2е Коринфянам

Павелым Тӯңлӣт Посланияңи Ухпықанун Коринфымылңуӷнун

¹Укут посланият Павелымың пиңӯт, апостолаңаның Христос Иисусым Кияӷныӷым пиюкылъҳакун, Тимофейемыңлъю пиңӯт ухпықа̄лгутымнъың.

Кияӷныӷым югитнун қырңуӷуткаюгнун юӷаӷвигани Коринфым, тамаҳӣтнунлъю Кияӷныӷым югитнун ӣңунаҳа̄ни Ахаиям.

²Йықай Кияӷныӷым Атамта, Атанымталъю Иисус Христосым тӯнлиси қуястылъыӷмыңлъю, ныкыхмылъыӷмыңлъю.

Павел Игамсиқаюлӷӣ Кияӷныӷмун

³Усюқылътыху Кияӷнық Атаңа Атанымта Иисус Христосым, наңлъыхтапихлъыҳӣ Ата, Кияӷныӷмың тагӣқуқ қамахлъюни каюткаҳқақ! ⁴Каюсиӷақӣлъю қамахлъюта сыӷлылӣлъымнъи, ынка̄м хўаңкуталъю каюсиӷьяқлъыгўа̄пут тама̄кут алъя̄ҳӣнаӷмың сыӷлылӣлӷӣт, атуқлъюку ата̄сиқ та̄на каюсилъық алъхыҳтыкаҳпут Кияӷныӷмың. ⁵Катам илятңалъымтыстун Христосым угля̄пихлъыҳӣнун икфиқылъҳанун, ынка̄м Христосыкун илятңалъықукут Кияӷныӷым каюсилъыҳлъяганун. ⁶Икфиқыхкумта каюсилъыҳпысинунлъю, югулилъыҳпысинунлъю пилъҳӯқ; каюсилъыңыхкумта та̄ўа лъпысилъю каюсилъыңылъықуси ынка̄м тӯнылъыңылъықуси ныкыхмылъылиӷлюси сюфлъюҳсяҳқа̄люки тама̄кут ата̄сит икфиқылъҳыт сюфлъюҳтыкапут. ⁷Ынка̄м сиӷимакилъыҳпут лъпысинун аӷулӣтуқ; лӣсимакаҳпут та̄на катам илятңалъыҳпысигун икфиқылъымнъун, лъпысилъю илятңа̄си каюсилъыӷмун алъхыҳтыкамнъун.

⁸Ухпықа̄лгутымнъи, налъюкысюнӷитамси сыӷлылӣлъыӷмың нанӷӣқамнъың Асиями. Ынңа̄талъ сыӷлыҳлъягӯқ уқихтупихтыка̄гуқ, рыпалъ сиӷимананиқа̄гукут кияҳтылъыҳқамнъың. ⁹Ипапыста̄қ туқунақнилюта пияҳтукут. Иўырңа таўатын аныҳтукут хўаңкунъың сиӷимакыфқа̄мта писқылъюта, та̄ўаңинаҳақ Кияӷнық сиӷимакысқылъюку уңуваҳтыстикаюк туқуканың. ¹⁰Ынңа̄талъ сыӷлыпыста̄ӷмың туқум тывныӷаның югулӣлъи, югулилъықӣсилъю. Ынка̄м лъңакун сиӷимаңӯкут лъңан югулилъя̄таҳлъықӣлъю, ¹¹лъпыси каюсӣсималюта юӷалъыҳпысигун. Юӷа̄ткилъыҳлъяхси хўаңкунъың кӣмсилъыңылъықут, ынка̄м Кияӷныӷым қуяслъықӣлъю; угляпихлъыҳӣтлъю игляхтуҳлъютың игамсиқаюгвикылъықа̄т хўаңкунъың.

Павелым Алъяңуҳтыкаңа Қакиқниқылъыни

¹²Уна ысҳа қука̄югусиҳпут, сюмыҳтаӷалъымта уңипа̄тӣлъю кияҳта̄лъыҳпут хўани нунами ипапиҳқыңъа̄қлъю, пиниқиңа̄қлъю, кияң лъпысинун. Таўатын пӣқукут Кияӷныӷым пиниқиңалӷӣкун каюсилъҳакун, нака̄н югым пыҳқинылъҳакун. ¹³Қамахлъютың посланияпут лъпысинун пияқнӣтут атиҳтуӷьяҳқа̄лютыңлъю, лӣгиксяҳқа̄лютыңлъю. Сиӷимакақамси лӣгикңўа̄ӷысқылъюку ¹⁴сяңўа̄ ма̄тын лӣгикыхкаҳпыси налиӷныҳӣна̄, ынка̄м Аӷныӷани Атанӷым Иисусым лъпыси қука̄югуткылъықаҳпысикут катам хўаңкута қука̄югуткылъымтыстун лъпыси.

¹⁵Қаюҳлъяк ипапиҳқуткыхкақақа қамахлъюку тама̄на, сивуклъюңа лъпысинун ля̄лиҳналюңа пика̄яҳтуңа, қуястылъыңнаюкафси малӷуҳқыңъа̄н. ¹⁶Ля̄лиҳфиксюкақамси агля̄ткылъюку Македониямун, утыӷнӣткылъюкулъю тама̄кын, каютыңналюңа лъпысиның иглыӷалъыҳқамнун Иудеямун. ¹⁷Сюмыҳпысинӣ таўатын қакиқниқылъымни ата̄сӣӷныӷисиңа̄? Сюмыҳпысинӣ қакиқниқылъқа нунам югатун аюқа̄, таўаниңинақ пияҳқақ: «А̄а», «Нака̄»? ¹⁸Ипапыста̄қ Кияӷнық ата̄сӣӷмытуқ, акықусяқа лъпысинун «А̄ңӷунӷитуқлъю», «Нака̄ңунӷитуқлъю». ¹⁹Кияӷныӷым Иӷныӷа, Иисус Христос уңипақыхкаҳпут лъпысинун Силуанамлъю, Тимофеймлъю, хўаңалъю: «А̄ңӷунӷитуқлъю», «Нака̄ӷунӷитуқлъю»; иўырңа лъңани қӯнпың «А̄ңӷӯқ». ²⁰Лъңаңӯқ «Аңылъық» тамаҳӣтнун Кияӷныӷым акықусӣтнун. Тама̄кын апалъюқлъюку хўаңкута «Аминақукут» лъңакун усюқнымтыху Кияӷнық. ²¹Кияӷныӷым айыпсюгиҳсяӷӣлъю, малигулъюта лъпысинун Христосыкун; Кияӷныӷым лъңан катам а̄фтӣлъю; ²²налъюнӣӷӣлъю лъңанун пиңулюта, тӯна̄клъю Таӷныӷагни илюмнъун налъяңӣся̄люкык тамаҳа̄нун акықусяқыхкаминун хўаңкунъун.

²³Туқлъюӷақа Кияӷнық лӣсимакистыңулюку қаюҳлъяк лӣсимакыхкаңа қа̄мна илюка! Коринфысюгунӷитуңа сыӷлылӣҳқыснаюкамси. ²⁴Иглыӷунъақуткыңъунӷитаҳпут ухпықилъыҳси; қыпҳалгусиӷьюгамси қуямасқылъюси, қаюҳлъяк аӷулӣтуси ухпықилъыҳпысигун.

¹Та̄ўа умьюгахка ата̄сӣҳсима̄хка алъя лъпысинун пикума қуянӷитысяҳқа̄фқа̄фси пиналюси. ²Қаюҳлъяк қуянӷитыстыкумси китумңам хўаңа қақаюхтыслъықаңа? Алъя китум пина̄нӷитаңа иўырңақун лъпыси қуянӷитыстыкама. ³Тама̄кын апалъюқлъюку письмокақамси қаюҳлъяк лъпысинун пиюнӷилңӯңа қуянӷитыснаюкафсиңа, лъпыси қуянӷитыснаюкафсиңа, лъпыси қуястистымни. Ипапиҳқуткыңъўа̄қа уна, хўаңа қуяңанымни та̄ўа лъпысилъю қамахлъюси қуяңа̄қуси. ⁴Письмока̄гуңа лъпысинун ынңа̄талъ а̄ңлюку қивӷулъылиӷлюңа қамагун илюмкун, қиямаӷма алъя қуянӷитыстыфқа̄фси пиналюси та̄ўаңинақ лӣгикысқылъюку пиниқылъыҳлъяка лъпысинун.

⁵Та̄на ю̄к сыӷлыҳқылӷӣ таўани, сыӷлыҳқынӷитуқ хўаңамнун. Йыӷлыги лъпысинун сыӷлыҳқыңъӯқ иўырңа нака̄н тамаҳаҳпысинун. Унӣӷмиҳсюнӷитақа сямың пилъымкун. ⁶Таўатыңинақ аӷью̄ӷилъыҳси итагнаҳтуқ. ⁷Ма̄тын сыӷывулъюкуңʼңам кайымитыху ўата ӣлъқынъаюкан рыпалъ ӣлъқаюхлъягнаюкан. ⁸Манигӯтутақа лъпысинун лӣгикыстысқылъюку ипапыста̄қ пиниқнилюку лъпысинун. ⁹Та̄на апалъюқлъюку письмокақамси: лӣсимакналюку қа̄ткутңўа̄ӷыстык сямун тамаҳа̄нун. ¹⁰Кина сыӷывунъыҳписигу сямың лъпысинун пилъҳаның хўаңалъю сыӷывутақақа. Сяңўа̄ алңунак сыӷывусяҳқақ сыӷывусюгақақа лъпыси апалъюглюси Христос таўантыпихлъыҳӣстун, ¹¹Туӷныӷа̄м а̄ҳқутақнаюкаңилъю қаюҳлъяк лӣсимакыхкыфут сяңутаңа ята̄ҳқыхка̄.

