WAI PII EPE
MATYUMI
PEPA PIAMO DOKO
Pii atupa wambao kandapenge
Goteme wamba Juta dupa-kisa Pyoo Nyingi Akali mende epena latona leamo doko Jisasa. Dopa leamo doko angi jiamo kandatala Matyumi Wai Pii Epe dokome Jisasanya lao lao panea-pyaa. Matyu dokome Jisasanya atome doko Jisasa baa mandeamino dokonya pituu tee pyatala lao pao kaimbu nyepeamopa Sataneme makande piapi, Jisasame kalai piapi, Jetusaleme pupala kumiapi, malunya dee sakateapi dupa pitakanya lea-pyaa. Dopa latala Jisasa baa Pyoo Nyingi Akalina lao Matyumi langyokondape petea-pyaa.
Wai Pii Epe Matyumi pepa piamo dokonya Jisasa baa mana lenge akali epe auu petae mende kateana lea-pyaa. Jisasa baa mana lenge akali etete epe dokome kapa pao Gotenya mana setapae dupanya tengepi Goteme endakali dupa pitaka isoo katengena lawapi lao panea-pyaa. Baame baanya masepae longo lao panao pituu pii yuungi datupa lea-pyaa.
Matyu 5-7 Jisasa yuu manda mendenya katao Goteme endakali isingi dupa aipale joo katapengepe, kalai aipa pipengepe, dupa aipa pyoo auu pyoo katapengepe, dupame tanga tangapi aipa pyoo katatamipi lao mana lea-pyaa.
Matyu 10 Jisasame baanya disaipele dupame pii lamaipenge mana dupa lamaiya-pyaa.
Matyu 13 Kaitinya Katenge dokome baanya endakali dupa isingi dokonya kongali lao lea-pyaa.
Matyu 18 Endakali dupame baanya disaipele joo katapenge tenge dokonya mana lea-pyaa.
Matyu 24-25 Yuu gii etatamopa Kaitinya Katenge dokome dupa pitaka isoo katatana lea-pyaa.
Wai Pii Epe doko Matyumiaka pepa piana lao kapilyetae silyamo. Dopaka doko, masingi akali mendapuame Wai Pii Epe dake apimi piape lao masala naelyamanona lengema.
Wai Pii Epe Matyumi pepa piamo dokonya pii lyaa dupa:
1:1–2:23 Matiame Jisasa mandeamo atome dupa
3:1–12 Joneme endakali dupanya kaimbu pyakamaiyamo doko
3:13–4:11 Jisasa kaimbu pyateamopa Sataneme makande piamo doko
4:12–18:35 Jisasame Galili katao kalai piamo dupa
19:1–20:34 Jisasame Galili yakinatala Jetusaleme peamo doko
21:1–27:66 Jisasame Jetusaleme katao kalai piamo dupa
28:1–20 Jisasa malunya sakateamopa kandeamino doko
1Jisasa Kataisanya yumbange dupanya kenge dupa
(Lu 3:23-28)
1 Jisasa* 1:1 1 Ktl 17:11; Ais 11:1; Mt 9:27; Ga 3:16 baa Dapiti tatanya mandipae. Dapiti baa Apotakame tatanya mandipae. Pii dake Jisasa Kataisanya yumbange tata paliuu epeamino dupanya:
2 Apotakame* 1:2 Ip 7:14 ikiningi Aisake. Aisake ikiningi Jekope. Jekope ikiningi dupa Jutapi dee baanya kaiminingi dupapi. 3 Juta* 1:3 Jen 38:29-30* 1:3 Lus 4:18-22; 1 Ktl 2:1-15 ikiningi dolapo Petesapa Satapa. Dolaponya endangi doko Tama. Petesa ikiningi Esotone. Esotone ikiningi Lamo. 4 Lamo ikiningi Aminatape. Aminatape ikiningi Nasone. Nasone ikiningi Salomane. 5 Salomane* 1:5 Jas 2:1; Lus 4:13-17 ikiningi Boasa. Boasa endangi doko Leapa. Boasa ikiningi Opeta. Opeta endangi doko Lusa. Opeta ikiningi Jesi. 6 Jesi* 1:6 2 Sam 12:24 ikiningi doko Kiŋi Dapiti.
Dapiti ikiningi Solomone. Solomone endangi doko wamba akali Yutayame enda nyiamo doko. 7 Solomone* 1:7 1 Ktl 3:10-16 ikiningi Liapome. Liapome ikiningi Apaisa. Apaisa ikiningi Esa. 8 Esa ikiningi Jiosapata. Jiosapata ikiningi Jotama. Jotama ikiningi Usaya. 9 Usaya ikiningi Jotame. Jotame ikiningi Easa. Easa ikiningi Esekaya. 10 Esekaya ikiningi Manasa. Manasa ikiningi Emosa. Emosa ikiningi Josaya. 11 Josaya* 1:11 2 Kiŋ 24:14-15; 2 Ktl 36:10 ikiningi dupa Jekenayapi dee baanya kaiminingi dupapi. Gii dokopa Isataele endakali dupa Bapilone yuu dokonya lanyoo peami-pyaa.
12 Pateaminopa Jekenayame Siatiele mandea-pyaa. Siatiele ikiningi Setapapele. 13 Setapapele ikiningi Apiata. Apiata ikiningi Elayakimi. Elayakimi ikiningi Eso. 14 Eso ikiningi Setoko. Setoko ikiningi Ekimi. Ekimi ikiningi Elayata. 15 Elayata ikiningi Eliesa. Eliesa ikiningi Matana. Matana ikiningi Jekope. 16 Jekope ikiningi Josepe. Josepe doko enda Matia akalingi. Enda Matia doko Jisasa kandao Kataisana lengema dokonya endangi.
17 Dopana, wamba Apotakame kateamo gii dokonya pituu, Dapiti kateamo dokonya tuu lao yumbange tata paleamino dupa kingi ita mende-kisa dee kitomende. Dapiti kateamo gii dokonya pituu, Isataele endakali dupa Bapilone yuu dokonya lanyoo peamino gii dokonya tuu lao yumbange paleamino dupa kingi ita mende-kisa dee kitomendeaka. Bapilone yuu dokonya lanyoo peamino gii dokonya pituu, Kataisa doko mandeamo gii dokonya tuu lao yumbange tata kingi ita mende-kisa dee kitomendeaka paleami-pyaa.
Matiame Jisasa Kataisa mandeamo doko
(Lu 2:1-7)
18 Jisasa* 1:18 Lu 1:26-38; 2:5,11 Kataisa mandeamo dokonya atome doko dapa: Jisasa endangi Matia doko akali Josepeme nyetana lao andaka joo peteambi-pyaa. Dopaka doko, Josepeme Matia endana lao lanyepala nayamopa, Oli Sipitisame Matia wane maiyamopa tongata petea-pyaa. 19 Matia akalingi Josepe doko akali epe tolatae dokonyana, baame Matia elya pisala nayato lao masia-pyaa. Dopa lao masetala baame enda doko elyakao pata-pata lao kayatoana lao masia-pyaa. 20 Dopa* 1:20 Jen 16:7; Mt 2:13,19; 28:2; Lu 1:11; 2:9; Jo 5:4 lao masoo kateamopa, Kamongonya enjele mendeme baa kombeame lamaiyoo, “Josepe, Dapiti yumbange, embame enda Matia doko embanya enda jina lao lanyalanya paka nakayape. Baanya inginya wane pilyamo doko Oli Sipitisame maiya. 21 Baame* 1:21 Wee 130:8; Lu 1:31,35; 2:11,21; Jo 1:29; Ap 3:16; 4:12; 13:23 wane ane mende manditana, embame baa kenge doko Jisasa lape. Doko baame baanya endakali dupanya koo dupa kunanya nepatakamaitala pyoo nyetana,” lea-pyaa.
22 Piamo* 1:22-23 Ais 7:14 dutupa pitaka wamba Kamongome potopesa mende-kisa pii leamo datupa angi injisoo pia-pyaa: “Enda mapuakae akali mendepa tole napingi mendenya inginya wane ane mende pititamopa mandita. Mandipatamopa dupame baanya kenge doko Emanyuele latamina,” potopesa dokome dopa lea-pyaa. (Kenge Emanyuele dokonya tenge doko Gote naima-pipa tole kalyamano.)
24 Josepe paliuu sakatatala Kamongonya enjele dokome baa lamaiyamoli pyoo baame enda doko lanyia-pyaa. 25 Dopaka* 1:25 Lu 2:7,21 doko, baame enda dokopa tole napyawaka katao wane ane doko mandeamo gii dokonya tuu lea-pyaa. Dopa petala baame wane doko kenge Jisasa lea-pyaa.
2Niki pyakaengesa tange akali dupame Jisasa kanja epeamino doko
1 Matiame* 2:1-2 Lu 1:5; 2:4-7* 2:1-2 Nam 24:17; Jet 23:5; Mk 15:2; Jo 1:49 Jisasa Jutia yuu taono Beteleme lenge dokonya mandea-pyaa. Gii dokopa akali Etote lenge doko kiŋi katea-pyaa. Maitakao niki pyakaengesa tange buinya tenge masingi akali mendapuame Jetusaleme ipupala lao pituu, “Jutamanya kiŋi katatana lapae wane ŋaŋa doko anja mandipae silyape? Naimame baanya bui doko niki pyakaengesa-kaita katamosa kandatala baa tama pyaa epelyamanona,” leami-pyaa. 3 Kiŋi Etoteme pii doko sepala baa walu lea-pyaa. Jetusaleme tange endakali dupa pitakame sepala apata walu leamiaka-pyaa. 4 Etoteme pitisa mupapi dee Jutamanya mana setapae masingi akalipi dupa pitaka epena lao nyoo elyambu pia-pyaa. Dopa petala, “Kataisa doko yuu andukunya mandipengepe?” lao pisia-pyaa. 5 Dupame* 2:5 Jo 7:42 baa lamaiyoo, “Jutia yuu dokonya yuu taono Beteleme dokonyana,” leami-pyaa. “Doko potopesa dokome dapa lao pepa pia-pyaa:
6 ‘Jutamanya* 2:6 Mai 5:2 yuu Beteleme, emba Juta tata isoo kalyamino akali andake dupanya pundipundi joo nasilino.
Emba-kisa akali andake mende pyakalyeta.
Baame nambanya Isataele endakali dupa setao katakatana,’ lao pia-pyaana,” leami-pyaa.
7 Dopa lateaminopa Etote baame elyakawaka akali niki pyakaengesa tange kanja paanya epeamino dupa epena latala tipa-tipa pyoo, “Gii andukupa bui doko kateape?” lao pisia-pyaa. 8 Dopa petala dupa Beteleme pena latala lamaiyoo, “Nyakamame wane doko kutakondape pyoo kutalapape. Kutao kandatala dokopa, nambame apata tama pyaa patona langya ipupape,” lea-pyaa.
9 Dupame kiŋi dokonya pii dupa sepala peami-pyaa. Peaminopa wamba niki pyakaengesa-kaita bui kateamo kandeamino dokoaka ipao katea-pyaa. Dopa petala wambao pao wane mandipae siamo desa katao lita pia-pyaa. 10 Dopa piamopa dupame bui doko kandatala nyakamanya mona doko etete yaepeami-pyaa. 11 Mona* 2:11 Wee 72:10-15; Ais 49:23; 60:6; Mt 1:18; 12:46 yaepao andaka kolandatala wane dokopa endangi Matia dokopa dolapo kandeami-pyaa. Dopa petala dupame isa luma lakapala wane doko tama piami-pyaa. Dupame nyakamanya mandi dupa tangupala oapi mendapua wane doko maiyami-pyaa. Golopi, kena tunduma pipae pingi pautapi, dee mamba yale tunduma epe pingi mendepi dutupa maiyami-pyaa.
12 Kuka* 2:12 1 Kiŋ 13:9; Mt 2:22 Goteme akali dokaita Etote kalyamosa-kaita pilyala naena lao kombea pimaiya-pyaa. Dopa piamosa dokaita kaitini waka mendenya-kaita nyakamanya yuusa pilyiami-pyaa.
Isipe yuu dokonya paka peamino doko
13 Akali* 2:13 Mt 1:20; 2:19-20,22-23 dokaita pateaminopa, kuka Kamongonya enjele mendeme Josepe kombea pimaiyoo, “Emba sakatala wane dokopa endangipa dolapo laminao Isipe yuu dokonya paka puu. Dokonya katatenopa nambame emba tenda dee langitoli pyoo pilyetena, Etoteme wane doko kutao pyao kumasalanya pilyamona,” lea-pyaa. 14 Dopa lateamopa kuka dokonya Josepeme sakatatala wane dokopa endangipa dolapo laminao Isipe paanya pea-pyaa. 15 Pupala* 2:15 Nam 23:22; Osi 11:1 Josepe Isipeaka katao Etote kumiamo gii dokonya tuu lea-pyaa.
Dopa piamo dokome potopesa mendenya nengekaita lungu petala Kamongome lao pituu, “Nambanya ikiningi doko Isipe yuu dokonya kateamopa, nambame epena leona,” leamo pii doko etete angi jia-pyaa.
Wane longo pyao kumasakamaiyamino doko
16 Kanja epeamino akali niki pyakaengesa tange dupame Etote baa minakasetala pumi lumu lao masetala baa etete imbumi kumia-pyaa. Dopa petala yuu Betelemepi dee Beteleme tengesa yuu singi dupanyapi pupala wane ŋaŋa ane ee kana lapo pataepi dee ee kana laponya anatenapi dupa pitaka pyao kumasala pena lea-pyaa. Baame niki pyakaengesa tange masingi akali dupa pisiamopa, dupame baa lamaiyamino gii doko masoo dopa pia-pyaa. 17 Dopa piamo dokome wamba potopesa Jetemayame pii leamo datupa angi jia-pyaa.
18 “Dupame* 2:18 Jen 35:16-19; Jet 31:15 yuu Lama lenge dokonya pii dupa setami.
Dupame yako lao kondo-kondo pyoo ee latamino dupa setami.
Enda Lesolome baanya wane dupa lao ee latamopa
endakali mendaipi mendeme kapa pao baanya mona minao auu pisakamaiya nayata.
Doko, baanya wane dupa pitaka nakatataminosa dopa latana,” lea-pyaa.
Isipe katao pilyiamino doko
19 Etote* 2:19-20 Eke 4:19; Mt 1:20; 2:13 kumateamopa, maitakao Kamongonya enjele mende Isipe yuu dokonya ipupala Josepe kombea pimaiyoo, “Emba wane dokopa endangipa dolapo laminao Isataelemanya yuu dokonya pilyepe. Wane doko pyalanya piamino endakali dupa kumatelyaminona,” lea-pyaa. 21 Dokopa Josepeme wane dokopa endangipa dolapo laminao Isataelemanya yuu dokonya pilyia-pyaa.
22 Dopaka doko, Akelesa dokome baanya takange Etotenya panda nyoo Jutia yuu dokonya kiŋi joo kalyamo lapae sia-pyaa. Dopa lapae sepala baa yuu dokaita paanya paka kaya-pyaa. Dokopa Goteme baa kombea mende pimaitiamopa, Galili yuu dokonya yangi-kaita pea-pyaa. 23 Baa* 2:23 Mt 13:54; 26:71; Mk 1:24; Lu 1:26; 2:39; 4:34; 18:37; 24:19; Jo 1:46; Ap 2:22; 3:6; 6:14; 22:18; 24:5; 26:9 pao yuu taono Nasatete lenge dokonya katea-pyaa. Dopa piamo dokome wamba potopesa dupame, “Baa Nasatete tangena latamina,” leamino pii doko angi jia-pyaa.
3Jone Kaimbu Pingi dokome pii lamaiyamo doko
(Mk 1:2-8; Lu 3:1-18; Jo 1:19-28)
1 Gii* 3:1 Jo 1:6 dokopa akali Jone Kaimbu Pingi doko ipao Jutia yuu dokonya endakali napalenge yuu mendasa katapala pii panao tee pyao lamaiya-pyaa. 2 Baame* 3:2 Ese 18:32; Dan 2:44; 4:17; Mt 4:17; 10:7; 10:7; Mk 1:15; Ap 2:38 lao pituu, “Kaitinya Katenge dokome isingi doko tengesa petelyamona mona kapilyalapa!” lao lamaiyoo katea-pyaa. 3 Potopesa* 3:3 Ais 40:3; Jo 1:23 Aisayame lao pituu,
“Endakali napalenge yuu mendasa akali mendeme katapala wii lao,
‘Kamongonya kaitini doko depa lanya setakamaiyepape!
Baanya kaitini dupa tolasakamaiyepape!’ lao katatana,” lea-pyomo doko akali Jone baa kandao lea-pyaa.
4 Jone* 3:4 Lep 11:22; 2 Kiŋ 1:8; Sak 13:4; Mt 11:8-9 baa mena kamele itimi yonge pee wasepae dupa pyoo, matapu mena pulumakao yanungimi wasepae pyoo katea-pyaa. Baa nee neamo dupa pauyombopi ambulya kakasa lingi dupapi dupa nao katea-pyaa. 5 Dopa* 3:5 Mt 11:7 piamopa Jetusaleme tangepi, Jutia yuu doko pitakanya tangepi, dee endaki Jotane mate dosale tangepi dupa Jone baa kateamo dokonya epeami-pyaa. 6 Ipupala dupame nyakamanya koo pingi dupa lao paneaminopa, baame dupa endaki Jotanenya kaimbu pyakamaiya-pyaa.
7 Dee* 3:7 Ais 59:5; Emo 5:18; Mt 12:34; 21:25,32; 23:33; Jo 5:35; 1 Te 1:10 akali Patasipi Satyusipi longo mendapua kaimbu pyekena lao epeamino kandatala, baame dokaita lamaiyoo, “Nyakama kanopato pambeanya mandipae dupa, apimi nyakama Goteme kapa pao imbu kayata doko langipumosa paka kayao wandyalanya epelyamipi? 8 Dopana, nyakamame mona kapilyetala mona kapilyetae dupame mana miningimali pyoo minalapape. 9 Nyakamame* 3:9 Jo 8:33-40; Lo 2:28-29; 4:12,16; 9:7-8; Ga 4:21-31 nyakama tangenya mona dokome, ‘Apotakame naimanya takangena,’ lao masala nayalapape. Kana silyamo datupa Goteme kapa pao Apotakamenya wane jina lapyalina lao, nambame nyakama langilyo. 10 Uaa* 3:10 Mt 7:19; Lu 13:6-9 doko ita tengenya depa latae sepelyamo. Dii epe manja naenge ita dupa pitaka pokanya setapala itatenya soo yangata. 11 Nambame* 3:11 Jo 1:26-27,33; Ap 1:5 nyakama mona kapilyalapale lao endakimi kaimbu pyekelyo. Dopaka doko, akali maita pyao epelyamo dokome Oli Sipitisa dokopa itatepame nyakamanya kaimbu pyakata. Baanya pupu lapae dokome nambanya pupu lapae doko ita miningi. Nambame baanya moko pee pingi dolapo sakamaipenge namba epe daaka. 12 Baame* 3:12 Ais 41:16; Jet 15:7; Mt 13:30,42,50; Lu 13:28 baanya yati doko minao wiisa angi imbupi pyasoo silyamo dupa pitaka yapapala angi dupa baanya nee setenge anda dokonya setata. Imbu dupa ita konjala naenge dokonya soo yangatana,” lea-pyaa.
Joneme Jisasanya kaimbu pyakamaiyamo doko
(Mk 1:9-11; Lu 3:21-22)
13 Gii* 3:13 Jo 1:31-34 dokopa Jisasame Galili yuu doko yakinatala endaki Jotane mate dokonya Joneme kaimbu pyekena lao epea-pyaa. 14 Dopaka* 3:14 Jo 13:6 doko, Joneme Jisasanya mona aloo pyakamaitoo latala lao pituu, “Embame nambanya kaimbu pyakapili doko yakana, nambame embanya kaimbu pyakatale lao epelepe?” lea-pyaa. 15 Dopa leamoaka doko, Jisasame baanya pii yanu pyakamaiyoo, “Kayapala indupa nambame lelyoli pii. Nalimbame dopa pyoo mana tolatae dupa pitaka kapa pisatambanopa auu pitana,” lea-pyaa. Dopa leanya Joneme baanya pii doko watao minao kaimbu pyakamaiya-pyaa.
16 Jisasanya* 3:16 Ais 11:2; Jo 1:32-34 kaimbu pyalu petakamaiyamopa baame endaki doko yakinatala pyakalyia-pyaa. Pyakalyeteamopa kaiti doko saa papa laloo pia-pyaa. Dopa peteamopa baame kandeamopa Oli Sipitisa doko yaka maileo joo ipupala Jisasa baa-kisa petea-pyaa. 17 Dokopa* 3:17 Jen 22:2; Ais 42:1; 49:3; Mt 12:18; 17:5; Mk 9:7; Lu 9:35 kaiti-kisa katao pii mende lea dokome, “Doo kalyamo doko nambanya Ikiningi etete mona setenge doko kalyamo. Nambame baa kandao etete mona epe palyingina,” lea-pyaa.
4Sataneme Jisasa minao makande piamo doko
(Mk 1:12-13; Lu 4:1-13)
1 Gii* 4:1 Ip 2:18; 4:15 dokopa Sataneme Jisasa minao makande pina lao Oli Sipitisa dokome baa laminao endakali napalenge yuu mendasa pea-pyaa. 2 Pupala* 4:2 Eke 24:18; 34:28; 1 Kiŋ 19:8 dosa Jisasame kuka kotakapi gii kingi ita kitomende nee nanao Gote lao masoo mee katea-pyaa. Dopa petala maitakao baa lopo kaya-pyaa. 3 Dokopa* 4:3 Jen 3:1-7 makande pingi akali dokome baa kateasa ipupala lao pituu, “Emba Gote Ikiningi tamo kandao doko, embame kana silyamo datupa kapilyetala nee jina laa!” lea-pyaa. 4 Dopa* 4:4 Dit 8:3 leamoaka doko, Jisasame baanya pii yanu pyakamaiyoo lao pituu, “‘Endakali mende nee nenge tenge dokonya iki saka nakatenge. Daa, Gotenya kaimbu dokonya pii lapae epenge dupa pitakame endakali saka katasingina,’ dopa lao pepa pyapae silyamona,” lea-pyaa.
5 Dopa* 4:5 Nia 11:1; Dan 9:24; Mt 27:53; Pa 21:10 lateamopa Sataneme baa laminao yuu taono etete epe Jetusaleme dokonya pupala, losuu anda andake kame etete ketae dokonya katena lea-pyaa. 6 Dopa* 4:6 Wee 91:11-12 latala baame Jisasa lamaiyoo, “Pii mende dapa lao pepa pyapae silyamo: ‘Goteme emba lao masetala baanya enjele dupa lamaiyapomona,’ dee, ‘Aopyoo latala kaname embanya mokopi mende koyatame lao enjele dupame emba kopyoo nyalamino.’ Dopana, emba Gote Ikiningi tamo kandao doko, ketae dokonya katao isa manga!” lea-pyaa. 7 Dokopa* 4:7 Dit 6:16 Jisasame baa lamaiyoo, “‘Embame embanya Kamongo Gote doko minao makande napipi,’ lao pepa pyapae silyamoakana,” lea-pyaa.
8 Sataneme Jisasa deaka laminao yuu manda etete ketae mendenya pupala isa yuu dake pitakapi dupanya auu pipae dupapi dupa baa laitaka pia-pyaa. 9 Dopa petala baame Jisasa lamaiyoo, “Embame luma lakapala namba tama pitino kandao doko, oapi datupa pitaka nambame emba ditoana,” lea-pyaa. 10 Dopa* 4:10 Dit 6:13; Mt 16:23; Mk 8:33 leamopa Jisasame baa lamaiyoo, “Satane, emba puu! ‘Embame embanya Kamongo Gote doko tama pyoo baanya iki kalai pyakamaiyoo katape!’ lao pepa pyapae silyamona,” lea-pyaa. 11 Dokopa* 4:11 Mt 26:53; Lu 22:43; Ip 1:6,14 Sataneme Jisasa yakinatala pea-pyaa. Dopa peteamopa enjele mendapuame ipupala Jisasa nisiami-pyaa.
Jisasame Galili yuu dokonya tee pyao kalai piamo doko
(Mk 1:14-15; Lu 4:14-15)
12 Jone* 4:12 Mt 14:3; Mk 6:17; Lu 3:19-20 anjetelyaminona lapae doko Jisasame sepala dokopa, baa Galili yuu dokonya pilyia-pyaa. 13 Pilyetala* 4:13 Jo 2:12 Nasatete yuu dokonya kuki katapala yuu taono Kapaneame dokonya pao katea-pyaa. Yuu taono Kapaneame doko endaki Galili Pete dokonya lembatena singi-pyaa. Yuu taono Kapaneame doko, akali tata Sepyulanepa Napatalaipanya yuu dokonya sia-pyaa. 14 Dopa piamo dokome potopesa Aisayame pii mende dapa leamo doko angi jia-pyaa:
15 “Sepyulanemanya* 4:15-16 Ais 9:1-2; Jo 8:12 yuupi, Napatalaimanya yuupi, endaki pete lembapi, endaki Jotanenya yangi-kaitapi,
endakali tata waka dupanya yuu Galili dokonyapi,
endakali iminjetaenya katatamino dupame tii pipae andake doko kandatami.
Endakali kumapenge yuu iminjetae dokonya katatamino dupa tii pipae dokome tii pisetana,” Aisayame dopa lea-pyaa.
17 Gii* 4:17 Dan 7:14; Mt 3:2; 10:7; Mk 1:15; Lu 17:20 dokopa pituu, Jisasame baanya pii doko tee pyao dapa lao panao lamaiya-pyaa: “Kaitinya Katenge dokome isingi doko tengesa petelyamona, nyakama mona kapilyalapa!” lao lamaiya-pyaa.
Jisasame wapaka nyingi akali kitomende epena leamo doko
(Mk 1:16-20; Lu 5:1-11)
18 Jisasa* 4:18 Jo 1:35-42 Galili Pete lemba dokaita payao pituu, baame akali nyalambo kaiminingipa mendalapo, Saimone, kenge mende Pita lengema dokopa baanya kaiminingi Endutu dokopa dolapo kandea-pyaa. Dolapome wapaka nyalanya wapaka nyingi mandi mende endaki pete dokonya pyandao kateambi-pyaa. Akali dolapome wapaka nyoo pisinisa pingimba-pyaa. 19 Baame* 4:19 Mt 13:47-50; Lu 5:1-11; Jo 21:3 akali dolapo lamaiyoo, “Nambame nyalambo endakali lanyingi injisotona, namba watao ipupa,” lea-pyaa. 20 Gii* 4:20 Mt 8:19-22; 19:27 dokopaka akali dolapome wapaka nyingi mandi dupa yakinatala baa watao peambi-pyaa.
21 Baa dee kuki ulipisale pupala nyalambo kaiminingipa waka mendalapo, Sepete ikiningi Jemesa dokopa baanya kaiminingi Jone dokopa dolapo kandea-pyaa. Dolapo nyalambonya takange Sepete doko-pipa sipi mendenya pituu nyakamanya wapaka nyingi mandi dupa wasoo petami-pyaa. Dopa piaminopa Jisasame akali dolapo epena lea-pyaa. 22 Gii dokopaka akali dolapome sipi doko nyalambonya takange doko-pipa yakinatala, baa watao peambi-pyaa.
Jisasame endakali dupa mana lamaita pii lamaita mee injiseta piamo doko
(Lu 6:17-19)
23 Jisasame* 4:23 Mt 9:35; Mk 1:39; 3:7-8; Lu 4:15,44; Ap 10:38 Galili yuu doko pitakanya awali lao paya-pyaa. Dopa pyoo baame endakali dupa nyakamanya losuu anda dupanya mana lamaita, Kaitinya Katenge dokome isingi dokonya lao Wai Pii Epe doko lamaita pia-pyaa. Dee baame endakalipi yaina tata tatame pyapae dupapi papa tambotae dupapi dupa pitaka mee injisoo katea-pyaa. 24 Baame* 4:24 Mk 6:55 piamo dupanya pii doko Sitia yuu doko pitakanya taya-pyaa. Dopa piamopa endakali dupame yaina tata tatame pyapae dupapi, tanda koo nengepi, enjele koo paletapi, mandipaeme nyingipi, papa tambotaepi dupa pitaka laminao epeami-pyaa. Dopa piaminopa Jisasame dupa mee injisia-pyaa. 25 Endakali* 4:25 Mk 3:7-8 kambu longo mendapuame yuu Galili Dekapolisapi, Jetusalemepi, Jutiapi, endaki Jotane yangi-kaitapi, dupanya katao Jisasa watao payata piami-pyaa.
5Jisasame yuu manda dokonya katao mana leamo doko
(Lu 6:20-23)
1 Jisasame* 5:1 Mk 3:13; Lu 6:17; Jo 6:3 endakali kambu longo dupa kandatala baa yuu manda mendenya pao petea-pyaa. Peteamo dokonya baanya disaipele dupa ipupala baa pituu kakopeami-pyaa. 2 Dopa piaminopa baame tee pyao dokaita dapa lao mana lamaiya-pyaa:
3 “Monanya* 5:3 Ais 57:15; Mt 19:21,29; Mk 10:14; Lu 22:29; 2 Ko 8:9 tipya joo kalyamano lao masoo katenge endakali dupa,
Kaitinya Katenge dokome isilyamona mona yaepena.
4 “Ee* 5:4 Wee 126:5; Ais 61:2-3; Jo 16:20; Pa 7:17 lao katenge endakali dupa,
Goteme mona epe palisetana mona yaepena.
5 “Endakali* 5:5 Jen 13:15; Wee 37:11; Pot 2:21 andanda semaiyoo katenge dupame
yuu dake nyakamanya moya nyetamina mona yaepena.
6 “Lopo* 5:6 Pot 9:5; Ais 55:1-2; Emo 8:11; Jo 4:14; 6:48-51 pilyamopapi endaki nanu pilyamopapi napu laka lao putiti kaengeli pyoo, mana tolatae doko nyipu laka lao putiti kayao katenge endakali dupa, Goteme maiyoo etete kapa pisetana mona yaepena.
7 “Endakali* 5:7 Je 2:13 yango kondo kaenge dupa, Goteme kondo kayatana mona yaepena.
8 “Mona* 5:8 Eke 33:20; Wee 24:3-4; 37:1; 51:10; Pot 22:11; Ip 12:14; 1 Jo 3:2; Pa 22:4 epe palenge endakali dupame, Gote kandatamina mona yaepena.
9 “Mona* 5:9 Wee 34:14; Pot 12:20; 15:18; Sak 8:16; 1 Jo 3:2 mendai paliuu katamana lao kyoto joo akema lenge endakali dupa, Goteme baanya ikiningina latana mona yaepena.
10 “Mana* 5:10 Je 1:2; Ip 12:4; 1 Pi 3:14 tolatae watao minapiminosa kenda pipae nyilyamino endakali dupa,
Kaitinya Katenge dokome isilyamona mona yaepena.
11 “Nyakamame* 5:11 1 Pi 4:14 namba watao minataminosa endakali dupame nyakama kenda pisowapi, sambo pii koo tata tata dupa lawapi, pyao watawapi pitamino dokopa, nyakama mona yaepapenge. 12 Nyakamanya* 5:12 2 Ktl 36:16; Mt 23:31,34,37; Ap 5:41; 7:52; Pl 1:29; Kl 1:24; 1 Te 2:15; Ip 10:34; 11:32-38; Je 1:2; 5:10 yole etete andake doko kaitinya sekelyamona, nyakama eteke kayao mona epe palyalapape! Wamba potopesa kateamino dupa dopaka piami daape.
Aipipa tii pipaepa dolapo
(Mk 9:50; Lu 14:34-35)
13 “Nyakama* 5:13 Lep 2:13 aipi joo yuunya kalyamino. Aipi doko tende napitamo kandao doko, dee aipa petala tende pisepengepe? Aipi dopaleme mende etete napipenge. Endakali dupame soo nepatala moko katao paengema.
14 “Nyakama* 5:14 Jo 1:4-9; 8:12; 9:5; Ep 5:8; Pl 2:15 lama kaiyepae joo yuunya kalyamino. Yuu taono mende manda mendenya singi doko kapa pao yalo petae nasingi. 15 Endakali* 5:15 Mk 4:21; Lu 8:16; 11:33 dupame lama mende kaiyepala titopene penge mendenya koko setapala sanga pyambala naengema. Dopa napinya, setapenge panda dokonya setengesa endakali andaka petenge dupa pitaka tii pisingi! 16 Dopaka* 5:16 Jo 3:21; 15:8; 1 Ko 3:17; 1 Pi 2:12 pyoo nyakamame endakali dupa tii pisoo kalyepape! Dopa pitaminopa dupame nyakamanya kalai epe dupa kandatala nyakamanya Takange kaitinya katenge doko lao lalyetamina,” Jisasame lea-pyaa.
Mana setapae dupanya lao Jisasame mana lamaiyamo doko
17 “Moseseme* 5:17 Mt 3:15; Lo 3:31; 10:4 pii pepa piapi potopesa dupame pii pepa piamipi dupa nambame mee injisala epena lao masala nayalapape! Nambame etete angi injisala epeo. 18 Nambame* 5:18 Mk 13:31; Lu 16:17; 21:33 nyakama kiningi langilyona, yuupi kaitipi dupa kapa pao etapengeaka doko, mana setapae dupanya kuki etete mende tamopi, kaki mendai mende tamopi, alu napyoo mee soaka pao dupa pitaka pyoo etatamo gii dokonya tuu lata. 19 Dopana,* 5:19 Je 2:10 endakali mendeme mana setapae dupanya mendenya kuki etete mende yalatala endakali waka dupame dopaka pina lao mana lamaitamo doko, baa Kaitinya Katenge dokome isingi endakali dupanya anasale joo katapenge. Dopaka doko, endakali mendeme mana setapae dupa watao minatala endakali waka dupame dopaka pina lao mana lamaitamo doko, baa Kaitinya Katenge dokome isingi endakali dupanya alyasale joo katapenge. 20 Nyakamame* 5:20 Lo 10:3; Pl 3:9 mana tolao minatamino dokome mana setapae masingi akalipi Patasipi dupanya mana tolatae dupa ita minala nayatamo kandao doko, Kaitinya Katenge dokome nyakama etete isala nayatana lao nambame nyakama langilyona,” lea-pyaa.
Imbu kaenge dokonya lao Jisasame mana lamaiyamo doko
(Lu 12:57-59)
21 “‘Embame* 5:21 Eke 20:13; 21:12; Lep 24:17; Dit 5:17 endakali pyao kumasala nayape. Endakali mendeme endakali yango mende pyao kumasetamopa, baa laminao kosa laa pupengena,’ lao nyakamanya yumbange dupa lamaiyamino doko nyakamame sepeami. 22 Dopaka* 5:22 Ep 4:26; Je 1:19-20; 3:6; 1 Jo 3:15 doko, nambame nyakama dapa langilyo: endakali mendeme endakali yango mende imbu kaelyamo doko laminao kosa laa pupenge. Dee endakali mendeme endakali yango mende kandao lamba lao pii koo lelyamo doko baa kanjole mupa dupa-kisa laminao pupenge. Dee endakali mendeme mende kandao kyakaenge mona napalengena lelyamo doko, baa ita tao katenge yuu koo dokonya pupenge. 23 Dopana,* 5:23-24 Mk 11:25* 5:23-24 Pot 17:14 embame epe mende Gote kundi maiyanya minao pao setakamaingi olata toko tengesa dosa katao, embanya endakali yango dokome emba-kisa kenda pipae mende setelyamona lao masii kandeno doko, epe minao pateno doko olata toko enombasa dosa sina setape. Setapala emba wambao pao baapa pii lao tolatala mona mendai palyalapape. Dopa petala embame dee ipao epe mende Gote maipenge doko maipina,” Jisasame lea-pyaa.
25 “Dee* 5:25 Mt 6:14-15; 18:34-35; Lu 12:57-59* 5:25 Ep 4:32 akali mendeme emba kosimi laanya pia kandeno dokopa, kosa laa pao pituu kaitinisa ene pitamopa yapa mona mendai palyalapape. Daa tamo kandao doko, akali dokome emba laminao pao pii tolasingi akali jasa doko maitamopa, dokome yanda singi dupa maita. dupame emba anjingi andaka pyandatami. 26 Emba dokonya anjetae paliuu akali dokonya saandi emba-kisa setamo dupanya etete mendaipi mende nasina lao yanu pyao etapala dokopaka ipatena lao nambame emba kiningi langilyona,” lea-pyaa.
Kepo kolao enda nyingi dokonya lao mana lamaiyamo doko
27 “‘Embame* 5:27 Eke 20:14; Dit 5:18 kepo kolala nayape,’ lapae pii doko wamba nyakamame sepeami. 28 Dopaka* 5:28 Jop 31:1; 2 Pi 2:14 doko, nambame nyakama dapa langilyo: akali mendeme enda mende kandatala kepo kolao nyipu laka lao masilyamo dokome enda doko moname kepo kolao nyepelyamo. 29 Dopana,* 5:29 Mt 18:9; Mk 9:47; Kl 3:5 embanya lenge tolae dokome emba koo pyaale lao mapisia kandeno doko, lukunya nepape! Embanya yonge dokonya kuki mende alu pitamo kandao doko, kuki auu pyoo katate. Dopaka doko, embanya yonge pitaka kateta yuu koo dokonya soo pyandatamo doko, etete auu pyoo nakatate. 30 Embanya* 5:30 Mt 18:8; Mk 9:43 kingi tolae dokome emba koo pyaale lao mapisia kandeno doko, kepanya nepape! Embanya yonge dokonya kuki mende alu pitamo kandao doko, kuki auu pyoo katate. Dopaka doko, embanya yonge pitaka kateta yuu koo dokonya pateno doko, etete auu pyoo nakatatena,” Jisasame lea-pyaa.
