1е Иоанна

Иоанным Сивӯлӣм Посланияңи

Акузин Уңувалъық

¹Та̄на пӣнлиӷьюхўа̄лъыӷмың аюқылӷӣ: нагақуқаҳпут, ысҳақаҳпут хўаңкута катам ийымнъың, ысҳапакаҳпут, ся̄фтыкаҳпут ӣхымнъың, та̄наңӯқ Акузин уңувалъық. ²Та̄на уңувалъық ысҳаӷьяҳқа̄ҳтыстақңан ысҳақақаҳпут; ынка̄м хўа̄ а̄пҳаҳпутлъю, уңипақаҳпутлъю лъпысинун та̄на кынлыңилңуқ уңувалъық Атамысялӷӣ, ысҳаҳтыстыкақ хўаңкунъун. ³А̄пҳаҳпут лъпысинун сяңўа̄ ысҳақаҳпутлъю, нагаткаҳпутлъю илятысқылъюси хўаңкунъун, илятңалъымнъунлъю Атамун, Иӷныӷанунлъю Иисус Христосымун. ⁴Письмоткапут тама̄кут қуялъыҳпут ӣӷўӣсқылъюку.

Кияӷнық Ниӷугӯқ

⁵Уна уңипақ нагақуқаҳпут Иӷныӷаның Кияӷныӷым апыӷнақаҳпут лъпысинун, Кияӷныӷңуқ ниӷугӯқ, мамлылъықшахӣтуқ. ⁶Иўырңа илятңаникумта лъңанун нақам паниның мамлыгми кияҳтыңъулюта, иқлъыңиқңӯкут, атуқигатаҳпутлъю ипапиҳқылъық. ⁷Иўырңа ниӷугми кияҳтыкумта лъңан ниӷугмытылъҳатун та̄ўа илятңа̄кут илямнъун, а̄ўанлъю Иисусым, Кияӷныӷым Иӷныӷан, укмаңӣўӣлъю тамаҳа̄ның сыӷлыҳқылъымнъың.

⁸Сыӷлыҳқылъҳинъикумта пӯҳтыңъӯкут хўаңкунъың катам, ипапиҳқылъҳитукутлъю. ⁹Иўырңа а̄пқумтыки сыӷлыҳқылъыпут Кияӷныӷмун, сыӷывусяҳқақӣлъю сыӷлыҳқылъымнъың, укмаңиӷьяҳқақӣлъюлъю тамаҳа̄ның анахутаӷалъымнъың қаюҳлъяк ата̄сӣӷмытуқлъю, ылъқуӷулъюнилъю аюқылӷӣңӯқ. ¹⁰Сыӷлыҳқиганъикумта, Кияӷнық иқлъыңиқыстыңуҳлъықаҳпут, акузитаңилъю атуқңунӷитапут.

Христос Каютфут

¹Таӷнуҳаҳамни, хўатын письмоңўа̄мси сыӷлыҳқыфқа̄фси писқылъюси. Иўырңа кина алңунак сыӷлыҳқыхкан Иисус Христосым ылъқуӷутңалӷӣм манигӯтутақӣлъю Атамун. ²Лъңаңӯқ иқитусиқ сыӷлыҳқылъымнъун, хўаңкуңина̄мта сыӷлыҳқылъымнъун пиңунӷитуқ, иўырңа тамаҳаҳлъяган югым сыӷлыҳқылъҳанун аюқуқ.

³Ысҳа хўатын ипапиҳқуткысяҳқаҳпут лӣсимакилъыҳпут Кияӷныӷмың, қа̄ткылъымтыхун қылӷусӣ. ⁴Кина хўатын пилӷӣ: «Лӣсимакақа Кияӷнық», нақам қа̄ткыхпынаки қылӷусӣ, иқлъыңиқыстыңӯқ, налъюка̄лъю ипапиҳқылъық. ⁵Иўырңа китум алңунак қа̄ткыхкумики Кияӷныӷым акузитаңи, пиниқылъҳа Кияӷныӷмун ипапыста̄п ӣгўақа̄гуқ, таўатын ипапиҳқуткысяҳқақаҳпут лъңанитулвут. ⁶Кина алңунак пилӷӣ кияҳтыңъунилюни лъңани, кияҳсяҳқа̄гуқ Иисус Христосым пилъҳатун.

