1е Тимофею

Павелым Посланияксюхўа̄ӷи Тимофейемун

¹Укут посланият Павелымың пиңӯт апостолаңаның Христос Иисусым. Апостолыңуҳтыка̄гуңа қылылъҳакун Кияӷныӷым Югулиӷистымта, Христос Иисусымлъю сиӷимакыхкамта.

²Тимофейемун; иӷныпикамкын ухпықилъымтыгныгун. Кияӷныӷым Атам, Христос Иисусымлъю Атанымта қуяслъитын, наңлъыклъитын, ныкыхмылъылгуслъитынлъю.

Кылыңася̄лъҳыт Апыҳтуӷистысиӷўа̄ӷның

³Аӷуляқнақумалюңа Македониямун Ефесымытысқыхкақамкын. Иляңи югыт тама̄нлыңӯт апыҳтуӷиңӯт ипаңунӷилңуӷмың апыҳтӯсяның. Қылыҳқи та̄қысқылъюки ⁴сяңилъҳа̄ткыхпынакиңуқ акузимҳуткылъюки уңипаӷа̄тыңлъяқат, сивунылӷутыҳлъягытлъю а̄тҳит. Тама̄кут а̄ҳтӣра̄ӷусиҳӣна̄гут, каютңунӷитут қыпҳақа̄нун Кияӷныӷым. Лъңан қыпҳақа̄ апыӷӣӷақуқ ухпықилъҳӣнаҳаҳқун. ⁵Қылылю̄гуткақа ухпықат пиниқутыпӣгысқылъюки, умьюгақыхлъюки, ипапигмың ухпықилъылгулюки. ⁶Иляңита югыт пыхтыкақӣт тама̄кут ынка̄м а̄ҳтӣра̄ӷақут тымңимың. ⁷Апыҳтуӷистыңуюгақут Кияӷныӷым Лӣлиҳтӯся̄мнъун. Иўырңа лӣгикигатӣт акузиткыхкатың қайўа апыҳтӯсяқыӷңа̄ӷмыхтыки ипасюгнилъюки.

⁸Лӣсимакапут Лӣлиҳтӯсят пиниҳтут ылъқуҳлъюки атуқылӷӣни. ⁹Лӣсимакапут Лӣлиҳтӯсят улима̄ӷунӷитут пинилӷӣнун югнун. Улима̄ӷӯт лӣлиҳтӯсяның на̄фқӣкаюгнун, қа̄ткусигалңуӷнунлъю. Улима̄ӷӯт Кияӷныӷьюгигалңуӷнун, сыӷлыҳқыстынунлъю. Улима̄ӷӯт ўа̄кигалңуӷнун Кияӷныӷмың, лыгасӣӷўа̄ткилӷӣнунлъю аглыӷналӷӣнун. Улима̄ӷӯт туқутикаюгнун атамыхның налиӷмың на̄мыхның, юхтаҳтынунлъю. ¹⁰Улима̄ӷӯт блудникыстынун, югнун юлгутмыхның атуқикаюгнун, югнун акикикаюгнун югмың қыпҳаҳтыля̄ӷулюки, иқлъыңиқыстынун, иқлъыңалӷӣнун лӣсимакистынун, кипулъхина̄лӷӣнунлъю Кияӷныӷым апыҳтӯсӣтнун ипапиҳқыңъалӷӣнун. ¹¹Та̄кут апыҳтӯсят пинӣпихлъыҳӣның Пинилӷӣның Уңипаның пиңӯт. А̄пҳўа̄т усюқналӷӣ Кияӷнық, ныӷьюкуткақӣ хўаңамнун а̄пҳысқылъюки.

