PILIPAE

POLOME

PILIPAE

TANGE DUPANYA PEPA

PYAO PYASAKAMAIYAMO DOKO

Pii atupa wambao kandapenge

Masetonia Potopinja dokonya taono Pilipae doko siamopa Loma tangeme isia-pyaa. Polo baa tee pyao yuu Yutope pupala taono Pilipae dokonya Wai Pii Epe doko lamaiyamopa sosa mende katea-pyaa. Sosa dokome Polo baa anjetae paleamopa oapapi daa jilyamo lapae sepala Pilipae tange dupame nisiami-pyaa. Dopa piamino dokonya yaka pilyaminona lao pepa pyao pyasia-pyaa. Dopa pyoo pituu dupame nyakamanya kenda pipae dupa masala naenya Jisasa Kataisa lao masoo mona yaepao kyoto joo katena lao kyoto injisoo pepa pyao pyasia-pyaa.

Polome Pilipae tange dupanya pepa pyao pyasakamaiyamo dokonya pii lyaa dupa:

1:1–11 Pii wambao pepanya piamo dupa

1:12–26 Polo baa dopa pyoo kalyo lao leamo doko

1:27–2:18 Kitisene dupa Kataisapa kopatae katenge

2:19–30 Timotipa Ipapotaitasapame kalai pitambino doko

3:1–4:9 Opale mendeme nyakama koyasetana yandapipa dupa kandao isoo kalyepape

4:10–20 Pilipae dupame yaka pilyaminona leamo doko

4:21–23 Polome pii etao lasa leamo dupa

¹ Polopa* 1:1 Ap 16:1,12-40; Lo 1:1; 2 Ko 1:1; Ga 1:10; Kl 1:1; 1 Te 1:1; 2 Te 1:1; Pm 1 Timotipa nalimba Kataisa Jisasanya kendemane dolapome nyakama Pilipae tange Kataisa Jisasa-pipa pakatae kalyamino Gotenya dupa pitakapi, setao katenge akali dupapi, nisingi akali dupapinya pepa dake pyao peekelyambano. ² Naimanya* 1:2 Lo 1:7; Ga 1:3; Pm 3 Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.

Polome Pilipae tange dupanya loma sakamaiyamo doko

³ Nambame* 1:3 Lo 1:8; 1 Ko 1:4; 1 Te 1:2 nyakama lao masilyoli pyoo koteaka lao nambanya Gote doko kandao yaka pilino lenge. ⁴ Nyakamame* 1:4-5 Pl 1:18,25; 2:2,29; 3:1; 4:1,4,10; 1 Te 5:16 Wai Pii Epe doko tee pyao siamino gii dokopa pituu Wai Pii Epe lamaingi kalai dokonya namba-pipa awapa piamino doko pyoaka ipao indupa tuu lelyamino. Dokonya nambame koteaka lao nyakama pitaka nisoo loma silyoli pyoo mona yaepao loma soo tee lekenge. ⁶ Nambame* 1:6 1 Ko 1:8; Pl 1:10; 2:13,16 dapa lao masokondape pyoo masingi: Goteme nyakama-kisa kalai epe mende tee pyao piamo doko pyoaka katao Kataisa Jisasa dee ipatamo gii dokopa pyoo etatana lao masingi. ⁷ Nyakama* 1:7 Ap 21:33; 2 Ko 7:3; Ep 3:2; 6:20; Pl 1:30 nambanya mona itange etete! Dokonya nambame nyakama pitaka kandao dopa lao masingi doko kapa pelyamo. Namba anjetae palipu dokopapi, dee endakali dupame Wai Pii Epe nambame lamaingi doko kaya lao namba kosimi lapiminopa nambame Wai Pii Epe doko kiningina lamaitoana lao yanu pyao pupu lasipu dokopapi, nyakama pitakame Goteme kalai namba diamo doko awapa pilyamino. ⁸ Goteme* 1:8 Lo 1:9; 2 Ko 1:23 kandamupa kiningi lelyona, Kataisa Jisasame endakali dupa eteteaka auu kaengeli pyoo nambame nyakama auu kayao kandapu laka lao neame kumilyo.

