POLOME
KOTINA
TANGE DUPANYA PEPA
PYAO PYASAKAMAIYAMO LAPONGE DOKO
Pii atupa wambao kandapenge
Paa mendatupanya Kotina tange dupame Polo-pipa mona koo palyoo imbu kayapae sepala dupame Polo kandao pii mendapua leaminosa Polome dupa kandao pyalanya lao pepa mende pia-pyaa. Dopa piamo pepa doko naminilyamano.
Dupame Polo kandao pii koo lao baanya pii tanga leamino dokonya pyalanya lao pepa pyao pituu tenge lao panatala, dee dupame mona kapilyetala baa-pipa mona mendai jiamino dokonya dupa kandao mona yaepao pepa piaka-pyaa. Dopa petala indupa Jutia tange Kitisene dupa nee akipi opale daa joo kalyamino dupa nisemana muni longole nyoo limbalapape lao baame tee lea-pyaa.
Pepa etao pyao pituu, baa aposele kiningi dokonyana Kotina tange mendapuame naima aposele kalyamanona Polo sambo lelyamona lengema dokonya lao panao pituu, doko dopa daana kopeta masoo leamina lao lao panao pia-pyaa.
Polome Kotina tange dupanya pepa pyao pyasakamaiyamo laponge dokonya pii lyaa dupa:
1:1–11 Pii wambao pepanya piamo dupa
1:12–7:16 Kotina tange sosa dokopa Polopa
8:1–9:15 Juta dupa nisalanya muni limbiamino doko
10:1–13:10 Polome aposele kalai piamo dokonya leamo doko
13:11–14 Polome pii etao lasa leamo dupa
11 Goteme* 1:1 Ap 16:1; 18:1; Lo 1:1; 1 Ko 1:2; 2 Ko 1:19; Ep 1:1; Kl 1:1 masiamoli pyoo namba Polo Kataisa Jisasanya aposele kalyo dokopa kaiminingi Timotipa nalimbame Kotina yuu dokonya nyakama Gotenya sosa kalyamino dupapi Akaya yuu doko pitakanya Gotenya endakali kalyamino dupa pitakapinya pepa dake pyao peekelyambano.
2 Naimanya* 1:2 Lo 1:7; 1 Ko 1:3 Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.
Goteme naima kenda pipae dupanya pyoo nyiana lao tama piamo doko
3 Naimame* 1:3 Lo 15:5; Ep 1:3; 1 Pi 1:3 naimanya Kamongo Jisasa Kataisanya Gote-kisa Takange doko lao tama pimana! Baa kondo kaenge Takange. Dee baa kenda pipae dupa pitakanya mona epe palisingi Gote. 4 Naima-kisa* 1:4 2 Ko 7:6-7,13 kenda pipae epelyamo dupa pitakanya baame naima mona epe palisingi. Dopa pilyamo doko naimame kapa pao endakali dupa-kisa kenda pipae tata tata ipatamo dupa pitakanya dupa mona epe palisalapale lao dopa pingi. Baame naima mona epe palisilyamo dokomeaka naimame dopa pingi. 5 Doko,* 1:5 Wee 34:19; 94:19; Pl 1:20; Kl 1:24 Kataisa tanda neamo dupanya naima tanda epao nenge. Mendai dopaka pyoo Kataisa-kisa Goteme naima epawaka mona epe palisilyamopa, nyakama-kisa kai lao epenge. 6 Naima-kisa* 1:6 2 Ko 4:15 kenda pipae epelyamo doko, nyakama mona epe palyowapi pyoo nyepae katawapi pyepale lao epenge. Dee Goteme naimanya mona epe palisekelyamo doko, nyakama apata mona epe palyoo katao maka maka nakayao naima tanda nelyamano dopale dupa kapa pao nao kalyepale lao pingi. 7 Dokonya naimame nyakama kapana lao kyoto joo masoo kalyamano. Doko, naima tanda nelyamano dokonya nyakama awapa tanda nengemana, naima mona epe palisekelyamo dokonya nyakama awapa mona epe palisekengena lao masilyamano.
8 Kaimia* 1:8 Ap 19:23; 20:18-19; 1 Ko 15:32 paluma, yuu Esia potopinja dokonya namba-kisa kenda pipae epeamo doko nyakamame masipimi laka lao masilyo. Kenda pipae namba-kisa epeamo doko eteteaka andake nambanya pupu lapae doko ita minalakao minapenge mende epeanya, namba kapa pao nakalyapo lamo lao masio. 9 Kini,* 1:9 Lo 1:4; 4:17; 8:11; 2 Ko 4:7 nambame nambanya mona dokome namba pyao kumasemana latapimi lamona lao masio. Dopa piamo doko, nambame namba tange tungi pyala naenya endakali kumapae dupa dee sakatasingi Gote doko tungi pyatale lao pia. 10 Baame* 1:10-11 2 Ti 4:18* 1:10-11 Lo 15:30; 2 Ko 4:15; 9:12 namba etete kumatae pyoo nyiana, tenda dee pyoo nyetaka. Kini, nyakamame apata namba nisoo loma setaminopa baame namba dee pyoo nyetana lao masetala baa tungi pio doko pyao kalyo. Dopana, endakali longo dupame namba nisoo loma setamino dokopa Goteme namba nisetamo doko kandatala, endakali longo dupame Gote lao yaka pilino latami.
Polo Kotina yapa napea dokonya leamo doko
12 Naima* 1:12 1 Ko 1:17; 2 Ko 1:17; 2:17; Ip 13:8; Je 3:15 luilyama doko dakenya luingi: naimanya mona dokome naima langyuu naima isa yuu angenya etete auu pyoo payao mona tolatae mendai palyoo payamina lao langingi. Naimame nyakamanya kaina dokonya epao dopa pyoo kateama. Mana doko Goteme naima-kisa minao sakatasia. Endakalinya masingi dokome daa. Goteme naima kandao mona epe palyoo nisiamopa dopa pyoo payama. 13 Doko,* 1:13-14 1 Ko 1:17; 2:1-5* 1:13-14 1 Ko 1:8; 2 Ko 5:12; Pl 1:26; 2:16; 4:1; 1 Te 2:19-20 nyakamame pii kapa pao itaki pyatala tenge masepenge dupa iki naimame nyakamanya pepa pyao peekenge. Indupa nyakamame naima kandao kuki dapa lao masilyamino: Kamongo Jisasa dee ipatamo gii dokopa nyakamame naima kandatala luiyataminoli pyoo naimame apata nyakama kandatala luiyatamina lao masilyamino. Dopaka doko, nyakamame masoaka pao etenge gii doko kandao nyipimi laka lao masilyo.
15 Nyakamame dopa lao masiamino doko nambame kyoto joo masetala nyakama paa lapomasa mona yaepalapale lao nyakama kanja ipato lao masio. 16 Doko,* 1:16 Ap 19:21; 1 Ko 16:5-6 namba Masetonia yuu dakenya ipao pituu nyakama kandama ipatona, dee maitakao pilyoo pituu kandamaka pilyotona lao masio. Dee Jutia patopa kaitini pupenge dupanya nyakamame nisetamina lao masiwaka. 17 Nyakamame* 1:17 2 Ko 1:12 aipa lao masilyamipi? Nambame dopa pitoo lao masio dokopa namba mona mende pali pali piope? Pande, nambame opale mende pyaanya pilyo dokopa nambame namba tangenya moname pyuwani kaenge dupa watao minao pitoo lata daa lata pingipi? Dopa etete napingi! 18 Gote* 1:18 Mt 5:37; 1 Ko 1:9 baa tungi pyapenge dokaita doko naimame nyakama pii langingi dupa pitoo lata daa lata pingi doko daana lelyo. 19 Doko* 1:19 Ap 15:22; 16:1; 18:5; 1 Te 1:1 Silipenasapi Timotipi naimame Gotenya Ikiningi Jisasa Kataisanya lao nyakama pii langingi dokome pitoo lata daa lata napinya, baame pitoo iki lea lenge. 20 Doko,* 1:20 1 Ko 14:16; Pa 3:14 Goteme epe ditona lanya setea pii dupa pitakanya pitoo lenge doko baa. Tenge dokonya minao naimame baa-kisa Gote lalyoo kiniaka lenge. 21 Dee* 1:21-22 Lo 5:5; 8:16-17; 2 Ko 5:5; Ep 1:13-14; 1 Jo 2:20 Gote tangeme naima nyakama-pipa kyoto injisilyamopa naima Kataisapa pakatae kyoto joo katenge. Baame naima yapao nyoo naima baanya lao kongali petala, baame naima opale maitakao ditamo dupa kiningi ditona lao makande pyoo wambao Oli Sipitisa doko naimanya mona andaka epekena lea.
23 Nambame* 1:23 Lo 1:9; 2 Ko 11:31 sambo lato doko Goteme kandamupa lelyona, nambame nyakama kenda pisala nayatoo latala Kotina yapa naepeo. 24 Naimame* 1:24 1 Pi 5:3 nyakamanya masoo miningi doko isalanya pyoo nakalyamano. Daa, nyakamame kyoto joo masoo minao kalyamino. Nyakama mona yaepao kalyepale lao naimame nyakama-pipa awapa kalai pyoo kalyamano.
21 Dopana,* 2:1 1 Ko 4:21; 2 Ko 12:21 nambame nambanya mona dokome dapa lao masio: nyakamanya mona doko dee kenda pisakala nayatoo latala namba nyakama kateamisa naipato lao masio. 2 Doko, nambame nyakamanya mona minao kenda pisakapuli kandao doko, nambanya mona doko minao auu pisakalanya api katapyalipi? Nambame nyakama minao mona kenda pisipu dupa iki katapimili daape! 3 Tenge dokonya minao nambame wamba nyakamanya pepa pyao peekeo. Nambame nyakama katatamisa ipato dokopa nambanya mona yaepasakapenge endakali dupame namba minao mona kenda pisala nayalapale lao masio. Nambame nyakama pitaka kandapaena, namba mona yaepelyo dokonya nyakama mona yaepengemaka. 4 Nambame* 2:4 Ap 20:31 nyakamanya pepa pyao peekeo dokopa namba mona andao mona etete koyamopa eaka lao pyao peekeo. Nambame nyakama minao mona kenda pisoo daa. Nambame nyakama etete auu kaeleno lao nyakamame kanjepale lao pyao peekeo.
