12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

POLOME

TAITESANYA

PEPA

PYAO PYASAKAMAIYAMO DOKO

Pii atupa wambao kandapenge

Taitesa dokome Polo baa nisoo kalai piamosa Taitesa baa yuu Kitita dokonya sosa mende isoo katena latala pepa dake pyao pyasoo pituu, pii tata tepoma lea-pyaa. Mende doko Taitesame akali aipale mendeme sosa doko isoo katena lapengepe lao masokondape pina lea-pyaa. Lapo doko endakali lyangapi kolelepi kendemanepi mana lamaipenge mana dupa lamaiya-pyaa. Tepo doko Kitisene dupame imbu nakayao atete napyoo andiki pyoo paenge dokonya mana lamaiya-pyaa.

Polome Taitesanya pepa pyao pyasakamaiyamo dokonya pii lyaa dupa:

1:1-4 Pii wambao pepanya piamo dupa

1:5-16 Isingi akali makande pipenge doko

2:1-15 Kitisene dupame pipenge dupa

3:1-11 Taitesame kalai pina lao Polome mona minao sakatasiamo doko

3:12-15 Polome pii etao lasa leamo dupa

1

1 Namba* 1:1 Lo 1:1; 1 Ti 2:4 Polo Gotenya kendemane Jisasa Kataisanya aposele kalyo. Nambame Gotenya yapao nyepae endakali dupanya masoo miningi doko kyoto injisakamaitopa, Gote minao katenge dokopa kanda soo dupame kiningi pii doko masokondape pina lao Goteme namba ipu lea. 2 Gotenya* 1:2 Nam 23:19; Kl 1:27; 2 Ti 2:13; Ip 6:18 mana watao miningi dokonya tenge doko lete etete katatamana lao masoo malisoo katenge doko. Wamba yuupi kaitipi wapuala nayao pituu, sambo nalenge Gote dokome lete etete katenge doko naima ditona latea-pyaa. 3 Baame* 1:3 Ap 1:7-8; Lo 3:26; Ep 1:9-10; 1 Ti 1:1,11; Ta 2:10; 3:4 dopa pitona lao masiamo doko gii seteamo dokonya panasia. Naimanya Pyoo Nyingi Gote dokome panasiamo pii doko nambame isoo lamaiyoo katape lea.

4 Nambapa* 1:4 Lo 1:7; 1 Ko 4:15; 2 Ko 2:13; 8:23; Ga 2:3; 2 Ti 1:2; 4:10 masoo miningi mendai dokonya nambanya wane angi Taitesa embanya pepa dake pyao peekelyo. Takange Gotepa naimanya Pyoo Nyingi Akali Kataisa Jisasapame emba kandao mona epe mende palyetala embanya mona doko lyuu lasekena.

Akali auu pipae mendapua isingi akali katena lape

5 Kalai* 1:5-6 Ap 11:30; 1 Te 5:12; 1 Ti 5:17; Ip 13:7; Je 5:14* 1:5-6 1 Ti 3:1-7* 1:5-6 2 Ti 2:24-26 malatae silyamo dupa embame tolasetala, sosa katenge yuu taono mendai mendai lao dupanya isingi akali mendatupa katena latenopa lao emba Kitita yuu dokonya yakineo. Embame dopa pyaale lao nambame dapa langio: akali mende-kisa koo tengepi mende nasingi, baa enda mendai petenge, baanya wane dupame Kataisa lao masoo minao endangi takangepanya pii tanga nalao kyakao luilyamino nalengema akali dopale dupa embame isingi akali katena lape. 7 Kini,* 1:7 1 Ti 3:15; Ip 3:2; 1 Pi 5:2 setao katenge akali doko-kisa koo tengepi mende nasoo Gotenya kalai isoo katapenge. Baame luiyala nayao, yapa imbu nakayao, bia akipi masetae soo nala nayao, pyao napyoo, munipi opale longo waa palyoo nyalanya putiti nakayawaka pipenge. 8 Baame endakali opone minao mana epe dupa auu kayao mona palyokondape petala, tolalakao tolatae epe etete joo katao baame baa tange isokondape pipenge. 9 Tungi* 1:9 2 Ti 4:3; Ta 2:1 pyapenge Gote dokonya pii doko baame mana nyiamoliaka pyoo minakondape pipenge. Dopa pyoo katao baame endakali dupa mana pii tolatae doko lamaiyoo pupu lasetala, pii tanga lenge endakali dupanya kopeta pingi dupa tange masina lao panasakamaipenge.

