2 TIMOTI

POLOME

TIMOTINYA

PEPA

PYAO PYASAKAMAIYAMO LAPONGE DOKO

Pii atupa wambao kandapenge

Polome Timotinya pepa pyao pyasakamaiyamo laponge dokome Timoti pupu lasoo pia-pyaa. Doko, Timoti baa wane kole doko Gotenya kalai akali katao Polo baa nisingi dokonya baa tolasoo pyao pyasakamaiya-pyaa. Pepa pyao pyasiamo dokonya tenge doko dapa: Timoti baa kyoto joo kupa nakayao katapala Wai Pii Epe dokonya-kaita Jisasa Kataisa lao lao panena lao Polome baa kyoto injisia-pyaa. Pii wambataepa Wai Pii Epe dokopame baa tolasetamopa baame kiningi pii doko lao panena lea-pyaa. Polome lao pituu Timoti emba opale pii tata tata tenge nakatenge dupanya lapenge daana lea-pyaa.

Polome Timotinya pepa pyao pyasakamaiyamo laponge dokonya pii lyaa dupa:

1:1-2 Pii wambao pepanya piamo dupa

1:3–2:13 Polome Timotinya kalai auu kayapala mona minao sakatasiamo doko

2:14–4:5 Polome Timoti kandao opale koo dupanya wandyuu katena leamo doko

4:6-18 Polome baa tange atome leamo doko

4:19-22 Polome pii etao lasa leamo dupa

¹ Goteme* 1:1 Lo 1:1; Ep 1:1 masiamoli pyoo namba Polo Kataisa Jisasanya aposele katao baame naima Kataisa Jisasapa pakatae katatamina lateamo pii doko lamaiyoo kalyo. ² Nambame* 1:2 Ap 16:1; 1 Ko 4:15,17 nambanya mona setenge wane Timoti embanya pepa dake pyao peekelyo. Takange Gotepa naimanya Kamongo Jisasa Kataisapame emba kandao mona epe mende palyetala kondo kayao embanya mona doko lyuu lasekena.

Polome Timoti pupu lasoo pii leamo doko

³ Nambanya* 1:3 Ap 23:1; Lo 1:9; Pl 3:5 yumbange takangepi dupame Gote watao miniamino doko nambame mona auu petae paliuu watao minawaka katao, kuka kotakapi loma silyo dii lao emba kame sala nayao loma soo Gote lao yaka pilino lenge. ⁴ Nambame* 1:4 2 Ti 4:9,21 emba ee leeno doko masetala namba mona etete yaepatoo latala emba kandatapu laka lao masilyo. ⁵ Embanya* 1:5 Ap 16:1; 2 Ti 3:14-15 masoo miningi doko etete angina lao masilyo. Wamba embanya aputingi Loisapa embanya endangi Yunisapame masoo miniambino dopale joaka embame apata masoo minilinona lao nambame masalakao masilyo. ⁶ Tenge* 1:6 1 Ti 4:14 dokonya minao nambame embanya masingi dee sakatasoo langilyona, nambame embanya aiyomba minani pyekeo dokonya-kaita Goteme emba epe diamo emba-kisa silyamo doko itate joo yuli tena mondo pyoo poo lao katape. ⁷ Goteme* 1:7 Ap 4:20-21; Lo 8:15 naima Sipitisa diamo dokome naima paka kaenge endakali injisala naenge. Dopa napinya, baame naima pupu lao, auu kayao, mona paliuu kalyepale lao sakatasingi.

⁸ Dopana* 1:8 Lu 9:26; Lo 1:16; 5:3-4; 8:28; Ep 3:13; 2 Ti 1:16 embame naimanya Kamongo dokonya lao pii lamailino dokopa dee nambame baanya kalai pyakamaipusa anjetae kalyo dokopa dolaponya embame elya nakayape. Dopa napinya Goteme emba pupu lasetamopa Wai Pii Epe lamaingi kalai dokonya kenda pipae dupa embame awapa nyoo katapeaka. ⁹ Goteme* 1:9-10 Ta 3:5* 1:9-10 Lo 6:9; 8:2; 16:25; 1 Ko 15:55-57; Ta 2:11; 3:4; Ip 2:14-15 naima pyoo nyepala baanya endakali joo kalyepale lao ipupa lea. Naimame mana mende miniama kandatala dopa nalea. Baa tangeme mona epe palyetala pitona lao masiamoli pyoo naima ipupa lea. Yuu wamba waka Goteme yuupi kaitipi wapuala nayao pituu, Kataisa Jisasa-kisa naima kandao mona epe palyoo katea-pyaa. Dopa piamo doko naimanya Pyoo Nyingi Akali Jisasa Kataisa epeamo dokonya-kaita epapu panasia. Kataisame kuminginya pupu lapae doko mee jinya nepatala, kumala nayao lete katenge doko Wai Pii Epe dokome panasilyamo.

