1е Петра

Петырым Сивулӣт Посланияңи

¹Укут посланият Петырымың пиңӯт апостолаңаның Иисус Христосым, Кияӷныӷым накмикыхкӣтнун югнун аӷуляқӯтыстыкат Понтамун, Галатиямун, Каппадокиямун, Асиямун, Вифиниямунлъю. ²Ныӷиӷлюку Кияӷныӷым Атам накмикыхкақӣси лъңанун югулюси, Аглыӷналӷӣмлъю Таӷныӷам пылюңиҳсяқақӣси. Таўатын пика̄гуқ қа̄ткутысқылъюси Иисус Христосымун, укмаңӣҳтысқылъюсилъю а̄ўакун. Кияӷныӷым каюсилъҳалъю, ныкыхмылъҳалъю ўата нулялик лъпысинун.

Ухпықат Сиӷималъҳат

³Усюқылътыху Кияӷнық, Атаңа Атанымта Иисус Христосым! Апалъюқлъюку наңлъыхталъыҳлъяни алъхынқихтыстӣлъю уңуваҳтылъыӷмикун Иисусым Христосым туқулъыӷмың. Та̄м сиӷималъыңыстыҳлъягӣлъю налъюнықнӣлңуӷмың. ⁴Ынка̄м утақаңўа̄пут пилӣсяҳқапут қуястылъыҳлъягыт Кияӷныӷым афлъыңакыхкаңи югминун. Афлъыңакңўӣ қилягми лъпысинун ынка̄м аӷуна̄нӷитут, на̄вна̄нӷитут, ӷывна̄нӷитутлъю. ⁵Кияӷныӷым аҳтуӷьяҳқа̄нӷилъыӷмикун пақнӣҳсяҳлъықӣси ухпықилъыҳпысигун. Ынка̄м кынлытҳӯтылъыӷми алӣҳлъықа̄ югулилъық ята̄ҳқыхка̄қ лъпысинун.

⁶Та̄м қуямастӣси, қайўа ма̄тын натыңӣҳақ алъя̄ҳӣнаӷмың сыӷлылӣӷьяӷңа̄ҳпыси. ⁷Тама̄кут сыӷлылӣӷыт нанӷӣқусӣгут ипапиҳқынъалюси ухпықилъыпӣлгутси. Ухпықилъыҳси мыгнунаӷатаӷалӷӣңуқ калмылӷимың. Калмылӷит нанӷӣқуныӷмыхтыки кыныҳқун на̄фқыхкаюгӯт. Паниның кынӷыт атуқақӣт пылюңиӷналюки. Таўатыҳпигақ ухпықилъыҳси нанӷӣқуяҳқа̄гуқ. Аӷулӣскан пылюңилъюни, алъхыҳлъықаҳси усюқилъық, ниӷуҳқылъық, қӯлвалъық Кияӷныӷмың алӣҳтыкагу Иисус Христос. ⁸Ысҳӣгатыӷңа̄ҳпысигу пиниқаҳси, ысҳанӷитыӷңа̄ҳпысигу ма̄тын ухпықаҳси. Ынка̄м қуяҳлъягӯси рыпалъ а̄пҳўа̄ҳпагниңитаҳси аңталяңа қуялъыҳпыси, ⁹қаюҳлъяк алъхыҳтыңъукыси югулилъҳа уңувасиҳпыси. Та̄наңӯқ апалъя̄ ухпықилӷӣси Христосыкун.

¹⁰Ныӷиӷлюку ӯкналиқистыт лӣгикңўа̄ӷнақыхкақа̄т та̄на югулилъық. Ӯкналиқуткыхкақа̄т тунусяқ Кияӷныӷым тӯньяҳқа̄ лъпысинун. ¹¹Таӷныӷакык Христосым ӯкналиқистыт илюңитнитка̄гук. Уңипа̄тыкыстақақӣ икфиқылъыҳқа̄ның Христосым, қӯлвалъыңылъыҳқаҳлъяганыңлъю икфиқылъҳан киңуңаның. Ынка̄м ӯкналиқистыт лӣгикнақуткыхкақа̄т кинаңуяҳқа̄таңа Христос, қакунлъю тама̄кут пияҳқа̄таңи. ¹²Кияӷныӷым ӯкналиқистыт лӣгикыстыкақӣ ӯкналиқуткыхкӣт лъңитнун пиңунӷинъилюки, иўырңа лъпысинун пиңунилюки. Аглыӷналӷӣк Таӷныӷак каяхтыка̄гук қилягмың. Лъңан аҳтуӷьяҳқа̄нӷилъҳакун уңипақилӷӣт Пинилӷӣның Уңипаның уңипа̄ткақӣси тама̄кын. Талўа яқулгыт лӣгиксюпихтыкақӣт тама̄кут.

