1е Фессалоникийцам

Павелым Посланияксюхўа̄ӷи Ухпықанун Фессалоникамылңуӷнун

¹Укут посланият Павелымың, Силамың, Тимофейемыңлъю пиңӯт, Фессалоникаӷмӣт ухпықӣтнун Кияӷныӷым Атам пиңи Атанӷымлъю Иисус Христосым. Кияӷныӷым наңлъыкилъҳалъю, ныкыхмылъҳалъю лъпысинилъик.

Фессалоникаӷмӣт Кияҳта̄лъҳатлъю, Ухпылъҳатлъю

²Қӯнпың игамсиқаюгвикақаҳпут Кияӷнық тамаҳаҳпысинун, ӣўлыңлъю юӷа̄ткақамси. ³Юӷанымта Кияӷныӷмун Атамнъун нықамикақаҳпут қыпҳалъыҳси ухпылъыҳпысигун, қыпҳалъыҳси пиниқылъыҳпысигун. Игамсиқаюгвикақаҳпутлъю ухпылъыҳси нагныӷускыси икнақлъюку қаюҳлъяк сиӷимаңулӷӣси Атанымтыхун Иисус Христосыкун. ⁴Ухпықа̄лгутымнъи, Кияӷныӷым пиниқыхка̄ни, лӣсимакаҳпут накмикыхкақӣси ⁵қаюҳлъяк Пинилӷӣның Уңипаның тагитақңамси, акузитыра̄ӷинаҳтыхун пимаңитукут, иўырңа аҳтуӷьяҳқа̄нӷилъыҳқунлъю, Аглыӷналӷӣгныкунлъю Таӷныӷагныкун пика̄гукут. Ынка̄м ухпықаси Пинилӷӣт Уңипат ипаңутаңи. Лӣсимакаҳсилъю натын кияҳтыка̄тфут лъпысинилъюта, таўатын каюсӣнъалюси кияҳтыка̄гукут. ⁶Ынка̄м хўаңкутыстунлъю, Атаныҳтунлъю лъӣҳтык. Қайўа икфиқыҳлъягңа̄ҳпыси, тугуклъиӷаси Пинилӷӣт Уңипат қуямалъылиӷлюси Аглыӷналӷӣгның Таӷныӷагның. ⁷Ынка̄м успута̄ҳтуси тамаҳӣтнун ухпықанун Македониямилъю, Ахаиямилъю. ⁸Атанӷым уңипа̄ миңитңӯқ лъпысиның Македониямилъю, Ахаиямилъю. Ухпықилъыҳсилъю Кияӷныӷмың лӣта̄т тамаңани. Ынка̄м хўаңкута сямың пинӷисяӷңа̄мтыху ухпықилъыҳси, қаюҳлъяк сӣңынлъю югыт нагақӯма̄т. ⁹Тамаңани а̄пҳақа̄т упуӷатилъыҳлъяхси хўаңкунъың лъпысинитңулюта. Қӣвуманилюсилъю уңувалӷӣмун Кияӷныпигмун қыпҳа̄нъалюку, пыхлъюки кияӷныңлъяқат. ¹⁰Утақа̄қаҳсилъюңуқ Кияӷныӷым Иӷныӷа, Иисус, тагияҳқақ қилягмың. Лъңаңӯқ Кияӷныӷым уңуваҳтыка̄ туқулъыӷмың, югулӣқа̄қалъю Кияӷныӷым сякша̄лъҳаның ка̄сяҳқамың.