⁹ Dee* 1:9 Kl 1:9-10; Pm 6 nambame dapa lao loma sekenge: nyakamame angi dupa masokondape pyoo masingi dokopa mana doko epepe koope lao yapakondape pyoo yapenge mana dokopa mana dolapo minao mende auu kayamai kayamai pyoo auu kayamaiyoo kalyepale lao loma sekenge. ¹⁰ Dopa* 1:10 1 Ko 1:8; Pl 1:6; 2:16; 1 Te 5:23; Ip 5:14 pyoo katao nyakamame angi dupa yapao nyoo nyakama-kisa koo tengepi mende nasingi auu pipae katao Kataisa dee ipatamo gii doko kandao nyetami. ¹¹ Dee* 1:11 Jo 15:8; Pl 3:9; Ip 12:11; Je 3:18 Jisasa Kataisame nyakama sakatasetamopa nyakamame mana tolatae dupa longo lao minao payao Gote lalyoo tama pyoo katatamiaka.

Polome namba Kataisanya iki kalyona leamo doko

¹² Kaimia* 1:12 Lu 21:13 paluma, namba-kisa piamo dupame Wai Pii Epe doko kaita lyokala naenya, lao tayatale lao nisiana lao nyakamame masipimi laka lao nambame masilyo. ¹³ Dopa* 1:13 Ap 28:30; Ep 3:1; 2 Ti 2:9 piamo dokonya Kapomane Isingi Mupa dokonya anda isoo katenge yanda singi dupa pitakapi endakali waka ae katapimino dupapimi namba Kataisanya kalai pyakamaingi dokonya anjetae kalyeno lao masilyamino. ¹⁴ Dee namba anjetae kalyo dokonya masoo miningi kaiminingilongo dupame Kamongo lao masokondape pyoo masoo minatala paka nakayao Wai Pii Epe doko etete kyoto joo lao panelyamino.

¹⁵ Kini,* 1:15 Pl 2:20-21 kaiminingi yangi dupame nambapa tilya nyoo namba ita minalanya Kataisanya lao pii lamailyamino. Dopaka doko, yangi dupame kiningi mona mendai palyoo lamailyamino. ¹⁶ Mona mendai palyoo Kataisanya lao pii lamailyamino akali dupame Wai Pii Epe doko auu pyoo sina lao nambame kyoto injisoo kalyale lao Goteme namba katasia lamo lao masetala namba auu kayao pii lamailyamino. ¹⁷ Dopaka doko, yangi dupame kopeta masoo nyakama tange andake jipuma laka lao masetala Kataisanya lao pii lamailyamino. Dupame namba anjetae palelyo dokonya kenda pipae mendapua waipa soo dyaanya dopa pilyamino doko nambame angi mende daana lao masilyo. Mana dupa pitakanya—sambo mona lapo palyoo Kataisanya lao pii lamailyamino dokopi kiningi mona palyoo pii lamailyamino dokopi—mana dupa pitakanya akali dupame Kataisanyaka lao pii lamailyamino. Dokonya namba mona epe palyilyo doko tendapi dopaka pito.

¹⁹ Nyakamame* 1:19 Jop 13:16; Ap 16:7; 2 Ko 1:11; 2 Ti 4:17 loma soo tee lekenge dokonyapi Jisasa Kataisanya Oli Sipitisa dokome nisingi dokopinya nambanya kosa dake etatamo dokopa namba kapa pao auu pyoo katato lao masoo lelyo. ²⁰ Dee* 1:20 Lo 14:8; 1 Ko 6:20; 2 Ko 1:5; 1 Pi 4:16 nambame dapa pitona lao kyoto joo masoo katenge: nambame kalai mendaipi mendenya kapa pao elya sala naenya paka nakayao kyoto joo koteaka lao pingiliaka pyoo indupa apata lete katato kandawapi kumato kandawapi dokome nambame Kataisaka lalyetoana lao masilyo. ²¹ Doko* 1:21 Ga 2:20 nambanya masingi dokome namba Kataisanya iki kalyona lao masilyo! Kumapala epe dupa longo lao nyepengena lao masilyo. ²² Dopaka* 1:22 Lo 1:13; Kl 3:3-4 doko, namba lete mee katato kandao doko, nambanya kalai dokome dii mandita. Dokonya nambame kaitini andukunya watao minawape lao masala naelyo. ²³ Nambame* 1:23 2 Ko 5:8 kaitini dolaponya andukunya watao minawape lao mona lapo palelyamo. Namba pao Kataisapa awapa katapu laka lao masilyo. Doko epe etete! ²⁴ Dopaka doko, nambame nyakama nisoo katapenge doko etete tenge angi jilyamo. ²⁵ Nambame* 1:25 Pl 2:24 doko kiningina lao masetala namba lete mee nyakama-pipa awapa katao nisalapo lao masilyo. Dopa pitopa nyakamame masoo miningi dokonya minama-minama pyoo minao mona yaepatami. ²⁶ Dopa* 1:26 1 Ko 15:31; 2 Ko 1:14; 5:12; Pl 1:4; 2:16; 1 Te 2:19 pitaminopa namba nyakama katatamisa dee ipato tenge dokonya nyakamame Kataisa Jisasa kandao etete lalyetami lao masilyo.

