К Колоссянам

Павелым Посланияңи Ухпықанун Колоссымылңуӷнун

¹Укут посланият Павелымың пиңӯт. Кияӷныӷым пиюкылъҳакун апостолыңуҳтыка̄гуңа Христос Иисусымун. Тимофейемыңлъю пиңӯт ухпықа̄лгутымнъың.

²Кияӷныӷым югитнун пиңӯт Колоссымылңуӷнун, ата̄сӣӷмылңӯт ухпықа̄лгутыт Христосыкун.

Кияӷныӷым Атамта, наңлъыклъисилъю, ныкыхмылъылисилъилъю.

Юӷӣ Игамсиқаюлъҳым

³Ӣўлың игамсиқаюгвикақаҳпут Кияӷнық, Атаңа Атанымта Иисус Христосым, юӷа̄ткынъымси. ⁴Таўатын пӣқукут қаюҳлъяк нагақӯма̄ҳпут ухпықилъыҳси Христос Иисусымың, пиниқилъыҳсилъю тамаҳӣтнун Кияӷныӷым югитнун. ⁵Пинилӷӣт Уңипат уңипапигӯт. Нагақуӷьюхўа̄ӷақңафсики, лӣтка̄гуси сиӷималъыӷмың Кияӷныӷым тӯныхка̄ның лъпысинун. Ынка̄м сиӷмалъыҳпыси ухпықилъылгустақӣсилъю, пиниқилъылгустақӣсилъю. Қилягми Кияӷныӷым кахпагума̄ лъпысинун сяңўа̄ сиӷимакыхкаҳси. ⁶Пинилӷӣт Уңипат қуястимаңина̄гут югнун. Ынка̄м Пинилӷӣт Уңипат миңитңӯт ӣңунаҳа̄нун нунам, катам таўатын қуястилъҳистун лъпысинун нагақуӷьюхўа̄ӷақңафсигу Кияӷныӷым наңлъыхталъҳа. Та̄хкын кынляңа лӣтаҳси Кияӷныӷым наңлъыхталъҳа. ⁷Лӣткақаҳси Кияӷныӷым наңлъыхталъҳа Епафрасымың, пиниқыхкамнъың қыпҳалгутымнъың. Ата̄сӣӷмылъюни қыпҳа̄гуқ Христосымун, қыпҳақақа̄ хўаңкута қыпҳаӷьюхўақаҳпут. ⁸Лъңан уңипа̄симинкутлъю пиниқилъыӷмың Аглыӷналӷӣм Таӷныӷам тӯныхка̄ның лъпысинун.

⁹Аӷныӷмың та̄хкын нагақӯтымнъың тама̄куның, юӷа̄ткынъанӣгатамси. Туңсӣтңўа̄мси Кияӷныӷмун лӣсимакысқылъюку қамахлъюку лъңан пиюкылъҳа. Юӷа̄ткақамсилъю пыҳқинӷусқылъюси, лӣгикысқылъюкилъю сяңўа̄т Аглыӷналӷӣм Таӷныӷам апыҳтӯткӣ. ¹⁰Та̄хкын кияҳсяҳқа̄ҳлъықуси Атанӷым пиюкылъҳатун, ӣўлың атуқақылъықаҳси сяңўа̄ ыфқуӷналӷӣ лъңани. Таўатын кияҳтылъыҳпысини алъя̄ҳӣнақ пинилӷӣ қыпҳаҳлъықаҳси ынка̄м ўата лӣлъықаҳси Кияӷнық. ¹¹Юӷа̄ткақамси Кияӷныӷмун икнақуҳсӣсқылъюси илюхпысигун аҳтуӷьяҳқа̄нӷилъыҳлъягмикун. Таўатын пӣқуқ нуқынъыҳтуҳтыҳлъягысқылъюси ныкыхмылъылиӷлюси сямун тамаҳа̄нун. ¹²Ынка̄м қуямалъылиҳлъяглюси игамсиқаюгвикылъықаҳси Ата. Лъңаңулӷӣ лъпысинун ныңилгутыстикақ сямың тамаҳа̄ның акықусяқыхкаминың тӯнылъықнилюки юни кияҳлъыҳӣт ниӷугми. ¹³Лъңан югуликақӣлъю аҳтуӷьяҳқа̄нӷилъҳаның мамлыгым ынка̄м тагиткақӣлъю Атаныҳпагулъҳанун пиниқыхками Иӷныӷми. ¹⁴Лъңан тукфиқақӣлъю, сыӷывуткақӣлъю сыӷлыҳқылъыпут.