Иқамсиқаюлъық Кияӷныӷым Наңлъыхталъҳанун

¹²Игамсиқаюгвикақа Христос Иисус Атаныҳпут, икнақуҳсяқақа̄ңа қыпҳақамнун. Игамсиқаюгвикақа ысҳақақа̄ңа ата̄сӣӷмылъюңа накмиклъюңа қыпҳа̄тысқылъюни. ¹³Сивунӷани сыӷлыпыста̄тун акузиткыхкақақа Христос, сыӷлыпыста̄тунлъю пикақақа. Амьюқыта̄ткақңамки малихся̄ҳтыңи таўатытыфтуқ амьюқыта̄ткыңъуфтақа лъңа. Таўалъӣма Кияӷныӷым наңлъыкыхкақыхкаңаңа қаюҳлъяк сялин ухпықигалъкыхка Христос, лӣгикумаңилъкыхка ся̄қутка. ¹⁴Иўырңа Атанымта наңлъыкыҳлъякақа̄ңа! Ухпықилъылиткақа̄ңа, пиниқылъылиткақа̄ңалъю Христос Иисусымылңуӷмың. ¹⁵Сямың пилъыҳқақа ипаңӯқ ынка̄м қамахлъюни ухпықсяҳқа̄гуқ: «Христос Иисус тагика̄гуқ нунамун югулиналюки сыӷлыҳқыстыт». Хўаңа сыӷлылъыҳпига̄гуңа сыӷлыҳқыстының. ¹⁶Нақамлъю Кияӷныӷым наңлъыгьягуткақа̄ңа. Ынка̄м успута̄гуңа натын тахка̄н Христос Иисусым утақӣлъыҳқа̄ның сыӷлыҳқыстының ухпықысқылъюни. Та̄на успутақ тама̄кунун аюқуқ ухпықияҳқанун лъңаның уңувалъыңысқылъюки кынлыңилңуӷмың. ¹⁷Умӣлыгмун кынлыңилңуӷмун, туқупагниңилңуӷмун, алӣнъыӷилңуӷмун, лъңина̄ Кияӷныӷӯқ; лъңа қӯлвалъыңлилъю, усюқылъыңлилъю қӯнпырухлъяк кынлыңуна̄н! Аминь.

¹⁸Тимофейеми иӷнымни, қавңақ иляңита ӯкналиқистыт акузиткыхкақа̄тын. Ынка̄м ма̄тын қылӷамкын акузитаңит гӯтуткики пилъюўамун. Таўатын пинитун пилъюўаҳлъықутын Христосымун. ¹⁹Ухпықикыста̄ Христосыкун атуқлъюку лӣсимакыхкан ылъқуӷутңалӷӣ. Иляңита югыт атуқигатӣт лӣсимакыхкатың ылъқуӷутңалӷӣт ынка̄м на̄фқақӣт ухпықилъытың катам аңьяҳпагӣлъҳӣстун. ²⁰Именейелъю, Александрлъю тама̄кут акулңитнитук. Тӯныхкақахка Туӷныӷаӷмун лӣтысқылъюкык сыӷлыпыста̄тун акузиткыфқа̄н Кияӷнық писқылъюку.

Апыҳтӯсят Манигӯтылъыӷмың

¹Сивуклъюку кайымамкын юӷа̄ткысқылъюки қамахлъюки югыт, туңсӣтысқылъюки Кияӷныӷмун аклъюкыхкӣтның, игамсиқаягунъакытынлъю Кияӷныӷмун. ²Юӷа̄ткики умӣлгыт, қамахлъюкилъю иглыӷутилӷӣт, кияҳсяҳқа̄люта ныкыхмылъюта манигӯсималюта, қӯлва̄малюкулъю Кияӷнық. ³Таўатылңуқ юӷалъық пиниҳтуқ, ыфқуӷнаҳтуқ Кияӷныӷми Югулиӷистымнъи, ⁴қаюҳлъяк қамахлъюку ю̄к югулилъыңысюга̄, лӣтысюга̄лъю ипапилъық. ⁵Та̄ўа ата̄сӣна̄гуқ Кияӷнық, ата̄сӣна̄гуқлъю илялӣӷутиста Кияӷныӷмунлъю, югнунлъю. Та̄наңӯқ ю̄к Христос Иисус. ⁶Лъминың тӯныхка̄гуқ аҳқутңулюни итымунъалюки сыӷлыҳқылъҳитның қамахлъюки югыт. Та̄наңӯқ пилъыҳқаҳлъюўа̄қ Кияӷныӷым кылгутилъҳа югулилъыңысюгнилюки югыт қамахлъюки. ⁷Тама̄кын апалъюқлъюку Кияӷныӷым накмикыхкақа̄ңа уңипақистыңулюңа, апостолыңулюңа. Каяхта̄ңа апыҳтӣсқылъюки язычнигыт ухпықилъыӷмыңлъю, ипапилъыӷмыңлъю. Ипа уңипа̄тамкын, иқлъыңиқңунӷитуңа!