²⁷ Nambame* 1:27 Ap 4:32; Ep 4:1; Pl 4:3; Kl 1:10; 2:5 mendai mende iki nyakama langilyo: nyakama payatamino dokome Kataisanya lao Wai Pii Epe doko nyepae endakali joo payalapape. Dopa pitaminopa nambame nyakama kanja ipatopi naipatopi nyakama mona mendai palyoo kyoto joo katao, masingi mendai iki palyoo tole payao Wai Pii Epe masoo miningi doko kiningina lao kyoto injisalanya lekeleke tao lamaiyoo kalyamino lapae so ²⁸ Nyakamame* 1:28 2 Te 1:5 nyakamanya yandapipili akali dupanya mana mendaipi mendenya paka nakayalapape. Dopa pitamino dokome dupa kapa pao koyataminopa nyakama auu pyoo katatamina lao dupa laitaka pita. Doko Gote mambele nyakama dopa pyoo katatami! ²⁹ Baame nyakama-kisa mana epe minao Kataisanya joo kalyepa latala, Kataisa lao masoo minalapape iki laa naenya, Kataisanya kalai doko pyoo tanda nalapape leaka. ³⁰ Wamba* 1:30 Mt 5:11; Ap 16:19-40; Pl 1:7,13; Kl 1:24; 1 Te 2:2; 2 Te 1:4-7 namba lekeleke tao kateopa kandeamino doko indupa mee lekeleke tawaka kalyeno lapae silyamino. Kini, nyakama apata lekeleke telyo mendai dokonya lekeleke tawaka kalyamino.

Kitisenepa Kataisapanya anasale joo katenge mana dolapo

¹ Kataisa* 2:1 2 Ko 10:1; 13:13 nyakama-pipa pakatae katao baame nyakama kyoto injisala naelyape? Goteme nyakama auu kayao nyakamanya mona lyuu lasala naelyape? Oli Sipitisa nyakama-pipa tole nakalyape? Nyakamame nyakamanya mende neame kumao kondo kaya kaya napilyamipi? ² Tenge* 2:2 Lo 15:5; Ga 5:10; Pl 1:4 dutupanya minao nyakamame mana dapale dupa minao namba etete mona yaepasalapape: nyakama masingi mendai iki palyoo mende auu kaya kaya pyoo awapa kalyepape. Nyakama mona mendai palyoo awapa katao mana mendai minamana lao masalapape. ³ Nyakamame* 2:3 Ap 20:19; Lo 12:3,10; 15:1-2; 1 Ko 1:10-11; Ga 5:26 nyakama tange iki lao masoo alyasale joo kalyamanona lao masetala luiyala naenya, endakali yango dupame nyakama ita minao alyasale joo kalyaminona lao masoo kalyepape.

⁴ Nyakama* 2:4 1 Ko 10:24,33 mendai mendai lao dupame nyakama tange nisepenge jeta dupanya iki nisoo nakatenya, nyakamanya mende nisepenge jeta dupanya apata mende nisa nisa pyoo kalyepape. ⁵ Kataisa* 2:5 Mt 11:29; 20:28; Jo 13:15; 2 Ko 8:9; Ip 5:8 Jisasame masoo kateamo mendai dopaka pyoo nyakamame masoo, mende kanda kanda pyoo kalyepape:

⁶ Koteaka* 2:6 Jo 1:2; 17:5; Kl 1:15-20; Ip 5:8 lao baa Gote angi katea.

Dopaka doko, Gote yaleaka katato kandao doko,

namba tange nisalanya daana lao masia-pyaa.