Павелым Нулъқавӣҳтылъҳа Троадами

¹²Ка̄сялӷӣңа Троадамун уңипақналюку Пинилӷӣ Уңипа̄ Христосым, Атанӷым пилъыҳқаңыстыңъўа̄ӷумакаңаңа. ¹³Иўырңа пыңыхлъяка̄гуңа қаюҳлъяк ухпықа̄лгутка Тит авӣлңуқ тама̄ни. Ынка̄м унилъюки аӷуляқуңа Македониямун.

Кая̄лъқӣлъық Христосыкун

¹⁴Иўырңа игамсиқанаҳалык Кияӷнық! Ӣўлың иглыӷутңўӣлъю каялъқӣңалъыҳқун Христосыкун. Кияӷныӷым хўаңкутхун миңитыстыңъўа̄ лӣсималъыни нани алңунак катам нықнилӷӣм тыпыңлъя̄сим тыпаңан миңитылъҳатун. ¹⁵Қаюҳлъяк хўаңкута тыпкыхтастун нықниҳся̄систун аюқукут Христосым аҳқуткыхка̄тун Кияӷныӷмун. Тыпывут миңитңӯқ югуликанунлъю, ифлъяканунлъю. ¹⁶Тама̄кунун ифлъяканун тыпкӣлъю туқулъҳым туқутикаюгым; иўырңа югуликанун тыпка̄ уңувалъыңыстикаюгым. Кинаңам қыпҳаӷьяҳқа̄ўа таўатылңуӷмың қыпҳақамың? ¹⁷Угляпихлъыҳӣстун кинкустун аюқынӷитукут сялин қыпҳаӷьяҳқа̄нӷилңуӷыстун тама̄кын қыпҳақамың. Пинилӷӣт уңипат пӣқӣт иляңистун қыпҳақастун аюқнилюки алъхыӷутусиҳқат кияҳта̄ӷусиҳқамун. Иўырңа хўаңкута ата̄сӣӷмылъюта ипапиҳқылъюта қыпҳаӷақукут; а̄пҳақапут уңипат Кияӷныӷым писқылъҳатун, каяхтылъҳатун уңипаҳтыңулюталъю, қыпҳаҳтыңулюталъю Христосымун.

Қыпҳаҳтыңи Нутаӷам Акықусям

¹Хўаңкута усюқыся̄юхнақлъя̄таӷыста̄ хўаңкунъың катам? Налиӷмың иляңистун аклъюкиңуста̄ посланиямың а̄пҳысқылъюта лъпысинун, налиӷмың лъпысиның? ²Лъпыси, лъпыси катам хўаңкута письмокамси, игақңа̄си илюмтыхун тамаңанун лӣсимакысқылъюсилъю атиҳтӣсқылъюси. ³Хўатыҳлъюўа̄қ посланияңӯси Христосымың пикат хўаңкунъун туюқӣ. Письмоткыхка̄нӷитуси чернилакун налиӷмың лъӣвнықыхтатхун уйӷахтыхун. Письмоткыхка̄гуси югыт илюңитхун Таӷныӷахкынкун уңувалӷӣм Кияӷныӷым.

⁴Таўатын пӣкут қаюҳлъяк ныӷьюлъылгӯкут Кияӷныӷми Христосыкун. ⁵Хўаңкунъың пикнина̄нӷитаҳпут қыпҳаӷьяқлъыгунилюку та̄на қыпҳақақ. Кияӷныӷым пияқлъыгуҳтыстақӣлъю қыпҳақамун. ⁶Лъңан қыпҳаӷьяқлъыгуҳтыстӣлъю нутаӷамун акықусямун. Та̄на нутаӷақ акықусяқ игақңалӷӣңунӷитуқ лӣлиҳтӯсяқ, иўырңа Таӷныӷагның аюқуқ. Игақңалӷӣм Лӣлиҳтӯсям тагита̄ туқулъық, иўырңа Таӷныӷам тӯна̄ уңувалъық. ⁷Лӣлиҳтӯсят игақыхка̄гут уйӷахтыхун, ынка̄м Кияӷныӷым ниӷуҳқылъҳа алӣқа̄гуқ Лӣлиҳтӯсят тӯнақңата. Моисейем хина̄ кӯкхутка̄гуқ та̄хкын ниӷуҳқылъыӷмың, қайўа ӷывыӷңа̄н Израилыӷмӣт ысҳаҳпагниңитка̄т хина̄. Лӣлиҳтӯсят туқустияҳқа̄гут қаюҳлъяк югыт қа̄ткынӷилъкаңит. Лӣлиҳтӯсят ниӷуҳқыстиҳлъягумаката, ⁸натынми аңка̄н қыпҳалъҳа Кияӷныӷым Таӷныӷахкынка ниӷуҳқыстӣӷатаӷаҳлъықа! ⁹Лӣлиҳтӯсяқ нанқихтияҳқа̄кан югмың аӷью̄ӷьяҳқа̄люки ниӷуҳқыңъаяҳтуқ; анахутылъҳинъилютың югыт пилӷӣт натынми аңка̄н ниӷуҳқыңъалъыҳтулъықат! ¹⁰Таўатын пиңӯкут қаюҳлъяк ниӷугатаӷалӷӣңуҳтуқ ниӷуҳқылъық ма̄тын, та̄на ниӷуҳқыңъаялӷӣ сивунӷани авӣӷусима̄қ. ¹¹Ниӷуҳқылъылгуяқан таўатын мулюӷра̄камың, натынми аңка̄н ниӷуҳқылъылгулъықа мулюҳлъягьяҳқамың қӯнпырухлъяк!

¹²Та̄на сиӷимакутымнъың тытугигатңўа̄ҳтукут. ¹³Моисейитун аюқынӷитукут, хинани ся̄путиқа̄ ынка̄м Израилыӷмӣт ысҳа̄маңита̄т ниӷухлъяк авӣӷулъҳӣ. ¹⁴Умьюгӣт лӣгикыпагниңӣтка̄гут, хўавымун кынляңа умьюгӣт ся̄пңа̄т та̄хкын ата̄симың ся̄путамың, атиҳтуныӷмыхтыки ныӷиҳтат акықусят. Та̄на ся̄путақ иқисяҳқа̄гуқ Христосыңинаҳаҳқун. ¹⁵Талўа аӷныӷми хўани, атиҳтуныӷмыхтыки Лӣлиҳтӯсят Моисейемун тӯныхка̄т, умьюгӣт ся̄путамың ся̄пңа̄қут. ¹⁶Иўырңа ю̄к қӣвныӷмини Атаныӷмун ся̄пута̄ иқитақуқ. ¹⁷Ма̄тын Атанық Таӷныӷа̄лӷӣ, кина алңунак Атанӷым Таӷныӷахкының пилгукуми, итымңалъылгӯқ. ¹⁸Қамахтыңъўа̄ӷлюта ся̄путаңунаки хинапут ысҳаҳлъықаҳпут ниӷуҳқылъҳа Атанӷым. Та̄на ата̄сиқ ниӷуҳқылъық тагилӷӣ Атаныӷмың Таӷныӷа̄гуқ, алъяңуҳтӣлъю лъңасюгниҳтысқылъюта а̄ңатаӷаӷлюку ниӷуҳқылъыӷмың.

Югым Кая̄тылъҳа Кияӷныӷымлъю Аҳтуӷьяҳқа̄нӷилъҳа

¹Ынка̄м Кияӷныӷым наңлъыхталъыӷмикун қыпҳақалитӣлъю хўакын қыпҳаӷьяҳқамың. Тама̄кын апалъюқлъюку ӣлъқаюгигатукут. ²Иҳсяягуткақапут аксяқыхкатлъю, кайңуналӷӣтлъю. Пӯҳсигатапут югыт, алъяңуҳсигатапутлъю Кияӷныӷым акузитаңи. Хўатыҳлъюўа̄қлъю апыҳтӯсяқақапут Кияӷныӷым ипапилъҳи, ынка̄ңам югыт лӣлъықӣлъю натылңӯтфут ысҳа̄манӷани Кияӷныӷым. ³Уңипақыхкапут Пинилӷӣт Уңипат ся̄пңаката, ся̄пңа̄т ифлъяяҳқаҳӣнаӷнун. ⁴Лъңита ухпықигата̄т уңипаҳпут қаюҳлъяк Туӷныӷа̄м, ӯм нунам Кияӷныӷын, ая̄стыкақӣ умьюгӣт. Ысҳанӷитыстақа̄ ниӷуга Пинилӷӣм Уңипам ниӷуҳқылъҳаның Христосымың аюқылӷӣ. Христос Кияӷныҳтун аюқуқ. ⁵Хўаңкунъың катам уңипақңунӷитукут, итупилъ уңипақңўа̄ҳпут Иисус Христос Атанӷунилюку. Қыпҳаҳтыкаҳпысикут Иисус апалъюқлъюку. ⁶Кияӷныӷӯқ хўатын пикақ: «Йықай ниӷук кӯкхулъи мамлылъыӷмың!» Лъңаңӯқ ата̄сиқ Кияӷнық кӯкхутыстилӷӣ ниӷугмың илюмнъун. Та̄хун ниӷухкун лӣтаҳпут ниӷуҳқылъҳа Кияӷныӷым, кӯкхулъҳӣ Иисус Христосым хина̄ның.