Endakali koo piamo dokonya koo doko kunanya nepakamaiyepape leamo doko
5 Endakali* 2:5 1 Ko 5:1 mendeme mona minao kenda pisetamo kandao doko, baame namba minao mona kenda pisala naenya nyakama pitaka minao kuki mona kenda pisia. Dokonya nambame etete yae pyao nalatoo latala, nambame “Nyakama minao kuki mona kenda pisiana,” lelyo. 6 Nyakamanya endakali longo dupame baa-kisa kenda pingi setapeamino doko kapana, dee epao setala nayalapape. 7 Dopana,* 2:7 Kl 3:13; 2 Te 3:14-15 indupa nyakamame baanya koo doko kunanya nepatakamaitala mona epe palisakamaiyepape. Aopyoo latala, baa etete mona kendame kumatana dopa pyepape. 8 Dopana, nyakamame baa auu kaelyamino lao kandena pii mende lao yaki pipimi laka lao etete masilyo. 9 Nambame* 2:9 2 Ko 7:15; 10:6 wamba pepa pyao peekeo doko, nyakama kyoto joo kalyamipi nakalyamipi, dupa pitakanya nambanya pii doko watao minilyamipi naminilyamipi lao kanjanya pyao peekeo. 10 Nyakamame endakali mendenya koo doko kunanya nepakamailyamino endakali dokonya nambame apata kunanya nepakamaingiaka. Endakali mendenya koo doko nambame kunanya nepakamaipenge jiamo kandao doko, nambame nyakama lao masetala Kataisanya enomba dokonya kunanya nepakamaiyo. 11 Dopa* 2:11 Lu 22:31; Ep 4:27 pio doko, Sataneme naima ita naminina lao pio. Doko naimame baanya pitoo lao masingi doko kandenge daape.
Polome mona kenda kayapi Gote lao tama piapi dokonya leamo doko
12 Wamba* 2:12 Ap 14:27; 16:8; 1 Ko 16:9* 2:12 Ap 20:1 nambame Toasa yuu dokonya Kataisanya lao Wai Pii Epe doko lamaiyanya peopa, yuu dokonya nambame Kamongonya kalai pyakamaitale lao kaitini lumbapae sia. 13 Dopaka* 2:13 2 Ko 7:6; Ga 2:1; Ta 1:4 doko, nambame nambanya kalai mendai pingi kaiminingi Taitesa kutao kayo. Dopa pio dokome nambanya mona doko auu pyoo napaleanya, nambame endakali dupa katena lao lasa latala namba ipao Masetonia yuu dakenya pyakayo.
14 Dopaka* 2:14 Kl 2:15 doko, Gote tama pimana! Doko, baame naima pupu lasilyamopa naima Kataisapa pakatae katao koteaka lao yanda pyoo ita miningi. Dee naima-kisa Kataisa lao masepenge epe doko tunduma pyoo yuu dupa pitakanya baame taena lenge. 15 Endakali* 2:15 1 Ko 1:18 pyoo nyepae kalyamino dupapi yuu koo dokonya patae kalyamino dupapi dupanya kaina dokonya naima Kataisame tunduma epe pingi mende Gote lao pyao yangenge dopale joo kalyamano. 16 Pyoo* 2:16 Lu 2:34; 2 Ko 3:5-6 nyepae kalyamino endakali dupa-kisa tunduma epe petala dokome dupa lete etete katasingi. Yuu koo dokonya patae kalyamino endakali dupa-kisa etete aii pyatala aii dokome dupa etete pyao kumasingi. Dopana, apimi kalai doko kapa pao pipengepe? 17 Endakali* 2:17 2 Ko 1:12; 1 Pi 4:11 waka dupame payalya payana pyoo Gotenya pii doko pisinisa kalai joo lamaiyoo paelyamino dopale naima daa. Naima Goteme wai lea dokonya naimame baanya enomba dokonya katao Kataisanya akali joo mona tolatae mendai paliuu pii lamaingi.
3Naima pii lao setapae enenge dokonya kalai akalina leamo doko
1 Indupa* 3:1 Ap 18:27; Lo 16:1; 1 Ko 16:3; 2 Ko 5:12; 10:12; 11:18 pituu tee pyao naimame naima tange dee lalyemanape? Pande endakali mendapuame pingimali pyoo, endakalimi naima lalyoo pepa pyapae mende nyakama dipengepe? Pande naimame nyakama-kisa pepa dopale mende nyepengepe? 2 Daa,* 3:2 1 Ko 9:2 nyakama naima lalyoo pepa pyapae joo nyakama naimanya mona dokonya pepa pyatae kalyamino. Endakali dupa pitakame pepa doko kandatala itaki pingima. 3 Dake* 3:3 Eke 24:12; 31:18; 32:15-16; Jet 31:33; Ese 11:19; 36:26-27 panao silyamo: naimame kalai pimano dokonya-kaita nyakama Kataisame pepa pyatae joo kalyamino. Baame pepa doko pyanjolepi mendeme pyala naya. Daa, baame lete katenge Sipitisa Gote dokome pia. Pepa doko kananya pyatae nakatenya endakalinya monanya pyatae kalyamo.
4 Dee naimame Kataisa mambele Gotenya enomba dokonya dopa lao kyoto joo masilyamano. 5 Naimame* 3:5 Jo 3:27; 2 Ko 2:16 opale mende kapa pao napipenge dokonya naima tangeme opale mende pingina nalapenge. Kalai kapa pao pipenge pupu lapae doko Goteme naima dingi. 6 Baameaka* 3:6 Jet 31:31; Jo 6:63; Lo 2:29; 7:5-6; 1 Ko 11:25; Ep 3:6-7; Kl 1:23,25 naima baanya pii lao setapae enenge dokonya kapa pao kalai akali joo kalyepale lao katasia. Pii lao setapae enenge doko mana setapae dupanya pii pepa pyapae singi dopale mende daa. Oli Sipitisanya mende. Doko, mana setapae dupanya pii pepa pyapae singi dokome endakali pyao kumasingi. Dopaka doko, Sipitisa dokome endakali lete katasingi.
7 Goteme* 3:7-8 Eke 32:16; 34:29-35; Ip 3:2* 3:7-8 Ga 3:2,5 mana setapae dupa kana pata mendalaponya pepa pyanya katatala Mosese maiya-pyaa. Gii dokopa Goteme baanya tii pipae doko Mosese-kisa panasiamopa baanya lengelyaapi doko etete tii pia-pyaa. Kini, maitakao tii piamo doko etama-etama pyoo eteamoaka doko, wambao Isataele endakali dupame baanya lengelyaapi doko kanjanya piaminopa lenge auu makea-pyaa. Dopana, kumingi doko sakatasingi mana setapae dokonya Gotenya tii pipae andake dopa pyoo sepeta setea tamo kandao doko, kiningi etete Oli Sipitisa toko naima endakali dupa dingi kalai dokonya baanya tii pipae etete epao singi daape! 9 Doko,* 3:9 Dit 27:26; Lo 1:17; 3:21 Goteme endakali dupa-kisa pii setenge kalai dokonya tii pipae setea tamo kandao doko, kiningi etete baame endakali dupa tolataena lenge kalai dokonya tii pipae etete epao singi. 10 Doko,* 3:10 Eke 34:29 kalai dokonya tii pipae eteteaka epao sipya dokome wamba Goteme tii pipae seteamo kalai dokonya indupa tii pipae nasingi joo silyamo. 11 Doko, kalai etama-etama pyoo etenge dokonya tii pipae setea tamo kandao doko, kalai soaka penge dokonya tii pipae etete epao singi daape!
12 Naimame* 3:12 1 Te 2:2 doko lao masokondape petala paka nakayao pii panao lamaingi. 13 Naimame* 3:13 Eke 34:33 Moseseme piamoli napingi. Baame baa-kisa tii piamo doko etama-etama pyoo etatamo doko Isataele endakali dupame nakandena lao opale kotalepi mendeme baanya lengelyaapi sanga pia-pyaa. 14 Dopaka* 3:14 Lo 10:4; 11:25; 2 Ti 3:15 doko, dupanya masingi doko pyakilyia-pyaa. Doko, pii lao setapae wambatae dokonya lao lapae singi buku dupa dupame itaki piamino doko pyao ipao indupa tuu lapiminopa, kotale dokomeaka dupanya mona doko sanga pyatae mee kalyamo. Doko, endakali mende Kataisapa pakelyamo dokonya-kaita iki kotale doko nyoo nepenge. 15 Kini,* 3:15 Eke 34:34-35; Lo 11:7-10 indupa apata dupame Moseseme pii pepa piamo doko itaki pyapiminopa kotale mende dupanya mona dokonya silyamo. 16 “Dopaka* 3:16 Lo 11:23,26 doko, endakali mendeme Kamongo doko lao mona kapilyilyamo dokopa kotale doko nyoo nepenge.” 17 Nambame* 3:17 Ais 61:1-2; Jo 8:32-36; Lo 8:2; Ga 5:1 Kamongo lelyo doko Oli Sipitisa doko. Sipitisa Kamongo doko katenge endakali doko opale mendaipi mendeme anjala naenge. Daa, endakali doko mokopae katenge. 18 Dopana* 3:18 Eke 16:7; 24:16-17; Lo 8:29; 2 Ko 4:6; 2 Pi 1:4; 1 Jo 3:2; Pa 21:23 naima pitaka opale mendeme lengelyaapi sanga pyatae doko nyinya nepatae katao, naimame Kamongonya tii pipae doko galasanya imambu joo laitaka pingi. Dopa pyoo kalyamanopa naima baa wangi talapale lao naima minao aloo pyoo kalyamopa, koteaka lao naima tii pipae nyema-nyema pyoo katenge. Doko, Kamongo baa Sipitisa dokomena dopa pingi.
