2е Петра

Петырым Тӯңлӣт Посланияңи

¹Укут посланият Симон Петырымың пиңӯт. Қыпҳаҳтыка̄ңалъю, апостолоңалъю Иисус Христосым. Письмомамси қамахлъюси алъхыӷуткани ухпықилъыӷмың хўаңкутыстун аюқылӷӣмың. Алъхыҳтыкақаҳпут ухпықилъыҳпут ылъқуӷутңалъҳакун Иисус Христосым, Кияӷнықыхкыфутлъю, Югулиӷистыкыхкыфутлъю.

²Пиниқылъҳалъю, ныкыхмылъҳалъю ўата нулялик лъпысини лӣсимакылъыҳпысигун Кияӷныӷымлъю, Иисусымлъю Атаныҳтамта.

Кияҳтылъыҳқақ Кияӷныӷым Кияҳтысқысюлъҳатун

³Иисус аҳтуӷьяҳқа̄нӷилъылгӯқ Кияӷныӷмың. Та̄хун аҳтуӷьяҳқа̄нӷилъыҳқун тӯныхкақӣлъю сямың тамаҳа̄ның аклъюкыхкамнъың кияҳтысқылъюта Кияӷныӷьюныҳтулюта. Тама̄кут алъхыҳтыкақапут қаюҳлъяк лӣсимакыхкыфут Иисус. Туқлъюӷӣлъю илятысқылъюта қӯлвалъыӷминуңлъю, пинилъыӷминуңлъю. ⁴Аҳтуӷьяҳқа̄нӷилъыӷмикун, Иисусым тӯныхкақӣлъю акықусяминың мыгнунапихлъыҳӣныңлъю, пивагнапихлъыҳӣныңлъю. Тама̄гун акықусятхун Кияӷныӷым илятыслъықӣси наңаӷныӷминун. Та̄хкын анагьяқлъыгуҳлъықаси сыӷлыӷым пиюкылъҳи нунамылңӯт на̄фқӣяқлъыгыт лъпысиның. ⁵Кияӷныӷым наңаӷнылиткақутаңаның лъпыси, та̄куңинаҳа̄гның пинақылъҳаҳси қамахлъюку илятыки укут ухпықилъыҳпысинун: ухпықилъыҳпысинун илятыху пинилъық, пинилъыҳпысинун илятыху лӣсималъық, ⁶лӣсималъыҳпысинун илятыху нуқытутилъық, нуқытутилъыҳпысинун илятыху аӷулӣлъка̄малъық, аӷулӣлъка̄мылъыҳпысинун илятыху Кияӷныӷьюныҳтулъық, ⁷Кияӷныӷьюныҳтулъыҳпысинун илятыху наңлъыкутутылъық ухпықа̄лгутыхпысинун, наңлъыкутутылъыҳпысинун илятыху пиниқылъық. ⁸Тама̄кут атуқңукуфсики, нулястыкуфсикилъю каюсӣлъықӣси атуҳқа̄люсилъю, каюткаҳқа̄люсилъю лӣсимакылъыҳпысигун Атанымта Иисус Христосым. ⁹Иўырңа китум алңунак атуқынӷилъкумики тама̄кут, амухтапихтуқ ынка̄м ысҳа̄тыпагниңитуқ. Пуйгукақа̄ Кияӷныӷым укмаңиқа сыӷлыҳқылъыҳа.

¹⁰Ынка̄ңам ухпықа̄лгутымни, налъюнықнӣӷўа̄ҳтыху Кияӷныӷым туқлъюқақӣсилъю, накмикыхкақӣсилъю. Таўатын пикуфси та̄ўа иқитықаҳна̄нӷитуси Христосымың. ¹¹Ынка̄м Кияӷныӷым қуякусиқыҳлъяглюси итыҳтыслъықӣси кынлыңилңуӷмун Атаныҳпагулъҳанун Атанымталъю, Югулиӷистымталъю Иисус Христосым.

¹²Қайўа лӣсимакыӷңа̄ҳпысики та̄кут ипапилъҳыт, сягиқутңуӷңа̄ҳпысикилъю қа̄ткынъалюки, ӣўлың нықамиклъықамси та̄куның ипапилъыӷның лъпысинун апыҳтӯткамнъың. ¹³Сюмымни итагнаҳтуқ нықамикыхкумси тама̄куның уңуваңулюңа. ¹⁴Лӣсимакақа туқуяҳтуҳтуңа қаюҳлъяк Атанымта Иисус Христосым уңипа̄тыкыстакақа̄ңа. ¹⁵Пинақылъқа қамахлъюку апыҳтуӷамси тама̄кын, ынка̄м туқулъыӷма киңуңаның нықа̄микылъықаси.