¹¹ Goteme* 1:11 1 Ti 2:7 namba Wai Pii Epe doko lamaingi akalipi, aposelepi, mana lenge akilipi joo kalyale lao katasia. ¹² Tenge* 1:12 1 Ko 1:8; 1 Ti 6:20 dokonya minao nambame kenda pipae dupa nyoo kalyo. Dopa pilyoaka doko, elya nakaelyo. Doko aipuma? Nambame mende tungi pilyo doko masetala, baame kalai nambanya kingilyaka seteamo doko baame kapa pao isokondape pyoo isoo pao yuu etatamo gii dokonya tuu latana lao nambame masalakao masilyo.

¹³ Emba* 1:13 1 Ti 1:10; 4:6; 6:3; Ta 1:9; 2:1 Kataisa Jisasapa pakatae katao masoo minao auu kayao mana pii tolatae nambame emba langio makande doko minapeta kopo lape. ¹⁴ Goteme* 1:14 1 Ti 6:20 epe isatale lao emba diamo dupa, Oli Sipitisa naima-kisa kalyamo dokonya pupu lapae dokome isepe.

¹⁵ Esia* 1:15 2 Ti 4:16 yuu dokonya endakali kalyamino dupa pitakapi, dupanya akali Piselasapi, Emosenisapimi namba yakineamino doko embame masilino. ¹⁶ Akali* 1:16 2 Ti 4:19 Onesipotasa dokome paa longosa nambanya mona auu pisakao, namba anjetae kalyo dokonya baame elya nakayao piana, Kamongome baanya palu dupa kondo kaenako lelyo. ¹⁷ Baame mona mendai palyoo Loma yuu dokonya ipao namba kutawaka katapala kandea. ¹⁸ Yuu* 1:18 Ju 21 etatamo gii dokopa Kamongome baa kondo kaenako lelyo. Dee Onesipotasa dokome Epesasa yuu dokonya namba nisiamo dupa embame masokondape pilino daape.

Kenda pipae nyoo kyoto joo katape leamo doko

¹ Nambanya wane Timoti, Goteme Kataisa Jisasa-kisa mona epe palenge dokome emba kyoto joo katape. ² Nambame* 2:2 1 Ti 4:14; 6:12; 2 Ti 3:14 endakali longo dupanya enombasa pii langiopa siino dupa akali mendapuame auu pyoo isoo kapa pao endakali waka dupa mana lamaipengena lao embame masete dupa-kisa setape.

³ Emba* 2:3 2 Ti 1:8; 4:5 Kataisa Jisasanya yanda singi amii kyoto joo katao kenda pipae dupa embame naima-pipa awapa nyoo katape. ⁴ Yanda singi amii mendeme kalai tata waka dupame mee endakali dupa pyalya miningili pyoo baa pyalya minina lao kayala naenge. Dopa napinya baa isingi dokome auu kaena lao yanda singi kalai dokoaka watambao pingi. ⁵ Dee* 2:5 1 Ko 9:25; 2 Ti 4:8 endakali mende ita mina-mina pyoo male pingi mendenya endakali mendeme male pingi mana dupa watao napitamo kandao doko, baame ita minao yole nanyeta. ⁶ Dee* 2:6 1 Ko 3:6-9; 9:7,10; Ip 6:7 akali mendeme lekeleke tao akali mendenya yuunya ee pokatamo dokonya nee mandipae dupa baa wambao nyepenge. ⁷ Dopana, nambame pii latelyo dutupa embame masoo katape. Doko, Kamongo dokome emba nisetamopa embame dutupa pitaka masete.