Ухпықат Кияҳсяҳқа̄гут Пылюңилъютың

¹³Ынка̄ңам умьюгаси апыӷӣҳсяӷўа̄ӷлюки аюқитыки сялъыҳқамун. Умьюгаси хўатыҳлъюўа̄ӷулюки, сиӷимакңўа̄ҳтыхулъю тунусяқ югулилъыңылъық Кияӷныӷым тӯньяҳқа̄ Иисус Христос тагикан. ¹⁴Қа̄ткулъюси Кияӷныӷмун қаюҳлъяк авақутақӣси. Ынка̄м атуқыхпынаки сыӷлыӷыт пиюкылъыси атуқңуяқыси. Таўатысяҳтуси налъюкутыхпысиның натын Кияӷныӷым кияҳтысқысюлъҳан аюқутаңа. ¹⁵Кияӷнық накмикыстызи, пылюңитутаңаның лъпысилъю пылюңитык сялъыҳпысигун тамаҳа̄кун. ¹⁶Акузитни Игақыхкани игақңа̄қ: «Пылюңитык қаюҳлъяк хўаңа пылюңитуңа».

¹⁷Юӷаныҳпысини Кияӷныӷмун Атакнӣқаҳси. Нанқихтақа̄ атуныңўа̄қ ю̄к тамаҳа̄н сялъыҳтулңатун. Ынка̄м талъюқитыху нуната̄малюси нунами хўани. ¹⁸Лӣсимакаҳси сивунӷани кияҳтыка̄гуси сясӣхпынаси катам сивуныҳпысистун. Иўырңа Кияӷныӷым итымуткақӣси та̄хкын сясӣнӷилңуӷмың кияҳта̄лъыӷмың. Тукфилъҳитӣси серебромың налиӷмың калмылӷимың на̄выхкаюгмың, ¹⁹иўырңа тукфиқақӣси мыгнунапихлъыҳӣмың а̄ўаның Христосым. Лъңа пынъӣӷаӷаҳтун аюқуқ сялъхўа̄ҳӣлңуқ. ²⁰Кияӷныӷым накмикыхкақа̄ Христос талўа сивуңани нуна улималъҳилъюку. Ма̄тын киңулиӷни аӷныӷни алӣҳтыкақа̄ лъпыси апалъюқлъюси. ²¹Христосыкун ухпықаҳси Кияӷнық. Лъңан уңуваҳтыкақа̄ Христос туқулъыӷмың, қӯлваҳлъякақа̄лъю. Тама̄кын апалъюқлъюку ухпықилъыҳси, сиӷималъыҳси Кияӷныӷмун аюқуқ.

²²Қа̄ткутылъыҳқун ипапиҳқылъыӷмун пылюңиҳтыкақаси уңувасиси, ынка̄м пиниқыпӣгаси ухпықа̄лгутыси. Пиниқутыкыстаҳтык илюхпысиның қамакын. ²³Алъхынқихтыка̄гуси. Уңувалъыӷраӷаҳси туқукаюгмың пиңунӷитуқ, иўырңа туқуңигалңуӷмың пиңӯқ. Алъхынқихтыка̄гуси Кияӷныӷым акузитаңитхун, уңувалӷӣт, кынлыңилңӯт. ²⁴Акузитни Игақыхкани игақңа̄қ:

«Қамахлъютың югыт выга̄ӷыстун аюқут,

пиниӷналъҳилъю пӣтысиӷаӷыстун аюқут.