Enda watao pingi dokonya Jisasame leamo doko
(Mt 19:9; Mk 10:11-12; Lu 16:18)
31 “‘Akali* 5:31 Dit 24:1-4; Mal 2:14-16; Mt 19:7,9; Mk 10:4,10-11; Lu 16:18; 1 Ko 7:10-11 mendeme baanya etanenge doko watao pyao pituu, watao pingi pepa mende maipengena,’ leamiaka-pyaa. 32 Dopaka doko, nambame nyakama dapa langilyo: akali mendenya etanenge dokome kepo kolala nayatamopa mee watao pyatamosa, enda dokome dee akali waka mende nyetamo kandao doko, akali wambatae doko mambele enda dokome kepo kolao nyilyamo. Enda watao pyatae doko dee akali waka mendeme lanyilyamo dokome kepo kolawaka nyilyamo,” Jisasame lea-pyaa.
Pii etete kiningi lelyona lenge dokonya lao mana lamaiyamo doko
33 “‘Embame* 5:33 Eke 20:7; Lep 19:12; Nam 30:2-3; Dit 23:21-22 Kamongo doko kandao opale mende kiningi etete pituu muli mauwana lateno doko, kayala nayao latenoli pyoo pipina,’ lao nyakamanya yumbange dupa lamaiyamino doko nyakamame sepeami. 34 Dopaka* 5:34 Wee 11:4; Ais 66:1; Mt 23:22; Ap 7:49; Je 5:12 doko, nambame nyakama dapa langilyo: nyakamame pii mende lao pituu muli mauwa kiningi lelyona laa nayalapape. Pii doko pupu lasalanya kaiti doko kenge laa nayalapape. Kaiti doko Gotenya isoo petenge toko mende. 35 Nyakamame* 5:35 Wee 48:2; Ais 66:1; Ap 7:49 pii mende pupu lasalanya yuunya kenge doko laa nayalapape. Yuu doko Gotenya moko setapae petenge panda mende. Nyakamame pii mende pupu lasalanya yuu taono Jetusaleme doko kenge laa nayalapapeaka. Jetusaleme doko kiŋi andake dokonya taono mende. 36 Nyakamame pii mende pupu lasalanya nyakamanya aiyomba iti akuala nayalapape! Nyakamame nyakamanya aiyomba iti mendaipi mende yaku injiseta pumbuti injiseta napitami. 37 Dopana,* 5:37 2 Ko 1:17-19; Je 5:12 nyakamame pii mende ŋee lao pituu ŋee iki laapape. Daa lao pituu daa iki laapape. Pii waipa sinyoo lelyamino dupa Sataneme sakatasingina,” Jisasame lea-pyaa.
Koo pingi dupanya yanu nyingi dupanya mana lamaiyamo doko
(Lu 6:29-30)
38 “‘Akali* 5:38 Eke 21:24; Lep 24:20; Dit 19:21 mendeme embanya lenge lukatamopa itingi lengeaka lukope. Nenge longatamopa itingi nengeaka longape,’ lapae pii doko wamba nyakamame sepeami. 39 Dopaka* 5:39 1 Pi 2:19; 3:9* 5:39 Lep 19:18; Pot 24:29; J.Ee 3:30; Jo 18:22-23; Lo 12:17,19,21 doko, nambame nyakama dapa langilyo: endakali mendeme nyakama-kisa koo pitamo doko pina kayalapape. Endakali mendeme nyakamanya wakena tolae-kaita pyao takia kandeno doko, yangi-kaita apata takina kayapeaka. 40 Dee* 5:40 1 Ko 6:7 endakali mendeme nyakamanya yonge pee isa pingi doko nyotoo lao kosa lea kandeno dokopa, yonge pee kisa pingi doko apata baa maiyepapeaka. 41 Dee kapomanenya isingi akali mendeme nyakamanya mende kandao pinju soo tengesale katao mapa lea kandeno dokopa, londatili katao soo mapape. 42 Endakali mendeme oapi mende dii lao tee latamopa maipi. Endakali mendeme saandi mende tee latamopa maita tuu laa nayape,” Jisasame lea-pyaa.
Yandapipi endakali dupa auu kaenge mana doko
(Lu 6:27-28,32-36)
43 “‘Embame* 5:43 Lep 19:18; Jop 31:29 embanya kaita miningi dupa auu kayao katao yandapipi dupa imbu kayape,’ lapae pii doko nyakamame sepeami. 44 Dopaka* 5:44 Eke 23:4-5; Pot 25:21-22; Lu 23:34; Ap 7:60; Lo 12:14,20 doko, nambame nyakama dapa langilyo: nyakamame nyakamanya yandapipi dupa auu kayao katao, nyakama watao pyalanya pilyamino dupa nisoo loma salapape. 45 Dopa* 5:45 Pot 22:2; 29:13; Ep 5:1 pitamino dokome nyakamanya Takange kaitinya katenge dokonya wane joo katatami. Baame niki doko endakali koopi epepi dupa pitaka-kisa tapina lenge. Baame aiyuu doko endakali mana tolatae miningipi mana koo miningipi dupa pitaka-kisa epena lenge. 46 Nyakamame endakali nyakama auu kayatamino dupa iki auu kayatamino kandao doko, dokonya nyakama yole aki mende nyetamipi? Takisa nyingi akali dupame dopaka napingimape? 47 Dee* 5:47 Lu 3:12 nyakamame nyakamanya kaita miningi dupa iki pii epe lamaitamino kandao doko, aki mana mendeme waka dupa ita minatamipi? Kamalya katenge endakali dupame dopaka napingimape? 48 Dopana,* 5:48 Lep 11:44; 19:2; Dit 18:13; Je 1:4; 1 Pi 1:16; 1 Jo 3:3 nyakamanya Takange kaitinya katenge dokome tolalakao tolatae katengeli pyoaka nyakama kalyepape!” Jisasame lea-pyaa.
6Endakali nisingi dupanya lao Jisasame mana lamaiyamo doko
1 “Nyakamame* 6:1 Mt 23:5; Lu 16:14-15 nyakamanya mana tolatae dupa endakali dupame kandapimili lao minatamane lao kandao kalyepape. Dopa pitamino kandao doko, nyakamanya Takange kaitinya katenge dokome nyakama yole mende nandita.
2 “Nyakamame* 6:2 Pot 20:6; Emo 4:5; Mt 15:7; 22:18; 23:13-15; Jo 5:44; 12:43 opale mende endakali tipya mende nisoo maiyoo pituu dokopa, minakasingi endakali dupame Jutamanya losuu andapi kaitini kembopi dupanya endakali dupame nyakama lalyipimili lao maku longo lengemali pyoo laa nayalapape. Minakasingi endakali dupame nyakama lalyipimi laka lao masingima. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 3 Dopaka* 6:3 Mt 25:37-40 doko, nyakamame endakali tipya mende nisoo pituu dokopa, kingi tolae-kaitame nisetamino doko koya-kaitame nakandena lao nisalapape. 4 Dopa* 6:4 Wee 139:2-3; Kl 3:23-24 pyoo nyakamame kondo kaenge mana doko yalo pyoo minataminopa nyakamanya Takange dokome mana yalo pyoo minatamino dupa kandatala nyakama yole mende ditana,” Jisasame lea-pyaa.
Loma sina lao Jisasame mana lamaiyamo doko
(Lu 11:2-4)
5 “Dopana* 6:5 Pot 20:6; Mt 23:5; Mk 11:25; Lu 18:10-14; Je 4:3 nyakamame loma setamino gii dokopa minakasingi endakali dupame loma singimali pyoo sala nayalapape! Dupame losuu andapi kaitini kembopi dupanya katao endakali enombanya loma sipuma laka lao masilyamino. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 6 Dopaka* 6:6 2 Kiŋ 4:33; Ais 26:20; Dan 6:11 doko, nyakamame loma salanya pituu nyakamanya palenge palo ongonya pao kaita pai lanyetala nyakamanya Takange yalo pyoo katenge doko lao loma salapape! Dopa pitaminopa nyakamanya Takange dokome nyakamame yalo pyoo pitamino doko kandatala nyakama yole mende dita.
7 “Dee* 6:7 1 Kiŋ 18:26-29; Ekl 5:1; Ais 1:15 nyakamame loma soo pituu, kamalya katenge endakali dupame pingimali pyoo niminamu lao loma sala nayalapape! Dokaitame pii longo lao loma silyamano doko mambele Goteme setana lao masingima. 8 Nyakama* 6:8 Mt 6:32; Lu 12:30 endakali dopale joo nakalyepape! Nyakamanya Takange Gote dokome nyakamanya daa jilyamo dupa nyakamame tee laa naengesa wambao masingi! 9 Nyakamame* 6:9 Jo 17:6,26 dapa lao loma salapape:
Naimanya Takange ketae kaitinya katenge doko,
Embanya kenge doko auu pyoaka sina lape.
10 Embame* 6:10 Mt 7:21; 26:39,42; Lu 22:42 naima isoo ipao katape.
Ketae kaitinya embanya masingili pingimali pyoo, isa yuu dakenya pyepa lape.
11 Indupaka* 6:11 Pot 30:8-9; Jo 6:32-35 natamanoli pyoo nee dupa dipi.
12 Embame* 6:12 Pot 24:29; Mt 6:14-15; 18:21-35 naimanya koo dupa kunanya nepakape.
Dopaka pyoo naimanya koo pyekelyamino dupanya yanu dupa kaelyamano.
13 Koo* 6:13 Mt 26:41; Lu 22:40; Jo 17:11,15; 2 Te 3:3; 2 Ti 4:18; 1 Jo 2:14 pyepa lao makande pingi dupanya embame naima laminao napupi.
Koo tata dupanya embame naima pyoo nyepe.
14 Dopana,* 6:14 Mk 11:25-26* 6:14 Mt 5:7 endakali mendeme nyakama-kisa koo pitamo dupanya yanu nyala nayatamino kandao doko, nyakamanya Takange kaitinya katenge dokome nyakamanya koo pitamino dupa kunanya nepakataka. 15 Dopaka* 6:15 Pot 21:13; Ep 4:32; Kl 3:13; Je 2:13 doko, nyakamame endakali waka dupanya koo pitamino dupanya yanu dupa kayala nayatamino kandao doko, Goteme nyakamanya koo pitamino dupa kunanya nepakala nayatakana,” Jisasame lea-pyaa.
Gote masalanya nee nanenge dokonya lao Jisasame mana lamaiyamo doko
16 “Nyakamame* 6:16 Pot 20:6; Ais 58:5-9 Gote lao masalanya nee nanao katatamino dokopa, minakasingi endakali dupame pingimali pyoo enomba kumala nayalapape. Dokaitame nee nanao kalyamini lamo lao endakali dupame nyakama kandena lao enomba kumao lambalu pyapae paengema. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 17 Nyakamame nee nanao katatamino dokopa nyakama lengelyaapi kaimbu pyapala aiyomba dupa kai pyao auu pisalapape. 18 Endakali* 6:18 Ais 58:3; Mt 6:4,6 dupame nyakama nee nanao kalyaminona lao masala naena lao dopa pyepape. Dopa pitaminopa nyakamanya Takange yalo pyoo katenge dokome iki maseta. Baame nyakamanya yalo pyoo pitamino doko kandatala nyakama yole mende ditana,” Jisasame lea-pyaa.
Epe dupa kaitinya setenge mana doko
(Lu 12:33-34)
19 “Nyakamame* 6:19 Jop 22:24-26; 1 Ti 6:17-19; Je 5:1-3* 6:19 Wee 62:10 oapi epe dupa yuu dakenya nyoo limbala nayalapape. Yuu dakenya setapaesa kokalyame koyasingi. Dee kaa tao koenge. Pake nenge endakali dupame anda kalupala pake nyingimaka. 20 Dopana,* 6:20 Mt 19:21; Mk 10:21; Lu 18:22; Kl 3:1-2 nyakamame oapi epe dupa nyakamanya jina lao kaitinya limbalapape. Kaiti dokonya kokalyame koyasala nanege. Dee kaa tao koyala naenge. Pake nenge endakali dupame anda kalupala pake nanyingimaka. 21 Nyakamanya oapi epe dupa setenge panda dokonyaka nyakamanya mona yukuoo setengema daape!” Jisasame lea-pyaa.
Yongenya tii pingi doko
(Lu 11:34-36)
22 “Lenge doko yongenya kia joo telyamo. Embanya lenge doko auu pyoo tao payateno kandao doko, embanya yonge doko pitaka etete tii pita. 23 Dopaka doko, embanya lenge lapo tao payateno kandao doko, embanya yonge doko pitaka iminjeta. Tii pipae emba-kisa silyamo doko iminjetamo kandao doko, iminjetae doko etete andaka jetana,” Jisasame lea-pyaa.
Endakali mendeme kapa pao kamongo lapomanya kalai napipenge
(Lu 16:13)
24 “Endakali* 6:24 Jop 31:24-25; Wee 62:10; Mt 5:3; 19:21,26; Ep 5:5 mendeme kamongo lapomanya kalai pakao pyakamaipenge nanjilyamo. Dopa pitoo lao masetamo kandao doko, tenda baame mende doko auu nakayapala mende doko auu kayata. Dee baame mende doko mona setapala mende doko maka kayata. Dopana nyakamame Gotepa munipa lapota mona setapenge nanjetana,” Jisasame lea-pyaa.
Moname longo masoo nea kaenge doko
(Lu 12:22-31)
25 “Dopana* 6:25 Wee 145:15-16; Lu 10:41; 12:11; Pl 4:6; 1 Ti 6:6-8; Ip 13:5; 1 Pi 5:7 nyakamame nyakama tange auu pyoo katapenge dupanya lao masetala, ‘Naima neepi endakipi aki nao katatama laa kanjemape?’ dee ‘Yonge yati akimi pitamape?’ lao nea kayala nayalapape. Endakali auu pyoo katenge tenge doko neepi endakipi, yongenya yati pingipi dutupape? 26 Nyakamame* 6:26 Mt 10:29-31; Lu 12:6-7* 6:26 Wee 147:9 yaka dupa kanjepape! Dupame ee pokala naengema. Dupame nee mandyuu ipao nee setenge anda dupanya mau pyala naengemaka. Dopaka doko, nyakamanya Takange kaitinya katenge dokome dupa nee maingi. Dopana nyakamame yaka dupa etete ita minao nakalyamipi? 27 Nyakamanya* 6:27 Wee 39:5 endakali mendeme baa gii longo lao katapu laka lao nea kayapala baa tangeme baanya katapenge gii dupanya ee kana mendapua waipa setape?
28 “Angi aipuma nyakamanya yongenya pingi dupa lao masetala nea kaelyamipi? Nyakamame mee tanu dupanya dii yati pipae dupa aipa pyoo pyakalyingipi lao masokondape pyepape. Dupame kalai mende pyaa naengema. Dee yonge peepi mende wasala naengemaka daape! 29 Wamba* 6:29 1 Kiŋ 10:1-19; 2 Ktl 9:1-28 akali Solomoneme baa tangenya yati tata dupa pitaka petala tanu dupanya dii yati pipae epe dopale mendeme yati pyoo nakateana lao nambame nyakama langilyo. 30 Mee* 6:30 Mt 8:26; 14:31; 16:8 tanu dupa indupa iki katapelyamopa taita pokanya setapala itatenya yangengemaka doko, Goteme tanu dopale dupa dii yati pipaeme yati pisingi! Dokaita joo baame nyakama yonge yati pingi dupa etete auu pyoo nandingipi? Nyakama kuki iki masoo miningima lamo! 31 Dopana nyakamame ‘Neepi endakipi aki nalamane laa kanjemape, yonge pee aki pyaamane laa kanjemape?’ lao nea nakayalapape! 32 Mana* 6:32 Mt 6:8 dopale dupa pitaka kamalya katenge endakali dupame watao miningima. Dopaka doko, nyakamanya Takange kaitinya katenge dokome nyakama daa jilyamo dupa pitaka masetelyamo. 33 Dopana,* 6:33 1 Kiŋ 3:13-14; 2 Ktl 1:12; Wee 37:4,25; Mt 19:28; Mk 10:29-30; Lu 18:29-30; Lo 14:17; Je 4:3 Goteme isina lao katapengepa baanya mana tolataepa dolapo nyakamame wambao kutao nyalapape. Dopa pitaminopa baame oapi dupa pitaka nyakama ditaka. 34 Tenge* 6:34 Eke 16:4,19; Mt 6:11; Je 4:13-14 dokonya minao nyakamame taitanya lao masetala nea nakayalapape. Taita doko taitanya kalai. Kenda pipae yuu mendai doko gii dokopa ikiaka jingina,” Jisasame dopa lea-pyaa.
7Endakali mende koo epe lao yapala nayalapape leamo doko
(Lu 6:37-38,41-42)
1 “Nyakamame* 7:1 Pot 11:25; Lo 2:1-2; 14:10; 1 Ko 4:5; Je 4:11-12 endakali mende koo epe lao yapala nayalapape. Dopa pitaminopa Goteme nyakama koo epe lao yapala nayataka. 2 Doko* 7:2 Mk 4:24 aipuma? Nyakamame endakali mende koo epe lao yapatamili pyoaka Goteme nyakama koo epe lao yapata. Dee nyakamame endakali mende-kisa mana minataminoli pyoaka Goteme nyakama-kisa minata. 3 Aipuma* 7:3 Wee 36:2 embame embanya lengenya ita waiyepae andake silyamo doko nakandenya, embanya endakali yango mendenya lengenya kuni silyamo doko kandakamaiyoo kalyepe? 4 Emba* 7:4 Jo 8:7 tangenya lenge dokonya ita waiyepae andake mende setamopa aipa petala embame embanya endakali yango mende kandao, ‘Embanya lengenya kuni silyamona nyakatoo,’ latepe? 5 Emba sambo akali epe jili pyoo kalyeno! Wambao embanya lengenya ita waiyepae andake mende silyamo doko nyoo nepao embanya lenge takondape petala, endakali yango mendenya lenge kuni silyamo doko kapa pao nyoo nepakamaiti.
6 “Nyakamame* 7:6 Pot 23:9; Mt 10:11 epe etete dupa endakali yana jepae dupa namaiyepape. Dee nyakamanya mamaku epe dupa endakali mena jepae dupa katatamisa pyale lao namaiyepape. Maitamino kandao doko, dokaitame moko katanya iki nepatala, kapilyetala nyakama nao indyuu nepatamina,” Jisasame lea-pyaa.
Tee lao kutao kaita watawata pyepape leamo doko
(Lu 11:9-13)
7 “Nyakamame* 7:7 Pot 8:17; Jet 29:13-14; Mt 18:19; Mk 11:24; Jo 14:13-14* 7:7 Dit 4:30; Lu 18:1-8; Jo 15:7; 16:23-24; Je 1:5; 4:3; 1 Jo 3:22; 5:14-15 tee laapape! Kapa pao nyetami. Kutalapape! Kapa pao kandatami. Andakaita watawata pyepape! Kapa pao lumbakata. 8 Tee lelyamino endakali dupa pitakame nyingima. Kutilyamino endakali dupa pitakame kandengema. Andakaita watawata pilyamino endakali dupa pitakanya kaita lumbakamaingi. 9 Nyakamanya mendenya wane mendeme takange kandao mapu mende tee latamopa kana mende maitamipi? 10 Dee baame wapaka mende tee latamopa kanopato koo nanenge mende maitamipi? 11 Dopana,* 7:11 Je 1:5,17; 1 Jo 3:22; 5:14-15 nyakama takange koo dupame nyakamanya wane dupa oapi epe dupa maingima tamo kandao doko, nyakamanya Takange kaitinya katenge dokome nyakamanya wane mailyamino doko etete ita minao baa-kisa tee lelyamino endakali dupa opale epe dupa maingi.
12 “Endakali* 7:12 Pot 3:27; Mt 22:39-40; Lu 6:31; Lo 13:8-10 dupame nyakamanya pyakapimili lao masetamili pyoaka nyakamame dupanya pyakamaiyepape! Moseseme pii pepa piapi potopesa dupame pii pepa piamipi dupame pii dokonyaka tenge paliuu lapae silyamona,” Jisasame lea-pyaa.
Kaitini kembo tambukinatae doko
(Lu 13:24)
13 “Koenge* 7:13 Wee 1:1; Jet 21:8; Jo 14:6* 7:13 Dit 30:15-19 panda koo ongonya penge kaitini doko andake. Kaitini dokonya kembo doko pee latae. Endakali longo dupame kaitini kembo dokonya kolamengema. Dopana nyakama kaitini kembo tambukinatae dokonya kolamalapape. 14 Lete* 7:14 Mt 19:24; Jo 10:7-10; Ap 14:22 etete katenge panda dokonya penge kaitini doko yakane. Kaitini dokonya kembo doko tambukinatae. Endakali kuki mendai mendiaimi iki kaitini kembo doko kandasingimana,” Jisasame lea-pyaa.
Ita diipa itangepa
(Lu 6:43-44)
15 “Nyakamame* 7:15 Ese 22:27; Mt 24:4,11,24; Jo 10:12; Ap 20:29; 2 Pi 2:1; 1 Jo 4:1; Pa 13:11; 19:20 sambo potopesa dupa kandao isoo kalyepape! Dokaitame mena sipisipi yanu pee petala nyakama katatamisa ipatamiaka doko, monanda-kaita yana kapua joo ipatami. 16 Nyakamame* 7:16 Mt 12:33-35; Ga 5:19-24; Je 3:12 dokaitanya mana minatamino dupa kandatala dopale lamo lao masetami. Ikililyambu kende dupanya kopi lyingipi? Dee take ita dupanya anga lyingipi? 17 Ita* 7:17 Mt 12:33 epe dupa pitakame dii epe mandenge. Ita koo dupa pitakame dii koo mandenge. 18 Ita epe dupame kapa pao dii koo namandenge. Ita koo dupame kapa pao dii epe namandengeaka. 19 Dii* 7:19 Mt 3:10; Lu 3:9; Jo 15:6 epe namandenge ita dupa pitaka pokapala itatenya soo yangenge. 20 Dopana, nyakamame sambo potopesa dokaitanya mana minatamino dupa kandatala dopale lamo lao masetamina,” Jisasame lea-pyaa.
Jisasame endakali mendapua kandao nambame nyakama masala naengena latamo doko
(Lu 13:25-27)
21 “Namba* 7:21 Ais 29:13; Emo 5:21; Mt 21:31; Lu 6:46; Lo 2:13; Je 1:22-25; 2:14-17; 1 Jo 3:18 kandao, ‘Kamongo, Kamongo,’ lenge endakali dupa pitaka Kaitinya Katenge dokome isingi dokonya napatami. Nambanya Takange kaitinya katenge dokome masingili pingima dupa iki patami. 22 Gii* 7:22 Jet 14:14; Mt 25:11-12 andake doko ipatamopa endakali longo dupame namba kandao, ‘Kamongo, Kamongo, naimame embanya kenge doko lao Wai Pii Epe doko lamaiyama. Naimame embanya kenge doko lao enjele koo longo watao piama. Naimame embanya kenge doko lao kalai pupu lapae longo dupa piamana,’ latami. 23 Gii* 7:23 Wee 5:5; 6:8; Mt 10:33; 13:41-42; 25:41; 2 Ti 2:19 dokopa nambame dokaita lamaiyoo, ‘Nambame nyakama kukipi masala naengena, nyakama endakali koo pingi dupa namba kalyosa naepenya pupa!’ latona,” Jisasame lea-pyaa.
Akali lapomame anda lapoma piambino doko
(Lu 6:47-49)
24 “Dopana,* 7:24 Pot 10:8* 7:24 Je 1:22-25 nambanya pii dutupa sepala watao minatamino endakali dupa pitaka, akali masepae mendeme baanya anda yuu kyotonya piamo dopale. 25 Aiyuu* 7:25 Pot 10:25 ipao endaki lyoo poo pupu lao lao anda doko pyao takyalanya pia-pyaa. Dopa piamoaka doko, baame muku minapala yuu kyotonya piamo dokome takyala naya-pyaa. 26 Nambanya* 7:26 Pot 12:3,7; Ese 33:31; 1 Jo 2:17 pii datupa sepala watao minala nayatamino endakali dupa pitaka, akali masala naenge mendeme anda muku minala naenya mee yuu tambo lapaenya piamo dopale. 27 Aiyuu* 7:27 Jop 8:15; Ese 13:10-14 ipao endaki lyoo poo pupu lao lao piamo dupame anda doko pyao takiamopa etete takyoo pandu pyambea-pyaana,” Jisasame lea-pyaa.
28 Jisasame* 7:28 Mt 11:1; 13:53; 19:1; 26:1; Mk 1:22; 5:20; Lu 4:32; Jo 7:15,46 pii dutupa lao etapeamopa endakali kambu longo peteamino dupame, baame mana leamo doko sepala walu lao paka kayami-pyaa. 29 Nyakamanya mana setapae masingi akali dupame mana lengemali pyoo baame laa nayao baa tange-kisa pupu lapae singina lao mana lea-pyaa.
8Jisasame akali kopetali mende mee jakamaiyamo doko
(Mk 1:40-44; Lu 5:12-16)
1 Jisasame yuu manda doko yakinatala lanao peamopa endakali kambu longome baa watao peami-pyaa. 2 Dokopa* 8:2 Mt 15:25; 18:26; 20:20; Jo 9:38 akali kopetali mendeme Jisasa kateamo dosa ipao luma lakapala baa lamaiyoo, “Akali Andake, embame nambanya kopetali doko mee jakatoo lao maseteno kandao doko, kapa pao mee jakalapenona,” lea-pyaa. 3 Dopa* 8:3 Mt 9:18,25; 11:5; 15:31; 14:14,36 leamopa Jisasame akali doko kingimi watandatala, “Nambame emba mee jipili lao masilyona, emba mee jaa!” lea-pyaa. Dopa lalu piamo gii dokopaka akali dokonya kopetali doko mee jakamaiya-pyaa. 4 Dopa* 8:4 Lep 14:1-32; Mt 9:30; Mk 1:34; 3:12; 5:43; 7:36; 8:30; 9:9; Lu 17:14 piamopa Jisasame akali doko lamaiyoo, “Kandeleno! Embame endakali mendaipi mende lamaiya naenya, pitisa dokome emba kandena puu! Dopa petala emba mee jilino doko dokaitame kandena laitaka pyoo wamba Moseseme makande seteamoli pyoo, opale epe mende Gote lao kundi maiyalena,” lea-pyaa.
Jisasame isingi akali mendenya kendemane mende saka nyiamo doko
(Lu 7:1-10)
5 Jisasa* 8:5-6 Jo 4:46-53 Kapaneame yuu taono dokonya pao pyakameamopa yanda singi amii isingi akali mendeme ipupala baa nisina lao kyoto joo dapa lao tee lea-pyaa: “Akali Andake, nambanya kendemane mende yaina nyepala kuli akipi dupa pitaka kumao etapapumopa tanda andake nao andaka yaina silyamona,” lea-pyaa. 7 Dopa leamopa, Jisasame baa lamaiyoo, “Nambame baa saka nyala ipatoana,” lea-pyaa. 8 Dopa* 8:8 Wee 33:9; 107:20; Lu 5:8 leamopa yanda singi isingi akali dokome baanya pii yanu pyakamaiyoo, “Akali Andake, dopa napipi! Emba nambanya andaka kapa pao ipupenge namba akali epe daana, embame piimi iki latenopa nambanya kendemane doko saka paapomo. 9 Namba apata akali kenge singi mendenya pundipundi katenge. Dee yanda singi mendapua nambanya pundipundi katengemaka. Dupanya mende pena lelyopa baa penge. Mende epena lelyopa baa epenge. Dee nambanya kendemane mendeme mende pina lelyopa baame pingina,” lea-pyaa. 10 Jisasame* 8:10 Mt 9:2,22,28; 15:28; Lu 1:20; 5:5,20; 7:9,50 pii doko sepala akali doko kandao longo lao masia-pyaa. Dopa petala baa watao epeamino endakali dupa lamaiyoo, “Nambame nyakama kiningi langilyona, Isataele endakali dupanya dapa pyoo masoo miningi endakali mende nambame nakandapu. 11 Dopana,* 8:11 Wee 107:3; Ais 49:12; 59:9; 25:6; Mal 1:11; Lu 13:29 nyakamame dake masalapape: niki pyakaengesa tangepi, niki landa pingisa tangepi, endakali longo dupa ipao Kaitinya Katenge dokome isingi panda dokonya Apotakame, Aisake, Jekopepi dutupa-pipa awapa nee andake nao pititami. 12 Dopaka* 8:12 Mt 13:42,50; 22:13; 24:51; 25:30; Lu 13:28; Jo 8:12 doko, isingi pandanya katapenge endakali dupa iminjetae panda koo dokonya watao pyandata. Dopa pitamopa dokonya katao ee lao yamataka lao nenge gilyoo katatamina,” Jisasame lea-pyaa. 13 Dopa latala baame yanda singi isingi akali doko lamaiyoo, “Embanya kendemane doko embame masoo minatenoli pyekenana, indupa emba andaka puu,” lea-pyaa. Dopa leamo gii dokopaka isingi akali dokonya kendemane doko saka pea-pyaa.
Jisasame endakali yaina pyapae longo saka nyiamo doko
(Mk 1:29-34; Lu 4:38-41)
14 Jisasa* 8:14 1 Ko 9:5 Pitanya andaka peamopa Pitanya enda imange doko yonge itaita pyoo yaina piamosa tokonya paliuu siamo kandea-pyaa. 15 Kandatala* 8:15 Mt 9:25; Mk 9:27; Ap 3:7 baame enda dokonya kinginya watandeamopa, yonge itaita piamo doko mee jia-pyaa. Mee jeteamopa sakatatala Jisasanya nee akipi yangakamaiya-pyaa.
16 Yuu* 8:16 Mt 4:23-24 kualanya niki landa piamopa endakali mendapuame enjele koo paleta endakali longo dupa Jisasa kateasa laminao epeami-pyaa. Dokopa Jisasame endakali dupa-kisa enjele koo paleamo dupa piimi watao pyata, endakali yaina pyapae dupa pitaka saka nyepa pia-pyaa. 17 Baame* 8:17 Ais 53:4 dopa piamo dokome wamba potopesa Aisayame lao pituu, “Baame naimanya yonge nepenge dupa nyia. Dee baame naimanya yaina tata dupa soo nepekeana,” leamo doko etete angi jia-pyaa.
Endakali mendapuame Jisasa watao payatamana leamino doko
(Lu 9:57-60)
18 Endakali* 8:18 Mk 4:35; Lu 8:22 kambu mendeme Jisasa baa katao kakopeamino kandatala baame lao pituu, “Naima endaki pete ongonya omotena muaa,” lea-pyaa. 19 Dokopa mana setapae masingi akali mendeme baa kateasa ipupala lao pituu, “Mana Lenge Akali, emba payateli pyoo nambame emba watao payatoana,” lea-pyaa. 20 Dopa* 8:20 Wee 84:3; Mt 11:19; 2 Ko 8:9 lateamopa Jisasame baa lamaiyoo, “Yana kapua dupanya palenge yuli tombapae dupa singi. Dee yaka dupanya palenge panda singiaka doko, Endakalinya Ikiningi dokonya imambu soo aiyomba setenge panda mende nasingina,” lea-pyaa. 21 Dokopa* 8:21 Jen 50:5; 1 Kiŋ 19:20; Jo 5:25 dee akali waka baa watao payamino dupanya mendeme Jisasa lamaiyoo, “Akali Andake, wambao nambame nambanya takange doko malu petala puu lapoko,” lea-pyaa. 22 Dopa* 8:22 Mt 4:19; 9:9; 10:37; Jo 1:43; 21:19 leamopa Jisasame baa lamaiyoo, “Endakali kumapae joo katengema dupame kumapae yango dupa tange malu pina, embame namba watao ipu,” lea-pyaa.
Jisasame poo andake kaena leamo doko
(Mk 4:36-41; Lu 8:22-25)
23 Dopa latala Jisasame sipi mendenya pyakalyiamopa baanya disaipele dupa pyakalyetala baa-pipa awapa peami-pyaa. 24 Peaminopa* 8:24 Wee 4:8; Ap 27:9-10 poo andake mende lao epeamo dokome endaki doko buu minatala sipi doko nyoo landa pyalanya pia-pyaa. Dopa piamoaka doko, Jisasa mee luu palea-pyaa. 25 Dopa* 8:25 Jon 1:6; Mt 14:30 piamopa baanya disaipele dupame baa pyale tatala, “Kamongo, naima kumalanya petelyamanona, embame naima pyoo nyaa!” leami-pyaa. 26 Dopa* 8:26 Wee 89:9; 107:29; Mt 6:30; 8:10; 14:31; 16:8 leaminopa Jisasame dokaita lamaiyoo, “Nyakama kuki masoo miningima lamo dupa aipuma paka kaelyamipi?” lea-pyaa. Dokopa baame sakatatala poo leapi endaki buu miniapi dupa kaena leamopa kuki emapi mende napia-pyaa. 27 Dopa* 8:27 Wee 65:7 piamopa akali dupame mona etete andapala, “Poopa endakipa dolapome baanya pii sakamaingimba lamo doko, akali dake aki akali mende laa kanjemape?” leami-pyaa.
Jisasame akali lapomanya enjele koo watao pyakamaiyamo doko
(Mk 5:1-17; Lu 8:26-37)
28 Jisasame endaki pete dokonya omotena Gatata tangemanya yuu dokaita pao pyakameamopa akali mendalapo endakali malu kananda dupanya katao ipao baa kandanyiambi-pyaa. Akali dolapo-kisa enjele koo longo palelyaminopa, etete kapua joo kalyambinosa endakali dupame kaitini dokonya-kaita etete napaengema-pyaa. 29 Dokopa* 8:29 Isi 11:12; 2 Sam 16:10; Mt 4:3; 9:33; 10:1; 12:23,28,43; 15:22; 17:18; Mk 1:24; Lu 4:34,41; Jo 2:4 akali dolapome puu lao ae lao, “Gote Ikiningi, embame naima aipa pyaanya epelepe? Embanya pipenge gii doko ipatala nayapumopa embame naima tanda andake dyaanya ae wambao epelepe?” leambi-pyaa. 30 Tengesa dosale mena elyambu mende nao kateami-pyaa. 31 Dokopa* 8:31 Lu 4:35-36 enjele koo dupame Jisasa kandao, “Naimame akali dalapo yakinatala pupale lao pyao watateno kandao doko, mena kalyamino dupanya koko palya pupa lapoko,” leami-pyaa. 32 Dopa* 8:32 Ap 8:7; 10:38; 16:18; Je 2:19; 2 Pi 2:4 leaminopa Jisasame dupa kandao, “Pupana!” lea-pyaa. Dopa leamopa enjele koo dupame akali dolapo yakinatala pao mena dupa-kisa landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa.
33 Dokopa mena setao katenge akali dupame yuu taono dokonya paka pupala piamo dupa pitakapi, akali enjele koo palenge dolapo-kisa piamo dupapi dupa pitaka dopa pyomo dopa pyomo lao lamaiyami-pyaa. 34 Dopa leaminopa yuu taono dokonya palenge endakali dupa pitakame Jisasa kutao pupala kandanyiami-pyaa. Kandanyetala, “Embame naimanya yuu dake yakinatala puu!” lao kongo leami-pyaa.
9Jisasame akali papa tambotae mende mee jina leamo doko
(Mk 2:1-12; Lu 5:17-26)
1 Jisasame* 9:1 Mt 4:13 sipi dokonya pao pitipala endaki pete dokonya omotena baanya yuu taono+ 9:1 baanya yuu taono Baanya yuu taono doko Kapaneame kandao lelyamo. Mt 4:13 doko kandape.ongonya pilyia-pyaa. 2 Dokopa* 9:2 Mt 8:10; 9:22; Mk 6:50; 10:49; Lu 7:48; Jo 5:14; 16:33; Ap 23:11 endakali mendapuame akali papa tambotae mende lapa tokonya soo baa kateasa epeami-pyaa. Dopa piaminopa Jisasame dokaitanya masoo miniamino doko kandatala, akali papa tambotae doko lamaiyoo, “Wane, embanya koo dupa kunanya nepekelyona, emba mona yaepa!” lea-pyaa. 3 Dopa* 9:3 Jo 10:33-36 leamopa mana setapae masingi akali mendapuame nyakama lapo lao pituu, “Akali dakeme Gote kilya kandao lelyamona,” leami-pyaa. 4 Dopa* 9:4 Mt 12:25; Lu 9:47; Jo 1:48; 2:25 leamino doko Jisasame kandatala dokaita lamaiyoo, “Aipuma nyakamame koo dopale dupa masilyamipi? 5 Anduku laa nayapengepe? Akali dakenya koo dupa kunanya nepakamailyona lapenge dokope, pande baa sakatatala kaita paena lapenge dokope? 6 Dopaka* 9:6 Dan 7:14; Jo 5:8,27; 17:2 doko, Endakalinya Ikiningi dokome isa yuu dakenya katao endakali dupanya koo dupa kunanya nepenge pupu lapae doko baa-kisa singi lamo lao kanjepalena,” lea-pyaa. Dopa latala baame akali papa tambotae doko lamaiyoo, “Emba sakata! Sakatatala embanya lapa toko doko nyoo soo andaka puuna!” Jisasame lea-pyaa. 7 Dopa* 9:7 Mt 8:3 leamopa akali doko sakatatala baanya andaka pea-pyaa. 8 Dopa piamo doko endakali kambu piamino dupame kandao paka kayapala, pupu lapae dopale dupa Goteme endakali maingi lamo lao masoo Gote lalyiami-pyaa.
Jisasame akali Matyu epena leamo doko
(Mk 2:13-17; Lu 5:27-32)
9 Jisasame* 9:9 Mt 4:19; Lu 7:34; 15:1-2; Jo 1:43 yuu doko yakinatala ipao pituu, takisa nyingi akali Matyu lenge mende takisa nyingi anda dokonya peteamo kandea. Kandatala baa lamaiyoo, “Emba namba watao ipu,” lea. Dokopa baa sakatatala Jisasa watao pea.