Павелым Қыпҳалъҳа Фессалониками

¹Ухпықа̄лгутымнъи, лӣсимакаҳси лъпысинун пилъыҳпут тымңиңунӷитка̄гуқ. ²Иўырңа сивунӷани лъпысинун пилъымта, лӣсимакаҳси Филиппыми икфиқлъӣҳтыстыкақӣнкутлъю, сыӷлықӯқақӣнкутлъю. Тама̄нлъюта қайўа углялӷӣм югым аӷулӣҳнақуткыӷңӣлъю Кияӷныӷым илютустыкақӣнкутлъю, ынка̄м уңипа̄сяҳтуӷамси Пинилӷӣның Уңипа̄мың Кияӷныӷым. ³Уңипақилъыҳпут ипаңӯқ. Иқлъыңиқңунӷитукут лъпысинун, сыӷлыӷмың пиюкыхкӣтукут лъпысинун, пӯҳнақуткигатамси. ⁴Йыӷлыги, уңипақақапут Пинилӷӣт Уңипат қаюҳлъяк Кияӷныӷым итагнақлъюта ныӷьюкуткақӣ хўаңкунъун. Акузилъымтыхун ыфқуҳнақуткыңъунӷитапут югыт, иўырңа ыфқуҳсюкаҳпут Кияӷныӷӯқ, нанқихтиңалӷӣ илюмта сюмыҳтаӷалъҳаның. ⁵Лӣсимакаҳси усюқӯҳсяҳтӯнӷитамси налиӷмың сякыңвиксяҳтӯнӷитамси. Кияӷнық лӣсимакистыкаҳпут. ⁶Усюқыся̄юхтыңъунӷитукут югның, лъпысиның, налиӷмың кинкуның. ⁷Апостолыңутымнъың Христосымун, туңсиӷнӣӷвиксяҳқақсяӷамси сямың алңунак. Иўырңа лъпысинилъюта якумаңилъиқуткумаңитамси, йыӷлыги мамаҳтикаюгыстун на̄стун афлъыңакилӷӣстун таӷнуҳаӷмыхның аюқыхка̄гукут. ⁸Пиниқыпихтамси, ынка̄м қуякусиқинаӷлюку лъпысинун лӣсимакысюгапут Кияӷныӷым Пинилӷӣт Уңипӣ. Пинилӷӣңина̄т Уңипат пихпынаки, қуякусиқинаӷлюку сямың тамаҳа̄ның каюсиӷьюглюси аюқамси, қаюҳлъяк пиниқсялӣткақамси. ⁹Ухпықа̄лгутымнъи, нықамикаҳси натын аңка̄н қыпҳалъыҳпутлъю, уӷлыӷӣлъыҳпутлъю! Қыпҳақа̄гукут унухтӯма̄н, аӷныҳтӯма̄н қаюҳлъяк лъпысинун уқихтуқутңуюнӷилңӯкут; лъпысинисималюта уңипақика̄гукут Пинилӷӣның Уңипа̄мың Кияӷныӷым.

¹⁰Лъпысилъю, Кияӷнықлъю лӣсимакистыкамси. Лъпысини ухпықани кияҳтыка̄гукут пылюңилъюта, ипапиҳқылъюта, анахутылъңуна̄мта. ^11-12Лӣсимакаҳси катам атам афлъыңакилъҳатун таӷнуҳаӷминың, хўаңкуталъю тамаҳаҳпыси таўатын катам афлъыңакыхкақамси. Кайымыхкақамси, илютуҳсяқақамси, қылӷута̄тақақаҳпут лъпысинун атуқысқылъюку кияҳта̄лъық ыфқуӷналӷӣ Кияӷныӷми. Туқлъю̄ңўӣси илятысқылъюси лъми катам Атаныҳпагулъыӷминунлъю, пиниӷналъыҳлъягминунлъю.