Minakasingi endakali dupa pupu lao tolasepena leamo doko

10 Endakali* 1:10 1 Ti 4:1,7; 2 Ti 3:13 longome pii tanga lao pii tenge nakatenge dupa lao endakali minakasoo kalyamino. Doko, Juta endakali masoo miningi dupame dopale dupanya tenge joo kalyamino. 11 Endakali* 1:11 Jo 10:12; 1 Ti 6:10; 2 Ti 3:6; 1 Pi 5:2 dopale dupame muni pake nyalanya pii lamaiya nayapenge dupa mana lamaiyoo endakali mendapuanya palu dupa pitaka koyasilyamino. Dopana, embame dupanya nengekaita lyokena lape. 12 Wamba Kitita tange dupanyaka masingi akali mendeme lao pituu, “Kitita tange dupame wambapi indupapi sambo lao mena kumbalo joo katao, nee tuu lao napala maka maka kayao katengemana,” lea-pyaa. 13 Pii* 1:13-14 2 Ti 4:2* 1:13-14 1 Ti 1:4,10; 4:7 doko kiningina, tenge dokonya minao dupame Jutamanya tindi piipi Gotenya kiningi pii doko yakinenge endakali dupame mana seteamino dupapi dupanya kale katao sala naenya, masoo minao kyoto joo katena lao embame pupu lao dupa tolasepe.

15 Endakali* 1:15 Mt 15:11,18-20; 23:25-26; Lo 14:14-20 auu pipae dupame kandapimino dupa pitaka auu pipayaka jilyamo. Dopaka doko, endakali koyapae Kataisa lao masoo minala naenge dupame kandapimino dupanya mendaipi mende auu pipae nanjilyamo. Doko, dupanya mona masingipi dupa koyapae. 16 Dupanya* 1:16 2 Ti 3:5; 1 Jo 1:6; 2:4 kambumi Gote lao masilyamano lengemaka doko, mana minilyami dokome Gote maita maingima. Dupame aii pyao katapala Gotenya pii watao minala nayao mana epe mendaipi mende kapa pao naminapengema.

2

Pii manapi tolatae dupa lamaipina leamo doko

1 Dopaka* 2:1-2 1 Ti 6:20; Ta 1:9* 2:1-2 1 Ti 5:1-2; 6:11 doko, embame mana tolatae lamailino dokopa kapa pata mana tata mendapua minina lao dapa lamaipi: akali angi dupame bia akipi longo lao nanao mona paliuu lalyepenge joo katao, masoo miningipi, auu kaengepi, kyoto joo katengepi dutupanya auu pyoo katena lape.

3 Dopaka* 2:3-5 1 Ti 3:11* 2:3-5 Ep 5:22; Kl 3:18; 1 Ti 2:12 pyoo enda angi dupame etete epe joo pitipala, nambonambo napyoo bia akipi dupanya masetae soo longo lao nanao petena lape. Kolele dupame nyakamanya wane akalipi dupa auu kayao, mona paliuu, kepo kolalanya masala nayao, andaka lambao pituu, mana epe minao, nyakamanya akalingi dupanya pundipundi petena lao enda angi dupame mana epe dupa lamaina lape. Endakali dupame Gotenya pii doko kandao pii koo laa nayataminopa lao dopa pina lape.