10 Maitakao* 9:10 Mt 11:19; Lu 15:1-2; 19:1-10 Jisasa Matyunya andaka nee nao peteamopa takisa nyingi akalipi mana koo minao paengepi dupanya longo epeami. Jisasapi baanya disaipelepi dupa-pipa awapa nee nao peteami. 11 Dopa* 9:11 1 Ti 1:15 piamino doko akali Patasi dupame kandatala Jisasanya disaipele dupa pisoo, “Nyakamanya mana lenge akali dokome takisa nyingi akalipi mana koo minao paenge endakalipi dupa-pipa awapa nee nao pituu kalyamo doko aipuma pilyape?” leami. 12 Dopa leamino doko Jisasame sepala yanu pyao, “Endakali yaina napingi dupame dokosaa katatasa pupenge nanjilyamo. Endakali yaina pyapae dupa pupenge jilyamo. 13 ‘Kundi* 9:13 Osi 6:6; Mt 12:7; 18:11; Lu 19:10 dingi doko daana, kondo kayamaingi doko nambame auu kaenge.’ Pii dopa lapae singi doko nyakamame mana nyala pupa. Nambame endakali tolatae dupa lanyala naepeo. Endakali mana koo minao paenge dupa lanyala epeona,” lea.
Nee nanenya kaenge dokonya Jisasa pisiamino doko
(Mk 2:18-22; Lu 5:33-39)
14 Gii* 9:14 Sak 8:19; Lu 18:12 dokopa Jonenya disaipele dupame Jisasa kateasa ipupala baa pisoo, “Naimapi Patasi dupapimi Gote lao masalanya nee nanenya kaengena, embanya disaipele dupame aipuma dopa napingimape?” leami. 15 Dopa* 9:15 Jo 3:29 leaminopa Jisasame dokaitanya pii yanu pyakamaiyoo, “Akali mendeme enda kelyapala watapae pyao baanya kaita miningi dupa-pipa awapa kalyamo gii dokopa baanya kaita miningi dupame mona kenda kaengemape? Daa! Dopaka doko, yuu gii mende ipatamo dokopa enda kelenge akali doko dupanya kainanya nyokonyetatamopa dupa nee nanao katatamina,” lea.
16 “Endakali* 9:16 Jo 1:17; Lo 7:6; 2 Ko 5:17; Ga 1:6; 4:9 mendaipi mendeme lapalapa kangupae enenge mendeme yonge pee wambatae mendenya tii telya dokonya kii pimbala naenge. Endakali mendeme dopa pitamo kandao doko, enenge doko inungunyetala wambatae doko kangutamopa tii andake tata. 17 Dee* 9:17 Jop 32:19 endakali dupame waene enenge doko penge mena meme yanungimi wasepae wambatae dupanya kambuoo pisala naengema. Dupame dopa pitamino kandao doko, waene enenge dokome bolo lao penge dupa polapala kai lala patamopa penge dupa koyata. Endakali dupame waene enenge doko penge enengenya pisilyaminopa pengepa kopao petengena,” Jisasame lea.
Isingi akali mendenya wanengepa enda mende Jisasanya yonge peenya watandeamo dokopa
(Mk 5:22-43; Lu 8:41-56)
18 Jisasame* 9:18 Mt 8:2; 15:25; 18:26; 20:20; Jo 9:38; 1 Ti 4:14 pii doko dokaita lamaiyoo kateamopa Jutamanya losuu anda isingi akali mendeme ipupala baa kandao luma lakapala lao pituu, “Nambanya wanenge doko epapu kumatalamo. Kumatalamoaka doko, embame ipao baa kingimi watandatale. Dopa pitinopa baa dee lenge talapomona,” lea. 19 Dopa lateamopa Jisasa baa sakatatala akali dokopa peambinopa baanya disaipele dupa awapa peami.
20 Peaminopa* 9:20 Nam 15:38; Dit 22:12; Mt 14:36; Mk 3:10; Ap 19:12 enda mende ee kana kingi ita mende-kisa dee lapoma dupanya koteaka lao andaka nao paliti-paliti singi mendeme Jisasanya maitasa-kaita ipupala baanya yonge pee ketae pingi londe dokonya puna dosa watandea. 21 Enda dokome, “Nambame baanya yonge peenya iki watandato kandao doko, nambanya yaina doko mee jakalapomona,” lao masetala dopa pia. 22 Dopa* 9:22 Mt 8:10; 9:29; 15:28; Mk 10:52; Lu 7:50; 17:19 piamopa Jisasame kapilyetala enda doko kandatala lamaiyoo, “Wanaku, embame masoo minapino dokome emba mee injisetelyamona, emba mona yaepa!” lea. Dopa leamo gii dokopaka enda dokonya yaina doko mee jia.
23 Maitakao Jisasame isingi akali dokonya andaka pao kolandea. Kolandatala kandeamopa akali mendapuame endakali malu pyaanya pulupapu lengema dupa leaminopa endakali yangi peteamino dupa pitakame yako lao yae pyao kateami. 24 Dopa* 9:24 Jo 11:11-13 piaminopa baame dokaita lamaiyoo, “Nyakama pyuu pupa! Wanaku dake kumatala nayalamo. Baa luu palyeme lamona,” lea. Dopa leamopa endakali dupame baa kilya kandao gii kayami. 25 Dopa piaminopa Jisasame endakali dupa watao kamanda pyalyetala baa wanaku kumapae doko siamo palo dokonya kolandea. Kolandatala wanaku doko kinginya minao nyokonyiamopa baa lenge tao sakatea. 26 Dopa* 9:26 Mt 8:3,15 piamo dokonya atome doko yuu dokaita singi dupa pitakanya taya.
Jisasame akali lenge monda mendalapo lenge tasiamo doko
27 Jisasame* 9:27 Mt 12:23; 15:22; 21:9; Lu 1:32* 9:27 Mt 20:29-34 yuu doko yakinatala peamopa akali lenge monda mendalapome baa watao ipao wii lao, “Dapiti Yumbange, embame nalimba kondo kayape!” leambi. 28 Jisasa* 9:28 Mt 8:10 andaka kolandatala peteamopa akali lenge monda dolapo epeambi. Epeambinopa baame dolapo pisoo, “Nambame kapa pao nyalambome pyakapili lao masilyambinoli pyakalapenona lao masoo minilyambipi?” lea. Dopa leamopa dolapome yanu pyao, “Kamongo, kini dopaka lao masilyambanona,” leambi. 29 Dokopa* 9:29 Mt 8:13 Jisasame baanya kingimi dolaponya lengenya watandatala lao pituu, “Nyalambome masoo minilyambinoli pinana!” lea. 30 Dopa* 9:30 Mt 8:4; Mk 1:34 leamopa akali dolapo dee lenge teambi. Dokopa Jisasame akali dolapo kyoto joo lamaiyoo, “Dake endakali mendeme setana kandao kalyepape!” lea. 31 Dopa lamaiyamoaka doko, akali dolapome pupala Jisasanya lao pii doko yuu dokaita singi dupa pitakanya lao tayambi-pyaa.
Jisasame akali pii nalenge mende nisiamo doko
32 Akali* 9:32 Mt 12:22-24; Lu 11:14-15 dolapo puu peteambinopa endakali mendapuame enjele koo paleta akali pii nalenge mende laminao Jisasa kateasa epeami. 33 Dokopa* 9:33 Mk 2:12; 7:37 Jisasame akali doko-kisa enjele koo paleamo doko watao pyakamaiya. Pyatakamaiyamopa akali doko pii lea. Dopa piamopa endakali kambu piamino dupame mona etete andapala, “Wamba naima Isataele endakali dupame mana dapale mendaipi mende nakandeamana,” leami. 34 Dopa* 9:34 Mt 10:25; Mk 3:22; Jo 7:20 leaminoaka doko, Patasi dupame lao pituu, “Enjele koo dupanya isingi doko mambele baame enjele koo dupa watao pilyamona,” leami.
Jisasame endakali dupa kondo kayamo doko
35 Jisasame* 9:35 Mt 4:23; Mk 1:39; 6:6; Lu 8:1 yuu taono andakepi yakanepi dupa pitakanya awali lao payao, nyakamanya losuu anda dupanya katao mana lamaita Kaitinya Katenge dokome isingi dokonya lao Wai Pii Epe doko lamaita pia. Dee baame endakali yaina tata tatame pyapaepi papa tambotaepi dupa pitaka mee injisia. 36 Dopa* 9:36 Nam 27:17; 1 Kiŋ 22:17; 2 Ktl 18:16; Jet 50:6; Ese 34:5; Sak 10:2; Mt 14:13-14; 15:37; Mk 6:34 pyoo baame payamoli pyoo kandeamopa endakali kambu longo dupa mona kendame kumao maka-maka kayao mena sipisipi setao katenge akali nakatenge dopale joo kateaminosa baame dupa kondome kumia. 37 Dopa* 9:37 Lu 10:2; Jo 4:35-38 petala baame baanya disaipele dupa lamaiyoo, “Eenya nee longo wambu petelyamoaka doko, mandyuu mau pyapenge endakali longo nakalyamino. 38 Dopana ee tange dokome baanya nee mandyuu mau pyakamaitami endakali mendapua epena lape lao nyakamame loma salapape!” lea.
10Aposele kingi ita mende-kisa dee lapoma dupa
(Mk 3:13-19; Lu 6:12-16)
1 Jisasame* 10:1 Mk 6:7; Lu 9:1 baanya disaipele kingi ita mende-kisa dee lapoma dutupa epena latala, enjele koo watao pyapengepi, endakali yaina tata tatame pyapaepi, papa tambotaepi dupa mee injisepengepi, pupu lapae doko dokaita-kisa setea. 2 Aposele* 10:2-4 Ap 1:13 kingi ita mende-kisa dee lapoma dutupanya kenge dupa datupa: wambao doko Saimone kenge mende Pita lengema dokopi, baanya kaiminingi Endutupi, Sepete ikiningi Jemesapi, baanya kaiminingi Jonepi, Pilipapi, Batolomyupi, Tomasapa takisa nyingi akali Matyupi, Aopiasa ikiningi Jemesapi, Tatiasapa Saimone+ 10:2-4 saimone Kenge Saimone doko Iputu pii lao Saimone Kenanayosa lenge. Gitiki pii lao Saimone Selote lenge. Kenge dolaponya tenge doko baame Gotepi Gotenya mana makandepi etete watao minawanimi kumingi. Lu 6:15 doko kandape.kenge mende Kenanayosa lengema dokopi, Jisasa enge nyiamo akali Jutasa Isaketiote dokopi dutupa.
Jisasame akali kingi ita mende-kisa dee lapoma kalai maiyamo doko
(Mk 6:7-13; Lu 9:1-5)
5 Jisasame* 10:5 Mt 15:24; Lu 9:52-53; Jo 4:9; Ap 8:5,25; 13:46 akali kingi ita mende-kisa dee lapoma dutupa kalai pyaa pena lao pituu dapa pyepape lea: “Nyakamame endakali tata waka dupanya yuusa napupape. Dee Samatiamanya yuu taono mendenya napupapeaka. 6 Dopa* 10:6 Jet 50:6; Mt 10:23; 15:24 napinya Isataele tata dupanya mendapua mena sipisipi alu petae joo kalyamino dupanya pupape. 7 Pupala,* 10:7 Mt 3:2; 4:17; Lu 9:2; 10:9,11 ‘Kaitinya Katenge dokome isingi doko tengesa petelyamona,’ lao pii lamaiyepape. 8 Endakali* 10:8 Ais 55:1; Ap 8:20; 20:33 yaina pyapae dupa saka nyalapape. Kumapae dupa lenge tasalapape. Kopetali dupa mee injisalapape. Enjele koo dupa watao pyakamaiyepape. Nyakamame mee nyepelyamino dokonya meaka pyakamaiyepape. 9 Nyakamame* 10:9 Mk 6:8-9; Lu 9:3; 22:35-36 muni mendaipi mende manja nayao mee pupape. 10 Kaitini* 10:10 Nam 18:31; Lu 9:4; 10:4,7; 1 Ko 9:14; 1 Ti 5:18; 3 Jo 8 paanya nokaina mende manja nayao, yonge pee laponge doko namandyuu, moko pee napyoo, pangali naminao pupape. Kalai pingi akali mende neepi opale kapa pena lao baa maipenge.
11 “Nyakama* 10:11 Mk 6:10-11; Lu 9:4-5; 10:5-6 yuu taono andake mendenya tamopi yakane mendenya tamopi pupala endakali mendepa nyakama kapa pao awapa katapengepe lao kutao kanjepape. Kutao kandatala baapaka tole katapala paanya pituu ongopa baa yakinatala pupape. 12 Nyakamame anda dokonya kolandao pituu dokonya palenge endakali dupa kandao mona lyuu lao petena lamaiyepape. 13 Endakali dupame nyakama taeme ipamini lamo lao lanyetamino kandao doko, nyakamanya mona lyuu lasingi pii epe doko dupa-kisa seta. Dopa napitamino kandao doko, nyakama tange-kisa pilyeta. 14 Dee* 10:14 Lu 10:10-11; Ap 13:51; 18:6 andaka mendenya tamopi yuu taono mendenya tamopi nyakama taeme ipamini lamo lao lanyala nayawapi, nyakamame pii lamaitamino dupa nasowapi piami kandeno doko, nyakamame yuu doko yakinatala pupape. Pao pituu nyakamanya mokonya kuni kungumapi patatamo dupa lyanda lanya nepalapape. 15 Goteme* 10:15 Jen 19:24-28; Mt 11:24; Lu 10:12; 12:48; 2 Pi 2:6; Ju 7 endakali dupa mokosetamo gii dokopa yuu taono dokonya kenda pipae ipatamo dokome yuu taono Sotoma Gomotapanya kenda pipae ipatamo doko ita minatana lao nambame nyakama kiningi langilyona,” Jisasame lea.
Kenda pipae dupa ipatana leamo doko
(Mk 13:9-13; Lu 21:12-17)
16 “Kandeleno!* 10:16 Jen 3:1; Mt 7:15; Lu 10:3; Jo 10:12; Ap 20:29; Lo 16:19 Nambame nyakama mena sipisipi jepae dupa yana kapua dupanya kainanya pupa lelyo. Dopana kanopato dupame waa katengemali pyoo nyakama kandao isoo katao, yaka maileo dupame mona epe mendai palyoo petengemali pyoo kalyepape. 17 Endakali* 10:17 Jo 16:2; Ap 5:40* 10:17 Mt 24:9-13; Mk 13:9-11; Lu 12:11-12; 21:12-15 mendapuame nyakama anjoo soo kanjole dupa-kisa kosimi laa patami. Dopa pitaminopa dupame nyakamanya losuu anda dupanya nyakama konjame pyatamina kandao isoo kalyepape. 18 Nyakamame* 10:18 Jo 15:27; Ap 23:23; 27:24 namba watao payataminosa endakali dupame nyakama laminao pao kapomane andakepi kiŋipi dupanya enombanya katasetamiaka. Dopa pitamino dokonya-kaita nyakamame dupapi endakali tata waka dupapi nambanya lao pii lamaitami. 19 Endakali* 10:19 Eke 4:10-12; Jet 1:6-10 dupame nyakama kosimi laanya anjoo soo patamino dokopa nyakamame aipa lamanape aipa pimanape lao nea nakayalapape. Nyakamame kosa latamino gii dokopaka pii lapenge dupa Goteme nyakama dita. 20 Nyakamame* 10:20 Jo 14:26; 15:26; 16:7-11; Ap 4:8,31 pii latamino dupa nyakama tangeme masetala laa nayatami. Nyakamanya Takangenya Oli Sipitisa dokome nyakama lungu petala lata.
21 “Akali* 10:21 Mai 7:6; Mt 10:35-36; Mk 13:12; Lu 21:16; 12:52-53 mendapuame nyakamanya kaiminingi etete dupa enge nyepala pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala nyakamanya endangi takangepi dupa pyao kumasina lao maitamiaka. 22 Nyakamame* 10:22 Mt 24:9,13; Mk 13:13; Lu 21:17; Jo 15:18-21,25 nambanya lao pii lamaitaminosa endakali dupa pitakame nyakama imbu kaengyetami. Dopaka doko, endakali mendeme kyoto joaka katao baa etatamo doko pyoo nyepae katata. 23 Dopana* 10:23 Mt 16:27-28; 24:34; 1 Te 4:17 endakali dupame nyakama yuu taono mendenya watao pyatamino dokopa waka mendenya paka pupape. Nambame nyakama kiningi langilyona, nyakamame Isataele yuu dokonya taono dupa pitakanya kalai pyoo etapala nayataminopa Endakalinya Ikiningi doko ipata.
24 “Mana* 10:24 Lu 6:40; Jo 13:16; 15:20 nyingi akali mendeme baa mana lamaingi akali doko ita naminingi. Kendemane mendeme baa isingi doko ita naminingiaka. 25 Dopana* 10:25 2 Kiŋ 1:2; Mt 9:34; 12:24; Mk 3:21; Lu 11:15 mana nyingi mendeme baa mana lamaingi akali dopale joo katatamo kandao doko, mona yaepapenge. Dee kendemane mendeme baa isingi akali dopale joo katatamo kandao doko, mona yaepapengeaka. Endakali dupame endakali isingi doko kandao kenge koo Belesapulu latamino kandao doko, baa tata dupa kandao kenge etete koo mendapua latamina,” Jisasame lea.
Paka kayapenge doko apipi
(Lu 12:2-7)
26 “Dopana,* 10:26 Mk 4:22; Lu 8:17; Ep 5:13; 1 Ti 5:25 nyakamame endakali dupa paka nakayalapape. Sanga pyatae silyamo dupa pitaka tenda lopalyeta. Yalo petae silyamo dupa tenda panasetaka. 27 Nambame pii elyakao nyakama langingi dupa panao lamaiyepape. Pii kakateme singima dupa puu lao wii lee pyoo lamaiyepape. 28 Yonge* 10:28 Ip 10:31; Je 4:12; 1 Pi 3:14; Pa 2:10; 14:7 doko pyao kumasetala imambu apata kapa pao pyao kumasala nayatamili dupa nyakamame paka nakaenya, yongepa imambupa lapota yuu koo dokonya koyasepenge doko paka kayalapape. 29 Endakali dupame muni toya mendaimi yaka pimbinakae lapoma sambengema daape. Dopa pingimaka doko, nyakamanya Takange dokome kaka nasilyamo kandao doko, yaka dupanya mendaipi mende isa mangala naenge. 30 Dee Goteme nyakamanya iti dupa pitaka itaki pyatayaka kalyamino. 31 Dopana,* 10:31 Mt 6:26; 12:12 nyakamame yaka longo dupa ita minao alyasale joo kalyaminona paka nakayalapape!” Jisasame lea.
Namba Kataisanyana lao endakali dupa-kisa lao panenge doko
(Lu 12:8-9)
32 “Endakali* 10:32 Pa 3:5 mendeme endakali dupa-kisa ‘Namba Kataisanyana,’ lao lao panatamo doko kandao, nambame nambanya Takange kaitinya katenge doko-kisa ‘Baa nambanyana,’ lao lao panatoaka. 33 Dopaka* 10:33 Mk 8:38; Lu 9:26; 2 Ti 2:12 doko, endakali mendeme endakali dupa-kisa ‘Namba Kataisanya daana,’ latamo doko kandao, nambame nambanya Takange kaitinya katenge doko-kisa ‘Baa nambanya daana,’ latoakana,” lea.
Epe yuu yongasalanya naepeona leamo doko
(Lu 12:51-53; 14:26-27)
34 “Nambame* 10:34 Mt 10:21; Mk 13:12; Lu 2:34; 22:36 yuunya endakali dupa mona mendai paliuu katena lao epe yuu yongasalanya epeena lao masala nayalapape. Daa! Nambame epe yuu yongasala naepeona, ŋiliŋali lenge mana doko sakatasala epeo. 35 Ikiningimi* 10:35 Mai 7:6 takange-pipa ŋiliŋali lena wanengeme endangi-pipa ŋiliŋali lena, akali mendenya etanengeme ayange-pipa ŋiliŋali lena lao lungu pisala epeo. 36 Kini endakali mendenya palu dupame baa kandao kapa pao yandapipi jetami.
37 “Endakali* 10:37 Eke 32:27; Dit 33:9; Mt 8:22* 10:37 Lu 14:26-27 mendeme baanya takange tamopi endangi tamopi mende auu kayapala, namba auu kayalakao nakayatamo doko kapa pao nambanya joo nakatata. Dee endakali mendeme baanya ikiningi tamopi wanenge tamopi mende auu kayapala, namba auu kayalakao nakayatamo doko kapa pao nambanya joo nakatata. 38 Dee* 10:38 Mt 16:24-25; Mk 8:34-35; Lu 9:23-24 endakali mendeme baanya ita poko doko nyoo soo namba watao payala nayatamo doko kapa pao nambanya joo nakatataka. 39 Endakali* 10:39 Lu 17:33; Jo 12:25 mendeme namba lao masetala baa tange yakinatamo kandao doko, baa auu pyoo katata. Dee endakali mendeme baa tange yakinala nayatamo kandao doko, baa koyatana,” Jisasame lea.
Yole nyetamina leamo doko
(Mk 9:41)
40 “Endakali* 10:40 Mt 18:5; Mk 9:37; Lu 9:48; 10:16; Jo 13:20; Ga 4:14 mendeme nyakama lanyetamo dokome namba lanyeta. Namba lanyetamo dokome namba puu leamo doko lanyeta. 41 Endakali* 10:41 Jo 12:44-45 mendeme nambanya pii minao paenge potopesa mende baa potopesana lao lanyetamo dokome potopesa dupame yole nyetaminoli pyoo nyeta. Dee endakali mendeme akali tolatae mende baa tolataena lao lanyetamo dokome akali tolatae dupame yole nyetaminoli pyoo nyeta. 42 Dee* 10:42 Pot 11:25; Mt 25:40; Mk 9:41 endakali mendeme namba watao paenge endakali mee datupanya mende nambanya endakalina lao masetala endaki kii napae mende iki nena lao kambuoo maitamo endakali dokonya yole doko eteteaka kapa pao sulu soo setana lao nambame nyakama kiningi langilyona,” Jisasame lea.
11Joneme baanya disaipele mendatupa Jisasa kateasa pena leamo doko
(Lu 7:18-35)
1 Jisasame* 11:1 Mt 7:28; 13:53; 19:1; 26:1 pii manapi dutupa baanya disaipele kingi ita mende-kisa dee lapoma dutupa lamaiyoo etapala dokopa, baa kateamo panda doko yakinatala yuu dokaita taono singi dupanya Wai Pii Epe doko lamaiyoo, mana lamaiyoo pyaanya pea.
2 Jone* 11:2-3 Mt 14:3* 11:2-3 Dit 18:15; Ap 2:3; Mal 3:1; Mk 1:7-8; Jo 1:21; 11:27 Kaimbu Pingi doko anjetae paliuu Kataisame kalai pupu lapae dupa pilyamo lapae sepala, baanya disaipele mendatupame Kataisa kateasa pupala, “Emba akali mende ‘Ipatana’ latae dokope, pande naimame akali waka mende malisemape?” lao pisoo sala pena lea-pyaa. 4 Dupame pupala pisiaminopa, Jisasame dokaitanya pii yanu pyakamaiyoo, “Nyakamame pilyetala kandelyamino dupapi silyamino dupapi Jone lamaiyepape. 5 ‘Lenge* 11:5 Ais 26:19; 29:18; 35:5-6; 61:1; Mt 8:3; Lu 4:18-19,21 koo dupa dee lenge telyamino. Moko koo dupa kaita paelyamino. Kopetali dupa mee jilyamino. Kaleketa dupame pii silyamino. Endakali kumapae dupa dee lenge tao kalyamino. Endakali tipya dupame Wai Pii Epe doko silyamino. 6 Dee* 11:6 Mt 13:57; 26:31; Jo 6:61 akali mendeme namba maka kayapala mona lapo palyala naenge doko mona yaepasetae kalyamona,’ pii dutupa Jone lamaiyepape!” Jisasame lea.
7 Jonenya* 11:7 Mt 3:5; Jo 5:33 disaipele dutupa pilyeteaminopa, endakali kambu pyao kateamino dupa Jonenya lao Jisasame pii lamaiyoo, “Wamba nyakamame endakali napalenge yuu dokonya aki mende kanja peamipi? Kembo maitangepi mende poome ema ema pyoo kateamo kanja peamipi? 8 Pande akali mende yonge pee epe tambo lapae yati pipae mende pyoo kateamo kanja peamipi? Yonge pee epe yati pipae dupa pyoo yuu isingi kiŋi dupanya andaka katengema. 9 Kiniaka* 11:9 Mt 14:5; 16:14; 21:26; Lu 1:76-79 doko, nyakamame aki mende kanja peamipi? Potopesa mende kanja peamipi? Kini, baa potopesa mende kateamo kandeaminoaka doko, baa mee potopesa mende daana lao langilyo. 10 Akali* 11:10 Mal 3:1; Mk 1:2; Jo 3:28 doko kandao dapa lao pepa pyapae silyamo:
‘Kandeleno! Nambame nambanya wai minao paenge
akali doko embanya wambao pekena latopa
embanya kaita doko depa lanya setakata!’ lapae silyamo.
11 Nambame nyakama kiningi langilyo, yuunya endakali dupa pitaka Jone Kaimbu Pingi dokome ita minao kalyamo. Kiniaka doko, endakali mende Kaitinya Katenge dokome isingi endakali dupanya etete anasale joo katenge dokome Jone ita miningi. 12 Jone* 11:12 Lu 16:16 Kaimbu Pingi dokome pii lamaiyoo kateamo gii dokonya pituu indupa tuu lao endakali longo dupame etete konga lao Kaitinya Katenge dokome nyakama isina lao kalyanya pilyamino. 13 Potopesa dupa pitakapi Moseseme pii pepa piapi dupame Kaitinya Katenge dokome isingi dokonya lao pii doko lao panao ipao Jone pyakalyiamo dokonya tuu leami-pyaa. 14 Dee* 11:14-15 Mal 4:5; Mt 17:10-13; Mk 9:11-13; Lu 1:17; Jo 1:21* 11:14-15 Mt 13:9,43; Mk 4:23; Pa 2:7; 13:9 nyakamame setami tamo kandao doko, dake apata salapape: ‘Ipatana’ latae Ilainja doko Jonena, nyakama kalekaita singi dupame pii doko salapape!
16 “Nambame* 11:16-17 Lu 7:31-35 endakali tata indupa palelyamino dupa aki mendepa makande pyuape? Wane kole dupame kamapi dupanya kambu lapoma pyao pitipala pii dapa lao yanu pyaloo pyoo lengema:
‘Naimame nyakamanya pulupapu+ 11:16-17 pulupapu Naimanya mali liyoo pituu laiyane pingili pyoo Jutamanya pulupapu lengema-pyaa.latakalamanoaka doko, nyakama lyala nayalamino!
Nyakama kondo kayao ee latakalamanoaka doko, nyakama itingi laa nayalamino!’
Wane dupame dopa lao katengemana nyakama dopalema lamo. 18 Doko,* 11:18 Mt 3:4; Lu 1:15 Jone baa ipupala nee endakipi epe mende nanao katapumopa dupame baa kandao, ‘Enjele koo mendeme baa minao kyakasilyamona,’ lelyamino. 19 Endakalinya* 11:19 Mt 9:10-11,14 Ikiningi doko ipupala nee endakipi epe dupa nao kalyamo. Dopa pimopa dupame baa kandao, ‘Akali dakeme neepi endakipi tuu lao nawaka katao, takisa nyingi akalipi mana koo minao paenge endakalipi dupa-pipa kaita minao kalyamona,’ lelyamino. Dopaka doko, Gotenya masepae dokome dii angi mandyuu, baanya masepae doko tolataena lao panasingina,” Jisasame lea.
Mona kapilyala naelyamino dupame koyatama iki lamo lao masina
(Lu 10:13-15)
20 Jisasame* 11:20 Emo 3:2; Mt 13:58; Jo 12:37; 15:24 kalai pupu lapae etete longo piamo yuu taono dupanya endakali dupame mona kapilyala nayaminosa, baame endakali dupa pyalanya lao katea. 21 Baame* 11:21 Jon 3:6* 11:21 Ais 23; Ese 26:1–28:26; Joe 3:4-8; Emo 1:9-10; Sak 9:2-4 lao pituu, “Taono Kotasina tange dupame koyatama iki lamo lao masina! Taono Betesaita tange dupame koyatamaka iki lamo lao masina! Dupame kalai pupu lapae nyakamanya yuu dolaponya kandeami dupa wamba Taya yuupa Saitone yuupa dolaponya endakali dupame kandeamili kandao doko, dokaitame kenai lumbanya aiyombanya pyalyetala mena kende matapu pyoo yuu wamba waka mona kapilyiamili! 22 Goteme endakali mokosetamo gii dokopa yuu dolaponya kenda pipae ipatamo dokome Taya yuupa Saitone yuupa dolaponya kenda pipae doko ita minatana lao nambame nyakama langilyo. 23 Dee* 11:23 Jen 19:24-28; Ais 14:13-15 nyakama taono Kapaneame tange dupanya kenge doko kaiti-kisa kapa pao seta laape? Daa, Goteme nyakama yuu koo dokonya pyandata! Dupame kalai pupu lapae nyakamanya yuu dokonya kandeami dupa wamba taono Sotoma yuu dokonya kandeamili kandao doko, indupa dakepa Sotoma yuu doko koyala nayao mee sipyali. 24 Goteme* 11:24 Mt 10:15; Lu 10:12 endakali mokosetamo gii dokopa yuu dokonya kenda pipae ipatamo dokome Sotoma yuu dokonya kenda pipae ipatamo doko ita minatana lao nambame nyakama langilyona,” Jisasame lea.
Nyakama namba-kisa imambu nyala ipupapena leamo doko
(Lu 10:21-22)
25 Gii* 11:25 Mt 13:11; Jo 7:48-49; 1 Ko 1:26-29 dokopa Jisasame lao pituu, “Apane, emba yuupi kaitipi dupa pitakanya Kamongo kalyeno! Mana longo kandenge endakalipi masepae endakalipi dupame nakandena lao yalo piino dupa wane ŋaŋa joo katengema endakali dupame kandena lao embame panasiino dokonya nambame emba lao tama pilyo. 26 Kini,* 11:26 Mt 4:3; 16:17 Apane, embame pitona lao auu pyoo masiinoli pyoo petee-pyaa.
27 “Nambanya* 11:27 Jo 1:18; 3:35; 10:15; 17:25; Pl 2:9 Takangeme dupa pitaka nambame isepe lao namba-kisa setea. Endakali mendaipi mendeme Ikiningi doko masala naenge. Takangeme iki masingi. Dee endakali mendaipi mendeme Takange doko masala naengeaka. Ikiningimi iki masingi. Dee Ikiningi dokome Takange doko endakali mende laitaka pitoo lao masetala petelyamopa endakali dokome Takange doko lao masingiaka.
28 “Nambame* 11:28 Pot 3:17; Jet 2:20; 5:5; 31:35 nyakama imambu nyalapa latona, kenda pipae andake dupa pitaka soo namba-kisa ipupape. 29 Nambame* 11:29 Jet 6:16; Osi 10:11; Jo 13:12-15; Pl 2:5; 1 Pi 2:21 endakali dupa andanda semaiyoo, namba tange anasale joo katenge. Nambanya lataiyanya itakalya silyamo doko nyoo nyakamanya lataiyanya setapala, namba-kisa mana nyalapa. Nyepala dokopa nyakama imambu setami. 30 Nambanya* 11:30 Ap 15:10; Ga 5:1; 1 Jo 5:3 itakalya epe soo kalyamino doko tawe lapaena,” Jisasame dopa lea.
12Sambasa giinya kalai napyepape latae singi doko
(Mk 2:23-28; Lu 6:1-5)
1 Maitakao* 12:1 Eke 20:8; Dit 23:25 Jisasa Sambasa gii mendenya wiisa ee kaina mendenya kaita peamopa, baanya disaipele dupame lopo kayapala wiisa dii mendapua kii lao nyoo nama-nama+ 12:1 nama-nama Juta dupanya mana mendeme wiisa ee kainanya kaitini singi dupanya kaita endakali dupa payao pituu wiisa dii dupa kii lao nyoo napa pyoo paengema-pyaa.peami. 2 Dopa* 12:2 Eke 20:10; Jo 7:22 piaminopa Patasi dupame kandatala Jisasa lamaiyoo, “Embanya disaipele dupame Sambasa gii dokonya daa latae singi mana doko minilyamino kandape!” leami. 3 Dokopa* 12:3 1 Sam 21:1-6 Jisasame pii doko yanu pyao, “Nyakamame Dapitipi dee baa-pipa awapa kateamino akali dupapi lopo kayapala Dapitimi piamo doko nyakamame pepanya itaki pyala nayamipi? 4 Baame* 12:4 Lep 24:9 Gotenya losuu anda dokonya kolandatala betesa Gotenyana lao setapae dupa nyepeamopa, dupame neami-pyaa. Betesa dupa pitisa dupame iki napengena, waka dupame daana latae singi-pyaa. 5 Dee* 12:5 Nam 28:9-10 nyakamame Moseseme mana pii pepa piamo dupanya mende itaki pyala nayamipi? Sambasa gii dupanya pitisa dupame mana yalao losuu anda andake dokonya kalai pilyaminoaka doko, tenge mende nasingi. 6 Dopana* 12:6 Mt 12:41-42; Lu 11:31-32; Jo 2:20 angi dakeme losuu anda andake doko ita minilyamona lao nambame nyakama langilyo. 7 Pii* 12:7 1 Sam 15:22; Osi 6:6; Mt 9:13 mende dapa lapae silyamo: ‘Kundi dingi doko daana, kondo kayamaingi doko nambame auu kaenge.’ Pii dopa lapae silyamo dokonya tenge doko nyakamame masiamili kandao doko, tenge nasingi endakali dupa-kisa kapa pao tenge setala nayamili. 8 Endakalinya* 12:8 Jo 5:1-18; 7:19-24; 9:1-41 Ikiningi dokome Sambasa gii doko isoo kalyamona,” Jisasame lea.
Akali kingi kumapae doko
(Mk 3:1-6; Lu 6:6-11)
9 Dokopa Jisasame yuu dutupa yakinatala dokaitanya losuu anda mendenya pea. 10 Peamopa* 12:10 Lu 14:3; 20:20; Jo 8:6; 9:14 akali kingi kumapae mende petea. Endakali mendapuame Jisasa kosimi lamana lao masetala baa pisoo, “Sambasa gii dupanya endakali yaina pyapae dupa mee injisepenge doko, naimanya mana setapae dupanya kapa pelyape daape?” leami. 11 Dopa* 12:11 Lu 14:5; Jo 7:22-23 leaminopa Jisasame dokaita lamaiyoo, “Nyakamanya akali mendenya mena sipisipi mende katatamo kandao doko, Sambasa gii mendenya yuli koko mendenya mangatamopa sipisipi tange dokome minatala kopyoo kamanda nanyetape? 12 Endakalimi* 12:12 Mt 10:31 sipisipi dupa etete ita minao kalyamino daape! Dopana naimame Sambasa gii dokonya mana epe dupa minapengena,” lea. 13 Dopa latala baame akali kingi kumapae doko lamaiyoo, “Embanya kingi doko tinoka,” lea. Tinokateamopa kingi doko yangi epe dopaleaka jia. 14 Dopa* 12:14 Mk 14:1; Jo 5:16,18; 7:30; 8:59; 10:39; 11:53 piamopa Patasi dupame losuu anda doko yakinatala pao Jisasa pyao kumasemana lao kambuiyami-pyaa.
Jisasa baa Gotenya yapao nyepae kalai akali doko
15 Jisasame* 12:15 Mk 3:7-10 pii doko sepala, baame yuu doko yakinatala pea. Dokopa endakali longo dupame baa watao peaminopa, baame endakali yaina pyapae dupa pitaka auu pisakamaiya. 16 Dopa* 12:16 Mt 8:4; Mk 1:34; 3:12 petala baame kyoto joo dokaita lamaiyoo, “Nyakamame namba lao panala nayalapape,” lea. 17 Dopa piamo dokome potopesa Aisayanya kambunya pii mende Goteme leamo doko angi jia.
18 “Dake* 12:18 Mt 3:16* 12:18 Ais 42:1-4; Mt 3:17 nambanya kalai akali doko nambame baa yapao nyepeo.
Nambame baa etete auu kayapala, baa kandao etete mona epe palyingi.
Nambanya Sipitisa doko baa-kisa setatopa,
baame nambanya mana tolatae doko endakali tata dupa pitaka panao lamaita.
19 Baame tanga lawapi yako lawapi napita.
Baanya kambu dokonya pii kyotopi mende kaitini kembo dupanya nasetamiaka.
20 Kembo* 12:20 Sak 11:16; 2 Ti 2:24 maitange mende tambapala lakalanya pitamo doko baame etete lakasala nayata.
Ita langa mende konjalanya kii lao setamo doko baame etete konjisala nayata.
Baame dopa pyoaka katao mana tolatae dokome ita minatamo dokonya tuu lata.
21 Dokopa endakali tata dupa pitakame baa lao masoo minatala malisoo katatamina,” Aisayame dopa lea-pyaa.
Jisasapa Belesapulupa
(Mk 3:20-30; Lu 11:14-23; 12:10)
22 Gii* 12:22 Mt 9:32-33 dokopa endakali mendapuame akali lenge monda pii laa naenge enjele koo paleta mende laminao Jisasa kateasa epeami. Jisasame akali doko auu piseteamopa pii lao lenge tao pia. 23 Dokopa* 12:23 Mt 9:27 endakali kambu piamino dupa pitakame mona andapala lao pituu, “Akali dake Dapiti Yumbangepe?” leami. 24 Dopaka* 12:24 Mt 9:24; 10:25; Jo 7:20; 8:52; 10:20 doko, Patasi dupame pii doko sepala lao pituu, “Enjele koo isingi Belesapulu mambele iki baame enjele koo dupa watao pilyamona,” leami.