¹³Игамсиқаюгвикумаңина̄ңўа̄ҳпутлъю Кияӷнық уна апалъюқлъюку: хўаңкунъың нагақуӷлюку тугуклъиӷаҳси Кияӷныӷым уңипа̄. Лъпыси тугуклъиӷаҳси Кияӷныӷмың уңипа̄, нака̄н югның уңипа̄люку. Та̄наңӯқ Кияӷныӷым уңипаҳпига̄ қыпҳалӷӣ лъпысини ухпықилӷӣни. ¹⁴Ухпықа̄лгутымнъи, лъпыси таўатытуси ухпықистыңистун Христос Иисусым қырңуӷуткаюгның юӷаӷвигитни Кияӷныӷым Иудеями. Нуналгутыхпыси икфиқыстыкақӣси катам Иудеит икфиқыстылъҳистун ухпықат Иудеями. ¹⁵Иудеяңӯт туқутикат Атаныӷмың Иисусымың, ӯкналиқистыныңлъю, амьюқыта̄ткыхкақӣлъюлъю. Ыфқуҳныӷита̄т Кияӷнық, кипулъхина̄ӷӯтлъю тамаҳа̄нун югнун ¹⁶аӷулӣҳнақуткылъыӷмыхтыхун уңипақилъыҳпут язычнигнун югулилъыңнаюката. Таўатын пилъыӷмыхтыхун илямаңинаӷӣт сыӷлыҳқылъытың ынка̄м қынўатлъю Кияӷныӷым угумиягутыҳлъяглюки қантаӷақун аӷью̄ҳлъықӣ.

Павелым Ля̄лиҳфикынқихсюкаңи Фессалоникаӷмӣт

¹⁷Ухпықа̄лгутымнъи, амьюқыта̄ткистымта аӷуляқыстақңамикут Фессалоникамың, пылъҳутутыстӣнкутлъю, иўырңа паниның сюмыӷмикақамси. Ысҳаӷьюпихтақсяӷамси хинасилъю ¹⁸ынка̄м такунақуткақсяӷамси. Хўаңа, Павел, такунақутка̄таӷақсяӷамси иўырңа Туӷныӷа̄м амигиӷаҳтақӣнкутлъю. ¹⁹Лъпыси сиӷималъқамси, қуясиқамси, қаҳпакамсилъю. Та̄на қаҳпа хўаңкута қука̄югусиқылъықаҳпут мануңани Атанымта Иисусым тагикан. ²⁰Ипапыста̄қ лъпыси қука̄югусиқамсилъю, қуясиқамсилъю!

¹Иўырңа ысҳа̄тусигатутымнъың қавңаҳа̄ның пылъыӷңатутылъыҳпут нуқытутыпагниңӣтаҳпут. Ынка̄м агӷитка̄гукут хўаңа лъңинаӷма Афинымынъалюңа, ²каяхтыкақаҳпутлъю Тимофей лъпысинун. Ухпықа̄лгуткаҳпут, қыпҳалгусиӷақӣнкут Кияӷныӷмун. Уңипақилгусиӷақӣнкуң Пинилӷӣның Уңипаның Христосымың аюқылӷӣның. Каяхтыкақаҳпут икнақуҳсяӷьяҳтӣсқылъюки ухпықилъыси, кайымысқылъюсилъю, ³қаюҳлъяк ӣлъқаюхтысюнӷилъкымси ухпықилъыҳпысиның сыӷлылӣлъыси апалъюқлъюки. Иўырңа лӣсимакаҳси ухпықани хўаңкута сыӷлылӣӷьяҳқа̄гукут. ⁴Лъпысинилъюта уңипа̄тңўа̄қақамси амьюқыта̄ткылъыңылъықнилюта; ынка̄м лӣсимакаҳси та̄ўа ипа икфиқуткыхкақаҳпут амьюқыта̄ткылъық. ⁵Тама̄кын апалъюқлъюку аҳтуӷьягусяма нуқынъыӷмың, каяхтыкақақа Тимофей лъпысинун лӣгикналюку ухпықилъыҳси натытақутаңа. Пыңкақамси қаюҳлъяк Туӷныӷа̄м нанӷӣқуманаюкаңиси ухпықинанӣсқылъюси, ынка̄м қыпҳалъыҳпут тымңисюгниҳсиманаюкан.

