2е Тимофею

Павелым Тӯңлӣт Посланияңи Тимофейемун

¹Укут посланият Павелымың пиңӯт апостолаңаның Христос Иисусым Кияӷныӷым пиюкылъҳакун. Каяхтыкақа̄ңа а̄пҳысқылъюку акықусяқыхкақ уңувалъық Христос Иисусымылңуқ.

²Тимофейемун пиниқыпихтыкамнун иӷнымнун. Кияӷныӷым Атам, Христос Иисусымлъю Атанымта қуяслъитын, наңлъыклъитын, ныкыхмылъылгуслъитынлъю.

Иқамсиқаюлъықлъю, Кайымылъықлъю

³Унухтӯма̄н, аӷныҳтӯма̄н юӷалъымкун игамсиқаюгвикақақа Кияӷнық лъпынун. Қыпҳа̄тақақа сыӷлыӷьюлъңунаңа, катам сивунымтун. ⁴Ысҳаӷьюпихтақамкын алъямың, қаюҳлъяк нықамикақа пылъҳутутақңамтуң қияка̄лӷӣтын. Ынка̄м қуяҳлъяхлъықуңа қырңуӷунъықихтыкумтуң. ⁵Нықамикақа ухпықилъыпӣгын. Та̄наңӯқ ата̄сиқ ухпықилъық ныңьюҳпык Лоидам, на̄хпыклъю Евникам атуқыхкаңак. Лӣсимакңўа̄ӷақа лъпыклъю атуқңўа̄н. ⁶Тама̄кын апалъюқлъюку нықаңуҳсюгамкын, атуқумаңинаҳу тунусян Кияӷныӷмың, тӯныхкақа̄ ӣхтиӷақңамкын. ⁷Кияӷныӷым таӷныӷалитылъҳитӣлъю алиңьюгналӷӣмың. Итупилъ Таӷныӷахкынка имиқақӣлъю аҳтуӷьяҳқа̄нӷилъыӷмың, пиниқылъыӷмың, нуқытылъыӷмыңлъю.

⁸Кайңукыхпына̄н уңипақигу Атаныҳпут, талўа кайңуягутыхпынаңа анусимиңлъяӷа̄гуңа Христос апалъюқлъюку. Итупилъ аҳтуӷьяҳқа̄нӷилъҳакун Кияӷныӷым икфиқылгусиӷңа Пинилӷӣт Уңипат апалъюқлъюки. ⁹Кияӷныӷым югуликақӣлъю, накмикыхкақӣлъю пылюңитысқылъюта. Таўатын пика̄гуқ апалъюқлъюки лъми катам успықылъынилъю, пиниқилъынилъю, нака̄н қыпҳалъыҳпут апалъюқлъюку. Пиниқыхкақӣлъю Христос Иисусыкун сивутҳулъюку пӣнлилъыҳқа̄н нунам. ¹⁰Иўырңа хўа̄ пиниқылъыни лӣтыста̄ хўаңкунъун тагилъҳакун Югулиӷистымта Христос Иисусым. Христосым на̄фқыхкақа̄ туқулъық, та̄хкын Пинилӷӣтхун Уңипатхун лӣтыстӣлъю туқуңигалңуӷмың уңувалъыӷмың.

¹¹Пинилӷӣт Уңипат апалъюқлъюки Кияӷныӷым накмикыхкақа̄ңа уңипақистыңулюңа, апостолыңулюңа, апыҳтуӷистыңулюңалъю. ¹²Та̄кут апалъюқлъюки икфиқңӯңа. Иўырңа кайңуюнӷитуңа қаюҳлъяк лӣсимакақа кинаңутаңа ухпықыхкақа̄. Лӣсимакңўа̄ӷақа лъңан кылыңаксяқлъыгўа̄ сяңўа̄ ныӷьюкуткақа лъңанун кынляңа киңулиӷмун Аӷныӷмун. ¹³Малихтики апыҳтӯсяпигыт нагақуқаҳтын хўаңамның. Успута̄гут атуҳқақатын. Апыҳтӯсяқики ухпықилъыҳқунлъю, пиниқылъыҳқунлъю алъхыҳтыкақатын Христос Иисусымың. ¹⁴Кылыңакигу ипапилъық ныӷьюкуткақ лъпынун. Кылыңакигу каюткылъюкык Аглыӷналӷӣк Таӷныӷак кияҳлъыҳӣк илюмнъи.