4Sanima penge dupanya eteteaka epe singina leamo doko
1 Goteme* 4:1 2 Ko 3:6 naima kondo kayapala baame baanya kalai doko naima dia dokonya naima mona kumala naenge. 2 Dopa* 4:2 2 Ko 2:17; 1 Te 2:4-5 napinya endakali dupame elya kayapala yalo pingima mana dupa naimame maita maingi. Naima waa katao payala naenge. Dee naimame Gotenya pii doko aloo napingiaka. Dopa napinya endakali dupame nyakamanya mona dokome naima akali epena lao masina lao naimame kiningi pii doko Gotenya enomba dokonya tolao lamaingi. 3 Naimame* 4:3 1 Ko 1:18 Wai Pii Epe lamaingi doko yalo pitamo kandao doko, endakali yuu koo dokonya patae kalyamino dupa-kisa iki yalo pita. 4 Isa* 4:4 Jo 12:31; 14:7; Lo 8:29; Ep 2:2; Kl 1:15; 2 Te 2:10; Ip 1:3 yuu angenya gote dokome dupanya monanya lenge doko minao iminjisiamo dokonya dupame masoo minala naengema. Dee baame dopa piamo doko Gote wangi tapae Kataisanya tii pipae dokonya lao Wai Pii Epe dokome tii pisingi doko dupame nakandena lao pia. 5 Doko* 4:5 2 Ko 1:24; 1 Ti 1:11 naimame naima tangenya lao pii lamaiya naenge. Daa, naimame pii dake lamaingi: Jisasa Kataisa baa Kamongona, naimame baa lao masetala nyakamanya kendemane joo kalyamanona lao lamaingi. 6 Doko,* 4:6 Jen 1:3; Ais 9:2; Jo 8:12; 2 Ko 3:18 wamba iminjetae kateamo dokonya tii pina leamo Gote dokomeaka baanya tii doko naimanya mona dokonya pisekea. Naima-kisa tii doko pitamopa naimame baanya tii pipae Kataisanya lengelyaapinya singi doko kandao masalapale lao baame dopa pia.
7 Eteteaka* 4:7 1 Ko 1:27; 2 Ko 1:9; 5:1; 12:9 epe doko singi akali dupa naima sanima penge joo kalyamano. Dopaka doko, naima dopa pyoo kalyamano dokome pupu lapae andake doko Gotenyana naimanya daana lao laitaka pingi. 8 Dupa* 4:8 1 Ko 4:9-13; 2 Ko 1:8; 6:4-10; 7:5 pitakanya kenda pipae naima-kisa sala epengeaka doko, dokome naima etete ita minala naenge. Naimame longo pyoo masingiaka doko, naima mona koyala naenge. 9 Endakali dupame naima watao pingimaka doko, Goteme naima yakinala naenge. Dupame naima pyao isa setengemaka doko, naima etete kumala naenge. 10 Dopa* 4:10 1 Ko 15:31; Kl 1:24 pyoo kalyamanopa Jisasa kumapenge joo kateamo mana dokome mendai dopaka pyoo koteaka lao naima kanja epenge. Jisasanya lete katenge kende doko naima-kisa panena lao dopa pingi. 11 Kini,* 4:11 Lo 8:36; 2 Ko 6:9 Jisasanya lete katenge kende doko apata naimanya kumapenge yonge dokonya panena lao, naimame baanya kalai pyakamaipumanosa naima katapumano gii dupa pitakanya kumapenge joo kalyamano. 12 Dopa pyoo katapumanopa kumingi kende dokome naima-kisa kalai pyoo katenge. Dopaka doko, lete katenge kende dokome nyakama-kisa kalai pyoo katenge.
13 Pii* 4:13 Wee 116:10 pepa pyapae singi dokonya, “Nambame masoo minio dokome pii lamaiyona,” lapae silyamo. Masoo miningi dokonya naima-kisa mana mendai dopaleaka sipumopa naimame masoo minapuma dokome naimame apata pii lamailyamano. 14 Doko,* 4:14 Lo 1:4; 8:11; 1 Ko 6:14; 1 Te 4:14 Kamongo Jisasa dee lete katasiamo Gote dokome naima apata Jisasa-pipa dee lete katasetala baame naimapi nyakamapi baanya enomba dokonya lanyetana lao masilyamano. 15 Dutupa* 4:15 2 Ko 1:3-6,11 pitaka pingi doko, nyakama nisalanya pingi. Dee Gotenya mona epe palenge doko endakali longo dupa-kisa tayama-tayama pyoo tayatamopa dupame baa tama pyoo baa lao etete yaka pilino latami.
Naimame masoo minao kalyamano leamo doko
16 Tenge* 4:16 Lo 7:22; Ep 3:16 dokonya minao naima mona kumala naenge. Naima yongenya koyao katengeaka doko, naimanya mona kokotena yuu yongelya dii lao minao enenge injisakao katenge. 17 Naima-kisa* 4:17 Mt 5:11-12; Lo 8:17-18; 1 Pi 5:10 kenda pipae epenge doko angi mende daa. Doko gii kuki iki epenge. Dopaka doko, dokonya-kaita naima pao tanga tangapi eteteaka tii pipae katatama. Tii pipae katatamano dokome kenda pipae kuki epenge doko etete ita minatama. 18 Doko,* 4:18 Lo 8:24-25; Kl 1:16; Ip 11:1-3 lengeme kandenge dupa naimame kandapeta nasingi. Daa, lengeme nakandenge dupa naimame kandapeta singi. Doko, lengeme kandenge dupa gii kuki iki singi. Dopaka doko, lengeme nakandenge dupa soaka katenge.
51 Indupa* 5:1 Ais 38:12; 1 Ko 15:44-49; 2 Ko 4:7; Pl 3:20; Kl 3:3-4; 2 Pi 1:13-14 naima isa yuu angenya kalyamano aiyaa anda dake lakyetamo kandao doko, naima katatama anda angi doko kaiti-kisa katekelyamona lao masilyamano. Anda doko Gote tangeme petae. Endakali kingi mendeme daa. Anda doko tanga tangapi kalyu katata. 2 Indupa* 5:2 Lo 8:23; 1 Ko 15:51-53 kalyamano angepa naima mona ŋee lao katao naimanya anda kaiti-kisa kalyamo doko yonge pee joo pee pyuwanimi kumilyamano. 3 Naima doko pee pyoo katatamano kandao doko, mee nakatatama. 4 Kini,* 5:4 1 Ko 15:53-54; 1 Te 4:15 naima aiyaa anda dakenya katapumano dokopa tanda nao mona ŋee lao kalyamano. Doko, naimame anda dake yakinatama daa. Naima naimanya anda kaiti-kisa kalyamo dokonya kolandatamanopa lete katenge dokome naimanya kumingi doko etete etasalakao etasipya laka lao masilyamano. 5 Naima-kisa* 5:5 Lo 8:16,23; 2 Ko 1:22 dopa pina lao Gote tangeme naima depa lasetea. Dee baame naima opale maitakao ditamo dupa kiningi ditona lao makande pyoo wambao Oli Sipitisa doko ditia.
6 Dopa* 5:6 Ip 11:13-16; 1 Pi 1:17 piamopa naima koteaka lao mona kyoto joo kalyamano. Naima anda dakenya katapumano dokopa naima Kamongo-pipa awapa nakalyamanona lao masilyamano. 7 Doko,* 5:7 Lo 8:24; 1 Ko 13:12 naimame baa lengeme kandao nakalyamano. Baa lao masoo minao kalyamano. 8 Dopaka* 5:8 Pl 1:21-23 doko, naima mona kyoto joo kalyamanona lao nambame latelyo. Dee naimame anda naima kalyamano dake yakinatala pao Kamongo-pipa awapa katatamano kandao doko, etete epena lao masilyamano. 9 Dopana,* 5:9 Kl 1:10; 1 Te 4:1 naima baa-pipa awapa katatamanopi angenya katatamanopi doko baame auu kaenge mana dupa naimame minamana lao masingi. 10 Doko,* 5:10 Mt 16:27; 25:19,31; Jo 5:27; Lo 14:10; Ip 11:6 naima pitaka Kataisame yapena lao baanya enomba dokonya katapenge. Naima isa yuu dakenya kalyamano dokopa naima mendai mendai lawame mana koo epepi minatamanoli pyoo yole nyepenge dokonya dopa pipenge.
Endakali dupa Gotenya mona setenge injisakamaipenge kalai dokonya leamo doko
11 Dopana,* 5:11 2 Ko 4:2 naimame Kamongo masetala paka semaiyoo katao endakali dupanya masingi doko aloo pisakamaiyoo kalyamano. Goteme naima kandapaena dee nyakamame nyakamanya mona dokome apata naima masipimi laka lao nambame masilyo. 12 Naimame* 5:12 2 Ko 3:1; Pl 1:26 nyakama pii langilyamano dake nyakamame naima dee lalyalapale lao daa. Nyakamame naima kandatala nyakama luiyalapale lao kaitini mende nyakama dilyamano. Mona andaka aipa pyoo kalyamape lao masoo luiyala naenya mee ketae yonge kandao luingi endakali dupa kandao nyakamame lamaipenge pii dupa nyakama-kisa sipya laka lao naimame masilyamano. 13 Kini naima kyekeamape? Doko, Gote lao masetala kyekeama. Kini naima mona paliuu kalyamape? Doko, nyakama lao masetala mona paliuu kalyamano. 14 Doko,* 5:14 Lo 5:15; 6:4-11; 8:32 Kataisame naima auu kaenge dokome naima kalai pyepale lao sakatasingi. Kini, naimame dapa lao masilyamano: akali mendeme naima endakali dupa pitaka alo pyoo kumatea. Dopa piamo dokonya naima pitaka kumateama. 15 Baame* 5:15 Lo 6:11; 14:7-9; 1 Ti 2:6 naima pitaka alo pyoo kumiamo doko naima endakali kalyamano dupa deaka naima tangenya joo kalya naenya, baanya itata kalyepale lao baame naima alo pyoo kumapeamopa Goteme dee sakatasia.
16 Dopana,* 5:16 Lo 1:3; 9:5 endakalimi endakali mende yapao kandenge kaitini dokonya naimame endakali mende deaka yapala naenge. Kini, wamba naimame kaitini dokonya Kataisa yapeamanoaka doko, indupa naimame baa deaka dopa napilyamano. 17 Dee* 5:17 Ais 43:19; Mt 9:16; Lo 8:1,10; Ga 6:15; Ep 2:10; Ip 8:13; Pa 21:5 endakali mende Kataisapa pakatae kalyamo doko, baa enenge. Kandeleno! Wambatae dupa etapala enenge dupa sakatatelyamo. 18 Gote* 5:18 Lo 5:10; Kl 1:20 baame dutupa pitaka pia. Naimame Gote yandapipi joo kateamanopa Kataisa mambele baame naima mona setea. Dee naimame endakali waka dupa baanya mona setenge injisakamaipenge kalai doko baame naima dia. 19 Doko* 5:19 Jo 3:17; Lo 3:24-25; Kl 1:19-20 dapa: Kataisame kalai piamo dokome Goteme yuunya endakali dupa pitaka mona setao katea. Endakali dupame koo pingi dokonya baame yanu nanyetona lao masoo katea. Dee baame endakali dupa baanya mona setenge injisiamo pii doko naimanya kingilyaka setea.
