1е Коринфянам

Павелым Посланияксюхўа̄ӷи Ухпықанун Коринфымылңуӷнун

¹Укут посланият Павелымың пиңӯт, Кияӷныӷым накмикыхка̄ның Иисус Христосымун апостолыңулюки. Ухпықа̄лгутфут Сосфен хўаңамнитуқ. ²Письмоӷақуңа Кияӷныӷым ухпыҳтыңитнун Коринфымылңуӷнун, Кияӷныӷым а̄фтыка̄нун юкналюси Христос Иисусыкун. Накмикыхкақӣсилъю пылюңитысқылъюси малигулъюси юлӷутыҳлъягнун тамаңанилңуӷнун, юӷақаюгнун Атанымнъун Иисус Христосымун, қамахтыңъўа̄ӷлюта Атанқаҳпут. ³Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Қуястылъҳыт Христосыкун

⁴Игамсиқаюгвикақақа Кияӷнық қаюҳлъяк наңлъыкыхкақӣси Христос Иисусыкун. ⁵Ынка̄м лъңакун аклъюңиӷика̄гуси лӣгикылъыӷмыңлъю, акузилъыӷмыңлъю. Ынка̄м ма̄тын лӣгикатаӷаҳлъықаҳси Христос, акузиткатаӷаҳлъықаҳсилъю Атанық. ⁶Алъяңуҳтыкамлъю кияҳта̄лъыҳпыси ипапиҳқа̄ уңипақыхкаҳпут Христос. ⁷Аглыӷналӷӣгның Таӷныӷагның тунусялгӯси сямың тамаҳа̄ның, утақӣңулюси Атанымта Иисус Христосым тагинқихтылъыҳқа̄ның. ⁸Кияӷныӷым ухпылъыси икнақуҳся̄маңинаӷна̄ӷӣ кынляңа киңулиҳпигаӷмун аӷныӷмун. Инқун анахутылъҳитысқылъюси Атаныҳпут Иисус Христос нанқихтикан югның. ⁹Ата̄сӣӷмылңӯм Кияӷныӷым накмикыхкақӣси илятысқылъюси Иӷныӷминун Иисус Христосымун Атанымнъун.

Коринфыӷмӣт Ухпықӣт А̄ҳтӣра̄ӷулъҳӣт

¹⁰Ухпықа̄лгутымни, Атанымта Иисус Христосым а̄тҳакун пӣмси та̄қысқылъюси а̄ҳтӣра̄ӷунъыӷмың. А̄фқӯтыхпынаси. Сюмыҳтаӷалъысилъю, сянақылъысилъю ата̄сӣҳнақлъюки. ¹¹Ухпықа̄лгутымни, иляңита Хлоям ныңлъюгутаңан уңипа̄ткақа̄тңа а̄ҳтӣра̄ӷутақнилюси. ¹²Илясиңуқ пӣқут: «Хўаңа Павелым малихся̄ҳтыка̄ңа». Иляси: «Хўаңа Аполлосым». Иляси: «Хўаңа Петырым». Паниның илясиңуқ пӣқут: «Хўаңа Христосым малихся̄ҳтыка̄ңа». ¹³Ынка̄ңам қафсинаҳқаҳси Иисус Христос. Павелым қақура̄ткыхкақисӣ? Крестиӷумастык Павелым а̄тҳакун?

¹⁴Игамсиқаюгвикақақа Кияӷнық крестиӷымаңилъкыхка налиҳӣнаҳси иўырңақун Криспалъю, Гаийялъю. ¹⁵Ынка̄ңам кина алңунак пина̄нӷитуқ крестиӷыманилюни атымкун. ¹⁶(Атхўай крестиӷикақанкалъю Стефановым ныңлъюгутаңа̄. Иўырңа нықамикынӷитақа китумун алъя алңунак крестиӷиматка).

Христосым Аҳтуӷьяҳқа̄нӷилъҳалъю, Кияӷныӷымлъю Пыҳқинылъҳа

¹⁷Христосым крестиӷилӣсқумаңита̄ңа, иўырңа каяхтыкақа̄ңа уңипақисқылъюңа Пинилӷӣның Уңипаның. Уңипақиңигатуңа атуқлъюки югым пыҳқинылъҳи, лю̄рақ аҳтуӷьяҳқа̄нӷилъҳӣтыснаюкамкун қақӯра̄ Христосым. ¹⁸Уңипақ Христосым туқулъҳа қақӯракун тымңиңӯқ ифлъянақылӷӣнун. Иўырңа югулилъыңылӷӣни хўаңкута лӣсимакаҳпут Кияӷныӷым аҳтуӷьяҳқа̄нӷилъқа̄. ¹⁹Акузитни Игақыхкани игақңа̄қ:

«Пыҳқинӷыт пыҳқинылъҳат атӯнаниҳтыслъықақа.

Лӣткаҳлъягытлъю лӣтылъҳат сясӣнаниҳтыслъықақа».

²⁰Ынка̄м сянақанңам нунам пыҳқинылӷӣңи? Сянақанңам апыҳтуӷистыңи Лӣлиҳтӯсят? Сянақанңам а̄ҳтӣра̄ҳтыт? Қамахтыңъўа̄ӷлюни лӣтылъыҳлъялъҳат сясӣнӷитуқ қаюҳлъяк Кияӷныӷым тымңитхўаңлъяқақа̄ пыҳқинылъҳа нунам.

²¹Пыҳқинылъыӷмикун Кияӷнық пика̄гуқ нунам юганун налъюкылъықнилюни пыҳқинылъҳитхун. Ынка̄м Кияӷныӷым накмикӣ югулиналюки қамахлъюки ухпылӷӣт Христосымың уңипақыхкамнъың. Ухпықа̄нӷилңӯт сюмыҳтаӷа̄ткақа̄т та̄на уңипақыхкаҳпут тымңиңунилюку. ²²Иудеит ысҳа̄сюгақут алъя̄ҳлъюхўаҳтилъыӷның ухпықналюку Кияӷныӷым уңипа̄; язычнигыт пыҳқинылъыңьюгақут ухпықналюку уңипақ ипаңутаңа. ²³Иўырңа паниның уңипақнақңўа̄ҳпут Христосымун туқуткыхкақнилюки қақӯракун. Уна уңипақ Иудеяни пияқнапихтуқ ухпықсяҳқа̄люни, язычнигни тымңӣңӯт. ²⁴Иўырңа хўаңкунъун Кияӷныӷым накмикыхка̄нун Иудеяңуӷңа̄мта, язычнигыңуӷңа̄мта таўатынъыӷитуқ. Христосым туқулъҳан қақӯракун лӣтыстыкақӣлъю Кияӷныӷым аҳтуӷьяҳқа̄нӷилъҳаныңлъю, пыҳқинылъҳаныңлъю. ²⁵Кияӷныӷым тымңитхўалъҳа пыҳқинӷатаӷаҳтуқ югым пыҳқинылъҳаның. Кияӷныӷым кая̄тылъҳа икнақатаӷаҳтуқ югым икнақылъҳаның. ²⁶Ухпықа̄лгутымни, нықамиклъюку натыся̄ӷыстык Кияӷныӷым туқлъюӷақңиси. Қафсинкӯраҳаӷни пыҳқинӷуяҳтуси нунам юган сюмыҳтаӷа̄ткылъҳитни. Қафсинкӯраҳаӷни аҳтӣгасяҳтуси иглыӷутистыт, налиӷмың аклъюңилңуӷның, ныңлъюгутның пиңуяҳтуси. ²⁷Иўырңа Кияӷныӷым накмикыхкақӣ тама̄кут налъю̄қат нунами кайңуся̄кналюки пыҳқинылӷӣт, Кияӷныӷым накмикыхкақӣ кая̄лңӯт нунами кайңуся̄кналюки тама̄кут икнақылӷӣт. ²⁸Кияӷныӷым накмикыхкақӣ укаванлыңӯтлъю, аситңина̄қӣтлъю нунами. Тама̄куңӯт Кияӷныӷым накмикыхкӣ, югнун лӣгикысқылъюки сюмыҳтаӷа̄ткыхкӣт а̄ңўа̄ӷулюки иўырңа Кияӷныӷми а̄ңўа̄ӷунӷитут. ²⁹Ынка̄ңам кина алңунак а̄ңа̄юхна̄нӷитуқ ныкывыхкуни сивуңани Кияӷныӷым. ³⁰Кияӷныӷӯқ тӯнистыси уңувалъыӷмың Христос Иисусыкун. Кияӷныӷым Христос Иисусымун тӯныстӣлъю пыҳқинылъыӷмың, ылъқуӷутыстӣлъюлъю Кияӷныӷми, аглыӷнаҳтыстӣлъюлъю, итымутыстӣлъюлъю сыӷлыҳқылъымнъың. ³¹Ынка̄ңам атуқылътыху, Акузитни Игақыхкани игақңалӷӣ:

«Кина алңунак а̄ңа̄юхсюкуни,

а̄ңа̄югуткылъики Атанӷым апыӷӣқӣ лъңанун».

Павелым Уңипақилъҳа Коринфыӷмӣнун

¹Ухпықа̄лгутымни, уңипақияҳтуӷақңама лъпысинун, атуқумаңитанка акузитыт лӣгикыпагниңилъкыси. Пыҳқилъыҳлъямкун уңипақиюнӷитуңа Кияӷныӷым уңипа̄мың лъпысинун. ²Пакикақанка тама̄кут қаюҳлъяк уңипақиюлӷӣңа Иисус Христосыңинаҳаӷмың туқулъҳаныңлъю қақӯракун. ³Лъпысинитақңама тытуга̄тақа̄гуңа, алиңрӯқа̄гуңа, уңылыхтыка̄гуңалъю. ⁴Кукшагналӷӣмың акузиткумаңитуңа пыҳқиныҳлъягым акузитаңаның. Иўырңа Аглыӷналӷӣм Таӷныӷам аҳтуӷьяҳқа̄нӷилъҳан ипапиҳқыхкақӣ апыҳтуӷилъҳынка ипаңутаңи. ⁵Ынка̄ңам ухпыҳтуси апалъюқлъюку Кияӷныӷым аҳтуӷьяҳқа̄нӷилъҳа, нака̄н апалъюқлъюку югым пыҳқинылъҳа.

Кияӷныӷым Пыҳқинылъҳа

⁶Аңтанӣтканун ухпықанун апыҳтӯсяқақа Кияӷныӷым пыҳқинылъҳа. Иўырңа та̄на пыҳқинылъық нунамың пиңунӷитуқ, талўа иглыӷутистыңаның. Қантаӷақун авӣӷусяҳқа̄гут. ⁷Пыҳқинылъық апыҳтӯсяқа Кияӷныӷым пыҳқинылъқа̄, налъюка̄т югыт. Югыт налъюкңўа̄ӷьяқаңат та̄на пыҳқинылъық кынляңа Кияӷныӷым лӣтыстылъҳанун. Талўа нунаңлъя̄маңилъюни Кияӷныӷым усюқсяҳқа̄люта пикақӣлъю пыҳқинылъыӷмикун. ⁸Налиҳӣнӣта̄ нунам иглыӷутистыңита лӣгикумаңита̄т та̄на пыҳқинылъық. Лӣгикыхкақсяқумыхтыху, қақӯраӷнаянӷита̄т Атанӷа ниӷуҳқылъҳым. ⁹Игақыхкани Акузитни игақыхка̄гуқ:

«Тама̄кут ийым ысҳамаңилъкаңи,

тама̄кут сигутым нагақӯмаңилъкаңи,

тама̄кут умьюгам сюмыҳтаӷа̄ткумаңилъкаңи.

Кияӷныӷым ята̄ҳқыхкақӣ пиниқистыминун».

¹⁰Иўырңа Кияӷныӷым лӣгикыстыкақӣ хўаңкунъун Аглыӷналӷӣгныкун Таӷныӷагмикун. Таӷныӷам ювӷӣӷақа̄ сяңўа̄ тамаҳа̄н, талўа Кияӷныӷым қа̄мнарухлъяганилңӯт. ¹¹Югым сюмыҳтаӷалъҳа китум алңунак налъюка̄ иўырңақун лъңан катам таӷныӷахкынка. Таўатыҳпигақ Кияӷныӷым сюмыҳтаӷалъҳа китум алңунак налъюка̄ иўырңақун лъңан катам Таӷныӷахкынка. ¹²Нунам таӷныӷа̄ның алъхыӷусимаңитукут. Йыӷлыги, алъхыҳтыкақахпут Таӷныӷак Кияӷныӷмың пӣк, лӣгикналюки қамахлъюки Кияӷныӷым тӯныхкӣ хўаңкунъун. ¹³Ынка̄м акузиңигатукут югым пыҳқинылъҳакун, иўырңа атуқақапут акузитыт Аглыӷналӷӣм Таӷныӷам апыҳтӯткӣ. Таўатын пӣқукут апыҳтӯсяқнымтыки Таӷныӷам ипапилъҳи тама̄кунун алъхыӷутканун Аглыӷналӣгның Таӷныӷагның. ¹⁴Иўырңа кина алңунак алъхыӷусимаңилңуқ Аглыӷналӷӣгның Таӷныӷагның, тугуклъиӷиңигатуқ тунусяның Таӷныӷагның пиның. Тама̄кут тунусят тымңитхўаңӯт лъңани. Лӣгикыпагниңитӣ қаюҳлъяк Аглыӷналӷӣм Таӷныӷам каюсилъҳӣна̄кун лӣгиксяҳқа̄гуқ. ¹⁵Югым алъхыӷуткам Аглыӷналӷӣгның Таӷныӷагның нанқихтақа̄ сяңўа̄ қамахлъюку. Иўырңа китум алңунак нанқихсяҳқақынӷита̄ лъңа. ¹⁶Акузитыт Игақыхкат пилъҳистун:

«Китум алңунак налъюка̄ Атанӷым сюмыҳтаӷалъҳа.

Ынка̄м китум алңунак лӣлиҳтуӷна̄нӷита̄».

Иўырңа хўаңкута ухпықани сюмыҳтаӷаӷақукут Христосым сюмыҳтаӷалъҳатун.

Кияӷныӷым Қыпҳаҳтыңи

¹Ухпықа̄лгутымни, лъпысинитақңама алыҳқуҳпагниңиткақамси алыҳқуӷўақылъымтун ухпықаҳлъягыт. Йыӷлыги алыҳқуқақамси ухпылъыси аңлилъҳилңуӷыстун аюқлъюки. Ухпықылъыҳси Христосыкун таӷнуҳаҳаӷыстун аюқут. ^2,3Кукшагнаңуна̄н апыҳтуқақамси. Катам таўатын мамаҳаӷмың мыӷыслъыҳӣстун пикақамси. Нықыпигмың ныӷыстыпагниңиткақамси қаюҳлъяк нықыпихтуҳпагниңилңӯси сялин. Паниның ма̄тын нықыпихтуҳпагниңитақуси, қаюҳлъяк ухпықа̄нӷилңуӷыстун аюқуси сялин. Лӣгикыстыңъўа̄ҳси ухпылъыҳпыси аңлинӷитылъҳа ақиналъыҳпысигунлъю, аӷиватылъыҳпысигунлъю. Ухпықа̄нӷилңуӷыстун кияҳтыңъӯси. ⁴Налиҳси пиныӷмини: «Хўаңа Павелым малихся̄ҳтыка̄ңа», илясилъю пиныӷмыхни: «Хўаңа Аполлосым малихся̄ҳтыка̄ңа», ухпықа̄нӷилңуӷыстун пӣқуси.