¹⁵Лӣсимакан қамахтывзиӷлютың ухпықат Асиямылңӯт каюсиӷьюгнанӣма̄тңа, талўа Фигеллымлъю, Ермогенымлъю. ¹⁶Юӷа̄ткыңъўа̄нка Атаныӷмун наңлъыгьягутысқылъюки Онисифорым ныңлъюгутаңи, қаюҳлъяк угляӷңа̄н илютуҳсяӷақа̄ңа. Кайңуягусимаңита̄лъю анусимиңлъяӷа̄малъқа. ¹⁷Ка̄тақңами Римымун иванӷӣӷуткақа̄ңа кынляңа на̄лъкылъыӷминун. ¹⁸Атаныӷмун юӷа̄ткақақа Онисифор наңлъыгьягутысқылъюку таўани Аӷныӷми! Лӣсимакан каюткыҳлъякақақа Ефесыми.

Ата̄сӣӷмытылъық Христос Иисусымун

¹Ынка̄ңам лъпык иӷнымни, икнақи атуқылъыҳпыгун пиниқылъҳа Христос Иисусым. ²Лъпыклъю таўантыкалӷитын нагаткақаси апыҳтӯсянка. Ынка̄м апыҳтӯсянка ныӷьюкутики ата̄сӣӷмылңуӷнун. Та̄хкын лъңита апыҳтӯсяқлъыгулъықӣт илямыхнун.

³Икфиқылгусиҳқут пинилӷӣтун пилъюўаҳтыңатун Христос Иисусым. ⁴Пилъюўаҳтым илятңалӷӣм пилъюўаҳтынун ыфқуҳсюгақа̄ умӣлыни, ынка̄м акумҳӯсигатуқ пилъюўаҳтыңунӷилңӯт кияҳта̄лъҳитнун. ⁵Кая̄лъқӣра̄ҳта килга̄қумун малиҳқутақынӷилъкуми лӣлиҳтӯсямыхнун, алъхыӷунъа̄нӷитуқ қаҳпаңаның кая̄лъқӣстым. ⁶Уӷлыӷӣҳлъякақ пӣтысиӷаҳта ныңиӷьюхўа̄ӷьяҳқа̄гуқ унатақата. ⁷Сюмыҳта̄ӷа̄ткики сямың пилъҳынка қаюҳлъяк Атанӷым лӣгиксягутыслъықа̄тын сямың тамаҳа̄ның.

⁸Нықамиклъюку Кияӷныӷым уңуваҳтыстыкақа̄ Иисус Христос туқулъыӷмың, киңунқа̄ Давидым. Тама̄куңӯт уңипақақыхкынка апынымки Пинилӷӣт Уңипат. ⁹Икфиқңӯңа қаюҳлъяк уңипақыхкынка Пинилӷӣт Уңипат. Талўа қӣпшаӷусиӷлюңа аюқуңа лӣлиҳтӯсямың на̄фқӣстытун. Иўырңа акузитаңи Кияӷныӷым қӣпшаӷутңитут. ¹⁰Ынка̄м икфиқусиқсюглюку аюқақа сяңўа̄ тамаҳа̄н Кияӷныӷым накмикыхкӣ югулилъыңысқылъюки Христос Иисусыкун. Югулилъыӷмыхтыхун ниӷуҳқылъыңылъықут кынлыңилңуӷмың.