Выга̄ӷыт палиӷақут, пӣтысиӷа̄тлъю ифкаӷақут,

²⁵иўырңа акузитаңи Кияӷныӷым қӯнпыкаҳқа̄гут».

Та̄куста акузитыт Пинилӷӣт Уңипат уңипақыхкаңит лъпысинун.

Атанық Уңувалӷӣңӯқ Уйӷак

¹Ынка̄м та̄қитыху алъя̄ҳӣнақ сыӷлық атуқыхкаҳси. Иқлъыңиқнаниҳтык, пинӣюхнаниҳтык, ақинананиҳтык, сыӷлықӯӷунъаниҳтыклъю. ²Алъхынҳаҳа̄т қӯнпың мамаӷьюгақут. Лъңистун қӯнпың мамаӷьюхтык пылюңилңуӷмың таӷныӷам мама̄ның. Аңтанӣтыслъықа̄ югулилъыҳси, ³қаюҳлъяк на̄сӣӷаҳси Атанӷым наңлъыхталъҳа.

⁴Тагитык Атаныӷмун, лъңа уңувалӷӣңӯқ уйӷак. Югыт иҳсякыхка̄т сясӣнӷилңуӷыстун, иўырңа Кияӷныӷым накмикыхкақа̄ мыгнунаӷлюку. ⁵Лъпысилъю уңувалӷӣстун уйӷагыстун аюқуси, ынка̄м Аглыӷналӷӣм Таӷныӷам ныкыфтусиқлъиси Кияӷныӷым мыңтыӷа̄нун. Қыпҳа̄лъықаҳси а̄фтыка̄люси священнигыт тӯнилӷӣт аҳтутмың Кияӷныӷмун. Лъңан тугуклъиҳлъықӣ аҳтутыт Иисус Христосыкун. ⁶Игақыхка̄лӷӣ Акузитни Игақыхкани хўатын:

«Сиоными ныкыхтақақа мыгнуналӷӣ уйӷак;

каңиӷам уйӷака̄ накмикыхкақа̄.

Кина алңунак ухпықилӷӣ лъңаның кайңумиқна̄нӷитуқ».

⁷Та̄на уйӷак мыгнунапихтуқ лъпысинун ухпықилӷӣнун. Иўырңа ухпықиңигалңуӷнун хўатылңӯгуқ:

«Та̄на уйӷак мыңтыӷаңлъяҳтыт иҳсякыхка̄т,

каңиӷам уйӷака̄ҳсимакаңа».

⁸Амалъықа:

«Та̄м уйӷагым югыт на̄хтыстақӣ, иқустақӣлъю».

На̄хтақут қаюҳлъяк қа̄ткусигалңӯт Кияӷныӷым акузитаңанун. Таўатын Кияӷныӷым успықыхкақӣ.

⁹Иўырңа лъпыси югни накмикыхка̄гуси, умӣлгым священнигакӣси, а̄фтыка̄гуси югни, Кияӷныӷым лъңан катам юкӣси. Накмикыхка̄гуси а̄пҳысқылъюки алъя̄ҳлъюхўа̄т аныӷныҳқилъҳи Кияӷныӷым, тахсиӷикақ лъпысиның мамлыхлъягмың лъми катам алъя̄ҳлъюхўаӷмун ниӷугминун. ¹⁰Сивунӷани Кияӷныӷым юкынӷисяӷӣси, иўырңа ма̄тын юлӣсимӣси. Сивунӷани налъюксяӷаҳси Кияӷныӷым наңлъыхталъҳа, иўырңа ма̄тын алъхыҳсима̄ҳси наңлъыхталъҳа.

Кияӷныӷым Қыпҳаҳтыкӣси

¹¹Илякумта̄мни, нуната̄гусилъю, алъяныҳта̄гусилъю нунами хўани. Ынка̄м кайымамси иляпхатыхпынаси югусиҳпыси пиюкылъҳанун, қаюҳлъяк югусим пиюкылъҳан пилъюўа̄ңўа̄ уңувасиҳси. ¹²Пинитун кияҳтык акулңитни ухпықа̄нӷилңӯт, лю̄рақ лъңита сыӷлытун пистыңунинаюкаңиси. Ысҳақумыхтыки аныӷныҳқилъыси усюқылъықа̄т Кияӷнық Аӷныӷани Христосым тагилъҳан.

