POLOME
KOLOSI
TANGE DUPANYA PEPA
PYAO PYASAKAMAIYAMO DOKO
Pii atupa wambao kandapenge
Yuu taono Kolosi dokonya sosa mende katea-pyaa. Polome siamopa endakali mendapu Kolosi ipupala sambo pii mendapua lelyamino lapae sepala pepa dake pyao Kolosi pyasia-pyaa. Dupame sambo pii dupa lao pituu, embame Gote masokondape pitinopa baame emba pyoo nyina lao kaitinya isingi dupapi enomba nyoo isoo katenge dupapi dupa lao loma sepenge. Dee mendapuame Juta dupa losuu lengemali pyoo elya-pingi kambu kepawapi nee mendapu daa laapape lawapi lelyamino lapae Polome sepala pepa dake pyao Kolosi pyasoo pituu, Jisasa Kataisame iki kapa pao endakali dupa pyoo nyetana lea-pyaa.
Polome Kolosi tange dupanya pepa pyao pyasakamaiyamo dokonya pii lyaa dupa:
1:1-8 Pii wambao pepanya piamo dupa
1:9–2:19 Jisasame piamo dupa lao panelyamo
2:20–4:6 Endakali dupa Kataisame enenge injisia
4:7-18 Polome pii etao lasa leamo dupa
11 Goteme* 1:1-2 Lo 1:1; Ep 1:1* 1:1-2 Lo 1:7 namba Polo Kataisa Jisasanya aposele katatena lao masiamoli pyoo kalyo. Dopa pyoo katao nambapa kaiminingi Timotipa nalimbame nyakama Gotenya endakali Kataisa lao masoo miningi kaiminingi Kolosi tange dupanya pepa dake pyao peekelyambano. Naimanya Takange Goteme nyakama kandao mona epe mende palyetala baame nyakamanya mona doko lyuu lasekena.
Polome Kitisene dupa masetala Gote lao yaka pilino lenge doko
3 Nalimbame* 1:3 Ep 1:16* 1:3 Pm 4-5 nyakama lao masetala loma silyamba dii lao naimanya Kamongo Jisasa Kataisanya Takange Gote doko kandao koteaka lao yaka pilino lenge. 4 Nyakamame* 1:4 1 Ko 13:13 Kataisa Jisasa lao masoo minao katao Gotenya endakali dupa pitaka auu kayamaiyoo kalyamino lapae sepala dopa pilyambano. 5 Wamba* 1:5 Ep 1:13,15; Kl 1:23; 1 Pi 1:3-4 Wai Pii Epe kiningi doko nyakama-kisa tee pyao epeamo dokopa nyakamame pii dokonya masoo malisoo katenge doko sepeami. Dokonya nyakamame nyakamanya masoo malisoo katenge Goteme kaiti-kisa isakao kalyamo doko masetala, masoo minao auu kayamaiyoo kalyamino. 6 Wai* 1:6 Ap 14:3; 20:24,32; Lo 1:13; 2 Ko 6:1; 1 Ti 3:16 Pii Epe dokome yuu dupa pitakanya dii mandisoo tayao silyamo. Goteme naima kandao mona epe palelyamona lapae pii doko nyakamame tee pyao siami. Sepala dokonya tenge angi dupa etete masokondape pyoo masoo kateamino gii dokopa pituu Wai Pii Epe dokome nyakama-kisa mendai dopaka pia. 7 Wai* 1:7 Kl 4:12; Pm 23 Pii Epe doko Kataisanya kendemane kalai awapa pyakamaingi akali nalimbanya mona setenge Ipapotasame nyakama langiamopa mana nyiami. Baame nalimba nisoo Kataisanya kalai mimi minao pyakamaingi. 8 Oli* 1:8 1 Ko 13:1 Sipitisame nyakama sakatasipumopa nyakamame mende auu kaya kaya pyoo kalyaminona lao akali dokome nalimba langia.