20 Dopana,* 5:20 Ep 6:20 naima Kataisanya enomba joo katenge. Naimame nyakama pii kongo lao langingi doko Gote tangeme langilyamosa pingi. Naimame Kataisanya panda nyoo katao nyakama Gotepa mona setao kalyepa nalepe lao masoo katenge. 21 Akali* 5:21 Ais 53:5-8; Jo 8:46; Ap 3:14; Lo 8:3; 1 Ko 1:30; Ga 3:13; Pl 3:9; 1 Pi 2:22,24; 1 Jo 3:5 koo nasingi doko naima alo pyoo Goteme baa koo singi akali injisia. Baame naima akali dokopa pakatala, naima tolataena latae endakali katatamina lao baame dopa pia.
61 Dopana,* 6:1 2 Ko 5:20 naima Gote-pipa awapa kalai pyoo katao kyoto joo langilyamanona, Goteme nyakama kandao mona epe palenge doko nyakama-kisa mee maa yangatae katena lao kayala nayalapape. 2 Doko* 6:2 Ais 49:8; Lu 4:19-21 Goteme lao pituu,
“Nambame yuu gii epe seteo dokonya embanya pii doko siona,
pyoo nyingi gii dokonya nambame emba nisiona,” lea-pyaana lapae silyamo.
Kandeleno! Goteme yuu gii epe seteamo doko indupa silyamo. Pyoo nyingi gii doko indupa!
3 Naimame* 6:3 2 Ko 8:21 Gotenya kalai pyakamaingi doko kandao endakali dupame pii koopi mende nalena lao naimame endakali mende koyasepenge opale mendaipi mende napingi. 4 Dopa* 6:4 1 Ko 4:9-13; 2 Ko 4:2,8-10 napinya naima Gotenya kalai pyakamaingi akalina lao dupa pitakanya naimame endakali dupa laitaka pingi. Naima-kisa kenda pipae epelyapi, naima minao koyasilyamipi, dee naima tanda dilyamipi dupanya naima etete kyoto joaka katenge. 5 Endakali* 6:5 Ap 16:23; 2 Ko 11:23-27 dupame naima konjame pyao, anjoo palyoo, katao kakopalya kakopana pyoo katengema. Dopa pilyaminopa naima lekeleke tao, luu napaliuu, lopo kayao katenge. 6 Naimame* 6:6 Ga 5:22; 1 Ti 4:12 mona epe tolatae paliuu katengepi, mana kandengepi, yapa maka nakaengepi, kondo kaengepi, dutupame naima Gotenya kalai pyakamaingi akalina lao endakali dupa laitaka pingi. Dee Oli Sipitisa doko naima-pipa awapa katenge. Naimame endakali dupa sambo auu kaele napinya kiningi auu kaenge. 7 Naimame* 6:7 Lo 13:12; 1 Ko 2:4; 2 Ko 10:4; Ep 6:11-12 kiningi pii doko lamaingi. Naimame Gotenya pupu lapae dokome kalai pingi. Naimame mana tolatae doko kingi tolae-kaitame yandate minili kingi koyakaitame konambi minili pingi. 8 Endakali* 6:8 1 Ko 7:29-31 yangi dupame naima lalyilyaminopa yangi dupame naima kandanya palyingima. Yangi dupame naima lao nepelyaminopa yangi dupame naima tama pingima. Yangi dupame naima kandao minakasingi akalina lao masingimaka doko, naima akali kiningi lenge. 9 Endakali* 6:9 Wee 118:18; Lo 8:36; 1 Ko 7:29-31; 2 Ko 4:10-11 dupame naima nakandengema joo katengeaka doko, longo dupame naima kanjakao kandengema. Naima kumalanya pyoo katengeaka doko, mee kalyamano kanjepa. Goteme naima mana lao tolasingiaka doko, baame naima pyao kumasala naenge. 10 Naima* 6:10 Lo 8:32; 1 Ko 3:21; 2 Ko 7:4; Pl 2:17; Kl 1:24 mona kenda pisingiaka doko, koteaka lao naima mona yaepao katenge. Naima tipya joo katengeaka doko, naimame endakali longo dupa kamongasingi. Naima oapi dupa daa joo katengeaka doko, dupa pitaka naimanya.
11 Oo* 6:11 2 Ko 7:3 nyakama Kotina tange dupa, naimame mende masala nayao pii dutupa nyakama tolao langilyamano. Naimame nyakama mona salakao singi. 12 Naimame nyakama mona setala nayamana lao tuu napiama. Daa, nyakamame naima mona setala nayamana lao tuu pyoo kalyamino. 13 Nambame* 6:13 1 Ko 4:14; Ga 4:19 nyakama nambanya wane dupa langilyona, naimame nyakama mona setengeli pyoo nyakamame naima mona salakao salapape.
Masoo minala naenge endakali dupa-pipa awapa nakalyepape leamo doko
14 Nyakamame* 6:14 Dit 22:10; Jo 8:12; Ep 5:7,11 masoo minala naenge endakali dupa-pipa tole pyatala mendai dopale joo nakalyepape. Doko, mana tolatae dokopa mana koyapae dokopa dolapo aipa petala mendai dopale jetape? Tii pingi dokopa iminjetae dokopa dolapo aipa petala pyasetape? 15 Kataisame aki mendenya Biliopa+ 6:15 bilio Bilio doko Satanenya kenge mende.mona mendai palyetape? Masoo miningi endakeli dokopa masoo minala naenge endakali dokopa dolapo lapotame aki mende awapa lao minatambipi? 16 Dee* 6:16 Eke 25:8; 29:45; Lep 26:11-12; Nam 5:3; Jet 31:1; Ese 37:27; 1 Ko 3:16-17; 6:19; 10:21 Gotenya losuu anda doko-pipa sambo gote dupa-pipa aipa petala awapa pii mendai lao yaki pitamipi? Doko, naima lete katenge Gote dokonya losuu anda joo kalyamano. Gote tangeme dopaka lao dapa lea-pyaa:
“Namba dupa-kisa katao dupanya kaina dokonya payato.
Namba dupanya Gote katatopa, dupa nambanya endakali katatamina,” lea-pyaa.
17 Dopana,* 6:17 Ais 52:11; Jet 51:45; Pa 18:4
“Namba Kamongo dokome lelyona, nyakama dupa-pipa awapa nakatenya waka kalyepape.
Nyakamame koo dupa watandalapi nayao katataminopa namba tange nyakama lanyoto.
18 Dopa* 6:18 2 Sam 7:14; 1 Ktl 17:13; Ais 43:6; Jet 31:9; Osi 1:10; Pa 1:8 petala namba nyakamanya takange katatopa nyakama nambanya ikiningi wanengepi katatamina,
Kamongo eteteaka pupu lapae dokome lelyona,” lea-pyaa.
71 Mona setenge paluma, Goteme dopa pitona leamo pii dutupa pitaka naima kandao lea-pyaa. Dopana, naimame naimanya yongepi imambupi koyasetamo dupa pitaka kunao nepamana. Naimame Gote andanda semaiyoo katao etete epe joo payamana lao masoo katamana.
Polo mona epe palyiamo dokonya leamo doko
2 Nyakamame* 7:2 Ap 20:33; 2 Ko 12:17* 7:2 2 Ko 6:12-13 naima mona salapape. Naimame nyakamanya endakali mende koo pingyala nayama. Mende minao koyasala nayama. Dee mende minakasala nayamaka. 3 Nambame dopa lelyo doko, nyakama-kisa tenge peyao nalelyo. Doko nyakama naimanya mona itange etetena latelyo. Nyakama kumatamino doko, naima awapa kumatama. Nyakama katatamino doko, naima awapa katatama. 4 Nambame* 7:4 Kl 1:24 nyakama kapana lao masokondape pilyo. Nambame nyakama lao masetala etete luilyo. Naima-kisa kenda pipae epelyamo dupa pitakanya namba mona yaepao mona etete epe palyoo katenge.
5 Wamba* 7:5 2 Ko 2:13; 4:8 naima Masetonia yuu dakenya ipao kateamano dokopa apata naima kukipi mende mee kalya nayama. Daa, kenda pipae tata tata dupa pitaka naima-kisa epea. Endakali waka dupa-pipa laiya lao naimanya mona andaka paka kayao pyoo kateama. 6 Dopaka* 7:6 2 Ko 1:3-4; 2:13; 7:13-14 doko, mona kenda kaelyami endakali dupa mona epe palisingi Gote dokome Taitesa baa naima kateamasa epeamo dokonya-kaita baame naima mona epe palisia. 7 Baa* 7:7 1 Te 3:6 epeamo dokonya iki mona epe palyala nayama. Daa, baa nyakama-pipa kateamino dokopa nyakamame baanya mona epe palisiamino doko baame naima langiamo dokome apata naima mona epe palyiama. Taitesame naima langyuu, nyakamame namba etete kandapuma laka lao masoo, mona andao namba watao katamana lao kyoto joo masoo kalyaminona lao langia. Dokonya namba eteteaka mona yaepeo.