⁵Кинаңа̄ўа Аполлос? Кинаңузиңа хўаңа? Қыпҳаҳтыкӣнкуң Кияӷныӷым, каюсӣткақамси ухпықысқылъюку Христос. Қыпҳақалыстаҳӣна̄гукуң Атаныӷым қылӷутка̄ның. ⁶Лъпыси Кияӷныӷым пӣтысиӷаӷвикӣси. Пӣтысиӷаӷақуңа, Аполлосым мыҳқақа̄, иўырңа Кияӷныӷым нагустақа̄. ⁷Ынка̄ңам кина алңунак пӣтысӣӷалӷӣлъю, мыҳқилӷӣлъю укавантуқ. Кияӷныҳӣнақ а̄ңыҳлъяхтуқ нагустикаюгӯқ. ⁸Пӣтысиӷаҳталъю, мыҳқисталъю таўатылъкутук. Кияӷныӷым акилыҳтуӷьяҳқақа̄к қыпҳалъҳыхкынкун. ⁹Қыпҳалгуткутукуң Кияӷныӷмун; лъпыси Кияӷныӷым пӣтысиӷаӷвикӣси.

Кияӷныӷым мыңтыӷақӣси. ^10,11Кияӷныӷым наңлъыхталъық тагивақа̄ атуқлъюку пӣнлиқақақа қыпҳақақ лъпысини. Пыҳқинылӷӣстун тунымиқақақа мыңтыӷақ улимаяҳқақ. Иисус Христосыңина̄гуқ тунымақ, алъя ся̄ӷўакун тунымаҳқӣтуқ. Иляңита улимавикңўа̄т қа̄йңакун. Қамахлъюни пира̄мсилюни улимали. ¹²Иляңита атуҳлъықа̄т золото, серебро, аңляминалӷи уйӷақ, иляңита унаҳсиқ, палиқақ выга̄қ, уңагақлъю тунымакун та̄хун. ¹³Сяңўа̄ атуқыхкаҳпут ысҳаӷьяҳқақаҳпут ата̄сикаҳта̄мта қамахтыңъўа̄ӷлюта аӷныӷми таўани Христосым нанқихтилъыҳқа̄ни. Кынӷым ысҳаҳтысяҳқақа̄ қыпҳақаҳпут натытуляңа. ¹⁴Сяңўа̄ югым атуқыхка̄ куманӷилъкуни, акилыҳтӯсяңьяҳқа̄гуқ. ¹⁵Иўырңа иляңан югым қыпҳақа̄ ифлъяяҳқа̄гуқ кумақуни, акилыҳтӯсяңна̄нӷитуқлъю. Нақамынрақ лъңа югулилъыңьяҳқа̄гуқ, катам таўатын кыныӷмың а̄нылӷӣстун.

¹⁶Лӣсимакңўа̄ӷаҳси Кияӷныӷым Храмкӣси. Аглыӷналӷӣк Таӷныӷакык кияҳтыңӯқ илюхпысини! ¹⁷Китум алңунак на̄фқыхкагу Кияӷныӷым Храмыңа, Кияӷныӷым на̄фқысяҳқақа̄ лъңа, қаюҳлъяк Кияӷныӷым Храмыңа аглыӷналӷӣңӯқ. Лъпыси Храмкӣси.

¹⁸Кина алңунак пӯҳтыфқа̄ми лъңаның пили. Налиҳси сюмыҳтаӷа̄ңукуми лӣтыпахлъяка̄нилюни нунам пыҳқинылъҳаның, йықай малихлъигу Христос, ухпықа̄нӷилңӯт тымңиңуниӷңа̄тху. Таўатын пикуни ынңа̄талъ пыҳқинӷуҳтыпӣхлъықа̄. ¹⁹Кияӷныӷми нунам пыҳқинылъҳа тымңиңӯқ. Акузитни Игақыхкани игақңа̄қ: «Пыҳқинӷыт югыт нунами хўани Кияӷныӷым пипагниңӣтыстақӣ лъңита катам пыҳқинылъҳитхун». ²⁰Игақыхка̄гуқлъю: «Атанӷым лӣсимака̄ пыҳқинӷым югым сюмыҳтаӷалъҳа сясӣнӷитуқ».

²¹Ынка̄ңам китум алңунак қука̄югуткысяҳқақынӷитӣ сяңўа̄т югыт пӣқыхкаңит. Сяңўа̄ қамахлъюку Кияӷныӷым пиниҳқусиҳқа̄ҳтыстыкақа̄ лъпысинун, ²²талўа Павел, Аполлос, Петырлъю. Нуналъю уна, уңувалъықлъю, туқулъықлъю, сяңўа̄лъю алңунак кияҳта̄лъыӷмылңуқ ма̄тын, сяңўа̄лъю алңунак ка̄сяҳқақ, қамахтыңъўа̄ӷлюки лъпыси пикаси. ²³Ынка̄м лъпыси Христосым пикӣси, Христос Кияӷныӷым пика̄.

Христосым Апостолыни

¹Сюмыҳтаӷа̄ткитыкут қыпҳаҳтыкнилюта Христосымун. Қыпҳаҳтыңӯкут апыҳтуӷилӷӣт ипапиҳқылъыӷмың Кияӷныӷым апыҳтӯтка̄ның хўаңкунъун. ²Христосым қыпҳаҳтыңи ата̄сӣӷмысяҳқа̄гут. ³Хўаңа, ата̄сӣӷмынъилюңа қыпҳаҳта пикуфсиңа, налиӷмың ата̄сӣӷмынъыӷинъилюңа китум алңунак пикаңаңа, сюмыҳтаӷа̄ткынъа̄нӷитақа. Талўа хўаңамның нанқихсигатуңа. ⁴Налъюкақа̄ сямың анахусиматка, иўырңа анахутылъҳинъилюңа пинӷитуңа. Атанҳӣна̄м нанқихсяҳқақа̄ңа. ⁵Ынка̄ңам ўӣн нанқихтыхпына̄н кина алңунак сялъҳаның. Атанӷым тагинқихтыкуми кукыхсяҳқақӣ югыт илюңит алӣҳқылъюки сяңўа̄т ӣӷңаялӷӣт тысқамани. Алӣҳқысяҳқақӣ сяңамың ся̄қутаңи. Та̄хкын усюқсяҳқат тама̄кут усюқылъыңьяҳқа̄гут Кияӷныӷмың.

⁶Ухпықа̄лгутымни, лъпыси апалъюқлъюси Аполлослъю хўаңкутуң успутақңӯкуң. Успута̄гукуң лъпысинун лӣтысқылъюку уна игақңалӷӣ сямың писӣтаңа: «Қа̄ткақитыки сяңўа̄т игақңалӷӣт Акузитни Игақыхкани». Налиҳӣнаҳпыси а̄ңа̄югуткысяқуна̄н ата̄сиқ ю̄к, а̄лъҳа угумиклъюку. ⁷Китум пиниӷатаӷаҳтыстиси ухпықа̄лгутыхпысиның? Сяңўа̄ қамахлъюку Кияӷныӷмың пикаҳси. Кияӷныӷым тӯнумакаңиси, а̄ңа̄юхтыхпынаси. Уңипаҳпынаси хўатын: «Сяңўа̄ қамахлъюку хўаңамның пикақақа».

⁸Алъхыҳтыңъўа̄ӷума̄ҳси аклъюкыхкаҳси қамахлъюку! Аклъюңиӷиңўа̄ӷлюси аюқуси! Хўаңкуңунаси умӣлгуҳсима̄си! Умӣлгулӷӣситуқ, ынка̄м умӣлгутилгусиӷнаяӷамси! ⁹Сюмыҳтаӷалъымни Кияӷныӷым ныкыхтыкақӣлъю апостолыни укалиҳпига̄люта югның. Анусимиңлъяӷастун аюқукут, туқусяҳқастун. Югыт қамахтыңъўа̄ӷлютың, яқулгытлъю ысҳапагақӣлъю. ¹⁰Хўаңкута налъюңуҳтыка̄гукут Христос апалъюқлъюку, иўырңа лъпыси сюмыҳпысини пыҳқиныпигӯси ухпықани. Югыт ўа̄кигатӣлъю, иўырңа сюмыҳпысини лъпыси нагатақӣсилъю, қӯлваӷақӣсилъю, хўаңкута пиңигатӣтинкут. ¹¹Хўавымун кынляңа нықаңисягақукут, мыӷьяҳқӣсягақукут, а̄ткӣсягақукут. Югыт қывуткақӣлъю. Ныңитукут, иглыҳта̄гукут қӯнпың. ¹²Қыпҳаӷақукутлъю қывӯлъюта маниңналюта кияҳта̄ӷусиҳқамың. Сыӷлықӯлӷӣт хўаңкунъың пинитун алыҳқуӷақапут. Ухпықа̄тымнъың амью̄ткылӷитлъю, акузилӷӣгатукутлъю, акисигатапутлъю. ¹³Иқлъыңиқулӷилъю пинитун алыҳқуӷақапут таўатын пифқӣта писқылъюки. Хўавымун кынляңа сюмыҳтаӷа̄ткақӣлъю, сякўа̄ӷыстунлъю, сясӣнӷилңуӷыстунлъю. ¹⁴Письмонӷитуңа кайңуюхналюси. Иўырңа пиниқыпихлъюси хўаңа катам таӷнуҳақылӷистун лӣлиҳтуӷьюгақамси кияҳта̄лъыҳқаҳпысиның. ¹⁵Қайўа апыҳтуӷистытупихсяӷңа̄ҳпыси Христосымың, ататуҳлъянӷитуси. Ухпықсюхўаӷақңафсигу Иисус Христос нагақуӷлюки Пинилӷӣт Уңипат, таўанита атастун лъӣқаңа лъпысинун. ¹⁶Ынка̄ңам кияҳтысюпихтамси хўаңамтун. ¹⁷Тама̄кын апалъюқлъюку Тимофей каяхтыңъўа̄қа лъпысинун. Иӷнықылӷӣстун аюқақа Атаныҳқун. Ата̄сӣӷмылңуқ ухпықақ пиниқыпихтақа. Нықаңуҳна̄ӷӣси натын хўаңа кияҳтақылъымның Христосымун. Таўатылңуқ кияҳта̄лъық апыҳтӯсяқақақа ухпықанун тамаңанилңуӷнун.

¹⁸Иляси а̄ңа̄югныӷуҳтақут, қаюҳлъяк сюмыӷмыхни ля̄лиҳна̄нӷинъилюңа пикақа̄тңа Коринфымун. ¹⁹Иўырңа Атанӷым пиюкылъқыхкагу, лъпысинун пияҳтуңыстаҳтуңа. Та̄хкын лӣгикылъықанка а̄ңа̄югныӷыт а̄ңа̄юхтылъыӷмыгыстун пияҳқа̄таңи. ²⁰Кияӷныӷым Атаныҳпагулъҳа акузитытхун аюқынӷитуқ иўырңа аҳтуӷьяҳқа̄нӷилъыҳқун аюқуқ. ²¹Ка̄скума сясқысюгыстыңъа? Анагуталиӷлюңа̄ аӷью̄ӷлямсӣ, налиӷмың пиниқлъюси, пинитуңўа̄қ пилямсӣ?

Анагңалӷӣ Атуқутылъық

¹Нагақуӷақақа налиҳпысиңуқ атами нулиҳа нулиҳқылӷӣстун аюқа̄. Сыӷлыпихлъыҳӣмың сыӷлыҳқыңъӯқ талўа ухпықа̄нӷилңӯт атуқыснаянӷита̄т та̄на сыӷлыҳқылъық. ²Паниның ю̄куткақытсӣ лъпысиның катам? Қивӷуҳлъягьяқлъыгыстун! Лъпыси иқисяқлъыгыстун ю̄к та̄на акулыхпысиның. ^3-5Уявантыҳлъягьяӷңа̄ӷма сюмыҳтаӷа̄ткыҳлъяўа̄қа. Таўанлыңуӷыстун лъпысини агӷиткыхкақақа натын пилъыҳқамың та̄на ю̄к а̄тҳакун Атанымта Иисусым. Ухпықани, алъямың қырңуӷускуфси, таўанлыңуӷыстун умьюгаӷмиклъюңа, аҳтуӷьяҳқа̄нӷилъҳакун Иисус Христосым ю̄к та̄на лъпысинитыстыхпына̄н алъямыңлъю пинакыси. Тӯнитыхӯ Туӷныӷаӷмун, пиюкылъыӷмитун югусӣ на̄фқылъигу, ынка̄м таӷныӷакык югулилъыңысқылъюкык Атанық тагинқихтыкан.

⁶Пинӣюхтылъыҳси сыӷлыӷӯқ. Лӣсимакаҳси хўатын пилъық: «Закваскам ҳӯҳтыстыҳлъякаюўа̄ акӯтақ». ⁷Тама̄кын апалъюқлъюку сыӷлыҳқылъҳыт акулыхпысинилңӯт иқитыки. Таўатын пикуфси пылюңилъықуси акӯтастун закваскаңилңуӷыстун. Ипа пылюңитуси қаюҳлъяк Христос Пасхам пынъӣӷаӷақа̄ аҳқуткыхка̄гуқ сыӷлыҳқылъымнъун. ⁸Катам Иудеит иқитылъҳистун закваскат мыңтыӷамыхның ята̄ҳқутфагилгамыхтыху Пасхам нықынӷаҳқылъҳа, таўатыҳпигақ сыӷлыҳқылъыпут, иқилъықапут. Ынка̄ңам пылюңилъықукут, ипапиҳқыңъалъықукутлъю.

⁹Иляңитхун посланияма илятңаснаниӷамси ухпықанун анагңалӷӣкун атуқулъҳӣнун. ¹⁰Акузиткыңъунӷитанка ӯм нунам юги анагңалӷӣкун атуқулъҳӣт, налиӷмың пакигныӷыт, ўаяӷнӣҳтыт, налиӷмың тама̄кут манигӯткаюгыт кияӷныңлъяқанун. Иқисюкуфси таўатылңуӷның югның нуна унисяҳқақаҳси. ¹¹Иўырңа посланиямкун илятыснаниқақамси тама̄кунун ухпықа̄лгутңунилютың пилӷӣнун блудникыңуката, налиӷмың пакигныӷуката, манигӯткаюгуката кияӷныңлъяқанун, сыӷлықӯӷутңуката юлгутмың, мыӷыстыңуката, ўаяӷнӣҳтыңукаталъю. Талўа ныӷылгусиҳпынаки таўатылңӯт.

^12-13Хўаңа нанқихсяҳқақынӷитанка ухпықа̄нӷилңӯт; Кияӷныӷым нанқихсяҳқақӣ. Иўырңа лъпыси нанқихсяҳқақсяӷаси ухпықа̄лгутыси. Акузитыт Игақыхкат пӣт: «Сыӷлыҳқыста иқитыху акулыхпысиның».