⁷Иўырңа хўаңкунъун Кияӷныӷым канаҳтыкақа̄ та̄на ниӷук кӯкхутысқылъюку илюмнъи. Хўаңкута қикустун қантаҳқастун аюқукут, ынка̄м тамаңан лӣгикылъықа̄т аҳтуӷьяҳқа̄нӷитыҳлъяк Кияӷныҳта̄нилюку, хўаңкунъың пиңунӷинъилюку. ⁸Сыӷлылӣлъыңақукут алъя̄ҳӣнатун иўырңа кая̄лъқигатӣлъю. Иляңакун кукшагьюлъыңақукут иўырңа сиӷималъҳӣсигатукут. ⁹Амьюқыта̄ткылъыңақукут, иўырңа Кияӷныӷым унисигатӣлъю; ақниҳқўа̄лъыңақукут, иўырңа туқуңигатукут. ¹⁰Ӣўлың туқулъҳа Иисусым югусимнъитуқ, ысҳӣсқылъюку уңувалъҳа Иисусым югусимнъи. ¹¹Уңуваңулюта ӣўлың якуӷналъҳанитукут туқулъҳым апалъюқлъюку Иисус, ысҳӣсқылъюку Иисусым уңувалъҳа югусимнъи туқукаюгни. ¹²Ынка̄м хўаңкута якуӷналъҳанитукут туқулъҳым қаюҳлъяк қыпҳа̄тңукыфут Кияӷнық. Иўырңа қыпҳалъымта кынлыңилңуӷмың уңувалъыңыстыңъўӣси.

¹³Игақңа̄қ Акузитни Игақыхкани: «Ухпықақа Кияӷнық ынка̄м акузиткақақа». Ухпықилъыҳпут таўатытуқ игақыстытун. Хўаңкуталъю ухпықаҳпут Кияӷнық ынка̄м акузиткақаҳпут. ¹⁴Лӣсимакаҳпут Кияӷныӷым уңуваҳтыкақа̄ Атанық Иисус. Хўаңкуталъю уңуваҳлъықӯкут Иисусыкун. Та̄хкын агля̄лъықӣнкут қырңа̄мта лъпысилъю таўантылъыӷминун. ¹⁵Қамахлъютың тама̄кут апыӷӣқат хўаңкунъун лъпысинун аюқут. Кияӷныӷым наңлъыхталъҳан нуляслъықӣ югыт ухпықилӷӣт Христосыкун. Ынка̄м игамсиқаюлъыҳлъяк Кияӷныӷмун нулялъықуқ, қӯлвалъыңыҳлъяхлъықуқлъю.

Кияҳта̄лъық Ухпықилъыҳқун

¹⁶Ынка̄м ӣлъқаюгигатукут. Қайўа югусипут кая̄ликыстаӷьяӷңа̄та, таӷныӷапут нутаҳтыңъӯт аҳутаңа тамаҳа̄н. ¹⁷Сыӷлылӣлъыпут сясқуҳа̄гут мулюяҳқа̄нӷитут. Иўырңа тама̄кут ята̄ҳқутңўӣлъю алъхыҳтысқылъюку Кияӷныӷмың кынлыңилңуқ қуялъыҳлъяк. Ынка̄м сыӷлылӣлъыпут аваңилңуӷыстун аюқут. ¹⁸Сюмыҳтаӷа̄ткумаңинӣгатапут сыӷлылӣлъыпут. Итупилъ сюмыҳтаӷа̄ткақапут ысҳаҳпагниңилъкыпут. Қантаӷақун сыӷлылӣлъыпут кынлытҳӯлъықут, иўырңа қуялъыҳпут ысҳӣгалъкыфут қӯнпыкаҳқа̄гуқ.

¹Хўани нунами укут югусипут кияҳфипут хижинастун аюқут. Лӣсимакаҳпут югусипут туқуката Кияӷнық мыңтыӷалгӯқ қилягми хўаңкунъун кияҳфихкамың. Кияӷныӷым улимакақа̄ мыңтыӷақ, югым улима̄қынӷита̄. Та̄на мыңтыӷақ қӯнпыкаҳқа̄гуқ. ²Ипа ңилъыхтукут нунамытңулюта қаюҳлъяк кияҳсюпихлъыҳӣкут югусиӷраӷамнъи қилягми. ³А̄ткастун а̄лъықаҳпут тама̄кут югусиӷраӷа̄т амсикаӷмынъыӷинъалюта. ⁴Югусипут хижинастун аюқут. Хижинамылъюта ңилъыхтақукутлъю, сыӷлылӣҳтукутлъю қаюҳлъяк матаҳсюгигалъкыпут. Итупилъ симиӷьюгақапут югусинун туқуңигалңуӷнун. ⁵Кияӷныӷым ята̄ҳқуткақӣлъю хўавык алъяңуҳтылъыӷмун. Хўаңкунъунлъю тӯныхкақа̄к Таӷныӷагни лӣсимакысқылъюку алъяңуҳтылъыҳқаҳпут ипапыста̄қ апыӷӣҳлъықнилюку.

⁶Ынка̄м ӣўлың илюта̄қукут. Лӣсимакаҳпут нымытңулюта югусимнъи, Атаныӷмысигатукут. ⁷Кияҳтыңъӯкут ухпықилъыҳқун, нака̄н ысҳақаюмтыхун. ⁸Ынка̄м илюта̄қукут. Унисюгақапут югусипут нымынъалюта Атаныӷми. ⁹Нымысяӷңа̄мта налиӷмың нымынъыӷитыӷңа̄мта, ыфқуҳсюгақаҳпут Атанық. ¹⁰Қамахлъюта ныкывыпыста̄ӷьяҳқа̄гукут Христосым сивуңакун нанқихтысқылъюта. Ата̄сикаҳта̄мта алъхыӷулъықукут пинилӷӣмың налиӷмың сыӷлыӷмың апыӷӣӷутылъымтыстун югусимтыхун.

¹¹Ынка̄ңам аликақаҳпут Атанық, тама̄кын апалъюқлъюку ухпыҳтыснақуткақапут югыт Христосыкун. Кияӷныӷым лӣсимакӣлъю натылңӯтфут югни, сюнаңуқ лъпысилъю лӣсимакитыкут таўатылъюта. ¹²Лъпысинун тугуклъиҳтыснақуткыңъунӷитукут алъямың. Итупилъ уңипа̄тақамси хўаңкунъың лъпысинун қука̄югуткысқылъюта. Та̄хкын апыӷьяқлъыгуҳлъықаҳпысикут қука̄югуткилӷӣнун югым қа̄стулңинаҳа̄ның. Ўа̄кигата̄т сяңутаңа югым илюмикыхка̄. ¹³Налъютуйиқңукумта, Кияӷныӷмун аюқуқ, иўырңа налъютуйиқңунӷилъкумта, лъпысинун аюқуқ. ¹⁴Христосым иглыӷутңўӣлъю пиниқылъыӷмикун. Лӣсимакңўа̄ӷаҳпут югым ата̄сим туқуматкыхкақа̄ қамахтыңъўа̄ӷлюку ю̄к. Тама̄кын апалъюқлъюку қамахтыңъўа̄ӷлютың югыт туқука̄гут. ¹⁵Христосым туқуматкыхкақӣ қамахтыңъўа̄ӷлюки югыт. Ынка̄м кияҳлъыҳӣт кияҳсяқлъыгулъықут лъңанун, нака̄н лъмыхнун катам. Туқулюни уңуваҳтыка̄гуқ лъңит апалъюқлъюки.

Илякумта̄ӷулъық Кияӷныӷмун Христосыкун

¹⁶Хўакын кынлыклъюку кина алңунак сюмыҳтаӷа̄ткынъанӣма̄ҳпут нунам юган сюмыҳтаӷа̄ткылъҳатун. Қайўа ата̄симың сюмыҳтаӷа̄ткыхкақаҳпут Христос нунам юган пилъҳатун, таўатын сюмыҳтаӷа̄ткынъанӣма̄ҳпут. ¹⁷Кина алңунак Христосым пилӣнъыӷминигу нутаӷаҳлъюгуҳтақуқ. Кияҳта̄лъылъюга авӣӷутақуқ, иўырңа нутаӷаҳлъюк кияҳта̄лъҳа пӣнлиӷақуқ. ¹⁸Кияӷныӷӯқ таўатын пикақ. Лъңан илялӣӷутыстыкақӣлъю лъңанун Христосыкун. Қыпҳақалитӣлъюлъю, иляңилъю югыт илялӣӷутысқылъюки лъңанун. ¹⁹Христосыкун Кияӷныӷым илялӣӷўӣ қамахтыңъўа̄ӷлюки югыт, умьюгаӷмикыхпынаки сыӷлыҳқылъҳит. Ынка̄ңам уңипаҳқалиткақӣлъю а̄пҳысқылъюки натын лъңанун илялӣӷутаңи лъңит. ²⁰Кияӷныӷым каяхтыкақӣлъю уңипаҳтыңулюта Христосымун, ынка̄м хўаңкутхун тагисқылъюси лъңанун. Акузистыңӯкут Христосымун кайымилӷӣт илялӣӷутысқылъюси Кияӷныӷмун. ²¹Христос сыӷлыҳқумаңитңўа̄ҳтуқ, иўырңа сыӷлыҳқылъымнъун Кияӷныӷым аӷью̄қақа̄ сыӷлыҳқыхка̄люку. Ынка̄м Христосыкун Кияӷныӷым ылъқуӷутңаңлъяқақӣлъю.

¹Қыпҳалгуткутутымнъың Кияӷнықлъю, та̄ўа кайымамси Кияӷныӷым наңлъыхталъҳа тугуклъиҳпына̄н тымңитхўаңулюку. ²Кияӷнық пика̄гуқ:

«Пилъыҳқаҳлъюўа̄ӷми нагақуқақамкын,

аӷныӷани югулилъҳым каюсиқақамкын».