25 Dopa leaminopa Jisasame dokaitanya masiamino doko kandatala dokaita lamaiyoo, “Yuu dupanya kiŋi mendeme isingi tata dupanya mende wakale pyoloo petala yanda pitaminopa tata doko etete koyata. Dee yuu taono mendenya tamopi anda mendenya tamopi endakali dupa wakale pyoloo petala yanda pitaminopa taono doko tamopi anda doko tamopi etete koyataka. 26 Dee* 12:26 Jop 1:6 Sataneme Satane tange watao pyatamo kandao doko, baame baa tangeaka wakale pyoloo petala yanda pimaita. Dopa pitamo kandao doko, baame isingi tata doko aipa petala kyoto joo katatape? 27 Nambame Belesapulu mambele enjele koo dupa watao pyapuli kandao doko, nyakamanya mana nyingi dupame api mambele enjele koo dupa watao pyapimilipi? Dokonya dokaitame, ‘Nyakamame kopeta leami lamona,’ latami. 28 Dopaka* 12:28 Mt 3:16; Lu 11:20; Ap 10:38; 1 Jo 3:8 doko, nambame Gotenya Oli Sipitisa doko mambele enjele koo dupa watao pyato kandao doko, Goteme nyakama isala ipatamosa.
29 “Aipa* 12:29 Ais 49:24; Jo 12:31; 1 Jo 4:4 petala akali mendeme akali pupu lapae mendenya andaka kolandatala baanya pinju setamo dupa kapa pao nyetape? Baame akali pupu lapae doko wambao kendeme yaki pinya setapala tamo kandao doko, kapa pao baanya andaka pinju setamo dupa pyao nyeta.
30 “Endakali* 12:30 Mk 9:40; Lu 9:50 mende namba tata joo nakalyamo doko nambanya yandapipi lamo. Dee endakali mendeme namba-pipa endakali nyoo limbala naelyamo dokome endakali dupa saa lasingi. 31 Tenge* 12:31 1 Ti 1:13; Ip 6:4-6; 10:26 dokonya nambame nyakama langilyo, Goteme endakali dupanya koo pingi dupapi baa kandao lamba latamino dupapi dupa pitaka kunanya nepakamaita. Dopaka doko, endakali mendeme Oli Sipitisa doko kandao lamba latamo kandao doko, Goteme baanya koo doko kunanya nepakamaiya nayata. 32 Endakali* 12:32 Lu 12:10; Ip 10:30 mendeme Endakalinya Ikiningi doko kandao lamba latamo kandao doko, Goteme baanya doko kunanya nepakamaita. Dopaka doko, endakali mendeme Oli Sipitisa doko kandao lamba latamo kandao doko, Goteme baanya koo doko indupapi tendapi kunanya nepakamaiya nayatakana,” Jisasame lea.
Ita diipa itangepa
(Lu 6:43-45)
33 “Ita* 12:33 Mt 7:16-20; Je 3:11-12 epe dupame dii epeaka mandenge. Ita koo dupame dii ka mandenge. Ita mendenya dii mandelyamo dupa wambao kandatala ita angi doko dopale lamo lao masingima. 34 Nyakama* 12:34 Pot 10:14; Mt 3:7; 15:11,18; 23:33; Lu 3:7 kanopato pambeanya mandipae! Nyakama koo dupame aipa petala kapa pao pii epe mende lengemape? Endakali monanya palelyali pyoo kambunya pyakalyingi. 35 Endakali epe mendenya monanya epe palelyamo dupaka pyakalyingi. Dee endakali koo mendenya monanya koo palelyamo dupaka pyakalyingi.
36 “Nambame* 12:36 Je 3:1-6 nyakama dapa langilyo: tenda mokosetamo gii dokopa Goteme endakali pii mee ambe lengema dupanya maa minao tenge angi doko piseta. 37 Emba tangenya pii dokonyaka Goteme, ‘Emba-kisa tenge mende nasilyamona,’ lata. Daa tamo kandao doko, emba tangenya pii dokonyaka Goteme, ‘Tenge emba-kisa silyamona,’ latana,” Jisasame lea.
Endakali mendapuame kongali mende pina leamino doko
(Mk 8:12; Lu 11:29-32)
38 Gii* 12:38 Ese 3:7; Mt 16:1; Mk 8:11; Lu 11:16; Jo 2:18; 6:30; 1 Ko 1:22 dokopa mana setapae masingi akalipi Patasipi mendapuame Jisasa lamaiyoo, “Mana Lenge Akali, embame kongali mende pipinopa naimame kandapuma laka lao masilyamanona,” leami. 39 Dopa* 12:39 Mt 6:4; Jo 4:48 leaminopa baame dokaitanya pii yanu pyakamaiyoo, “Endakali indupa palelyamino dupame Gote yakinenge kooma lamo! Nyakamame kongali mende kandamana lelyaminoaka doko, nambame kongali mende pyakala nayatoo. Goteme potopesa Jonaa-kisa kongali piamo dokoaka makande petae seta. 40 Wamba* 12:40 Jon 1:17 Jonaa doko kotaka gii tepo kuka gii tepoaka wapaka andake mendenya ingi koko paleamoliaka pyoo, Endakalinya Ikiningi doko kotaka gii tepo kuka gii tepoaka yuu koko palita. 41 Wamba* 12:41 Jon 3:5; Mt 12:6 akali Jonaa dokome yuu Nenepa tange dupa pii panao lamaiyamopa dokaitame sepala mona kapilyiaminoaka doko, indupa Jonaa doko ita miningi akali doko ae kalyamo. Tenge dokonya Goteme endakali mokosetamo gii dokopa endakali Nenepa tange dupame sakatatala nyakama kosimi latami. 42 Wamba* 12:42 1 Kiŋ 10:1-10; 2 Ktl 9:1-12; Lo 2:27 Isingi Enda Kuini mendeme yuu Sauta-kaita pituu masingi akali Solomone lenge doko kanjanya kaita etete londe mendenya epea-pyaa. Dopaka doko, indupa akali mendeme Solomone etete ita minao ae kalyamo. Tenge dokonya Goteme endakali mokosetamo gii dokopa, Isingi Enda Kuini dokome sakatatala nyakama kosimi latana,” lea.
Enjele koo dee pilyoo epenge doko
(Lu 11:24-26)
43 “Enjele koo mendeme endakali mende yakinatala dokopa, baa mendasa koto nyoo kalyanya yuu sapu dupanya paelya paena pyoo panda kutingi. Kutao kayapala, baame lao pituu, ‘Nambame anda wamba yakineo dokonya dee pilyoo pato,’ lenge. Dopa latala baame anda dokonya pao kandelyamopa anda kuaa doko potoma polao yati petae kalyamo kandenge. 45 Dopa* 12:45 Mk 5:9; Lu 8:2; Jo 5:14; 2 Pi 2:20 petae kalya silyasa baame pupala enjele etete koo kalange lanyepala anda dokonya dee pilyoo ipao katengema. Dokopa akali doko wamba kopeta kateamoaka doko, indupa etete kopeta katenge. Endakali tata koo indupa palelyamino dupa mendai dopaka pyoo katatamina,” Jisasame lea.
Jisasanya endangi dokopi kaiminingi dupapi
(Mk 3:31-35; Lu 8:19-21)
46 Jisasame* 12:46 Mt 13:55-56; Mk 6:3; 1 Ko 9:5* 12:46 Jo 2:2-3,12; 7:2-3,10; 19:25-27 endakali kambu dupa pii lamaiyoo kateamopa baanya endangi dokopi baanya kaiminingi dupapi ipao kamaka katapala, baa-pipa pii lamana lao masiami. 47 [Dopa piaminopa akali mendeme Jisasa lamaiyoo, “Yaa, embanya endangi dokopi kaiminingi dupapi kamaka katapala emba-pipa pii lamua laka lao masilyaminona,” lea.] 48 Dopa* 12:48 Lu 2:49,50 leamopa Jisasame akali dokonya pii yanu pyakamaiyoo, “Nambanya endangi doko apipi? Nambanya kaiminingi dupa apitupape?” lea. 49 Dopa latala baame baanya disaipele dupa kingimi laitaka petae katao lao pituu, “Datupa nambanya endangipi kaiminingipina, kanjepape. 50 Nambanya* 12:50 Jo 15:14; Lo 8:29 Takange kaitinya katenge dokome masingili pingima endakali dupa nambanya kaiminingipi, pimalengepi, endangipina,” Jisasame lea.
13Akali mendeme ee wai lyandeana lao kongali pii doko
(Mk 4:1-9; Lu 8:4-8)
1 Dokondinaka Jisasame anda doko yakinatala pao endaki pete lemba dokonya petea. 2 Peteamo* 13:2 Lu 5:1-3 dokonya endakali etete longo mendapua ipao kambu piaminosa, baa sipi mendenya pyakalyetala ongonya petea-pyaa. Dokopa endakali kambu doko pitaka endaki lemba dokonya kateami. 3 Kateaminopa Jisasame kongali lawaka pii longo dokaita lamaiya. Lamaiyoo pituu, “Kandeleno, akali mendeme ee wai lyandala pea-pyaa. 4 Pupala lyandeamopa yangi kaitininya pea-pyaa. Peamo dupa yaka dupame ipupala nao eteami-pyaa. 5 Yangi kana-kisa yuu epao napalengenya pea-pyaa. Yuu epao napalenge dokonyana wai dupa pupae langa lea-pyaa. 6 Langa leamoaka doko, niki teamo dokome pyao nea-pyaa. Dupa pingi pyalakao napiamosa sapuiya-pyaa. 7 Yangi lyiki tenge palengenya pea-pyaa. Lyiki dupa andapala ee wai dupa kuii pyambea-pyaa. 8 Dopaka* 13:8 Jo 15:8,16 doko, yangi yuu epenya pupala dii mandea-pyaa. Yangimi andate mendai, yangimi kingi ita tokange, yangimi kingi ita tepoma lao mandea-pyaa. 9 Nyakama* 13:9 Ais 42:19; Pa 2:7; 13:9 kalekaita singi dupame pii doko salapapena!” lea.
Jisasame kongaliaka lao pii lamaiyamo dokonya tenge doko
(Mk 4:10-12; Lu 8:9-10)
10 Maitakao disaipele dupame Jisasa kateasa ipupala baa pisoo, “Embame endakali dupa kongaliaka lao pii lamaiyoo kalyeno doko aipuma pilipi?” leami. 11 Baame nyakamanya pii yanu pyakamaiyoo, “Kaitinya Katenge dokome isingi dokonya yalo petae dupa nyakama laitaka petelyamo. Dopaka doko, dokaita laitaka napilyamo. 12 Opale* 13:12 Mt 25:29; Mk 4:25; Lu 8:18; 19:26 singi endakali doko mendapua apata konda pyoo maitamopa, baa-kisa longo seta. Dopaka doko, opale nasingi endakali doko-kisa setamo dolapo nyokonyeta. 13 Nambame* 13:13 Dit 29:4; Jo 9:39; Lo 11:8 endakali dupa kongali pii lao lamailyo dokonya tenge doko dapa: endakali dupame kandelyaminoaka doko, angi nakandelyamino. Silyaminoaka doko, angi nasilyamino. Dee dupame masala naelyaminoaka. 14 Goteme* 13:14 Mk 8:18; Jo 12:38-41; Ap 28:26-27* 13:14 Ais 6:9-10 potopesa Aisayanya nengekaita lungu petala pii mende dapa lea-pyomo doko endakali dupa-kisa angi jema-jema pilyamo:
‘Nyakamame pii sepala dee setamiaka doko, etete masala nayatami.
Nyakamame kandatala dee kandatamiaka doko, angi mende nakandatami.
15 Doko endakali dupame kaleme soo lengeme kandao,
moname masoo petala nambame auu pisatale lao
dee mona kapilyetala ipatamane lao nyakama tangeme mona pyakilyoo,
kale poyao lenge iminjoo katpelyaminona,’ Aisayame lea-pyaa.
16 Dopaka* 13:16 Lu 10:23-24 doko, nyakamame lengeme kandao kaleme soo pilyamino dokonya nyakama mona yaepasetae kalyamino. 17 Nyakamame* 13:17 Jo 8:56; Ap 22:15; Ep 3:5; Ip 11:13; 1 Pi 1:10-12 kandelyamino dupa wamba potopesapi endakali tolataepi longo dupame kandawanimi kumiaminoaka doko, nakandeami. Dee nyakamame silyamino dupa sowanimi kumiaminoaka doko, nasiamina lao nambame nyakama kiningi langilyona,” lea.
Akali mendeme ee wai lyandeana lao kongali leamo dokonya tenge doko
(Mk 4:13-20; Lu 8:11-15)
18 “Dopana,* 13:18 Jo 12:47 akali mendeme ee wai lyandeana lao kongali pii dokonya tenge doko dapana salapape. 19 Kaitinya Katenge dokome isingi dokonya lao pii doko sepala masala naenge endakali dupa pitaka ee wai kaitininya peamo dopalema. Endakali dopale dupanya monanya ee wai lyandakamailyamo doko akali koo dokome ipupala yukuoo nepenge. 20 Dee pii doko sepala mona yaepao yapa nyingima endakali dupa, kana palenge yuunya wai peamo dopalema. 21 Dupame moname auu pyoo masala nayao gii kuki iki katengema. Dupame pii doko watao minilyaminosa, dupa minao kenda pisowapi watao pyawapi pingima. Dopa pilyaminopa yapa yakinengema. 22 Dee* 13:22 Mt 6:19-34; 19:23; Lu 12:16-21; 1 Ti 6:9-10,17 endakali yangi dupa ee wai lyiki tenge palengenya peamo dopale dupame pii doko singima. Katato mange doko aipa pitope lao masetala nea kaengepi, munipi oapi dupa auu kaengepi dopale dupame pii doko pyalya minilyamopa dii manja naengema. 23 Dopaka* 13:23 Jo 15:8,16; Ga 5:22 doko, pii doko soo masetala dii mandenge endakali dupa, wai yuu epenya peamo dopalema. Dupanya yangimi andate mendai, yangimi kingi ita tokange, yangimi kingi ita tepoma lao mandengemana,” Jisasame lea.
Tanu koopa makande pyoo kongali pii doko
24 Jisasame* 13:24 Mk 4:26-29 dee kongali pii mende dokaita lamaiyoo lao pituu, “Kaitinya Katenge dokome isingi doko akali mendeme baanya eenya wiisa wai epe lyandeamo dopale. 25 Kuka gii mendepa endakali dupa pitaka palipiaminopa, akali dokonya yandapipi mendeme ipupala wiisa wai lyandatae kaina dupanya wiisa jepae tanu koo mende lyandatala pea-pyaa. 26 Maitakao wiisa dupa langa latala andao dii manjanya piamopa tanu koo dupa awapa kateamo kandeami-pyaa. 27 Dokopa akali ee tange dokonya kalai akali dupame baa peteasa ipupala pisoo, ‘Akali andake, embame embanya ee dokonya wiisa wai epe lyandala naepe? Tanu koo kalyamo dupa anjatae kalyape?’ leami-pyaa. 28 Dopa leaminopa baame dokaita lamaiyoo, ‘Doko akali yandapipi mendeme lyandao piana,’ lea-pyaa. Dopa leamopa kalai akali dupame baa lamaiyoo, ‘Naimame dupa yukuoo nepala pumili lao masilipi?’ leami-pyaa. 29 Dopa* 13:29-30 Mt 3:12; Jo 15:6 leaminopa baame dokaita lamaiyoo, ‘Daana, tanu koo dupa yukuwatiti wiisa dupa awapa yukuotamina, lapota pyasoo andao katao wambu pitamo gii dokonya tuu lena kayalapa. Wambu pitamo gii dokopa nambame nee mandyuu mau pingi akali dupa lamaiyoo, “Wambao nyakamame tanu koo dupa itatenya soo yangapengena yukuoo yaki-yaki pyepape. Dopa petala wiisa dupa elyambu petala nambanya nee setenge anda dokonya setalapape,” latona,’ lea-pyaana,” Jisasame lea.
Masete diipa iisapanya makande pyoo kongali pii doko
(Mk 4:30-32; Lu 13:18-21)
31 Jisasame* 13:31 Mt 17:20 dee kongali pii mende dokaita lamaiyoo lao pituu, “Kaitinya Katenge dokome isingi doko akali mendeme masete+ 13:31 masete Juta dupame nee tende pisingi masete lenge mende pokengema. Dokonya dii doko awa dii jepayaka doko, andelyamopa endakali nyoo kuki ana pyandenge.wai mende baanya eenya lyandeamo dopale. 32 Ee* 13:32 Ese 17:23; Dan 4:10-17 wai dupa pitakanya masete wainginya dii doko etete yakane. Dopaka doko, lyandataesa langa latala andao ee wai pokatae waka dupa pitaka ita miningi. Andao ita jilyamopa wangya dupanya yaka dupame ipao anda pingimana,” lea.
33 Baame* 13:33 Jen 18:6; Ga 5:9 dee kongali pii mende dokaita lamaiyoo, “Kaitinya Katenge dokome isingi doko enda mendeme iisa mendalapo nyoo palawa longo-pipa kapilya mina-mina pilyamopa, iisa dokome palawa doko pitakanya tayapala andasingi dopalena,” lea.
Jisasame kongaliaka lao pii lamaiyamo doko
(Mk 4:33-34)
34 Jisasame* 13:34 Jo 10:6; 16:25 endakali kambu andake doko pii lamaiyamo dutupa pitakanya mende mee lamaiya nayao kongaliaka lao lamaiya. 35 Dopa* 13:35 Wee 72:8 piamo dokome wamba potopesa mende-kisa lungu petala Goteme pii dapa leamo doko angi jia:
“Nambame dupa pii kongali lao lamaito.
Tee piamo dokonya pituu indupa tuu lao yalo
petae dupa nambame lao pyanga pyatona,” lea.
Tanu koopa makande pyoo kongali leamo dokonya tenge doko
36 Dokopa Jisasame endakali kambu andake doko pena latala baa andaka kolandea. Dopa piamopa baanya disaipele dupa baa peteasa ipupala lamaiyoo, “Eenya tanu koopa makande pyoo kongali laleno dokonya tenge doko naima langi,” leami. 37 Dopa leaminopa baame yanu pyao, “Ee wai epe lyandeamo akali doko, Endakalinya Ikiningi doko. 38 Ee* 13:38 Jo 8:44; 1 Ko 3:9; 1 Jo 3:10 doko, isa yuu dake. Wai epe lyandeamo doko, Goteme isingi endakali dupa. Dee tanu koo dupa, akali koo dokome isingi endakali dupa. 39 Tanu* 13:39 Pa 14:15-16 koo lyandeamo akali yandapipi doko, Satane. Wambu pitamo gii doko, yuu dake etatamo doko. Dee nee mandyuu mau pingi akali dupa, enjele dupa. 40 Dopana,* 13:40 Mt 7:19; Jo 15:6 tanu koo dupa yukuoo elyambu petala itatenya soo yangengema, mana mendai dokoaka yuu dake etatamo gii dokopa seta. 41 Endakalinya* 13:41 Mt 24:31; 25:31-46; Mk 13:27 Ikiningi dokome baanya enjele dupa epena latamopa dupame ipupala, koo pina lao mapisingi endakalipi tanga lao koo pingi endakalipi dupa baame isingi endakali dupa-pipa awapa katatamino dupa nyoo elyambu pitami. 42 Dopa* 13:42 Mt 3:12; 8:12; 13:50; 22:13; 24:51; 25:30; Lu 13:28; Pa 21:8 petala koo dupa itate andake dokonya soo pyandataminopa dupame dokonya katao ee lao yamataka lao nenge gilyoo katatami. 43 Dokopa* 13:43 Isi 5:31; Dan 12:3 endakali tolatae dupa niki tele pyoo dupanya Takangeme isingi dokonya katatamina, nyakama kalekaita singi dupame pii doko salapapena!” Jisasame lea.
Munipi opale epe mendapua-pipa makande pyoo kongali leamo doko
44 “Kaitinya* 13:44 Pot 2:4; 4:7; Mt 19:21-29; Lu 14:33; Pl 3:7 Katenge dokome isingi doko munipi opale epe mendapua eenya yalo petae kateamo dopale. Akali mendeme doko kandasetala sanga pyambea-pyaa. Dopa petala baa mona yaepao pao baanya oapi dupa pitakame muni nyepala ee doko sambea-pyaana,” lea.
Mamaku eteteaka epe mendepa makande pyoo kongali pii doko
45 “Dee Kaitinya Katenge dokome isingi doko mamakumi pisinisa andake pingi akali mendeme mamaku epe dupa kutao kateamo dopale. 46 Akali dokome mamaku eteteaka epe yole andake pupenge mende kutao kandatala dokopa, baame pao baanya oapi dupa pitakame muni nyepala mamaku doko sambea-pyaana,” lea.
Wapaka nyingi mandi-pipa makande pyoo kongali pii doko
47 “Dee* 13:47 Mt 22:9-10 Kaitinya Katenge dokome isingi doko akali dupame wapaka nyingi mandi gulangala jepae mende endaki petenya pyandatala wapaka tata tata dupa pitaka nyingi dopale. 48 Tumbatelyamopa wapaka nyingi akali dupame pyalya lao lembasa nyepala isa pituu yapengema. Yapapala epe dupa nyakamanya pengenya pyandatala koo dupa nepengema. 49 Dopana,* 13:49-50 Mt 13:40-42* 13:49-50 Mt 8:12; Lu 13:28 yuu dake etatamo gii dokopa mana mendai dokoaka seta. Enjele dupa ipupala endakali tolatae dupa-pipa koo pingi katatamino dupa yapao nyepala, itate andake dokonya soo pyandatami. Dopa pitaminopa dokonya katao ee lao yamataka lao nenge gilyoo katatamina,” Jisasame lea.
Oapi enenge wambataepi epe dupa
51 Jisasame* 13:51 Mk 4:13 dokaita pisoo, “Nyakamame pii dutupa pitaka masilyamipi? lea. Dopa leamopa dokaitame baa lamaiyoo, “Masilyamanona,” leami. 52 Dokopa baame dokaita kandao, “Gotenya pii lapae masingi endakali Kaitinya Katenge dokome isingi dokonya mana nyepeamino dupa pitaka akali anda tange dopale. Baame baanya oapi singi palo dokonya oapi enenge wambataepi epe silyamo dupa nyoo kamanda pyalyingina,” lea-pyaa.
Nasatete tange dupame Jisasa kandao mona koo palyiamino doko
(Mk 6:1-6; Lu 4:16-30)
53 Jisasame* 13:53 Mt 7:8; 11:1; 19:1; 26:1 pii kongali dutupa lamaiyoo etapala yuu doko yakinatala pea. 54 Baanya* 13:54 Mt 2:23; Jo 1:46; 6:42; 7:15 yuu tenge dokonya pupala endakali dupa nyakamanya losuu anda dokonya mana lamaiya. Dopa piamopa dupame walu latala lao pituu, “Akali dakeme masepae datupa anjatae nyia laape? Baame kalai pupu lapae dupa aipa petala pilya kanjemape? 55 Akali* 13:55 Mt 12:46; 27:56; Lu 3:23 dake kapendaa dokonya ikiningi daa kandamuape? Baanya endangi doko Matia daa kandamuape? Baanya kaiminingi dupa Jemesapi, Josepepi, Saimonepi, Jutasapi dutupa daa kandamuape? 56 Baanya pimalenge dupa pitaka naima-pipa ae napilyamape? Dopana, baame pilyamo datupa pitaka anja mana nyia laape?” leami. 57 Dopa* 13:57 Eke 4:1; Jo 4:44 latala dupame baa kandao mona koo palyiami. Dopa piaminosa Jisasame dokaita lamaiyoo, “Yuu dupa pitakanya potopesa mende andanda semaingimaka doko, baanya yuu tengepi baanya palupi dupame iki baa kilya kandengemana,” lea. 58 Dupame* 13:58 Mt 8:10 masoo minala nayaminosa baame kalai pupu lapae longo yuu dokonya napia.
14Jone Kaimbu Pingi kumiamo doko
(Mk 6:14-29; Lu 3:19-20; 9:7-9)
1 Gii* 14:1 Lu 3:1 dokopa yuu yakane isingi akali Etote lenge dokome Jisasame pilyamo lapae dupa sia-pyaa. 2 Sepala* 14:2 Mt 16:14; Mk 8:28; Lu 23:8-12 baanya kalai akali dupa lamaiyoo, “Akali doko Jone Kaimbu Pingi doko. Baa malunya sakatapya dokonya baame kalai pupu lapae dupa pyoo kalyamona,” lea-pyaa.
3 Doko* 14:3-4 Lep 18:16; 20:21; Mt 11:2; Mk 6:17-18 wamba Etoteme dapa pia-pyaa: baanya kaiminingi Pilipa etanenge Etotiasa lenge doko baa tondao nyia-pyaa. Dopa piamosa Jone Kaimbu Pingi dokome Etote lamaiyoo, “Embame enda doko tondao nyilino doko kopeta pilinona,” lea-pyaa. Dopa lati siamosa Etoteme Etotiasa lao masetala Etoteme Jone ŋili kendeme anjetala anjingi andaka pyandea-pyaa. 5 Baame* 14:5 Mt 21:26 Jone pyao kumasotoo lao masiamoaka doko, Juta endakali dupame potopesana lao masiaminosa dupa paka kayapala kaya-pyaa.
6 Koto mende Etotenya mandenge gii dokonya akali limbao petamino kaina dokonya Etotiasa wanenge doko lyia-pyaa. Lyiamopa Etoteme auumi kumapala wanaku doko dapa lamaiya-pyaa: “Nambame kiningi etete langilyona, embame opale mende namba-kisa dii lao tee lateno doko nambame kapa pao dyaapona,” lea-pyaa. 8 Dokopa wanaku dokonya endangi dokome baa pii mende lamaitiamopa dapa lea-pyaa: “Embame Jone Kaimbu Pingi dokonya aiyomba doko kepao pelesanya setapala dasa namba dii!” lea-pyaa. 9 Dopa leamosa Kiŋi Etote mona kenda kaya-pyaa. Dopa piamoaka doko, wamba baame pii, “Kiningi etete langilyona,” lao leamo dokopi, akali limbao peteamino dupapi lao masetala, “Lelyamo doko baa maiyepa!” lea-pyaa. 10 Dopa* 14:10 Mt 17:12 latala baame yanda singi mende anjingi andaka pupala Jonenya aiyomba doko kepao nyala pena lea-pyaa. 11 Pena lateamopa Jonenya aiyomba doko kepanyetala pelesa mendenya setapala ipao wanaku doko maiya-pyaa. Maitiamopa minao endangi peteasa pea-pyaa. 12 Dopa petamopa Jonenya disaipele dupa ipupala baa nyoo pao malu piami-pyaa. Malu petala dokopa dupame Jisasa ipao lamaiyami.
Jisasame akali taosene yuungi dupa nee maiyamo doko
(Mk 6:31-44; Lu 9:10-17; Jo 6:1-13)
13 Jisasame* 14:13 Mt 15:32-38; Mk 8:1-10 pii doko sepala, baame yuu doko yakinatala sipi mendenya pituu endakali napalenge yuu mendakaita baa iki pea. Peamopa endakali dupame sepala nyakamanya yuu taono dupa yakinatala baa watao endaki pete kilikili dokonya peami-pyaa. 14 Peaminopa* 14:14 Mt 9:36; 15:32 Jisasa netesa pao pyakamatala, endakali kambu andake mende kateamino kandea-pyaa. Kandatala baame dokaita kondome kumapala, dokaitanya endakali yaina pyapae dupa mee jakamaiya-pyaa.
15 Dokopa alemandi baanya disaipele dupame baa kateasa ipupala lao pituu, “Dakaita endakali napalengema lamo dokonya yuu kuilyamona, taono yakane dupanya pao tange nee sambama pena laa!” leami. 16 Dopa leaminopa Jisasame dokaita lamaiyoo, “Daa, dupa napenana, nyakamameaka dokaita nee maiyepa!” lea. 17 Dopa leamopa dupame baa lamaiyoo, “Angenya naimanya nee longo nasilyamo. Betesa yuungi-pipa wapaka lapoma iki silyamona,” leami. 18 Dokopa baame lao pituu, “Dutupa nyoo minao ae ipupa,” lea. 19 Dopa* 14:19 Mt 26:26; Mk 14:22; Lu 24:30; Jo 6:1-15,51-58; 11:41; 17:1 latala baame endakali dupa tanu dupanya petena lea. Petena latala baame betesa yuungi wapaka lapoma pyoo siamo dutupa nyepala, kaiti-kisa kandalyetae katao yaka pilino lea. Dopa latala betesa dutupa konjepala baanya disaipele dupa maiyamopa, dupame endakali dupa mokosoo maiyami. 20 Dokaita* 14:20 2 Kiŋ 4:44 pitakame nao tiaka kayateaminopa, kakana siamo dupa disaipele dupame nyoo baseketa mandi kingi ita-kisa dee lapomanya mandyuu tumbasiami. 21 Nee* 14:21 Mt 16:9 neamino endakali dupa pitaka enda wanepi dupa itaki napyao akali iki taosene yuungipi mendeme neami.
Jisasa endaki ketae moko katao payamo doko
(Mk 6:45-52; Jo 6:15-21)
22 Dokopa Jisasame baanya disaipele dupa sipi dokonya pituu endaki pete ongonya yangitena wambao pao katena latala, baame endakali dupa pena lea. 23 Pena* 14:23 Mk 1:35; 6:45-46; Lu 6:12; 9:28; Jo 6:15 latala baa iki loma salanya yuu manda dokonya pea. Pupala yuu kuala epeamopa baa iki dokonya katea-pyaa. 24 Dokopa sipi dokonya pituu endaki pete kainasale paanya peaminopa poo andake mende paanya peamino dokaita-kaita lao ipupala, endaki doko buli piamo dokome sipi doko yangi pyasa-pyasa pia. 25 Yuu yongalanya pee payamopa Jisasa baa endaki pete ketae dokonya moko katao disaipele dupa peteamino dokonya epea. 26 Dupame* 14:26 Lu 24:37 baa endaki pete ketae dokonya moko katao payamo kandatala etete walu leami. Dopa petala dupame, “Doko timango mende lamo!” lao pakame kumapala ae leami. 27 Dopa leaminopa Jisasame dokaita yapa lamaiyoo, “Namba kalyona, nyakama paka nakaenya, mona palyepa!” lea.
28 Dokopa Pitame baa lamaiyoo, “Kamongo, embaka tamo kandao doko, embame namba endaki ketae moko katao emba kalyeno dokonya ipu laa,” lea. 29 Dopa* 14:29 Jo 21:7 leamopa Jisasame, “Emba ipu!” lea. Dokopa Pitame sipi doko yakinatala endaki ketae dokonya moko katao Jisasa kateamo dokonya paanya pea. 30 Peamoaka doko, baame poo leamo doko kandatala paka kayapala baa endakinya landa pyalanya pia. Dopa petala baame, “Kamongo, embame namba nisa!” lao ae lea. 31 Dopa* 14:31 Mt 6:30; 8:26; 16:8 leamopa Jisasame yapa pyakamatala Pita minatala lamaiyoo, “Kuki masoo miningi! Aipuma embame mona lapo palyalepe?” lea. 32 Dopa* 14:32 Mk 4:39 lateamopa sipi dokonya pyakalyiambinopa poo doko yatu lea. 33 Dokopa* 14:33 Mt 28:9,17; 16:16 disaipele sipinya peteamino dupame, “Kiningi etete, emba Gote Ikiningi lamona,” lao tama piami.
Jisasame Genesatete yuu dokonya yaina dupa mee jakamaiyamo doko
(Mk 6:53-56)
34 Dokaitame* 14:34 Jo 6:22-26 endaki pete dokonya yangi-kaita Genesatete yuu dokonya pao pyakameami. 35 Yuu dokaita tange endakali dupame Jisasa lamo lao kandatala, yuu dosa singi dupa pitakanya wai leaminopa yaina pyapae dupa pitaka soo epeami. 36 Dopa* 14:36 Nam 15:38; Mt 9:20-22; Mk 3:10; 5:27-28; Lu 8:44 petala dupame Jisasa kandao, “Yaina pyapae dupame embanya yonge pee ketae pingi londe dokonya puna dosa iki kingimi watandenalena,” lao kyoto joo leami. Dokopa Jisasanya yonge peenya watandeamino endakali dupa pitakanya yaina dupa mee jiami.
15Yumbangeme mana seteamino dupa
(Mk 7:1-13)
1 Gii* 15:1-2 Lu 11:38; Lo 14:14; Ga 1:14; Kl 2:8 dokopa akali Patasipi mana setapae masingi akalipi mendapuame Jetusaleme katao Jisasa kateasa ipupala dapa lao pisiami: “Embanya disaipele dupame mana wambatae naimanya yumbangeme seteamino dupa aipuma yalengemape? Dupame nee nalanya dokopa kingi kaimbu+ 15:1-2 kingi kaimbu Juta dupame kingi kaimbu pilyami doko kaimala pipae dupa walya pyao nepelyamanona lao masoo pingima-pyaa.pingili pyoo napingima lamo!” leami.
3 Dopa leaminopa Jisasame dupanya pii yanu pyakamaiyoo, “Doko aipuma nyakamame nyakama tangenya mana wambatae dupa watao minatala, Gotenya mana setapae dake yalengemape? 4 Wamba* 15:4 Eke 20:12; 21:17; Lep 20:9; Dit 5:16 Goteme lao pituu, ‘Embanya endangi takangepa dolapo andanda semaiyoo katape!’ dee, ‘Endakali mendeme baanya endangi tamopi takange tamopi mende kandao pii koo latamo doko, baa kumina lao pyao kumasepengena,’ lea. 5 Dopaka* 15:5-6 Pot 20:25 doko, endakali mendeme baanya endangi takangepi mende kandao, ‘Wamba nambame emba nisoo oapi dioliaka doko indupa nambame Gote maitapuna,’ latamopa nyakamame baanya endangi takangepi andanda semaiyoo nakatapenge jilyamona lengema. Dopa pyoo nyakamanya mana wambatae dupa watao minalanya Gotenya pii doko mee injisingima. 7 Wamba* 15:7 Mt 6:2; 23:13-14 potopesa Aisayame nyakama minakasingima akali nyakama makande pyokondape pyoo dapa lea-pyaa:
8 ‘Endakali* 15:8 Ais 29:13 tata dakeme kambumi namba lalyingimaka doko,
nyakamanya moname namba-pipa kopala naengema.
9 Dupame endakalinya mana setapae dupanya mana lao pituu,
“Dake Gotenya mana setapaena,” lengema.
Dopa latala dupame namba mee ambe tama pingimana,’ lea-pyaana,” lea.
Endakali koyasingi mana doko
(Mk 7:14-23)
10 Jisasame endakali kambu piamino dupa epena latala lamaiyoo, “Nyakamame sepala masokondape pyepape! 11 Nengekaita* 15:11 Mt 12:34; Ap 10:14-15; Ep 4:29; 1 Ti 4:3-4; Ta 1:15 penge dokome endakali koyasala naenge. Dopaka doko, nengekaitanya epenge dokome endakali koyasingina,” lea. 12 Gii dokopa disaipele dupame ipupala baa lamaiyoo, “Patasi dupame embanya pii doko sepala imbu kaelyamino doko embame kandelepe?” leami. 13 Baame* 15:13 Ais 60:21; Jo 15:2 dokaitanya pii yanu pyao, “Nambanya Takange kaitinya katenge dokome waingi pokala nayamo dupa pitaka pingi-pipa yukuota. 14 Dopana* 15:14 Mt 23:16,19,24; Lu 6:39; Jo 9:40; Ap 5:39 nyakamame dupa katena kayalapape. Lenge monda dupame lenge monda yango dupa kaitini laitaka pingima. Akali lenge monda mendeme lenge monda yango mende kaitini laitaka pipyali kandao doko, dolapo lapota yuli mendenya mangambilina,” Jisasame lea.
15 Dopa leamopa Pitame baa lamaiyoo, “Embame kongali leleno dokonya tenge doko naima langi,” lea. 16 Dopa* 15:16 Mk 4:13 leamopa Jisasame lao pituu, “Nyakamame apata masala naengemakape? 17 Kini, nengekaita penge dupa pitaka inginya pupilyamopa, tao nepenge doko nyakamame masala naelyamipi? 18 Dopaka* 15:18 Mt 12:34; Ta 1:15; Je 3:6 doko, monanya palenge dupa nengekaitanya epenge dupame endakali koyasingi. 19 Monanya* 15:19-20 Jen 3:6; Lo 14:14; 1 Ko 5:9-10; Ga 5:19-21 paliuu pyakalyingi dupa datupa: masingi koopi, endakali pyao kumasingipi, kepo kolengepi, endakalipi nyele-nyele paengepi, pake nengepi, sambo pii lengepi, lamba lengepi dopale dupame endakali koyasingi. Dopaka doko, endakali mendeme kingi kaimbu napinya mee nee nyoo nelyamo dokome baa koyasala naengena,” Jisasame lea.
Enda mendeme masoo miniamo doko
(Mk 7:24-30)
21 Jisasame* 15:21 Mt 9:27 yuu doko yakinatala yuu taono Tayapa Saitonepanya yuu siamo dupanya pea. 22 Peamopa Kenane enda mende yuu dokaita petenge doko ipupala puu lao lao pituu, “Akali Andake, emba Dapiti Yumbange, embame namba kondo kayape! Enjele koo mendeme nambanya wanenge doko etete koyasilyamona,” lea. 23 Dopa* 15:23 Lu 11:8 leamopa Jisasame pii mende yanu pyao baa lamaiya naya. Dokopa baanya disaipele dupame ipupala baa lamaiyoo, “Enda dakeme wii lata-lata pyoo naima watao epelyamona, embame baa pena laa!” leami. 24 Dopa* 15:24 Mt 10:6,23; Lo 15:8 leaminopa Jisasame dupanya pii yanu pyao, “Goteme namba Isataele tata dupanya mendapua mena sipisipi alu petae joo kalyamino dupanya iki puu leana,” lea. 25 Dopa* 15:25 Mt 8:2; 18:26; 20:20; Jo 9:38 leamoaka doko, enda dokome ipao baa kateamo dosa luma lakapala lao pituu, “Akali Andake, embame namba nisa!” lea. 26 Dokopa Jisasame baanya pii doko yanu pyao, “Naimame wanenya nee dupa nyepala pyale lao yana dupa maitamanopa auu napitana,” lea. 27 Dokopa enda dokome lao pituu, “Akali Andake, embame kiningi leenoaka doko, yana dupame endakali yana tange dupanya nee katai pyapae isa kopo lelyamo dupa nyoo nengemana,” lea. 28 Dopa* 15:28 Mt 8:10,13; 9:22,28; Mk 10:52; Lu 7:50; 17:19 leamopa Jisasame enda doko lamaiyoo, “Enda, embame kyoto joo masoo minao petenge lamona, embame pyakapyali lao masilinoli pyekenana,” lea. Dopa leamo gii dokopaka baanya wanenge doko mee jia-pyaa.