8 Nambame* 7:8 2 Ko 2:1-4; Ip 12:11 nyakamanya pepa mende pyao peekeo dokome nyakamanya mona minao kenda pisiana lao masilyo. Dopaka doko, nambame dopa napyuu naenya lao masala naelyo. Kini wamba nambame pepa pyao peekeo dokome kuki mende nyakamanya mona minao kenda pisiamo doko kandatala nambame dopa napyuu naenya lao masio. 9 Dopa lao masiwaka doko, indupa nambame taeme piona lao masetala mona yaepelyo. Nambame nyakamanya mona minao kenda pisio dokonya namba mona yaepala naelyo. Daa, nyakama mona kenda kayamino dokome nyakama mona kapilyiamino dokonya namba mona yaepelyo. Doko, Goteme mona kenda kayapimili lao masiamoli pyoo nyakama mona kenda kayami. Dopana, naimame opale mendenya nyakama koyasala nayama. 10 Doko* 7:10 Mt 27:3-5; Ip 12:16-17 Goteme mona kenda kayapimili lao masingili pyoo mona kenda kaenge dokome naima endakali dupa mona minao kapilyetala pyoo nyepae kalyepale lao katasingi. Dopana, endakali mendeme dokonya mona kenda nakayapenge. Dopaka doko, yuunya endakali dupame mona kenda kaengeli pyoo mona kenda kaenge dokome etete koenge doko sakatasingi. 11 Goteme mona kenda kayapimili lao masiamoli pyoo mona kenda kayamino dokome nyakama-kisa mana tata tata epe dupa sakatasiamo doko nyakamame masalapape. Dopa piamo dokome nyakamame mana tolao minawani kayao kateami. Dopa pyoo iki kalya naenya nyakamame nea kayao nyakama-kisa pii siamo doko yanu pyamana lao masiami. Dee nyakamame mana koo dupa etete maka kayao kateami. Dopa pyoo iki kalya naenya nyakama paka kayao kateami. Dee nyakamame naima kandatapuma laka lao masoo naima watao payawanimi kumao kateami. Dee nyakamame kyoto joo kateami. Dee nyakamame kenda pipae siamo doko auu pyoo tolasalanya pyoo kateamiaka. Nyakamame dokonya piamino dupa pitakanya nyakama-kisa tenge mende nasilyamona lao laitaka piami. 12 Dopana,* 7:12 2 Ko 2:3,9; 7:8 nambame pepa pyao peekeo doko akali koo piamo dokopa dee baame akali mende koo pimaiyamo dokopa dolapo lao masetala pyao peyakala nayo. Daa, nyakamame naima watao payawanimi kumao kateamino doko Gotenya enomba dokonya nambame nyakama laitaka pyaanya pepa doko pyao peekeo. 13 Nyakamame dopa pyoo kateamino tenge dokonya naima mona epe palyoo kateama.
Kini, naima mona epe palyoo kateamanoaka doko, nyakama pitakame Taitesanya mona minao auu pisetakamaiyaminopa baa mona yaepao kateamo dokonya naima eteteaka mona yaepeama. 14 Nambame baa lamaiyoo nyakama lalyio dokonya namba elya sala nayo. Naimame pii nyakama langiamano dupa pitaka kiningi. Mendai dopaka pyoo naimame Taitesa lamaiyoo nyakama lalyiamano pii doko kiningi jiaka. 15 Taitesa* 7:15 2 Ko 2:9 baa nyakama kateamisa epeamo dokopa nyakamame paka kayao walu lao baa lanyiami. Dee nyakama pitakame baanya pii doko watao miniami. Nyakamame dopa piamino doko baame masepeta sepala nyakama mona setalakao setelyamo. 16 Nambame* 7:16 2 Te 3:4 dupa pitakanya nyakama etete kapana lao masetala mona yaepao kalyo.
8Muni pyasingi kalai epe doko pyoo etasalapape leamo doko
1 Kaimia* 8:1 1 Ko 16:15; 2 Ko 11:8-9* 8:1 Lo 15:26 paluma, indupa naimame Gote mona epe palenge dokome Masetonia yuu dakenya sosa kalyamino dupame pina lao sakatasiamo dokonya salapale langimana. 2 Dupa-kisa kenda pipae andake mendapua ipupala dupa etete makande pyaakao pia. Dopa piamoaka doko, dupanya mona eteteaka epe palenge dokopa dupa etete daa jepae katengema dokopa dolapome dupa sakatasiamopa dupame muni etete epao pyasiami. 3 Nambame* 8:3 1 Ko 16:1-2 kiningi dupanya pingima dupa kandatala lelyona, dupame pyasepenge jiamoli pyoo pyasiami. Kini, dupame pyasepenge jiamo doko ita minao pyasiami. Dee dupa tangeme dopa pimana lao masetala piami. 4 Gotenya* 8:4 Ap 24:17; Lo 15:31; 2 Ko 9:1-2 endakali dupa nisingi kalai epe dokonya dupame awapa nisalanya nisalapa lapale lao naima kongo lao tee leami. 5 Dupame pyaamino lao naimame masiamanoli pyoo iki pyaa nayami. Daa, wambao dupame nyakama tange Kamongo maiyami. Dee Goteme masiamoli pyoo dupame nyakama tange naima diamiaka. 6 Dopana,* 8:6 2 Ko 2:13; 8:16,23 Taitesame nyakamanya kainanya kalai epe tee pyao sakatasiamo doko nyakamame pyoo etasalapale lao baame nyakama nisina lao baa lamaiyokondape petelyamano. 7 Nyakama-kisa* 8:7 1 Ko 1:5; 16:1-2 epe dupa longo lao dapa pyoo silyamo: nyakamame masoo minao, pii lamaiyoo, mana kandao, kalai pyuwani kayao, naima auu kayao kalyamino. Dopaka pyoo kalai epe lelyo doko apata nyakamame kandao epao pipimi laka lao naimame masilyamano.
8 Nambame lelyo doko nyakamame kayala nayao dopaka pyepapena lao nalelyo. Daa, nambame nyakamanya auu kaenge doko kanjanya endakali waka dupame kalai doko pyuwani kayao pyoo katengemana lelyo. 9 Doko,* 8:9 Mt 5:3; 8:20; 1 Ko 1:5; 2 Ko 6:10; 9:15; Pl 2:6-7; Ip 12:2 naimanya Kamongo Jisasa Kataisame mona epe palyoo piamo doko nyakamame masilyamino. Baa Kamongoaka doko, baame nyakama nisalanya tipya jia. Baa tipya jiamo dokome nyakama kamongo joo kalyepale lao dopa pia.
10 Kalai* 8:10 1 Ko 16:2-3; 2 Ko 9:2 epe dokonya nambanya masingimi nyakamame ee kana peamo dokonya kalai pyoo tee piamino doko pyoo etasetamino doko epena lao masilyo. Kalai doko wambao nyakamame piami. Dee wambao nyakamameaka kalai doko pimana lao masiami. 11 Dopana, nyakamame indupa sakatao kalai doko pyoo etasalapape. Nyakamame kalai doko tee pyao pituu pyuwani kayao piami kandenoli pyoaka pyoo etasalapape. Nyakamame pyasepenge jetamoli pyoo pyasalapape. 12 Doko,* 8:12 Mk 12:43 endakali mendeme pyasowani kayao pituu baa-kisa silyamoli pyoo pyasilyamo kandao doko, Goteme auu kaenge. Baa-kisa nasilyamo dupa Goteme pyasipyali lao masala naenge. 13 Doko, nambame endakali yangi dupa auu pyoo katataminopa nyakama kenda pipae nyoo kalyepale lao nalelyo. Daa, nambame pitaka mendai dopale joo katapimi laka lao masoo lelyo. 14 Indupa* 8:14 Lo 15:26-27; 2 Ko 9:12 gii dakepa nyakama-kisa opale longo silyamo dokome endakali dupa daa jetamo dupame kapa pao nisalamino. Dopaka pyoo, dupa-kisa setamo dupame nyakama daa jetamo dupa nisoo ditamiaka. Dopa pyoo katatamino dokome nyakamapi dupapi mendai dopale joo katatami. 15 Dokonya* 8:15 Eke 16:18 dapa lao pii pepa pyapae silyamo:
“Longo lao yapao mau piamo endakali dokonya etete epao nasia.
Dee kuki yapao mau piamo endakali doko etete daa joo nakateana,” lapae silyamo.
16 Naimame nyakama nisowani kaengeli pyoo Taitesame nyakama nisowani kaena lao Goteme baa minao sakatasiamo dokonya naimame Gote tama pilyamano. 17 Doko, naimame baa epena lapumano dokonya iki ŋee laa naenya, baa tangeme nyakama nisowanimi kumapala ipatoo lao masilyamo. 18 Wai* 8:18 2 Ko 12:18 Pii Epe doko lamaiyoo kalai pilyamopa sosa dupa pitakanya kenge singi masoo miningi kaiminingi doko naimame Taitesapa awapa epena lelyamano. 19 Dee* 8:19 1 Ko 16:3-4 sosa dupame apata baame naima-pipa awapa payao nisingi kalai epe doko pina lao kingi pyalyetala baa yapao nyiamiaka. Naimame Kamongo lalyalanyapi dee naimame kalai pyuwani kaelyamanona lao endakali dupa laitaka pyaanyapi nisingi kalai doko pilyamano. 20 Doko, epe andake mee mailyamino doko kopeta isilyaminona lao endakali mendeme naima-kisa pii setala nayapya laka lao masilyamano. 21 Kamongome* 8:21 Pot 3:4; Lo 12:17 kapana lao masingi mana epe dupa iki naimame watao minala naenya, endakalimi kapana lao masingi mana epe dupa apata watao minalanya pyoo kalyamano.
22 Dee naimame naimanya masoo miningi kaiminingi doko anelyapo-pipa awapa epena lelyamanoaka. Paa longosa naimame baa makande pyoo kandelyamanopa baame koteaka lao kalai pyuwani kayao pingi. Indupa baame nyakama etete kapana lao masetala nyakama nisoo kalai pyuwanimi kumilyamo. 23 Taitesanya lelyona, baame nambapa lautao nyakama nisoo namba-pipa kalai mendai pingi. Dee naimanya masoo miningi kaiminingi dolapo sosa dupanya pii wai minakamaiyoo payao katengemba. Dolapome kalai pilyambino dokome Kataisa lalyingi. 24 Dopana,* 8:24 2 Ko 7:13-14 nyakamame auu kayao kalyamino doko kiningina lao dupa laitaka pyepape. Dopa pitaminopa dupamepi sosa dupamepi naimame nyakama lao masetala luingi doko mee luiyala naengema lamo lao masetami.