Уңипа̄тамси, ма̄тыңӯқ Кияӷныӷым пилъыҳқаҳлъюўа̄ӷа; нагатык, ма̄тыңӯқ аӷныӷа югулиӷилъҳым! ³Кияҳта̄лъымтыхун на̄хсяӷаңлъӣгатапут югыт, сыӷлықӯфқа̄н писқылъюку қыпҳақаҳпут Атаныӷмун. ⁴Иўырңа сялъымтыхун тамаҳа̄кун лӣгикыстақукут югнун Кияӷныӷмун қыпҳаҳтыкнилюта. Тама̄кын апалъюқлъюку нуқытутималъымтыхун сюфлъюҳтаӷақапут сыӷлылӣлъҳыт, пияқлъӣлъҳыт, икфиқылъҳыт. ⁵Қывутқуқа̄гукут, анусимиңлъяқа̄гукут, угля̄тылъыңыхка̄гукутлъю. Уӷлыӷӣқа̄гукут, қавалъқумаңитукут, игатақа̄гукутлъю. ⁶Лӣгикыстыңъӯкутлъю Кияӷныӷмун қыпҳақаҳпут пинитун кияҳта̄лъымтыхун, лӣсимакилъымтыхун, нуқытутилъымтыхун, наңлъыхталъымтыхун, пиниқипилъымтыхун, Аглыӷналӷӣгныкун Таӷныӷагныкун. ⁷Қыпҳа̄тңўа̄ҳпут Кияӷнық уңипақылъымтыхун ипапилъық. Атуқақаҳпут Кияӷныӷым аҳтуӷьяҳқа̄нӷилъҳа, ылъқуӷутңалъықлъю гӯтуткылъюку аӷынқигныӷымлъю, сяӷумигныӷымлъю. ⁸Қӯлвалъыңақукутлъю, укаваҳлъыңақукутлъю; сыӷлықӯҳсиӷақукутлъю, усюқылъыңақукутлъю. Иқлъыңалӷӣңунӣқӣлъю, иўырңа акузӣқукут ипапигмың. ⁹Югыт налъюкниқӣтлъю, нақамлъю лӣсимаклъюта; угляӷңа̄н туқувзиӷақукут, иўырңа паниның уңува̄кут. Аӷью̄ӷьяӷңа̄мталъю, туқусигатӣнкутлъю. ¹⁰Қивӷуңуӷңа̄мта, нақамлъю қуяңаҳлъяўа̄қукут; аклъюмаӷңа̄мта, нақамлъю аклъюңиӷистақапут югыт; авақшахӣтыӷңа̄мта, нақамлъю пилўа̄қукут сямың тамаҳа̄ның.

¹¹Ухпықа̄лгутымнъи, Коринфыӷмӣни, ипапиҳқылъюси аюқамси. Уңипа̄тамси пиниқыпихтамси. ¹²Нуқныӷусимаңитамси пиниқылъымнъың, иўырңа лъпысиңӯт нуқныӷутикат пиниқилъыҳпысиның хўаңкунъун. ¹³Ма̄тын алыҳқуӷамси авақутақыпихлъыҳӣстун, пиниқаҳтикут катам хўаңкута пиниқылъымтыстун лъпыси.

Кылыңася̄лъық Ухпықа̄нӷилңӯт Аюқнӣҳқилъҳитның

¹⁴Иңлюкыхпынаки ухпықа̄нӷилңӯт. Ылъқуӷутңанӷилңуқлъю, сыӷлыӷықлъю иңлюкутыпагниңитук. Ниӷуклъю мамлыклъю қырңаӷмытыпагниңитук. ¹⁵Христосым итагнақсяҳқақынӷитңўа̄ӷа̄ Туӷныӷақ. Ухпықат пиюкылъҳит алъяңӯт ухпықа̄нӷилңуӷның. ¹⁶Кияӷныңлъяқат манигуӷьяҳқа̄нӷитут Кияӷныӷым Храмыңани. Қаюҳлъяк хўаңкута Храмыкӣлъю уңувалӷӣм Кияӷныӷым, Кияӷнық пика̄лӷӣ:

«Лъңитнилъықуңалъю, акулңитнилъықуңалъю; Кияӷнықылъықа̄тңа, лъңитлъю юкылъықанка».

¹⁷«Тама̄кын апалъюқлъюку Атанық пика̄лӷӣ:

Унитыки тама̄кут югыт, а̄фтык лъңитның.

Ся̄фтыхпынаки укмаңинъыӷилңӯт;

ынка̄м тугуклъиҳлъықамси.

¹⁸Атакылъықаҳпысиңа,

ынка̄м лъпыси иӷнықылъықамсилъю, паникылъықамсилъю»,

пӣқ Атанық Аҳтуӷьяҳқаҳа̄нӷилңуқ.

¹Пиниқыхкамни илякумта̄мни, Кияӷнық тама̄куның акықусяңлъяқа̄таңаның хўаңкунъун, укмаңиҳся̄лътыки алъя̄ҳӣна̄т нукыхнӣ югусимталъю, таӷныӷамталъю. Пылюңиҳтыңъўа̄ӷылъта қаюҳлъяк аликаҳпут Кияӷнық.

Павелым Қуялъҳа

²Илялӣқаҳқут илюхпысигун. Кина алңунак анагңалӷӣмың пиңигатаҳпут, ухпықилъҳа на̄фқумаңитаҳпут, талўа пӯҳнықхӯсимаңитаҳпут. ³Уңипа̄тңунӷитамси тама̄куның авуткынъалюси. Сивунӷани уңипа̄ткақамси пиниқыпихнилюси, ынка̄м кияҳтылгусиҳлъықамси налиӷмың туқулгусиҳлъықамси. ⁴Ныӷьюкыҳлъяглюси аюқамси, қука̄югуткыпихтамси. Кайымыҳлъягақаҳпысиңа. Ынка̄м сыӷлылӣлъыҳлъямнъи паниның тывуӷа̄қуңа қуялъыӷмың.

⁵Ка̄тақңамта Македониямун, мыӷна̄липагниңитка̄гукут. Сыӷлылӣқа̄гукут тамаңани, югыт а̄ҳтӣра̄қагӯтлъю, тыхылъҳӣқа̄гукутлъю. ⁶Иўырңа Кияӷныӷым илютуҳсяӷақӣ ӣлъқыңъалӷӣт, ынка̄м илютуҳсяӷӣлъю тагистылъыӷмикун Тит хўаңкунъун. ⁷Илютуҳтыка̄гукут тагӣқңан Тит, иўырңа илютуҳлъыңатаӷаҳтукут уңипа̄силъю лъпысинун илютуҳся̄манилюни. Уңипа̄тӣлъю лъпысинун ысҳаӷьюпихнилюңа, қивӷукнилюңа сыӷлылӣҳқылъыҳпысиның, каюсиӷьюпихнилюңалъю. Таўатын пилъыҳпыси ўанлыги қуястыҳлъяга̄ңа.

⁸Қайўа посланиямкун қивӷустыӷңа̄мси, авутыҳқуткыңъунӷитанка посланиянка. Сивукун авутыҳқысяҳтуңа қаюҳлъяк посланияма қивӷустаҳтыкаңиси. ⁹Қуяңунӷитуңа посланиямнун қивӷусиманилюси. Иўырңа қуяҳлъягӯңа қивӷулъыҳпыси алъяңуҳтыстыкақыхкаңи кияҳта̄лъыси. Қивӷулъыҳси Кияӷныӷым атуқыхкақа̄ лъпысинун, ынка̄м натын алңунак хўаңкута ақниҳтылъҳитамси. ¹⁰Кияӷныӷым атуқақа̄ қивӷулъық югнун авутыҳқылъюки сыӷлыҳқылъҳитның, югулилъыңысқылъюки. Китум алңунак авутыҳқуткынъа̄нӷита̄ югулилъық. Иўырңа қивӷулъық нунамың пи туқустӣқуқ. ¹¹Ысҳақаҳтыхуқун сяңутаңа Кияӷныӷым апыӷӣқа̄ қивӷулъыҳпысигун. Қивӷулъыҳпыси ыфқуӷутысюхлъягӣси Кияӷныӷмун. Ынңа̄талъ ипапиҳқынъақуткыхка̄яҳтуси анахутылъҳинъилюси. Угумиягуткақаҳси анахутылъық, алиңрӯқа̄гусилъю. Ысҳаӷьюпихтыкақаҳпысиңа, пинитун пика̄гуси, аӷью̄қақаҳсилъю анахуткақ. Таўатын пилъыҳпысигун ипапиҳқыхка̄гуси апалъӣнъилюси.

¹²Ынка̄м қайўа таўатын письмояӷңа̄мси, апалъюқңунӷитақа анахуткақ, налиӷмың таўавык сыӷлытун пика̄нун. Итупилъ письмокақамси лӣгикңўа̄ӷысқылъюси Кияӷныӷым ысҳа̄манӷани тӯнңўа̄ӷлюси хўаңкунъун аюқылӷӣси. ¹³Тама̄кын апалъюқлъюку илютуҳтыңъўа̄кут.