Нутаӷақ Қылӷусяқ

⁷Пиниқыхкамни, уна қылӷусяқ письмоткыхкыхка лъпысинун нутаӷа̄нӷитуқ. Та̄наңӯқ ныӷиҳтақ қылӷусяқ нагаткаюхси има пӣнлиӷьюхўа̄лъыӷмың, та̄на уңипа̄гуқ нагаткаҳси. ⁸Иўырңа уна қылӷусяқ письмоткыхкыхка лъпысинун нутаӷа̄гуқ. Та̄м ипапиҳқылъҳа ысҳаӷлюни аюқуқ Христосыкунлъю, лъпысигунлъю қаюҳлъяк мамлык ага наӷуҳтыңъӯқ, ниӷупик кӯкхутңӯқ.

⁹Кина алңунак пилӷӣ ниӷугмынъилюни нақам угумиклъюку ухпықа̄лгутни, паниның мамлыгмылңӯгуқ. ¹⁰Китум алңунак пиниқыхкумигу ухпықа̄лгутни ниӷугми кияҳтыңъӯқ, ниӷугмытутминың на̄хтусиҳқӣтуқ. ¹¹Иўырңа китум алңунак угумикыхкумигу ухпықа̄лгутни, мамлыгмытуқ. Иглыҳтыңъӯқ мамлыгми, талўа налъюкуқ навык пиңутни қаюҳлъяк мамлыгым ая̄стыкақа̄.

¹²Таӷнуҳаҳамни,

письмоӷақамси қаюҳлъяк сыӷлыҳқылъыси сыӷывутылъыңыхка̄гут апалъюқлъюку Христос.

¹³Атани, письмоӷақамси қаюҳлъяк лӣсимакыхкыси лъңа пӣнлиӷьюхўа̄лъыӷмың аюқылӷӣ.

Нукалъпигани, письмоӷақамси қаюҳлъяк кая̄лъқыхкақыхкыси Туӷныӷақ.

Таӷнуҳаӷни, письмоӷақамси қаюҳлъяк лӣсимакыхкыси Ата.

¹⁴Атани, письмоӷақамси қаюҳлъяк лӣсимакыхкыси лъңа има пӣнлиӷьюхўа̄лъыӷмың аюқылӷӣ.

Нукалъпигани,

письмоӷақамси қаюҳлъяк икнақылӷӣси,

акузитаңилъю Кияӷныӷым илюхпысинилңӯт,

кая̄лъқыхкақыхкысилъю Туӷныӷақ.

¹⁵Пиниқыхпына̄н нуна талўа сяңўа̄ алңунак нунам пӣңа. Китум алңунак пиниқыхкумигу нуна, пиниқылъҳитуқ Атамун. ¹⁶Укут ысҳа қамахлъюки нунам пиңи: сяңўа̄ югусим пиюкылъҳа сыӷлыҳқусиқақылӷӣ, ийым қилӣҳтыстылъҳа, сяңўа̄тлъю югыт қука̄югуткақыхкаңит нунами хўани. Та̄кут Атамың пиңунӷитут, нунамың пиңӯт. ¹⁷Нуна авӣӷутңӯқ, тама̄кутлъю сыӷлыҳқусӣўақылӷӣт югым пиюкақыхкаңи; иўырңа китум атуқыхкумигу Кияӷныӷым пиюкылъҳа кияҳсяҳқа̄гуқ қӯнпырухлъяк кынлыңуна̄н.

Аңуякилӷӣт Христосымың

¹⁸Таӷнуҳамни, кынля қантаӷалъӣӷаҳтуқ! Уңипа̄тка̄гуси Аңуякилӷӣ Христосымың тагилъықнилюку, хўа̄ ма̄тын угляпихлъыҳӣт аңуякилӷӣт Христосымың алъхыҳтӯтңўа̄ӷлютың аюқут, ынка̄м лӣсимакаҳпут кынля қантаӷалъӣӷаҳтуқ. ¹⁹Тама̄кут хўаңкунъисяҳтут иўырңа униткақӣлъю қаюҳлъяк илятңўа̄ӷумаңилңӯт хўаңкунъун. Илятңўа̄қа̄яқумың унинъаянӷитӣлъю. Унитылъыӷмыхтыхун лӣгикыстыңъўа̄ӷа̄т илятңўа̄ӷумаңитылъыҳтың хўаңкунъун.