¹¹Ма̄кут пилъҳыт ипаңӯт:

«Туқулгусӣмакумтыху, кияҳтылгусиҳлъықаҳпут.

¹²Ӣлъқаюнӷилъкумта, иглыӷутилгусиҳлъықаҳпут.

Налъюнқыхкумтыху, лъңанлъю налъюнқылъықӣлъю.

¹³Ата̄сӣӷмынъыӷилъкумта, лъңа ата̄сӣӷмытақуқ қаюҳлъяк та̄қна̄нӷитуқ ата̄сӣӷмынъыӷмың».

Итагнақыхкақ Қыпҳаҳта

¹⁴Китумун алңунак пуйгустыхпынаки тама̄кут. Кияӷныӷым нагасиманӷани, кылыңася̄ҳқи қаниқутуткыфқӣта акузитыт писқылъюки. Қаниқутылъҳат каютңуна̄нӷитуқ, на̄фқыңъинаҳлъықа̄т ухпықилъҳат нагалъҳӣт. ¹⁵Та̄куңинаҳа̄гның қыпҳа̄ Кияӷныӷмун итагнақысқылъютын. Қыпҳаҳтыңу кайңукиңигалңуқ қыпҳақаминың. Ылъқуӷаҳлъюкулъю апыҳтӯсяқигу Кияӷныӷым уңипаҳпига̄. ¹⁶Иқитңалютын тымңитхўаның, сямың писӣнӷилңуӷның алыҳқӯтылъыӷның. Таўатылңӯт алыҳқӯтылъҳыт уява̄таӷаҳлъықӣт югыт Кияӷныӷмың. ¹⁷Таўатылңӯт тымңитхўат апыҳтӯсят ақниӷныӷыстун аюқут миңиткаюгыт ма̄мьяҳқа̄нӷилңӯт. Именейемлъю, Филитылъю апыҳтуӷилъҳик таўатылңӯгут. ¹⁸Пыхтыкақӣк апыҳтӯсяпигыт қаюҳлъяк пӣқук сӣңынлъю туқукат уңуваҳтысиманилюки. Ынка̄м иляңитнун ухпықнаниҳтыстыкақа̄к ипапилъық. ¹⁹Иўырңа аюгилңуқ тунымақ Кияӷныӷым ныкыхтыка̄ қапшахтыпагниңитуқ. Та̄хун тунымакун игақңа̄т акузитыт:

«Атанӷым лӣсимакӣ лъми пини».

Хўатынлъю игақңа̄қ:

«Кина алңунак туқлъюӷилӷӣ а̄тҳаның Атаныӷым, сыӷлытун пиныӷмың та̄қлъи».

²⁰Мыңтыӷаҳлъягми алъя̄ҳӣнаӷмың сялӷутаҳтӯқ: иляңи улима̄ӷӯт золотамың, серебромың, унаҳсимың, қикумыңлъю. Иляңи сялӷутат мыгнуналӷӣнун атӯгут, иляңи сямун алңунак. ²¹Кина алңунак лъминың катам пылюңиҳсяқуми сыӷлыӷмың, сялӷутаҳтун атуҳқа̄ҳлъықуқ мыгнуналӷӣмун. А̄фтыка̄ҳлъықуқ атӯлюни мыңтыӷам юганун. Та̄хкын атуҳқа̄ҳлъықуқ алңунак пинилӷӣмун қыпҳақамун. ²²Иқитңалютын сямың сыӷлыӷмың аңлинҳат атуқсюгақыхкаңитның. Қӯнпың атуқақигу ылъқуӷутңалъық. Ата̄сӣӷмылъютын, пиниқиңалютын, ныкыхмылъютынлъю. Тама̄кут атуқики, малигулъютың туқлъюӷилӷӣнун Атаныӷмун қамакын пылюңилңуӷмың илюмыхның. ²³Иқитңалютын тымңитхўаның алыҳқӯтылъҳитның югыт акузиткилӷӣның лӣгикумаңилъкымыхның. Лӣсимакатын а̄ҳтӣра̄ӷутыстикаюгӯт. ²⁴Атанӷым қыпҳаҳтыңа а̄ҳтӣра̄ҳтыңунӷитуқ. Итупилъ наңлъыхтаӷьяҳқа̄гуқ тамаңанун. Пинилӷӣңуяҳқа̄гуқ апыҳтуӷиста. Нуқынъыҳтуяҳқа̄гуқ. ²⁵Атанӷым қыпҳаҳтыңа кавьюгисяҳқа̄гуқ апыҳтуӷикуми кипулъхина̄лӷӣнун. Ўалъю̄млъю Кияӷныӷым авутыҳқыстақлъики ухпықысқылъюку ипапилъық. ²⁶Ынка̄м лӣся̄ӷаӷьяқумың анагнаяӷа̄т Туӷныӷа̄м ныгаӷа̄. Туӷныӷа̄м на̄псиманыӷминики а̄ҳқутақақӣ.