Илютуҳтыңъинаҳпына̄мта, иўырңа қуя̄ӷатаӷаҳтукут ысҳаӷлюку Титым қуямалъҳа. Қамахлъюси сюмыӷьялиңӣтысима̄ҳси. ¹⁴Қанаткыхкақамси Титымун ыфқуқнилюси. Лъпысинун пӣқңами лӣткақӣ ипаңутаңи сямың пилъҳынка лъпысиның аюқылӷӣт, ынка̄м кайңуягутылъҳитанка қанаткилъҳынка. Ӣўлың ипапиҳқылъюта алыҳқуӷақамси. Таўатыҳпигақ ипаңӯт қанаткилъыҳпут Титымун. ¹⁵Ынка̄м Титым ўанлыги пиниқа̄ҳтӣси сюмыҳтаӷа̄ткынъыӷминигу қа̄ткутңалъыҳси лъңанун. Упуӷаткақыхкысилъю алиңылъылиӷлюси, уңылъыхтылъылиӷлюси. ¹⁶Қуяҳлъягӯңа қаюҳлъяк ныӷьюкыҳлъяглюси аюқамси сямун тамаҳа̄нун!

Ухпықат Тӯнилъҳат

¹Ухпықа̄лгутымни, хўаңкута лӣсимакысюўамси Кияӷныӷым наңлъыхталъҳаның ухпықанун юӷаӷвигитни Македониям. ²Икфиқлъӣҳтылъыҳлъягита нанӷӣҳсяӷалъыңыстыҳлъякақӣт. Қайўа аклъюмаҳлъягьяӷңа̄ӷмың, паниның қуямаҳлъяка̄гут рыпалъ иӷлыхпынатың тӯника̄гут каюсиӷналюки иляңи ухпықат. ³Уңипа̄тамси тӯника̄гут тӯньяҳқаҳтуталмыгыстун, талўа тӯнӣӷатаӷақа̄гут. Таўатын пика̄гут қаюҳлъяк лъңит тӯниюлӷӣт. Китум алңунак писқумаңитӣ. ⁴Талўа а̄пуқӯтыҳлъяка̄гут тӯнилгусиӷиналютың Кияӷныӷым югитнун. ⁵Тӯнилъҳат угляқа̄гуқ сиӷимакылъымнъың. Сивуклъютың лъңитның пыхтут Атаныӷмун, та̄хкын хўаңкунъун пиюкылъҳакун Кияӷныӷым. ⁶Тит лъпысинитақңами пӣнлиӷика̄гуқ қырңуҳтилъыҳпысиның манимың. Ынка̄м кайымаҳпут каюсӣсяҳтӣсқылъюси апыӷӣӷысқылъюку наңлъыкусяҳси тунусяқ. ⁷Сялъыҳпысигун тамаҳа̄кун пинитун пӣқуси: ухпықилъыҳпысигун, акузилъыҳпысигун, лӣсималъыҳпысигун, каюсиӷиюкысталъыҳпысигун, пиниқилъыҳпысигунлъю хўаңкунъун. Ма̄тымилъю пинитун пӣқитык тӯнилъыҳпысигун.

⁸Қылӷунӷитамси тӯнисқылъюси, иўырңа уңипа̄тңўа̄мси натын иляңит тӯниматаңи. Ынка̄м тӯнилъыҳпыси ипапиҳқылъықа̄ пиниқилъыҳси ипаңутаңа. ⁹Лӣсимакаҳси пиниқиңалъыҳлъяга Атанымта Иисус Христосым. Аклъюңиҳлъягмини таўалъӣма лъңаның катам аклъюма̄ҳтыка̄гуқ лъпыси апалъюқлъюси. Таўатын пика̄гуқ аклъюңиӷисқықаҳлъюси аклъюмалъыӷмикун.

¹⁰Аўатаңани лъпыси қырңуҳтиюхўа̄қа̄гуси манимың, тӯника̄гусилъю қаюҳлъяк тӯниюлӷӣси. Сюмымни хўатылъюку пияқуфсигу, итагнаӷнаяҳтуси, ¹¹нагныӷусяқуфсигу пӣнлиқаҳси! Сягиқңака̄гуси қырңуҳтиюхўа̄ӷақңафси манимың. Ынка̄м сягиқынқихлъюси апыӷӣҳтыху қырңуҳтыкаҳси. Тӯнитык тӯнилъыҳқаҳпысистун. ¹²Тӯниюпихтыкуфси Кияӷныӷым тугуклъиҳлъықӣ тунусяси. Пиюкақа̄ ю̄к тӯнисқылъюку тӯньяҳқалгукан, иўырңа аваңискан тӯнинӷисяӷңа̄н.

¹³Нӯқшахтистысюгунӷитамси иляси нӯқшахтинӷисималюки. ¹⁴Ма̄тын лъилыҳлъяглюси аюқуси ынка̄м каюсиӷьяҳқақаси тама̄кут аклъюлӷӣт. Иўырңа аклъюкуфси та̄ўа лъңита каюсиҳлъықӣси. Таўатын пикуфси каюсӣтулъықуси ынка̄м атуным пилъықуси. ¹⁵Катам Акузитыт Игақыхкат игақылъҳистун: «Ю̄к сяӷнаҳлъякақ сюйваҳсимаңитуқ, иўырңа ю̄к сяӷнапагумаңилңуқ аклъюна̄нӷитуқ».

Титымлъю Қыпҳалгутңи

¹⁶Игамсиқаюгвикақа Кияӷнық қаюҳлъяк Тит каюсиӷиюхтыстыҳлъякаңа лъпысиның катам хўаңкутыстун. ¹⁷Тит аңыҳқумака̄гуқ лъпысинун писқысямтыху. Лъпысинун пиюпихтыка̄гуқ, та̄на лъңан Пиюкылъқақа. ¹⁸Ухпықа̄лгутфут Титымун малигутыснақаҳпут. Қамахтыңъўа̄ӷлютың ухпықат қырңуӷуткаюгның юӷаӷвигни усюқыпихтақа̄т уңипақилъҳаның Пинилӷӣның Уңипаның. ¹⁹Та̄наңина̄хпына̄н, ухпықат накмикыхкақа̄т малигутысқылъюку хўаңкутхун, тӯнияҳтуқумта наңлъыкусямың тунусямың ухпықанун. Таўатын пиңӯкут усюқылъыңысқылъюку Атанық, югнунлъю лӣтысқылъюку каюсиӷиюлъыҳпут.

²⁰Пира̄мсиңӯкут китумун алңунак сыӷлықӯфқа̄мта писқылъюта натын афлъыңакылъыҳпут та̄на тунусяҳлъяк. ²¹Ынка̄м тама̄кын апалъюқлъюку атуқсюгақаҳпут Кияӷныӷми ылъқуӷутңалӷӣ, югнилъю ылъқуӷутңалӷӣ.

²²Титмунлъю малигутыснақаҳпут иляңа ухпықа̄лгутфут. Аўын ысҳаӷналюку натытуляңа пӣқаҳпут, пиялӷӣкут ӣўлың каюсиӷиюкыстаӷлюни аюқыфтуқ. Ўанлыги ма̄тын каюсиӷиюхлъягуҳтуқ қаюҳлъяк ныӷьюкыҳлъякаңиси. ²³Тит қыпҳалгуткақа, қыпҳалгусиӷақа̄ңа каюсӣнъалюси. Та̄куклъю ухпықа̄лгутык ухпықат юӷаӷвигнилңӯт каяхтыкақахкыт. Қӯлваҳлъяглюку Христос аюқа̄к. ²⁴Ынка̄м Коринфыӷмӣни, ысҳаҳтыстыху пиниқилъыҳси та̄кугнун югыгнун. Та̄хкын пиниқилъыҳпыси ипапиҳқыслъықӣт ухпықат юӷаӷвигнилңӯт сяңан қанаткылъымнъың лъпыси.

Каюсиӷилъық Ухпықа̄лгутнун

¹Письмоткынӷисяӷңа̄мкун аюқақа тунусяқ туюӷьяҳқаҳси Кияӷныӷым югитнун Иерусалимым. ²Лӣсимакамси каюсиӷиюглюси аюқуси ынка̄м қанаткақамси ухпықӣтнун Македониям. Хўатын пика̄гуңа: «Аўатаңани има ухпықа̄лгутыт Ахаиямылңӯт ята̄ҳқыхка̄гут тӯниналютың». Сягиқылъыҳпыси алъюлъюки ухпықат ма̄нлыңӯт тӯниюхтыстыкақӣтлъю. ³Иўырңа каяхнақанка иляңи ухпықа̄лгутыпут лъпысинун. Апалъюқақа қанаткилъқа лъпысиның тымңиңуфқа̄н писқылъюку. Ята̄ҳқысқысюгамси катам хўаңа писқылъымтун лъпыси, ⁴лю̄рақ Македонияӷмӣт иляңита малихнаюкаңатңа Коринфымун. Ысҳақумиси ята̄ҳқылъҳилъюси тунусяҳқаҳпысиның, та̄ўа хўаңкута кайңуся̄кылъықӣлъю, лъпысилъю кайңуюхлъықуси. ⁵Ынка̄м сюмыҳтаӷаҳтуңа сивумни каяхтыкыстаӷналюки иляңи ухпықа̄лгутыпут. Таўатын каюсӣлъықӣси ята̄ҳқысқылъюку акықусяқыхкаҳси тунусяқ. Та̄хкын ка̄скума тунусяҳси апыӷӣӷңалъықуқ, ынка̄м югыт лӣсимакылъықа̄т тӯниюлъыҳси, нака̄н қаюҳлъяк тӯнияҳқа̄тыхпысиның.