⁸Тамаҳа̄ни юӷаӷвигни югӣна̄т юӷӣсқысюганка. Тама̄куңулит кияҳлъыҳӣт қа̄ткулъютың Кияӷныӷым пиюкылъҳанун. Юӷаӷлит ныңугулъюки ӣхытың сякша̄лъңунатыңлъю, а̄ҳтӣра̄лъңунатыңлъю. ^9-10Пиюканкалъю аӷнат пиниӷналъҳит кылгутысқылъюки пинитун пилюгулъҳитхун. А̄ткӣт малъыгңафқӣта налиӷмың кайңунаӷьяҳқа̄фқӣта. Итупилъ пиниӷналъытың кылгулъитки аныӷныҳқилъыӷмыхтыхун, нака̄н нуяқыхсяӷўа̄лъыҳқун налиӷмың золотамыңлъю, жемчугымыңлъю улъңақлъютың налиӷмың акитуқамың а̄ткамың а̄лъютың. Таўатын пилъық ылъқуӷутңа̄қ аӷнанун манигӯткаюгнун Кияӷныӷмун.

¹¹Югыт апыҳтуӷинӷата юӷаӷвигни аӷнат нагасяҳқа̄гут ныпӣӷңаӷмың, малиҳқутақлъютың. ¹²Аӷнат апыҳтуӷистысюгигатанка налиӷмың иглыӷутистыңусюгигатанка югнун. Ныпӣӷңаяҳқа̄гут, ¹³қаюҳлъяк Кияӷныӷым улимаюха̄қақа̄ Адам, та̄хкын Ева. ¹⁴Адамыңунӷитуқ пӯҳтылъыңыхкақ, иўырңа аӷна̄гуқ пӯҳтылъыңыхкақ ынка̄м сыӷлыҳқыстыңуҳтыка̄қуқ. ¹⁵Иўырңа аӷнат иӷнӣката таӷнуҳаӷның югулилъыңылъықут нагныӷумакуйың ныӷьюклъюку Иисус, пиниқимаңинақумың илямыхның, кияҳсимаңинақумыңлъю аглыӷнаӷлюку кияҳта̄лъыӷмың қусывыхтылъылиӷлютың.

Иглыӷутистыңит Ухпықат

¹Хўатын пилъық ипаңӯқ: Кина алңунак иглыӷутистыңуюкуми ухпықанун та̄на қыпҳақақ пиюкыхка̄ пинӣпихтуқ. ²Иглыӷутиста авутңисяҳқа̄гуқ, ата̄симың нулӣлгуяҳқа̄гуқ, нуқынъыҳтуяҳқа̄гуқ, сюмыҳтаӷақыхсяҳқа̄гуқ, юпӣнӷуяҳқа̄гуқ, упуӷанӷуяҳқа̄гуқ, апыҳтуӷияқлъыгӯқлъю. ³Сю̄мыстыңуяҳқа̄нӷитуқ, сю̄хлъюгуяҳқа̄нӷитуқ иўырңа наңлъыҳтаӷьяҳқа̄гуқ, қаныңнақигасяҳқа̄гуқ, маниюныҳтуяҳқа̄нӷитуқ. ⁴Иглыӷутистым иглыӷутңўа̄ӷьяҳқақӣ мыңтыӷаӷмӣни, авақутанилъю апыҳтуӷьяҳқақӣ выӷусна̄тыфқа̄ми қа̄ткысқылъюни. ⁵Иглыӷутиста иглыӷутилъхискуми лъми катам ныңлъюгутминың, натынңам афлъыңакылъықаки ухпықистыңи Кияӷныӷым? ⁶Иглыӷутиста ухпынҳа̄нӷисяҳқа̄гуқ, лю̄рақ қука̄юхтыпагнаюкан ынка̄м нанқихтылъыңылъықуқ аӷью̄ӷьяҳқа̄люни Туӷныӷаҳтун. ⁷Иглыӷутиста пинитун кияҳсяҳқа̄гуқ ухпықа̄нӷилңуӷнун акузиткысқылъюку итагнаӷлюку. Ынка̄м сыӷлықӯҳпагниңилъықа̄т, Туӷныӷа̄млъю кая̄лъқыпагниңилъықа̄.

