2е Фессалоникийцам

Павелым Тӯңлӣт Посланияңи Ухпықанун Фессалоникамылңуӷнун

¹Укут посланият Павелымың, Силамың, Тимофейемыңлъю пиңӯт. Ухпықанун Фессалоникамылңуӷнун Кияӷныӷым Атамта пиңитнун, Атанӷымлъю Иисус Христосым.

²Наңлъыхталъықлъю, ныкыхмылъықлъю лъпысинун пиңӯк Кияӷныӷмың Атамың, Атаныӷмыңлъю Иисус Христосымың.

Нанқихтилъыҳқақ Христосым Тагилъҳани

³Ухпықа̄лгутымнъи, ӣўлың игамсиқаягусяҳқақамси Кияӷныӷмун. Ылъқуӷутңа̄қ таўатын пилъыҳқаҳпут, қаюҳлъяк ухпықиныҳтуҳтаӷалӷӣсилъю, пиниқутаӷаӷлюсилъю лъӣҳтуси. ⁴Тама̄кын апалъюқлъюку қанаткақамси иляңитнун ухпықат Кияӷныӷым юӷаӷвигитнилңуӷнун. А̄пҳақаҳпут нуқытутиныҳтулъыҳсилъю, ухпықилъыҳсилъю қайўа амью̄ткылъыңыӷңа̄ҳпыси, икфиқылъыңыӷңа̄ҳпысилъю.

⁵Тама̄кут ипапиҳқа̄т Кияӷныӷым нанқихтилъҳа ылъқуӷутңалӷӣңӯқ. Ынка̄м Кияӷныӷым а̄пҳӣси итагнаӷнилюси кияҳтысқылъюси Атаныҳпагулъыӷмини қаюҳлъяк икфиқуткыңъукыси. ⁶Кияӷныӷым пияҳқақа̄ сяңўа̄ ылъқуӷутңалӷӣ: икфиқысяҳқақӣ тама̄кут икфиқыстилӷӣт лъпысиның. ⁷Ынка̄м лъпыси икфиқылӷӣни Кияӷныӷым мыӷна̄лисна̄ӷӣси икфиқылъыӷмың хўаңкуталъю малигулъюта. Таўатын пилъықуқ алӣҳтыкумики Атанық Иисус, икнақыҳлъялӷӣтлъю яқулги. Қилягмың укихлъықут кыныӷмылъютың кумаӷуӷңалӷӣми. ⁸Та̄хкын Иисусым аӷью̄ҳлъықӣ тама̄кут налъюкилӷӣт Кияӷныӷмың, қа̄ткусигалңӯтлъю Пинилӷӣның Уңипа̄мың Иисусымың аюқылӷӣт. ⁹Аӷью̄ӷнақңўӣлъю кынлыңилңуӷмың на̄фқылъыӷмың, иқитыснақңӯтлъю Атаныӷмың, ниӷуганыңлъю аҳтуӷьяҳқа̄нӷилъҳан. ¹⁰Тама̄кут пияҳқа̄гут таўани Аӷныӷми Атанық Иисус тагикан. Қамахлъютың югыт ухпықикат лъңаның усюқылъықа̄т, сяӷӣӷаягулъықа̄тлъю. Лъпыси акулңитнилъықуси қаюҳлъяк ухпықыхкыси уңипақ а̄пқаҳпут лъпысинун.

¹¹Ынка̄м қӯнпың юӷа̄ткақамси хўатын: Кияӷныӷым апыӷлиси кияҳтыңъунилюси лъми кияҳтысқысюлъыӷмитун. Аҳтуӷьяҳқа̄нӷилъыӷмикунлъю на̄михлъигу қамахлъюку пиюкылъыҳси пинилъыӷмун, қыпҳалъҳилъю ухпықилъыҳпыси. ¹²Ынка̄м а̄тҳа Атанымта Иисусым қӯлвалъыңылъықуқ лъпысигун, лъпысилъю лъңакун қӯлвалъыңылъықуси нафуҳталъҳакунлъю, наңлъыхталъҳакунлъю Кияӷнымта, Атанымталъю Иисус Христосым.