⁶Нықамиклъюку уна, ю̄к паляҳаӷмың пӣтутмың пӣтысиӷақуми, паляҳа̄н сяӷналъықуқ. Ю̄к угляӷлюку пӣтутмың пӣтысиӷақуми, угляӷлюку сяӷналъықуқ. ⁷Тамаҳаҳпыси сюмыҳтаӷа̄ткитыху тӯнилъыҳқаҳтуталыси. Иӷлыгумаҳпыси тӯнихпынаси налиӷмың тӯнияҳқа̄тыхпысиның. Иўырңа қуякусиқлъюку тӯнӣқитык қаюҳлъяк Кияӷныӷым пиниқӣ таўатылңӯт тӯнистыт. ⁸Кияӷныӷым тӯньяқлъыгўӣси аклъюкыхкаҳпысиның қа̄йӷулъюку. Ынка̄м ӣўлың сямың алңунак пилгулъықуси, сӣпңа̄нлъю каюсӣтысқылъюки иляси. ⁹Акузитни Игақыхкани игақңа̄қ:

«Иӷлылъңунани тӯнӣқуқ аклъюмалӷӣнун;

пинитун пималъҳа нагныӷьяҳқа̄гуқ қӯнпың».

¹⁰Кияӷныӷӯқ тӯникаюк пӣтутмың пӣтысиӷаҳтымун, нықмыңлъю ныӷьяҳқамың. Тӯнылъықа̄ қамахлъюку пӣтун аклъюкыхкаҳси, нагуслъықӣлъю. Ынка̄ңам унатаҳлъяхлъықуси қаюҳлъяк иӷлыгилңӯси. ¹¹Сякун тамаҳа̄кун аклъюңиӷислъықӣси, наранңуна̄н тӯнисқылъюси сялъыӷми тамаҳа̄ни. Ынка̄м тӯнилъыҳпысигун хўаңкутхун углялӷӣм игамсиқаюгвикылъықа̄т Кияӷнық. ¹²Кияӷныӷым югита Иерусалимымылңӯт алъхыҳлъықӣт аклъюкыхкатың тунусяҳпысигун. Ынка̄м юлӷутыҳлъягыт игамсиқаюлъыӷмың тывуӷалъықут Кияӷныӷмун. ¹³Тӯньяҳқаҳпысигун ипапиҳқылъықуси ухпықиңанилюсилъю, қа̄ткутңанилюсилъю Пинилӷӣнун Уңипа̄нун Христосым. Тама̄кын апалъюқлъюку югыт усюқылъықа̄т Кияӷнық. Усюқылъықа̄тлъю иӷлылъңунаси тӯнилъыҳпысиның Иерусалимыӷмӣнунлъю, иляңитнунлъю. ¹⁴Ынка̄ңам пиниқыпихлъюси юӷа̄ткылъықӣси апалъюқлъюку пиниқылъыӷрухлъяк Кияӷныӷым тӯнңакаңа лъпысинун. ¹⁵Йықай игамсиқаюгвикылътыху Кияӷнық тунуся̄нун акузитыт апыҳпагниңилъкаңат.

Павелым А̄пқаңа Қыпҳақани

¹Иляңита юхпыси пӣқа̄тңа тытухтаӷнилюңа лъпысининъымни, иўырңа тытугиганъӣқа̄тңа лъпысининъыӷинъымни. Хўаңа Павел, хўаңамның катам, Христосым қусывыгңалъҳакунлъю, пиниқылъҳакунлъю, ²тытухтысныӷитаҳнакыфсиңа ля̄лиҳфикынқихтыкумси. Иўырңа тытугьяҳқақынӷилъкумки тама̄кут югыт пилӷӣт кияҳтыңъунилюңа нунам югыстун, ынңа̄талъ тытугна̄нӷитанка. ³Нунамытңуӷңа̄мта пилъюўӣгатукут нунам юган пилъюўалъҳистун. ⁴Гӯтутыт пилъюўа̄сипут нунам юган гӯтуткынӷитӣ. Гӯтутыпут Кияӷныӷым аҳтуӷьяҳқа̄нӷилъҳаның пилгӯт. На̄фқысяқлъыгўӣт айыпсюгилңӯт миңлъютыт аңуягым ныкыфқуқӣ югыт увитаңитхун. ⁵Та̄кутхун гӯтутытхун на̄фқақапут аңуягым иқлъыңӣ, сюмыӷныӷитлъю а̄ңа̄югныӷыт. Апыҳтуӷилъҳита амигиӷақӣт югыт лӣтылъыҳқӣтның Кияӷныӷмың. Катам пилъюўаҳтыт тугутылъҳистун анусимиңлъяӷьяҳқамың, хўаңкуталъю тугўа̄қапут қамахлъюки сюмыӷныӷыт қа̄ткутысқылъюки Христосымун. ⁶Христосымун қа̄ткутңъўа̄қуфси, та̄ўа аӷью̄ӷияҳқа̄ҳлъықукут қа̄ткунъыӷилңуӷнун.

⁷Нанқихтӣқуси ысҳалъҳӣнаҳпысигун. Христосымун пикыпыста̄ӷникуфси, нықамиклъюку хўаңкуталъю Христосым пикӣлъю, лъпысистун. ⁸Кайңукигатақа қанаткивлыӷапалъқа Атанӷым иглыӷутистыңуҳтыстыкаңаңа лъпысинун. Таўатын пика̄гуқ хўаңкунъун кайымысқылъюку ухпықилъыҳси, нака̄н на̄фқынъалюку. ⁹Сюмыҳтаӷаҳпынаси алиңыснақуткыңъунилюси посланиямкун. ¹⁰Иляңита пӣқӣт Павелым посланияңи сыӷлыҳлъягунилюки аҳся̄ӷмикаӷңанилюки, нақам хўаңкунъинъыӷмини, аҳся̄н аюқақуқ, акузийӣтақуқлъю! ¹¹Тама̄кут югыт таўатын пикат лӣгиклъитху сямың пилъыҳпут посланиятхун, тама̄куңӯт ата̄сит пияҳқапут лъңитнун пикумта.

¹²Иңлюнъақуткынъа̄нӷитукут тама̄кунун а̄ңа̄юхлъыҳӣнун. Сюмыҳтаӷаӷақут а̄ңнилютың қаюҳлъяк уңипа̄тутақылӷӣт а̄ңнилютың. Налъю̄ҳаӷмың! ¹³Қука̄югуткынъа̄нӷитаҳпут алңунак қыпҳақақ Кияӷныӷым каягусимаңилъкаңа хўаңкунъун. Иўырңа қука̄югуткыңъинаҳлъықаҳпут қыпҳақақ каягутка̄ хўаңкунъун. Лъпысилъю илятңа̄си қыпҳақамнъун. ¹⁴Сивулиҳпига̄гукут уңипақияҳтуқани лъпысинун Пинилӷӣның Уңипа̄мың Христосым. Ынка̄м алъпагигатаҳпут қыпҳақақ Кияӷныӷым каягутка̄ хўаңкунъун. ¹⁵Қука̄югуткылъықаҳпут та̄наңинақ қыпҳақақ пикаҳпут, нака̄н иляңита қыпҳақа̄т. Ухпылъыҳтуҳтыкуфси сиӷима̄кут каюсиӷатаӷӣсқылъюта қыпҳақамнъың. ¹⁶Ынка̄м уңипақияҳтуҳлъықукут Пинилӷӣның Уңипаның иляңитнун нунат. Қука̄югуткысюгунӷитаҳпут қыпҳақақ иляңита апыӷӣқа̄т.

¹⁷Иўырңа игақңа̄қ Акузитни Игақыхкани хўатын: «Кина алңунак қука̄юхсюкуми, қука̄югуткылъигу Атанҳӣнақ». ¹⁸Атанӷым тугуклъӣгатӣ пиниӷнилӷӣт. Итупилъ Атанӷым тугуклъиӷақӣ тама̄кут пиниӷнилюки пикани.

Павелылъю, Апостолысиӷўа̄ӷытлъю

¹Сиӷимакамси ныкыхмытутысқылъюңа акузикума тымңитхўалӷӣстун натыңӣҳақ. Ныкыхмытутықаҳтыңъа. ²Қуңьяӷақуңа Кияӷныӷым қуңьяқылъҳатун лъпыси, қаюҳлъяк тӯнума̄мси Христосымун. Пылюңилңуӷыстун угӣӷнақылӷӣстун а̄ңӷусима̄мси лъңанун, угикысқылъюку лъңина̄. ³Иўырңа алиңуткақамси аңуягым пӯҳнаюкаңиси, катам таўатын нымыӷьям пыҳқиниқуткылъюку пӯҳтылъҳатун Ева. Ынка̄м лъпыси пиниқнаниӷўа̄ӷнаюкафсигу Христос. ⁴Уңипақақңамтыки Пинилӷӣт Уңипат лъпысинун, ухпықыхкақаҳси Иисус, тугуклъиӷахсилъю Аглыӷналӷӣк Таӷныӷак. Иўырңа нагасюкыстаӷлюки аюқыхкақаси уңипақияҳтулӷӣт иляңаның Иисусымың. Тугуклъиӷиюхтусилъю иляңаның таӷныӷам, ухпықсюкақасилъю иляңи пинилӷӣт уңипат.

⁵Тама̄кут уңипақистыт апостолыңунилютың пӣқут. Сюмыӷмыхни а̄ңўа̄ӷунӣқут апостолыт. Иўырңа лӣсимаканка а̄ңўа̄ӷунӷитут хўаңамның. ⁶Акузилъхитыӷңа̄ӷма, лӣсимаҳлъяхтуңа. Угляӷңа̄н лӣгикыстақамси лӣсималъымның.