6 Dopaka pyoo wane kolele dupame mona paliuu katena lao mana lamaiyoo katape. 7 Mana* 2:7-8 2 Te 3:7; 1 Ti 4:12; 1 Pi 5:3* 2:7-8 1 Te 1:10; 5:14; 1 Pi 2:15 tata tata dupa pitakanya endakali dupanya makande epe setakamaiyoo emba tangeme mana epe dupa minao katape. Endakali dupa mana lamaiyoo pituu, male-male nalao mona mendai palyoo pii lyaa tolatae dupa lamaiyoo katape. Dopa pitinopa naimanya yandapipi dupame elya kayapala naima kandao pii koopi mende kapa pao laa nayatami.

9 Kendemane* 2:9-10 Ep 5:6-8; Kl 3:22; 1 Ti 6:1; Pm 18-19* 2:9-10 1 Ti 1:1; Ta 1:3 dupame nyakamanya akali andake dupanya pundipundi katapala pina latamino dupa pitaka pipenge. Akali andake dupanya mona minao auu pisakamaiyoo katao, pii tanga nalao, opale mende pake nyakamaiya naenya, nyakama tungi pina lao epe joo katapenge. Dopa pyoo katao dupame mana minatamino dupa pitakame naimanya Pyoo Nyingi Gotenya lao mana lamaingi pii doko minalyetami.

11 Doko,* 2:11 2 Ti 1:10; Ta 3:4 endakali dupa pitaka kandao mona epe palyoo pyoo nyingi Gote dokonya mona epe palenge doko panatea. 12 Naimame* 2:12 Ep 1:4; 1 Jo 2:16 Gote maita maingi mana dupapi, yuunya pyuani kaenge koo dupapi, dupa daa lao yakinatala, indupa gii dakepa naima mona paliuu tolao payao Gote watao minao kalyepale lao Gotenya mona epe palenge dokome naima mana langingi. 13 Naimame* 2:13 1 Ko 1:7; Pl 3:20 dopa pyoo katao naimanya Kamongo Gote Pyoo Nyingi Jisasa Kataisa baa gii etete epe dokonya tii pipae dokopa tambetambe ipatamo doko malisoo kalyamano. 14 Baame* 2:14 Eke 19:5; Dit 4:20; 7:6; 14:2; Wee 130:8; Ese 37:23; Lo 3:24; Ga 1:4; Ep 5:25-27; 1 Ti 2:6; 1 Pi 2:9 naima koo pingi mana dupa pitakanya kii tamao nyotoo lawapi, naimame mana epe dupa minawani kayao minao baanya endakali yapao nyepae joo kalyepale lao auu pisotoo lawapi, baa tangeme naimanya lao kumikea.

15 Embame* 2:15 1 Ti 4:12 pii dutupa lamaiyoo katape. Emba Kamongonya akali angi dokome endakali dupa pupu lasoo tolasepe. Endakali mendaipi mendeme emba kilya nakandena lao katape.

3

Mana epe dupanya naima kyoto joo katapengena leamo doko

1 Embame* 3:1 Lo 13:1-7; 1 Ti 2:1-2; 1 Pi 2:3-14 embanya endakali yango dupa kapomanepi dee kapomanenya isingi akalipi, dupanya pundipundi katapala pii watao minakamaiyoo kalai epe dupa pitaka pyaanya depa latae katena lao masingi dee sakatasakamaiyoo katape. 2 Dupame endakali mendaipi mende kandao pii koo laa nayao kaita miningi joo tambo-tambo lao endakali pitaka andiki andiki pyoo katena lape.

3 Wamba* 3:3 Lo 1:29; 3:21-26; 1 Ko 6:9-11; Ep 2:2-3; 5:8; Kl 3:7; 1 Pi 4:3 naima apata mona napalenge joo katao pii tanga lao kateamanopa, Sataneme naima minao kyakasiamosa kyakalya kyakana pyoo kateama. Naima yuunya mona yaepasingipi putiti kaenge tata tatapi dupanya masetae soo kateama. Naimame endakali yango dupa kandao tilya nyoo mona koo palyoo katao, dupa-pipa imbu kayaloo pyoo kateama.

