың аҳтуӷьяҳқа̄нӷилъылитысқылъюси икнақуҳсӣсқылюки илюси қа̄мкут Таӷныӷахкынкун. ¹⁷Юӷа̄ткамси Христос кияҳтысқылъюку илюхпысини ухпықилъыҳпысигун. Юӷа̄ткамси акулгусқылъюсилъю, тунымалгусқылъюсилъю пиниқылъыҳқун. ¹⁸Юӷа̄ткамси, қамахлъюкилъю Кияӷныӷым юги, лӣгиксяқлъыгусқылъюку Христосым пиниқылъҳан, иқытуляңа, тахталяңа, ӯсқаҳтуляңа, сямавныҳтуляңалъю. ¹⁹Лъпысинун лӣсимакысқысюгақа Христосым пиниқылъҳа, қайўа пияқнаӷңа̄н лӣгикңўа̄лъыҳқа̄. Та̄хкын пиниқылъҳакун, Кияӷныӷым наңаӷныӷатун ўата лъӣҳлъықуси. ²⁰Кияӷныӷым аҳтуӷьяҳқа̄нӷилъҳакун қыпҳалӷӣкут илюмнъи, лъңан пияқлъыгўа̄ қа̄йӷулъюку сяңўа̄ алңунак а̄птыкаҳпут налиӷмың сюмыҳтаӷа̄ткыхкаҳпут. ²¹Кияӷнық усюқылъыңли ухпықатхун юӷаӷвигнилңуҳтыхун, Христос Иисусыкунлъю. Усюқитыху қӯнпырухлъяк кынлыңуна̄н. Аминь.

Ухпықат Христосым Югусиқӣ

¹Анусимиңлъяӷа̄гуңа қаюҳлъяк қыпҳа̄скыхка Атанық. Кияӷныӷым накмикыхкақӣси лъңанун югулюси; тама̄кын апалъюқлъюку кайымамси кияҳтысқылъюси Кияӷныӷым кияҳтысқысюлъҳатун. ²Ӣўлың қусывыхлъюси, якумаңилъиқыхпынаси, нуқынъыҳтулюси, тугуклъӣтулъюси пиниқылъыҳқун. ³Кияӷныӷым Таӷныӷахкынка қырңуӷуткақӣси ныкыхмылъыҳқун. Ынка̄м нанӷӣқуҳлъяхтык ӣўлың кияҳтык таўатын. ⁴Ата̄сӣгуқ югусиқ, ата̄сӣгуклъю Таӷныӷак, катам таўатын ата̄симун сиӷималъыӷмун Кияӷныӷым тахсиӷӣси. ⁵Ата̄сӣгуқ Атанық, ата̄сӣгуқ ухпықилъық, ата̄сӣгуқ крестиӷылъық. ⁶Ата̄сӣгуқ Кияӷнық, Атака̄т ся̄м тамаҳа̄н. Лъңан иглыӷутңўа̄ сяңўа̄ тамаҳа̄н, тамаҳа̄нитуқ, сямытуқлъю алңунак.

⁷Христосым тамаҳа̄мта тӯныхкақӣлъю тунусямың қыпҳақани писқылъюку. Тӯныхкақӣ та̄кут тунусят тӯньюкылъыӷмитун. ⁸Тама̄кын апалъюқлъюку Акузитни Игақыхкани игақыхка̄лӷӣ:

«Маюӷақңами ӯсқалъыӷмун тугукақӣ угля̄пихлъыӷӣт ўаяқат,

югытлъю тунусялиқуқақӣ».