Диаконыт Каюткӣт Ухпықат

⁸Таўатыҳпигақ Диаконытлъю пиниӷлюки акузиткысяҳқа̄гут, ипапиҳқыңъаяҳқа̄гут, виномың мыӷыпагьяҳқа̄нӷитут, пакигныӷуяҳқа̄нӷитутлъю манимың. ⁹Пыхсяҳқақынӷитӣт апыҳтӯсят Кияӷныӷым қайвиҳқыхкӣ, умьюгӣтлъю сыӷлыӷьюгисяҳқа̄гут. ¹⁰Иглыӷутистыт накмӣӷвагилгамың диаконкаҳқамың қыпҳақалилъюки лӣгикнакаңит пинӣтаңи югыт. Та̄хкын диаконыңуҳтыснакаңит. ¹¹Таўатыҳпигақ аӷнатлъю пиниӷлюки акузиткысяҳқа̄гут, йӣлъхияҳқа̄нӷитут, иўырңа нуқынъыҳтуяҳқа̄гут, ата̄сӣӷмысяҳқа̄гутлъю сякун тамаҳа̄кун. ¹²Диаконыт ата̄симың нулӣлгуяҳқа̄гут, иглыӷутңўа̄ӷьяҳқақӣт авақутатыңлъю, мыңтыӷаӷмӣтыңлъю. ¹³Тама̄кут диаконыт қыпҳақыхтат қӯлвалъыңьяҳқа̄гут, налъюнықсюкна̄нӷита̄тлъю ухпықилъыҳтың Христос Иисусыкун.

Натын Ухпықат Кияҳтылъыҳқӣт

¹⁴Сюнаңуқ қантаӷақун лъпынун пиляңа, иўырңа ма̄тын лъпынун письмотканка тама̄кут апыҳтӯсят. ¹⁵Ынка̄м кима̄ўимакума посланияма лӣсимакыслъықа̄тын натын ухпықат кияҳсяҳқа̄таңи Кияӷныӷым ныңлъюгутаңанилңӯт. Лъңитңут ухпықистыңи уңувалӷӣм Кияӷныӷым, аӷвыӷақыта̄гут, тумыңутлъю ипапилъыӷмун. ¹⁶Налъюнықнаҳаңунаки ухпықапут апыҳтӯсят Кияӷныӷым қайвиҳтыкӣ сыӷлыҳлъягӯтлъю, ипапыста̄ӷӯтлъю:

Христос алъхықа̄гуқ югусипигулюни,

Кияӷныӷым Таӷныӷахкынка лӣсимакыстӣ тама̄кут лъңан пикӣ ылъқуӷутңатаңи,

яқулгытлъю ысҳақақа̄т.

Уңипақыхка̄гуқ нунатаҳа̄ни тамаҳа̄ни,

ухпықыхкақа̄т нунатаҳа̄ни тамаҳа̄ни,

та̄хкын қилягмун маю̄ткагуқ.

Иқлъыңалӷӣт Апыҳтуӷистыт

¹Аглыӷналӷӣк Таӷныӷак хўатыҳлъюўа̄қ пӣк киңулиӷни аӷныӷни иляңита югыт пыхлъықа̄т ухпықилъыҳтың Христосыкун. Таўатын пилъықут қаюҳлъяк қа̄ткылъықыхкаңит иқлъыңалӷӣт туӷныӷа̄т, апыҳтӯсӣтлъю. ²Таўатылңӯт апыҳтӯсят иқлъыңалӷӣның пиңӯт. Иқлъыңиқылъытың а̄пҳақӣт ипапихсюгниҳқылъюки. Наганъаниқақӣт умьюгатың лӣсимакилӷӣт ылъқуӷутңалъыӷмыңлъю, анахутңалъыӷмыңлъю. ³Таўатылңӯт югыт ныңуӷутыснаниӷӣқут, иляңилъю нықым ныӷыснаниӷақӣт. Иўырңа Кияӷныӷым улима̄қӣ қамахлъюки нықыт ныӷьяҳқа̄люки игамсиқаягутақлъюки. Ухпықат лӣсимакилӷӣт ипапилъыӷмың лӣсимакӣт тама̄кут. ⁴Кияӷныӷым улима̄ӷи қамахлъютың пинилӷӣңӯт. Ынка̄м иҳсяксяҳқа̄нӷитут тугуклъӣмакумың игамсиқаягулъюки. ⁵Акузитаңакун Кияӷныӷым, юӷакунлъю а̄фтыка̄гут аглыӷнаӷлюки.