9Gotenya endakali dupa nisingi kalai epe dokonya leamo doko
1 Gotenya* 9:1 2 Ko 8:1-7 endakali dupa nisingi kalai epe dokonya nambame nyakama langipenge tenge mende nasilyamo. 2 Doko,* 9:2 Lo 15:26; 2 Ko 8:10 nyakamame kalai doko pyuwani kaelyamino kandatala nambame ae Masetonia palengema endakali dupa lamaiyoo nyakama lalyingi. Nambame dupa lamaiyoo, “Ee kana pumu amanya endakali Akaya kalyamino dupame kalai doko pyaanya depa lateamina,” lamaingi. Dee nyakamame kalai doko pyuwanimi kumilyaminona lapae doko sipimino dokome dupanya longo dupame apata pimana lao masingi sakatatelyamino. 3 Dopana,* 9:3 1 Ko 16:2 indupa nambame masoo miningi kaiminingi tepoma dutupa nyakama katamisa epena lelyo. Naimame nyakama lalyiamano pii doko mee jala naena lao nambame dupa lamaiyoli pyoo nyakamame kalai doko pyaanya depa latae kalyepale lao nambame dopa pilyo. 4 Aopyoo latala, Masetonia endakali mendatupa namba-pipa awapa ipatamano nakandenya nyakama depa latae nakatataminosa naimame nyakama kapana lao masoo lalyingi dokonya naima elya sowapi dee nyakama elya sowapi pitamane lao masilyo. 5 Dopa pitamane latala nyakamame epe mee maitamana leamino doko masoo miningi kaiminingi dutupame depa lao katena wambao epena lamaitoo lao masio. Nyakamame epe maitamana leami doko dupame wambao depa latataminopa namba ipato dokopa depa latae seta. Kini, epe maitamino doko nyakamame maiyuwani kayao maiyami jeta. Naimame tolao nyoo maikeama nanjeta.
6 Nyakamame* 9:6 Pot 11:24-25; 22:9 pii dake masalapape: endakali mendeme ee kuki pokatamo dokome nee kukiaka mandita. Ee longo pokatamo dokome nee longoaka mandita. 7 Dopana,* 9:7 Pot 22:8; Lo 12:8 endakali mendai mendai lawame Gote maitoo lao masetali pyoo maipenge. Mona kenda kayao maiyowapi dee mendeme mai lao tuu latamopa maiyowapi napipenge. Doko, mona yaepao mailyamo doko Goteme auu kaenge. 8 Dee Goteme kapa pao nyakama epe dupa pitaka etete epao dipenge. Dopa pitamopa koteaka lao nyakama tange nisepenge dupa pitaka nyakama-kisa soo dee nyakamame kalai epe dupa pitaka pipenge dopale longo dupa nyakama-kisa soaka pita. 9 Dokonya* 9:9 Wee 112:9 dapa lao pii pepa pyapae silyamo:
“Endakali dokome daa jingi endakali dupa opale longo lao mokosoo maingi.
Baanya mana epe miningi doko tanga tangapi soaka patana,” lapae silyamo.
10 Ee* 9:10 Ais 55:10; Osi 10:12 wai lyandenge akali doko ee wai maiyoo dee nee nena lao maiyoo pingi Gote dokome nyakama wai longo lao ditala minao andaseta. Dee baame nyakamanya mana epe miningi dokome dii epao mandena lata. 11 Baame* 9:11 2 Ko 1:11; 4:15 dupa pitakame nyakama kamongasetamopa koteaka lao nyakamame kapa pao epao maitami. Dee naimanya kalai dokonya-kaita nyakamame epao maitami dokome endakali longome Gote lao yaka pilino lena lao sakataseta. 12 Doko,* 9:12 2 Ko 8:14 Gotenya endakali nisingi kalai nyakamame pilyamino dokome endakali dupanya daa jingi dupa iki kapa pisala naenge. Daa, dokome Gote lao etete yaka pilino lenge doko sakatasingiaka. 13 Nyakamame* 9:13 Ap 2:42; Lo 15:31; 2 Ko 8:4 kalai pilyamino dokome nyakama endakali dopalena lao dupa laitaka pilyamo. Dopa pyoo katao nyakamame Kataisanya lao Wai Pii Epe doko lao panawapi watao minawapi pilyamino dokonyapi, dee nyakamame dupapi waka dupa pitakapi epao mailyamino dokonyapi dupanya endakali dupame baa lao lalyetami. 14 Dee Goteme nyakama kandao mona eteteaka epe palyiamo doko masetala dupame nyakama auumi kumao nyakama nisoo loma setami. 15 Goteme* 9:15 Lo 5:15-16; 2 Ko 8:9 naima epe mee dingi dokonya baa lao yaka pilino lamana! Baame naima epe dingi doko opalena lao mendepa kapa pao makande etete napipenge!
10Polonya kalai dokonya leamino dupanya yanu piamo doko
1 Nyakamame* 10:1 Mt 11:29; 1 Ko 2:3; 2 Ko 10:10; Pl 2:3 namba Polo kandao, “Naima-pipa awapa katelyamo dokopa baa papa lapae joo katengena, waka katelyamo dokopa baame naima kandao yuli tengena,” lengema. Namba dopa lengema akali dokomeaka Kataisame andiki-andiki pyoo kateamo dokonyapi tambo-tambo lao kateamo dokonyapi dolaponya nambame nyakama kyoto joo pii mende langitoo. 2 Namba* 10:2 1 Ko 4:21; 2 Ko 13:2,10 nyakama katatamisa ipato dokopa nambame nyakama kandao yuli talale lao nyakamame mende napyepape lao kongo lao langilyo. Doko, nambame masilyona, naimame endakalinya moname pyuwani kaengeli pyoo pyoo paelyaminona lao masingima endakali dupa kandao namba etete yuli tato. 3 Kini, naima isa yuu angenya endakaliaka doko, naimame endakalinya mana doko minao yanda pyaa naenge. 4 Doko,* 10:4-5 1 Ko 1:25; 2 Ko 6:7; Ep 6:11,13-17* 10:4-5 Ais 2:11-18 naimame yanda yandatepi minao yanda pingi dupa isa yuu angenya-tae daa. Yanda yandatepi dupanya Gotenya kalai pyakamaipenge pupu lapaepi dee yandapipi dupanya lome kyoto dupa kalupenge pupu lapaepi dupa singi. Naimame yanda yandatepi dupame sambo masingi dupapi, dee Gote lao masingi doko kaita lyokalanya pingi luiyapae mana dupa pitakapi, dupa minao koyasoo endakalinya pimana lao masingi dupa pitaka anjetala dupame Kataisa watao paena lenge. 6 Dee* 10:6 Lo 1:5; 2 Ko 2:9 nyakamame naimanya pii doko watao minalakao minatamino dokopa tanga lenge dupa pitaka naimame yanu pyalanya depa latae katatama.
7 Nyakamame* 10:7 1 Ko 1:12 opale panao silyamo datupa masalapape: endakali mendeme baa Kataisanyana lao masetamo dokome baa tange Kataisanyana lao masetamo dopaka pyoo dee baanya moname naima apata Kataisanyana lao masepenge. 8 Naimame* 10:8 Jet 1:10; 2 Ko 11:23; 12:6; 13:10 nyakama nisoo kalai pyoo kalyamano doko Kamongonya pii minao pyoo kalyamano. Nyakama minao koyasalanya daa, nyakama kyoto injisalanya pilyamano. Dee namba dokonya etete epao luiyato kandao doko, elya sala nayato. 9 Dopaka doko, nambame nyakama paka pisalanya nambanya pepa dupa pyao kalyeno lao masala nayapimi laka lao masilyo. 10 Akali* 10:10 1 Ko 2:3 mendeme lao pituu, “Polome pii pepa pyapya dupa kenda pilyamo. Baame pii kyoto lelyamo. Dopa pilyamoaka doko, baa ae katelyamo dokopa pisiti pyapae joo katengena baanya pii lelyamo doko mee jingina,” lelyamo. 11 Dopa* 10:11 2 Ko 13:2,10 lelyamo endakali dokome dake masepenge: naima waka katao pituu pii pepa pyao peekelyamano dokopa nyakama-pipa awapa katao kalai pitamano dokopa dolapo mendai dopaleaka.
12 Tange* 10:12 Pot 27:2; 2 Ko 3:1; 5:12; Ga 6:4 lalyingi endakali mendapua kalyamino dupa-pipa naima mendai dopalena laanyapi dee naimanya mana doko dupanya mana doko-pipa awapa lao yapalanyapi paka pilyamo. Dupame nyakamanya mana doko nyakama tangeme makande setelyamino doko minao yapengema. Dupanya mendeme baanya mana doko dupanya mendenya mana doko-pipa makande pingima. Endakali dupa etete kyakaengema! 13 Dopaka* 10:13 Lo 12:3; 15:19-20 doko, naimame kapa pao luiyawaka pao naimanya tombo doko yalala nayapenge. Daa, Goteme naima kalai pyepale lao tombo pyao diamo dokopa kapa pao luiyapenge. Tombo doko soo ipao nyakama-kisa tuu lelyamo. 14 Dopana, nyakama naimanya kalai pingi tombonya kalyamino dokonya naimame Kataisanya lao Wai Pii Epe doko nyakama-kisa minao epeamano dokopa naimame tombo doko yalala nayama. 15 Dee* 10:15 Lo 15:20-21 naimame tombo doko yalatala endakali waka dupanya kalai dokonya naima luiyala naenge. Dopa napinya naimame dapa pipya laka lao masingi: nyakamame kyoto joo masoo minataminopa naimanya kalai doko nyakamanya kaina dokonya andake jetala, naimanya tombo dokonya tuu latamopa etete andake jipya laka lao masingi. 16 Dopa* 10:16 Ap 19:21 pitamopa naimame Wai Pii Epe doko yuu waka nyakamanya maitakaita silyamo dupanya kapa pao lamaitama. Dee naimame yalatala endakali waka mendeme kalai pitamo dokonya naima luiyala nayatama.
17 Dopaka* 10:17 Jet 9:24; 1 Ko 1:31 doko, “Endakali mende luiyatamo dokome Kamongome piamo dupa lao masetala luina.” 18 Doko,* 10:18 1 Ko 4:4-5 tange lalyingi akali doko angi daa. Kamongome lalyingi akali doko angi.
11Polopi sambo aposele dupapi
1 Nambame* 11:1 2 Ko 11:20 kyakaenge pii kuki mende latalale lao nyakamame kayapimi laka lao masilyona, kaimini etete, dopa pitoo kayalapape! 2 Goteme* 11:2 Dit 4:24; Osi 2:19-20; Ep 5:26-27; Pa 21:2,9 pingili pyoo nambame nyakama neame kumilyo. Doko, nyakamame akali mendai iki nyalapale lao nambame nyakama makande peteo. Nambame nyakama enda mapuakae mende napingi etete epe mende joo Kataisa maitoo lao masetala dopa pio. 3 Dopaka* 11:3 Jen 3:1-5,13 doko, kanopato dokome baanya waa katenge mana dokome enda Epa minakasiamo dokaita doko, nyakama kyakapala mona epe mendai palyoo Kataisa watao miningi doko yakinatamini lao paka kaelyo. 4 Doko,* 11:4 Ga 1:6-9 endakali mendeme nyakama katamisa ipupala naimame langiamano Jisasa dokonya lao langya naenya, Jisasa waka mendenya lao langilyamo dokonyapi, dee wamba nyakama Sipitisa nyiamino doko nyala naenya sipitisa waka mende nyilyamino dokonyapi, dee Wai Pii Epe wamba siamino doko sala naenya waka mendepale mende silyamino dokonyapi nyakama kukipi mende mona kenda nakaengema.