9 Langiamo* 1:9 Ep 1:9,15-17; 5:17; Pl 1:9; Pm 6 doko nalimbame sepala gii dokopa pituu tee pyao kayala nayao koteaka lao nyakama nisoo loma soo kalyambano. Goteme pipimili lao masingi doko etete auu pyoo masalapale lao baanya mana kandapengepi auu pyoo masepengepi dupa pitaka baame nyakama dina lao nalimbame Gote-kisa tee lekelyambano. 10 Baame* 1:10 Ep 2:10; Pl 1:27; Kl 3:10 dopa pitamopa nyakamame kapa pao Kamongonya endakali joo payao pitamino dupa pitaka baame auu kaengeli pyoo pitami. Dee nyakamame kalai epe pitamino dupa pitakame dii mandyuu Gote lao etete auu pyoo masokondape pyoo masoo katatamiaka. 11 Goteme* 1:11-12 Ep 1:19; 3:16* 1:11-12 Jo 8:12; Ap 26:18; Ep 1:11,18; 5:8; 1 Pi 1:4; 2:9 baanya pupu lapae etete epe singili pyoo nyakama etete kyoto injisetamopa nyakamame yapa maka nakayao kenda pipae dupa nyoo katao Takange Gote doko lao mona yaepao yaka pilino lao katatami. Baame baanya endakali tii pipae kalyamino dupanya epe setakamaiyamo dokonya yangi nyakama nyalapale lao baame nyakama auu pisetea. 13 Baame* 1:13 Lu 22:53; Ep 1:21; 2:2 naima iminjetaenya pupu lapae dokonya pyoo nyepala baanya mona setenge Ikininginya isingi dokonya auu pyoo katasia. 14 Baanya* 1:14 Lo 3:24; Ep 1:6-7; Ip 1:3 mona setenge Ikiningi dokome naima kii tamao nyepae koo kunanya nepatae kalyamano.
Gotenya Ikiningi dokonya lao Polome leamo doko
15 Gotenya* 1:15 Jen 1:1-2; Sak 12:10; 2 Ko 4:4; Kl 1:18 Ikiningi doko naimame nakandenge Gote doko waingi tapae. Baa Gotenya wambao mandipae. Wapopae dupa pitakanya ulusale katenge. 16 Doko* 1:16 Jo 1:3,10,18; Lo 8:29; 11:36; 1 Ko 8:6; Ep 1:10,21; Ip 1:3,6 Goteme baanya Ikiningi dokome yuupi kaitipinya kandengepi nakandengepi singi dupa pitakapi, kaitinya kiŋi joo isoo katenge dupapi, kamongo dupapi, isingi dupapi, enomba nyoo isoo katenge dupapi, dupa wapuina leamopa wapuia-pyaa. Dupa pitaka baanya jina lao baa tangeme wapuia-pyaa. 17 Dupa* 1:17 Pot 8:22-31; Jo 1:1; 8:58 pitaka nasiamopa baa wamba katea-pyaa. Dupa pitaka baa mambele siamo doko mee soaka kalyamo. 18 Dee* 1:18 Ap 26:23; 1 Ko 15:20; Ep 1:22-23; 4:15; 5:23; Kl 1:15,24; Pa 1:5 baa yonge dokonya aiyomba. Yonge doko sosa. Tee piamo doko baaka. Gotenya wambao mandipae doko baa malunya wambao sakatea. Baa dupa pitakanya mupa joo kalyanya dopa pia. 19 Goteme* 1:19-20 Kl 2:9* 1:19-20 Lo 5:1; Ep 1:7,10; 2:13-16; 1 Jo 2:2 baa tange itata baanya Ikiningi doko-kisa katatona lao masia-pyaa. Katapala yuupi kaitipinya singipi katengepi dupa pitaka dee tange mona setatona lao masia-pyaa. Kini baame masiamoli pyoo baanya Ikininginya taiyoko ita pokonya kai leamo dokonya-kaita epe yuu yongasia.