⁶Иўырңа Тимофейем утыӷниӷлюни уңипа̄тӣнкут қуяналӷӣмың уңипа̄мың ухпықилъыҳпысиныңлъю, пиниқылъыҳпысиныңлъю. Уңипа̄тақӣнкуңлъю ӣўлың нықамикақнилюта пинитун, ысҳаӷьюгақнилюталъю катам хўаңкута ысҳаӷьюлъымтыстун лъпыси. ⁷Ухпықа̄лгутымнъи, сыӷлылӣҳлъягумалюта, икфиқыҳлъягумалюта илютуҳтукут қаюҳлъяк нагныӷутңукыси ухпықилъыҳси. ⁸Хўа̄ аныҳтаӷаҳтукут қаюҳлъяк аӷулӣлъка̄лӷӣси Атаныҳқун. ⁹Ынка̄м игамсиқаюгвикңўа̄ҳпут Кияӷнық лъпысиның. Лъпыси апалъюқлъюси қуяҳлъягӯкут сивуңани Кияӷнымта. ¹⁰Та̄куңинаҳа̄гның юӷа̄ткыңъўа̄мси унухтӯма̄н, аӷныҳтӯма̄н алъя ысҳаӷьяҳқа̄люси, иляяҳқа̄люки ухпықилъыҳпыси аклъюкыхкӣт.

¹¹Кияӷнымта, Атам лъңаның катам, Атанымталъю Иисусым қантаӷақун лъпысинун пияҳқа̄ҳтыслъикут! ¹²Атанӷым, пиниқсялӣтутыстаӷаӷлиси. Пиниқылъыҳсилъю тывуӷаслъигу тамаҳа̄нун югнун, катам хўаңкута пиниқылъымтыстун лъпыси. ¹³Таўатын айыпсюгиҳсяҳлъықӣ илюси авутңитысқылъюсилъю, пылюңитысқылъюсилъю сивуңани Кияӷнымта Атам, Атанымта Иисусым тагилъҳани. Таўани кылъқылъықӣ қамахтыңъўа̄ӷлюки лъми юни.

Кияҳтылъық Ыфқуӷналӷӣ Кияӷныӷми

¹Ухпықа̄лгутымнъи, аляӷраң хўатын пинақамси, лӣтивикыхкақамси натын кияҳтылъыҳқамың ыфқуӷнаӷлюси Кияӷныӷмун, ысҳа таўатын кияҳлъыҳӣси. А̄тҳакун Атанӷым Иисусым кайымамси ўатақа̄ӷақ таўатын писқылъюси. ²Лӣсимакаси сяңўа̄т қылӷуткапут лъпысинун писқылъюки Атаныҳқун Иисусыкун. ³Хўатытуқ Кияӷныӷым пиюкылъҳа лъпысинун: пылюңитысюгӣси сыӷлыҳқыстысюнӷитӣси атуқутылъыҳқун. ⁴Лӣтысюгӣсилъю тамаӷаҳпыси нуқытутысқылъюки югусиси пинилъыӷмун ынка̄м кияҳлъықуси пылюңилъюси, ыфқуӷнаӷлюси Кияӷныӷмунлъю, югнунлъю. ⁵Иляпхатыхпынаси югусиҳпыси атуқиюлъҳанун ухпықа̄нӷилңӯт пилъҳистун налъюкилӷӣт Кияӷныӷмың. ⁶Китум алңунак сякусӣқыфқа̄н пилигу ухпықа̄лгутми иңлюңа атуқилъыӷмун. Атанӷым аӷью̄ҳлъяхлъықӣ таўатын пикаюгыт. Сивунӷани кылыңася̄ҳлъякақамси тама̄кын. ⁷Кияӷныӷым накмикыхкақӣлъю кияҳтысқылъюта пылюңилъюта, сыӷлыҳқылъңуна̄мта. ⁸Ынка̄ңам китум алңунак қа̄ткынӷилъкумики тама̄кут апыҳтӯсят, Кияӷныӷӯқ қа̄ткынӷилъкаңа нака̄н ю̄к. Кияӷныӷӯқ тӯнистызи Аглыӷналӷӣгның Таӷныӷагның.