Пинилӷӣ Қыпҳаҳтыңа Христос Иисусым

⁶Тама̄кут апыҳтӯсят лӣгикыстыңъўа̄қуфки ухпықа̄лгутыхпынун, пинилӷӣңулъықутын қыпҳаҳтыңа Христос Иисусым. Ухпықилъҳын икнақуҳлъықа̄ лӣсимаңинақуфки ипапилъҳыт ухпықат ухпықақыхкаңит, пинилӷӣтлъю апыҳтӯсят қа̄ткыхкаҳтын. ⁷Нагатыхпынаки сясӣнӷилңӯт уңипаӷа̄тыт тыңвимун аюқылӷӣт Кияӷныӷым ипапилъҳанун. Йыӷлыги пыҳқихся̄ткигу Кияӷныӷмун аюқылӷӣ кияҳта̄лъық. ⁸Югусим уляпылъҳа пиниҳтуқ, иўырңа кияҳтылъыҳпут Кияӷныӷым пиюкылъҳатун аюқылӷӣ пиниӷатаӷаҳтуқ. Каюсӣсяҳқақӣлъю хўани уңувалъымнъи, тӯңлиҳа̄нилъю уңувалъҳым. ⁹Та̄на пилъық ипаңӯқ, ынка̄м қамахтыңъўа̄ӷлюни ухпықсяҳқа̄гуқ. ¹⁰Тама̄кын апалъюқлъюку қыпҳаҳлъягӯкутлъю, сягиқлъӣҳтыңъӯкутлъю югнун ухпықысқылъюку ипапилъық. Таўатын пӣкут қаюҳлъяк ныӷьюкаҳпут уңувалӷӣ Кияӷнық, Югулиӷистыңат қамахлъютың югыт, кияң тама̄кут ухпылӷӣт лъңакун.

¹¹Қылыҳқи апыҳтуҳқи тама̄кын. ¹²Китумун алңунак паляқыстыхпына̄н аңлинҳа̄малъҳын. Иўырңа ухпықанун успута̄ўи акузилъыҳпыгун, сялъыҳпыгун, пиниқылъыҳпыгун, ухпықилъыҳпыгун, пылюңилъютын кияҳтылъыҳпыгун. ¹³Ка̄тылъымнун кынляңа, ухпықат қырңуӷунъыӷата атиҳтӯтақики Акузитның Игақыхканың, уңипақитақики, апыҳтуӷақики. ¹⁴Атуқақигу таӷныӷагныкун тунусяқ илюхпынилңуқ. Та̄на тунусяқ тӯныхка̄гуқ лъпынун ӯкналиқылъыҳқун Пресвитерыт ӣхтиӷақңатын. ¹⁵Пинақылъҳын қамахлъюку пӣқики қылӷутканка. Таўатын югыт лӣлъықа̄т пилъхӯҳлъыҳӣтын. ¹⁶Пира̄мсиңўа̄ӷлютын кияҳта̄лъыҳпынилъю, апыҳтуӷилъыҳпынилъю. Таўатын пикувык лъпынун югулилъықутын, тама̄кутлъю нагатыстытын.

Апыҳтуӷалъҳыт Кияҳтылъыҳқӣтнун Ухпықат

¹Аӷью̄ҳпына̄н сӣванлъық ю̄к, иўырңа кавьюңуна̄н налъҳусяӷақигу атакылӷӣстун. Уюқлъӣт югыт аңлыгуткылӷӣстун пӣқики. ²Сӣванлъыӷыт аӷнат на̄кылӷӣстун пӣқики, ынка̄м уюқлъӣт аӷнат наягыстун пӣқики, қилӣӷьюкыфқӣта.