⁸ Nambame* 2:8 Ap 13:22-23; Lo 1:3-4; 1 Ko 15:4,20 Wai Pii Epe doko lao pituu, Jisasa Kataisa baa Goteme malunya dee sakatasiana, baa Dapiti tatanya mandipaena lenge doko embame kame nasepe. ⁹ Nambame* 2:9 Ep 3:1,13; Pl 1:12-14; Kl 1:24 Wai Pii Epe lamaingi tenge dokonya namba kenda pipae nyepala akali etete koo pingi dupa anjetae katengemali pyoo anjetae kalyo. Dopaka doko, Gotenya pii lapae doko anjetae nasilyamo. ¹⁰ Tenge* 2:10 1 Te 2:13 dokonya minao nambame Gotenya yapao nyepae endakali dupa nisakamaitoo lao kenda pipae dupa pitaka nyoo kyoto joo kalyo. Endakali dupa Kataisa Jisasame pyoo nyepae tanga tangapi tii pipae dokonya katatamina lao dopa pilyo. ¹¹ Pii* 2:11 Lo 6:4-5; 2 Ko 4:11; 1 Ti 1:15 dapa lapae silyamo doko etete kiningi:

Naima baa-pipa awapa kumiama tamo kandao doko,

baa-pipa lete etete katatamaka.

¹² Naima* 2:12 Mt 10:33; Ap 14:22; Lo 8:17 kyoto joo katatamano kandao doko,

baa-pipa awapa dupa pitaka isoo katatamaka.

Naimame baa maita maiyoo katatamano kandao doko,

baame naima maitaka dita.

¹³ Naimame* 2:13 Nam 23:19; Lo 3:3-4; 1 Ko 1:9; Ta 1:2; Ip 6:18 baanya pii doko watao minamanalena latala

lelyamanoli napilyamano kandao doko,

baanya pii doko lelyamoli pyoo pyoo mee katenge.

Doko, baame baa tangenya pii doko kayala nayapenge.

Gotenya kalai akali epe dupanya leamo doko

¹⁴ Embame* 2:14 1 Ti 1:4; 6:4; Ta 3:9 pii dutupa endakali dupame masina lao lamaiyoo pituu, dupame kaina pii mende atete napina lao Gotenya enomba dokonya kyoto joo lamaipi. Atete pyoo pii yanda pingi mana dokome dii epe mende manja naenya, pii silyamino endakali dupa koyasingi. ¹⁵ Emba* 2:15 1 Ti 4:6-7; Ta 2:7-8 Gotenya enomba dokonya kalai akali wambu pipae joo, mendaipi mendenya elya nakayao, baanya kiningi pii doko tolao mana lamaingi akali joo katatona lao masetala kyoto joo katape. ¹⁶ Mee* 2:16 1 Ti 4:7 kaina pii koo lenge endakali dupa wandyuu katape. Dupame endakali dupa laminao Gote maita maiyoo koo pingi kaita ongonya puma-puma pingima. ¹⁷ Dupame* 2:17 1 Ti 1:20 pii mana lamailyami dupa kopetali joo tee pyatala andake jema-jema pingi. Endakali tata dopale dupanya mendalapo akali Aimeniasapa Pailitasapa kalyambino. ¹⁸ Endakali dopale dupame kiningi pii dokonya pakuatala lao pituu, “Naima sakatatala deaka sakatala nayatamana,” lengema. Dopa lelyamino pii dokome endakali mendapuanya masoo miningi doko koyasakamaingima. ¹⁹ Dopaka* 2:19 Nam 16:5,26; Ais 26:13; 52:11; Jo 10:14; 1 Ko 8:3; Ep 2:20 doko, Goteme yuu kyoto mendenya anda muku miniamo doko minapae salakao silyamo. Anda muku doko kandao dapa lapae silyamo: “Kamongo dokome baanya endakali dupa kandenge.” Dee “Kamongo lao tee lenge endakali mendai mendai lao dupa pitakame mana koo dupa maita maitala waka katapengena,” lapae silyamo.

²⁰ Akali* 2:20 Ais 29:6; Lo 9:21; 1 Ko 3:12 andake mendenya andaka disa akipi opale golome wasepaepi silipame wasepaepi dupa iki nasinya itapi yuupimi wasepae dupa singiaka. Dupanya yangi dupame kalai epe pingi. Yangi dupame kalai mee ambe dupa pingi. ²¹ Dopana* 2:21 2 Ti 3:17 endakali mendeme mana koo dupa maita maitamo kandao doko, baa kalai epe dupa pipenge disa penge epe dopale joo katata. Dopa pyoo katao baame baanya akali andake dokonya kalai dupa kapa pao pyakamaipenge. Baame kalai epe dupa pitaka pyaanya depa latae katata.