Киңулӣт Аӷныӷыт

¹Лӣсимакысюгамкын киңулиӷни аӷныӷни сыӷлылӣҳлъягуяҳқа̄гуқ. ²Югыт лъмыхның пиниқылъықут, маниюныҳтулъықут, ямшатулъықут, а̄ңа̄юхлъықутлъю. Сыӷлықӯҳлъықӣт илятың, қа̄ткынъа̄нӷитӣт аңаюқатың, игамсиқаюгна̄нӷитут, ўа̄кнаниҳлъықа̄тлъю Кияӷнық. ³Пиниқина̄нӷитут, сыӷывутина̄нӷитут, иқлъыңиқуткилъықут, сю̄хлъюгулъықут, амьюқытиқылъықут, угумикылъықа̄тлъю сяңўа̄ алңунак пинилӷӣ. ⁴Увыҳпагулъықӣт илятың, наңьӣӷулъықут, қука̄юхтыҳлъяхлъықут, тыӷигниқылъық пиниқатаӷаҳлъықа̄т пакихулъюку Кияӷныӷмың. ⁵Қа̄ймыхтыхун ухпықа̄юхлъықут, иўырңа кияҳта̄лъҳита апыҳлъықа̄т аваңитулңи Кияӷныӷым аҳтуӷьяҳқа̄нӷилъҳаның. Иқитңалютын таўатылңуӷның югның. ⁶Иляңи тама̄кут нынун ӣтҳа̄таҳлъықут а̄ҳқутақыпигыснаӷналюки налъыкаӷнилңӯт аӷнат. Тама̄кут аӷнат сыӷлыҳқылъҳита уқихтуқусиҳлъяхлъықӣ, сыӷлыӷымлъю пиюкылъылӷутңита а̄ҳқутақылъықӣ. ⁷Тама̄кут аӷнат нагалъықут апыҳтуӷилъҳанун китум алңунак, та̄ўаңинақ лӣнъа̄нӷита̄т ипапилъық. ⁸Тама̄кут апыҳтуӷилӷӣт лъңитнун кипулъхина̄ҳлъықа̄т ипапилъық, катам Ианнийым Иамврийым кипулъхина̄лъҳыхкытун Моисей. Умьюгаҳлъю̄хлъықут, ухпықилъҳатлъю ипаңунӷилъықуқ. ⁹Иўырңа таўатын пилъҳат мулюна̄нӷитуқ. Тымңитхўалъҳат алӣлъықуқ тамаңанун, катам Ианнийым, Иамврийым тымңитхўалъҳак алӣтңалъҳатун.