5 Nyakamanya* 11:5 1 Ko 15:10; 2 Ko 12:11; Ga 2:6 aposele etete wakane dupame namba mendaipi mendeme ita naminilyaminona lao masilyo. 6 Dopaka* 11:6 1 Ko 1:17; 2:1,13; Ep 3:4 doko, pii lamaiyanya namba mana nanyingi akali mende joo katato kandawapi, namba masingi daa jala naenge. Daa, naimame mana minilyamano dupa pitakame endakali dupa pitakanya enombanya nyakama laitaka pingi.
7 Nambame* 11:7 Ap 18:3; 1 Ko 9:12,18; 2 Ko 12:13 nyakama minalyalanya namba tange koo joo katao, Gotenya Wai Pii Epe doko nyakama mee langio. Dopa pio doko koo piope? 8 Nambame* 11:8 Pl 4:15-18 nyakamanya kaina dokonya kalai pio dokopa sosa waka dupame namba nisiami dupa nyio. Dopa pio doko, nambame nyakama nisalanya dupa-kisa waa nyili pio. 9 Wamba* 11:9 2 Ko 8:1-2 namba nyakama-pipa awapa katao namba oapi daa joo kateo dokopa nyakamanya mende kenda pisala nayo. Daa, masoo miningi kaiminingi Masetonia katao epeamino dupame namba daa jiamo dupa kapa pisiami. Nambame nyakama opale mendenya minao kenda pisala nayatoo latala kandao isoo kateona dee nambame dopaka pito. 10 Kataisanya* 11:10 1 Ko 9:15 kiningi pii doko namba-kisa silyamo dokaita doko, Akaya yuu doko pitakanya endakali mendeme namba tange lalyilyo pii doko kaita lyokala nayata etete mauwa. 11 Doko* 11:11 2 Ko 12:15 aipuma nambame dopa lelyope? Nambame nyakama auu nakayapala dopa lelyope? Daa, Goteme kandelyamo.
12 Akali mendapuame kalai pilyamino dokonya luiyao katao endakali dupanya lengelyaapi dokonya naima yale joo kalyanya kaitini kutao kalyamino. Dopa pilyaminoaka doko, dupame kutao nakandena lao nambame indupa pilyoliaka pyoo pyoo katato. 13 Doko,* 11:13 2 Ko 2:17; Pl 3:2; Pa 2:2 akali dupa sambo aposele. Dupame sambo lao minakasoo kalai pyoo katao mana minilyamino dupa Kataisanya aposele kiningimi minili pingima. 14 Dopaka doko, dokonya walu lapenge daa. Doko, Satane tangeme baa tii pipae dokonya enjele mendeaka paele pingi! 15 Dopana,* 11:15 Pa 2:2 baanya kalai akali dupame mana tolatae dokonya kalai akali paele pitamino doko enenge mende daa. Akali dupa etatamino dokopa dupame kalai pitamino dokopa kapa lao yanu nyetami.
Polome aposele kalai pyoo tanda neamo dokonya leamo doko
16 Nambame* 11:16 2 Ko 12:6 deaka langilyona, endakali mendeme namba akali kyakaengena lao masala nayapenge. Dopaka doko, nyakamame namba kandao dopa lao masetamino kandao doko, nambame apata kuki mende namba tange lalyetatoo kayalapape. 17 Nambame* 11:17 1 Ko 7:12,25 namba tange kapana lao masoo lalyoo pii laanya pilyo doko, Kamongonya mana doko watao laanya napilyo. Daa, namba kyakaenge joo laanya pilyo. 18 Endakali* 11:18 2 Ko 3:1 longo dupame nyakama dopalena lao masetala tange lalyingima dokonya nambame dopaka pitoo. 19 Doko,* 11:19 1 Ko 4:10 nyakama endakali masepaema dokonya endakali kyakaenge dupa nyakama-pipa katapuma laka lao masetala katena kaengema. 20 Endakali mendeme nyakama baanya kendemane injisowapi, nyakamanya oapi dupa pitaka etasakawapi, nyakama sambo langyoo minakasetala lanyowapi, nyakama luingyowapi, nyakama lengelyaapi pyao takyowapi pilyamo dokopa nyakamame dopa pina lao kaengema. 21 Naima akali tambo lapae joo katao nyakama kandao dopa pyaanya paka pingi. Dopa pingina lelyo dokonya namba-kisa elya silyape?
Dopaka doko, endakali mendeme opale mendenya mona tuu tuu petala baa tange lalyetoo lao masetamo dokonya-kyakaenge joo lelyona-nambame apata dopaka pitoo. 22 Dupa* 11:22 Ap 22:3; Lo 11:1; Ga 1:13-14; Pl 3:4-6 Iputupi? Namba apata Iputuaka. Dupa Isataelepe? Namba apata Isataeleaka. Dupa Apotakamenya yumbangepe? Namba apata Apotakamenya yumbangeaka. 23 Dupa* 11:23 Ap 16:23; 20:19; 1 Ko 15:10; 2 Ko 6:5; 10:7; 2 Ti 3:11 Kataisanya kalai akalipi? Etete kyakaenge joo lelyona-nambame dupa ita minao Kataisanya kalai akali kalyo. Namba epao lekeleke tao kateo. Namba anjetae paliti-paliti sio. Endakali dupame namba konjame pyao indiami. Paa longosa kumapenge joo kateo. 24 Juta* 11:24 Dit 25:2-3 dupame paa yuungisa namba konjame piami. Doko dupame pingili pyoo pee kingi-ita tepoma-kisa dee mange mendai waketao lawaka piami. 25 Paa* 11:25 Ap 14:19; 16:22 tepomasa Loma tange mendapuame namba kyoo konjame piami. Paa mendai endakali dupame namba kaname piami. Paa tepomasa namba sipinya pituu peyopa, sipi dutupa koya. Kuka kotakapi gii lapoma namba solowata pete andake dokome soo payao katea. 26 Paa* 11:26 Ap 9:23; 14:5 longosa namba kaitini payopa endaki dupanya mangeoli jia. Akali makongopae dupame kaitinisa anga petala namba piamili jia. Namba tatapi tata wakapi dupame namba koyasiamili jia. Yuu taono dupanyapi, endakali napalenge yuu dupanyapi, solowata pete andake dokonyapi koyoli jia. Dee sambo masoo miningi kaiminingi dupame namba koyasiamili jiaka. 27 Nambame* 11:27 1 Ko 4:11; 2 Ko 6:5 kalai lekeleke tao tanda nao pio. Paa longo namba luu napaleo. Namba lopo kayao endaki nanu kayao kateo. Paa longo namba neepi mende nanao kupa kayao yongenya pingi daa joo kateo. 28 Dee* 11:28 Ap 20:18-21,31 kenda pipae nambame nalelyo dupanya mende konda pyoo doko nambame sosa dupa pitaka neame kumingi. Kenda pipae andake dokome koteaka lao namba sanga pingi. 29 Endakali* 11:29 Lo 9:1-3; 1 Ko 9:22 mende tambo lapae joo katelyamo dokopa nambame baanya kalaina lao masala naenge. Endakali mendeme endakali mende koo pina lao mapisilyamo dokopa nambame dokonya etete epao mona kenda kaenge.
30 Nambame* 11:30 1 Ko 12:5 namba tange lalyepenge jetamo kandao doko, opale dupame namba akali tambo lapaena lao laitaka pingi dokonya lalyoto. 31 Nambame sambo nalelyo. Kamongo Jisasanya Gote-kisa Takange tanga tangapi lalyepenge dokome kandelyamo. 32 Namba* 11:32 2 Ko 1:23* 11:32 Ap 9:23-25 yuu taono Damasakosa kateo dokopa Kiŋi Atetasanya nisingi akali andake dokome namba anjalanya yuu dokonya kaita kembo dupanya namba anga pina lea-pyaa. 33 Dopa* 11:33 Jas 2:15 piamoaka doko, namba baseketa mandi elyoko andakeme petae mendenya mandipala yuu taono doko kakopatae kame londe dokonya tii lumbao seteami mendenya kamalyatena pyandeami. Dopa peteaminopa namba baa paka peo.
12Polome lee manimanimi kandawapi Kamongome laitaka piamopa kandawapi piamo doko
1 Nambame namba tange lalyepenge. Tange lalyingi mana dokome endakali mende nisala naengeaka doko, dee Kamongome namba-kisa panasiamopa nambame lee manimanimi kandeo dupapi baame namba opale laitaka piapi dupanya latoo. 2 Goteme Kataisa lao masoo miningi akali mende kaiti etete ketae dokonya nyokonyia doko ee kana kingi-ita mende-kisa dee kitomende patelyamo. Akali doko nambame kandenge. Baa lenge tao nyokonyiape imambu ikipi namba masala naelyo. Goteme masilyamo. 3 Goteme* 12:3-4 Lu 23:43 akali doko Patandisa+ 12:3-4 patandisa Juta dupame Gotenya kaiti yuu auu pyoo katapenge enenge mende silyamona lao masetala kenge Patandisa lengema-pyaa.yuu dokonya nyokonyiamo doko nambame masilyo. Nambame deaka lelyona, baa lenge tao nyokonyiape imambu ikipi namba masala naelyo. Goteme masilyamo. Baame Patandisa yuu dokonya pii etete epe endakalimi nasepenge endakalimi nalena lao nee nyetae dupa sia. 5 Akali* 12:5 2 Ko 11:30 doko kandatala namba luiyatoo. Dopaka doko, nambame namba tange kandatala luiyala nayatoo. Opale dupame namba akali tambo lapaena lao laitaka pingi dokonya iki namba luiyatoo. 6 Namba* 12:6 2 Ko 10:8; 11:16 luiyatoo lao masetoli kandao doko, namba akali kyakaenge joo nakatatoli. Doko, namba luiyao katatoli kiningi piaka lao katatoli. Dopaka doko, endakali mendeme nambame mana minilyopa kandengepi pii lelyopa singipi dupa nyoo ana pyandatala, namba akali etete epena lao masala naena lao namba luiyala nayatoo.