²² Enda* 2:22 Ga 5:22-23; 1 Ti 6:11 akalipi kole dupanya nyipu laka lao masingi koo dupanya emba paka pupi. Dopa petala tolao katengepi, masoo minao katengepi, auu kayao katengepi, mona setao katengepi, mana dutupa Kamongo doko lao mona epe palyetala tee lao katenge endakali dupa-pipa watao minao katape. ²³ Embame* 2:23 1 Ti 1:4; 4:7 endakali kyakaenge mona napalenge dupanya atete pingi pii dupa nasoo waka katape. Pii dopale dupanya laiya lenge mana sakatenge doko embame masilino. ²⁴ Kamongonya* 2:24 1 Ti 3:2; Ta 1:7 kendemane mendeme laiya laa naenya, baame endakali dupa pitaka patapata lao mana auu pyoo lamaiyoo, tomba nanao koo dupanya yanu nyala nayao katapenge. ²⁵ Baame* 2:25 Ais 42:3; Mt 12:20; Ga 6:1; 1 Ti 2:4 endakali pii tanga lenge dupanya masingi dupa patapata lao tolasakamaipenge. Baame dopa pipyali kandao doko, Goteme dupa nisipumopa mona kapilyetala kiningi pii doko masokondape pimili. ²⁶ Kini,* 2:26 1 Jo 2:14 dupame masingi tolatala Sataneme baanya masingi doko watao minekena lao dupa kone makateamopa lyiamino doko pyalyinya nepamili.

Yuu etalanya pitamo dokopa endakalimi mana koo minatamina leamo doko

¹ Embame* 3:1 1 Ti 4:1 dake masepe: yuu etalanya pitamo dokopa kenda pipae etete koo dupa ipata. ² Doko,* 3:2 Lo 1:29-31 endakali dupame nyakama tange iki lao masoo muni putiti kayao, alyasale joo kalyamanona lao masoo, pii luiyapae dupa lao katatami. Dupame Gote kilya kandao, endangi takangepanya pii nepakamaiyoo, yaka pilino laanya masala nayao, koaka pyoo katatami. ³ Dupame endakali yango dupa auu nakayao, imbu kayatayaka katao, nambonambo pyoo, pyuani kayatamino dupa pyoaka katao, endakali pyao koyasoo, mana epe dupa yanda pimaitami. ⁴ Dee dupame endakali yango dupa yandapipi dupanya kingilyaka maiyoo, kopeta masingi dupa pupae lao watao minao, luiyawaka katao, Gote auu nakaenya endakalimi auu kaenge dupaka watao payao katatami. ⁵ Dupame* 3:5 Mt 7:15,21; 24:4-5,24; Lo 2:19-20; Kl 2:23; Ta 1:16 Gote watao miningi endakali paele pitamiaka doko, ketae iki watao minatala angi naminao mee pitamina, embame endakali dopale dupa wandyuu katape. ⁶ Endakali* 3:6 Ta 1:11 dopale dupanya mendapuame anda mendapuanya andiki andiki pyoo kolandatala enda mona napalenge dupanya masingi kakunyingima. Enda dupame nyakamanya koo dupa andakena lao masetala nea kaelyaminopa, nyipu laka lao masingi tata tata koo dupame pyalya lao nyingi. ⁷ Enda* 3:7 Ap 17:21 dupame koteaka lao mana tata tata dupa nyingimaka doko, dupame kiningi pii doko kapa pao masala nayapengema. ⁸ Wamba* 3:8 Eke 7:11,22; Jo 8:32; 1 Ti 2:4; 6:5; 2 Ti 2:25 akali Janisapa Jambatisapame Mosesenya kaita lyokao kateambinoliaka pyoo endakali dupame kiningi pii doko kaita lyokelyamino. Dupanya masingi dupa etete koyapumopa masoo miningi dokonya pakuatala lombapae soo kalyamino. ⁹ Dopaka doko, dupanya mana doko kapa pao andake nanjeta. Doko aipuma? Wamba akali Janisapa Jambatisapanya kyakaenge mana doko kandeaminoli pyoo, dupanya kyakaenge mana doko endakali dupa pitakame kandatami.