⁹Китум алңунак письмонӷисяӷңа̄ӷмиси аюқӣси уңипа̄нъалюси пиниқысқылъюки ухпықа̄лгутыси, қаюҳлъяк Кияӷныӷым апыҳтуқақӣси пиниқутысқылъюси. ¹⁰Ипаңӯқ пиниқыхкаси қамахлъюки ухпықа̄лгутыси тамаҳа̄ни Македониями. Иўырңа ухпықа̄лгутымнъи, қылӷамси пиниқутаӷӣсқылъюси. ¹¹Пинақылъҳаҳси қамахлъюку кияҳтык ныкыхмылъылиӷлюси, лъпыси сяяҳқаси пӣқитыки, авылӷаӷлюки иляхпыси сяяҳқӣт. Қыпҳаҳтык алъхыӷусяҳқа̄люси аклъюкыхкаҳпысиның катам хўаңкута қылылъымтыстун. ¹²Таўатын пикуфси ныӷьюкна̄нӷитасилъю алңунак аклъюкыхкаҳси, ухпықа̄нӷилңӯтлъю сӣвакылъықӣси.

Атанӷым Тагилъҳа

¹³Ухпықа̄лгутымнъи, лӣсимакысюгамси ухпықаның қавалӷӣның қивӷукыфқӣта писқылъюки сиӷималъҳилңуӷыстун. ¹⁴Ухпықаҳпут Иисус туқулюни уңувақа̄гуқ. Ынка̄м ухпықаҳпут Кияӷныӷым тагилъықӣ Иисусыкун тама̄кут қавақат ухпықилютың лъңаның.

¹⁵Уңипа̄тңўа̄ӷамси Атанӷым апыҳтӯтка̄ның. Атанық тагикан, хўаңкута паниның уңувалӷӣни иңьяӷаӷна̄нӷитапут тама̄кут қавақат. ¹⁶Атанық лъңа катам қилягмың укихлъықуқ, югыт нагақуҳлъықа̄т игляхтуқақ қылылъық, мыңа архангелым, қалӷиҳта̄таңалъю Кияӷныӷым. Тама̄кут ухпықилютың Христосымың туқуляӷа̄ткат уңуваӷьюха̄ҳлъықут. ¹⁷Та̄хкын хўаңкута уңувалӷӣни уныхтыкани, Кияӷныӷым қырңуӷутыслъюта, лъңитнун, ҳатаӷаҳта̄тыслъықӣнкутлъю қилягўа̄ӷнун па̄йӷысқылъюку Атанық ыслъями. Ынка̄м Атаныӷмылъықукут қӯнпырухлъяк. ¹⁸Тама̄кын апалъюқлъюку илютуҳся̄сиқақитыки та̄кут акузитыт.