¹³Атанық апалъюқлъюку малиҳқутақлъюси кияҳтык тамаҳӣтнун кавымым иглыӷутистыңитнун. Қа̄ткулъюси умӣлыгмун; лъңаңӯқ аңылъыҳпигақ иглыӷутиста. ¹⁴Қа̄ткылъюкилъю иглыӷутистыт; умӣлгым аӷью̄ӷияқлъыгуҳтыстақӣ сыӷлытун пистынун, усюқияқлъыӷуҳтыстыкақӣлъю пинитун пистынун. ¹⁵Кияӷныӷым Пиюкылъқақа пинитун пилъыҳпысигун ныпӣҳтысқылъюки налъю̄қат тымңитхўамың акузилъҳӣт. ¹⁶Кияҳтык итымңалӷӣстун иўырңа итымңалъыҳси атуқыфқа̄н сыӷлыӷмун. Кияҳтык қыпҳаҳтыля̄ӷулюси Кияӷныӷмун. ¹⁷Қӯлваӷлюку тамаҳа̄ ю̄к, пиниқлъюки ухпықа̄лгутыси, аликлъюку Кияӷнық, қӯлваӷлюкулъю умӣлык.

Христосым Икфиқылъҳа Успутақаҳпут

¹⁸Лъпыси қыпҳаҳтыля̄ӷни қа̄ткутык пилӣтыстыхпысинун сӣвакылъылиӷлюси. Қа̄ткыхпынаки наңлъыхтаҳӣна̄тлъю, умьюгақыхтаҳӣна̄тлъю, иўырңа қа̄ткақитыкилъю амьюқыталӷӣт. ¹⁹Кияӷныӷым ыфқуқақӣси сюмыӷмикныҳпысигу лъңа икфиқңулюси сямың сяпихлъыҳӣстун. ²⁰Иўырңа сюфлъюҳсимакуфсики қывутқулъыси, сыӷлытун пилъыси апалъюқлъюки, китум алңунак усюқна̄нӷитӣси. Нақамынрақ сюфлъюҳсимакуфсигу икфиқылъық пинитун пилъыҳпысинун, та̄ўа Кияӷныӷым ыфқуқылъықӣси. ²¹Кияӷныӷым накмикыхкақӣси сюфлъюҳтысқылъюки икфиқылъҳыт қаюҳлъяк Христосым икфиқуткыхкақӣси. Икфиқылъҳа успута̄гуқ лъпысинун малихтысқылъюку. ²²Лъңа сыӷлыҳқигатуқ, иқлъыңиқигатуқ. ²³Сыӷлықӯлъыңақңами акисимаңитӣ. Икфиқақңами акықсяхсимаңитӣ. Итупилъ ныӷьюкутка̄гуқ лъңаның нанқихтикаюгмун ылъқуӷаҳлъюку. ²⁴Христосым лъминың катам агля̄ткақӣ сыӷлыҳқылъыпут югусиӷмиклъюки қақӯрамун. Таўатын пика̄гуқ туқумасқылъюта сыӷлыҳқылъыӷмун уңувасқылъюта ылъқуӷутңалъыӷмун. Кӣтиқулъҳакун на̄лъҳутка̄гуси. ²⁵Пынъӣӷыстун аӷуляқа̄талӷӣстун аюқсяҳтуси. Иўырңа ма̄тын утыӷнӣма̄си Пынъӣӷнӣҳтымун Кылыңакистыңанун уңувасиҳпыси.