⁷ Dopa* 2:7 Mt 20:28; Jo 1:14; Lo 8:3; 2 Ko 8:9; Ga 4:4; Ip 2:17; Pa 5:12 lao masetala baa tangeme Gote katenge mana

doko yakinatala kendemane akali jia-pyaa.

Baa endakali jetala kateamopa

endakali kiningiaka joo kandeami-pyaa.

⁸ Baame* 2:8 Ais 49:4; Mt 26:39; Jo 10:17; Ip 5:8; 12:2; 1 Pi 5:6 baa tange anasale jetala Gotenya pii doko

watao minokondape pyoo minawaka pao baa kumia-pyaa.

Kini, baa ita poko mendenya kumia-pyaa!

⁹ Dopa* 2:9 Ais 52:13; Mt 23:12; Ap 2:33; Lo 10:9; 14:9* 2:9 Ep 1:20-23; Ip 1:3-4 piamo dokonya Goteme baa

etete ketae waka minalyetala

waka dupa pitakanya kenge dupa ita minao

baanya kenge doko ketae sina lea-pyaa.

¹⁰ Dopa* 2:10-11 Ais 45:23; Lo 14:11; Ep 4:10* 2:10-11 Ap 2:36; Lo 10:9; 1 Ko 12:3 piamo doko kaitinya katenge dupapi,

isa yuunya katenge dupapi,

yuu koko yuu koo dokonya katenge dupapi

dupa pitakame kenge Jisasa doko sepala

kapa pao baa lao luma lakao dapa latami:

Jisasa Kataisa baa Kamongona lao

Takange Gote lalyetami.

Bui tii pingili pyoo kalyepape leamo doko

¹² Dopana,* 2:12 Wee 2:11; 1 Ko 2:3; 2 Ko 7:15; 1 Pi 1:17 nambanya mona setenge paluma, wamba namba nyakama-pipa awapa kateamano dokopa pii doko watao miniamino doko indupa namba tependa waka kalyo dokopa nyakamame etete watao minawaka kalyepape. Goteme nyakama pyoo nyepeamo dokonya etao doko nyakamame nyalanya paka kayao walu lao kalai pyoo kalyepape. ¹³ Dopa* 2:13 Jo 15:5; Ap 17:28; 1 Ko 12:6; 15:10; 2 Ko 3:5; Ep 2:10; 3:20; 1 Te 2:13; Ip 13:21 pyoo kalyepape lelyo doko, Gotenya masingili pipuma laka lao masingi dokopa angi pingi dokopa dolapo baa tangeme nyakama-kisa koteaka lao pyakalyina lenge.

¹⁴ Nyakamame pitamino dupa pitaka mumu laa nayao atete napyoo pyepape. ¹⁵ Nyakama-kisa* 2:15-16 Dit 32:5; Dan 12:3; Mt 5:14-16,45,48; 10:16; Ap 2:40* 2:15-16 Ais 49:4; 1 Ko 1:8; Ga 2:2; 4:11; 5:7; Pl 1:10,26; 1 Te 2:19 koo tengepi mende nasingi auu pipae katao uanga pyoo paenge endakali dupanya kaina dokonya Gotenya wane epe joo kalyanya dopa pyepape. Nyakamame pii lapae lete katasingi doko kyoto joo minao katao dupanya kaina dokonya tii pyoo kaitinya bui katengeli pyoo yuu angenya kalyepape. Dopa pyoo katataminopa nambame nyakama-kisa kalai doko mee maa yangao lekeleke tao napiona lao masetala Kataisa dee ipatamo gii dokopa namba luiyato. ¹⁷ Nyakamanya* 2:17 Lo 15:16; 2 Ti 4:6 masoo minao paenge doko Isataelemame opale mende Gote lao pyao yangao kundi maiyamipi kalai piamipi dopale joo silyamo. Nambame nyakamanya kalai doko pyakatopa endakali dupame namba taiyoko nyetamino kandao doko namba mona yaepatala nyakama pitaka-pipa mona yaepatoaka. ¹⁸ Mendai* 2:18 Pl 1:4; 3:1; 4:4 dopaka pyoo nyakama mona yaepatala namba-pipa mona yaepalapapeaka.