Христос Кияӷныҳтуңўа̄қ Аюқуқ

¹⁵Христос таўатытңўа̄ҳтуқ алӣнъыӷилңуҳтун Кияӷныҳтун. Кияҳтыңъӯқ сивуңани сяңўа̄ алңунак улималъҳилъюку, ынка̄м қулиҳпига̄гуқ улима̄ӷьяхаӷның. ¹⁶Лъңакун Кияӷныӷым улимакақӣ сяңўа̄т қамахлъюки қилягмылңӯтлъю, нунамылңӯтлъю. Улимакақӣ ысҳақаюпут, ысҳӣгалъкыпутлъю, тама̄кутлъю умӣлгыт, атанӷыт, иглыӷутистыт, пилъыҳқалгытлъю. Кияӷныӷым улимакақӣ сяңўа̄т қамахлъюки Христосыкун, Христосымунлъю. ¹⁷Христос таўантыка̄гуқ сивуңитни сяңўа̄т алңунак, аҳтуӷьяҳқа̄нӷилъҳакунлъю сяңўа̄т қамахлъюки лъңан ныкаҳқаҳлъюўа̄ӷитнитыстақӣ. ¹⁸Лъңа на̄сқӯгуқ ухпықанун юӷаӷвигмылңуӷнун, лъңан югусиқӣ. Лъңан югусиқ уңуваңустыңъўа̄. Лъңаңӯқ уңуваӷьюхўа̄қақ туқулъыӷмың, ынка̄м қулиҳпига̄гуқ сямун тамаҳа̄нун. ¹⁹Кияӷныӷым Пиюкылъқақа қамахтыңъўа̄ӷлюни лъми катам кияҳналюни Иӷныӷми илюңани. ²⁰Кияӷныӷым Иӷныӷмикун выӷутыстыкақӣ лъңанун сяңўа̄т қамахлъюки нунамилъю, қилягмилъю. Ынка̄м а̄ўакун Иӷныӷми туқа̄қңан қақӯрами илялӣӷутыстыкақӣ лъңанун.

²¹Ата̄симың пылъыӷңаяҳтуси Кияӷныӷмың. Ынка̄м аңуяксяӷӣси сюмыҳтаӷаткаҳтыкилъю, сыӷлытунлъю пилъыҳпысигун. ²²Иўырңа Кияӷныӷым илялӣӷунъықихтыстӣси лъңанун Иӷныӷми югусӣн туқулъҳакун. Таўатын пика̄гуқ тагинъалюси наю̄тңалъыӷминун аглыӷнаӷлюси, пылюңилъюси, авутңилъюсилъю. ²³Кияӷнық таўатын пилъықуқ нагнықуфси ухпықлъюки Пинилӷӣт Уңипат айгуӷикылъңунаки. Иқитыхпынаси сиӷмалъыӷмың алъхыҳтыкаҳпысиның нагақуӷақңафсики Пинилӷӣт Уңипат. Та̄кут Пинилӷӣт Уңипат уңипақңӯт тамаҳа̄ни нунам. Кияӷныӷым накмикыхкақа̄ңа, хўаңа Павел, қыпҳаҳтыңулюңа лъңанун уңипақысқылъюки Пинилӷӣт Уңипат.