Нулиҳқулъҳӣтлъю, Угикулъҳӣтлъю

¹Лъпыси угӣқани, кияҳтык қа̄ткулъюси угихпысинун. Иляңи нулӣлгыт ухпықиңигалңӯгут Кияӷныӷым акузитаңаның. Иўырңа таўатын кияҳтылъыҳпысигун ухпықа̄ҳнаюката сямың пинӷитыӷңа̄ҳпысики, ²қаюҳлъяк ысҳапакаңат пылюңитун кияҳта̄лъыҳси, аликилъыҳсилъю Кияӷныӷмун. ³Нуяқыхсялъҳым, улъңақылъҳым золотамың, а̄шалъҳым пиниӷнаҳсӣгатӣ илюси. ⁴Итупилъ пиниӷнаҳтык илюхпысигун қусывыхлъылиӷлюси, ныкыхмылъылиӷлюсилъю. Таўатылңуқ пиниӷналъық қӯнпыкаҳқа̄гуқ, мыгнунаҳлъяхтуқ Кияӷныӷмун. ⁵Сивунӷани агани, аӷнат манигӯткаюгыт Кияӷныӷмун пиниӷнаҳсяқаюгӯт илюмыхтыхун, қусывыхлъылиӷлютың, ныкыхмылъылиӷлютыңлъю. Ныӷьюкыхкақа̄т Кияӷнық, қа̄ткыхкақӣтлъю угитың. ⁶Сарра таўатытка̄гуқ! Қа̄ткыхкақа̄ Авраам, атанқынъикақа̄лъю. Ынка̄м лъпыси паникӣси пинитун пимакуфси, алиңигалъкуфсилъю сямың алңунак.

⁷Лъпысилъю нулиҳтуқани кияӷутыки нулӣси лӣгиклъюки натытуляңи қаюҳлъяк кая̄таӷаҳтут лъпысиның. Қӯлваӷлюки нулӣси қаюҳлъяк атуным алъхыҳсяҳқақаҳси Кияӷныӷым тунуся̄ кынлыңилңуқ уңувалъық. Таўатын пикуфси ся̄м алңунак пилъхилъиқна̄нӷитӣ юӷалъыси.

Икфиқылъық Пинитун Пилъыӷмун

⁸Та̄қмиӷнақанка сямың пилъҳынка хўатын: қамахлъюси ата̄систун сюмыӷнылгутык, ақниқутутык, пиниқутык аңлыгуткулъҳӣстун, наңлъыкутутык, қусывгутутык. ⁹Югыт сыӷлытун пикаңиси акитыхпынаки сыӷлытун, налиӷмың сыӷлықӯқаңиси акитыхпынаки сыӷлықӯӷмың. Итупилъ акитыки қуястылъыӷмың, қаюҳлъяк Кияӷныӷым накмикыхкақӣси таўатын писқылъюси лъпысинун алъхыҳтысқылъюку қуястилъыни. ¹⁰Акузитыт Игақыхкат пилъҳистун:

«Кина алңунак қуяңалӷӣмың уңувалъылгуюкуми,

қуямалӷӣныңлъю аӷнылгуюкуми,

сыӷлытун акузиныӷмың та̄қлъи, иқлъыңиқнаниӷлилъю.

¹¹Сыӷлытун пинаниӷлюни, пинитун пили.

Ныкыхмынъақлъюнилъю кияҳлъи,

¹²қаюҳлъяк Атанӷым ысҳапаўӣ ылъқуӷутңалӷӣт,

нагатақӣлъю юӷалъҳит.

Иўырңа Атанӷым тыңвимун аюқӣ сыӷлытун пилӷӣт».