Jisasame endakali yaina pyapae longo mee injisiamo doko
29 Jisasame* 15:29 Mk 7:31-37 yuu doko yakinatala endaki Galili pete tengesa dosale epea. Ipupala manda mendenya lalyoo pupala petea. 30 Peteamo dokonya endakali kambu longo dupa ipao pituu, endakali moko koopi, lenge mondapi, kuli uanga petaepi, mumaapi dee waka yainame pyapae longo mendapuapi apata laminao ipupala, baanya moko kateamo dosa setami. Seteaminopa baame dupa mee injisia. 31 Dopa piamo doko endakali kambu piamino dupame kandeaminopa, mumaa dupame pii lao, kuli uanga petae dupa tolao, moko koo dupa kaita payao, lenge monda dupa lenge tao piaminosa, dupame mona andapala Isataelemanya Gote doko lao lalyiami.
Jisasame akali taosene kitomende nee maiyamo doko
(Mk 8:1-10)
32 Dokopa* 15:32 Mt 9:36* 15:32 Mt 14:13-21 Jisasame baanya disaipele dupa epena latala lamaiyoo, “Endakali dakaita yuu gii tepoma namba-pipa katapumano doko, indupa dupa nee natami nasilyamo dokonya dupa kondome kumilyo. Nambame dakaita mee pena latopa aopyoo latala kaitinisa lopome lawambe latala lombapae setamina, mee pena nalatowana,” lea. 33 Dokopa disaipele dupame baa lamaiyoo, “Endakali napalenge yuu dakenya naimame endakali kambu dakeme tiaka nao nena lao maiyanya betesa longo dupa anjatae nyakamaimape?” leami. 34 Dopa leaminopa baame dokaita pisoo, “Nyakamanya betesa akipate silyape?” lea. Dopa leamopa dokaitame baa lamaiyoo, “Betesa kalange-pipa wapaka yakane mendalapopi silyamona,” leami. 35 Dokopa Jisasame endakali dupa isa petena lea. 36 Dopa latala baame betesa kalange dutupapi wapaka dupapi nyepala, Gote lao yaka pilino latala konjia. Konjepala baanya disaipele dupa maiyamopa, dupame endakali dupa mokosoo maiyami. 37 Maiyaminopa dokaita pitakame nao tiaka kayateaminopa, kakana siamo dupa disaipele dupame baseketa mandi kalangenya mandyuu tumbasiami. 38 Endakali* 15:38 Mt 16:10 nee neamino dupa pitaka enda wanepi dupa itaki napyao akali iki taosene kitomendeme neami. 39 Napeaminopa Jisasame endakali dupa pena latala, baa sipi mendenya pituu yuu taono Makatana-tena pea.
16Kongali mende kandamana pii leamino doko
(Mk 8:11-13; Lu 12:54-56)
1 Dokopa* 16:1 Mt 12:38; 19:3; Lu 11:16; Jo 2:18; 6:30-31 Patasipi Satyusipi mendapuame Jisasa kateasa ipupala baa minao makande pyoo baame kaitinya-tae kongali mende kandamana pina leami. 2 Dopa leaminoaka doko, baame dokaitanya pii yanu pyao, [“Yuu kualanya kone yuu pumbuti yuu pilyamopa nyakamame, ‘Kaiti kate pilyamona, paina pyaapome lamo,’ lengema. 3 Dee* 16:3 Lu 19:44 yuu yongalanya puli ita waiyepae paelyamopa nyakamame, ‘Kaiti iminjeta kate pyata pilyamona, aiyuu ipapome lamo,’ lengema. Nyakamame kaiti doko kandatala opa pyaapome lamo apa pyaapome lamo lao yapengemaka doko, indupa gii dakepa kongali dupa nyakamame yapapenge nanjilyape?] 4 Endakali* 16:4 Jon 3:4-5; Mt 12:39; Lu 11:29 indupa palelyamino dupame Gote yakinenge kooma lamo! Nyakamame kongali mende kandamana lelyaminoaka doko, nambame kongali mende pyakala nayatoo. Goteme akali Jonaa-kisa kongali piamo dokoaka makande petae setana,” lea. Dopa latala baame dupa yakinatala pea.
Patasipi Satyusipi dupanya iisa jepae mana dupa
(Mk 8:14-21)
5 Dokopa disaipele dupame endaki pete dokonya yangitena paanya betesa kame setala peami-pyaa. 6 Dokopa* 16:6 Lu 12:1 Jisasame dokaita lamaiyoo, “Kandeleno! Nyakamame Patasipi Satyusipi dupanya iisa dupame nyakama koyasetamina wandyuu kalyepape!” lea. 7 Dopa leamopa dupame nyakama betesa nasiamo tenge dokonya nyakamalapo leami. 8 Dopa* 16:8 Mt 6:30; 8:26; 14:31 leamino doko Jisasame kandatala dokaita lamaiyoo, “Nyakama kuki masoo miningi dupame, aipuma betesa nasilyamo lao nyakamalapo mende lamai-lamai pilyamipi? 9 Nyakamame* 16:9 Mt 14:17-21; Mk 4:13 masetala naelyamipi? Nambame betesa yuungi akali taosene yuungi dupanya konjakamaiyo doko kame silyamipi? Dopa piopa kakana siamo dupa nyakamame baseketa mandi akipatenya mandyuu tumbasiamipi? 10 Dee* 16:10 Mt 15:34-37 nambame betesa kalange akali taosene kitomende dupanya konjakamaiyo dokopa kakana siamo dupa nyakamame baseketa mandi akipatenya mandyuu tumbasiamipi? 11 Nambame betesanya lao nalalo doko, aipa petala nyakamame masala naelyamipi? Patasipi Satyusipi dupanya iisa dupame nyakama koyasetamina kandao kalyepape lalona,” lea. 12 Dokopa betesanya palyingi iisa doko kandao laa nayao Patasipi Satyusipi dupame mana lamaingi iisa jepae dupanya kandao kalyepape lalame lamona lao disaipele dupame masiami.
Pitame Jisasa kandao emba Kataisana leamo doko
(Mk 8:27-30; Lu 9:18-21)
13 Jisasa baa yuu taono Sisatia Pilipae-tena pea. Pupala baanya disaipele dupa pisoo, “Endakali dupame Endakalinya Ikiningi doko kandao apina lengemape?” lea. 14 Dupame* 16:14 Mt 14:1-2; Mk 6:14-15; Lu 9:7-8; Jo 1:21 yanu pyao, “Yangimi emba kandao Jone Kaimbu Pingi dokona, yangimi Ilainjana, yangimi Jetemaya tamopi potopesa waka dupanya mende tamopina lengemana,” leami. 15 Jisasame dokaita lamaiyoo, “Dopaka doko, nyakamame namba kandao apina lengemape?” lea. 16 Dokopa* 16:16 Mt 1:16; 4:3; 14:33; Jo 1:49; 6:69; 11:27 Saimone Pitame baa kandao, “Emba Kataisa Gote saka katenge dokonya Ikiningi dokona,” lea. 17 Dopa* 16:17 Mt 17:5; Lo 7:5; 1 Ko 15:50; Ga 1:15-16; Ip 2:14 leamopa Jisasame baa lamaiyoo, “Saimone, Jone ikiningi, emba mona yaepasetae. Doko embame pii kiningi leleno dake endakali mendeme langya naya. Daa. Nambanya Takange kaitinya katenge dokome emba-kisa panasia. 18 Nambame* 16:18 Ais 28:16; Jo 1:40-42; 21:15-17; 1 Ko 15:5; Ep 2:20 emba kandao dapa langilyoaka: Pita, emba kana yangapae kyoto. Kana yangapae doko-kisa nambame nambanya sosa doko sakatasoto. Yuu koo dokonya pupu lapae dokome sosa doko nyoo isa palyala nayata. 19 Nambame* 16:19 Ais 22:22; Mt 18:18; Lu 22:32; Jo 20:23; Pa 1:18; 3:7 Kaitinya Katenge dokome isingi dokonya kii dupa emba dito. Embame isa yuu dakenya mende pyakilyina kayakamaitino doko, kaitinya pyakilyina kayakamaitaka. Embame isa yuu dakenya mende yukuokamaitino doko, kaitinya yukuokamaitakana,” lea. 20 Dopa* 16:20 Mt 8:4; 17:9; Mk 1:34; 3:12; 5:43; 7:36; 9:9-10 latala baame disaipele dupa kyoto joo lamaiyoo, “Namba Kataisa dokona lao mendaipi mende lamaiya nayalapape!” lea.
Jisasame baa kumatapa dee sakatatapa dolaponya leamo doko
(Mk 8:31–9:1; Lu 9:22-27)
21 Gii* 16:21 Mt 17:12,22-23; 20:17-19; 26:2; Lu 2:38; 13:33; 17:25; Ap 10:40 dokopa pituu Jisasame baanya disaipele dupa panao dapa lamaiya: “Namba Jetusaleme pupenge. Patopa isingi akalipi, pitisa mupapi, mana setapae masingi akalipi dupame tanda longo ditala namba pyao kumasetataminopa kote teponya Goteme dee sakatasetana,” lea. 22 Dopa leamopa Pitame Jisasa laminao umbisale pupala pyalanya lao, “Kamongo, emba dopa etete napina! Goteme emba kondo kaenana!” lea. 23 Dopa* 16:23 Mt 4:10 lao pyalanya leamopa Jisasame kandapilyetala Pita lamaiyoo, “Satane, emba nao puu! Embame namba koo pyaale lao makande pilino. Embame Gotenya masingi doko masala naenya, endakalinya masingi doko masilinona,” lea.
24 Dokopa* 16:24 Mt 10:38; Lu 14:27 Jisasame baanya disaipele dupa lamaiyoo, “Endakali mendeme namba watao payatoo lao masetamo kandao doko, baame baa tange kame setala baanya ita poko doko nyoo soo namba watao paena. 25 Endakali* 16:25 Mt 10:39; Lu 17:23; Jo 12:25 mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme namba lao masetala baa tange kame setamo kandao doko, baa auu pyoo katata. 26 Doko,* 16:26 Mt 4:8-9 endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape? Dee aki mendeme baa tange kii tamao nyepengepe? 27 Endakalinya* 16:27 Jop 34:11; Wee 62:12; Pot 24:12; Jet 17:10; Sak 14:5; Mt 10:33; Lu 12:9; 2 Te 1:7; 1 Jo 2:28; Pa 22:12 Ikiningi doko baanya enjele dupa-pipa baanya Takangenya tii pipae doko tambetambe kapa pao ipata. Ipupala endakali mendai mendai lao dupame mana minataminoli pyoo yanu pyata. 28 Nambame* 16:28 Mt 10:23; 24:30,34; 26:64; 1 Ko 16:22; 1 Te 4:15-18; Je 5:7; Pa 1:7 nyakama kiningi langilyona, endakali ae kalyamino datupanya mendapua kumapala nayataminopa Endakalinya Ikiningi dokome kiŋi joo isala ipatamo gii doko kandatamina,” Jisasame dopa lea.
17Jisasa waka jiamo doko
(Mk 9:2-13; Lu 9:28-36)
1 Koto* 17:1 Mt 26:37; Mk 5:37; 13:3; 2 Pi 1:17-18 tokange pateamopa Jisasame Pitapi, Jemesapi, Jemesa kaiminingi Jonepi dutupa laminao yuu manda ketae mendenya pupala nyakama iki kateami-pyaa. 2 Kateaminopa* 17:2 Mt 28:3 dutupanya enombasa Jisasa baa waka jia-pyaa. Baanya lengelyaapi doko tii pyoo niki tele pia-pyaa. Dee baanya yonge pee dupa kyoo lao pakenana timbokopaele jia-pyaa. 3 Dokopa akali Mosesepa Ilainjapa Jisasa-pipa awapa pii lao kateambinopa dutupame kandeami-pyaa. 4 Kandatala Pitame Jisasa lamaiyoo, “Kamongo, naima angenya katamanopa auu pilyamona, embame kapana lao maseteno kandao doko, nambame angenya aiyaa anda tepo pitoo. Mende embanya, mende Mosesenya, mende Ilainjanyana,” lea-pyaa. 5 Pitame* 17:5 Eke 19:16; Ais 42:1; Mt 3:17; 12:18; 28:3; Mk 1:11; Lu 3:22; Jo 12:28 pii doko lao mee kateamopa kopa etete kyoo lapae mendeme ipupala dokaita sanga pia-pyaa. Dopa piamopa kopa tambetambe dokonya pii mende lea dokome, “Doo kalyamo doko nambanya Ikiningi etete mona setenge doko kalyamo. Nambame baa kandao etete mona epe palyingina, nyakamame baanya pii doko sakamaiyepape!” lea-pyaa. 6 Dokopa disaipele dutupame pii doko soo etete pakame kumapala tombauli siami-pyaa. 7 Dopa piaminopa Jisasame ipao dutupa watandatala lao pituu, “Nyakama paka nakaenya, sakatalapa!” lea-pyaa. 8 Dopa leamopa dupame kandalyetala endakali waka mende nakandao Jisasa baa iki kateamo kandeami-pyaa.
9 Dokaitame* 17:9 Mt 8:4; 16:20; Mk 3:12; 5:43; 7:36 yuu manda dokonya katao lanao ipao pituu Jisasame kyoto joo dutupa lamaiyoo, “Nyakamame kanjimino doko mende lamaiya nayalapape. Lamaiya nayawaka katao Endakalinya Ikiningi doko malunya sakatasetamo gii dokonya tuu laapapena,” lea-pyaa.
10 Dokopa* 17:10 Mal 4:5; Mt 11:14; 16:14; Lu 1:17 disaipele dupame Jisasa pisoo, “Mana setapae masingi akali dupame aipuma, ‘Ilainja wambao ipupengena,’ lengemape?” leami. 11 Jisasame dutupanya pii yanu pyakamaiyoo, “Kini, Ilainjame dupa pitaka dee katengeli pina lao tolasalanya ipupenge. 12 Dopaka* 17:12 Mt 14:10; 16:21; 17:22-23; 20:17-18; 26:2; Lu 17:25 doko, Ilainja ipateana lao nambame nyakama langilyo. Ipateamopa endakali dupame baa lamo lao nakandenya, baa-kisa pyuani kayamino dupa pitaka piami. Dupame mana mendai dopaka pyoo Endakalinya Ikiningi doko tanda maitamina,” lea. 13 Dokopa* 17:13 Mt 11:14; Lu 1:17 disaipele dupame baame Jone Kaimbu Pingi doko kandao lalumuna lao masiami.
Jisasame enjele koo paleta wane mende mee injisiamo doko
(Mk 9:14-29; Lu 9:37-42)
14 Endakali kambu pyao kateamino dokonya dutupa ipateaminopa akali mendeme Jisasa kateasa ipao baa lao luma lakapala lamaiyoo, “Akali Andake, embame nambanya wane doko kondo kyayakape! Baa mandipaeme nyilyamosa paa longo itatenya tapa endakinya mangata pyoo etete koyao tanda nao katenge. 16 Nambame baa laminao embanya disaipele dupa katamisa epoaka doko, dupame kapa pao mee injisala nayalaminona,” lea. 17 Dopa* 17:17 Dit 32:5,20; Jo 14:9; Ap 2:40 leamopa Jisasame lao pituu, “Kanau! Masoo minala naenge uanga pyoo paengema endakali nyakama! Oo koto koto ongo namba nyakama-pipaka tole katatama laape? Nyakamame nambaka nenge nyoo katatami laape? Wane doko laminao namba kalyosa ipupa!” lea. 18 Jisasame wane doko-kisa enjele koo paleamo dokome wane doko yakinena lao pyalanya leamopa yakinatala pea. Peamo gii dokopaka wane doko mee jia.
19 Maitakao* 17:19 Mt 10:1 Jisasa iki peteamopa disaipele dupame ipupala baa pisoo, “Aipuma naimame enjele koo doko kapa pao watao napyalamape?” leami. 20 Dopa* 17:20 Mt 21:21; Mk 9:23; 11:22-23; Lu 17:6; 1 Ko 13:2 leaminopa Jisasame dokaita lamaiyoo, “Nyakama kuki iki masoo minilyamino dokonya kapa nanjalamo. Nambame nyakama kiningi langilyo, nyakamame awa wainginya dii palenge dopale joo masoo minapimili kandao doko, opale mendaipi mende pyaanya kokala nayamili. Nyakamame yuu manda dake lamaiyoo, ‘Emba asa nasina omosa sala puu!’ lapiminopa kapa pao pupyali. 21 [Dopaka* 17:21 Mk 9:29 doko, loma sowapi nee nanenya kayawapi pingi dokonya-kaita iki enjele koo dopale dupa watao pingi. Kaitini waka mendenya-kaita daana,” lea.]
Jisasame baa kumatapa dee sakatatapa dolaponya lapo pyoo leamo doko
(Mk 9:30-32; Lu 9:43-45)
22 Galili* 17:22 Mt 16:21; 17:12; 20:17-19; 26:2 yuu dokonya Jisasapi baanya disaipele dupapi pao kambu pyatala baame dupa lamaiyoo, “Akali mendeme Endakalinya Ikiningi doko endakali dupa laitaka pyaanya enge nyalanya pilyamo. 23 Laitaka* 17:23 Ap 10:40 pitamopa dupame baa pyao kumasetataminopa koto teponya Goteme baa dee sakatasetana,” lea. Dopa leamopa disaipele dupame mona etete kendame kumiami.
Losuu anda andake dokonya takisa pingi doko
24 Dupa* 17:24 Eke 30:13-15; 38:26 pao yuu taono Kapaneame dokonya pyakameaminopa losuu anda andake dokonya takisa nyingi akali dupame Pita kateasa ipupala baa pisoo, “Nyakamanya mana lenge akali dokome losuu anda andake dokonya takisa pingipi napingipi?” leami. 25 Dopa* 17:25 Mt 22:17-21; Lo 13:7 leaminopa Pitame lao pituu, “Kini pingi daape,” latala andaka kolandea. Kolandeamopa Jisasame wambao Pita lamaiyoo, “Saimone, embame aipa lao masilipi? Yuu dakenya kiŋi dupame takisa tata tata dupa api-kisa nyingimape? Dupame yuu tenge tange dupa-kisa nyingimape, pande katamana lao epenge endakali dupa-kisa nyingimape?” lea. 26 Pitame yanu pyao, “Katamana lao epenge endakali waka dupa-kisa nyingimana,” lea. Dopa leamopa Jisasame baa lamaiyoo, “Dopa tamo doko, yuu tenge tange dupame takisa napyapenge. 27 Dopaka* 17:27 Mt 5:29; 18:6-9; Jo 6:61; 1 Ko 8:13 doko, naimame akali dokaita kenda pisala nayamana. Dopana, emba endaki pete dokonya wapaka nyingi uku doko pyandala puu. Pyandatala wapaka wambao nyeteno doko nyoo nengekaita angapu lakyetala muni mende palyapomona nyepe. Muni doko nyepala losuu anda andake dokonya nalimba lapotanya takisa pyao dupa maipina,” Jisasame dopa lea.
18Api alyasale joo kalyape leamino doko
(Mk 9:33-37; Lu 9:46-48)
1 Gii* 18:1 Lu 22:24 mendai dokopaka disaipele dupame Jisasa kateasa ipupala baa pisoo, “Kaitinya Katenge dokome isingi endakali dupanya api alyasale joo kalyape?” leami. 2 Dopa* 18:2-3 Wee 131:2; Mt 19:14; Mk 10:15; Lu 18:17; 1 Pi 2:2 leaminopa Jisasame wane koo mende epena latala dokaitanya kaina dokonya katasetala lao pituu, “Nyakama kapilyetala wane koo nanjetamino kandao doko, Kaitinya Katenge dokome nyakama etete isala nayatana lao nambame nyakama kiningi langilyo. 4 Endakali* 18:4 Mt 23:12 mendeme baa tange anasale jetala wane koo dopale jingi doko Kaitinya Katenge dokome isingi endakali dupanya alyasale katenge. 5 Dee* 18:5 Mt 10:40; 25:40; Mk 9:37; Lu 9:48; 10:16; Jo 13:20 endakali mendeme namba lao masetala wane koo dapale mende lanyilyamo dokome namba lanyingiakana,” lea.
Koo pina lao mapisingi mana dupa
(Mk 9:42-48; Lu 17:1-2)
6 “Endakali mendeme namba lao masoo miningi wane koo datupanya mendeme koo pina lao mapisetamo doko, baa etete koyata. Baame dopa pitame lao kana etete andake mende mangenya anjetala nyokaimbatamopa kumina lao solowata pete andake kaina dokonya soo pyandamili kandao doko, baa kuki yaka jipyali. 7 Koo pina lao mapisingi yuunya endakali dupa koyatami iki lamo! Koo pina lao mapisingi mana dupa kapa pao sepengeaka doko, endakali mendeme mapisetamo doko, baa koyata iki lamo!
8 “Embanya* 18:8 Mt 5:29-30; 17:27 kingi mokopi mendeme emba koo pyaale lao mapisia kandeno doko, kepanya nepape! Emba kingi tamopi moko tamopi tanoma kateta lete etete katenge ongonya pateno doko, auu pyoo katate. Kingi mokopi pitaka kateta itate konjala naenge dokonya soo pyandatamo doko, auu pyoo nakatate. 9 Dee* 18:9 Lu 12:5 embanya lenge dokome emba koo pyaale lao mapisia kandeno doko, lukunya nepape! Emba lenge mendai iki tao lete etete katenge ongonya pateno doko, auu pyoo katate. Emba lenge lapota tapeta ita tao katenge yuu koo dokonya soo pyandatamo doko, auu pyoo nakatatena,” lea.
Mena sipisipi mende alu piana lao kongali pii doko
(Lu 15:3-7)
10 “Nyakamame* 18:10 Ap 12:11; Ip 1:14 wane koo datupanya mendaipi mende angi mende daa lamo lao masetamina kandao kalyepape. Nambame nyakama langilyona, wane koo dupa isingi enjele dupa koteaka lao nambanya Takange kaitinya katenge doko-pipa awapa katengema. 11 [Endakalinya* 18:11 Lu 19:10 Ikiningi dokome endakali alu petae dupa pyoo nyala epea.]
12 “Nyakamame* 18:12 Ese 34:4,16 aipa lao masilyamipi? Akali mendenya mena sipisipi andate mendai katatamo kandao doko, dutupanya mendai alu pitamopa baame aipa pitape? Baame sipisipi kingi ita mange mendai wakyoo-kisa dee mange mendai wakyoo dutupa tanu nao pau manda mendenya katena latala mendai alu pitamo doko pao kutata daape! 13 Nambame nyakama kiningi langilyona, baame kutao kandatatamo kandao doko, mendai doko kandao etete mona yaepata. Sipisipi kingi ita mange mendai wakyoo-kisa dee mange mendai wakyoo alu napitamino dutupa dopa pyoo mona yaepala nayata. 14 Dopaka pyoo nyakamanya Takange kaitinya katenge dokome wane koo datupanya mende alu napipya laka lao masingina,” Jisasame lea.
Endakali yango mendeme koo pitamopa lamaipina leamo doko
15 “Embanya* 18:15 Lep 19:17; Lu 17:3; 1 Ko 6:1-6; Ga 6:1; Ta 3:10; Je 5:19-20 endakali yango mendeme emba koo pingitamo kandao doko, emba baa katatasa pao nyalambo iki pitipala baanya koo pitamo doko lao panasoo lamaipi. Lamaitinopa baame embanya pii setamo kandao doko, embame embanya endakali yango doko dee lanyete. 16 Baame* 18:16 Dit 19:15; Jo 8:17; 2 Ko 13:1; 1 Ti 5:19-20 embanya pii nasetamo kandao doko, pii pepa pyapae singili pyoo, ‘Lapo tepopi mendeme pii dupa pitaka sokondape petala kyoto injisetaminopana,’ embame mendalapo lanyepala deaka lamaiya pupi. 17 Baame* 18:17 Lo 16:17; 1 Ko 5:11-13 dutupanya pii nasetamo kandao doko, embame sosa doko lamaipi. Dee baame sosanya apata pii nasetamo kandao doko, baa netesa endakalipi takisa nyingi akalipi dopale lamo lao masepe.
18 “Nambame* 18:18 Mt 16:19; Jo 20:23 nyakama kiningi langilyona, nyakamame isa yuu dakenya mende pyakilyina kayakamaitamino doko, kaitinya pyakilyina kayakamaitaka. Dee nyakamame isa yuu dakenya mende yukuokamaitamino doko, kaitinya yukuokamaitaka.
19 “Dee* 18:19 Mt 7:7-8; 21:22; Mk 11:24; Jo 14:13; 15:7,16; Je 1:5-7; 1 Jo 5:14 nambame pii mende nyakama dapa langilyo: nyakamanya endakali lapomame isa yuu dakenya katao mona mendai palyetala mende pyekena lao loma soo tee latambino kandao doko, nambanya Takange kaitinya katenge dokome kapa pao pyakamaita. 20 Doko,* 18:20 Mt 28:20; Jo 14:23; 1 Ko 5:4 endakali lapo tepopi mendatupame namba lao masetala mendasa kambu pyao pilyami dosa namba dupa-pipa awapa katengena,” Jisasame lea.
Kalai akali kondo nakaenge dokonya kongali pii doko
21 Dokopa* 18:21 Jen 4:24; Mt 6:12 Pitame ipupala Jisasa pisoo lao pituu, “Kamongo, nambanya endakali yango mendeme paa akipatesa namba koo pingyetamopa nambame baanya koo yanu doko kayapengepe? Paa kalangesa kayapengepe?” lea. 22 Dopa* 18:22 Lu 17:4; Kl 3:12 leamopa Jisasame baa lamaiyoo, “Paa kalangesa daa. Kingi itaka kalange dupanya paa kalangesa+ 18:22 paa kalangesa Kingi itaka kalange dupanya paa kalangesana leamo doko koteaka lao koo yanu dupa etete kayalapape lao lea-pyaa.lao lelyo. 23 Dopana,* 18:23 Mt 25:19 Kaitinya Katenge dokome isingi doko akali kiŋi mendeme baanya kalai akali dupa-kisa yanu siamo dupa pyekena latoo lao masoo kateamo dopale. 24 Kiŋi dokome tee pyao yanu dupa pyekena lao kateamopa kalai akali dupanya mende laminao epeami-pyaa. Akali doko-kisa baanya muni yanu yakiaka etete longo sia-pyaa. 25 Baame* 18:25 Lu 7:42 yanu doko kapa pao pyapenge nanjiamosa baanya akali andake dokome lao pituu, ‘Nyakamame akali dake, baanya endapi, wanepi, dee baanya oapapi dupa pitakame muni nyepala yanu doko pyakalapape!’ lea-pyaa. 26 Dopa* 18:26 Mt 8:2 leamopa kalai akali dokome baa lao luma lakapala, ‘Nambame embanya muni dupa pitaka yanu pyakatona, embame namba maka nakaenya malisepoko!’ lea-pyaa. 27 Dokopa akali andake dokome kalai akali doko kondome kumao baanya yanu doko kayapala baa yakinea-pyaa.
28 “Dopa peteamopa kalai akali dokome pupala baanya kalai akali yango mende kandanyia-pyaa. Akali doko-kisa baanya muni yanu kina andate mendai sia-pyaa. Dokonya baame baa minatala mange minao lakatete pyoo pituu, ‘Embame nambanya yanu doko pyaka!’ lea-pyaa. 29 Dopa leamopa baanya kalai akali yango dokome tombauli sepala, ‘Nambame embanya muni dupa yanu pyakatona, embame namba maka nakaenya malisepoko!’ lea-pyaa. 30 Dopa leamoaka doko, baame malisala nayatowana lao masetala, akali dokome muni dupa yanu pyao etapalaka andaka ipatana anjoo pyandala pena lea-pyaa. 31 Dokopa baanya kalai akali yango dupame piamo doko kandatala mona etete kenda kayapala, doko pitaka nyakamanya akali andake doko pao lamaiyami-pyaa. 32 Lamaiyaminopa akali andake dokome baa epena latala lamaiyoo, ‘Emba kalai akali koo lamo! Embame namba pisipino dokonya nambame nambanya yanu emba-kisa sipumu doko pitaka kayapu. 33 Nambame* 18:33 1 Jo 4:11 emba kondo kayapu dopaka pyoo embame embanya kalai akali yango doko kondo kayapili, yaka nanjipyalipi?’ lea-pyaa. 34 Dopa* 18:34 Mt 5:25-26 latala akali andake dokome imbu kayapala baanya kalai akali doko anjingi andaka tanda maiyoo isingi akali dupanya kingilyaka maiyoo pituu, ‘Akali dakeme nambanya muni dupa pitaka yanu pyao etapalaka andaka ipatana anjoo soo pupa,’ lea-pyaana,” Jisasame lea. 35 Dopa* 18:35 Mt 6:12-15; Mk 11:25; Ep 4:32; Kl 3:13; Je 2:13 latala baame kongali pii doko etasoo lao pituu, “Nyakama mendai mendai lao dupame nyakamanya endakali yango mendeme koo pingyetamo dupanya yanu dupa kiningi etete kayala nayatamino kandao doko, nambanya Takange kaitinya katenge dokome nyakama mendai dopaka pitana,” lea.
19Enda watao pingi dokonya lao Jisasame mana lamaiyamo doko
(Mk 10:1-12; Lu 16:18)
1 Jisasame* 19:1 Mt 7:28; 11:1; 13:53; 26:1; Lu 9:51; Jo 10:40 pii dutupa lamaiyoo etapala, Galili yuu doko yakinatala Jutia yuu dokonya endaki Jotane yangitena pea. 2 Dokopa endakali kambu longome baa watao peaminopa baame endakali dokaitanya yaina dupa yuu dokonya mee jakamaiya.
3 Dopa* 19:3 Mt 16:1; Lu 11:54; Jo 8:6 piamopa Patasi mendapuame ipupala baa minao makande pyoo lao pituu, “Enda watao pingi tenge dupanya mendenya-kaita akali mendeme baanya enda doko pena lao watao pyatamopa naimanya mana setapae dupanya kapa patape napatape?” leami. 4 Dopa* 19:4 Jen 1:27; 5:2 leaminopa baame yanu pyao, “Nyakamame pii dake itaki napiamipi? ‘Tee piamo dokopa Pyoo Injiamo dokome endapa akalipa lao wasia-pyaa.’ 5 Dopa* 19:5 Jen 2:24; 1 Ko 6:16; Ep 5:31 petala baame lao pituu, ‘Tenge dokonya akalimi baanya endangi takangepa yakinatala, baanya etanengepa kopatala dolapo yonge mendai joo pititambina,’ lea-pyaa. 6 Dopana* 19:6 1 Ko 7:10 dolapo lapoma joo napetenya, yonge mendai joo pititambi. Goteme nyoo pyasetae doko endakalimi wakale pyoloo napipengena,” Jisasame lea. 7 Dopa* 19:7 Dit 24:1-4; Mt 5:31 leamopa Patasi dupame baa lamaiyoo, “‘Akali mendeme baanya enda doko watao pyao pituu, watao pingi pepa mende maitala watao pyapengena,’ lao Moseseme mana setekea-pyoomo doko aipuma setea laape?” leami. 8 Dokopa Jisasame dokaitanya pii yanu pyao, “Nyakama tuu-tuu piaminosa enda watenge kaita doko Moseseme nyakamanya setekeamoaka doko, wamba tee piamo dokopa mana doko nasia-pyaa. 9 Dopana* 19:9 Mt 5:32; 1 Ko 7:10-13 nambame nyakama dapa langilyo: akali mendenya etanenge dokome kepo kolala nayatamopa, baame mee watao pyapala enda waka mende lanyetamo kandao doko, akali dokome kepo kolatana,” lea.
10 Dopa* 19:10 1 Ko 7:1-2 leamopa baanya disaipele dupame baa lamaiyoo, “Enda akalipa tole pyao petenge mana doko dopale tamo kandao doko, akalimi enda lanyala nayao katataminopa auu pitana,” leami. 11 Dopa* 19:11 1 Ko 7:7-9 leaminopa baame dokaita lamaiyoo, “Endakali pitakame kapa pao dopa napitami. Goteme endakali mendapua mana doko maiyamo dupame iki pitami. 12 Akali* 19:12 1 Ko 7:1,7-8,32-34 mendapua enda nanyepenge jepae mandeami dupame enda nanyoo mee katengema. Mendapua lakapo nyepae dupame kapa pao enda lanyala naengema. Dee mendapuame Kaitinya Katenge dokome isingi doko lao masetala enda lanyala naengemaka. Mana doko kapa pao watao minatamo dokome mininana,” Jisasame lea.
Wane wanakupi dupa-kisa Jisasame kingi seteamo doko
(Mk 10:13-16; Lu 18:15-17)
13 Gii* 19:13 Mt 18:2-3 dokopa endakali mendapuame wane wanakupi koo dupa-kisa Jisasame kingi setapala sekena lao laminao epeami. Dopaka doko, disaipele dupame dokaita pyalanya leami. 14 Dokopa* 19:14 Lu 9:47; 1 Pi 2:1-2 Jisasame dokaita lamaiyoo, “Wane wanakupi koo dupa epekena kaita lyokala nayakalapa! Kaitinya Katenge dokome wane wanakupi dapale joo kalyamino endakali dupa isoo kalyamona,” lea. 15 Dopa* 19:15 1 Ti 4:14 latala baame dokaita-kisa kingi setapala yuu doko yakinatala pea.
Akali kamongo mende
(Mk 10:17-31; Lu 18:18-30)
16 Yuu* 19:16 Lep 18:5; Lu 10:25 mendepa akali mende Jisasa kateasa ipupala lao pituu, “Mana Lenge Akali, tenda namba lete etete katatopa lao mana epe aki mende minawape?” lea. 17 Dopa* 19:17 Lu 10:28 leamopa Jisasame baa lamaiyoo, “Aipuma embame aki mana mende epepe lao namba kandao pisilipi? Mendai iki baa epe. Emba lete etete kalyanya masii kandeno doko, mana setapae dupa watao minape!” lea. 18 Dopa* 19:18 Eke 20:13-16; Dit 5:17-20; Lo 13:9; Je 2:11 lateamopa akali dokome baa pisoo, “Mana setapae dupa andutupape?” lea. Dokopa Jisasame baa lamaiyoo, “‘Embame endakali pyao kumasala nayape. Embame kepo kolala nayape. Embame pake nala nayape. Embame endakali mende minakasalanya sambo laa nayape. 19 Embanya* 19:19 Eke 20:12; Lep 19:18; Dit 5:16; Mt 22:39; Jo 13:34 endangi takangepa dolapo andanda semaiyoo katape. Dee embame emba tange auu kaengeli pyoo endakali yango dupa auu kayao katapena,’” Jisasame lea. 20 Dokopa akali dokome pii yanu pyao, “Mana setapae dutupa pitaka nambame watao minio doko mee minawaka kalyona, dee aki mende nambame pipenge jilyape?” lea. 21 Dopa* 19:21 Mt 5:3; 6:19-21; Lu 12:33; Ap 2:45; 4:34-37 leamopa Jisasame baa lamaiyoo, “Emba tolalakao tolatae katatoo lao maseteno kandao doko, emba pupala embanya oapi dupame muni nyepala endakali tipya dupa maipi. Dopa pitinopa embanya epe etete dupa kaitinya sakatana, embame namba watao ipupi,” lea. 22 Dopa leamopa akali dokome sepala baanya oapi etete longo singi dokonyana, mona etete kenda kayao yakinatala pea.
23 Dokopa Jisasame disaipele dupa lamaiyoo, “Nambame nyakama kiningi langilyona, kamongo mendeme baa Kaitinya Katenge dokome isina lao kalyanya lekeleke tata. 24 Dee* 19:24 Mt 7:14; 1 Ko 1:26 mendeaka nyakama langilyona, mena kamele mendeme kepo tii mendenya kolandalanya lekeleke tapyaliaka doko, kamongo mendeme baa Goteme isina lao kalyanya etete lekeleke tapyalina,” lea. 25 Dokopa disaipele dupame pii dutupa soo etete walu latala lao pituu, “Dopa tamo kandao doko, api kapa pao pyoo nyepae katatape?” leami. 26 Dopa* 19:26 Jen 18:14; Jop 42:2; Lu 1:37 leaminopa Jisasame dokaita kandatae soo yanu pyao, “Endakalimi kapa pao dopa napipengeaka doko, Goteme dupa pitaka kapa pao pingina,” lea.
27 Dokopa* 19:27 Mt 4:18-22 Pitame baa lamaiyoo, “Kandeleno, naimame dupa pitaka yakinatala emba watao paelyamano dokonya tenda naimame aki mende nyetamape?” lea. 28 Dopa* 19:28 Dan 7:22; Mt 20:21; 25:31; Lu 22:30; 1 Ko 6:2; Pa 3:21; 20:4 leamopa Jisasame dokaita lamaiyoo, “Nambame nyakama kiningi langilyona, tenda dupa pitaka enenge jetamo gii dokopa Endakalinya Ikiningi doko etete kamongao kiŋi petenge toko dokonya pitita. Gii dokopa nyakama namba watao paelyamino dupame Isataele tata kingi ita mende-kisa dee lapoma dupanya pii tolasakamaiyanya kiŋi petenge toko kingi ita mende-kisa dee lapoma dupanya pititamiaka. 29 Dee* 19:29 Lu 14:26; Ip 10:34 namba lao masetala anda tamopi, kaiminingi tamopi, pimalenge tamopi, takange tamopi, endangi tamopi, wane tamopi, ee tamopi dupa yakineamino endakali dupa pitakame dupanya yanu etete longo waa palyoo nyepala dee lete etete katatamiaka. 30 Dopaka* 19:30 Mt 20:16; Lu 13:30 doko, enomba nyoo katenge endakali longo dupa maita-kaita katatami. Maita-kaita katenge longo dupa enomba nyoo katatamina,” Jisasame dopa lea.