⁹Сямың писӣўа: «Маюқа̄гуқ»? Хўатын писӣгуқ, сивуклъюни укика̄гуқ сямавык асилиӷныӷанун нунам. ¹⁰Ынка̄м лъңа та̄на укикақ сямавык, лъңаңӯқ ата̄сиқ та̄на маюқақ памавык иңьяӷлюки қилягыт, имиӷналюку сяңўа̄ қамахлъюку наю̄тңалъыӷминың. ¹¹Лъңаңӯқ тунусялиқуқақ югнун: иляңи апостолыңулюки, иляңи ӯкналиқистыңулюки, иляңи евангелистыңулюки, иляңи юӷаҳтыңулюки, апыҳтуӷистыңулюкилъю. ¹²Та̄кут тунусялиткақӣ апыҳтӣсқылъюки Кияӷныӷым юги лъңитнун қыпҳа̄тысқылъюку лъңа. Кияӷнық таўатын пика̄гуқ лъңитнун ныкыфтысқылъюку Христосым югусӣ. ¹³Та̄на қыпҳақақ нагныҳлъықуқ кынляңа ата̄сӣҳтылъымнъун ухпықилъымтыхун, лӣсимакылъымтыхунлъю Иӷныӷа Кияӷныӷым. Та̄хкын аңтанӣтңўа̄ӷлюта Христосытун лъӣҳлъықукут. ¹⁴Ынка̄м таӷнуҳаҳа̄наниҳлъықукут. Тама̄кын апалъюқлъюку пӯҳтысна̄нӷитукут югнун тымңимың апыҳтуӷилъҳитхун. Апыҳтуӷилъҳит ануқыстунлъю, имаҳлъюгыстунлъю аюқут нӯхта̄талӷӣт югның. Тама̄кут пыҳқинылӷӣт, иқлъыңалӷӣт югыт, иқлъыңатың ипасюгниҳсяӷақӣт маӷьяҳқуныҳлъюхналюки югыт. ¹⁵Итупилъ акузиткылътыху ипапилъық пиниқылъыҳқун, ынка̄м ўата Христосытун лъӣҳлъықукут сялъымтыхун тамаҳа̄кун. Христос на̄сқуқа̄т ухпықат. ¹⁶Ухпықани югусиқӣлъю Христосым. Лъңакун ӣңунаӷми югусиқ қырңуӷутка̄гуқлъю, нувыша̄тка̄гуқлъю югусим ивалюңакун. Қамахлъютың налиӷныӷыт қыпҳанъыӷмыхни қыпҳалъыҳқамыгыстун, та̄ўа югусиқ нагўа̄қуқ, икнақуҳсяӷақуқлъю пиниқылъыҳқун.

Уңувалъыӷраӷақ Христосыкун

¹⁷Ынка̄ңам Атанӷым а̄тҳакун хўатын пӣмсилъю, кылыңася̄ӷамсилъю: кияҳтыхпынасиңам язычнигыт кияҳта̄лъҳистун. Сюмыҳтаӷалъҳит сясӣнӷилңӯгут, ¹⁸умьюгӣтлъю лӣгикиңигалңӯгут. Илятңанӷитут уңувалъыӷмун Кияӷныӷым тӯныхка̄нун, қаюҳлъяк налъюкңўа̄ӷа̄т, пиныҳлъюгӯтлъю. ¹⁹Талўа кайңуюгьяҳқа̄нанӣма̄т; атуқақӣтлъю сяңўа̄т алңунак сыӷлыӷыт югусимың пиюкыхкӣт. Нагныӷусюгақӣт қамахлъюки сыӷлыӷыт нуқытутыхпынаки.

²⁰Иўырңа тама̄кут лӣтылъҳитаси Христосым апыҳтӯсӣтның! ²¹Нагақупыста̄қақаҳси лъңа, қаюҳлъяк малихся̄ҳтыкыхкаңиси. Ынка̄м апыҳтуқа̄гуси ипа апыҳтӯся̄мның Иисусым. ²²Хўатын апыҳтуқақӣси: сыӷлыӷыт пиюкылъыҳпыси пӯҳлъықӣсилъю, на̄фқылъықӣсилъю. Тама̄кын апалъюқлъюку пыхтыки наңаӷнылюсилъю, кияҳта̄лъқысяқысилъю. ²³Итупилъ таӷныӷам нутаҳлъики умьюгаси. ²⁴Ынка̄м атуқитыху наңаӷныӷраӷаҳси қаюҳлъяк Кияӷныӷым улимакақа̄ лъмитун аюқлъюку: ылъқуӷутңапӣглюку, аглыӷнаӷлюкулъю.