21 Wamba* 1:21 Lo 5:10; Ep 2:1-2,12; 4:18-19 nyakama Gote-pipa waka joo katao nyakamanya monanya masingi dokome baa-pipa yandapipili joo mana koo dupa minao kateami. 22 Dopaka* 1:22 1 Ko 1:8; Ep 2:14-16; 5:27; Kl 2:13 doko, indupa nyakama baanya enomba dokonya etete epe auu pipae koo tengepi mende nasingi kalyepale lao katasalanya Goteme baanya Ikiningi endakali jetala kumiamo dokonya-kaita baame nyakama baanya mona setenge injisia. 23 Dopana,* 1:23 Mk 16:15; Ap 2:5; 2 Ko 3:6; Ep 3:7,17; 1 Ti 3:16; Ip 3:14 Goteme nyakama masoo miningi dokonya kyoto joo katasiamo doko nyakamame yakinala naenya minawaka kalyepape. Nyakamame Wai Pii Epe wamba siamino dokonya masoo malisoo katenge doko yakinalapale lao opale waka mendeme nyakama pyalya lao nyina lao kayala nayalapape. Wai Pii Epe dake yuu dupa pitakanya sepeami. Namba Polo Wai Pii Epe dakenyaka kalai akali jio.
Polome sosanya kalai pingi dokonya leamo doko
24 Nambame* 1:24 Mt 5:11; 2 Ko 1:5; Ep 3:13; Kl 1:18; 2:1 nyakama nisoo indupa tanda nelyo dokonya mona epe palyoo kalyo. Nambame Kataisanya yonge sosa doko nisoo kenda pipae nyepenge malatae sipumu dupa nambanya yongeme kapa pisoo kalyo. 25 Nambame* 1:25 Lo 15:19; 2 Ko 3:6; Ep 3:2,7-8 nyakama nisatale lao Goteme kalai diamoli pyoo namba sosanya kalai akali jio. Baame baanya pii doko pitaka nambame lamaiyakao kalyale lao kalai doko namba dia. 26 Pii* 1:26 Lo 16:25-26; Ep 3:3-5,9-10 doko wamba yuu gii peamo dupa pitakanya endakali dupame nakandena lao Goteme yalo piamoaka doko, indupa baame baanya endakali dupa-kisa panasetelyamo. 27 Goteme* 1:27 Ep 1:8; 2:12; Kl 3:4; 1 Te 4:13; 1 Ti 1:1 pii yalo pyoo kateamo doko naimame endakali tata dupa pitakanya lamo lao eteteaka epe longo paka lamo lao masipimi laka lao masia. Pii yalo piamo doko dapa: Kataisa nyakama-kisa koko kalyamo. Nyakamame Gotenya yuu eteteaka epe dokonya katatamana lao masoo malisoo kalyamino dokonya tenge doko baa. 28 Naimame* 1:28 1 Ko 2:6; Ep 4:13 Kataisanya lao pii lamaingi. Endakali dupa pitaka Gotenya enomba dokonya Kataisapa pakatae angi joo katasina latala, naimame mana tata tata dupa pitaka masoo, endakali dupa mendai mendai lao kandao isoo kalyepape lamaita mana lamaita pyoo kalyamano. 29 Kataisanya* 1:29 Ep 3:7,20; Pl 4:13; 2 Te 1:11 pupu lapae dokome namba sakatasipumopa nambame endakali mendai mendai lao dupame dopa pyoo katena lao kalai lekeleke tao kyoto joo pilyo.
21 Nambame* 2:1 Kl 1:24; 1 Te 2:17 nyakamapi, Leotosia yuu dokonya kalyamino endakali dupapi, namba enomba nakandenge endakali dupapi, dupa nisalanya etete lekeleke tao kalyo doko nyakamame masipimi laka lao nambame masilyo. 2 Dupame* 2:2 Ep 3:4,18-19; Kl 1:26 mona yaepao mende auu kaya kaya pyoo tole pyao katena lao dopa pyoo lekeleke tao kalyo. Dee etete longo paka masingimi kiningi lao masokondape pyoo masingi doko pitaka dupame masoo, Goteme yalo piamo Kataisa doko auu pyoo masina lao dopa pilyo. 3 Gotenya* 2:3 Pot 2:4-5; Ais 45:3; 1 Ko 1:24,30; Ep 3:19 eteteaka epe mana kandapenge dupapi baanya masepenge dupapi dupa pitaka Kataisa-kisa yalo petae silyamo. 4 Nambame* 2:4 Lo 16:18; Ep 4:14; 5:6; Kl 2:8 dopa lelyo doko aipuma lelyope? Endakali mendeme pii kaiyu lapae mendeme nyakama minakasina lao kayala nayalapale lao lelyo. 5 Kini,* 2:5 1 Ko 5:3-4; Pl 1:27; 1 Te 2:17 namba nyakama-pipa tole nakalyamanoaka doko, nambanya masingi doko nyakama-pipa tole katao nyakamame mana epe awapa lao miningipa Kataisa lao kyoto joo masoo miningipa dolapo kandao mona yaepao kalyo.