¹³Китумңам ақниҳлъықиси сягиқңукуфси пинитун пилъыӷмун? ¹⁴Иўырңа икфиқыӷңа̄ҳпыси пинитун пилъыӷмун қуястылъыңылъықуси. Аликыхпынаки югыт, талўа сюмыӷьялихпынаси. ¹⁵Иўырңа илюхпысигун манигуӷақитыху Христос Атанӷулюку. Китум алңунак а̄птыкаңиси сиӷималъыӷмың илюхпысинилңуӷмың қӯнпың лӣгикнатун кӣмсиӷьяқлъыхӣна̄ўақитыки. ¹⁶Иўырңа кӣмсиӷақитыки қусывыхлъылиӷлюси, сӣвакилъылиӷлюси. Сыӷлыҳқынӷилъкуфси умьюгаси сыӷлыӷнина̄нӷитут. Ынка̄м югыт сыӷлықӯқаңиси пинитун кияҳтылъыҳпысиның Христосыкун, кайңуюхлъықут таўатын акузилъыӷмыхның. ¹⁷Иўырңа Кияӷныӷым пиюкылъқыңъукагу икфиқысқылъюси пинитун пилъыӷмун, та̄на итагнаӷатаӷаҳтуқ икфиқылъыҳқаҳпысиның сыӷлытун пилъыӷмун. ¹⁸Христос туқука̄гуқ ата̄сиҳаӷмың апалъюқлъюки югыт сыӷлыҳқылъҳит. Сыӷлыҳқумаңитуқ, иўырңа туқуматкыхкақӣ сыӷлыҳқыстыт тагинъалюки Кияӷныӷмун. Югусӣ туқутка̄гуқ иўырңа таӷныӷакык уңуваҳтыка̄гук. ¹⁹Ынка̄м таӷныӷа̄люни уңипаӷьяҳтуқа̄гуқ таӷныӷанун анусимиңлъяӷвигмылңуӷнун. ²⁰Та̄куңӯт қа̄ткусимаңилңӯт Кияӷныӷмун ныӷиӷлюку Ной кияҳтыңъулюку. Ной ковчегыңлъя̄люку Кияӷнық қыляныҳпынани утақӣка̄гуқ қа̄ткусимаңилңуӷнун авутыҳқысқылъюки. Пиңаюның иңлюлъхӣна̄т югыт итыӷлютың ковчегымун югулика̄гут мыҳқун. ²¹Та̄наңӯқ мық успутақ крестиӷылъыӷмун югулиӷилӷӣ лъпысиның ма̄тын уңуваҳтылъҳакун Иисус Христос. Крестиӷылъық иқаңӣсӣнӷитуқ югусимун. Итупилъ крестиӷылъыҳқун акықӣкут Кияӷныӷмун умьюгамнъың сыӷлыӷниңилңуӷмың. ²²Иисус Христос қилягмун маюӷлюни аӷынқигныӷанитуқ Кияӷныӷым. Ынка̄м иглыӷутңўӣ қамахлъюки яқулгыт, қилягым иглыӷутистыңи, аҳтуӷьяҳқа̄нӷилъҳытлъю.

Кияҳтык Кияӷныӷмун

¹Икфиқыхка̄таңаның Христос югусимикун лъпысилъю ята̄ҳқитык икфиқсяҳқа̄люси Христосытун, қаюҳлъяк кина алңунак югусимикун икфиқылӷӣ сыӷлыҳқысюгнанӣма̄қ. ²Ынка̄м хўакын кынлыклъюку уңувалъыҳпыси тахталңатун малиҳқутақыхпынаси югусиҳпыси пиюкылъҳанун, иўырңа атуқитыху Кияӷныӷым пиюкылъҳа. ³Сивунӷани сыӷлытун кияҳтылъқинаҳтуси қа̄ткусигалңуӷыстун Кияӷныӷмун. Хўатын пика̄гуси: сыӷлыӷнапихлъюку атуқуткаюгуяҳтуси, қилӣқутақлъюси, сю̄мӯтақлъюси, қырңуӷутулъюси угляпыста̄ӷыт сыӷлыӷыт атуқақлъюки, нықынӷаҳқылъюси, мыӷӯтыҳлъяглюси ынка̄м алңунасыӷаҳлъягуҳтақуси, манигуқақасилъю ӣнӷуткат кияӷныңлъяқат. ⁴Кияҳнанилӷӣси ухпықа̄нӷилңуӷыстун, лӣгикигата̄т сяңан илянъанӣӷыстык сыӷлытун кияҳта̄лъыӷмыхнун, ынка̄м сыӷлықӯӷақӣси. ⁵Иўырңа сялъытың лъңитның катам апыӷьяҳқақӣт Кияӷныӷмун, нанқихтияқлъыхӣнаӷмун уңувалӷӣныңлъю, туқуканыңлъю. ⁶Тама̄кын апалъюқлъюку Пинилӷӣт Уңипат уңипақыхка̄гут талўа туқуканун. Тама̄кут нанқихтыка̄гут уңуваңулютың нунами хўани. Иўырңа Пинилӷӣт Уңипат уңипақыхка̄гут лъңитнун, ынка̄м таӷныӷӣт кияҳсяҳқа̄ҳлъықут катам Кияӷныӷым кияҳтылъҳатун.