²⁵Ынка̄м иқлъыңиқнаниҳтыгңам! Итупилъ ӣўлың апыҳтыху ипапилъық иляхпысинун, қаюҳлъяк қамахлъюта налиӷнықуӷӣлъю Христосым югусӣн. ²⁶Сякшитык иўырңа сыӷлыҳқыхпынаси. Сиқинық тывиҳтыстыхпына̄н паниның сякшитңулюси. ²⁷Талўа туӷныӷақ пилъыҳқалитыхпына̄н нанӷӣқусқылъюси сыӷлыҳқылъыӷмун. ²⁸Тыглыгнӣҳта тыглыгнаниӷли. Итупилъ қыпҳаӷли алъхыӷусяҳқа̄люни аклъюкыхкаминың, тӯнияҳқа̄ҳлъықуқлъю аклъюкилӷӣнун. ²⁹Акузиткихпынаси сыӷлыӷмың. Итупилъ алыҳқуҳтыки пинитун югыт аклъюкилъҳитни. Пинилӷӣт акузитыт кайымьяҳқақӣт, аныӷныҳқысяҳқақӣт нагалъҳӣт. ³⁰Қивӷустыхпынакыклъю Аглыӷналӷӣк Таӷныӷакык Кияӷныӷым. Таӷныӷагминың налъюнӣқақӣси лъми пикналюси. Таўатын пика̄гуқ лъпысинун лӣсимакысқылъюку итымулъықӣси сыӷлыҳқылъыҳпысиның Итымутылъҳым Аӷныӷа ка̄скан. ³¹Пыхтыху угумикыра̄қ, сякша̄, сякша̄ҳлъяк, юпиҳқаӷа̄тақ, сыӷлықӯқ, қамахлъюкилъю сыӷлыӷыт. ³²Йыӷлыги наңлъыхтаҳтык, нафуҳтаҳтык иляхпысинун, сыӷывутулъюсилъю, катам Кияӷныӷым сыӷывуткақыхкаңиси Христосыкун.

Кияҳта̄лъық Ниӷугми

¹Кияӷныӷым лъпыси авақутақутаңаның пиниқитыху, аюқысиӷаҳтыху. ²Кияҳта̄лъыси а̄ҳқутақыстыки пиниқылъыӷмун, катам Христосым пиниқыхкаңилъю, туқуматкыхкақыхкаңилъю. Туқулъҳа тыпкыхтатун тунусятун аюқуқ Кияӷныӷмун, аҳқутңӯқлъю лъңанун.

³Лъпыси Кияӷныӷым юкыхкаңиси, ынка̄м китумун алңунак алъянӣҳтыстыңунифқа̄фси, налиӷмың алңунак блудыстыңунифқафси, налиӷмың пакигнӣҳтыңунифқа̄фси. Тама̄кут сыӷлыӷӯт ынка̄м Кияӷныӷым югита пияҳқақынӷитӣт. ⁴Кайңусяӷа̄тыхпынаси, тымңитхўамың акузиткыхпынаси, налиӷмың амьюӷа̄ӷуткыхпынаси. Итупилъ игамсиқаюгвиксяҳқақаҳси Кияӷнық. ⁵Налъюнықнаҳӣтуқ уна: Кина алңунак пагисяҳқӣтуқ Атаныҳпагулъҳани Христосымлъю, Кияӷныӷымлъю сыӷлыҳқылӷӣ алъянӣӷмың, алңунак блудникыӷмың, налиӷмың пакигнӣӷмың. (Пакигныӷыт манигуҳтыңӯт кияӷныңлъяқанун.)