Akali Timotipa Ipapotaitasapa

¹⁹ Kamongo* 2:19 Ap 16:1 Jisasame kini yakana latana lao masetala kuki tendale nambame akali Timoti nyakama kalyamino dokonya epena lato. Dopa petala nambame nyakama dopa pyoo kalyamino lapae sepala nambanya mona doko lyuu lata. ²⁰ Nambame masingili pyoo masingi nyakama kapa pao auu pyoo niseta akali Timoti yale waka mende ae nakalyamo. ²¹ Endakali* 2:21 Pl 1:15-17; 2 Ti 2:10 waka yangi dupa pitakame nyakama tangenya oapi dupa isoo katao Jisasa Kataisanya kalai dupa pyakamaiya naengema. ²² Dopa pingimaka doko, akali Timoti doko auu pyoo katengena lao nyakamame masilyamino. Wane mendeme baanya takangepa awapa kalai pyoo nisingili pyoo baame nambapa awapa Wai Pii Epe lamaingi kalai dokonya kalai pia. ²³ Dopana opale mende namba-kisa pyanya pitaminopa nambame kandatala gii dokopa baa nyakama kalyamino ongonya yapa epena latona lao masilyo. ²⁴ Dee* 2:24 Pl 1:25-26; Ip 13:19 Kamongo dokome yakana latana lao nambame masilyona kuki tendale namba tange nyakama katatamisa ipatoaka.

²⁵ Nambame* 2:25 Pl 4:18 akali Ipapotaitasa doko nyakama katamisa dee pilyina latoo lao masilyo. Baa masoo miningi kaiminingi nambapa kalai mendai pyoo yanda awapa pingi. Namba iki injiamosa baame namba nisina lao nyakamame epena leami. ²⁶ Dopaka doko, baame nyakama kandapu laka lao masetala nea kaelyamo. Nyakamame baa yaina nyiana lapae siamino dokonya baa mona andao kalyamo. ²⁷ Kini, baa yaina nyepala etete kumapenge jiamoaka doko, Goteme baa kondo kaya. Baa iki kondo nakaya. Namba-kisa kenda pipae silyamo dokonya kenda pipae mende deaka nasina lao namba apata kondo kayaka. ²⁸ Dokonya nambame baa nyakama kalyamino dokonya epena lapu laka lao etete masilyo. Nyakamame baa kandatala mona epe palyetaminopa dee namba-kisa kenda pipae silyamo ongonya kuki mee jetaka. ²⁹ Dopana* 2:29 1 Ko 16:16,18; 1 Ti 5:17 nyakamame mona etete yaepatala Kamongo doko lao masoo emba taeme epene lamo lao baa lanyalapape. Nyakamame akali dopale dupa alyasale katena lao minalyalapape. ³⁰ Kini, Ipapotaitasame Kataisanya kalai doko pyoo katao baa etete kumiali jia. Nyakamame kapa pao namba nisepenge nanjiamo dokonya baame nyakama alo pyoo kalai pyoo katao kumatone lao paka nakaya.

Kiningi mana tolatae doko

¹ Nambanya* 3:1 2 Ko 13:11; Pl 1:4; 2:18 kaimia paluma, nambame pii dake waipa soo lelyo: nyakamame Kamongo doko lao mona yaepao kalyepape. Nambame nyakamanya pii wamba pepa pyakalo mendai dopaleaka mende deaka pyekelyo dokonya namba maka nakaelyo. Deaka pyekelyo dokome nyakama kyoto joo kalyepale lao niseta.