Ысҳа̄ткат Христосым Ниӷуҳқылъҳаның

¹⁶Атуқумаңитапут пыҳқиниқутңўа̄ӷлюки уңипаӷа̄тыңлъяқат а̄пҳақңамтыки лъпысинун аҳтуӷьяҳқа̄нӷилъҳалъю, тагилъҳалъю Атанымта Иисус Христосым. Хўаңкута катам ийыҳлъюўа̄мнъың ысҳақақаҳпут лъңан а̄ңылъыҳлъяга. ¹⁷Иисусым алъхыҳтақңагу қӯлвалъықлъю, ниӷуҳқылъықлъю Кияӷныӷмың Атамың, нагақуқақа̄ мыңа Кияӷныӷым, Қулиҳпига̄лӷӣ Ниӷуҳқыңъаҳлъяк. Атам пикақа̄: «Унаңӯқ пиниқыпихтыкыхка Иӷнықа, ыфқуқыпихтыкыхка». ¹⁸Хўаңкута хўаңкунъың катам нагаткақаҳпут ма қилягмың Иисусымытақңамта аглыӷналӷӣми на̄йӷами.

¹⁹Тама̄кын апалъюқлъюку хўаңкунъи налъюнықшахӣтут ӯкналиқистыт ӯкналиқуткыхкӣт ипаңутаңи. Лъпысинун пиниҳлъықут сюмыҳтаӷа̄ткыңъўа̄қуфсики ӯкналиқуткыхкӣт, қаюҳлъяк кынылӷутам кӯкхутылъҳатун аюқут мамлыгмун. Таўатытыкыстаҳтык кынляңа Христосым тагилъыҳқа̄н аӷныӷанун. Та̄хкын ниӷуга кӯкхулъықуқ илюхпысинун, уна̄ңум иӷалықыта̄ӷатун аюқлъюни. ²⁰Лӣгикңўа̄ӷьяҳқақаҳси уна: Китум алңунак лъңаның катам лӣгикыпагниңитӣ сямың писӣтаңи ӯкналиқылъҳыт Акузитнилңӯт Игақыхкани. ²¹Ӯкналиқистыт накмикумаңитӣт ӯкналиқуткысяҳқатың. Итупилъ Аглыӷналӷӣм Таӷныӷам ӯкналиқистыт акузитылиткақӣ акузисқылъюки Кияӷныҳтамың.

Апыҳтуӷистысиӷўа̄ӷыт

¹Сивунӷани агани ӯкналиқистысӣӷўа̄ӷыт акулңитнисяҳтут Кияӷныӷым югитни, катам апыҳтуӷистысиӷўа̄ӷыт акулыхпысинилъықут. Налъюныҳпысини апыҳтуҳлъықӣси иқлъыңамың на̄фқынъалюки ухпықилъыси. Қайўа Христосым Пилӣтыстыңита тукфиқақыӷңӣстың итымунъалюки сыӷлыҳқылъҳитның, паниның пикнаниҳлъықӣт. Ынка̄м нӯскаган лъңитның на̄фқыслъықут. ²Юлӷутыт малигулъықут апыҳтуӷистысиӷўа̄ӷнун кайңуналӷинун кияҳта̄лъҳитнун. Ынка̄м югыт сыӷлықӯҳлъықӣт апыҳтӯсяпигыт атупут. ³Пакихтылъыӷмыхтыхун апыҳтуӷистысиӷўа̄ӷыт аклъюңиӷиюхлъықут лъпысиның. Ынка̄м апыҳлъықӣт апыҳтӯсяңлъяқатың маниңналютың лъпысиның. Има ныӷиҳа̄ның Кияӷныӷым Нанқихтистыңатлъю, На̄фқӣстыңатлъю қавӣгатуқ аӷью̄ӷьяқлъыгуҳлъюки аюқӣ.