20Getepe eenya kalai pingi akali dupa
1 “Kaitinya* 20:1 Mt 21:28,33 Katenge dokome isingi doko akali mendeme yongama wamba sakatatala akali mendapuame baanya getepe ee dokonya kalai pyekena lao lanyala peamo dopale. 2 Pupala ee tange dokome akali mendatupa-pipa pii lao wasoo mona mendai palyetala, muni kina mendai mendai lao yuu gii mendainya singili pyoo nyalapalena latala, akali dutupame baanya getepe ee dokonya kalai pyaa pena lea-pyaa. 3 Maitakao baame yongama kiloko mange mendai wakyoapi mendenya dee kamapisa pupala kandeamopa, akali mendapua mee dupanya kateami-pyaa. 4 Kateaminopa baame dupa lamaiyoo, ‘Nyakama apata getepe ee dokonya kalai pyaa pupa. Nambame nyakama yole yaka dyaapona,’ lea-pyaa. 5 Dopa lateamopa akali dupa kalai pyaa peami-pyaa. Pateaminopa kotaka andawai pungupungupi, alemandi kiloko tepopi dupanya deaka patapu dopaka pia-pyaa.
6 “Dopa petala alemandi kiloko yuungi laanya piamopa baa deaka pupala akali mendapua mee kateamino kandatala dupa lamaiyoo, ‘Aipuma nyakama indupa gii dake pitaka mee dakenya katalamipi?’ lea-pyaa. 7 Dopa leamopa dupame yanu pyao, ‘Akali mendeme naima kalai nandyomona,’ leami-pyaa. Dokopa baame dupa lamaiyoo, ‘Nyakama apata nambanya getepe ee dokonya kalai pyaa pupa,’ lea-pyaa.
8 “Yuu* 20:8 Lep 19:13; Dit 24:14-15 kualanya piamopa akali ee tange dokome ee isingi akali doko lamaiyoo, ‘Embame kalai akali dupa epena latala yole maipi. Maiyanya pituu embame kalai akali etete maitakao ipamino dupa wambao maima-maima pyoo maiyoo pao, tee pyao ipamino dokonya tuu lape,’ lea-pyaa. 9 Dokopa akali mendatupa kiloko yuungi laanya piamopa ipao kalai piamino dupa muni kina mendai mendai lao nyiami-pyaa. 10 Dee akali wambao yongama sakatao kalai piamino dupame ipupala nyakama muni mendalapo apata nyalamano lao masiaminoaka doko, dupa apata kina mendai mendai lawaka nyiami-pyaa. 11 Nyepala dokopa dupame akali ee tange doko kandao imbu kayapala mumu lao lao pituu, ‘Akali etete maitakao ipamino datupame kiloko gii mendai iki kalai pimino doko, naima niki popome kumao indupa gii doko pitaka lekeleke tao kalai pyemano. Dopaka doko, embame dupa naima-pipa kapa kapa lao yole pilinona,’ leami-pyaa.
13 “Dopa* 20:13 Mt 22:12; 26:50 leaminopa baame yanu pyao akali dupanya mende kandao dapa lea-pyaa: ‘Kaimia, nambame emba koo pingyala naelyona, emba muni kina mendai nyatalena lao nalimba mona mendai palyala nayalambape? 14 Embanya yole doko nyoo puu. Nambame emba yole dyoo dopaka pyoo akali maita pyao ipao kalai pyomo doko maitoo lao masetala maiyo. 15 Nambanya* 20:15 Dit 15:9; Mt 6:23; Mk 7:22; Lo 9:19-20 muni dokome mendita mende pitoo lao masoto doko kapa pao napitope? Dee nambame auu pyoo dokonya emba mona koo palyilipi?’ akali ee tange dokome dopa lea-pyaa. 16 Dopaka* 20:16 Mt 19:30; Mk 10:31; Lu 13:30 pyoo endakali enomba nyoo katenge dupa maita-kaita katatami. Maita-kaita katenge dupa enomba nyoo katatamina,” Jisasame lea.
Jisasame baa kumatapa dee sakatatapa dolaponya tepo pyoo leamo doko
(Mk 10:32-34; Lu 18:31-33)
17 Jisasa* 20:17-18 Mt 16:21; 17:12,22-23; 26:2 Jetusaleme pao pituu, baanya disaipele kingi ita mende-kisa dee lapoma dutupa iki lanyepala kaitinisa dapa lamaiya: “Kandeleno! Naima indupa Jetusaleme pelyamano. Akali mendeme Endakalinya Ikiningi doko enge nyepala pitisa mupapi mana setapae masingi akalipi dupa laitaka pitamopa dupame baa kosa lao pyao kumasemana latami. 19 Dopa* 20:19 Ap 10:40 latala dupame baa endakali tata waka dupanya kingilyaka maitaminopa, dokaitame baa kandao lamba lao konjame pyapala ita pokonya pyao yukuotami. Dopa pitaminopa koto teponya Goteme baa dee sakatasetana,” Jisasame lea.
Jemesa Jonepanya endangimi Jisasa-kisa tee leamo doko
(Mk 10:35-45)
20 Gii* 20:20 Mt 8:2; 9:18; 15:25; 18:26; Jo 9:38 dokopa akali Sepete ikiningi mendalapo endangi dokome laminao Jisasa kateasa ipao luma lakapala baa-kisa mendita mende tee lea-pyaa. 21 Dokopa* 20:21 Mt 19:28; Lu 22:30 Jisasame baa pisoo, “Embame aki mende auu kaelepe?” lea-pyaa. Dopa leamopa enda dokome baa lamaiyoo, “Emba kiŋi jeteno gii dokopa nambanya wane dalaponya mende embanya kingi tolae-kaita katata mende koya-kaita katata lao laa,” lea-pyaa. 22 Dopa* 20:22 Mt 26:39; Jo 18:11 leamopa Jisasame lao pituu, “Nyakamame lelyamino doko masokondape napilyamino. Wane nyalambome kapo penge namba nato dokonya kapa pao natambipi?” lea-pyaa. Dokopa dolapome baa lamaiyoo, “Nalimba kapana nambana,” leambi-pyaa. 23 Dopa* 20:23 Ap 12:2; Pa 1:9 leambinopa Jisasame dolapo lamaiyoo, “Kiningi etete nyalambome nambanya kapo penge dokonya natambiaka doko, nambanya kingi tolae-kaita petena lengepi koya-kaita katena lengepi doko nambanya kalai daa. Nambanya Takangeme katatamina lao yapao nyiamo endakali dupa katatamina,” lea-pyaa.
24 Dopa pilyamino lapae doko disaipele kingi ita dutupame sepala nyalambo kaiminingipa dolapo imbu kayami. 25 Dopa* 20:25 Lu 22:25-26 piaminopa Jisasame dokaita pitaka epena latala lamaiyoo, “Endakali tata dupanya yuu isingi akali kenge singi kalyamino dupame endakali dupanya alyasale joo katengema doko nyakamame masilyamino. Dee dupanya akali andake dupame nyakamanya pii watao minekena lao kyoto jingima doko nyakamame masilyaminoaka. 26 Dopaka* 20:26 Mt 23:11; Mk 9:35; Lu 9:48 doko, nyakamame dopa napinya, nyakamanya mende akali andake joo katapuli lao masetamo kandao doko, nyakamanya kalai akali joo katapenge. 27 Dee nyakamanya mende enomba nyoo katapuli lao masetamo kandao doko, nyakamanya kendemane joo katapenge. 28 Dopaka* 20:28 Mt 26:28; Lu 22:27; Jo 13:15-16; Lo 5:6-21; Pl 2:7; 1 Ti 2:5-6; Ta 2:14; 1 Pi 1:18 pyoo Endakalinya Ikiningi dokome baanya kalai pyekena lao naepea. Baame endakali dupa nisoo kii tamao nyalanya baa tangeme kumala epeana,” Jisasame lea.
Jisasame akali lenge monda mendalapo lenge tasiamo doko
(Mk 10:46-52; Lu 18:35-43)
29 Dupame* 20:29 Mt 9:27-31 yuu taono Jeteko doko yakinatala peaminopa endakali kambu andake mendeme Jisasa watao peami. 30 Dokopa* 20:30 Mt 15:22 akali lenge monda lapoma kaitinisa peteambi-pyaa. Akali dolapome Jisasa epelyamo leamino sepala dolapome puu lao ae lao, “Dapiti Yumbange! Kamongo! Embame nalimba kondo kayape!” leambi. 31 Dopa leambinopa endakali dupame dolapo pii kaena lao pyalanya leami. Dopa leaminoaka doko, akali dolapome dee eteteaka puu lao ae lao, “Dapiti Yumbange! Kamongo! Embame nalimba kondo kayape!” leambi. 32 Dokopa Jisasa ipao katapala akali dolapo epena latala lamaiyoo, “Nambame nyalambonya aipa pyakapili lao masilyambipi?” lea. 33 Dopa leamopa akali dolapome baa lamaiyoo, “Kamongo, embame nalimbanya lenge tasakapili lao masilyambanona,” leambi. 34 Dopa* 20:34 Mt 8:3 leambinopa Jisasame dolapo kondome kumapala baanya kingimi dolaponya lengenya watandeamo awapaka lenge talu petala baa watao peambi.
21Kiŋi dupa pengemali pyoo Jisasa Jetusaleme pao pyakameamo doko
(Mk 11:1-11; Lu 19:28-40; Jo 12:12-19)
1 Dokaita Jetusaleme tengesale pao pituu, Olipimanda yuu dokonya taono Betepasi dokonya peami. Pao pituu dokopa Jisasame disaipele lapoma wambao pena lao lamaiyoo, “Yuu taono yakane nyalambonya enomba-kaita omo silyamo ongonya pupala, mena dongi mende anjetae yakane apata katatambinopa, nyalambome pupae kanjambinona, liangao minao ipupape. 3 Endakali* 21:3 Mt 26:18 mendeme nyalambo kandao pii mende lea kandeno doko, nyalambome baa lamaiyoo, ‘Kamongo dokome kalai mende dongi dalapome pipenge jilyamona,’ laapape. Dopa latambinopa yapa pealapomona,” lea.
4 Dopa piamo dokome akali potopesa mendeme pii mende dapa leamo doko angi jia:
5 “Nyakamame* 21:5 Ais 62:11; Sak 9:9 Sayone tange dupa dapa lamaiyepape:
Indupa nyakamanya kiŋi doko nyakama katamisa epelyamo kanjepa.
Endakali andanda semaiyoo katenge doko dongi maita dokonya pituu epelyamo.
Baa dongi mendenya yakane dokonya maitanya pituu epelyamona,” lea-pyaa.
6 Disaipele dolapome pupala Jisasame leamoli piambi-pyaa. 7 Dopa* 21:7 1 Kiŋ 1:33 petala dolapome dongi matakai dokonya yakane doko kateta minao epeambi. Ipupala nyalambonya yonge pee ketae pingi dolapo dongi maita dolaponya ketae seteambinopa, Jisasa dongi yakane dokonya pyakalyetala pituu pea. 8 Peamopa* 21:8 2 Kiŋ 9:13 endakali kambu andake mendeme nyakamanya yonge pee ketae pingi dupa kaitini dokonya kuiyoo seteami. Yangi dupame ita yoko dupa yandao kaitini dokonya kuiyoo setami. 9 Dee* 21:9 Wee 118:25-26; Mt 9:27; 21:15; 23:39; Lu 2:14; Ap 2:33 endakali dupa wambata maita pyata pyoo pao pituu puu lao dapa lao wee leami:
“Dapiti Yumbange, embame pyoo nyoo katape!
Akali epelyamo dake auu pisetaena Kamongo Goteme epena lapumopa epelyamo!
Etete Ketae Kaitinya Katenge, embame pyoo nyoo katapena,” leami.
10 Jisasa Jetusaleme pyakameamopa Jetusaleme tange dupa pitakame walu latala lao pituu, “Akali dake apipi?” leami. 11 Dopa* 21:11 Mk 6:15; Lu 13:33; Jo 6:14; 7:40; Ap 3:22 leaminopa endakali awapa peamino dupame, “Baa Jisasa lenge Galili yuu taono Nasatete tange potopesa dokona,” leami.
Jisasa losuu anda andake dokonya peamo doko
(Mk 11:15-19; Lu 19:45-48; Jo 2:13-22)
12 Jisasa* 21:12 Eke 30:13; Lep 1:14; Nia 13:8 baa losuu anda andake katenge kame dokonya pupala topo setao peteamino endakali dupapi sambao kateamino endakali dupapi dupa watao pyapala, muni aloo pingi akali dupanya tepolo tokopi yaka maileome topo nyingi akali dupanya petenge tokopi dupa lokalyinya nepea. 13 Dopa* 21:13 Ais 56:7; Jet 7:11 petala baame dokaita lamaiyoo, “Gotenya pii pepa pyapae singi dokonya, ‘Nambanya anda doko kandao endakalimi loma singi andana latamina,’ lapae silyamo. Dopaka doko, nyakamame anda dake pake nao makongao paenge endakali dupa yalo pingi kananda injisilyaminona,” lea.
14 Endakali* 21:14 2 Sam 5:8 lenge mondapi moko koopi dupa Jisasa kateasa losuu anda andake kame dokonya epeaminopa baame dupa mee injisia. 15 Dopa* 21:15 Mt 21:9; Lu 19:39; Jo 12:19 piamopa pitisa mupapi mana setapae masingi akalipi dupame Jisasanya kalai pupu lapae piamo dupa kandata, dee wane kole dupame losuu anda andake kame dokonya katao, “Dapiti Yumbange, embame pyoo nyoo katape!” lao wee leamino doko sepa petala imbumi kumiami. 16 Dopa* 21:16 Wee 8:2 petala dokaitame baa lamaiyoo, “Wane dupame pii lelyamino doko embame silipi?” leami. Dokopa Jisasame dokaita lamaiyoo, “Kini, nambame silyona, pii mende dapa lapae silyamo: ‘Embame wane koopi ŋaŋapi dupanya nengekaita lumbakamainopa dupame emba lalyokondape piamina,’ lapae silyamo doko nyakamame itaki pyala nayamipi?” lea. 17 Dopa* 21:17 Lu 21:37 latala baame dokaita yakinatala Jetusaleme dokonya kamalyatena pao yuu taono Betani dokonya palea.
Jisasame piki ita mende sapuina leamo doko
(Mk 11:12-14,20-24)
18 Jisasa* 21:18 Jet 8:13* 21:18 Lu 13:6-9 yongama wamba dee Jetusaleme pilyoo pituu baa lopo kaya. 19 Lopo* 21:19 Osi 9:16 kayapala baame piki ita mende kaitini lembasa kateamo kandatala dokonya pea. Peamoaka doko, dii mende kutao nakandao yoko iki pyoo kateamo kandea. Dokopa baame piki ita doko kandao, “Embame tanga tangapi dii mende dee namanditi, etete daana!” lea. Dopa lalu piamopa piki ita doko sapuiya. 20 Dopa piamo doko disaipele dupame kandao mona andapala lao pituu, “Piki ita dake aipa petala pupae lao sapuilyape?” leami. 21 Dokopa* 21:21 Mt 17:20; Lu 17:6; Jo 14:12; 1 Ko 13:2; Je 1:6 Jisasame dokaitanya pii yanu pyakamaiyoo, “Nambame nyakama kiningi langilyona, nyakamame masoo minao katao mona lapo palya nayatamino kandao doko, nambame piki ita dake pilyoli pyoo nyakamame kapa pao pitami. Nyakamame doko iki pyaa nayao dee yuu manda dake kandao, sakatalala solowata pete andake dokonya mangena latamino kandao doko, lataminoli pita. 22 Nyakamame* 21:22 Mt 7:7-11; 18:19; Jo 14:13-14; 16:23 masoo minao loma soo tee latamino dupa pitaka nyetamina,” Jisasame lea.
Kalai datupa apimi emba diape lao pisiamino doko
(Mk 11:27-33; Lu 20:1-8)
23 Jisasa* 21:23 Mt 28:18* 21:23 Jo 2:18-22 losuu anda andake dokonya pilyetala endakali dupa mana lamaiyoo kateamopa, pitisa mupapi Jutamanya isingi akalipi dupame baa kateasa ipupala lao pituu, “Embame apinya pii minao kalai datupa pilipi? Apimi kalai datupa emba-kisa seteape?” leami. 24 Dokopa Jisasame dokaitanya pii yanu pyakamaiyoo, “Nambame nyakama pii mende pisilyoakana, nyakamame yanu pyakatamino kandao doko, nambame kalai datupa dokonya pii minao pilyona lao nyakama langitoaka. 25 Joneme* 21:25 Mt 3:6; 21:32; Jo 3:27 kaimbu pyakamaiyamo doko apimi pina leape? Goteme pina leape, pande endakalimi pina leamipi?” lea. Dokopa dokaitame pii doko sepala nyakamalapo lao pituu, “Naimame, ‘Goteme pina leana,’ latamano kandao doko, ‘Aipuma nyakamame Jonenya pii doko masoo minala nayamipi?’ lata. 26 Dee,* 21:26 Mt 11:9; 14:5; 16:14; 21:46; Lu 1:76 ‘Endakalimi pina leamina,’ latamano kandao doko, endakali pitakame Jone doko akali potopesana lao masingima dokonya paka pyaumuna,” lao nyakamalapo leami. 27 Dopa latala dokaitame Jisasanya pii yanu pyakamaiyoo, “Naimame masala naelyamanona,” leami. Dokopa Jisasame dokaita lamaiyoo, “Doko tamo doko, nambame kalai pilyo datupa pii leamo doko nyakama langya nayatoakana,” lea.
Wane lapoma makande pyoo kongali pii leamo doko
28 Dee* 21:28 Mt 20:1; 21:33; Lu 15:1 Jisasame lao pituu, “Akali mendenya wane lapoma kateambi-pyaana salapape! Dolaponya takange dokome ipao wane mupa doko lamaiyoo, ‘Emba indupa getepe ee dokonya kalai pyaa puu,’ lea-pyaa. 29 Dopa leamopa wane dokome yanu pyao, ‘Namba daana,’ lea-pyaa. Dopa leamoaka doko, maitakao mona aloo petala pea-pyaa. 30 Takange dokome wane mende doko kateasa pao dopaka lamaiya-pyaa. Dopa lamaiyamopa, ‘Apane, yaka lumu,’ leamoaka doko, angi napea-pyaa. 31 Dopa* 21:31 Lu 7:29-30; 18:9-14 latala wane dolaponya andukumi takangenya masiamoli pia lusilyamape?” lao Jisasame dokaita pisia. Dopa lao pisiamopa endakali dupame lao pituu, “Wane mupa dokome lumuna,” leami. Dopa leaminopa Jisasame dokaita lamaiyoo, “Dee nambame nyakama kiningi langilyona, takisa nyingi akalipi kepo kolao paenge endapi dupame nyakama nyoo maita pyatala Goteme isina lao kalyanya ipao wambelyamino. 32 Doko* 21:32 Mt 3:6; Lu 3:12; 7:37-50; 19:1-10 aipumape? Jone Kaimbu Pingi doko nyakama kateamisa ipupala mana tolatae doko laitaka peteamoaka doko, nyakamame baa masala nayami. Dopaka doko, takisa nyingi akalipi kepo kolao paenge endapi dupame masiami. Dopa piamino doko nyakamame kandatala mona aloo petala baa masala nayamina,” Jisasame lea.
Getepe ee mende isoo kateamina lao kongali pii doko
(Mk 12:1-12; Lu 20:9-19)
33 Jisasame,* 21:33 Mt 25:14* 21:33 Ais 5:1-7 “Dee kongali pii mende lelyona, salapape,” latala lao pituu, “Akali yuu andake singi mende katea-pyaa. Akali dokome getepe ee mende kakopatala pokea-pyaa. Pokatala baame getepe ee dokonya getepe dii lyao indyalanya yuli mende lakea-pyaa. Dee isoo pititamo anda ketae mende piaka-pyaa. Dopa petala akali mendapuame ee doko isakao katena latala, baa yuu londati mendakaita pao katea-pyaa. 34 Dopa* 21:34 Mt 22:3 petala yuu mende getepe wambu pingi gii doko ipateamopa baame baanya kendemane mendapuame ee isakamaingi akali dupa kateamisa pupala, getepe dii mendapua lyao peekena lao nyakala pena lea-pyaa. 35 Peaminopa* 21:35 Mt 22:6 ee isakamaingi akali dupame baanya kendemane dupa minatala, mende pyao indyepala mende kumi pyao kumasoo, mende kaname pyao takyoo piami-pyaa. 36 Dopa peteaminopa akali ee tange dokome dee kendemane mendatupa pena lea-pyaa. Wamba pena leamoli pyoo pena laa nayao dee longole pena lea-pyaa. Dopa piamopa ee isakamaingi dupame wamba piaminoliaka piami-pyaa. 37 Dee* 21:37 Jo 3:16-17; 1 Jo 4:9 etao doko baame baanya ikiningi doko dokaita kateamisa pena lao pituu, ‘Dupame nambanya ikiningi doko andanda semaitamina,’ lao masetala pena lea-pyaa. 38 Dopa* 21:38 Mt 27:18; Jo 8:37; Ga 3:16; 4:7; Ip 1:2 leamoaka doko, ee isakamaingi dutupame wane doko epeamo kandatala nyakamalapo lao pituu, ‘Wane dakeme takangenya moya nyepengena, yapa pyao kumasema! Pyao kumasetala baanya ee moya nyepenge dake naima nyetamana,’ leami-pyaa. 39 Dopa* 21:39 Ip 13:12 latala dokaitame baa minatala ee dokonya kamalyatena soo pyandatala pyao kumasiami-pyaa.
40 “Dopana akali ee tange dokome ipupala ee isakamaingi dupa aipa pitape?” lea. 41 Dopa* 21:41 Mt 8:11; Ap 13:46; 18:6; 28:28 leamopa dupame baa lamaiyoo, “Akali koo dokaita tanda maiyoo pyao kumaseta. Dopa petala baame getepe ee doko akali waka mendapuame isakao katena latamopa, wambu pingi gii dokonya dupame getepe dii lyao maiyakamaitamina,” leami. 42 Dokopa* 21:42 Wee 118:22-23; Ais 28:16; Ap 2:33; 4:11; Lo 9:33; 1 Pi 2:6-8 Jisasame dokaita lamaiyoo, “Nyakamame Gotenya pii pepa pyapae singi dake itaki pyatala nayamipi?
‘Anda pingi akali dupame anda pingina daa latala nepeamino doko pingina mupa jetea.
Kamongome dopa pipumu doko,
naimame kandamanopa auu etete pilyamona,’ lapae silyamo.
43 Dopana,* 21:43 Lo 11:11 nambame nyakama dapa langilyo: Goteme nyakama dee isala nayao baame isingi dokonya dii manditamino endakali dupa iseta. 44 [Endakali* 21:44 Dan 2:44-45 mendeme kana doko-ketae lombao sepala baa indyuu tale pita. Dee kana dokome endakali mende pyao takyembatamo kandao doko, endakali doko etete kunguma jetana,” lea.]
45 Dopa lao Jisasame pii kongali leamo dupa pitisa mupapi Patasipi dupame sepala, “Naima kandao lalumu,” lao masiami. 46 Dopa* 21:46 Mt 16:14; 21:26 lao masetala baa anjemana lao kaita kutiaminoaka doko, endakali kambu kateamino dupame Jisasa baa potopesana lao masiaminosa paka kayami.
22Enda kelyao nee andake yaweana lao kongali pii doko
(Lu 14:16-24)
1 Jisasame* 22:1-2 Pot 9:1-6* 22:1-2 Pa 19:9Z dee kongali pii mendapua dokaita lamaiyoo lao pituu, “Kaitinya Katenge dokome isingi doko kiŋi mendenya ikiningi doko enda keleamopa baame nee andake mende yawakamaiyamo dopale. 3 Kiŋi* 22:3 Mt 21:34 dokome endakali wamba epena lateamo dupa nee andake dokonya nala epena lao baanya kendemane mendapuame lanyala pena lea-pyaa. Dopaka doko, dokaitame nala ipumana lao masala nayami-pyaa. 4 Dopa* 22:4 Mt 21:36 piaminosa baame kendemane mendatupa pena lao pituu, ‘Nambame endakali wamba epena lateo dutupa kandao dapa lamaiyepape: “Baame baanya nee andake doko depa latelyamo. Baanya mena pulumakao maipa dupapi dee pulumakao andapae dupapi pyapalamo. Dupa pitaka depa latae sepelyamona, nyakama dokonya nala ipupa,” lao lamaiyepape!’ lea-pyaa. 5 Dokopa dokaitame lamaiyaminoaka doko, tuu petala nyakamanya masiamili piami-pyaa. Dupanya mende baanya eenya pea-pyaa. Mende baanya pisinisa dupanya pea-pyaa. 6 Dee* 22:6 Mt 21:35 yangimi kiŋi dokonya kendemane dupa minatala mana koo minao pyao kumasiami-pyaa. 7 Dopa piamino doko soo kiŋi dokome imbu kayapala baanya yanda singi amii dupa pena lateamopa, dupame pupala kendemane pyao kumasiamino endakali dutupa pyao kumasetala dutupanya yuu taono doko pyao yangeami-pyaa.
8 “Dokopa kiŋi dokome baanya kendemane dupa lamaiyoo, ‘Nambanya nee andake doko depa latae sepelyamoaka doko, nala epena leo endakali dupa kooma lamo. 9 Dopana* 22:9 Mt 8:11; Pa 19:7 nyakamame kaitini kembo dupanya pupala endakali kutao kandatamino dupa pitaka nee andake dakenya nala epena lamaiyepape!’ lea-pyaa. 10 Dopa* 22:10 Mt 13:38,47 lateamopa kendemane dokaitame kaitini dupanya pupala, endakali koopi epepi kandeamili pyoo laminao ipao kambu pyateaminopa, enda kelyao nee napenge anda doko etete tumbiami-pyaa.
11 “Peteamino dokonya kiŋi dokome endakali dokaita kanjanya kolandatala kandeamopa, akali mende yonge pee enda kelenge giinya pingi doko napyoo mee peteamo kandea-pyaa. 12 Kandatala* 22:12 Mt 20:13; 26:50; Pa 19:8 baame baa lamaiyoo, ‘Kaimia, embanya yonge pee enda kelenge giinya pingi doko napyene lamo doko aipa petala emba dakenya kolandalepe?’ lao pisia-pyaa. Dopa lao pisiamopa akali dokome pii mende lapenge nanjia-pyaa. 13 Dopa* 22:13 Mt 8:12; 13:42,50; 24:51; 25:30; Lu 13:28 piamopa kiŋi dokome kendemane dupa lamaiyoo, ‘Nyakamame baanya kingi mokopi dupa yaki petala yuu etete iminjetae dokonya baa soo pyale laapa! Dokonya katao baa ee lao yamataka lao nenge gilyoo katatana,’ kiŋi dokome dopa lea-pyaa. 14 Epena latae endakali longo katengemaka doko, yapao nyepae kuki iki katengemana,” Jisasame lea.
Muni takisa dupa pyakamaipengepe kayapengepe lao Jisasa pisiamino doko
(Mk 12:13-17; Lu 20:20-26)
15 Dokopa* 22:15 Jet 18:18; Mk 3:6; 8:15; Lu 11:54 akali Patasi dupame pupala kambu pyao pituu Jisasame pii mende latamo dokonya-kaita baa-kisa tenge setamana lao masetala pii wasiami-pyaa. 16 Dopa* 22:16 Lo 13:1-7 petala nyakamanya disaipele mendapuapi dee Kiŋi Etote tata mendapuapi dupa Jisasa kateasa pena leaminopa dupame pupala baa kandao lao pituu, “Mana Lenge Akali, emba pii kiningi lenge akalina, embame kiningi pii lao Goteme endakali dupame pipimili lao masingili pyoo mana lamailino lao masilyamano. Embame endakali dupa paka nakayapala itange kandao mokosala nanenge. 17 Dopana, naimanya mana setapae dupanya aipa lapae silyape? Kapomane Isingi Mupa dokonya takisa dupa naimame pyakamaipengepe, pande kayapenge? Embame aipa lao masilipi? Naima langi,” leami.
18 Dopaka doko, Jisasame dupanya mana koo doko kandatala lao pituu, “Nyakama endakali minakasingi akali! Aipuma nyakamame namba minao makande pilyamipi? 19 Nyakamame takisa pyapenge muni ongonya mende namba laitaka pyepa!” lea. Dokopa dokaitame muni mende maitiaminopa baame dokaita pisoo, “Muni dakenya endakali lengelyaapi wasetae kalyamopi kenge pyatae kalyamopi doko apinyape?” lea. 21 Dopa leamopa dokaitame lao pituu, “Doko Kapomane Isingi Mupa dokonya kalyamona,” leami. Dopa leaminopa baame dokaita lamaiyoo, “Dopa tamo doko, opale Kapomane Isingi Mupa dokonya dupa tange maiyakamaiyepape. Dee opale Gotenya dupa Gote tangeaka maiyakamaiyepape,” lea. 22 Dokaitame pii dutupa sepala mona andao baa yakinatala peami.
Endakali kumapae dupa dee sakatatamipi lao Jisasa pisiamino doko
(Mk 12:18-27; Lu 20:27-40)
23 Koto* 22:23-24 Ap 4:1-2; 23:8* 22:23-24 Jen 38:8; Dit 25:5 gii dokopaka akali Satyusi mendapua Jisasa kateasa epeami. Dupame endakali kumapala dee sakatala naengena lengema. Akali dupame ipupala Jisasa pisoo, “Mana Lenge Akali, wamba Moseseme dapa lea-pyaa: ‘Akali mende wane manja nayao mee kumatamo kandao doko, baanya kaiminingi mendeme enda walyakae doko pisetala wane manditamo dupa kaiminingi kumapae dokonya manjakamaitana,’ lapae silyamo. 25 Gii mendepa akali mendenya ikiningi kalange naima-pipa kateamano dokonya mupa dokome enda nyepala wane manja nayao baa mee kumia. Kumateamopa kaiminingi lapo dokome enda walyakae doko baa pisia. 26 Dokome dopaka piamopa kaiminingi tepo dokome enda dokoaka pisia. Dopaka pyoo kaiminingi kalange dutupa pitakame enda dokoaka nyepala pitaka kumateaminopa maitakao enda doko kumia. 28 Dopana, endakali kumapae dupa dee sakatatamino gii dokopa enda mendai dokoaka kaiminingi kalange dutupa pitakame wamba nyiamino doko apinya joo pitita laape?” leami.
29 Dokopa Jisasame dokaitanya pii yanu pyakamaiyoo, “Nyakamame Gotenya pii pepa pyapae singi doko masala nayao baanya pupu lapae doko masala nayawaka pingima. Tenge dokonya nyakamame etete kopeta lelyamino. 30 Endakali kumapae dupa dee sakatatamino gii dokopa endakalipa nyala nayao kaitinya enjele dupa katengemali pyoo katatami. 31 Endakali* 22:31-32 Eke 3:6; Mt 8:11 kumapae dupa dee sakatatamina lao Goteme nyakamanya pii pepa pyao setekeamo doko itaki napiamipi? Baame dapa lea-pyaa: ‘Namba Apotakamepi, Aisakepi, Jekopepi, dutupanya Gote dokona,’ lapae silyamo. Baa endakali lete katenge dupanya Gotena, kumapae dupanya daana,” Jisasame lea. 33 Dopa* 22:33 Mt 7:28; Ap 13:12 leamopa endakali kambu piamino dupame baanya mana leamo dutupa sepala walu leami.
Mana setapae dupanya mupa doko
(Mk 12:28-31; Lu 10:25-28)
34 Jisasame* 22:34 Lu 10:25-28 pii dutupa leamo dokome Satyusi dupanya nengekaita lyokapya lapae doko Patasi dupame sepala, baa kateasa ipao kapeami. 35 Kapatala* 22:35-36 Lu 7:30; 11:45; 14:3* 22:35-36 Jo 13:34-35; 1 Jo 4:21 dokaitanya mana setapae masingi akali mendeme Jisasa minao makande pyaanya pisoo pituu, “Mana Lenge Akali, mana setapae dupanya anduku mupa joo silyape?” lea. 37 Dopa* 22:37 Dit 6:5; 1 Jo 2:7 leamopa Jisasame baa lamaiyoo, “‘Embame embanya Kamongo Gote auu kayao katao, embanya monapi, imambupi, masingipi dutupa pitaka baa iki maitae katape.’ 38 Mana setapae doko etete andake mupa. 39 Dee* 22:39 Lep 19:18; Mt 19:19; Lo 13:9; Ga 5:14; Je 2:8 mendai dopaleaka lapo doko dake: ‘Embame emba tange auu kaengeli pyoo embanya endakali yango doko auu kayao katape.’ 40 Mana* 22:40 Mt 7:12 setapae lapoma dolapome Moseseme pii pepa piamo dupa pitakapi potopesame pii pepa piamino dupapi dupa tumunya minalyoo silyamona,” Jisasame lea.
Kataisa doko apipi lao pisiamo doko
(Mk 12:35-37; Lu 20:41-44)
41 Patasi* 22:41-42 Jo 7:42 dupa kapatae kateaminopa Jisasame dokaita pisoo, “Nyakamame Kataisa doko kandao apina lao masilyamipi? Baa apinya yumbangepe?” lea. Dokopa dupame baanya pii yanu pyakamaiyoo, “Baa Dapitinya yumbangena,” leami. 43 Dopa leaminopa baame dupa lamaiyoo, “Dopa tamo kandao doko, Dapitimi aki mende masetala baanya yumbange doko kandao ‘Kamongona’ lea-pyaape? Doko, Oli Sipitisa dokome Dapitinya mona sakatasiamopa baame dapa lea-pyaana lapae silyamo:
44 ‘Kamongo* 22:44 Wee 110:1; Mt 26:64; Ip 1:13; 10:13 Gote dokome nambanya Kamongo doko lamaiyoo,
“Emba nambanya kingi tolae-kaita katape.
Katatenopa nambame embanya yandapipili dupa embanya moko pundipundi ongonya katena latona,” lea-pyaana,’ lea.
45 Dopana wamba Dapitimi Kataisa doko kandao ‘Kamongona’ latamo kandao doko, aipa petala baa Dapiti yumbange jilyape?” lea. 46 Dopa* 22:46 Mk 12:34; Lu 20:40 lateamopa akali mendaipi mendeme Jisasanya pii doko kapa pao yanu pyapenge etete nanjia. Koto gii dokonya pituu tee pyao akali mendeme pii mende dee baa pisalanya paka kayami.
23Mana setapae masingi akalipi Patasipi dupa kandao wandyuu kalyepape leamo doko
(Mk 12:38-39; Lu 11:43-46; 20:45-46)
1 Dokopa* 23:1-2 Jet 8:8-9; Lo 2:17-24 Jisasame endakali kambu piamino dupapi baanya disaipele dupapi dupa lamaiyoo lao pituu, “Mana setapae masingi akalipi Patasipi dupame Mosesenya panda nyoo kalyamino. 3 Dopana,* 23:3 Dit 17:10 dupame nyakama langitaminoli pyoo dupa pitaka watao minao pyepape. Dopaka doko, dupame mana minataminoli pyoo naminalapape. Doko, dupa tangeme lelyaminoli pyoo napingima. 4 Dee* 23:4 Mt 11:30; Ap 15:10 dupame kenda pipae dupa andake pyoo yaki pipala, endakali dupanya lataiyanya nyoo sakamaingima. Dopa pingimaka doko, dupame etete kukipi mende kingi maiya naengema. 5 Dupame* 23:5 Eke 13:9; Nam 15:38; Dit 6:8; Mt 6:1,5,16 kalai pilyami dupa pitaka endakalimi kandapimili lao pingima. Dopa pina lao dupame Gotenya pii pepa pyapae dokonya mendatupa pepa pyao nyepala mata+ 23:5 mata, kitambu, yati pipae Juta dupame Gotenya mana setapae dupa watao minokondape pingina lao kongali pyoo yati pipae dupa yonge pee puna dupanya anjeta kitambu joo piseta mata joo peta pingima-pyaa.joo peta kitambu joo piseta pingima. Dupame nyakamanya yonge pee kisa pingi puna dupanya yati pipae dupa londe pyoo anjinya pyandata pingimaka. 6 Dee* 23:6 Emo 4:5; Lu 14:7 dupame nee andake nelyami dupanya petenge toko enomba nyoo dupanyapi, losuu anda dupanya enomba nyoo petenge toko dupanyapi dupanya pilyanya auu kaengema. 7 Kamapi dupanya endakali dupame nyakama lasa lata ‘Mana Lenge Akalina’ lata, pipimili lao auu kaengemaka. 8 Dopaka* 23:8 Je 3:1 doko, endakali dupame nyakama kandao ‘Mana Lenge Akalina’ lena lao kayala nayalapape. Doko, nyakamanya Mana Lenge Akali mendai iki katamopa nyakama pitaka kaiminingiaka kalyamino. 9 Dee nyakamame isa yuu dakenya endakali mende nyakamanya ‘Takangena’ laa nayalapape. Kaitinya katenge doko iki nyakamanya Takange. 10 Endakali dupame nyakama kandao ‘Akali Andakena’ lena lao kayala nayalapapeaka. Nyakamanya Akali Andake mendai iki kalyamo. Doko baa Kataisa. 11 Nyakamanya* 23:11 Mt 20:26; Mk 9:35; 10:43-44; Lu 9:48; 22:26 mende alyasale joo katatamo doko, nyakamanya kalai pyekenge akali joo katapenge. 12 Endakali* 23:12 Jop 22:26; Pot 29:23; Ese 21:26; Lu 1:52-53; 14:11; 18:14; 1 Pi 5:6 mende tangeme alyasale joo katatamo doko, anasale joo katena lata. Dee endakali mende tangeme anasale joo katatamo doko, alyasale joo katena latana,” lea.