⁷Лъпысинун акилыҳтуҳсяқумаңитуңа уңипақақңамки Пинилӷӣт Уңипӣ Кияӷныӷым. Таўатын пика̄гуңа қусывыхлъюңа қӯлваӷналюси. Сыӷлыҳқысиңа̄а таўатын пилюңа? ⁸Ухпықат иляңитнилңӯт юӷаӷвигыт акилыҳтуқақа̄тңа лъпысинилъюңа. Ўаяқалъҳӯӷанка маниңитның каюсӣнъалюси. ⁹Лъпысинитақңама уӷлыӷӣҳтылъҳитамси каюсӣтысқылъюңа аклъюкыхкамның. Ухпықа̄лгутыт Македониямың тагиткақа̄тңа сямың тамаҳа̄ның аклъюкыхкамның. Ынка̄м а̄пфикылъҳитамси аклъюкыхкамның, а̄пфикна̄нӷитамси. ¹⁰Китум алңунак Ахаиями аӷулӣҳна̄нӷита̄ қука̄юхтылъқа та̄хкын. Таўатын пӣңа Христосым ипапиҳқылъҳакун хўаңамнилңуҳқун. ¹¹Каютыңлъянӷитутымның лъпысинун, сюмыҳпысинӣи пиниқынӷинъилюси пӣқыстык хўаңамнун? Кияӷныӷым лӣсимака̄ пиниқилъқа лъпысинун.

¹²Та̄ўа иҳсякӣвикумаңинаӷнақамси манихпысиның. Таўатын пӣқуңа қука̄юхнанӣсқылъюки апостолысиӷўа̄ӷыт хўаңкутыстун қыпҳаӷнилӷӣт акилыҳтӯсяңунатың. ¹³Тама̄кут югыт апостолысиӷўа̄ӷӯт пӯҳтилӷӣт югның иқлъыңиқылъыӷмыхтыхун. Югнун сюмыҳтаӷа̄ткыстақут Христосымун апостолыпӣкнилютың. ¹⁴Та̄мыңхўақун. Талўа Туӷныӷақ алъяңуҳтақуқ лъңаның катам алӣӷьяҳқа̄люни кӯкхутңалӷӣтун яқулыхтун. ¹⁵Ынка̄м сяӷӣӷанӣтут Туӷныӷа̄м қыпҳаҳтыңи таўатын пикумың. Югнун сюмыҳтаӷа̄ткыстақут ылъқуӷутңалӷӣңунилютың қыпҳаҳтыңи Кияӷныӷым. Иўырңа кынлыми Кияӷныӷым аӷью̄ҳлъықӣ ылъқуӷутңалӷӣмың аӷью̄лъыӷмың анахутылъҳитнун.

Павелым Уңипақыхкаңи Икфиқылъыни

¹⁶Алъя пӣмси, китум алңунак сюмыҳтаӷа̄ткынӷилъиңа тымңитхўаңулюңа. Иўырңа таўатын сюмыҳтаӷа̄ткыңъукуфсиңа, тугуклъиқаҳтыңъа тымңитхўаңулюңа. Та̄хкын хўаңалъю қука̄юхтывлыӷаҳлъықуңа. ¹⁷Қука̄югуткылъқа хўаңамның Атаныӷмың пиңунӷитуқ. Итупилъ акузиңӯңа тымңи пилӷӣстун. ¹⁸Углялӷӣт ухпықа̄нӷилңуӷыстун қука̄юхтақут қыпҳақамыхның, ынка̄м хўаңалъю таўатын қука̄юхлъықуңа. ¹⁹Сюмыҳпысини пыҳқиныпихнилюси пӣқуси. Ынка̄м қуякусиқлъюку нагатақаси тымңитхўалӷӣт. ²⁰Тугуклъиӷақаси қылылъҳит никимқун лъпыси қыпҳаҳтыля̄ӷыт лъңитнун. Кагукақыстақуси, тыглыгвикыстақуси, укалиқыстақусилъю, талўа хинаҳпысигун қасяҳтыстақлъюси. ²¹Кайңуюхтуңа кая̄тыпихтукут таўатын пилъыҳқамнъың лъпысинун тама̄кустун апостолсиӷўа̄ӷыстун.

Кина алңунак қука̄юхсяҳқа̄кан, хўаңалъю қука̄юхлъықуңа. Иўырңа таўатын пилъыҳқақ тымңитхўаңӯқ. ²²Та̄кут апостолсиӷўа̄ӷыт, Еврейеңўа̄т? Хўаңалъю Еврейеңӯңа. Израилыӷмӣңўа̄т? Хўаңалъю Израилыӷмӣңӯңа. Авраамым киңунқакӣ? Хўаңалъю киңунқа̄ңа. ²³Христосым қыпҳаҳтыкакӣ? Иўырңа хўаңа пиниӷатаӷаҳтуңа қыпҳаҳта лъңитның. Та̄ўа акузӣңа налъыкаӷнилңуӷыстун. Қыпҳаӷатаӷақа̄гуңа лъңитның, анусимиңляӷвигмыта̄ӷақа̄гуңалъю лъңитның. Кахсягмилъыңыхка̄гуңа кыстыка̄нӷилңуӷмың, угляӷңа̄н туқувзиӷа̄тақа̄гуңа. ²⁴Талъимагьягның Иудеит иглыӷутистыңита кахсягмихтыста̄таӷа̄тңа. (Ю̄к ма̄лӷук қуля стаманың иңлюлык сӣпнықлъюкуңўа̄қут ата̄сит кахсягмилъҳыт.) ²⁵Римыӷмӣт умӣлўа̄ӷита пиңаюның анагулыҳтыстыкақа̄тңа. Ата̄симың иляңита югыт милюҳпага̄таӷа̄тңа. Пиңаюның аңьяӷиӷутутақа̄ңа ынка̄м ата̄симың унулъқусиқ, аӷнылъқусиқ ӯҳуткақа̄ңа кылъӣни. ²⁶Угля̄пихлъыҳӣми иглыӷалъымни ынңа̄талъ якуӷнӣҳтуңа кӣгўигни, ўаяӷнӣҳтының, талўа юлгутымныңлъю, язычнигныңлъю. Якуӷнӣҳтуңалъю ныҳлъягни, килга̄ни, кылъӣнилъю. Талўа якуӷнӣҳтуңа ухпықа̄лгутысиӷўа̄ӷның. ²⁷Уӷлыӷӣҳлъяка̄гуңа, пияқлъӣӷақлъюңа. Иляңани қаваҳпынаңа, игатаӷңа̄ӷмалъю, мықсюгңа̄ӷмалъю. Аўын нықңитақлъюңа, азигутӣтақлъюңа, ҳӯтақлъюңалъю а̄ткӣтым. ²⁸Тама̄кут ся̄ӷўитхун, аҳутаңа тамаҳа̄н сюмыӷьялиткыхкақанка ухпықа̄лгутыт тамаҳӣтни юӷаӷвигни. ²⁹Ухпықа̄лгутым ухпықилъҳа кая̄нъыӷани, хўаңалъю кая̄тақуңа. Ухпықа̄лгута китум сыӷлыҳқысныӷагу, сякшитақуңа.

³⁰Қука̄юхнақңукума, қука̄юхлъықуңа кая̄лъиқусимның. ³¹Кияӷныӷым лӣсимака̄ңа иқлъыңиқна̄нӷитуңа. Лъңа Атака̄ Атанӷым Иисусым, усюқсяҳқақ қӯнпырухлъяк. ³²Дамаскымылъюңа, правителым тугустысюкақа̄ңа. (Умӣлгым Аретам правителыңуҳтыстыкам.) Ынка̄м тугусқылъюңа пилъюўаҳтыни кылыңакистыкақӣ ныҳлъягым амихлъягитни. ³³Иўырңа илякумта̄ӷма укихтыкақа̄тңа корзинагныкун миңлъютым қыргысыхкынкун ынка̄м анака̄гуңа правителымың.

Павелым Ысҳаӷўа̄лъҳа

¹Қука̄юхсяҳқа̄гуңа, аныӷныҳқусӣнӷитыӷңа̄н. Паниның уңипа̄нъақамси ысҳаӷўа̄лъымның, Атанӷымлъю алӣҳқуқа̄ның хўаңамнун. ²Лӣсимакақа ю̄к Христосымылңуқ. Қуля стамат сӣпнықлъюки аюмиқулъыӷни агани наӷуҳтыкани Кияӷныӷым маю̄тқаҳтыкақа̄ пиңая̄нун қилягым. Налъюкңўа̄ӷақа ю̄к югусиминитутаңа налиӷмың югусиминың а̄нңака̄таңа, иўырңа Кияӷныӷым лӣсимака̄. ³Лӣсимакақа та̄на ю̄к Кияӷныӷым маю̄тқаҳтыкақа̄ Райемун. Налъюкңўа̄ӷақа ю̄к югусиминитутаңа налиӷмың югусиминың а̄нңака̄таңа, иўырңа Кияӷныӷым лӣсимака̄. ⁴Таўани нагаткақӣ сяңўа̄т апыӷьяҳқа̄нӷилңӯт. Тама̄кут ӣнӷутка̄гут югмун акузиткысяҳқа̄лютың. ⁵Қука̄югуткынъақақа та̄на ю̄к, иўырңа қука̄югуткынъақынӷитуңа хўаңамның иўырңақун кая̄лъиқусиқыхкаҳӣнамның. ⁶Қука̄югуткысюкума хўаңамның, тымңиңуна̄нӷитуңа қаюҳлъяк апыҳлъықақа ипапилъық. Иўырңа қука̄югуткынъанӷитуңа хўаңамның, қаюҳлъяк югнун сюмыҳтаӷа̄ткысюхтуңа ылъқуҳлъюңа ысҳапалъҳитхунлъю, нагатылъҳитхунлъю хўаңа.