Embame Gotenya pii doko kyoto joo minape leamo doko

¹⁰ Dopaka* 3:10 1 Ko 4:9; 13:13 doko, nambame mana leopi, mana miniopi, kalai pio tengepi, Gote lao masoo minao kateopi, yapa maka nakayopi, endakali dupa auu kayopi, kyoto joo kateopi mana dutupa embame watao minii. ¹¹ Endakali* 3:11 Wee 34:19; Ap 13:14-52; 14:1-7,8-20; 2 Ko 11:23-27 dupame namba watao piamipi tanda diamipi dupa embame masilino. Andioko tangepi, Aikoniame tangepi, Lisata tangepi dupame namba-kisa mana koo longo minao watao piaminopa tanda nao kateo doko masilinoaka. Dupame dopa piaminopa Kamongo dokome dutupa pitakanya namba pyoo nyia. ¹² Kataisa* 3:12 Mt 16:24; Jo 15:20; Ap 14:22; Lo 8:36; 1 Te 3:4-5 Jisasapa pakatae katao Gotenya mana doko watao minamana lao masetamino endakali dupa pitaka yandapipi dupame watao pyatami. ¹³ Endakali* 3:13 Ta 1:10 koo pingipi minakasingi endakalipi dupame koo dupa pima-pima pyoo pao nyakama tange kyakapala, endakali waka dupa kyakasetamiaka.

¹⁴ Dopaka* 3:14 1 Ti 6:20; 2 Ti 2:2 doko, embame mana nyoo kyoto joo masoo minao kateeno dupa mee minawaka katape. Doko, emba mana langiamano endakali dutupa embame masilino. ¹⁵ Embame* 3:15 Jo 5:39; Ap 16:1; 2 Ko 3:14-18; 2 Ti 1:5 wane kolesa pituu indupa tuu lao Gotenya pii pepa pyapae singi dupa masoo kalyeno doko masilino. Kataisa Jisasa lao masoo miningi dokonya-kaita emba pyoo nyepae kalyale lao Gotenya pii pepa pyapae singi dupame emba kapa pao mana langingi. ¹⁶ Gotenya* 3:16 Lo 15:4; 2 Pi 1:20-21 pii pepa pyapae silyamo dupa pitaka baame akali mendapuanya mona sakatasakamaiyamopa dupame piami-pyaa. Pii dupame endakali dupa mana lamaita, dupanya koo dupa laitaka peta, dupa tolao paena lao tolaseta, mana tolatae doko minina lao mana lamaita pyaanya yaka jingi. ¹⁷ Dopana,* 3:17 2 Ti 2:21 Goteme baanya endakali dupa kapa pisetamopa dupame kalai epe dupa pitaka kapa pao pipenge.

Embame Gotenya pii doko lamaipi leamo doko

¹ Endakali* 4:1-2 Ap 10:42; Lo 14:9-10; 1 Ti 6:14; 1 Pi 4:5* 4:1-2 Ap 20:20-21,31 letepi kumapaepi dupa yapala ipatamo Kataisa Jisasa dokopa Gotepanya enombasa katao nambame Kataisa dee ipatamo dokopa baame isingi dokopa dolapo lao masetala emba kyoto joo dapa langilyo: endakali dupa pii lamaipenge jetamopi nanjetamopi dupanya Wai Pii Epe doko lamaiyoo katape. Embame etete patapata lao mana lamaiyoo pituu, endakali dupanya koo dupa laitaka pyoo pyalanya lao mona sakatasakamaiyoo katape. ³ Tenda* 4:3 1 Ti 1:10; 4:1; 2 Ti 1:13 endakali dupame mana pii tolatae doko sowani nakaenya nyakama tangenya masingi iki watao minatala, tangenya mana lenge endakali longo mendapua yapao nyoaka pupala, dupanya pii dupa sepawanimi kumatami. ⁴ Dopa* 4:4 1 Ti 4:7 petala dupame kiningi pii doko nasemana lao maita maitala, tindi pii tata dupanya kale pyasoo setami. ⁵ Dopaka doko, dupa pitakanya embame emba tange isoo katao, kenda pipae dupa nyoo, waiyakali joo katao, Gotenya kalai emba-kisa silyamo dupa pyokondape pyoo pyoo katape.