⁴Кияӷныӷым аӷью̄ӷумаңинъыӷитӣ яқулгыт сыӷлыҳқақңата, иўырңа милю̄ткақӣ геенамун. Таўани писяҳтӣҳлъягми қӣпшаӷусиӷңа̄т, утақӣлӷӣт Аӷныӷанун Нанқихтилъҳым. ⁵Ныӷиӷлюку Ной кияҳтыңъулюку, Кияӷныӷым аӷью̄ӷумаңинъыӷитӣ югыт авылӷасиңўа̄ӷикат лъңаның, ынка̄м улывыстыкақа̄ нуна. Иўырңа югуликақа̄ Ной, иляңилъю ма̄ӷраӷвинлык югыт. (Ной уңипаҳтыңука̄гуқ ылъқуӷутңалӷӣмун кияҳта̄лъыӷмун.) ⁶Кияӷныӷым аӷью̄қақа̄клъю ныҳлъягык Содомылъю, Гоморрамлъю. На̄фқыхкақа̄к кыныҳқун кынляңа пепелыңуҳтылъҳыхкынун. Ынка̄м успута̄ҳтыкақа̄к сяяҳқа̄таңи югыт авылӷасиӷўа̄ӷикат Кияӷныӷмың. ^7-8Лот ылъқуӷутңалӷӣңуяҳтуқ ю̄к кияҳтыкақ акулңитни тама̄куни сыӷлыӷыт югыт. Аҳутаңа тамаҳа̄н сыӷлылӣӷуткыҳлъякақӣ уңувасиӷмикун ысҳапаглюки, нагалъюки сыӷлытун кияҳта̄лъҳит, нуқытыхпынатыңлъю блудылъӷит. Ынка̄м Атанӷым югуликақа̄. ⁹Та̄ўа лӣтаҳпут, Атанық лӣсимакуқ натын югулилъыҳқамың ылъқуӷутңалӷӣт югыт, нанӷӣҳсяӷалъыңынӷата. Кылыңакңўӣлъю сыӷлыӷыт югыт аӷью̄лъыңылъыӷмылңӯт, утақӣмалюки Аӷныӷанун Нанқихтилъҳым. ¹⁰Та̄на аӷью̄лъық кияң тама̄кунун аюқуқ малигулъҳӣнун югусимың сыӷлытун пиюкылъыҳлъягитнун, қа̄ткусюгигалңуӷнунлъю китумун алңунак.

Тама̄кут апыҳтуӷистысиӷўа̄ӷыт тытугигатутлъю, лъмиңуюгныӷӯтлъю. Алиңыхпынатың сыӷлықӯӷақӣт ниӷугракыхтат. ¹¹Яқулгыт икнақатаӷаҳтут, аҳтуӷьяҳқа̄нӷитаӷаҳтут та̄куның ниӷугракыхтаның, паниның сивуңани Атанӷым анахусиманина̄нӷитӣт ниӷугракыхтат. ¹²Иўырңа тама̄кут апыҳтуӷистысиӷўа̄ӷыт сыӷлықӯӷақӣт сяңўа̄т лӣгикыхпынаки. Тыӷикусястун сюмыҳтаӷаҳпагниңилңӯгут. Туқутылъыңылъықут тыӷикусястун алъхыӷлютың тыӷихтуӷлюки туқутка̄т. ¹³Углялӷӣт икфиқыстақӣт ынка̄м Кияӷныӷым икфиқыслъықӣ. Талўа аӷныра̄ӷинаӷми мыӷӯтыҳлъягақут, югусимыңлъю сыӷлыӷыт пиюкылъҳит атуқақӣт. Кайңусяӷа̄тыҳлъягақут нықынӷаҳқылгусӣмалюси, ынка̄м акулыхпысини нукыхнаҳқыхкастунлъю, лъмӣгуткастунлъю аюқут. ¹⁴Ысҳаныӷмыхтыки аӷнат қилӣқақӣт. Сыӷлыҳқысюныҳтӯт иўырңа сыӷлыҳқылъылӷутаңита кыпсюҳсигатңўа̄ӷӣт. Маниӷақӣт югыт пӯҳнықыхтат сыӷлыҳқысюгысқылъюки, пакигныпихтутлъю. Тама̄кын апалъюқлъюку Кияӷныӷым аӷью̄ӷьяҳқақӣ! ¹⁵Тама̄кут апыҳтуӷистысиӷўа̄ӷыт ухпықнаниқақӣт апыҳтӯсяпигыт. Ынка̄м аӷуляқыхка̄гут Валаамым пилъҳатун пиналютың. (Иӷнықсяқаңа Веорым.) Қуя̄қуқ югыт акилыҳтунӷатни сыӷлытун писқылъюку. ¹⁶Иўырңа осёлым акузипагниңилңӯм, югым мыңакун иныҳтыкақа̄ Валаам. Ынка̄м аӷулӣҳтыкақа̄ ӯкналиқиста сюмыӷныӷӣлъиқылъҳаның.