Kataisapa pakatae katao auu pyoo katenge doko
6 Nyakamame* 2:6 Ep 4:21; Ip 2:9 Kamongo Kataisa Jisasa doko nyepeamino dokonya baapa pakatae katao payalapape. 7 Nyakama* 2:7 Ep 2:20-22; 3:17; 1 Te 2:13 baa-kisa pingi pyambatala kyoto joo katao mana nyiaminoli pyoo masoo miningi doko pupu lao minao yaka pilino lawaka kalyepape.
8 Akali* 2:8 Mt 15:2; Ga 4:3; Ep 4:14; 5:6; Kl 2:3 mendeme Kataisanya lao mana langya naenya yumbangenya mana miniamino dupapi yuunya mana dupapi endakalinya mee sambo pii dopale mende watao minalapale lao nyakama mana langitala pyalya lao nyoo soo patana kandao kalyepape. 9 Doko* 2:9 Jo 1:14,16; Kl 1:19 aipuma? Akali Kataisa doko Gote baa tange itata kalyamo. 10 Kaitinya* 2:10 Ep 1:13,21-22; 3:19; 4:12-13 isingi dupapi enomba nyoo isoo katenge dupapi dupa pitakanya etete ulusale katenge Kataisa dokopa nyakama pakatae katao etete auu pisetae kalyamino.
11 Nyakama* 2:11 Jet 4:4; Lo 2:29; Pl 3:3 baapa pakatae kateaminopa endakali kingimi elya pingi kambu kepengeli pyoo akali nyakamanya kepakala naenya, Kataisanya mana dokome nyakamanya elya pingi kambu kepatakala yongeme koo pipu laka lao masingi pupu lapae dokonya nyakama mokao nyia. 12 Kini,* 2:12 Lo 1:4; 6:3-4; 8:11; Ep 1:19-20; 2:6 Goteme Kataisa malunya sakatasiamo pupu lapae doko nyakamame masoo miniamino dokonya-kaita Goteme baanya kaimbu dokonya nyakama Kataisapa awapa malu petala dee baa-pipa awapa malunya sakatasia. 13 Wamba* 2:13 Ep 2:1-5; Kl 1:22 nyakamame koo piamino dokopa nyakamanya yongenya koo pipu laka lao masingi dokopa dolaponya kumapae joo kateaminopa Goteme nyakama Kataisa-pipa awapa lete katasia. Baame naimanya koo dupa pitaka kunanya nepekea. 14 Mana* 2:14 Ep 2:14-16; 1 Pi 2:24 setapae dokonya naimame dopa pyoo yanu pyalapapena lao pepa pyapae siamo doko Goteme kunanya nepekea. Baame pepa doko nyoo ita pokonya nili pyambatala mee jinya nepea. 15 Baame* 2:15 Ais 53:12; 2 Ko 2:14; Ep 1:21; Kl 1:13; 1 Pi 3:22 Kataisa ita pokonya kumiamo dokonya-kaita sipitisa koo dupanya isingi dupapi enomba nyoo isoo katenge dupapinya konambipi yanda yandatepi dupa nyoo nepao ita minatala elya sina lao panao anjoo laminao pea.