³Каюсӣтики угиңиӷат афлъыңакистыңӣткат. ⁴Иўырңа угиңиӷақ авақутаҳтукуми налиӷмың ылътуӷаҳтукуми, кылгулъит ныңлъюгутмыхнун кияҳсюгнилютың Кияӷныӷым кияҳтысқылъҳатун. Афлъыңакылъыӷмыхтыхун аңаюқатың акинақылъықӣт ынка̄м ыфқуҳлъықа̄т Кияӷнық. ⁵Угиңиӷақ илякўа̄ӷӣткақ сиӷимаңӯқ Кияӷныҳқун. Ынка̄м унухтӯма̄н, аӷныҳтӯма̄н юӷа̄маңина̄гуқ каюсӣтысқылъюни. ⁶Иўырңа угиңиӷақ тыӷигниқңинақуми лъңаның ыфқуҳналюни, уңуваӷңа̄ӷми туқукастун аюқсяҳқа̄гуқ. ⁷Қылыҳқи ухпықат тама̄кут писқылъюки ынка̄м китум алңунак сыӷлықӯнӷилъитки. ⁸Китум алңунак афлъыңакынӷилъкумики илякўа̄ни, ўата лъми катам ныңлъюгутни, таўатын пилъыӷмикун пыхтыкақа̄ ухпықилъыни. Ынка̄м сыӷлыӷатаӷа̄лъықуқ ухпықа̄нӷилңуӷмың.

⁹Угиңиӷақ ю̄к пиңают уксюҳтуткалӣмакан, ныңуҳтыка̄канлъю ата̄симың, а̄тҳа игақсяӷңа̄ӷми аюқуқ угиңиӷат атылӷутӣтхун. ¹⁰Амалъықа тамаңан лӣсимака̄т қыпҳалъыхтуляңа, катам авақутани пинитун аңлистылъҳатун, упуӷаныҳтуляңа, ухпықа̄лгутми итыгӣт уӷвуҳтуӷақлъюки, каюсиӷӣқлъюни сыӷлылӣлӷӣның, қӯнпыңлъю пинитун пӣқылӷӣ.

¹¹Иўырңа нутаӷат угиңиӷат а̄тҳит игақыхпынаки атылӷутатхун. Югусӣта пиюкылъҳан сякниқысныӷистың угӣӷьюхлъықут. Таўатын пимакумың на̄фқылъықа̄т акықилъыҳтың Христосымун. ¹²Ынка̄м Кияӷныӷым нанқихлъықӣ аӷью̄ӷьяҳқа̄люки қаюҳлъяк на̄фқыхкаңат акықилъыҳтың. ¹³Та̄м ся̄ӷўакун иҳсянитаҳтақӣ, итҳӣтуҳтақӣ, йӣлъхитуҳтақӣ, янутқуныҳтуҳтақӣ, акузиткақӣтлъю сяңўа̄т акузиткысяҳқақынӷилъкытың. ¹⁴Ынка̄м итагнаӷатаӷаӷнаяҳтут нутаӷат угинҳат угӣӷьяқуйың, таӷнуҳаңлютың, афлъыңакысқылъюкилъю ныңлъюгутаңит. Таўатын пикумың аңуяк сыӷлықӯӷвигӣтыслъықа̄т хўаңкунъың. ¹⁵А̄ўалъю иляңи нутаӷат угиңиӷат ухпықа̄наниӷлютың малигусима̄т Туӷныӷаӷмун. ¹⁶Ухпықақ аӷнақ илякўа̄лгукуми угиңиӷаның, лъңан каюсӣсяҳқақӣ. Ынка̄м иляңита ухпықат каюсӣнъыӷисяӷңа̄ӷмыхтыки аюқӣт. Та̄хкын ухпықат каюсӣлъықӣт угинӷиӷат афлъыңакистыңӣткат.

¹⁷Пресвитерыт иглыӷутиюқат юӷаӷвигми, та̄куңинаҳа̄гныңлъю қыпҳалӷӣт апыҳтуӷилъыҳқун, уңипақилъыҳқунлъю, қӯлваӷақитыки малӷуҳқылъюки акилыҳтӯсӣт. ¹⁸Қаюҳлъяк Акузитыт Игақыхкат пӣт: «Вол тутмалӷӣ зерномың малъӣӷналюки, ныӷысқылъюку зерномың сюгругӣтиҳпына̄н». Амалъықа: «Қыпҳаҳта акилыҳтуӷьяҳқа̄гуқ қыпҳалъҳанун».