Ухпықа̄нӷилңуӷнун Нанқихтысқыхпынаки Ухпықат

¹Налиҳси а̄ҳтӣра̄ныӷмини ухпықа̄лгутминың, сяңан агля̄тақагу нанқихтивигмун? Кайңуюгигастык ухпықа̄нӷилңуӷнун нанқихтысныҳпысини лъпыси ухпықани? Ухпықат ухпықа̄лгутмыхнун таклъяӷутысяҳқа̄яҳтут а̄ҳтӣра̄ӷутылъыӷмыхның. ²Лӣсимакынӷистыхӯ Кияӷныӷым юган нанқихсяҳқӣ ухпықа̄нӷилңӯт иляңани аӷныӷым? Нанқихсяҳқақңукуфсики, натын пияқнаҳтуткалъықыфтат лъпысинун нанқихтылъыҳқӣ пияқнӣлңӯт? ³Лӣсимакынӷистыкӣ нанқихсяҳқақыкыпут яқулгыт? Ынка̄м таклъяҳқулъҳыт а̄ҳтира̄ӷутылъыӷның хўани уңувалъыӷми пияқнӣсяҳқа̄яҳтут. ⁴А̄ҳтӣра̄ӷунъыҳпысини сяңафсиңам ухпықа̄нӷилңуӷнун пӣқыстык нанқихтысқылъюси? ⁵Кайңунаҳалык лъпыси! Лӣсимакақа акулыхпысини лӣсималӷӣмың таклъяӷутистыкаҳқалгӯт ухпықа̄лгутыт а̄ҳтӣра̄ӷулъҳӣт. ⁶Йыӷлыги ухпықам ухпықа̄лгутни агля̄тақа̄ ухпықа̄нӷилңуӷнун нанқихтистынун, агӷиткысқылъюки а̄ҳтӣра̄ӷутылъытынь. ⁷Таўатытылъыҳпысигун ухпықа̄нӷилңуӷыстун кияҳта̄ӷӯси. Ухпықа̄лгутыси агля̄тыхпынаки нанқихтивигмун. Ныпӣӷутақитыки анахтыӷңӣси, пӯҳтыӷңӣси. ⁸Итупилъ лъпыси катам ухпықа̄лгутыси анахтақасилъю, пӯҳтақасилъю.

⁹Ипапыста̄қ лӣсимаксяҳқақсяӷаҳси сыӷлытун пистыт ныкаҳқӣлңӯт Атаныҳпагулъҳани Кияӷныӷым. Пӯҳтыстыхпынаси китумун алңунак. Кияӷныӷым Атаныҳпагулъҳани ныкаҳқӣтут: блудникыт, манигӯткаюгыт кияӷныңлъяқанун, гылгаӷнӣҳтыт, аӷна̄сит, югыт юлгутмыхның атуқикаюгыт, аӷнат аӷна̄лгутмыхның атуқикаюгыт. ¹⁰Тама̄кутлъю тыглыңалӷӣт, пакигныӷыт, мықаюгыт, сыӷлықӯҳтыт югның, ўаяӷнӣҳтыт, ныкаҳқӣтут Атаныҳпагулъҳани Кияӷныӷым. ¹¹Иляси таўатысялӷӣт сялин ухпықилъҳилъютың Христосымың. Иўырңа ма̄тын Кияӷныӷым Таӷныӷахкынка уӷвуҳқыхкақӣси сыӷлыҳқылъыҳпысиның, а̄фтыкақӣси Кияӷныӷмун, сыӷлыҳқумаңилңуӷыстунлъю лъӣҳтыка̄гуси қаюҳлъяк ухпықилӷӣси Атаныҳқун Иисус Христосыкун.

Югусиси Қӯлва̄сиҳқақаси Кияӷныӷмун

¹²Иляси пика̄гут: «Итагнаҳтуқ сяңўа̄ пиюкылъқа пияӷңа̄мкун». Иўырңа хўаңа пӣмси, иляңан сялъыҳпыси каю̄сӣнъа̄нӷитӣ ухпылъыси. А̄, ынтақун: «Итагнаҳтуқ сяңўа̄ пиюкылъқа пияӷңа̄мкун». Иўырңа сюмыҳтаӷаӷьялӷӣңа сыӷлыӷмун айӷипахлъягнаюкама пина̄нӷитуңа. ¹³Киналъю пинаялӷӣ: «Нықа улима̄ӷӯқ ақсяқумун, ақсяқуқ нықмун». А̄, иўырңа иляңани аӷныӷым Кияӷныӷым на̄фқысяҳқақа̄к қамахлъюкык ақсяқуқлъю, нықалъю. Югусиқ блудыӷқанҳисаӷтуқ қаюҳлъяк югусиқ Атаныӷмун пиңӯқ, Атанық югусимнъун пиңӯқ. ¹⁴Иляңани аӷныӷым Кияӷныӷым макысяҳқақӣ югусипут туқулъыӷмың аҳтуӷьяҳқа̄нӷилъыӷмикун, таўатыҳпигақ макытылъыӷмитун Атанық Иисус Христос туқулъыӷмың.

¹⁵Лӣсимакынӷистыхӯ югусиси налиӷнықыхкаңи Христосым югусӣн? Югусиқа Христосым пилӣтка̄ атуқысна̄яҳсикӯн аӷнамун акикикаюгмың югусиминың? Нака̄! Пина̄нӷитақа. ¹⁶Нықамиклъюку, югым атуқыхкумигу аӷнақ акикилӷӣ югусиминың ата̄сӣҳтыкаюгык югусӣк. Қаюҳлъяк игақңа̄қ Акузитни Игақыхкани: «Ма̄лӷук югусӣк ата̄сиҳсяҳқа̄гук». ¹⁷Иўырңа Атаныӷмун лъӣқувык, ата̄сӣгутык таӷныӷакун.

^18-20Лӣсимакынӷистыхӯ югусиси Кияӷныӷым Храмкыхкаңи, Аглыӷналӷӣм Таӷныӷахкынка кияҳфиги? Кияӷныӷым тӯныхкақисӣ Аглыӷналӷӣгның Таӷныӷаӷминың, ынка̄м ма̄тын Кияӷныӷым пилӣткақӣси. Лъпысиның пикынӷитуси. Тама̄кын апалъюқлъюку блудыгпынаси. Блудыӷкуфси, нукыхнаҳқылӷӣстун Кияӷныӷым Храмыңа пилъықаҳси. Иляңи сыӷлыҳқылъҳыт таўатынъыӷитут. Кияӷныӷым тукфиқақӣси акитупихлъюку. Тама̄кын апалъюқлъюку қӯлваҳтыху Кияӷнық югусиҳпысигун.

А̄пқуӷа̄лъҳыт Ныңуӷутылъыӷмың

¹А̄птыкақаҳпысиңа ныңуӷутылъыӷмың письмохпысигун. Укуста кӣмсӣтынка. Пиниҳтуқ ю̄к нулӣңунани. ²Иўырңа ю̄к тамаҳаӷми нулӣлгуяҳқа̄гуқ, аӷнақ тамаҳаӷми угилгуяҳқа̄гуқ, қаюҳлъяк нанӷӣқулъыңнаюкафси блудылъыӷмун. ³Югым ыфқуҳсяҳқақа̄ нулӣни. Таўатыҳпигақ аӷнам ыфқусяҳқақа̄ угини атуқутылъыӷмыгни. ⁴Аӷнам лъңинаӷми югусини пикынӷита̄, угиңанлъю пика̄. Таўатыҳпигақ югым лъңинаӷми югусини пикынӷита̄, нулиҳанлъю пика̄. ⁵Ныңуҳсимакуфси иҳсякутыхпынаси. Ўыткуқун итагнақулъюси атуқусяҳқа̄фқа̄фси қафсинат унугыт юӷаӷатаӷаӷналюси. Та̄хкын атуқунъықихлъыҳа̄си нанӷӣқулъыңнаюкафси Туӷныӷаӷмың қаюҳлъяк нуқысяҳқа̄наниқа̄лӷӣси.

⁶Қылӷунӷитамси нулиҳтӣсқылъюси налиӷмың угӣӷысқылъюси. Иўырңа пиюкуфси пилӷа̄си. ⁷Хўаңамтун нулиҳтуфқа̄фси, аӷнанилъю угӣфқа̄фси. Иўырңа алъякутукут. Кияӷныӷым нулӣлгустыкаюгӣ иляңи югыт, угилгустыкаюгӣ иляңи аӷнат. Иўырңа итагнаҳтыстыкаюгӣ иляңи югыт нулӣңунаки, аӷнатлъю угиңунаки. Кияӷныӷым алъякулъҳӣ тунусяқ тӯныхкаюўа̄ югнунлъю, аӷнанунлъю.

⁸Уната пикыхка нулиҳтӯмаңилңуӷнун, угӣӷумаңилңуӷнунлъю, угиңиӷанунлъю: Пиниӷнаяҳтуси нулиҳтунӷисяқуфси хўаңамтун, аӷнанилъю угӣнӷисяқуфси. ⁹Иўырңа ю̄к пиниӷатаӷаӷнаяҳтуқ нулиҳтуӷлюни нуқытыпагниңилңуқ аӷнаӷьюлъыӷминың. Аӷнақлъю пиниӷатаӷаӷнаяҳтуқ угӣӷлюни нуқытыпагныңилңуқ югьюлъыӷминың. Пиниӷатаӷаӷнаяҳтуси ныңуҳлъюси нанӷӣқулъыңылъыҳқаҳпысиның блудамун.

¹⁰Укут акузитыт хўаңамның пиңунӷитут, қылӷуся̄гут Атаныӷмың ныңуҳтыканун. Аӷнақ иқисяҳқа̄нӷитуқ угиминың. ¹¹Иўырңа иқискуми, алъяның угӣӷьяҳқа̄нӷитуқ налиӷмың угиминун лъӣнқихлъи. Югымлъю иқитысяҳқақынӷита̄ нулӣни.

¹²Уна қылӷусяқ хўаңамның пиңӯқ иляңитнун. (Атанӷым сямың пӣҳсимаңита̄.) Ю̄к ухпықақ ухпықа̄нӷилңуӷмың нулӣлгукуми лъңанисюлӷӣмың, иқитысныӷилъигу. ¹³Аӷнақлъю ухпықақ ухпықа̄нӷилңуӷмың угилгукуми лъңанисюлӷӣмың, иқинъыӷилъи. ¹⁴Инқун ю̄к ухпықа̄нӷилңуқ а̄фтыңъўа̄қа̄гуқ Кияӷныӷмун қаюҳлъяк нулиҳа ухпықа̄лӷӣ. Аӷнақлъю ухпықа̄нӷилңуқ а̄фтыңъўа̄қа̄гуқ Кияӷныӷмун қаюҳлъяк угиңа ухпықа̄лӷӣ. Тама̄кын апалъюқлъюку таӷнуҳа̄т пылюңитутлъю, а̄фтыңъўа̄қа̄гутлъю. ¹⁵Иўырңа налиқ ухпықа̄нӷилңуқ иқисюкуми, иқилъи. Та̄хкын ухпықақ ю̄к налиӷмың аӷнақ итымли таўатылңуӷмың ныңуҳтылъыӷминың. Кияӷныӷым ныкыхмылъюси кияҳтысқысюгақӣси. ¹⁶Ухпықами аӷнами, угихпынискувык каюсӣтақся̄ӷан югулилъыӷмун. Налиӷмың ухпықами югми, нулӣҳпынискувык каюсӣтақся̄ӷан югулилъыӷмун.

Кияҳтык Кияӷныӷым Кияҳтысқысюлъҳатун

¹⁷Кияӷныӷым ата̄сикаҳтаҳпыси ухпықистақңиси Христосымың, ныңуҳтыка̄стык налиӷмың ныңуҳсимаңистык? Обрезанияка̄стык налиӷмың пимаңистык? Қыпҳаҳтыля̄ӷуяӷыстык налиӷмың қыпҳаҳтыля̄ӷунӷистык? Алмысиқлъюси таўатын нагныҳтык қаюҳлъяк Атанӷым таўатытыстыкақӣси. Қамахлъюки ухпықат та̄хкын апыҳтуӷақанка. ¹⁸Ю̄к обрезаниякақ ухпыӷақңами, алъяңуҳтыфқа̄ми пилӷа̄қ. Обрезаниямаңилңуқлъю ухпықақ, обрезанияқыфқа̄ми пилӷа̄қ. ¹⁹Обрезаниялъықлъю, обрезаниянӷитылъықлъю пикатңунӷитук. Питңуяҳқақта та̄на қа̄ткылъюки Кияӷныӷым Лӣлиҳтӯсӣ. ²⁰Ата̄сикаҳтаҳпыси ухпықӣқңафси, натытылъыҳпысистун алмысиқитыху. ²¹Қыпҳаҳтыля̄ӷуяҳсӣн Кияӷныӷым туқлъюӷақңатын? Сюмыҳтаӷа̄ткыхпына̄н. Иўырңа қыпҳаҳтыля̄ӷунаниӷнақңукувык, ся̄қсин лыган таўатын пилӷа̄тын. ²²Қыпҳаҳтыля̄қ накмикыхка̄ Атанӷым, лъңан итымңалӷӣка̄. Таўатыҳпигақ қыпҳаҳтыля̄ӷунӷилңуқ ю̄к накмикыхка̄ Христосым, лъңан қыпҳаҳтыля̄қа̄. ²³Кияӷныӷым тукфиҳпакақӣси, ынка̄м қыпҳаҳтыля̄ӷуҳтыхпынаси югнун. ²⁴Ухпықа̄лгутымни, тамаҳаҳпыси аӷулӣсяҳқа̄гуси илятңалъыҳпысигун Кияӷныӷмун алмысиқлъюси таўатын туқлъюлъҳатун.

Апыҳтӯсяқ Ныңуҳсимаңилңуӷнун

²⁵А̄птақаҳпысиңа натын сюмыҳтаӷа̄ткақутаңи угӣӷумаңилңӯтлъю, нулиҳтӯмаңилңӯтлъю. Атанӷым уңипа̄симаңита̄ңа Лӣлиҳтӯсямың тама̄кунун югнун, иўырңа уңипа̄нъақамси сюмыҳтаӷалъымның. Кияӷныӷым наңлъыхталъҳакун апостолыңуҳтыка̄гуңа. Тама̄кын апалъюқлъюку ныӷьюкнакыфсиңа.

²⁶Сыӷлылӣҳлъягуҳтуқ нуна ма̄тын. Сюмымни хўаңа итагнаӷьяҳқа̄гуқ ю̄к алмысиқлъюни. ²⁷Нулиҳтӯмазӣн? Иқитыстыхпына̄н нулиҳын. Нулиҳтӯмаңилъкувык, нулиҳтуӷнақыхпынаң. ²⁸Иўырңа нулиҳтуқувык сыӷлыҳқыңъунӷитутын. Угӣӷумаңилңуқ угӣқуми, сыӷлыҳқыңъунӷитуқ. Иўырңа нулиҳтуқуфси, аӷнатлъю угӣқумың пияқлъӣӷатаӷаӷьяҳқа̄гуси хўани кияҳта̄лъыӷми. Пияқлъӣҳтысюнӷитыпихтамси таўатын.

²⁹Ухпықа̄лгутымни, уната пикыхка: Атаныҳпут тагияҳтуңыстаҳтуқ. Та̄на апалъюқлъюку ныңуҳтыкат қыпҳа̄лъитху Атанық ныңуҳсимаңилңуӷыстун. ³⁰Қивӷулӷӣтлъю қыпҳа̄лъитху қивӷунӷилңуӷыстун. Қуяңалӷӣтлъю қыпҳа̄лъитху қуянӷилңуӷыстун. Тама̄кутлъю тукфиҳтуҳлъякаюгыт қыпҳа̄лъитху аваңилңуӷыстун. ³¹Кияҳтыңъулюси нунами хўани, мыгнукатаӷаҳпына̄н нунам сянқутаңа. Қаюҳлъяк нуна алмысиқлъюни авӣӷусяҳқа̄гуқ.