¹⁷Тама̄кут апыҳтуӷистысиӷўа̄ӷыт па̄тқастун сыңъустун аюқут, қилягўа̄ӷыстунлъю аюқут ануқыҳлъягым тыңтыкаңи. Кияӷныӷым ныкаҳқаңлъя̄ткақӣ писяҳтӣҳлъягми. ¹⁸Аҳся̄ӷмикамың а̄ңа̄юхтақут тымңитхўамың акузиткылъютың. Пӣқут итагнаӷнилюку малиҳқутақылъыҳқақ сыӷлыӷнун югусим пиюкылъҳанун. Ынка̄м югыт та̄қақутлъю таўатын кияҳтылъыӷмыхның, манигақӣт таўатын пинқихтысқылъюки. ¹⁹Апыҳтуӷистысиӷўа̄ӷыт уңипа̄ткақӣт тама̄кут югыт итымңанилюки сямун алңунак пиюкылъҳитнун, лъңит катам итымңаңунӷитыӷңа̄ӷмың. Қыпҳаҳтыля̄ӷӯт сыӷлыҳқылъыӷмыхнун ынка̄м сыӷлыҳқылъҳита на̄фқысяқлъыгўӣ. Ю̄к қыпҳаҳтыля̄ӷӯқ алңунак сямун иглықатақилӷӣмың лъңанун. ²⁰Югыт лӣтақңамыхтыху Атаныҳпутлъю, Югулиӷистывутлъю Иисус Христос анагьяҳқақа̄т нукыхна̄ нунам. Иўырңа утыӷнинқихтыкумың сыӷлытун кияҳта̄лъыӷмыхнун а̄ҳқутақысимакумыңлъю тама̄кунун, та̄ўа кияҳта̄лъҳит сыӷлыӷатаӷа̄яҳқа̄гут пиюхўа̄лъыӷмыхның. ²¹Тама̄кут югыт, лӣтңўа̄ӷлюку аглыӷналӷӣ қылӷусяқ алъхыҳтыкаҳтың, тунуткақа̄т. Итагнаӷатаӷаӷнаяҳтут лӣсимаңисяқумыхтыху ылъқуӷутңалӷӣ кияҳта̄лъық. ²²Таўатын аныҳтылъҳита ипаңуҳтыста̄т югыт пилъҳат: «Қикмим утыҳфикақа̄ миӷьяқани, куругақлъю уӷвуҳқыхкақ аглянқихлъюни уӷашамун миңуӷунъықихтақуқ».

Акықусяқ Атанӷым Тагилъыҳқа̄нун

¹Илякумта̄мни, укут алӷӣткӣ письмолъыӷма лъпысинун. Тамаҳа̄хкынкун письмолъыӷма нықаңуҳтыснақуткамси лӣсимакыхкаҳпысиның. Сюмыҳтаӷӣсқысюгамси тама̄куның ипапиҳқылъюси. ²Лъпысинун нықамикысюганка аглыӷналӷӣт ӯкналиқистыт ӯкналиқуткыхкӣт. Нықамикысюгақалъю қылӷусяқ Атанымта Югулиӷистым а̄пқа̄ апостолыхпысигун. ³Лӣгикңўа̄ӷьяҳқақаҳси уна: киңулиӷни аӷныӷни лыгасӣӷўаҳтылгуяҳқа̄гуқ; тама̄куңӯт малиҳқутақңалӷӣт сыӷлыӷнун пиюкыхкамыхнун. Лыгасӣӷўа̄ткылъықа̄т Кияӷныӷым акықуся̄, ⁴хўатын пилъықут: «Иисус акықика̄гуқ тагинқихлъықнилюни. На̄гу? Има сивуныпут туқуляӷа̄тылъҳитның, паниның сяңўа̄ қамахлъюни алмысиқақа̄ нунам пӣнлилъҳаның». ⁵Накмӣқа̄гут авылӷасиңўа̄ӷналюку уна ипапилъық: ныӷиӷлюку Кияӷныӷым акузитмикун улимакақа̄ қиляга, улимакақа̄лъю нуна мыӷмың, мыҳқунлъю. ⁶Та̄хкын Кияӷныӷым мыӷмың улывыслъюку нуна на̄фқыхкақа̄. ⁷Иўырңа та̄хун акузиткун Кияӷныӷым афлъыңакақӣ қилягалъю, нуналъю на̄фқысяҳқа̄люки кыныҳқун. Афлъыңакңӯт кынляңа аӷныӷанун нанқихтилъҳым. Таўанилъю аӷныӷми на̄фқылъықӣ югыт авылӷасиңўа̄ӷикат лъңаның.