Сыӷлыпыста̄ӷыт Пияҳқа̄гут

¹Ухпықа̄лгутымнъи, уңипа̄сюгамси тагилъыҳқа̄ның Атанымта Иисус Христосым, қырңуӷутылъыҳқамнъыңлъю лъңанун. ²Умьюгаси қапшагаҳтысюнӷитңўа̄ӷапут налиӷмың какавысюнӷитапут нагақуқуфсигу Аӷныӷа Атанӷым ка̄симанилюку. Ынтақун китум ӯкналиқуткыхкақа̄, налиӷмың китум уңипақыхкақа̄, налиӷмың китум письмоӷуманилюку хўаңкунъун пикақа̄. ³Иўырңа пӯҳтыстыхпынаси! Та̄на Аӷныӷа Атанӷым ка̄нъа̄нӷитуқ кынляңа югыт малиҳқутақсюгнанилӷитнун Кияӷныӷым иглыӷутилъҳанун, ка̄тылъҳанунлъю Сыӷлыпыста̄ӷым Югым. (Лъңа на̄фқысяҳқа̄гуқ геенами.) ⁴Та̄м югым кипулъхина̄ҳлъықӣ кияӷныңлъяқат налиӷмың манигуӷьяҳқат, тама̄куның лъңаның қулиҳпига̄ҳсяҳқа̄гуқ. Ынка̄ңам итыӷлюни Кияӷныӷым Храмыңанун ақумлюни Кияӷныӷунилъықуқ.

⁵Нықамикынӷистыхӯ сялин лъпысинилъюңа уңипа̄ткақыхкымси тама̄кын? ⁶Лӣсимакаҳси китум ма̄тын нуқнықақа̄ Сыӷлыпыста̄қ Ю̄к тагилъыҳқа̄ның. Ўытку аӷныни ка̄скан тагилъықуқ. ⁷А̄ўалъю қайвиҳсимаңилңуқ аҳтуӷьяҳқа̄нӷилъҳа сыӷлыҳқылъҳым қыпҳа̄ҳсима̄қ нунами. Иўырңа ма̄тын китум кима̄ўистақа̄ та̄на сыӷлыҳқылъық. Кима̄ўистистыңа таўатын пилъықуқ кынляңа Кияӷныӷым иқитыстылъҳанун. ⁸Та̄хкын Сыӷлыпыста̄қ Ю̄к алӣҳтыслълъықуқ, иўырңа Атанӷым Иисусым тагикуми туқулъықа̄ аныӷныӷаның қаныӷми, на̄фқылъықа̄лъю ниӷухлъягакун тагилъыӷми. ⁹Сивутҳулъюку Атанӷым Иисусым тагилъыҳқа̄, Сыӷлыпыста̄қ Ю̄к тагилъықуқ аҳтуӷьяҳқа̄нӷилъылиӷлюни Туӷныӷаӷмың. Та̄на Ю̄к алъя̄ҳлъюхўаҳтисиӷўа̄ҳлъықуқ алъя̄ҳӣнаӷмың сяӷӣӷаналӷӣның. ¹⁰Атуқылъықӣлъю алъя̄ҳӣна̄т сыӷлыӷыт пӯҳналюки туқуяҳқат. Туқуяҳқа̄гут қаюҳлъяк ухпықсюнӷилъкаңат ипалъық югулисиҳқақсяқысың. ¹¹Тама̄кын апалъюқлъюку Кияӷныӷым пӯӷнықхӯтыслъықӣ ухпықысқылъюки сяңўа̄т ипаңунӷилңӯт. ¹²Ынка̄м қамахтыңъўа̄ӷлютың ухпықинӷилңӯт ипапилъыӷмың нанқихсяҳқа̄гут аӷью̄ӷьяҳқа̄лютың қаюҳлъяк пиниӷью̄гусиқыхкаңат сыҳлъыҳқылъық.

Накмикыхка̄гуси Югулилъыӷмун

¹³Ухпықа̄лгутымнъи, ӣўлың игамсиқаягусяҳқақамси Кияӷныӷмун, лъпыси пиниқыхкӣтни Атанӷым. Игамсиқаюгвикақаҳпутлъю Кияӷнық қаюҳлъяк накмикыхкақӣси югулисқылъюси има пӣнлиӷьюхўа̄лъҳаның нунам. Югулика̄гуси пылюңиҳсялъҳакун Аглыӷналӷӣм Таӷныӷам, ухпықылъыҳпысигунлъю ипапилъық. ¹⁴Таўатын кияҳта̄лъыӷмун Кияӷныӷым тахсиқақӣси Пинилӷӣтхун Уңипатхун уңипақыхкамыхтыхун; тагисқақӣси пилӣтысқылъюку ныңиҳқаҳси пиниӷналъҳа Атанымта Иисус Христосым. ¹⁵Ынка̄м ухпықа̄лгутымнъи, аӷулӣтыкыстаҳтык, ухпықыкыстаҳтыху ипапилъық апыҳтӯткаҳпут лъпысинун уңипақилъымтыхунлъю, письмолъымтыхунлъю.