Павелым Қыпҳа̄тилъҳа Ухпықанун Юӷаӷвигнилңуӷнун

²⁴Икфиқылъыӷма югусимкун лъпыси апалъюқлъюси қуястыҳлъяга̄ңа. Таўатын каюсиӷиңӯңа апыӷӣӷналюки Христосым икфиқылъҳи югусиминун. Лъңан югусӣ ухпықа̄гут юӷаӷвигмылңӯт. ²⁵Кияӷныӷым қыпҳаҳтыңлъяқақа̄ңа ухпықанун. Тагивақақа̄ уна қыпҳақақ каюсӣтысқылъюси, лъпысинун лӣгикңўа̄ӷысқылъюки Кияӷныӷым акузитаңи. ²⁶Сивунӷани Кияӷныӷым қайвиҳсимаңита̄ уна ипапилъық тамаҳа̄нун югнун, иўырңа ма̄тын қайвиҳтыңъўа̄ лъми югминун. ²⁷Кияӷныӷӯқ накмӣлӷӣ югминун лӣсимакысқылъюку сяңўа̄ қайвиҳтылъҳилъкынъи сивунӷани. Накмикыхкақа̄ лӣсимакысқылъюку а̄ңылъыҳлъяга ӯм ипапилъҳым акулңитни язычнигыт. Ипапилъық қайвиҳтыка̄ унаңӯқ: Христос кияҳтыңъӯқ илюхпысини. Христосыңӯқ сиӷимавут кияҳтысқылъюта Кияӷныӷми лъңан ниӷуҳқылъҳани. ²⁸Ынка̄м уңипақңўа̄ҳпут Христос тамаҳа̄нун. Қамахлъюку пыҳқинылъыҳқун, кылыңася̄ӷақапутлъю, апыҳтуӷақапутлъю қамахлъюки югыт. Таўатын пӣқукут тагинъалюки ата̄сикаҳтӣта югыт Кияӷныӷым наю̄тңалъҳанун аңтанӣтка̄люки Христосыкун. ²⁹Та̄на пиналюку та̄куңинаҳа̄гның уӷлыӷӣҳтуңа атуқлъюку Христосым аҳтуӷьяҳқа̄нӷилъҳа қыпҳалӷӣ икнақыпихлъюни илюмнъи.

¹Уңипа̄таҳлъямси та̄куңинаҳа̄гның қыпҳа̄тилъымның лъпысинун, ухпықанунлъю Лаодикиямылңуӷнун, тамаҳа̄нунлъю ысҳа̄сигалңуӷның хўаңамның. ²Таўатын пӣқуңа илюңит илютуҳтысқылъюки, ата̄сӣҳтысқылъюкилъю пиниқылъыҳқун. Ынка̄м лӣгикңўа̄ҳлъықа̄т сяңўа̄ Кияӷныӷым қайвиҳсимаңилъкаңа сивунӷани. Та̄на Кияӷныӷым қайвиҳтыка̄ Христосыңӯқ. ³Қамахлъюки Кияӷныӷым пыҳқинылъҳилъю, лӣгикиңалъҳилъю Христосымытут. Та̄кук аклъюңистун аюқук ӣӷңалӷӣк Христосыми.

⁴Уңипа̄тамси, китумун алңунак пӯҳтыстыхпынаси тымңиның апыҳтуӷалъҳитның, қайўа ипасюгнитыӷңа̄та. ⁵Қайўа уявансяӷңа̄ӷма лъпысиның, умьюгамкун лъпысинитақуңа. Қуя̄ңа қаюҳлъяк кияҳлъыҳӣси Кияӷныӷым писқылъҳатун, ухпықилъыҳсилъю Христосыкун аӷулӣлңуқ.

Нагныӷутыху Кияҳта̄лъыҳси Христосыкун

⁶Тугуклъилъыҳпысистун Христос Иисус Атанӷулюку, таўатыҳпигақ ухпықилъыҳқун кияҳтык лъңакун. ⁷Лъңакун акулгутык асиванун сямавык, лъңакун ныкыфтыки кияҳта̄лъыси ынка̄м икнақуҳтык ухпықилъыҳпысигун апыҳтулъыҳпысистун. Иқамсиқаюгумаңинаҳтык.

⁸Кылыңалюси! Китумун алңунак аӷуляқутыстыхпынаси тымңитхўатхун апыҳтуӷалъҳитхун. Тама̄кут апыҳтуӷалъҳыт югыт сюмыҳтаӷалъҳитның пиңӯт, туӷныӷаӷныңлъю пиңӯт, иглыӷутилӷӣт хўани нунами. Христосымың пиңунӷитут, ⁹қаюҳлъяк қамахтыңъўа̄ӷлюни Кияӷнық кияҳтыңъӯқ Христосым югусӣн. ¹⁰Христос на̄сқӯгуқ иглыӷутистынунлъю, пилъыҳқалыгнунлъю. Илятыслъюси Христосымун Кияӷныӷым тӯныхкақисӣ уңувалъыпигмың.