Кияӷныӷым Тунусӣ

⁷Сяңўа̄ қамахлъюни кынлытҳӯсяҳтуҳтуқ. Тама̄кын апалъюқлъюку хўатыҳлъюўа̄ӷулюки умьюгаси, нуқынъыҳтулюси юӷаӷьяҳқа̄люси юӷалъыҳқаҳпысистун. ⁸Мыгнуналъыҳпига̄гуқ уна: пиниқутыпӣглюси қаюҳлъяк пиниқылъҳым сыӷывутыстақӣ сыӷлыҳқылъылӷутыҳлъягыт. ⁹Упуӷанӷулюси қикыҳқуфқа̄фси. ¹⁰Тамаҳаҳпыси алъхыӷутка̄гуси тунусяның атуҳқамың иляхпысинун. Алъя̄ҳӣна̄т тунусят Кияӷныӷмың писи атуқақитыки пинитун. ¹¹Тунусялгыт акузимун акузилит Кияӷныӷым акузитаңаның. Тунусялгыт қыпҳга̄тимун қыпҳга̄тилит икнақылъылиӷлютың Кияӷныӷым тӯныхка̄ның. Ынка̄м сялъыҳпысигун тамаҳа̄кун Кияӷнық усюқылъыңылъықуқ Иисус Христосыкун. Лъңан пика̄т ниӷуҳқылъықлъю, аҳтуӷьяҳқа̄нӷилъықлъю қӯнпырухлъяк кынлыңуна̄н. Аминь.

Ухпықат Икфиқылъҳат

¹²Пиниқыхкамни илякумта̄мни, қӯвьюхпынаси сыӷлылӣӷрукута̄ҳлъягыт ка̄скаңиси нанӷӣҳсяӷаӷналюси. Нанӷӣҳсяӷалъыси алъяка̄ягунӷитут. ¹³Итупилъ қуятык илялъҳӣси Христосым икфиқылъҳанун қуяңаҳлъягысқылъюси ниӷуҳқылъҳа алӣҳтыкан. ¹⁴Сыӷлықӯқаңиси апалъюқлъюку малихся̄ҳтыңумалъыҳси Христосымун, қуястылъылгӯси қаюҳлъяк Кияӷныӷым Таӷныӷакык ниӷуҳқыңъалӷӣк кияҳтыңӯқ лъпысини. ¹⁵Икфиқсяҳқа̄куфси, икфиқыхпынаси юхтаҳтыңулюси, тыглыгнӣҳтыңулюси, сыӷлытун пистыңулюси, налиӷмың янутқустыңулюси. ¹⁶Нақамынрақ икфиқсяҳқа̄куфси Христианиныңутыхпысиның, кайңуюхпынаси иўырңа усюқнакыси Кияӷнық атиқаңиси Христосым а̄тҳаның.

¹⁷Нанқихтилъыҳқақ ка̄туқ, сивуклъюни пӣнлиҳлъықуқ Кияӷныӷым ныңлъюгутаңакун. Пӣнлиӷнақңукан хўаңкутхун, сялъықанңам қа̄ткусигалңӯт Кияӷныӷым Пинилӷӣнун Уңипа̄нун? ¹⁸Акузитыт Игақыхкат пилъҳистун:

«Ылъқуӷутңалӷӣт пыгным югулика̄куйың,

авылӷасиңўа̄лӷӣт Кияӷныӷмың,

сыӷлыҳқыстытлъю натынңам югулилъыңылъықат?»

¹⁹Ынка̄ңам тама̄кут икфиқылӷӣт апалъюқлъюку Кияӷныӷым пиюкылъҳа, ылъқуӷулъютың пилъықут, ныӷьюкулъықӣтлъю уңуваситың ата̄сӣӷмылңуӷмун Улимаӷистымун.