⁸Илякумта̄мни, пуйгухпына̄н уна! Атаныӷми аӷнық ата̄сиқ тысяча аюмиқулъҳыстун аюқуқ, тысяча аюмиқулъҳыт ата̄ситун аӷныҳтун аюқуқ. ⁹Атанық ыгна̄ңинъыӷитуқ акықусяни пияҳқа̄люку, иляңита югыт сюмыҳтаӷалъҳистун. Йыӷлыги ныкыхмытутақӣси қаюҳлъяк кина алңунак ифлъяюгунӷилъкаңа. Итупилъ тамаҳа̄н ю̄к агўитысқысюгўа̄ сыӷлыҳқылъҳитның.

¹⁰Иўырңа Аӷныӷа Атанӷым тагилъықуқ тыглыгнӣҳтытун. Таўани Аӷныӷми қиляга авӣӷусяҳқа̄гуқ ыфтуӷӯтыҳлъягмың. Сяңўа̄т қамахлъютың қилягамылңӯт кынӷым уӷухлъықӣ. Қамахлъютыңлъю нунамылңӯт паныҳлъықут. ¹¹Қамахлъютың тама̄кут уӷугьяҳқа̄таңитның, лъпыси югни натылъыкыстык? Кияҳта̄лъыси пылюңилъит, Кияӷныӷмунлъю аюқлъит, ¹²утақӣмалюси Аӷныӷанун Кияӷныӷым. Пинақылъҳаҳси қамахлъюку пинитун пӣқитыки аӷнық тагирахкӣӷысқылъюку. Таўани аӷныӷми кынӷым на̄фқылъықа̄ қиляга, ма̄тныӷымлъю уӷухлъықӣ сяңўа̄т қамахлъюки қилягамылңӯт. ¹³Иўырңа хўаңкута утақӣңӯкут Кияӷныӷым акықусяқыхка̄ның. Пика̄гуқ нутаӷамың қилягаңлъяҳлъықнилюни нутаӷамыңлъю нунаңлъяҳлъықнилюни. Таўани ылъқуӷутңалӷӣңина̄т кияҳлъықут.

¹⁴Ынка̄ңам илякумта̄мни, утақӣмалюси таўавык Аӷныӷмун пинақылъҳаҳси қамахлъюку пылюңитыклъю, афкуйӣтыклъю Кияӷныӷым ысҳа̄малъҳани. Ныкыхмытыклъю Лъңани. ¹⁵Сюмыӷмикитыху Атанымта нуқытутилъҳа лъпысиның югулилъыңысқылъюси. Пиниқыхкамта ухпықа̄лгутымта Павелым а̄пқақӣ та̄кут ата̄сит письмоӷақңами пыҳқинылъылиӷлюни Кияӷныҳтамың. ¹⁶Письмоткыхкақӣ тама̄кут қамахлъюки посланиямикун. Налиӷныӷи Павелым посланияңан лӣгикныҳлъюгӯт. Югыт лӣгикылъыпагилңӯт, ухпықилъыпагилңӯт алъяңуҳтақӣт сямың писӣтаңи посланияңанилңӯт. Таўатынлъю пӣқӣт иляңи Акузитыт Игақыхкат ынка̄м на̄фқыңъӯт лъңитның.

¹⁷Илякумта̄мни, лӣсимакутыхпысиның ся̄қутаңи қа̄ткусигалңӯт лӣлиҳтӯсянун, кылыңатык. Аӷуляқутыстыхпынаси анахутңалӷӣнун апыҳтуӷилъҳитнун. Таўатын пикуфси малӷуклъина̄нӷитуси ухпықыхкаҳпысиның. ¹⁸Иўырңа нагныҳтык ўатақа̄ӷақ лӣсимаклъюку Иисус Христос, Атаныҳпут, Югулиӷистывут, нагныҳтыклъю ўатақа̄ӷақ пиниқылъҳакун. Ынка̄м Христос усюқылътыху, қӯлва̄лътыху ма̄тын, қӯнпырухлъяклъю! Аминь.