Павелым Киңулӣт Апыҳтӯсӣ

¹⁰Иўырңа лъпык лӣсимакңўа̄ӷатын апыҳтуӷилъҳынка, кияҳта̄лъқа, апалъя̄лъю кияҳтылъыӷма. Лӣсимаканлъю ухпықилъқа, ӣлъқаюнӷитылъқа, пиниқилъқа, аӷулӣлъка̄малъқа. ¹¹Лӣсимакан амьюқыта̄ткысилъқа, икфиқылъқалъю. Лӣсимакан таўатын пикақа̄тңа Антиохиями, Икониями, Листрамилъю. Угляӷңа̄н амьюқыта̄ткылъыңыхка̄гуңа, таўалъӣма Атанӷым югуликақа̄ңа тамаҳӣтның. ¹²Тамаҳаӷми амьюқыта̄ткылъыңылъықуқ кияҳсюлӷӣ Кияӷныӷым пиюкылъҳатун Христос Иисусыкун. ¹³Сыӷлыӷыт югыт, пӯҳтистытлъю, сыӷлыӷуҳтаӷаҳлъықут. Пӯҳқуҳлъықут, лъңитлъю пӯҳтылъыңылъықут. ¹⁴Иўырңа лъпык атуқумаңинаҳқи апыҳтӯсят лӣткаҳтын, ухпықыпӣкаҳтын. Лӣсимакатын ипаңутаңи, қаюҳлъяк лӣсимакатын кинкуңутаңи апыҳтуӷистыкыхкаҳтын. ¹⁵Има таӷнуҳа̄тыхпының лӣсимакыхкақатын аглыӷналӷӣт Акузитыт Игақыхкат. Акузитыт Игақыхкат апыҳтуӷьяқлъыгўа̄тын югулилъыҳқамың ухпықилъыҳпыгун Христос Иисусыкун. ¹⁶Қамахлъютың Акузитыт Игақыхкат Кияӷныӷым аныӷзӣлъқӣ. Ынка̄м апыҳтуӷисиҳқа̄гут, аӷью̄ӷусиҳқа̄гут, налъҳуся̄сиҳқа̄гут анахутылъыӷмун, апыҳтуӷисиҳқа̄гутлъю пинитун кияҳта̄лъыҳқамун. ¹⁷Ынка̄м атуқлъюки Акузитыт Игақыхкат, Кияӷныӷым қыпҳаҳтыңа пыҳқихсяӷўа̄ӷңалъықуқ, ята̄ҳқыңъалъықуқлъю тамаҳа̄нун аныӷныҳқилъыӷмун.

¹Христос Иисус тагикуми иглыӷутиналюни Атаныҳпагулъыӷмини, нанқихлъықӣ уңувалӷӣтлъю туқукатлъю. Ынка̄м нагасиманӷыхкыни Кияӷныӷылъю, Христос Иисусылъю, қылӷамкын ²уңипақики Пинилӷӣт Уңипат. Сягиқлъютын уңипақики югнун нагасюгуӷңа̄та налиӷмың нагасюгунӷитыӷңа̄та. Ныкыхмылъютын апыҳтуӷилъыҳпыгун ухпыҳтыснақики, иныҳтики анахутылъҳитның, кайымикилъю. ³Пилъыҳқақ тагиңӯқ югыт нагасюгнаниҳлъықут ипапигнун апыҳтӯсянун. Иваӷилъықут пиюкыхкамыхның апыҳтуӷистылӷутның нагатыпигыснаӷналюки нагақуӷьюкыхкаҳӣнатың. ⁴Нагасюгнаниҳлъықут ипапилъыӷмун, нагасюгьягулъықут тымңинун уңипаӷанун. ⁵Иўырңа лъпык ӣўлың ныкыхмылъютын, нагныӷутигу сяңўа̄ пияҳқан икфиқңуӷңа̄ҳпык, уңипақикыста̄ Пинилӷӣның Уңипаның. Лъпык қыпҳаҳтыкыхкаңатын Кияӷныӷым, апыӷӣҳу қамахлъюку қыпҳақақ лъпынун писқыхка̄.