¹⁹Нагатыхпынаки килъю алңунак авуткилӷӣт Пресвитерымың анахусиманилюку, ўыткуқун авуткилӷӣ лӣсимакистылгукан ма̄лӷугыгның налиӷмың пиңаюның. ²⁰Кина алңунак сыӷлыҳқумаңинақан, аӷью̄ӷнакын сыӷлыҳқынъанӣсқылъюку ухпықат мануңитни. Таўатын пикувгу иляңи тама̄кут алиңылъықут.

²¹Тама̄кут қылгутанка лъпынун қа̄ткысқылъюки, пакихутифқа̄вык налиӷмың танӣлъқифқа̄вык писқылъютын. Таўатын қылӷамкын ысҳа̄манӷитни Кияӷныӷымлъю, Христос Иисусымлъю, накмикыхкатнилъю яқулгытни. ²²Ӣхтиӷаҳтыхпына̄н кина иглыӷутистыкаҳқа̄люку юӷаӷвигми. Та̄юҳқыхкувык илялъкӣнъаюкавык сыӷлыҳқылъҳанун. Кияҳтыкыста̄ пылюңилъютын.

²³Мыҳӣнаӷмың мыӷыхпынаң, иўырңа виноңӣҳаӷмың мықаӷақлъютын каюткылъықан ақсяқуҳпынун, қинуюга̄талъыҳпынунлъю. ²⁴Иляңита югыт сыӷлыҳқылъҳит алӣтңўа̄ӷақут, талўа сялин нанқихтылъҳилъютың. Иўырңа иляңита югыт сыӷлыҳқылъҳит алӣҳсяҳқа̄гут киңувақўа̄қун. ²⁵Таўатыҳпигақ аныӷныҳқилъҳат алӣтңўа̄ӷақут, иўырңа тама̄кут алӣнъыӷилңӯт ӣӷңана̄нӷитут.

¹Қамахлъютың қыпҳаҳтыля̄ӷыт сӣвакыҳлъяглитки тама̄кут пилӣтистытың, ынка̄м китум алңунак сыӷлытун акузиткынӷилъикык а̄тҳа Кияӷныӷым, апыҳтуӷилъыҳпутлъю. ²Қыпҳаҳтыля̄ӷыт пилӣтистыңит ухпықа̄лгутңуката сӣвакатаӷаӷлитки қаюҳлъяк ухпықа̄лгуткыхкаңит. Ынка̄м қыпҳа̄таӷаӷлитки қаюҳлъяк каюсӣңўӣт ухпықа̄лгутытың пиниқыхкатың. Тама̄кут апыҳтӯсяқикилъю, уңипақикилъю.

³Кина алңунак апыҳтуӷикуми алъяңулюку тама̄куның апыҳтӯсяның, итагнақынӷитӣ апыҳтӯсяпиги Атанымта Иисус Христосым. Лъңан апыҳтӯся̄н уңипа̄тӣлъю Кияӷныӷым пиюкылъҳатун кияҳтылъыҳқамың. ⁴Кина алңунак алъятун апыҳтуӷилӷӣ а̄ңа̄югныҳлъягӯқ, лӣгикигатуқ сямың алңунак. А̄ҳтӣра̄ӷьюныҳтӯқлъю, қаниқсюныҳтӯқлъю акузитның. Таўатын пилъҳым алъхыҳтақӣ: ақиналъық, аӷиватылъық, сыӷлықӯӷутылъық, ухпықунъанилъық. ⁵Таўатылңӯт қӯнпың а̄ҳтӣра̄ӷутыстӣқут. Умьюгӣт сюмыӷныҳлъю̄хтақут ынка̄м лӣсимакнаниӷақа̄т ипапилъық. Сюмыӷмыхни қыпҳа̄скумыхтыху Кияӷнық аклъюңиӷилъықнилютың пӣқут. ⁶Иўырңа алъхыӷутыҳлъяхлъықукут кияҳтыкумта Кияӷныӷым кияҳтысқысюлъҳатун итагнақлъюку пикатуталвут. ⁷Алъхыӷақңамта нунамун кылъқутңитукут, туқукумталъю кылъқутылгуна̄нӷитукут. ⁸Ынка̄м итагнаҳлъықукут нықылгукумта, а̄ткалгукумта. ⁹Иўырңа тама̄кут аклъюңиӷиюлӷӣт нанӷӣқулъыңақут. Сыӷлыӷым пиюкылъҳита тугўа̄қӣ ынка̄м тымңитхўаҳлъягуҳтақут. Та̄хкын пиюкылъҳита сяюгақӣ на̄фқылъыӷмун. ¹⁰Манимың пиниқылъық акуқа̄ қамахлъюни сыӷлыӷым. Иляңита югыт пыхтақа̄т ухпықилъыҳтың қаюҳлъяк манитуҳқа̄ҳлъягьюлӷӣт. Ынка̄м лъңит қивӷуҳлъягуҳтақут.