¹¹Илятңалъыҳпысигун Христосымун обрезанияка̄гуси. Обрезаниялъыҳси югыт пистылъҳита̄т, иўырңа Христосым пистыкақа̄. Ынка̄м итымуткақӣси аҳтуӷьяҳқа̄нӷилъҳаның югусиҳпыси сыӷлыҳқыңъалӷӣт пиюкылъҳитның. ¹²Крестиӷақңафси қуңӯтка̄гуси Христосыкун. Та̄хкын макытка̄гуси уңувалъыӷмун Христосыкун қаюҳлъяк ухпықыхкыси Кияӷныӷым аҳтуӷьяҳқа̄нӷилъҳа. Кияӷныӷым макыткақа̄ Христос туқумың. ¹³Туқука̄гуси қаюҳлъяк сыӷлыҳқыстыңуялӷӣси, қаюҳлъяклъю обрезаниялъҳилңӯси югусиҳпысигун. Иўырңа Кияӷныӷым уңуваҳтыстыкақӣси Христосыкун қаюҳлъяк сыӷывуткақӣ қамахлъюки сыӷлыҳқылъыпут. ¹⁴Қа̄ткынӷитақңамтыки Кияӷныӷым Лӣлиҳтӯсӣ сыӷлыҳқылъҳыт пикапут игақыхка̄гут. Кияӷныӷым иқиткақӣ игақуқат сыӷлыҳқылъыпут туқуқа̄лъюки Христосым қақӯра̄нун. ¹⁵Кияӷныӷым ўаяҳтықақӣ гӯтутаңит иглыӷутилӷӣтлъю, аҳтуӷьяҳқа̄нӷилъылгытлъю туӷныӷа̄т. Таўатын тамаңанун ысҳаҳтыстыка̄ кая̄лъқӣлъыни тама̄куның туӷныӷаӷның.

¹⁶Китумун алңунак нанқихтыстыхпынаси ныӷылъыӷмыңлъю, мыӷылъыӷмыңлъю, нықынӷаҳқылъҳыт аӷныӷитның, нутаӷат танқит аӷныӷитның, налиӷмың Субботат аӷныӷитның. ¹⁷Та̄кут таӷныӷаңулъҳӣстун аюқут та̄кунун пияҳқанун ага сивумылңуӷнун. Иўырңа тама̄кут ипапигыт Христосымытут. ¹⁸Иляңи югым қусывыгңасюгниҳқысюныҳтӯт, манигуӷақӣтлъю яқулгыт. Ӣўлың акузиткақӣт ысҳаӷўа̄лъытың ысҳақатың. Лъңитнун уңипа̄тыстыхпынаси анахутңанилюси. Лъңит ыслъықңа̄т тымңитхўамың қука̄юхлъыӷмың қаюҳлъяк сюмыӷныӷит югым сюмыӷнықӣ. ¹⁹Лъңит илянъаниҳтут Христосымун на̄сқӯлыгмың югусимун. Иглыӷутңўа̄ ӣңуна̄н югусиқ, икнақуҳсяӷақа̄лъю ныҳқақлъюку. Қырңаӷмытыстақа̄ югусиқ атуқыслъюки нафлъӣлъю, ивалюңилъю. Ынка̄м югусиқ нагуңӯқ Кияӷныӷым нагустысқысюлъҳатун.

Туқулӷӣтлъю, Уңувалӷӣтлъю Христосыми

²⁰Христос туқа̄қңан туқулгусиқалъҳӯқақаҳси. Ынка̄м итымутка̄гуси туӷныӷаӷның иглыӷутилӷӣның хўани нунами. Сяңанңам кияҳтақыстык нунамун пикыпихлъыҳӣстун? Сяңан қа̄ткақыстыки лӣлиҳтуӷалъҳит хўатылңӯт: ²¹«Сяфлъыхпына̄н, На̄сӣҳпына̄н, Ся̄фтыхпына̄н?» ²²Та̄кут лӣлиҳтуӷалъҳыт югыт ныӷыхкӣтныңлъю мыӷыхкӣтныңлъю аюқут. Ынка̄м ныӷыхкӣтлъю, мыӷыхкӣтлъю атуқсяҳқа̄наниӷақут. Тама̄кут лӣлиҳтуӷалъҳыт та̄ўаңинаҳақ югыт лӣлиҳтуӷалъқӣтлъю, апыҳтӯсяқӣтлъю. ²³Тама̄кут лӣлиҳтуӷалъҳыт апыҳтуӷӣт югыт пыҳқинысиӷўа̄ӷысқылъюки. Апыҳтуӷӣтлъю амью̄ткысқылъюки югусӣт, атуқнанӣсқылъюки югусӣта пиюкылъҳит. Иўырңа таўатын пилъҳита аӷулӣҳсигатӣт атуқнанилъыҳқамың тама̄кут сыӷлыҳқылъҳыт. Тама̄кут лӣлиҳтуӷалъҳыт ипасюгнитут иўырңа тымңиңӯт апыҳтӯсят.