⁶Хўаңа аҳқуткысяҳқа̄ҳсима̄ңа Кияӷныӷмун, туқулъыҳқақа ка̄сяҳтӯма̄қ. ⁷Пилъюўа̄ма̄қа пинилӷӣ пилъюўалъық, апыӷӣӷақа килга̄қулъқа, ата̄сӣӷмысимаңинақа̄гуңа Атаныӷмун. ⁸Ынка̄м та̄ўа Кияӷныӷым утақӣтңўа̄ хўаңамнун қаҳпаңа ылъқуӷутңалъҳым. Атанӷым ылъқуҳлъюку нанқихтистым акилыҳтуҳлъықа̄ңа Нанқихтилъҳым Аӷныӷани. Хўаңаңина̄хпынаңа иўырңа акилыҳтуҳлъықӣ қамахлъюки тама̄кут қылянылӷӣт тагилъыҳқа̄ның.

Павелым Та̄қнӣтңи

⁹Пинақылъҳа̄хкын қамахлъюкык тагирахкӣӷи хўаңамнун. ¹⁰Димасым пиниқсялӣсима̄ нунам кияҳта̄лъҳа ынка̄м унисима̄ңа, аӷуляқума̄қ Фессалоникамун. Крискента Галатиясима̄қ ынка̄м Тит Далматиямун пима̄қ. ¹¹Лукаңинаҳақ хўаңамнитуқ. Марка ақфалюку кылъқынъакын қаюҳлъяк каюткыпихтақа қыпҳалъымни. ¹²Тихик Ефесымун каяхсима̄қа. ¹³Троадамылъюңа униткақахка қа̄слъихка Карпынкуни. Тагинақыхкувык тагитаҳнакыхкын. Тагитаҳнакытынлъю ӣмгат иганка, кияң та̄кут амӣрамың улима̄ӷыт.

¹⁴Александрым сӣлюмың сяңлъяҳтым ынңа̄талъ сыӷлытун пикақа̄ңа. Атанӷым аӷью̄ӷна̄ӷа̄ таўатын пилъҳаның. ¹⁵Лъпыклъю кылыңаклъюку таўатын пинаюкаңатын қаюҳлъяк уңипаҳпут угумикыпихта̄.

¹⁶Нанқихтистымун агля̄сюхўа̄ӷақңатңа китум алңунак мысиӷа̄сяҳтулъҳита̄ңа, йыӷлыги униқаӷа̄ткақа̄тңа. Юӷа̄ткақанка Кияӷныӷмун акинақыфқӣта писқылъюки таўатын пилъҳитның. ¹⁷Иўырңа Атанық хўаңамнитка̄гуқ. Икнақусиқақа̄ңалъю уңипақысқылъюки ӣңунӣта Пинилӷӣт Уңипат қамахлъюки язычнигыт нагақӣсқылъюки. Ынка̄м Кияӷныӷым югуликақа̄ңа туқутылъыҳқамың. ¹⁸Атанӷым югулияҳқақа̄ңа тамаҳа̄ның сыӷлыӷым сюӷугалъҳаның, ынка̄м пақнанаңуна̄н агля̄лъықа̄ңа қилягмылңуӷмун Атаныҳпагулъыӷминун. Лъңанун усюқилъық қӯнпырухлъяк кынлыңуна̄н. Аминь.

¹⁹Уңипа̄таҳнакытын Прискиллалъю, Акилалъю, Онисифорылъю ныңлъюгуткулъҳӣт сю̄мқақанкаңуқ. ²⁰Ераста уныхтыка̄гуқ Коринфыми; қинуюгутаңаның Трофим униткақақа Милитыми. ²¹Уксюӷвагилган тагинақыҳлъяги.

Еввулымлъю, Пудымлъю, Линымлъю, Клавдиямлъю, иляңиталъю ухпықа̄лгутыт уңипа̄тысқӣси сю̄мқақӣсиңуқ. ²²Атанық таӷныӷаҳпынилъи, қуяслъисилъю.