² Nyakamame* 3:2 Wee 22:16,20; Ga 5:12; Pa 22:15 akali yana jepae dupa kandao kalyepape. Akali dupame kopeta mana miningima. Dupanya yonge doko kaketalya kaketana pyoo koyasetaena, akali dupame nyakama koyasetamina kandao kalyepape. ³ Naima* 3:3 Jet 4:4; Lo 2:25-29; Ga 6:14-15; Kl 2:11 angi elya pingi kambu kepapae joo kalyamano. Yana jepae dupa daa. Gotenya Oli Sipitisa doko naima-kisa sipumopa naimame Gote lao tama pyoo katao endakalinya mana dupame naima nisepengena lao masala naelyamano. Dopa napinya Kataisa Jisasa lao masoo minao alyasale joo kalyamanona lao masilyamano. ⁴ Nambame* 3:4 2 Ko 11:18,21 apata namba tangenya mana dupame namba nisepengena lao masoo minapuli kandao doko, tenge palipyali. Akali waka mendeme baanya mana dupame baa nisepenge tenge palelyamona lao masetamo kandao doko, nambanya mana dokonya tenge etete angi palelyamo. ⁵ Nambanya* 3:5 Jen 17:10; Lu 1:59; Ap 23:6; 26:5; Lo 11:1; 2 Ko 11:22* 3:5 Ap 22:3-5 endangimi namba mandyuu setao koto kalenge pitipiamopa tukulapo dokonya nambanya elya pingi kambu kepekeami-pyaa. Namba Isataele. Namba Iputu Benjamene tata. Namba Iputumanya mandipae. Nambame mana setapae dupa watao minao Patasi kateo. ⁶ Patasi* 3:6 Mt 3:7; Ap 8:1,3; 26:9-11 dupanya mana dupa nambame etete kyoto joo watao minao sosa doko watao pyao kateo. Mana setapae dupa tolao watao miniopa akali mendaipi mendeme nambame kopeta watao minilinona laa naya. ⁷ Wamba* 3:7 Mt 13:44,46 nambame mana dopale dupa watao minatala auu pyoo katatona lao masiwaka doko, indupa Kataisa lao masipu dokome mana dopale dupanya namba kapa pao koyoli lamo lao masilyo. ⁸ Dopa lao iki masala naenya, Kataisa Jisasa nambanya Kamongona lao masipu etete epe dokome waka dupa pitakanya koyapenge lamo lao masilyo. Nambame Kataisa nyoo baapa pakatae kalyanya baa lao masipu dokome dupa pitaka yakinatala aii pyapae lamo lao masilyo. ⁹ Mana* 3:9 Lo 1:16; 3:21-22; 10:3; Ga 2:16 setapae watao miningi dokonya namba akali tolatae joo nakalyo. Kataisa lao masoo miningi dokonya Goteme masoo miningi endakali dupa tolataena lenge dokonya namba tolatae joo kalyo. ¹⁰ Nambame* 3:10 Lo 1:4; 6:3-5; 8:11,17; Ga 6:17 Kataisa iki masipu laka lao masilyo. Baa malunya sakateamo pupu lapae doko namba-kisa sipumopa payapu laka lao masilyo. Dee baame tanda nao kateamo mendai dokaita joo namba tanda nao katao baa kumiamo mendai dokaita joo kumapu laka lao masilyo. ¹¹ Goteme* 3:11 Ap 4:2; Pa 20:5-6 namba malunya sakatasetakana lao masetala dopa pyoo payapu laka lao masoo lelyo.

Polome alo pyao pao lita etao dokonya tuu latoo leamo doko

¹² Nambame* 3:12 Ap 9:5-6; Pl 2:16; 1 Ti 6:12,19 Kataisanya mana dutupa nyoo etapeopa etete akali angi injiseteana lao laa naelyo. Kataisa Jisasame namba baanya injisiamo dokonya nambame baanya mana dutupa nambanya jekena lao puupae lao watao minilyo. ¹³ Oo* 3:13 Lu 9:32 kaimia, nambame mana dutupa nyoo etapeona lao masala naelyo. Dopaka doko, nambame mendai dapa iki pilyo: wamba maita maitio dupa kame setala ene nyepenge dupa kyoto joo nyalanya pyoo kalyo. ¹⁴ Kataisa* 3:14 1 Ko 9:24-25; Ip 3:1 Jisasame naima nisoo kalai piamo dokonya Goteme naima auu pyoo kalyepale ketae pyakalyalapa leamo dokonya namba kalya paanya nambame lita etao dokonya tolao alo pilyo. ¹⁵ Naima* 3:15 1 Ko 2:6 endakali angi joo kalyamano dupa pitakame dopaka pyoo masoo katamana. Nyakamame waka mende masoo katatamino kandao doko, Goteme nyakamanya masingi doko tolasekena. ¹⁶ Dopaka* 3:16 Ga 6:16 doko, naimame wambao mana nyepeamano doko watao minao katamana.