Апыӷӣҳсяӷлюси Атанӷым Тагилъыҳқа̄нун

¹Ухпықа̄лгутымнъи, лъпысинун письмоткынъунӷӣтут қакун тама̄кут пияҳқа̄таңи. ²Қаюҳлъяк лъпыси лӣсимакңўа̄ӷаҳси Аӷныӷа Атанӷым тагияҳқа̄гуқ ўа̄кынӷилъҳаӷулъюни тагилъҳатун тыглыгнӣҳтым унугми. ³Югыт хўатын пималюки: «Ныкыхмылъылгӯкутлъю, пақнӣтукутлъю», на̄фқылъҳым ка̄тқаҳлъықӣ катам аӷнам иӷниюлъҳан ақниҳқылъҳатун. Югыт анагна̄нӷита̄т та̄на на̄фқылъық. ⁴Иўырңа лъпыси ухпықа̄лгутымнъи, мамлыхлъягмынъыӷитуси ынка̄м Аӷныӷан Аӷныӷым ўа̄кынӷилъҳаҳна̄нӷитӣси тыглыӷнӣҳтытун. ⁵Қамахлъюси авақутақӣси ниӷугым, авақутақӣсилъю аӷныӷым. Унугым пикынӷитӣлъю налиӷмың мамлыхлъягым. ⁶Ынка̄м қава̄фқа̄мта пилъта иляңистун, итупилъ тыҳумалъта, лӣсималюта. ⁷Тама̄кут қавалӷӣт қаваӷақут унугми, тама̄кут мыӷылӷӣт сю̄мақут унугми. ⁸Иўырңа Атанӷым пикӣлъю ынка̄м лӣсималюта кияҳтылъта. Пақнӣҳся̄силъыҳқамнъун сякимамтыхун а̄тылътыху сиӷималъық югулилъыӷмун. ⁹Кияӷныӷым пиюкылъқынӷита̄ икфиқысқылъюта сякша̄лъыӷмың, иўырңа югулилъыңысюгӣлъю Атанымтыхун Иисус Христосыкун. ¹⁰Иисусым туқуматкыхкақӣлъю лъминитысқылъюта уңуваяӷңа̄мта, туқука̄яӷңа̄мта тагикуми. ¹¹Тама̄кут апалъюқлъюки кайымутутақитыклъю, каюткутақитыклъю хўа̄ ма̄тын пилъыҳпысистун.

Киңулӣт Апыҳтуӷалъҳыт Қуякылъҳытлъю

¹²Ухпықа̄лгутымнъи, сӣвакитыки Атаныӷмун қыпҳалӷӣт акулыхпысини. Лъңан накмикыхкақӣ иглыӷутистыңулюкилъю, апыҳтуӷистыңулюкилъю лъпысинун. ¹³Сӣвакыҳлъягақитыкилъю, пиниқақитыкилъю апалъюқлъюки қыпҳалъҳит. Ныкыхмытулъюси пӣқитык.

¹⁴Ухпықа̄лгутымнъи, кылыңася̄ҳтыки иҳсяниталӷӣт, илютуҳсяҳтыки алиңталӷӣт, каюсиҳтыки кая̄лңӯт, ныхкыҳлъюўа̄н пӣқитыки қамахлъюки. ¹⁵Ўатаҳлъяк акисяқунаки сыӷлытун пистыси иўырңа пинитун пӣқитыки иляси, қамахлъюкилъю югыт.

¹⁶Қуямаңинаӷлюси, ¹⁷юӷа̄маңинаӷлюси, ¹⁸игамсиқаюглюси тамаҳа̄ни ныкыгныӷми. Та̄куңӯт Кияӷныӷым пиюкылъҳи лъпысинун Христос Иисусым пилӣткӣтнун.

¹⁹Қа̄мтыхпынакык Аглыӷналӷӣк Таӷныӷак, ²⁰сясӣнӷинъихпынаки ӯкналиқилъҳыт. ²¹Иўырңа сяңўа̄ қамахлъюку нанӷӣқўа̄қитыху ынка̄м тугуклъиӷақлъюки сяңўа̄т пинилӷӣт, ²²иқитңатык тамаҳа̄ның сыӷлыӷмың.

²³Кияӷныӷым ныкыхмылъылитистым ӣӷўиҳтыңъўа̄ӷлюси пылюңиҳлъиси. Авутңитыслъики таӷныӷаси, уңувасиси, югусиси Атаныҳпут Иисус Христос тагикан. ²⁴Тахсиқлъиҳтыхпыси пилъықӣ тама̄кут қаюҳлъяк ата̄сӣӷмытуқ.

²⁵Ухпықа̄лгутымнъи, юӷа̄ткақлъюта.

²⁶Қуякақитыки ухпықа̄лгутыси на̄ӷлюки Кияӷныӷым пиниқылъҳакун.

²⁷Қылӷамси Атанӷым пилъыҳқалитылъҳакун укут посланият атиҳтӣсқылъюки тамаҳӣтнун ухпықа̄лгутыхпысинун.

²⁸Пиниқылъҳа Атанӷым Иисус Христосым лъпысинилъи.