4 Dopaka* 3:4-5 1 Ti 1:1; 2 Ti 1:10; Ta 1:3; 2:11* 3:4-5 Jo 3:5; Lo 5:5; 6:1,4; 2 Ko 13:13; Ep 5:26; 1 Ti 1:1; 2 Ti 1:9 doko, naimanya Pyoo Nyingi Gote dokome mana epepa auu kaenge manapa dolapo panasiamo gii dokopa baame naima pyoo nyia. Naimame tolao katapala kalai epe piamanosa pyoo nyia daa. Baame mee kondo kayao kaimbu dokome naima pyoo nyia. Oli Sipitisame naima kaimbu dokome dee ŋaŋa joo mandipala aloo pinya katea. 6 Goteme* 3:6-7 Ap 2:17-18* 3:6-7 Lo 3:24; 8:17,24 mona epe palyoo naima tolataena lateamo endakali dupame lete etete katatamana lao masoo malisoo kalyamano doko nyalapale lao baame Oli Sipitisa doko naimanya Pyoo Nyingi Akali Jisasa Kataisa-kisa dyaakao dia. 8 Pii* 3:8 1 Ti 1:15 dutupa etete kiningi. Gote lao masoo minao kalyamino endakali dupame mana epe dupa masokondape pyoo minao katena lao embame pii dutupa kyoto joo lamaipi laka lao masilyo. Piipi manapi dutupa epe. Dutupame endakali dupa nisingi. 9 Dopaka* 3:9 1 Ti 1:4; 4:7 doko, kyakaenge pii dupa lalya lana petala atete pilyamino dupapi, wamba akali yumbange kateamino dupa kenge lao itaki pilyamino dupapi, imbu kayaloo pingi dupapi, mana setapae dupanya lao pii yanda pilyamino dupapi dupanya embame wandyuu katape. Pii dutupame endakali nisoo dii angi mende namandenge. 10 Masoo* 3:10 Mt 18:15-17; 2 Jo 10 miningi endakali dupa wakale pisingi endakali mende kandao embame paa mendaipi lapopi mende dopa napina lao pupu lao lamaipi. Baame embanya pii nasetamo kandao doko, baa maita maipi. 11 Endakali* 3:11 1 Ti 6:3-5 dopale dokome koo pyoo koyao kalyamopa baa tange-kisa tenge singi doko embame masilino.

Etao lasa leamo pii doko

12 Tenda* 3:12 Ap 20:4; Ep 6:21-22; Kl 4:7-8; 2 Ti 4:12 nambame akali Atemasa tamopi Tikikasa tamopi mende emba kalyeno dokonya epena lato dokopa emba Nikopolisa yuu dokonya namba katatosa yapa alo pyao ipupi. Koo kana palitamo gii dokopa namba Nikopolisa yuu dokonya katatona lao masetelyo. 13 Embame* 3:13 Ap 18:24; 1 Ko 3:5-6; 16:12 akali Apolosapa mana setapae masingi akali Sinasapa dolapo pena lao nisepe. Kaitini payatambino dupanya opale mendeme daa jetana nisokondape petala pena lape. 14 Dee* 3:14 Mt 7:19; Ep 4:28; Ta 2:14 naimanya endakali dupame aopyoo latala mee katatamina, oapi daa jingi endakali dupa nisalanya kalai epe dupa pyokondape pyoo pyoo katao mana nyepenge.

15 Namba-pipa endakali awapa katapumano dupa pitakame emba kandao auu pyoo katape lelyamino. Gote lao masoo miningi dokome naima mona setao kalyamino endakali dupa auu pyoo katena lelyamanona lamaiyakape. Goteme nyakama pitaka kandao mona epe palena.