¹Уңуваҳтыка̄тыхпысиның малигулъюси Христосымун, пиюкақитыки сяңўа̄т Кияӷныӷым лъпысинун пикысқылъюки қилягмылңӯт. Таўани Христос ақумга̄қ аӷынқигныӷакун Кияӷныӷым. ²Сю̄мқақитыки тама̄кут қилягмылңӯт, нака̄н тама̄кут нунамылңӯт. ³Таўатын сюмыҳтаӷаӷақитык қаюҳлъяк туқука̄гуси. Уңувалъыҳси ӣӷңа̄қ Христосыми Кияӷныҳқун. ⁴Христос уңувалъқаҳпут. Алӣқан, лъпысилъю алӣлгусиҳлъықаҳси ниӷуҳқылъҳани.

Кияҳта̄лъылюклъю, Кияҳта̄лъыӷра̄ӷақлъю

⁵Та̄қитыки атуқныӷмың югусиҳпыси сыӷлыӷыт пиюкылъҳит, катам алъянӣқ, укмаңинъыӷилңуқ кияҳта̄лъық, атуқсюлъҳа сыӷлыӷым, пакигнӣқлъю. Пакигнӣқ манигӯлъҳӣстун кияӷныңлъяқанун аюқуқ. ⁶Тама̄кут апалъюқлъюки Кияӷныӷым сякша̄лъыҳлъяга тагиңӯқ қа̄ткусигалңуӷнун лъңанун. ⁷Сивунӷани таўатын кияҳтыңъуяҳтуси.

⁸Иўырңа ма̄тын атуқнаниҳтыки қамахлъюки укут: сякша̄, сякша̄ҳлъяк, угумикыра̄қ, сыӷлықӯқ, сыӷлыӷмыңлъю акузиткилъық. ⁹Иқлъыңиқутыхпынаси қаюҳлъяк та̄қума̄ҳси кияҳта̄лъылюхси, айӷӣткақсяқысилъю. ¹⁰Ынка̄м кияҳта̄лъыӷраӷақ атуқа̄ҳсима̄ҳси. Нутаҳтыңъӯси, Улимаӷистыхпысистунлъю лъӣӷӯси. Тама̄кын апалъюқуку лӣгикыкыстаӷаҳси Кияӷнық кинаҳпига̄таңа. ¹¹Кияҳта̄лъыӷраӷаӷми, алъяңуӷутңитут акулңитни язычнигытлъю, Иудеитлъю, акулңитни обрезаниякатлъю, обрезаниялъҳилңӯтлъю, акулңитни варварытлъю, Скифатлъю, акулңитнилъю, қыпҳаҳтыля̄ӷытлъю, қыпҳаҳтыля̄ӷунӷилңӯтлъю. Иўырңа Христос қулиҳпига̄гуқ, кияҳтыңъӯқлъю тамаҳамнъи ухпықани.