³²Кияҳта̄лъыӷмыңтуқ хўакын сюмыҳтаӷа̄ткыхкӣлңӯси. Нулиҳтӯмаңилңуқ қыпҳалъыҳқаҳта̄ӷаҳтуқ Атанӷым қыпҳақа̄ның қаюҳлъяк ыфқуҳсюгақыхкаңа. ³³Нулӣлык қыпҳаӷатаӷақаюгӯқ кияҳта̄лъҳым қыпҳақа̄ның қаюҳлъяк ыфқуҳсюгақыхкаңа нулӣни. Ынка̄м сюмыҳтаӷалъҳа малӷуҳқыңъўа̄қуқ. ³⁴Таўатыҳпигақ аӷнатлъю аюқут. Аӷнат угиңӣткат, угӣӷумаңилңӯтлъю қыпҳалъыҳқаҳта̄ӷатут Атанӷым қыпҳақа̄ның, қаюҳлъяк югуситыңлъю, таӷныӷатыңлъю тӯньюгақӣт ӣңунӣта Атаныӷмун. Иўырңа угилык қыпҳаӷатаӷақаюгӯқ кияҳта̄лъҳым қыпҳақа̄ның қаюҳлъяк ыфқуҳсюгақыхкаңа угини. Лъңанлъю сюмыҳтаӷалъҳа малӷуҳқыңъа̄қ. ³⁵Таўатын пӣмси каюсӣнъалюси. Ныңуҳтыснанинӷитамси. Иўырңа накмикысюгақа пинилъыҳпигақ лъпысинун қыпҳа̄тысқылъюку Атанық угляфқусиңунаси.

³⁶Нулӣҳқалгым атуқсюгьягускумигу нулӣҳқани, ныңуҳлъик. Ынка̄м ныңуҳтыкумык сыӷлыҳқыңъуна̄нӷитук. ³⁷Иўырңа югым лӣсимакңўа̄қумигу натын пилъыҳқани, нуқытутңукумигулъю атуқсюлъыӷминың нулӣҳқани, пинитун пиңӯқ. Китум алңунак нулиҳтӣсқуӷа̄нӷилъкумигу, нулиҳтуӷьюнӷилъкуми пинитун пиңӯқ. ³⁸Нулӣҳқалык ныңуҳлъюни пинитун пиңӯқ, иўырңа нулӣҳқалык ныңуҳныӷилъкуми пиниӷатаӷатун пиңӯқ.

³⁹Аӷнақ алъяның угӣӷьяҳқа̄нӷитуқ угини кияҳлъюку. Иўырңа угини туқукан, пиюкылъыӷминың угӣӷьяӷңа̄ӷми итагнаҳтуқ, та̄ўаңинақ ухпықаҳӣнаӷмың. ⁴⁰Иўырңа қуяңа̄ӷатаӷаӷьяҳқа̄гуқ угӣнқихныӷилъкуни. Та̄куста сюмыҳтаӷалъҳынка. Ухпықақа Кияӷныӷым Таӷныӷакык хўаңамнитуқ.

А̄пқуга̄лъҳыт Аҳқуткыхканың Нықның

¹Кӣмсиӷьюганка а̄пқуӷа̄лъыҳси нықның аҳқуткыхканың кияӷныңлъяқанун. Ипаңӯқ хўатын пилъыҳси: «Лӣсималъылгӯкут қамахлъюта». Таўатылңуқ лӣсималъық а̄ңа̄юхтыстикаюгӯқ, иўырңа пиниқылъҳым икнақуҳтыңъўа̄ ухпылъыҳпут. ²Ю̄к пилъхуюгнық, ысҳаҳу та̄на паниның лӣсяҳқаҳтуқақ. ³Иўырңа Кияӷныӷым пиниқистыни хўатын пияҳқақӣ: «Хўаңа пиканка».

⁴Ынка̄м ныӷылъықыста̄ аҳтуткыхкамың кияӷныңлъяқанун? Лӣсимакапут кияӷныңлъяқат кияӷныӷунӷитут. Ата̄сиҳа̄гуқ Кияӷнық, алъя кияӷныӷитуқ. ⁵Иляңита югыт ухпықақа̄т кияӷныҳтунилюку, атаныҳтунилюку қиляклъю, нуналъю. ⁶Иўырңа хўаңкута лӣсимакаҳпут ата̄сиҳа̄гуқ Кияӷнық, лъңа Атанӷӯқ. Сяңўа̄ қамахлъюни лъңаның пиңӯқ, кияҳтыңъӯкут лъңанун. Лӣсимакаҳпутлъю ата̄сиҳа̄гуқ Атанық, Иисус Христосыңӯқ. Лъңакун сяңўа̄ қамахлъюни улимака̄гуқ, уңуваңӯкутлъю лъңакун.

⁷Иляңита ухпықат налъюкӣт кияӷныңлъяқат кияӷныпигунӷитуляңи. Тама̄кын апалъюқлъюку ухпықақӣт нықыт аҳқуткақнилюки кияӷныпигнун. Ынка̄м ныныӷмыхни аҳтуткыхкамың сюмыҳтаӷаӷақут: «Сыӷлыҳқуңа». ⁸Иўырңа нықа пикатңунӷитуқ. Кияӷныӷым усюқатаӷаӷна̄нӷитӣси ныӷылъыҳпысигун нықмың. Аҳқуткыхкамың ныӷынӷилъкумта сяңўа̄ алңунак ифлъяна̄нӷитаҳпут Кияӷныӷмың аюқылӷӣ. Талўа ныӷыӷңа̄мта алъхыӷунъанӷитукут лъңаның.

⁹Ухпықаҳлъягни лъпыси, пиюкылъыҳпысистун пияҳқа̄лӷӣси, лӣгикңатыхпысиның та̄на ипапиҳқылъық апыҳтӯсяқыхкақа. Иўырңа кылыңалюси кая̄лңӯт ухпылъҳит аюқнӣҳқыхпынаки лъңита сюмыҳтаӷалъҳитни анахутңалӷӣмың. ¹⁰Налӣта ысҳақунитын ныӷумалютын кияӷныңлъяқат храмыңитни, лъңалъю ныӷьюҳтуқ сюмыҳтаӷалъыӷмини анахутңаяӷңа̄н. ¹¹Ынка̄м лӣсималъыҳпык сыӷлыҳқыстыся̄ӷа̄ кая̄лңуқ ухпылъҳа ифлъяслъюку, ухпықа̄лгуткан Христосым туқуткыхка̄. ¹²Ынка̄ңам аюқнӣҳқыхкуфсики сюмыҳтаӷалъҳитни анахутңалӷӣмың, сыӷлыҳқылъықуси лъңитнунлъю, Христосымунлъю. ¹³Ынка̄м ныӷылъымкун аҳқутқыхкамың сыӷлыҳқыснаюкамкун ухпықа̄лгутка, алъямыңлъю ныӷна̄нӷитуңа сямың тама̄кын.

Павел Лъминың Успутақылӷӣ

¹Итымңа̄ңа, пиюкылъымтун пияҳқа̄гуңа. Апостолыңӯңа ысҳа̄ткақ Иисусымың Атанымнъың. Қыпҳа̄тылъымкун лъңанун ухпықа̄гуси лъпыси. ²Талўа иляңита апостолыпигунӷинъиӷңа̄тңа лъпыси лӣсимакаҳпысиңа апостолыпӣгӯңа Атаныҳқун, қаюҳлъяк кияҳта̄лъыҳпыси Христосымун кылгускаңа. ³Та̄куста а̄пҳақыхкынка сыӷлықистымнун.

⁴Варнавалъю хўаңкутуң туңсиӷна̄нӷитӯкуң ныӷьяҳқамыңлъю, мыӷьяҳқамыңлъю лъпысиның апыҳтуқамсини? ⁵Навык пинымтуң кылъқыпагниңитапут ухпықат нулӣпут иляңистун апостолытун, Атанӷым аңлыгутаңистунлъю, Петырытунлъю? ⁶Варнавалъю хўаңкутуң лъңинаҳа̄мтуң қыпҳа̄симаңинаӷьяҳқақыстыху нықыкаҳқаҳпут? ⁷Пилъюўаҳтым тукфиӷьяҳқақынӷитӣ сяӷьяни пилъюўаҳтыңилъюни. Таўатыҳпигақ виноградымың пӣтысиӷаҳтым ныӷыхкаюгӣ иляңи пӣтыстыкани. Пынъӣӷнӣҳтымлъю пынъӣӷми мама̄н иляңа пикаюга̄.

⁸Та̄кут успутат югым апыҳтӯсяқӣ, иўырңа Кияӷныӷым Лӣлиҳтуся̄нилъю апыҳтӯсят таўатытут. ⁹Игақыхка̄гуқ Лӣлиҳтӯсяни, Кияӷныӷым тӯныхка̄кун Моисейемун: «Сюгругӣталиҳпынан вол пшеницат тутмаҳтысныҳпысики қантӣт сигиқысқылъюки». Кияӷныӷым сюмыӷмикынӷитагӯ вол? ¹⁰Сяңами Кияӷнық таўатын пӣ? Волыңинаҳа̄қ сю̄мқагӯ? Нака̄, хўаңкуталъю сю̄мқақӣнкут. Ипапыста̄қ хўаңкунъунлъю игақыхка̄гуқ, қаюҳлъяк пӣтысиӷаӷвигмың ята̄ҳқистынунлъю, сяӷнастынунлъю ныӷьюкыхкаюга̄пут ныңиҳқапут. ¹¹Кияӷныӷым акузитаңи пӣсяҳқастун аюқут. Хўаңкутуң пӣтысиӷаӷвикыхкақамси, ынка̄м таӷныӷаси қуястыка̄гут.

Туңсипахлъықыстӯң туңсиӷвикыхкумси аклъюкыхкамтыгның? ¹²Апыҳтуӷистым иляңи лъпысиның алъхыӷутңуката аклъюкыхкамыхның, хўаңкутуң ўатақа̄ӷақ пияҳқаҳпига̄яҳтукуң. Йыӷлыги қыпҳаӷьюка̄гукуң маниңырыгаӷналютуң аклъюкыхкамтыгның алъхыӷунъалютуң. Иляңани манипагитақукуң. Талўа тама̄ни а̄псюгигатамси акилыҳтӣсқылъютуң. Уната апалъюқа, китумун алңунак хўатын писюнӷитукуң: «Павел уңипақӣқуқ Пинилӷӣның Уңипаның акилыҳтӯсяңыпигыснаӷналюни». ¹³Лӣсимакаси Храмым қыпҳаҳтыңи ныӷыхкаюгыт нықмың Храмымун тӯныхкамың. Аҳқыфигымлъю қыпҳаҳтыңи ныңиқаюгӯт аҳқуткаҳқамың. ¹⁴Таўатытуқ Атанӷым қылӷуся̄: Уңипаҳтытлъю Пинилӷӣның Уңипаның аклъюкыхкатың алъхыҳсяҳқақӣт тама̄куның ухпықиканың Пинилӷӣның Уңипаның.

¹⁵Лъпысиның сямың алңунак алъхыӷусигатуңа пикаҳқақсяқымның. Сюмыҳтаӷа̄ткыхпынаңа сямың алңунак туңсиӷнилюңа ма̄тын. Қуя̄қуңа акилыҳтӣсқигалңӯңа лъпысинун уңипақинымни Пинилӷӣның Уңипаның. Уңипақинақңӯңа акилыҳтӯсӣтыӷңа̄ӷма талўа паныӷьяӷңа̄ӷма. Ынка̄м китум алңунак пина̄нӷита̄ңа: «Павел уңипақӣқуқ Пинилӷӣның Уңипаның акилыҳтӯсяңыпигыснаӷналюни». ¹⁶Иўырңа а̄ңа̄югусиҳқӣтуңа уңипақинымни Пинилӷӣның Уңипаның, қаюҳлъяк Кияӷныӷым қылъқақа̄ңа уңипақисқылъюңа. Сыӷлыӷўа̄ӷунаяҳтуңа қа̄ткынӷисяқумкун Кияӷнық. ¹⁷Накмикыхкақсяқумкун уна қыпҳақақ хўаңамның акилыҳтӯсяҳқалгунилюңа пинаяҳтуңа, иўырңа Кияӷныӷым накмикыхкақутаңаның пияҳқақақа акилыҳтӯсӣтыӷңа̄ӷма. Алъя натын пилъыҳқӣтуңа. ¹⁸Сяңа̄ўа акилыҳтӯсяқа? Акилыҳтӯсяқақа уна, қуяпихтақуңа акилыҳтӯсяңунаңа уңипақинымни Пинилӷӣның Уңипаның, қайўа акилыҳтуӷьяҳқақсяӷңа̄ҳпысиңа.

¹⁹Қыпҳаҳтыля̄ӷунӷисяӷңа̄ӷма, хўаңамның катам қыпҳаҳтыля̄ӷуҳтыка̄гуңа китумун алңунак, югмун углялӷӣмун ухпықысқылъюку Христос. ²⁰Иудеянинъымни кияҳтақуңа лъңистун, ухпықысқылъюку Христос. Кияҳнымни язычнигни Лӣлиҳтӯсятхун кияҳта̄ӷни, лъңистун кияҳтақуңа лӣсимакыӷңа̄мкун қа̄ткутылъымкун Лӣлиҳтӯсятхун югулилъыңьяҳқа̄нӷитыӷңа̄ӷма, ухпықысқылъюку Христос. ²¹Язычнигнинъымни налъюкилӷӣни Лӣлиҳтӯсяның, лъңистун кияҳтақуңа налъюкылӷӣстун Лӣлиҳтӯсят, ухпықысқылъюку Христос. Қа̄ткыңъунӷинъилюки пиңунӷитанка Кияӷныӷым Лӣлиҳтӯсӣ, иўырңа қа̄ткыңъўа̄нка Христосым Лӣлиҳтӯсӣ. ²²Кая̄лңуӷни кияҳнымни лъңистун лъӣӷақуңа, ухпықысқылъюку Христос. Ынка̄ңам кинкустун алңунак кияҳтақуңа натысяӷңа̄та, натын алңунак югулилъыңысқылъюки. ²³Таўатын пӣқуңа нагақӣсқықыҳлъюки Пинилӷӣның Уңипаның, қаюҳлъяк қуястылъыңақылӷӣңалъю ухпықынӷатху Христос.

²⁴Қамахлъютың кытанқустыт сивулӣюкаюгӯт, иўырңа ата̄сиҳақ кая̄лъқӣкаюгӯқ. Кияҳта̄лъыҳпысини Христосымун, кытанқустыстун кая̄лъқӣнақақитык. ²⁵Кытанқустыт уляпақут югуситың икнақуҳналюки қаюҳлъяк қаҳпаңьюгақылӷӣт аваямың қуқуңалыгмың. Тама̄кут палиӷьяҳқа̄гут. Иўырңа қаҳпа ухпықат алъхыҳсяҳқа̄т қӯнпыкаҳқа̄гуқ. ²⁶Кытанқустыстун таклъяӷрукытун кытанқўа̄қуңа ка̄нъалюңа кынлымун. Налиӷмың тыңлюхтыстун, тыңлюхпага̄таӷақуңа кая̄лъқӣналюңа. ²⁷Уңипақӣқуңа натын кияҳтылъыҳқамың Христосымун. Хўаңалъю Кияҳтыңӯт лъңанун ынка̄м югусимнун қа̄ткыстақуңа, лю̄рақ пинӷилъкума Кияӷныӷым иқинъаюкаңаңа лъңаның.