16 Dopana,* 2:16 Lo 14:1-12; Ga 4:3; 1 Ti 4:3; Ip 9:10 nyakamame nee natamino dupapi, endaki natamino dupapi, gii epe mendenya pitamino dupapi, kana enenge lasilyamopa kandao katenge gii andake dupanya pitamino dupapi, Sambasa gii dupanya kalai pitamino dupapi dupanya endakali mendeme nyakamame dopa napinya dapa pyepa latamo doko nasalapape. 17 Mana* 2:17 Ep 1:23; Ip 8:5; 10:1 dopale dupame maitakao pitamo dupa makande pyoo mee wambao sia-pyaa. Dopaka doko, angi doko Kataisa. 18 Dopana,* 2:18-19 Ga 6:12* 2:18-19 Ep 1:22; 2:21; 4:15-16 endakali mendapuame lee manimanimi kandelyami dupanya pii longo lao latala sambo anasale joo kalyona lao masoo enjele dupa tama pingi endakali dupame nyakama-kisa koo silyamona lena lao kayala nayalapape. Dupame alyasale joo kalyamanona lao mee masingi katapao Kataisa aiyomba joo katenge doko yakinatelyamino. Kataisame yonge doko pitaka nee maiyoo yonge dokonya kuli kongapupi dupa pitaka nyoo kopelyamo. Dopa pipumopa Goteme yonge doko andapyali lao masipyali pyoo andao kalyamo.
Kataisapa awapa enenge joo kalyamino leamo doko
20 Nyakama* 2:20-21 Ga 4:3-5,9* 2:20-21 1 Ti 4:3 Kataisapa awapa yuunya mana koo dupanya kumateamino doko indupa aipuma nyakama yuunya endakali joaka kalyamipi? Aipuma nyakama endakali dupame nee mendapua nala nayao, nakande nasoo, watandala nayao kalyepape lao langina lao kaelyamipi? 22 Dopale* 2:22 Ais 29:13; Mt 15:9; Mk 7:7; 1 Ko 6:13; 8:8 dupa pitaka napaesa etenge. Makande setapae dopale dupapi mana pii dopale dupapi dupa endakalimi iki seteami. 23 Endakali* 2:23 2 Ti 3:5 dupa tangeme tama pingi mana seteami dokopi, dupanya anasale joo kalyamano lao masingi dokopi, dupame tange kenda pisilyamino mana dokopi, dupa kandengesa auu pipae mana mende sili pilyamo. Dopaka doko, mana dopale dupame yongeme pipu laka lao masingi doko kaita lyokala naenge.
31 Goteme* 3:1 Wee 110:1; Mk 12:36; 16:19; Ap 2:33; Ep 1:20; 2:6; Pl 3:20; Kl 2:12 nyakama Kataisapa awapa malunya sakatasia. Ongonya nyakamame ketae kaitinya-tae epe dupa kutao nyoo kalyepape. Yuu ongonya Kataisa Gotenya kingi tolae-kaita kalyamo. 2 Nyakamanya* 3:2 Mt 6:33 masingi dokome yuu dakenya oapi dupanya masala naenya ketae kaitinya epe dupa masoo kalyepape. 3 Doko* 3:3 Lo 6:2; 2 Ko 5:14; Pl 1:21 aipuma? Nyakama yuu dakenya mana koo dupanya kumateami. Dee indupa lete auu pyoo kalyamino enenge doko Goteme Kataisa-pipa Gote baa-kisa yalo pyekea. 4 Nyakama* 3:4 Lo 8:19; 1 Ko 15:43; Kl 1:27; 1 Pi 5:1; 1 Jo 3:2 lete katasingi Kataisa baa panao ipatamo dokopa Goteme nyakama baa-pipa awapa tii pipae dokonya panaseta!