7 Opale* 12:7 Jop 2:6; Lo 9:2 Goteme namba laitaka pia dupa eteteaka epe wakane. Dopaka doko, dopale dupanya namba etete mona yanga laa nayatale lao baame nambanya yonge dokonya teke mende palyekea. Teke palyekeamo doko Satanenya kalai akali jepae dokonyana dokome namba etete mona yanga laa nayatale lao namba tanda dingi. 8 Nambanya* 12:8 Mt 26:39,42,44 teke palyekeamo doko yukuoo nepekena lao nambame paa tepomasa Kamongo lao loma soo tee leo. 9 Dopaka* 12:9 Ais 40:29; Lo 1:16; 5:3; 2 Ko 4:7 doko, baame namba langyuu, “Nambanya mona epe palenge doko emba-kisa kapa silyamo. Doko, nambanya pupu lapae dokome endakali tambo lapae dupa-kisa kalai pyokondape pingina,” langia. Dopana, Kataisanya pupu lapae doko namba-kisa sina lao namba tambo lapae joo katenge dupanya etete mona yaepao luiyao katato. 10 Kataisa* 12:10 2 Ko 6:4-5; Pl 4:11-13; Kl 1:24 minao paelyosa namba tambo lapae joo katawapi, endakali dupame namba-kisa mana koo minawapi, namba minao koyasowapi, watao pyawapi, tanda dyowapi pilyaminopa namba mona epe palyoo katenge. Doko, namba tambo lapae joo katelyo dokopa Goteme kyoto injisingi.
Polome Kotina kateamino dupa lao masiamo doko
11 Nambame* 12:11 2 Ko 11:5 kyakaenge joo katao pii lelyo. Doko nyakama mambele kyekelyo. Nyakamame namba lalyiamili kandao doko yaka. Kini namba akali angi mende daa tamo kandao doko, nyakamanya aposele etete wakane dupame namba mendaipi mendeme ita minala nayami. 12 Aposele* 12:12 Lo 15:19; 1 Ko 2:4; 15:10; 1 Te 1:5 angina lao laitaka pingi dupa kongalipi, kalai paka pipaepi, kalai pupu lapaepi dupa nambame nyakamanya kaina dokonya katao etete kyoto joo maka nakayao pio. 13 Dopana,* 12:13 Ap 18:3; 2 Ko 11:7,9 sosa mendapua dupa-kisa aki mende sipumu doko nyakama daa joo kalyamipi? Nambame opale mendenya nyakama minao daa injisoto kandao doko, namba daa joo katao pituu opale mendenya nyakama minao kenda pisala nayo doko iki joo pilyamo. Nambame mana doko koo mende minio tamo kandao doko, kaimini paluma, nyakamame masala nayalapape!
14 Indupa* 12:14 2 Ko 13:1 nambame nyakama paa tepo pyoo kanja ipanya depa lelyo. Nambame nyakama opale mendenya kenda pisala nayato. Doko, nambame nyakamanya opale mende nyakalanya naipato. Daa, nambame nyakama lanyalanya ipato. Waneme nyakamanya endangi takangepi dupa nisalanya oapi dupa nyoo setala naenge. Endangi takangepimi nyakamanya wane dupa nisalanya oapi dupa nyoo setenge daape. 15 Dopana,* 12:15 Pl 2:17 nambame nyakama nisalanya nambanya oapi dupa pitaka yakinawapi dee namba itange apata yakinawapi pipu laka lao etete masilyo. Nambame nyakama etete auumi kumilyo. Dopa pilyo dokonya nyakamame namba kuki mende iki auu kayatamipi?
16 Nyakamanya mendeme namba kandao lao pituu, “Kini baame naima kenda pisala nayamoaka doko, baa waa katapaena baame naima amai soo langiana,” latami. 17 Doko aipa petalape? Nambame akali epena leo dupanya mendeme nyakama minakasiape? 18 Nambame* 12:18 2 Ko 8:6,16-18 kongo lao Taitesa baa nyakama kateamisa epena latala dee masoo miningi kaiminingi mende doko baapa tole epena lewaka. Taitesa baame nyakama minakasiana lao masilyamipi? Baapa nambapa masingi mendaiyaka paliuu mana awapa lao minao payala nayambape?
19 Nyakamame pepa dake itaki pyao ipatamino dokopa, naima-kisa pii sipya mendapua nyakamanya enomba dokonya naimame yanu pyao langyanya pilyamino lao masetamipi? Daa, naimame dopa pyaanya napilyamano. Naima Gotenya enomba dokonya katao Kataisanya akali joo pii lamaingi. Mona setenge paluma, naimame pilyamano dupa pitakame nyakama nisalanya pilyamano. 20 Namba* 12:20 Lo 1:29; 1 Ko 1:11; 3:3; 2 Ko 2:1-4 nyakama katatamisa ipato dokopa nambame nyakama kalyapimino lao masotoli pyoo nakatatamini lawapi, dee nyakamame namba kalyapeno lao masetamili pyoo nakatatone lawapi paka kaelyo. Nyakama laiya lawapi, tilya nyowapi, imbu kayawapi, tange iki lao masowapi, pii koo lawapi, mendenya opale mende lale lale payakamaiyowapi, luiyawapi, kyakalya kyakana pyoo lalya lana pingi mana minawapi katatamini lao namba paka kaelyo. 21 Namba* 12:21 2 Ko 13:2 nyakama katatamisa dee ipato dokopa nambanya Gote dokome nyakama kandatala namba elya pisetame lawapi, dee wamba endakali longo mendapuame elya pingi napipenge piamipi, kepo koleamipi, luiyawaka payamipi mana miniamino dutupa mona kapilyetala maita namaiyamino dupa kandao namba etete ee latone lawapi paka kaelyo.
13Pii etao leamo dupapi lasa leamo dupapi
1 Indupa* 13:1 Dit 17:6; 19:15; Mt 18:16; 2 Ko 12:14; 1 Ti 5:19 nambame paa tepo pyoo nyakama kanja ipanya pilyo. “Endakali mendeme mende-kisa tenge mende silyamona latamo doko, endakali lapomapi tepomapi mendeme kiningina lao laitaka pipenge.” 2 Wamba namba paa lapo pyoo ipao nyakama-pipa kateamano dokopa nambame endakali koo pyoo kateamino dupapi endakali yangi dupa pitakapi pii mende langio. Dopa pio doko indupa namba waka katao deaka langilyona, namba dee ipato dokopa nyakama mee kalyepale lao kayala nayato. 3 Kataisame nambanya nengekaita dokonya pii lengepe nalengepe lao mende kandapuma laka lao masilyamino dokonya nambame dopa pito. Kataisame nyakama kandao opale pilyamo dupanya baa tambo lapae joo nakatenge. Daa, baame nyakamanya kaina dokonya pupu lao kalai pingi. 4 Doko,* 13:4 Lo 1:4; 6:8; 8:11; 1 Ko 1:25; Pl 2:7-8 wamba baa tambo lapae joo kateamopa endakali dupame baa pyao yukuiyaminoaka doko, indupa baa Gotenya pupu lapae dokome lete kalyamo. Naima apata baapa pakatala tambo lapae kalyamanoaka doko, naimame opale nyakama-kisa pitamano dupa pitaka Gotenya pupu lapae dokome baa-pipa lete katao pitama.
5 Nyakamame* 13:5 1 Ko 11:28 masoo miningi doko minao kalyamape daape lao nyakamame nyakama tange makande pyoo kalyepape. Nyakamame nyakama tange yapao kalyepape. Kataisa Jisasa baa nyakama-kisa kalyamo doko masala naelyamipi? Daa tamo doko, nyakama pakuatala lombapae sepelyamino. 6 Dee* 13:6 1 Ko 13:6 nyakamame naima kandao pakuatala lombapae nasilyamino lao masipimi laka lao nambame masilyo. 7 Nyakamame mana koopi mende naminalapale lao naimame Gote lao loma silyamano. Naimame dopa pilyamano doko, naima akali angi wambu pipae joo kalyamanona lao nyakama laitaka pyaanya dopa napilyamano. Daa, nyakamame mana epe minao katapimi laka lao masetala pilyamano. Dee naima akali pakuatala lombapae sepaele joo katatamano doko yaka. 8 Doko,* 13:8 Ap 4:20; 1 Ko 13:6 naimame kiningi pii doko kenda pisepenge opalepi mende kapa pao napipenge. Daa, naimame kiningi pii doko nisepenge dupaka pipenge. 9 Naima akali tambo lapae joo katelyamanopa nyakama kyoto joo katelyamino kandao doko, naima mona yaepao katenge. Dee Goteme nyakama etete kapa pisina lao naimame loma singiaka. 10 Namba* 13:10 Jet 1:10; 2 Ko 2:3; 10:8 waka katao dopa lao nyakamanya pepa pyao peekelyo doko, namba ipato dokopa nambame Kamongonya pii minao nyakama epao pyalanya nalatopa lao pilyo. Doko, Kamongome namba pii diamo doko nyakama minao koyasatale lao daa, nyakama kyoto injisatale lao dia.
11 Kaimia* 13:11 Lo 15:33; Pl 3:1 paluma, nambame pii dake etao lelyo: nyakama mona epe palyoo kalyepape. Nyakamame nyakamanya mana doko tolasalapape. Nyakamame nambanya pii doko watao minalapape. Nyakama masingi mendai palyoo mona setao kalyepape. Dopa pyoo katataminopa auu kaengepi mona lyuu lengepi sakatasingi Gote doko nyakama-pipa katata.
12 Nyakamame* 13:12 Lo 16:16; 1 Ko 16:20 nyakama tangelapo mende auu pyoo katena laa laa pyoo, Gotenya endakali dupame pipengeli pyoo mende kopyoo nunu pii pii pyoo kalyepape.
Gotenya endakali dupa pitakame nyakama kandao auu pyoo kalyepape lelyamino.
13 Kamongo* 13:13-14 1 Ko 2:10; Ep 2:18; 4:6; Pl 2:1 Jisasa Kataisame nyakama pitaka kandao mona epe palena; Goteme nyakama auu kaena; Oli Sipitisame nyakama-pipa tole pyao katena.