Иудеит Успутақлъюки Кылыңася̄тыт

¹Ухпықа̄лгутымни, сюмыҳтаӷа̄ткысқысюганка Иудеит, малихся̄ӷикат Моисейемың. Египетмың аӷуляқақңамың қамахлъютың малихтыкақа̄т қиляўа̄қ, маӷьяҳқуӷилӷӣ тӯмкаҳқӣтхун. Ка̄сята Кавилңуӷмун Кылъӣмун, Кияӷныӷым пылъыҳтыкақыхкаңа мық аӷвӣсқылъюки яйўа̄сың. ²Қамахлъютың крестиӷқа̄лӷӣт қиляўа̄ҳқунлъю, Кавилңуҳқунлъю Кылъӣкун малихся̄ҳтыңулютың Моисейемун. ³Қамахлъютың ныӷыхка̄гут маннамың, ⁴мыӷыхка̄гут ата̄симың та̄хкын мыӷмың Кияӷныӷым Таӷныӷахкынка тӯныхка̄ның. Мыӷыхкақа̄т мық ма̄қыхкақ уйӷагмың. Та̄м уйӷагым малихся̄қақыхкаңи Кияӷныӷым Таӷныӷахкынкун. Уйӷак та̄на Христосыңӯқ. ⁵Таўатын Кияӷныӷым афлъыңакыхкақыӷңӣстың, паниның алъюлъютың ыфқуҳсимаңилъкаңат лъңа. Ынка̄м тумаңани Кияӷныӷым туқустақлъюки югусиҳқўа̄ӷит миңитка̄лӷӣт килга̄ни.

⁶Тама̄на қамахлъюни пилъҳат хўаңкунъун успута̄гуқ, кылыңася̄ӷӣлъю лъңистун пиюкыфқа̄н сыӷлық писқылъюку. ⁷Манигуҳтыңуҳтыхпынаси кияӷныңлъяқанун иляңистун. Акузитни Игақыхкани игақыхка̄гуқ: «Югытлъю, аӷнатлъю ныӷақут, мыӷақут та̄хкын аӷуля̄қут». Таўатын манигӯтка̄гут золотамың улима̄ӷмун каумӷаӷмун. ⁸Блудыфқамта иляңистун. Алъхыӷныӷа сыӷлыҳқылъҳита 23,000 ю̄к туқуляӷа̄тка̄гуқ ата̄сими аӷныӷми. ⁹Нанӷӣқунақыфқа̄мтыху Атанӷым нуқынъыҳтулъҳа пилътыху, иляңистун. Нымыӷьят туқуқуқақӣт иляңи сивуныпут қаюҳлъяк нанӷӣқукақыхкаңат Атанық. ¹⁰Акузилгаҳпынаси иляңистун. Яқулгым туқустикаюгым туқуқуқақӣ иляңи сивуныпут қаюҳлъяк акузилга̄ткақыхкаңат Кияӷнық.

¹¹Қамахлъюки тама̄кут сивунымта атуқыхкӣт, успутаҳқа̄ка̄гут хўаңкунъун. Игақыхка̄гут кылыңася̄тңулютың хўаңкунъун кияҳлъыҳӣнун киңулиӷни аӷныӷни, лъңистун пифқа̄мта писқылъюта. ¹²Ынка̄м кина алңунак сюмыӷмини пикуми ухпылъыни аӷулӣнъилюку, кылыңали лю̄рақ сыӷлыҳқыся̄ҳтуқ. ¹³Қамахлъютың нанӷӣқулъыси алъяка̄ягунӷитут югнун. Иўырңа Кияӷнық ата̄сӣӷмытуқ, нанӷӣқулъыӷмун қа̄сҳутысяҳқақынӷитӣ икнақылъыси, икнақылъылитақна̄ӷӣси нуқытусиҳқамың. Ынка̄м иқитақылъықуси та̄хкын нанӷӣқулъыӷмың.

Пилӣтыстыка̄куфси Христосымун Туӷныӷа̄т Малихна̄нӷитаси

¹⁴Пиниқыхкамни, манигӯтыхпынаси кияӷныңлъяқанун. ¹⁵Алыҳқуӷамси сюмыӷнылгулюси, сюмыҳтаӷа̄ткынъакыси сямың пилъқа. ¹⁶Игамсиқаягунъымтыху қаю̄симылңуқ вино Атанӷым Нықынӷаҳқылъҳани, ныңиӷақукут Христосым а̄ўаның. Ӣхымнъың а̄вгуӷлюку нықыкшаңлъяқ нынымтыху, ныңиӷақукут Христосым югусӣның. ¹⁷Нықыкшаңлъяқ а̄вгуқа̄ӷңа̄ӷми ата̄сӣгуқ. Угляҳлъягьяӷңа̄мта, ата̄симың та̄хкын ныӷақукут. Ынка̄м кылгутақа̄ налиӷнықуӷнилюта ата̄симун югусимун.

¹⁸Сюмыҳтаӷа̄ткаҳтыкиқун Израилыӷмӣт; ныныӷмыхни аҳтуткыхкамың, илятақут манигӯлъҳӣнун Кияӷныӷмун аҳқыфигыгни. ¹⁹Сюмыҳпысинӣ кияӷныңлъяқат кияӷныпиўа̄т? Нықытлъю аҳқуткыхкат кияӷныңлъяқанун, манигӯсипиўа̄қа̄т? ²⁰Нака̄! Налъюкилӷӣт Кияӷныӷмың аҳқыша̄ӷақут туӷныӷаӷнун, нака̄н Кияӷныӷмун. Илятңастысюнӷитамси туӷныӷаӷнун. ²¹Христосымун пилӣтыстыка̄куфси туӷныӷа̄т малихна̄нӷитаси. Тама̄кын апалъюқлъюку Атанӷым қаю̄сӣның мыӷыхкуфси, туӷныӷа̄тлъю қаю̄сӣтның мыӷна̄нӷитуси. Таўатыҳпигақ Атанӷым Нықынӷаҳқылъҳани ныӷыхкаюгукуфси нықыкшаңлъямың Атанӷым қаюӷвигани, туӷныӷа̄тлъю қаюӷвигитни ныӷна̄нӷитуси нықмың. ²²Хўаңкута Христосым пилӣткӣтни туӷныӷа̄т малихнақыхкумтыки, Кияӷнық қуңьяҳтыслъықаҳпут. Нықамиклъюку лъңа икнақыҳлъяхтуқ хўаңкунъың.

²³Иляси пика̄гут: «Итагнаҳтуқ сяңўа̄ пиюкылъқа пияӷңа̄мкун». Иўырңа хўаңа пӣмси, иляңи сялъыси пининӷитут. А̄а, ынтақун: «Итагнаҳтуқ сяңўа̄ пиюкылъқа пияӷңа̄мкун», иўырңа иляңан сялъыҳпыси каю̄сӣнъа̄нӷитӣ ухпылъыси. ²⁴Кина алңунак лъңина̄юхтыфқа̄ми пӣқлъи, йыӷлыги иляңилъю сюмыҳтаӷа̄ткақлъюки.

²⁵Сяңўа̄ алңунак кымыкшак тукфиқаҳси акилъпыгаӷвигмың ныӷақитыху сюмыҳтаӷа̄ткыхпына̄н аҳқуткыхка̄таңа кияӷныңлъяқанун. ²⁶Қаюҳлъяк игақыхка̄гуқ Акузитни Игақыхкани: «Нуна, сяңўа̄тлъю қамахтыңъўа̄ӷлюки таўанлыңӯт Атанӷым пикӣ».

²⁷Ухпықа̄нӷилңӯм ныӷьяҳтӣсқыхкаңиси пиюкуфси пилӷа̄си. Сяңўа̄ алңунак кытфаҳтуқа̄т ныӷақитыху сюмыҳтаӷа̄ткыхпына̄н аҳқуткыхка̄таңа кияӷныңлъяқанун. ^28,29Иўырңа китум пикаңиси: «Та̄на аҳқуткыхка̄гуқ кияӷныңлъяқанун», ныӷыхпына̄н, уңипа̄тистыхпыси ухпылъҳа кая̄лиснаюкафсигу, қаюҳлъяк лъңани анахутңалӷӣңӯқ.

Ынтақун сюмыҳтаӷаӷнаялӷӣси: «Сяңаматуқ пиюкылъымтун пияҳқа̄нӷисиңа? Сяңаматуқ китум иныҳқуӷаӷақаңа алъятун сюмыҳтаӷақаюгым хўаңамның? ³⁰Игамсиқаюгвикыхкумкун Кияӷнық ныӷьяҳқамның, сяңанңам китум сыӷлықӯҳлъықаңа ныӷыхкума игамсиқаюгуткыхкамның?»

³¹Ынка̄м қамахлъюку сялъыҳси қӯлва̄сиқақитыху Кияӷныӷмун, талўа ныӷылъысилъю, мыӷылъысилъю. ³²Сяхпынаси сыӷлыҳқыстияҳқамың Иудеянун, язычнигнун, ухпықанунлъю. ³³Ыфқуҳнақуткақанка юлгутынка сялъымкун алңунак. Хўаңаңинамнун пинилъыҳқақ пиңигатақа, иўырңа пиниҳқылъыҳқӣтнунлъю юлгутма пӣқуңа, углялӷӣ югулилъыңысқылъюку.

¹Ынка̄м хўаңамтун пӣқитык, катам хўаңа малихтылъымтун Христос.

Аӷнат Насқуӷӣтиӷлютың Манигӯсяҳқа̄гут

²Усюқамси нықамикыхкыфсиңа, атуқыхкысилъю апыҳтӯсянка. ³Иўырңа лӣгикысюгамси Христос на̄сқӯтиңӯқ тамаҳа̄нун югнун, югӯқлъю на̄сқӯтилӷӣ нулӣӷминың. ⁴Насқуӷӣтиӷлюни ю̄к юӷақуми налиӷмың уңипақуми Кияӷныӷым уңипа̄мың юӷаӷвигми, қӯлваӷьяҳқақынӷита̄ на̄сқӯтилӷӣ. ⁵Ынка̄м аӷнақ насқуӷӣтиҳпынани юӷақуми налиӷмың уңипақуми Кияӷныӷым уңипа̄мың, қӯлваӷьяҳқақынӷита̄ на̄сқӯтилӷӣ. Таўатын пикуми қигуӷўа̄қастун мықыслъюни аюқылъықуқ. ⁶Аӷнақ насқуӷӣтиӷьюнӷилъкуми, кыпуӷли нуйӣӷулъюни. Иўырңа аӷнани кайңуналӷӣңӯқ қигулъықлъю, нуйӣӷулъюнилъю кыпулъық, ынка̄м насқуӷӣтиӷңали. ⁷Ю̄к насқуӷӣтиӷьяҳқа̄нӷитуқ манигӯскуми қаюҳлъяк Кияӷныӷым наңаӷныӷатун улима̄ӷӯқ, Кияӷныӷым а̄ңылъҳа ысҳӣсқылъюку. Иўырңа аӷнақ улима̄ӷӯқ югым а̄ңылъҳа ысҳӣсқылъюку. ⁸Лӣсимакыхкыси ю̄к аӷнамың улима̄ӷунӷилңуқ, иўырңа аӷнақ югмың улима̄ӷулӷӣ. ⁹Ю̄к улима̄ӷунӷитуқлъю аӷнамун иўырңа аӷнақ улима̄ӷӯқ югмун. ¹⁰Та̄на апалъюқлъюку аӷнақ насқуӷӣтиӷьяҳқа̄гуқ, ынка̄м яқулгыт лӣгиклъитху ю̄к аӷнамун на̄сқӯтиңутаңа. ¹¹Иўырңа нықамикитыху Атанӷым успықылъҳа, югылъю, аӷна̄млъю аклъюкутңа̄к. ¹²Аӷнақсюха̄қ югмың улима̄ӷуӷңа̄н, та̄хкын кынляңа ю̄к қамахлъюни алъхықа̄гуқ аӷнамың, иўырңа аӷнатлъю, югытлъю қамахлъютың Кияӷныӷмың пиңӯт.

¹³Сюмыҳтаӷа̄ткаҳтыхуқун: ипа анахутңа̄ аӷнам насқуӷӣтаңунани юӷалъҳа Кияӷныӷмун? ¹⁴Югыт қӯнпың ухпықақа̄т нуйӣҳтыкаӷңуқ ю̄к укаваҳтақуқ лъңаның, ¹⁵иўырңа аӷнам нуяҳлъяни қӯлва̄сиқа̄. Насқуӷӣтаҳқа̄люни лъңанун пика̄гуқ. ¹⁶Паниның кина а̄ҳтӣра̄ӷьюгукуми насқуӷӣтамың, уңипа̄нъықихтаҳлъякун та̄ната апостолыни апыҳтӯсяқақыхкыфут, Кияӷныӷым юган атуқақа̄т апыҳтӯсяқ на̄нсяӷңа̄ӷмың.

Атанӷым Ныӷыстилъҳа

¹⁷Хўакын апыҳтуӷьюгамси қырңуӷутақылъыҳпысиның манигӯтылъыӷмун. Усюқыпагниңитамси қырңуӷутақылъыҳпысинун қаюҳлъяк ақниҳқӯтаӷаӷақуси пиниҳқутыхпынаси. ¹⁸Уңипа̄тақа̄тңа қырңуӷунъыҳпысиниңуқ иляси а̄фқымыра̄ӷутақут, ата̄систун пихпынатың. Ухпықыкыстаӷлюку лъӣӷақа. ¹⁹Ынтақун а̄фқӯтылъыҳпысигун лӣгиксяҳқақаси налиси ипа қа̄ткутңатаңи Атаныӷмун.

²⁰Ынка̄м қырңуӷунъыҳпысини Атанӷым Ныӷыстилъҳанун, ныӷьяҳтӯнӷитақаҳси. ²¹Ныӷӯнъыҳпысини тамаҳаҳпыси нырахкӣӷақуси нықыхпысиның, иляси утақахпынаки. Ынка̄м иляси игатаӷақут, иляси сю̄мақут. ²²Ныӷигастык, мыӷигастык ныныхпысини? Налиӷмың угумикыстыкӣ Кияӷныӷым юги? Кайңусяӷа̄тыснақуткақыстыкӣ аваңилңӯт? Сямың пилямси? Усюқлъямсӣ? Нака̄, усюқна̄нӷитамси!

²³Сяңўа̄ лӣткақа Атаныӷмың апыҳтӯсяқақақа лъпысинун. Атанӷым Иисусым иӷивгаӷми таўани увыҳпагутылъыҳқамини тугука̄ нықыкшаңлъяқ. ²⁴Игамсиқаюгвиксямигу Кияӷнық, а̄вгуӷлюку, пикақ: «Уна югусиқақа лъпысинун пиңӯқ. Ныӷақитыху нықамикусӣлюку хўаңамның».