²⁰Иўырңа лъпыси, Христосым кӯвыхкақӣси Аглыӷналӷӣгның Таӷныӷагның ынка̄м қамахлъюси лӣсимакаҳси ипапиҳқылъық. ²¹Письмоңустымсӣи ипапиҳқылъық налъюкутыхпысиның? Нака̄, письмоңўа̄мси лӣсимакутыхпысиның. Лӣсимакыхкысилъю иқлъыңиқылъық ипапиҳқылъыӷмың пиңунӷилңуқ.

²²Кина иқлъыңиқыстыңўа̄? Иқлъыңиқыстыңӯқ хўатын пилӷӣ: «Иисус, Христосыңунӷитуқ». Та̄наңӯқ аңуякилӷӣ Христосымың қаюҳлъяк иҳсякыхкык Атаңалъю, Иӷныӷалъю. ²³Китум алңунак иҳсякыхкумигу Иӷныӷа, Атаңалъю иҳсяксяҳқақа̄; китум алңунак тугуклъиқумигу Иӷныӷа, Атаңалъю тугуклъиӷьяҳқақа.

²⁴Ынка̄ңам ӣўлың нықамиклъюку апыҳтӯсяқ, апыҳтӯсяқыхкақ лъпысинун ухпыӷьюхўа̄лъыҳпысиның има. Атуқумаңинақуфсигу нагақуқаҳси та̄ўа ӣўлың Иӷныӷмылъықусилъю, Атамылъықусилъю. ²⁵Унаңӯқ акықусяқыхка̄ тӯнылъықнилюку хўаңкунъун, кынлыңилңуқ уңувалъық.

²⁶Письмосиқанка лъпысинун тама̄кут пӯҳтинақуткылӷӣт лъпысиның апалъюқлъюки. ²⁷Иўырңа лъпыси Христосым кӯвикыхкақӣси Таӷныӷагминың. Таӷныӷакык илюхпысинитутмыгның алъя кина алңунак Апыҳтуӷистыксюгна̄нӷитаҳси, қаюҳлъяк Таӷныӷахкынка апыҳтуӷақӣси сямың тамаҳа̄ның. Апыҳтӯсӣ ипаңӯт, тымңиңунӷитут ынка̄м Таӷныӷам апыҳтулҳатун Христосымытыкыстаҳтык.

²⁸Таӷнуҳамни, Христосымытыкыстаҳтык ынка̄м ука алӣқан илютуяҳқа̄люта, ӣӷнақыфқа̄мта кайңуюгым лъңаның пилӷа̄кут таўани Аӷныӷми тагилъҳани. ²⁹Лӣсимакыхкыси Христос ылъқуӷутңалӷӣ. Ынка̄м лӣсимаксяҳқақасилъю алңунак ылъқуӷутңа̄н пикаюгыт Кияӷныӷым таӷнуҳақӣ.

Авақутӣ Кияӷныӷым

¹Ысҳақаҳтыхуқун Атам пиниқималъыҳлъяга хўаңкунъун, авақутақнӣқӣлъю лъңанун, ипа авақутақӣлъю. Тама̄кын апалъюқулюку нунам юган налъюкӣлъю қаюҳлъяк налъюкыхкаңат Кияӷнық. ²Пиниқыхкамни, та̄ўа авақутақыхкаңилъю Кияӷныӷым, иўырңа сялин хўатыҳлъюўа̄қ лӣгикигатаҳпут натын лъӣлъыҳқаҳпут. Иўырңа лӣсимакаҳпут, Христос алӣқан лъңатун аюқылъықукут қаюҳлъяк ысҳаҳлъықаҳпут лыган таўатылъюку. ³Та̄на китум алңунак лъминың сиӷимакыхкумигу Христосыкун пылюңиҳсяӷьяҳқа̄гуқ, катам Христосым пылюңитылъҳатун.

⁴Кина алңунак сыҳлъыҳқыхкаюк қа̄ткусигатуқ Кияӷныӷым Лӣлиҳтӯся̄мнъун. Сыӷлыҳқылъҳӯқ қа̄ткунъыӷитылъық Кияӷныӷым Лӣлиҳтӯся̄мнъун. ⁵Лӣсимакаҳси Христос алъхықа̄гуқ иқинъалюки сыӷлыҳқылъыпут, лъңа сыӷлыҳқылъҳитуқ. ⁶Кина алңунак Христосыми кияҳлъыҳӣ сыӷлыҳқумаңинаӷна̄нигуқ. Кина алңунак сыӷлыҳқумаңинақуми, лӣгикумаңита̄лъю, налъюкақа̄лъю Христос.