Mana setapae masingi akalipi Patasipi dupa-kisa Jisasame pii seteamo doko
(Mk 12:40; Lu 11:39-42,44,52; 20:47)
13 “Mana* 23:13 Jet 8:8; Mal 2:8* 23:13 Ais 5:8-25 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame endakali dupa Kaitinya Katenge dokome isala naena lao kaitini lyokakamaingima. Nyakama isina lao nakatenya dee endakali isina lao kalyanya pipimino dupa isina lao kayala naelyaminoaka.
14 [“Mana setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame enda walyakae dupanya anda yuupi dupa minamao nyepakamaitala, endakali dupame nyakama epepe lao masina lao loma londe pyoo singima. Dokonya Goteme nyakama-kisa kenda pipae etete andake mende setata.]
15 “Mana* 23:15 Ap 2:9-11; 6:5; 13:43 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame endakali mende Juta injisalanya solowata pete andake dupanya yangi-kaita pata yuu dupanya mendasa pata pingima. Dopa petala nyakamame endakali mende nyepa pilyamino dokome nyakamanya mana koo dupa ita minao yuu koo dokonya mupa joo pupenge endakali injisingima.
16 “Kaitini* 23:16 Mt 15:14; Jo 9:38-41; Lo 2:19* 23:16 Mt 5:33-37 laitaka pingi akali lenge monda nyakama koyatami iki lamo! Nyakamame endakali dupa dapa lao mana lamaingima: ‘Endakali mendeme losuu anda andake dake mauwana kiningi etete dopa pitona latamo dokome latamoli napipenge. Dopaka doko, endakali dokome losuu anda andake dokonya golome wasepae dupa mauwana kiningi etete dopa pitona latamo dokome kayala nayao latamoli pipengena,’ lamaingima. 17 Nyakama* 23:17 Eke 30:29 lenge monda kyakaenge! Angi doko andukupi? Golome wasepae dupape, pande golome wasepae dupa Gotenyana lao makande pingi losuu anda andake dokope? 18 Dee nyakamame endakali dupa dapa lao mana lamaingimaka: ‘Endakali mendeme losuu anda andake dokonya kundi maingi olata toko doko mauwana kiningi etete dopa pitona latamo dokome latamoli napipenge. Dopaka doko, endakali mendeme opale epe mende Gotenya lao setapae olata toko ketae dokonya singi doko mauwana latamo dokome kayala nayao latamoli pipengena,’ lamaingima. 19 Nyakama lenge monda daape! Angi doko andukupi? Opale epe setapae dokope, pande setapae doko Gotenyana lao makande pingi olata toko dokope? 20 Dopana, endakali mendeme olata toko doko mauwana lelyamo dokome olata toko dokopi opale epe Gotenya lao setapae olata toko dokonya singi dupa pitaka apata kandao lenge. 21 Dee* 23:21 1 Kiŋ 8:13; Wee 26:8 endakali mendeme losuu anda andake doko mauwana lelyamo dokome losuu anda andake dokonya katenge doko apata kandao lenge. 22 Dee* 23:22 Ais 66:1 endakali mendeme kaiti doko mauwana lelyamo dokome Gotenya isoo petenge toko dokopa toko dokonya petenge dokopa apata kandao lenge.
23 “Mana* 23:23 Lep 27:30; Dit 14:22; Ese 45:13; Emo 5:21; Mai 6:8 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame takae mondai itamaiyapi dupa paa kingi ita lao mokosepala mende doko Gote maingima. Dopa pingimaka doko, mana tolatae miningipi, kondo kayamaingipi, lelyamoli pingipi, mana setapae dupanya pii angi dopale dupa nyakamame watao naminingima. Nyakamame mendatupa dutupa yakinala nayao pituu angi datupa watao miningima pyali yaka. 24 Kaitini laitaka pingi dupa nyakama lenge monda daape! Nyakamanya kapo penge dupanya pongena mende pelyamo doko nyoo nepengemaka doko, mena kamele dupa mee goe lengema daape!
25 “Mana* 23:25 Mk 7:4; Ta 1:15 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame nyakamanya kapopi pelesapi dupanya ketae-kaita iki kunanya nepao katengema. Dopa pingimaka doko, pake nyilyamino dupapi pyuani kayao pilyamino dupapi dupame kapo pelesapi dupanya koko-kaita tumbatae katena kaengema. 26 Lenge monda Patasi! Wambao embame kapo dupanya koko-kaita katenge dupa kunanya nepape. Dopa pitinopa ketae-kaita kunapayaka seta.
27 “Mana* 23:27 Ap 23:3 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakama endakali malu dupanya akaipu wai nyetae katengeli pyoo kalyamino. Endakali dupame ketae-kaita kandelyaminopa etete epe jilyamoaka doko, koko-kaita endakali kumapae kuli akipi tamopae dupame tumbatae katenge. 28 Dokaita* 23:28 Wee 5:9; Lu 16:15; 18:11-12 joo endakali dupame nyakama ketae kandao epepe lao masingima. Dopaka doko, nyakamanya koko-kaita sambo epe jili pingipi, mana setapae tanga lao koo pingipi dupame tumbatae kalyamona,” Jisasame lea.
Mana setapae masingi akalipi Patasipi dupa-kisa yanu nyetana Jisasame leamo doko
(Lu 11:47-51)
29 “Mana* 23:29 Mt 13:17* 23:29 Ap 7:51-53 setapae masingi akalipi Patasipi nyakama koyatami iki lamo! Nyakama endakali minakasingi akali! Nyakamame potopesa kumiami dupanya malu dupa makande pyoo, malu ketae dupanya anda auu pipae dupa pinya katengema. Dee nyakamame endakali tolatae kumiami malu kananda dupa yati pingimaka. 30 Dopa pyoo pituu, ‘Wamba naimanya yumbange dupa kateami gii dokopa naima kateamali kandao doko, naimame dupa-pipa awapa potopesa dupa pyao kumasala nayamalina,’ lengema. 31 Nyakamame dopa lelyamino dokome nyakama tangemeaka potopesa pyao kumasiamino dupanya mandipaena lao panasingima. 32 Dopana,* 23:32 1 Te 2:16 nyakamame nyakamanya yumbange dupame tee piamino doko pyoo etasalapape! 33 Nyakama* 23:33 Mt 3:7; 12:34; Lu 3:7; Ap 23:3 kanopato! Kanopato pambeanya mandipae! Goteme nyakama yuu koo dokonya nyoo pyandatamo doko, aipa petala nyakamame wandyatamipi? 34 Tenge* 23:34 Mt 5:12; 10:17,23; 1 Te 2:14-15 dokonya minao nambame nyakama dapa langilyona salapape: nambame potopesapi, mana kandenge akalipi, pii lapae masingi akalipi dupa nyakama katatamisa epena lato. Dopa pitopa nyakamame dupanya mendapua pyao kumasetami. Mendapua pyao ita pokonya yukuotami. Dee mendapua nyakamanya losuu andaka dupanya konjame pyapala yuu taono mendenya watao pyata mendenya watao pyata pitami. 35 Nyakamame* 23:35 Jen 4:8-10; 2 Ktl 24:20-21; Sak 1:1; Mt 27:5; Ip 11:4; Pa 16:6; 18:24 dopa pitaminosa wamba akali tolatae kateamino dupa pitaka pyao kumasiamino dokonya tenge doko nyakama-kisa seta. Dopa piamino mana doko wamba akali tolatae Epolo lenge doko pyao kumasiamino dokonya pituu tee pyatala, akali Betokayanya ikiningi Sakataya lenge doko losuu anda andake dokopa olata toko dokopa dolaponya kainanya pyanya seteamino dokonya tuu lea-pyaa. 36 Dopa* 23:36 Mt 10:23; 16:28; 24:34 piamino dupa pitakanya yanu doko Goteme endakali indupa palelyamino dupa-kisa nyetana lao nambame nyakama kiningi langilyona,” lea.
Jisasame Jetusaleme tange dupa kandao mona kenda kayao pii leamo doko
(Lu 13:34-35)
37 “Kanau!* 23:37 Wee 17:8; 91:4; Jet 26:4-5; Mt 21:35; 22:6; Ap 7:59; 1 Te 2:15 Kanau! Jetusaleme tange! Nyakamame potopesa dupa pyao kumasoo dee Goteme epena latae akali dupa kaname pyao kumasoaka katengema! Gii longo paka nambame nyakama nyoo limbatala yaka matakaimi yakane dupa papa pundipundi yapu nengeli pitoo lao masoo katewaka doko, nyakamame tanga leami! 38 Dokopa* 23:38 1 Kiŋ 9:7-8; Jet 7:14; 12:7; 18:7-8; 22:5; Ese 11:23; Jo 2:19-21 nambame nyakamanya anda doko yakinatekelyona, doko mee katakata. 39 Ongonya* 23:39 Wee 118:26; Mt 21:9; Ap 2:33 nambame nyakama langilyona, indupa pituu tee pyao nyakamame namba etete nakandawaka katao, ‘Akali epelyamo dake auu pisetaena, Kamongo Goteme epena lapumopa epelyamona,’ latamino gii dokonya tuu latamina,” Jisasame lea.
24Losuu anda andake doko kalunya nepatamina Jisasame leamo doko
(Mk 13:1-2; Lu 21:3-6)
1 Jisasame losuu anda andake kame doko yakinatala peamopa, baanya disaipele dupame losuu anda katenge dosa anda petae katenge dupa baa laitaka pyaanya epeami. 2 Dopa* 24:2 Mt 26:61; 27:39-40; Lu 19:44; Jo 2:19 piaminopa baame dokaita lamaiyoo, “Kini, nyakamame datupa pitaka kandelyamipi? Kandelyaminoaka doko, nambame nyakama kiningi langilyona, ae kaname petae kalyamo datupanya mendaipi mende kalyamoli petae katena lao kayala nayao, pitaka kalunya nepatamina,” lea.
Kenda pipae longo dupa ipatana Jisasame leamo doko
(Mk 13:3-13; Lu 21:7-19)
3 Olipimanda* 24:3 Mt 13:39-40,49; 16:27; 28:20; Lu 17:20; 1 Jo 2:28 yuu dokonya Jisasa peteamopa baanya disaipele dupame elyakao ipupala baa pisoo, “Embame laleno dutupa andukupa pitana lao lalepe? Aki mende pitamopa naimame kandatala emba dee ipanya pilino, yuu dake etalanya pilyamo lao masetama laape? Dokonya embame naima langi,” leami.
4 Jisasame yanu pyao dokaita lamaiyoo, “Endakali mendeme nyakama minao kyakasetana kandao kalyepape. 5 Tenge* 24:5 Mt 24:11,23-24; Jo 5:43; Ap 5:36-37; 2 Ti 3:5; 1 Jo 2:18 doko endakali longome namba epele lao ipupala, ‘Namba Kataisa dokona,’ lao endakali longo minao kyakasetami. 6 Yanda* 24:6 Jet 51:46* 24:6 Pa 6:3-8,12-17 andake dupa pitaminopa kii-kau latapi, yanda andake dupa pilyamino lapaepi dupa nyakamame setami. Sepala paka kayatamina paka nakayalapape. Dopale dupa ipupengeaka doko, yuu etenge gii doko dokopa ipatala nayata. 7 Akali* 24:7 2 Ktl 15:6; Ais 19:2 tata mendeme tata mende yanda pimaita, kiŋi mendenya isingi tata mendeme kiŋi mendenya isingi tata mende yanda pimaita pitami. Dee yuu wakale wakale dupanya lopo andake dupa sepa titiwali dupa minata pita. 8 Dopaka* 24:8 Jo 16:21; Lo 8:22; 1 Te 5:3; Pa 12:2 doko, pitamo dutupa pitaka enda wane maita pyalanya tee pingi dopale joo pita.
9 “Gii* 24:9 Mt 10:17-18,22; Jo 15:18; 16:2; 1 Jo 3:13 dokopa endakali mendapuame nyakama tanda dyuu kenda pisina lao maitami. Dopa pitaminopa dupame nyakama pyao kumasetami. Nyakamame nambanya lao pii lamaitaminosa endakali paliuu pelyamo dupa pitakame nyakama imbu kaengitami. 10 Gii* 24:10 Mt 10:21,35-36 dokopa endakali longome masoo miningi doko yakinatami. Dupame nyakamalapo yandapipi dupanya kingilyaka mende mai mai pyoo mende imbu kayamai kayamai pitami. 11 Endakali* 24:11 Mt 24:5,24; 2 Te 2:3; 1 Jo 4:1 sambo potopesa longo mendapuame ipupala endakali longo minao kyakasetami. 12 Mana* 24:12 Lu 18:8 setapae yalenge mana doko etete andatamosa endakali longo dupanya auu kayamaingi mana doko kupa palita. 13 Dopaka* 24:13 Mt 10:22; Pa 2:7,10 doko, endakali mendeme kyoto joaka katao baa etatamo doko pyoo nyepae katata. 14 Dee* 24:14 Mt 10:18; 28:19; Lo 10:18 Kaitinya Katenge dokome isingi dokonya lao Wai Pii Epe doko yuu dupa pitakanya endakali paliuu pelyamo dupa pitakame sina lao lamaitami. Lamaiyoo etapatamino dokopa yuu etenge gii doko ipatana,” lea.
Kenda pipae andake ipatamopa lekeleke tatamina leamo doko
(Mk 13:14-23; Lu 21:20-24)
15 “Losuu* 24:15 Dan 9:27; 11:31; 12:11 anda andake koyasingi aii pyapae doko kandao wamba Goteme potopesa Daniele-kisa lungu petala leamo doko panda etete epe dokonya katatamopa nyakamame kandatami. (Pii dake itaki pyatamo endakali dokome tenge doko masepenge.) 16 Kandatala* 24:16 Ese 7:15 dokopa Jutia yuu dokonya katatamino endakali dupa yuu manda dupanya paka pyakao pupenge jeta. 17 Endakali* 24:17 Lu 17:31 mende baanya anda patakisa katatamo dokome baanya oapi andakote setamo dupa nyalanya napupenge jeta. 18 Dee endakali mende eesa katatamo dokome baanya yonge pee ketae pingi doko nyalanya pilyala nayapengeaka jeta. 19 Enda* 24:19 Lu 23:29 wane tongatapi enda wane andu nengepi dupa gii dokopa etete kondo pita! 20 Nyakamame koo kana palitamopapi Sambasa gii mendenyapi paka pyakao napataminopana loma soo kalyepape. 21 Gii* 24:21 J.Ee 1:12; Dan 12:1; Joe 2:2; Pa 7:14 dokopa kenda pipae andake ipatamo dokome yuupi kaitipi tee piamo dokopa pituu indupa tuu lao kenda pipae epeamo dupa pitaka ita minata. Dee kenda pipae dopale mende tenda tendapi etete naipataka. 22 Goteme yuu gii dupa kaketatona lao masala nayali kandao doko, endakali mendaipi mende nakatatama jipyali. Dopaka doko, baame baanya yapao nyepae endakali dupa lao masetala yuu gii dupa kaketata.
23 “Gii* 24:23 Wee 75:6; Mt 24:5,11; Lu 17:23-24; 2 Te 2:3-4 dokopa endakali mendeme nyakama langyoo, ‘Kataisa doko asa kalyamo kanjepa! Amasa kalyamo kanjepa!’ lea kandeno doko, baame kiningi lelyamona lao nyakamame masala nayalapape. 24 Doko,* 24:24 Dit 13:1-3; 2 Te 2:8-9; 2 Pi 2:1-3; 1 Jo 4:1; Pa 13:13-14 sambo kataisapi sambo potopesapi longo dupa ipupala kongalipi kalai paka pipaepi dupa pitami. Dupame Gotenya yapao nyepae endakali dupa kapa pao minao kyakasepenge jipyali kandao doko, kyakasimili. 25 Kandeleno! Nambame nyakama ene pimopa langitilyo.
26 “Dopana,* 24:26 Lu 17:23-24; Pa 1:7 endakali mendapuame nyakama langyoo, ‘Baa endakali napalenge yuu dokonya kalyamona,’ leami kandeno doko, nyakama dosa napupape. Dee dupame, ‘Baa asa yalo petae kalyamo kanjepa!’ leami kandeno doko, kiningi lelyaminona lao masala nayalapape. 27 Doko,* 24:27 Mt 24:37-39 niki pyakaengesa-kaita pituu yuu wapaka pilyamo doko pyoo niki landa pingisa-kaitapi yuu pitakanya tii piyoko lenge. Dopaka pyoo Endakalinya Ikiningi doko ipata. 28 Opale* 24:28 Jop 39:30; Lu 17:37 mende kumapae silya mendasa yaka lakepame dupa ipao kambu pingimana,” Jisasame lea.
Endakalinya Ikiningi doko dee ipata dokonya Jisasame leamo doko
(Mk 13:24-27; Lu 21:25-28)
29 “Gii* 24:29 Ais 13:9-10; 34:4; Ese 32:7; Joe 2:10,31; 3:15; Emo 8:9; Sep 1:15; Ap 2:20; Pa 6:12-13; 8:12 dupanya kenda pipae ipatamo dupa etalu petatamopa niki doko iminjoo, kana doko tii napyoo, kaiti-kisa bui katenge dupa kondao isa ipao, kaitinya kuingi dupa ema-ema pyoo pita. 30 Dokopa* 24:30 Dan 7:13-14; Sak 12:10-14; Mt 16:27; 17:5; 26:64; Pa 1:7; 6:12-13 Endakalinya Ikiningi doko ipatamo dokonya kongali doko kaiti-kisa pitamopa, yuunya endakali tata dupa pitakame etete ee lao yamataka latami. Dupame Endakalinya Ikiningi doko kaitinya kopa ketae dokonya pupu lao etete tii pyoo ipatamo kandatami. 31 Beto* 24:31 Ais 27:13; Sak 9:14; 1 Ko 15:52; 1 Te 4:16 mende puu lao latamopa baame baanya enjele dupa pena lata. Dupame pupala yuunya lita yangi yangipi dupanya baanya yapao nyepae endakali dupa nyoo elyambu pitami. Kini yuu lita dokonya pituu yuu lita yangi-kaita tuu lao nyoo elyambu pitamina,” lea.
Piki ita dupanya makande doko
(Mk 13:28-31; Lu 21:29-33)
32 “Nyakamame piki ita dupanya makande doko masalapape. Mange dupa kanga latala yoko ŋaŋa pyakalyilyamo doko kandatala nyakamame aiyuu kana palyanya pilyamona lao masingima. 33 Dokotekee joo pitamo dutupa pitaka nyakamame kandatala yuu etalanya tengesa petelyamona lao masalapape. 34 Nambame* 24:34 Mt 10:23; 16:28; Je 5:8 nyakama kiningi langilyo, endakali indupa palelyamino dupa kumao etapala nayataminopa dutupa pitaka pita. 35 Yuupi* 24:35 Ais 40:8; 51:6; Mt 5:18; Lu 16:17; Ip 12:27 kaitipi dupa kapa pao alu pitamoaka doko, nambanya pii dupa kapa pao alu napitana,” Jisasame lea.
Depa latae kalyepapena leamo doko
(Mk 13:32-37; Lu 17:26-30,34-36)
36 “Endakali* 24:36 Ap 1:7; 1 Te 5:1-2 mendaipi mendeme yuu etenge gii doko andukupa ipatape, kiloko gii andukunya ipatape lao masala naengema. Enjele kaiti-kisa katenge dupame masala naengema. Ikiningi dokome apata masala naengeaka. Takange dokome iki masingi. 37 Wamba* 24:37 Jen 6:5-8; 7:6-24 akali Noa kateamo gii dokopa endakali dupame pyoo kateaminoliaka pyoo katataminopa Endakalinya Ikiningi doko dee ipata. 38 Wamba* 24:38 Ip 11:7 endaki andake doko ipatala nayamopa endakali dupame neepi endakipi dupa nao katao, akali dupa enda lanyoo, enda dupa akali pao Noa endakinya paenge sipi dokonya kolandeamo gii dokonya tuu leami-pyaa. 39 Dupame* 24:39 1 Te 5:3; 2 Pi 3:6 aipa pitape lao masala nayawaka kateaminopa endaki andake dokome ipupala dokaita pitaka pyao soo pea-pyaana, tenda Endakalinya Ikiningi doko ipatamopa dopaka pita. 40 Gii dokopa endakali lapoma eenya katatambino dolaponya mende enjele dupame lanyepala mende yakinatami. 41 Dee enda lapomame palawa wasalanya wiisa dii takyoo indyuu pititambino dolaponya mende dupame lanyepala mende yakinatami. 42 Dopana,* 24:42 Mt 25:13 nyakamanya Kamongo doko andukupa ipatape lao masala naelyamino dokonya lenge tao kalyepape. 43 Nyakamame* 24:43 Lu 12:39; 1 Te 5:2; 2 Pi 3:10; Pa 3:3; 16:15 dake masalapape: akali anda tange dokome pake nenge akali mende kuka dokonya gii ongopa ipapomo lao wambao masetali kandao doko, baa lenge tao katapala baanya anda doko kaluina lao kayala nayatali. 44 Dopana,* 24:44 Lu 12:40 Endakalinya Ikiningi doko naipapomo lao masetami gii mendenyaka ipatana, nyakama apata depa latae kalyepape!” lea.
Kalai auu pyoo pingipi kopeta pingipi dokonya leamo doko
(Lu 12:42-46)
45 “Lelyamoli* 24:45 Pot 14:35; Mt 25:21-23 pyoo kalai pyakamaingi mona palenge akali kendemane doko apipi? Baa kamongo dokome baanya kendemane waka dupa isoo nee napenge gii dii lao makosoo maiyoo katena lenge kendemane doko daape. 46 Baame kalai auu pyoaka pyoo katatamopa baanya kamongo doko andaka pilyoo ipatamo kandao doko, baa mona yaepata. 47 Nambame* 24:47 Mt 19:28 nyakama kiningi langilyo, kamongo dokome baanya oapi dupa pitaka baanya kendemane dokome isakao katena lata. 48 Dopaka* 24:48-49 Lu 21:34 doko, baa kendemane koo tamo kandao baanya moname, ‘Nambanya kamongo doko yasoo waka ipatana,’ lao masetala, baame baanya kendemane yango dupa pyapapu waene nao kyakao paenge dupa-pipa neepi waenepi awapa nao katata. 50 Dopa pyoo katao baanya kamongo doko naipapomo lao masoo ambe lao katatamo gii dokopaka ipata. 51 Ipupala* 24:51 Mt 8:12; 13:42,50; 22:13; 25:30; Lu 13:28 kamongo dokome baa pyao etete indyepala minakasingi endakali dupa-pipa awapa katena lao katata. Dopa petatamopa baa dokonya katao ee lao yamataka lao nenge gilyoo katatana,” Jisasame dopa lea.
25Enda mapukae kingi ita mende makande pyoo kongali pii doko
1 “Endakalinya* 25:1 Lu 12:35-38; Pa 19:7 Ikiningi doko dee ipatamopa Kaitinya Katenge dokome isetamo doko, enda mapuakae kingi ita mende peteamino dupame akali enda kelyapala ipatamo doko kandanyemana latala, nyakamanya lama dupa kaiyoo minao peamino dopale jeta. 2 Enda* 25:2 Mt 7:24-27 dupanya yuungi masala naenge. Dee yuungi masepae. 3 Enda masala naenge dutupame nyakamanya lama minao pao pituu olipi ipange kamuoo namandeami-pyaa. 4 Dopaka doko, enda masepae dutupame nyakamanya lama dupa minao penge dupanya olipi ipange kamuoo mandyuu peami-pyaa. 5 Pupala akali doko enda kelyapala yapa naepeamosa, enda dokaita pitaka lemongati kayapala paleami-pyaa.
6 “Dokopa kuka andatombe dokonya wii mende epeamo dokome, ‘Akali enda kelyalamo doko olo epelyamona, nyakamame kandanyalapale pupa!’ lea-pyaa. 7 Dopa leamopa enda mapuakae dutupa pitaka sakatatala nyakamanya lama dupa depa leami-pyaa. 8 Dokopa enda masala naenge dutupame enda masepae dutupa lamaiyoo, ‘Naimanya lama datupa konjalanya pilyamona nyakamanya olipi ipange dupanya mendatupa naima dyepa,’ leami-pyaa. 9 Dopa leaminoaka doko, enda masepae dutupame dolotupanya pii yanu pyakamaiyoo lao pituu, ‘Olipi ipange atupame naimapi nyakamapi pitaka kapa napyapome lamona, sisoa andaka pupala nyakamanya waka sambatamino doko kapana,’ leami-pyaa. 10 Dopa* 25:10 Pa 19:9 leaminopa dokaitame sisoa andaka sambala pateaminopa enda keleamo akali doko epea-pyaa. Epeamopa enda depa latae peteamino dutupa baa-pipa enda watapae dokonya nee nalanya andaka kolandateaminopa kaitini pai lea-pyaa.
11 “Maitakao* 25:11 Mt 7:21-23; Lu 13:25-27 enda mapuakae mendatupa dutupame ipupala lao pituu, ‘Akali Andake! Akali Andake! Naima ipumana kaitini lumba!’ leami-pyaa. 12 Dopa leaminoaka doko, baame dokaitanya pii yanu pyao, ‘Nambame nayakama etete masala naelyona,’ lea-pyaa. 13 Dopa* 25:13 Mt 24:42; Mk 13:33-35; Lu 12:40 lea-pyaana, nyakamame yuu giipi kilokopi andukunya ipatape lao masala naelyaminona, lenge tao kalyepape,” Jisasame lea.
Kalai akali tempoma-pipa makande pyoo kongali pii doko
(Lu 19:11-27)
14 “Kaitinya* 25:14 Mk 13:34 Katenge dokome isetamo doko, akali mende baa yuu tependa mendakaita katama paanya pituu baame baanya kendemane dupa epena latala baanya oapi dupa pitaka isekena lao maiyamo dopale jeta. 15 Baame* 25:15 Lo 12:6 baanya kendemane dupa kandakondape petala, dupanya kalai pipenge jiamoli pyoo dupa mendai mendai lao muni mokosoo maiya-pyaa. Mende muni kina taosene yuungi maitala, mende taosene lapoma maitala, dee mende taosene mendai maiya-pyaa. Dopa petala baa paanya piamo dokonya pea-pyaa. 16 Pateamo dokopa muni taosene yuungi nyiamo akali dokome pupae lao pao muni dutupame pisinisa kalai petala dee taosene yuungiaka konda pyoo nyia-pyaa. 17 Mendai dopaka pyoo muni taosene lapoma nyiamo akali dokome pisinisa kalai petala taosene lapomaka konda pyoo nyia-pyaa. 18 Dopaka doko, muni taosene mendai nyiamo akali dokome pao yuli tombapala baanya kamongo dokonya muni dutupa yuli pia-pyaa.
19 “Yuu* 25:19 Mt 18:23; 2 Ko 5:10 longo pateamopa, maitakao kendemane dokaitanya kamongo doko dee pilyoo ipupala, muni maiyamo dokonya dutupa-pipa pii lao wasalanya pia-pyaa. 20 Dopa piamopa muni taosene yuungi nyiamo akali dokome taosene yuungi dee konda pyoo minao ipupala lao pituu, ‘Akali Andake, embame namba muni taosene yuungi diino doko, nambame taosene yuungiaka potopesa nyiona, kanda,’ lea-pyaa. 21 Dopa* 25:21 Mt 19:28; 24:45-47; Lu 16:10 leamopa baanya kamongo dokome baa lamaiyoo, ‘Kalai yaka pyekee lamo! Emba kendemane epe dokome auu pii lamo. Embame kalai kuki dutupa nambame leoli pyoo auu pyoo isii lamo dokonya nambame emba longo dupa isoo kata latoo. Embapa nambapa mona yaepao katambana ipu,’ lea-pyaa.
22 “Dokopa akali muni taosene lapoma nyiamo dokome apata ipupala lao pituu, ‘Akali Andake, embame namba muni taosene lapoma diino doko, nambame taosene lapomaka potopesa nyiona, kanda,’ lea-pyaa. 23 Dopa* 25:23 Jo 15:11; 17:24 leamopa baanya kamongo dokome baa lamaiyoo, ‘Kalai yaka pyekee lamo! Emba kendemane epe dokome auu pii lamo. Embame kalai kuki dutupa nambame leoli pyoo auu pyoo isii lamo dokonya nambame emba longo dupa isoo kata latoo. Embapa nambapa mona yaepao katambana ipu,’ lea-pyaa.
24 “Dokopa muni taosene mendai nyiamo akali dokome apata ipupala lao pituu, ‘Akali Andake, emba akali tomba neleno nambame kandenge. Embame eenya waingi pokala naeleno dupanya yukuoo nao, dee waingi lyandala naeleno dupanya mandyuu nao pingi kandapi. 25 Dopa pingi dokonya nambame paka kayapala embanya muni dutupa pao yuli piona, embanya muni datupa ae silyamo, kanda,’ lea-pyaa.
26 “Dopa leamopa baanya kamongo dokome baa lamaiyoo, ‘Emba akali koo maka kayapae lamo! Nambame eenya waingi pokala naelyo dupanya yukuoo nao, waingi lyandala naelyo dupanya mandyuu nelyopi dupa embame kandenge lumu doko, nambanya muni dupa potopesa mandenge beŋe mendenya pyasekeeli kandao doko, namba dee pilyoo ipupala nambanya muni dutupa-pipa potopesa mendatupa apata nyipuli. 28 Dopana, nyakamame muni taosene mendai doko yukuoo nyepala taosene kingi ita mendai minilyamo akali doko maiyepa. 29 Doko* 25:29 Mt 13:12; Mk 4:25; Lu 8:18 aipuma? Opale singi endakali dupa pitaka nambame mendatupa apata konda pyoo maitopa dupa-kisa longo seta. Dopaka doko, opale nasingi endakali doko-kisa setamo dolapo nyokonyoto. 30 Dopana,* 25:30 Mt 8:12; 13:42,50; 22:13; Lu 13:28 nyakamame kendemane koo dake yuu etete iminjetae koo dokonya soo pyale laapa! Dokonya katao baa ee lao yamataka lao nenge gilyoo katatana,’ kamongo dokome dopa lea-pyaana,” Jisasame lea.
Endakalinya Ikiningi dokome endakali pitaka mokosetamo doko
31 “Tenda* 25:31 Mt 16:27; 19:28; 2 Ko 5:10; Pa 20:11-13 Endakalinya Ikiningi doko baanya tii pipae dokonya tambetambe enjele dupa pitaka-pipa awapa ipupala, baa etete kamongao kiŋi petenge toko dokonya pitita. 32 Pititamo* 25:32 Ese 34:17; Lo 14:10 dokonya endakali paliuu pelyamo dupa pitaka baanya enombasa nyoo limbatami. Dopa pitaminopa mena sipisipi setao katenge akali mendeme sipisipipi memepi wakale mokosingili pyoo baame endakali dupa mokoseta. 33 Mokosoo pituu baame mena sipisipi jepae dupa baanya kingi tolae-kaita katena latala meme jepae dupa kingi koya-kaita katena lata.
34 “Dokopa* 25:34 Ais 58:6-8; Mt 5:3; Lu 12:32; Lo 8:17; Ep 1:4; Pa 13:8; 17:8 kiŋi dokome kingi tolae-kaita katatamino dupa lamaiyoo lao pituu, ‘Nyakama nambanya Takangeme auu piseteana ipupa! Yuupi kaitipi tee piamo dokopa baame isingi panda doko nyakamanyana lao depa lanya setekeamo dokona nyala ipupa. 35 Wamba* 25:35 Jop 31:17; Ais 58:7; Ese 18:7; Ip 13:2-3; Je 1:27; 2:15-16 namba lopo kayopa nyakamame nee diami. Endaki nanu kayopa kamuoo diami. Opone joo epeopa lanyiami. 36 Yambale napyoo kateopa diami. Yaina siopa kanja epeami. Anjetae paleopa kanja epeamiakana,’ kiŋi dokome dopa lata. 37 Dopa latamopa endakali tolatae dupame yanu pyao: ‘Akali Andake, naimame andukupa emba lopo kayenopa kandatala nee diamape? Andukupa endaki nanu kayenopa kamuoo diamape? 38 Andukupa opone joo epeenopa kandatala lanyiamape? Andukupa yambale napyoo kateenopa diamape? 39 Andukupa naimame emba yaina siinopapi anjetae paleenopapi kandatala kanja epeamape?’ latami. 40 Dopa* 25:40 Pot 19:17; Mt 10:42; 18:5; Mk 9:41; Lu 10:16; Ap 9:5; Ip 6:10; Je 2:14-17 lataminopa kiŋi dokome dokaita lamaiyoo dapa lata: ‘Nambame nyakama kiningi langilyona, nambanya kaiminingi datupanya koo mende nisiamino dokome, namba nisiamiakana,’ lata.
41 “Dopa* 25:41 Mt 7:23; Mk 9:48; Lu 16:23; Pa 20:10 latala baame kingi koya-kaita katatamino dupa lamaiyoo lao pituu, ‘Nyakama watao pyataena namba yakinatala pupa! Goteme Satanepi Satanenya enjele koopi dupanya lao itate konjala naenge setakamaiyamo dokonya nyakama pupa! 42 Wamba* 25:42 Jop 22:7 namba lopo kayopa nyakamame nee nandiami. Endaki nanu kayopa kamuoo nandiami. 43 Opone joo epeopa lanyala nayami. Yambale napyoo kateopa nandiami. Yaina siopapi anjetae paleopapi kanja naepeamina,’ lata. 44 Dopa latamopa dokaitame apata yanu pyao, ‘Akali Andake, andukupa naimame emba lopo kayenopapi, endaki nanu kayenopapi, opone joo epeenopapi, yambale napyoo kateenopapi, yaina siinopapi, anjetae paleenopapi kandatala nisala nayamape?’ latami. 45 Dopa* 25:45 Mt 10:41 lataminopa kiŋi dokome dokaita lamaiyoo, ‘Nambame nyakama kiningi langilyona, nyakamame endakali datupanya koo mende nisala nayamino dokome, namba nisala nayamiakana,’ lata. 46 Dopa* 25:46 Dan 12:2; Jo 5:29 latala Goteme endakali dokaita yanu nyetamopa tanda nao etete katatami. Dopaka doko, endakali tolatae dupa lete etete katatamina,” Jisasame dopa lea.
26Jisasa pyao kumasemana lao kambuiyamino doko
(Mk 14:1-2; Lu 22:1-2; Jo 11:45-53)
1 Jisasame* 26:1-2 Mt 7:28; 11:1; 19:1* 26:1-2 Eke 12:1-27; Mt 20:18 pii manapi dokaita pitaka lamaiyoo etapala, baanya disaipele dupa lamaiyoo, “Koto lapoma sepatamopa Napinya Kayamo Gii ipata doko nyakamame masilyamino. Dokopa endakali mendapuame Endakalinya Ikiningi doko ita pokonya pyao yukuina lao akali mendeme dokaitanya kingilyaka maitana,” lea.
3 Gii* 26:3 Wee 2:1-2 undinaka pitisa mupapi Jutamanya isingi akalipi dupa, pitisa mupa Kayapasa lenge dokonya andaka kambu piami-pyaa. 4 Dopa* 26:4 Jo 11:47-53; Ap 4:25-27 petala dokaitame waa katao Jisasa anjetala pyao kumasemana lao kambuiyami-pyaa. 5 Dopa piaminoaka doko, dee dupame lao pituu, “Aopyoo latala endakali dupame pyao pilya pyana pitamina, gii epe dokonya dopa napimanalena,” leami-pyaa.
Enda mendeme Jisasanya aiyomba kai pyakamaiyamo doko
(Mk 14:3-9; Jo 12:1-18)
6 Jisasa* 26:6 Lu 7:36-38 baa yuu taono Betani dokonya akali kopetali Saimone lenge dokonya andaka petea. 7 Dokopa enda mendeme wele penge yakane mendenya wele tunduma pipaeme tumbatae muni longome sambenge mende minao Jisasa peteasa epea. Dopa petala baame wele doko aiyombanya kai lao kai pyakamaiya. 8 Dopa piamo doko disaipele dupame kandatala imbu kayao, “Aipuma wele dake mee maa yangelya kanjemape! 9 Wele dake endakalimi sambapiminopa yole andake nyepala endakali tipya dupa maipenge jipyalina,” leami. 10 Dopa leamino doko Jisasame sepala dokaita lamaiyoo, “Aipuma nyakamame enda dake kenda pisilyamipi? Baame namba-kisa kalai epe wakane mende pyakalamo. 11 Endakali* 26:11 Dit 15:11 tipya dupa koteaka lao nyakama-pipa katengemaka doko, namba nyakama-pipa koteaka lao nakatatama. 12 Enda* 26:12 Jo 19:40 dakeme wele dake nambanya yongenya kai lao kai pyakalamo dokome namba malu pina lao depa lalamo. 13 Nambame nyakama kiningi langilyona, Wai Pii Epe doko yuu dupa pitakanya lamaitaminoli pyoo, endakali dupame enda dake masina lao baame pyomo doko lao tayatamiakana,” Jisasame lea.
Jutasame Jisasa enge nyiamo doko
(Mk 14:10-11; Lu 22:3-6)
14 Gii* 26:14-15 Jo 11:57* 26:14-15 Jen 37:28; Eke 21:32; Sak 11:12 dokopa disaipele kingi ita mende-kisa dee lapoma dupanya mende Jutasa Isaketiote lenge doko pitisa mupa dupa kateamisa pupala baame dokaita pisoo, “Nambame Jisasa nyakama laitaka pitoo nyakamame namba aki mende ditamipi?” lea-pyaa. Dokopa dokaitame baa muni silipa kingi ita tepoma maiyami-pyaa. 16 Gii dokopa tee pyao baame Jisasa dokaita laitaka pyaanya kaitini mende kutao katea-pyaa.