²⁵Ныныӷмың та̄қсямың, таўатыҳпигақ тугулюку қаю̄сиқ виноӷраӷаӷмың ималык, пикақ: «Уна қаю̄сиқ Кияӷныӷым нутаӷа̄гуқ акықуся̄ а̄мкун. Аўын мыӷақитыху нықамикусӣлюку хўаңамның». ²⁶Ынка̄м қӯнпың ныныҳпысини та̄хкын нықыкшаңлъямың, мыныҳпысинилъю та̄хкын қаю̄симың, кылгутңўа̄қаҳси Атанӷым туқулъҳа кынляңа алъя тагилъыҳқа̄нун.

²⁷Кина алңунак тымңи ныӷыхкуми Атанӷым нықыкшаңлъя̄ның, мыӷыхкумилъю Атанӷым қаю̄сӣның, қӯлваӷна̄нӷита̄ Атанӷым югусӣлъю а̄ўалъю. ²⁸Тама̄кын апалъюқлъюку сивуклъюни югым авутыҳқуткылъики сыӷлыҳқылъыни алъя пияҳқа̄фқӣта пиналюки. Ынка̄м ныӷылӷа̄қ нықыкшаңлъямың, мыӷылӷа̄қлъю қаю̄симың. ²⁹Кина алңунак ныӷылӷӣ нықыкшаңлъямың, мыӷылӷӣлъю қаю̄симың, Атанӷым югусӣ лӣгикнақыхпына̄н сямың писӣтаңа нанқихтылъыңьяҳқа̄қуқ Атаныӷмың. ³⁰Та̄на апалъюқлъюку угляҳтуси кая̄лңуӷнилъю, қинуюгңалӷӣнилъю ынка̄м қафсинат туқуляӷа̄тка̄гут. ³¹Иўырңа ипапиҳқылъюта нанқихтыкумта хўаңкунъың катам ынка̄м авутыҳқуткыхкумтыки сыӷлыҳқылъыпут, Атанӷым нанқихна̄нӷитӣлъю таўатын пикумта. ³²Иўырңа Атанӷым апыҳтуӷьюныӷминикут натын кияҳтылъыҳқамың, нанқихтақӣлъю. Аӷью̄ӷьяҳқа̄фқа̄мта пиналюта нанқихтикуми ухпықиңигалңуӷның.

³³Ынка̄м ухпықа̄лгутымни қырңуӷунъыҳпысини ныӷналюси Атанӷым Нықынӷаҳқылъҳаның ныӷаӷаҳтаҳпынаси, утақатутақлъюси. ³⁴Игаталӷӣт тама̄кут нымыхни ныӷлит ынка̄ңам Атанӷым нанқихныӷилъики. Агляқума лъпысинун иляңи а̄птыкаси кӣмсиӷна̄ӷанка.

Тунусят Аглыӷналӷӣгның Таӷныӷагның

¹Ухпықа̄лгутымни, лӣтысюгамси Аглыӷналӷӣм Таӷныӷам тунуся̄мың. ²Нықамикаҳси сялин ухпылъҳилъюси манигӯтыста̄тақақыхкаңиси кияӷныңлъяқанун акузиңигалңуӷнун. А̄ҳқутақыстыка̄лӷӣси. ³Тама̄кын апалъюқлъюку лӣгикысюгамси кина алңунак хўатын пилӷӣ: «Иисус сыӷлыӷӯқ», Аглыӷналӷӣм Таӷныӷам акузистыңъунӷита̄ таўатын. Иўырңа кина алңунак хўатын пилӷӣ: «Иисус Атанӷӯқ», Аглыӷналӷӣм Таӷныӷам акузистыңъўа̄ таўатын.

⁴Аглыӷналӷӣм Таӷныӷам тунусӣ алъяҳӣна̄гут, иўырңа тунусят қамахлъюки та̄м ата̄сим Таӷныӷам тунусяқӣ. ⁵Угляпихтуқ алъя̄ҳӣнақ қыпҳа̄тилъыҳқақ илямун, иўырңа та̄на ата̄сиқ Атанық қыпҳа̄тылъыңақуқ. ⁶Угля̄пихтуқ алъякулъҳӣ Кияӷныӷым қыпҳақа̄, иўырңа та̄м ата̄сим Кияӷныӷым пистақӣ хўаңкунъун. ⁷Аглыӷналӷӣм Таӷныӷам лӣтыстыкаюга̄ аҳтуӷьяҳқа̄нӷилъыни ухпықатхун тунусялиткамикун. Тунусят китумун алңунак пиниҳқусиҳқа̄гут. ⁸Та̄м ата̄сим Таӷныӷам югым иляңи акузистақӣ пыҳқинылъыӷмикун, иляңи лӣсималъыӷмикун. ⁹Та̄м ата̄сим Таӷныӷам ухпықилъылитаӷақақӣ иляңи югыт, иляңи аҳтуӷьяҳқа̄нӷилъылитақӣ на̄лъҳутияҳқа̄люки ақниӷныӷның. ¹⁰Таӷныӷам тӯныхкақӣ иляңи югыт алъя̄ҳлъюхўаҳтисиҳқамың. Иляңан югым тугуклъиқақа̄ уңипақилъыҳқақ Кияӷныӷым уңипа̄мың. Иляңан югым тугуклъиқақа̄ лӣгикилъыҳқақ Аглыӷналӷӣм Таӷныӷам налиӷмың туӷныӷа̄т иглыӷутңутаңа кина. Аглыӷналӷӣм Таӷныӷам акузистақӣ иляңи югыт алъя̄ҳӣнакун улюкун. Ынка̄м иляңитнун мумиҳқуҳтыстақӣ акузилъҳыт. ¹¹Қамахлъютың тама̄кут тунусят ата̄сикаҳтаҳаӷмың та̄хкын ата̄сигның Таӷныӷагның пиңӯт. Тӯньюкани тама̄кут налӣтның тунусяҳқами тӯнақӣ.

Ата̄сиқ Югусиқ Налиӷныҳтуқақ

¹²Катам югусиқ ата̄сиқ налиӷныҳтуҳлъяк, қамахлъютың налиӷныӷыт югусим пикыхкаңи. Қайўа угляӷңа̄ӷмың ата̄сӣгуқ югусиқ, Христосылъю таўатытуқ. ¹³Қамахлъюки ухпықат налиӷнықуӷӣ Христосым югусӣн. Иляпут Иудеяңӯт, иляңи язычнигыт, иляңи қыпҳаҳтыля̄ӷыт, иляңи қыпҳаҳтыля̄ӷунӷитут. Иўырңа қамахлъюта крестиӷыка̄гукут та̄хун ата̄сикун Аглыӷналӷӣгныкун Таӷныӷагныкун, Христосымун югусилӣтысқылъюта. Қамахлъюта тугуклъиқақахпут ата̄сик Таӷныӷак.

¹⁴Югусиқ ата̄сӣнӷитуқ налиӷнық, налиӷныҳтупихтуқ. ¹⁵Итыгат хўатын пиӷңа̄ӷмың: «Ӣхыңунӷилңӯңа, югусим пикынӷита̄ңа». Та̄қна̄нӷитңўа̄ҳтут югусимынъыӷмың. ¹⁶Сигута хўатын пиӷңа̄ӷми: «Ӣйңунӷитуңа, югусим пикынӷита̄ңа». Та̄қна̄нӷитңўа̄ҳтуқ югусимынъыӷмың. ¹⁷Югусиқ ийыра̄ӷина̄яқуми, натынңам нагақуӷнаяҳта? Налиӷмың сигутыра̄ӷина̄яқуми, натынңам на̄ӷунъаяҳта сяпагнимың? ¹⁸Иўырңа Кияӷныӷым улимамаңитӣ югусипут таўатылъюки. Накмикыхкаминың налиӷнылиҳтуқақӣ. ¹⁹Югусиқ ата̄сӣяқуми налиӷнық югусӣнаянӷитуқ. ²⁰Ипапыста̄қ югусиқ налиӷныҳтупихтуқ.

²¹Тама̄кын апалъюқлъюку ийым пина̄нӷитӣ ӣхыт: «Аклъюкынӷитамси». Таўатыҳпигақ на̄сқум пина̄нӷитӣ итыгат: «Аклъюкынӷитамси». ²²Ипапыста̄қ югусимта натаңи кая̄тысюгнилңӯт мыгнунапихтут. ²³Югусимта натаңи сюмымни мыгнунапагилңӯт, ынңа̄талъ афлъыңакақапут. Югусимта натаңи ысҳаҳтысюгигалъкыпут пилюгугңа̄қапут, ²⁴иляңи тама̄кут ысҳаӷьяӷңа̄ӷмың аюқылӷӣт пилюгугигатапут. Кияӷныӷым улима̄қңамигу югусиқ, мыгнунаӷатаӷаҳтыстыкақӣ мыгнунапагитысюгнилңӯт. ²⁵Ынка̄м югусиқ қыпҳақаюгӯқ қырңаӷми. Налиӷныӷым қамахлъютың афлъыңакақӣт илятың таўатыңўа̄қ. ²⁶Ата̄сиқ ақнинӷани қамахлъютың ақниқаюгӯт. Ата̄сиқ усюқылъыңынӷани қамахлъютың қуякаюгӯт.

²⁷Қамахлъюси ухпықани Христосым югусиқӣси, налиӷнықуӷӣси. ²⁸Кияӷныӷым ухпықанун накмикыхкақӣ сивуклъюки апостолыт а̄ңылъыҳпига̄люки, тӯңлиҳӣ ӯкналиқистыт (уңипақилӷӣт Кияӷныӷым уңипа̄мың) пиңайӣ апыҳтуӷистыт, та̄хкын алъя̄ҳлъюхўаҳтистыт, тама̄кутлъю аҳтуӷьяҳқа̄нӷилъылиткат на̄лъҳутимун, каюсиӷияҳқат илямыхның, пинилӷӣт иглыӷутистыт, тама̄кутлъю алъя̄ҳӣна̄стун акузикаюгыт. Кияӷныӷым тӯньюкани тама̄кут налӣтның тунусяҳқами тӯнақӣ. ²⁹Қамахлъюси апостолыңустык, ӯкналиқыстыңустык, апыҳтуӷистыңустык? Қамахлъюси аҳтуӷьяҳқа̄нӷилъылистык алъя̄ҳлъюхўаҳтисиҳқамың, ³⁰на̄лъҳутикаюгустык? Қамахлъюси алъя̄ҳӣна̄стун акузикаюгустык мумиҳқуқаюгустыклъю алъя̄ҳӣнаӷның акузилъыӷның? Нака̄! ³¹Иўырңа пиюкитыки а̄ңатаӷалӷӣт Аглыӷналӷӣм Таӷныӷам тунусӣ.

Хўа̄ ма̄тын апыӷнақақа пиниӷатаӷалӷӣ та̄куның.

Пиниқылъық

¹Акузикаюгуяӷңа̄ӷма югытлъю, яқулгытлъю акузилъҳистун, тымңи тыңъа̄хтаҳлъықуңа налиӷмың лыңа̄ҳтаҳлъықуңа пиниқинӷилъкума. ²Ӯкналиқыхкаюгуӷңа̄ӷма, лӣгикыхкаюгуӷңа̄мки алӣнъыӷилңӯт қамахлъюки, лӣсималъық қамахтыкақсяӷңа̄мкун, ухпықилъылгуӷңа̄ӷма на̄йӷанун нӯхтисиҳқамың, пикатңуна̄нӷитуңа пиниқинӷилъкума. ³Тӯньяӷңа̄мки қамахлъюки сянка аклъюмалӷӣнун, налиӷмың паныҳтысяӷңа̄ӷма уңипақилъқа Пинилӷӣның Уңипаның апалъюқлъюку, алъхыӷунъа̄нӷитуңа пиниқинӷилъкума.

⁴Пиниқылъық нуқынъыҳтӯқлъю, наңлъыхтаҳтуқлъю; пиниқылъық ақинаңитуқ, налиӷмың ямшаңитуқ, налиӷмың а̄ңа̄югныӷитуқ. ⁵Пиниқылъық сыӷлыӷьюгутңитуқ, налиӷмың лъңина̄югныӷитуқ. Пиниқылъық сягиқигатуқ пиюкылъыӷмитун пиналюни, қикыҳқуңигатуқ, налиӷмың нықамикиңигатуқ анахутылъыӷмың. ⁶Пиниқылъҳым қуясиқигата̄ сыӷлық, йыӷлыги қуясиқақа̄ ипапилъық. ⁷Пиниқылъық ата̄сӣӷмытуқ сяңўа̄ сяяӷңа̄н. Ӣўлың ухпықиңа̄қ, ӣўлың ныӷьюкиңа̄қ, ӣўлың нуқынъыҳтӯқ.

⁸Пиниқылъық кынлыңилңуқ. Ӯкналиқылъҳыт кынлытҳӯсяҳқа̄гут; алъястун акузилъҳыт та̄қсяҳқа̄гут; лӣсималъық кынлытҳӯсяҳқа̄гуқ. ⁹Қаюҳлъяк тунусяхпут лӣсималъықлъю, ӯкналиқылъықлъю ӣӷўинъыӷилңӯк. ¹⁰Иўырңа ӣӷўилңуқ ка̄скан, қамахлъютың ӣӷўинъыӷилңӯт авӣӷуҳсяҳқа̄гут.

¹¹Таӷнуҳа̄люңа акузикаюгуяҳтуңа, сюмыҳтаӷақаюгуяҳтуңа, лӣгикыхкаюгуяҳтуңа таӷнуҳаӷыстун, иўырңа югуҳсялӷӣңа таӷнуҳаӷыстун пинаниҳтуңа. ¹²Лӣгикылъыҳпут Кияӷныӷмың ӣӷўинъыӷитуқ, катам таўатытуқ ысҳалӷӣстун таӷныӷаҳқӯтылюхкун. Қакуқа̄қун лӣгикңўа̄ӷьяҳқаҳпут Кияӷнық қаюҳлъяк ысҳаҳлъықаҳпут хинасяҳқуӷлюку. Ма̄тын лӣсималъқа ӣӷўинъыӷитуқ. Иляңани аӷныӷым лӣсималъқа ӣӷўиӷьяҳқа̄гуқ катам таўатын Кияӷныӷым лӣсимакңўа̄қаңаңа ӣӷўиӷма.

¹³Ынка̄ңам укут пиңают кынлытҳӯнъа̄нӷитут: ухпылъық, сиӷималъық, пиниқылъық; иўырңа пиниқылъҳӯқ аңылъыҳпигақ.

Павелым Апыҳтӯткатаӷақаңи Аглыӷналӷӣм Таӷныӷам Тунусӣ

¹Пиниқылъыңьюгатаӷаӷьяҳқа̄гуси пакихулъюку сямың тамаҳа̄ның. Иўырңа пиюкитыкилъю Аглыӷналӷӣм Таӷныӷам тунусӣ, ўата пиюксяҳқақаҳси уңипақилъық Кияӷныӷым уңипа̄мың. ²Ю̄к акузиныӷмини алъястун улюстун алыҳқуӷақа̄ Кияӷнық. Югыт алыҳқӣгатӣ қаюҳлъяк лӣгикна̄ӷита̄т. Акузӣқуқ аҳтуӷьяҳқа̄нӷилъҳакун Аглыӷналӷӣм Таӷныӷам югым налъюкыхка̄ның. ³Иўырңа ю̄к тунусялык уңипақилъыӷмың Кияӷныӷым уңипа̄мың акузикаюгӯқ югнун. Акузитаңи каюсиӷикаюгӯт, кайымикаюгӯт, илютуҳсяӷикаюгӯт югнун. ⁴Ю̄к акузикаюк алъястун улюстун каюсӣткаюгӯқ лъңаның катам, иўырңа ю̄к уңипақикаюк Кияӷныӷым уңипа̄мың каюсиӷикаюгӯқ ухпықаның.