5 Tenge* 3:5 Lo 1:29; 6:6,11-12; 8:13; Ga 5:24; Ep 4:19,22; 5:3-5 ongonya minao nyakamame yuu dakenya mana dapale nyakamanya monanya singi dupa pyao kumasalapape: endakalipi nyele-nyele paenge dokopi, elya pingi napipenge pingi dokopi, elya pingi pyowanimi kumapala putiti kaenge dokopi, endakali mendenya opale mende nyipu laka lao masingi dokopi, mana dupa pyao kumasalapape. Nyipu laka lao masingi mana doko sambo gote tama pingi mana mende. 6 Mana* 3:6 Lo 1:18; Ep 5:6 dopale dupa minao Gotenya pii nepenge endakali dupa Goteme imbu kayao yanu nyala epelyamo. 7 Wamba* 3:7 Ep 2:2-3; Ta 3:3; 1 Pi 4:4 nyakama endakali dupa-pipa awapa kateamino gii dokopa nyakamame apata mana dopale dupa watao miniami. 8 Dopaka* 3:8 Ep 4:25-31; 5:4 doko, indupa tii lengepi, imbu kaengepi, mona koo palengepi, pii koo lengepi, mokolipi lengepi mana dopale dutupa apata nyakamame soo nepalapape. 9 Nyakamame* 3:9-10 Lo 6:6; Ep 4:22,25* 3:9-10 Jen 1:26-27; Ep 4:22-24 akali wambatae nyakamanya monanya katenge dokopi dokonya mana koo dupa-pipa watao nepatala akali enenge doko nyakama-kisa nyoo kateami. Dokonya nyakamame nyakamanya mende sambo lamai lamai napyepape. Akali enenge Goteme wapuiamo dokome baa waingi tao etete auu pyoo masoo katena lao baame enenge injisoo katenge. 11 Enenge* 3:11 Jen 11:1; 1 Ko 12:13; 15:28; Ga 3:27-28; Ep 4:13 joo katenge dokonya tata wakapi dee Juta endakalipi, elya pingi kambu kepapaepi dee kepala naengepi, pii tata waka kelyo kalyo lao lengepi, yana katatope joo katengepi, kendemane endakalipi, mee endakalipi dupa wakale wakale joo nakatenge. Enenge joo katenge dokonya Kataisa iki angi. Dupa pitakanya baaka angi!
12 Nyakama* 3:12 Ep 4:1-2,32; 1 Pi 2:9 Gotenya yapao nyepae. Nyakama baanya endakali etete epe baame auu kayapae. Dopana, nyakamame endakali yango moname kondo kayamaingi dokopi, auu pisingi dokopi, anasale joo katenge dokopi, andiki andiki pyoo katenge dokopi, yapa maka nakaenge dokopi, mana dutupa yonge pee joo pee pyoo katao kenda pipae dupanya mende nisa nisa pyoo kalyepape. 13 Nyakamanya* 3:13 Mt 6:14; 18:21-35; 2 Ko 2:7; Ep 4:32; 1 Te 5:15 mendeme mende-kisa koo tenge mende setapenge jia kandeno doko, nyakamame baanya koo dupa kunao nepakamaiyepape. Kamongo dokome nyakama kondo kayao nyakamanya koo dupa kunao nepekeamoli pyoo nyakamame nyakamanya mendenya koo dupa kunao nepakamai nepakamai pyoo kalyepape. 14 Auu* 3:14 Lo 13:8-10; 1 Ko 13:13 kayamaingi mana dokome mana dutupa pitaka etete epe jina lao nyoo mendai injisingina, nyakamame auu kayamaingi doko mana dutupanya konda pyoo minao kalyepape. 15 Mona* 3:15 1 Ko 12:12-13,27; Ep 2:16; 4:3-4; Pl 4:7 lyuu lasekenge Kataisa dokome nyakamanya monanda doko isekena lao kalyepape. Nyakama dopa pyoo katao yonge mendai joo kalyepale lao Goteme nyakama ipupa lea. Dee nyakamame baa lao yaka pilinona lao masoo kalyepape. 16 Kataisanya* 3:16 Ap 16:25; Ep 4:29* 3:16 Ep 5:19-20 pii doko nyakamanya mona koko dokonya longo lao sina lao kalyepape. Mana kandenge dupa pitakame mende mana lamai lamai pyoo, kandao isoo kalyepape lao lamaiyepape. Nyakamanya mona dokome Losuu Wee dupa lao, Gote lao tama pingi wee dupa lao, masoo miningi dokonya wee dupa lao kalyepape. 17 Nyakamame* 3:17 1 Ko 10:31 pii latamino dupapi, kalai pitamino dupapi, dupa pitaka Kamongo Jisasa lao masoo pyepape. Nyakamame baa-kisa Takange Gote doko lao yaka pilino laapape.