Нықамиксяҳқат

¹¹Иўырңа лъпык Кияӷныӷым юка̄тын, ынка̄м иқитңалютын тама̄куның. Сягиқутики ылъқуӷутңалъық, кияҳтын Кияӷныӷым кияҳтысқылъҳатун, ухпықилъылиӷлютын, пиниқилъылиӷлютын, нуқынъыҳтулютын, наңлъыхтаӷлютын. ¹²Пилъюўа̄тигу ухпықилъық қаюҳлъяк таўатын пилъюўалъық пинилӷӣңӯқ. Тугугулъю кынлыңилңуқ уңувалъық. Кияӷныӷым тахсиқақа̄тын тугуклъӣсқылъюку та̄на уңувалъық а̄пҳақңавгу ухпықилъҳын ухпықалӷутнун. ¹³Қылыӷнақамкын нагасиманӷани Кияӷныӷым, уңувалъылитикам сямун тамаҳа̄нун уңувалӷӣнун, нагасиманӷанилъю Христосым Иисусым, кӣмсиӷиля̄тақуӷикам Понтий Пилатым. ¹⁴Қылӷамкын пира̄мсилютын қа̄ткысқылъюки қамахлъюки қылгутканка лъпынун. Нагныӷутики кынляңа Атанымта Иисус Христосым утыӷнинқихлъыӷанун. Таўатын пикувык китум алңунак анахунилютын пина̄нӷита̄тын. ¹⁵Кияӷныӷым пилъыҳқаҳлъюўа̄ӷмини тагислъықа̄ Иисус Христос. Усюқналӷӣ Кияӷнық, лъңина̄гуқ Иглыӷутистыҳлъяк, лъңаңӯқ Умӣлгат умӣлгыт, Атанӷат атанӷыт. ¹⁶Лъңӣна̄гуқ туқуңигалңуқ. Кияҳтыңъӯқ ниӷугракыхлъягми рыпалъ китум алңунак тугухпагниңита̄. Китум алңунак ысҳӣгата̄, талўа ысҳаӷна̄нӷита̄. Кияӷныӷым пиклъикык қӯлвалъықлъю, аҳтуӷьяҳқа̄нӷилъықлъю қӯнпырухлъяк. Аминь.

¹⁷Қука̄юхтыснаниҳқи тама̄кут аклъюңилңӯт нунами хўани, талўа сиӷимаснаниҳқи аклъюңиңитхун налъюнықналӷӣтхун. Иўырңа сиӷимасқики Кияӷныҳқун. Лъңан иӷлыгутыхпына̄мта тӯнақӣлъю сямың тамаҳа̄ның пиниӷью̄гусиҳқамың. ¹⁸Аклъюңилңӯт пинитун писқики, аклъюңитысқики пинитун қыпҳалъыҳқун, иӷлылъңунаки тӯниюкыстаӷлюки иляңитнун югнун. ¹⁹Таўатын пикумың кахпахлъықа̄т аклъюңи лъмыхнун. Та̄на аклъюңи аюгилңӯгуқ тунымақ а̄гнакаҳқӣтнилңуқ. Ынка̄м уңувалъыңылъықут уңувалъыпигмың.

²⁰Тимофей, кылыңаклъюки тама̄кут Кияӷныӷым ныӷьюкуткӣ лъпынун. Иқитңалютын ухпықа̄нӷилңӯтнъын тымңитхўаның акузитңитныңлъю, а̄ҳтӣра̄ӷутылъҳитныңлъю. Тама̄кут ухпықа̄нӷилңӯт сюмыӷмыхни лӣсималъыпӣлгунӣқут, иўырңа ипаңунӷитуқ. ²¹Иляңита пыхсима̄т ухпықилъыҳтың қаюҳлъяк ухпықыхкаңат ипаңунӷилңуқ лӣсималъық.

Кияӷныӷым қуяслъиси.