⁷Кияӷныӷым алӣҳтыкақыӷңа̄ки хўаңамнун угля̄пихлъыӷӣт сяңўа̄т қилягми, қука̄юхтыстысюнӷита̄ңа. Ынка̄м Кияӷныӷым қусывыхтысқылъюңа сикуҳлъюңыста̄ңа югусимкун. Та̄на сикуҳлъюк уңипаҳтыңӯқ Туӷныӷаӷмың. Та̄м икфиқыста̄ңа қусывыгңасқылъюңа. ⁸Пиңаюның кытўылъ Атаныӷмун юӷаӷақуңа иқитысқылъюку. ⁹Иўырңа пӣңа: «Каюсилъқа на̄ма̄қ лъпынун сюфлъюҳтысқылъюку та̄на икфиқылъық қаюҳлъяк аҳтуӷьяҳқа̄нӷилъқа икнақылъыҳпига̄гўақуқ кая̄лъиқныҳпыни». Ынка̄м қуякусиқлъюку қука̄юхтақуңа кая̄лъиқусимның хўаңамнитысқылъюку Христосым аҳтуӷьяҳқа̄нӷилъҳа. ¹⁰Та̄на апалъюқлъюку қуя̄қуңа кая̄лъиқңанымни, сыӷлықӯлъыңнымни, пияқлъӣнымни, амью̄ткылъыңнымни, алъя̄ҳӣнаӷмыңлъю сыӷлылӣнымни Христос апалъюқлъюку. Қаюҳлъяк кая̄лъиқңанымни та̄ўа икнақақуңа.

Павелым Сюмыӷьялиткыхкаңи Коринфыӷмӣт Ухпықӣт

¹¹Акузиңӯңа тымңитхўастун, иўырңа лъпыси таўатын пистаҳпысиңа. Лъпыси пинитун акузиткысяҳқақсяӷаҳпысиңа иляхпысинун. Қайўа сясӣнӷитыӷңа̄ӷма, тама̄кут «а̄ңўа̄ӷыт апостолыт» а̄ңўа̄ӷунӷитут хўаңамның. ¹²Лъпысинилъюңа ныкыхлъюўа̄н угля̄пихлъыӷӣт алъя̄ҳӣна̄т алъя̄ҳлъюхўаҳтилъҳыт пикақанка. Тама̄кут ипапиҳқа̄тңа апостолыпӣгутка. ¹³Сякақсиңи ухпықат иляңитнилңӯт юӷаӷвигми лъпысинун пимаңилъкымның? Ата̄сиҳӣнақ алъяңӯқ, акилгуқумаңитамси. Сыӷывутаҳтыңъа анахсимакумси! ¹⁴Ля̄лиҳфикнақақамси пиңайӣткун, иўырңа уӷлыӷӣӷуткыстысюнӷитуңа лъпысинун. Лъпыси сюмыӷмикақамси, нака̄н сяӷьяси. Таӷнуҳақылӷӣстун аюқамси. Таӷнуҳа̄т афлъыңакияҳқа̄нӷитут аңаюқамыхның, иўырңа аңаюқат афлъыңаксяҳқақӣт таӷнуҳатың. ¹⁵Тӯньяҳқа̄ҳтамси сямың тамаҳа̄ның хўаңа пимның, талўа хўаңамның тӯнылъықуңа лъпысинун. Пиниқатаӷанымси, лъяңақа лъпыси пиниқыпагигатаҳпысиңа.

¹⁶Лъпысилъю, хўаңалъю лӣсимакаҳпут уӷлыӷӣҳтысимаңитамси. Иўырңа иляхпыси анахусиманӣтңа. Пӣқут пӯҳнилюси иқлъыңиқылъымкун. ¹⁷Натын таўатын пистымси? Сякыңыхка̄зиңа лъпысиның каяхтақңамки югыт лъпысинун? ¹⁸Каяхтыкақақа Тит лъпысинун писқылъюку, ухпықа̄лгутфутлъю малигутысқақа. Титым пӯҳсимисӣ? Нака̄, Титымлъю, хўаңалъю қыпҳақаҳпут ата̄сӣгуқ, ата̄сикун таӷныӷакун.

¹⁹Сюмыҳпысинӣи лъпысинун ипапиҳқынъақуткыстыху анахусиманилютуң? Нака̄! Кияӷныӷым нагақӯманӷани, акузӣқукут Христосым акузисқылъҳатун. Пиниқыхкамни, сяңўа̄ қамахлъюку пӣқаҳпут икнақуҳсяӷналюку ухпылъыҳси. ²⁰Сюмыӷьялиткақамси лъпысинун ка̄скума ысҳақумси алъякнаюкамси хўаңа сиӷимакылъымның. Лъпысилъю хўаңа ысҳақуфсиңа алъякнаюкафсиңа сиӷимакылъыҳпысиның. Сюмыӷьялиткақамси аӷиватңунаюкафси, ақинакутңунаюкафси, сякша̄тутңунаюкафси, лъңина̄югутңунаюкафси, сыӷлықӯӷутңунаюкафси, йӣлъхитңунаюкафси, қука̄югутңунаюкафси, сю̄хлъиқутңунаюкафси. ²¹Сюмыӷьялӣқуңа алъя такукумси Кияӷныӷма кайңуся̄кнаюкаңаңа сивухпысини апалъюқлъюки сыӷлыҳқылъыси. Ынка̄м қивӷуҳлъяхлъықуңа қаюҳлъяк углялӷӣни лъпыси сыӷлыҳқумаңина̄гуси авутыҳқыхпынаси. Паниның сюмыҳтаӷаӷақуси нечистотамың пылюңинъыӷилңуӷмың, блуда атуқақаҳси, алңунасыӷат анагңалӷӣт нуқытусигатаси.

Киңулӣт Кылыңася̄лъҳыт

¹Уна пиңайӣтка̄ ля̄лиҳнақылъыӷма лъпысинун. Акузитни Игақыхкани игақңа̄қ хўатын: «Ю̄к анахусимаңиткатху, ма̄лӷук налиӷмың пиңают лӣсимакистыт ипапиҳқысяҳқақа̄т анахутылъҳа». ²Тӯңлиҳа̄ни ля̄лиҳфикақңамси кылыңася̄қақамси тама̄кут сивунӷани сыӷлыҳқылӷӣт. Иляңитлъю кылыңася̄қақанка, тагинқихтыкума аӷью̄ӷмихлъықнилюки сыӷлыҳқумаңинақата. Тама̄нъыӷитыӷңа̄ӷма кылыңася̄ӷнақанка. ³Хўаңамнун ипапиҳқыстысюкыси Христос акузӣқутаңа хўаңамкун. Христос кая̄нъыӷитуқ аӷью̄ӷмикумиси, итупилъ аҳтуӷьяҳқа̄нӷитуқ. ⁴Қайўа Христос кая̄тка̄яҳтуқ қақӯраӷақңамыхтыху, ма̄тын кияҳтыңъӯқ Кияӷныӷым аҳтуӷьяҳқа̄нӷилъҳакун. Хўаңкуталъю кая̄тукут катам Христосым кая̄тка̄ялъҳатун. Иўырңа лъпысиниткумта каюсӣлъықамси Кияӷныӷым аҳтуӷьяҳқа̄нӷилъҳакун.

⁵Ювӷӣҳтык лъпысиның лӣгикысқылъюку ухпықылъыҳси Иисус Христосымун. Лӣгикынӷистыхӯу Иисус Христос кияҳтыңъутаңа илюхпысини? Илюхпысининъыӷитңукан, та̄ўа ухпықыпӣлъҳитаҳси. ⁶Сюнаңуқ лӣгикитыху Кияӷныӷмун итагнақуманилюта. ⁷Юӷаӷақукут Кияӷныӷмун каюсӣтысқылъюси анахутыфқа̄фси писқылъюси. Иўырңа юӷа̄ңунӷитукут ипапиҳқынъалюку лъпысинун Кияӷныӷмун итагнақуманилюта. Итупилъ хўаңкута юӷа̄ткақамси ылъқуӷутңа̄н писқылъюси, қайўа югыт пиӷңата̄лъю итагнақылъҳинъилюта Кияӷныӷмун. ⁸Кипулъхина̄ҳпагниңитаҳпут ипапилъық; итупилъ иляпхаяҳқақаҳпут. ⁹Қуя̄қукут кая̄нъымта, икнақңуныҳпысини. Ынка̄м юӷа̄ткақамси выӷунъықихтысқылъюси кияҳтысқысюлъҳанун Кияӷныӷым. ¹⁰Тама̄кын апалъюқлъюку письмокақамси лъпысинун пивагилгама қаюҳлъяк нанқихсюнӷилъкымси аӷью̄ӷмигьяҳқа̄люси. Атанӷым қылъқақа̄ңа нанқихтыстыңулюңа лъпысинун. Ынка̄м нанқихсюгамси каюсӣнъалюси ухпықилъыҳтуҳтысқылъюси, нака̄н кая̄лисқылъюси.

¹¹Ухпықа̄лгутымни, таўатынңам пӣңа. Қуяңатык. Выӷутык кияҳтысқысюлъҳанун Кияӷныӷым. Писқысюлъымтун питык. Кияҳтык итагнақулъюси, ныкыхмытулъюси. Ынка̄м Кияӷнық тынымыңа пиниқылъҳымлъю, ныкыхмылъҳымлъю лъпысинилъи.

¹²Қуякутутақитык аглыӷналӷӣкун на̄лъыҳқун.

¹³Қамахлъютың ухпықа̄лгутыт пиниқӣсиңут. ¹⁴Наңлъыхталъҳа Атанӷым Иисус Христосым, пиниқылъҳалъю Кияӷныӷым, қырңаӷмытылъҳалъю Аглыӷналӷӣм Таӷныӷам лъпысинилъи.