Enenge joo katenge dokonya endakali yango dupa-kisa kalai pipenge dupa
18 Nyakama* 3:18 Ep 5:21–6:9* 3:18 Ta 2:5; 1 Pi 3:1 enda dupame nyakamanya akalingi dupanya pundipundi joo pilyepape. Dopa pingi mana doko Kamongo-kisa kapa penge. 19 Nyakama* 3:19 Ep 5:25; 1 Pi 3:7 akali dupame nyakamanya etanenge dupa auu kayao kalyepape. Nyakamame dupa kandao imbu imbuaka kayamaiya nayalapape.
20 Nyakama* 3:20 Ep 6:1 wane dupame nyakamanya endangi takangepa dolaponya pii dupa pitaka auu pyoo sakamaiyepape. Dopa pitamino mana doko Kamongome auu kayata. 21 Aopyoo* 3:21 Ep 6:4 latala wane dupame mona koo palyetamina, nyakama takange dupame nyakamanya wane dupa imbu pisala nayalapape.
22 Nyakama* 3:22 1 Ko 7:21-23; Ep 6:5; 1 Ti 6:1; Ta 2:9-10; Pm 16; 1 Pi 2:18* 3:22 Ep 6:5-8 kendemane dupame nyakamanya isa yuu dakenya kamongo dupanya pii dupa pitaka auu pyoo sakamaiyoo kalyepape. Mona lapo palyala nayao endakali dupame auu kaena lao nyakama kandatamino dokopa iki kalai pyaa naenya Kamongo Kataisa paka kayamaiyoo pyoo kalyepape. 23 Nyakamame* 3:23 Lo 12:11 kalai pitamino dupa pitaka nyakamanya mona dokome endakalinya kalai pyakamailyamanona lao masala naenya Kamongonya kalai pyakamailyamanona lao masoo pyepape. 24 Kamongome nyakamanya epe setekeamo doko yole joo ditana lao masilyamino. Dokonya nyakamame Kamongo Kataisanya kalai pyakamaiyoo kalyepape! 25 Endakali* 3:25 Lo 2:11 koo kalai pitamo dokome baanya koo kalai pitamo dokonya dee tange yanu nyeta. Goteme endakalinya lengelyaapi kandao mokosala naenge.
41 Nyakama* 4:1 Lep 25:43,53; Jop 31:15; Ep 6:5,9; Pm 16 kamongo dupame nyakamanya kendemane dupa-kisa mana tolao minao kapa pena lao pyepape. Nyakama kamongo dupanya Kamongo mende kaiti-kisa kalyamoakana lao masalapape.
Dapa pyoo kalyepapena leamo doko
2 Nyakamame* 4:2 Lo 12:12; Ep 6:18; Pl 4:6; 1 Te 5:6 lomaka soo isetae katao Gote lao tama pyoo kalyepape. 3 Dopa* 4:3 Lo 15:30; 1 Ko 16:9; Ep 6:19; 2 Te 3:1; Ip 3:18 pitamino gii dokopa Goteme naima apata dapa pyoo nisina lao loma salapapeaka: Goteme Kataisa-kisa pitona lao yalo pyoo masoo kateamo doko lao panasoo naimame baanya Wai Pii Epe doko lamaiyakalapale lao baame naimanya kaitini mende lumbekena lao loma salapape. Kalai dokonyaka namba anjetae kateo doko mee kalyo. 4 Kini,* 4:4 Ep 6:20 nambame pii doko auu pyoo lao panao namba-kisa kalai silyamoli pyoo pyaale lao loma salapape. 5 Sosanya* 4:5 1 Ko 5:12; Ep 5:15-16; 1 Te 4:11-12 konda napingi endakali dupanya kaina dokonya nyakama auu pyoo masoo payao, kalai pipenge jetamo doko pyokondape pyoo pyepape. 6 Koteaka* 4:6 2 Ko 6:2; Ep 4:29; 1 Pi 3:15 lao nyakamame pii latamino dupa tenge paliuu tende pina lao laapape. Endakali mendai mendai lao dupanya pii auu pyoo yanu pyakamaipenge dupa mana nyoo kalyepape.