⁷Таӷнуҳаҳаӷни, китумун алңунак пӯҳтыстыхпынаси! Кина алңунак ылъқуӷулъюни пикаюк ылъқуӷутңа̄қ катам Христосым ылъқуӷутңалъҳатун. ⁸Кина алңунак сыӷлыҳқумаңиналӷӣ Туӷныӷа̄м пика̄ қаюҳлъяк Туӷныӷақ сыӷлыҳқыңъулӷӣ има пӣнлиӷьюхўа̄лъыӷмың. Иӷныӷа Кияӷныӷым алъхықа̄гуқ уна апалъюқлъюку, на̄фқынъалюку Туӷныӷа̄м қыпҳақа̄.

⁹Кина алңунак таӷнуҳа̄ Кияӷныӷым сыӷлыҳқумаңинӣгатуқ қаюҳлъяк Кияӷныӷым наңаӷныӷа лъңанилңуқ; қаюҳлъяклъю Кияӷнық Атакыхкаңа, ынка̄м сыӷлыҳқумаңинаӷна̄нӷитуқ. ¹⁰Хўатын лӣсимаксяҳқақапут Кияӷныӷымлъю авақутӣ, Туӷныӷа̄млъю авақутӣ: кина алңунак ылъқуӷулъюни пиңигалңуқ налиӷмың угумикиңалӷӣ юлгутминың Кияӷныӷым авақутақынӷита̄.

Пиниқутулъюси

¹¹Уңипақ нагақуқаҳси пӣнлиӷьюхўа̄лъыҳпысиның унаңӯқ: пиниқутусяҳқа̄гукут. ¹²Каинтун аюқсяҳқа̄нӷитукут. Каин Туӷныӷа̄м пика̄ ынка̄м туқуткақа̄ лъми катам аңлыгутни. Сяңан туқутагу? Қаюҳлъяк сялъҳи анахутңалӷӣт нақам аңлыгутаңан сялъҳи ылъқуӷутңалӷӣт.

¹³Ухпықа̄лгутымни, сяӷӣӷаюхпынаси нунам юган угумикыхкаңиси. ¹⁴Лӣсимакаҳпут туқумың алъпака̄гукут уңувалъыӷмун қаюҳлъяк пиниқыхкыпут ухпықа̄лгутыпут. Кина алңунак пиниқиңигалңуқ паниның туқумытуқ. ¹⁵Китум алңунак угумикыхкумигу ухпықа̄лгутни юхтаҳтыңӯқ. Лӣсимакаҳси юхтаҳтым илюңани кынлыңилңуқ уңувалъық кияҳтыңъунӷитуқ. ¹⁶Хўатын ысҳа лӣсимакыхкыфут пиниқылъық сяңутаңа: Христосым тӯнылъҳакун уңувалъыни хўаңкунъун. Ынка̄м хўаңкуталъю тӯнылътыки уңувалъыпут ухпықа̄лгутымнъун. ¹⁷Китум алңунак на̄маӷми кияҳта̄ӷым ысҳаӷлюку ухпықа̄лгутни аклъюмалӷӣ наңлъыкынӷилъкумигу, натынңам Кияӷныӷым пиниқылъҳа илюңанилъықа?