Napinya Kayamo Nee neamino doko
(Mk 14:12-21; Lu 22:7-14,21-23; Jo 13:21-30)
17 Betesanya* 26:17 Eke 12:14-20; Jo 13:1; 18:28; 19:14 iisa napalyoo nenge gii mupa dokonya disaipele dupame Jisasa kateasa ipupala baa lamaiyoo, “Napinya Kayamo Nee doko emba natale andusa naimame depa lakamili lao masilipi?” leami. 18 Dopa* 26:18 Mt 21:3; 26:45; Jo 2:4; 7:6; 12:23; 13:1; 17:1 leaminopa baame dokaita lamaiyoo, “Nyakamame yuu taono Jetusaleme dokonya pupala akali mende kanjaminona doko dapa lamaiyepape: ‘Mana Lenge Akali dokome, “Nambanya gii doko tengesa petelyamona,” laamo. “Napinya Kayamo Nee doko nambame nambanya disaipele dupa-pipa embanya andaka natoo,” laamona,’ lao lamaiyepape,” lea. 19 Dokopa* 26:19 Dit 16:5-8; Mt 21:6 disaipele dupame Jisasame leamoli petala Napinya Kayamo Nee doko depa leami.
20 Yuu kualanya piamopa Jisasa baa disaipele kingi ita-kisa dee lapoma dutupa-pipa nee nao peteami. 21 Nao* 26:21 Wee 55:13-14 pituu baame dokaita lamaiyoo, “Nyakamanya mendeme namba enge nyipimina yandapipi dupa laitaka pyaaminona lao nyakama kiningi langilyona,” lea. 22 Dopa leamopa dokaitame mona etete kenda kayapala mendai mendai lawame baa pisoo, “Kamongo, embame leeno doko, namba kandao leepe?” laa laa peami. 23 Dopa* 26:23 Wee 41:9; Jo 13:18 leaminopa Jisasame yanu pyao, “Nambapa disanya nee poyao nyilyambano akali dokome namba yandapipi dupa laitaka pyaapomo. 24 Kini,* 26:24 Jop 3:3; Mt 18:7; Lu 24:25; Jo 17:12; Ap 17:2-3 Endakalinya Ikiningi dokonya lao Gotenya pii pepa pyapae singi dokonya lapae silyamoli pyoo, baa kumalapomo. Dopaka doko, Endakalinya Ikiningi doko enge nyilyamo akali doko koyata iki lamo! Akali doko endangimi manja nayali kandao baa yaka jipyalina,” lea. 25 Dopa leamopa baa enge nyiamo akali Jutasa dokome yanu pyao, “Mana Lenge Akali, embame leeno doko, nambame lao leepe?” lea. Dopa leamopa Jisasame baa lamaiyoo, “Emba tangeme latelenona,” lea.
Jisasame baanya nee doko disaipele dupa maiyamo doko
(Mk 14:22-26; Lu 22:15-20; 1 Ko 11:23-25)
26 Dupa-pipa* 26:26 Mt 14:19; 15:36; Jo 6:51-58; 1 Ko 10:16 nee nao pituu Jisasame betesa mende nyepala Gote lao yaka pilino latala konjia. Konjepala baanya disaipele dupa maiyoo pituu, “Dake nambanya yonge dokona, nyoo nalapa,” lea. 27 Dee baame kapo penge mende nyepala yaka pilino latala dokaita maiyoo pituu, “Nyakama pitakame nyoo nalapa. 28 Dake* 26:28 Eke 24:6-8; Ais 53:12; Jet 31:31-34; Sak 9:11; Mk 1:4; 1 Ko 10:6; Ip 9:20 nambanya taiyoko dokona, koo dupa kunanya nepakalanya kai lekelyo dokome endakali dupa pitakanya Goteme pii lao seteamo doko angi injisilyamo. 29 Dee nambame nyakama langilyona, indupa pituu nambame getepe ipange dake nala nayawaka katao tenda nambanya Takangeme isingi dokonya, nyakama-pipa awapa getepe ipange enenge doko natamano gii dokonya tuu latona,” Jisasame lea. 30 Dopa* 26:30 Lu 22:39; Jo 18:1; 14:31 lateamopa dokaitame wee mende latao pituu kamanda pyakalyetala Olipimanda dokonya peami.
Jisasame Pita kandao embame namba nakandengena laapeno leamo doko
(Mk 14:27-31; Lu 22:31-34; Jo 13:36-38)
31 Dokopa* 26:31 Sak 13:7; Jo 16:32 Jisasame dokaita lamaiyoo, “Indupa kuka gii dakepa nyakama pitakame namba yakinatala lombapae salamino. Doko, Gotenya pii pepa pyapae singi dokonya, ‘Sipisipi setao katenge doko nambame pyatopa, sipisipi ambo doko polao wakale puu puu pyoo patamina,’ lapae silyamo. 32 Dopaka* 26:32 Mt 28:7,10,16 doko, Goteme namba dee sakatasetatamopa nyakama nyoo maita pyatala Galili yuu dokonya wambatona,” lea. 33 Dokopa Pitame Jisasa lamaiyoo, “Yangi dupa pitakame emba yakinatala lombapae setamino kandao, nambame dopa napyaapo etete daana,” lea. 34 Dopa* 26:34 Mt 26:69-75 leamopa Jisasame baa lamaiyoo, “Nambame emba kiningi langilyona, indupa kuka gii dakenya yaka pauli pii ene laanya pitamopa, paa tepomasa embame namba nakandengena laapenona,” lea. 35 Dee* 26:35 Mt 26:56 Pitame yanu pyao, “Namba embapa awapa kumatambano doko kapakana, nambame emba nakandengena etete laa nayalapona,” lea. Dopa leamopa disaipele dupa pitakame dopaka leami.
Jisasame Gesemani pao loma siamo doko
(Mk 14:32-42; Lu 22:39-46)
36 Dokopa* 26:36 Jo 18:1* 26:36 Jo 12:27-30 Jisasa baanya disaipele dupa-pipa yuu Gesemani lenge dokonya peami. Pupala baame dupa lamaiyoo, “Namba omosa loma sala pelyona nyakama asa pilyepa,” lea. 37 Dopa* 26:37-38 2 Ko 12:8 latala baame Pitapi Sepete ikiningi dolapopi laminao pea. Pupala baa mona etete kenda kayapala dokaita lamaiyoo, “Nambanya mona doko etete kenda petala kumapenge julumuna, nyakama asa kandao katamana kalyepape!” lea-pyaa. 39 Dopa* 26:39 Mt 6:10; 20:22; Jo 4:34; 6:38; 18:11; Lo 5:19; 2 Ko 6:10; Pl 2:8; Ip 5:7-10 latala baa kuki umbisale pao yuunya tombauli sepala loma soo pituu, “Nambanya Takange, embame namba-kisa kenda pipae silyamo dake nyoo nepakapenge jia kandeno doko, nyoo nepakape! Dopaka doko, nambame masilyoli napinya, embame masetenoli pipi,” lea-pyaa.
40 Dopa lao loma setala ipao disaipele tepoma dutupa kandeamopa luu palyasiamisa baame Pita lamaiyoo, “Anematupa, aipa petala gii kuki iki dutupanya nyakamame namba-pipa kapa pao kandao isoo nakatalamipi? 41 Makande* 26:41 Wee 69:20; Mt 6:13; Lu 11:4; Lo 7:5; Ip 2:14; 4:15 pingi dupanya nyakama pao koyatamane lao kandao isoo loma soo kalyepape. Moname pyuani kaelyamoaka doko, yongeme papa tambuingina,” lea-pyaa.
42 Dopa* 26:42 Jo 4:34; 5:30; 6:38; Ip 10:9 latala Jisasame dee paa lapo pyoo pao loma soo pituu, “Nambanya Takange, nambame kenda pipae dake kayala nayao nyepengeaka jia kandeno doko, embame masetenoli pipi,” lea-pyaa. 43 Dopa latala dee ipao disaipele dutupa kandeamopa lemongati kayapala luu paliuu kateami-pyaa.
44 Jisasame* 26:44 2 Ko 12:8 dutupa yakinatala dee paa tepo pyoo loma sala pupala pii wamba leamo dutupaka lao loma sia-pyaa. 45 Loma* 26:45-46 Mt 26:18; Jo 12:23; 13:1; 17:1* 26:45-46 Jo 14:30-31 setala baame ipao disaipele dutupa lamaiyoo, “Nyakama mee luaka paliuu koto nyilyamipi? Kandeleno! Gii doko ipatelyamo. Akali mendeme Endakalinya Ikiningi doko koo pingi endakali dupa laitaka pyaapomona, mona nyakama sakatalapa. Namba enge nyipumu akali doko ipatelyamona, kanjepa!” lea-pyaa.
Jutasame Jisasa dokaita laitaka piamo doko
(Mk 14:43-50; Lu 22:47-53; Jo 18:3-12)
47 Jisasame dopa lao kateamopaka baanya disaipele kingi ita-kisa dee lapoma dutupanya mende Jutasa lenge doko epea. Baa-pipa awapa endakali kambu andake mendeme konjuapi kolyepepi dupa minao, pitisa mupapi Jutamanya isingi akalipi dupame pena leaminopa epeami. 48 Jisasa enge nyiamo akali dokome endakali kambu doko wambao lamaiyoo, “Nambame akali mende nunu pio kondeno doko, baana, nyakamame minalapape!” lea-pyaa. 49 Dopa* 26:49 Pot 27:6; Mt 26:23 lamaitala ipao baa Jisasa kateasa tolao pupala, “Mana Lenge Akali, emba asa katalepe?” latala baa nunu pia. 50 Dopa* 26:50 Jo 18:26 piamopa Jisasame baa lamaiyoo, “Kaimia, embame angi pyaanya ipate doko yapa pii!” lea. Dokopa dokaitame ipao baa minatala anjiami. 51 Dopa piaminopa Jisasa-pipa awapa kateamino dupanya mendeme baanya konjua doko kolanyetala, pitisa mupa dokonya kendemane mendenya kale doko taka lanya nepea. 52 Dopa* 26:52 Jen 9:6; Pa 19:10 piamopa Jisasame baa lamaiyoo, “Embanya konjua doko palenge andanda dokonya mandi! Konjua minao yanda pingi dupa pitaka, konjuameaka kumingi. 53 Nambame* 26:53 Jo 18:36 nambanya Takangeme namba nisina lao wii lapupa baame gii dokopaka enjele tata kingi ita-kisa dee lapoma ita minao etete longo epena lapyalina lao embame masala naelepe? 54 Dopaka* 26:54 Lu 24:26-27 doko, nambame dopa pipuli kandao, Gotenya pii pepa pyapae singi dokonya dopaka pitana lapae silyamo doko aipa petala angi jipyalipi?” Jisasame lea.
55 Dopa* 26:55 Lu 19:47; 21:37; Jo 18:19-21 latala dokopa baame endakali kambu doko lamaiyoo, “Nyakamame akali pake nao makongao paenge mende anjala epele lao konjuapi kolyepepi dupa minao namba anjala epelyamipi? Nambame koteaka lao losuu anda andake dokonya endakali dupa mana lamaiyoo kateo dokopa nyakamame namba anjala nayami. 56 Dopaka* 26:56 Mt 26:31 doko, potopesa dupame pii pepa piami dupa angi jina lao dutupa pitaka pilyamona,” lea.
Dokopa disaipele dupa pitakame Jisasa yakinatala paka peami.
Jisasa kosimi leamino doko
(Mk 14:53-65; Lu 22:54-55,63-71; Jo 18:13-14,19-24)
57 Jisasa anjiamino akali dupame baa laminao pitisa mupa Kayapasa kateasa peaminopa, mana setapae masingi akalipi isingi akalipi dupa ipao dokonya kambu piami-pyaa. 58 Dokopa* 26:58 Jo 18:15-16 Pitame Jisasa watao tependale joo pea-pyaa. Pupala pitisa mupa dokonya anda kamapisa kolamatala aipa pilyamipi lao kandatoo latala lome kambu isoo katenge dupa-pipa petea-pyaa. 59 Pitisa* 26:59 Wee 35:11-12; Jet 26:11; Ap 25:7 mupapi kanjole dupa pitakapimi Jisasa pyao kumasemana latala akali mendapuame baa-kisa sambo pii setao kosimi lena lao kutiami-pyaa. 60 Dokopa* 26:60-61 Mt 27:2,40; Jo 2:19:21; Ap 6:14 akali longo ipupala Jisasa-kisa sambo pii setao kosimi leami-pyaa. Dopa piaminopaka doko, baa pyao kumasepenge tenge mende kandao nanyiami-pyaa. Dee ete pyoo akali lapoma ipupala lao pituu, “Akali dakeme dapa lea: ‘Gotenya losuu anda andake doko kapa pao lakyepala, yuu gii tepoma pito,’ leana,” leambi-pyaa.
62 Dokopa pitisa mupa dokome toya katapala Jisasa lamaiyoo, “Pii emba kandao lelyambino dake embame yanu napilino doko, aipa pyoo lelyambipi?” lea-pyaa. 63 Dopa* 26:63 Ais 53:7; Mt 27:11-12; Jo 18:33 leamoaka doko, Jisasa ema napia-pyaa. Dokopa pitisa mupa dokome dee baa lamaiyoo, “Nambame emba pii mende pisilyona embame Gote lete katenge doko lao masetala angi langipi. Emba Gote Ikiningi, Kataisa dokope?” lea-pyaa. 64 Dopa* 26:64 Wee 110:1; Dan 7:13; Mt 16:28; 24:30; Ap 2:33; 7:55 leamopa Jisasame baa lamaiyoo, “Embame lateleno. Dopaka doko, nambame nyakama dapa langilyo: indupa pituu tenda tuu lao Endakalinya Ikiningi doko Gote etete pupu lapae dokonya kingi tolae dokonya katao kaitinya kopa ketae dokonya ipatamo nyakamame kandatamina,” lea-pyaa. 65 Dopa* 26:65 Nam 14:6; Mt 9:3; Jo 10:33; Ap 14:14* 26:65 Lep 24:16 leamosa pitisa mupa dokome baa tangenya yonge pee dupa minao lapyepala lao pituu, “Baame Gote kilya kandao lelyamo. Aipuma naimame endakali mendapuanya pii deaka nyetamape? Epapu baame Gote kilya kandao pii lelyamo doko nyakamame sepelyamino! 66 Sepala* 26:66 Jo 19:7 nyakamame aipa lao masilyamipi?” lea-pyaa. Dopa leamopa dupame baanya pii yanu pyakamaiyoo, “Pyao kumasepenge julumuna,” leami-pyaa. 67 Dopa* 26:67-68 Ais 50:6; 52:14; 53:5 latala dupame baanya lengelyaapinya sopakalimi pyapala kii momangame piami-pyaa. Dee mendapuame baa pyao pituu, “Kataisa, akali dokome pilyamo lao embame laa!” leami-pyaa.
Pitame namba Jisasa nakandengena leamo doko
(Mk 14:66-72; Lu 22:56-62; Jo 18:15-18,25-27)
69 Pita anda kamapisa peteamopa pitisa mupa dokonya kalai pyakamaiyoo petenge enda dupanya mendeme baa peteamo dosa ipupala lao pituu, “Emba apata akali Galili tange Jisasa dokopa awapa katengembana,” lea-pyaa. 70 Dopaka doko, Pitame endakali dupa pitakanya enombasa tanga lao lao pituu, “Embame leeno doko namba nakandengena,” lea-pyaa. 71 Dopa latala baa pao lome kambu dosa peteamopa dee kalai pingi enda waka mendeme kandatala endakali dosa kateami dupa lamaiyoo, “Baa Nasatete tange Jisasa dokopa awapa katengembana,” lea-pyaa. 72 Dokopa Pitame deaka tanga lao, “Namba akali doko etete nakandenge mauwana,” lea-pyaa. 73 Dee kuki maitakawale akali dosa kateami dupame ipupala Pita kandao, “Embanya pii dokome panalumuna, kiningi etete emba akali dupanya mendeaka lamona,” leami-pyaa. 74 Dopa* 26:74 Isi 12:6 lateaminopa Pitame lao pituu, “Namba akali doko nakandenge mauwana, sambo lato kandao doko, Goteme namba pinana,” lea-pyaa. Dopa lalu piamopa yaka pauli pii mende lea-pyaa. 75 Wamba* 26:75 Mt 26:34 Jisasame Pita kandao, “Yaka pauli pii ene laanya pitamopa embame paa tepomasa namba nakandengena laapeno,” leamo doko Pitame masia-pyaa. Masetala kamaka pao ee lao yamataka lea-pyaa.
27Jisasa anjoo soo Pailate kateasa peamino doko
(Mk 15:1; Lu 23:1-2; Jo 18:28-32)
1 Dokopa pitisa mupa dupapi Jutamanya isingi akali dupapi dupa pitakame Jisasa pyao kumasepenge dokonya lao yongama wamba kambuiyami-pyaa. 2 Dopa petala dupame Jisasa kendeme anjetala anjoo soo pao kapomane andake Pailate maiyami-pyaa.
Jutasa kumiamo doko
(Ap 1:18-19)
3 Jisasa* 27:3 Eke 21:32; Mt 26:14-15 enge nyiamo akali Jutasa dokome kandeamopa dupame baa pyao kumasemana leaminosa, baa mona kenda kayapala muni silipa kingi ita tepoma nyiamo dutupa pitisa mupapi Jutamanya isingi akalipi dupa kateamisa yukuoo minakamaiyoo pea-pyaa. 4 Dopa petala baame dokaita lamaiyoo, “Akali mana koopi naminingi mende nambame koo pyoo enge nyio dokonya baa kumata lamona,” lea-pyaa. Dopa leamoaka doko, dokaitame lao pituu, “Doko naimanya kalaipi? Daa, embanya kalaina,” leami-pyaa. 5 Dokopa* 27:5 Ap 1:18 baame muni dutupa losuu anda andake dokonya kainanya pyale latala pea-pyaa. Pupala baame baa tange kende katatala yukuotae katea-pyaa.
6 Pitisa* 27:6 Dit 23:18 mupa dupame muni dutupa yapao nyepala lao pituu, “Endakali pyao kumasalanya muni datupame enge nyepae dokonya, losuu anda andakenya muni singi dokonya setala nayapengena,” leami-pyaa. 7 Dokonya dupame pii wasoo latala, endakali waka kumatami dupa malu pipengena lao, akali titopene penge akipi yuumi wasingi dokonya yuu doko muni dutupame sambeami-pyaa. 8 Tenge dokonya endakali dupame yuu doko kandao kenge Taiyokopausa leami doko indupa mee lelyaminoaka. 9 Dopa* 27:9-10 Jet 18:2-3; 32:6-15; Sak 11:12-13 piamino dokome pii mende wamba Goteme potopesa Jetamaya lungu piamopa baame dapa leamo doko etete angi jia-pyaa: “Isataele endakali dupame pii lao wasetala muni silipa kingi ita tepoma baapa kapana lateamino muni dutupa nyepala, Kamongo dokome namba langiamoli pyoo titopene akipi wasingi akali dokonya yuu doko sambeamina,” lea-pyaa.
Pailateme Jisasa pisiamo doko
(Mk 15:2-5; Lu 23:3-5; Jo 18:33-38)
11 Jisasa* 27:11 Mt 27:29 baa kapomane andake dokonya enombasa kateamopa kapomane andake dokome baa pisoo, “Emba Jutamanya kiŋi dokope?” lea-pyaa. Dopa leamopa Jisasame yanu pyao, “Embame latelenona,” lea-pyaa. 12 Dokopa* 27:12 Ais 53:7; Mt 26:63 pitisa mupapi Jutamanya isingi akalipi dupame baa-kisa tenge seteaminopa, baame yanu pyao mende nalea-pyaa. 13 Dopa piamopa Pailateme baa lamaiyoo, “Emba-kisa tenge longo setao pii lelyamino dupa embame nasilipi?” lea-pyaa. 14 Dopa* 27:14 Ais 53:7; Mt 26:63; Mk 14:60; Lu 23:9; Jo 19:9; 1 Ti 6:13 leamopa Jisasame pii leamino dupanya mendaipi mende yanu pyao baa lamaiya naya-pyaa. Dopa piamopa kapomane andake doko etete mona andea-pyaa.
Jisasa pyao kumasina Pailateme leamo doko
(Mk 15:6-15; Lu 23:13-25; Jo 18:39–19:16)
15 Ee kana dii lao Napinya Kayamo Gii epe doko epelyali pyoo, kapomane andake dokome endakali anjetae palelyami dupanya mendai mende endakali dupame mokekena lelyamili pyoo mokata pyakamaingi-pyaa. 16 Dee akali Batapasa lenge mendeme pundu nyilyamosa kenge singi mende anjiami doko gii dokopa anjetae palea-pyaa. 17 Dokonya endakali dupa ipao kambu pyateaminopa Pailateme dokaita pisoo, “Nambame nyakamanya api mokakapili lao masilyamipi? Batapasa dokope, pande Kataisa lengema Jisasa dokope?” lea-pyaa. 18 Dopa* 27:18 Jo 11:47-48; 12:19 leamo doko, dupame Jisasa tilya maitala baa maiyamino doko masetala dopa lea-pyaa.
19 Pailate* 27:19 Lu 23:4 baa kosa lao petenge toko dokonya peteamopa, baanya etanengeme, “Embame akali tolatae doko mende napipi. Nambame kuka kombeame baa kandao neame kumalona,” lanya pea-pyaa.
20 Dopaka doko, pitisa mupapi isingi akalipi dupame endakali kambu piamino dupa lamaiyoo, “Batapasa mokatala Jisasa pyao kumasina Pailate lamaiyepa,” lao lungu piami-pyaa. 21 Dopa* 27:21 Ap 3:13-14 piaminopa kapomane andake dokome dokaita pisoo, “Nambame akali lapoma dolaponya anduku nyakamanya mokakapili lao masilyamipi?” lea-pyaa. Dopa leamopa dokaitame yanu pyao, “Batapasana,” leami-pyaa. 22 Dokopa Pailateme lao pituu, “Dopa tamo doko, nambame Kataisa lengema Jisasa doko aipa pyuape?” lea-pyaa. Dopa leamopa dokaita pitakame lao pituu, “Ita pokonya pyao yuka!” leami-pyaa. 23 Dopa leaminoaka doko, baame dokaita lamaiyoo, “Baame koo aki mende piape?” lea-pyaa. Dopa leamopa dokaitame eteteaka puu lao lao, “Baa pyao yuka!” leami-pyaa. 24 Dokopa* 27:24 Dit 21:6-9; Wee 26:6; Mt 27:4; Ap 18:6 Pailateme dokaitanya pii doko nyoo isa palyala nayatopa pyao pyaamini lamo lao kandatala, endaki mendalapo nyoo endakali dupanya enombasa baanya kingi kaimbu pyao pituu, “Akali dake taiyoko nyilyamino dokonya tenge doko namba-kisa nasilyamo. Doko nyakamanya kalaina,” lea-pyaa. 25 Dopa* 27:25 Jas 2:19; Mt 23:35; Ap 5:28 leamopa endakali dupa pitakame yanu pyao, “Dokonya tenge doko naimapi naimanya wane dupa-kisa sinana!” leami-pyaa. 26 Dokopa Pailateme Batapasa doko mokatakamaitala, Jisasa konjame+ 27:26 konja Jutapi Loma tange dupapi dupame kende mendapua elyambu pyoo minatala puna dupanya kana kuli akipi mendapua anjilyamipi dee puna dupa pongo pongo pilyamipi petala pingima-pyaa.pyapala pyao yukuina lao yanda singi dupa maiya-pyaa.
Yanda singi dupame Jisasa minakasoo lamba leamino doko
(Mk 15:16-20; Jo 19:2-3)
27 Dokopa kapomane andake dokonya yanda singi dupame Jisasa laminao kapomane andake petenge anda dokonya kolandatala, yanda singi tata doko pitaka epena latala Jisasa kateasa kambu piami-pyaa. 28 Dopa* 27:28 Lu 23:11 petala dupame baanya yonge pee pingi dupa lyokao nyepala kate pyapaele ketae pingi mendeme baa yapu neami-pyaa. 29 Dee* 27:29 Mt 27:1 dupame ikililyambu mendapua nyoo langapu pipala Jisasanya aiyombanya petakamaitala, kyoo konja mende baanya kingi tolae-kaita minasakamaiyami-pyaa. Dopa petala dupame baa kandao minakasoo luma lakao lamba lao lao pituu, “Jutamanya Kiŋi, emba auu pyoo katape!” leami-pyaa. 30 Dee* 27:30 Ais 50:6 dupame baa sopakalimi pyapa kyoo konja doko nyepala baanya aiyombanya pyapa piami-pyaa. 31 Dupame baa minakasoo etapala dokopa yonge pee wamba pyakamaiyamino doko lyokao nyepala, baanya dupa tange petakamaitala baa pyao yukualanya laminao peami-pyaa.
Jisasa ita pokonya pyao yukuiyamino doko
(Mk 15:21-32; Lu 23:26-43; Jo 19:17-27)
32 Paon* 27:32 Ip 13:12 kamalyatena pyakamatala akali Saitini tange Saimone lenge mende kandanyetala yanda singi dupame Jisasanya ita poko doko sakamaina leami. 33 Dokopa dupame yuu Golokota lenge dokonya pao pyakameami. Kenge Golokota dokonya tenge doko Matenakulimanda lengema. 34 Yuu* 27:34 Wee 69:21; Pot 31:6 Golokota dokonya pyakamatala yanda singi dupame matasini etete kaa pipae mendapuame pyasilya pyasena petala waene mende baa maiyaminopa nakande setala kaya.
35 Dokopa yanda singi dupame baa ita pokonya pyao yukuotala, kana yakane dupa pyasoo male pyoo+ 27:35 male pyoo Naimame opale mende ita minao nyalanya masisa pyao male pingili pyoo yanda singi amii dupame Jisasanya yonge pee nyalanya kana yakane dupa pyasoo ita minao nyiami-pyaa.ita miniamino akali dupame Jisasanya yonge pee dupa mokosoo nyiami. 36 Dopa petala dupame Jisasa isoo dosa peteami. 37 Jisasa-kisa tenge seteami pepa pyapae doko baanya aiyomba sia ketae dosa yukuiyami. Pepa dokonya, “Dake Jisasa, Jutamanya Kiŋi dokona,” latae katea. 38 Dokopa* 27:38 Ais 53:9 pake nao makongao paenge akali lapoma Jisasa-pipa awapa pyao yukuiyami. Mende doko baanya kingi tolae-kaita, mende doko koya-kaita yukuiyami.
39 Jisasa* 27:39-40 Wee 22:7; 109:25; Jet 18:16; J.Ee 2:15* 27:39-40 Mt 26:61; Jo 2:19; Ap 6:14 pyao yukuotae kateamo dokonya-kaita endakali payamino dupame Jisasa kilya kandao aiyomba ema-ema pyoo dapa leami: “‘Losuu anda andake doko lakyepala yuu gii tepoma pitona,’ leeno akali dake! Emba Gotenya Ikiningi tamo kandao doko, emba tangeme pupu latala ita poko doko yakinatala isa ipu!” leami. 41 Mendai* 27:41-42 Jo 11:50 dopaka pyoo, pitisa mupapi, mana setapae masingi akalipi, Jutamanya isingi akalipi dupame Jisasa kandao dapa lao lamba leamiaka: “Baame endakali waka dupa nisiamoaka doko, baa tange kapa pao nisala naelyamo. Kini, baa naima Isataele dupanya Kiŋi tamo kandao doko, naimame baa lao masoo minamana, epapu ita poko doko yakinatala isa epena. 43 Baame* 27:43 Wee 22:8 Gote masokondape pingi daape. Dee baame baa Gotenya Ikiningina lenge. Dopana, Goteme baa auu kayatamo kandao doko, epapu baa pyoo nyinana,” leami. 44 Akali pake nao makongao paenge baa-pipa awapa pyao yukuotae kateamino dolapome apata mendai dopaka pyoo baa kandao pii koo leambi.
Jisasa kumiamo doko
(Mk 15:33-41; Lu 23:44-49; Jo 19:28-30)
45 Kotaka andawai pungupungu dokonya pituu, yuu doko pitaka kuiyatala kuiyatayaka katao pao alemandi kiloko tepo lea. 46 Kiloko* 27:46 Wee 22:1 tepopi mendenya Jisasame etete puu lao lao, “Eli, Eli, lema sapakatani!” lea. Dopa leamo doko kapilyoo, “Nambanya Gote, nambanya Gote, embame namba aipuma yakinelepe?” lea. 47 Dopa leamo doko endakali dosa kateamino dupanya mendapuame sepala lao pituu, “Ilainja lao wii lelyamona,” leami. 48 Dopa* 27:48 Wee 69:21; Lu 23:36 latala dupanya mendeme alo pyao pao koma jepae+ 27:48 koma jepae Koma jepae doko naimanya koma kakataesa palenge dopaleaka doko, koma dake endaki solowatanya koko singi tata mendepale mende-pyaa.mende waene kaa pipae mendenya poyatala itakali mendenya tuku petala Jisasa nena lao makapusakamaiya. 49 Dopaka doko, yangi dupame lao pituu, “Ilainjame baa pyoo nyala epelyape lao kandamana maliseta!” leami. 50 Dokopa Jisasame deaka etete puu lao ae latala kumia.
51 Dokopa* 27:51-52 Eke 26:31-35; Mt 28:2; Ip 6:19-20; 9:8; 10:19-20 losuu anda andake dokonya lapalapa pyatu doko ketae ulusa pituu kanguoo yuunya tuu latala lapo pyoloo pia-pyaa. Dee yuu doko titiwali minao, kana yale dupa longapae buu minao, endakali malu dupanya kaitini dupa lumbao, Gotenya endakali isa palipiami dupanya longo mendapua sakatasoo pia-pyaa. 53 Dupame nyakamanya malu dupa yakinatala, maitakao Jisasa sakateamo dokopa yuu taono etete epe Jetusaleme dokonya peaminopa endakali longo dupame kandeami.
54 Yanda* 27:54 Mt 3:17; 17:5 singi amii isingi dokopi baa-pipa awapa Jisasa isoo kateamino dupapimi titiwali miniapi piamo dupa pitakapi kandao etete pakame kumapala lao pituu, “Kiningi etete akali dake Gote Ikiningi lamona,” leami. 55 Enda* 27:55 Lu 8:2-3; Jo 19:25 longo mendapua Galili pituu Jisasa nisoo awapa epeamino dupame kuki tependale pituu dokonya piamo dupa kandatae peteami. 56 Enda* 27:56 Mt 13:55; 20:20; Lu 24:10 peteamino dupanya mendatupa Matia Makatala tange dokopi, Jemesa Josepepanya endangi Matia dokopi, Sepete ikiningi dolaponya endangi dokopi dutupa dokonya peteami.
Jisasa malu piamino doko
(Mk 15:42-47; Lu 23:50-55; Jo 19:38-42)
57 Yuu alemanjeteamopa akali Atimatia tange kamongo Josepe lenge mende epea. Baa Jisasanya disaipele joo katengeaka. 58 Akali* 27:58 Dit 21:22-23 dokome Pailate peteasa pupala Jisasa dina lao tee lea-pyaa. Dopa leamopa yanda singi dupame kondao nyoo maina lea-pyaa. 59 Dokopa* 27:59-60 Ap 13:29* 27:59-60 Ais 53:9,12 Josepeme Jisasa nyoo lapalapa kyoto epe mendeme ambo pyapala malu pipenge kananda enenge mende baanya tumbinya setea dokonya setea-pyaa. Setapala kana andake mende kapilya mina-mina pyoo minao pao malu kambu doko piti petala baa pea-pyaa. 61 Dopa piamo dosa enda Matia Makatala tange dokopa dee Matia lenge waka mende dokopame kandamatae peteambi-pyaa.
Jisasa malu isoo kateamino doko
62 Sambasanya* 27:62-63 Mt 12:40; 16:21; 17:23; 20:19; Mk 8:31; 9:31; 10:33-34; Lu 9:22; 18:31-33; Jo 2:19-21; 7:12; Ap 10:40 opale depa lenge kalai yuungi doko pateamopa taita dopa pyoo pitisa mupapi Patasipi dupame Pailate peteasa ipao kambu pyatala lao pituu, “Akali Andake, pii mende sambo lenge akali dokome mee katao pituu, ‘Koto teponya namba dee sakatatona,’ lea doko naimame masilyamano. 64 Dopa leana aopyoo latala baanya disaipele dupame pao baa nyoo yalo petala endakali dupa lamaiyoo, ‘Baa sakatapyana,’ latamina, malu doko isokondape pyoo isoo katao koto tepo dokonya tuu lena lape. Dopa pitamino kandao doko, wamba sambo leamo doko maitakao sambo dokome ita minatana,” leami-pyaa. 65 Dopa leaminopa Pailateme dokaita lamaiyoo, “Nyakamame yanda singi mendatupa nyoo pupala malu doko pyokondape pyoo petae katena lao pipenge jetali pyoo pyepape,” lea-pyaa. 66 Dokopa* 27:66 Dan 6:17; Mt 27:60; 28:11-15 dupame pupala malu doko pingili petae katelyape lao kandapengena latala, kongali pyoo wakaiya kateami-pyaa. Dopa petala yanda singi dupame isokondape pyoo katena leami-pyaa.
28Jisasa malunya sakateamo doko
(Mk 16:1-10; Lu 24:1-10; Jo 20:1-18)
1 Sambasa* 28:1 Mt 27:56; Lu 8:2 gii doko pateamopa Sandeenya yongama niki pyakayalanya pia-kaita Matia Makatala tange dokopa Matia mende dokopa dolapome malu doko kanja peambi-pyaa. 2 Peambinopa,* 28:2 Mt 27:51,60 pupae lao titiwali andake mende miniamopa Gotenya enjele mende kaitinya katao isa ipupala pao kana doko kapilya mina-mina pyoo nyoo kapya latala dokonya ketae petea-pyaa. 3 Baanya* 28:3 Mt 17:2; Ap 1:10 lengelyaapi doko polepole pyoo, yonge pee doko kyoo lao pakenana timbokopaele jia-pyaa. 4 Dopa* 28:4 Mt 27:62-66 piamopa malu isetae kateamino dupa pakame kumao etete walu latala kumapae jiami-pyaa.
5 Dokopa enjele dokome enda dolapo lamaiyoo, “Nyalambo paka nakayalapape. Nyalambome Jisasa ita pokonya pyao yukuiyamino doko kutilyambino lao nambame masilyo. 6 Baa* 28:6 Mt 12:40; 16:21 angenya nasilyamo. Wamba baame leamoli pyoo sakatatalamona baa seteamino dakenya kanja ipupa. 7 Kandatala,* 28:7 Mt 26:32; 28:16; Jo 21:1-23 yapa pao baanya disaipele dupa dapa lamaiyepape: ‘Baa malunya sakatatala Galili yuu dokonya wambao pame lamo, nyakamame baa yuu dokonya kandatamina,’ nambame nyalambo langitilyo doko masalapape!” lea-pyaa. 8 Dopa leamopa enda dolapome malu doko yapa yakinatala paka kayao pituaka doko, mona etete yaepatala baanya disaipele dupa lamaiyakamaiyanya alo piambi-pyaa.
9 Alo* 28:9 Jo 20:14-18 pyao peambinopa Jisasame kaitinisa kandanyetala, “Wanalapo, anja paanya epelyambipi?” lea-pyaa. Dokopa dolapome tengesa ipao luma lakapala baanya mokonya minao baa tama piambi-pyaa. 10 Dopa* 28:10 Lu 24:9-10; Jo 20:1; Ap 1:3; 1 Ko 15:4; Ip 2:11 piambinopa Jisasame enda dolapo lamaiyoo, “Paka nakaenya, nambanya kaiminingi dupa katatamisa pupala Galili pena lamaiyepape. Dupame namba dokonya kandatamina,” lea-pyaa.
Dopa pyomo dapa pyomo lao yanda singi dupame leamino doko
11 Enda* 28:11 Mt 27:62-66 dolapo peambinopa, malu isetae kateamino yanda singi dupanya mendapuame yuu taono dokonya pupala piamo dupa pitaka pitisa mupa dupa lamaiyami-pyaa. 12 Dokopa pitisa mupapi isingi akalipi dupa-pipa pii lao kambuatala muni longo mendapua yanda singi dupa maiyami-pyaa. 13 Maitala dapa lena leami-pyaa: “‘Naima luu palipamanopa Jisasanya disaipele dupame kuka ipupala baa nyoo pamini lamona,’ laapape. 14 Dee kapomane andake dokome pii dake setamo kandao doko, naimame mende lata-lata pitamanopa nyakama-kisa pundu nasetana,” leami-pyaa. 15 Dopa lateaminopa yanda singi dupame muni dutupa nyepala dupame pina leamiliaka piami-pyaa. Dopa piamino dokonya atome doko Juta endakali dupa-kisa tayateamopa dupame lawaka katao indupa tuu lelyamino.
Jisasame baanya disaipele dupa kalai pyaa pena leamo doko
(Mk 16:14-18; Lu 24:36-49; Jo 20:19-23)
16 Disaipele* 28:16 Mt 26:32; 28:7,10; Mk 14:28; Jo 21:1-23 kingi ita-kisa dee mendai dutupa wamba Jisasame Galili yuu dokonya manda mendenya patamina leamo dokonya peami. 17 Dokonya* 28:17 1 Ko 15:5 pao Jisasa kandatala baa lao luma lakapala tama piami. Dopa piaminoaka doko, mendapuame mona lapo paleami. 18 Dokopa* 28:18 Dan 7:14; Mt 11:27; Lu 10:22; Jo 13:3; Ep 1:20-22; Pl 2:9 Jisasa baa tengesa ipupala dokaita lamaiyoo pituu, “Yuupi kaitipi dupa isepenge pupu lapae doko pitaka Goteme namba ditilyamo. 19 Dopana* 28:19 Mk 16:15-16; Lu 24:47; Ap 1:8; 2:38 nyakama pupala endakali paliuu pelyamo dupa pitaka nambanya disaipele injisalapape. Dopa pyoo pituu, Takange dokopi, Ikiningi dokopi, Oli Sipitisa dokopi dutupanya kenge doko lao kaimbu pyakamaiyepape. 20 Dee* 28:20 Wee 125:2; Mt 13:39,49; 18:10; 24:3; Jo 14:18-21; Ap 18:20 piipi manapi nambame nyakama langio kandeno, dupa pitaka minina lao lamaiyepape. Namba nyakama-pipa koteaka lao awapaka katao yuu etatamo gii doko kandao nyetona, masalapape!” Jisasame dopa lea.