Indupa nambanya kalai etalanya pilyamo leamo doko

⁶ Kundi* 4:6 Pl 2:17 maingili pyoo endakali dupame namba taiyoko nyalanya petelyamino. Namba alu pipenge gii doko ipatelyamo. ⁷ Lekeleke* 4:7 Ap 20:24; 1 Ko 9:24; 1 Ti 1:18; 6:12 tao katenge angi dokonya namba lekeleke tao etao, kaita alo pingi dokonya alo pyao etao, Gote lao masoo miningi doko minapeta kopo lao petelyo. ⁸ Gotenya* 4:8 1 Ko 9:24-25; 1 Ti 6:14; 2 Ti 2:4-5; Pa 2:10 mana tolatae watao minatala yole nyepenge doko nambanyana lao depa lanya setalakao setekea. Yuu etatamo gii dokopa Kamongo baa pii tolao yapenge akali dokome yole doko namba dita. Dopaka doko, namba iki dyaa nayata. Baa panao ipatamo doko kandapuma laka lao putiti kaenge endakali dupa pitaka maitaka.

Opale pia mendatupa Polome leamo dupa

⁹ Akali* 4:9-10 2 Ti 1:4* 4:9-10 2 Ko 8:23; Ga 2:3; Kl 4:14; Ta 1:4; Pm 24 Dimasame yuunya dupa putiti kayapala, namba yakinatala Tesalonaika yuu dokonya pea. Akali Ketesenesa lenge doko Galasia yuu dokonya peamopa, Taitesa baa Dalamesia yuu dokonya pea. Dopana emba yapa alo pyao ipupi. ¹¹ Luku* 4:11 Ap 12:12,25; 13:13; 15:37-39; Kl 4:10,14; Pm 24 iki nambapa kalyambanona, embame Make lanyepala laminao awapa ipupape. Baame namba nisoo kalai pitamopa yaka jalapomo. ¹² Nambame* 4:12 Ap 20:4; Ep 6:21-22; Kl 4:7-8 akali Tikikasa doko Epesasa yuu dokonya pena leo. ¹³ Emba* 4:13 Ap 20:6; Ta 3:12 ipao pituu dokopa, nambanya yonge pee kisa pingi mendepa buku mende-pipa Toasa yuu dokonya akali Kapasanya andaka seteona dupa nyoo minakao pituu, dee buku mendatupa mena yanungimi wasepae utupa etete kayala nayao nyepala minakao ipupi. ¹⁴ Kana* 4:14 Wee 62:12; Pot 24:12; Lo 2:6; 1 Ti 1:20 botonjame oapi wasingi akali Alekesanda lenge dokome namba etete koyasiana, baanya kalai dokopa kapa lao tenda Kamongo dokome yanu nyeta. ¹⁵ Baame naimanya pii doko etete pyanya palyiana, embame akali doko wandyuu katape.

¹⁶ Namba* 4:16 2 Ti 1:15 tee pyao kosa lao kateo gii dokopa akali mendaipi mendeme namba nisalanya awapa nakatea. Endakali pitakame namba yakineamina, Goteme dokaitanya koo dupa masala naenako lao masilyo. ¹⁷ Dopaka* 4:17 Wee 22:21; Dan 6:17,22; Mt 10:19-20; Ap 23:11; 27:23; Pl 1:19; Kl 4:3 doko, Kamongo doko nambapa awapa katao pupu lasiamo dokome Wai Pii Epe doko lamaiyokondape piopa, endakali tata waka dupa pitakame siami. Dokopa mena kumbalo dupame namba nalanya petae doko Kamongome pyoo nyia. ¹⁸ Namba* 4:18 Lo 16:27 koyasalanya pitamino dupa pitakanya Kamongome namba pyoo nyepala baanya kaitinya isingi panda dokonya isoo laminao pata. Tanga tangapi Kamongo dokoaka lao tama pipenge lamo. Kiniaka.

Etao lasa leamo pii dupa

¹⁹ Embame* 4:19 Ap 18:2; 2 Ti 1:16 enda Pitisikapi, akali Akuilapi, Onesipotasanya palupi dupa nambame auu pyoo katena lelyona lamaiyakape. ²⁰ Akali* 4:20 Ap 19:22; 20:4; 21:29; Lo 16:23 Ilasatasa baa Kotina yuu dokonya kateamopa, akali Topimasa baa yaina pianya nambame baa Mailitasa yuu dokonya katena lao yakineo. ²¹ Akali Yupulasapi, Pyutenesapi, Lainasapi, enda Kolotiapi dee masoo miningi kaiminingi dupa pitakapimi emba auu pyoo katape lelyamino. Koo kana palitana emba nea kayao yapa ipupi. ²² Kamongo doko embanya mona andaka katena. Baame nyakama kandao mona epe palena.