Тытуўитылъық Сивуңани Кияӷныӷым

¹⁸Таӷнуҳаҳаӷни! Пиниқияҳқа̄нӷитукут акузитыра̄ӷинаҳтыхунлъю, акузилъымтыхунлъю. Йыӷлыги пиниқилъта ипапиҳқылъюта наңаӷнымтыхун. ^19-20Ынка̄ңам лӣсимакылъықукут Кияӷныӷмун ипапиҳқылъыӷмун пикутфут. Сыӷлыӷнинымталъю Кияӷныӷым сивуңани налъюнықсюкна̄нӷитаҳпут сыӷывутиңалъҳа қаюҳлъяк Кияӷнық а̄ңатаӷаҳтуқ сыӷлыӷьюгңалъымнъың, лӣсимакыхкаңалъю сяңўа̄ тамаҳа̄н. ²¹Пиниқыхкамни, сыӷлыӷнинӷилъкумта тытугна̄нӷитаҳпут Кияӷнық. ²²А̄пнымталъю сямың алңунак алъхыӷутақукут лъңаның қаюҳлъяк қа̄ткақыхкыпут қылӷӯсӣ, атуқақыхкыпутлъю ыфқуӷналӷӣт лъңани. ²³Уна ысҳа қылӷуся̄: хўаңкунъун ухпықысқылъюку Иӷныӷми а̄тҳа Иисус Христосым, пиниқутулъюталъю Христосым қылылъҳатун. ²⁴Китум алңунак қа̄ткыхкумики Кияӷныӷым қылӷӯсӣ кияҳтыңъӯқ Кияӷныӷми, Кияӷнық лъңани. Хўатын ысҳа лӣсимакыхкыфут Кияӷныӷым хўаңкунъитылъҳа: Таӷныӷагныкун тӯныхкамикун хўаңкунъун.

Нанӷӣқутыки Таӷныӷат

¹Пиниқыхкамни, ухпықыхпынаки қамахлъюки таӷныӷат. Йыӷлыги лӣгикнақақитыки Кияӷныӷмың пиңутаңи, қаюҳлъяк угляпихлъыҳӣт ӯкналиқистысиӷўа̄ӷыт миңисима̄т нунами. ²Ысҳа хўатын лӣсимаксяҳқахси Кияӷныӷмун Таӷныӷақуткык: тамаҳаӷми таӷныӷам а̄пқагу Иисус Христос югулюни алъхықа̄нилюку, Кияӷныҳта̄гуқ. ³Иўырңа тамаҳаӷми таӷныӷам мысӣӷа̄скагу Иисус югулюни алъхықа̄нӷинъилюку Кияӷныҳта̄нӷитуқ. Та̄кук таӷныӷак аңуякилӷӣмың Христосымың пиңӯк нагақуқаҳпысиның тагӣяҳқа̄нилюкык. Та̄ўа ма̄тын ка̄тңўа̄ӷлютык нунамун аюқук.

⁴Таӷнуҳаӷни, лъпыси Кияӷныӷым пикутаңаның, кая̄лъқыхкақаси тама̄кут қаюҳлъяк илюхпысинилңуқ аҳтуӷьяҳқа̄нӷитаӷаҳтуқ нунамылңуӷмың. ⁵Тама̄кут нунам пикӣ, апыҳтӯсӣт нунамың пиңӯт, ынка̄м нунам юган нагатақӣт. ⁶Иўырңа хўаңкута Кияӷныӷым пикӣлъю, ынка̄м китум лӣсимакилӷӣм Кияӷныӷмың нагатақӣлъю. Тама̄кут иляңита Кияӷныӷым пикынӷилъкаңан нагасигатӣлъю. Ынка̄м таўатын ысҳа лӣсимаксяҳқахпут Таӷныӷакык ипапиҳқылъҳым налиӷмың таӷныӷакык ипаңунӷилңӯм.

Кияӷнық Пиниқылъҳӯқ

⁷Пиниқыхкамни, йықай пиниқутутылъта қаюҳлъяк пиниқылъық Кияӷныӷмың пиңӯқ. Кина алңунак пиниқиңалӷӣ таӷнуҳақа̄ Кияӷныӷым, лӣсимака̄лъю Кияӷнық.

⁸Китум алңунак пиниқинӷилңӯм налъюка̄ Кияӷнық, қаюҳлъяк Кияӷнық пиниқылъҳӯқ. ⁹Кияӷныӷым каяхтыкақа̄ та̄наңинаҳақ Иӷныни нунамун, уңувалъыңысқылъюта лъңакун. Таўатын пилъыӷмикун Кияӷныӷым кылгуткақа̄ пиниқылъыни хўаңкунъун. ¹⁰Пиниқылъық акузиткыхкыхка хўаңкута пиниқылъқынӷитаҳпут Кияӷныӷмун. Йыӷлыги Кияӷныӷым пиниқылъқа̄ хўаңкунъун кылгутка̄ каяхтылъыӷмикун Иӷныни иқитусӣлюку сыӷлыҳқылъымнъун.