¹⁶Кияӷныӷым Атамта, пиниқистымта, наңлъыхталъыӷмикун тӯныхкақӣлъю кынлыңилңуӷмың илютулъыӷмың, пинилӷӣмыңлъю сиӷималъыӷмың. Атанымта Иисус Христосым лъңан катам, Кияӷныӷымлъю Атамта, ылъкыхкынка ¹⁷илютуҳсяӷлисилъю, икнақуҳсяӷлисилъю тамаҳа̄кун пинилӷӣкун қыпҳалъыҳпысигунлъю, акузилъыҳпысигунлъю.

Юӷа̄ткитыкут

¹Ухпықа̄лгутымнъи, та̄қнӣткун сямың пӣӷа̄тақаӷлямси. Юӷа̄ткитыкут Атанӷым уңипа̄ миңишахкӣӷысқылъюку, югнунлъю қӯлвӣсқылъюку, катам лъпыси пилъыҳпысистун. ²Юӷа̄ткитыкутлъю Кияӷныӷмун югулисқылъюта сыӷлыӷның югның, қаюҳлъяк углялӷӣ ю̄к ухпықилъылгунӷитуқ.

³Иўырңа Атанық ата̄сӣӷмытуқ; икнақуҳсяҳлъықӣсилъю, пақнӣҳсяҳлъықӣсилъю Туӷныӷаӷмың. ⁴Атанӷым налъюнықнӣӷума̄ хўаңкунъун қа̄ткутңӯси қылылъымнъун, қа̄ткумаңинаҳлъықаҳсилъю.

⁵Атанӷым лӣгикыслъиси ўатақа̄ӷақ Кияӷныӷым пиниқылъҳаның, Христосымлъю нуқытутиныҳтулъҳаның.

Қамахлъютың Ухпықат Қыпҳаӷлит

⁶Ухпықа̄лгутымнъи, а̄тҳакун Атанымта Иисус Христосым қылӷамси иқитңасқылъюси тамаҳӣтның ухпықа̄лгутыхпысиның иҳсяниталӷӣныңлъю, малиҳқутақигалңуӷныңлъю апыҳтӯткамнъың лъпысинун. ⁷Лъпыси катам лӣсимакаҳси аюқысиӷаӷьяҳқақсяӷаҳпысикут; лъпысинилъюта иҳсянитиқумаңитукут. ⁸Тугуклъӣгатапут нықыт кинкуның алңунак тукфилъңунаки. Иўырңа унухтӯма̄н, аӷныҳтӯма̄н қыпҳақа̄гукут, уӷлыӷӣқа̄гукут уқихтуқутңуюнӷитутымнъың налиҳӣнаҳпысинун. ⁹Лъпысинун а̄псяқлъыгуяҳтукут каюсӣтысқылъюта, йыӷлыги қыпҳақа̄гукут афлъыңакналюта хўаңкунъың успута̄налюта лъпысинун аюқысиӷӣсқылъюта. ¹⁰Талўа лъпысинилъюта хўатын қылъқақыхкымси: «Кина алңунак қыпҳаӷьюнӷилңуқ ныӷыстыхпына̄н».

¹¹Таўатын пика̄гукут қаюҳлъяк нагақуӷақукут илясиңуқ иҳсянитаҳтут, қыпҳаӷьюгигатут, йыӷлыги янутқўа̄қӣңуқ югыт. ¹²А̄тҳакун Атанӷым Иисус Христосым қылӷапутлъю, кайымапутлъю таўатылңӯт югыт иҳсянитиқыфқӣта алъҳыӷутысқылъюки кияӷусиҳқӣтның.

¹³Ухпықа̄лгутымнъи, қинуягутыхпынаси пинитун пиныӷмың. ¹⁴Кина алңунак қа̄ткусюнӷилъкан сямың пилъымнъун укутхун письмотхун, сю̄мқынъакыси кинкуңутаңи. Ынка̄м иқитңалӷа̄си лъңаның кайңуюгысқылъюку анахутылъҳаның. ¹⁵Иўырңа кияӷутыхпына̄н аңуягулюку, итупилъ кылыңася̄ҳтыху ухпықа̄лгуткылъюку.

Та̄қнӣтыт

¹⁶Атанӷым лъңаның катам ныкыхмылъылитикаюгым, ныкыхмылъылисилъи ӣўлың сями тамаҳа̄ни. Атанық тамаҳа̄ҳпысинилъи.

¹⁷Хўаңа, Павел хўаңа катам ӣхымның игақақа пиниқилъқа лъпысинун. Таўатын игаӷақуңа қамахлъюки посланиямкун лъпысинун лӣсимакысқылъюки хўаңамның пиңутаңи.

¹⁸Наңлъыхталъҳа Атанымта Иисус Христосым тамаҳаҳпысинилъи.