⁵Қамахлъюси пиюкақсяӷамси акузисқылъюси алъястун улюстун, иўырңа ўатақа̄ӷақтуқ тунусялгулӷӣси уңипақсяҳқа̄люки Кияӷныӷым уңипӣ. Тама̄кут уңипақикаюгыт а̄ңатаӷаҳтут акузикаюгның алъястун улюстун. Акузикаюгыт алъястун улюстун мумиҳқуҳтылгуяҳқа̄гут каюсӣтысқылъюки ухпықат. ⁶Ухпықа̄лгутымни, лъпысинун пилюңа алыҳқуӷьяқумси алъястун улюстун лӣгиксяҳқақынӷилъкыхпысигун натынңам каюсӣнъаяӷамси? Иўырңа апыҳтуӷьяқумси Кияӷныӷым кылгутка̄ның хўаңамнун, налиӷмың уңипа̄сяқумси сямың лӣткамның, налиӷмың ӯкналиқуткысяқумкун Кияӷныӷым сялъыҳқа̄, налиӷмың апыҳтуӷьяқумси ипапиҳқылъыӷмың ынңа̄талъ каюсӣнъаяӷамси.

⁷Свирелытлъю, гуслитлъю сыӷлытун қалӷиҳтыкуйык китум алңунак лӣгикна̄нӷита̄ сяңўа̄ иляга̄н атуӷақутаңа. ⁸Пилъюўаҳтым труба қалӷиҳтыкагу сыӷлытун иляңита пилъюўаҳтыт налъюкылъықа̄т пилъюўалъыҳқаҳтың. ⁹Таўатыҳпигақ акузикуфси алъястун улюстун, китум алңунак лӣгикна̄нӷитӣси сямың пӣқыстык. Акузинӷилңуӷыстун пияҳқа̄гуси. ¹⁰Угляпихтуқ алъя̄ҳӣнақ акузилъық, атуқистыңита лӣгикақӣт. ¹¹Иўырңа лӣгикынӷилъкумкун ю̄к акузилӷӣ алъякун акузилъыҳқун накумӣңӯқ хўаңамни, ынка̄м хўаңалъю накумӣңуңа лъңани. ¹²Ынка̄ңам лъпыси, тунусяңьюпихтыкуфси Аглыӷналӷӣм Таӷныӷам тунуся̄мың, туңсиҳтык каюткаҳқамың ухпықанун.

¹³Тама̄кын апалъюқлъюку ю̄к акузикаюк алъястун улюстун, юӷаӷли мумиҳқуӷьяҳқа̄люку сямың пилъыни. ¹⁴Юӷаӷьяқума алъястун улюстун, таӷныӷахка юӷаҳлъықук, иўырңа умьюгагма лӣгикна̄нӷита̄к. ¹⁵Сянақсиңаңам? Юӷаҳлъықуңа таӷныӷамкун, юӷаҳлъықуңалъю умьюгамкун. Таўатыҳпигақ илягаҳлъықуңа таӷныӷамкун, илягаҳлъықуңалъю умьюгамкун. ¹⁶Қаюҳлъяк таӷныӷахпыгун усюқыхкувгу Кияӷнық алъястун улюстун, натынңам лӣгикигалңӯм усюқилгусиҳлъықатын Кияӷныӷмун игамсиқаюлъыҳпының? Налъюка̄ сямың пӣқсин. ¹⁷Юӷалъҳын пинӣпихсяӷңа̄н иляңа югым каюсилъыңна̄нӷитуқ.

¹⁸Игамсиқаюгвикақақа Кияӷнық акузӣқылӷӣңа алъястун улюстун угляӷатаӷаӷлюку лъпысиның. ¹⁹Иўырңа юӷаӷвигмынъымни апыҳтуӷиюгақуңа. Тама̄кын апалъюқлъюку апыҳтуӷӣқуңа қафсинкӯраҳа̄т акузитыт атуқлъюки лӣгиксяҳқаси, акузина̄нӷитуңа алъястун улюстун угля̄пихлъюку лӣгиксяҳқақынӷилъкыхпысиның. ²⁰Ухпықа̄лгутымни, сюмыҳтаӷаҳпынаси таӷнуҳаҳаӷыстун. Сюмыҳтаӷаӷақитык аңликастун, иўырңа сыӷлыҳқысюлъыҳси таӷнуҳаҳаӷыстун аюқуқ. ²¹Лӣлиҳтӯсяни игақңа̄қ: «Кияӷнық пӣқ:

“Каяхлъықанка югыт алъяның нунаның алыҳқуӷьяҳтӣсқылъюси лъңита катам улюңистун.

Алыҳқуҳлъықамси қа̄нӷитхун иўырңа паниның наганъа̄нӷитаҳпысиңа”».

²²Ынка̄м тунуся̄ акузилъҳым алъястун улюстун ипапиҳқусӣгуқ ухпықиңигалңуӷнун, нака̄н ухпықикаюгнун. Уңипақилъық ухпықилӷӣнун аюқуқ, нака̄н ухпықиңигалңуӷнун.

²³Ынка̄ңам юӷаӷвихпысини ухпықат қамахлъютың акузисяқумың алъястун улюстун, иляңи югым налиӷмың ухпықа̄нӷилңӯт ӣтқумың налъюңуҳнилъықӣси. ²⁴Иўырңа ухпықа̄нӷилңуқ налиӷмың лӣгикигалңуқ юӷаӷвихпысинун итыӷлюни нагаскумиси уңипалӷӣси Кияӷныӷым уңипа̄мың, нагалъюни нанқихтыңъўа̄ҳлъықуқ сыӷлыҳқыстыңунилюни. ²⁵Қаманлъиқыхкӣ аксяқңалӷӣт қайвиҳқылъықут. Ынка̄м қуңуҳлъюни манигуҳлъықа̄ Кияӷнық. Хўатын пилъықуқ: «Ипапыста̄қ, Кияӷнық хўа̄нтуқ лъпысини».

Натын Атуқылъыҳқӣ Аглыӷналӷӣм Таӷныӷам Тунусӣ Юӷаӷвигми

²⁶Ухпықа̄лгутымни, уната апыҳтӯсяқнақуткақыхкыхка. Қырңуӷунъыҳпысини манигӯнъалюси иляси илягаӷақна̄ҳтут, кина апыҳтуӷӣқылъықуқ, налиӷмың налиҳси уңипаҳлъықуқ Кияӷныӷым уңипақысқыхка̄ның, налиӷмың налиҳси акузилъықуқ алъястун улюстун, налиҳпыси мумиҳқуҳлъықӣ. Ухпықат ухпылъҳитнун икнақуӷусӣлит қамахлъютың. ²⁷Юӷаӷвигми кина акузинақңукуми алъястун улюстун, ма̄лӷук налиӷмың пиңают пилӷа̄т, утақалюки илятың та̄қылъыҳқӣт. Китумлъю мумиҳқуӷнакаңи сямың пилъҳит. ²⁸Иўырңа мумиҳқуҳтыңискан акузилӷӣмун алъястун улюстун, акузифқа̄ми пилӷа̄қ. Алъястун улюстун акузиюкуми кавьюгӯтыхпынани акузилӷа̄қ лъңанунлъю, Кияӷныӷмунлъю. ²⁹Ӯкналиқистык ма̄лӷук налиӷмың пиңают уңипаңылӷӣт Кияӷныӷмың акузилит. Қамахлъютың нагалъит, лӣгиклъитху уңипақ Кияӷныӷмың пиңутаңа. ³⁰Иўырңа кина уңипаңыхкан Кияӷныӷмың, акузилӷӣ ныпӣӷли, уңипаңылӷӣ акузисқылъюку. ³¹Таўатын пикуфси қамахлъютың уңипақияҳқат Кияӷныӷым уңипа̄мың акузӣқылъықут. Ынка̄м қамахлъюни нагалъҳӣ, лӣлъи, та̄гавыңина̄лъыңлилъю. ³²Нықамиклъюки уңипақикаюгыт Кияӷныӷым уңипа̄мың, аҳтуӷьяҳқа̄нӷилъылитка̄гут акузисиҳқамың, та̄қусиҳқамыңлъю. Ӣўлың аҳтуӷьяҳқа̄нӷилъылгӯт акузисиҳқамың налиӷмың та̄қусиҳқамың. ³³Кияӷныӷым алңунак писюгигатӣлъю. Қырңуӷутылъыпут ныкыхмытысюгақӣ.

Кияӷныӷым юги қырңуӷунъыӷата, ³⁴аӷнат акузистыңуяҳқа̄нӷитут юӷаӷвигни. Акузияҳқа̄нӷитутлъю, иглыӷутистыңуяҳқа̄нӷитутлъю қырңуӷутңалӷӣни, қаюҳлъяк Лӣлиҳтусянилъю игақңа̄қ таўатын. ³⁵А̄пқуӷаӷьюкумың, угитың нымыхни а̄плъитки. Юӷаӷвигни аӷнат акузилъыҳқа̄т анахутңа̄қ.

³⁶Лъпыси Коринфыӷмӣт ухпықат а̄ңа̄югныӷӯси. Сюмыҳпысинӣ Кияӷныӷым акузитаңи лъпысиның пиңўа̄т? Лъңинаҳаҳпысинун апыҳтӯтка̄ўа̄т? ³⁷Кина алңунак сюмыӷмини ӯкналиқистыңунилюни пикуми, налиӷмың ухпыҳлъягуманилюни, лӣгиклъики письмотхун лъпысинун Атаныӷым қылӷусяқӣ. ³⁸Тугуклъинӷилъкагу уна апыҳтӯсяқ, тугуклъиҳпына̄н лъңа.

³⁹Ынка̄ңам ухпықа̄лгутымни, уңипаҳтыңуюгақитык Кияӷныӷым уңипа̄мың, иўырңа та̄қыстыхпынаки акузилӷӣт алъястун улюстун. ⁴⁰Юӷаӷвигни сяңўа̄ қамахлъюку пинитуңўа̄қ, таўатыңўа̄қ пӣқитыху.

Христосым Уңуваҳтылъҳа

¹Ухпықа̄лгутымни, нықамиксюгамси Пинилӷӣның Уңипаның уңипақыхкамның лъпысинун. Тугуклъиқақаси ынка̄м ухпылъыси та̄хун ныкыгңа̄т аюгўилъютың. ²Югулилъыңыхка̄гуси ухпықақңафсики Пинилӷӣт Уңипат, ынка̄м ухпықумаңинаҳтыки а̄пқанка. Иўырңа ухпықнаниқуфсики, ухпылъыси сясӣна̄нӷитут.

³Апыҳтуқақамси апыҳтӯсяқыхкамың хўаңамнун. Та̄кут ухпықсяҳқақаси: Христосым туқуткыхкақӣ сыӷлыҳқылъыпут, катам Акузитыт Игақыхкат пинақнилъҳистун. ⁴Та̄хкын лъӣфқақа̄т, ынка̄м пиңая̄ни аӷныӷым уңувақа̄гуқ Акузитни Игақыхкани пинақнилъҳистун. ⁵Петырым ысҳақақа̄, та̄хкын киңуңаның қамахлъютың қуля ма̄лӷук сӣпнықлъюку апостолыт ысҳақақа̄т. ⁶Киңуңитның ю̄к ма̄лӷук қуля сӣпнықлъюкуның углялӷӣм малихся̄ҳтыңита қырңаҳлъягмың ысҳақақа̄т. Кияң та̄кут уңува̄т, иляңи туқука̄ӷңа̄ӷмың. ⁷Та̄хкын Иаковым ысҳақақа̄, ынка̄м киңувақун қамахлъютың апостолыт ысҳақақа̄т. ⁸Киңулӣлюңа ысҳақақақа, ухпыӷьяҳқаҳпагниңитка̄ӷңа̄ӷма китуми алңунак.

⁹Укалиҳпига̄гуңа апостолыни, талўа атиӷьяҳқа̄нӷисяҳтуңа апостолымың, қаюҳлъяк амьюқыта̄тқыхкақанка Кияӷныӷым юги. ¹⁰Иўырңа Кияӷныӷым наңлъыхталъҳакун апостолыңӯңа. Наңлъыхталъҳа хўаңамнун аваңинъыӷитуқ. Қыпҳаӷатаӷаҳтуңа тамаҳӣтның апостолыт, иўырңа хўаңамның пиңунӷитақа, Кияӷныӷым наңлъыхталъҳакун пӣқуңа. ¹¹Қыпҳаӷатаӷалъыҳпут илямнъың мыгнунӣтуқ. Мыгнуналӷӣта та̄на қамахлъюта уңипақыхкақапут лъпысинун та̄кут ата̄сит Пинилӷӣт Уңипат, ынка̄м ухпықыхкақаси.

Хўаңкута Уңувалъыҳқаҳпут

¹²Ухпықңукыси Уңипақ уңипақыхкаҳпут: Христосым уңуваҳтылъҳа туқулъыӷмың. Сяңамыңам иляси пӣқат: «Туқукат уңуваӷна̄нӷитут?» ¹³Кина алңунак уңуваҳтысимаңилъкан, Христос паниның туқуңанаяҳтуқ. ¹⁴Паниның туқуңакан уңипаҳқӣтукут, ынка̄м ухпықсяҳқӣтуси. ¹⁵Туқукат уңуваҳтысимаңилъката туқулъыӷмың, Кияӷныӷым уңуваҳтысимаңита̄ Христос. Ынка̄ңам хўаңкута апостолыни қамахлъюта иқлъыңиқыстыңӯкут қаюҳлъяк пика̄гукут: «Кияӷныӷым Христос уңуваҳтыстыкақа̄ туқулъыӷмың». ¹⁶Туқукат уңуваҳтысимаңилъката, Христосылъю уңуваҳтысимаңитуқ. ¹⁷Христос паниның туқуңакан ухпылъыси сясӣнӷитут ынка̄м аӷьюлъыңылъықуси сыӷлыҳқылъыҳпысинун. ¹⁸Ухпықистыт Христосыкун туқуляӷа̄ткат қамахлъютың ифлъянаяҳтут. ¹⁹Ныӷьюкилъыҳпут Христосыкун хўаниңинаҳақ кияҳта̄лъымнъи атӯкан, наңлъыгналъыҳпига̄яҳқа̄гукут югни китумың алңунак.