¹¹Пиниқыхкамни, Кияӷныӷым пиниқылъҳа хўаңкунъун таўатыскан хўаңкуталъю пиниқутусяҳқа̄гукут. ¹²Китум алңунак ысҳӣгатңўа̄ӷа̄ Кияӷнық; пиниқускумта Кияӷнық кияҳтыңъӯқ илюмнъи, пиниқылъҳалъю ӣӷўиӷьяҳқа̄гуқ илюмнъи. ¹³Кияӷныӷым тӯныхкақӣлъю лъми катам Таӷныӷагминың ынка̄м лӣсимакаҳпут кияҳтыңъӯқ хўанкунъи, хўаңкута лъңани. ¹⁴Ысҳақақаҳпут Иӷныӷа. Ынка̄м уңипақңўа̄ҳпут Кияӷныӷмун каяхтыкақнилюку Югулиӷистыңулюку тамаҳа̄нун югнун. ¹⁵Китум алңунак а̄пқагу Иисус Иӷнықнилюку Кияӷныӷмун, Кияӷнық кияҳтыңъӯқ лъңани, лъңа Кияӷныӷми. ¹⁶Ынка̄м хўаңкута лӣсимакаҳпутлъю, ухпықаҳпутлъю Кияӷныӷым пиниқылъҳа хўаңкунъун.

Кияӷнық пиниқылъҳӯқ, ынка̄м кина алңунак кияҳлъыҳӣ пиниқылъыӷми кияҳтыңъӯқ Кияӷныӷми, Кияӷнық лъңани. ¹⁷Ынка̄м пиниқылъық ӣӷўиҳтыка̄гуқ илюмнъи илютусқылъюта Нанқихтилъҳым Аӷныӷани. Таўатытукут қаюҳлъяк Христосытун аюқылӷӣкут нунами хўани. ¹⁸Пиниқылъыӷми алиңылъық авӣтуқ қаюҳлъяк ӣӷўиқам пиниқылъҳым иҳлъықаюўа̄ алиңылъық. Ынка̄ңам пиниқылъық ӣӷўӣмаңитуқ тама̄куни паниның алиңыхкаюгни, қаюҳлъяк алиңылъылгӯқ аӷью̄лъық.

¹⁹Пиниқӣқукут қаюҳлъяк Кияӷныӷым сивуклъюни пиниқыхкақӣлъю. ²⁰Кина пикуми: «Пиниқақа Кияӷнық», нақам угумиклъюку ухпықа̄лгутни, иқлъыңиқыстыңӯқ. Қаюҳлъяк китум алңунак пиниқынӷилъкумигу ухпықа̄лгутни ысҳақаюни, пиниқна̄нӷита̄ Кияӷнық ысҳӣгалъкынъи. ²¹Уна қылӷусяқа̄ Христосым хўаңкунъун, китум пиниқыхкумигу Кияӷнық, пиниқсяҳқақа̄ ухпықа̄лгутнилъю.

Ухпықилъық Иӷныӷаның Кияӷныӷым

¹Китум алңунак ухпықңукумигу Иисус, Христосыңутаңа, авақутақа̄ Кияӷныӷым, китум алңунак пиниқыхкумигу Ата пиниқсяҳқақӣ авақутӣ. ²Хўатын лӣсимаксяҳқақаҳпут пиниқилъыҳпут Кияӷныӷым авақутӣтнун: пиниқылъымтыхун Кияӷнық, қа̄ткылъымтыхунлъю қылӷусӣ. ³Уна пиниқылъҳӯқ Кияӷныӷмун: қа̄ткутылъыҳпут қылӷуся̄нун. Қылӷусӣ пияқнаҳлъягунӷитут, ⁴қаюҳлъяк тамаҳаӷми авақуталӣтка̄н Кияӷныӷым кая̄лъқыхкақа̄ нуна. Хўатын ысҳа кая̄лъқысяҳқаҳпут нуна, ухпықилъымтыхун. ⁵Кинаңа̄ўа кая̄лъқӣста нунамың? Китум алңунак ухпықыхкумигу Иисус Иӷнықнилюку Кияӷныӷмун, та̄ната кая̄лъқӣста.