Афлъыңакылъыҳқӣт Кияӷныӷым Юги

¹Сямың пӣҳсюганка Пынъиниҳат юӷаӷвихпысинилңӯт. Хўаңалъю пынъиниҳагуңа, ысҳапакақыхкыхкалъю Христосым икфиқылъҳа, илясяҳқа̄гуңалъю Христосым а̄ңылъыҳлъяганун Кияӷныӷым алӣҳтыкагу. ²Ынка̄м қылыӷьюгамси Пынъиниҳатыни хўатын: Пынъӣӷнӣҳтыңутык Кияӷныӷым пынъӣӷитнун; ныӷьюкуткақӣ лъпысинун афлъыңакысқылъюки. Афлъыңакитыки қаюҳлъяк афлъыңаксюкыси, нака̄н қаюҳлъяк пияҳқа̄тыхпысиның. Кияӷныӷым таўатын писқысюгӣси. Афлъыңакитыки нака̄н акилыҳтӯсяңыпигыснаӷналюси, иўырңа қаюҳлъяк каюсиӷьюкыси. ³Агӷиткақыхпынаки афлъыңакыхкаси, иўырңа малихсюгнаҳқитык лъңитнун. ⁴Ынка̄м Иглыӷутистыңат Пынъӣӷнӣҳтыт тагикан алъхыӷулъықуси пиниӷнапихлъыҳӣмың қаҳпамың қылмыӷӣсяҳқа̄нӷилңуӷмың.

⁵Таўатыҳпигақ лъпыси уюқлъиӷни малиҳқутақлъюси сӣванлъыӷнун. Қамахлъюси қусывгутулъюси қаюҳлъяк Акузитыт Игақыхкат пика̄гут:

«Кияӷныӷым кипулъыгмун аюқӣ қука̄югныӷыт,

иўырңа каюсиӷақӣ қусывыгңалӷӣт».

⁶Ынка̄ңам лъпысиның катам қусывыгңатык Кияӷныӷмун аҳтуӷьяҳқа̄нӷитыҳлъягмун. Та̄хкын қӯлваҳлъықӣси накмикыхкамини аӷныӷми. ⁷Қамахлъюки сюмыӷьялиткыхкаси пыхтыки лъңанун, қаюҳлъяк афлъыңакңўӣси.

⁸Лӣсималюси, кылыңалюси. Аңуяхси Туӷныӷақ иглыӷаңӯқ угинилӷӣтун левытун, иваӷӣқуқ кина на̄фқынъалюку. ⁹Аяклъиҳтыху Туӷныӷақ айыпсюгилңуҳқун ухпықилъыҳпысигун, лӣсимаклъюки ухпықа̄лгутыси нунатаҳа̄нилңӯт таўатын лъңитлъю икфиқңӯт. ¹⁰Иўырңа натыңӣҳақ икфиқылъыҳпыси киңуңаның, Кияӷныӷым пиниқиңаҳлъягым тамаңанун, лъңан катам налъҳуся̄лъықӣси сямың тамаҳа̄ның. Ухпықилъыси икнақуҳсяҳлъықӣ, айыпсюгиҳсяҳлъықӣ, аӷулӣҳтыслъықӣ. Кияӷныӷым накмикыхкақӣси Христосыкун илятысқылъюси кынлыңилңуӷмун а̄ңылъыҳлъягминун. ¹¹Қамахлъюку аҳтуӷьяҳқа̄нӷилъық лъңан пика̄ қӯнпырухлъяк! Аминь.

Петырым Та̄қнӣтаңи Акузитыт

¹²Сила ата̄сӣӷмылңӯгуқ ухпықа̄лгута; ига̄тақа̄ңа такыста̄ҳаҳтыхун посланиямкун лъпысинун. Посланиянка Кияӷныӷым пиниқылъыпӣганың аюқут. Уңипа̄тамсилъю, кайымамсилъю кияҳтыкыстӣсқылъюси пиниқылъҳани.

¹³Ухпықа̄лгутыси Вавилонымылңӯт, лъпысистун Кияӷныӷым накмикыхкақӣ. Лъңитлъю, иӷныӷмалъю Маркым пиниқӣсиңут. ¹⁴Қуякутақитык на̄лъыҳқун Христосым пиниқылъҳакун.

Ныкыхмылъық тамаҳаҳпысинилъи Христосым пилӣткӣтни.