¹⁷ Kaimia* 3:17 1 Ko 4:16; 1 Te 1:7; 2 Te 3:7; 1 Pi 5:3 paluma, nyakama pitakame nambanya mana miningi doko minawaka kalyepape. Naimame nyakamanya makande epe setekeama doko watao paelyamino endakali dupa nyakamame kanjepape. ¹⁸ Wamba* 3:18 Ap 20:19; 1 Ko 1:23; Ga 6:12 paa longosa nambame nyakama langioli pyoo indupa ee lao deaka langilyo: endakali longo dupa payapimino dokome Kataisa ita pokonya kumapala naima pyoo nyiamo Wai Pii Epe doko yandapipili joo paelyamino. ¹⁹ Akali* 3:19 Jo 3:12; Lo 8:5-6; 16:18 dupa etapala yuu koo ongonya patami. Dupanya yongenya auu kaenge dupa dupanya gote lamo. Dupame nyakamanya elya kayapenge dupanya nyakama tange lalyoo kalyamino. Dupame nyakamanya masingi doko yuunya singi dupanya pena lao kalyamino. ²⁰ Dopaka* 3:20 1 Ko 15:23-28; Ep 2:6,19; Kl 3:1-4; Ip 11:13-16 doko, naimanya yuu tenge doko kaiti-kisa silyamo. Ketae kaiti dokonya katao naimanya Pyoo Nyingi Akali Kamongo Jisasa Kataisa ipatamo doko putiti kayao malisoo kalyamano. ²¹ Baame* 3:21 Ap 3:20-21; Lo 8:23,29; 1 Ko 15:43-53 naimanya yonge kui lapae doko minao aloo petala baa tangenya yonge tii pipae dopale injisakata. Dupa pitaka baanya pundipundi sina lapenge baa pupu lapae dokome dopa pita.

¹ Dopana,* 4:1 Pl 1:4; 1 Te 2:19-20 nyakama nambanya mona setenge kaiminingi dupapi, nambanya kandapu laka lao masingi dupapi, nambanya mona yaepasekenge dupapi, nambanya yati nea pipaele dupapi, nyakama nambanya mona setenge dupa Kamongopa pakatae katao nambame langyo dopaka pyoo kyoto joo kalyepape!

Polome dopa pyoo kalyepapena leamo doko

² Enda Yotia Sindikipa nyilyambo nambame pii mende langyakondape pyoo langilyona salapape: nyilyambo Kamongonya joo mona mendai palyoo pilyepape. ³ Dee* 4:3 Wee 69:28; Dan 12:1; Lu 10:20; Pa 20:12 nambanya nisingi akali epe, emba apata nambame pii mende langilyo: embame enda dolapo nisepe. Enda dolapome nambapi Kelemenepi dee endakali waka namba-pipa kalai mendai pingi dupa-pipapi Wai Pii Epe lamaingi kalai dokonya lekeleke tao kyoto joo nisiambi. Dupanya kenge dupa Gotenya endakali lete etete katenge dupanya kenge singi buku dokonya silyamo. ⁴ Koteaka* 4:4 Pl 1:4; 3:1 lao nyakamame Kamongo doko lao mona yaepao kalyepape. Nambame nyakama deaka mona yaepao kalyepapena langilyo. ⁵ Endakali* 4:5 1 Ko 16:22; Ta 3:2; Ip 10:25,37; Je 5:8-9 dupa pitakame nyakamanya tambo tambo lao katenge mana doko kandena lao kalyepape. Kamongo doko ipanya tengesa petelyamo. ⁶ Nyakamame* 4:6 Mt 6:25-34; Kl 4:2 opale mendaipi mendenya nea nakaenya, nyoani kayatamino dupa pitaka Gote-kisa loma soo tee lao yaka pilino laapape. ⁷ Dopa* 4:7 Ais 26:3; Jo 14:27; Kl 3:15 pitaminopa Goteme endakalinya masingi dupa pitaka ita minao nyakamanya mona lyuu lasekenge dokome nyakamanya monapi masingipi dupa Kataisa Jisasa-kisa auu pyoo sekena lao isakao katata.

⁸ Kaimia* 4:8 Lo 12:17 paluma, nambame pii dake etao lelyo: nyakamame mana epe tolatae tama pipenge dapale dupa masoo kalyepape: kiningi dupapi, auu pipae dupapi, tolatae dupapi epe etete dupapi, nea pipae dupapi, nyoani pipae dupapi, dopale dupa pitaka moname masoo kalyepape. ⁹ Nambame* 4:9 Lo 15:33; 16:20; 1 Ko 14:33; 1 Te 2:13; 5:23; 2 Te 3:7 nyakama mana langiopa nyiamino dupapi, mana miniopa kandeamino dupapi, siamino dupapi, dupa koteaka lao nyakamame minao kalyepape. Dopa pitaminopa mona lyuu lasekenge Gote doko nyakama-pipa katatami.