Пиңают А̄пҳистыт

⁶Иисус Христосыңӯқ тагикақ. Тагика̄гуқ мыҳқунлъю, а̄хўкунлъю. Тагимаңитуқ мыҳӣнаҳқун иўырңа мыҳқунлъю, а̄хўкунлъю тагика̄гуқ. ⁷Таӷныӷам а̄пҳа̄ та̄на ипаңунилюку қаюҳлъяк Таӷныӷак ипапиҳқылъҳулӷӣк. ⁸Та̄ўа пиңаюгӯт а̄пҳистыт, Таӷныӷак, мық, а̄кхў; та̄кут қамахлъютың итагнақулъютың аюқут. ⁹Ухпықңукумтыки югыт а̄пқӣт хўаңкунъун, ипапыста̄қ ухпықатаӷаӷьяҳқақапут Кияӷныӷым а̄пқӣ. Кияӷныӷым апылъҳа Иӷныӷмун ипаңӯқ. ¹⁰Ынка̄м китум алңунак ухпықыхкумигу Иӷныӷа Кияӷныӷым қама илюңанитуқ Кияӷныӷым а̄пқа̄. Иўырңа китум алңунак ухпықынӷилъкумигу Кияӷнық иқлъыңиқыстыңлъяҳлъықа̄, қаюҳлъяк Кияӷныӷым а̄пқа̄ Иӷныӷминың ухпықынӷилъкаңа. ¹¹Уна Кияӷныӷым а̄пқақа̄, Кияӷныӷымңуқ тӯныхкақӣлъю кынлыңилңуӷмың уңувалъыӷмың, та̄на уңувалъық Иӷныӷанитуқ. ¹²Китум алңунак тугуклъиқумигу Иӷныӷа, уңувалъылгӯқ; китум алңунак тугуклъӣмаңилъкумигу Иӷныӷа Кияӷныӷым уңувалъыңылъҳитуқ.

Кынлыңилңуқ Уңувалъық

¹³Письмосиқанка тама̄кут лъпысинун ухпықилӷӣнун а̄тҳаның Иӷныӷан Кияӷныӷым, лъпысинун лӣсимакысқылъюку кынлыңилңуқ уңувалъыҳси. ¹⁴Налъюнықсюкигатаҳпут Кияӷнық; лӣсимакаҳпут нагатақӣлъю а̄пнымтыху сямың алңунак пиюкылъҳакун аюқылӷӣмың. ¹⁵Лӣсимакыхкумтыху нагатылъҳа сямың алңунак а̄птылъымнъың, лӣсимакаҳпут алъхыӷутақукут туңсиқамнъың лъңаның.

¹⁶Китум ысҳақумигу ухпықа̄лгутни сыӷлыҳқылӷӣ туқумун аюқынӷилңуӷмың юӷа̄ткылъигу ынка̄м Кияӷныӷым тӯнлигу уңувалъыӷмың. Акузиткыңъўа̄нка югыт сыӷлыҳқылъҳита туқумун пияҳқақынӷилъкаңитның. Сыӷлыҳқылъылгӯқ туқумун аюқылӷӣмун. Иўырңа юӷа̄ткысқыңъунӷитақа таўатын сыӷлыҳқылӷӣ. ¹⁷Қамахлъюни сыӷлытун пилъық сыӷлыҳқылъҳӯқ. Иўырңа сыӷлыҳқылъылгӯқ туқумун аюқынӷилңуӷмың.

¹⁸Лӣсимакаҳпут кина алңунак Кияӷныӷым авақута̄ сыӷлыҳқумаңинаӷна̄нӷитуқ, қаюҳлъяк Иӷныӷан Кияӷныӷым афлъыңакңукаңа ынка̄м Туӷныӷа̄м сыӷлытун пина̄нӷита̄.

¹⁹Лӣсимакукут Кияӷныӷым пикӣлъю қайўа Туӷныӷа̄м иглыӷутңуӷңа̄гу қамахлъюку нуна.

²⁰Лӣсимакаҳпут Иӷныӷан Кияӷныӷым тагилюни лӣгикыстыкақӣлъю лӣсимакысқылъюку Кияӷныпик. Кияӷныпигмытукут Иӷныӷанитутымнъың Иисус Христосыми. Та̄ната Кияӷныпиклъю, кынлыңилңуқлъю уңувалъық.

²¹Таӷнуҳаҳаӷни, иқитңалюси кияӷнысиӷўа̄ӷның!