⁶Югнун пӯҳтыстыхпынаси уңипа̄скаңиси тама̄кут сыӷлыҳқылъҳыт сыӷлыӷунӷинъилюки. Иўырңа таўатылңӯт сыӷлыҳқылъҳыт Кияӷнық сякша̄стыҳлъягақа̄т қа̄ткунъыӷилңӯт лъңанун. ⁷Тама̄кын апалъюқлъюку илятыхпынаси таўатылңуӷнун югнун. ⁸Югыстун аюқсяҳтуси кияҳлъыҳӣт мамлыгми, иўырңа ма̄тын кияҳтыңъӯси ниӷугми қаюҳлъяк Атанӷым пикыхкаңиси. Ынка̄м кияҳтык югыстун ниӷугмылңуӷыстун. ⁹(Қаюҳлъяк кияҳныҳпысини ниӷугми пиниҳтыстақӣси, ылъқуӷутңастақӣси, ипаңустақӣси.) ¹⁰Лӣнъақитыхулъю сяңўа̄ ыфқуӷналӷӣ Атаныӷмун. ¹¹Илятқаҳтаҳпынаси югнун сятңунӷилңуӷмың пилӷӣнун мамлыгми. Итупилъ лӣгикыстыкӣ таўатын пилъҳит сыӷлыӷӯт. ¹²Кайңунапихтут талўа акузиткысяҳқа̄лютың тама̄кут пӣқыхкаңит аксяқлъюку. ¹³Иўырңа қамахтыңъўа̄ӷлютың алӣҳтыкумың ниӷугмун, та̄ўа натытыҳпига̄таңи хўатыҳлъюўа̄қ алӣҳлъықут, қаюҳлъяк сяңўа̄ қамахлъюни ниӷугым ысҳаӷьяҳқа̄ҳтыслъықа̄. ¹⁴Тама̄кын апалъюқлъюку югыт пика̄гут:

«Қавалӷӣми, таҳтуҳа̄тын.

Уңува̄ туқулъыӷмың ынка̄м Христосым кукыхлъықа̄тын».

¹⁵Ынка̄м кылыңалюси кияҳтык. Пыҳқинӷунӷилңуӷыстун кияҳтыхпынаси; итупилъ пыҳқинӷыстун кияҳтык. ¹⁶Пинитун атуқитыху тамаҳа̄н пилъыҳқаҳси қаюҳлъяк аӷныӷни ма̄тын югыт сыӷлытун пӣқут. ¹⁷Тама̄кын апалъюқлъюку налъюфқа̄фси, иўырңа лӣгикитыху сяңўа̄ Атанӷым писқысюлъҳа лъпысинун.

¹⁸Сю̄мыхпынаси виномың қаюҳлъяк на̄фқылъықӣси. Иўырңа имиҳтык Таӷныӷагның, ¹⁹алыҳқӯтақлъюси акузитаңитның псалмыт, иляга̄тыт, таӷныӷакунлъю иляга̄тның. Илягаӷақитык иляга̄тныңлъю, псалмыныңлъю Атаныӷмун, усюқилъылиӷлюси илюхпысигун. ²⁰А̄тҳакун Атанымта Иисус Христосым, игамсиқаюгвикумаңинаҳтыху Кияӷнық Атаңа ся̄м тамаҳа̄н.

Нулиҳытлъю, Угитлъю

²¹Малиҳқутақңалюси иляхпысинун қаюҳлъяк сӣвакңукыси Христос.

²²Нулӣӷни, малиҳқутақлъюси угихпысинун катам Атаныӷмун пилӷӣстун. ²³Қаюҳлъяк уги на̄сқуқа̄ нулиҳан катам Христос на̄сқуқыхкаңат ухпықат. Христос Югулиӷистыка̄т ухпықат; лъңан югусиқӣ. ²⁴Катам ухпықат малиҳқутақылъҳистун Христосымун, таўатыҳпигақ сялъыҳқун тамаҳа̄кун нулиҳыт малиҳқутақсяҳқа̄гут угимыхнун.