Pilipae tangemame oapi Polo maiyaminopa yaka pilyamino leamo doko

¹⁰ Indupa* 4:10 2 Ko 11:9; Pl 1:4 gii mendatupa patapumopa nyakamame namba dee nisilyamino dokonya nambame Kamongo doko lao etete mona epe palyilyo! Kini, wamba nyakamame namba nisemana lao masiaminoaka doko, namba nisoo peakapenge kaitini mende nasia. ¹¹ Nambame* 4:11 1 Ti 6:6; Ip 13:5 dopa lelyo doko namba opale mende daa jipyanya nalelyo. Namba-kisa oapi setamopi nasetamopi dokonya namba yaka katatona lao mana nyio. ¹² Oapi kuki setao katenge mana dokopa longo lao setao katenge mana dokopa dolapo nambame masilyo. Mana mende pyoo katengepi, mende pyoo katengepi, mana tata tata dupanya nee longo napengepi, lopo kayapengepi, oapi longo setao katapengepi, daa joo katapengepi mana dopale dupa pitakanya nambame kandateo. ¹³ Namba* 4:13 2 Ko 12:9-10; Kl 1:29; 2 Ti 4:17 pupu lasilyamo dokome namba nisilyamopa nambame opale mende pyanya kokala naenge. ¹⁴ Dopaka doko namba-kisa kenda pipae epeamo dokonya nyakamame namba nisoo mana epe miniami.

¹⁵ Nambame* 4:15 Ap 16:12-13; 2 Ko 11:9 Wai Pii Epe doko tee pyao lamaiyoo ipao nyakamanya yuu Masetonia doko yakinatala peo dokopa sosa waka mendeme namba-pipa awapa kalai pyoo auu kayapae nyepa kenda pipae nyepa napiaminopa, nyakama Pilipae tange dupame iki dopa piamino doko nyakamame masilyamino. ¹⁶ Namba* 4:16 Ap 17:1; 1 Te 2:9 daa joo Tesalonaika kateo dokopa kini nyakamame namba nisoo oapi dupa paa lapomasa peekeami. ¹⁷ Nyakamame* 4:17 1 Ti 6:19 oapi dupa namba dyepale lao tee laa naelyo. Nambame nyakamanya itai wai dokonya dii dupa longo lao manditamo kandapu laka lao masilyo. ¹⁸ Nyakamame* 4:18 Jen 8:21; Eke 29:18; Ese 20:41; Ep 5:2; Pl 2:17,25; Ip 13:16 yanu pyalakao pyekeamino dokonya namba-kisa oapi yaka longo silyamo! Nyakamame nambanya oapi dupa akali Ipapotaitasa-kisa peekeamino dupa nyepala longo sakapumopa kalyo. Nyakamame peekeamino dupa Isataelemame tunduma epe pingi mende Gote lao kundi maiyoo pyao yangeaminopa Goteme auu kayao nyiamo dopale joo peekeami. ¹⁹ Dopana, nambanya Gote dokonya epe etete longo paka Kataisa Jisasa-kisa silyamoli pyoo baame nyakama daa jetamo dupa pitaka dyoo kapa piseta. ²⁰ Tanga* 4:20 Lo 16:27 tangapi naimanya Gote-kisa Takange dokoaka lao tama pipenge lamo! Kiniaka.

Etao lasa leamo pii dupa

²¹ Gotenya* 4:21 Pl 1:13 endakali Kataisa Jisasa-pipa pakatae kalyamino dupa pitaka mendai mendai lao nambame auu pyoo kalyepape lelyona lamaiyakalapape. Namba-pipa masoo miningi kaiminingi awapa katamano dupame nyakama kandao auu pyoo kalyepape lelyamino. ²² Gotenya endakali ae katenge dupa pitakame nyakama kandao auu pyoo kalyepape lelyaminoaka. Dee Loma tange Kapomane Isingi Mupa dokonya andaka kalai pyakamaiyoo katenge dupame nyakama auu pyoo kalyepape lao nea kayao lelyamino. ²³ Kamongo* 4:23 Ga 6:18; Pm 25 Jisasa Kataisanya mona epe palenge doko nyakamanya mona dokonya sina!