¹²Кияӷныӷым юкӣси аглыӷналӷӣт, пиниқыпихтӣсилъю. Накмикыхкақӣси. Ынка̄м наңлъыхтаӷлюси, наңлъыкилюси, қусывыхлъюси, якуқлъюси, нуқынъыҳтулюсилъю. ¹³Сякшитутыхпынаси иўырңа сыӷывутулъюси. Килъю анахтыкаңиси сыӷывунъакыси катам Атанӷым сыӷывутылъҳистун лъпыси. ¹⁴Қамахлъютың тама̄кут мыгнунаҳтут иўырңа пиниқылъық мыгнуналъыҳпига̄гуқ. Пиниқутылъҳым ата̄сӣҳтыңъўа̄ӷӣлъю. ¹⁵Тамаҳаҳпыси налиӷнықӣси Христосым югусӣн, ынка̄м накмикыхка̄гуси кияҳтысқылъюси қырңаҳпыси ныкыхмылъыҳқун. Та̄на апалъюқлъюку Христосым ныкыхмылъҳан иглыӷулъики илюси. Иқамсиқаюгңатыклъю. ¹⁶Йықай Христосым апыҳтӯсӣ кымнаӷлютың кияҳлъит илюхпысини. Апыҳтӯтутақлъюси, кылыңася̄ӷутутақлъюсилъю тамаҳа̄кун пыҳқинылъыҳқун. Илягаҳтык Кияӷныӷмун игамсиқаюлъылиӷлюси илюхпысигун, илягаҳтык псалмының, иляга̄тның, манигӯтмунлъю иляга̄тның. ¹⁷Ынка̄м сяңўа̄ пикаҳси, акузиткун налиӷмың қыпҳалъыҳқун қамахлъюку пӣқитыху а̄тҳакун Атанӷым Иисусым. Лъңакун игамсиқаюгвикитыху Кияӷнық Ата.

Натын Ныңлъюгутыт Кияҳтылъыҳқа̄т

¹⁸Нулӣӷни, малиҳқутақлъюси угихпысинун қаюҳлъяк таўатын Атанӷым писқысюўӣси.

¹⁹Угини, пиниқлъюки нулӣси, якуқлъюки пӣқитыки.

²⁰Таӷнуҳаӷни, қа̄ткылъюки аңаюқаси сялъыҳқун тамаҳа̄кун, қаюҳлъяк таўатын пилъҳым ыфқуҳтақа̄ Атанық.

²¹Атани, сякша̄сяӷаҳпынаки таӷнуҳаси лю̄рақ ӣлъқынъаюката.

²²Қыпҳаҳтыля̄ӷни, ӣўлың қа̄ткылъюки пилӣтистыси. Ӣўлыңлъю ыфқуҳнақлъюки ысҳапагуӷңа̄та налиӷмың ысҳапагунӷитыӷңа̄та. Қыпҳа̄тыки ипапиҳқылъюси қаюҳлъяк таўатын қӯлва̄ңўа̄ҳси Атанық. ²³Сялъыҳпысини тамаҳа̄ни қыпҳаӷақитык пинақылъҳаҳси қамахтӣлюку қыпҳа̄тыпихлъыҳӣстун Атанық, нака̄н югнун. ²⁴Нықамиклъюку Атанӷӯқ Христос қыпҳа̄ткаҳси. Алъхыҳлъықаҳси акилыҳтӯсяҳси лъңаның. Акилыҳтӯсяқ акықусяқыхкақа̄ тӯнылъықнилюку югминун. ²⁵Иўырңа кина алңунак сыӷлытун писта налъяңиӷьяҳқа̄гуқ сыӷлытун пилъҳанун қаюҳлъяк Кияӷныӷым нанқихсяҳқақа̄ тамаҳа̄н ю̄к таўатыҳлъюўа̄қ.

¹Қыпҳаҳтыля̄ӷыт пилӣтистыңитни, пинитуңўа̄қлъю, атуныңўа̄қлъю пӣқитыки қыпҳаҳтыля̄си, лӣсимаклъюку лъпысилъю Пилӣтистылгӯси қилягми. ²Юӷа̄маңинаҳтык, ӣлъқаюхпынасилъю юӷаӷақитык игамсиқаюгвикума̄н Кияӷнық. ³Юӷақуфси, юӷа̄ткынъакыфсикутлъю. Юӷаҳтык Кияӷныӷмун қылъпыӷутысқылъюта амигмың миңитысқылъюки акузитаңи Христосымың аюқылӷӣт. Сивунӷани Кияӷныӷым қайвиҳсимаңита̄ ипапилъық Христосымың аюқылӷӣ. Иўырңа Кияӷныӷым уңипа̄та̄ңа уңипақысқылъюку та̄на қайвиҳсимаңилңуқ ипапилъық. Уңипақыхкақутымның та̄на ипапилъық анусимиңлъяӷа̄тңа. ⁴Ынка̄м юӷа̄ткитыңъа уна уңипақ уңипақсяҳқа̄люку хўатыҳлъюўа̄қ катам Кияӷныӷым хўаңамнун писқылъҳатун.