²⁵Угини, пиниқлъюки нулӣси катам Христосым пиниқылъҳатун ухпықат. Пиниқыпихтыкақӣ рыпалъ туқуматкыхкақӣ. ²⁶Ухпықат аглыӷнаҳсяқақӣ аҳтуӷьяҳқа̄нӷилъҳакун акузитми, пылюңиҳсяқақӣлъю аӷвиглюки мыҳқун. ²⁷Христос таўатын пика̄гуқ а̄ңггунъалюки ухпықат лъңанун катам пиниӷналӷӣтун угӣӷнақылӷӣтун. Туқука̄гуқ ухпықат тагнықшӣтысқылъюки, уңлъыврыгӣтысқылъюки налиӷмың сямың алңунак афкуйӣтысқылъюки. Ынка̄м нулӣҳқа̄ аглыӷнаҳлъықуқ, авутңилъықуқлъю. ²⁸Угим пиниқсяҳқақа̄ нулӣни пиниқылъыӷмитун югусини. Уги пиниқилӷӣ нулӣӷминың лъңаның пиниқңӯқ. ²⁹Китум алңунак угумикигата̄ лъми катам югусини. Йыӷлыги ныӷыстақа̄лъю, афлъыңакақа̄лъю, катам таўатын Христосым пӣқылъҳатун ухпықанун, ³⁰қаюҳлъяк налиӷнықуӷӣлъю лъңан югусӣн. ³¹Акузитни Игақыхкани хўатын игақңа̄қ: «Тама̄кын апалъюқлъюку югым унилъықа̄к атанилъю, на̄нилъю илянъалюни нулӣӷминун. Ынка̄м нулиҳқулъҳӣк ата̄сӣҳлъықук». ³²Та̄м Акузитым Игақыхкам қайвиҳта̄ мыгнунапихлъыҳӣ ипапилъық: Христосылъю, ухпықатлъю ата̄сӣгут. ³³Иўырңа та̄на лъпысинунлъю аюқуқ: тамаҳаӷми угим пиниқыпыста̄ӷьяҳқақа̄ нулӣни лъми катам пиниқылӷӣстун. Тамаҳаӷмилъю нулиҳым сӣваксяҳқақа̄ угини.

Таӷнуҳа̄тлъю, Аңаюқатлъю

¹Таӷнуҳаӷни, қа̄ткулъюси аңаюқаҳпысинун Атанӷым писқысюлъҳатун лъпысинун. Таўатын ылъқуӷутңа̄қ. ²Акузитни Игақыхкани хўатын Кияӷнық қылӷика̄гуқ: «Қӯлваӷлюку атанлъю, на̄нлъю». Та̄на қылӷусяқ сивулӣгуқ акықусялык. ³Хўатын Кияӷнық пика̄гуқ: «Кияҳта̄лъҳын итагнаҳлъықуқ, та̄клъюкулъю кияҳлъықутын нунами».

⁴Аңаюқани, сякшитыстыхпынаки таӷнуҳаси. Йыӷлыги аңлистыки пыҳқихсяӷлюкилъю, апыҳтуӷаӷлюкилъю Атанӷым писқылъҳатун.

Қыпҳаҳтыля̄ӷытлъю, Пилӣтистыңитлъю

⁵Қыпҳаҳтыля̄ӷни, алиңылъылиӷлюсилъю, уңылыхлъылиӷлюсилъю қа̄ткитыки пилӣтистыси нунами хўани. Ипапиҳқылъюси қыпҳа̄тақитыки, катам Христос қыпҳа̄тылъыҳпысистун. ⁶Пилӣтистыси қа̄ткитыки қайўа ысҳапанӷитыӷңӣси. Қыпҳаҳтык ыфқуҳналюки пилӣтистыси катам ыфқуҳтылъыҳпысистун Атанық. Илюхпысиның атуқитыху Кияӷныӷым пиюкылъҳа Христосымун қыпҳаҳтыля̄қылӷӣстун. ⁷Ынка̄м қыпҳаҳтык сягиқлъюси Атаныӷмун пилӷӣстун, нака̄н югнун. ⁸Нықамиклъюку Атанӷым акилыҳтуӷьяҳқақӣ югыт қамахлъюки, пинитун пилъҳитнун. Атанық таўатын пилъықуқ қыпҳаҳтыля̄ӷнунлъю, қыпҳаҳтыля̄ӷунӷилңуӷнунлъю.

⁹Пилӣтистыни, пинитун пӣқитыки қыпҳаҳтыля̄си катам уңипа̄тылъымтун лъңит пинитун писқылъюси. Алиңсықухпынаки. Нықамиклъюку лъпысилъю, қыпҳаҳтыля̄силъю ата̄симың Атанылгӯси қилягмылңуӷмың. Лъңан нанқихсяҳқақӣ югыт қамахлъюки танӣлъңунаки.