²⁰Ипаңӯқ Христос уңувақа̄гуқ туқулъыӷмың, тама̄кын апалъюқлъюку лӣсимакңўа̄ӷаҳпут хўаңкуталъю уңуваҳтысяҳқа̄гукут иляңани аӷныӷым. ²¹Туқулъық алъхықа̄гуқ ата̄сикун юхкун, Адамыкун. Таўатыҳпигақ уңуваҳтыстылъық туқулъыӷмың алъхықа̄гуқ иляңакун юхкун, Христосыкун. ²²Адамыкун қамахлъюни туқуяҳқа̄гуқ, иўырңа қамахлъютың Христосымылңӯт уңуваҳтысяҳқа̄гут туқулъыӷмың. ²³Қамахлъютың туқуляӷа̄ткат пилъыҳқатың ка̄нъыӷата уңуваӷақна̄ҳтут: Христос сивулиҳпига̄люни уңувақа̄гуқ. Та̄хкын тагинқихтыкан тама̄кут лъңан пиңи уңуваӷьяҳқа̄гут. ^24-28Христос умӣлгуяҳқа̄гуқ кынляңа кая̄лъқылъыӷминун қамахтыңъўа̄ӷлюки аҳтуӷьяҳқа̄нӷилъҳыт қа̄ткусюгигалңӯт Кияӷныӷмун, туӷныӷа̄тлъю иглыӷутистыт, югытлъю иглыӷутистыт илялъюки. Христос умӣлгуяҳқа̄гуқ кынляңа Кияӷныӷым кая̄лъқылъҳанун қамахтыңъўа̄ӷлюки Христосым аңуяги. Киңулиҳпигақ аңуяк туқулъҳӯқ Кияӷныӷым кая̄лъқысяҳқа̄. Христосым тӯныхкагу Атаныҳпагулъық Кияӷныӷмун Атамун та̄хкын кынля ка̄лъықуқ.

Игақңа̄қ Акузитни Игақыхкани: «Кияӷныӷым сяңўа̄ тамаҳа̄н итыга̄н асиңанун лъӣҳтысяҳқақа̄». Хўатын писӣгуқ, Кияӷныӷым сямун тамаҳа̄нун қа̄ткыстысяҳқақа̄ Христос. Иўырңа Кияӷныӷым қа̄ткусяҳқа̄ҳтыстыкумигу сяңўа̄ тамаҳа̄н Христосымун, қа̄ткусяҳқа̄ҳсяҳқа̄нӷитуқ, лъңаның катам. Таўатын пикан, та̄хкын Иӷнық лъңаның катам асилӣҳсяҳқа̄гуқ Кияӷныӷмың. Ынңа̄талъ Кияӷныӷым сяңўа̄ тамаҳа̄н иглыӷулъықа̄.

²⁹Иляңи югыт крестиӷистақут туқукат апалъюқлъюки. Туқукат уңуваҳсяҳқа̄нӷилъката туқулъыӷмың, сяңамыңам иляңи крестиӷистақат туқукат апалъюқлъюки? ³⁰Лӣсимакапут туқукат уңувақа̄гут туқулъыӷмың. Ынка̄ңам уңипақиңӯкут Пинилӷӣның Уңипаның туқунъақсяӷңӣлъю аҳутаңа тамаҳа̄н. ³¹Ипаңӯқ туқусяқлъыхӣнақ аюқа̄тңа аҳутаңа тамаҳа̄н. Катам лӣсимакылъыҳпысистун қуякылъқа ухпылъыҳси аңлилӷӣ Христос Иисусыкун Атанымтыхун. Таўатыҳпигақ ипапиҳқуткысяҳқақаҳси туқусяқлъыхӣнақ аюқыхкаңатңа аҳутаңа тамаҳа̄н. ³²Югыт Ефесымылңӯт пилъюўақанка тыӷикусястун аюқут. Алъхыӷунъалюңа хўани кияҳтылъымни пилъюўақумки, сямың алъхыӷунъа̄нӷитуңа. Туқулъымта киңуңаның уңуваӷьяҳқа̄нӷилъкумта: «Ныӷылъта, мыӷылъта, қаюҳлъяк уна̄ми туқулъықукут».

³³Китумун алңунак пӯҳтыстыхпынаси илякумта̄ңумакуфси сыӷлытун пикаюгмың, атуқсягулъықаҳси сяңўа̄ пӣқыхкаңат. ³⁴Сюмыҳтаӷаӷақлъюси пинитун, сыӷлыҳқынъаниҳтык, иляси акулыхпысинилңӯт апыҳтӯмаңилңӯгут Кияӷныӷмың. Қаюҳлъяк лъпыси ухпықани кайңуюгьяҳқа̄гуси.

Югусиҳқат Уңуваҳтыстылъҳым Киңуңаның

³⁵Кина алңунак хўатын пикан: «Натын туқукат уңуваҳтыстақат туқулъыӷмың? Натылңуӷмың югусилгуяҳқа̄ўат?» ³⁶Уюқ налъю̄қақ! Пӣтута нунакун пыӷукувгу туқуяҳқа̄гуқ сивуңани пӣтылъыҳқами. ³⁷Пӣтутмың алъяңулюни аңлӣқуқ. Пӣтысиӷаныҳпыни, пӣтутысқувыгаҳақ пыӷўа̄қан нунакун, пшеницакаҳқақ налиӷмың сяңуяҳқақ. ³⁸Пӣтутысқувыгаҳақ та̄на Кияӷныӷым накмикыхкаминың югусилитақа̄. Алъякулъҳӣт пӣтутыт алъякулъҳӣмың югусиҳқалгӯт.

³⁹Таўатылъкутңўа̄ӷунӷитут югусӣт. Югыт, тыӷикусят, қаўа̄гыт, иқалъюгыт алъякутут югусӣт.

⁴⁰Қиляк югусиҳтӯқ, нуна югусиҳтӯқ. Югусӣт қилягмылңӯт лъмыгыстун пиниӷнаҳтут. Югуситлъю нунамылңӯт лъмыгыстун пиниӷнаҳтут. ⁴¹Сиқинық, танқиқ, иӷалықыта̄ӷытлъю алъякутут пиниӷналъҳит. Талўа иӷалықыта̄ӷыт алъякақаҳтаӷмың алъякутут пиниӷналъҳит.

⁴²Таўатысяҳқа̄гут туқукат уңуваҳтыстыката туқулъыӷмың: нунами югусипут туқа̄қут, аӷўа̄қут, иўырңа югусиӷраӷапут туқуна̄нӷитңўа̄ҳтут. ⁴³Лъӣфқумың нунамылңӯт югусипут сыӷлыӷуҳсяҳқат кая̄лияҳқат, иўырңа югусиқ уңуваҳтыстыкуми пиниӷнаӷьяҳқақлъю, икнақсяҳқақлъю. ⁴⁴Лъивыныӷмини югусиқ югым пика̄. Иўырңа югусиқ уңуваҳтыстыкуми таӷныӷамнъун югусӣяҳқа̄гуқ. Югусилгуката югыт югусиҳқалгӯтлъю таӷныӷапут. ⁴⁵Ынка̄м Акузитни Игақыхкани игақыхка̄гуқ: «Юксюхўа̄қ Адам уңувалӷӣңуҳтыка̄гуқ». Иўырңа киңулиқ Адам уңувалъылитикаюгӯқ таӷныӷақ, Христосыңӯқ. ⁴⁶Сивуклъюта югым югусӣның югусиңақукут, та̄хкын та̄кўаниңани Кияӷныӷым югусилитақӣ таӷныӷапут. ⁴⁷Юксюхўа̄қ нунамың пиңӯқ, пагуляңаның нунам улима̄ӷӯқ, иўырңа тӯңлиҳа̄ ю̄к Христос, қилягмың пиңӯқ. ⁴⁸Югыт кияҳтыкумың нунами хўани, югусилгӯт Адамым югусӣтун аюқылӷӣмың. Иўырңа тама̄кут қилягми кияҳсяҳқат Христосытун югусилгуяҳқа̄гут. ⁴⁹Адамытун югусилгулъымтыстун, иляңани аӷныӷым Христосытун югусилгуяҳқа̄гукут. ⁵⁰Ухпықа̄лгутымни, лӣтысюгамси югусипут укут кымыкшагмың, а̄ўмың улима̄ӷыт, итыӷна̄нӷитут Атаныҳпагулъҳанун Кияӷныӷым. Иляңани аӷныӷым укут югусипут туқуяҳқа̄гут. Уңувана̄нӷитут қӯнпырухлъяк.

⁵¹Уңипа̄таҳлъямси қайвиҳсимаңилңуӷмың: қамахлъюта туқуна̄нӷитукут, иўырңа қамахлъюта алъяңуҳсяҳқа̄гукут, ⁵²сюкатыпихлъюта қунқалъылъҳыстун киңулиҳпигақ қалӷиҳтақ нагақуқумтыху. Таўани қалӷиҳталъыӷми ухпықат қамахлъютың туқуляӷа̄ткат уңуваҳтӯсяҳқа̄гут нутаӷамың югусилиӷлютың туқуяҳқа̄нӷилңуӷмың. Та̄хкын хўаңкуталъю паниның уңувалӷӣни нутаӷамың югусиңаӷаҳта̄лъықукут. ⁵³Югусипут пагулямың улима̄ӷыт алъяңуҳсяҳқапыста̄ӷӯт на̄фқысяҳқа̄нӷилңуӷмың. Укут югусипут туқукаюгыт симиӷьяҳқа̄гут югусимың туқуяҳқа̄нӷилңуӷмың. ⁵⁴Ынка̄м Акузитни Игақыхкани игақыхкақ апыӷӣҳлъықуқ:

«Туқулъық на̄фқуқ; кая̄лъқӣлъық ӣӷўиҳтуқ!»

⁵⁵«Туқу, кая̄лъқӣлъҳын на̄гу?

Туқу, аҳтуӷьяҳқа̄нӷилъҳын ақниҳқӯсин хўаңкунъун на̄гу?»

⁵⁶Туқулъҳым аҳтуӷьяҳқа̄нӷилъыни алъхыҳтақа̄ сыӷлыҳқылъыӷмың ақниҳналюта, ынка̄м сыӷлыҳқылъҳым Лӣлиҳтӯсят аҳтуӷьяҳқа̄нӷилъқӣ. ⁵⁷Ынка̄ңам игамсиқаюгвикақаҳпут Кияӷнық қаюҳлъяк кая̄лъқӣстыкақӣлъю Атанымтыхун Иисус Христосыкун.

⁵⁸Ынка̄ңам, пиниқыхкамни ухпықа̄лгутымни, кая̄лъқӣлъыҳқаҳпут ипапыстаӷутаңаның, ухпылъыси аӷулӣтыслъюки, нӯхаҳтафқа̄фси, қӯнпың қыпҳаҳтыху Атанӷым қыпҳақа̄. Лӣсимакаҳси Атаныҳқун қыпҳалъыҳси аваңинъыӷитуқ.

Мани Тӯньяҳқақ Ухпықанун Иудеямылңуӷнун

¹Укут ысҳа лъпысинун қылӷусянка манимың тӯньяҳқаҳпысиның ухпықанун Иудеямылңуӷнун. Уңипа̄тылъымтун Галатияӷмӣт ухпықӣт, лъпысилъю лъңистун пикатык. ²Сивулиҳпигаӷми Сянтилъҳым аӷныӷани қамахлъюси а̄фтӣқитык манимың алъхыӷныҳпысиның. Тӯньяҳқаҳпыси аңталяңа алъхыӷныҳпыси аңталяңаның ӣклъюку тӯньяҳқа̄гуқ. Ынка̄м лъпысинун пикума қырңуҳтифқа̄фси манимың пилӷа̄си. ³Ка̄скума каяхлъықанка тама̄кут накмикыхкаси посланиятхун агля̄тысқылъюку тунусяҳси Иерусалимымун. ⁴Сюмыҳтаӷалъымни хўаңалъю пилъыҳқақа пиниӷьяҳқа̄кан, малихнакаңатңа.

Павел Ля̄лиҳсюлӷӣ Коринфымун

⁵Лъпысинун ля̄лиҳнақыхкума сивуклъюңа Македониякун а̄хлъықуңа. ⁶Ынтақун лъпысинитаӷақаҳлъықуңа ўалъю̄млъю уксюлъқусиқ. Та̄хкын навык пинақыхкума ята̄ҳқылгусиқаӷнакыфсиңа. ⁷Атанӷым пиюкылъқыхкагу ма̄тын пикума лъпысинитаӷаӷьюгақуңа, а̄ӷвикаӷыснаӷьюнӷитамси.

⁸Иўырңа Ефесымылъықуңа кынляңа Пятидесятницам аӷныӷанун, ⁹қаюҳлъяк мыгнуналӷӣ, а̄нылӷӣ қыпҳалъыҳқақа Атаныӷмун пӣқыфтуқ. Ма̄нлъықуңа қайўа угляпихлъыҳӣм аңуяксяӷңа̄тңа.

¹⁰Тимофей лъпысинун пикан, ынңа̄талъ упуӷанъакыси, қаюҳлъяк қыпҳа̄гуқ Атаныӷмун хўаңамтун. ¹¹Қамахлъюси аситңина̄ҳпына̄н, ынка̄м қуяңа̄н каяхнакыси хўаңамнун. Утақа̄қақа малигулъюку ухпықа̄лгутнун.

¹²Уңипа̄таҳлъямси ухпықа̄лгутымнъың Аполлосымың. Ынңа̄талъ қылъқақсяӷақа ля̄лиҳфикысқылъюси малихлъюки иляңи ухпықа̄лгутыт. Иўырңа ма̄тын пиюнӷитуқ. Ля̄лиҳфикна̄ӷӣси пилъыҳқаңыхкуми.

¹³Кылыңатык, ухпықилъыҳпысини аӷулӣтык, илютутык, икнақитык. ¹⁴Пиниқылъыҳқун пӣқитыху сяңўа̄ тамаҳа̄н.

¹⁵Ухпықа̄лгутымни, лӣсимакаси Стефановолъю ныңлъюгуткулъҳӣт, ухпықақсюхўа̄ӷулӷӣт Ахаиями. Атаныӷмун тӯныхка̄гут лъңит, ухпықат иляңи каюсӣнъалюки. ¹⁶Қылӷамси қа̄ткумаңинӣсқылъюки лӣлиҳтулъҳит таўатылңӯт югыт, иляңилъю қыпҳалгутаңит.

¹⁷Қуя̄ңа Стефанамыңлъю, Фортунамыңлъю, Ахаикамыңлъю ка̄лъҳӣт қаюҳлъяк каюсӣтңўа̄тңа авӣлъыҳпысини. ¹⁸Қуястыңъўа̄тңа қуястылъыӷмыгыстун лъпыси. Каюсӣтилъҳитнун игамсиқаюгвикылъыҳпысиның лӣсимакыстыңъўа̄ӷнакыси.

¹⁹Ухпықат Асиямылңӯт сю̄мқақӣсиңуқ. Акиламлъю, Прискилламлъю сю̄мқыҳлъягӣсиңуқ Атаныҳқун, қамахлъютыңлъю ухпықат қырңуӷуткаюгның ылъкыхкынка мыңтыӷӣтни. ²⁰Қамахлъютың ухпықа̄лгутыт хўаңамнилңӯт сю̄мқақӣсиңуқ. Қуякутақитык на̄ӷлюки Кияӷныӷым пиниқылъҳакун.

²¹Хўаңа катам ӣхымның уна игақақа: Сю̄мқамси. Павел.

²²Китум алңунак пиниқынӷилъкумигу Атанық, на̄фқылъылгӯқ. «Маранафа», хўатын писӣгуқ, Атаныҳпут, таги!

²³Наңлъыхталъҳа Атанӷым Иисусым лъпысинилъи.

²⁴Пиниқамси қамахлъюси Христос Иисусыкун. Аминь.