⁵Пыҳқинӷўа̄қитык ухпықа̄нӷилңуӷнинъыҳпысини. Атуқақитыху тамаҳа̄н пилъыҳқаҳси уңипа̄сяҳқа̄люки Христосымың. ⁶Алыҳқуныҳпысики ӣўлың наңлъыхтаӷлюси, акузӣқлъюси итагнаӷьюгнаӷлюси, нагасюгнаӷлюсилъю. Таўатын пӣқитык лӣсимакысқылъюси натын кӣмсилъыҳқӣт а̄пқуӷа̄лъҳит.

Павелым А̄пқаңи Югыт Лъминилңӯт

⁷Тихик ухпықа̄лгуткақа, пиниқыпихтыкақа. Қыпҳалгуткақа, қыпҳа̄тақа̄лъю Атанық хўаңамнун малигулъюни. ⁸Каяхтақа лъпысинун, лӣсимакысқылъюку натытулвут ынка̄м кайымылъыңысқылъюси. Уңипа̄нъа̄ӷӣси хўаңамның. ⁹Каяхтақалъю Онисим лъпысинун. Пиниқыхка̄гуқ ата̄сӣӷмылңуқ ухпықа̄лгун, лъпысиның пиңӯқ. Тихикылъю уңипа̄лъықӣси сямың тамаҳа̄ның сялъыӷның ма̄ни.

¹⁰Аристархым анусимиңлъяӷалгутма, Маркымлъю аталгутаңан Варнавам сю̄мқақӣсиңуқ. (Уңипа̄ткақамси посланиятхун Маркымың, ка̄симакан лъпысинун упуӷатысқылъюку.) ¹¹Иисусымлъю, алъя атылгым Иустымың сю̄мқақӣсиңуқ. Та̄куңина̄гут Иудеит ухпықат, қыпҳалгусиӷақа̄тңа Атаныҳпагулъҳанун Кияӷныӷым. Илютуқутканка ынңа̄талъ.

¹²Епафрас, қыпҳаҳтыңа Христос Иисусым, лъпысиның пиңӯқ, лъңанлъю сю̄мқақӣсиңуқ. Ӣўлың та̄куңинаҳа̄гның юӷа̄ткақӣси аңтанӣтысқылъюси, лӣсимакңъўа̄ӷысқылъюку сяңўа̄ Кияӷныӷым писқысюлъҳа лъпысинун, лъпысинунлъю қамахтыңъўа̄ӷлюку пиюкылъҳа пикысқылъюку. ¹³Уңипа̄сюгамси Епафрас қыпҳаҳлъяка̄гуқ каюсӣнъалюси, каюсӣнъалюкилъю Лаодикияӷмӣтлъю, Иераполыӷмӣтлъю. ¹⁴Лукамлъю пиниқыпихтыкамта аӷалиҳтым, Димасымлъю сю̄мқақӣсиңуқ.

¹⁵Ухпықа̄лгутнун Лаодикиямылңуӷнун, Нимфанымунлъю, ухпықа̄лгутнунлъю қырңуӷуткаюгнун манигӯнъалютың мыңтыӷа̄ни, уңипа̄нъакыси сю̄мқақанкаңуқ. ¹⁶Атиҳтуӷнакыси укут посланият ухпықанун қырңуӷуткаюгнун юӷаӷвигани Колоссым. Ўатаҳлъяклъю атиҳтуӷнакыси укут посланият Лаодикияӷмӣт ухпықӣтнун. Атиҳтуӷнакысилъю посланият Лаодикияӷмӣт ухпықӣта туюӷьяҳқӣт лъпысинун. ¹⁷Архипп Уңипа̄таҳнакыси хўатын: «Ўатаҳлъяк апыӷӣӷнакын қыпҳақақ Атанӷым қылӷутка̄ лъпынун».

¹⁸Хўаңа, Павел, хўаңа катам ӣхымның уна игақақа. Нықамиклъюңа анусимиңлъяӷа̄гуңа, қӣпшаӷусиӷлюңа аюқуңа. Қамахлъюси сю̄мқақамси.

Кияӷнық наңлъыхтаӷли лъпысини.