Etao lasa leamo pii dupa
7 Namba* 4:7 Ap 20:4; Ep 6:21 dopa pyoo kalyeno lao nambanya pii dupa pitaka akali Tikikasa dokome nyakama langita. Tikikasa doko naimanya auu kaenge kaiminingi, Kamongonya kalai akali tupi lapae. Baa naima-pipa Kamongonya kendemane kalai mendai pyakamaingi. 8 Nyakamame* 4:8 Ep 6:22 naima dopa pyoo kalyaminona lao masalapale lao tenge mendai dokonya baame nyakama langyoo nyakamanya mona kyoto injisakao nambame baa epena lelyo. 9 Nambame* 4:9 Pm 10-12 nyakamanya akali Onisimasa naimanya auu kaenge kaiminingi akali tupi lapae doko Tikikasapa awapa epena lelyo. Akali dolapome kapa pao ae pilyamo dupa pitaka nyakama langitambi.
10 Namba-pipa* 4:10 Ap 12:12,25; 13:13; 15:37-39; 19:29; 27:2 awapa anjetae palenge akali Atitakasame nyakama kandao auu pyoo kalyepape lelyamo. Dee Banapasanya kaiingi Makeme nyakama auu pyoo kalyepape lelyamo. Nyakamame baa kandao dopa pyepape lapae pii mende nyepeami. Baa nyakama katatamisa epea kandeno doko, nyakamame baa lanyalapape. 11 Akali mende kenge Jisasa Jasatasa lenge dokome apata nyakama auu pyoo kalyepape lelyamoaka. Juta dupanya Kitisene akali tepoma datupame iki Gotenya isingi dokonya namba-pipa awapa kalai pyoo kalyamino. Akali datupame nambanya mona doko minao auu pisekeami. 12 Nyakamanya* 4:12 Lo 15:30; Kl 1:7; Pm 23 akali Ipapotasa dokome nyakama auu pyoo kalyepape lelyamo. Baa Kataisa Jisasanya kendemane akali. Goteme nyakama akali angi injisina lao, baame pipimili lao masingi doko pitaka etete masokondape pyoo masoo kalyepale lao, Ipapotasame koteaka lao nyakama nisoo kyoto joo loma soo katenge. 13 Baame nyakamapi Leotosia kalyamino dupapi Itapolisa kalyamino dupapi nisalanya lekeleke tao kalai pilyamona lelyo. 14 Naimanya* 4:14 2 Ti 4:10-11; Pm 24 auu kaenge dokosaa Lukupa dee akali Dimasapame nyakama auu pyoo kalyepape lelyambino. 15 Nyakamame* 4:15 Lo 16:5 Leotosia kalyamino masoo miningi kaiminingi dupapi enda Nipapi dee endakali baanya andaka kambu pingi sosa dokopi dupa kandao nambame auu pyoo katena lelyona lamaiyakalapape. 16 Nyakama* 4:16 1 Te 5:27 pepa dake itaki pyao langitatamino dokopa nyakamame sepala Leotosia yuu dokonya sosa kalyamo dokome apata sina pyasalapape. Dee nyakamame Leotosia kalyamino dupanya pepa doko apata nyoo itaki pyao kanjepapeaka. 17 Dee* 4:17 Pm 2 nyakamame akali Akipasa doko dapa lamaiyepape: “Kamongo dokome embame kalai pyakatale lao diamo dupa kandao isoo katao dupa pitaka pyakamaipi,” lao lamaiyepape.
18 Nyakama* 4:18 1 Ko 16:21; Ga 6:11; Ep 3:1; 2 Te 3:17; Pm 9,19 auu pyoo kalyepape lelyo pii dake namba tangenya kingimi pyekelyo: namba Polo. Namba anjetae palelyo doko nyakamame kame sala nayalapape. Goteme nyakamanya mona epe palyekena!