Ӣңунаӷмылңӯк Акулӷа̄ҳқык Кияӷныӷым

¹⁰Киңулиқ апыӷьяҳқақа унаңӯқ, икнақылъыңитык Атаныӷмың, аҳтуӷьяҳқа̄нӷилъыҳлъяганыңлъю. ¹¹А̄тыкык ӣңуна̄хкынка акулӷа̄ӷык Кияӷныӷым ята̄ҳқыхкакык лъпысинун. Та̄хкын тыңвимун ныкывӷасяҳқа̄ҳлъықаси Туӷныӷа̄м пӯҳтилъҳи. ¹²Нықамиклъюку, пилъюўа̄ңунӷитапут югыт. Итупилъ пилъюўа̄ңўа̄пут иглыӷутилӷӣт, аҳтуӷьяҳқа̄нӷилъылгыт, иглыӷутилӷӣт нунам мамлыганың, сыӷлыӷытлъю туӷныӷа̄т қиляганилңӯт. ¹³Тама̄кын апалъюқлъюку а̄тыкык ӣңуна̄хкынка акулӷа̄ҳқык Кияӷныӷым ята̄ҳқыхкакык лъпысинун! Ынка̄м сыӷлылӣӷым аӷныӷани пилъюўаӷьяқлъыгулъықаси аңуягым сюӷугалъҳи. Та̄хкын пилъюўаныӷмың апыӷӣқуфси, лъпыси паниның ныкывӷаңулъықуси.

¹⁴Ынка̄м ныкывӷамаңинаҳтык. Ипапилъық тафсӣтыху, ылъқуӷутңалъықлъю сякимагӣтӣтыху. ¹⁵Пинилӷӣт Уңипат ныкыхмылъыӷмың аюқылӷӣт, камӣтыки. ¹⁶Тама̄кут ся̄ӷўитхун, атуқитыху ухпықилъық амӣгиӷаҳта̄сӣлюку қа̄мсяҳқа̄люки кумаңалӷӣт а̄йгуңи Туӷныӷа̄м. ¹⁷А̄тыху югулилъық на̄сқуӷӣта̄люку, Таӷныӷамлъю сявихпага, Кияӷныӷым акузитка̄. ¹⁸Ӣўлың юӷаҳтык Таӷныӷам маӷьяҳқӯтылъҳакун. Атуқлъюки алъя̄ҳӣна̄т юӷалъҳыт, а̄пнӣҳтыклъю Кияӷныӷмун. Тама̄кын апалъюқлъюку кылыңалюси, ӣлъқаюхпынаси. Ӣўлың юӷа̄ткылъюки қамахлъюки Кияӷныӷым юги. ¹⁹Хўаңалъю юӷа̄ткитыңъа Кияӷныӷмун акузитылитысқылъюңа. Та̄хкын тытухпынаңа апыҳлъықақа сяңўа̄ Кияӷныӷым сялин лӣгикыстылъҳилъкаңа Пинилӷӣның Уңипаның аюқылӷӣ. ²⁰Кияӷныӷым накмикыхкақа̄ңа акузистыңулюңа лъңанун. Ынка̄м тама̄кын апалъюқлъюку анусимиңлъяӷа̄гуңа қӣпшаӷусиӷлюңа. Юӷаҳтык уңипақиналюңа тытухпынаңа катам Кияӷныӷым пиюкылъҳатун.

Посланиям На̄ңнӣтаңи

^21-22Лӣсимакысюгамси натытулымныңлъю, ся̄қутымныңлъю. Тама̄кын апалъюқлъюку каяхсима̄қа Тихик лъпысинун. Пиниқыхкаҳпут ухпықа̄лгутфут, ата̄сӣӷмылңӯгуқлъю қыпҳаҳтыңа Атанӷым. Ка̄скуми уңипа̄лъықӣси сямың тамаҳа̄ның хўаңамның, кайымылъықӣсилъю.

²³Кияӷныӷмың Атамың, Атаныӷмыңлъю Иисус Христосымың лъпысинун пиңӯк ныкыхмылъықлъю, пиниқылъықлъю ухпықилъылык. ²⁴Наңлъыхталъық тамаҳаҳпысинун пиңӯқ пиниқилӷӣни Атанымнъың Иисус Христосымың пиниқылъылиӷлюку на̄ңьяҳқа̄нӷилңуӷмың.